1 Ontumwafo ndjika oya zi kuPaulus naTimoteus, aamati yaJesus Kristus, ya nyolelwa aantu yaKalunga ayehe yomuFilippi, mboka yi itaala Jesus Kristus pamwe naawiliki yegongalo lyaKalunga naayakuli yalwe.
2 Silweni ohenda, ne mu kale mu na ombili yaKalunga noyOmuwa Jesus Kristus.
3 Otandi hambelele Kalunga kandje omolweni amuhe, kehe ethimbo tandi mu dhiladhila.
4 Momagalikano gandje agehe otandi mu galikanene nenyanyu,
5 oshoka omwa kwatha ndje moshilonga sheuvitho lyevaangeli okuza kesiku lyotango sigo ongashingeyi.
6 Ngame ondi inekela shili kutya Kalunga, ngoka a tameke oshilonga oshiwanawa mune, ote shi tsikile, sigo tashi ka pwa mesiku lyaJesus Kristus.
7 Ngame ondi mu hole. Nokuli osho oshu uka lela, ngame ndi kale noku mu dhiladhila ngeyi, oshoka one aasilwahenda kuKalunga pamwe nangame; ngashingeyi sho ndi li mondholongo naasho wo nda li inaandi kwatwa okupopila nokukoleka evaangeli.
8 Kalunga oku shi shi kutya otandi popi oshili, sho tandi ti: Onde mu yuulukwa nohole yomuJesus Kristus.
9 Egalikano lyandje olyo ndika kutya Kalunga a kokithe nokutaneka ohole yeni mokutseya nomokuninga omatokolo ge na oondunge,
10 opo mu kale mu na owino yokuyoolola iinima mbyoka yi na oshilonga. Nena mesiku lyaKristus one otamu ka kala ihe mwa yela mwaa na nando okantongo kasha.
11 Okukalamwenyo kweni otaku kala ihe ku udha iiyimati iiwanawa mbyoka Jesus Kristus awike ta vulu oku yi mu imitha, iiyimati yokusimanekitha noyokuhambelelitha Kalunga.
12 Aamwameme, ngame onda hala, mu kale mu shi shi kutya iinima mbyoka ya ningilwa ndje, oya kwathele lela mokutaandelitha evaangeli.
13 Nokuli etanga alihe lyaalangeli yuuwa naambala yalwe ooyakwawo yaamuka oye shi shi ngashingeyi kutya ngame onda tulwa mondholongo molwaashoka ndi li omumati gwaKristus.
14 Okukala kwandje mondholongo okwa pe oyendji yomaamwameme aalumentu omukumo okwiinekela Omuwa nokuuvitha nuulaadhi yaa na uumbanda.
15 Eeno, yamwe yomuyo otaa uvitha Kristus omolwefupa nomolwondumbo, ihe ooyakwawo otaye mu uvitha nehalo ewanawa.
16 Mboka otaye shi ningithwa kohole, oshoka oyo oye shi shi kutya Kalunga okwa pe ndje oshilonga shokupopila evaangeli.
17 Mbeyaka ooyakwawo ihaa uvitha Kristus nehalo ewanawa, ihe omombepo yokwiihola noyondumbo. Ngashingeyi sho ndi li mondholongo, oye shi aniwa otaa gwedhele ndje uudhigu u vule wonale.
18 Ihe shoka kashi na mbudhi. Ngame ondi li po nde shi nyanyukilwa notandi ke shi nyanyukilwa komeho, Kristus shaa ashike tu uvithwa pamukalo kehe ngoka tagu vulika, ongele nelalakano ewanawa nenge nelalakano lya puka.
19 Nokuli ngame ondi shi shi kutya omolwomagalikano geni nokekwatho lyOmbepo yaJesus Kristus otandi ka manguluka.
20 Oshoka ondjuulukwe yandje onene netegameno lyandje olyo ndika kutya ngame ndaa idhimbike nando okuli oshinakugwanithwa shandje. Ethimbo alihe, unene okuza kongashingeyi, otandi kala ndi na omukumo omunene, opo ngame mwene nuuntu wandje auhe ndi simanekithe Kristus. Ashihe shimwe, ngele ondi na omwenyo nenge tandi si.
21 Oshoka kombinga yandje Kristus oye omwenyo gwandje nokusa okwo elikolo.
22 Ihe ngele nani mokukala ndi na omwenyo molutu nduka, otandi vulu okulonga sha shi na oshilonga oshinene, nena onda nyengwa nokandi shi wo kutya oshini po ndi na okuhogolola po.
23 Ondi li po tandi thiminikwa koombinga adhihe mbali: Onda hala nokuhalelela, ndi thige po okukalamwenyo huka, ndi ka kale puKristus. Shika osho oshinima oshiwanawa shi vule oshikwawo.
24 Ihe osha pumbiwa unene noonkondo, ndi kale ndi na omwenyo omolweni.
25 Onkee ngame ondi inekela lela nondi shi shi kutya otandi ka kala ndi na omwenyo. Eeno, otandi ka kala natango pune oku mu kokitha noku mu nyanyudha meitaalo.
26 Ngele nda kala pune natango, nena ne otamu ka vula ihe okwiisimanekela ndje mokukala kweni muKristus Jesus.
27 Oshinima oshinene nosha simana osho shoka kutya omikalo dheni nadhi kale dho opalathana nevaangeli lyaKristus, opo nge nde ya ko, ndi mu mone nongele ndi li kokule, ndi mu uve mu li mwa thikama omuthika mu na elalakano limwe alike, nokutya okukondjela eitaalo lyomevaangeli pamwe nangame.
28 Inamu tila aakondjithi yeni, ihe kaleni aluhe mu na omukumo. Omukumo gweni otagu ya tompo kutya oyo itaa ka sindana, ihe ne otamu ka sindana, oshoka Kalunga oye te mu pe esindano.
29 Oshoka ne omwa pewa ohenda yokuyakula Kristus, hamoku mu itaala akuke, ihe nomoku mu hepekelwa wo.
30 One wo otamu vulu okukondja pamwe nangame. Olugodhi ndoka olwo naanaa ndoka mwa li mwa mono ndje ndi lu na, nosigo onena omu uvite ndje ndi lu na.
1 Okukala kweni muKristus otaku mu koleke tuu? Ohole otayi mu hekeleke tuu? Omu na tuu ehangano lyOmbepo? Omu holathane nomu na tuu olukeno mokukalathana kweni?
2 Ngame otandi mu indile, nyanyudhii ndje nenyanyu lya tsakana. Kaleni mwa tsa ompango yimwe. Holathaneni, ne mu kale mu na ombepo yimwe nedhiladhilo limwe.
3 Inamu longa nando osha mombepo yokwiihola nenge yokukonga esimano lyowala, ihe ifupipikeni kiipala yayakweni, ne mwaa dhiladhile kutya one aawanawa mu ya vule.
4 Lalakaneneni uuwanawa wooyakweni wo, haamboka ashike weni yene.
5 Okukala kweni naku kale kwa fa kwaJesus Kristus.
6 Oye okwa li e na uukwatya waKalunga, ye ina dhiladhila nando olumwe, a kambadhale nokuhakana okukala a fa Kalunga.
7 Ihe okwi ihula uukalunga, e ta zala olupe lwomupika. Oye okwa ningi a fa omuntu nokwa holoka molupe lwomuntu.
8 Oye okwi ifupipike nokwe ende ondjila yevuliko sigo omeso lye lyokomushigakano.
9 Onkee ano Kalunga okwe mu yele pombandambanda nokwe mu luku edhina enene li vule omadhina agehe,
10 opo kehe shimwe megulu nokombanda yevi nomohi yevi, shi tse oongolo medhina lyaJesus.
11 Nomokusimanekitha Kalunga He ayihe yi hokolole montaneho kutya Jesus Kristus oye Omuwa.
12 Aaholike yandje, ngashika mwa kala hamu vulika aluhe kungame, manga nda li pune, vulikeni wo ngashingeyi, sho ndaa po we pune. Kaleni tamu longo nokutila nokukakama molwehupitho lyeni.
13 Oshoka Kalunga oye mwene ta longo aluhe mune oku mu pa ehalo noonkondo, opo a tsakanithe elalakano lye ewanawa.
14 Longeni iilonga yeni ayihe mwaa na omangungutulo nenge omaludhi.
15 Kaleni aana yaKalunga mwaa na oshipo nomwa yela, mwaa na nando okantongo mokukala kweni muuyuni mbuka u na aantu ya pilaala noya goyoka. One omu na okukala tamu adhima mokati kawo, ngashika oonyothi tadhi adhima pombanda kegulu,
16 sho tamu ya uvithile ohapu yomwenyo. Nena ngame otandi ka vula okwiitanga omolweni mesiku lyaKristus, oshoka oonkambadhala dhandje niilonga yandje ayihe kaya li ashike eihepeko lyowala.
17 Nonando ombinzi yandje yi tilwehi kombanda yomayambo ngoka eitaalo lyeni tali ga yambele Kalunga, ngame onda nyanyukwa notandi ka nyanyukwa pamwe nane amuhe.
18 Nane wo nyanyukweni pamwe nangame.
19 Ngame ondi na einekelo mOmuwa Jesus kutya otandi ka vula okutuma mbala Timoteus kune, opo ndi tsuwe omukumo konkundana ndjoka tayi ka za kune.
20 Oshoka Timoteus oye awike he mu dhiladhila ngaashi ngame noku na oshimpwiyu nane.
21 Oshoka ooyakweni ayehe oyi ipyakidhila ashike niinima yawo yene, haambyoka yaJesus Kristus.
22 Ihe uudhiginini we omu u shi, nkene twa kala tatu longo pamwe naye moshilonga shevaangeli ngashika he nomwana.
23 Ano oye tuu nda dhiladhila okutuma kune, uuna nda mono nkene tandi ningwa.
24 Ondi na nokuli einekelo okwiinekela Omuwa kutya ngame mwene wo otandi ke ya mbala kune.
25 Onde shi tala wo kutya osha pumbiwa okutuma kune omumwameme nomutumwa gweni, ngoka a kwatha ndje moluhepo lwandje. Oye Epafroditus, omukwiita omukwetu.
26 Oye okwe mu yuulukwa nokwa hala nokuhalelela oku mu talela po, oshoka okwa zizilikwa noonkondo molwaasho mwe shi uva kutya okwa li ta alukwa.
27 Eeno, oye okwa li ta alukililwa, konyala nokuli a se, ihe Kalunga okwe mu sile ohenda. Nokuli haye awike a silwa ohenda, ihe nangame wo, opo ndaa gwedhelwe oluhodhi olukwawo lu vule nduka.
28 Ngame onda hala nokuhalelela oku mu tuma kune, opo mu nyanyukwe, ngele tamu mu mono, noluhodhi lwandje lu ninge oluhwepo.
29 Mu taambeni ano nenyanyu, oshoka oye omumwanyoko mOmuwa. Aalumentu ya tya ngaaka ya simanekeni,
30 oshoka omolwoshilonga shaKristus okwa hupula omwenyo gwe, konyala nokuli a se, opo a kwathe ndje ekwatho ndyoka ne yene inaamu vula oku li pa ndje.
1 Hugunina, aamwameme, Omuwa ne mu gwedhele ko natango enyanyu olindji. Ngame inandi shi kunyukwa okweendulula iinima mbyoka nde yi mu nyolele nale, ihe otashi mu koleke.
2 Kotokeleni oombwa ndho, aantu mboka haa longo uuwinayi, aalumentu mboka haa itangele efukaleko lyokombanda.
3 Oshoka aafukalekwa yashili otse mbaka hatu galikana Kalunga mOmbepo notwa nyanyukilwa okukala kwetu muKristus Jesus. Tse itatu itangele nando oshilonga shimwe shokombanda,
4 nando ngame otandi vulu okwiinekela wo iinima ya tya ngaaka. Ngele ku na ngoka ta dhiladhila kutya ota vulu okwiinekela iilonga yokombanda, nena ngame ondi mu vule.
5 Ngame tuu nguka nda fukalekwa konima yoshiwike shimwe okuza kokuvalwa kwandje. Ngame Omuisraeli kevalo, omunezimo lyaBenjamin, Omuhebelilela. Kombinga yokudhiginina ompango yAajuda onda li omufarisayi.
6 Ngame onda li omulaadhi noonkondo mokutidhagana egongalo. Ngame onda li ndaa na okantongo kasha kombinga yuuyuuki mboka omuntu te u adha molwokuvulika komalombwelo gompango.
7 Ihe ayihe mbyoka nda li nde yi tala yi na omupondo, ngashingeyi otayi etele ndje oshiponga omolwaKristus.
8 Eeno shili, iinima ayihe yilwe oyo ekanitho lyowala, ngele tandi yi yeleke nokutseya Jesus Kristus, Omuwa gwandje, shoka osho oshinima shondilo shi vule ayihe. Omolwe onde ekelehi iinima ayihe nonde yi tala oyo iiyagaya yowala, opo ndi likole Kristus,
9 ngame ndi kale muukumwe naye. Ngame kandi na we uuyuuki wandje mwene, uuyuuki mboka hau adhika mokuvulika kompango. Ihe ngashingeyi ondi na uuyuuki mboka tau gandjwa molweitaalo okwiitaala Jesus Kristus, uuyuuki tau zi kuKalunga nowi ikwatelela keitaalo.
10 Shoka nde shi hala ngashingeyi, osho okutseya Kristus, okumakela oonkondo dheyumuko lye, okukala ndi na oshitopolwa momahepeko ge nondi mu fe mokusa,
11 opo nangame wo ndi yumudhwe mo meso, ndi ye momwenyo.
12 Ngame itandi itanga kutya onda adha nale esindano moshinima shika nenge onda adha nale ethikilo. Aawe, otandi matuka, opo ndi li adhe, oshoka Jesus Kristus okwa likola ndje.
13 Aamwameme, ngame inandi itala natango kutya onde li adha, aawe, ihe oshinima shimwe tandi ningi, otandi dhimbwa shoka shi li konima notandi ningi ashihe shoka tandi vulu, opo ndi adhe shoka shi li komeho gandje.
14 Onkee otandi matuka ndu ukilila kethikilo, opo ndi ka likole ondjambi yesindano. Ondjambi ndjika oyo omwenyo gwomegulu, ngoka Kalunga e gu ithanena ndje molwaJesus Kristus.
15 Ano tseni atuheni mboka twa koka pambepo, natu kaleni tatu dhiladhila ngeyi. Nongele nani oku na yamwe ye na omadhiladhilo gi ili, nena Kalunga ote ke mu yelithila oshinima shoka.
16 Natu humeni owala komeho nondjila naanaa ndjoka twe ende nayo sigo oompaka.
17 Aamwameme, kaleni nokuholela ndje. Tse otwe mu pe oshiholelwa oshiwanawa, onkee ano landuleni aantu mboka haa landula oshiholelwa shetu.
18 Ngaashi nde mu lombwele nale olwindji, otandi shi endulula natango ndi na omahodhi kutya oku na aantu oyendji mboka ya ningi aatondi yeso lyaKristus lyokomushigakano.
19 Oyo otaa ka ya sigo omoheli, oshoka uuhalu womalutu gawo oye u ningi kalunga kawo. Oyo ohaa isimanekele iinima mbyoka ya li ye na okukala ye yi sa ohoni nohaa dhiladhila ashike iinima mbyoka yomuuyuni mbuka.
20 Ihe tse uukwashilongo wetu ou li megulu notwa tegelela nondjuulukwe onene Omuwa gwetu Jesus Kristus, a ze megulu, e ye e tu hupithe.
21 Oye tuu ngoka ta ka shitulula omalutu getu ngaka omankundi nomasi e te ga ningi, ga kale ngaashi olutu lwe lu na eadhimo. Oye ota longitha oonkondo dhe tadhi vulu okutula iinima ayihe kohi yepangelo lye.
1 Onkee ano aamwameme, ne mboka ndi mu hole nonde mu yuulukwa, one enyanyu lyandje noshishani shandje. Kaleni aluhe mwa thikama omuthika mwi ikolelela mOmuwa.
2 Euodia naSintike, otandi mu kumagidha, mu kambadhale okuuvathana ngashika aakiintu aamwayinathana mOmuwa.
3 Nangoye wo, omuyakuli gwandje omwiinekelwa, onda hala, u kwathe aakiintu mboka, oshoka oyo oya longo nuudhiginini okutaandelitha evaangeli pamwe nangame naKlemens nonaalongi ooyakwawo yalwe ayehe mboka nda longo pamwe nayo, oomboka ye na omadhina ga nyolelwa membo lyaKalunga lyaanamwenyo.
4 Kaleni aluhe mwa nyanyukwa mokukala mOmuwa. Otandi shi tumbula natango: nyanyukweni!
5 Kaleni mu na olukeno naantu ayehe. Omuwa ote ya mbala.
6 Inamu kala mu na nando oshimpwiyu shasha, ihe oompumbwe dheni dhi tseyithileni Kalunga momagalikano geni agehe. Ihe indileni aluhe nomwenyo gu udha ehambelelo.
7 Nombili yaKalunga, ndjoka yi vule uunongo auhe wopantu, otayi gamene oomwenyo dheni nomadhiladhilo geni muKristus Jesus.
8 Hugunina, aamwameme, kaleni nokudhiladhila iinima mbyoka iiwanawa noya gwana okusimanekwa: iinima mbyoka yoshili yo opala, yu uka, ya yogoka noyi na epopilo ewanawa.
9 Ningeni iinima mbyoka mwe yi longwa nomwe yi lombwelwa kungame, ongele moohapu dhandje nenge omiilonga yandje. Nena Kalunga, ngoka te tu pe ombili, ota kala ihe pamwe nane.
10 Onda nyanyukwa shili mOmuwa, sho mwa mono ishewe ompito okusila ndje oshimpwiyu konima yethimbo ele. Osho shoka mwa li mwa hala oku shi ninga shito, ihe inamu mona ompito.
11 Shika itandi shi popi omolwoluhepo, oshoka ondi igilila okukala naashoka ndi shi na,
12 nashi kale oshishona nenge nashi kale oshindji. Onda pyokoka miinima ayihe: okukala nda kuta nenge okukala nda sa ondjala, okukala meloolo nenge okukala moluhepo.
13 Ngame otandi vulu shaa shoka, oshoka Kristus ota koleke ndje.
14 Ihe ne omwa ninga nawa shili, sho mwa kwatha ndje muudhigu wandje,
15 Ne Aafilippi, omu shi shi nawa kutya, sho nda zile muMakedonia pomasiku ngeyaka gopetameko, manga nda li tandi uvitha elaka etoye, egongalo lyeni olyo alike lya li lya kwatha ndje. Eeno, ne amuke omwa li mwa topola pamwe nangame etano neshonopalo lyiiniwe.
16 Ongame sho nda li ndi na oluhepo muTessalonika, one omwa li mwa tumine ndje ekwatho, halumwe aluke, ihe lwaali nokuli.
17 Shika itashi ti, onda hala ashike ando okutaamba omagano, ihe onda hala, mu ilikolele sha ne yene.
18 Ngashingeyi ondi na oshindji shi vule shoka nda pumbwa. Ondi na eloolo, Epafroditus sho e etele ndje omagano geni, taga ningi eyambo lyezimba lya nika nawa, lyo opala nolya hokiwa kuKalunga.
19 Kalunga kandje, ngoka e na uuyamba auhe muKristus Jesus, ote ke mu gwanithila ashihe shoka mwe shi pumbwa.
20 Kalunga, Tate yetu, oye na simanekwe aluhe sigo aluhe. Amen.
21 Kundilii po aantu yaKalunga ayehe noyaJesus Kristus. Aamwameme ayehe mboka ye li mpaka, otaye mu kundile po.
22 Aayapuki ayehe otaye mu kundile po, unene mboka yomuuwa womupangeli Omuroma.
23 Esilohenda lyOmuwa Jesus Kristus nali kale pamwe nane amuhe.