1

¹ Momwedhi omutihetatu gwomumvo omutiyali Darius sho a li omukwaniilwa gwaPersia, Omuwa okwa gandja elaka komuhunganeki Sakaria yaBerekia, omutekulu gwaIddo.

² Omuwa Omunankondoawike okwa lombwele Sakaria, a lombwele iigwana a tye: “Ngame, Omuwa, onda li nda geele oohokulu,

³ ihe ngashingeyi otandi mu lombwele: ‘Galukileni kungame, nangame otandi galukile kune.’

⁴ Inamu fa oohokulu. Aahunganeki oye ya lombwele nale oohapu dhandje, ye ethe oondjila dhawo oombwinayi niilonga yawo yaa fele. Ihe inaa pulakena ndje yo inaa vulika kungame.

⁵ Oohokulu naahunganeki mboka kaye ko we.

⁶ Aamati yandje aahunganeki oya gandja koohokulu omalombwelo nomalondodho gandje, ihe oye ga dhini noya monithwa iihuna. Nena oyi itedhulula noya tseya kutya ngame, Omuwa Omunankondoawike, onda li nde ya geele, ngaashi yi ilongele nonde shi utha, shi tye ngaaka.”

⁷ Momumvo omutiheyali sho Darius a li omukwaniilwa, mesiku etimilongo mbali netine lyomwedhi omutimulongo nogwotango (omwedhi Shebat) Omuwa okwa lombwele ndje memoniko uusiku.

⁸ Onda mono omuyengeli gwOmuwa a londa okakambe okatiligane. Okwa thikama mokati komiti omimirte molusilu, nokonima ye kwa li uukambe uukwawo — uutiligane, uukanga nuutokele.

⁹ Onde mu pula: “Tatekulu, uukambe mbuka otau holola shike?” Okwa yamukula a ti: “Otandi ku ulukile shoka tau holola.

¹⁰ Omuwa okwe u tumu u ye u ka ndaadhe evi.”

¹¹ Uukambe owa hokololele omuyengeli tau ti: “Otwe endagula akuhe notwa dhimbulula uuyuni auhe owa mwena nou na ombili.”

¹² Nena omuyengeli okwa ti: “Omuwa Omunankondoawike, ongoye wa geele Jerusalem niilando yaJuda omimvo omilongo heyali ngashingeyi. Sigo uunake tashi kala ngawo inoo yi hololela esilohenda lyoye?”

¹³ Omuwa okwa hekeleke omuyengeli noohapu dho opala,

¹⁴ nomuyengeli okwa lombwele ndje, ndi uvithe shoka Omuwa Omunankondoawike a ti: “Ondi na ohole yomuule noshimpwiyu molwaJerusalem, oshilando shandje oshiyapuki,

¹⁵ nokandi na ombili nande niigwana mbyoka tayi nyanyukwa ya thuwa yi na ombili. Oshoka sho nda li nda geele aantu yandje, iigwana mbyoka oya gwedhele ko kuuwehame waantu yandje.

¹⁶ Onkee onda galukile kuJerusalem, ndi hololele oshilando esilohenda. Otempeli yandje otayi ka thikamekululwa, noshilando otashi ka tungululwa?”

¹⁷ Omuyengeli okwa lombwele ndje wo, ndi uvithe te ti: “Omuwa Omunankondoawike, ota ti kutya iilando ye otayi ka ninga iinelago ishewe noye ta ka kwatha natango Jerusalem notashi ka kala oshilando she mwene.”

¹⁸ Memoniko ekwawo onda mono ooniga ne dhoondumetana.

¹⁹ Onda pula omuyengeli ngoka a li ta popitha ndje: “Ooniga ndhoka otadhi holola shike?”

²⁰ Oye a yamukula: “Otadhi holola oonkondo dhuuyuni ndhoka dha halakanitha aantu yaJuda, Israel naJerusalem.”

²¹ Onda pula e te ti: “Aantu mbaka oye ya okuninga shike?” Okwa yamukula a ti: “Oye ya okuhalutha nokudhenga iigwana mbyoka ya lyatagula evi lyaJuda noya halakanitha aantu yalyo.”

2

¹ Memoniko ekwawo onda mono omuntu e na oshiyelekithongodhi miikaha ye.

² Onda pula nda ti “Oto yi peni?” Okwa yamukula a ti: “Otandi ka yeleka Jerusalem, ndi tale kutya oshi na uule u thike peni noshi na omutamo gu thike peni.”

³ Nena onda mono omuyengeli ngoka a popi nangame, okwa katuka u uka komeho, nomuyengeli omukwawo okwe ya, e mu tsakaneke.

⁴ Gwotango okwa ti kumukwawo: “Matuka, u ka lombwele omugundjuka ngoka e na oshiyelekithongodhi kutya muJerusalem otamu ka kala aantu oyendji niimuna oyindji notashi ka kala oshinene unene, itashi ka vula okukala nedhingililokuma.

⁵ Omuwa oku uvaneke kutya oye mwene ta ka kala ekuma lyomulilo lya kunduka oshilando e shi gamena noye ta ka kala mo neadhimo lye alihe.”

⁶ Omuwa okwa ti kaantu ye: “Onde mu halakanithile koombinga adhihe. Ihe ngashingeyi, ne aapongekwa, zii ko kuBabilon, mu shune kuJerusalem.

⁷

⁸ Shaa ngoka te mu umpile, ota gumu keliko lyandje lyondilo.” Onkee Omuwa Omunankondoawike okwa tumu ndje nelaka ndika kiigwana mbyoka ya yugu aantu ye:

⁹ “Omuwa ye mwene ote ke mu kondjitha, notamu ka yugwa kaantu mboka ya li aapika yeni.” Uuna shika tashi ka ningwa, shaa ngoka ota ka tseya kutya Omuwa Omunankondoawike okwa tuma ndje.

¹⁰ Omuwa okwa ti: “Yantu yaJerusalem, imbeni kenyanyu! Otandi ya, ndi kale mokati keni.”

¹¹ Pethimbo ndyoka iigwana oyindji otayi ke ya kOmuwa notayi ningi aantu ye. Ota ka kala mokati keni, notamu ka tseya kutya oye a tumu ndje kune.

¹² Lumwe natango, Juda ota ka kala eliko lyOmuwa lya sheywa mevi lye eyapuki, naJerusalem otashi ka ninga oshilando shoka e shi hole unene.

¹³ Mweneni koshipala shOmuwa, oshoka ote ya ta ziilile kehala lyuuyapuki we.

3

¹ Memoniko ekwawo Omuwa oku ulukile ndje omuyambi omukuluntu Josua a thikama koshipala shomuyengeli gwOmuwa. Ponto yaJosua opwa thikama Satana i ipyakidhila oku mu pa uusama.

² Omuyengeli gwOmuwa okwa ti kuSatana: “Omuwa ne ku pangule, Satana! Omuwa, ngoka e hole Jerusalem, ne ku tokole. Omulumentu nguka okwa fa oshidhimakuni sha nakulwa momulilo.”

³ Josua okwa li a thikama mpoka a zala oonguwo dha nyata.

⁴ Omuyengeli okwa ti kaayakuli ye aakwagulu: “Huleni omulumentu nguka oonguwo ndhoka a zala.” Nena okwa ti kuJosua: “Onda kutha po omayono goye notandi ku pe oonguwo oompe dhokuzala.”

⁵ Okwa lombwele aayakuli, ya zaleke egala lya yela komutse gwaJosua. Oye shi ningi noye mu zaleke oonguwo oompe manga omuyengeli gwOmuwa a thikama mpoka.

⁶ Nena omuyengeli okwa hokololele Josua kutya

⁷ Omuwa Omunankondoawike okwa tile: “Ngele to vulika kiipango yandje noto dhiginine iilonga nde yi ku pa, nena oto ka tsikila okukala miilonga yotempeli yandje noyiinyanga yayo, notandi ka uva omagalikano goye, naanaa ngaashi handi uvu omagalikano gaayengeli mboka ye li koshipala shandje.

⁸ Josua, pulakena, ngoye ngu omuyambi omukuluntu; pulakeneni ne aayambi yalwe wo, one endhindhiliko lyonakuyiwa ombwanawa; otandi ka holokitha po omuntu gwandje, ngoka taku tiwa Shitutuma.

⁹ Otandi tenteke koshipala shaJosua emanya limwe li na oombo heyali. Otandi ka takela mo enyolo, nomesiku limwe otandi ka kutha po oondjo dhoshilongo shika.

¹⁰ Esiku ndyoka shaa ngoka gwomune ote ki ithana mushiinda she ya kale mombili nomegameno momiviinu nomomikwiyu dhe.”

4

¹ Omuyengeli ngoka a li ta popi nangame, okwe ya ishewe nokwa pendutha ndje ongaangoka nda li nda kotha,

² e ta pula: “Owu wete shike?” Onda yamukula: “Oshihukikwanyeka shoshingoli nokomutse gwasho oku na oshikwatelo shomahooli. Koshihukikwanyeka oku na oolamba heyali, kehe yimwe yi na omahala gomitemo heyali.

³ Oku na omiti mbali dhooholivi ontega noshihukikwanyeka, omuti gumwe kombinga kehe.”

⁴ Nena onda pula omuyengeli nda ti: “Shika otashi holola shike, tatekulu?”

⁵ Okwa pula ndje a ti: “Ku shi shi?” Onda yamukula: “Aawe, tatekulu.”

⁶ Omuwa okwa lombwele ndje, ndi pe Serubbabel elaka ndika lya zi kuye tali ti: “Oto ke shi vula, ihe hakoonkondo dhuukwiita nenge komatha goye mwene, aawe, okombepo yandje.

⁷ Omikundu ominenenene dhi thike poondundu otadhi ka kana po komeho goye. Oto ka tungulula otempeli, nongele wa tula ondhopi yahugunina peha lyayo, oshigwana otashi ka kugilila tashi ti: ‘Osho opala sho opalelela!’ ”

⁸ Elaka ekwawo olye ya lya zi kOmuwa

⁹ tali ti: “Serubbabel okwa tameka omukanka gwotempeli noye te ke yi mana okutunga. Shika sho sha ningwa, nena aantu yandje otaa ka tseya kutya ongame nde ku tumu kuyo.

¹⁰ Oya nika oluhodhi, oshoka opwa ningwa ehumokomeho eshona lyowala. Ihe otaa ka mona Serubbabel ta tsikile okutunga otempeli notaa ka nyanyukwa.”

5

¹ Onda ligamene ishewe, nopethimbo ndika onda mono ondhinga yembo tayi tuka mewangandjo.

² Omuyengeli okwa pula ndje: “Ou wete shike?” Ngame onda yamukula: “Ondhinga yembo tayi tuka mewangandjo; oyi na uule woometa omugoyi nomutamo gwoometa ne netata.”

³ Nena omuyengeli okwa ti kungame: “Muyo omwa nyolwa etulomutima ndyoka tali adha evi alihe. Kombinga yimwe yondhinga otaku tiwa kutya omufuthi kehe ota ka kuthwa mo moshilongo; nokombinga onkwawo otaku tiwa kutya shaa ngoka ha popi iifundja mokugana, ota ka kuthwa mo.

⁴ Omuwa Omunankondoawike ota ti kutya ota ka tuma etulomutima ndika, notali ka adha egumbo lyomufuthi kehe negumbo lyakehe ngoka ha popi iifundja mokugana. Otali ka kala momagumbo gawo, notaa ka teka po.”

⁵ Omuyengeli okwa holoka ishewe e ta ti: “Tala! Otaku zi sha!”

⁶ Onda pula nda ti: “Oshike?” Okwa yamukula: “Osho eshungu tali yeleke oondjo dhoshilongo ashihe.”

⁷ Eshungu olya li li na oshisiikilo sha ningwa moholo. Sho nda tongolola, eshungu olya suukululwa, omo nomwa li omukiintu a kuutumba.

⁸ Omuyengeli okwa ti: “Omukiintu oku lile po aantu aagoyoki.” Nena okwe mu tula meshungu nokwe li siikile.

⁹ Onda ligamene nonda mono aakiintu yaali taa tuka yu uka kungame ye na omawawa omanene ga fa gakandoko. Oya kutha po eshungu e taa tuka nalyo.

¹⁰ Onda pula omuyengeli: “Otaye li fala peni?”

¹¹ Okwa yamukula: “OkuBabilon, nkoka taa ke li tungila otempeli. Otempeli ngele ya pu okutungwa, eshungu otali ka tulwa mo, opo li simanekwe.”

6

¹ Onda mono emoniko ekwawo. Pethimbo ndika onda mono mo omatembakwiita gane tage ya taga zi pokati koondundu mbali dhoshikushu.

² Etembakwiita lyotango olya li tali hilwa kuukambe uutiligane, etiyali okuukambe uuluudhe,

³ etitatu okuukambe uutokele netine okuukambe uukanga.

⁴ Nena onda pula omuyengeli. “Tatekulu, omatembakwiita ngaka otaga holola shike?”

⁵ Okwa yamukula: “Ogo oombepo ne; odha zi koshipala shOmuwa gwevi alihe.”

⁶ Etembakwiita tali hilwa kuukambe uuluudhe, olya li tali yi kuBabilon, uukambe uutokele owa li wu uka kuuninginino nuukambe uukanga owa li wu uka koshilongo shokuumbugantu.

⁷ Uukambe uukanga sho wa zi mo, owa li we endelela, u ka ndaadhe evi. Omuyengeli okwa ti: “Indeni, mu ka ndaadhe evi!” Owo nowe shi ningi,

⁸ Nena omuyengeli okwi igidha ndje. “Uukambe mboka wa yi koshilongo shokuumbangalantu, owa loteke ondjahi yOmuwa.”

⁹ Omuwa okwa pe ndje elaka ndika

¹⁰ a ti: “Kutha omagano ngoka ge etwa kaapongekwa Heldai, Tobia naJedaia e to yi kaandjaJosia yaSefani. Aalumentu mbaka ayehe oya zi muupika muBabilon.

¹¹ Hambula oshishani shoshisiliveli noshingoli shoka ye shi eta e to shi zaleke komutse gwomuyambi omukuluntu Josua yaJehosadak.

¹² Mu lombwela kutya Omuwa Omunankondoawike ota ti: ‘Omulumentu ngoka taku tiwa Shitutuma, ota ka tsapuka e ta ka tungulula otempeli yOmuwa.

¹³ Oye mwene te ke yi tungulula nota taamba esimano lyuukwaniilwa, nota ka lela aantu ye. Omuyambi ota ka thikama poshipangelapundi she, oyo notaa ka longela kumwe mombili nomeuvathano.’

¹⁴ Oshishani otashi ka kala endhindhiliko motempeli yOmuwa okudhimbulukwa Heldai, Tobia, Jedaia naJosia.”

¹⁵ Aantu mboka ye li kokule, otaa ke ya e taa kwatha metungululo lyotempeli yOmuwa. Nongele ya tungwa, otamu ka tseya kutya Omuwa Omunankondoawike okwa tumu ndje kune. Ayihe mbika otayi ka ningwa, ngele tamu vulika shili kiipango yOmuwa Kalunga keni.

7

¹ Momumvo omutine gwaDarius sho a li omukwaniilwa, mesiku etine lyomwedhi omutimugoyi (omwedhi Kislev) Omuwa okwa pe ndje elaka.

² Aantu yokuBetel oya tumu Sharezer naRegemmelek naantu yawo kotempeli yOmuwa Omunankondoawike, ya galikane nokwiindila eyambeko lyOmuwa

³ noya pule aayambi naahunganeki epulo ndika: “Otu na okutsikila okulila molwekumukopo lyotempeli nokwiidhilika iikulya momwedhi omutitano, ngaashi hatu shi ningi momimvo odhindji dha pita?”

⁴ Omuwa okwa pe ndje elaka ndika

⁵ a ti: “Lombwela aantu yomoshilongo naayambi kutya sho ya li yi idhilika iikulya nokulila momwedhi omutitano nomutiheyali methimbo lyoomvula omilongo heyali, kasha li nando omolwokusimaneka ndje.

⁶ Nuuna ya li noya nu, osha li owala okwiinyanyudha yo yene.”

⁷ Kamu shi oohapu ndhoka Omuwa a lombwele aahunganeki yonale, manga Jerusalem sha li oshilando shi na elago noshi na aantu oyendji, ngaashi wo iilando momudhingoloko gwasho, oshitopolwa shokuumbugantu niikulundundu yoponyonga yoondundu dhokuuninginino?

⁸ Omuwa okwa lombwele Sakaria:

⁹ “Nalenale onda lombwelele aantu yandje: ‘Tsakanitheni uuyuuki ne mu ulukilathane uukuume nesilohenda.

¹⁰ Aaselekadhi, oothigwa, aakwiilongo noohepele inamu ya hepeka. Inamu dhiladhila okweehamekathana.’

¹¹ “Ihe aantu yandje oya tindi okupulakena. Oya pata omadhiladhilo gawo

¹² noya kukutike omitima dhawo ongemanya. Onkee onda geyele noonkondo, oshoka oya li inaa hala okupulakena omalongo ngoka nde ya pe maahunganeki.

¹³ Molwaashoka oya li inaa pulakena oohapu dhandje, inandi ya yamukula, sho ya galikana.

¹⁴ Onde ya thekeke po ngaashi oshikungulu hashi ningi noya kala muundjendi. Oshilongo shika oshiwanawa osha thigwa po sha mbugala, shaa na omuntu.”

8

¹ Omuwa Omunankondoawike okwa lombwele Sakaria elaka ndika:

² “Onda yuulukwa okukwatha Jerusalem, oshoka ondi hole unene aantu yasho. Ohole ndjoka oyo ya geyitha ndje, ndi geele aatondi yasho.

³ Otandi ka shuna kuJerusalem, oshilando shandje oshiyapuki, notii ka kala mo. Otashi ka kala sha tseyika oshilando oshiinekelwa, nondundu yOmuwa Omunankondoawike otayi ki ithanwa ondundu ondjapuki.

⁴ Aalumentu naakiintu aakulupe, mboka taye ende nokwiitsila koombondje, otaa ka kuutumba momahalandjandja gasho.

⁵ Omapandaanda otage ku udha aamati naakadhona taa dhana.

⁶ “Shika osha fa itaashi vulika momeho gaamboka ya hupu po ngashingeyi, ihe ngame itashi nyenge ndje.

⁷ Otandi ka kongolola aantu yandje, ya ze kiilongo ayihe nkoka ya falelwe ko,

⁸ notandi ke ya eta okuza kuuzilo nuuninginino, ya kale muJerusalem. Otaa ka ninga aantu yandje notandi ningi Kalunga kawo noku ya lela nuudhiginini nonuuyuuki.

⁹ “Ikoleleleni! Ngashingeyi otamu uvu oohapu odho tuu ndhoka dha popilwe kaahunganeki pethimbo lyefulo lyomukanka gwetungululo lyotempeli yandje.

¹⁰ Sigo oompoka kakwa li nando omuntu ta vulu okuthitha omuntu nenge oshimuna nokape na ngoka a li a hupu miikaha yaatondi ye. Onde etha aantu, ya pilukilathane.

¹¹ Ihe ngashingeyi mboka ya hupu po yomoshigwana shika, otandi ya ningile uuwanawa.

¹² Otaa ka kuna oombuto dhawo nombili. Omiviinu dhawo otadhi ki ima omandjembele, evi otali ke eta eteyo notaa ka mona omvula ya gwana. Aantu yoshigwana shandje mboka taa hupu ko, otandi ke ya pa omayambeko agehe ngaka.

¹³ Oshigwana shaJuda naIsrael! Nale aakwiilongo oya li haa thingathana taa ti: ‘Oshiponga sha adhele Juda naIsrael, nashi ku lambele!’ Ihe ngame otandi ku hupitha. Nena aakwiilongo mbeyaka otaa ka lombwelathana taa ti: ‘Taamba eyambeko ndyoka lya adha Juda naIsrael!’ Onkee ano ikoleleleni ne inamu tila.”

¹⁴ Omuwa Omunankondoawike ota ti: “Oohokulu sho ya geyithile ndje, onde ya dhiladhilile iiponga noinandi lundulula nando omadhiladhilo gandje, ihe onda tsakanitha oompangela dhandje.

¹⁵ Ihe nena onda hala okuyambeka aantu yomuJerusalem naJuda. Onkee inamu tila.

¹⁶ Tsakanitheni iinima mbika: Hokololelathaneni oshili. Tokoleni pauyuuki nopambili.

¹⁷ Inamu dhiladhililathana uuwinayi. Inamu gandja uumbangi wiifundja nokugana. Ondi tonde iifundja, uugoyoki nuukolokoshi.”

¹⁸ Omuwa Omunankondoawike okwa lombwele Sakaria elaka ndika:

¹⁹ “Okwiidhilika iikulya momwedhi omutine, omutitano, omutiheyali nomutimulongo otaku ka kala oshituthi shenyanyu noshehambelelo moshigwana shaJuda. Holeni oshili nombili.”

²⁰ Omuwa Omunankondoawike ota ti: “Esiku otali ya, uuna aantu taa ka za kiilando iinene taye ya kuJerusalem.

²¹ Mboka taa zi koshilando shika, otaa ka tya kumboka ya zi koshilando shiyaka: ‘Otatu ka simaneka Omuwa Omunankondoawike noku mu galikana, e tu yambeke. Ileni, tu yeni!’

²² Aantu oyendji niigwana iinankondo otayi ke ya kuJerusalem, yi simaneke Omuwa Omunankondoawike noku mu galikana, e ya yambeke.

²³ Momasiku ngeyaka aakwiilongo omulongo otaye ya kOmujuda gumwe notaa ti: ‘Otwa hala okukala pamwe nane, oshoka tse otu uvu kutya Omuwa oku li nane.’ ”

9

¹ Ndika olyo elaka lyOmuwa: Oku uthile evi lyaHadrak noshilando Damaskus egeelo. Hamazimo gaIsrael ageke, ihe oshilandopangelo shaSiria nasho wo oshOmuwa.

² Hamat sha palathana naHadrak nasho wo oshOmuwa ngashika iilando Tiro naSidon nomaunkulungu gaantu yayo.

³ Tiro okwi itungile omapopilongulu nokwa ndumbile iisiliveli niingoli ongoondumba dhiiyagaya!

⁴ Ihe Omuwa ota ka kutha po shaa shoka shi li mo. Ota ka umbila uuyamba washo mefuta, noshilando otashi ka fikwa po sheke.

⁵ Oshilando Ashkelon otashi ke shi mona e tashi haluka. Oshilando Gaza otashi ke shi mona e tashi adhika kuuwehame uunene. Osho wo Ekron, nomategameno gasho otaga kana po. Gaza otashi ka kanitha omukwaniilwa gwasho, Ashkelon otashi ka thigwa sha mbugalekwa.

⁶ Aantu yoombinzi mbali otaa ka kala muAshdod. Omuwa ota ti: “Otandi ka fupipika Aafilisti ayehe mbaka ye na uuntsa.

⁷ Itaa ka lya we onyama yi na ombinzi nenge iikulya yilwe yi indikwa. Oonakuhupapo ayehe yawo otaa ka ninga ongundu maantu yandje notaa ka ninga oludhi mezimo lyaJuda. Ekron ota ka ninga ongundu maantu yandje, ngaashi Aayebusi ya ningi.

⁸ Otandi ka wilika oshilongo shandje notandi shi gamene kiita, yi shi pitilile. Itandi pitika we, aathiminiki ya thindile aantu yandje kongudhi. Onda mono, nkene aantu yandje taa hepekwa.”

⁹ Nyanyukweni, nyanyukweni, yantu yaSion! Ligoleni kenyanyu, ne yomuJerusalem, Taleni, omukwaniilwa gweni ote ya kune! Ote ya nekandanga omusindani, ihe omuneifupipiko a londa okasino, okandoongilona, ontana yokasino.

¹⁰ Omuwa ota ti: “Otandi ka kandula po omatembakwiita muIsrael e tandi kutha ko uukambe kuJerusalem; omatati ga longithwa miita, otaga ka teyagulwa po. Omukwaniilwa gweni ota ka tunga ombili mokati kiigwana; ota ka lela okuza kefuta sigo okefuta, okuza komulonga Eufrat sigo ehulilo lyuuyuni.”

¹¹ Omuwa ota ti: “Omolwehangano lyandje nane, ndyoka lya kolekwa nombinzi yomayambo, otandi ka mangulula oshigwana sheni — shi ze moshilambo shuupika shaa na omeya.

¹² Galukeni, ne aapongekwa mboka mu na etegameno, galukileni keha lyeni lyepopilo. Otii mu lombwele nena otii ke mu yambeka shili omolwokuhepekwa kweni akuhe.

¹³ Otandi ningi Juda onguutati womukwiita naIsrael ota fe iikuti. Aalumentu yaSion otaa ka kala egongamwele lyandje okukondjitha aalumentu Aagreka.”

¹⁴ Omuwa ota ka holoka kombanda yaantu ye; iikuti ye ote ke yi umba ngoombadhi. Omuwa Omupangeliawike ota ka hika ombenda ote ke endela moshikungulu tashi zi kuumbugantu.

¹⁵ Omuwa Omunankondoawike ota ka gamena aantu ye oyo notaa ka hanagula po aatondi yawo. Otaa ki igidha molugodhi ya fa oonkolwi, notaa ka tilahi ombinzi yaatondi yawo; otayi ka kunguluka ngombinzi yomayambo ya tilwa koshiyambelo.

¹⁶ Uuna esiku ndyoka tali thiki, Omuwa ota ka hupitha aantu ye, ngaashi omusita ta hupitha oshigunda shoonzi moshiponga. Otaa ka adhima moshilongo she onguuwe womoshishani.

¹⁷ Oshilongo shoka otashi ka kala oshiwanawa nosho opala! Aagundjuka otaa ka koka aanankondo kiilya yasho nokomaviinu gasho

10

¹ Indileni kOmuwa omvula yontemuna. Omuwa ota tumu iikogo yomvula niihomo nota zizitha omapya gaayehe.

² Aantu otaa pula omayele kiikalunga nokaayanekeli, ihe omayamukulo ngoka taa mono, ogiifundja noguugoya. Yamwe otaa fatulula oondjodhi, ihe otaye mu pukitha ashike; itaa vulu oku mu kwatha. Onkee aantu taa endagula ya fa oonzi dha kana. Oye li muudhigu, oshoka kaye na omuwiliki.

³ Omuwa ota ti: “Onda geela aakwiilongo mboka taa pangele aantu yandje, otandi ke ya pangula. Oshigwana shaJuda oshandje, nangame, Omuwa Omunankondoawike, otandi ke ya sila oshimpwiyu. Otaa ka ninga uukambe wandje wuukwiita uunankondo.

⁴ Mokati kawo otamu ka za aaleli, aawiliki noondjayi okupangela aantu yandje.

⁵ Aantu yaJuda otaa ka kala aasindani ya fa aakwiita taa lyatele aatondi yawo mondoya yomuuyanda. Otaa ka kondja, oshoka Omuwa oku li pamwe nayo, notaa ka sinda aatondi, nonando oya kale haa kayile uukambe.

⁶ “Otandi koleke Aajuda; otandi hupitha Aaisraeli. Otandi ya sile ohenda, notandi ya eta ayehe kegumbo. Otaa ka kala ya fa inaandi ya ekelahi nande. Ongame Omuwa Kalunga kawo; otandi ka yamukula omaindilo gawo.

⁷ Aaisraeli otaa ka nkondopala ya fa aakwiita; taa nyanyukwa ya fa aantu ya nwa omaviinu. Oluvalo lwawo otalu ka dhimbulukwa esindano ndika notaa ka nyanyukilwa shoka Omuwa a longo.

⁸ “Otii ki ithana aantu yandje noku ya gongela kumwe Otii ke ya hupitha e tandi ya indjipalitha, ngaashi ya li nale.

⁹ Nonando nde ya halakanithila mokati kiigwana, natango otaa ka dhimbulukwa ndje komahala gokokule. Oyo pamwe noyana otaa ka hupa notaa galukile kegumbo ayehe kumwe.

¹⁰ Otandi ke ya eta kegumbo okuza Egipiti naAssur, e taa kala mevi lyawo yene. Otii ke ya tula muGilead naLibanon; oshilongo ashihe otashi ku udha aantu.

¹¹ Sho taa taguluka efuta lyuudhigu wawo, ongame, Omuwa, tii ka lotitha omakuthikuthi, nomeya omale gaNiili otaga ka pwina. Assur shuuntsa otashi ka shonopekwa, Egipiti oshinankondo otashi ka tyololoka.

¹² Otii ka nkondopaleka aantu yandje; otaa ka simaneka ndje nokuvulika kungame.” Omuwa oye a popi adhihe ndhika.

11

¹ Libanon, egulula omiyelo dhoye, opo omulilo gu fike po omiti dhoye omisendeli!

² Omiti omikiperesi, lileni nokutakuma — omisendeli odha teka po; omiti ndhoka dha simana, odha hanagulwa po! Lileni nokutakuma, oomwandi dhaBaasha — okuti kwa thitakana okwa komangelwa po!

³ Aaleli taa lilagana koluhodhi; esimano lyawo lya hulu! Pulakeneni okupumba kwoonime; omakuti gadho puJordan oga hanagulwa po!

⁴ Omuwa Kalunga kandje okwa ti kungame: “Kala omusita gwoshigunda shoonzi dhu uka kokatomeno.

⁵ Ooyene yadho otaye dhi dhipaga yo itaa geelwa. Otaa hahitha onyama e taa ti: ‘Hambeleleni Omuwa! Otse aayamba!’ Naasita yadho kaye na henda nadho.”

⁶ (Omuwa okwa ti: “Itandi sile nando ogumwe ohenda kombanda yevi. Ongame mwene tii ka tula aantu ayehe miikaha yaapangeli yawo. Aapangeli mboka otaa ka mbugaleka evi, ngame noitii ke li hupitha nando miikaha yawo.”)

⁷ Mboka ya landa noya landitha po oonzi, oya ningi ndje omusita gwoonzi tadhi ka dhipagwa. Onda kutha oondhimbo mbali: Yimwe onde yi luku “Ohokwe” nonkwawo “Uukumwe”. Onkee onda li te litha oonzi.

⁸ Aasita yatatu mboka ye tonde ndje, inandi yi idhidhimikila; onde ya tidha po ayehe momwedhi gumwe aguke.

⁹ Nena onda lombwele oonzi: “Inandi hala we okukala omusita gweni. Ndhoka dhi na okusa, nadhi se. Ndhoka dhi na okukana, nadhi kane. Naandhoka tadhi hupu po, nadhi lyaathane po.”

¹⁰ Nena onda kutha ondhimbo yedhina “Ohokwe” e tandi yi teya po. Shika osha holola okuteya ehangano ndyoka Omuwa a hangana niigwana ayihe.

¹¹ Mesiku ndyoka ehangano olya teywa po. Mboka ya landa noya landitha oonzi oya tongolola ndje noya tseya kutya Omuwa okwa li ta popi mushoka nda ningi.

¹² Onda ti kuyo: “Ngele oshe mu opalela, pii ndje ondjambi yandje. Ihe ngele hasho, kaleni nayo.” Onkee oya futu ndje iimaliwa iisiliveli omilongo ndatu, yi ninge ondjambi yandje.

¹³ Omuwa okwa ti kungame: “Yi tula meliko lyotempeli.” Onkee onda kutha iimaliwa mbyoka iisiliveli omilongo ndatu — ogwo omwaalu omunene, ngoka taa dhiladhila kutya ogwa gwana ndje — nonde yi tula meliko lyotempeli.

¹⁴ Nena onda teya po ondhimbo ontiyali yi ithanwa “Uukumwe”. Osho uukumwe pokati kaJuda naIsrael owa teka po.

¹⁵ Nena Omuwa okwa ti kungame: “Ngashingeyi kala omusita omugoya.

¹⁶ Onda tula omusita mokulitha oshigunda shandje, ihe ita kwatha nando oonzi ndhoka tadhi yonwa po; ita pukulula oonkani, ita panga ndhoka tadhi alukwa nenge a paluthe ndhoka dha hupu po. Peha lyasho ota li onyama yoonzi ndhoka dho ondoka lela e ta teya ko omakondo gadho.

¹⁷ Yaye omusita omugoya! Okwe ethele oshigunda she miiponga. Iita otayi ke mu kutha oonkondo thiluthilu. Okwooko kwe otaku kukuta, neho lye lyokolulyo otali ka tsika mo.”

12

¹ Ndika olyo elaka tali popi Israel lya zi kOmuwa, Omuwa ngoka a tula ko omawangandjo, a shita evi nokwa mwenyeke omuntu. Ye ota ti:

² “Otandi ka ninga Jerusalem a fe oshitenga shomaviinu; iigwana ye shi kunduka, otayi ke ga nwa e tayi tantagala ya fa oonkolwi. Nuuna taa kondeke Jerusalem, oshilando shevululuko lyaJuda, nasho wo otashi ka kondekwa.

³ Ihe ethimbo ngele lya thikana, otandi ka ninga Jerusalem ongemanya lya kola. Oshigwana kehe tashi li toola po, otashi gwilwa kulyo. Iigwana ayihe yomuuyuni otayi hangana molugodhi, yi shi matukile.

⁴ Pethimbo ndyoka otandi ka pwidhukitha uukambe wawo auhe naalondi yawo otandi ke ya goyapeka. Otandi ka tonatela oshigwana shaJuda, ihe uukambe waatondi yawo otandi ke u posipaleka.

⁵ Nena omaludhi gaantu yaJuda otaga ka lombwelathana taga ti: ‘Omuwa Kalunga Omunankondoawike ota gandja oonkondo kaantu ye mboka ye li muJerusalem.’

⁶ “Pethimbo ndyoka omaludhi gaJuda otandi ke ga ninga ga fa epeya mokuti nenge omulilo mepya lyiilya ya kukuta — otaa ka hanagula po iigwana ayihe ye ya kunduka. Aantu yaJerusalem otaa ka hupa e taa kala nawa moshilando.

⁷ “Ongame, Omuwa, tango ote gandja esindano kuJuda, opo oluvalo lwaDavid naantu yaJerusalem yaa kale ye vule oshihupe shaJuda mesimano.

⁸ Pethimbo ndyoka Omuwa ota ka gamena mboka ye li muJerusalem. Oshimbembe mokati kawo otashi ka kala sha fa David moonkondo. Oluvalo lwaDavid otalu ke ya wilika ngaashi omuyengeli gwOmuwa, ongaashi Kalunga mwene.

⁹ Pethimbo ndyoka otandi ka hanagula po oshigwana kehe tashi kambadhala okuponokela Jerusalem.

¹⁰ “Oluvalo lwaDavid naantu yalwe yaJerusalem otandi ke ya udhitha nombepo yesilohenda noyegalikano. Otaa ka tongolola ngoka ye mu dhipaga notaye ke mu lila ongaantu taa lili omunona epona. Otaa ka lila omahodhi omapyu ongomuntu a kanitha osheeli she shomumati.

¹¹ Pethimbo ndyoka oosa muJerusalem otadhi ka ninga oonene dha fa oosa dhaHadad Rimmon mesilu lyaMegiddo.

¹² “Ezimo kehe moshilongo otali ka lila oosa pulyo lyene: ezimo lya za muDavid, ezimo lya za muNatan, ezimo lya za muLevi, ezimo lya za muShimei nomazimo agehe galwe. Ezimo kehe otali ka lila oosa pulyo lyene, naalumentu yomezimo kehe otaa ka lila ya yooloka maakiintu.”

13

¹ Omuwa Omunankondoawike ota ti: “Uuna esiku ndyoka nali ya, oluthithiya otalu ka thituluka okuyoga oluvalo lwaDavid naantu yaJerusalem koonyata dhawo dhuulunde nokiimenka yawo haye yi simaneke.

² Pethimbo ndyoka otandi ka dhima po omadhina giimenka moshilongo, nokaku na we ngoka te ke ga dhimbulukwa. Otandi ka tidha mo shaa ngoka ti iti omuhunganeki notii ka kutha po ondjuulukwe yokusimaneka iimenka.

³ Nena shaa ngoka ta dhiginine natango okuhunganeka, he nayina otaa ka tya kutya na dhipagwe, oshoka ota ti kutya ota popi oohapu dhOmuwa, ihe ota fundju. Uuna ta hunganeke ngeyi, he nayina otaye ke mu dhipaga.

⁴ Uuna ethimbo ndyoka tali ya, kape na omuhunganeki te ki itangela omamoniko ge, nenge ta kala a fa omuhunganeki, nenge ta zala omizalo dhiifufu ongomuhunganeki, opo a fundjaleke aantu.

⁵ Peha lyasho ota ka tya: ‘Ngame kandi shi omuhunganeki, ngame omunepya — ngame onda longo omapya nonda litha iimuna mokukala kwandje akuhe.’

⁶ Nena ngele gumwe te mu pula ta ti: ‘Iilalo mbyoka yi li molupati lwoye, oyashike?’ Ota ka yamukula ta ti: ‘Onde yi monene maandjakuume kandje.’ ”

⁷ Omuwa Omunankondoawike ota ti: “Gongamwele, yeluka, u ukilile omusita ngoka ta longele ndje! Mu dhipaga, nena oonzi otadhi ka halakana. Otii ka matukila aantu yandje,

⁸ nomoshilongo ashihe iititatu iyali otayi ka sa.

⁹ Notandi ke ya yelitha, ngaashi oshisiliveli tashi yelithwa komulilo. Otandi ke ya yelitha, ngaashi oshingoli hashi yelithwa. Nena otaa ka galikana ndje, ngame notandi ya yamukula. Otandi ke ya lombwela kutya oyo aantu yandje, notaa ka zimina kutya ongame Kalunga kawo.”

14

¹ Esiku uuna Omuwa ta ka pangula iigwana, oli li popepi. Nena Jerusalem otashi ka matukilwa, noshihakanwa otashi ka topolwa montaneho yeni.

² Omuwa ota ka gongela iigwana ayihe, yi hingile Jerusalem iita. Oshilando otashi ka lalwa, omagumbo otaga ka yugwa, naakiintu otaa ka lalwa nayo. Etata lyaantu otali ka ya muupika, ihe oshihupe shomuyo itashi ka kuthwa mo moshilando.

³ Nena Omuwa ota ka za mo e ta kondjitha iigwana mbyoka, ngaashi a kondjele muuyuni wonale.

⁴ Pethimbo ndyoka ota ka thikama kOndundu yomiolivi kuuzilo waJerusalem. Nena Ondundu yomiolivi otayi ka pambuka miitopolwa iyali okuza kuuzilo sigo okuuninginino polusilu olunene. Etata lyondundu otali uka lwokuumbangalantu, netata ekwawo, olwokuumbugantu.

⁵ Ne otamu ka fadhuka po tamu piti molusilu nduka talu topola ondundu miitopolwa iyali. Otamu ka fadhuka po, ngaashi oohokulu ya ningile, sho evi lya kakamene muuyuni womukwaniilwa gwaJuda Usia. Omuwa Kalunga kandje ote ke ya te etelele aayengeli ayehe.

⁶ Uuna ethimbo ndyoka tali ya, itaku ka kala uutalala nenge ombambi

⁷ nenge omilema. Otaku ka kala omutenya, nando omokati kuusiku. Omuwa oye awike a tseya, uuna mbika tayi ka ningwa.

⁸ Uuna esiku ndyoka tali ya, omeya omayelele otaga ka tondoka okuza muJerusalem; etata lyago otali tondokele mEfuta lya sa, netata ekwawo olyu uka kEfuta lyopokati. Otaga ka tondoka omumvo aguhe, pokwenye nopothinge.

⁹ Nena Omuwa ota ka ninga omukwaniilwa gwevi alihe; shaa ngoka ota ka simaneka Kalunga note ke mu tseya kedhina tuu ndyoka.

¹⁰ Omudhingoloko aguhe okuza kuGeba muumbangalantu sigo oRimmon muumbugantu otagu ka yelekana. Jerusalem otashi ka tuntumana kombanda yoshilongo she shi kunduka; oshilando otashi ka tsa kOsheelo shaBenjamin sigo okOsheelo shokokolonela, mpoka pwa li nale osheelo, nokuza koshungo yaHananel sigo okomatemba gokukolela omaviinu guuwa.

¹¹ Aantu otaa ka kala mo yaa na mbudhi; itaa ka lilithwa we kiiponga.

¹² Iigwana mbyoka tayi hingile Jerusalem iita, Omuwa ote ke yi tumina uuvu welega etilithi. Otaa ka ola, manga ye na omwenyo; omeho gawo nomalaka gawo otaga ka ola.

¹³ Pethimbo ndyoka Omuwa ote ke ya piyaganeka noku ya halutha e taa dhiladhila kutya shampa gumwe ota ka kwata kehe omuntu e li puye, e mu dhipage.

¹⁴ Aalumentu yaJuda otaa ka kondja, ya popile Jerusalem. Otaa ka kwata uuyamba wiigwana ayihe — oshingoli, oshisiliveli nomizalo odhindjidhindji.

¹⁵ Uuvu welega uutilithi otau ka kwata wo uukambe, omamulutiya, oongamelo nuusino — iinamwenyo ayihe moontanda dhaatondi.

¹⁶ Nena ayehe mboka ya hupu po yomiigwana mbyoka ya kondjitha Jerusalem, otaa ka ya ko omumvo kehe, ya simaneke Omuwa Omunankondoawike nomukwaniilwa noya dhane oshituthi shomatsali giihwa iitalala.

¹⁷ Ngele pe na oshigwana tashi tindi okuya ko, shi simaneke Omuwa Omunankondoawike nomukwaniilwa, nena omvula itayi ka loka nando moshilongo shawo.

¹⁸ Aayegipiti ngele otaa tindi okudhana oshituthi shomatsali giihwa iitalala, nena otaa ka adhika kelega tuu ndyoka Omuwa e li tumu kiigwana ayihe mbyoka tayi tindi okuya ko.

¹⁹ Osho Egipiti niigwana ayihe yilwe otayi ka geelwa, ngele itayi dhana oshituthi shomatsali giihwa iitalala.

²⁰ Pethimbo ndyoka nokuungendjo wokiikeshele yuukambe otaku ka kala kwa nyolwa “Wa yapulilwa Omuwa.” Oombiga dhokuteleka motempeli otadhi ka kala oondjapuki ngaashi iiyuma komeho goshiyambelo.

²¹ Oombiga adhihe dhokuteleka muJerusalem nomuJuda ashihe otadhi ki ikalekelwa okusimaneka Omuwa Omunankondoawike. Aantu mboka taa yamba omayambo, otaye ke dhi longitha mokuteleka onyama yomayambo. Uuna ethimbo ndyoka tali ya, motempeli yOmuwa Omunankondoawike itamu ka kala we omushingithi.