1 Paulus, omuyapostoli gwaJesus Kristus pahalo lyaKalunga nomutumwa okuhokolola omwenyo ngoka twe gu uvanekelwa muukumwe naKristus Jesus,
2 ota nyolele omwana omuholike Timoteus. Esilohenda, ontalanteni nombili yaKalunga Tate noyOmuwa gwetu Jesus Kristus nayi kale nangoye.
3 Otandi hambelele Kalunga ngoka handi mu longele neiyuvo lya yela ongaashi ootate wo. Otandi hambelele, sho handi ku dhimbulukwa aluhe uusiku nomutenya momagalikano gandje.
4 Otandi dhimbulukwa oluhodhi lwoye nonda hala oku ku talela po, opo ndi nyanyukwe.
5 Itandi dhimbwa, nkene eitaalo lyoye lya kola, ongaandyoka lyanyokokulu Loide nolyanyoko Eunike.
6 Onkee ano otandi ku dhimbulutha, u longithe omagano ngoka we ga pewa kuKalunga, sho nde ku tenteke iikaha.
7 Oshoka Kalunga ine tu pa Ombepo yoku tu ninga aambanda, ihe okwe tu pe Ombepo ye yoku tu pa oonkondo, ohole neikwatonawa.
8 Ino sa ohoni okuhokolola Omuwa gwetu nangame wo, ngoka nda kwatwa omolwe. Onkee ano nangoye wo ou na ompito yokukala momahepeko omolwevaangeli, oshoka Kalunga ote ku pe oonkondo dhoku ga idhidhimikila.
9 Kalunga okwe tu hupitha nokwe tu ithana, tu ninge aantu ye, hamolwiilonga yetu, ihe opahalo nopasilohenda lye. Esilohenda ndyoka e li tu pe nale petameko lyomathimbo omolwaJesus Kristus,
10 okwe li tu hololele ngashingeyi nokuya kwOmuhupithi gwetu Jesus Kristus. Kristus okwa shundula oonkondo dheso nokwa holola mevaangeli omwenyo gwaaluhe.
11 Kalunga okwa hogolola ndje, ndi kale omuyapostoli nomulongi gwokuuvitha elaka etoye.
12 Onkee omolwevaangeli onda adhika komahepeko ngoka. Ihe inandi li sa ohoni, oshoka ondi mu shi ngoka nde mu inekela. Ondi inekela lela kutya oye ota vulu okugamena oshilonga she shoka e shi inekelela ndje, sigo esiku ndyoka te ke ya.
13 Dhiginina oohapu dhoshili ndhoka nde dhi ku longo, dhi kale oshiholelwa shoye. Kala meitaalo nomohole ndjoka tatu yi adha muukumwe naKristus Jesus.
14 Dhiginina omagano omawanawa ngoka we ga pewa koonkondo dhOmbepo Ondjapuki, ngoka e li mutse.
15 Owa tseya kutya ayehe yomoshitopolwa shaAsia, ngaashi Figelus naHermogenes, oya thigi ndje po.
16 Omuwa na sile ohenda egumbo lyaOnesiforus, oshoka oye okwa hekeleke ndje olwindji. Oye ina sa ndje ohoni, sho ndi li mondholongo,
17 ihe sho a thiki muRoma, okwa tameke okukonga ndje mbala, sigo a mono ndje.
18 Omuwa ne mu kwathe, a ka mone esilohenda koshipala shOmuwa esiku ndyoka te ke ya. Ngoye owa tseya nawalela ashihe shoka e shi ningile ndje muEfeso.
1 Mumwandje, ikolelela ano mesilohenda ndyoka tu li na muukumwe naKristus Jesus.
2 Dhiginina oohapu ndhoka u uvu tandi dhi uvitha montaneho yoonzapo oyendji. Dhi gandja kaantu ye shi kwiinekelwa, mboka taa vulu oku dhi longa yakwawo.
3 Idhidhimikila omahepeko ongomukwiita ofule gwaJesus Kristus.
4 Omukwiita ngoka e li molugodhi, ihi ipyakidhile noompumbwe dhilwe, oshoka okwa hala okwoopalela aluhe omuwiliki gwe.
5 Omumatuki kehe methigathano ita mono ondjambi, ngele ita vulika koompango.
6 Omunepya ngoka i ihepeke nokulonga epya lye, oku na okumona tango sha meteyo lyepya lye.
7 Dhiladhila nawa shoka tandi ku lombwele, oshoka Omuwa ote ke ku pa oondunge dhokuuva ko iinima ayihe mbika.
8 Dhimbulukwa Jesus Kristus, omunezimo lyaDavid ngoka a yumudhwa kuusi, ngaashi tashi popiwa kelaka etoye ndyoka tandi li uvitha.
9 Otandi hepekwa, sho tandi uvitha elaka etoye nonda mangwa nokuli ongomukolokoshi. Ihe oohapu dhaKalunga inadhi mangwa.
10 Onkee ano otandi idhidhimikile iinima ayihe, opo aahogololwa yaKalunga ya mone ehupitho neadhimo lyaaluhe ndyoka li li muKristus Jesus.
11 Ohapu ndjika oyoshili: “Ngele twa si pamwe naye, otatu ka kaleni wo tu na omwenyo pamwe naye.
12 Ngele tatu tsikileni okwiidhidhimika, otatu ka pangeleni wo pamwe naye. Ngele tatu mu idhimbike, naye wo ote ke tu idhimbika.
13 Ngele itatu kala aainekelwa, nena oye ota kala omwiinekelwa, oshoka ita vulu okwiifundjaleka.”
14 Aakwanegongalo yaandjeni ya dhimbulutha iinima mbika, ngu u ya londodhe koshipala shaKalunga, yaa kale ye hole okuludhika. Omaludhi itaga eta uuwanawa washa, ihe otaga yono po owala aapulakeni.
15 Kambadhala, u kale omulongihapu a hokiwa kuKalunga, ongaangoka inaa sa ohoni iilonga ye noha longo aantu oshili ya yela yomoohapu dhaKalunga.
16 Yanda omapopyo ga nyata noguugoya, ngoka taga fala aantu kokule naKalunga.
17 Elongo lyawo olya fa ondhiya tayi kunya ko oontumba kolutu. Yaali yomaalongi mbaka oyo Himeneus naFiletus.
18 Yo oya puka mo mondjila yoshili notaa yono po eitaalo lyoyendji, sho taa popi kutya eyumuko lyaasi olya ningwa nale.
19 Ihe ekankameno ndyoka lya tungwa kuKalunga, olya kola noitali tenguka. Kekankameno ndika okwa nyolwa oohapu ndhika: “Omuwa oku ya shi mboka ye,” na: “Kehe ngoka ta tumbula edhina lyOmuwa, ne ethe uulunde.”
20 Megumbo enene omu na iiyaha nomatiti goludhi kehe: Yimwe oya ningwa moshisiliveli nomoshingoli, yimwe omiiti nomeloya, yimwe ohayi longithwa ashike omasiku gamwe niikwawo ohayi longithwa esiku kehe.
21 Ano ngele ku na ngoka ti iyoolola mo muuwinayi mbuka auhe, ota vulu okulongithwa miilonga yi na esimano. Oye okwa yapulwa, a kale oopalela mwene gwe nokwi ilongekidha okulongithwa moshilonga kehe oshiwanawa.
22 Yanda uuhalu womuugundjuka, lalakanena uuyuuki, eitaalo, ohole nombili pamwe naamboka ye na omitima dha yela nohaa pula ekwatho kOmuwa.
23 Yanda okuludhika kwa nika uugoya nokwaa na owino, oshoka iinima ya tya ngeyi ohayi hulile moontamanana.
24 Omumati gwOmuwa ita pumbwa okutamanana. Oye oku na okukala omulongi omwaanawa, omwiidhidhimiki, e na olukeno naayehe
25 noha pukulula aatamaneki ye nombili. Oshoka Kalunga ota vulu oku ya pa ompito yokwiitedhulula e taa tseya oshili.
26 Nena otaa papudhuka e taa manguluka mo momwigo gwaSatana, ngoka a li e ya manga e te ya vulikitha.
1 Dhimbulukwa aluhe kutya komasiku gokomeho otaku ke ya omathimbo omadhigu.
2 Aantu otaa ka kala nokwiihola, ye hole eliko, aainomi noye hole uuntsa. Otaa ka kala aasheki, ihaa vulika kaakuluntu yawo, ihaa pandula noya pota.
3 Oyo otaa ka kala yaa na olukeno nohenda, haa lundilathana, aapwidhi naadhudhu; otaa kala ye tonde uuwanawa.
4 Otaa kala aakotokeli, ihaa yawala, haa tuwalala noye hole iihulo peha lyokuhola Kalunga.
5 Oyo otaa ka kala ya fa haa simaneke Kalunga, ihe otaa idhimbike oonkondo dhe. Yanda aantu ya tya ngaaka.
6 Yamwe yomuyo ohaa gwayele momagumbo, haa kwata aakiintu mboka ya lolodhwa kuulunde nohaa endithwa kuuhalu womaludhi ogendji.
7 Aakiintu mbaka otaa kambadhala aluhe okwiilonga okutseya oshili, ihe oyo kaye na nando oompoka naa ke yi tseya.
8 Ngashika naanaa Jannes naJambres ya li ya tsile Moses ondumbo, osho wo naantu mbaka otaa tsu ondumbo noshili. Aalumentu mbaka oye na oondunge dha pilaala noya gwaya mo meitaalo.
9 Ihe kaye na nando oompoka naa ka huma komeho, oshoka aantu ayehe otaa ka mona uugoya wawo ngashika naanaa mbwiyaka waJannes naJambres.
10 Ihe ngoye owa landula elongo lyandje, omikalo dhandje nelalakano lyandje; owa holele ndje meitaalo, meidhidhimiko, mohole nomomukumo,
11 mokutidhaganwa nomokuhepekwa. Ngoye owa tseya nawa, nkene nda li nda hepekwa noonkondo muAntiokia, muIkonium nomuListra. Ihe Omuwa okwa hupitha ndje mo mwaayihe mbika.
12 Ayehe mboka ya hala okulongela Kalunga nesimaneko muukumwe naKristus Jesus, otaa ka tidhaganwa.
13 Ihe aakolokoshi naafudhime otaa tsikile okuza muuwanawa yu uka muuwinayi, okupukitha yalwe nokwiipukitha wo yo yene.
14 Ngoye kombinga yoye kala mwaambyoka yoshili, ngaashi we yi longwa nowe yi itaala. Oshoka mboka ye yi ku longo, ou ya shi.
15 Owa tseya Omanyolo omayapuki okuza kuunona woye. Otaga vulu oku ku pa oondunge ndhoka tadhi ku thikitha mehupitho, sho wi itaala Jesus Kristus.
16 Oshoka Enyolo kehe olya nyolithwa kOmbepo yaKalunga noli na oshilonga shokulonga oshili, okukumagidha, okupukulula nokuulukila omuntu ondjila yu uka,
17 opo kehe ngoka ta longele Kalunga, a kale a gwana a pwa nokwoopalela oshilonga kehe oshiwanawa.
1 Otandi ku pula, u uvaneke koshipala shaKalunga noshaJesus Kristus, ngoka te ke ya Omukwaniilwa, a pangule aantu ayehe, aanamwenyo naasi. Otandi ku kumagidha,
2 u dhiginine okuuvitha pethimbo ewanawa nenge edhigu: pukulula, ganda, kumagidha, longa aantu neidhidhimiko alihe.
3 Oshoka ethimbo otali ke ya, uuna aantu taa ka kala inaa hala okupulakena elongo lyu uka. Ihe otaa ka landula uuhalu wawo yene notaa ki ikongela aalongi mboka taye ya lombwele oohapu tadhi nywitha omakutsi gawo.
4 Oyo otaa ke etha elongo lyoshili e taa gama koongano dhawo.
5 Ihe ngoye itonatela nawa miinima ayihe, idhidhimikila omahepeko, longa oshilonga shomuuvithi gwelaka etoye, gwanitha ayihe mokulongela Kalunga.
6 Ethimbo olya thika, ethimbo lyokuthiga po okukalamwenyo huka oli li popepi.
7 Methigathano ndika ondi itula mo nda mana mo. Onda matuka oshinano ashihe, onda dhiginina eitaalo.
8 Ngashingeyi ondjambi yesindano oya tegelela ndje. Kalunga, omupanguli omuyuuki, ota ka ninga ndje omuyuuki mesiku ndiyaka ongashika wo ayehe mboka ye na ondjuulukwe oku mu mona.
9 Kambadhala, u ye mbala kungame.
10 Oshoka Demas mokuhokwa uuyuni mbuka okwa thigi ndje po nokwa yi kuTessalonika. Kreskes okwa yi kuGalatia naTitus okuDalmatia.
11 Lukas oye awike a thigala pungame. Ngele to ya, etelela Markus, oshoka onde mu pumbwa, a kwathe ndje miilonga.
12 Tikikus onde mu tumu kuEfeso.
13 Etelela ombaikitha yandje nde yi thigi maandjaKarpus muTroas. Etelela wo omambo, unene omambo ngoka gopergamendi.
14 Aleksander omuhambudhi okwa hindi ndje nayi unene. Omuwa ote ke mu futila shi thike piilonga ye.
15 Nangoye wo kala we mu kotokela, oshoka okwa tsa ondumbo unene neuvitho lyetu.
16 Mokwiipopila kwandje lwotango kakwa li ku na nando omuntu a gama kungame; ayehe oye etha ndje. Onda hala, Kalunga kee shi ya yalulile.
17 Ihe Omuwa okwa kala pamwe nangame nokwa pe ndje oonkondo, onkee onda vulu okuuvithila aapagani ayehe, yu uve elaka etoye. Ihe onda hupithwa mokana konime.
18 Omuwa ota ka hupitha ndje kuuwinayi auhe e ta ka thikitha ndje mOshilongo she shomegulu. Oye na simanekwe aluhe sigo aluhe. Amen.
19 Otandi kundu Priska naAkula noyaandjaOnesiforus.
20 Erastus oku li muKorinto, naTrofimus onde mu thigi muMileto, oshoka okwa li ta alukwa.
21 Kambadhala, u ye huka, manga okufu inaaku thika. Eubulus, Pudens, Linus, Klaudia nooitaali ayehe otaye ku kundile po.
22 Omuwa na kale pamwe nangoye. Esilohenda lyaKalunga nali kale nane amuhe.