1

¹ Oohapu ndhika Omuwa okwe dhi lombwele Sefania pethimbo lyaJosia yaAmmon, omukwaniilwa gwaJuda. (Sefania oyaKushi kwaGedalia yaAmaria gaHiskia.)

² Omuwa okwa ti: “Otandi ka hanagula po shaa shoka kombanda yevi,

³ aantu ayehe niinamwenyo noohi. Otandi ka komba po aakolokoshi ayehe. Otandi ka yonagula po aantu ayehe noitaku hupu nando ogumwe. Ongame Omuwa nde dhi popi.

⁴ “Otandi ka geela aantu ayehe yaJerusalem noyaJuda. Otandi ka hanagula po omathegela gesimaneko lyaBaal, nokaku na we ngoka ta ka dhimbulukwa aasaageli mboka ya li ya longele Baal.

⁵ Otandi ka hanagula po shaa ngoka ta londo koshihoko nota simaneke etango, omwedhi noonyothi. Otandi ka hanagula po wo mboka taa longele ndje nuudhiginini, ihe otaa gana medhina lyoshikalunga Molek.

⁶ Otandi ka hanagula po mboka ya shuna monima noitaa landula ndje we, mboka itaa ya we kungame nenge itaa galikana ndje, opo ndi ya endithe.”

⁷ Mweneni thilu koshipala shOmuwa. Oshoka esiku lyOmuwa oli li popepi, esiku uuna Kalunga ta ka ninga po sha Omuwa okwi ilongekidha okudhipaga aantu ye ngaashi iimuna.

⁸ Omuwa ota ti: “Esiku lyetselo otandi geele aambala, aana yokombanda aamati naayehe mboka taa holele aakwiilongo.

⁹ Otandi geele ayehe mboka haa tutula uudhano woshipagani naamboka haa yaka nohaa dhipaga, opo ya yambapaleke egumbo lyoshikalunga shawo.”

¹⁰ Omuwa ota ti: “Esiku ndyoka otamu ku uva omawi taga kugagana pOsheelo shoohi muJerusalem. Otamu ku uva etakumo moshitopolwa oshipe shoshilando nekolokoto enene koondundu.

¹¹ Kugeni e tamu lili, ne mbo mu li molusilu lwoshilando, uuna tamu shi uvu, oshoka aapindiki ayehe otaa ka sa.

¹² “Pethimbo mpoka otandi kutha olamba e tandi shilile Jerusalem. Otandi geele aantu mboka taa imbilipaleke noyi inekela yo yene notayi ipopile taa ti: ‘Omuwa ita tompola sha, shika nenge shiyaka.’

¹³ Uuyamba wawo otau ka yugwa po nomagumbo gawo taga ka hanagulwa po. Itaa ka kala momagumbo ngoka taye ga tungu nenge okunwa omaviinu gomiitsambe mbyoka taye yi tsike.”

¹⁴ Esiku enene lyOmuwa oli li popepi — popepilela notali ya tali endelele. Otali ka kala esiku elulululu, oshoka aakwiita oofulelela otaa ka lila kuudhigu!

¹⁵ Otali ka kala esiku lyondjahi, esiku lyuuwehame nolyuudhigu, esiku lyeyonuko nolyehanagulo, esiku lyomilema nolyondhimeya, esiku lyiikogo nolyomuzimbi,

¹⁶ esiku lyelilo lyoombenda dhiita noonkalu dhaakwiita taa ponokele iilandohote nooshungo oondeendeka.

¹⁷ Omuwa ota ti: “Otandi ka tumina aantu uudhigu tau ya pampadhalitha ya fa aaposi. Oya yono kungame, nongashingeyi ombinzi yawo otayi ka tilwahi ya fa omeya, nomidhimba dhawo otadhi ka lala dho olela pevi.”

¹⁸ Mesiku ndjoka Omuwa ota ka holola ondjahi ye, onkee oshisiliveli noshingoli shawo itashi vulu oku ya hupitha. Evi alihe otali ka hanagulwa po komulilo gwondjahi ye. Ota ka hulitha po mbala ayehe mboka ya kala kombanda yevi.

2

¹ Shigwana shaa na honi, itedhululeni,

² manga inaamu ganya e tamu si mwa fa oongala, manga ondjahi yOmuwa inaayi mu lambela, manga esiku ndyoka ta holola ondjahi ye, inaali thikana.

³ Galukileni kOmuwa, aayifupipiki amuhe yomoshilongo, mboka hamu vulika kiipango ye. Longeni shoka shu uka, ne mu ifupipike koshipala shOmuwa. Pamwe otamu ka henuka egeelo mesiku ndyoka, sho Omuwa ta ka holola ondjahi ye.

⁴ Moshilando Gaza itamu ka thigala nando ogumwe. Ashkelon otashi ka mbugalekwa. Aantu yomuAshdod otaa ka tidhwa mo metatasiku, naantu yomuEkron otaa ka tidhwa moshilando shawo.

⁵ Aafilisti, otamu pangulwa, aantu ne mbo mwa kala komunkulo. Omuwa okwe mu tokolele epangulo. Ote ke mu hanagula po amuhe noitapa hupu nando ogumwe.

⁶ Oshilongo sheni shopefuta otashi ka ninga omaputa pamwe nomatsali gaasita niiti yokupandekela oonzi.

⁷ Oshigwana shaJuda shoka sha hupu ko, otashi ka kwata po oshilongo sheni. Otaa ka lithila ko iimuna yawo notaa ka lala momagumbo gomuAshkelon. Omuwa Kalunga kawo ota ka kala pamwe nayo, noye te ya ningi aanelago ishewe.

⁸ Omuwa Omunankondoawike ota ti: “Ondu uvu aantu yaMoab noyaAmmon taa sheke notaa nyenkele aantu yandje notaa itanga kutya otaa kwata po oshilongo shawo.

⁹ Ongame Kalunga kaIsrael omunamwenyo, otandi gana kutya Moab naAmmon otayi ka hanagulwa po ngaashi Sodom naGomorra. Otayi ka ninga omakango gomongwa nombuga ya mena iigwanga sigo aluhe. Mboka yomaantu yandje mbo ya hupu ko, otaa ke ya yuga e taa kutha po oshilongo shawo.”

¹⁰ Oshigwana shaMoab noshaAmmon otashi ka geelwa omolweinenepeko lyawo nomolwokusheka oshigwana shOmuwa Omunankondoawike.

¹¹ Omuwa ote ya tilitha. Ota shundula iikalunga ayihe yokombanda yevi. Nena oshigwana kehe otashi ke mu simaneka mevi lyasho shene.

¹² Omuwa ota ka dhipaga po Aasudani.

¹³ Omuwa ota ka longitha oonkondo dhe, a hanagule po Assur. Oshilando Ninive ote shi ningi eputu, ongombuga yaa na omeya.

¹⁴ Otashi ka ninga ehala lyokukalwa kiinamwenyo yomaludhi agehe. Omahwiyu otaga ka huhuwala momakulukuma gasho nokulilila momakende. Omakola otaga ka lilila komayelo. Iipilangi yomisedeli momatungo gasho otayi ka kuthwa mo.

¹⁵ Shika otashi ningilwa oshilando shoka hashi isimanekele oonkondo dhasho nokukala kwasho kwaa na mbudhi. Aantu yasho otaa dhiladhila kutya oshilando shawo osha simana kwaayihe muuyuni. Akutu, nkene tashi ka ninga eputu neha lyiiyamakuti! Shaa ngoka ta pitilile po, oti ihunyu mumwe komahwilili.

3

¹ Yayee Jerusalem, oshilando sha tangalala nosha shunduka, tashi hepeke aantu yasho!

² Itashi pulakene Omuwa nenge shi taambe omapukululo ge. Inashi tula einekelo lyasho mOmuwa nenge shi mu kugile ekwatho.

³ Aambala yasho oya fa oonime tadhi pumbu; aatokolihapu yasho oya fa omambungu ga sa ondjala taga li nuufukedhi esipa gaaha adhe kungula.

⁴ Aahunganeki oyo aakotokeli aakaanohenda; aayambi otaa nyateke shoka oshiyapuki notaa pilike ompango yaKalunga pamayele gawo yene.

⁵ Ihe Omuwa oku li natango moshilando; ota longo shoka shu uka, iha gama kuuwinayi. Ongula kehe otu utha epangulo lye, itali kala inaali ya. Ihe natango aakolokoshi otaa tsikile niilonga yawo iiwinayi yo yaa na nando ohoni.

⁶ Omuwa ota ti: “Onda kombo po iigwana ayihe. Onda yonagula po iilando yawo, omakuma gayo nooshungo dhayo odha teka po. Iilando oya mbugala; omapandaanda oge li owala — inapa kala nando omuntu.

⁷ Onda dhiladhila, nena aantu yandje otaa simaneke ndje nokutaamba omageelo gandje, yaa dhimbwe nando omalombwelo gandje. Ihe mbalambala oya longo iihuna yowala.”

⁸ Omuwa ota ti: “Tegeleleni! Tegeleleni esiku, uuna tandi thikama okupangula iigwana. Onda tokola okugongela iigwana niilongo, opo ndi yi ulukile oonkondo dhondjahi yandje. Evi alihe otali ka yonagulwa po komulilo gwondjahi yandje.

⁹ “Nena otandi ka shitulula aantu yiigwana, notaa ka galikana ndje ngame awike nohaikalunga yilwe. Ayehe otaa ka vulika kungame.

¹⁰ Nokuli aantu yandje mboka ye li mehalakano muSudan, otaa ke etela ndje oondjambo.

¹¹ Pethimbo ndyoka, aantu yandje, itamu ka sa we ohoni, sho mwa li mwa tsa ondumbo nangame. Otii ka kutha po kehe ngoka ti itanga noti inomo, noitamu ka tsa we ondumbo nangame kondundu yandje ondjapuki.

¹² Aantu aaifupipiki naaishonopeki otandi ke ya kaleka po, mboka taa ya kungame okukonga ekwatho.

¹³ Oshigwana shaIsrael shoka sha hupu ko, itashi ka ningila nando ogumwe uuwinayi, itashi ka popya iifundja noitashi ka kambadhala okukotokela. Otaa ka kala ye na elago negameno, itaa ka tila nando osha.”

¹⁴ Imbeni nokuyelutha ewi lyenyanyu, ne Aaisraeli! Nyanyukwa nomutima aguhe, Jerusalem!

¹⁵ Omuwa a hulitha po oku ku geela; okwa kutha po aatondi yoye ayehe. Omuwa, omukwaniilwa gwaIsrael, oku li pungoye; onkee ito pumbwa we okutila.

¹⁶ Ethimbo otali ya, ya ka tye kuJerusalem: “Ino tila, shilando shaSion! Ino etha, omaako goye ga yululuke!

¹⁷ Omuwa Kalunga koye oku li pungoye; oonkondo dhe otadhi ku pe esindano. Omuwa okwe ku hokwa, nomohole ye ote ku pe omwenyo omupe. Oti imbi e te ku nyanyukilwa, ta nyanyukwa ongaambo ye li moshituthi.”

¹⁸ Omuwa ta ti: “Onda hulitha omupya gwoye note kutha po okushekwa kwoye!

¹⁹ Ethimbo otali ya! Otandi ka geela aathiminiki yoye; otandi ka mangulula iilema ayihe, naapongekwa otandi ya eta kegumbo. Ohoni yawo otandi yi shitukitha esimano, nuuyuni auhe otau ke ya tanga.

²⁰ Ethimbo otali ya! Otandi ka kongololela aantu yeni kegumbo; otandi mu simanekitha nuuyuni auhe, notandi mu ningi aanelago ishewe.” Omuwa oye e dhi popi.