1

¹ Ndika olyo elaka ndyoka Omuwa e li pe Maleaki, opo e li lombwele oshigwana shaIsrael.

² Omuwa ota ti kaantu ye: “Ondi mu hole aluhe.” Ihe oyo taa yamukula: “Ohole yoye owe yi tu ulukile mushike?” Omuwa ta yamukula: “Esau naJakob oya li aamwayinathana, ihe ngame onda li ndi hole Jakob noluvalo lwe

³ nonda tondo Esau noluvalo lwe. Onda mbugaleke oondundu dhaEsau nevi lye onde li thigile iithitukuti.”

⁴ Ngele oluvalo lwaEsau, Aaedomi, taa ti: “Iilando yetu oya hanagulwa po, ihe otatu yi tungulula,” nena Omuwa ota yamukula: “Yi tungululeni e tandi ke yi kumuna po ishewe. Aantu otaa ke yi ithana ‘Oshilongo oshidhudhu’ na ‘Oshigwana shoka sha geelwa kOmuwa ndongo aluhe.’ ”

⁵ Oshigwana shaIsrael otashi ka tala iinima mbika nomeho gawo yene e taa ti: “Omuwa oye omunankondo nokiilongo yilwe.”

⁶ Omuwa Omunankondoawike ota lombwele aayambi ta ti: “Omumati oha simaneke he, nomupiya oha simaneke mwene gwe. Ongame ho — omolwashike itaamu simaneke ndje? Ongame mwene gweni, ndele oshike itaamu tundu ndje? Ne otamu nyeme ndje, nonando tamu pula: ‘Otwe ku nyeme ngiini?’

⁷ Oshoka ohamu yamba poshiyambelo shandje iikulyandjambo inaayi yogoka. Nena otamu pula: ‘Otwa nyengwa ngiini oku ku simaneka?’ Oshoka otamu dhiladhila kutya otamu vulu okudhina oshiyambelo shandje.

⁸ Ngele tamu eta oshimuna oshiposi, mu shi yambele ndje, nani kape na epuko mpoka? Nongele tamu eta oshimuna oshilema nenge tashi alukwa, kali shi epuko ndyono? Yelekela utale, oshimuna sha tya ngaaka u shi faalele omuleli gwoshilongo shaandjeni! Ote ku taamba nuukuume nenge ote ku hokwa?”

⁹ Ngashingeyi ne aayambi, kambadhaleni okupula Kalunga, e tu sile ohenda. Sho itaa yamukula nando omagalikano geni, ombedhi oyeni.

¹⁰ Omuwa Omunankondoawike ota ti: “Onda hala, gumwe gweni e edhile omiyelo dhotempeli, opo e mu keelele, mwaa teme omulilo gwosima koshiyambelo shandje. Kandi na ombili nane; itandi taamba omayambo ngoka tamu etele ndje.

¹¹ Okuza kuuzilo sigo okuuninginino aantu otaa simaneke ndje. Akuhe oyo taa fikile ndje omatsininondjambo notaa yamba oondjambo dhi shi okutaambwa. Ayeheyehe otaa simaneke ndje.

¹² Ihe ne otamu shundula ndje, sho tamu ti, oshiyambelo shandje kashi na shilonga nasho tamu yambele ko iikulya yaa na omupondo gwasha.

¹³ Ne otamu ti: ‘Otwa loloka ngiini kwaayihe mbino, ee!’ One nomwa kenyanana ndje. Ngele tamu yambele ndje, otamu eta oshimuna sha yakwa nenge oshilema nenge tashi ehama. Otamu dhiladhila, otandi shi taamba?

¹⁴ Etulomutima nali adhe omukotokeli ngoka ta yambele ndje oshimuna kaashi na omwago, manga e na moshigunda she oshimuna oshiwanawa e shi uvanekela ndje. Oshoka ngame omukwaniilwa omunene, naantu yiigwana ayihe ohaa tila ndje.”

2

¹ Omuwa Omunankondoawike ota ti kaayambi: “Otamu pewa oshipango shika.

² Omu na okusimaneka ndje mushoka tamu longo. Ngele itamu pulakene shoka te ti, nena otandi ke mu thinga. Otandi ka thinga iitaambwa yeni ayihe hayi mu kwatha. Tashi ti, onde yi thinga nokuli, oshoka inamu taamba iipango yandje nuudhiginini.

³ Otandi ka geela aana yeni e tandi pwikike iipala yeni mehoho lyiimuna yomayambo geni — notamu ku umbilwa mondoya.

⁴ Nena otamu ka tseya kutya onde mu pa oshipango shika, opo ehangano lyandje naayambi noluvalo lwaLevi lyaa teke po.

⁵ “Mehangano lyandje onde ya uvanekele omwenyo nuundjolowele, naashika onde shi ya ningile, opo ya simaneke ndje. Momasiku ngeyaka oya li ya longele ndje nesimaneko.

⁶ Oya nongeke shoka shu uka, haashoka sha puka. Oya kala meuvathano nangame; inaa longa ashike shoka shu uka yoyene, ihe oya pukulula oyendji yalwe, ye ethe okulonga uukolokoshi.

⁷ Oshilonga shaayambi osho okunongeka okutseya oshili yaKalunga. Aantu oye na okuya kuyo, yi ilonge ehalo lyandje, oshoka oyo aatumwa yOmuwa Omunankondoawike.

⁸ “Ihe ngashingeyi, ne aayambi, omwa pilamene ondjila yu uka. Omalongo geni oga fala oyendji mokulonga iihuna. Omwa teya ehangano ndyoka twa hangana nane.

⁹ Osho tuu nangame tandi mu dhinitha koshigwana shaIsrael, oshoka inamu vulika kehalo lyandje nomu na ontondo menongeko lyeni.”

¹⁰ Tse atuheni hatu na Tate gumwe? HaKalunga gumwe e tu shita atuhe? Omolwashike nduno itaatu tsakanitha omauvaneko getweni, nomolwashike tatu dhini ehangano ndyoka Kalunga a hangana nootate?

¹¹ Aantu yaJuda oya yono euvaneko lyawo naKalunga noya longo iihuna muJerusalem nomoshilongo ashihe. Oya nyateke otempeli yi holike kOmuwa. Aalumentu oya hokana aakiintu mboka haa simaneke iikalunga.

¹² Omuwa na kuthe megwaneno lyaIsrael ngoka te shi ningi, kaa vule we okweetela Omuwa Omunankondoawike omayambo pamwe noshigwana shetu.

¹³ Oshinima oshikwawo hamu shi ningi, osho shika. Ohamu hipike oshiyambelo shOmuwa nomahodhi, ohamu lili nokuhekumuna, sho itaa taamba we omayambo ngoka tamu mu etele.

¹⁴ Otamu pula, oshike itee ga taamba we. Ite ga taamba, oshoka oku shi shi kutya owa yono euvaneko kumukadhoye ngoka wa hokana muugundjuka woye. Okwa li kuume koye, ongoye nowa yono euvaneko lyoye kuye, nonando owa uvaneke koshipala shaKalunga kutya oto ke mu dhiginina.

¹⁵ Kalunga nani ine mu ninga olutu lumwe nombepo yimwe naye? Elalakano lye olini mpaka? Ndishi ou mone aanona mboka taa kala aantu lela yaKalunga. Shi tseyeni ano, pwaa kale nando ogumwe ta henge po omukiintu gwe.

¹⁶ Omuwa Kalunga kaIsrael ota ti: “Otandi tondo eteyo lyoondjokana. Ondi tonde omuntu ta ningile omukadhi esithahoni li thike mpa. Kala u shi shi, waa yone euvaneko lyoye, ihe u dhiginine omukulukadhi gwoye.”

¹⁷ Omwa vulitha Omuwa nokupopya kweni. Ihe otamu pula: “Otwe mu vulitha ngiini?” Sho tamu ti: “Omuwa Omunankondoawike ota dhiladhila kutya aadhudhu oyo aawanawa; aantu ya tya ngaaka okwe ya hokwa.” Nenge sho tamu pula tamu ti: “Kalunga kuuyuuki oku li peni?”

3

¹ Omuwa Omunankondoawike ota yamukula: “Otandi ka tuma omutumwa gwandje okulongekidhila ndje ondjila. Nena Omuwa ngoka tamu mu kongo, ote ke ya ohaluka kotempeli ye. Omutumwa ngoka mwa yuulukwa, ote ke ya nota popi ehangano lyandje.”

² Ihe olye ta vulu okwiidhidhimikila esiku ndyoka te ya? Olye ta vulu okukala ko, uuna ta holoka? Ota ka kala a fa othewa yekoha, a fa omulilo tagu hemuna uutale.

³ Ote ke ya okupangula a fa omuhemuni ta yelitha oshisiliveli noshingoli. Osho omutumwa gwOmuwa ta ka yogola aayambi, opo ye etele Omuwa omayambo gu uka.

⁴ Nena omayambo ngoka oshigwana shaJuda naJerusalem taa etele Omuwa, otage mu opalele, ngaashi ga li pomathimbo gonale.

⁵ Omuwa Omunankondoawike ota ti: “Otii ka holoka mokati keni okupangula. Otii ka tompa mbala mboka haa anekele, haa hondele, haa gandja uumbangi wiifundja, haa kotokelele aaniilonga oondjambi dhawo naamboka haa nyokoma aaselekadhi, oothigwa naakwiilongo — nokuthikamena ayehe mboka ihaa simaneke ndje.”

⁶ “Ongame Omuwa, itandi lunduluka. Nane, oluvalo lwaJakob, otamu kala ko natango.

⁷ Ne omwa fa oohokulu ye mu tetekela, omwa pilamene iipango yandje noinamu yi dhiginina. Galukileni kungame, nangame tandi galukile kune. Ihe ne otamu pula: ‘Otatu galukile ko ngiini kungoye?’

⁸ Otandi mu pula: ‘Omuntu ota vulu tuu okukotokela Kalunga? Aawe, ndishi, ihe osho hamu ningi.’ Otamu pula: ‘Otatu ku kotokele ngiini?’ Okombinga yiitimulongo nomayambo.

⁹ Ne amuhe aathingwa, oshoka oshigwana ashihe ohashi kotokele ndje.

¹⁰ Eteni iitimulongo ya gwana po kotempeli, opo mongulu yandje mu kale iikulya ya gwana. Yelekii ndje, notamu ka mona, sho tandi egulula oombende dhokegulu, ndi mu lokithile eloolo lyomaliko guuyamba owindji.

¹¹ Itandi ka eta okapuka, ka lye po ompagona yeni, nomahila gomiviinu dheni otaga ka kanyata omandjembele.

¹² Nena iigwana yilwe otayi ke ku ithana omunelago, oshoka evi lyeni otali ka kala ehala lyo opala okukala.”

¹³ Omuwa ota ti: “Omwa popi ndje nayi, ihe otamu pula: ‘Otwa ti ngiini?’

¹⁴ Omwa ti: ‘Okulongela Kalunga itaku kwatha sha. Otashi kwatha shike okuvulika kuye nenge okuulukila Omuwa Omunankondoawike kutya otwa sa oluhodhi molwiilonga yetu?

¹⁵ Ngaashi tu wete, aanuuntsa oyo aanelago. Aakolokoshi ohaa likola nohaa makele Kalunga mokwiidhidhimikila kwe iilonga yawo iiwinayi yo itaa geelwa.’ ”

¹⁶ Nena oonakutila Omuwa oya kundathana, nOmuwa okwe ya pulakene nokuuva ko shoka ya ti. Membo omwa nyolwa montaneho ye iilonga yaamboka haa tila Omuwa nohaye mu simaneke.

¹⁷ Omuwa Omunankondoawike ota ti: “Otaa ka kala aantu yandje. Mesiku ndyoka, sho tii ka ninga sha, otaa ka kala yandje mwene. Otandi ke ya sila ohenda, ngashika ohe ta sile omwana ohenda ngoka he mu longele.

¹⁸ Aantu yandje otaa ka koneka ishewe eyooloko pokati komuyuuki nomukolokoshi, pokati komuntu ngoka ta longele ndje naangoka itee shi ningi.”

4

¹ Omuwa Omunankondoawike ota ti: “Esiku otali ya, uuna aanuuntsa naadhudhu ayehe taa ka hwama ya fa iihenguti. Esiku ndyoka otaa ka lunguna po thilu noitapu ka thigala nando osha.

² Ihe one mboka hamu vulika kungame, otamu ka pitilwa ketango lyuuyuuki tali mu aludha noonte dhalyo. Otamu ka manguluka e tamu nyanyukwa ngaashi uutaagona tau dhana omalondo.

³ Mesiku ndyoka tandi li gandja, otamu ka sinda aadhudhu, e taa ningi ya fa ontsi kohi yoompadhi dheni.

⁴ “Dhimbulukweni omalongo gomuntu gwandje Moses, oompango nomalombwelo ngoka nde mu pe kondundu Sinai, opo oshigwana ashihe shaIsrael shi vulike kugo.

⁵ “Ihe esiku ndyoka enene netilithi lyOmuwa manga inaali ya, otandi mu tumine omuhunganeki Elia.

⁶ Ota ka hanganitha natango oohe noyana, opo ndaa ye, ndi yone po evi lyeni.”