1

¹ Ndika olyo elaka ndyoka Omuwa e li pe Hosea yaBeeri pomasiku gaakwaniilwa yaJuda Usia, Jotam, Ahas naHiskia nomanga Jeroboam yaJehoas a li omukwaniilwa gwaIsrael.

² Uuna Omuwa a popitha Israel muHosea, okwa ti: “Inda, wu ka hokane; mukadhoye ota ka kala kee shi kwiinekelwa naanona yoye otaa ka kala ye mu fa. Osho ngaaka aantu yandje oya thigi ndje po nokaye shi kwiinekelwa.”

³ Hosea okwa hokana omukulukadhi edhina lye Gomer yaDiblajim. Nguka okwe mu valele osheeli shomumati.

⁴ Omuwa okwa ti kuHosea: “Mu luka Jesreel, oshoka itapu piti ethimbo ele inaandi geela omukwaniilwa gwaIsrael molwomadhipago ngoka ga ningwa kuhekulu Jehu puJesreel. Otandi ka hulitha po ezimopangeli lyaJehu.

⁵ Nopethimbo ndyoka otandi ka hanagula po omatangakwiita gaIsrael mesilu lyaJesreel.”

⁶ Gomer okwa vala okanona okatiyali; haka oka li okakadhona. Omuwa okwa ti kuHosea: “Ka luka ‘Kiimuhole’, oshoka itandi kala we ndi hole oshigwana shaIsrael nenge oku shi dhimina po.

⁷ Ihe oshigwana shaJuda otandi kala ndi shi hole. Ngame, Omuwa Kalunga kawo, otandi ya hupitha, ihe itandi shi ningi niita — negongamwele nenge nuutati nenge nuukambe naakawilinkambe.”

⁸ Gomer sho a toyitha okakadhona ke, okwa ningi ishewe omusimba e ta vala okamati.

⁹ Omuwa okwa ti kuHosea: “Ka luka ‘Kamushiyandje’, oshoka oshigwana shaIsrael kashi shi oshigwana shandje, nangame kandi shi Kalunga kawo.”

¹⁰ Oshigwana shaIsrael otashi ka fa evi lyokefuta, oshindji tashi nyenge okuyalulwa nenge okuudhikwa. Ngashingeyi Kalunga ota ti: “Kamu shi aantu yandje,” ihe esiku otali ke ya, uuna ta ka tya: “One aana yaKalunga omunamwenyo.”

¹¹ Oshigwana shaJuda noshigwana shaIsrael otayi ka hangana ishewe. Otaa ki ihogololela yo yene omuwiliki gumwe, nopolumwe otaa ki indjipala notaa ka kala ye na elago mevi lyawo. Eeno, esiku lyaJesreel otali ka kala esiku enene.

2

¹ Osho ngeyi ithaneni Aaisraeli ooyakweni “Oshigwana shaKalunga” na “Aaholike yOmuwa”.

² Aana yandje, tamanekeni nyoko — nando ke shi we mukadhandje, nangame kandi shi we omulume. Mu tamanekeni, a hulithe uuholume noluhondelo lwe.

³ Ngele ite shi ningi, otandi ke mu hula, a kale omudhu ongesiku ndiyaka a valwa. Otandi ke mu ninga, a kale a fa evi ekukutu lya mbugala e ta ka sa kenota.

⁴ Oyana itandi ya sile ohenda; oyo aana yohonda kaayi na honi. Oyo tayi ti: “Otandi yi kaaholi yandje — otaa pe ndje iikulya nomeya, omafufu goonzi niilugu, omagadhi nomaviinu.”

⁵

⁶ Onkee ano, tala, ondjila yayo tandi yi thitikitha omano, tandi gumbile enkolo komeho gayo yaa mone omapola gayo.

⁷ Otayi ka matukila kaaholi yayo, ihe itayi ke ya adha. Otayi ke ya konga, ihe itayi ke ya mona. Nena otayi ka tya: “Ote shuna komusamane gwandje — puye onda li omuhwepo ndi vule sho ndi li ngashingeyi.”

⁸ Ina tseya nande kutya ongame handi mu pe iilya, omaviinu nomagadhi niisiliveli ayihe noshingoli mbyoka ha yambele Baal.

⁹ Pethimbo lyeteyo otii ka kutha po omagano gandje giilya nogomaviinu notii ka kutha po omafufu goonzi niilugu mbyoka nde mu pele, a mone omizalo.

¹⁰ Otandi ke mu hula montaneho yaaholi ye, nokape na ngoka ta vulu oku mu kutha miikaha yandje.

¹¹ Iituthi ye ayihe otandi yi hulitha po — iituthi ye yokomumvo noyokomwedhi nokudhana Esabati — omalongelokalunga ge agehe.

¹² Otandi ka hanagula po omiviinu dhe nomikwiyu dhe ndhoka ta ti, okwe dhi pewa kaaholi ye, e ya yakule. Iitsambe ye yoomviinu noyiiyimati otandi ke yi mbugaleka; iithitukuti otayi ke yi thekeka po.

¹³ Otandi ke mu geelela omathimbo ngoka a dhimbwa ndje, sho a lungunithile Baal omatsininondjambo nokwiizaleka uuwe, a ka lambalale aaholi ye. Omuwa osho ta ti.

¹⁴ Onkee otandi ke mu shunitha natango kombuga; nkwiyaka otandi ke mu sinda noohapu dhomaheko gohole.

¹⁵ Otandi ke mu shunina iitsambe ye yomiviinu mbyo a li nayo nale, nEsilu lyomalwa otali ningi osheelo shetegameno. Nkwiyaka ota ka vulika, ngashi a li sho a li omugundjuka, sho a tembuka muEgipiti.

¹⁶ Nena ota ka tya ndje ongame omulume — ite ki ithana ndje we Baal gwe.

¹⁷ Itandi ke mu etha we, a tumbule edhina lyaBaal.

¹⁸ Pethimbo ndyoka otandi ka dhika ehangano niithitukuti ayihe noondhila adhihe, opo yaa ehameke aantu yandje. Otandi ka kutha po omauta giita moshilongo, omagonga agehe nomatati e te kaleke aantu yandje mombili nomegameno.

¹⁹ Israel, otandi ke ku hokana; ote kala omunashili nomwiinekelwa; otandi ke ku hololela ohole yokolela nesilohenda; oto ka hokanekeka ndongo aluhe.

²⁰ Ote dhiginine euvaneko lyandje e tii ku ningi gwandjelela, nangoye oto ka tseya kutya ngame Omuwa.

²¹ Pethimbo ndyoka otandi ka yamukula omagalikano goshigwana shandje Israel. Evi otandi ke li lokithila omvula, nevi otali ka menitha iilya nomandjembele nooholivi.

²²

²³ Otandi ki indjipaleka aantu yandje moshilongo e tandi ya lagopaleke. Otandi ka holola ohole yandje kumboka nda li nda ti “Kiimuhole”, nokumboka ya li haa ithanwa “Kamushiyandje”. Otandi ka tya: “One aantu yandje,” nayo otaa ka yamukula: “Ongoye Kalunga ketu.”

3

¹ Omuwa okwa ti kungame: “Inda natango e to kala ishewe u hole omukiintu e li moluhondelo nomuholi gwe. Kala wu mu hole, ngaashi ngame ndi hole natango oshigwana shaIsrael, nando oya yi kiikalunga noye hole okuyambela iimenka omayambo giiyimati.”

² Opo ihe nda futu iimaliwa iisiliveli omulongo niitano nooshako ne dhiishokelya, ndi mu kulile.

³ Onde mu lombwele: “Kala ethimbo ele nangame; ino ya moluhondelo naalumentu yalwe. Osho nangame wo ote ningi nangoye.”

⁴ Osho ngeyi Aaisraeli otaa ka kala ethimbo ele yaa na aakwaniilwa nenge aawiliki, yaa na omayambo nenge oongudhimanya dhiidhila, yaa na iikalunga nenge iihongwamenka.

⁵ Ihe ethimbo otali ya, uuna oshigwana shaIsrael tashi ka galukila natango kOmuwa Kalunga kawo nokomuna gwaDavid, omukwaniilwa gwawo. Nena otaa ka tila Omuwa notaa ka taamba omagano omawanawa kuye.

4

¹ Omuwa ota gandja uusama koshigwana shoka sha kala mevi ndika. Israel, pulakena shoka ta ti: “Kaku na omwiinekelwa nenge ohole moshilongo, naantu inaa tseya ndje kutya ongame Kalunga.

² Otaa ningi omauvaneko e taye ga yono, otaa dhipaga, taa yaka e taa hondele. Oya vuka muudhudhu nomomadhipagathano.

³ Onkee evi otali si oluteni noshaashoka shi na omwenyo, otashi ka sa. Iithitukuti ayihe noondhila adhihe noohi wo otayi ka sa.”

⁴ Omuwa ota ti: “Inaku kala ngoka ta nyenyetele aantu nenge te ya pukulula — omagando ogu uka kaayambi.

⁵ One tamu tantagala uusiku nomutenya, naahunganeki ongashikwawo. Ngame otandi ka hanagula po nyoko Israel.

⁶ Aantu yandje oya pangulwa, oshoka inaa tseya ndje. Ne aayambi omwa tinda okutseya ndje nomwe ekelahi omalongo gandje. Onkee otandi ekelehi aana yeni.

⁷ “Ne aayambi sho mwa ningi oyendji, okuyona kweni okwa ningi wo okwindji. Esimano lyeni otandi ke li ukitha meshunduko.

⁸ Otamu yambapala molwomayono gaantu yandje notamu hala, ya yone nena nangula.

⁹ Otamu ka geelwa egeelo limwe noshigwana. Otandi mu geele e tandi mu galulile uuwinayi mbuka tamu longo.

¹⁰ Nando otamu li oontumba dhoondjambo, itamu ka kuta. Otamu simaneke iikalunga yokugandja oluvalo, ihe natango otamu ka kala mwaa na aanona, oshoka omwa pilamene ndje e tamu landula iikalunga.”

¹¹ Omuwa ota ti: “Omaviinu omalulu nomatoye otaga kutha aantu yandje oondunge.

¹² Otaa kongo omamoniko methindi lyomuti. Oshiti tashi ya lombwele shoka ya hala okutseya. Oye etha ndje. Oya fa omukiintu a ningi ohonda. Oyi igandja yo yene kiikalunga.

¹³ Otaa yamba oondjambo pomahala giimenka koondungu dhoondundu. Kiikulundundu otaa lungunithile etsininondjambo momiti ominene dha gumbakana, omolwomizile omiwanawa. “Omolwaashoka aakadhona yeni otaa ningi oohonda niitenyakadhona yeni otaa hondele.

¹⁴ Ihe itandi ke ya geelela shika, one yene ohamu kala noohonda dhomootempeli notamu gandja pamwe nadho oondjambo dhopashipagani. Ngaashi eyeletumbulo tali ti: ‘Aantu aagoya otaa ka mbolokotela meolelo.’

¹⁵ “Nando ngoye oshigwana shaIsrael, ino inekela ndje, Juda na kale inee shi pelwa uusama. Inamu galikanena puGilgal nenge puBetaven nenge mu ningile po euvaneko medhina lyaKalunga omunamwenyo.

¹⁶ Oshigwana shaIsrael osha pwidhuka sha fa omamulutiya. Ote vulu oku ya napitha ngiini ngaashi oonzi komanapelo?

¹⁷ Oshigwana shaIsrael oshi li mehangano niimenka. Shi etheni, shi ye noondjila dhasho shene.

¹⁸ Ngele ya kolwa komaviinu, nena otaa hokwa muuholume wawo, taa hogolola esithahoni komeho gesimaneko.

¹⁹ Otaa ka pepwa po kombepo notaa ka sa ohoni yoondjambo dhawo dhoshipagani.

5

¹ “Aayambi, pulakeneni! Pakalekeni omakutsi, one Aaisraeli! Pulakeneni ne yomezimo lyaapangeli! Omwa tegelelwa, mu tokole pauyuuki. Epangulo otali mu adha! Omwa ningi omwigo gwaMispa noshiliya kondundu Tabor,

² ekelo ele puShittim, notandi ka geela ayehe yomuyo.

³ Israel ondi mu shi, nkene a tya — ita vulu okuholama ndje. Okwa ningi kee shi we kwiinekelwa, naantu ye inaa gwana we okulongela ndje.”

⁴ Uuwinayi mboka oshigwana shaIsrael sha ningi, owe shi keelele okugalukila kuKalunga kasho. Okusimaneka iimenka okwe ya tsikitha, yaa vule we okudhimbulula Omuwa.

⁵ Eitumbo lyoshigwana shaIsrael otali shi tamaneke. Ondjo yuulunde wawo otayi ya pundukitha, naantu yaJuda otaa pundukile mumwe nayo.

⁶ Otaa kutha oonzi niimuna yawo, ye yi yambele Omuwa oondjambo, ihe itashi kwatha sha. Itaa vulu oku mu mona, oshoka okwe ya thigi po.

⁷ Oyo inaa inekela Omuwa; aana yawo kaa shi yOmuwa. Onkee otaa ka hanagulwa po mbala pamwe nomapya gawo.

⁸ Hikeni oombenda dhiita muGibea! Kugeni onkugo muRama! Tseyitheni iita muBetaven! Yamati yaBenjamin, indeni kiita!

⁹ Esiku lyegeelo otali ya, naIsrael ota ka ya meyonuko. Oshigwana shaIsrael, shika otashi ka ningwa shili!

¹⁰ Omuwa ota ti: “Onda geya, oshoka aawiliki yaJuda oya matukile Israel noya yugu po evi lye. Onkee otandi ya tilehile egeelo tali kunguluka lya fa efundja.

¹¹ Israel ota thiminikwa; okwa kanitha evi ndyoka lya li lye lela, oshoka oya ka pula ekwatho kumboka yaa na sha okugandja.

¹² Otandi eta eyonuko muIsrael nehanagulopo moshigwana shaJuda.

¹³ “Israel sho a mono uuvu we, naJuda sho a mono iilalo ye, nena Israel okwa yi kuAssur, a pule omupangeli omunene ekwatho, ihe ina vula oku ya aludha nenge okupanga iilalo yawo.

¹⁴ Otandi ka ponokela oshigwana shaIsrael naJuda ngaashi onime. Ongame mwene tandi ke ya tuulagula notandi ya thigi po. Uuna tandi ke ya kookolola, kape na ngoka te ya hupitha.

¹⁵ “Otandi ke ethela aantu yandje momahepeko, sigo oondjo dhawo dhe ya hepekitha sha gwana notaa ka konga ndje. Ngiika muudhigu wawo otaa ka kambadhala, ya mone ndje.”

6

¹ Aantu otaa ti: “Tu galukileni kOmuwa. Okwe tu dhenge, ihe ote tu aludha; ote tu ningi iilalo, ihe ota manga wo iilalo yetu.

² Momasiku gaali nenge gatatu ote tu tululula omwenyo, notatu ka kala tu na omwenyo montaneho ye.

³ Natu tseyeni Omuwa. Ote ke ya kutse a fa eluwa tali tende; eeno shili, okwa fa omvula tayi tutike evi, sho tayi nyaganya.”

⁴ Ihe Omuwa ota ti: “Israel naJuda, otandi mu ningi ngiini? Ohole yeni yokuhola ndje, otayi pwine mbala ya fa osheentsi shongula; oya fa omume ndjoka tayi kaha ongulangula.

⁵ Omolwaashika onde mu tumine aahunganeki yandje nelaka lyepangulo nolyehanagulo. Shoka nda hala kune, osha yela noshi li puuyelele:

⁶ osho ohole ya kola, handjambo dhiimuna yeni. Onda hala, aantu yandje ya tseye ndje shi vule okulungunithila ndje omayambo.

⁷ “Ihe sho ye ya mevi puAdam, oya yono ehangano ndyoka nda hangana nayo.

⁸ Gilead osho oshilando shu udha aantu aawinayi naadhipagi.

⁹ Aayambi oya fa ongundu yaayugi mboka ya langela omuntu. Nomondjila yu uka keha eyapuki kuShekem, otaa dhipaga. Notaa longo uuwinayi mbuka ya manguluka nokuli!

¹⁰ Onda mono iihuna muIsrael; aantu yandje otayi inyateke pesimanekelo lyiimenka.

¹¹ “Nomolwoye wo, oshigwana shaJuda, ondu utha ethimbo lyoku ku pangula omolwiilonga yoye.”

7

¹ “Nando nee nda hala okupanga aantu yandje Aaisraeli noku ya ninga aanelago ishewe, ondi wete ashike uuwinayi wawo niihuna mbyoka taa ningi. Otaa kotokelathana; otaa fulu omagumbo notaa yaka; otaa yugu aantu momapandaanda.

² Itashi ya mo nando momitse dhawo kutya ote dhimbulukwa uuwinayi auhe mbuka; ihe omayono gawo oge ya kondeka noge li aluhe momeho gandje.”

³ Omuwa ota ti: “Aantu otaa kotokele omukwaniilwa naambala ye nomaendathano gomevi omawinayi.

⁴ Ayehe aaniineya nokaa shi kwiinekelwa. Ondjahi yawo tayi mukuta ngaashi omulilo mesiga, ngoka inaagu yokwa komuyothi, sigo ondombo tayi tumbu.

⁵ Mesiku lyelalo lyomukwaniilwa oya simaneke omukwaniilwa naambala ye niikunwa yopashimbala e taye ya goyapeke nomaviinu.

⁶ Omakoto gawo oge ya hanyeke ngaashi eziko. Uusiku auhe ondjahi yawo oya li tayi mukuta, nongula oya ndwafuka.

⁷ “Muupyundjahi wawo oya dhipaga aaleli yawo. Aakwaniilwa yawo oya dhipagwa miineya gumwe nagumwe, ihe kape na ngoka ti indile ndje ekwatho.”

⁸ Omuwa ota ti: “Oshigwana shaIsrael osha fa oshikwiila inaashi pya nawa. Oya vundakana niigwana ye ya kunduka

⁹ noinaa dhimbulula kutya okukwatathana kwawo naakwiilongo okwe ya kutha oonkondo. Omasiku gawo oga yalulwa, ihe yo inaa shi tseya.

¹⁰ Eitumbo lyoshigwana shaIsrael otali ya tamaneke. Nonando mbika oya ningwa, inaa galukila kungame, Omuwa Kalunga kawo.

¹¹ Israel ota fadhuka po a fa onguti ya thethelekwa. Tango otaa pula ekwatho kuEgipiti, nena otaa matukile kuAssur.

¹² Ihe otandi ke ya tegela omwigo, gu ya yule ngaashi oondhila, sho yu uka ko. Otandi ya geelele uuwinayi ye u ninga.

¹³ “Oya geelwa! Oye etha ndje e taa tsu ondumbo nangame. Otaa ka hanagulwa po. Onda halele, ndi ya hupithe, ihe elongelo lyawo okulongela ndje olyiifundja.

¹⁴ Oyo inaa galikana ndje shili, ihe peha lyasho oyi iyekelehi yo yene e taa lilagana ya fa aapagani. Uuna taa pula iilya nomaviinu, otaa ishatagula ya fa aapagani. Aadhudhu oya tya ngiini mbano, ee!

¹⁵ Nando ngame onde ya putudha nonde ya koleke, oya li taa kondjitha ndje.

¹⁶ Oya pilamene ndje e taa taalele kiikalunga yaa na mwago. Oyo kaye shi kwiinekelwa, ya fa uutati wenkowatata. Oshoka aawiliki yawo otaa inomo, otaa ka sa iisa yaa na mutse nandungu, nAayegipiti otaa ka yola.”

8

¹ Omuwa ota ti: “Kugeni onkugo! Aatondi otaa fegula po evi lyandje ya fa omakodhi. Aantu yandje oya yono ehangano lyetu nayo noya tsa ondumbo nompango yandje.

² Nonando nee yi ithane ndje Kalunga kawo noya tye, oyo aantu yandje noya tseya ndje,

³ oye ekelehi shoka oshiwanawa. Onkee aatondi yawo otaa ke ya tidhagana.

⁴ “Aantu yandje oyi ihogololele aakwaniilwa, ihe oye shi ningi muyo yene. Oya langeke aawiliki, ihe ngame inandi shi zimina. Oya kutha oshisiliveli shawo noshingoli e taa hambula iimenka. Shika otashi ya fala meyonuko.

⁵ Otandi tondo ontsezi yoshingoli tayi simanekwa kaantu yomoshilando Samaria. Otandi ya geele. Sigo uunake taa kala ngeyi inaaye etha iikalunga yawo?

⁶ Omuhambudhi Omuisraeli okwa hambula oshimenka, ihe kashi shi Kalunga. Ontsezi yoshingoli hayi simanekwa muSamaria, otayi ka tatulwa po.

⁷ Otaa kunu ombepo, ihe otaa ka teya oshikungulu! Epya lyiilya mbyoka inaayi tiligana itayi vulu okugandja oshithima. Nonando nee nali shi ninge, aakwiilongo otaye shi li po.

⁸ Israel a faathana niigwana yilwe noke na we oshilonga mokati kayo, a fa ombiga ya tatuka.

⁹ Ngaashi uusino uupwidhi aantu yaIsrael otaa lambalala oondjila dhawo yene. Oya yi, ya ka konge ekwatho kuAssur noya futu iigwana yilwe, opo yi ya gamene.

¹⁰ Ihe nena otandi ke ya gongela e tandi ya geele. Mbala otaa ka thinonwa kuuwehame, omukwaniilwa gwaAssur sho te ya hepeke.

¹¹ “Oshigwana shaIsrael sho sha tungu iiyambelo oyindji okukutha po oondjo, oshi na muyo omahala ogendji gokuyonena.

¹² Nando ndi kale nde ya nyolela iipango yaa shi kuyalulwa, oye yi tindi noye yi tala iinima iikwiilongo.

¹³ Otaa yambele ndje oondjambo notaa li onyama yadho, ihe ngame Omuwa kandi na mbili nayo. Otandi dhimbulukwa oondjo dhawo e tandi dhi ya geelele. Otandi ke ya shuna kuEgipiti.

¹⁴ “Oshigwana shaIsrael osha tungu oombala dhaakwaniilwa, ihe osha dhimbwa omushiti gwasho. Oshigwana shaJuda osha tungu iilandohote, ihe otandi ka tuma omulilo, gu lungunithe po oombala dhawo dhaakwaniilwa niilando yawo.”

9

¹ Shigwana shaIsrael, hulithii po iituthi yeni ya fa yaapagani. One mwa pilamene Kalunga keni noinamu mu inekela. Moshilongo ashihe omwi ilanditha po koshikalunga Baal ngaashi oohonda nomu hole iilya mbyoka tamu ti, okwe yi mu futile!

² Ihe mbala ito ka kala niilya ya gwana nomagadhi nosho wo omaviinu.

³ Oshigwana shaIsrael itashi ka kala we mevi lyOmuwa, ihe otashi ka shuna kuEgipiti e tashi kala tashi li muAssur iikulya yi indikwa.

⁴ Momavi omakwiilongo itashi ka vula okuyambela Omuwa omayambo gomaviinu nenge oku mu etela oondjambo. Iikulya yasho otayi nyateke shaa ngoka te yi li ya fa iikulya tayi lilwa pomawendo. Otayi ka liwa ashike oku ya kutitha; itamu kuthwa nando osha, shi yambelwe motempeli yOmuwa.

⁵ Nuuna ethimbo tali ya lyokudhana iituthi yokusimaneka Omuwa, otaa ka ninga shike?

⁶ Uuna oshiponga tashi ya, naantu taa halakanithwa, Aayegipiti otaa ke ya gongela — taye ya gongelele efumviko puMemfis! Uuyamba wawo woshisiliveli nomahala mpoka omagumbo gawo ga li ga dhikilwa po, otaga ka kala ga sa omwiidhi nomano.

⁷ Ethimbo lyepangulo olya thikana, uuna aantu taa pewa shoka yi ilongela. Uuna tashi ningwa, Israel ote shi tseya. Otamu ti: “Omuhunganeki nguka omugoya. Omukwambepo nguka ota alukwa.” Ne aantu otamu tondo ndje unene, oshoka oondjo dheni odhindji unene.

⁸ Ngame omuhunganeki nda tumwa kuKalunga okulondodha oshigwana shaIsrael. Ihe aluhe shaa mpoka tandi yi, otamu tegele ndje omwigo ngaashi ondhila. Aantu oya ningi aatondi yomuhunganeki mevi lyaKalunga mwene.

⁹ Oyo aawinayi noonkondo miilonga yawo, naanaa ngaashi ya li puGibea. Kalunga ota dhimbulukwa oondjo dhawo e te dhi ya geelele.

¹⁰ Omuwa ota ti: “Israel onde mu adhele a fa omandjembele ga kokela mombuga. Oohokulu oya li ya fa oonkwiyu dhoondhiye. Ihe sho ye ya kondundu Peor, oya tameke okulongela Baal, mbalambala oya ningi iikungitha ngaashi iikalunga mbyoka ye yi hole.

¹¹ Esimano lyaIsrael otali ka tuka po lya fa ondhila, noitaa ka valelwa we aanona, kape na mukiintu ta ka ninga omusimba, kape na we mukiintu ta ka ya metegelelo.

¹² Ihe nando naa vale aanona, otandi ke ya kutha po noite thigi po nando ogumwe e na omwenyo. Uuna tandi etha aantu mbano, otaa ka adhika kiihuna.”

¹³ Memoniko ondi wete oyana taa tidhwa notaa dhipagwa.

¹⁴ Omuwa, otandi ku indile shike, u shi ningile aantu mbaka? Ninga aakiintu yawo kaaya vale! Nomagundji gawo ga thipuka kage shi kuyamutha we uunona.

¹⁵ Omuwa ota ti: “Iilonga yawo ayihe iiwinayi oya tameke muGilgal. Oko nkoka nda tameke oku ya tonda. Nomoluuwinayi mboka ye u ningi, otandi ke ya tidha mo mevi lyandje. Itandi ka kala we ndi ya hole; aawiliki yawo oya tsa ondumbo nangame.

¹⁶ Oshigwana shaIsrael osha fa oshimeno shi na omidhi dha kukuta noitashi imi we iiyimati. Itaa ka kala we ye na aanona, ihe nando ya kale nayo, otandi ka dhipaga po aanona yawo ye ya hole.”

¹⁷ Kalunga nguka he longele, ote ke ekelahi aantu ye, oshoka inaye mu pulakena. Otaa ka kala aatembauki mokati kiigwana.

10

¹ Oshigwana shaIsrael osha li sha fa omuviinu gwa kanyata omandjembele. Sho sha likola iiyimati oyindji, oshi indjipalitha omwaalu gwiiyambelo yasho. Evi lyasho sho lya vala nawa, osho opaleke shi vule shito oongudhimanya dhiimenka shi dhi longele.

² Aantu yomitima omikotokeli otaa ka sa uudhigu molwoondjo dhawo. Kalunga ota ka kumuna po iiyambelo yawo e ta yonagula po oongudhi dhawo dhiimenka.

³ Aantu mbaka otaa ka tya: “Katu na omukwaniilwa, oshoka inatu tila Omuwa. Ihe omukwaniilwa ote tu kwatha shike?”

⁴ Otaa popi oohapu dhaa na shilonga notaa ningi omauvaneko giifundja nomauvaneno gowala. Uuyuuki wa shituka uukeenuuyuuki tau koko wa fa iigwanga yuuzigo mepya lya pululwa.

⁵ Aantu mboka taa kala moshilando Samaria, otaa ka tila e taa si oluhodhi omolwoshikalunga shoshingoli puBetaven. Oyo naayambi mboka ya longele oshimenka shika, otaye ke shi lilila. Otaa ka kugagana, sho tashi hulwa eadhimo lyasho lyoshingoli.

⁶ Oshimenka otashi ka falwa kuAssur, shi ninge ombalagelo komupangeli omunene. Israel ota ka kuthwa esimano, ota ka sithwa ohoni molwaashoka ye shi ningi.

⁷ Omukwaniilwa gwe ota ka falwa ngoshipipili kombanda yomeya.

⁸ Iimenka yokoondungu dhoondundu dhaBetaven, nkoka oshigwana shaIsrael hashi yi simanekele, otayi ka yonagulwa po. Omano noongwena otayi ka mena piiyambelo yayo. Aantu otaa ki ithana oondundu taa ti: “Tu holekeni!” niikulundundu: “Tu siikileni!”

⁹ Omuwa ota ti: “Oshigwana shaIsrael inashi etha nando okuyona kungame, ngaashi ya li ya yono puGibea. Onkee iita otayi ke ya adha puGibea.

¹⁰ Otandi ka ponokela aantu mbaka aalunde notandi ya geele. Iigwana otayi ke ya hangena, noyo otaa ka geelelwa oondjo dhawo odhindji.

¹¹ Israel nale okwa li a fa ondema ya dheuka nawa, yi ilongekidha noya hala okuyungula iilya. Ihe onda tokola oku mu tula ondjoko kothingo ye yo opala nonde mu tula miilonga iidhigu. Juda onde mu hilitha oshipululo naIsrael onde mu kookololitha oshihelelitho.

¹² Nda ti: ‘Ipululila eputa epe, tsika uuyuuki noto teya omayambeko ngoka taga pendutha okwiigameka kwoye kungame. Ndika olyo ethimbo lyokugalukila kungame, Omuwa gwoye, nangame otandi ya notandi mu pe omayambeko.’

¹³ Ihe ne omwa kunu uukolokoshi nokuteya iiyimati yawo. Omwa li iiyimati ya zi miifundja yeni. “Oshoka omwi inekela omatembakwiita geni naakwiita yeni oyendji,

¹⁴ iita otayi ka adha aantu yeni, noohote dheni otadhi ka kumunwa po. Esiku ndyoka otali ka kala lya fa uuna omukwaniilwa Shalman a hanagula po oshilando Betabel molugodhi, naakulukadhi naanona oya sile mo.

¹⁵ Shika osho tamu ka ningilwa, ne aantu yokuBetel omolwiihuna mbyoka mwa longo. Omukwaniilwa gwaIsrael ota ka sa, shampa tuu olugodhi lwa tameke.”

11

¹ Omuwa ota ti: “Israel sho a li omunona, onda li ndi mu hole. Omumwandjemati onde mu ithana muEgipiti.

² Ihe mpoka pa thika nde mu ithana, opo pe thika a pilamene ndje. Aantu yandje oya yambele Baal; oya lungunithile iimenka omidhidhindjambo

³ Ongame nda longo Israel okweenda. Ondu ukata aantu yandje momaako, ihe inaa zimina nande kutya ongame omusilishimpwiyu gwawo.

⁴ Onde ya hilile kungame nolukeno nohole. Onde ya yambulile komapepe gandje; onda kuutumba e tandi ya palutha niikulya.

⁵ “Oya tindi okugalukila kungame, onkee taa shuna kuEgipiti, naAssur ote ke ya pangela.

⁶ Iita otayi ka mbolokotela miilando yawo e tayi teyagula po omiyelo dhiilando. Otayi ka yonagula po aantu yandje, oshoka shoka taa longo, oye shi tala oshiwanawa.

⁷ Otaa tsikile okupilamena ndje. Otaa ka lilagana omolwondjoko ndjoka yi li komapepe gawo, ihe kaku na ngoka te ke yi kutha ko kuyo.

⁸ “Israel, otandi vulu ngiini, ndi ku ethe? Otandi vulu ngiini, ndi ku gandje po? Ondi ku hanagule po, ngashi nda hanagula po Adma, nenge ndi ku ninge, ngashi nda ningi Zebojim? Omwenyo gwandje itagu pitika, ndi shi ninge! Ohole yandje yoku ku hola onene unene.

⁹ Itandi ku geele nda sa ondjahi; Israel, itandi ku yonagula po we. Oshoka ngame oKalunga, kandi shi muntu. Ngame, Omuyapuki, ondi ku na. Ngame itandi ya kungoye nda sa ondjahi.

¹⁰ “Aantu yandje otaa ka landula ndje, sho tandi pumbile aatondi yawo ngaashi onkoshi. Otaa ka matuka taa ya kungame taa zi kuuninginino.

¹¹ Otaa ka za kuEgipiti ya fa uundigilili, nokuAssur ya fa oonguti. Otandi ke ya fala ishewe komagumbo gawo. Ongame Omuwa nda popi.”

¹² Omuwa ota ti: “Oshigwana shaIsrael osha kunduka ndje niifundja nonomakoto, noshigwana shaJuda osha tsa ondumbo nangame, Kalunga omuyapuki e shi kwiinekelwa.”

12

¹ “Shaa shoka oshigwana shaIsrael tashi longo okuza ongula sigo ongulohi, kashi na shilonga notashi fala meyonuuko. Ekotokelo nuukolokoshi otayi indjipala mokati kawo. Otaa uvanene naAssur e taa pindike naEgipiti.”

² Omuwa ota tamaneke oshigwana shaJuda, ota ka geela wo Israel molwiilonga mbyoka ta longo. Ote ya galulile shoka yi ilongele.

³ Hekulu Jakob okwa kondjele nomumwayina omukwanambwiyu, manga ya li natango mela lyayina. Jakob sho a koko, okwa kondjo naKalunga —

⁴ okwa kondjo nomuyengeli e ta sindana. Okwa lili e ti indile eyambeko. PuBetel Kalunga okwe ya kutatekulu Jakob e te mu popitha.

⁵ Nguka oye Omuwa Kalunga Omunankondoawike — Omuwa olyo edhina ndyoka ha simanekwa nalyo.

⁶ Onkee ngashingeyi, luvalo lwaJakob, inekeleni Kalunga keni nokugalukila kuye. Kaleni aainekelwa naayuuki, nokutegelela neidhidhimiko ekwatho lyaKalunga keni.

⁷ Omuwa ota ti: “Oshigwana shaIsrael osha fa Aakaanana, kashi shi kwiinekelwa. Oshi hole okukotokela aalandi yasho nondjele ya puka.

⁸ Aaisraeli ohaa ti: ‘Tse aayamba notu na omaliko. Kape na ngoka te tu nyenyetele, sho tu na uuyamba wa za mokukotokela.’

⁹ Ihe ngame, Omuwa Kalunga keni nde mu tembudha muEgipiti, otandi ke mu kaleka ishewe mootenda, ngashi mwa li nale, sho nde ya kune mombuga.

¹⁰ “Onda lombwele aahunganeki nonde ya talitha omamoniko ogendji, nomaahunganeki onda londodha olwindji aantu yandje.

¹¹ Natango iimenka otayi longelwa muGilead, naayehe mboka taa yi longele, otaa ka sa. Oontsezi otadhi yambwa muGilgal, niiyambelo otayi ka ninga omakulukuma momalundu.”

¹² Tatekulu Jakob okwa fadhukile kuMesopotamia, hoka a lithile omusamane Laban iimuna ye yoonzi, opo a mone omukiintu.

¹³ Omuwa okwa tumu omuhunganeki, a mangulule Israel muupika waEgipiti noku ya sila oshimpwiyu.

¹⁴ Oshigwana shaIsrael osha geyitha Omuwa; oshi ilongele okusa molwokuyona kwasho. Omuwa ote ke shi geela, sho inaashi mu simaneka.

13

¹ Nale shampa tuu ezimo lyaEfraim lya popi, omazimo omakwawo gaIsrael oga tila; oga tala kuEfraim. Ihe aantu oya yono molwokusimaneka Baal, onkee otaa ka sa.

² Otaa tsikile natango okuyona, sho taa hambula iikalunga yoshisiliveli ye etwa po komadhiladhilo gomuntu nokiikaha yomuntu. Nena otaa ti: “Yi yambeleni oondjambo.” Aantu otaa vulu ngiini okuthipa iimenka komilungu — iikalunga molupe lwoontsezi!

³ Ano aantu mbaka otaa ka kana ngetsitsiya lyongula ya fa omume ndjoka tayi kaha po ongulangula. Otaa ka kala ya fa etutu tali pepwa kombepo molupale, ya fa olwithi talu zi moluungu.

⁴ Omuwa ota ti: “Ongame Omuwa Kalunga koye nde ku tembudha muEgipiti. Ngoye ku na Kalunga gulwe, ongame awike. Ongame awike omukulili gwoye.

⁵ Onde ku sile oshimpwiyu mevi lyombuga.

⁶ Ihe sho we ya moshilongo oshiwanawa, owa kuta e to kala u na ombili, nena owi inenepeke e to dhimbwa ndje.

⁷ Nena otandi ke ku langela pondjila ndjoka ho ende.

⁸ Otandi ke ku nukila nda fa emwanka ndyoka lya kanitha uunimona walyo, notandi ku vutula. Ongonime otandi ke ku hutagula po notandi ke ku tuulagula nda fa oshilikama.

⁹ “Otandi ke ku hanagula po, ngoye oshigwana shaIsrael! Olye te ku popile?

¹⁰ Owi indile, u pewe omukwaniilwa naawiliki, ihe otaa vulu ngiini okuhupitha oshigwana?

¹¹ Mondjahi onde ku pe aakwaniilwa, nomongeyo onde ya kutha po.

¹² “Uulunde nomayono gaIsrael oga nyolwa membo noga pungulwa nawalela.

¹³ Israel oku na ompito yokukala nomwenyo, ihe ina hala okwiitaala — okwa fa omunona e li pokuvalwa, ihe ota tindile moshivalelo.

¹⁴ Onda li nda hala oku ya hupitha, yaa ye mehala lyaasi, onda li nda hala oku ya kutha moonyala dheso. Eso, etelela oshiyelakondjitho shoye! Shaasi, etelela egonga lyoye! Oshigwana shika itandi shi sile we olukeno.

¹⁵ Israel nando a kokelele a fa iigwanga, otii ka pepitha ombepo ompyu yokuuzilo tayi zi kombuga, e tayi kukutike oothithiya nomithima dhe. Otayi ka kutha po ashihe shi na ondjundo.

¹⁶ Samaria ota geelwa omolwokutsa ondumbo nangame. Aantu ye otaa ka sila miita; uuhanona otau ka nyanyagulwa, naakulukadhi aasimba otaa ka vutulwa.”

14

¹ Israel, shuna kOmuwa Kalunga koye. Omayono goye oge ku pundukitha.

² Shuneni kOmuwa meitedhululo, mu mu galikane mu tye: “Dhima po omayono getu agehe, taamba omagalikano getu notatu ke ku hambelela, ngashi tu uvaneke.

³ Assur ita vulu oku tu hupitha nando, nuukambe wiita itau vulu oku tu gamena. Itatu lombwele we iikalunga, tu tye oyo Kalunga ketu. Omuwa, ongoye to sile ohenda mboka taa galukile kungoye.”

⁴ Omuwa ota ti: “Otandi ka galulila aantu yandje kungame. Otandi kala ndi ya hole nomwenyo gwandje aguhe; itandi ya geele we.

⁵ Ote kala noshigwana shaIsrael ngaashi omvula mevi lyoluteni. Otaa ka tsapuka ya fa oongala; otaa ka mena omidhi dha ya muule, ya fa omiti dhokuLibanon.

⁶ Otaa ka kala mokukoka okupe, yo opala ya fa omiti dhooholivi. Otaa ka taandelitha ezimba ewanawa. ngaashi omisendeli dhaLibanon.

⁷ Esiku limwe otaa ka kala ishewe megameno lyandje. Otaa ko opala ya fa oshikunino noyu udha iiyimati ya fa oshitsambe shomiviinu. Otaa ka simana ya fa omaviinu gaLibanon.

⁸ Oshigwana shaIsrael itashi kala we shi na sha niimenka; otandi yamukula omagalikano gawo e tandi ya sile oshimpwiyu. Ongomuti gwokwaziza tandi ke ya shiga; ongame othithiya yomayambeko agehe.”

⁹ Mboka ye na oondunge, naa uve shoka sha nyolwa mpaka, opo ye shi taambe komitima. Oondjila dhOmuwa odhu uka, naantu aayuuki otaa kala noku dhi lamba, ihe aalunde otaa pundukile po, oshoka inaa hala oku dhi tseya.