1 Ontumwafo ndjika oya zi kuPaulus, Silvanus naTimoteus. Oya nyolelwa egongalo lyomuTessalonika, lyaantu yaKalunga Tate noyOmuwa Jesus Kristus. Esilohenda nombili nayi kale nane.
2 Tse ohatu hambelele Kalunga aluhe omolweni nohatu mu dhimbulukwa wo aluhe momagalikano getu.
3 Ohatu mu dhimbulukwa koshipala shaKalunga Tate, nkene mu na eitaalo li na iilonga, nkene mu na ohole tayi mu longitha nuupenda nonkene okutegamena kweni Omuwa gwetweni Jesus Kristus kwa kola.
4 Aamwameme, tse otu shi shi kutya Kalunga oku mu hole nokwe mu hogolola, mu ninge aantu ye.
5 Oshoka elaka etoye ndyoka twe mu etele, kalya li owala oohapu dhomokana, ihe olya holoka moonkondo nomOmbepo Ondjapuki mokuholola oshili ayihe. Okukala kwetu omwe ku tseya, sho twa li pune; osha ningwa moluuwanawa weni.
6 Ne omwa ningi aaholeli yetu noyOmuwa. Nonando omwa li moothina odhindji, oohapu dhaKalunga omwe dhi taamba nenyanyu lyomOmbepo Ondjapuki.
7 Onkee ano omwa ningi oshiholelwa shooitaali ayehe yomuMakedonia noyomuGreka.
8 Oshoka elaka tali popi Omuwa, olya zi mune nolya taandele nokuli pondje yaMakedonia noyaGreka. Eitaalo lyeni okwiitaala Kalunga olya kundanwa akuhe. Kaku na we sha tu na oku shi popya.
9 Aantu yo yene ohaa hokolola, nkene mwe tu taamba, sho twe mu talele po nonkene mwe etha iimenka e tamu ya kuKalunga. One omwa hala okulongela Kalunga kashili nomunamwenyo
10 nokutegelela Omwana, a ze megulu. Oye Jesus ngoka Kalunga e mu yumudha kuusi naangoka te tu hupitha, twaa adhike kondjahi yaKalunga ndjoka tayi ke ya.
1 Aamwameme, omu shi shi kutya etalelopo lyetu kune kalya li osima.
2 Omwa tseya wo kutya, manga inaatu ya kune muTessalonika, otwa li twa hindwa notwa shekwa muFilippi. Ihe Kalunga okwe tu pe omukumo oku mu hokololela elaka etoye lya zi kuye, nonando opwa li omakondjitho ogendji.
3 Oshoka omakumagidho getu kage na elalakano ewinayi lya nyata nenge lyoku mu pukitha.
4 Ihe otwa popi aluhe pahalo lyaKalunga, oshoka okwe tu tala, tu shi ku pewa oshilonga shokuuvitha elaka etoye. Tse itatu kambadhala okwoopalela aantu, ihe oKalunga ngoka ta konakona omadhiladhilo getu.
5 Oshoka omwa tseya nawa kutya tse inatu ya kune noohapu dhomakoto nenge okwiikongela eliko nomuheka; Kalunga oye onzapo yetu.
6 Tse inatu kambadhala, tu simanekwe nando okomuntu, ngee kune nenge kuyalwe.
7 Sho tu li po aayapostoli yaKristus, otwa li twa gwana ando oku mu thiminika, ihe otwa kala mokati keni nombili, ngaashi yina ta sile oyana oshimpwiyu.
8 Omolwohole yetu yoku mu hola inatu ya kune owala nelaka etoye lya za kuKalunga, ihe otwa hupula wo oomwenyo dhetu molweni. Ne aaholike yetu.
9 Aamwameme, otamu dhimbulukwa nawa kutya, sho twe mu uvithile elaka etoye lya za kuKalunga, otwe shi ningi nokwiihepeka. Otwa longo omutenya nuusiku, opo twaaye mu etele nando uupyakadhi washa.
10 One oonzapo dhetu pamwe naKalunga, omikalo dhetu mokukalathana kwetu nane mboka ooitaali odha li dhu uka, omiwanawa nodhaa na uusama.
11 One omwa tseya, nkene twa li twa kala nane, ngaashi he e li noyana.
12 Otse otwe mu tsu omukumo, otwe mu hekeleke notwa kala noku mu kumagidha, mu opalele Kalunga mokukalamwenyo kweni, Kalunga ngoka e mu ithanene mOshilongo she nomeadhimo lye.
13 Onkee ano natse wo ohatu hambelele aluhe Kalunga. Oshoka sho twe mu etele oohapu dhaKalunga, omwe dhi uvu e tamu dhi taamba, hangaashi oohapu dhomuntu, ihe odhaKalunga, dho odho tuu shili. Oshoka Kalunga ota longo mune mboka mwi itaala.
14 Aamwameme, ne omwa ningilwa iinima ya fa mbyoka ya ningilwa omagongalo gaKalunga gomuJudea, ya ningilwa aantu yaKristus yaahwiyaka. Omwa hepekwa kaantu yomoshilongo sheni, ngashika naanaa yo ya hepekwa kAajuda.
15 Aajuda tuu mboka ya dhipaga Omuwa Jesus naahunganeki noye tu tidhagana wo. Oyo inaa opalela nando Kalunga. Oyo oye tonde aantu ayehe.
16 Oya kambadhala oku tu keelela, twaa uvithile aapagani oohapu dhaKalunga ndhoka tadhi ya fala mehupitho. Osho ngeyi otaa udhitha nayi oshiyelekitho noondjo dhawo. Ngashingeyi ondjahi yaKalunga oya gwile nokuli kombanda yawo.
17 Aamwameme, sho twa li twa topoka nane okathimbo palutu, otwa kala noku mu dhiladhila. Omwa li mwe tu yi kokule, notwa kambadhala oku mu mona natango.
18 Otwa li twa hala, tu galukile kune, unene ngame Paulus onda kambadhala shi vule lumwe okuya kune ishewe, ihe Satana okwe tu keelele.
19 Hane nani etegameno lyetu, enyanyu lyetu nuulenga wesindano lyetu mboka tatu itangele koshipala shOmuwa gwetu Jesus, uuna te ya?
20 Eeno shili, one esimano nenyanyu lyetu.
1 Lwahugunina otwa nyengwa oku shi idhidhimikila. Otwa tokola okukala atuke muAtena,
2 manga tatu tumu omumwatate Timoteus, ngoka a longo pamwe natse oshilonga shaKalunga shokuuvitha elaka etoye tali popi Kristus. Otwe mu tumu, e mu tse omukumo ye a koleke eitaalo lyeni,
3 opo kwaa kale nando ogumwe ta shuna monima omolwomatidhagano. One omu shi shi kutya omatidhagano ga tya ngaaka ogo ombinga yimwe yehalo lyaKalunga mokukala kwetu.
4 Oshoka sho twa li pune, otwe mu londodha kutya onatu ka tidhaganwa, naashika omwe shi mono kutya osho naanaa tashi ningwa ngashingeyi.
5 Shika osho sha tumitha ndje Timoteus kune. Inandi vula we okwiidhidhimika, onkee onde mu tumu, opo a tale, ngele omu li tuu natango meitaalo. Kwaa ninge, pamwe omuhongololi e mu hongolola, niilonga yetu ayihe e tayi ningi eihepeko lyowala.
6 Ngashingeyi Timoteus okwa galukile ishewe kutse nokwe etelele elaka lyenyanyu tali popi eitaalo nohole yeni. Okwe tu hokololele wo kutya ohamu tu dhimbulukwa aluhe nomwe tu yuulukwa noonkondo, ngashika naanaa natse wo twe mu yuulukwa.
7 Aamwameme, otwa tsuwa omukumo omolweni mokuhepekwa nomomaudhigu getu. Eitaalo lyeni olye tu koleke,
8 oshoka ngashingeyi oomwenyo omo dhi li, ngele ne otamu kala mwa kankama mOmuwa.
9 Ehambelelo lyetu oli thike peni tu li na koshipala shaKalunga ketu, omolweni!
10 Ohatu galikana Kalunga noomwenyo dhetu adhihe uusiku nomutenya, tu mone ompito yokumona iipala yeni, tse tu gwedhe ko shoka sha kambela keitaalo lyeni.
11 Kalunga Tate nOmuwa gwetu Jesus naye tu longekidhile ompito yoku mu talela po.
12 Omuwa ne mu pe ohole yokuholathana, nohole yeni yokuhola aantu ayehe nayi koke yi thike pohole yetu yoku mu hola.
13 Osho ngeyi ota koleke omitima dheni, mu kale aayapuki nomwaa na oshipo koshipala shaKalunga Tate, uuna Omuwa gwetu Jesus te ya pamwe naayapuki ye ayehe.
1 Aamwameme, hugunina otwe mu lombwele, nkene mu na okukala, opo mu opalele Kalunga. Shika osho hamu ningi shito. Onkee otatu mu indile noku mu kumagidha medhina lyOmuwa Jesus, mu shi ninge mu vule shito.
2 Omalombwelo ngoka twe mu pe mewiliko lyOmuwa Jesus, omu ga shi.
3 Kalunga okwa hala, mu kale aayapuki ne mu yande oluhondelo.
4 Omulumentu kehe gwomokati keni na kale a tseya, nkene e na okukala nomukiintu, a kale naye pamukalo gu uka nogwesimaneko.
5 Ina kala naye pakahalu kuulunde ngashika aapagani mboka inaa tseya Kalunga.
6 Ano moshinima shika inaku kala nando omulumentu ta yono kumukwawo nenge te mu yugu. Shika otwe shi mu lombwele nale notwe mu kumagidha noonkondo kutya Omuwa ota ka geela mboka taa longo uuwinayi wa tya ngaaka.
7 Kalunga ine tu ithanena okukala muuholume, ihe okukala aayapuki.
8 Onkee ngoka ta dhini elongo ndika, ita dhini aantu, ihe oKalunga ngoka ha gandja Ombepo Ondjapuki.
9 Itamu pumbwa okunyolelwa kombinga yokuhola ooitaali ooyakweni. Oshoka Kalunga mwene okwe mu longa, mu kale mu holathane.
10 Shika omwe shi holola nale mokukalathana kweni nooitaali ayehe yomuMakedonia. Aamwameme, otatu mu indile, mu shi ninge mu vule shito.
11 Kaleni mu na elalakano okukala mwa gundjila, tamu longo iilonga yeni e tamu ikongele iipalutha yeni, ngaashi twe mu lombwele nale.
12 Pamukalo gwa tya ngeyi otamu simanekitha uukriste weni mokati kaamboka yaa shi ooitaali noitamu pumbwa okukala tamu indile oompumbwe dheni kuyalwe.
13 Aamwameme, otwa hala mu tseye kutya aantu mboka ya sa, oye li ngiini, opo mwaaye ya sile oluhodhi ngashika mboka yaa na etegameno.
14 Tse otwi itaala kutya Jesus okwa sile e ta yumuka; onkee otwi itaala wo kutya uuna Jesus te ya, Kalunga ota ka yumudha pamwe naJesus aantu mboka ya sile meitaalo.
15 Mpaka otatu mu lombwele elongo lya zi kOmuwa. Uuna ndoka Omuwa te ya, tse mboka tatu ka adhika tu na omwenyo, itatu ka tetekela mboka ya sa nale.
16 Tango otaku ka uvika elombwelo, ewi lyomuyengeli omukuluntu nehiko lyenkuma lyaKalunga. Nena Omuwa mwene ota ka kuluka ta zi megulu. Aantu mboka ya si yi itaala Kristus, otaa ka yumudhwa tango.
17 Opo ihe tse mboka tatu ka adhika tu na omwenyo pethimbo ndyoka, otatu ka gongelwa atuhe pamwe nayo pombanda miikogo, tu ka tsakaneke Omuwa mombepo. Osho ngeyi otatu ka kala ihe aluhe pOmuwa.
18 Onkee ano talalekathaneni noohapu ndhika.
1 Aamwameme, kape na ompumbwe yoku mu nyolela kombinga yethimbo notundi, uuna iinima mbika tayi ka ningwa.
2 Oshoka omwa tseya nawa kutya esiku lyOmuwa otali ya ongomufuthi te ende uusiku.
3 Manga aantu ye li mokutya: “Ope na ombili, naayihe oya gamenwa,” nena ohaluka ehanagulo otali ya adha. Itaa ka vula okuya ontuku, oshoka otashi ka kala ngaashi omusimba ta adhika koshitheta.
4 Aamwameme, ne kamu shi yomomilema, esiku ndyoka li mu adhe ando ohaluka ngaashi omufuthi.
5 Ne amuhe aantu yomuuyelele noyomomutenya. Otse katu shi aantu yomuusiku nenge yomomilema.
6 Onkee ano inatu kaleni twa kotha ngaashi yalwe; tu kaleni twa tonata notu na eidhiliko.
7 Aakothi ohaa kotha uusiku noonkolwi ohadhi kolwa uusiku.
8 Ihe otse aantu yomuuyelele, onkee otu na okukala tu na eidhiliko. Tu zaleni eitaalo nohole ongehuuyanza, netegameno lyehupitho lyetu ongegala lyosheela.
9 Kalunga ine tu hogolola, e tu geele, ihe otu hupithwe omolwOmuwa gwetu Jesus Kristus.
10 Oye a si peha lyetu, opo tu kale pamwe naye, uuna te ya, nokashi na mbudhi kutya otu na omwenyo nenge otwa sa.
11 Onkee ano kumagidhathaneni ne mu kwathathane, ngaashi hamu shi ningi nokuli.
12 Aamwameme, otatu mu indile, mu simaneke mboka taa longo mokati keni. Omuwa Kalunga oye e ya hogolola, ye mu wilike noye mu pukulule.
13 Ya simanekeni ne mu ya hole omwolwoshilonga shoka taye shi longo. Kaleni mu na ombili mokati keni.
14 Aamwameme, otatu mu kumagidha: gandeni aananyalo, tseni aambanda omukumo, ambidhidheni aankundi ne mu idhidhimikile ayehe.
15 Kotokeni, kwaa kale nando omuntu ta galulile mukwawo uuwinayi, ihe lalakaneneni aluhe okuningilathana uuwanawa noku u ningila wo aantu ayehe.
16 Nyanyukweni aluhe,
17 galikaneni aluhe,
18 panduleni aluhe. Shika osho Kalunga a hala, mu ninge mokukala kweni muKristus Jesus.
19 Inamu keelela Ombepo Ondjapuki,
20 inamu dhina omahunganeko.
21 Konakoneni iinima ayihe; dhiginineni shoka oshiwanawa,
22 ne mu yande uuwinayi kehe.
23 Kalunga kombili na yapule okukala kweni akuhe ye ne mu gamene, opo ombepo, omwenyo nolutu yi kale yaa na nando oshipo sigo okokugaluka kwOmuwa gwetu Jesus Kristus.
24 Ngoka he mu ithana, ote ke shi gwanitha, oshoka oye omwiinekelwa.
25 Aamwameme, tu galikanenii wo.
26 Kundilii po ooitaali ayehe nohole yaamwayinathana.
27 Otandi mu kumagidha palombwelo lyOmuwa, ontumwafo ndjika mu yi leshele ooitaali ayehe.
28 Esilohenda lyOmuwa gwetu Jesus Kristus nali kale nane.