1

¹ Mesiku etitano lyomwedhi omutine gwomumvo omutimulongo nomutitatu, ngame, omuyambi Hesekiel yaBusi, sho nda kala pamwe naapongekwa Aajuda pomulonga Kebar muBabilon, egulu olye eguluka nonda mono emoniko lyaKalunga.

² (Ogwa li omumvo omutitano, sho omukwaniilwa Jehoiakin a li a falwa muupongekwa.)

³ Mwiyaka muBabilonia pomulonga Kebar ondu uvu Omuwa ta popitha ndje, noshikaha she osha thinda ndje.

⁴ Onda ligamene nonda mono okambiya taka zi kuumbangalantu, ka fa oshikogo oshinene sha geta omulilo, newangandjo lye shi kunduka olya li lya hanya. Mokati kasho omwa li eadhimo tali tayima, lya fa oshikushu sha hanya.

⁵ Mokati kokambiya onda ndhindhilike mo iinamwenyo ine molupe lwomuntu,

⁶ ihe kehe shimwe shomuyo osha li shi na iipala ine nomawawa gane.

⁷ Omagulu gayo oga li gu ukilila, noya li yi na omakondo ga fa gongombe. Taga adhima ga fa oshikushu sha kwehulwa.

⁸ Kakele kiipala ine nomawawa gane, kehe shimwe oshi na iikaha ine, oshikaha shimwe kohi yewawa kehe.

⁹ Omawawa gaali goshinamwenyo kehe oga li ga yalalekwa taga gumathana nogoshikwawo. Mokweenda oyu ukilila owala, inayi punguluka.

¹⁰ Oshinamwenyo kehe osha li shi na iipala ine: komeho oshipala shomuntu, kolulyo oshipala shonime, kolumoho oshipala shongombe nokonima oshipala shekodhi.

¹¹ Omawawa gaali goshinamwenyo kehe oga li ga yeluka ga gumathana noondungu dhomawawa goshinamwenyo kehe she shi egama, nomawawa gaali oga li ga lambalala olutu lwasho.

¹² Oshinamwenyo kehe osha li sha tala koombinga adhihe ne, onkee ongundu ya vulu okuya shaa hoka ya hala, pwaa na epunguluko lyasha.

¹³ Mokati kiinamwenyo omwa li sha sha geta sha fa onyeka, tashi inyenganyenga aluhe. Omulilo ogwa li gwa yaka gu na omalaka taga igandjana.

¹⁴ Iinamwenyo oya telagana nokuuka huka naahwiyaka ngeshelo lyolwaadhi.

¹⁵ Sho nda tongolola iinamwenyo, onda mono omagulutemba gane ga guma pevi; okugulu kumwe okwa li kombinga yoshinamwenyo kehe.

¹⁶ Omagulutemba agehe gane oga li ga faathana, shaa nkoka otaku adhima kwa fa emanya li na ondilo, noshaa hoka okwa li ku na okugulutemba okukwawo kwe ku shigakana mokati,

¹⁷ opo okugulutemba kehe otaku ngoongola mokati koombinga adhihe ne.

¹⁸ Omigoyo dhomagulutemba odha li dhu udha omeho.

¹⁹ Shaa hoka iinamwenyo tayi uka, nomagulutemba oko taga uka pamwe nayo; niinamwenyo nge tayi yeluka po pevi, nomagulutemba osho taga ningi wo.

²⁰ Iinamwenyo otayi yi shaa nkoka ya hala, nomagulutemba otaga ningi naanaa, ngaashi iinamwenyo tayi ningi, oshoka iinamwenyo otayi ga utha.

²¹ Onkee shaa tuu iinamwenyo tayi yi nenge tayi thikama nenge tayi uka mombanda, nomagulutemba osho naanaa taga ningi wo.

²² Kombanda yomitse dhiinamwenyo okwa li ondunda ya tungwa momamanya gokristali taga adhima.

²³ Iinamwenyo oya li meni lyondunda, shaa shoka sha yalaleka omawawa gaali gu uka pushoka shi li pusho, noshi isiikile nomawawa gaali.

²⁴ Ondu uvu oshihomo shomawawa gayo, sho tayi papama mokutuka. Oshihomo shoka osha fa shefuta, sha fa oshihomo shetangakwiita enene, sha fa oshihomo shaKalunga Omunankondoawike. Nge ya lambele, otayi gonyo omawawa gayo,

²⁵ ihe natango oshihomo otashi pupu pombanda yondunda komitse dhayo.

²⁶ Kombanda yondunda yayo okwa li sha sha fa oshipangelapundi sha ningwa mosafire, nokoshipangelapundi kwa kuutumba nakukala a fa omuntu.

²⁷ Olupe lwe olwa fa eadhimo lyoshikushu shi li meziko lya hanya. Koombinga adhihe ota tayima uuyelele wo wene.

²⁸ Meadhimo omwa li omalwaala agehe guutamvula. Osho sha li olupe lweadhimo lyOmuwa.

2

¹ Sho nde shi mono, onda tsu oshipala mevi. Ongame nondu uvu ewi tali ti: “Muna gwomuntu, thikama. Onda hala ndi popye nangoye.”

² Ewi manga tali popi, yo ombepo yaKalunga oye ya mungame e tayi yambula ndje po, nonatango ondu uvu ewi tali ti:

³ “Muna gwomuntu, otandi ku tumu kAaisraeli. Oya tsa ondumbo notaa kondjitha ndje sigo onena ndjika, naanaa ngaashi oohekulu ye shi ningi.

⁴ Oyo aatangalali noihaa simaneke ndje nando, onkee tandi ku tumu kuyo, u ya tseyithile shoka ngame, Omuwa Omupangeliawike, tandi ya lombwele.

⁵ Kashi na nee mbudhi, aatangalali mboka ngele otaye ku pulakene nenge itaye ku pulakene, otaa ka tseya kutya omuhunganeki okwa kala mokati kawo.

⁶ “Ihe ngoye, muna gwomuntu, ino ya tila nenge u tile oohapu dhawo. Otaye ke ku nyema noku ku dhina. Oto ka kala wa fa u li mokati koondje. Ihe nando ongeyi, ino tila aanandumbo mboka nenge shaa shoka taa popi.

⁷ Ya lombwela oohapu dhandje, ngele otaa pulakene nenge itaa pulakene. Dhimbulukwa kutya oyo aatangalali.

⁸ “Muna gwomuntu, pulakena shoka tandi ku lombwele. Ino tsa ondumbo u ya fe. Makula okana koye u lye shoka tandi ke ku pa.”

⁹ Onda mono oshikaha sha ganekwa shu ukithwa kungame, nosha li sha yelutha ondhinga yembo.

¹⁰ Oshikaha osha dhingulula ondhinga yembo, nonda dhimbulula kutya oya li ya nyolwa meni nokombanda. Omwa li mwa nyolelwa oontakumandjimbo, omahekumuno nomayemato. Kalunga okwa ti:

3

¹ “Muna gwomuntu, lya po ondhinga yembo ndjika, opo u ye u ka hunganekele Aaisraeli.”

² Onda makula okana kandje, nokwa pe ndje ondhinga yembo, ndi yi lye po.

³ Okwa ti: “Muna gwomuntu, lya po ondhinga yembo ndjika tandi yi ku pe, kutitha nayo ela lyoye.” Onde yi li po, noya li yi na omulyo gwa fa omagadhi goonyushi.

⁴ Kalunga okwa ti: “Muna gwomuntu, inda kAaisraeli, u ya lombwele shoka tandi shi ku lombwele.

⁵ Itandi ku tumu koshigwana shoka hashi popi elaka lyaatakumi, ihe okAaisraeli.

⁶ Ngele otandi ku tumu kiigwana mbyoka hayi popi elaka waa li uvite ko, otaye ke ku pulakena.

⁷ Ihe kape na nando ogumwe gwomAaisraeli ta ka hala a pulakene; nokuli itaa ka pulakena ndje nando. Ayehe oyo aatangalali ye na omanganga.

⁸ Ngashingeyi otandi ku ningi omukukutu wa kindja we ya fa.

⁹ Otandi ke ku ninga omukukutu wa fa emanya nongaashi ondiamande; ino tila aatangalali mboka.”

¹⁰ Kalunga okwa tsikile a ti: “Muna gwomuntu, taamba oohapu dhandje adhihe tandi dhi ku lombwele. Dhi dhimbulukwa nawa.

¹¹ Inda ihe kaapongekwa aakweni, u ya lombwele shoka ngame, Omuwa Omupangeliawike, tandi ya lombwele, ngele otaye ku pulakene nenge aawe.”

¹² Ombepo yaKalunga oya yambula ndje po, nondu uvu konima yandje ewi enene tali ndunduma tali ti: “Hambeleleni esimano lyOmuwa megulu pombanda!”

¹³ Ondu uvu oshihomo shomawawa giinamwenyo, sho tagi idhenge kumwe mewangandjo, nekolokoto lyomagulu lya fa epupo lyekakamo lyevi.

¹⁴ Oonkondo dhOmuwa odha kwata ndje, nOmbepo ye oye enditha ndje, nonda adhika koshinyenu nda geya.

¹⁵ Onde ya kuTel Abib pomulonga Kebar, nkoka kwa kala aapongekwa, nonda kala ko omasiku gaheyali nda kwatwa kushoka nda monene nonde shi uvile.

¹⁶ Omasiku gaheyali sho ga piti po, Omuwa okwa lombwele ndje a ti:

¹⁷ “Muna gwomuntu, otandi ku ningi omulangeli gwoshigwana Israel. Ou na oku ya londodha nomalondodho tandi ge ku lombwele.

¹⁸ Ngele otandi tomona kutya omulunde ota ka sa, ihe ngoye ito mu londodha, i itedhulule nokweetha oondjila dhe oombwinayi, ota ka sila muulunde we, ihe ombinzi ye otandi yi ku pula.

¹⁹ Ngele oto londodha omulunde, a ethe uulunde we, ihe ye ite shi ningi, nena ota ka sila muulunde we, ihe ngoye owa hupitha omwenyo gwoye.

²⁰ “Omuyuuki ngele ote etha uuyuuki we nokuyona, notandi mu tula moshiponga, ota ka sa, ngele ino mu londodha. Ota sile muulunde we, nuuyuuki we itau dhimbulukiwa we, ihe ombinzi ye otandi yi ku pula.

²¹ Ngele oto londodha omuyuuki, opo kaa yone, oye note ku pulakene noita yono, ota kala e na omwenyo, nangoye wa hupitha omwenyo gwoye.”

²² Oshikaha shOmuwa osha li kombanda yandje, oye nokwa lombwele ndje a ti: “Thikama, u ye molusilu. Omo tandi ka popya nangoye.”

²³ Onda yi ihe molusilu, nonda mono eadhimo lyaKalunga, naanaa ngaashi nde li mwene pomulonga Kebar. Onda tsu oshipala shandje mevi,

²⁴ ihe Ombepo yaKalunga oya lambele ndje e tayi thikameke ndje. Omuwa okwa lombwele ndje a ti: “Inda megumbo, u ki iyedhilile mo.

²⁵ Muna gwomuntu, otaye ke ku manga noongodhi, opo kuu pite mo u ye mokati kaantu.

²⁶ Otandi ka lemaneka elaka lyoye, opo waa vule okulondodha aantu mbaka aapandala.

²⁷ Ngele tandi ke ku popitha ishewe notandi ka makula okana koye, nena oto ke ya lombwela shoka ngame, Omuwa Omupangeliawike, tandi ti. Yamwe yomuyo otaa ka pulakena, ihe yamwe itaye ke ku pulakena, oshoka oyo aantu ye na iityani.”

4

¹ Kalunga okwa popi a ti: “Muna gwomuntu, kutha ondhopi, yi tula komeho goye, e to thaneke kombanda yayo oshilando Jerusalem.

² Shi tula ekondeka: shi fulila omukanka, shi ndumbilila omutuni, shi yungila oontanda noku shi kundukidha niikumunithi yekuma.

³ Kutha oshikangwa shosheela e to shi dhike sha fa ekuma pokati keni noshilando. Taalela koshilando. Oshi li mekondeka lyoye. Shika otashi ningi endhindhiliko koshigwana Israel.

⁴ “Langela kolumoho lwoye, ngame notandi ke ku tsika oondjo dhoshigwana Israel. Oto ka kala omasiku 390 to hepekwa omolwoondjo dhawo. Onde ku geelele esiku limwe omolwomumvo gumwe gwepangulo lyaIsrael.

⁵

⁶ Ngele wa vulilwa ko, galukila kolulyo lwoye, u hepekelwe oondjo dhaJuda omasiku omilongo ne — esiku limwe omolwomumvo gumwe gwepangulo lyawo.

⁷ “Omeho goye ga nzanena mo ekondeka lyaJerusalem. Shi takela omunwe, u shi hunganekele.

⁸ Otandi ke ku manga, opo waa wape okugalukila kolupati olukwawo, sigo ekondeka lya piti.

⁹ “Kutha osiima, iishokelya, omakunde, oofukwa, omahangu nosiima yoombo ndatu. Yi ninga oshikwiila shohwangalahwahwa. Shika osho to ka lya omasiku 390, sho wa langela kolumoho.

¹⁰ Oto ka pitikilwa uusila wekopi limwe mesiku, u ninge oshikwiila, notashi kala sigo esiku lya landula ko.

¹¹ Oto ka kala wo u na ondjele yomeya gokunwa, oompamba mbali mesiku.

¹² Ou na okutema omulilo gwomapumba gaantu omakukutu, e to yothele ko oshikwiila montaneho yawo e to shi li po.”

¹³ Omuwa okwa popi a ti: “Shika otashi hungunine Aaisraeli kutya oye na okulya iikulya mbyoka yi indikwa kompango, uuna tandi ya halakanithile niilongo yaapagani.”

¹⁴ Onda yamukula nda ti: “Aawe, Omuwa Omupangeliawike! Kandi na okwiinyateka. Okuza kuunona wandje inandi lya onyama yoshinamwenyo shi isila nenge sha lika kiilikama. Inandi lya nando iikulya ya talika ya nyata.”

¹⁵ Kalunga okwa ti: “Onawa nduno, otandi ku pitika u longithe omapumba goongombe, opo u yothele ko oshikwiila shoye.”

¹⁶ Okwa tsikile ko a ti: “Muna gwomuntu, otandi ka hulitha po okugandja oshikwiila muJerusalem. Aantu yamo otaa ka lulilwa nokusa oshimpwiyu, ngele taa hawalekwa iikulya mbyoka taa li nomeya ngoka taa nu.

¹⁷ Otaa ka sa olunagela molwompumbwe yiikulya nomeya; otaa ki ihupula notaa ka thithonoka po omoluulunde wawo.”

5

¹ Omuwa okwa ti: “Muna gwomuntu, kutha egongamwele lya tsa, u ikulule. Viha omafufu agehe e to ga topola iitopolwa itatu.

² Oshititatu shago shi lungunithila moshilando, ekondeka nge lya piti. Kutha ishewe oshititatu, shi tetagula po negongamwele lyoye e to shi halakanithile pondje yoshilando. Oshihupe shi halakanithila mombepo, ongame notandi shi landulitha egongamwele lya pweywa mo.

³ Thiga po omafufu omashona, u ga dhingile momigoyo dhoonguwo dhoye.

⁴ Kutha ishewe gamwe e to ga umbile meziko, u ga lungunithe po. Okuza kugo omulilo otagu yaka sigo okoshigwana shaIsrael ashihe.”

⁵ Omuwa Omupangeliawike ota ti: “Tala kuJerusalem. Onde mu tula pondingandinga yuuyuni, a kundukwa kiilongo.

⁶ Ihe Jerusalem okwa tsu ondumbo niipango yandje e ti igalaleke uulunde we e vule iigwana yilwe, e vule okwaavulika kwiilongo ye mu kunduka. Jerusalem okwe ekelehi iipango yandje nokwa tindi okudhiginina omautho gandje.

⁷ Jerusalem, pulakena ngashingeyi shoka ngame, Omuwa Omupangeliawike, tandi ti. Omolwashoka inoo vulika koompango dhandje noino dhiginina omautho gandje, owa yono nokuyonenena, u vule iigwana ye ku kunduka. Owa lambalala ontshingo.

⁸ Onkee ano ngame, Omuwa Omupangeliawike, tandi ku lombwele kutya ngame omutondi gwoye. Otandi ke ku pangula epangulo montaneho yiigwana.

⁹ Molwiinima mbyoka wa ningi handi yi tondo, otandi ka geela Jerusalem egeelo inaandi li mu geela nale noitandi ke shi ninga we.

¹⁰ Molwashika aavali muJerusalem otaa ka lya po oyana, naanona otaa ka lya po aakuluntu yawo. Otandi ke mu geela nokuhalakanithila koombinga adhihe mboka ya hupu ko ye na omwenyo.

¹¹ “Onkee ano ngame, ngaashi ndi na omwenyo — ndhika oohapu dhOmuwa Omupangeliawike — oshoka owa nyateke otempeli yandje nuulunde owindji niihuna mbyoka wa ningi, otandi ke ku teta po pwaa na ohenda.

¹² Oshititatu shimwe shaantu yoye otashi ka sa po kelega moshilando; oshititatu oshikwawo otashi ka dhipagwa po komagongamwele pondje yoshilando; noshititatu shahugunina otandi ke shi halakanithila mombepo noku ya landula negongamwele.

¹³ “Oto ka kala u uvite uupyundjahi wandje wa pupyala, sigo tandi geyuluka. Uuna ayihe mbika tayi ningwa, oto ka hempulula kutya ongame Omuwa nde shi ku lombwela, sho nda geyithwa kuukolokoshi woye.

¹⁴ Omupitipo kehe gwomiigwana ye ku kunduka, ote ke ku sheka a thikama kokule.

¹⁵ “Uuna tandi geye muupyundjahi ndi ku pangule, iigwana ayihe ye ku kunduka, otayi ka haluka. Otayi ke ku tala nuunyanyali e tayi ku nyenkele.

¹⁶ Otandi ka hulitha po eloolo lyeni notamu ka sa po kondjala. Otamu ka hepekwa kondjala ya fa iikuti ya upikwa tayi mu hanagula po.

¹⁷ Otandi ka tuma ondjala niilikama yi lye po aana yeni. Otamu ka sa kuuvu nokokutilwahi kwombinzi. Otandi mu undulile iita, yi mu dhipage po. Ongame, Omuwa, nda popi.”

6

¹ Omuwa okwa lombwele ndje a ti:

² “Muna gwomuntu, taalela lwokoondundu dhaIsrael, u dhi lombwele oohapu dhandje.

³ Lombwela oondundu dhaIsrael, dhi pulakene oohapu dhOmuwa — dhi uve shoka ngame, Omuwa Omupangeliawike, tandi shi lombwele oondundu niikulundundu, omakolombongo nomasilu. Otandi ka tuma egongamwele, li hanagule po omahala mpoka aantu haa saagelele iimenka.

⁴ Iiyambelo otayi ka kumunwa po, niiyambelo yiitsinino otayi ka teywa po. Aantu ayehe otaa ka dhipagelwa koshipala shiimenka yawo.

⁵ Otandi ka halakanitha omidhimba dhAaisraeli; iipongo yawo otandi ke yi halakanithila piiyambelo yawo.

⁶ Iilando ayihe yaIsrael otayi ka hanagulwa po, opo iiyambelo yawo ayihe niimenka yawo yi ka nyanyagulwe po; iiyambelo yawo yiitsinino otayi ka teyagulwa po, naayihe mbyoka ya ninga, otayi ka hula po.

⁷ Aantu otaa ka dhipagelwa apehe, naamboka taa ka hupa ko, otaa ka tseya kutya ongame Omuwa.

⁸ “Otandi ka hupitha yamwe, ya hunuke edhipago notaa ka halakanithilwa mokati kiigwana,

⁹ moka taa ka kala aapongekwa. Otaa ka dhimbulukwa ndje nokutseya kutya onde ya geele noinandi ya sila ohenda, oshoka oomwenyo dhawo kadhi na uudhiginini, odhi iteka ndje noya hokwa iimenka peha lyandje. Oyo notaa ka mbilingwa kuuwinayi wawo nokiihuna mbyoka ye yi longo.

¹⁰ Otaa ka tseya kutya ongame Omuwa, nomakumagidho gandje kage shi owala omagandagulo.”

¹¹ Omuwa Omupangeliawike ota ti: “Hakela omake goye, tutulitha oompadhi dhoye. Kuga onkugo omolwiihuna ayihe niilonga yuupwidhi ya longwa kuIsrael. Otaa ka sa kiita, kondjala nokelega.

¹² Mboka yokokule otaa kwatwa kuuvu e taa si; mboka yopopepi otaa ka dhipagelwa molugodhi; mboka taa hupu ko, otaa ka sa po kondjala. Otaa ka uva uupyundjahi wandje.

¹³ Omidhimba otadhi halakanene mokati kiimenka, dha kunduka iiyambelo, dha halakanena koshikulundundu kehe oshile, koondungu dhoondundu, momuzile gwomuti kehe omutalala nomomwandi kehe omunene — opehala kehe mpoka ya li haa yambele iimenka iitsinino. Nena shaa ngoka ota ka tseya kutya ongame Omuwa.

¹⁴ Eeno, otandi ka tagananeka oshikaha shandje notandi hanagula po oshilongo shawo. Otandi ke shi mbugaleka okuza kombuga yokuumbugantu sigo okoshilando Ribla muumbangalantu. Itandi ka hupitha nando ehala limwe lya kalwa kAaisraeli. Otaa ka tseya kutya ongame Omuwa.”

7

¹ Omuwa okwa lombwele ndje a ti:

² “Muna gwomuntu, shika osho shoka ngame, Omuwa Omupangeliawike, tandi shi lombwele oshilongo Israel: Ndika olyo ehulilo lyoshilongo ashihe!

³ “Israel, ehulilo olya hedha ko. Oto ka mona ondjahi yandje, oshoka otandi ke ku pangulila shoka wa longo. Otandi ke ku futila iilonga yiihuna ayihe we yi longo.

⁴ Itandi ku hunutha nenge ndi ku sile ohenda. Otandi ke ku geelela iilonga yiihuna we yi longo, opo u ka tseye kutya ongame Omuwa.”

⁵ Omuwa Omupangeliawike ota ti: “Iiponga otayi ke ku adha ya hukilathana.

⁶ Opuwo ihe. Ehulilo olye ya. Olya thikana.

⁷ Ehulilo otali adha aantu yoye mboka ya kala moshilongo. Ethimbo olya thikana, uuna itaaku ka kala we iituthi pomahala giinonoma koondundu, evundakano ashike.

⁸ “Nziyanziya oto ka uva uupyundjahi wandje. Otandi ke ku pangulila shoka wa longo. Otandi ke ku futila iilonga yiihuna ayihe we yi longo.

⁹ Itandi ku katutha nenge ndi ku sile ohenda. Otandi ke ku geelela iilonga yiihuna mbyoka we yi longo, opo u ka tseye kutya ongame Omuwa, nongame tandi ku geele.”

¹⁰ Esiku lyoshiponga olya adha Israel. Iikolokosha oya vuka unene. Einenepeko olya tumbalala.

¹¹ Iikolokosha oya ningi ondhimbo yokudhengitha aakaanakalunga. Muyo itamu ka hupa nando olye, noitaa thigilwa sha shomuuyamba wawo, omutumbo nenge esimano lyawo.

¹² Esiku otali ya. Esiku oli li popepi, uuna okulanda sha nokulanditha po sha itaku ti we sha, oshoka egeelo lyaKalunga otali ka hwamena oshigwana ashihe.

¹³ Kape na omuhalithi ta ka kala e na olweedhe, a ka shune kushoka a landitha po nale, oshoka ondjahi yaKalunga otayi ka lambela ayehe. Aakolokoshi itaa ka hupa ko.

¹⁴ Omankuma taga lili, noshaa ngoka oti ilongekidha. Ihe kape na ngoka ta yi kiita, oshoka ondjahi yaKalunga otayi lambele ayehe oshita.

¹⁵ Omalugodhi oge li momapandaanda, uuvu nondjala oyi li momagumbo. Shaa ngoka ta zi moshilando, ota ka sila molugodhi, noshaa ngoka ta kala moshilando, ota ningi omulape gwondjala nuuvu.

¹⁶ Yamwe otaa ka fadhukila koondundu ya fa oonguti dha haluthwa tadhi zi mo mesilu. Ayehe yomuyo otaa ka kemena uulunde wawo.

¹⁷ Iikaha yaayehe otayi yululuka, noongolo dhawo otadhi ka kakama.

¹⁸ Otaa ka zala omahahi yo taa kakama kuumbanda. Omitse dhawo otadhi ka kululwa, noyo ayehe otaa ka sithwa ohoni.

¹⁹ Otaa ka ekelahi iingoli yawo niisiliveli momapandaanda ngaashi iinyakwi, oshoka oshingoli noshisiliveli itashi ya hupitha, uuna Omuwa te ya poolele ondjahi ye. Itaye shi longitha ya kutithe oomwenyo dhawo nenge ya udhithe omala gawo. Oshingoli noshisiliveli oshe ya fala muulunde.

²⁰ Nale oya li yi itangele iipako yawo yoshingoli, oye yi hambula iimenka iinyanyalithi. Omolwashoka Omuwa a etha uuyamba wawo u ya kunkute.

²¹ Omuwa ota ti: “Otandi pitika aakwiilongo ye ya yuge, naakolokoshi otaa ka kutha po uuyamba wawo auhe noku u nyateka.

²² Itandi ka keelela nande otempeli yandje ondjapuki yi shundulwe, uuna aayugi taa gwayele mo noku yi nyateka.

²³ “Shaa shoka osha vundakana — oshilongo oshu udha aadhipagi, niilando oyu udhilila uukolokoshi.

²⁴ Otandi eta po aantu aadhudhu, notaa lala omagumbo geni. Aalumentu yeni aanankondolela otaa ka kanitha uuntsa wawo, uuna tandi ka etha iigwana yi shundule omahala geni gomalongelokalunga.

²⁵ Eihupulo otali ya. Otamu ka konga ombili, ihe itamu yi mono.

²⁶ Iiponga otayi ya ya hukilathana nomukungu gwoonkundana oombwinayi otagu iyetelele mo. Otamu ka pula aahunganeki, ye mu hololele shoka ya mono shokomeho. Aayambi itaa ka kala ye na sha ye shi longe aantu, naawiliki itaa ka kala ye na omayele gasha ye ga gandje.

²⁷ Omukwaniilwa ota ka lila, elenga otali kanitha etegameno, noshigwana otashi ka kakama kuumbanda. Otandi ke ku pangulila ayihe mbyoka wa longo, notandi ke ku tokolela, ngaashi wa longele yakweni. Shika otashi ke ku ulukila kutya ongame Omuwa.”

8

¹ Mesiku etitano lyomwedhi omutihamano gwomumvo omutihamano guupongekwa, aawiliki yaapongekwa Aajuda oya li ya kuutumba megumbo lyandje pamwe nangame. Ohaluka oshikaha shOmuwa Omupangeliawike oshe ya kombanda yandje.

² Onda keuka nonda mono emoniko lyolupe lwomuntu ta adhima. Okuza moombwetelo dhe okuuka pohi olutu olwa fa omulilo, okuza moombwetelo okuuka pombanda ota tayima a fa oshikushu sha kwehulwa.

³ Okwa ganeke sha sha fa oshikaha e ta kwata ndje komafufu. Ombepo yaKalunga oya yambula ndje po noya fala ndje pombanda meyalelo e tayi fala ndje kuJerusalem. Oya fala ndje mosheelo shokuumbangalantu shehale lyaayambi lyomotempeli, moka mwa li oshimenka shokutukula ondjahi yaKalunga.

⁴ Onda mono mo eadhimo lyaKalunga naanaa ngaashi nde li mwene pomulonga Kebar.

⁵ Kalunga okwa lombwele ndje a ti: “Muna gwomuntu, taalela lwokuumbangalantu.” Onda tala, lwokuumbangalantu wosheelo shoshiyambelo onda mono oshimenka shokutukula ondjahi yaKalunga.

⁶ Kalunga okwa lombwele ndje a ti: “Muna gwomuntu, ou wete tuu shoka tashi ningwa? Tala kiilonga yiihuna tayi longwa kAaisraeli mpaka, tayi tidhile ndje kokule nehala lyandje eyapuki. Natango oto ka mona iilonga yiihuna yi vule mbika.”

⁷ Okwa fala ndje posheelo shehale enene e tu ulukile ndje ombululu mekuma.

⁸ Okwa ti: “Muna gwomuntu, gwaya mekuma.” Onda gwaya mulyo e te mono omweelo.

⁹ Okwa lombwele ndje a ti: “Inda mo, u tale iilonga yiihuna iinene mbyoka taa longo.”

¹⁰ Onda yi mo nonda tala. Omakuma oga li ga thanekwa omayoka niinamwenyo yoshidhila niimenka ayihe mbyoka hayi longelwa kAaisraeli.

¹¹ Okwa li aawiliki yaIsrael omilongo heyali, pamwe naJaazania yaShafan. Shaa ngoka okwa li a yelutha oshitsininitho, nolwithi olwa li talu tsinagala talu zi moshitsininitho.

¹² Kalunga okwa pula ndje a ti: “Muna gwomuntu, ou wete tuu shoka aawiliki yAaisraeli taa longo meholamo? Otaa ningi elongelokalunga mongulu yu udha omathano giimenka. Otaa dhiladhila: ‘Omuwa ke tu wete. Omuwa okwa thigi po nale oshilongo shika.’ ”

¹³ Omuwa okwa lombwele ndje a ti: “Oto ke ya mona, sho taa longo iihuna yi vulithe mpoka.”

¹⁴ Okwa fala ndje komweelo gwotempeli gwokuumbangalantu e tu ulukile ndje aakulukadhi taa lili oosa dhoshikalunga Tammuz.

¹⁵ Okwa pula ndje a ti: “Muna gwomuntu, ou shi wete tuu? Oto ka mona iihuna yi vulithe mpoka.”

¹⁶ Oye nokwa fala ndje kehale lyaayambi motempeli. Hwiyaka, popepi neelo lyotempeli, pokati koshiyambelo nomukala, opwa li aasamane ye thike ando pomilongo mbali nayatano. Oya li ya pilamena otempeli, ya nyongama ya taalela lwokuuzilo, taa simaneke etango sho tali piti.

¹⁷ Omuwa okwa lombwele ndje a ti: “Muna gwomuntu, ou shi wete tuu? Aajuda mbaka inashi ya gwanena, sho taa longo iihuna mbyoka to mono mpaka notaa taandelitha uukolokoshi noshilongo ashihe. Aawe, otaye ya notaye yi longo motempeli yo yene notaa geyitha ndje unene. Tala, nkene taa hindi pamukalo gu kenyeneka.

¹⁸ Otaa ka uva uupyundjahi wandje. Itandi ke ya hututha nenge ndi ya sile ohenda. Otaa ka galikana ndje nokukuga ngaashi taa vulu, ihe itandi ke ya pulakena.”

9

¹ Ondu uvu Kalunga ti igidha ta ti: “Ileni huka, one tuu mboka tamu geele oshilando shika. Eteleleni omatati geni.”

² Ohaluka aalumentu yahamano oya ziilile pondje kosheelo shotempeli shokuumbangalantu, shaa ngoka oku na uutati. Puyo opwa li omulumentu a zala oonguwo dholiina nepaya li na okakende kohinga. Oye ya e taa thikama poshiyambelo shoshikushu.

³ Eadhimo lyaKalunga kaIsrael olya yeluka kombanda yaakerubi nolyu uka keelo lyotempeli. Omuwa okwi ithana omulumentu ngoka a zala oonguwo dholiina e ta ti:

⁴ “Enda Jerusalem ashihe, u ndhindhilike endhindhiliko moshipala shashaa ngoka ta keme nokwa lulilwa molwiihuna ayihe mbyoka tayi longwa moshilando.”

⁵ Ondu uvu sho Kalunga ta lombwele aalumentu yalwe ta ti: “Mu landulileni moshilando, mu ka dhipage. Inamu hunutha nando ogumwe; inamu sila nando ogumwe ohenda.

⁶ Dhipageni aasamane, aamati, aafuko, aakulukadhi oonzinzi naanona. Ihe mboka ye na endhindhiliko, inamu ya guma. Tamekeni potempeli yandje.” Osho ngaaka ya tameke paawiliki mboka ya li ya thikama potempeli.

⁷ Kalunga okwe ya lombwele a ti: “Nyatekeni otempeli. Omahale gayo gu udhitheni omidhimba. Ka longeni!” Osho ngaaka ya tameke okudhipaga aantu moshilando.

⁸ Manga ya li taa dhipaga, ngame onda thigwa po awike. Ondi ihata po nda tsa oshipala shandje mevi nondi igidha nda ti: “Omuwa Omupangeliawike, oto geele Jerusalem e to dhipaga po ayehe muIsrael?”

⁹ Kalunga okwa yamukula a ti: “Aaisraeli nAajuda oye na ondjo yuulunde uunene. Oya dhipaga po ayehe moshilongo noyu udhitha Jerusalem uukolokoshi. Otaa ti ngame Omuwa onda thigi po oshilongo shawo nokandi ya wete we.

¹⁰ Ihe itandi ya sile nando ohenda, otandi ya ningile shoka ye shi ningile yakwawo.”

¹¹ Omulumentu ngoka a zala oonguwo dholiina, okwa shuna nokwe shi hokololele Omuwa a ti: “Onda gwanitha oohapu dhoye.”

10

¹ Onda tala kondunda komitse dhiinamwenyo yomawawa nokombanda yayo okwa li sha sha fa oshipangelapundi sha ningwa memanya lyosafire.

² Kalunga okwa lombwele omulumentu ngoka a zala oonguwo dholiina a ti: “Inda pokati komagulutemba kohi yiinamwenyo e to udhitha omake goye nomakala ga hanya. Ga halakanithila noshilando.” Onde mu tongolola, sho ta yi.

³ Iinamwenyo yomawawa oya li ya thikama kuumbugantu wotempeli, sho a yi mo, oshikogo oshu udha ehale lyaayambi.

⁴ Eadhimo lyOmuwa olya yeluka kombanda yaakerubi lyu uka kosheelo shotempeli, nomehale omwa li mwa udha uuyelele.

⁵ Oshihomo shomawawa gaakerubi osha li shu uvika sigo okehale enene. Osha li tashi pupu sha fa ewi lyaKalunga Omunankondoawike.

⁶ Omuwa sho a lombwele omulumentu ngoka a zala oonguwo dholiina, a kuthe omakala gamwe mokati komagulutemba ngoka ga li kohi yaakerubi, omulumentu okwa yi mo e ta thikama pokugulu kumwe.

⁷ Omukerubi gumwe okwa tula oshikaha she momulilo ngoka gwa li mokati kawo, a kutha mo omakala gamwe e te ga tula miikaha yomulumentu ngoka a zala oonguwo dholiina. Omulumentu okwa taamba omakala gomulilo e ta yi.

⁸ Kohi yewawa kehe lyomukerubi okwa monika sha sha fa oshikaha shomuntu.

⁹ Onda mono wo kutya okwa li ku na omagulutemba gane ga faathana, kumwe okombinga yomukerubi kehe. Omagulutemba otaga adhima ga fa emanya lyokrisoliti, noshaa hoka okwa li ku na okugulutemba okukwawo hoka kwe ku shigakana mokati.

¹⁰

¹¹ Aakerubi nge taa yi, otaa vulu okuuka shaa hoka inaa punguluka. Otaa uka kombinga ndjoka ya hala okuya pwaa na epunguluko lyasha.

¹² Omalutu gawo, oombunda, omaako, omawawa nomagulutemba ogu udha omeho.

¹³ Omagulutemba ngaka oga li ga faathana naangeyaka nda mwene memoniko lyotango.

¹⁴ Omukerubi kehe okwa li e na iipala ine, shimwe oshongombe, shimwe oshomuntu, shimwe oshonime nashimwe oshekodhi.

¹⁵ (Aakerubi mbaka oyo ngaa mbeyaka nda mwene pomulonga Kebar.) Aakerubi ngele taa yelukile mewangandjo

¹⁶ notaa yi, omagulutemba otage ende pamwe nayo. Uuna taa yalaleke omawawa gawo taa tuka, omagulutemba inaga thigala po.

¹⁷ Uuna aakerubi taa kankama, omagulutemba otaga kankama wo; uuna aakerubi taa tuka, omagulutemba otaga yi pamwe nayo, oshoka aakerubi taye ga utha.

¹⁸ Eadhimo lyOmuwa nolya zi po posheelo shotempeli nolya yi kombanda yaakerubi.

¹⁹ Oya yalaleke omawawa gawo e taa tuka po pevi, manga nde ya tongolola, nomagulutemba oga yi pamwe nayo. Oya kankama pomweelo gwotempeli gwokuuzilo, neadhimo olya li kombanda yawo.

²⁰ Onde ya dhimbulula kutya oyo aakerubi mbeyaka nda mwene kohi yaKalunga kaIsrael pomulonga Kebar.

²¹ Shaa ngoka okwa li e na iipala ine nomawawa gane, nokewawa kehe okwa li ku na sha sha fa oshikaha shomuntu.

²² Iipala yawo oya li ya fa naanaa iipala mbiyaka nda mwene pomulonga Kebar. Shaa ngoka okwe ende u ukilila komeho.

11

¹ Ombepo yOmuwa oya yelutha ndje po, noya fala ndje komweelo gwotempeli gwokuuzilo. Pomweelo onda mono po aalumentu omilongo mbali nayatano ye li pamwe naJaazania yaAssur naPelatia yaBenaia, aawiliki yoshigwana yaali.

² Kalunga okwa lombwele ndje a ti: “Muna gwomuntu, aalumentu mbaka otaa dhiladhila omadhiladhilo omawinayi e taa gandja omayele omawinayi moshilando shika.

³ Otaa ti: ‘Otatu ka tunga po omagumbo ishewe mbala. Oshilando osha fa ombiga tayi yaya, notse otwa fa onyama yi li muyo.’

⁴ Ngashingeyi ya hunganekela, ngoye omuna gwomuntu.”

⁵ Ombepo yOmuwa oya lambele ndje nokwa lombwele ndje ndi faalele aantu elaka tali ti: “Aaisraeli ne, ondi shi shi shoka tamu popi naashoka tamu dhiladhila.

⁶ Omwa dhipaga aantu oyendji moshilando, sigo omapandaanda gu udha omidhimba.

⁷ “Onkee ano ngame, Omuwa Omupangeliawike, tandi lombwele oshilando shika kutya osho naanaa ombiga ndjoka tayi yaya, ihe onyama oshike? Oyo omidhimba dhaamboka mwe ya dhipaga! Itamu ka kala po mpaka — otandi ke mu umbila pondje yoshilando!

⁸ Omwa tila egongamwele, ihe otandi ka eta mboka taye mu ponokele ye na omagongamwele.

⁹ Otandi ke mu fala pondje yoshilando noku mu gandja kaakwiilongo. Onde mu tokolela eso,

¹⁰ notamu ka dhipagelwa molugodhi moshilongo sheni yene. Shaa ngoka ota ka tseya kutya ongame Omuwa.

¹¹ Oshilando shika itashi ke mu gamena, ngaashi ombiga tayi gamene onyama yi li muyo. Otandi ke mu geela shaa mpoka mu li moshilongo Israel.

¹² Otamu ka tseya kutya ongame Omuwa — one mboka mwa yono oompango dhandje noinamu vulika komautho gandje, ihe omwa dhiginine oohedhi dhiigwana ye mu kunduka.”

¹³ Manga nda li tandi hunganeke, ye Pelatia yaBenaia okwi ihata pevi omukukutu. Ondi ihata po nda tsu oshipala mevi e tandi igidha te ti: “Aawe, Omuwa Omupangeliawike! Oto ka dhipaga po shaa ngoka a hupu muIsrael?”

¹⁴ Omuwa okwa lombwele ndje a ti:

¹⁵ “Muna gwomuntu, aantu mboka ye li muJerusalem, otaye ku popi nAaisraeli ooyakweni mboka mwa kala nayo muupongekwa. Otaa ti: ‘Aapongekwa oye li kokule unene okulongela Omuwa. Omuwa okwe tu pe evi ndika, li kale eliko lyetu.’

¹⁶ “Ngashingeyi lombwela aapongekwa ooyakweni shoka tandi popi. Ongame mwene nde ya tumu, ya ka kale kokule mokati kiigwana noku ya halakanithila miilongo yilwe. Onkene tuu ethimbo ndyoka taa kala ko, otandi ka kala pamwe nayo momavi moka ya kala mo.

¹⁷ “Onkee ya lombwela shoka ngame, Omuwa Omupangeliawike, tandi ti. Otandi ya kongolola ko kiilongo ayihe hoka nde ya halakanithile ko, notandi ke ya galulila kevi lyaIsrael.

¹⁸ Uuna taa shuna, otaa ka kanyutuka ko kiimenka ayihe yi sitha ohoni noyi nyanyalitha.

¹⁹ Otandi ke ya pa omwenyo omupe nombepo ompe. Otandi ke ya kutha omutimamanya notandi ya pe omwenyo hagu vulika.

²⁰ Otaa ka vulika koompango dhandje nokudhiginina omautho gandje agehe. Otaa ka ninga aantu yandje, ongame note kala Kalunga kawo.

²¹ Ihe otandi ka geela aantu mboka ye hole okusimaneka iimenka iisithahoni niinyanyalithi. Otandi ke ya geelela shoka ya longo.” Omuwa Omupangeliawike a popi.

²² Aakerubi oya tuka po, nomagulutemba oga yi wo pamwe nayo. Eadhimo lyaKalunga kaIsrael olya li lye ya siikila.

²³ Eadhimo lyaKalunga nolya thigi po oshilando e tali yi kondundu yokuuzilo washo.

²⁴ Memoniko Ombepo yaKalunga oya yambula ndje po e tayi eta ndje kaapongekwa muBabilon. Opo ihe emoniko olye etha ndje,

²⁵ nonda hokololele aapongekwa ayihe mbyoka Omuwa a ulukile ndje.

12

¹ Omuwa okwa lombwele ndje a ti:

² “Muna gwomuntu, owa kala mokati kaantu aanandumbo. Oye na omeho, ihe kaye wete ko; oye na omakutsi, ihe kayu uvite ko, oshoka oyo aatangalali.

³ “Muna gwomuntu, manga ngashingeyi omutenge wa fa ontauki e to piti mo komatango. Monika kwaayehe, sho to yi kehala lilwe. Otashi vulika aatangalali taye ku koneke.

⁴ Manga inaaku wiwila, manga omutenge gwoye okuya muupongekwa, opo ya wape ye ku mone. Ongulohi naye ku tongolole ihe, sho to yi wa fa to yi muupongekwa.

⁵ Manga ye ku tongolola, tsa ombululu mekuma lyongulu yoye e to pitile mo wa humbata omutenge gwoye.

⁶ Naye ku tongolole, sho to itsike omutenge noto zi mo wa uka momilema wi isiikila komeho, opo kuu mone ho wa uka. Shoka to ningi, otashi kala elondodho kAaisraeli.”

⁷ Onda ningi shoka Omuwa a lombwele ndje ndi shi ninge. Esiku ndyoka onda manga omutenge, ngaashi ontauki hayi ningi, nongulohi ndjoka sho taku luudha, onda tsu ombululu mekuma niikaha yandje e te piti mo. Manga ayehe ye shi tongolola, ondi itsike omutenge e te yi.

⁸ Ongula yanakwasha Omuwa okwa lombwele ndje a ti:

⁹ “Muna gwomuntu, ngashingeyi sho Aaisraeli mbaka aanandumbo taye ku pula shoka to ningi,

¹⁰ ya lombwela shoka tandi ya lombwele, ngame, Omuwa Omupangeliawike. Elaka ndika nali lombwelwe elenga ndyoka tali lele muJerusalem naantu ayehe ye li mo.

¹¹ Ya lombwela kutya shoka wa ningi, osho ehunganeko lyaashoka taa ka ningilwa — otaa ka ninga oontauki noonkwatwa.

¹² Omupangeli ngoka te ya lele, ote ki itsika omutenge gwe momilema e ta fadhuka po ta pitile mombululu ndjoka ye yi mu hokele mekuma. Ota ka siikila omeho ge noita mono hoka ta yi.

¹³ Ihe otandi ka tega omwigo, notagu mu yulu. Otandi ke mu fala koshilando Babilon, nkoka ta ka sila inee shi mona.

¹⁴ Aambala naalangeli ye ayehe otandi ke ya halakanithila koombinga adhihe, naantu otaye ke ya konga, ye ya dhipage.

¹⁵ “Uuna tandi ya halakanithile mokati kiigwana yilwe, nomiilongo yaakwiilongo, otaa ka tseya kutya ongame Omuwa.

¹⁶ Aashona yomuyo otandi ke ya hupitha ko kiita, kondjala nokoshivu, opo ya ka hokolole mokati kiigwana, nkene ya longo iihuna yi nyanyalitha, notaa ka tseya kutya ongame Omuwa.”

¹⁷ Omuwa okwa lombwele ndje a ti:

¹⁸ “Muna gwomuntu, nge to li, kakama, nou dhekwete kuumbanda, uuna to nu.

¹⁹ Lombwela oshigwana ashihe kutya elaka ndika Omuwa Omupangeliawike ote li lombwele Aajerusalem mboka ye li natango moshilongo shawo: Otaa ka kakama, nge taa li notaa dhekweta kuumbanda, nge taa nu. Oshilongo shawo otashi ka mbugala, oshoka ayehe ye li mo, otaa kolokosha

²⁰ Iilando mbyoka yu udha aantu ngashingeyi, otayi ka hanagulwa po, noshilongo otashi ka ninga eputu. Nena otaa ka tseya kutya ongame Omuwa.”

²¹ Omuwa okwa lombwele ndje a ti:

²² “Muna gwomuntu, omolwashike Aaisraeli haa ifola meyeletumbulo ndika: ‘Omasiku otaga ka pita, nomamoniko itaga eta sha?’

²³ Ngashingeyi ya lombwela shoka ngame, Omuwa Omupangeliawike, ndi na oku shi popya. Otandi hulitha po eyeletumbulo ndyoka. Itali ki ifolwa we muIsrael. Peha lyalyo ya lombwela: ‘Omasiku otage ya, uuna emoniko kehe tali ka gwanithwa.’

²⁴ “Mokati kAaisraeli itamu ka holoka we omamoniko giifundja nenge omahunganeko taga pukitha.

²⁵ Ongame, Omuwa Omupangeliawike, tandi ke ya lombwela, naashoka tandi ti, otashi ka gwanithwa. Itaku ka kala we eshelelelwo. Aatangalali ne, mokukalamwenyo kweni otandi ka gwanitha ashihe shoka nda popi.” Omuwa osho ta ti.

²⁶ Omuwa okwa lombwele ndje a ti:

²⁷ “Muna gwomuntu, Aaisraeli otaa dhiladhila kutya omamoniko goye nomahunganeko goye oge li monakuyiwa.

²⁸ Onkee ano ya lombwela kutya ngame, Omuwa Omupangeliawike, ote ti: ‘Kaku na nando ohapu yandje tayi gwile pevi. Shoka nda popi, otashi ka gwanithwa.’ Ongame, Omuwa Omupangeliawike nda popi.”

13

¹ Omuwa okwa lombwele ndje a ti:

² “Muna gwomuntu, hunganekela aahunganeki yaIsrael mboka haa hunganeke momitse dhawo yene. Ya lombwela ya pulakene oohapu dhOmuwa.”

³ Omuwa Omupangeliawike ota popi ta ti: “Yaye aahunganeki mbaka aagoya! Otayi inwetha mo yo yene e taa landula omamoniko gawo yene.

⁴ Aaisraeli ne, aahunganeki yeni oyowala, ya fa uululunga wa kala momakulukuma goshilando.

⁵ Inamu langela omakulukuma ne inamu ga tungulula. Osho ngaaka Israel ita vulu okwiipopila, uuna iita tayi ya mesiku lyOmuwa.

⁶ Omamoniko gawo ogiifundja, nomahunganeko gawo oganakalindi. Otaa uvitha taa ti, otaa popi etumwalaka lyandje, ihe ngame inandi ya tuma nando. Natango otaa tegelele, oohapu dhawo dhi tse.

⁷ Ya lombwela kutya omamoniko ngoka taa mono, ogiifundja, nomahunganeko gawo oganakalindi. Otaa uvitha taa ti oohapu odhOmuwa, ihe ngame inandi ya lombwela nando osha.”

⁸ Onkee ano Omuwa Omupangeliawike ote ya lombwele ngeyi: “Oohapu dheni odhiifundja, nomamoniko geni oganakalindi. Onda tsa ondumbo nane.

⁹ Otandi ka geela aahunganeki yeni mboka ya mono omamoniko giifundja notaa hunganeke omahunganeko ganakalindi. Itaa ka kala megongalo lyaantu yandje, omadhina gawo itaga ka kala membo lyaakwashilongo yaIsrael noitaa ka galukila we koshilongo shawo. Nena otamu ka tseya kutya ongame Omuwa Omupangeliawike.

¹⁰ “Aahunganeki otaa pukitha oshigwana shandje, sho taa ti, ayihe oyi li nawa. Nonando ayihe kayi li onawa! Aantu yandje oya tungu ekuma inaali kola, naahunganeki oye ya e taye li kolongitha okaalaka.

¹¹ Lombwela aahunganeki kutya ekuma lyawo otali ka gwa po. Otandi ka lokitha omvula yepoola. Oompawe otadhi ke li loka, nombepo yepukutula otayi ke li pepa po.

¹² Ekuma otali ka teka po, noshaa ngoka ote ke ku pula: ‘Okukolongitha okaalaka okwa kwatha shike?’ ”

¹³ Onkee ano Omuwa Omupangeliawike ota ti: “Mondjahi yandje otandi ka tuma ombepo yoshikungulu, omvula yepoola noompawe dhi hanagule po ekuma ndyoka.

¹⁴ Onda hala okukumuna po ekuma ndyoka lya kolongwa nokaalaka, oku li teya po nokuthiga po omakankameno ge li puuyelele. Ekuma otali ka ongotela pevi notali mu dhipaga po amuhe. Nena shaa ngoka ota ka tseya kutya ongame Omuwa.

¹⁵ “Ekuma naamboka ye li kolongitha okaalaka, otaa ka uva uupyundjahi wandje. Otandi ke mu lombwela kutya ekuma kali po we nosho wo mboka ye li kolongele nokaalaka —

¹⁶ aahunganeki yaIsrael mboka ya hunganekele Jerusalem kutya oku na ombili, nando kape na nando ombili.” Omuwa Omupangeliawike a popi.

¹⁷ Omuwa okwa ti: “Muna gwomuntu, ngashingeyi tala aakiintu mokati kaantu yoye mboka taa hunganeke. Ya hunganekela,

¹⁸ u ya lombwele shoka Omuwa Omupangeliawike te ya lombwele ta ti: “Yaye aakiintu ne! Otamu zaleke aantu iigegeti piikesho, notamu tungile aantu omawiiwili gokomitse, opo ya kale ya pula. Omwa hala mu kale mwa lya omayuku, opo mu kaleke aantu nomwenyo nenge mu ya lye po, nomu shi ningile uuwanawa weni yene.

¹⁹ One otamu sheke ndje montaneho yaantu yandje, opo mu mone eshambekela lyiishokelya nuupambu woshikwiila. Otamu dhipaga aantu mboka inaa ilongela eso, notamu hupitha aantu mboka inaa gwana okukala ye na omwenyo. Otamu lombwele aantu yandje iifundja notaye mu itaale.”

²⁰ Omuwa Omupangeliawike ota popi ta ti: “Otandi tondo iigegeti mbyoka mwa zala moonkambadhala mu uthe omwenyo neso. Otandi ke yi tokagula ko komaako geni nokumangulula aantu mboka tamu hehelele.

²¹ Otandi ka tuula omawiiwili geni e tandi etha aantu yandje ya hunuke miikaha yeni noitaa ka shuna mo we sigo aluhe. Nena otamu ka tseya kutya ongame Omuwa.

²² “Iifundja yeni oya tyololokitha aantu aawanawa, mboka inaandi dhiladhila ndi ya ninge sha. Otamu keelele aawinayi ye ethe uuwinayi, opo oomwenyo dhawo dhi hupithwe.

²³ Ngashingeyi omamoniko geni giifundja nomahunganeko geni gomapukitho ga hulu po. Otandi hupitha aantu yandje miikaha yeni, opo mu tseye kutya ongame Omuwa.”

14

¹ Aawiliki yamwe yaIsrael oye ya kungame, ya pule ehalo lyOmuwa.

² Nena Omuwa okwa lombwele ndje a ti:

³ “Muna gwomuntu, aantu mbaka oya gandja oomwenyo dhawo kiimenka yi ya fale muulunde. Otaa dhiladhila, ndi ya yamukule?

⁴ “Ya lombwela shoka ngame, Omuwa Omupangeliawike, tandi ya lombwele: Omuisraeli kehe ngoka i igandjela iimenka noye mu falitha muulunde, ngele ote ya a pule omuhunganeki, ota ka mona eyamukulo lya za kungame — eyamukulo olyo ndyoka iimenka ye ye li ilongele!

⁵ Iimenka ayihe mbyoka oya pukitha Aaisraeli, ihe keyamukulo lyandje otandi ka sinda einekelo lyawo.

⁶ “Onkee ano ngashingeyi lombwela Aaisraeli shoka ngame, Omuwa Omupangeliawike, tandi ti: Galukeni nomu ethe iimenka yeni yi nyanyalitha.

⁷ “Kashi na nee ombudhi, na kale oye Omuisraeli nenge oye omukwiilongo ngoka a kala megongalo lyaIsrael nokwa pilamene ndje e ta simaneke iimenka nota yi a ka pule omuhunganeki, ongame, Omuwa, tandi mu pe eyamukulo!

⁸ Otandi ke mu kondjitha. Otandi ke mu ninga elondodhitho. Otandi mu kondo megongalo lyaantu yandje, opo mu tseye kutya ongame Omuwa.

⁹ “Omuhunganeki ngele ota kotokelwa a yamukule eyamukulo lyiifundja, osha ningwa, oshoka ongame mwene, Omuwa, nde mu pukitha. Otandi mu kondo mo mAaisraeli,

¹⁰ Ayehe yaali, omuhunganeki naangoka ta pula omayele, otaa geelwa sha faathana.

¹¹ Shika otandi shi ningi, opo ndi keelele Aaisraeli yaa ethe ndje noyi inyatekele muulunde wawo. Oye na okukala aantu yandje, nangame ote kala Kalunga kawo.” Omuwa Omupangeliawike oye a popi.

¹² Omuwa okwa lombwele ndje a ti:

¹³ “Muna gwomuntu, ngele oku na oshilongo tashi yono noitashi inekele ndje, otandi ka taganeka okwooko kwandje nokuhanagula po olunza lwasho lwiikulya. Otandi tumu ondjala, yi lye po aantu niimuna.

¹⁴ Nonando mu kale aalumentu mbaka yatatu, Noa, Daniel naJob, uuyuuki wawo otau hupitha oomwenyo dhawo adhike.” Omuwa Omupangeliawike oye a popi.

¹⁵ “Nenge ondi na okutuma iilikama, yi lye po aantu, notayi etele oshilongo oshiponga, opo pwaa kale ngoka te shi taakana,

¹⁶ nonando mu kale aalumentu mboka yatatu — oshili ngaashi ngame Omuwa Omupangeliawike, Kalunga omunamwenyo — itaa vulu okuhupitha nando oyana. Otaa hupitha ashike oomwenyo dhawo yene, noshilongo otashi ka ninga eputu.

¹⁷ “Nenge ondi na okutuma iita moshilongo shoka nokugandja omatati ga dhipage po aantu niimuna,

¹⁸ nonando aalumentu mboka yatatu ya kale mo — oshili ngaashi ngame Omuwa Omupangeliawike, Kalunga omunamwenyo — itaa vulu okuhupitha nando oyana, oomwenyo dhawo adhike.

¹⁹ “Ngele oshilongo shoka tandi shi tumine elega, nomondjahi yandje te kutha po oomwenyo odhindji, te dhipaga aantu niimuna,

²⁰ nonando mu kale Noa, Daniel naJob — oshili ngaashi ngame Omuwa Omupangeliawike, Kalunga omunamwenyo — itaa vulu okuhupitha nando oyana. Uuyuuki wawo otau hupitha ashike oomwenyo dhawo.”

²¹ Omuwa Omupangeliawike ota popi ta ti: “Jerusalem otandi shi tumine omageelo gandje gane omadhigulela: iita, ondjala, iilikama nelega, ga hanagwe po aantu niimuna.

²² Ngele oku na ngoka ta hupu ko e ta hupitha oyana, ya koneka sho taa ya kungoye. Tala, nkene oyo aalunde, opo u dhimbulule kutya egeelo ndyoka tandi geele nalyo Jerusalem, olyopauyuuki,

²³ noto ka koneka kutya nani ashihe shoka nda longo, osho opala.” Omuwa Omupangeliawike oye a popi.

15

¹ Omuwa okwa lombwele ndje a ti:

² “Muna gwomuntu, omuviinu otagu yelekwa ngiini nomuti? Oshimpona shomuviinu oshi na shike shi vulithe omuti gwomomugulu?

³ Oto vulu oku shi longitha? Oto vulu oku shi ninga nando oshilekitho, u tsilike ko sha?

⁴ Otashi opalele owala meziko. Ngele oondungu dhasho dha pi po nosha lunguna pokati, oto vulu we oku shi longitha sha?

⁵ Osha li shaa na oshilonga, manga inaashi lunguna po. Ngashingeyi sho sha lunguna po, kashi na we oshilonga shasha.”

⁶ Ngashingeyi Omuwa Omupangeliawike ota popi ta ti: “Naanaa ngaashi omuviinu tagu kuthwa momugulu e tagu lungunithwa po, osho tandi ka ninga aantu mboka ye li muJerusalem,

⁷ e tandi ya geele. Oya hunuka momulilo, ihe ngashingeyi omulilo otagu ke ya lungunitha po. Nge tandi ya geele, otamu ka tseya kutya ongame Omuwa.

⁸ Inaa inekela ndje, nomolwashoka oshilongo tandi shi shitukitha eputu.” Omuwa Omupangeliawike a popi.

16

¹ Omuwa okwa lombwele ndje ishewe a ti:

² “Muna gwomuntu, hololela Jerusalem iilonga ye yiihuna.

³ Lombwela Jerusalem shoka Omuwa Omupangeliawike te mu lombwele ta ti: “Owa valelwa mevi lyaKaanan. Ho Omuamori, nyoko Omuheti.

⁴ Uuna wa pulumuthwa, ino tetwa okaankoga nenge u yogwe ombango nenge u dhingilwe moshiteta.

⁵ Kakwa li ngoka e ku sile ohenda, e ku ningile iinima mbika. Sho wa valwa, kakwa li ngoka e ku hole. Owe ekelwahi meputa.

⁶ “Onda li tandi piti po nonde ku mono to pinauka mombinzi yoye. Owa li metente lyomangwili, ihe inandi ku etha u se.

⁷ Onde ku kokitha ngomuti tagu lelema. Owa koko wa kola, omuleeleka e to fukala. Omagundji goye oga shitika, nomafufu goye ga fufuka nawa, ihe owa li omudhu.

⁸ “Ihe sho nda piti po ishewe, onda mono kutya ethimbo lyoku ku endela olya thiki. Onde ku gondo ondjatha u zale, nonde ku uvanekele kutya onde ku yaleke. Eeno, onde ku hokana, nowa ningi gwandje.” Shika osho shoka Omuwa Omupangeliawike ta ti.

⁹ “Onda kutha omeya e tandi ku yogo ombinzi nonde ku gwayeke omagadhi gooholivi kolutu lwoye.

¹⁰ Onde ku zaleke ohema yuulenga e tandi ku pe oongaku dhoshipa sho opala noshikayiwa sholiina ombwanawa noshiyata shofeyi.

¹¹ Onde ku zaleke iipako — uugondo wopiikesho nokalyenge komothingo.

¹² Onde ku gondo okalinga kokomayulu nuutenda wokomakutsi noshishani sho opala.

¹³ Owa kala nuulenga woshingoli nowoshisiliveli, nowa zala oonguwo dha tungika dholiina noofeyi. Owa li oshithima shuusila womunziya nomagadhi goonyushi nomahoka ga dhoga. Owa mbweshukila e to ningi omunyekadhi.

¹⁴ Omolwembweshukilo lyoye lyuushekesheke owa tseyika moshigwana kehe, oshoka ongame nde ku ningi u holike.” Shika osho shoka Omuwa Omupangeliawike ta popi.

¹⁵ “Owi itula embweshukilo lyoye e to lala nashaa ngoka e ya ko.

¹⁶ Iiyata yoye yimwe owe yi opalekitha omahala giinonoma; owa fa naanaa ohonda nowi igandja komulumentu kehe.

¹⁷ Owa kutha oshisiliveli noshingoli shoka nde ku gondo nowe shi ningi iiyelekela yaalumentu, e to hondelwa puyo.

¹⁸ Owa kutha oonguwo dhuulenga e to zaleke nadho iiyelekela mbyoka nowe yi yambele omagadhi gooholivi niitsinino nde yi ku pe.

¹⁹ Onde ku pe iikulya — uusila womunziya, omagadhi gooholivi nogoonyushi — ihe owe ga yamba po, opo u opalele iimenka.” Shika osha popiwa kOmuwa Omupangeliawike.

²⁰ “Owa kutha aamati naakadhona mboka wa valele ndje e to ya yambele iimenka. Okuhondela kwoye inaku ku gwanena nani,

²¹ sho wa dhipaga aamwandje e to ya fikile iikalunga?

²² Miihuna yoye mbika, sho wa li muuhonda, ino dhimbulukwa we nando ethimbo lyuugundjuka woye, sho wa li olutu lwowala to pinauka mombinzi yoye.”

²³ Omuwa Omupangeliawike okwa popi a ti: “Yaye ngoye! Yayee! Owa longo iihuna yi thike mpoka,

²⁴ nopooha dhoondjila adhihe owa tungu omahala giinonoma gokusaagela iimenka nokulalwa nangoye.

²⁵ Owa lyatele eopalo lyoye montopo. Owi igandjele shaa ngoka ta piti po, nowa kala esiku kehe moluhondelo.

²⁶ Owa nyanyudha aashiinda shoye Aayegipiti, sho to lala nayo, noluhondelo lwoye olwa geyitha ndje.

²⁷ “Ngashingeyi onda yelutha okwooko kwandje, ndi ku geele, noku ku kutha oshipewa shoye sheyambeko lyandje. Onde ku gandja kAafilisti, mboka ye ku tonde noya sa ohoni omolwoohedhi dhoye oonyanyalithi.

²⁸ “Mbeyaka sho inaaye ku kutha omwamwa, owa yi kAayassur. Owa hondelwa kuyo, ihe inaye ku ulula.

²⁹ Owa ka hondelwa kAababilonia, oshigwana shaahalithi, ihe inaye ku kutitha.”

³⁰ Omuwa Omupangeliawike ota ti: “Ayihe mbika owe yi ningi wa fa ohonda yaa na ohoni.

³¹ Momapandaanda agehe owa tungile mo omahala giinonoma nogokuhondelelwa. Ihe owa hokwa oluhondelo ngaashi ohonda.

³² Owa fa omukulukadhi ta lalwa naye kaakwiilongo peha lyomulume.

³³ Aahondelwa ohaa futwa, ihe ngoye owa gondo aahondeli yoye, nowe ya pe oombumbo, opo ya kongomoke akuhe, ye ye ya lale nangoye.

³⁴ Mokuhondela kwoye owa pilike omikalo dhaakiintu. Kape na ngoka e ku thiminike, u shi ninge. Ino gondwa, ongoye wa gondo! Eeno, owi ili shili!”

³⁵ Jerusalem, nakuhondelwa ngoye, uva ngashingeyi shoka Omuwa ta popi.

³⁶ Omuwa Omupangeliawike ota popi ta ti: “Owi iyanuna oonguwo nowi igandja kaasamane aaholi yoye nokiimenka yoye yi nyanyalitha. Owa dhipaga aamwoye e to ya saagelele iimenka.

³⁷ Molwiinima mbika otandi ka gongela aaholi yoye — mboka u hole naamboka u tonde. Otandi ke ya eta ye ku tule mekondeka, e tandi ku hula iiteta e taa tala epenge lyoye.

³⁸ Otandi ke ku pangulila oluhondelo nedhipago, nomuupyundjahi wandje otandi ke ku geela neso.

³⁹ Otandi ke ku gandja miikaha yawo, notaa ka hanagula po omahala mpoka wa hondelelwa nokusaagela iimenka. Otaa ka kutha omizalo niipako yoye notaye ku thigi u li omudhu.

⁴⁰ “Otaa sikumudha ongundu yaantu ye ku dhenge nomamanya e taye ku tetagula iintimbu nomagongamwele gawo.

⁴¹ Otaa ka fika po omagumbo goye, noongundu dhaakiintu otadhi tala egeelo lyoye. Otandi hulitha po okuhondelwa kwoye notandi ku keelele, waa gandje we iigonda kaahondeli yoye.

⁴² Ondjahi yandje otayi ka lota ihe, e tandi ngungumana. Itandi ka geya we nenge ndi se uukodhi.

⁴³ Owa dhimbwa sho nde ku ningile, sho wa li omugundjuka, nowa geyitha ndje mokulonga iilonga ya tya ngaaka. Omolwashoka nde yi ku futile. Omolwashike wa gwedha ko iihuna yoluhondelo kiilonga yilwe iinyanyalithi mbyoka wa ningi?” Omuwa Omupangeliawike oye a popi.

⁴⁴ Omuwa okwa ti: “Aantu otaye ku popile momayeletumbulo taa ti: ‘Omwanakadhona okwa fekwa kuyina.’

⁴⁵ Ngoye owa fa nyoko shili. Okwa kunyukwa omulume noyana. Owa fa aamwanyoko aakiintu, mboka ya kunyukwa aasamane yawo noyana. Ngoye niilando iimwanyoko omu na nyoko Omuheti naho Omuamori.

⁴⁶ “Omumwanyokokadhona omukuluntu oSamaria muumbangalantu pamwe nomikunda dhe. Omumwanyoko ondenge pamwe nomikunda dhe oSodom muumbugantu.

⁴⁷ Inashi ku gwanena okulandula onshingo yawo nokuholela iilonga yawo iinyanyalithi. Aawe, mokathimbo okashona owa vuka u ya vule mumbyoka wa longo.”

⁴⁸ Omuwa Omupangeliawike ota ti: “Oshili, ngaashi ngame Kalunga omunamwenyo, omumwanyokokadhona Sodom pamwe nomikunda dhe ina longa iihuna yi thike pumbyoka to ningi.

⁴⁹ Oye pamwe noyana aakadhona oya li aanuuntsa, oshoka oya li ye na iikulya ya ha noya kala nombili nengungumano, ihe inaa sila oohepele naakwanaluhepo oshimpwiyu.

⁵⁰ Oyi itanga noya tangalala e taa ningi shoka ndi tonde, onkee onde ya hanagula po, ngaashi u shi shi nawa.

⁵¹ “Samaria mokuyona kwe ina thika nando oketata lyoye. Ngoye owa vuka unene miihuna mbyoka wa ningi u mu vule. Eolelo lyoye otali ku ningi omwiinayi u vule aamwanyoko yaa na ondjo mokuyelekanitha.

⁵² Ngashingeyi oto ka humbata ohoni yoye. Uulunde woye owa lundu pombanda u vule waamwanyoko aakadhona. Ponto yoye oya li nokuli aayelele. Ngashingeyi sa ohoni, u kale wa gugwa, oshoka omumwanyoko oto mu ningi omukeenandjo.”

⁵³ Omuwa okwa lombwele Jerusalem ta ti: “Otandi ke ya ninga aanelago ishewe — Sodom pamwe nomikunda dhasho naSamaria pamwe nomikunda dhasho. Eeno, otandi ke ku pa wo elago.

⁵⁴ Oto ki isa ohoni ngoye mwene, nohoni yoye otayi ka holola kutya aamwanyokokadhona oyo opala.

⁵⁵ Otaa ka ninga aanelago ishewe, ngoye nomikunda dhoye otadhi ka hepuluka wo.

⁵⁶ Momasiku gesimano lyoye ngoye owa ningi Sodom iileva,

⁵⁷ manga uukolokoshi woye mwene owa li inaau igalala. Ngashingeyi owe mu fa — Aaedom, Aafilisti naashiinda shoye yalwe mboka ye ku tonde, otaye ku ningi iileva.

⁵⁸ Ou na okuhepekelwa uuholume woye niilonga yoye iinyanyalithi.”

⁵⁹ Omuwa Omupangeliawike ota ti: “Otandi ku ningi ngaashi wi ilongela, oshoka ku na ko na sha nomauvaneko goye nowa yono ehangano.

⁶⁰ Ihe ngame otandi dhiginine ehangano nde li hangana nangoye, manga wa li omugundjuka, notandi ka hangana nangoye ehangano lyaaluhe.

⁶¹ Oto ka dhimbulukwa, nkene wa ningi, e to si ohoni, sho to mono mumwanyokokadhona omukuluntu namumwanyokokadhona ondenge to ya galulilwa. Otandi ke ya eta kungoye aamwoyekadhona, nando kashi shi ehangano lyandje pamwe nangoye.

⁶² Otandi ka pepaleka ehangano lyandje pamwe nangoye, noto ka tseya kutya ongame Omuwa.

⁶³ Otandi ka dhima po omapuko goye agehe we ga ningi, ihe ngoye oto ke ga dhimbulukwa e to si ohoni okumakula okana koye.” Omuwa Omupangeliawike oye a popi.

17

¹ Omuwa okwa lombwele ndje a ti:

² “Muna gwomuntu, lombwela Aaisraeli eyele ndika,

³ li ya tseyithile shoka ngame, Omuwa Omupangeliawike, tandi ya lombwele: Okwa li ku na ekodhi enenenene li na omalwenya go opala nomawawa omanene ga pakalala. Olya tuka kombanda yoondundu dhaLibanon e tali teya ko ondungu yomusendeli

⁴ nolye yi fala koshilongo shokuhalitha e tali yi tula moshilando shaanangeshefa.

⁵ Olya kutha ihe oshimeno oshishona moshilongo Israel e tali shi tsike mevi lyo ondoka, mpoka hapu tondoka omeya goku shi kokitha.

⁶ Oshimeno osha tsapuka oshihupihupi nosha ningi omuviinu gwa yalalala. Iitayi yagwo oya koko yu uka lwokekodhi, nomidhi odha yi muule. Omuviinu ogwi igandjana nogwa ziza nawa.

⁷ “Okwa li ishewe ekodhi ekwawo li na omawawa omanene nomalwenya ga thita. Omuviinu ogwa taandeleke iitayi yagwo lwokulyo, nomafo gagwo oga taalela kulyo, opo li gu tekele nawa shi vule omeya gomoshikunino.

⁸ Ihe omuviinu ogwa tsikwa nale mevi lyo ondoka nolya tuta nawa, opo gu zize omafo nogu ime omandjembele, gu ninge omuviinu gwo opala.

⁹ Ngame, Omuwa Omupangeliawike, otandi pula ngashingeyi: Omuviinu nguka otagu kala tuu gu na omwenyo gu koke? Ekodhi lyotango itali tudha mo omidhi dhagwo nokutona ko omahila nokuteya iitayi noku yi kukutika? Itashi pula oonkondo odhindji nenge oshigwana oshinankondo oku gu tudha po.

¹⁰ Eeno, ogwa tsikwa, ihe otagu kala tuu gu na omwenyo notagu koko? Itagu kukuta, ombepo yokuuzilo nge ye gu pepele? Itagu kukutile mpoka gwa kokele?”

¹¹ Omuwa okwa lombwele ndje a ti:

¹² “Pula aatangalali mbaka, ngele oyu uvite ko tuu eyele shoka tali ti. Ya lombwela kutya omukwaniilwa gwaBabilonia okwe ya kuJerusalem e ta kutha mo omukwaniilwa nomalenga ge e te ya fala kuBabilon.

¹³ Okwa kutha gumwe gwomezimo ekwaniilwa, a hangana naye e te mu ganitha egano lyokuvulika. Aanamadhina okwe ya ningi oonkwatwa.

¹⁴ Ina hala oshigwana shi penduke po ishewe nokutonatela ehangano lyawo li dhigininwe.

¹⁵ Ihe omukwaniilwa gwaJuda okwa tsu ondumbo e ta tumu aatumwa kuEgipiti, ya ka tale ko uukambe nomatanga omanene giita. Ote shi vulu tuu? Ota hunuka mo ngaa? Ita vulu okuyona ehangano lyawo e ta kala inaa geelwa!

¹⁶ “Oshili ngaashi ngame Kalunga omunamwenyo,” Omuwa Omupangeliawike ta popi, “omukwaniilwa nguka ota ka sila muBabilon, oshoka okwa yono egano lye nehangano ndyoka a hangana nomukwaniilwa gwaBabilonia, ngoka e mu tula koshipundi.

¹⁷ Etangakwiita enankondo lyaEgipiti itali vulu oku mu popila, uuna Aababilonia taa tungu omutuni gwekondekela notaa fulu omikanka, opo ya dhipage aantu oyendji.

¹⁸ Okwa yono egano lye nehangano e li hangana. Ayihe mbika okwe yi ningi, noita ka hunuka we.”

¹⁹ Omuwa Omupangeliawike ota ti: “Oshili ngaashi ngame Kalunga omunamwenyo, otandi ke mu geela, sho a yono ehangano ndyoka a ganene medhina lyandje, e li dhiginine.

²⁰ Otandi ka lukila omwigo gu mu yule. Otandi ke mu fala kuBabilonia noku mu geelela hoka, oshoka ina inekela ndje.

²¹ Aakwiita ye ya pyokoka otaa ka dhipagelwa molugodhi, naamboka taa hupu ko, otaa ka halakanithilwa koombinga adhihe. Otamu ka tseya kutya ongame, Omuwa, nda popi.”

²² Omuwa Omupangeliawike ota popi ta ti: “Otandi ka kutha ondungu yomusendeli, okatayi opo ka tsapuka tandi ke ka teya; otandi ka tsike kondundu onde,

²³ okondundu ondeendeka yaIsrael. Otaka ka tsapuka iitayi e taka imi e taka ningi omusendeli gwo opala. Oondhila dhomaludhi agehe otadhi gongalele mo, tadhi kala momuzile gwagwo.

²⁴ Omiti adhihe moshilongo otadhi ka tseya kutya ongame Omuwa. Otandi ke po omiti omile notandi kokitha omiti omifupi. Otandi kukutike omiti dha ziza notandi zizike omiti dha kukuta. Ongame Omuwa nda popi. Otandi ningi shoka nda ti, otandi shi ningi.”

18

¹ Omuwa okwa lombwele ndje

² e ta ti: “Eyeletumbulo ndika olyashike, aantu taye li tumbululula moshilongo Israel? ‘Oohekulu oya lile omagongwa gomandjembele, nomayego goyana oga ningi uuge.’

³ “Oshili ngaashi ngame Kalunga omunamwenyo,” Omuwa Omupangeliawike ta ti, “itamu ka tumbululula we eyeletumbulo ndika muIsrael.

⁴ Omwenyo gwomuntu kehe ogwandje, omwenyo gwahe nomwenyo gwomwanamati ogwandje. Omuntu ngoka ta yono, oku na okusa.

⁵ “Natu tye oku na omuntu omwaanawa, omuyuuki nomunashili.

⁶ Iha simaneke iimenka yAaisraeli noiha li oohula dha saagelelwa pomahala giinonoma yuupagani. Iha nyateke omukiintu gwamushiinda she nenge a lale nomukiintu e li komwedhi.

⁷ Iha kotokele nenge a yuge mukwawo. Oha shunitha shoka a pelwe ombambyona; noha palutha aasindjala nokuzaleka aanankayi.

⁸ Iha pula ontanitho yiimaliwa ya liwa ongunga. Oha tindi okulonga uuwinayi e ta tokola etokolo lyu uka moontamanana.

⁹ Omuntu a tya ngaaka oha vulika kiipango yandje noha dhiginine omautho gandje. Oye omuyuuki nota kala e na omwenyo,” Omuwa Omupangeliawike osho ta popi.

¹⁰ “Natu tye ihe, omuntu a tya ngaaka oku na omwanamati ha yugu ye ha dhipaga, ha ningi iinima mbyoka

¹¹ inaayi ningwa kuhe. Oha li oohula dha saagelelwa pomahala giinonoma yuupagani noha hondele aakulukadhi yaantu.

¹² Oha kotokele oohepele, oha yugu, ye ha tindile shoka a pelwe ombambyona. Oha yi komahala giinonoma yuupagani, oha simaneke iimenka yi nyanyalitha,

¹³ oha li ongunga yiimaliwa, a mone ontanitho. Ota kala ngaa e na omwenyo? Aawoo! Ite gu mono! Okwa longo iihuna ayihe mbika, onkee ota ka sa. Ota ka kala e na uusama weso lye mwene.

¹⁴ “Natu tye natango, omuntu nguka omutiyali oku na omwanamati, ngoka e wete iihuna ayihe tayi longwa kuhe, ihe ye ita landula oshiholelwa shahe.

¹⁵ Iha simaneke iimenka yAaisraeli noiha li oohula dha saagelelwa pomahala giinonoma yuupagani. Iha hondele omukiintu gwamukwawo

¹⁶ nenge a hepeke omuntu nenge e mu yuge. Oha shunitha shoka a pelwe ombambyona. Oha palutha aasindjala noha zaleke aanankayi.

¹⁷ Oha tindi okulonga uuwinayi noiha li oongunga dhiimaliwa, a mone ontanitho. Oha dhiginine omautho gandje e ta vulika kiipango yandje. Oye ita si moluulunde wahe, ihe ota kala shili e na omwenyo.

¹⁸ Ihe he, ngoka a kotokele, a yugu nokwa longele aantu uuwinayi, okwa si moluulunde we mwene mboka a ningi.

¹⁹ “Ihe ne otamu pula tamu ti: ‘Omolwashike omwana inaa hepekwa omoluulunde wahe?’ Eyamukulo olyo ndika kutya omwana okwa ningi shoka shu uka nosho opala. Okwa vulika kiipango yandje ayihe e te yi dhiginine nawa. Onkee ta kala shili e na omwenyo.

²⁰ Ngoka ta yono, oye e na okusa. Omwana ita hepekelwa uulunde wahe, nahe ita geelelwa uulunde womwana. Omuyuuki ota galulilwa uuwanawa molwiilonga ye iiwanawa, ihe omukeenakalunga ota geelelwa uuwinayi e u ningi.

²¹ “Omukeenakalunga ngele ote etha uulunde we e ta dhiginine iipango yandje, ngele ota longo shoka shu uka nosho opala, ita ka sa; ota kala e na omwenyo.

²² Uulunde we otau dhimwa po; nota kala e na omwenyo, oshoka okwa ningi shoka shu uka.

²³ Ondi nyanyukilwe ando eso lyomukeenakalunga?” Osho Omuwa Omupangeliawike ta pula. “Aawe, ihe onda hala, i itedhulule, opo a kale e na omwenyo.

²⁴ “Ihe omuyuuki ngele ote etha uuyuuki we e ta tameke okulonga uuwinayi, iilonga yiihuna ayihe mbyoka hayi longwa kaakaanakalunga, ota kala tuu e na omwenyo? Aawe! Kape na nando uuyuuki mboka a ningile tau dhimbulukiwa we. Ota ka sa moluukolokoshi nuulunde we.

²⁵ “Ihe ne natango otamu ti: ‘Omuwa ita ningi nawa nando.’ Pulakenii ndje, ne Aaisraeli! Otamu dhiladhila kutya omukalo gwandje gwokuninga iinima mbika kagu li mondjila. Ne one kaamu li mondjila.

²⁶ Omuyuuki ngele te etha okulonga uuyuuki nota tameke okuyona e ta si, ota si moluuwinayi mboka a longo.

²⁷ Omukeenakalunga ngele te etha uulunde we e ta ningi shoka shu uka noshiwanawa, ota hupitha omwenyo gwe.

²⁸ Okwa dhimbulula shoka ta ningi e te etha okuyona, onkee ano ita si shili, ihe ota kala e na omwenyo.

²⁹ Ne Aaisraeli otamu ti: ‘Shoka Omuwa ta ningi, inashi uka nando.’ Otamu dhiladhila kutya omukalo gwandje inagu uka? Ndishi ne one kaamu li mondjila.

³⁰ “Ngashingeyi ngame, Omuwa Omupangeliawike, otandi mu lombwele ne Aaisraeli kutya otandi ka pangula kehe gumwe gwomune pailonga ye. Etheni uulunde mboka tamu ningi, inamu etha uulunde u mu hanagule po.

³¹ Etheni iilonga ayihe yuulunde mwe yi longo ne mu kale mu na ombepo ompe nomwenyo omupe. Omolwashike mwa hala okusa, ne Aaisraeli?”

³² Omuwa Omupangeliawike ota ti: “Ngame itandi nyanyukilwa eso lyomuntu. Itedhululeni, opo mu kale mu na omwenyo.”

19

¹ Izizima u imbe ontakumandjimbo yaawa yaIsrael

² u tye: “Nyoko okwa li a fa onkoshi onkiintu! Oya putudhile uunkoshona wayo mokati koonkulunkoshi.

³ Okankoshona kamwe oye ka longo okuyewa; oka ningi onkoshi hayi kwata aantu.

⁴ Iigwana oye yi kundana noye yi tula mekelo. Onolugoololo ye yi kokele kuEgipiti.

⁵ Yina ya tegelele, sigo etegameno lya hulu. Oya tekula okankoshona kayo kalwe. Oka koko noka ningi onkulunkoshi.

⁶ Sho ya koko lela, oyi inyowo pamwe noonkwawo. Nayo wo oyi ilongo okuyewa nohayi kwata aantu.

⁷ Oya teyagula po oohote, oya kumuna po iilando. Aanashilongo oya haluka kendundumo lyayo.

⁸ Iigwana oya gongala yi yi kondjithe; aantu oya zi akuhe. Oya tege omatavu gawo e taye yi tula mekelo.

⁹ Oye yi tula molugumbo e taye yi fala komukwaniilwa gwaBabilon. Oye yi tula melangelo, opo endundumo lyayo lyaa uvike we koondundu dhaIsrael.

¹⁰ “Nyoko okwa li a fa omuviinu gwa tsikwa pomulonga. Sho kwa li omeya ogendji, omuviinu ogwa zizi gwi imi oomviinu.

¹¹ Iitayi yagwo oya kolo noya koko, yi hongwe oondhimbo dhuukwaniilwa. Omuviinu ogwa koko sigo okiikogo; shaa ngoka okwe gu mono gwa ziza omuleeleka.

¹² Iikaha yomugeyentu oye gu dhakula mo e tayi gu umbile pevi. Ombepo yokuuzilo oya kukutike iiyimati yagwo. Iitayi yagwo oya pomponwa ko; oya kukuta noya fikwa po.

¹³ Ngashingeyi ogu li po gwa tsikwa mombuga, montale, mevi lyaa na omeya.

¹⁴ Ekota lyomuviinu olya hwama omulilo, ngoka gwa lungunitha iitayi niiyimati. Iitayi itayi ka kola we, yi hongwe oodhimbo dhuukwaniilwa.” Ontakumandjimbo ndjika oyoluhodhi; oya ningi eimbilokemo.

20

¹ Esiku etimulongo lyomwedhi omutitano gwomumvo omutiheyali gwomuupongekwa, aawiliki yaIsrael yamwe oye ya kungame, ya pule ndje ehalo lyaKalunga, oyo noya kuutumba komeho gandje.

² Omuwa okwa lombwele ndje a ti:

³ “Muna gwomuntu, lombwela aantu mboka noku ya hokololela shoka ngame, Omuwa Omupangeliawike, tandi popi te ti: Omwe ya okupula ehalo lyandje, ndishi? Oshili ngaashi ngame Kalunga omunamwenyo, itandi pitika, mu pule ndje sha. Ngame, Omuwa Omupangeliawike, nda popi.

⁴ “Muna gwomuntu, owa hala oku ya pangula? Shi ninga ano. Ya dhimbulutha iinima iinyanyalithi ya ningwa koohekulu.

⁵ Ya lombwela shoka tandi ti. Sho nda hogolola Israel, onde ya uvanekele euvaneko. Onde ya ihololele muEgipiti e tandi ya lombwele: ongame Omuwa Kalunga keni.

⁶ Onde ya uvanekele, ndi ya tembudhe mo muEgipiti, ndi ya fale kevi nde li ya hogololela lya tondoka omahini nomagadhi goonyushi, evi ewanawalela.

⁷ Onde ya lombwele, ya ekelehi iimenka mbyoka yi nyanyalitha ye yi hole, opo yaa inyateke niikalunga yiifundja yaEgipiti, oshoka ongame Omuwa Kalunga kawo.

⁸ Ihe oya tsu ondumbo nangame noya tindi okupulakena. Inaa ekelahi iimenka yawo yi nyanyalitha nenge ya ethe iikalunga yaEgipiti. Onda dhiladhila oku ya hwamena nondjahi yandje muEgipiti.

⁹ Ihe inandi shi ninga, opo ndaa sithe edhina lyandje ohoni montaneho yaantu mboka ya kala mokati kawo, sho nda li nda lombwele Israel kutya otandi ya tembudha mo muEgipiti.

¹⁰ “Onde ya tembudha mo nonde ya eta mombuga,

¹¹ moka nde ya pe iipango yandje noku ya longa omautho gandje ngoka taga gandja omwenyo kushaa ngoka ta vulika kugo.

¹² Onda ningi eyapulo lyEsabati endhindhiliko pokati ketu nayo, opo li ya dhimbuluthe kutya ongame, Omuwa, tandi ya yapula.

¹³ Ihe omombuga nokuli ya tsu ondumbo nangame. Oya yono iipango yandje e taye ekelehi omautho gandje ngoka taga gandja omwenyo kushaa ngoka ta vulika kugo. Oya shekitha Esabati. Onda li nda hala ndi ya geelele mombuga noku ya hanagula po.

¹⁴ Ihe inandi shi ninga, opo ndaa shekithe edhina lyandje mokati kiigwana mbyoka ya mono ndje tandi tembudha mo Israel muEgipiti.

¹⁵ Onkee ndu uvaneke mombuga kutya itandi ya fala we kevi nde li ya uvanekele, evi lya tondoka omahini nomagadhi goonyushi, evi ewanawalela.

¹⁶ Onde shi uvaneke, oshoka oye ekelehi omautho gandje, ya yono iipango yandje noya shekitha Esabati — oya hokwa okusimaneka iimenka.

¹⁷ “Ihe onde ya etele olukeno. Onda tokola, ndaaye ya dhipagele mombuga.

¹⁸ Onda lombwele oyana mombuga nda ti: Inamu lambalala oshinkoti shoohokulu nenge mu inyateke niimenka yawo.

¹⁹ Ongame Omuwa Kalunga keni. Vulikeni kiipango yandje, dhiginineni omautho gandje.

²⁰ Yapuleni esiku lyEsabati, opo li ninge endhindhiliko lyehangano twe li hanganeni, notali ke mu dhimbulutha kutya ongame Omuwa Kalunga keni.

²¹ “Ihe nepipi ndyoka wo olya tsu ondumbo nangame. Olya yono iipango yandje noinali dhiginina omautho gandje, ngoka taga gandja omwenyo kukehe ngoka ta vulika kugo. Olya shekitha Esabati. Onda li nda hala oku li geelela mombuga noku li dhipagela mo alihe.

²² Ihe inandi shi ninga, opo ndaa shekithe edhina lyandje mokati kiigwana mbyoka ya mono ndje, sho tandi tembudha mo Israel muEgipiti.

²³ Onkee onda ningi euvaneko lilwe mombuga. Onda gana kutya otandi ya halakanithile nuuyuni.

²⁴ Onde shi ningi, oshoka oye ekelehi omautho gandje, ya yono iipango yandje, ya shekitha Esabati noya simaneke iimenka tuu mbyoka oohekulu ye yi simaneke.

²⁵ “Onde ya pe omalombwelo gaa shi omawanawa nomautho itaage ya etele omwenyo.

²⁶ Onde ya etha yi inyateke nomayambo gawo yene, ya yambe aatango yawo aamati. Osha li egeelo kuyo noku ya ulukila kutya ongame Omuwa.

²⁷ “Muna gwomuntu, ngashingeyi lombwela Aaisraeli shoka ngame, Omuwa Omupangeliawike, tandi ya lombwele. Nguka ogwo omukalo gulwe oohekulu ya pula ndje muuhasha wawo.

²⁸ Onde ya eta mevi ndyoka ndu uvaneke kutya otandi li ya pe. Ihe shaa mpoka ya mono ondundu onde nomuti gwa ziza, oya yambele po omayambo gawo. Oya geyitha ndje nomafikilondjambo niinuwandjambo yawo.

²⁹ Onde ya pula: Omahala ngaka gokoondundu ogashike, nkoka tamu yi? Omolwashoka haga ithanwa omahala gokoondundu sigo onena.

³⁰ Lombwela Aaisraeli shoka ngame, Omuwa Omupangeliawike, tandi ti: Omolwashike tamu yono omayono ngoka ga ningwa koohokulu, sho tamu landula iimenka yawo iinyanyalithi?

³¹ Sigo onena otamu saagele omayambo tuu ngoka notamu inyateke niimenka, sho tamu yamba aana yeni kuyo momulilo. Ihe nando ongeyi, ne Aaisraeli otamu pula kutya ehalo lyandje olini! Oshili ngaashi ngame Omuwa Omupangeliawike, Kalunga omunamwenyo, itandi mu pitikile mu pule ndje sha.

³² Otamu ti: Tse otwa hala tu kale twa fa iigwana yilwe, twa fa aantu yomiilongo yilwe haa simaneke omiti nomamanya. Ihe shika itashi ka ningwa.”

³³ “Oshili ngaashi ngame, Omuwa Omupangeliawike, Kalunga omunamwenyo, otandi mu londodha kutya mondjahi yandje otandi ke mu lelitha oshikaha shoonkondo, okwooko kwa taganana nondjahi onenenene.

³⁴ Otandi ke mu ulukila oonkondo dhandje nondjahi yandje, uuna tandi ke mu gongela notandi ke mu kongolola kiilongo ayihe nde mu halakanithile ko.

³⁵ Otandi ke mu fala mombuga yiigwana, notandi ke mu pangulila koshipala noshipala.

³⁶ Otandi ke mu pangula, ngaashi nda pangula oohokulu mombuga Sinai,” Omuwa Omupangeliawike osho ta ti.

³⁷ “Otandi ke mu pangela noku mu vulikitha kehangano lyandje.

³⁸ Otandi ka kutha mokati keni aatangalali naalunde. Otandi ya kutha mo miilongo moka ya kala ngashingeyi, ihe itandi ke ya pitikila we, ya galukile kevi lyaIsrael. Otamu ka tseya kutya ongame Omuwa.”

³⁹ Omuwa Omupangeliawike okwa ti: “Ngashingeyi ne Aaisraeli amuhe otamu iyopalele ne yene! Indeni ashike, mu ka simaneke iimenka yeni! Ihe otandi mu londodha kutya konima yaambika otamu ka vulika kungame e tamu etha okushekitha edhina lyandje mokuyambela iikalunga omayambo.

⁴⁰ Moshilongo kondundu yandje ondjapuki, ondundu onde yaIsrael, ne Aaisraeli amuhe otamu ka longela ndje. Otandi ka kala ndi na ombili nane notandi ke mu tegelela, mu yambele ndje omafikilondjambo geni, omayambo geni omawanawa nomagano omayapuki.

⁴¹ Uuna tandi mu tembudha mo miilongo moka mwa halakanithilwa mo e tandi mu gongele, otandi ka taamba omafikilondjambo geni, niigwana otayi ka mona kutya ngame omuyapuki.

⁴² Uuna tandi ke mu galulila kuIsrael, kevi ndyoka ndu uvaneke kutya otandi li pe oohokulu, nena otamu ka tseya kutya ongame Omuwa.

⁴³ Nena otamu ka dhimbulukwa iinima iinyanyalithi mwe yi ningi nonkene mwi inyateke. Otamu ki inyanyala moluuwinayi auhe mwe u ningi.

⁴⁴ Ngele tandi ikwatele ko, ndi gamene esimano lyandje, ne Aaisraeli otamu ka tseya kutya ongame Omuwa, oshoka ngame inandi mu ningila, ngaashi uukolokoshi weni niilonga yeni iiwinayi ye shi ilongela.” Omuwa oye a popi.

⁴⁵ Omuwa okwa lombwele ndje a ti:

⁴⁶ “Muna gwomuntu, taalela kuumbugantu. Uvithila uumbugantu, hunganekela omugulu gwokuumbugantu.

⁴⁷ Lombwela omugulu gwokuumbugantu, gu uve shoka ngame, Omuwa Omupangeliawike, tandi ti: Tala! Otandi tomeke omulilo mungoye, notagu yaka komuti kehe, omutalala nenge omukukutu. Kapu na shoka tashi gu dhimi. Otagu ka taandela okuza kuumbugantu sigo okuumbangalantu, noshaa ngoka otu uvu uupyu womalaka gomulilo.

⁴⁸ Otaa ka mona kutya ngame, Omuwa, onda tomeke omulilo, nokaku na ngoka te gu dhimi po.”

⁴⁹ Ngame onda ti: “Akwetse, Omuwa Omupangeliawike! Otaa popi ndje taa ti: ‘Ota popi ashike ootumbutumbu.’ ”

21

¹ Omuwa okwa lombwele ndje a ti:

² “Muna gwomuntu, lombwela Jerusalem. Hunganekela omahala agehe moka aantu haa gongala komambo. Londodha oshilongo Israel

³ kutya ongame, Omuwa, tandi ti: Ngame omutondi gwoye. Otandi pweya mo egongamwele lyandje e tandi mu dhipaga po amuhe, aawanawa naawinayi sha faathana.

⁴ Otandi ka ukitha egongamwele lyandje kushaa ngoka gwokuumbangalantu sigo okuumbugantu.

⁵ Shaa ngoka ota ka tseya kutya ongame, Omuwa, nda pweya mo egongamwele lyandje noitandi li shuna mo we.

⁶ “Muna gwomuntu, yematela montaneho yawo u na omutima gwa nyanyagulwa nogwa sa oluhodhi olunene.

⁷ Ngele taye ku pula omolwashike wa yemata, ya lombwela kutya omolwonkundana ndjoka tayi ya. Uuna tayi thiki, omitima dhawo otadhi ka haluka kuumbanda, iikaha yawo otayi ka endjelela komvulwe, omukumo gwawo gwa tyololoka, noongolo dhawo tadhi kakama. Esiku lya thiki; lye ya.” Omuwa Omupangeliawike a popi.

⁸ Omuwa okwa lombwele ndje a ti:

⁹ “Muna gwomuntu, hunganeka. Lombwela aantu shoka ngame, Omuwa, tandi popi. Egongamwele, egongamwele olya tsa nolya yagwa.

¹⁰ Olyu upikwa lya tsa li dhipage, lya yagwa li tayime ngolwaadhi. Itaku kala we enyanyu. Oshigwana shandje osha dhina elondodho negeelo.

¹¹ Egongamwele olya yagwa, olyu upikilwa iilonga. Olya tsa lya yagwa, li kale meke lyomudhipagi.

¹² Muna gwomuntu, kololoka, u yemate. Egongamwele ndika lyu uka aantu yandje naawiliki ayehe yaIsrael. Ayehe otaa ka dhipagwa po pamwe noshihupe ashihe shaantu yandje. Ikwata ombandamutse meihupulo!

¹³ Otandi yeleke aantu yandje. Ngele taa tindi okwiitedhulula, mbika ayihe otayi ke ya ningilwa.

¹⁴ “Muna gwomuntu, hunganeka ngashingeyi. Hakela nomake goye, negongamwele otali ka hahala lwaali, lutatu. Egongamwele otali dhipaga, egongamwele tali halutha notali ulula.

¹⁵ Otali tyololokitha aantu yandje noku ya lontaukitha. Otandi tilitha oshilando shawo negongamwele tali tayima lya fa olwaadhi nolya hala okudhipaga.

¹⁶ Gongamwele lya tsa, fegula ko olulyo nolumoho! Keka mpoka to thikile.

¹⁷ Nangame wo otandi ka hakela nomake gandje, nondjahi yandje otayi ka pola. Ongame, Omuwa, nda popi.”

¹⁸ Omuwa okwa lombwele ndje a ti:

¹⁹ “Muna gwomuntu, ndhindhilika oondjila mbali moka omukwaniilwa gwaBabilonia ta vulu okweenda negongamwele lye. Adhihe mbali otadhi zi moshilongo shimwe. Tula po omandhindhiliko mpoka oondjila tadhi topokele.

²⁰ Endhindhiliko limwe otali ulukile omukwaniilwa ondjila yu uka koshilando shAayammoni Rabba, nekwawo oondjoka yu uka kuJuda, koshilandohote Jerusalem.

²¹ Omukwaniilwa gwaBabilonia ota thikama pendhindhiliko poompagiila dhoondjila. Opo a mone ondjila ndjoka ta yi nayo, ota shikashika iikuti; ota pula omayele kiimenka ye; ota simonona ehuli lyoshimuna sha yambwa.

²² Ngashingeyi! Olulyo lwe olwa yelutha endhindhiliko lyoshikuti ‘Jerusalem’. Otashi mu lombwele, a ye aka dhike iikumunithi yekuma, a kuge onkugo, a tule iikumunithi pomiyelo, a tunge omutuni gwekondekela ye a fule omikanka.

²³ Aajerusalem inaye shi itaala, molwaashoka oye na euvathano nayo. Ihe eanekelo ndika otali ya dhimbulutha uulunde wawo, li ya londodhe kutya otaa ka kwatwa po.

²⁴ Shika osho shoka ngame, Omuwa Omupangeliawike, tandi popi. Uulunde weni we ya puuyelele. Shaa ngoka okwa tseya, nkene ne aalunde. Otamu holola uulunde weni miilonga yeni ayihe. Omwa pangulwa, notandi ke mu gandja kaatondi yeni.

²⁵ “Muleli ngoye omukeenakalunga gwaIsrael, ngoka wi inyateka, esiku lyegeelo lyoye lyahugunina olya thikana.

²⁶ Ongame, Omuwa Omupangeliawike, nda popi. Ihula oshishani, kutha ko egala. Itashi ka kala we ngaaka. Omufupi ota nenepekwa, nomunene ota fupipikwa.

²⁷ Omakulukuma, omakulukuma! Otandi ningi oshilando omakulukuma. Ihe shika itashi ningwa, sigo ngoka tandi hogolola a geele oshilando, a thiki. Nena otandi shi mu pe.”

²⁸ “Muna gwomuntu, hunganeka. Tumbula shoka ngame, Omuwa Omupangeliawike, tandi lombwele Aayammoni, mboka taa tuku Israel. Ya lombwela to ti: ‘Egongamwele otali ka hanagula; olya yagelwa okutsela, tali adhima lya fa olwaadhi.

²⁹ Omamoniko tamu mono, iifundja; omahunganeko tamu hunganeke, odhanakalindi. One aakolokoshi naalunde, esiku lyeni olya thikana, esiku lyokugeelwa kweni kwahugunina. Egongamwele otali ke mu keka koothingo.

³⁰ “ ‘Shuna mo egongamwele! Otandi ke mu pangulila mehala moka mwa shitilwa, mevi moka mwa valelwa.

³¹ Otandi ke mu poolela ondjahi yandje ya fa omulilo gwa hwama. Otandi ke mu gandja kaantu aapwidhi, oonkulungu dhokuhanagula.

³² Otamu ka lunguna po komulilo. Ombinzi yeni otayi ka tikila mevi lyeni yene, nopwaa na we ngoka te ke mu dhimbulukwa.’ ” Omuwa oye a popi.

22

¹ Omuwa okwa lombwele ndje a ti:

² “Muna gwomuntu, owi ilongekidha okupangula oshilando shoka shu udha aadhipagi? Shi yelithila iinima ayihe iinyanyalithi mbyoka sha ningi.

³ Lombwela oshilando shoka ngame, Omuwa Omupangeliawike, tandi ti: Molwashoka wa dhipaga aantu yoye oyendji nowi inyateke mokusimaneka iimenka, ethimbo lyoye olya thikana.

⁴ Ou na uutoni wedhipago nowa nyatekwa kiimenka mbyoka wa ningi, onkee ethimbo lyoye lya thiki, lya pu po! Omolwashoka nda zimine, iigwana yi ku ningile iihelele, niilongo ayihe otayi ku sheke.

⁵ Iilongo yopopepi naambyoka yokokule otayi ku sheke, ngoye oshilando sha nyata noshaa na elandulathano.

⁶ Aawiliki yaIsrael ayehe oyi itula oonkondo dhawo yene notaa dhipaga.

⁷ Moshilando kamu na ngoka ta simaneke he nayina. Otamu kotokele aakwiilongo e tamu yugu aaselekadhi noothigwa.

⁸ Itamu simaneke omahala omayapuki noitamu yapula Esabati.

⁹ Yamwe yomune otaa fundju ooyakwawo, opo ye ya dhipage po. Yamwe yomune otaa li oohula dha saagelelwa iimenka. Yamwe otaa kutitha uuhalu wawo.

¹⁰ Yamwe yomune otaa lala naakulukadhi yoohe. Yamwe otaa thiminike aakiintu ye li komwedhi, ya lale nayo.

¹¹ Yamwe otaa hondele notaa pukitha iitenya yawo iikiintu nenge aamwahe aakiintu.

¹² Yamwe otaa pula Aaisraeli ooyakwawo ontanitho kongunga notaa likola moku ya yuga. Oya dhimbwa ndje.” Ongame Omuwa Omupangeliawike, nda popi.

¹³ “Otandi dhenge omake gandje kumwe omolwomayugo nomadhipago muJerusalem.

¹⁴ Oto dhiladhila kutya oto kala u na omukumo nenge oonkondo u yeluthe omaako goye, uuna nda mana oku ku ningila shoka tandi ningi? Ongame, Omuwa, nda popi notandi dhiginine oohapu dhandje.

¹⁵ Otandi ka halakanitha aantu yoye niilongo ayihe nomiigwana ayihe e tandi ka hulitha po iilonga yoye iiwinayi.

¹⁶ Iigwana yilwe otayi ke ku dhina, ihe oto ka tseya kutya ongame Omuwa.”

¹⁷ Omuwa okwa lombwele ndje a ti:

¹⁸ “Muna gwomuntu, Aaisraeli oya shunduka. Oya ningi omange; oyo oshikushu, otina, oshiyela oshiluudhe noshumbu sha thigala meziko lyomupepo, oshisiliveli sho sha yelithwa.

¹⁹ Onkee ngashingeyi ngame, Omuwa Omupangeliawike, otandi ya tseyithile kutya oya fa omange, kaye na we oshilonga. Otandi ke ya gongela ayehe muJerusalem,

²⁰ ngaashi oshisiliveli, oshikushu, oshiyela oshiluudhe, oshumbu notina tayi tulwa meziko lyeyelitho. Ondjahi yandje nuupyundjahi otau ke ya hemukitha, ngaashi eziko tali hemuna uutale.

²¹ Eeno, otandi ke ya gongela muJerusalem e tandi ya temene omulilo notandi ya hemuna nondjahi yandje.

²² Otaa ka hemuninwa muJerusalem, naanaa ngaashi oshisiliveli tashi hemunwa meziko, oyo notaa ka tseya kutya Omuwa okwe ya poolele ondjahi ye.”

²³ Omuwa okwa lombwele ndje ishewe a ti:

²⁴ “Muna gwomuntu, lombwela Aaisraeli kutya evi lyawo inali yela, onkee tandi ke li geela mondjahi yandje.

²⁵ Aawiliki oya fa oonime tadhi gonene onyama yiiyamakuti dhe yi dhipaga. Otaa dhipaga aantu, taa yugu po iimaliwa ayihe neliko alihe taa mono, notaa indjipalekele mo aaselekadhi.

²⁶ Aayambi otaa taaguluka ompango yandje noitaa simaneke uuyapuki. Itaa yoolola pokati koshinima oshiyapuki naashoka shaa shi oshiyapuki. Itaa nongele eyooloko pokati kiinima ya yogoka naambyoka ya nyata, nokaye na ko nasha nEsabati. Molwaashika Aaisraeli itaa simaneke ndje we.

²⁷ Omalenga oga fa omambungu taga hwagununa po iimuna mbyoka ge yi dhipaga. Otaga dhipaga, opo ga ninge omayamba.

²⁸ Aahunganeki oya holeke uulunde mbuka ya fa aantu taa kolonga ekuma nokaalaka. Otaa mono omamoniko giifundja e taa hunganeke dhanakalindi. Otaa uvitha oohapu dhOmuwa Omupangeliawike, ihe ngame, Omuwa, inandi dhi ya lombwela.

²⁹ Aantu yoshilongo shika ohaa hepeke yo taa yugu. Otaa hepeke oohepele notaa kutha ombambyona kaakwiilongo.

³⁰ Onda lengalenga, ndi konge muyo ngoka ta vulu okutunga omakuma, a thikame peha mpoka omakuma ga mwahuka, ye a popile oshilongo, uuna ondjahi yandje ya hala oku shi yona po, ihe inandi mona nando ogumwe.

³¹ Onkee ano otandi ya tilile ondjahi yandje ya hwama ya fa omulilo, otandi ya hanagulile po iilonga mbyoka ye yi ningi.” Omuwa Omupangeliawike a popi.

23

¹ Omuwa okwa lombwele ndje a ti:

² “Muna gwomuntu, okwa li ku na aakiintu yaali aamwayinathana.

³ Sho ya li aakadhona, oya li muEgipiti, oya miti e taa ningi oohonda.

⁴ Edhina lyosheeli oOhola (tashi ti Samaria) nonkelo oOholiba (tashi ti Jerusalem). Onde ya hokana ayehe noya valele ndje aanona.

⁵ Ohola nando okwa li omukiintu gwandje, okwa kala moluhondelo nokwa lalwa naye kaaholi Aayassur.

⁶ Oya li aakwiita ya zala oonguwo oombwilili, oya li aanenentu nomalenga oondjayi; ayehe oya li aanashihako aagundjuka ya shitika aakayili yuukambe.

⁷ Okwa li omukiintu gwomalenga agehe gaAssur, nuuhalu we owe mu fala meinyateko lyokusimaneka iimenka yAayassur.

⁸ Okwa tsikile moluhondelo lwe ndoka a tamekele muEgipiti, moka a mitile. Okuza kuukadhona we oha lala naalumentu noye mu hondele.

⁹ Onkee onde mu gandja kaaholi ye Aayassur mboka e ya hole unene.

¹⁰ Oye mu hula iiteta e taa kwata po oyana aamati naakadhona e taye mu dhipaga po negongamwele. Okwa ningi elondodho kaakiintu yalwe, mboka ye mu pangula moohapu dhawo.

¹¹ “Omumwayina Oholiba nando e shi mono, okwa ningi owala ombwanda, ohonda e vule Ohola.

¹² Naye wo okwa li a halelela aanenentu naanashihako Aayassur — aakwiita ya zala yo opala — naakayili yuukambe, aamati ayehe ya shitika.

¹³ Onde shi mono kutya okwa mwamwelwa thilu, ayehe yaali oya faathana.

¹⁴ “Okwa ningine muuleeleka wuuhalu we. Okwa hilwa komathano gaanashihako aanenentu yaBabilonia ya fanekelwa kekuma nondomo ontiligane ye na omakwamo moombunda nomatsilu go opala komitse dhawo.

¹⁵

¹⁶ Sho a mono omathano gawo, mbalambala okwe ya haluka e ta tumu aatumwa kuyo muBabilonia.

¹⁷ Aababilonia oye ya, ya lale naye. Oye mu nyateke noluhondelo, sigo e ya nyanyala.

¹⁸ Okwi isuukulula montaneho, noshaa ngoka okwa tseya kutya ye omuniihulo. Onde mu nyanyala, ngaashi nda nyanyalele omumwayina.

¹⁹ Okwa pwile moluhondelo, ta lalwa naye, ngaashi a li he shi ningi kuukadhona, sho a li ohonda muEgipiti.

²⁰ Okwa li a halelela aalumentu yuulumentu wuusino nomasita ga fa guukambe uutsezi.”

²¹ (Oholiba, owa halele iipala yokuukadhona woye, sho wa li muEgipiti, moka ye ku papatele montulo e taa pampadhala omagundji goye, nowa kanitha uukadhona woye.)

²² “Oholiba, ngame, Omuwa Omupangeliawike, otandi ku lombwele te ti: Owa kunyukwa oohonda dhoye, ihe ngame otandi ke dhi sikumudha, dhi ku geele, notadhi ku homona koombinga adhihe.

²³ Otandi ka eta Aababilonia ayehe nAakaldea, aantu yokuPekod, Shoa naKoa, nAayassur ayehe. Otandi gongele aalumentu mboka ayehe aagundjuka aanenentu naanashihako, omalenga agehe ga simana naakayilinkambe ayehe oondjayi.

²⁴ Otaye ke ku ponokela taa zi kuumbangalantu taa etelele etangakwiita enene ye na omatembakwiita nomatemba gu udha taa gamenwa komahuuyanza nomagala giiyela. Otaye ku kunduka. Otandi ke ku gandja miikaha yawo, notaye ku pangula pampango yawo.

²⁵ Molwaashoka onde ku geela, otandi ya etha ye ku geele. Otaa ka teta eyulu lyoye nomakutsi goye notaa dhipaga aamwoye aamati naakadhona. Eeno, otaa ka kwata po aamwoye aamati naakadhona e taye ya fike po ye na omwenyo.

²⁶ Otaa togonyona oonguwo dhoye e taa kutha po iipako yoye.

²⁷ Uuhalu woye otandi u hulitha po nokuhola aalumentu kwoye hoka wa li u hole muEgipiti. Ito ka simaneka we nando oshimenka shimwe nenge u dhiladhile we Egipiti.”

²⁸ Omuwa Omupangeliawike ota ti: “Otandi ke ku gandja miikaha yaantu u ya tonde noku ya nyanyala.

²⁹ Molwaashoka ye ku tonde, otaa ka yuga po ashihe shoka wa longele notaye ku thigi olutu lwowala, owa yanunwa wa fa ohonda. Uuhalu woye nokuhondelwa kwoye

³⁰ okwo kwe ku etele mbika. Owa li ohonda yiigwana nowi inyateke niimenka yayo.

³¹ Owa landula oshinkoti shomumwanyoko, notandi ke ku pa oshitenga she shegeelo, u nwe mo.”

³² Omuwa Omupangeliawike ota ti: “Oto ka nwa mo moshitenga shomumwanyoko, osho oshinene shi na omutima. Shaa ngoka ote ke ku nyonkela noku ku dhina, oshitenga oshu udha.

³³ Otashi ke ku kolitha noto ka udha oluhodhi. Osho oshitenga shuumbanda noshokuyona, oshitenga shomumwanyoko Samaria.

³⁴ Oto ke shi nwa noku shi dhindolola, niitandu yasho oto nkwanuna omagundji goye. Ongame, Omuwa Omupangeliawike, nda popi.”

³⁵ Ngashingeyi Omuwa Omupangeliawike ota popi ta ti: “Molwaashoka wa dhimbwa ndje nowa pilamene ndje, oto ka tala omalwa omoluuhalu nokuhola iipala kwoye.”

³⁶ Omuwa okwa lombwele ndje a ti: “Muna gwomuntu, owi ilongekidha tuu okupangula Ohola naOholiba? Ya tamaneka molwiinima iinyanyalithi ye yi ningi.

³⁷ Oya hondele noya dhipaga — ya hondele niimenka noya dhipaga po aamati mboka ye ya valele ndje. Aamwandje oye ya yambele iimenka.

³⁸ Inaa ninga shika ashike. Oya nyateke otempeli yandje e taa yono Esabati, ndyoka nda tula po.

³⁹ Esiku tuu ndyoka ya dhipaga po aamwandje e taye ya yambele iimenka, oye ya kotempeli yandje e taye yi nyateke.

⁴⁰ “Oya tumu nokutumununa aahiyi, ya ka hiye aantu ye ye taa zi kokule, noye ya. Aakiintu oyi iyogo noya gwayeke iikulugumbo yawo e taa zala iipako yawo.

⁴¹ Oya kuutumba koombete dho opala, komeho gawo oku na oshitaafula sha tulwa iitsinino nomagadhi gooholivi ngoka nde ya pe.

⁴² Ombuyagano yongundu yaalumentu ya shambukwa otayi uvika. Mokati kaalumentu yaamakaha omwa li wo aanwi ya zi kombuga. Oya zaleke aakiintu uugondo komaako niikayiwa yuulenga komitse.

⁴³ Onda popi nda ti: ‘Oh, otaa hondele nomukiintu a kulupila moluhondelo!’

⁴⁴ Oya li haa shuna koohonda ndhika ishewe niishewe. Oya galukile kuOhola naOholiba, aakiintu mboka ye hole aalumentu.

⁴⁵ Aalumentu aayuuki otaye ke ya pangula molwoluhondelo nedhipago, oshoka otaa hondele, niikaha yawo oya nika ombinzi.”

⁴⁶ Omuwa Omupangeliawike ota popi ta ti: “Ya hiyileni ongundu, yi ya haluthe yo yi ya yuge.

⁴⁷ Ongundu nayi ya dhenge nomamanya noyi ya ponokele nomagongamwele. Nayi dhipage oyana aamati naakadhona nokufika po omagumbo gawo.

⁴⁸ Moshilongo ashihe otandi ka hulitha mo oluhondelo, shi ninge elondodho komukiintu kehe, kaa hondele we, ngaashi mbeyaka yaali ya ningi.

⁴⁹ Ne aamwayinathana, otandi mu geelele oluhondelo lweni nuulunde weni wokusimaneka iimenka. Notamu ka tseya kutya ongame Omuwa Omupangeliawike.”

24

¹ Mesiku etimulongo lyomwedhi omutimulongo gwomumvo omutimugoyi guupongekwa wetu, Omuwa okwa lombwele ndje a ti:

² “Muna gwomuntu, nyola esiku lyonena, oshoka esiku ndika olyo esiku ndyoka omukwaniilwa gwaBabilonia ta tameke ekondeko lyaJerusalem.

³ Lombwela aantu yandje aatangalali eyele ndika ngame, Omuwa Omupangeliawike tandi ti kuyo: Tula ombiga peziko, yu udhitha omeya.

⁴ Tula mo oontumba dhonyama, iiyoko niilama, udha mo omapandwa.

⁵ Kutha onyama yonzi; tula iikuni kohi yombiga. Tema ombiga yi pye, omasipa noontumba.”

⁶ Omuwa Omupangeliawike ota ti: “Akwetse, oshilando shaadhipagi! Osha fa ombiga ya kakatela iikogo, ya tinda okuyela. Ontumba nontumba tayi kuthwa mo, noinamu kala we sha.

⁷ Moshilando omwa dhipagelwa mo, ihe ombinzi inayi tikila pevi, mpoka ontsi tayi yi siikile. Oya tikile kemanya.

⁸ Onda thigile ombinzi mpoka; itayi vulu okusiikilwa notayi pula ofuto.”

⁹ Omuwa Omupangeliawike ota popi ta ti: “Yaye oshilando shaadhipagi! Ongame mwene tandi gongele iikuni.

¹⁰ Eteni utale iikuni! Pepeleni omulilo! Tulii po onyama! Telekeni omuhoka! Lungunitheni omasipa!

¹¹ Ngashingeyi tuleni ombiga yi li owala pomakala, yi lungune ya geta. Nena ombiga otayi ka yelithwa ishewe, sho iikogo ya pi ko,

¹² nando iikogo ayihe itayi zi ko komulilo.

¹³ Jerusalem, iihuna yoye yoluhondelo oye ku nyateke. Nando nda kambadhala oku ku yelitha, owa kala wa nyata. Ito ka yela we, sigo wa lambelwa kondjahi yandje.

¹⁴ Ongame, Omuwa Omupangeliawike, nda popi. Ethimbo lya thikana, ndi ikwatele ko. Kandi na ohenda nuulunde woye nenge ndi ku uvitile olukeno. Oto geelelwa shoka wa yono.” Omuwa Omupangeliawike okwa popi.

¹⁵ Omuwa okwa lombwele ndje

¹⁶ a ti: “Muna gwomuntu, mepathimo limwe otandi ka kutha po omuntu u mu hole unene. Ino yemata nenge u lile nenge u pitithe omahodhi.

¹⁷ Ino uvika to hekumuna. Ino ikulula epalu nenge u kale oompadhi dhowala, u holole oluhodhi. Oshipala shoye ino shi siikila nenge u lye iikulya yoosa.”

¹⁸ Onda li tandi popi naantu ongula onene. Ongulohi omukiintu gwandje okwa si, nongula yanakwasha onda ningi, ngaashi nda lombwelwa.

¹⁹ Aantu oya pula ndje ya ti: “Oshike to ningi ngaaka?”

²⁰ Onde ya lombwele nda ti: “Omuwa okwa lombwele ndje,

²¹ ndi lombwele Aaisraeli elaka ndika: Otamu itangele otempeli. Omu hole oku yi tala nokuya kuyo, ihe Omuwa ote ke yi nyatekitha. Aana yeni aamati naakadhona mboka ya kala muJerusalem, otaa dhipagelwa molugodhi.

²² Nena otamu ka ninga, ngaashi nda ningi. Itamu ka siikila iipala yeni nenge mu lye iikulya yoosa.

²³ Itamu ki ikulula omapalu nenge mu kale poompadhi dhowala, mu yemate nenge mu lile oosa. Otamu ka kombwa po moluulunde weni notamu ka kemenathana.

²⁴ Nena otandi ka ninga endhindhiliko kune; otamu ka ninga ayihe mbyoka nda ningi. Omuwa ota ti, uuna shika tashi ningwa, otamu ka tseya kutya oye Omuwa Omupangeliawike.”

²⁵ Omuwa okwa ti: “Muna gwomuntu, ngashingeyi otandi ke ya kutha otempeli ndjoka haye yi inomene noku yi nyanyukilwa noye hole oku yi tala nokuya kuyo. Otandi ka kutha po oyana aamati naakadhona.

²⁶ Esiku ndyoka tandi shi ningi, ontauki otayi ke ku hokololela ehanagulo ndika.

²⁷ Esiku tuu ndyoka oto ka galulilwa omukumo gwokupopya, ngoka wa kanitha, e to ka popya naye. Pahedhi ndjika oto ka ninga endhindhiliko kaantu, noyo taa ka tseya kutya ongame Omuwa.”

25

¹ Omuwa okwa lombwele ndje a ti:

² “Muna gwomuntu, hunganekela oshilongo Ammon.

³ Ya lombwela ya pulakene shoka ngame, Omuwa Omupangeliawike, tandi ti: Owa li wa nyanyukilwa okumona otempeli yandje ya nyatekwa, okutala evi lyaIsrael lya mbugalekwa nokumona Aajuda taa yi muupongekwa.

⁴ Owa li wa nyanyukwa, ihe otandi etha omazimo gomombuga yokuuzilo ge ku sinde. Otaa ka yunga oontanda dhawo moshilongo shoye e taa kala mo. Otaa ka lya iiyimati notaa ka nwa omahini goye.

⁵ Oshilando Rabba otandi shi shitukitha uunapelo woongamelo, noshilongo ashihe Ammon eputu lyokunapa oonzi, opo u tseye kutya ongame Omuwa.”

⁶ Omuwa Omupangeliawike ota ti: “Owa hakele nomake nokunuka kenyanyu. Owa dhini oshilongo Israel.

⁷ Molwaashoka we shi ningi, otandi ke ku gandja miikaha yiigwana yilwe mbyoka tayi ke ku yuga. Otandi ke ku hanagula po thiluthilu noito ka ninga we oshigwana nenge u kale noshilongo shoye mwene. Nena oto ka tseya kutya ongame Omuwa.”

⁸ Omuwa Omupangeliawike okwa ti: “Molwaashoka Moab a popi ta ti: ‘Juda okwa fa iigwana yilwe,’

⁹ otandi ka ponokelitha iilando mbyoka ya shiga ongamba yaMoab, mwa kwatelelwa iilando yo opala — Bet Jeshimot, Baal Meon naKiriataim.

¹⁰ Otandi ka sinditha Moab komazimo gomombuga yokuuzilo pamwe naAmmon, opo Moab kaa ninge we oshigwana.

¹¹ Otandi ka geela Moab, notaa ka tseya kutya ongame Omuwa.”

¹² Omuwa Omupangeliawike okwa ti: “Aaedom oya galulile Juda ondjahi yonyanya, nondjahi ndjoka ye etele Edom ondjo.

¹³ Ngashingeyi otandi tseyitha kutya otandi ka geela Edom notandi dhipaga aalumentu ayehe niimuna. Otashi ka ninga eputu okuza koshilando Teman sigo okoshilando Dedan, aantu notaa ka dhipagelwa molugodhi.

¹⁴ Oshigwana shandje Israel otashi ka galulila Edom ondjahi omolwandje, notashi ka ninga Edom a tililwe ondjahi yandje ondhigu. Edom ota ka tseya kutya oku mu galulila ondjahi yandje otaku ti ngiini.” Omuwa Omupangeliawike oye a popi.

¹⁵ Omuwa Omupangeliawike okwa ti: “Aafilisti oya galulile aatondi yawo ondjahi ondhigu e taye ya hanagula po muutondwe.

¹⁶ Omolwashoka tandi tseyitha kutya otandi ka ponokela Aafilisti noku ya komba po. Otandi ka yonagula po ayehe mboka ya kala kooha dhefuta.

¹⁷ Otandi ke ya geela noonkondo e tandi ya galulile ondjahi. Otandi ya poolele ondjahi yandje. Nena otaa ka tseya kutya ongame Omuwa.”

26

¹ Mesiku lyotango lyomwedhi gwomumvo omutimulongo nogwotango guupongekwa wetu, Omuwa okwa lombwele ndje a ti:

² “Muna gwomuntu, shika osho sha nyanyudha aantu yomuTiro. Otaa igidha taa ti: ‘Jerusalem osha teyagulwa po! Aahalithi yasho oya kana! Itashi ka hakana we omaliko getu!’

³ “Ngashingeyi ngame, Omuwa Omupangeliawike, otandi ti: Shilando Tiro, ngame omutondi gwoye. Otandi ka eta iigwana oyindji, yi ku ponokele; otayi ya ya fa omakuthikuthi gefuta.

⁴ Otaa ka kumuna po omakuma goshilando shoye notaa hanagula po ooshungo dhoye. Opo ihe tandi ka komba po ontsi ayihe e tandi thigi po omamanya ga kwehuka.

⁵ Aayuli yoohi otaa ka aneka po iiyulitho yawo pontuntu mpoka wa li. Ongame, Omuwa Omupangeliawike, nda popi. Iigwana otayi ka yuga Tiro,

⁶ naamboka ya kala momikunda dhasho kooha dhefuta, otayi ke ya dhipaga po nomagongamwele gayo. Nena Tiro ota ka tseya kutya ongame Omuwa.”

⁷ Omuwa Omupangeliawike ota ti: “Otandi ka tala omukwaniilwa omunene kwaayehe — omukwaniilwa gwaBabilonia Nebukadnezzar — a homone Tiro. Ote ya ziilile kuumbangalantu netangakwiita enene li na aakayilinkambe.

⁸ Oomboka ya kala momikunda dhokooha dhefuta, otaa ka dhipagelwa molugodhi. Aatondi otaa fulu omikanka, otaa tungu omutuni gwekondekela e taye ku yeluthile omahuuyanza ye ku kondjithe.

⁹ Otaa ka nyanyula omakuma goye niikumunithi yomakuma notaa hanagula po ooshungo dhoye niitago yiiyela.

¹⁰ Oshikogo shontsi ya tukulwa kuukambe wawo, otashi ku kwidhidhike. Oshihomo shuukambe wawo tau hili omatemba nomatembakwiita, otashi ka kakamitha omakuma goye, nge taa pitile miiyelo yomakulukuma goshilando shoye.

¹¹ Aakayilinkambe yawo otaa mbolokotele momapandaanda goye, taa dhipaga aantu yoye nomagongamwele. Oongudhi dhoye oonene otadhi ka undulilwa pevi.

¹² Aatondi yoye otaye ki ikutha ko nuuyamba woye niipindikwa yoye. Otaa ka undulila omakuma goye pevi e taa mbonyona po omagumbo goye guuyamba. Otaa ka kutha po oondhopi, iipilangi niitandu ayihe noku yi ninginitha mefuta.

¹³ Otandi ka hulitha po omaimbilo goye agehe notandi ka mweneka ewi lyuuharpa woye.

¹⁴ Otandi thigi po ashike emanya ethenu, mpoka aayuli yoohi taa aneke iiyulitho yawo yoohi. Oshilando itashi ka tungululwa we. Ongame, Omuwa Omupangeliawike, nda popi.”

¹⁵ Omuwa Omupangeliawike ota lombwele oshilando Tiro ta ti: “Nge wa sindika, aantu mboka ya kunkula nomunkulo gwefuta, otaa ka haluka keuyagano lyaamboka taa dhipagwa.

¹⁶ Aakwaniilwa ayehe yiigwana yaayendifuta otaa ka kuluka ko kiipangelapundi yawo. Otaa ka hula mo oonguwo nomalwaakani gawo guulenga yo taa kuutumba mevi taa kakama. Otaa ka haluka keadhiko lyoye, notaa ka nyengwa okwiidhidhimika mokukakama kwawo.

¹⁷ Otaye ke ku imbila eimbilo ndika lyoosa taa ti: Shilando wa simana, owa kumunwa po! Oosikepa dhoye odha kombwa mo mefuta. Aanashilando yoye oya pangelele omafuta noya halutha ayehe pomunkulofuta.

¹⁸ Nena, omesiku ndika wa teka po, oontuntu otadhi kakama, aakalimo noya kunkwa kehanagulo ndika.”

¹⁹ Omuwa Omupangeliawike ota ti: “Otandi ku ningi oshilando sha mbugala shaa na aantu. Otandi ku siikile nuulemeya wefuta.

²⁰ Otandi ke ku fala mwi, muuyuni wokuusi, u ka tsakanene naakulu yonale. Otandi ke ku kaleka muuyuni womohi mokati komakulukuma gaaluhe, u ka hangane naambeyaka yomuusi. Otashi ti nduno, ito ka kala we oshilando shi na aantu, u kale ando mokati kiilando yaanamwenyo.

²¹ Otandi ke ku ninga oshiholelwa shehalutho, notali ka eta ehulilo lyoye. Aantu otaye ke ku konga, ihe ito ka monika we.” Omuwa Omupangeliawike oye a popi.

27

¹ Omuwa okwa lombwele ndje a ti:

² “Muna gwomuntu, imbila Tiro eimbilo lyoosa,

³ oshilando shoka shi li polungenge lwefuta notashi pindike niigwana yi li komunkulofuta. Shi lombwela shoka Omuwa Omupangeliawike ta ti: Tiro, oto itangele eopalo lyoye.

⁴ Egumbo lyoye efuta. Aatungi yoye oye ku ningi wa fa osikepa yo opala.

⁵ Iipilangi yoye ayihe oyomikiperesi dha za kondundu Hermon, olwoondje lwoye olwomusendeli gwokuLibanon.

⁶ Oomwandi dhokuBaasha omo mwa hongwa iidhugithoti yoye, noontala dhoye odha pangelwa niipilangi yomikiperesi dhokuKipro, ya takelwa uulenga womasipa goondjamba.

⁷ Oothayila dhoye odholiina yokuEgipiti dha hondjelwa uulenga. Otadhi dhimbululwa nuupu kokule. Oondunda dhoye dhokugamena kuupyu wetango odha ningwa nomalapi ga tungika omatiliganembwilili gokontuntu Kipro.

⁸ Aadhugi yoye oya zi kiilando Sidon naArvad. Oonkulungulela dhoye mwene odha li aathayili.

⁹ Omangomba ga pyokoka gokuBiblos oga pangele shoka sha teka mungoye. Aathayili ya za akuhe ku na oosikepa, oya halitha moositola dhoye.

¹⁰ “Aakwiita ya za kuPersia, Lidia naLibia, oya yakula metangakwiita lyoye. Oya tsilike omahuuyanza nomagala gawo giiyela moongulu dhaakwiita yoye. Oyo aantu ye ku etele esimano.

¹¹ Aakwiita ya za kuArvad, oya tonatele omadhingililokuma goye, naantu ya za kuGamad, oya langele ooshungo dhoye. Oya tsilike omahuuyanza gawo komadhingililokuma goye. Oyo aantu mboka ye ku pe eopalo.

¹² “Owa halitha muSpania nowa landitha iinima yoye yomaludhi ogendji oshisiliveli, osheela oshiluudhe, otina noshumbu.

¹³ Owa halitha muGreka, Tubal naMeshek nowa landitha iinima yoye, aapika niikwaniipangitho yoshikushu.

¹⁴ MuBet-Togarma iinima yoye owe yi pingakanitha noonani, uukambe wolugodhi nomamulutiya.

¹⁵ Aarodos oya pindike nangoye; aantu yokomavi ogendji komunkulofuta oye ku pe omayego goondjamba noshiti oshiluudhe mokupingakanitha iinima yoye.

¹⁶ Aasiria oya landa nangoye. Oye ku etele omamanya goturkoisi, iiyata iitiliganembwilili, iiyata ya hondjelwa uulenga, ooliina dha tungika, oomba nomamanya gojaspes, ya lande iipindi yoye oyindjiyindji.

¹⁷ Juda naIsrael oya futu iipindi yoye niilya, nomagadhi goonyushi, nomagadhi gooholivi noniitoyithi.

¹⁸ Aadamaskus oya pindike nangoye, niilandithomwa yoye oye yi futu nomaviinu gokuHelbon nomafufu goonzi gokuZahar. Oya pingakanitha iinima yoye nosheela oshiluudhe niitoyithi.

¹⁹

²⁰ Aadedan oya pingakanitha iinima yoye noombanza nomakumbatha gokomitumba dhuukambe.

²¹ Aayarabia naapangeli yoshilongo Kedar oya futu iipindi yoye noonzigona, noonzi noniikombo.

²² Iipindi yoye aahalithi Aasheba nAarama oya pingakanitha niizimba iitoye, nomamanya ge na ondilo nonoshingoli.

²³ Iilando Haran, Kanne naEden, aahalithi yaSheba, iilando yaAssur naKilmad ayihe oya pindike nangoye.

²⁴ Oye ku landitha oonguwo dhuufuuli, iiyata iitiliganembwilili naambyoka ya hondjelwa uulenga, oombanza dhoombapa dha yela noongodhi dha yogohekeka.

²⁵ Iipindi yoye oya humbatwa moosikepa oonene dhoofulaha. Ongoye owa li wa fa osikepa mefuta ya longelwa ofulaha ondhigu.

²⁶ Aadhugi yoye sho ye ku fala kefuta, ombepo yokuuzilo oye ku etele oshiponga u li kokule nevi.

²⁷ Uuyamba woye auhe wiipindi, aathayili yoye ayehe naadhugi, omangomba mokupangela osikepa naahalithi yoye, aakwiita ayehe mosikepa — ayeheyehe oya kanene mefuta, osikepa yoye sho ya teka.

²⁸ Onkugo yaathayili taa si omeya, oya tukulutha ewi komunkulo.

²⁹ Osikepa kehe oya thigwa po, nomuthayili kehe a yi komunkulo.

³⁰ Ayehe otaye ku lili omahodhi omapyu. Otayi igundu ontsi momitse yo taa galangata momutoko.

³¹ Otaye ku ikululile omitse dhawo, notaa zala omahahi. Oomwenyo dhawo odha lulilwa e taa lili.

³² Otaye ku izizimine eimbilo lyoosa: ‘Itatu vulu okuyeleka Tiro, Tiro ngoka ngashingeyi a mwena mefuta.

³³ Uuna iipindi yoye ya kondo omafuta, owa mana po oompumbwe dhoshigwana kehe. Aakwaniilwa oya ningi aayamba okuuyamba womaliko goye.

³⁴ Ngashingeyi owa tekela mefuta; ou li wa ningina muule wefuta. Omaliko goye naalongeli yoye oya ningine mefuta pamwe nangoye.’

³⁵ “Ayehe ya kala komunkulofuta, oya tilithwa koshiponga shoye. Naakwaniilwa yawo otaa haluka, neshololo olya nyolelwa miipala yawo.

³⁶ Wa kana, wa kana sigo aluhe. Aahalithi muuyuni auhe oya haluka, ya tila pamwe oshiponga shoye otashi ya adha wo.”

28

¹ Omuwa okwa lombwele ndje a ti:

² “Muna gwomuntu, lombwela omupangeli gwaTiro shoka ngame, Omuwa Omupangeliawike, tandi mu lombwele: Muuntsa woye oto inomo kutya ongoye kalunga. Oto ti owa kuutumba koshipangelapundi wa fa kalunga, wa kundukwa komafuta. Oto ifethitha kalunga, ihe hasho, ngoye omusi, ku shi kalunga.

³ Oto dhiladhila ngoye omunandunge u vule Daniel nokape na oshiholekwa tashi ku holekwa.

⁴ Uunongo woye nomakoto goye oge ku ningi omuyamba gwomaliko goshingoli noshisiliveli.

⁵ Owa pindike noondunge e to mono iihohela. Oto itangele uuyamba woye!

⁶ “Ngashingeyi ngame, Omuwa Omupangeliawike otandi ti: Molwaashoka to dhiladhila kutya ngoye ou na oondunge ngaashi kalunga,

⁷ Otandi ka eta aatondi yaa na ohenda, ye ku ponokele. Otaa ka hanagula po iinima yoye ayihe iiwanawa mbyoka wa likola kuunkulungu nokuunongo woye.

⁸ Otaye ke ku dhipaga po e taye ku undulile mefuta, omo u fumvikwe.

⁹ Nge taye ya ye ku dhipage po, oto ki inoma natango tuu kutya ongoye kalunga? Koshipala shaadhipagi yoye oto ka ninga omusi, ku shi kalunga nande.

¹⁰ Oto ka sa wa fa ombwa miikaha yaakwiilongo aakaanakalunga. Ongame, Omuwa Omupangeliawike, nda gandja oshipango shika.”

¹¹ Omuwa okwa lombwele ndje ishewe a ti:

¹² “Muna gwomuntu, lilila oshiponga shoka sha tegelela omukwaniilwa gwaTiro. Mu lombwela shoka ngame, Omuwa Omupangeliawike, tandi ti: Tango owa li oshiholelwa sheopalo. Owa li omunandunge nomuntuuntuu!

¹³ Owa kala muEden, oshikunino shaKalunga, nowa zala omamanya ge na ondilo gomaludhi ogendji: oorubini, ootopasi, oojaspes, ookrisoliti, okarenelia, oohoniks, oosafire, ooturkoisi noosmaragdi. Owa li u na uulenga woshingoli. Owe u ningilwa, uuna wa shitwa.

¹⁴ Onda langeke ko omukerubi, e ku langele. Owa kala kondundu yandje ondjapuki nowa lyanga mokati komamanya taga adhima.

¹⁵ Okuza uuna wa shitwa, owi ihumbata nawa, sigo wa tameke okulonga uuwinayi.

¹⁶ Owa li wi ipyakidhila niipindi nokulanditha, noshe ku fala muukolokoshi nomuulunde. Omolwashoka nde ku thiminike, u ze ko kondundu yandje ondjapuki, nomukerubi ngoka e ku langele, okwe ku tidha mo momamanya taga adhima.

¹⁷ Owi itangele eopalo lyoye, nesimano lyoye lye ku ningi egoya. Molwaashika onde ku hata pevi nonde ku thigi po, u ninge elondodho kaakwaniilwa yalwe.

¹⁸ Nuuwinayi woye owindji nomakotokelo goye mokulanda owa nyateke omahala goye omayapuki. Onkee onda tomeke oshilando shoye omulilo, nogwe ku lungunitha po. Ayehe mboka taye ku tala ngashingeyi, otaa ku mono wa fupipikwa momutoko.

¹⁹ Owa kana, wa kana sigo aluhe, niigwana ayihe mbyoka ya li ye ku tseya, oya haluka, ya tila kutya otayi ka adhika koshiponga shoye.”

²⁰ Omuwa okwa lombwele ndje a ti:

²¹ “Muna gwomuntu, hunganeka oshilando Sidon.

²² Lombwela aantu yamo shoka ngame, Omuwa Omupangeliawike, tandi ya lombwele: Ngame omutondi gwoye, Sidon; otandi ke ku hololela uuyapuki wandje. Aantu otaa ka tseya kutya ongame Omuwa, sho tandi geele mboka ya kala mungoye.

²³ Otandi ke ya tumina elega nokukungululitha ombinzi momapandaanda goye. Oto ka homonwa koombinga adhihe, naantu yoye otaa ka dhipagwa po. Nena oto ka tseya kutya ongame Omuwa.”

²⁴ Omuwa okwa ti: “Kaku na nando oshimwe shomiigwana mbyoka ya kunduka Israel, tashi mu sheke, tashi ka ninga we omakwega noondjoho, shi ehameke Israel. Oyo notayi ka tseya kutya ongame Omuwa Omupangeliawike.”

²⁵ Omuwa Omupangeliawike ota ti: “Otandi ka kongolola Aaisraeli miigwana moka nde ya halakanithile, ndele niigwana ayihe tayi ka tseya kutya ongame omuyapuki. Aaisraeli otaa ka kala mevi lyawo yene, evi tuu ndyoka nde li pe omuntu gwandje Jakob.

²⁶ Otaa ka kala mo nombili. Otaa ka tunga omagumbo e taa tsike iitsambe yomiviinu. Otandi ka geela aashiinda yawo ayehe mboka taye ya dhini, Israel nota ka kala megameno. Notaa ka tseya kutya ongame Omuwa Kalunga kawo.”

29

¹ Mesiku etimulongo netiyali lyomwedhi omutimulongo gwomumvo omutimulongo guupongekwa, Omuwa okwa lombwele ndje a ti:

² “Muna gwomuntu, hunganekela omukwaniilwa gwaEgipiti. Mu lombwela, nkene ta geelwa pamwe naayehe mboka ye li muEgipiti.

³ Popya to ti, Omuwa Omupangeliawike ota lombwele omukwaniilwa gwaEgipiti ta ti: Ngame omutondi gwoye, ngandu ngoye omuhaluthi u li momulonga Niili. Oto ti, Niili ogwoye nowe gu shiti.

⁴ Otandi ke ku tula ondjolo moondjego, noohi dhomomulonga gwoye otandi ke dhi kanyatelitha kungoye. Opo ihe otandi ke ku hila mo muNiili, noohi adhihe dha kanyatela kungoye.

⁵ Otandi ke ku umbila mombuga pamwe noohi adhihe ndhoka. Oto ka gwila puukukutu, nomudhimba gwoye itagu ka fumvikwa. Otandi ke gu pa oondhila niilikama, yi gu lye po.

⁶ Nena Egipiti alihe otali ka tseya kutya ongame Omuwa.” Omuwa ota ti: “Egipiti, Aaisraeli oye ku inekela, u ya kwathe, ihe ku vulathane noshihenguti shenenge.

⁷ Nge ye ku itsile, oto teka po, e to ya tsu moonkwapa noku ya thingonona oombunda.

⁸ Ngashingeyi ngame, Omuwa Omupangeliawike, otandi ku lombwele kutya otandi ka eta aantu ye ku ponokele ye na omagongamwele, notaa dhipaga po aantu yoye niimuna yoye.

⁹ Egipiti otali ka ninga eputu lyowala. Notaa ka tseya kutya ongame Omuwa. “Oshoka oto ti Niili ogwoye nowe gu shita,

¹⁰ ngame omutondi gwoye nogwaNiili. Otandi mbugaleke Egipiti alihe, okuza koshilando Migdol muumbangalantu sigo okoshilando Aswan muumbugantu sigololo oongamba dhaEtiopia.

¹¹ Kaku na nando ompadhi yomuntu nenge ekondo lyoshimuna tali li taakana. Methimbo lyoomvula omilongo ne kaku na sha tashi kala mo.

¹² Egipiti otandi ke li ninga eputu mokati kiilongo yilwe ya mbugalekwa muuyuni. Iilando yaEgipiti otayi ka kala monkalo yomakulukuma omimvo omilongo ne. Omakulukuma omanene ge vule goshilando kehe. Aayegipiti otandi ke ya ninga oontauki. Otaa ka taukila koshilongo kehe e taa ka kala mokati kiigwana yilwe.”

¹³ Omuwa Omupangeliawike ota ti: “Konima yomimvo omilongo ne otandi ka kongolola Aayegipiti miigwana moka nde ya halakanithile,

¹⁴ notandi ke ya eta, ya kale muumbugantu waEgipiti, oshilongo shawo shonale. Otaa ka ninga oshilongo shaa na oonkondo,

¹⁵ oshilongo oshinkundinkundi shi vulike kwaayihe, noitashi ka sinda we iigwana yilwe. Otandi shi shundula, opo shaa pangele iigwana.

¹⁶ Israel ite ke shi inekela we, shi mu kwathe. Oshiponga shaEgipiti otashi ka dhimbulutha Israel kutya nani epuko, sho e shi inekele. Nena Israel ota ka tseya kutya ongame Omuwa Omupangeliawike.”

¹⁷ Mesiku lyotango lyomwedhi gwotango gwomumvo omutimilongombali nomutiheyali guupongekwa wetu, Omuwa okwa lombwele ndje a ti:

¹⁸ “Muna gwomuntu, nuudhigu uunene omukwaniilwa gwaBabilonia Nebukadnezzar okwa ponokelitha aakwiita ye Tiro. Okwe ya humbatitha omitenge omidhigu, onkee omitse dhawo dha thuka nomapepe ga pushuka, ihe omukwaniilwa naakwiita ye inaa likola sha muupyakadhi wawo.”

¹⁹ Onkee ano Omuwa Omupangeliawike ota ti: “Otandi gandja Egipiti miikaha yomukwaniilwa Nebukadnezzar. Ote ke li yuga noku li hakana po e ta kutha po uuyamba waEgipiti auhe e te u futu etangakwiita lye.

²⁰ Otandi mu pe Egipiti ondjambi yiilonga ye, oshoka etangakwiita lye olya longele ndje. Ongame, Omuwa Omupangeliawike, nda popi.

²¹ “Uuna shika tashi ningwa, otandi ka nkondopaleka Aaisraeli e tandi ka makula okana koye, Hesekiel, opo u ya popithe, noya tseye kutya ongame Omuwa.”

30

¹ Omuwa okwa popi ishewe a ti:

² “Muna gwomuntu, hunganeka, u popye shoka ngame, Omuwa Omupangeliawike, tandi ti. Kololoka oohapu ndhika: Esiku etilithi otali ya!

³ Esiku olya thikana, uuna Omuwa ti ikwatele ko, esiku lyomuzimbi nolyomalwa kiigwana.

⁴ MuEgipiti otamu ka kala iita nuuwehame uunene muSudan. Oyendji otaa ka dhipagwa muEgipiti; oshilongo otashi ka yugwa, otashi ka ninga omakulukuma.

⁵ “Iita mbyoka otayi ka dhipaga aakwiita ya hehelwa ya za kuSudan, Lidia, Libia, Arabia, Kub, nokuli mboka ya za koshigwana shandje.”

⁶ Omuwa Omupangeliawike ota ti: “Okuza kuMigdol muumbangalantu sigo okuAswan muumbugantu, aapopili yaEgipiti ayehe otaa ka dhipagelwa molugodhi. Etangakwiita lya kinga otali ka halakanithwa. Ongame, Omuwa Omupangeliawike, nda popi.

⁷ Oshilongo otashi ka mbugala lela mokati kiilongo ya mbugala yomuuyuni, niilando yasho otayi ka kumunwa po thilu.

⁸ Nge tandi tomeke Egipiti naapopili yasho taa dhipagwa po, otaa ka tseya kutya ongame Omuwa.

⁹ “Uuna esiku ndyoka tali thiki, naEgipiti lya hanagulwa po, otandi ka tuma aatumwa moosikepa, ya ka haluthe Aasudani mombili yawo. Otaa ka kakama kuuwehame. Esiku ndyoka olya thikana!”

¹⁰ Omuwa Omupangeliawike ota ti: “Otandi ka longitha Nebukadnezzar, omukwaniilwa gwaBabilon, a hulithe po uuyamba waEgipiti.

¹¹ Oye pamwe netangakwiita lye lyaa na ohenda, ote ya a mbugaleke evi. Otaa ponokele Egipiti nomagongamwele, nevi otali ka udha omidhimba.

¹² Otandi ka kukutika Niili nokugandja Egipiti miikaha yaantu aapwidhi. Aakwiilongo otaa ka mbugaleka oshilongo ashihe. Ongame, Omuwa, nda popi.”

¹³ Omuwa Omupangeliawike ota ti: “Otandi ka hanagula po iimenka niikalunga yiifundja muMemfis. Itamu ka kala we ngoka ta lele Egipiti, notandi ka tilitha aantu ayehe.

¹⁴ Otandi mbugaleke Egipiti muumbugantu nokutomeka Zoan omulilo muumbangalantu. Otandi ka pangula oshilandopangelo Thebes.

¹⁵ Otandi ka polithila ondjahi yandje moshilando Pelusium, oshilandohote sha kola shaEgipiti. Otandi ka hanagula po uuyamba waThebes.

¹⁶ Egipiti otandi li tomeke omulilo, naPelusium otashi ka kala muuwehame uunene. Omakuma gaThebes otaga kumunwa po, noshilando otashi ka kungululwa po kefundja.

¹⁷ Aagundjuka yomiilando Heliopolis naPi-Beset otaa ka sila molugodhi, naantu yalwe otaa ka kwatwa po oonkwatwa.

¹⁸ Omilema otadhi ka kwidhidhika Takpanhes, uuna tandi teya po oonkondo dhaEgipiti nokuhulitha po omwiityo gwasho guuntsa. Oshikogo otashi ka kwidhidhika Egipiti, naantu yomiilando yasho otaa ka kwatwa po oonkwatwa.

¹⁹ Uuna tandi geele Egipiti ngeyi, otaa ka tseya kutya ongame Omuwa.”

²⁰ Mesiku etiheyali lyomwedhi gwotango lyomumvo omutimulongo nogwotango guupongekwa wetu, Omuwa okwa lombwele ndje a ti:

²¹ “Muna gwomuntu, onda teya okwooko kwomukwaniilwa gwaEgipiti. Kape na ngoka e ku manga nenge e ku tule melapi, opo ku aluke kwo ku ka kwate ishewe egongamwele.

²² Ngame, Omuwa Omupangeliawike, otandi ti ngashingeyi: Ngame omutondi gwomukwaniilwa gwaEgipiti. Otandi ka teya po omaako ge agehe gaali, okwooko okundjolowele nokukwawo hoka kwa teka nale, negongamwele otali ka gwila pevi.

²³ Aayegipiti otandi ke ya halakanithila nuuyuni auhe.

²⁴ Omaako gomukwaniilwa gwaBabilonia otandi ke ga koleka e tandi tula egongamwele lyandje moshikaha she. Ihe omaako gomukwaniilwa gwaEgipiti otandi ga teya, nota ka kema e ta si montaneho yaatondi ye.

²⁵ Eeno, otandi ke mu nkundipaleka nokukoleka omukwaniilwa gwaBabilon. Uuna tandi mu pe egongamwele lyandje, oye note li taganekele lwokuEgipiti, shaa ngoka ota ka tseya kutya ongame Omuwa.

²⁶ Aayegipiti otandi ke ya halakanithila nuuyuni. Notaa ka tseya kutya ongame Omuwa.”

31

¹ Mesiku lyotango lyomwedhi omutitatu gwomumvo omutimulongo nogwotango guupongekwa wetu, Omuwa okwa lombwela ndje a ti:

² “Muna gwomuntu, lombwela omukwaniilwa gwaEgipiti naantu ayehe to ti: Ngoye omunankondo ngiini! Otandi ku yeleke nalye?

³ Owa fa omusendeli muLibanon, gwiitayi yomuzile gwaalofu, omuti gwa tsa miikogo.

⁴ Ogwa kokithwa komeya, omilonga dhokohi odhe gu palutha. Odha tutike ehala lyomuti mpoka gwa mena. Dha tondokitha omeya komiti adhihe dhomomugulu.

⁵ Sho pwa li pwa tuta nawa, ogwa koko omule gu vule adhihe. Iitayi yagwo oya kola niile.

⁶ Miitayi yagwo oondhila dhi ili nodhi ili odha tungile mo iihandhila yadho. Iiyamakuti oya valele momuzile gwagwo. Iigwana yomuuyuni oya gondjo momuzile gwagwo.

⁷ Omuti ogwa li gwo opala ngiini — omule gu na iitayi iile. Omidhi dhagwo odha tsa mevi muule, moonza dhomilongameya.

⁸ Moshikunino shaKalunga kamu na omusendeli tagu yelekwa nagwo. Kaku na omukiperesi gu thike piitayi yagwo, nenge omukwiyu tagu yelekwa niimpona yagwo. Meopalo lyagwo ogu vule omiti adhihe moshikunino shaKalunga.

⁹ Onde gu opaleke, niitayi ya yalalala. Ogwa li gwa silwa efupa komiti adhihe muEden, moshikunino shaKalunga.

¹⁰ Ngashingeyi ngame, Omuwa Omupangeliawike, otandi mu lombwele shoka tashi ka ningiwa omuti nguka gwa koko, sigo gwa tsu kiikogo. Sho gwa ningi omule, ogwi itanga unene.

¹¹ Onkee onde gu ekelehi nokweetha omupangeli omukwiilongo e gu kwate po. Ota ka ninga nagwo, ngaashi gwi ilongele nuukolokoshi wagwo.

¹² Aakwiilongo yaa na ohenda otaye gu ke po e taye gu etha. Iitayi niimpona yagwo ya teka otayi ka gwila kondundu nomesilu kehe moshilongo. Iigwana ayihe mbyoka ya li momuzile gwagwo, otayi zi po e tayi yi.

¹³ Oondhila otadhi ke ya notadhi lambele komuti gwa gwila pevi, niithitukuti otayi ka taaguluka iitayi yagwo.

¹⁴ Ano okuza nena ndjika kaku na we omuti tagu ka koka gu ninge omule gwe gu fa nenge gu mbunyuke iitayi yi tse miikogo, nando gu tutikwe ngiini. Adhihe odha uthilwa eso dha fa omuntu nakukasa, dhi ye kumboka taa kulukile muuyuni wokuusi.”

¹⁵ Omuwa Omupangeliawike ota popi ta ti: “Esiku ndyoka omuti nguka tagu yi muuyuni wokuusi, otandi ke gu siikilitha oonza dhomeya endhindhiliko lyokulila oosa. Otandi ka keelela omilonga noitandi pitika, oonza dhi kunguluke omeya. Molwaashoka omuti gwa si, otandi ka undulila oondundu dhaLibanon omilema notandi ka ganyitha omiti adhihe dhomomugulu.

¹⁶ Uuna tandi gu tumine muuyuni wokuusi, ewalakato lyokugwapo kwagwo otali kakameke iigwana. Omiti adhihe muEden nomanyakwa agehe gomiti dha tekelwa nawa dhaLibanon ndhoka dha kulukile muuyuni womohi, otadhi ka hupuluthwa kekulukilomo lyagwo.

¹⁷ Otadhi ka ya pamwe nagwo muuyuni wokuusi, dhi ka tsakanene naandhoka dha tetekele nale. Naayehe mboka ye li momuzile gwagwo, otaa ka halakanithilwa mokati kiigwana ayihe.

¹⁸ “Omuti nguka ogwo omukwaniilwa gwaEgipiti pamwe naantu ye ayehe. Nomiti dhomuEden kadha li omile nomisimani. Ihe ngashingeyi ogwa fa omiti dhaEden, otagu ka kulukila muuyuni wokuusi gu tsakanene naakaanakalunga naamboka ya dhipagelwa molugodhi. Ongame nda popi.” Omuwa Omupangeliawike osho ta ti.

32

¹ Mesiku lyotango lyomwedhi omutimulongo nomutiyali gwomumvo guupongekwa wetu, Omuwa okwa lombwele ndje a ti:

² “Muna gwomuntu, tangumuna oondjimbo dhoosa dhomukwaniilwa gwaEgipiti. Mu lombwela etumwalaka lyandje tali ti: Owa fa onkoshi mokati kiigwana, ihe owa fa ongandu tayi wilola momulonga. Oto vongola omeya noompadhi dhoye e to nyateke omilonga.

³ Iigwana oyindji nge ya gongala, otandi ke ku yula moshiyulitho shandje, notayi shi kookololele komunkulo.

⁴ Otandi ke ku umbila pevi e tandi gongele oondhila adhihe niithitukuti yomuuyuni, yi ku lye po yo yi paluke.

⁵ Oondundu nomasilu otandi ke ga udhitha nonyama yoye yo ola.

⁶ Otandi ka tilahi ombinzi yoye, sigo ya kunguluka koondundu nokuudha omilonga.

⁷ Uuna tandi ku hanagula po, otandi ka siikila ewangandjo nokudhima po oonyothi. Etango otali ka holama handiyaka yiikogo, nomwedhi itagu minikile we.

⁸ Otandi ka dhima omaminikilo agehe gokegulu nokuundulila uuyuni woye momilema. Ongame, Omuwa Omupangeliawike, nda popi.

⁹ “Iigwana oyindji otayi ka lulilwa, uuna tandi taandelitha onkundana yokuhanagulwapo kwoye miilongo inoo yi tseya.

¹⁰ Shoka tandi ku ningile, otashi ka kakameka iigwana oyindji. Uuna tandi fungafunga egongamwele lyandje, aakwaniilwa yayo otaa ka kakama ye na ehaluko. Esiku ndyoka to teka po, ayehe otaa dhekweta kuumbanda woomwenyo dhawo.”

¹¹ Omuwa Omupangeliawike ota lombwele omukwaniilwa gwaEgipiti ta ti: “Oto ka taalela egongamwele lyomukwaniilwa gwaBabilon.

¹² Omagongamwele gaakwiita yiigwana iidhudhu otaga ka dhipaga po aantu yoye ayehe. Aantu yoye ayehe noshaa shoka shilwe ho shi itangele, otashi ka yonagulwa po.

¹³ Otandi ka tselitha po iimuna yoye poshipemba kehe. Itaku ka kala we aantu nenge iimuna, yi vongole omeya.

¹⁴ Otandi ka kaleka omeya goye ga mwena e taga yengala, nomilonga dhoye tadhi tondoka mengungilo. Ongame, Omuwa Omupangeliawike, nda popi.

¹⁵ Uuna tandi mbugaleke Egipiti nokuyonagula po ayehe mboka ye li mo, otaa ka tseya kutya ongame Omuwa.

¹⁶ Ndjika ondjimbo yoosa. Aakulukadhi yomiigwana otaye ke yi imba, ya lile oosa dhaEgipiti naantu yasho ayehe. Ongame, Omuwa Omupangeliawike, nda popi.”

¹⁷ Mesiku etimulongo netitano lyomwedhi gwotango gwomumvo omutimulongo nomutiyali guupongekwa wetu Omuwa okwa lombwele ndje a ti:

¹⁸ “Muna gwomuntu, lila oosa dhaantu ayehe yomuEgipiti. Ya kulukithila mo pamwe niigwana iinankondo sigo omuuyuni wokuusi.

¹⁹ Ya lombwela u tye: ‘Oto dhiladhila, owo opala u vule yalwe? Oto ka kulukila muuyuni wokuusi noto ka lala pamwe naafukolume.’

²⁰ “Aayegipiti otaa ka gwila pamwe naamboka taa ka dhipagelwa molugodhi. Egongamwele olya longekidhwa, li ya dhipage po ayehe.

²¹ Omapendafule omanene naayehe mboka ya kondjele kombinga yaEgipiti, otaa kundu Aayegipiti muuyuni wokuusi. Otayi igidha taa ti: ‘Aafukolume mboka ya dhipagelwa molugodhi, ya kulukile huka, oyo mbaka ya lala mpaka!’

²² “Assur oye nguka, a kundukwa koombila dhaakwiita ye. Ayehe oya dhipagelwa molugodhi.

²³ Oombila dhawo odhi li mohi muule womuuyuni wokuusi. Aakwiita ye ayehe oya sile molugodhi, noombila dhawo odha kunduka ombila ye. Nale oya li haa halutha evi lyaanamwenyo.

²⁴ “Elam oye nguka a kundukwa koombila dhaakwiita ye. Ayehe oya dhipagelwa molugodhi noya kulukile mo, sigo okuuyuni wokuusi inaa fukalekwa. Sho ya li ye na omwenyo, oya tilitha, ihe ngashingeyi oya lala ya sa ye na ohoni.

²⁵ Elam a lala mokati kaadhipagwa mboka ya sile miita, noombila dhaakwiita ye odhe mu kunduka. Ayehe aafukolume, ayehe ya dhipagelwa molugodhi. Sho ya li ye na omwenyo, oya li haa tilitha, ihe ngashingeyi oyo mba ya lala ya sa ya sithwa ohoni. Oshipewa shawo oshaamboka ya sile molugodhi.

²⁶ “Meshek naTubal omo ye li ya kundukwa koombila dhaakwiita yawo. Ayehe aafukolume, ayehe oya dhipagelwa molugodhi. Nale oya haluthile aanamwenyo.

²⁷ Inaa mona efumviko lya simana ya fa omapenda gomuuyuni wonale, mboka ya kulukile muuyuni wokuusi, omagongamwele gawo oga tulwa kohi yomitse dhawo nomahuuyanza gawo ga siikile omidhimba dhawo. Omapenda ngoka oga li ge na oonkondo dha tilitha aanamwenyo.

²⁸ “Osho Aayegipiti taa ka lala ya nyanyagulwa mokati kaafukolume mboka ya dhipagelwa molugodhi.

²⁹ “Edom oye nguka pamwe naakwaniilwa ye nomalenga. Oya li aakwiita aanankondo, ihe ngashingeyi oya lala muuyuni wokuusi pamwe naafukolume mboka ya dhipagelwa molugodhi.

³⁰ “Aapangeli ayehe yokuumbangalantu oyo mbaka nosho wo Aasidoni. Oya li ya tilitha, ihe ya yi mohi mesithahoni pamwe naamboka ya dhipagelwa molugodhi, noya lala taa vululukwa inaa fukalekwa. Oya mono esithahoni lyaamboka taa kulukile muuyuni wokuusi.

³¹ “Omukwaniilwa gwaEgipiti naakwiita ye otaa ka tala ayehe mbaka ya dhipagelwa molugodhi e taa hekelekwa kusho.” Omuwa Omupangeliawike osho ta ti.

³² “Omukwaniilwa gwaEgipiti onde mu tilithitha aanamwenyo, ihe oye netangakwiita lye alihe ota ka dhipagwa e ta ka lala a vululukwe pamwe naafukolume mboka taa sile molugodhi.” Omuwa Omupangeliawike a popi.

33

¹ Omuwa okwa lombwele ndje a ti:

² “Muna gwomuntu, lombwela aantu shoka tashi ningwa, uuna tandi eta iita moshilongo. Aantu yoshilongo shoka otaa hogolola gumwe gwomongundu yawo, a ninge omulangeli.

³ Uuna ta mono aatondi taa hedha ko, ota hiki ohiya, a londodhe shaa ngoka.

⁴ Ngele oku na ngoka te yi uvu, ihe ita pupu ko, naatondi oye ya e taye mu dhipaga, nena oye e na ondjo yeso lye mwene.

⁵ Eso lye olyo ondjo ye mwene, oshoka ina vulika kelondodho. Ando okwa pulakenene, ando a fadhuka po.

⁶ Omulangeli ngele ota mono omutondi te ya, ye ita hiki ohiya, omutondi ote ya nota dhipaga aayoni mboka, ihe ombinzi yawo otandi yi pula miikaha yomulangeli.

⁷ “Muna gwomuntu, ngashingeyi otandi ku langeke omulangeli gwoshigwana Israel. Ou na oku ya lombwela omalondodho ngoka nde ku pe.

⁸ Ngele otandi ku lombwele te ti, omulunde ota ka sa, ihe ngoye ito mu londodha, a ethe oondjila dhe oombwinayi, opo a hupithe omwenyo gwe, nena ota ka sa shili moluulunde, nombinzi ye otandi yi pula miikaha yoye.

⁹ Ngele oto londodha omulunde, ihe ite etha uulunde, ota ka sa omoluulunde we, ihe ngoye wa hupitha omwenyo gwoye.”

¹⁰ Omuwa okwa lombwele ndje a ti: “Muna gwomuntu, tumbululila Aaisraeli sho haa popi taa ti: ‘Otwa tsikwa uulunde wetu nomapuko ngoka twa ningi. Otatu kombwa po. Otatu kala, ngiini tu na omwenyo?’

¹¹ Ya lombwela kutya oshili, ngaashi ngame, Omuwa Omupangeliawike, Kalunga omunamwenyo, itandi nyanyukilwa omulunde ta si. Onda hala, i itedhulule ye a kale e na omwenyo. Israel, etha uulunde to u ningi. Omolwashike wa hala okusa?

¹² “Muna gwomuntu, lombwela ngashingeyi Aaisraeli kutya omuyuuki ngele ta yono, uuyuuki mboka a longele itau mu hupitha. Omulunde ngele ote etha uulunde, ita ka pangulwa, nomuyuuki ngele ota tameke okuyona, omwenyo gwe itagu hupithwa.

¹³ Ngele otandi lombwele omuyuuki kutya oku na omwenyo, ihe ota yono ta dhiladhila kutya uuyuuki we wonale owa gwana oku mu hupitha, itandi dhimbulukwa we uuyuuki we wonale. Ota ka sa moluulunde we.

¹⁴ Ngele otandi londodha omulunde kutya ota ka sa, ye ote etha okuyona e ta kala omuyuuki —

¹⁵ ngaashi ando, ngele ota galula shoka e shi pelwe ombambyona nota shunitha shoka a yakele — ngele ote etha okuyona e ta landula oompango ndhoka tadhi gandja omwenyo, ita ka sa, ihe ota kala e na omwenyo.

¹⁶ Otandi ka dhima po uulunde e u longo nota kala e na omwenyo, oshoka okwa longa shoka shu uka noshiwanawa.

¹⁷ “Aantu yoye ohaa ti, kandi li mondjila! Ihe otandi ti, yo oyo yaa li mondjila!

¹⁸ Uuna omuyuuki te etha okulonga uuyuuki, e ta tameke okuyona, ota ka sa molwasho.

¹⁹ Uuna omukeenakalunga te etha okuyona e ta longo uuyuuki nuuwanawa, okwa hupitha omwenyo gwe.

²⁰ Ihe Israel ngoye, oto ti shoka tandi ningi inashi uka. Otandi ke ku pangula pailonga yoye.”

²¹ Mesiku etitano lyomwedhi omutimulongo gwomumvo omutimulongo nomutiyali guupongekwa wetu, kungame okwe ya omuntu a zi ondapo kuJerusalem e ta lombwele ndje kutya oshilando osha teka po.

²² Ongulohi ndjoka ya tetekele eyo lye, oshikaha shOmuwa osha kwata ndje. Omuntu sho a thiki ongula sho kwa shi, Omuwa okwa makula okana kandje ndi popye.

²³ Omuwa okwa lombwele ndje a ti:

²⁴ “Muna gwomuntu, aantu mboka ye li momakulukuma giilando yaIsrael, otaa ti: ‘Abraham okwa li oye awike, sho a pewa evi alihe. Ngashingeyi tse oyendji, onkee evi lya ningi uuthiga wetu.’

²⁵ “Ya lombwela shoka ngame, Omuwa Omupangeliawike, tandi popi te ti: Ohamu li onyama yi na ombinzi. Ohamu simaneke iimenka. Ohamu dhipaga. Oshike tashi mu dhiladhilitha kutya evi olyeni?

²⁶ Omwi inekela omagongamwele geni. Iilonga yeni oyi nyanyalitha. Shaa ngoka ota hondele. Oshike tashi mu dhiladhilitha kutya evi olyeni?

²⁷ “Ya lombwela kutya ngame, Omuwa Omupangeliawike, otandi ya londodha kutya oshili ngaashi ngame Kalunga omunamwenyo, aantu mboka ye li momakulukuma giilando, otaa ka dhipagwa po. Mboka ya kala moshilongo, otaa ka lika po kiilikama. Mboka taa holama moondundu nomomakololo, otaa ka sa koshivu.

²⁸ Otandi ka mbugaleka oshilongo, nomanganga gawo guuntsa otaga hulu po. Noondundu dhaIsrael otadhi ka mbugala, nokaku na ngoka te ke dhi taakana.

²⁹ Uuna tandi geelele aantu oondjo dhawo nokumbugaleka oshilongo, nena otaa ka tseya kutya ongame Omuwa.”

³⁰ Omuwa okwa popi a ti: “Muna gwomuntu, aantu yoye otaye ku popi, nge taa tsakanene pomakuma goshilando nenge piiyelo yomagumbo gawo. Otaa lombwelathana taa ti: ‘Tu yeni tu ka pulakene oohapu ndhoka dha zi kOmuwa ngashingeyi.’

³¹ Aantu yandje otaa gongala oongundu, ya uve shoka to popi, ihe itaa gwanitha shoka to ti. Otaa pulakene oohapu dhoye tadhi shata, ihe omitima dhawo otadhi lalakanene omaliko giifundja.

³² Kuyo ku shi sha shilwe shaa shi omuholi gwokwiimba omaimbilo taga nyanyudha nenge okuhika okaharpa. Otaa pulakene oohapu dhoye adhihe, ihe itaa vulika nando okuyimwe yomudho.

³³ Ihe uuna oohapu dhoye nadhi ka tsa — odho notadhi ka tsa — nena otaa ka tseya kutya omuhunganeki okwa kala mokati kawo.”

34

¹ Omuwa okwa lombwele ndje a ti:

² “Muna gwomuntu, hunganekela aaleli yaIsrael. Hunganeka u ya lombwele shoka ngame, Omuwa Omupangeliawike, tandi ya lombwele. Ote ti: Yaye ne aasita yaIsrael! Ohamu ilitha ne yene, itamu hungu oonzi.

³ Otamu suulula omahini, tamu zala oonguwo dhomafufu goonzi notamu dhipaga tamu li po oonzi dho ondoka. Ihe ne itamu litha oonzi.

⁴ Ndhoka dha nama inamu dhi sila oshimpwiyu, mu mange ndhoka dha teka ne mu pange ndhoka tadhi ehama, mu galule ndhoka dha puka nenge mu konge ndhoka dha kana. Ihe omwe dhi ningi onyanya.

⁵ Molwaashoka oonzi dhaa na omusita, odha halakana, niilikama oye dhi dhipaga noku dhi lya po.

⁶ Onkee oonzi dhandje odha pukila koondundu nokiikulundundu. Odha halakanene kombanda yevi alihe, nokape na ngoka te dhi kongo nenge a kambadhale e dhi pulidhe.

⁷ “Ne aasita, pulakeneni ano shoka ngame, Omuwa, tandi mu lombwele.

⁸ Oshili, ngaashi ngame Kalunga omunamwenyo, pulakenii ndje nawa. Oonzi dhandje odha hakanwa kiilikama, mbyoka ye dhi dhipaga noku dhi lya po, oshoka kakwa li omusita. Aasita oya li kaaye na ko nasha noonzi. Oyi ilitha yo yene yo inaa litha oonzi.

⁹ Onkee ano pulakenii ndje, ne aasita.

¹⁰ Ongame, Omuwa Omupangeliawike, te popi te ti, ngame omutondi gweni. Otandi ke mu kutha oonzi dhandje noitandi pitika we, mu ninge aasita yokwiilitha ne yene. Otandi ka yugulula oonzi dhandje miikaha yeni noitandi pitika we, mu dhi lye po.”

¹¹ “Ongame, Omuwa Omupangeliawike tandi mu lombwele kutya ongame mwene tandi ka konga oonzi dhandje noku dhi sila oshimpwiyu,

¹² ngaashi omusita ta gongele oonzi dhe ndhoka dha halakanithwa e te dhi eta pamwe ishewe. Otandi ke dhi kongolola ko komahala agehe hoka dha halakanithilwa ko esiku lyomuzimbi nolyiikogo yoonzigi.

¹³ Otandi ke dhi kutha kiilongo yaakwiilongo, tandi dhi gongele pamwe e tandi dhi eta mevi lyadho dhene. Otandi ke dhi fala koondundu nokoothithiya dhaIsrael e tandi dhi napitha momaunapelo gomwiidhi omutalala.

¹⁴ Otandi ke dhi napitha nombili moondundu nomomasilu gomwiidhi gweleshuleshu. Otadhi ka napa komahala agehe ga ziza gaIsrael.

¹⁵ Ongame mwene tandi ka ninga omusita gwoonzi dhandje notandi ke dhi gondjitha nawa. Ongame, Omuwa Omupangeliawike, nda popi.

¹⁶ “Otandi ka konga ndhoka dha kana nokugalula ndhoka dha puka, otandi ka manga ndhoka dha teka nokupanga ndhoka tadhi alukwa. Ihe ndhoka dho ondoka nodhi na oonkondo, otandi ke dhi yonagula po, oshoka ngame omusita tandi ningi shoka shu uka.

¹⁷ “Ne oonzi dhandje, ngame, Omuwa Omupangeliawike, otandi mu lombwele kutya otandi mu pangula ne amuhe notandi yoolola oonzi oombwanawa moonzi oombwinayi, ote kutha oonzi miikombo.

¹⁸ Ihe inashi mu gwanena nani okulya ashike omwiidhi gweleshuleshu, sho tamu lyatagula ngoka inaamu gu lya! Omwa nu omeya omayelele nomwa vongola ngoka inaamu ga nwa!

¹⁹ Oonzi dhandje dhilwe odhi na okulya omwiidhi ngoka mwa lyatagula nokunwa omeya ngoka mwa vongola.

²⁰ “Onkee ano ngashingeyi, ngame, Omuwa Omupangeliawike, tandi mu lombwele kutya mokupangula otandi ka yoolola oonzi ndhoka dho ondoka naandhoka dha nanga.

²¹ Omwa undula ndhoka tadhi alukwa dhi ye pooha noku dhi tidha dhi ze mo moshigunda.

²² Ihe ngame otandi ka hupitha oonzi dhandje noitandi pitika dhi tsuwe. Otandi ka utha onzi kehe nokuyoolola oombwanawa moombwinayi.

²³ Otandi ke dhi pa omukwaniilwa a fa omuntu gwandje David, a ninge omusita gwadho, oye note ke dhi litha.

²⁴ Ongame, Omuwa, tandi ka ninga Kalunga kadho, nomukwaniilwa a fa omuntu gwandje David ota ka ninga omuleli gwadho. Ongame nda popi.

²⁵ Otandi ka hangana nadho ehangano ndyoka tali dhi gamene. Otandi ka mana mo iilikama ayihe iigeyi moshilongo, opo oonzi dhandje dhi kale dhaa na ombudhi momalundu notadhi ka lala nokukothela momigulu.

²⁶ “Otandi ke dhi yambeka noku dhi kaleka dha kunduka ondundu yandje ondjapuki. Oko hoka tandi ke dhi yambeka niihomo yomvula, uuna dhe yi pumbwa.

²⁷ Omiti otadhi ka ima iiyimati, omapya otaga ka vala iilya, noshaa ngoka ota ka kala nombili moshilongo shawo yene. Uuna tandi tokola omalyenge gaantu yandje noku ya mangulula miikaha yaapiki yawo, nena otaa ka tseya kutya ongame Omuwa.

²⁸ Iigwana yaapagani itayi ke ya yuga we, niilikama itayi ke ya dhipaga we noku ya lya po. Otaa ka kala ye na ombili, nokaku na ngoka te ya halutha we.

²⁹ Otandi ke ya pa omatathapya e tandi hulitha po ondjala moshilongo. Iigwana yilwe itayi ke ya sheka we.

³⁰ Shaa ngoka ota ka tseya kutya otandi gamene Israel, noyo aantu yandje. Ongame, Omuwa Omupangeliawike, nda popi.

³¹ “Ne oonzi dhandje, oshigunda shoka tandi palutha, one aantu yandje, nangame oKalunga keni,” Omuwa Omupangeliawike osho ta ti.

35

¹ Omuwa okwa lombwele ndje a ti:

² “Muna gwomuntu, hunganekela oshilongo Edom.

³ Lombwela aantu shoka ngame, Omuwa Omupangeliawike, tandi popi: Evi lyokoondundu dhaEdom, ngame omutondi gwoye!

⁴ Otandi ka kumuna po iilando yoye, evi lyoye notali mbugala. Nena oto ka tseya kutya ongame Omuwa.

⁵ “Owa li lela omutondi gwaIsrael nowe mu dhipagitha methimbo lyomupya gwe, ethimbo lyegeelo lyahugunina lyoondjo dhe.

⁶ Onkee ano — oshili ngaashi ngame, Omuwa Omupangeliawike, Kalunga omunamwenyo — ehulilo lyoye eso, noito li henuka nando. Ou na ondjo yedhipago, nedhipago otali ku landula.

⁷ Otandi ka mbugaleka evi lyokoondundu dhaEdom notandi ka dhipaga shaa ngoka te dhi taakana.

⁸ Oondundu dhalyo otandi ke dhi siikila nomidhimba dhaantu mboka taa dhipagelwa molugodhi, otadhi siikile iikulundundu nomasilu.

⁹ Otandi ku shitukitha ombuga sigo aluhe, nokape na we ngoka ta ka kala miilando yoye. Nena oto ka tseya kutya ongame Omuwa.

¹⁰ “Owa popi wa ti, iilongo mbika iyali, Juda naIsrael, pamwe nomapya gayo oyoye, noto ke yi lala, nando ongame mwene, Omuwa, nda li Kalunga kawo.

¹¹ Onkee ano — oshili ngaashi ngame, Omuwa Omupangeliawike, Kalunga omunamwenyo otandi ku galulile ondjahi yoye, efupa lyoye nuutondwe woye wokutonda oshigwana shandje. Otaa ka tseya kutya otandi ku geelele shoka we ya ningile.

¹² Nena oto ka tseya kutya ongame, Omuwa, ndu uvu shoka wa popi nondhino kutya oondundu dhaIsrael odha mbugalekwa nodhe ku pewa u dhi lale.

¹³ Ondu uvu, nkene wi itangele ndje to kondjitha ndje to popi waa na efudho.”

¹⁴ Omuwa Omupangeliawike ota ti: “Otandi ke ku mbugaleka, nuuyuni auhe otau ka nyanyukilwa etekopo lyoye,

¹⁵ naanaa ngaashi wa li wa nyanyukilwa ehanagulo lyaIsrael, eliko lyandje mwene. Oondundu dhaSeir, eeno, evi alihe lyaEdom otali ka ninga eputu. Shaa ngoka ota ka tseya kutya ongame Omuwa.”

36

¹ Omuwa okwa popi a ti: “Muna gwomuntu, hunganekela oondundu dhaIsrael u dhi lombwele, dhi pulakene elaka ndyoka ngame,

² Omuwa Omupangeliawike, tandi dhi lombwele: aatondi yaIsrael oya nyekele ya ti: ‘Ngashingeyi oonkulundundu ndhoka odha ningi dhetu!’

³ “Hunganeka, u popye shoka ngame, Omuwa Omupangeliawike, tandi popi. Uuna iigwana yopuushiinda ya kwata po nokuyuga oondundu dhaIsrael, ayihe oya sheke Israel.

⁴ Onkee ano pulakeneni shoka ngame, Omuwa Omupangeliawike, tandi mu lombwele, ne oondundu niikulundundu, ne omilonga nomasilu, ne omahala mwa kumunwa po nane iilando ya mbugala mbyoka mwa yugwa nomwa nyekelwa kiigwana ayihe ye mu kunduka.

⁵ “Ongame, Omuwa Omupangeliawike, nda popi muupyundjahi wandje te kondjitha iigwana yopuushiinda, unene Edom. Oshilongo shandje oye shi kwata po nenyanyu nondhino e taa lala omaunapelo gasho.

⁶ “Hunganekela oshilongo Israel, u lombwele oondundu niikulundundu, omilonga nomasilu shoka ngame, Omuwa Omupangeliawike, tandi popi muulaadhindjahi, sho mwa shekwa nokufupipikwa kiigwana.

⁷ Ongame, Omuwa Omupangeliawike, tandi uvaneke nokugana kutya iigwana yopuushiinda otayi ka fupipikwa.

⁸ Ihe koondundu dhaIsrael omiti otadhi ka ziza noku mu imina iiyimati, ne aantu yandje Aaisraeli. Otamu ka galukila mbala kaandjeni.

⁹ Onda gama kune notandi si oshimpwiyu, omapya geni ga pululwe ishewe noga kunwe oombuto.

¹⁰ Otandi ka indjipalitha oshigwana sheni. Otamu kala miilando notamu ka tungulula ayihe ya kumunwa po.

¹¹ Otandi ka indjipalitha aantu niimuna. Otamu ka ninga oyendji mu vule shito, notamu ka kala mu na okakwiyu. Otandi ke mu kaleka mu kale ngaashi mwa kala, notandi ke mu hepulutha mu vule nale. Notamu ka tseya kutya ongame Omuwa.

¹² Aantu yandje Aaisraeli, otandi ke mu galulila ishewe kevi lyeni, mu kale ko. Otali ka ninga eliko lyeni, noitali ka sitha aana yeni ondjala.

¹³ “Ngame, Omuwa Omupangeliawike, otandi ti: Odhoshili, sho aantu ya luku evi omuli gwaantu notaa ti otali yugu oshigwana oyana.

¹⁴ Ihe okuza ngashingeyi itali ka ninga we omuli gwaantu ngo ta yugu po aana yeni. Ongame, Omuwa Omupangeliawike, nda popi.

¹⁵ Evi itali ka pulakena we kiigwana tayi li sheke nenge li tale aantu taye li nyonkele. Evi itali ka yuga oshigwana aana yasho. Ongame Omuwa Omupangeliawike, nda popi.”

¹⁶ Omuwa okwa lombwele ndje a ti:

¹⁷ “Muna gwomuntu, Aaisraeli sho ya li mevi lyawo, oye li nyateke pahedhi ndjoka ya kala noya longo. Onda tala epumpo lyawo lya fa okukala kwonyata yoshidhila ngaashi omukiintu momasiku ge gokomwedhi.

¹⁸ Onde ya tilile ondjahi yandje omolwomadhipago ye ga ningi moshilongo nomolwiimenka ye yi nyatekithitha oshilongo.

¹⁹ Onde ya pangulile mokukala kwa tya ngaaka niilonga ya tya ngaaka, nonde ya halakanithile niilongo yaapagani.

²⁰ Shaa hoka ya yi, oya sitha edhina lyandje ohoni, oshoka aantu oya ti: ‘Oshigwana shika osha li shi na okuthiga po evi lyasho shene Kalunga kasho e li shi pele.’

²¹ Onda li ndu uvitile edhina lyandje eyapuki oluhodhi, oshoka Aaisraeli oye li dhinitha akuhe hoka ya yi.

²² “Ngashingeyi lombwela Aaisraeli elaka ndyoka ngame, Omuwa Omupangeliawike, tandi ya pe: Shoka tandi ka ninga, itandi shi ningi omolweni Aaisraeli, ihe omolwedhina lyandje eyapuki, ndyoka mwa shekitha moshilongo kehe moka mwa li mo.

²³ Uuna tandi ulukile iigwana uuyapuki wedhina lyandje enene — edhina tuu ndyoka mwa shekitha mokati kawo — nena otayi ka tseya kutya ongame Omuwa. Ongame, Omuwa Omupangeliawike, nda popi. Otandi mu longitha, ndi ulukile iigwana kutya ngame omuyapuki.

²⁴ Otandi ke mu kutha mo moshigwana kehe nomoshilongo kehe noku mu eta kevi lyeni.

²⁵ Otandi ke mu shashamina nomeya omayelele noku mu yelitha kiimenka yeni nokonyata kehe.

²⁶ Otandi ke mu pa omwenyo omupe nombepo ompe. Otandi ke mu kutha omutima gwemanya e tandi mu pe omutima gwontumba.

²⁷ Otandi ke mu pa ombepo yandje meni lyeni notandi ke mu tonatela, mu dhiginine oompango dhandje niipango yandje ayihe mbyoka nde yi mu pe.

²⁸ Otamu ka kala mevi ndyoka nde li pe oohokulu. Otamu ka kala aantu yandje, nangame otandi ka ninga Kalunga keni.

²⁹ Otandi mu hupitha kukehe shoka tashi mu nyateke. Otandi ka kokitha iilya yi vale nawa, opo mwaa kale we mu na ondjala.

³⁰ Otandi ke mu pa eloolo lyiiyimati yomiti nolyiilya momapya geni, opo kwaa kale we ondjala, yi mu sithe ohoni mokati kiigwana.

³¹ Otamu ka dhimbulukwa omikalo dheni omiwinayi nomapuko ngoka mwa ningi, notamu ka sa ohoni moluulunde nuumbudhi weni.

³² Israel, onda hala mu tseye kutya iinima mbika ayihe itandi yi mu ningile molweni, onda hala mu se ohoni nomu gugilwe shoka mwa ningi. Ongame, Omuwa Omupangeliawike, nda popi.”

³³ Omuwa Omupangeliawike ota ti: “Uuna tandi mu yogo kuulunde weni auhe, otandi ke mu kaleka miilando yeni ishewe nokutungulula omakulukuma gayo.

³⁴ Shaa ngoka a li ha tokola pomapya geni, okwa li e wete, nkene ga putupala, ihe otaga ka longwa ishewe.

³⁵ Otaa ka tya: ‘Evi ndika lya li lya mbugala, olya ningi lya fa oshikunino shaEden. Iilando mbyoka ya li omakulukuma, omaputu, ya hanagulwa po, oyi na ngashingeyi omapopilongulu naakalimo.’

³⁶ Nena iigwana yomuushiinda mbyoka ya hupile ko, otayi ka tseya kutya ongame Omuwa nda tungulula iilando ya kumuka po nonda tsike omapya ga mbugala. Ongame, Omuwa, ndu uvaneke kutya otandi shi ningi — notandi ke shi gwanitha.”

³⁷ Omuwa Omupangeliawike ota ti: “Otandi ka etha Aaisraeli ya kugile ndje ekwatho ishewe, notandi ke ya indjipalitha oyendji ya fa oshigunda shoonzi.

³⁸ Iilando mbyoka yi li momakulukuma ngashingeyi, otayi ka kala yu udha aantu, ngaashi Jerusalem sha li shu udha oonzi ndhoka dha li hadhi yambwa omafikilondjambo miituthi. Nena otaa ka tseya kutya ongame Omuwa.”

37

¹ Oshikaha shOmuwa osha kwata ndje, Ombepo ye noya kutha ndje po e tayi fala ndje mesilu lyu udha omasipa.

² Omuwa okwe enditha ndje koombinga noombinga dhesilu, nonda mono omasipa ogendji omakukutu.

³ Okwa lombwele ndje a ti: “Muna gwomuntu, omasipa ngano otaga vulu tuu okuninga omwenyo?” Onda yamukula nda ti: “Omuwa Omupangeliawike, ongoye awike u shi shi!”

⁴ Omuwa okwa ti: “Hunganekela omasipa. Lombwela omasipa ngaka omakukutu ga pulakene oohapu dhOmuwa.

⁵ Ga lombwela kutya ngame, Omuwa Omupangeliawike, otandi ga lombwele te ti: Otandi ka tula omufudho mune e tandi mu yumudha.

⁶ Otandi mu tula oothipa noontumba e tandi mu pe oshipa. Otandi mu fudhile omufudho notandi mu yumudha. Nena otamu ka tseya kutya ongame Omuwa.”

⁷ Onda hunganeke, ngaashi nda lombwelwa. Manga nda li tandi uvitha, ondu uvu ekolokoto, nomasipa ga tameke okuhedhathana.

⁸ Manga nde shi tongolola, omasipa oga mene oothipa noontumba noshipa. Ihe kamwa li omufudho momalutu.

⁹ Kalunga okwa lombwele ndje a ti: “Muna gwomuntu, hunganeka ombepo. Lombwela ombepo kutya Omuwa Omupangeliawike ote yi lombwele, yi ze koombinga noombinga, yi pepele omalutu ngaka ga sa, yi ga yumudhe.”

¹⁰ Onda hunganeke, ngaashi nda lombwelwa. Omufudho ogwa hiti momalutu, ogo noga yumuka e taga thikama po. Oya li ongundu onenenene.

¹¹ Kalunga okwa lombwele ndje a ti: “Muna gwomuntu, Aaisraeli oya fa omasipa ngaka. Otaa ti yo oya kukuta, yaa na etegameno lyokonakuyiwa.

¹² Hunganekela ano aantu yandje Aaisraeli u ya lombwele kutya ngame, Omuwa Omupangeliawike, otandi ka makula oombila dhawo. Otandi ke ya hitulula mo noku ya galulila kevi lyaIsrael.

¹³ Uuna tandi makula oombila moka mwa fumvikwa aantu yandje e tandi ya pititha mo, otaa ka tseya kutya ongame Omuwa.

¹⁴ Otandi ka fudhila muyo omufudho gwandje e tandi ya yumudha, e tandi ya kaleke mevi lyaandjawo. Nena otaa ka tseya kutya ongame Omuwa. Ondu uvaneke kutya otandi shi ningi — notandi ke shi tsakanitha. Ongame, Omuwa, nda popi.”

¹⁵ Omuwa okwa lombwele ndje ishewe a ti:

¹⁶ “Muna gwomuntu, kutha oshipilangi u nyolele mo oohapu ndhika: ‘Oshilongo Juda’. Kutha ishewe oshipilangi oshikwawo u nyolele mo oohapu ndhika: ‘Oshilongo Israel’.

¹⁷ Iipilangi mbika iyali yi kwatela kumwe miikaha yoye yi kale ya fa oshipilangi shimwe.

¹⁸ Uuna aantu yoye taye ku pula, u ya lombwele kutya shika otashi ti ngiini,

¹⁹ ya lombwela kutya ongame, Omuwa Omupangeliawike, tandi ka kutha oshipilangi sha kalela po Israel noku shi tula kumwe naashoka sha kalela po Juda. Ayihe iyali otandi yi kankeke kumwe e tandi yi ningi oshipilangi shimwe e tandi yi humbata miikaha yandje.

²⁰ “Yelutha iipilangi ayihe iyali momake goye e to yi ulukile aantu ye yi mone.

²¹ Ya lombwela kutya ngame, Omuwa Omupangeliawike, otandi ka kongolola aantu yandje miigwana moka ye li mo, tandi ya gongele e tandi ya galulile kaandjawo.

²² Otandi ke ya hanganitha oshigwana shimwe moshilongo, okoondundu dhaIsrael. Otaa ka kala ye na omukwaniilwa gumwe te ya lele, noitaa ka topolwa we miigwana iyali nenge ya ninge iilongo iyali.

²³ Itaa ki inyateka we niimenka iinyanyalithi nenge yi iluudhike nuulunde. Otandi ke ya kanyutulula komikalo adhihe ndhoka dhe ya yonitha noya kengelele ndje. Otandi ke ya yelitha; otaa ka ninga aantu yandje, notandi ka ninga Kalunga kawo.

²⁴ Otaa ka kala ye na omukwaniilwa a fa omuntu gwandje David. Otaa ka hangana mepangelo lyomuleli gumwe notaa ka gwanitha oompango dhandje nuudhiginini.

²⁵ Otaa ka kala mevi ndyoka nde li pe omuntu gwandje Jakob, omevi moka mwa kala oohekulu. Omo taa kala sigo aluhe, osho wo oyana nomaluvalo gawo. Omukwaniilwa a fa omuntu gwandje David ote ke ya lela sigo aluhe.

²⁶ Otandi ka hangana nayo ehangano ndyoka tali ya gamene sigo aluhe. Otandi ya taandeleke nokwiindjipalitha oshigwana shawo nokutunga otempeli yandje mevi lyawo, moka tayi kala sigo aluhe.

²⁷ Otandi ka kala pamwe nayo; otandi ningi Kalunga kawo, noyo taa ningi aantu yandje.

²⁸ Uuna tandi tungile ko otempeli yandje yi kale mokati kawo sigo aluhe, iigwana otayi ka koneka kutya ongame, Omuwa, nda hogolola Israel a ninge oshigwana shandje mwene.”

38

¹ Omuwa okwa lombwele ndje a ti:

² “Muna gwomuntu, hunganekela Gog, omukwaniilwa omukuluntu gwiigwana yaMeshek naTubal mevi lyaMagog. Mu kondjitha

³ u mu lombwele kutya ngame, Omuwa Omupangeliawike, omutondi gwe.

⁴ Otandi ke mu galukila, tandi mu tula ondjolo moondjego e tandi mu kookolola po pamwe naakwiita ye ayehe. Etangakwiita lye olyo enenenene li na uukambe naakayili yawo ye na iikeleketi. Omukwiita kehe a humbata ehuuyanza ye a homata egongamwele.

⁵ Aantu ya za kuPersia, Kush naLibia, oye li pamwe nayo, naayehe oye na omahuuyanza nomagala giiyela.

⁶ Aakwiita ayehe yomavi Gomer naBet Togarma muumbangalantu oye li pamwe nayo, naantu oyendji yomiigwana yilwe.

⁷ Mu lombwela, i ilongekidhe nomatanga ge agehe ga langele komauta.

⁸ Nge pwa piti omimvo odhindji, otandi ke mu lombwela a matukile oshilongo moka mwa gongelwa aantu yomiigwana oyindji noye li po yaa na uumbanda wiita. Ota ka homona oondundu dhaIsrael, ndhoka dha li dha mbugala nodha ningi eputu ethimbo ele, ihe ngashingeyi omu na aantu ye li mombili.

⁹ Oye pamwe netangakwiita lye niigwana oyindji pamwe naye otaa ka homona ya fa oshikungulu nongiikogo tayi kwidhidhike evi.”

¹⁰ Omuwa Omupangeliawike ota lombwele Gog ta ti: “Esiku uuna tali ya, oto ka pangela ompangela ombwinayi.

¹¹ Oto ka tokola, u homone oshilongo sha weya nokuponokela aantu aanambili ya kala miilando yaa na eshigo lyedhingililokuma moka mu na omiyelo nomakumba.

¹² Oto ka hakana nokuyuga aantu mboka ya kala miilando mbyoka ya li ya kumuka po nale. Oya gongelwa ya kongololwa miigwana, nongashingeyi oye na iimuna nuuyamba noye li poompagiila dhuuyuni.

¹³ Aasheba nAadedan naahalithi yokiilando yokuSpania otaye ku pula: ‘Owa hiya tuu etangakwiita lyoye, opo u homone u hakane nokuyugulula iihakanwa? Owa hala tuu okulikola oshisiliveli noshingoli, iimuna nomaliko, u ye niihakanwa mbyoka ayihe?’ ”

¹⁴ Omuwa Omupangeliawike okwa tumu ndje, ndi hunganekele Gog shoka Omuwa te mu lombwele: “Ngashingeyi manga aantu yandje Aaisraeli ye li megameno, oto ka pita mo

¹⁵ mehala lyoye lyokokule kuumbangalantu, to wilike etanga enene lyaakwiita ya za miigwana oyindji, ayehe ya kayila uukambe.

¹⁶ Oto ka ponokela aantu yandje Aaisraeli wa fa oshikungulu tashi taakana oshilongo. Esiku otali ya, uuna tandi ke ku tuma, u homone evi lyandje, opo ndi ulukile iigwana, nkene ndi li, ndi holole uuyapuki wandje mushoka tandi longo mungoye.

¹⁷ Ongoye tuu nda li tandi popi nale, sho nda popitha aapiya yandje, aahunganeki yaIsrael, kutya momasiku tage ya otandi ka pendutha omuntu a ponokele Israel.” Omuwa Omupangeliawika oye a popi.

¹⁸ Omuwa Omupangeliawike ota ti: “Mesiku ndyoka Gog ta homona Israel, ondjahi yandje otayi tukuluka.

¹⁹ Otandi popi muupyundjahi wandje kutya esiku ndyoka otaku kala ekakamo edhigu mevi lyaIsrael.

²⁰ Oohi noondhila adhihe, iinamwenyo ayihe iinene niishona naantu ayehe kombanda yevi otaa ka kakama molwokutila ndje. Oondundu otadhi ka gwila po, omatayimanya otaga ka mwahuka, nekuma kehe otali ka ihunyina mumwe.

²¹ Otandi ka tilitha Gog niiponga oyindji. Ongame, Omuwa Omupangeliawike, nda popi. Aantu ye otaa ka taganekelathana omagongamwele.

²² Otandi ke mu geela nelega netiko lyombinzi. Omvula yepoola noompawe mumwe noombadhi, omulilo nosulufuli otandi yi mu lokithile pamwe netangakwiita lye niigwana oyindji mbyoka ya gama kuye.

²³ Pahedhi ndjika otandi ka ulukila iigwana ayihe kutya ngame omunene nomuyapuki. Otaa ka tseya kutya ongame Omuwa.”

39

¹ Omuwa Omupangeliawike okwa popi ta ti: “Muna gwomuntu, hunganeka to kondjitha Gog, omuleli omukuluntu gwiigwana yaMeshek naTubal, u mu lombwele kutya ngame omutondi gwe.

² Otandi ke mu endithila nondjila ompe tandi mu pititha mo a za kokule kuumbangalantu, sigo te ya koondundu dhaIsrael.

³ Nena otandi ka nakula mo uutati we moshikaha she shokolumoho niikuti ye moshikaha she shokolulyo.

⁴ Gog netangakwiita lye niigwana ayihe ya gama kuye, otaa ka sila koondundu dhaIsrael, notandi ka pitika omidhimba dhawo dhi paluthe oondhila niithitukuti.

⁵ Otaa ka sila momalundu. Ongame, Omuwa Omupangeliawike, nda popi.

⁶ Otandi hwameke omulilo mevi lyaMagog nokominkulofuta adhihe nkoka kwa kala aantu yaa na mbudhi, noshaa ngoka ota ka tseya kutya ongame Omuwa.

⁷ Otandi ka tseyithila aantu yandje Aaisraeli edhina lyandje eyapuki, noitandi ka etha edhina lyandje li sithwe we ohoni. Iigwana notayi ka tseya kutya ongame, Omuwa, Kalunga kaIsrael omuyapuki.”

⁸ Omuwa Omupangeliawike ota ti: “Esiku ndyoka nde li popi, otali ke ya shili.

⁹ Aantu mboka ya kala miilando yaIsrael, otaa ka pita mo notaa gongele iikondjitho ye ekelwahi. Omahuuyanza, omatati, iikuti, oondhimbo nomagonga otaga ningi iikuni, notaa ke ga tema omimvo heyali.

¹⁰ Itaa ka tyaya we iikuni momalundu nenge ya ka komangele omiti momugulu, oshoka otaa ka kala ye na iikondjitho ya thigwa po ye yi teme. Otaa ka hakana nokuyuga iihakanwa yaamboka ye ya yugile nale.” Omuwa Omupangeliawike oye a popi.

¹¹ Omuwa okwa popi a ti: “Uuna ayihe mbika tayi ningwa, otandi ka pa Gog omayendo muIsrael, mEsilu lyaayendaguli, kuuzilo wEfuta lya sa. Gog netangakwiita lye alihe omo taa ka fumvikwa moka, nesilu ndyoka otali ka lukwa Esilu lyaHamon Gog.

¹² Otashi ka pula Aaisraeli oomwedhi heyali, opo ya fumvike omidhimba adhihe nokwoopaleka ishewe oshilongo.

¹³ Shaa ngoka moshilongo ota ka yakula mefumviko lyawo, notaye ke shi simanekelwa mesiku ndyoka lyesindano lyandje. Ngame, Omuwa Omupangeliawike, onda popi.

¹⁴ Oomwedhi heyali nge dha piti po, aantu otaa ka hogololwa ye endaende noshilongo nokukonga nokufumvika omidhimba ndhoka dha hupu ko dhi li pevi, opo oshilongo shi yele noshi opale.

¹⁵ Nge taa endaenda noshilongo e taa mono iipongo yomuntu, otaye yi tula endhindhiliko, opo aafuli yoombila nge taa ya, ye yi fumvike mEsilu lyaHamon Gog.

¹⁶ (Oku na nokuli oshilando sha lukwa Hamona.) Osho ngaaka oshilongo tashi opalekwa ishewe.”

¹⁷ Omuwa Omupangeliawike okwa lombwele ndje a ti: “Muna gwomuntu, hiya oondhila niithitukuti ayihe yi ze akuhe yi ye yi lye kondjambo ndjoka nde yi yi telekele. Otashi ka ninga oshituthi oshinene koondundu dhaIsrael, nkoka tayi vulu okulya onyama nokunwa ombinzi.

¹⁸ Oyi na okulya omidhimba dhaakwiita nokunwa ombinzi yaapangeli yevi, ayehe mboka otaa ka dhipagwa ya fa oonzi oondumentu nenge oonzigona, iikombo nenge oongombe.

¹⁹ Uuna tandi dhipaga aantu mbaka ya fa oontselelandjambo, oondhila niithitukuti oyi na okulya oofu adhihe yi kute nokunwa ombinzi sigo ya kolwa.

²⁰ Otayi ka lya koshililo shandje yi kute uukambe, aakayili yawo, aakwiita noofule. Ongame, Omuwa Omupangeliawike, nda popi.”

²¹ Omuwa okwa popi a ti: “Otandi ka talitha iigwana eadhimo lyandje noku yi ulukila oonkondo dhandje dhokugwanitha omautho gandje gu uka.

²² Okuza mpoka Aaisraeli otaa ka tseya kutya ongame Omuwa Kalunga kawo.

²³ Niigwana otayi ka koneka kutya Aaisraeli oya yi muupongekwa moluulunde, sho ya yono kungame. Onde ya pilamene e tandi ya sinditha kaatondi yawo noku ya dhipagela molugodhi.

²⁴ Onde ya pe shoka yi ilongele omolwonyata nuukolokoshi wawo, nonde ya pilamene.”

²⁵ Omuwa Omupangeliawike okwa popi a ti: “Ngashingeyi otandi ka sila oluvalo lwaJakob ohenda lu ze muupongekwa, nAaisraeli otandi ya ningi aanelago ishewe. Otandi gamene edhina lyandje eyapuki.

²⁶ Ngele taa kala mevi lyawo ye na ombili nopwaa na ngoka te ya hindi, otaa ka dhimbwa, nkene ya sitha ndje ohoni noya gwaaleke ndje.

²⁷ Opo ndi hololele iigwana oyindji kutya ngame omuyapuki, otandi ka kongolola aantu yandje miilongo ayihe moka mu na aatondi yawo.

²⁸ Nena aantu yandje otaa ka tseya kutya ongame Omuwa Kalunga kawo. Otaa ke shi tseya, oshoka onde ya tula muupongekwa, nongashingeyi otandi ya gongele e tandi ya galulile kevi lyawo noitandi thigi ko we nando ogumwegumwe.

²⁹ Otandi ka tilila Ombepo yandje kombanda yAaisraeli noitandi ke ya pilamena we. Ongame, Omuwa Omupangeliawike, nda popi.”

40

¹ Olya li esiku etimulongo lyomumvo omupe, ngoka gwa li omutimilongombali nomutitano guupongekwa wetu nenge omutimulongo nomutine okuza ketekopo lyaJerusalem. Esiku tuu ndyoka oshikaha shOmuwa osha adha ndje nosha fala ndje hwiyaka.

² Kalunga okwa kutha ndje po memoniko e ta fala ndje kevi lyaIsrael e ta londeke ndje kondundu ondeendeka. Komeho gandje onda mono oongulu odhindji dha fa dhoshilando.

³ Okwa fala ndje popepi, nonda mono omulumentu ta adhima a fa oshiyela oshikushu. Okwa li e na okapayametithi koliina noshiyelekithoshiti miikaha ye nokwa thikama muuyanda.

⁴ Okwa lombwele ndje a ti: “Muna gwomuntu, tongolola nawa! Pulakena utale ngoye u ndhindhilike nawa shaa shoka tandi ku ulukile, oshoka shika osho she ku etitha huka. Ou na okulombwela Aaisraeli ayihe to tala.”

⁵ Onda mono ekuma lya kundukidha otempeli. Omulumentu okwa kutha oshiyelekithoshiti, shoka shi na uule woometa ndatu nokwa yeleke ekuma. Olya li li na omuthika gwoometa ndatu, nuunene woometa ndatu.

⁶ Okwa yi ihe kuuyanda mboka wa taalela kuuzilo. Okwa londo kiilyatelelo, nopombanda okwa yeleke osheelo, oometa ndatu muule.

⁷ Konima yasho okwa li omukala, ngoka gu na omala gomatonatelelo gatatu kombinga kehe. Ela kehe olya li ombine yoometa ndatu lutatu, nomakuma pokati kago oga li ge na uunene woometa mbali netata. Konima yomala gomatonatelelo omwa li omukala gwoometa ndatu muule gu uka kela enene ndyoka lya taalela otempeli.

⁸ Okwa yeleke ela ndika, nokwa mono kutya oli na uule woometa ne. Olya li pehulilo lyuuyanda u li popepi notempeli, nopehulilo lyawo omakuma oga li ometa yimwe muunene.

⁹

¹⁰ (Omala gomatonatelelo kombinga kehe yomukala oga li ge thike pamwe, nomakuma gopokati kago oga li ge na uunene u thike pamwe.)

¹¹ Omulumentu okwa yeleke ihe omutamo gwomukala muuyanda. Ogwa li oometa hamano netata, noshinano pokati kiiyelo osha li oometa ntano.

¹² Komeho gomala gomatonatelelo okwa li ekuma efupi lyetatameta momuthika netatameta muunene. (Omala oga li oombine dhoometa ndatu lutatu.)

¹³ Okwa yeleke oshinano okuza kekuma lyokosindo yela limwe sigo okekuma lyokosindo yela ekwawo lyokombinga onkwawo yomukala, nosha li oometa omulongo nambali netata.

¹⁴ Ela lyahugunina olya gama kehale. Okwa yeleke ela ndyoka nokwa dhimbulula kutya oli na oometa omulongo momutamo.

¹⁵ Omukokomoko aguhe guuyanda okuza kekuma lyokondje yomweelo sigo okosindo yela lyahugunina olya li oometa omilongo mbali nantano.

¹⁶ Momakuma gopondje gomala agehe omwa li uumbululu uushona nosho wo momakuma gomeni pokati komala. Momakuma gomeni kombinga yomukala omwa li mwa takelwa omathano gomilunga.

¹⁷ Omulumentu okwa fala ndje kehale enene. Okwa li kwa tungwa omala omilongo ndatu ge egamena kekuma lyokombanda, nokomeho gago okwa li olupale lwa kolongwa nomamanya,

¹⁸ ngoka ga taakana ehale alihe. Ehale ndika enene olya li pevi li vulike kehale lyaayambi.

¹⁹ Okwa li ku na uuyanda pehala lyopombanda, mboka u uka kehale lyaayambi. Omulumentu okwa yeleke oshinano pokati komauyanda ngoka gaali, nosha li oometa omilongo ntano.

²⁰ Omulumentu okwa yeleke uuyanda wokuumbangalantu, mboka u uka kehale enene.

²¹ Omala gatatu kombinga kehe yomukala, omakuma pokati kago nela enene, agehe oge thike pamwe naangeyaka gomuuyanda wokuuzilo. Omukokomoko aguhe guuyanda ogwa li oometa omilongo mbali nantano, nomutamo oometa omulongo nambali netata.

²² Ela enene, omakende nomathano gomilunga ga takelwa mo oga li ga fa ngoka gomomweelo gwokuuzilo. Iilyatelelo iheyali tayi fala pombanda pomweelo, nela enene lyopehulilo lyawo olya taalela kehale.

²³ Kombinga onkwawo yehale okwa li ku na uuyanda uukwawo tau fala kehale lyaayambi, wa taalelathana naamboka wokuumbangalantu, naanaa ngaashi kuuzilo. Omulumentu okwa yeleke oshinano pokati komauyanda ngaka gaali, nosha li oometa omilongo ntano.

²⁴ Opo ihe omulumentu a fala ndje kombinga yokuumbugantu, nonda mono ko uuyanda ulwe. Okwe u yeleke, nowa li wa faathana nuukwawo.

²⁵ Momala gomuuyanda mbuka omwa li omakende naanaa ngaashi momakwawo. Omukokomoko guuyanda ogwa li oometa omilongo mbali nantano, nomutamo oometa omulongo nambali netata.

²⁶ Iilyatelelo iheyali tayi uka kuwo, nela lyawo enene olya li pehulilo lyawo lya taalela kehale. Momakuma gomeni kombinga yomukala omwa li mwa takelwa omathano gomilunga.

²⁷ Naampaka wo opwa li uuyanda tau fala kehale lyaayambi. Omulumentu okwa yeleke oshinano sigo okuuyanda mbuka uutiyali, nosha li oometa omilongo ntano.

²⁸ Omulumentu okwa endithile ndje muuyanda wokuumbugantu sigo okehale lyaayambi. Okwa yeleke uuyanda, nowa li u thike puukwawo mekuma lyokombanda.

²⁹ Omala gawo gokutonatelela, ela lyawo enene nomakuma gawo gomeni oga li ge thike pamwe naangoka gomomauyanda omakwawo. Omwa li wo omakende momala gomuuyanda mbuka. Omukokomoko ogwa li oometa omilongo mbali nantano, nomutamo oometa omulongo nambali netata.

³⁰

³¹ Ela enene olya taalela kehale, nomathano gomilunga oga li ga takelwa momakuma gomukala. Pomweelo nguka opwa li pe na iilyatelelo ihetatu.

³² Omulumentu okwe endithile ndje muuyanda wokuuzilo sigo okehale lyaayambi. Okwa yeleke uuyanda, nowa li u thike pamwe nuukwawo.

³³ Omala gawo gokutonatelela, ela lyawo enene nomakuma gawo gomeni oga li ge thike pamwe naangoka gomauyanda omakwawo. Okwa li ku na omakende akuhe, nomela wo enene. Omukokomoko aguhe ogwa li oometa omilongo mbali nantano, nomutamo oometa omulongo nambali netata.

³⁴ Ela enene olya taalela kehale enene. Omafano gomilunga oga li ga takelwa momakuma gomukala. Pomweelo nguka opwa li pe na iilyatelelo ihetatu.

³⁵ Omulumentu okwa fala ndje kuuyanda wokuumbangalantu. Okwe u yeleke, nowa li u thike puukwawo.

³⁶ Nawo wo owa li u na omala gomatonatelelo, omakuma gomeni ge na uulenga, ela enene nomakende akuhe. Omukokomoko ogwa li oometa omilongo mbali nantano, nomutamo oometa omulongo nambali netata.

³⁷ Ela enene olya taalela kehale enene. Omafano gomilunga oga li momakuma gomukala. Pomweelo nguka opwa li pu na iilyatelelo ihetatu.

³⁸ Kehale enene okwa li etungo lyopooha lya gama kuuyanda womeni kuumbangalantu. Olya li lye ekamena kela enene ndyoka lya taalela kehale, nomo moka haa yogo oontselelandjambo.

³⁹ Metungo ndika omwa li iitaafula ine, iyali kombinga kehe. Kombanda yiitaafula mbika oya li ye na okudhipagela ko omafikilondjambo, omayonondjambo noondjondjambo.

⁴⁰ Pondje yetungo opwa li uutaafula une, uyali kombinga kehe yosheelo shokuumbangalantu.

⁴¹ Iitaafula ayihe kumwe oya li ihetatu, hoka iimuna yomagandjelondjambo ya dhipagelwa ko: ine meni lyetungo niine pondje yalyo.

⁴² Iitaafula ine metungo lyopooha, hoka haku dhipagelwa omafikilondjambo noontselelandjambo, oya tungwa nomamanya ga hongwa. Oya li yomuthika gwoosendimeta omilongo ntano, nomitse dhayo odha li dhoosendimeta omilongo heyali nantano lwomilongo heyali nantano. Iilongitho ayihe hayi dhipagithwa iimuna, ohayi tulwa kiitaafula mbyoka.

⁴³ Oongenge dhoshitaafula kehe odha li dha kundukwa kepaya li na omutamo gweke. Onyama ayihe tayi yambwa, ohayi tentekwa kiitaafula mbyoka.

⁴⁴ Omulumentu okwa fala ndje ihe kehale lyaayambi. Oko kwa li ku na omala gaali ge ekamena kehale lyaayambi, limwe kombinga yuuyanda wokuumbangalantu lya taalela kuumbugantu nekwawo kombinga yuuyanda wokuumbugantu lya taalela kuumbangalantu.

⁴⁵ Omulumentu okwa lombwele ndje kutya ela ndyoka lya taalela kuumbugantu, olyaayambi mboka haa yakula motempeli,

⁴⁶ nekwawo ndyoka lya taalela kuumbangalantu, olyaayambi mboka haa yakula poshiyambelo. Aayambi ayehe oyo oluvalo lwaSadok; mezimo lyaLevi aayambi mbaka Aakwazadok oyo ayeke ya ziminwa ya ka yakule koshipala shOmuwa.

⁴⁷ Omulumentu okwa yeleke ehale lyaayambi, nolya li ombine yoometa omilongo ntano koombinga adhihe. Otempeli oya li kombinga yokuuninginino, nokomeho gayo okwa li oshiyambelo.

⁴⁸ Okwa fala ndje ihe mela lyethikilo lyotempeli. Okwa yeleke osheelo. Osha li oometa mbali netata muule noometa heyali momutamo. Omakuma koombinga adhihe mbali oga li ometa yimwe netata muunene.

⁴⁹ Iilyatelelo oya fala mela lyethikilo, ndyoka lya li oometa omulongo momutamo noometa hamano muule. Okwa li oongudhi mbali, yimwe kombinga kehe yosheelo.

41

¹ Natango omulumentu okwa fala ndje mEhala lyUuyapuki. Okwa yeleke omukala ngoka gu uka mo, ogwa li guule woometa ntano.

² Omakuma koombinga adhihe mbali dhagwo oga li oometa mbali netata muunene. Okwa yeleke Ehala lyUuyapuki lyo lyene: olya li lyomukokomoko gwoometa omilongo mbali nolyomutamo gwoometa omulongo.

³ Okwa yi mela lyomenilela. Okwa yeleke omukala gu uka mo: ogwa li guule wometa yimwe nogwomutamo gwoometa ndatu. Omakuma gagwo oga li oometa ndatu netata muunene.

⁴ Okwa yeleke ela lyo lyene, nolya li oometa omulongo koombinga adhihe. Okwa lombwele ndje a ti: “Ela ndika olyo Ehala lyUuyapukielela.”

⁵ Omulumentu okwa yeleke uunene wekuma lyomeni lyetungo lyotempeli, nowa li oometa ndatu. Otempeli oya li ya kundukwa komala omashona goometa mbali momutamo ga gama kekuma lyayo.

⁶ Omala ngoka oga li moontala ndatu, omala omilongo ndatu montala kehe. Ekuma lyotempeli montala kehe olya li li na epepe, opo oontala dhi kankame kekuma dhaa na omiti dha tungilwa mo.

⁷ Onkee omakuma gotempeli, nge taga monika kombinga yokondje, oga fa ge thike pamwe muunene sigo okombanda. Iikolo ya gama kekuma lyokombanda lyotempeli, oya li tayi fala montala ontiyali nontintatu.

⁸ Ekuma lyokombanda lyomala ngaka olya li lyoometa mbali netata muunene; okwa li ku na omweelo gumwe tagu fala momala gokombinga yokuumbangalantu wotempeli, nomukwawo tagu fala mungoka gwokombinga yokuumbugantu. Onda mono kutya okwa li ku na omutuni gwoometa mbali netata pombanda gwa kunkula otempeli. Omutumbo gwagwo ogwa li oometa ndatu nogwa adha kekankameno lyomala ngoka ga gama kekuma lyotempeli. Pokati komutuni nomatungo gaayambi opwa li ehala lyomwaka lyoometa omulongo momutamo lya kunkula otempeli.

⁹

¹⁰

¹¹

¹² Pehulilo lyehala lyomwaka kuuninginino wotempeli opwa li etungo lyoometa omilongo ne nantano momutaandelelo noometa omilongo ndatu nantano momutamo. Omakuma galyo oguunene woometa mbali netata.

¹³ Omulumentu okwa yeleke otempeli kondje, noya li yomutaandelelo gwoometa omilongo ntano. Okuza konima yotempeli, to taakana ehala lyomwaka sigo okombinga yetungo yokuuninginino, oshinano osha li wo shoometa omilongo ntano.

¹⁴ Oshinano sha taakana komeho gotempeli, mwa kwatelelwa ehala lyomwaka koombinga adhihe mbali, osha li oometa omilongo ntano.

¹⁵ Okwa yeleke omutaandelelo gwetungo sigo okuuninginino, mwa kwatelelwa omikala koombinga adhihe mbali, nogwa li wo oometa omilongo ntano. Ela lyethikilo lyotempeli, Ehala lyUuyapuki nEhala lyUuyapukielela

¹⁶ oga li ga ambekwa niipilangi okuza kolupanda sigo okomakende. Omakende ngaka ohaga vulu okusiikilwa.

¹⁷ Meni lyotempeli komakuma agehe, sigo opombanda yomiyelo, okwa li kwa takelwa

¹⁸ omathano gomilunga naakerubi. Omilunga odha li dha togathana naakerubi. Omukerubi kehe okwa li e na iipala iyali:

¹⁹ oshipala shimwe sha fa shomuntu osha li sha taalela kethano lyomulunga kombinga yimwe, naashoka sha fa shonime okethano ekwawo lyomulunga kombinga onkwawo. Ekuma alihe osho lya li lya tya ngaaka

²⁰ okuza kolupanda sigo opombanda yomiyelo.

²¹ Iikulo yEhala lyUuyapuki oya li yi na oombi ne. Momweelo gwEhala lyUuyapukielela omwa li sha sha fa

²² oshiyambelo shiipilangi. Osha li shi na omuthika gwometa yimwe netata nomutamo gwometa yimwe. Omakuvu gasho, oshitako shasho noombinga dhasho odha li dha tungwa miipilangi. Omulumentu okwa lombwele ndje a ti: “Shika osho oshitaafula tashi kala koshipala shOmuwa.”

²³ Pehulilo lyomukala gu uka kEhala lyUuyapuki opwa li omweelo, nomukwawo pehulilo lyomukala gu uka kEhala lyUuyapukielela.

²⁴ Odha li omiyelo dhomawawa gaali haga pingoshoka pokati.

²⁵ Komiyelo dhEhala lyUuyapuki okwa li kwa takelwa omathano gomilunga nogaakerubi ngaashi ngeyaka gokomakuma. Pomweelo gwela lyethikilo opwa li oshipamba sha tungwa miiti.

²⁶ Momakuma gela lyethikilo koombinga adhihe mbali omwa li omakende, nomakuma ga li ge na uulenga womilunga.

42

¹ Omulumentu okwa fala ndje kehale enene e tu ukitha ndje metungo lyokuumbangalantu wotempeli, popepi netungo lyokuuninginino wotempeli.

² Etungo ndika olya li oometa omilongo ntano momutaandelelo noometa omilongo mbali nantano momutamo.

³ Kombinga yimwe olya taalela kehala lyomwaka lyoometa omulongo momutamo lya kunkula otempeli, nokombinga onkwawo olya taalela kolupanda lwehale enene. Olya li lya tungwa moontala ndatu dha londathana, shaa ndjoka oyi vulike konkwawo.

⁴ Kombinga yokuumbangalantu wetungo ndika okwa li omukala gwoometa ntano momutamo noometa ntano momukokomoko, niiyelo oya taalela kuumbangalantu.

⁵ Omala gopombanda yetungo oga li omashona momutamo ge vulike kungoka gopokati nogopevi, oshoka omikala odhe ga kutha ehala.

⁶ Etungo ndika lyoontala ndatu olya li lyaa na oongudhi ngaashi ngoka gokehale, onkee omala galyo gopombanda oga li omashona momutamo ge vulike kungoka gomontala yopokati, naangoka oge vulike komala gopevi.

⁷ Pevi momukokomoko gwoometa omilongo mbali nantano mekuma kamwa li nando omala, momukokomoko omukwawo gwoometa omilongo mbali nantano omwa li omala. Montala yopombanda omala oga li momukokomoko aguhe gwetungo.

⁸

⁹ Kohi yomala gaali gopombanda kuuzilo, mpoka ekuma lya tameka, okwa li osheelo shu uka kehale enene. Kombinga yuumbugantu wotempeli, popepi netungo lyokuuninginino wayo okwa li etungo lya faathana naandyoka lyokuumbangalantu.

¹⁰

¹¹ Komeho gomala getungo okwa li omukala gwa fa ngoka gwokuumbangalantu. Moku dhi yeleka odhi thike pamwe, dhi na omufanekelo gumwe nomiyelo dha faathana.

¹² Kohi yomala gokombinga yokuumbangalantu wetungo kuuzilo, mpoka ekuma lya tameka, okwa li osheelo.

¹³ Omulumentu okwa lombwele ndje a ti: “Omatungo ngoka agehe gaali omayapuki. Aayambi mboka haa holoka koshipala shOmuwa, otaa lile mo omayambo omayapukilela. Oshoka oongulu ndhika oondjapuki, aayambi ohaa tula omayambo omayapukilela muka: oondjambo dhiikulya, omayonondjambo noondjondjambo.

¹⁴ Uuna aayambi taa zi motempeli noya hala okuya kehale enene, oye na okuthiga moongulu ndhika oonguwo oondjapuki ndhoka ya li ya zala, sho ya li meyakulo lyOmuwa. Oye na okuzala oonguwo dhilwe, nge taa piti mo ya ye kehale hoka haku gongala aantu.”

¹⁵ Omulumentu sho a mana okuyeleka meni lyotempeli, okwa pititha ndje mo twa pitile momweelo gwokuuzilo, nokwa yeleke eha lyotempeli.

¹⁶ Okwa kutha oshiyelekithoshiti e ta yeleke ombinga yokuuzilo, noya li oometa 250.

¹⁷ Opo ihe okwa yeleke ombinga yokuumbangalantu, ombinga yokuumbugantu nombinga yokuuninginino; ombinga kehe oya li yi na omukoka gu thike pamwe, oometa 250.

¹⁸

¹⁹

²⁰ Ekuma oli thike poometa 250 koombinga adhihe. Ekuma olya yoolola shoka oshiyapuki kwaashoka shaa shi oshiyapuki.

43

¹ Omulumentu okwa fala ndje komweelo gwa taalela kuuzilo,

² nonda mono ko eadhimo lyaKalunga kaIsrael tali zi kuuzilo. Ewi lyaKalunga otali ndunduma lya fa epopilo lyefuta, evi nolya adhima kesimano lye.

³ Emoniko ndika olya li lya fa ndyoka nda mwene, sho Kalunga i ile a hanagule po Jerusalem, naandyoka nda mwene pomulonga Kebar. Ngame nonda tsu oshipala pevi.

⁴ Eadhimo olya pitile mosheelo shokuuzilo e tali yi motempeli.

⁵ Ombepo yOmuwa oya yambula ndje po e tayi fala ndje kehale lyaayambi, moka nda mono kutya otempeli oyu udha eadhimo lyOmuwa.

⁶ Omulumentu okwa thikama ponto yandje, nondu uvu Omuwa ta lombwele ndje e li motempeli ta ti:

⁷ “Muna gwomuntu, oshipangelapundi shandje opo shi li mpaka. Otandi ka kala mpaka mokati kAaisraeli notandi ya lele aluhe sigo aluhe. Aaisraeli nenge aakwiilongo yawo itaa ka sitha we edhina lyandje eyapuki ohoni mokusimaneka iikalunga nenge ya fumvike omidhimba dhaakwaniilwa yawo mehala ndika.

⁸ Aakwaniilwa oya tungu omishigo niikulo yomiyelo dhuuwa wawo ontega nomishigo niikulo yotempeli yandje; pokati ketu nayo opwa li owala ekuma. Oya dhinitha edhina lyandje eyapuki niilonga ayihe iinyanyalithi ye yi ningi, nomolwashoka nde ya yono po mondjahi yandje.

⁹ Ngashingeyi oye na okweetha okusimaneka iikalunga nokukutha po omidhimba dhaakwaniilwa yawo. Ngele taye shi ningi, otandi ka kala mokati kawo sigo aluhe.”

¹⁰ Omuwa okwa tsikile a ti: “Muna gwomuntu, lombwela Aaisraeli kombinga yotempeli, ya koneke omufanekelo gwayo. Ya sitha ohoni niilonga yawo yuulunde ye yi ningi.

¹¹ Ngele oya si ohoni molwaambyoka ya ningi, ya fatululila omufanekelo gwotempeli, meni lyayo nkene mwa tya, iiyelo yayo yokuya mo noyokupita mo, olupe lwayo, omalongekidho agehe, elelo lyayo nomautho gayo agehe. Mbika ayihe yi ya nyolela, opo ya dhimbulule nkene ayihe ya landulathanithwa, yo ya gwanithe omautho agehe.

¹² Ndjika ompango yotempeli: Ehala alihe lye yi kunkula kondungu yondundu, olyo eyelele neyapuki.”

¹³ Oondjeleko dhoshiyambelo odho ndhika, nge to yeleke noshiyelekitho shoka wa yeleke nasho otempeli. Oshitako shoshiyambelo osha kunkulwa komukanka gu na uule wopohi woosendimeta omilongo ntano nomutamo gwoosendimeta omilongo ntano. Koongenge dhomukanka oku na omugoyo gu na omutumbo gwoosendimeta omilongo mbali nantano.

¹⁴ Oshitopolwa shopevi shoshiyambelo, okuza pombanda yoshitako, oshi na omuthika gwometa yimwe. Oshitopolwa oshitiyali shomutumbo gwoometa mbali osha tentekwa kushoka shopevi pokati ku na oosendimeta omilongo ntano kombinga kehe okuza koongenge dhoshitopolwa shotango. Oshitopolwa oshititatu osha tulwa kushoka oshitiyali, pokati ku na wo oosendimeta omilongo ntano kombinga kehe okuza koongenge dhoshitopolwa oshitiyali.

¹⁵ Omutumbo gwoshitopolwa shoka shopombanda, mpoka hapu fikilwa omafikilondjambo, ogwo oometa mbali. Uunguku pomakuvu gane owa li wa lontomana kombanda yoshiyambelo.

¹⁶ Omutse gwoshiyambelo ogwa li ombine yoometa hamano luhamano.

¹⁷ Oshitopolwa shopokati osha li wo ombine yoometa heyali luheyali, shi na omugoyo gwomutumbo gwoosendimeta omilongo mbali nantano kolungenge lwokondje. (Omukanka ogwomutamo gwoosendimeta omilongo ntano.) Iilyatelelo yu uka pombanda koshiyambelo, oya li kombinga yokuuzilo.

¹⁸ Omuwa Omupangeliawike okwa lombwele ndje a ti: “Muna gwomuntu, pulakena shoka tandi ku lombwele. Oshiyambelo nge sha tungwa, shi yapula nokufikila kusho omafikilondjambo noku shi shashamina nombinzi yiimuna mbyoka tayi yambwa.

¹⁹ Aayambi yezimo lyaLevi ya za moluvalo lwaSadok oyo ayeke taa vulu okuya koshipala shandje ya yakule ndje. Ongame Omuwa Omupangeliawike nde shi popi. Ou na oku ya pa ongombe ondumentu yomutanda yi yambelwe oondjo.

²⁰ Ou na okukutha mo ombinzi yayo e to yi gogo kuunguku une woshiyambelo, nokomakuvu goshitopolwa shopokati shoshiyambelo nokoongenge adhihe. Pahedhi ndjika oto yapula oshiyambelo noku shi yelitha.

²¹ Ou na okukutha ongombe ndjoka ya yambelwa oondjo e to yi lungunitha po peha lyi ikalela pondje yehala lyotempeli.

²² Esiku lyanofu ou na okukutha oshikombo oshilumentu shaa na oshipo, u shi yambele oondjo. Yelitha oshiyambelo nombinzi yasho pahedhi ndjoka ngaashi wa ningile nombinzi yongombe.

²³ Nge wa mana, kutha ongombe ondumentu yomutanda nonzigona ondumentu, adhihe dhaa na oshipo,

²⁴ ngoye u dhi etele ndje. Aayambi otaye dhi gundu omongwa e taye dhi fikile ndje omayambo.

²⁵ Esiku kehe lyomomasiku gaheyali ou na okuyamba oshikombo, ongombe ondumentu yomutanda nonzigona ondumentu, yi ninge omayonondjambo. Ayihe nayi kale yaa na oshipo.

²⁶ Omasiku gaheyali aayambi oye na okuyapula oshiyambelo, ye shi longekidhile okulongithwa.

²⁷ Oshiwike nge sha piti, aayambi oye na okutameka okuyamba omafikilondjambo nomakwatathanondjambo gaantu koshiyambelo. Nangame otandi ka kala ndi na ombili nane amuhe. Ongame, Omuwa Omupangeliawike, nda popi.”

44

¹ Omulumentu okwa fala ndje komweelo gwopondje kombinga yokuuzilo wehala lyotempeli. Omweelo ogwa li gwa patwa,

² Omuwa nokwa lombwele ndje a ti: “Omweelo nguka otagu kala gwa patwa noitagu egululwa nando. Kape na omuntu ta ziminwa e gu egulule, oshoka ongame, Omuwa Kalunga kaIsrael, nda pitile mo. Otagu kala gwa patwa.

³ Omuleli ota vulu okuya ko, a ka lye uulalelo uuyapuki koshipala shandje. Oku na okuya mo nokuza mo te ende mela enene kombinga yomeni.”

⁴ Omulumentu okwa pititha ndje mosheelo shokuumbangalantu sigo okomeho gotempeli. Sho nda tala, onda mono kutya otempeli yOmuwa oya li yu udha eadhimo lye. Ondi iyumbile pevi nda tsa oshipala pevi.

⁵ Omuwa nokwa lombwele ndje a ti: “Muna gwomuntu, ndhindhilika ashihe shoka to tala noto uvu. Otandi ke ku lombwela omautho noompango dhotempeli. Ndhindhilika nawa, oolye mboka taa ziminwa okuya mo nokuza mo motempeli, noolye mboka itaa ziminwa.

⁶ “Lombwela Aaisraeli mboka aatangalali kutya ongame, Omuwa Omupangeliawike, itandi ki idhidhimikila we iinima iinyanyalithi mbyoka ya ningi.

⁷ Oya nyateke otempeli yandje, sho ya pitikile mo aafukolume aakwiilongo, aantu mboka ihaa vulika kungame, ya yi motempeli, uuna oofu nombinzi yiinamwenyondjambo tayi yambelwa ndje. Aantu yandje oya teya ehangano lyandje molwiinima iinyanyalithi ye yi ningi.

⁸ Inaa tonatela nando omisindilo omiyapuki motempeli yandje, ihe oya tula po aakwiilongo ye dhi tonatele.

⁹ “Ongame, Omuwa Omupangeliawike, tandi fatulula kutya kape na omukwiilongo omufukolume, ngoka ihaa vulika kungame, te ya motempeli yandje, nando na kale mokati kAaisraeli.”

¹⁰ Omuwa okwa lombwele ndje a ti: “Otandi geele Aalevi ayehe mboka yi iteka ndje pamwe nAaisraeli noya simaneke iimenka.

¹¹ Oye na ompito okulongela ndje motempeli taa tonatele omiyelo notaa tsakanitha iilonga yotempeli. Naa dhipagele aantu iimuna mbyoka taye yi eta omolwomafikilondjambo noontselelandjambo, noye ya yakule.

¹² Ihe molwaashoka ya simaneke iimenka noya pukitha Aaisraeli, ongame, Omuwa Omupangeliawike, tandi uvaneke nokugana kutya oye na okugeelwa.

¹³ Kaye na okulongela ndje muuyambi nenge ya ka hedhe kusha shoka sha yapulilwa ndje, nenge ya hite mEhala lyUuyapukielela. Ndika olyo egeelo molwiinima iinyanyalithi ye yi ningi.

¹⁴ Otandi gandja kuyo iilonga yeyakulo mbyoka tayi pumbiwa motempeli.”

¹⁵ Omuwa Omupangeliawike okwa ti: “Mezimo lyaLevi oluvalo lwaSadok aluke olwa tsikile okuyakula nuudhiginini motempeli, nando Aaisraeli oya pilamene ndje. Onkee oyo ayeke mboka ye na okulongela ndje nokuholoka koshipala shandje ya yambele ndje oofu nombinzi yiinamwenyondjambo.

¹⁶ Oyo ayeke taa yi motempeli yandje, taa yakula koshiyambelo shandje notaa wilike elongelokalunga motempeli.

¹⁷ Uuna taa yi mosheelo shehale lyaayambi, oye na okuzala oonguwo dholiina. Inaa zala oonguwo dhomafufu goonzi, uuna ye li miilonga kehale lyaayambi nenge motempeli.

¹⁸ Opo yaa pushe omazigudhe, oye na okuzala etsilu lyoliina nombulukweya yoliina, ihe hakwamo nando.

¹⁹ Manga inaa pita mo ya ye kehale enene, nkoka ku na aantu, naa hule mo tango oonguwo ya li ye dhi zala, sho ya li meyakulo motempeli, e taye dhi thigi moondjugo oondjapuki. Oye na okuzala oonguwo dhilwe, opo oonguwo dhawo oondjapuki dhaa etele aantu omupya.

²⁰ “Aayambi inaa kululitha omitse dhawo nenge ya ethe omafufu gawo ga ninge omaleeleka. Naga kale haga fugulwa.

²¹ Aayambi inaa nwa nando omaviinu, nge taa yi kehale lyaayambi.

²² Kape na omuyambi ta hokana omukulukadhi a hengwa; oku na ashike okuhokana omukadhona Omuisraeli nenge omuselekadhi a silwa omuyambi.

²³ “Aayambi oye na okunongeka aantu yandje eyooloko pokati kaambyoka iiyapuki naambyoka yaa shi iiyapuki, pokati kaambyoka ya yogoka pamisindilo naambyoka inaayi yogoka pamisindilo.

²⁴ Uuna oontamanana dha ziminwa tadhi tukuka, aayambi oye na okutokola pamukalo gwompango. Oye na okudhiginina iituthi yomalongelokalunga pamautho noompango dhandje, noye na okuyapula Esabati.

²⁵ “Omuyambi ina inyateka pamisindilo a gume omudhimba, ngele kagu shi gwahe nenge gwayina, gwomwanamati nenge gwomwanakadhona, gwomumwayinamati nenge gwomumwayinakadhona.

²⁶ Ngele i iyogo a ningi omuyelele, oku na okutegelela omasiku gaheyali,

²⁷ nota yi ihe kehale lyaayambi motempeli, a yambele eiyelitho lye eyonondjambo, opo a wape okuyakula ishewe motempeli. Ongame, Omuwa Omupangeliawike, nda popi.

²⁸ “Uuyambi owo uuthiga waayambi. Mokati kAaisraeli kaye na uuthiga ulwe. Ongame uuthiga wawo.

²⁹ Iikulya yaayambi oyo iikulyandjambo, omayonondjambo noondjondjambo, noye na okutaamba muIsrael ashihe shoka sha yoololelwa ndje.

³⁰ Aayambi oye na okupewa iilya yoshipe iiwanawa naayihe mbyoka tayi yambelwa ndje. Ethimbo kehe aantu taa ningi iikwiila, oye na okupa aayambi ondjambo yoshipambu shotango, eyambeko lyandje notali ka kala maandjawo.

³¹ Aayambi inaa lya ondhila nenge oshimuna shi isila nenge sha lika koshilikama.”

45

¹ Uuna evi tali topolelwa omazimo, oshitopolwa shimwe nashi yapulilwe Omuwa. Oshi na okukala shookilometa omulongo nambali netata momukoka nookilometa omulongo momutamo. Ehala ndyoka alihe oli na okukala eyapuki.

² Mehala ndika omu na okukala eyana lyotempeli molupe lwombine yoometa 250 kombinga kehe, lya kundukwa kehala lyomwaka lyomutamo gwoometa omilongo mbali nantano.

³ Yeleka etata lyoshitopolwa oshiyapuki, ehala lyookilometa omulongo nambali netata lwookilometa ntano; omo tamu kala otempeli, ehala ndyoka eyapukielela kwaagehe.

⁴ Otashi ningi oshitopolwa oshiyapuki moshilongo, sha yoololelwa aayambi mboka haa longele Omuwa motempeli ye. Otashi kwatelele mo omagumbo gawo neyana lyotempeli.

⁵ Etata ekwawo lyoshitopolwa oshiyapuki otali yoololelwa Aalevi mboka haa longo motempeli. Omo tamu kala omikunda dhawo dhokukala mo.

⁶ Ontega noshitopolwa oshiyapuki oku na oshitopolwa shimwe shookilometa omulongo nambali netata momukoka nookilometa mbali netata momutamo. Otashi yoololelwa oshilando moka tamu kala Omuisraeli kehe.

⁷ Omuleli gwoshilongo oku na okuyoololelwa oshitopolwa. Otashi ka taandela okuza kuuninginino woshitopolwa oshiyapuki sigo okEfuta lyopokati kuuninginino; nokuza kuuzilo washo sigo okongamba yoshilongo yokuuzilo. Omukoka gwasho nagu kale gu thike pomukoka gwoshitopolwa sha pewa ezimo limwe lyAaisraeli.

⁸ Oshitopolwa shika osho shoka omuleli ta kala nasho mevi lyaIsrael, opo kaa thiminike we oshigwana, ihe a zimine oshihupe shoshilongo shi kale shomazimo gaIsrael.

⁹ Omuwa Omupangeliawike okwa ti: “Aaleli ne yaIsrael, omwa yono unene! Hulitheni po uukolokoshi nomahepeko! Utheni eutho lyu uka nolyoshili. Inamu tidha we aantu yandje momapya gawo. Ongame, Omuwa Omupangeliawike, tandi shi mu lombwele.

¹⁰ “Shaa ngoka na longithe iiviha niiyelekitho yi shi okwiinekelwa.

¹¹ “Oshiyelekitho efa, shoka hashi yeleke iipindomwa (iilya nuusila), nashi kale shi thike poshiyelekitho obat mokuyeleka iikunguluki. Ondjele yiiyelekitho oyo ohomer. Mohomer yimwe namu kale ooefa omulongo, osho wo oobat omulongo.

¹² “Iiviha yeni nayi kale ngeyi: oogera omilongo mbali otadhi ningi osekeli yimwe, noosekeli omilongo hamano otadhi ningi omina yimwe.

¹³ “Omayambo geni naga ningwe pamuthika nguka: oshitihamano shimwe sheteyo kehe lyiilya yosiima noshitihamano shimwe sheteyo kehe lyiishokelya.

¹⁴ “Mokor kehe yomagadhi gooholivi gandjeni oshitimulongo shimwe shobat. Obat osho oshiyelekitho shomagadhi; oobat omulongo otadhi ningi ohomer yimwe nenge okor yimwe.

¹⁵ “Moshigunda kehe shoonzi omathele gaali dhi li momaunapelo gaIsrael omawanawa, namu ze onzi yimwe. Eteni oondjambo dhiikulya niimuna omolwomafikilondjambo nomakwatathanondjambo, opo oondjo dheni dhi dhimwe po. Ongame, Omuwa Omupangeliawike, nde shi utha.

¹⁶ “Aantu ayehe yomoshilongo oye na okugandja omayambo ngaka komuleli gwaIsrael.

¹⁷ Omuleli oku na oshimpwiyu omolwokufika omidhidhindjambo nomolwoondjambo dhiikulya nomaviinu miituthi yomwedhi omupe, mOmasabati nomiituthi ayihe yaIsrael. Ota gandja omayonondjambo, oondjambo dhiikulya, omafikilondjambo nomakwatathanondjambo gokudhima po oondjo dhAaisraeli.”

¹⁸ Omuwa Omupangeliawike okwa ti: “Mesiku lyotango lyomwedhi gwotango omu na okuyamba ongombe ondumentu yaa na oshipo, mu yapule otempeli.

¹⁹ Omuyambi na kuthe ombinzi yeyonondjambo ndika e te yi gwayeke piikulo yotempeli, komakuvu gane goshiyambelo nopiikulo yomiyelo dhokuya kehale lyaayambi.

²⁰ Mesiku etiheyali lyomwedhi omu na okuninga oshinima tuu shoka omolwashaangoka inaa yonena owina nenge e shi ningi mokwaashi wo. Pahedhi ndjika otamu yapula otempeli yi kale ondjapuki.

²¹ “Mesiku etimulongo netine lyomwedhi gwotango otamu tameke okudhana oshituthi shOpaasa. Omasiku gaheyali amuhe otamu li iikwiila inaayi tulwa efulika.

²² Mesiku lyotango lyoshituthi omuleli ota yamba ongombe yi ninge eyonondjambo omolwoondjo dhe nodhaantu ayehe.

²³ Esiku kehe lyomomasiku gaheyali goshituthi ota yambele Omuwa oongombe oondumentu heyali noonzi oondumentu heyali dhaa na oshipo noku dhi lungunitha po omudhidhi. Ota yamba wo oshikombo oshilumentu esiku kehe shi ninge eyonondjambo.

²⁴ Omolwongombe kehe nonzi kehe ndjoka tayi yambwa, otapu kala ondjambo yiilya yoolata omulongo naheyali netata nomagadhi gooholivi oolita ndatu.

²⁵ “Omolwoshituthi shomatsali giihwa iitalala, shoka tashi tameke mesiku etimulongo netitano lyomwedhi omutiheyali, omuleli ota yamba esiku kehe lyomomasiku gaheyali eyonondjambo, omafikilondjambo noondjambo dhiikulya nomagadhi gooholivi, ngaashi ha ningi moshituthi shOpaasa.”

46

¹ Omuwa Omupangeliawike ota ti: “Omweelo gwokuuzilo okuya mehale lyaayambi ogu na okweedhilwa momasiku gahamano giilonga, ihe ogu na okweegululwa mEsabati nomOshituthi shomwedhi omupe.

² Omuleli ota zi mehale enene ta yi mela enene mosheelo e ta thikama ontega niikulo yomweelo, manga aayambi taa lungunitha omidhidhindjambo dhe notaa yamba omakwatathanondjambo ge. Ota ningi elongelokalunga e li posheelo e ta piti mo ishewe. Omweelo inagu edhilwa tuu sigo ongulohi.

³ Esabati kehe nOshituthi shomwedhi omupe kehe aantu ayehe oye na okwiinyongamena pevi e taa simaneke Omuwa pomweelo.

⁴ “MEsabati omuleli ota yambele Omuwa oonzigona hamano nonzi ondumentu yimwe, adhihe dhaa na oshipo, opo dhi lungunithwe omudhidhi.

⁵ Pamwe nonzi ondumentu kehe ote eta ondjambo yiilya yoolita omulongo naheyali netata nopamwe nonzigona kehe oku na okweeta shaa shoka a hala okugandja. Molwondjambo kehe yiikulya, oku na okweeta omagadhi ooholivi goolita ndatu.

⁶ MOshituthi shomwedhi omupe ota yamba ongombe yomutanda, oonzigona hamano nonzi ondumentu, adhihe dhaa na oshipo.

⁷ Pamwe nongombe kehe nonzi kehe opu na okukala ondjambo yiilya yoolata omulongo naheyali netata nopamwe nonzigona kehe ope na okuyambwa shaa shoka omuleli a hala okugandja. Oolita ndatu dhomagadhi gooholivi odhi na okuyambwa pamwe nondjambo kehe yiilya.

⁸ Omuleli oku na okupita mela enene lyomosheelo e ta yi pondje nondjila tuu ndjoka e ende, sho e ya mo.

⁹ “Uuna aantu taa ya okulongela Omuwa moshituthi kehe, mboka taa yi mo taa pitile momweelo gwokuumbangalantu, naa ze mo taa pitile momweelo gwokuumbugantu, sho ya zimbuka, naamboka taa yi mo taa pitile momweelo gwokuumbugantu, naa ze mo taa pitile momweelo gwokuumbangalantu. Kape na ngoka ta zi mo ta pitile momweelo ngoka a pitile, sho e ya mo, ihe oku na okupitila momweelo gwa taalelathana naangoka a pitile, sho e ya mo.

¹⁰ Omuleli oku na okuya mo, aantu sho taa gongala, nokupita mo, sho taa piti mo.

¹¹ Momasiku gokudhana oshituthi nomiituthi yilwe ondjambo yiikulya oyi na okukala oolita omulongo naheyali netata kongombe nenge konzi kehe, noshaa shoka omuntu a hala okugandja konzigona kehe. Oolita ndatu dhomagadhi gooholivi odhi na okuyambwa pamwe nondjambo kehe yiikulya.

¹² “Uuna omuleli a hala okuyambela Omuwa, ngaashi omwenyo gwe tagu mu lombwele, ongele efikilondjambo nenge ekwatathanondjambo, ne egululilwe omweelo gwokuuzilo. Oku na okuyamba pahedhi yimwe, ngaashi he shi ningi mEsabati, nomweelo otagu edhilwa, nge a piti mo ishewe.”

¹³ Omuwa ota ti: “Ongula kehe onzigona yomumvo gumwe yaa na oshipo, oyi na okuyambelwa Omuwa efikilondjambo. Ondjambo ndjika oyi na okudhigininwa kehe esiku.

¹⁴ Ongula kehe oku na okuyambwa wo uusila womunziya ookilograma ne pamwe nomagadhi gooholivi olita yimwe ga pilulilwa muusila. Eutho lyondjambo ndjika yOmuwa olyaaluhe.

¹⁵ Onzigona, uusila womunziya nomagadhi gooholivi oge na okuyambelwa Omuwa ongula kehe sigo aluhe.”

¹⁶ Omuwa Omupangeliawike ota ti: “Ngele ope na omuleli ta gandja oshitopolwa shevi lye mwene kugumwe gwomoyanamati, otashi kala uuthiga womwanamati ngoka.

¹⁷ Ihe omuleli ngele ota gandja oshitopolwa shasha shevi lye komupiya gwe, otashi galukile komuleli, uuna omumvo gweligolo gwa thiki. Oshe mwene, oye awike noyanamati taa kala nasho aluhe.

¹⁸ Omuleli kee na okuyuga nando ogumwe gwomaantu uuthiga we. Oshitopolwa kehe ta gandja koyanamati, oshi na okuza mevi ndyoka a pewa, opo kaa hepeke nando aantu moku ya yuga evi lyawo.”

¹⁹ Omulumentu okwa fala ndje posheelo shomala ngoka ga taalela kuumbangalantu popepi nosheelo shokombinga yokuumbugantu wehale lyaayambi. Omala ngaka omayapuki kaayambi. Okwa ulike ehala lyokombinga yokuuninginino womala

²⁰ e ta ti: “Ehala ndika olyo eha mpoka aayambi taa telekele onyama yomayonondjambo nomakwatathanondjambo notaa yotha iikwiila yomayambo, opo iinima iiyapuki yaa falwe mehale enene, yi etele aantu omupya.”

²¹ Okwa fala ndje mehale enene e ta ulukile ndje kutya mokolonela kehe yalyo omwa li okakololo komukoka gwoometa omilongo mbali nomutamo gwoometa omulongo nantano.

²²

²³ Okakololo kehe oka kundukwa kekuma lyomamanya, nopomakuma opwa li omaziko gomulilo koombinga adhihe.

²⁴ Omulumentu okwa lombwele ndje a ti: “Ngaka ogo omalugo moka aanatempeli taa teleke omayambo taga yambwa kaantu.”

47

¹ Omulumentu okwa shuna ndje muuyanda wotempeli. Omeya oga li taga zi kohi yuuyanda taga kungulukile lwokuuzilo, okombinga ndjoka otempeli ya taalela. Otaga zi kohi yombinga yuumbugantu wotempeli taga piti oshiyambelo kuumbugantu.

² Omulumentu okwa kutha ndje mo mehala lyotempeli twa pitile mosheelo shokuumbangalantu e ta fala ndje tatu kunkula otempeli pondje sigo okosheelo shoka sha taalela kuuzilo. Okalonga okashona oka li taka kunguluka mo kombinga yuumbugantu wosheelo.

³ Omulumentu okwa yeleke noshiyelekithoshiti she oometa omathele gatano u uka lwokuuzilo, hoka omeya taga tondokele. Okwa lombwele ndje, ndi taaguluke okalonga. Omeya oga li ga tsa ndje poompando.

⁴ Opo ihe a yeleke oometa dhilwe omathele gatano, omeya noga tsu ndje poongolo. Okwa yeleke ishewe oometa omathele gatano, omeya noga tsu ndje moshiya.

⁵ Okwa yeleke ishewe oometa omathele gatano, omeya noga li omale, itandi vulu we oku ga taaguluka. Oga li omale oku ga tokola, shila onontente.

⁶ Okwa lombwele ndje a ti: “Muna gwomuntu, ayihe mbika yi ndhindhilika nawa.” Omulumentu okwa fala ndje ihe komunkulo gwomulonga.

⁷ Sho nde ya ko, onda mono kutya okwa li ku na omiti odhindji kominkulo adhihe mbali.

⁸ Okwa lombwele ndje a ti: “Omeya ngaka otaga tondoka moshilongo taga uka kuuzilo sigo okesilu lyaJordan nokEfuta lya sa. Omeya ngaka omayelele otaga lugulula omeya goshimongwa mEfuta lya sa.

⁹ Shaa mpoka omulonga tagu tondoka, otapu ka kala omaludhi agehe giinamwenyo noohi. Omulonga otagu lugulula omeya gEfuta lya sa, noshaa mpoka taga tondoka, otaga fala po omwenyo.

¹⁰ Okuza koothithiya dhaEn-gedi ondjila ayihe sigo oothithiya dhaEneglaim otaku ka kala aayuli yoohi komunkulo gwefuta, oyo notaa ka lukila iiyulitho yawo. Otaku ka kala oohi dhomaludhi ogendji ngaashi mEfuta lyopokati.

¹¹ Ihe omeya momatapa nomoondombe okukunkula nomunkulo itaga lugululwa. Otaga ka kala olunza lwomongwa.

¹² Komunkulo kehe gwomulonga otaku kala omiti dhomaludhi gi ili nogi ili tadhi imi iiyimati. Omafo gadho ihaga ganya, dho itadhi kuka. Otadhi imi iiyimati iipe omwedhi kehe, oshoka odha tosipalekwa komulonga ngoka tagu kunguluka okuza motempeli. Omiti otadhi gandja iikulya, nomafo gadho otaga aludha aantu.”

¹³ Omuwa Omupangeliawike okwa ti: “Oku na oongamba dhoshilongo shoka shi na okutopolelwa omazimo omulongo nagaali gaIsrael. Ezimo lyaJosef nali pewe iitopolwa iyali.

¹⁴ Onda uvanekele oohokulu nokugana kutya otandi ya pe uuthiga wevi ndika; li topolelathaneni ngashingeyi.

¹⁵ “Ongamba yokuumbangalantu otayi uka lwokuuzilo okuza kEfuta lyopokati sigo okoshilando Hetlon, ketaulilo lyaHamat, sigo oshilando Zedad,

¹⁶ tayi yi kiilando Berota naSibrajim (oyi li pokati koshikandjo shoshilongo shaDamaskus noshikandjo shoshilongo shaHamat), sigo okoshilando Tikon (shi li pongamba yoshilongo Hauran).

¹⁷ Ongamba yokuumbangalantu otayi zi ano kEfuta lyopokati yu uka lwokuuzilo koshilando Enon, manga iikandjo yopooha yaDamaskus naHamat yi li kuumbangalantu wayo.

¹⁸ “Ongamba yokuuzilo otayi uka kuumbugantu ya za pokati koshikandjo shaDamaskus noshaHauran. Omulonga Jordan ogwo ongamba pokati kaIsrael naGilead, sigo oTamar kEfuta lya sa.

¹⁹ “Ongamba yokuumbugantu otayi uka kuuningininombugantu okuza kuTamar sigo okomatope gaMeriba muKadesh. Okuza mpoka otayi uka kuuningininombangalantu ya kunkula nongamba yaEgipiti sigo kEfuta lyopokati.

²⁰ “Ongamba yokuuninginino oyo Efuta lyopokati sigo okehala ndyoka li li kuuninginino waHamat.

²¹ “Topolelathaneni evi ndika ezimo nezimo;

²² otali ningi uuthiga weni waaluhe. Aakwiilongo mboka ya kala mokati keni noye na aanona ya valelwa mo, naa mone wo oshitopolwa shawo shevi, uuna tamu li topola. Otaa ningwa ya fa Aaisraeli; otaa umbilwa iihogololitho omolwiitopolwa yevi pamwe nomazimo gaIsrael.

²³ Omukalimo kehe omukwiilongo ota mono oshitopolwa she pamwe naantu yezimo ndyoka a kala nalyo. Ongame, Omuwa Omupangeliawike, nda popi.”

48

¹ Ongamba yokuumbangalantu woshilongo otayi uka lwokuuzilo okuza kEfuta lyopokati sigo okoshilando Hetlon noketaulilo lyaHamat, sigo okoshilando Enon nokongamba pokati koshilongo Damaskus naHamat. Ezimo kehe oli na okutaamba oshitopolwa shevi sha taandela okuza kongamba yokuuzilo sigo okEfuta lyopokati kuuninginino. Elandulathano okuza kuumbangalantu sigo okuumbugantu olyo ndika: Dan, Aser, Naftali, Manasse, Efraim, Ruben, Juda.

²

³

⁴

⁵

⁶

⁷

⁸ Oshitopolwa tashi landula ko shoshilongo otashi ikalekelwa. Oshi na okukala shookilometa omulongo nambali netata momutamo okuza kuumbangalantu sigo okuumbugantu, nuule okuza kuuzilo sigo okuuninginino u thike pamwe niitopolwa mbyoka ya pewa omazimo. Otempeli otayi kala moshitopolwa shika.

⁹ Pokati koshitopolwa shika ehala lyi ikalekelwa lyookilometa omulongo nambali netata lwookilometa omulongo otali yapulilwa Omuwa.

¹⁰ Aayambi oye na okukala ye na oshitopolwa shehala ndika eyapuki. Okuza kuuzilo sigo okuuninginino oshitopolwa shawo otashi yelekwa ookilometa omulongo nambali netata, nokuza kuumbangalantu sigo okuumbugantu ookilometa ntano. Otempeli yOmuwa oyi na okukala pondingandinga yehala ndika.

¹¹ Ehala ndika eyapuki oli na okukala lyaayambi mboka ya za moluvalo lwaSadok. Oya longele ndje nuudhiginini, yo inaa landula Aaisraeli momapuko, ngaashi Aalevi yalwe ya ningi.

¹² Oye na okukala ye na ehala lyi ikalekelwa lya tegama nehala lyAalevi, notali ka ninga eyapukilela.

¹³ Aalevi oye na okukala ye na ehala lyi ikalekelwa kuumbugantu waandyoka lyaayambi. Oli na okukala lyookilometa omulongo nambali netata okuza kuuzilo okuuka kuuninginino, nookilometa ntano okuza kuumbangalantu okuuka kuumbugantu.

¹⁴ Ehala lya yoololelwa Omuwa, olyo ewanawalela kwaagehe moshilongo nokali na okulandithwa po nenge li pingakanithwe nenge li lundululwe. Olyo eyapuki nolyOmuwa.

¹⁵ Oshitopolwa shehala lyi ikalekelwa shoka sha hupu ko, ookilometa omulongo nambali netata lwookilometa mbali netata, kashi shi oshiyapuki, ihe otashi longithwa kaantu. Otaa kala mo ye shi longithe. Oshilando oshi na okukala mokati kasho,

¹⁶ notashi kala ombine yoometa 2 250 koombinga adhihe.

¹⁷ Okukunduka oshilando ashihe kombinga kehe otaku kala ehala lyomwaka lyoometa 125 momutamo.

¹⁸ Evi ndyoka tali hupu ko, oshilando sho sha tungwa mbala mehala ndyoka lya tegama nehala eyapuki kuumbugantu, ookilometa ntano lwookilometa mbali netata kuuzilo nookilometa mbali netata kuuninginino, otali ningi lyuunamapya nuuniimuna kaanashilando.

¹⁹ Shaa ngoka a kala moshilando, kape na mbudhi ogwezimo lini, ota vulu oku li longitha.

²⁰ Oshitopolwa ashihe pondingandinga yoshitopolwa shoka sha yoololwa, nashi kale ombine yookilometa omulongo nambali netata koombinga adhihe, mwa kwatelelwa ehala lyoshilando.

²¹ Kuuzilo nokuuninginino wehala ndika li na otempeli, evi lyaayambi, evi lyAalevi noshilando; evi lya hupu ko, olyomuleli. Otali taandele lyu uka kuuzilo sigo okongamba yokuuzilo nokuuninginino sigo okEfuta lyopokati. Kuumbangalantu olya gama koshitopolwa shaJuda nokuumbugantu koshitopolwa shaBenjamin.

²²

²³ Kuumbugantu woshitopolwa shika shi ikalekelwa, ezimo kehe lya hupu ko oli na okutaamba oshitopolwa shevi shoka sha taandela okuza kongamba yokuuzilo sigo okuuninginino kEfuta lyopokati. Elandulathano okuza kuumbangalantu sigo okuumbugantu olyo ndika: Benjamin, Simeon, Issaskar, Sebulon, Gad.

²⁴

²⁵

²⁶

²⁷

²⁸ Kombinga yokuumbugantu woshitopolwa sha pewa ezimo lyaGad, ongamba otayi uka kuuningininombugantu okuza kuTamar sigo okomatope gaMeriba muKadesh. Okuza mpoka otayi uka kuuningininombangalantu ya kunkula nongamba yaEgipiti sigo Efuta lyopokati.

²⁹ Omuwa Omupangeliawike okwa ti: “Evi olyo ndika li na okutopolwa iitendelwa yomazimo gaIsrael, li ninge eliko lyawo.”

³⁰ Oshilando Jerusalem oshi na omiyelo omulongo nambali. Ekuma kehe lyoometa 2 250 lyomomakuma gane oli na omiyelo ndatu, shaa ngoka gwa lukilwa ezimo limwe. Omiyelo dhomekuma lyokuumbangalantu odha lukilwa Ruben, Juda naLevi; ndhoka dhomekuma lyokuuzilo Josef, Benjamin naDan; ndhoka dhomekuma lyokuumbugantu Simeon, Issaskar naSebulon; naandhoka dhomekuma lyokuuninginino Gad, Aser naNaftali.

³¹

³²

³³

³⁴

³⁵ Omukoka gwekuma alihe koombinga adhihe ne dhoshilando ogwo oometa omayuvi omugoyi. Edhina lyoshilando okuza kongashingeyi otali ka kala “Omuwa-oku-li-mpaka”.