1 Ontumwafo ndjika oya zi kuPetrus, omuyapostoli gwaJesus Kristus. Oya nyolelwa aahogololwa yaKalunga, aapongekwa mboka yi ihanena iitopolwa yomuPontus, Galatia, Kappadokia, Asia naBitinia.
2 Okuhogololwa kweni okwa zi nale medhiladhilo lyaKalunga Tate nomwa yapulwa kOmbepo ye, opo mu vulike kuJesus Kristus, ngoka e mu yelitha nombinzi ye. Esilohenda nombili nayi mu indjipalele.
3 Kalunga He yOmuwa gwetu Jesus Kristus na hambelelwe! Oshoka molwesilohenda lye enene okwe tu pe omwenyo omupe, sho a yumudha Jesus Kristus kuusi. Shika oshe tu pe etegameno lya kola,
4 kutya megulu Kalunga okwe tu pungulila eliko enene, ndyoka itaali wapa okwoola, okuyonuuka nokuhula po.
5 Molwaashoka mwi inekela Kalunga meitaalo, ote mu gamene noonkondo dhe, sigo tamu mono ehupitho ndyoka lya longekidhwa oku ka hololwa pehulilo lyomathimbo.
6 Onkee ano nyanyukilweni ehupitho ndika, nonando omu na okusa oluhodhi mokathimbo okafupi kowala omolwomamakelo ogendji tage mu adha.
7 Ogo otaga lalakanene okutala, eitaalo lyeni ngele olya kola. Noshingoli wo, shoka hashi yonuka, ohashi yelekwa momulilo. Osho wo neitaalo lyeni, ndyoka li na ondilo li vule oshingoli, oli na okuyelekwa, opo li vule okukala lya kola. Nena otamu ka pewa epandulo, eadhimo nesimaneko mesiku ndyoka Jesus Kristus ta ka holoka.
8 Oongoka mu mu hole, nando inamu mu mona; omwe mu itaala, nando kamu mu wete ngashingeyi. Onkee ano ohamu kala mu na enyanyu enene tali adhima notali nyengana okutumbulwa,
9 oshoka otamu adha elalakano lyeitaalo lyeni, nokutya ehupitho lyoomwenyo dheni.
10 Ehupitho ndika olyo tuu ndyoka lya li lya kongwa nolya konakonwa neitulomo kaahunganeki. Oyo oya hunganeke uuwanawa mbuka Kalunga e u mu pa.
11 Oya kambadhala okukonakona ethimbo, uuna nonkene ehupitho ndika tali ka holoka. Oshoka Ombepo yaKristus oya longo muyo noyu ulike kethimbo ndika mokuhunganeka omahepeko ngoka ge na okwaadha Kristus, nesimano mpoka li thike ndyoka tali ka landula.
12 Kalunga okwa hololele aahunganeki mbaka kutya iilonga yawo kaya li ekwatho lyawo yene, ihe olyeni, sho ya popi iinima mbika. Elaka ndika etoye omwe li etelwa ngashingeyi kaayuvithi mboka ya popi koonkondo dhOmbepo Ondjapuki ya tumwa kuKalunga. Mbika oyo iinima mbyoka naayengeli ya hala oku yi uva ko.
13 Kaleni mwi ilongekidhila shoka mu na oku shi ninga. Kaleni mwa tonata nomwa tegamena uuwanawa mboka tamu ke u pewa, uuna Jesus Kristus ta holoka.
14 Vulikeni kuKalunga ne inamu etha, okukalamwenyo kweni ku pangelwe kuuhalu mboka mwa li nawo, manga mwa li mwaa na oondunge.
15 Ihe kaleni aayapuki mwaayihe mbyoka tamu yi ningi, ngaashi Kalunga ngoka e mu ithana, omuyapuki.
16 Oshoka enyolo otali ti: “Omu na okukala aayapuki, oshoka ongame omuyapuki.”
17 Kalunga ohamu mu ti Tate, uuna tamu mu galikana. Oye ngoka ha tokolele aantu ayehe shi thike pamwe noha pe omuntu kehe ngaashi e shi ilongela. Onkee ano kaleni hamu simaneke Kalunga methimbo lyeni ndyoka lya hupu ko lyokombanda yevi.
18 Oshoka omwa tseya iikulila mbyoka ye mu kulile mokukala kweni kwonale, hoka mwe ku thigulula kooho, oyo kaya li oshinima hashi hulu po, ngaashi oshisiliveli nenge oshingoli.
19 One omwa kulilwa nombinzi yi na ondilo yaKristus, ngoka a fa onzigona yaa na oshipo nenge onyata.
20 Kalunga okwe mu hogolola nale, manga uuyuni inaau shitwa, ihe okwa holoka ngashingeyi pomathimbo gahugunina omolweni.
21 OmolwaKristus omwi itaala Kalunga, ngoka e mu yumudha kuusi nokwe mu pe eadhimo. Onkee ano eitaalo netegameno lyeni oyi ikwatelela muKalunga.
22 Ngashingeyi sho mwa vulika koshili, omwi iyogo nomu hole ooitaali ooyakweni mwaa na uufudhime. Holathaneni ano lelalela nomwenyo aguhe.
23 Oshoka omolwohapu yaKalunga, ndjoka yi na omwenyo noyaaluhe, one omwa valululwa, mu ninge aana yaangoka ihaa hulu po, hayaangoka ha hulu po.
24 Ongaashi enyolo tali ti: “Aantu ayehe oya fa owala omwiidhi gwokelundu, eopalo lyawo alihe olya fa owala lyongala. Omwiidhi ohagu si, nongala yagwo ohayi kukuta.”
25 Ihe ohapu yOmuwa otayi kalele sigo aluhe. Ohapu oyo tuu ndjika ye mu etele elaka etoye.
1 Etheni ano uuwinayi auhe niifundja, uufudhime, efupa noohapu adhihe dhomahokolo.
2 Ihe kaleni onguuhanona mwa sa enota aluhe lyomahinihini gopambepo. Ngele tamu ga nu, otamu koko e tamu hupithwa.
3 Ongaashi enyolo tali ti: “One omwa makela uuwanawa wOmuwa.”
4 Ileni kOmuwa, okemanya li na omwenyo, lye ekelwahi kaantu ongolyaa na oshilonga, ihe Kalunga okwe li hogolola nokwe li tala li na oshilonga.
5 Ileni ongomamanya ge na omwenyo, mu igandje e tamu ningi iitungitha yotempeli yopambepo. Muka otamu ka ninga aayambi aayapuki yokuyamba omayambo gopambepo noga hokiwa kuKalunga molwaJesus Kristus.
6 Oshoka enyolo otali ti: “Onda hogolola emanya lya simana, ndyoka tandi li ningi ngashingeyi emanya lyokolonela muSion. Nakehe ngoka te mu itaale, ita sithwa ohoni.”
7 Emanya ndika oli na oshilonga oshinene kune mboka mwi itaala; ihe kumboka inaa itaala: “Emanya tuu ndyoka aatungi ye li ekelehi, olya ningi emanya li na oshilonga li vule agehe.”
8 Enyolo ekwawo otali ti: “Emanya ndika otali pundukitha aantu. Emanya ndyoka tali ya gwilitha po.” Oyo otaa punduka, oshoka inaa itaala ohapu ndjika. Shika osho Kalunga a li e ya halela.
9 Ihe one ezimo lya hogololwa, aayambi yOmukwaniilwa, oshigwana oshiyapuki, aantu yaKalunga mwene mwa hogololwa, mu hokolole iilonga ye iinene. Kalunga okwe mu ithana mo momilema, mu ye muuyelele we uukumithi.
10 Nale kamwa li aantu yaKalunga, ihe ngashingeyi omwa ningi aantu ye. Nale omwa li inaamu tseya esilohenda lyaKalunga, ihe ngashingeyi omu li shi.
11 Aaholike, one oondjendi naakwiilongo muuyuni mbuka. Onkee otandi mu kumagidha, inamu etha, mu pangelwe kuuhalu wopantu mboka tau hindi aluhe omwenyo.
12 Kaleni wo mu na omikalo omiwanawa mokati kaapagani, opo uuna taye mu lundile kutya one aayoni, ya dhimbulule iilonga yeni iiwanawa noya ka hambelele Kalunga mesiku ndyoka te ke ya.
13 OmolwOmuwa vulikeni kepangelo kehe lyokombanda yevi: Komupangeli, ngoka e li kombanda yaayehe,
14 nokaaleli mboka ye li kohi yepangelo lye, oomboka ya tumwa okugeela aayoni nokupandula mboka haa longo uuwanawa.
15 Oshoka Kalunga okwa hala, mu mweneke okupopya kwaagoya niilonga iiwanawa.
16 Kaleni mu na emanguluko, ndele emanguluko lyeni inamu li longitha okusiikila uukolokoshi, ihe kaleni ongaapiya yaKalunga.
17 Simanekeni aantu ayehe, holeni ooitaali ooyakweni, tileni Kalunga ne mu simaneke omupangeli.
18 Aalelwa, vulikeni kooyene yeni ne mu ya simaneke. Inamu vulika owala kwaamboka aawanawa naanambili, ihe nokumboka wo ye na onyanya.
19 Kalunga ote ke mu yambeka, ngele tamu idhidhimikile omahepeko, naasho mwa tseya kutya shika osho ehalo lye.
20 Oshoka otashi mu kwatha shike, ngele tamu idhidhimikile omadhengo, ihe nani omwa yona? Ihe ngele tamu idhidhimikile omahepeko nuuna inaamu yona sha, nena Kalunga ote shi mu yambekele.
21 Oshoka oshinima sha tya ngeyi osho Kalunga e mu ithanene. Oshoka Kristus wo okwa hepekwa omolweni nokwe mu thigile oshiholelwa, opo mu landule ondjila ndjoka a li e yi ende.
22 Oye ina yona nando; kaku na omuntu gumwe u uvu iifundja yasha tayi zi mokana ke.
23 Ina tuka mboka ye mu tuku; naasho a hepekwa, ina sa ondjahi, ihe okwi inekele Kalunga, omupanguli omuyuuki.
24 Kristus okwa humbata oondjo dhetu komapepe ge sigo okomushigakano, opo tu vule okumanguluka muulunde, tu ninge aayuuki. One omwa aludhwa kiilalo ye.
25 Omwa li mwa fa oonzi dha kana, ihe ngashingeyi omwa galulilwa kegumbo, opo mu landule omusita nomutekuli gwoomwenyo dheni.
1 Osho ngeyi ne wo aakiintu, vulikeni kaalumentu yeni, opo aalumentu mboka inaa itaala oohapu dhaKalunga, ya falwe meitaalo komikalo dheni. Itamu pumbwa oku shi ninga noohapu,
2 oshoka oyo otaa ka mona, nkene omikalo dheni dha yogoka nonkene hamu simaneke Kalunga.
3 Inashi pumbiwa okwiiyopaleka nomaulenga gokombanda, ngaashi kombinga yomitse, etheni okuzala omagwe noonguwo dhuuyamba. Ihe eopalo lyeni nali kale ndyoka lyomeni.
4 Eopalo itaali hulu po lyombepo yi na ombili noya ngungumana, olyo ndyoka li na oshilonga oshinene koshipala shaKalunga.
5 Oshoka aakiintu mbeyaka yonale yi ikwatelela muKalunga, osho yi iyopaleke ngaaka. Oya vulika kaalumentu yawo.
6 Sara osho a li ngaaka; okwa vulika kuAbraham nokwe mu ithana “omuwa gwandje”. Ne aana aakadhona yaSara, ihe ongele tamu longo uuwanawa nokamu na uumbanda washa.
7 Ne wo aalumentu, mokukalathana kweni naakiintu yeni omu na okutseya kutya oya fa iiyuma yeloya, onkee omu na oku ya simaneka. Oshoka nayo wo Kalunga ote ke ya pa pamwe nane omwenyo omagano. Shika shi ningeni, opo omagalikano geni gaa piyaganekwe kusha.
8 Pafupi nandi tye: ne omu na okukala mu na edhiladhilo limwe neuvitopamwe. Kaleni mu holathane ongaamwayinathana. Silathaneni ohenda ne mu ifupipikilathane.
9 Ngoka te mu ningile uuwinayi nenge te mu thingi, inamu mu thinga. Ihe mu shunithileni elaleko nuuyamba, oshoka eyambeko olyo Kalunga e mu uvanekela, sho e mu ithana.
10 Ngaashi enyolo tali ti: “Ngoka a hala okunyanyukilwa okukalamwenyo nokumona omasiku ge na elago, ne ethe okupopya uuwinayi, nomilungu dhe inadhi pititha iifundja.
11 Na ze mo miilonga iiwinayi, a longe uuwanawa. Na konge ombili e te yi lalakanene.
12 Oshoka omeho gOmuwa oge wete aayuuki, naaluhe ota pulakene omaindilo gawo; ihe ota thigi po mboka haa longo uuwinayi.”
13 Olye te mu etele oshiponga, ngele otamu lalakanene okulonga uuwanawa?
14 Nongele omu na okwaadhika komahepeko, sho hamu longo shoka shu uka, one aanelago. Inamu tila aantu ne inamu kala mwa piyagana.
15 Ihe simanekeni Kristus momitima dheni ne mu mu ninge Omuwa gweni. Kaleni mwi ilongekidha aluhe okuyamukula kehe ngoka te mu pula okufatulula etegameno ndyoka li li mune.
16 Ihe shi ningeni nombili nesimaneko. Kaleni mu na eiyuvo ewanawa. Ngele tamu dhiginine omikalo omiwanawa dhaalanduli yaKristus, aasheki yeni otaa sithwa ohoni kokupopya kwawo.
17 Oshoka okuhepekelwa iilonga iiwanawa, ngele oshi li pahalo lyaKalunga, oshi vule okuhepekelwa lilonga iiwinayi.
18 Oshoka Kristus okwa si omolweni; okwa si lumwe aluke omolwoondjo, omuyuuki omolwaalunde, opo e mu fale kuKalunga. Oye okwa dhipagwa palutu nokwa tulwa omwenyo pambepo;
19 nomokukala kwopambepo okwa yi e tu uvithile oombepo moshaasi.
20 Oombepo ndhika odho aantu mboka inaa vulika kuKalunga, sho a tegelele neidhidhimiko eitedhululo lyawo pomasiku ngoka Noa a tungu onguluwato. Monguluwato omwa hupithilwa aantu yahetatu ayeke komeya.
21 Omeya ngaka ogo efano tali ulike eshasho ndyoka tali mu hupitha ngashingeyi. Eshasho ihali theta po ongaga yokolutu, ihe mulyo otatu pula, Kalunga e tu pe eiyuvo ewanawa omolweyumuko lyaJesus Kristus.
22 Oye okwa londo a yi megulu noku li kolulyo lwaKalunga ta pangele aayengeli, aapangeli yomegulu naanankondo.
1 Ano Kristus sho e ehamekwa palutu, nane wo ikumikeni nelalakano ndika. Oshoka kehe ngoka te ehamekwa palutu, oye ote etha uulunde.
2 Onkee ano okuza kongashingeyi methimbo ndyoka lya hupu ko lyokukalamwenyo kweni kwokombanda yevi, inamu etha, mu pangelwe kuuhalu wopantu, ihe pangelweni kehalo lyaKalunga.
3 Oshoka osha gwana, sho mwa kala nale hamu longo iilonga ya faathana noyaapagani. Omwa kala muukeeneidhiliko, muuhalu, muunkolwi, muufukedhi, momanwino nomiihuna yesimaneko lyiimenka.
4 Onkee ano aapagani oya kumwa notaye mu sheke nokuli, sho itaamu ya holele mokukala muuholume nomokwaaidhilika.
5 Ihe oye na oku ki ihokolola koshipala shaKalunga, ngoka ta ka pangula aanamwenyo naasi.
6 Shika osho sha ningitha, elaka etoye li uvithilwe wo aasi, oomboka mokukala kwawo kombanda yevi ya pangulwa ngaashi aantu ayehe. Oyo oyu uvithilwa, opo mokukalamwenyo kwawo kwopambepo ya kale ye na omwenyo, ngaashi Kalunga e na omwenyo.
7 Ehulilo lyiinima ayihe oli li popepi. Omu na okwiikwata nawa nomwa tonata, opo mu vule okugalikana.
8 Komeho gaayihe holathaneni nomwenyo aguhe, oshoka ohole ohayi siikile omayono ogendji.
9 Yakuleni aayenda momagumbo geni mwaa na omangungutulo.
10 Kehe gumwe na longithe omagano ngoka e ga pewa okukwatha yakwawo, ongaashi sho opalela aatonateli aawanawa yomagano gaKalunga gi ili nogi ili.
11 Ngoka tu uvitha, nu uvithe oohapu dhaKalunga. Ngoka ta yakula, na yakule koonkondo ndhoka e dhi pewa kuKalunga. Opo kehe shimwe shi simanekithe Kalunga molwaJesus Kristus, ngoka e na eadhimo noonkondo aluhe sigo aluhe. Amen.
12 Ookuume kandje aaholike, inamu kuminwa emakelo elulu ndyoka mu li mulyo ngashingeyi ongoshinima inaamu shi mona nale.
13 Ihe nyanyukweni, sho mu na oshitopolwa momahepeko gaKristus, opo mu ka nyanyukwe nokuligola, uuna eadhimo lye tali ka hololwa.
14 Ngele otamu shekwa molwaasho tamu landula Kristus, one aanelago, oshoka Ombepo yuuyelele, Ombepo yaKalunga, oyi li kombanda yeni.
15 Inaku kala gumwe gwomokati keni ta hepekwa molwaasho oye omudhipagi nenge omufuthi nenge omukolokoshi nenge ngoka hi itula miinima yayakwawo.
16 Ihe ngele otamu hepekwa molwaasho one aakriste, inamu sa ohoni, ihe panduleni Kalunga, sho mu na edhina lyaKristus.
17 Ethimbo lyepangulo lyaKalunga olya thikana, naantu yaKalunga otse tatu pangulwa tango. Ngele epangulo otali tameke natse, ehulilo lyalyo otali ka kala lya tya ngiini kumboka inaa itaala elaka etoye lya za kuKalunga?
18 Ongaashi enyolo tali ti: “Ngele ehupitho lyomuyuuki okonyala, ngoka kee na Kalunga nomulunde ota ningwa ngiini?”
19 Onkee ano mboka taa hepekwa molwaasho ehalo lyaKalunga osho tali ti, naa longe uuwanawa nokwiiyethela mOmushiti gwawo omwiinekelwa.
1 Aakuluntu yegongalo lyaKalunga yomokati keni otandi ya kumagidha, ngame nguka omukuluntu mukweni. Ongame onzapo yomahepeko gaKristus nondi na oshitopolwa meadhimo ndyoka tali ka hololwa. Otandi mu kumagidha:
2 Kaleni aasita yoshigunda shoka mwe shi pewa kuKalunga, mu shi tonatele nehalo ewanawa, hakethiminiko. Inamu longa nelalakano tali sitha ohoni lyokukonga eliko, ihe onehalo tali zi momwenyo.
3 Inamu pangela mboka ya tulwa metonatelo lyeni, ihe kaleni mu shi kuholelwa kegongalo.
4 Nena Omusitawiliki ngele ta holoka, otamu ka pewa oshishani sheadhimo itaali kana.
5 Ne aagundjuka, vulikeni kaakuluntu. Amuhe zaleni eifupipiko, opo mu vule okuyakulathana. Oshoka enyolo otali ti: “Kalunga oha tondo aainenepeki, ihe oha sile ohenda aaishonopeki.”
6 Onkee ano ishonopekeni kohi yoshikaha shoonkondo shaKalunga, opo e mu nenepeke pethimbo lye.
7 Mu tsikeni iimpwiyu yeni ayihe, oshoka oye omusilishimpwiyu gweni.
8 Kotokeni ne mu tonate! Oshoka omutondi gweni Satana ohe mu kundukidha, ta ndunduma a fa onime, ta kongo ngoka, te mu ninagula po.
9 Kaleni mu na eitaalo lya kola, opo mu vule oku mu kondjitha. Oshoka omwa tseya nooitaali ooyakwetu yomuuyuni auhe otaa pitile momahepeko ogo tuu ngoka.
10 Ihe omahepeko ogokathimbo kowala. Kalunga kesilohenda alihe okwe mu ithana, mu ye meadhimo lye lyaaluhe muukumwe naKristus. Oye ote mu longekidha, te mu pe oonkondo, te mu koleke note mu tula kekankameno lya kola.
11 Oye na pangele aluheluhe! Amen.
12 Ontumwafo ndjika ofupi onde yi nyola kekwatho lyaSilvanus, omwiitaali mukwetu ngoka nde mu inekela. Onda hala oku mu kumika noku mu hokololela kutya ndika olyo esilohendalela lyaKalunga. Kaleni mwi ikolelela mulyo.
13 Egongalo ekweni lyomuBabilon ndyoka lya hogololwa wo kuKalunga, otali mu kundile po. Osho wo omumwandje Markus ote mu kundile po.
14 Kundilathanii po nohole yopakriste. Ombili nayi kale nane amuhe mboka yaKristus.