1 Ontumwafo ndjika oya zi kuPaulus, ngoka i ithanwa pahalo lyaKalunga, a ninge omuyapostoli gwaJesus Kristus, nokomumwatate Sostenes.
2 Oya nyolelwa kegongalo lyaKalunga lyomuKorinto, kwaayehe mboka yi ithanwa kuKalunga, ya ninge aantu ye aayapuki muukumwe naKristus Jesus, kumwe naayehe mboka ye li akuhe haa ithana edhina lyOmuwa gwetu Jesus Kristus nohaa ti kutya oye Omuwa gwawo nongaashi e li wo Omuwa gwetu.
3 Silweni ohenda, ne mu kale mu na ombili yaKalunga Tate noyOmuwa Jesus Kristus.
4 Otandi hambelele Kalunga kandje aluhe omolweni nomolwomagano gesilohenda ngoka e ge mu pe medhina lyaJesus Kristus.
5 Oshoka mokukala muukumwe naKristus omwa ningi aayamba miinima ayihe ngaashi mokupopya nomokutseya akuhe.
6 Elaka tali popi Kristus olya tsama nawa mune,
7 onkee inamu hunutha eyambeko nando olimwe mokutegelela eholoko lyOmuwa gwetu Jesus Kristus.
8 Kalunga ote mu kankameke sigo okehulilo, opo mu ka adhike mwaa na oshipo sigo okesiku lyOmuwa gwetu Jesus Kristus.
9 Kalunga oye omwiinekelwa. Oye ngoka e mu ithanene muukumwe nOmwana Jesus Kristus, Omuwa gwetu.
10 Aamwameme, otandi mu kumagidha medhina lyOmuwa gwetu Jesus Kristus: Uvathaneni mwaashihe shoka tamu popi, opo mokati keni mwaa kale omatopoko. Kaleni nekwatathano, mu na edhiladhilo limwe nelalakano limwe.
11 Oshoka onda hokololelwa kuyamwe ya zi kaandjaKloe kutya mokati keni omu na oontamanana.
12 Onda hala okutya: Kehe gumwe gwomune ota popi i iyukila. Gumwe ota ti: “Ngame onda gama kuPaulus;” mukwawo ota ti: “Ngame onda gama kuApollos;” mukwawo ota ti: “Ngame onda gama kuPetrus;” mukwawo ota ti: “Ngame onda gama kuKristus.”
13 Kristus okwa topolwa ano moongundu? Nenge ngoka a si komushigakano molweni, oPaulus? Omwa shashwa, mu ninge aalongwa yaPaulus?
14 Otandi pandula Kalunga, sho inaandi shasha nando omuntu gumwe, kakele kaKrispus naGaius.
15 Kaku na nando ogumwe gwomune ta vulu okutya omwa shashwa, mu ninge aalongwa yandje.
16 Eeno, onda shasha wo Stefanas pamwe naanegumbo lye, ihe itandi dhimbulukwa kutya onda shashele omuntu gwontumba gulwe.
17 Kristus ina tuma ndje, ndi ka shashe aantu. Oye okwa tumu ndje ndi ka uvithe elaka etoye, nondi ke li uvithe itaandi longitha uunongo wopantu. Oshoka uunongo wopantu otau ningi eso lyaKristus lyokomushigakano li kale lyaa na oshilonga.
18 Oshoka ohapu ndjoka tayi popi eso lyaKristus lyokomushigakano, oya nika uugoya kumboka ye li mondjila ndjoka yu uka mekano, ihe kutse mbaka tu li mondjila ndjoka yu uka mehupitho, oyo oonkondo dhaKalunga.
19 Oshoka enyolo otali ti: “Otandi hanagula po uunongo waanongo, oondunge dhaanandunge otandi dhi shundula.”
20 Nena ano aanongo oye li peni? Aalongimpango oye li peni? Aanongo mokuludhika yomuuyuni mbuka oye li peni? Kalunga okwe shi holola kutya uunongo wopauyuni mbuka owo uugoya wowala.
21 Oshoka uunongo waKalunga inau shi pitika, aantu ye mu tseye noondunge dhawo. Onkee Kalunga okwa tokola, a hupithe aantu mboka yi itaala keuvitho ndyoka tatu li uvitha, lya nika uugoya.
22 Aajuda oya hala okwiitaalithwa kiikumithalonga, nAagreka otaa kongo uunongo.
23 Ihe tse otatu uvitha Kristus omwaalelwa komushigakano. Ohapu ndjika oya tsikitha Aajuda noya nika uugoya kaapagani.
24 Ihe kombinga yAajuda naapagani mboka yi ithanwa kuKalunga, ohapu ndjika oKristus. Oye oonkondo dhaKalunga nuunongo waKalunga
25 Oshoka kehe shoka Kalunga te shi longo sha fa uugoya, oshu udha oondunge dhi vule dhaantu, naashoka tashi ulike Kalunga a fa kee na oonkondo, oshu udha oonkondo dhi vule dhaantu.
26 Aamwameme, dhimbulukweni kutya omwa li mwa tya ngiini, Kalunga sho e mu ithana, mu ninge aakriste. Ngele tandi popi pantu, aashona yowala yomokati keni ya li aanongo nenge aanankondo nenge ya valekeka.
27 Oshoka Kalunga oha hogolola shoka uuyuni tau shi tala kutya osha nika uugoya, opo aanongo ya sithwe ohoni. Kalunga oha hogolola aankundi, opo aanankondo ya sithwe ohoni.
28 Kalunga oha hogolola mbyoka uuyuni tau yi tala yopevilela, ya dhinika noyaa na oshilonga, opo a hanagule po shoka uuyuni tau shi tala kutya oshi na oshilonga.
29 Onkee inaku kala ku na nando omuntu gumwe ta vulu okwiitanga koshipala shaKalunga.
30 Ihe Kalunga okwe mu eta muukumwe naKristus Jesus nokwa ningi Kristus uunongo wetu. MuKristus omwa zi ompito, tu ningwe aayuuki koshipala shaKalunga. Otse otwa ningi aantu yaKalunga notwa mangululwa.
31 Onkee ano ngaashi enyolo tali ti: “Kehe ngoka a hala okwiitanga, ni itangele shoka Omuwa e shi longa.”
1 Aamwameme, ngame sho nde ya kune oku mu uvithila oshili yaKalunga ndjoka ya holama, inandi longitha omukalo gwokupopya oohapu odhindji nenge guunongo wa dhenga pombanda.
2 Oshoka mokukala pune onda tokola, ndi dhimbwe ayihe, kakele kaJesus Kristus awike, nuunene eso lye lyokomushigakano.
3 Ano sho nde ya kune, onda li nda sa uunkundi nuumbanda, te kakama.
4 Moohapu nomeuvitho lyandje kamwa li mu na iitya yomuheka yopaunongo waantu, ihe omwa li mu na oonkondo dhOmbepo yaKalunga.
5 Onkee ano eitaalo lyeni kali na okukala lyi ikwatelela kuunongo waantu, ihe okoonkondo dhaKalunga.
6 Uunongo mbuka otandi u popi owala pumboka ya koka pambepo. Kau shi uunongo wopauyuni mbuka nenge woonkondo ndhoka tadhi pangele uuyuni mbuka, ndhoka dhi li pokuhula po.
7 Ihe uunongo mboka tandi u popi, owo uunongo waKalunga mboka wa holama nowa holekwa aantu. Uunongo wa tya ngaaka Kalunga okwe u utha nale, manga uuyuni inaawu shitwa, u ninge esimano lyetu.
8 Kaku na nando ogumwe gwomaapangeli yuuyuni mbuka e u tseya. Oshoka ando oya li ya tseya uunongo mbuka, ando Omuwa gweadhimo inaye mu alela komushigakano.
9 Ihe ongaashi enyolo tali ti: “Shoka omuntu nando ogumwe ine shi mona noine shi uva, shoka kaku na nando ogumwe e shi dhiladhila, osho tuu shoka Kalunga e shi longekidhile mboka ye mu hole.”
10 Ihe mokulongitha Ombepo ye Kalunga okwe tu tseyithile oshiholekwa shoka. Oshoka Ombepo ota konakona ayihe, noyomuule womadhiladhilo gaKalunga.
11 Ngaashi naanaa ombepo yomuntu, ndjoka yi li muye, oyo ayike ya tseya ashihe shokombinga ye, osho wo Ombepo yaKalunga oyo ayike ya tseya ashihe shokombinga yaKalunga.
12 Tse inatu pewa ombepo yuuyuni mbuka, ihe otwa pewa Ombepo ya zi kuKalunga, opo tu vule okutseya ashihe shoka Kalunga e shi tu pa.
13 Onkee ano itatu popi oohapu dha za melongo lyopaunongo waantu, ihe otatu popi oohapu dha za melongo lyOmbepo yaKalunga. Iinima yopambepo otatu yi fatululile mboka ye na Ombepo yaKalunga.
14 Ihe omuntu ngoka kee na Ombepo yaKalunga, ita vulu okutaamba omagano ga za mOmbepo tuu ngoka. Oye ite ga uvu ko. Otaga kala ge mu nikila uugoya, oshoka iinima yopambepo otayi uviwa ko owala kwaamboka yopambepo.
15 Omuntu ngoka e na Ombepo yaKalunga, ota vulu okukonakona iinima ayihe, ihe aantu yalwe itaa vulu okukonakona omuntu a tya ngaaka.
16 Ongaashi enyolo tali ti: “Olye a tseya omadhiladhilo gOmuwa? Olye ta vulu oku mu tsa omayele?” Ihe tse otu na omadhiladhilo gaKristus.
1 Aamwameme, inandi vula oku mu popitha, ngaashi tandi popitha aantu mboka ye na Ombepo yaKalunga. Onde mu popitha, ngaashi te popitha aantu yopauyuni mbuka, ongaamboka uunona natango meitaalo.
2 Onde mu palutha nomahini, haniikulya ya kola, oshoka kaya li ye mu opalela. Nongashingeyi inamu adha oku yi lya,
3 oshoka natango omwa faathana naantu yopauyuni mbuka. Mokati keni omu na efupa noontamanana. Shika hasho nani tashi holola kutya omwa faathana naantu yopauyuni mbuka nomu li pankalo yawo?
4 Ngele gumwe gwomune ota ti kutya ye okwa gama kuPaulus nagumwe ota ti, okwa gama kuApollos, kamu li ngaashi aantu yopauyuni mbuno?
5 Ano Apollos olye? NaPaulus olye? Tse aayakuli ashike yaKalunga mboka ye mu wilike, sigo mwi itaale. Kehe gumwe gwomutse ota longo oshilonga she shoka e shi pewa kOmuwa.
6 Ngame onda kunu, Apollos e ta tekele, ihe Kalunga oye a menitha e ta kokitha oshimeno.
7 Ngoka ta kunu naangoka ta tekele, itaa vulu okuyelekwa naKalunga, ngoka ta kokitha.
8 Kape na eyooloko pokati komukuni nomutekeli. Kalunga ota ka futa kehe gumwe shi thike piilonga ye.
9 Oshoka otse aalongi pamwe naKalunga moshilonga she, nane omu li po epya lyaKalunga. One wo etungo lyaKalunga.
10 Onda longo ngaashi omutungi enyakwa mokulongitha uunkulungu mboka Kalunga e u pa ndje. Onda tungu ekankameno, nagulwe okwa tungile ko. Ihe kehe gumwe oku na okukotoka, nkene e na okutunga.
11 Oshoka Kalunga oku utha kutya Jesus Kristus oye awike e na okukala ekankameno; itaku ningwa we ekankameno lilwe.
12 Aantu yamwe otaa tungitha oshingoli, yamwe oshisiliveli nayamwe omamanya ge na ondilo. Yamwe otaa tungitha iiti, yamwe omwiidhi nenge iihenguti.
13 Ndele uukolele wetungo lyomuntu kehe otau ka hololwa mesiku lyaKristus. Oshoka esiku lya tya ngaaka otali ya li na omulilo ngoka tagu ka yeleka notagu ka holola uukolele wiilonga yomuntu kehe.
14 Ngele oku na oshilonga shomuntu gwontumba sha tungilwa kekankameno ndika e tashi zi mo momulilo, nena ota ka mona ondjambi.
15 Ihe omuntu ngoka oshilonga she tashi ka pya po, ita ka mona ondjambi yasha. Omuntu a tya ngaaka ye mwene ota ka hupithwa a fa a nakulwa momulilo.
16 Kamu shi shi kutya one otempeli yaKalunga, nOmbepo yaKalunga oyi li mune?
17 Ngele oku na omuntu ta yono po otempeli yaKalunga, Kalunga ote mu yono po wo. Oshoka otempeli yaKalunga oyo ondjapuki, nane wo otempeli ye.
18 Inaku kala nando omuntu ti ifundjaleke. Ngele oku na omuntu gumwe mokati keni ta dhiladhila kutya ye oku na oondunge dhopantu, na ninge omunandungelela.
19 Oshoka shoka sha talwa kuuyuni mbuka kutya osho oondunge, osho uugoya koshipala shaKalunga. Ongashika enyolo tali ti: “Kalunga okwa kwata aanongo, manga yi iwete ya kotoka.”
20 Enyolo ekwawo otali ti: “Omuwa okwa tseya kutya omadhiladhilo gaanandunge kage na oshilonga.”
21 Inaku kala nando ogumwe ti itangele sha sha longwa kaantu; oshoka iinima ayihe oyeni:
22 Paulus, Apollos naPetrus; uuyuni mbuka, omwenyo neso, mbika yongashingeyi naambyoka yokomeho, ayihe mbika oyeni.
23 Ne oyaKristus naKristus ogwaKalunga.
1 Ano natu talwe kutya otse aayakuli yaKristus, mboka twa pewa iipatululo yegumbo lyiiholekwa yaKalunga.
2 Omusilishimpwiyu kehe ota tegelelwa, a kale omwiinekelwa.
3 Ngame polwandje kandi na ko nasha nokupangulwa kune nenge kompangu yilwe yopantu. Itandi vulu nokuli okwiipangula ngame mwene.
4 Ondi na eiyuvo lya yela, ihe itashi ti ando kutya kandi na oondjo. Omuwa oye omupanguli gwandje.
5 Onkee ano inamu pangula nando olye, esiku lyu uthwa manga inaali thika. Epangulo oli na okutegelela sigo uuna ndoka Omuwa mwene te ya. Oye te ke eta puuyelele iiholekwa ayihe mbyoka aantu ye yi longa momilema, nota ka holola wo omadhiladhilo gawo ngoka ga holama. Nena kehe gumwe ota ka pewa esimano kuKalunga, ndyoka e li ilongela.
6 Aamwamene, oshinima shika onde shi ukitha kombinga yaApollos noyandje mwene, oshoka onda gama kune. Ondu ulike kutse yene, opo mu ilonge kutya eyele ndika otali ti shike: “Ino konda shoka shu uthwa.” Inaku kala nando ogumwe mokati keni ti itangele nguka ye ta dhini ngwiyaka.
7 Olye e ku ningi u vule yakweni? Oshike shono u na inoo shi pewa kuKalunga? Onkee oto vulu ngiini okwiitanga wa fa iinima ayihe inoo yi pewa omagano?
8 One omu na nale ashihe shoka mwa pumbwa. One aayamba. One omwa ningi aakwaniilwa, nonando tse katu shi aakwaniilwa. Onda halele, mu kale mwa ninga lela aakwaniilwa, opo natse wo tu ninge aakwaniilwa pamwe nane.
9 Onde shi tala kutya tse aayapostoli otwa pewa kuKalunga ehala lya dhinika. Tse otwa fa aantu ya tokolelwa eso montaneho yaayehe. Muuyuni otu li mo twa tongololwa kaantu nokaayengeli.
10 Otse aagoya molwaKristus, ihe ne aanandunge muukumwe naKristus. Otse aankundi, ihe ne aanankondo. Tse otwa dhinika, ihe ne otamu simanekwa.
11 Sigo ongashingeyi otu li po twa sa ondjala nenota, twa zalekwa iinyanyu, otatu dhengwa, otatu endagula koombinga noombinga.
12 Otatu longo twa mana mo, opo tu imonene iipalutha. Otatu yambeke mboka taye tu thingi. Ngele tatu tidhaganwa, otatu idhidhimike.
13 Ngele tatu popiwa nayi, otatu yamukula noohapu oombwanawa. Ethimbo alihe otse otwa fa oshilambo shiiyagaya muuyuni mbuka nondoya yevi ndika.
14 Moku mu nyolela ngeyi itandi shi ningi ando nda hala oku mu sitha ohoni, ihe otandi shi ningi, ndi mu longe oondunge ongaamwandje aaholike.
15 Oshoka mokukala kweni muKristus nando omu kale mu na aalongi omayuvi omulongo, omu na owala ho gumwe awike. Oshoka ngame onda ningi ho mokukala kweni muKristus Jesus, sho nde mu uvithile elaka etoye.
16 Onkee otandi mu indile, mu landule oshiholelwa shoka tandi shi mu ulukile.
17 Omolwoshinima shika otandi mu tumine Timoteus. Oye omumwandje omuholike nomwiinekelwa mOmuwa. Oye te ke mu dhimbulukitha omikalo adhihe ndi dhi na mokukala kwandje akuhe muKristus Jesus, naandhoka tandi longo aantu momagongalo agehe.
18 Yamwe yomokati keni oya tameke okwiinenepeka, sho taa dhiladhila kutya itandi ya we, ndi mu talele po.
19 Omuwa ngele okwe shi hala, otandi ke ya mbala, ndi mu talele po notandi ki imonena ko mwene shoka aayinenepeki haa vulu okuninga, itaaku talwa owala okupopya kwawo.
20 Oshoka Oshilongo shaKalunga kashi shi oshinima shokupopya kwowala, ihe oshinima shi na oonkondo.
21 Otamu hogolola po shini? Nandi ye kune ndi na ongola nenge nandi ye ndi na omutima gu udha ohole nombili?
1 Akuhe otaku popiwa kutya mokati keni omu na oluhondelo lwa geya noonkondo, ndele naapagani ihaa yono eyono lya tya ngaaka. Oshoka onda lombwelwa kutya omulumentu gumwe ota kala nomukiintu gwahe.
2 Otamu vulu ngiini okwiitanga? Omwa li mu na okukala mwa sa oluhodhi, nomulumentu ngoka a ningi oshinima sha tya ngeyi, okwa li e na okukondwa mo mokati keni.
3 Oshoka ngame nando kandi li mokati keni palutu, onkee tuu ndi li pamwe nane pambepo. Medhina lyOmuwa gwetu Jesus onda ningi nale etokolo kombinga yomulumentu ngoka a ningi iihuna yi thike mpoka. Shika onde shi ningi nda fa ndi li pune.
4 Ngele tamu gongala, nangame wo otandi kala pamwe nane pambepo. Koonkondo dhOmuwa gwetu Jesus ndhoka dhi li mutseni,
5 ne omu na okugandja omulumentu a tya ngeyi kuSatana, a dhenge olutu lwe. Pamwe omwenyo gwe tagu ka hupithwa mesiku lyOmuwa.
6 Okwiitanga itaku mu opalele. Eyele omu li shi ndyoka tali ti: “Okafulika okashona ohaka tumbike ondombo ayihe.”
7 Kuthii mo mokati keni efulika lya tya ngaaka ekulu lyuulunde, opo mu kale mwa yogoka. Nena otamu kala mwa fa ondombo inaayi fulikwa, nondi shi shi kutya osho mu li. Oshituthi shetu shOpaasa osha longekidhwa nale, oshoka onzigona yetu yOpaasa, Kristus, okwa dhipagwa.
8 Tu dhaneni ano oshituthi shetu, ihe haniikwiila ya ningwa nefulika ekulu lyuulunde nolyonyata kehe, ihe oniikwiila inaayi fulikwa, ya yogoka noyashili.
9 Montumwafo ndjoka nde mu nyolele, onde mu lombwele, mwaa kwatathane naahondeli.
10 Ano inandi dhiladhila ando aahondeli yoomaapagani nenge aanalwiho, aayugi naasimaneki yiimenka, oshoka moku ya yanda omu na okuthiga po uuyuni mbuka.
11 Shoka nda tumbula montumwafo ndjoka, osho shika kutya inamu kwatathana nomuntu ngoka ti iningi a fa omukriste, nonando oye omuhondeli, omunalwiho, omusimaneki gwiimenka, omusheki, onkolwi nomuyugi. Nokuli inamu lya pamwe nomuntu a tya ngaaka.
12 Onkee ano kashi shi oshinima shandje okupangula aantu mboka kaaye shi ooyitaali. Kalunga oye te ke ya pangula. Ne itamu pangula nani mboka yokombinga yeni ongaashi enyolo tali ti: “Umbii mo omuyoni mokati keni.”
1 Ngele mokati keni omu na omuntu e na oontamanana nomukriste mukwawo, otashi vulika ngiini, a ye kaapanguli aapagani? Ndishi aantu yaKalunga oye na okwoopaleka oontamanana dhomokati kawo yene?
2 Nenge kamu shi shi kutya aantu yaKalunga otaa ka pangula uuyuni? Ngele ano otamu ka pangula uuyuni, itamu vulu ando okutokola iinima iishona?
3 Kamu shi shi kutya otatu ka panguleni aayengeli? Ano okutokola iinima mbika yomokukalamwenyo kwongashingeyi okwe tu nyenge andola?
4 Ngele ano iinima ya tya ngeyi tayi holoka, otamu ke yi fala, yi ka tokolwe kaantu ya dhinika megongalo?
5 Omu na okukala mwa sa ohoni! Kape na omalimbililo, mokati keni omu na omulumentu omunandunge ta vulu okutokola oohapu dhayakwawo.
6 Ihe ne otamu ningi ngaaka kutya omukwanegongalo ota yi kompangu e na oohapu nomukwanegongalo mukwawo notaa pangulwa kaapanguli kaaye shi ooyitaali.
7 Itashi mu kwatha nando osha, sho mu na oontamanana mokati keni yene. Omolwashike itaamu pitika, mu ningwe nayi? Omolwashike itaamu pitika, mu yugwe?
8 Ihe ne ohamu ningilathana uuwinayi nohamu yugu naangoka wo omukriste mukweni.
9 One omu shi shi kutya aakolokoshi itaa ka ya mOshilongo shaKalunga. Inamu ipukitha. Aantu mboka aaholume, aasimaneki yiimenka, aahondeli, omashenge naalali nomashenge,
10 aafuthi, aanalwiho, oonkolwi, aasheki naayugi, kaku na nando ogumwe gwomaantu ya tya ngeyi ta ka ya mOshilongo shaKalunga.
11 Yamwe yomune osho mwa li mwa tya ngaaka. Ihe omwa yogwa oondjo, omwa yoololelwa Kalunga, omwa ningwa aayuuki koshipala shaKalunga omolwOmuwa Jesus Kristus okOmbepo Ondjapuki yaKalunga.
12 Omuntu gumwe ota vulu okutya: “Ngame onda pitikwa okuninga shaa shoka.” Eeno, ou li mondjila, ihe haayihe ye ku opalela. Ngame otandi vulu okutya onda pitikwa okuninga shaa shoka, ihe itandi etha nando osha, shi ninge ndje omupika.
13 Gulwe ota vulu okutya: “Iikulya oya dhiladhililwa ela, nela olya dhiladhililwa iikulya.” Eeno osho, ihe Kalunga ota ka hulitha po ayihe iyali. Olutu lwomuntu inalu tulilwa po uuholume, aawe, olwo olwOmuwa, nOmuwa oye mwene gwalwo.
14 Kalunga oye a yumudha Omuwa kuusi, onkee ote ke tu yumudha wo noonkondo dhe kuusi.
15 Ne kamu shi shi kutya omalutu geni ogo iilyo yolutu lwaKristus? Otandi vulu tuu okukutha oshilyo sholutu lwaKristus e tandi shi ningi oshilyo sholutu lwohonda? Itashi vulika!
16 Nenge kamu shi shi kutya omulumentu kehe ngoka ta hangana nohonda, ota ningi olutu lumwe nayo? Enyolo otali popi sha yela tali ti: “Ayehe yaali otaa ningi omuntu gumwe.”
17 Onkee ano ngoka ta hangana nOmuwa, ota ningi omuntu gumwe naye pambepo.
18 Yandeni oluhondelo. Uulunde kehe ulwe omuntu te u ningi, itau mu kwata kolutu; ihe omuntu ngoka ta hondele, ota yono kolutu lwe mwene.
19 Kamu shi shi nani, kutya omalutu geni ogo otempeli yOmbepo Ondjapuki? Ombepo ngoka oku li mune nomwe mu pewa kuKalunga. Kamu shi yeni yene, ihe oyaKalunga.
20 Kalunga okwe mu kulile niikulila yi na ondilo. Omalutu geni naga simanekithe ano Kalunga.
1 Kombinga yaambyoka mwa nyola, otandi ti ngeyi: Omulumentu ngoka itaa hokana, ota ningi nawa.
2 Ihe omoluuhalu woluhondelo omulumentu kehe oku na okukala e na omukiintu gwe mwene, nomukiintu kehe oku na okukala e na omulumentu gwe mwene.
3 Omulumentu kehe na gwanithile omukiintu gwe oompumbwe dhe. Osho wo nomukiintu na gwanithile omulumentu gwe oompumbwe dhe. Kehe gumwe oku na okugwanithila mukwawo oompumbwe dhe.
4 Omukiintu omuhokanwa ke shi omupangeli gwolutu lwe mwene, ihe omulume oye omupangeli gwalwo. Osho wo nomulumentu ke shi omupangeli gwolutu lwe mwene, ihe omukadhi oye omupangeli gwalwo.
5 Inamu idhilikathana, shila uuna mu uvathana, mu shi ninge okathimbo kowala, opo ethimbo ndyoka mu li longithe mokugalikana Kalunga. Konima yaashoka indeni kumwe ishewe pandjokana ngaashi shito, opo mwaa gwile memakelo lyaSatana, sho itaamu vulu okwiidhidhimika.
6 Shika itandi shi mu lombwele ando pamukalo gwoshipango, ihe opampito ndjoka nde yi pewa.
7 Onda hala, ando aantu ayehe ya kale ngaashi ngame; ihe omuntu kehe okwa pewa kuKalunga omagano gontumba, gumwe oongaka namukwawo oongeyaka.
8 Mboka inaamu ya moondjokana naaselekadhi otandi mu lombwele: Osho opala, ngele itamu yi moondjokana, opo mu fe ndje.
9 Ihe ngele itamu shi vulu, indeni moondjokana, oshoka okuya moondjokana okuhwepo ku vule okuhepekwa kehalo.
10 Mboka ye li moondjokana, otandi ya lombwele oshipango sha zi kOmuwa, kashi shi shandje mwene: Omukiintu ina henga po omulumentu gwe.
11 Ngele ote shi ningi, oku na okukala itaa yi we moondjokana nenge a hangane ishewe nomulumentu gwe. Omulumentu ina henga po nando omukadhi.
12 Aantu yalwe otandi ya lombwele omadhiladhilo gandje, haangoka gOmuwa: Omulumentu omukriste ngoka e na omukadhi kee shi omwiitaali, nomukadhi okwa zimina okukala naye, omulumentu ngoka ine mu henga po.
13 Omukiintu omukriste ngoka a hokanwa komulumentu kee shi omwiitaali nokwa zimina okukala naye, nena omukiintu ngoka ine mu henga po.
14 Oshoka omulumentu kee shi omwiitaali, ota vulu okutaambwa kuKalunga, sho a hangana nomukadhi omwiitaali. Osho tuu wo omukiintu kee shi omwiitaali, ota vulu okutaambwa kuKalunga, sho a hangana nomulumentu gwe omwiitaali. Ando okwa li hasho, ando uunona wawo otau talwa wa fa uunona waapagani, ihe ngashingeyi otau vulu okutaambwa kuKalunga.
15 Ihe ngoka kee shi omwiitaali, ngele okwa hala okuhenga po mukwawo ngoka omukriste, ne shi ninge. Miinima ya tya ngeyi omunandjokana omukriste, omulumentu nenge omukiintu, okwa manguluka okuhogolola; oshoka Kalunga okwe mu ithanene okukalamwenyo ku na ombili.
16 Meme ngoye omukriste, oto shi tseya ngiini kutya ito vulu okuhupitha omulumentu gwoye? Tate ngoye omukriste, oto shi tseya ngiini kutya ito vulu okuhupitha omukiintu gwoye?
17 Kehe gumwe na kale pamagano ngoka e ga pewa kOmuwa, a kale ngaashi a li, uuna a adhika keithano lyaKalunga. Ndika olyo eutho momagongalo agehe.
18 Kalunga ngele e ku ithana wa fukalekwa, ino kambadhala okulundulula efukaleko. Ngele wi ithanwa inoo fukala, ino ifukalekitha.
19 Okukala wa fukalekwa nenge inoo fukalekwa hasho shi na oshilonga. Shoka shi na oshilonga, osho okuvulika kiipango yaKalunga.
20 Kehe gumwe na kale pomuthika gwe mpoka a li, uuna a adhika keithano lyaKalunga.
21 Ngele owa li omupika sho Kalunga e ku ithana, kashi na mbudhi we. Ihe ngele ou na ompito yokumanguluka, shi ninga.
22 Oshoka omupika ngoka i ithanwa kOmuwa, a ninge omukriste, okwa mangululwa kOmuwa. Osho wo omumangululwa ngoka i ithanwa kuKristus, oye omupika gwe.
23 Kalunga okwe mu kulile niikulila yi na ondilo. Inamu ninga aapika yaantu.
24 Aamwameme, koshipala shaKalunga kehe gumwe na kale pomuthika mpoka a li, uuna i ithanwa.
25 Kombinga yaamboka inaaya ya moondjokana, inandi pewa oshipango kOmuwa, ihe omadhiladhilo gandje ongangoka nda silwa ohenda kOmuwa, oge shi kwiinekelwa.
26 Sho nda tala omathimbo ngaka omadhigu, otandi dhiladhila kutya, osho opala kehe omuntu, ngele ta kala pomuthika mpoka e li ngashingeyi.
27 Ngele ou li moondjokana, ino etha po omukiintu gwoye. Ngele owi ikalela, ino konga omukiintu.
28 Ihe ngele to hokana, ito yono; nosho wo omukadhona ngele ta hokanwa, ita yono. Ondi mu uvitile owala ohenda omoluudhigu womokukalamwenyo kwaamboka taa hokana.
29 Aamwameme, onda hala okutya: Ethimbo lyokukalamwenyo kwetu olyo efupi. Onkee ano mboka ya hokana, naa kale ya fa inaaya hokana.
30 Mboka taa lili, naa kale ya fa inaaya sa oluhodhi; mboka taa yolo, naa kale ya fa mboka inaaya nyanyukwa. Mboka taa ilandele sha, naa kale ya fa inaayi ilikolela sha.
31 Mboka taa lalakana niinima yomuuyuni mbuka, naa kale ya fa inaayi itula muyo. Oshoka uuyuni mbuka kau li kokule nokuhula po.
32 Ngame onda hala, mu kale mwaa na iimpwiyu. Omulumentu ngoka inaa hokana, oti ipyakidhile owala niilonga yOmuwa, oshoka ota kambadhala okwoopalela Omuwa.
33 Ihe omulumentu ngoka a hokana, oti ipyakidhile niinima yomuuyuni, oshoka okwa hala okwoopalela omukadhi,
34 onkee ano okwa mangwa koombinga adhihe mbali. Omukiintu inaa hokanwa nenge ngoka omukadhona okwi ipyakidhila niilonga yOmuwa, oshoka okwa hala oku mu pa olutu nombepo ye. Ihe omukiintu a hokanwa oti ipyakidhile niinima yomuuyuni mbuka, oshoka okwa hala okwoopalela omulumentu gwe.
35 Otandi popi ngeyi, oshoka onda hala oku mu kwatha, haku mu manga. Onde mu halela okulonga shoka oshiwanawa noshi li mondjila, mu wape okwiigandja moshilonga shOmuwa.
36 Kombinga yayaali ya adhika ya yalekathana e taa tokola, yi idhilike oondjokana, otandi ti: Omumati ngele ita vulu okwiidhidhimika, nena naa hokane. Ngele taa hokana, itaa yono.
37 Omumati ngoka u uvite kutya ota vulu okwiikalela inaa hokana, nopwaa na ethiminiko lyomuntu, ne shi ninge. Ngele ota vulu okwiipangela noku na etokolo, nena oto opaleke, ngele ita hokana.
38 Onkee ano omumati ngoka ta hokana omuyalekwa gwe, ota opaleke, naangoka itee shi ningi, sho a hala okwiikalela, ota ningi nawa unene.
39 Omukiintu a hokanwa ita vulu okumanguluka, manga omulume e na omwenyo. Ihe ngele a si, nena omukiintu a tya ngaaka okwa mangulukila okuhokanwa komulumentu gulwe, ihe oondjokana dha tya ngaaka odhi na okukala dhopakriste.
40 Ihe osho opala unene, ngele omukiintu a tya ngaaka ita yi we moondjokana. Ngaka ogo omadhiladhilo gandje ngoka tandi tala kutya onde ga pewa kOmbepo yaKalunga.
1 Ngashingeyi ote popi kombinga yonyama ya yambelwa iikalunga. Osho oshipu okudhiladhila kutya tseni atuheni otwa tseya, ohula oshike. Ihe okutseya otaku fala omuntu meinenepeko, nohole otayi tungu.
2 Omuntu ngoka ta dhiladhila kutya oshinima shontumba oku shi shi, ke na naanaa ontseyo ya gwana.
3 Ihe ngoka e hole Kalunga, okwa tseyika wo kuKalunga.
4 Kombinga yokulya onyama ndjoka ya yambelwa iikalunga, tse otwa tseyeni kutya iikalunga oyo iinima ihaayi kwatha sha. Tse otu shi shi kutya oku na owala Kalunga gumwe.
5 Oku na ngaa mbyoka haku tiwa “ookalunga”, ongele megulu nenge kombanda yevi. Ihe nando oku na “ookalunga” oyendji “naawa” oyendji,
6 tseni otu na owala Kalunga gumwe. Oye Tate yetweni, omushiti gwiinima ayihe, mungoka tu na ethikilo. Otu na wo Omuwa gumwe awike, Jesus Kristus, ngoka Kalunga e mu shititha iinima ayihe, notu li po omolwe.
7 Ihe haayehe ya tseya oshili ndjika. Aantu yamwe oyi igilila iikalunga. Onkee ano sigo onena ndjika ngele taa li onyama ya tya ngeyi, otaye yi dhiladhila kutya oya yambelwa iikalunga. Eiyuvo lyawo enkundi noyu uvite taa nyatekwa kiikulya ya tya ngaaka.
8 Iikulya itayi vulu nando oku tu hedhitha popepi naKalunga. Itatu kanitha sha, ngele itatu li iikulya mbyoka; itatu likola wo sha, ngele tatu yi li.
9 Kotokeni ano, emanguluko lyeni okutokola oshinima shika lyaa fale aantu mboka aankundi muulunde.
10 Oshoka omuntu ngoka e na eiyuvo enkundi moshinima shika, ngele ta mono ngoka e na owino, ta li iikulya motempeli yoshikalunga, omunkundi a tya ngaaka ita tsuwa omukumo okulya iikulya mbyoka ya yambelwa iikalunga?
11 Ano mukweni a tya ngaaka omunkundi, ngoka Kristus a si wo omolwe, ota kana molwowino woye.
12 Ngele tamu yono ngaaka kuyakweni mboka notamu nkundipaleke eiyuvo lyawo, otamu yono kuKristus.
13 Ngele iikulya yontumba otayi fala mukwetu muulunde, nena ngame kombinga yandje itandi li we onyama, opo ndaa fale mukwetu muulunde.
1 Kandi na emanguluko nani? Kandi shi omuyapostoli? Omuwa gwetu Jesus inandi mu mona nani? Ne kamu shi nani iiyimati yoshilonga shandje medhina lyOmuwa?
2 Nonando oku kale ku na yalwe itaa tala ndje omuyapostoli, ngame omuyapostoli gweni. Okuninga kweni aakriste okwo taku holola kutya ngame omuyapostoli.
3 Eipopilo lyandje kumboka taa nikanika ndje, olyo ndika:
4 Kandi na epitikilo okupewa iikulya nokunwa sha miilonga yandje?
5 Kandi na epitikilo okuninga, ngaashi aayapostoli yalwe taa vulu okuninga? Itandi vulu okweenda pamwe nomukiintu omukriste, ngaashi aamwayina yOmuwa aalumentu nosho wo Petrus haa vulu oku shi ninga?
6 Nenge tse naBarnabas otse atuke tu na okulonga, tu mone iipalutha?
7 Olye u uva nando olumwe omukwiita ti ifutile ye mwene oompumbwe dhomoshilonga she? Nenge omunepya ita li iiyimati yomepya lye? Nenge omusita ita li omahini ngoka ta kanda miimuna ye?
8 Haiholelwa mbika ayike tayi popile ndje, oshoka ompango wo otayi popi oshinima tuu shoka.
9 Otatu lesha mompango yaMoses: “Ino manga okana konani ndjoka tayi yungula nokulyatagulithwa iilya molupale.” Ngashingeyi Kalunga ota holola ando kutya oku na oshimpwiyu noonani?
10 Hatse ta popi nani menyolo ndika? Eeno, shika osha nyolwa omolwetu. Omupululi nomuteyi naa gwanithe iilonga yawo ye na etegameno kutya kehe gumwe ota ka mona oshitopolwa she miilya mbyoka, ngele ya pu okuyelwa.
11 Tse otwa kunu ombuto yopambepo mokati keni. Ne itamu vulu ando oku tu pa iikwatha yopalutu?
12 Ngele yalwe oye na epitikilo lyokutegelela okupewa kune, tse mbela itatu tegelele oshindji tu ya vule? Ihe tse inatu longitha ompito ndjika. Otse otwi idhidhimike moshinima kehe, opo twaa tule eimbo meuvitho lyelaka etoye tali popi Kristus.
13 Ne omu shi shi kutya aantu mboka haa longo iilonga yomotempeli, oye na okumona iikulya motempeli, naamboka haa yamba omayambo koshiyambelo, oye na okupewa oshitopolwa momayambo ngoka.
14 Osho wo Omuwa oku utha kutya mboka haa uvitha evaangeli, ya pewe kulyo oompumbwe dhawo dhesiku kehe.
15 Ihe ngame inandi longitha nando ompito yimwe yaandhika. Osho wo itandi nyola, opo ndi longithe oompito ndhika kombinga yandje mwene. Okusa okuhwepo kungame. Kaku na ngoka ta vulu okuninga eitango lyandje, li kale lyaa na oshilonga.
16 Kandi na owala epitikilo lyokwiitanga owala, sho handi uvitha evaangeli, ihe ondu uvite ethiminiko, ndi shi ninge. Iihuna yowala, ngele itandi uvitha evaangeli!
17 Oshoka ando okwa li tandi longo pahogololo lyandje mwene, ando ote vulu okutegelela, ndi pewe ondjambi yiilonga yandje. Ihe ngashingeyi itandi longo pahogololo lyandje mwene; oshilonga shika onde shi pewa, shi kale oshinakugwanithwa shandje.
18 Ano ondjambi yandje oyini? Ondjambi yandje oyo uuthemba wokuuvitha elaka etoye itee pewa sha noitandi ulike omapitikilo ngoka ndi na mokuuvitha kwandje.
19 Oshoka nando kandi li muupika waantu, ondi iningi omupika gwakehe gumwe, opo ndi likolele Kristus aantu oyendji.
20 Mokulonga mokati kAajuda onda kala ngaashi Omujuda, opo ndi likole Aajuda. Nonando ngame inandi pangelwa kompango yaMoses, ondi li kohi yompango.
21 Osho tuu wo, sho nda kala mokati kaapagani, onda kala ndaa na ompango yAaJuda, opo ndi ya likolele Kristus. Shika itashi ti, onda dhina ompango yaKalunga, oshoka ngame otandi pangelwa kompango yaKristus.
22 Sho nda kala mokati kaankundi meitaalo, onda kala nda fa omunkundi, opo ndi ya likolele Kristus. Onkee ano onda ningi ashihe shoka tandi shi vulu omolwaayehe, opo ndi hupithe yamwe yomuyo komukalo kehe tagu vulika.
23 Ayihe mbika otandi yi ningi omolwevaangeli, opo nangame wo ndi mone omayambeko ngoka taga zi mulyo.
24 Ne omu shi shi kutya aantu mboka taa ningi shanamutango, ayehe otaa matuka, ihe gumwe awike ta mono ondjambi yesindano. Nane wo matukeni ngaangoka, mu yi mone.
25 Omuthigathani kehe oha mono edheulo, nkene e na okuvulika koompango dhomethigathano. Oye ote shi ningi, a zalekwe oshishani shoka tashi ka yonuka, ihe tse otatu shi ningi, tu zalekwe oshishani shaaluhe.
26 Omolwaasho ngame ndi na okumatuka ndu ukilila ethikilo. Ngame onda fa omulumentu enyakwa ihaa palutha mokudhenga noongonyo.
27 Onda kolondeke olutu lwandje noku lu dhenga, ndi lu vulikithe, opo ndaa ninge ngoka handi uvithile yakwetu, ngame mwene e tandi ekelwahi.
1 Onkee ano aamwameme, onda hala oku mu dhimbulutha shoka sha li sha ningilwa ootate, sho ya li ya landula Moses. Ayehe oya li megameno lyoshikogo noinaa mona oshiponga mokutokola Efuta etiligane.
2 Ayehe oya shashelwa moshikogo nomefuta mokulandula Moses.
3 Oyo oya lile ayehe oshikwiila shimwe shopambepo
4 noya nwine okunwa kumwe kwopambepo; oshoka oya nu momeya ga zi memanya lyopambepo ndyoka lye ende pamwe nayo; nemanya ndyoka oKristus.
5 Onkene tuu oyendji yomuyo Kalunga ine ya hokwa, ihe omidhimba dhawo odha halakanene nombuga ayihe.
6 Ano iinima ayihe ya tya ngeyi oyo iiholelwa yoku tu londodha, twaa longe iilonga iiwinayi, ngaashi yo ya ningile.
7 Inatu simaneka iikalunga, ngaashi yamwe yomuyo ye shi ningi, nongaashi enyolo tali ti: “Aantu oya kuutumba e taa li yo taa nu noya tutula uudhano.”
8 Inatu hondeleni, ngaashi yamwe yomuyo ya ningi; onkee oya yonwa po omayuvi omilongo mbali nagatatu mesiku limwe.
9 Inatu hindeni Omuwa, ngaashi yamwe yomuyo ye shi ningi e taa dhipagwa komayoka.
10 Inamu ngungutula, ngaashi yamwe yomuyo ye shi ningi e taa yonwa po komuyengeli gweso.
11 Iinima ayihe mbika oye ya adha, yi gune aantu yalwe noya nyolwa, yi tu londodhe. Oshoka otu li methimbo, uuna ehulilo li li popepi.
12 Ngoka ta dhiladhila kutya okwa thikama, na kotoke, kaa gwile po.
13 Emakelo ndyoka lye mu adha, olyo tuu ndyoka hali adha aantu ayehe, Kalunga oku shi kwiinekelwa. Onkee ite mu ethele memakelo li vule oonkondo dheni. Ihe ngele ta pitika, mu makelwe, ote mu pe ompito okuza mo mulyo noonkondo dhoku li humbata.
14 Onkee ano, ookuume aaholike, inamu simaneka iikalunga.
15 Otandi popi, ngaashi tandi lombwele aantu aanandunge; tokoleni ne yene okupopya kwandje.
16 Oshitenga shomayambeko shono hatu hambelelele Kalunga nohatu shi nu nokupaathana, ihatu nu nani ombinzi yaKristus? Noshikwiila shono hatu topola, ihatu topolelathana nani olutu lwaKristus, uuna tatu shi li?
17 Sho hatu li oshikwiila shimwe ashike, nonando otu li oyendji, otashi ulike kutya otse olutu lumwe, oshoka ohatu li oshikwiila shimwe.
18 Ipuleni, Aaisraeli mboka ya pitikwa okulya momayambo ngoka taga etelwa Kalunga, oye na ekwatathano neyambelo.
19 Onda hala okutya shike? Oshikalunga shoshene niikulya mbyoka tashi etelwa, otayi tu kwatha tuu sha?
20 Aawe, itayi kwatha sha. Onda hala okutya: omayambo ngoka taga yambelwa pomayambelo gopashipagani, itaga pewa Kalunga, ihe otaga pewa oombepo dhoompwidhuli. Ihe ngame inandi hala, mu kale mu na uukumwe noompwidhuli.
21 Itashi vulika, mu nwe moshitenga shOmuwa e tamu ka nwa ishewe moshitenga shoompwidhuli. Nenge mu lye koshililo shOmuwa e tamu ka lya ishewe koshililo shoompwidhuli.
22 Nenge otwa hala okugeyitha Omuwa? Otu na tuu oonkondo dhi vule dhe?
23 Aantu yamwe otaa dhiladhila kutya oya pitikwa okuninga shaa shoka ye shi hala. Eeno osho, ihe haayihe iiwanawa. Ayihe otayi vulika okuningwa, ihe haayihe tayi kwatha.
24 Inaku kala nando omuntu ta longo owala shoka she mu opalela, ihe na tale wo shoka tashi opalele mukwawo.
25 Ne omwa pitikwa okulya ashihe tashi landithwa puutomeno, itamu pumbwa okupula sha omolweiyuvo lyeni.
26 Oshoka nenyolo wo otali ti: “Evi alihe olyOmuwa nakehe shoka shi li mo.”
27 Omuntu kee shi omwiitaali ngele te ku ithana, u lye koshililo pamwe naye, nowa tokola oku shi ninga, lya ashihe shoka to pewa. Ito pumbwa okupula sha omolweiyuvo lyoye.
28 Ihe uuna to lombwelwa taku tiwa: “Iikulya mbika oya yambelwa iikalunga,” ino lya iikulya ya tya ngaaka omolweiyuvo lyaangoka e ku lombwele nolyoye mwene.
29 Shoka shi na oshilonga mpaka, kashi shi eiyuvo lyoye mwene, ihe olyamukweni. Omuntu gumwe ota vulu okupula ta ti: “Omolwashike okukala kwandje ku na okupangelwa keiyuvo lyamukwetu?
30 Ngele ohandi hambelele Kalunga molwiikulya yandje, omolwashike ndi na okupewa uusama molwiikulya handi yi hambelelele Kalunga?”
31 Onkee ano mwaashihe shoka tamu ningi, ngele tamu li nenge tamu nu, longeni ayihe nokusimanekitha Kalunga.
32 Kotokeni, mwaa pukithe Aajuda naapagani nenge egongalo lyaKalunga.
33 Holelii ndje. Ngame itandi landula nando shoka sho opalela ndje, ihe ooshoka sho opalela yakwetu ayehe, ya hupithwe.
1 Holelii ndje, oshoka ngame otandi holele Kristus.
2 Otandi mu pandula, sho hamu dhimbulukwa ndje miinima ayihe nomwa dhiginine elongo lyandje, ngaashi nde li mu pe.
3 Onda hala, mu kale mwa tseya kutya Kristus oye omutse gwomulumentu kehe, omulumentu oye omutse gwomukadhi, naKalunga oye omutse gwaKristus.
4 Omulumentu kehe ngoka ta galikana nenge tu uvitha melongelokalunga lyaayehe a zala sha komutse, oye ota shekitha Kristus.
5 Nomukiintu kehe ngoka ta galikana nenge tu uvitha melongelokalunga lyaayehe inaa zala sha komutse, ota shekitha omulume. Kapu na eyooloko pokati ke naangoka a kululwa omutse aguhe.
6 Omukiintu ngele ita siikile omutse gwe, nena na kululwe omutse aguhe. Osho ohoni yowala, ngele omukiintu ta kululwa omutse aguhe, nenge omafufu taga tetwa, ga ninge omafupi, ihwepo a siikile omutse gwe.
7 Omulumentu ita pumbwa okusiikila omutse gwe, oshoka oye efano nomuhololi gwesimano lyaKalunga. Ihe omukiintu ota holola esimano lyomulumentu.
8 Oshoka Kalunga sho a shiti omulumentu, ine mu kutha momukiintu, ihe omukiintu oye a kuthwa momulumentu.
9 Osho wo omulumentu ina shitilwa omukiintu, ihe omukiintu oye a shitilwa omulumentu.
10 Omolwaayengeli omukiintu oku na okusiikila omutse gwe, opo a holole kutya oku li mepangelo lyomulumentu gwe.
11 Mokukalamwenyo kwetu mOmuwa omukiintu oku li po omolwomulumentu nomulumentu oku li po omolwomukiintu.
12 Oshoka ngaashi omukiintu a li a kuthwa momulumentu, osho tuu wo omulumentu okwa valwa komukiintu, niinima ayihe ohayi zi kuKalunga.
13 Tokoleni ne yene, ngele osho opala, omukiintu ta galikana Kalunga melongelokalunga lyaayehe kee na sha komutse?
14 Ndishi nuunshitwe otau mu ulukile kutya inashi opala, omulumentu a kale e na omafufu omaleeleka,
15 ihe komukiintu osho esimano. Oshoka omukiintu ngoka e na omafufu omale, otage mu siikile nawa.
16 Ngele oku na ngoka e na omaludhi moshinima shika, ngame otandi ti ashike kutya tse yene nosho omagongalo gaKalunga katu na we omukalo gulwe hatu gu longitha melongelokalunga.
17 Moku mu lombwela omalombwelo ngaka taga landula mpano, itandi vulu we oku mu pandula. Oshoka mokugongala kweni ohamu longo uuwinayi u vulithe puuwanawa.
18 Tango ondu uvu kutya miigongigongalo yeni omu na oongundu dha topoka; nokombinga onde shi itaala kutya oshoshili.
19 Kape na omalimbililo, omatopoko ga tya ngaaka oge na okukala mokati keni, opo mboka ye li mo ye shi kwiinekelwa, ya holoke.
20 Oshoka ngele mwa gongala, ihamu shi ningi, opo mu lye Uulalelo wOmuwa.
21 Oshoka mokulya kweni ohamu kala ngeyi kutya yamwe ye na iikulya yawo yene, manga pu na yamwe ya sa ondjala nayamwe ya kolwa.
22 Ne kamu na omagumbo geni, moka tamu vulu okulya nokunwa? Nenge omwa dhina egongalo lyaKalunga nomwa hala okusitha ohoni aantu mboka yaa na sha? Ngashingeyi omwa tegelela, ndi mu lombwele shike? Omwa tega, ndi mu pandule andola? Aawe, mpaka itandi mu pandula.
23 Oshoka elongo ndyoka nde li mu etele, onde li pewa kOmuwa nokutya: Omuwa Jesus uusiku mbwiyaka a gwaalekwa, okwa kutha oshikwiila,
24 okwa hambelele, okwe shi pambula nokwa ti: “Shika osho olutu lwandje talu gandjwa omolweni. Shi ningeni nokudhimbulukwa ndje.”
25 Osho tuu wo okwa kutha oshitenga, sho ya mana okulya uulalelo, e ta ti: “Oshitenga shika osho ehangano epe tali kolekwa nombinzi yandje. Uuna tamu nu mo, shi ningeni nokudhimbulukwa ndje.”
26 Oshoka kehe esiku tamu li oshikwiila shika notamu nu moshitenga shika, ohamu hokolola eso lyOmuwa, sigo ote ya.
27 Onkee ano ngoka ta li oshikwiila shOmuwa nota nu moshitenga she pamukalo omwiinayi, oye oku na oondjo molwolutu nombinzi yOmuwa.
28 Kehe gumwe ni ikonakone ye mwene, opo ihe ta vulu okulya oshikwiila shika nokunwa mo moshitenga shika.
29 Oshoka ngoka ta li nota nu inaa yoolola kutya olutu lwOmuwa otalu ti shike, oti iyetele epangulo mokulya nokunwa kwa tya ngaaka.
30 Shika osho sha ningi oyendji yomokati keni, ya kale taa alukwa, yamwe aankundi nayamwe oya sa.
31 Ngele tatu ikonakona tse yene tango, itatu adhika kepangulo lyaKalunga.
32 Tse otwa pangulwa notwa putudhwa kOmuwa, opo twaa ka geyelwe pamwe nuuyuni.
33 Aamwameme, ngele tamu gongala, mu lye koshililo shOmuwa, tegelelathaneni.
34 Ngele ku na ngoka a sa ondjala, na lye kaandjawo, opo mokugongala kweni mwaa iyetele epangulo lyaKalunga. Iinima iikwawo otandi yi opaleke, uuna tandi ke ya kune.
1 Ano ngashingeyi otandi popi kombinga yomagano ngoka Ombepo Ondjapuki te ga gandja. Aamwameme, onda hala, mu tseye oshili ayihe kombinga yago.
2 Ne omu shi shi kutya, sho mwa li aapagani, omwa li hamu pangelwa kiikalunga ya sa e tayi mu pukitha.
3 Ne omu na okutseya kutya kaku na nando omuntu ta wilikwa kOmbepo yaKalunga, ta vulu okutya: “Jesus na kale a thingwa!” No kaku na omuntu ta vulu okuhempulula: “Jesus oye Omuwa,” ngele ita wilikwa kOmbepo Ondjapuki.
4 Omagano gopambepo oge li po ogendji gi ili nogi ili, ihe Ombepo gumwe awike te ga gandja.
5 Oku na oompito dhomayakulo dhi ili nodhi ili, ihe Omuwa ngoka ta yakulwa, gumwe awike.
6 Oku na omaunkulungu gi ili nogi ili gokuyakula, ihe Kalunga gumwe awike ngoka ta pe kehe gumwe uunkulungu momayakulo agehe.
7 Eholoko lyOmbepo momuntu kehe oli ili, ihe ayihe otayi ningi ekwatho lyaayehe.
8 Omuntu gumwe ota pewa kOmbepo okupopya nuunongo, manga mukwawo ta pewa okutseya kOmbepo tuu ngoka.
9 Omuntu gumwe ota pewa eitaalo kOmbepo, manga mukwawo ta pewa oonkondo dhokwaaludha aavu kOmbepo tuu ngoka.
10 Omuntu gumwe ota pewa omagano gokulonga iikumithalonga, gumwe ishewe ota pewa omagano gokupopya elaka lyaKalunga nagumwe ota pewa omagano gokumona eyooloko pokati komagano ga za mOmbepo Ondjapuki naangoka inaaga za mOmbepo Ondjapuki. Omuntu gumwe ota pewa omagano gokupopya omalaka gaa shiwike, nagumwe ota pewa omagano goku ga fatulula.
11 Ihe ombepo oye tuu ngoka gumwe, ngoka ta longo ayihe mbika, oye ta gandja omagano gi ili kukehe gumwe pahalo lye mwene.
12 Oshoka Kristus okwa fa olutu lu na iilyo oyindji, ihe lumwe aluke, nonando olwa tungwa miilyo yi ili noyi ili.
13 Osho tuu wo tseni atuheni, Aajuda naapagani, aapika naavalwa, otwa shashelwa molutu lumwe kOmbepo tuu ngoka notwa nwethwa Ombepo tuu ngoka gumwe.
14 Oshoka olutu inalu tungwa noshilyo shimwe, ihe olwa tungwa niilyo oyindji.
15 Ompadhi ando tayi ti: “Ngame kandi shi gwomolutu, oshoka kandi shi oshikaha,” shika itashi yi ningi, yi kale yaa shi yomolutu.
16 Nongele okutsi taku ti: “Ngame kandi shi gwomolutu, oshoka kandi shi eho,” shika itashi ku ningi, ku kale kwaa shi kwomolutu.
17 Ngele ando olutu aluhe olwa li eho, otalu vulu ngiini okuuva? Nongele ando olwa li okutsi, otalu vulu tuu okunika?
18 Onkee ano Kalunga oye a tula iilyo yi ili noyi ili molutu pahalo lye mwene.
19 Oshilyo shimwe itashi vulu okuninga olutu.
20 Onkee ano olutu olwo lumwe niilyo oyindji.
21 Onkee ano eho itali vulu okulombwela oshikaha kutya inali shi pumbwa. Nomutse itagu vulu okulombwela oompadhi kutya inagu dhi pumbwa.
22 Itashi vulika! Iilyo mbyoka tatu yi tala ya fa iinkundi, olutu olwe yi pumbwa unene.
23 Naambyoka tatu tala ya fa yaa na esimano, oyo ohatu yi sile oshimpwiyu. Naambyoka twa sa ohoni, ohatu yi siikile nawa
24 shi vulithe iilyo yetu mbiyaka yo opala. Kalunga mwene okwa tula kumwe omalutu getu pamukalo gwa tya ngeyi kutya okwa gandja esimano kiilyo mbyoka yaa li na.
25 Onkee ano kamu na etopoko molutu, ihe iilyo yalwo yi ili noyi ili ohayi silathana oshimpwiyu.
26 Oshilyo shimwe shomolutu ngele tashi ehama, nena iilyo ayihe otayi ehama pamwe nasho. Nongele shimwe otashi simanekwa, nena iilyo ayihe otayi nyanyukwa pamwe nasho.
27 One olutu lwaKristus, nakehe gumwe oye oshilyo shomolutu tuu ndoka.
28 Kalunga okwa langeke ayehe megongalo pomahala gawo. Yamwe oya ningi aayapostoli, yamwe aahunganeki, yamwe aalongihapu. Omu na wo mboka haa longo iikumithalonga, taku landula mboka ya pewa oonkondo dhokwaaludha, okuyakula, okuwilika nenge okupopya omalaka gaa shiwike.
29 Haayehe aayapostoli nenge aahunganeki nenge aalongihapu. Haayehe ye na oonkondo dhokulonga iikumithalonga,
30 nenge ye na omagano gokwaaludha omavu, nenge gokupopya omalaka gaa shiwike nenge goku ga fatulula.
31 Ihaleleni omagano ngoka ge vule omakwawo. Oshiholelwa oshiwanawa shi vule ayihe, osho shika tashi landula mpaka.
1 Nando ndi popye omalaka gaantu nogaayengeli, ihe kandi na ohole, nena okupopya kwandje okwa fa owala ekudhilo lyokangendjo taka tono nenge lyongendjo tayi ngelengendja.
2 Nando ondi kale ndi na omagano gokupopya elaka lyaKalunga nondi na owino wokutseya iiholekwa ayihe; nando ondi kale ndi na eitaalo tali vulu okudhikula po oondundu, ihe kandi na ohole, ongame oshinima showala.
3 Nando ondi gandje po iinima ayihe, nenge ndi gandje olutu lwandje, lu fikwe po, ihe kandi na ohole, itashi kwatha ndje sha.
4 Ohole ohayi idhidhimikile ayihe noyi na olukeno. Ohole ihayi si efupa, ihayi tuwalala.
5 Ohole ihayi holoka nayi, ihayi kongo shayo yene, ihayi ningi omwenyo omwiinayi, ohole ihayi dhimbulukwa uuwinayi ye u ningilwa.
6 Ohole ihayi nyanyukilwa uugoyoki, ihe ohayi nyanyukilwa oshili.
7 Ohole ihayi tonyala, ihe otayi itaale, tayi tegamene e tayi idhidhimike sigo okehulilo.
8 Ohole itayi hulu po. Okupopya elaka lyaKalunga itaku kala sigo aluhe, omagano gokupopya omalaka gaa shiwike itaga kala sigo aluhe, nosho wo okutseya otaku hulu po.
9 Oshoka okutseya nokupopya kwetu elaka lyaKalunga inaku gwana.
10 Ihe shono sha gwana sha pwa ngele tashi ya, nena shono inaashi gwana, otashi hulu po.
11 Ngame sho nda li okanona, onda popi, nda dhiladhila nonda yeleke pakanona; ihe sho nda ningi omulumentu, onde etha ayihe yopakanona.
12 Shoka tu wete ngashingeyi osha fa owala efano inaali yela nawa lyomuntu ngoka ti italele moshiitalelo, ihe esiku ndiyaka otatu ka mona koshipala noshipala. Ngashingeyi okutseya kwandje inaku gwana, ihe esiku ndiyaka otandi ka tseya nda gwana, ngaashi naanaa Kalunga a tseya ndje nawa.
13 Ihe ngashingeyi otaku kala mbika itatu: eitaalo, etegameno nohole, ihe oshinima oshinene kwaayihe mbika osho ohole.
1 Lalakaneni, mu kale mu na ohole. Ihaleleni omagano gopambepo, unene omagano gokupopya elaka lyaKalunga.
2 Omuntu ngoka ta popi omalaka gaa shiwike, ita lombwele aantu, ihe ota lombwele Kalunga. Oshoka kaku na ngoka u uvite ko shoka ta ti. Ye ota popi iiholekwa koonkondo dhOmbepo.
3 Ihe ngoka ta popi elaka lyaKalunga, ota lombwele aantu note ya pe ekwatho, omukumo netalaleko.
4 Omuntu ngoka ta popi omalaka gaa shiwike, oti itungu owala ye mwene, ihe ngoka ta popi elaka lyaKalunga, ota tungu egongalo alihe.
5 Onda hala, ando amuhe mu popye omalaka gaa shiwike; ihe unene onda hala, ando amuhe mu pewe omagano gokupopya elaka lyaKalunga. Oshoka omuntu ngoka ta popi elaka lyaKalunga, oku vule ngoka ta popi omalaka gaa shiwike, unene ngele kapu na gulwe ta vulu okufatulula shoka ta popi, opo egongalo alihe li tungwe.
6 Aamwameme, ando ondi ye kune tandi popi omalaka gaa shiwike, otashi mu kwatha tuu sha? Itashi mu kwatha sha, ngele kandi na oku mu pa ehololo lyaKalunga nenge owino washa nenge elaka lya zi kuKalunga nenge elongo lyasha.
7 Niihikomwa wo mbyoka yaa na omwenyo, ngaashi ohiya nokashandja, oku na tuu omuntu ta vulu okutseya ewi ndyoka tali hikwa, ngele omuhiki ita hiki nawa?
8 Nosho tuu wo, ngele oku na ngoka ta hiki enkuma lyokulondodha aantu, ya ye kiita, ndele ita hiki ewi lya yela, olye ta vulu okwiilongekidhila iita?
9 Onda hala okutya: omuntu otu uvu ko ngiini, ngele mokupopya kweni omalaka gaa shiwike iitya yeni inayi yela? Oohapu dheni otadhi kanene owala mombepo.
10 Muuyuni omu na omalaka ogendji gi ili nogi ili, ihe kaku na nando olimwe ihaali uvika ko.
11 Ihe ngele elaka ndyoka tali popiwa kandi li shi, nena omuntu ngoka te li popi, otandi mu tala omukwiilongo, ngaashi naye wo ta tala ndje omukwiilongo.
12 Ano mokulalakanena kweni omagano ngoka taga gandjwa kOmbepo, unene ihaleleni omagano ngoka taga tungu egongalo alihe.
13 Omuntu ngoka ta popi omalaka gaa shiwike, na galikane Kalunga, e mu pe omagano gokufatulula omalaka ngoka shoka taga ti.
14 Oshoka uuna tandi galikana nokupopya omalaka, nena ombepo yandje oyo ayike tayi galikana, ihe omadhiladhilo gandje itagi itula mo.
15 Ondi na okuninga ngiini ano? Ondi na okugalikana nombepo yandje nosho wo nomadhiladhilo gandje. Otandi imbi nombepo yandje nosho wo nomadhiladhilo gandje.
16 Ngele oto galikana Kalunga nombepo yoye ashike, nena mukweni ngoka ihaa popi omalaka, ota vulu ngiini okukoleka egalikano lyoye lyehambelelo a tye, “Amen?” Ita vulu okuuva ko shoka to ti.
17 Nonando omagalikano goye gokuhambelela Kalunga omawanawa, mukweni itage mu kwatha sha.
18 Otandi pandula Kalunga, sho ndi mu vule amuhe mokupopya omalaka gaa shiwike.
19 Ihe melongelokalunga lyaayehe okupopya iitya itano yu uvitike oshi vulile ndje okupopya iitya omayuvi yaa shiwike, opo ndi vule okulonga yalwe.
20 Aamwameme, inamu kala mwa fa uunona mokudhiladhila. Kombinga yuuwinayi kaleni mwa fa uunona, ihe ningeni aakuluntu mokudhiladhila.
21 MOmanyolo otamu tiwa: “Otandi ka lombwela aantu mbaka, Omuwa osho ta ti: Otandi ke ya lombwela momakana gaantu taa popi omalaka omakwiilongo. Otandi ka popitha omilungu dhaakwiilongo. Ihe nando ongaaka, aantu yandje itaa ka pulakena ndje.”
22 Onkee ano omagano gokupopya omalaka gaa shiwike ogo endhindhiliko lyaamboka inaa itaala, halyaamboka yi itaala. Ihe omagano gokupopya elaka lyaKalunga ogo endhindhiliko lyooyitaali, halyaamboka yaa shi ooyitaali.
23 Ngele ano egongalo alihe tali gongala, nangele gumwe ota tameke okupopya omalaka gaa shiwike, nena yakweni mboka ihaa popi omalaka nosho mboka kaaye shi ooyitaali, ngele taye ya mo, otaye mu dhiladhilile ngiini? Ndishi otaa ti: “Omwa piyagana?”
24 Ihe uuna ayehe taa popi elaka lyaKalunga, e tamu ya omuntu ini itaala nenge ngoka ihaa popi omalaka, nena ota hololelwa oondjo dhe keuvitho lyu uvitike.
25 Omadhiladhilo ge ngoka ga holama, otaga etwa puuyelele, nota tameke okutsa oongolo koshipala shaKalunga e ta ti: “Eeno, Kalunga oku li mpaka mokati keni.”
26 Aamwameme, onda hala okupopya shike ano? Sho hamu gongala melongelokalunga, ohamu kala ngeyi: Gumwe oti imbi eimbilo, gumwe ota longo yakwawo, gumwe oku na ehololo lyaKalunga, gumwe ota popi omalaka gaa shiwike namukwawo ota fatulula shoka taga ti. Kehe shimwe oshi na okukala ekwatho lyegongalo.
27 Melongelokalunga ngele omu na gumwe ta popi omalaka gaa shiwike, nena yaali nenge yatatu otaa vulu okupopya wo melandulathano ewanawa, ihe omu na okukala gumwe ta fatulula shoka taa ti.
28 Ihe ngele kapu na omuntu ta vulu okufatulula, nena inaku kala nando ogumwe ta popi megongalo, shila na kale owala ta popi puye mwene nenge ta popi kuKalunga.
29 Yaali nenge yatatu mboka ya pewa elaka lyaKalunga, naa popye, manga yakwawo yalwe taa konakona shoka taa popi.
30 Ihe gumwe gwaamboka ya kuutumba ngele okwa pewa elaka kuKalunga, nena ngoka a adhika ta popi, na mwene manga.
31 Amuhe otamu vulu okupopya elaka lyaKalunga, ihe shi ningeni koogumwe nagumwe, opo ayehe yi ilonge noya tsuwe omukumo.
32 Omagano gokupopya elaka lyaKalunga oge na okukalwa nago nawa komupopi.
33 Oshoka Kalunga ine tu ithanena okukala kwaa na elandulathano, ihe okukala tu na ombili. Momagongalo agehe gaantu yaKalunga omu na okukala omukalo nguka:
34 Aakiintu naa kale ya mwena miigongi yegongalo. Inaa pitikwa okupopya; ongaashi ompango yAajuda tayi ti kutya kaye na okuwilika.
35 Ihe ngele oya hala okutseya sha, naa pule aalumentu yawo megumbo. Omukiintu ngoka ta popi moshigongi shegongalo, oti isitha ohoni.
36 Nenge one amuke aapopi yoohapu dhaKalunga? Nenge one amuke mu na okupopithwa kudho?
37 Ngele oku na ngoka ti itala kutya oye omutumwa gwaKalunga nenge e na omagano gopambepo, oku na okutseya kutya mpaka otandi mu nyolele shoka sha zi kOmuwa.
38 Ngele ke na ko nasha nasho, osho tuu wo nOmuwa ke na ko nasha naye.
39 Aamwameme, ihaleleni okupopya elaka lyaKalunga, ihe inamu indika ngoka ta popi omalaka gaa shiwike.
40 Kehe shimwe nashi ningwe palandulathano nopamukalo omwaanawa.
1 Aamwameme, onda hala, ndi mu dhimbuluthe kombinga yelaka etoye ndyoka nde mu uvithile, ndyoka mwa taamba nokulyo okwi ikwatalela eitaalo lyeni.
2 Olyo evaangeli, ohapu ndjoka nde mu uvithile. Olyo otali mu hupitha, ngele tamu li dhiginine, ngele inamu itaala osima yowala.
3 Ngame onde mu tseyithile oshinima shi vule ayihe, ngaashi ngame nde shi pewa wo kutya Kristus okwa si omolwoondjo dhetu, ongaashi sha nyolwa mOmanyolo;
4 Okwa fumvikwa e ta yumudhwa kuusi mesiku etitatu, ngaashi kwa nyolwa mOmanyolo;
5 okwi ihololele Petrus, nokonima aayapostoli ayehe omulongo nayaali.
6 Nena okwi ihololele ishewe aalanduli ye ye vule omathele gatano polumwe. Oyendji yomuyo oye na omwenyo natango, nonando yamwe oya sa.
7 Nena okwi ihololele Jakob nokonima aayapostoli ayehe.
8 Hugunina okwi ihololele ndje wo, nonando ngame onda fa omuntu ngoka a pononwa.
9 Oshoka ngame ondi vulike kaayapostoli ayehe noinandi gwana, ndi ithanwe omuyapostoli, oshoka onda tidhaganene egongalo lyaKalunga.
10 Ihe omolwesilohenda lyaKalunga ngame ondi li ngaashi ndi li, nesilohenda lye inali kala lyaa na oshilonga kungame. Ihe onda longo unene ndi vule aayapostoli yalwe ayehe, nonando hakungame mwene nda vulu oku shi ninga, ihe esilohenda lyaKalunga lya longitha ndje.
11 Ano kashi na mbudhi kutya olye te shi ningi, ngele ongame nenge oyo, shika osho hatu uvitha, nomwe shi itaala.
12 Ano sho tatu uvitha kutya Kristus okwa yumudhwa kuusi, ongiini ano, sho ku na yamwe taa ti kutya aasi itaa ka yumudhwa kuusi?
13 Ngele oshinima sha tya ngawo oshoshili, nena otashi ti, Kristus wo ina yumudhwa;
14 nongele Kristus ina yumudhwa kuusi, nena katu na sha shokuuvitha, nane kamu na sha shokwiitaala.
15 Nena otatu lundile Kalunga, sho tatu ti, okwa yumudha Kristus kuusi, ye ine mu yumudha, ngele aasi itaa yumudhwa.
16 Oshoka ngele aasi itaa yumudhwa kuusi, nena naKristus wo ina yumudhwa.
17 Nongele Kristus ina yumudhwa kuusi, nena eitaalo lyeni kali na oshilonga, nane omwa kanena natango muulunde.
18 Nena ando otashi ti kutya naamboka ya sa nale yo yi itaala Kristus, oya kana.
19 Ngele etegameno lyetu muKristus oshinima shokombanda yevi owala, inaaku tegelelwa we sha shilwe, nena tse aantu aakweyi tu vulike kaantu ayehe.
20 Ihe oshili oyo ndjika: Kristus okwa yumudhwa kuusi. Shika otashi koleke kutya mboka ya kotha muusi ngashingeyi, otaa ka yumudhwa wo.
21 Oshoka ngaashi eso lye ya muuyuni omolwomuntu gumwe, osho neyumuko wo otali ningwa omolwomuntu gumwe.
22 Oshoka ngaashi aantu ayehe ye na okusa omoluukumwe wawo naAdam, osho wo aantu ayehe otaa ka yumudhwa omolwuukumwe wawo naKristus.
23 Ihe kehe gumwe opalufo lwe: Omutango kwaayehe oKristus, notaku landula mboka yaKristus, uuna ndoka te ke ya.
24 Nena otaku ya ihe ehulilo; Kristus ota ka sinda ihe aapangeli yomombepo, omapangelo noonkondo nota ka gandja oshilongo kuTate Kalunga.
25 Oshoka Kristus oku na okupangela, sigo Kalunga a sindi aatondi ayehe e te ya tula kohi yoompadhi dhaKristus.
26 Omutondi gwahugunina e na okusindwa, oye eso.
27 Oshoka enyolo otali ti: “Kalunga okwa tula iinima ayihe kohi yoompadhi dhaKristus.” Shika osha yela kutya iitya mbika “iinima ayihe” inayi kwatela mo Kalunga ye mwene, ngoka ta tula iinima ayihe kohi yoompadhi dhaKristus.
28 Ihe uuna iinima ayihe ya tulwa mepangelo lyaKristus, nena Omwana oti itula wo ye mwene kohi yepangelo lyaKalunga, ngoka a tula iinima ayihe kohi yepangelo lye; naKalunga ota ka ninga oye awike omupangeli gwaayihe.
29 Ihe ongiini kombinga yaantu mboka taa ishashitha medhina lyaasi? Otashi ya kwatha shike? Ngele aasi itaa ka yumudhwa, ngaashi taa ti, omolwashike tayi ishashitha medhina lyaasi?
30 Natse wo omolwashike tatu itula miiponga otundi kehe?
31 Aamwameme, ngame onda taalelwa keso esiku kehe. Otandi vulu okupopya ngeyi, oshoka ondu uvite uuntsa omolweni mokukalamwenyo kwetweni muKristus Jesus, Omuwa gwetu.
32 Ngele muEfeso onda kondjele pantu niilikama, osha kwatha ndje shike? Ngele aasi itaa ka yumudhwa, nena “Tu lyeni tse tu nweni, oshoka ngula otatu si”, ngaashi eyele tali ti.
33 Inamu pukithwa. “We ende nombudhi, nangoye oto ningi ombudhi.”
34 Ningeni aanandunge ne mu ethe uulunde. Otandi shi popi oku mu sitha ohoni kutya yamwe yomune inaa tseya Kalunga.
35 Aantu yamwe otaa pula taa ti: “Otashi vulika ngiini, aasi ya yumudhwe? Otaa ka kala ye na omalutu ga tya ngiini?”
36 Aagoya ne! Uuna to kunu ombuto mevi, ndishi ihayi mene, manga inaayi sila mo?
37 Shoka to kunu mevi, osho omuma yowala, ongele oyehangu nenge oyoludhi lulwe, kayi shi oshimeno shoshene shoka sha koka.
38 Kalunga ota pe omuma ya tya ngaaka omuno, ngaashi a hala; kehe tuu omuma ote yi pe omuno gwayo.
39 Onyama yiinamwenyo ayihe inayi faathana; onyama yaantu oyi ili, yiimuna noyiiyamakuti oyi ili, yoondhila oyi ili noyoohi oyi ili.
40 Oku na omalutu gomegulu nomalutu gokevi; eadhimo lyomalutu gomegulu oli ili, neadhimo lyomalutu gokevi oli ili,
41 etango oli na eadhimo lyalyo li ili, lyomwedhi oli ili nolyoonyothi oli ili, nomokati koonyothi dhodhene omu na omayooloko.
42 Osho naanaa tashi ka kala mokuyumudhwa kwaasi. Mevi otamu pakwa olutu lweyonuuko, mokuyumudhwa tamu zi olutu lwokwaayonuuka.
43 Otamu pakwa olutu lwa shunduka, ihe olutu lwa yumudhwa olwa sheneka. Otamu pakwa olutu luunkundi, mo tamu yumudhwa olutu luukolele.
44 Olutu ndoka talu pakwa, otalu vulu okugumwa, ihe ndoka lwa yumudhwa, otalu ka kala lwopambepo. Ngaashi ku na olutu talu vulu okugumwa, osho wo oku na olutu lwopambepo.
45 Oshoka enyolo otali ti: “Omuntu gwotango Adam okwa ningi omunamwenyo.” Adam ngoka a hugunine oye Ombepo tayi gandja omwenyo.
46 Shoka shopambepo hasho shotango, ihe ooshoka tashi vulu okugumwa, opo ihe shoka shopambepo.
47 Adam gwotango okwa shitwa montsi yevi; Adam omutiyali okwa zi megulu.
48 Aantu mboka yokevi oya faathana naangoka a shitwa montsi yevi; mboka yomegulu oya faathana naangoka a za megulu.
49 Ngaashi twa zala uukwatya womuntu ngoka a shitwa montsi yevi, osho wo tatu ka zala uukwatya wOmuntu gwomegulu.
50 Aamwameme, onda hala okutya: Olutu nduka lwonyama nombinzi italu vulu okuya mOshilongo shaKalunga, naashoka shi na okusa, itashi vulu okukala itaashi ka sa.
51 Pulakeneni oshiholekwa: Itatu ka seni atuheni, ihe otatu ka shitululweni ombaadhilila,
52 ongepathimo lyeho, uuna enkuma lyahugunina tali ka hika. Oshoka uuna tali tameke okuhika, aasi otaa ka yumudhwa nomalutu itaaga si we, nena atuheni otatu ka shitululwa.
53 Oshoka shoka tashi ka yonuka po, oshi na okwiizaleka shoka itaashi ka yonuka po; naashoka tashi ka sa, oshi na okwiizaleka shoka itaashi si.
54 Ano uuna shoka tashi ka sa, sha zalekwa shoka itaashi si, nena enyolo otali ka gwanithwa ndyoka tali ti: “Eso lya sindwa, olya yonwa po sheke.”
55 “So ngoye, esindano lyoye oli li peni? “So ngoye, oonkondo dhoye dhokweehameka odhi li peni?”
56 Uulunde owo tau pe eso oonkondo dhokweehameka, nuulunde otau pewa oonkondo kompango.
57 Ihe Kalunga na hambelelwe, ngoka te tu pe esindano molwOmuwa gwetu Jesus Kristus!
58 Onkee ano aamwameme ne aaholike, kaleni mwi ikolelela, mwaa tenguke. Kaleni mwi ipyakidhila aluhe niilonga yOmuwa, oshoka omu shi shi kutya ashihe shoka tamu ningile Omuwa, otashi tompola sha.
1 Kombinga yegongelo lyiimaliwa yokukwatha aantu yaKalunga yomuJudea, ne omu na okuninga shoka nda lombwele omagongalo gomuGalatia.
2 Mesiku lyotango lyoshiwike kehe, kehe gumwe gwomune na yoolole iimaliwa yasha pakulikola kwe e te yi pungula, opo kwaa ka kale we ompumbwe yokugongela iimaliwa, uuna tandi ke ya.
3 Ngele nde ya, otandi ka tuma aalumentu yamwe mboka mwa zimina, ya ye noontumwafo dhomayelithilo, ya fale omagano geni kuJerusalem.
4 Ngele ondi wete sho opalela ndje okuya, nena nayo wo otaa ka ya pamwe nangame.
5 Otandi ke ya, ndi mu talele po, ngele nda pitile muMakedonia, oshoka ondi na oku shi ninga.
6 Ngiika otandi ka menekela pune okufu akuhe nokuli, nena otamu ka vula ihe okuthindikila ndje shaa nkoka tandi ka ya.
7 Oshoka inandi hala ndi mu talele po nokupita owala pune ngashingeyi. Onda tegamena okumenekela pune ethimbo ele, Omuwa ngele okwe shi hala.
8 Ihe ondi na edhiladhilo okukala muEfeso sigo okesiku lyaPentekoste.
9 Oshoka mpaka opu na ompito okulonga oshilonga shika oshinene nosha simana, nonando opu na aakondjithi oyendji.
10 Timoteus ngele te ya, mu taambeni nawa, oshoka ota longele Omuwa ngaashi naanaa ngame.
11 Inaku kala nando ogumwe te mu dhini, ihe omu na oku mu kwatha nawa, opo a vule okutsikila olweendo lwe nombili, sigo ta galukile kungame; oshoka onde mu tegelela, e ye pamwe nooyitaali yalwe aalumentu.
12 Omumwatate Apollos onde mu kumagidha olwindji, e mu talele po pamwe nooyitaali yalwe aalumentu, ihe ke shi wo nawa, ngele ota vulu oku shi ninga ngashingeyi. Ote ke ya, uuna ta ka mona ompito.
13 Kotokeni, ne mu kale mwa kola meitaalo. Kaleni aanankondo mwaa na uumbanda.
14 Longeni iilonga yeni ayihe nokupangelwa kohole.
15 Stefanas naanegumbo ye omu ya shi; oyo ya ningi tango aakriste muGreka noyi igandjele oshilonga shokuyakula aantu yaKalunga. Aamwameme, otandi mu kumagidha,
16 mu landule oshiholelwa shaantu ya tya ngeyi noshakehe ngoka ta longo nota yakula pamwe nayo.
17 Onda nyanyukilwa etalelopo lyaStefanas, Fortunatus naAkaikus, oshoka oye li pungame pehala lyeni.
18 Oyo oya nyanyudha ndje naanaa, ngaashi ye mu nyanyudha wo. Aalumentu ya tya ngeyi oyi ilongela okusimanekwa.
19 Omagongalo gomoshitopolwa shaAsia otage mu kundile po. Akula naPriskila negongalo ndyoka hali gongala maandjawo, otaye mu kundile po unene medhina lyOmuwa.
20 Ooitaali ayehe ooyakweni yaahuka otaye mu kundile po. Kundilathanii po nohole yaamwayinathana.
21 Otandi nyola noshikaha shandje mwene: Omakundo ga zi kuPaulus.
22 Kehe ngoka kee hole Omuwa, na tulwe omutima. Maranata — Ila, Omuwa gwetu!
23 Esilohenda lyOmuwa Jesus nali kale nane.
24 Ondi mu hole amuhe muKristus Jesus.