1

¹ Methimbo ndyoka Jotam, Ahas naHiskia ya li aakwaniilwa yaJuda, Omuwa okwa pe Mika gwokuMoreshet elaka memoniko kombinga yaSamaria naJerusalem.

² Uvii ko shika, ne iigwana; pulakeneni, ne aakwambandayevi amuhe! Omuwa Omupangeliawike ote ke shi mu tompela. Pulakeneni! Ote shi popi motempeli ye ondjapuki.

³ Omuwa ote ya ta ziilile kehala lye eyapuki; ota ka kuluka e te ende koondundu.

⁴ Kohi yoompadhi dhe oondundu otadhi hemuka dha fa ezi momulilo; otadhi ka kungulukila momasilu, ngaashi omeya taga kunguluka kondundu.

⁵ Ayihe mbika otayi ka ningwa, oshoka oshigwana shaIsrael osha yono nosha tsa ondumbo naKalunga. Olye ta pewa uusama molwokwaavulika kwaIsrael? OSamaria, oshilandopangelo! Olye e na ondjo yiimenka muJuda? OJerusalem!

⁶ Omuwa ota ti ngeyi: “Samaria otandi shi ningi ondumba yomakulukuma meyalala, ehala lyokutsika omiviinu. Otandi ke ekelahi omamanya gasho molusilu, notandi ka holola omukanka gwoshilando puuyelele.

⁷ Iimenka yasho ayihe ya hambulikika otayi ka tatagulwa miitandu noshaa shoka sha pelwe oohonda dhomootempeli dhasho, otashi ka lungunithwa po nomulilo. Iiyelekela yasho ayihe otayi ka ninga ondumba ye ekelwahi. Samaria osha pula iinima mbika yokweetitha oluvalo, nongashingeyi aatondi yasho otaa yi nayo, yi ka simanekwe palwe.”

⁸ Nena Mika okwa ti: “Shika osho tashi lilitha ndje e te hekumuna. Ote holola oluhodhi lwandje mokweenda oompadhi dhowala nokukala omudhu. Ote kugu nda fa ombandje note pumbu nda fa ompo.

⁹ Samaria iilalo ye itayi vulu okwaaludhwa, naJuda ota ka adhika komahepeko tuu ngoka; eyonuko olya adha omiyelo dhaJerusalem, moka aantu yandje ya kala.”

¹⁰ Aatondi yetu muGat inamu ya hokololela okusindika kwetu; inamu ya talitha omayeme geni. Aantu yomuBet Leafra, hololeni etekomukumo lyeni mokugalangata montsi!

¹¹ Ne aantu yomuShafir, indeni muupika mu li omudhu nomwa sa ohoni. Mboka ya kala muZaanan, itaa yelekele nando okuza mo moshilando shawo. Uuna tamu uvu aantu yomuBetezel taa lili, otamu ka tseya kutya kaku na nando egameno.

¹² Aantu yomuMarot oya tegelela nehalo enene epupaleko, oshoka Omuwa okwe etele Jerusalem oshiponga she mu kundukidha.

¹³ One mboka mwa kala muLakish, kutileni uukambe komatembakwiita. One mwa holele uulunde waIsrael nomwa fala Jerusalem muulunde.

¹⁴ Shigwana shaJuda, laleka oshilando Moreshet Gat. Aakwaniilwa yaIsrael itaa ka mona nando ekwatho tali zi kuAksib.

¹⁵ Aantu yomuMaresha, Omuwa ote mu gandja kaatondi, mboka taa ka kwata po oshilando sheni. Aawiliki aasimanekwa yaIsrael otaa ka holama mekololo lyaAdullam.

¹⁶ Shigwana shaJuda, kulula ko omafufu goye mokulilila aamwoye aaholike. Ningeni oongwala mwa fa oontsa, oshoka aamwoye otaa ka falwa muupongekwa.

2

¹ Akutu mboka haa lala ondangala nokudhiladhila okulonga uuwinayi. Uuna ongula tayi shi, otaa tsakanitha omadhiladhilo gawo omawinayi pompito ye ya opalela.

² Nge ya hala omapya, otaye ga kwata; uuna ya hala omagumbo, otaye ga kutha po. Kaku na ngoka egumbo lye nenge eliko lye tali hupu.

³ Omuwa ota ti: “Otandi mu dhiladhilile oshiponga, noitamu ka vula oku shi henuka. Otamu ki imona owala mu li muudhigu, noitamu ke enda we nokwiithela.

⁴ Ethimbo ndika nge tali ya, aantu otaye mu sheke nokwiimba eimbilo lyetyololoko tali holola shoka she mu adha: Otwa teka po thilu! Omuwa okwa kutha po evi lyetu nokwe li pe mboka ye tu fala muupika.”

⁵ Onkee ano ethimbo nge lya thikana, uuna evi li na okugalukila kaantu yOmuwa, mokati keni itamu ka kala nando ogumwe, ta pewa oshitopolwa shasha.

⁶ Aantu otaa lombwele ndje taa ti: “Ino tu uvithila. Ino uvitha ayihe mbyoka. Kalunga ite ke tu geela nando.

⁷ Oto dhiladhila kutya oshigwana shaIsrael osha thingwa? Omuwa ihi idhidhimike we? Ota ningi shili iinima mbyoka? Ita popi ando nombili kumboka haa longo uuyuuki?”

⁸ Omuwa ota yamukula: “Otamu ponokele aantu yandje ngaatondi. Aalumentu taa galuka kolugodhi, otaa dhiladhila kutya otaa ka kala nawa pomagumbo, ihe omwa hala, mu ya yuge oondjatha komalutu gawo.

⁹ Otamu tidha aakulukadhi yaantu yandje momagumbo gawo omaholike noyana omwe ya yugu eyambeko lyandje sigo aluhe.

¹⁰ Thikameni, mu ye; mpaka kape na we egameno lyasha. Uulunde weni owe etele ehala ndika eyonuko.

¹¹ “Aantu mbaka oya hala omuhunganeki u udha iifundja nota kotokele ta ti: ‘Otandi mu hunganekele eloolo lyomaviinu niikwakunuwa.’ ”

¹² “Ihe otandi ke mu gongela, ne aantu amuhe yaIsrael mboka mwa hupu po. Otandi ke mu gongela, ngaashi oonzi tadhi ya koshigunda. Ngaashi omanapelo gu udha oonzi, evi lyeni otali ka kala lyu udha ishewe aantu polumwe.”

¹³ Kalunga ote ke ya palela ondjila e te ya pititha mo muupika. Otaa ka teya omiyelo dhoshilando e taa yi yaa na mbudhi. Omukwaniilwa gwawo oye Omuwa mwene. Oye te ya wilike.

3

¹ Pulakeneni, ne aaleli yaIsrael! One tamu dhiladhila okukondjela uuyuuki,

² ihe otamu tondo shoka oshiwanawa nomu hole shoka oshiwinayi. Otamu yuyu aantu yandje ye na omwenyo e tamu pele ko oontumba komasipa gawo.

³ Otamu li po aantu yandje. Otamu yuyu aantu yandje, tamu teya omasipa gawo, e tamu ya tetagula ongonyama mombiga.

⁴ Esiku otali ya, uuna tamu ka lilila Omuwa, ihe ite ke mu yamukula nando. Ita ka pulakena omalilagano geni, oshoka omwa longo uuwinayi.

⁵ Oshigwana shandje osha pukithwa kaahunganeki mboka taya uvanekele ombili mboka taye ya pe iimaliwa, ihe mboka itaaye ya pe sha, otaye ya uvithile epangulo. Omuwa ota ti kaahunganeki mbaka:

⁶ “Yahunganeki, ethimbo lyeni otali hulu po; etango otali mu tokele. Oshoka omwa pukitha aantu yandje, itamu ka mona we omamoniko gokuhunganeka noitamu ka vula we okuhunganeka nando osha.”

⁷ Oomboka taa uvitha onakuyiwa, otaa ka adhika kohoni. Otaa ka shonopekwa, oshoka Kalunga ite ya yamukula nando.

⁸ Ihe ngame Omuwa otu udha ndje nombepo ye noonkondo, e ta pe ndje eiuvito lyuuyuuki nomukumo okulombwela oshigwana shaIsrael uulunde washo mpoka u thike.

⁹ Pulakenii ndje, ne aaleli yaIsrael, ne mboka mu tonde uuyuuki notamu u shunine muugoyoki.

¹⁰ One tamu tungu oshilando shaKalunga, Jerusalem, nomadhipago nuukolokoshi.

¹¹ Aaleli yoshilando ohaa pangele molwoombumbo, aayambi ohaa fatulula ompango molwofuto, aahunganeki ohaa hunganeke molwiimaliwa — yo ayehe otaa ti kutya Omuwa oku li pamwe nayo. Otaa ti: “Itatu ka adhika koshiponga. Omuwa oku li natse.”

¹² Onkee molweni Sion otashi ka pululwa ngepya, Jerusalem otashi ka shituka ondumba yomakulukuma, nondundu ho ku na otempeli, otaku ka shituka okuti.

4

¹ Momasiku tage ke ya ondundu hoka kwa tungilwa otempeli, otayi ka ninga ondeendeka yi vule adhihe, otayi ki itumba kombanda yoondundu adhihe. Iigwana oyindji otayi ka matukila kuyo,

² naantu yayo otaa ka tya: “Natu londeni kondundu yOmuwa, tu ye kotempeli yaKalunga kaIsrael. Ote ke tu nongeka shoka a hala tu longe; otatu ke enda momapola e ga hogolola. Oshoka elongo lyOmuwa otali zi muJerusalem; okuza muSion ota popitha aantu ye.”

³ Oye ta loteke oontamanana mokati kiigwana, mokati kiigwana iinankondo popepi nokokule. Otaa ka hambula omagonga gawo omatemo nomagongamwele gawo iimwitho. Iigwana itayi ka ya we kiita, itayi ilongekidhile we olugodhi.

⁴ Kehe gumwe ota ka kala nombili mokati komiviinu nomikwiyu dhe, nokape na ngoka te mu halutha we. Omuwa Omunankondoawike oku uvaneke shika.

⁵ Oshigwana kehe otashi simaneke nokuvulika kuKalunga kasho shene, ihe tse otatu ka longela nokuvulika kOmuwa Kalunga ketu aluhe sigo aluhe.

⁶ Omuwa ota ti: “Esiku otali ya, uuna tandi ka gongela aantu mboka nde ya geele, oomboka ya hepela muupika.

⁷ Oya lemana noya kala kokule noyaandjawo, ihe otii ka ninga etameko epe kwaamboka ya thigala po, oyo notaa ka ninga oshigwana oshinene. Okuza kesiku ndyoka otandi ka ninga omukwaniilwa gwawo kondundu Sion sigo aluhe.”

⁸ Nangoye, Jerusalem, moka Kalunga ha tonatele aantu ye ngaashi omusita, oto ka ninga oshilandopangelo shuukwaniilwa, ngaashi wa li nale.

⁹ Omolwashike to kugu mokulekule? Omolwashike to hepekwa ongomukulukadhi ta thetwa? Ku na we omukwaniilwa? Omugandjindunge gwoye a mana oondjenda?

¹⁰ Igonyeni e tamu tongo, ne aantu yaJerusalem, mwa fa omukulukadhi ta thetwa, oshoka ngashingeyi omu na okuthiga po oshilando, mu kale mombuga. Omu na oku ka ya kuBabilon, ihe Omuwa ote ke mu hupitha miikaha yaatondi yeni.

¹¹ Iigwana oyindji oya gongala, yi mu ponokele. Otayi ti: “Jerusalem oshi na okuyonagulwa po! Otwa hala okumona oshilando shika sha kumunwa po.”

¹² Ihe iigwana mbika inayi tseya shoka shi li momadhiladhilo gOmuwa. Kayi uvite ko nokutya oya gongelwa, opo yi geelwe ngaashi iilya ye etwa kolupale, opo yi yungulwe.

¹³ Omuwa ota ti: “Aantu yaJerusalem, indeni, mu ka geele aatondi yeni! Otandi mu pe oonkondo mwa fa ontsezi yooniga dhiiyela nomakondo goshikushu. Otamu ka tatagula iigwana oyindji, nomauyamba ye ga yuga, otamu ke ga etela ndje, ngame Omuwa guuyuni auhe.”

5

¹ Aantu yaJerusalem, gongeleni omatanga geni. Otwa kondekwa! Otaa ponokele omuwiliki gwaIsrael.

² Omuwa ota ti: “Betlehem Efrata, ongoye gumwe gwomomikunda omishona muJuda, ihe omungoye tamu ka za omuleli gwaIsrael, oongoka gwomezimo lya za koohekulululwa yomuuyuni wonale.”

³ Osho ngeyi Omuwa te ethele aantu ye miikaha yaatondi yawo, sigo esiku ndyoka omuvali ta vala omwanamati. Nena aakwashilongo shaandjawo mboka ye li muupika, otaa ka hanganithwa naangandjawo.

⁴ Sho te ya, ota ka lela aantu ye noonkondo ndhoka dha za kOmuwa nonesimano lyOmuwa Kalunga mwene. Aantu ye otaa ka kala megameno, oshoka aantu ayehe yokombanda yevi otaa ka zimina uunene we,

⁵ note ke eta ombili. Aayassur ngele taa matukile oshilongo shetu e taa hanagula po omagameneno getu, otatu ke ya tumina aawiliki yetu aanankondo, ye ke ya kondjithe.

⁶ Noonkondo dhomatati otaa ka sinda Assur, oshilando shaNimrod, notaye tu hupitha miikaha yAayassur, ngele taa totele oshilongo shetu.

⁷ Aantu yomuIsrael mboka taa ka hupa ko mokati kiigwana oyindji, otaa ka kala ya fa omata gomume ga tumwa kOmuwa noya fa iihomo yomvula kiimeno iitalala. Otashi uthwa kOmuwa, hakomuntu.

⁸ Mboka taa ka hupa ko mokati kiigwana, otaa ka kala ya fa onime tayi weye yi ikongele iikulya mokuti nenge melundu; otayi itsu oshigunda shoonzi, tayi dhi nukile e tayi dhi tuulagula — nokape na etegameno lyehupitho.

⁹ Israel ota ka sinda aatondi ye e te ya hanagula po ayehe.

¹⁰ Omuwa ota ti: “Pomasiku ngoka otandi ka kutha po uukambe woye notandi ka yonagula po omatembakwiita goye.

¹¹ Otandi ka hanagula po iilando yomoshilongo shoye e tandi kumuna po omagameneno goye.

¹² Otandi ka hanagula po oonkondo dhuumpulile woye e to ka kala waa na we aayanekeli.

¹³ Otandi ka yonagula po iimenka yoye noongudhimanya dhoye oondjapuki; ito ka simaneka we iinima we yi ningi ngoye mwene.

¹⁴ Otandi ka kumuna po iiyelekela yoshikalunga Asheera moshilongo e tandi yonagula po iilando yoye.

¹⁵ Nomuupyundjahi wandje otandi ka galulila iigwana ayihe shoka ye shi ilongela, sho inaayi vulika kungame.”

6

¹ Pulakeneni iihokolola, Omuwa sho ta tamaneke Israel. Omuwa, thikama, u popye; oondundu niikulundundu nayi uve shoka to ti.

² Ne oondundu, ne omakankameno gaaluhe gevi, pulakeneni kiihokolola yOmuwa! Omuwa oku na iihokolola naantu ye. Ota ka tamaneka Israel.

³ Omuwa ota ti: “Yantu yandje, onde mu ningile shike? Onde mu dhigupalele ngiini? Yamukulii ndje.

⁴ Onde mu tembudha muEgipiti; onde mu mangulula muupika; onda tumu Moses, Aaron naMiriam, ye mu wilike.

⁵ Yantu yandje, dhimbulukweni sho Balak, omukwaniilwa gwaMoab, e mu dhiladhilile, nonkene Bileam yaBeor e mu yamukula. Dhimbulukweni iinima ya ningwa mondjila okuza kontanda puAkasia sigo oGilgal. Dhimbulukweni shoka nda ningi, opo ndi mu hupithe.”

⁶ Otandi ka fala shike kOmuwa, Kalunga komegulu, uuna tandi ke mu simaneka? Ondi fale oompunya dho ondodhwa oku dhi mu fikila omidhidhindjambo?

⁷ Omuwa ota ka nyanyukwa, ngele tandi mu faalele oonzi omayuvi, nenge omilonga dhomagadhi gooholivi? Ondi mu yambele omumwandje osheeli, ndi fute omayono gandje?

⁸ Aawe, Omuwa okwe tu lombwela shoka shu uka. Shoka te tu pula, osho okulonga shoka shu uka, oku mu ulukila ohole yashili nokukala muukumwe nomeifupipiko naKalunga ketu.

⁹ Osho opala okutila Omuwa. Oti igidhile oshilando ta ti: “Pulakeneni, ne aantu mboka tamu gongala moshilando!

¹⁰ Momagumbo gaagoyoki omu na omaliko giifundja. Ohaa longitha iiyelekitho ya puka; osho oshinima ndi shi tonde.

¹¹ Otandi vulu ngiini okudhimina po aantu haa longitha iiviha niiyelekitho ya puka?

¹² Aayamba yeni otaa ningilile mo oohepele, nane amuhe aafundja.

¹³ Onda tameke nokuli oku mu yona po noku mu halakanitha po omolwomayono geni.

¹⁴ Otamu ka lya, ihe itamu ka kuta — sho shene otamu ka kala nondjala. Otamu ka ya mwa humbata iinima, ihe itamu ka vula oku yi dhiginina; shaa shoka tamu hupitha otandi ke shi hanagula po miita.

¹⁵ Otamu ka kuna iilya, ihe itamu ka teya oondudhi. Otamu ka yenga omagadhi mooholivi, ihe itamu vulu oku ga longitha. Otamu ka kola omaviinu, ihe itamu ga nu nando.

¹⁶ Shika otashi ka ningwa, oshoka omwa landula iilonga iiwinayi yomukwaniilwa Omri noyomwana, omukwaniilwa Ahab. Omwa tsikile omikalo dhawo, onkee tandi mu yono po, naayehe otaye mu sheke. Aantu shaa mpoka otaye ke mu tala nondhino.”

7

¹ Yaye ngame! Onda fa omuntu a sa ondjala ngoka itaa matha nando iiyimati yomakukila komiti, nomandjembele komiviinu. Omandjembele agehe noonkwiyu dhoondhiye adhihe odha toononwa ko.

² Moshilongo kamu nomwiinekelwa, kamu na nando omuvuliki kuKalunga. Shaa ngoka ota kongo ompito, opo a dhipage. Shaa ngoka ota langele mukwawo, e mu nene ko.

³ Ayehe otaa kongo okulonga uuwinayi. Aambala naatokolihapu otaa pula oombumbo. Omunenentu ote ya hokololele shoka a hala, nosho ngeyi taa pangele kumwe.

⁴ Nokuli ngoka omwaanawa nomwiinekelwa gwomokati kawo ke na shilonga. Esiku olye ya, uuna Kalunga ta geele aantu, ngaashi e ya londodhitha kaahunganeki. Ngashingeyi oye li mevundakano.

⁵ Ino inekela mushiinda shoye, nenge u itule kuume koye. Kotokela oohapu dhoye, nando ou kale to lombwele mukadhoye.

⁶ Momasiku ngaka aamati otaa tala oohe oyo aagoya, aakadhona notaa kondjitha ooyina, naafuko otaa tamanana nooyinamweno; aatondi yomusamane oyo aangandjawo.

⁷ Ihe ngame otandi tegelele Omuwa; ondi inekela Kalunga, ngoka ta hupitha ndje. Kalunga otu uvu ndje.

⁸ Yatondi yandje, inamu kala nokunyanyukilwa ndje. Nando nda punduka, otandi yambuka ishewe. Ngashingeyi ondi li momilema, ihe Omuwa ota ka minikila ndje.

⁹ Onda yono kOmuwa, onkee ondi na okwiidhidhimikila ondjahi ye okathimbo. Ihe pehulilo ota popile ndje notu utha uuwinayi mboka wa ningilwa ndje. Ota fala ndje puuyelele; otandi kala ndi na omwenyo notandi ka mona ehupitho lye.

¹⁰ Nena aatondi yandje otaye ke shi mona e taa sithwa ohoni — oomboka ye tu nyenkele ya ti: “Omuwa Kalunga keni oku li peni?” Otandi ke ya mona ya dhengwa noya lyatelwa pevi ngaashi uuhoho muuyanda.

¹¹ Yantu yaJerusalem, ethimbo lyokutungulula omakuma goshilando otali ya. Pethimbo ndyoka oshilongo sheni otashi ka tamunuka.

¹² Oshigwana shoye otashi ka galukila kungoye tashi zi koombinga adhihe — kuAssur muuzilo, kuEgipiti muumbugantu, kombinga yaEufrat, komafuta gokokule nokoondundu.

¹³ Ihe evi otali ka ninga ombuga omoluuwinayi waamboka ya kala mo.

¹⁴ Omuwa, kala omusita gwoshigwana shoye, aantu we yi ihogololele. Nando oyi ikalela mombuga, oku na evi ewanawa lye ya kunduka. Ya fala, u ya napithe momanapelo omanene gaBaasha naGilead, ngaashi ya li haa ningi nale.

¹⁵ Tu longela iikumitha, Omuwa, ngaashi wa ningile nale, sho we tu tembudha muEgipiti.

¹⁶ Iigwana otayi ke shi mona e tayi ka sa uunye, nonando oyo iinankondo. Mokutyololoka otaa ka mutika omakana gawo e taa thitike omakutsi gawo.

¹⁷ Otaa ki igonyena montsi ya fa omayoka; otaa ka za moohote dhawo taa ningi omahwilili e taa kwatwa kuumbanda. Muumbanda wawo otaa ka galukila kOmuwa Kalunga kawo.

¹⁸ Kaku na kalunga kalwe e ku fa, Omuwa; ongoye to dhimi po omayono gaantu yoye mboka ya hupu po. Ngoye ito kala u na ondjahi sigo aluhe, ihe ngoye oto nyanyukilwa okuholola ohole yoye yashili.

¹⁹ Oto tu sile ohenda ishewe. Oto ka lyatagulila omayono getu kohi yoompadhi dhoye e to gu umbile kondaandelo yefuta.

²⁰ Oto ka hololela aantu yoye uudhiginini woye nohole yoye yashili, koluvalo lwaAbraham nolwaJakob, ngaashi wu uvanekele ootatekulu monalenale.