1

¹ Membo lyandje lyotango onda nyola nokuhokolola iinima mbyoka Jesus a ningi nokwe yi longo aantu okuza kethimbo ndyoka a tameke iilonga ye

² sigo okesiku ndyoka a falwa megulu. Manga inaa falwa megulu, okwa pe aayapostoli mboka e ya hogolola, omalombwelo koonkondo dhOmbepo Ondjapuki.

³ Methimbo lyuule womasiku omilongo ne konima yeso lye, okwe ya ihololele olwindji pomathimbo gi ili nogi ili e te ya ulukile sha yela kutya ye okwa yumuka noku na omwenyo. Oye okwe ya ihololele nokwa kundathana nayo kombinga yOshilongo shaKalunga.

⁴ Ano sho ya li ya gongala, okwe ya lombwele a ti: “Inamu za mo muJerusalem, ihe tegeleleni, mu pewe omagano ngoka Tate e ga uvaneka, ogo tuu ngoka ngame nde ge mu lombwele.

⁵ Oshoka Johannes okwa shasha aantu nomeya, ihe konima yomasiku gamwe otamu ka shashwa nOmbepo Ondjapuki.”

⁶ Aalongwa manga ya li ya gongala pamwe naJesus, oye mu pula ya ti: “Omuwa, uunake ano to ka pa Aaisraeli Oshilongo?”

⁷ Jesus okwe ya yamukula a ti: “Tate oye awike e na oonkondo okutokola, iinima mbyoka uuna tayi ka ningwa. Ne itamu vulu okutseya, uuna tashi ka ningwa.

⁸ Ihe one otamu ka pewa oonkondo, uuna Ombepo Ondjapuki ta ka tililwa mune. Nena one otamu ka ninga oonzapo dhokuhokolola ndje paantu ayehe mboka ye li muJerusalem, muJudea alihe nomuSamaria sigo omiilongo ayihe yokombanda yevi.”

⁹ Jesus sho a mana okupopya oohapu ndhika, okwa yeluthwa pombanda montaneho yaalongwa. Oye okwa yi moshikogo, yo inaye mu mona we.

¹⁰ Ano aalongwa sho ya li ya tongolola natango kegulu, taa ligamene, Jesus sho ta yi, ohaluka opwa holoka aalumentu yaali ya zala oonguwo oontokele e taa thikama puyo.

¹¹ Aalumentu mboka oya ti kuyo: “Aalumentu ne Aagalilea, omolwashike mwa thikama mpoka nomwa tala kegulu? Jesus tuu nguka a kuthwa pune a falwa megulu, ota ka galuka pamukalo naanaa ngoka mwe mu mono, sho ta yi megulu.”

¹² Nena aayapostoli oya zi kOndundu yooholivi, ndjoka yi li popepi noshilando, oshikako shuule wokilometa yimwe, e taa yi kuJerusalem.

¹³ Sho ya thiki muJerusalem, oya yi mondjugo yopombanda moka ya li haa kala shito. Oyo Petrus, Johannes, Jakob naAndreas, Filippus naTomas, Bartolomeus naMateus, Jakob yaAlfeus, Simon omulaadhi naJudas yaJakob.

¹⁴ Oyo ayehe oya kala nokugongala olwindji nokugalikana mongundu pamwe nooitaali aakiintu naMaria, yina yaJesus, naamwayina yaJesus aalumentu.

¹⁵ Omasiku gamwe sho ga piti po, okwa ningwa oshigongi shooitaali, aantu ye thike pethele limwe nomilongo mbali. Petrus okwa thikama mokati kawo e ta ti:

¹⁶ “Aalumentu ne ooyakwetu, enyolo ndyoka Ombepo Ondjapuki ye li popi mokana kaDavid, oli na okugwanithwa. Olyo otali popi Judas, ngoka a ningi omuwiliki gwaantu mboka ya kwata Jesus.

¹⁷ Judas okwa li gumwe gwomongundu yetu, oshoka oye okwa li a hogololwa, a longe pamwe natse.”

¹⁸ (Iimaliwa mbyoka Judas e yi pewa, sho a longo oshilonga shuukolokoshi, okwe yi landa epya, nomepya tuu moka okwi ihata po e ta si. Oye okwa topa niinima ayihe yomela lye oya tika mo.

¹⁹ Aantu ayehe mboka ya kala muJerusalem, oye shi uvu. Onkee epya ndika ohaye li ithana melaka lyawo Akeldama, tashi ti “Epya lyombinzi”.)

²⁰ “Oshoka membo lyOmapisalomi omwa nyolwa: ‘Egumbo lye nali ninge oshithigwapo, mwaa kale nando omuntu.’ Okwa nyolwa ishewe: ‘Oshilonga she nashi pewe omuntu gulwe.’

²¹ “Onkee ano omulumentu gulwe na ninge onzapo yokuhokolola eyumuko lyOmuwa Jesus pamwe natse. Oye oku na okukala gumwe gwaamboka ya li ya kala mongundu yetu ethimbo alihe ndyoka Omuwa Jesus a li te ende pamwe natse, okuza kethimbo ndyoka Johannes a li tu uvitha e ta shasha, sigo okesiku ndyoka Kalunga a kutha po Jesus putse nokwe mu fala megulu.”

²²

²³ Nena oyo oya yoolola mo aalumentu yaali: Josef, ngoka hi ithanwa Barsabas, oongoka haku tiwa wo Justus, naMatias.

²⁴ Opo ihe oya galikana ya ti: “Omuwa, ongoye wa tseya omitima dhaantu ayehe. Tu ulukila ano, Omuwa, oguni po paalumentu mboka yaali ngoka we mu hogolola,

²⁵ a ninge omuyapostoli peha lyaJudas, ngoka a thigi po oshilonga shika nokwa yi kehala ndyoka e li ilongela.”

²⁶ Konima yaashika oyo oya longitha oshihogololitho okuhogolola po gumwe. Oshihogololitho osha kwata po Matias, oye nokwa yalulilwa ihe mongundu yaayapostoli mbeyaka omulongo nagumwe.

2

¹ Ano esiku lyaPentekoste sho lya thikana, ooitaali ayehe oya adhika ya gongala peha limwe.

² Ombaadhilila aantu oyu uvu oshihomo oshinene tashi zi kegulu noshu udhitha ondjugo moka ya li ya kuutumba.

³ Oyo oya mono ihe omalaka ga fa gomulilo taga halakanene mokati kawo, nomuntu kehe ngoka a li mo, okwa lambelwa kulimwe.

⁴ Oyo ayehe oyu udhithwa ihe Ombepo Ondjapuki e taa tameke okupopya omalaka omakwiilongo, ngashika naanaa Ombepo e ya pe owino oku ga popya.

⁵ MuJerusalem omwa li mu na aalumentu Aajuda haa simaneke Kalunga ya za kiilongo ayihe yokombanda yevi.

⁶ Oyo sho yu uvu oshihomo shika, oya gongala kumwe ongundu onene. Ayehe oya li ya kumwa, oshoka kehe gumwe gwomokati kawo oku uvu, ooitaali taa popi melaka lyaandjawo.

⁷ Oyo oya haluka noya kumwa e taa pulathana: “Aantu mbaka taa popi ngashingeyi, kaye shi ayehe Aagalilea?

⁸ Ongiini ano, sho kehe gumwe gwomutse e ya uvite taa popi elaka lyoshilongo shaandjawo moka a valelwa?

⁹ Otse otwa za kuPartia, kuMedia nokuElam, kuMesopotamia, muJudea nokuKappadokia, kuPontus nokuAsia,

¹⁰ kuFrigia naPamfilia, kuEgipiti nokomikunda dhaLibia ndhoka dhi li popepi naKireni. Yamwe yomutse oya za kuRoma,

¹¹ Aajuda naapagani mboka yi itedhululila muujuda. Yamwe yomutse oya za kuKreta nokuArabia. Ihe tse atuhe otu ya uvite taa popi iilonga iinene yaKalunga melaka lyetu.”

¹² Aantu ayehe oya haluka noya kumwa. Oyo oya ti: “Shika otashi ti ngiini ano?”

¹³ Ihe ooyakwawo yalwe oya sheke ooitaali ya ti: “Aantu mbaka oya kolwa.”

¹⁴ Nena Petrus okwa thikama pamwe naayapostoli ooyakwawo omulongo nagumwe. Oye okwa tameke okupopitha ongundu yaantu newi enene a ti: “Aajuda ooyakwetu, nane yalwe amuhe mboka mwa kala muJerusalem, pulakenii ndje ndi mu lombwele:

¹⁵ One otamu dhiladhila kutya aantu mbaka oya kolwa, ihe hasho. Otundi oyo ngaa ontimugoyi yongula.

¹⁶ Shika osho shoka sha popiwa komuhunganeki Joel. Kalunga ota ti:

¹⁷ ‘Pomasiku gahugunina otandi ka ninga ngeyi, Omuwa ta ti. Otandi ka tilila Ombepo yandje maantu ayehe; aana yeni aamati naakadhona otaa ka hunganeka, aamati aagundjuka otaa ka mona omamoniko, aasamane aakulupe otaa ka yaguma.

¹⁸ Eeno, maayakuli yandje ayehe, aalumentu naakiintu, otandi ka tilila mo Ombepo yandje pomasiku ngoka, oyo notaa ka hunganeka.

¹⁹ Otandi ka holola iilongankondo pombanda kegulu, niikumithalonga pevi, kombanda yevi. Otaku ka holoka ombinzi nomulilo nolwithi lwa gundakana.

²⁰ Etango otali ka luudha, nomwedhi otagu ka tiligana gwa fa ombinzi, esiku ndyoka lyOmuwa enene nolya simana manga inaali thikana.

²¹ Ihe kehe ngoka ti ithana edhina lyOmuwa, ota hupithwa.’

²² “Aaisraeli ne, pulakeneni oohapu ndhika! Jesus Omunasareti okwa li omulumentu a hogololwa kuKalunga. Kalunga okwe shi mu hololele kiilongankondo, kiikumithalonga nokomandhindhiliko ngoka Kalunga e mu longitha mokati keni. One omu shi shi nawa.

²³ Pahalo lye nopawino ye Kalunga okwa kala e shi tokola nale kutya Jesus ota ka gandjwa miikaha yeni notamu ke mu dhipaga. One nomwa longitha aalumentu aalunde oku mu alela komushigakano.

²⁴ Ihe Kalunga okwe mu yumudha kuusi. Oye okwe mu mangulula mo muuwehame weso, oshoka eso inali vula oku mu kwata uupika.

²⁵ Oshoka David ote mu popi ta ti: ‘Ethimbo alihe onda mono Omuwa e li komeho gandje. Oye oku li kolulyo lwandje, opo ndaa punduke.

²⁶ Onkee omutima gwandje ogu udha enyanyu nelaka lyandje otali ligola; nokuli ngame nando ondi li monkalo yokusa, otandi vululukwa nombili metegameno.

²⁷ Oshoka omwenyo gwandje ito gu ethele maasi. Ngoye ito pitika, omuntu gwoye omwiinekelwa a ole.

²⁸ Ongoye u ulukile ndje oondjila ndhoka tadhi fala komwenyo. Ngame nonda nyanyukwa, oshoka ou li pungame.’

²⁹ “Aamwameme, onda hala, ndi mu fatululile kombinga yatatekulu David. Oye okwa si e ta fumvikwa, nombila ye oyi li sigo onena mpaka putse.

³⁰ Oye okwa li omuhunganeki nokwa li a tseya omauvaneko ngoka Kalunga e ge mu uvanekela. Kalunga okwa ganene David egano kutya ota ka langeka gumwe gwomoyana koshipundi she shuukwaniilwa naanaa, ngashika David a li.

³¹ David okwa mono shoka Kalunga ta ka ninga, onkee okwa popi eyumuko lyaKristus sho a ti: ‘Kalunga ine mu ethela maasi, olutu lwe inalu vula okwoola.’

³² OJesus tuu nguka Kalunga e mu yumudha kuusi, natse atuhe oonzapo dhoshinima shika.

³³ Oye okwa yeluthilwa pombanda kolulyo lwaKalunga e ta taamba kuye Ombepo Ondjapuki, ndjoka He e yi uvaneka. Ano shoka mu wete nomu uvite ngashingeyi, osho omagano ngoka Jesus e ge tu tilile.

³⁴ Oshoka David ye mwene ina londa megulu, aawe, oye okwa ti: ‘Omuwa okwa lombwele Omuwa gwandje: Kala omutumba mpaka kolulyo lwandje,

³⁵ sigo tandi tula aatondi yoye kohi yoompadhi dhoye.’

³⁶ “Onkee ano Aaisraeli ayehe oye na okutseya kutya Jesus ngoka mwe mu alele komushigakano, Kalunga okwe mu ningi Omuwa naKristus.”

³⁷ Aantu sho yu uvu oohapu ndhoka, odhe ya dhenge pomutima. Oyo noya pula Petrus naayapostoli ooyakwawo ya ti: “Aamwameme, otu na okuninga shike?”

³⁸ Petrus okwe ya yamukula a ti: “Itedhululeni, mu ethe uulunde, kehe gumwe gwomune polwe, mu shashelwe medhina lyaJesus Kristus. Nena Kalunga ota dhimi po oondjo dheni note mu pe omagano gOmbepo Ondjapuki.

³⁹ Oshoka euvaneko ndika Kalunga okwe li mu uvanekela, one naana yeni naantu ayehe mboka ye li kokule, oomboka ayehe Omuwa Kalunga ketu te ya ithana, ye ye kuye.”

⁴⁰ Petrus okwe ya tompo nokwe ya kumagidha noohapu dhilwe odhindji a ti: “Etheni, mu hupithwe mo megeelo ndyoka tali ka adha aakolokoshi mboka.”

⁴¹ Oyendji yomuyo oyi itaale oohapu dhe noya shashwa. Esiku ndyoka Omuwa okwa gwedhele ko ongundu yooitaali, aantu ye thike pomayuvi gatatu.

⁴² Oyo oya kala taa longwa kaayapostoli e taa topola shoka ye shi na naayapostoli noya lile pamwe e taa galikana Kalunga pamwe.

⁴³ Iilongankondo niikumithalonga oyindji mbyoka Kalunga e yi longitha aayapostoli, oye etele kehe gumwe uumbanda netilo.

⁴⁴ Ooitaali ayehe oya tsikile okukala muukumwe neliko lyawo alihe oye li tula mumwe.

⁴⁵ Oyo oya landitha po omapya gawo niimuna yawo e taa topolelathana iimaliwa mbyoka, nakehe gumwe okwa pewa shoka e shi pumbwa.

⁴⁶ Esiku kehe oya tsikile okugongala pamwe motempeli mombepo yimwe e taa li iikulya yawo pamwe momagumbo gawo noye yi li nenyanyu noneifupipiko.

⁴⁷ Oyo oya kala nokuhambelela Kalunga noya li ya hokiwa kaantu ayehe. Esiku kehe Omuwa okwa gwedhele ko aahupithwa kongundu yawo.

3

¹ Esiku limwe Petrus naJohannes oya yi motempeli pethimbo lyegalikano, opotundi ontintatu yokomatango.

² Ano pomweelo gwotempeli ngoka hagu ithanwa “Omweelo gwo opala”, opwa li pu na omulumentu gumwe oshilema nkene a valwa. Omulumentu nguka ohe etwa po kehe esiku a humbatwa nohi indile mboka taa yi motempeli.

³ Oye sho a mono Petrus naJohannes yu uka motempeli, okwe ya indile, ye mu pe sha.

⁴ Oyo oye mu tala nokutongolola, Petrus nokwe mu lombwele a ti: “Tu tala!”

⁵ Oye okwe ya tala a tegelela, ye mu pe sha.

⁶ Nena Petrus okwe mu lombwele a ti: “Ngame kandi na nando iimaliwa, ihe shoka ndi shi na, otandi shi ku pe. Medhina lyaJesus Kristus Omunasareti otandi ku lombwele: thikama, ngu u ende!”

⁷ Petrus okwe mu kwata ihe koshikaha shokolulyo nokwe mu ambidhidha, a thikame. Mbalambala oompadhi noompando dhomulumentu odha kolo;

⁸ oye okwa nuka po a thikama komagulu ge nokwa tameke okweendaenda. Oye okwa yi pamwe naayapostoli motempeli te ende ta tanta nokuhambelela Kalunga.

⁹ Aantu ayehe mboka ya adhika motempeli, oye mu mono, sho te ende nokuhambelela Kalunga.

¹⁰ Oyo sho ye mu dhimbulula kutya oye ngoka ha kala ta hehela pOmweelo gwo opala, oya li ya kuminwa shoka sha ningilwa omulumentu nguka oshilema.

¹¹ Ano omwaaludhwa sho a li ta landula Petrus naJohannes, aantu ayehe oya kwatwa konkumwe noye endelele okugongalela puye pondunda hayi ithanwa Ondunda yaSalomo.

¹² Petrus sho e ya, okwe ya tsakaneke noohapu ndhika: “Aaisraeli ne, omolwashike mwa kuminwa oshinima shika? Omolwashike tamu tu tala mwe tu tongolola? Otamu dhiladhila ando kutya okoonkondo dhetu nenge kokusimaneka Kalunga ketu twa aludha omulumentu nguka, a vule okweenda?

¹³ Kalunga kaAbraham, kaIsak nokaJakob, oye a gandja esimano lyuukalunga komuntu gwe Jesus. One mwe mu gandja miikaha yaapangeli nomwe mu idhimbike koshipala shaPilatus, nonando Pilatus okwa li a tokola oku mu mangulula.

¹⁴ Oye okwa li omuyapuki nomuyuuki, ihe ne omwe mu ekelehi nomwi indile Pilatus, e mu mangululile omudhipagi peha lye.

¹⁵ Osho ngeyi omwa dhipagitha omugandji gwomwenyo. Ihe Kalunga okwe mu yumudha kuusi — natse oonzapo dhoshinima shika.

¹⁶ Koonkondo dhedhina lyaJesus omulumentu nguka, mu mu wete nomu mu shi, okwa mono uukolele. Okwiitaala Jesus okwo kwe mu aludha ngaaka montaneho yeni amuhe.

¹⁷ “Ano ngashingeyi, aamwameme, ondi shi shi kutya shoka ne naawiliki yeni mwe shi ningile Jesus, omwe shi ningithwa kokwaashisha kweni.

¹⁸ Ihe pamukalo gwa tya ngaaka Kalunga okwa tsakanitha shoka e shi hunganekitha nale aahunganeki ayehe kutya Omugwayekwa gwe oku na okuhepekwa.

¹⁹ Onkee ano itedhululeni, ne mu galukile kuKalunga, opo a dhime po oondjo dheni,

²⁰ opo okukala po kwOmuwa ku mu etele omathimbo goonkondo oompe, ye e mu tumine Jesus nokutya Kristus, oye tuu ngoka mwe mu uthilwa nale.

²¹ Oye oku na okukala megulu, sigo iinima ayihe ya ningwa iipe, ngashika Kalunga e shi hunganekitha nale nomakana gaahunganeki ye aayapuki.

²² Oshoka Moses okwa tile: ‘Omuwa Kalunga keni ote ke mu tumina omuhunganeki ta ka za mokati keni, ngashika naanaa a li a tumu ndje. One omu na okuvulika mushaa shoka te mu lombwele.

²³ Shaa ngoka itaa vulika koohapu dhomuhunganeki ngoka, oye ota yoololwa mo maantu yaKalunga e ta hanagulwa po.’

²⁴ Osho wo Samuel naahunganeki ayehe mboka ye mu landula, oya popi nokuhunganeka omasiku ngaka gongashingeyi.

²⁵ One oonakupewa omauvaneko ngoka Kalunga e ga uvanekitha aahunganeki nomu na oshitopolwa mehangano ndyoka Kalunga e li dhike noohokulu yonale, uuna ndoka a lombwele Abraham a ti: ‘Moluvalo lwoye otandi ka yambeka aantu ayehe yokombanda yevi.’

²⁶ Osho ngeyi Kalunga okwa hogolola Omuntu gwe e te mu tumu tango kune oku mu yambeka, sho te mu galula moondjila dheni oombwinayi.”

4

¹ Petrus naJohannes manga ya li natango taa uvithile aantu motempeli, aayambi nomukuluntu gwaalangeli yotempeli naasadukayi oye ya kuyo.

² Oyo oya li ya geya, oshoka aalongwa mbaka yaali oya li taa longo aantu kutya Jesus okwa yumudhwa kuusi, naashika otashi holola kutya aasi otaa ka yumuka.

³ Onkee oye ya kwata e taye ya edhilile mondholongo sigo esiku lya landula, oshoka etango olya li lya toka.

⁴ Ihe aantu oyendji yomongundu mboka yu uvu oohapu dhaPetrus naJohannes, oyi itaale Jesus. Omwaalu gwaalumentu mboka yi itaale ogwa adha lwopomayuvi gatano.

⁵ Esiku lya landula aawiliki yAajuda, aakuluntu naalongimpango oya gongala muJerusalem.

⁶ Oyo oya gongala pamwe nomuyambimukuluntu Annas naKajafas naJohannes naAleksander nayalwe ayehe mboka yomezimo lyomuyambimukuluntu.

⁷ Oyo oya thikameke aayapostoli kiipala yawo noye ya pula ya ti: “Omwe shi ningi ngiini? Okoonkondo dhinipo mwa longo shino? Edhina olyalye mwa tumbula, sho mwa aludha oshilema?”

⁸ Petrus oku udha Ombepo Ondjapuki nokwe ya yamukula a ti: “Aawiliki naakuluntu yoshigwana,

⁹ omolwoshilonga oshiwanawa sha ningilwa omulumentu oshilema otu li mpaka nena tatu pulwa kutya okwa aludhwa koshike.

¹⁰ Onkee ano ne amuhe noshigwana ashihe shAaisraeli, kaleni mu shi shi kutya omulumentu nguka sho a thikama ngeyi komeho geni ondjolowele, okwa aludhwa koonkondo dhedhina lyaJesus Kristus Omunasareti. Jesus ngoka mwe mu alele komushigakano, Kalunga okwe mu yumudha kuusi.

¹¹ Oye ngoka ta popiwa kenyolo ndyoka tali ti: ‘Emanya ndyoka ne aatungi mwe li dhini, olyo lya ningi emanya li na oshilonga li vule agehe.’

¹² Omuye awike tamu tu zile ehupitho; oshoka muuyuni auhe kamu na nando ogumwe gwedhina Kalunga e li hololela aantu, tatu vulu okuhupithilwa muye.”

¹³ Iilyo yoshigongi shaatokoli yAajuda sho ya mono, Petrus naJohannes taa popi nuulaadhi, oya kumwa, sho ye ya dhimbulula kutya oyo aantu inaa longwa sha. Nena oyo oya dhimbulula ihe kutya aalumentu mbaka oya kala puJesus.

¹⁴ Mokutala omulumentu ngoka a aludhwa a thikama pamwe naPetrus, inaa vula okutya sha.

¹⁵ Onkee oye ya lombwele, ya pite mo manga mongulu yoshigongi, noya tameke ihe okukundathana.

¹⁶ Oyo oya pulathana ya ti: “Aalumentu mbaka otatu ya ningi ngiini? Oshoka oshikumithalonga shoka ye shi ningi, oshi li puuyelele nosha tseyika kaantu ayehe mboka ye li muJerusalem; natse itatu vulu okuludhika shoka sha ningwa.

¹⁷ Ihe oshinima sha tya ngeyi opo shaa taandele mokati kaantu ayehe, tu ya gandeni, yaa popithe we nando omuntu gumwegumwe medhina lyaJesus.”

¹⁸ Nena oye ya ithana ishewe, ye ye meni, e taa ya indike, yaa longe noyaa popye we nando medhina lyaJesus.

¹⁹ Ihe Petrus naJohannes oye ya yamukula ya ti: “Tokoleni ne yene kutya oshini po shu uka koshipala shaKalunga. Otu na okuvulika kune nenge otu na okuvulika kuKalunga?

²⁰ Oshoka itatu vulu okumwena, tu kale ando itaatu hokolola shoka tse twe shi mono notwe shi uvu.”

²¹ Aakwashigongi shaatokoli oye ya lombwele ihe nomagandambadhi noye ya etha, ya ye, oshoka inaa mona etompelo nando olimwe lyoku ya geela. Aantu ayehe oya li taa hambelele Kalunga molwaashoka sha ningwa po.

²² Nokuli omulumentu ngoka a ningilwa oshikumithalonga shika shealudho, okwa li e na oomvula dhi vule omilongo ne.

²³ Petrus naJohannes sho ye ethiwa, oya shuna mbalambala kooyakwawo noye ya hokololele ashihe shoka aayambi aakuluntu naakuluntu yoshilongo ya ti.

²⁴ Oyo sho ye shi uvu, oya galikana Kalunga ongomuntu gumwe ya ti: “Omuwa, Omushiti gwegulu nevi nefuta naashihe shoka sha kala muyo.

²⁵ Ongoye wa pele omuntu gwoye, tatekulu David, koonkondo dhOmbepo Ondjapuki iitya yokupopya, sho a ti: ‘Omolwashike aapagani ya fulakata, omolwashike iigwana tayi pangele oompangela dhowala?

²⁶ Aakwaniilwa yokombanda yevi otaa ilongekidha, naaleli otaa gongala, notaa tsu ondumbo okukondjitha Omuwa nOmugwayekwa gwe.’

²⁷ Oshoka Herodes naPontius Pilatus pamwe naapagani noshigwana shAaisraeli oya gongala moshilando shika okukondjitha Jesus, Omuntu gwoye omuyapuki, ngoka we mu ningi Kristus.

²⁸ Oyo oya gongala, opo ya kondjithe ashihe shoka ngoye mwene koonkondo dhoye nokehalo lyoye we shi utha nale, shi ningwe.

²⁹ Ano ngashingeyi, Omuwa, pulakena, nkene taa popitha aamati yoye nomagandambadhi, ngoye u pe aamati yoye oohapu dhoye, tu popye nuulaadhi auhe twaa na uumbanda.

³⁰ Yelutha oshikaha shoye pombanda, u aludhe aavu, ngoye u holole po iikumithalonga niilongankondo omedhina lyaJesus, Omuntu gwoye omuyapuki.”

³¹ Ooitaali sho ya mana okugalikana, ehala mpoka ya li taa galikanene, olya kakama. Oyo ayehe oyu udhithwa Ombepo Ondjapuki e taa tameke okupopya nuulaadhi oohapu dhaKalunga.

³² Ongundu ayihe yooitaali oya li ya fa omuntu gumwe momadhiladhilo nomomitima dhawo. Kapwa li nando ogumwe ngoka a vulu okutumbula kutya oshinima shontumba shomeliko lye oshe, ihe oya topolelathana shaa shoka ya li ye shi na.

³³ Aayapostoli oya hokolola noonkondo adhihe kutya Omuwa Jesus okwa yumudhwa kuusi, Kalunga nokwe ya pe omayambeko ogendji.

³⁴ Mongundu yawo kamwa li nando ogumwe a hepa. Mboka ya li ye na omapya nenge omagumbo, oye ga landitha po, niimaliwa mbyoka ya zi mo, oye yi eta kaayapostoli,

³⁵ yi topolelwe ooitaali, opo kehe gumwe a pewe shi thike pampumbwe dhe.

³⁶ NaJosef, Omulevi a valelwa muKipro, ngoka aayapostoli haye mu ithana Barnabas, ndyoka tali ti omukumiki, osho a ningi.

³⁷ Oye okwa landitha po epya lye, niimaliwa okwe yi eta kaayapostoli.

5

¹ Ihe okwa li ku na omulumentu gumwe, edhina lye Ananias, nomukadhi Safira. Ananias okwa landitha po epya lyawo,

² ihe okwi ipungulile iimaliwa yimwe, nomukadhi okwa li e shi shi. Oshihupe shiimaliwa okwe shi eta kaayapostoli.

³ Nena Petrus okwe mu pula a ti: “Ananias, omolwashike wa zimine, Satana a pangele momutima gwoye nokwe ku lombwele, u fundje Ombepo Ondjapuki, sho wa holeke oshitopolwa shimwe shondando yepya lyeni?

⁴ Epya ndyoka nomanga inoo li landitha po, kalya li lyoye? Naasho we li landitha po, iimaliwa mbyono ya zi mo, oyoye. Omolwashike ano wa tokola momutima gwoye, u ninge oshinima shi thike mpaka? Ongoye ino fundja aantu, ihe owa fundju Kalunga.”

⁵ Ananias nkene tuu u uvu oohapu ndhika, okwi ihata pevi nokwa si. Aantu ayehe mboka yu uvu oshinima shika, oya haluka noonkondo.

⁶ Nena aalumentu aagundjuka oye ya mo e taa kutha po omudhimba gwe noye gu fala pondje e taye mu fumvike.

⁷ Ootundi ndatu sho dha piti po, omukadhi okwe ya mo mongulu moka mwa li Petrus. Oye okwa li inaa tseya shoka sha ningilwa omulume.

⁸ Petrus okwe mu pula a ti: “Lombwela ndje, iimaliwa mbika oyo ayihe mwa pewa, sho mwa landitha po epya lyeni?” Oye okwa yamukula a ti: “Eeno, oyo ayike.”

⁹ Nena Petrus okwe mu lombwele a ti: “Omolwashike mwa tokola nomulumentu gwoye okumakela Ombepo yOmuwa? Aalumentu mboka ya fumvike omulumentu gwoye, oye li ngashingeyi posheelo, oyo notaye ku fala ko wo.”

¹⁰ Mbalambala Safira wo okwi ihata pevi poompadhi dhaPetrus e ta si. Aalumentu aagundjuka oye ya mo noya mono kutya okwa sa. Oyo oye mu fala pondje e taye ke mu fumvika pooha dhomulume.

¹¹ Egongalo alihe naantu yalwe ayehe mboka yu uvu oshinima shika, oya haluka noonkondo.

¹² Iikumithalonga niilongankondo oyindji oya ningwa kaayapostoli mokati kaantu. Ooitaali ayehe oya li haa gongala pamwe mondunda yaSalomo.

¹³ Kapwa li pu na nando ogumwe ngoka kee shi omwiitaali, a mono omukumo okwiitula mongundu yawo, nonando aantu oya li ye ya popile muuwanawa.

¹⁴ Ihe omwaalu gwaamboka yi itaale Omuwa, ogwa tana. Muyo omuwa li aalumentu naakiintu oyendji.

¹⁵ Omolwiikumithalonga mbyoka ya ningwa kaayapostoli, aantu oya fala aavu yawo poondjila nomapandaanda noye ya langeke komalutala, opo Petrus ngele te ende po, omuzizimba gwe gu adhe nando yamwe yomuyo.

¹⁶ Nokiilando yopuushiinda waJerusalem okwa zi ongundu onene yaantu ye eta aavu yawo naamboka ye niwe koombepo dha nyata. Oyo ayehe noya aludhwa.

¹⁷ Nena omuyambimukuluntu pamwe nongundu ye ayihe, iilyo yongundu yaasadukayi, oya sile aayapostoli efupa noonkondo noya tokola okuninga po sha.

¹⁸ Oyo oya kwata aayapostoli noye ya tula mondholongo yaayehe.

¹⁹ Ihe uusiku omuyengeli gwOmuwa okwa egulula omiyelo dhondholongo, okwa piitha mo aayapostoli nokwe ya lombwele e ta ti:

²⁰ “Indeni motempeli, ne mu ka hokololele aantu iinima ayihe kombinga yokukalamwenyo huka okupe.”

²¹ Aayapostoli oya vulika kelombwelo lyomuyengeli noya yi motempeli, manga eluwa tali tende, e taa tameke okulonga aantu. Omuyambimukuluntu nongundu ye oya hiya oshigongi shaakuluntu yAajuda ayehe, ye ye koshigongi shaatokoli. Opo ihe oya tumu aalumentu kondholongo, ye ete aayapostoli moshigongi.

²² Ihe aatumwa sho ya thiki kondholongo, aayapostoli inaye ya adha mo. Onkee oya galukile koshigongi noya lombwele aakwashigongi ya ti:

²³ “Otse sho twa thiki kondholongo, otwa adha omiyelo dhayo dha patekeka naalangeli oya langela nawa piiyelo, ihe sho twe egulula omiyelo, otwi iyadhaadha mo owala.”

²⁴ Omukuluntu gwaalangeli yotempeli naayambi aakuluntu sho ye shi uvu, oyi ipula nonkumwe mokudhiladhila shoka sha ningilwa aayapostoli.

²⁵ Ihe omulumentu gumwe okwe ya mo mongulu yoshigongi e te ya lombwele ta ti: “Taleni, aalumentu mbeyaka mwa tulile mondholongo, oye li ngashingeyi motempeli taa longo aantu.”

²⁶ Nena omukuluntu gwaalangeli yotempeli okwa yi pamwe naamati ye noya ka tala ko aayapostoli. Ihe inaye ya eta ko kethiminiko, oshoka oya li ya tila kutya otashi vulika, aantu ye ya dhipage nomamanya.

²⁷ Oyo oye eta mo aayapostoli noye ya kaleke omuthika komeho goshigongi. Omuyambimukuluntu okwa ti kuyo:

²⁸ “Otse otwe mu lombwele: Inamu longa we nando aantu medhina lyomulumentu nguka Jesus. Taleni ihe shoka mwa ningi. Jerusalem ashihe mwe shi udhitha elongo lyeni. One omwa hala nokuli oku tu tsika ondjo yeso lyomulumentu ngoka Jesus.”

²⁹ Nena Petrus naayapostoli ooyakwawo oye ya yamukula ya ti: “Otse otu na okuvulika kuKalunga, hakaantu.

³⁰ Kalunga ngoka ootate haye mu longele, oye ngoka a yumudha Jesus tuu ngoka mwe mu alele komushigakano nomwe mu dhipaga.

³¹ Kalunga okwe mu yeluthile pombanda kolulyo lwe, a kale Omuwiliki nOmuhupithi, nokwa pe Aaisraeli ompito yokwiitedhulula, ya dhiminwe po oondjo dhawo.

³² Mokuhokolola iinima mbika otse oonzapo pamwe nOmbepo Ondjapuki, ndjoka Kalunga he yi gandja omagano kumboka haa vulika kuye.”

³³ Iilyo yoshigongi shaatokoli sho yu uvu oohapu ndhika, odhe ya lulumike koomwenyo noya tokola okudhipaga aayapostoli.

³⁴ Ihe moshigongi omwa thikama gumwe, omulongimpango nomufarisayi, edhina lye Gamaliel, ngoka a li ha simanekwa kaantu ayehe. Oye okwa gandja elombwelo, aayapostoli ya piithwe mo manga.

³⁵ Opo ihe okwa lombwele oshigongi a ti: “Aaisraeli ne ooyakwetu, dhiladhileni nawa shoka mwa hala okuningila aalumentu mbaka.

³⁶ Oshoka inapu pita ethimbo ele, sho Teudas a holokele nokwi iningi aniwa oye ashikeshalye, naalumentu ye thike lwopomathele gane oyi igameke kuye. Ihe oye okwa dhipagwa, naalanduli ye ayehe oya halakanithwa noya manwa po.

³⁷ Konima yaanguka, pethimbo lyomayalulo gaantu, Judas Omugalilea okwa holoka po. Oye okwi ihilile ongundu, ihe naye wo okwa dhipagwa, naalanduli ye oya halakanithwa po.

³⁸ Onkee ano ngashingeyi otandi mu lombwele, aalumentu mbaka inamu ya ningila nando uuwinayi washa. Ya etheni, ya tye ngaaka, oshoka oshilonga shika shawo ngele osha za momuntu, otashi ka hula po;

³⁹ ihe ngele osha za muKalunga, nena one itamu vulu nando oku ya sinda. Nokuli otamu ke shi mona kutya otamu kondjitha Kalunga.” Oshigongi shaatokoli osha taamba epukululo lyaGamaliel.

⁴⁰ Oyo oyi ithanene mo ihe aayapostoli noya lombwele aalangeli, ye ya dhenge. Opo ihe oye ya indike, yaa popye we nando olumwe medhina lyaJesus, noye ya etha.

⁴¹ Aayapostoli oya zi mo moshigongi shaatokoli ya nyanyukwa noonkondo, sho Kalunga e ya tala ya gwana okuhepekelwa edhina lyaJesus.

⁴² Nokuli esiku kehe oya tsikile okulonga nokuuvitha motempeli nomomagumbo elaka etoye ndyoka tali ti kutya Jesus oye Kristus.

6

¹ Pomasiku ngeyaka omwaalu gwooitaali sho gwa li tagu indjipala noonkondo, opwa tukuluka oontamanana pokati kAajuda mboka haa popi Oshigreka nAajuda aavalelwamo. Aajuda mboka haa popi Oshigreka, oya nyenyeta kutya mokutopola kwesiku kehe kwoompumbwe dhopalutu aaselekadhi yawo oya pangwa.

² Nena aayapostoli oya hiya ongundu ayihe yooitaali e taye ya lombwele taa ti: “Inashi opala, ngele tse otatu etha po okuuvitha oohapu dhaKalunga, opo tu kale twi ipyakidhila noompumbwe dhopalutu.

³ Onkee ano, aamwameme, hogololii mo mokati keni aalumentu yaheyali mboka ye shi kwiinekelwa noye na Ombepo Ondjapuki noondunge. Otse otatu ya langeke moshilonga shika.

⁴ Tse yene polwetu otwa hala okwiitula lela megalikano nomoshilonga sheuvitho lyoohapu dhaKalunga.”

⁵ Egongalo alihe olya hokwa edhiladhilo ndika lyaayapostoli. Onkee oya hogolola mo Stefanus, omulumentu e na eitaalo nOmbepo Ondjapuki, naFilippus, Prokorus, Nikanor, Timon, Parmenas naNikolaus, nale omupagani gwokuAntiokia, a ninga Omujuda.

⁶ Egongalo olye ya tula ihe komeho gaayapostoli, naayapostoli oye ya galikanene noye ya tenteke iikaha.

⁷ Osho ngeyi oohapu dhaKalunga odha tsikile okutaandela. Omwaalu gwooitaali yomuJerusalem ogwi indjipala noonkondo, nongundu onene yaayambi oya ningi ooitaali.

⁸ Stefanus okwa li a yambekwa unene kuKalunga noku udha oonkondo. Oye okwa longo iikumithalonga niilongankondo iinene mokati kaantu.

⁹ Ihe aalumentu yamwe oye mu tsile ondumbo. Oyo oya li iilyo yomosinagoga ndjoka hayi ithanwa “Osinagoga yaalumentu ya manguluka”, moka mwa li mu na Aajuda mboka ya za kuKireni nokuAleksandria. Aalumentu mboka pamwe nAajuda yalwe ooyakwawo mboka ya za kuKilikia nokuAsia, oya tameke okuludhika naStefanus.

¹⁰ Ihe Ombepo oya pe Stefanus oondunge, onkee oya nyengwa oku mu yamukula nenge oku mu ludhikitha.

¹¹ Onkee ano oya pe aalumentu yamwe yontumba oombumbo, opo ya lundile Stefanus ya tye: “Otse otwe mu uvu ta sheke Moses naKalunga.”

¹² Pamukalo gwa tya ngeyi oya sikumudha aantu, aakuluntu yAajuda naalongimpango. Mboka oye ya kuStefanus noye mu kwata e taye mu fala moshigongi shaatokoli Aajuda.

¹³ Nena oyo oye eta po aalumentu yamwe taa popi iifundja nokulundila Stefanus taa ti: “Omulumentu nguka oha popi aluhe nokusheka otempeli yetu ondjapuki nompango yaMoses.

¹⁴ Nokuli tse otwe mu uvu ta popi ta ti: Jesus Omunasareti ota ka hanagula po otempeli ndjika nota lundulula omithigululwakalo ndhoka twe dhi thigilwa kuMoses.”

¹⁵ Ayehe mboka ya li ya kuutumba moshigongi, oya tongolola Stefanus noya dhimbulula, oshipala she osha fa oshipala shomuyengeli.

7

¹ Omuyambimukuluntu okwa pula Stefanus a ti: “Oshoshili tuu shoka to pelwa uusama kaalumentu mbaka?”

² Stefanus okwa yamukula a ti: “Aamwameme nootate, pulakenii ndje. Kalunga keadhimo okwa holokele tatekulu Abraham, manga a li natango muMesopotamia, inaa tembukila kuHaran.

³ Kalunga nokwa ti kuye: ‘Thiga po ezimo lyoye noshilongo sheni, u ye kevi ndyoka tandi li ku ulukile.’

⁴ Osho ngeyi Abraham okwa thigi po evi lyaBabilonia nokwa yi, a ka tule muHaran. He yaAbraham sho a si, Kalunga okwa tembudhile Abraham moshilongo shika moka mu li ngashingeyi.

⁵ Kalunga ina thikila ta pe Abraham nando okatopolwa okashona kevi ndika, ka ninge ke mwene. Ihe Kalunga oku uvaneke ashike kutya ote ke li mu pa; olyo notali ka kala lye nolyoluvalo lwe konima yeso lye. Abraham okwa li kee na omunona, Kalunga sho e mu pe euvaneko ndika.

⁶ Kalunga okwa lombwele Abraham ta ti: ‘Aamwoye otaa ka kala oondjendi moshilongo shaa shi shawo; taa ka kala mo aapika notaa ka hepekwa kooyene yoshilongo shoka uule woomvula omathele gane.

⁷ Ihe ngame otandi ka geela oshilongo shoka tashi ke ya kwata aapika,’ Kalunga osho a ti: ‘nokonima yethimbo ndyoka otaa ka manguluka mo muupika mboka e taye ya, ya longele ndje peha ndika.’

⁸ Kalunga okwa dhike ehangano pokati ke naAbraham nendhindhiliko lyehangano ndika olyo efukaleko. Ano Isak sho a valwa, Abraham okwe mu fukaleke konima yoshiwike shimwe. Isak okwa fukaleke Jakob, naJakob okwa fukaleke ootatekulu mbeyaka omulongo nayaali.

⁹ “Ootatekulu mbeyaka oya sile omumwahe Josef efupa noye mu landitha po, a ka kale omupika kuEgipiti. Ihe Kalunga okwa li pamwe naye,

¹⁰ nokwe mu hupitha mo momaudhigu ge agehe. Kalunga okwa pe Josef elago nuunongo, uuna ndoka a holoka koshipala shaFarao, omukwaniilwa gwaEgipiti. Farao nokwa lenge Josef, a ninge omuleli gwoshilongo shaEgipiti nogwegumbo alihe lyomukwaniilwa.

¹¹ Ondjala sho ye ya moshilongo ashihe shaEgipiti noshaKaanan, oye eta oluhepo olunene. Ootatekulu oya li kaa na nando oompoka taa vulu okumona iikulya.

¹² Onkee Jakob sho u uvu kutya kuEgipiti oku na iilya, okwa tumu ko oyana molweendo lwawo lwotango.

¹³ Molweendo lwawo olutiyali Josef okwi ihololele aamwahe, naFarao okwa tseyithilwa aanezimo lyaJosef.

¹⁴ Nena Josef okwa tumine he Jakob elaka nokwe mu lombwele, e ye kuEgipiti pamwe negumbo lye alihe, aantu omilongo heyali nayatano ayehe kumwe.

¹⁵ Osho ngeyi Jakob okwa yi kuEgipiti, hoka ye mwene noyana, ootatekulu yetu, ya sile ko.

¹⁶ Jakob naJosef oya si, oya falwa kuShekem e taa fumwikwa mombila ndjoka Abraham a li e yi landa naana yaHamor.

¹⁷ “Ethimbo lyaKalunga lyokutsakanitha euvaneko lye ndyoka e li uvanekela Abraham sho lya hedha popepi, omwaalu gwaantu yoshigwana shetu muEgipiti ogwa li wo gwa indjipala noonkondo.

¹⁸ Navulwa omukwaniilwa gumwe ngoka inaa tseya Josef nando okashona, okwa lala oshilongo shaEgipiti.

¹⁹ Oye okwa kotokele oshigwana shetu, okwa hepeke ootatekulu nokwe ya thiminike okweekelahi uunona wawo uumati, opo u se.

²⁰ Moses okwa valwa pomasiku ga tya ngaaka. Oye okwa li omunona omwaanawa nokwa hokiwa kuKalunga. Oye okwa paluthilwa megumbo lyahe uule woomwedhi ndatu.

²¹ Hugunina okwa kuthwa mo megumbo nokwa ka ekelwahi, ihe omuna gwaFarao omukadhona okwe mu toola nokwe mu iputudhile ongomwana.

²² Osho ngeyi Moses okwa longwa uunongo auhe wAayegipiti nokwa ningi omuntu omunene mokupopya nomokulonga.

²³ “Moses sho a gwanitha oomvula omilongo ne, okwa tokola, a ye a ka talele po aamwayina Aaisraeli.

²⁴ Oye okwa adha ko gumwe gwomAaisraeli ta dhengwa kOmuegipiti, onkee okwa yi, a ka kwathe Omuisraeli nokwa shunithile Omuegipiti uuwinayi e te mu dhipaga.

²⁵ Moses okwa li e shi aniwa aantu yoshigwana she oyu uvite ko kutya Kalunga okwa hala oku mu longitha, opo e ya mangulule mo muupika, ihe oya li kaaye shi uvite ko.

²⁶ Esiku lya landula Moses okwa adha Aaisraeli yaali taa kondjo. Oye okwa kambadhala oku ya hangukununa nokwe ya lombwele a ti: ‘Yalumentu ne, pulakeneni. One aamwayinathana, omolwashike tamu hepekathana?’

²⁷ Nena gumwe ngoka a li ta hepeke mukwawo, okwe mu undula nokwe mu pula a ti: ‘Olye e ku ningi omupangeli nomupanguli gwetu?

²⁸ Owa hala ano okudhipaga ndje, ngashika wa li wa dhipaga ohela Omuegipiti ngwiyaka?’

²⁹ Moses sho u uvu oohapu ndhoka, okwa yi ontuku nokwa kala moshilongo shAamidiana. Oye okwa valelwa hwiyaka aanona aamati yaali.

³⁰ “Oomvula omilongo ne sho dha piti po, omuyengeli okwi ihololele Moses mombuga moshihwa sha hwama omulilo popepi nondundu yaSinai.

³¹ Moses okwa li a kuminwa emoniko ndyoka nokwa hedha popepi noshihwa, a tale nawa. Ihe oku uvu ewi lyOmuwa tali mu popitha tali ti:

³² ‘Ongame Kalunga koohokulu, Kalunga kaAbraham, Kalunga kaIsak naKalunga kaJakob.’ Moses okwa kwatwa kuumbanda e ta kakama nokwa li itaa vulu okulengalenga.

³³ Opo ihe Omuwa okwe mu lombwele ta ti: ‘Kutha ko oongaku koompadhi dhoye, oshoka eha ndyoka mpoka wa thikama, olyo evi eyapuki.

³⁴ Ongame onda tala nonda mono, nkene aantu yandje taa hepekwa noonkondo muEgipiti. Ondu uvu omikemo dhawo nonda kulukile pevi, opo ndi ya hupithe. Ila ano, onda hala oku ku tuma kuEgipiti.’

³⁵ “Moses tuu ngoka Aaisraeli ye mu idhimbike, sho ye mu pulile taa ti: ‘Olye e ku ningi omupangeli nomutokoli gwetu?’ Oye tuu ngoka Kalunga e mu tumu, a kale omupangeli nomuhupithi gwawo okekwatho lyomuyengeli ngoka e mu ihololele moshihwa sha hwama omulilo.

³⁶ Oye okwa tembudha mo Aaisraeli muEgipiti nokwa longo iikumithalonga niilongankondo moshilongo shaEgipiti nomEfuta etiligane nomombuga uule woomvula omilongo ne.

³⁷ Moses tuu ngoka a li a lombwele Aaisraeli ta ti: ‘Kalunga ote ke mu tumina omuhunganeki ta zi moshigwana sheni yene, ngashika naanaa a li a tumu ndje kune.’

³⁸ Oye tuu ngoka a li pamwe nAaisraeli, sho ya gongalele mombuga. Oye okwa kala mombuga pamwe nootate nopamwe nomuyengeli ngoka a li a popi naye kondundu yaSinai. Oye okwa pewa kuKalunga oohapu ndhoka tadhi gandja omwenyo, e dhi tu lombwele.

³⁹ “Ihe ootate oya li inaa hala okuvulika kuMoses, oya dhiladhila okushuna kuEgipiti.

⁴⁰ Onkee oya lombwele Aaron ya ti: ‘Tu ningila ookalunga taye tu kwatele komeho, oshoka Moses ngoka e tu tembudha muEgipiti, katu shi wo shoka she mu adha?’

⁴¹ Oyo oyi iningile oshikalunga sha fa ontana e taye shi yambele noya ningi oshituthi shokunyanyukilwa oshikalunga shoka ye shi iningile niikaha yawo.

⁴² Onkee Kalunga okwa zi po puyo nokwe ya etha, ya simaneke oonyothi dhokegulu, ngashika mwa nyolwa membo lyaahunganeki taku ti: ‘Aaisraeli ne, hamolwandje mwa dhipaga nomwa yamba omayambo giinamwenyo oomvula omilongo ne mombuga.

⁴³ Aawe, one omwa humbata etsali lyoshikalunga Molek, noshiyelekela shonyothi yoshikalunga sheni Refan. Mbika oyo iikalunga mbyoka mwe yi ningile, mu yi simaneke. Onkee ano otandi mu undulile handiyaka yaBabilon.’

⁴⁴ “Mombuga ootate ya li ye na etsali ndyoka tali holola kutya Kalunga oku li mokati kawo. Olyo olya li lya tungwa, ngashika naanaa Kalunga a lombwele Moses, e li tunge palupe lwefano ndyoka Kalunga e li mu ulukile.

⁴⁵ Hugunina ootate oya thigulula etsali lya tya ngaaka noye ende aluhe ye li humbata. Oyo oya li ye li humbata nuuna ndwiyaka ya yi pamwe naJosua, ya ka kwate po oshilongo, sho ye shi yugu iigwana mbiyaka Kalunga e yi tidha po komeho gawo. Osho ya kala ngaaka nalyo sigo opethimbo lyaDavid.

⁴⁶ David okwa silwa ohenda kuKalunga nokwi indile, a pitikilwe okutungila Kalunga kaJakob otempeli.

⁴⁷ Ihe Salomo oye a pitikilwa okutungila Kalunga otempeli.

⁴⁸ “Ihe Kalunga gwokombandambanda iha kala momagumbo ga tungwa kaantu, ngashika omuhunganeki ta ti:

⁴⁹ ‘Omuwa ota ti: Egulu olyo oshipangelapundi shandje. Nevi olyo oshilyatelo shoompadhi dhandje. Omu tungile ndje egumbo lya tya ngiini andola? Ehala lyandje lyokuvululukwa oli kale peni?

⁵⁰ Hangame mwene nda shiti iinima mbika ayihe?’

⁵¹ “Ne kamu na omakutsi! Omitima dheni odha fa owala dhaapagani. One omwa thita omakutsi noihamu uvu ko elaka lyaKalunga. Ngashika naanaa ooho ya li, osho nane wo mu li: aluhe tamu tindi okuvulika kOmbepo Ondjapuki.

⁵² Oku na tuu nando ogumwe gwoomaahunganeki inaa tidhaganwa kooho? Oyo oya dhipaga po aatumwa yaKalunga mboka ya tseyitha nalenale eyo lyOmuntu gwe omuyuuki. Oye tuu ngoka mwe mu gwaaleke nomwe mu dhipaga.

⁵³ One mboka mwa pewa ompango yaKalunga, ndjoka mwe yi pewa keyakulo lyaayengeli, ihe inamu vulika kuyo.”

⁵⁴ Ano iilyo yoshigongi shaatokoli sho yu uvu oohapu ndhika dhaStafanus, odhe ya lulumike koomwenyo dhawo noye mu sile ondjahi.

⁵⁵ Ihe Stefanus, ngoka a li u udha Ombepo Ondjapuki, okwa ligamene pombanda kegulu nokwa mono ko eadhimo lyaKalunga naJesus a thikama kolulyo lwaKalunga.

⁵⁶ Oye okwa lombwele aatokoli a ti: “Taleni, ondi wete egulu lye eguluka nOmuna gwOmuntu a thikama kolulyo lwaKalunga.”

⁵⁷ Nena oyo oyi igidha mokulekule noya thitike omakutsi gawo. Opo ihe ayehe oye mu nukile oshita,

⁵⁸ oye mu tidhile pondje yoshilando e taye mu umbu nomamanya. Oonzapo oya thigi oonguwo dhawo metonatelo lyomulumentu omugundjuka, edhina lye Saulus.

⁵⁹ Ano manga ya li taa tsikile ngeyi okudhenga Stefanus nomamanya, okwa galikana a ti: “Omuwa Jesus, taamba omwenyo gwandje!”

⁶⁰ Opo ihe Stefanus okwa tsu oongolo nokwiigidha mokulekule a ti: “Omuwa, ino ya yalulila ondjo ndjika.” Ano sho a popi ngeyi, okwa si.

8

¹ Saulus naye wo okwa li a panda okudhipagwa huka kwaStefanus. Okuza kesiku tuu ndyoka egongalo lyomuJerusalem olya adhika komahepeko omanene. Onkee ooitaali ayehe, kakele kaayapostoli, oya halakanene omikunda adhihe dhaJudea nodhaSamaria.

² Aalumentu yamwe haa simaneke Kalunga, oya fumvike Stefanus noye mu lili noonkondo.

³ Ihe Saulus okwa kambadhala okuhanagula po egongalo. Oye okwe ende nomagumbo agehe nokwa hilagula mo ooitaali ayehe, aalumentu naakiintu, nokwe ya edhililitha mondholongo.

⁴ Ooitaali mboka ya halakanithwa ngeyi, oya yi akuhe noyu uvitha oohapu dhaKalunga.

⁵ Filippus okwa yi koshilando shaSamaria noku uvithile aantu yaahoka elaka tali popi Kristus.

⁶ Ongundu ayihe yaantu oya ndhindhilike nawa shoka tashi tiwa kuFilippus, sho ye mu pulakene noya mono iikumithalonga mbyoka e yi longo.

⁷ Oshoka oombepo dha nyata odha zi mo maantu oyendji nokwiigidha mokule, naasilombanda oyendji niilema oya aludhwa.

⁸ Onkee aantu yomuSamaria oya li ya nyanyukwa noonkondo.

⁹ Ihe moshilando shiyaka omwa li omulumentu gumwe, edhina lye Simon, nopomathimbo gamwe okwa li ha kumitha Aasamaria nuumpulile we. Oye okwi iningi omunene,

¹⁰ naantu ayehe, aanenentu naadhinwa, oye mu simaneke ya ti: “Omulumentu nguka oye oonkondo dhaKalunga, haku tiwa ‘Oonkondo oonene.’ ”

¹¹ Oyo oye mu simaneke, oshoka okwa li e ya kumitha ethimbo ele nuumpulile we.

¹² Ihe aantu sho yi itaale elaka etoye ndyoka ye li uvithilwa kuFilippus tali popi Oshilongo shaKalunga nedhina lyaJesus Kristus, oya shashwa ayehe, aalumentu naakiintu.

¹³ Simon mwene naye wo okwi itaale Jesus, naasho a shashwa, okwa kala puFilippus. Oye okwa li a kuminwa iikumithalonga niilongankondo mbyoka tayi longwa kuFilippus.

¹⁴ Aayapostoli yomuJerusalem sho yu uvu kutya Aasamaria oya taamba oohapu dhaKalunga, oya tumu Petrus naJohannes kuyo.

¹⁵ Oyo sho ya thiki ko, oya galikanene ooitaali, opo ya pewe Ombepo Ondjapuki.

¹⁶ Oshoka kakwa li nando ogumwe gwomuyo ngoka a adhika a pewa Ombepo Ondjapuki. Oyo oya li owala ya shashelwa medhina lyOmuwa Jesus.

¹⁷ Petrus naJohannes oye ya tenteke ihe iikaha yawo, oyo noya pewa Ombepo Ondjapuki.

¹⁸ Simon okwa mono kutya Ombepo Ondjapuki oya pewa ngoka aayapostoli ye mu tenteke iikaha yawo. Onkee okwe etele Petrus naJohannes iimaliwa nokwa ti:

¹⁹ “Pii ndje wo oonkondo ndhoka, opo shaa ngoka tandi mu tenteke iikaha yandje, a pewe Ombepo Ondjapuki.”

²⁰ Ihe Petrus okwe mu yamukula a ti: “Iimaliwa yoye nayi ye pamwe nangoye moheli, oshoka ito vulu okulanda omagano gaKalunga niimaliwa.

²¹ Ito vulu okulonga pamwe natse, oshoka omadhiladhilo goye inagu uka koshipala shaKalunga.

²² Itedhulula ano, u ze mo momadhiladhilo goye omawinayi. Galikana Omuwa, opo e ku dhimine po, sho wa li wa dhiladhila oshinima sha tya ngeyi.

²³ Oshoka ondi wete kutya ou udha efupa ewinayi nou li omupika guulunde.”

²⁴ Nena Simon okwa lombwele Petrus naJohannes a ti: “Galikanenii ndje koshipala shOmuwa, opo ndaa adhike nando okushimwe shomiinima mbyoka mwa ti kutya otayi ka adha ndje.”

²⁵ Ano Petrus naJohannes sho ya adhika ya hokolola noyu uvitha elaka lyOmuwa, oya shuna kuJerusalem. Mokushuna kwawo oyu uvitha elaka etoye momikunda adhihe dhAasamaria.

²⁶ Omuyengeli gwOmuwa okwa lombwele Filippus a ti: “Thikama, ilongekidha, u ye lwokuumbugantu kondjila ndjoka ya za muJerusalem tayi yi kuGaza.” Ondjila ndjoka ihayi endiwa we.

²⁷ Filippus okwa thikama e ta yi. Ano omulumentu gumwe a simana gwokuEtiopia okwa adhika e li mondjila ta shuna kegumbo. Omulumentu nguka okwa li elenga enene nomudhiginini gweliko lyaKandake, omukwaniilwa omukiintu gwaEtiopia. Oye okwa yile kuJerusalem, a ka galikane Kalunga.

²⁸ Ngashingeyi mokugaluka kwe okwa adhika a kuutumba metemba lye, te ende ta lesha membo lyomuhunganeki Jesaja.

²⁹ Opo ihe Ombepo Ondjapuki oya lombwele Filippus ya ti: “Inda, u ka ende popepi netemba ndii.”

³⁰ Nena Filippus okwa matukile ketemba noku uvu, elenga tali lesha membo lyomuhunganeki Jesaja. Onkee okwe li pula a ti: “Ou uvite ko tuu omadhiladhilo gaashoka to lesha?”

³¹ Elenga olye mu yamukula lya ti: “Otandi vulu ngiini okuuva ko, ngele kape na ngoka ta fatululile ndje?” Nena elenga olyi ithana Filippus, a londe metemba ye a kuutumbe pamwe naye.

³² Oohapu dhomenyolo ndhoka dha li tadhi leshwa kelenga odho ndhika: “Oye okwa li a fa onzi tayi falwa, yi ka dhipagwe. Oye a li a fa onzigona tayi mwena thilu, uuna tayi kululwa. Noye ina tumbula nando oshitya shimwe.

³³ Oye okwa fupipikwa ye ina uthilwa eutho lyu uka. Kaku na nando ogumwe ta ka vula okupopya sha kombinga yoluvalo lwe, oshoka okukalamwenyo kwe kwokombanda yevi okwa hulu po.”

³⁴ Elenga olya pula Filippus lya ti: “Lombwela ndje! Olye ngoka ta popiwa komuhunganeki? Oti ipopi ye mwene nenge ota popi omuntu gulwe i ili?”

³⁵ Nena Filippus okwa tameke okufatulula okuza kenyolo ndyoka noku uvithile elenga elaka etoye tali popi Jesus.

³⁶ Ano manga ya li taa ende ya landula ondjila, oya thiki pehala pu na omeya. Elenga olya lombwele ihe Filippus lya ti: “Omeya ogo ngaka, oshike ando tashi imbi ndje, ndi shashwe?”

³⁷ Filippus okwe mu yamukula a ti: “Kapu na omaimbo, ngele owi itaala nomwenyo gwoye aguhe!” Elenga olya yamukula lya ti: “Ondi itaala kutya Jesus Kristus oye Omuna gwaKalunga.”

³⁸ Elenga olya thikameke ihe etemba. Filippus nelenga oya zi mo metemba e taa yi momeya. Opo ihe Filippus okwe mu shasha.

³⁹ Ano manga ya li taa zi momeya, Ombepo yOmuwa oya kutha po Filippus pelenga, lyo inali mu mona we. Ihe olya tsikile ondjila yalyo lya nyanyukwa noonkondo.

⁴⁰ Filippus okwa adhika muAzotus; oye okwe ende miilando ayihe e tu uvitha elaka etoye, sigo e ya kuKesarea.

9

¹ Ihe pomasiku ngeyaka Saulus okwa li u udha uutondwe okutonda aalongwa yOmuwa nokwa hala oku ya dhipaga. Oye okwa yi komuyambimukuluntu

² e te mu indile, a pewe oontumwafo dhi faalelwe aawiliki yoosinagoga muDamaskus, opo a wape okukwata nokweeta kuJerusalem aalanduli ayehe yondjila yOmuwa mboka te ya adha ko, aalumentu naakiintu.

³ Ano mondjila ye yokuya kuDamaskus, sho a li popepi noshilando, okwa adhiminwa ombaadhilila kuuyelele wa zi megulu.

⁴ Oye okwi ihata pevi noku uvu ewi tali mu popitha tali ti: “Saulus, Saulus, omolwashike to tidhagana ndje?”

⁵ Saulus okwa pula a ti: “Ongoye lye, Omuwa?” Ewi olye mu yamukula lya ti: “Ongame Jesus, ngoka to mu tidhagana.

⁶ Thikama po, inda moshilando, moka to ka lombwelwa shoka u na oku shi ninga.”

⁷ Aalumentu mboka ya li taa ende pamwe naSaulus, oya si onkumamuthika yo inaa tumbula nando oshitya shimwe. Oyo oyu uvu ewi, ihe inaa mona nando omuntu gumwe.

⁸ Saulus okwa thikama ihe, sho a tonata, okwa li a tsika ye inaa vula okumona nando osha. Onkee oye mu kwata koshikaha noye mu fala kuDamaskus.

⁹ Saulus nokwa kala a tsika uule womasiku gatatu, nopethimbo ndyoka alihe ina lya sha ye ina nwa nando osha.

¹⁰ MuDamaskus omwa li mu na omulongwa gumwe, edhina lye Ananias. Omuwa okwe mu ihololele memoniko nokwe mu lombwele ta ti: “Ananias!” Oye okwa yamukula a ti: “Ongame nguka, Omuwa!”

¹¹ Nena Omuwa okwe mu lombwele ihe ta ti: “Thikama, inda kaandjaJudas mEpandaanda lya lukwa Eukililo e to pula omulumentu Omutarsus, edhina lye Saulus. Ongoye to ke mu adha ta galikana.

¹² Nokuli oye okwa mono memoniko omulumentu, edhina lye Ananias, te ya kuye e te mu tenteke iikaha ye, opo a tonate.”

¹³ Ananias okwa yamukula a ti: “Omuwa, onda hokololelwa kaantu oyendji kutya omulumentu nguka okwa hepeke noonkondo aantu yoye muJerusalem.

¹⁴ Nokuli huka kuDamaskus okwe ya ko e na epitikilo lyaayambi aakuluntu okukwata ayehe mboka haa ku galikana.”

¹⁵ Omuwa okwe mu lombwele a ti: “Inda ko kuye, oshoka ngame onde mu hogolola, a longele ndje ye a tseyithile aapagani naakwaniilwa yawo nAaisraeli edhina lyandje.

¹⁶ Ngame mwene onda hala oku mu ulukila, uudhigu mpoka u thike mboka e na oku u humbata omolwedhina lyandje.”

¹⁷ Ananias okwa thikama ihe e ta yi. Oye okwa yi megumbo ndyoka nokwa tenteke iikaha ye kuSaulus e te mu lombwele ta ti: “Mumwameme Saulus, Omuwa Jesus ngoka e ku ihololele mondjila yoye, sho to ya huka, oye a tumu ndje kungoye, opo u mone ko ishewe nou udhithwe Ombepo Ondjapuki.”

¹⁸ Mbalambala momeho gaSaulus omwa gu iinima ya fa iipeta yoohi, oye nokwa tsikuluka. Nena oye okwa thikama e ta shashwa.

¹⁹ Opo ihe Saulus okwa li iikulya nokwa kolo. Saulus okwa kala paalongwa yomuDamaskus omasiku gamwe.

²⁰ Oye okwa yi u ukilila kosinagoga nokwa tameke okuuvithila aantu kutya Jesus oye Omuna gwaKalunga.

²¹ Ayehe mboka ye mu uvu, oya kumwa. Oyo oya pulathana ya ti: “Omulumentu nguka haye ngoka a li ha dhipaga aantu ayehe mboka haa galikana medhina ndika lyaJesus muJerusalem? Pamwe naahuka okwe ya ko nelalakano tuu ndyoka okukwata aantu ya tya ngaaka, ye e ya fale kaayambi aakuluntu?”

²² Ihe Saulus oku uvitha noonkondo. Oye okwa tompo Aajuda yomuDamaskus kutya Jesus oye Kristus, yo inaa vula oku mu ludhikitha.

²³ Sho pwa piti omasiku ogendji, Aajuda oya gongala noyu uvanene, ya dhipage Saulus.

²⁴ Ihe Saulus okwa londodhwa. Aajuda oya kala ihe ya langela iiyelo yoshilando uusiku nomutenya, opo ye mu dhipage.

²⁵ Ihe aalanduli yaSaulus oye mu pitithile mombululu yomekuma noye mu kulukithile pevi e li montungwa.

²⁶ Saulus okwa yi kuJerusalem nokwa kambadhala okwiitula mongundu yaalongwa yaahoka. Ihe ayehe oya li ye mu tila, oshoka oya li ya nyengwa okwiitaala kutya Saulus okwi itedhulula.

²⁷ Ihe Barnabas okwi itula puye e te mu fala kaayapostoli nokwe mu tseyitha kuyo. Barnabas okwa hokololele aayapostoli, nkene Omuwa ihololele Saulus mondjila yokuya kuDamaskus naashoka Omuwa e mu lombwele. Oye okwe ya hokololele wo, nkene Saulus a li u uvitha edhina lyaJesus nuulaadhi uunene muDamaskus.

²⁸ Onkee ano Saulus okwa kala paalongwa nokwe ende noshilando ashihe shaJerusalem nokuuvitha edhina lyOmuwa Jesus nuulaadhi uunene.

²⁹ Oye okwa li wo ha popi nokuludhika nAajuda mboka haa popi Oshigreka, ihe mbaka oya li taa kambadhala oku mu dhipaga.

³⁰ Ano ooitaali sho ya dhimbulula oshinima sha tya ngaaka, oya kutha Saulus noye mu fala kuKesarea e taye mu tumu kuTarsus.

³¹ Nena egongalo alihe lyomuJudea, muGalilea nomuSamaria olya kala li na ombili. Kekwatho lyOmbepo Ondjapuki egongalo olya tungala nolyi indjipala, naayehe oya li haa simaneke Omuwa.

³² Petrus okwa li he ende apehe mokati kaalongwa, onkee pethimbo limwe okwa yi, a ka talele po aantu yaKalunga mboka ya kala muLidda.

³³ Omo a adha omulumentu, edhina lye Eneas, ngoka a kala uule woomvula hetatu e na uuvu wombanda.

³⁴ Petrus okwe mu lombwele a ti: “Eneas, Jesus Kristus ote ku aludha ngashingeyi. Thikama, u yale iinguma yoye.” Mbalambala Eneas okwa thikama.

³⁵ Aantu ayehe mboka ya kala muLidda nomesilu lyaSharon, oye mu mono noyi itaale Omuwa.

³⁶ Ano muJoppa omwa li mwa kala omukiintu omwiitaali, edhina lye Tabita. Edhina ndika mOshigreka oDorkas, ndyoka tali ti omenye. Oye okwa kala aluhe ta longo uuwanawa nota kwatha oohepele.

³⁷ Pomasiku ngeyaka Tabita okwa kwatwa kuuvu e ta si. Nena ooitaali oya yogo omudhimba gwe noye gu langeke mondjugo yopombanda.

³⁸ Ooitaali oya adhika yu uvu kutya Petrus oku li muLidda. Oshoka Lidda osha li popepi naJoppa, oya tumu aalumentu yaali kuPetrus nelaka tali ti: “Alikana, endelela, u ye kutse!”

³⁹ Petrus okwa thikama ihe e ta yi pamwe nayo. Oye sho a thiki kuJoppa, oye mu fala mondjugo ndjoka yopombanda. Opo ihe aaselekadhi ayehe oye ya taa lili e taa kundukidha Petrus noye mu ulukile oohema noombaikitha ndhoka Tabita a li e dhi hondjo, manga a li e na omwenyo.

⁴⁰ Nena Petrus okwe ya lombwele, ya ze mo mondjugo. Oye okwa tsu oongolo e ta galikana Kalunga. Opo ihe okwa punguluka nokwa taalele komudhimba e ta ti: “Tabita, penduka!” Oye okwa tonata, naasho a mono Petrus, okwa kuutumba.

⁴¹ Petrus okwe mu kwata koshikaha nokwe mu ambidhidha. Oye okwi ithana ihe ooitaali naaselekadhi e te mu gandja kuyo e na omwenyo.

⁴² Onkundana ndjika oya taandele noshilando ashihe shaJoppa, onkee aantu oyendji mboka ye shi uvu, oyi itaale Omuwa.

⁴³ Petrus okwa kala omasiku ogendji muJoppa maandjaSimon, omupeli gwiipa.

10

¹ MuKesarea omwa li mu na omulumentu, edhina lye Kornelius, omukuluntu gwetanga lyaakwiita yAaroma ndyoka haku tiwa “Etanga lyAaitalia”.

² Oye okwa li omulumentu ha simaneke Kalunga nohe mu galikana pamwe negumbo lye alihe. Oye okwa ningi oshindji okukwatha Aajuda mboka oohepele nokwa li ha galikana Kalunga aluhe.

³ Esiku limwe potundi ontintatu komatango Kornelius okwa mono emoniko: omuyengeli gwaKalunga e ya kuye e te mu ithana ta ti: “Kornelius!”

⁴ Oye okwa tala omuyengeli e mu tongolola a haluka e ta ti: “Omuwa, oshike?” Omuyengeli okwe mu yamukula a ti: “Kalunga oku uvu omagalikano goye nokwa mono iilonga yoye yokukwatha oohepele e te ku dhimbulukwa.

⁵ Ano ngashingeyi tuma aalumentu yamwe, ya ye kuJoppa, ya ka tale omulumentu, edhina lye Simon Petrus.

⁶ Oye omuyenda maandjaSimon omupeli gwiipa, ngoka e na egumbo li li pooha dhefuta.”

⁷ Ano omuyengeli ngoka a li a popi naye, sho a yi, Kornelius okwi ithana aamati ye yaali nomukwiita omusimanekikalunga gwomwaamboka yopopepi naye.

⁸ Oye okwe ya hokololele shoka sha ningwa po, e te ya tumu kuJoppa.

⁹ Esiku lya landula, manga ya li mondjila taa ihilile popepi naJoppa, Petrus okwa londo kombanda yongulu pethimbo lyopokati komutenya, a ka galikane.

¹⁰ Oye okwa li u uvite ondjala nokwa hala okulya. Ihe manga iikulya ya li tayi telekwa, Petrus okwa mono emoniko.

¹¹ Okwa mono egulu lye eguluka e tamu zi oshinima sha fa onguwo onene ontokele sha kwatwa koonkotso dhasho ne nosha kulukithilwa pevi.

¹² Musho omwa li mu na iikwamagulugane yokuukukutu yomaludhi agehe, iihono noondhila.

¹³ Nena ewi olye mu lombwele lya ti: “Petrus, thikama, dhipaga iinamwenyo mbyoka e to li.”

¹⁴ Ihe Petrus okwa ti: “Aawe, Omuwa! Itashi vulika! Noshitonale inandi lya nando shaa shoka sha talika shi na oshidhila nenge sha nyata.”

¹⁵ Ewi olye mu yamukula ishewe lya ti: “Shaa shoka Kalunga e shi yapula, ito vulu oku shi tala kutya oshi na oshidhila.”

¹⁶ Ewi sho lye mu popitha lutatu, onguwo oya hililwa megulu.

¹⁷ Petrus okwa li a kuminwa emoniko ndyoka e li mono. Manga a li ti ipula ngeyi, aalumentu mbeyaka ya tumwa kuKornelius, oya adhika yu ulukilwa egumbo lyaSimon noye ya e taa thikama posheelo.

¹⁸ Oyo oyi indile megumbo nokwiigidha mokule e taa ti: “Megumbo muno omu na tuu omulumentu omuyenda e na edhina Simon Petrus?”

¹⁹ Ano Petrus manga a li natango ti ipula emoniko ndika shoka tali ti, Ombepo Ondjapuki oye mu lombwele ya ti: “Pulakena! Peelo ope na aalumentu yatatu taa ku pula.

²⁰ Thikama ano, u ye kuyo pevi, ngoye ino limbililwa okuya pamwe nayo, oshoka ongame nde ya tumu.”

²¹ Osho ano Petrus okwa yi pevi kaalumentu mbeyaka e te ya lombwele ta ti: “Ongame omulumentu ngoka tamu kongo. Omwi ile shike mpaka?”

²² Oyo oye mu yamukula ya ti: “Tse otwa tumwa komukuluntu gwaakwiita Kornelius. Oye omulumentu omwaanawa, ha galikana Kalunga nokwa simanekwa noonkondo kAajuda ayehe. Oye okwa lombwelwa komuyengeli gwaKalunga memoniko, e ku ithane kegumbo lye, opo u uve shoka to mu lombwele.”

²³ Petrus okwi ithana ihe aalumentu megumbo nokwe ya pe omulalo uusiku mbwiyaka. Esiku lya landula Petrus okwa thikama e ta yi pamwe nayo. Yamwe yomooitaali yomuJoppa oya yi pamwe naye.

²⁴ Esiku ekwawo oya thiki kuKesarea noya adha Kornelius e ya tegelela pamwe naanegumbo lye ayehe nookuume mboka Kornelius a adhika e ya hiya.

²⁵ Ano Petrus manga a li te ende u uka megumbo, Kornelius okwe mu tsakaneke, okwi ihata pevi poompadhi dhe nokwi inyongamene koshipala she.

²⁶ Ihe Petrus okwe mu lombwele a ti: “Thikama, oshoka nangame wo omuntu gwowala.”

²⁷ Oyo oye ende ihe taa popi yu uka megumbo, moka ya adha mo aantu oyendji ya gongala.

²⁸ Nena Petrus okwa ti: “Omu shi shi ne yene kutya elongelokalunga lyopaShijuda itali mu pitika nando, Omujuda a talele po nenge e endathane nomupagani. Ihe Kalunga oku ulukile ndje kutya itandi vulu nando okutala omuntu gwontumba e na oshidhila nenge a nyata.

²⁹ Onkee ano sho mwa tumu kungame nomwi ithana ndje, ndi ye kune, onde ya mbala. Onkee ngashingeyi otandi mu pula kutya omwi ithanene ndje shike?”

³⁰ Kornelius okwe mu lombwele a ti: “Sho pwa piti omasiku gatatu, pethimbo naanaa ngandika, ngame onda adhikile te galikana megumbo lyandje potundi ontintatu yokomatango. Ohaluka yowala onda mono omulumentu a zala oonguwo tadhi adhima a thikama koshipala shandje.

³¹ Oye okwa lombwele ndje a ti: ‘Kornelius! Kalunga oku uvu omagalikano goye nokwa dhimbulukwa iilonga yoye yokukwatha oohepele.

³² Onkee ano ngashingeyi, tuma aantu kuJoppa, ya ka tale ko omulumentu gumwe, edhina lye Simon Petrus. Oye omuyenda megumbo lyaSimon omupeli gwiipa, ngoka e na egumbo li li pooha dhefuta.’

³³ Onkee ano onde endelele oku ku tumina mbala elaka. Owa ningi nawalela, sho we ya. Ano ngashingeyi otse atuhe otu li mpaka koshipala shaKalunga twa tegelela, u tu lombwele ashihe shoka Omuwa e ku lombwele, u shi popye.”

³⁴ Nena Petrus okwa tameke ihe okupopya ta ti: “Ngame ngashingeyi onde shi tseya kutya Kalunga aantu ayehe ohe ya tala ye thike pamwe.

³⁵ Ngoka he mu tila noha longo shoka shu uka, Kalunga ote mu taamba, na kale ogwomoshigwana sha tya ngiini.

³⁶ Oye okwa tumine Aaisraeli elaka etoye lyombili tali hokolola kutya Jesus Kristus oye Omuwa gwaantu ayehe.

³⁷ One omwa tseya kutya okuza peshasho ndyoka Johannes a li e li uvitha, oshinima oshinene osha ningwa moshilongo ashihe shAaisraeli okutameka kuGalilea sigo okuJudea.

³⁸ Omwa tseya wo kutya Jesus Omunasareti Kalunga okwa li e mu gwayekitha Ombepo Ondjapuki noonkondo. Oye okwe ende apehe, okwa longo uuwanawa nokwa aludha ayehe mboka ya li mepangelo lyomuhindadhi, oshoka Kalunga okwa li pamwe naye.

³⁹ “Otse oonzapo dhiinima ayihe mbyoka e yi ningi moshilongo shAajuda nomuJerusalem. Ihe oyo oye mu dhipaga, sho ye mu alele komushigakano.

⁴⁰ Ihe Kalunga okwe mu yumudha kuusi esiku etitatu nokwe mu hololele aantu.

⁴¹ Oye ini ihololela aantu ayehe, ihe otse ashike mboka Kalunga e tu hogolola nale, tu kale oonzapo dhe. Otse otwa lile notwa nwine pamwe naye, sho a yumuka kuusi.

⁴² Oye okwe tu lombwele, tu uvithile aantu ayehe evaangeli notu tseyithile aantu ayehe kutya Kalunga okwa lenge Jesus, a ninge omupanguli gwaanamwenyo naasi.

⁴³ Aahunganeki ayehe oye mu popi kutya kehe ngoka te mu itaale, ota dhiminwa po oondjo dhe omolwoonkondo dhedhina lye.”

⁴⁴ Ano Petrus manga a li natango ta popi. Ombepo Ondjapuki okwa kulukile moomwenyo dhaayehe mboka ya li ye mu pulakene.

⁴⁵ Ooitaali Aajuda mboka ya zile kuJoppa pamwe naPetrus, oya li ya kumwa, sho Kalunga a gandja omagano ge gOmbepo Ondjapuki nokaapagani wo.

⁴⁶ Oshoka oyo oye ya uvu taa popi omalaka gaa shiwike notaa simaneke iilonga iinene yaKalunga. Nena Petrus okwa popi a ti:

⁴⁷ “Aantu mbaka oya pewa Ombepo Ondjapuki naanaa ngashika tse. Ope na tuu ngoka ta vulu oku ya keelela, kaaya shashwe nomeya?”

⁴⁸ Oye okwe ya lombwele ihe, ya shashelwe medhina lyaJesus Kristus. Nena oyo oye mu indile, a kale puyo omasiku gamwe.

11

¹ Aayapostoli nooitaali yomuJudea alihe oyu uvu kutya naapagani wo oyi itaale oohapu dhaKalunga.

² Ano Petrus sho a galukile kuJerusalem, aantu mboka ya li ya hala, aapagani ya fukalekwe, oye mu pe uusama ya ti:

³ “Ngoye owa yile kaalumentu inaa fukala nowa kala ho li pamwe nayo.”

⁴ Petrus okwe ya hokololele ehokololo lyaashihe shoka sha ningwa po okuza petameko a ti:

⁵ “Sho nda li moshilando shaJoppa te galikana, onda mono memoniko, ndi wete oshinima tashi zi megulu sha fa onguwo onene yi na oonkotso ne nosha kulukithilwa pevi e tashi ya sigo opungame.

⁶ Sho nda tala nawa meni lyasho, onda mono mo iikwamagulugane, iilikama, iihono noondhila.

⁷ Opo ihe ondu uvu ewi tali popitha ndje tali ti: ‘Petrus, thikama, u dhipage iinamwenyo mbyoka e to li.’

⁸ Ihe ngame onda ti: ‘Itashi vulika, Omuwa! Oshoka noshitonale inandi lya nando iikulya mbyoka yi na oshidhila nenge ya nyata.’

⁹ Ewi lyomegulu olya yamukula ndje lutiyali lya ti: ‘Shaa shoka Kalunga e shi yapula, ito vulu oku shi tala kutya inashi yela.’

¹⁰ Shika oshe endululwa lutatu, opo ihe lwahugunina oshinima ashihe osha hililwa ishewe megulu.

¹¹ “Pethimbo olyo tuu ndyoka aalumentu yatatu mboka ya zi kuKesarea ya tumwa ndje, oya thiki pegumbo moka nda li.

¹² Ombepo okwa lombwele ndje, ndi ye mbala pamwe nayo. Aalumentu mbaka yahamano oya yi wo pamwe nangame kuKesarea, otse notwa yi nayo megumbo lyaKornelius.

¹³ Oye okwe tu hokololele, nkene a mono omuyengeli a thikama megumbo lye te mu lombwele ta ti: ‘Tuma aantu kuJoppa, ya ka tale ko omulumentu e na edhina Simon Petrus.

¹⁴ Oye ote ya, e ku lombwele oohapu ndhoka tadhi ku hupitha pamwe naanegumbo lyoye.’

¹⁵ “Ano ngame sho nda tameke okupopya, Ombepo Ondjapuki okwa kulukile muyo, naanaa ngaashi e ya mutse petameko.

¹⁶ Nena onda dhimbulukwa oohapu ndhoka Omuwa e dhi tu lombwele, sho a tile: ‘Johannes okwa shasha nomeya, ihe ne otamu ka shashwa nOmbepo Ondjapuki.’

¹⁷ Osha yela kutya Kalunga okwa pe aapagani mbeyaka omagano gOmbepo Ondjapuki, naanaa ngaashi e ge tu pe, uuna ndoka twi itaale Omuwa Jesus Kristus. Ngame ondi na tuu oonkondo okukeelela Kalunga, a gwanithe ehalo lye?”

¹⁸ Oyo sho yu uvu oohapu ndhika, oya hulitha okupa Petrus uusama noya hambelele Kalunga ya ti: “Osho ngeyi Kalunga okwa pe aapagani ompito yokwiitedhulula, opo ya kale ye na omwenyo.”

¹⁹ Omahepeko ngeyaka ga tameke, uuna Stefanus a dhipagwa, oga halakanitha ooitaali. Yamwe yomuyo oya yi sigo okuFoinikia, kuKipro nokuAntiokia, ihe oyo oya hokololele Aajuda ayeke elaka etoye.

²⁰ Ihe mokati kawo omwa li aalumentu yamwe ooitaali ya za kuKipro nokuKireni, mboka ya yi kuAntiokia noya hokololele naapagani wo elaka etoye tali hokolola Omuwa Jesus.

²¹ Oonkondo dhOmuwa nodhe ya longitha, onkee ongundu onene yaantu oyi itedhulula noyi itaale Omuwa.

²² Ooitaali yomegongalo lyomuJerusalem oyu uvu shoka sha ningwa po noya tumu Barnabas kuAntiokia.

²³ Oye sho a thiki ko, okwa dhimbulula, nkene esilohenda lyaKalunga tali longo mokati kaantu. Onkee okwa nyanyukwa noonkondo nokwe ya kumagidha ayehe, ya ninge etokolo moomwenyo dhawo okukalela Omuwa.

²⁴ Barnabas okwa li omulumentu omwaanawa u udha Ombepo Ondjapuki neitaalo. Aantu oyendji oya taamba Omuwa.

²⁵ Opo ihe Barnabas okwa yi kuTarsus, a ka konge Saulus.

²⁶ Oye sho e mu mono, okwa zi ko naye nokwe mu eta kuAntiokia. Oyo ayehe yaali oya longo pamwe megongalo ndiyaka uule womumvo gumwe noya longo aantu oyendji. Nokuli muAntiokia omo moka aalongwa ya lukwa lwotango aakriste.

²⁷ Pethimbo olyo tuu ndyoka aahunganeki yamwe oya zi kuJerusalem e taye ya kuAntiokia.

²⁸ Gumwe gwawo, edhina lye Agabus, okwa thikama nokwa hunganeke koonkondo dhOmbepo Ondjapuki kutya ondjala onene oyi li pokuya muuyuni. Osho ye ke ya pethimbo ndyoka Klaudius a li omupangeli muRoma.

²⁹ Nena ooitaali oya tokola kutya kehe gumwe gwomuyo na gandje iikwatha ngaashi ta vulu, opo yi tuminwe aamwayina meitaalo mbeyaka ya kala muJudea.

³⁰ Oyo oye shi ningi, niimaliwa mbyoka ya gongelwa ngeyi, oye yi pe Barnabas naSaulus, ye yi faalele aakuluntu yegongalo kuJerusalem.

12

¹ Pomasiku ngeyaka omukwaniilwa Herodes okwa tameke okutidhagana yamwe yomaakwanegongalo.

² Oye okwa dhipagitha Jakob, omumwayina gwaJohannes, negongamwele.

³ Nokuli oye sho a dhimbulula kutya Aajuda oya panda oshinima shoka, okwa tsikile ko nokwa kwatitha wo naPetrus. Shika osha ningwa pethimbo lyoshituthi shiikwiila inaayi fulikwa.

⁴ Petrus sho a kwatwa, okwa tulwa mondholongo nokwa gandjwa miikaha yuutanga une waantu ooyane, ye mu langele pamalufo. Herodes okwa li a dhiladhila oku mu eta mepangulo montaneho yaantu ayehe, Opaasa ngele ya piti.

⁵ Osho ngeyi Petrus okwa kala e edhililwa mondholongo, ihe aakwanegongalo oya galikana Kalunga nuudhiginini omolwe.

⁶ Uusiku mboka wa tetekele esiku ndyoka Herodes a li a dhiladhila oku mu eta montaneho yaantu ayehe, Petrus okwa li a kothela pokati kaakwiita yaali. Oye okwa li a mangwa nomalyenge gaali, noposheelo shondholongo opwa li pu na aakwiita.

⁷ Ohaluka yowala omuyengeli gwOmuwa okwe ya e ta thikama puye, nuuyelele we owa yelele mokandjugo hoka. Omuyengeli okwa pupula Petrus kepepe nokwe mu pendutha e ta ti: “Thikama, endelela!” Mbalambala omalyenge oga gu ko komaako gaPetrus.

⁸ Nena omuyengeli okwe mu lombwele a ti: “Pameka epaya lyoye, ngoye u izaleke oongaku dhoye.” Petrus okwa ningi, ngashika a lombwelwa. Opo ihe omuyengeli okwe mu lombwele a ti: “Zala ihe ombaikitha yoye e to landula ndje.”

⁹ Petrus okwe mu landula nokwa piti mo mondholongo. Ihe oye okwa li kee shi wo kutya shoka sha ningwa komuyengeli, oshoshili; nenge pamwe okwa mono ashike emoniko.

¹⁰ Oyo oya pitilile aakwiita yotango mboka ya li ye mu langela nosho wo aatiyali, sigo ya thiki kosheelo shiitenda shokuya moshilando. Omweelo nguka ogwi iyegulula gwo gwene, oyo noya piti mo ihe moshilando. Oyo oye ende pamwe ya landula epandaanda, opo ihe omuyengeli okwa henuka po puPetrus ombaadhilila e ta yi.

¹¹ Nena Petrus okwa dhimbulula kutya shoka e shi ningilwa, nani oshoshili, nokwa popi a ti: “Ngashingeyi ondi shi shi nawa kutya Omuwa okwa tumine ndje omuyengeli gwe, a hupithe ndje mo miikaha yaHerodes, opo ndaa mone iihuna mbyoka Aajuda ya li ya dhiladhilila ndje.”

¹² Petrus sho a dhimbulula, iinima nkene yi li, okwa yi kaandjaMaria, yina yaJohannes, ngoka ha ithanwa wo Markus. Megumbo ndyoka omwa adhika mwa gongala aantu oyendji taa galikana Kalunga.

¹³ Petrus sho a konkola komweelo gwokondje, omuyakulikadhona Rode okwe ya, a tale kutya olye ngoka ta konkola.

¹⁴ Ihe oye sho a dhimbulula kutya ewi ndyoka tali popi olyaPetrus, enyanyu olye mu kola nokwa matuka e ta shuna kumbeyaka ye li megumbo, ye ina egulula omweelo, e te ya lombwele kutya ngoka ta konkola pondje, oPetrus.

¹⁵ Aantu oye mu yamukula ya ti: “Oto yadhuuka.” Ihe oye okwa dhiginine okutumbula nomukumo kutya Petrus opo e li pondje. Nena oyo oye mu yamukula ya ti: “Shila omuyengeli gwe.”

¹⁶ Manga taa ludhike ngeyi, Petrus okwa dhiginine okukonkola. Hugunina oye egulula omweelo noya kumwa noonkondo, sho ye mu mono.

¹⁷ Nena Petrus okwe ya anda noshikaha she, ya mwene, nokwe ya hokololele, nkene Omuwa e mu piitha mo mondholongo. Oye okwe ya lombwele a ti: “Shika shi hokololeleni Jakob nooitaali ooyakwetu ayehe.” Opo ihe okwa piti mo e ta yi kulwe.

¹⁸ Ongula sho kwa shi, aalangeli oya li ya tila noya piyagana noonkondo, oshoka inaa tseya Petrus mpoka u uka.

¹⁹ Nena Herodes okwa gandja elombwelo kutya, Petrus na kongwe, ihe ina monika. Onkee okwa fala aalangeli mompangu nokwe ya gandja, ya dhipagwe. Konima yaashika Herodes okwa zi mo muJudea nokwa yi kuKesarea e ta kala ko omasiku gamwe.

²⁰ Herodes okwa li a geele noonkondo aantu yomuTiro naSidon, onkee ongundu onene yaantu mbaka oya thikama e taa yi kuHerodes. Tangotango oya panga uukuume naBlastus, elenga ekuluntu lyomuuwa womukwaniilwa Herodes, opo ihe oya yi kuHerodes noye mu indile ombili, oshoka oshilongo shawo osha li hashi kutha iipalutha yasho koshilongo shomukwaniilwa.

²¹ Esiku lyontumba lya hogololwa, Herodes okwa zala onguwo ye yuukwaniilwa nokwa kuutumba koshipangelapundi she e ta popitha aantu.

²² Nena aantu oyi igidha ya ti: “Ewi ndyoka tali popi, kali shi lyomuntu, ihe olyakalunga.”

²³ Mbalambala omuyengeli gwOmuwa okwa dhenge Herodes nuuvu uudhigu, oshoka oye okwa zimine, aantu ye mu pe esimano li thike pesimano lyaKalunga. Oye okwa tukwa komazinyo e ta si.

²⁴ Nena oohapu dhaKalunga odha tsikile okutaandela, naantu oyendji oya ningi ooitaali.

²⁵ Barnabas naSaulus oya shuna kuAntiokia, sho ya adhika ya tsakanitha oshilongayakulo shawo muJerusalem noya yi naJohannes, ngoka hi ithanwa wo Markus.

13

¹ Megongalo lyomuAntiokia omwa li mu na aahunganeki naalongihapu ngaashi Barnabas, Simeon, ngoka hi ithanwa Omuluudhe, Lukius Omukireni, Manahen, ngoka a putuka pamwe nomupangeli Herodes, naSaulus.

² Ano manga ya li taa longele Omuwa noyi idhilika iikulya, Ombepo Ondjapuki okwe ya lombwele ta ti: “Yoololelii ndje mo Barnabas naSaulus, ya longe oshilonga shoka nde ya ithanena.”

³ Nena oyo oyi idhilike iikulya e taa galikana, opo ihe oye ya tenteke iikaha noye ya laleke.

⁴ Ano Barnabas naSaulus sho ya tumwa kOmbepo Ondjapuki, oya yi kuSeleukia, naahoka oya zi ko nosikepa e taa yi kontuntu yaKipro.

⁵ Sho ya thiki kuSalamis, oyu uvitha oohapu dhaKalunga moosinagoga dhAajuda. Oyo oya li pamwe, naJohannes Markus te ya kwatha miilonga.

⁶ Oyo oye endaenda nontuntu ayihe, sigo ya thiki kuPafo, hoka ya adha ko omulumentu gwontumba Omujuda ompulile, edhina lye Bar-Jesus, ngoka hi iti omuhunganeki.

⁷ Oye okwa li kuume komupangeli gwontuntu, Sergius Paulus, ngoka a li omulumentu omunandunge. Omupangeli okwi ithana Barnabas naSaulus, ye ye kuye, oshoka okwa li a hala okuuva oohapu dhaKalunga.

⁸ Ihe ompulile ndjoka Elimas, ngaashi edhina lye tali ti mOshigreka, oye ya tsile ondumbo noya kambadhala okutula omalimbililo meitaalo lyomupangeli.

⁹ Saulus, ngoka hi ithanwa wo Paulus, oku udhithwa Ombepo Ondjapuki. Oye okwa tala ompulile e yi tongolola

¹⁰ e te yi lombwele ta ti: “Akutu ngoye, omuna gwaSatana! Ongoye omutondi gwaashihe shoka oshiwanawa nou udha iihelele iiwinayi yoludhi kehe. Aluhe oto kambadhala okupilika oshili yOmuwa, u yi ninge iifundja!

¹¹ Onkee ano oshikaha shOmuwa otashi ku adha ngashingeyi. Ongoye to ka tsika noito ka mona nando uuyelele wetango uule womasiku gamwe.” Mbalambala etsitsiya eluudhe olya siikile omeho gaElimas, oye nokwa kala nokweenda ta kongo ngoka te mu kwata keti.

¹² Omupangeli sho a mono shono sha ningwa po, okwi itaale. Oye okwa kuminwa noonkondo elongo ndyoka tali popi Omuwa.

¹³ Paulus naamboka ya li pamwe naye, oya zi mo muPafo nosikepa e taa yi kuPerge shomuPamfilia. Ihe Johannes Markus okwe ya thigi hoka e ta shuna kuJerusalem.

¹⁴ Oyo oya zi mo muPerge e taa yi kuAntiokia shomuPisidia; nomEsabati oya yi mosinagoga e taa kuutumba.

¹⁵ Ano sho kwa leshwa mompango yaMoses nomomambo gaahunganeki, aawiliki yosinagoga oye ya tumine elaka tali ti: “Aamwameme, tse otwa hala, mu popithe egongalo, pamwe omu na elaka lyasha lyoku ya tsa omukumo.”

¹⁶ Nena Paulus okwa thikama, okwe ya mweneke noshikaha nokwa tameke okupopya ta ti: “Aaisraeli ooyakwetu naapagani amuhe mu li mpaka, mboka hamu galikana Kalunga, pulakeneni shoka te ti.

¹⁷ Kalunga koshigwana shika shAaisraeli okwa hogolola ootate nokwe ya indjipaleke pethimbo lyokukala kwawo aakwiilongo mevi lyaEgipiti e taa ningi oshigwana oshinene. Kalunga okwe ya tembudha mo muEgipiti koonkondo dhe oonene

¹⁸ e te ya idhidhimikile uule woomvula omilongo ne mombuga.

¹⁹ Oye okwa hanagula po iigwana iheyali mbyoka ya adhikile mevi lyaKaanan, noshilongo shawo okwe shi pe aantu ye Aaisraeli.

²⁰ Shika osha pula ethimbo li thike poomvula omathele gane nomilongo ntano. “Konima yaashika Kalunga okwe ya pe aatokolihapu sigo opethimbo lyomuhunganeki Samuel.

²¹ Oyo noya pula, ya pewe omukwaniilwa. Opo ihe Kalunga okwe ya pe Saul, omuna gwaKish, omunezimo lyaBenjamin, a ninge omukwaniilwa gwawo. Oye nokwe ya lele uule woomvula omilongo ne.

²² Kalunga sho a kutha ko Saul koshipundi shuukwaniilwa, okwa langeke ko David, a ninge omukwaniilwa gwawo. Mokupopya David Kalunga okwa ti: ‘Ngame onda koneke kutya David, omuna gwaIsai, oye omulumentu ngoka ta ka gwanitha ashihe shoka nda hala, e shi ninge, onkee onde mu hokwa.’

²³ Kalunga okwa lenge ihe Jesus gwomoluvalo lwaDavid, a ninge omuhupithi gwoshigwana shAaisraeli, ngashika e shi uvaneka.

²⁴ Jesus okwa tetekelwa kuJohannes, ngoka u uvithile oshigwana ashihe shAaisraeli kutya nayi itedhulule e taa shashwa.

²⁵ Ihe Johannes sho a li popepi nokuhulitha oshilonga she, okwa lombwele aantu ta ti: ‘Otamu dhiladhila kutya ongame lye? Ngame kandi shi ngoka tamu tegelele. Ihe ngoka te ya konima yandje, ngame inandi gwana nande okukutha ko oongaku koompadhi dhe.’

²⁶ “Aamwameme, ne mboka mwa za moluvalo lwaAbraham naapagani mboka mu li mpaka hamu galikana Kalunga, Kalunga okwe tu tumine elaka ndika lyehupitho.

²⁷ Aajerusalem naawiliki yawo inaa dhimbulula kutya oye lye, yo inaa uva ko oohapu dhaahunganeki ndhoka hadhi leshelwa aantu Esabati kehe. Ihe mokutokola Jesus oya tsakanitha oohapu ndhoka dhaahunganeki.

²⁸ Nokuli nando oya li kaa wete etompelo lyoku mu tokolela eso, oyo oyi indile Pilatus e mu gandje, a dhipagwe.

²⁹ Ano oyo sho ya gwanitha ayihe mbyoka Omanyolo tage yi popi kombinga ye, oye mu kutha ko komushigakano noye mu tula mombila.

³⁰ Ihe Kalunga okwe mu yumudha kuusi.

³¹ Omasiku ogendji okwi ihololele aantu mboka ye ende pamwe naye okuza kuGalilea sigo okuJerusalem. Ngashingeyi aantu mboka oyo oonzapo dhe mokati koshigwana shAaisraeli.

³² “Onkee ano tse otu li mpaka nena, opo tu mu uvithile elaka ndika etoye kutya euvaneko ndyoka Kalunga e li uvanekele ootate Aajuda, okwe li tu gwanithile tse oyana pamwe naapagani wo. Shika okwe shi ningi, sho a yumudha Jesus kuusi.

³³ Ngaashi mEpisalomi etiyali mwa nyolwa taku tiwa: ‘Ongoye omumwandje, onena ndjika nda ningi Ho.’

³⁴ Moku mu yumudha kuusi itaa ka mona we eolelo, Kalunga okwa ti ngeyi: ‘Ongame otandi ke mu yambeka lela nomayambeko omayapuki, omayambeko tuu ngoka nde ga uvanekela David.’

³⁵ Osho wo ota popi pehala ekwawo ta ti: ‘Omuntu gwoye omwiinekelwa ito mu etha a ole.’

³⁶ Oshoka David sho a longo ehalo lyaKalunga pethimbo lye, okwa si nokwa fumvikwa pooha dhoohe, olutu lwe e talu olele mevi.

³⁷ Ihe Jesus, ngoka Kalunga e mu yumudha kuusi, olutu lwe inalu olela mo mevi.

³⁸ “Onkee ano kaleni, mu shi shi amuhe kutya one otamu uvithilwa elaka ndyoka tali popi edhimopo lyoondjo dheni omolwaJesus.

³⁹ Tseyeni wo kutya kehe ngoka ti itaale Jesus, ota dhiminwa po oondjo adhihe ndhoka ompango yaMoses ya nyengwa oku dhi mu dhimina po.

⁴⁰ Onkee ano kotokeni, opo mwaa adhike kushoka sha popiwa kaahunganeki, sho taa ti:

⁴¹ ‘Pulakeneni, ne mboka hamu dhini oohapu dhaKalunga. Kumweni, e tamu yonuka po. Oshoka otandi longo oshilonga shimwe pomasiku gokukalamwenyo kweni. Oshilonga shoka itamu shi itaale, nando opu kale omuntu te shi mu fatululile.’ ”

⁴² Paulus naBarnabas manga ya li taa piti mo mosinagoga, oya pulwa, ya galuke mEsabati tali landula okuhokolola natango iinima mbyoka.

⁴³ Aantu sho ya halakana, Aajuda nosho wo aapagani oyendji mboka yi itedhululila muujuda, oya landula Paulus naBarnabas. Nena aayapostoli oye ya uvithile noye ya kumagidha, ya dhiginine okukala yi inekela esilohenda lyaKalunga.

⁴⁴ Esabati lya landula konyala kehe gumwe gwomoshilando okwe ya, a pulakene oohapu dhOmuwa.

⁴⁵ Aajuda sho ya mono ongundu yaantu, oya kwatwa kefupa noya tamaneke Paulus e taye mu sheke.

⁴⁶ Ihe Paulus naBarnabas oya popi nuulaadhi u vule woshito ya ti: “One mwa li mu na okuuvithilwa tango oohapu dhaKalunga, ihe sho mwe dhi dhini nomwi iwete inaamu gwana okuya momwenyo gwaaluhe, nena ano tse otatu mu etha, tu ka uvithile aapagani.

⁴⁷ Oshoka Omuwa okwe tu pe oshipango shika tashi ti: ‘Onde ku tula po, u kale uuyelele waapagani, u kale ondjila yehupitho lyuuyuni auhe.’ ”

⁴⁸ Aapagani sho ye shi uvu, oya nyanyukwa noya simaneke oohapu dhOmuwa; naayehe mboka Kalunga e ya hogolola, ya ka mone omwenyo gwaaluhe, oya ningi ooitaali.

⁴⁹ Oohapu dhaKalunga odha taandele apehe moshilongo shiyaka.

⁵⁰ Ihe Aajuda oya sikumudha aawiliki yoshilando naakiintu aapagani aanamadhina mboka haa galikana Kalunga. Oyo oya tameke okutidhagana Paulus naBarnabas noye ya tidha mo moshilongo shawo.

⁵¹ Omolwokwaaitaala kwawo aayapostoli oye ya pupulile oontsi dhokoompadhi dhawo noya yi kuIkonium.

⁵² Ihe aalongwa yomuAntiokia oya li ya nyanyukwa unene noyu udha Ombepo Ondjapuki.

14

¹ Ngaashi muAntiokia shomuPisidia, osho wo sha ningwa nomuIkonium: Paulus naBarnabas oya yi mosinagoga yAajuda noyu uvitha nuulaadhi uunene, onkee ongundu onene yAajuda naapagani oyi itedhulula e taa ningi ooitaali.

² Ihe Aajuda mboka ya li inaa hala okwiitaala Jesus, oya sikumudha aapagani noye ya tsithitha ondumbo naakriste.

³ Nando ongaaka, aayapostoli oya kala mo iiwike yimwe muIkonium. Oyo oyu uvitha nuulaadhi oohapu dhOmuwa. Omuwa nokwa koleke oohapu dhesilohenda lye ndhoka ye dhi uvitha niikumithalonga noniilongankondo mbyoka e yi ya longitha.

⁴ Aantu yomoshilando oya topoka moongundu mbali: ongundu yimwe oya li ya gama kAajuda nonkwawo oya li ya gama kaayapostoli.

⁵ Nena aapagani nAajuda pamwe naawiliki yawo oya tokola okuhepeka aayapostoli noku ya dhipaga nomamanya.

⁶ Aayapostoli sho ye shi dhimbulula, oya fadhuka po noya yi kiilando mbiyaka yomuLikaonia, Listra naDerbe nokomikunda dhomuushiinda wayo.

⁷ Oyo noyu uvithile hoka elaka etoye tali popi Omuwa Jesus.

⁸ MuListra omwa li mu na omulumentu e na oompadhi dha lemana. Oye okwa valwa oshilema ihaa vulu okweenda.

⁹ Omulumentu nguka okwa li a kuutumba i imwenenena nokupulakena oohapu dhaPaulus. Paulus okwe mu tala e mu tongolola nokwa dhimbulula kutya okwi itaala, onkee ota vulu okwaaludhwa.

¹⁰ Nena Paulus okwe mu lombwele ihe newi enene a ti: “Thikama, u ukililithe omagulu goye.” Omulumentu okwa nuka po, a thikama nokwa tameke okweendaenda.

¹¹ Aantu sho ya mono shoka sha ningwa kuPaulus, oya tameke okwiigidha taa popi Oshilikaonia taa ti: “Ookalunga oyi itula molupe lwaantu e taa kulukile kutse!”

¹² Oyo noya luku Barnabas Zeus, naPaulus oye mu luku Hermes, oshoka oye a li ta popi.

¹³ Nena omuyambi gwoshikalunga Zeus, ngoka ha kala motempeli yasho, ya tungilwa kondje yoshilando, okwe eta oontsezi noongala pomweelo gwotempeli. Omuyambi okwe ya pamwe nongundu yaantu noya hala okuyambela aayapostoli omayambo.

¹⁴ Paulus naBarnabas sho yu uvu shoka aantu ya hala okuninga, oya tuula oonguwo dhawo noya matukile pondje mokati kaantu e taa igidha taa ti:

¹⁵ “Aantu ne, omolwashike tamu ningi ngaaka? Otse aantu yowala naanaa ngashika ne. Otse otwe ya mpaka oku mu uvithila elaka etoye, opo mu itedhulule, mu ethe iikalunga yaa na sho tayi kwatha e tamu gama kuKalunga omunamwenyo, ngoka a shiti egulu, evi, efuta niinima ayihe yi li muyo.

¹⁶ Nale Kalunga okwa li e etha aantu ayehe, ya ninge ngashika ya hala.

¹⁷ Ihe nando ongaaka, oye okwa kala hi iholola miilonga iiwanawa mbyoka he yi ningile aantu: ohe mu pe omvula tayi zi kegulu niilya pethimbo lyo opala, ohe mu pe iikulya noha nyanyudha oomwenyo dheni.”

¹⁸ Aayapostoli nando ya popi ngeyi, oya mono uudhigu okungungumaneka aantu mboka ya li ya hala oku ya yambela omayambo.

¹⁹ Aajuda yamwe oya zi kuAntiokia shomuPisidia nokuIkonium e taye ya kuListra. Oyo oyi ihilile ongundu yaantu noya dhenge Paulus nomamanya a taye mu kookololele pondje yoshilando, noya li ye shi okwa sa.

²⁰ Ihe ooitaali sho ye mu gongalele, okwa thikama po e ta yi moshilando. Esiku lya landula okwa yi naBarnabas kuDerbe.

²¹ Paulus naBarnabas oyu uvitha elaka etoye muDerbe, naantu oyendji oyi itaale Jesus. Opo ihe oya shuna ishewe kuListra nokuIkonium nokuAntiokia shomuPisidia.

²² Oyo oya tsu ooitaali omukumo noye ya longo noku ya kumagidha, ya dhiginine eitaalo, ya ti: “Mokuya moshilongo shaKalunga otu na okupitila muudhigu owindji.”

²³ Oyo oya hogololele ihe omagongalo agehe aakuluntu, naasho ye ya galikanene nokwiidhilika iikulya, oye ya gandja miikaha yOmuwa ngoka ye mu inekela.

²⁴ Ano sho ye ende noshilongo ashihe shaPisidia, oya yi kuPamfilia.

²⁵ Oyo oyu uvithile muPerge e taa yi kuAtalia.

²⁶ Okuza muAtalia oya yi mosikepa e taa shuna kuAntiokia shomuSiria, hoka ya li ya gandjwa miikaha yesilohenda lyaKalunga, ya ka longe oshilonga shoka ye shi longo ngashingeyi.

²⁷ Ano sho ya thiki kuAntiokia, oya hiya aakwanegongalo ayehe e taye ya hokololele ayihe mbyoka Kalunga e yi ya longitha, sho a kala pamwe nayo, nonkene e egululile aapagani osheelo, ya vule okwiitaala.

²⁸ Nena oya menekele ihe pooitaali ethimbo ele.

15

¹ Nena kuJudea okwa zi aalumentu yamwe e taye ya kuAntiokia. Oyo oya tameke okulonga aakwanegongalo taa ti: “Kalunga ita vulu oku mu hupitha, ngele inamu fukalekwa, ngashika shu uthwa mompango yaMoses.”

² Nena Paulus naBarnabas oya li ye na oontamanana nomaludhi omanene naantu mboka. Onkee okwa tokolwa kutya Paulus naBarnabas nayamwe yomaakwanegongalo yomuAntiokia ya ye kuJerusalem, ya ka kundathane oshinima shika naayapostoli naakuluntu.

³ Oyo oya lalekwa ihe kegongalo, ya ye mondjila, nomokupitila muFoinikia nomuSamaria oya hokolola, nkene aapagani yi itedhulula noyi itaale Kalunga. Onkundana ndjika oye etele ooitaali ayehe enyanyu.

⁴ Ano sho ya thiki kuJerusalem, oya taambwa kegongalo, kaayapostoli nokaakuluntu yegongalo. Oyo noye ya hokololele ayihe mbyoka Kalunga e yi ya longitha, sho a kala pamwe nayo.

⁵ Ihe ooitaali yamwe yomongundu yaafarisayi oya popi noya ti: “Oyo oye na okufukalekwa, ya vulike kompango yaMoses.”

⁶ Nena aayapostoli naakuluntu yegongalo oya gongala, ya kundathane oshinima shika.

⁷ Ano sho ya kundathana ethimbo ele, Petrus okwa thikama e ta ti: “Aamwameme, omu shi shi nawa kutya pomasiku gopetameko Kalunga okwa hogolola ndje mokati keni okuuvithila aapagani elaka etoye, opo ye li uve noyi itaale.

⁸ Nokuli Kalunga ngoka a tseya omadhiladhilo gaantu ayehe, oku ulike kutya ota taamba naapagani wo, sho e ya pe Ombepo Ondjapuki, ngaashi naanaa e yi tu pe wo.

⁹ Kalunga oku ulike kutya kape na nando eyooloko lyasha pokati ketu nayo. Onkee okwa dhimi po oondjo dhawo, oshoka oyi itaala.

¹⁰ Omolwashike ano ngashingeyi mwa hala ishewe okuhinda Kalunga, sho tamu tsike ooitaali omutenge omudhigu komapepe? Omutenge tuu ngoka tse yene nootate twa nyengwa oku gu humbata.

¹¹ Tse otwi itaala kutya otatu hupithwa kesilohenda lyOmuwa Jesus, osho nayo wo.”

¹² Nena ongundu ayihe oya mwena thilu noya pulakene Barnabas naPaulus, sho taa hokolola iikumithalonga niilongankondo mbyoka Kalunga e yi ya longitha mokati kaapagani.

¹³ Ano sho ya mana okupopya, Jakob okwa ti: “Aamwameme, pulakenii ndje!

¹⁴ Simon opo a hulitha okupopya nokwa fatulula ngashingeyi, nkene Kalunga a tameke okwiilikolela egongalo lye mwene mokati kaapagani.

¹⁵ Oohapu dhomuhunganeki otadhi tsu kumwe thiluthilu noshinima shika. Ngaashi enyolo tali ti:

¹⁶ ‘Konima yaambika otandi ka galuka natango, Omuwa osho ta ti. Ngame notandi ka tungulula egumbo lyaDavid, ndyoka lya teka po. Otandi ka fululula omikanka nomakulukuma galyo. Otandi ke ga tungulula ishewe.

¹⁷ Nena aantu yalwe ayehe otaa ka konga Omuwa, iigwana ayihe mbyoka nde yi ithana, yi ninge aantu yandje.

¹⁸ Omuwa ngoka a tseyithile nale aantu oshinima shika, osho ta ti.’ ”

¹⁹ Jakob okwa tsikile okupopya ta ti: “Omadhiladhilo gandje ogo ngaka: Inatu tsikeni aapagani uudhigu, ngele taa itedhulula notaye ya kuKalunga.

²⁰ Ihe naa nyolelwe ashike ontumwafo, ya lombwelwe kutya naa idhilike iikulya ayihe mbyoka ya yambelwa iikalunga, oshoka oya nyata. Osho wo naa idhilike oluhondelo, onyama yoshinamwenyo sha pondwa, nombinzi.

²¹ Oshoka okuza koomvula dhonalenale ompango yaMoses oya kala hayi leshwa kehe Esabati moosinagoga adhihe dhAajuda, noohapu dhe ohadhi uvithwa miilando ayihe.”

²² Nena aayapostoli, aakuluntu yegongalo negongalo alihe oya tokola okuhogolola mokati kawo aalumentu yamwe, ye ya tume kuAntiokia pamwe naPaulus naBarnabas. Oyo oya hogolola mo ihe Judas, ngoka hi ithanwa Barsabas, naSilas. Aalumentu mbaka yaali oya li ya simanekwa kaakwanegongalo ayehe.

²³ Aayapostoli naakuluntu oya nyolele ihe aakwanegongalo yokuAntiokia ontumwafo noye yi pe Judas naSilas, ye yi fale ko. Ontumwafo oya li ya nyolwa ngeyi: “Otse aayapostoli naakuluntu yegongalo, ooitaali pamwe nane, otatu kundu ooitaali ooyakwetu ayehe yomuAntiokia, muSiria nomuKilikia, mboka ya za muupagani.

²⁴ Otse otu uvu kutya aalumentu yamwe yomutse, nando inatu ya tuma, oye mu pukitha noku mu piyaganeka noohapu dhawo.

²⁵ Onkee ano sho twa gongala notwa kundathana, otwa tokola okuhogolola mo aalumentu yamwe yomutse, tu ya tume kune. Oyo otaye ya pamwe nookuume ketu aaholike Barnabas naPaulus,

²⁶ mboka ya hupula oomwenyo dhawo omolwoshilonga shOmuwa gwetu Jesus Kristus.

²⁷ Ano otatu mu tumine Judas naSilas, opo ye mu lombwele kokana iinima mbyoka tatu yi mu nyolele montumwafo.

²⁸ Tse otwa tokola mewiliko lyOmbepo Ondjapuki, twaa mu tsike we nando omutenge gulwe. Omalombwelo getu ge na oshilonga ogo ngaka:

²⁹ Inamu lya iikulya mbyoka ya yambelwa iikalunga, ombinzi nonyama yoshinamwenyo shoka sha pondwa ne mu idhilike oluhondelo. Otamu opaleke, ngele tamu idhilike iinima mbika. Kalii po nawa!”

³⁰ Aatumwa oya lalekwa e taa yi kuAntiokia. Ano sho ya thiki ko, oya hiya egongalo alihe noye li pe ontumwafo.

³¹ Oohapu ndhika odha tsu aantu omukumo noye dhi nyanyukilwa noonkondo.

³² Judas naSilas, ayehe yaali oya li aahunganeki. Oyo oya kumagidha ooitaali olule noye ya tsu omukumo.

³³ Ano sho ya kala ko iiwike yimwe, ooitaali oye ya laleke nombili, ya shune kumboka ye ya tumine.

³⁴ Ihe Silas okwa tokola okukala puyo.

³⁵ Paulus naBarnabas oya menekele muAntiokia. Oyo oya longo e taa uvitha oohapu dhOmuwa pamwe nooyakwawo yalwe.

³⁶ Ano sho pwa piti omasiku gamwe, Paulus okwa lombwele Barnabas ta ti: “Tu ye, tu ka talele po ooitaali ooyakwetu yomiilando ayihe moka tu uvithile oohapu dhOmuwa, tse tu ka tale, nkene ye li po.”

³⁷ Barnabas okwa li a hala okukutha Johannes Markus, ya ye pamwe naye.

³⁸ Ihe Paulus okwa dhiladhila kutya inashi opala okuya naye, oshoka okwa li e ya iteka muPamfilia e ta shuna kegumbo kuJerusalem.

³⁹ Oyo oya kuthathana po e taa topoka. Barnabas okwa kutha Markus, e taa yi nosikepa kuKipro.

⁴⁰ Paulus okwa hogolola Silas, ye ende pamwe naye.

⁴¹ Ano ooitaali sho ye ya gandja miikaha yesilohenda lyaKalunga, oya yi kuSiria nokuKilikia e taa kumike omagongalo.

16

¹ Paulus okwa yi kuDerbe nokuListra, hoka a adha ko omwiitaali, edhina lye Timoteus, a valwa komukiintu Omujuda omwiitaali, ihe he okwa li Omugreka.

² Ooitaali ayehe yomuListra nomuIkonium oya li taa popile Timoteus muuwanawa.

³ Paulus okwa li a hala okukutha Timoteus, a ye pamwe naye, onkee okwe mu fukalekitha. Paulus okwe shi ningi, oshoka Aajuda ayehe mboka ya kala miilando mbiyaka, oya li ye shi shi kutya he yaTimoteus Omugreka.

⁴ Mokweenda kwawo miilando ayihe oya tseyithile ooitaali omautho ngoka ga ningwa kaayapostoli nokaakuluntu muJerusalem noye ya lombwele, ya ga dhiginine.

⁵ Osho ngeyi omagongalo oga kolekelwa meitaalo nomwaalu gwooitaali ogwi indjipala esiku kehe.

⁶ Oyo oye ende nokupitila muFrigia nomuGalatia, oshoka Ombepo Ondjapuki okwe ya keelele okuuvithila oohapu dhaKalunga moshitopolwa shaAsia.

⁷ Ano sho ya thiki koongamba dhaMisia, oya kambadhala okuya kuBitinia, ihe Ombepo yaJesus inayi ya pitikila oku shi ninga.

⁸ Onkee ano oya taakana Misia pokati noya yi kuTroas.

⁹ Uusiku mbwiyaka Paulus okwa mono emoniko: omulumentu Omumakedonia a thikama koshipala she e te mu indile ta ti: “Taagulukila huka kuMakedonia, u tu kwathe!”

¹⁰ Mbalambala konima yemoniko ndika lyaPaulus otwa thikama e tatu yi kuMakedonia, oshoka otwa dhimbulula kutya Kalunga okwe tu ithana, tu ka uvithile aantu yaahoka elaka etoye.

¹¹ Okuza muTroas otwa yi nosikepa tu ukilila kuSamotrake nomesiku lya landula otwa thiki kuNeapolis.

¹² Okuza muNeapolis otwa yi koshilando shaFilippi, oshitembukilwa shAaroma shi li moshikandjo shotango shaMakedonia.

¹³ MEsabati otwa piti mo moshilando e tatu yi komulonga, hoka twa tengeneke kutya oku na ehala lyAajuda lyokugalikanena. Ano sho twa thiki ko, otwa kuutumba e tatu popitha aakiintu mboka twa adha ya gongalela ko.

¹⁴ Omukiintu gumwe, edhina lye Lidia, omuhalithi gwoonguwo oontiligane gwokoshilando shaTiatira, okwa li gumwe gwaapulakeni. Oye okwa li omukiintu nakusimaneka Kalunga, Omuwa nokwe egulula omwenyo gwe okutaamba nokwiitaala shoka Paulus a ti.

¹⁵ Onkee okwa shashwa pamwe naanegumbo lye ayehe. Nena oye okwe tu lombwele ta ti: “Ngele omu uvite kutya ngame ondi itaala shili Omuwa, nena ileni, mu kale megumbo lyandje.” Oye nokwe tu thiminike, tu ye naye.

¹⁶ Esiku limwe manga twa li mondjila tu uka kehala lyokugalikanena, otwa tsakanekwa komupika omukadhona e niwe kombepo ombwinayi, ndjoka ya kala hayi mu longitha okuhunganeka onakuyiwa. Mokuhunganeka ngeyi okwa likolitha ooyene ye iimaliwa oyindji.

¹⁷ Oye okwa kala he tu landula nosho wo Paulus ti igidha ta ti: “Aalumentu mbaka oyo aamati yaKalunga gwokombandambanda. Oyo otaye mu tseyithile, nkene ne tamu vulu okuhupithwa.”

¹⁸ Oye sho e shi ningi omasiku ogendji, osha vulitha Paulus. Nena Paulus okwa punguluka e ta lombwele ombepo ombwinayi ta ti: “Medhina lyaJesus Kristus otandi ku lombwele, za mo muye!” Nena ombepo oya zi mo muye pethimbo tuu ndyoka.

¹⁹ Ano ooyene ye sho ya dhimbulula kutya nani omukadhona gwawo ita vulu we oku ya likolitha iimaliwa, oya nukile Paulus naSilas noye ya kookololele kehalandjandja lyokutokolela oohapu.

²⁰ Oyo oye ya fala koshipala shaapangeli Aaroma noya ti: “Aalumentu mbaka Aajuda otaa piyaganeke oshilando shetu.

²¹ Oyo otaye tu longo omikalo ndhoka dha tsa ondumbo nompango yetu. Tse Aaroma itatu vulu okulandula omikalo dha tya ngaaka.”

²² Nena ongundu yaantu yomoshilando oya tameke okudhenga Paulus naSilas, naaleli yoshilando oya tuulitha oonguwo dhaayapostoli e taye ya dhengitha noongola.

²³ Ano sho ye ya dhenge noonkondo, oye ya edhilile mondholongo. Omulangeli gwondholongo okwa lombwelwa, e ya tonatele nawa.

²⁴ Omulangeli sho a lombwelwa ngeyi, okwe ya edhilile mela lyomeni nokwe ya tula meti.

²⁵ Ihe pokati kuusiku Paulus naSilas oya galikana nokwiimbila Kalunga omahambelelondjimbo, noonkwatwa odhe ya pulakene.

²⁶ Ohaluka yowala evi olya tameke okukakama noonkondo nolya ndjingandjinga ondholongo sigo okomakankameno gayo. Opo tuu mpoka omiyelo dhondholongo odhe eguluka, nomalyenge goonkwatwa adhihe oga dhituluka.

²⁷ Ano omulangeli gwondholongo sho a papudhuka nokwa mono omiyelo dhondholongo dhe ekama, okwa dhiladhila kutya oonkwatwa adhihe odha fadhuka po. Oye okwa pweya mo egongamwele lye nokwa li a hala okwiidhipaga.

²⁸ Ihe Paulus okwi igidha mokule ta ti: “Ino iningila uuwinayi nando owasha! Tse atuhe omo tu li.”

²⁹ Nena omulangeli okwi indile, a pewe omulilo, e ta matukile mo. Oye okwi ihata pevi poompadhi dhaPaulus naSilas.

³⁰ Opo ihe okwe ya piitha mo e te ya pula ta ti: “Aasimanekwa, ondi na okuninga shike, opo ndi hupithwe?”

³¹ Oyo oye mu yamukula ya ti: “Itaala Omuwa Jesus, e to hupithwa pamwe naanegumbo lyoye.”

³² Aayapostoli oye mu uvithile oohapu dhOmuwa pamwe naanegumbo lye ayehe.

³³ Omulangeli okwe ya kutha e ta yi nayo potundi tuu ndjoka yuusiku nokwa yogo iilalo yawo; oye nokwa shashwa pamwe naanegumbo lye ayehe pethimbo tuu ndyoka.

³⁴ Nena okwa kutha Paulus naSilas nokwe ya fala megumbo lye e te ya pe iikulya. Oye okwa li a nyanyukwa unene pamwe naanegumbo lye ayehe, oshoka ngashingeyi oyi itaala Kalunga.

³⁵ Ongula yesiku lya landula aapangeli Aaroma oya tumu aambala komulangeli nelaka tali ti: “Etha aalumentu mboka, ya ye!”

³⁶ Nena omulangeli okwa lombwele Paulus ta ti: “Aaleli oya tumine ndje elaka tali ti kutya nandi mu ethe, mu ye, ne naSilas. Ano thikameni ngashingeyi, mu ye nombili.”

³⁷ Ihe Paulus okwa lombwele aambala ta ti: “Oyo oye tu dhengitha montaneho yaantu ayehe, nando inatu pangulwa, noye tu tula mondholongo, nando tse aakwashilongo shaRoma. Ihe ngashingeyi oya hala, ye tu piithe mo meholamo. Aawe, itashi vulika nando! Aapangeli mboka naye ye yo yene huka, ye tu piithe mo.”

³⁸ Aambala oya shuna e taa ka hokololela aapangeli Aaroma oohapu ndhika. Ano mbeyaka sho yu uvu kutya Paulus naSilas aakwashilongo shaRoma, oya haluka noonkondo.

³⁹ Onkee oya yi kuyo e taye ya pe ombili, oye ya piitha mo mondholongo noye ya indile, ya ze mo moshilando.

⁴⁰ Paulus naSilas oya zi mo mondholongo e taa yi kaandjaLidia. Mwiyaka oya tsakanene nooitaali ooyakwawo, oye ya tsu omukumo e taa yi kulwe.

17

¹ Paulus naSilas oya pitile muAmfipolis nomuApollonia e taye ya muTessalonika, moka mwa li mu na osinagoga yAajuda.

² Paulus okwa yi mosinagoga, ngaashi i igilila, moka a kala nokutompa aantu nOmanyolo mOmasabati gatatu.

³ Oye okwe ya fatululile e te ya ulukile kutya Kristus okwa li e na okuhepekwa nokuyumuka kuusi. “Jesus nguka tandi mu mu uvithile, oye Kristus,” osho a ti.

⁴ Aajuda yamwe oya tompwa noyi itaale oohapu dhaPaulus naSilas e taa gama kuyo, osho wo ongundu onene yAagreka mboka haa simaneke Kalunga, naakiintu aanamadhina.

⁵ Ihe Aajuda oya kwatwa kefupa. Oyo oya gongele aalumentu aakolokoshi yomomapandaanda noya kongolola aantu e taa lundaganitha ombuyagano moshilando. Oya ponokele egumbo lyaJason noya kongo Paulus naSilas, ye ya ete komeho gongundu yaantu.

⁶ Ihe sho ya nyengwa oku ya mona, oya kookololele Jason nooitaali ooyakwawo koshipala shaaleli yoshilando noyi igidha taa ti: “Aalumentu mbaka oya taandelitha epiyagano apehepehe. Ngashingeyi oye li moshilando shetu.

⁷ NaJason nguka okwe ya edhilile megumbo lye. Oyo ya yono oompango dhomupangeli Omuroma, oshoka otaa longo aantu kutya oku na omukwaniilwa gulwe, edhina lye Jesus.”

⁸ Oohapu ndhika odha piyaganeke aantu ayehe yomoshilando, naapangeli wo.

⁹ Aaleli yoshilando oya futitha Jason nooyakwawo noye ya etha, ya ye.

¹⁰ Ano uusiku sho we ya, ooitaali oya laleke Paulus naSilas, ya ye kuBerea. Oyo sho ya thiki ko, oya yi mosinagoga yAajuda.

¹¹ Aantu yomoshilando shika oya li ye na ehalo ewanawa lyokutaamba ye vule mbeyaka yomuTessalonika. Oyo oya kala ya hokwa okupulakena oohapu dhaKalunga, nesiku kehe oya kala nokukonakona Omanyolo, opo ya tale, ngele shono tashi popiwa kuPaulus, oshoshili tuu.

¹² Oyendji yomuyo oya ningi ooitaali; mokati kawo omwa li mu na aakiintu aanamadhina naalumentu Aagreka oyendji.

¹³ Ihe Aajuda yokuTessalonika sho yu uvu kutya Paulus oku uvithile wo oohapu dhaKalunga muBerea, oye ya ko noya tameke okupiyaganeka nokutsitha aantu ondumbo.

¹⁴ Nena ooitaali oya laleke mbala Paulus, e ye komunkulo gwefuta, ihe Silas naTimoteus oya kala manga muBerea.

¹⁵ Aalumentu mboka ya thindikile Paulus, oye mu fala sigo okuAtena. Opo ihe oya galukile kuBerea nelaka lya zi kuPaulus tali ti, Silas naTimoteus naa ye mbala kuye.

¹⁶ Ano Paulus manga a li a tegelela Silas naTimoteus muAtena, okwa li u uvite nayi, sho a dhimbulula, nkene oshilando shu udha iikalunga.

¹⁷ Onkee okwa kala ta ludhike nAajuda naapagani mboka oonakusimaneka Kalunga mosinagoga, nokwa ludhike wo esiku kehe pehalandjandja lyoshilando naantu mboka haa kala po.

¹⁸ Nena aalongi yamwe yomongundu yaaepikuri noyaastoa oya ludhike wo naye. Yamwe oye mu popi ya ti: “Omupopyagani nguno okwa hala okufatulula shike ano?” Ooyakwawo oya ti: “Oye okwa fa ta popi kombinga yookalunga aakwiilongo.” Oya popi ngeyi, oshoka Paulus okwa li ta hokolola Jesus neyumuko.

¹⁹ Onkee oya kutha Paulus e taye mu fala moshigongi shaatokoli kuAreopagi noya ti: “Tse otwa hala okutseya elongo ndyoka epe to li longo.

²⁰ Otu uvu to popi iinima yimwe kaatu yi shi, onkee otwa hala okutseya shoka tayi ti.”

²¹ Oshoka aantu ayehe yomuAtena pamwe naakwiilongo mboka ya kala mo, oya li ye hole okuhokolola nokuuva iinima iipe ethimbo alihe.

²² Nena Paulus okwa thikama komeho goshigongi shaAreopagi e ta popi ta ti: “Aalumentu ne Aayatena! Ngame ondi wete kutya one aadhiginini miinima ayihe yopalongelokalunga.

²³ Oshoka ngame sho nda li tandi endaenda noshilando sheni nonda tala omahala geni omayapuki, ondi itsu oshiyambelo shimwe sha nyolwa ngeyi: ‘Oshiyambelo shaKalunga kee shiwike.’ Ano Kalunga ngoka hamu mu galikana, nando kamu mu shi, oye naanaa ngoka tandi mu uvithile.

²⁴ Kalunga ngoka a shiti uuyuni niinima ayihe yi li mo, oye Omuwa gwegulu nogwevi. Oye iha kala mootempeli dha tungwa kaantu.

²⁵ Moku mu longela ina pumbwa, a pewe ando sha kaantu, oshoka oye mwene ha pe aantu ayehe omwenyo nomufudho niinima ayihe.

²⁶ Mokushita kwe Kalunga okwa kutha omihoko adhihe dhaantu momulumentu gumwe nokwe ya tula kombanda yevi alihe. Oye okwe ya uthile wo nale omathimbo gawo noongamba dhomahala gokukala kwawo.

²⁷ Kalunga okwa hala, aantu ya kale taye mu kongo, pamwe taye mu mono mokupampadhala kwawo. Ihe Kalunga ke li kokule nomuntu nando ogumwe;

²⁸ ngaashi gumwe a tile: ‘Muye tse otu na omwenyo, tatu inyenge notu li po.’ Ngaashi wo yamwe yomaatoti yiitewo yeni oya tumbula taa ti: ‘Natse wo aana yaKalunga.’

²⁹ Onkee ano ngele tse aana yaKalunga, nena inatu dhiladhileni kutya olupe lwe olwa fa efano lyoshisiliveli nenge lyemanya lya hongwa paunkulungu nopamayele gomuntu.

³⁰ “Kalunga okwa li i idhidhimikile nale aantu pomathimbo ngeyaka, sho ya li yaa na owino, ihe ngashingeyi ota lombwele aantu ayehe shaa mpoka ye li, yi itedhulule yo ya ethe oondjila dhawo oombwinayi.

³¹ Nokuli oye oku utha nale esiku, uuna ndoka ta ka pangula uuyuni pauyuuki, note ke u pangulitha omulumentu ngoka e mu hogolola. Oye okwa hololele aantu ayehe oshinima shika puuyelele, sho a yumudha omulumentu ngoka kuusi.”

³² Ano sho yu uvu Paulus ta popi kombinga yeyumuko lyaasi, yamwe oye mu yolo, ihe ooyakwawo oye mu lombwele ya ti: “Otse otwa hala natango okuuva iinima mbyoka to yi popi esiku lilwe.”

³³ Nena Paulus okwa zi mo moshigongi.

³⁴ Ihe aantu yamwe oyi igameke kuye noya ningi ooitaali. Mokati kawo omwa li Dionisius, oshilyo shoshigongi shaAreopagi nomukiintu gumwe, edhina lye Damaris, nooyakwawo yalwe.

18

¹ Konima yaambika Paulus okwa zi muAtena e ta yi kuKorinto.

² Hwiyaka okwa adha ko omulumentu Omujuda, edhina lye Akula, nomukadhi Priskila. Omulumentu nguka okwa valelwa muPontus nokwa adhika, opo e ya mo a zi kuItalia, oshoka omupangeli Omuroma Klaudius okwa li a lombwele Aajuda ayehe kutya naa ze mo muRoma. Paulus okwa yi kuyo

³ e ta kala puyo nokulonga pamwe nayo, oshoka nayo wo oya li aatungi yootenda ngashika ye.

⁴ MEsabati kehe Paulus okwa popi mosinagoga nokwa kambadhala okutompa ayehe, Aajuda nAagreka.

⁵ Ano Silas naTimoteus sho ya thiki muKorinto okuza kuMakedonia, oya adha Paulus i ipyakidhila ethimbo alihe nokuuvithila aantu oohapu dhaKalunga nokwa tompo Aajuda kutya Jesus oye Kristus.

⁶ Ihe oyo sho ye mu ludhikitha noye mu popile muuwinayi, okwi ipupula ontsi koonguwo dhe e te ya lombwele ta ti: “Ngele omwa ka kana, nena ondjo oyeni yene. Ngame kandi na sha moshinima shika. Okuza kesiku lyonena ngame otandi yi, ndi ka uvithile aapagani.”

⁷ Nena oye okwe ya thigi po nokwa ka kala megumbo lyomulumentu omupagani nakusimaneka Kalunga, edhina lye Titius Justus. Egumbo ndika olya li popepi nosinagoga.

⁸ Krispus, omukuluntu gwosinagoga, pamwe naanegumbo lye ayehe oyi itaale, nosho wo aantu oyendji yomuKorinto oyu uvu oohapu dhaKalunga noyi itaale e taa shashwa.

⁹ Uusiku umwe Omuwa okwi ihololele Paulus memoniko nokwe mu lombwele ta ti: “Ino tila, popya, ino mwena;

¹⁰ oshoka ondi li pamwe nangoye. Kape na nando ogumwe te ku ningile uuwinayi, oshoka ondi na aantu oyendji moshilando shika.”

¹¹ Onkee ano Paulus okwa kala muKorinto omvula yimwe netata nokwa longo aantu oohapu dhaKalunga.

¹² Ihe Gallio sho a langekwa kAaroma, a ninge omuleli muGreka, Aajuda oya gongala noya hangene Paulus e taye mu kwata noye mu fala kompangu.

¹³ Oyo oya popi noya ti: “Omulumentu nguka ota kambadhala okuhongolola aantu, ya longele Kalunga pamukalo ngoka gwa tsa ondumbo nompango.”

¹⁴ Ano Paulus sho kwa ale a popye, Gallio okwa lombwele Aajuda ta ti: “Aajuda ne, omulumentu nguka ando okwa li a ningi epogolo lyasha nenge oshilonga shuukolokoshi, ando ondi idhidhimike ngaa oku mu pulakena.

¹⁵ Ihe sho mu na owala omaludhi naye kombinga yiitya, yomadhina noyompango yeni, nena oshinima shika oshi li miikaha yeni.”

¹⁶ Oye nokwe ya tidha mo mompangu.

¹⁷ Nena oyo ayehe oya nukile Sostenes, omukuluntu gwosinagoga, noye mu dhengele mpoka komeho goshipundi shompangu. Ihe Gallio okwa li kee na ko nasha.

¹⁸ Paulus okwa kala natango pamwe nooitaali omasiku ogendji muKorinto, opo ihe okwe ya laleke nokwa yi nosikepa pamwe naAkula naPriskila kuAntiokia. Ihe manga inaa ya mosikepa, okwa gana egano muKenkrea nokwa kululitha omutse gwe.

¹⁹ Ano sho ya thiki muEfeso, Akula naPriskila oya thigala moka, ihe Paulus okwa yi kosinagoga nokwa kundathana nAajuda.

²⁰ Oyo oye mu indile, a kale puyo omasiku gamwe, ihe oye okwa tindi.

²¹ Okwe ya laleke ashike nokwe ya uvanekele a ti: “Kalunga ngele okwe shi hala, otandi ka galukila kune.” Oye okwa zi muEfeso nosikepa.

²² Ano sho a thiki muKesarea, okwa yi kuJerusalem, a ka popithe egongalo. Opo ihe okwa yi kuAntiokia.

²³ Sho a kala ko omasiku gamwe, okwa thikama ishewe, a shune. Okwa pitile momikunda dhaGalatia nodhaFrigia nokwa tsu ooitaali omukumo.

²⁴ Omujuda gumwe, edhina lye Apollos, a valelwa muAleksandria, okwe ya kuEfeso. Oye okwa li enyakwa lyokupopya nokwa tseya nawa Omanyolo.

²⁵ Apollos okwa li wo a longwa okutseya ondjila yOmuwa, onkee okwa popi nuulaadhi nokwa longo aantu elongo lyu uka kombinga yaJesus. Ihe okwa li a tseya owala eshasho ndyoka Johannes e li ningi.

²⁶ Oye okwa tameke okupopya nuulaadhi mosinagoga. Ano Priskila naAkula sho ye mu pulakene, oye mu kutha e taa yi naye kaandjawo noye mu longo noku mu yelithila nawalela ondjila yaKalunga.

²⁷ Nena Apollos okwa tokola ihe okuya kuGreka, onkee ooitaali yomuEfeso oye mu kwatha mokunyolela ooitaali ooyakwawo yomuGreka noku ya kumagidha, ye mu taambe nawa. Ano sho a thiki ko, okwa kwatha lela mbeyaka ya ningi ooitaali kesilohenda lyaKalunga.

²⁸ Oshoka oye okwa tompo Aajuda nomatompelo ga kola montaneho yaantu ayehe, nomokulongitha Omanyolo okwe ya ulukile kutya Jesus oye Kristus.

19

¹ Ano Apollos manga a li muKorinto, Paulus okwa taakana pokati koshitopolwa shoka, sigo a thiki kuEfeso. Hwiyaka okwa adha ooitaali yamwe

² nokwe ya pula ta ti: “Omwa pewa tuu Ombepo Ondjapuki, sho mwa ningi ooitaali?” Oyo oye mu yamukula ya ti: “Otse inatu uva nando olumwe kutya oku na Ombepo Ondjapuki.”

³ Nena Paulus okwe ya pula ta ti: “Ano omwa shashwa eshasho lya tya ngiini?” Oyo oye mu yamukula ya ti: “Tse otwa shashwa eshasho ndyoka Johannes e li ningi.”

⁴ Nena Paulus okwe ya lombwele ihe ta ti: “Johannes okwa shasha mboka yi itedhulula nokweetha oondjila dhawo oombwinayi, ihe okwa lombwele aantu kutya naa itaale ngoka te ya konima ye — kokutya naa itaale Jesus.”

⁵ Ano oyo sho yu uvu shoka sha popiwa kuPaulus, oyi ishashithile medhina lyOmuwa Jesus.

⁶ Paulus sho e ya tenteke iikaha ye, Ombepo Ondjapuki oya kulukile muyo. Nena oyo oya tameke okupopya omalaka gaa shiwike noyu uvitha wo oohapu dhaKalunga.

⁷ Aalumentu mboka oya li ye thike lwopomulongo nayaali ayehe kumwe.

⁸ Pethimbo lyoomwedhi ndatu Paulus okwa li ha yi mosinagoga e tu uvithile aantu nuulaadhi ta popi Oshilongo shaKalunga.

⁹ Ihe yamwe oyi ikukutike, ya tindi okwiitaala noya sheke montaneho yaayehe ondjila yaKalunga. Onkee Paulus okwe ya thigi po, a yoolola mo ooitaali nokwa kala ha kundathana nayo esiku kehe mosikola yaTirannus.

¹⁰ Pamukalo nguka Paulus okwa tsikile okulonga aantu uule woomvula mbali, naayehe mboka ya kala moshitopolwa shaAsia, Aajuda naapagani, oyu uvu oohapu dhOmuwa.

¹¹ Kalunga okwa longitha Paulus iikumithalonga iinene.

¹² Nokuli iipugulitho niitetahema mbyoka a li e yi longitha, sho ya tentekwa kaavu, oya aluka komavu gawo, noombepo dha nyata odha zi mo muyo.

¹³ Nena Aajuda yamwe mboka ya li haa endagula nokutidha mo oombepo dha nyata maantu, oya kambadhala wo oku shi ninga nokulongitha edhina lyOmuwa Jesus. Oyo oya lombwele oombepo dha nyata taa ti: “Otandi mu lombwele medhina lyaJesus, ngoka tu uvithwa kuPaulus, zii mo momuntu nguka.”

¹⁴ Mokati kawo omwa li wo aana aamati yaheyali yomuyambimukuluntu gwAajuda, edhina lye Skeva.

¹⁵ Ihe ombepo ya nyata oye ya yamukula ya ti: “Jesus ondi mu shi, naPaulus ondi mu shi, ihe ne one oolye ano?”

¹⁶ Omulumentu ngoka a li e niwe kombepo ya nyata, okwe ya nukile nokwe ya kondjitha noonkondo adhihe e te ya sindi. Nena oyo oya gwaya mo megumbo e taa fadhuka po nomalutu ga toshagulwa noonguwo dha tuulwa.

¹⁷ Aajuda ayehe naapagani mboka ya kala muEfeso, oya kundana oshinima shika; oya tila noonkondo noya simaneke unene edhina lyOmuwa Jesus.

¹⁸ Oyendji yomooitaali oye ya e taa hempulula nokuhokolola montaneho yaayehe iinima mbyoka ye yi ninga.

¹⁹ Oyendji yomwaamboka ya li haa longitha uumpulile, oye eta omambo gawo agehe taga popi uumpulile e taye ga fike po montaneho yaantu ayehe. Sho ya tula kumwe ondando yomambo ngoka agehe, oya ningi iimaliwa yoshisiliveli omayuvi omilongo ntano.

²⁰ Osho ngeyi oohapu dhaKalunga odha taandele noonkondo, naantu oyendji oye dhi itaale.

²¹ Konima yaambika Paulus okwa tokola okupitila muMakedonia nomuGreka, a ye kuJerusalem. Oye okwa popi a ti: “Ongame ngele nda thiki ko hoka, nena ondi na wo oku ka talela po kuRoma.

²² Onkee okwa tumu aakwathi ye yaali, Timoteus naErastus, kuMakedonia, manga ye ta kala natango okathimbo muAsia.”

²³ Pomasiku ngeyaka muEfeso omwa tukuluka uupyakadhi uunene omolwokulandula Omuwa.

²⁴ Omuhambudhi gumwe gwoshisiliveli, edhina lye Demetrius, okwa li ha hambula iiyelekela iishona yoshisiliveli yotempeli yoshikalunga oshikiintu Artemis. Iipindi mbika oye etele oonakulonga pamwe naye uuyamba owindji.

²⁵ Onkee okwi ithana aantu ayehe mboka haa longo puye nosho wo ooyakwawo yalwe mboka haa longo iilonga ya fa yawo, e te ya lombwele ta ti: “Aalumentu ne, omu shi shi nawa kutya uuyamba wetu ohau zi miilonga mbika.

²⁶ Ihe ngashingeyi omu shi wete nomu shi uvite ko ne yene shoka omulumentu nguka Paulus ta ningi. Oye ota popi kutya omafano giikalunga ngoka ga hongwa kaantu, kage shi Kalunga. Oye okwi itaalitha aantu oyendji moshinima shika, haamuka ashike muEfeso, ihe okonyala moshitopolwa ashihe shaAsia.

²⁷ Ano ngashingeyi ope na oshiponga shi li popepi kutya iilonga mbika yetu otayi ka dhinika. Nokuli haashika ashike, ihe ope na wo oshiponga oshikwawo kutya otempeli yakalunga omukiintu a simana, Artemis, otayi ka dhinika, nesimano lye enene otali ka shunduka, nonando oye kalunga ngoka ha simanekwa kaantu ayehe yomuAsia noyomuuyuni auhe.”

²⁸ Ano ongundu yaantu sho yu uvu oohapu ndhika, oya geyea noya tameke okwiigidha mokule taa ti: “Artemis gwaEfeso oye omunene!”

²⁹ Epiyagano ndika oli ihanene oshilando ashihe. Nena aantu oya nukile Aamakedonia yaali, Gaius naAristarkus, mboka ye ende pamwe naPaulus, noye ya tidhile kongulu yomaudhano.

³⁰ Paulus okwa li a hala okupopya komeho gongundu, ihe ooitaali inaye shi pitika.

³¹ Yamwe yomaaleli yoshilongo, mboka ya li ookuume kaPaulus, oye mu tumine elaka noye mu indile, kaa ye ko nando kongulu yomaudhano.

³² Mongulu yomaudhano omwa li epiyagano alike. Aantu oya li taa igidha taa popi shontumba noshongandi, yo oyendji oya li kaaye shi wo kutya oya gongalele shike.

³³ Yamwe oya dhiladhila kutya Aleksander oye e etitha epiyagano, Aajuda sho ye mu undulile komeho gaantu. Nena Aleksander okwa mweneke aantu noshikaha she, oshoka okwa li a hala okupopila Aajuda komeho gongundu.

³⁴ Ihe aantu sho ya dhimbulula kutya oye Omujuda, oya tameke okwiigidha mokulekule ongomuntu gumwe uule wootundi mbali taa ti: “Artemis gwaEfeso oye omunene!”

³⁵ Hugunina amushanga gwoshilando okwa mweneke aantu. Oye okwe ya lombwele ta ti: “Aaefeso ne, aantu ayehe oye shi shi kutya oshilando shaEfeso ohashi gamene otempeli yakalunga omukiintu omunene, Artemis, noyemanya eyapuki ndyoka lya gwa megulu.

³⁶ Kape na nando ogumwe ta ludhike iinima mbika. Onkee ano gundjileni, inamu longa nando osha shaa fele.

³⁷ One omwe eta aalumentu mbaka huka, nando oyo inaa yaka mo iinima iiyapuki yomotempeli nongaashi inaa sheka nando kalunga haka ketu.

³⁸ Demetrius naalongeli ye ngele oye na oombudhi dhasha nomuntu gwontumba, omasiku gu uthwa gompangu oko ge li, naatokoli yoohapu opo ye li, naa ka tamanekathane hwiyaka.

³⁹ Nongele ope na natango sha shilwe shoka mwe shi hala, nena oshi na okukundathanwa moshigongi shoshigwana pamukalo gwompango yoshilongo.

⁴⁰ Oshoka oshinima shika sha ningwa nena, otashi vulu oku tu talitha kutya otse aapiyaganeki yaantu, nando hasho. Kape na nando eipopilo lyasha okupopila epiyagano ndika.”

⁴¹ Ano sho a popi ngeyi, aantu oya halakana.

20

¹ Ano euyagano ndika sho lya mwena, Paulus okwi ithana ooitaali nokwe ya laleke noohapu dhomakumagidho. Nena okwe ya thigi po ihe e ta yi kuMakedonia.

² Oye okwe endaenda nomikunda ndhiyaka adhihe nokwa tsu aantu omukumo noohapu odhindji. Opo ihe okwe ya kuGreka e ta kala ko uule woomwedhi ndatu.

³ Ano manga a li ti ilongekidha, a ye kuSiria, okwa dhimbulula kutya Aajuda oye mu langela. Onkee okwa tokola okushuna nokupitila muMakedonia.

⁴ Sopater yaPirro, Omuberea, okwa yi pamwe naye; osho wo Aatessalonika, Aristarkus naSekundus, Gaius Omuderbe, Timoteus nAayasia yaali, Tikikus na Trofimus.

⁵ Oyo oya tetekele e taye tu tegelele muTroas.

⁶ Konima yoshituthi shiikwiila inaayi fulikwa otwa thikama nosikepa muFilippi notwa thiki kuyo muTroas, sho twe ende omasiku gatano e tatu kala mo oshiwike shimwe.

⁷ Ongulohi yOlyomakaya otwa gongala pamwe, opo tu lye uulalelo wuukumwe. Paulus okwa popitha aantu. Molwaashoka okwa li e na okuza po esiku lya landula, okwa tsikile okupopya sigo opokati kuusiku.

⁸ Moshinyanga shopombanda, moka twa li twa gongala, omwa li mu na oolamba odhindji dha minikila.

⁹ Omulumentu gumwe omugundjuka, edhina lye Eutikus, okwa li a kuutumba pekende. Ano Paulus sho a popi olule, Eutikus okwa tameke okusa oomposi. Oye okwa gu ko kontala ontintatu e ta gwile pevi nokwa toolwa a sa.

¹⁰ Ihe Paulus okwa kulukile pevi e ti iyumbile kombanda ye nokwe mu papatele e ta ti: “Inamu tila, oku na natango omwenyo.”

¹¹ Opo ihe okwa shuna ishewe pombanda, a topola oshikwiila nokwa li e ta tsikile natango okupopya, sigo etango lya piti, nokwa yi.

¹² Nena oyo oya kutha po omugundjuka nguka e taye mu fala kegumbo e na omwenyo, naashika osha talaleke oomwenyo dhawo.

¹³ Otse otwa tetekele nosikepa notwa yi kuAsso, tu ka pitule Paulus. Oshoka oye okwa li a hala okweenda kolupadhi, nokwe tu lombwele, tu ke mu pitule hoka.

¹⁴ Ano sho e tu tsakaneke muAsso, otwe mu taamba mosikepa notwa yi kuMitilene.

¹⁵ Esiku lya landula otwa li ontega naKios, nesiku etiyali otwe ya kuSamos nesiku etitatu otwa thiki muMileto.

¹⁶ Oshoka Paulus okwa li a tokola okupitilila Efeso, opo kaa manene ethimbo muAsia. Oye okwa li meendelelo, a hala ando, ngele tashi vulika, a thike kuJerusalem esiku lyaPentekoste.

¹⁷ MuMileto Paulus okwa tumu elaka kuEfeso nokwi ithana aakuluntu yegongalo, ye ye kuye.

¹⁸ Ano sho ye ya, okwe ya lombwele ta ti: “One omwa tseya, nkene nda kala ethimbo alihe pune okuza kesiku lyotango, sho nda thiki kuAsia.

¹⁹ Mokati komamakelo ogendji ngoka ga tsakaneke ndje omolwondumbo yAajuda, onda longele Omuwa neifupipiko enene nonomahodhi ogendji.

²⁰ One omwa tseya kutya mokuuvitha nomokulonga kwandje montaneho yaantu ayehe nomomagumbo geni onde mu ulukile iinima ayihe mbyoka tayi mu kwatha.

²¹ Onda lombwele aantu ayehe, Aajuda naapagani kutya naa itedhulule, ya galukile kuKalunga noyi itaale Omuwa gwetu Jesus.

²² “Ano ngashingeyi mokuvulika kwandje kOmbepo Ondjapuki otandi yi kuJerusalem nokandi shi wo kutya oshike tashi ka tsakaneka ndje nkwiyaka.

²³ Onda tseya ashike kutya miilando ayihe Ombepo Ondjapuki ota tseyithile ndje kutya oomango nomahepeko otayi tegelele ndje.

²⁴ Ihe ngame mokugwanitha eithano lyandje kandi na nando uutende nomwenyo gwandje. Onda hala ashike okutsakanitha oshilonga shoka nde shi pewa kOmuwa Jesus shokuuvitha elaka etoye tali hokolola esilohenda lyaKalunga.

²⁵ “Nokuli ngashingeyi ondi shi shi kutya ne mboka nde ende mokati keni, sho ndu uvitha Oshilongo shaKalunga, itamu ka mona we oshipala shandje.

²⁶ Onkee ano otandi mu tseyithile nena ndjika kutya ngele ope na gumwe gwomune ta ka kana, kashi shi nando ondjo yandje.

²⁷ Oshoka ngame inandi thiga ko nando osha, ihe onde mu tseyithile ashihe shoka Kalunga a hala oku shi mu ningila.

²⁸ Itonateleni ano, ne mu tonatele wo oshigunda ashihe shoka mwe shi pewa kOmbepo Ondjapuki. Litheni egongalo lyaKalunga ndyoka e li ilikolele neso lyOmwana.

²⁹ Oshoka ondi shi shi kutya, ngele nda zi po, omambungu haga lyana otaga ka gwayela mokati keni, gaa na nando ohenda noonzi.

³⁰ Nokuli ethimbo otali ke ya, uuna aalumentu yamwe yomokati keni taa ka kala nokupopya iifundja, yi ihilile aalongwa.

³¹ Onkee ano kotokeni, ne mu dhimbulukwe, nkene nde mu kumagidha amuhe nomahodhi gandje uule woomvula ndatu.

³² “Onkee ano ngashingeyi otandi mu gandja mesiloshimpwiyu lyaKalunga nokoohapu dhesilohenda lye. Oye oku na oonkondo oku mu koleka noku mu pa omayambeko ngoka e ga pungulila aantu ye ayehe.

³³ Ngame inandi ihalela nando oshinima shaa shi shandje, oshisiliveli nenge oshingoli nenge oonguwo dhomuntu.

³⁴ One yene omwa tseya kutya ngame onda longo mwene niikaha yandje nondi imonene oompumbwe dhandje nodhooyakwetu.

³⁵ Miinima mbika ayihe ngame onde mu ulukile kutya mokulonga noonkondo adhihe pamukalo nguka otatu vulu okukwatha aankundi. Dhimbulukweni oohapu ndhoka Omuwa Jesus mwene e dhi popi, sho a ti: ‘Okugandja oku na elago ku vule okutaamba.’ ”

³⁶ Ano Paulus sho a mana okupopya, okwa tsu oongolo pamwe nayo ayehe e ta galikana.

³⁷ Oyo ayehe oya lili, oye mu papatele noye mu laleke noku mu thipa komilungu.

³⁸ Oyo oya li ya nika oluhodhi, unene omolwoohapu ndhoka e dhi popi, sho a ti kutya itaye ke mu mona we. Opo ihe oye mu thindikile kosikepa.

21

¹ Nena otwe ya laleke ihe notwa yi. Okuza mpoka otu ukilile sigo okontuntu yaKos. Esiku lya landula otwa thiki kuRodos nomokuza hoka otwa tsikile, sigo twa thiki kuPatara.

² Hwiyaka otwa adha ko osikepa yu uka kuFoinikia notwa londo e tatu yi nayo.

³ Mokweenda kwetu otwe ya sigo oompoka twa vulu okumona ontuntu yaKipro, ndjoka otwe yi ende kombinga yokuumbugantu notu ukilile kuSiria. Sho twa thiki muTiro, otwa heluka, oshoka osikepa oya li yi na okuhelulwa ofulaha yayo.

⁴ Mwiyaka otwa adha mo ooitaali yamwe notwa kala puyo oshiwike shimwe. Mewiliko lyOmbepo Ondjapuki ooitaali oya kumagidha Paulus, kaa ye nando kuJerusalem.

⁵ Ihe ethimbo lyetu lyokukala puyo sho lya pu ko, otwe ya laleke notwa tsikile ondjila yetu. Nena ooitaali ayehe pamwe naakulukadhi naanona yawo oye tu thindikile sigo opondje yoshilando. Sho twa thiki komunkulo gwefuta, otwa tsu oongolo atuhe pamwe nayo e tatu galikana.

⁶ Opo ihe otwa lalekathana. Otse otwa londo mosikepa, ihe yo oya shuna komagumbo.

⁷ Otwa zi muTiro notwa yi kuPtolemais, hoka twa popitha ooitaali e tatu kala puyo esiku limwe.

⁸ Esiku lya landula otwa zi ko e tatu yi kuKesarea. Sho twa thiki ko, otwa yi megumbo lyomweevaangeli Filippus notwa kala puye. Filippus nguka okwa li gumwe gwaalumentu mbeyaka yaheyali ya hogololelwa muJerusalem.

⁹ Oye okwa li e na oyana aakadhona yane, mboka ya li haa popi elaka lyaKalunga.

¹⁰ Otse otwa menekele mo omasiku ogendji, sigo twa adhika mo komuhunganeki gumwe a za kuJudea, edhina lye Agabus.

¹¹ Oye okwe ya kutse, a kutha epaya lyaPaulus e ti imanga nalyo komagulu nokomaako e ta ti: “Ombepo Ondjapuki ota ti: ‘Mwene gwepaya ndika osho ta ka mangwa ngeyi kAajuda muJerusalem e taye ke mu gandja miikaha yaapagani.’ ”

¹² Ano sho twe shi uvu pamwe nooyakwetu yaahwiyaka, otwa kumagidha Paulus, kaa ye ko nando kuJerusalem.

¹³ Ihe okwe tu yamukula a ti: “Otamu ningi shike shono, sho tamu lili ngaaka notamu mbandapaleke omwenyo gwandje? Ngame ondi ilongekidha, hakumangwa akuke muJerusalem, ihe nokusa wo nokuli omolwedhina lyOmuwa Jesus.”

¹⁴ Ano sho twa nyengwa oku mu tompa, otwa mwena notwa ti: “Ehalo lyOmuwa nali gwanithwe.”

¹⁵ Sho twa kala ko omasiku gamwe, otwa longele mo iinima yetu notwa thikama e tatu yi kuJerusalem.

¹⁶ Yamwe yomooitaali yomuKesarea oya yi pamwe natse. Oyo oye tu fala kaandjaMnason, gumwe gwooitaali yotango a za kuKipro, oshoka oko nkoka twa li tu na okumenekela.

¹⁷ Ano sho twa thiki kuJerusalem, ooitaali ooyakwetu oye tu taamba nenyanyu enene.

¹⁸ Esiku lya landula Paulus okwa yi pamwe natse oku ka talela po Jakob, naakuluntu yegongalo ayehe oya gongalele ko.

¹⁹ Paulus okwe ya popitha nokwe ya hokololele naanaa ashihe shoka Kalunga e shi longo, sho e mu longitha mokati kaapagani.

²⁰ Sho yu uvu ehokololo lye, oyo ayehe oya hambelele Kalunga. Opo ihe oya lombwele Paulus ya ti: “Mumwameme, ongoye ou shi shi kutya otu na muka Aajuda oyendji mboka ya ningi ooitaali, naayehe ohaa dhiginine noonkondo ompango yaMoses.

²¹ Oyo oya lombwelwa kutya aniwa ou li ko to longo Aajuda mboka ya kala miilongo yaapagani okweetha po ompango yaMoses noto ya lombwele kutya inaa fukaleka we oyana noinaa dhiginina we omikalo dhopashijuda.

²² Kape na omalimbililo, otaa ka uva kutya owe ya po. Otu na okuninga ngiini ano moshinima shika?

²³ Ninga ano shoka tatu ku lombwele. Mpaka ope na aalumentu yane yu uvanekela Kalunga euvaneko noya hala oku li gwanitha.

²⁴ Inda naalumentu mbaka e to holele omukalo gwawo gweiyogo e to ya futile ofuto yawo, opo ya vule okwiikululitha omitse dhawo. Nena ayehe otaa ka dhimbulula kutya nani iifundja ayike mbyoka ye yi lombwelwa, nani ngoye oho dhiginine ompango yaMoses.

²⁵ Ihe kombinga yaapagani mboka ya ningi ooitaali, otwe ya nyolele ontumwafo notwe ya lombwele, yi idhilike iinima mbika: iikulya ya yambelwa iimenka, ombinzi, onyama yoshinamwenyo shoka sha pondwa, noluhondelo.”

²⁶ Paulus okwa kutha aalumentu mbeyaka. Esiku lya landula okwa yi meiyogo pamwe nayo. Opo ihe okwa yi motempeli, a ka tseyithe, uuna ndwiyaka omasiku geiyogo lyawo taga ka hula po, oshoka omolwakehe gumwe gwomuyo okwa li ku na okweetwa eyambo, manga omasiku ngoka inaaga pwa ko.

²⁷ Ano omasiku ngeyaka gaheyali sho ga li ge li pokupwa ko, Aajuda yamwe yokuAsia oyi itsu Paulus motempeli. Oyo oya sikumudha ongundu ayihe yaantu e taa nukile Paulus

²⁸ noyi igidha mokule taa ti: “Aalumentu ne Aaisraeli, tu kwatheni! Omulumentu nguka ohe ende apehe ta longo aantu okutsa ondumbo noshigwana shetu shAaisraeli, ompango yaMoses notempeli ndjika. Nokuli ngashingeyi okwe eta aapagani motempeli nokwa nyatekitha ngeyi ehala ndika eyapuki.”

²⁹ Oyo oya popi ngeyi, oshoka oya monene Trofimus gwokuEfeso e li pamwe naPaulus moshilando noya dhiladhila kutya Paulus okwe mu eta motempeli.

³⁰ Osho ngeyi epiyagano olya taandele noshilando ashihe, naantu oyendji oya mbombolokele ko. Oyo oya nukile Paulus noye mu kookololele pondje yotempeli. Mbalambala omiyelo dhotempeli odhe edhilwa po.

³¹ Ano aantu manga ya li taa kambadhala okudhipaga Paulus, elaka olya thiki momakutsi gomuwiliki omukuluntu gwaakwiita Aaroma kutya Jerusalem ashihe oshi li po sha mbuyagana.

³² Mbalambala omuwiliki omukuluntu gwaakwiita okwa kutha aawiliki yalwe naakwiita noya matukile kongundu yaantu. Aantu sho ye mu mono e na aakwiita, oye etha okudhenga Paulus.

³³ Omuwiliki okwa yi ihe kuPaulus, okwe mu kwatitha nokwa gandja elombwelo kutya na mangwe nomalyenge gaali. Opo ihe okwa pula aantu ta ti: “Omulumentu nguka oye lye nokwa ninga shike?”

³⁴ Ihe aantu yamwe yomongundu oyi igidha taa popi oshinima shontumba, nooyakwawo oshongandi. Omuwiliki okwa nyengwa okukoneka kutya oshike naanaa sha ningwa po. Onkee okwa lombwele aakwiita ye, ya fale Paulus mepopilongulu.

³⁵ Ano aakwiita sho ye ende naye piilondelo, oye mu humbata komapepe omolwepindjalo lyaantu.

³⁶ Oshoka ongundu onene yaantu oye ya landula tayi igidha tayi ti: “Mu dhipaga!”

³⁷ Ano sho ya li poku mu fala mepopilongulu, Paulus okwa pula omuwiliki omukuluntu gwaakwiita ta ti: “Otandi vulu tuu oku ku lombwela sha?” Omuwiliki okwe mu pula ta ti: “Oho popi Oshigreka?

³⁸ Hangoye nani Omuegipiti ngwiyaka a li a tamekitha ondumbo mokati kaalumentu omayuvi gane ya homata pomasiku ngeyaka ga piti nokwa yi nayo mombuga?”

³⁹ Paulus okwe mu yamukula a ti: “Ngame Omujuda. Onda valelwa muKilikia moshilando shiyaka sha simana shaTarsus. Alikana, kwatha ndje, ndi popithe aantu mbaka!”

⁴⁰ Omuwiliki gwaakwiita okwe mu pe ezimino. Onkee Paulus okwa mweneke aantu noshikaha; naasho ya mwena, okwe ya popitha mOshihebeli a ti:

22

¹ “Aalumentu ne, aamwameme nootate, pulakeneni, sho tandi ipopile koshipala sheni.”

² Ano sho yu uvu te ya popitha mOshihebeli, oya mwena thilu. Nena Paulus okwa tsikile ihe okupopya ta ti:

³ “Ngame Omujuda, nda valelwa muTarsus shomuKilikia nonda putudhilwa muka muJerusalem. Omulongi gwandje oGamaliel. Ngame onda longwa nawa okutseya ompango yookuku nonda li omulaadhi mokulongela Kalunga pamukalo naanaa ngoka mu li ngashingeyi.

⁴ Nokuli ngame onda hepekele nonda dhipaga aantu mboka haa landula ondjila yuukriste. Onda li nda kwata aalumentu naakiintu nonde ya edhilile mondholongo.

⁵ Omuyambimukuluntu niilyo ayihe yoshigongi shaatokoli otaa vulu okukoleka kutya ote popi oshili. Oyo naanaa mboka ya li ya pe ndje oontumwafo dha nyolelwa Aajuda ooyakwetu yomuDamaskus, opo ndi ye ko, ndi ke ya kwate nondi ya ete kuJerusalem ya mangwa nomalyenge, ya wape okugeelwa.”

⁶ “Ano mokweenda kwandje, manga nda li mondjila pokati komutenya tandi ihilile kuDamaskus, ohaluka yowala onda adhiminwa kuuyelele uunene wa zi megulu nowa kondeke ndje.

⁷ Nena ondi ihata pevi nondu uvu ewi tali popitha ndje tali ti: ‘Saulus, Saulus, omolwashike to tidhagana ndje?’

⁸ Ongame onda pula ihe nda ti: ‘Ongoye lye ano, Omuwa?’ Oye okwa yamukula ndje a ti: ‘Ongame Jesus Omunasareti, oongoka to mu tidhagana.’

⁹ Aalumentu mboka ya li pamwe nangame, oya mono uuyelele, ihe ewi ndyoka lya popitha ndje, inaye li uva.

¹⁰ Nena onde mu pula nda ti: ‘Omuwa, ondi na okuninga shike?’ Oye okwa lombwele ndje ihe ta ti: ‘Thikama, inda kuDamaskus. Oko hoka to ka lombwelwa ashihe shoka Kalunga a hala, u ninge.’

¹¹ Uuyelele mbuka owa tsikitha omeho gandje, onkee aalumentu mboka ya li pamwe nangame, oya kwata ndje keti e taa fala ndje kuDamaskus.

¹² “Okwa li ku na omulumentu gumwe, edhina lye Ananias, ha simaneke Kalunga nonakuvulika kompango, ngoka a li a simanekwa kAajuda ayehe yomuDamaskus.

¹³ Oye okwe ya kungame, a hedha ponto yandje nokwa lombwele ndje e ta ti: ‘Mumwameme Saulus, mona ko ishewe!’ Pethimbo olyo tuu ndyoka onda mono ko nonde mu tala.

¹⁴ Opo ihe okwa lombwele ndje e ta ti: ‘Kalunga ngoka ootate ya kala haye mu longele, okwe ku hogolola, opo u tseye ehalo lye, ngoye u mone Omuntu gwe omuyuuki nou uve ewi lye, sho te ku popitha.

¹⁵ Oshoka ongoye oto ka ninga onzapo ye okuhokololela aantu ayehe shoka we shi mono nowe shi uvu.

¹⁶ Nokuli ngashingeyi oto tegelele we shike? Thikama, u ithane edhina lye ngoye u shashwe, noondjo dhoye dhi dhimwe po.’ ”

¹⁷ “Nena onda shuna kuJerusalem, nomanga nda li te galikana motempeli, onda mono emoniko,

¹⁸ ndi wete Omuwa ta lombwele ndje ta ti: ‘Endelela, u ze mo muJerusalem, oshoka aantu yaamuka itaa ka itaala nando shoka to ya lombwele, sho to hokolola ndje.’

¹⁹ Ngame onde mu yamukula nda ti: ‘Omuwa, oyo oye shi shi kutya onda li handi yi moosinagoga okukwata nokudhenga aantu ayehe mboka ye ku itaala.

²⁰ Nokuli nomumati omuhokololi gwoye Stefanus sho a dhipagwa, nangame wo opo nda li. Onda li nda panda okudhipagwa kwe nonda li tandi tonatele oonguwo dhaadhipagi ye.’

²¹ Ihe Omuwa okwa lombwele ndje ta ti: ‘Inda ko, oshoka otandi ke ku tuma kokule kaapagani.’ ”

²² Sigo oompoka aantu oya pulakene Paulus, opo ihe oya tameke okwiigidha mokule ya ti: “Na ze po! Na dhipagwe! Oye ina gwana we okukala e na omwenyo!”

²³ Oyo oya li taa igidha yo taa dhungadhunga oonguwo dhawo e taa fundu evi.

²⁴ Nena omuwiliki omukuluntu gwaakwiita Aaroma okwa lombwele aamati ye, ya fale Paulus meni lyepopilongulu. Oye okwe ya lombwele, ye mu pule noku mu dhenga, opo yu uve kutya omolwashike Aajuda taye mu kugilile ngeyi.

²⁵ Ihe sho ye mu manga, ya vule oku mu dhenga noongola, Paulus okwa pula omukuluntu gwaakwiita, ngoka a li a thikama puyo e ta ti: “Osha pitikwa tuu pampango okudhenga Omuroma, manga ina pangulwa, a monike ondjo?”

²⁶ Omukuluntu nguno sho e shi uvu, okwa yi komuwiliki omukuluntu gwaakwiita e te mu pula ta ti: “Oto ningi ngiini ngawo? Omulumentu nguka Omuroma.”

²⁷ Nena omuwiliki omukuluntu gwaakwiita okwa yi kuPaulus nokwe mu pula a ti: “Lombwela ndje, ngoye ngele Omuroma?” Paulus okwe mu yamukula a ti: “Eeno, osho.”

²⁸ Omuwiliki gwaakwiita okwa ti: “Ngame onda mono uukwashigwana mbuka wAaroma, sho nda futu epangelo iimaliwa oyindji.” Paulus okwe mu yamukula a ti: “Ihe ngame Omuromalela kevalo.”

²⁹ Mbalambala aalumentu mboka ya li ye na okupula Paulus, oye mu etha. Nokuli omuwiliki gwaakwiita okwa li a tila, sho a dhimbulula kutya nani Paulus ngoka e mu mangitha nomalyenge, oye Omuroma.

³⁰ Omuwiliki omukuluntu gwaakwiita okwa li a hala okutseya kutya oshike naanaa Aajuda taa tamanekele Paulus. Onkee esiku lya landula okwa lombwele aamati ye, ya mangulule mo Paulus momalyenge. Nena oye okwa hiya ihe aayambi aakuluntu naakuluntu ayehe yAajuda, ye ye koshigongi shawo nokwe eta mo Paulus e te mu thikameke komeho gawo.

23

¹ Paulus okwa tongolola oshigongi shaatokoli Aajuda nokwa popi e ta ti: “Aamwameme! Sigo onena ndjika eiyuvo lyandje olya yela koshipala shaKalunga.”

² Omuyambimukuluntu Ananias okwa lombwele aantu mboka ya thikama popepi naPaulus, ye mu kwate komulungu.

³ Ihe Paulus okwe mu lombwele ta ti: “Kalunga ne ku dhenge, kuma ngoye etokele lya thethengwa kombanda! Owa kuutumba mpoka, u pangule ndje ongaangoka nda yono ompango, ihe ngoye mwene oto yono ishewe ompango, sho to lombwele aantu, ya dhenge ndje!”

⁴ Aalumentu mboka ya li popepi naPaulus, oye mu lombwele noya ti: “Oto sheke omuyambimukuluntu gwaKalunga?”

⁵ Paulus okwa yamukula nokwa ti: “Aamwameme, inandi tseya, ngele oye omuyambimukuluntu. Oshoka enyolo otali ti: ‘Ino sheka omuleli gwoshilongo shaandjeni.’ ”

⁶ Ano Paulus sho a dhimbulula kutya nani yamwe yomongundu aasadukayi nooyakwawo aafarisayi, okwa popi mokule moshigongi e ta ti: “Aamwameme, ongame omufarisayi nomuna gwaafarisayi. Otandi pangulwa, oshoka ondi itaala kutya aasi otaa ka yumudhwa.”

⁷ Ano sho a popi ngeyi, aafarisayi naasadukayi oya tameke okuludhika, onkee oshigongi osha topoka.

⁸ (Oshoka aasadukayi otaa ti: “Aantu itaa ka yumudhwa kuusi, aayengeli noombepo kaye ko.” Ihe aafarisayi oyi itaala iinima mbika ayihe itatu.)

⁹ Nena euyagano olya ningi enene naalongimpango yamwe yomongundu yaafarisayi oya thikama e taa ludhike nuulaadhi taa ti: “Tse inatu dhimbulula uuwinayi washa momulumentu nguka. Pamwe okwa popithwa kombepo nenge komuyengeli.”

¹⁰ Omaludhi oga tana noonkondo, onkee omuwiliki omukuluntu gwaakwiita okwa tila kutya pamwe otashi vulika, aantu ya nyanyagule po Paulus. Onkee okwa lombwele aakwiita, ya ka kuthe mo Paulus mokati kongundu yaantu, ye mu fale mepopilongulu.

¹¹ Ihe uusiku mbwiyaka wa landula Omuwa okwa thikama puPaulus nokwa ti: “Ikolelela! Ngaashi wa hokolola ndje muJerusalem, ou na oku shi ninga wo muRoma.”

¹² Ongula yesiku lya landula Aajuda oya gongala noya pangele ompangela. Oyo oya gana egano kutya itaa li yo itaa nu nando osha, manga inaa dhipaga Paulus.

¹³ Aalumentu mboka ya pangele ompangela ndjika, oya li ye vule omilongo ne.

¹⁴ Nena oyo oya yi kaayambi aakuluntu nokaakuluntu e taye ya lombwele taa ti: “Otse otwa gana egano lya mana mo kutya itatu li nando osha, manga inaatu dhipaga Paulus.

¹⁵ Ano ne noshigongi ashihe shaatokoli, tumineni omuwilikimukuluntu gwaakwiita Aaroma elaka kutya ne ete Paulus kune, ongaamboka mwa hala okumona natango uuyelele washa kombinga ye. Ihe tse otwi ilongekidha oku mu dhipaga, manga nokuli inaa thika kune.”

¹⁶ Ihe omumati omutekulu gwaPaulus oku uvu ompangela ndjika. Oye okwa yi kepopilongulu nokwe shi lombwele Paulus.

¹⁷ Nena Paulus okwi ithana gumwe gwomaakuluntu yaakwiita nokwe mu lombwele ta ti: “Fala omumati nguka komuwiliki omukuluntu, oshoka oye oku na sha shoku mu lombwela.”

¹⁸ Oye okwe mu kutha nokwe mu fala komuwiliki gwaakwiita nokwe mu lombwele e ta ti: “Onkwatwa Paulus okwi ithana ndje e ti indile ndje, ndi ete omumati nguka kungoye, oshoka oku na sha aniwa oku ku lombwela.”

¹⁹ Nena omuwiliki omukuluntu okwe mu kwata koshikaha e te mu kutha po paantu nokwe mu pula ta ti: “Owa hala ano okulombwela ndje shike?”

²⁰ Nena omumati okwe mu lombwele a ti: “Tala, Aajuda oyu uvanene oku ku indila, u tume Paulus ongula koshigongi shaatokoli ongaamboka ya hala ando okumona natango uuyelele washa kombinga ye.

²¹ Ihe ino ya zimina nando, oshoka ope na aalumentu ye vule omilongo ne yomokati kawo, taa ka kala ye mu langela. Oyo oya gana kutya itaa li noitaa nu nando osha, manga inaaye mu dhipaga. Nokuli ngashingeyi oye li po yi ilongekidha noya tegelela ashike etokolo lyoye.”

²² Omuwiliki gwaakwiita okwa lombwele ihe omumati e ta ti: “Ino hokololela nando omuntu gumwe kutya oshinima shika owe shi lombwele ndje.” Oye nokwe mu laleke ihe, a ye.

²³ Nena omuwiliki omukuluntu gwaakwiita okwi ithana yaali yomaakuluntu yaakwiita nokwe ya lombwele ta ti: “Kutheni aakwiita yokolupadhi omathele gaali, aakwiita yokuukambe omilongo heyali naaumbi yomagonga omathele gaali, ya ye kuKesarea. Kaleni mwi ilongekidhila okuthikama potundi ontimugoyi yuusiku wonena.

²⁴ Longekidheni wo uukambe umwe wokulondwa kuPaulus, ne mu mu fale komuleli gwoshilongo Feliks.”

²⁵ Nena omuwiliki omukuluntu gwaakwiita okwa nyola ontumwafo yi li ngeyi:

²⁶ “Ya zi kuKlaudius Lisias, ya nyolelwa omusimanekwa, omuleli Feliks: Omakundo.

²⁷ Omusimanekwa, Aajuda oya kwata omulumentu nguka noya ale ye mu dhipage. Ndele ngame onda kundana kutya oye Omuroma, onkee onda matukile ko naakwiita yandje nonde mu hupitha.

²⁸ Sho nda li nda hala okutseya shoka taye mu tamanekele, onde mu tumu koshigongi shaatokoli yawo.

²⁹ Ihe onda dhimbulula kutya ina ninga nando osha sha gwana oku mu dhipagitha nenge oku mu tulitha mondholongo. Nani ota tamanekelwa ashike iinima yimwe yi na sha nompango yawo.

³⁰ Ano sho nda tseyithilwa kutya oku na Aajuda yamwe yu uvanena oku mu dhipaga, onda tokola oku mu tuma kungoye. Onda lombwele wo aatamaneki ye kutya naye mu tamanekele koshipala shoye.”

³¹ Aakwiita oya ningi ngaashi ya lombwelwa. Oyo oya kutha Paulus noye mu fala sigo okuAntipatris uusiku mbwiyaka.

³² Esiku lya landula aakwiita yokolupadhi oya galukile kepopilongulu noye ethele Paulus miikaha yaakwiita yokuukambe, ye ke mu thikithe.

³³ Oyo oye mu fala kuKesarea, oya gandja ontumwafo komuleli Omuroma noye mu pe wo Paulus.

³⁴ Omuleli okwa lesha ontumwafo nokwa pula Paulus kutya oye ogwomoshitopolwa shini. Ano sho u uvu kutya Paulus ogwokuKilikia,

³⁵ okwe mu lombwele e ta ti: “Onda hala okupulakena oohapu dhoye, aatamaneki yoye ngele ya thiki.” Opo ihe okwa gandja elombwelo kutya Paulus na ka kale a langelwa mombala yaHerodes.

24

¹ Sho pwa piti omasiku gatano, omuyambimukuluntu Ananias okwa yi kuKesarea pamwe naakuluntu yamwe nomunongompango, edhina lye Tertullus. Oyo oye ya koshipala shomuleli Feliks, ya tamaneke Paulus.

² Paulus sho e etwa mo, Tertullus okwa tameke okupa Paulus uusama a ti: “Omusimanekwa Feliks! Sho wa lele noondunge ethimbo ele, oshe tu pe ombili. Omalunduluko ogendji omawanawa moluuwanawa woshilongo shetu oga ningwa.

³ Tse ohatu hempulula aluhe naakuhe oshinima shika notatu ku pandula noonkondo.

⁴ Ihe inandi hala unene okumana po ethimbo lyoye, onkee otandi ku indile, u idhidhimike okupulakena ehokololo lyetu pafupi.

⁵ Omulumentu nguka otwe mu mono kutya omupiyaganeki. Oye ota piyaganeke Aajuda muuyuni auhe noye omuwiliki gwoshimpaga shAanasareti.

⁶ Oye okwa li ta kambadhala nokuli okunyateka otempeli yetu, onkee otwe mu kwata. [Otwa li twa hala oku mu pangula pampango yetu yene,

⁷ ihe omuwiliki omukuluntu gwaakwiita, Lisias, okwe ya po nokwe tu mu yugu koonkondo.

⁸ Nena Lisias okwe tu lombwele ihe kutya natu ye, tu mu tamanekele koshipala shoye.] Ngele wa pula omulumentu nguka, nena oto ka vula okutseya iinima ayihe mbyoka tatu yi mu tamanekele.”

⁹ Aajuda oya koleke wo kutya iinima mbyoka ayihe oyoshili.

¹⁰ Opo ihe omuleli okwa pe Paulus ompito yokupopya, Paulus okwa popi a ti: “Onda tseya kutya owa kala omupangeli moshigwana shika oomvula odhindji, onkee onda nyanyukwa, sho ndi na ompito okwiipopila koshipala shoye.

¹¹ Ngaashi naanaa ngoye mwene to vulu oku shi tseya, opwa piti ashike omasiku omulongo nagaali, ngame sho nda yile kuJerusalem oku ka galikana Kalunga motempeli.

¹² Aajuda inaa mona ndje nando tandi ludhike nomuntu motempeli. Osho wo inaa mona ndje tandi tsu aantu omaminimini moosinagoga nenge peha lilwe lyontumba moshilando.

¹³ Nokuli itaa vulu nando oku ku pa etompelo lyiinima mbyoka taa tamanekele ndje.

¹⁴ Ihe otandi hempulula mpaka koshipala shoye: Ngame ohandi longele Kalunga kootate nokulandula ondjila ndjika taa ti kutya oya puka. Ondi itaala wo iinima ayihe mbyoka ya nyolwa mompango yaMoses nomomambo gaahunganeki.

¹⁵ Ondi na wo etegameno limwe pamwe nayo kutya Kalunga ota ka yumudha aantu ayehe kuusi, naawanawa naawinayi.

¹⁶ Onkee ohandi kambadhala aluhe okukala ndi na eiyuvo lya yela koshipala shaKalunga noshaantu.

¹⁷ “Ano sho nda ningi oomvula odhindji ndaa mo muJerusalem, onda yile ko okufaalela aantu yoshigwana shetu omagano giimaliwa nokuyambela Kalunga omayambo.

¹⁸ Ano manga nda li tandi longo iilonga mbika, oyi itsu ndje motempeli, nda adhika opo nda mana ko omasiku geiyogo. Kapwa li nando ongundu yaantu noinapu holoka epiyagano lyasha.

¹⁹ Opwa li ashike Aajuda yamwe ya za kuAsia. Naye ye yo yene mpaka koshipala shoye, ye ku hokololele, ngele ondi na uusama washa.

²⁰ Nongele pamwe aalumentu mbaka ye li mpaka, oya monene ndje ondjo yasha, sho nda li tandi ipopile koshipala shawo moshigongi shaatokoli, nena naye shi popye.

²¹ Nenge pamwe osho ndi igidhile, manga nda thikama koshipala shawo nda ti: ‘One otamu pangula ndje, sho ndi itaala kutya aasi otaa ka yumudhwa.’ ”

²² Ihe Feliks sho a li a tseya oshindji kombinga yondjila yOmuwa, okwa mweneke manga iihokolola. Oye okwa lombwele Aajuda ta ti: “Otandi ka pulakena ishewe oohapu dheni, uuna Lisias, omuwiliki omukuluntu gwaakwiita, te ke ya.”

²³ Opo ihe okwa lombwele omukuluntu gwaakwiita ngoka ha tonatele Paulus, kutya na tsikile natango oku mu langela, ihe ne mu pe emanguluko lyontumba, opo nookuume ke ya mone ompito yoku mu yakula moompumbwe dhe.

²⁴ Omasiku gamwe sho ga piti po, Feliks okwe ya pamwe nomukadhi Drusila, ngoka a li Omujuda. Feliks okwi ithana Paulus nokwe mu pulakene, sho ta hokolola okwiitaala Jesus Kristus shoka taku ti.

²⁵ Ihe Paulus sho a tsikile okupopya kombinga yuuwanawa, eikwatonawa nesiku lyepangulo ndyoka tali ya, Feliks okwa haluka nokwa ti kuye: “Sha gwana manga, otandi ke ku ithana ishewe, ngele nda mono ethimbo.”

²⁶ Ihe kombinga onkwawo okwa li ta dhiladhila kutya pamwe Paulus ote mu pe iimaliwa, onkee okwa kala he mu ithana olwindji, a popye naye.

²⁷ Oomvula mbali sho dha piti po, Porkius Festus okwa ningi omuleli gwoshitopolwa shoka peha lyaFeliks. Ano Feliks sho a li a hala okuhokiwa kAajuda, okwa ethele Paulus mondholongo.

25

¹ Konima yomasiku gatatu Festus sho a ningi omuleli gwoshitopolwa shoka, okwa zi mo muKesarea a ta yi kuJerusalem.

² Nena aayambi aakuluntu naawiliki yAajuda oye ya kuFestus noya tameke oku mu hokololela uusama waPaulus mpoka u li. Oyo oyi indile ihe Festus,

³ e ya kwathe, a tume ko Paulus kuKesarea, e ye kuJerusalem, oshoka oya adhika ya pangela ompangela, ye mu dhipagele mondjila.

⁴ Ihe Festus okwe ya yamukula nokwa ti: “Paulus oku li muKesarea a kwatwa, nangame mwene otandi ka shuna mbala hwiyaka.

⁵ Aawiliki yeni naa ye kuKesarea pamwe nangame, ye ke mu tamanekele hwiyaka, ngele oku na shoka a yona.”

⁶ Festus okwa menekele natango puyo uule womasiku gahetatu nenge omulongo nokwa shuna kuKesarea. Esiku lya landula okwa kuutumba koshipundi shepangulo nokwa lombwele aakwiita, ye ete mo Paulus.

⁷ Ano Paulus sho e ya mo, Aajuda mboka ya zi kuJerusalem, oye mu kundukidha noya tameke oku mu pa oondjo odhindji noondhigu, ihe oya nyengwa oku dhi monena omatompelo.

⁸ Oshoka Paulus okwi ipopile a ti: “Ongame inandi ninga nando osha sha tsa ondumbo nompango yAajuda nenge notempeli nenge nomupangeli Omuroma.”

⁹ Ihe Festus okwa li a hala okwoopalela Aajuda, onkee okwa pula Paulus ta ti: “Owa hala, tu ye kuJerusalem, ndi ka pulakene oohapu dhoye hwiyaka?”

¹⁰ Paulus okwe mu yamukula a ti: “Ngame onda thikama mompangu yomupangeli Omuroma nopo mpaka nda hala, ndi uthilwe oohapu dhandje. KAajuda inandi pogola ko nando osha, ngashika nangoye mwene u shi shi nawa.

¹¹ Mpaka itandi indile ando, ndaa dhipagwe, ngele nani onda yona ompango nonda ninga sha, shoka sha gwana okugeelitha ndje neso. Ihe ngele iinima mbyoka taa tamanekele ndje, kaayi shi yoshili, nena kape na nando omuntu ta vulu okugandja ndje miikaha yawo. Ngame otandi igameke komupangeli Omuroma.”

¹² Festus sho a kundathana nomalenga ge, okwa lombwele Paulus a ti: “Ngoye sho wi igameke komupangeli Omuroma, onkee ano okuye u na okuya.”

¹³ Omasiku gamwe sho ga piti po, omukwaniilwa Agrippa naBernike oye ya kuKesarea okutalela po noku kunda Festus.

¹⁴ Ano sho ya ningi mo omasiku gamwe, Festus okwa hokololele omukwaniilwa okukala kwaPaulus a ti: “Muka omu na omulumentu onkwatwa a thigwa mo kuFeliks.

¹⁵ Ngame sho nda yile kuJerusalem, aayambi aakuluntu naakuluntu yAajuda oyi ile kungame e taa hokololele ndje shoka taye mu tamanekele noyi indile ndje, ndi mu pangule.

¹⁶ Ihe ngame onde ya lombwele nda ti: Aaroma ihaa gandja omutamanekwa, manga inaa tulwa pamwe naatamaneki ye, opo a mone ompito yokwiipopila mwaashoka ta tamanekelwa.

¹⁷ Ano sho ye ya huka, ngame mbalambala mesiku lya landula onda kuutumba koshipundi shepangulo nonda lombwele aamati, ye ete mo omutamanekwa.

¹⁸ Nena aatamaneki ye oya thikama e taye mu tamaneke, ihe nani itaye mu tamanekele eyono enene, ngaashi nda li nda dhiladhila.

¹⁹ Nani otaye mu tamanekele ashike iinima yimwe yi na sha nelongelokalunga lyawo nosho wo kombinga yanakusa gumwe, edhina lye Jesus, ngoka Paulus ta ti kutya oku na omwenyo.

²⁰ Ngame sho nda li mokwaashisha, oshinima sha tya ngeyi nkene shi na okukonakonwa, onda pula Paulus, ngele okwa hala okuya kuJerusalem, opo ndi ka pulakene oohapu dhe hwiyaka.

²¹ Ihe Paulus okwi igameke komupangeli Omuroma nokwi indile, a kale mondholongo, sigo omupangeli Omuroma ta ka tokola oohapu dhe. Onkee ano onda gandja elombwelo kutya na kale manga mondholongo sigo okesiku ndyoka tandi ka mona ompito oku mu tuma, a ye komupangeli Omuroma.”

²² Nena Agrippa okwa lombwele Festus a ti: “Nangame wo onda hala okupulakena oohapu dhomulumentu ngoka.” Festus okwe mu yamukula a ti: “Oto ke dhi pulakena ngula.”

²³ Esiku lya landula Agrippa naBernike oya thindikilwa nesimaneko enene koshinyanga shiihokolola kaakuluntu yaakwiita nokaanenentu yomoshilando. Nena Festus okwa gandja elombwelo, Paulus e etwe mo.

²⁴ Opo ihe Festus okwa lombwele Agrippa ta ti: “Omukwaniilwa Agrippa naasimanekwa amuhe mboka mu li mpaka pamwe natse! Omulumentu nguka mu wete, oye ngoka Aajuda ayehe yaamuka muKesarea nokuJerusalem haye mu tamaneke koshipala shandje. Oyo ohaa igidha mokule taa ti kutya na dhipagwe.

²⁵ Ihe ngame kandi wete nando kutya okwa ninga sha, shoka sha gwana oku mu dhipagitha. Onkee ano ye mwene sho i igameke komupangeli Omuroma, onda hala oku mu tuma kuye.

²⁶ Ihe kandi na naanaa sha, shoka nda gwana oku shi lombwela omupangeli Omuroma, ngele tandi mu nyolele. Onkee onde mu eta mpaka koshipala sheni, unene koshipala shoye, omukwaniilwa Agrippa. Opo ihe ngele wa konakona oshinima she, pamwe tandi mono po wo tuu sha sha gwana okunyolwa.

²⁷ Oshoka osha nika uugoya kungame okutuma onkwatwa pwaa na etseyithilo lya yela lyaashoka ta tamanekelwa.”

26

¹ Agrippa okwa lombwele ihe Paulus a ti: “Ou na ompito yokwiipopila.” Nena Paulus okwa yelutha oshikaha she nokwi ipopile ta ti:

² “Omukwaniilwa Agrippa! Ondu uvite kutya ngame omunelago, sho nda pitikilwa okwiipopila koshipala shoye omolwiinima ayihe mbyoka Aajuda taa yi tamanekele ndje.

³ Eeno, shika oshoshili, oshoka ngoye owa tseya nawa oohedhi nomapulo gAajuda. Onkee otandi ku indile, u idhidhimike okupulakena ndje.

⁴ “Okuputuka kwandje akuhe sigo omuugundjuka Aajuda oye ku shi, oshoka okuza petameko sigo onena onda kala moshilongo shaandjetu nomuJerusalem.

⁵ Ngele oya hala, otaa vulu okuhokolola kutya noshitonale ngame onda kala gumwe gwomaafarisayi, mboka haa dhiginine nuulaadhi auhe eitaalo lyetu. Nongele oya hala oku shi holola, otaa vulu oku shi ninga.

⁶ Ngashingeyi onda thikama mpaka tandi pangulwa molwaashoka ondi itaala omauvaneko ngoka Kalunga e ga uvanekela ootatekulu.

⁷ Omolwomauvaneko tuu ngaka omazimo agehe omulongo nagaali gomoshigwana shetu ohaga longele Kalunga omutenya nuusiku, naantu oya tegelele, Kalunga e ge ya gwanithile. Etegameno ndika, omukwaniilwa omusimanekwa, olyo tandi tamanekelwa kAajuda.

⁸ Omolwashike ano ne Aajuda tamu nyengwa okwiitaala kutya Kalunga ota yumudha aasi?

⁹ “Nangame wo onda li ndu uvite kutya ondi na okukondjitha noonkondo adhihe edhina lyaJesus Omunasareti.

¹⁰ Osho nda ningile muJerusalem. Onda li nda pewa oonkondo kaayambi aakuluntu nonde edhilile aantu oyendji yaKalunga mondholongo. Nokuli naasho ya tokolelwa eso, onda li nde shi panda.

¹¹ Olwindji onde ya dhengitha moosinagoga adhihe nonda kambadhala oku ya thiminika, yi idhimbike eitaalo lyawo. Onda li nde ya geele noonkondo, onkee onda yi sigo okiilando yokiilongo yilwe oku ya tidhagana.”

¹² “Nelalakano ndika onda yile kuDamaskus ndi na oonkondo nomapitikilo ga za kaayambi aakuluntu.

¹³ Ano sho nda li mondjila pokati komutenya, omukwaniilwa omusimanekwa, onda mono uuyelele owindji u vule mboka wetango wa zi kegulu nowa kondeke ndje pamwe naalumentu mboka twa li nayo.

¹⁴ Tse atuhe otwi ihata pevi, ngame nondu uvu ewi tali popitha ndje mOshihebeli tali ti: ‘Saulus, Saulus, omolwashike to tidhagana ndje? Ngoye oto ialula ngoye mwene, sho to thanga ondungu yegonga.’

¹⁵ Nena onde mu pula nda ti: ‘Ongoye lye, Omuwa?’ Oye okwa yamukula a ti: ‘Ongame Jesus ngoka to mu tidhagana.

¹⁶ Ihe thikama, ikolelela komagulu goye. Ongame onde ku ihololele, opo ndi ku longekidhe, u ninge omuyakuli gwandje. Ongoye ou na okuhokololela aantu yalwe shoka we shi mono nena, naashoka tandi ke ku hololela komeho.

¹⁷ Ngame otandi ke ku hupitha miikaha yAaisraeli noyaapagani mboka tandi ku tumu kuyo.

¹⁸ Ngoye ou na okutonatitha omeho gawo, opo ya ze mo momilema, ye ye muuyelele, yo ya thige po epangelo lyaSatana, ye ye kuKalunga. Nena omolweitaalo lyawo okwiitaala ndje otaa ka dhiminwa po oondjo dhawo notaa ka pewa eha mongundu yaahogololwa yaKalunga.’

¹⁹ “Onkee ano, omukwaniilwa Agrippa, ngame onda zimine okuvulika kemoniko lyomegulu.

²⁰ Onkee ondu uvithile tango muDamaskus nomuJerusalem, opo ihe onde shi ningi moshilongo shaJudea ashihe nomokati kaapagani wo. Onde ya lombwele, yi itedhulule, ye ethe uulunde noya galukile kuKalunga, ya longe iilonga mbyoka tayi holola kutya oyi itedhulula.

²¹ Ano omolwokuuvitha kwa tya ngeyi Aajuda oya kwata ndje, manga nda li motempeli, noya li taa kambadhala okudhipaga ndje.

²² Ihe Kalunga okwa kwatha ndje, onkee sigo onena onda thikama mpaka notandi hololele aantu ayehe, naanamadhina naadhinwa, oshili. Nokuli shoka tandi popi, osho naanaa shoka aahunganeki naMoses ya tile kutya onashi ka ningwa:

²³ kokutya Kristus oku na okusa, opo a ninge omutango mokuyumudhwa kuusi ye a uvithile Aajuda naapagani uuyelele wehupitho.”

²⁴ Ano Paulus sho kwa li ti ipopile ngeyi, Festus okwe mu popitha newi enene a ti: “Paulus, oto yi oonkwengu! Elongo lyoye enene notali pilaaleke oondunge dhoye!”

²⁵ Paulus okwe mu yamukula a ti: “Aawe, omusimanekwa Festus, inandi pilaala, ihe otandi popi oohapu dhoshili nodhi shi kwiinekelwa.

²⁶ Omukwaniilwa Agrippa, otandi vulu oku ku hokololela iinima mbika nomukumo aguhe, oshoka ngoye owe yi tseya nawa. Ondi inekela shili kutya iinima mbika ayihe owe yi koneka, oshoka inayi ningilwa meholamo.

²⁷ Omukwaniilwa Agrippa, owi itaale tuu shoka sha nyolwa kaahunganeki? Eeno, ondi shi kutya owe shi itaala.”

²⁸ Nena Agrippa okwa lombwele Paulus a ti: “Oto dhiladhila aniwa kutya oto vulu okuninga ndje omukriste mokathimbo okafupi ke thike mpoka?”

²⁹ Paulus okwe mu yamukula a ti: “Kashi na mbudhi kutya ethimbo ele nenge efupi, ngame otandi galikana ashike Kalunga, opo ngoye pamwe naantu ayehe mboka taa pulakene ndje ngashingeyi, mu ninge aakriste ngangame. Kakele ashike kaashoka kutya inandi hala, mu mangwe.”

³⁰ Nena omukwaniilwa, omuleli gwoshilongo, naBernike naantu yalwe ayehe mboka ya li pamwe nayo, oya thikama e taa yi.

³¹ Ano mokweenda kwawo oya kundathana taa ti: “Omulumentu nguka ina ninga nando osha shoka sha gwana oku mu dhipagitha nenge oku mu tulitha mondholongo.”

³² Agrippa okwa lombwele ihe Festus a ti: “Omulumentu nguka ando okwa li ini igameka komupangeli Omuroma, ando ota mangululwa ashike.”

27

¹ Ano sho pwa tokolwa kutya otu na okuya kuItalia nosikepa, Paulus noonkwatwa yalwe ooyakwawo oya gandjwa miikaha yomukuluntu gwaakwiita gumwe, edhina lye Julius. Oye okwa li omukuluntu gwetanga lyaakwiita yAaroma ndyoka haku tiwa “Etanga lyomupangeli Omuroma”.

² Nena otse otwa londo mosikepa yokuAdramiti, ndjoka ya li pokuthikama yu uka pomahelulilo ngoka ge li komunkulo gwefuta moshitopolwa shaAsia, notwa yi ihe. Aristarkus Omumakedonia gwokuTessalonika okwa yi pamwe natse.

³ Esiku lya landula okwa thiki kuSidon. Julius okwa li e na ombili naPaulus nokwe mu pe epitikilo oku ka talela po ookuume, opo ye mu pe shoka te shi pumbwa.

⁴ Okuza muSidon otwa tsikile olweendo nosikepa, ihe molwaasho ombepo oya li tayi tu dhenge noonkondo moshipala, otwa gama kombinga yontuntu yaKipro, opo tu henuke ombepo ndjoka onene.

⁵ Ano sho twa taaguluka efuta ndyoka lya gama komunkulo gwaKilikia naPamfilia, otwa thiki kuMira, oshilando shomuLikia.

⁶ Hwiyaka omukuluntu gwaakwiita okwa mono ko osikepa tayi zi kuAleksandria yu uka kuItalia nokwe tu lombwele, tu londe muyo.

⁷ Otse otwe ende kashona nakashona nuudhigu uunene, sigo lwahugunina otwa li ontega noshilando shedhina Knidos. Ihe ombepo sho ya li tayi tu dhenge moshipala, otwa nyengwa okuya koshilando shoka. Onkee otwa pitilile oshimpoko shaSalmoni notwe ya popepi nontuntu yaKreta kombinga ndjoka ihaaku pepe ombepo ondhigu.

⁸ Otwe ende twi igameka popepi nomunkulo notwa thiki nuudhigu uunene peha ndyoka hali ithanwa “Omatulilo omawanawa”, popepi noshilando shaLasea.

⁹ Opwa adhika pwa pita ethimbo ele, nosha ningi oshidhigu kutse okutsikila olweendo, oshoka esiku enene lyehanganitho nalyo wo olya adhika lya pita nale. Onkee Paulus okwe ya londodha a ti:

¹⁰ “Aalumentu ne, ondi wete kutya olweendo lwetu okuza mpaka otalu ka kala oludhigu nolu udha iiponga oyindji. Nokuli osikepa yo yene nofulaha yayo otayi ka mona oshiponga oshinene, ihe noomwenyo dhaantu otadhi ka kana wo.”

¹¹ Ihe omukuluntu gwaakwiita okwa li i inekela oohapu dhomuwiliki nodhamwene gwosikepa, onkee ina zimina shoka sha tiwa kuPaulus.

¹² Nokuli ehelulilo ndyoka kalya li unene ewanawa okukalwa pethimbo lyokufu. Onkee oyendji yomaalumentu mboka ya li mosikepa, oya li yu uvite kutya ihwepo ashike, yi idhenge mefuta yo ya kambadhale ya tale, ngele taa thiki kuFoiniks. Ndika olyo ehelulilo lyomuKreta lya taalela uuningininombugantu nuuningininombangalantu, moka ya li taa vulu okukala mo pokufu.

¹³ Ombepo oya tameke ihe okupepa kashona tayi ziilile lwokuumbugantu. Nena aalumentu oya dhiladhila kutya otaa vulu okuthika hoka ya hala okuya. Onkee oya hili mo ohangela noye ende ya kunkula nomunkulo gwontuntu yaKreta, ngaashi tashi vulika.

¹⁴ Ihe mbalambala ombepo onenenene, ndjoka hayi ithanwa. “Oshikungulu shokuuzilombangalantu”, oya tukuluka tayi ziilile kontuntu.

¹⁵ Oyo oya yakele osikepa, onkee sho twa nyengwa oku yi ukililitha mokati kombepo, otwa gu mo ngomondhikwa, notwe etha osikepa, yi falafalwe kombepo.

¹⁶ Opo ihe otwa mono epopilo lyasha, sho twa thiki kuumbugantu wokantuntu kedhina Kauda. Oko hoka twa vulu okuninga nawa okawato komosikepa, ihe otwe shi ningi nuudhigu uunene.

¹⁷ Nena oyo oye ka hilile ihe mosikepa noya manga osikepa noongodhi. Ihe oya li ya tila kutya pamwe osikepa otayi ki idhenga kiituntu yokohi yomeya pomunkulo gwaLibia, onkee oya kulukitha othayila noye etha osikepa, yi endithwe kombepo.

¹⁸ Oshikungulu shika oshinene osha tsikile oku tu dhungadhunga noonkondo, onkee esiku lya landula oya tameke okuumbila ofulaha mefuta,

¹⁹ nesiku etitatu lya landula ko oyu umbu mo niikaha yawo yene iilongitho yosikepa.

²⁰ Otwa kala omasiku ogendji inaatu mona nande etango nenge oonyothi, nombepo oya tsikile okupepa noonkondo. Lwahugunina otwa kanitha etegameno alihe lyokukala nomwenyo.

²¹ Ano aantu sho ya ningi omasiku ogendji inaaya lya sha, Paulus okwa thikama mokati kawo nokwe ya lombwele e ta ti: “Aalumentu ne, ando omwa li mwa taamba epukululo lyandje ne inamu za mo muKreta, ando omwa vulu okuyanda uupyakadhi mbuka auhe noshiponga shika.

²² Ihe ngashingeyi otandi mu indile, mu ikolelele. Oshoka kape na nando ogumwe gwomune ta kanitha omwenyo gwe; osikepa oyo ayike tayi ka yonuka po.

²³ Oshoka uusiku mbuka omuyengeli gwaKalunga kandje, Kalunga ngoka handi mu longele, okwa li i ihololele ndje

²⁴ nokwa lombwele ndje a ti: ‘Paulus, ino tila! Ongoye ou na oku ka thikama koshipala shomupangeli Omuroma. Nokuli omolwoye Kalunga ota ka hupitha ayehe mboka ye li pamwe nangoye mosikepa.’

²⁵ Onkee ano aalumentu ne, ikoleleleni, oshoka ngame ondi inekela lela kutya Kalunga ota ka tsakanitha naanaa shoka e shi lombwele ndje.

²⁶ Tseni otatu ka falafalwa kombepo sigo okomunkulo gwontuntu yontumba.”

²⁷ Uusiku wesiku etimulongo netine otwa adhika tatu alaalithwa natango kombepo mEfuta lyopokati. Ihe lwopokati kuusiku aanasikepa oya dhimbulula kutya otu li popepi nevi.

²⁸ Onkee oya kulukitha ongodhi yoshumbu noya mono kutya uule womeya gefuta owa li u thike poometa omilongo ne, naasho ye shi ningi ishewe konima yokathimbo, oya mona kutya uule womeya ou thike poometa omilongo ndatu.

²⁹ Oyo oya li ya tila kutya pamwe osikepa otayi ki idhenga komamanya gokohi yomeya, onkee oya kulukitha oohangela ne dhokosindo yosikepa noya li ya hala nokuhalelela, etango li pite.

³⁰ Nena aanasikepa oya kambadhala okuza mo mosikepa, yi ihupithe. Oya tula okawato mefuta noya shendjeleke yakwawo ongotaa umbile oohangela dhokondete yosikepa mefuta.

³¹ Ihe Paulus okwa lombwele omukuluntu gwaakwiita naakwiita a ti: “Aanasikepa mbaka ngele itaa kala mosikepa, nena kamu na nando ompito yokuhupa.”

³² Nena aakwiita oya tete oongodhi ndhoka dha manga okawato noye ke etha, ka ye nefuta.

³³ Ano etango sho lya li pokupita, Paulus okwa kumagidha aantu ayehe, ya lye, a ti: “Ngashingeyi omwa ningi omasiku omulongo nagane mwa tegelela, ku tye hwepo, ne inamu makela nando osha.

³⁴ Onkee ano otandi mu indile, mu lye sha, oshoka iikulya otayi mu koleke, mu wape okuhupa. Oshoka one itamu ka adhika nando okoshiponga shasha.”

³⁵ Ano Paulus sho a popi ngeyi, okwa kutha oshikwiila, a hambelele Kalunga e te shi pambula nokwa tameke ihe okulya.

³⁶ Nena oyo ayehe oyi itsu omukumo noya tameke okulya.

³⁷ Aantu atuhe mboka twa li mosikepa, otwa li omathele gaali nomilongo heyali naantu yahamano.

³⁸ Ano aantu sho ya kuta, oya tameke ihe okweekelahi iilya mefuta, opo osikepa yi ninge ompu.

³⁹ Etango sho lya piti, aanasikepa oya mono evi, ihe inaa tseya edhina lyeha ndyoka. Oyo oya dhimbulula okatulilo ke na omunkulo gwo opala noya tokola ihe, ya kambadhale okuukitha osikepa kokatulilo hoka, ngele otashi vulika.

⁴⁰ Onkee oya tete oongodhi ndhoka dha manga oohangela e taye dhi gwithile mefuta. Pethimbo olyo tuu ndyoka oya dhitula oongodhi ndhoka dha kwata iihingitho. Opo ihe oya yelutha pombanda othayila yondete noyu ukitha osikepa lwokomunkulo.

⁴¹ Ihe osikepa oyi idhenge moshituntu shevi kohi yomeya e tayi tyuulile. Ondete yosikepa oya patekene noinayi vula we okwiinyenga, ihe osindo oya teyagulwa po komakuthikuthi.

⁴² Nena aakwiita oya dhiladhila okudhipaga oonkwatwa ayehe, opo dhaa wape okuya ontuku tadhi yogo ontente.

⁴³ Ihe omukuluntu gwaakwiita sho a hala okuhupitha Paulus, okwe ya keelele kaaye shi ninge. Oye okwa lombwele ihe aalumentu ayehe mboka ye shi kuyoga ontente kutya naa nukile tango mefuta e taa yogo, sigo taa thiki komunkulo kevi.

⁴⁴ Nena mboka ya hupu ko, ye ya landule ihe taa lyatelele kiipilangi nenge kiitekela yosikepa. Osho ngeyi tse atuhe otwa hupu notwa thiki nawa kevi.

28

¹ Ano sho twa thiki nawa komunkulo, otu uvu kutya edhina lyontuntu ndjiyaka oMalta.

² Aakali yokontuntu oye tu taamba nuukuume uunene. Oyo oya tema omulilo noye tu ithana, tu ka huhulukwe, oshoka omvula oya li tayi loko nokwa li ku na uutalala.

³ Nena Paulus okwa tyaya oshihampi shiikuni nomanga a li te yi tula peziko, eyoka olya zi miikuni omoluupyu womulilo e tali mu kanyatele koshikaha.

⁴ Aantu yokontuntu sho ya mono eyoka lye endjelela koshikaha shaPaulus, oya lombwelathana ya ti: “Omulumentu nguno oye omudhipagi, oshoka nando a hupithwa mefuta, Kalunga kuuyuuki ina pitika, a kale e na omwenyo.”

⁵ Ihe Paulus okwa pupulile eyoka meziko ye ina mona nando oshiponga shasha.

⁶ Oyo oya li ya tegelela, Paulus a zinde nenge i ihate pevi e ta si. Ihe sho ya tegelele ethimbo ele noya dhimbulula kutya Paulus oku li nawa kee na nando oshiponga shasha, oya lundulula omadhiladhilo gawo noya ti: “Oye kalunga!”

⁷ Popepi neha ndyoka opwa li pu na omapya gomukuluntu gwontuntu Publius. Oye okwe tu taamba nombili e tatu menekele puye uule womasiku gatatu.

⁸ He yaPublius okwa li ta alukwa e na olwiidhi noshimela shombinzi. Nena Paulus okwa yi mondunda ye, a galikana, e te mu tenteke iikaha nokwe mu aludha.

⁹ Ano omolwoshiningwanima shika aavu yalwe ooyakwawo yokontuntu oye ya kuPaulus, oye nokwe ya aludha.

¹⁰ Oyo oye tu pe omagano ogendji, naasho twa yi mosikepa, oye tu pe oompumbwe dhomondjila.

¹¹ Oomwedhi ndatu sho dha piti po, otwa yi mosikepa yokuAleksandria hayi ithanwa “Ookalunga aakwanambwiyu”, ndjoka ya kala montuntu ndjika okufu akuhe.

¹² Otse otwa thiki koshilando shaSirakusa notwa kala mo omasiku gatatu.

¹³ Okuza mpoka otwa yi nosikepa notwa thiki kuRegio. Esiku lya landula ombepo oya tameke okupepa tayi zi kuumbugantu noye tu thikitha momasiku gaali koshilandotulilo Puteoli.

¹⁴ Otwa adha mo ooitaali yamwe noye tu pula, tu kale puyo uule woshiwike shimwe. Opo ihe otwa thikama, tu ye kuRoma.

¹⁵ Ooitaali ooyakwetu yomuRoma oyu uvu kutya otu li mondjila, onkee oye ya oku tu tsakaneka opOshilandelo shaAppius nopOondjendingulu ndatu. Paulus sho e ya mono, okwa hambelele Kalunga nokwa tsuwa omukumo.

¹⁶ Ano sho twa thiki muRoma, Paulus okwa pitikilwa okwiikalela e na omukwiita te mu tonatele.

¹⁷ Omasiku gatatu sho ga piti po, Paulus okwi ithana aakuluntu yAajuda koshigongi. Sho ya gongala, okwe ya lombwele ta ti: “Aamwameme! Ngame nando inandi yona sha koshigwana shetu nenge koompango ndhoka twe dhi thigulula kootate, aantu yomuJerusalem oya gandja ndje miikaha yAaroma.

¹⁸ Aaroma oya pulapula ndje noya li ya hala okumangulula ndje, oshoka oya mono kutya inandi ninga nando osha sha gwana okudhipagitha ndje.

¹⁹ Ihe Aajuda sho ya tamaneke oshinima shika, onda thiminikwa okwiigameka komupangeli Omuroma, nonando kandi na sha shokutamanana naantu yoshigwana shaandjetu.

²⁰ Onkee ano ondi indile, ndi mu mone, tse tu popyeni, oshoka ngame ondi li momalyenge ngaka omolwaangoka a tegelelwa koshigwana shAaisraeli.”

²¹ Nena Aajuda oye mu lombwele ya ti: “Tse inatu mona nando oontumwafo dhasha dha za kuJudea tadhi ku popi. Osho wo kape na nando ogumwe gwomooyakwetu mboka ya zi hwiyaka a popi nenge a hokolola sha oshiwinayi kombinga yoye.

²² Ihe tse otwa hala okuuva omadhiladhilo goye, oshoka otwa ndhindhilika kutya akuhe aantu otaa popi nokutamaneka ongundu yeni.”

²³ Onkee ano oyu uvathana esiku lyokutsakanena ishewe naPaulus, nomesiku ndyoka ongundu onene yaantu yi vule ndjiyaka yotango, oye ya kehala hoka kwa li Paulus. Okuza ongula sigo ongulohi Paulus okwe ya fatululile nokwe ya hokololele Oshilongo shaKalunga. Oye okwa totha mo omatumbulo mompango yaMoses nomiinyolwa yaahunganeki, e ya tompo, yi itaale Jesus.

²⁴ Yamwe yomuyo oya tompwa koohapu dhe, ooyakwawo oya li inaa hala okwiitaala.

²⁵ Osho ngeyi oya zi po puye yaa uvitathane. Paulus okwe ya lombwele owala a ti: “Nani Ombepo Ondjapuki okwa popitha omuhunganeki Jesaja oohapu dha tsa, sho a lombwele oohokulu

²⁶ a ti: ‘Inda, u ka lombwele aantu yoshigwana shika, u tye: One otamu ka kala nokupulakena, ihe itamu uvu ko. Otamu ka kala nokutala, ihe itamu mono ko.

²⁷ Oshoka omadhiladhilo gaantu yoshigwana shika oga simpa, omakutsi gawo oye ga thitika. Nomeho gawo oga thithikila. Oshoka ando hasho, ando omeho gawo otaga mono ko, omakutsi gawo otaga uvu ko, nomadhiladhilo gawo ando otaga pyokoka, ando otaa itedhulula e taa galukile kungame. Ongame notandi ya aludha.’ ”

²⁸ Hugunina Paulus okwa ti: “Ano kaleni mu shi shi kutya elaka lyaKalunga lyehupitho olya tuminwa kaapagani; oyo notaye ke li uva ko.”

²⁹ [Paulus sho a popi oohapu ndhika, Aajuda oye mu thigi po noya yi nomaludhi omanene mokati kawo.]

³⁰ Paulus okwa kala megumbo e li thithwa nohe li futile uule woomvula mbali nokwa kundathana naayehe mboka ye ya oku mu talela po.

³¹ Nuulaadhi uunene oye oku uvithile aantu Oshilongo shaKalunga nokwe ya hokololele Omuwa Jesus Kristus, ye ina keelelwa nando okomuntu.