1

¹ Ndika olyo elandulathano lyezimo lyaJesus Kristus, omuna gwaDavid nosho wo omuna gwaAbraham.

² Abraham ohe yaIsak, Isak ohe yaJakob, Jakob ohe yaJuda naamwahe.

³ Juda ohe yaPerez naSera, yina yawo oye Tamar. Perez ohe yaHezron, Hezron ohe yaRam.

⁴ Ram ohe yaAminadab, Aminadab ohe yaNahshon, Nahshon ohe yaSalmon.

⁵ Salmon ohe yaBoas, yina yaBoas oye Rahab. Boas ohe yaObed, yina yaObed oRut. Obed ohe yaIsai.

⁶ Isai ohe yomukwaniilwa David. David okwa valelwa Salomo komukiintu gwaUria.

⁷ Salomo ohe yaRehoboam, Rehoboam ohe yaAbia, Abia ohe yaAsa.

⁸ Asa ohe yaJehosafat, Jehosafat ohe yaJoram, Joram ohe yaUsia.

⁹ Usia ohe yaJotam, Jotam ohe yaAhas, Ahas ohe yaHiskia.

¹⁰ Hiskia ohe yaManasse, Manasse ohe yaAmmon, Ammon ohe yaJosia.

¹¹ Josia ohe yaJehoiakin naamwahe pethimbo lyuupika muBabilon.

¹² Konima yuupika muBabilon Jehoiakin okwa vala Shealtiel, Shealtiel ohe yaSerubbabel.

¹³ Serubbabel ohe yaAbiud, Abiud ohe yaEliakim, Eliakim ohe yaAsor.

¹⁴ Asor ohe yaSadok, Sadok ohe yaAkim, Akim ohe yaEliud.

¹⁵ Eliud ohe yaEleasar, Eleasar ohe yaMattan, Mattan ohe yaJakob.

¹⁶ Jakob ohe yaJosef, omulumentu gwaMaria yina yaJesus, ngoka i ithanwa Kristus.

¹⁷ Osho ngeyi omapipi agehe okuza kuAbraham sigo oDavid oge li omulongo gumwe nomapipi gane, nomokuza muupika waBabilon sigo oKristus oge li omapipi omulongo gumwe nagane.

¹⁸ Okuvalwa kwaJesus Kristus okwa li ngeyi: Yina Maria okwa li a yalekwa kuJosef, ihe manga inaa ya kumwe, Maria okwi idhimbulula, oye omusimba gwOmbepo Ondjapuki.

¹⁹ Ihe shoka omulumentu gwe Josef okwa li omwiinekelwa, okwa li inaa hala okusitha Maria ohoni, onkee okwa dhiladhila oku mu etha po ongumitila.

²⁰ Manga a li ta dhiladhila ngeyi, omuyengeli gwOmuwa okwe mu ihololele mondjodhi a ti: “Josef, omuna gwaDavid, ino tila okukutha Maria, a ninge omukiintu gwoye, oshoka ela ndyoka e li na, olyOmbepo Ondjapuki.

²¹ Oye ta ka vala okanona okamati, e to ka luku Jesus, oshoka oye ta hupitha aantu ye moondjo dhawo.”

²² Shika ashihe osha ningwa, opo adhihe dhi gwanithwe ndhoka Omuwa e dhi lombwele omuhunganeki, sho ta ti:

²³ “Omukadhona ota ningi omusimba nota vala okanona okamati, nedhina lyako otali lukwa Immanuel;” otali ti: Kalunga oku li pamwe natse.

²⁴ Josef sho a papudhuka moomposi, okwa ningi ngaashi a lombwelwa komuyengeli gwOmuwa nokwa kutha Maria, a ninge omukiintu gwe.

²⁵ Ihe ine mu guma, sigo a vala okanona okamati, e te ka luku Jesus.

2

¹ Jesus sho a valelwa muBetlehem shomuJudea, pethimbo ndyoka Herodes oye a li omukwaniilwa, aakoneki yokuuzilo oye ya kuJerusalem taa ti:

² “Omukwaniilwa gwAajuda a valwa ngashingeyi, oku li peni? Oshoka onyothi ye otwe yi mono kuuzilo notwe ya okwiinyongamena kuye.”

³ Omukwaniilwa Herodes sho e shi uvu, okwa haluka, nAajerusalem ayehe oya haluka wo.

⁴ Herodes okwa gongele aayambi aakuluntu ayehe naalongimpango yomoshilongo ashihe nokwe ya pulagula mpoka Kristus ta ka valelwa.

⁵ Yo oya ti kuye: “OmuBetlehem shomuJudea, oshoka okwa nyolwa ngeyi komuhunganeki:

⁶ ‘Ongoye Betlehem mevi lyaJuda, hangoye oshishonashona lya mokati kiilando yepangelo Juda. Oshoka mungoye otamu zi omuleli ngoka ta ka litha aantu yandje Aaisraeli.’ ”

⁷ Onkee ano Herodes okwi ithana aakoneki meholamo nokwe ya pula shili ethimbo, uuna onyothi ya holoka.

⁸ Oye okwe ya tumu kuBetlehem a ti: “Indeni, mu ka konge nuupenda okanona; ngele mwe ka mono, ileni, mu lombwele ndje, nangame ndi ye, ndi ki inyongamene kuko.”

⁹ Sho yu uvu oohapu dhomukwaniilwa, oya yi. Nena onyothi ndjoka ya monene kuuzilo, oye ya kwatele komeho noya thikama kombanda yeha mpoka pwa li okanona.

¹⁰ Sho ya mono onyothi, oye yi nyanyukilwa noonkondo.

¹¹ Oyo ya yi megumbo, oya mono mo okanona nayina Maria, oya tsu oongolo noye ki inyongamene. Oya matula uuyamba wawo noye ka pe omagano: oshingoli, iitsinino nomagadhi ga nika nawa.

¹² Sho ya kumagidhwa kuKalunga mondjodhi, yaa shune we kuHerodes, oya yi nondjila yilwe koshilongo shaandjawo.

¹³ Aakoneki sho ya yi, omuyengeli gwOmuwa okwa holokele Josef mondjodhi a ti: “Thikama, kutha okanona nayina, ngu u tembukile kuEgipiti. Kala hoka, sigo tandi ku lombwele, oshoka Herodes ota kongo okanona e ka dhipage.”

¹⁴ Josef okwa thikama, a kutha okanona nayina uusiku nokwa yi kuEgipiti.

¹⁵ Oko a kala sigo eso lyaHerodes, opo dhi gwanithwe ndhoka dha popiwa kOmuwa mokana komuhunganeki, sho ta ti: “Omumwandje onde mu ithana muEgipiti.”

¹⁶ Herodes sho a dhimbulula kutya, aakoneki oye mu kotokele, okwa geye noonkondo. Oye okwa tumu kuBetlehem nopuushiinda washo okudhipagitha uunona auhe woomvula mbali naamboka uushona, opathimbo ndyoka e li lombwelwa kaakoneki.

¹⁷ Nena odha gwanithwa ndhoka dha popiwa komuhunganeki Jeremia, sho ta ti:

¹⁸ “Ekudhilo otali uvika muRama, elilo enene noosa. Rakel ta lilile oyana. Ye ina hala okuhekelekwa, oshoka oyo kaye po we.”

¹⁹ Herodes sho a si, omuyengeli gwOmuwa okwa holokele Josef mondjodhi muEgipiti

²⁰ nokwa ti kuye: “Thikama, kutha okanona nayina, u shune koshilongo shaIsrael, oshoka mboka ya li ya hala okudhipaga okanona, ya si.”

²¹ Josef okwa thikama, a kutha okanona nayina nokwa shuna koshilongo shaIsrael.

²² Ano Josef sho u uvu, Arkelaus a ningi omukwaniilwa gwaJudea peha lyahe Herodes, okwa tila okuya ko. Oye sho a londodhwa kuKalunga mondjodhi, okwa ka tula moshilongo shaGalilea.

²³ Oye okwa yi nokwa kala moshilando, edhina lyasho Nasaret, opo dhi ninge dhoshili ndhoka dha lombwelwa kaahunganeki kutya: “Oye te ki ithanwa Omunasareti.”

3

¹ Pomasiku ngeyaka Johannes Omushashi okwa holoka noku uvitha mombuga yaJudea

² a ti: “Itedhululeni, oshoka Oshilongo shegulu she ya popepi.”

³ Johannes oye naanaa ngoka a popiwa komuhunganeki Jesaja, sho ta ti: “Ewi lyanakwiigidha mombuga tali ti: ‘Longekidhileni Omuwa ondjila, yelekanitheni omapola ge.’ ”

⁴ Johannes okwa li a zala onguwo yiifufu yongamelo nepaya lyoshipa mombunda ye. Iikulya ye oya li oombahu nomagadhi goonyushi.

⁵ Nena aantu ayehe yomuJerusalem noyomuJudea noyomomikunda adhihe dhaJordan oye ya kuye.

⁶ Oye okwe ya shashele momulonga gwaJordan, sho ya hempulula oondjo dhawo.

⁷ Ihe Johannes sho a mono aafarisayi naasadukayi oyendji taye ya keshasho, okwa ti kuyo: “Oluvalo lwomayoka ne, olye e mu londodha okuya ontuku egeelo lyaKalunga ndyoka tali ya?

⁸ Imikeni ano iiyimati mbyoka tayi holola kutya omwi itedhulula.

⁹ Inamu isimaneka ne yene, mu tye: ‘Tse otu na tate Abraham’, oshoka otandi mu lombwele: Kalunga ota vulu okushitila Abraham aanona momamanya ngaka.

¹⁰ Ekuya olya egekwa nokuli pekota lyomuti. Okehe tuu omuti itaagu imi iiyimati iiwanawa, otagu kewa po e tagu umbilwa momulilo.

¹¹ Ongame tandi mu shasha nomeya, mu itedhulule, ihe nakuya konima yandje ngoka e vule ndje oonkondo, oongoka ngame inaandi gwana okuhumbata oongaku dhe, oye te mu shasha nOmbepo Ondjapuki nomulilo.

¹² Oye e na oshiyelitho miikaha ye. Oye ota kombo olupale lwe e ta yele. Iilya ote yi pungula miigandhi ye, ihe etutu ote li fike po nomulilo ihaagu dhimi po.”

¹³ Jesus okwa zi kuGalilea nokwe ya kuJordan, a shashwe kuJohannes.

¹⁴ Ihe Johannes okwa kambadhala oku mu tinda e ta ti: “Ongame nda li ndi na okushashwa kungoye, ihe ngoye oto ya kungame, ndi ku shashe.”

¹⁵ Jesus okwe mu yamukula a ti: “Zimina ashike, opo tu gwanithe ashihe shoka Kalunga e shi hala.” Johannes nokwe mu pitika.

¹⁶ Jesus sho a shashwa, okwa zi momeya mbalambala. Nena egulu olye eguluka, nokwa mono Ombepo yaKalunga ya kuluka ya fa onguti e tayi mu lambele.

¹⁷ Megulu nomwa zi ewi lya ti: “Nguka Omumwandje omuholike nde mu hokwa.”

4

¹ Nena Ombepo oya fala Jesus kombuga, a ka makelwe komuhindadhi.

² Ano Jesus sho a ningi omasiku omilongo ne inaa lya sha, okwa li a sa ondjala.

³ Omumakeli okwe ya kuye e ta ti: “Ngele ngoye Omuna gwaKalunga, lombwela omamanya ngaka, ga shituke iikwiila.”

⁴ Ihe Jesus okwa yamukula a ti: “Okwa nyolwa: ‘Omuntu ita kala e na omwenyo koshikwiila ashike, ihe okukehe ohapu tayi zi mokana kaKalunga.’ ”

⁵ Opo ihe omuhindadhi okwe mu fala kOshilando oshiyapuki nokwe mu londeke koshihoko shotempeli

⁶ e ta ti kuye: “Ngele ngoye Omuna gwaKalunga, iyundulila pevi, oshoka okwa nyolwa: ‘Kalunga ote ku tumine aayengeli ye: Otaye ku papatele momaako gawo, opo waa pume oompadhi dhoye komamanya.’ ”

⁷ Jesus okwa ti kuye: “Okwa nyolwa natango. ‘Ino makela Omuwa, Kalunga koye.’ ”

⁸ Omuhindadhi okwa fala ishewe Jesus kondundu ondeendeka e te mu ulukile omapangelo agehe gomuuyuni nomasimano gago

⁹ e ta ti: “Ayihe mbika otandi yi ku pe, ngele to tsile ndje oongolo e to galikana ndje.”

¹⁰ Jesus okwa ti kuye: “Za po, Satana, oshoka okwa nyolwa: ‘Omuwa Kalunga koye oye awike u na oku mu galikana noye awike u na oku mu longela.’ ”

¹¹ Ano osho ngaaka omuhindadhi okwa thigi po Jesus; aayengeli noye ya e taye mu yakula.

¹² Jesus sho u uvu, Johannes e edhililwa mondholongo, okwa shuna kuGalilea.

¹³ Ye ina tula we muNasaret, ihe okwa ka kala muKapernaum, shi li pomunkulo gwefuta, omiikandjo yaSebulon naNaftali,

¹⁴ opo oohapu dhi gwanithwe ndhoka dha popiwa komuhunganeki Jesaja, sho ta ti:

¹⁵ “Evi lyaSebulon nevi lyaNaftali, ombinga yefuta, handiyaka yaJordan, Galilea yaapagani!

¹⁶ “Oshigwana sha kuutumba momilema, otashi mono uuyelele owindji. Naamboka ya kuutumba mevi lyomilema nomomuzizimba gweso, uuyelele otau ya yelele.”

¹⁷ Okuza mpoka Jesus okwa tameke okuuvitha ta ti: “Itedhululeni, oshoka Oshilongo shegulu she ya popepi.”

¹⁸ Jesus sho a li ta kunkula nefuta lyaGalilea, okwa mono ko aamwayinathana yaali, Simon, ngoka i ithanwa Petrus, naAndreas. Oyo ya adhika taa umbile iiyulitho yawo mefuta, oshoka oya li aayuli yoohi.

¹⁹ Jesus okwa ti kuyo: “Landulii ndje, ngame otandi mu ningi aayuli yaantu.”

²⁰ Mbalambala oye etha iiyulitho yawo, noye mu landula.

²¹ Sho a humu ko ishewe, okwa mono ko yalwe yaali aamwayinathana, Jakob naJohannes yaSebedeus. Oyo ya li mowato pamwe nahe taa andeke iiyulitho yawo. Jesus okwe ya ithana.

²² Mbalambala oye etha owato nahe noye mu landula.

²³ Jesus okwe endagula muGalilea ashihe nokwe ya longo moosinagoga dhawo. Oye oku uvitha elaka etoye lyOshilongo nokwa panga uuvu noshigombo kehe maantu.

²⁴ Okupopiwa kwe okwa taandele muSiria ashihe. Aantu oye eta kuye aavu yomikithi dhi ili nodhi ili nuuwehame kehe: aanampwidhuli, aanashintona naasilombanda, Jesus okwe ya aludha ayehe.

²⁵ Oongundu oonene dhaantu ya zi kuGalilea, Dekapolis, Jerusalem, Judea nokiilongo yahandiyaka yaJordan, oye mu landula.

5

¹ Jesus sho a mono oongundu dhaantu, okwa londo kondundu nokwa kuutumba. Aalongwa ye oye ya kuye.

² Oye a tameke oku ya longa ta ti:

³ “Aanelago oomboka yu uvite oyo oohepele koomwenyo, oshoka Oshilongo shegulu oshawo.

⁴ “Aanelago oomboka ya nika uuthigwa, oshoka oyo taa ka talalekwa.

⁵ “Aanelago oomboka aayifupipiki, oshoka oyo taa ka thigulula evi.

⁶ “Aanelago oomboka ya sa ondjala noya sa enota lyuuyuuki, oshoka oyo taa ka kutithwa.

⁷ “Aanelago aanamutimahenda, oshoka oyo taa ka silwa ohenda.

⁸ “Aanelago oomboka ya yela moomwenyo dhawo, oshoka oyo taa ka mona Kalunga.

⁹ “Aanelago aakondjeli yombili, oshoka oyo taa ki ithanwa aana yaKalunga.

¹⁰ “Aanelago oomboka taa hepekwa molwaashoka taa longo uuwanawa, oshoka Oshilongo shegulu oshawo.

¹¹ “One aanelago, aantu ngele taye mu sheke, taye mu tidhagana, taye mu popile muuwinayi auhe nokufundja omolwandje.

¹² Nyanyukweni, ligoleni pombanda, oshoka ondjambi yeni onene yi li megulu. Oshoka osho ngeyi wo ya tidhaganene aahunganeki ye mu tetekela.”

¹³ “One omongwa gwevi. Omongwa ngele tagu hahuka, otagu toyalekwa nashike? Kagu na we oshilonga, ogu na okweekelwahi nokulyatwa kaantu.”

¹⁴ “One uuyelele wuuyuni. Oshilando sha tungilwa kondundu itashi wapa okuholama.

¹⁵ Osho wo olamba ihayi temwa e tayi tulwa kohi yontungwa, aawe, okoshihukikwa, notayi minikile ayehe ye li megumbo.

¹⁶ Osho ano uuyelele weni nau yele montaneho yaantu, ya mone iilonga yeni iiwanawa noya hambelele Ho yeni yomegulu.”

¹⁷ “Inamu dhiladhila kutya ongame nde ya okudhima po ompango nomahunganeko. Inandi ya oku yi dhima po, ihe oku yi gwanitha.

¹⁸ Ongame tandi mu lombwele: Manga egulu nevi inaaga hula po, mompango itamu zi nando okanyolo kamwe nenge okankwanu kamwe sigo ayihe ya gwanithwa.

¹⁹ Onkee ano ngele ku na ngoka ta dhimi mo nando kamwe okashonashona komiipango mbika nota longo ngaaka aantu, oye ote ki ithanwa omushuushuka mOshilongo shegulu. Ihe ngoka te yi gwanitha note yi longo, oye ota ka kala omunene mOshilongo shegulu.

²⁰ Ongame tandi mu lombwele: Ngele okukala kweni akuhe kaku vule hoka kwaalongimpango nokwaafarisayi, itamu ka ya mOshilongo shegulu.”

²¹ “One omu uvu oohokulu yonale ya lombwelwa: ‘Ino dhipaga. Ngoka ta dhipaga, oye i ilongela okuya kepangulo.’

²² Ihe ngame otandi mu lombwele: Kehe ngoka ta geyele mukwawo, oye i ilongela epangulo. Ngoka ta ti komuntu omukwawo: ‘Shintu ngoye!’ oye i ilongela okufalwa kompangu. Ngoka ta ti komuntu omukwawo: ‘Mugoya ngoye!’ oye i ilongela omulilo gwoheli.

²³ Ngele to fala omagano goye koshiyambelo, ihe ohaluka wa dhimbulukwa hoka kutya ou na omuntu e ku ninga nayi,

²⁴ nena omagano goye ga thiga ko, u ye manga, mu paathane ombili namukweni, opo u galuke ihe, u gandje omagano goye kuKalunga.”

²⁵ “Paathaneni ombili nomutamaneki gwoye, manga inaamu thika kompangu, omutamaneki gwoye opo kee ku gandje komupanguli, omupanguli e te ku gandja komumbala, e to edhililwa mondholongo.

²⁶ Ongame tandi ku lombwele: Ku na mpoka to zi mo, manga inoo mana okufuta nokapeni kahugunina.”

²⁷ “One omu uvu kwa tiwa: ‘Ino hondela.’

²⁸ Ihe ngame otandi mu lombwele: Okehe tuu ngoka ta tala omukiintu e mu haluka, oye okwe mu hondele momwenyo gwe.

²⁹ Eho lyoye lyokolulyo ngele tali ku hongolola, li tsipula mo, ngu u li ekelehi. Oshoka oshe ku opalela okukanitha shimwe shomiilyo yoye, shi vule okukala nolutu olundjolowele, e to umbilwa moheli.

³⁰ Oshikaha shoye shokolulyo ngele tashi ku hongolola, shi teta ko, ngu u shi ekelehi. Oshoka oshe ku opalela okukanitha shimwe shomiilyo yoye, shi vule okukala nolutu olundjolowele, e to yi moheli.”

³¹ “Okwa tiwa wo: ‘Ngoka ta henge po omukiintu gwe, oku na oku mu pa onzapo yehengo.’

³² Ihe ngame otandi mu lombwele: Kehe ngoka ta hengele po omukiintu gwe ohapu yilwe yaa shi oluhondelo, oye ote mu hondelitha. Nosho wo ngoka ta hokana omuhengwa, oye ta hondele.”

³³ “Natango one omu uvu oohokulu ya lombwelwa: ‘Ino gana iifundja, ihe egano lyoye li gwanithila Omuwa.’

³⁴ Ihe ngame otandi mu lombwele: Inamu gana nando okuli. Hakegulu, oshoka olyo oshipangelapundi shaKalunga;

³⁵ hakevi, oshoka olyo oshilyatelopundi she; hakuJerusalem, oshoka osho oshilando shomukwaniilwa omunene;

³⁶ hakomutse gwoye, oshoka ku vulu okushitukitha efufu lyoye limwe, li ninge etokele nenge eluudhe.

³⁷ Onkee oohapu dheni nadhi tye: ‘Eeno, eeno,’ nenge ‘aawe, aawe,’ oondhoka tadhi gwedhwa ko, otadhi zi muMwiinayi.”

³⁸ “One mu uvu kwa tiwa: ‘Ngoka a tsipula mo eho lyamukwawo, naye wo na tsipulwe eho; naangoka a teya mo eyego lyamukwawo, naye wo na teywe eyego.’

³⁹ Ihe ngame otandi mu lombwele: Inamu shunitha uuwinayi kungoka te mu ningile uuwinayi. Ngele ku na ngoka te ku dhenge olupi kolupanda lwokolulyo, mu etha, a dhenge nolukwawo.

⁴⁰ Ngele ku na ngoka a hala okutamananena ohema yoye, e yi ku kuthe, mu pa nombaikitha yoye wo.

⁴¹ Ngele oku na ngoka te ku thiminike, u mu thindikile oshikako shimwe, mu thindikila iyali.

⁴² Pa ngoka te ku indile sha; ino pilamena ngoka a hala, e ku lile oongunga.”

⁴³ “One mu uvu kwa tiwa: ‘Hola mukweni, tonda omutondi gwoye.’

⁴⁴ Ihe ngame otandi mu lombwele: Holeni aatondi yeni, galikaneneni aahepeki yeni,

⁴⁵ opo mu ninge aana yaHo yeni yomegulu. Oshoka etango lye ohe li pitithile aawinayi naawanawa, nomvula ye ohe yi lokithile aayuuki naalunde.

⁴⁶ Oshoka ngele mu hole owala mboka ye mu hole, otamu ka pewa ondjambi yashike? Naafendelithi wo osho haa ningi.

⁴⁷ Nongele hamu popitha ookuume keni ayeke, mu shi ohamu ningi oshinima oshinene? Naapagani wo osho haa ningi.

⁴⁸ Kaleni ano mwa gwana mwa pwa, ngaashi Ho yeni yomegulu a gwana a pwa.”

6

¹ “Kotokeleni okuulika okulongela Kalunga kweni montaneho yaantu, mu monike kuyo. Ngele tamu ningi ngeyi, kamu na oshipewa puHo yeni yomegulu.

² Ongoye ngele to gandja omagano goohepele, ino shi ulika nokuhika enkuma, ongaashi aafudhime haa ningi moosinagoga nomomapandaanda, opo ya simanekwe kaantu. Ongame otandi mu lombwele: Oyo ya pewa ondjambi yawo.

³ Ihe ngoye ngele to pe ohepele sha, oshikaha shoye shokolumoho inashi tseya shokolulyo shoka tashi ningi;

⁴ opo omagano goye ga kale meholamo. Nena Ho ngoka ha mono meholamo, ote ku futu.”

⁵ “Ngele tamu galikana, inamu kala ngaashi aafudhime! Oshoka oye hole okuthikama nokugalikana moosinagoga nopoompagiila dhoondjila, opo ya monike kaantu. Ongame otandi mu lombwele: Oyo ya pewa ondjambi yawo.

⁶ Ihe ngoye ngele to galikana, inda mondunda yoye, edhila po osheelo, u galikane Ho ngoka e li meholamo. Nena Ho ngoka ha mono meholamo, ote ku futu.

⁷ Ngele tamu galikana, inamu popyagana ongaapagani mboka ye shi, ohaa uvilwa omolwomapopyagano gawo.

⁸ Ano inamu ya fa, oshoka Ho yeni oku shi shi nale shoka mwa pumbwa, manga inaamu mu indila.

⁹ One omu na oku galikana ngeyi: ‘Tate yetu, ngu u li megulu: Edhina lyoye nali yapulwe,

¹⁰ Oshilongo shoye nashi ye, Ehalo lyoye nali gwanithwe kombanda yevi wo ngaashi megulu.

¹¹ Tu pa wo nena oshithima shetu shesiku kehe.

¹² Dhima po oondjo dhetu, ngashika natse wo tatu dhimi po dhaamboka ya yono kutse.

¹³ Ino tu fala mehongololo, aawe, tu hupitha muuwinayi. Oshoka Oshilongo oshoye, oonkondo odhoye, nesimano olyoye, aluhe sigo aluhe. Amen’

¹⁴ “Oshoka ngele hamu dhimine po aantu omayono gawo, nena Ho yeni yomegulu ote mu dhimine po wo omayono geni.

¹⁵ Ihe ngele ihamu dhimine po aantu omayono gawo, nena Ho yeni yomegulu ite mu dhimine po omayono geni.”

¹⁶ “Ngele tamu idhilike iikulya, inamu lulika iipala yeni, ongaashi aafudhime haa ningi. Oshoka ohaa kala noshizimbi miipala yawo, opo ya monike kaantu, oyi idhilika iikulya. Ongame tandi mu lombwele: Oyo ya pewa ondjambi yawo.

¹⁷ Ihe ngoye ngele to idhilike iikulya, gwayeka omutse gwoye omagadhi, ngu u yoge oshipala shoye.

¹⁸ Nena ito dhimbululwa kaantu kutya owi idhilika iikulya, ihe okuHo awike ngoka e li meholamo; naHo ngoka ha mono meholamo, ote ku futu.”

¹⁹ “Inamu ilikolela omaliko kombanda yevi, moka haga yonwa po koothithi nokoshushi noku na aafuthi yokuteya po nokuyaka po.

²⁰ Ihe ilikoleleni omaliko megulu, moka kaamu na oothithi noshushi yokuyona po, nokaamu na aafuthi yokuteya po nokuyaka po.

²¹ Oshoka kokuma nkoka ku na eliko lyoye, oko ku na nomwenyo gwoye wo.”

²² “Omeho ogo olamba yolutu. Ano omeho goye ngele omandjolowele, nena olutu lwoye aluhe olu na uuyelele.

²³ Ihe omeho goye ngele kage li nawa, nena olutu lwoye aluhe olu li momilema. Ano uuyelele mbuka u li mungoye ngele omilema, nena omilema otadhi kala dhi thike peni!”

²⁴ “Kaku na ngoka ta vulu okulongela aawa yaali; oshoka ota tondo gumwe, ye e ta kala e hole mukwawo, nenge ta simaneke nguka, ye ta dhini ngwiyaka. Kamu vulu okulongela Kalunga pamwe nemona.

²⁵ “Nomolwashika otandi mu lombwele mwaa se oshimpwiyu shokulya nokunwa, opo mu kale mu na omwenyo, nenge omalutu geni mu zale shike. Omwenyo nani kagu vule iikulya? Nenge olutu kalu vule oonguwo?

²⁶ Taleni oondhila dhokegulu. Nando ihadhi kunu, dho ihadhi teya, dho ihadhi pungula miigandhi, Ho yeni yomegulu ohe dhi palutha. Ano hane mboka mu dhi vule?

²⁷ Olye ando gwomune ta vulu nando okugwedha ko noshimpwiyu she kuule womasiku gokukalamwenyo kweand?

²⁸ “Oshike mwa kala mu na oshimpwiyu shoonguwo? Taleni nokundhindhilika oongala dhokelundu, nkene hadhi koko. Odho ihadhi longo, dho ihadhi iningile oonguwo.

²⁹ Ihe ngame otandi mu lombwele: NaSalomo meopalo lye alihe ina zala a fe yimwe yadho.

³⁰ Ano Kalunga ngele ta zaleke omwiidhi gwokelundu ngoka gwa thikama owala nena, ihe ngula otagu umbilwa meziko, unene ano ne mboka yeitaalo enkundi ite shi mu ningile ando?

³¹ “Inamu kala mu na oshimpwiyu mu tye: ‘Otatu li shike?’ nenge: ‘Otatu nu shike?’ nenge: ‘Otatu zala shike?’

³² Ayihe mbika otayi lalakanenwa kaapagani. Oshoka Ho yeni yomegulu oku shi shi kutya omwa pumbwa mbika ayihe.

³³ Tangotango kongeni Oshilongo shaKalunga nuuyuuki we, nena mbika ayihe otamu yi gwedhelwa ko.

³⁴ Inamu sila esiku lyanofu oshimpwiyu, oshoka esiku lyanofu otali isile lyo lyene oshimpwiyu. Oshoka esiku kehe olya gwana nuudhigu walyo.”

7

¹ “Inamu pangula yakweni, opo Kalunga kee mu pangule.

² Oshoka omukalo ngoka tamu gu pangulitha yakweni, ogwo Kalunga te ke mu pangulitha, noshiyelekitho shoka tamu shi yelekitha yakweni, osho Kalunga te ke mu yelekitha.

³ Ongiini ano wa tala okahwandu okashona ke li meho lyamukweni, ihe endangalati li li meho lyoye ku li wete?

⁴ Nenge oto vulu ngiini okulombwela mukweni: ‘Andiya, ndi kuthe mo okahwandu ke li meho lyoye,’ ihe ngoye ou na endangalati meho lyoye mwene?

⁵ Mufudhime ngoye, kutha mo tango endangalati meho lyoye mwene, opo ihe u tale, ngele oto vulu okukutha mo okahwandu ke li meho lyamukweni.”

⁶ “Shoka oshiyapuki inamu shi gandja koombwa, opo dhaa ka galuke e tadhi mu ponokele. Iimona yeni inamu yi umbila iingulu, opo yaa ke yi lyatagule nomakondo gayo.”

⁷ “Indileni, e tamu pewa; kongeni, e tamu mono; konkoleni, e tamu egululwa.

⁸ Oshoka kehe ngoka ti indile, ota pewa; naangoka ta kongo, ota mono; naangoka ta konkola, ote egululwa.

⁹ Nenge mokati keni omu na tuu omuntu, omwana ngele te mu indile oshikwiila, ye te mu pe emanya?

¹⁰ Nenge te mu indile ohi, ye te mu pe eyoka?

¹¹ Ano one mboka aawinayi ngele omu shi okupa aana yeni omagano omawanawa, unene tuu Ho yeni yomegulu ota gandja omagano omawanawa kumboka taye mu indile.”

¹² “Onkee ano shaa shoka mwa hala aantu ye mu ningile, osho ya ningileni wo. Ndjika oyo ompango nomahunganeko.”

¹³ “Indeni mo, mu pitile mosheelo shoka sha patekidha, oshoka osheelo shoka oshinene nondjila ndjoka ya mbwalangandja otayi fala mekano, noku na oyendji mboka taye yi lamba.

¹⁴ Ihe osheelo shoka oshishona nondjila ndjoka ya thinana otayi fala komwenyo, naashona yowala mboka taye yi mono.”

¹⁵ “Angaleni aahunganeki aafundja mboka taye ya kune molupe lwoonzi, ihe meni lyawo omambungu haga lyana.

¹⁶ Otamu ya dhimbulula kiiyimati yawo. Ndishi oomviinu ihadhi likolwa komano nenge oonkwiyu komankono?

¹⁷ Ano okehe tuu omuti omwaanawa otagu imi iiyimati iiwanawa, ihe omuti omwiinayi otagu imi iiyimati iiwinayi.

¹⁸ Omuti omwaanawa kagu wapa okwiima iiyimati iiwinayi, nomuti omwiinayi kagu wapa okwiima iiyimati iiwanawa.

¹⁹ Kehe omuti itaagu imi iiyimati iiwanawa, otagu kewa po e tagu umbilwa momulilo.

²⁰ Onkee ano otamu ya dhimbulula kiilonga yawo.”

²¹ “Hakehe ngoka ti ithana ndje ‘Omuwa, Omuwa’, ta yi mOshilongo shegulu, aawe, oye tuu ngoka ta gwanitha ehalo lyaTate yomegulu.

²² Mesiku ndyoka oyendji otaa ka lombwela ndje taa ti: ‘Omuwa, Omuwa! Hatse tuu mboka tu uvitha medhina lyoye notwa tidha mo oompwidhuli medhina lyoye notwa longo iilongankondo oyindji medhina lyoye?’

²³ Nena ongame tandi ya lombwele: ‘Kandi mu shi noshitonale. Zii po pungame, one aakolokoshi!’ ”

²⁴ “Oshoka kehe tuu ngoka tu uvu oohapu ndhika dhandje nota vulika kudho, oye ta yelekwa nomulumentu omunandunge a tungile ongulu ye kemanya.

²⁵ Omvula oya loko, efundja lye ya, noombepo odha pepe dhi itsu mongulu ndjoka, ihe inayi kumuka po, oshoka ekankameno lyayo olya li kemanya.”

²⁶ “Nakehe tuu ngoka tu uvu oohapu ndhika dhandje, ye ita vulika kudho, ota yelekwa nomulumentu egoya a tungile ongulu ye pehekevi.

²⁷ Omvula oya loko, efundja lye ya, noombepo odha pepe dhi itsu mongulu ndjoka, e tayi kumuka po, nekumuko lyayo olya li enene.”

²⁸ Jesus sho a mana okupopya oohapu ndhoka, aantu oya kuminwa elongo lye.

²⁹ Oshoka okwe ya longo ngaangoka e na oonkondo, haangaashi aalongimpango yawo.

8

¹ Jesus sho a kuluka ko kondundu, oongundu oonene dhaantu odhe mu landula.

² Nena omunashilundu e ya kuye nokwa tsu oongolo poompadhi dhe a ti: “Omuwa, ngele wa hala, oto vulu okwaaludha ndje.”

³ Jesus okwa ganeke oshikaha she nokwe mu kwata e ta ti: “Onda hala, yela!” Mbalambala oshilundu oshe mu etha po.

⁴ Jesus okwa ti kuye: “Pulakena! Ino shi popya nando okulye. Inda owala, u ki iyulike komuyambi, u gandje omagano gealuko gu uthwa kuMoses, opo ge ya ningile onzapo, kutya owa aluka.”

⁵ Jesus sho e ya muKapernaum, omukuluntu gwaakwiita Omuroma okwe ya kuye nokwe mu hehela

⁶ a ti: “Omuwa, omumati gwandje okwa lala kegumbo ta alukwa, e na uuvu wombanda nuuwehame owindji.”

⁷ Jesus okwa ti kuye: “Otandi ya, ndi mu aludhe.”

⁸ Omukuluntu gwaakwiita okwa yamukula a ti: “Omuwa, ngame inandi opala, u ye mondunda yandje. Popya owala ohapu yimwe, omumati gwandje nota aluka.

⁹ Oshoka nangame wo omuntu omupangelwa, ihe ondi na aakwiita mepangelo lyandje. Otandi lombwele nguka: ‘Inda!’ nota yi, nomukwawo: ‘Ila!’ note ya, nomupika gwandje: ‘Longa shika!’ note shi longo.”

¹⁰ Jesus sho e shi uvu, okwa kumwa nokwa ti kumboka ye mu landula: “Ongame tandi mu lombwele, mAaisraeli inandi mona mo nando gumwe e na eitaalo li thike pundika.

¹¹ Natango otandi mu lombwele: Oyendji otaa ka za kuuzilo nokuuninginino notaa ka kuutumba koshililo pamwe naAbraham, Isak naJakob mOshilongo shegulu.

¹² Ihe aana yOshilongo otaye ku umbilwa momilema dhopondjelela, moka tamu ka kala elilagano neikokoto lyomayego.”

¹³ Opo ihe Jesus okwa lombwele omukuluntu gwaakwiita: “Inda ano! Ngaashi wi itaale, osho u ningilwe.” Omumati gwe nokwa aluka ethimbo olyo tuu ndyoka.

¹⁴ Jesus sho e ya megumbo lyaPetrus, okwa adha yinamweno yaPetrus a ala olwiidhi.

¹⁵ Oye e mu kwata koshikaha, olwiidhi nolwe mu thigi po. Yinamweno yaPetrus okwa thikama e ta yakula Jesus.

¹⁶ Ano sho kwa ningi ongulohi, aantu oye eta aanampwidhuli oyendji kuJesus. Oombepo dha nyata okwe dhi tidhitha mo ohapu nokwa aludha ayehe mboka ya li taa alukwa.

¹⁷ Okwe shi ningi, opo dhi gwanithwe ndhoka dha popiwa komuhunganeki Jesaja, ngoka ta ti: “Oye okwi itsike uunkundi wetu nomavu getu okwe ga humbata.”

¹⁸ Jesus sho a mono ongundu yaantu ye mu kundukidha, okwe ya lombwele, ya taagulukile komunkulo gwahandiyaka yefuta.

¹⁹ Opo ihe omulongimpango gumwe okwe ya kuye ta ti: “Muhongi, onda hala oku ku landula shaa mpoka to yi.”

²⁰ Jesus okwa ti kuye: “Oombandje odhi na omakwena, noondhila odhi na iihandhila, ihe Omuna gwOmuntu ke na mpoka ta langeke omutse gwe.”

²¹ Gumwe ishewe gwomaalongwa ye okwa ti kuye: “Omuwa, pitika ndje manga, ndi ye, ndi ka fumvike tate.”

²² Jesus okwa ti kuye: “Landula ndje! Etha aasi, ya fumvike aasi yawo.”

²³ Jesus okwa yi mowato, naalongwa ye oye mu landulile mo.

²⁴ Ombaadhilila oshikungulu oshidhigu osha tukuluka mefuta. Owato noya kuwikilwa komakuthikuthi, ihe Jesus okwa li a kotha.

²⁵ Aalongwa oye ya kuye noye mu pendutha ya ti: “Omuwa, tu hupitha, otatu ningine mo!”

²⁶ Jesus okwa ti kuyo: “Ooyitaali ne aankundi, omolwashike mwa tila?” Opo ihe okwa thikama nokwa ganda ombepo nomakuthikuthi, e taku ti thilu.

²⁷ Aantu oya kumwa noya ti: “Nguno omuntu a tya ngiini, ombepo nomakuthikuthi sho tayi vulika kuye?”

²⁸ Jesus nokwa taagulukile handiyaka yefuta koshilongo shAagadara, oko nkoka aanampwidhuli yaali oye mu tsakaneke ya zi moombila dhomomakololo. Oya li ya pwidhuka nayi, onkee kakwa li ngoka a wapa okweenda nondjila ndjoka.

²⁹ Oyo yi igidha ya ti: “Owe tu halela shike, Omuna gwaKalunga? Owe ya, u tu hepeke, ethimbo manga inaali thika?”

³⁰ Ihe kokule nayo okwa li ku na oshigunda oshinene shiingulu tayi napa.

³¹ Oompwidhuli nodhe mu helela dha ti: “Ngele to tu tidha mo, tu tuma moshigunda shiingulu.”

³² Oye e dhi pitika. Odho nodha yi miingulu. Oshigunda ashihe shiingulu osha nuka okuza komutuni, noshi iyumbile mefuta e tashi sile mo.

³³ Ihe aasita yiingulu oya fadhuka po noya yi koshilando e taa hokolola ashihe, naanampwidhuli nkene ya ningwa.

³⁴ Oshilando ashihe oshe ya, shi tsakaneke Jesus; ano sho ye mu mono, oye mu indile, a ze mo moshilongo shawo.

9

¹ Jesus okwa yi mowato nokwa taakana efuta e ta shuna koshilando shaandjawo.

² Nena okwe etelwa omulumentu e na uuvu wombanda, a lala kontala. Jesus sho a mono eitaalo lyawo, okwa lombwele omusilombanda: “Ikolelela, mumwandje, oondjo dhoye odha dhimwa po.”

³ Nena yamwe yomaalongimpango oya lombwelathana ya ti: “Nguno ota sheke Kalunga.”

⁴ Jesus sho a dhimbulula omadhiladhilo gawo, okwa ti: “Omolwashike tamu dhiladhila uuwinayi u thike mpano?

⁵ Oshipu shoshikwawo oshini po andola? Okulombwela: ‘Oondjo dhoye odha dhimwa po,’ nenge okulombwela: ‘Thikama, ngu u ende’?

⁶ Ihe opo mu kale mu shi shi, Omuna gwOmuntu oku na oonkondo kombanda yevi okudhima po oondjo,” okwa lombwele omusilombanda: “Thikama, kutha ontala yoye, u ye kaandjeni!”

⁷ Nguka okwa thikama e ta yi kaandjawo.

⁸ Aantu sho ye shi mono, oya kumwa noya hambelele Kalunga, sho a pe aantu oonkondo dhi thike mpa.

⁹ Jesus sho a zi po mpoka, okwa mono omulumentu, edhina lye Mateus, a kuutumba pongulu yoompale dhopoongamba. Oye a ti kuye: “Landula ndje!” Mateus okwa thikama e te mu landula.

¹⁰ Manga Jesus a li koshililo maandjaMateus. Aafendelithi oyendji naalunde oya kuutumba poshililo pamwe naJesus naalongwa ye.

¹¹ Aafarisayi sho ye shi mono, oya ti kaalongwa ye: “Omulongi gweni omolwashike ta lile pamwe naafendelithi naalunde?”

¹² Jesus sho e shi uvu, okwa ti: “Aandjolowele itaa pumbwa omwaaludhi, ihe aavu tuu ayeke.

¹³ Indeni ihe, mu ka konakone enyolo ndika, shoka tali ti: ‘Okusila ohenda oku vulile ndje okugandja omayambo.’ Oshoka inandi ya okwiithana mboka yi iwete aayuuki, ihe aalunde tuu.”

¹⁴ Opo ihe aalongwa yaJohannes oye ya kuJesus ya ti: “Tse naafarisayi ohatu idhilike iikulya olwindji, ihe omolwashike aalongwa yoye ihaa idhilike iikulya?”

¹⁵ Jesus okwe ya yamukulula a ti: “Aahiywa yombushiki inashi opala, ya nikithwe oluhodhi, manga ombushiki e li puyo. Omasiku tage ya, uuna ombushiki taye mu kuthwa, nena otaye ki idhilika ihe iikulya.

¹⁶ “Kaku na ngoka ta andeke onguwo onkulu noshaando oshipe, oshoka oshaando sha tya ngaaka otashi tuula onguwo, nombululu otayi ningi onene yi vule yonale.

¹⁷ Osho wo omaviinu omape itaga zilwa moompunda oonkulu. Ngele tashi ningwa, nena oompunda otadhi tuuka, nomaviinu otaga tika mo, oompunda e tadhi yonuka. Omaviinu omape oge na okuzilwa moompunda oompe, ayihe iyali notayi gamenwa.”

¹⁸ Ano manga Jesus a li te ya lombwele, omukuluntu gwosinagoga okwe ya nokwa tsu oongolo koshipala she a ti: “Omumwandje omukadhona opo a mana oondjenda ngashingeyi, ila, u mu tenteke oshikaha shoye, ye nota ningi omwenyo.”

¹⁹ Jesus okwa thikama nokwa landula omukuluntu gwosinagoga pamwe naalongwa ye.

²⁰ Nomukiintu a ala etiko lyombinzi oomvula omulongo nambali, okwa thikama konima yaJesus nokwa gumu oongenge dhonguwo ye.

²¹ Oye i ipopile a ti: “Shampa tuu tandi gumu konguwo ye, otandi aluka.”

²² Jesus okwa punguluka nokwe mu tala e ta ti: “Ikolelela, mumwandje! Eitaalo lyoye lye ku aludha.” Pethimbo tuu ndyoka omukiintu okwa aluka.

²³ Jesus sho a yi megumbo lyomukuluntu gwosinagoga, okwa mono mo oonakuhika uuhumba molwefumviko nongundu yu uyagana.

²⁴ Oye a ti: “Zii mo amuhe! Omukadhona ina sa, ihe okwa kotha.” Oyo noye mu yolo.

²⁵ Aantu sho ya tidhwa mo, Jesus okwa yi mondunda yomukadhona, okwa kwata oshikaha she nokwe mu pendutha.

²⁶ Onkundana ndjika oya taandele noshilongo shiyaka ashihe.

²⁷ Jesus sho a zi po mpoka, aaposi yaali ye mu landula noyi igidha ya ti: “Omuna gwaDavid, tu sila ohenda.”

²⁸ Jesus sho e ya megumbo, aaposi oye ya kuye. Oye okwe ya pula: “Omwi itaala tuu kutya otandi vulu oku shi ninga?” Oyo ya ti: “Eeno, Omuwa!”

²⁹ Nena Jesus okwa gumu omeho gawo nokwa ti: “Mu ningilwe shi thike peitaalo lyeni!”

³⁰ Omeho gawo noga tonata. Jesus okwe ya kumagidha noonkondo, yaahe shi popye nando okulye.

³¹ Ihe sho ya yi, oya hokolola Jesus moshilongo shiyaka ashihe.

³² Manga mbaka taa yi, Jesus okwe etelwa po omulumentu ihaa popi nokwa li e na ombepo ompwidhuli.

³³ Ompwidhuli sho ya tidhwa mo, okwa tameke okupopya. Aantu oya kumwa ya ti: “Oshinima sha tya ngeyi inatu shi mona nando onale muIsrael.”

³⁴ Ihe aafarisayi oya ti: “Oye ta tidha mo oompwidhuli koonkondo dhomukuluntu gwoompwidhuli.”

³⁵ Jesus okwe ende miilando ayihe nomomikunda adhihe. Oye okwa longo moosinagoga dhawo noku uvitha elaka etoye lyOshilongo. Okwa panga uuvu kehe noshigombo kehe.

³⁶ Sho a tala oongundu dhaantu, okwa li e ya uvitile ohenda, oshoka oya li ya hepekwa noya loloka ya fa oonzi dhaa na omusita.

³⁷ Oye okwa ti kaalongwa ye: “Iilya oyi li po oyindji, ihe aalongi oyo aashona.

³⁸ Galikaneni ano mwene gwiilya, a tume aalongi keteyo lye.”

10

¹ Jesus okwi ithana aayapostoli ye omulongo nayaali nokwe ya pe epangelo okutidha mo oombepo dha nyata nokwaaludha uuvu kehe noshigombo kehe.

² Omadhina gaayapostoli omulongo nayaali ogo ngaka: omutango oSimon, i ithanwa Petrus, nomumwayina Andreas; Jakob yaSebedeus nomumwayina Johannes;

³ Filippus naBartolomeus; Tomas naMateus, omufendelithi; Jakob yaAlfeus naTaddeus;

⁴ Simon, omulaadhi naJudas Iskariot, ngoka e mu gwaaleke.

⁵ Jesus okwa tumu mboka omulongo nayaali nokwe ya lombwele a ti: “Inamu ya kaapagani ne inamu ya moshilando nando oshimwe shAasamaria.

⁶ Indeni tango koonzi ndhoka dha kana dhomAaisraeli.

⁷ Mokweenda kweni uvitheni, mu ya lombwele mu tye: Oshilongo shegulu she ya popepi.

⁸ Aludheni aavu, yumudheni aasi, pangeni aanashilundu, tidhii mo oompwidhuli. One mwa pewa oshindji omagano, gandjeni wo omagano.

⁹ Inamu humbata iimaliwa yoshingoli nenge yoshiliveli nenge yoshikushu moondjato dheni;

¹⁰ hampunda yokweenda nayo, hahema mbali, hangaku koompadhi nenge ondhimbo. Oshoka omulongi okwi ilongela okupewa iipalutha ye.

¹¹ “Ngele tamu yi moshilando shontumba nenge momukunda, puleni, olye e li mo e shi kwiinekelwa. Kaleni moka, sigo tamu ka huma ko.

¹² Ngele tamu yi megumbo, kundii mo.

¹³ Egumbo ndyoka ngele oli shi kwiinekelwa, ombili yeni nayi kale mo, ihe ngele kali shi kwiinekelwa, ombili yeni nayi mu galukile.

¹⁴ Nongele itamu taambwa, noohapu dheni itadhi pulakenwa, zii mo megumbo ndyoka nomoshilando shoka, ne mu pupule ko ontsi koompadhi dheni.

¹⁵ Ngame otandi mu lombwele: Evi lyaSodom nolyaGomorra otali ningi ihwepo li vule oshilando shoka mesiku lyepangulo.”

¹⁶ “Ongame otandi mu tumu ongoonzi mokati komambungu. Kaleni ano mwa kotoka ongomayoka nongoonguti mwaa na okantongo.

¹⁷ Kotokeni, oshoka aantu otaye ke mu gandja koompangu notaye ke mu dhenga noongola moosinagoga dhawo.

¹⁸ Otamu ka falwa kiipala yomalenga noyaakwaniilwa omolwandje, shi ninge ompito yokuhokolola elaka etoye kuyo nokaapagani.

¹⁹ Ihe ngele taye mu gandja ngeyi kaatokoli, inamu kala mu na oshimpwiyu kutya otamu ka popya shike, oshoka otamu pewa pethimbo tuu ndyoka shoka mu na oku shi popya.

²⁰ Oshoka hane tamu popi, ihe Ombepo yaHo ta popi mune.

²¹ “Aantu aamwayinathana otaa ka gandjathana mokusa, noohe otaa gandja oyana. Aanona ota ka tsa ondumbo naakuluntu yawo notaye ya dhipaga.

²² Otamu ka tondwa kwaayehe omolwandje. Ihe ngoka ti idhidhimike sigo ehulilo, oye ta hupithwa.

²³ Ngele taye mu tidhagana moshilando shontumba, tembukileni kushilwe. Ongame tandi mu lombwele: Itamu ka mana okulonga miilando ayihe yaIsrael, sigo Omuna gwOmuntu te ya.

²⁴ “Omulongwa ke vule omulongi gwe, nomupika ke vule mwene gwe.

²⁵ Osho opala, omulongwa ngele ta ningwa ngaashi omulongi gwe nomupika ngaashi mwene gwe. Mwene gwegumbo ngele oye mu ithana Belsebul, ano unene tuu aanegumbo osho taye ya ithana wo.”

²⁶ “Ano inamu tila aantu, oshoka kaku na shoka sha siikilwa itaashi ka hololwa, naashoka sha holama itaashi ka tseyika.

²⁷ Shoka nde shi mu lombwele momilema, shi hokololeni puuyelele. Naashoka tamu shi uvu mokunongonenwa momakutsi, shi uvitheni kiihoko yoongulu.

²⁸ Inamu tila mboka taa dhipaga olutu, ihe itaa vulu okudhipaga omwenyo. Unene tileni Kalunga ngoka ta vulu okuyonagulila moheli omwenyo nolutu.

²⁹ Omanza gaali itaga landithwa po nani nando okapeni kamwe akeke? Nokuli kapu na nando olimwe lyomugo tali gwile pevi, Ho ngele ina hala.

³⁰ Nomafufu geni agehe gokomutse oga yalulwa.

³¹ Ano inamu tila: one mu vule omanza ogendji.”

³² “Kehe tuu ngoka ta hempulula montaneho kutya ogwandje, nangame wo osho tandi ka ninga puTate megulu.

³³ Ngoka ti idhimbike ndje paantu, nangame wo otandi mu idhimbike puTate megulu.”

³⁴ “Inamu dhiladhila, ngame onde ya okweeta ombili kombanda yevi. Inandi ya okweeta ombili, ihe egongamwele.

³⁵ Ongame nde ya okuhongakanitha omumati nahe, nomukadhona nayina, noshitenya shomukiintu nayinamweno.

³⁶ Aanegumbo yomuntu ngoka otaa ningi aatondi ye.”

³⁷ “Ngoka e hole he nenge yina e mu vulile ndje, oye ino opalela ndje. Ngoka e hole omwana omumati nenge omukadhona e mu vulile ndje, oye ino opalela ndje.

³⁸ Ngoka itaa humbata omushigakano gwe e ta landula ndje, oye ino opalela ndje.

³⁹ Oongoka ta kambadhala okuhupitha omwenyo gwe, ote gu kanitha, naangoka ta kanitha omwenyo gwe omolwandje, ote gu hupitha.”

⁴⁰ “Ngoka te mu taamba, ota taamba ndje, naangoka ta taamba ndje, ota taamba ngoka a tumu ndje.

⁴¹ Oongoka ta taamba omutumwa gwaKalunga molwaashoka oye omutumwa, ota mono ondjambi yomutumwa. Naangoka ta taamba omuntu omwiinekelwa molwaashoka oku shi kwiinekelwa, ota mono ondjambi yomwiinekelwa ngoka.

⁴² Naangoka ta nwetha gumwe gwaambaka aafupi oshitenga shomeya omatalala molwaashoka oye omulongwa gwandje, ongame tandi mu lombwele, oye ita kala inaa mona ondjambi ye.”

11

¹ Jesus sho a mana omalombwelo ngaka kaalongwa ye omulongo nayaali, okwa zi po pehala ndyoka. Oye a longo e tu uvithile aantu miilando yawo.

² Ihe Johannes Omushashi sho a li mondholongo, oku uvu iilonga yaKristus. Okwa tumu aalongwa ye kuye

³ oku mu pula: “Ongoye tuu nguka nakuya, nenge otu na okutegelela gulwe?”

⁴ Jesus okwe ya yamukula a ti: “Indeni, mu ka hokololele Johannes mbyoka tamu yi uvu notamu yi mono:

⁵ aaposi otaa mono ko, iilema otayi ende, aanashilundu otaa yele, oombolo otaa uvu ko, aasi otaa yumudhwa noohepele otaa uvithilwa elaka etoye.

⁶ Ihe omunelago oye tuu ngoka itaa etha ndje.”

⁷ Ano aalongwa yaJohannes sho ya yi, Jesus okwa tameke okulombwela aantu ta popi Johannes ta ti: “Mombuga omwa yile, mu ka tale shike? Enenge tali nyenganyengithwa kombepo?

⁸ Nenge omwa yile, mu ka tale shike? Omuntu a zala oonguwo dho opala? Oomboka haa zala oonguwo dho opala, oyo haa kala moombala dhaakwaniilwa.

⁹ Lombwelii ndje, omwa ka talele tuu shike? Omuhunganeki andola? Ongame tandi mu lombwele: Oye e vule omuhunganeki.

¹⁰ Johannes oye tuu ngoka a nyolwa kwa tiwa: ‘Ongame tandi tumu omutumwa gwandje, e ku tetekele. Oye ngoka te ku opalekele ondjila.’

¹¹ Ongame tandi mu lombwele: Kaku na nando ogumwe gwomaantu omunene e vule Johannes Omushashi. Ihe mOshilongo shegulu ngoka omushuushuka kwaayehe oye e mu vule.

¹² Okuza komasiku gaJohannes Omushashi sigo onena Oshilongo shegulu otashi matukilwa, noofule otaye shi hakana.

¹³ Oshoka omahunganeko agehe nompango oya hulile muJohannes Omushashi.

¹⁴ Nongele mwa hala okwiitaala, Johannes oye Elia ngoka a li e na okuya.

¹⁵ Ngoka e na omakutsi, nu uve ko!

¹⁶ “Ihe aantu yopethimbo ndika otandi ya yeleke nashike? Oya fa uunona wa kuutumba pomalandelo tau igidhile uukwawo

¹⁷ e tau ti: ‘Otse twe mu hakelele, ihe ne inamu tutula uudhano. Otse notwi imbi omaimbilo goosa, ihe ne inamu lila.’

¹⁸ Johannes okwe ya ti idhilike iikulya ye ita nu omaviinu. Oyo notaa ti: ‘Oye oku na oompwidhuli.’

¹⁹ Omuna gwOmuntu okwe ya ta li ye ta nu omaviinu. Oyo notaa ti: ‘Tala komufukedhi nonkolwi, kuume kaafendelithi nokaalunde!’ Ihe uunongo waKalunga owa hololwa kiilonga ye.”

²⁰ Jesus okwa tameke okunyenyetela iilando moka a li a ningile iilongankondo oyindji, oshoka oyo inayi itedhulula.

²¹ “Yayee ngoye, Korasin! Yayee ngoye, Betsaida! Oshoka ando muTiro nomuSidon mwa li mwa ningilwa iilongankondo mbyoka ya ningilwa mune, ando oyo oyi itedhulula nale mokuzala omahahi nokukuutumba momutoko.

²² Ihe ngame otandi mu lombwele: Tiro naSidon otayi ka ninga ihwepo yi mu vule mesiku lyepangulo.

²³ Nangoye wo Kapernaum, oto ka lengwa sigo omegulu? Aawe, oto ka kulukithilwa sigo omoheli. Oshoka ando muSodom mwa li mwa ningilwa iilongankondo ngaambika ya ningilwa mungoye, ando opo shi li sigo onena.

²⁴ Ihe otandi mu lombwele: Evi lyaSodom otali ka ninga ihwepo li mu vule mesiku lyepangulo.”

²⁵ Pethimbo olyo tuu ndyoka Jesus okwa tameke okupopya a ti: “Otandi ku hambelele, Tate, Omuwa gwegulu nogwevi, oshoka iinima mbika ongoye we yi holeke aanongo naanamayele nowe yi hololele mboka ya fa uunona.

²⁶ Eeno, Tate, shika osho she ku opalela.”

²⁷ “Iinima ayihe onde yi pewa kuTate. Kaku na ngoka a tseya Omwana, Tate oye tuu awike. Osho wo kaku na ngoka a tseya Tate, Omwana oye tuu awike, naangoka Omwana a hala oku mu hololela.”

²⁸ “Ileni kungame amuhe mwa vulwa nomwa humbatekwa uudhigu, ongame notandi mu pe evululuko.

²⁹ Itsikeni ondjoko yandje, ne mu tseye ndje, oshoka ongame omunambili nomomutima ondi ishonopeka; notamu imonene evululuko.

³⁰ Oshoka ondjoko yandje ombwanawa nomutenge gwandje omupu.”

12

¹ Inapu pita ethimbo ele, Jesus okwa pitile pokati komapya mesiku lyEsabati. Aalongwa ye oya li ya sa ondjala noya tameke okupolola omaha e taa li.

² Aafarisayi sho ye shi mono, oya ti kuJesus: “Tala, aalongwa yoye otaa ningi shono shi indikwa mesiku lyEsabati.”

³ Jesus okwa ti kuyo: “Inamu lesha nani, shoka David e shi ningi, sho a li a sa ondjala, oye mwene naantu ye?

⁴ Oye okwa yi mongulu yaKalunga nokwa li iikwiila mbyoka ya yambelwa Kalunga, ya li inaayi pitikwa okuliwa kuye mwene nokaantu ye, ndele, okaayambi ayeke.

⁵ Nenge inamu lesha mompango, aayambi sho haa yono Esabati motempeli yo kaaye na oondjo?

⁶ Ngame otandi mu lombwele: Nguka e li mpaka, oku vule otempeli.

⁷ Ando mwa tseya shika shoka tashi ti: ‘Okusila ohenda oku vulile ndje okugandja omayambo,’ ando itamu pangula mbaka inaaya yona sha.

⁸ Oshoka Omuna gwOmuntu oye Omuwa gwEsabati.”

⁹ Jesus okwa zi po mpoka e ta yi mosinagoga yawo.

¹⁰ Omo omwa li mu na omulumentu e na oshikaha sha lemana. Mboka ya li ya hala okutamaneka Jesus, oye mu pula ya ti: “Osha pitikwa tuu okwaaludha mEsabati?”

¹¹ Oye okwa ti kuyo: “Olye andola gwomune e na onzi yimwe ayike e tayi gwile moshilambo mEsabati, ite yi kwata, e yi hile mo?

¹² Ano omuntu oku vule onzi kokulekule. Onkee ano osho opala okulonga uuwanawa mesiku lyEsabati.”

¹³ Oye nokwa ti komulumentu: “Utha oshikaha shoye!” Oye nokwe shi utha, nosha aluka sha ningi sha fa oshikwawo.

¹⁴ Aafarisayi oya zi mo noya kundathana, ya dhipage Jesus.

¹⁵ Jesus sho e shi dhimbulula, okwa zi nkoka, naantu oyendji oye mu landula. Oye okwe ya aludha ayehe

¹⁶ nokwe ya indike noonkondo, kaaye mu holole.

¹⁷ Osho oohapu ndhoka dha popiwa komuhunganeki Jesaja odha gwanithwa, sho ta ti:

¹⁸ “Nguka oye omuntu gwandje nde mu hogolola. Oye ngoka ndi mu hole nonde mu hokwa. Ngame otandi mu tula Ombepo yandje, oye notu uvithile aantu ayehe epangulo.

¹⁹ Oye iha tamanana, ye iha igidha, newi lye itali uvika momapandaanda.

²⁰ Oshihenguti sha tanduka ite shi nyanyagula. Onyeka tayi tsina ite yi dhimi po, sigo uuyuuki te u thikitha mesindano.

²¹ Naantu ayehe otaye ki inekela edhina lye.”

²² Oyo ye eta kuJesus omulumentu omunampwidhuli, ngoka a li omuposi, ye ihaa popi. Jesus okwe mu aludha, oye nokwa popi e ta mono ko.

²³ Aantu ayehe oya kumwa ya ti: “Nguka ke shi nani omuna gwaDavid?”

²⁴ Ihe aafarisayi sho ye shi uvu, oya ti: “Hakusha shilwe ta tidha mo oompwidhuli ihe okoonkondo dhaBelsebul, omukuluntu gwoompwidhuli.”

²⁵ Jesus sho a dhimbulula omadhiladhilo gawo, okwa ti kuyo: “Okehe tuu oshilongo tashi itsile ondumbo, otashi yonuka po. Nakehe oshilando nenge egumbo tali itsile ondumbo, itali kala po.

²⁶ Ano Satana ngele ta tidha mo Satana omukwawo, ini itsila tuu ondumbo muye mwene, noshilongo she otashi vulu tuu okukala po?

²⁷ Ngele ngame otandi tidha mo oompwidhuli koonkondo dhaBelsebul, aana yeni otaye dhi tidha mo noonkondo dhalye? Onkee ano oyo taa ningi aapanguli yeni.

²⁸ Ihe ngele ngame otandi tidha mo oompwidhuli koonkondo dhOmbepo yaKalunga, nena Oshilongo shaKalunga oshi li pune.

²⁹ “Kaku na ngoka ta vulu okugwayela megumbo lyomunankondo, e mu yuge eliko lye okuninga ta manga tango omunankondo ngoka, opo ihe ta yugu egumbo lye.

³⁰ “Kehe ngoka kee li kombinga yandje, oye okwa tsa ondumbo nangame. Naangoka itaa gongele pamwe nangame, oye ota halakanitha po.

³¹ “Onkee ano tandi mu lombwele: Ondjo kehe nesheko kehe aantu otaye li dhiminwa po, ihe esheko lyokusheka Ombepo Ondjapuki itali dhimwa po.

³² Ngele ku na ngoka ta popi ohapu a tsa ondumbo nOmuna gwOmuntu, oye te yi dhiminwa po. Ihe ngoka ta popi ohapu a tsa ondumbo nOmbepo Ondjapuki, oye ita dhiminwa po nomuuyuni mbuka nomumbwiyaka tau ya.”

³³ “Ningeni omuti omwaanawa niiyimati yagwo iiwanawa, nenge ningeni omuti omwiinayi niiyimati yagwo iiwinayi. Oshoka omuti ohagu dhimbululwa kiiyimati yagwo.

³⁴ Oluvalo lwomayoka ne, otamu wapa ngiini okupopya uuwanawa, one sho mu li po aawinayi? Oshoka shoka shu udhilila momutima, osho shoka okana take shi popi.

³⁵ Omuntu omwaanawa ota holola mompungulo ye ombwanawa uuwanawa, nomuntu omwiinayi ota holola mompungulo ye ombwinayi uuwinayi.

³⁶ “Ngame otandi mu lombwele: Okehe tuu ohapu yowala aantu taye yi tumbula, otaye ke yi pulwa mesiku lyepangulo.

³⁷ Oshoka okoohapu dhoye ongoye to uthwa waa na oondjo, nokoohapu dhoye ongoye to pewa uusama.”

³⁸ Nena yamwe yomaalongimpango noyomaafarisayi oya pula Jesus ya ti: “Muhongi, otwa hala, u tu talithe oshikumithalonga.”

³⁹ Oye a yamukula a ti: “Aantu yopethimbo ndika aawinayi naahondeli, omwa hala oshikumithalonga, ihe itamu pewa oshikumithalonga shilwe, aawe, osho tuu shoka shomuhunganeki Jona.

⁴⁰ Oshoka ngaashi Jona a li mela lyondjambameya omasiku gatatu, osho tuu nOmuna gwOmuntu ota ka kala meni lyevi omasiku gatatu.

⁴¹ Aaninive otaa ka holoka mesiku lyepangulo pamwe nane notaye ke mu pa uusama, oshoka oyo yi itedhululithwa keuvitho lyaJona; ihe nguka e li mpaka oku vule Jona.

⁴² Omukwaniilwa omukiintu gwokuumbugantu ota ka holoka mesiku lyepangulo pamwe nane note ke mu pa uusama, oshoka oye okwa zile koha yuuyuni, a pulakene oondunge dhaSalomo; ihe nguka e li mpaka oku vule Salomo.”

⁴³ “Ombepo ya nyata ngele tayi zi momuntu, otayi endagula nomitunda dhaa na omeya, tayi kongo evululuko, yo itayi li mono.

⁴⁴ Otayi ti: ‘Otandi shuna megumbo lyandje moka nda zile.’ Ngele ya galuka, otayi li adha li li owala, lya kombwa nolyo opalekwa.

⁴⁵ Nena otayi yi notayi etelele oombepo oonkwawo heyali dhi yi vule muuwinayi. Odho tadhi ya notadhi kala moka. Nena okukala kwahugunina kwomuntu ngoka otaku ningi okwiinayi ku vule kwopetameko. Ano aantu mbaka aawinayi osho taa ka ningilwa.”

⁴⁶ Ano manga Jesus a li ta lombwele aantu, yina naamwayina aalumentu oya thikama pondje, taye mu kongo, ya hala ya popye naye.

⁴⁷ Nena gumwe gwomaantu mboka okwa ti kuye: “Tala, nyoko naamwanyoko oya thikama pondje, taye ku kongo, ya hala ya popye nangoye.”

⁴⁸ Jesus okwe mu yamukula a ti: “Meme naamwameme oolye?”

⁴⁹ Opo okwa ganeke oshikaha she kaalongwa ye e ta ti: “Tala, meme naamwameme oyo mbaka!

⁵⁰ Oshoka kehe tuu ngoka ta gwanitha ehalo lyaTate yomegulu, oye omumwameme omulumentu nomumwameme omukiintu nameme.”

13

¹ Esiku olyo tuu ndyoka Jesus okwa zi mo megumbo e ta kuutumba pefuta.

² Aantu oyendji oye mu gongalele, onkee okwa yi mowato e ta kuutumba, manga ongundu ayihe yaantu ya thikama komunkulo gwefuta.

³ Oye okwe ya lombwele iinima oyindji momayele a ti: “Omukuni okwa ka kuna.

⁴ Ano mokukuna kwe oombuto dhimwe odha gwile mondjila, noondhila odhe ya e tadhi dhi shomona po.

⁵ Dhimwe odha gwile poshipale pwaa na evi olindji. Onkee odha mene mbalambala, oshoka kapwa li evi ele.

⁶ Etango sho lya piti, omimeno odha lembe, naasho dha li dhaa na omidhi dha ya muule, odha ganya.

⁷ Dhimwe odha gwile moongwena. Oongwena sho dha koko, odhe dhi thininike.

⁸ Ihe dhimwe odha gwile mevi ewanawa nodha vala, dhimwe olwethele, dhimwe olwomilongo hamano, nadhimwe olwomilongo ndatu.”

⁹ “Ngoka e na omakutsi, nu uve ko!”

¹⁰ Aalongwa oye ya kuJesus noye mu pula ya ti: “Omolwashike to ya lombwele momayele?”

¹¹ Oye e ya yamukula a ti: “Ne omwa pewa owino okutseya iiholekwa yOshilongo shegulu, ihe yalwe inaye yi pewa.

¹² Oshoka ngoka e na, oye ota pewa, opo a kale a gwanenena. Ihe ngoka kee na, oye ota kuthwa naashoka e shi na.

¹³ Otandi ya lombwele momayele, oshoka oye na omeho gokumona, ihe ihaa mono ko, nomakutsi gokuuva, ihe ihaa uvu ko.

¹⁴ Osho ngaaka ehunganeko lyaJesaja tali ningi lyoshili sho tali ti: ‘Okuuva ohamu uvu, ihe kamu uvite ko. Okumona ohamu mono, ihe kamu wete ko.

¹⁵ Oshoka omitima dhaantu mbaka odha kukuta; ihaa uvu ko nawa. Omeho gawo oga thithikila, opo gaa mone ko, nomakutsi gawo gaa uve ko, omitima dhawo dhaa taambe, opo yaa galukile kungame, ngame ndaahe ya aludhe.’

¹⁶ “Ihe omeho geni oge na elago, sho taga monoko, nomakutsi geni, sho tagu uvu ko.

¹⁷ Otandi mu lombwele: Aahunganeki naayuuki oyendji oya li ya hala nokuhalelela okumona mbyoka tamu yi tala, yo inaye yi mona, nokuuva ndhoka tamu dhi uvu, yo inaye dhi uva.”

¹⁸ “Pulakeneni ano eyele lyomukuni shoka tali ti.

¹⁹ Okehe tuu ngoka ta pulakene oohapu dhOshilongo, kee dhi uvite ko, nena okwa fa ndhoka dha kunwa mondjila. Mwiinayi ote ya e ta yugu mo ndhoka dha kunwa momwenyo gwe.

²⁰ Ndhoka dha kunwa poshipale, oye ngoka ta pulakene oohapu note dhi taamba nziya nenyanyu,

²¹ ihe itadhi ningine muye. Ota dhiginine okathimbo kowala. Uuna tapu ya uudhigu nenge etidhagano omolwoohapu, nena mbalambala ote etha eitaalo.

²² Ndhoka dha kunwa moongwena, oye ngoka ta pulakene oohapu, ihe oshimpwiyu shuuyuni mbuka nefundjaleko lyuuyamba otayi thininike oohapu, noita imike iiyimati.

²³ Ndhoka dha kunwa mevi ewanawa, oye tuu ngoka tu uvu oohapu e te dhi dhiginine. Oye te eta iiyimati, gumwe olwethele, gumwe olwomilongo hamano nagumwe olwomilongo ndatu.”

²⁴ Jesus okwe ya lombwele ishewe eyele ekwawo a ti: “Oshilongo shegulu osha fa omuntu a kunu ombuto ombwanawa mepya lye.

²⁵ Ihe manga aantu ya kotha, omutondi okwe ya nokwa kunu omawu mokati kiilya e ta yi.

²⁶ Ano omimeno sho dha koko nodha vala, omawu oga holoka wo.

²⁷ Nena aamati ye oye ya kuye noye mu pula ya ti: ‘Omuwa, ino kuna mo nani oombuto oombwanawa mepya lyoye? Omawu oga zi peni ano?’

²⁸ Oye okwa ti kuyo: ‘Omutondi e shi ningi.’ Aamati noya ti kuye: ‘Owa hala, tu ye, tu ke ga vudhe mo?’

²⁹ Oye okwa yamukula a ti: ‘Aawe, opo mwaa vudhile omawu mumwe niilya.

³⁰ Etheni, ga koke mumwe niilya sigo esiku lyeteyo. Mesiku lyeteyo otandi lombwele aateyi: Gongeleni tango omawu, ne mu mange iihampi, opo ga fikwe po. Ihe iilya yi punguleni miigandhi yandje.’ ”

³¹ Jesus okwe ya lombwele ishewe eyele a ti: “Oshilongo shegulu osha fa omuma yosinapi, omulumentu e yi kutha nokwe yi kunu mepya lye.

³² Oyo okamuma okashuushuka ke vulike koomuma adhihe. Ihe ngele tayi koko, oyi vule iihwa ayihe. Oyo tayi ningi omuti, noondhila otadhi ya e tadhi tungile iihandhila yadho miitayi yagwo.”

³³ Jesus okwe ya lombwele ishewe eyele ekwawo a ti: “Oshilongo shegulu osha fa efulika, omukiintu e li kutha e te li pilulile muusila woontungwa ndatu, sigo auhe wa fulu.”

³⁴ Adhihe ndhoka Jesus okwe dhi lombwele aantu ta popi momayele, ye ine ya lombwela sha itaa popi momayele.

³⁵ Opo oohapu ndhoka dha popiwa komuhunganeki, dhi ninge dhoshili, sho ta ti: “Ongame tandi popi momayele; tandi popi iinima mbyoka ya li ya holekwa okuza ketameko lyuuyuni.”

³⁶ Jesus okwa laleke aantu e ta yi megumbo. Aalongwa ye oye ya kuye ya ti: “Tu fatululila eyele lyomawu gomepya.”

³⁷ Oye e ya yamukula a ti: “Ngoka a kunu ombuto ombwanawa, oye Omuna gwOmuntu.

³⁸ Epya olyo uuyuni. Ombuto ombwanawa oyo aana yOshilongo. Omawu ogo aana yaMwiinayi.

³⁹ Omutondi ngoka a kunu omawu, oye omuhindadhi. Eteyo olyo ehulilo lyuuyuni. Aateyi oyo aayengeli.

⁴⁰ Ongaashi omawu haga gongelwa e taga fikwa po momulilo, osho taku ka ningwa mesiku lyahugunina.

⁴¹ Omuna gwOmuntu ota ka tuma ko aayengeli ye, notaa ka gongolola mOshilongo she aahongololi ayehe naayehe mboka haa yono ompango.

⁴² Oyo taye ke ya umbila meziko lya hanya, moka tamu ka kala elilagano neikokoto lyomayego.

⁴³ Nena aayuuki otaa ka adhima ngetango omOshilongo shaHe. Ngoka e na omakutsi, nu uve ko!”

⁴⁴ “Oshilongo shegulu osha fa uuyamba wa holekwa mepya. Omulumentu gumwe okwe u itsu e te u holeke. Omolwenyanyu okwa yi nokwa landitha po iinima ye ayihe e ta landa epya ndiyaka.

⁴⁵ Osho wo Oshilongo shegulu osha fa omuhalithi ta kongo uuwe wo opala.

⁴⁶ Oye sho a mono okawe kamwe ke na ondilo, okwa yi nokwa landitha po ayihe e te ki ilandele.”

⁴⁷ “Osho wo Oshilongo shegulu osha fa oshiyulitho shoohi she endithilwa mefuta e tashi kwata oohi dhomaludhi agehe.

⁴⁸ Ano oshiyulitho sho shu udha, aayuli oye shi hilile komunkulo. Oyo ya kuutumba e taye dhi yoolola. Oohi oombwanawa oye dhi tula miiyuma yawo, ihe oombwinayi oye dhi ekelehi.

⁴⁹ Ano osho taku ningi pehulilo lyuuyuni. Aayengeli otaa yi notaa yoolola aawinayi maawanawa

⁵⁰ notaye ya umbile meziko lya hanya, moka tamu ka kala elilagano neikokoto lyomayego.”

⁵¹ Jesus okwe ya pula a ti: “Omu uvu ko tuu adhihe ndhoka?” Oyo ya ti: “Eeno.”

⁵² Onkee okwa ti kuyo: “Ano okehe tuu omulongimpango ta ningi omulongwa gwOshilongo shegulu, okwa fa mwene gwegumbo ta holola mompungulo ye iinima iipe niikulu.”

⁵³ Jesus sho a mana okupopya omayele ngaka, okwa zi po mpoka.

⁵⁴ Okwe ya koshilando shaandjawo nokwa longo aantu moosinagoga dhawo. Oyo ya kumwa e taa ti: “Oondunge ndhika niilongankondo okwe yi adha peni?

⁵⁵ Ke shi nani omuna gwomuhongi gwiipilangi, omuna gwaMaria, omumwayina gwaJakob, Josef, Judas naSimon?

⁵⁶ Aamwayina aakiintu hayo mbaka putse mpano? Mbika ayihe okwe yi adha peni?”

⁵⁷ Oyo ye mu nyeme. Jesus okwa ti kuyo: “Omuhunganeki iha dhinwa palwe, aawe, omoshilando tuu shaandjawo nomegumbo lyaandjawo.”

⁵⁸ Onkee ano Jesus ina vula we okuningila ko iilongankondo oyindji omolwokwaaitaala kwawo.

14

¹ Opethimbo tuu ndyoka Herodes, omuleli gwoshitine shoshilongo, oku uvu epopiwo lyaJesus.

² Herodes okwa ti kaamati ye: “Nguka oJohannes Omushashi a yumuka kuusi, onkee oonkondo dha tya ngaaka otadhi longo muye.”

³ Oshoka Herodes okwa li a kwatitha Johannes nokwe mu manga e te mu tula mondholongo omolwaHerodias, omukiintu gwamumwayina Filippus.

⁴ Oshoka Johannes okwa lombwele Herodes: “Itashi vulika, u hokane Herodias.”

⁵ Herodes okwa li a hala oku mu dhipaga, ihe okwa tila aantu, oshoka oya li ya tala Johannes, oye omuhunganeki.

⁶ Ano mesiku lyoshituthi shokuvalwa kwaHerodes omukadhona gwaHerodias okwa tutula uudhano montaneho yaamboka ya li moshituthi. Owo nowo opalele Herodes,

⁷ onkee oku uvanekele omukadhona nokugana kutya ote ke mu pa kehe tuu shoka a hala.

⁸ Omukadhona sho a adhika a ngongoshekwa kuyina, okwa ti: “Pe ndje omutse gwaJohannes Omushashi moshiyaha shika!”

⁹ Omukwaniilwa okwa nika oluhodhi ihe omolwegano lye nomolwaayenda okwa lombwele, e gu pewe.

¹⁰ Opo a tumu okutetitha ko omutse gwaJohannes mondholongo.

¹¹ Omutse gwe ogwa etwa gu li moshiyaha nogwa pewa omukadhona e te gu faalele yina.

¹² Aalongwa yaJohannes oye ya noya kutha po omudhimba e taye gu fumvike. Oyo noya yi noya hokololele Jesus.

¹³ Jesus sho e shi uvu, okwa zi po mpoka e li mowato nokwa yi e ki ikalele muuwike. Aantu sho ye shi uvu, oye mu landulile ko kolupadhi ya zi kiilando.

¹⁴ Ano Jesus sho e ya komunkulo, okwa mono ongundu onene yaantu nokwa li e ya uvitile olukeno e ta aludha aavu yawo.

¹⁵ Ano sho kwa ningi ongulohi, aalongwa ye oye ya kuye noya ti: “Pokuma mpaka omombuga yowala, netango olya toka. Laleka aantu, ya ye komagumbo, opo ye ki ilandele iikulya.”

¹⁶ Jesus okwa ti kuyo: “Inashi opala, ya ye ngaaka. Ya peni iikulya.”

¹⁷ Oyo ya ti kuye: “Mpaka otu na po iikwiila itano ayike noohi mbali.”

¹⁸ Jesus okwa ti: “Yi eteni nkuka kungame.”

¹⁹ Nokwa lombwele aantu, ya kuutumbe pomwiidhi. Ye okwa kutha ihe iikwiila itano noohi mbali, okwa ligamene kegulu e ta hambelele Kalunga, okwe yi pambula e te yi pe aalongwa ye, ye yi topolele aantu.

²⁰ Aantu ayehe oya li noya kuta e taa toola iihupe yiipambu, oontungwa omulongo nambali dhu udha.

²¹ Mboka ya lya, aalumentu omayuvi gatano, aakiintu naanona inaa yalulwa.

²² Jesus oku ulumike aalongwa, ya ye mowato, opo ye mu tetekele komunkulo gwahandiyaka yefuta, manga ye ta laleke aantu.

²³ Sho e ya laleke, okwa londo kondundu oye awike, opo a galikane. Oye okwa kala ko awike sigo ongulohi.

²⁴ Ihe owato oya adhika mefuta kokule nomunkulo noya monithwa iihuna komakuthikuthi, oshoka ombepo oye yi dhenge moshipala.

²⁵ Pethimbo lyokoongulasha Jesus okwe ya kuyo te ende kombanda yomeya.

²⁶ Ano aalongwa sho ye mu mono te ende kombanda yomeya, oya haluka e taa kugu mokule kuumbanda ya ti: “Oshiluli sho!”

²⁷ Mbalambala Jesus okwe ya popitha e ta ti: “Ikoleleni, inamu tila, ongame.”

²⁸ Petrus okwa ti kuJesus: “Omuwa, ngele ongoye, lombwela ndje, ndi ye kungoye tandi ende kombanda yomeya.”

²⁹ Jesus okwa ti kuye: “Ila.” Petrus okwa zi mowato e te ya kuJesus te ende kombanda yomeya.

³⁰ Ihe sho a mono ombepo yoshikungulu, okwa haluka nokwa tameke okuningina mo. Oye okwi igidha: “Omuwa, hupitha ndje!”

³¹ Jesus okwa ganeke mbala oshikaha she nokwe mu kwata e ta ti kuye: “Mwiitaali ngoye omunkundi, omolwashike wa limbililwa?”

³² Ano sho ya yi mowato, ombepo oya kodha.

³³ Ihe mboka ya li mowato, oya tsu oongolo koshipala she e taa ti: “Oshili ngoye Omuna gwaKalunga.”

³⁴ Oyo ya taagulukile handiyaka yetale noye ya kevi lyaGenesaret.

³⁵ Ano aantu yaankoka sho ye mu dhimbulula, oya tumu elaka muushiinda, aavu ayehe noye etwa kuye.

³⁶ Oyo yi indile Jesus, a pitike, aavu ya gume nando okoongenge dhonguwo ye. Ayehe mboka ye yi gumu, oya aluka.

15

¹ Nena aafarisayi naalongimpango ya zi kuJerusalem, oye ya kuJesus ya ti:

² “Omolwashike aalongwa yoye ihaa dhiginine omithigululwakalo dhaakulu yonale? Oshoka ihaa yogo iikaha yawo, ngele taa ka lya.”

³ Jesus okwe ya yamukula a ti: “Omolwashike nane wo hamu yono iipango yaKalunga omolwomithigululwakalo dheni?

⁴ Oshoka Kalunga okwa ti: ‘Simaneka ho nanyoko, naangoka ta tuku he nenge yina, oku na okudhipagwa.’

⁵ Ihe ne ohamu ti: ‘Oongoka ta ti kuhe nenge kuyina: Iikwatha mbyoka nda li ndi na oku ku pa ando, oyo nda gandja kuKalunga.’

⁶ Oye ita pumbwa okusimaneka he nenge yina. Ne otamu kutha oohapu dhaKalunga oonkondo omolwomithigululwakalo dheni.

⁷ Aafudhime ne, Jesaja okwe mu hunganekele dha tsa, sho ta ti:

⁸ ‘Aantu mbaka ohaa simaneke ndje owala noohapu dhomokana, ihe omitima dhawo odhi li kokule nangame.

⁹ Okulongela ndje kwawo osima yowala, oshoka otaa longo omalongo gopaipango yaantu.’ ”

¹⁰ Jesus okwi ithana aantu kuye e ta ti kuyo: “Pulakeneni, ne mu ndhindhilike.

¹¹ Haashoka tashi yi mokana, tashi nyateke omuntu, aawe, ooshoka tashi zi mokana, osho tashi nyateke omuntu.”

¹² Aalongwa oye ya kuye e taa ti: “Ou shi shi tuu kutya aafarisayi sho yu uvu oohapu ndhoka, oya ningi omwenyo omwiinayi?”

¹³ Jesus okwa yamukula: “Okehe tuu ontsika inaayi tsikwa kuTate yomegulu, otayi ka vudhwa mo nomidhi dhayo.

¹⁴ Ya etheni, oyo aakwatiketi lyaaposi aakwawo. Ngele ku na omuposi ta kwata keti lyomuposi omukwawo, nena ayehe yaali otaa gwile moshilambo.”

¹⁵ Petrus okwe mu yamukula a ti: “Tu fatululila eyele ndika.”

¹⁶ Jesus okwa ti: “Natango onkene mwaa na oondunge?

¹⁷ Kamu uvite ko nani kutya kehe tuu shoka tashi yi mokana, otashi yi mela e tashi piti mo?

¹⁸ Ihe shoka tashi piti mokana, otashi zi momwenyo. Osho shoka tashi nyateke omuntu.

¹⁹ Oshoka momwenyo ohamu zi omadhiladhilo omawinayi, omadhipago, uuholume, oluhondelo, uufuthi, omalundilathano nokusheka.

²⁰ Oyo mbika tayi nyateke omuntu. Ihe okulya niikaha inaayi yogwa itaku nyateke omuntu.”

²¹ Jesus okwa zi nkoka e ta yi popepi niilando yaTiro naSidon.

²² Omukiintu Omukaanani a zi momikunda odho tuu ndhoka, okwi igidha a ti: “Omuwa, Omuna gwaDavid, sila ndje ohenda! Omumwandje omukadhona ota hepekwa nayi kompwidhuli.”

²³ Ihe Jesus ine mu yamukula nando ohapu yimwe. Aalongwa ye oye ya kuye noye mu indile ya ti: “Mu utha, oshoka ote tu kudhile konima yetu.”

²⁴ Jesus okwa yamukula a ti: “Ngame inandi tuminwa kaantu yalwe, okoonzi ndhoka dha kana dhomAaisraeli odho adhike.”

²⁵ Omukiintu okwe ya nokwa tsu oongolo koshipala she e ta ti: “Omuwa, kwatha ndje!”

²⁶ Jesus okwa yamukula: “Inashi opala okukutha oshikwiila shuunona noku shi umbila uumbwena.”

²⁷ Omukiintu okwa ti: “Eeno, Omuwa, ihe nuumbwena wo ohau li uundjagumuke mboka tau gu koshililo shooyene yawo.”

²⁸ Nena Jesus okwe mu yamukula a ti: “Nekulu, eitaalo lyoye enene. Oto ningilwa ngaashi wa hala.” Omwana nokwa aluka pethimbo olyo tuu ndyoka.

²⁹ Jesus sho a zi ko nkoka, oku uka kefuta lyaGalilea. Oye okwa londo kondundu e ta kuutumba.

³⁰ Aantu oyendjiyendji oye ya kuye ye eta iilema, aaposi, iitiningili, aathitawi nooyakwawo oyendji. Oyo ye ya langeke poompadhi dhaJesus. Oye nokwe ya aludha.

³¹ Aantu sho ye shi mono, oya kumwa, aathitawi sho taa popi, iitiningili ya aluka, iilema tayi ende, naaposi ya tonata. Oyo ya hambelele Kalunga kaIsrael.

³² Jesus okwi ithana aalongwa ye kuye e ta ti kuyo: “Aantu mbaka ondi ya uvitile olukeno, oshoka oya menekele pungame omasiku gatatu yo kaye na shoka taa li. Ngame inandi hala oku ya laleka nondjala, opo yaa loloke mondjila.”

³³ Aalongwa ye oya ti kuye: “Mombuga yowala muka otatu adha peni iikwiila ya gwana okukutitha aantu oyendji ye thike mpano?”

³⁴ Jesus okwe ya pula: “Omu na po iikwiila ingapi?” Oyo ya ti: “Iheyali nuuhi umweumwe.”

³⁵ Jesus okwa lombwele, aantu ya kuutumbe pevi.

³⁶ Oye a kutha iikwiila iheyali noohi. Ano sho a hambelele, okwe yi pambula e te yi gandja kaalongwa ye, ye yi topolele aantu.

³⁷ Ayehe oya li e taa kuta. Oyo ya toola uupambu mboka wa hupu po, oontungwa heyali dhu udha.

³⁸ Ihe mboka ya lya, oya li aalumentu omayuvi gane, aakiintu naanona inaa yalulwa.

³⁹ Jesus sho a laleke aantu, okwa yi mowato e ta yi koshilongo shaMagadan.

16

¹ Ano aafarisayi naasadukayi oye ya kuJesus ya hala oku mu makela noye mu indile, e ya talithe oshikumithalonga shokuulika kutya ota longithwa kuKalunga.

² Jesus okwe ya yamukula a ti: “Ethimbo lyongulohi ohamu ti: ‘Otaku ka kala ombepo ombwanawa, oshoka egulu olya tiligana.’

³ Ongula onene ohamu ti: ‘Nena otatu ka mona omvula yoshikungulu, oshoka egulu olya tiligana nolya luudha.’ Omu shi kundhindhilika oshipala shegulu, ihe omandhindhiliko gomathimbo kamu shi ku ga dhimbulula.

⁴ Aantu yopethimbo ndika aawinayi naahondeli, omwa hala oshikumithalonga, ihe itamu pewa oshikumithalonga shilwe, osho tuu shoka shaJona.” Oye nokwe ya thigi po e ta yi.

⁵ Ano aalongwa sho ya taagulukile komunkulo gwahandiyaka yefuta, oya dhimbwa okweetelela iikwiila.

⁶ Jesus okwa ti kuyo: “Kotokeleni, ne mu iyageke efulika lyaafarisayi naasadukayi.”

⁷ Oyo ya lombwelathana ya ti: “Ota popi molwaashoka inaatu za ko niikwiila.”

⁸ Jesus sho e shi dhimbulula, okwa ti kuyo: “Ooyitaali ne aankundi, omolwashike tamu ilombwele kutya omolwashono inaamu za ko niikwiila?

⁹ Kamu uvite ko natango, ne inamu dhimbulukwa iikwiila mbiyaka itano kaantu omayuvi gatano, noontungwa ngapi mwa toola dhiihupe?

¹⁰ Osho wo iikwiila mbiyaka iheyali kaantu omayuvi gane, noontungwa ngapi mwa toola iihupe?

¹¹ Omolwashike kaamu uvite ko natango kutya ngame inandi popya kombinga yiikwiila? Ihe onda popi efulika lyaafarisayi naasadukayi.”

¹² Oyo noyu uvu ko ihe kutya ine ya lombwela okwiiyageka efulika lyiikwiila, ihe elongo lyaafarisayi naasadukayi.

¹³ Jesus sho e ya komikunda dhaKesarea Filippi, okwa pula aalongwa ye e ta ti: “Aantu otaa ti ngiini, Omuna gwOmuntu oye lye?”

¹⁴ Oyo oya ti: “Aantu yamwe otaa ti oJohannes Omushashi, yamwe otaa ti oElia, yamwe otaa ti oJeremia nenge gumwe gwomaahunganeki.”

¹⁵ Oye a ti kuyo: “Ne otamu tile ndje ngiini, ongame lye?”

¹⁶ Nena Simon Petrus okwe mu yamukula a ti: “Ongoye Kristus, Omuna gwaKalunga omunamwenyo.”

¹⁷ Jesus okwe mu yamukula a ti: “Ongoye omunelago, Simon yaJona, oshoka kaku na nando omuntu gumwe e ku hololele shino, aawe, oTate megulu.

¹⁸ Nangame wo otandi ku lombwele: Ongoye emanya, Petrus, nokemanya tuu ndika otandi tungile ko egongalo lyandje, lyo itali ka sindwa nando okoonkondo dheso.

¹⁹ Ongame tandi ku pe iipatululo yOshilongo shegulu. Shoka to shi manga kombanda yevi, otashi kala sha mangwa nomegulu. Ihe shono to shi mangulula kombanda yevi, nomegulu wo otashi kala sha mangululwa.”

²⁰ Nena okwi indike aalongwa ye oku shi lombwela nando omuntu kutya oye Kristus.

²¹ Okuza mpoka Jesus okwa tameke okuhololela aalongwa ye kutya oku na okuya kuJerusalem oku ka hepekwa nomahepeko ogendji kaakuluntu, kaayambi aakuluntu nokaalongimpango. Oye ta dhipagwa, ihe esiku etitatu ota yumudhwa.

²² Petrus okwe mu kutha paantu nokwa tameke oku mu ganda a ti: “Omuwa, shi valelwe, u ningwe ngaaka!”

²³ Ihe Jesus okwa punguluka e ta ti kuPetrus: “Za po pungame, Satana! Ongoye omwigo gwandje, oshoka ito dhiladhila shoka shopaKalunga, ihe ooshoka shopantu.”

²⁴ Opo ihe Jesus okwa lombwele aalongwa ye: “Ngele ku na ngoka, a hala okulandula ndje, oye ni idhimbwe ye mwene, ni itsike omushigakano gwe, ye na landule ndje.

²⁵ Oshoka oongoka a hala okuhupitha omwenyo gwe, oye te gu kanitha, ihe ngoka ta kanitha omwenyo gwe omolwandje, oye te gu ilikolele.

²⁶ Oshoka otashi kwatha shike, omuntu nando ni ilikolele uuyuni auhe, ye e ta kanitha omwenyo gwe? Nenge omuntu ota gandja shike, shi ninge ekulilo lyomwenyo gwe?

²⁷ Oshoka Omuna gwOmuntu ote ke ya e li mesimano lyaHe pamwe naayengeli ye nota futu kehe gumwe shi thike piilonga ye.

²⁸ Otandi mu lombwele: Opu na yamwe mwaambaka ya thikama mpaka itaa makele eso, sigo taa mono okugaluka kwOmuna gwOmuntu, te ya omukwaniilwa.”

17

¹ Sho pwa piti omasiku gahamano, Jesus okwa kutha Petrus nosho wo aamwayinathana Jakob naJohannes e te ya fala kondundu ondeendeka, ye ki ikalele.

² Oye kwa shituluka montaneho yawo. Oshipala she osha adhima ngetango, noonguwo dhe odha yele dha fa uuyelele.

³ Nena Moses naElia oye ya holokele noya kundathana naJesus.

⁴ Petrus okwa lombwele Jesus e ta ti: “Omuwa, opwe tu opalela mpaka okukala. Ngele owa hala, otandi dhikile mpaka omatsali gatatu, limwe olyoye, limwe olyaMoses nalimwe olyaElia.”

⁵ Ano manga ta popi, oshikogo shuuyelele oshe ya siikile. Ewi olya zi moshikogo lya ti: “Nguka Omumwandje omuholike nde mu hokwa, mu uveni!”

⁶ Aalongwa sho ye li uvu, oyi ihata iipala yawo pevi ya tilililila.

⁷ Jesus okwe ya kuyo nokwe ya gumu ta ti: “Thikameni, inamu tila.”

⁸ Sho ya yelutha omeho gawo, inaa mona we nando omuntu, Jesus oye awike.

⁹ Ano sho ya li taa kuluka kondundu, Jesus okwe ya kumagidha a ti: “Emoniko ndika inamu li hokololela nando omuntu, manga Omuna gwOmuntu inaa yumudhwa kuusi.”

¹⁰ Aalongwa oye mu pula ya ti: “Omolwashike aalongimpango taa ti kutya Elia oye e na okuya tango?”

¹¹ Jesus okwe ya yamukula a ti: “Eeno, Elia ote ya nota ku ukitha ishewe ayihe.

¹² Ihe otandi mu lombwele: Elia okwi ile nokuli, ihe aantu inaye mu dhimbulula. Oyo ye mu ningile shaa shoka ya hala. Ano osho tuu nOmuna gwOmuntu ota hepekwa kuyo.”

¹³ Aalongwa noyu uvu ko ihe kutya ote ya lombwele Johannes Omushashi.

¹⁴ Ano sho ya galukile kongundu yaantu, omulumentu gumwe okwe ya kuJesus e ta tsu oongolo koshipala she.

¹⁵ Oye a ti: “Omuwa, sila ohenda omumwandje omumati e na oshintona nuuwehame owindji, oshoka olwindji ota gwile momulilo nomomeya.

¹⁶ Onda li nde mu eta kaalongwa yoye, ihe oya nyengwa oku mu aludha.”

¹⁷ Jesus okwa yamukula a ti: “Yayee aantu yopethimbo ndika, sho mwaa na eitaalo nomwa pilaala. Osigo uunake ndi kale pune? Osigo uunake ndi na oku mu idhidhimikila? Mu eteni nkuka kungame.”

¹⁸ Jesus okwa ganda ompwidhuli, oyo noya zi muye. Omumati nokwa aluka pethimbo olyo tuu ndyoka.

¹⁹ Sho yi ikalele, aalongwa oye ya kuJesus noye mu pula ya ti: “Omolwashike twa nyengwa oku yi tidha mo?”

²⁰ Oye a ti kuyo: “Omolweitaalo lyeni enkundi. Otandi mu lombwele: Andola mu na eitaalo li thike pomuma yosinapi, ando otamu vulu okulombwela ondundu ndjika: ‘Itumba po mpaka, u hedhe nkwiyaka!’ Ando tayi itumbu po; nokaku na shoka tashi mu nyenge.

²¹ [“Ihe oludhi nduka ihalu tidhwa mo koshinima shilwe, okegalikano nokeidhiliko alike.”]

²² Ano aalongwa ayehe sho ya li ya gongala pamwe muGalilea, Jesus okwa ti kuyo: “Omuna gwOmuntu ota ka gandjwa miikaha yaantu.

²³ Oyo taye mu dhipaga, ihe esiku etitatu ota yumudhwa.” Aalongwa oya si oluhodhi noonkondo.

²⁴ Jesus naalongwa ye sho ya thiki kuKapernaum, aagongeli yiimaliwa yotempeli oye ya kuPetrus noya ti: “Omuhongi gweni oha futu tuu iimaliwa yotempeli?”

²⁵ Petrus okwa ti: “Oha futu.” Ihe Petrus sho e ya megumbo, Jesus okwa tetekele oku mu pula a ti: “Oto ti ngiini, Simon? Aakwaniilwa yokombanda yevi ohaa pula kulye oompale nomafendelo, okoyana nenge okaathigona?”

²⁶ Petrus okwa yamukula a ti: “Okaathigona.” Jesus okwa ti kuye: “Ano oyana oya manguluka.

²⁷ Ihe opo twaaye ya ningithe oomwenyo oombwinayi, inda kefuta, u umbile mo okandjolo. Kutha ohi ndjoka to yulu tango. Ngele wa makula okana kayo, oto mono mo oshimaliwa oshisiliveli. Shi kutha mo, u shi ya pe, shi ninge oompale dhetu nangoye.”

18

¹ Pethimbo tuu ndyoka aalongwa oye ya kuJesus ya ti: “Omukuluntu e vule ooyakwawo mOshilongo shegulu olye?”

² Jesus okwi ithana okanona nokwe ka thikameke mokati kawo

³ e ta ti kuyo: “Ongame tandi mu lombwele: Ngele itamu itedhulula e tamu kala mwa fa aanona, kamu na mpoka namu ka ya mOshilongo shegulu.

⁴ Onkee ano ngoka ti ifupipike ngokanona nkaka, oye omukuluntu e vule ooyakwawo mOshilongo shegulu.

⁵ Naangoka ta taamba okanona ka tya ngeyi medhina lyandje, oye ta taamba ndje.”

⁶ “Ihe ngoka ta hongolola kamwe komuushona mbuka wi itaala ndje, okwa gwana, a mangelwe emanya edhigudhigu mothingo ye, e tu umbilwa muule wefuta.

⁷ Yayee uuyuni omolwomahongololo! Oshoka omahongololo oge na okuya, ihe yayee omuntu ngoka, te ga eta.

⁸ “Oshikaha shoye nenge ompadhi yoye ngele tayi ku hongolola, yi teta ko, ngoye u yi ekelehi. Okuya momwenyo noshindimbukaha nenge noshindimbukugulu okwe ku opalela ku vule okukala niikaha iyali noompadhi mbali e to umbilwa momulilo gwaaluhe.

⁹ Eho lyoye ngele tali ku hongolola, li tsipula mo, ngoye u li ekelehi. Okuya momwenyo neho limwe okwe ku opalela ku vule okukala nomeho gaali e to umbilwa momulilo gwoheli.

¹⁰ “Taleni, mwaa dhine nando okamwe kaambuka uushona. Oshoka otandi mu lombwele: Aayengeli yawo megulu oye li aluhe koshipala shaTate megulu. [

¹¹ Oshoka Omuna gwOmuntu okwe ya okuhupitha shoka sha kana.]”

¹² “Otamu ti ngiini? Ngele omuntu e na oonzi ethele limwe, ihe yimwe yomudho tayi kana, ita thigi po ando ndhoka omilongo omugoyi nomugoyi koondundu, a ka konge ndjiyaka ya kana?

¹³ Ihe ngele e yi mono, otandi mu lombwele, oye te yi nyanyukilwa noonkondo shi vule ndhoka omilongo omugoyi nomugoyi dha li inaadhi kana.

¹⁴ Onkee ano kali shi ehalo lyaHo megulu, ku kane nando okamwe kaambuka uushona.”

¹⁵ “Mukweni ngele ta yono kungoye, inda, u ke mu pukulule, mu li po amuke yaali. Ngele te ku uvu ko, nena owe mu likola.

¹⁶ Ihe ngele ite ku uvu ko, ki ithane po gumwe nenge yaali, oohapu adhihe opo dhi ukithwe koonzapo yaali nenge yatatu.

¹⁷ Nongele ite ya uvu ko, shi lombwela egongalo. Ihe ngele itu uvu ko egongalo wo, nena mu tala ongomupagani nenge ongomufendelithi.

¹⁸ “Ongame tandi mu lombwele: Shaa shoka tamu shi manga kombanda yevi, otashi kala sha mangwa nomegulu. Ihe shono tamu shi mangulula kombanda yevi, otashi kala sha mangululwa nomegulu.”

¹⁹ “Natango otandi mu lombwele: Ngele yaali yomune kombanda yevi yu uvanene sha notaye shi indile, oyo taye shi pewa kuTate megulu.

²⁰ Oshoka mpoka pu na yaali nenge yatatu ya gongala medhina lyandje, ongame wo ondi li mokati kawo.”

²¹ Petrus okwe ya kuJesus e ta ti: “Omuwa, olungapi ndi na okudhimina po mukwetu a yono kungame? Luheyali olwa gwana?”

²² Jesus okwa ti kuye: “Otandi ku lombwele kutya haluheyali, ndele, olwomilongo heyali luheyali.

²³ Onkee ano Oshilongo shegulu osha fa omukwaniilwa a hala okuyalula oongunga dhaamati ye.

²⁴ Ano sho a tameke oku dhi yalula, okwe etelwa po gumwe e mu lile oongunga dhiimaliwa oomiliyona.

²⁵ Ihe sho a li owala, kee na sho ta futu, omuwa gwe okwa gandja elaka, a landithwe po pamwe nomukiintu gwe noyana naashihe shoka e shi na, opo oongunga dhe dhi vule okufutwa.

²⁶ Nena omumati nguno okwi ihata pevi nokwa tsu oongolo koshipala she e ta ti: ‘Tala ndje onteni, otandi ku futile adhihe.’

²⁷ Omuwa okwe mu sile ohenda nokwe mu dhimine po oongunga dhe e te mu etha, a ye.

²⁸ “Omumati nguno sho a yi pondje, okwi itsu po gumwe gwomaamati ooyakwawo ngoka e mu lile oongunga dhiimaliwa yimweyimwe ayike. Nena okwe mu kwata nokwe mu pondo e ta ti: ‘Futa oongunga dhandje!’

²⁹ Omumati ngu omukwawo okwi ihata pevi koompadhi dhe nokwe mu hehela a ti: ‘Tala ndje onteni, otandi ku futile.’

³⁰ Ihe okwa tindi ashike nokwa yi e te mu edhililitha mondholongo sigo ta futu oongunga dhe.

³¹ Ihe aamati ooyakwawo sho ya mono shono sha ningwa po, oya si oluhodhi noonkondo noya hokololele omuwa gwawo ayihe.

³² Nena omuwa gwe okwe mu ithana, e ye kuye, nokwa ti: ‘Mumati ngoye omwiinayi, oongunga dhoye adhihe onde dhi ku dhimine po, sho wa hehela ndje.

³³ Nangoye wo owa li u na okusila omumati mukweni ohenda, ngaashi ngame nde ku sile ohenda.’

³⁴ Omuwa okwa geye nokwe mu gandja, e ke edhililwe mondholongo, sigo ta futu iinima ayihe, e yi mu lile oongunga.

³⁵ “Tate yomegulu osho te mu ningile wo, ngele itamu dhimine po omuntu kehe nomwenyo aguhe.”

19

¹ Jesus sho a mana okupopya oohapu ndhoka, okwa zi muGalilea e tu uka komikunda dhaJudea handiyaka yaJordan.

² Oongundu oonene dhaantu odhe mu landula. Oye nokwe ya aludha.

³ Aafarisayi oye ya kuye oku mu makela ya ti: “Oshu uka tuu, omulumentu ngele ta henge po omukiintu gwe omolwoshinima kehe?”

⁴ Jesus okwe ya pula wo a ti: “Inamu lesha nani kutya petameko Omushiti okwe ya shiti omulumentu nomukiintu?

⁵ Onkee ano omulumentu e na okuthiga po he nayina e ti ihanganitha nomukiintu gwe, ayehe yaali e taa ningi omuntu gumwe.

⁶ Kaye li we yaali, aawe, oyo omuntu gumwe. Ano shono Kalunga e shi tula kumwe, inashi kuthwa kumwe komuntu.”

⁷ Aafarisayi oye mu pula ya ti: “Omolwashike Moses a pitika, omulumentu a gandje onzapo yehengo komukiintu gwe, e mu ethe po?”

⁸ Jesus okwe ya yamukula a ti: “Moses okwa pitika, mu henge po aakiintu yeni omolwokwaahavulika kweni. Ihe hasho sha li ngaaka petameko.

⁹ Ihe ngame otandi mu lombwele: Oongoka ta henge po omukiintu gwe omolwoshinima shilwe shaa shi oluhondelo e ta hokana gulwe, oye ota hondele. Naangoka ta hokana omuhengwa, oye ota hondele.”

¹⁰ Aalongwa oya ti kuJesus: “Ano ngele okukala kwomulumentu nomukiintu gwe okwa tya ngeyi, nena okuhokana inaku opala.”

¹¹ Jesus okwa ti kuyo: “Haayehe taa uvu ko oohapu ndhika, aawe, oomboka ayeke ye shi pewa.

¹² Oshoka oku na oonakwiikalela nkene tuu ya valwa, oye li ngaaka okuza mela lyayina. Oku na wo mboka ya ningwa oonakwiikalela kaantu. Oku na ishewe mboka yi iningi oonakwiikalela yoyene omolwOshilongo shegulu. Oongoka ta vulu oku dhi taamba, ne dhi taambe.”

¹³ Aantu yamwe oye eta uunona kuJesus, opo e u tenteke iikaha ye, ye a galikane. Aalongwa noya ganda mboka ye u eta.

¹⁴ Ihe Jesus okwa ti: “Etheni uunona, u ye kungame, inamu u keelela ko, oshoka Oshilongo shegulu oshaamboka ye u fa.”

¹⁵ Oye okwe u tenteke iikaha ye, e ta yi.

¹⁶ Nena omulumentu gumwe okwe ya kuJesus e ta ti: “Muhongi, nandi longe uuwanawa washike, ndi mone omwenyo gwaaluhe?”

¹⁷ Jesus okwa ti kuye: “Omolwashike to pula ndje kutya oshiwanawa oshini po? Gumwe awike omwaanawa. Ngele owa hala okuya momwenyo, gwanitha iipango.”

¹⁸ Oye okwa pula Jesus a ti: “Oyini po?” Jesus okwe mu yamukula a ti: “Oombika: ‘Ino dhipaga,’ ‘Ino hondela,’ ‘Ino yaka,’ ‘Ino lundila,’

¹⁹ ‘Simaneka ho nanyoko,’ ‘Hola mukweni ngaashi ngoye wi ihole mwene.’ ”

²⁰ Omugundjuka okwa ti kuye: “Ayihe mbika onde yi gwanitha. Oshike nde shi pumbwa natango?”

²¹ Jesus okwe mu yamukula a ti: “Ngele owa hala, u kale wa gwana wa pwa, inda, u ka landithe po ayihe mbyoka u na, iimaliwa e to yi pe oohepele, ngoye e to kala u na eliko megulu. Ila ihe, u landule ndje.”

²² Omugundjuka sho u uvu oohapu ndhoka, okwa zi po a sa oluhodhi, oshoka okwa li e na eliko olindji.

²³ Opo Jesus okwa ti kaalongwa ye: “Ongame tandi mu lombwele: Omuyamba oku na uudhigu okuya mOshilongo shegulu.

²⁴ Niishewe tandi mu lombwele: Okupitila kwongamelo mombululu yonane ihwepo ku vule okuya kwomuyamba mOshilongo shaKalunga.”

²⁵ Aalongwa sho ye shi uvu, oya haluka noonkondo noya pula e taa ti: “Olye ano ta vulu okuhupithwa?”

²⁶ Jesus okwe ya tongolola e ta yamukula: “Eeno, aantu ohaa nyengwa, ihe Kalunga iha nyengwa kusha.”

²⁷ Nena Petrus okwa ti kuJesus: “Tala, otse twa thigi ko iinima ayihe e tatu ku landula. Otatu ka pewa shike?”

²⁸ Jesus okwe ya yamukula a ti: “Ongame tandi mu lombwele: Muuyuni mboka uupe Omuna gwOmuntu sho ta ka kuutumba koshipangelapundi shesimano lye, nane wo mboka mwa landula ndje, otamu ka kuutumba kiipangelapundi omulongo niiyali, mu pangule omazimo gaIsrael omulongo nagaali.

²⁹ Nokehe tuu ngoka a thigile ko egumbo nenge aamwayina aalumentu nenge aamwayina aakiintu nenge he nenge yina nenge oyana nenge epya omolwandje, ote ke yi mona lwethele yi vule mbika, nomwenyo gwaaluhe ote gu pewa.

³⁰ Ihe aatango oyendji otaa ka ninga aahugunini, naahugunini oyendji otaa ka ninga aatango.”

20

¹ “Oshilongo shegulu osha fa omusamane a meneka, a ka kongele eyana lye lyomiviinu aalongi.

² Sho yu uvathana naalongi oshimaliwa shesiku, okwe ya tumu keyana lye lyomiviinu.

³ Ano sho a piti mo potundi ontimugoyi, okwa mono ko yamwe ya thikama owala pomalandelo.

⁴ Oye a ti kuyo: ‘Nane wo indeni keyana lyomiviinu, otandi ke mu futa pauyuuki.’

⁵ Oyo noya yi. Oye a piti mo ishewe potundi ontimulongo nambali nopontitatu nokwa ningi ngaashi a ningile.

⁶ Oye a piti mo ishewe potundi ontintano nokwa adhele ko ishewe yamwe ya thikama e ta ti kuyo: ‘Omolwashike mwa thikama owala mpaka esiku alihe?’

⁷ Oyo ya ti kuye: ‘Oshoka katu na ngoka e tu hiya.’ Oye a ti kuyo: ‘Nane wo indeni keyana lyandje lyomiviinu.’

⁸ “Ano sho kwa ningi ongulohi, mwene gweyana lyomiviinu okwa lombwele elenga lye a ti: ‘Ithana aalongi, u ya fute ondjambi yawo. Tameka kumboka yahugunine sigo okumboka yotango.’

⁹ Mboka ye ya potundi ontintano, oya pewa kehe gumwe oshimaliwa she.

¹⁰ Mbeyaka yotango sho ye ya, oya li ye shi, otaa pewa oshindji shi vule shayakwawo, ihe nayo wo oya pewa ondjambi oyo tuu ndjoka.

¹¹ Sho ye yi pewa, oya tameke okutamaneka mwene gweyana

¹² e taa ti: ‘Aahugunini oya longo otundi yimwe ayike, ihe ngoye owe ya yeleke natse mbaka twa longo esiku alihe momutenya omupyu.’

¹³ “Nena mwene gweyana okwa yamukula gumwe gwomuyo e ta ti: ‘Kuume kandje, inandi ku yuga. Inatu uvathana nani ondjambi oyo tuu ndjono?

¹⁴ Kutha po yoye, u ye. Ngame onda hala okupa nguka omuhugunini shi thike pushika shoye.

¹⁵ Ondi indikwa nani okuninga ngaashi nda hala niimaliwa yandje? Nenge ou na efupa molwashoka ngame ndi na ohenda?’ ”

¹⁶ Jesus nokwa hulitha a ti: “Osho aahugunini otaa ka ninga aatango, naatango otaa ka ninga aahugunina.”

¹⁷ Jesus sho kwa li ta londo ta yi kuJerusalem, okwa kutha aalongwa mboka omulongo nayaali. Manga ya li mondjila, okwe ya lombwele yi ikalela a ti:

¹⁸ “Tala, otatu yeni kuJerusalem, hoka Omuna gwOmuntu ta ka gandjwa miikaha yaayambi aakuluntu noyaalongimpango, notaye mu pangulile eso.

¹⁹ Oyo otaye ke mu gandja ishewe kaapagani, mboka taye mu sheke e taye mu dhenge notaye mu alele komushigakano, ihe esiku etitatu ota yumudhwa.”

²⁰ Nena yina yaana yaSebedeus okwe ya kuJesus pamwe noyana mboka nokwa tsu oongolo koshipala she oku mu pula sha.

²¹ Jesus okwe mu pula a ti: “Owa hala shike?” Oye a yamukula a ti: “Pitika aamwandje mbaka yaali, ya ka kuutumbe gumwe okolulyo lwoye nomukwawo okolumoho lwoye mOshilongo shoye.”

²² Jesus okwe mu yamukula a ti: “One inamu tseya shoka mwe shi hala. Otamu vulu tuu okunwa oshitenga shoka tandi ke shi nwa?” Oyo oya ti kuye: “Otatu shi vulu.”

²³ Jesus okwa ti kuyo: “Oshitenga shoka otamu ke shi nwa, ihe okukuutumba kolulyo lwandje nenge kolumoho lwandje hangame tandi ku utha, ihe okwaamboka ye ku longekidhilwa kuTate.”

²⁴ Aalongwa mbeyaka omulongo sho ye dhi uvu, oya geyele aamwayinathana mboka yaali.

²⁵ Jesus okwe ya ithana ayehe e ta ti kuyo: “One omu shi shi, aapangeli ohaa lele iigwana, naanenentu ohaye yi pangele pankondo dhawo.

²⁶ Ihe inashi kala ngaaka mokati keni. Ngoka gwomune a hala, a ninge omunene, oye na ninge omuyakuli gweni.

²⁷ Naangoka gwomune a hala, a ninge gwotango, oye na kale omupika gweni.

²⁸ Oshoka nOmuna gwOmuntu ine ya okuyakulwa, ihe okuyakula nokugandja omwenyo gwe, a hupithe oyendji.”

²⁹ Sho ya zi mo muJeriko, aantu oyendjiyendji oya landula Jesus.

³⁰ Aaposi yaali oya kuutumba mooha dhondjila. Sho yu uvu, Jesus te ende po, oyi igidha mokule ya ti: “Omuwa, Omuna gwaDavid, tu sila ohenda!”

³¹ Aantu oye ya ganda, ya mwene. Ihe oya dhiginine okwiigidha mokule ya ti: “Omuwa, Omuna gwaDavid, tu sila ohenda!”

³² Jesus okwa thikama nokwe ya ithana e te ya pula: “Omwa hala, ndi mu ningile shike?”

³³ Oyo oya ti kuye: “Omuwa, otwa hala, omeho getu ga tonatithwe.”

³⁴ Jesus okwe ya sile ohenda nokwa gumu omeho gawo; mbalambala oya tonata e taye mu landula.

21

¹ Sho yi ihilile kuJerusalem, oya thiki kuBetfage, popepi nOndundu yooholivi. Nena Jesus okwa tetekelitha aalongwa ye yaali

² e ta ti kuyo: “Indeni komukunda ngwiyaka gu li komeho geni. Nziyanziya otamu mono okasino okakiintu ka pandekwa nontana yako. U pandukululeni, ne mu u ete kungame.

³ Nongele ku na ngoka ta ti sha kune, mu lombweleni mu tye: ‘Omuwa e u pumbwa. Oye ote u galula mbala.’ ”

⁴ Shika osha ningwa, opo oohapu ndhoka dha popiwa komuhunganeki, dhi tse, sho ta ti:

⁵ “Lombweleni oshilando shaSion: ‘Tala, omukwaniilwa gwoye te ya kungoye. Oye omunambili a kayila okasino. Oye a kayila ontana, ona yokasino haka longithwa.’ ”

⁶ Aalongwa oya yi noya ningi, ngaashi Jesus e ya lombwele.

⁷ Oyo ye eta okasino okakiintu nontana yako noya yala oonguwo dhawo kuwo, Jesus e ta kuutumba ko.

⁸ Ihe ongundu onene yaantu oya yala oonguwo dhawo mondjila. Yamwe oya tete iitayi yomiti e taye yi yala mondjila.

⁹ Ano oongundu dhaamboka ya kwata komeho naamboka ye mu landula, oyi igidha mokule ya ti: “Hosianna, Omuna gwaDavid! Na lalekwe nuuyamba kuKalunga, oonguka te ya medhina lyOmuwa! Hosianna, gwokombandambanda!”

¹⁰ Ano sho e ya muJerusalem, oshilando ashihe osha piyagana. Aantu oya pula ya ti: “Olye nguka?”

¹¹ Oongundu odha yamukula: “Nguka oye Jesus, omuhunganeki gwomuNasaret shaGalilea.”

¹² Jesus okwa yi motempeli e ta tidha mo ayehe ya li taa landa notaa landitha motempeli. Oye okwa tilehi iitaafula yaapingakanithi yiimaliwa niipundi yaahalithi yoonguti

¹³ nokwa ti: “Okwa nyolwa: ‘Ongulu yandje oyi na okwiithanwa ongulu yegalikano,’ ihe ne omwe yi ninga ombogo yaayugi.”

¹⁴ Aaposi niilema oye ya kuye motempeli, oye nokwe ya aludha.

¹⁵ Ano aayambi aakuluntu naalongimpango oya geye, sho ya mono iikumitha e yi longo, naanona mboka yi igidha motempeli ya ti: “Hosianna, Omuna gwaDavid!”

¹⁶ Oyo oye mu pula ya ti: “Ou uvite ko mbano shoka taa ti?” Jesus okwa ti kuyo: “Eeno. Inamu lesha nani nando lumwe, sho taku tiwa: ‘Momakana guunona noguuhanona owa longekidhile mo ehambelelo.’ ”

¹⁷ Jesus okwe ya thigi po e ta zi mo moshilando. Oye okwa yi kuBetania nokwa kala ko uusiku auhe.

¹⁸ Jesus sho a meneka ongula ta shuna koshilando, okwa li a sa ondjala.

¹⁹ Pondjila okwa mono omukwiyu nokwa yi kugwo, ihe ina mona mo sha, omafo ageke. Oye a ti kugwo: “Ku imi we iiyimati sigo aluhe.” Omukwiyu nogwa si mbala.

²⁰ Ano aalongwa sho ye shi mono, oya kumwa e taa pula: “Omukwiyu ogwa si ngiini nziyanziya?”

²¹ Jesus okwe ya yamukula a ti: “Ongame tandi mu lombwele: Andola mu na eitaalo, ne itamu limbililwa, ando otamu vulu, hashika ashike sha ningilwa omukwiyu, ihe otamu vulu wo okulombwela ondundu ndjika: ‘Itumba po mpaka, u iyundulile mefuta,’ notashi ningwa.

²² Nongele mwi itaala, otamu pewa kehe tuu shoka tamu shi indile megalikano.”

²³ Jesus sho a yi motempeli, aayambi aakuluntu naakuluntu yoshigwana oye ya kuye, manga ta longo aantu, e taye mu pula: “Okoonkondo dhalye ho longo ngeyi? Olye e ku pa epitikilo?”

²⁴ Jesus okwe ya yamukula a ti: “Nangame wo otandi mu pula epulo limwe. Ngele tamu li yamukula, nena nangame wo otandi mu lombwele, okoonkondo dhalye tandi longo.

²⁵ Eshasho ndyoka lya ningwa kuJohannes, olya zi peni: okuKalunga nenge omaantu?” Oya tameke okupatathana: “Natu tye ngiini? Ngele otwa yamukula: ‘OmuKalunga,’ ota ka tya: ‘Omolwashike ano inaamu itaala Johannes?’

²⁶ Ngele tatu ti ishewe: ‘Omaantu,’ nena otu na okutila aantu, oshoka aantu ayehe oya tala Johannes oye omuhunganeki.”

²⁷ Oyo oya yamukula Jesus ya ti: “Katu shi wo.” Nena Jesus okwa ti kuyo: “Ano nangame wo itandi mu lombwele, okoonkondo dhalye tandi longo ngeyi.

²⁸ “Otamu dhiladhila ngiini? Okwa li ku na omuntu e na oyana aamati yaali. Oye a yi komutango e ta ti: ‘Mumwandje, inda, u ka longe nena meyana lyandje lyomiviinu.’

²⁹ Oye a yamukula: ‘Inandi hala,’ ihe komeho okwi itedhulula e ta yi.

³⁰ He okwa yi ihe komukwawo e te mu lombwele oohapu odho tuu ndhoka. Oye a yamukula: ‘Eeno tate,’ ye ina ya.

³¹ Oguni po gwaambaka yaali a gwanitha ehalo lyahe?” Oyo oya yamukula: “Oonguka gwotango.” Jesus okwa ti kuyo: “Otandi mu lombwele: Aafendelithi noohonda otaye mu tetekele okuya mOshilongo shaKalunga.

³² Oshoka Johannes okwe ya kune e te mu ulukile ondjila yu uka ndjoka mu na oku landula, ne inamu mu itaala, ihe aafendelithi noohonda oye mu itaale. Nokomeho nando mwe shi dhimbulula, inamu itedhulula, ne inamu itaala.”

³³ Jesus okwa ti: “Pulakeneni eyele ekwawo. Okwa li ku na omusamane a tsike omiti dhomiviinu meyana lye. Oye okwe dhi gumbile enkolo, okwe dhi fulile oshilambo shokukolela mo omaviinu, okwa tungile mo ongulushungo nokwa langeke mo aalongi yeyana e ta yi kiilongo yokokule.

³⁴ Ano oomviinu sho dha tiligana, mwene gweyana okwa tumu aamati ye kaalongi yeyana, ye mu pe iiyimati mbyoka e na oku yi pewa.

³⁵ Aalongi yeyana oya kwata aamati ye, gumwe oye mu dhenge, omukwawo oye mu dhipaga nomutitatu oye mu dhipaga nomamanya.

³⁶ Oye a tumununa ko aamati yalwe ye vule mbeyaka yotango, oyo noye ya ningile ngaashi yakwawo.

³⁷ Lwahugunina okwa tumu ko omwana nokwa ti: ‘Omumwandje otaye mu tila.’

³⁸ Ihe aalongi yeyana sho ya mono omwana, oya kundathana ya ti: ‘Nguno omuthigululi, tu yeni, tu ke mu dhipageni, tse tu ye neliko lye.’

³⁹ Oyo oye mu kwata, oye mu umbu mo meyana noye mu dhipaga.

⁴⁰ “Mwene gweyana ngele a galuka, ota ningi ngiini aalongi mbano?” Jesus okwe ya pula.

⁴¹ Oyo oya ti kuye: “Aakolokoshi mboka ote ya yonagula po nayi, neyana lyomiviinu ote li pe aalongi yalwe, mboka taye mu pe iiyimati pethimbo lyo opala.”

⁴² Jesus okwa ti kuyo: “Inamu lesha nani nando olumwe mOmanyolo, sho taku tiwa: ‘Emanya ndyoka aatungi ye li ekelehi, olyo lya ningi emanya li na esimano li vule agehe. Osha ningwa kOmuwa, nosha ningi oshikumitha momeho getu.’

⁴³ “Onkee ano tandi mu lombwele. Otamu ka kuthwa Oshilongo shaKalunga e tashi ka pewa aantu haa imike iiyimati mbyoka ya pumbiwa.

⁴⁴ [Kehe tuu ngoka ta pundukile kemanya ndyoka, oye ota teka; naangoka ta gwilwa kemanya ndyoka, oye ota nyanyagulwa.”]

⁴⁵ Ano aayambi aakuluntu naafarisayi sho yu uvu omayele ngaka gaJesus, oya dhimbulula kutya oyo taa popiwa.

⁴⁶ Oyo oya kambadhala oku mu kwata, ihe oya tila aantu, oshoka oya tala Jesus oye omuhunganeki.

22

¹ Jesus okwe ya lombwele ishewe momayele a ti:

² “Oshilongo shegulu otashi yelekwa nomukwaniilwa a longekidhile omwana omumati oshituthi shohango.

³ Oye okwa tumu aamati ye, ye ki ithane aahiywa, ye ye koshituthi, ihe oya li inaa hala okuya.

⁴ Onkee okwa tumununa ko aamati yalwe e ta ti: ‘Lombweleni aahiywa kutya ngashingeyi oshituthi shandje onde shi longekidha, oondumetana niimuna yo ondodhwa oya tselwa, ashihe osha longekidhwa. Ileni kohango.’

⁵ Ihe aahiywa oya li kaaye na ko nasha; oyo ya yi. Gumwe okwa yi kepya lye, nomukwawo okwa ka halitha.

⁶ Ooyakwawo oya kwata aamati ye, oye ya hepeke e taye ya dhipaga.

⁷ Omukwaniilwa okwa geye ihe, okwa tumu ko aakwiita ye, okwa hanagula po aadhipagi mboka nokwa fike po oshilando shawo.

⁸ Oye a ti kaamati ye: ‘Oshituthi shohango osha pwa okulongekidhwa, ihe aahiywa inaye shi opalela.

⁹ Indeni ano koompagiila dhoondjila, ayehe mboka tamu mono, ya hiyeni kohango.’

¹⁰ Aamati oya yi noondjila noye eta mo ayehe mboka ya mono, aawinayi naawanawa, ohango noyu udha aayenda.”

¹¹ “Ano omukwaniilwa sho a yi okutala aayenda, okwa mono mo omuntu gumwe kee na onguwo yoshituthi.

¹² Oye okwe mu pula: ‘Kuume, owe ya mo ngiini muka waa na onguwo yoshituthi?’ Ihe oye okwa mwena.

¹³ Nena omukwaniilwa okwa ti kaamati ye: ‘Mu mangeni omaako nomagulu, ne mu mu umbile momilema dhopondjelela.’ Omo hamu kala elilagano neikokoto lyomayego.”

¹⁴ “Oshoka oyendji oyi ithanwa, ihe aashona ya hogololwa.”

¹⁵ Nena aafarisayi oya yi noya kundathana, nkene ye na okuyula Jesus moohapu.

¹⁶ Oyo ya tumu kuye aalongwa yawo pamwe naamboka ya gama kuHerodes ya ti: “Muhongi, otu ku shi kutya ongoye omunashili, iho ipula nomadhiladhilo gaantu noiho tala olupe lwomuntu.

¹⁷ Tu lombwela, oto ti ngiini, osho opala okupa omupangeli Omuroma oompale, nenge inashi opala?”

¹⁸ Jesus sho a dhimbulula uuwinayi wawo, okwa ti: “Aafudhime ne, omolwashike tamu makele ndje?

¹⁹ Ulukilii ndje oshimaliwa shoshene!” Oyo oye mu pe oshimaliwa oshisiliveli.

²⁰ Jesus okwe ya pula a ti: “Efano ndino nenyolo li li ko, olyalye?”

²¹ Oyo ya yamukula: “Olyomupangeli Omuroma.” Nena Jesus okwe ya lombwele a ti: “Ano shono shomupangeli, shi peni omupangeli, naashoka shaKalunga, shi peni Kalunga.”

²² Sho ye shi uvu, oya kumwa noye mu thigi po e taa yi.

²³ Esiku tuu ndyoka yamwe yomaasadukayi, mboka haa ti, kaku na eyumuko, oye ya kuJesus noye mu pula e taa ti:

²⁴ “Muhongi, Moses okwa tile: ‘Ngele ku na omulumentu inaa mona oluvalo, e ta si, nena omukiintu gwe na hokanwe po komumwayina, opo nakusa a monenwe oluvalo.’

²⁵ Putse mpaka opwa li aalumentu aamwayinathana yaheyali. Omutango okwa hokana nokwa si kee na oluvalo, ihe okwa thigile mumwayina omukiintu gwe.

²⁶ Osho omutiyali nomutitatu osigo tuu ayehe yaheyali.

²⁷ Hugunina omukiintu okwa si wo.

²⁸ Ano uuna aasi taa ka yumudhwa, ota ka ninga gwalye mwaambaka yaheyali?”

²⁹ Jesus okwe ya yamukula a ti: “Ne omwa puka, ne inamu tseya Omanyolo omayapuki nosho wo oonkondo dhaKalunga.

³⁰ Oshoka uuna aasi taa ka yumudhwa, itaa ka hokana noitaa ka hokanwa, aawe, megulu otaa ka kala ngaayengeli yaKalunga.

³¹ Ihe kombinga yeyumuko lyaasi inamu lesha nani ndhoka mwe dhi lombwelwa kuKalunga, sho ta ti:

³² ‘Ongame Kalunga kaAbraham, Kalunga kaIsak naKalunga kaJakob.’ Shika tashi ti, ke shi Kalunga kaasi, aawe, okaanamwenyo.”

³³ Aantu sho ye dhi uvu, oya kuminwa elongo lye.

³⁴ Aafarisayi sho yu uvu, Jesus a tompo aasadukayi, oya gongala.

³⁵ Gumwe gwomuyo, omunongompango, okwe mu makele ta ti:

³⁶ “Muhongi, oshipango oshinene shomompango oshini po?”

³⁷ Jesus okwa ti kuye: “ ‘Hola Omuwa Kalunga koye komutima gwoye aguhe nokomwenyo gwoye aguhe nokomadhiladhilo goye agehe.’

³⁸ Shika osho oshipango oshinene noshotango.

³⁹ Oshitiyali shi thike pusho osho shika: ‘Hola mukweni ngaashi ngoye wi ihole mwene.’

⁴⁰ Ompango ayihe nomahunganeko agehe oya kwatelelwa miipango mbika iyali.”

⁴¹ Aafarisayi sho ya adhika ya gongala, Jesus okwe ya pula:

⁴² “Kristus otamu mu dhiladhila ngiini? Oye omuna gwalye?” Oyo ya ti: “OgwaDavid.”

⁴³ Jesus okwe ya pula a ti: “Omolwashike ano David te mu ithana mewiliko lyOmbepo, Omuwa? Oshoka David okwa ti:

⁴⁴ ‘Omuwa okwa lombwele Omuwa gwandje: Kala omutumba kolulyo lwandje, sigo tandi lyatele aatondi yoye kohi yoompadhi dhoye.’

⁴⁵ Ano David ngele okwe mu ithana Omuwa, ano Kristus omuna gwaDavid pamukalo guni?”

⁴⁶ Okuza kesiku tuu ndyoka kakwa li we ngoka a wapa oku mu yamukula nando ohapu yimwe, nokakwa li ngoka a vulu oku mu pula sha.

23

¹ Nena Jesus okwa lombwele oongundu dhaantu nosho wo aalongwa ye e ta ti:

² “Aalongimpango naafarisayi oye li koshipundi shaMoses.

³ Onkee ano shaa shoka taye mu lombwele, shi ningeni, ne mu shi dhiginine. Ihe inamu holela iilonga yawo, oshoka shoka taya popi, ihaye shi longo.

⁴ Oyo ohaa manga omitenge omidhigu dhokuhumbatwa e taye dhi tsike komapepe gaantu, ihe yo yene inaa hala oku dhi guma nando onomunwe gumwe.

⁵ Iilonga yawo ayihe ohaye yi longo, opo ya monike kaantu. Iipakolwa yomatumbulo gomoohapu dhaKalunga, miipala yawo nokomaako, ohaye yi tende iinene, noonyemba dhoonguwo dhawo ohaye dhi ningi oondeendeka.

⁶ Oyo oye hole pomahala gaakuluntu miituthi nokiipundi ya simana moosinagoga.

⁷ Oye hole okukundilwa pokuma hapu gongala aantu nokwiithanwa kaantu ‘omuhongi’.

⁸ Ne inamu zimina, mu ithanwe omuhongi, oshoka one amuhe aamwayinathana nomu na Omuhongi gumwe awike.

⁹ Inamu ithana nando olye gwokombanda yevi ‘ho’, oshoka one mu na Ho gumwe awike, oonguka gwomegulu.

¹⁰ Inamu pitika, mu ithanwe ‘omuwiliki’, oshoka omuwiliki gweni gumwe awike oKristus.

¹¹ Omunene gwomokati keni na ninge omuyakuli gweni.

¹² Oshoka ngoka ti inenepeke, ota shonopekwa, naangoka ti ishonopeke, ota nenepekwa.”

¹³ “Yayee, one aalongimpango naafarisayi, one aafudhime! One tuu mboka tamu edhile po osheelo shOshilongo shegulu. Oshoka one yene itamu yi mo notamu keelele mboka ya hala okuya mo.

¹⁴ [“Yayee, one aalongimpango naafarisayi! One aafudhime, sho hamu li omagumbo gaaselekadhi nohamu galikana omagalikano omaleeleka gokumonika kwowala. One otamu ka mona epangulo edhigu.]

¹⁵ “Yayee, one aalongimpango naafarisayi! One aafudhime, sho hamu tuulagana omafuta nomavi, mu likole omulongwa gumwe; nongele sha ningwa, otamu mu ningi omuna gwoheli e mu vule ne yene lwaali.”

¹⁶ “Yayee, one aakwatiketi aaposi! One ohamu ti: ‘Ngele ku na ngoka ta gana kotempeli, egano lye kali na oshilonga; ihe ngoka ta gana koshingoli shotempeli, oku na okudhiginina egano lye.’

¹⁷ One aagoya naaposi! Oshinipo shi vule oshikwawo, oshingoli nenge otempeli ndjoka tayi ningi oshingoli oshiyapuki?

¹⁸ One ohamu ti: ‘Ngele ku na ngoka ta gana koshiyambelo, egano lye kali na oshilonga; ihe ngoka ta gana komagano ge li koshiyambelo, oku na okudhiginina egano lye.’

¹⁹ Aaposi ne! Oshinipo shi vule oshikwawo, omagano nenge oshiyambelo, shoka tashi ningi omagano omayapuki?

²⁰ Onkee ano oongoka ta gana koshiyambelo, oye ta gana kusho nokukehe shoka shi li ko.

²¹ Naangoka ta gana kotempeli, oye ta gana kuyo nokuKalunga, nguka a kala muyo.

²² Naangoka ta gana kegulu, oye ta gana koshipangelapundi shaKalunga nokungoka a kuutumba ko.”

²³ “Yayee, one aalongimpango naafarisayi! One aafudhime, sho hamu gandja kuKalunga oshitimulongo shiigwanga yaa na oshilonga oshinene; ominti, odili nokumina, ihe ohamu etha iinenenima yomompango; uuyuuki, esilohenda nokwiinekelwa. Mbika oyi na okugwanithwa, ihe naambiyaka kayi shi kweethiwa.

²⁴ One aakwatiketi aaposi! Omwe otamu yi dhindi mo, ihe ongamelo otamu yi nina.”

²⁵ “Yayee, one aalongimpango naafarisayi! One aafudhime, sho hamu yogo oshitenga netemba kombanda, ihe meni omu udha eyugo nuukwaaneidhiliko.

²⁶ Omufarisayi ngoye, yoga tango oshitenga meni, opo shi yele nokombanda wo.”

²⁷ “Yayee, one aalongimpango naafarisayi! One aafudhime, sho mwa fa oombila dha kolongwa nodho opala okutalwa kombanda, ihe meni lyadho odhu udha omasipa gaasi nonyata ayihe.

²⁸ Osho nane wo kombanda paantu omu na eholoko lyuuyuuki, ihe meni omu udha uufudhime nuulunde.”

²⁹ “Yayee, one aalongimpango naafarisayi! One aafudhime, sho hamu tungu oombila dhaahunganeki nohamu opaleke oompampa dhaayuuki

³⁰ nohamu ti: ‘Ando twa li ko pomasiku gookuku, ando otse inatu ninga, ngaashi ya ningi, sho ya dhipaga aahunganeki.’

³¹ Ano otamu iholola kutya one aana yaadhipagi yaahunganeki.

³² Tsikilii ko ano kushoka oohokulu ya adhika ye shi tameke.

³³ Oluvalo lwomayoka ne! Otamu wapa ngiini okuya ontuku okupangulilwa moheli?

³⁴ Onkee ano otandi mu tumine aahunganeki, aalumentu aanandunge naalongi yoohapu dhaKalunga. Yamwe yomwaamboka otamu ya dhipaga e tamu ya alele komushigakano, yamwe otamu ya dhenge noongola moosinagoga dheni e tamu ya tidhagana moshilando noshilando oshikwawo.

³⁵ Onkee egeelo otali ya kombanda yeni omolwokudhipaga aantu yaa na oondjo, okuza kedhipago lyaAbel, ngoka a li, kee na oondjo, sigo okedhipago lyaSakaria, omuna gwaBerekia, mwe mu dhipagela pokati kotempeli noshiyambelo.

³⁶ Ongame tandi mu lombwele: Ayihe mbika otayi ya kombanda yaantu yopethimbo ndika.”

³⁷ “Jerusalem, Jerusalem! Ongoye ho dhipaga aahunganeki noho dhipaga nomamanya aatumwa yaKalunga. Olungapi nda li nda hala okugongela aamwoye, ngaashi ondjuhwa hayi gongele uuyuhwena wayo meni lyomawawa gayo, ihe inamu hala.

³⁸ Ngashingeyi egumbo lyeni otali thigwa ombuga yowala.

³⁹ Ongame tandi mu lombwele. Okuza mpaka itamu mono ndje we, sigo tamu ka tya: ‘Na lalekwe nuuyamba, oonguka te ya medhina lyOmuwa!’ ”

24

¹ Jesus okwa zi mo motempeli nokwa yi. Aalongwa ye oye ya kuye noye mu ulukile oongulu dhotempeli.

² Oye a ti kuyo: “Kamu dhi wete adhihe ndhika! Ongame tandi mu lombwele: Itapu thigwa mpaka emanya lya tentekwa kekwawo inaali kumunwa po.”

³ Jesus sho a kuutumba kOndundu yooholivi, aalongwa oye ya kuye, manga ya li yi ikalela. Oyo oye mu pula ya ti: “Tu lombwela, uunake ano tashi ka ningwa, nendhindhiliko olini tali holola, uuna to ya nehulilo lyuuyuni?”

⁴ Jesus okwe ya yamukula a ti: “Kotokeni, mwaa pukithwe nando okulye.

⁵ Aantu oyendji otaa ke ya taa ti: ‘Ongame Mesias!’ notaa pukitha oyendji.

⁶ Otamu ka uva omalugodhi noonkundana dhomalugodhi, ihe inamu tulwa uumbanda. Oshoka mbika oyi na okuningwa, ihe ehulilo inali thikana natango.

⁷ Iigwana otayi ka thikama okukondjithathana, iilongo otayi ka matukilathana. Otaku ke ya oondjala nomakakamo gevi okoombinga noombinga.

⁸ Ayihe mbika otayi ningi ongetameko lyoshitheta, okanona ngele taka valwa.

⁹ “Aantu otaye ke mu kwata notaye ke mu gandja, mu hepekwe, e taye mu dhipaga. One tamu ka tondwa kaantu ayehe omolwandje.

¹⁰ Aantu oyendji otaa ka etha eitaalo, otaa ka gandjathana e taa tondathana.

¹¹ Otaku ka za aahunganeki aafundja oyendji e taa pukitha oyendji.

¹² Uulunde otau ka lunda pombanda, nohole yoyendji otayi huhwa.

¹³ Ihe ngoka ti idhidhimike sigo ehulilo, ota hupithwa.

¹⁴ Elaka ndika etoye lyOshilongo otali ka uvithilwa aantu ayehe, li ningile iigwana ayihe onzapo; notaku ya ihe ehulilo.”

¹⁵ “Ngele tamu mono iihuna yeshunduko, mbyoka ya popiwa komuhunganeki Daniel, yi li meha eyapuki” (omuleshi na ndhindhilike nawa),

¹⁶ “nena ayehe mboka ye li muJudea, naa tembukile koondundu.

¹⁷ Ngoka ta adhika kombanda yongulu ina kuluka ko, a ka pitule iinima ye megumbo.

¹⁸ Ngoka ta adhika mepya, ina shuna, a ka tale ko onguwo ye.

¹⁹ Yayee aasimba naamwali yopomasiku ngoka!

²⁰ Galikaneni, okufadhuka po kweni kwaa ningwe pokufu nenge mesiku lyEsabati.

²¹ Oshoka omasiku ngoka otaku kala uudhigu uunene inaau kala ko nale okuza ketameko lyuuyuni sigo ongashingeyi, nongaashi itau ya we.

²² Omasiku ngoka ando itaga fupipikwa, ando kaku na nando omuntu ta hupithwa. Ihe Kalunga ota fupipike omasiku ngoka omolwaahogololwa ye.

²³ “Ano ngele ku na ngoka te mu lombwele: ‘Tala, Kristus oye ngu,’ nenge: ‘Oye ngwiyaka,’ inamu mu itaala.

²⁴ Oshoka otaku ka holoka ookristus naahunganeki aafundja notaa holola po omandhindhiliko omanene niikumithalonga, opo ya pukithe, ngele tashi vulika, naahogololwa yaKalunga wo.

²⁵ Uvii ko, onda tetekele oku shi mu lombwela.

²⁶ Onkee ano, ngele tamu lombwelwa: ‘Tala, omombuga e li,’ inamu ya ko, nenge: ‘Tala, omondjugo e li,’ inamu itaala.

²⁷ Oshoka ongashika olwaadhi talu adhima kuuzilo notalu monika kuuninginino, osho tuu wo tashi ka ningwa, uuna Omuna gwOmuntu te ya.

²⁸ “Kokuma nkoka ku na omudhimba, oko haku gongala oontsa.”

²⁹ “Uudhigu womasiku ngoka otau landulwa mbala kokuluudha kwetango, omwedhi itagu ka yela we, oonyothi otadhi ka gwa megulu, noonkondo dhomewangandjo otadhi ka tukuluka.

³⁰ Endhindhiliko lyOmuna gwOmuntu otali ka holoka ihe kegulu. Nena aantu ayehe yokombanda yevi otaa ka lilagana, sho taa ka mona Omuna gwOmuntu te ya te ende kiikogo yokegulu e na oonkondo odhindji neadhimo.

³¹ Enkuma enene otali ka hikwa, oye sho ta ka tuma ko aayengeli ye, ya ka gongele aahogololwa ye koombinga ne dhevi, okuza kombinga yimwe sigo okonkwawo.”

³² “Ilongeni omayele komukwiyu. Iitayi yagwo ngele tayi hapuka nomafo taga mbunyuka, nena omu shi shi kutya othinge oyi li popepi.

³³ Osho nane wo ngele tamu mono ayihe mbika, kaleni mu shi shi, ethimbo olya thikana, Omuna gwOmuntu oku li popepi posheelo.”

³⁴ Dhimbulukweni kutya iinima mbika ayihe otayi ka ningwa omanga epipi ndyoka li na omwenyo ngashingeyi inaali hula po.

³⁵ Egulu nevi otali hulu po, ihe oohapu dhandje kadhi na mpoka tadhi hulu po.

³⁶ “Esiku notundi ndjoka kaku na ngoka e yi shi, nando aayengeli yomegulu nenge Omwana, Tate oye awike.

³⁷ Oshoka ngaashi sha li pethimbo lyaNoa, osho tuu taku ka kala, uuna Omuna gwOmuntu te ya.

³⁸ Ngaashi aantu ya li pethimbo ndiyaka lya tetekele eyelu, ya kala taa li notaa nu, taa hokana notaa hokanitha, sigo esiku ndyoka Noa a yi monguluwato,

³⁹ yo inaye shi tseya, sigo eyelu lye ya nolye ya hanagula po ayehe, osho tuu taku ka kala, uuna Omuna gwOmuntu te ya.

⁴⁰ Pethimbo ndyoka aantu yaali taa longo mepya; gumwe ta kuthwa po, mukwawo ta thigwa po.

⁴¹ Aakiintu yaali taa tsu poshini: gumwe ta kuthwa po, mukwawo ta thigwa po.”

⁴² “Ano tonateni, oshoka inamu tseya, esiku olini Omuwa gweni te ya.

⁴³ One omu shi shi, mwene gwegumbo ngele oku na owino kutya opethimbo lini omufuthi te ya, nena ota tonatele egumbo lye, opo lyaa gwayelwe.

⁴⁴ Onkee ano nane wo kaleni mwi ilongekidha, oshoka Omuna gwOmuntu ote ke ya pethimbo tuu ndyoka inaamu mu tegelela.”

⁴⁵ “Olye ano omumati omwiinekelwa nomunandunge? Oye ngoka, omuwa gwe e mu pe, a tonatele aamati ooyakwawo, e ya pe iikulya pethimbo lyayo.

⁴⁶ Omumati omunelago oye ngoka, omuwa gwe ngele te ya, te mu adha ta ningi ngaaka.

⁴⁷ Oshili tandi mu lombwele: Omuwa gwe ote mu pe etonatelo lyiinima ye ayihe.

⁴⁸ Ihe omumati ngoka ngele omwiinayi, oti ilombwele ye mwene ta ti: ‘Omuwa gwandje ite ya mbala.’

⁴⁹ Oye ta tameke ihe okudhenga aamati ooyakwawo, ta li e ta nu pamwe noonkolwi.

⁵⁰ Nena omuwa gwomumati ngoka ote ya esiku ndyoka inee mu tegelela nethimbo ndyoka inee li tseya;

⁵¹ omuwa note mu ntimbagula e te mu pe oshipewa she pamwe naafudhime. Omo moka tamu ka kala elilagano neikokoto lyomayego.”

25

¹ Nena Oshilongo shegulu tashi ka kala sha fa aakadhona omulongo mboka ya kutha oolamba dhawo noya ka tsakaneka ombushiki.

² Yatano yomuyo oya li aagoya nooyakwawo yatano oya li aanandunge.

³ Aagoya oya kutha oolamba dhawo, yo inaa kutha omahooli.

⁴ Ihe aanandunge oya kutha iiyuma yomahooli noolamba dhawo.

⁵ Ano ombushiki sho a kala ko, ayehe oya lendenda noya kotha.

⁶ “Ihe pokati kuusiku okwi igidhwa: ‘Ombushiki oye ngu! Indeni, mu ke mu tsakaneke!’

⁷ Aakadhona ayehe oya penduka noyo opaleke nawa oolamba dhawo.

⁸ Aagoya oya lombwele aanandunge: ‘Tu pii mo wo momahooli geni, oshoka oolamba dhetu otadhi dhimi.’

⁹ Aanandunge oya yamukula ya ti: ‘Itage tu gwaneni, otse nane. Indeni, mu ki ilandele kaalandithi.’

¹⁰ Ano sho ya yi, ya ka lande, ombushiki okwe ya. Oye nokwa yi mo pamwe naakadhona yatano mboka ya adhika yi ilongekidhila oshituthi shohango, osheelo noshe edhilwa po.

¹¹ “Ohugunina aakadhona ooyakwawo oye ya wo noyi igidha ya ti: ‘Omuwa, Omuwa, tu egulula!’

¹² Ombushiki okwa yamukula a ti: ‘Ongame tandi mu lombwele: Kandi mu shi.’

¹³ “Kaleni ano mwa tonata, oshoka inamu tseya esiku notundi.”

¹⁴ “Oshoka otaku ningi ngashika omulumentu te ke enda kiilongo: Oye okwi ithana aamati ye e te ya pe eliko lye.

¹⁵ Gumwe okwe mu pe iimaliwa omayuvi gatano, omukwawo omayuvi gaali nomutitatu eyuvi limwe. Kehe gumwe okwa pewa shoka sha yeleka uupenda we. Oye nokwa yi.

¹⁶ Ngoka a pewa iimaliwa omayuvi gatano, okwa yi nziya nokwe yi likolitha iimaliwa iikwawo omayuvi gatano.

¹⁷ Nosho wo nguka a pewa iimaliwa omayuvi gaali, okwa likolitha iimaliwa iikwawo omayuvi gaali.

¹⁸ Ihe ngoka a pewa iimaliwa eyuvi limwe, okwa yi e ta fulu oshilambo mevi nokwa fumvike mo iimaliwa yomuwa gwe.”

¹⁹ “Konima yethimbo ele omuwa gwaamati mbeyaka okwa galuka ihe nokwe ya yalulitha.

²⁰ Nena omumati ngoka a li a pewa iimaliwa omayuvi gatano, okwe ya nokwe eta iimaliwa iikwawo omayuvi gatano e ta ti: ‘Omuwa, ongoye wa pele ndje iimaliwa omayuvi gatano. Tala, nkene nde yi likolitha iimaliwa iikwawo omayuvi gatano.’

²¹ Omuwa gwe okwa ti kuye: ‘Iyaloo, mumati ngoye omwaanawa nomwiinekelwa! Ongoye wa kala omwiinekelwa miishona, otandi ku pe okupangela oyindji. Inda menyanyu lyomuwa gwoye!’ ”

²² “Omumati ngoka a li a pewa iimaliwa omayuvi gaali, okwe ya nokwa ti: ‘Omuwa, ongoye wa pele ndje iimaliwa omayuvi gaali. Tala, nkene nde yi likolitha iimaliwa iikwawo omayuvi gaali.’

²³ Omuwa gwe okwa ti kuye: ‘Iyaloo, mumati ngoye omwaanawa nomwiinekelwa! Ongoye wa kala omwiinekelwa miishona, otandi ke ku pa okupangela oyindji. Inda menyanyu lyomuwa gwoye!’ ”

²⁴ “Osho wo ngoka a li a pewa iimaliwa eyuvi limwe, okwe ya nokwa ti: ‘Omuwa, ondi ku shi, ongoye omulumentu omukukutu; ho teya mpoka inoo kuna po noho gongele mpoka inoo halakanithila po sha.

²⁵ Onkee ano nda li nda tila, onda yi nonda fumvike mevi iimaliwa yoye. Onkee oyo mbika.’ ”

²⁶ “Omuwa okwe mu yamukula a ti: ‘Mumati ngoye omwiinayi nomunanyalo! Owa ti, ou shi ndje, handi teya mpoka inaandi kuna po nohandi gongele mpoka inaandi halakanithila sha.

²⁷ Owa li u na okugandja iimaliwa yandje kaagwedheli mombaanga, opo ando ngame mokugaluka kwandje nda galulilwa shoka shandje kwa gwedhelwa ontanitho.

²⁸ Ano ngashingeyi mu kutheni iimaliwa yandje, ne mu yi pe ngoka e na iimaliwa omayuvi omulongo.

²⁹ Oshoka ngoka e na oyindji, oye ta pewa, opo a kale a gwanenena. Ihe ngoka kee na, oye ta kuthwa noshishona shoka e shi na.

³⁰ Onkee ano omumati ngu omwiinayi mu umbileni momilema dhopondjelela, moka tamu kala elilagano neikokoto lyomayego.’ ”

³¹ “Ano uuna Omuna gwOmuntu te ya meadhimo lyuukwaniilwa we pamwe naayengeli ye ayehe, nena ota ka kuutumba koshipangelapundi shuukwaniilwa we.

³² Aantu ayehe yokombanda yevi otaa ka gongelwa ihe koshipala she, note ke ya yoolola mooyakwawo, ongashika omusita ta yoolola oonzi miikombo.

³³ Oonzi ote dhi gameke kolulyo lwe, iikombo okolumoho lwe.

³⁴ Nena omukwaniilwa ota lombwele mboka yokolulyo lwe: ‘Ne aalalekwa nuuyamba kuTate, ileni, mu ka thigulule oshilongo mwe shi longekidhilwa okuza keshito lyuuyuni.

³⁵ Oshoka ongame nda li nda sa ondjala, one omwa pe ndje ndi lye. Ongame nda li nda sa enota, one omwa pe ndje ndi nwe. Ongame nda li ondjendi, one omwe edhilile ndje.

³⁶ Ongame nda li olutu lwowala, one omwa zaleke ndje; nda li nda ala, omwe ya okupendula ndje; nda li mondholongo, omwe ya okutalela ndje po.’

³⁷ “Nena aayuuki otaye mu yamukula taa ti: ‘Omuwa, uunake twe ku mwene wa sa ondjala, e tatu ku pe u lye; nenge wa sa enota, e tatu ku pe u nwe?

³⁸ Uunake twe ku mwene ondjendi, e tatu ku edhilile, nenge u li olutu lwowala, e tatu ku zaleke?

³⁹ Uunake twe ku mwene wa ala nenge u li mondholongo, e tatu ya kungoye?’

⁴⁰ Nena omukwaniilwa ote ya yamukula ta ti: ‘Ongame tandi mu lombwele: Ayihe mbyoka mwe yi ningile gumwe gwaamwatate mbaka aashuushuka, ongame mwe yi ningile.’

⁴¹ “Omukwaniilwa ota lombwele ihe mbeyaka yokolumoho lwe: ‘Zii po pungame, ne mboka mwa thingwa, mu ye momulilo gwaaluhe ngoka gwa longekidhilwa omutondi naayengeli ye.

⁴² Oshoka ongame nda li nda sa ondjala, ne inamu pa ndje ndi lye. Ongame nda li nda sa enota, ne inamu pa ndje ndi nwe.

⁴³ Ongame nda li ondjendi, ne inamu edhilila ndje; olutu lwowala, ne inamu zaleka ndje; nda li nda ala nonda li mondholongo, ne inamu ya okutalela ndje po.’ ”

⁴⁴ “Nena naamboka wo otaye ke mu yamukula taa ti: ‘Omuwa, uunake twe ku mwene wa sa ondjala, nenge wa sa enota, nenge ondjendi nenge olutu lwowala, nenge wa ala nenge mondholongo, tse inatu ku yakula?’

⁴⁵ Omukwaniilwa ote ke ya yamukula ta ti: ‘Ongame tandi mu lombwele: Ayihe mbyoka inaamu yi ningila nando ogumwe gwaambaka aashuushuka, ongame mwene inaamu yi ningila.’

⁴⁶ Oombaka otaa ka ya ihe mokugeyelwa kwaaluhe, ihe aayuuki otaa ka ya momwenyo gwaaluhe.”

26

¹ Jesus sho a mana okupopya oohapu ndhoka adhihe, okwa ti kaalongwa ye:

² “One omu shi shi, ngele pwa piti omasiku gaali, oku na oshituthi shOpaasa. Nena Omuna gwOmuntu ota ka gandjwa okwaalelwa komushigakano.”

³ Nena aayambi aakuluntu naakuluntu yoshigwana oya gongalele megumbo lyomuyambimukuluntu, edhina lye Kajafas.

⁴ Oyo oya kundathana, nkene ye na okukwata Jesus nekoto, ye mu dhipage.

⁵ Ihe oya ti: “Itatu shi ningi pethimbo lyoshituthi, opo evundakano lyaa holoke maantu.”

⁶ Jesus sho a li muBetania megumbo lyaSimon omunashilundu,

⁷ omukiintu e na ohanga yu udha omugwayo gwondilo, okwe ya kuye nokwe gu tile komutse gwaJesus, manga a kuutumba poshililo.

⁸ Ihe aalongwa sho ye shi mono, oya geye e taa ti: “Omolwashike omugwayo nguka tagu hepithwa owala?

⁹ Andola gwa landithwa po, ando gwa zi iimaliwa oyindji, yi pewe oohepele.”

¹⁰ Jesus okwe shi dhimbulula nokwa ti kuyo: “Omolwashike tamu piyaganeke omukiintu? Oye okwa longele ndje oshilonga oshiwanawa.

¹¹ Oohepele omu dhi na aluhe pune, ihe ngame kamu na ndje aluhe.

¹² Oshoka sho a tile omugwayo ngu kolutu lwandje, okwa longekidha efumviko lyandje.

¹³ Ngame otandi mu lombwele: Shaa nkoka muuyuni auhe elaka ndika etoye tali ka uvithwa, oshilonga wo shika e shi ningi, otashi ka dhimbulukiwa.”

¹⁴ Nena gumwe gwaamboka omulongo nayaali, edhina lye Judas Iskariot, okwa yi kaayambi aakuluntu

¹⁵ e ta ti: “Otamu pe ndje shike, opo ndi gandje Jesus miikaha yeni?” Oyo ye mu futu iimaliwa iisiliveli omilongo ndatu.

¹⁶ Ano okuza mpoka Judas okwa li ta kongo ashike ethimbo lyo opala okugandja Jesus.

¹⁷ Mesiku lyotango lyokulya iikwiila inaayi fulikwa, aalongwa oye ya kuJesus e taa ti: “Openi wa hala, tu ke ku longekidhile, u lye uulalelo wOpaasa?”

¹⁸ Jesus okwa ti kuyo: “Indeni koshilando komuntu gwontumba, mu ke mu lombwele mu tye: ‘Omuhongi ota ti: Ethimbo lyandje olya thikana. Otandi ya, ndi ningile oshituthi shOpaasa megumbo lyoye pamwe naalongwa yandje.’ ”

¹⁹ Aalongwa oya ningi, ngaashi Jesus e ya lombwele, noya longekidha uulalelo wOpaasa.

²⁰ Ongulohi sho ye ya, Jesus okwa kuutumba poshililo pamwe naalongwa ye omulongo nayaali.

²¹ Manga taa li, Jesus okwa ti: “Ngame tandi mu lombwele: Gumwe gwomokati keni ota ka gwaaleka ndje.”

²² Aalongwa oya nika uuthigwa noonkondo noye mu pula koogumwe noogumwe ya ti: “Omuwa, hangame ndishi?”

²³ Jesus okwa yamukula a ti: “Ngoka te elele metemba mumwe nangame, oye ta ka gwaaleka ndje.

²⁴ Omuna gwOmuntu ota ka sa, ngaashi kwa nyolwa, ihe yayee omuntu ngoka te ke mu gwaaleka! Omuntu ngoka ando a li inaa valwa, ando ihwepo.”

²⁵ NaJudas, ngoka te ke mu gwaaleka, okwa pula a ti: “Muhongi, hangame ndishi?” Jesus okwa ti kuye: “Ongoye tuu, ngaashi wa ti.”

²⁶ Sho ya li taa li, Jesus okwa kutha oshikwiila, okwa hambelele, okwe shi pambula nokwe shi pe aalongwa ye e ta ti: “Taambeni, lyeni, shika osho olutu lwandje.”

²⁷ Oye a kutha wo oshitenga, okwa hambelele nokwe shi ya pe e ta ti: “Nweni mo amuhe;

²⁸ shika osho ombinzi yandje, ombinzi yehangano, tayi tilwahi omolwoyendji oyokudhima po oondjo.

²⁹ Otandi mu lombwele: Okuza nena itandi nu we omaviinu sigo esiku ndyoka tandi ke ga nwa omape pamwe nane mOshilongo shaTate.”

³⁰ Ano sho yi imbi eimbilo lyehambelelo, oya yi kOndundu yooholivi.

³¹ Nena Jesus okwa ti kuyo: “Uusiku wonena one amuhe otamu yi ontuku e tamu etha ndje, oshoka okwa nyolwa taku tiwa: ‘Otandi dhipaga po omusita, noonzi dhuusita otadhi halakana.’

³² Ihe ngame nge nda yumudhwa, otandi ke mu tetekela kuGalilea.”

³³ Petrus okwa yamukula Jesus a ti: “Nando ayehe oya ye ontuku, ngame itandi yi ontuku.”

³⁴ Jesus okwa ti kuye: “Ongame tandi ku lombwele: Uusiku mbu wonena ekondombolo manga inaali iga, ongoye to idhimbike ndje lutatu.”

³⁵ Petrus okwa yamukula: “Nando ondi ka se pamwe nangoye, itandi ku idhimbike.” Naalongwa ooyakwawo ayehe osho ya yamukula.

³⁶ Opo ihe Jesus okwa yi naalongwa ye keyana, edhina lyalyo Getsemane, e ta ti kuyo: “Kuutumbeni mpaka, manga tandi yi nkwiyaka, ndi galikane.”

³⁷ Oye okwa kutha Petrus naana yaali yaSebedeus e ta yi nayo. Okwa tameke okusa oluhodhi nokuuva uuwehame.

³⁸ Nokwa ti kuyo: “Oluhodhi momwenyo gwandje olunene, konyala talu nyanyagula ndje. Kaleni mpaka, mu tonate pamwe nangame.”

³⁹ Oye okwa humu ko kashona, okwi ihata pevi oshipala she nokwa galikana ta ti: “Tate, ngele tashi vulika, oshitenga shika nashi pitilile ndje po. Ihe hamolwehalo lyandje, ihe ongaashi wa hala.”

⁴⁰ Oye okwa yi kaalongwa nokwe ya adha ya kotha e ta ti kuPetrus: “Ano osho mwa nyengwa okutonata otundi yimwe ayike pamwe nangame?

⁴¹ Tonateni, mu galikane, mwaa pwile memakelo. Ombepo yomuntu oya hala, ihe onyama onkundi.”

⁴² Natango Jesus okwa shuna ko lutiyali nokwa galikana e ta ti: “Tate, oshitenga shika ngele itashi vulika okupitilila ndje po inaandi shi nwa, ano ehalo lyoye nali gwanithwe.”

⁴³ Oye okwa galuka ishewe nokwa adha aalongwa ya kotha, oshoka omeho gawo oga li ge niwe koomposi.

⁴⁴ Natango Jesus okwe ya thigi po e ta shuna ko nokwa galikana olutitatu a popyulula oohapu odho tuu ndhoka.

⁴⁵ Opo ihe okwe ya kaalongwa e ta ti kuyo: “Otamu kotha natango tamu vululukwa? Tala, ethimbo olya thikana, uuna Omuna gwOmuntu ta ka gandjwa miikaha yaalunde.

⁴⁶ Thikameni, tu yeni. Ngoka ta gwaaleke ndje, oku li popepi.”

⁴⁷ Ano manga ta popi, Judas, gumwe gwaamboka omulongo nayaali, okwe ya pamwe nongundu onene yi na omagongamwele noondhimbo, ya tumwa kaayambi aakuluntu nokaakuluntu yoshigwana.

⁴⁸ Omugwaaleki okwa li e ya tsu onyala a ti: “Ngoka tandi thipi komilungu, oye ngoka mwa hala. Mu kwateni!”

⁴⁹ Mbalambala okwe ya kuJesus nokwa ti: “Muhongi, wa tokelwa.” Oye nokwe mu thipi komilungu.

⁵⁰ Jesus okwa ti kuye: “Kuume, shoka wa hala, shi ninga mbala!” Nena mbeyaka oya hedha kuJesus, ye mu tsu iikaha e taye mu kwata.

⁵¹ Ano gumwe gwaamboka ya li pamwe naJesus, okwa ganeke oshikaha she, a pweya mo egongamwele lye noku umpile omumati gwomuyambi omukuluntu e te mu fegula okutsi.

⁵² Ihe Jesus okwa ti kuye: “Shuna mo egongamwele lyoye molumpangwa, oshoka ayehe mboka taa longitha egongamwele, oyo otaa ka sa kegongamwele.

⁵³ Nenge u shi, kandi vulu okwiindila Tate, a tumine ndje ngashingeyi omatanga omanene gaayengeli ge vule omulongo nagaali?

⁵⁴ Ihe Omanyolo otaga gwanithwa ngiini andola, ngoka taga ti kutya osho shi na okuningwa.”

⁵⁵ Jesus nokwa lombwele ongundu yaantu: “One mwe ya okukwata ndje ongaashi omukolokoshi mu na omagongamwele noondhimbo. Kehe esiku onda li handi kuutumba motempeli tandi longo aantu, ne inamu kwata ndje.

⁵⁶ Ihe ayihe mbika oya ningwa, Omanyolo gaahunganeki opo ga gwanithwe.” Nena aalongwa ayehe oye mu thigi po e taa yi ontuku.

⁵⁷ Aakwati yaJesus oye mu fala megumbo lyomuyambimukuluntu Kajafas, moka mwa li mwa gongala aalongimpango naakuluntu.

⁵⁸ Petrus okwe mu landula e li konima kokule sigo omolugumbo lwegumbo lyomuyambi omukuluntu. Okwa yi mo nokwa kuutumba pamwe naalangeli, a mone shoka tashi ka ningwa po.

⁵⁹ Ano aayambi aakuluntu noshigongi ashihe shaatokoli oya kambadhala okukonga omalundilo, ya lundile Jesus, opo ye mu dhipage.

⁶⁰ Ihe inaye ga mona, nando pwa holoka aalundili oyendji. Hugunina opwe ya aalundili yaali

⁶¹ e taa ti: “Omuntu nguno okwa tile: ‘Otandi vulu okukumuna po otempeli yaKalunga e tandi yi tungulula omasiku gatatu.’ ”

⁶² Omuyambi omukuluntu okwa thikama nokwa pula Jesus ta ti: “Ito yamukula sha komalundilo ngoka taye ku lundile?”

⁶³ Ihe Jesus okwa mwena. Nena omuyambi omukuluntu okwa ti kuye: “Otandi ku ganitha kuKalunga omunamwenyo, tu lombwela, ngele ongoye Kristus, Omuna gwaKalunga.”

⁶⁴ Jesus okwa ti kuye: “Eeno, ngaashi wa ti. Ihe otandi mu lombwele: Okuza ngashingeyi otamu ka mona Omuna gwOmuntu a kuutumba kolulyo lwoonkondo lwaKalunga note ke ya te ende kiikogo yokegulu.”

⁶⁵ Omuyambi omukuluntu okwa tuula oonguwo dhe mwene e ta ti: “Okwa tuku Kalunga! Inatu pumbwa we oonzapo! One mu uvu ngashingeyi etukano lye.

⁶⁶ Otamu ti ngiini?” Oyo ya yamukula taa ti: “Oye okwi ilongele okusa.”

⁶⁷ Oyo ye mu hiyile omayeye moshipala noye mu dhenge noongonyo. Naamboka ye mu dhenge nomalupi

⁶⁸ oya ti: “Kristus, tu hunganekela ngoka e ku dhenge.”

⁶⁹ Petrus okwa li a kuutumba pondje molugumbo. Omukadhona gumwe gwomaayakuli okwe ya kuye a ti: “Nangoye wo owa li pamwe naJesus, Omugalilea.”

⁷⁰ Ihe ye okwi idhimbike montaneho yaayehe a ti: “Kandi uvite ko shoka to popi.”

⁷¹ Ano manga tu uka lwokomweelo, a pite mo, omuyakuli gulwe omukadhona okwe mu mono nokwa lombwele aantu mbeyaka: “Naanguka wo okwa li pamwe naJesus Omunasareti.”

⁷² Petrus okwi idhimbike ishewe nokugana a ti: “Omulumentu ngoka kandi mu shi.”

⁷³ Konima yokathimbo okashona mboka ya li ya thikama, oye ya kuPetrus e taa ti: “Kapu na omalimbililo, nangoye wo gumwe gwaambeyaka, oshoka nelaka lyoye olye ku holola.”

⁷⁴ Nena okwa tameke okwiithinga nokugana e ta ti: “Omulumentu ngoka kandi mu shi.” Ekondombolo nolyi igi.

⁷⁵ Opo Petrus okwa dhimbulukwa oohapu dhaJesus, sho a tile kuye: “Ekondombolo manga inaali iga, ongoye to idhimbike ndje lutatu.” Oye a yi pondje nokwa lili nokulililila.

27

¹ Ongula sho kwa shi aayambi aakuluntu naakuluntu yoshigwana ayehe oya gongala noya kundathana, ya dhipage Jesus.

² Oyo ye mu manga, ye mu kutha noye mu gandja kuPilatus, omuleli gwaRoma.

³ Ano Judas, ngoka e mu gwaaleke, sho a mono, Jesus a tokolwa, okwi itedhulula nokwa shunitha iimaliwa iisiliveli mbiyaka omilongo ndatu kaayambi aakuluntu nokaakuluntu

⁴ e ta ti: “Onda yona, sho nda gwaaleke omulumentu kee na oondjo, a ka dhipagwe.” Oyo oye mu yamukula ya ti: “Otu na shike nasho? Tala mwene sho to ningi.”

⁵ Judas okwe ekelehi iimaliwa iisiliveli motempeli, okwa zi mo, a yi e ti imangeleke.

⁶ Aayambi aakuluntu oya kutha iimaliwa iisiliveli e taa ti: “Mbika itayi wapa okutulwa miimaliwa yotempeli, oshoka oyo ofuto yombinzi.”

⁷ Ano sho ya kundathana, oye yi landa epya lyomuhongi gwiiyuma yeloya, li ninge eyendo lyokufumvika aakwiilongo.

⁸ Epya ohali ithanwa sigo onena Epya lyombinzi.

⁹ Nena odha gwanithwa ndhoka dha popiwa komuhunganeki Jeremia, ngoka ta ti: “Oyo ya taamba iimaliwa iisiliveli omilongo ndatu, ofuto yomulumentu ngoka gwomaana yaIsrael.

¹⁰ Iimaliwa noye yi landa epya lyomuhongi gwiiyuma yeloya, ngaashi Omuwa a lombwele ndje.”

¹¹ Jesus okwa thikama koshipala shomuleli. Omuleli okwe mu pula e ta ti: “Ongoye omukwaniilwa gwAajuda?” Jesus okwa ti: “Eeno, ongame tuu, ngaashi to ti.”

¹² Ano aayambi aakuluntu naakuluntu sho ye mu tamaneke, oye ina yamukula sha.

¹³ Nena Pilatus okwa ti kuye: “Ku uvite ko, sho taye ku popi odhindjidhindji?”

¹⁴ Ihe Jesus ine mu yamukula nando ohapu yimwe, opo omuleli okwa kumwa unene.

¹⁵ Pethimbo lyoshituthi shOpaasa okwa li ku na omukalo, omuleli ha mangululile aantu onkwatwa yimwe, ndjoka yo yene ye yi hala.

¹⁶ Pomasiku ngeyaka okwa li ku na onkwatwa ya tseyika nawa, edhina lyayo Barabbas.

¹⁷ Aantu sho ya gongala, Pilatus okwe ya pula ta ti: “Oguni po mwa hala, ndi mu mangululile, oBarabbas nenge oJesus, haku tiwa Kristus?”

¹⁸ Oshoka okwa li e shi shi kutya oya gandja Jesus omolwefupa.

¹⁹ Ano Pilatus manga a li a kuutumba koshipundi shepangulo, omukiintu gwe okwe mu tumine elaka ta ti: “Omulumentu nguka ke na ondjo, onkee ino mu ningila uuwinayi, oshoka uusiku wonena onde mu ehamenwa mondjodhi.”

²⁰ Ihe aayambi aakuluntu naakuluntu oya thiminike aantu okwiindila Barabbas nokudhipagitha Jesus.

²¹ Omuleli okwe ya pula e ta ti: “Oguni po mwaamboka yaali mwa hala, ndi mu mangululile?” Oyo ya ti: “oBarabbas!”

²² Pilatus okwe ya pula ta ti: “Jesus, nguka haku tiwa Kristus, otandi mu ningi ngiini?” Oyo ayehe oya yamukula: “Na alelwe komushigakano!”

²³ Omuleli okwa ti: “Okwa yono shike ano?” Ihe oya dhiginine owala okwiigidha pombanda taa ti: “Na alelwe komushigakano!”

²⁴ Pilatus sho a mono kee na we sho ta vulu okuninga, nombuyagano ya lundu pombanda, okwa kutha omeya nokwi iyogo kiikaha montaneho yaantu e ta ti: “Ngame kandi na oondjo dhombinzi yomulumentu nguka. Taleni sho tamu ningi.”

²⁵ Aantu ayehe oya yamukula ya ti: “Ombinzi ye natu yi pulwe, otse naana yetu!”

²⁶ Nena Pilatus okwe ya mangululile Barabbas nokwa dhengitha Jesus e te mu gandja, a ka alelwe komushigakano.

²⁷ Nena aakwiita yomuleli Pilatus oya fala Jesus megumbo. Aakwiita ayehe oya gongalele Jesus ye mu kundukidha.

²⁸ Oyo ye mu hula oonguwo dhe noye mu zaleke onguwo onene ontiligane.

²⁹ Opo ihe oya tungu oshishani shomakwega noye shi mu zaleke komutse, oye mu pe oshihenguti moshikaha she shokolulyo noye mu tsile oongolo, ongotaye mu simaneke. Oyo ye mu nyekelele ya ti: “We ya po, omukwaniilwa gwAajuda!”

³⁰ Oyo ye mu hiyile omayeye, ya kutha oshihenguti noye mu dhenge momutse.

³¹ Ano sho ye mu nyekelele ngeyi, oye mu hula onguwo ontiligane noye mu zaleke oonguwo dhe mwene e taye mu fala, a ka alelwe komushigakano.

³² Mokweenda kwawo oya tsakaneke omulumentu Omukireni, edhina lye Simon naakwiita oye mu thiminike a humbate omushigakano gwaJesus.

³³ Sho ya thiki kehala lyi ithanwa Golgata, tali ti Oshala sholukwe,

³⁴ oye mu pe omaviinu ga vongakanithwa nonyango. Jesus sho e ga makele, ina hala oku ga nwa.

³⁵ Sho ye mu alele komushigakano, oya topolelathana oonguwo dhe pamukalo gwokuumba oshihogololitho.

³⁶ Opo ihe oya kuutumba noye mu langele nkoka.

³⁷ Kombanda yomutse gwe oya mbambalele ko ondjo ye ya nyolwa ngeyi: “Nguno oJesus, omukwaniilwa gwAajuda.”

³⁸ Aakolokoshi yaali oya alelwa pamwe naJesus komishigakano dhawo, gumwe okolulyo lwe nomukwawo okolumoho lwe.

³⁹ Mboka ya piti po, oya sheke Jesus nokupukapuka komitse

⁴⁰ ya ti: “Ongoye tuu nguka to kumuna po otempeli e to yi tungulula omasiku gatatu? Ihupitha ano, ngele ongoye Omuna gwaKalunga, u ze ko komushigakano!”

⁴¹ Aayambi aakuluntu, aalongimpango naakuluntu osho tuu wo ye mu sheke ya ti:

⁴² “Okwa li ha hupitha aantu yalwe, ihe ngashingeyi okwa nyengwa okwiihupitha. Ano ngele oye omukwaniilwa gwAaisraeli, na ze ngashingeyi komushigakano, tse notatu mu itaale.

⁴³ Oye i inekela Kalunga, Kalunga ne mu hupithe ano ngashingeyi, ngele okwe mu hokwa. Oshoka okwa tile, kutya oye Omuna gwaKalunga.”

⁴⁴ Osho wo aakolokoshi mboka ya alelwa pamwe naye, oye mu sheke.

⁴⁵ Pokati komutenya okwa ningi omilema moshilongo ashihe ndhoka dha kwata ootundi ndatu.

⁴⁶ Potundi oyo tuu ndjoka ontintatu Jesus okwi igidha mokule ta ti: “Eli, Eli, lama sabaktani?” Otashi ti: Kalunga kandje, Kalunga kandje, omolwashike we ekelehi ndje?

⁴⁷ Nena yamwe yomwaamboka ya thikama mpoka sho ye dhi uvu, oya ti: “Oti ithana Elia.”

⁴⁸ Nena gumwe gwawo okwa matuka nokwa kutha oshiyayo, okwe shi yaya momaviinu omalulu nokwe shi tula koshihenguti e te shi tsike komilungu dhe.

⁴⁹ Ihe ooyakwawo oya ti: “Etha, u tale, Elia ngele ote ya oku mu hupitha.”

⁵⁰ Jesus okwi igidha ishewe pombanda nokwa si.

⁵¹ Etopolitho lyotempeli olya tuuka okuza pombanda sigo opevi. Evi olya kakama, nomamanya oga tanduka;

⁵² oombila odha suukuluka, nomidhimba odhindji dhoonakusa aayapuki odha yumuka.

⁵³ Oya zi mo moombila noye ya kOshilando oshiyapuki, Jesus sho a yumuka noya monika koyendji.

⁵⁴ Ano omukuluntu gwaakwiita naambeyaka ya langele Jesus pamwe naye, sho ya mono ekakamo lyevi naayihe mbyoka ya ningwa po, oya tila nokutililila ya ti: “Kapu na omalimbililo, nguka okwa li Omuna gwaKalunga.”

⁵⁵ Kokuma nkoka okwa li ku na aakiintu oyendji ya zile kuGalilea ya landula Jesus noye mu yakulile. Oyo ya thikama kokule noye mu tala.

⁵⁶ Mokati kawo omwa li Maria Magdalena naMaria, yina yaJakob naJosef nayina yaana yaSebedeus.

⁵⁷ Ano sho kwa ningi ongulohi, omulumentu omuyamba a zi kuArimatia, edhina lye Josef, okwe ya po. Oye okwa li wo omulongwa gwaJesus.

⁵⁸ Okwa yi kuPilatus nokwe mu indile omudhimba gwaJesus. Pilatus okwa zimine, e gu pewe.

⁵⁹ Josef okwa kutha omudhimba e te gu dhingile moshiyata oshitokele,

⁶⁰ e te gu langeke mombila ye mwene ompe, a li e yi ihokela memanya. Okwa galangatithile posheelo shombila emanya enene e ta zi po.

⁶¹ Maria Magdalena naMaria mukwawo oya kuutumba ya taalela kombila.

⁶² Ano mesiku ndyoka lya landula kEtitano, aayambi aakuluntu naafarisayi oya gongala puPilatus

⁶³ ya ti: “Tatekulu, otwa dhimbulukwa kutya omukotokeli ngwiyaka manga a li e na omwenyo, okwa tile: ‘Ngele pwa piti omasiku gatatu, otandi ka yumuka.’

⁶⁴ Lombwela ano aantu, ya langele nawa ombila sigo esiku etitatu, aalongwa ye opo kaaye mu yake mo; yo ya lombwele aantu kutya okwa yumudhwa kuusi. Nena epukitho lyahungunina otali ningi ewinayi noonkondo li vule lyotango.”

⁶⁵ Pilatus okwa ti kuyo: “Aalangeli oyo mbaka, indeni, mu ke yi langele nawa, ngaashi mu shi shi.”

⁶⁶ Oyo ya yi noye edhilitha po emanya e taye li hotele po noshihotekitho e taa langeke aalangeli pombila.

28

¹ Esabati sho lya piti, meluwa lyesiku lyotango lyoshiwike Maria Magdalena naMaria mukwawo oya yi, ya ka tale ko kombila.

² Ombaadhilila opwa ningi ekakamo enene lyevi, oshoka omuyengeli gwOmuwa okwa kuluka a zi megulu, okwa kandula po emanya e te li kuutumba.

³ Okufa kwe okwa li a fa olwaadhi, noonguwo dhe oontokele dha fa omahegele gomongwa.

⁴ Aalangeli yombila oya haluka noya kakama e taa ningi ya fa ya sa.

⁵ Omuyengeli okwa popitha aakiintu a ti: “Inamu tila, oshoka ondi shi shi, otamu kongo Jesus, ngoka a li a alelwa komushigakano.

⁶ Ke mo muka, okwa yumudhwa kuusi, ngaashi a tile. Ileni, mu tale eha mpoka a li a lala.

⁷ Indeni nokweendelela, mu ka lombwele aalongwa kutya okwa yumudhwa kuusi. Ote mu tetekele kuGalilea, oko tamu ke mu mona. Dhimbulukweni, ongame nde shi mu lombwele.”

⁸ Oyo ya zi kombila mbalambala ya tila, yo ya nyanyukwa pombanda noya matuka, ya ka faalele aalongwa ye elaka.

⁹ Ombaadhilila Jesus okwe ya tsakaneke a ti: “Mwa penduka!” Oyo ya hedha kuye, oye mu idhingile koompadhi noyi inyongamene kuye.

¹⁰ Jesus okwa ti kuyo: “Inamu tila. Indeni, mu ka lombwele aamwatate, ya ye kuGalilea, oko taa ka mona ndje.”

¹¹ Ano manga aakiintu ye li mondjila, yamwe yomaalangeli oye ya koshilando noya hokololele aayambi aakuluntu ayihe mbyoka ya ningwa ko.

¹² Nena aayambi aakuluntu oya ningi oshigongi pamwe naakuluntu noya kundathana e taa pe aakwiita iimaliwa oyindji

¹³ ya ti: “Tyeni, aalongwa ye ye ya uusiku e taye mu yaka mo, manga twa kotha.

¹⁴ Pamukalo gwa tya ngeyi otatu loteke mbala omuleli gwoshilongo, opo kaa geye, ngele te shi uvu, e tatu mu popile, mu kale mwaa na oombudhi.”

¹⁵ Aalangeli oya taamba iimaliwa noya ningi ngaashi ya longwa. Ehokololo ndika olya taandelithwa mAajuda, onkee ohali hokololwa sigo onena.

¹⁶ Aalongwa mboka omulongo nagumwe oya yi kuGalilea okondundu ndjiyaka Jesus e yi ya lombwelele.

¹⁷ Oyo sho ye mu mono, oye mu inyongamene, ihe yamwe oya limbililwa.

¹⁸ Jesus okwe ya kuyo nokwe ya lombwele a ti: “Ongame nda pewa epangelo alihe megulu nokombanda yevi.

¹⁹ Indeni ano, ka ningeni aantu ayehe aalongwa yandje, mu ya shashele medhina lyaHe nolyOmwana nolyOmbepo Ondjapuki.

²⁰ Ne mu ya longe okudhiginina ayihe mbyoka nde yi mu lombwele. Ihe ngame otandi kala pamwe nane omasiku agehe sigo ehulilo lyuuyuni.”