1 Otse otatu mu tseyithile Ohapu yomwenyo ya li ko okuza ketameko, ndjoka twe yi uva notwe yi mona nomeho getu yene. Eeno, tse otwe yi mona, niikaha yetu oye yi guma.
2 Omwenyo nguka sho gwa holoka, otwe gu mono, onkee otatu gu popi notatu mu hokololele omwenyo gwaaluhe, ngoka gwa li puTate notwe gu tseyithilwa.
3 Shoka twe shi mono notwe shi uvu, otatu shi mu hokololele wo, opo mu kale pamwe natse muukumwe mboka tse tu u na naTate nOmwana Jesus Kristus.
4 Shika otatu shi mu nyolele, opo enyanyu lyetu li kale lya gwanenena.
5 Ano elaka ndyoka tse twa uvu kOmwana, otatu li mu tseyithile kutya Kalunga oye uuyelele, muye kamu na nando omilema dhasha.
6 Onkee ano ngele otatu ti kutya otu na uukumwe naye, ihe natango otu li momilema, nena otu na iifundja moohapu dhetu nosho wo miilonga yetu, tse ihatu longo sha shoshili.
7 Ihe ngele tatu kala muuyelele, ngashika naanaa ye e li muuyelele, nena otu na uukumwe mokati ketu, nombinzi yOmwana Jesus otayi tu yogo oondjo dhetu adhihe.
8 Ngele otatu ti kutya katu na oondjo, nena otatu ipukitha tse yene, noshili kayi mo mutse.
9 Ihe ngele tatu hempululile Kalunga oondjo dhetu, nena otatu vulu oku mu inekela, oshoka oye ota longo shoka shu uka. Oye ote tu dhimine po oondjo dhetu e te tu yogo omayono getu agehe.
10 Ngele tatu ti kutya inatu yona sha, nena otatu lundile Kalunga kutya oye omufundja, notashi holola kutya oohapu dhe kadhi mo mutse.
1 Aamwandje, otandi mu nyolele oohapu ndhika, opo mwaa yone. Ihe ngele ku na ngoka a yono, nena otu na Omupopili Kristus, omuyuuki ngoka te tu galikanene puTate.
2 Oshoka Kristus ye mwene oye eyambo lyokudhima po oondjo dhetu, lyo kali shi ashike lyoondjo dhetu, ihe nolyaandhoka wo dhaantu ayehe.
3 Ngele otatu vulika kiipango yaKalunga, nena otu shi shi ihe kutya otu mu shi.
4 Ngele ope na ngoka ta ti: “Ngame ondi mu shi,” ihe ita vulika kiipango ye, omuntu a tya ngaaka oye omufundja, noshili kayi mo muye.
5 Ihe ngoka ta vulika koohapu dhe, oye tuu ngoka ohole yokuhola Kalunga yu udha mo muye. Opo mpoka ihe tse tatu vulu okutseya nawa kutya tse otu li muKalunga.
6 Ngoka ta ti kutya okwa kala muKalunga, oye na kale ngashika Jesus Kristus a li.
7 Ookuume kandje aaholike, oshipango shika tandi shi mu nyolele, kashi shi oshipe. Osho oshipango sha tseyika shoka mwa kala nasho okuza ketameko. Oshipango shoka osho Ohapu ndjoka mwe yi uvu okuza ketameko.
8 Onkene tuu oshipango shika tandi shi mu nyolele, osho oshipe, noshili yasho oya monika muKristus nomune wo. Oshoka omilema odhi li pokuhula, nuuyelele washili otau minikile nale nokuli.
9 Ngoka ta ti kutya oku li muuyelele, ihe oku tonde mukwawo, oye oku li natango momilema.
10 Ngoka e hole mukwawo, oye oku li muuyelele nomuye kamu na nando osha shoka tashi fala mukwawo muulunde.
11 Ihe ngoka e tonde mukwawo, oye oku li momilema note ende mudho, ye ita tseya nkoka ta yi, oshoka omilema odha tsikitha omeho ge.
12 Aamwandje, otandi mu nyolele, oshoka oondjo dheni odha dhimwa po omolwaKristus.
13 Ngame otandi mu nyolele, ne ootate, oshoka one omu mu shi ngoka a li ko okuza ketameko. Ngame otandi mu nyolele, ne aalumentu aagundjuka, oshoka one omwa sinda Mwiinayi.
14 Ngame otandi mu nyolele, ne aanona, oshoka one mwa tseya Tate. Ngame otandi mu nyolele, ne ootate, oshoka one omu mu shi ngoka a li ko okuza ketameko. Ngame otandi mu nyolele, ne aalumentu aagundjuka, oshoka one aanankondo, oohapu dhaKalunga odhi li mune, one nomwa sinda Mwiinayi ngoka.
15 Inamu kala mu hole uuyuni nenge iinima ayihe yomuuyuni. Ngele omu hole uuyuni, ohole yokuhola Tate kayi mo mune.
16 Iinima ayihe mbyoka yi li muuyuni, inayi za muTate, ihe oyomuuyuni. Iinima mbika oyo uuhalu wopantu okuhola mbyoka aantu taye yi tala notaye yi itangele.
17 Uuyuni niinima ayihe yi li mo mbyoka aantu ye yi hokwa, otayi hulu po. Ihe ngoka ta longo shoka Kalunga a hala, ota kala e na omwenyo aluhe.
18 Aamwandje, ehulilo oli li popepi! One mwa lombwelwa kutya omukondjithi gwaKristus ote ke ya. Ngashingeyi okwa holoka nale aakondjithi oyendji yaKristus, onkee otu shi shi kutya ehulilo oli li popepi.
19 Aantu mbaka oya zile mutse, ihe kaya li oyaakwetu, onkee oye tu thigi po e taa yi. Oshoka ando oya li oyaakwetu, ando oya kala putse. Ihe oyo oya yi opo shi kale sha yela kutya kape na nando ogumwe gwomuyo a li mukwetu.
20 Ihe ne amuhe omu na Ombepo Ondjapuki, ndjoka ya tililwa mune kuKristus, onkee ne amuhe omwa tseya oshili.
21 Ano ngame otandi mu nyolele, hamolwaashoka ando inaamu tseya oshili, aawe, ihe omolwaashoka mu yi shi, nomu shi shi kutya miifundja ihamu zi oshili.
22 Olye ano omufundja? Oye tuu ngoka ta tindi okutya, Jesus oye Kristus. Omuntu a tya ngaaka oye omukondjithi gwaKristus, oye tuu ngoka ti idhimbike ayehe yaali: He nOmwana.
23 Oshoka ngoka ti idhimbike Omwana, oti idhimbike wo He, naangoka ta taamba Omwana, ota taamba wo naHe.
24 Kaleni ihe mu na omukumo okupungula moomwenyo dheni elaka ndyoka mwe li uvu okuza ketameko. Oshoka ngele shoka mwe shi uvu okuza ketameko, tashi kala mune, nena otamu kala muukumwe nOmwana nosho wo naHe.
25 Shika osho shoka Kristus mwene e tu uvanekele, oku tu pa omwenyo gwaaluhe.
26 Ngame onde mu nyolele oshinima shika omolwaamboka ya hala oku mu pukitha.
27 Ihe Kristus okwe mu tilile Ombepo ye. Onkee Ombepo ye ngele tayi kala mune, nena one inamu pumbwa nando omuntu te mu longo. Oshoka Ombepo otayi mu longo iinima ayihe, naashoka te mu longo, osho oshoshili, kashi shi shiifundja. Onkee ano vulikeni kelongo lyOmbepo e tamu kala muKristus.
28 Aamwandje, tu kaleni muye, opo tu vule okukala tu na omukumo, uuna ndoka ta holoka, tse twaa pumbwe oku mu holama noku mu sa ohoni esiku ndyoka te ke ya.
29 Omu shi shi kutya Kristus oye omuyuuki, nomwa tseya wo kutya kehe ngoka ta longo shoka shu uka, oye omuna gwaKalunga.
1 Taleni ohole mpoka yi thike, Tate sho e tu hole! Ohole ye oyi li po onene, sho tse hatu ithanwa aana yaKalunga. Osho oshili kutya tse oyana. Onkee ano uuyuni inau tu tseya, oshoka owo inau tseya Kalunga.
2 Ookuume kandje aaholike, otse aana yaKalunga ngashingeyi, ihe inashi yela natango kutya otatu ka kaleni twa tya ngiini! Ihe otu shi shi kutya uuna Kristus ta holoka, otatu ka ningeni twe mu fa, oshoka otse otatu ke mu mona, ngashika naanaa e li.
3 Kehe ngoka e na etegameno ndika muKristus, oti ikaleke a yela ngashika Kristus.
4 Kehe ngoka ta yono, oye oku na ondjo yokuyona ompango yaKalunga, oshoka uulunde owo okuyona ompango.
5 One omu shi shi kutya Kristus okwa holoka, opo a kuthe po oondjo dhaantu, nomuye kamu na nando oondjo.
6 Onkee ano kehe ngoka e li muKristus, oye ita longo uulunde. Ngoka ta longo uulunde, oye ine mu mona nando olumwe ye inee mu tseya.
7 Aamwandje, inamu etha, mu pukithwe nando okulye. Kehe ngoka ta longo shoka shu uka, oye omuyuuki ngashika Kristus omuyuuki.
8 Kehe ngoka ta longo uulunde, oye ota longithwa komuhindadhi, oshoka omuhindadhi nkene a kala oha longo uulunde. Onkee ano Omuna gwaKalunga okwa holoka, opo a hanagule po iilonga yomuhindadhi.
9 Shaa ngoka e li omuna gwaKalunga, oye ita longo uulunde, oshoka okukala kwaKalunga oku li muye. Onkee ano shoka Kalunga oye He, ita vulu okulonga uulunde.
10 Eyooloko pokati kaana yaKalunga naana yomuhindadhi opo li li mpa: Shaa ngoka itaa longo shoka shu uka nenge kee hole mukwawo, oye ke shi omuna gwaKalunga.
11 Oshoka elaka ndyoka twe li uvu okuza ketameko olyo ndika: otse otu na okuholathana.
12 Inatu kaleni twa fa Kain, ngoka a li ta longithwa komuhindadhi nokwa dhipaga po omumwayina. Omolwashike ano Kain a dhipaga mumwayina? Omolwaashoka iilonga yaKain ya li ya puka, ihe iilonga yomumwayina oya li yu uka.
13 Aamwameme, inamu kumwa, aantu yomuuyuni ngele taye mu tondo.
14 Tse otu shi shi kutya otwa za mo meso notwe ya momwenyo, oshoka tse otu hole ooyakwetu. Ngoka ke na ohole, oku li natango meso.
15 Kehe ngoka e tonde mukwawo, oye omudhipagi. One omu shi shi kutya omudhipagi kee na omwenyo gwaaluhe.
16 Ohole otwe yi tseya kutya oyo oshike. Oyo ndjika kutya Kristus okwa si peha lyetu. Ano natse wo otu na okuhupula oomwenyo dhetu omolwooyakwetu.
17 Ngele ku na ngoka e na uuyamba wiinima yomuuyuni mbuka, nota mono mukwawo a hepa e ta kala inee mu pa sha, omuntu a tya ngaaka ota vulu ngiini okutya, ye oku na ohole yaKalunga momwenyo gwe?
18 Aamwandje! Ohole yetu inayi kala ashike moohapu nomokupopya, aawe, nayi kale ohole yashili, ndjoka tayi iholola yo yene miilonga wo.
19 Opo tuu mpoka tatu idhimbulula kutya otu li moshili. Osho ngeyi otatu kala tu uvite omukumo okukala koshipala shaKalunga.
20 Oshoka eiyuvo lyetu ngele otali tu pe uusama, nena otu shi shi kutya Kalunga oye omunene e vule eiyuvo lyetu nokwa tseya iinima ayihe.
21 Onkee ano, ookuume kandje aaholike, eiyuvo lyetu ngele itali tu pe uusama, nena otu na omukumo okuhedha koshipala shaKalunga.
22 Otse notatu pewa kuye ashihe shoka tatu mu indile, oshoka ohatu vulika kiipango ye nohatu longo shoka she mu opalela.
23 Oshipango she osho shika kutya tse otwi itaala edhina lyOmwana Jesus Kristus notu holathane, ngashika naanaa Kristus e tu lombwele.
24 Kehe ngoka ta vulika kiipango yaKalunga, oye oku li muKalunga, naKalunga oku li muye. Ombepo ndjoka e yi tu pa, oyo tayi ulike kutya Kalunga oku li mutse.
1 Ookuume kandje aaholike, inamu itaala ayehe mboka taa ti kutya oye na Ombepo yaKalunga, ihe ya konakoneni, mu tale ombepo ndjoka ye na ngele oyaKalunga tuu. Oshoka aahunganeki aafundja oyendji oya ya nuuyuni auhe.
2 Ombepo yaKalunga otamu yi dhimbulula ngeyi: Kehe ngoka ta hempulula kutya Jesus Kristus okwa ningi omuntu, oye oku na Ombepo yaKalunga.
3 Ihe kehe ngoka ta tindi oshinima shika kombinga yaJesus, oye ke na Ombepo yaKalunga, ndele ombepo yomukondjithi gwaKristus, ngoka mwe mu uvu kutya ote ya, nongashingeyi oku li nale muuyuni.
4 Aamwandje, one aantu yaKalunga, onkee mwa sindi aahunganeki aafundja, oshoka Ombepo ndjoka yi li mune, oyi na oonkondo yi vule ndjiyaka yi li maantu yomuuyuni mbuka.
5 Oyo otaa popi iinima yomuuyuni, nuuyuni otau ya pulakene, oshoka yo oyomuuyuni.
6 Ihe tse aantu yaKalunga. Kehe ngoka a tseya Kalunga, ote tu pulakene; ihe ngoka kee shi omuntu gwaKalunga, ite tu pulakene. Osho ngeyi tatu dhimbulula eyooloko pokati kOmbepo yoshili nombepo yiifundja.
7 Ookuume aaholike! Tu holathaneni, oshoka ohole oya za muKalunga. Kehe ngoka e na ohole, oye omuna gwaKalunga nokwa tseya Kalunga.
8 Oongoka kee na ohole, oye ina tseya Kalunga, oshoka Kalunga oye ohole.
9 Kalunga okwe tu hololele ohole ye, sho a tumu Omuvalwa gwe awike muuyuni, opo tu kale tu na omwenyo omolwe.
10 Ohole hayo ndjoka kutya ando twa li tu hole Kalunga, aawe, ihe Kalunga oye kwa li e tu hole tango nokwa tumu Omwana, a ninge eyambo lyokudhima po oondjo dhetu.
11 Ookuume aaholike, Kalunga ngele osho e tu hole ngeyi, nena natse wo otu na okuholathana.
12 Kaku na omuntu a mono Kalunga nando olumwe. Tse ngele otu holathane, Kalunga ota kala mutse, nohole ye otayi kala yu udha mutse.
13 Opo mpoka tatu tseya ihe nawa kutya tse otu li muKalunga naye oku li mutse, sho e tu pa Ombepo ye.
14 Tse otwe shi mono notatu shi hololele yakwetu kutya Kalunga okwa tumu Omwana, a ninge Omukulili guuyuni.
15 Kehe ngoka ta hempulula kutya Jesus oye Omuna gwaKalunga, Kalunga oku li muye, naye oku li muKalunga.
16 Otse otwa tseya ohole ndjoka Kalunga e yi na oku tu hola notwe yi itaala. Kalunga oye ohole, nakehe ngoka ha kala mohole, oye oku li muKalunga, Kalunga nota kala muye.
17 Elalakano lyohole ndjika olya gwanithwa mutse. Tashi ti, otatu kala tu na omukumo mesiku lyepangulo, oshoka okukalamwenyo kwetu muuyuni mbuka okwa fa nkoka kwaKristus.
18 Mohole kamu na uumbanda, oshoka ohole yashili ndjoka ya gwana otayi tidha po uumbanda auhe. Onkee ano ngoka e na natango uumbanda, ina thika muule wohole ndjika, oshoka uumbanda ou na sha negeelo.
19 Otse otu hole, oshoka Kalunga okwa kala e tu hole tango.
20 Ngele pe na ngoka ta ti kutya oku hole Kalunga, ihe oku tonde natango mukwawo, oye omufundja. Oshoka ita vulu okukala e hole Kalunga, ngoka kee mu wete, ngele kee hole omuntu mukwawo ngoka e mu wete.
21 Ano oshipango shoka Kristus e shi tu pa osho shika: Oongoka e hole Kalunga, oku na wo okukala e hole omuntu mukwawo.
1 Kehe ngoka i itaala kutya Jesus oye Kristus, oye omuna gwaKalunga. Kehe ngoka e hole He, oku hole wo Omwana.
2 Opo tuu mpoka tse tatu dhimbulula kutya tse otu hole aana yaKalunga, ngele tu hole Kalunga notatu vulika kiipango ye.
3 Oshoka ohole yokuhola Kalunga oyo okuvulika kiipango ye. Iipango ye kayi shi iidhigu kutse,
4 oshoka kehe omuna gwaKalunga ota vulu okusinda uuyuni. Esindano ndyoka tatu sindi nalyo uuyuni, olyo eitaalo lyetu.
5 Olye ta vulu okusinda uuyuni? Oye awike ngoka i itaala kutya Jesus oye Omuna gwaKalunga.
6 Jesus Kristus ngoka e ya kutse, okwe ya nomeya geshasho lye nombinzi yeso lye. Ine ya ashike nomeya, ihe okwe ya naayihe iyali; omeya nombinzi. Ombepo yoyene otayi hokolola kutya shika oshoshili, oshoka Ombepo oyo oshili.
7 Ano ope na oonzapo ndatu:
8 Ombepo, omeya nombinzi; naadhihe ndatu odha tsa kumwe.
9 Tse otwi itaala ehokololo lyoonzapo ndatu, ihe ehokololo lyaKalunga oli vule ndyoka. Ehokololo ndika olyo tuu ndyoka Kalunga e li hokolola kombinga yOmwana.
10 Onkee ano shaa ngoka i itaala Omuna gwaKalunga, oye oku na ehokololo ndika meni lye. Ihe ngoka ini itaala Kalunga, oye ota ningi Kalunga omufundja, oshoka oye ini itaala shoka Kalunga e shi hokolola kombinga yOmwana.
11 Ano ehokololo olyo ndika: Kalunga okwe tu pe omwenyo gwaaluhe, nomwenyo nguka otu gu na mOmwana.
12 Shaa ngoka e na Omwana, oye oku na omwenyo nguka; ihe shaa ngoka kee na Omuna gwaKalunga, oye kee na omwenyo.
13 Ontumwafo ndjika otandi yi mu nyolele, opo mu kale mu shi shi kutya omu na omwenyo gwaaluhe, ne mboka mwi itaala edhina lyOmuna gwaKalunga.
14 Ano osho ngeyi otatu vulu okuhedha kuKalunga tu na omukumo, oshoka ngele tatu mu indile shaa shoka she mu opalela, oye ote tu uvu ethimbo kehe ndyoka tatu mu indile.
15 Onkee ano sho tu shi shi kutya shika oshoshili, nena otu shi shi wo kutya oye ote tu pe shoka tatu mu indile.
16 Ngele ope na omuntu ta mono mukwawo ta yono eyono ndyoka itaali mu fala meso, oye ne mu galikanene koshipala shaKalunga, oye note mu tula omwenyo. Shika oshi na sha noondjo ndhoka itaadhi fala meso. Ihe oku na oondjo ndhoka tadhi fala meso, naantu ya tya ngaaka hayo tandi popi kutya naa galikanenwe.
17 Eyono kehe olyo ondjo, ihe oku na oondjo ndhoka itaadhi fala meso.
18 Tse otu shi shi kutya kape na omuntu gwaKalunga ta kala muulunde, shoka Omuna gwaKalunga ote mu gamene kaa yone, nomuhindadhi kaa vule oku mu pukitha.
19 Tse otu shi shi kutya tse aantu yaKalunga, ihe uuyuni auhe ou li mepangelo lyomuhindadhi.
20 Tse otu shi shi kutya Omuna gwaKalunga okwe ya nokwe tu longo okutseya Kalunga kashili. Okukala kwetu oku li muKalunga kashili nomOmwana Jesus Kristus. Nguka oye Kalunga kashili nomwenyo gwaaluhe.
21 Aamwandje, yandeni iikalunga.