1 Omusimanekwa Teofilus! Aanyoli oyendji oya si oshimpwiyu shokutunga ehokololo lyiiningwanima mbyoka ya tsakanithwa mokati ketu.
2 Oyo oya nyola shoka twa li twe shi hokololelwa kumboka ya li ya mono nomeho gawo okuza petameko noya ningi aayuvithi yoohapu.
3 Onkee ano ngame wo sho nda konakona iinima ayihe okuza petameko, onde shi tala sho opala, ndi ku nyolele ehokololo lya yela, omusimanekwa Teofilus,
4 opo u tseye nawa kutya omahokololo ngoka we ga longwa, ogoshili.
5 Pethimbo ndyoka, uuna Herodes a li omukwaniilwa gwaJudea, okwa li ku na omuyambi, edhina lye Sakaria, gwometanga lyaAbia. Edhina lyomukiintu gwe oElisabet, gwomezimo lyaAron.
6 Ayehe yaali oya li aayuuki koshipala shaKalunga, yaa na oshipwe noya vulika kiipango ayihe nokomautho agehe gOmuwa.
7 Ihe oya li kaaye na oluvalo, oshoka Elisabet okwa li ihaa vala, yo ayehe yaali oya adhika ye li methimbo lyuukulupe.
8 Esiku limwe Sakaria okwa li miilonga yokuyamba koshipala shaKalunga opalufo lwetanga lye.
9 Pamukalo ngoka gwa li gwa landulwa kaayambi, Sakaria okwa hogololwa nokuumba oshihogololitho, a ka tsinine motempeli yOmuwa.
10 Pethimbo lyokutsinina aantu ayehe oya kala pondje taa galikana.
11 Omuyengeli gwOmuwa, ngoka a thikama kombinga yokolulyo lwoshiyambelo hoka haku fikilwa omatsinino, okwi ihololele Sakaria.
12 Sakaria sho e mu mono, okwa haluka a tila.
13 Omuyengeli okwa ti kuye: “Sakaria, ino tila, egalikano lyoye olyu uvika. Omukiintu gwoye Elisabet ote ke ku valela okanona okamati, e to ka luku Johannes.
14 Ngoye oto kala u udha enyanyu neligolo, noyendji yalwe otaa ka nyanyukilwa evalo lyako.
15 Oshoka omunona nguka ota ka kala omunene koshipala shOmuwa. Oye ita nu omaviinu nenge oshinuwa kehe hashi kolitha. Oye te ku udha Ombepo Ondjapuki nomanga e li mela lyayina.
16 Oyendji yomAaisraeli ote ya galulile kOmuwa, Kalunga kawo.
17 Oye omutumwa gwOmuwa te ya e na ombepo noonkondo dhaElia. Oye ota hanganitha oohe noyana, ota galulile oonakwaavulika mondjila yu uka nota longekidha aantu, ya wape okutaamba Omuwa gwawo.”
18 Sakaria okwa ti komuyengeli: “Shika otandi shi tseya ngiini? Oshoka ngame onda kulupa nomukiintu gwandje wo oku li methimbo lyuukulupe.”
19 Omuyengeli okwe mu yamukula a ti: “Ongame Gabriel nda thikama koshipala shaKalunga, ngoka a tumu ndje, ndi ku lombwele nondi ku uvithile elaka ndika etoye.
20 Ano ngashingeyi pulakena: Sho ino itaala oohapu dhandje, oto ka kala itoo popi sigo esiku ndyoka ayihe nde yi ku lombwele tayi ka gwanithwa.”
21 Aantu oya li ya tegelele Sakaria noya kumwa, sho a kala ethimbo ele unene motempeli.
22 Ano sho a zi mo, okwa li itaa vulu okupopya nayo. Aantu noya dhimbulula kutya okwa mono emoniko motempeli. Molwaashoka Sakaria okwa li itaa vulu okupopya nayo, okwe ya lombwele nokuninga omandhindhiliko niikaha.
23 Omasiku giilonga yomotempeli sho ga pu ko, Sakaria okwa shuna kegumbo.
24 Konima yomasiku omukulukadhi gwe Elisabet okwa ningi omusimba nokwa kala megumbo uule woomwedhi ntano inaa za mo nokwa ti:
25 “Shika onde shi ningilwa kOmuwa. Ngashingeyi Omuwa okwa sile ndje ohenda, sho a kutha ndje okudhinwa kaantu.”
26 Elisabet sho a ningi omusimba gwoomwedhi hamano, Kalunga okwa tumu omuyengeli Gabriel koshilando shomuGalilea, edhina lyasho Nasaret,
27 a ye komukadhona a yalekwa komulumentu, edhina lye Josef, gwomezimo lyaDavid. Edhina lyomukadhona oMaria.
28 Omuyengeli okwe ya kuye e ta ti: “Ombili nayi kale nangoye! Omuwa na kale pamwe nangoye ye ne ku yambeke!”
29 Maria okwa haluthwa kepopitho nokwe li dhiladhila kutya otali ti ngiini.
30 Omuyengeli okwa ti kuye ishewe: “Maria, ino tila, owa silwa ohenda kuKalunga.
31 Oto ka ninga omusimba e to vala okanona okamati nou na oku ka luka Jesus.
32 Oye ta ningi omunene e ti ithanwa Omuna gwaKalunga gwokombandambanda. Omuwa Kalunga ote mu ningi omukwaniilwa ongaashi he David.
33 Oye ta ningi omukwaniilwa gwoluvalo lwaJakob sigo aluhe; nuukwaniilwa we kau na mpoka tau ka hula po.”
34 Maria okwa ti komuyengeli: “Otashi ka vulika ngiini, oshoka ngame omukadhona natango?”
35 Omuyengeli okwe mu yamukula a ti: “Ombepo Ondjapuki otayi ku lambele, noonkondo dhaKalunga gwokombandambanda otadhi ku siikile. Onkee ano omunona nguka ota ka lukwa Omuna gwaKalunga.
36 Tala, naElisabet omunezimo lyoye ngoka a popiwa kutya iha vala, okwa ningi ngashingeyi omusimba gwoomwedhi hamano, nonando okwa kulupa.
37 Oshoka kaku na shoka tashi nyenge Kalunga.”
38 Maria okwa ti: “Ongame omuntu gwOmuwa. Nandi ningwe ngaashi wa ti.” Omuyengeli nokwa zi po puye.
39 Pethimbo olyo tuu ndyoka Maria okwa thikama e ta yi nokweendelela koshilando shomuJudea, shi li momukunda gu na oondundu.
40 Maria sho e ya maandjaSakaria, okwa popitha Elisabet.
41 Elisabet sho u uvu epopitho lyaMaria, okanona oka nyulukuta mela lye. Opo Elisabet oku udha Ombepo Ondjapuki
42 nokwa popi mokule a ti: “Kala wa yambekwa mokati kaakiintu aakweni, nosho wo okanona hoka to ka vala, naka yambekwe.
43 Osha zile ndje peni, yina yOmuwa gwandje sho te ya kungame?
44 Oshoka manga tuu ewi lyepopitho lyoye tali thiki momakutsi gandje, okanona oka nyulukuta kenyanyu mela lyandje.
45 Omunelago oongoka wi itaala kutya shoka to shi lombwelwa kOmuwa, otashi ka gwanithwa.”
46 Maria okwa ti: “Omwenyo gwandje otagu hambelele Omuwa,
47 ombepo yandje otayi nyanyukilwa Kalunga, omuhupithi gwandje,
48 oshoka okwa dhimbulukwa omuntu gwe mokwiishonopeka kwe. Okuza ngashingeyi aantu ayehe otaa ki ithana ndje omunelago,
49 oshoka Omuwa omunankondo okwa ningile ndje iinima iinene. Edhina lye olyo eyapuki.
50 Oye ta sile ohenda ayehe mboka haye mu tila yomomapipi agehe.
51 Oye okwa longo iilongankondo. Oonakuholuuntsa okwe ya halakanitha po pamwe nomadhiladhilo gawo.
52 Aakwaniilwa aanankondo okwe ya kutha ko kiipangelapundi yawo, nokwa nenepeke aaishonopeki.
53 Mboka ya sa ondjala, okwe ya kutitha nuuwanawa, aayamba okwe ya tidha po ye li iikaha yowala.
54 Oye okwa dhiginine euvaneko ndyoka e li lombwele ootate. Oye e ya okukwatha omuntu gwe Israel,
55 nokwa dhimbulukwa okusila Abraham ohenda noluvalo lwe sigo aluhe.”
56 Maria okwa menekele puElisabet oomwedhi ndatu, opo ihe okwa shuna kaandjawo.
57 Ethimbo lyaElisabet lyokuvala sho lya thiki, okwa vala okanona okamati.
58 Aashiinda ye naanezimo sho yu uvu, nkene Omuwa e mu hololele esilohenda enene li thike mpoka, oya nyanyukwa pamwe naye.
59 Esiku etihetatu oye ya, ya fukaleke okanona, noya li ya hala ye ka lukile he Sakaria.
60 Ihe yina okwa ti: “Itashi vulika. Edhina lyako otali lukwa Johannes.”
61 Oyo noya ti kuye: “Mezimo lyoye kamu na nando omuntu e na edhina ndyoka.”
62 Oyo noya lombwele he nokuninga omandhindhiliko niikaha, opo ye mu pule kutya okanona okwa hala ka lukwe edhina lini.
63 Oye okwi indile, a pewe okapelende kokunyolela nokwa nyolele mo kutya: “Edhina lyako oJohannes.” Aantu ayehe noya kumwa.
64 Opo tuu mpoka ewi lye olya thituluka nelaka lye olya manguluka, nokwa tameke okupopya e ta hambelele Kalunga.
65 Aantu ayehe yopuushiinda oya kwatwa kehaluko, nakehe gumwe gwomoshitopolwa shoka shoondundu muJudea oku uvu ayihe mbika ya ningwa.
66 Ayehe mboka ye shi uvu, oya pungula oohapu ndhika moomwenyo dhawo noya ti: “Okanona haka otaka ka kala ka tya ngiini?” Oyo oya dhimbulula kutya, oko oke li miikaha yOmuwa.
67 He Sakaria oku udha Ombepo Ondjapuki nokwa hunganeke a ti:
68 “Omuwa, Kalunga kaIsrael, na hambelelwe! Oshoka okwe ya okuhupitha nokumangulula aantu ye.
69 Oye okwe tu pe Omukulili ofule a zi mezimo lyomuntu gwe David.
70 Ngaashi aahunganeki ye aayapuki ye shi uvaneke nale kutya:
71 Oye ote ke tu hupitha maatondi yetu nomiikaha yaayehe mboka ye tu tonde.
72 Shika ote shi ningi molwesilohenda lye ndyoka e li hololele ootate, sho ha dhimbulukwa ehangano lye eyapuki.
73 Oye okwa ganene tate yetu Abraham kutya,
74 ote ke tu hupitha miikaha yaatondi yetu, opo tu mu longele twaa na uumbanda,
75 tse tu ninge aayapuki naayuuki koshipala she omasiku getu agehe.
76 Ngoye okanona oto ki ithanwa omuhunganeki gwaKalunga gwokombandambanda, oshoka oto ka tetekela Omuwa, u mu opalekele ondjila.
77 Ongoye to ka tseyithila aantu ye ehupitho, uuna oondjo dhawo dha dhimwa po.
78 Oshoka Kalunga ketu oku na olukeno nesilohenda, onkee eluwa lyehupitho otali tu tendele, li tu minikile.
79 Tse mboka twa kuutumba momilema nomomuzizimba gweso, li ukithe oompadhi dhetu mondjila yombili.”
80 Omunona okwa koko nokwa kolo pambepo. Oye okwa kala mombuga sigo esiku ndyoka i ihololele Aaisraeli.
1 Pomasiku ngeyaka omupangeli Omuroma Augustus okwa gandja oshipango kutya aantu ayehe ye li mepangelo lye, oye na okwiinyolitha, opo ya gandje oompale.
2 Einyolitho ndika olyo lyotango nolya ningwa, Kirenius sho a li omuleli gwaSiria.
3 Aantu ayehe oya yi, ye ki inyolithe, kehe gumwe omoshilando shaandjawo.
4 Josef wo okwa thikama muNasaret shomuGalilea nokwa yi kuJudea koshilando shaDavid, shi ithanwa Betlehem, oshoka oye okwa li omunezimo lyaDavid.
5 Oye okwa yi, e ki inyolithe pamwe nomuyalekwa gwe Maria, ngoka a li omusimba.
6 Ano manga ya li muBetlehem, ethimbo lyaMaria lyokuvala olya thiki.
7 Oye okwa yelipa osheeli she shokamati nokwe ka dhingile momalapi e te ka langeke metemba lyokulila iimuna, oshoka mongulu yaayenda kamwa li mu na eha.
8 Komukunda ngoka okwa li ku na aasita ye li kelundu ya langela iimuna yawo uusiku.
9 Omuyengeli gwOmuwa okwe ya holokele, neadhimo lyOmuwa olye ya adhimine. Aasita oya haluka noonkondo.
10 Omuyengeli okwa ti kuyo: “Inamu tila! Oshoka ngame otandi mu uvithile elaka lyenyanyu enene tali ningi lyaantu ayehe.
11 Nena tuu ndjika mwa valelwa Omukulili moshilando shaDavid. Oye Kristus, Omuwa.
12 Endhindhiliko lyoku mu dhimbulula olyo ndika: Otamu ka mona okahanona ka dhingilwa nomalapi noka langekwa metemba lyokulila iimuna.”
13 Ombaadhilila pomuyengeli nguka opwa li pu na ongundu onene yaayengeli yomegulu, ya hambelele Kalunga ya ti:
14 “Esimano olyaKalunga gwokombandambanda! Nombili kombanda yevi maantu e ya hokwa!”
15 Aayengeli sho ya zi po puyo, ya shuna megulu, aasita oya lombwelathana ya ti: “Tu yeni ano kuBetlehem, tu ka tale shoka sha ningwa ko, Omuwa e shi tu hololele.”
16 Oyo oya yi nokweendelela noya mono Maria naJosef nokahanona ka langekwa metemba lyokulila iimuna.
17 Aasita sho ya mono okahanona, oya hokololele aantu shoka omuyengeli a tile okanona haka.
18 Ayehe mboka ye shi uvu, oya kuminwa oohapu ndhoka ye dhi hokololelwa kaasita.
19 Ihe Maria okwa kala ta dhiladhila oohapu ndhoka adhihe nokwe dhi pungula momwenyo gwe.
20 Aasita oya shuna nokusimaneka nokuhambelela Kalunga, oshoka ayihe oye yi uvu noye yi mono, ngaashi omuyengeli e ya lombwele.
21 Sho pwa piti omasiku gahetatu, okanona oka fukalekwa noka lukwa Jesus, edhina tuu ndyoka ke li lukwa komuyengeli, manga ka li mela lyayina.
22 Omasiku geiyopaleko pampango yaMoses sho ga pu ko, oya fala okanona kuJerusalem e taye ke eta koshipala shOmuwa.
23 Shika osha nyolwa mompango yOmuwa kutya: Okanona okasheeli kehe taka valwa kuyina, oke na okuyoololelwa Omuwa,
24 nonaku gandjwe omayambo: omatendenguti gaali nenge uungutyona uyali.
25 Ano muJerusalem omwa li mu na omulumentu, edhina lye Simeon. Oye okwa li omuyuuki, ha tila Kalunga nokwa kala a tegelela ehupitho lyaIsrael. Ombepo Ondjapuki oya li muye.
26 Oye okwa li a tseyithilwa kOmbepo Ondjapuki kutya ita si, manga inaa mona Omugwayekwa gwOmuwa.
27 Ombepo Ondjapuki noya fala Simeon motempeli. Nena aakuluntu yaJesus oye mu eta kotempeli noye mu ningile, ngaashi ompango tayi shi ti.
28 Simeon oku ukata okanona momaako ge nokwa hambelele Kalunga a ti:
29 “Ngashingeyi Omuwa, sho wa gwanitha omauvaneko goye, laleka ndje ihe, omuntu gwoye, ndi ye nombili.
30 Oshoka onda mono nomeho gandje ehupitho ndyoka
31 we li longekidha montaneho yaantu ayehe:
32 Uuyelele wokuminikila aapagani, nesimano lyaantu yoye Aaisraeli.”
33 He nayina oya kuminwa oohapu ndhoka Simeon e dhi popi.
34 Simeon okwe ya yambeke e ta ti kuMaria, yina yokanona: “Omunona nguka okwa tulwa po kuKalunga okupundukitha nokuyambukitha oyendji yomAaisraeli. Oye endhindhiliko lya zi kuKalunga, ihe oyendji itaye ke mu taamba.
35 Osho ngeyi omadhiladhilo gawo omawinayi ngoka ga holama otage ya puuyelele. Ihe uudhigu ongegongamwele lya tsa otau ka ulula omutima gwoye.”
36 Okwa li ku na omuhunganeki omukiintu, edhina lye Anna, omuna gwaFanuel, gwomezimo lyaAser. Oye okwa li a koka. Manga a li omukadhona, okwa hokanwa e ta kala nomulumentu gwe oomvula heyali;
37 Okwa adhika ihe omuselekadhi gwoomvula omilongo hetatu nane. Ethimbo alihe okwa kala motempeli koshipala shaKalunga uusiku nomutenya ti idhilike iikulya nokugalikana.
38 Ethimbo olyo tuu ndyoka okwe ya po nokwa hambelele Kalunga e ta hokolola okanona kwaayehe mboka ya li ya tegelela ethimbo lyekulilo lyaJerusalem.
39 Sho ya tsakanitha ayihe pampango yOmuwa, oya shuna kuGalilea koshilando shaandjawo kuNasaret.
40 Omunona okwa koko nokwa kolo u udha oondunge nokwa hokiwa kuKalunga.
41 Aakuluntu yaJesus oya li haa yi omumvo kehe kuJerusalem koshituthi shOpaasa.
42 Jesus sho a gwanitha oomvula omulongo nambali, oya yi naye koshituthi, ngaashi hashi ningwa aluhe.
43 Omasiku goshituthi sho ga piti, oya shuna kegumbo, ihe Jesus okwa thigala muJerusalem. Aakuluntu oya li inaaye shi tseya kutya oku li peni.
44 Oya tengeneke owala kutya oku li mongundu yaayendi, sigo ye ende esiku alihe. Opo ihe oya tameke oku mu konga maanezimo nomaashiwikile.
45 Sho inaaye mu mona, oya shuna kuJerusalem, ye ke mu konge.
46 Konima yomasiku gatatu oye mu mono ihe motempeli, a kuutumba mokati kaalongi Aajuda, te ya pulakene ye te ya pula.
47 Ayehe mboka ye mu pulakene, oya kuminwa oondunge dhe nomayamukulo ge.
48 Aakuluntu ye sho ye mu mono, oya kumwa. Yina nokwa ti kuye: “Mumwandje, omolwashike we tu ningile ngeyi? Ngame naho otwe ku kongo nokunika uuthigwa.”
49 Jesus okwe ya yamukula a ti: “Omwa kongele ndje shike? Kamu shi shi nani kutya ngame ondi na okukala mumbika yaTate?”
50 Ihe kaya li yu uvite ko kutya okwa hala oku ya lombwela shike.
51 Jesus okwa zi mo pamwe nayo e taa shuna kuNasaret nokwa kala ha vulika kuyo. Yina okwa pungula oohapu ndhoka adhihe momwenyo gwe.
52 Jesus okwa koko palutu nomoondunge, a hokiwa kuKalunga nokaantu.
1 Omumvo omutimulongo nantano gwepangelo lyaTiberius, omupangeli Omuroma, Pontius Pilatus okwa li omuleli gwaJudea, naHerodes omuleli gwaGalilea, nomumwayina Filippus okwa li omuleli gwaIturea na Trakonitis, Lisanias okwa li omuleli gwaAbilene,
2 Annas naKajafas oya li aayambi aakuluntu yayakwawo. Pethimbo olyo tuu ndyoka oohapu dhaKalunga odha adha Johannes, omuna gwaSakaria, mombuga.
3 Johannes okwa yi komikunda adhihe dhopopepi nomulonga gwaJordan noku uvitha kutya aantu nayi itedhulule e taa shashwa, Kalunga nota dhimi po oondjo dhawo,
4 ongaashi omuhunganeki Jesaja a nyola ta ti: “Ewi lyanakwiigidha mombuga tali ti: ‘Longekidhileni Omuwa ondjila, yelekanitheni omapola ge.’
5 Omasilu agehe naga filwe po; oondundu niikulundundu ayihe nayi kumunwe po; oondjila dha goyoka nadhi ukililithwe; iisilukutumba nayi yelekanithwe.
6 Aantu ayehe otaa ka mona ehupitho lyaKalunga.”
7 Oongundu dhaantu odhe ya kuJohannes, ya shashwe kuye, nokwa ti kuyo: “Oluvalo lwomayoka ne, olye e mu londodha okuya ontuku egeelo lyaKalunga ndyoka tali ya?
8 Imikeni ano iiyimati mbyoka tayi holola kutya omwi itedhulula. Inamu tameka okupopya mu tye: ‘Tse otu na tate Abraham,’ oshoka otandi mu lombwele: Kalunga ota vulu okuyumudhila Abraham aanona momamanya ngaka.
9 Ekuya olye egekwa nale nokuli pekota lyomuti. Okehe tuu omuti itaagu imi iiyimati iiwanawa, otagu kewa po e tagu umbilwa momulilo.”
10 Aantu mbeyaka oya pula Johannes ya ti: “Natu ninge ngiini ano?”
11 Oye okwe ya yamukula a ti: “Kehe ngoka e na oohema mbali, na pe mukwawo ngoka kee na sha, naangoka e na iikulya, na pe mukwawo ngoka kee yi na.”
12 Aafendelithi wo oye ya kuJohannes, e ya shashe, noye mu pula ya ti: “Tatekulu, otu na okuninga ngiini?”
13 Oye okwa ti kuyo: “Inamu fendelitha sha pitilila.”
14 Osho wo aakwiita oye mu pula ya ti: “Ongiini kombinga yetu? Otu na okuninga ngiini?” Oye okwe ya lombwele a ti: “Inamu yuga omuntu iimaliwa ye ne inamu kotokela. Kaleni mwa gwanenwa kondjambi yeni.”
15 Aantu sho ya li mokutegelela, ayehe oya dhiladhila kutya, pamwe Johannes oye Kristus.
16 Ihe Johannes okwe ya lombwele ayehe ta ti: “Ngame otandi mu shasha nomeya, ihe oku na gumwe ngoka e vule ndje oonkondo te ke ya. Ngame inandi gwana nande okudhitula omiya dhoongaku dhe. Oye ote ke mu shasha nOmbepo Ondjapuki nomulilo.
17 Oye e na oshiyelitho miikaha ye. Ota kombo olupale lwe e ta yele. Iilya ote yi pungula miigandhi ye, ihe etutu ote li fike po nomulilo ihaagu dhimi po.”
18 Johannes okwa kumagidha aantu nomakumagidho omakwawo ogendji nokwe ya uvithile elaka etoye.
19 Omuleli Herodes okwa nyenyetelwa kuJohannes molwaashoka okwa adhika a hokana Herodias, omukiintu gwamumwayina, nomoluuwinayi ulwe kwa li e u ningi.
20 Uuwinayi u vule uukwawo Herodes e u ningi owo mbuka, sho e edhilile Johannes mondholongo.
21 Aantu ayehe sho ya shashwa, Jesus naye wo okwa shashwa. Manga a li ta galikana, egulu olye eguluka,
22 nOmbepo Ondjapuki oya kuluka noye mu lambele yi na olupe lwolutu lwa fa lwonguti. Ewi nolya zi megulu lya ti: “Ongoye omumwandje omuholike, onde ku hokwa.”
23 Jesus sho a tameke okuuvitha, okwa li e na oomvula dhi thike lwopomilongo ndatu nokwa kala, ngaashi aantu ye mu dhiladhila kutya oye omuna gwaJosef yaeli,
24 lyaMatati gaLevi lyaMelki gaJannai gaJosef,
25 yaMatatias gaAmos yaNahum yaEsli lyaNangai,
26 yaMaat gaMatatias gaSemei yaJosek yaJoda,
27 yaJohanan yaResa lyaSerubbabel lyaShealtiel lyaNeri,
28 lyaMelki gaAddi yaKosam yaElmadam lyaEr,
29 lyaJosua yaElieser lyaJorim yaMatati gaLevi,
30 lyaSimeon yaJuda yaJosef yaJonam yaEliakim,
31 lyaMelki gaMenna gaMatata gaNatan yaDavid,
32 yaIsai yaObed yaBoas yaSalmon yaNahshon,
33 yaAminadab yaAdmin yaArni yaHezron lyaPerez yaJuda,
34 yaJakob yaIsak yaAbraham yaTera yaNahor,
35 yaSerug lyaReu yaPelek yaEber lyaShela,
36 yaKainan yaArfaksad yaSem yaNoa yaLamek,
37 yaMetusala gaEnok lyaJared yaMahalalel gaKainan,
38 yaEnos lyaSet yaAdam yaKalunga.
1 Jesus okwa zi kuJordan u udha Ombepo Ondjapuki. Ombepo noye mu fala kombuga,
2 hoka a makelwa komuhindadhi omasiku omilongo ne. Omasiku ngoka okwa kala inaa lya sha, onkee sho ga hulu po, okwa li u uvite nayi nokwa sa ondjala.
3 Omuhindadhi okwa ti kuye: “Ngele ngoye Omuna gwaKalunga, lombwela emanya ndika, li shituke oshikwiila.”
4 Jesus okwe mu yamukula a ti: “Okwa nyolwa: ‘Omuntu ita kala e na omwenyo koshikwiila ashike.’ ”
5 Omuhindadhi okwe mu kutha nokwe mu fala pokuma puule e te mu ulukile mepathimo lyeho omapangelo agehe gomuuyuni.
6 Omuhindadhi okwa ti kuye: “Otandi ku ningi omupangeli gwaayihe notandi ku pe omauyamba agehe, oshoka ayihe mbika otandi vulu oku yi pa kehe ngoka nda hala.
7 Ayihe mbika otayi ningi yoye, ngele to tsile ndje oongolo e to galikana ndje.”
8 Jesus okwe mu yamukula nokwa ti: “Okwa nyolwa: ‘Omuwa Kalunga koye oye awike u na oku mu galikana noku mu longela.’ ”
9 Omuhindadhi okwe mu fala kuJerusalem nokwe mu londeke koshihoko shotempeli e ta ti kuye: “Ngele ngoye Omuna gwaKalunga, iyundulila pevi,
10 oshoka okwa nyolwa: ‘Kalunga ote ku tumine aayengeli ye, e taye ku gamene.
11 Oyo otaye ku papatele momaako gawo, opo waa pume oompadhi dhoye komamanya.’ ”
12 Jesus okwe mu yamukula a ti: “Okwa nyolwa natango: ‘Ino makela Omuwa Kalunga koye.’ ”
13 Ano omuhindadhi sho a hulitha okumakela Jesus moshinima kehe, okwe mu thigi po manga.
14 Jesus okwa shuna kuGalilea nokwe endithwa koonkondo dhOmbepo Ondjapuki. Okupopiwa kwe okwa taandele nomikunda adhihe dhopuushiinda.
15 Oye okwa longele aantu moosinagoga dhaahoka nokwa simanekwa kwaayehe.
16 Jesus okwe ya muNasaret, moshilando moka a putukila. NomEsabati okwa yi mosinagoga, ngaashi i igilila. Oye okwa thikama, a leshe Omanyolo omayapuki,
17 nokwa pewa embo lyomuhunganeki Jesaja. Sho a gonyununa ongonga yalyo, okwi itsu ehala mpoka pwa nyolwa ngeyi:
18 “Ombepo yOmuwa oya lambele ndje. Osho ngeyi Omuwa okwa gwayeke ndje, ndi uvithile oohepele elaka etoye. Okwa tumu ndje, ndi igidhile oonkwatwa emanguluko, naaposi ya tonate, okumangulula oonakuhepekwa,
19 okutseyitha omumvo, uuna Omuwa te ya, a hupithe aantu ye.”
20 Jesus sho a mana okulesha embo, okwe li pe omuyakuli e ta kuutumba. Aantu ayehe mboka ya li mosinagoga, oye mu tongolola.
21 Oye okwa tameke oku ya lombwela e ta ti: “Nena ndjika oohapu ndhoka mu uvu dha leshwa, odha gwanithwa.”
22 Oyo ayehe oye mu popile muuwanawa. Noya kuminwa oohapu oombwanawa dha zi mokana ke ya ti: “Ke shi nani omuna gwaJosef?”
23 Oye okwa ti kuyo: “Ondi shi shi nawa kutya omwa hala okulombwela ndje eyele. ‘Mwaaludhi, iyaludha!’ Notamu ti ishewe: ‘Shoka tu uvu wa ningi muKapernaum, shi ninga wo muka.’ ”
24 Jesus okwa ti: “Ongame otandi mu lombwele: Kaku na omuhunganeki ha taambwa nawa kaantu yomoshilongo shaandjawo.
25 “Dhimbulukweni shoka sha li sha ningwa pethimbo lyomuhunganeki Elia. Kapu na omalimbililo, muIsrael omwa li mu na aaselekadhi oyendji, sho kwa li inaaku lokwa ethimbo lyoomvula ndatu netata, nokwa li ondjala ondhigu moshilongo ashihe.
26 Ihe Kalunga ina tuma Elia nando okugumwe gwomaaselekadhi mbaka, ihe okwe mu tumu owala komuselekadhi gwokuSarefat shomomikunda dhaSidon.
27 MuIsrael omwa li wo mu na aanashilundu oyendji pethimbo lyomuhunganeki Elisa, ihe Elisa ina aludha nando ogumwe gwomuyo, oNaeman awike Omusiria.”
28 Aantu mboka ya li mosinagoga sho yu uvu oohapu ndhoka, oya geye noonkondo.
29 Oyo noya thikama noya tidha mo Jesus moshilando, oye mu fala kolungenge lwondundu hoka oshilando shawo sha li sha tungilwa, opo ye mu undulile pevi.
30 Ihe Jesus okwa piti mokati kawo ayehe nokwa yi.
31 Jesus okwa yi kuKapernaum, oshilando shomuGalilea, nokwa longo aantu mesiku lyEsabati.
32 Aantu mboka oya kuminwa elongo lye, oshoka oohapu dhe odha li dhi na oonkondo.
33 Mosinagoga moka omwa li mu na omulumentu e niwe kombepo ya nyata yoompwidhuli. Oye okwi igidha mokule a ti:
34 “Iihuna yowala! Jesus Omunasareti, owe tu halela shike? Owe ya u tu yone po? Ondi ku shi kutya ongoye Omuyapuki gwaKalunga.”
35 Jesus okwa ganda ombepo ya nyata a ti: “Mwena thilu, u ze mo muye!” Ombepo oye mu hata pevi mokati kaantu noya zi mo muye, inayi mu ningila nando uuwinayi washa.
36 Aantu ayehe oya kumwa noya pulathana ya ti: “Ota popi ngiini ngeyi? Oye e na epitikilo noonkondo okuganda oombepo dha nyata noku dhi tidha mo.”
37 Oshiningwanima shoka osha taandele akuhe momikunda ndhoka.
38 Ano Jesus sho a zi mo mosinagoga, okwa yi kaandjaSimon. Yinamweno yaSimon okwa li ta alukwa olwiidhi lwa geya noonkondo. Oyo noye mu popi kuJesus.
39 Jesus okwa hedha kuye nokwa ganda olwiidhi, olwo nolwe mu etha. Mbalambala yinamweno okwa thikama nokwa tameke oku ya yakula.
40 Etango sho lya yi mo, aantu ayehe mboka ya li ye na aavu yomavu gi ili nogi ili, oye ya eta kuJesus. Jesus okwa tenteke iihaka ye kukehe omuvu nokwe ya aludha ayehe.
41 Oompwidhuli wo odha zi mo maantu oyendji tadhi igidha tadhi ti: “Ongoye Omuna gwaKalunga!” Ihe Jesus okwe dhi ganda ye ine dhi pitika, dhi popye, oshoka odha li dhi mu shi kutya oye Kristus.
42 Ongula sho kwa shi, Jesus okwa zi mo moshilando nokwa yi kokuma kwaa na omagumbo. Aantu oya tameke oku mu konga, naasho ye mu mono, oye mu kwatele po, kaa ze po puyo.
43 Ihe Jesus okwe ya lombwele a ti: “Elaka etoye lyOshilongo shaKalunga ondi na oku li uvitha wo miilando yilwe, oshoka osho naanaa shika Kalunga a tumu ndje, ndi shi ninge.”
44 Oye noku uvithile moosinagoga dhomuJudea.
1 Esiku limwe Jesus sho a li a thikama pefuta lyaGenesaret, aantu oye mu gongalele, ya pulakene oohapu dhaKalunga.
2 Oye okwa mono oowato mbali dhi li pomunkulo gwefuta, ihe aayuli yoohi oya adhika ya za po, ya ka yoga iiyulitho yawo.
3 Jesus okwa yi mowato yimwe yaandhoka, omundjoka yaSimon, nokwe mu lombwele, e yi humithe momeya kashona. Opo Jesus okwa kuutumba mowato ndjoka e ta longo aantu.
4 Sho a mana okupopya, okwa lombwele Simon e ta ti: “Dhugila owato lwopuule, ne mu umbile iiyulitho yeni momeya, mu tameke okuyula.”
5 Simon okwe mu yamukula a ti: “Muhongi, otwi ihepeke uusiku auhe nokulonga, ihe inatu kwata nando osha. Ihe ngashingeyi iiyulitho otandi yi umbile mo molwelombwelo lyoye.”
6 Oyo sho ye shi ningi, oya kwata oohi odhindji noonkondo niiyulitho oya tameke okutomoka.
7 Oyo noya lapa aayuli ooyakwawo yomowato yilwe, ye ye oku ya kwatha. Oyo oye ya noyu udhitha oowato adhihe mbali noohi, nodha tameke okuningina kuudhigu.
8 Ano Simon Petrus sho a mono shoka sha ningwa po, okwa tsu oongolo koshipala shaJesus e ta ti: “Omuwa, za po pungame, oshoka ngame omulumentu omulunde!”
9 Oshoka Petrus nosho wo ayehe mboka ya li pamwe naye, oya kuminwa eyulo lyoohi ndyoka ye li yulu.
10 Osho tuu wo Jakob naJohannes, aana yaSebedeus, mboka ya li puSimon. Jesus okwa ti kuSimon: “Ino tila, okuza ngashingeyi oto ningi omuyuli gwaantu.”
11 Oyo oya dhugile oowato dhawo komunkulo noya thigi po iinima ayihe e taa landula Jesus.
12 Jesus sho a li moshilando shimwe shaankoka, omwa li omulumentu a kanyata oshilundu. Omunashilundu sho a mono Jesus, okwa tsu oongolo koshipala she nokwe mu hehela ta ti: “Omuwa, ngele owa hala okwaaludha ndje, oto shi vulu.”
13 Jesus okwa ganeke oshikaha nokwe mu gumu e ta ti: “Onda hala, yela.” Mbalambala oshilundu noshe mu etha nokwa yele.
14 Jesus okwe mu kumagidha noonkondo a ti: “Ino shi popya nando okulye, inda owala, u ki iyulike komuyambi, ngoye u gandje omagano gealuko ngoka gu uthwa kuMoses, opo ge ya ningile onzapo kutya owa aluka.”
15 Ihe ehokololo ndyoka olya taandele owala mbala akuhe, naantu oyendji oye ya kuye oku mu pulakena, nokwa panga omavu gawo.
16 Opo ihe okwa yi komahala gaa na aantu nokwa galikana.
17 Esiku limwe Jesus sho a li ta longo aantu, aafarisayi naalongimpango oya kuutumba mpoka, ya zi komikunda adhihe dhomuGalilea nodhomuJudea nosho wo kuJerusalem. Omuwa nokwa pe Jesus oonkondo dhokwaaludha aavu.
18 Aalumentu yamwe oye etele Jesus omusilombanda ye mu inda kontala. Oyo noya kambadhala oku mu fala meni lyegumbo ndyoka, ye mu langeke puJesus.
19 Ihe omolwowindji waantu oya nyengwa oku shi ninga. Onkene oya londo noyu ulula ombululu pombanda yondunda e taye mu kulukithile nontala ye pevi mokati kaantu noye mu tula puJesus.
20 Jesus sho a mono eitaalo lyawo, okwa lombwele omusilombanda: “Kuume kandje, oondjo dhoye odha dhimwa po.”
21 Ihe aalongimpango naafarisayi oya tameke okupopya taa ti: “Nguka olye ta sheke Kalunga? Kaku na nando omuntu ta vulu okudhima po oondjo, oKalunga awike.”
22 Jesus sho a dhimbulula omadhiladhilo gawo, okwe ya yamukula e ta ti: “Omolwashike tamu idhiladhilile ngawo?
23 Oshipu oshini po? Okulombwela omusilombanda: ‘Oondjo dhoye odha dhimwe po,’ nenge oku mu lombwela: ‘Thikama, ngu u ende?’
24 Ihe opo mu kale mu shi shi kutya Omuna gwOmuntu oku na oonkondo kombanda yevi okudhima po oondjo,” okwa ti komusilombanda: “Otandi ku lombwele: Thikama, kutha ontala yoye, u ye kaandjeni.”
25 Oye okwa thikama mbala montaneho yaantu ayehe nokwa kutha ontala ye e ta yi kaandjawo te ende ta hambelele Kalunga.
26 Aantu ayehe oya kumwa nomokuudha etilo oya hambelele Kalunga ya ti: “Nena ndjika otwa mono iinyengandunge.”
27 Konima yaambika Jesus okwa zi mo moshilando nokwa mono omufendelithi, edhina lye Levi, a kuutumba pongulu yoompale dhopoongamba e ta ti kuye: “Landula ndje.”
28 Levi okwa thikama nokwa thigi po iinima ayihe e te mu landula.
29 Opo Levi okwa ningile Jesus oshituthi oshinene megumbo lye. Ongundu onene yaafendelithi nosho wo aantu yalwe oya kuutumba poshililo pamwe nayo.
30 Nena aafarisayi naalongimpango mboka yomongundu yawo oya nyenyetele aalongwa yaJesus ya ti: “Omolwashike tamu li notamu nu pamwe naafendelithi naalunde?”
31 Jesus okwe ya yamukula nokwa ti: “Aandjolowele inaa pumbwa omwaaludhi, ihe aavu tuu ayeke.
32 Oshoka ngame inandi ya okwiithana mboka yi iwete aayuuki, ihe aalunde tuu, yi itedhulule.”
33 Aantu yamwe oya ti kuJesus: “Aalongwa yaJohannes ohaa idhilike iikulya olwindji nohaa galikana. Nosho wo aalongwa yaafarisayi haa ningi, ihe aalongwa yoye ihaa idhilike iikulya.”
34 Jesus okwe ya yamukula a ti: “Ndishi ito tegelele, aahiywa yombushiki yi idhilike iikulya, manga ombushiki e li puyo?
35 Omasiku otage ke ya, uuna ombushiki taye yi kuthwa; nena otaye ki idhilika ihe iikulya.”
36 Jesus okwe ya lombwele natango eyele ndika: “Kaku na omuntu ta kutha oshaando konguwo ompe e te shi andeke konguwo onkulu. Ngele te shi ningi, ota tuulitha onguwo ompe. Osho wo oshaando oshipe itashi vulu okukalathana noshaando oshikulu.
37 Omaviinu omape ihaga zilwa moompunda oonkulu, ngele tashi ningwa, nena omaviinu omape otaga tuula oompunda e taga tika mo, noompunda otadhi yonuka.
38 Ihe omaviinu omape oge na okuzilwa moompunda oompe.
39 Kaku na ngoka i igilila omaviinu omakulu, ta hala ishewe omape, oshoka ota ti: ‘Omakulu omawanawa.’ ”
1 MEsabati lyontumba Jesus okwa piti pokati komapya. Aalongwa ye oya polola omaha noye ga thengele pomake gawo e taa li.
2 Nena yamwe yomaafarisayi oya ti: “Omolwashike tamu longo shoka shi indikwa kompango mEsabati?”
3 Jesus okwe ya yamukula a ti: “Inamu lesha nani shoka David e shi ningi, sho a li a sa ondjala, oye mwene naantu ye?
4 Oye okwa yi mongulu yaKalunga e ta kutha mo iikwiila mbyoka ya yambelwa Kalunga nokwe yi li po e ta pe wo mboka ya li puye. Iikwiila ya tya ngaaka aayambi ayeke ya li ya pitikilwa oku yi lya.”
5 Opo Jesus okwa ti kuyo: “Omuna gwOmuntu oye Omuwa nogwEsabati.”
6 MEsabati ekwawo Jesus okwa yi mosinagoga nokwa longo aantu. Omo omwa li mu na omulumentu e na oshikaha shokolulyo sha lemana.
7 Nena aalongimpango naafarisayi oya kongo ompito yokutamaneka Jesus, onkee oye mu langele, ya tale, ngele ota aludha mEsabati.
8 Ihe Jesus okwa dhimbulula omadhiladhilo gawo nokwa ti komulumentu gwoshikaha sha lemana: “Thikama, u ye huka montaneho yaayehe.” Oye okwa thikama e te ya.
9 Jesus okwe ya pula e ta ti: “Oshike sha pitikwa okulongwa mEsabati: okulonga uuwanawa nenge okulonga uuwinayi, okuhupitha omwenyo nenge oku gu kanitha?”
10 Jesus okwa tala iipala yaayehe mboka ya kuutumba mpoka nokwa lombwele omulumentu ngoka a ti: “Utha oshikaha shoye.” Oye okwe shi utha, osho nosha aluka.
11 Ihe aatamaneki oye mu geele noonkondo noya pulathana kutya Jesus oye na oku mu ninga ngiini.
12 Pethimbo tuu ndyoka Jesus okwa londo kondundu, a ka galikane, nokwa kala ko uusiku auhe ta galikana Kalunga.
13 Ano ongula sho kwa shi, okwi ithana aalongwa ye, ye ye kuye nokwa hogolola mo muyo omulongo nayaali mboka e ya luku aayapostoli:
14 Simon, ngoka Jesus e mu luku wo Petrus, nomumwayina Andreas, Jakob naJohannes, Filippus naBartolomeus,
15 Mateus naTomas, Jakob yaAlfeus naSimon, ngoka i ithanwa omulaadhi,
16 Judas yaJakob naJudas Iskariot, ngoka a ningi omugwaaleki gwe.
17 Jesus okwa kuluka kondundu pamwe nayo nokwa thikama pelundu puuyelele pamwe nongundu onene yaalongwa ye. Okwa li wo ku na aantu oyendji ya zi kuJudea nokuJerusalem, nosho wo komunkulo gwefuta, popepi naTiro naSidon.
18 Oye ya oku mu pulakena nokupangwa omavu gawo. Naamboka ya li ya hepekwa koombepo dha nyata, oye ya kuye nokwe ya aludha.
19 Ayehe mboka oya kambadhala oku mu guma, oshoka oonkondo ndhoka dha zi muJesus odhe ya aludha.
20 Jesus okwa tala kaalongwa ye e ta ti: “Aanelago one mboka mwa hepa, oshoka Oshilongo shaKalunga osheni.
21 Aanelago one mboka mwa sa ondjala ngashingeyi, oshoka otamu ka kutithwa. Aanelago one mboka tamu lili ngashingeyi, oshoka otamu ka yola.
22 “One aanelago, aantu ngele taye mu tondo, taye mu tidha po, taye mu sheke, nenge taa ti kutya one aawinayi omolwOmuna gwOmuntu.
23 Uuna tashi ningwa, nyanyukweni e tamu tanta, oshoka ondjambi yeni onene yi li megulu. Oshoka noohe osho ya ningile wo aahunganeki.
24 Ihe yayee ne mbo aayamba ngashingeyi, sho mu iwete mwa gwana.
25 Yayee one mboka mwa kuta ngashingeyi, oshoka otamu ka sa ondjala. Yayee one mboka tamu yolo ngashingeyi, oshoka otamu ka sa oluhodhi notamu ka lila.
26 “Yayee, aantu ayehe ngele taye mu popile muuwanawa, oshoka noohe osho ya ningile aahunganeki aafundja.”
27 “Ihe ne mboka tamu pulakene, otandi mu lombwele: Holeni aatondi yeni, mboka ye mu huge, ya ningileni uuwanawa.
28 Yambekeni mboka taye mu thingi, galikaneneni mboka taye mu sheke.
29 Oongoka te ku dhenge kolupanda lumwe, mu etha, a dhenge nolukwawo. Ngoka te ku kutha ohema yoye, mu pa nombaikitha yoye wo.
30 Kehe ngoka te ku indile sha, mu pa. Ngoka te ku yugu iinima yoye, ino yi mu pula we.
31 Shoka mwa hala aantu ye mu ningile, osho ya ningileni wo.
32 “Ngele ne omu hole owala aantu mboka ye mu hole, otamu tegelele tuu epandulo lyasha? Oshoka naalunde wo oye hole aantu mboka ye ya hole.
33 Ngele ohamu ningile owala uuwanawa aantu mboka haye mu ningile uuwanawa, otamu tegelele tuu epandulo lyasha? Oshoka naalunde wo osho haa ningi.
34 Ngele ohamu pe owala mboka taye ke mu pa komeho, otamu tegelele tuu epandulo lyasha? Oshoka naalunde ohaa paathana, opo ya ka galulilwe shi thike pushoka ye shi gandja.
35 Holeni aatondi yeni e tamu ya ningile uuwanawa. Gandjeni, ne inamu tegelela, mu galulilwe. Oshoka ondjambi yeni onene, notamu ningi aana yaKalunga gwokombandambanda. Oshoka Kalunga oye omwaanawa kumboka ihaa pandula naamboka oonakwiihola.
36 Kaleni mu na ohenda ngashika Ho yeni e na ohenda.”
37 “Inamu pangula yakweni, opo Kalunga kee mu pangule; inamu tokola, opo Kalunga kee mu tokole. Dhiminathaneni po oondjo, Kalunga ote mu dhimine po wo.
38 Gandjeni, Kalunga ote mu pe oshiyelekitho shoka tashi holola iilonga yeni iiwanawa, shu udha, sha thindwa, sha huwa, tashi tika e tashi tulwa mekolo lyeni. Oshoka oshiyelekitho shoka tamu shi yelekitha yakweni, osho Kalunga te ke mu yelekitha.”
39 Jesus okwe ya lombwele eyele a ti: “Omuposi ota vulu tuu okukwata omuposi mukwawo keti? Ayehe yaali itaa gwile moshilambo?
40 Omulongwa ke vule ndishi omulongi gwe. Ihe omulongwa kehe ngoka a pwa okulongwa, oku thike pomulongi gwe.”
41 “Omolwashike wa tala okahwandu okashona ke li meho lyamukweni, ihe endangalati li li meho lyoye ku li wete?
42 Nenge oto vulu ngiini okulombwela mukweni: ‘Kuume, andiya, ndi kuthe mo okahwandu ke li meho lyoye,’ ihe endangalati ndyoka li li meho lyoye mwene ku li wete? Mufudhime ngoye, kutha mo tango endangalati meho lyoye mwene, nena oto vulu okumona ko e to kutha mo okahwandu ke li meho lyamukweni.”
43 “Omuti omwaanawa kagu wapa okwiima iiyimati iiwinayi, nomuti omwiinayi kagu wapa okwiima iiyimati iiwanawa.
44 Oshoka kehe omuti ohagu dhimbululwa kiiyimati yagwo. Ndishi oonkwiyu ihadhi likolwa komano nenge oomviinu komankono?
45 Omuntu omwaanawa ota holola mompungulo ombwanawa yomutima gwe uuwanawa. Osho wo omuntu omwiinayi ota holola mo uuwinayi mompungulo ye ombwinayi. Oshoka shoka shu udhilila momutima, okana ohake shi piitha mo.”
46 “Omolwashike hamu ithana ndje: ‘Omuwa, Omuwa’, ihe ihamu longo shono tandi shi mu lombwele?
47 Kehe ngoka te ya kungame nota pulakene oohapu dhandje e ta vulika kudho, otandi mu ulukile nkene a tya.
48 Oye okwa fa omulumentu ta tungu ongulu. Oye okwa fulu nokwa tungile ekankameno kemanya. Opo eyelu olye ya, nefundja olya panuka ko e tali itsu mongulu ndjoka, ihe inayi teka po, oshoka oya li ya tungwa ya kola.
49 Ihe ngoka tu uvu oohapu ndhika dhandje, ye ita vulika kudho, okwa fa omulumentu a tungile ongulu pehekevi, ye ina fula omukanka. Ano efundja sho lya panuka ko e tali itsu mongulu ndjoka, oya kumuka po, nekumukopo lyayo olya li enene.”
1 Jesus sho a mana okulombwela aantu oohapu ndhoka, okwa yi kuKapernaum.
2 Omukuluntu gwaakwiita Omuroma okwa li e na omumati gwe e mu hole ta alukwa e li pokusa.
3 Omulumentu nguka sho a kundana Jesus, okwa tumu aakuluntu yAajuda kuye oku mu indila, e ye, a aludhe omumati gwe.
4 Oyo oye ya kuJesus noye mu hehela nuupenda ya ti: “Omulumentu nguka okwa gwana okukwathwa kungoye.
5 Oye oku hole oshigwana shetu shAajuda nokwe tu tungila osinagoga.”
6 Jesus okwa yi pamwe nayo. Manga inaa thika pegumbo, omukuluntu gwaakwiita okwa tumu ookuume ke yamwe kuJesus, ye mu lombwele kutya: “Omuwa, ino ihepeka owala, oshoka ngame inandi opala, u ye megumbo lyandje.
7 Ngame sho ndi itala, inandi opala, ndi ye kungoye. Popya owala ohapu yimwe, omumati gwandje nota aluka.
8 Oshoka nangame wo omuntu omupangelwa, ihe ondi na aakwiita mepangelo lyandje. Otandi lombwele nguka. ‘Inda!’ nota yi. Otandi lombwele nomukwawo: ‘Ila!’ note ya. Sho tandi lombwele nomupika gwandje: ‘Longa shika!’ ote shi longo.”
9 Jesus sho e shi uvu, okwa kumwa nokwa taalele kongundu yaantu mboka ya li taye mu landula e ta ti kuyo: “Otandi mu lombwele, nomAaisraeli inandi mona mo nando omuntu gumwe e na eitaalo li thike pundika.”
10 Ano aatumwa sho ya galukile megumbo, oya adha omumati a aluka nale.
11 Inapu pita ethimbo ele, Jesus okwa yi koshilando, edhina lyasho Nain. Aalongwa ye nongundu onene yaantu oye mu landula.
12 Sho a thiki peelo lyoshilando, okwa tsakanene naantu yi inda omudhimba taa yi kefumviko lyomumati a valwa awike, kuyina omuselekadhi. Ongundu onene yaantu yomoshilando oya thindikile omuselekadhi.
13 Omuwa sho a mono omuselekadhi ngoka, okwe mu uvile olukeno e ta ti kuye: “Ino lila we.”
14 Jesus okwa hedha popepi nokwa gumu ontala hoka kwa indwa omudhimba, aayindi noya thikama. Nena Jesus okwa ti: “Mugundjuka, otandi ku lombwele, penduka po!”
15 Omumati ngoka a li a sa, okwa penduka nokwa tameke okupopya. Jesus nokwa ti: “Omumwoye oye ngu.”
16 Aantu oya tameke okutila noya hambelele Kalunga ya ti: “Omuhunganeki omunene a holoka mokati ketu. Kalunga okwe ya okuhupitha aantu ye.”
17 Ehokololo ndika tali popi shoka Jesus e shi ningi, olya taandele muJudea ashihe nomomikunda dhopuushiinda.
18 Aalongwa yaJohannes oye mu hokololele ayihe mbika.
19 Nena Johannes okwi ithana yaali yomaalongwa ye nokwe ya tumu kOmuwa oku mu pula: “Ongoye tuu nguka nakuya, nenge otu na okutegelela gulwe?”
20 Ano aalongwa mbeyaka sho ya thiki kuJesus, oya ti: “Johannes Omushashi okwe tu tumu kungoye, tu pule: ‘Ongoye tuu nguka nakuya, nenge otu na okutegelela gulwe?’ ”
21 Pethimbo tuu ndyoka Jesus okwa aludha aantu oyendji ya li ye na omavu, omauwehame noompwidhuli nokwa tonatitha aaposi.
22 Oye okwa yamukula aalongwa yaJohannes a ti: “Indeni, mu ka hokololele Johannes mbyoka mwe yi mono nomwe yi uvu: Aaposi otaa mono ko, iilema otayi ende, aanashilundu otaa yele, oombolo otaa uvu ko, aasi otaa yumudhwa noohepele otaa uvithilwa elaka etoye.
23 Ihe omunelago oye tuu ngoka itaa etha ndje.”
24 Ano aalongwa yaJohannes sho ya yi, Jesus okwa tameke okulombwela aantu ta popi Johannes ta ti: “Mombuga omwa yile, mu ka tale shike? Enenge tali nyenganyengithwa kombepo?
25 Nenge omwa yile, mu ka tale shike? Omuntu a zala oonguwo dho opala? Tala, aantu mboka haa zala oonguwo tadhi adhima, oye li muutoye moombala dhaakwaniilwa.
26 Lombwelii ndje, mombuga omwa ka talele tuu shike? Omuhunganeki andola? Ongame tandi mu lombwele: Oye e vule omuhunganeki.
27 Oye tuu ngoka a nyolwa kwa tiwa: ‘Ongame tandi tumu omutumwa gwandje, e ku tetekele. Oye ngoka te ku opalekele ondjila.’
28 Ongame tandi mu lombwele: Kaku na nando ogumwe gwomaantu omunene e vule Johannes Omushashi. Ihe mOshilongo shaKalunga ngoka omushuushuka kwaayehe oye e mu vule.”
29 Aantu ayehe naafendelithi mboka ya li ya pulakene euvitho lyaJohannes, oya vulika kehalo eyuuki lyaKalunga e taa shashwa kuJohannes.
30 Ihe aafarisayi naanongompango inaa vulika kehalo lyaKalunga, onkee oya tindi okushashwa kuJohannes.
31 “Ihe aantu yopethimbo ndika otandi ya yeleke nashike? Oya fa shike?
32 Oya fa uunona wa kuutumba pomalandelo tau igidhile uukwawo e tau ti: ‘Otse twe mu hakelele, ihe ne inamu tutula uudhano. Otse notwi imbi omaimbilo goosa, ihe ne inamu lila.’
33 Johannes Omushashi okwe ya, ti idhilike iikulya ye ita nu omaviinu, ihe ne otamu ti: ‘Oye oku na oompwidhuli.’
34 Omuna gwOmuntu okwe ya, ta li ye ta nu. One notamu ti: ‘Tala komufukedhi nonkolwi, kuume kaafendelithi nokaalunde.’
35 Ihe uunongo waKalunga owa hololwa u uka kwaayehe mboka ye u taamba.”
36 Omufarisayi gumwe okwa hiya Jesus, a lye pamwe naye. Jesus okwa yi megumbo lye nokwa kuutumba e ta li.
37 Moshilando shoka omwa li mu na omukiintu a li a kala muulunde. Sho u uvu kutya Jesus oku li megumbo lyomufarisayi ta li, okwa yi mo e na ohanga yu udha omugwayo.
38 Oye okwa thikama lwokonima yaJesus poompadhi dhe nokwa tameke okulila e ta thetitha oompadhi dhaJesus nomahodhi ge nokwe dhi kukutike nomafufu gokomutse gwe. Nena okwa simaneke Jesus nokuhupita oompadhi dhe nokwe dhi gwayeke omugwawo gwa nika nawa.
39 Ihe omufarisayi ngoka a hiya Jesus sho e shi mono, okwi ipopile a ti: “Omulumentu nguka ngele omuhunganeki, okwa li e na okutseya wo omukiintu nguka e mu gumu kutya omulunde.”
40 Jesus okwe mu lombwele a ti: “Simon, onda hala, tu popye po.” Oye a yamukula: “Oshike, Muhongi?”
41 Jesus okwa ti kuye: “Okwa li ku na omuyamba gumwe a lilwa iimaliwa kaantu yaali: Gumwe okwe mu lile oongunga dhiimaliwa omathele gatano nomukwawo omilongo ntano.
42 Ano sho ya li kaaye na shoka taa futu, okwe dhi ya dhimine po ayehe. Olye ano gwaambaka yaali ta kala e na ohole oyindji?”
43 Simon okwa yamukula a ti: “Ndishi oye ngoka a dhiminwa po oongunga odhindji.” Jesus okwa ti kuye: “Eyamukulo lyoye oli li mondjila.”
44 Opo Jesus okwa tala omukiintu ngoka nokwa ti kuSimon: “Omukiintu nguno ou mu wete? Ongame sho nde ya megumbo lyoye, ino pa ndje omeya gokwiiyoga koompadhi, ihe omukiintu nguno okwa theta oompadhi dhandje nomahodhi ge e te dhi kukutike nomafufu gokomutse gwe.
45 Ngoye ino thipa ndje komilungu, ihe omukiintu nguno, sho nde ya mo, ine etha okusimaneka ndje nokuthipa oompadhi dhandje.
46 Ngoye ino gwayeka omutse gwandje nomagadhi, ihe ye okwa gwayeke oompadhi dhandje nomugwayo gwa nika nawa.
47 Onkee ano otandi ku lombwele: Omukiintu nguno sho a holola ohole oyindji, osha ulike wo kutya okwa dhiminwa po oondjo odhindji. Oshoka ngoka a dhiminwa po oondjo oonshona, oku na wo ohole onshona.”
48 Jesus okwa ti komukiintu: “Oondjo dhoye odha dhimwa po.”
49 Aantu mboka ya li ya kuutumba poshililo, oya tameke okupulathana ya ti: “Nguka olye ano, ta vulu okudhima po oondjo?”
50 Opo Jesus okwa lombwele omukiintu: “Eitaalo lyoye lye ku hupitha. Inda nombili.”
1 Methimbo lya landula Jesus okwe ende miilando nomomikunda noku uvitha elaka etoye lyOshilongo shaKalunga. Aalongwa ye omulongo nayaali oye ende pamwe naye
2 nosho wo aakiintu mboka a li e ya aludha, sho ya li ye na oompwidhuli nomavu galwe: Maria Magdalena, mungoka mwa li mwa tidhwa oompwidhuli heyali,
3 naJohanna, omukiintu gwaKusa, elenga lyaHerodes nosho wo Susanna naakiintu yalwe mboka ya li ya longitha omaliko gawo e taa yakula Jesus naalongwa ye.
4 Aantu oya tameke okuya kuJesus, ya zi kiilando niilando, nongundu onene sho ye mu gongalele, okwe ya lombwele eyele ndika:
5 “Omukuni okwa yi, a ka kune oombuto mepya. Ano mokukuna kwe oombuto dhimwe odha gwile mondjila, noondhila odhe ya e tadhi dhi shomona po.
6 Dhimwe odha gwile poshipale pwaa na evi olindji nomokumena odha ganya, oshoka evi lyapo ihali lwedha okukukuta.
7 Dhimwe odha gwile moongwena. Oongwena odha koko mumwe nadho nodhe dhi thininike.
8 Dhimwe odha gwile mevi ewanawa nodha mene e tadhi vala lwethele.” Jesus sho a mana okupopya, okwa ti kuyo: “Pulakeneni, ngoka e na omakutsi gokuuva, nu uve ko!”
9 Aalongwa yaJesus oye mu pula oondunge dheyele ndika kutya otali ti ngiini.
10 Oye nokwa ti: “Ne omwa pewa okuuva ko iiholekwa yOshilongo shaKalunga, ihe yalwe otaa lombwelwa momayele. Onkee: Okumona ohaa mono, ihe kaa wete ko. Okuuva ohaa uvu, ihe kaa uvite ko.”
11 “Eyele otali ti: Oombuto odho oohapu dhaKalunga.
12 Ndhoka dha gwile mondjila, odha fa aantu mboka haa pulakene oohapu, ihe omuhindadhi ote ya e ta kutha mo oohapu ndhoka dha kunwa moomwenyo dhawo, opo yaa vule okwiitaala, ya hupithwe.
13 Ndhoka dha gwile poshipale, odha fa aantu mboka taa uvu oohapu e taye dhi taamba nenyanyu, ihe itadhi ningine muyo. Otaa itaale okathimbo kowala, ihe uuna taa adhika kemakelo, otaa etha eitaalo.
14 Ndhoka dha kunwa moongwena, odha fa aantu mboka taa uvu oohapu, ihe konima yethimbo iimpwiyu, uuyamba nuuhalu wopauyuni otayi thininike oohapu, kaaya imike iiyimati.
15 Ndhoka dha gwile mevi ewanawa, odha fa aantu mboka taa uvu oohapu notaye dhi taamba nomwenyo omwaanawa gu na evuliko e taa dhiginine, sigo taa imike iiyimati.”
16 “Kaku na omuntu ta tema olamba e te yi tula kohi yontungwa nenge kohi yontala. Ihe oku na oku yi tula koshihukikwa, opo aantu ngele taa ya megumbo, ya mone uuyelele.”
17 “Oshoka kaku na shoka sha holekwa itaashi ka hololwa, nokaku na shoka sha holama itaashi ka tseyika, shi ye puuyelele.”
18 “Kotokeni, mu tale, nkene hamu pulakene. Oshoka mboka ye na, oyo otaa pewa, ihe mboka kaye na, oyo otaa kuthwa noshishona shoka taa dhiladhila kutya oshawo.”
19 Yina yaJesus naamwayina aalumentu oye ya kuye, ihe oya nyengwa okuthika kuye omolwowindji waantu.
20 Nena gumwe gwomaantu mboka okwa ti kuJesus: “Tala, nyoko naamwanyoko oya thikama pondje, taye ku kongo, ya hala, ya popye nangoye.”
21 Jesus okwe ya yamukula a ti: “Meme naamwameme oyo mboka taa uvu oohapu dhaKalunga e taa vulika kudho.”
22 Esiku limwe Jesus okwa yi mowato pamwe naalongwa ye nokwa ti kuyo: “Tu taagulukileni handiyaka yetale.” Oyo noya yi.
23 Ano mokudhuga kwawo oye okwa tameke okukotha. Oshikungulu shombepo osha tukuluka kombanda yetale. Omeya noga tameke okuya mowato noshiponga osha li popepi nayo.
24 Aalongwa oye ya kuJesus noye mu pendutha ya ti: “Omuwa, Omuwa, tatu sile mwee!” Opo Jesus okwa penduka nokwa ganda ombepo nomakuthikuthi, nokwa mwena kwa tya thilu.
25 Oye nokwa ti kaalongwa: “Eitaalo lyeni oli li peni?” Ihe oya kumwa noya tila e taa pulathana: “Nguka olye ano, sho ta ganda ombepo nomakuthikuthi, oyo notayi vulika kuye?”
26 Oyo oya dhugu yu uka koshilongo shAagerasa, shi li handiyaka yefuta lyaGalilea.
27 Jesus sho a thiki kuukukutu, okwa tsakaneke omulumentu ta zi koshilando e niwe kompwidhuli. Oye okwa kala ethimbo ele te ende omupwedhu ye ina kala megumbo, ihe okwa kala moombila dhomomakololo.
28 Sho a mono Jesus, okwi igidha, a tsu oongolo koshipala she nokwa popi mokule a ti: “Jesus, Omuna gwa Kalunga gwokombandambanda! Owa halela ndje shike? Otandi ku galikana waa hepeke ndje.”
29 Oye okwa popi ngeyi, oshoka Jesus okwa tidha mo ombepo ya nyata muye. Olwindji sho ye mu kwata, okwe edhililwa mondholongo a mangwa nomalyenge nomiya kiikaha nokomagulu, ihe ohi itokola mo, ompwidhuli e tayi mu fala kombuga.
30 Opo Jesus okwe mu pula a ti: “Edhina lyoye olini?” Oye a yamukula: “Edhina lyandje ongame Ngundu,” oshoka muye omwa li mu na oompwidhuli odhindji.
31 Oompwidhuli odha hehela Jesus, kee dhi undulile molumbogo lwomuule.
32 Popepi nondundu opwa li oshigunda oshinene shiingulu tayi napa. Oompwidhuli odha hehela Jesus, e dhi pitike, dhi ye miingulu. Oye okwe dhi pitika.
33 Oompwidhuli odha zi momulumentu ngoka nodha yi miingulu. Nena oshigunda ashihe shiingulu osha nuka okuza komutuni omule noshi iyumbile mefuta e tashi sile mo.
34 Aasita yiingulu sho ya mono shoka sha ningwa po, oya fadhuka po noya ka hokolola oshiningwanima shika moshilando nomomikunda ndhoka.
35 Aantu noye ya okutala shoka sha ningwa po. Oyo oye ya kuJesus noya mono omulumentu ngoka a zi oompwidhuli, a kuutumba puJesus a zala nawa noku na oondunge; oyo noya tila.
36 Aantu mboka ye shi mono, oya hokololele yalwe, nkene omulumentu ngoka a li e na oompwidhuli, a aludhwa.
37 Nena aantu ayehe yomomikunda ndhoka dhAagerasa oyi indile Jesus, a ze mo moshilongo shawo, oshoka oya li ya tila noonkondo. Opo Jesus okwa yi mowato e ta shuna.
38 Omulumentu ngoka a li e na oompwidhuli, okwi indile Jesus, a pitikwe okukala puye. Ihe Jesus okwe mu laleke a ti:
39 “Shuna kaandjeni, u ke ya hokololele shoka Kalunga e shi ku ningile.” Omulumentu okwa yi nokwa hokolola moshilongo ashihe shoka Jesus e shi mu ningile.
40 Jesus sho a galuka ko, aantu oyendji oye mu tsakaneke, oshoka oya adhika ye mu tegelela.
41 Nena omulumentu gumwe, edhina lye Jairus, omukuluntu gwosinagoga, okwe ya kuye. Oye okwa tsu oongolo poompadhi dhaJesus nokwe mu hehela, a ye megumbo lye,
42 oshoka okwa li e na omwana omukadhona omuvalwa awike gwoomvula omulongo nambali e li pokusa. Jesus manga ta yi pamwe naJairus, aantu oye mu uminine.
43 Okwa li wo ku na omukiintu a ala uuvu wetiko lyombinzi oomvula omulongo nambali. Oye okwa manene eliko lye alihe moonganga, ihe odha nyengwa oku mu aludha.
44 Omukiintu ngoka okwe ya te endele konima yaJesus nokwa gumu koongenge dhonguwo ye; mbalambala etiko lye olya kodha.
45 Jesus okwa pula: “Olye a gumu ndje?” Nena kehe gumwe okwe shi idhimbike, ihe Petrus okwa ti: “Muhongi, aantu oyendji ye ku kundukidha noye ku uminina.”
46 Jesus okwa ti: “Onde shi dhimbulula kutya ope na gumwe a gumu ndje, omolwoonkondo ndhoka dha zi mungame.”
47 Ano omukiintu sho a dhimbulula kutya ita vulu we okuholama, okwe ya nokwa tsu oongolo koshipala shaJesus, a tila ta kakama. Nena okwa lombwele Jesus montaneho yaantu ayehe kutya omolwashike e mu gumu nankene a aludhwa mbalambala.
48 Jesus okwa ti kuye: “Mumwandje, eitaalo lyoye lye ku aludha. Inda nombili.”
49 Manga Jesus a li ta popi, opwe ya omulumentu a zi kaandjawo yomukuluntu gwosinagoga a ti: “Omumwoye omukadhona a mana oondjenda. Oto monithile we shike Muhongi iihuna?”
50 Jesus sho u uvu oohapu ndhoka, okwa ti kuJairus: “Ino tila, itaala owala, omumwoye ota aluka.”
51 Jesus sho e ya megumbo, ina pitika nando omuntu gumwe a ye mo pamwe naye, kakele kaPetrus, Johannes naJakob nahe nayina yomunona ayeke.
52 Aantu ayehe mboka ya li mo, oya hekumuna noya lili oosa omolwe. Ihe Jesus okwa ti. “Inamu lila, omukadhona ina sa, ihe okwa kotha.”
53 Aantu oya yolo Jesus, oshoka oya li ye shi shi kutya omukadhona okwa sa.
54 Jesus okwe mu kwata koshikaha nokwa popi mokule a ti: “Mumwandje penduka po!”
55 Omwenyo gwe ogwe ya mo nokwa thikama nziya. Jesus okwe ya lombwele, ya pe omunona iikulya.
56 Aakuluntu yomunona oya kumwa, ihe Jesus okwe ya indile, yaa hokololele nando omuntu shoka sha ningwa po.
1 Jesus okwi ithana aalongwa ye omulongo nayaali nokwe ya pe oonkondo nepitikilo okutidha mo oompwidhuli nokwaaludha omavu.
2 Nena okwe ya tumu okuuvitha Oshilongo shaKalunga nokwaaludha aavu.
3 Oye a ti kuyo: “Inamu ya nasha mondjila: handhimbo, hampunda yokweenda nayo, haikulya, haimaliwa, hahema mbali, yimwe oya gwana.
4 Ngele tamu yi megumbo lyontumba, kaleni moka, sigo tamu ka za mo moshilando shoka.
5 Ngele itamu taambwa, zii mo moshilando shoka, ne mu pupule ko ontsi koompadhi dheni, opo shi ninge onzapo yoku ya pa uusama.”
6 Aalongwa oya yi noye ende omikunda adhihe. Oyu uvithile aantu elaka etoye noya aludha aavu akuhe.
7 Herodes, omuleli gwaGalilea, sho u uvu ayihe mbyoka ya ningwa po, ina tseya shoka e na okuninga. Oshoka aantu yamwe oya popi ya ti kutya Johannes Omushashi okwa yumuka kuusi.
8 Ihe yamwe oya ti, oElia a holoka; yamwe ishewe oya ti kutya gumwe gwomaahunganeki yonale a yumuka kuusi.
9 Herodes okwa ti: “Johannes onde mu tetitha omutse, ihe omulumentu nguka olye ano? Ondu uvu omahokololo ogendji tage mu hokolola.” Oye nokwa kala ta kongo ompito, a mone Jesus.
10 Aayapostoli oya galuka noya hokololele Jesus ayihe mbyoka ye yi longo. Oye okwe ya kutha maantu nokwe ya fala, ye ki ikalele lwokoshilando, edhina lyasho Betsaida.
11 Oongundu dhaantu sho dhe shi uvu, odhe mu landulile ko. Oye okwe ya taamba nenyanyu nokwe ya hokololele Oshilongo shaKalunga e ta aludha aavu mboka ya li ya pumbwa okwaaludhwa.
12 Ano sho kwa ningi ongulohi, aalongwa ye oye ya kuye noya ti: “Pokuma mpaka omombuga yowala, onkee laleka aantu, ya ye momikunda nomomagumbo gopuushiinda, ya ka konge omulalo niikulya.”
13 Jesus okwa ti kuyo: “Ya peni iikulya.” Oyo ya ti kuye: “Mpaka otu na po iikwiila itano ayike noohi mbali. Owa hala, tu ye, tu ka landele aantu ayehe mbaka iikulya?”
14 Aalumentu mboka ya li po, oya li ye thike pomayuvi gatano. Opo Jesus okwa lombwele aalongwa ye e ta ti: “Kuutumbikeni aantu moongundu, kehe yimwe aantu omilongo ntano.”
15 Oyo oye shi ningi e taye ya kuutumbike ayehe.
16 Jesus okwa kutha iikwiila mbyoka itano noohi mbali, okwa ligamene kegulu nokwe yi hambelelele Kalunga, e yi pambula nokwe yi pe aalongwa ye, ye yi topolele aantu.
17 Oyo ayehe oya li e taa kuta. Aalongwa oya toola iihupe yuupambu, oontungwa omulongo nambali.
18 Pethimbo lyontumba Jesus sho a li ta galikana muuwike, aalongwa ye oye ya kuye. Oye okwe ya pula a ti: “Aantu otaa tile ndje ngiini, ongame lye?”
19 Oyo oye mu yamukula ya ti: “Yamwe otaa ti oJohannes Omushashi, yamwe otaa ti oElia, nayamwe otaa ti gumwe gwomaahunganeki yonale a yumuka kuusi.”
20 Oye okwe ya pula natango: “Ne otamu tile ndje ngiini, ongame lye?” Petrus okwe mu yamukula a ti: “Ongoye Omugwayekwa gwaKalunga.”
21 Nena okwe ya indike, kaaye mu popye nando okulye.
22 Jesus okwa tsikile ko a ti: “Omuna gwOmuntu ota ka hepekwa nomahepeko ogendji note ke ekelwahi kaakuluntu, kaayambi aakuluntu nokaalongimpango. Oye ota dhipagwa, ihe esiku etitatu ota ka yumudhwa.”
23 Jesus okwa lombwele aantu ayehe e ta ti: “Ngele ku na ngoka a hala okulandula ndje, oye ni idhimbwe ye mwene, ni itsike omushigakano gwe esiku kehe, ye na landule ndje.
24 Oshoka oongoka a hala okuhupitha omwenyo gwe, oye te gu kanitha, ihe ngoka ta kanitha omwenyo gwe molwandje, oye te gu hupitha.
25 Oshoka otashi kwatha shike, omuntu nando ni ilikolele uuyuni auhe, ye e ta kanitha omwenyo gwe nenge ti iyono po?
26 Ngele ku na ngoka ta si ndje ohoni nosho wo oohapu dhandje, nena Omuna gwOmuntu ote ke mu sa wo ohoni, uuna te ke ya e li mesimano lye mwene nolyaHe nolyaayengeli aayapuki.
27 Ongame tandi mu lombwele: Opu na yamwe mwaambaka ya thikama mpaka, itaa makele eso, manga inaaya mona Oshilongo shaKalunga.”
28 Jesus sho a popi ngeyi, opwa piti konyala omasiku gahetatu nokwa kutha Petrus, Johannes naJakob e ta yi nayo kondundu, a ka galikane.
29 Manga a li ta galikana, olupe lwoshipala she olwa shituluka, noonguwo dhe odha toka dhe eta uuyelele.
30 Ombaadhilila opwa holoka aalumentu yaali, Moses naElia, e taa kundathana naye.
31 Oyo oya holoka ye na eadhimo lyomegulu noya kundathana naJesus, nkene ta ka tsakanitha ehalo lyaKalunga, sho ta ka sa muJerusalem.
32 Ihe Petrus nayakwawo oya li yu umbwa oomposi, ihe sho ya papudhuka mo, oya mono eadhimo lyaJesus naalumentu mboka yaali ya thikama puye.
33 Ano Moses naElia sho ya topoka naJesus, Petrus okwa ti kuye: “Muhongi, opwe tu opalela mpaka okukala. Otatu ka dhikila po omatsali gatatu, limwe olyoye, limwe olyaMoses nalimwe olyaElia.” Petrus ina tseya shoka a li ta popi.
34 Ano manga ta popi, oshikogo osha holoka noshe ya siikile nomuzile gwasho. Aalongwa mboka oya tila, sho ya siikilwa koshikogo.
35 Ewi olya zi moshikogo lya ti: “Nguka Omumwandje, ngoka nde mu hogolola, mu uveni.”
36 Konima yokupopya kwewi aalongwa oya mono Jesus e li awike. Oyo noye shi mwenene yo inaa hokololela nando omuntu sha pethimbo ndyoka shoka ye shi mono.
37 Mesiku lya landula ko, sho ya kuluka kondundu, aantu oyendji oya tsakaneke Jesus.
38 Omulumentu gumwe okwi igidha mokati kongundu a ti: “Muhongi, otandi ku indile, u sile ohenda omumwandje, omuvalwa awike.
39 Oku na ompwidhuli, ndjoka omathimbo gamwe hayi mu kwata, nota tameke okwiigidha oshihalulu, e tayi mu mbungambunga, sigo te eta ondutu. Oyo ohayi kala tayi mu ehameke noyi na uudhigu oku mu etha.
40 Onda li ndi indile aalongwa yoye, ye yi tidhe mo, ihe oya nyengwa.”
41 Jesus okwa yamukula a ti: “Yayee, aantu yopethimbo ndika yaa na eitaalo noya pilaala, osigo uunake tandi kala pune? Osigo uunake ndi na oku mu idhidhimikila?” Opo Jesus okwa ti kuhe: “Eta omumwoye huka kungame.”
42 Omumati manga te ya, ompwidhuli oye mu hata pevi e tayi mu mbungambunga. Nena Jesus okwa ganda ombepo ya nyata nokwa aludha omumati e te mu fala kuhe.
43 Aantu ayehe oya kuminwa oonkondo oonene dhaKalunga. Aantu oya li ya kuminwa natango ayihe mbyoka Jesus e yi longo, sho a lombwele aalongwa ye e ta ti:
44 “Taambeni oohapu ndhika tandi mu lombwele ngashingeyi, mu dhi dhiginine: Omuna gwOmuntu ota ka gandjwa miikaha yaantu.”
45 Aalongwa inaa uva ko kutya otashi ti ngiini, oshoka osha li she ya holekwa, ihe oya tila oku mu pula.
46 Mokati kaalongwa omwa penduka edhiladhilo kutya olye omukuluntu e vule ooyakwawo ayehe.
47 Jesus sho a dhimbulula omadhiladhilo gawo, okwa kutha okanona nokwe ka thikameke ponto ye
48 e ta ti kuyo: “Kehe ngoka ta taamba medhina lyandje okanona nkaka, oye ta taamba ndje; naangoka ta taamba ndje, ota taamba wo ngoka a tuma ndje. Oshoka ngoka gwomokati keni omudhinwa kwaayehe, oye omukuluntu.”
49 Johannes okwa popi a ti: “Muhongi, otwa mono omuntu gumwe ta tidha mo oompwidhuli medhina lyoye, otse notwe mu indike, oshoka ka li gwomongundu yetu.”
50 Opo Jesus okwa yamukula Johannes naalongwa yalwe a ti: “Inamu mu indika, oshoka ngoka kee na ondumbo nane, oye okwa gama kune.”
51 Ano omasiku sho ga thiki popepi, uuna Jesus e na okulonda, a ye megulu, okwa tokola okuukilila kuJerusalem.
52 Oye okwa tetekelitha aatumwa ye, ya ye komukunda gwontumba muSamaria, opo ye ke mu longekidhile ehala lyokulala.
53 Ihe mbeyaka oya tindi okutaamba Jesus, oshoka okwa li u uka kuJerusalem.
54 Ano aalongwa ye Jakob naJohannes, sho ye shi mono, oya ti: “Omuwa, owa hala, tu indile omulilo gu ze megulu, gu ya halakanithe po?”
55 Nena Jesus okwe ya tala e te ya ganda.
56 Oyo noya yi komukunda gulwe.
57 Ano mokweenda kwawo omulumentu gumwe okwa ti kuJesus: “Onda hala oku ku landula shaa mpoka to yi.”
58 Jesus okwa ti kuye: “Oombandje odhi na omakwena, noondhila odhi na iihandhila, ihe Omuna gwOmuntu ke na mpoka ta langeke omutse gwe.”
59 Jesus okwa lombwele natango gulwe a ti: “Landula ndje!” Nguka okwa ti: “Omuwa, pitika ndje manga, ndi ye, ndi ka fumvike tate.”
60 Jesus okwa ti kuye: “Etha aasi, ya fumvike aasi yawo. Inda, u ka uvithe Oshilongo shaKalunga.”
61 Gumwe ishewe okwa ti: “Omuwa, onda hala oku ku landula, ihe etha ndje manga, ndi ka laleke yaandjetu.”
62 Jesus okwa ti kuye: “Kehe ngoka ta tameke okupulula e ta tala konima, ino opalela Oshilongo shaKalunga.”
1 Konima yaambika Omuwa okwa hogolola aalongwa yalwe omilongo heyali nayaali nokwe ya tetekelitha, ya ye koshilando nokehala kehe hoka ye mwene e na okuya ko.
2 Oye okwe ya lombwele a ti: “Iilya oyi li po oyindji, ihe aalongi oyo aashona. Galikaneni ano mwene gwiilya, a tume aalongi keteyo lye.
3 Indeni! Ngame otandi mu tumu ongoonzi mokati komambungu.”
4 “Inamu humbata okampunda kiimaliwa nenge ompunda yokweenda nayo, hangaku koompadhi, ne inamu mana po ethimbo nokukunda aantu mondjila.
5 Ngele tamu yi megumbo lyontumba, tyeni tango: ‘Ombili nayi kale megumbo ndika.’
6 Ngele omu na omuntu e hole ombili, nena ekundo lyeni lyombili otali kala kuye; ihe ngele hasho, ombili yeni otayi mu galukile.
7 Kaleni megumbo olyo tuu ndyoka, mu lye ne mu nwe shoka tamu shi pewa; oshoka nakulonga kehe oku na okupewa ondjambi ye. Inamu za megumbo limwe, mu ye kekwawo.
8 Ngele tamu yi moshilando shontumba e tamu taambwa, lyeni shoka tamu shi pewa.
9 Aludheni aavu yomoshilando shoka, ne mu ya lombwele mu tye: ‘Oshilongo shaKalunga she ya popepi nane.’
10 Ngele tamu yi moshilando, ihe inamu taambwa, indeni komapandaanda gasho e tamu ti:
11 ‘Ontsi yomoshilando sheni, ndjoka ya kakatela koompadhi dhetu, otatu yi pupula ko oku mu pa uusama. Ihe tseyeni kutya Oshilongo shaKalunga she ya popepi.’
12 Ngame otandi mu lombwele: Sodom otashi ka ninga ihwepo, shi vule oshilando shoka mesiku ndyoka lyepangulo.”
13 “Yayee ngoye Korasin! Yayee ngoye Betsaida! Oshoka ando muTiro nomuSidon mwa li mwa ningilwa iilongankondo mbyoka ya ningilwa mune, ando yo oyi itedhulula nale mokuzala omahahi nokukuutumba momutoko.
14 Ihe Tiro naSidon otayi ka kala ihwepo yi mu vule mesiku ndyoka lyepangulo.
15 Nangoye wo Kapernaum, oto ka lengwa sigo omegulu? Aawe, oto ka kulukithilwa sigo omoheli.”
16 Jesus okwa ti kaalongwa ye: “Oongoka ta vulika koohapu dheni, oye ta vulika wo koohapu dhandje; ngoka itee mu taamba, ita taamba ndje; naangoka ita taamba ndje, ita taamba wo ngoka a tuma ndje.”
17 Aalumentu omilongo heyali nayaali oya galuka yu udha enyanyu enene noya ti: “Omuwa, noompwidhuli wo sho twe dhi ganda medhina lyoye, odha vulika kutse.”
18 Jesus okwa ti kuyo: “Onda mono Satana a gu megulu ongolwaadhi.
19 Pulakeneni! Ne onde mu pa oonkondo dhokulyata omayoka noondje nokusinda oonkondo adhihe dhaSatana, nokaku na shoka tashi mu etele oshiponga.
20 Ihe inamu nyanyukilwa, oompwidhuli sho tadhi vulika kune; nyanyukilweni, omadhina geni sho ga nyolelwa membo lyomegulu.”
21 Pethimbo tuu ndyoka Jesus oku udhithwa enyanyu kOmbepo Ondjapuki e ta ti: “Otandi ku hambelele, Tate, Omuwa gwegulu nogwevi, oshoka iinima mbika ongoye we yi holeke aanongo naanamayele nowe yi hololele mboka ya fa uunona. Eeno, Tate, shika osho she ku opalela.”
22 “Iinima ayihe onde yi pewa kuTate. Kaku na ngoka a tseya kutya Omwana oye olye, oTate awike. Osho wo kaku na ngoka a tseya Tate oye olye, Omwana awike, naamboka Omwana a hogolola oku ye mu hololela.”
23 Jesus naalongwa ye sho ya li yi ikalele, okwe ya tala e ta ti kuyo: “Omeho geni oge na elago, sho taga mono iinima mbika mwe yi tala.
24 Oshoka otandi mu lombwele: Aahunganeki oyendji naakwaniilwa oya li ya hala nokuhalelela okumona mbyoka tamu yi tala, yo inaye yi mona, nokuuva ndhoka tamu dhi uvu, yo inaye dhi uva.”
25 Nena omunongompango gumwe okwe ya, a makele Jesus e ta ti: “Muhongi, ondi na okuninga shike, ndi mone omwenyo gwaaluhe?”
26 Jesus okwe mu yamukula a ti: “Omanyolo otaga ti ngiini? Oho ga fatulula ngiini?”
27 Oye okwa yamukula a ti: “ ‘Hola Omuwa Kalunga koye komutima gwoye aguhe nokomwenyo gwoye aguhe nokomadhiladhilo goye agehe nonoonkondo dhoye adhihe’; na: ‘Hola mukweni, ngaashi ngoye wi ihole mwene.’ ”
28 Jesus okwa ti kuye: “Owa yamukula mondjila, shi gwanitha e to kala u na omwenyo.”
29 Omunongompango sho a li a hala okwiiyulika kutya oye omuyuuki, okwa pula Jesus a ti: “Mukwetu olye?”
30 Opo Jesus okwa yamukula a ti: “Omulumentu gwontumba okwa li ta zi kuJerusalem u uka kuJeriko nokwa adhika kaayugi. Oye mu hula oonguwo noye mu mokagula e taye mu thigi e na okamwenyo okashona.
31 Ohaluka omuyambi gwontumba okwa adhika te ende nondjila ndjoka. Sho e mu mono, okwa tsu moluha e te mu pitilile.
32 Osho wo Omulevi, sho e ya pehala mpoka, okwe mu mono nokwa tsu moluha e te mu pitilile.
33 Ihe Omusamaria manga a li te ende nondjila ndjoka, okwe ya po nokwa mono omulumentu ngoka a mona iihuna nokwa li e mu uvitile olukeno.
34 Oye okwa yi kuye nokwa panga iilalo ye nokutila mo omahooli nomaviinu e te yi manga. Oye okwe mu kayilike konkutsa ye nokwe mu sisidhile kongulu yaayenda e te mu hungu.
35 Esiku lya landula manga inaa ya, okwa kutha iimaliwa iisiliveli iyali nokwe yi pe mwene gwongulu yaayenda e ta ti kuye: ‘Hunga omuvu nguka, nuuna tandi ka galuka, otandi ke ku galulila ashihe shoka we mu futile.’ ”
36 Jesus okwa ti: “Ano pandunge dhoye oguni po gwaambaka yatatu a kala omukwawo gwaanguka a adhikile kaayugi?”
37 Omunongompango okwa yamukula a ti: “Oye ngoka e mu sile ohenda.” Jesus okwa ti kuye: “Nangoye wo inda, u ka ninge ngaaka.”
38 Jesus naalongwa ye oya tsikile ondjila yawo noye ya komukunda gwontumba. Omukiintu gumwe edhina lye Marta okwe mu taamba maandjawo.
39 Oye okwa li e na omumwayina, edhina lye Maria, ngoka a li a hokwa okukuutumba poompadhi dhOmuwa nokwa pulakene oohapu dhe.
40 Ihe Marta okwi ipyakidhile unene niilonga nokwe ya kuJesus e ta ti: “Omuwa, ku na ko nasha nangame, omumwameme sho e etha ndje, ndi yakule awike? Mu lombwela, e ye, a kwathe ndje.”
41 Omuwa okwe mu yamukula a ti: “Marta, Marta, ou na iimpwiyu oyindji nowa piyagana,
42 ihe oshinima shimwe shi na oshilonga, osho shika: Maria okwi ihogololele ombinga ombwanawa itee yi kuthwa nando okulye.”
1 Esiku limwe Jesus okwa li ta galikana pehala lyontumba. Sho a hulitha, gumwe gwomaalongwa ye okwa ti kuye: “Omuwa, tu longa okugalikana, ngaashi Johannes a longo aalongwa ye.”
2 Jesus okwa ti kuyo: “Ngele tamu galikana, tyeni: ‘Tate, edhina lyoye nali yapulwe, Oshilongo shoye nashi ye.
3 Tu pa wo nena oshithima shetu twe shi pumbwa.
4 Dhima po oondjo dhetu, ngashika natse wo tatu dhimi po dhaamboka ya yono kutse. Ino tu fala mehongololo.’ ”
5 Jesus okwa ti kaalongwa ye: “Olye gwomune e na kuume ke te ya kaandjawo mokati kuusiku e te mu lombwele: ‘Kuume kandje, pe ndje iikwiila itatu.
6 Oshoka ondi na kuume kandje, opo a thiki ngashingeyi a zi mondjila, ihe ngame kandi na nando osha shoku mu pa, a lye.’
7 Natu tye, kuume koye ngoka ote ku yamukula e li meni e ta ti: ‘Ino yonena ndje oomposi. Omweelo ogwa patwa nale, naamwandje oya lala mpaka pungame. Ite vulu okupenduka, ndi yi ku pe.’
8 Ngame otandi mu lombwele: Ngele ita penduka, e ku pe iikwiila mbyono omoluukuume weni naye, oku na okupenduka e te ku pe shoka we shi pumbwa omoluudhiginini woye woku mu indila.
9 “Onkee tandi mu lombwele: Indileni, e tamu pewa; kongeni, e tamu mono; konkoleni, e tamu egululwa.
10 Oshoka kehe ngoka ti indile, ota pewa; naangoka ta kongo, ota mono; naangoka ta konkola, ote egululwa.
11 Omuvali olye gwomokati keni, omwana ngele te mu indile ohi, te mu pe eyoka?
12 Nenge te mu indile eyi, ye te mu pe ondje?
13 Ano ne mboka aawinayi ngele omu shi okupa aana yeni omagano omawanawa, unene tuu Ho yeni yomegulu ota gandja Ombepo Ondjapuki kumboka taye mu indile.”
14 Jesus okwa tidha momulumentu ompwidhuli ihayi popi. Opwa ningi ihe, ompwidhuli sho ya tidhwa mo, omulumentu ngoka okwa tameke okupopya. Aantu oya kumwa,
15 nayamwe yomuyo oya ti: “OBelsebul, omukuluntu gwoompwidhuli e mu pe oonkondo dhokutidha mo oompwidhuli.”
16 Yamwe ishewe oye mu makele noye mu pula, e ya talithe oshikumithalonga shokuholola kutya ota longithwa kuKalunga.
17 Ihe Jesus sho a dhimbulula omadhiladhilo gawo, okwa ti kuyo: “Okehe tuu oshilongo tashi itsile ondumbo, otashi yonuka po. Osho wo egumbo ngele tali itsile ondumbo, itali kala po.
18 Satana ngele ti itsile ondumbo, oshilongo she otashi vulu tuu okukala po? One otamu ti kutya oonkondo dhokutidha mo oompwidhuli onde dhi pewa kuBelsebul.
19 Ngele osho tandi dhi tidha mo ngawo, aana yeni otaye dhi tidha mo noonkondo dhalye? Onkee ano oyo taa ningi aapanguli yeni.
20 Ihe ngele ngame otandi tidha mo oompwidhuli noonkondo dhaKalunga, nena Oshilongo shaKalunga oshi li pune.”
21 “Uuna omulumentu omunankondo e na iikondjitho ya gwana, nena ota tonatele nawa egumbo lye, neliko lye olya gamenwa.
22 Ihe ngele ta matukilwa komulumentu mukwawo e mu vule oonkondo e ta sindika, mukwawo ote mu yugu iikondjitho ye ayihe mbyoka a li inekela e ta topola oshihakanwa.”
23 “Kehe ngoka kee li kombinga yandje, oye okwa tsa ondumbo nangame. Naangoka itaa gongele pamwe nangame, oye ota halakanitha po.”
24 “Ombepo ya nyata ngele tayi zi momuntu, otayi endagula nomitunda dhaa na omeya, tayi kongo evululuko, yo itayi li mono. Otayi ti: ‘Otandi shuna megumbo lyandje moka nda zile.’
25 Ngele ya galuka, otayi adha egumbo lya kombwa nolyo opalekwa.
26 Nena otayi yi notayi etelele oombepo oonkwawo heyali dhi yi vule muuwinayi. Odho tadhi ya notadhi kala moka. Nena okukala kwahugunina kwomuntu ngoka otaku ningi okwiinayi ku vule kwopetameko.”
27 Jesus sho a mana okupopya ngeyi, omukiintu gumwe okwa thikama mokati kongundu nokwa popi mokule e ta ti kuye. “Omukiintu a li e ku vala e te ku yamutha, oye omunelago!”
28 Ihe Jesus okwa yamukula a ti: “Eeno, ihe aanelago oomboka taa uvu oohapu dhaKalunga e taye dhi dhiginine.”
29 Aantu manga taye mu ngundumanene, Jesus okwa tsikile ta ti: “Aantu yopethimbo ndika oyo aawinayi. Oya hala oshikumithalonga, ihe itaa pewa oshikumithalonga shilwe, osho tuu shoka shaJona.
30 Oshoka ngaashi omuhunganeki Jona a li endhindhiliko kAaninive, osho wo Omuna gwOmuntu ota ka kala endhindhiliko kaantu yopethimbo ndika.
31 Omukwaniilwa omukiintu gwokuumbugantu ota ka holoka mesiku lyepangulo pamwe nane note ke mu pa uusama, oshoka oye okwa zile kooha dhuuyuni, a pulakene oondunge dhaSalomo; ihe nguka e li mpaka, oku vule Salomo.
32 Aaninive otaa ka holoka mesiku lyepangulo pamwe nane notaye ke mu pa uusama, oshoka oyo oyi itedhululithwa keuvitho lyaJona; ihe nguka e li mpaka oku vule Jona.”
33 “Kaku na omuntu ta tema olamba e te yi holeke nenge te yi tula kohi yontungwa. Aawe, okoshihukikwa, opo mboka taye ya megumbo, ya mone uuyelele.
34 Omeho geni ogo olamba yolutu. Ano omeho goye ngele omandjolowele, nena olutu lwoye aluhe olu na uuyelele. Ihe omeho goye ngele kage li nawa, nena olutu lwoye aluhe olu li momilema.
35 Kotoka ano, uuyelele mbuka u li mungoye waa ninge omilema.
36 Ngele olutu lwoye aluhe olu na uuyelele, kaalu na nando ombinga yimwe yi li momilema, nena olutu aluhe otalu gandja uuyelele, noto kala wa fa wa minikilwa kuuyelele wolamba.”
37 Jesus sho a mana okupopya, omufarisayi gumwe okwe mu ithana komwiha maandjawo. Jesus okwa yi nokwa kuutumba poshililo.
38 Ihe omufarisayi okwa kumwa, sho a dhimbulula kutya Jesus ini iyoga kiikaha, manga inaa tameka okulya.
39 Opo Omuwa okwe mu lombwele a ti: “Ne aafarisayi, ndishi ohamu yogo oshitenga netemba kombanda, ihe ne yene meni omu udha eyugo nuuwinayi auhe.
40 Magoya ne! Kalunga ngoka a shiti kombanda, haye tuu a shiti nomeni wo?
41 Ano gandjeni koohepele shoka shi li moshitenga, nena ayihe otayi kala ya yogoka.”
42 “Yayee ne, aafarisayi! Oshoka ohamu gandja kuKalunga oshitimulongo shiigwanga yaa na oshilonga: ominti, iizimba noomboga, ihe ohamu dhini uuyuuki nohole yokuhola Kalunga.”
43 “Yayee ne, aafarisayi! Oshoka omu hole okukuutumba kiipundi yokomeho moosinagoga nokukundilwa pokuma hapu gongala aantu.
44 Yayee ne! Oshoka omwa fa oombila dha filala, naantu otaa ende kombanda yadho yo inaa tseya sha.”
45 Gumwe gwomaanongompango okwa ti kuJesus: “Muhongi, sho wa popi ngawo, owe tu shekitha.”
46 Jesus okwa ti: “Yayee ne, aanongompango! Oshoka ohamu tsike omitenge omidhigu komapepe gaantu, ihe ne yene ihamu gumu ko nando onomunwe gumwe.
47 Yayee ne! Oshoka ohamu tungu oombila dhaahunganeki mboka ya dhipagwa koohokulu yonale.
48 Ano osho ngeyi otamu iholola kutya omwa tseya notamu zimine shoka oohokulu ya ningi; oyo oya dhipaga aahunganeki, ihe ne otamu ya tungile oompampa.
49 Onkee ano uunongo waKalunga otau ti: ‘Otandi ya tumine aahunganeki naatumwa. Yamwe yomuyo otaye ya dhipaga nayamwe otaye ya tidhagana.’
50 Onkee ano aantu yopethimbo ndika otaa ka geelwa omolwedhipago lyaahunganeki ayehe mboka ye ya dhipaga okuza keshito lyuuyuni,
51 okuza kokudhipagwa kwaAbel sigo okokudhipagwa kwaSakaria, ngoka a dhipagelwa pokati koshiyambelo nEha eyapuki. Eeno, otandi mu lombwele, aantu yopethimbo ndika itaa kala inaa geelwa.”
52 “Yayee ne, aanongompango! One omwa kutha po oshipatululo shokweegulula omweelo gwegumbo lyuunongo. Ne yene sho itaamu yi mo, otamu keelele mboka ya hala okuya mo.”
53 Jesus sho a zi mo megumbo, aalongimpango naafarisayi oya tameke oku mu gongalela noku mu pa uusama miinima oyindji;
54 oya kambadhala oku mu langela, opo ye mu kwate moohapu.
1 Aantu omayuvi nomayuvi oya gongala e taa lyatathana. Tango Jesus okwa lombwele aalongwa ye a ti: “Kotokeleni efulika lyaafarisayi nokutya uufudhime wawo.
2 Kaku na shoka sha siikilwa itaashi ka hololwa, naashoka sha holama itaashi ka tseyika.
3 Kehe tuu shoka mwe shi popi momilema, otashi ka uvika puuyelele. Naashoka mwe shi nongonene aantu momakutsi meholamo, otashi ka uvithwa kiihoko yoongulu.”
4 “Ne ookuume kandje, otandi mu lombwele: Inamu tila mboka taa dhipaga olutu, ihe itaa vulu we okuninga sha shilwe.
5 Otandi mu ulukile ngoka mu na oku mu tila: tileni Kalunga ngoka, sho a dhipaga, e na oonkondo okuundulila moheli. Eeno, otandi mu lombwele, mu tileni!”
6 “Omanza gatano itaga landithwa po nani nando uupeni uyali auke? Ihe kaku na nando olimwe lya dhimbiwa kuKalunga.
7 Oshoka nomafufu geni gokomutse oga yalulwa. Ano inamu tila: one mu vule omanza ogendji.”
8 “Otandi mu lombwele: Kehe tuu ngoka ta hempulula montaneho kutya ogwandje, osho wo Omuna gwOmuntu ote mu hempulula montaneho yaayengeli yaKalunga.
9 Ngoka ti idhimbike ndje paantu, nOmuna gwOmuntu ote mu idhimbike wo montaneho yaayengeli yaKalunga.”
10 “Ngoka ta popi ohapu a tsa ondumbo nOmuna gwOmuntu, ote yi dhiminwa po. Ihe ngoka ta sheke Ombepo Ondjapuki, oye ita dhiminwa po.”
11 “Uuna aantu taye mu fala moosinagoga kiipala yomalenga noyaakwaniilwa, inamu kala mu na oshimpwiyu kutya otamu ki ipopila ngiini nenge otamu ka popya shike.
12 Oshoka Ombepo Ondjapuki ote mu longo pethimbo tuu ndyoka shoka mu na okupopya.”
13 Gumwe gwongundu okwa ti kuJesus: “Muhongi, lombwela omumwameme omukuluntu, tu topolelathane uuthiga weliko lyatate.”
14 Jesus okwe mu yamukula a ti: “Mulumentu, olye u utha ndje, ndi ninge omutokoli nomutopoli guuthiga weni?”
15 Opo Jesus okwa ti kuyo: “Angaleni ne mu ikotokele kombinga yuuhalu weliko, oshoka okukalamwenyo kwomuntu kombanda yevi itaku lelepekwa kowindji weliko lye.”
16 Nena Jesus okwe ya lombwele eyele a ti: “Epya lyomuyamba gwontumba olya vala nawa.
17 Oye okwa tameke okudhiladhila ngeyi: ‘Kandi na mpoka tandi pungula iilya yandje. Otandi ningi ngiini?
18 Otandi ningi ngeyi,’ osho i ipopile. ‘Otandi hanagula po iigandhi yandje e tandi tungu yilwe iinene, moka tandi ka pungula mo iilya yandje neliko lyandje alihe.
19 Nena otandi ilombwele ihe: Munelago ngoye! Owa pungulilwa ashihe shoka we shi pumbwa methimbo lyoomvula odhindji. Onkee fudha ihe lya, nwa e to inyanyudha!’
20 Ihe Kalunga okwe mu lombwele: ‘Goya ngoye! Uusiku mbuka wonena omwenyo gwoye oto gu kuthwa; nena iinima ayihe mbika we yi ilikolele, otayi ningi yalye?’
21 “Shika osho tashi ningilwa ngoka ti igongelele omaliko, ye kee shi omuyamba koshipala shaKalunga.”
22 Nena Jesus okwa ti kaalongwa: “Shika otashi ti, onda hala oku mu lombwela: Inamu kala mu na oshimpwiyu kutya otamu li shike, opo mu kale mu na omwenyo nenge oshimpwiyu shomizalo.
23 Oshoka okukala u na omwenyo oku vule iikulya, nolutu olu vule omizalo.
24 Taleni omakola. Ihaga kunu noihaga teya; osho wo kage na oondunda dhokupungula nenge iigandhi, ihe Kalunga ohe ga palutha. Ihe ne omu vule oondhila.
25 Olye ando gwomune ta vulu okugwedha ko noshimpwiyu she kuule womasiku gokukalamwenyo kwe?
26 Ngele nani ne itamu vulu okuninga oshinima oshishona sha tya ngawo, omolwashike mwa sa oshimpwiyu shiinima yilwe?
27 Taleni nokundhindhilika oongala dhokelundu, nkene hadhi koko. Odho ihadhi longo, dho ihadhi iningile oonguwo. Ihe ngame otandi mu lombwele: NaSalomo meopalo lye alihe ina zala a fe yimwe yadho.
28 Ano Kalunga ngele ta zaleke omwiidhi gwokelundu ngoka gwa thikama owala nena, ihe ngula otagu umbilwa meziko, ano ne mboka yeitaalo enkundi ite shi mu ningile ando?”
29 “Inamu ipiyaganeka, mu kale tamu kongo kutya otamu li shike nenge otamu nu shike.
30 Oshoka aapagani yomuuyuni ohaa kongo mbika ayihe. Oshoka Ho oku shi shi kutya omwa pumbwa mbika ayihe.
31 Peha lyaambika kongeni tango Oshilongo shaKalunga, nena mbika ayihe otamu yi gwedhelwa ko.”
32 “Inamu tila, ne oshigunda oshishona! Oshoka Ho okwa hala oku mu pa Oshilongo.
33 Landithii po eliko lyeni alihe, iimaliwa e tamu yi pe oohepele. Ilandeleni uumpunda wiimaliwa ihaau kulupa neliko lyomegulu ndyoka ihaali hulu po, moka ihaamu yi aafuthi noothithi itadhi vulu oku li yona po.
34 Oshoka kokuma nkoka ku na eliko lyoye, oko ku na nomwenyo gwoye wo.”
35 “Kaleni mwi ilongekidha, mu na omapaya ga patwa noolamba dha tema,
36 ongaashi aantu ya tegelela omuwa gwawo ta zi koshituthi shohango. Uuna te ya e ta konkola, oyo otaye mu egulula mbala.
37 Aamati aanelago oyo mboka, omuwa gwawo sho ta galuka, te ya adha ya tonata. Ongame tandi mu lombwele: Oye ota pata epaya lye note ya kuutumbike e te ya yakula.
38 Oyo aanelago ngiini, ngele ote ya adha yi ilongekidha, nonando one ye pokati kuusiku nenge koongulasha!
39 One omu shi shi, mwene gwegumbo ngele oku na owino kutya omufuthi ote ya uunake, nena ite mu etha, a teye po egumbo lye.
40 Onkee ano nane wo kaleni mwi ilongekidha, oshoka Omuna gwOmuntu ote ke ya pethimbo tuu ndyoka inaamu mu tegelela.”
41 Petrus okwa ti: “Omuwa, eyele ndino otse to li lombwele nenge oto lombwele kehe gumwe?”
42 Omuwa okwa yamukula: “Olye ano omumati omwiinekelwa nomunandunge? Oye ngoka omuwa gwe e mu pe oshilonga shokutonatela egumbo lye, opo a pe aamati ooyakwawo iikulya pethimbo lyayo.
43 Omumati omunelago oye ngoka, omuwa gwe ngele te ya, te mu adha ta ningi ngaaka.
44 Oshili tandi mu lombwele: Omuwa gwe ote mu pe etonatelo lyiinima ye ayihe.
45 Ihe omumati ngoka ngele oti ilombwele ye mwene ta ti: ‘Omuwa gwandje ite ya mbala.’ Oye ta tameke ihe okudhenga aayakuli ooyakwawo, aalumentu naakiintu, ta li nota nu e ta kolwa.
46 Nena omuwa ote ya esiku ndyoka inee mu tegelela nethimbo ndyoka inee li tseya; omuwa note mu hendagula e te mu pe oshipewa she pamwe noonakwaavulika.”
47 “Omumati ngoka a tseya shoka omuwa gwe a hala, shi longwe, ihe ini ilongekidha ye ina gwanitha shoka omuwa gwe e shi hala, oye ota dhengwa unene.
48 Ihe omumati ngoka inaa tseya shoka omuwa gwe e shi hala, e ta ningi epuko, oye ota dhengwa kashona. Oshoka kehe ngoka a pewa oshindji, ota ka pulwa oshindji; naangoka a pewa oshindjishindji, ota ka pulwa natango oshindjishindji.”
49 “Ngame onde ya okutema omulilo kombanda yevi nonda hala nokuhalelela gwa hwama.
50 Onda tega, ndi shashwe eshasho ndyoka, ihe otandi kala ndi li muudhigu sigo sha gwanithwa.
51 Omu shi, onde ya okweeta ombili kombanda yevi? Otandi mu lombwele: inandi ya okweeta ombili, ihe etopoko.
52 Okuza mpaka aantu yatano yomegumbo limwe otaa ka topoka ngeyi; yatatu ya tsilathana ondumbo nayaali, osho wo yaali otaa tsilathana ondumbo nayatatu.
53 Aanona aamati otaa ka tsa ondumbo noohe, noohe noyana aamati. Aanona aakadhona otaa ka tsa ondumbo nooyina, nooyina onoyana aakadhona. Oshitenya shomukiintu otashi ka tsa ondumbo nayinamweno, nosho wo yinamweno ota ka tsa ondumbo noshitenya she.”
54 Jesus okwa lombwele ishewe aantu ta ti: “Ngele tamu mono omugamba gwa mena kuuninginino, ohamu ti: ‘Otaku ka lokwa,’ nosho tashi ningwa.
55 Ihe ombepo ngele otayi pepe tayi zi kuuninginino, otamu ti: ‘Otaku zi oluteni,’ nosho tashi ningwa.
56 Aafudhime ne! Omu shi okundhindhilika shoka shi li pevi nokegulu, ihe kamu shi okundhindhilika ethimbo ndika.”
57 “Omolwashike ihaamu tokola ne yene shoka shi li mondjila?
58 Ngele ope na ngoka te ku tamaneke e ku fale kompangu, kambadhala, mu opaleke oshinima naye, manga inaamu thika, opo kee ku gandje nethiminiko komupanguli, omupanguli e te ku gandja komumbala, omumbala e te ku edhilile mondholongo.
59 Otandi ku lombwele: Ku na mpoka to zi mo, manga inoo mana okufuta nokapeni kahugunina.”
1 Pethimbo tuu ndyoka opwa li pu na aantu mboka ya hokololele Jesus kombinga yAagalilea mboka, Pilatus e ya dhipaga, manga ya li taa yambele Kalunga omayambo.
2 Jesus okwe ya yamukula a ti: “Ne otamu dhiladhila ndishi kutya okudhipagwa kwAagalilea mbeya otaku holola kutya oya li aalunde unene ye vule Aagalilea ayehe yalwe?
3 Aawe, hasho! Otandi mu lombwele, ngele itamu itedhulula, otamu ka kana ngaashi yo.
4 Nenge omu shi, aantu mbeya omulongo nayahetatu sho ya li ya gwilwa koshungongulu yomuSiloa e taa si, oya li aalunde unene ando ye vule aantu yalwe mboka ye li muJerusalem?
5 Aawe, hasho! Otandi mu lombwele, ngele itamu itedhulula, otamu ka kana ngaashi yo.”
6 Nena Jesus okwe ya lombwele eyele ndika: “Okwa li ku na omusamane gumwe a tsike omukwiyu meyana lye lyomiviinu. Oye okwa yi, a ka konge iiyimati mugwo, ihe ina mona mo sha.
7 Oye okwa ti komulongi gweyana: ‘Tala, methimbo lyoomvula ndatu onda kala handi ya mpaka okukonga oonkwiyu komukwiyu nguka, ihe inandi mona mo sha. Gu ka po! Omolwashike gu na okumana owala evi oonkondo?’
8 Ihe omulongi okwa yamukula: ‘Tatekulu, gu etha natango omvula yimwe, manga tandi fulu omukanka, gu gu kundukidhe, e tandi gu tutile ishewe uuhoho.
9 Nena ngele otagu imi iiyimati momumvo tagu ya, onawa unene; ihe ngele itagu imi, nena nagu kewe po.’ ”
10 Esiku lyEsabati Jesus okwa li ta longo aantu mosinagoga.
11 Omo omwa li mu na omukiintu e niwe kombepo ya nyata, oyo noye mu etele uuvu oomvula omulongo nahetatu. Oye okwa li a andalala ye ina vula okuukilila.
12 Jesus sho e mu mono, okwe mu ithana a ti: “Nekulu, wa aluka kuuvu woye!”
13 Jesus okwa tula iikaha ye kombanda yomukiintu, nguka nokwi iyukililitha nziya e ta hambelele Kalunga.
14 Ihe omukuluntu gwosinagoga okwa tameke okugeela Jesus, sho a aludha mEsabati. Oye okwa yi mo moohapu nokwa lombwele aantu a ti: “Otu na omasiku gahamano ngoka tu na okulonga; ileni momasiku ngoka, mu aludhwe, ihe hamEsabati.”
15 Omuwa okwe mu yamukula a ti: “Aafudhime ne! Ihamu piitha mo ongombe nenge okasino moshigunda mEsabati e tamu ke yi hugila?
16 Ihe mpaka opu na omuna gwaAbraham, ngoka Satana a kala e mu tula moomango oomvula omulongo nahetatu. Ita mangululwa ando moomango ndhika mEsabati?”
17 Ano Jesus sho a popi ngeyi, aatondi ye ayehe oya si ohoni, ihe aantu yalwe ayehe oya nyanyukilwa iilonga iikumithi mbyoka e yi longo.
18 Jesus okwa ti: “Oshilongo shaKalunga osha fa shike? Otandi shi yeleke nashike?
19 Osha fa omuma yosinapi, omulumentu e yi kutha nokwe yi kunu mepya lye. Oyo oya koko e tayi ningi omuti, noondhila odha tungile iihandhila yadho miitayi yagwo.”
20 Jesus okwa ti ishewe: “Oshilongo shaKalunga otandi shi yeleke nashike?
21 Osha fa efulika, omukiintu e li kutha nokwe li pilulile muusila woontungwa ndatu, sigo auhe wa fulu.”
22 Jesus okwe ende miilando nomomikunda nokwa longo aantu, sho a li mondjila ye yokuuka kuJerusalem.
23 Omuntu gumwe okwe mu pula a ti: “Omuwa, aantu mboka taa ka hupithwa aashona yowala?” Jesus okwe ya yamukula a ti:
24 “Kondjeni, mu ye mo mosheelo shoka sha patekidha. Oshoka otandi mu lombwele: Aantu oyendji otaa kambadhala okuya mo, ihe itaa ka vula.
25 “Mwene gwegumbo ngele a penduka e te edhile omweelo, nena otamu thikama pondje e tamu konkola komweelo e tamu ti: ‘Omuwa, tu egulula!’ Oye note mu yamukula: ‘Kandi shi wo mpoka tamu zi!’
26 One otamu yamukula: ‘Otse otwa lileni notwa nwineni pamwe poshililo; osho wo owa longo aantu moshilando shetu.’
27 Oye ote ke mu lombwela ta ti: ‘Kandi shi wo mpoka tamu zi. Zii po pungame, one aakolokoshi!’
28 Otaku ka kala elilagano neikokoto lyomayego, sho tamu ka mona Abraham, Isak naJakob naahunganeki ye li mOshilongo shaKalunga, manga ne mwe edhililwa pondje.
29 Aantu otaa ka za kuuzilo nokuuninginino, kuumbangalantu nokuumbugantu e taa ka kuutumba poshililo mOshilongo shaKalunga.
30 Nena mboka aahugunini otaa ka ninga aatango, naamboka aatango otaa ka ninga aahugunini.”
31 Pethimbo olyo tuu ndyoka aafarisayi yamwe oye ya kuJesus noya ti kuye: “Za po mpaka, u ye kulwe, oshoka Herodes okwa hala oku ku dhipaga.”
32 Jesus okwe ya yamukula a ti: “Indeni, mu ka lombwele ombandje ndjoka: ‘Ngame nena otandi tidha mo oompwidhuli notandi aludha aavu, ihe ngula nahela otandi ka hulitha iilonga yandje.’
33 Nonando ongawo, ondi na okutsikila ondjila yandje nena, ngula nahela, oshoka omuhunganeki ita dhipagelwa palwe, ihe omuJerusalem.”
34 “Jerusalem, Jerusalem! Ongoye ho dhipaga aahunganeki noho dhipaga nomamanya aatumwa yaKalunga. Olungapi nda li nda hala okugongela aamwoye, ngaashi ondjuhwa hayi gongele uuyuhwena wayo meni lyomawawa gayo, ihe inamu hala.
35 Ngashingeyi egumbo lyeni otali thigwa ombuga yowala. Ongame tandi mu lombwele: One itamu mono ndje we sigo ethimbo ndyoka, uuna tamu ka tya: ‘Na lalekwe nuuyamba oonguka te ya medhina lyOmuwa!’ ”
1 Esiku limwe lyEsabati Jesus okwa yi megumbo lyagumwe gwomaafarisayi mboka aakuluntu, a ka lye; aantu oya li ya langela Jesus.
2 Omulumentu a li a zinda olutu aluhe, okwe ya kuJesus.
3 Nena Jesus okwa yi mo moohapu nokwa pula aanongompango naafarisayi a ti: “Ompango yetu otayi pitika tuu, omuntu a aludhe mEsabati nenge aawe?”
4 Ihe inaa yamukula sha. Jesus okwa kutha omulumentu ngoka nokwe mu aludha e te mu lombwele, a ye.
5 Nena okwe ya lombwele a ti: “Ngele gumwe gwomune oku na omwana omumati nenge ongombe e tayi gwile momuthima mEsabati, ite yi hili mo andola nonando Esabati?”
6 Ihe kaya li taa vulu oku mu yamukula moshinima shika.
7 Jesus okwa dhimbulula, aayenda yamwe yi ihogololele iipundi ya simana, onkee ayehe okwe ya lombwele eyele ndika a ti:
8 “Ngele ku na ngoka e ku hiya koshituthi shohango, ino kuutumba kiipundi ya simana, oshoka otashi vulika, ku na gumwe a simana e ku vule, a hiywa wo.
9 Nena omwiithani gweni amuhe yaali ote ya e te ku lombwele ta ti: ‘Pa mukweni nguka eha lyoye.’ Nena oto kala wa sa ohoni, sho u na okukuutumba mehala lyokonima.
10 Ihe ngele wa hiywa, inda u ka kuutumbe mehala lyokonima, opo ngoka e ku hiya ngele te ya, ote ku lombwele ihe: ‘Kuume kandje, ila huka kehala ewanawa.’ Shika otashi ku simanekitha montaneho yaayenda yalwe ayehe.
11 Oshoka ngoka ti inenepeke, ota shonopekwa, naangoka ti ishonopeke, ota nenepekwa.”
12 Nena Jesus okwa ti kungoka e mu hiya: “Ngele to paka po omwiha nenge uulalelo, ino hiya ookuume koye nenge aamwanyoko aalumentu nenge aanezimo yoye nenge aashiinda yoye aayamba, oshoka mboka otaye ke ku hiya komeho e to futilwa mushoka we shi ningi.
13 Hiya oohepele, iitiningili, iilema naaposi.
14 Nena oto kala wa yambekwa, oshoka mbaka kaye na sha shoku ku pa. Ihe oto ka futwa kuKalunga, uuna mboka ya longa uuwanawa taa ka yumudhwa kuusi.”
15 Gumwe gwaayenda mboka ya li ya kuutumba poshililo, sho e shi uvu, okwa ti kuJesus: “Aanelago oomboka taa ka lya koshililo mOshilongo shaKalunga.”
16 Jesus okwa ti kuye: “Omusamane gumwe okwa longekidha oshituthi oshinene nokwa hiya aantu oyendji.
17 Ano ethimbo lyoshituthi sho lya thiki, okwa tumu omumati gwe, e ki ithane aahiywa ta ti: ‘Ileni, ayihe oya longekidhwa.’
18 Ihe ayehe oya tameke okutinda komukalo gumwe. Gwotango okwa ti komutumwa: ‘Ngame onda landa epya, ondi na okuya ko, ndi ke li tale.’
19 Mukwawo okwa ti: ‘Ngame onda landa oonani omulongo, otandi yi, ndi ke dhi tale, nkene tadhi longo. Otandi ku indile, u mangulule ndje.’
20 Gumwe ishewe okwa ti: ‘Ngame opo nda hokana, itandi vulu okuya.’
21 “Omumati okwa galuka nokwa hokololele omuwa gwe ashihe. Nena omusamane mwene gwegumbo okwa geye nokwa ti komumati gwe: ‘Endelela, u ye koondjila nokomapandaanda goshilando.’
22 Omumati okwa ti: ‘Omuwa, onda longo, ngaashi wa lombwele ndje, ihe natango omu na eha.’
23 Nena omuwa okwa ti komumati: ‘Inda natango koondjila nomapola, u ya lombwele, ye ye mo, opo egumbo lyandje lyu udhe.
24 Oshoka otandi mu lombwele: Kaku na nando ogumwe gwaalumentu mbeyaka yi ithanenwe tango, ta makele iikulya yandje.’ ”
25 Oongundu oonene dhaantu odhe ende pamwe naJesus. Oye okwa taalele kuyo e ta ti:
26 “Kehe ngoka te ya kungame, ita vulu okuninga omulongwa gwandje, ngele ita dhimbwa he nayina, omukiintu gwe noyana, aamwayina aalumentu naakiintu, naye mwene nokuli.
27 Kehe ngoka itaa humbata omushigakano gwe e ta landula ndje, ita vulu okuninga omulongwa gwandje.
28 “Ngele ku na gumwe e na edhiladhilo okutunga oshungo, oku na okukuutumba tango, a yalule kutya otayi pula shi thike peni, ye a tale, ngele oku na iimaliwa ya gwana oku yi tunga sigo ya pu.
29 Opo shaa ninge, sho a mana okutunga ekankameno, ta ka nyengwa okuhulitha etungo alihe. Nena ayehe mboka taye shi mono, otaye ke mu sheka
30 taa ti: ‘Omulumentu nguka okwa tameke okutunga, ihe okwa nyengwa okuhulitha etungo.’ ”
31 “Omukwaniilwa gwontumba ngele ta yi, a ka kondjithe omukwaniilwa mukwawo gulwe, ita kuutumba manga, a dhiladhile, ngele ota vulu naalumentu omayuvi omulongo gumwe aguke okutsakaneka ngoka te ya nomayuvi omilongo mbali?
32 Ngele a nyengwa, ota tumu ko aatumwa, manga ngwiyaka e li kokule, e mu indile ombili.
33 Osho tuu kaku na nando ogumwe gwomune ta vulu okukala omulongwa gwandje, ngele ite etha ayihe e yi na.”
34 “Omongwa ogwo oshinima oshiwanawa, ihe uuna tagu hahuka, otagu toyalekwa we nashike?
35 Itagu opalele we mepya nenge muuhoho, otagu ekelwahi owala. Ngoka e na omakutsi, nu uve ko!”
1 Aafendelithi ayehe naalunde oye ya okupulakena Jesus.
2 Ihe aafarisayi naalongimpango oya ngungutula ya ti: “Nguno ota taamba aalunde e ta li pamwe nayo.”
3 Onkee Jesus okwe ya lombwele eyele ndika a ti:
4 “Natu tye, gumwe gwomune oku na oonzi ethele limwe, ihe yimwe yomudho te yi kanitha. Ota ningi ngiini? Oye ota thigi po oonzi omilongo omugoyi nomugoyi melundu e ta ka konga ndjiyaka ya kana, sigo te yi mono.
5 Ngele e yi mono, ota nyanyukwa noonkondo, ote yi humbata komapepe ge
6 e te yi eta kegumbo. Oti ithana ihe ookuume ke naashiinda she e ta ti: ‘Nyanyukweni pamwe nangame, oshoka onzi yandje ndjoka ya li ya kana, nde yi mono!’
7 Otandi mu lombwele: osho wo megulu otamu kala enyanyu omolwomulunde gumwe i itedhulula, li vule ndyoka lyokunyanyukilwa aayuuki omilongo omugoyi nomugoyi mboka taa dhiladhila kutya inaa pumbwa eitedhululo.”
8 “Natu tye, omukiintu oku na iimaliwa iisiliveli omulongo e ta kanitha po shimwe. Ita hwameke ando olamba e ta kombo egumbo noku shi konga nuupenda, sigo te shi mono?
9 Ngele e shi mono, oti ithana ihe ookuume ke naashiinda she ta ti: ‘Nyanyukweni pamwe nangame, oshoka oshimaliwa shandje shoka sha li sha kana, nde shi mono!’
10 Otandi mu lombwele: osho wo aayengeli yaKalunga otaa nyanyukilwa omulunde gumwe ngoka i itedhulula.”
11 Jesus okwa ti ishewe: “Okwa li ku na omusamane e na aamati yaali.
12 Ngoka omushona kumukwawo okwa ti kuhe: ‘Tate, pe ndje ombinga yomeliko ndjoka ndi na oku yi pewa.’ Nena he okwa topolele oyana yaali eliko ndyoka.
13 “Inapa pita omasiku ogendji, omwana nguka omushona okwa gongele iinima ye ayihe e ta yi koshilongo shokokule. Oye okwa hanagula po eliko lye nkoka nokukala muuholume.
14 Ihe sho a mana po ashiheshihe, oshilongo shiyaka osha adhika ihe kondjala ondhigu, oye nokwa tameke okuhepa.
15 Oye okwa yi, a ka longe pomuntu gumwe gwomoshilongo shoka, nguka okwe mu tumu kohambo ye yiingulu.
16 Okwa li e shi, ota vulu okwiipalutha nomakunde ngoka haga liwa kiingulu, ihe ine ga pewa.
17 Lwahugunina sho a dhimbulula okukala kwe, okwa ti: ‘Aaniilonga ayehe ya tate oye na iikulya ya gwana, manga ngame te si ondjala!
18 Otandi thikama, ndi ye kutate, e tandi mu lombwele te ti: Tate, onda yono kuKalunga nokungoye.
19 Inandi gwana we, ndi ithanwe omumwoye, taamba ndje ongagumwe gwomaalumentu mboka taye ku longele.’
20 Oye okwa thikama nokwe ya kuhe. “Ano manga a li kokule, he okwe mu mono nokwe mu uvitile olukeno e ta matuka, e ke mu tsakaneke, okwe mu papatele e te mu thipi komilungu.
21 Omwana okwe mu lombwele a ti: ‘Tate onda yono kuKalunga nokungoye. Inandi gwana we, ndi ithanwe omumwoye.’
22 Nena he okwa lombwele ihe aapiya ye: ‘Endeleleni, mu ete onguwo ndjiyaka ombwanawa, mu yi mu zaleke. Mu zalekeni okalinga komunwe gwe noongaku koompadhi dhe.
23 Indeni, mu ka tale wo ontana ndjiyaka yo ondoka, yi dhipageni, tu lyeni tse tu nyanyukweni.
24 Oshoka omumwandje nguka a li a sa, ngashingeyi oku na omwenyo; okwa li a kana, ihe ngashingeyi okwa monika.’ Oyo oya tameke ihe okudhana oshituthi ya nyanyukwa.
25 “Ihe omwana omukuluntu okwa adhika e li kepya. Sho e ya, a thiki popepi negumbo, oku uvu ehiko lyuuhumba nomatanto.
26 Oye okwi ithana gumwe gwomaapiya e te mu pula: ‘Oshike shi li megumbo?’
27 Oye okwe mu yamukula a ti: ‘Omumwanyoko okwe ya, ho e te mu dhipagele ontana ndjiyaka yo ondoka, sho e mu mono e na omwenyo.’
28 “Omwana omukuluntu okwa geye ihe nokwa tindi okuya megumbo. Nena he okwe ya pondje nokwe mu popitha nombili, a ye meni.
29 Oye okwa ti kuhe: ‘Tala tate, oomvula odhindji onde ku longele ongomupika noinandi yona oshipango shoye nando oshimwe. Owa pe ndje shike? Ino pa ndje nando oshikombo sho sheneshene, opo ndi nyanyukwe pamwe nookuume kandje.
30 Ihe omumwoye ngono a hanagula po eliko lyoye moohonda, sho e ya, owe mu dhipagele ontana ndjiyaka yo ondoka!’
31 He okwa ti kuye: ‘Mumwandje, ngoye ou li aluhe pungame, ayihe yandje oyoye.
32 Ihe osho opala, tu ningeni oshituthi e tatu nyanyukwa, oshoka omumwanyoko ngoka a li a sa, ngashingeyi oku na omwenyo; okwa li a kana, ihe ngashingeyi okwa monika.’ ”
1 Jesus okwa lombwele aalongwa ye a ti: “Okwa li ku na omulumentu omuyamba e na elenga lye, e li lombwelwa, tali hanagula po eliko lye.
2 Oye okwe mu ithana nokwa ti kulyo: ‘Ondu uva shike kombinga yoye? Ulukila ndje, nkene wa kala to tonatele eliko lyandje.’
3 Elenga olya tameke okwiipula: ‘Otandi ningi ngiini, omuwa gwandje sho ta kutha ndje uulenga? Iilonga iidhigu itandi yi vulu, ngame ishewe otandi si ohoni okuhehela.
4 Ngashingeyi ondi shi shi shoka ndi na okuninga, opo uuna te kuthwa iilonga yandje, ndi kale ndi na ookuume mboka taa ka taamba ndje momagumbo gawo.’
5 “Nena okwi ithana aantu ayehe mboka ya li ye na oongunga dhomuwa gwe. Oye okwa ti kungoka gwotango: ‘Oongunga ndhoka wa lila omuwa gwandje, odhi thike peni?’
6 Oye okwa yamukula: ‘Omagadhi iiyuma ethele limwe.’ Elenga okwe mu lombwele a ti ‘Taamba eyalulo, kuutumba mbala, u nyole mo omilongo ntano.’
7 Oye okwa ti ishewe komutiyali: ‘Ngoye oongunga dhoye odhi thike peni?’ ‘Ooshako ethele limwe dhiilya,’ osho a yamukula. Elenga okwe mu lombwele a ti: ‘Taamba eyalulo, u nyole mo omilongo hetatu.’ ”
8 “Mwene gwelenga ndika efundja okwe li pandula, sho lya longo ngeyi noondunge. Oshoka aantu mboka haa ende pauyuni mbuka, oye na oondunge mokukalathana nooyakwawo ye vule aana yaKalunga.”
9 Jesus okwa ti ihe: “Onkee ano otandi mu lombwele: ikongeleni ookuume neliko lyomuuyuni mbuka, opo uuna tali hulu po, mu ka taambwe megumbo lyaaluhe.
10 Ngoka ti inekelwa miinima iishona, oti inekelwa wo miinima iinene; naangoka omufundja miinima iishona, oye wo omufundja miinima iinene.
11 Ne ano ngele kamu shi okwiinekelwa mokulongitha eliko lyomuuyuni mbuka, otamu vulu ngiini okwiinekelelwa eliko lyashili?
12 Nongele ne kamu shi aainekelwa miinima mbyoka yaa shi yeni, olye te mu pe mbyoka yeni yene?
13 “Kaku na omupika ta vulu okulongela aawa yaali; oshoka ota tondo gumwe, ye e ta kala e hole mukwawo, nenge ta simaneke nguka, ye e ta dhini ngwiyaka. Kamu vulu okulongela Kalunga pamwe nemona.”
14 Aafarisayi sho yu uvu iinima mbika, oya yolo Jesus, oshoka oya li ye hole iimaliwa.
15 Jesus okwa ti kuyo: “One ohamu iholola montaneho yaantu kutya one aayuuki, ihe Kalunga oku shi omitima dheni nkene dha tya. Oshoka shoka aantu taye shi tala shi na esimano, osho iihuna koshipala shaKalunga.”
16 “Ompango yaMoses nomanyolo gaahunganeki oya hulile muJohannes Omushashi. Okuza mpoka elaka etoye tali popi Oshilongo shaKalunga, otali uvithwa, nakehe gumwe ota matuka, a ye mo.
17 Ihe okuhulapo kwegulu nevi okuhwepo ku vule okukana po kwokankwanu kamwe komompango.”
18 “Omulumentu kehe ngoka ta henge po omukiintu gwe e ta hokana gulwe, oye ota hondele. Naangoka ta hokana omuhengwa, naye ota hondele.”
19 “Okwa li ku na omulumentu omuyamba ha zala oonguwo dhondilo noha li uutoye esiku kehe.
20 Ihe posheelo shegumbo lye opwa li pwa lala ohepele gumwe, edhina lye Lasarus, u udha omathina,
21 nokwa hala okwiikutitha nuundjagumuke mboka tau gu koshitaafula shomuyamba. Olwindji oombwa odhe ya nodha latha omathina ge.
22 “Ano ohepele nguka okwa si nokwa papatelwa kaayengeli noye mu fala megulu puAbraham. Omuyamba okwa si wo nokwa fumvikwa.
23 Moshaasi okwa kala muuwehame. Sho a yelutha omeho, okwa mono kokule naye Abraham ye li naLasarus.
24 Oye nokwi igidha a ti: ‘Tate Abraham! Sila ndje ohenda, u tume Lasarus, a yaye omunwe gwe momeya, a talaleke elaka lyandje, oshoka ondi li muuwehame uunene momulilo!’
25 “Ihe Abraham okwa ti kuye: ‘Mumwandje, dhimbulukwa kutya, manga wa li kombanda yevi, owa pelwe iinima ayihe iiwanawa, ihe Lasarus okwa pelwe iinima ayihe mbyoka iiwinayi. Ngashingeyi Lasarus oku li mehala ndika ewanawa, manga ngoye to ehamekwa.
26 Ihe nando ongaaka, pokati ketu nangoye opu na olumbogo olunene, opo mboka ya hala okutaagulukila hoka kune, kaaye shi vule, nenge ya hala okutaagulukila huka kutse.’
27 Omuyamba okwa ti: ‘Ano otandi ku indile tatekulu, u tume Lasarus kegumbo lyatate.
28 Ondi na ko aamwameme aalumentu yatano, opo e ke ya londodhe, kaaye ye mehala ndika lyuuwehame.’
29 “Abraham okwa ti: ‘Aamwanyoko oye na oohapu dhaKalunga, naa vulike kudho.’
30 Omuyamba okwa yamukula: ‘Aawe, tate Abraham! Andola okwa li taku yumuka gumwe gwomaasi e ta yi kuyo, ando otaa etha uulunde.’
31 Abraham okwa ti: ‘Ngele itaa vulika koohapu dhaKalunga, natango itaa itaale, nando naku yumuke gumwe gwomaasi.’ ”
1 Jesus okwa ti kaalongwa ye: “Omahongololo oge na okuya, ihe yayee omuntu ngoka, te ga eta!
2 Ngoka ta hongolola kamwe komuushona mbuka, okwa gwana, a mangelwe emanya edhigudhigu mothingo ye e tu umbilwa muule wefuta.
3 Onkee ano ikotokeleni!” “Mukweni ngele a yono, mu pukulula, nongele i itedhulula, mu dhimina po.
4 Ngele ta yono kungoye luheyali mesiku, note ya kungoye meyono kehe ta ti: ‘Onda sa oluhodhi,’ mu pa ombili.”
5 Aayapostoli oya lombwele Omuwa ya ti: “Tu gwedhela eitaalo.”
6 Omuwa okwa yamukula: “Andola omu na eitaalo li thike pomuma yosinapi, ndjoka onshonanshona, otamu vulu okulombwela omuti nguka omunene: ‘Itumba po mpaka, u iyundulile mefuta!’ Notagu vulika kune.”
7 “Tu tye, oku na omuntu mokati keni e na omumati gwe ta longo mepya nenge ta litha iimuna. Nge a zi kepya, mwene gwe ote mu lombwele tuu ta ti: ‘Endelela nziya, u lye’?
8 Aawe ndishi, ihe ote mu lombwele: ‘Pakela ndje po uulalelo e to izaleke, u yakule ndje, manga tandi li e tandi nu. Opo ihe oto vulu okulya e to nu.’
9 Omumati ngono a longo owala shoka a lombwelwa, ndishi ita pandulwa?
10 Ano osho nane wo ngele omwa gwanitha owala ayihe mbyoka mwe yi lombwelwa, omu na okutya: ‘Otse aamati aahethi, sho twa longo owala shoka twa li tu na oku shi longa.’ ”
11 Jesus sho a li mondjila ta yi kuJerusalem, okwe ende ta kunkula nongamba yopokati kaSamaria naGalilea.
12 Sho e ya momukunda gumwe, okwa tsakanekwa kaalumentu aanashilundu omulongo. Oyo oya thikama kokule naye
13 noyi igidha ya ti: “Muhongi Jesus, tu sila ohenda!”
14 Jesus okwe ya tala nokwa ti kuyo: “Indeni, mu ki iyulike komuyambi.” Ano manga ya li mondjila taa yi, oya aluka.
15 Ihe gumwe gwawo sho a mono a aluka, okwa galukile kuJesus, ye ta hambelele Kalunga newi lyopombanda.
16 Oye okwi ihata poompadhi dhaJesus e te mu pandula. Omulumentu nguka okwa li Omusamaria.
17 Opo Jesus okwa ti: “Aalumentu mboka ya aludhwa kaya li omulongo? Omugoyi oye li peni?
18 Omolwashike omukwiilongo nguno oye awike a galuka, a hambelele Kalunga?”
19 Jesus okwe mu lombwele: “Thikama, u ye; eitaalo lyoye lye ku aludha.”
20 Aafarisayi yamwe oya pula Jesus kutya Oshilongo shaKalunga otashi ya uunake. Oye okwe ya yamukula a ti: “Oshilongo shaKalunga itashi ya shi na omandhindhiliko taga monika nomeho.
21 Kaku na ngoka ta ka tya: ‘Tala, osho shika nenge osho shiyaka.’ Oshoka Oshilongo shaKalunga oshi li meni mune.”
22 Nena Jesus okwa lombwele aalongwa a ti: “Otaku ke ya ethimbo, uuna tamu ka hala okumona nando esiku limwe lyOmuna gwOmuntu, ihe itamu ke li mona.
23 Otaku ka kala mboka taye mu lombwele taa ti: ‘Tala, hwiyaka,’ nenge: ‘Tala, huka.’ Ano inamu ya ko ne inamu ya landula.
24 Oshoka ngashika olwaadhi talu adhima okuza kombinga yimwe sigo okonkwawo, osho wo Omuna gwOmuntu ta ka kala mesiku lye.
25 Ihe tango oku na okuhepekwa nomahepeko ogendji nokweekelwahi kaantu yopethimbo ndika.
26 Oshoka ngaashi sha li pomasiku gaNoa, osho tuu wo tashi ka kala pomasiku gOmuna gwOmuntu:
27 Aantu oya li ye hole okulya nokunwa, okuhokana nokuhokanitha, sigo esiku ndyoka Noa a yi monguluwato, eyelu nolye ya e tali ya hanagula po ayehe.
28 Otaku ka kala, ngaashi sha li pethimbo lyaLot. Aantu oya li ye hole okulya nokunwa, okulanda nokulanditha, okukuna nokutunga.
29 Esiku ndyoka Lot sho a zi mo muSodom, omulilo nomamanya gosulufuli oya gu kegulu, noya hanagulwa po ayehe.
30 Ano osho tashi ka kala wo nomesiku ndyoka lyOmuna gwOmuntu ta ka holoka.
31 “Mesiku ndyoka ngoka ta adhika kombanda yongulu a thiga iinima ye megumbo, ina kuluka ko, e ke yi tale; osho tuu wo ngoka ta adhika mepya, ina galukila megumbo.
32 Dhimbulukweni omukiintu gwaLot!
33 Oongoka ta kambadhala okuhupitha omwenyo gwe, ote gu kanitha, naangoka te gu kanitha, ote gu hupitha.
34 Otandi mu lombwele: Uusiku mbwiyaka otaku ka kala aantu yaali ya lala montala yimwe; gumwe ta kuthwa po, mukwawo ta thigwa po.
35 Aakiintu yaali taa tsu poshini; gumwe ta kuthwa po, mukwawo ta thigwa po.
36 Aalumentu yaali ye li mepya; gumwe ta kuthwa po, mukwawo ta thigwa po.”
37 Aalongwa oye mu pula ya ti: “Openi, Omuwa?” Jesus okwa yamukula a ti: “Kokuma nkoka ku na omudhimba, oko haku gongala oontsa.”
1 Jesus okwe ya lombwele eyele ndika, opo e ya longe, nkene ye na okugalikana aluhe yo yaa vulwe, a ti:
2 “Moshilando shimwe omwa li mu na omutokoli ihaa tila Kalunga ye ke na ko nasha naantu ooyakwawo.
3 Moshilando osho tuu shoka omwa li wo omuselekadhi e ya olwindji kuye nokwa ti: ‘Uthila ndje pauyuuki kombinga yoohapu dhetu nomutamaneki gwandje.’
4 Omutokoli okwa li ta tindi ethimbo ele, ihe konima okwi ipopile a ti: ‘Nando ihandi tila Kalunga nokandi na ko nasha naantu ooyakwetu,
5 ihe molwaashoka omuselekadhi nguka ote etele ndje uupyakadhi, onda hala oku mu uthila, opo kaa kenyaneke ndje nokuya aluhe kungame.’ ”
6 Omuwa okwa ti ihe: “Pulakeneni omutokoli nguka ke na uuyuuki sho a ti.
7 Ano Kalunga itu uthile ando aahogololwa mboka haye mu ithana omutenya nuusiku? Ote ya tegelelitha tuu ethimbo ele inee ya kwatha?
8 Otandi mu lombwele, ote ya uthile mbalambala. Ihe Omuna gwOmuntu uuna te ke ya, ota ka adha ko tuu eitaalo kombanda yevi?”
9 Jesus okwa hokololele mboka yi idhiladhilile yo yene kutya oyo aayuuki e taa dhini aantu yalwe, ndika eyele:
10 “Aalumentu yaali oya yi motempeli, ya ka galikane, gumwe omufarisayi nomukwawo omufendelithi.”
11 “Omufarisayi okwa thikama i ikalela nokwa galikana puye mwene e ta ti: ‘Kalunga, otandi ku hambelele, oshoka ngame inandi fa aantu yalwe: aayugi, aakolokoshi naahondeli; otandi ku hambelele wo, sho inaandi fa omufendelithi ngono.
12 Iikulya ohandi idhilike omasiku gaali moshiwike kehe nohandi ku pe oshitimulongo shomwaayihe mbyoka nde yi likola.’
13 “Ihe omufendelithi okwa thikama kokule ye ina vula okutala kegulu, oshoka okwa sa oluhodhi e ta ti: ‘Kalunga, sila ndje ohenda, ongame omulunde!’ ”
14 Opo Jesus okwa ti: “Otandi mu lombwele: nguka okwa shuna kegumbo omuyuuki koshipala shaKalunga e vule mukwawo. Oshoka ngoka ti inenepeke, ota shonopekwa, naangoka ti ishonopeke, ota nenepekwa.”
15 Aantu yamwe oye eta uuhanona wawo kuJesus, a tenteke iikaha ye kuwo. Ihe aalongwa sho ye shi mono, oya ganda mboka ye u eta.
16 Ihe Jesus okwi ithana uunona, u ye kuye, a ti: “Etheni uunona, u ye kungame. Inamu u keelela ko, oshoka Oshilongo shaKalunga oshaamboka ye u fa.
17 Ongame tandi mu lombwele: Oongoka itaa taamba Oshilongo shaKalunga ongokanona, oye ita yi mo musho.”
18 Gumwe gwomaakuluntu Aajuda okwe mu pula a ti: “Muhongi omwaanawa, nandi longe shike, ndi mone omwenyo gwaaluhe?”
19 Jesus okwe mu pula: “Omolwashike to ti ndje omwaanawa? Kaku na nando omuntu omwaanawa, oKalunga awike.
20 Iipango ou yi shi: ‘Ino hondela, Ino yaka, Ino lundila, Simaneka ho nanyoko.’ ”
21 Nguka okwe mu yamukula a ti: “Ayihe mbika onde yi gwanitha okuza muugundjuka wandje.”
22 Jesus sho e shi uvu, okwa ti kuye: “Oku na oshinima shimwe natango u na oku shi ninga. Landitha po ayihe mbyoka u yi na, iimaliwa e to yi pe oohepele, ngoye e to kala u na eliko megulu. Ila ihe, u landule ndje.”
23 Ano omulumentu nguka sho u uvu oohapu ndhoka, okwa tameke okusa oluhodhi noonkondo, oshoka okwa li e na eliko olindji.
24 Jesus sho a dhimbulula kutya okwa sa oluhodhi, okwa ti: “Aayamba oye na uudhigu ngiini okuya mOshilongo shaKalunga!
25 Okupitila kwongamelo mombululu yonane okuhwepo ku vule okuya kwomuyamba mOshilongo shaKalunga.”
26 Aantu mboka ye dhi uvu, oya pula ya ti: “Olye ano ta vulu okuhupithwa?”
27 Jesus okwe ya yamukula a ti: “Shoka tashi nyenge aantu, itashi nyenge Kalunga.”
28 Nena Petrus okwa ti: “Tala, otse otwa thigi po omagumbo getu e tatu ku landula.”
29 Jesus okwa ti kuyo: “Eeno, ihe ongame tandi mu lombwele, kehe ngoka ta thigi po egumbo nenge omukiintu nenge aamwayina aalumentu nenge aakuluntu ye nenge oyana omolwOshilongo shaKalunga,
30 ota ka mona ko oyindji muuyuni mbuka, nomwenyo gwaaluhe ote ke gu pewa muuyuni tau ya.”
31 Jesus okwi ikalekele aalongwa omulongo nayaali nokwa ti kuyo: “Tala, otatu yeni kuJerusalem, hoka taku ka tsakanithwa ayihe mbyoka ya nyolwa kaahunganeki tayi popi Omuna gwOmuntu.
32 Oye ota ka gandjwa miikaha yaapagani, mboka taye mu yolo, taye mu sheke e taye mu hiyile omayeye.
33 Oyo otaye ke mu dhenga e taye mu dhipaga, ihe esiku etitatu ota ka yumudhwa.
34 “Aalongwa oya li yaa uvite nando osha; oohapu ndhoka odha li dhe ya holekwa, yo inaa uva ko kutya Jesus okwa hala okutya shike.”
35 Jesus sho e ya popepi naJeriko, omuposi gumwe okwa kuutumba pooha dhondjila ta hehela.
36 Sho u uvu, ongundu yaantu tayi ende po, okwa pula a ti: “Oshike shino?”
37 Aantu oye mu lombwele ya ti: “OJesus Omunasareti te ende po.”
38 Oye okwi igidha ihe a ti: “Jesus, omuna gwaDavid, sila ndje ohenda!”
39 Aantu yokomeho oye mu ganda, a mwene. Ihe omuposi okwa dhiginine okwiigidha mokule a ti: “Omuna gwaDavid, sila ndje ohenda!”
40 Jesus okwa thikama nokwe ya lombwele, ye ete omuposi kuye. Sho e ya lwopopepi, Jesus okwe mu pula:
41 “Owa hala, ndi ku ningile shike?” Oye okwa ti: “Omuwa, onda hala, ndi mone ko ishewe.”
42 Nena Jesus okwa ti kuye: “Tonata! Eitaalo lyoye lye ku aludha.”
43 Mbalambala okwa mono ko e ta landula Jesus ye ta pandula Kalunga. Aantu sho ye shi mono, ayehe oya hambelele Kalunga.
1 Jesus sho e ya muJeriko nokwa piti mo.
2 Okwa li ku na omukuluntu gwaafendelithi, omulumentu omuyamba, edhina lye Sakeus.
3 Oye okwa kambadhala, a mone ye a tseye Jesus, ihe shoka okwa li omuhupi komuthika, okwa nyengwa oku mu mona omolwowindji waantu.
4 Oye okwa matuka a tetekele komeho gongundu nokwa londo komukwiyu, a wape okumona Jesus, oshoka ondjila oya li ye enda pomukwiyu.
5 Ano Jesus sho e ya mpoka, okwa ligamene pombanda nokwa ti kuSakeus: “Sakeus, londoloka mbala, oshoka ondi na oku ka talela po nena maandjeni.”
6 Sakeus nokwa taamba Jesus nenyanyu.
7 Aantu ayehe mboka ye shi mono, oya ngungutula ya ti: “Nguno okwa yi, a ka talele po omulumentu omulunde.”
8 Nena Sakeus okwa thikama nokwa lombwele Omuwa a ti: “Omuwa, pulakena! Etata lyeliko lyandje otandi ke li pa oohepele, nongele ku na ngoka nde mu yugu nokulongitha iifundja, otandi ke mu shunithila iinima oyo tuu mbyoka lune.”
9 Jesus okwa ti kuye: “Nena tuu ndjika ehupitho lye ya megumbo ndika, oshoka naye wo omuna gwaAbraham.
10 Oshoka Omuna gwOmuntu okwe ya okukonga nokuhupitha shoka sha kana.”
11 Jesus okwa hokololele mboka ya li taye mu pulakene eyele ndika. Oye okwa li popepi naJerusalem naantu oya li ye shi, Oshilongo shaKalunga otashi holoka mbala.
12 Jesus okwa ti ihe: “Okwa li ku na omulumentu omuvalekele e ta yi koshilongo shokokule, a ka ningwe omukwaniilwa, ye a galuke.
13 Manga inaa ya, okwi ithana aamati ye omulongo nokwe ya pe kehe gumwe iimaliwa iisiliveli omulongo e ta ti kuyo: ‘Indeni, mu ke yi likolithe iikwawo, manga tandi galuka.’
14 Ihe aakwashilongo she oye mu tondo noye mu tumine aatumwa ya ti: ‘Omulumentu nguka inatu mu hala, a ninge omukwaniilwa gwetu.’
15 “Omulumentu okwa ningwa omukwaniilwa e ta galuka. Opo okwi ithana aamati ye, mboka e ya pele iimaliwa, ye ye kuye, opo a tseye kutya oya likola shi thike peni.
16 “Gwotango okwe ya nokwa ti: ‘Omuwa, iimaliwa yoye omulongo onde yi likolitha iikwawo omulongo.’
17 Oye okwa ti: ‘Yaloo, omumati ngoye omwaanawa! Ongoye sho wa li omwiinekelwa miinima iishona, otandi ke ku pa epangelo lyiilando omulongo.’
18 Omutiyali okwe ya nokwa ti: ‘Omuwa, iimaliwa yoye omulongo onde yi likolitha iikwawo itano.’
19 Nguka okwe mu lombwele a ti: ‘Ngoye oto ka pangela iilando itano.’
20 “Mukwawo okwe ya e ta ti: ‘Iimaliwa yoye oyo mbika; onda kala nde yi pungula moshikayiwa.
21 Ngame onda li nde ku tila, oshoka ongoye omulumentu omudhigu. Oho kutha shono shaa shi shoye, noho teya shoka inoo shi kuna.’
22 Oye okwa ti kuye: ‘Ongoye omumati omukolokoshi! Otandi ku pangula omolwoohapu dhoye. Ou shi ndje omudhigu handi kutha shoka shaa shi shandje, nohandi teya shoka inaandi shi kuna.
23 Omolwashike inoo tula iimaliwa yandje mombaanga? Opo ando ngame sho nda galuka, nda galulilwa shoka shandje kwa gwedhelwa ontanitho.’
24 “Nena omukwaniilwa okwa lombwele mboka ya li ya thikama mpoka: ‘Mu kutheni iimaliwa mbyoka, mu yi pe ngoka a likolitha iimaliwa omulongo.’
25 Oyo oya ti kuye: ‘Ngoka oku na nale iimaliwa iikwawo omulongo.’
26 Oye okwe ya yamukula a ti: ‘Ngoka e na, oye ta pewa oshindji. Ihe ngoka kee na, oye ta kuthwa naashoka e shi na.
27 Ngashingeyi aatondi yandje mbaka inaa hala, ndi ninge omukwaniilwa gwawo, ye eteni nkuka, mu ya dhipagele koshipala shandje.’ ”
28 Jesus sho a popi ngaaka, okwa kwata komeho u uka kuJerusalem.
29 Sho a thiki popepi naBetfage naBetania pOndundu yooholivi, okwa tetekelitha aalongwa ye yaali
30 e ta ti kuyo: “Indeni komukunda ngwiyaka gu li komeho geni. Ngele mwa thiki ko, otamu ka mona ontana yokasino ya pandekwa, ndjoka inaayi kayilwa nando onale komuntu. Yi pandukululeni mo, ne mu yi ete nkuka.
31 Ngele ku na ngoka te mu pula: ‘Otamu yi pandukululile shike?’ Mu lombweleni kutya Omuwa okwe yi pumbwa.”
32 Oyo oya yi noya adha ayihe yi li, ngaashi Jesus e yi ya lombwele.
33 Ano manga taa pandukulula mo ontana, ooyene oye ya pula ya ti: “Omolwashike tamu yi pandukulula mo?”
34 Oyo oya yamukula ya ti: “Omuwa okwe yi pumbwa.”
35 Oyo oye yi eta kuJesus noya yala oonguwo pombunda yayo e taa kayilike ko Jesus.
36 Manga te ende, aantu oya yala oonguwo dhawo mondjila.
37 Ano sho a thiki popepi naJerusalem, pehala mpoka ondjila tayi kuluka tayi zi kOndundu yooholivi, ongundu onene yaalongwa ye oya tameke okupandula nokuhambelela Kalunga mokulekule omolwiilongankondo ayihe mbyoka ye yi mono
38 ya ti: “Omukwaniilwa ngoka te ya medhina lyOmuwa, na lalekwe nuuyamba kuKalunga! Ombili omegulu nesimano olyaKalunga!”
39 Nena yamwe yomaafarisayi oya lombwele Jesus mokati kongundu ya ti: “Muhongi, lombwela aalongwa yoye, ya mwene.”
40 Jesus okwa ti kuyo: “Otandi mu lombwele: ngele taa mwena, nena omamanya otagi igidha.”
41 Jesus sho a hedha popepi noshilando, okwe shi tala e te shi lili
42 a ti: “Ando ongoye wa dhimbulula nena kutya oshike we shi pumbwa omolwombili yoye. Ihe shika osha holekwa omeho goye.
43 Oshoka omasiku otage ke ya, uuna aatondi yoye taye ke ku kondeka e taye ku kundukidha koombinga adhihe.
44 Oyo otaye ku hanagula po thiluthilu naantu ayehe ye li mo; itaa ka thiga po mpaka emanya lya tentekwa kekwawo inaaye li kumuna po, oshoka ngoye ino dhimbulula ethimbo ndyoka Kalunga e ya, e ku hupithe.”
45 Jesus okwa yi motempeli nokwa tameke okutidha mo aahalithi
46 e ta ti kuyo: “Okwa nyolwa: ‘Ongulu yandje oyi na okwiithanwa ongulu yegalikano,’ ihe ne omwe yi ningi ombogo yaayugi.”
47 Esiku kehe Jesus okwa li ta longo aantu motempeli. Opo aayambi aakuluntu, aalongimpango naakuluntu yoshigwana oye mu kongo, ye mu dhipage,
48 ihe oya nyengwa oku shi ninga, oshoka aantu ayehe oya li ya hokwa oku mu pulakena.
1 Esiku limwe, Jesus sho a li ta longo aantu motempeli e te ya uvithile elaka etoye, aayambi aakuluntu naalongimpango pamwe naakuluntu yoshigwana oye ya
2 e taa ti kuye: “Tu lombwela, okoonkondo dhalye ho longo ngeyi? Olye e ku pa epitikilo lyokuninga iinima ya tya ngeyi?”
3 Jesus okwe ya yamukula a ti: “Nangame wo otandi mu pula epulo limwe. Yamukulii ndje.
4 Okushasha kwaJohannes okwa zi kuKalunga nenge omaantu?”
5 Oyo oya kundathana ya ti: “Ngele tatu ti: ‘Okwa zi kuKalunga,’ nena ota ka pula: omolwashike inaamu itaala Johannes?
6 Ihe ngele tatu ti: ‘Omaantu,’ nena aantu ayehe mbaka otaye ke tu dhipaga nomamanya, oshoka oye shi shi kutya Johannes oye omuhunganeki.”
7 Oyo oya yamukula ya ti: “Katu shi wo mpoka kwa za.”
8 Nena Jesus okwa ti kuyo: “Ano nangame wo itandi mu lombwele, okoonkondo dhalye tandi longo ngeyi.”
9 Nena Jesus okwa lombwele aantu eyele ndika: “Omusamane gumwe okwa tsike omiti dhomiviinu meyana lye nokwa langeke mo aalongi yeyana e ta yi koshilongo shilwe, nkoka ta kala ko ethimbo ele.
10 Ethimbo lyokukola oomviinu sho lya thiki, okwa tumu omupika gwe kaalongi yeyana, ye mu pe iiyimati mbyoka e na oku yi pewa. Ihe aalongi oya dhenge omupiya noye mu shunitha e li iikaha yowala.
11 Oye a tumu ko ishewe omupika gulwe, naanguka wo oye mu dhenge noye mu sitha ohoni e taye mu shunitha e li iikaha yowala.
12 Oye okwa tumu ko omupika omutitatu. Naye wo aalongi oye mu dhenge e taye mu umbu mo meyana.
13 Nena mwene gweyana okwa ti: ‘Otandi ningi ngiini? Otandi tumu ko omumwandje omuholike; nguka otaye mu tila.’
14 Ihe aalongi yeyana sho ye mu mono, oya lombwelathana ya ti: ‘Nguno omuna gwamwene gweyana. Tu mu dhipageni, eliko li ninge lyetu!’
15 Oyo oye mu umbu mo meyana e taye mu dhipaga.” “Mwene gweyana ota ka ninga ngiini aantu mbano?” Jesus okwa pula.
16 “Oye ote ya e te ya dhipaga po, neyana ote li pe yalwe.” Aantu sho ye shi uvu, oya ti: “Itashi vulika!”
17 Jesus okwe ya tala e te ya pula ta ti: “Enyolo ndika otali ti ngiini? ‘Emanya ndyoka aatungi ye li ekelehi, olyo lya ningi emanya li na oshilonga li vule agehe.’ ”
18 “Kehe tuu ngoka ta pundukile kemanya ndyoka, oye ota teka; naangoka ta gwilwa kemanya ndyoka, oye ota nyanyagulwa.”
19 Aalongimpango naayambi aakuluntu oya kambadhala okukwata Jesus pethimbo tuu ndyoka, oshoka oya dhimbulula kutya oyo taa popiwa meyele ndika, ihe oya tila aantu.
20 Oyo oya tegelele ompito yilwe noya futu meholamo aalumentu yamwe, ye shi okweenda miineya. Mbaka oye ya tumu kuJesus, ye mu kwate moohapu, opo ye mu gandje kepangelo nomeutho lyomuleli gwoshilongo.
21 Aalumentu yiineya oya ti kuJesus: “Muhongi, otu shi shi kutya oho popi noho longo aantu oshili. Ongoye iho tala olupe lwomuntu, nondjila yaKalunga oto yi longo pashili.
22 Tu lombwela: Osho opala tuu, tu pe omupangeli Omuroma oompale, nenge inashi opala?”
23 Jesus okwa dhimbulula omakoto gawo e ta ti kuyo:
24 “Ulukilii ndje oshimaliwa shoshene. Efano ndika nenyolo ndika li li ko, olyalye?” Oyo oya yamukula: “Olyomupangeli Omuroma.”
25 Nena Jesus okwe ya lombwele a ti: “Ano shono shomupangeli, shi peni omupangeli, naashoka shaKalunga, shi peni Kalunga.”
26 Ano oyo oya nyengwa oku mu kwata nando omoshinima shimwe montaneho yaantu, onkee oya mwena owala ya kuminwa eyamukulo lye.
27 Aasadukayi yamwe oye ya kuJesus oomboka haa ti, kaku na eyumuko noye mu pula ya ti:
28 “Muhongi, Moses okwe tu nyolele ngeyi: ‘Ngele ku na omulumentu inaa mona oluvalo, ye ta si, nena omukiintu gwe na hokanwe komumwayina, opo nakusa a monenwe oluvalo.’
29 Okwa li ku na aalumentu aamwayinathana ye li yaheyali. Omutango okwa hokana nokwa si kee ne oluvalo.
30 Osho wo omutiyali okwa hokana po omuselekadhi ngoka,
31 osho omutitatu wo. Shika osha ningwa kwaayehe yaheyali, ihe oya si kaaye na oluvalo.
32 Ohugunina omukiintu okwa si wo.
33 Ano mesiku uuna aasi taa ka yumudhwa, ota ka ninga gwalye mwaambaka, oshoka ayehe yaheyali oya li ye mu hokana?”
34 Jesus okwe ya yamukula a ti: “Aantu yomuuyuni mbuka ohaa hokana nohaa hokanwa,
35 ihe mboka ya talwa ya gwana okuyumudhwa kuusi noyo opalela okuya muuyuni mbwiyaka tau ya, ihaa hokana noihaa hokanwa.
36 Oyo oya fa aayengeli yaKalunga noitaa si. Oyo aana yaKalunga, oshoka oya yumudhwa kuusi.
37 NaMoses wo okwe shi holola sha yela kutya aasi otaa ka yumudhwa. Mehokololo ndyoka tali popi oshihwa sha hwama ota ti kutya Omuwa oye Kalunga kaAbraham, Kalunga kaIsak naKalunga kaJakob.
38 Kalunga ke shi Kalunga kaasi, aawe, okaanamwenyo; oshoka mekwatathano naye ayehe otaa kala ye na omwenyo.”
39 Nena yamwe yomaalongimpango oya yi mo ya ti: “Owa yamukula nawa, Muhongi.”
40 Okuza mpoka inaa vula we okupula Jesus sha.
41 Jesus okwa ti kuyo: “Aantu otaa vulu ngiini okutya, Kristus oye omuna gwaDavid?
42 Oshoka David ye mwene membo lyOmapisalomi ota ti: ‘Omuwa okwa lombwele Omuwa gwandje: Kala omutumba kolulyo lwandje,
43 sigo tandi tula aatondi yoye kohi yoompadhi dhoye.’
44 “David ngele ote mu ithana Omuwa, ano Kristus oye omwana pamukalo guni?”
45 Aantu ayehe manga ya li taa pulakene, Jesus okwa ti kaalongwa ye:
46 “Angaleni aalongimpango mboka ye hole okweenda ya zala oonguwo oondeendeka nokukundilwa pokuma hapu gongala aantu. Oyo oye hole kiipundi yokomeho moosinagoga nopomahala ga simana miituthi.
47 Oyo ohaa li omagumbo gaaselekadhi nohaa galikana omagalikano omaleeleka gokumonika kwowala. Oyo otaa ka mona epangulo edhigu.”
1 Jesus okwa lengalenga nokwa mono, aayamba nkene taa tula omagano moshiketha shotempeli.
2 Nena okwa mono omuselekadhi gumwe ohepele a tula mo uupeni uyali.
3 Oye okwa ti: “Otandi mu lombwele kutya kape na omalimbililo, omuselekadhi nguka ohepele okwa tula mo oshindji e vule ayehe yalwe.
4 Oshoka ayehe mboka oya tula mo, ya kutha muuyamba wawo, ihe omuselekadhi moluhepo lwe okwa gandja ashihe shoka a li e shi na, iipalutha ye ayihe.”
5 Yamwe yomuyo sho ya popi kombinga yotempeli, nkene ya tungwa nomamanya go opala noya zalekwa nomagano ngoka ga pewa Kalunga, Jesus okwa ti:
6 “Omu yi wete ayihe mbino; omasiku otage ke ya, uuna itaapa ka thigwa nando emanya lya tentekwa kekwawo inaali kumunwa po.”
7 Oyo oye mu pula ya ti: “Muhongi, shika otashi ningwa uunake? Nendhindhiliko ndyoka tali ka holola kutya ethimbo lya thiki, mbika yi ningwe, olini?”
8 Jesus okwa ti: “Kotokeni, mwaa pukithwe. Oshoka otaku ka holoka aantu oyendji medhina lyandje taa iti kutya oyo ngame notaa ti kutya ethimbo olya thika. Ihe inamu ya landula.
9 Inamu tilithwa, ngele tamu uvu oonkundana dhiita nomapiyagano. Mbika oyi na okuningwa, ihe ehulilo inali thikana natango.”
10 Oye okwe ya lombwele natango a ti: “Iigwana otayi ka thikama okukondjithathana, niilongo otayi ka matukilathana.
11 Otaku ke ya omakakamo gevi omatilithi, oondjala nomalega koombinga noombinga. Kegulu otaku ka holoka iitilithi iinene nomandhindhiliko omakumithi.”
12 “Manga ayihe mbika inaayi ningwa, otamu ka kwatwa notamu ka tidhaganwa. Otamu ka falwa koompangu moosinagoga e tamu ke edhililwa mondholongo. Otamu ka falwa wo kiipala yaakwaniilwa noyomalenga omolwandje.
13 Otashi ka kala ompito yeni, mu ninge oonzapo dhokupopya oshili mokati kawo.
14 Ilongekidheni ano, mwaa kale mu na oshimpwiyu kutya otamu ki ipopila ngiini.
15 Oshoka ngame otandi ke mu pa iitya noondunge tadhi nyenge aatondi yeni ayehe oku mu kondjitha noku mu ludhikitha.
16 Otamu ka gandjwa miikaha yaatidhagani kaakuluntu yeni, kaamwanyoko aalumentu, kaanezimo nokookuume keni; yamwe yomune otaye ke ya dhipaga.
17 Otamu ka tondwa kwaayehe omolwandje.
18 Ihe one otamu kala mwa gamenwa, nefufu limwe lyokomitse dheni itali kana.
19 Mokwiidhidhimika otamu ihupithile oomwenyo dheni.”
20 “Uuna tamu mono, Jerusalem sha kondekwa komatanga gaakwiita, tseyeni kutya oshi li popepi nokuhanagulwa po.
21 Nena ayehe mboka ye li muJudea, naa tembukile koondundu; naamboka ye li moshilando shoshene, naa fadhuke po; naamboka taa adhika kondje yasho, inaa galukila mo.
22 Oshoka ngaka ogo omasiku ngoka Kalunga ta geele Aaisraeli, opo Omanyolo ga tsakanithwe ngoka taga ti:
23 Yayee aasimba naamwali yopomasiku ngoka! Oshoka uudhigu uunene otau ka adha oshilongo shika, nondjahi yaKalunga otayi ke ya kombanda yaantu mbaka.
24 Oyo otaa ka sa kegongamwele notaa ka falwa muupika miilongo ayihe. Aapagani otaa ka lyatagula Jerusalem, sigo ethimbo lyawo lya hulu po.
25 “Otaku ka holoka omandhindhiliko ketango, komwedhi nokoonyothi. Aantu ayehe yokombanda yevi otaa ka limbililwa notaa ka tilithwa kepopomo lyefuta nokomakuthikuthi galyo.
26 Aantu otaa ka sa omoluumbanda mokutegelela mbyoka tayi ka adha evi alihe, oshoka oonkondo dhomewangandjo otadhi ka tukuluka.
27 Oyo otaa ka mona Omuna gwOmuntu te ya te endele moshikogo e na oonkondo odhindji neadhimo.
28 Ano mbika ayihe ngele tayi tameke okuningwa, yelutheni omitse dheni, mu ukilila nokutegelela, oshoka ehupitho lyeni lya thiki popepi.”
29 Nena Jesus okwe ya lombwele eyele a ti: “Dhiladhileni omukwiyu nosho wo omiti dhilwe.
30 Omafo gadho ngele taga mbunyuka, nena omu shi shi kutya othinge oyi li popepi.
31 Ano osho wo, ngele tamu mono ayihe mbika tayi ningwa, kaleni mu shi shi kutya Oshilongo shaKalunga oshi li popepi.
32 “Ongame tandi mu lombwele: Aantu mboka ye na omwenyo ngashingeyi, itaa si, manga ayihe mbika inaayi gwanithwa.
33 Egulu nevi otayi hulu po, ihe oohapu dhandje kadhi na mpoka tadhi hulu po.”
34 “Ikotokeleni ne yene! Inamu etha, omadhiladhilo geni ga luudhikwe kiituthi nokuunkolwi nokiimpwiyu yopauyuni, opo esiku ndyoka lyaaye mu adhe ombaadhilila.
35 Oshoka otali ya ongomwigo, tali akele aantu ayehe kombanda yevi alihe.
36 Tonateni, ne mu galikane ethimbo kehe, mu mone oonkondo dhoku mu pititha mumbika ayihe tayi ka ningwa, nokuthikama koshipala shOmuna gwOmuntu.”
37 Momasiku ngoka Jesus okwa longo aantu motempeli pethimbo lyomutenya, ihe uusiku ngele we ya, oha yi, a ka lale kOndundu yooholivi.
38 Aantu ayehe oya meneka ongula onene e taa yi kotempeli, ye ke mu pulakene.
1 Ano ethimbo lyoshituthi shiikwiila inaayi fulikwa, nokutya Opaasa, olya thiki.
2 Aayambi aakuluntu naalongimpango oya li taa kongo ompito, ya dhipage Jesus, oshoka oya li ya tila aantu.
3 Nena Satana okwa yi muJudas i ithanwa Iskariot, gumwe gwaamboka omulongo nayaali.
4 Opo Judas okwa yi nokwa kundathana naayambi aakuluntu nosho wo naakuluntu yaalangeli yotempeli, nkene e na okugandja Jesus miikaha yawo.
5 Oyo oya nyanyukwa noyu uvaneke, ye mu pe iimaliwa.
6 Judas okwe shi zimine nokwa kala ta kongo ethimbo lyo opala okugandja Jesus kuyo, manga aantu inaaye shi tseya.
7 Esiku olya thiki pomasiku goshituthi shiikwiila inaayi fulikwa, uuna onzigona yOpaasa yi na okudhipagwa.
8 Jesus okwa tumu Petrus naJohannes nokwe ya lombwele a ti: “Indeni, mu ke tu longekidhile uulalelo wOpaasa, tu u lye.”
9 Oyo oye mu pula ya ti: “Openi wa hala, tu ke u longekidhe?”
10 Oye okwa ti: “Pulakeneni! Ngele mwa yi moshilando, otamu ka tsakaneka omulumentu a humbata etenga lyomeya. Mu landuleni sigo omegumbo moka u uka,
11 e tamu lombwele mwene gwegumbo tamu ti: ‘Muhongi ote ku pula: Openi pu na oshinyanga shaayenda, ndi lile mo pamwe naalongwa yandje uulalelo wOpaasa?’
12 Oye note mu ulukile ondjugo onene yopombanda yo opalekwa. Longekidheni ayihe.”
13 Oyo oya yi noya adha ayihe yi li, ngaashi Jesus e ya lombwele, e taa longekidha uulalelo wOpaasa.
14 Ethimbo sho lya thiki, Jesus okwa kuutumba poshililo pamwe naayapostoli.
15 Oye nokwa ti kuyo: “Onda yuulukwa vale okulya Opaasa ndjika pamwe nane, manga inaandi hepekwa.
16 Oshoka otandi mu lombwele: Itandi li we Opaasa, sigo uuna tandi ka lya ndjiyaka yomOshilongo shaKalunga.”
17 Nena Jesus okwa kutha oshitenga, a hambelele nokwa ti: “Shi taambeni, mu paathane.
18 Oshoka otandi mu lombwele: Okuza mpaka itandi nu we omaviinu, Oshilongo shaKalunga manga inaashi holoka.”
19 Oye a kutha wo oshikwiila, a hambelele, okwe shi pambula nokwe shi ya pe e ta ti: “Shika osho olutu lwandje ndoka talu mu gandjelwa. Shi ningeni nokudhimbulukwa ndje.”
20 Osho tuu wo, sho ya mana okulya, okwe ya pe oshitenga e ta ti: “Oshitenga shika osho ehangano epe lyomombinzi yandje ndjoka tayi tilwahi molweni.”
21 “Ano tala! Ngoka ta gwaaleke ndje, oku li mpaka poshililo pamwe nangame.
22 Oshoka Omuna gwOmuntu oku na okusa, ngaashi Kalunga e shi tokola nale; ihe yaye omuntu ngoka te mu gwaaleke!”
23 Oyo oya tameke okupulathana kutya olye ngoka gwomokati kawo te shi ningi.
24 Mokati kaalongwa omwa penduka edhiladhilo kutya olye ngoka e na okutalwa omukuluntu e vule ooyakwawo ayehe.
25 Jesus okwa ti kuyo: “Aakwaniilwa yomuuyuni mbuka ohaa pangele aantu yawo koonkondo, naapangeli yawo oya hala, yi ithanwe ookuume kaantu.
26 Ihe ne inamu kala ngaaka! Omukuluntu gwomokati keni na ninge omuhugunini, naangoka gwokomeho na ninge omuyakuli.
27 Oshoka olye e na esimano, oye ngoka a kuutumba poshililo ta li nenge oye ngoka ta yakula? Ndishi oye ngoka a kuutumba owala. Ihe ngame ondi li mokati keni nda fa omuyakuli.”
28 “One mwa kala pamwe nangame momamakelo gandje agehe.
29 Ngaashi Tate a pe ndje epitikilo lyokupangela, osho nangame wo otandi mu pe oshilongo.
30 One tamu ka lya notamu ka nwa poshililo shandje omOshilongo shandje e tamu ka kuutumba kiipangelapundi, mu pangule omazimo omulongo nagaali gaIsrael.”
31 “Simon, Simon! Pulakena! Satana okwa pula e ta pewa epitikilo, e mu makele ne amuhe, ongaashi omukiintu ta yele iilya polupale.
32 Ihe ngame onde ku galikanene, opo eitaalo lyoye lyaa kane. Nongele wa galukile kungame, tsa wo ooyakweni omukumo.”
33 Petrus okwa ti kuye: “Omuwa, ngame ondi ilongekidha okuya mondholongo pamwe nangoye nosho wo okusa pamwe nangoye.”
34 Jesus okwa ti kuye: “Petrus, otandi ku lombwele: Uusiku mbu wonena ekondombolo manga inaali iga, oto idhimbike ndje lutatu to ti ku shi ndje.”
35 Nena Jesus okwa ti kuyo: “Sho nde mu tumiine mwaa na okampunda kiimaliwa, ompunda yokweenda nayo noongaku, omwa li mwa pumbwa sha?” Oyo oya ti: “Aawe.”
36 Jesus okwa ti kuyo: “Ihe ngashingeyi ngoka e na okampunda kiimaliwa nenge ompunda yokweenda nayo, ne yi kuthe. Ngoka kee na egongamwele, na landithe po ombaikitha ye, e li ilandele.
37 Oshoka otandi mu lombwele: Enyolo ndyoka tali ti: ‘Oye a yalulilwa maakolokoshi,’ oli na okutsakanithwa. Oshoka ashihe shoka sha nyolwa tashi popi ndje, oshi na okuninga shoshili.”
38 Aalongwa oya ti kuye: “Omuwa, tala, otu na po omagongamwele gaali.” Oye okwa ti kuyo: “Sigo opo mpo sha gwana!”
39 Jesus okwa zi mo nokwa yi, ngaashi i igilila, kOndundu yooholivi. Aalongwa ye oya yi pamwe naye.
40 Sho a thiki kehala ndyoka, okwa ti kuyo: “Galikaneni, mwaa pwile memakelo.”
41 Nena okwe ya thigi po okakako ke thike pedhaadhigo lyemanya nokwa tsu oongolo e ta galikana
42 a ti: “Tate, ngele oto shi pitika, oshitenga shika nashi pitilile ndje po. Ihe hamolwehalo lyandje, ihe olyoye li gwanithwe.”
43 [Omuyengeli gwomegulu okwe ya kuye nokwe mu tsu omukumo.
44 Oye okwa adhika kuuwehame uunene nokwa galikana a mana mo. Omazigudhe ngoka ga zi muye, oga li ga fa omata gombinzi noga ndondele pevi.]
45 Konima yokugalikana okwa thikama e ta shuna kaalongwa ye nokwe ya adha ya kotha, oshoka oya li ya sa oluhodhi.
46 Oye okwa ti kuyo: “Omolwashike tamu kotha? Pendukeni, mu galikane, mwaa pwile memakelo.”
47 Manga Jesus ta popi, ongundu yaantu oye ya po, ya kwatelwa komeho kuJudas, gumwe gwomaalongwa omulongo nayaali. Oye okwa hedha kuJesus nokwe mu thipi komilungu.
48 Jesus okwa ti kuye: “Judas, Omuna gwOmuntu oto mu gwaaleke noku mu thipa komilungu?”
49 Ano aalongwa mboka ya li pamwe naJesus, sho ya mono shoka tashi ningwa, oya ti: “Omuwa, natu kondje nomagongamwele getu?”
50 Nena gumwe oku umpile omumati gwomuyambimukuluntu nokwe mu fegula okutsi kwokolulyo.
51 Jesus okwa yamukula a ti: “Opuwo, inashi ningwa we!” Oye okwa gumu okutsi kwomumati nokwe mu aludha.
52 Nena Jesus okwa lombwele aayambi aakuluntu, aakuluntu yaalangeli yotempeli naakuluntu yoshigwana mboka ye ya oku mu kwata a ti: “Omwe ya, mu kwate ndje ongomukolokoshi mu na omagongamwele noondhimbo?
53 Esiku kehe onda kala pamwe nane motempeli, ihe inamu kwata ndje. Ihe ndika olyo ethimbo lyeni nolyoonkondo dhomupangeli gwomilema.”
54 Oyo oya kwata Jesus noye mu fala megumbo lyomuyambimukuluntu. Petrus okwa landula mo e li konima kokule.
55 Molugumbo lwomeni omwa li mu na yamwe ya kuutumba taa huhulukwa pomulilo, naPetrus okwe ya e ta kuutumba mongundu yawo.
56 Ano gumwe gwomaayakuli aakadhona sho a mono Petrus ta huhulukwa, okwe mu tongolola e ta ti: “Omulumentu nguka naye wo okwa li pamwe naJesus.”
57 Ihe Petrus okwi idhimbike a ti: “Nekulu, kandi mu shi nando.”
58 Konima yokathimbo omulumentu gumwe okwe mu dhimbulula e ta ti: “Nangoye wo ogumwe gwawo.” Petrus okwa yamukula a ti: “Mentu ngoye, hangame.”
59 Sho pwa piti otundi yimwe, omulumentu gumwe ishewe okwa koleke a ti: “Kapu na omalimbililo, omulumentu nguka okwa li pamwe naye, oshoka naye wo Omugalilea.”
60 Petrus okwa yamukula a ti: “Mentu ngoye, kandi uvite ko shoka to popi.” Ano manga ta popi, ekondombolo olyi igi.
61 Opo Omuwa okwa punguluka nokwa tongolola Petrus. Petrus okwa dhimbulukwa oohapu dhOmuwa, sho a tile: “Nena tuu ndjika, ekondombolo manga inaali iga, ongoye to idhimbike ndje lutatu.”
62 Petrus okwa yi pondje e ta lili nokulililila.
63 Aalumentu mboka ya li ya langela Jesus, oye mu sheke e taye mu dhenge.
64 Oyo oye mu siikile koshipala noye mu pula ya ti: “Tengeneka, olye e ku dhenge?”
65 Oyo oye mu sheke omasheko omakwawo ogendji.
66 Ano sho kwa shi, aakuluntu yoshigwana, aayambi naalongimpango oya gongala, naJesus okwa etwa moshigongi shawo.
67 Oyo oye mu pula ya ti: “Tu lombwela, ngele ongoye Kristus.” Oye okwe ya yamukula a ti: “Ngele ando ondi mu lombwele, itamu itaale ndje.
68 Nongele ando ondi mu pule epulo limwe, itamu yamukula ndje.
69 Ihe okuza mpaka otamu ka mona Omuna gwOmuntu a kuutumba kolulyo lwaKalunga, ngoka e na oonkondo adhihe.”
70 Oyo ayehe oye mu pula ya ti: “Ngoye ano Omuna gwaKalunga?” Oye okwa ti kuyo: “One omwa ti kutya ongame.”
71 Oyo oya ti: “Tse inatu pumbwa nando onzapo yimwe yi tu lombwele. Otse yene otu uvu oohapu adhihe ndhoka e dhi popi.”
1 Ongundu ayihe yaantu oya thikama noya fala Jesus kuPilatus.
2 Oyo oya tameke oku mu tamaneka taa ti: “Omulumentu nguka otwe mu kwata, oshoka ota pukitha aantu note ya indike okugandja oompale komupangeli Omuroma, ye ti iti kutya oye Kristus, omukwaniilwa.”
3 Pilatus okwe mu pula a ti: “Ongoye omukwaniilwa gwAajuda?” Jesus okwe mu yamukula: “Osho wa ti.”
4 Nena Pilatus okwa lombwele aayambi aakuluntu nongundu ayihe a ti: “Kandi wete etompelo lyokupa omulumentu nguka oondjo.”
5 Ihe aatamaneki oya dhiginine noonkondo ya ti: “Oye ota piyaganeke aantu nelongo lye. Oye okwa tameke muGalilea nokwe ende muJudea ashihe sigo oompaka.”
6 Ano Pilatus sho e shi uvu, okwa pula a ti: “Omulumentu nguka Omugalilea?”
7 Sho a kundana kutya Jesus okwa za koshitopolwa shoka shi li mepangelo lyaHerodes, okwe mu tumu kuHerodes, oshoka Herodes okwa li muJerusalem pethimbo ndyoka.
8 Herodes okwa nyanyukwa unene, sho a mono Jesus, oshoka okwa adhika e mu uvu owala nokwa kala ethimbo ele e na ehalo oku mu mona; unene okwa kala a hala, a mone Jesus ta longo oshikumithalonga.
9 Ano Herodes sho a pula Jesus omapulo ogendji, Jesus ina yamukula nando osha.
10 Aayambi aakuluntu naalongimpango oye ya po noya lundile Jesus ye na uulaadhi.
11 Nena Herodes pamwe naakwiita ye oye mu dhini noye mu sheke. Oyo oye mu zaleke onguwo onene yesimano. Herodes nokwe mu shunitha kuPilatus.
12 Okuza kesiku tuu ndyoka Herodes naPilatus oya panga ihe uukuume, oshoka nale oya li ye tondathane.
13 Pilatus okwa gongele aayambi aakuluntu, aakuluntu Aajuda naantu yalwe
14 e ta ti kuyo: “One omwe eta omulumentu nguka kungame tamu ti kutya ota pukitha aantu. Ngashingeyi onde mu pula nokuli montaneho yeni amuhe, ihe inandi mona muye nando eyono limwe ndyoka tamu mu tamanekele.
15 Herodes wo sho inee mu mona e na oondjo, okwe mu shunitha kutse. Omulumentu nguka ina ninga nando osha shoku mu dhipagitha.
16 Onda hala ndi mu dhengithe e tandi mu etha, a ye.” [
17 Pethimbo kehe lyoshituthi shOpaasa Pilatus ohe ya mangululile onkwatwa yimwe.]
18 Nena aantu ayehe oyi igidha mokule ya ti. “Na dhipagwe! Tu mangululila Barabbas!”
19 Barabbas okwa li e edhililwa mondholongo omolwekolokosho ndyoka lya li lya holoka moshilando nomolwedhipago.
20 Pilatus okwe ya tseyithile ishewe kutya okwa hala okumangulula Jesus.
21 Ihe oyo oyi igidha mokule ya ti: “Na alelwe, na alelwe komushigakano!”
22 Pilatus okwe ya pula olutitatu a ti: “Uuwinayi owashike ano ningi? Ngame inandi mu mona e na oondjo dhoku mu dhipagitha. Otandi mu dhengitha owala e tandi mu etha.”
23 Ihe oya dhiginine okwiigidha mokule taa ti kutya Jesus na alelwe komushigakano. Neigidho lyawo olya sindana.
24 Nena Pilatus okwa tokola, ehalo lyawo li gwanithwe.
25 Oye okwa mangulula omulumentu ngwiyaka taa pula, ngoka a li a tulwa mondholongo omolwekolokosho nedhipago, nokwa gandja Jesus miikaha yawo, ye ke mu ninge ngaashi ya hala.
26 Oyo oya yi naJesus. Mokweenda kwawo oya tsakaneke Simon, omulumentu Omukireni, a li ta zi kepya u uka moshilando. Aakwiita oye mu thikamitha noye mu tsike omushigakano komapepe ge, e gu humbate konima yaJesus.
27 Ongundu onene yaantu oya landula Jesus. Mokati kawo omwa li aakiintu mboka ya li taa lili notaa hekumuna omolwe.
28 Jesus okwa punguluka nokwe ya tala e ta ti. “Aakiintu Aajerusalem, inamu lila ndje, ihe ilileni ne yene naana yeni.
29 Oshoka omasiku otage ke ya, uuna aantu taa ka tya: ‘Aakiintu aanelago oomboka inaa mona uunona, inaa vala yo inaa yamutha.’
30 Pethimbo ndyoka aantu otaa ka popya taa ti: ‘Oondundu, tu gwileni! iikulundundu, tu siikileni!’
31 Oshoka omuti omutalala ngele otagu ningwa ngeyi, nena omuti omukukutu otagu ningwa ngiini?”
32 Jesus okwa falwa, a ka dhipagwe pamwe naalumentu aakolokoshi yaali.
33 Sho ya thiki kehala ndyoka lyi ithanwa Oshala sholukwe, oko ya alele Jesus komushigakano pamwe naakolokoshi mboka yaali komishigakano dhawo, gumwe okolulyo lwe nomukwawo okolumoho lwe.
34 Jesus okwa ti: “Tate, ya dhimina po oondjo dhawo, oshoka inaa tseya shoka taa ningi.” Oyo oya topolelathana oonguwo dhe pamukalo gwoku dhi umbila oshihogololitho.
35 Aantu oya thikama mpoka noye mu tala, manga aakuluntu Aajuda ye mu sheke ya ti: “Okwa li ha hupitha aantu yalwe, ni ihupithe ano, ngele oye Kristus, omuhogololwa gwaKalunga.”
36 Aakwiita wo oye mu sheke; oyo oye ya kuye noye mu pe omaviinu omalulu
37 e taa ti: “Ihupitha ano, ngele ngoye omukwaniilwa gwAajuda.”
38 Oohapu ndhika odha li dha nyolwa kombanda yomutse gwe: “Nguka oye omukwaniilwa gwAajuda.”
39 Gumwe gwomaakolokoshi okwe mu sheke wo a ti: “Ongoye Kristus? Ihupitha ano, u tu hupithe wo.”
40 Nena mukwawo okwe mu ganda a ti: “Iho tila Kalunga? Natse otu li megeelo olyo ndyoka.
41 Okuhepekwa kwetu oku li mondjila, sho tatu ningilwa shoka twe shi ilongela, ihe nguka ina ninga nando uuwinayi washa.”
42 Oye okwa ti kuJesus: “Jesus, dhimbulukwa ndje ngele wa thiki mOshilongo shoye.”
43 Jesus okwa ti kuye: “Ongame tandi ku lombwele, nena tuu ndjika oto ka kala pamwe nangame mOparadisa.”
44 Pokati komutenya lwopotundi omulongo nambali etango inali minikila, onkee okwa ningi omilema moshilongo ashihe sigo opotundi ontintatu yokomatango.
45 Nena etopolitho lyotempeli olya tuuka pokati.
46 Jesus okwi igidha mokule a ti: “Tate, omwenyo gwandje otandi gu gandja miikaha yoye.” Ano sho a popi ngeyi, okwa si.
47 Ano omukuluntu gwaakwiita sho a mono ayihe mbyoka ya ningwa po, okwa simaneke Kalunga a ti: “Kapu na omalimbililo, omulumentu nguka ke na oondjo.”
48 Aantu mboka ya gongalele okutala, sho ya mono shoka sha ningwa po, ayehe oya shuna komagumbo ya sa oluhodhi.
49 Aantu ayehe mboka ya li ye shaathane nawa naJesus, osho wo aakiintu mboka ye mu landula okuza kuGalilea, oya thikama kokule noya tala ayihe mbika.
50 Okwa li ku na omulumentu, edhina lye Josef, gwomuArimatia, oshilando shAajuda.
51 Oye okwa li e na omikalo omiwanawa, he ende moshili nokwa kala a tegelela Oshilongo shaKalunga. Nonando oye okwa li oshilyo shoshigongi shaatokoli, ina zimina omatokolo niilonga yawo.
52 Oye okwa yi kuPilatus nokwe mu indile omudhimba gwaJesus.
53 Oye okwe gu kutha nokwe gu dhingile moshiyata oshitokele nokwe gu langeke mombila ya li ya hokwa memanya, inaamu tulwa nando nale omuntu.
54 Esiku olya li Etitano, nEsabati olya li pokutameka.
55 Aakiintu mboka ya li ya landula Jesus okuza kuGalilea, oya yi pamwe naJosef noya mono ombila nomudhimba mpoka gwa langekwa.
56 Ano sho ya shuna komagumbo, oya longekidha iizimba ya nika nawa nomugwayo, ya ka gwayeke omudhimba. MEsabati oya vululukwa, ngaashi shu uthwa kompango.
1 Ongula onene yesiku lyotango lyoshiwike aakiintu oya yi kombila ye na iizimba ya nika nawa, mbyoka ye yi longekidha.
2 Sho ye ya posheelo, oya adha emanya lya kandulwa po nale.
3 Oyo oya yi mo, ihe inaa mona mo omudhimba gwOmuwa Jesus.
4 Ano manga ya li ya limbililwa, ombaadhilila aalumentu yaali ya zala oonguwo tadhi adhima, oya thikama puyo.
5 Aakiintu oya haluka noyi ihata pevi. Aalumentu mboka oye ya popitha ya ti: “Omolwashike tamu kongo ngoka e na omwenyo mokati kaasi?
6 Ke mo muka, okwa yumudhwa kuusi. Dhimbulukweni shoka e mu lombwelele, manga a li muGalilea.
7 Okwa tile: ‘Omuna gwOmuntu oku na okugandjwa miikaha yaalunde, e ta ka alelwa komushigakano, ihe ngele pwa piti omasiku gatatu, ota ka yumudhwa kuusi.’ ”
8 Nena aakiintu oya dhimbulukwa oohapu dhaJesus.
9 Sho ya galuka kombila, oya hokolola ayihe mbika kaalongwa omulongo nagumwe nokuyalwe wo.
10 Aakiintu mbaka oyo Maria Magdalena, Johanna naMaria, yina yaJakob; oyo pamwe naakiintu ooyakwawo yalwe oya hokololele aayapostoli iinima mbika ayihe.
11 Ihe aayapostoli oya tala kutya oohapu dhaakiintu kadhi na oshilonga, onkee inaye dhi itaala.
12 Ihe Petrus okwa thikama e ta matukile kombila. Oye okwa ontamene mo nokwa mono mo owala omalapi ngoka ga li omudhimba. Nena okwa shuna kegumbo a kuminwa shoka sha ningwa po.
13 Mesiku olyo tuu ndyoka yaali yomaalongwa oya li taa ende yu uka kokalando, edhina lyako Emmaus, ke li ookilometa omulongo nambali okuza kuJerusalem.
14 Oyo oya li taa kundathana iinima ayihe mbyoka ya ningwa po.
15 Ano manga taa popi notaa kundathana, Jesus mwene okwa hedha puyo e te ende pamwe nayo.
16 Oyo oye mu mono ngaa, ihe inaye mu dhimbulula.
17 Jesus okwa ti kuyo: “Otamu kundathana shike mokweenda kweni?” Oyo oya thikama ya lulika iipala yawo.
18 Gumwe gwawo, edhina lye Kleopas, okwe mu pula a ti: “Ongoye awike wa kala muJerusalem, ino uva shoka sha ningwa mo pomasiku ngano?”
19 Jesus okwe ya pula a ti: “Omwa ningwa shike?” Oyo oya yamukula ya ti: “Ooshoka sha ningwa kombinga yaJesus Omunasareti. Omulumentu nguka okwa li omuhunganeki e na oonkondo miilonga nomoohapu montaneho yaKalunga noyaantu ayehe.
20 Ihe aayambi aakuluntu naapangeli yetu oye mu gandja mompangu, a ka se, e taye mu alele komushigakano.
21 Tse otwa li twi inekele kutya omulumentu nguka oye ngoka e na okuhupitha Aaisraeli. Nena nokuli esiku etitatu, mbika ayihe sho ya ningwa.
22 Aakiintu yamwe yomokati ketu oye tu kumitha, sho ye ya ongula onene kombila,
23 ihe inaa mona omudhimba gwaJesus. Oyo sho ya galuka, oya hokolola kutya oya mono emoniko lyaayengeli mboka ye ya lombwele kutya Jesus oku na omwenyo.
24 Okuza mpoka yamwe yomokati kawo oya yi ko kombila noya adha ko naanaa, ngaashi ya lombwelwa kaakiintu, ihe Jesus ye mwene inaye mu mona.”
25 Nena Jesus okwa ti kuyo: “Kamu shi tuu aagoya, sho mwa nyengwa okwiitaala ayihe mbyoka ya popiwa kaahunganeki!
26 Ndishi Kristus okwa li e na okuhepekwa pamukalo nguno, opo a ye mesimano lye?”
27 Opo Jesus okwe ya fatululile shoka sha tiwa kombinga ye mOmanyolo agehe okutameka momambo gaMoses sigo omambo agehe gaahunganeki.
28 Oyo sho ye ya popepi nokalando moka ya li taa yi, Jesus okwa ningi a fa ta pitilile po.
29 Oyo oye mu galula ya ti: “Kala putse, oshoka otaku toko, nomilema odhe ya.” Nena okwa yi megumbo nokwa kala puyo.
30 Ano sho a kuutumba poshililo pamwe nayo, okwa kutha oshikwiila, e shi yambeke nokwe shi pambula e te shi ya pe.
31 Omeho gawo oga tonata noye mu dhimbulula; ihe ohaluka okwe ya kana.
32 Oyo oya pulathana ya ti: “Katwa li tuu tu na ehwamo moomwenyo dhetu, sho a popi natse mondjila nokwe tu fatululile Omanyolo!”
33 Mbalambala oya thikama e taa shuna kuJerusalem noya adha ko aalongwa omulongo nagumwe ya gongala nooyakwawo yalwe.
34 Mbaka oya ti kuyo: “Kapu na omalimbililo, Omuwa okwa yumudhwa! Okwa monika kuSimon!”
35 Nena aalongwa mboka yaali oye ya fatululile shoka sha ningwa mondjila nankene ya dhimbulula Omuwa, sho a pambula oshikwiila.
36 Manga mbaka taa hokolola, Omuwa mwene okwa thikama mokati kawo e ta ti kuyo: “Ombili nayi kale nane.”
37 Oyo oya kwatwa kuumbanda nokehaluko, oshoka oya dhiladhila kutya oya mono oshiluli.
38 Ihe oye okwa ti kuyo: “Omolwashike mwa tila? Omolwashike oomwenyo dheni dha limbililwa?
39 Taleni iikaha yandje noompadhi dhandje, mu dhimbulule kutya ongame. Gumii ndje, mu tale, oshoka oshiluli kashi na oontumba nomasipa, ngaashi ngame ndi yi na.”
40 Sho a popi ngeyi, okwe ya ulukile iikaha ye noompadhi dhe.
41 Natango tuu inaa hala okwiitaala, oshoka oyo oya li yu udha enyanyu nonkumwe. Oye okwe ya pula a ti: “Omu na po sha shokuliwa?”
42 Oyo oye mu pe okantumba kohi ya pya.
43 Oye okwe ka kutha nokwe ka li montaneho yawo.
44 Oye okwa ti kuyo: “Iinima mbika oyo tuu mbyoka nde mu lombwelele, sho nda li pune, nda ti: Ayihe mbyoka ya nyolwa mompango yaMoses tayi popi ndje nenge momanyolo gaahunganeki nenge momapisalomi, oyi na okugwanithwa.”
45 Opo okwa patulula omadhiladhilo gawo, yu uve ko Omanyolo.
46 Oye nokwa ti kuyo: “Okwa nyolwa kutya Kristus okwa li e na okuhepekwa, nongele pwa piti omasiku gatatu, ota ka yumudhwa kuusi.
47 Medhina lye aantu ayehe oye na okuuvithilwa kutya nayi itedhulule, Kalunga nota dhimi po oondjo dhawo. Tamekeni muJerusalem.
48 One aahokololi yiinima mbika ayihe.
49 Ngame otandi ke mu tumina shoka Tate e shi uvaneke. Ihe ne omu na okukala moshilando muka, sigo tamu pewa oonkondo dhopombanda.”
50 Jesus okwa kutha mo aalongwa ye moshilando nokwe ya fala kuBetania. Oko nkoka okwa yelutha iikaha ye nokwe ya yambeke.
51 Moku ya yambeka okwa kana po puyo nokwa falwa megulu.
52 Aalongwa oya tsu oongolo e taye mu galikana noya shuna kuJerusalem yu udha enyanyu enene.
53 Oyo oya kala aluhe motempeli taa hambelele Kalunga.