1

¹ Ontumwafo ndjika oya zi kuPaulus, omumati gwaKalunga nomuyapostoli gwaJesus Kristus. Ngame onda hogololwa nonda tumwa, ndi kwathele eitaalo lyaahogololwa yaKalunga noku ya thikitha moshili tayi zi meitaalo lyetu,

² ndyoka li na ekankameno ketegameno lyomwenyo gwaaluhe. Kalunga ngoka ihaa fundju, okwe tu uvanekele omwenyo gwaaluhe, manga uuyuni inaau shitwa.

³ Euvaneko ndika okwe li holola pethimbo lyo opala mevaangeli nopalombwelo lyaKalunga, Omuhupithi gwetu, ngame ondi inekelelwa okuuvitha elaka ndika etoye.

⁴ Otandi nyolele Titus, omumwandjelela paitaalo lyetu limwe. Esilohenda nombili yaKalunga Tate noyOmukulili gwetu Jesus Kristus nayi kale nangoye.

⁵ Onde ku thigi muKreta, opo u pongolole iinima mbyoka ya pumbwa okutulwa melandulathano nou hogolole aakuluntu yegongalo momukunda kehe. Dhimbulukwa omalombwelo gandje:

⁶ Omukuluntu gwegongalo oku na okukala kee na oshipo, e na owala omukiintu gumwe, oyana oye na okukala ooitaali, inaa uvikila uupwidhi nenge okwaavulika.

⁷ Omuwiliki gwegongalo oye omusilishimpwiyu megumbo lyaKalunga, ngoka e na okukala kee na oshipo, hamutuwalali, hamugeentu, hankolwi, hamupwidhi nohamukongi gweliko nomakoto.

⁸ Oye oku na okukala ha yakula aayenda, ha longo uuwanawa, hi ikwata nawa, omuyuuki, omuyapuki nomwiidhiliki.

⁹ Oye oku na okudhiginina ohapu ndjoka yi shi kwiinekelwa noya tsa kumwe nelongo lyetu. Pamukalo nguka ota ka vula ihe okutsa yalwe omukumo, ya kale melongo lyashili nokuholola omapuko gaamboka taye li kondjitha.

¹⁰ Oshoka unene mokati kaamboka ya zi meitaalo lyopaShijuda omu na aapopyagani oyendji, ihaa vulika notaa pukitha yalwe noongano dhawo.

¹¹ Okupopya kwawo oku na okumwenekwa, oshoka otaa piyaganeke omagumbo nokuli nokulonga aantu shoka inaashi opala notaye shi ningi nelalakano lyokukonga eliko. Shika otashi sitha ohoni!

¹² Omuhunganeki gumwe gwawo Omukreta okwa tile: “Omulumentu Omukreta oye omufundja noshilikama oshiwinayi. Oye oku li owala melalangali nomuufukedhi.”

¹³ Omukreta nguka okwa popi dhoshili. Onkee ano ou na oku ya ganda, opo ya taambe eitaalo lyu uka,

¹⁴ yo yaa ikwatelele koongano dhAajuda nokiipango yaantu mboka ye etha oshili.

¹⁵ Kehe shimwe osha yogoka kwaamboka ya yogoka muyo yene; ihe kaku na shoka sha yogoka kwaamboka ya nyata muyo yene noyaa shi ooitaali, oshoka omadhiladhilo gawo neiyuvo lyawo olya nyata.

¹⁶ Oyo otaa ti kutya oya tseya Kalunga, ihe iilonga yawo itayi shi holola. Okukala kwawo okwo iikungitha, ihaa vulika yo itaa vulu okulonga uuwanawa nando owasha.

2

¹ Ihe ngoye ou na okulonga palongo ndyoka lyu uka.

² Lombwela aalumentu aakokele, ya kale aaidhiliki, aasimanekwa nohayi ikwata nawa; ya kale wo ye li nawa kombinga yeitaalo, yohole noyeidhidhimiko.

³ Osho wo lombwela oonekulu aakokele, ya kale nokukalamwenyo kwa yapuka. Kaye na okukala aahokoli nenge oombwiyi dhiikolitha. Oye na okulonga elongo lyu uka,

⁴ opo ya ulukile aakiintu aagundjuka, okuhola aalumentu yawo noyana,

⁵ ya kale haa ikwata nawa, aayogoki, ya ninge aakiintu ye shi kukala nawa nomagumbo, haa vulika kaalumentu yawo, opo kwaa kale nando omuntu ta sheke elaka lya za kuKalunga.

⁶ Osho wo kumagidha aalumentu aagundjuka, ya kale haa ikwata nawa.

⁷ Ihe ngoye ou na okukala omuholelwa miilonga iiwanawa. Longa aantu nomwenyo aguhe nowi itula mo.

⁸ Popya aluhe iitya itaayi ku tamanekitha, opo aakondjithi yoye ya sithwe ohoni, sho itaa vulu we oku tu popila muuwinayi.

⁹ Aapika naa vulike kooyene yawo noye ya nyanyudhe miinima ayihe. Kaye na oku ya yamukula

¹⁰ nenge okuyaka po omaliko gawo. Ihe oye na okuholola aluhe kutya oyo aawanawa naainekelwa, opo ya simanekithe elongo ndyoka tali popi Kalunga, Omuhupithi gwetu, mwaayihe mbyoka taye yi ningi.

¹¹ Oshoka Kalunga okwa holola esilohenda lye, opo a hupithe aantu ayehe.

¹² Esilohenda ndika otali tu longo, tu ethe okudhina Kalunga nuuhalu wuuyuni, tse tu kale muuyuni mbuka meikwatonawa, muuyuuki nomokusimaneka Kalunga,

¹³ sho twa tegelela notwa tegamena esiku lyelago, uuna eadhimo lyaKalunga ketu omunene nolyOmukulili Jesus Kristus tali ka holoka.

¹⁴ Oye okwi igandja meso omolwetu, opo e tu hupithe mo muuwinayi auhe ye e tu yelithe, tu ninge aantu ye mwene ya hala okulonga uuwanawa.

¹⁵ Iinima mbika ayihe yi longa aantu, ngu u longithe oonkondo adhihe ndhoka u dhi na mokutsa omukumo nomokupukulula mboka taa ku pulakene. Ino etha nando ogumwe gwawo, e ku dhine.

3

¹ Dhimbulutha aakwanegongalo yoye, ya kale haa vulika kaaleli nokaapangeli noya kale taa vulu okulonga uuwanawa kehe.

² Ya lombwela, yaa popile ooyakwawo muuwinayi yo yaa tamanane, ihe ya kale ye na uukuume nolukeno naantu ayehe.

³ Oshoka natse wo otwa li nale twaa na oondunge, oonakwaavulika notwa li twa puka. Otwa li aapika yuuhalu womaludhi ogendji noyomolundundu. Otwa kala miilonga iiwinayi nomefupa. Otwa li twa tondika kuyalwe, tse twe ya tondo wo.

⁴ Ihe uuna uuwanawa nohole yaKalunga, Omuhupithi gwetu, ya holoka,

⁵ okwe tu hupitha. Hamolwiilonga ando yasha iiwanawa twe yi longo, aawe, ihe okwe shi ningi molwesilohenda lye alike. Oye okwe tu yogo meshasho nokwe tu valululitha kOmbepo Ondjapuki, tu ninge aantu aape.

⁶ Kalunga okwe tu tilile Ombepo Ondjapuki oyindji molwaJesus Kristus, Omuhupithi gwetu,

⁷ opo molwesilohenda lye tu ninge aayuuki koshipala she nokumona omwenyo gwaaluhe ngoka twe gu tegamena.

⁸ Ohapu ndjika oyoshili. Onda hala, u teneneke iinima mbika, opo mboka yi itaala Kalunga, ya vule okulongitha ethimbo lyawo mokulonga uuwanawa. Iinima mbika iiwanawa notayi kwatha aantu.

⁹ Ihe ngoye, yanda omaludhi guugoya, omalandulathano omale gondjokonona yomadhina goohokulu, oontamanana nomaludhi gokombinga yompango. Iinima ya tya ngeyi kayi na oshilonga noitayi kwatha sha.

¹⁰ Omuntu ngoka te eta omatopoko, mu kumagidha ando lwaali, nongele itashi kwatha sha, mu etha.

¹¹ Ou shi shi kutya omuntu a tya ngaaka okwa puka, ta longo uulunde nokwi ipangula ye mwene.

¹² Uuna tandi ku tumine Artemas nenge Tikikus, endelela, u ye kungame kuNikopolis, oshoka omo nda hala ndi kale pethimbo lyokufu.

¹³ Longekidha nawa omunongompango Zenas nosho wo Apollos, ya ye moondjenda ye na iipumbiwa ayihe.

¹⁴ Aakwanegongalo yetu naa igilile wo okulonga uuwanawa mokukwatha mpoka pu na oluhepo. Naa ethe okukalamwenyo kwaa na iilonga yasha.

¹⁵ Ayehe mboka ye li pungame, otaye mu kundile po. Kundila po ookuume ketu meitaalo. Esilohenda lyaKalunga nali kale nane amuhe.