1

¹ Momumvo omutitatu sho Jehoiakim a li omukwaniilwa gwaJuda, omukwaniilwa gwaBabilon, edhina lye Nebukadnezzar, okwa matukile Jerusalem e te shi kondeke.

² Omuwa Kalunga okwe mu kwatitha omukwaniilwa Jehoiakim niikwaniipangitho yimwe yomotempeli. Okwa fala oonkwatwa dhimwe kotempeli yiikalunga ye kuBabilon, e ta tula iikwaniipangitho moompungulilo dhomotempeli yiikalunga ye.

³ Omukwaniilwa okwa lombwele elenga ekuluntu Aspenas, a hogolole mokati kAaisraeli aapika aagundjuka yamwe yomaawagona noomvalekele.

⁴ Oyo ye na okukala ya shitika, ye na oondunge, ya longekeka noye na omitse omipu mokwiilonga yo yaa na shipo, opo ya longwe okuyakula muuwa. Aspenas okwa li e na oku ya nongeka okulesha nokunyola elaka lyoshilongo.

⁵ Omukwaniilwa okwa gandja ishewe elaka kutya esiku kehe naa pewe iikulya nomaviinu ngaashi aambala ayehe. Konima yoomvula ndatu otaa ka holoka koshipala shomukwaniilwa.

⁶ Mumboka ya hogololwa omwa li Daniel, Hanania, Mishael naAzaria, ayehe mbaka oyomezimo lyaJuda.

⁷ Elenga ekuluntu olye ya lukulula omadhina omape: Beltshazzar, Shadrak, Meshak naAbednego.

⁸ Daniel okwa tokola, ki inyateke a lye iikulya nokunwa omaviinu gambala, onkee okwi indile Aspenas, e mu kwathe.

⁹ Kalunga oku uvitithitha Aspenas ohenda, a yaalele Daniel.

¹⁰ Aspenas sho a li a tila omukwaniilwa, okwa ti kuDaniel: “Omukwaniilwa oku utha shoka tamu li notamu nu, nongele itamu ondoka mwa fa aagundjuka ooyakweni, nena ota ka dhipaga ndje.”

¹¹ Onkee Daniel okwa yi komutonateli ngoka a tulwa po kuAspenas, e ya tonatele nokwa ti kuye:

¹² “Tu yelekela omasiku omulongo. Tu pa, tu lye omboga tse tu nwe omeya.

¹³ Nena tu yeleka naamati mboka taa li iikulya yambala, opo ihe etokolo lyoye li uthwe kuukwatya wetu.”

¹⁴ Aspenas okwe ya pitika, ya kambadhale omasiku omulongo.

¹⁵ Sho ethimbo ndyoka lya thiki, oya li ya kola noye na oonkondo ye vule ayehe mboka haa li iikulya yambala.

¹⁶ Okuza mpoka omutonateli okwe ya etha, ya tsikile okulya oomboga peha lyaashoka omukwaniilwa e shi ya longekidhila.

¹⁷ Kalunga okwa pe aagundjuka mbaka yane oondunge nuunongo mokutseya omanyolo agehe. Daniel okwa pewa omagano gokufatulula wo omamoniko noondjodhi.

¹⁸ Konima yomimvo ndhoka ndatu Aspenas okwe ya fala kuNebukadnezzar.

¹⁹ Omukwaniilwa okwa kundathana nayo ayehe, ndele Daniel, Hanania, Mishael naAzaria oye mu kumitha ye vule yalwe. Osho ya ningi aayakuli yomukwaniilwa.

²⁰ Omukwaniilwa aluhe sho e ya pula kombinga yiinima tayi pula oondunge nuunongo, okwe ya dhimbulula kutya oye vule lwomulongo oonganga noompulile adhihe moshilongo she ashihe.

²¹ Daniel okwa hugunine mombala, sigo omukwaniilwa Kores gwaPersia a lala Babilon.

2

¹ Momumvo omutiyali Nebukadnezzar sho a li omukwaniilwa, okwa lala ondjodhi. Oye mu piyaganeke unene e ta londokwa koomposi.

² Nena okwi ithana aayanekeli, oonganga, oompulile noonkulungu, ye ye noye mu fatululile ondjodhi. Sho ye ya noya thikama koshipala shomukwaniilwa,

³ okwa ti kuyo: “Onda piyaganekwa kondjodhi nde yi yaguma. Onda hala ndi tseye shoka tayi ti.”

⁴ Oya yamukula omukwaniilwa mOshiaramea ya ti: “Nkeyama, kulupa nomeho, mayego otatu ku taasinine. Tu hokololela ondjodhi yoye notatu yi ku fatululile.”

⁵ Omukwaniilwa okwa ti kuyo: “Onda tokola kutya one mu na okuhokololela ndje ondjodhi e tamu fatululile ndje shoka tayi ti. Ngele itamu shi vulu, otandi ke mu ndembagulitha miintimbu nomagumbo geni otandi ke ga halakanitha po, ga ninge ondumba yomakulukuma.

⁶ Ihe ngele otamu vulu okuhokololela ndje ayihe iyali, otandi ke mu pa omagano e tandi mu simaneke noonkondo. Ngashingeyi hokololelii ndje nduno, ondjodhi oyashike notayi ti ngiini.”

⁷ Oya yamukula ishewe omukwaniilwa: “Nkeyama, ngele oto tu hokololele owala kutya ondjodhi oyashike, otatu ke yi fatulula.”

⁸ Nena omukwaniilwa okwi igidha: “Osho naanaa, ngaashi nda dhiladhila kutya ne otamu mana po owala ethimbo, oshoka mu shi shi kutya onda tokola,

⁹ ndi mu geele ne amuhe, ngele itamu hokololele ndje ondjodhi. Ne omwa uvanene ndje monanguwi, mu lombwele ndje iifundja, oshoka omwa tegamena kutya iinima otayi ka lunduluka. Hokololelii ndje ondjodhi kutya oyashike, opo te vulu okwiinekela kutya otamu vulu okulombwela ndje wo shoka tayi ti.”

¹⁰ Aanongo oya yamukula: “Noshitonale inaku kala omuntu kombanda yevi ta vulu okuhokololela Nkeyama shoka wa hala okutseya. Kakwa li omukwaniilwa omunene nenge omunankondo a pulile aayanekeli ye, oonganga dhe nenge oompulile dhe oshinima sha fa shika.

¹¹ Nkeyama, shoka to pula, oshidhigu nokape na ngoka ta vulu oku shi ku lombwela, shila ookalunga, ihe kaye li putse mpaka.”

¹² Shika osha geyitha omukwaniilwa nayi e ta gandja elaka, aanongo ayehe muBabilon ya dhipagwe.

¹³ Elaka sho lya gandjwa, aanongo ayehe ya dhipagwe, naDaniel wo nayakwawo oya kongwa, ya dhipagwe.

¹⁴ Nena Daniel okwa yi kuArjok, ondjayi yetanga lyaalangeli yomukwaniilwa, ngoka a li a lombwelwa, a ka dhipage aanongo yomuBabilon. Okwa popi ti itegelele nawa.

¹⁵ Okwa pula Arjok kutya omolwashike omukwaniilwa a gandja elaka lya tya ngaaka ekukutu. Nena Arjok okwa hokololele Daniel shoka sha ningwa po.

¹⁶ Daniel okwa yi komukwaniilwa nokwe mu indile, a pewe ethimbo lya gwana, opo a vule okufatulula ondjodhi.

¹⁷ Nena Daniel okwa yi kaandjawo e ta hokololele yakwawo Hanania, Mishael naAzaria shoka sha ningwa po.

¹⁸ Okwe ya lombwele, ya galikane Kalunga komegulu, e ya sile ohenda noku mu pula, e ya hololele oshiholekwa shika, opo yaa dhipagelwe pamwe naanongo yalwe muBabilon.

¹⁹ Nena uusiku tuu mboka oshiholekwa shoka osha hololelwa Daniel memoniko. Oye nokwa hambelele Kalunga komegulu a ti:

²⁰ “Edhina lyaKalunga nali hambelelwe aluhe sigo aluhe, oye e na uunongo noonkondo.

²¹ Omathimbo nomimvo ote dhi lundulula; ota kwaniileke aakwaniilwa noku ya shundula; aanongo ote ya pe uunongo naanandunge omayele.

²² Ota holola iinima yomuule noya holekwa; ota tseya mbyoka ya holekwa momilema noye mwene okwa kundukidhwa kuuyelele.

²³ Otandi ku tanga e tandi ku simaneke, Kalunga kootate. Ongoye wa pe ndje uunongo noonkondo; ongoye wa yamukula omagalikano gandje nowe tu ulukile shoka to lombwele omukwaniilwa.”

²⁴ Daniel okwa yi kuArjok, ngoka a li a lombwelwa komukwaniilwa, a ka dhipage aanongo Aababiloni. Daniel okwa ti kuye: “lno ya dhipaga. Fala ndje komukwaniilwa, notandi ke mu fatululila ondjodhi ye.”

²⁵ Nanziya Arjok okwa fala Daniel komukwaniilwa Nebukadnezzar e ta lombwele omukwaniilwa ta ti: “Onda mono gumwe gwomaapongekwa Aajuda, ngoka ta vulu oku ku fatululila ondjodhi yoye.”

²⁶ Omukwaniilwa okwa ti kuDaniel (okwa li hi ithanwa Beltshazzar): “Oto vulu okuhokololela ndje shoka nda yaguma, nondjodhi shoka tayi ti?”

²⁷ Daniel okwa yamukula a ti: “Tatekulu Nkeyama, muuyuni kamu na omunongo, onganga, omwaanekeli nenge omukonekinyothi ta vulu oku ku hokololela shika.

²⁸ Ihe oku na Kalunga megulu, ngoka ta holola iiholekwa. Oye e ku hololele, tatekulu Nkeyama, shoka tashi ka ningwa konakuyiwa. Ngashingeyi otandi ku hokololele ondjodhi yoye, emoniko ndyoka wa mono, sho wa li wa kotha.

²⁹ “Nkeyama, manga wa li wa kotha, owa yaguma shoka tashi ka ningwa konakuyiwa; naKalunga ngoka ta holola iiholekwa, okwe ku hololele shoka tashi ka ningwa komeho.

³⁰ Ngashingeyi oshiholekwa shika osha hololelwa ndje, hamolwaashoka ando ngame omunandunge ndi vule yalwe, aawe, ihe opo ngoye, Nkeyama, u vule okunongela ondjodhi shoka tayi ti, ngoye u uve ko omatedho ngoka ge ya kungoye.

³¹ “Nkeyama, memoniko lyoye owa mono oshiyelekela oshinenenene sha thikama komeho goye, tashi wema notashi adhima, nomoku shi tala owa ningi uugelele.

³² Omutse gwasho ogwoshingolielela; ontulo nomaako gasho oshisiliveli; oshiya noombwetelo dhasho oshikushu;

³³ Omagulu gasho osheela oshiluudhe noompadhi dhasho iiyela ya kwatakanithwa mumwe neloya.

³⁴ Manga wa li we shi tongolola, emanya enene olya pambuka kondundu kulyo lyene e tali dhenge oshiyelekela koompadhi dhiiyela neloya nolye dhi nyanyagula.

³⁵ Nanziya iiyela, eloya, oshikushu, oshisiliveli noshingoli oya tatagulwa e tayi ningi ya fa etutu polupale. Ombepo oye yi pepe po ayihe, noinapa kala we nando osha. Ihe emanya olya koko lya ningi ondundu ya siikile evi alihe.

³⁶ “Ondjodhi oyo ndjika. Nena otandi ku hokololele nduno shoka tayi ti, tatekulu.

³⁷ Nkeyama, ongoye shime shaakwaniilwa ayehe. Kalunga komegulu okwe ku ningi omupangeli e te ku pe oonkondo, oonkondopangelo nesimano.

³⁸ Okwe ku ningi omuleli gwaakali kombanda yevi alihe, e to pangele iinamwenyo ayihe noondhila. Ongoye omutse gwoshingoli.

³⁹ Oto landulwa komupangeli gulwe, ihe ke thike pungoye muunene, oye nota landulwa komutitatu, omupangeli gwoshikushu, ngoka ta ka lela uuyuni auhe.

⁴⁰ Nena otaku ka landula omupangeli omutine a kola a fa osheela, ngoka ta nyanyagula nokuteyagula shaa shoka. Ongosheela tashi nyanyagula, oshilongo she otashi ka nyanyagula shaa shoka. Otashi ka nyanyagula nokuyonagula po iilongo ayihe ya tetekela.

⁴¹ Owa mono wo kutya oompadhi nominwe odha li dha kwatakanithwa neloya. Shika otashi ti kutya oshilongo otashi ka kala sha andjagana. Otashi ka kala shi na sha shoonkondo dhosheela, oshoka osheela osha vundakanithwa neloya.

⁴² Mominwe dhokoompadhi omwa li osheela neloya ya tulwa mumwe. Shika otashi ti kutya ombinga yimwe yoshilongo shika otayi ka kala ya kola, nonkwawo inayi kola.

⁴³ Owa mono ishewe kutya osheela osha vundakanithwa neloya. Otashi ti, aaleli yoshilongo otaa ka kambadhala okuhanganitha omazimo gawo mokuhokanathana, ihe itashi kwatha sha, ngaashi osheela itashi kwatathana neloya.

⁴⁴ Pomasiku gaaleli mboka Kalunga komegulu ota ka dhika po oshilongo shoka shaa na hulilo. Itashi ka sindika nando, ihe otashi ka yonagula po iilongo mbyoka ayihe, nosho shene otashi kala sigo aluhe.

⁴⁵ Owa mono, nkene emanya lya koloka ko lya zi kondundu inaali gumwa nonkene lya nyanyagula efano lyosheela, oshikushu, eloya, oshisiliveli noshingoli. Nkeyama, Kalunga omunene ote ku lombwele shoka tashi ka ningwa konakuyiwa. Onde ku hokololele naanaa ondjodhi yoye nonde yi ku fatululile shoka tayi ti.”

⁴⁶ Nena omukwaniilwa Nebukadnezzar okwa tsu oshipala pevi nokwa ti, Daniel na fikilwe oondjambo netsininondjambo.

⁴⁷ Omukwaniilwa okwa ti: “Oshili, Kalunga keni oye omunene e vule ookalunga ayehe, Omuwa ta lele aakwaniilwa ayehe noye awike ta holola iiholekwa. Ondi shi shi, oshoka owa vulu okufatulula oshiholekwa shika.”

⁴⁸ Nena omukwaniilwa okwa lenge Daniel, a ninge elenga ekuluntu, okwe mu pe omagano ogendji omanene nokwe mu ningi omuleli gwoshikandjo shaBabilon nomukuluntu gwaanongo ayehe musho.

⁴⁹ Paindilo lyaDaniel omukwaniilwa okwa lenge Meshak, Shadrak naAbednego ya ninge aakuluntu yoshikandjo shaBabilon. Daniel okwa kala mombala.

3

¹ Omukwaniilwa Nebukadnezzar okwa hongitha oshiyelekela shoshingoli shi na uule woometa omilongo mbali naheyali nomutamo gwasho oometa ndatu konyala, e te shi dhikithile molushandja lwaDura moshikandjo shaBabilon.

² Nena omukwaniilwa okwa lombwele oongoloneya, aaleli, ookomufala, aagandjimayele, aadhiginini yeliko, aatokolihapu, oomangestalata naakwanepangelo ayehe yalwe yomiitopolwa, ye ye keyapulo lyoshiyelekela shoka sha dhikwa komukwaniilwa Nebukadnezzar.

³ Aakwanepangelo mbaka ayehe sho ya gongala keyapulo noya thikama komeho goshiyelekela,

⁴ omunashipundi okwa popi newi lyopombanda a ti: “Aantu yiigwana ayihe, yomaludhi noyomalaka!

⁵ Otamu ku uva ewi lyoombenda lya landulwa kehiko lyoohiya, iiketala, uuharpa nuushandja, nonena iihikomwa yi ili noyi ili otayi itula mo. Opo tuu mpoka sho iihikomwa ya tameke, omu na okwiinyongamena pevi, mu simaneke oshiyelekela shoshingoli shoka sha dhikwa po komukwaniilwa Nebukadnezzar.

⁶ Shaa ngoka itee shi inyongamene, e shi simaneke, ote ku umbilwa mbalambala meziko lya hanya.”

⁷ Nopo tuu mpoka sho yu uvu oshihomo shiihikomwa, aantu yomiigwana ayihe, yomaludhi agehe noyomalaka agehe, oya nyongama e taa simaneke oshiyelekela shoshingoli shoka sha dhikwa po komukwaniilwa Nebukadnezzar.

⁸ Aababiloni yamwe oya mono ompito yokutamaneka Aajuda.

⁹ Oya ti komukwaniilwa Nebukadnezzar: “Omukwaniilwa na kale e na omwenyo sigo aluhe!

¹⁰ Nkeyama, owa gandja oshipango kutya nanziya ngele iihikomwa ya tameke, shaa ngoka na nyongame, a simaneke oshiyelekela shoshingoli,

¹¹ nokutya shaa ngoka itaa nyongama, e shi simaneke, otu umbilwa meziko lya hanya.

¹² Oku na Aajuda yamwe mboka we ya ningi aakuluntu yoshikandjo shaBabilon — Shadrak, Meshak naAbednego — mboka inaa vulika kelombwelo lyoye, Nkeyama. Itaa simaneke kalunga koye nenge yi inyongamene koshiyelekela we shi dhike.”

¹³ Nena omukwaniilwa okwa kala a thita po kondjahi e ta gandja elombwelo, aalumentu yatatu ye etwe koshipala she.

¹⁴ Okwa ti kuyo: “Shadrak, Meshak naAbednego, odhoshili tuu kutya ne omwa tinda okusimaneka kalunga kandje nokwiinyongamena koshiyelekela shoshingoli shoka nda dhike?

¹⁵ Eewa, shampa tuu mu uvu ewi lyoombenda, oohiya, iiketala, uuharpa nuushandja nolyiihikomwa ayihe yi ili noyi ili, nyongameni ne mu simaneke oshiyelekela. Ngele itamu shi ningi, nena otamu umbilwa mbala meziko lya hanya. Otamu dhiladhila kutya oku na kalunga ta vulu oku mu hupitha?”

¹⁶ Shadrak, Meshak naAbednego oya yamukula: “Tatekulu, itatu kambadhala okwiipopila tse yene.

¹⁷ Kalunga ngoka hatu mu longele okwa gwana oku tu hupitha meziko lya hanya nomiikaha yoye; ote ke shi ninga.

¹⁸ Ihe ngele ite shi ningi, Nkeyama, kala u shi shi, tse itatu ka simaneka kalunga koye noitatu inyongamene koshiyelekela shoshingoli shoka wa dhika.”

¹⁹ Nena Nebukadnezzar okwa kanitha eidhidhimiko lye, nomeho ge ga tiliganene Shadrak, Meshak naAbednego. Onkee okwa lombwele aantu ye, ya hanyeke eziko li pupyale li vule shito luheyali.

²⁰ Nokwa lombwele aalumentu aanankondo yomaakwiita ye, ya mange aalumentu mboka yatatu noye yu umbile meziko lya hanya.

²¹ Mbaka oye ya manga — oya li ya zala oohema, oondjatha, omagala noonguwo dhawo adhihe dhilwe — noye ya umbile meziko lya hanya.

²² Ngashingeyi, molwaashoka omukwaniilwa a gandja elaka lya kola, eziko li pupyalekwe lela, omalaka gomulilo oga fike aalumentu mboka ye ya fala meziko.

²³ Nena Shadrak, Meshak naAbednego, manga ya li ya mangwa, oya gwile menilela lyeziko lya hanya.

²⁴ Ohaluka Nebukadnezzar okwa haluka a kunkwa. Okwa pula aambala ye: “Inatu manga nani aalumentu yatatu noku ya umbila meziko lya hanya?” Oya yamukula ya ti: “Eeno, osho twa ningi, Nkeyama.”

²⁵ Omukwaniilwa okwa pula a ti: “Ihe ongiini ano ndi wete aantu yane taa ende momulilo? Inaa mangwa yo kaye na endhindhiliko lyuuwehame — nomutine okwa fa omuna gwaKalunga.”

²⁶ Osho ngeyi Nebukadnezzar okwa thikama po e ta yi komweelo gweziko lya hanya nokwi ithana a ti: “Shadrak! Meshak! Abednego! Aamati yaKalunga gwokombandambanda! Zii mo.” Oyo noya zi mo nziya.

²⁷ Oongoloneya, aaleli, ookomufala naakwanepangelo ayehe yalwe yomukwaniilwa oya gongala, ya tale aalumentu yatatu mbaka inaa lungunithwa komulilo. Omafufu gawo oga li inaaga yayuka, oonguwo dhawo inadhi pya nokaya li ya nika othungu.

²⁸ Omukwaniilwa okwa ti: “Tangeni Kalunga kaShadrak, Meshak naAbednego! Okwa tumu omuyengeli gwe nokwa hupitha aalumentu mbaka haye mu longele noye mu inekela. Oyo inaa vulika kiipango yandje noya hupula oomwenyo dhawo shi vulithe okwiinyongamena nokusimaneka kalunga kalwe, kakele Kalunga kawo yene.

²⁹ “Ngashingeyi otandi gandja elombwelo kutya ngele oku na ngoka gwomoshigwana kehe, moludhi kehe nenge melaka kehe ta popi ta shundula Kalunga kaShadrak, Meshak naAbednego, oku na okundembagulwa miintimbu, negumbo lye otali ka halakanithwa po, li ninge ondumba yomakulukuma. Kaku na kalunga kalwe ta vulu okuhupitha, ngaashi twe shi mono nena.”

³⁰ Omukwaniilwa nokwa lenge Shadrak, Meshak naAbednego omalenga omanene moshikandjo shaBabilon.

4

¹ Omukwaniilwa Nebukadnezzar okwa tumu elaka kaantu yomiigwana ayihe, momaludhi nomomalaka agehe muuyuni tali ti: “Otandi mu kundu!

² Pulakeneni ehokololo lyandje lyiilongakumithi niilongandhindhiliko mbyoka Kalunga gwokombandambanda e yi ulukile ndje.

³ “Iilongankumwe iinene ngiini Kalunga e yi tu ulukile! Iilongandhindhiliko oyoonkondo ngiini mbyoka e yi longo! Kalunga ota kala omukwaniilwa sigo aluhe; oye ta ka lela aluheluhe.

⁴ “Onda li ndi li nawa muuwa wandje, te nyanyukilwa elago enene.

⁵ Ihe onda yaguma ondjodhi ontilithi nonda mono omamoniko guugelele, manga nda li nda kotha.

⁶ Onda gandja elombwelo, aanongo ayehe yomuBabilon ye etwe kungame, opo ya fatululile ndje ondjodhi yandje.

⁷ Nena aayanekeli ayehe, oonganga, oompulile naakonekinyothi oye ya mo, nonde ya hokololele ondjodhi yandje, ihe inaa vula oku yi fatululila ndje.

⁸ Nena Daniel okwe ya mo. (Ohi ithanwa Beltshazzar, a lukilwa kalunga kandje.) Ombepo yookalunga aayapuki oyi li muye, onkee nde mu hokololele shoka nda yaguma. Onda ti kuye:

⁹ Beltshazzar, omukuluntu gwaayanekeli, onda tseya kutya ombepo yookalunga aayapuki oyi li mungoye nou shi iiholekwa ayihe. Ondjodhi yandje oyo ndjika. Lombwela ndje shoka tayi ti.

¹⁰ “Manga nda li nda kotha, onda mono emoniko lyomuti omuleeleka gu li pokati kuuyuni.

¹¹ Ogwa koko omunene, sigo gwa adha mewangandjo nogwa monika kaantu ayehe ya kala muuyuni.

¹² Omafo gagwo ogo opala nogwa kakata iiyimati — ya gwanena okuliwa kuuyuni auhe. Iiyamakuti ohayi gondjo momuzile gwagwo, oondhila otadhi tungile iihandhila yadho miitayi yagwo, niinamwenyo ayihe otayi li iiyimati yagwo.

¹³ “Manga nda li tandi dhiladhila emoniko ndyoka, onda mono omuyengeli ta kuluka megulu a pya ondjungu.

¹⁴ Okwa popi newi lyomokule a ti: ‘Kii po omuti, pomponeni iitayi yagwo, kweyii ko omafo gagwo, halakanitheni iiyimati yagwo. Tidhii mo iiyamakuti mugwo noondhila kiitayi yagwo.

¹⁵ Ihe oshithindi shi thigii mo mevi sha mangwa nomalyenge giiyela iiluudhe niikushu. Nashi kale melundu mokati komwiidhi. “ ‘Ngashingeyi etheni, omume yi gwile komulumentu nguka, mu kalekeni mokati kiiyamakuti nokiimeno mokuti.

¹⁶ Omimvo heyali ota kala kee na we uuntu meni lye, ihe uuthitukuti.

¹⁷ Ndika olyo etokolo lyaayengeli mbeyaka ya pya ondjungu. Tseyithila ano aantu ayehe shaa mpoka kutya Kalunga gwokombandambanda oku na oonkondo okupangela uukwaniilwa auhe wopantu kombanda yevi note u pe ngoka ye mwene e mu hogolola — nando na kale omufupi gwomaantu.’ ”

¹⁸ Omukwaniilwa Nebukadnezzar okwa ti: “Ondjodhi oyo ndjika nda yaguma. Ngashingeyi, Beltshazzar, lombwela ndje shoka tayi ti. Kape na gumwe gwomaanongo moshilongo shandje ta vulu okulombwela ndje, ihe ngoye oto vulu, oshoka ombepo yookalunga aayapuki oyi li mungoye.”

¹⁹ Daniel, ngu haku tiwa Beltshazzar, okwa li a kankwa noina vula okutya sha. Omukwaniilwa okwa ti kuye: “Beltshazzar, ondjodhi nelaka lyayo inayi ku kunka.” Beltshazzar okwa yamukula: “Nkeyama, ando ondjodhi nefatululo lyayo li kale li na sha naatondi yoye nohangoye mwene!

²⁰ Omuti ngoka omule gwa adha ewangandjo, ogwa vulu okumonika kushaa ngoka muuyuni.

²¹ Omafo gagwo oga li go opala, nogu na iiyimati ya gwana okupalutha uuyuni auhe. Iiyamakuti oya gondjo momuzile gwagwo, noondhila odha tungile iihandhila yadho miitayi yagwo.

²² “Nkeyama, ongoye omuti ngoka omule nomunankondo. Owa koko unene, sigo wa tsu mewangandjo, noonkondo dhoye odha taandele nuuyuni auhe.

²³ Nkeyama, manga wa li we shi tongolola, omuyengeli okwa kuluka a zi megulu nokwa ti: ‘Kii po omuti nguka noku gu hanagula po, ihe oshithindi shagwo shi thigileni mevi. Shi mangeni nomalyenge giiyela iiluudhe niikushu, nomu shi thigile melundu lyomwiidhi, gwithileni omume kombanda yomulumentu nguka, ne mu mu kalithe mumwe niiyamakuti omimvo heyali.’

²⁴ “Nkeyama, efatululo lyondjodhi yoye netokolo lyaKalunga gwokombandambanda mushoka tashi ke ku adha, olyo ndika:

²⁵ Oto ka tidhwa mo mokati kaantu e to ka kala mokati kiiyamakuti. Omimvo heyali oto ka lya omwiidhi wa fa ondumetana, e to lala polweela, mpoka to gwilwa komume. Nena oto ka zimina kutya Kalunga gwokombandambanda oha pangele iilongo ayihe yaantu nota vulu oku yi pa shaa ngoka ye mwene e mu hogolola.

²⁶ Aayengeli oya lombwele, oshithindi shi kale mevi. Shika otashi ti kutya ngoye oto ka kala omukwaniilwa ishewe, shaa wa tseya kutya Kalunga ota lele uuyuni auhe.

²⁷ Nkeyama, taamba ano omayele gandje. Etha okuyona, longa shoka shu uka, sila ohenda oohepele. Nena oto kala u na elago.”

²⁸ Ayihe mbika oya ka ningilwa omukwaniilwa Nebukadnezzar.

²⁹ Konima yoomwedhi omulongo nambali manga a li ta lyanga pombanda yongulumbala ye muBabilon,

³⁰ okwa ti: “Taleni, Babilon nkene oshinene! Ngame ongame nde shi tungu, shi ninge oshilandopangelo shandje, shi holole oonkondo noonkondopangelo dhandje, eadhimo lyandje nuunenepangelo wandje.”

³¹ Manga tuu inaa mana okupopya, lyo ewi otali popi megulu tali ti: “Mukwaniilwa Nebukadnezzar, pulakena shoka tandi ti. Uukwaniilwa woye owe u kuthwa ngashingeyi.

³² Oto ka tidhwa mo mokati kaantu e to ka kala mokati kiiyamakuti e to li omwiidhi wa fa ondumetana omimvo heyali. Nena oto ki ilonga okutseya kutya Kalunga gwokombandambanda oha pangele iilongo yaantu nota vulu oku yi pa shaa ngoka ye mwene e mu hogolola.”

³³ Oohapu ndhika odha ka tsa mbalambala. Nebukadnezzar okwa tidhwa mo mokati kaantu e ta napa omwiidhi a fa ondumetana. Omume oya gwile kolutu lwe, nomafufu ge oga koko omale ga fa omalwenya gontsa, noonyala dhe dha homonoka mo dha fa oonyala dhoondhila.

³⁴ Omimvo heyali sho dha piti po, omukwaniilwa okwa ti: “Onda ligamene kegulu, noondunge dhandje odha galukile ndje. Onda hambelele Kalunga gwokombandambanda e te simaneke nokutumbaleka ngoka ta kala e na omwenyo aluhe sigo aluhe. “Ye ota ka lela aluhe sigo aluhe, nuukwaniilwa we otau ka kala ko sigo aluhe.

³⁵ Oye ta tala aakali kombanda yevi aanima yowala; aayengeli megulu naantu kombanda yevi, oye li mepangelo lye. Kape na ngoka ta vulu okukondjitha ehalo lye nenge okupula shoka ta ningi.

³⁶ “Oondunge dhandje sho dha galukile ndje, esimano lyandje, uunenepangelo lyandje neadhimo lyuukwaniilwa wandje oya galulilwa ndje wo. Aambala yandje nomalenga gandje oga kundu ndje nombili, nonda shunithilwa oonkondo dhuukwaniilwa nesimano enene li vule lyonale.

³⁷ “Nongashingeyi, ngame Nebukadnezzar, ote tanga, te hambelele note simaneke Omukwaniilwa gwomegulu. Shaa shoka ta longo, otashi kala sho opala noshu uka, nota shonopeke shaa ngoka ti inenepeke.”

5

¹ Ongulohi yimwe omukwaniilwa Belshazzar okwa hiya oomvalekele dha simana dheyuvi komatelekela, oyo noya nwine omaviinu pamwe.

² Manga ya li taa nu, Belshazzar okwe etitha mo iitenga yoshingoli noyoshisiliveli niiyuma mbyoka he Nebukadnezzar e yi kutha motempeli yaJerusalem. Omukwaniilwa okwe yi tumu, opo a nwine mo pamwe noomvalekele dhe naakadhi noohonda dhe.

³ Iitenga niiyuma yoshingoli oye etwa mo mbala, noyo ayehe oya nwine mo omaviinu

⁴ noya tanga iikalunga ya hambulwa moshingoli, moshisiliveli, moshikushu, mosheela oshiluudhe noya hongwa miiti nomomamanya.

⁵ Ohaluka oshikaha shomuntu osha holoka nosha tameke okunyola kekuma lyuuwa lya gwayekwa okaalaka, mpoka pwa li pwa minikilwa kuuyelele woolamba. Omukwaniilwa nokwa mono oshikaha sho sha li tashi nyola.

⁶ Okwa shituka a pemba kuumbanda ye a tyololoka, ndele noongolo dhe odha li tadhi kakama.

⁷ Okwi igidha mokule nokwa gandja elaka, mu etwe oonganga, oompulile naakonekinyothi. Sho ye ya mo, omukwaniilwa okwa ti kuyo: “Shaa ngoka ta vulu okulesha enyolo ndika nota lombwele ndje shoka tali ti, ota ka zalekwa elwaakani etiliganembwilili lyopaukwaniilwa, elyenge lyoshingoli lyesimano mothingo ye, nota lengwa elenga etitatu moshilongo.”

⁸ Aanongo yambala oye ya mo, ihe kape na gumwe gwawo a li ta vulu okulesha enyolo nenge a lombwele omukwaniilwa shoka tali ti.

⁹ Nena omukwaniilwa Belshazzar okwa haluka noonkondo, oshipala she osha pembe shi vule shito, noomvalekele dhe odha li dha kunkwa.

¹⁰ Yina yomukwaniilwa oku uvu ombuya yomukwaniilwa noomvalekele dhe e te ya moshinyanga shoshituthi. Okwa ti: “Omukwaniilwa na kale e na omwenyo sigo aluhe! Ikolelela, ino tyololoka, u kale wa pemba.

¹¹ Moshilongo shoye omu na omulumentu ngoka e na ombepo yookalunga aayapuki. Ho sho a li omukwaniilwa, omulumentu ngoka okwa holola oondunge oombwanawa, owino nuunongo wa fa wookalunga. Ho, omukwaniilwa Nebukadnezzar, okwe mu lenge omukuluntu gwaayanekeli, oonganga, oompulile naakonekinyothi.

¹² Oku na omayele, uunongo nuunkulungu mokufatulula oondjodhi, mokuyelitha ootumbutumbu nomokuholola iiholekwa. Tuma ko ano, u ithane omulumentu ngoka Daniel — omukwaniilwa okwe mu luka Beltshazzar — note ke ku lombwela ayihe mbika shoka tayi ti.”

¹³ Daniel okwe etwa mbala koshipala shomukwaniilwa. Omukwaniilwa okwa ti kuye: “Ongoye tuu Daniel, gumwe gwomaapika Aajuda mboka tate e ya kwata muJuda?

¹⁴ Ondu uvu kutya ombepo yookalunga aayapuki oyi li mungoye, onkee ongoye onkulungu nou na ontseyo nuunongo.

¹⁵ Aanongo noonganga oya li ye etwa mpaka, ya leshe enyolo ndika noya lombwele ndje shoka tali ti, ihe inaa vula nando okuholola shoka tali ti.

¹⁶ Ngashingeyi ondu uvu kutya ngoye oto vulu okumona iiholekwa nokufatulula shoka tayi ti. Ngele oto vulu okulesha enyolo ndika noto lombwele ndje shoka tali ti, nena oto zalekwa elwaakani etiliganembwilili lyopaukwaniilwa, elyenge lyoshingoli mothingo yoye noto lengwa elenga etitatu moshilongo.”

¹⁷ Daniel okwa yamukula: “Kala nomagano goye nenge u ga pe gulwe. Ihe enyolo otandi li ku leshele, Nkeyama, notii ku lombwele shoka tali ti.

¹⁸ “Kalunga gwokombandambanda okwa kwaniileke ho Nebukadnezzar e mu ningi omukwaniilwa omunene nokwe mu pe esimano nuunenepangelo.

¹⁹ Okwa li omunenenene nomutilithi; aantu yomiigwana ayihe, yomomaludhi agehe noyomomalaka agehe oya kakama koshipala she. Ngele okwa li a hala okudhipaga ntumba, ina nyengwa oku shi ninga; ngele okwa li a hala okugamena ngandi, a kale e na omwenyo, ina nyengwa oku shi ninga. Okwa yele nguka nenge a shundula ngwiyaka, ngaashi a hala.

²⁰ Ihe molwaashoka a ningi omunuuntsa, omwiinenepeki nomudhudhu, okwa nakulwa mo moshipangelapundi she e ta kanitha esimano lye.

²¹ Okwa tidhwa mo mokati kaantu, noondunge dhe odha fe dhiiyamakuti. Okwa kala pamwe nuusinokuti ta li omwiidhi a fa ondumetana nota lala melundu a hipa komume. Hugunina okwa zimine kutya Kalunga gwokombandambanda ota lele uukwaniilwa auhe note u pe shaa ngoka ye mwene e mu hogolola.

²² “Ihe ngoye, omwana, ino ifupipika, nando owa tseya ayihe mbika.

²³ Owa kondjitha Omuwa gwomegulu e to eta mo iitenga niiyuma ya kuthwa motempeli ye. Ongoye, oomvalekele dhoye, aakiintu yoye noohonda dhoye mwa nwine mo omaviinu e tamu tanga iikalunga ya hambulwa moshingoli, moshisiliveli, moshikushu, mosheela oshiluudhe noya hongwa miiti nomomamanya — iikalunga mbyoka itaayi vulu nando okumona ko nenge okuuva ko noitayi vulu okutseya sha. Ihe ngoye ino simaneka nando Kalunga ngoka tu utha ongele okukalamwenyo kwoye nenge okusa, naangoka ta lele ayihe to yi ningi.

²⁴ Omolwaashoka Kalunga a tumu oshikaha shika, shi nyole oohapu ndhika.

²⁵ “Shika sha nyolwa, osho shika: ‘Sha yalulwa, sha yalulwa, sha vihwa, sha topolwa.’

²⁶ Notashi ti nduno: sha yalulwa, Kalunga okwa yalula omasiku guukwaniilwa woye nokwe u hulitha po;

²⁷ sha vihwa, owa tulwa koshiviha nowa monika omupu;

²⁸ sha topolwa, oshilongo shoye osha topolelwa Aamedia nAapersia.”

²⁹ Mbalambala Belshazzar okwa lombwele aapiya ye, ya zaleke Daniel elwaakani etiliganembwilili lyopaukwaniilwa nelyenge lyoshingoli mothingo. Nokwe mu lenge elenga etitatu moshilongo.

³⁰ Uusiku tuu mboka Belshazzar, omukwaniilwa gwaBabilon, okwa dhipagwa,

³¹ naDarius, Omumedia gwomimvo omilongo hamano nambali, okwa lala oshilongo.

6

¹ Darius okwa tokola, a langeke oongoloneya ethele nomilongo mbali ya andjagana noshilongo she ashihe.

² Daniel naantu yalwe yaali oya li aatonateli yawo, opo eliko lyomukwaniilwa lyaa hepe.

³ Daniel okwe shi holola mbala kutya ota longo nawa e vule aatonateli yalwe nenge oongoloneya. Oshoka okwa li a pita ooyakwawo miilonga, omukwaniilwa okwe mu tala a gwana okulengwa elenga lyoshilongo ashihe.

⁴ Nena aatonateli yalwe noongoloneya oya kambadhala, ya monene Daniel ombedhi yepuko melelo lyoshilongo, ihe inaa shi vula, oshoka Daniel okwa li omwiinekelwa noina longa sha shuusama nenge sha puka.

⁵ Oya lombwelathana ya ti: “Itatu ka mona epuko lyasha okugandja oombedhi, okulopota Daniel, shila otatu li mono melongelokalunga lye.”

⁶ Nena oya yi komukwaniilwa noya ti: “Omukwaniilwa Darius, kala u na omwenyo sigo aluhe!

⁷ Atuhe mba hatu lele oshilongo shoye — aatonateli, aaleli, oongoloneya, aagandjimayele nookomufala — otu uvathana kutya Nkeyama na gandje oshipango shi na oonkondo tadhi dhengele. Lombwela ano aantu ayehe kutya momasiku omilongo ndatu itaa pitikwa, yi indile sha kukalunga kalwe nenge komuntu gulwe, shila okungoye awike, omukwaniilwa. Shaa ngoka ta taaguluka elaka ndika, oku na okuumbilwa melambo lyu udha oonime.

⁸ Nkeyama, gandja ano oshipango noku shi shainina, opo shi kale sha kola pampango yokwaalunduluka yAamedia nAapersia.”

⁹ Osho ngaaka omukwaniilwa Darius okwa shaina oshipango shoka.

¹⁰ Daniel sho a koneke kutya oshipango osha shainwa, okwa yi kaandjawo. Mondunda yopombanda mongulu ye omwa li omakende ga taalela lwokuJerusalem. Omo moka a tsu oongolo pomakende ge eguluka nokwa galikana Kalunga lutatu mesiku, ngaashi a li ha ningi shito.

¹¹ Aatondi yaDaniel sho ye mu dhimbulula ta galikana Kalunga,

¹² ayehe oya yi komukwaniilwa oku ka lya ko Daniel. Oya ti: “Nkeyama, ndishi owa shaina oshipango kutya momasiku omilongo ndatu taga landula shaa ngoka ti indile sha kukalunga kalwe nenge komuntu gulwe kee shi kungoye, nu umbilwe melambo lyu udha oonime?” Omukwaniilwa okwa yamukula a ti: “Eeno, oshipango sha kola pampango yokwaalunduluka yAamedia nAapersia.”

¹³ Nena oya ti komukwaniilwa: “Daniel, gumwe gwomaapongekwa Aajuda, ine ku simaneka, Nkeyama, nenge a vulike koshipango we shi gandja. Oha galikana lutatu mesiku.”

¹⁴ Omukwaniilwa sho e shi uvu, okwa li u uvite uudhigu nokwa kambadhala okuhupitha Daniel. Okwi ipyakidhile nasho, sigo etango lya toko.

¹⁵ Nena aalumentu oya galukile komukwaniilwa e taa ti kuye: “Nkeyama, oto tseya ndishi kutya pampango yAamedia nAapersia kape na shipango sha gandjwa komukwaniilwa tashi vulu okulundululwa.”

¹⁶ Omukwaniilwa sho kwa li kee na sho ta vulu, okwa gandja elaka, Daniel a kwatwe noku umbilwe melambo lyu udha oonime. Okwa ti kuDaniel: “Kalunga koye ho mu longele nuudhiginini, ne ku hupithe.”

¹⁷ Emanya olya li lya galangatithilwa kokana kwelambo, nomukwaniilwa okwa tula ko oshihako she, osho wo oshihako shoomvalekele dhe, opo Daniel kaa hupithwe nando okulye.

¹⁸ Nena omukwaniilwa okwa shuna kuuwa, i idhilike iikulya nokwa londokwa koomposi uusiku auhe.

¹⁹ Petendo lyeluwa omukwaniilwa okwa meneka nokwa yi nokweendelela kelambo.

²⁰ Sho a thiki ko, okwi ithana noluhodhi ta ti: “Daniel, mumati gwaKalunga omunamwenyo! Kalunga ngoka ho mu longele nuudhiginini, okwa vulu tuu oku ku hupitha koonime?”

²¹ Daniel okwa yamukula a ti: “Nkeyama, kala u na omwenyo sigo aluhe!

²² Kalunga okwa tumu omuyengeli gwe, a mutike omakana goonime, opo dhaa lye ndje po. Okwe shi ningi, oshoka oku shi shi kutya ngame kandi na mbedhi noinandi yona kungoye, Nkeyama.”

²³ Omukwaniilwa okwa tuntua kenyanyu nokwa gandja elaka, Daniel a hilwe mo melambo. Oyo noye mu hili mo noya mono, ina lumatwa nando okuli, oshoka okwi inekela Kalunga.

²⁴ Nena omukwaniilwa okwa gandja elaka lyokukwatitha aantu ayehe mbeyaka ya lile ko Daniel, noyu umbilwa melambo lyu udha oonime pamwe naakadhi noyana. Manga inaa thika kondaandelo yelambo, oonime odhe ya ndjombokele e tadhi mokotola po omasipa gawo agehe.

²⁵ Omukwaniilwa Darius okwa nyolele aantu yomiigwana ayihe, yomomaludhi agehe noyomomalaka agehe kombanda yevi elaka tali ti: “Kundweni!

²⁶ Otandi popi te ti, moshilongo shandje ashihe shaa ngoka na tile ye a simaneke Kalunga kaDaniel. Oye Kalunga omunamwenyo, oye nota lele aluhe sigo aluhe. Oshilongo she kashi na mpo nashi ka teka po, noonkondo dhe kadhi na mpoka nadhi hulu po.

²⁷ Oye ta hupitha e ta kanyutulula; ota longo iilongakumithi niilongandhindhiliko megulu nokombanda yevi. Okwa hupitha Daniel moshiponga shokuliwa po koonime.”

²⁸ Daniel okwa kala e na esimano mepangelo lyaDarius nosigo omuuyuni waKores, omukwaniilwa gwaPersia.

7

¹ Momumvo gwotango Belshazzar sho a li omukwaniilwa gwaBabilon, ongame Daniel nda lala ondjodhi e te mono emoniko uusiku. Ondjodhi onde yi nyola, nehokololo lyemoniko olyo ndika,

² ndyoka nda monene uusiku mboka. Oombepo odha li tadhi pepe koombinga adhihe nodha tukulutha omakuthikuthi gefuta enene.

³ Iilikama iinene ine oya anduka mefuta, shaa shoka sha yooloka kiikwawo.

⁴ Oshilikama shotango osha li sha fa onkoshi, ihe oshi na omawawa ga fa gekodhi. Manga nda li nde shi tongolola, omawawa gasho oga dhakulwa ko. Oshilikama osha thikamithwa sha fa omuntu. Nopo tuu mpoka osha pewa omayele gopantu.

⁵ Oshilikama oshitiyali osha li sha fa emwanka sha thikama nomagulu gasho gokonima, sha yedha oombati ndatu komulungu pokati komayego gasho, nosha lombwelwa kwa tiwa: “Tsikila, lya onyama oyindji, ngaashi to vulu!”

⁶ Manga nda li nda nzananeka mo omeho, oshilikama oshikwawo osha holoka. Osha li sha fa ongwe, ihe kombunda yasho okwa li ku na omawawa gane, ga fa omawawa gondhila, nosha li shi na omitse ne. Osha pewa oonkondo dhuupangeli.

⁷ Manga nda li nda tongolola, oshilikama oshitine osha holoka. Osha li oshinankondo, shi etitha uugelele, oshitilithi. Osha nyankagula po iihakanwa yasho nomayego gasho giiyela noshe yi lyatagula. Inashi fa iikwawo, osha li shi na ooniga omulongo.

⁸ Manga nda li nda tala kooniga, onda mono oluniga olushona talu tsapuka mokati koonkwawo. Olwa tudha mo ooniga ndatu ndhoka dha li ko. Oluniga olwa li lu na omeho ga fa gomuntu nokana ka popi iipolopolo nokwiinenepeka.

⁹ Manga nda li nda tala, iipangelapundi oya tulwa peha lyayo. Ngoka ta kala e na omwenyo aluhe sigo aluhe okwa kuutumba kushimwe shomiipangelapundi. Oonguwo dhe odha li oontokele totototo dha fa omahegele gomongwa, nomafufu ge oga li go opala ga fa omafufu goonzi. Oshipangelapundi she osha li sha londekwa komagulu getemba ga tema omulilo tagu tyotyoma,

¹⁰ nomukungu gwomulilo ogwa li tagu zi musho. Okwa li ku na aantu omayuvi ogendji taye mu yakula, naantu oomiliyona ya thikama koshipala she. Epangulo nolya tameke iihokolola yalyo, nomambo oga li ga pandjwa.

¹¹ Manga nda li te tala, ondu uvu oluniga olushona talu kudhile nokupopya iipolopolo. Onda mono oshilikama oshitine osha dhipagwa, nolutu lwasho olu umbilwa momulilo gwa getukila e talu lungunine mo.

¹² Iilikama iikwawo oya kuthwa oonkondo dhayo, ihe oya pitikwa okukala nomwenyo ethimbo lyu uthwa.

¹³ Memoniko ndika uusiku onda mono gumwe a fa omuntu. Okwe ya a kundukwa kiikogo nokwa yi kungoka ta kala e na omwenyo aluhe sigo aluhe, nokwe mu tseyithilwa.

¹⁴ Okwa li a pewa epangelo, esimano noonkondo dhuukwaniilwa, opo aantu yomiigwana ayihe, yomomaludhi agehe noyomomalaka agehe ye mu longele. Epangelo lye otali ka kala sigo aluhe, nuukwaniilwa we kau na mpoka tau hulu po sigo aluhe.

¹⁵ Omamoniko ngoka nda mono, oga halutha ndje nonda li nda lulilwa.

¹⁶ Ondi ikokele kugumwe gwomwaamboka ya li ya thikama nkoka nonde mu pula, a fatulule ayihe, nokwa hokololele ndje ayihe.

¹⁷ Okwa ti: “Iilikama mbika ine iinene oyo iilongo mbyoka tayi ka anduka mevi.

¹⁸ Naantu yaKalunga gwokombandambanda otaa ka taamba oonkondo dhuukwaniilwa e taa kala nadho ndongo aluhe.”

¹⁹ Nena onda li nda hala okutseya oshindji unene koshilikama oshitine, shoka sha li inaashi fa iikwawo — oshilikama oshitilithi shoka sha nyankagula po iihakanwa yasho nomayego gasho giiyela noonyala dhoshikushu e tashi yi lyatagula.

²⁰ Onda li nda hala okutseya kombinga yooniga omulongo komutse gwasho noluniga ndoka lwa tsapuka konima yooniga oonkwawo nolwa gwitha ko ooniga oonkwawo ndatu. Olwa li lu na omeho nokana nolwa li lwa popi iipolopolo neinenepeko. Olwa li olutilithi unene lu vule oonkwawo.

²¹ Manga nee nda li nda tala, oluniga ndoka olwa hingile aantu yaKalunga iita nolwe ya sindi.

²² Nena ngoka ta kala e na omwenyo aluhe sigo aluhe okwe ya e ti igidha epangulo nokuhepulutha aantu yaKalunga gwokombandambanda. Ethimbo lya thikana aantu yaKalunga, ya taambe oonkondo dhopaukwaniilwa.

²³ Efatululo ndyoka nda pewa, olyo ndika: “Oshilikama oshitine osho oshilongo oshitine shoka tashi ka kala kombanda yevi notashi ka kala sha yooloka kiilongo iikwawo. Otashi ka nyanyagula evi alihe noku li lyatagula.

²⁴ Ooniga omulongo odho aakwaniilwa mboka omulongo taa ka lela oshilongo shoka. Nena omukwaniilwa gulwe ota ka holoka; ota ka kala a yooloka kuyakwawo mboka ye mu tetekelele, e ta ka sinda aakwaniilwa yatatu.

²⁵ Ota ka popya ta sheke Kalunga gwokombandambanda e ta thindile aantu yaKalunga kongundhi. Ota ka kambadhala okulundulula omisindilo dhawo niituthi yawo, naantu yaKalunga otaa ka kala kohi yepangelo lye omimvo ndatu netata.

²⁶ Nena epangulo lyomegulu otali ka tokola e tali kutha po oonkondo dhe notali mu hanagula po thiluthilu.

²⁷ Oonkondo nuunene wiilongo ayihe kombanda yevi otayi ka pewa aantu yaKalunga gwokombandambanda. Oonkondo dhawo dhuukwaniilwa kadhi na mpoka tadhi ka hula po, naapangeli ayehe kombanda yevi otaye ke ya longela nokuvulika kuyo.”

²⁸ Efatululo olya hulu. Onda li nda tililila, oshipala shandje osha pembe kuumbanda, noohapu ndhoka onde dhi pungula momwenyo gwandje.

8

¹ Momumvo omutitatu sho Belshazzar a li omukwaniilwa, onda mono emoniko etiyali.

² Memoniko ndika ondi imono owala ohaluka ndi li moshilandohote Susa shi li moshikandjo shaElam. Okwa li nda thikama pomulonga Ulai.

³ Pomulonga onda mono ontsezi yonzi yi na ooniga mbali oondeendeka. Oluniga lumwe olwa li olule nolupeepeka lu vule olukwawo.

⁴ Onda tongolola ontsezi yonzi tayi umpile nooniga dhayo kuuninginino, kuumbangalantu nokuumbugantu. Kakwa li oshinamwenyo tashi vulu oku yi keelela nenge okuhunuka mo mepangelo lyayo. Oya ningi naanaa ngaashi ya hala noyu ulike oonkondo dhayo.

⁵ Manga nda li nda kuminwa kutya shika otashi ti ngiini, oshikombo oshitsezi oshu uluka ko sha zi kuuninginino tashi tondoka sha fa shaa li pevi, noluniga lumwe lwoshuuluko lu li pokati komeho gasho.

⁶ Osha yi shu ukilila komeho gontsezi yonzi ndjoka nda monene ya thikama pomulonga, noshe yi ponokele noonkondo dhasho.

⁷ Onde shi tongolola, sho tashi ponokele ontsezi yonzi. Osha li sha geya noshe yi mbothagula nokuteyagula po ooniga dhonzi adhihe mbali. Ontsezi yonzi kaya li tayi vulu okwiigamena. Oya finyuninwa pevi noya lyatagulwa, nokakwa li ngoka ta vulu oku yi hupitha.

⁸ Oshikombo oshitsezi osha koko tashi ningi oshinenenene, ihe manga sha li metifa lyoonkondo dhasho, oluniga lwasho olwa teka po. Peha lyalwo opwa tsapuka ooniga ne dhi na oshuuluko, shaandoka lwa tagananena kombinga yi ili.

⁹ Koluniga lumwe lwaandhika okwa tsapuka oluniga olushona, ndoka lwa tagananena lwokuumbugantu nolwokuuzilo nolwokEvi lyeuvaneko.

¹⁰ Olwa koko, sigo lwa gwana okumatukila aakwiita yomegulu, noonyothi dhodhene nokuli, nolwa yagumunine dhimwe dhomudho pevi noku dhi lyatagula.

¹¹ Olwa shongo nokuli ondjayi yaakwiita yomegulu, lwa keelele oku mu yambela oondjambo dhesiku kehe nolwa nyateke otempeli.

¹² Aantu oya yonene mo peha lyokuyambela mo esiku kehe, nelongelokalunga lyashili olya li lya lyatelwa pevi. Oluniga olwa li lu na ompolo miilonga yalwo ayihe.

¹³ Nena ondu uvu omuyengeli gumwe ta pula mukwawo ta ti: “Iinima mbika tayi monika memoniko ndika, otayi tsikile sigo uunake? Sigo uunake uulunde wiihuna tau ka pingena oondjambo dhesiku kehe? Sigo uunake aakwiita yomegulu taa matukilwa notempeli tayi lyatagulwa?”

¹⁴ Ondu uvu omuyengeli omukwawo ta yamukula ta ti: “Otashi ka tsikilwa, sigo pwa piti oongula noongulohi 2 300. Methimbo ndika oondjambo dhongulohi nodhongula itadhi yambwa we. Nena otempeli otayi ka opalekululwa.”

¹⁵ Onda li tandi kambadhala ndi tseye emoniko shoka tali ti, ohaluka yowala gumwe a thikama komeho gandje.

¹⁶ Ondu uvu ewi tali igidha handiyaka yomulonga Ulai tali ti: “Gabriel, mu fatululila shoka a mono kutya otashi ti ngiini.”

¹⁷ Gabriel okwe ya e ta thikama ontega nangame. Onda li nda tililila e tandi ihata pevi. Gabriel okwa ti kungame: “Muntu gwomuntu, tseya shoka emoniko tali ti. Emoniko otali hunganeke ehulilo lyuuyuni.”

¹⁸ Manga a li ta popi, onda gwile pevi nda kukuta kuumbanda. Ihe okwa yambula ndje, a yelutha ndje nda thikama

¹⁹ nokwa ti: “Otandi ku ulukile uukwatya wondjahi yaKalunga kutya otau kala wa tya ngiini. Emoniko otali holola omathimbo gahugunina.

²⁰ “Onzi ontsezi we yi mono, ndjoka yi na ooniga mbali, otayi ti oshilongo shaMedia noshaPersia.

²¹ Oshikombo oshitsezi otashi ti oshilongo shaGreka noluniga lwa simana pokati komeho gasho olwo omukwaniilwa gwotango.

²² Ooniga ne ndhoka dha tsapuka, sho oluniga lwotango lwa teka po, otadhi hunganeke iilongo ine moka oshilongo shotango tashi ka topolwa noitayi ka kala iinankondo ya fa oshilongo shotango.

²³ “Uuna ehulilo lyiilongo mbika tali thiki popepi, notayi ilongele egeelo omoluuwinayi wayo, otaku ka holoka omukwaniilwa omwiinayi nomunamakoto.

²⁴ Ota ka nenepala moonkondo, ihe hakoonkondo dhe mwene. Ote ke eta ehanagulo li kenyaneka nota ka pondola ayihe mbyoka te ke yi ninga. Ota ka yonagula po aantu aanankondo noyaKalunga mwene wo.

²⁵ Molwaashoka oku li po e na uunkulungu, ota ka tompola omakotokelo ge. Ote ki itanga nota hanagula po aantu oyendji ontukuluka. Ote ki inenepekela nOmukwaniilwa gwaakwaniilwa, ihe nena ota ka hanagulwa po pwaa na elongitho lyoonkondo dhomuntu ngandi.

²⁶ Emoniko ndika tali popi oondjambo dhongulohi nongula, ndyoka lye ku fatululilwa, otali ka ninga lyoshili. Ihe pungula nawa oshiholekwa shika ngashingeyi, oshoka otashi ka kala ethimbo ele, manga inaashi tsakanithwa, shi ninge shoshili.”

²⁷ Onda li nda tyololoka nonda gomboka omasiku ogendji. Nena onda yambuka po e te shuna kiilonga mbyoka nda pewa komukwaniilwa, ihe onda li nda piyaganekwa kemoniko noine vula nando oku li uva ko.

9

¹ Darius Omumedia, ngoka omuna gwaKserkses, okwa lele oshilongo shaBabilon.

² Momumvo gwotango gwepangelo lye onda koneke momanyolo omayapuki omwaalu gwoomvula omilongo heyali, uuna ndoka Jerusalem shi na okukala sha hanagulwa po pahapu yOmuwa, ngaashi e yi hololele omuhunganeki Jeremia.

³ Nonda galikana Kalunga nda mana mo, nde mu indile ndi idhilika iikulya, nda zala omahahi, nda kuutumba momutoko.

⁴ Onda galikana Omuwa Kalunga kandje nonda hempulula oondjo dhoshigwana shandje. Onda ti: “Omuwa Kalunga, ongoye omunene, otse notatu ku simaneke. Ongoye omudhiginini gwehangano lyoye nou na esilohenda naamboka ye ku hole nohaa gwanitha iipango yoye.

⁵ “Otse twa yono, twa longo iihuna notwa kolokosha. Otwa tindi shoka we tu lombwele, tu shi ninge, notwa pilamene shoka we tu ulukile shu uka.

⁶ Inatu pulakena aamati yoye aahunganeki, mboka yu uvitha medhina lyoye, ya lombwele aakwaniilwa yetu, aaleli yetu, ootatekulu noshigwana ashihe.

⁷ Ongoye, Omuwa, aluhe oho ningi shoka shu uka, ihe otse hatu iyetele aluhe omupya tse yeneyene. Shika oshoshili kutse atuhe mboka twa kala muJudea nomuJerusalem nokAaisraeli ayehe mboka wa halakanithila niilongo popepi nokokule, oshoka oya li inaaye ku dhiginina, ye ku inekele.

⁸ Aakwaniilwa yetu, aaleli yetu nootatekulu ya ningi iisithahoni noya yono kungoye, Omuwa.

⁹ Ongoye omunamutimahenda nomudhimipo gwoondjo, nando tse twe ku tukulile oshipotha.

¹⁰ Inatu ku pulakena nando, Omuwa Kalunga ketu, sho we tu lombwele okudhiginina oompango ndhoka we dhi tu pa maapiya yoye aahunganeki.

¹¹ Aaisraeli ayehe oya yono iipango yoye noya tindi okupulakena shoka we ya lombwele. Otwa yono kungoye, nosho ngeyi we tu ethele ethingano ndyoka lya nyolwa mompango yaMoses, omuntu gwoye.

¹² Owa longo shoka wa ti, oto tu ningile naaleli yetu. Owa geele Jerusalem unene shi vule iilando ayihe kombanda yevi.

¹³ We tu undulile omageelo agehe ga nyolwa mompango yaMoses. Ihe tse inatu kambadhala nando okuli oku ku geyulukitha, Omuwa Kalunga ketu, tu ethe uulunde wetu nenge tu taambe oshili.

¹⁴ Ongoye, Omuwa Kalunga ketu, owa li wi ilongekidha oku tu geela nowe shi ningi, oshoka oho longo aluhe shoka shu uka, natse inatu ku pulakena.

¹⁵ “Omuwa Kalunga ketu, owa holola oonkondo dhoye, sho wa tembudha mo aantu yoye muEgipiti, noonkondo dhoye otadhi dhimbululwa natango. Otwa yono; otwa kolokosha.

¹⁶ Ongoye we tu popile shitonale, onkee ino geela we Jerusalem. Osho oshilando shoye, ondundu yoye ondjapuki. Iigwana ayihe miilongo yopuushiinda otayi ligamene Jerusalem naantu yoye omoluulunde wetu nuukolokoshi mboka wa ningwa kootatekulu.

¹⁷ Kalunga, uva omagalikano gandje nomaindilo gandje. Tungulula otempeli yoye ndjoka ya kumunwa po; yi tungulula, opo shaa ngoka a tseye kutya ongoye Kalunga.

¹⁸ Tu pulakena, Kalunga; tu tala, u mone omalwa ngoka tu li mugo nokuhepekwa kwoshilando shoka tashi kala edhina lyoye. Otatu ku galikana, oshoka ngoye omunamutimahenda, hamolwaashoka twa ningi nawa.

¹⁹ Omuwa, tu uva. Omuwa, tu dhimina po. Omuwa, tu pulakena, u shi ninge. Ino shelelelwa, opo shaa ngoka e shi tseye kutya ongoye Kalunga. Oshilando shika naantu mbaka oyoye.”

²⁰ Onda tsikile okugalikana tandi hempulula oondjo dhandje noondjo dhoshigwana shandje Israel. Ondi indile Omuwa Kalunga kandje, a tungulule otempeli ye ondjapuki.

²¹ Manga nda li te galikana, Gabriel, ngoka nda mwene memoniko lyonale, okwe ya ta tuka u uka kungame. Olya li ethimbo lyeyambo lyokomatango.

²² Okwa fatulula a ti: “Daniel, onde ya ndi ku kwathe, u uve ko omahunganeko.

²³ Uuna wa tameke okwiindila Kalunga, okwe ku yamukula. Oku ku hole, nonkee nde ya ndi ku lombwele eyamukulo. Ngashingeyi pulakena nawa, manga tandi fatulula emoniko.

²⁴ “Iiwike omilongo heyali oyo uule wethimbo ndyoka Kalunga u uthile oshigwana shoye noshilando shoye oshiyapuki. Nena uukolokoshi otau hulu, oondjo otadhi dhimwa po nomayono otaga kuthwa po; uuyuuki waaluhe otau ka tulwa po, emoniko nehunganeko otali kolekwa, notempeli ondjapuki otayi ka yapulululwa.

²⁵ Ndhindhilika shika noku shi uva ko: Okuza pethimbo ndyoka elombwelo tali gandjwa lyokutungulula Jerusalem sigo omuwiliki omuhogololwa gwaKalunga te ke ya, otaku piti iiwike iheyali. Jerusalem otashi ka tungululwa nomapandaanda gasho nomapopilokanka gasho, notashi ka kala po iiwike omilongo hamano niiyali, ihe ethimbo ndika otali ka kala ndyoka lyomalwa.

²⁶ Pehulilo lyethimbo ndika omuwiliki omuhogololwa gwaKalunga ota ka dhipagwa iipundjamenye yowala. Oshilando notempeli otayi ka hanagulwa po kematukilo lyaakwiita yomupangeli omunankondo. Ehulilo otali ke ya lya fa efundja tali eta iita nehanagulo ndyoka lya longekidhwa kuKalunga.

²⁷ Omupangeli ota ka koleka ehangano noyendji oshiwike shimwe; etata lyethimbo ndika sho lya piti po, ota ka hulitha po oontselelandjambo niikulyandjambo. Oshiyelekela shiitonditha otashi ka tulwa peha lya yeluka lyotempeli e tashi kala mpoka, sigo ngoka e shi tula po, ta adha ehulilo ndyoka Kalunga e li mu longekidhila.”

10

¹ Momumvo omutitatu sho Kores a li omukwaniilwa gwaPersia, elaka olya hololelwa Daniel, ngoka haku tiwa Beltshazzar; Elaka olya li lyoshili, ihe edhigu unene okuuvika ko. Olye mu fatululilwa memoniko.

² Pethimbo ndyoka onda li nda sa oluhodhi iiwike itatu.

³ Inandi lya iithima yomagadhi nenge onyama, inandi nwa omaviinu, nenge ndi igwayeke nomagadhi, sigo iiwike itatu ya piti po.

⁴ Mesiku etimilongombali netine lyomwedhi gwotango gwomumvo, onda li nda thikama pomunkulo gwomulonga omunene Tigris.

⁵ Onda ligamene pombanda nonda mono omulumentu a zala oonguwo dholiina nepaya lyoshingoli oshiyelele.

⁶ Olutu lwe olwa li talu wema lwa fa emanya lyondilo. Oshipala she osha li tashi adhima sha fa okushela kwolwaadhi, nomeho ge oga hwama ga fa omulilo. Omaako ge nomagulu ge oga li taga taima ga fa oshikushu sha yelithwa, newi lye olya li tali popi lya fa omupopyo gwongundu onene.

⁷ Ongame awike nda mono emoniko ndika. Aantu mboka ya li nangame, inaa mona sha, ihe oya li ya haluka e taa fadhuka po noya holama.

⁸ Onda thigwa po awike nda tongolola emoniko ndika ekumithi. Oonkondo dhandje odha thigi ndje po, noshipala shandje osha shituka, kape na muntu ta dhimbulula ndje.

⁹ Sho ndu uvu ewi lye, onda gwile pevi nda kankwa nonda lala nda tsa oshipala mevi.

¹⁰ Nena oshikaha osha yelutha ndje po nonda tsu oongolo ndi ikwatelela pevi niikaha, ngame te kakama natango.

¹¹ Omuyengeli okwa ti kungame: “Daniel, Kalunga oku ku hole. Thikama, ngoye u pulakene nawa shoka tandi ke ku lombwela. Onda tumwa, ndi ye kungoye.” Sho a popi oohapu ndhika, onda kakama natango.

¹² Nena okwa ti: “Daniel, ino tila, Kalunga oku uvu omagalikano goye okuza kesiku ndyoka lyotango wa tokola, u ifupipike koshipala she, opo u ninge omunandunge. Onde ya, ndi ku etele eyamukulo lyomagalikano goye.

¹³ Omuyengelindjayi gwoshilongo shaPersia okwa kondjitha ndje omasiku omilongo mbali nalimwe. Nena Mikael, gumwe gwomaayengeli aakuluntu, okwe ya okukwatha ndje, oshoka ongame awike nda kalele mo muPersia.

¹⁴ Onde ya, ndi ku uvitithe ko shoka tashi ka ningilwa oshigwana shoye konakuyiwa. Emoniko ndika olyiinima yokomeho.”

¹⁵ Sho a popi ndhika, onda thikama nokupugalala.

¹⁶ Nena omuyengeli, ngoka a fa omuntu, okwa ganeke oshikaha she e ta gumu omilungu dhandje. Onda ti kuye: “Tatekulu, emoniko ndika olya tyololokitha ndje thilu, noite vulu sha.

¹⁷ Onda fa omupika a thikama koshipala shamwene gwe. Otandi vulu okutya ngiini kungoye? Kandi na nkondo nenge omufudho gwa kala mungame.”

¹⁸ Nena okwa gumu ndje ishewe e ta kolekulula ndje.

¹⁹ Okwa ti: “Kalunga oku ku hole, onkee ino tila, ino piyaganekwa kusha.” Sho a popi ndhika, onda mono oonkondo nonda ti: “Tatekulu, lombwela ndje shoka u na okulombwela ndje. Ongoye wa nkondopaleke ndje.”

²⁰ Okwa ti: “Ou shi shi tuu kutya omolwashike nde ya kungoye? Onde ya, ndi ku hololele shoka sha nyolelwa membo lyoshili. Ngashingeyi otandi shuna notii ka kondja nomuyengelindjayi gwaPersia. Konima yaambika omuyengelindjayi gwaGreka ota ka holoka. Kape na ngoka ta kwatha ndje kakele kaMikael, omuyengelindjayi gwaIsrael.

11

¹ Momumvo gwotango gwaDarius Omumedia onda kala pooha dhe nde mu kwatha noku mu gamena.

² Shika tandi ke ku lombwela ngashingeyi, oshoshili.” Omuyengeli okwa ti: “Aakwaniilwa yatatu otaa ka pangela natango Persia, taa landulwa komutine, ngoka ta ka kala omuyambelela e vule yalwe. Metifa lyoonkondo dhe nuuyamba we ota ka hongakanitha oshilongo shaGreka.

³ “Nena otaku ka holoka omukwaniilwa ofule. Ota ka lela oshilongo oshinene e ta longo shoka a hala.

⁴ Ihe metifa lyoonkondo dhe oshilongo she otashi ka teka po e tashi ningi iilongo ine. Aakwaniilwa yaa shi yomezimo lye, otaa ka pangela peha lye, ihe itaa ka kala ye na oonkondo ndhoka a li e na.

⁵ “Omukwaniilwa gwaEgipiti ota ka kala e na oonkondo. Gumwe gwomoondjayi dhiita ye ota ka kala omunankondo e mu vule e ta pangele oshilongo oshinene.

⁶ Konima yomimvo odhindji omukwaniilwa gwaEgipiti ota ka hangana nomukwaniilwa gwaSiria note mu pe omwana omukadhona, a ninge omufuko gwe. Ihe ehangano itali kalelele, nomufuko nomulume nomwana naapiya mboka yi ile pamwe nayo, otaa ka dhipagwa.

⁷ Nanziya otaku landula omukwanezimo lyomufuko e ta ningi omukwaniilwa. Oye ta ka homona etangakwiita lyomukwaniilwa gwaSiria, ta ningine mepopilongulu lyawo e te ya sindi.

⁸ Ota ka fala kuEgipiti iiyelekela yiikalunga yawo niiyuma yoshingoli noshisiliveli mbyoka ya yoololelwa iikalunga mbyoka. Konima yomimvo odhindji dhombili

⁹ omukwaniilwa gwaSiria ota ka matukila Egipiti, ihe ota ka thiminikwa, a shune ko.

¹⁰ “Oyanamati yomukwaniilwa gwaSiria otaa ki ilongekidhila iita e taa hiya omatanga omanene. Gumwe gwomuyo ota ka kunguluka a fa efundja e ta ponokele epopilongulu lyaatondi.

¹¹ Omukwaniilwa gwaEgipiti ota ka pindjala e ta yi kelondo lyiita yokukondjitha omukwaniilwa gwaSiria e ta dhenge omatanga ge omanene.

¹² Ota ka kwatwa kuuntsa omolwesindano lye, sho a dhipaga aakwiita oyendji, ihe ita ka kala aluhe omusindani.

¹³ “Omukwaniilwa gwaSiria ota ka shuna e ta ka hiya etangakwiita enene li vule lyonale. Pompito yo opala ota ka galuka e na etangakwiita lya homatekeka.

¹⁴ Nena aantu oyendji otaa tukulile omukwaniilwa gwaEgipiti oshipotha. Naalumentu yamwe yekuni otaa zi moshigwana shoye, Daniel, notaa ka tamanana molwemoniko ndyoka ye li mono, ihe otaa ka sindika.

¹⁵ Omukwaniilwa gwaSiria ota ka kondekitha oshilandohote e te shi kutha ko. Aakwiita yaEgipiti itaa ka tsikila we okukondja; naamboka ngaa oofulelela itaa ka kala ye na omukumo gwa gwana.

¹⁶ Omuhomoni Omusiria ota ka ninga ashihe a hala, nopwaa na ngoka te mu imbi. Ota ka kala mEvi lyeuvaneko notali ka kala miikaha ye naanaa.

¹⁷ “Omukwaniilwa gwaSiria ota ka dhiladhila okuhomona ta longitha etangakwiita lye alihe. Nena opo a hanagule po oshilongo shomutondi gwe, ota hangana naye e te mu yambele omwana omukadhona, e mu hokane, ihe ondunge ye itayi tompola sha.

¹⁸ Konima yaambika ota ka ponokela iigwana yopefuta noyindji yomuyo ote ke yi sinda. Ihe omuwiliki omukwiilongo ote mu sindi e ta hulitha po eitumbo lye; osho ngaaka ta ka galulila omukwaniilwa gwaSiria eitumbo lye.

¹⁹ Omukwaniilwa ota ka galukila komapopilongulu gokoshilongo she mwene, ihe ota ka sindika; ndika olyo ehulilo lye.

²⁰ “Ota ka landulwa komukwaniilwa omukwawo, ngoka ta ka tuma omumbala, a thindile aantu kongudhi nomafendelo, opo i indjipaleke uuyamba woshilongo she. Methimbo efupifupi omukwaniilwa nguka ota ka dhipagwa, ihe hamondjahi nenge molugodhi.”

²¹ Omuyengeli okwa tsikile okufatulula ta ti: “Omukwaniilwa gwaSiria ta landula ko, ota ka kala omulumentu omwiinayi, ino opala nando okuninga omukwaniilwa. Ota ka holoka ombaadhilila noti iningi omukwaniilwa miineya.

²² Omatangakwiita omanene ote ke ga nyanyagula e te ga thekeke po, osho wo Omuyambimukuluntu gwaKalunga.

²³ Mokuninga oondjuvaneno ota kotokele iigwana yilwe. Ota ka ninga omunankondo, nando oye omupangeli gwoshigwana oshishona ashike.

²⁴ Ohaluka yowala ota ka matukila oshikandjo shuuyamba e ta ningi iinima inaayi ningwa nando okoohekulu. Nena ota ka topolela aantu ye iinima mbyoka nuuyamba e u yugu miita. Ota ka dhiladhila okumatukila omapopilongulu, ihe ethimbo lye otali ka hula po mbala.

²⁵ “Ota ka hiya etangakwiita enene, a ponokele omukwaniilwa gwaEgipiti, ngoka ti ilongekidha oku mu kondjitha netangakwiita enene li na oonkondo. Ihe omukwaniilwa gwaEgipiti ota ka kotokelwa noita vulu sha.

²⁶ Aagandjindunge ye aainekelwalela otaye ke mu teya po. Aakwiita ye oyendji otaa ka dhipagwa, netangakwiita lye otali thekulwa po.

²⁷ Nena aakwaniilwa ayehe yaali otaa ka kuutumba, ya lye poshitaafula shimwe, ihe oye ninathane uuwinayi notaa fundjathana. Itaa ka tompola sha, oshoka ethimbo lyasho inali thikana manga.

²⁸ Omukwaniilwa gwaSiria ota ka shuna koshilongo she e na iihakanwa mbyoka a yugu, a tokola okudhima po eitaalo lyaantu yaKalunga. Ota ka ninga shoka a tokola e ta shuna nduno kevi lyaandjawo.

²⁹ “Pethimbo lyu uthwa ota ka homona ishewe Egipiti, ihe pethimbo ndika iinima otayi ka lunduluka.

³⁰ Aaroma otaye ke ya ye li moosikepa e taye mu kondjitha nota ka haluthwa. “Nena ota shuna a pindjala nota kambadhala okuhanagula po eitaalo lyaantu yaKalunga. Ota ka landula oondunge dhaamboka ye ekelahi eitaalo ndyoka.

³¹ Aakwiita ye yamwe otaa ka nyateka otempeli. Otaa ka hulitha po oondjambo dhesiku kehe e taa tula po oshiyelekela shiitonditha.

³² Omukwaniilwa ota hongolola aantu noku ya hekaheka okweetha eitaalo lyawo, ihe mboka haa landula Kalunga, otaye mu kondjitha.

³³ Aawiliki yoshigwana aanandunge otaa ka nongeka aantu yalwe oyendji, ihe pethimbo limwe yamwe yomuyo otaa ka dhipagelwa molugodhi nenge ya fikwe po ya se, yamwe otaa ka yugwa e taa tulwa mondholongo.

³⁴ Metifa lyomatyakaleko aantu yaKalunga otaa ka fudha po kashona, nando oyendji mboka tayi igameke kuyo, otayi iningitha ashike.

³⁵ Yamwe yomaawiliki aanandunge otaa ka dhipagwa po, opo ongundu yawo yi yelekwe, yi thithwe noyi yelithwe. Shika otashi ka kala, sigo ehulilo tali ya, ethimbo ndyoka Kalunga e li utha.

³⁶ “Omukwaniilwa gwaSiria ota ka longa shoka a hala. Ote ki inoma ta ti, oye omunene e vule ookalunga ayehe nonaKalunga gwokombandambanda wo. Ota ka kala ta vulu okuninga ngeyi, sigo ethimbo ndyoka Kalunga te ke mu geela. Kalunga ota ka gwanitha shoka a dhiladhila.

³⁷ Omukwaniilwa ota ka kala inaa pupa ko kookalunga ya longelwa koohekulu nosho wo kukalunga e holike kaakiintu. Sho shene ota ka thithimanena kalunga kehe, oshoka oti idhiladhila ye omunene e ya vule ayehe.

³⁸ Ihe ota simaneke kalunga ngoka ta gamene omapopilongulu. Ota ka yambela kalunga ngoka oohekulu inaaye mu simaneka, te mu yambele oshingoli, oshisiliveli, uuwe nomagano galwe guuyamba.

³⁹ Opo a gamene omapopilongulu ge, ota ka longitha aantu mboka haa simaneke kalunga kokiilongo. Ota ka simaneka aantu mboka taye mu taamba omuleli gwawo, ote ya lenge aambala aanene note ya pe evi, li ninge ondjambi yawo.

⁴⁰ “Shampa ehulilo lyethimbo lyomukwaniilwa gwaSiria li li pokuthika, nena omukwaniilwa gwaEgipiti ote ke mu matukila, nomukwaniilwa gwaSiria ote ke mu kondjitha noonkondo dhe adhihe, ta longitha omatembakwiita, uukambe noosikepa odhindji. Ota ka homona iilongo oyindji a fa omeya gefundja.

⁴¹ Ota ka homona nokuli Evi lyeuvaneko e ta dhipaga omayuvi omilongo, ihe iilongo Edom, Moab noshihupe shaAmmon otayi hunuka mo.

⁴² Sho ta homona iilongo ayihe mbika, naEgipiti wo itashi hupu ko.

⁴³ Ota ka kwata po omaliko gaEgipiti goshingoli nogoshisiliveli nomauyamba omakwawo ge na ondilo. Ota ka lala Libia naSudan.

⁴⁴ Nena oonkundana dhokuuzilo nodhokuumbangalantu otadhi mu halutha nota ka kondja a sa ondjahi e ta dhipaga aantu oyendji.

⁴⁵ Oye nota ka dhika ootenda dhe oonene dhuuwa pokati kefuta nondundu ndjoka hoka kwa tungilwa otempeli. Ihe ota ka sa pwaa na ngoka te mu gongele.”

12

¹ “Pomasiku ngoka omuyengeli omukuluntu Mikael, ngoka ha popile oshigwana shoye, ota ka holoka. Nena otaku ka kala ethimbo edhigu, omalwa omanene inaaga kala ko nale kombanda yevi, hela aantu ya shitilwe. Uuna ethimbo ndyoka tali ya, aantu ayehe yoshigwana shoye mboka omadhina gawo ga nyolelwa membo lyaKalunga, otaa ka hupithwa.

² Oyendji yomwaamboka ya sa nale nokuli, otaa ka yumuka; yamwe otaa ka nyanyukilwa omwenyo gwaaluhe, nayamwe otaa ke ehamekwa kekano lyaaluhe.

³ Aawiliki aanandunge otaa ka adhima ya fa uuyelele wokegulu. Naamboka ya nongeka aantu oyendji okuninga shoka shu uka, otaa ka adhima ya fa oonyothi aluhe sigo aluhe.

⁴ “Daniel, ngashingeyi siikila embo ndika noshihako, shi kale sigo ehulilo lyuuyuni. Aantu oyendji otaa ke li konakona, nontseyo otayi indjipala.”

⁵ Nena onda mono aalumentu yaali ya thikama pomulonga, gumwe e li handika nomukwawo e li handiyaka.

⁶ Gumwe gwomuyo okwa pula omuyengeli ngoka a li a thikama mpeya kombanda yomeya a ti: “Iilongankumwe mbika otayi ka kala sigo uunake, manga ehulilo lyayo inaali ya?”

⁷ Omuyengeli okwa yelutha omaako ge agehe gaali kegulu e ta gana medhina lyaKalunga kaaluhe. Onde mu uvu ta ti: “Otayi ka kala omimvo ndatu netata. Okutidhagana aantu yaKalunga shampa kwa hulu, iinima ayihe mbika otayi ka ningwa.”

⁸ Ondu uvu shoka a ti, ihe kanda li ndi uvite ko. Omolwaasho onda pula nda ti: “Tatekulu, ayihe mbino otayi ka hula ano ngiini?”

⁹ Okwa yamukula a ti: “Daniel, inda ngashingeyi, molwaashoka oohapu ndhika odhi na okukala ooholekwa dha pungulwa, sigo ehulilo tali ya.

¹⁰ Aantu oyendji otaa ka yogolwa, taa ka yelithwa notaa ka opalekwa. Aakolokoshi itaa ka pukuluka nando, yu uve ko, ihe otaa ka tsikila iikolokosha yawo; aanandunge ayeke taa ka pukuluka nokuuva ko.

¹¹ “Okuza kethimbo ndyoka oondjambo dhesiku kehe tadhi hulithwa po, noshiyelekela shiitonditha tashi tulwa po, otapu piti omasiku 1 290.

¹² Aanelago oomboka taa kala aadhiginini, sigo omasiku 1 335 ga piti po!

¹³ “Nangoye, Daniel, kala omudhiginini sigo ehulilo. Oto ka sa, ihe oto ka yumukila okutaamba oshipewa shoye pehulilo lyomasiku.”