1

¹ Ndhika oohapu dhaAmos, omusita gwoonzi gwokomukunda Tekoa. Omimvo mbali manga evi inaali kakama, Usia sho a li omukwaniilwa muJuda naJeroboam yaJehoas okwa li omukwaniilwa muIsrael, Kalunga a hololele Amos iinima mbika kombinga yaIsrael.

² Amos ota ti: “Omuwa ota pumbu okuza kondundu Sion; ewi lye otali ndunduma okuza kuJerusalem. Omanapelo taga lembe, nomwiidhi kondundu Karmel tagu pembe.”

³ Omuwa ota ti: “Aadamaskus oya yono nokuyonagula ishewe, nomolwashika otandi ya geele. Oya dhenge Aagilead nayi.

⁴ Onkee otandi ka tuma omulilo kongulumbala yomukwaniilwa Hasael e tagu ka lungunitha po omapopilongulu gomukwaniilwa Ben Hadad.

⁵ Omiyelo dhaDamaskus otandi ke dhi teyagula po e tandi ka tembudha aakali molusilu lwaBikat Aven nomuleli gwaBet Eden. Aasiria otaa ka kwatwa po oonkwatwa, ya falwe kevi lyaKir.”

⁶ Omuwa ota ti: “Aagaza oya yono nokuyonagula ishewe, nomolwashika itandi ya etha inaandi ya geela shili. Oya kutha po oshigwana ashihe e taye shi landitha po aapika kAaedom.

⁷ Onkee otandi ka tuma omulilo komankolo gaGaza e tagu lungunitha po omapopilongulu gasho.

⁸ Otandi ka tembudha aaleli yiilando Ashdod naAshkelon. Otii ka geela oshilando Ekron, ndele nAafilisti ayehe mboka ya kala po, otaa ka sa.”

⁹ Omuwa ota ti: “Aatiro oya yono nokuyonagula ishewe, nomolwashika otandi ya geele shili. Oya kutha po oshigwana ashihe noye shi fala muupika mevi lyaEdom noinaa dhiginina euvaneno lyuukuume ndyoka ya panga nayo.

¹⁰ Omolwaasho otandi ka tuma omulilo komankolo gaTiro e tagu lungunitha po omapopilongulu gasho.”

¹¹ Omuwa ota ti: “Aaedom oya yono nokuyonagula ishewe, nomolwashika otandi ke ya geela shili. Oya yewe aamwayina Aaisraeli noinaye ya sila ohenda. Ondjahi yawo oya li yaa na hulilo noyaa na mpo naye yi lotitha.

¹² Onkee otandi ka tuma omulilo kombanda yoshilando Teman e tagu ka lungunitha po oongulumbala dhaBozra.”

¹³ Omuwa ota ti: “Aayammoni oya yono nokuyonagula ishewe, nomolwashika otandi ke ya geela shili. Miita mokutaandelitha oshilongo shawo oya vutula nokuli aakiintu aasimba muGilead.

¹⁴ Omolwashika otandi ka tuma omulilo kombanda yomankolo gaRabba e tagu lungunitha po omapopilongulu gasho. Nena otaku ka kala oonkugo mesiku lyolugodhi, nekondjo otali ka lundalala ngoshikungulu.

¹⁵ Omukwaniilwa gwawo naambala ye otaa ka ya muupika.”

2

¹ Omuwa ota ti: “Aamoabi oya yono nokuyonagula ishewe, nomolwashika otandi ya geele shili. Oya dhini iipongo yomukwaniilwa gwaEdom, sho ye yi lungunitha omutoko.

² Otandi ka tuma omulilo kombanda yoshilongo shaMoab, notagu lungunitha po omapopilongulu gokuKerijot. Aamoabi otaa ka sila mekolokoto lyolugodhi, manga aakwiita taa kolomoka, noohiya tadhi lili.

³ Otandi ka dhipaga omuleli gwaMoab naakuluntu ayehe yoshilongo.”

⁴ Omuwa ota ti: “Aajuda oya yono nokuyonagula ishewe, nomolwashika otandi ke ya geela shili. Oya dhini omalongo gandje noinaa dhiginina iipango yandje. Oya pukithwa kiikalunga yiifundja mbyoka oohekulu ye yi longele.

⁵ Onkee otandi ka tuma omulilo kombanda yaJuda e tagu lungunitha po omapopilongulu gaJerusalem.”

⁶ Omuwa ota ti: “Aaisraeli oya yono nokuyonagula ishewe, nomolwashika otandi ya geele shili. Aayuuki mboka ya nyengwa okufuta oongunga dhawo, ohaye ya landitha po aapika, oohepele mboka itaa vulu okufuta, ohaye ya landakanitha po epando lyoongaku.

⁷ Otaa lyatagula aankundi niizage notaa pagula mo oohepele mepola. Omumati nahe otaa hondele omufukopika gumwe, nosho ngeyi taa shundula edhina lyandje eyapuki.

⁸ Pehala kehe lyelongelokalunga aantu otaa kotha yi isiikila omakumbatha ngoka ye ga kutha koohepele, ga ninge esiikilo lyoongunga. Motempeli yaKalunga kawo otaa nu omaviinu ngoka ye ga kutha kumboka ye na oongunga dhawo dhiimaliwa.

⁹ “Aantu yandje, ngame ongame ngoka nde mu hanagulile po thilu Aayamori, aantu mboka ya li aaleeleka ya fa omisendeli noya kola ya fa omithiya.

¹⁰ Onde mu tembudha mo muEgipiti nde mu enditha mombuga omimvo omilongo ne nonde mu pe evi lyAayamori, li ninge lyeni yene.

¹¹ Onda hogolola mo aana yeni aamati yamwe, ya ninge aahunganeki, nayamwe yomaagundjukamati yeni, ya ninge aanasiri. Aaisraeli ne, kashi shi oshili shino? Ongame Omuwa nde dhi popya.

¹² Ihe ne otamu nwetha aanasiri omaviinu notamu ganda aahunganeki, yaa popye oohapu dhandje.

¹³ Nongashingeyi otandi ke mu ndangula pevi notamu ka lila othenyenge mwa fa okatemba ka londekwa ofulaha yiilya.

¹⁴ Aanandapo itaa ka fadhuka po. Aalumentu aanankondo otaa ka yululuka, naakwiita itaa ka vula okuhupitha oomwenyo dhawo.

¹⁵ Aanamatati itaa ka vula okuthikama, aanandapo itaa ka hunuka po, naakayili yuukambe itaa ka fadhuka po, ya hupithe oomwenyo dhawo.

¹⁶ Mesiku ndyoka naakwiita omapendafule otaa ka ekelahi omatati gawo e taa fadhuka po.” Oohapu ndhika odha popiwa kOmuwa.

3

¹ Shigwana shaIsrael, ne mboka Omuwa e mu tembudha muEgipiti, pulakeneni kelaka ndika te li mu lombwele:

² “Miigwana ayihe yokombanda yevi one amuke nda tseya nonde mu sile oshimpwiyu. Omolwashoka uulunde weni owo uunene, notandi ke mu geela.”

³ Aalumentu yaali otaye ende ngaa pamwe inaaye shi uvathana?

⁴ Onkoshi otayi pumbu ngaa mokuti inaayi mona oshihakanwa? Okankoshona otaka gonene ngaa mekololo lyako inaaka kwata sha?

⁵ Ondhila otayi yi tuu momwigo, ngele inagu tegwa naasho hayi shi li? Omwigo otagu fatuka tuu, ngele inagu komonwa?

⁶ Enkuma otali hikwa tuu moshilando kaakwiita, ndele itali halutha aantu? Oshiponga otashi kolokele tuu oshilando, Omuwa ngele ine shi tuma?

⁷ Omuwa Omupangeliawike iha longo sha, manga inaa hololela aapiya ye aahunganeki shoka ta ka ninga.

⁸ Ngele onkoshi tayi pumbu, olye ta vulu okukala inaa tila? Ngele Omuwa Omupangeliawike ta popi, olye ta vulu okukala itaa hunganeke?

⁹ Uvithileni mboka ya kala muuwa waAshdod nomuuwa waEgipiti mu tye: “Gongaleni pamwe koondundu dha dhingilila oshilando Samaria, mu tale epiyagano enene musho niihuna mbyoka tayi pangele mo.”

¹⁰ Omuwa ota ti: “Aayamba otaa udhitha omagumbo gawo niinima ya yugwa ya za miikolokosha. Inaa tseya nokuli kutya okukala muuyuuki oshike.

¹¹ Omolwashoka omutondi ota ka kondeka evi lyawo, ota hanagula po omapopilongulu gawo e ta yugu omagumbo gawo uuyamba.”

¹² Omuwa ota ti: “Ngaashi omusita gwoonzi ngele ta yugulula iilama iyali konime, nenge oshintoko shokutsi, osho mAaisraeli muSamaria tamu ka hupa aashona ayeke mwaamboka taye egamene kiipundi yuuyamba.

¹³ Ngashingeyi pulakeneni ne mu londodhe oluvalo lwaJakob,” Omuwa Omupangeliawike nOmunankondoawike osho ta ti.

¹⁴ “Mesiku ndyoka tandi geele Aaisraeli omolwomayono gawo, omo tandi ka hanagula po iiyambelo yokuBetel. Omakuvu goshiyambelo kehe otaga ka kumunwa po notaga gwile pevi.

¹⁵ Otandi ka hanagula po omagumbo gopokufu naangoka gopothinge. Omagumbo ga tulwa uulenga womasipa goondjamba, otaga ka ninga omakulukuma; egumbo enene kehe otali ka hanagulwa po.”

4

¹ One aakiintu Aasamaria, pulakeneni oohapu ndhika, ne mboka mwo ondoka mwa fa oonzinzi dhaBaasha dha paluthikika, ne mboka tamu thiminike aafupi notamu thindile oohepele kongudhi notamu pula aashungu yeni, ya kale haye mu kongele iikolitha!

² Omuwa Omupangeliawike omuyapuki oku uvaneka ngeyi: “Omasiku otage ya, uuna taye ke mu kookolola po noongoololo; shaa ngoka gwomune ota ka fa ohi yi li kondjolo.

³ Otamu ka kookololelwa momusa gu li mekuma notamu ka umbilwa pondje.”

⁴ Omuwa Omupangeliawike ota ti: “Aaisraeli ne, ngele tamu yi keha eyapuki kuBetel, otamu ka yona, nongele tamu yi kuGilgal, otamu yono unene shi vule kuBetel. Eteni kehe ongula ontselelandjambo yeni ne mu ete wo iitimulongo yeni mesiku kehe etitatu.

⁵ Tsikileni nokuyamba iikwiila yeni mokuhambelela Kalunga nokwiitangela omayambo ga sheywa ngoka tamu ga eta! Oshoka osho mwa hala oku shi ninga.

⁶ “Nando onde etele iilando yeni ondjala, ne inamu galukila kungame.

⁷ Onda pegula ko omvula, uuna ya li ya pumbiwa unene kiilya yeni. Omvula onde yi lokithile oshilando shimwe nohashikwawo. Omvula ya loko epya limwe, manga ekwawo lya kukuta.

⁸ Aantu ya kangala kenota, oya zi miilando yimwe taa yi koshilando nkoka ya li yi inekela taa ka mona ko omeya, ihe inaa za nando enota. Natango inamu pungulukila kungame.

⁹ “Onda tumu ombepo ompyu, yi kukutike iimeno yeni. Oombahu odha li po iitsambe yeni ayihe, oomviinu, omikwiyu nooholivi dheni. Ihe natango inamu itedhulula, mu ye kungame.

¹⁰ “Onde mu tumine elega lya fa ndyoka nda tumine Egipiti. Onda dhipagele aagundjuka yeni molugodhi nonda kutha po uukambe weni. Ondu udhitha omayulu geni ezimba ewinayi lyomidhimba moontanda dheni. Ihe inamu galukila kungame.

¹¹ “Onda hanagula po yamwe yomune, ngaashi nda hanagula po Sodom naGomorra. Oomboka yomune ya hupu ko, oya li ya fa iidhimakuni ya nakulwa momulilo. Ihe natango inamu galukila kungame,” Omuwa osho ta ti.

¹² “Ano, ne Aaisraeli, otandi ke mu geela. Nomolwashoka tandi ka ninga ngeyi, ilongekidhileni okutsakaneka epangulo lyandje.”

¹³ Kalunga oye omuumbi gwoondundu nomushiti gwoombepo. Omadhiladhilo ge ohe ga tseyithile aantu; ota lundululile omutenya muusiku. Ota lyanga mookathele mwii. Edhina lye olyo ndika: Omuwa Kalunga Omunankondoawike.

5

¹ Pulakeneni, ne Aaisraeli, kelilo lyoosa tandi li mu hekumununine:

² Omukadhona Israel a pundukila po, ita penduka tuu we! Okwa lala i iyekelahi pevi, nokape na ngo te mu yambula po.

³ Omuwa Omupangeliawike ota ti: “Oshilando shoka shomuIsrael tashi tumu aakwiita eyuvi, ethele alike tali galuka ko; noshikwawo shoka tashi tumu ethele, omulongo ayeke taa ka galuka ko.”

⁴ Omuwa ota lombwele Aaisraeli ta ti: “Ileni kungame, notamu ka kala mu na omwenyo.

⁵ Inamu ya ko kuBeersheba, mu ka ninge elongelokalunga. Inamu kambadhala okumona ndje kuBetel, oshoka Betel otashi ka hanagulwa po. Inamu ya kuGilgal, oshoka aantu yasho otaa ka pangulilwa muupika.”

⁶ Kongeni Omuwa, notamu ka kala mu na omwenyo. Ngele itamu shi ningi, ota ka koloka ko a hwama a fa omulilo ta lambele Aaisraeli. Omulilo otagu ka lungunitha po Aabetel, nokape na ngoka ta vulu oku gu dhima.

⁷ Yaye ne mboka hamu goyokitha ompango nohamu lyatele pevi uuyuuki!

⁸ Omuwa okwa mbumbinga oonyothi, Oshothi nOkalimbanombwa. Omilema ote dhi shitukitha uuyelele, nomutenya uusiku. Ota gongaleke omeya gomefuta note ga wayulile kombanda yevi. Edhina lye oye Omuwa.

⁹ Ota hanagula po aanankondo nomapopilongulu gawo.

¹⁰ Ne aantu ohamu tondo ngoka ta popile uuyuuki nohamu hugu ngoka ta hokolola oshili mompangu.

¹¹ Ne omwa thindile oohepele kongudhi nomwe ya yugu iilya yawo. Osho nduno itamu ka kalelela mo momagumbo goondhopi ga tungika nenge mu nwe omaviinu ga za miitsambe yeni yo opala.

¹² Ngame ondi shi oondjo dheni odhindji nomayono geni omadhigu. Ohamu tidhagana aantu aawanawa, ohamu taamba oombumbo nohamu thininike aafupi, yaa tokolelwe eutho lyu uka miihokolola.

¹³ Onkee omunandunge oha mwena pethimbo ndika ewinayi.

¹⁴ Lalakaneneni okulonga uuyuuki, haashoka sha goyoka, opo mu kale mu na omwenyo. Nena Omuwa Kalunga Omunankondoawike ota kala shili nane, ngaashi mwa hala a kale.

¹⁵ Tondeni uuwinayi, holeni uuyuuki nokutala kutya uuyuuki otau pangele miihokolola. Pamwe Omuwa ota sile ohenda aantu yoshigwana shika mboka ya hupu ko ye na omwenyo.

¹⁶ Omuwa Kalunga Omunankondoawike ota ti ngeyi: “Otaku kala etakumo nelilagano lyoluhodhi momapandaanda goshilando. Naanamapya otaa ki ithanwa, ye ye ya lile oosa ya tegama naalilasa aafutwa.

¹⁷ Otaku ka kala etakumo miitsambe ayihe yomiviinu. Ayihe mbika otayi ka ningwa, oshoka otandi ya, ndi mu geele.” Ndhika odha popiwa kOmuwa.

¹⁸ Uudhigu ou thike peni tau ke mu adha mboka mwa yuulukwa esiku lyOmuwa! Esiku ndyoka otali mu etele uuwanawa washike? Esiku ndyoka otali ke mu ningila esiku lyomilema nohalyuuyelele.

¹⁹ Otali ka kala ngomuntu ta fadhuka po onkoshi e ta tsakaneke emwanka. Nenge ngomuntu ngoka te ya kegumbo nosho ta kwatelele kekuma, ota lika keyoka!

²⁰ Esiku lyOmuwa otali ke etelela omilema nohauyelele; otali ka kala esiku eluudhe lyaa na eminikilo.

²¹ Omuwa ota ti: “Otandi tondo iituthi yeni yomalongelokalunga; itandi vulu oku yi idhidhimikila!

²² Sho tamu etele ndje omafikilondjambo niikulyandjambo, itandi yi taamba nando; itandi taamba iimuna mbyoka mwo ondodha notamu yi etele ndje omayambo.

²³ Mwenekeni embolongondjo lyoondjimbo dheni; inandi hala okupulakena uuharpa weni.

²⁴ Peha lyasho, tondokitheni eutho lya fa efundja nuuyuuki wa fa omulonga itaagu pwine.

²⁵ “Aaisraeli ne, inandi mu pula nando oontselelandjambo niikulyandjambo momimvo ndhiyaka omilongo ne, sho nde mu enditha mombuga.

²⁶ Ihe ngashingeyi, molwashoka mwa simaneke oshiyelekela shaSakkut, oshikalungakwaniilwa sheni, naKewan, oshikalunganyothi sheni, otamu ka humbata iiyelekela mbyoka,

²⁷ sho tandi mu fala muupika handiyaka yaDamaskus,” Omuwa osho ta ti, oongoka e na edhina lye Kalunga Omunankondoawike.

6

¹ Otashi ka kala oshitilithi ngiini kune mboka mu li nawa muSion nokune mboka mu uvite kaamu na mbudhi muSamaria — ne aanenentu yoshigwana shika oshinene shaIsrael, ne mboka aantu taa ya kune, ya konge ekwatho!

² Indeni, mu tale oshilando Kalne. Nena tsikileni, sigo okoshilando oshinene Hamat nomu kulukile koshilando shAafilisti Gat. Iilongo mbyoka iiwanawa andola yi vule iilongo Juda naIsrael? Iilongo yawo iinene ngaa yi vule yeni?

³ Otamu tindi okuzimina kutya esiku lyomupya otali ya, ihe otamu panda uukolokoshi mokati keni.

⁴ Otashi ke mu lulila ngiini molwokwiiyalela iipundi yomafulafula go opala, mu kale ko tamu li onyama yomitanda noyoonzi!

⁵ Omu hole okutota omaimbilo, ngaashi David a ningile, notamu ga hiki nuuharpa.

⁶ Ohamu nwine omaviinu miitenga iinene nohamu longitha iizimba ya nika nawa, ihe ihamu lili nando etekepo lyaIsrael,

⁷ onkee otamu ka ya tango muupika. Iituthi yeni noonshingo dheni odha tya ko nee.

⁸ Omupangeliawike Omuwa Omunankondoawike okwa gandja elondodho ndika nokugana tali ti: “Ondi tonde okwiitanga kwaIsrael; otandi dhini omagumbo gawo guuyamba ga tungikika. Otandi ka gandja kaatondi oshilandopangelo shawo noshaa shoka shi li mo.”

⁹ Megumbo ngele tamu hupu aalumentu omulongo, otaa ka sa.

¹⁰ Omukwanezimo lyanakusa, ngoka ta ka paka mukwawo, ota kutha mo omudhimba megumbo. Ota ka pula ngoka a kuutumba kosindo yegumbo ta ti: “Pungoye ope na tuu natango gumwe?” Ewi otali yamukula: “Aawe!” Nena mukwawo ota ti: “Mwena thilu! Natu kotoke nokuli, inatu tumbula edhina lyOmuwa.”

¹¹ Omuwa shampa a popi, omagumbo omanene nomashona otaga ka teka po iihanuhanu.

¹² Uukambe otau pwapwata tuu komamanya? Aantu otaa pulula tuu efuta noonani? Onkene tuu ne omwa shitukitha uuyuuki uuzigo nomwa goyokitha omautho.

¹³ Otamu itangele okukwata po omukunda Debir. Otamu itanga tamu ti: “Otwa li aanankondo twa gwana okukutha po Karnajim.”

¹⁴ Omuwa Kalunga Omunankondoawike oye mwene ta ti: “Aaisraeli, otandi ka tuma etangakwiita lyaakwiilongo, li lwe po oshilongo sheni. Otali ke mu laminina po okuza ketaulilo lyaHamat muumbangalantu, sigo okolusilu lwaArab muumbugantu.”

7

¹ Onda mono emoniko lya zi kOmuwa Omupangeliawike. Mulyo oku ulukile ndje, nkene e etitha po oshiluku shoombahu naanaa konima yokumuwa kwomwiidhi guuwa, sho gwa ningi ishewe ohuluhulu.

² Memoniko lyandje onda mono, oombahu sho dha thekeke po shaa shoka sha ziza moshilongo, nonda ti: “Omuwa Omupangeliawike, dhimina po aantu yoye! Otaa vulu okuhupa ngiini? Oyo aashona naankundi.”

³ Nena Omuwa okwa si olukeno e ta ti: “Shoka wa mono, itashi ka ningwa we.”

⁴ Onda mono emoniko ekwawo lya zi kOmuwa Omupangeliawike. Mulyo onde mu mono ti ilongekidha okugeela aantu ye nomulilo. Omulilo ogwa latha po efuta kohi yevi e tagu tameke okulungunitha po evi.

⁵ Nena onda ti: “Omuwa Kalunga, mwena! Aantu yoye otaa vulu okuhupa ngiini? Oyo aashona naankundi.”

⁶ Omuwa okwa si olukeno ishewe e ta ti: “Shika itashi ka ningwa we.”

⁷ Onda mono ishewe emoniko ekwawo lya zi kOmuwa. Mulyo onde mu mono a thikama ontega nekuma ndyoka lya li lya tungwa kekwatho lyongodhi yoshumbu, nomoshikaha she okwa li e na ongodhi yoshumbu.

⁸ Okwa pula ndje a ti: “Amos, owa tala shike?” Onda yamukula: “Ongodhi yoshumbu.” Nena okwa ti: “Otandi yi longitha okuholola kutya aantu yandje oya fa ekuma lyongulu lya tungwa lya goyoka. Itandi ke ya sila we ohenda.

⁹ Omahala mpoka oluvalo lwaIsak halu ningi omalongelokalunga, otaga ka hanagulwa po. Omahala omayapuki gaIsrael otaga ka ninga omakulukuma. Otandi ka hulitha po ezimo lyaJerobeam muukwaniilwa.”

¹⁰ Nena Amazia, omuyambi gwokuBetel, okwa tumu elaka komukwaniilwa gwaIsrael Jerobeam tali ti: “Amos ote ku tukulile oshipotha mokati kaantu. Omauvitho ge otaga ka hanagula po oshilongo.

¹¹ Ota ti: ‘Jerobeam ota ka sila miita, nAaisraeli otaa ka kwatwa mo mevi lyawo, ya falwe muupika.’ ”

¹² Nena Amazia okwa ti kuAmos: “Muhunganeki ngoye, sha gwana ihe! Shuna kuJuda, u ku uvithile nkoka. Yo ye ku fute ihe ondjambi yoye.

¹³ Ino uvitha we muka muBetel. Ndika olyo ehala lyomukwaniilwa lyelongelokalunga, ehala eyapuki notempeli yoshilongo.”

¹⁴ Amos okwa yamukula: “Ngame kandi shi omuhunganeki komukalo gwondjambi, ndi futilwe sho tandi uvitha. Ngame omunahambo nohandi tsike omikwiyu.

¹⁵ Ihe Omuwa okwa kutha ndje kiilonga yandje yuusita woonzi nokwa lombwele ndje, ndi ye ndi hunganekele aantu ye Aaisraeli.

¹⁶ Ano ngashingeyi, pulakena oohapu dhOmuwa. Oto ganda ndje, ndi hulithe okuhunganeka, ndi tule po okukudhila Aaisraeli.

¹⁷ Omolwashoka, Amazia, Omuwa te ku lombwele ta ti: ‘Mukadhoye ota ka ninga omuhulwakadhi momapandaanda, naanona yoye otaa ka sila miita. Evi lyoye otali ka topagulwa notali ka gandjwa po kuyalwe, ngoye mwene oto ka sila moshilongo shaapagani. Aaisraeli otaa ka kwatwa mo shili mevi lyawo, ya falwe muupika.’ ”

8

¹ Onda mono emoniko ekwawo lya zi kOmuwa Omupangeliawike. Mulyo onda mono ontungwa yiiyimati.

² Omuwa okwa pula: “Amos, owa tala shike?” Onda yamukula: “Ontungwa yiiyimati.” Omuwa okwa ti kungame: “Ehulilo lyoshigwana shandje Israel, olya hedha ko. Itandi ke ya sila we ohenda.

³ Esiku ndyoka omaimbilo gomuuwa otaga ka shituka oosa. Omidhimba otadhi ka kala akuhe. Otadhi ke ekelwahi pwa tya tuu thilu.”

⁴ Pulakeneni shika, ne mboka hamu lyatagula oohepele notamu kambadhala okuhutula aafupi moshilongo.

⁵ Otamu lombwelathana ne yene tamu ti: “Oshituthi shomwedhi omupe otashi hulu po uunake, tu matule iigandhi, opo tu landithe po iilya yetu? Esabati otali hulu po uunake, opo tu tameke okulanditha ishewe? Nena otatu vulu okushonopeka iiyelekitho, okuyelutha oondando nokukengelela niiviha yomakoto.

⁶ Otatu vulu okulanditha iilya yomako nondando yopombanda. Otatu ka mona ohepele ngoka ta ka nyengwa okufuta oongunga dhe, ta nyengwa okufuta nokuli epando lyoongaku, nena otatu mu landa po, a ninge omupika.”

⁷ Omuwa, Kalunga kaIsrael okwa gana a ti: “Kandi na mpoka ne dhimbwa iilonga yawo iiwinayi.

⁸ Omolwashoka evi otali ka kakama, naantu ayehe moshilongo otaa ka yemata. Oshilongo ashihe otashi ka ndjingandjingwa; otashi ki itumba nokuthootela sha fa omulonga Niili.

⁹ Esiku otali ya, uuna tandi ka ninginitha etango moshanga shomutenya, nuusiku tau kwidhidhike evi, manga omutenya. Ongame, Omuwa Omupangeliawike, nda popi.

¹⁰ Iituthi yeni otandi ke yi shitukitha oosa nomaimbilo geni okulila oosa. Otandi ke mu ikululitha omitse dheni noku mu izalekitha omahahi, notamu ka fa aavali taa lili omwanamati epona. Esiku ndyoka otali ka ninga elulu, sigo opehulilo.

¹¹ “Esiku otali ya, uuna tandi ka tumina oshilongo ondjala. Aantu otaa ka sa ondjala, ihe hayoshikwiila; otaa ka sa enota, ihe halyomeya. Otaa ka sa ondjala nenota lyohapu yOmuwa. Ongame, Omuwa Omupangeliawike, nda popi.

¹² Aantu otaa ka matuka okuza kuumbangalantu sigo okuumbugantu nokuza kuuzilo sigo okuuninginino. Otaa ka konga shaa mpoka ohapu yOmuwa, ihe itaye yi mono.

¹³ Pomasiku ngoka aakadhona aawawawawa, naamatyelela oondjolowele ayehe otaa ki ihunya mumwe kenota.

¹⁴ Ayehe mboka haa gana kuAshima, oshikalungakiintu shaSamaria, mboka taa ti: ‘Oshikalunga shokuDan’ nenge: ‘Oshikalunga shokuBeersheba’ — aantu mboka ayehe otaa ka pundukila po yo itaa ka yambuka po we.”

9

¹ Onda mono Omuwa a thikama poshiyambelo. Okwa ti: “Ligagula po oondungu dhoongudhi dhotempeli nomungunda, opo oshipamba ashihe shi ndjingandjingwe. Dhi nyanyagulila kombanda yomitse dhaantu. Oshihupe shomuyo otandi ke shi dhipagela miita. Kape na ngoka ta ka hunuka po, kape na ngoka ta ka fadhuka po.

² Nokuli nando nayi ihupile omakwena okuya muuyuni wokuusi, otandi ke ya kwata. Nonando naa londe kegulu, otandi ya mbolokotitha ko.

³ Ngele taa ka holama kondungu yondundu Karmel, otandi ke ya shilila e tandi ke ya kwata ko. Ngele otaa holama ndje kondaandelo yefuta, otandi ka lombwela evovo lyomefuta, li ya lye po.

⁴ Ngele aatondi otaye ya fala muupika, otandi ke ya lombwela, ye ya dhipage. Onda tokola oku ya yonagula po, haku ya kwatha.”

⁵ Omupangeliawike Omuwa Omunankondoawike ota gumu evi, olyo notali kakama, naayehe ya kala mo, otaa lilagana. Uuyuni auhe otau itumbu notau thootele wa fa omulonga Niili.

⁶ Omuwa ota tungu egumbo lye mookathele, nokombanda yevi ota yaleleke ko eyalelo. Oti ithana omeya gefuta e te ga wayulile kombanda yevi. Edhina lye oye Omuwa.

⁷ Omuwa ota ti: “Aaisraeli ne, momeho gandje omu thike pamwe nAasudani. Onda tembudha Aafilisti muKreta nAasiria muKir, naanaa ngaashi nde mu tembudha muEgipiti.

⁸ Ngame Omuwa Omupangeliawike otandi tongolola oshilongo shaIsrael sha yonana notandi ke shi hanagula po kombanda yevi. Ihe itandi ka yona po oluvalo aluhe lwaJakob.

⁹ “Otandi ka gandja elombwelo notii ka yela Aaisraeli ngaashi iilya metutu. Otandi ke ya yela mokati kiigwana, ndi yoolole mo mboka yaa na mwago.

¹⁰ Aayoni yomaantu yandje otaa ka dhipagelwa miita — ayehe mboka haa ti: ‘Kalunga ita ka pitika, omupya gu tu adhe.’ ”

¹¹ Omuwa ota ti: “Esiku otali ya, uuna tandi ka pendula po uukwaniilwa waDavid, mboka wa fa egumbo lyo ongotela po. Otandi ka thitika omisa dhomakuma galyo nokutungulula shoka sha kumuka po. Otandi ke li tungulula, li kale ngaashi lya li shito.

¹² Nena Aaisraeli otaa ka pangela oshihupe shevi lyaEdom niigwana ayihe mbyoka ya li yandje.” Omuwa osho ta ti, ngoka te etitha mbika yi ningwe.

¹³ Omuwa ota ti: “Omasiku otage ya, uuna omuteyi ta hokele omukuni, omukoli gwomandjembele ti ikokele komutsiki gwomiviinu. Nena oondundu otadhi vivile omaviinu, niikulundundu otayi ka hunga.

¹⁴ Otandi ka kongolola aantu yandje, ya shune kevi lyawo. Otaa ka tungulula iilando yawo ya kumuka po notaa kala mo; otaa ka tsika iitsambe yomiviinu e taa nu omaviinu; otaa ningi iikunino e taa li iiyimati mbyoka yi ima mo.

¹⁵ Otandi ka tsika aantu yandje mevi ndjoka nde li ya pe, oyo noitaa ka nakulwa mo we.” Omuwa Kalunga keni oye e dhi popi.