1 Oshilando shoka sha li shu udha aantu, osha si uuwike ngiini! Shoka sha li oshinankondo mokati kiigwana, osha ningi sha fa omuselekadhi. Shoka sha li omunyekadhi mokati kiilongo, osha ningi omupika gwowala.
2 Ota lili omahodhi omapyu uusiku auhe, omahodhi otaga pononoka koompanda dhe. Kaku na nando ogumwe gwomaaholike ye a hupu ko te mu talaleke. Ookuume ke ayehe oye mu kotokele noya ningi aatondi ye.
3 Juda okwa falwa muupongekwa, oku li muupika nomoluhepo. Oku li mokati kiigwana, ye ita mono evululuko. Aatidhagani ye oye mu kondeke, okwa thitikininwa pokakololo.
4 Omapola gu uka kuSion, otaga lili oosa; kaku na we ngoka te ya kiituthi ye. Omiyelo dhoshilando odha teywa po, naayambi otaa tsu omazima. Aakadhona ye oya yemata; Sion mwene okwa lulilwa.
5 Aathiminiki ye oya sindana, aatondi ye otaa nyanyukwa. Omuwa mwene okwe mu sitha oluhodhi omolwomayono ge ogendjigendji. Uunona we owa kwatwa po komutondi nowa falwa muupongekwa.
6 Esimano lyomukadhona Sion olye mu thigi po. Aawiliki ye oya fa oomenye dhaa na omaunapelo. Muunkundi wawo oya nduungile komeho gaakwatipo yawo.
7 Momasiku guukweyi muupongekwa Jerusalem ota dhimbulukwa uuyamba we auhe wonale, uuna aantu ye ya gwile komeho gaatondi, nokakwa li ngoka e ya e mu kwathe. Aathiminiki ye oye mu tongolola yo taa yolo okutekapo kwe.
8 Jerusalem okwa yono nokuyonenena, okwi inyateke nayilela. Ayehe mboka ya li haye mu simaneke, otaye mu dhini ngashingeyi; oya mono eshunduko lye. Jerusalem ota hekumuna a pungulula oshipala she.
9 Onyata ye oya kakatela koohulukweya dhe. Ina yaguma nando ehulilo lya fa ndika. Okutekapo kwe okwa li okukumithi; ke na ngoka te mu talaleke. “Omuwa, tala efupipiko lyandje; aatondi yandje otaa imbi ekandanga.”
10 Omuthininiki okwa ganeke iikaha ye, a kwate po omaliko ge agehe. Okwa mono aapagani taa hiti motempeli ye, aantu mboka wi indike okuya megongalo lyoye.
11 Aantu ayehe otaa keme, sho taa kongo oshikwiila. Eliko lyawo lyondilo otaye li tula miilya, opo ya kwatele mo omwenyo. “Shi tala, Omuwa, u shi ndhindhilike, nkene tandi dhinwa.”
12 Kamu uvite ondjaalela, amuhe mboka tamu pitilile po? Lengalengeni mu tale: oku na tuu uuwehame u thike puuwehame wandje, mboka Omuwa a dhenge ndje nawo mesiku lyehwamo lyondjahi ye?
13 Okwa tumu omulilo gwa koloka muule nogwe ya momasipa gandje. Okwa lukile omwigo kohi yoompadhi dhandje nokwa kulukithile ndje mo. Okwa mbugalekitha ndje nokwa alukitha ndje omasiku agehe.
14 Oshikaha she osha kutile ndje ondjoko yomayono gandje. Okwe yi tsike kothingo yandje nokwa pegeyitha oonkondo dhandje. Omuwa okwa tula ndje miikaha yaatondi yandje, nonda nyengwa okwiipopila.
15 Omuwa okwe ekelehi aakwiita yandje ayehe oofule. Okwa hiyile ndje aakwiita, opo ya hanagule po aagundjuka yandje. Metemba lye lyokukolela, Omuwa okwa lyatele mo omukadhona Juda.
16 Omolwashoka tandi lili; omeho gandje otaga pononoka omahodhi. Ngoka ta vulu okutalaleka ndje, oku li kokule. Aamwandje oya halakanithwa po, oshoka omutondi a lundalala.
17 Sion ota yelutha omaako ge: kaku na ngoka te mu hekeleke. Omuwa okwa tukulukithile Jakob aatondi koombinga adhihe. Oya tala Jerusalem onyata ayike.
18 Omuwa ota pongolola nawa, oshoka onda pingathana neutho lye. Pulakeneni, ne iigwana ayihe, ne mu mone uuwehame wandje. Aakadhona yandje naamati yandje oya falwa muupongekwa.
19 Onda kugile ookuume kandje ekwatho, ihe oye etha ndje. Aayambi naawiliki yandje oya sile moshilando kondjala, sho ya li taa kongo okulya, ya kwatele mo omwenyo.
20 Omuwa, tala, uuwehame wandje uunene ngiini! Omandjandja gandje otaga nyulukuta kuugelele. Omutima gwandje otagu pilukile meni lyandje. Akutukutu ko! Nda ningi omutangalali — pondje egongamwele olya yugu ndje aanona, ndele nomeni omu na elega.
21 Pulakeneni omakemo gandje. Kaku na ngoka ta hekeleke ndje. Aatondi yandje ayehe oyu uvu omupya gwandje; otaa ligolele shoka wa ningi. Thikitha esiku we li ya hunganekele, opo ya fe ndje.
22 Ya pangulila uukolokoshi wawo; ya ninga ngaashi wa ningile ndje molwoondjo dhandje. Omakemo gandje ogendji, nomutima gwandje otagu alukwa.
1 Akwetse! Omuwa mondjahi ye okwa tula omukadhona Sion momilema. Okwe ekelehi esimano lyaIsrael lyomegulu, e li umbile pevi. Ina dhimbulukwa we oshilyatelelo shokoompadhi dhe mesiku lyondjahi ye.
2 Omuwa okwa hanagula po omagumbo gaJakob pwaa na ohenda. Mondjahi ye okwa nyanyagula omapopilongulu gaJuda, okwe ga kumunine pevi. Okwa sitha oshilongo naawiliki yasho ohoni.
3 Omuupyundjahi we, a teyagula oonkondo dhaIsrael. Okwa tindi okukwatha pokuhomona kwomutondi nokwa hwameke muJakob omulilo tagu lungunike ayihe yopopepi.
4 Okwa lukile uutati we ongomutondi, a yelutha olulyo lwe i ilongekidha. Ngaashi omutondi, okwa hanagula po ashihe sho opala momeho; momatsali gomukadhona Sion, a poolele mo ondjahi ye ya fa omulilo.
5 Omuwa okwa fa omutondi; okwa hanagula po Israel. Okwa kombo po oombala dhe adhihe; a silukitha omapopilongulu ge. Okwi indjipalitha oluhodhi nelilagano lyomukadhona
6 Okwa hwagununa po enkolo lye a fa ta yonagula po oshikunino; a halakanitha po ehala lye lyoshigongi. Omuwa okwe ekelehi edhimbulukwo lyiituthi nOmasabati muSion. Muupyundjahi we okwi inaga omukwaniilwa nomuyambi.
7 Omuwa okwe ekelehi oshiyambelo she e ta thigi po otempeli ye. Omakuma guuwa we e ga gandja kaatondi. Oya kugu onkugo motempeli yOmuwa ya fa yomesiku lyoshituthi.
8 Omuwa okwa li a tokola a kumune po omadhingililokuma gaSion; okwa tama oshiyelekithongodhi ye ina yelutha we oshikaha she, sigo a hanagula po ayihe thilu. Omapopilongulu nomadhingililokuma ogo ongotele pevi nokuyemata.
9 Iiyelo yaJerusalem oya ningine mevi, okwa teyagula po iiyedhilitho yayo. Omukwaniilwa naanamadhina yasho oye li muupongekwa. Ompango ihayi longwa we, naahunganeki ihaa mono we omamoniko taga zi kOmuwa.
10 Aawiliki yomukadhona Sion, oya mbwata mevi ya tya thilu. Oyi igunda ontsi momitse dhawo yo ya zala omahahi. Aafuko Aajerusalem, omitse dhawo odha nyongama.
11 Omeho gandje oga dhimeya kokulila, omandjandja gandje otaga nyulukuta, ehuli lyandje olya hililwa pevi, oshoka oshigwana shandje osha gonwa, aanona nuuhanona otau gundile momapandaanda goshilando.
12 Otaa pula ooyina taa ti: “Oshithima oshi li peni?” Otaa galangata ya fa oomwahe momapandaanda goshilando e taa fudha mo oomwenyo dhawo ye li komagundji gooyina.
13 Omukadhona Jerusalem, nandi ku hokololele shike, nandi ku yeleke nashike? Olye ngoka ndi mu tule pungoye, e ku hekeleke, omukadhona Sion? Omupya gwoye omunene ngefuta, olye ta vulu oku ku aludha?
14 Omamoniko gaahunganeki yoye oga li giilombo gaa na omwago; inaa yanuna nando uulunde woye, oga ningi ondjambi yokupongekwa kwoye. Oye ku lombwele omahunganeko giifundja nogomapukitho.
15 Aapitipo ayehe otaye ku hakelele omake. Otaa hiki omwiilwa taa pukapukile omukadhona Jerusalem komitse e taa ti: “Oshilando osho tuu shoka kwa tiwa osheopalo lyo lyene nenyanyu lyuuyuni auhe?”
16 Aatondi yoye ayehe otaye ku nyonkele. Otaa hiki omwiilwa yo tayi ikokota komayego. Otaa ti: “Twe mu dhilagula po. Ndika olyo esiku twa kala twa tegelela. Ngashingeyi otwa thiki mulyo, twe li mono.”
17 Omuwa a tsakanitha shoka a popile, okwa gwanitha oohapu dhe dha popilwe momasiku gonale. Okwa hanagula pwaa na ohenda, a pe omutondi gwoye ompito yoku ku nyonkela nokuholola oonkondo dhe.
18 Omukadhona Sion, kuga muule, kugila Omuwa. Omahodhi goye naga pononoke omutenya nuusiku ga fa efundja. Ino ipa nando evululuko, ino thithikila omeho goye.
19 Yambuka po, lilagana uusiku auhe nokomutakushi. Omwenyo gwoye gu tilahi ongomeya koshipala shOmuwa. Yeluthila omaako goye kuye omolwoomwenyo dhaamwoye, mboka taa sile pookolonela dhomapandaanda kondjala.
20 Omuwa, tala u shi dhiladhile: Olye we mu ningile ngeyi? Omolwashike aakiintu taa li po uuhanona wawo, oomputu ye dhi yamutha, ye dhi ukata? Omolwashike omuyambi nomuhunganeki taa dhipagelwa motempeli yOmuwa?
21 Aanona naakuluntu, oya kangawala pevi momapandaanda. Aafuko yandje naamati, oya gwila po ya sa kegongamwele. Owe ya dhipaga mesiku lyondjahi yoye, owe ya tsele waa na ohenda.
22 Owa hiya aahaluthi yandje koombinga adhihe, ye ye koshituthi shomatilitho. Mesiku lyondjahi yoye kakwa li ngoka a fadhuka po. Ayehe mboka nda tekula nonde ya palutha, omutondi a tula kothingo.
1 Ngame omuntu nda talithwa omalwa koshivugati shondjahi ye.
2 Ondu undagulwa nda thiminikilwa momilema pwaa na uuyelele washa.
3 Esiku alihe ota pilukile ndje noshikaha she, a kondjithe ndje.
4 Okwa yugu ndje oshipa e ta kunya onyama yandje komasipa e ga teya.
5 Okwa hongele ndje ondjoko, a kondeke ndje nuudhigu nuuwehame.
6 Okwa thiminike ndje, ndi pukile momilema pamwe noonakusa yonalenale.
7 Okwa tungile ndje ekondeka, ite vulu okuhunuka mo. A tula ndje momalyenge ga kola.
8 Nando otandi kugagana tandi igidha, ita pulakene omagalikano gandje.
9 Okwa thitike ondjila yandje nomamanya, omapola gandje okwe ga golipaleke.
10 Okwa langele ndje a fa emwanka, a fa onime tayi tegelele ndje moshiholameno shayo.
11 Okwa tidha ndje mo mondjila yandje nokwa tuulagula ndje; okwa thigi ndje po.
12 Okwa lukile uutati we e ta shoneke ndje niikuti ye.
13 Okwa ndjike iikuti ye molutu lwandje.
14 Onda ningi ondjolwi yoshigwana shandje ashihe, otaa sheke ndje miiyimbo yawo aluhe.
15 Okwa kolitha ndje kuululu wonyango.
16 Omayego gandje okwe ga teyagulitha omawe nokwa tsu oshipala shandje mevi.
17 Omwenyo gwandje okwe gu yugu ombili; onda dhimbwa elago nenyanyu.
18 Ngashingeyi otandi ti: “Oonkondo dhandje odha pwine, kandi na we etegameno lyasha tali zi kOmuwa.”
19 Dhimbulukwa omalwa gandje nokwaalaala kwandje, onyango ondulundulu.
20 Otandi yi dhimbulukwa nawa, omwenyo gwandje ogwa thindililwa mo nayo.
21 Shimwe otandi shi lombwele omwenyo gwandje, note mono etegameno.
22 Okesilohenda lyOmuwa, sho inaatu yonwa po thilu, ontalanteni ye inayi hula po.
23 Esilohenda lye olyo epe kehe ongula; uudhiginini we kau na ondjele.
24 Omwenyo gwandje otagu ti: “Omuwa oye oshitendelwa shandje; ongame nonde mu inekela.”
25 Omuwa oye omwaanawa kwaamboka ye mu inekela, komwenyo ngoka tagu mu kongo.
26 Osho opala okutegelela ehupitho lyOmuwa meimweneneno.
27 Osho opala omulumentu a humbate ondjoko okuza kuugundjuka we.
28 Na kuutumbe muuwike nokumwena, uuna Omuwa te yi mu tsike.
29 Na lale montsi — pamwe oku na natango etegameno.
30 Na gandje olupanda kungoka te mu dhenge, na mone omasheko ga gwana.
31 Oshoka Omuwa ite ekelehi omuntu sigo aluhe.
32 Ngele ota geye, oku na ohenda, esilohenda lye enenenene.
33 Nokuli iha nyanyukilwa okuhepeka aana yaantu nenge oku ya nikitha oluhodhi.
34 Oonkwatwa adhihe moshilongo uuna tadhi vunyagulwa notadhi lyatagulwa noompadhi,
35 uuna uuthemba womuntu tau thininikwa koshipala shaanguka gwokombandambanda,
36 uuna omuntu ta kuthwa uuyuuki — Omuwa ke shi wete?
37 Olye a popi, iinima noye ya po? Olye e shi ningi, ngele ke shi Omuwa?
38 Openi nduno, ngele kamu shi mokana kwaanguka gwokombandambanda, hamu zi uuwinayi nuuwanawa?
39 Omuntu oshike ta tamananene? Oshipu okukala ta keme moluulunde we.
40 Tu konakoneni oondjila dhetu, tu dhi simonone, tu galukile kOmuwa.
41 Tu yelutheni oomwenyo nomaako getu kuKalunga megulu tu tye:
42 Otwa yono notwa kolokosha, ongoye noino tu dhimina po.
43 Ongoye wi idhingile ondjahi nowe tu tidhagana, owe tu dhipaga waa na ohenda.
44 Owi idhingile moshikogo itamu piti omagalikano.
45 Owe tu ningi etutu niifakufaku mokati kiigwana.
46 Aatondi yetu ye tu makulile omakana, taye tu nyana miiyimbo.
47 Omahalutho nomakolombongo ogo oshitopolelwa shetu, ekano nehanagulo.
48 Omeho gandje oga togala momulonga gwomahodhi okulila ehanagulo lya adha oshigwana shandje.
49 Omeho gandje otaga lili gaa na evululuko,
50 sigo Omuwa to ontamene pevi, e tu taalele megulu.
51 Omeho gandje oga pushuka iilalo kokulila aakadhona ayehe yomoshilando shandje.
52 Oya yewe ndje, ya tidha ndje ngondhila, oyo mboka ye tonde ndje owala.
53 Oyu undulile omwenyo gwandje monyombo, noyu umbile mo omamanya.
54 Omeya oga pitilile omutse gwandje; onda ti: “Nda kana.”
55 Omuwa, onde ku ithana muuleelee wonyombo.
56 Ou uvite onkugo yandje tayi ti: “Ino thitika okutsi kwoye, kwaa uve omagalikano gandje.”
57 Owa hedha popepi, uuna ndoka nde ku ithana; owa ti: “Ino tila.”
58 Ongoye, Omuwa, owa popile ndje miihokolola, owa hupitha omwenyo gwandje.
59 Omuwa, ou wete omathiminiko tandi ga thiminikwa. Uthila ndje.
60 Owa mono omafudhagano gawo agehe, iineya yawo ayihe taa dhiladhilile ndje.
61 Omuwa, owu uvu okusheka kwawo, niiponga ayihe taye yi dhiladhilile ndje.
62 Aatondi yandje otaa piyaganeke ndje nomanongono gawo omasiku agehe.
63 Nando oya kuutumbe nenge ya thikame, tala, ongame oshiimbo shawo.
64 Omuwa, shi ya futila, ngaashi ye shi ilongele.
65 Kukutika oomwenyo dhawo, etulomutima lyoye nali ya lambele.
66 Ya tidha mondjahi, ya nakula mo kohi yegulu lyoye.
1 Akwetse, oshingoli osha ninga iikogo, oshingoli oshiyelele osha dhimeya. Omamanya omayapuki oga halakanithwa ga napakana momapandaanda.
2 Aana yaSion, mboka ya li ye na ondilo ya fa yoshingoli sha hogololwa, oya talwa ngashingeyi ya fa iiyuma yeloya, oshilonga shomuhongi gwiiyuma.
3 Nuululunga wo hau gandja omagundji nohau yamutha uunimona wawo, ihe aakiintu yoshigwana shandje oye na olungwenye ya fa oompo dhomombuga.
4 Elaka lyokahanona otali kakatele kondaathelo omolwenota. Uunona tau indile oshikwiila, ihe kaku na ngoka te shi u pambulile.
5 Mboka ya li haa li nawa, ngashingeyi oya kangawala momapandaanda; mboka ya li haa ithele moonguwo oombwilili, ngashingeyi otaa lala pelunda lyomutoko.
6 Uukolokoshi woshigwana shandje owa lundu pombanda u vule uulunde waSodom, shoka sha hanagulwa po mepathimo, pwaa na omuntu e shi gumithe iikaha ye.
7 Nale aawagona yaSion oya li taa tayima ya fa oompawe, aatotototo ye vule omahini. Omalutu gawo oga li ge vule oonyoka dha kwehulwa, neopalo lyawo olya li li vule eadhimo lyosafire.
8 Ngashingeyi oye na iipala ya fa ombiga yomudhilo, itaa dhimbululwa we momapandaanda. Oshipa shawo osha kakatela komasipa, oya kukuta ya fa oshikuni.
9 Aanelago oyo mboka ya si kegongamwele, oyo aahwepo ye vule mboka ya si kondjala, oomboka ya gunda taa thithonoka kompumbwe yiilya yomomapya.
10 Niikaha yawo yene, aakiintu aanahenda oya paka po oyana, mboka ya ningi iikulya yawo momupya ngoka gwa adha oshigwana shandje.
11 Omuwa okwe etha uupyundjahi we u hwame; okwa tilehi mo ongeyo ye. Okwa hwameke eziko lyomulilo muSion, ndyoka lya lungunike po omakankameno ge.
12 Aakwaniilwa yokombanda yevi inaye shi itaala nenge wo aakali ayehe muuyuni kutya omuthininiki omutondi ona ka vula a hite miiyelo yaJerusalem.
13 Oshe ya adha moluulunde waahunganeki nomoluumbudhi waayambi, mboka ya tilehi ombinzi yaayuuki mokatilela koshilando.
14 Otaa pwampwauka momapandaanda ya fa aaposi. Oya hipa ombinzi nokaku na ngoka e na omukumo okuguma oonguwo dhawo.
15 Aantu oyi igidha ya ti: “Kandukii po, hedhii ko, inamu tu guma!” Sho ya tauka mo ya yi kiigwana yilwe, inaa ziminwa nando, ya kale mokati kayo.
16 Omuwa oye mwene e ya halakanitha, ite ya tonatele we nohokwe. Aantu itaa simaneke we aayambi noitaa pulakene aawiliki.
17 Otwa lolodha owala omeho getu tatu tegelele ekwatho — osima yowala! Kooshungo dhetu otwa pekapeka twa tegelela oshigwana shoka inaashi vula oku tu hupitha.
18 Aatondi yetu oya tala oonkatu dhetu noye edhile omagumbo getu. Ehulilo lyetu olya thikana, omasiku getu oga hulu.
19 Aatidhagani yetu oya li oontondoki, oye vule omakodhi mewangandjo. Oya landula oshinkoti shetu moondundu, oye tu langele mombuga.
20 Omukwaniilwa gwetu, omugwayekwa gwOmuwa, okwa gwile momakelo gawo. Okwa li omufudho gwomomayulu getu, ngoka twa popile tatu ti: “Meni lyomuzile gwe otatu ka kala mokati kiigwana.”
21 Nyanyukwa nokuligola, ngoye oshigwana shaEdom, ngoka wa kala moshilongo Uz! Molufo lwoye oshitenga otashi ke ku adha: Otashi ke ku kolitha, e to mbugalekwa.
22 Omukadhona Sion, ongunga yuulunde woye ya futwa; Omuwa ite ke ku konda mo we. Omukadhona Edom, uulunde woye otau ka geelwa; Omuwa ota ka holola oondjo dhoye puuyelele.
1 Omuwa, dhimbulukwa shoka twa ningilwa; tu tala u mone ehutuko lyetu.
2 Uuthiga wetu owa yi kaayeni. Omagumbo getu oga yi kaatyakala.
3 Otwa ningi oothigwa, katu na ootate; oomeme oya fa aaselekadhi.
4 Omeya tatu ga nu, otatu ga futile; iikuni tatu yi pumbwa, otayi tu pula ondando.
5 Ondjoko oyi li moothingo dhetu, otatu haulwa. Otatu longo sigo eso, pwaa na oluthuwo.
6 Otwa yeluthile omaako getu kuEgipiti nenge kuAssur, aniwa tu pewe iikulya ya gwana.
7 Ootate oya yono, ihe kaye po we. Otse tatu si uudhigu woondjo dhawo.
8 Otatu lelwa kaapika ihe kaku na ngoka te tu mangulula miikaha yawo.
9 Puupatekedhi woomwenyo dhetu tatu mono iikulya yetu mokuhenuka egongamwele mombuga.
10 Oshipa shetu sha hanya sha fa eziko, osha luudhikwa kepupyu lyondjala.
11 Oya gugitha aakulukadhi muSion, aakadhona momikunda dhaJuda.
12 Oya tula aawagona kohake, yo inaa simaneka aakuluntu yoomvi.
13 Aalumentu aagundjuka oya humbata iikweyithilomanya, aamati otaa tonwa kiipandi yiikuni.
14 Aasamane kaye mo we momiyelo, naagundjuka oye etha iiketala.
15 Enyanyu olya kana mo moomwenyo dhetu, okutanta kwetu okwa shituka oondila.
16 Oshishani shesimano osha gu komitse dhetu. Yaye tse, sho twa yono!
17 Molwashika oomwenyo dhetu dha ziyalala, nomolwashika omeho getu ga siilila.
18 Molwashoka ondundu Sion ya mbugala, noombandje tadhi yi lyatagula.
19 Ihe Omuwa, ongoye to kala po sigo aluhe, oshipangelapundi shoye otashi kala okuza komapipi nomapipi.
20 Oshike to tu dhimbwa sigo aluhe? Oshike to tu etha sigo osigo?
21 Tu galulila kungoye, Omuwa, notatu galukile ko. Pepaleka omasiku getu ngashika muushitonale.
22 Nenge owe tu ekelehi mondjahi yaa na ondjele?