1 Ontumwafo ndjika oya zi kuPaulus, omuyapostoli gwaJesus Kristus pahalo lyaKalunga, nokomumwameme Timoteus. Oya nyolelwa kegongalo lyaKalunga li li muKorinto nokaantu yaKalunga ayehe ye li muGreka alihe.
2 Silweni ohenda, ne mu kale mu na ombili yaKalunga Tate noyOmuwa Jesus Kristus.
3 Kalunga, He yOmuwa gwetu Jesus Kristus, na hambelelwe! Oye Tate omunahenda, Kalunga, ngoka kuye haku zi ekwatho alihe.
4 Oye ngoka he tu kwatha muudhigu wetu auhe, opo tu vule wo okukwatha mboka ye li momaudhigu gi ili nogi ili. Ekwatho ndika olyo ndyoka, tse yene twa kwathwa nalyo kuKalunga.
5 Oshoka ngaashi naanaa tse tu na oshitopolwa momahepeko gaKristus, osho wo molwaKristus otu na oshitopolwa mekwatho lye enene.
6 Ngele tse otatu hepekwa, otashi ningwa molwekwatho nehupitho lyeni. Ngele otatu kwathwa, nena nane wo otamu kwathwa notamu pewa oonkondo dhokwiidhidhimikila omahepeko ngoka natse wo tu na.
7 Ano einekelo lyetu oku mu inekela inali lunduluka nando okashona. Otu shi shi kutya, ngaashi naanaa mu na oshitopolwa momahepeko getu, osho wo mu na oshitopolwa mekwatho ndyoka tatu pewa.
8 Oshoka otwa hala oku mu dhimbulutha uudhigu mboka twa li tu na muAsia. Omitenge ndhoka twa li twa tsikwa, odha li ominene nomidhigu, onkee otwa li twa kanitha etegameno alihe lyokukala nomwenyo.
9 Otwa li twa dhiladhila kutya otwa tokolelwa eso. Ihe shika osha ningwa, opo twaa kale twi inekela tse yene, ihe tu inekele owala Kalunga, ngoka ta yumudha aasi.
10 Ye okwe tu hupitha moshiponga oshinene shi thike mpoka sheso, note ke tu hupitha. Otwe mu inekela, oye ote ke tu hupitha natango,
11 ngaashi nane wo mwe tu kwatha nomagalikano geni. Omagalikano geni ngele ga yamukulwa, nena oyendji otaa ka hambelela Kalunga molwetu nomolwoshilonga shesilohenda lye kutse.
12 Oshinima shimwe tatu itangele, osho shika: Eiyuvo lyetu otali tu tseyithile nawa kutya muuyuni mbuka otwa kala twaa na iifundja niipwe, unene mekwatathano pokati ketu nane. Inatu wilikwa kuunongo wopantu, ihe okoonkondo dhesilohenda lyaKalunga.
13 Tse itatu mu nyolele ashike shoka tatu dhiladhila kutya otamu vulu oku shi lesha noku shi uva ko. Nonando ngashingeyi mu tu uvite ko ombinga, ondi inekela kutya komeho otamu ka uva ko nawalela
14 opo mesiku lyOmuwa Jesus otamu ka vula oku tu itangela, ngashika natse wo tatu ke shi mu ningila.
15 Mokwiinekela ayihe mbika onda li nda hala tango okuya kune, opo mu ka mone eyambeko lyetalelopo etiyali.
16 Oshoka onda li nda dhiladhila okupitila pune mokuya nomokugaluka kwandje kuMakedonia, opo mu ka thindikile ndje kuJudea.
17 Ano sho nda li nda hala okuninga ngeyi, onde shi ningi nelalakano lyuumbudhi? Onda ningi ando omatokolo, ndi mu fundje, ndi kale ndi na oohapu mbali: “eeno, eeno” na “aawe, aawe?”
18 Ihe Kalunga oye omunashili, onkee oohapu dhandje kune kadhi shi “Eeno” na “Aawe.”
19 Oshoka Jesus Kristus, Omuna gwaKalunga, ngoka u uvithwa mokati keni kuTimoteus naSilvanus nokungame mwene, ke shi ngoka e li “Eeno” na “Aawe,” ihe oye “Eeno” yaKalunga.
20 Oshoka oye tuu ngoka e li “Eeno” yomauvaneko agehe gaKalunga. Onkee ano ngele tatu simaneke Kalunga, ohatu tumbula “Amen” medhina lyaJesus Kristus.
21 Ihe Kalunga, ngoka te tu kolekele muKristus pamwe nane, oye ngoka wo e tu hogolola.
22 Okwe tu tula oshihako shoku tu ndhindhilika kutya tse aantu ye, nokwe tu pe Ombepo Ondjapuki, okapilo kaayihe mbyoka a hala oku tu pa.
23 Ngame otandi ithana Kalunga, a ninge onzapo yandje, oshoka okwa tseya omutima gwandje. Ngame onda gama kune, sho itaandi ya we kuKorinto.
24 Tse inatu hala oku mu thiminikila mushoka mu na okwiitaala, oshoka omwa kola meitaalo. Ihe otatu longo pamwe nane, oshoka otashi ke mu nyanyudha.
1 Ngashingeyi onda lundulula edhiladhilo lyandje moshinima shika: Itandi ya ko we kune, opo ndaaye mu nikithe oluhodhi.
2 Oshoka ngame ngele onde mu nikitha oluhodhi, olye we ta hupu ko, a nyanyudhe ndje, kee shi ne mboka nda nikitha oluhodhi?
3 Onkee ano tandi mu nyolele ontumwafo ndjika. Kanda li nda hala okuya kune, ndi nikithwe oluhodhi kaantu mboka ya li ye na okunyanyudha ndje. Oshoka ngame ondi inekela kutya uuna nda nyanyukwa, nena nane wo omwa nyanyukwa.
4 Otandi mu nyolele ndi na oluhodhi olunene nuuwehame momwenyo gwandje. Onda lili omahodhi ogendji, haku mu nikitha oluhodhi, ihe oku mu ulukila kutya ondi mu hole.
5 Ihe gumwe gwomune ngoka a nikitha mukwawo oluhodhi, hangame e shi ningile, ihe one amuhe. Nenge ndi tye oyendji yomune, oshoka inandi hala ndi mu ehameke.
6 Osha gwana omuntu ngoka, sho a geelwa koyendji yomune pamukalo ngoka.
7 Ngashingeyi omu na oku mu dhimina po noku mu hekeleka, opo kaa thindilwe pevi koluhodhi lwe e ti iyekelele.
8 Onkee ano otandi mu kumagidha, mu kale noku mu hola.
9 Oshoka sho nde mu nyolele ontumwafo ndjiyaka, onda li nda hala okutseya, nkene mwa sindi omamakelo nongele omwi ilongekidha aluhe okugwanitha omalombwelo gandje.
10 Nongele mwa dhimine po omuntu a tya ngaaka uuwinayi mboka e u ningi, nena nangame wo otandi mu dhimine po. Shono otandi shi ningi omolweni amuhe koshipala shaKristus, ngele ondi na sha shokudhimina po kombinga yandje,
11 Satana opo kaa mone oonkondo oku tu pangela, oshoka omakoto ge otu ga shi.
12 Ngame sho nda thiki muTroas okuuvitha elaka etoye tali hokolola Kristus, onda dhimbulula kutya Omuwa okwe egululile ndje osheelo, ndi longe mpeyaka.
13 Ihe onda li ndu uvite uudhigu, oshoka omumwameme Titus inandi mu adha ko. Onkee onda laleke aantu yaahoka e te yi kuMakedonia.
14 Ihe Kalunga na hambelelwe, oshoka ohe tu enditha aluhe mosheendo shaKristus shesindano! Ongaashi ezimba ewanawa tali taandele koombinga adhihe, osho Kalunga te tu longitha okutseyithila aantu ayehe Kristus.
15 Mokati kaamboka taa hupithwa nokaamboka ye li mondjila ndjoka yu uka mekano, otwa fa ezimba lyeyambo lya nika nawa, ndyoka Kristus te li yambele Kalunga.
16 Kwaamboka ye li mondjila ndjoka yu uka mekano, ezimba ndika otali ningi omuku tagu dhipaga, ihe mboka taa ka hupithwa, oyu uvite mulyo ezimba tali eta omwenyo. Olye ano ngoka a opalela oshilonga shika?
17 Tse inatu fa yalwe oyendji mboka haa halitha oohapu dhaKalunga ongoshinima shombiliha. Tse aamati yaKristus Kalunga e tu tumu, onkee otatu popi oohapu dha yela montaneho ye.
1 Otatu tameke ishewe okwiitanga? Pamwe otwa pumbwa, ngashika aantu yamwe, oontumwafo dhomaitumbaleko tadhi zi kutse nenge kune?
2 Ne omu li po ontumwafo yetu ya nyolelwa momitima dhetu, yi tseyike noyi leshwe kukehe gumwe.
3 Ontumwafo ndjika oya nyolwa kuKristus mwene nokwe yi tu pe, tu yi mu pe. Yo inayi nyolwa nohinga yo inaayi nyolelwa kiipelende yomamanya, ihe oya nyolelwa momitima dhaantu kOmbepo yaKalunga omunamwenyo.
4 Tse otatu popi oshinima shika, oshoka otwi inekela Kalunga molwaKristus.
5 Mutse kamu na nando osha shoka tashi vulu oku tu itangitha kutya otwa gwana okulonga oshilonga shika. Okuvula sha kwetu otaku zi kuKalunga.
6 Oshoka oye e tu ningi aayakuli yehangano epe ndyoka lyaa shi lyomompango ya nyolwa, ihe olyomOmbepo. Oshoka ompango ndjoka ya nyolwa otayi eta eso, ihe Ombepo otayi gandja omwenyo.
7 Uunyolo wompango owa li wa hokelwa miipelende yomamanya, neadhimo lyaKalunga olya li lya holoka pokugandjwa kwayo. Eadhimo ndika nando olya li tali ka dhimeya, uuyelele womoshipala shaMoses owa li owindji. Onkee Aaisraeli inaa vula okutongolola oshipala she. Ngele eyakulo lyompango, ndyoka lye eta eso, olya holoka li na eadhimo enene li thike mpoka,
8 nena uuwindji weadhimo ndyoka li li meyakulo tali wilikwa kOmbepo, otau kala u thike peni!
9 Oshoka ngele eyakulo ndyoka tali pangulile aantu meso, olya li li na eadhimo, ano eadhimo lyomeyakulo ndyoka tali mangulula aantu, otali kala li thike peni!
10 Eadhimo ndika li li po ngashingeyi, olyo enene shili li vule ndiyaka lyonale.
11 Oshoka ngele mushoka sha li sha kala owala okathimbo, omwa li mu na eadhimo, nena eadhimo ndyoka li li mushoka tashi kala aluhe, oli thike peni!
12 Ano sho tu na etegameno ndika, otatu popi nomukumo.
13 Tse inatu fa Moses, ngoka a li e na okusiikila oshipala she, opo Aaisraeli yaa wape okutala eadhimo nkene tali kana po.
14 Omadhiladhilo gawo oga li ga patwa. Osho ge li sigo onena ndjika, sho taa lesha omambo gomehangano ekulu. Oshisiikilo shika otashi kuthwa po owala, uuna omuntu ta hangana naKristus.
15 Sigo onena ndjika natango oshisiikilo osha siikila omadhiladhilo gawo, ngele taa lesha ompango yaMoses.
16 Ihe oshisiikilo otashi kuthwa po, ngaashi enyolo tali ti: “Oshisiikilo shaMoses ohashi kuthwa po aluhe, ngele ta yi koshipala shOmuwa.”
17 “Omuwa” menyolo ndika oye Ombepo. Mpoka pu na Ombepo yOmuwa, opu na emanguluko.
18 Tse atuhe otwa fa oshiitalelo tashi monikila eadhimo lyOmuwa ngoka e li Ombepo, notatu shitululwa, tu fe ondjelo ye mwene yeadhimo enenenene li vule agehe.
1 Kalunga okwe tu pe eyakulo ndika molwesilohenda lye, onkee itatu si uunye.
2 Otwa laleke iilonga ayihe yomeholamo noyohoni. Tse ihatu longo nuufudhime noihatu pilike oohapu dhaKalunga, ihe ohatu popi oshili nokwiiholola pomuntu kehe e na eiyuvo ewanawa koshipala shaKalunga.
3 Oshoka evaangeli ndyoka tatu uvitha, shila olya holekwa owala mboka ye li mondjila ndjoka yu uka mekano.
4 Oomboka inaa itaala, oshoka omadhiladhilo gawo oga pukithwa komuhindadhi, kalunga komuuyuni mbuka, ngoka te ya imbi okumona uuyelele mboka tau ya minikile. Uuyeleke mboka otau zi melaka etoye ndyoka tali hokolola eadhimo lyaKristus, ngoka olupe lwaKalunga.
5 Oshoka ihatu iyuvitha tse yene, aawe, ohatu uvitha kutya Jesus Kristus oye Omuwa. Natse otu li po aayakuli yeni omolwaJesus.
6 Kalunga ngoka a popi nale a ti: “Momilema namu ze uuyelele, u minikile,” oye tuu ngoka a minikile wo nuuyelele we moomwenyo dhetu, opo tu tseye eadhimo lye, eadhimo ndyoka tali welima moshipala shaKristus.
7 Ihe tse mbaka tu na uuyamba mbuka wopambepo, otwa fa owala iiyuma yeloya. Shika otashi ulike kutya oonkondo kadhi li mutse yene, ihe odhi li muKalunga.
8 Tse otwa kala tu na uudhigu owindji, ihe inatu hatwa po. Omathimbo gamwe otwa kala momalimbililo, ihe inatu teka omukumo.
9 Otwa kala tu na aatondi oyendji, ihe Kalunga ine tu ekelahi. Pomathimbo gamwe otwa hepekwa unene, ihe inatu yonagulwa po.
10 Aluhe otwe ende nokuhumbata eso lyaJesus momalutu getu omasi, opo omwenyo gwe gu holoke wo momalutu getu.
11 Mokukalamwenyo kwetu akuhe otwa kala aluhe popepi noshiponga sheso molwaJesus, opo omwenyo gwe gu holoke momalutu ngaka getu omasi.
12 Shika otashi ti kutya eso otali longo mutse, ihe omwenyo ogu li mune.
13 Enyolo otali ti: “Ngame ondi itaala, onkee otandi popi.” Onkee ano sho tu na ombepo yimwe yeitaalo, natse wo otatu popi, oshoka otwi itaala.
14 Oshoka otu shi shi kutya Kalunga, ngoka a yumudha Omuwa Jesus kuusi, ote ke tu yumudha wo pamwe naJesus note ke tu eta koshipala she pamwe nane.
15 Iinima ayihe otayi ningwa molweni. Esilohenda lyaKalunga sho tali adha aantu oyendjiyendji, nena oku na wo oyendji mboka taa ka hambelela nokusimaneka Kalunga.
16 Onkee ano itatu si uunye. Omuntu gwetu gwokombanda uuna ta yonuka po, omuntu gwetu gwomeni ota ningwa omupe esiku kehe.
17 Oshoka uudhigu mbuka tu na ngashingeyi, owokathimbo notau ke tu etela eadhimo enenenene lyaa shi kuyelekwa nolyaaluhe.
18 Tse ihatu tala iinima mbyoka yi wetike, ihe oombyoka kaayi wetike. Oshoka shoka shi wetike, otashi kala owala okathimbo, ihe shoka itaashi vulu okumonika, otashi kala aluhe.
1 Oshoka otu shi shi kutya uuna etsali ndika, moka tu li ngashingeyi, tali kumunwa po, nokutya omalutu ngaka getu gokevi, nena otu na onganda puKalunga megulu, moka tatu ka kala. Egumbo ndyoka olya tungwa kuKalunga mwene notali kala aluhe.
2 Onkee ano ngashingeyi otatu fudhagana notwa yuulukwa noonkondo, tu kale megumbo ndyoka lyomegulu, nokutya tu na omalutu omape.
3 Oshoka ngele twe ga zalekwa, itatu ka adhika we tu li owala twaa naa omalutu.
4 Manga tu li metsali ndhika lyokevi, otatu fudhagana, tu uvite twa thiminikwa. Itashi ti ando, otwa hala okuhulwa olutu lwetu, ihe, otwa hala owala okuzalekwa ndoka lwomegulu, opo shoka tashi si, shi hemukile mumwe naashoka shi na omwenyo.
5 Kalunga mwene okwe tu longekidhile eshituluko ndika nokwe tu pe Ombepo ye, a kale okapilo kaashihe shoka te ke tu pa.
6 Onkee ano otu na aluhe omukumo. Tse otu shi shi kutya manga tu li molutu nduka, katu li pOmuwa.
7 Oshoka kombanda yevi ohatu ende olweendo lweitaalo, haandoka lwokumona.
8 Ihe otu na omukumo notwa yuulukwa okutembuka mo megumbo lyetu, molutu nduka, tu ye, tu ka kale maandjetu pOmuwa.
9 Ihe komeho giinima ayihe otwa hala okwoopalela Omuwa, ongele tu li maandjetu mpaka nenge hwiyaka.
10 Oshoka atuheni otatu ka holoka koshipala shaKristus, tu pangulwe kuye. Kehe gumwe ota ka pewa shoka i ilongela pailonga mbyoka a longa manga a li kombanda yevi, ongele uuwanawa nenge uuwinayi.
11 Tse otwa tseya okutila Omuwa shoka taku ti, onkee otatu kambadhala okweeta aantu puKalunga. Kalunga oku tu shi nawa, nondi inekela wo kutya nane wo omu shi ndje.
12 Tse itatu itumbaleke pune ishewe, aawe, ihe otwa hala oku mu pa etompelo ewanawa, mu kale mu uvite uuntsa molwetu, opo mu vule okuyamukula aantu mboka haa itangele eholoko lyomuntu, hamolwomikalo dhe.
13 Oshoka ngele otwa yaluluka, otwe shi ningi molwaKalunga, ihe ngele otwa longo noondunge, nena otwe shi ningi molweni.
14 Oshoka ohole yaKristus otayi tu pangele, sho twa dhimbulula kutya omuntu gumwe okwa sile aantu ayehe. Shika otashi ti, aantu ayehe oya sa.
15 Kristus okwa sile aantu ayehe, opo mboka ye na omwenyo yaa ikalele we yo yene, ihe ya kalele nguka a si molwawo nokwa yumudhwa molwawo.
16 Ano ngashingeyi katu na we ngoka tu mu shi pakukala kwomuntu; nonando twa li twa tseya Kristus pakukala kwomuntu, ngashingeyi katu mu shi we ngaaka.
17 Ngele ope na ngoka e li muukumwe naKristus, oye omushitwa omupe; iikulu ya hulu po, iipe ya holoka.
18 Ayihe mbika oya ningwa kuKalunga, ngoka e tu hanganitha naye mwene molwaKristus nokwe tu pe oshilonga shokuhanganitha aantu yalwe naye.
19 Tse otatu uvitha kutya Kalunga okwa li muKristus nokwa hanganitha aantu ayehe naye, ye ina yalulila aantu oondjo dhawo. Kalunga okwe tu pe elaka tali popi, nkene ta hanganitha aantu naye mwene.
20 Ano tse aatumwa yaKristus. Kalunga oye mwene te tu longitha oku mu kumagidha, onkee peha lyaKristus otatu mu indile, mu hanganithwe naKalunga.
21 Kristus okwa li kee na oondjo, ihe Kalunga okwe mu humbateke oondjo dhetu, opo muukumwe naye tu pewe uuyuuki waKalunga.
1 Tse sho tu li po aalongi pamwe naKalunga, otatu mu kumagidha, mwaa hepithe esilohenda lyaKalunga ndyoka mwe li taamba.
2 Oshoka Kalunga ota ti: “Ethimbo lyo opala onde ku uvu, esiku lyehupitho onde ku kwatha.” Pulakena ano! Ethimbo lyo opala okutaamba esilohenda lyaKalunga olyo ndika. Esiku lyokuhupithwa onena.
3 Tse itatu alulitha omuntu nando omoshinima shimwe, oshilonga shetu opo shaa shekwe.
4 Ihe moshinima kehe shoka tatu ningi, otatu ulike kutya tse aayakuli yaKalunga. Otatu idhidhimikile uudhigu, iiponga noothina neidhidhimiko enene.
5 Otwa dhengwa, otwe edhililwa mondholongo, otwa kondekwa kaantu. Otwa longithwa iilonga iidhigu nokatu na ompito okukotha nenge okulya.
6 Otu li muuyogoki, moondunge, meidhidhimiko nomuukuume. Otatu endithwa kOmbepo Ondjapuki notu na ohole yaa na uufudhime.
7 Otatu uvitha oohapu dhoshili, naKalunga ote tu pe oonkondo. Uuyuuki owo oshikondjitho shetu mokuumpila nomokwiipopila.
8 Tse otatu simanekwa e tatu dhinwa, ohatu popilwa muuwinayi nomuuwanawa. Otwa talwa aapukithi, nonando otatu popi oshili.
9 Otwa talwa aakwiilongo, nonando otwa tseyika kwaayehe. Otwa fa twa sa, ihe otu na omwenyo. Tse otwa geelwa, ihe inatu dhipagwa po.
10 Otu li moluhodhi, ihe otwa nyanyukwa aluhe. Tse oohepele, ihe oyendji otatu ya ningi aayamba. Otwa fa twaa na sha, ihe otu na iinima ayihe.
11 Ookuume aaholike yomuKorinto, tse otwe mu lombwele oshili notwe mu egululile omitima dhetu.
12 Tse inatu mu holeka omitima dhetu, ihe ne omwe tu holeke omitima dheni.
13 Ote popi nane, ngaashi te popi naamwandje: Tu ningileni ngaashi twe mu ningile; tu egululileni omitima dheni.
14 Inamu kambadhala okulongela kumwe naamboka yaa shi ooyitaali, oshoka shika itashi vulika. Shoka shi li mondjila naashoka sha puka, otayi vulu ngiini okukala kumwe? Uuyelele nomilema otayi vulu ngiini okukala mumwe?
15 Kristus nomuhindadhi otaa vulu ngiini okutsa kumwe? Omwiitaali nomukeeneitaalo otaa vulu tuu okukala ye na uukumwe?
16 Otempeli yaKalunga otayi vulu ngiini okulongela kumwe niikalunga? Oshoka tse otempeli yaKalunga omunamwenyo, ngaashi Kalunga mwene ta ti: “Ngame otandi ka tungila egumbo lyandje puyo, e tandi kala mokati kawo. Ngame otandi kala Kalunga kawo, oyo notaa kala aantu yandje.”
17 Onkee Omuwa ota ti: “Zii mo mokati kawo, ne mu iyoolole mo muyo. Inamu kala mu na ekwatathano naashoka sha nyata, ngame notandi ke mu taamba.
18 Ngame otandi kala Ho, ne notamu kala aamwandje aamati naakadhona, Omuwa Omunankondoadhihe osho ta ti.”
1 Ookuume kandje aaholike, ano sho tu na omauvaneko ngaka agehe, natu iyogeni shaa shoka tashi nyateke olutu nenge omwenyo. Tu lalakaneni wo okukala aayapuki, tse tu tile Omuwa.
2 Tu taambeni nomwenyo aguhe. Inatu ningila nando omuntu gumwe uuwinayi, inatu pukitha nando omuntu gumwe, tse inatu ningilila mo nando ogumwe.
3 Oshinima shika itandi shi popi, ndi mu pangule, oshoka onde mu lombwela nale kutya otu mu hole. Onkee otu na okukala tu na uukumwe aluhe, ongele tu na omwenyo nenge tatu si.
4 Ngame onde mu inekela lela notandi mu itangele. Momaudhigu getweni agehe ngame ondi na omukumo nondu udha enyanyu.
5 Ano sho twa thiki muMakedonia, inatu mona nando efudho lyasha, oshoka otwa li tu na omaudhigu koombinga adhihe: oontamanana naantu yalwe nuumbanda moomwenyo dhetu.
6 Ihe Kalunga ngoka ha tsu omukumo mboka ya tyololoka, okwe shi tu ningile nokuyapo kwaTitus.
7 Nokuli hakuyapo kwe akuke, ihe okuhokolola kwe wo, nkene mwe mu tsu omukumo. Ye okwe tu hokololele, nkene mwa yuulukwa ndje, nkene mwa yemata nonkene mwi ilongekidha okupopila ndje. Ano ngashingeyi onda nyanyukwa pombanda.
8 Oshoka nando ontumwafo yandje ye mu nikitha oluhodhi, kandi uvite ando nayi, sho nde yi nyola. Tango onda li ndi na okukala ndu uvite omwenyo omwiinayi, sho nda dhimbulula kutya ontumwafo ya tya ngaaka oye mu nikitha oluhodhi, nonando olwokathimbo ashike.
9 Ihe ngashingeyi onda nyanyukwa, hamolwaasho nde mu nikitha oluhodhi, ihe omolwaasho oluhodhi lweni lwe mu fala meitedhululo. Oluhodhi lwa tya ngaaka olwa hokiwa kuKalunga, onkee tse inatu mu etela nando oshiponga shasha.
10 Oshoka oluhodhi ndoka lwa hokiwa kuKalunga, otalu fala omuntu meitedhululo, eitedhululo e tali mu fala mehupitho, onkee inalu puka. Ihe oluhodhi lwopayuni otalu eta eso.
11 Taleni ano shoka Kalunga a ningi, sho e mu pitikile oluhodhi ndoka. Oluhodhi tuu ndoka lwe mu pe uulaadhi, mu vule okuholola kutya kamu na uusama. Oshinima sha tya ngaaka oshe mu geyitha noshe mu londodha, oshe mu yuulukitha noshe mu pe uupenda nehalo okugeela uuwinayi. Omu ulike kutya ne kamu na epuko lyasha moshinima shika.
12 Onkee ano nando nda nyola ontumwafo ndjoka, inandi shi ninga molwaangoka a ningi nayi nenge molwaangoka a ningwa nayi. Onda nyola, opo ndi mu hololele uupenda weni molwetu koshipala shaKalunga.
13 Onkee tse otwa tsuwa omukumo. Tse otwa tsuwa omukumo notwa nyanyukwa unene, sho twa mono Titus e na enyanyu, oshoka ne amuhe omwa kambadhala oku mu nyanyudha.
14 Ngame onde mu itangele koshipala shaTitus, ne inamu sitha ndje ohoni. Aluhe otwe mu lombwele oohapu dhoshili. Osho wo eitango lyandje koshipala shaTitus olya holoka kutya oli li mondjila.
15 Onkee ano ohole ye yoku mu hola otayi koko notayi kolo, sho aluhe ta dhimbulukwa, nkene mwa li mwi ilongekidha okuvulika nonkene mwe mu taamba nokutila nokukakama.
16 Onda nyanyukwa unene, sho tandi vulu oku mu inekela miinima ayihe.
1 Aamwameme, tse otwa hala, mu tseye shoka sha longwa kesilohenda lyaKalunga momagongalo gomuMakedonia.
2 Ooyitaali oya li ya piti momayeleko omadhigu, ihe nando ongawo, enyanyu lyawo olya li enene. Onkee ano oya gandja nomwenyo omwaanawa, nonando oya li ye na oluhepo olunene.
3 Ngame onzapo yawo, nkene ya gandja, ngaashi taye shi vulu. Nokuli kehalo lyawo yene oya gandja shi vulithe po.
4 Oye tu indile noya pula, ya pewe ompito yokukwatha aantu yaKalunga yomuJudea.
5 Oya gandja shi vulithe pushoka twa li twa tegelela. Tango oyi igandja yo yene kOmuwa noyi igandja ihe kutse pahalo lyaKalunga.
6 Onkee ano otwa kumagidha Titus, ngoka a tameke oshilonga shika mokati keni, e shi tsikile ye e mu kwathe, mu wape okutsakanitha eyakulo ndika lyohole.
7 One aayamba miinima ayihe mbyoka mu na; meitaalo, mokupopya nomokutseya, muuladhi weni wokukwatha nomohole yeni yoku tu hola. Osho ano otwa hala, mu kale mwaa na uuluya nomeyakulo ndika lyohole.
8 Ngame itandi gandja nando oshipango shasha. Ihe moku mu ulukila yakweni yalwe nkene ya ladhipala okukwatha, onda hala okutala ohole yeni ngele oyashili tuu.
9 Oshoka omwa tseya shoka Omuwa gwetu Jesus Kristus e mu ningile. Nando oye okwa li omuyamba, okwi iningi ohepele molweni, opo mu ninge aayamba molwoluhepo lwe.
10 Ngame otandi dhiladhila moshinima shika kutya otashi kala oshiwanawa kune, ngele tamu tsakanitha ngashingeyi shoka mwe shi tameke omumvo gwa piti. One omwa li yotango, hamiilonga ashike, ihe nomehalo wo lyokulonga.
11 Tsikileni ano oshilonga shika, mu shi hulithe. Kaleni mu na uulaadhi oku shi hulitha, ngaashi mwa li mwa hala. Shi ningeni naashoka mu na.
12 Oshoka ngele omu na ehalo ewanawa lyokugandja, nena Kalunga ota taamba omagano ngoka tamu gandja pamuthika mpoka mu thike, haampoka mwaa thike.
13 Ngame inandi hala ando okupupalekela yalwe e tandi mu tsike omutenge. Ihe sho mu na oshindji ngashingeyi, onawa ngele tamu kwatha mboka ye li moluhepo.
14 Nena uuna tamu ka adhika koluhepo yo ye na oshindji, otaa ke mu kwatha wo. Pamukalo nguka otamu ningilwa amuhe shi thike pamwe.
15 Ngashika enyolo tali ti: “Oongoka a gongele oshindji, ina kala e na oshindji. Naangoka a gongele oshishona, ina kala a hepa.”
16 Kalunga na hambelelwe, sho a pe Titus uupenda woku mu kwatha ngaashi tse.
17 Nokuli ina taamba owala ekumagidho lyetu, ihe okwa li wo a sa uulaadhi okukwatha. Onkee okwa tokola okuya kune kehalo lye mwene.
18 Otatu tumu wo pamwe naye omumwameme omulumentu, ngoka a simanekwa unene momagongalo agehe omolwoshilonga she shokuuvitha evaangeli.
19 Kakele kaashika, omumwameme nguka okwa hogololwa noku uthwa komagongalo, a kale he ende pamwe natse, uuna tatu ende molweyakulo ndika lyohole okusimanekitha Omuwa nokuulika kutya tse otwa hala okukwatha.
20 Tse otwa hala okuyanda, twaa pewe uusama komuntu omolwomukalo ngoka tatu longitha kombinga yiikwatha mbika.
21 Elalakano lyetu olyo okuninga shoka shu uka, hakoshipala shOmuwa awike, ihe nokoshipala shaantu wo.
22 Pamwe naambaka otatu tumu omumwameme omulumentu gulwe ishewe, ngoka twa mono opendji nomiinima oyindji kutya ye ependa nokwa sa uulaadhi okukwatha. Unene ngashingeyi sho e mu inekela, oku na ehalo okukwatha.
23 Titus oye omuyakuli gwandje ngoka ta longo pamwe nangame oku mu kwatha. Aamwameme ooyakwawo mboka taye ya pamwe naye, oyo aakalelipo yomagongalo notaa simanekitha Kristus.
24 Ya ulukileni ohole yeni, opo omagongalo agehe ga dhimbulule noga tseye wo kutya eitango lyetu lyoku mu itangela oli li mondjila.
1 Inashi pumbiwa, ndi mu nyolele kombinga yekwatho ndyoka li na okutuminwa aantu yaKalunga yomuJudea.
2 Ondi shi shi kutya omu na ehalo okukwatha, onkee onde mu itangele montaneho yAamakedonia. Onde ya lombwele kutya aamwameme yomuGreka oya kala yi ilongekidha okukwatha okuza momumvo gwa piti. Uulaadhi weni owa hwameke oyendji yomuyo.
3 Ngashingeyi otandi tumu aamwameme mbaka, opo eitango lyetu lyoku mu itangela moshinima shika lyaa kale ashike oohapu dhowala. Onkee ano kaleni mwa longekidha ekwatho lyeni, ngashika nda tile.
4 Oshoka Aamakedonia ngele ando oye ye ko pamwe nangame e taye mu adha inaamu ilongekidha, nena ohoni yetu otayi kala yi thike peni, sho twa kala twe mu inekela ngeyi! Ndjoka yeni itayi popiwa.
5 Onkee ano onde shi tala kutya osho opala, ndi tse omukumo aamwameme mbaka, opo ya tetekele ndje okuya noya longekidhe omagano ngoka mwa uvaneke nale oku ga gandja. Uuna tandi ke ya, otandi ka adha ihe omagano ga tya ngaaka ga pwa okugongelwa, naashika otashi ka ulika ihe kutya omwa gandja kehalo lyeni yene, hamolwaasho mwa thiminikwa oku shi ninga.
6 Dhimbulukweni, kutya omuntu ngoka ta kunu ombuto onshona, ota ka teya oshishona; ihe omuntu ngoka ta kunu ombuto oyindji, ota ka teya oshindji.
7 Kehe gumwe na gandje, ngaashi eiyuvo lye tali mu lombwele, hanokungungutula nenge kethiminiko. Oshoka Kalunga oku hole ngoka ta gandja nenyanyu.
8 Kalunga ota vulu oku mu pa oshindji shi vulithe pushoka mwa pumbwa, opo mu kale mu na aluhe ashihe shoka mwa pumbwa, ne mu kale wo mu na sha sha gwana okugandjela oshilonga kehe oshiwanawa.
9 Ngashika enyolo tali ti: “Oye ota pe oohepele kehalo ewanawa. Uuwanawa we otau kala sigo aluhe.”
10 Ihe Kalunga ngoka ta pe omukuni ombuto yokukuna niikulya yokulya, ote ke mu pa wo ombuto kehe mwe yi pumbwa nota ka kokitha omimeno, opo dhi mu etele eteyo lyeloolo omolwokugandja kweni kehalo ewanawa.
11 Ote ke mu yambeka aluhe, mu kale mu na sha shokugandja, opo oyendji ya ka hambelele Kalunga molwomagano geni tatu gandja kuyo.
12 Oshoka ekwatho ndyoka tamu longekidha, itali mana po ashike oluhepo lwaantu yaKalunga, ihe otali ke etela wo Kalunga omapandulo ogendji.
13 Aataambi otaa ka pandula Kalunga molweyakulo ndika lyeni, sho taa dhimbulula, nkene hamu vulika kevaangeli lyaKristus nomwa hala shili okukala mekwatathano nayo nonaantu ayehe.
14 Onkee ano otaa ke mu galikanena nohole oyindji molwesilohenda ndyoka enene Kalunga e li mu hololele.
15 Kalunga na hambelelwe omolwomagano ge gaa shi kutumbulwa!
1 Ongame mwene Paulus tandi mu kumagidha, ngame ngoka tamu ti kutya omumbanda, ngele ndi li pune, ihe onda fula, ngele ndaa po pune. Otandi mu indile molwombili nomolwolukeno lwaKristus.
2 Inamu thiminika ndje, ndi kale nda fula, ngele tandi ya kune. Oshoka onde shi inekela kutya otandi vulu okukala ndaa na uumbanda pumboka wo taa ti kutya tse otatu hingwa komahalo gaantu yomuuyuni mbuka.
3 Eeno, osho oshili kutya tse otu li muuyuni, ihe ihatu hingwa komahalo gaantu yomuuyuni mbuka.
4 Iikondjitho mbyoka tatu longitha molugodhi nduka, kayi shi yomuuyuni mbuka, ihe oyo iikondjitho ya kola tatu yi pewa kuKalunga, tayi vulu okuhanagula po omapopilongulu omanene. Otatu hanagula po omadhiladhilo agehe gomaifundjaleko.
5 Otatu kumuna po einenepeko kehe ndyoka tali inenepekele okutseya Kalunga; otatu tula edhiladhilo kehe meti notatu li vulikitha kuKristus.
6 Ngele mwa vulika tango koshili, nena otatu ka kala ihe twi ilongekidha okugeela etangalalo kehe.
7 Taleni iinima, ngaashi tayi monika. Ngele pe na ngoka ti itala kutya ye ogwaKristus, na dhiladhile natango. Ongaashi naanaa ye mwene e li gwaKristus, osho natse wo aantu yaKristus.
8 Ngame itandi ka sa ohoni, nonando ndi itangele epitikilo ndyoka twa pewa kOmuwa, opo tu mu kwathe, haku mu hanagula po.
9 Inandi hala shoka te popi, shi talwe ongaangoka te kambadhala oku mu tilitha noontumwafo dhandje.
10 Otaku tiwa kutya oontumwafo dhaPaulus odha pupyala nodhi na oohapu oonkunkutu, ihe ngele ta holoka ye mwene, omutalala noohapu dhe kadhi na omupondo gwasha.
11 Ngoka ta dhiladhila ngaaka, na kale e shi shi kutya kape na nando eyooloko lyasha pokati kaashoka tatu shi nyola moontumwafo dhetu uuna twaa li pune, naashoka tatu ningi, uuna ndoka tu li pune.
12 Eeno, osho oshili kutya tse inatu fula, tu vule okwiitula mongundu yontumba nenge okwiiyeleka nayamwe yomwaamboka taa itumbaleke. Oyo aagoya ngiini! Otaa iyeleke notaa itokolele yo yene pakuyeleka kwawo.
13 Tse eitango lyetu itali kondo oongamba, ihe otali kala li li meni lyoongamba dhiilonga mbyoka Kalunga e tu uthila. Miilonga mbyoka omwa kwatelwa iilonga yetu yomokati keni.
14 Onkee ano ne sho mu li meni lyoongamba ndhoka, natse wo inatu dhi konda, sho twe mu etele elaka etoye tali hokolola Kristus.
15 Ano tse itatu itangele iilonga mbyoka ya longwa kuyalwe, mboka ya ya kondje yoongamba ndhoka Kalunga e dhi tu uthile. Ihe otwi inekela kutya eitaalo lyeni sho tali koko, nena otatu ka vula ihe okulonga iilonga iinene mokati keni yi vule mbika, shampa ashike aluhe tatu longo meni lyoongamba ndhoka Kalunga e tu uthila.
16 Nena otatu vulu ihe okuuvitha elaka etoye miilongo yilwe, kondje yoongamba dhoshilongo sheni, ihe itatu ki itangela nando iilonga mbyoka ya longwa nale kuyalwe.
17 Ano ngaashi enyolo tali ti: “Kehe ngoka a hala okwiitanga, ni itangele shoka Omuwa e shi longo.”
18 Oshoka omuntu ngoka to opalele Omuwa, oye ngoka iti itumbaleke ye mwene, ihe ota tege, a tumbalekwe kOmuwa.
1 Onda hala, mu idhidhimikile ndje nuuna ndoka wo nda fa nda nika uugoya. Alikana, idhidhimikilii ndje!
2 Ngame onde mu sila efupa, ndele naKalunga osho e li. Oshoka ne omwa fa omukadhona omuyelele, ngoka nda kongela omulumentu gumwe awike, oKristus.
3 Ngame onda tila kutya pamwe oondunge dheni otadhi yonuka e tamu ke etha po okukala aantu yaKristus, ngaashi Eva a pukithwa koondunge dhomakoto geyoka.
4 Oshoka ohamu idhidhimikile nenyanyu shaa ngoka te ya kune tu uvitha Jesus gulwe i ili kee shi ngoka twa uvitha. Omwa taamba wo ombepo nevaangeli lilwe, ndyoka inaali fa ombepo nevaangeli ndyoka mwe li taamba kutse.
5 Ngame itandi dhiladhila ando kutya ondi vulike kaayapostoli yeni mboka aanene.
6 Otashi vulika ndaa shi enyakwa mokupopya, ihe ondi na ngaa oondunge. Shika otwe shi mu tseyithile aluhe pamikalo odhindji.
7 Ngame sho nde mu uvithile elaka etoye lya za kuKalunga, inandi mu pula nando osha. Ngame ondi ifupipike, opo ndi mu nenepeke. Nenge onda puka?
8 Manga nda li tandi longo mokati keni, onda li tandi futwa komagongalo galwe. Nandi tye, onde ga yugu, opo ndi mu kwathe.
9 Ethimbo ndyoka nda kala pune, inandi mu pula iimaliwa, nonando onda li nde yi pumbwa, oshoka aamwameme mboka ya zi kuMakedonia, oye etele ndje ashihe shoka nda li nda pumbwa. Ngashika sha kala methimbo lya piti, osho wo tashi ka kala nokomeho kutya ngame inandi hala oku mu etela uudhigu nando owasha.
10 Omolwoshili yaKristus, ndjoka yi li mungame? Otandi uvaneke kutya eitango ndika lyandje kali na nando mpoka tali ka mwenekwa mevi alihe lyAagreka.
11 Omolwashike tandi popi ngeyi? Omolwaasho ando ndaa mu hole? Kalunga oku shi shi kutya ondi mu hole.
12 Ngashingeyi otandi tsikile owala naashoka tandi shi longo, opo aayapostoli mboka yalwe yaa vule okumona etompelo lyokwiitanga kutya otaa longo pamukalo ngaangoka tatu longo.
13 Aalumentu ya tya ngaaka kaye shi aayapostoli yashili, ihe oyo aafundja. Oyo otaa longitha iifundja miilonga yawo notayi iningi ya kale ya fa aayapostoli yaKristus.
14 Eeno, shika itashi kumitha! Oshoka naSatana ota vulu okwiishitukitha, a kale a fa omuyengeli guuyelele.
15 Onkee ano itashi kumitha, ngele aayakuli yaSatana otayi ishitukitha, ya kale ongaayakuli aawanawa. Ihe hugunina otaa ka pewa shoka yi ilongela.
16 Otandi shi endulula natango: Inaku kala nando ogumwe ta tala ndje kutya ngame egoya. Ihe ngele otamu shi ningi, nena taambii ndje ano ongegoya. Osho ngeyi otandi vulu ihe okwiitanga.
17 Eeno, shoka tandi popi ngashingeyi, hasho shoka Omuwa a hala, ndi popye. Moshinima shika shokwiitanga ote popi lela ongegoya.
18 Ihe sho pe na aantu oyendji mboka hayi itanga paantu, nangame wo otandi shi ningi.
19 Ne yene omu li po aanandunge, onkee ohamu idhidhimikile omagoya.
20 Ohamu idhidhimikile kehe ngoka te mu ningilile mo nenge te mu yulu moohapu nenge te mu tala nondhino nenge te mu nyekele.
21 Ngame onda sa ohoni oku shi zimina kutya otwa li twa tila okuninga ngaaka. Otandi popi ongegoya kutya, ngele ope na ngoka ta vulu okwiitangela oshinima shontumba, nena nangame wo ote vulu oku shi ninga.
22 Oyo Aahebeli? Ngame wo Omuhebeli. Oyo Aaisraeli? Ngame wo Omwiisraeli. Oyo oluvalo lwaAbraham? Ngame wo ogwomoluvalo lwaAbraham.
23 Oyo aayakuli yaKristus? Ote popi ongomulumentu egoya kutya ondi ya vule ayehe. Onda longo noonkondo ndi ya vule. Onda kala mondholongo omathimbo ogendji, onda dhengwa olwindji, onda kala olwindji popepi neso.
24 Onda dhengwa lutano kAajuda omadhengo omilongo ndatu nomugoyi.
25 Onda dhengwa noongola lutatu kAaroma, nalumwe onda dhengwa nomamanya. Onda kala lutatu moshiponga sheteko lyosikepa. Ethimbo limwe onda kala ootundi omilongo mbali nane momeya.
26 Momalweendo gandje ogendji onda adhika kiiponga yomafundja noyaayugi, iiponga tayi zile ndje mAajuda ooyakwetu nomaapagani. Opwa kala iiponga miilando, iiponga moombuga, iiponga yomomafuta omanene nomiiponga tayi zi mookuume aafundja.
27 Opwa li pwa kala iilonga nuupyakadhi. Olwindji onda lala inee kotha nonda si ondjala nenota. Olwindji onda kala ndaa na iikulya nonda hepekwa unene kuutalala nokonkayi.
28 Kakele kiinima mbika, esiku kehe otandi thiminikwa meni lyandje koshimpwiyu shomagongalo agehe.
29 Olye ngoka omunkundi, ngame ndaa kale ando omunkundi pamwe naye? Olye ngoka ta pundukile muulunde, ndaa lulumikwe kusho?
30 Ngele ondi na okwiitanga, otandi itangele iinima mbyoka tayi ulike, nkene ngame ndi li po omunkundi.
31 Edhina lyaKalunga, He yOmuwa gwetu Jesus, nali simanekwe, oshoka oku shi shi kutya ite fundju.
32 Manga nda li muDamaskus, elenga lyomukwaniilwa Aretas olya tula aalangeli piiyelo yoshilando, li kwate ndje.
33 Ihe ngame onda kulukithwa ndi li montungwa nonda pitithwa mombululu yi li mekuma e tandi hunuka mo miikaha ye.
1 Ondi na okwiitanga, nando itashi kwatha sha. Ngashingeyi otandi tameke okupopya kombinga yomamoniko nomahololo ngoka nde ga hololelwa kOmuwa.
2 Opwa piti ngashingeyi oomvula omulongo nane, ihe ote dhimbulukwa omulumentu gumwe gwontumba omukriste, ngoka a akelwa megulu lyopombandaelela. Inandi tseya kutya osha ningwa lela nenge pamwe osha li owala emoniko, Kalunga oye awike e shi shi.
3 Otandi shi tumbula natango: omulumentu ngwiyaka okwa falwa mOparadisa, ihe kandi shi wo kutya shika osha ningwa lela nenge osha li owala emoniko, Kalunga oye awike e shi shi.
4 Mwiyaka oku uvu iinima mbyoka itaayi vulu okutumbulwa, iinima mbyoka omuntu inaa pitikwa oku yi popya.
5 Omulumentu nguka otandi mu itangele, ihe itandi itanga ngame mwene, shila iinima mbyoka tayi ulike, nkene ndi li po omunkundi.
6 Ngele ando onda hala okwiitanga, nena kandi shi egoya, oshoka ote popi oshili. Ihe inandi hala okwiitanga, oshoka inandi hala, pu kale nando omuntu ta dhiladhilile ndje pombanda, hangaashi omuntu e wete ndje te longo nenge te popi.
7 Ihe opo ndaa kwatwe keinenepeko okwiinenepekela iikumitha mbyoka nda mono, onda pewa uuwehame uunene wopalutu. Uuwehame wa tya ngaaka owa ningi omutumwa gwaSatana, ngoka a dhenge ndje nowa keelele ndje okwiinenepeka.
8 Opo ihe onda galikana Omuwa lutatu omolwoshinima shika nonde mu indile, e shi kuthe ndje.
9 Ihe okwa yamukula ndje a ti: “Esilohenda lyandje olye ku gwanena, oshoka oonkondo dhandje odho oonenenene kwaamboka aankundi.” Onkee ngame onda nyanyukwa notandi itangele uunkundi wandje, opo ndi kale megameno lyoonkondo dhaKristus.
10 Ngame onda nyanyukilwa okukala muunkundi, mokudhinwa, miiponga, momatidhagano nomoothina omolwaKristus. Oshoka uuna ndoka ndi na uunkundi, opo mpoka ndi na oonkondo.
11 One mwe shi ningitha ndje, ndi kale nda fa egoya, nando omwa li mu na okutumbaleka ndje. Oshoka nando ngame ondi kale oshinima showala, kandi na nando mpoka ndi vulike kaayapostoli yeni mboka aanene.
12 Iinima mbyoka yu ulike kutya ngame omuyapostoli, omwe yi longwa neidhidhimiko enene, ya ningwa momandhindhiliko, miikumithalonga nomiilongankondo.
13 Openi mwa ningwa nayi mu vule omagongalo galwe? Shila osho inaandi mu hepeka noku mu pula ekwatho. Alikana, dhiminii ndje po uusama mbuka.
14 Nduka olutitatu ngame ndi ilongekidha okuya kune, noitandi ke mu pula nando osha. Ngame onde mu hala ne yene, haimaliwa yeni. Oshoka aanona ndishi hayo haa pungulile aakuluntu yawo omaliko, ihe aakuluntu oyo haa pungulile aanona yawo?
15 Ngame otandi ka gandja nenyanyu ashihe shoka ndi na notandi ki igandja wo omolwoomwenyo dheni, opo ndi mu kwathe. Ngame sho ndi mu hole unene, ne otamu kala mu hole ndje kashona?
16 Ano zimineni, kutya ngame inandi mu etela uudhigu washa. Ihe omuntu gumwe ota vulu okutya, onda li ndi na iineya nonde mu yulu nomakoto.
17 Olye gwomaalumentu mboka nda tumu kune, e mu ningilile mo?
18 Onda li ndi indile Titus, e mu talele po pamwe nomumwameme gumwe. Otamu vulu tuu okutya Titus okwe mu ningilile mo? Tse naye inatu longa ando nelalakano limwe notwa landula ondjila yimwe?
19 Pamwe otamu dhiladhila kutya ethimbo alihe otwa kala owala tatu ipopile koshipala sheni? Aawe, tse otatu popi owala shoka Kristus a hala tu popye koshipala shaKalunga. Ookuume aaholike, kehe shoka tatu ningi, otatu shi ningi, tu mu kwathe.
20 Ngame onda tila kutya pamwe uuna tandi ke ya kune, otandi ke mu adha mwi ili, hangaashi nda hala mu kale. Nena ne wo pamwe otamu ka mona ndje ndaa li ngaashi mwa hala. Ngame onda tila kutya pamwe otandi ke mu adha mu na oontamanana, efupa, uugeyentu, okwiihola, okusheka, oluhoko, uuntsa nevundakano.
21 Ngame onda tila kutya, uuna tandi ke ya natango kune, Kalunga kandje ota ka fupipika ndje montaneho yeni, notandi ka lila omahodhi molwoyendji mboka ya yono nale, ihe inayi itedhulula, ya ze moonyata dhawo dholuhondelo nodhuuholume wawo.
1 Nduka otalu ka ninga olutitatu tandi mu talele po. Ngele opu na uusama washa, oshi na okukolekwa koonzapo yaali nenge yatatu, ngashika enyolo tali ti:
2 Onda hala ndi mu lombwele ne mboka mwa yono nale nane yalwe amuhe. Ngaashi nde mu lombwele nale metalelopo lyandje etiyali, natango otandi mu lombwele, manga ndaa po pune tandi ti: Ngashingeyi ngele tandi ke ya, itandi ka tala nando ogumwe onteni.
3 Nena otamu ka tseya ihe kutya Kristus oye ta popi mungame. Kristus ngoka ta longo mokati keni, ke shi ngoka kee na oonkondo, ihe ota holola oonkondo dhe mune.
4 Oshoka nando okwa si komushigakano a fa kee na oonkondo, ngashingeyi oku na omwenyo omolwoonkondo dhaKalunga. Muukumwe wetu naye natse wo otwa fa twaa na oonkondo, ihe mekwatathano lyetu nane otatu ka kala tu na omwenyo pamwe naye omolwoonkondo dhaKalunga.
5 Ikonakoneni, ne mu iyeleke, opo mu tale, ngele omu li tuu meitaalo. Omwa tseya kutya Jesus Kristus oku li mune? Ngele hasho, nena omwa hunutha oshinima oshinene.
6 Ondi inekela, otamu ka tseya kutya tse inatu shi hunutha.
7 Tse otatu galikana Kalunga, mwaa ninge nando epuko lyasha. Mpaka itatu ulike kutya tse aasindani, ihe otwa hala okuulika kutya nane wo otamu vulu okulonga shoka shi li mondjila, nando tse otu kale twa fa inaatu sindana.
8 Oshoka tse itatu vulu nando okulonga shoka sha tsa ondumbo noshili yaKalunga, ihe otatu yi popile.
9 Tse otwa nyanyukwa, sho twaa na oonkondo, ihe ne aanankondo. Onkee ano otatu galikana, mu kale mwa gwana mwa pwa.
10 Onkee ano otandi nyola ontumwafo ndjika, manga inaandi ya kune, opo uuna tandi ke ya, ndaa kale omukukutu mokati keni omolwepitikilo ndyoka nda pewa kOmuwa oku mu tunga, haku mu hanagula po.
11 Onkee ano, aamwameme, kalii po nawa! Lalakaneni mu kale mwa gwana. Taambeni ekumagidho lyandje, mu kale mwa tsa ompango yimwe. Uvathaneni, ne mu kale mu na ombili. Nena Kalunga kohole nokombili ota kala pamwe nane.
12 Kundilathanii po nohole yaamwayinathana. Aantu yaKalunga ayehe otaye mu kundile po.
13 Esilohenda lyOmuwa Jesus Kristus nohole yaKalunga nehangano lyOmbepo Ondjapuki nali kale nane amuhe.