1 Ontumwafo ndjika oya zi kuPaulus, omuyapostoli gwaJesus Kristus, opalombwelo lyaKalunga, omuhupithi gwetu, nolyaJesus Kristus, etegameno lyetu.
2 Oya nyolelwa Timoteus, omumwandjelela meitaalo. Esilohenda, ontalanteni nombili yaKalunga Tate noyOmuwa gwetu Jesus Kristus nayi kale nangoye.
3 Sho nda li mondjila yokuuka kuMakedonia, onda li nde ku lombwele kutya onda hala u kale muEfeso, opo u indike aantu mboka ye li mo taa longo omalongo ga puka.
4 Ya lombwela ano, ye ethe po oongano dhawo nomukalo gwawo gwokusimaneka oondjokonona dhomadhina goohekulu, oshoka iinima ya tya ngeyi otayi eta owala omaludhi. Oyo inayi opalela edhiladhilo lyaKalunga, ndyoka tali tseyika mokwiitaala.
5 Elalakano lyekumagidho ndika olyo oku ya penduthila ohole tayi zi momwenyo gwa yela, meiyuvo ewanawa nomeitaalo lyashili.
6 Aantu yamwe oya za mo miinima mbika e tayi ipukitha nomapopyagano guugoya.
7 Oyo oya hala okukala aalongi yompango yaKalunga, nando kaa uvite ko shoka taa popi naashoka taa ludhike.
8 Tse otu shi shi kutya ompango oyo ombwanawa, ngele tayi longithwa pamukalo ngoka yi na okulongithwa.
9 Otu na okutseya kutya oompango ihadhi ningilwa aantu mboka haa longo uuwanawa, ihe aayoni naakolokoshi, aakeenakonasha naKalunga naalunde, mboka kaaye na eiyapulo nuukwambepo, aadhipagi yoohe nooyina nosho wo aadhipagi yalwe,
10 aahondeli, omashenge naalali nomashenge, aayakipo yaantu, aafundja naamboka haa gana iifundja nenge haa ningi shoka inaashi tsa kumwe nelongo ndyoka lyu uka.
11 Elongo lyu uka otali monika mevaangeli ndyoka nde li pewa, ndi li uvithe, elaka etoye lya zi kuKalunga keadhimo nomulalekwa nuuyamba.
12 Ngame otandi hambelele Jesus Kristus, Omuwa gwetu, sho a pe ndje oonkondo dhokulonga oshilonga shandje. Otandi mu hambelele, sho a tala ndje kutya otandi vulu oku mu longela, e ta tula ndje miilonga ye,
13 nando ngame onda li nale handi mu popi nayi, nde mu tidhagana nonde mu sheke. Ihe Kalunga okwa sile ndje ohenda, oshoka onda li inaandi itaala nokanda li ndi shi wo shoka te ningi.
14 Omuwa gwetu okwa hololele ndje esilohenda lye lya gwanenena nokwa pe ndje eitaalo nohole mbyoka tu yi na muukumwe naKristus Jesus.
15 Ohapu ndjika oyoshili noyi shilela okutaambwa nokwiitaalwa: Jesus Kristus okwe ya muuyuni, a hupithe aalunde, nangame omulunde omunene ndi vule aalunde ayehe.
16 Onda hala ndi tye: Kalunga okwa sile ndje ohenda, opo Jesus Kristus a holole mungame komeho gaayehe eidhidhimiko lye alihe lyokwiidhidhimikila ndje. Ngame onda ningi oshiholelwa shaayehe mboka taye ke mu itaala, ya mone omwenyo gwaaluhe.
17 Kalunga awike, omukwaniilwa gwaaluhe, ngoka kee na ehulilo noiha monika, na hambelelwe ye na simanekwe aluheluhe! Amen.
18 Omumwandje Timoteus, otandi ku pe oshilonga shika shokukumagidha opahapu dhehunganeko ndyoka lyonale lye ku popi. Oohapu dhehunganeko ndyoka nadhi ninge omatati goye, u kondje ekondjo lya mana mo.
19 Dhiginina eitaalo neiyuvo lya yela. Aantu yamwe inaa vulika keiyuvo lyawo, onkee oya teya omutenge gwolweendo lweitaalo lyawo.
20 Mongundu yawo omu na Himeneus naAleksander, mboka nde ya gandja miikaha yaSatana, opo shi ya longe, yaa sheke we Kalunga.
1 Omakumagidho gandje ogo ngaka: Tangotango naku ningwe omaindilo, omagalikano, omagalikaneno nomahambelelo koshipala shaKalunga omolwaantu ayehe.
2 Naku galikanenwe aakwaniilwa naapangeli ayehe, opo tu kale nokukala kwa ngungumana nokwombili mokusimaneka Kalunga akuhe nomikalo omiwanawa.
3 Shika osho oshiwanawa nosho opalela Kalunga, omuhupithi gwetu,
4 ngoka a hala, aantu ayehe ya hupithwe noya tseye oshili.
5 Oshoka Kalunga ogumwe awike, naangoka a hanganitha aantu naKalunga, ogumwe, omuntu Jesus Kristus,
6 ngoka i igandja, a ninge iikulila yaantu ayehe. Shika osha ningwa pethimbo lyo opala, oshoka Kalunga okwa li a hala aantu ayehe ya hupithwe.
7 Onkee ano ngame onda tumwa, ndi ninge omuyapostoli nomulongi mokati kaapagani nondi uvithe elaka tali popi eitaalo noshili. Otandi popi oshili, ite fundju.
8 Onda hala, aalumentu ya galikane akuhe nokuyelutha omaako gawo pombanda yaa na uutondwe nomalimbililo.
9 Onda hala wo, aakiintu ya dhiladhile nawa kombinga yomizalo dhawo, yo ya zale oonguwo dhi shi kutalwa nodha yogoka. Inaa panda omafufu ya zalekwe oombandi dhiingoli nomagwe taga adhima nenge oonguwo dhi na ondilo.
10 Peha lyaambika kaleni mu udha iilonga iiwanawa, ngaashi sho opalela aakiintu ooitaali.
11 Melongelokalunga aakiintu naa pulakene ya mwena nokuvulika kelandulathano.
12 Ngame itandi pitika, aakiintu ya ninge aalongihapu nenge ya pangele aalumentu, ihe naa kale ya mwena.
13 Oshoka Adam oye a shitwa tango e taku landula ihe Eva.
14 Adam haye a pukithwa, ihe omukiintu oye a pukithwa nokwa yono oshipango shaKalunga.
15 Ano omukiintu ota ka hupithwa omolwokuvala uunona, ihe ongele ta dhiginine eitaalo, ohole yopakriste neiyapulo.
1 Ohapu oyoshili ndjoka tayi ti: Omulumentu ngoka a hala okuninga omuwiliki gwegongalo lyaKalunga, oye okwa hala oshilonga oshiwanawalela.
2 Ihe oye oku na okukala omulumentu kee na oshipo; e na omukiintu gumwe awike, omwiidhiliki, hi ikwata nawa, e na elandulathano noha yakula aayenda megumbo lye. Oku na okukala wo ta vulu okulonga aantu;
3 hankolwi nenge omupwidhi, ihe oku na engungumano nombili ye ke na okahalu kiimaliwa.
4 Oye oku na okukala omulumentu e shi okukala nawa naanegumbo lye noku shi okuputudha oyana, ya kale ye na evuliko nesimaneko.
5 Oshoka omulumentu ngoka kee shi, nkene e na okukala naanegumbo lye, ota vulu ngiini okulela egongalo lyaKalunga?
6 Oye ke na okukala omuntu ngoka, opo a ningi omukriste, opo kaa inenepeke e ta geelwa, ngaashi omuhindadhi a ningwa.
7 Oye oku na okukala omulumentu ha popilwa muuwanawa nokumboka yaa shi aakriste, opo kaa ishekithe ye kaa ye momwigo gwomuhindadhi.
8 Aayakuli yegongalo oye na okukala ye na omikalo omiwanawa noyaa na iifundja; kaye shi oonkolwi nenge nalwiho mokulikola.
9 Oyo oye na okudhiginina neiyuvo lya yela oshili ya hololwa meitaalo.
10 Aantu ya tya ngaaka oye na okukonakonwa tango, ngele otaa vulu tuu okuya moshilonga.
11 Aakiintu yawo naa kale ye na omikalo omiwanawa noyaa na oluhoko. Naa kale aaidhiliki noye na oshili miinima ayihe.
12 Omuyakuli gwegongalo oku na okukala e na omukiintu gumwe noku shi okulela nawa oyana naanegumbo lye.
13 Mboka taa longo iilonga yawo nawa, otaa imonene esimano notaa vulu okukala nuulaadhi mokwiitaala Jesus Kristus.
14 Moku ku nyolela ontumwafo ndjika ondi na etegelelo lyokuya kungoye mbala.
15 Ihe ngele inandi ya mbala, ontumwafo ndjika otayi ku tseyithile, nkene tu na okwiikwata nawa megumbo lyaKalunga. Egumbo ndika olyo egongalo lyaKalunga omunamwenyo. Olyo ongundhi nekankameno okukoleka oshili.
16 Kaku na ngoka ta vulu okuludhika uunene woshiholekwa sheitaalo lyetu: Jesus Kristus okwa holoka molupe lwomuntu, Ombepo oye mu holola omunashili nokwa holokele aayengeli. Oye oku uvithwa mokati kiigwana, okwi itaalwa muuyuni nokwa yeluthilwa megulu.
1 Ombepo Ondjapuki ote shi popi sha yela kutya komasiku gokomeho aantu yamwe otaa ke etha eitaalo. Oyo otaa ka vulika koombepo dhiifundja notaa ka landula omalongo goompwidhuli.
2 Omalongo ga tya ngeyi otaga zi maantu aanamakoto naafundja, oomboka ye na eiyuvo lya sa, ongolya fikwa noshiyela sha hanya.
3 Aantu ya tya ngeyi ohaa indike okuhokana nosho wo okulya iikulya yontumba noyongandi. Ihe Kalunga okwa shiti iikulya mbika, yi liwe kooitaali nokumboka ya tseya oshili noku mu hambelela.
4 Ashihe shoka sha shitwa kuKalunga, osho shiwanawa; inashi ekelwahi, ihe nashi taambwe nokuhambelela Kalunga.
5 Oshoka oohapu dhaKalunga negalikano oyo tayi shi taambitha kuKalunga.
6 Ngele to longo yakweni omalombwelo ngano, nena oto talwa omuyakuli omwaanawa gwaJesus Kristus. Oto mono ihe eitaalo moohapu nomelongo lyu uka, ngaashi wa kala mulyo.
7 Onkee ano yanda oongano itaadhi popi Kalunga nodhaa na ekwatho lyasha. Ihe iputudha, u kale ho simaneke Kalunga.
8 Eidheulo lyopalutu oli na ekwatho eshona lyowala, ihe okusimaneka Kalunga otaku kwatha miinima ayihe, oshoka omo mu na euvaneko lyomwenyo ngashingeyi nokonakuyiwa.
9 Ohapu ndjika oyoshili, onkee oyi shi kutaambwa nokwiitaalwa.
10 Shika osho tatu kondjele notatu shi ihepekele, oshoka otwi inekela Kalunga omunamwenyo, Omuhupithi gwaantu ayehe, unene gwaamboka ooitaali.
11 Ano ya lombwela, u ya longe iinima mbika ayihe.
12 Inapu kala nando ogumwe te ku dhini molwaasho omugundjuka, ihe kala omuholelwa kooitaali moohapu, momikalo, mohole, meitaalo nomuuyogoki.
13 Longitha ethimbo lyoye mokulesha Omanyolo omayapuki montaneho yaayehe, mokuuvitha nomokulonga aantu, sigo tandi ya.
14 Ino hepitha omagano gopambepo ge li mungoye, ngoka we ga pewa, aahunganeki sho ya popi elaka lyaKalunga, naakuluntu sho ye ku tenteke iikaha yawo.
15 Iinima mbika yi ninga ano, ngoye wi itule mo muyo, opo okuhuma kwoye komeho ku monike kwaayehe.
16 Itonatela ano mwene nosho wo elongo lyoye. Iinima mbika yi dhiginina, oshoka ngele to shi ningi, oto ihupitha nosho wo mboka taye ku pulakene.
1 Ino ganda omusamane omukokele, ihe mu popitha ongaho. Aalumentu aagundjuka kala nayo ongaamwanyoko,
2 naakulukadhi ongoonyokokulu naakiintu aagundjuka ongaamwanyoko omuuyogoki auhe.
3 Simaneka aaselekadhi, oomboka aaselekadhilela.
4 Omuselekadhi ngoka e na oyana nenge aatekulu, naa ilonge okukwatha aakuluntu yawo nooyinakulu paukriste. “Kayuhwena hadhela nyoko, nyoko onale e ku hadhele,” oshoka osho ehalo lyaKalunga.
5 Omukiintu omuselekadhilela ngoka kee na nando omusilishimpwiyu, ohi inekele Kalunga ye e ta dhiginine okugalikana noku mu indila ekwatho omutenya nuusiku.
6 Ihe omuselekadhi ngoka ti iyethele natango muuhalu we, oye okwa sa, nonando na kale e na omwenyo.
7 Ya lombwela eutho ndika, opo kwaa kale nando omuntu te ya pe uusama.
8 Ihe ngele ope na omuntu ngoka itaa sile aanezimo lye oshimpwiyu, unene aanegumbo lye, oye okwi idhimbike eitaalo nomwiinayi e vulike komupagani.
9 Omuselekadhi ngoka e na oomvula dhaa vule omilongo hamano, ita vulu okuyalulilwa komwaalu gwaaselekadhi ooyakwawo. Ihe omuselekadhi a tya ngaaka oku na wo okukala a hokanwa lumwe aluke,
10 nokwa popiwa a longa iilonga iiwanawa: a putudha nawa oyana, a yakula aayenda megumbo lye, a yoga oompadhi dhaantu yaKalunga, a kwatha mboka ye li muudhigu nokwiigandjela oshilonga kehe oshiwanawa.
11 Aaselekadhi aagundjuka inaaya yalulilwa komwaalu nguka, oshoka uuhalu wawo otau ya thiminike okuya moondjokana. Oyo otaa gamuka kuKristus,
12 e taa kala ye na oondjo, sho inaa gwanitha euvaneko lyawo lyotango.
13 Otaa igilile wo okukala monyalo nokweendagula nomagumbo, ihe unene otaa igilile okupopyagana, okwiitula miinima yaantu nokupopya iinima mbyoka itaayi pumbwa okupopiwa.
14 Onkee onda hala, aaselekadhi aagundjuka ya hokanwe, ya vale aanona noya dhiginine okukala nawa nomagumbo gawo, opo yaa pe aanandumbo natse ompito yoku tu popila muuwinayi.
15 Oshoka aaselekadhi yamwe oya puka nokuli e taa landula Satana.
16 Ihe ngele oku na omukiintu omwiitaali e na aaselekadhi megumbo lye, ne ya sile oshimpwiyu, opo egongalo kaali tsikwe omutenge lyo li vule okusila aaselekadhilela oshimpwiyu.
17 Aakuluntu yegongalo mboka ya monika aadhiginini miilonga yawo, oyi ilongela okusimanekwa, unene mboka haa ihepeke mokuuvitha nomokulonga aantu.
18 Oshoka enyolo otali ti: “Ino manga okana konani ndjoka tayi yungula nokulyatagulithwa iilya molupale;” na: “Omulongi okwi ilongela okupewa ondjambi ye.”
19 Omukuluntu gwegongalo ngele ta tamanekwa, ino zimina oohapu ndhoka, manga kaapu na oonzapo yaali nenge yatatu.
20 Mboka taa yono, ya ganda montaneho yegongalo, opo yakwawo ya tile okuyona.
21 Otandi ku ganitha koshipala shaKalunga noshaJesus Kristus nomontaneho yaayengeli aayapuki: Dhiginina elongo ndika, waa kale nando nontondo nenge nondhipi mwaayihe mbyoka to yi ningi.
22 Ino endelela okutenteka omuntu iikaha yoye omolwoshilonga shOmuwa. Ino kwatathana noondjo dhaantu yalwe; ikaleka wa yela.
23 Ino nwa we omeya ageke, ihe kala ho nu omaviinu omashona omoluuwehame womela lyoye.
24 Oondjo dhaantu yamwe odhi igalala nale, notadhi ya tetekele okuya mepangulo, ihe dhayamwe otadhi ka holoka owala komeho.
25 Osho ngeyi iilonga ayihe iiwanawa oyi li puuyelele, naambyoka wo inaayi holoka, itayi kala aluhe ya holama.
1 Aapika naa simaneke ooyene yawo, opo edhina lyaKalunga nelongo lyetu lyaa shekwe.
2 Aapika mboka ye na ooyene ooitaali, inaye ya dhina, oshoka ayehe otaa talwa aamwayinathana. Ihe naye ya longele nomwenyo omwaanawa, oshoka oyo ooitaali pamwe nayo aaholike. Ano ou na okulonga nokuuvitha iinima mbika.
3 Ihe ngoka ta longo elongo li ili ye ina taamba oohapu dhoshili dhOmuwa gwetu Jesus Kristus nosho wo elongo lyashili,
4 okwa kwatwa kuuntsa nokokwaashisha. Oye ota hingwa kehalo ewinayi tali fala momaludhikithathano nomomatompathano, moka hamu zi efupa, oontamanana, omashekathano nomalundilathano.
5 Aantu mboka yaa na oondunge noihaa landula oshili, oye hole aluhe okuludhika. Oyo otaa dhiladhila kutya uukriste owo olunza lweliko.
6 Eeno, uukriste owo shili eliko enene, ihe ongele wa gwana naashoka u shi na.
7 Muuyuni inatu ya mo nando onasha, osho wo itatu vulu okuza mo nasha.
8 Onkee ano natu kale twa gwana, ngele otu na iikulya nomizalo.
9 Ihe mboka ya hala okuninga aayamba, otaa gwile memakelo. Oyo otaa yulwa kuuhalu uuwinayi wuugoya mboka tau ya fala moshiponga nomekano.
10 Oshoka mohole yeliko omo tamu zi uukolokoshi auhe. Aantu oyendji sho ya lalakanene eliko, oya puka mo mondjila yeitaalo noya yono po oomwenyo dhawo niimpwiyu oyindji.
11 Onkee ano ngoye omuntu gwaKalunga, yanda iinima ayihe ya tya ngeyi. Lalakanena uuyuuki, esimanekokalunga, eitaalo, ohole, eidhidhimiko nombili.
12 Matuka methigathano ewanawa lyeitaalo, u hakane omwenyo gwaaluhe, ngoka we gu ithanenwa kuKalunga, sho wa hempulula ehempululo ewanawa lyeitaalo montaneho yoonzapo oyendji.
13 Koshipala shaKalunga, ngoka ha tula iinima ayihe omwenyo noshaJesus Kristus, ngoka a hempulula ehempululo ewanawa koshipala shaPontius Pilatus, otandi ku kumagidha:
14 Vulika koshipango, u kale wa yogoka nowaa na oshipo sigo esiku Omuwa gwetu Jesus Kristus ta ka holoka.
15 Eholoko lye otali ka etwa po kuKalunga pethimbo lyo opala, omulalekwa nuuyamba nOmupangeli awike, Omukwaniilwa gwaakwaniilwa nOmuwa gwaawa.
16 Oye awike ihaa si; a kala muuyelele itaau wapa okuyiwa. Kaku na nando omuntu e mu mona nokaku na nando omuntu ta vulu oku mu tala. Oye na simanekwe ye na pangele aluheluhe! Amen.
17 Kumagidha aayamba yeliko lyokombanda yevi, yaa inenepeke yo yaa inekele iinima mbyoka tayi hulu po, ihe naa inekele Kalunga ngoka he tu pe iinima ayihe kee na uuluya.
18 Ya kumagidhila okulonga uuwanawa, ya ninge aayamba yiilonga iiwanawa, haa gandja nohaa topolele yalwe momaliko gawo.
19 Osho ngeyi otayi igongelele eliko ndyoka tali ka ninga ekankameno lya kola konakuyiwa. Nena otaa vulu okwiimonena okukalamwenyo kwashili.
20 Timoteus, pungula nawa shoka we shi pewa. Yanda omapopyagano ga nyata nomaludhiko guunongo wuugoya, ngaashi aantu yamwe haye u tala owo oondunge.
21 Oshoka yamwe mboka ya ti kutya oye na uunongo wa tya ngaaka, oyi iteka eitaalo. Esilohenda lyaKalunga nali kale nane amuhe.