1 Ndika olyo elaka tali popi Ninive, ehokololo lyemoniko lya monika kuNahum gwokuElkosh.
2 Omuwa Kalunga iti idhidhimikile mboka taa iyeleke naye; ota geele mboka taye mu kondjitha. Mondjahi ote shi ya galulile.
3 Omuwa iha geye mbala, ihe oye omunankondo noite etha aanandjo inaa geelwa. Mpoka Omuwa te ende, otapu tukuka iikungulu; iikogo oyo ontsi tayi tukulwa koompadhi dhe!
4 Efuta ote li lombwele, e tali pwine! Omilonga ote dhi kukutike. Omapya gokuBaasha otaga ganya, ondundu Karmel otayi pembe, noongala dhokuLibanon otadhi lembe.
5 Oondundu otadhi tengatenga montaneho yOmuwa; iikulundundu otayi hemuka koshipala she. Uuna Omuwa ta holoka, evi otali telagana; uuyuni naantu ayehe otaa kakama.
6 Olye ta vulu okuthikama, uuna Omuwa a geya? Olye ta vulu okuhupa, uuna a pindjala? Ota lokitha ondjahi ye ngomulilo; oondundu otadhi nyanyauka koshipala she.
7 Omuwa oye omwaanawa; ota gamene aantu ye methimbo lyuudhigu; ota sile oshimpwiyu ayehe mboka ye mu inekela.
8 Aatondi ye ote ya hanagula po thiluthilu ngefundja tali tondoka; mboka taye mu kondjitha, ote ya unzile meso.
9 Oshike tamu hangana, mu kondjithe Omuwa? Ote ke mu hanagula po. Kape na ngoka te shi yelekele ishewe.
10 Otamu ka lunguna po ngethita lyomano nongiiyagaya ya kukuta.
11 Mungoye, Ninive, omwa zi omuntu u udhilila iineya iiwinayi, ngoka a hala okukondjitha Omuwa.
12 Omuwa ota lombwele oshigwana she Israel: “Nando Aayassur ya kale aanankondo noya nyenga okuyalulwa, otaa ka yonagulwa po e taa kana po. Shigwana shandje, onde ku gandja mehepeko, ihe itandi ke shi ninga we.
13 Otandi ka hulitha po oonkondo dhaAssur dhoku ku gwililila po e tandi tokola omalyenge ngoka ge ku manga.”
14 Omuwa okwa tokola molwaAssur ta ti: “Itaa ka kala noluvalo lwokukalitha po edhina lyawo. Otandi hanagula po iimenka mbyoka yi li mootempeli dhiikalunga yawo. Otandi ya longekidhile ombila — inayi ilongela okukala ye na omwenyo.”
15 Taleni, omutumwa ote ya ta zi koondundu nonkundana ombwanawa! Oku li mondjila okutseyitha esindano! Shigwana shaJuda, iituthi yeni yi dhaneni nokupa Omuwa shoka mwe shi mu uvanekela. Aakolokoshi itaa ka ponokela we evi lyeni. Oya hanagulwa po thiluthilu.
1 Ninive, oto ka ponokelwa! Ehanagulo olye ku adha! Indeni komahala gokwiipopila! Langeleni ondjila! Ilongekidhileni olugodhi!
2 (Omuwa okwa hala okugalula esimano lyaIsrael, ngaashi lya li nale, manga aatondi ye inaaye li mu yuga.)
3 Aakwiita aatondi oya humbata iikandekitho iitiligane noya zala omizalo dha fa ombinzi. Otaa ilongekidhile eponokelo! Omatembakwiita gawo otaga geta ga fa omulilo! Uukambe wawo tau nuka omalondo!
4 Omatembakwiita otaga mbolokota momapandaanda, otaga kolokota momahalandjandja goshilando. Otaga adhima ngomalaka gomulilo notage ende ga fa olwaadhi.
5 Aambala otaa hiywa ya gongale; otaa tantala, sho taa endelele yu uka komeho. Aaponokeli otaa matukile kekuma e taa yelutha oshikandekitho okushiga oshikumunithi shekuma.
6 Omiyelo dhopomulonga dha mwakuka; uuwa wa shoshomekwa kuumbanda.
7 Omunyekadhi ota kwatwa omupika; aadhike ye taa lili ya fa oonguti notayi ikwata pontulo koluhodhi.
8 Aantu otaa gwaya mo muNinive ongomeya taga panuka mondama. Otaku igidhwa: “Kankameni! Thikameni!” Ihe kape na ngoka ta galuka.
9 Yugeni oshisiliveli! Hakaneni oshingoli! Oshilando oshu udha omaliko!
10 Ninive otashi hanagulwa po, tashi thigwa po, tashi mbugalekwa! Omitima otadhi kukuta kuumbanda; oongolo otadhi tifauka, oonkondo dha kana; iipala otayi pembe.
11 Oshilando oshi li peni ngashingeyi, shoka sha li sha fa ekololo lyoonime, ehala mpoka oonime oongundjuka dha paluthilwa, mpoka oondumentunime noonyalinime dha wapa okweenda nuunimegona wadho wu na okukala megameno?
12 Onime oya dhipaga oshihakanwa shayo noye shi topolele oonkwawo nuunimegona wayo; oyu udhitha ekololo lyayo nonyama ya tudhwagulwa.
13 Omuwa Omupangelinkondoawike ota ti: “Ngame onda ningi omutondi gweni! Omatembakwiita geni otandi ga fike po! Aakwiita yeni otaa ka dhipagelwa miita, notandi kutha po shaa shoka mwe shi kutha yalwe. Oonkondo dheni itadhi ku uvika we muuyuni.”
1 Yayee oshilando oshidhipagi noshiifundja! Oshu udha uuyamba, opo shi yugwe nokuhakanwa po!
2 Pulakeneni! Etopo lyongola, ekolokoto lyomatemba, elapato lyuukambe, engwandjauko lyomatembakwiita!
3 Aakayili otaa tsitsimike, omagongamwele otaga tayima, omagonga otaga wema! Omidhimba odha ndumbala, omituntu dhaa shi kuyalulwa — aantu otaa pundukithwa kudho!
4 Ninive oshihondeli otashi geelwa. Oshu udha omahongololo nuumpulile tau fala meso. Osha hekaheka iigwana noku yi pika.
5 Omuwa Omunankondoawike ota ti: “Ninive, otandi ke ku geela! Otandi ke ku hula, u kale omudhu, e tandi ke ku ulika kiigwana; otayi ka tala ohoni yoye ayihe.
6 Otandi ke ku tala nondhino e tandi ke ku siikila nondumba yiiyagaya. Aantu otaye ke ku kenyanana.
7 Ayehe mboka taye ku mono, otaa kunkwa. Otaa ka tya: ‘Ninive osha ningi omakulukuma! Olye e shi uvitile ohenda? Olye a hala e shi hekeleke?’ ”
8 Ninive, u shi ngoye omwaanawa u vule Thebes, oshilandopangelo shomuEgipiti? Osha li shi na omulonga gwoku shi gamena ngaashi ekuma Niili ogwa li epopilo lyasho.
9 Osha li tashi lele Sudan naEgipiti. Libia osha li mehangano nasho.
10 Onkene tuu aantu yomuThebes oya li ya falwa muupika. Momapandaanda gasho aanona yawo omo ya dhengelwa, ya se. Aawiliki yawo oya tulwa momalyenge noya topolelwa aakwatipo yawo.
11 Ninive, ngoye wo oto ka kumukila moomposi dhuunkolwi! Nangoye wo oto ka kambadhala okufadhuka po aatondi yoye.
12 Oohote dhoye adhihe otadhi ka kala dha fa omikwiyu dha tiligana oondhiye: Shikashika omiti, niiyimati otayi gwile naanaa momakana geni!
13 Aakwiita yoye oya fa aakulukadhi, noshilongo shoye kashi na epopilo lyasha kaatondi yoye. Omulilo otagu ka yonagula po iipatitho yiiyelo yoye.
14 Popolela mo omeya gokunwa ngoye u koleke oohote dhoye. Lyata omunoko, u tholome oondhopi. Iitholomo nayi kale ya longekidhwa!
15 Ihe nando ongawo, oto ka pya po nenge oto ka dhipagelwa molugodhi. Oto ka kombwa po, ngaashi iimeno tayi thekekwa po koombahu. Aantu yoye oyi indjipala ya fa oombahu!
16 Aapindiki yoye oya ningi oyendjiyendji ye vule oonyothi mewangandjo! Ihe oyo ya yi ya fa oombahu tadhi papama e tadhi tuka tadhi yi.
17 Aambala yoye oya fa oshipupu shoombahu dha lambela komakuma mesiku lyuutalala. Ihe etango nge lya holoka, otadhi tuka po, nokape na ngoka a tseya mpoka dha yi!
18 Omukwaniilwa gwaAssur, aaleli yoye oya dhipagwa, naanenentu yoye oya kotha sigo aluhe! Aantu yoye oya halakanithilwa koondundu, nokape na ngoka te ya eta ishewe kegumbo.
19 Kape na nando omuti gwokugwayekwa piilalo yoye, niilalo yoye itayi vulu okwaaludhwa. Ayehe mboka taa kundana eyonuko lyoye, otaa hakele kenyanyu. Ope na tuu ngoka inoo mu monitha iihuna?