1 Ontumwafo ndjika oya zi kuSimon Petrus, omumati nomuyapostoli gwaJesus Kristus. Oya nyolelwa mboka ya pewa eitaalo ewanawa ngaashi lyetu omoluuyuuki waKalunga ketu nowOmukulili Jesus Kristus.
2 Esilohenda nombili nayi mu indjipalele, mu tseye Kalunga naJesus, Omuwa gwetu.
3 Oonkondo dhe dhopakalunga odhe tu pe ashihe sha pumbiwa opo tu kale tu na omwenyo netilokalunga, okoakutseya nguka e tu ithanitha eadhimo lye negwaneneno.
4 Osho ngeyi okwe tu pe omauvaneko ge na ondilo nomanenenene. Moku ga taamba otatu vulu okuya ontuku eolelo ndyoka li li muuyuni omoluuhalu, nokupewa oshtopolwa shuukwatya wopaKalunga.
5 Onkee ano kambadhaleni, eitaalo lyeni li ze iilonga iiwanawa; niilonga iiwanawa yi ze oondunge;
6 oondunge dhi ze eikwatonawa; eikwatonawa li ze eidhidhimiko; eidhidhimiko li ze okusimaneka Kalunga;
7 okusimaneka Kalunga ku ze ohole yaamwayinathana; ohole yaamwayinathana yi ze ohole yokuhola ayehe.
8 Mbika oyo iinima mbyoka mwe yi pumbwa, nongele omu yi na ya gwana e tayi indjipala, otayi mu tula miilonga mbyoka tayi eta iiyimati mokutseya kweni Omuwa gwetu Jesus Kristus.
9 Ihe ngoka kee yi na, oye omuposi ngoka a dhimbwa kutya oondjo dhe dhonale odha dhimwa po.
10 Onkee ano aamwameme, kambadhaleni natango mwa mana mo, okwiithanwa nokuhogololwa kweni kuKalunga ku kale aluhe kwa mena omidhi mune. Oshoka ngele tamu shi ningi, itamu ihata po we.
11 Nena otamu ka pewa ihe ompito yokuya mOshilongo shaaluhe shOmuwa gwetu noshOmukulili Jesus Kristus.
12 Onkee ano otandi kala noku mu dhimbulutha iinima mbika, nonando omu yi shi nale nomwa kolelela moshili ndjoka mwe yi pewa.
13 Onde shi tala shu uka, ndi mu penduthe noku mu dhimbulutha iinima mbika, manga natango ndi na omwenyo.
14 Oshoka onda tseya kutya otandi ka za mo mbala molutu nduka lweso, ngaashi Omuwa gwetu Jesus Kristus e shi lombwele ndje sha yela.
15 Otandi kambadhala oku mu ulukila ondjila, mu vule okudhimbulukwa aluhe iinima mbika nongele nda mana oondjenda.
16 Oshoka moku mu tseyithila okugaluka okunankondo kwOmuwa gwetu Jesus Kristus inatu ikwatelela koongano dha totwa kaantu. Otse twa mono nomeho getu yene uunenesimano we.
17 Opo twa li, uuna a pewa esimano neadhimo kuHe Kalunga, ewi sho lye mu popitha lya zi meadhimo lyokombandambanda lya ti: “Nguka oye Omumwandje omuholike, ngoka nde mu hokwa.”
18 Otse naanaa tu uvu ewi ndika lya zi megulu, sho twa li pamwe naye kondundu ondjapuki.
19 Omolwaashoka otu na wo einekelo enene melaka lyu uvithwa kaahunganeki. Nane wo otamu ningi nawa, ngele tamu li tala nawa, oshoka olya fa olamba tayi minikile momilema, sigo taku shi nonyothi yokoongulasha tayi minikile momitima dheni.
20 Ihe komeho gaayihe omu na okudhimbulukwa kutya kaku na nando omuntu ta vulu okufatulula koonkondo dhe mwene ehunganeko limwe lyomOmanyolo.
21 Oshoka kaku na nando elaka lyopahunganeko lya za mehalo lyomuntu, ihe aantu mokupopya elaka lya za kuKalunga oya wilikwa kOmbepo Ondjapuki.
1 Ngaashi naanaa aahunganeki aafundja ya kala nale haa holoka mokati kaantu, osho wo aalongi aafundja otaa ka holoka mokati keni. Oyo otaa ke eta omalongo tage mu yono po nogaa na oshili. Aantu ya tya ngaaka otaa ki idhimbika Omuwa ngoka e ya kulile e taa iyetele ehanagulo lyombadhilila.
2 Aantu oyendji otaa ka holela uukeeneidhiliko wawo, nomolwiilonga yawo aantu otaa ka sheka ondjila yoshili.
3 Omolwolwiho lwawo aalongi mbaka aafundja otaye mu hokololele iifundja, opo ye mu likole. Ihe nkene ya kala, omupanguli gwawo okwi ilongekidha, nomuhanaguli gwawo oku li popepi.
4 Oshoka Kalunga ine etha inaa geela aayengeli mbeyaka ya yono, ihe okwe ya umbile moheli, moka ye li mo ya mangwa nomalyenge, ya tegelela esiku lyepangulo.
5 Kalunga ine etha inaa geela uuyuni mbwiyaka wonale waakeenakonasha naye, ndele okwe u tumine eyelu. Noa, omuuvithi guuyuuki, oye awike a hupithwa kuKalunga pamwe nooyakwawo yaheyali.
6 Kalunga okwa geele iilando mbiyaka Sodom naGomorra, sho e yi hanagula po nomulilo, u ulukile aakeenakonasha naKalunga shoka taa ka ningwa.
7 Ihe oye okwa hupitha Lot, omulumentu omuyuuki, ngoka a li u uvite nayi kuukeeneidhiliko waakeenompango.
8 Omuyuuki nguka okwa kala mokati kawo, nesiku kehe oku uvu nokwa mono iilonga yawo iiwinayi e tayi alula omutima gwe omuyogoki.
9 Ano Omuwa oku shi shi, nkene e na okuhupitha aantu ye momamakelo ngoka tage ya adha. Ihe oye ota geele aakolokoshi sigo omesiku lyepangulo,
10 unene mboka taa landula uuhalu wa nyata wopantu e taa dhini oonkondo nepangelo lyaKalunga. Aalongi aafundja ya tya ngeyi oyo aalaadhi naatuwalali noihaa tila okusheka iikwayadhimo yomegulu.
11 Naayengeli mboka ye na uukolele noonkondo ye vule aalongi mbaka aafundja, ihaye ya tamanekele okusheka kwawo koshipala shaKalunga.
12 Aantu ya tya ngeyi pakukala kwawo oya fa iiyamakuti ya valelwa okukwatwa nokudhipagwa. Otaa sheke iinima kaaye yi shi, notaa ka yonwa po ya fa iiyamakuti.
13 Aantu mbaka otaa ka geelelwa uukolokoshi wawo. Nopokati komutenya ohaa nyanyukilwa okulonga shaa shoka tashi opalele uuhalu womalutu gawo. Osho esithahoni nesheko, ngele taa kala pamwe nane piililo yeni, kombinga onkwawo ohaa kala moohedhi dhawo oombwinayi.
14 Itaa kongo sha shilwe shaa shi aakiintu aaholume. Ihaa kuta okulonga uulunde. Otaa kwatitha aantu mboka aankundi komwigo. Oomwenyo dhawo odha dheulilwa olwiho. Oye li kohi yethingo lyaKalunga.
15 Oyo oye etha ondjila yu uka e taa kana. Oyo oya landula ondjila ndjoka ya landulilwe kuBileam, omuna gwaBeor, sho a hokwa iimaliwa e ta longo shoka sha puka.
16 Oye okwa pukululilwa eyono lye. Okasino ihaaka popi, oka popi ka fa omuntu noka mweneke iilonga yuugoya yomuhunganeki nguka.
17 Aantu ya tya ngeyi oya fa owala oothithiya dha kukuta niikogo ya halakanithwa koshikungulu shombepo. Kalunga okwe ya yoololela eha molumbogo lwomuule.
18 Oyo ohaa popi iitya yuuntsa noyu udha uugoya. Mboka taa kambadhala okuyanda aantu mboka ye li momapuko, ohaa yulwa nuuhalu wopalutu nonuukeeneidhiliko.
19 Aapukithi otaye ya uvanekele emanguluko, manga yo yene ya ningwa aapika komikalo tadhi ya fala meyonuuko. Oshoka omuntu ota ningwa omupika kukehe shoka tashi mu pangele.
20 Oshoka aantu mboka ya li ya yi ontuku eolelo lyomuuyuni, sho ya tseya Omuwa gwetu nOmukulili Jesus Kristus, ngele taa shuna ishewe meolelo ndyoka e taa sindwa, nena ohugunina yaantu ya tya ngaaka otayi ka ninga ombwinayi yi vule yopetameko.
21 Ando okwa li inaa tseya ondjila yuuyuuki, ando ihwepo shi vule, sho ye yi shi e taa etha ompango ondjapuki ndjoka ye yi pewa.
22 Shoka tashi ya adha, otashi holola kutya eyele olyoshili ndyoka tali ti: “Ombwa otayi galukile konkungo,” na: “Oshingulu sha yogwa otashi galangata ishewe mondoya.”
1 Ookuume kandje aaholike! Ndjika oyo ontumwafo ontiyali nde yi mu nyolele. Moontumwafo adhihe mbali onda kambadhala okupendutha mune omadhiladhilo ga yela, sho nde mu dhimbulutha iinima mbika.
2 Onda hala oku mu dhimbulutha oohapu ndhoka dha popiwa nalenale kaahunganeki aayapuki. Onda hala wo oku mu dhimbulutha oshipango sha zi kOmuwa nOmukulili, shoka mwe shi pewa kaayapostoli yeni.
3 Tangotango omu na oku shi tseya kutya pomasiku gopehulilo otaku ka holoka aantu mboka taa endithwa kuuhalu wawo. Oyo otaye ke mu fundjaleka
4 taa ti: “Oye oku uvaneke tuu, ta ka galuka? Oku li peni? Ootate oya sa nale, ihe iinima ayihe oyi li, ngaashi ya kala shito okuza keshito lyuuyuni.”
5 Otaa ipwililike owina, ongoinaa tseya oshinima shika kutya nalenale Kalunga okwa li a popi, omagulu nevi e tayi shitwa. Evi olyu umbwa momeya nolyu umbwa nomeya,
6 nokomeya geyelu wo uuyuni owa hanagulwa po.
7 Ihe omagulu nevi sho yi li ko sigo onena, oya gamenenwa po kohapu tuu ndjoka yaKalunga, yi ka hanagulwe po nomulilo. Oya pungulilwa esiku, uuna aakeenakonashanakalunga taa ka pangulwa notaa ka yonagulwa po.
8 Ihe ne, ookuume kandje aaholike, inamu dhimbwa oshinima shika. Ano pOmuwa kapu na eyooloko pokati kesiku limwe noomvula eyuvi. Mbika ayihe iyali oya faathana momeho ge.
9 Omuwa ina tokelwa okutsakanitha shoka e shi uvaneke, ngaashi aantu yamwe taa dhiladhila. Oye okwe mu idhidhimikile owala, oshoka ina hala, ku kale nando ogumwe ta geelwa, ihe okwa hala, aantu ayehe ye ethe uulunde wawo.
10 Ihe esiku lyOmuwa otali ya lya fa omufuthi. Mesiku tuu ndyoka omagulu otaga ka kana po nomatopo omanene. Iikwakegulu otayi ka pya po e tayi yonuka po, nevi wo niinima ayihe yi li ko otayi ka lunguna po.
11 Ngele ano iinima ayihe otayi ka yonwa po pamukalo nguno, ne aantu omu na okwaadhika mwa tya ngiini? Omu na okwiiyapulila Kalunga noku mu igandjela,
12 sho mwa tegelela esiku lyaKalunga. Hwameni moku li te gelela, mu li endelelithe, esiku tuu ndyoka, uuna omagulu taga ka pya po e taga ka yonuka po, niikwakegulu tayi ka hemukithwa kuupyu.
13 Ihe tse otwa tegelela shoka Kalunga e shi uvaneka: egulu epe nevi epe, moka tamu ka kala uuyuuki.
14 Onkee ano, ne ookuume kandje, manga mwa tegelela esiku ndyoka, kambadhaleni okukala aayogoki nomwaa na oshipo koshipala shaKalunga, nomu na ombili naye.
15 Taleni kontalanteni yOmuwa gwetu. Oyo ompito yeni okuhupithwa, ongaashi wo omwiitaali mukwetu omuholike, Paulus, e mu nyolele nokulongitha uunongo mboka a pewa kuKalunga.
16 Shika osho te shi popi moontumwafo dhe adhihe. Mudho omu na iinima yimwe iidhigu, mbyoka tayi pilikwa kaantu mboka yaa na ontseyo nekankameno, ongaashi haa ningi wo omahala omakwawo gomOmanyolo. Osho ngeyi otaa iyetele eyonuuko.
17 Ihe ne, ookuume kandje, shika omu shi shi nale. Onkee ano kaleni mwa tonata, opo mwaa pukithwe komapukitho gaantu kaaye na ompango e tamu gu ko kekankameno lyeni lya kola.
18 Ihe kaleni tamu koko mesilohenda nomokutseya Omuwa gwetu nOmukulili Jesus Kristus. Oye na simanekwe nena nosigo aluhe. Amen.