1 Esiku limwe Omuwa okwa lombwele Jona yaAmittai.
2 Okwa ti: “Inda kuNinive, oshilando shiyaka oshinene, u shi uvithile egeelo; ondi shi shi kutya aantu yasho aakaanakalunga.”
3 Ihe Jona okwa thikama, a ye Omuwa ontuku. Okwa yi kuJoppa e ta mono osikepa yu uka kuSpania. Okwa landa otekete nokwa yi noonakulonga mosikepa, opo ya thayile yu uka kuSpania, nkoka ta ka kala kokule nOmuwa.
4 Ihe Omuwa okwa tumu ombepo ondhigu mefuta, nomwa tukuluka oshikungulu oshinene sha hala okuteya po osikepa.
5 Aathayili oya li ya tila nokehe ngoka okwa kugile kalunga ke ekwatho. Nena oyu umbu mo ofulaha okukeelela oshiponga. Manga taye shi ningi, Jona okwa yi e ta lala meniinii lyosikepa nokwa li mokati koomposi.
6 Kapitiya gwosikepa okwe mu mono e ta ti kuye: “Oshike to kotha ashike? Penduka, u kugile kalunga koye ekwatho. Pamwe ote tu sile ohenda nota hupitha oomwenyo dhetu.”
7 Aathayili oya lombwelathana ya ti: “Natu umbeni oshihogololitho, opo tu mone ngoka e na ondjo nokwe tu tula momupya nguka.” Sho ye shi ningi, osha kwata Jona.
8 Onkee oya ti kuye: “Tu lombwela, olye e tu etithile omupya nguka. Ngoye oto ningi shike mpano? Oto zi peni? Ngoye omukwashike koshigwana?”
9 Jona okwa yamukula: “Ongame Omuhebeli. Ohandi simaneke Omuwa, Kalunga komegulu, ngoka a shiti evi nefuta.”
10 Jona okwe ya hokololele wo kutya ota fadhuka po Omuwa. Aathayili oya li ya sa uumbanda noye mu pula: “Omolwashike to pumbwa okufadhuka po ngeyi?”
11 Oshikungulu osha li sha lundalala ethimbo alihe. Onkee aathayili oye mu pula: “Otatu ku ningi ngiini, tu loteke oshikungulu?”
12 Jona okwa yamukula: “Umbilii ndje mefuta, notali loto. Ondi shi shi kutya ombedhi oyandje, sho mwa adhika koshikungulu shi thike mpa.”
13 Oonakulongamo oya kambadhala okufala osikepa komunkulo noya dhugu nomatha gawo agehe. Ihe oshikungulu osha dhenge noonkondo, noinaa vula okuhuma ko.
14 Onkee oya kugile Omuwa ya ti: “Omuwa, otatu ku galikana, ino tu ethela meyonuko omolwomwenyo gwomulumentu nguka. Omuwa, owa longo ngaashi wa dhiladhila.”
15 Nena oya kutha Jona e taye mu umbile mefuta, olyo nolya loto nziya.
16 Shika osha halutha aathayili unene okutila Omuwa, noye mu yambele omayambo noyu uvaneke oku mu longela.
17 Palombwelo lyOmuwa, ohi onene oya nina po Jona, nokwa kala mela lyayo omasiku gatatu, uusiku nomutenya.
1 Mela lyohi Jona okwa galikana Omuwa a ti:
2 “Muudhigu wandje onde ku ithana, Omuwa, nangoye owa yamukula ndje. Omuule, muuyuni wokuusi onda kugile ekwatho, nangoye owu uvu ndje.
3 Ongoye wa dhogele ndje muuleeleka, sigo okondaandelo yefuta, nkoka omeya ga li ga kuwike ndje, nomakuthikuthi goye agehe goonkondo oga gwilile ndje pa.
4 Onda dhiladhila kutya onda pegulwa ko koshipala shOmuwa nokandi na we mpo ne mono otempeli yoye ondjapuki.
5 Omeya oga siikile ndje taga li ndje oshuunguungu, efuta olya kuwike ndje thiluthilu, oombungufuta odha kutunine omutse gwandje.
6 Onda mbolokele sigo okomidhi dhoondundu, eeno, sigo okoshilongo shomiyelo dha patwa aluheluhe. Ihe ongoye, Omuwa Kalunga kandje, owa galula omwenyo gwandje mombwili.
7 Sho nda li ndu uvite omwenyo gwandje tagu thigi ndje po, onde ku galikana, Omuwa, motempeli yoye ondjapuki ngoye nou uvu ndje.
8 Mboka haa simaneke iimenka kaayi na ntumbu, otaa etha okuvulika kungoye.
9 Ihe ngame otandi ku imbile omahambelelo; otandi ku yambele ondjambo e tandi gwanitha shoka ndu uvaneke. Ehupitho otali zi kOmuwa.”
10 Nena Omuwa okwa lombwele ohi, yi kungile Jona komunkulo, noye shi ningi.
1 Omuwa okwa lombwele ishewe Jona.
2 Okwa ti: “Inda kuNinive, oshilando shiyaka oshinene, u uvithile aantu yasho elaka ndyoka tandi ku pe.”
3 Jona okwa vulika kOmuwa e ta yi kuNinive, oshilando oshinene hashi tokolwa momasiku gatatu kolupadhi.
4 Jona okwa tameke oku shi enda nosho e ende esiku limwe, oku uvitha ta ti: “Oku na omasiku omilongo ne, nena Ninive otashi hanagulwa po.”
5 Aantu yomuNinive oyi itaale etumwalaka lyaKalunga. Onkee oya tokola okwiidhilika iikulya, naantu ayehe, okuza kaakuluntu sigo okaanona, oya zala omahahi okuholola ngeyi eitedhululo.
6 Omukwaniilwa gwaNinive sho e shi uvu, okwa zi ko koshipangelapundi she, a hula mo oonguwo dhe dhuukwaniilwa e ta zala ehahi nokwa kuutumba momutoko.
7 Okwa tumu etumwalaka kaantu yaNinive tali ti: “Elaka ndika olya zi komukwaniilwa nokaambala ye. Otali ti, inapa kala nando ogumwe ta li sha; aantu ayehe, iimuna noonzi oyi indikwa okulya nenge okunwa.
8 Aantu ayehe niinamwenyo naa zale omahahi. Ayehe naa galikane Kalunga ya mana mo nokweetha omikalo dhawo omiwinayi nuukolokoshi wawo.
9 Pamwe Kalunga ti igaluluka; ngiika ota geyuluka, natse opo twaa se.”
10 Kalunga okwa mono shoka ya ningi; okwa mono kutya oye etha uuwinayi wawo. Onkee okwi igaluluka noine ya geela, ngaashi a tile.
1 Jona okwa yematele shika nokwa geye.
2 Okwa galikana ngeyi: “Omuwa, inandi shi popya nale nani, manga inaandi za paandjetu, kutya oto ningi shino? Omolwashika onda li nda hala okuya ontuku kuSpania. Onda li ndi shi shi kutya ongoye Kalunga kohole nokesilohenda, aluhe omutalanteni, aluhe omunambili nowi ilongekidha aluhe okwiigaluluka noito geye.
3 Ngashingeyi, Omuwa, etha ndi se. Okusa oku vulile ndje okukala nomwenyo.”
4 Omuwa okwa yamukula: “Okugeya kwoye oku li tuu mondjila?”
5 Jona okwa piti mo a yi kuuzilo woshilando e ta kuutumba. Okwi idhikile etsali e ta gondjo momuzile gwalyo a tegelela, a mone Ninive sho tashi ningwa.
6 Nena Omuwa Kalunga okwa menitha olumono lwa koko edhelele nolwa siikile Jona, opo a kale u uvite hwepo momuzile gwalwo. Jona okwa li a nyanyukilwa olumono nokunyanyukililwa.
7 Ihe pokutenda kweluwa esiku lya landula ko Kalunga okwa tula ko epuka li thekeke po olumono nolwa si.
8 Etango sho lya piti, Kalunga okwa pepitha ombepo ompyuumpyuu yokuuzilo. Jona okwa li a lulilwa kuupyu woonte dhetango, sho dhe mu yaha momutse. Okwi ihalele okusa. Okwa ti: “Eso oli vulile ndje omwenyo.”
9 Kalunga okwa ti kuye: “Oshi li tuu mondjila okugeya omolwolumono?” Jona okwa yamukula: “Eeno, oshi li mondjila, ndi kale nda geya nokwiihalela eso.”
10 Omuwa okwa ti kuye: “Olumono nduka olwa koko muusiku umwe nolwa si po muukwawo wa landula ko.
11 Ngoye ino lu kuna noino lu kokitha, ndele ngame ote kala ngiini, ndaa uvitile Ninive, oshilando oshinene, olukeno? Oshi na aanona ye vule 120 000, osho wo iimuna oyindji.”