1 Ontumwafo ndjika oya zi kuPaulus, omuyapostoli gwaJesus pahalo lyaKalunga. Oya nyolelwa aantu yaKalunga ye li muEfeso, mboka aainekelwa mekwatathano lyawo naJesus Kristus.
2 Silweni ohenda, ne mu kale mu na ombili yaKalunga Tate noyOmuwa Jesus Kristus.
3 Kalunga, He yOmuwa gwetu Jesus Kristus, na hambelelwe! Oye tuu ngoka e tu laleke nuuyamba muukumwe naKristus, sho e tu pe omagano agehe gopambepo taga zi megulu.
4 Kalunga sho e tu hole, okwe tu hogolola nale molwaKristus, manga uuyuni inaau shitwa, tu kale aayapuki twaa na oshipo koshipala she.
5 Oye okwa kala e shi nuna nale kutya ote ke tu taamba, tu ninge oyana omolwaJesus Kristus. Shika osho enyanyu nelalakano lye.
6 Onkee Kalunga na hambelelwe omoluuwindji wesilohenda lye nomolwomagano agehe ngoka e ge tu pa mOmwana omuholike.
7 Oshoka tse otwa mangululwa notwa dhiminwa po oondjo dhetu omolweso lyaKristus. Esilohenda lyaKalunga ekumithi ngiini!
8 Esilohenda ndika Kalunga okwe li tu pa olindji, li ninge oondunge nuunongo wetu miinima ayihe.
9 Kalunga okwa ningi shoka a kala nale a hala oku shi longa nokwe tu hololele oshiholekwa shoka a li a hala oku shi tu hololela muKristus.
10 Kalunga oku uvaneke okutsakanitha edhiladhilo lye pethimbo lyo opala. Oye ota ka hanganitha eshito alihe, nokutya ayihe yomegulu noyokombanda yevi otayi ka tulwa kumwe nomutse, Kristus.
11 Oshoka ayihe oya ningwa pamadhiladhilo nopatokolo lyaKalunga. Kalunga okwe tu hogolola molwaKristus, tu ninge aantu ye, ongaashi e shi tokola nale okuza petameko.
12 Onkee ano tu tangeni esimano lyaKalunga, oshoka otse aatango mboka twa kala tu na etegameno muKristus.
13 Nane wo sho mu uvu ohapu yoshili, elaka etoye ndyoka lye mu etele ehupitho, omwi itaale Kristus. Kalunga nokwe mu tula oshihako shoku mu ndhindhilika kutya mwa ningi aantu ye, sho e mu pe Ombepo Ondjapuki ngoka e mu uvanekela.
14 Ombepo oye okapilo kutya tse otatu ka pewa shoka Kalunga e shi uvanekela aantu ye. Ombepo ote tu tsu omukumo, tu inekele kutya Kalunga ota ka mangulula aantu ye. Tu tangeni ano esimano lye!
15 Onkee ano ngame sho ndu uvu, nkene mwi itaala Omuwa Jesus nohole yeni yokuhola aantu yaKalunga ayehe,
16 inandi etha we okuhambelela Kalunga omolweni. Ngame ohandi mu dhimbulukwa aluhe momagalikano gandje
17 nohandi indile Tate a simana, Kalunga He yOmuwa gwetu Jesus Kristus, e mu pe Ombepo ngoka te mu pe oondunge note mu hololele Kalunga, opo mu kale mu mu shi.
18 Ngame otandi galikana, oondunge dheni dhi wape okumona uuyelele waKalunga, opo mu tseye onkalo yetegameno ndyoka e li mu ithanena, eudhililo lyomayambeko ngoka e ga uvanekela aantu ye,
19 nuuwindji woonkondo ndhoka tadhi longo mutse ooitaali.
20 Oonkondo ndhoka Kalunga e dhi longitha, sho a yumudha Jesus Kristus kuusi nokwe mu kuutumbike kolulyo lwe megulu.
21 Oko nkoka Kristus ta pangele aapangeli ayehe yomegulu, aaleli aanankondo naawa. Oye oku vule aanamadhina ayehe aanankondo yomuuyuni mbuka naambwiyaka tau ya.
22 Onkee Kalunga okwa tula iinima ayihe mepangelo lyaKristus nokwe mu ningi omutse gwegongalo nogwiinima ayihe.
23 Egongalo olyo olutu lwaKristus nolyo egwanopo lyaKristus, ngoka u udhitha iinima ayihe.
1 Nale omwa li mwa sa pambepo omolwokwaavulika kweni kuKalunga nomolwoondjo dheni.
2 Pethimbo ndiyaka omwa landula oondjila oombwinayi dhuuyuni mbuka. Omwa vulika komupangeli gwoonkondo dhombepo yomewangandjo, ombepo ndjoka tayi pangele ngashingeyi aantu mboka ihaa vulika kuKalunga.
3 Eeno, tseni atuheni osho twa li twe ya fa. Otwa landula uuhalu wuuntu wetu notwa longo shaa shoka sho opalela uuhalu womomalutu getu nowomadhiladhilo getu. Ngashika naanaa aantu yalwe ayehe, natse wo panshitwe yetu otwa li twi ilongela egeelo lyaKalunga.
4 Ihe Kalunga, nguka u udha esilohenda omolwohole ye onene, sho e tu hole,
5 okwe tu tula omwenyo pamwe naKristus. Okwe shi tu ningile, manga twa li twa sa pambepo omolwokwaavulika kwetu kuye. Ne omwa hupithwa kesilohenda lyaKalunga.
6 Muukumwe wetu naKristus Jesus, Kalunga okwe tu yumudha kuusi pamwe naKristus, opo tu wape okupangela pamwe naye megulu.
7 Oye okwe shi ningi, opo a holole sigo okomathimbo ngoka tage ke ya uuwindji wesilohenda lye nowohole ye ndjoka e yi tu hololele muJesus Kristus.
8 Oshoka omwa hupithwa kesilohenda lyaKalunga keitaalo. Ehupitho ndika inali za mune yene, aawe, olyo omagano gaKalunga.
9 Mpaka kape na sha shokwiitangela, oshoka shika inashi za moonkambadhala dheni.
10 Kalunga oye omushiti gwetu, onkee muukumwe naKristus Jesus oye okwe tu shiti, tu kale tu na iilonga iiwanawa mokukalamwenyo kwetu. Iilonga mbyoka Kalunga okwe yi tu uthila nale, tu yi longe.
11 One aapagani kevalo. Aajuda ohaa ti kutya inamu fukalekwa, manga yo haa iti, oya fukalekwa nokuulika kefukaleko ndyoka aalumentu yo yene haa li ningi niikaha yawo komalutu gawo. Dhimbulukweni shoka mwa li mwa tya omathimbo ngoka ga piti.
12 Pethimbo ndiyaka omwa li mwaa na Kristus. One omwa li aakwiilongo nokamwa li yomongundu yaahogololwa yaKalunga. One omwa li mwaa na oshitopolwa mehangano ndyoka lyi ikwatelela komauvaneko ngoka Kalunga e ga uvanekela aantu ye. One omwa li mwa kala muuyuni mbuka mwaa na etegameno nomwaa na Kalunga.
13 Ihe ngashingeyi muukumwe naKristus Jesus, ne mboka mwa kala shito yokokule, omwe etwa popepi omolweso lyaKristus.
14 Oshoka Kristus oye mwene e tu etele ombili, sho a hanganitha Aajuda naapagani, ya ninge oshigwana shimwe. Nolutu lwe mwene okwa kumuna po ekuma lya li pokati kawo, tashi ti, etondathano.
15 Oye okwa hanagula po ompango yAajuda pamwe niipango yawo, opo a shite momihoko ndhika adhihe mbali oshigwana shimwe oshipe muukumwe naye mwene moku ya paathanitha ombili.
16 Kristus sho a si komushigakano, okwa hanagula po etondathano. Koonkondo dhomushigakano gwe okwa hanganitha omihoko adhihe mbali, dhi ninge olutu lumwe. Osho ngeyi okwe ya galulile kuKalunga.
17 Onkee ano okwe ya noku uvithile aantu ayehe elaka etoye lyombili. Oye okwe li mu uvithile, ne aapagani mboka mwa li mwa kala shito kokule naKalunga nosho wo Aajuda mboka ya li shito popepi naye.
18 OmolwaKristus tseni atuheni, Aajuda naapagani, otu na ompito okuhedha koshipala shaTate Kalunga koonkondo dhOmbepo tuu ngoka gumwe.
19 Onkee ano ne aapagani, kamu shi we oondjendi nenge aakwiilongo, aawe, ngashingeyi omu na uukwashilongo umwe naantu yaKalunga nomwa ningi aanegumbo lye.
20 Nane wo omwa tungilwa kekankameno hoka ku na aayapostoli naahunganeki, naahoka Jesus Kristus mwene e li ko emanya lyokolonela.
21 Oye ta kwatakanitha etungo alihe kumwe note li kokeke, sigo tali ningi otempeli ondjapuki mOmuwa.
22 Muukumwe naKristus nane wo otamu tungilwa mumwe nooyakweni ayehe yalwe, mu ninge egumbo moka Kalunga ta kala mo nOmbepo ye.
1 Onkee ngame Paulus, ngoka ndi li onkwatwa molwaJesus Kristus ngashingeyi peha lyeni aapagani, ohandi galikana Kalunga.
2 Ondi inekela, omu uva kutya Kalunga okwa pe ndje molwesilohenda lye oshilonga shika shelelo lyegumbo lye, ndi shi longe omoluuwanawa weni.
3 Eeno, Kalunga okwa holola oshiholekwa she nokwa tseyithile ndje memoniko, ngashika naanaa nda li nde mu nyolele nale pafupi kombinga yoshinima shika.
4 Nongele otamu lesha shoka nda nyola, nena otamu ka koneka kutya ngame ondu uvite ko oshiholekwa shika shaKristus.
5 Oshiholekwa shika osha kala sha holekwa aantu yomapipi ngoka ga piti, ihe ngashingeyi Kalunga okwe shi hololele aayapostoli naahunganeki ye aayapuki mOmbepo Ondjapuki.
6 Oshiholekwa osho shika kutya omolwevaangeli aapagani oye na oshitopolwa momayambeko gaKalunga pamwe nAajuda. Oyo ayehe iilyo yolutu lumwe noye na wo oshitopolwa momauvaneko ngoka Kalunga e ga uvaneka muJesus Kristus.
7 Ngame onda ningi omuyakuli gwevaangeli pamagano gesilohenda lyaKalunga, ngoka e ga pe ndje pakulonga kwoonkondo dhe.
8 Ngame tuu nguka, omufupi ndi vulike kaantu yaKalunga ayehe, onda pewa kesilohenda, ndi uvithile aapagani elaka etoye lyuuyamba waKristus waa shi kuyelekwa,
9 nondi tseyithile aantu ayehe oshiholekwa shika shaKalunga kutya otashi ti ngiini. Kalunga, omushiti gwiinima ayihe, okwa li a kaleke oshiholekwa shika sha holama uule womathimbo agehe ngoka ga piti,
10 opo pethimbo ndika lyongashingeyi egongalo li tseyithile aapangeli yomaayengeli naanankondo yomegulu uunongo waKalunga momalupe gawo agehe gi ili nogi ili.
11 Kalunga okwe shi ningi palalakano lye lya kala po aluhe, ndyoka e li gwanitha muKristus Jesus, Omuwa gwetu.
12 Muukumwe naye nomolweitaalo lyetu oku mu itaala, tse otu na ompito okuhedha koshipala shaKalunga neinekelo lya kola.
13 Onkee otandi mu kumagidha, mwaa se uunye, oshoka ngame otandi hepekwa molweni; ashihe otashi ningwa omoluuwanawa weni.
14 Onkee ano otandi tsu oongolo koshipala shaTate,
15 kungoka kwa za edhina tate mezimo kehe lyomegulu nolyokombanda yevi.
16 Ngame otandi galikana Kalunga omoluunene wesimano lye, e mu pe oonkondo tadhi zi mOmbepo ye, opo mu wape okukala mwa kola kombinga yomuntu gweni gwomeni.
17 Kristus na tunge egumbo lye momitima dheni keitaalo. Otandi mu galikanene, mu kale mu na omidhi nekankameno mohole,
18 ne mu wape pamwe naantu yaKalunga ayehe okuuva ko uumbwalangandja nuunene, uule wopombanda nuule womohi wohole yaKristus.
19 Eeno, tseyeni ohole ye, nonando itayi vulu okutseyika thiluthilu, e tamu kala ihe mu udhithwa egwano alihe lyaKalunga.
20 Kalunga sho ta longo noonkondo ndhoka dhi li mutse, ota vulu okulonga oshindji shi vulithe pushoka tatu shi indile nenge tatu shi dhiladhila.
21 Oye na simanekwe megongalo nomuKristus Jesus uule womathimbo agehe aluhe sigo aluhe! Amen.
1 Ngame ngoka nda kwatwa molwaashoka tandi longele Omuwa, otandi mu kumagidha kutya okweenda kweni naku kale kwo opalathana neithano ndyoka Kalunga e mu ithana nalyo.
2 Kaleni aluhe aaifupipiki, aatalanteni naaidhidhimiki. Hololeni ohole yeni mokuyakulathana.
3 Ningeni ashihe shoka tamu vulu okukoleka uukumwe weni wOmombepo Ondjapuki omolwombili ndjoka tayi mu mangele kumwe.
4 Olutu olumwe nOmbepo oyimwe, ngashika naanaa etegameno ndyoka Kalunga e mu ithanena, olimwe.
5 Omuwa ogumwe, eitaalo olimwe neshasho olimwe.
6 Kalunga ogumwe, He yaantu ayehe, ngoka Omuwa gwaayehe nota longo mwaayihe noku li mwaayihe.
7 Kehe gumwe gwomutse Kalunga okwe mu pa omagano gasha opandjele yokugandja kwaKristus.
8 Ngashika enyolo tali ti: “Sho a londo a yi kombandambanda, okwa faalele oonkwatwa odhindji; oye okwa pe aantu omagano.”
9 Ihe otashi ti ngiini, oye okwa londo a yi pombanda? Otashi ti, oye okwa kuluka tango, nokutya a kulukile muule womeni lyevi.
10 Ano ngoka a kuluka, oye tuu a londo a yi megulu, opo a udhithe ewangandjo alihe nokukalapo kwe.
11 Oye wo ngoka a pe aantu omagano. Oye oku utha, yamwe ya ninge aayapostoli, yamwe aahunganeki, yamwe aayuvithi, yamwe aasita nayamwe aalongihapu.
12 Oye okwe shi ningi, a longekidhile aantu yaKalunga ayehe oshilonga sheyakulo lyopakriste, okutunga olutu lwaKristus.
13 Natseni atuheni tatu hangana kumwe muukumwe womeitaalo lyetu nomontseyo yetu okutseya Omuna gwaKalunga. Otatu ka ninga ihe aakuluntu twa koka, twa thika kegwano lyuukuluntu waKristus.
14 Nena otse itatu kala we aanona haa tengatengithwa nohaa alaalithwa kombepo kehe yomalongo gaantu aafundja, mboka taa pukitha yakwawo noku ya tegela oomwigo.
15 Ihe mokupopya oshili tayi pangelwa kohole, otu na okukoka muKristus, ngoka e li omutse.
16 Mewiliko lye iilyo ayihe yolutu yi ili noyi ili otayi kwatathana kumwe nolutu aluhe lwa kwatelwa kumwe koluthipa kehe ndoka lu li molutu. Onkee oshilyo kehe pehala lyasho ngele tashi longo, ngashika shi na okulonga, nena olutu aluhe otalu koko notalu itungu lwo lwene e talu kala talu pangelwa kohole.
17 Medhina lyOmuwa otandi mu lombwele ihe oshinima shika noku mu kumagidha kutya, inamu enda we ngashika aapagani, mboka taa ende muugoya womadhiladhilo gawo.
18 Omadhiladhilo gawo oga sa komilema. Kalunga ite ya pe omwenyo, oshoka kaye na oondunge noyi ikukutika.
19 Oyo ihaa si ohoni. Otaa iyethele yo yene moonyata dhuulunde kaaye na eidhiliko noyaa na nando onge.
20 Ihe ne inamu longwa okutseya Kristus pamukalo gwa tya ngaaka.
21 Ondi inekela, omwe mu uvu, naasho mu li aalanduli ye, omwa longwa oshili ndjoka yi li muJesus.
22 Ano ihuleni omuntu gweni omukulu ngoka mwe mu landula nale, ngoka hi iyono po ye mwene mokwiifundjaleka nuuhalu we.
23 Omitima dheni nomadhiladhilo geni naga shituluke lela, ga ninge omape.
24 Zaleni omuntu omupe ngoka a shitwa a fa Kalunga nohi iholola ye mwene mokukalamwenyo ku uka nokwa yapuka.
25 Onkee ano etheni iifundja. Ihe kehe gumwe na lombwele mukwawo oshili, oshoka tse atuhe iilyo yolutu lwaKristus.
26 Ngele tamu geye, inamu etha ondjahi yeni yi mu fale sigo omokuyona; inamu kala mwa geya esiku alihe.
27 Inamu pa omuhindadhi ompito, e mu sinde.
28 Omufuthi na ethe po okuyaka kwe, ye a tameke okwiilongela sha pamukalo omwaanawa, ye a vule ihe okukala e na sha okukwatha oohepele.
29 Inamu popya oohapu oombwinayi. Popyeni ashike oohapu ndhoka oombwanawa tadhi tungu nodha pumbiwa, opo aapulakeni yeni ye dhi hokwe.
30 Ombepo Ondjapuki yaKalunga inamu yi nikitha uuthigwa, oshoka oyo oshihako shaKalunga shoku mu ndhindhilika kutya mwa ningi aantu ye, okapilo koku mu tsa omukumo kutya esiku otali ke ya, uuna ndoka Kalunga te ke mu mangulula.
31 Etheni ano uululu auhe, ondjahi nonkone, omakudhilo nenge omatukano, uuwinayi kehe nau mu kale kokule.
32 Ihe kalathaneni mu na uukuume nolukeno. Silathaneni ohenda nokudhiminathana po oondjo, ngashika naanaa Kalunga e mu dhimine po oondjo dheni molwaKristus.
1 Kambadhaleni ano okuholela Kalunga, oshoka one oyana aaholike.
2 Okukalamwenyo kweni naku kale taku pangelwa kohole, ngashika Kristus a li e tu hole e ta gandja omwenyo gwe omolwetu, gu ninge eyambo lya nika nawa nolyo opalela Kalunga.
3 One aantu yaKalunga, onkee itashi vulika, mokati keni tamu uvika oluhondelo niilonga ya nyata yoludhi kehe nolwiho.
4 Osho wo inashi opala, ngele ne otamu popi oohapu tadhi sitha ohoni, omategu guugoya nenge oohapu dha nyata, shila omahambelelo okuhambelela Kalunga.
5 Ndhindhilikeni ihe nawa oshinima shika: kape na ando omuhondeli nenge omuntu kehe e li muulunde nenge omunalwiho, oshoka olwiho olwo okusimaneka iimenka, ta ka kala e na oshitopolwa mOshilongo shaKristus noshaKalunga.
6 Inamu etha, mu pukithwe nando okomuntu gumwe noohapu dhuugoya, oshoka omolwiinima ya tya ngaaka, ondjahi yaKalunga otayi ka adha aantu mboka ihaa vulika kuye.
7 Ano inamu kala mu na ekwatathano naantu ya tya ngaaka.
8 Nale omwa li aantu yomomilema, ihe ngashingeyi sho mwa ningi aantu yOmuwa, one omu li muuyelele. Onkee ano kaleni ngashika aantu yomuuyelele.
9 Oshoka uuyelele owo otau eta eteyo olindji ngashika uuwanawa, uuyuuki noshili.
10 Kambadhaleni okwiilonga okutseya shoka sho opalela Omuwa.
11 Inamu kala mu na ekwatathano naantu mboka haa longo iilonga yaa fele yomomilema. Ihe hololeni iinima ya tya ngaaka puuyelele.
12 Oshoka okutumbula iinima mbyoka haa ningi meholamo, osho ohoni yowala.
13 Ihe uuna iinima ayihe tayi ka hololwa puuyelele, nena uukwatya wayo otau ka kala puuyelele.
14 Oshoka shaa shoka sha hololwa puuyelele, otashi kala sha yela. Onkee ano otaku tiwa: “Penduka, ngoye ngoka wa kotha, za mo meso! Kristus note ku minikile.”
15 Ikonakoneni ano nawa, nkene mu na okukala. Inamu kala ngashika omagoya, kaleni ngaashi aanandunge.
16 Longitheni nawa ethimbo kehe mu li na, oshoka omasiku ngaka omawinayi.
17 Inamu kala ano omagoya, ihe kambadhaleni okukonakona kutya Omuwa okwa hala, mu ninge shike.
18 Inamu kolwa komaviinu, oshoka uunkolwi otau mu etele oshiponga, ihe udheni Ombepo Ondjapuki.
19 Hokololelathaneni oohapu dhomapisalomi, omaimbilo noondjimbo oondjapuki dhopambepo. Imbileni Omuwa omaimbilo nomapisalomi, mu simanekeni momitima dheni.
20 Hambeleleni aluhe Kalunga Tate molwaayihe medhina lyOmuwa gwetu Jesus Kristus.
21 Ilongeni evuliko mokati keni omolwetilo lyeni okutila Kristus.
22 Aakiintu, vulikeni kaalumentu yeni, ngaashi hamu vulika kOmuwa.
23 Oshoka omulumentu oku na epitikilo okupangela omukiintu gwe, naanaa ngashika Kristus e na epitikilo okupangela egongalo lye. Nokuli Kristus ye mwene oye Omuhupithi gwegongalo lye, nokutya olutu lwe.
24 Osho ngeyi aakiintu oye na okuvulika kaalumentu yawo miinima ayihe pamukalo naanaa ngoka egongalo tali vulika kuKristus.
25 Aalumentu, holeni aakiintu yeni, naanaa ngashika Kristus e hole egongalo lye nokwi igandja meso omolwalyo.
26 Oye okwe shi ningi, opo a yoololele Kalunga egongalo nohapu ye, nge e li yelitha noku li yoga momeya,
27 opo i iyetele po egongalo lyo opala, lya yogoka, lya yelithwa, lyaa na ontongo nenge egonyoto nenge onyata ya sha.
28 Ano aalumentu oye na okuhola aakiintu yawo, naanaa ngashika ye hole omalutu gawo yene.
29 Oshoka kaku na nando omuntu e tonde olutu lwe mwene, ihe kehe gumwe ohe lu palutha nohe lu sile oshimpwiyu, naanaa ngashika Kristus ha sile egongalo lye oshimpwiyu;
30 oshoka tse iilyo yolutu lwe, yegongalo lye.
31 Ngashika enyolo tali ti: “Onkee ano omulumentu oku na okuthiga po he nayina e ti ihanganitha nomukiintu gwe, ayehe yaali notaa ningi omuntu gumwe.”
32 Oshiholekwa shika sha hololwa menyolo ndika, osho oshinene. Ngame ondi uvite ko kutya otashi ulike Kristus negongalo lye.
33 Ihe otashi ulike wo kutya omulumentu kehe oku na okuhola omukiintu gwe, ngashika i ihole ye mwene, nomukiintu kehe oku na okusimaneka omulumentu gwe.
1 Aanona, vulikeni kaakuluntu yeni. Shika osho oshinakugwanithwa sheni shopakriste, onkee ano osho oshu uka, mu shi ninge.
2 “Simaneka ho nanyoko.” Shika osho oshipango shotango, shoka kusho kwa gwedhwa euvaneko:
3 “Opo u kale u na okukalamwenyo okuwanawa, ngoye u kale u na omwenyo ethimbo ele kombanda yevi.”
4 Aakuluntu, inamu hinda aana yeni noku ya geyitha, ihe ya putudheni ne mu ya kumagidhe paukriste.
5 Aapika, vulikeni kooyene yeni yomuuyuni nokutila nokukakama. Ihe shi ningeni nomwenyo aguhe, ongaashi tamu longele Kristus.
6 Shika inamu shi ninga ashike uuna ndoka ye mu wete, mu hokiwe ando kuyo, ihe longeni nomwenyo aguhe shoka sha hokiwa kuKalunga ngashika aamati yaKristus.
7 Longeni iilonga yeni nenyanyu ongaamboka tamu longele Omuwa mwene, hamuntu ashike.
8 Dhimbulukweni, kutya Omuwa ota ka futa omuntu kehe ngoka ta longo uuwanawa, na kale omupika nenge omuvalwa.
9 Ooyene, kaleni nawa naapika yeni. Etheni okulongitha omatilitho. Dhimbulukweni, kutya ne amuhe omu na Omuwa gumwe awike megulu, ngoka ta ningile aantu ayehe shi thike pamwe.
10 Hugunina, ikoleleleni mOmuwa, mu mone omomukumo moonkondo dhe oonene.
11 Ihomatekeni iikondjitho ayihe mbyoka Kalunga te yi mu pe, opo mu vule okukandeka omakotokelo omawinayi gomuhindadhi.
12 Oshoka tse itatu kondjitha aantu, ihe otatu kondjitha oonkondo dhomombepo, aanankondo yuuyuni mbuka womilema nosho wo oonkondo dhuuwinayi mewangandjo.
13 Onkee ano ngashingeyi ihomatekeni iikondjitho ayihe mbyoka Kalunga te yi mu pe. Omasiku omawinayi ngele tage ya, nena otamu ka vula okwiipopila komahomono gomukondjithi gweni nokukala omuthika, ngele mwa kondjo sigo okehulilo.
14 Kaleni ano omuthika mwi ilongekidha; zaleni oshili, yi ninge epaya moombunda dheni. Izalekeni uuyuuki, u ninge ehuuyanza poontulo dheni.
15 Kaleni mwi ilongekidha okuuvitha elaka etoye lyombili, li kale oongaku dhokoompadhi dheni.
16 Ethimbo alihe zaleni eitaalo ongehuuyanza, opo mu wape okudhima nalyo iikuti ayihe ya hwama omulilo mbyoka tayi umbwa kuMwiinayi.
17 Taambeni ehupitho, li ninge ongegala lyosheela, noohapu dhaKalunga ongegongamwele, ndyoka Ombepo te li mu pe.
18 Mbika ayihe yi longeni negalikano okwiindila ekwatho lyaKalunga. Galikaneni aluhe, Ombepo ngaashi te mu wilike. Onkee ano kaleni mwa tonata ne inamu teka omukumo. Galikaneneni aantu yaKalunga ayehe.
19 Galikanenii ndje wo, opo Kalunga a pe ndje oohapu ndhoka ndi na oku popya pethimbo ndyoka, opo ndi popye nuulaadhi oshiholekwa shika shevaangeli.
20 Oshoka ngame omutumwa omolwevaangeli, nonando ngashingeyi ondi li mondholongo. Onkee ano galikaneni, opo mokuuvitha kwandje ndi popye nuulaadhi, ngaashi ndi na oku shi ninga.
21 Tikikus, omumwameme omuholike nomuyakuli omwiinekelwa moshilonga shOmuwa, ote mu hokololele iinima ayihe kombinga yandje, opo mu tseye, nkene ndi li po.
22 Onkee ngame otandi mu tumu kune, e mu hokololele, nkene tu li po, ye e mu tse omukumo.
23 Kalunga Tate nOmuwa Jesus Kristus na gandje ombili nohole neitaalo kaamwameme ayehe.
24 Esilohenda lyaKalunga nali kale naayehe mboka ye hole Omuwa gwetu Jesus Kristus, yo naa pewe ohole yaa na ehulilo.