1 Ontumwafo ndjika oya zi kuJakob, omumati gwaKalunga nogwOmuwa Jesus Kristus. Omakundo kaantu yaKalunga ayehe, mboka ya halakana nuuyuni auhe.
2 Aamwameme, italeni aanelago, ngele tamu adhika komamakelo gi ili nogi ili,
3 oshoka omwa tseya, eitaalo lyeni uuna tali piti momayeleko ga tya ngeyi, nena otamu mono omukumo gwokwiidhidhimika.
4 Eidhidhimiko nali mu endithe ondjila ayihe pwaa na omapunduko, opo mu kale mwa gwana, mwaa na oshipo ne inamu pumbwa sha.
5 Ihe ngele oku na gumwe gwomune a pumbwa oondunge, ne dhi indile kuKalunga, oye note dhi mu pe. Oshoka Kalunga ke shi omundalapata, ihe oha pe ayehe nopwaa na omanyenyeto.
6 Ihe indileni mu na eitaalo ne mwaa na omalimbililo. Oshoka omuntu ngoka ta limbililwa, okwa fa ekuthikuthi lyomefuta tali falafalwa notali telaalithwa kombepo.
7 Omuntu a tya ngeyi na tseye kutya ita pewa sha kOmuwa,
8 oshoka oye ota li oompanda mbali nomutengauki miilonga ye ayihe.
9 Omwiitaali ohepele ni itangele uuvalekele we,
10 ihe omuyamba uuthigona we, oshoka oye ota ka kana a fa ongala yokelundu.
11 Etango otali piti nuupyu walyo, e tali fike po oshimeno, oongala otadhi gu ko, eopalo lyadho e tali kana. Osho naanaa omuyamba ta yonwa po manga e li meipyakidhilo.
12 Omulumentu omunelago oongoka ta sindana mokumakelwa, oshoka shampa a piti mo, Kalunga ote ke mu pa ondjambi, omwenyo gwaaluhe, ngoka e gu uvanekela mboka ye mu hole.
13 Omuntu ngele a adhika kemakelo lyoku mu yeleka, ina tya: “Emakelo ndika olya zi kuKalunga.” Oshoka Kalunga iha makelwa kuuwinayi noiha makele nando omuntu.
14 Ihe omuntu oha makelwa kuuhalu we mwene, mboka tau mu hekaheka e tau mu yulu.
15 Uuhalu ngele wa ningi uusimba, otau vala uulunde; nuulunde ngele wa koko, otau vala eso.
16 Aamwameme aaholike, inamu fundjalekwa!
17 Oshipewa kehe oshiwanawa nomagano kehe ga gwana ga pwa ohaga zi kuKalunga, Omushiti gwomaminikilo gokegulu. Puye kapu na nando elunduluko nenge epingathano lyuuyelele nomilema.
18 Kehalo lye mwene okwe tu pe omwenyo, opo tu ninge aatango mokati kiishitwa ye ayihe.
19 Shika omu na oku shi tseya, aamwameme aaholike! Kehe gumwe na kale ha pulakene mbala, ihe ohi ikwata mokupopya ye iha geye mbala.
20 Oshoka ondjahi yomuntu ihayi longo shoka shu uka koshipala shaKalunga.
21 Onkee ano zeni moonyata adhihe nomuuwinayi auhe, mu taambe meimweneneno ohapu ndjoka Kalunga e yi kunu momitima dheni, oondjoka yi na oonkondo oku mu hupitha.
22 Mokupulakena kweni oohapu dhaKalunga inamu ifundjaleka, ihe okupulakena kweni naku mu fale miilonga.
23 Oshoka omuntu ngoka ta pulakene oohapu, ndele okupulakena kwe itaku mu fala miilonga, okwa fa omuntu ngoka ti italele moshiitalelo e ti imono naanaa, nkene a tya.
24 Oti imono moshiitalelo, ihe sho a zi po pusho, mbalambala ota dhimbwa kutya okwa tya ngiini.
25 Ihe ngoka ti italele mompango ya gwana yokumangulula, te yi pulakene noite yi dhimbwa, ihe ote yi gwanitha, oye ota yambekwa moku shi ninga.
26 Ngele oku na ngoka ta dhiladhila kutya ota longele Kalunga, ndele ita pangele okupopya kwe, nena elongelokalunga lye itali tompola sha, oti ifundjaleke owala.
27 Elongelokalunga lya yela nolya yogoka koshipala shaKalunga Tate olyo okusila oshimpwiyu oothigwa naaselekadhi muudhigu wawo nokwiikotokela waa nyatekwe kuuyuni.
1 Aamwameme, eitaalo lyeni mokwiitaala Omuwa gwetu gweadhimo, Jesus Kristus, inali kala ndyoka tali tongola aantu pandjelo yokombanda.
2 Natu tye, ngele mwa gongala, otamu ya omuyamba a zala okalinga koshingoli noonguwo dhuulenga, nosho wo ohepele a zala iinyanyu.
3 Ngele tamu simaneke ngoka a zala nawa e tamu mu lombwele: “Kuutumba koshipundi shika oshiwanawa,” ihe ohepele otamu mu lombwele: “Kala wa thikama, nenge kuutumba pevi poompadhi dhandje,”
4 nena omu na oondjo, sho tamu itongola neyene nokuninga omapangulo taga pangelwa komatompelo omawinayi.
5 Aamwameme aaholike, pulakeneni! Kalunga okwa hogolola oohepele yomuuyuni mbuka, ya ninge aayamba yomeitaalo noya ka pewe Oshilongo shoka e shi uvanekela mboka ye mu hole.
6 Ihe ne ohamu dhini oohepele! Aayamba hayo tuu mboka haye mu hepeke nohaye mu fala kiipala yaapanguli?
7 Aayamba hayo tuu mboka haa sheke edhina ewanawa ndyoka mwe li lukilwa?
8 Otamu opaleke, ngele tamu vulika kompango yOshilongo shaKalunga, ndjoka tayi monika menyolo ndika: “Hola mukweni, ngaashi u ihole mwene.”
9 Ihe ngele ohamu kala naantu noku ya tongola pandjelo yokombanda, nena omu na oondjo, nompango otayi mu pangula kutya one aayoni yayo.
10 Kehe ngoka ta yono oshipango shimwe shomompango, okwa yono wo iipango ayihe.
11 Oshoka ngoka a ti: “Ino hondela,” oye wo a ti: “Ino dhipaga.” Ano ngoye nando ino hondela, oto ningi omuyoni gwompango, ngele to dhipaga.
12 Popyeni ne mu longe ngaashi aantu mboka taa ka pangulithwa kompango ndjoka tayi ya mangulula.
13 Oshoka uuna Kalunga ta pangula aantu mboka yaa na ohenda, ite ke ya sila ohenda; ihe mboka ye na ohenda, otaa ka pita mepangulo.
14 Aamwameme, omuntu ngoka ta ti kutya oku na eitaalo, ndele eitaalo lye itali holoka miilonga, otashi mu kwatha tuu sha? Eitaalo lya tya ngawo itali mu hupitha.
15 Natu tye, oku na ooitaali ooyakweni aalumentu nenge aakiintu ye na onkayi nondjala.
16 Ngele to ya lombwele to ti: “Endii po nawa. Ki isiikileni e tamu li nawa,” otashi kwatha shike, ngele inamu ya pa shoka ye shi pumbwa?
17 Ano neitaalo osho li li: ngele eitaalo lyowala, lyaa na iilonga, nena eitaalo lya tya ngaaka olya sa.
18 Ihe pamwe oku na ngoka ta ti: “Oku na omuntu gumwe e na eitaalo, manga mukwawo e na iilonga.” Eyamukulo lyandje olyo ndika: “Ulukila ndje, nkene omuntu ta vulu okukala e na eitaalo lyaa na iilonga. Ngame otandi ku ulukile wo eitaalo lyandje tali holoka miilonga.”
19 Owi itaala kutya oku na owala Kalunga gumwe. Ou li mondjila. Oompwidhuli wo odhe shi itaala notadhi kakama kuumbanda.
20 Mugoya ngoye! Owa hala tuu, u ulukilwe kutya eitaalo lyaa na iilonga, itali tompola sha?
21 Tatekulu Abraham okwa ningi ngiini omuyuuki koshipala shaKalunga? Osha zi miilonga ye, sho a ka yamba omwana Isak koshiyambelo.
22 U wete ko ano? Eitaalo lye niilonga ye oya longele kumwe; eitaalo lye olya hololwa nawa kiilonga ye.
23 Nenyolo wo olya tsa ndyoka tali ti: “Abraham okwi itaale Kalunga, nomolweitaalo lye Kalunga okwe mu tala omuyuuki.” Osho ngaaka Abraham okwi ithanwa kuume kaKalunga.
24 Ngashingeyi omu wete ko kutya omuntu ota ningi omuyuuki koshipala shaKalunga omolwiilonga ye, hamolweitaalo alike.
25 Osho sha li wo sha ningwa kohonda Rahab. Rahab okwa ningi omuyuuki koshipala shaKalunga omolwiilonga ye, sho e edhilile oondaadhi dhaJuda e te dhi pititha nondjila yilwe.
26 Onkee ano ngaashi naanaa omuntu ngele ke na omufudho, ta talwa a sa, osho wo neitaalo lyaa na iilonga, olya sa.
1 Aamwameme! Mokati keni inamu kala oyendji ya hala okuninga aalongi, oshoka omu shi shi kutya tse aalongi otatu ka pangulwa nepangulo edhigu li vule lyayalwe.
2 Tseni atuheni ohatu puka olwindji. Omuntu ngoka ihaa puka moohapu, oye okwa pwa nokwa gwana okupangela okukala kwe akuhe.
3 Tse ohatu tula oshitomo mokana kokakambe nohatu ka vulikitha e tatu ka ukitha shaa mpoka twa hala.
4 Natu dhiladhile osikepa. Oyo onene nohayi endithwa koombepo oonankondo, ihe ohayi goyolwa nokahingitho okashona, nomuhingi ote yi ukitha mpoka a hala, yi uke.
5 Osho wo elaka lyomokana li li. Olyo eshona, ihe ohali itangele iinima iinene. Dhiladhila, nkene ohandje yimwe tayi fike okuti.
6 Nelaka olya fa omulilo, olyo uuyuni wa vuka muuwinayi. Elaka ohali nyateke omuntu aguhe nohali hwameke okukalamwenyo kwe akuhe kwokombanda yevi, nomulilo tagu zi moheli yoyene.
7 Omuntu ota vulu okudheula iinamwenyo ayihe: iilikama, oondhila, iihono noohi.
8 Ihe kaku na nando omuntu gumwe ta vulu okudheula elaka. Olyo uuwinayi waa na evululuko nou udha uuzigo hau lyana.
9 Elaka ndyoka hatu hambelelitha Omuwa Tate, olyo wo hatu tukitha ooyakwetu ya shitwa mondjelo yaKalunga.
10 Oohapu dhehambelelo nodhetukano otadhi zi mokana tuu hoka. Aamwameme, itashi vulika, shi kale ngaaka!
11 Kaku na oluthithiya halu vulu okufuluka omeya omatoye nomalulu molunza lumwe.
12 Aamwameme, omukwiyu itagu vulu okwiima oomono, nomuviinu itagu vulu okwiima oonkwiyu. Osho wo omuthima omululu itagu vulu okuza omeya omatoye.
13 Olye ngoka omunandunge nomunamayele mokati keni? Oye oku na oku shi ulika mokukala kwe okuwanawa, miilonga ye iiwanawa ya longwa meifupipiko nomoondunge.
14 Ihe omitima dheni ngele odhu udha efupa, uululu nomu hole olugodhi, nena kaleni inaamu inenepeka nomu ludhikithe oshili.
15 Uunongo wa tya ngeyi itau zi kombanda megulu, ihe owomuuyuni. Owo owopantu nowoompwidhuli,
16 oshoka mpoka aantu ya silathana efupa noye hole olugodhi, opo wo pu na evundakano nuuwinayi auhe.
17 Ihe uunongo wokombanda tango owa yogoka, ou na wo ombili, olukeno nuukuume. Ou udha ohenda niilonga iiwanawa nokau na omalimbililo nuufudhime.
18 Uuwanawa owo eteyo ndyoka lya imi koombuto ndhoka aatungimbili ye dhi kunu mombili.
1 Omalugodhi noontamanana mokati keni ohayi zi peni? Ohayi zi muuhalu weni mboka tau kondjo aluhe momalutu geni.
2 One omu na okahalu, ihe ihamu likola. Ohamu dhipaga nohamu haluka noonkondo, ihe itamu mono sha. Ohamu tamanana e tamu kondjo. Ne omu li moluhepo, oshoka inamu indila oompumbwe dheni kuKalunga.
3 Nuuna tamu indile, itamu pewa, oshoka omalalakano geni omawinayi. Mbyoka tamu yi indile, ohamu ke yi longitha muuhalu weni yene.
4 Kamu shi aainekelwa! Inamu tseya nani kutya okukala mu na uukuume nuuyuni okwo okutonda Kalunga? Ngoka a hala okukala e na uukuume nuuyuni, oti iningi e tonde Kalunga.
5 Enyolo itali popi osima, sho tali ti: “Ombepo ndjika Kalunga e yi tula mutse, oku na uukodhi nayo.”
6 Ihe esilohenda lyaKalunga oli na oonkondo li vule ayihe. Ongaashi enyolo tali ti: “Kalunga ota tondo mboka ye hole uuntsa, ihe ota sile ohenda mboka yi ifupipika.”
7 Vulikeni ano kuKalunga. Kondjitheni Satana, ye note mu yi ontuku.
8 Hedheni kuKalunga, ye nota hedha kune. Yelitheni iikaha yeni, ne aalunde. Opalekeni omitima dheni, ne aafudhime.
9 Tseyeni uukweyi weni, seni oluhodhi ne mu lile. Okuyola kweni naku shituke okulila, nenyanyu lyeni nali ninge oluhodhi.
10 Ifupipikeni koshipala shOmuwa, oye note mu nenepeke.
11 Aamwameme, inamu lundilathana. Ngoka ta lundile mukwawo nenge te mu pangula, oye ota lundile ompango e te yi pangula. Ngele oto pangula ompango, nena ito vulu we oku yi gwanitha, ihe oto ningi omupanguli gwayo.
12 Kalunga oye omugandjimpango nomupanguli. Oye awike ta vulu okuhupitha nokweekelahi. Ongoye lye ano, u vule okupangula mukweni?
13 Ano pulakenii ndje, ne mboka hamu ti: “Nena nenge ngula otatu ka ya koshilando shontumba noshongandi. Otatu ka ninga ko omumvo, tatu halitha e tatu likola iimaliwa oyindji.”
14 Kamu shi wo, ngele ngula omutse otagu ka kala kumwe nothingo! One omwa fa etsinauko lyolwithi, ndyoka tali holoka okathimbo, notali kana po.
15 Omu na okutya: “Omuwa ngele e shi hala, otatu ka kala tu na omwenyo, e tatu longo shika naashiyaka.”
16 Ihe ngashingeyi omu na uuntsa neitango; eitango lya tya ngeyi olya puka.
17 Onkee ano ngoka e shi kutya oku na okulonga uuwanawa, ndele ite shi ningi, oye oku na oondjo.
1 Ne aayamba, pulakenii ndje! Lileni ne mu kuge kuupyakadhi mboka tau mu adha.
2 Uuyamba weni owo ola noonguwo dheni odha lika koothithi.
3 Oshingoli noshisiliveli sheni oya lika kevi, naashika otashi ka ninga onzapo yoku mu pa uusama. Evi ndika otali ka lya onyama yeni ngomulilo. Omwi igongelele uuyamba pomasiku ngaka gopehulilo.
4 Aantu mboka ye mu longele omapya, inamu ya futa ondjambi yawo. Pulakeneni, sho taa nyenyeta! Omalilo gaamboka ye mu teyele iilya, oga thiki momakutsi gaKalunga, Omuwa Omunankondoadhihe.
5 Okukalamwenyo kweni kwokombanda yevi okwa kala meloolo nomelalangali. Omwi iyondodhele esiku lyokutselwa kweni.
6 Omwa pangula nomwa dhipaga aantu inaa yona sha, yo inaye mu kondjitha.
7 Aamwameme, kaleni nokwiidhidhimika, sigo uuna Omuwa te ya. Taleni omunepya, nkene ha kala a tegelela neidhidhimiko, epya lye li mu pe eteyo olindji. Oye oha tegelele neidhidhimiko omvula yetemuno noyothinge.
8 Nane wo omu na okwiidhidhimika. Ituleni omukumo, esiku lyokugaluka kwOmuwa oli li popepi.
9 Aamwameme, inamu halelathana uuwinayi, opo Kalunga kee mu pangule. Omupanguli oku li popepi posheelo.
10 Aamwameme, dhimbulukweni aahunganeki mboka ya popi medhina lyOmuwa. Ya holeleni mokwiidhidhimikila omaudhigu.
11 Tse otatu ya tala aanelago, sho yi idhidhimike. One omu uvu eidhidhimiko lyaJob nomwa tseya, nkene Omuwa e mu kwatha pehulilo. Oshoka Omuwa oye omunesilohenda nomunalukeno.
12 Aamwameme, komeho gaayihe inamu gana, nge tamu ningi euvaneko. Inamu gana kegulu nenge kevi nenge kushaa shoka. Tyeni owala “Eeno,” uuna mwa dhiladhila eeno, nosho wo “Aawe,” uuna mwa dhiladhila aawe, opo mwaa adhike kepangulo lyaKalunga.
13 Oku na gumwe gwomokati keni e na uudhigu? Na galikane. Oku na gumwe e li menyanyu? Ni imbe omahambelelo.
14 Oku na gumwe ta alukwa? Ni ithane aakuluntu yegongalo, ye mu galikanene noye mu gwayeke omagadhi medhina lyOmuwa.
15 Egalikano lyomwiitaali otali aludha omuvu. Omuwa ota galulile omuvu uundjolowele we, noondjo dhe otadhi dhimwa po.
16 Hempululilathaneni ano oondjo ne mu galikanenathane, nena otamu aludhwa. Egalikano lyomuyuuki oli na oonkondo okuninga sha.
17 Elia wo okwa li omuntu e tu fa. Sho a galikana a mana mo, omvula yaa loke osha ningwa, noshilongo osha kala inaashi lokwa uule womimvo ndatu netata.
18 Okwa galikanununa ishewe, kegulu nokwa zi omvula, nevi olya menitha iimeno.
19 Aamwameme, ngele oku na gumwe gwomokati keni ta puka mo moshili, naku kale ku na ngoka te mu galula.
20 Dhimbulukweni shika: Ngoka ta galula omulunde mondjila ya puka, ota hupitha omwenyo gwomulunde a tya ngaaka meso, noondjo odhindji otadhi dhimwa po.