1 Ontumwafo ndjika oya zi kuPaulus, omumati gwaJesus Kristus, a hogololwa nokwi ithanwa kuKalunga, a ninge omuyapostoli okuuvitha elaka lye etoye.
2 Elaka ndyoka etoye Kalunga okwe li uvanekitha nale aahunganeki ye mOmanyolo omayapuki.
3 Olyo tali popi Omwana, Omuwa gwetu Jesus Kristus, ngoka pankalo yopantu a zi moluvalo lwaDavid.
4 Ihe pankalo yopaKalunga mokuyumudhwa kwe kuusi okwa hololwa oye Omuna gwaKalunga, ngoka e na oonkondo.
5 OmolwaKristus ngame onda pewa kuKalunga oshilonga shuuyapostoli kesilohenda, aantu yomiigwana ayihe opo ya vulike kuye noye mu itaale.
6 Nena nane mboka mu li muRoma Kalunga okwe mu ithana, mu ninge aantu yaJesus Kristus.
7 Onkee tandi mu nyolele, ne amuhe mu li muRoma kutya Kalunga oku mu hole, sho e mu ithana, mu ninge aantu ye mwene. Silweni ohenda, ne mu kale mu na ombili yaKalunga Tate noyOmuwa Jesus Kristus.
8 Tango otandi hambelele Kalunga kandje omolwaJesus Kristus, ngele tandi mu dhiladhila one amuhe, oshoka eitaalo lyeni otali hokololwa akuhe muuyuni auhe.
9 Kalunga oye e shi shi kutya ote popi oshili. Oye ngoka handi mu longele nomwenyo gwandje aguhe omokuuvitha elaka etoye tali popi Omwana.
10 Ohandi mu dhimbulukwa aluhe momagalikano gandje nohandi indile wo Kalunga, ngele e shi hala, ndi mone ompito mokathimbo haka kahugunina okuya kune.
11 Onda hala noonkondo oku mu talela po, opo ndi gandje sha kune kombinga yomagano gopambepo.
12 Osho ngaaka otatu vulu okutsaathana omukumo kombinga yeitaalo lyetweni atuhe.
13 Inandi hala oku shi mu holeka, aamwameme, kutya olwindji onda li nda hala okuya kune, ihe sigo oompaka onda mono omaimbo. Onda li nda hala okulikola aayitedhululi mokati keni ongaashi nomiigwana yilwe.
14 Oshoka ondi na ongunga kaantu ayehe, kwaamboka ya huma komeho naamboka inaaya huma komeho, kwaamboka ya longwa naamboka inaaya longwa.
15 Onda hala oku mu uvithila wo elaka etoye, mboka mu li muRoma.
16 Ano ngame inandi sa evaangeli ohoni, oshoka olyo oonkondo dhaKalunga tadhi hupitha ayehe mboka yi itaala. Tango Aajuda nosho wo Aagreka.
17 Oshoka evaangeli otali holola, nkene Kalunga ta ningi aantu aayuuki koshipala she. Shika otashi ningwa keitaalo alike okuza ketameko sigo opehulilo. Ongaashi kwa nyolwa: “Omuntu ngoka a ningi omuyuuki koshipala shaKalunga, ota kala e na omwenyo molweitaalo.”
18 Onkee ano ondjahi yaKalunga otayi zi megulu, yi adhe ondhino yokudhina Kalunga nuuwinayi auhe waantu, sho haa siikile oshili nuuwinayi wawo.
19 Kalunga ote ya geele, oshoka ashihe shoka aantu taa vulu oku shi tseya kombinga yaKalunga, oshi li puuyelele mokati kawo. Kalunga mwene okwe shi ya hololele.
20 Okuza Kalunga sho a shiti uuyuni, nando oye iha monika, okwa holola puuyelele oonkondo dhe dhaaluhe nuukalunga we. Aantu otaa vulu okukoneka Kalunga miinima mbyoka e yi shiti. Onkee itaa vulu okwiipopila.
21 Oyo oya tseya Kalunga, ihe inaye mu simaneka yo inaye mu hambelela, ngaashi e shi ilongela. Omadhiladhilo gawo ga ningi gaa na oshilonga yo kaye na oondunge, noomwenyo dhawo odhu udha omilema.
22 Sho taa itanga kutya oyo aanandunge, oya ningi aagoya.
23 Peha lyokugalikana Kalunga ihaa hulu po oya galikana oshiyelekela sholupe lwomuntu ta hulu po, nosholupe lwoondhila, lwiinamwenyo nenge lwaambyoka hayi ipwedha.
24 Onkee Kalunga okwe ya ethele muuhalu womomadhiladhilo gawo, tau ya fala mokunyateka omalutu gawo yene.
25 Oyo ya pingakanitha oshili yaKalunga niifundja, sho taa galikana yo taa longele oshishitwa peha lyOmushiti, ngoka a gwana okusimanekwa aluheluhe. Amen.
26 Onkee ano Kalunga okwe ya ethele muuhalu tau sitha omuntu ohoni. Aakiintu yawo oya lundulula omukalo gwopanshitwe gwokukalathana nomulumentu.
27 Osho wo aalumentu oye etha omukalo gwopanshitwe gwokukalathana nomukiintu noya longo iihuna. Oyo oya mono egeelo lye ya yeleka omolwepwidhuko lyawo.
28 Ano sho ya dhini okunongela Kalunga, Kalunga naye wo okwe ya ethele momadhiladhilo gawo omawinayi nomokulonga shoka shiihuna.
29 Oyo oyu udhilila muyo yene uugoyoki woludhi kehe: uuwinayi, olwiho, uukolokoshi; oyu udha efupa, edhipago, oontamanana, ekotokelo, onyanya.
30 Oyo aahokoli naalundili. Oyo oye tonde Kalunga. Oyo oompote noye hole uuntsa. Oyo aainomi yo ye na iineya. Oyo ihaa vulika kaakuluntu yawo.
31 Oyo aagoya naayoni yomauvathano. Oyo kaye na olukeno nondjaalela.
32 Oyo oya tseya oshili yiipango yaKalunga kutya mboka haa ningi ngeyi, oyo oyi lilongela eso. Ihe haashoka ashike, sho haa longo ngeyi, ihe unene tuu, sho haa panda mboka ye li miilonga ya tya ngeyi.
1 Kuume kandje, ngele oho pangula yakweni, ito vulu okwiipopila, nando ou kale ongoye lye. Oshoka ngele oho pangula yalwe, ihe nani mbyoka to ya pele uusama oyo ho ningi, nena oto ipangula ngoye mwene.
2 Tse otu shi shi kutya Kalunga oku li mondjila, uuna ta pangula aantu mboka haa yono omayono ga tya ngeyi.
3 Ihe ngoye, kuume kandje, gwanitha mwene shoka ho pele yakweni uusama. Oto dhiladhila kutya oto fadhuka po epangulo lyaKalunga?
4 Pamwe owa dhini uuwanawa we waa shi kuyelekwa, eidhidhimiko nontalanteni ye? Ino tseya nani, uuwanawa waKalunga ou lile po oku ku hila, wi itedhulule?
5 Ihe molweikukutiko nokwaavulika kwoye oto igongelele egeelo mesiku ndyoka, uuna ondjahi yaKalunga nepangulo eyuuki tayi ka hololwa.
6 Oshoka Kalunga ota ka futa omuntu kehe ngaashi i ilongela.
7 Aantu mboka taa dhiginine okulonga uuwanawa, otaa lalakanene eadhimo, esimano nokukalamwenyo itaaku hulu; Kalunga ote ke ya pa omwenyo gwaaluhe.
8 Aantu mboka yi ihole, ohaa tindi oshili e taa landula shoka sha puka. Onkee ondjahi negeelo lyaKalunga otayi ya kombanda yawo.
9 Uudhigu nuuwehame otau adha ayehe mboka haa longo uulunde, tango Aajuda nosho wo aapagani.
10 Ihe Kalunga ota ka gandja eadhimo, esimano nombili kwaayehe mboka haa longo uuwanawa, tango Aajuda nosho wo aapagani.
11 Oshoka Kalunga oha ningile aantu ayehe shi thike pamwe.
12 Aapagani sho yaa na ompango yaMoses, otaa yono e taa ka kana yaa na ompango. Aajuda oye na ompango; oyo otaa yono e taa pangulwa pampango.
13 Oshoka aantu itaa ningi aayuuki koshipala shaKalunga molwokuuva ompango, ihe omolwokugwanitha shoka tashi pulwa kompango.
14 Aapagani kaye na ompango, ihe uuna taa gwanitha shoka tashi pulwa kompango pandunge dhawo, nena oyo ompango kuyo yene, nando kaye na ompango.
15 Nena omikalo dhawo otadhi holola kutya shoka tashi pulwa kompango, osha nyolelwa momitima dhawo. Omaiyuvo gawo otaga koleke wo oshili ndjika, oshoka omadhiladhilo tage ya tamaneke nenge tage ya popile.
16 Palaka etoye ndyoka tandi li uvitha, Kalunga ota ka ninga Jesus Kristus omupanguli gwiiholekwa ayihe yomomitima dhaantu.
17 Ongiini kombinga yoye? Ngoye oho iti Omujuda, owi inekela ompango noho itanga kutya ngoye omuntu gwaKalunga.
18 Ngoye owa tseya ehalo lyaKalunga nowi ilonga mompango okuyoolola shoka shi li mondjila.
19 Owi ishi kutya ongoye omukwatiketi gwaaposi, uuyelele waamboka ye li momilema,
20 omuputudhi gwaagoya nomulongi gwaanona, ngoka u na mompango ehuku lyuunongo nolyoshili.
21 Ngoye oho longo yalwe, ihe omolwashike ihoo ilongo ngoye mwene? Oho uvithile aantu yaa yake, ngoye iho yaka?
22 Ngoye oho indike aantu yaa hondele, ngoye iho hondele? Ou tonde iikalunga, ngoye iho yaka mootempeli?
23 Oho itanga, sho u na ompango yaKalunga, ihe iho shekitha Kalunga, sho ho yono ompango ye?
24 Oshoka okwa nyolwa kutya omolwAajuda aapagani otaa sheke edhina lyaKalunga.
25 Efukaleko otali ku kwatha owala, ngele to vulika kompango. Ihe ngele iho vulika kompango, nena owa faathana naanguka inaa fukalekwa, nando ngoye owa fukalekwa.
26 Ngele omupagani ngoka inaa fukalekwa ta vulika komalombwelo gompango, Kalunga ite mu tala nani ongo a fukalekwa?
27 Ne Aajuda otamu ka pewa uusama kaapagani. Oshoka ohamu yono ompango, nonando omu yi na ya nyolwa, nane yene omwa fukalekwa, manga aapagani haa vulika kompango, nonando inaa fukalekwa panyama.
28 Omujuda gwashili ke shi ngoka ta monika kombanda, nefukaleko lyashili kali shi ndyoka tali ningwa kombanda panyama.
29 Ihe Omujuda gwashili oye ngoka Omujuda meni lye, a fukalekwa momutima gwe. Shika kashi shi oshilonga shompango, ihe oshilonga shOmbepo yaKalunga. Omuntu a tya ngaaka ota pewa esimano kuKalunga, hakaantu.
1 Ano Aajuda oye vule aapagani mushike? Efukaleko oli na tuu ekwatho lyasha?
2 Eeno, Aajuda oye na oshindji pamikalo odhindji. Shotango, oya pewa oohapu dhaKalunga.
3 Ongiini ano, yamwe yomuyo sho inaa itaala? Okwaaitaala kwawo otaku ningi tuu, Kalunga a kale kee shi omwiinekelwa?
4 Itashi vulika! Kalunga oye omunashili, nonando omuntu kehe oye omufundja. Ngaashi enyolo tali ti: “Ngele to popi, aluhe ou li mondjila. Ngele to tamanekwa, ongoye to sindana.”
5 Ihe ongiini ano, omayono getu ngele otaga holola kutya Kalunga oye omuyuuki? Otatu ti ngiini ano? Otatu ti, Kalunga oha longo epuko, ngele te tu geele? Mpaka ote popi pantu.
6 Aawe, hasho! Kalunga ota vulu ngiini okupangula uuyuni, ngele ke shi omuyuuki?
7 Ihe ongiini, oshili yaKalunga, ndjoka tayi mu simanekitha, ngele otayi hololwa nawa kiifundja yandje? Omolwashike ndi na okupangulwa natango ndi li omulunde?
8 Omolwashike itaandi ti: “Tu longeni uuwinayi, opo mu ze uuwanawa?” Oshoka aantu yamwe oya sheke ndje nokulundila ndje kutya onda popi ngeyi. Oyo otaa ka pangulwa, ngaashi ye shi ilongele.
9 Ongiini ano? Tse Aajuda otu li nawa ando tu vule aapagani? Aawe, hasho! Oshoka onde shi ulike nale kutya Aajuda naapagani ayehe oye li kohi yoonkondo dhuulunde.
10 Ongaashi kwa nyolwa taku tiwa: “Kaku na nande omuntu gumwe omuyuuki.
11 Kaku na nando ogumwe u uvite ko, kaku na nando ogumwe ta kongo Kalunga.
12 Aantu ayehe oye etha Kalunga. Ayehe oya puka. Kaku na nando ogumwegumwe ta longo uuwanawa.
13 Omiligu dhawo odha fa ombila ye ekama. Omalaka gawo ogu udha oohapu dhomakoto. Omilungu dhawo otadhi popi oohapu oombwinayi dha fa uuzigo wontoka.
14 Omakana gawo ogu udha omatukano omadhigu.
15 Oyo otaa matuka, ya ka dhipage omuntu.
16 Eyonuuko niiponga otayi kala mpoka ye enda.
17 Oyo inaa tseya ondjila yombili,
18 yo inaa ilonga okutila Kalunga.”
19 Ngashingeyi otu shi shi kutya ashihe shoka sha nyolwa mompango, otayi shi lombwele mboka ye li kohi yoonkondo dhompango, opo omuntu kehe a mutikwe, nuuyuni auhe u tompwe kutya ou na oondjo koshipala shaKalunga.
20 Oshoka kaku na nando omuntu ta ningi omuyuuki koshipala shaKalunga, sho a gwanitha shoka tashi pulwa kompango; oshoka ompango oyi lile po okutseyithila omuntu kutya oye omulunde.
21 Ihe ngashingeyi Kalunga okwa holola po ondjila yokuninga aantu aayuuki koshipala she kaayi na sha nompango. Ompango naahunganeki oye shi popi kutya
22 Kalunga ota ningi aantu aayuuki, sho yi itaala Jesus Kristus. Oye ote shi ningile aantu ayehe mboka yi itaala pwaa na eyooloko.
23 Oshoka aantu ayehe oya yona, kaye na oonkondo dhoku ya hupitha.
24 Ihe molwomagano gesilohenda lye Kalunga ote ya ningi aayuuki, oshoka Jesus Kristus okwe ya kulila.
25 Kalunga okwa gandja Jesus, opo mokusa kwe a ninge iikulila, moka aantu mboka ye mu itaala, taa dhiminwa po oondjo dhawo. Kalunga okwe mu gandja, opo a ulike, nkene ta ningi aantu aayuuki koshipala she. Nale Kalunga okwa li i idhidhimikile nokwe etha oondjo dhaantu, inee ya geela omolwadho.
26 Ngashingeyi Kalunga ota holola kutya oye oku li mondjila, sho ta ningi omuntu kehe ngoka i itaala Jesus, omuyuuki koshipala she.
27 Otatu vulu natango tuu okwiitanga? Aawe, itashi vulika we! Omolwashike? Omolwaashoka omuntu ta gwanitha ompango? Aawe, omolwaasho i itaala.
28 Ano otatu ti kutya omuntu ota ningi owala omuyuuki koshipala shaKalunga, sho i itaala, ihe hamolwaasho ta gwanitha shoka tashi pulwa kompango.
29 Nenge Kalunga okAajuda ayeke? Ke shi nani Kalunga kaapagani wo? Eeno, okaapagani wo.
30 Kalunga gumwe awike, ngoka ta ningi Aajuda aayuuki koshipala she omolweitaalo lyawo nosho wo aapagani omolweitaalo lyawo.
31 Ano ompango otatu yi dhimi po molweitaalo? Aawe, hasho; ihe otatu yi koleke.
1 Otatu ti ngiini ano kombinga yatatekulu Abraham pazimo? Oye okwa mono shike?
2 Ngele Abraham okwa ningi omuyuuki koshipala shaKalunga molwaashoka e shi ningi, nena ota vulu oku shi itangela, ihe hakoshipala shaKalunga.
3 Oshoka enyolo otali ti: “Abraham okwi itaale Kalunga, nomolweitaalo ndika Kalunga okwe mu tala ihe omuyuuki.”
4 Omuntu ngoka ta longo, oha futwa, nondjambi ye itayi talwa kutya oshinima sha gandjwa omagano, aawe, otayi talwa oshinima e shi ilongele ye mwene.
5 Omuntu ngoka iti ilongele sha, ihe okwi itaala Kalunga, ngoka ta taamba omulunde a kale kee na oondjo, ota talwa omuyuuki koshipala shaKalunga omolweitaalo lye.
6 Shika osho naanaa shoka David e shi popi, sho a ti kutya omuumentu omunelago oye ngoka Kalunga te mu tala omuyuuki pwaa na iilonga:
7 “Aanelago aantu mboka Kalunga e ya dhimina po omayono gawo, oomboka oondjo dhawo dha siikilwa.
8 Omuntu omunelago oye ngoka Omuwa itaa yalula we oondjo dhe.”
9 Ano elago ndino tali popiwa kuDavid olyaamboka ya fukalekwa ayeke? Aawe, olyaamboka wo inaa fukalekwa. Oshoka otwa ti: “Abraham okwi itaale Kalunga, nomolweitaalo ndika Kalunga okwe mu tala ihe omuyuuki.”
10 Shika osha ningwa uunake? Ndishi omanga Abraham a li inaa fukalekwa.
11 Tango okwi itaale, opo ihe okwa fukalekwa, nokufukalekwa kwe okwa ningi ihe endhindhiliko tali koleke kutya Kalunga okwa tala Abraham omuyuuki koshipala she, sho i itaala. Ngashingeyi Abraham oye he yopambepo yaayehe mboka yi itaala Kalunga noya taambwa aayuuki koshipala she, nonando inaa fukalekwa.
12 Oye wo he yaamboka ya fukalekwa, hamolwaasho owala ya fukalekwa, ihe omolwaasho ye li meitaalo ndyoka tate Abraham a li e li na, manga inaa fukalekwa.
13 Kalunga oku uvanekele Abraham, uuyuni u ninge we nowoluvalo lwe. Euvaneko ndika inali ningwa ando molwaasho Abraham a gwanitha ompango, ihe omolwaasho i itaala, naKalunga okwe mu tala omuyuuki.
14 Oshoka ngele omauvaneko gaKalunga otaga pewa mboka taa gwanitha ompango, nena eitaalo lyomuntu itali kwatha sha nomauvaneko gaKalunga kage na oshilonga.
15 Ano ompango otayi etelele ondjahi yaKalunga; ihe hoka kwaa na ompango, kaku na wo eyono lyompango.
16 Euvaneko olya gandjwa molweitaalo, opo li kolekwe nawa kutya olyo esilohenda lyaKalunga koluvalo aluhe lwaAbraham, hakwaamboka haa vulika kompango, ihe nokwaamboka wo yi itaala ngaashi Abraham. Oshoka Abraham oye tate yopambepo atuhe mbaka.
17 Ongaashi enyolo tali ti: “Ngame onde ku ningi he yiigwana oyindji.” Euvaneko oli na oshilonga oshinene koshipala shaKalunga, ngoka i itaalwa kuAbraham. Oye Kalunga ngoka ta yumudha aasi, naangoka ta popi, iinima mbyoka ya li yaa ko e tayi holoka.
18 Abraham okwi itaale nokwa tegamene, manga pwaa na sha shokutegamenwa, onkee okwa ningi he yiigwana oyindji. Ongaashi enyolo tali ti: “Oluvalo lwoye otalu ka ningwa wo olwindji.”
19 Oomvula dhaAbraham odha li lwopethele, ihe ina nengena meitaalo lye, nando e wete kutya olutu lwe kalu na we oonkondo dholuvalo, naSara ita vala we.
20 Oye okwi itaale ye ina limbililwa shoka e shi uvanekelwa kuKalunga, onkee eitaalo lye olye mu koleke e ta hambelele Kalunga.
21 Oshoka Abraham okwa li e shi shi nawa kutya shoka Kalunga e shi uvaneke, ota vulu oku shi gwanitha.
22 Onkee ano Kalunga okwa tala Abraham omuyuuki koshipala she, sho i itaala.
23 Oohapu ndhika: “Kalunga e mu tala omuyuuki koshipala she,” inadhi nyolwa molwaAbraham awike,
24 ihe odha nyolwa wo molwetu, mboka tatu talwa aayuuki, sho twi itaala Kalunga ngoka a yumudha Omuwa gwetu Jesus kuusi.
25 Kalunga okwa gandja Jesus omolwoondjo dhetu nokwe mu yumudha kuusi, e tu ninge aayuuki koshipala she.
1 Ano ngashingeyi sho twa ningwa aayuuki koshipala shaKalunga molweitaalo, otu na ombili naKalunga omolwOmuwa gwetu Jesus Kristus.
2 Oshoka molweitaalo Kristus okwe tu thikitha mesilohenda lyaKalunga, moka tu li mo ngashingeyi. Onkee ano tu nyanyukweni mokutegamena eadhimo lyaKalunga.
3 Hasho shika ashike, ihe otatu nyanyukwa wo, sho tu li muudhigu, sho tu shi shi kutya muudhigu ohamu zi eidhidhimiko.
4 Eidhidhimiko otali tu kwatha okusindana memakelo notamu zi omukumo gwetu gwokutegamena.
5 Okutegamena itaku tu sitha ohoni, oshoka ohole yaKalunga oya tililwa moomwenyo dhetu kOmbepo Ondjapuki, ndjoka twe yi pewa omagano kuKalunga.
6 Ano manga twa li twaa na nando etegelelo lyasha, Kristus okwa sile aakolokoshi pethimbo lyu uthwa kuKalunga.
7 Osho oshinima oshidhigu, omuntu gwontumba ngele ta si omolwomuyuuki. Eeno, pamwe otashi vulika, omuntu gwontumba ta si omolwomuntu gumwe omwaanawa.
8 Ihe Kalunga okwe tu hololele kutya oku tu hole, Kristus sho a si peha lyetu, manga twa li aalunde.
9 Unene tuu ngashingeyi, sho twa ningwa aayuuki koshipala shaKalunga omolweso lye, Kristus ote tu hupitha, twaa adhike kondjahi yaKalunga.
10 Oshoka manga twa li aatondi yaKalunga, Kalunga okwe tu hanganitha naye mwene meso lyOmwana. Ano unene ngashingeyi sho tu li mehangano naKalunga, otatu hupithwa kokukala kwaKristus e na omwenyo.
11 Ihe hasho shika ashike; tse otatu nyanyukilwa Kalunga omolwOmuwa gwetu Jesus Kristus, ngoka e tu hanganitha naKalunga.
12 Uulunde owe etwa muuyuni komuntu gumwe, nuulunde we owe etelele eso. Onkee ano eso olya taandele maantu ayehe, oshoka ayehe oya yono.
13 Uulunde omo wa li muuyuni, manga ompango inaayi gandjwa; ihe manga kaakwa li ompango, uulunde owa li inaau yalulwa.
14 Ihe okuza kethimbo lyaAdam sigo okethimbo lyaMoses eso olya pangele maantu ayehe naamboka inaaya yona ngaashi Adam, ngoka a li inaa vulika koshipango shaKalunga. Adam okwa li oshiholelwa shaanguka te ke ya.
15 Ihe mbaka yaali inaa faathana, oshoka omagano gesilohenda lyaKalunga itaga vulu okuyelekwa nokuyona kwaAdam. Eeno, aantu oyendji oya si omolwokuyona kwomuntu gumwe. Ihe esilohenda lyaKalunga enenenene nomagano ge ogendjigendji kaantu oyendji omolwesilohenda lyomuntu gumwe, Jesus Kristus.
16 Ihe opu na eyooloko pokati komagano gaKalunga neyono lyomuntu ngoka gumwe. Eyono lyomuntu ngoka gumwe olye mu etele a pangulilwe eso. Ihe esilohenda lyaKalunga olyo okumangulula omuntu konima yokuyona okwindji.
17 Eeno, omolwokuyona kwomuntu gumwe eso olya tameke okupangela maantu omolwomuntu ngoka gumwe. Ihe shoka sha ningwa kwaanguka gumwe, Jesus Kristus, osho oshinene. Omolwe ayehe mboka taa pewa eudho lyesilohenda lyaKalunga nomagano guuyuuki we, otaa ka pangela mokukalamwenyo kwawo.
18 Ano ngashika okuyona kwagumwe kwe etele aantu ayehe epangulo, osho tuu wo oshilonga shimwe shuuyuuki otashi mangulula aantu ayehe e taa pewa omwenyo.
19 Ngaashi aantu ayehe ya ningi aalunde omolwokwaavulika kwomuntu gumwe, ano osho tuu oyendji otaa ningwa aayuuki koshipala shaKalunga omolwokuvulika kwomuntu gumwe.
20 Ompango oya gandjwa, opo yi indjipaleke omayono; ihe mpoka oondjo dha ningi odhindji, opo mpoka wo esilohenda lyaKalunga tali ningi olindji.
21 Oshoka ngashika uulunde wa pangele mokweeta eso, osho tuu wo esilohenda lyaKalunga otali pangele li na uuyuuki, li tu fale momwenyo gwaaluhe omolwaJesus Kristus, Omuwa gwetu.
1 Otatu ti ngiini ano? Otu na okukala muulunde, opo esilohenda lyaKalunga li ninge olindji?
2 Aawe, itashi vulika! Tse sho twa kwatunuka mo muulunde, otashi vulika ngiini, tu kale mo natango?
3 One omu shi shi nawa kutya uuna ndoka twa shashwa, otwa yi muukumwe naJesus Kristus notwa yi wo muukumwe naye meso.
4 Mokushashwa kwetu otwa si notwa fumvikwa pamwe naye. Ihe ngaashi Kristus a yumudhwa kuusi koonkondo dheadhimo lyaHe, osho natse wo otatu vulu okweenda mokukalamwenyo okupe.
5 Oshoka ngele twa faathana naye mokusa kwa fa kwe, osho wo otatu ka faathana naye mokuyumudhwa kuusi ngaashi ye.
6 Tse otu shi shi kutya omuntu gwetu omukulu okwa si pamwe naKristus komushigakano, opo oonkondo dhomuntu guulunde dhi hanagulwe po, twaa kale we aapika yuulunde.
7 Oshoka omuntu ngele okwa sa, nena okwa mangululwa moonkondo dhuulunde.
8 Ngele otwa si pamwe naKristus, nena otwi itaala wo kutya otatu ka kala tu na omwenyo pamwe naye.
9 Oshoka otu shi shi kutya Kristus okwa yumudhwa kuusi, ita si we. Eso kali na we oonkondo oku mu pangela.
10 Kristus sho a si, okwa si moluulunde lumwe aluke; ihe sho a kala e na omwenyo, okwa kalele Kalunga.
11 Osho nane wo omu na okudhiladhila kutya omwa kwatunuka mo muulunde, ihe omu na omwenyo, mu longele Kalunga muukumwe naJesus Kristus.
12 Uulunde kau na okupangela we momalutu geni omasi, mu vulike ando kuuhalu womuntu guulunde.
13 Ne inamu gandja iilyo yomalutu geni muulunde, yi longithwe miilonga iiwinayi. Ihe igandjeni ne yene kuKalunga, mu kale mwa yumudhwa kuusi, ne mu pe Kalunga uuntu weni auhe, u longithwe miilonga iiwanawa.
14 Uulunde kau na oku mu pangela, oshoka kamu li kohi yompango, ihe okohi yesilohenda lyaKalunga.
15 Ongiini ano, otu na okukala muulunde, oshoka katu li kohi yompango, ihe okohi yesilohenda lyaKalunga? Aawe, itashi vulika!
16 Oshoka omu shi shi nawa kutya uuna tamu igandja komuntu gwontumba, nena one aapika yaangoka tamu vulika kuye. Ngele tamu igandja okulonga uulunde, nena ehulilo olyo eso. Ihe ngele tamu vulika kuKalunga, evuliko ndyoka otali mu ningi aayuuki koshipala shaKalunga.
17 Kalunga na hambelelwe! Nale omwa li aapika yuulunde, ihe ngashingeyi ohamu vulika nomwenyo aguhe koshili tayi zi melongo ndyoka mwe li longwa.
18 One omwa mangululwa muulunde, mu ninge aapika yiilonga iiwanawa.
19 Otandi popi pantu omoluunkundi wuuntu weni. Nale omwa li mwi igandja okulonga iilonga yuupika, yoonyata noyuukolokoshi, mbyoka tayi kondjitha ehalo lyaKalunga. Ano osho tuu wo ngashingeyi igandjeni, mu ninge aapika yiilonga iiwanawa, opo mu ninge aayapuki.
20 Nale sho mwa li aapika yuulunde, omwa li mwa manguluka mwaa na sha nuuyuuki.
21 Ano omwa mono mo uuwanawa washike mokulonga mbyoka mwe yi sa ohoni ngashingeyi? Ehulilo lyiilonga mbyoka olyo eso.
22 Ihe ngashingeyi omwa mangululwa muulunde nomwa ningi aapika yokulongela Kalunga, nokutya okukalamwenyo kweni akuhe oku li meutho lye, nopehulilo otamu ka mona omwenyo gwaaluhe.
23 Oshoka eso olyo ondjambi yuulunde, ihe omwenyo gwaaluhe ogwo omagano gesilohenda lyaKalunga muukumwe naJesus Kristus, Omuwa gwetu.
1 Aamwameme, one omu uvite ko shoka nda hala okutya, oshoka ompango omu yi shi. Ompango otayi pangele owala omuntu, manga e na omwenyo.
2 Omukiintu ngoka e li moondjokana, ompango otayi mu mangele owala komulumentu gwe, manga omulumentu e na omwenyo. Ihe omulumentu ngele a si, nena omukiintu okwa manguluka mompango ya tya ngaaka.
3 Onkee ngele omukiintu ota kala nomulumentu gulwe, manga omulumentu gwe e na omwenyo, nena oti ithanwa ohonda. Ihe ngele omulumentu gwe okwa si, nena omukiintu ngoka okwa manguluka pampango noita talwa we ta hondele, ngele ta hokanwa komulumentu gulwe.
4 Osho nane wo aamwameme, omwa kwatunuka mo mompango, oshoka one iilyo yolutu lwaKristus. Ngashingeyi otse oyaanguka a yumudhwa kuusi, opo tu kale tu na okukalamwenyo kwo opalela Kalunga.
5 Oshoka manga twa li tatu landula omadhiladhilo getu yene, uuhalu wuulunde wa penduthwa kompango owa kala tau longo mutse. Okukala kwa tya ngeyi otaku fala meso.
6 Ihe ngashingeyi otwa manguluka mompango notwa kwatunuka mo mushoka sha li she tu ninga oonkwatwa. Onkee ihatu longo we pamukalo omukulu gwompango ndjoka ya nyolwa, ihe ohatu longele Kalunga muupe wOmbepo.
7 Otatu ti ngiini ano? Ompango yo yene oyi na uulunde? Aawe, itashi vulika! Ihe ompango oya tseyithile ndje kutya uulunde oshike. Oshoka ando inandi tseya kutya okuhaluka oshike, ngele ompango inayi tya: “Ino haluka.”
8 Uulunde owa mono ihe ompito mokulongitha oshipango nowa pendutha uuhalu wi ili nowi ili mungame. Oshoka uulunde otau kala wa sa, ngele kaku na ompango.
9 Mokukala kwandje nale onda li inaandi tseya ompango, ihe oshipango sho she ya, uulunde owa ningi omwenyo,
10 ngame e tandi si. Ano oshipango shoka sha li shi na okupa ndje omwenyo, oshe etele ndje eso.
11 Onkee ano uulunde owa mono ihe ompito okufundja ndje mokulongitha oshipango e tau dhipagitha ndje oshipango.
12 Ompango yo yene oyo ondjapuki niipango yamo oyo iiyapuki, yi li mondjila niiwanawa.
13 Ano shoka oshiwanawa oshe etele ndje eso? Aawe, itashi vulika! Eso olye etwa kuulunde. Uulunde owa longitha shoka oshiwanawa nowe etele ndje eso, opo u holoke puuyelele kutya owo uulunde. Ano mokulongitha oshipango uulunde owa holola kutya owo uulundelela.
14 Otse otu shi shi kutya ompango oyopambepo, ihe ngame omuntu tandi ka sa, nda landithwa po ndi kale omupika guulunde.
15 Kandi shi shi shoka tandi shi longo, oshoka ihandi longo shoka nda hala oku shi longa, ihe ohandi longo shoka ndi tonde.
16 Ngele ano ohandi longo shoka inaandi shi hala, nena otandi zimine kutya ompango oyi li mondjila.
17 Ano hangame we handi longo ngeyi, ihe uulunde mbuka wa kala mungame.
18 Oshoka ondi shi shi kutya mungame, nokutya muuntu wandje kamu na nando uuwanawa washa. Oshoka nonando mungame omu na ehalo okulonga uuwanawa, itandi shi vulu.
19 Uuwanawa mboka nda hala oku u ninga, ihandi u longo, ihe uuwinayi mboka inaandi u hala, owo he longo.
20 Ngele ohe longo shoka inaandi shi hala, nena otashi ti kutya hangame we handi shi longo, ihe uulunde mbuka wa kala mungame.
21 Onkee ano mokukala kwandje ondi wete ompango ndjika kutya nando ndi kale nda hala okulonga uuwanawa, uuwinayi auke he longo.
22 Meni lyandje onda hokwa ompango yaKalunga.
23 Ihe ondi wete ompango onkwawo yi li molutu lwandje tayi kondjitha ndjoka ya ziminwa komadhiladhilo gandje. Oyo oya kwata ndje, ndi kale omupika gwompango yuulunde yi li molutu lwandje.
24 Ongame omuntu omukweyi! Olye ta mangulula ndje molutu nduka talu etele ndje eso?
25 Kalunga na hambelelwe omolwaJesus Kristus, Omuwa gwetu! Onkee ano ngame mwene ohandi longo owala pampango yaKalunga nomadhiladhilo gandje, ihe nuuntu wandje ohandi longo pampango yuulunde.
1 Ano ngashingeyi kaku na we epangulo lyokukanitha mboka ye li muukumwe naJesus Kristus.
2 Oshoka otandi pangelwa kOmbepo ndjoka hayi gandja omwenyo kwaamboka ye li muukumwe naJesus Kristus. Oyo oya mangulula ndje mepangelo lyuulunde nolyeso.
3 Kalunga okwa ningi shoka sha nyenge ompango moluunkundi womuntu. Oye okwa pangula uulunde momuntu, sho a tumu Omwana, ngoka e ya molupe lwomuntu omulunde, a kuthe po oondjo.
4 Ngashingeyi otatu vulu okuvulika kushoka shu uka tashi pulwa kompango, oshoka ihatu endithwa kuuntu wetu, ihe okOmbepo yaKalunga.
5 Mboka haa kala pahalo lyuuntu wawo, ohaa dhiladhila ngaashi uuntu wawo wa hala. Ihe mboka haa kala ngaashi Ombepo te ya lombwele, ohaa dhiladhila ngaashi Ombepo e shi hala.
6 Okukala pamadhiladhilo guuntu otashi eta eso, ihe okukala mewiliko lyOmbepo otashi eta omwenyo nombili.
7 Omuntu ngoka e na omadhiladhilo taga wilikwa kuuntu, oku tonde Kalunga, oshoka iha vulika kompango yaKalunga ye ita vulu okuvulika kuyo.
8 Mboka haa vulika kuuntu wawo, itaa vulu okwoopalela Kalunga.
9 Ihe ne itamu pangelwa kuuntu weni, ihe otamu pangelwa kOmbepo, ngele Ombepo yaKalunga oku li mune. Oshoka kehe ngoka kee na Ombepo yaKristus, ke shi wo gwaKristus.
10 Ihe ngele Kristus oku li mune, Ombepo ote mu pe omwenyo, nonando olutu olwa sa moluulunde, oshoka omwa ningwa aayuuki koshipala shaKalunga.
11 Ngele Ombepo yaKalunga, ngoka a yumudha Jesus kuusi, tayi kala mune, nena oongoka a yumudha Kristus kuusi ota ka yumudha wo omalutu geni omasi koonkondo dhOmbepo tuu ngoka.
12 Onkee ano, aamwameme, katu na okukala pahalo lyuuntu wetu.
13 Oshoka ngele otamu kala pahalo lyuuntu weni, otashi mu etele eso. Ihe ngele otamu dhipaga iilonga yuulunde nOmbepo, nena otamu kala mu na omwenyo.
14 Ayehe mboka haa endithwa kOmbepo yaKalunga, oyo aana yaKalunga.
15 Ombepo ngoka mwe mu pewa kuKalunga, ke shi gwoku mu ninga aapika, mu kale muumbanda. Ombepo ote mu ningi aana yaKalunga, nokoonkondo dhe otatu igidha kuKalunga tatu ti: “Tate! Tate!”
16 Ombepo yaKalunga oye mwene ta kwatathana noombepo dhetu mokuhempulula kutya otse aana yaKalunga.
17 Ano ngele otse oyana, nena otatu ka pewa ashihe shoka Kalunga te ke shi pa aantu ye. Otatu ka pewa wo pamwe naKristus ashihe shoka e shi mu pungulila. Oshoka ngele twa faathana naKristus mokuhepekwa, otatu ka faathana wo naye meadhimo.
18 Otandi tala kutya omahepeko ngoka tu ga na ngashingeyi, kage shi okuyelekwa neadhimo ndyoka tatu ke li hololelwa.
19 Kehe shoka shomeshito otashi tegelele nondjuulukwe onene eholoko lyaana yaKalunga.
20 Oshoka kehe shimwe shomeshito osha gandjwa monkalo yaa na ekwatho, hakehalo lyasho shene, ihe oKalunga e shi utha. Ihe nando ongaaka, okwa kala etegameno,
21 kutya oku na esiku ndyoka, uuna eshito alihe tali ka manguluka muupika weyonuuko, li ye memanguluko nomeadhimo lyaana yaKalunga.
22 Oshoka otu shi shi kutya sigo ongashingeyi kehe shimwe shomeshito otashi fudhagana kuuwehame wa fa mboka wopevalo lyokanona.
23 Ihe hayo ayike, ndele natse wo mboka tu na uutango womagano gOmbepo yaKalunga, otatu fudhagana meni lyetu twa tegelela, Kalunga e tu ninge oyana ye e tu hupithe.
24 Mokutegamena omo twa hupithilwa, oshoka ngele otu wete shoka twe shi tegamena, nena kashi shi we etegameno. Oshoka olye ta tegamene shoka e shi wete?
25 Ihe ngele tatu tegamene shoka kaatu shi wete, nena otatu shi tegamene neidhidhimiko.
26 Osho wo Ombepo ote tu kwatha muunkundi wetu. Oshoka katu shi nkene tu na okwiindila, ihe Ombepo oye mwene te tu galikanene nomifudho kaadhi shi kutumbulwa.
27 Ihe Kalunga ngoka ha mono muule womitima dhaantu, oku shi omadhiladhilo gOmbepo. Oshoka Ombepo sho ta galikanene aantu koshipala shaKalunga, ote shi ningi wo pahalo lyaKalunga.
28 Otse otu shi shi kutya Kalunga otu ukitha iinima ayihe, yi etele uuwanawa mboka ye mu hole. Oyo mboka Kalunga e ya ithana pamadhiladhilo ge.
29 Oshoka mboka e ya hogolola, okwe ya utha nale, ya ninge ya fa Omwana, opo Omwana a ninge omutango mokati kaamwayina oyendji.
30 Osho wo Kalunga okwi ithana mboka e ya hogolola. Oye ine ya ithana owala, ihe okwe ya ningi wo aayuuki koshipala she. Niishewe, ine ya ninga owala aayuuki, ihe okwe ya adhimitha wo.
31 Otatu ti ngiini ano kombinga yaambika ayihe? Kalunga ngele oku li kombinga yetu, olye ta tsu ondumbo natse?
32 Oye ngoka ini ihupithila Omwana, ihe okwe mu gandja molwetu atuhe, oye ite tu pe ando iinima ayihe omagano?
33 Olye ta tamaneke aahogololwa yaKalunga? Kalunga oye mwene te ya mangulula.
34 Olye ta vulu oku ya pa oondjo? Jesus Kristus oye tuu nguka a si e ta yumudhwa nongashingeyi oku li kolulyo lwaKalunga te tu galikanene.
35 Olye ano te tu topola ko kohole yaKristus? Uudhigu ando tau shi ningi, nenge oothina nenge etidhagano, ondjala nenge oluhepo, oshiponga nenge eso?
36 Ongaashi enyolo tali ti: “Esiku alihe otse otu li popepi nokusa omolwoye, otse otwa ningwa ngaashi oonzi tadhi ka dhipagwa.”
37 Ihe mumbika ayihe otatu sindi nokusindilila omolwaangoka e tu hole.
38 Oshoka ondi shi shili kutya kaku na nando oshinima shimwe tashi vulu oku tu topola ko kohole yaKalunga: haeso nenge omwenyo, haayengeli nenge aapangeli naanankondo yomegulu, haambyoka yongashingeyi nenge mbyoka tayi ke ya,
39 hauyuni wokombanda nenge wokohi. Meshito kamu na sha tashi vulu oku tu topola ko kohole yaKalunga yi li muJesus Kristus, Omuwa gwetu.
1 Ngame omuntu gwaKristus ote popi oshili, ite fundju. Eiyuvo lyandje otali popile ndje kutya ite fundju, oshoka otali wilikwa kOmbepo Ondjapuki.
2 Ondi na aluhe oluhodhi olunene nuuwehame momwenyo gwandje omolwaantu yoshigwana shandje Aaisraeli.
3 Oshoka omolwawo onda hala, ando ndi tulwe omutima kuKalunga nondi yoololwe ko kuKristus.
4 Oyo aahogololwa yaKalunga, sho e ya ningi oyana nokwe ya pe eadhimo lye. Oye okwa dhike ehangano nayo nokwe ya pe ompango, elongelokalunga lyashili nomauvaneko ge.
5 Moohekulu omo mwa zi Kristus, sho a ningi omuntu. Kalunga, omupangeli gwaayihe, na hambelelwe aluhe sigo aluhe! Amen.
6 Ngame itandi ti ando kutya euvaneko lyaKalunga inali kwatha sha, aawe, oshoka Aaisraeli haayehe aahogololwa yaKalunga.
7 Osho wo aana yaAbraham haayehe aana yaKalunga, oshoka Kalunga okwa lombwele Abraham a ti. “Aana yaIsak oyo ayeke taa ka talwa aamwoye.”
8 Shika otashi ti kutya aanona ya valwa pahalo lyomuntu alike hayo aana yaKalunga, ihe aanona mboka ya valwa pauvaneko lyaKalunga, oyo taa talwa oyana.
9 Oshoka oohapu dheuvaneko lyaKalunga odha li ngeyi: “Otandi ka galuka pethimbo lyo opala notandi ka adha Sara e na okanona okamati.”
10 Hasho shika ashike. Oshoka aana yaRebekka aamati yaali oya li aana yahe gumwe, tatekulu Isak.
11 Ihe opo ehogololo lyagumwe li kale naanaa, ngaashi Kalunga e shi dhiladhila, Kalunga mwene okwa lombwele Rebekka a ti: “Omumwoye omukuluntu ota ka longela omumwayina ngoka omushona.” Oye okwe shi popi, manga inaaya valwa nomanga inaaya ninga sha oshiwanawa nenge oshiwinayi. Oshoka Kalunga ngele ti ithana nenge ta hogolola, itaku talwa iilonga.
12
13 Ngaashi enyolo tali ti kutya Kalunga okwa li e hole Jakob e ta tondo Esau.
14 Otatu ti ngiini ano? Otatu ti ando kutya Kalunga ke shi omuyuuki? Itashi vulika!
15 Oshoka Kalunga okwa lombwele Moses a ti: “Otandi sile ohenda ngoka nda hala oku mu sila ohenda notandi si olukeno ngoka nda hala oku mu sa olukeno.”
16 Onkee ano kashi shi oshinima tashi ningilwa omuntu molwehalo lye nenge molwiilonga ye, ihe ote shi ningilwa molwesilohenda lyaKalunga.
17 Oshoka enyolo otali popi Farao tali ti: “Kalunga okwe ku ningi omukwaniilwa oku ku longitha, a holole oonkondo dhe noku tseyithe edhina lye muuyuni auhe.”
18 Onkee ano Kalunga ota sile ohenda ngoka a hala oku mu sila ohenda nota kukutike ngoka a hala oku mu kukutika.
19 Gumwe gwomune okwa hala okupula ndje ngiika a tye: “Ngele osho ngawo, Kalunga ota vulu ngiini okupa omuntu uusama? Oshoka olye ta vulu okutinda ehalo lyaKalunga?”
20 Ihe ongoye lye, kuume kandje, u vule okuyamukula Kalunga? Ndishi oshuma sheloya itashi vulu okupula ngoka e shi hongo, shi tye: “Omolwashike wa ningi ndje ngeyi?”
21 Oshoka omuhongi gwiiyuma kehe oku na oonkondo dhokuutha eloya, e li ninge ngaashi a hala, ye a honge meloya tuu ndyoka oshuma shimwe shi na ondilo noshikwawo shombiliha.
22 Ano Kalunga osho a ningi ngaaka. Oye okwa li a hala okuholola ondjahi ye nokuulika oonkondo dhe, ihe okwi idhidhimike nokwa sile olukeno olunene aantu mboka ye na okugeelwa noya tegelela okuyonwa po.
23 Oye okwa li wo a hala okuholola uuwindji weadhimo lye, ndyoka e li zaleke tse mboka e tu sile ohenda nokwe tu longekidha oku li taamba.
24 Oshoka tse mboka e tu ithana, ine tu kutha owala mAajuda, ihe okwe tu kutha wo maapagani.
25 Oshoka membo lyaHosea ota popi ta ti: “Aantu mboka ya li yaa shi yandje, otandi ke yi ithana ‘aantu yandje’. Oshigwana shoka nda li ndaa hole, otandi ke shi ithana ‘omuholike gwandje’.
26 Pehala olyo tuu ndyoka ya lombwelelwe: ‘kamu shi aantu yandje,’ pehala olyo tuu ndyoka otaa ki ithanwa ngashingeyi aana yaKalunga omunamwenyo.”
27 Jesaja oti igidhile Israel ta ti: “Nonando Aaisraeli oya kale oyendji ye thike pehekevi lyopefuta, aashona yowala yomokati kawo taa ka hupithwa.
28 Oshoka Omuwa ota ka ninga mbala eyalulo netokolo lyahugunina muuyuni auhe.”
29 Shika osho shoka Jesaja e shi popi nale ta ti: “Ando Omuwa Omunankondoadhihe ine tu hupithila sha koluvalo lwetu, ando twa ningi twa fa Sodom notu ningwe ngaashi Gomorra.”
30 Otatu ti ngiini ano? Aapagani mboka inaaya kambadhala okwiininga aayuuki koshipala shaKalunga, oya ningwa aayuuki molweitaalo.
31 Aaisraeli mboka ya kambadhala nompango, yi ya ninge aayuuki koshipala shaKalunga, oya nyengwa.
32 Omolwashike? Oshoka shoka ye shi ningi, kasha li shi ikwatelela keitaalo, ihe okiilonga. Oyo oyi ipumu kemanya tali pundukitha,
33 ndyoka tali popiwa kenyolo kutya: “Tala, otandi tula muSion emanya tali pundukitha aantu, emanya hoka aantu taa ki ipuma ko. Ihe ngoka te mu itaale, ita sithwa ohoni.”
1 Aamwameme, ondi na ehalo momwenyo gwandje, Aaisraeli ya hupithwe, onkee ohandi ya galikanene.
2 Ngame mwene otandi vulu oku ya hokolola kutya oye na ehwamo lyokulongela Kalunga, nonando kaye na uunongo oku shi ninga lela.
3 Oshoka inaa tseya nkene Kalunga ta ningi aantu aayuuki koshipala she. Oyo otaa kambadhala okutota ondjila yawo yene yo inaa gama kondjila ndjoka yaKalunga yokuninga aantu aayuuki.
4 Oshoka ompango oya hulu, sho Kristus e ya, opo kehe ngoka ti itaale, a ninge omuyuuki koshipala shaKalunga.
5 Moses ota nyola kombinga yomuntu ngoka ta ningi omuyuuki koshipala shaKalunga mokugwanitha ompango ta ti: “Omuntu ngoka ta gwanitha shoka tashi pulwa kompango, ota kala e na omwenyo molwayo.”
6 Ihe shoka tashi popiwa kombinga yomuntu ta ningi omuyuuki koshipala shaKalunga molweitaalo, osho shika: “Ino ilombwela mwene, u tye: Olye ta londo, a ye megulu?” nokutya e ke ete Kristus.
7 “Ino tya wo: Olye ta kulukile muule mwiya?” nokutya e ke ete ko Kristus kuusi.
8 Shika otashi ti. “Oohapu dhaKalunga odhi li popepi nangoye, mokana koye nomomwenyo gwoye.” Odho oohapu ndhoka tatu dhi uvitha notadhi pula eitaalo.
9 Ngele to hempulula nokana kutya Jesus oye Omuwa, nowi itaala momwenyo gwoye kutya Kalunga okwe mu yumudha kuusi, nena oto hupithwa.
10 Oshoka ngoka i itaala nomwenyo gwe aguhe, ota ningi omuyuuki koshipala shaKalunga, naangoka ta hempulula nokana ke, ota hupithwa.
11 Oshoka enyolo otali ti: “Kehe ngoka te mu itaale, ita sithwa ohoni.”
12 Mpaka kapu na eyooloko pokati kAajuda naapagani. Kalunga oye Omuwa gwaayehe noha gandja ayihe yomuuyamba we kwaayehe mboka taye mu ithana.
13 Ngaashi enyolo tali ti: “Kehe ngoka ti ithana edhina lyOmuwa, ota hupithwa.”
14 Ihe otaye mu ithana ngiini, ngele inaye mu itaala? Notaa itaale ngiini, ngele inaa uvithilwa?
15 Noohapu otadhi uvithwa ngiini, ngele aayuvithi inaa tumwa ko? Ngaashi enyolo tali ti: “Osho opala ngiini, aantu mboka taye ya okuuvitha elaka etoye!”
16 Ihe haayehe ya taamba elaka etoye. Jesaja mwene ota ti: “Omuwa, olye i itaale euvitho lyetu?”
17 Onkee ano eitaalo ohali zi mokuuva, neuvitho otali zi moohapu dhaKristus.
18 Ihe ote pula: Oshoshili tuu kutya inaa uva? Oyo oyu uva, ngaashi enyolo tali ti: “Ekugagano lyewi lyaayuvithi olyi ifala kombanda yevi alihe, oohapu dhawo odha thiki sigo okooha dhuuyuni.”
19 Ihe natango ote pula: Aaisraeli inaye shi tseya nani? Moses ota yamukula tango ta ti: “Otandi mu ningi mwa sila aantu efupa mboka yaa shi oshigwana. Otandi mu ningi mu geele oshigwana shaa na oondunge.”
20 Jesaja wo okwa popi e na uupenda, sho ta ti: “Onda monika kaantu mboka inaa konga ndje, ondi ihololele aantu mboka inaa pula ndje.”
21 Ihe kombinga yaIsrael ota ti: “Esiku alihe onda yelutha omaako kaantu ihaaya vulika noye na iityani.”
1 Ihe otandi pula: Kalunga okwe ekelahi aantu ye? Aawe, hasho! Ngame mwene Omuisraeli, gwomoluvalo lwaAbraham nomunezimo lyaBenjamin.
2 Kalunga ine ekelahi aantu ye, mboka e ya hogolola okuza petameko. Omwa lesha ndishi ehokololo moka Elia ta tamaneke Aaisraeli koshipala shaKalunga ta ti:
3 “Omuwa, oyo ya dhipaga po aahunganeki yoye noya hanagula po iiyambelo yoye. Ongame awike nda hupu po, ihe otaa kongo ndje, ya dhipage ndje wo.”
4 Eyamukulo ndyoka Kalunga e mu yamukula otali ti ngiini? Otali ti: “Ondi na po natango aalumentu omayuvi gaheyali, mboka inaaya galikana oshikalunga Baal.”
5 Ano osho naanaa shi li ngashingeyi. Opu na omwaalu omushona gwowala gwaamboka Kalunga e ya hogolola molwesilohenda lye.
6 Ehogololo ndika olyopasilohenda lyaKalunga kali na sha niilonga yawo. Oshoka ando okwa li ehogololo lyaKalunga lya li lyi ikwatelela kushoka aantu ye shi longa, ando esilohenda lye kali shi we esilohenda lyashili.
7 Ihe ongiini ano? Aaisraeli inaa mona shoka ya li taye shi lalakanene, ihe osha monika kokangundu okashona hoka Kalunga e ka hogolola. Mbeyaka yalwe oya thitike omakutsi, yaa uve eithano lyaKalunga.
8 Ngaashi enyolo tali ti: “Kalunga okwa kukutike omitima nomadhiladhilo gawo, onkee sigo onena omeho gawo kage wete ko nomakutsi gawo kagu uvite ko.”
9 David kombinga ye ota ti: “Iililo yawo nayi ya ningile omwigo gwoku ya kwata noku ya yula. Naa punduke e taa geelwa.
10 Omeho gawo naga tsike, yaa vule okumona ko. Naa kale aluhe ya thindilwa pevi komaudhigu.”
11 Nena otandi pula: Aajuda oya pundukilile? Aawe, itashi vulika! Ihe sho ya yono, ehupitho olye ya kaapagani, opo Aajuda ye ya sile efupa.
12 Onkee ano okuyona kwAajuda okwe etele uuyuni omayambeko ogendji, noluhepo lwawo lwopambepo olwe etele aapagani omayambeko ogendji. Ano omayambeko otaga ka kala ge thike peni, uuna omwaalu gwAajuda ayehe tagu ke ya mo!
13 Ngashingeyi otandi popi kombinga yeni aapagani. Sho ndi li po omutumwa mokati kaapagani, otandi isimanekele oshilonga shandje.
14 Pamwe otashi vulika, aantu yomoshigwana shandje taa ka sila aapagani efupa, opo ndi vule ihe okuhupitha nando oyamwe yomuyo.
15 Oshoka sho ya li ye ekelwahi, nena uuyuni owa hanganithwa naKalunga. Otashi ka kala ano ngiini, uuna taa ka taambwa? Otashi ka kala ongotaa yumudhwa kuusi.
16 Ngele okapambu kotango koshikwiila taka pewa Kalunga, nena oshikwiila ashihe oshe wo. Omidhi dhomuti ngele odha pewa Kalunga, nena iitayi oye wo.
17 Iitayi yimwe yolumono ndoka lwa helelwa, oya teywa ko, e taku tsikwa ihe oshitayi sholumono lwomiihwa. Ne aapagani omwa fa naanaa olumono ndoka lwomiihwa, ihe ngashingeyi otamu yamu mekota lyolumono lwa helelwa iikulya iitoye.
18 Onkee ano ino inenepeka, u dhine iitayi mbyoka ya teywa ko. Ngoye oshitayi showala, hangoye wa humbata ekota, ihe ekota olyo lye ku humbata.
19 Ihe pamwe oto ti: “Eeno osho, ihe iitayi mbyoka oya teywa ko, opo ndi tsikwe ko.”
20 Shika oshoshili. Oyo oya teywa ko, oshoka inaa itaala, manga ngoye owa tulwa peha lyawo, oshoka owi itaala. Ihe ino shi inenepekela, shila kala wa tila.
21 Oshoka Kalunga ngele ina hupitha Aajuda mboka iitayi yopanshitwe, nangoye wo ite ku hupitha.
22 Mpaka otatu mono uuwanawa nuugeyi waKalunga mpoka u thike. Oye ota geele mboka ya shuna monima. Kungoye oye omwaanawa, ngele oto u kwata nawa; ihe ngele hasho, nena nangoye wo oto ka tetwa mo.
23 Aajuda wo ngele taa etha okwaaitaala kwawo, nena otaa shunwa pehala mpoka ya li. Kalunga ota vulu oku ya shuna po natango.
24 Ne aapagani omwa fa oshitayi sholumono lwomiihwa shoka sha teywa ko e tashi tsikwa nuunkulungu kolumono lwa helelwa. Aajuda oya fa olumono ndoka, onkee kombinga yaKalunga oshipu okutsika ko natango iitayi mbyoka ya li ya tewa ko kolumono tuu ndoka.
25 Aamwameme, opo mwaa kale tamu landula oondunge dheni yene, onda hala oku mu tseyithila oshiholekwa shika kutya kombinga yimwe Aaisraeli oya adhika keikukutiko tali kala sigo omwaalu gwa gwana gwaapagani gwe ya kuKalunga.
26 Ano Aaisraeli ayehe otaa ka hupithwa, ngaashi enyolo tali ti: “Omuhupithi ota zi muSion, oye ota kombo mo okudhina Kalunga moluvalo lwaJakob.
27 Otandi dhike ehangano nayo, sho tandi kutha po oondjo dhawo.”
28 Aajuda oya ningi aatondi yaKalunga omolweni aapagani, oshoka oya tindi elaka etoye. Ihe molwehogololo lyaKalunga oyo aaholike omolwoohekulu.
29 Oshoka Kalunga iha lundulula omadhiladhilo ge kutya ota hogolola lye nota yambeke lye.
30 Ne aapagani omwa li nale inaamu vulika kuKalunga, ihe ngashingeyi Kalunga okwe mu sile ohenda omolwokwaavulika kwAajuda.
31 Osho tuu wo ne sho mwa silwa ohenda, Aajuda oya tindi okuvulika kuKalunga, opo nayo wo ya vule okutaamba esilohenda lyaKalunga ngashingeyi.
32 Oshoka Kalunga okwe ethele ayehe mokwaavulika, opo e ya sile ohenda ayehe.
33 Ano uuwindji wuuyamba waKalunga ou thike peni! Uunongo noondunge dhe odha hulila peni! Olye ta vulu okufatulula omatokolo ge? Olye ta vulu okuuva ko oondjila dhe?
34 Ngaashi enyolo tali ti: “Olye a tseya omadhiladhilo gOmuwa? Olye ta vulu oku mu tsa omayele?
35 Olye e mu pele sha tango, ye e shi mu galulile?”
36 Oshoka ayihe oya shitwa kuye, omolwe ayihe yi li po notayi shuna kuye. Kalunga na simanekwe aluheluhe! Amen.
1 Onkee ano, one aamwameme, otandi mu kumagidha, mu dhimbulule esilohenda lyaKalunga kutseni mpoka li thike: Igandjeni ne yene kuKalunga eyambo li na omwenyo, mu kale mwe mu iyapulila, ne mu kale mwe mu opalela. Ndika olyo elongelokalunga lyeni lyashili.
2 Inamu faathana nonkalo yuuyuni mbuka, aawe, Kalunga ne mu shitulule meni lyeni nomomadhiladhilo geni. Nena otamu vulu ihe okutseya ehalo lyaKalunga naashoka oshiwanawa, she mu opalela nosha gwana.
3 Omolwomagano gesilohenda lyaKalunga ngoka nde ga pewa, onda hala oku mu lombwela one amuhe: Inamu idhiladhilila pehala mpoka inaamu adha, ihe dhiladhileni pandjele. Kehe gumwe gwomune ni iyeleke pamuthika gweitaalo ndyoka Kalunga e li mu pa.
4 Otse otu na iilyo oyindji molutu lumwe, nakehe shimwe shomiilyo mbika oshi na oshilonga shasho shi ili.
5 Osho wo, nonando tse otu li po oyendji, otse olutu lumwe muukumwe naKristus notwa kwatelwa kumwe ongiilyo yolutu lumwe.
6 Onkee ano otu na okulongitha omagano getu gi ili nogi ili pasilohenda ndyoka twe li pewa kuKalunga. Ngele otu na omagano gokuuvitha oohapu dhaKalunga, natu shi ninge paitaalo lyetu.
7 Ngele okuyakula, natu yakule. Ngele okulonga aantu, natu longe.
8 Ngele okutsa yakwetu omukumo, natu shi ninge. Ngoka ta pe yakwawo sha, na gandje nomwenyo aguhe. Ngoka e na oonkondo dhokupangela aantu, ne shi ninge noondunge. Ngoka ta kwatha mboka ye li moluhepo, ne shi ninge nenyanyu.
9 Ohole nayi kale yashili. Tondeni shaa shoka oshiwinayi, ne mu dhiginine shoka oshiwanawa.
10 Kaleni mu na ohole yaamwayinathana, ne mu lalakanene okusimanekathana.
11 Longeni nuupenda, inamu kala aanye. Longeleni Omuwa nomwenyo aguhe.
12 Etegameno nali mu nyanyudhe, idhidhimikeni muudhigu, dhiginineni okugalikana.
13 Kwatheni yakweni mboka ye na oluhepo, ne mu yakule oondjendi momagumbo geni.
14 Galikaneni Kalunga, a yambeke mboka taye mu tidhagana; eeno, ya galikaneni, e ya yambeke, kee ya thinge.
15 Nyanyukweni pamwe naamboka ya nyanyukwa, lileni pamwe naamboka taa lili.
16 Inamu kala mu hole komeho, ihe pangeni uukuume naamboka aafupi. Inamu itala kutya one aanandunge.
17 Ngele ku na ngoka te mu ningile uuwinayi, inamu mu shunithila uuwinayi. Kambadhaleni okuninga shoka aantu ayehe taye shi tala kutya oshiwanawa.
18 Ne yene kombinga yeni ningeni ashihe tamu shi vulu, mu kale nombili naantu ayehe.
19 Aaholike, inamu shunithila omuntu uuwinayi, ihe etheni, ondjahi yaKalunga yi shi ninge. Oshoka enyolo otali ti: “Egeelo olyandje, ongame mwene tandi ka geela, Omuwa osho ta ti.”
20 Onkee ano ninga, ngaashi enyolo tali ti: “Omutondi gwoye ngele okwa sa ondjala, mu pa a lye. Ngele okwa sa enota, mu pa a nwe, oshoka moku shi ninga oto gongele omakala ga tema komutse gwe.”
21 Inamu sindwa kuuwinayi, ihe sindeni uuwinayi nuuwanawa.
1 Omuntu kehe na vulike kaapangeli mboka taye mu pangele. Oshoka epangelo kehe itali vulu okukala po, ngele inali pitikwa kuKalunga. Aapangeli mboka tu ya na, oya tulwa po kuKalunga.
2 Kehe ngoka ta tindi okuvulika kepangelo, oye okwa tsa ondumbo neutho lyaKalunga, naangoka ta ningi ngaaka, okwi ilongela okugeelwa.
3 Oshoka aapangeli kaye lile po okutilitha mboka taa longo uuwanawa, ihe oomboka taa longo uuwinayi. Opo waa kale wa tila omupangeli, longa uuwanawa, nena ote ku pandula.
4 Oshoka omupangeli oye omuyakuli gwaKalunga e lile po uuwanawa woye mwene. Ihe ngele to longo uuwinayi, kala wa tila, oshoka oku na oonkondo dhoku ku geela. Oye omuyakuli gwaKalunga mokugeela mboka taa longo uuwinayi.
5 Onkee ano ne omu na okuvulika kaapangeli, hamolwokutila ondjahi yaKalunga ayike, ihe omolweiyuvo lyeni wo.
6 Onkee ano omolwoshinima shika ohamu gandja oompale. Oshoka aapangeli ohaa longele Kalunga, uuna taa gwanitha iinakugwanithwa yawo.
7 Ano ya peni shoka mu na oku shi ya pa: ya peni oompale nomafendelo; vulikeni ne mu ya simaneke ayehe.
8 Inamu kala mu na ongunga yomuntu, kakele kongunga yokuholathana. Oshoka ngoka e hole mukwawo, oye okwa gwanitha ompango ayihe.
9 Iipango oyo mbika: “Ino hondela, Ino dhipaga, Ino yaka, Ino haluka;” iipango mbika ayihe niikwawo ya gwedhwa ko, oya kwatelelwa moshipango shika: “Hola mukweni, ngaashi ngoye wi ihole mwene.”
10 Oshoka ngoka e hole mukwawo, ita vulu oku mu ningila uuwinayi. Onkee ano ohole oyo egwanitho lyompango ayihe.
11 Ningeni shika, oshoka omwa tseya ethimbo ndika kutya olyo ethimbo lyokupenduka moomposi. Ngashingeyi ehupitho lyetu oli li popepi li vule lyuuna ndoka twa tameke okwiitaala.
12 Uusiku owa tya koongulasha, netango oli li pokupita. Natu etheni okulonga iilonga yomomilema. Natu ihomatekeni iikondjitho, tse tu kondjeni tu li muuyelele.
13 Natu endeni pamikalo ndhoka dho opala, ngashika aantu taa ende muuyelele; hamuufukedhi nomuunkolwi, hamuuholume nomuukeeneidhiliko, hamoontamanana nomefupa.
14 Ihe ihomatekeni iikondjitho mbyoka tamu yi pewa kOmuwa Jesus Kristus, ne inamu landula ehalo lyomuntu guulunde.
1 Taambeni mokati keni omuntu ngoka omunkundi meitaalo, ne inamu mu ludhikitha kombinga yomadhiladhilo ge.
2 Omuntu gumwe eitaalo lye otali mu pitika, a lye shaa shoka, ihe omuntu ngoka omunkundi meitaalo ota li owala iikwamboga.
3 Omuntu ngoka ha li shaa shoka, ina dhina mukwawo ngoka ihee shi ningi. Osho tuu wo ngoka ha li owala iikwamboga, ina pangula mukwawo ngoka ha li shaa shoka, oshoka Kalunga okwa taamba omuntu ngoka.
4 One oolye, mu vule okupangula omuyakuli gwomuntu gulwe? Mwene gwe oye mwene ta tokola, ngele omuntu ngoka ota ka mona elago nenge omupya. Oye ota ka mona elago, oshoka Omuwa ota vulu oku mu kwatha, e li mone.
5 Omuntu gumwe ota dhiladhila kutya esiku lyontumba olya simana li vule omakwawo, manga mukwawo ta dhiladhila kutya omasiku agehe oge thike pamwe. Kehe gumwe na kale a kola momadhiladhilo ge.
6 Ngoka ha dhiladhila esiku lyontumba li vule omakwawo, ne shi ninge nokusimaneka Omuwa. Ngoka ha li shaa shoka, ne shi ninge okusimaneka Omuwa, sho ta pandula Kalunga omolwiikulya. Ngoka ta tindi okulya iikulya yontumba, ne shi ninge nokusimaneka Omuwa, sho ta pandula Kalunga.
7 Oshoka kaku na nando ogumwe gwomutse e li po owala polwe mwene, nokaku na nando ogumwe gwomutse ta si owala polwe mwene. Ngele tatu kala tu na omwenyo, otatu kalele Omuwa,
8 nongele tatu si, otatu sile koshipala shOmuwa. Onkee ano, ngele otu na omwenyo nenge otatu si, otse oyOmuwa.
9 Oshoka Kristus okwa si e ta yumuka kuusi, opo a kale Omuwa gwaasi nogwaanamwenyo.
10 Nenge ngoye, omolwashike to pangula mukweni? Nenge ngoye, omolwashike to dhini mukweni? Oshoka tse aantu atuhe otatu ka thikama koshipala shaKalunga, tu pangulwe kuye.
11 Oshoka enyolo otali ti: “Ngaashi ndi na omwenyo, kehe omuntu ota ka tsa oongolo koshipala shandje, Omuwa osho ta ti. Kehe omuntu ota ka hempulula kutya ongame Kalunga.”
12 Ano kehe gumwe gwomutse ote ki ihokolola koshipala shaKalunga polwe mwene.
13 Ano inatu pangulathaneni. Ihe kaleni mu na etokolo, mwaa pundukithe mukweni nenge oku mu undulila muulunde.
14 Ngame sho ndi na uukumwe nOmuwa Jesus, ondi shi shi nawa kutya kaku na oshinima sha nyata musho shene. Ihe ngele omuntu i itaala kutya oshinima shontumba osha nyata, nena otashi nyata.
15 Ngele oto yono po mukweni naashoka to shi li, nena ino landula we ompango yohole. Ino etha iikulya mbyoka to yi li, yi yone po omuntu ngoka Kristus e mu sile.
16 Ino etha shoka to shi tala oshiwanawa, shi mone edhina ewinayi.
17 Oshoka Oshilongo shaKalunga kashi shi oshinima shokulya nokunwa, ihe oshuuyuuki nombili nenyanyu, naambika otayi zi mOmbepo Ondjapuki.
18 Naangoka ta longele Kristus pamukalo nguka, oye okwo opalela Kalunga nokwa hokiwa kaantu.
19 Onkee ano otu na okulalakanena aluhe mbyoka tayi tu kaleke tu na ombili nooyakwetu, naambyoka tayi tungu okukalathana kwetu.
20 Ino hanagula po oshilonga shaKalunga omolwiikulya. Iikulya ayihe, otashi vulika, yi liwe, ihe osha puka, ngele to li iikulya mbyoka tayi undulile mukweni muulunde.
21 Oshinima shoka oshiwanawa okuninga, okukala ihoo li onyama noihoo nu omaviinu nenge okuninga kehe tuu shoka tashi pundukitha mukweni.
22 Kala mushoka ngoye mwene we shi tala shu uka koshipala shaKalunga. Omunelago oye ngoka eiyuvo lye itaali mu pe uusama mumbyoka ta tala kutya iiwanawa.
23 Ihe ngele oku na omalimbililo kombinga yaashoka te shi li, nena Kalunga ote mu pe uusama, oshoka okulya kwe inaku za keitaalo. Ano kehe tuu shoka inaashi za keitaalo, osho oondjo.
1 Tse mboka twa kola meitaalo, otu na okukwatha yakwetu mboka aankundi mokuhumbata omitenge dhawo, tse twaa iyopalele tse yene.
2 Kehe gumwe gwomutse no opalele mukwawo omoluuwanawa wamukwawo ngoka noku mu kokitha meitaalo.
3 Oshoka Kristus ini iyopalela ye mwene, ihe ongaashi enyolo tali ti: “Omasheko gaamboka ye ku sheke, oga gwile ndje.”
4 Oshoka ashihe shoka sha nyolwa mOmanyolo, osha nyolwa, shi tu longe, opo tu kale tu na etegameno tali zi mokwiidhidhimika notu mone omukumo, ngele tatu lesha oohapu dhaKalunga.
5 Kalunga, ngoka oluthithiya lweidhidhimiko nolwomukumo, ne mu pe oonkondo, mu kale mu na euvathano mokati keni mokulandula oshiholelwa shaJesus Kristus,
6 opo ne amuhe kumwe mu hambelele Kalunga, He yOmuwa gwetu Jesus Kristus, nomawi inaaga topoka.
7 Taambathaneni ano, ngaashi Kristus e mu taamba, opo mu simaneke Kalunga.
8 Onkee ano otandi mu lombwele ngeyi kutya Kristus okwa ningi omuyakuli gwAajuda, shi holole kutya Kalunga oye omwiinekelwa. Oshoka muKristus omwa tsakanithwa omauvaneko ngoka ga pewa ootate.
9 Onkee aapagani kombinga yawo otaa hambelele Kalunga, sho e ya sile ohenda. Ngaashi enyolo tali ti: “Onkee ano otandi ku hambelele mokati kaapagani, ongame otandi imbile edhina lyoye.”
10 Natango enyolo tali ti: “Nyanyukweni, ne aapagani, pamwe naahogololwa yaKalunga!”
11 Natango otaku tiwa: “Hambeleleni Omuwa, ne aapagani amuhe. Iigwana ayihe nayi mu imbile ehambelelo!”
12 Natango Jesaja ota ti: “Otaku ya ngoka ta zi moluvalo lwaIsai; Oye ta thikama, a pangele aapagani. Oyo notaa ka kala ye mu inekela.”
13 Onkee ano Kalunga, ngoka oluthithiya lwetegameno, ne mu udhithe enyanyu alihe nombili tayi zi meitaalo lyeni, opo mu vule okukoka mokutegamena kweni koonkondo dhOmbepo Ondjapuki.
14 Aamwameme, ngame mwene ondi shi shi nawa kutya mokati keni omu na uuwanawa owindji, ne omu udha oondunge notamu vulu okulongathana.
15 Ihe montumwafo ndjika ondi na uupenda oku mu nyolela, opo ndi mu dhimbuluthe kombinga yiinima yimwe. Shika onde shi ningi omolwompito ndjoka nde yi pewa kuKalunga molwesilohenda lye,
16 ndi kale omuyakuli gwaJesus Kristus mokati kaapagani. Otandi longele Kalunga mokuuvitha elaka etoye lya zi kuye, opo aapagani ya ninge eyambo lya hokiwa kuKalunga nolya yapulwa kOmbepo Ondjapuki.
17 OmolwaJesus Kristus otandi vulu ihe okwiisimanekela oshilonga shaKalunga.
18 Oshoka otandi kala owala ndi na omukumo okupopya kombinga yaashoka Kristus e shi longo moohapu nomiilonga yandje.
19 Oye okwa longo iikumithalonga niinyengandunge koonkondo dhOmbepo Ondjapuki, opo aapagani ya vulike kuKalunga. Onkee ano okuza kuJerusalem nomuushiinda sigo okuIlliriko ondu uvitha nda mana mo elaka etoye tali popi Kristus.
20 Aluhe onda kala ndi na elalakano, ndi uvithe elaka etoye pomahala mpoka apeke Kristus inaa tumbulwa po nale, opo ndaa tungile kekankameno lya fulilwa mo komuntu gulwe i ili.
21 Ngaashi enyolo tali ti: “Mboka inaaye mu lombwelwa, otaa ka mona, naamboka inaa uva, otaa ka uva ko.”
22 Iinima ya tya ngeyi oyo yi imbi ndje olwindji okuya kune.
23 Ano ngashingeyi sho itaandi imbwa we kiilonga mbyoka nde yi longo momahala ngano, naunene sho nda kala oomvula odhindji ndi na ehalo okuya, ndi mu talele po, otandi shi ningi.
24 Ondi na edhiladhilo oku mu talela po, opo ndi pite pune mondjila yandje yokuya kuSpania, nongele nde mu talele po, otamu vulu ihe okuthindikila ndje nkwiyaka.
25 Ngashingeyi otandi ka pita kuJerusalem, ndi fale omagano ngoka ga pewa aantu yaKalunga yaankoka.
26 Oshoka omagongalo agehe gomuMakedonia nogomuGreka oga tokola, ga umbe ongalo yokukwatha oohepele dhomaantu yaKalunga muJerusalem.
27 Oyo oya tokola oku shi ninga pahalo lyawo yene, oshoka oyu uvite kutya oye na oku ya kwatha. Oshoka Aajuda oya topolele aapagani omagano gopambepo, onkee naapagani wo oye na okupa Aajuda momagano gawo gopalutu.
28 Ngele nda mana okugongela ongalo ndjika, otandi ke ya faalela ekwatho ndyoka lya zi mo e tandi mu talele po ihe mondjila yandje yokuSpania.
29 Ondi shi shi kutya ngele tandi ya kune, otandi mu etele eyambeko alihe tali zi kuKristus.
30 Aamwameme, otandi mu indile omolwOmuwa gwetu Jesus Kristus nomolwohole tayi zi mOmbepo Ondjapuki: galikaneni mwa mana mo pamwe nangame koshipala shaKalunga omolwandje.
31 Galikaneni, ndi hupithwe miikaha yaantu mboka inayi itaala yomuJudea, opo wo omagano geyakulo ngoka tandi ga fala kuJerusalem, ga taambwe nawa kaantu yaKalunga yaankoka.
32 Ngele Kalunga okwe shi hala, otandi ya kune ndu udha enyanyu, ndi mone evululuko moku mu talela po.
33 Kalunga, ngoka oluthithiya lwombili yetu, na kale nane amuhe. Amen.
1 Omumwameme meitaalo Foibe, ngoka ta yakula egongalo lyomuKenkrea, otandi mu gandja moshimpwiyu sheni.
2 Mu taambeni medhina lyOmuwa, ne mu mu yakule moompumbwe dhe adhihe, ongaashi sho opalela aantu yaKalunga. Oshoka oye okwa yakula aantu oyendji, nangame mwene wo.
3 Kundeni Priska naAkula, aayakuli ooyakwetu moshilonga shaJesus Kristus.
4 Oyo oya li ya hupula oomwenyo dhawo omolwandje. Otandi ya pandula unene, hangame awike, ihe otaa pandulwa wo komagongalo agehe ngoka ga zi maapagani.
5 Kundeni wo egongalo ndyoka hali gongala megumbo lyawo. Kundeni kuume kandje omuholike Epainetus, ngoka i itaale tango Kristus muAsia.
6 Kundeni Maria, ngoka e mu ihepekele noonkondo.
7 Kundeni Andronikus naJunias, oyo Aajuda ooyakwetu mboka ya li mondholongo pamwe nangame. Oyo oya tseyika nawa kaayapostoli noya ningi tango aakriste kungame.
8 Kundeni Ampliatus, kuume kandje omuholike muukumwe nOmuwa.
9 Kundeni Urbanus, omuyakuli mukwetu moshilonga shaKristus nakuume kandje omuholike Stakus.
10 Kundeni Apelles, ngoka i iholola kutya okwa hala okulandula Kristus. Kundilii po yaandjaAristobulus.
11 Kundeni Herodion, Omujuda mukwetu, naakriste mboka ye li maandjaNarkissus.
12 Kundeni Trifania naTrifosa, oomboka ye li moshilonga shOmuwa, nosho wo kuume kandje omuholike Persis, ngoka a longele Omuwa nuudhiginini.
13 Kundeni Rufus, omuyakuli a simana moshilonga shOmuwa, nayina, ngoka a kala nangame ongomwana.
14 Kundeni Asinkritus, Flegon, Hermes, Patrobas, Hermas naakriste ooyakwetu ayehe mboka ye li puyo.
15 Kundeni Filologus naJulia, Nereus nomumwayina omukiintu, Olimpas, naantu ayehe yaKalunga ye li puyo.
16 Kundilathanii po nohole yaamwayinathana. Omagongalo agehe gaKristus otage mu kundile po.
17 Aamwameme, otandi mu kumagidha, mu angale aantu mboka taa eta omatopoko notaa pukitha ooitaali, sho ya tsa ondumbo nelongo ndyoka mwe li longwa. Kaleni kokule nayo.
18 Aantu mboka haa ningi iinima ya tya ngeyi, itaa longele Kristus, Omuwa gwetu, aawe, ihe oya pikwa komahalo gawo yene. Oyo ohaa popi oohapu oombwanawa dhokufundjaleka nokupukitha omadhiladhilo gaantu yaa na oondjo.
19 Kehe omuntu okwa uva kutya ohamu vulika kevaangeli; onkee onde mu nyanyukilwa. Oshoka onda hala mu kale aanandunge miinima mbyoka iiwanawa ne kaamu kale mu na okantongo miinima iiwinayi.
20 Kalunga, oluthithiya lwombili, ota ka nyanyagulila mbala Satana kohi yoompadhi dheni. Esilohenda lyOmuwa gwetu Jesus nali kale pamwe nane.
21 Timoteus, omuyakuli mukwetu ote mu kundile po, nosho wo Lukius, Jason naSosipater, Aajuda ooyakwetu, otaye mu kundile po.
22 Ngame Tertius, omukriste mukweni nomunyoli gwoohapu dhaPaulus, otandi mu kundile po.
23 Gaius, omweedhilili gwandje, ote mu kundile po. Megumbo lye omo hamu gongala aakwanegongalo. Erastus, omudhiginini gwiimaliwa yoshilando, nomumwameme Kwartus otaye mu kundile po.
24 Esilohenda lyOmuwa Jesus Kristus nali kale pamwe nane. Amen.
25 Kalunga na simanekwe! Oye ngoka e na oonkondo oku mu kaleka mwa kola meitaalo, tashi monika melaka etoye ndyoka tali popi Jesus Kristus. Otashi monika wo mehololo lyoshili ndjoka ya kala ya holekwa nale momathimbo ga pita.
26 Ngashingeyi oshili ndjika oye etwa puuyelele momanyolo gaahunganeki nokelombwelo lyaKalunga kaaluhe noya tseyithilwa iigwana ayihe, aantu ayehe opo ya vulike kuye noye mu itaale.
27 Kalunga, ngoka omunandunge awike, na simanekwe omolwaJesus Kristus aluheluhe. Amen.