1 Ontumwafo ndjika oya zi kuPaulus, ngoka eithano lye okuninga omuyapostoli inaali za komuntu nenge komadhiladhilo gomuntu, ihe olya zi kuJesus Kristus nokuKalunga He, ngoka e mu yumudha kuusi.
2 Aamwameme ayehe mboka ye li mpaka pungame, otaa kundile po omagongalo agehe gomuGalatia.
3 Silweni ohenda, ne mu kale mu na ombili yaKalunga Tate noyOmuwa Jesus Kristus.
4 Kristus ngoka i igandja ye mwene omolwoondjo dhetu, opo e tu hupithe mo methimbo ndika ewinayi, sho a vulika kehalo lyaTate Kalunga.
5 Kalunga na simanekwe aluhe sigo aluhe! Amen.
6 Ngame onde mu kuminwa. One omwa pilamene nziyanziya Kalunga, ngoka e mu ithana molwesilohenda lyaKristus, nomwa gama kevaangeli lilwe.
7 Sho shene kaku na evaangeli lilwe, ihe otandi shi ti, oshoka ope na aantu yamwe mboka taye mu piyaganeke notaa kambadhala okupilika evaangeli lyaKristus.
8 Ihe nonando otse nenge omuyengeli a ze megulu, te mu uvithile evaangeli lilwe lyaa shi ndyoka twe li mu uvithile, na pangulilwe moheli.
9 Shoka twa popi nale, ngame otandi shi popi ishewe ngashingeyi: Ngele ope na ngoka te mu uvithile evaangeli lyaa shi ndyoka mwe li taamba, oye na pangulilwe moheli.
10 Shika itashi uvika ko ando sha fa ongaangoka tandi kambadhala okwoopalela aantu? Aawe! Ngame onda hala okwoopalela Kalunga. Natango otandi kambadhala okukala nda hokiwa kaantu? Ngele nani otandi kambadhala okuninga ngaaka, nena kandi shi we omumati gwaKristus.
11 Aamwameme, nandi mu hokololele oshinima shika kutya evaangeli ndyoka tandi uvitha, inali totwa komuntu.
12 Ngame inandi li pewa nando okomuntu gwontumba, nongaashi kape na nando ogumwe ngoka e li longo ndje, ihe oJesus Kristus ye mwene e li hololele ndje.
13 Ne omwa hokololelwa okukala kwandje kwonale, nkene nda li ependa meitaalo lyopaShijuda nonda tidhagana egongalo lyaKalunga ndaa na ohenda nonda ningi ashihe shoka tandi vulu oku li hanagula po.
14 Ngame onda li ependa ndi vule Aajuda ooyakwetu oyendji yepipi lyandje mokukala meitaalo lyopaShijuda. Onda li wo ependa mokudhiginina omithigululwakalo dhootate.
15 Ihe nando ongaaka, Kalunga okwa hogolola ndje molwesilohenda lye, manga inaandi valwa, nokwi ithana ndje, ndi mu longele.
16 Oye okwa tokola okuhololela ndje Omwana, opo ndi uvithile aapagani elaka etoye tali popi Omwana. Onkee ngame inandi ya nando okomuntu gumwegumwe oku mu pula omayele.
17 Osho wo inandi ya kuJerusalem kumboka ya ningi tango aayapostoli kungame. Ihe onda yi mbalambala kuArabia nonda galukile ishewe kuDamaskus.
18 Oomvula ndatu sho dha piti po, onda yi ihe kuJerusalem okumona oowino kuPetrus nonda kala puye uule wiiwike iyali.
19 Ngame inandi mona nando omuyapostoli mukwawo gulwe, kakele kaJakob, ngoka omumwayina gwOmuwa.
20 Shoka tandi mu nyolele, oshoshili. Otandi popi ndi li koshipala shaKalunga, ite fundju.
21 Konima onda yi komikunda dhomuSiria nodhomuKilikia.
22 Ethimbo ndika alihe aakriste ayehe yomomagongalo gomuJudea oya li inaa tseya oshipala shandje.
23 Oyo yu uvu ashike shono tashi hokololwa kaantu yalwe kutya omulumentu ngoka a li he tu hepeke shito, ngashingeyi otu uvitha eitaalo ndyoka a li a hala okuhanagula po.
24 Oyo noya hambelele Kalunga omolwandje.
1 Oomvula omulongo nane sho dha piti po, onda shuna kuJerusalem pamwe naBarnabas. Titus naye wo okwa yi pamwe natse.
2 Ngame onda yi, oshoka onda lombwelwa kuKalunga, ndi ye ko. Otwa gongala moshigongi pamwe naawiliki yawo, nonde ya hokololele elaka lyevaangeli ndyoka tandi uvithile aapagani. Ngame inandi hala iilonga mbyoka nda longo nale nenge mbyoka tandi longo ngashingeyi, yi ninge yosima.
3 Nokuli nomuthindikili gwandje Titus nando okwa li Omugreka, ina thiminikwa nando okuli okwiifukalekitha.
4 Ihe aalumentu yamwe mboka yi iningi ya fa aakriste, oyi iyakele mokati ketu, noya li ya hala oku mu fukaleka. Aantu mbaka oyi iyakele mokati ketu, opo ya ndaadhe emanguluko lyetu ndyoka tu na muukumwe wetu naKristus Jesus. Oyo oya li ya hala oku tu tsika ondjoko yuupika.
5 Tse inatu ya zimina nando okashona, oshili yomevaangeli opo yi kale puuyelele mokati keni.
6 Ihe mbeyaka oohashikeshalye otandi shi ti, inaa etela ndje nando iimpwiyu iipe. Kungame kashi na mbudhi kutya aantu ya tya ngaaka oyo oolye. Oshoka Kalunga iha pangula pakutala ondjelo yomuntu.
7 Oyo oya dhimbulula kutya Kalunga okwa pe ndje oshilonga shokuuvitha mokati kaapagani, naanaa ngashika a pe Petrus oshilonga shokuuvitha evaangeli mokati kAajuda.
8 Oshoka koonkondo dhaKalunga ngame onda ningi omuyapostoli mokati kaapagani, naanaa ngaashi Petrus a ningi omuyapostoli mokati kAajuda.
9 Nena Jakob, Petrus naJohannes, mboka ya talika kutya oyo aawiliki, oya dhimbulula wo kutya Kalunga oye a pe ndje oshilonga shika. Onkee ano oye tu laleke mombepo yuukumwe tse naBarnabas, tu ka longe mokati kaapagani, manga yo taa longo mokati kAajuda.
10 Shoka ashike ye tu indile, tu ninge, osho okudhimbulukwa oohepele dhomokati kawo, naashika onda kambadhala olwindji oku shi ninga.
11 Ihe Petrus sho e ya kuAntiokia, onde mu ganda montaneho yaayehe, oshoka okwa li a pukalela.
12 Oshoka manga aalumentu yamwe mboka ya li ya tumwa kuJakob, ya adhika inaaye ya, Petrus okwa li ha li naamwameme aalumentu yomaapagani. Ihe aalumentu mboka sho ye ya, Petrus okwi iyoolola mo maamwameme mboka yomaapagani, ye ina hala we okulya pamwe nayo. Oshoka okwa li a tila aalumentu mboka ya kala haa ti kutya aakriste mboka taa zi maapagani, naa fukalekwe.
13 Aajuda ooyakwawo aakriste nayo wo oye mu holele, sigo naBarnabas a pukithwa kuufudhime wawo.
14 Ano ngame sho nda mono kutya omikalo dhawo itadhi tsu we kumwe noshili yevaangeli, onda lombwele Petrus montaneho yawo ayehe nda ti: “Ngoye Omujuda, ihe ku li ngaashi Omujuda, ou na omikalo dha fa dhaapagani. Oto vulu tuu okuthiminika aapagani, ya kale ngaashi Aajuda?”
15 Eeno oshoshili, otse Aajuda kevalo, katu shi aalunde aapagani.
16 Otu shi shi kutya omuntu ota ningi omuyuuki koshipala shaKalunga keitaalo okwiitaala Jesus Kristus, hamolwokugwanitha shoka tashi pulwa kompango. Onkee ano natse wo otwi itaala Jesus Kristus, opo tu ninge aayuuki omolweitaalo, hamolwokugwanitha shoka tashi pulwa kompango. Oshoka kape na nando omuntu ta ningi omuyuuki koshipala shaKalunga omolwokugwanitha shoka tashi pulwa kompango.
17 Ngele ano tse mboka tatu lalakanene uuyuuki molwaKristus, tatu monika kutya otse aalunde, ngaashi naanaa aapagani ye li, nena shono otashi ti ando kutya Kristus oye omuyakuli guulunde? Itashi vulika!
18 Oshoka ngele otandi tameke okutungulula shoka nda li nda kumuna po nale, nena otandi holola kutya ongame omuyoni gwompango.
19 Mokupopya ompango ngame onda sa, nda dhipagwa kompango, opo ndi kalele Kalunga ndi na omwenyo. Ngame onda si pamwe naKristus komushigakano,
20 opo ndaa kale we ndi na omwenyo mungame mwene, ihe Kristus oye a kale e na omwenyo mungame. Ano manga ndi na omwenyo muuyuni mbuka, otandi kala ndi itaala Omuna gwaKalunga, ngoka e hole ndje nokwa gandja omwenyo gwe molwandje.
21 Onkee ano itandi ekelehi esilohenda lyaKalunga. Oshoka ngele omuntu ota ningwa omuyuuki molwompango, nena okusa kwaKristus inaku kwatha sha.
1 Aagalati ne, one aagoya! Olye e mu pilaaleke? One tuu mboka mu na efano lyokusa kwaJesus Kristus komushigakano lya anekwa komeho geni!
2 Lombwelii ndje oshinima shika: Omwa pewa Ombepo yaKalunga molwokugwanitha shoka tashi pulwa kompango nenge omolwokuuva nokwiitaala evaangeli?
3 One aagoya ngiini? One omwa tameke mewiliko lyOmbepo yaKalunga. Ngashingeyi omwa hala okuhulithila moonkondo dheni yene?
4 Inamu pyokoka nando miinima mbika ayihe? Ndishi yo inayi kala ayihe osima.
5 Kalunga sho te mu pe Ombepo nota longo iikumithalonga mokati keni, ote shi ningi molwaasho mwa gwanitha shoka tashi pulwa kompango nenge omolwaasho mu uvu nomwi itaale evaangeli?
6 Oshinima oshi li naanaa, ngashika enyolo tali popi kombinga yaAbraham: “Abraham okwi itaale Kalunga, nomolweitaalo lye Kalunga okwe mu tala ihe omuyuuki.”
7 Dhimbulukweni ano kutya aantu mboka yi itaala, oyo aana yaAbraham.
8 Enyolo olye shi mono nale kutya Kalunga ota ka ninga aapagani aayuuki omolweitaalo. Onkee ano enyolo olya tseyithile Abraham elaka etoye manga kuyele tali ti: “Molwoye Kalunga ota ka yambeka aantu ayehe yokombanda yevi.”
9 Abraham okwa li i itaala e ta yambekwa. Osho wo ayehe mboka yi itaala, otaa ka yambekwa ngashika Abraham.
10 Oomboka taa kambadhala okugwanitha ompango, oyo oya thingwa. Oshoka enyolo otali ti: “Shaa ngoka itaa gwanitha ashihe shoka sha nyolelwa membo lyompango, oye okwa thingwa.”
11 Ano osha yela kutya kaku na omuntu ta ningi omuyuuki koshipala shaKalunga molwokugwanitha ompango. Enyolo otali ti: “Omuntu ngoka a ningi omuyuuki koshipala shaKalunga, ota kala e na omwenyo molweitaalo.”
12 Ihe ompango inayi ikwatelela keitaalo, ihe oshinima oshi li ngashika enyolo tali ti: “Omuntu ngoka ta gwanitha ashihe shoka tashi pulwa kompango, oye ota kala e na omwenyo molwayo.”
13 Kristus sho a thingwa omolwetu, okwe tu mangulula mo methingo ndyoka ompango ye li tu etele. Oshoka enyolo otali ti: “Kehe ngoka te endjelelekwa komuti, oye okwa thingwa.”
14 Kristus okwe shi ningi, opo eyambeko Kalunga e li uvanekele Abraham, li ninge lyaapagani wo omolwaJesus Kristus, opo natse molweitaalo tu taambe Ombepo ndjoka twe yi uvanekelwa kuKalunga.
15 Aamwameme, otandi longitha oshiholelwa shoshinima shoka hashi monika mokukalamwenyo kwaantu. Euvathano lyaantu yaali ngele olya kolekwa paveta, kape na ngoka ta vulu oku li teya nenge okugwedhela ko sha.
16 Kalunga oku uvanekele Abraham noluvalo lwe euvaneko, ndyoka inaali tya “nomaluvalo” ge, kokutya ando aantu oyendji, ihe olya ti “nokoluvalo” lwoye, tashi ti omuntu gumwe awike, nomuntu ngoka oKristus.
17 Onda hala okutya: Kalunga okwa dhike ehangano noku uvaneke oku li dhiginina. Ompango ndjoka ye ya konima yoomvula omathele gane nomilongo ndatu, itayi vulu okuteya po ehangano ndyoka nokuhulitha po euvaneko lyaKalunga.
18 Oshoka ngele shoka Kalunga te shi gandja, oshi ikwatelela kompango, nena inashi ikwatelela we keuvaneko lye. Onkee ano Kalunga okwa pe Abraham shoka e mu uvanekela.
19 Ompango oya gandjelwa shike ano? Oya gwedhwa po, opo yi ulukile aantu kutya uulunde oshike, noya li ya dhiladhilwa yi kale po, sigo omuna gwaAbraham, ngoka a pewa euvaneko, te ya. Ompango oya gandjwa ya pitile maayengeli noya pewa omuntu, a ninge omuyakuli gwopokati kaKalunga naantu.
20 Ihe omuyakuli ita pumbiwa, uuna pe na ashike omuntu gumwe, naKalunga oye gumwe awike
21 Nani ompango oya tsa ondumbo nomauvaneko gaKalunga? Aawe, itashi vulika! Oshoka ando okwa gandjelwe ompango ndjoka yi na oonkondo okupa aantu omwenyo, nena ando omuntu ota vulu okuninga omuyuuki koshipala shaKalunga omolwompango.
22 Ihe enyolo otali ti kutya uuyuni auhe ou li kohi yoonkondo dhuulunde, opo mboka yi itaala, ya pewe eyambeko ndyoka lyu uvanekwa, sho yi itaala Jesus Kristus.
23 Ihe manga ethimbo lyeitaalo lya li inaali ya, tse otwa li twe edhililwa mondholongo kompango ongoonkwatwa, sigo eitaalo lya hololwa.
24 Osho ngeyi ompango oya kala omuputudhi gwetu, sigo Kristus e ya, opo tu ningwe aayuuki koshipala shaKalunga omolweitaalo.
25 Onkee ano ngashingeyi sho tu na ethimbo lyeitaalo, otse katu li we melelo lyomuputudhi.
26 One amuhe aana yaKalunga muukumwe naKristus Jesus omolweitaalo.
27 Oshoka sho mwa shashwa, omwa yi muukumwe naJesus Kristus nomwa zala uukwatya waKristus mwene.
28 Onkee ano kape na we eyooloko pokati kOmujuda nomupagani, komupika nomuvalwa, komulumentu nomukiintu, ihe ne amuhe gumwe muukumwe naJesus Kristus.
29 One ngele oyaKristus, nena one aana yaAbraham notamu ka pewa shoka Kalunga e shi uvaneka.
1 Ihe ngame otandi ti: Omuvalwa manga omunona, ina yooloka nomupika, nonando na kale oye mwene guuthiga auhe wahe.
2 Manga e li omushona, ohapu kala aantu mboka taye mu sile oshimpwiyu notaa tonatele iinima ye sigo ethimbo ndyoka lyu uthwa kuhe.
3 Pamukalo nguka natse wo manga twa li aanona, otwa li twa pikwa koombepo dhomewangandjo sigo esiku ndyoka twa adha uukuluntu.
4 Ihe ethimbo lyo opala sho lya thikana, Kalunga okwa tumu Omwana. Oye okwa valwa komukiintu nokwa kala kohi yompango yAajuda,
5 a vule okumangulula mboka ya kala kohi yompango, opo tse tu ninge aana yaKalunga.
6 Kalunga opo u ulike kutya otse oyana, okwe tu pe Ombepo yOmwana moomwenyo dhetu, Ombepo ndjoka tayi igidha: “Tate, Tate!”
7 Onkee ano kamu shi we aapika, ihe aavalwa. Onkee molwaashoka one oyana, nena Kalunga ote ke mu pa ashihe shoka e shi nine aathigululi ye.
8 Nale omwa li inaamu tseya Kalunga, onkee omwa li mwa pikwa kiikalunga kaayi shi ookalunga muukwatya wayo.
9 Ihe ngashingeyi sho mwa tseya Kalunga, nenge ndi tye, ngashingeyi sho mwa tseyika kuKalunga, otamu vulu ngiini okwiigameka ishewe koombepo ndhoka tadhi pangele mewangandjo nodhaa na oshilonga? Omolwashike mwa hala ishewe okuninga aapika yadho?
10 One ohamu yoolola omasiku gontumba, oomwedhi, omathimbo gomumvo nomimvo.
11 Onda tila omolweni. Iilonga yandje ayihe mokati keni oya ningi osima yowala?
12 Aamwameme, otandi mu indile, ituleni pehala lyandje, ngashika nangame wo tandi itula pehala lyeni. Ne inamu ningila ndje uuwinayi nando owasha.
13 Ne otamu dhimbulukwa kutya omoluunkundi wandje wokolutu onde mu uvithile tango evaangeli.
14 Ihe ne inamu dhina ndje noinamu huga ndje, nonando onkalo yolutu lwandje oya li eyeleko enene kune. Ihe omwa taamba ndje, ngashika tamu taamba omuyengeli gwaKalunga nenge Jesus Kristus mwene nokuli.
15 One omwa li mwa nyanyukwa unene. Oshike ano sha ningwa po? Ngame mwene otandi vulu oku shi mu lombwela kutya ando sha li tashi vulika, ando omwa kolola mo omeho geni e tamu ga pe ndje.
16 Ano ngashingeyi onda ningi omutondi gweni, sho nde mu hokololele oshili?
17 Aantu yamwe mboka oya hwama unene omolweni, ihe elalakano lyawo kali shi ewanawa. Oyo oya hala oku mu tokola ko kungame, opo mu ya ningile ngaashi yo ye mu ningile.
18 Aluhe osho opala okuhwamena oshinima oshiwanawa, hauna ndoka ashike ndi li pune.
19 Aamwameme aaholike, ngashika naanaa omukiintu e li muuwehame wokuvala, osho wo nangame ndi uvite uuwehame omolweni, sigo ondjelo yaKristus ya tungwa mune.
20 Onda halele ando ondi li pune ngashingeyi, opo ndi popye nane newi li ili. Ondi li po ndu uvite uudhigu omolweni.
21 Lombwelii ndje ano, ne mboka mwa hala okukala kohi yompango: Inamu uva nani ompango shoka tayi ti?
22 Ompango otayi ti kutya Abraham okwa li e na oyana aamati yaali, gumwe omuna gwomudhike nomukwawo omuna gwomuhokanwa.
23 Omuna gwomudhike okwa li a valwa pamukalo gwopanshitwe, ihe omuna gwomuhokanwa omolwoonkondo dheuvaneko lyaKalunga.
24 Ehokololo ndika olyo eyele. Aakiintu mbaka yaali oyo omahangano gaali. Ehangano limwe oondyoka lyokondundu yaSinai hali vala aapika, olyo Hagar.
25 Oshoka Hagar oye ondundu yaSinai yi li muArabia. Oye efano lyoshilando shaJerusalem shopethimbo ndika, shoka shi li muupika pamwe naantu yamo ayehe.
26 Ihe Jerusalem shomegulu osho omukiintu omuhokanwa, meme yetu.
27 Oshoka enyolo otali ti: “Nyanyukwa, ngoye nguka ihoo vala! Ligola nokwiigidha pombanda, ngoye nguka inoo thetwa nando olumwe! Oshoka omukiintu ngoka e ethiwa ota ka kala e na aanona oyendji ye vule yaangoka e na omulumentu.”
28 Aamwameme, nane wo aana yaKalunga omolweuvaneko lye, ngashika naanaa Isak a li.
29 Pomasiku ngeyaka omunona ngoka a valwa pamukalo gwopanshitwe, okwa tidhagana mukwawo ngoka a valwa koonkondo dhOmbepo yaKalunga. Osho shi li po nonena.
30 Ihe enyolo otali ti ngiini? Otali ti: “Laleka omudhike nomwana, oshoka omuna gwomudhike ita vulu okutopola uuthiga nomuna gwomuhokanwa.”
31 Onkee ano, aamwameme, tse katu shi aana yomudhike, ihe otse aana yomuhokanwa.
1 Kristus okwe tu mangulula, opo tu kale twa manguluka. Ikoleleni ano, oshoka omwa manguluka, ne inamu zimina we, mu ninge aapika.
2 Pulakeneni! Ongame Paulus tandi mu lombwele kutya one ngele otamu zimine, mu fukalekwe, nena otashi ti Kristus ke na shoka te mu kwatha.
3 Onda hala oku shi tumbula natango nomuthindo kutya kehe ngoka ta zimine a fukalekwe, oye oku na okugwanitha ompango ayihe.
4 Ne mboka mwa hala okuninga aayuuki koshipala shaKalunga omolwokugwanitha ompango, omwi ikutha mo ne yene muKristus. One omwa gwa mo mesilohenda lyaKalunga.
5 Ihe tse etegameno lyetu olyo ndika kutya Kalunga ote ke tu ninga aayuuki, onkee otatu shi tegelele meitaalo koonkondo dhOmbepo yaKalunga.
6 Oshoka tse ngele otu li muukumwe naKristus Jesus, nena okukala wa fukalekwa nenge inoo fukalekwa, ayihe mbika itayi kwatha sha. Ihe shoka tashi kwatha, osho eitaalo ndyoka tali holoka mohole.
7 One omwa li hamu matuka nawa, mu sindane. Olye e mu ethitha okuvulika koshili? Oye okwe mu hongolola nashike?
8 Ehongololo ndyoka inali za kuKalunga, ngoka te mu ithana.
9 Okafulika okashona otaka tumbike ondombo ayihe.
10 Ihe omoluukumwe wetu nOmuwa ngame onde mu inekela kutya ne itamu ka taamba edhiladhilo lilwe. Omuntu ngoka te mu piyaganeke, ota ka geelwa kuKalunga, na kale oye lye.
11 Ihe ngame, aamwameme, omolwashike ando tandi tidhaganwa natango, ngele tandi uvitha kutya efukaleko olya pumbiwa? Shika ngele oshoshili, nena ando euvitho lyandje kombinga yomushigakano gwaKristus itali eta we uudhigu.
12 Ando aalumentu mboka taye mu piyaganeke, yi ithonithe nokuli!
13 Ne aamwameme, omwi ithanwa, mu kale mwa manguluka. Ihe inamu etha, emanguluko ndika lyeni li ninge ompito yuuhalu wopantu, ihe yakulathaneni nohole.
14 Oshoka ompango ayihe oya kwatelelwa moshipango shika shimwe: “Hola mukweni, ngaashi wi ihole ngoye mwene.”
15 Ihe ngele tamu kala ngaashi iilikama, tamu lyaathana ne tamu etelathana iiponga, kotokeni ano, opo mwaa manathane po.
16 Ngame otandi mu lombwele tandi ti: Kaleni tamu endithwa kOmbepo mokukalamwenyo kweni akuhe. Nena itamu ka gwanitha we uuhalu wopantu.
17 Oshoka uuhalu wetu wopantu itau tsu kumwe naashoka Ombepo e shi hala. Naashoka sha halika kOmbepo, itashi tsu kumwe nuuhalu wopantu. Iinima mbika iyali ohayi kala aluhe tayi kondjithathana, onkee itamu vulu okulonga pahalo lyeni yene.
18 Ihe one ngele tamu endithwa kOmbepo, nena itamu pangelwa we kompango.
19 Ihe iilonga yuuhalu wopantu oyi igalala. Aantu oye hole uuholume, iipala nuukeeneidhiliko,
20 otaa simaneke iimenka notaa longo muumpulile. Oyo otaa tondathana, otaa tamanana, otaa silathana efupa, otaa geelathana notaa kotokelathana. Oyo otaa topoka moongundu nomiimpaga.
21 Oye na uukodhi, uunkolwi nuufukedhi niinima iikwawo ya fa mbika. Otandi mu kumagidha natango, ngaashi nda li nde mu kumagidha nale: Aantu mboka taa longo iilonga ya tya ngeyi, itaa ka thigulula Oshilongo shaKalunga.
22 Ihe iiyimati yOmbepo oyo mbika: ohole, enyanyu, ombili, eidhidhimiko, uukuume, uuwanawa, okukala omwiinekelwa,
23 eifupipiko neikwatonawa. Kaku na nando ompango ya tsa ondumbo niinima mbika.
24 Naamboka yaJesus Kristus oya dhipaga okukala kwawo kwopantu nuuhalu auhe.
25 Ombepo otayi tu pe omwenyo, onkee oyo nayi kale tayi utha wo okukalamwenyo kwetu.
26 Inatu kaleni tu na uuntsa, tu hindathaneni nenge tu silathaneni efupa.
1 Aamwameme, ngele oku na ngoka ta gwile meyono lyontumba, nena aantu mboka yomokati keni yopambepo naye mu pukulule; ihe naye shi ninge nonge. Kala wa kotoka, opo nangoye wo waa hongololwe.
2 Kwathathaneni mokuhumbata omitenge. Osho ngeyi otamu gwanitha ompango yaKristus.
3 Ngele oku na ngoka ta dhiladhila kutya oye sha, nando ke shi sha, oti ifundjaleke.
4 Kehe gumwe na konakone ye mwene, iilonga ye nkene ya tya. Iilonga ye ngele iiwanawa, nena ota vulu okwiitangela shoka e shi longo, ihe ita vulu okuyelekanitha iilonga ye niilonga yamukwawo.
5 Oshoka kehe gumwe oku na okuhumbata ye mwene omutenge gwe.
6 Omuntu ngoka ta longwa oohapu dhaKalunga, oku na okutopola iinima ayihe iiwanawa mbyoka e yi na nomulongi gwe.
7 Inamu ifundjaleka, Kalunga iha nyekelwa. Oshoka shono omuntu te shi kunu, osho wo ta ka teya.
8 Ngele okwa kunu pauhalu we, nena eteyo olyo eso, ihe ngele okwa kunu mOmbepo, nena ota ka teya omwenyo gwaaluhe mOmbepo.
9 Ano inatu vulweni okulonga uuwanawa, oshoka ngele itatu seni uunye, nena ethimbo otali ke ya, uuna tatu ka teya iiyimati.
10 Onkee ano manga tu na ethimbo, natu ningileni kehe gumwe uuwanawa, ihe unene tuu mboka tu li nayo meitaalo limwe.
11 Taleni, nkene tandi mu nyolele noshikaha shandje mwene moondanda oonene.
12 Aantu ayehe mboka ya hala okwiisimanekela nokwiitangela iinima yi wetike, oyo wo mboka taa kambadhala oku mu thiminika, mu ifukalekithe. Oyo otaye shi ningi ashike, opo kaaya hepekelwe omushigakano gwaKristus.
13 Nokuli naamboka haa longitha efukaleko, nayo wo ihaa vulika kompango. Ihe oyo oya hala ashike, ne mu ifukalekithe, opo ya wape okwiitanga kutya oye mu vulikitha.
14 Ihe ngame kombinga yandje otandi itangele ashike omushigakano gwOmuwa gwetu Jesus Kristus. Oshoka mugwo uuyuni owa kwatunuka ko kungame, nangame onda kwatunuka ko kuwo.
15 Itashi kwatha nando osha okukala wa fukalekwa nenge inoo fukalekwa. Shoka ashike tashi kwatha, osho okuninga omushitwa omupe.
16 Ombili nohenda nayi kale naayehe mboka taa landula eutho ndika mokukalamwenyo kwawo, yo nayi kale naantu yaKalunga ayehe.
17 Inaku kala we nando oongoka te etele ndje uudhigu washa. Oshoka iiyadhi mbyoka ndi yi na kolutu lwandje, otayi ulike kutya ngame omupika gwaJesus.
18 Esilohenda lyOmuwa gwetu Jesus Kristus nali kale nane, aamwameme amuhe. Amen.