1 Elaka etoye tali popi Jesus Kristus, Omuna gwaKalunga, otali tameke naanaa,
2 ngaashi kwa nyolwa membo lyomuhunganeki Jesaja: “Onkee ano otandi tumu omutumwa gwandje, e ku tetekele, opo e ku opalekele ondjila.
3 Ewi lyanakwiigidha mombuga tali ti: ‘Longekidhileni Omuwa ondjila, yelekanitheni omapola ge!’ ”
4 Johannes Omushashi okwa holoka mombuga noku uvitha kutya aantu nayi itedhulule e taa shashwa, Kalunga nota dhimi po oondjo dhawo.
5 Kehe gumwe muJudea nomoshilando shaJerusalem okwe ya kuJohannes, oye okwe ya shashele momulonga gwaJordan, sho ya hempulula oondjo dhawo.
6 Johannes okwa li a zala onguwo yiifufu yongamelo nepaya lyoshipa mombunda ye. Iikulya ye oya li oombahu nomagadhi goonyushi.
7 Ye okwa uvitha ta ti: “Ngoka te ya konima yandje, oku vule ndje oonkondo. Ngame inandi gwana okunyongama, ndi dhitule omiya dhoongaku dhe.
8 Ngame otandi mu shasha nomeya, ihe ye ote mu shasha nOmbepo Ondjapuki.”
9 Pomasiku ngeyaka Jesus okwa zi kuNasaret shomuGalilea nokwa shashwa kuJohannes momulonga gwaJordan.
10 Opo tuu mpoka Jesus sho a zi momeya, okwa mono egulu lye eguluka, nOmbepo ya fa onguti oye mu lambele.
11 Megulu nomwa zi ewi lya ti: “ongoye Omumwandje omuholike, onde ku hokwa.”
12 Mbalambala Ombepo oya fala Jesus kombuga.
13 Okwa menekele mombuga omasiku omilongo ne, a makelwa kuSatana nokwa kala mokati kiilikama; naayengeli oye ya e taye mu yakula.
14 Johannes sho e edhililwa mondholongo, Jesus okwa yi kuGalilea nokuuvitha elaka ndika etoye lya zi kuKalunga
15 a ti: “Ethimbo lya thiki, Oshilongo shaKalunga she ya popepi. Itedhululeni, mu itaale elaka etoye.”
16 Manga Jesus a li ta kunkula nefuta lyaGalilea, okwa mono ko aamwayinathana, Simon naAndreas. Oya adhika taa umbile iiyulitho yawo mefuta, oshoka oya li aayuli yoohi.
17 Jesus okwa ti kuyo: “Landulii ndje, ngame notandi mu ningi aayuli yaantu.”
18 Mbalambala oye etha iiyulitho yawo e taye mu landula.
19 Sho a humu ko ishewe kashona, okwa mono ko aana yaSebedeus, Jakob naJohannes. Oya li mowato taa andeke iiyulitho yawo.
20 Jesus okwe ya ithana, ye mu landule, noya thigi po he Sebedeus mowato pamwe naamati yiilonga e taye mu landula.
21 Oyo ye ya moshilando shaKapernaum. Mesiku lyEsabati Jesus okwa yi mosinagoga nokwa tameke okulonga aantu.
22 Aantu oya kuminwa elongo lye, oshoka olya li li na oonkondo, hangaashi ndyoka lyaalongimpango.
23 Mosinagoga ndjoka omwa li mu na omulumentu e na ombepo ya nyata. Oye a popi mokule:
24 “Jesus Omunasareti, owe tu halela shike? Owe ya u tu yone po? Ondi ku shi kutya ongoye omuyapuki gwaKalunga.”
25 Jesus okwa ganda ombepo ya nyata a ti: “Mwena thilu, u ze mo muye!”
26 Ombepo ya nyata oye mu mbungambunga noonkondo noyi igidha newi enene e tayi zi mo muye.
27 Aantu ayehe oya kumwa noya tameke okupulathana taa ti: “Oshike shino? Elongo epe li na oonkondo? Oye ta ganda oombepo dha nyata, notadhi vulika kuye.”
28 Mbalambala oshiningwanima shika osha taandele muGalilea ashihe.
29 Ano sho ya zi mo mosinagoga, oya yi maandjawo yaSimon naAndreas pamwe naJakob naJohannes.
30 Ihe yinamweno yaSimon okwa li ta alukwa olwiidhi. Oyo ye mu popi nziya kuJesus.
31 Jesus okwe ya nokwe mu kwata koshikaha e te mu kuutumbike. Olwiidhi olwe mu etha nokwa tameke oku ya yakula.
32 Pethimbo lyongulohi, etango lya ningina, aantu oye eta kuJesus aavu ayehe naanampwidhuli ayehe.
33 Aantu ayehe yomoshilando oya gongalele posheelo shegumbo.
34 Jesus okwa aludha ayehe mboka ya li ye na omavu gi ili nogi ili nokwa tidha mo oompwidhuli adhihe. Oompwidhuli ine dhi pitika, dhi popye, oshoka odha li dhi mu shi kutya oye olye.
35 Ongulangula manga inaaku sha, Jesus okwa penduka nokwa yi muuwike, a galikane.
36 Simon nosho wo mboka ya li pamwe naye, oya yi, ye ke mu konge.
37 Sho ye mu mono, oya ti: “Ayehe otaye ku kongo.”
38 Jesus okwe ya yamukula a ti: “Tu yeni momikunda dhopuushiinda, opo ndi uvithile mo wo, oshoka osho tuu shika nde shi endela.”
39 Onkee okwe ende muGalilea ashihe nokwa uvitha moosinagoga dhawo e ta tidha mo oompwidhuli.
40 Omulumentu omunashilundu okwe ya kuJesus, okwa tsu oongolo nokwe mu hehela a ti: “Ngele owa hala okwaaludha ndje, oto shi vulu.”
41 Jesus okwe mu uvitile olukeno, okwa ganeke oshikaha she nokwe mu gumu e ta ti: “Onda hala, yela!”
42 Mbalambala oshilundu oshe mu etha nokwa yele.
43 Jesus okwe mu kumagidha noonkondo nokwe mu laleke mbala
44 e ta ti kuye: “Pulakena! Ino shi popya nando okulye, inda owala, u ki iyulike komuyambi, ngoye u gandje omagano gealuko ngoka gu uthwa kuMoses, opo ge ya ningile onzapo kutya owa aluka.”
45 Ihe omunashilundu sho a yi pondje, okwa tameke okuuvitha nokuhokolola oshinima shika akuhe. Onkee Jesus ina vula we okweenda puuyelele miilando, okwa yi komahala gaa na aantu. Nando ongawo, aantu yokoombinga adhihe oye ya kuye.
1 Ano sho pwa piti omasiku gamwe, Jesus okwe ya ishewe kuKapernaum. Aantu oya uvu kutya oku li pegumbo.
2 Aantu oyendji noyu udhilile mondjugo, sigo noposheelo kapwa li we pu na eha. Manga Jesus a li te ya uvithile oohapu dhaKalunga,
3 aalumentu yane oye mu etele omusilombanda, ye mu inda kontala.
4 Ihe omolwowindji waantu oya nyengwa oku mu thikitha puJesus. Onkee oyu ulula ombululu kombanda yondunda, yu ukilila peha mpoka Jesus a li noya kulukitha ontala hoka kwa li kwa lala omusilombanda.
5 Jesus sho a mono eitaalo lyawo, okwa lombwele omusilombanda: “Mumwandje, oondjo dhoye odha dhimwa po.”
6 Nena yamwe yomaalongimpango mboka ya li mo ya kuutumba, oyi idhiladhilile:
7 “Ota popi ngiini ngawo? Ota sheke Kalunga! Kaku na nando omuntu ta vulu okudhima po oondjo, oKalunga awike.”
8 Jesus okwe shi dhimbulula mbala kutya osho ya dhiladhila ngaaka e ta ti kuyo: “Omolwashike tamu idhiladhilile ngawo?
9 Oshipu oshini po? Okulombwela omusilombanda: ‘Oondjo dhoye odha dhimwa po,’ nenge oku mu lombwela: ‘Thikama, kutha ontala yoye, ngoye u ye’?
10 Ihe opo mu kale mu shi shi kutya Omuna gwOmuntu oku na oonkondo kombanda yevi okudhima po oondjo,” okwa ti komusilombanda:
11 “Otandi ku lombwele: thikama, kutha ontala yoye, u ye kaandjeni.”
12 Oye okwa thikama nokwa kutha po mbala ontala ye e ta yi pondje montaneho yawo ayehe. Aantu ayehe oya kumwa noya hambelele Kalunga ya ti: “Oshinima sha tya ngeyi inatu shi mona nando onale!”
13 Jesus okwa yi ishewe komunkulo gwefuta. Aantu ayehe oye ya kuye nokwe ya longo.
14 Ano sho a humu ko, okwa mono ko Levi yaAlfeus, a kuutumba pongulu yoompale dhopoongamba. Jesus okwa ti kuye: “Landula ndje!” Levi okwa thikama e te mu landula.
15 Konima Jesus okwa yi koshililo megumbo lyaLevi, aafendelithi oyendji naalunde oya lile pamwe naye naalongwa ye, oshoka oyendji yomuyo oya li ye mu landula.
16 Ano aalongimpango, mboka ya li wo aafarisayi, sho ye mu mono ta lile pamwe naalunde naafendelithi, oya pula aalongwa ye ya ti: “Omolwashike ta lile pamwe naafendelithi naalunde?”
17 Jesus sho e shi uvu, okwa ti kuyo: “Aandjolowele inaa pumbwa omwaaludhi, ihe aavu tuu ayeke. Oshoka inandi ya okwiithana mboka yi iwete aayuuki, ihe aalunde tuu.”
18 Aalongwa yaJohannes nosho wo aafarisayi, oya li haa idhilike iikulya. Aantu yamwe oye ya kuJesus e taa ti: “Aalongwa yaJohannes noyaafarisayi ohaa idhilike iikulya, ihe omolwashike aalongwa yoye ihaa idhilike iikulya?”
19 Jesus okwe ya yamukula a ti: “Ndishi aahiywa yombushiki inashi pumbiwa, yi idhilike iikulya, manga ombushiki e li puyo? Manga ye na ombushiki mokati kawo, itaa vulu okwiidhilika iikulya.
20 Omasiku otage ke ya, uuna ombushiki taye mu kuthwa, nena otaye ki idhilika ihe iikulya.
21 Kaku na ngoka ta andeke onguwo onkulu noshaando oshipe. Ngele tashi ningwa, oshaando oshipe otashi tuula onguwo nombululu otayi ningi onene yi vule yonale.
22 Nosho tuu kaku na ngoka ta zile omaviinu omape moompunda oonkulu, oshoka omaviinu otaga tuula oompunda, naayihe iyali otayi yonuka. Omaviinu omape oge na okuzilwa moompunda oompe.”
23 MEsabati lyontumba Jesus okwa piti pokati komapya. Manga taa ende, aalongwa ye oya tameke okupolola omaha.
24 Nena aafarisayi oya ti kuJesus: “Mbano otaa ningi shoka shi indikwa okuningwa mEsabati?”
25 Jesus okwe ya yamukula a ti: “Inamu lesha nani shoka David a ningi, sho a li a sa ondjala, ye mwene naantu ye?
26 Oye okwa yi mongulu yaKalunga nokwa lile iikwiila ya yambelwa Kalunga pamwe naamboka ya li puye, mbyoka ya li yi indikwa okuliwa kumboka yaa shi aayambi. Pethimbo ndyoka Abiatar oye a li omuyambi omukuluntu.”
27 Jesus okwa ti kuyo: “Esabati olya tulwa po molwomuntu, hamuntu a shitwa molwEsabati.
28 Onkee Omuna gwOmuntu oye Omuwa nogwEsabati.”
1 Jesus okwa yi ishewe mosinagoga, moka mwa li mu na omulumentu e na oshikaha sha lemana.
2 Aantu mboka ya li mo, oya langele Jesus, ye mu tale, ngele ote mu aludha mEsabati, opo ya wape oku mu tamaneka.
3 Jesus okwa lombwele omulumentu ngoka e na oshikaha sha lemana a ti: “Hedha huka montaneho.”
4 Opo okwe ya pula a ti “Oshike sha pitikwa okuningwa mEsabati, okulonga uuwanawa nenge okulonga uuwinayi, okuhupitha omwenyo gwomuntu nenge oku gu yona po?” Ihe oyo ya mwena owala.
5 Jesus okwe ya tala noshipala sha lula ye a nika oluhodhi omolwokwaavulika kwawo. Nena okwa lombwele omulumentu ngoka a ti: “Utha oshikaha shoye.” Oye okwe shi utha, osho nosha aluka.
6 Aafarisayi oya zi mo mosinagoga noya gongala nziya, ya kundathane naamboka ya gama kombinga yaHerodes, opo ya dhipage Jesus.
7 Jesus okwa yi naalongwa ye komunkulo gwefuta lyaGalilea. Aantu oyendji oye mu landulile ko, ya zi muGalilea, kuJudea,
8 Jerusalem, Idumea nahandiyaka yaJordan nosho wo popepi naTiro naSidon. Aantu oyendji ye thike mpoka oye ya kuJesus, oshoka oyu uvu shoka a li ta longo.
9 Omolwowindji waantu Jesus okwa lombwele aalongwa ye, ye mu kalekele owato popepi, opo kaa thininikwe kaantu.
10 Jesus okwa li a aludha aantu oyendji, onkee aavu ayehe oyi ithininikile puye, opo ye mu gume.
11 Aantu mboka ye na oombepo dha nyata sho ye mu mono, oya tsu oongolo koshipala she noyi igidha mokule ya ti: “Ongoye Omuna gwaKalunga!”
12 Jesus okwa ganda oombepo dha nyata, dhaaye mu popye, kutya oye lye.
13 Jesus okwa londo kondundu nokwi ithana aalumentu mboka ye mwene a hala, ye ye kuye.
14 Oye nokwa hogolola aalongwa omulongo nayaali, ya kale puye e te ya luku aayapostoli. Okwe ya tumu, ya ka uvithe
15 noya kale ye na oonkondo dhokutidha mo oompwidhuli.
16 Mboka omulongo nayaali e ya hogolola, oyo: Simon, ngoka Jesus e mu luku wo Petrus;
17 Jakob yaSebedeus nomumwayina Johannes, mboka Jesus e ya luku Boanerges, otali ti: aalumentu yendundumo lyomvula;
18 Andreas, Filippus, Bartolomeus, Mateus, Tomas, Jakob yaAlfeus, Taddeus, Simon omulaadhi
19 naJudas Iskariot, ngoka e mu gwaaleke.
20 Jesus okwe ya kaandjawo, naantu oyendji oya gongala ishewe. Onkee Jesus naalongwa ye inaa vula we okulya.
21 Ihe aakwanezimo lye sho ye shi uvu, oya yi ko, ye ke mu kwate, oshoka oya ti: “Ota yi oonkwengu!”
22 Ihe aalongimpango mboka ya zi kuJerusalem oya ti: “OBelsebul, omukuluntu gwoompwidhuli e mu pe oonkondo dhokutidha mo oompwidhuli.”
23 Jesus okwi ithana aantu, ya hedhe kuye nokwe ya lombwele momayele e ta ti: “Satana ota vulu tuu okutidha mo Satana mukwawo?
24 Oshilongo ngele tashi itsile ondumbo, nena oshilongo shoka itashi vulu okukala po.
25 Egumbo ngele tali itsile ondumbo, nena egumbo ndyoka itali vulu okukala po.
26 Osho wo Satana ngele ti ikondjitha noti itsile ondumbo, nena ita vulu okukala po, ota hulu po.
27 “Ihe kaku na ngoka ta vulu okugwayela megumbo lyomunankondo, e mu yuge eliko lye, okuninga ta manga tango omunankondo ngoka, opo ihe ta yugu egumbo lye.
28 “Ngame otandi mu lombwele: Oondjo adhihe nomasheko agehe, nando oga kale ge thike peni, aantu otaye ga dhiminwa po.
29 Ihe ngoka ta sheke Ombepo Ondjapuki, ke na mpoka na dhiminwa po oondjo dhe sigo aluhe, oshoka ota kala e na oondjo dhaaluhe.”
30 Jesus okwa popi ngeyi, oshoka oya ti kutya oku niwe kombepo ya nyata.
31 Yina yaJesus naamwayina aalumentu oye ya noya thikama pondje. Oya tumu kuye noye mu ithana, e ye kuyo.
32 Ihe ongundu yaantu oya kuutumba ya ngundumanena Jesus noye mu lombwele ya ti: “Tala, nyoko naamwanyoko oye li pondje, taye ku kongo.”
33 Jesus okwe ya yamukula a ti: “Meme naamwameme oolye?”
34 Oye okwa tala kumboka ya kuutumba puye nokwa ti: “Tala, meme naamwameme oyo mbaka.
35 Oshoka kehe tuu ngoka ta gwanitha ehalo lyaKalunga, oye omumwameme omulumentu nomumwameme omukiintu nameme.”
1 Jesus okwa tameke ishewe okulonga aantu pomunkulo gwefuta. Ongundu onene yaantu oye mu gongalele, onkee okwa li e na okuya mowato e ta kuutumba muyo, momeya. Ongundu ayihe yaantu oya li yi li kevi pomunkulo gwefuta.
2 Oye okwe ya longo iinima oyindji momayele. Mokulonga kwe okwa ti kuyo:
3 “Pulakeneni! Omukuni okwa ka kuna.
4 Ano mokukuna kwe oombuto dhimwe odha gwile mondjila, noondhila odhe ya e tadhi dhi shomona po.
5 Dhimwe odha gwile poshipale pwaa na evi olindji. Onkee odha mene mbalambala, oshoka kapwa li evi ele.
6 Etango sho lya piti, omimeno odha lembe, naasho dha li dhaa na omidhi dha ya muule, odha ganya.
7 Dhimwe odha gwile moongwena. Oongwena sho dha koko, odhe dhi thininike, dhaa vale.
8 Ihe dhimwe odha gwile mevi ewanawa, naasho dha mene, odha koko e tadhi vala: dhimwe olwomilongo ndatu, dhimwe olwomilongo hamano nadhimwe olwethele.”
9 Opo Jesus okwa ti: “Ngoka e na omakutsi gokuuva, nu uve ko!”
10 Ano Jesus manga a li i ikalela, aantu mboka ya li ye mu kundukidha pamwe naalongwa omulongo nayaali, oye mu pula kombinga yomayele ngaka. Oye okwe ya yamukula a ti:
11 “Ne omwa pewa okuuva ko iiholekwa yOshilongo shaKalunga, ihe yalwe yopondje, ashihe otaye shi pewa owala momayele.
12 Onkee: Okumona ohaa mono, ihe kaa wete ko. Okuuva ohaa uvu, ihe kaa uvite ko, ando ya galukile kuKalunga, ye e ya dhimine po.”
13 Jesus okwe ya pula a ti: “Ngele kamu uvite ko eyele ndika, otamu vulu ngiini okuuva ko omayele omakwawo?
14 Omukuni okwa ka kuna oohapu dhaKalunga.
15 Ndhoka dha gwile mondjila, odha fa aantu mboka taa uvu oohapu dhaKalunga, ihe manga taye dhi pulakene, mbalambala Satana ote ya e ta kutha mo oohapu ndhoka dha kunwa muyo.
16 Ndhoka dha kunwa poshipale, odha fa aantu mboka taa uvu oohapu dhaKalunga e taye dhi taamba mbala nenyanyu,
17 ihe itadhi ningine muyo. Otaa dhiginine okathimbo kowala. Uuna tapu ya uudhigu nenge etidhagano molwoohapu, nena otaa etha eitaalo mbala.
18 Ndhoka dha kunwa moongwena, odha fa aantu mboka taa uvu oohapu dhaKalunga,
19 ihe oshimpwiyu shuuyuni mbuka nefundjaleko lyuuyamba nakehe tuu okahalu otayi yi muyo e tayi thininike oohapu, yaa imike iiyimati.
20 Ndhoka dha kunwa mevi ewanawa, odha fa aantu mboka taa uvu oohapu dhaKalunga e taye dhi taamba notaa imike iiyimati: yamwe olwomilongo ndatu, yamwe olwomilongo hamano nayamwe olwethele.”
21 Jesus okwe ya pula ishewe a ti: “Oku na tuu ngoka te eta mo olamba e te yi tula kohi yontungwa nenge kohi yontala? Ndi shi, oku na oku yi tula koshihukikwa?
22 Oshoka kaku na shoka sha holekwa itaashi ka hololwa, nokaku na shoka sha holama itaashi ka holoka.
23 Ngoka e na omakutsi gokuuva, nu uve ko!”
24 Jesus okwe ya lombwele ishewe a ti: “Ndhindhilikeni shoka tamu shi pulakene. Oshiyelekitho shoka tamu shi yelekitha, nane wo otamu ke shi yelekithwa, mwa gwedhelwa ko nokuli.
25 Oshoka ngoka e na, oye ta pewa, ihe ngoka kee na, oye ota kuthwa naashoka e shi na.”
26 Jesus okwa ti ishewe: “Oshilongo shaKalunga osha fa omuntu a kunu ombuto mepya.
27 Uusiku okwa ka lala nokwa penduka ongula. Ombuto oya mene e tayi koko, ye ina tseya, nkene sha ningwa,
28 oshoka evi olyo lyene tali kokitha iimeno e tali etithitha oomuma: tango omuno, tagu landulwa komutse, nosho wo oomuma tadhi kolo komutse.
29 Iilya ngele ya kukuta, nena omuteyi ota kutha mbala oshiteyitho, a teye, oshoka eteyo olya thikana.”
30 Jesus okwa pula a ti: “Oshilongo shaKalunga otatu shi faathanitha nashike, notatu shi yeleke neyele lini?
31 Osha fa omuma yosinapi. Manga tayi kunwa mevi, oyo okamuma okashuushuka ke vulike koomuma adhihe dhokombanda yevi.
32 Ihe ngele ya kunwa, otayi mene e tayi koko yi vule iihwa ayihe notayi ningi iitayi iinene, noondhila dhokegulu otadhi tungile iihandhila miitayi yagwo.”
33 Jesus okwa lombwele aantu oohapu nomayele omakwawo ogendji ga fa ngaka opankondo dhokuuva kwawo.
34 Ine ya lombwela sha itaa popi momayele. Ihe sho a li naalongwa ye oyo ayeke, okwe ya fatululile ayihe.
35 Ano sho kwa ningi ongulohi yesiku ndyoka, Jesus okwa ti kaalongwa ye: “Tu taagulukileni handiyaka yetale.”
36 Aalongwa oya thigi po ongundu yaantu noya landulile Jesus mowato e taa yi pamwe naye. Oowato dhilwe wo odhe ende pamwe nayo.
37 Oshikungulu oshidhigu shombepo osha tukuluka, nomakuthikuthi ogi iyundulile mowato, sigo tayi hala okuudha omeya.
38 Ihe Jesus ye mwene okwa li kosindo yowato a kothela koshigwilo. Aalongwa oye mu pendutha ya ti: “Muhongi, ku na ko nasha nani natse, ngele tatu ningine mo?”
39 Jesus okwa penduka nokwa ganda ombepo e ta ti komakuthikuthi: “Mwena!” Ombepo oya kodha e taku ti thilu.
40 Jesus nokwa ti kuyo: “Omolwashike mwa tila? Kamu na natango eitaalo?”
41 Oyo oya kwatwa kehaluko enene noya pulathana e taa ti: “Nguka olye ano, ombepo nomakuthikuthi sho tayi vulika kuye?”
1 Ano sho ya yi handiyaka yefuta lyaGalilea, koshilongo shAagerasa,
2 Jesus okwa zi mo mowato nokwa tsakanekwa komulumentu e niwe kombepo ya nyata, a zi moombila dhomomakololo.
3 Omulumentu nguka okwa kala momakololo moka, nokakwa li nando omuntu a vulu oku mu manga we, nando onomalyenge.
4 Oshoka olwindji sho a mangwa nomiya nomalyenge, okwe ga teyagula nomiya okwe dhi tokola. Kakwa li nando omuntu a li e na omukumo oku mu vulikitha.
5 Uusiku nomutenya okwa kala aluhe momakololo nomoondundu ti igidha ye ti idhenge nomamanya.
6 Ihe sho a mono Jesus e li kokule, okwa matuka nokwa tsu oongolo koshipala she
7 e ti igidha mokule a ti: “Jesus, Omuna gwaKalunga Omukombandambanda! Owa halela ndje shike? Otandi ku ganitha koshipala shaKalunga, waa hepeke ndje.”
8 Oshoka Jesus okwa adhika a ti kuye: “Mbepo ngoye ya nyata, za mo momulumentu nguka!”
9 Jesus okwe mu pula: “Edhina lyoye olini?” Oye a yamukula: “Edhina lyandje ongame Ngundu, oshoka otu li oyendji.”
10 Omulumentu nokwi indile Jesus noonkondo, kaa tidhe mo oombepo dha nyata momukunda ngoka.
11 Popepi nondundu opwa li oshigunda oshinene shiingulu tayi napa.
12 Oombepo dha nyata odha hehela Jesus dha ti: “Tu tuma miingulu, tu hite muyo.”
13 Oye okwe dhi pitika. Oombepo dha nyata odha zi momulumentu nodha yi miingulu. Oshigunda ashihe shiingulu yi thike lwopomayuvi gaali osha nuka okuza komutuni omule noshi iyumbile mefuta e tashi sile mo.
14 Aasita yiingulu oya fadhuka po noya hokolola oshiningwanima shika moshilando nomomikunda ndhoka. Aantu noye ya okutala shoka sha ningwa po.
15 Oyo ye ya kuJesus noya mono omulumentu ngoka a li e niwe koompwidhuli odhindjidhindji, a kuutumba, a zala nawa noku na oondunge; oyo noya tila.
16 Aantu mboka ye shi mono, oya hokolola shoka sha ningilwa omunampwidhuli nosho wo iingulu.
17 Opo tuu mpoka oyi indile Jesus, a ze mo moshilongo shawo.
18 Manga Jesus ta londo mowato, omulumentu ngoka a li e niwe koompwidhuli, okwe mu hehela, a pitikwe okukala puye.
19 Ihe Jesus ine mu pitika, okwe mu lombwele ashike a ti: “Inda kegumbo lyaandjeni, u ke ya hokololele shoka Omuwa e shi ku ningile, sho e ku sile ohenda.”
20 Omulumentu okwa tameke okuuvithila miilando yaDekapolis ashihe shoka Jesus e shi mu ningile; ayehe noya kumwa.
21 Jesus okwa shuna ishewe komunkulo gwahandiyaka yefuta. Aantu oyendji oye mu gongalele, sho a li pomunkulo gwefuta.
22 E taku zi gumwe gwomaakuluntu yosinagoga, edhina lye Jairus. Sho a mono Jesus, okwa tsu oongolo koompadhi dhe
23 nokwe mu hehela noonkondo a ti: “Okamwandje okakadhona otaka alukililwa. Ila, u ka tenteke iikaha yoye, opo ka aluke noka kale ke na omwenyo.”
24 Jesus okwa yi pamwe naye. Aantu oyendji oye mu landula e taye mu uminine.
25 Okwa li ku na omukiintu e na uuvu wetiko lyombinzi oomvula omulongo nambali.
26 Oye okwa mono iihuna noonkondo mokuya koonganga odhindji noku dhi futa ashihe shoka a li e na, ihe ina kala nande nawa, uuvu owa geye owala.
27 Oye okwa adhika u uvu sha kombinga yaJesus nokwe ya mongundu e li konima yaJesus e ta gumu konguwo ye;
28 oshoka okwa ti: “Shampa tuu tandi gumu koonguwo dhe, nena otandi aluka.”
29 Sho e shi ningi, mbalambala etiko lye olya kodha nokwa li u uvite molutu lwe kutya okwa aluka.
30 Opo Jesus okwa dhimbulula oonkondo dha zi muye, onkee okwa tala konima ye mongundu yaantu nokwa pula: “Olye a gumu koonguwo dhandje?”
31 Aalongwa ye oye mu yamukula ya ti: “Ou shi wete kutya aantu oye ku uminina, ihe oto pula: ‘Olye a gumu ndje?’ ”
32 Jesus okwa lengalenga koombinga adhihe, opo a mone ngoka e shi ningi.
33 Ihe omukiintu sho a dhimbulula shoka a ningilwa, okwa tsu oongolo koshipala shaJesus, a tila ta kakama nokwe mu lombwele oshili ayihe.
34 Jesus okwa ti kuye: “Mumwandje, eitaalo lyoye lye ku aludha. Inda nombili, ngoye u kale wa aluka kuuvu woye.”
35 Manga Jesus a li ta popi, opwe ya aantu yamwe ya zi kaandjaJairus noya ti: “Okamwoye okakadhona ka mana oondjenda. Oto monithile we shike Muhongi iihuna?”
36 Jesus okwa dhini oohapu ndhoka ya popi nokwa ti kuJairus: “Ino tila, itaala owala.”
37 Ihe Jesus ina pitika nando omuntu a ye meni pamwe naye, kakele kaPetrus naamwayinathana Jakob naJohannes.
38 Jesus sho e ya megumbo lyomukuluntu gwosinagoga, okwa mono evundakano lyaantu taa lili mokule notaa hekumuna.
39 Jesus okwa yi meni e ta ti kuyo: “Okanona inaka sa, ihe oka kotha.”
40 Oyo noye mu yolo. Oye okwa tidhile ayehe pondje nokwa kutha he nayina yokanona nosho wo mboka ya li naye e ta yi meni moka mwa lala okanona.
41 Jesus okwa kwata koshikaha shokanona nokwa ti kuko: “Talita kuum,” otashi ti: Mukadhona, otandi ku lombwele, penduka po!
42 Mbalambala okakadhona oka penduka noka tameke okweenda; oshoka oka li ke na oomvula omulongo nambali. Aantu oya kwatwa kehaluko enene.
43 Ihe Jesus okwe ya indike noonkondo, kaaye shi lombwele nando omuntu, e te ya lombwele, ya pe okakadhona iikulya.
1 Jesus okwa zi po mpoka nokwe ya koshilando shaandjawo. Aalongwa ye noye mu landula.
2 Mesiku lyEsabati okwa tameke okulonga aantu mosinagoga. Oyendji mboka ye mu pulakene, oya kumwa e taa pula: “Ayihe mbika okwe yi adha peni? Oondunge ndhoka e na, odha tya ngiini? Iilongankondo mbyoka ta longo, oyi thike peni?
3 Ke shi nani omuhongi gwiipilangi, omuna gwaMaria, omumwayina gwaJakob, Josef, Judas naSimon? Aamwayina aakiintu kaye li putse mpano?” Oyo noye mu nyeme.
4 Jesus okwa ti kuyo: “Omuhunganeki iha dhinwa palwe, aawe, omoshilando tuu shaandjawo, maakwawo nomegumbo lyaandjawo.”
5 Onkee ano Jesus ina vula we okuningila ko oshilongankondo shasha. Aavu yamweyamwe ayeke a tenteke iikaha ye nokwe ya aludha.
6 Oye okwa kuminwa okwaayitaala kwawo. Oye okwa li te endaenda nomikunda dhopuushiinda e ta longo aantu.
7 Jesus okwi ithana aalongwa ye omulongo nayaali nokwa tameke oku ya tuma ooyaali nooyaali e te ya pe oonkondo dhokupangela oombepo dha nyata.
8 Okwe ya indike wo, yaa ye nasha mondjila, kakele kolwoondje: hashikwiila, hampunda yokweenda nayo, haimaliwa moondjato.
9 “Zaleni oongaku, ihe inamu zala oohema mbali.”
10 Okwe ya lombwele ishewe a ti: “Ngele tamu yi megumbo, kaleni moka, sigo tamu ka huma ko.
11 Ngele ope na mpoka itaamu taambwa ne itaamu pulakenwa, zii po, ne mu pupule ko ontsi koompadhi dheni, opo shi ninge onzapo yoku ya pa uusama.”
12 Oyo oya yi noyu uvitha kutya aantu naa itedhulule.
13 Oyo oya tidha mo oompwidhuli odhindji noya gwayeke aavu oyendji nomagadhi e taye ya aludha.
14 Omukwaniilwa Herodes oku uvu ayihe mbika, oshoka edhina lyaJesus olya adhika lya tseyika akuhe, naantu yamwe oya ti: “Nguka oJohannes Omushashi a yumuka kuusi, onkee oonkondo dha tya ngaaka otadhi longo muye.”
15 Ihe yamwe oya ti, oElia; yamwe ishewe, gumwe gwomaahunganeki yonale.
16 Herodes sho e shi uvu, okwa ti: “Johannes ngoka nda tetitha omutse, oye a yumuka.”
17 Oshoka Herodes okwa li a tumu aantu, ya ka kwate Johannes, noye mu manga e taye mu tula mondholongo. Shika osha ningwa omolwaHerodias ngoka Herodes a adhika a hokana, nonando oye omukiintu gwamumwayina Filippus.
18 Onkee Johannes okwa ti kuHerodes: “Itashi vulika, u hokane omukiintu gwamumwanyoko.”
19 Herodias okwa tondo Johannes nokwa li a hala oku mu dhipaga, ihe okwa nyengwa.
20 Herodes wo okwa li a tila Johannes, oshoka okwa li e mu shi kutya ye omulumentu omuyuuki nomuyapuki, onkee okwe mu gamene. Okwa li ngaa a hokwa oku mu pulakena, nonando sho e mu pulakene, ina tseya shoka e na okuninga.
21 Ihe esiku lyo opala olye ya, uuna Herodes a ningile omalenga ge, aawiliki yiita naanenentu yomuGalilea oshituthi shevalo lye.
22 Omukadhona omuna gwaHerodias sho e ya moshituthi, okwa tutula uudhano nowo opalele Herodes naayenda. Omukwaniilwa nokwa lombwele omukadhona a ti: “Indila ndje kehe shoka wa hala, otandi shi ku pe.”
23 Oye okwe mu uvanekele nokugana e ta ti: “Shaa shoka to indile ndje, otandi shi ku pe, nonando owi indile, ndi ku pe etata lyoshilongo shandje.”
24 Omukadhona okwa yi kuyina nokwe mu pula a ti: “Meme, ondi na okupula shike?” Yina okwa yamukula: “Omutse gwaJohannes Omushashi.”
25 Omukadhona okwa shuna mbalambala komukwaniilwa nokweendelela nokwe mu indile e ta ti: “Onda hala, u pe ndje ngashingeyi omutse gwaJohannes Omushashi moshiyaha shika.”
26 Nena omukwaniilwa okwa nika oluhodhi olunene, ihe omolwegano lye nomolwaayenda ina vula we oku mu tinda.
27 Omukwaniilwa okwa tumu mbala omukwiita gwomaatonateli yuuwa nokwe mu lombwele, e mu etele omutse gwaJohannes. Omukwiita okwa yi kondholongo e ta tete Johannes omutse.
28 Oye nokwe gu eta gu li moshiyaha e te gu pe omukadhona, opo e gu fale kuyina.
29 Aalongwa yaJohannes sho ye shi uvu, oye ya noya kutha po omudhimba gwe e taye gu tula mombila.
30 Aayapostoli sho ya galuka, oye ya kuJesus noye mu hokololele ashihe shoka ya ningi naashoka ya longo aantu.
31 Okwa li ku na aantu oyendji taye ya notaa yi, onkee kaya li ye na ethimbo lyokulya. Jesus okwa lombwele ihe aalongwa ye a ti: “Ileni, tu yeni, tu ki ikalele, opo mu vululukwe kashona.”
32 Oyo noya londo mowato e taa yi kokuma kwaa na aantu.
33 Ihe nonando ongaaka, aantu oyendji oye ya mono, sho taa yi, noye ya dhimbulula e taa matuka ye li kolupadhi, ya zi miilando ayihe noya thiki ko tango kehala ndyoka Jesus naalongwa ye ya li yu uka ko.
34 Ano Jesus sho a thiki komunkulo, okwa zi mo mowato nokwa mono ongundu onene yaantu. Oye okwa li e ya uvitile olukeno, oshoka oya li ya fa oonzi dhaa na omusita. Oye nokwa tameke oku ya longa iinima oyindji.
35 Ano sho kwa toko, aalongwa ye oye ya kuye noya ti: “Eha ndika ombuga yowala, netango olya toka.
36 Laleka aantu, ya ye komagumbo nokomikunda dhopuushiinda, ye ki ilandele iikulya.”
37 Jesus okwe ya yamukula a ti; “Ya peni iikulya.” Oyo oya ti kuye: “Natu ye, tu ke ya landele iikwiila niimaliwa omathele gaali, tu ya pe, ya lye?”
38 Jesus okwe ya pula a ti: “Omu na po ano iikwiila ingapi? Indeni, mu ke yi tale.” Sho ye yi mono, oya ti: “Otu na itano noohi mbali.”
39 Jesus okwa lombwele aalongwa ye, ya lombwele aantu ayehe, ya kuutumbe pomwiidhi omutalala, yo ye ya topole moongundu.
40 Aantu oya kuutumba moongundu: dhimwe odha li dhi na aantu ethele nadhimwe omilongo ntano.
41 Jesus okwa kutha ihe iikwiila itano noohi mbali, okwa ligamene kegulu nokwa hambelele. Ye okwa pambula iikwiila, e te yi pe aalongwa ye, ye yi topolele aantu. Osho wo okwa topolele ayehe oohi ndhoka mbali.
42 Oyo ayehe oya li e taa kuta.
43 Aalongwa oya toola iipambu yiikwiila oontungwa omulongo nambali dhu udha nosho wo iihupe yoohi.
44 Aantu mboka ya li iikwiila mbiyaka oya li aalumentu omayuvi gatano.
45 Mbalambala Jesus oku ulumike aalongwa ye, ya ka londe mowato, opo ye ke mu tetekele komunkulo gwahandiyaka yefuta kuBetsaida, manga ye ta laleke aantu.
46 Sho e ya laleke, okwa londo kondundu, opo a galikane.
47 Ongulohi sho ye ya, owato oya adhika mokati kefuta, naJesus okwa li awike kevi.
48 Nena okwa dhimbulula kutya, aalongwa oye na uudhigu mokudhuga kwawo, oshoka ombepo yoshikungulu oya li tayi ya ziilile moshipala. Pethimbo lyokoongulasha Jesus okwe ya kuyo te ende kombanda yomeya. Okwa li a hala oku ya pitilila.
49 Ihe sho ye mu mono te ende kombanda yomeya, oya li ye shi oshiluli noya kugu mokule.
50 Ayehe oya haluka, sho ye mu mono. Ihe mbalambala Jesus okwe ya popitha a ti: “Ikoleleni, inamu tila, ongame!”
51 Nena okwa yi kuyo mowato, ombepo noya kodha. Aalongwa oya li ya kumwa noya piyagana.
52 Oya nyengwa okuuva ko oshiningwanima shiikwiila shoka tashi ti; omadhiladhilo gawo oga li ga simpa.
53 Oyo ya taagulukile handiyaka yetale noye ya kevi lyaGenesaret e taa tula owato komunkulo.
54 Ano sho ya zi mo mowato, mbalambala aantu yaankoka oya dhimbulula Jesus.
55 Oyo oya matuka nomukunda aguhe noye eta aavu, ye ya inda koontala e taye ya fala kehala kehe hoka yu uvu Jesus e li ko.
56 Ano shaa tuu mpoka Jesus a yi, momikunda nenge moshilando nenge momagumbo, aantu oye eta aavu yawo pomagongalelo gaantu noye mu indile, a pitike, aavu ya gume nando okoongenge dhonguwo ye. Ayehe mboka ye yi gumu, oya aluka.
1 Aafarisayi nayamwe yomaalongimpango mboka ya zi kuJerusalem, oya gongala noye ya kuJesus.
2 Oyo oya mono, nkene yamwe yomaalongwa yaJesus ya li taa li niikaha inaayi yogoka, nokutya inaayi yogwa.
3 Oshoka aafarisayi nAajuda yalwe ayehe ohaa dhiginine omithigululwakalo dhaakulu yonale, sho ihaa li, manga inaa yoga iikaha yawo pamukalo.
4 Uuna ya yile komalandelo, ihaa li manga inaa yoga ashihe, shi yele. Osho wo omithigululwakalo omikwawo odhindji ohaye dhi dhiginine ngaashi okuyoga iitenga, iiyuma niiyaha yoshikushu.
5 Aafarisayi naalongimpango oya pula Jesus ya ti: “Omolwashike ano aalongwa yoye ihaa dhiginine omithigululwakalo dhaakulu yonale, sho haa li niikaha inaayi yogwa?”
6 Jesus okwe ya yamukula a ti: “Jesaja okwe mu hunganekele dha tsa omoluufudhime weni, ngaashi a nyola: ‘Aantu mbaka ohaa simaneke ndje owala noohapu dhomokana, ihe omitima dhawo odhi li kokule nangame.
7 Okulongela ndje kwawo osima yowala, oshoka otaa longo omalongo gopaipango yaantu.’ ”
8 “Otamu etha oshipango shaKalunga e tamu dhiginine omalongo gaantu.”
9 Jesus okwe ya lombwele ishewe a ti: “Osho ngaaka ohamu etha oshipango shaKalunga e tamu dhiginine omalongo geni yene.
10 Oshoka Moses okwa tile: ‘Simaneka ho nanyoko, naangoka ta tuku he nenge yina oku na okudhipagwa.’
11 Ihe ne ohamu ti: Omuntu ngoka ta ti kuhe nenge kuyina: ‘Iikwatha mbyoka nda li ndi na oku ku pa ando, oyo Korban,’ tashi ti, ooshoka sha pewa Kalunga,
12 nena itamu mu pitikile we, a kwathe he nenge yina.
13 Otamu kutha oohapu dhaKalunga oonkondo nokudhiginina omithigululwakalo dheni. Osho tuu iikwawo oyindji ya fa mbika ohamu yi ningi.”
14 Jesus okwi ithana natango aantu, ye ye kuye, nokwe ya lombwele e ta ti: “Pulakeneni, ne mu ndhindhilike.
15 Haashoka tashi zi pondje, tashi yi momuntu, tashi mu nyateke, aawe, ihe ooshoka tashi piti mo momuntu, osho tashi mu nyateke. [
16 Ngoka e na omakutsi ge shi okuuva, nu uve ko!]”
17 Jesus sho a topoka nongundu yaantu, okwa yi megumbo lyontumba. Aalongwa ye noye mu pula eyele ndyoka shoka tali ti.
18 Oye okwa ti kuyo: “Nane wo kamu na oondunge? Kamu uvite ko nani kutya kehe tuu shoka tashi yi momuntu, tashi zi pondje, itashi mu nyateke,
19 oshoka itashi yi momutima gwe, aawe, otashi yi mela e tashi piti mo pamukalo gwopanshitwe?” Osho Jesus a fatulula kutya iikulya ayihe oya yogoka.
20 Natango okwa ti: “Ano shoka tashi zi momuntu, osho tashi mu nyateke.
21 Oshoka meni, momutima gwomuntu omo moka hamu zi omadhiladhilo omawinayi, uuholume, uufuthi, omadhipago,
22 oluhondelo, olwiho, uudhudhu, ekotokelo, uukeeneidhiliko, efupa, okusheka, einenepeko, uulayi.
23 Uuwinayi mbuka auhe ohau zi meni lyomuntu e tau mu nyateke.”
24 Jesus okwa zi ko nkoka e ta yi komikunda dhopopepi noshilando shaTiro. Oye okwa yi megumbo lyontumba nokwa li inaa hala, aantu ya tseye mpoka e li, ihe ina vula oku shi holeka.
25 Oko nkoka omukiintu gumwe a li e na omwana omukadhona e niwe kombepo ya nyata, sho e mu kundana, okwe ya kuye mbala nokwa tsu oongolo poompadhi dhe.
26 Omukiintu ngoka okwa li omupagani, a valelwa muFoinikia shomuSiria. Oye okwi indile Jesus, a tidhe mo ompwidhuli momwana omukadhona.
27 Jesus okwa ti kuye: “Etha uunona u lye tango, oshoka inashi opala okukutha oshikwiila shuunona noku shi umbila uumbwena.”
28 Omukiintu okwe mu yamukula a ti: “Eeno, Omuwa, nuumbwena wo ohau li uundjagumuke mboka wa thigwa po kuunona.”
29 Jesus okwa ti kuye: “Omolweyamukulo lyoye inda kegumbo; ompwidhuli oya za mo momumwoye.”
30 Omukiintu okwa yi kegumbo nokwa adha omwana a lala kontala, nompwidhuli oya za mo nale muye.
31 Jesus sho a zi komikunda dhopopepi naTiro, okwa pitile muSidon noku uka kefuta lyaGalilea e te ende pokati kiilando yaDekapolis.
32 Aantu oye eta kuye omulumentu ombolo ye iha popi noyi indile Jesus, a tenteke oshikaha she kuye.
33 Jesus okwe mu kutha maantu, ye ki ikalele yo naye. Okwa tula ominwe dhe momakutsi gombolo nokwa hiya omayeye e ta gumu elaka lye.
34 Nena Jesus okwa ligamene kegulu nokwa fudha olule e ta ti kuye: “Efata!” otashi ti: Thituluka!
35 Mbalambala omakutsi gomulumentu oga thituluka nosho wo elaka lye olya manguluka, e ta tameke okupopya.
36 Ihe Jesus okwi indike aantu, yaa shi popye nando okulye. Nando e ya indike noonkondo noku ya kumagidha, oye shi hokolola nuupenda.
37 Aantu oya kumwa unene e taa ti: “Ayihe ote yi longo nawa! Ota thitulula omakutsi goombolo, naathitawi otaa popi.”
1 Pomasiku ngeyaka ongundu onene yaantu oya gongala ishewe, ihe molwashoka ya li yaa na shoka taa li, Jesus okwi ithana aalongwa ye e ta ti kuyo:
2 “Aantu mbaka ondi ya uvitile olukeno, oshoka oya menekele pungame omasiku gatatu nokuli yo kaye na shoka taa li.
3 Ngele tandi ya laleke, ya ye komagumbo gawo inaaya lya sha, nena otaa ka gundila mondjila, oshoka yamwe yomuyo oya zile kokule.”
4 Aalongwa ye oye mu yamukula: “Iikulya otayi monika peni mombuga yowala muno, opo yi kutithe aantu ye thike mpano?”
5 Opo Jesus okwe ya pula: “Omu na po iikwiila ingapi?” Oyo ya ti: “Iheyali.”
6 Jesus okwa lombwele aantu, ya kuutumbe pevi. Nena okwa kutha iikwiila mbyoka iheyali. Sho a hambelele, okwe yi pambula e te yi pe aalongwa ye, ye yi topolele aantu. Oyo noye shi ningi.
7 Oyo ya li ye na po wo uuhi umwe waa shi owindji. Jesus sho a hambelele, okwa lombwele ishewe aalongwa ye, ye u topolele aantu.
8 Aantu oya li e taa kuta, aalongwa noya toola uupambu mboka wa hupu po, oontungwa heyali dhu udha.
9 Opwa li pu na aantu ye thike pomayuvi gane. Jesus sho a laleke aantu mboka,
10 okwa yi mbala mowato pamwe naalongwa ye e ta yi komukunda gwaDalmanuta.
11 Aafarisayi oye ya noya tameke okuludhikitha Jesus noye mu makele noku mu pula, e ya talithe oshikumithalonga tashi zi megulu.
12 Jesus okwa fudha olule e ta ti: “Omolwashike epipi ndika lya hala okutalithwa oshikumithalonga? Ngame otandi mu lombwele: Epipi ndika itali talithwa oshikumithalonga.”
13 Jesus okwe ya thigi po e ta yi ishewe mowato nokwa taagulukile handiyaka yefuta.
14 Aalongwa oya adhika ya dhimbwa okweetelela iikwiila; mowato oya adhika ye na mo oshikwiila shimwe ashike.
15 Jesus okwe ya kumagidha a ti: “Kotokeni, ne mu iyageke efulika lyaafarisayi nolyaHerodes.”
16 Oyo ya pulathana ya ti: “Ota popi molwaashoka inaatu za ko niikwiila?”
17 Jesus sho e shi dhimbulula, okwa ti kuyo: “Omolwashike tamu ilombwele kutya omolwashono inaamu za ko niikwiila? Kamu uvite ko natango? Omitima dheni odha kukuta?
18 Omeho omu ga na, ihe kamu wete ko. Omakutsi omu ga na, ihe kamu uvite ko. Inamu dhimbulukwa,
19 sho nda topolele aalumentu omayuvi gatano iikwiila mbiyaka itano kutya oontungwa ngapi dhu udha mwa toola dhiihupe?” Oyo ya ti kuye: “Omulongo nambali.”
20 “Osho wo iikwiila iheyali kaalumentu omayuvi gane kutya oontungwa ngapi mwa toola dhu udha uupambu?” Oyo ya ti kuye: “Heyali.”
21 “Ndele natango kamu uvite ko?”
22 Oyo oye ya muBetsaida. Aantu noye eta omulumentu omuposi kuJesus noye mu indile, e mu gume.
23 Jesus okwa kwata omuposi mokwaako nokwe mu fala kokule nomagumbo. Nena okwe mu hiyile omayeye momeho nokwe mu tenteke iikaha ye e te mu pula ta ti: “Ou wete sha?”
24 Omuposi okwa tameke okumona ko e ta ti: “Ondi wete aantu taa ende ya fa omiti.”
25 Jesus okwa tula ishewe iikaha ye komeho gomuposi. Nena okwa aluka ihe nokwa mono ko nawa. Ayihe okwa li e yi wete.
26 Opo Jesus okwe mu laleke, a ye kaandjawo, nokwa ti: “Ukilila kaandjeni. Ino ka pitapita, u shi lombwele omuntu.”
27 Jesus okwa yi pamwe naalongwa ye komikunda dhaKesarea Filippi. Manga ye li mondjila, okwe ya pula e ta ti: “Aantu otaa tile ndje ngiini, ongame lye?”
28 Oyo ye mu yamukula ya ti: “Yamwe otaa ti oJohannes Omushashi, yamwe otaa ti oElia, nayamwe otaa ti gumwe gwomaahunganeki.”
29 Oye okwe ya pula natango: “Ne otamu tile ndje ngiini, ongame lye?” Petrus okwe mu yamukula a ti: “Ongoye Kristus.”
30 Nena okwe ya indike, kaaye mu popye nando okulye.
31 Jesus okwa tameke okulonga aalongwa ye, Omuna gwOmuntu oku na okuhepekwa nomahepeko ogendji note ekelwahi kaakuluntu, aayambi aakuluntu nokaalongimpango. Oye ota ka dhipagwa, ihe esiku etitatu ota ka yumudhwa.
32 Oye okwa popi ngeyi inaa holeka nando osha. Petrus okwe mu kutha paantu nokwa tameke oku mu ganda.
33 Nena Jesus okwa punguluka e ta tala kaalongwa ye nokwa ganda Petrus a ti: “Za po pungame, Satana! Ngoye ito dhiladhila shoka shopaKalunga, ihe ooshoka shopantu.”
34 Jesus okwi ithana ihe ongundu yaantu nosho wo aalongwa ye, ye ye kuye, nokwa ti kuyo: “Ngele ku na ngoka a hala okulandula ndje, oye ni idhimbwe ye mwene, ni itsike omushigakano gwe, ye na landule ndje.
35 Oshoka oongoka a hala okuhupitha omwenyo gwe, oye te gu kanitha, ihe ngoka ta kanitha omwenyo gwe molwandje nomolwokutaandelitha elaka etoye, ote guhupitha.
36 Otashi kwatha shike omuntu, nando ni ilikolele uuyuni auhe, ye e ta kanitha omwenyo gwe?
37 Omuntu ota gandja ando shike, shi ninge ekulilo lyomwenyo gwe?
38 Ngele ku na ngoka ta si ndje ohoni nosho wo oohapu dhandje mokati kepipi ndika lyaahondeli nolyaalunde, nena Omuna gwOmuntu ote ke mu sa wo ohoni, uuna te ke ya e li mesimano lyaHe pamwe naayengeli ye aayapuki.”
1 Jesus okwa ti kuyo: “Ngame otandi mu lombwele: Opu na yamwe mwaambaka ya thikama mpaka itaaya makele eso, manga inaaya mona Oshilongo shaKalunga tashi ya noonkondo dhasho.”
2 Sho pwa piti omasiku gahamano, Jesus okwa kutha Petrus, Jakob naJohannes nokwe ya fala kondundu ondeendeka, ye ki ikalele. Oye okwa shituluka montaneho yawo,
3 noonguwo dhe odha adhima dha tokelela. Kombanda yevi kaku na nando omuntu ta vulu oku dhi tokitha ngaaka.
4 Elia naMoses oye ya holokele noya kundathana naJesus.
5 Petrus okwa lombwele Jesus e ta ti: “Muhongi, opwe tu opalela mpaka okukala. Otatu ka dhikila po omatsali gatatu, limwe olyoye, limwe olyaMoses nalimwe olyaElia.”
6 Petrus nayakwawo oya li ya tila noonkondo, onkee oye ina tseya shoka e na oku shi tya.
7 Oshikogo oshe ya noshe ya siikile, newi olya zi moshikogo lya ti: “Nguka oye Omumwandje omuholike, mu uveni!”
8 Ohaluka sho ya lengalenga, inaa mona we nando olye; Jesus oye awike a li puyo.
9 Ano sho ya li taa kuluka ko kondundu, Jesus okwe ya kumagidha, yaa hokololele nando omuntu shoka ya mono, manga Omuna gwOmuntu inaa yumudhwa kuusi.
10 Oyo ya taamba elombwelo ndyoka, ihe oya pulathana okuyumuka kuusi shoka taku ti.
11 Oyo noya pula Jesus ya ti: “Omolwashike aalongimpango taa ti kutya Elia ote ke ya tango?”
12 Jesus okwe ya yamukula: “Eeno, Elia ote ya tango nota opaleke ayihe. Ihe ongiini ano, sho Omuna gwOmuntu a nyolwa kutya oku na okuhepekwa nomahepeko ogendji nokudhinwa?
13 Ngame otandi mu lombwele ano kutya Elia okwi ile, ihe oyo oye mu ningile shaa shoka ya hala, ngaashi a nyolwa mOmanyolo.”
14 Sho ya galukile kaalongwa mboka ya kalele po, oya adha ongundu onene yaantu ye ya gongalela, naalongimpango oya li taye ya ludhikitha.
15 Aantu mboka sho ya mono Jesus, oya kumwa noya matukile kuye e taye mu popitha.
16 Jesus okwa pula aalongwa a ti: “Otamu ludhike ano shike nayo?”
17 Gumwe gwomongundu okwe mu yamukula: “Muhongi, onde ku etele omumwandje omumati e niwe kompwidhuli, ye iha popi.
18 Shaa tuu tayi mu kwata, otayi mu hata po. Oye ta eta ondutu, ti ikokota omayego noti ikukutile. Onda li nda lombwele aalongwa yoye, ye yi tidhe mo, ihe oya nyengwa.”
19 Jesus okwa ti kuyo: “Epipi ngoye lyaa na eitaalo, osigo uunake tandi kala pune? Osigo uunake ndi na oku mu idhidhimikila? Mu eteni kungame.”
20 Oyo noye mu eta kuye. Ompwidhuli sho ya mono Jesus, oya mbungambunga omumati, e ta gwile pevi, noye mu galangatitha e te eta natango ondutu.
21 Jesus okwa pula he yomumati a ti: “Okwa kala ngeyi omasiku ge thike peni?” Oye a yamukula: “Okuza kuunona we.
22 Olwindji ombepo ya tya ngawo oye mu undulile momulilo nomomeya, opo yi mu yone po. Ano ngele oto shi vulu, tu sila ohenda, ngu u tu kwathe.”
23 Jesus okwa ti kuye: “Ngele tii shi vulu, wa ti? Kehe shimwe otashi vulu okuningilwa ngoka i itaala.”
24 Mbalambala he yomumati okwi igidha a ti: “Ondi itaala, kwatha ndje nuuna ndaa na eitaalo.”
25 Jesus sho a mono aantu taa ngundumanene po, okwa ganda ombepo ya nyata ndjoka hayi ningi, omuntu kaa vule okupopya nokuuva ko, a ti: “Otandi ku lombwele, za mo muye ngoye ino ya mo we.”
26 Oyo oyi igidha noye mu mbungambunga e tayi zi mo muye. Omumati okwa ningi a fa kee na omwenyo, onkee aantu oyendji oya ti kutya okwa sa.
27 Ihe Jesus okwa kwata oshikaha she nokwe mu ambidhidha, e ta thikama.
28 Jesus sho a yi megumbo, aalongwa ye oye mu pula, manga ye li naye oyo ayeke ya ti: “Omolwashike twa nyengwa okutidha mo ompwidhuli ya tya ngawo?”
29 Oye okwa ti kuyo: “Oludhi lwombepo ya tya ngeyi ihalu tidhwa mo kusha shilwe, okegalikano alike.”
30 Oyo oya zi ko nkoka noya pitile muGalilea. Jesus okwa li inaa hala, aantu ya tseye mpoka e li,
31 oshoka okwa li ta longo aalongwa ye kutya: “Omuna gwOmuntu ota ka gandjwa miikaha yaantu mboka taa ke mu dhipaga, nongele ye mu dhipaga, e tapu piti omasiku gatatu, ota ka yumudhwa kuusi.”
32 Kaya li yu uvite ko oohapu ndhoka, ihe oya tila oku mu pula.
33 Oyo sho ye ya kuKapernaum, Jesus okwa yi megumbo nokwa pula aalongwa ye e ta ti: “Mondjila omwa li tamu kundathana shike?”
34 Ihe oya mwena owala, oshoka mondjila oya li taa kundathana kutya olye omunene e vule ooyakwawo ayehe.
35 Jesus okwa kuutumba nokwi ithana aalongwa mboka omulongo nayaali e ta ti kuyo: “Ngoka a hala, a kale gwotango, na kale omuhugunini kwaayehe nomuyakuli gwaayehe.”
36 Oye okwa kutha okanona nokwe ka thikameke montaneho yawo, okwe ka papata momaako ge e ta ti kuyo:
37 “Kehe tuu ngoka ta taamba kamwe komuunona wa tya ngeyi medhina lyandje, oye ta taamba ndje; naangoka ta taamba ndje, hangame ta taamba, ihe ota taamba ngoka a tuma ndje.”
38 Johannes okwa ti kuye: “Muhongi, otwa mono omuntu gumwe ta tidha mo oompwidhuli medhina lyoye, tse notwe mu indike, oshoka ka li gwomongundu yetu.”
39 Jesus okwa yamukula a ti: “Inamu mu indika, oshoka kaku na ngoka ta vulu okuninga oshikumithalonga medhina lyandje e ta popi ndje nayi nuupu.
40 Oshoka ngoka kee na ondumbo natse, okwa gama kutse.
41 Oshoka ngame otandi mu lombwele: Kehe ngoka te mu pe oshitenga shomeya, mu nwe, molwaashoka ne oyaKristus, ita kala inaa pewa ondjambi ye.”
42 “Ngoka ta hongolola kamwe komuushona mbuka wi itaala ndje, okwa gwana a mangelwe emanya edhigudhigu mothingo ye e tu umbilwa muule wefuta.
43 Oshikaha shoye ngele tashi ku hongolola, shi teta ko. Okuya momwenyo oshilema okwe ku opalela ku vule okukala niikaha iyali e to umbilwa moheli, momulilo ihaagu dhimi po. [
44 Moka omazinyo taga li onyama yawo go itaga si, nomu na omulilo ihaagu dhimi po.]
45 Ompadhi yoye ngele tayi ku hongolola, yi teta ko. Okuya momwenyo u na ompadhi yimwe okwe ku opalela ku vule okukala noompadhi mbali e to umbilwa moheli. [
46 Moka omazinyo taga li onyama yawo go itaga si, nomu na omulilo ihaagu dhimi po.]
47 Eho lyoye ngele tali ku hongolola, li tsipula mo. Okuya mOshilongo shaKalunga u na eho limwe okwe ku opalela ku vule okukala nomeho gaali e to umbilwa moheli.
48 Moka omazinyo taga li onyama yawo go itaga si, nomu na omulilo ihaagu dhimi po.
49 “Omuntu kehe oku na okuyelithwa nomulilo.
50 “Omongwa ogwo oshinima oshiwanawa; ihe uuna tagu hahuka, otagu toyalekwa nashike? “Kaleni mu na omongwa mune yene, ne mu kale mu na ombili mokati keni.”
1 Jesus okwa zi nkoka nokwa yi komikunda dhaJudea nahandiyaka yaJordan. Nena ongundu yaantu oye mu gongalele ishewe, nokwe ya longo, ngaashi he shi ningi shito.
2 Okwa zi ihe aafarisayi noye ya kuye oku mu pula noku mu makela, ngele oshu uka tuu, omulumentu a henge po omukiintu gwe.
3 Jesus okwe ya yamukula a ti: “Moses okwe mu lombwele, mu ninge ngiini?”
4 Oyo oya ti: “Moses okwa pitika, omulumentu a nyole onzapo yehengo, a ethe po omukiintu gwe.”
5 Jesus okwa ti kuyo: “Moses okwe mu nyolele eutho ndika omolwokwaavulika kweni.
6 Ihe petameko, peshito: ‘Kalunga okwe ya shiti omulumentu nomukiintu.
7 Onkee ano omulumentu e na okuthiga po he nayina e ti ihanganitha nomukiintu gwe,
8 ayehe yaali notaa ningi omuntu gumwe.’ Kaye shi we yaali, aawe, oyo omuntu gumwe.
9 Ano shono Kalunga e shi tula kumwe, inashi kuthwa kumwe komuntu.”
10 Sho ya yi megumbo, aalongwa oya pula ishewe Jesus oshinima shika.
11 Oye nokwe ya lombwele a ti: “Oongoka ta henge po omukiintu gwe e ta hokana gulwe, ota hondele.
12 Nosho tuu wo omukiintu ngele ta henge po omulumentu gwe e ta hokanwa kugulwe, ota hondele.”
13 Aantu yamwe oye eta uunona kuJesus, e u gume. Aalongwa noya ganda mboka ye u eta.
14 Ihe Jesus sho shi mono, okwa geye e ta ti kuyo: “Etheni uunona, u ye kungame. Inamu u keelela ko, oshoka Oshilongo shaKalunga oshaamboka ye u fa.
15 Ngame otandi mu lombwele: Oongoka itaa taamba Oshilongo shaKalunga ongokanona, ita yi mo musho.”
16 Oye okwe u papata momaako ge nokwe u tenteke iikaha ye e te u yambeke.
17 Jesus sho a zi mo megumbo, okwa tsikile ondjila ye. Omulumentu gumwe okwa matuka, e mu tsakaneke, nokwa tsu oongolo koshipala she e te mu pula: “Muhongi omwaanawa, nandi longe shike, ndi mone omwenyo gwaaluhe?”
18 Jesus okwe mu pula: “Omolwashike to ti ndje omwaanawa? Kaku na nando omuntu omwaanawa, oKalunga awike.
19 Iipango ou yi shi: ‘Ino dhipaga, Ino hondela, Ino yaka, Ino lundila, Ino yuga omuntu, Simaneka ho nanyoko.’ ”
20 Ihe ye okwe mu yamukula: “Muhongi, ayihe mbika onde yi gwanitha okuza muugundjuka wandje.”
21 Opo Jesus okwe mu tala nohole e ta ti kuye: “Owa pumbwa oshinima shimwe: Inda, u ka landithe po iinima yoye ayihe, iimaliwa e to yi pe oohepele, ngoye e to kala u na eliko megulu. Ila ihe, u landule ndje.”
22 Ihe oohapu ndhoka odhe mu alula komwenyo, nokwa zi po a nika oluhodhi, oshoka okwa li e na eliko olindji.
23 Jesus okwa tala aalongwa ye e ta ti kuyo: “Aayamba oye na uudhigu ngiini okuya mOshilongo shaKalunga!”
24 Aalongwa oya kuminwa oohapu dhe. Ihe Jesus okwe ya lombwele ishewe e ta ti: “Aamwandje, ope na uudhigu ngiini okuya mOshilongo shaKalunga!
25 Okupitila kwongamelo mombululu yonane okuhwepo ku vule okuya kwomuyamba mOshilongo shaKalunga.”
26 Aalongwa oya haluka noonkondo noya pulathana e taa ti: “Olye ano ta vulu okuhupithwa?”
27 Jesus okwe ya tongolola e ta yamukula: “Eeno, aantu ohaa nyengwa, ihe Kalunga iha nyengwa kusha.”
28 Petrus okwa tameke okupopya nokwa ti kuye: “Tala, tse otwa thigi po ayihe e tatu ku landula.”
29 Jesus okwa ti: “Ngame otandi mu lombwele: Kaku na ngoka a thiga po egumbo nenge aamwayina aalumentu nenge aamwayina aakiintu nenge he nenge yina nenge oyana nenge epya molwandje nomolwokutaandelitha elaka etoye,
30 a kale ando itaa mono lwethele muuyuni mbuka omagumbo, aamwayina aalumentu naamwayina aakiintu, ooyina, oyana, omapya — nosho wo omatidhagano; nomuuyuni tau ya ota ka mona omwenyo gwaaluhe.
31 Ihe aatango oyendji otaa ka ninga aahugunini, naahugunini oyendji otaa ka ninga aatango.”
32 Oyo oya li mondjila taa londo yu uka kuJerusalem. Jesus okwe ya kwatele komeho. Aalongwa oya adhika kehaluko nosho wo aantu mboka ya landula mo, oya li ya tila. Jesus okwi ikalekele ishewe aalongwa ye omulongo nayaali nokwa tameke oku ya lombwela shoka tashi ke mu adha
33 a ti: “Tala, otatu yeni kuJerusalem, hoka Omuna gwOmuntu ta ka gandjwa miikaha yaayambi aakuluntu noyaalongimpango, notaye mu pangulile eso. Yo otaye ke mu gandja ishewe kaapagani,
34 mboka taye mu sheke, taye mu hiyile omayeye, taye mu dhenge e taye mu dhipaga, ihe ngele pwa piti omasiku gatatu, ota yumudhwa.”
35 Nena aana yaSebedeus, Jakob naJohannes, oye ya kuJesus e taa ti: “Muhongi, otwa hala, u tu ningile shaa shoka tatu ku indile.”
36 Oye okwe ya pula a ti: “Omwa hala, ndi mu pe shike?”
37 Oyo ye mu yamukula: “Tu pitika, tu ka kuutumbe mOshilongo shoye gumwe okolulyo lwoye nomukwawo okolumoho lwoye.”
38 Jesus okwa ti kuyo: “Ne inamu tseya shoka mwa hala. Otamu vulu tuu okunwa oshitenga shoka tandi nu nokushashwa eshasho ndyoka tandi shashwa?”
39 Oyo ya ti kuye: “Otatu shi vulu.” Jesus okwa ti kuyo: “Oshitenga shoka tandi nu, otamu ke shi nwa, neshasho ndyoka tandi shashwa, otamu ke li shashwa.
40 Ihe omahala gokukuutumba kolulyo lwandje nenge kolumoho lwandje hangame tandi ga gandja, ihe ogaamboka ye ga longekidhilwa kuTate.”
41 Aalongwa mbeyaka omulongo sho ye dhi uvu, oya tameke okugeela Jakob naJohannes.
42 Jesus okwe ya ithana e ta ti kuyo: “Ne omu shi shi, aapangeli ohaa pangele iigwana, naanenentu ohaye yi pangele pankondo dhawo.
43 Ihe inashi kala ngaaka mokati keni. Ngoka gwomune a hala, a ninge omunene, na ninge omuyakuli gweni.
44 Naangoka gwomune a hala, a ninge gwotango, na kale omupika gwaayehe.
45 Oshoka nOmuna gwOmuntu ine ya okuyakulwa, ihe okuyakula nokugandja omwenyo gwe, a hupithe oyendji.”
46 Oyo ye ya kuJeriko. Jesus sho a li ta zi muJeriko pamwe naalongwa ye nongundu onene yaantu, omulumentu omuposi, edhina lye Bartimeus, omuna gwaTimeus, okwa kuutumba mooha dhondjila ta hehela.
47 Sho u uvu kutya oJesus Omunasareti e li po, okwa tameke okwiigidha ta ti: “Jesus, omuna gwaDavid, sila ndje ohenda!”
48 Oyendji yomaantu oye mu ganda, a mwene, ihe ye okwa dhiginine okwiigidha mokulekule: “Omuna gwaDavid, sila ndje ohenda!”
49 Jesus okwa thikama e ta ti: “Mu ithaneni, e ye.” Oyo oyi ithana omuposi noya ti kuye: “Thikama, ikolelela, to ithanwa.”
50 Oye okwi ihula ombaikitha ye nokwa thikama mbala e te ya kuJesus.
51 Jesus okwe mu pula a ti: “Owa hala, ndi ku ningile shike?” Omuposi okwe mu yamukula: “Muhongi, onda, hala, ndi mone ko ishewe.”
52 Jesus okwa ti kuye: “Inda, eitaalo lyoye lye ku aludha.” Mbalambala okwa tonata e ta landula Jesus.
1 Ano sho ye ya popepi naJerusalem, opuBetfage naBetania, oya thiki kOndundu yooholivi. Jesus okwa tetekelitha yaali yomaalongwa ye
2 e ta ti kuyo: “Indeni komukunda ngwiyaka gu li komeho geni. Ngele mwa thiki ko, otamu ka mona ontana yokasino ya pandekwa, ndjoka inaayi kayilwa nando onale komuntu. Yi pandukululeni mo ne mu yi ete nkuka.
3 Ngele oku na ngoka te mu pula: ‘Otamu ningi shike?’ Mu lombweleni kutya Omuwa okwe yi pumbwa. Ye ote yi galula mbala.”
4 Oyo ya yi noya mono ontana yokasino ya pandekelwa pondje muuyanda posheelo shegumbo e taye yi pandukulula mo.
5 Ihe aantu yamwe mboka ya li ya thikama mpoka, oye ya pula ya ti: “Otamu ningi shike, otamu pandukulula ontana?”
6 Oyo ya yamukula, ngaashi ya lombwelwa kuJesus, mbeyaka noye ya etha, ya ye.
7 Oyo ye eta ontana yokasino kuJesus noya yala oonguwo dhawo pombunda yayo, Jesus e ta kuutumba ko.
8 Ihe oyendji oya yala oonguwo mondjila, yakwawo ishewe oya tete iitayi yiihwa iitalala noye yi yaleke mondjila.
9 Aantu mboka ya kwata komeho naamboka ya landula mo, oyi igidha ya ti: “Hosianna, Kalunga ne mu laleke nuuyamba ngoka te ya medhina lyOmuwa!
10 Kalunga na laleke nuuyamba okuya kwoshilongo shatate David! Hosianna, Omukombandambanda!”
11 Jesus sho a thiki kuJerusalem, okwa yi motempeli nokwa tala, ayihe nkene ya tya. Ihe shoka etango olya adhika lya toka, okwa yi naalongwa ye omulongo nayaali kuBetania.
12 Mesiku lya landula, sho ya li taa zi kuBetania, Jesus okwa li a sa ondjala.
13 Okwa mono omukwiyu gu li kokule, gwa ziza nawa. Okwa yi kugwo, a tale, ngele ta mono mo oonkwiyu. Sho a yi ko, ina mona mo sha, omafo ageke, oshoka ethimbo lyoonkwiyu olya li inaali thika.
14 Jesus okwa ti kugwo: “Mukwiyu ngoye, kaku na we ngoka ta li iiyimati yoye sigo aluhe.” Aalongwa nayo wo oye dhi uvu.
15 Sho ye ya muJerusalem, Jesus okwa yi motempeli nokwa tameke okutidha mo aantu mboka ya li taa landa notaa landitha motempeli. Okwa tilehi iitaafula yaapingakanithi yiimaliwa niipundi yaahalithi yoonguti;
16 ye ina pitika nando omuntu a humbata sha, a pitile motempeli.
17 Okwe ya longo nokwa ti: “Inaku nyolwa nani: ‘Ongulu yandje oyi na okwiithanwa ongulu yegalikano yiigwana ayihe,’ ihe ne omwe yi ninga ombogo yaayugi.”
18 Aayambi aakuluntu naalongimpango sho ye shi uvu, oya kongo ompito, ya dhipage Jesus. Ihe oya li ye mu tila, oshoka aantu ayehe oya kuminwa elongo lye.
19 Sho kwa ningi ongulohi, Jesus naalongwa ye oya zi mo moshilando.
20 Ongula onene sho ya piti po, oya mono omukwiyu gwa sa sigo okomidhi.
21 Petrus okwa dhimbulukwa oshiningwanima shoka nokwa ti kuJesus: “Tala, Muhongi, omukwiyu ngoka wa thingi, ogwa sa.”
22 Jesus okwa yamukula e ta ti kuyo: “Ngame otandi mu lombwele: Ngele omwi itaala Kalunga,
23 otamu vulu okulombwela ondundu ndjika: ‘Itumba po mpaka, u iyundulile mefuta.’ Ngele kamu na omalimbililo mune yene, ihe omwi itaala kutya shoka tamu ti, otashi ka ningwa, nena otamu shi ningilwa.
24 Onkee ano tandi mu lombwele: Shaa shoka tamu shi indile nokugalikana, itaaleni kutya omwe shi pewa, notamu ke shi pewa.
25 Nongele mwa thikama e tamu galikana, dhiminii po kehe tuu ngoka e mu ninga nayi, opo Ho yeni yomegulu wo a dhime po omayono geni.
26 [Ihe ngele ihamu dhimine po yakweni, nena naHo yeni yomegulu ita dhimi po omayono geni.”]
27 Oyo ya galukile kuJerusalem. Ano manga Jesus a li te ende motempeli, aayambi aakuluntu, nosho wo aalongimpango naakuluntu oye ya kuye
28 noye mu pula: “Okoonkondo dhalye ho longo ngeyi? Olye e ku pa epitikilo lyokuninga iinima ya tya ngeyi?”
29 Jesus okwe ya yamukula a ti: “Nangame wo otandi mu pula epulo limwe. Ngele otamu li yamukula, nena nangame wo otandi mu lombwele kutya okoonkondo dhalye tandi longo.
30 Lombwelii ndje! Okushasha kwaJohannes okwa zi peni; okuKalunga nenge omaantu?”
31 Oya tameke okupatathana: “Natu tyeni ngiini? Ngele otwa yamukula: ‘OmuKalunga,’ ota ka tya: ‘Omolwashike ano inaamu itaala Johannes?’
32 Ihe ngele tatu ti: ‘Omaantu,’ nena otu na okutila aantu, oshoka aantu ayehe oya tala Johannes oye omuhunganeki.”
33 Oya yamukula Jesus ya ti: “Katu shi wo.” Nena Jesus okwa ti kuyo: “Ano nangame wo itandi mu lombwele, okoonkondo dhalye tandi longo ngeyika.”
1 Jesus okwa tameke oku ya lombwela momayele a ti: “Okwa li ku na omusamane a tsike omiti dhomiviinu meyana lye. Okwe dhi gumbile enkolo, okwe dhi fulile oshilambo shokukolela mo omaviinu, okwa tungile mo ongulushungo nokwa langeke mo aalongi yeyana e ta yi kiilongo yokokule.
2 Ethimbo lyokukola oomviinu sho lya thiki, okwa tumu omupika gwe kaalongi yeyana, ye mu pe iiyimati mbyoka e na oku yi pewa.
3 Aalongi yeyana oya kwata omupika gwe noye mu dhenge e taye mu shunitha e li iikaha yowala.
4 Oye okwa tumu ko ishewe omumati gulwe, naanguka wo oye mu dhenge ombole noye mu sitha ohoni.
5 Okwa tumu ko natango gulwe, ihe naangoka wo oye mu dhipaga; nooyakwawo yamwe oyendji oye ya dhenge e taye ya dhipaga.
6 Omusamane okwa li e na natango omwana omuholike e na oku mu tuma. Oye okwe mu tumu ko lwahugunina nokwa ti: ‘Omumwandje otaye mu tila.’
7 Ihe aalongi yeyana mbeyaka oya lombwelathana ya ti: ‘Nguno omuna gwamwene gweyana. Tu mu dhipageni, eliko li ninge lyetu!’
8 Oye mu kwata noye mu dhipaga e taye ekelehi omudhimba gwe kondje yeyana.
9 “Mwene gweyana oku na okuninga ngiini?” Jesus okwa pula. “Aalongi yeyana mboka ote ya, e ya dhipage po, neyana ote li pe yalwe.
10 Inamu lesha nani enyolo ndino? ‘Emanya ndyoka aatungi ye li ekelehi, olyo lya ningi emanya li na esimano li vule agehe.
11 Osha ningwa kOmuwa nosha ningi oshikumitha momeho getu.’ ”
12 Aatamaneki oya kambadhala okukwata Jesus, oshoka oya dhimbulula kutya okwe ya popi meyele ndika. Ihe shoka oya li ya tila aantu, oye mu thigi po e taa yi.
13 Oyo ya tumu kuJesus yamwe yomaafarisayi nayamwe yomwaamboka ya gama kuHerodes oku mu yula moohapu.
14 Oye ya kuye noya ti: “Muhongi, otu ku shi kutya ngoye omunashili, ondjila yaKalunga oto yi longo pashili, oshoka iho ipula nomadhiladhilo gaantu noiho tala olupe lwomuntu. Tu lombwela: Osho opala okupa omupangeli Omuroma oompale, nenge inashi opala? Natu gandje, nenge inatu gandja?”
15 Jesus sho a dhimbulula uufudhime wawo, okwa ti kuyo: “Omolwashike tamu makele ndje? Etelii ndje oshimaliwa shoshene, ndi shi tale!”
16 Oye shi eta. Oye okwe ya pula a ti: “Efano ndika nenyolo ndika li li ko, olyalye?” Oyo ya yamukula: “Olyomupangeli Omuroma.”
17 Nena Jesus okwe ya lombwele a ti: “Ano shono shomupangeli, shi peni omupangeli naashoka shaKalunga, shi peni Kalunga.” Oyo noye mu kuminwa.
18 Aasadukayi yamwe, oomboka haa ti, kaku na eyumuko, oye ya kuJesus noye mu pula ya ti:
19 “Muhongi, Moses okwe tu nyolele ngeyi: ‘Ngele ku na omulumentu inaa mona oluvalo, e ta si, nena omukiintu gwe na hokanwe po komumwayina, opo nakusa a monenwe oluvalo.’
20 Okwa li ku na aalumentu aamwayinathana ye li yaheyali. Omutango okwa hokana nokwa si kee na oluvalo.
21 Osho wo omutiyali okwa hokana po omuselekadhi ngoka nokwa si inaa thiga po oluvalo. Omutitatu wo osho a ningi.
22 Osho ngaaka ayehe yaheyali oya si inaa thiga po oluvalo. Hugunina omukiintu okwa si wo.
23 Ano uuna aasi taa ka yumudhwa, ota ka ninga gwalye mwaambaka, oshoka ayehe yaheyali oya li ye mu hokana?”
24 Jesus okwe ya yamukula a ti: “Ne omwa puka, ne inamu tseya Omanyolo omayapuki nosho oonkondo dhaKalunga.
25 Oshoka uuna aasi taa ka yumudhwa, itaa ka hokana noitaa ka hokanwa, aawe, megulu otaa ka kala ngaayengeli yaKalunga.
26 Ihe kombinga yeyumuko lyaasi, inamu lesha nani membo lyaMoses mehokololo tali popi oshihwa sheno? Moka Kalunga a lombwele Moses ta ti: ‘Ongame Kalunga kaAbraham, Kalunga kaIsak naKalunga kaJakob.’
27 Kalunga ke shi Kalunga koonakusa, aawe, okaanamwenyo. Ne omwa puka nokupukilila.”
28 Gumwe gwomaalongimpango okwe ya nokwe ya uvu, sho taa kundathana. Okwa dhimbulula wo kutya Jesus okwa yamukula aasadukayi nawa, onkee okwe ya kuye e te mu pula: “Oshipango oshinene shi vule iikwawo ayihe oshini po?”
29 Jesus okwa yamukula a ti: “Oshipango oshinene osho shika: ‘Israel, pulakena. Omuwa Kalunga ketu oye awike Omuwa.
30 Hola Omuwa Kalunga koye komutima gwoye aguhe nokomwenyo gwoye aguhe nokomadhiladhilo goye agehe nonoonkondo dhoye adhihe.’
31 Oshitiyali shi thike pusho, osho shika: ‘Hola mukweni, ngaashi ngoye wi ihole mwene.’ Kaku na oshipango oshinene shi vule iipango mbika iyali.”
32 Nena omulongimpango okwa ti kuJesus: “Eeno, Muhongi, owa popi dhoshili, sho wa ti kutya Omuwa Kalunga oye awike, kaku na gulwe e thike puye.
33 Oku mu hola komutima aguhe nonoondunge noonkondo adhihe, nosho wo okuhola mukwetu, ngaashi ndi ihole mwene, okwo oku vule omalungunithondjambo agehe nenge omayambo galwe taga yambelwa Kalunga.”
34 Ano Jesus sho a mono a yamukula nawa, okwa ti kuye: “Ngoye ku li kokule nOshilongo shaKalunga.” Okuza mpoka kakwa li we ku na ngoka a li e na omukumo okupula Jesus sha.
35 Jesus sho a li ta longo aantu motempeli, okwa pula a ti: “Aalongimpango otaa vulu ngiini okutya Kristus oye omuna gwaDavid?
36 Oshoka Ombepo Ondjapuki oyo ya wilike David, a tye: ‘Omuwa okwa lombwele Omuwa gwandje: Kala omutumba kolulyo lwandje, sigo tandi tula aatondi yoye kohi yoompadhi dhoye.’
37 David ye mwene ngele ote mu ithana Omuwa, ano Kristus omwana pamukalo guni?” Ongundu onene yaantu oya nyanyukilwa okupulakena Jesus.
38 Jesus okwa longo aantu a ti: “Angaleni aalongimpango mboka ye hole okweenda ya zala oonguwo oondeendeka nokukundilwa pokuma hapu gongala aantu.
39 Yo oye hole kiipundi yokomeho moosinagoga nopomahala ga simana miituthi.
40 Yo ohaa li omagumbo gaaselekadhi nohaa galikana omagalikano omaleeleka gokumonika kwowala. Otaa ka mona epangulo edhigu.”
41 Jesus okwa kuutumba a taalela oshiketha shiimaliwa nokwa mono, aantu nkene taa tula mo iimaliwa moshiketha. Aayamba oyendji oya tula mo iimaliwa oyindji.
42 Opwe ya omuselekadhi ohepele nokwa tula mo uumaliwa uyali, auhe kumwe tau ningi okapeni kamwe.
43 Jesus okwi ithana aalongwa ye, ye ye kuye e ta ti kuyo: “Ngame otandi mu lombwele: Omuselekadhi nguka ohepele okwa tula mo oshindji moshiketha shiimaliwa e vule ayehe mboka ya tula mo.
44 Oshoka ayehe mboka oya tula mo ya kutha muuyamba wawo, ihe omuselekadhi moluhepo lwe okwa tula mo ashihe shoka a li e na, iipalutha ye ayihe.”
1 Jesus sho a zi mo motempeli, gumwe gwomaalongwa ye okwa ti kuye: “Muhongi, tala komamanya noongulu nkene dho opala!”
2 Jesus okwa ti kuye: “Ou wete oongulu ndhika oonene? Itapu thigwa mpaka emanya lya tentekwa kekwawo inaali kumunwa po.”
3 Jesus manga a li a kuutumba kOndundu yooholivi a taalela kotempeli, Petrus, Jakob, Johannes naAndreas oye mu pula, sho ya li ayeke naye:
4 “Tu lombwela, uunake ano tashi ningwa, nendhindhiliko olini tali holola, uuna mbika ayihe tayi ka gwanithwa?”
5 Jesus okwa tameke ihe oku ya lombwela e ta ti: “Kotokeni, mwaa pukithwe nando okomuntu.
6 Aantu oyendji otaa ke ya taa ti: ‘Oyo Ngame!’ notaa pukitha aantu oyendji.
7 Inamu tilithwa, ngele tamu uvu omalugodhi noonkundana dhomalugodhi. Oshoka mbika oyi na okuningwa, ihe ehulilo inali thikana natango.
8 Iigwana otayi ka thikama okukondjithathana, niilongo otayi ka matukilathana. Otaku ke ya oondjala nomakakamo gevi koombinga noombinga. Ayihe mbika otayi ningi ongetameko lyoshitheta, okanona ngele taka valwa.
9 “Ano ikotokeleni, oshoka aantu otaye ke mu gandja koompangu notaye ke mu dhenga noongola moosinagoga dhawo. Otamu ka falwa kiipala yomalenga noyaakwaniilwa omolwandje, mu ninge oonzapo dhokupopya oshili mokati kawo.
10 Ihe tangotango elaka etoye oli na okuuvithilwa aantu ayehe.
11 Ano ngele taye mu gandja ngeyi kaatokoli, inamu kala mu na oshimpwiyu kutya otamu ka popya shike, oshoka otamu pewa pethimbo tuu ndyoka shoka mu na oku popya. Oshoka hane tamu popi, ihe Ombepo Ondjapuki ta popi.
12 Aantu aamwayinathana otaa ka gandjathana mokusa, noohe otaa ka gandja oyana. Aanona otaa ka tsa ondumbo naakuluntu yawo e taye ya dhipaga.
13 Otamu ka tondwa kwaayehe molwandje. Ihe ngoka ti idhidhimike sigo ehulilo, ota hupithwa.”
14 Omuleshi na ndhindhilike mbika: “Ngele tamu mono iihuna yeshunduko yi li pokuma yaa na okukala po, nena ayehe mboka ye li muJudea, naa tembukile koondundu.
15 Ngoka ta adhika kombanda yongulu, ina kuluka ko, a ye megumbo, a ka tale mo sha she, a ye nasho.
16 Ngoka ta adhika mepya, ina shuna megumbo, a ka tale onguwo ye.
17 Yayee aasimba naamwali yopomasiku ngoka!
18 Galikaneni, shaa ningwe pokufu.
19 Oshoka pomasiku ngoka otaku kala uudhigu inaau kala ko nale okuza ketameko, Kalunga sho a shiti uuyuni sigo ongashingeyi, nongaashi itau ya we.
20 Omuwa ando ina fupipika omasiku ngoka, ando kaku na nando omuntu ta hupithwa. Ihe okwa fupipike omasiku ngoka omolwaahogololwa ye.
21 “Ano ngele ku na ngoka te mu lombwele: ‘Tala, Kristus oye nguka,’ nenge: ‘Tala, oye ngwiyaka,’ inamu mu itaala.
22 Oshoka otaku ka holoka ookristus aafundja naahunganeki aafundja. Oyo otaa ka holola po omandhindhiliko niikumithalonga, opo ya pukithe, ngele tashi vulika, naahogololwa yaKalunga.
23 Kotokeni, onda tetekele oku mu londodha mwaayihe.”
24 “Uudhigu womasiku ngoka otau ka landulwa keluudho lyetango, nomwedhi itagu ka yela we.
25 Oonyothi otadhi ka gwa megulu, noonkondo dhomewangandjo otadhi ka tukuluka.
26 Aantu otaa ka mona ihe Omuna gwOmuntu te ya te ende kiikogo yokegulu e na oonkondo odhindji neadhimo.
27 Oye ota ka tuma ko aayengeli ye, ya ka gongele aahogololwa ye koombinga ne dhevi, okuza koshigo yevi sigo okoshigo yegulu.”
28 “Ilongeni omayele komukwiyu. Iitayi yagwo ngele tayi hapuka nomafo taga mbunyuka, nena omu shi shi kutya othinge oyi li popepi.
29 Osho nane wo ngele tamu mono mbika tayi ningwa, kaleni mu shi shi, ethimbo olya thikana. Omuna gwOmuntu oku li popepi posheelo.
30 Dhimbulukweni kutya iinima mbika ayihe otayi ka ningwa omanga epipi ndyoka li na omwenyo ngashingeyi inaali hula po.
31 Egulu nevi otali hulu po, ihe oohapu dhandje kadhi na mpoka tadhi hulu po.”
32 “Esiku notundi ndjoka kaku na ngoka e yi shi, nando aayengeli yomegulu nenge Omwana, oTate awike.
33 Kotokeni ano, ne mu tonate, oshoka inamu tseya kutya ethimbo otali thiki uunake.
34 Otaku ningi ngashika omulumentu te ke enda kiilongo e ta thigi po egumbo lye: Oye okwa thigile aamati ye, ya tonatele iinima ye ayihe. Kehe omumati okwe mu pe oshilonga she mu yeleka e ta lombwele omukeeleli gwoposheelo, a kale a tonata.
35 Onkee ano tonateni, oshoka inamu tseya, uuna mwene gwegumbo te ya, ngele ongulohi nenge opokati kuusiku opokwiiga kwekondombolo nenge okoongulasha.
36 Opo nge te ya ombaadhilila, kee mu adhe mwa kotha.
37 Shoka tandi mu lombwele, otandi shi lombwele wo aantu ayehe kutya: Tonateni!”
1 Ano sho kwa li ku na omasiku gaali, oshituthi shOpaasa noshiikwiila inaayi fulikwa shi thike, aayambi aakuluntu naalongimpango oya li taa kongo, nkene ye na okukwata Jesus nomakoto, ye mu dhipage.
2 Ihe oya ti: “Itatu shi ningi pethimbo lyoshituthi, opo evundakano lyaa holoke maantu.”
3 Jesus sho a li muBetania megumbo lyaSimon omunashilundu, omukiintu e na ohanga yu udha omugwayo gwondilo, gwonardilela, okwe ya mo. Oye okwa suukulula ohanga nokwe yi tile komutse gwaJesus, manga a kuutumba poshililo.
4 Ihe okwa li ku na aantu yamwe ya geele oshinima shoka noya popi ya ti: “Omolwashike omugwayo gwa hepithwa owala ngeyi?
5 Omugwayo nguka ando gwa landithilwe po, ando ogwa zi iimaliwa yi vule omathele gatatu, yi pewe oohepele.” Oyo noya nyenyetele omukiintu.
6 Jesus okwa ti: “Mu etheni. Omolwashike tamu mu piyaganeke? Oye okwa longele ndje oshilonga oshiwanawa.
7 Oohepele omu li nadho aluhe. Ethimbo kehe mwa hala, otamu vulu oku dhi ningila uuwanawa. Ihe ngame itandi kala pune aluhe.
8 Oye okwa ningi shoka shi thike poonkondo dhe. Okwa tetekele okugwayeka olutu lwandje, e lu longekidhile efumviko.
9 Ngame otandi mu lombwele: Shaa nkoka muuyuni auhe elaka ndika etoye tali ka uvithwa, oshilonga wo shika e shi ningi, otashi ka hokololwa nokudhimbulukiwa.”
10 Nena Judas Iskariot, gumwe gwaamboka omulongo nayaali, okwa yi kaayambi aakuluntu, a ka gandje Jesus miikaha yawo.
11 Ano mboka sho ye shi uvu, oya nyanyukwa e taye mu uvanekele oku mu pa iimaliwa. Onkee ano Judas okwa li ta kongo ashike ethimbo lyo opala okugandja Jesus.
12 Mesiku lyotango lyoshituthi shiikwiila inaayi tumbithwa, moka hamu dhipagwa wo onzigona yOpaasa, aalongwa yaJesus oye mu pula ya ti: “Openi wa hala, tu ke ku longekidhile, u lye uulalelo wOpaasa?”
13 Jesus okwa tumu yaali yomaalongwa ye e ta ti kuyo: “Indeni koshilando, notamu ka tsakaneka omulumentu a humbata etenga lyomeya. Mu landuleni
14 sigo omegumbo moka u uka, e tamu lombwele mwene gwegumbo tamu ti: ‘Omulongi ota ti: Openi pu na oshinyanga shaayenda, ndi lile mo uulalelo wOpaasa pamwe naalongwa yandje?’
15 Oye note mu ulukile ondjugo onene yopombanda yo opalekwa. Tu longekidhileni ayihe.”
16 Aalongwa oya yi e taye ya moshilando, naayihe oya li, ngaashi Jesus e ya lombwele. Oyo noya longekidha uulalelo wOpaasa.
17 Ongulohi sho ye ya, Jesus okwe ya pamwe naalongwa ye omulongo nayaali.
18 Manga ya kuutumba poshililo taa li, Jesus okwa ti: “Ngame otandi mu lombwele: Gumwe gwomokati keni, ngoka ta li pamwe nangame, ota ka gwaaleka ndje.”
19 Aalongwa oya nika uuthigwa noonkondo noye mu pula koogumwe noogumwe ya ti: “Hangame ndishi?”
20 Jesus okwe ya yamukula a ti: “Ogumwe gwomokati keni mboka omulongo nayaali, ngoka te elele metemba mumwe nangame.
21 Omuna gwOmuntu ota ka sa, ngaashi kwa nyolwa, ihe yayee omuntu ngoka te ke mu gwaaleka! Omuntu ngoka ando a li inaa valwa, ando ihwepo.”
22 Sho ya li taa li, Jesus okwa kutha oshikwiila, okwa hambelele, okwe shi pambula nokwe shi pe aalongwa ye e ta ti: “Taambeni, shika osho olutu lwandje.”
23 Okwa kutha wo oshitenga, a hambelele nokwe shi ya pe; oyo noya nu mo ayehe.
24 Oye okwa ti kuyo: “Ndjika oyo ombinzi yandje, ombinzi yehangano, ndjoka tayi tilwahi omolwoyendji.
25 Ngame otandi mu lombwele: Itandi nu we omaviinu sigo esiku ndyoka tandi ke ga nwa omape mOshilongo shaKalunga.”
26 Ano sho yi imbi eimbilo lyehambelelo, oya yi kOndundu yooholivi.
27 Nena Jesus okwa ti kuyo: “Ne amuhe otamu yi ontuku e tamu etha ndje, oshoka okwa nyolwa taku tiwa: ‘Otandi dhipaga po omusita, noonzi otadhi halakana.’
28 Ihe ngame nge nda yumudhwa, otandi ke mu tetekela kuGalilea.”
29 Petrus okwa ti kuye: “Nando ayehe oya ye ontuku, ngame itandi yi ontuku.”
30 Jesus okwa ti kuye: “Ngame otandi ku lombwele: Uusiku mbu wonena ekondombolo manga inaali iga olutiyali, ngoye oto idhimbike ndje lutatu.”
31 Petrus okwa yamukula: “Nando ondi ka se pamwe nangoye, itandi ku idhimbike!” Aalongwa ooyakwawo ayehe osho wo ya yamukula.
32 Oyo ye ya keyana edhina lyalyo Getsemane. Opo Jesus okwa ti kaalongwa ye: “Kuutumbeni mpaka, manga tandi ka galikana.”
33 Oye okwa kutha Petrus, Jakob naJohannes nokwa tameke okutila nokuuva uuwehame.
34 Nokwa ti kuyo: “Oluhodhi momwenyo gwandje olunene, konyala talu nyanyagula ndje. Kaleni mpaka, mu tonate.”
35 Sho a humu ko kashona, okwi ihata pevi nokwa galikana, ngele tashi vulika, ethimbo ndyoka li mu pitilile po, a ti:
36 “Tate, Tate, kaku na shoka tashi ku nyenge. Kutha ndje oshitenga shika. Hamolwehalo lyandje, ihe ongaashi wa hala.”
37 Oye okwa galuka nokwa adha aalongwa mboka yatatu ya kotha, e ta ti kuPetrus: “Simon, oto kotha? Owa nyengwa okutonata otundi yimwe ayike pamwe nangame?
38 Tonateni, mu galikane, mwaa pwile memakelo. Ombepo yomuntu oya hala, ihe onyama onkundi.”
39 Oye okwa shuna ko ishewe, a galikana nokwa popi oohapu odho tuu ndhoka.
40 Sho a galuka ishewe, okwe ya adha ya kotha, oshoka omeho gawo oga li ge niwe koomposi; yo inaa tseya shoka ye na oku mu yamukula.
41 Opo ihe okwa galuka olutitatu nokwa ti kuyo: “Otamu kotha natango tamu vululukwa? Sha gwana! Ethimbo olya thikana, uuna Omuna gwOmuntu e na okugandjwa miikaha yaalunde.
42 Thikameni, tu yeni. Ngoka ta gwaaleke ndje, oku li popepi.”
43 Manga Jesus ta popi, Judas, gumwe gwaamboka omulongo nayaali, okwe ya pamwe nongundu yi na omagongamwele noondhimbo, ya tumwa kaayambi aakuluntu nokaakuluntu yoshigwana.
44 Omugwaaleki okwa li e ya tsu onyala a ti: “Ngoka tandi thipi komilungu, oye ngoka mwa hala. Mu kwateni!”
45 Judas sho a thiki, okwe endelele okuya kuJesus e ta ti: “Muhongi,” nokwe mu thipi komilungu.
46 Nena mbeyaka oye mu tsu iikaha e taye mu kwata.
47 Ano gumwe gwaamboka ya li ya thikama mpoka, okwa pweya mo egongamwele lye noku umpile omumati gwomuyambi omukuluntu e te mu fegula okutsi.
48 Jesus okwa ti kuyo: “Ne omwe ya okukwata ndje ngaashi tamu ka kwata omukolokoshi, mu na omagongamwele noondhimbo?
49 Kehe esiku onda longo aantu mokati keni motempeli, ne inamu kwata ndje. Ihe shika osha ningwa, opo Omanyolo omayapuki ga gwanithwe.”
50 Nena aalongwa ayehe oye mu thigi po e taa yi ontuku.
51 Omugundjuka gumwe ngoka a li i idhingila owala elapi etokele, okwa landula Jesus. Oyo oya kambadhala oku mu kwata,
52 ihe okwa thigi po elapi lye nokwa yi ontuku e li olutu lwowala.
53 Oyo oya fala Jesus kegumbo lyomuyambi omukuluntu, hoka kwa gongala aayambi aakuluntu ayehe, aalongimpango naakuluntu.
54 Petrus okwe mu landula e li konima kokule sigo omolugumbo lwegumbo lyomuyambi omukuluntu. Okwa yi mo nokwa kuutumba pamwe naalangeli e ta huhulukwa pomulilo.
55 Ano aayambi aakuluntu noshigongi ashihe shaatokoli oya kambadhala okukonga omalundilo, ya lundile Jesus, opo ye mu dhipage, ihe inaye ga mona.
56 Aalundili oyendji oye mu lundile, ihe omalundilo gawo kaga li ga tsa kumwe.
57 Aalumentu yamwe oye ya po noye mu lundile ya ti:
58 “Tse otwe mu uvu ta ti: ‘Otandi kumuna po otempeli ndjika ya tungwa kaantu, nongele pwa piti omasiku gatatu, otandi ka tunga po onkwawo inaayi tungwa kaantu.’ ”
59 Ihe nando ongawo, ehokolo lyawo olya li inaali tsa kumwe.
60 Omuyambi omukuluntu okwa thikama komeho gawo nokwa pula Jesus a ti: “Ito yamukula sha komalundilo ngoka taye ku lundile?”
61 Ihe Jesus okwa mwena; ina yamukula sha. Omuyambi omukuluntu okwe mu pula natango a ti: “Ongoye Kristus, Omuna gwaKalunga omusimanekwa?”
62 Jesus okwa yamukula: “Eeno, ongame. Ano otamu ka mona Omuna gwOmuntu a kuutumba kolulyo lwaKalunga note ke ya te ende kiikogo yokegulu.”
63 Omuyambi omukuluntu okwa tuula oonguwo dhe mwene e ta ti: “Inatu pumbwa we oonzapo!
64 Ne omu uvu etukano lye. Otamu ti ngiini?” Oyo ayehe noye mu tokola, a dhipagwe.
65 Yamwe yomuyo oye mu hiyile omayeye, oye mu siikile koshipala noye mu dhenge noongonyo e taa ti kuye: “Tengeneka ngoka e ku dhenge.” Aamati aalangeli wo oye mu dhenge nomalupi.
66 Ano Petrus sho a li molugumbo lwomeni, opwe ya gumwe gwomaayakuli aakadhona yomuyambi omukuluntu.
67 Sho a mono Petrus ta huhulukwa, okwe mu tongolola e ta ti kuye: “Nangoye wo owa li pamwe naJesus, Omunasareti.”
68 Ihe Petrus okwi idhimbike e ta ti: “Kandi shi wo nokandi uvite ko shoka to ti.” Oye nokwa zi po u uka lwopondje. Opo mpoka ekondombolo olyi igi.
69 Omukadhona okwe mu mono ishewe nokwa tameke natango okulombwela aantu mboka ya li po a ti: “Omulumentu nguka naye wo ogumwe gwawo.”
70 Ihe Petrus okwi idhimbike ishewe. Konima yokathimbo aantu mboka ya li po ya thikama, oya lombwele Petrus ya ti: “Kapu na omalimbililo, nangoye wo gumwe gwaamboka, oshoka ongoye Omugalilea.”
71 Nena Petrus okwa tameke okwiithinga nokugana e ta ti: “Omulumentu ngoka tamu popi, kandi mu shi.”
72 Opo mpoka ekondombolo lyi igi olutiyali. Nena Petrus okwa dhimbulukwa oohapu ndhoka Jesus e dhi mu lombwelele, sho a tile: “Ekondombolo manga inaali iga lwaali, ngoye oto idhimbike ndje lutatu.” Oye nokwi ihata po e ta lili.
1 Ongula sho kwa shi mbalambala aayambi aakuluntu, aakuluntu yoshigwana, aalongimpango noshigongi ashihe shaatokoli oya kundathana. Oya manga Jesus, oye mu kutha noye mu gandja kuPilatus.
2 Pilatus okwe mu pula a ti: “Ongoye omukwaniilwa gwAajuda?” Jesus okwe mu yamukula: “Eeno, ongame tuu, ngaashi to ti.”
3 Aayambi aakuluntu oye mu tamaneke miinima oyindji.
4 Natango Pilatus okwe mu pula: “Ito yamukula sha? Tala, omatamaneko ngoka taye ku tamaneke nago mpoka ge thike.”
5 Ihe natango Jesus ina yamukula nando osha, onkee Pilatus okwa kumwa.
6 Pethimbo lyoshituthi shOpaasa kehe omuleli Pilatus okwa li ha mangululile aantu onkwatwa yimwe ndjoka yo yene ya hala.
7 Omulumentu gumwe, edhina lye Barabbas, okwa li mondholongo pamwe naakolokoshi ooyakwawo mboka ya li ya dhipaga aantu mokukolokosha kwawo.
8 Aantu oye ya noya tameke okupula Pilatus, e ya ningile, ngaashi ha ningi shito.
9 Pilatus okwe ya yamukula a ti: “Omwa hala, ndi mu mangululile omukwaniilwa gwAajuda?”
10 Oshoka okwa li e shi shi kutya aayambi aakuluntu oye eta Jesus kuye molwefupa.
11 Ihe aayambi aakuluntu oya lombwele aantu, yi indile Pilatus, e ya mangululile Barabbas.
12 Pilatus okwe ya pula ishewe a ti: “Omulumentu nguka tamu ti omukwaniilwa gwAajuda, omwa hala, ndi mu ninge ngiini?”
13 Oyo oye mu igidhile ya ti: “Na alelwe komushigakano!”
14 Nena Pilatus okwe ya pula: “Ano uuwinayi owashike a ningi?” Ihe oya dhiginine okwiigidha ya ti: “Na alelwe komushigakano!”
15 Pilatus okwa gama kokwoopalela aantu, onkee okwe ya mangululile Barabbas. Nena okwa dhengitha Jesus nokwe mu gandja, a ka alelwe komushigakano.
16 Aakwiita oya fala Jesus meni lyegumbo lyaPilatus noyi ithana yakwawo yalwe ayehe.
17 Oye mu zaleke onguwo onene ontiligane noya tungu oshishani shomakwega e taye shi mu zaleke komutse.
18 Oyo oya tameke oku mu kunda taa ti: “We ya po, omukwaniilwa gwAajuda!”
19 Nena oye mu dhenge noshihenguti momutse noye mu hiyile omayeye e taye mu tsile oongolo, ongotaye mu simaneke.
20 Ano sho ye mu nyekelele ngeyi, oye mu hula onguwo ontiligane noye mu zaleke oonguwo dhe mwene e taye mu fala, ye ke mu alele komushigakano.
21 Mokweenda kwawo oya tsakaneke Simon, omulumentu Omukireni, a li ta zi kepya, u uka moshilando. Oye he yaAleksander naRufus. Aakwiita oye mu thiminike, a humbate omushigakano gwaJesus.
22 Oye eta Jesus kehala lyi ithanwa Golgata, otali ti Oshala sholukwe.
23 Oyo noye mu pe omaviinu ga vongakanithwa nomeya gomira, ihe Jesus ine ga nwa.
24 Sho ye mu alele komushigakano, oya topolelathana oonguwo dhe pamukalo gwoku dhi umbila oshihogololitho, opo ya mone kutya kehe omuntu ota pewa shi thike peni.
25 Otundi ndjoka ye mu alele komushigakano, oya li omugoyi gwongula.
26 Okwa li ku na enyolo lyondjo ye lya nyolwa ngeyi: “Omukwaniilwa gwAajuda.”
27 Aakolokoshi yaali oye ya alele wo komushigakano pamwe naJesus, gumwe okolulyo lwe nomukwawo okolumoho lwe.
28 [Osho ngaaka enyolo olya gwanithwa ndyoka tali ti: Oye okwa yalulilwa maakolokoshi.]
29 Aantu mboka ya piti po, oya sheke Jesus nokupukapuka komitse ya ti: “Ooshi! Ongoye tuu nguka to kumuna po otempeli e to yi tungulula omasiku gatatu?
30 Ihupitha nduno, u ze ko komushigakano.”
31 Osho tuu wo aayambi aakuluntu naalongimpango oye mu sheke ya ti: “Okwa li ha hupitha aantu yalwe, ihe ngashingeyi okwa nyengwa okwiihupitha.
32 Kristus, omukwaniilwa gwaIsrael, na ze ko ngashingeyi komushigakano, opo tu shi mone, tse tu mu itaale.” Osho wo mboka ya alelwa pamwe naye, oye mu sheke.
33 Pokati komutenya okwa ningi omilema moshilongo ashihe ndhoka dha kwata ootundi ndatu.
34 Potundi oyo tuu ndjoka ontintatu Jesus okwi igidha mokule a ti: “Eli, Eli, lama sabaktani?” Otashi ti: Kalunga kandje, Kalunga kandje, omolwashike we ekelehi ndje?
35 Nena yamwe yomwaamboka ya thikama mpoka sho ye dhi uvu, oya ti: “Pulakeneni, oti ithana Elia.”
36 Nena gumwe gwawo okwa matuka nokwa kutha oshiyayo. Okwe shi yaya momaviinu omalulu, okwe shi tula koshihenguti nokwe shi tsike komilungu dhaJesus e ta ti: “Etha, u tale, Elia ngele ote ya oku mu kutha ko.”
37 Jesus okwi igidha ishewe pombanda nokwa si.
38 Etopolitho lyotempeli olya tuuka okuza pombanda sigo opevi.
39 Omukuluntu gwaakwiita ngoka a li a thikama a tala Jesus, okwa mono sho ti igidha naasho ta si, nokwa ti: “Kapu na omalimbililo, omulumentu nguka okwa li Omuna gwaKalunga!”
40 Kokuma nkoka okwa li wo aakiintu ya thikama kokule taa tala. Mokati kawo omwa li Maria Magdalena naMaria, yina yaJakob yomushona, naJoses nosho wo Salome.
41 Oyo oya li ya landula Jesus noye mu yakulile, sho a li muGalilea. Aakiintu yalwe oyendji oko ya li wo, mboka ye ya kuJerusalem pamwe naye.
42 Sho kwa ningi ongulohi, tashi ti yesiku lyelongekidho, ndyoka lya landulwa kEsabati,
43 Josef Omwaarimatia, oshilyo sha simana shoshigongi shaatokoli, okwe ya. Oye sho a li a tegelela Oshilongo shaKalunga, okwi itsu omukumo nokwa yi kuPilatus e te mu indile omudhimba gwaJesus.
44 Pilatus okwa kumwa, sho u uvu kutya Jesus okwa sa. Oye nokwi ithana omukuluntu gwaakwiita, e mu pule, ngele okwa si nale.
45 Ano sho u uvu komukuluntu gwaakwiita kutya okwa sa, okwa gandja ihe omudhimba kuJosef.
46 Josef okwa landa oshiyata oshitokele, okwa kutha omudhimba komushigakano nokwe gu dhingile moshiyata e te gu langeke mombila ya adhika ya hokwa memanya. Oye nokwa galangatithile emanya posheelo shombila.
47 Maria Magdalena naMaria, yina yaJosef, oya li ya tala noya mono mpoka Jesus a langekwa.
1 Esabati sho lya piti, Maria Magdalena naMaria, yina yaJakob, nosho wo Salome oya landa omugwayo gwa nika nawa, ya ka gwayeke omudhimba.
2 Ongula onene yesiku lyotango lyoshiwike, etango sho tali piti, oye ya kombila.
3 Manga ye li mondjila, oya pulathana ya ti: “Olye te ke tu kandulila po emanya posheelo shombila?”
4 Ano sho ya yelutha omeho gawo, oya mono kutya emanya olya kandulwa po nale, nonando olya li enene noonkondo.
5 Sho ya yi meni lyombila, oya mono mo omugundjuka a kuutumba kombinga yokolulyo, a zala onguwo onde ontokele. Oyo noya haluka.
6 Ye okwe ya popitha a ti: “Inamu tila. Otamu kongo Jesus Omunasareti, ngoka a li a alelwa komushigakano. Ke mo muka, okwa yumudhwa kuusi. Tala, eha olyo ndika mpoka ye mu langekele.
7 Indeni ihe, mu ka lombwele aalongwa ye naPetrus ngeyi: ‘Ote mu tetekele kuGalilea, oko tamu ke mu mona, ongaashi e mu lombwelele.’ ”
8 Oyo noya zi mo mombila nokumatuka, oshoka oya li ya haluka taa kakama. Onkee inaa popya nando osha komuntu, oshoka oya li ya tila. [
9 Ongula onene yesiku lyotango lyoshiwike Jesus sho a yumuka kuusi, okwi ihololele tango Maria Magdalena, mungoka a li a tidha oompwidhuli heyali.
10 Maria okwa yi nokwa hokololele mbeyaka ya li ya kala naJesus noya li ya nika oluhodhi notaa lili.
11 Sho yu uvu, Maria ta ti kutya Jesus oku na omwenyo nokwe mu mona, inaye mu itaala.
12 Konima yaambika Jesus okwi iholele yaali yomaalongwa molupe lwi ili, manga taa zi moshilando.
13 Sho ya shuna, oya hokololele yakwawo, ihe kakwa li nando ogumwe e ya itaale.
14 Lwahugunina Jesus okwi ihololele aalongwa omulongo nagumwe, manga ya li taa li. Okwe ya nyenyetelele okwaayitaala nokwaavulika kwawo, oshoka inaa itaala mboka ye mu mono, sho a yumudhwa kuusi.
15 Jesus okwa ti kuyo: “Indeni nuuyuni auhe, mu ka uvithile aashitwa ayehe elaka etoye.
16 Ngoka i itaale e ta shashwa, ota hupithwa; ihe ngoka ini itaala, ota pangulilwa ekano.
17 Mboka yi itaala, otaa ka longa iikumithalonga. Medhina lyandje otaa ka tidha mo oompwidhuli notaa ka popya omalaka galwe.
18 Ngele taa kwata omayoka nenge taa nu uuzigo, itau ya ningi sha. Otaa ka tenteka iikaha yawo kaavu naambaka otaa aluka.”
19 Jesus sho a kundathana naalongwa ye, okwa kuthwa po e ta yi megulu nokwa kuutumba kolulyo lwaKalunga.
20 Aalongwa oya yi noyu uvithile akuhe, Omuwa okwa longo pamwe nayo nokwa koleke euvitho lyawo niikumithalonga e yi ya longitha.]