1 Momumvo omutiyali sho Darius a li omukwaniilwa gwaPersia, mesiku lyotango lyomwedhi omutihamano, Omuwa okwa popi momuhunganeki Haggai. Elaka olya li tali popi omuleli gwaJuda Serubbabel yaShealtiel nomuyambimukuluntu Josua yaJehosadak.
2 Omuwa Omunankondoawike ota lombwele Haggai ta ti: “Aantu mbaka otaa ti, ethimbo ndika halyo lyo opalela okutungulula otempeli.”
3 Omuwa okwa gandja elaka ndika lye endele momuhunganeki Haggai:
4 “Aantu yandje, omolwashike tamu kala momagumbo ga tungikika, manga otempeli yandje omakulukuma?
5 Kamu wete shoka tamu ningilwa?
6 Omwa kunu ombuto oyindji, ihe omwa teya oshishona unene. Iikulya yokulya omu yi na, ihe inayi gwana oku mu kutitha. Omu na omaviinu gokunwa, ihe itage mu kumitha. Omu na oonguwo, ihe inadhi gwana oku mu pupyaleka. Nomuniilonga oha kala moluhepo.
7 Kamu wete shoka tamu ningilwa?
8 Ngashingeyi londeni kiikulundundu, mu ka komangele omiti nomu tungulule otempeli. Nena otii ka tundulukwa e tandi ka longelwa, ngaashi shi na okukala.
9 “Omwa tegelela eteyo lyiilya ya vala nawa, ihe otayi ka shonopala. Nuuna tamu eta oondudhi kegumbo, otandi dhi pepula po. Omolwashike te ningi ngeyi? Omolwashoka otempeli yandje omakulukuma, manga shaa ngoka gwomune i ipyakidhila nokutunga egumbo lye mwene.
10 Omolwashika omvula ihayi loko, nevi ihali gandja iilya.
11 Onde eta oluteni moshilongo — kiikulundundu yasho, komapya, kiitsambe yomiviinu nokooholivi — kiikwamepya ayihe hayi zi mevi, kaantu nokiinamwenyo nokwaashihe shoka hamu kambadhala okukokitha.”
12 Nena Serubbabel naJosua naantu ayehe mboka ya galuka muupika muBabilon, oya ningi shoka Omuwa Kalunga kawo e shi ya lombwele. Oya li ya tila noya vulika komuhunganeki Haggai, omutumwa gwOmuwa.
13 Nena Haggai okwa gandja elaka lyOmuwa koshigwana tali ti: “Otandi uvaneke okukala pamwe nane.”
14 Omuwa okwa ladhipike ayehe okutunga otempeli. Omuleli gwaJuda Serubbabel, omuyambimukuluntu Josua naantu ayehe mboka ya galuka muupika, oya tameke okutunga otempeli yOmuwa Omunankondoawike, Kalunga kawo.
15 Osha ningwa mesiku etimilongo mbali netine lyomwedhi omutihamano gwomumvo omutiyali, sho Darius a li omukwaniilwa.
1 Mesiku etimilongo mbali nolyotango lyomwedhi omutiheyali omumvo tuu ngoka, Omuwa okwa popi ishewe momuhunganeki Haggai.
2 Okwa lombwele Haggai, a lombwele Serubbabel, omuleli gwaJuda, nomuyambimukuluntu Josua naantu yalwe ngeyi:
3 “Ope na tuu gumwe mokati keni ta vulu okudhimbulukwa eopalo lyonale lyotempeli ndjika? Oyi li ano ngiini momeho geni ngashingeyi? Oya fa kaayi na omutalelo gwasha.
4 Ihe inamu kala mwa tyololoka. Longeni, oshoka ondi li pamwe nane.
5 Sho mwa tembuka muEgipiti, onde mu uvanekele, ndi kale aluhe nane. Ondi li nane nokuli, ano inamu tila.
6 “Konima yokathimbo otandi ki inyengitha egulu nevi, uukukutu nefuta.
7 Otandi ka tukulutha iigwana ayihe, nomaliko gayo otage ke etwa nkuka, notempeli otayi ku udhithwa omauyamba.
8 Iisiliveli ayihe niingoli yomuuyuni auhe oyandje.
9 Otempeli ompe otayi ka taima unene yi vule yonale. Peha ndika otandi ka pa aantu yandje elago nombili.” Omuwa Omunankondoawike okwe dhi popi.
10 Mesiku etimilongo mbali netine lyomwedhi omutimugoyi gwomumvo omutiyali, Darius sho a li omukwaniilwa, Omuwa Omunankondoawike okwa lombwele ishewe omuhunganeki Haggai.
11 Okwa ti: “Pula aayambi owino kepulo ndi:
12 ‘Tu tye, omuntu ota kutha ontumba yonyama ondjapuki kondjambelo e yi humbatela ponguwo ye. Ngele te etha, onguwo yi gume oshikwiila, iikulya ya pya, omaviinu, omagadhi nenge sha shilwe hashi liwa, otayi yi ningi wo iiyapuki?’ ” Epulo sho lya pulwa, aayambi oya yamukula: “Aawe.”
13 Nena Haggai okwa pula: “Tu tye, omuntu ina yogoka, oshoka okwa gumu omudhimba. Ngele ota gumu shimwe shomiikulya mbika, ote shi nyateke?” Aayambi oya yamukula: “Eeno.”
14 Nena Haggai okwa ti: “Omuwa ota ti: ‘Osho naanaa tashi ningwa kaantu yoshigwana shika nokukehe shoka taye eta po. Shaa shoka taa yamba koshiyambelo, osha nyata.’ ”
15 Omuwa ota ti: “Otamu wapa tuu okumona shoka mwa ningilwa? Manga inaamu tameka okutungulula otempeli,
16 otamu yi kondumba yiilya yooshako hamano, ihe otamu zi ko owala nooshako ndatu. Mongoma ndjoka mwa li mu na okuza oolita ntano dhomaviinu, omwa zi owala mbali.
17 Onda tumu ombepo ompyu noompawe, yi yonagule po shaa shoka mwa kambadhala okukokitha, ihe ne inamu itedhulula natango.
18 Nena esiku etimilongo mbali netine lyomwedhi omutimugoyi, esiku lyetameko lyomukanka gwotempeli. Taleni shoka tashi ka ningwa po okuza ngashingeyi.
19 Nando inapa hupa iilya, nomiviinu, omikwiyu, omigranati nomiolivi inadhi ima natango, okuza ngashingeyi otandi ke mu yambeka.”
20 Mesiku tuu ndyoka etimilongo mbali netine lyomwedhi Omuwa okwa pe Haggai elaka
21 tali popi Serubbabel, omuleli gwaJuda tali ti: “Ngame otandi inyengitha egulu nevi
22 notandi tukulutha omatembakwiita naahingi yago; uukambe otau ka sa, naalondi yawo otaa ka dhipagathana.
23 Mesiku ndyoka otandi ke ku taamba, omuntu gwandje Serubbabel, notandi ke ku langeka, u lele medhina lyandje. Ongoye ngoka nde ku hogolola.” Omuwa Omunankondoawike okwe dhi popi.