1 Ndika olyo elaka lyOmuwa, e li pe Joel yaPetuel.
2 Uvii ko, ne aakuluntu; shaa ngoka muJuda na pulakene. Osha ningilwe tuu nale sha fa shika, muuyuni weni nenge momauyuni goohokulu?
3 Shi hokololeleni aana yeni; oyo naye shi hokololele oyana, noyana naye ke shi hokololele oluvalo talu ya.
4 Oshipupu shoombahu tashi landula oshikwawo, osha lambela kiimeno; shoka sha thigwa po koonakapipi, osha liwa po komakamuti.
5 Ne oonkolwi, tonateni ne mu lile; takumeni, ne aanwi yomaviinu; omandjembele gokukolwa omaviinu omape oga yonwa po.
6 Oshipupu shoombahu osha ponokele evi lyetu; odhi na oonkondo nodhindji tadhi nyengana okuyalulwa; omayego gadho oga tsa ga fa gonime.
7 Odha yonagula po omiviinu dhetu nodha li po omikwiyu dhetu. Odha huula ko omihuya, sigo iitayi ya ningi iitokele to.
8 Yantu ne, lileni ngaashi omukadhona ta lili oosa dhomulumentu ngoka a li e na oku mu hokana.
9 Kaku na we iilya nenge omaviinu okuyambelwa motempeli; aayambi otaa lili, oshoka kaye na omayambo okuyambela Omuwa.
10 Omapya oge li owala; evi otali lili, oshoka iilya oya yonagulwa po, omahila goomviinu oga kukuta, nomiolivi odha ganya.
11 Aanamapya, seni oluhodhi; lileni ne mboka hamu dhiginine iitsambe yomiviinu, oshoka osiima niishokelya, eeno, iimeno ayihe oya yonagulwa po.
12 Omiviinu nomikwiyu odha ganya; omiti adhihe dhiiyimati odha kukuta. Enyanyu lyoshigwana olya kana.
13 Zaleni omahahi, mu lile, ne aayambi mboka hamu yakula poshiyambelo! Indeni motempeli, mu lile uusiku auhe! Kape na iilya nenge omaviinu okuyambela Kalunga keni.
14 Gandjeni elombwelo lyeidhiliko; hiyeni oshigongi! Gongeleni aawiliki noshigwana ashihe shaJuda motempeli yOmuwa Kalunga keni, mu mu galikane.
15 Esiku lyOmuwa oli li popepi; esiku uuna Omunankondoawike te eta ehanagulo. Esiku ndyoka otali eta uumbanda u thike peni!
16 Otwa kanitha etegameno, oshoka iimeno yetu oya lika po. Motempeli yaKalunga ketu kamu na nando enyanyu.
17 Oombuto otadhi sile mevi ekukutu. Kape na iilya yokupungulwa, niigandhi oyi li owala ya hohoka.
18 Iimuna otayi lilagana kuulumbu, oshoka kayi na oshinapelo; iigunda yoonzi otayi tala omalwa.
19 Omuwa, otandi ku galikana omolwomanapelo nomiti dha kukuta, ongodha lunguna komulilo.
20 Nokuli iithitukuti otayi ku lilile, molwashoka omilonga odha pwine.
1 Hikeni ombenda; hikeni enkuma muSion, kondundu yaKalunga ondjapuki. Kakameni, ne aantu yomuJuda!
2 Otali ka kala esiku eluudhe noli na oonzigi, esiku ethokothoko nolyiikogo iiluudhe. Oshipupu oshinene shoombahu otashi taandele, ngaashi omilema tadhi siikile oondundu. Inaku kala nale oshinima sha fa shika, noitashi ka kala ko we.
3 Oombahu otadhi li po iimeno dha fa epeya. Komeho gadho oshilongo osha fa oshikunino shaEden, ihe konima yadho osho ombuga ya hekuka. Kape na shoka tashi hunuka kudho.
4 Odha fa uukambe; otadhi matuka dha fa oonkawilwankambe.
5 Nge tadhi nyantuka koondundu, otadhi kolokota dha fa omatembakwiita; otadhi tyotyoma dha fa omwiidhi omukukutu mepeya. Odha fa etangakwiita tali ilongekidhile olugodhi.
6 Ngele tadhi hedha ko, shaa ngoka ota haluka; oshipala kehe otashi pembe.
7 Otadhi pononoka ko dha fa aakwiita; otadhi londo omakuma ngaakwiita. Adhihe otadhi katuka dhu ukilila komeho noitadhi penge nando, dhi ye mooha
8 nenge dhi pumathane. Otadhi pandakana mokati komagonga, nokaku na sha shoka tashi dhi keelele.
9 Otadhi matukile oshilando; otadhi kondo omakuma; otadhi londo omagumbo notadhi yi mo tadhi pitile momakende ngaafuthi.
10 Evi otali kakama, nge tadhi humu ko; ewangandjo otali tengauka. Etango nomwedhi otayi luudha, noonyothi itadhi minikile we.
11 Omuwa ota kaluluka, sho ta lombwele etangakwiita lye. Oongundu ndhoka hadhi vulika kuye odhindji noonankondo. Esiku lyOmuwa etilithi ngiini! Olye ta ka hupithwa kulyo?
12 Omuwa ota ti: “Itedhululeni shili ngashingeyi, mu galukile kungame nokwiidhilika iikulya, nokulila nonokunika uuthigwa.
13 Tuuleni omitima dheni, mu holole oluhodhi; okutuula oonguwo dheni inaku gwana.” Galukileni kOmuwa Kalunga keni. Oye omunambili nomunesilohenda; oye omunalukeno nota dhiginine omauvaneko ge.
14 Pamwe Omuwa ota lundulula omadhiladhilo ge note mu yambeke neloolo lyiimeno. Nena otamu mu yambele iilya nomaviinu.
15 Hikeni ombenda kondundu Sion; gandjeni elombwelo lyeidhiliko, hiyeni oshigongi!
16 Gongeleni aantu ayehe; ya longekidhileni oshigongi oshiyapuki; eteni aantu aakuluntu; gongeleni aanona nuuhanona wo. Nokuli ombushiki na ze mondunda ye nomufuko mondjugo ye, opo ye ye koshigongi.
17 Aayambi mboka taa longele Omuwa pokati koshiyambelo nomweelo gwotempeli, naa lile nokugalikana: “Omuwa, sila aantu yoye ohenda. Ino etha iigwana yilwe, yi tu sithe ohoni noyi tu sheke yi tye: ‘Kalunga keni oku li peni?’ ”
18 Nena Omuwa okwa holola oshimpwiyu nevi lye; okwa li e na ohenda naantu ye.
19 Okwe ya yamukula: “Ngashingeyi otandi ke mu pa iilya nomaviinu nomagadhi gooholivi, notamu ka kuta. Iigwana yilwe itayi ke mu sheka we,
20 Otandi ka tidha po oombahu ndhoka dhe ya dha ziilile kuumbangalantu note tidhile dhimwe dhomudho kombuga. Ombinga yokomeho otandi yi tidhile mEfuta lya sa, naandjoka yokonima omEfuta lyopokati. Ndhoka dha sa, otadhi ka nika keolelo. Otandi dhi yonagula po molwaayihe mbyoka dhe mu ningile.
21 “Malundu, inamu tila, ihe ligoleni nokunyanyukwa omolwaayihe Omuwa e yi mu ningile.
22 Iinamwenyo, inamu tila. Omanapelo oga ziza; omiti odhi ima iiyimati yadho, noku na eloolo lyoonkwiyu nomandjembele.
23 “Yantu yaSion, nyanyukweni. Tundulukilweni mbyoka Omuwa Kalunga keni e yi mu ningile. Okwe mu pe omagano go opala gomvula yokomusheko; okwe mu lokithile omvula yopokufu nomvula yontemuna ngoshitonale.
24 Omalupale otaga ka ndumbala iilya; iilambo yomatemba gokukolela otaga ka hunga omaviinu nomagadhi gooholivi.
25 Otandi ke mu galulila shoka mwa kanitha momimvo ndhiyaka, sho oombahu dha li po iimeno yeni. Ongame nda tumine oombahu ndhika, dhi mu kondjithe.
26 Ngashingeyi otamu ka kala mu na eloolo lyiikulya notamu ka kuta. Otamu ka hambelela Omuwa Kalunga keni, ngoka e mu ningile iikumitha. Aantu yandje itaa ka shekwa we.
27 Nena, Israel, oto ka tseya kutya ondi li mokati keni, nokutya ongame Omuwa Kalunga keni nokaku na gulwe. Aantu yandje itaa ka sithwa we ohoni.”
28 “Konima yomasiku otandi ka tilila ombepo yandje kushaa ngoka: aana yeni aamati naakadhona otaa ku uvitha oohapu dhandje; aasamane yeni otaa ka yaguma, naagundjuka yeni otaa ka mona omamoniko.
29 Pethimbo ndyoka otandi ka tilila ombepo yandje kombanda yaayakuli ayehe, aalumentu naakiintu.
30 “Otandi ka gandja omalondodho omolwesiku ndyoka mewangandjo nokombanda yevi; otaku ka kala etikombinzi, omulilo niikogo yolwithi.
31 Etango otali ka luudha, omwedhi otagu tiligana ngombinzi, manga esiku enene netilithi lyOmuwa inaali thikana.
32 Ihe ayehe mboka taa indile ekwatho kOmuwa, otaa hupithwa. Ngaashi Omuwa a ti: ‘Yamwe muJerusalem otaa ka fadhuka po; oomboka nde ya hogolola, otaa ka hupa ko.’ ”
1 Omuwa ota ti: “Pethimbo ndyoka otandi ka galulila Juda naJerusalem elago lyawo.
2 Otandi ka gongela iigwana ayihe e tandi yi eta kOlusilu lwaJehosafat. Nkwiyaka otandi ke yi pangulila ayihe mbyoka ye yi ningile aantu yandje. Oya halakanithile Aaisraeli miilongo yaapagani noya topola evi lyandje Israel.
3 Oyu umbu oshihogololitho, yu uthile ngoka ta ka pewa oonkwatwa. Oya landitha po aamati naakadhona muupika, opo ya fute oohonda noya mone omaviinu.
4 “Otamu kambadhala okuningila ndje shike, Tiro, Sidon nomikunda adhihe dhAafilisti? Otamu kambadhala, mu futile ndje sha? Ngele osho, otandi ke mu futila mbala.
5 Omwa kutha po oshisiliveli noshingoli shandje nomwa fala uuyamba wandje mootempeli dheni.
6 Omwa fala aantu yaJuda naJerusalem kokule nevi lyawo yene nomwe ya landitha po kAagreka.
7 Ngashingeyi otandi ke ya kutha mo momahala ngoka mwe ya landitha po. Otandi ke mu ninga shoka mwe ya ningile.
8 Otandi ka landitha po aana yeni aamati naakadhona koshigwana shaJuda; otaye ke ya landitha po kokule kAasaba. Ongame Omuwa nde dhi tya.
9 “Tseyithileni shika mokati kiigwana: ‘Ilongekidhileni iita; hiyeni omatanga geni; gongeleni aakwiita ayehe, mu katuke!
10 Hambululeni omatemo giipululo yeni, ga ninge omagongamwele niimwitho yeni, yi ninge omagonga. Nokuli omukatalume oku na okuya molugodhi.
11 Ne iigwana ayihe yopuushiinda, endeleleni, mu ye mu gongale molusilu.’ ” Omuwa, tuma etangakwiita lyoye, li yi ponokele.
12 “Iigwana oyi na okwiilongekidhila okuya kOlusilu lwaJehosafat. Nkwiyaka ngame, Omuwa, otandi ka kuutumba, ndi tokole iigwana ayihe yopuushiinda.
13 Oyo iiwinayi unene; yi teyeni ya fa iilya pethimbo lyeteyo. Yi hopoleni, ngaashi omandjembele taga hopolelwa metemba lyokukolela mo oomviinu, sigo omaviinu taga hunga.”
14 Omayuvi nomayuvi oye li mOlusilu lwetokolelo. Omo moka esiku lyOmuwa tali ya mbala.
15 Etango nomwedhi otayi luudha, noonyothi itadhi minikile we.
16 Omuwa ota pumbu kondundu Sion; ewi lye otali ndunduma muJerusalem; evi newangandjo otayi kakama. Ihe ota ka popila aantu ye.
17 “Nena, Israel, oto ka tseya kutya ongame Omuwa Kalunga keni. Onda kala kuSion, ondundu yandje ondjapuki. Jerusalem otashi ka ninga oshilando oshiyapuki; aakwiilongo itaa ke shi lala we.
18 Pethimbo ndyoka oondundu otadhi ka siikilwa komiviinu, niimuna otayi ka monika kiikulundundu ayihe; otaku ka kala omeya gefundja momilonga adhihe dhaJuda. Motempeli yOmuwa otamu zi omulonga tagu tutike Esilu lyomano.
19 “Egipiti ota ka ninga ombuga, naEdom eputu alike, oshoka oya ponokele evi lyaJuda noya dhipaga aantu yalyo yaa na ndjo.
20 Otandi ka geya molwaamboka ya dhipagwa; mbo ya yona, itandi ke ya hupitha. Ihe Juda naJerusalem otayi ka kalwa sigo aluhe, nangame Omuwa otandi ka kala kondundu Sion.”