1

¹ Ndhika oohapu dhaJeremia yaHilkia, gumwe gwomaayambi yokuAnatot mOshikandjo shaBenjamin.

² Oohapu dhOmuwa odha adha Jeremia momumvo omutimulongo nomutitatu gwepangelo lyaJosia yaAmmon, omukwaniilwa gwaJuda,

³ niishewe muuyuni waJehoiakim yaJosia, omukwaniilwa gwaJuda, sigo omomwedhi omutitano gwomomumvo omutimulongo nagumwe gwepangelo lyaSedekia yaJosia, omukwaniilwa gwaJuda, uuna Aajerusalem ya falwa muupongekwa.

⁴ Omuwa okwa lombwele ndje a ti:

⁵ “Onde ku hogolola, manga inaandi ku shitila moshivalelo shanyoko, nomanga inoo valwa, onde ku yapula nonde ku lenge omuhunganeki gwiigwana.”

⁶ Onda yamukula nda ti: “Omuwa Omupangeliawike, kandi shi okupopya, oshoka ngame omunona.”

⁷ Ihe Omuwa okwa lombwele ndje a ti: “Ino tya, ngoye omunona; inda kaantu mboka tandi ku tumu kuyo, ngoye u ya lombwele ashihe tandi shi ku lombwele, u shi popye.

⁸ Ino ya tila, oshoka ondi li pungoye notandi ku gamene. Ongame Omuwa nda popi!”

⁹ Omuwa okwa ganeke oshikaha she ta gumu omilungu dhandje e ta lombwele ndje ta ti: “Tala, otandi tula oohapu dhandje mokana koye.

¹⁰ Otandi ku lenge u vule iigwana niilongo, opo u dhikule nokuhalakanitha, u hanagule nokuhata pevi nou tungulule nokutsika.”

¹¹ Omuwa okwa pula ndje a ti: “Jeremia, ou wete shike?” Onda yamukula: “Ondi wete oshitayi shomuti omumandeli.”

¹² Omuwa okwa ti: “Ou li mondjila, otandi tonata ndi tale oohapu dhandje dhi tsakanithwe.”

¹³ Omuwa okwa pula ndje ishewe a ti: “Ou wete shike?” Onda yamukula: “Ondi wete ombiga yi li kuumbangalantu, tayi fuluka, ye endamena kuumbangalantu.”

¹⁴ Omuwa okwa ti kungame: “Kuumbangalantu okwo taku zi oshiponga shoka tashi ka adha oonakukala moshilongo,

¹⁵ oshoka otandi ithana iigwana ayihe yokuumbangalantu yi ye. Aakwaniilwa yayo otaa ka tula iipangelapundi yawo pomiyelo dhaJerusalem nokukunduka omankolo gasho nokukunduka wo iilando yilwe yaJuda.

¹⁶ Otandi ka geela aantu yandje, oshoka oya yono, oye etha ndje, oya yambele iikalunga iikwiilongo noya hambula iimenka e taye yi longele.

¹⁷ Jeremia, ilongekidha, u ye u ka lombwele aantu ayihe mbyoka nde ku lombwele u yi ya lombwele. Ino ya tila, opo ndaaye ku tule uumbanda, ngele to kala puyo.

¹⁸ Nena ndjika otandi ku ningi oshilando sha kola, ongundhi yosheela nekuma lyoshikushu okukondjitha oshilongo ashihe, aakwaniilwa yaJuda, omalenga, naayambi. Aantu yomoshilongo

¹⁹ otaye ke ku kondjitha, ihe itaye ku sindi, oshoka ondi li pamwe nangoye notandi ku hupitha. Ongame Omuwa nda popi.”

2

¹ Omuwa okwa lombwele ndje,

² ndi ka uvithile aantu ayehe muJerusalem kutya Omuwa ota ti ngeyi: “Otandi dhimbulukwa eopalo lyuugundjuka woye, ohole yoye momasiku guufuko woye, nkene wa landula ndje mombuga, montale moka ihaamu kunwa.

³ Israel, ngoye ogwandjelela, ngoye eliko lyandje eyapuki. Ayehe mboka ye ku ningi nayi, oyi ipetha ombedhi noya adhika koshiponga. Ongame, Omuwa, nda popi.”

⁴ Uveni oohapu dhOmuwa, ne oluvalo lwaJakob, ne omazimo agehe gaIsrael.

⁵ Omuwa ota ti: “Oohokulu oya mwene ndje ombedhi yashike? Oshike she ya pilamenitha ndje? Oya ka simaneka iimenka yaa na omwago, noyo yene ya ningi aanima yowala.

⁶ Inaa kala ye na ko nasha nangame, nando onde ya hupitha muEgipiti nonde ya pandakanitha ombuga, eha lyoontale nolyomakolombongo, evi lya kalanda lya nika iiponga, moka mwaa na nando olye, nokaku na ngoka he li tokola ando.

⁷ Onde ya eta mevi lyo ondoka, opo ya nyanyukilwe eteyo lyalyo nuuwanawa walyo wulwe. Ihe oya shundula evi lyandje noya nyateke oshilongo nde shi ya pe.

⁸ Aayambi inaa pula ya tye: ‘Omuwa oku li peni?’ Aayambi yandje mwene oya ningi kaaye shi ndje. Aaleli oya tsu ondumbo nangame; aahunganeki oyu uvitha medhina lyaBaal noya longele iimenka yaa na omwago.”

⁹ “Onkee ano ngame Omuwa tandi tamaneke aantu yandje, notandi ka tamaneka aatekulu yawo.

¹⁰ Indeni kuuninginino kontuntu Kipro, ne mu tume yamwe lwokuuzilo koshilongo Kedar. Otamu ka mona kutya kaku na nando osha sha fa mbika sha ningilwe nale.

¹¹ Kaku na oshigwana shilwe sha pingakanithile ookalunga yasho, nando yo yene kaye shi ookalunga. Ihe aantu yandje oya pingakanitha ndje po, Kalunga ngoka e ya simanekitha. Oya pingakanitha ndje naashoka kaashi na ekwatho.

¹² Onda lombwele eyalelo, li tale nuugelele noli kumwe tali zi omahwilili.

¹³ Oshoka aantu yandje oya yono paali: Oya pilamene ndje, othithiya yomeya omanamwenyo, noyi ihupile omithima dhawo yene, omithima dhiipopo, ndhoka itaadhi vulu okukala nomeya.”

¹⁴ “Israel ke shi omupika; ina valelwa nando omuupika. Omolwashike ano a ningi oshihakanwa shaatondi?

¹⁵ Oye mu gonene ya fa oonime; oya mbugaleke oshilongo she, niilando ye oya kumunwa po. Oya thigwa po owala.

¹⁶ Eeno, aalumentu yokuMemfis naTakpanhes oya kunya omutse gwe gu ninge ongwala.

¹⁷ Israel, ongoye mwene we shi iyetele! Owe etha ndje, Omuwa Kalunga koye, sho nda li tandi ku enditha nondjila.

¹⁸ Omolwashike to yi kuEgipiti, u ka nwe omeya gaNiili? Omolwashike to yi kuAssur, u ka nwe omeya gaEufrat?

¹⁹ Uuwinayi woye mwene otau ku pangula, nokupilamena ndje kwoye otaku ku tokola. Oto ka koneka, nkene sha puka noshilulululu, sho we etha ndje, Omuwa Kalunga koye, noino inekela ndje we nando. Ongame, Omupangeliawike Omuwa Omunankondoawike, nda popi.”

²⁰ Omuwa Omupangeliawike ota ti: “Israel, owe ekelehi ndje nalenale; owa tindi okuvulika kungame nokulongela ndje. Owa longele iikalunga yoluvalo koondundu adhihe oondeendeka nomomizile dhomiti adhihe omitalala.

²¹ Onde ku tsike ngaashi omuviinu gwa hogololwa, ombuto ya hogololekeka. Ihe tala utale, nkene wa tya! Owa fa omuviinu gwaa na oshilonga nogwo ola.

²² Nando u iyoge nomeya gomutoko nenge nothewa yekoha, ondi wete natango oontongo dhoondjo dhoye.

²³ Oto vulu ngiini okutya ino inyateka, nokutya ino longela Baal? Tala, nkene wa yono molusilu; tala shoka wa ningi. Owa fa ongamelo ongundjuka ya nikula, notayi pwampwauka yu uka huka naahwiyaka,

²⁴ tayi tondauka nombuga. Ngele ya nikula, olye ta vulu oku yi pangela? Ondumentu ndjoka ye yi hala, itayi pumbwa okwiivulitha; otayi monika nuupu pethimbo lyenikulo.

²⁵ Israel, ino matuka, sigo oompadhi dhoye dha kala owala, nomuligu gwoye tagu kukuta kokulandula iikalunga. Ihe oto ti: ‘Aawe! Ite vulu okushuna. Ondi hole iikalunga iikwiilongo notandi yi landula.’ ”

²⁶ Omuwa ota ti: “Aaisraeli ne, otamu ka sithwa ohoni ngashika omufuthi ngoka a adhikilila. Aakwaniilwa, omalenga, aayambi naahunganeki yeni otaa ka sithwa ohoni.

²⁷ Amuhe mboka tamu ti, omuti ogwo ho nemanya olyo nyoko, otamu ka sithwa ohoni, oshoka omwa pilamene ndje peha lyokugalukila kungame. Ihe uuna tamu adhika kuudhigu, otamu ithana ndje ndi ye oku mu hupitha.

²⁸ “Iikalunga mbyoka wi ihambulile, oyi li peni? Nayi ku hupithe, sho wa adhika kuudhigu — ngele otayi shi vulu! Juda, omwaalu gwiikalunga yoye ogu thike pamwe nomwaalu gwiilando yoye.

²⁹ Oto tamananene shike? Omolwashike wa tsu ondumbo nangame?

³⁰ Onde ku geele, ihe inashi eta uuwanawa. Ino pitika, ndi ku tule mondjila. Aahunganeki yoye owe ya dhipaga wa fa onime ya pindjala.

³¹ Aaisraeli ne, pulakeneni shoka tandi popi. Kune ano onda fa ombuga, onda fa oshilongo shomilema shi na iiponga? Omolwashike ano tamu ti, otamu ningi shoka mwa hala noitamu galukile we kungame?

³² Omukadhona oha dhimbwa tuu uulenga we nomufuko ofeyi ye? Ihe aantu yandje oya dhimbwa ndje omasiku ogendji gaa shi kuyalulwa.

³³ Ku na uudhigu washa okumona ondjila, ngele oto kongo aaholi yiipala. Eeno, nuuwinayi womukiintu otau konekwa mungoye.

³⁴ Oonguwo dhoye odha nyata kombinzi yoohepele naakaanandjo, hakombinzi yaakolokoshi. “Onkene tuu

³⁵ oto ti: ‘Kandi na ondjo; oshili, Omuwa ina geela ndje.’ Ihe ngame, Omuwa, otandi ke ku geela, molwashoka wa tindi okuzimina kutya ou na ondjo.

³⁶ Owi iningi gwowala, sho wi igameke kiikalunga yiigwana yilwe. Oto ka sithwa ohoni kuEgipiti, naanaa ngaashi wa ningilwe kuAssur.

³⁷ Naankoka oto ka za ko wi ikwata ombandamutse, molwashoka Omuwa okwe ekelehi mboka wa li wi inekela, noito ka kwathwa kuyo.”

3

¹ Omuwa ota ti: “Ngele oku na omusamane ta henge po omukadhi, nomukadhi ta ka hokanwa kugulwe, ita vulu we oku mu hokanununa. Shika otashi nyateke oshilongo nayi. Ihe ngoye Israel, sho wa hondelwa kaaholike yoye oyendji, oto galukile tuu kungame?

² Yelutha utale omeho goye u ligamene kiikulundundu. Oku na tuu ehala mpoka inoo hondelelwa po? Owa tegamene aasamane yoye pooha dhoondjila wa fa Omuarabia a langela oshihakanwa mombuga. Owa nyateke oshilongo noluhondelo lwoye.

³ Omolwashoka omvula ya keelelwa okuloka, omvula yontemuno ya kala inaayi loka we. Nando wa kala moluhondelo, ino sa ohoni.

⁴ “Nongashingeyi oto lombwele ndje to ti: ‘Ongoye tate, nou hole ndje okuza kuugundjuka.

⁵ Ino hala okugeyagana aluhe noino hala okukonenena ndje sigo aluhe.’ Israel, osho to popi, ihe oto longo iihuna ayihe to vulu oku yi huna.”

⁶ Omuwa okwa lombwele ndje muuyuni womukwaniilwa Josia ta ti: “Owa mona tuu, omuhasha Israel nkene a ningi? Okwa londo koondundu adhihe oondeendeka nokwa yi momizile dhomiti adhihe omitalala e ta lalwa naye nkoka.

⁷ Onda dhiladhila kutya ngele a gwanitha mbika, ota ka galukila kungame. Ihe ina galuka nando, nomumwayina omuhasha Juda okwe shi tala wo.

⁸ Juda okwa mono kutya onda henge po Israel, nonde mu tidha po, oshoka okwa pilamene ndje e ta ningi ohonda. Ihe Juda, omumwayina gwaIsrael, ina tila ndje. Naye wo okwa ningi ohonda

⁹ noina sa nando ohoni. Okwa nyateke oshilongo noluhondelo, sho a simaneke omamanya nomiti omitalala.

¹⁰ Nokonima yaambika ayihe Juda, omumwayina omuhasha gwaIsrael, ina galukila kungame. Okwi ifethitha ashike, ihe ine shi ninga moshili. Ongame Omuwa nda popi.”

¹¹ Omuwa okwa lombwele ndje kutya Israel nando okwe mu pilamene, okwa ningi ngaa hwepo e vule omwiiteki Juda.

¹² Okwa lombwele ndje, ndi ka lombwele Israel ndi tye: “Israel ngoka wi iteka ndje, galukila kungame. Ngame omunamutimahenda noihandi geye osima. Itandi ku geele we sigo aluhe.

¹³ Zimina owala kutya ngoye omunandjo, nowa tsu ondumbo nOmuwa, Kalunga koye. Hempulula kutya owa saagelele iikalunga yokiilongo momuti kehe omutalala noino vulika kiipango yandje. Ongame Omuwa nda popi.

¹⁴ “Aantu ne mboka mwi iteka ndje, galukeni; one aantu yandje. Otandi ka kutha gumwe gwomune moshilando kehe, nayaali yomoludhi kehe notandi ke mu galulila kondundu Sion.

¹⁵ Otandi ke mu pa aaleli haa vulika kungame, notaye mu lele nuunongo noondunge.

¹⁶ Nongele mwi indjipala oyendji moshilongo shoka, aantu itaa ka tumbula we oshikethahangano. Itaye ke shi dhiladhila we nenge ye shi dhimbulukwe; itaye shi pumbwa we noitaa ka pangela we oshipe.

¹⁷ Uuna ethimbo ndyoka nali thiki, Jerusalem otashi ka ithanwa ‘Oshipangelapundi shOmuwa’, niigwana ayihe oko tayi ka gongala yi simaneke ndje. Itaa ka ninga we, ngaashi omitima dhawo omiwinayi nodha tangalala tadhi ya lombwele.

¹⁸ Israel ota hangana naJuda, noyo ayehe otaa zi muupongekwa moshilongo shokuumbangalantu notaa galukile koshilongo shoka nde shi pele oohekulu, shi ninge eliko lyawo.”

¹⁹ Omuwa ota ti: “Israel, onda halele ndi ku taambe omumwandjemati, otandi ku pe evi lyo ondoka, evi ewanawa muuyuni auhe. Onde ku halele, u ithane ndje tate, noku na mpoka no ka pilamena ndje we.

²⁰ Ihe owa fa omukulukadhi ti iteka pomusamane gwe, ngoye ino inekela ndje. Ongame Omuwa nda popi.”

²¹ Ewi otali igidha muule koondungu dhoondundu. Oyo Aaisraeli taa kugu notaa galikana, oshoka oya kala moondjo noya dhimbwa Omuwa Kalunga kawo.

²² Galukeni, one amuhe mboka mwi iteka Omuwa; ote ke mu aludha e te mu ningi aainekelwa. Otamu ti: “Eeno, otatu ya kOmuwa, oshoka oye Kalunga ketu.

²³ Inatu mona ekwatho miinonoma yuupagani koondungu dhoondundu. Ekwatho lyaIsrael otali zi ashike kOmuwa Kalunga ketu.

²⁴ Ihe okulongela Baal, oshikalunga shohoni, oshe tu kanithitha oonzi dhetu, osho wo aanona yetu aamati naakadhona — ashihe shoka ootatekulu ya longelele muuyuni wonale.

²⁵ Natu laleni mohoni e tatu pitika ondhino yi tu kwidhidhike. Otse nootatekulu twa yono aluhe kOmuwa Kalunga ketu; inatu vulika nando kiipango ye.”

4

¹ Omuwa ota ti: “Aaisraeli ne, ngele omwa hala okugaluka, galukileni kungame. Ngele tamu etha iimenka handi yi tondo e tamu inekele ndje,

² otashi ka kala shu uka, sho tamu gana medhina lyandje. Nena iigwana ayihe otayi ka galikana ndje ndi yi yambeke, notayi ka hambelela ndje.”

³ Omuwa ota lombwele Aajuda nAajerusalem ta ti: “Kokoleni oshikokola, inamu kuna mokati komano.

⁴ Dhiginineni ehangano nangame, Omuwa gweni, iyapulilii ndje, ne Aajuda nAajerusalem. Ngele itamu shi ningi, ondjahi yandje otayi ka hwama ya fa omulilo omolwiinima iiwinayi mwe yi ningi. Otandi ka hwama nopwaa na omudhimi gwomulilo ngo.”

⁵ Hikeni omankuma noshilonga ashihe! Ga fudhileni ga kugagane nawa! Lombweleni Aajuda nAajerusalem ya ye miilandohote.

⁶ Yelutheni endhindhiliko lyokuuka lwokuSion. Zii ko neendelelo mu ka holame! Inamu kwatakwata! Oshoka otandi eta oshiponga tashi zi kuumbangalantu, ehanagulo enenenene.

⁷ Omuhanaguli okwa mbunzuka ko a fa onkoshi ya hituka moshiholameno shayo. Ote ya a hanagule po Juda. Iilando yaJuda otayi ka kumunwa po, nokaku na ngoka ta ka kala mo muyo.

⁸ Zaleni omahahi mu lile ne mu takume, oshoka ehwamo lyondjahi yOmuwa inali penga Juda.

⁹ Omuwa ota ti: “Esiku ndyoka aakwaniilwa nomalenga otaga tyololoka; aayambi otaa kunkwa, naahunganeki otaa kumwa.”

¹⁰ Ngame onda ti: “Omuwa Omupangeliawike, oshili, owa kotokele Aajerusalem! Owa tile, otaku kala ombili, ihe egongamwele olyo ndyoka li li poothingo dhawo.”

¹¹ Esiku otali ya, uuna Aajerusalem taa ka lombwelwa kutya ombepo ompyu otayi pepe tayi ziilile kombuga, yu uka kuyo. Inayi opala, yi pepe po ashike etutu —

¹² ombepo ndjoka tayi ya palombwelo lyOmuwa, otayi ka ninga epukutula! Omuwa oye mwene ta tumbulile aantu ye epangulo.

¹³ Talii ko, omutondi te ya a fa iikogo. Omatembakwiita ge oga fa ombepo yoshikungulu, nuukambe we otau endelele u vule omakodhi. Yaye tse! Ehanagulo tali ya!

¹⁴ Jerusalem, yoga ko uuwinayi komwenyo gwoye, opo u hupithwe. Sigo uunake to tsikile nomadhiladhilo guulunde?

¹⁵ Aatumwa ya zi koshilando Dan nokoondundu dhaEfraim, otaa hokolola onkundana ombwinayi.

¹⁶ Oye ya okulondodha iigwana nokulombwela Jerusalem kutya aatondi otaa ya taa zi koshilongo shokokule. Aatondi mbaka otaa ka kugila iilando yaJuda onkugo

¹⁷ notaa ka kondeka Jerusalem ya fa aantu ya keelela epya, oshoka aantu yasho oya tsu ondumbo nOmuwa. Omuwa oye a popi.

¹⁸ Juda, owe shi iyetele mwene mokukala mondjila ndjoka wa lamba nomokulonga shoka wa ningi. Uulunde woye owe eta iihuna yomahepeko; otayi ku tsu momutima.

¹⁹ Yayee, tandi tapata, tandi nkundumanekwa kuuwehame! Omutima gwandje! Omwenyo gwandje gwa tukuluka! Ite vulu okumwena; ondu uvite omankuma nonkugo yolugodhi.

²⁰ Oshiponga otashi landula oshiponga oshikwawo. Oshilongo ashiheshihe osha hanagulwa po. Omatsali getu oga dhikulwa mo ohaluka, nomagumbo getu ga ningi iihanuhanu yowala.

²¹ Sigo uunake tandi tala uugeyi wolugodhi nokukala te pulakene ehiko lyomankuma?

²² Omuwa ota ti: “Aantu yandje aagoya, inaa tseya ndje. Oyo aanona aatsini; kaye na nando omayele. Oya pyokoka mokulonga uuwinayi, ihe otaa nyengwa okulonga uuwanawa.”

²³ Onda tala evi — olya li lya vongakana nolya mbugala; onda ligamene kegulu — kakwa li ku na uuyelele.

²⁴ Onda tala koondundu — okwa li ekakamo, niikulundundu ayihe oya li tayi tengauka.

²⁵ Onda mono kutya kaku na aantu; noondhila odha tuka ko.

²⁶ Evi lyo ondoka olya mbugala; iilando yalyo oya ningi omakulukuma molwoohandje dhondjahi yOmuwa.

²⁷ Omuwa okwe shi popi ta ti: “Evi alihe otali ka mbugala, nando itandi li hanagula po thiluthilu.

²⁸ Evi otali ka lila; eyalelo otali ka luudha. Omuwa okwa popi noita ka lundulula we omadhiladhilo ge. Okwa utha etokolo lye noite li shunithile mo we.”

²⁹ Paigidho lyaakayilinkambe noondjumbeta shaa ngoka ota yi ontuku. Yamwe otaa ka matukila komakuti, yamwe otaa ka londakana omamanya. Oshilando kehe otashi ka thigwa po, nokaku na ngoka ta ka kala mo we.

³⁰ Yaye ngoye Jerusalem! Omolwashike wa zala uutiligane? Omolwashike wa zala omawe nowa gwayeke oombafu dhoye? Owi imbonzola mo osima yowala! Aaholi yoye oye ku ekelehi noya hala oku ku dhipaga po.

³¹ Otandi uvu onkugo ya fa yomukulukadhi ta thetwa, ekemo lya fa lyomukiintu opo ti iyelipa omunona. Oyo onkugo yaJerusalem ta hetha mefudhagano, okwa yelutha omaako ge ta takuma ta ti: “Akwetse! Otandi ka sila miikaha yaadhipagi.”

5

¹ Aajerusalem, matukileni momapandaanda geni! Ligameneni akuhe! Italeni ne yene! Kongeni omalandithilo! Otamu vulu tuu okumona omuntu ta ningi nawa nota kambadhala okwiinekela Kalunga? Ngele osho, nena Omuwa ota ka dhimina po Jerusalem.

² Nonando tamu ti, otamu longele Omuwa, itamu dhiladhila shoka tamu popi.

³ Oshili, Omuwa ota tala uudhiginini. Okwe mu dhenge, ihe inamu pupa ko; okwe mu nyanyagula, ihe omwa tindi okunongela sha. Omwa tangalala noinamu etha uulunde weni.

⁴ Onda dhiladhila: “Mbaka oohepele dhowala naashamba. Oye na uugoya; inaa tseya shoka Kalunga kawo ta pumbwa, shoka Kalunga a hala ya ninge.

⁵ Otandi hedha kaanenentu e tandi popi nayo. Oshili, otaa tseya Kalunga shoka ta pumbwa, shoka Omuwa a hala ya ninge.” Ihe oye ekelehi epangelo lyOmuwa noya tindi okuvulika kuye.

⁶ Omolwashoka oonime tadhi ka hituluka momugulu, dhi ya lye po; omambungu gomombuga otage ke ya ndimbula iintimbu, noongwe otadhi ka hundjunina miilando yawo. Aantu ngele otaa gwaya mo, otadhi ya tuula, oshoka uulunde wawo wi indjipala, esiku nesiku oya pilamene Kalunga.

⁷ Omuwa okwa pula a ti: “Omolwashike ndi dhimine po aantu yandje? Oye etha ndje noya longele ookalunga yaa shi yoshili. Onda palutha aantu yandje sigo ya kuta, ihe oyo ya hondele noya kala momagumbo goohonda.

⁸ Oya fa uukambe uutsezi wo ondoka wa nikula taa haluka aakiintu yayakwawo.

⁹ Ondi kale ando inaandi ya geelela iihuna mbika nondaa konenene oshigwana miinima ya tya ngaaka?

¹⁰ Otandi tumu aatondi ya ke po omiviinu dhaantu yandje, ihe haku ya hanagula po sheke. Otandi ya lombwele ya ponone ko iitayi, oshoka iitayi mbyoka kayi shi yandje.

¹¹ Aaisraeli nAajuda oya gwaaleke ndje shili. Ongame Omuwa nda popi.”

¹² Aantu yOmuwa oye mu idhimbike ta ti: “Ita ka ninga sha! Itatu adhika koshiponga! Itatu adhika kiita nenge kondjala yekomba.”

¹³ Oya ti, aahunganeki kaye na omwago, oohapu dhawo ombepo yowala, kaye na elaka lya za kOmuwa. Omuwa, Kalunga Omunankondoawike, okwa lombwele ndje a ti: “Jeremia, aantu sho taa popi iinima ya tya ngaaka, otandi ka tema oohapu dhandje dhi ninge omulilo mokana koye. Aantu otaa ningi ya fa iikuni, nomulilo otagu ya lungunitha po.”

¹⁴

¹⁵ Aaisraeli ne, Omuwa ote eta oshigwana tashi zi kokule, shi mu matukile. Osho oshigwana oshinankondo noshikulu, shoka elaka lyasho inoo li tseya.

¹⁶ Oondjumbeta dhasho odho aakwiita aanankondo taa dhipaga yaa na onge yasha.

¹⁷ Otaa ka dhilagula po iilya yeni niikulya yeni; otaa ka dhipaga po aana yeni aamati naakadhona. Otaa ka tsela po iimuna yeni, oongombe niikombo. Otaa ka hanagula po omiviinu nomikwiyu dheni. Iilandohote yeni mbyoka mwi itula, otayi ka hanagulwa po kiita yawo.

¹⁸ Omuwa ota ti: “Ihe nomomasiku ngoka wo itandi ke mu yonagula po thiluthilu.

¹⁹ Aantu nge taa pula taa ti: ‘Omolwashike Omuwa Kalunga ketu a ningile aantu ye iinima ya tya ngaaka?’ Ya yamukula to ti: ‘Ngaashi mwi iteka ndje nomwa longele iikalunga iikwiilongo mevi lyeni yene, osho tamu ka longela aakwiilongo mevi lyaa shi lyeni.’ ”

²⁰ Omuwa ota ti: “Shi hokololeleni oluvalo lwaJakob, ne mu shi tseyithile Aajuda:

²¹ Pulakena, shigwana ngoye oshigoya noshaa na oondunge. Ne omu na omeho, ihe kamu wete ko; omu na omakutsi, ihe kamu uvite ko.

²² Ongame Omuwa, oshike ihaamu tila ndje? Omolwashike itaamu kakama koshipala shandje? Onda ndumbile ehekevi li ninge ongamba yefuta, ongamba yolela itaayi taakanwa we. Efuta otali vulu okufuluka, ihe itali vulu oku yi taaguluka. Omakuthikuthi otaga yaya, ihe itaga vulu okuwayuka mo.

²³ Ihe yantu ne! One aatangalali naanamanganga; omwa pilamene ko nomwa thigi ndje po.

²⁴ Inamu hala nando mu simaneke ndje, nando handi mu lokithile omvula yontemuna noyothinge nohandi mu pe eteyo omumvo kehe.

²⁵ Uulunde weni owe mu keelele uuwanawa mbuka auhe.

²⁶ “Aantu aawinayi oya kala mokati kaantu yandje. Otaa hondjunine ya fa aategi yoomwigo ya yule oondhila, ihe otaa lukile omatavu ya yule aantu.

²⁷ Naanaa ngaashi omukongo tu udha oshikuku she oondhila, osho yu udhitha omagumbo gawo nomaliko ga yugwa. Osho she ya ningi aanankondo naayamba.

²⁸ Oyo ondoka ya ndinda nawa. Miilonga yawo iiwinayi kamu na ongamba. Itaa uthile oothigwa pauyuuki nenge ya popile oohepele.

²⁹ “Ihe ngame Omuwa otandi ke ya geelela iihuna mbika, otandi ka kwatela oshigwana shika iikonene.

³⁰ Moshilongo omwa ningwa iihuna.

³¹ Aahunganeki otaa hunganeke iifundja, aayambi otaa pangele pamalombwelo gaahunganeki, naantu yandje oye shi hole pahedhi ndjika. Ihe otaa ka ninga shike, ayihe nge ya hulu po?”

6

¹ Aabenjamin ne, tembukii mo, mu ka holame! Zii mo muJerusalem! Hikeni enkuma muTekoa! Dhikeni endhindhiliko muBetakerem! Oshiponga nehanagulo otali ziilile kuumbangalantu.

² Oshilando Sion osho opala, ihe otashi ka hanagulwa po.

³ Aakwaniilwa pamwe nomatangakwiita gawo otaa ka yungila ko oontanda. Taa dhike omatsali gawo ya kunduka oshilando, noshaa ngoka ote li dhike mpoka a hala.

⁴ Otaa ka tya: “Ilongekidheni, mu ponokele Jerusalem! Langeleni komauta! Tu shi matukileni moshanga shomutenya!” Ihe otaa ti ishewe: “Okwa fa kwa toko, etango lya peguka, omizile dha ningi omile.

⁵ Thikameni utale tu shi ponokele uusiku; tu kumunii po omankolokuma goshilando.”

⁶ Omuwa, Omunankondoawike okwa lombwele aakwaniilwa mbaka ya ke po omiti noya tungile Jerusalem omutuni gwekondekela. Okwa ti: “Otandi geele oshilando shika, oshoka oshu udha uukolokoshi.

⁷ Otashi zi uuwinayi sha fa omuthima tagu vile omeya. Ondu uvite omayugathano nomahanagulo moshilando nondi wete mo ashike uuwehame niilalo.

⁸ Aajerusalem ne, uudhigu mbuka nau kale elondodho kune; ngele hasho, otandi mu thigi po; oshilando sheni otandi shi shitukitha ombuga, ehala lyaa na aantu.”

⁹ Omuwa Omunankondoawike ota ti: “Israel ota ka toononwa thilu a fa omuviinu gwa kekwa omahila agehegehe. Osho u na okumangulula shaa ngoka, manga ku na ethimbo.”

¹⁰ Onda yamukula: “Olye ta pulakene ndje, sho te popi ndi ya londodhe? Oya tangalala notaa tindi okupulakena elaka lyoye; otaa yolo shoka to lombwele ndje ndi shi tye.

¹¹ Omuwa, ondjahi yoku ya geela otayi lilima mungame wo; itandi vulu oku yi idhidhimikila.” Omuwa okwa ti kungame: “Yi tilila maanona ye li momapandaanda nomaalumentu aagundjuka ya gongala pamwe; maasamane nomaakulukadhi ongashikwawo; nando oya kulupa, itaa hupu ko.

¹² Omagumbo gawo otaga ka gandjwa po kuyalwe, nosho wo omapya gawo naakiintu yawo. Otandi ka geela aantu yoshilongo shika.

¹³ Ayehe, aagundjuka naakuluntu, oye hole eliko lyiifundja. Nokuli aahunganeki naayambi otaa kotokele aantu.

¹⁴ Iilalo yaantu yandje otaa hala oku yi panga taa ti: ‘Oku na ombili,’ ko kwaa na nando ombili.

¹⁵ Oya li tuu ya sa ohoni, sho ya longo iihuna mbika? Aawoo, inaa sa nando ohoni; inaa tseya nokuli shoka tayi ti. Otaa ka nganyukila po pamwe naambeyaka yalwe ya pundukila po nale; sho tandi ya geele, otali ka ninga ehulilo lyawo. Ongame Omuwa nda popi.”

¹⁶ Omuwa ota ti: “Ka thikameni poompagiila mu tale. Puleni omapola goshitonale, puleni ondjila ombwanawa mu ende mo notamu kala nombili.” Ihe oya ti: “Itatu ende mo.”

¹⁷ Omuwa okwa langeke aalangeli ya pulakene elondodho lyenkuma. Ihe oya ti: “Itatu pulakene.”

¹⁸ Onkee ano Omuwa okwa ti: “Pulakeneni, ne iigwana, konekeni shoka tashi ka ningilwa aantu yandje.

¹⁹ Ngoye evi, pulakena! Aantu mbaka otandi ya undulile oshiponga, iiyimati yiineya yawo, oshoka inaa pulakena oohapu dhandje.

²⁰ Ondi na shike niitsinino taye yi eta tayi zi kuSheba nenge iizimba tayi zi koshilongo shokokule? Itandi ka taamba nando omafikilondjambo gawo nenge ndi mbilipalithwe koontselelandjambo dhawo.

²¹ Otandi ka teleganitha aantu mbaka e taa punduka. Oohe noyanamati otaa ka sa, nosho tashi ningilwa ookuume naashiinda.”

²² Omuwa ota ti: “Aantu otaa ya taa zi koshilongo shokuumbangalantu; oshigwana oshinankondo tashi zi kokule, oshi ilongekidhila olugodhi.

²³ Oye na omatati nomagonga; oyo aageyentu ye na onyanya. Otaa kugu ya fa efuta tali pupu, sho ya kayila uukambe wawo. Oyi ilongekidhila olugodhi ya kondjithe Sion.”

²⁴ Aajerusalem oya ti: “Otu uvu onkundana, nomaako getu oga lemanekwa; otwa kwatwa kehaluko nokuuwehame twa fa omukiintu e na oshitheta.

²⁵ Inamu pita mo, mu ye komapya nenge mu ka ende momapola, oshoka omutondi oku na egongamwele, naakuhe oku na iihuna yowala.”

²⁶ Omuwa ota ti: “Aantu yandje ne, zaleni omahahi ne mu gwaye omutoko. Lileni omahodhi omapyu mwa fa tamu lili omumati epona, oshoka ngoka te ya e mu hanagule po, ota homona mbala.

²⁷ Jeremia, onde ku langeke u ninge omuyeleki gwaantu yandje; ya yeleka nokukonakona iikala yawo.

²⁸ Oyo ayehe aanamanganga, aakukutu ya fa osheela oshikushu nosheela oshiluudhe. Oyo ayehe yo ola, taye endagula taa popi oluhoko.

²⁹ Omupepo otagu pepele, ihe osheela itashi hemuka shi ze omange. Itashi kwatha sha, aantu yandje ya yelithwe, oshoka mboka haa longo uuwinayi, inaa kuthwa mo.

³⁰ Otaa ka lukwa omange, uutale waa na oshilonga, oshoka ongame Omuwa nde ya ekelehi.”

7

¹ Ndjika oyo ohapu ndjoka ya adha Jeremia ya zi kOmuwa tayi ti:

² “Thikama pomweelo gwongulu yOmuwa, ngoye u ka uvithe elaka ndika tali ti: ‘Uveni oohapu dhOmuwa, ne Aajuda mboka hamu pitile momiyelo ndhika, mu ka simaneke Omuwa.’ ”

³ Omuwa Omunankondoawike, Kalunga kaIsrael, ota ti: “Yelitheni oondjila niilonga yeni, ongame notandi mu etha mu kale mehala ndika.

⁴ Inamu inekela oohapu dhomakoto mu tye: ‘Ndjika otempeli yOmuwa, uuyapuki wOmuwa, otempeli yOmuwa!’

⁵ Opalekeni oondjila dheni ne mu ethe iilonga iiwinayi tamu yi ningi. Uthileni aantu ayehe pauyuuki.

⁶ Inamu hepeka aakwiilongo, oothigwa naaselekadhi. Inamu dhipaga aantu yaa na ondjo moshilongo shika. Inamu longela iikalunga yaakwiilongo, oshoka otashi mu yono po.

⁷ Ngele otamu lunduluka, otandi mu etha mu kale mo moshilongo shika nde shi pe oohokulu shi ninge eliko lyawo lyaaluhe.

⁸ Taleni, ne otamu inekele oohapu dhomakoto.

⁹ “Ohamu yaka, ohamu dhipaga, ohamu hondele, ohamu gana iifundja, ohamu yambele Baal omafikilondjambo nohamu longele iikalunga inaamu yi tseya nale.

¹⁰ Otamu longo iinima mbyoka handi tondo notamu ya tamu thikama koshipala shandje motempeli e tamu ti: ‘Otwa hupithwa!’

¹¹ Otamu dhiladhila kutya otempeli yandje oyo oshiholameno shaayugi? Ondi wete shoka tamu ningi.

¹² “Indeni kuShilo, ehala lyotango ndyoka nda hogolola li ninge eha lyelongelokalunga, mu tale shoka nde li ningile moluulunde waantu yandje Aaisraeli.

¹³ Omwa yono ayihe; nando nda popi kune olwindji, omwa tindi okupulakena. Inamu zimina, sho nde mu ithana.

¹⁴ Shoka nda ningile Shilo, osho tandi ningile otempeli yandje ndjika mwi inekela. Mehala ndika nde li mu pe noohokulu, osho tandi ka ninga, ngaashi nda ningile Shilo.

¹⁵ Otandi mu tidha po koshipala shandje, ngaashi nda tidhile po Aaisraeli aakweni. Ongame Omuwa nda popi.”

¹⁶ Omuwa okwa ti kuJeremia: “Ngoye ino galikanena aantu mbaka. Ino kuga nenge u galikane omolwawo; ino indila ndje, oshoka itandi ku pulakene.

¹⁷ Ou wete tuu shoka taa ningi miilando yomuJuda nomomapandaanda gaJerusalem?

¹⁸ Aanona otaa tyaya iikuni, aasamane taa tema omulilo, naakiintu taa telekele omunyekadhi gwokegulu iikwiila. Otaa saagelele iikalunga omayambo gomaviinu, opo ye ehameke ndje.

¹⁹ Ihe ongame tuu shili ngoka taye ehameke? Aawe, otayi iyalula yo yene notayi isitha ohoni yo yene.

²⁰ Onkee ano ngame, Omuwa Omupangeliawike, otandi ka poolela ondjahi yandje ya hwama kotempeli ndjika. Otandi ke yi tilila aantu niinamwenyo sha faathana, nokuli nokomiti nokiimeno. Ondjahi yandje otayi ka fa omulilo nokaku na ngoka te gu dhimi po.

²¹ “Omuwa Omunankondoawike, Kalunga kaIsrael, ota popi ta ti: Gwedheni omafikilondjambo koontselelandjambo ne mu lye po onyama ayihe ne yene.

²² Oshoka sho nda popitha oohokulu nonde ya tembudha muEgipiti, inandi ya pa oshipango shasha kombinga yomafikilondjambo noontselelandjambo.

²³ Ihe onde ya lombwele nda ti: ‘Vulikeni kungame, notandi ningi Kalunga keni, one notamu ningi aantu yandje. Endeni momapola ngoka tandi mu lombwele, opo mu kale nawa.’

²⁴ Ihe yo inaa vulika nenge ya pupe ko. Oya kala muutangalali wawo nomeikukutiko lyomitima dhawo omiwinayi. Oya ningi aawinayi peha lyokuninga aawanawa.

²⁵ Okuza kesiku ndyoka oohokulu ya zi muEgipiti sigo okesiku lyonena, onda dhiginine oku mu tumina aahunganeki, aamati yandje.

²⁶ Ihe kakwa li ngoka a pulakene nenge a pupe ko. Omwa tangalala owala, nomu na iipotha mu vule oohokulu.

²⁷ “Sho to ya lombwele oohapu ndhika, itaye ku pulakene; sho to ya ithana, itayi itaale.

²⁸ Ya lombwela ano kutya oshigwana shawo inashi vulika kungame, Omuwa Kalunga kasho, nenge shi ilonge komageelo gasho. Oshili oye ekelwahi, itayi tumbulwa we.”

²⁹ “Lileni ne Aajerusalem; kululii ko omafufu geni mu ga ekelehi. Lileni oosa koondungu dhoondundu, oshoka ongame, Omuwa, nda geya nonde ekelehi aantu yandje.

³⁰ “Aajuda oya ningi nayi. Oya tula iimenka yawo iinyanyalithi motempeli yandje. Osho ngeyi ya nyateke otempeli yandje.

³¹ Mesilu Ben Hinnom oya tungile mo oshiyambelo sha lukwa Tofet, opo ya fikile ko oyana aamati naakadhona momulilo. Ngame inandi shi ya lombwela, noinashi ya nando okuli momadhiladhilo gandje.

³² Ethimbo otali ya, uuna itaashi ka ithanwa we Tofet nenge esilu Ben Hinnom, ihe Esilu lyonakupila. Oko taa ka fumvika aantu, oshoka kape na we eha lyokufumvika.

³³ Omidhimba otadhi ka ninga oondya dhoondhila nodhiithitukuti, nokape na ngoka te yi tidha po.

³⁴ Oshilongo otashi ka mbugala. Miilando yaJuda nomomapandaanda gaJerusalem otandi ka hulitha ekugililo lyenyanyu nondigolo nomatanto goshituthi shohango.”

8

¹ “Momasiku ngeyaka omasipa gaakwaniilwa nogomalenga gaJuda, nosho wo omasipa gaayambi nogaahunganeki nogaantu yalwe mboka ya kala muJerusalem, otaga ka fumvulwa mo moombila dhawo.

² Peha lyoku ga gongela noku ga fumvika otaga ka kala ga fa uuhoho ga napakana nelundu. Otaga ka anekwa montaneho yetango, omwedhi noonyothi ndhoka aantu mbaka ya li ye dhi hole, ye dhi longele, ye dhi pula noku dhi galikana.

³ Aantu yoshigwana shika oshiwinayi mboka taa hupu ko, momahala moka nde ya halakanithile, otaa ka hokwa okusa shi vule okukala ye na omwenyo. Ongame Omuwa Omunankondoawike nda popi.”

⁴ Ya lombwela to ti, Omuwa ota ti: “Nakwiihata pohi ita penduka po? Nakupuka ondjila ita pukuluka?

⁵ Omolwashike ano aantu yandje hela mwa pilamene ndje, inamu galuka we? Omwa kakatela kiimenka yeni notamu tindi okugalukila kungame?

⁶ Onda pulakena nawa, ihe ne inamu popya oshili. Kape na gumwe gwomune a sila oondjo dhe oluhodhi; kape na gumwe gwomune a pula a ti: ‘Oshike nda longo nda puka?’ Shaa ngoka ota nduungile nepola lye a fa okakambe okapwidhi taka matukile molugodhi.

⁷ Oonkumbinkumbi odhi shi ethimbo lyokushuna; omatendenguti, uundigilili nomambiimbili otaga tseya ethimbo lyokutembuka. Ihe ne aantu yandje inamu tseya oompango ndhoka tandi mu lele nadho.

⁸ Otamu vulu ngiini okutya one aanandunge nomwa tseya oompango dhandje? Taleni, oompango odha pilikwa kaanongompango yaa shi kwiinekelwa.

⁹ Aanandunge yeni otaa sithwa ohoni, otaa haluthwa notaa kwatwa. Oye ekelehi oohapu dhandje; nena oye na po uunongo wuni?

¹⁰ Omapya gawo otandi ga gandja kooyene aape, naakiintu yawo kaalumentu yalwe. Shaa ngoka, omunene nenge omushona, ota kambadhala okukotokela miimaliwa. Nokuli aahunganeki naayambi otaa kotokele aantu.

¹¹ Otaa palampadha iilalo yaantu yandje ya fa inaayi geya unene, yo taa ti: ‘Ombili, ombili,’ ko kwaa na nando ombili.

¹² Yantu yandje, omwa sa tuu ohoni, sho mwa longo iihuna yi thike mpoka? Aawe, inamu gugwa nando, ne kamu uvite ohoni. Otamu ka punduka, yalwe sho taa ka gwila po. Uuna tandi mu pangula, otali ka kala ehulilo lyeni. Ongame Omuwa nda popi.

¹³ “Onda halele okugongela aantu yandje, ngashika omuntu ta gongele eteyo lye; ihe yo oya fa omuviinu gwaa na omandjembele, ya fa omukwiyu gwaa na oonkwiyu; nokuli omafo oga ganya. Onkee ando onda pitika aantu yokokule ya kuthe po oshilongo.”

¹⁴ Omolwashike twa mbwateni tse twa mwena? Gongaleni! Tu matukileni kiilandohote, tu ka sile mo. Omuwa Kalunga ketu okwe tu pangula, tu se; okwe tu pe uuzigo, tu nwe, oshoka otwa yono kuye.

¹⁵ Otwa tegamene ombili nethimbo lyealudho, ihe inashi kwatha sha; ehalutho olyo alike lye ya.

¹⁶ Aatondi yetu oye li nokuli moshilando Dan; otatu uvu uukambe wawo tau pembe. Oshilongo ashihe tashi kakama, uukambe wawo sho tau lili. Aatondi yetu ye ya ya hanagule po oshilongo shetu noshaa shoka shi li musho, oshilando shetu naantu yasho ayehe.

¹⁷ Omuwa ota ti: “Kotokeni! Otandi ka tuma omayoka ge na uuzigo mokati keni, omayoka kaage shi kunonomwa, ogo notage mu li.”

¹⁸ Oluhodhi lwandje italu vulu okukodhekwa, omutima gwandje tagu alukwa.

¹⁹ Pulakeneni! Ondu uvite aantu yandje taa kugu moshilongo ashihe taa ti: “Omuwa ke mo we muSion? Omukwaniilwa gwaSion ke po we mpaka?” Omuwa, omukwaniilwa gwawo, ota yamukula: “Omolwashike mwa geyitha ndje mokulongela iimenka yeni, nokwiinyongamena kiikalunga yeni iikwiilongo yaa na oshilonga?”

²⁰ Aantu otayi igidha taa ti: “Othinge oya ti komusheko, neteyo olya pu, ihe tse inatu kwathwa.”

²¹ Omwenyo gwandje ogwa nyanyagulwa, oshoka aantu yandje oya nyanyagulwa; otandi lili; onda haluka nayi.

²² Kamu na omugwayo muGilead? Kamu na nando aapangi? Omolwashike aantu yandje inaa pangwa?

9

¹ Omutse gwandje andola gwa li omuthima gwomeya, nomeho gandje othithiya yomahodhi, ando te lili uusiku nomutenya omolwaantu yandje mboka ya dhipagwa po.

² Ando onda li ndi na ehala mombuga, moka te vulu okukala kokule naantu yandje. Oyo ayehe aahasha, ongundu yaakengeleli.

³ Aluhe oyi ilongekidha okufundja; oshili ihayi pangele moshilongo. Omuwa ota popi ta ti: “Aantu yandje otaa ningi nayi aluhe, yo inaa tseya ndje.”

⁴ Shaa ngoka ni iyageke kuume ke, nokape na ngoka ti inekele mumwayina. Oshoka omumwayina kehe omunamakoto a fa Jakob, nokehe ngoka ota lundile ookuume ke.

⁵ Kuume ta kotokele kuume, nokaku na ngoka ta popi oshili. Oya longo omalaka gawo okufundja; ohaa ivulitha muulunde.

⁶ Oye li mokati komakoto; momakoto gawo otaa tindi okutseya ndje.

⁷ Molwaashika Omuwa Omunankondoawike ota ti: “Otandi ka yelitha aantu yandje ngashika iiwengendje notandi ke ya yeleka. Aantu yandje ya ningi nayi — otandi ya ningi ishewe shike?

⁸ Omalaka gawo ogo iikuti hayi lyana; aluhe taa fundju. Shaa ngoka ota popi oohapu oontalala komushiinda gwe, ihe ote mu tegele etavu.

⁹ Itandi ke ya geelela andola iihuna mbika? Itandi ka galulila andola oshigwana uuwinayi wa fa mbuka? Ongame Omuwa nda popi.”

¹⁰ “Otandi lilile oondundu notandi takumine omaunapelo. Oshoka oga kukuta po, nokape na ngoka te ende mokati kago. Ekololoko lyoongombe itali uvika we; oondhila niithitukuti oya yi ontuku.

¹¹ “Jerusalem otandi shi ningi ondumba yomakulukuma, otandi shi ningi ehala lyokukala oombandje; iilando yomuJuda otayi ka mbugala, ehala itaali kalwa nando okulye.”

¹² Onda pula nda ti: “Omuwa, omolwashike oshilongo sha hanagulwa po nosha kukuta sha fa ombuga, nokaku na nando oongoka te yi tokola? Olye e na oondunge e shi uve ko? Owe shi fatululile lye, opo a vule okulombwela yalwe?”

¹³ Omuwa okwa yamukula a ti: “Osha ningwa, oshoka aantu yandje oye etha elongo ndyoka nde li ya pele. Inaa vulika kungame nenge ya ninge, ngaashi nde ya lombwele.

¹⁴ Oya kala ya tangalala noya longele iimenka yaBaal, ngaashi ya longwa koohekulu, ye shi ninge.

¹⁵ Onkee ano pulakeneni shoka ngame, Omuwa Omunankondoawike, Kalunga kaIsrael, tandi ti: Otandi ka pa aantu yandje oshigwanga oshilulu ya lye, notandi ya nwetha omeya guuzigo.

¹⁶ Otandi ke ya halakanithila mokati kiigwana mbyoka noohekulu nayo wo inaaye yi kundana nale, notandi ka tuma iita yi ya kondjithe, sigo nde ya yono po naanaa.”

¹⁷ Omuwa Omunankondoawike ota ti: “Shi kuthii mo nduno! Hiyeni aakiintu ye shi kulila, tumeni koonkulungu dhokulila oosa.”

¹⁸ Oshigwana osha ti: “Ya lombweleni, ya matuke ye tu lilile ko oosa, sigo omeho getu taga udha omahodhi, noombafu dhetu dha hipa kokulila.”

¹⁹ Oshihomo shoondila otashi uvika muSion: “Otwa hanagulwa po ngiini! Ohoni yetu onene ngiini! Otatu thigi po oshilongo shetu, oshoka omagumbo getu oga kumunwa po.”

²⁰ Onda ti: “Ne aakiintu, pulakeneni oohapu dhOmuwa, mu ndhindhilike shoka ta popi. Longeni aana yeni aakadhona okulila, nookuume keni uunkulungu wokulila oosa.

²¹ Eso olye ya lya pitile momakende getu nolya ningine moombala dhetu. Momapandaanda olya kanyata aanona, naagundjuka opomahala guundingosho.

²² Omidhimba odha langathana akuhe, odha fa oondumba dhuuhoho momapya, odha fa iilya ya teywa ya thigwa po kaateyi, iilya mbyoka itaayi gongelwa. Shika osho shoka Omuwa a lombwele ndje, ndi shi popye.”

²³ Omuwa ota ti: “Omunandunge ke na okwiitangela uunongo we, omunankondo iti itangele oonkondo dhe, nomuyamba iti itangele uuyamba we.

²⁴ Ngoka ti itanga, ni itangele okuuva ko nokutseya ndje, oshoka ohole yandje kayi na ondjele, nohandi longo shoka oshiwanawa noshu uka. Iinima mbika otayi opalele ndje. Ongame Omuwa nda popi.”

²⁵ Omuwa ota ti: “Esiku otali ya, uuna tandi ka pangula Aayegipiti, Aajuda, Aaedom, Aayammoni, Aamoabi naantu yomombuga mboka haa ikulula omapalu. Aantu mbaka ayehe oya pita etanda, ihe inaa dhiginina ehangano; oye na owala endhindhiliko lyalyo. Kaku na nando ogumwe gwomaantu mbaka nomAaisraeli a dhiginina ehangano lyandje.”

10

¹ Aaisraeli ne, pulakeneni kelaka ndyoka Omuwa te mu lombwele.

² Ota ti: “Inamu landula omikalo dhiigwana yaapagani; inamu haluthwa komandhindhiliko gokeyalelo, nando ohaga halutha iigwana mbyoka.

³ Eitaalo lyaantu mboka olyowala. Tala, omuti otagu komangelwa mokuti, onkulungu otayi gu mbunzu nawa nekuya lyayo,

⁴ notagu tulwa uulenga woshisiliveli nowoshingoli. Otagu kwatelwa peha lyagwo noomboha, dhi gu koleke gwaa gwe po.

⁵ Iimenka ya tya ngaaka oya fa enduguya mepya lyomatanga. Itayi vulu okupopya; ohayi humbatwa, oshoka kayi shi kweenda. Inamu yi tila; itayi mu ningi sha, oshiwanawa nenge oshiwinayi.”

⁶ Omuwa, kaku na ngoka e ku fa; ongoye omunankondo, nedhina lyoye enene noli na oonkondo.

⁷ Olye ando itee ku simaneke, omukwaniilwa gwiigwana ayihe? Owi ilongela esimano. Kaku na ngoka e ku fa mokati kaanandunge ayehe yomiigwana nenge mokati kaakwaniilwa yayo.

⁸ Ayehe yomuyo oyo aagoya nomathethe. Miimenka ya hongwa miiti, otaa koneke mo shike?

⁹ Iimenka yawo oya kolongwa noshisiliveli shokuSpania noshingoli sha za kuUfas. Oyo iilonga yaahambudhi oonkulungu. Oya zala oonguwo oombulau noontiliganembwilili dha tungika kaayogohi yoompumpo.

¹⁰ Ihe ngoye, Omuwa ongoye Kalunga kashili. Ongoye Kalunga omunamwenyo nomukwaniilwa gwaaluheluhe. Nge to geye, uuyuni otau telagana; iigwana itayi vulu okwiidhidhimikila ondjahi yoye.

¹¹ (Ya lombwela kutya iikalunga mbyoka inayi shita egulu nevi, otayi ka hula ko kombanda yevi alihe.)

¹² Omuwa okwa shiti evi koonkondo dhe; nokuunongo we okwa umbu uuyuni nokwa alele omagulu.

¹³ Okoohapu dhe omeya gomeyalelo taga ndunduma: ote eta iikogo okuza kooha dhevi. Ota shelitha oombadhi miikogo, nota tumu ombepo tayi zi moompungulo dhe.

¹⁴ Omuntu kehe omugoya noke na ontseyo; mboka haa hongo iimenka, oya thethelekwa, oshoka iimenka mbyoka taa hambula, oyiifundja nokayi na omwenyo.

¹⁵ Oyo iinima yowala noyi na okudhinika; otayi ka hanagulwa po kOmuwa, ngele te ya e yi pangule.

¹⁶ Kalunga kaJakob ine yi fa; oye ngoka a shiti ayihe, nokwa hogolola Israel a ninge oshigwana she mwene. Omuwa Omunankondoawike olyo edhina lye.

¹⁷ Gongeleni iinima yeni, mu tembuke mo moshilongo, moka mwa thitikilwa.

¹⁸ Omuwa ote ke mu ekelahi mo moshilongo shika; ote ke mu nyanyagula, sigo itaaku hupu nando ogumwe gwomune. Omuwa oye a popi.

¹⁹ Aajerusalem otaa kugu taa ti: “Otwa nyankagulwa ngiini ngeyi! Iilalo yetu itayi aluka nando. Otwa dhiladhila tu shi idhidhimikile!

²⁰ Omatsali getu oga finyunwa po; oongodhi dhago odha tokolwa. Aanona yetu oya yiwa nayo; inapa kala nando ogumwe, a dhike po ishewe omatsali getu; kaku na ngoka ta yelutha omalapi gago.”

²¹ Onda yamukula: “Aawiliki yetu oya ningi aagoya; itaa pula Omuwa e ya wilike. Omolwashoka oya ndopa, naantu yetu oya halakanithwa po.

²² Pulakeneni! Otaku zi omulombo! Oku na einyengo enene moshigwana shokuumbangalantu; etangakwiita lyasho otali shitukitha iilando yaJuda ombuga, moka tamu kala oombandje.”

²³ Omuwa, ondi shi shi kutya omuntu iha vulu okupangela shoka u uthilwa; kaku na omuntu hu utha okukalamwenyo kwe.

²⁴ Dhenga ndje, Omuwa, ihe hanoshikanyauko, ngoye ino tu geela muupyundjahi; otashi ningi shi kale ehulilo lyetu.

²⁵ Ondjahi yoye yi poolela miigwana mbyoka ihaayi ku longele, omaantu mboka ihaa ithana edhina lyoye. Oya dhipaga po aantu yoye; oye tu hanagula po sheke noya kumuna po oshilongo shetu.

11

¹ Oohapu dhOmuwa odha adha Jeremia tadhi ti:

² “Pulakeneni oohapu dhehangano. Lombweleni Aajuda nAajerusalem

³ kutya ngame, Omuwa Kalunga kaIsrael, otandi thingi shaa ngoka itaa vulika koohapu dhehangano ndika.

⁴ Olyo ehangano ndyoka nda hangana noohekulu, sho nde ya tembudha mo muEgipiti, mevi ndyoka lya li lya fa eziko lya hanya. Onde ya lombwele, ya vulike kungame noya gwanithe shoka tandi ti. Onde ya lombwele kutya ngele otaa vulika, otaa kala aantu yandje, nangame ote kala Kalunga kawo.

⁵ Nena otandi dhiginine euvaneko lyandje nde li uvanekele oohekulu kutya otandi ya pe evi ndika eyamba nolyo ondoka ye li na ngashingeyi.” Onda yamukula nda ti: “Oshili, Omuwa.”

⁶ Omuwa okwa lombwele ndje a ti: “Inda kiilando yaJuda nomomapandaanda gaJerusalem. Uvithila ko oohapu dhandje u lombwele aantu ya pulakene oohapu dhehangano noya vulike kudho.

⁷ Oohekulu sho nde ya tembudha muEgipiti, onde ya londodha nokugana, ya vulike kungame, nonda dhiginine okulondodha aantu yandje sigo onena.

⁸ Ihe inaa pulakena nenge ya vulike. Shaa ngoka okwa tsikile uutangalali nuuwinayi shi vule nale. Onde ya lombwele, ya dhiginine ehangano, ihe oya tindi. Onkee onde ya undulile omageelo ngoka ga nyolelwa mo.”

⁹ Omuwa okwa lombwele ndje a ti: “Aajuda nAajerusalem oya tsa ondumbo nangame.

¹⁰ Oya shuna muulunde woohekulu, mboka ya tindi okulonga shoka nda ti; oya longele ookalunga yalwe; Israel naJuda oya teya ehangano ndyoka nda hangana noohekulu.

¹¹ Onkee ano ngashingeyi ngame Omuwa otandi ya londodha kutya otandi ya undulile ehanagulo, oyo noitaa ka hunuka mo. Nongele taa kugile ndje ekwatho, itandi ke ya pulakena.

¹² Aajuda nAajerusalem otaa ka ya kiikalunga mbyoka ye yi yambele omafikilondjambo notaye yi kugile ekwatho. Ihe iikalunga mbyoka itayi vulu oku ya hupitha, uuna ehanagulo tali ya.

¹³ Mpoka pu thike omwaalu gwiilando muJuda, opo pu thike omwaalu gwiikalunga yawo; naampoka pu thike omwaalu gwomapandaanda muJerusalem, opo pu thike omwaalu gwiiyambelo yomafikilondjambo ya tungilwa Baal, oshikalunga shi nyanyalitha.

¹⁴ Jeremia, ino galikana ndje nenge u indile ndje molwaantu mbaka. Ngele oye li muudhigu taa kugile ndje, itandi ke ya pulakena.”

¹⁵ Omuwa ota ti: “Aantu mboka ndi ya hole, otaa longo uuwinayi. Oye na uuthemba washike okukala motempeli yandje? Otaa dhiladhila kutya otaa vulu okukeelela oshiponga, sho taa uvaneke omauvaneko notaa yamba oontselelandjambo? Otashi ya pe elago shika?

¹⁶ Onde ya luku omuolivi gwa hetukila, gwa kanyata iiyimati yo opala; ihe ngashingeyi otandi ka hwameka omafo gagwo, notaku uvika endundumo, note pompona ko iitayi yagwo.

¹⁷ “Ongame, Omuwa Omunankondoawike, nda tsike Israel naJuda; ihe ngashingeyi otandi ya undulile oshiponga. Oye shi iyetele yo yene, oshoka oya yono; oya geyitha ndje, sho ya yambele Baal omafikilondjambo.”

¹⁸ Omuwa okwa tseyithile ndje ondumbo ndjoka aatondi yandje ya pangele molwandje.

¹⁹ Onda li nda fa onzigona tayi falwa koshidhipagelo; inandi tseya kutya otaa kondjitha ndje, sho ya dhiladhilile ndje uuwinayi. Oya li taa ti: “Omuti natu gu komangele po, manga gwa ziza nawa, natu mu dhipageni po, opo pwaa kale ngoka te mu dhimbulukwa we.”

²⁰ Onda galikana nda ti: “Omuwa Omunankondoawike, ngoye omutokolihapu omuyuuki, oto konakona omatedho nokuyeleka oomwenyo dhaantu. Ondi itula miikaha yoye, tonatela ndje; aantu mbaka ya galulila uuwinayi.”

²¹ Aantu yokuAnatot oya hala okudhipaga ndje po, ngele otandi dhiginine okuuvitha oohapu dhOmuwa.

²² Onkee ano Omuwa Omunankondoawike okwa ti: “Otandi ke ya geela! Aagundjuka aamati yawo taa ka sila miita; aanona yawo otaa ka sa kondjala.

²³ Ondu utha ethimbo lyokweetela Aayanatot oshiponga, nuuna ethimbo ndyoka tali thiki, kape na nando ogumwe gwawo ta hupu ko.”

12

¹ Omuwa, ngoye omuyuuki aluhe; ote vulu tuu okutamanana nangoye? Onkene tuu ote popi nangoye kombinga yuuyuuki. Omolwashike aalunde ye na elago? Omolwashike aanandumbo taa kala nombili?

² Oto ya tsike e taa tsama; otaa koko notaa imi iiyimati. Otaye ku popi aluhe nawa momakana, ihe itaa ku longele.

³ Ihe, Omuwa, ngoye owa tseya ndje; ou wete shoka te ningi, nonkene ndi ku hole. Pwedhulula po aawinayi mbaka ngashika oonzi tadhi falwa koshidhipagelo; ya tonatela, sigo ethimbo lyokudhipagwa kwawo lya thiki.

⁴ Evi lyetu otali kala lya kalanda sigo uunake, nomwiidhi gwa ganya momalundu agehe? Iinamwenyo noondhila otadhi si moluulunde waantu yetu, oshoka otaa ti: “Kalunga ke wete shoka tatu longo.”

⁵ Omuwa okwa ti: “Jeremia, ngele owa loloka okuthigathana naantu, oto vulu ngiini okuthigathana nuukambe? Ngele ito vulu okuthikama mokati koshilongo, oto ke shi vula ngiini mongoya yaJordan?

⁶ Nokuli aamwanyoko, yomaandjeni, oye ku gwaaleke; oya pangele ye ku ponokele. Ino ya inekela, nando taa popi oohapu oontalala.”

⁷ Omuwa ota ti: “Onde etha Israel, onda thigi po oshigwana shandje. Onda gandja mboka ndi hole miikaha yaatondi yawo.

⁸ Aahogololwa yandje oya pilukile ndje. Oya fa onime momugulu, otaa vavele ndje, nosho ngaaka onde ya tondo.

⁹ Aahogololwa yandje oya fa ondhila ya kondekwa koombinga noombinga komakodhi. Hiyeni iithitukuti ayihe, yi ye koshituthi!

¹⁰ Aaleli oyendji aakwiilongo oya hanagula po oshitsambe shandje shomiviinu; oya lyatagula po epya lyandje; evi lyandje eholike ye li mbugaleke.

¹¹ Oye li ningi omaputu; oli li po lya mbugala koshipala shandje. Oshilongo ashihe osha mbugala, nokamu na ngoka te shi sile oshimpwiyu.

¹² Aahanaguli oye ya ya taakana omalondo gomombuga. Onda tumu egongamwele okudhipaga oshilongo ashihe; kape na ngoka ta kala e na ombili.

¹³ Aantu yandje oya kunu osiima, ihe oya teya oshinkumbwe; oya longo noonkondo, ihe inaa mona sha. Moluupyundjahi wandje iilya yawo oya theta.”

¹⁴ Omuwa ota ti: “Otandi popi sha kombinga yaashiinda yaIsrael mboka ya teya po oshilongo nde shi pe Aaisraeli. Aawinayi mboka otandi ke ya kutha mo miilonga yawo, ngaashi oshimeno tashi vudhwa mevi notandi mangulula Aajuda miikaha yawo.

¹⁵ Sho nde ya kutha mo, otandi ya sile ohenda. Otandi ka galulila oshigwana kehe kevi lyasho nokoshilongo shasho.

¹⁶ Nando oya longele aantu yandje okugana medhina lyaBaal, otaya ka ninga oshitopolwa shomaantu yandje noye na elago, ngele otaya ilongo omikalo dhaantu yandje notaya gana medhina lyandje taa ti: ‘Oshili, ngaashi Omuwa e na omwenyo.’

¹⁷ Ihe ngele oku na oshigwana itaashi vulika, otandi ke shi dhakula mo thilu noku shi hanagula po. Ongame Omuwa nda popi.”

13

¹ Omuwa okwa lombwele ndje a ti: “Ki ilandele epaya lyoliina, u li zale mombunda yoye, ihe ino li yaya tuu momeya.”

² Onda landa epaya, ngashika Omuwa a ti, nonde li zala mombunda.

³ Oohapu dhOmuwa odha adha ndje ishewe tadhi ti:

⁴ “Kutha epaya ndyoka wa landa nowe li zala mombunda, inda komulonga Eufrat u li holeke molumbogo lwemanya.”

⁵ Onda yi nonde li holeke pomulonga Eufrat, ngaashi Omuwa a lombwele ndje.

⁶ Sho pwa piti omasiku ogendji, Omuwa okwa lombwele ndje a ti: “Inda kuEufrat u ka tale ko epaya ndyoka nde ku lombwelele u ke li holeke ko.”

⁷ Onda shuna ko nonda kutha mo epaya mehala moka nde li holekele. Ihe olya li lya kulupa lyaa na we oshilonga.

⁸ Omuwa okwa lombwele ndje a ti:

⁹ “Ano osho ngeyi tandi shundula einenepeko lyaJuda nuuntsa waJerusalem.

¹⁰ Aantu mbaka aawinayi oya tindi okuvulika kungame. Oya ningi aatangalali notaa simaneke nokulongela iikalunga yaapagani. Onkee ano otaa ka ninga ya fa epaya ndika kaali na we oshilonga.

¹¹ Ngashika epaya lya kwata mombunda, osho ngaaka onda hala okukwatathana nAaisraeli ayehe nAajuda. Onde shi ningi, opo ya kale aantu yandje taa hambelele nokusimaneka edhina lyandje, ihe yo inaa vulika kungame.”

¹² Omuwa okwa lombwele ndje a ti: “Jeremia, lombwela Aaisraeli kutya oshiyuma kehe shomaviinu ohashi udhithwa nomaviinu. Otaa ka yamukula kutya oya tseya kutya iiyuma yomaviinu ohayi udhithwa omaviinu.

¹³ Ya lombwela nduno kutya ongame Omuwa tandi ka nwetha aantu moshilongo shika nomaviinu, sigo ya kolwa: aakwaniilwa, mboka oluvalo lwaDavid, aayambi, aahunganeki nAajerusalem ayehe.

¹⁴ Otandi ke ya nyanyagulithathana, shamukuluntu osho ngaa shamunona. Itandi kankekwa nando kuugelele nenge kesilohenda, opo ndaaye ya dhipage ando.”

¹⁵ Aaisraeli ne, Omuwa okwa popya! Ifupipikeni, mu pulakene.

¹⁶ Simanekeni Omuwa, Kalunga keni, manga inaa tuma omilema, notamu ka telagana noondundu. Otamu tegelele uuyelele, ihe oye te u shitukitha omilema thokothoko.

¹⁷ Ngele itamu pulakene elondodho ndika, uuntsa weni otau lilitha ndje ompompohodhi; ote lili omahodhi omapyu, omahodhi otaga pononoka ashike, aantu yOmuwa sho taa kwatwa po e taa falwa muupongekwa.

¹⁸ Omuwa okwa lombwele ndje a ti: “Lombwela omukwaniilwa nayina, ya kuluke ko kiipangelapundi yawo, oshoka iishani yawo yuulenga oya gu ko komitse dhawo.

¹⁹ Iilando muumbugantu waJuda oya kondekwa nokaku na ngoka ta vulu oku yi egulula. Aajuda ayehe oya kwatwa po noya falwa muupongekwa.”

²⁰ Tala utale, Jerusalem! Aatondi yoye otaye ya taa ziilile kuumbangalantu. Aantu mboka ye ku inekelelwa, oye li peni, aantu yoye mboka ho inomene?

²¹ Oto ka popya shike, uuna aantu mboka wa dhiladhila ookuume koye, taye ku sindi notaye ku pangele? Oto ka adhika koshitheta sha fa shomukulukadhi ta vala.

²² Ngele oto pula kutya omolwashike iinima mbika ye ku ningilwa — omolwashike oonguwo dhoye dha togonyonwa po nowa kondjithwa — osha ningwa omoluulunde woye uunene.

²³ Omuetiopia ota vulu tuu okulundulula oshipa she, nenge ongwe yi ikuthe iitotono yayo? Ngele otashi vulika, nena nangoye wo ngoka ho longo uuwinayi auke, oto vulu okwiilonga uuyuuki.

²⁴ Omuwa ota ka halakanitha aantu yoye ya fa etutu tali pepwa po kombepo yokombuga.

²⁵ Shika oshipewa shoye, oshitopolelwa shoka Omuwa e shi ku uthile, oshoka owe mu dhimbwa nowi inekela iikalunga yiifundja.

²⁶ Omuwa oye mwenemwene ta yelutha onguwo yoye, epenge lyoye li monike.

²⁷ Okwe ku mono to longo shoka ha tondo. Okwe ku mono to yi kiikalunga yaapagani koondundu nokomalundu, wa fa omuntu a lopela mukadhamushiinda she, wa fa okakambe okatsezi ka lamba okanzinzi. Yaye ne Aajerusalem! Onamu yogoka uunake?

14

¹ Oohapu ndhika dhOmuwa dha lombwelwa Jeremia, otadhi popi oluteni:

² “Juda ota lilagana; iilando ye oya shunduka, aantu ye oya mbwata pevi moluhodhi, naJerusalem ta kugu onkugo.

³ Aanamadhina taa tumu aapiya ya ka teke omeya. Otaa yi kiitentemba, ihe itaa mono ko omeya. Otaa galuka niiyuma yi li owala. Oya tyololoka yo ya ngwangwana, otaa holeke iipala yawo.

⁴ Evi olya kalanda, oshoka oshilongo inashi lokwa. Aanamapya naaniimuna oya haluka notaa holeke iipala yawo.

⁵ Oholongo onyali otayi thigi po okanimona kayo molwoluhepo lwomwiidhi.

⁶ Uusinokuti owa lontomana koondungu dhoondundu tau fudhagana wa fa oombandje. Owa tsika oshitanana, oshoka kau na uunapelo.

⁷ Aantu yandje otaa kugile ndje taa ti: ‘Nando uulunde wetu u tu tompe, Omuwa, tu kwatha, ngaashi wa uvaneka. Otwe ku pilamene olwindji; otwa yono kungoye.

⁸ Omuwa, ongoye etegameno lyaIsrael; ongoye omuhupithi gwetu methimbo lyiiponga. Omolwashike wa fa omukwiilongo mevi lyetu, wa fa omweendanandjila ngoka to penduka mo esiku limwe?

⁹ Omolwashike wa fa omuntu a haluka, wa fa omukwiita kee na oonkondo dhokukwatha? Oshili, ongoye Omuwa to kala pamwe natse! Otse aantu yoye; ino tu thiga po nando.’ ”

¹⁰ Aantu mbaka Omuwa ote ya popi ta ti: “Oye hole okunyekuka po pungame notaa nyengwa okwiipangela. Onkee ano inandi ya hokwa. Otandi dhimbulukwa omayono gawo notandi ya geele moluulunde wawo.”

¹¹ Omuwa okwa lombwele ndje a ti: “Ino galikana ndje nando, ndi kwathe aantu mbaka.

¹² Nokuli nando naa idhilike iikulya, itandi ka pulakena onkugo yawo, nonando ya yambele ndje omafikilondjambo noondjambo dhiikulya, itandi ya hokwa nando. Otandi ke ya dhipagela miita, mondjala nomelega.”

¹³ Ngame onda ti: “Omuwa Omupangelinkondoawike, owa tseya aahunganeki mboka taa lombwele aantu kutya itaku kala iita nenge ondjala, oshoka owu uvaneke kutya moshilongo otamu ka kala ombili.”

¹⁴ Omuwa okwa yamukula a ti: “Aahunganeki mboka otaa popi iifundja medhina lyandje; ngame inandi ya tuma, inandi ya lombwela nenge ndi popye nayo. Omamoniko gawo inaga za kungame. Omahunganeko gawo kage na oshilonga, ogo omafafaeko gawo yene.

¹⁵ Ongame Omuwa tandi ku lombwele shoka tandi ka ninga aahunganeki mboka inaandi ya tuma, ihe otaa hunganeke medhina lyandje kutya iita nondjala itayi ke ya mo moshilongo shika — otandi ke ya dhipagela miita nomondjala.

¹⁶ Aantu mboka ye ya lombwele iinima mbika, otaa dhipagwa pahedhi ya faathana. Omidhimba dhawo otadhi ka umbilwa momapandaanda gaJerusalem, noitaku ka kala mboka taye dhi fumvike. Ayehe osho taa ka ningilwa ngaaka — aakiintu yawo, oyana aamati naakadhona. Otandi ke ya futithitha uulunde wawo.”

¹⁷ Omuwa okwa lombwele ndje, ndi hokololele aantu oluhodhi lwandje ndi tye: “Omeho gandje otaga pononoka omahodhi uusiku nomutenya. Itandi etha okulila, oshoka aantu yandje oya tosholwa nayi noya hendagulwa nayi.

¹⁸ Nge te piti mo, ndi ye komalundu, ote tala omidhimba dhaantu ya sile miita. Nge tandi ya miilando, ote tala aantu ya sa kondjala. Aahunganeki naayambi otaa yi koshilongo kaaye shi ko.”

¹⁹ Omuwa, owe ekelahi shilishili Juda? Owa tonda nduno Aasioni? Omolwashike we tu hende nayinayi ngeyi, notatu nyengathana okupangwa? Otwa tegelele ombili, ihe inatu yi mona; otwa tegelele ealudho, ihe uumbanda wowala we ya po.

²⁰ Omuwa, tse otwa yona kungoye, otatu hempulula oondjo dhetu nomayono gootatekulu.

²¹ Molwedhina lyoye ino tu etha. Ino sitha Jerusalem ohoni; osho oshipangelapundi shoye shesimano. Ino teya po ehangano we li hangana natse.

²² Kaku na oshikalunga shaapagani tashi vulu okulokitha omvula; newangandjo lyo lyene ihali lokitha nando oshihomo shimwe. Otwe ku inekela, Omuwa Kalunga ketu, oshoka ongoye awike to longo mbika.

15

¹ Omuwa okwa lombwele ndje a ti: “Nando oMoses naSamuel ya thikame koshipala shandje ya galikanene aantu mbaka, itandi ya sile nando ohenda. Naa ze po, naa ze koshipala shandje.

² Ngele taye ku pula taa ti: ‘Otatu yi peni?’ Ya lombwela etokolo lyandje ndika: mboka yu uthilwa elega, otaa yi ya ka se kelega; mboka yu uthilwa egongamwele, otaa yi ya ka dhipagwe; mboka yu uthilwa ondjala, otaa yi ya ka se kondjala; naamboka yu uthilwa okukwatwa, otaa yi muupongekwa.

³ Ongame, Omuwa, nda tokola ndi ya undulile iiponga yopane: otaa ka dhipagelwa miita; omidhimba dhawo otadhi ka kookololwa koombwa; otadhi ka lika po koondhila; iithitukuti otayi ka mana po shoka sha hupu ko.

⁴ Otandi ya ningi oshinyanyalithi kiilongo ayihe muuyuni omolwiihuna mbyoka Manasse gaHiskia, omukwaniilwa gwaJuda, a longo muJerusalem.”

⁵ Omuwa ota ti: “Aajerusalem ne, olye te ke mu sila ohenda, nolye ngoka te ke mu nikila uuthigwa? Olye ta ka myauka po oku mu pula sho mu li po?

⁶ Ne omwe ekelehi ndje; ne omwa pilamene ndje. Otandi taganeke omaako gandje e tandi mu nyanyagula. Onda vulwa okuloteka ondjahi yandje.

⁷ Moshilando kehe otandi ke mu umbila mombepo mwa fa etutu. Otandi mu hanagula po, ne aantu yandje. Otandi dhipaga aana yeni, oshoka inamu etha oondjila dheni oombwinayi.

⁸ Moshilongo sheni otamu ka kala aaselekadhi oyendji ye vule ehekevi mooha dhefuta. Aalumentu yeni aagundjuka otandi ya dhipagitha po inaa koka, notashi lilitha ooyina omahodhi omapyu. Ohaluka yowala tandi ya gwilike uuwehame nehaluka.

⁹ Omukiintu ngoka a kanitha oyana yaheyali, ota yi oshitelele e ta fudha mo omwenyo gwe. Etango lye olya ningine mokati komutenya; okwa adhika komupya nokwa sithwa ohoni. One mboka tamu hupu ko, otandi mu dhipagitha kaatondi yeni. Ongame, Omuwa, nda popi.”

¹⁰ Yaye ngame, meme sho wa vala ndje, ndi ninge omulumentu gwomaludhi nogwondumbo moshilongo ashihe! Inandi lila omuntu ongunga nenge ndi lilwe ongunga komuntu, ihe ayehe otaa tuku ndje.

¹¹ Omuwa okwa ti: “Oshili, otandi ku mangulula molwelalakano ewanawa; oshili, aatondi yoye otandi ye ku galikanitha mesiku lyoshiponga nomesiku lyuudhigu.

¹² (Oku na tuu omuntu ta vulu okuteya osheela, unene osheela sha yaminwa mumwe nuutale woshikushu shokuumbangalantu?)”

¹³ Omuwa okwa lombwele ndje a ti: “Otandi ka tuma aatondi ya kuthe po uuyamba nomaliko gaantu yandje, opo ndi ya geelele uulunde mboka ya longo moshilongo ashihe.

¹⁴ Otandi ke ya longithitha ya longele aatondi yawo moshilongo inaaye shi tseya shito, oshoka ondjahi yandje oya fa omulilo, notayi kala ya hwama sigo aluhe.”

¹⁵ Onda popi nda ti: “Omuwa, ou uvite ko. Dhimbulukwa ndje, u kwathe ndje. Galulila aatidhagani yandje uuwinayi. Ino ya idhidhimikila, sigo ya dhipaga ndje. Dhimbulukwa kutya ngame onda shekwa omolwoye.

¹⁶ Owa lombwele ndje, nonda pulakene ohapu kehe. Ngame ogwoye, Omuwa Omunankondoawike, nomolwashoka oohapu dhoye dhu udhitha omwenyo gwandje enyanyu nelago.

¹⁷ Inandi hepitha ethimbo lyandje paantu yalwe, mokuyola nomokunyanyukwa. Onda vulika komalombwelo goye, ondi ikalele nonda li mondjahi.

¹⁸ “Omolwashike tandi hepekwa? Omolwashike iilalo yandje ya nyengathana okwaaludhwa? Oshike itaayi aluka? Owa hala okufundjaleka ndje ngaashi omulonga tagu pwine mothinge?”

¹⁹ Omuwa okwa yamukula ta ti: “Ngele to itedhulula, otandi ku galula, noto ka ninga ishewe omupiya gwandje. Peha lyokupopya iinima yowala ngele to uvitha elaka lyomungunda, oto ka ninga ishewe omuhunganeki. Oshigwana otashi ya kungoye, noito pumbwa okuya kusho.

²⁰ Otandi ku ningi ekuma lyoshikushu okukondjitha oshigwana shika. Otashi ke ku kondjitha, ihe itashi ku sindi, oshoka otandi kala pamwe nangoye. Otandi ku gamene notandi ku hupitha.

²¹ Otandi ku yugulula miikaha yaakolokoshi noyaananyanya. Ongame, Omuwa, nda popi.”

16

¹ Omuwa okwa lombwele ndje ishewe a ti:

² “Ino hokana, u kale u na aanona mehala ndika.

³ Otandi ke ku lombwela shoka tashi ka ningilwa aanona mboka taa valelwa mpaka, naakuluntu yawo.

⁴ Otaa ka sa komikithi omidhigu, nokaku na ngoka te ya lili nenge te ya fumvike. Omidhimba dhawo otadhi ka lala dha fa oondumba dhuuhoho mepya. Otaa ka dhipagelwa miita, nenge taa ka sa po kondjala, nomidhimba dhawo otadhi ka ninga oondya dhoondhila nodhiithitukuti.

⁵ “Ino ya megumbo tamu lilwa oosa. Ino sila nando olye oluhodhi. Itandi ka yambeka we oshigwana shika, nenge ndi shi hololele ohole nohenda.

⁶ Ayehe, aayamba naathigona, oye na okusa moshilongo shika, ihe kaku na ngoka te ya lili oosa nenge e ya fumvike. Kaku na ngoka ti ishata oonsha nenge a kulule omutse gwe, e ya lile.

⁷ Kape na oshikwiila tashi pewa aalilasa mokuhupulutha oonakusilwa, kape na oshinuwa shehupulutho tashi pewa ngoka a silwa he nenge yina.

⁸ “Ino ya megumbo mu na onshingo. Ino kuutumba pamwe naamboka taa li e taa nu.

⁹ Pulakena shoka ngame, Omuwa Omunankondoawike, Kalunga kaIsrael, tandi ti: ‘Otandi ka mweneka ekugililo lyenyanyu nondigolo nomatanto goshituthi shohango.’ Aantu yaampaka otaye ke shi mona tashi ningwa.

¹⁰ “Nge to ya hokololele ayihe mbika, otaye ke ku pula taa ti: ‘Omolwashike Omuwa a tokola e tu geele nonyanya? Ondjo yetu oyini, notwa yono ngiini kOmuwa Kalunga ketu?’

¹¹ Ya lombwela kutya Omuwa okwa ti: ‘Oohokulu oya pilamene ndje noya longele nokusimaneka iikalunga, oye etha ndje noinaa vulika komautho gandje.

¹² Ihe ne omwa ningi nayilela mu vule oohokulu. Ne amuhe aatangalali naakolokoshi noinamu vulika kungame.

¹³ Omolwashoka otandi ke mu tidha mo moshilongo shika noku mu fala koshilongo inaashi tseyika nokoohokulu. Oko tamu ka longela iikalunga uusiku nomutenya, noitandi mu sile nando ohenda.’ ”

¹⁴ Omuwa ota ti: “Ethimbo otali ya, uuna aantu itaa ka gana we medhina lyOmuwa omunamwenyo ngoka e ya tembudha mo muEgipiti,

¹⁵ ihe otaa gana medhina lyOmuwa omunamwenyo ngoka e ya tembudha mo moshilongo shokuumbangalantu nomiilongo ayihe moka nde ya halakanithile mo. Otandi ke ya kongolola ko ndi ya ete koshilongo shawo yene, kevi ndyoka nde li pe oohekulu. Ongame, Omuwa, nda popi.”

¹⁶ Omuwa ota ti: “Otandi tumu aayuli yoohi oyendji, ye ye ya kwate po aantu yandje. Opo ihe otandi ka tuma aakongo oyendji, ye ye ye ya yewe koondundu adhihe nokiikulundundu nomomakolombongo goondundu.

¹⁷ Ondi wete ashihe taye shi ningi. Kape na shoka sha holekwa ndje; uulunde wawo itau kana mo momeho gandje.

¹⁸ Otandi ndambula ofuto yawo okufutila uukolokoshi nuulunde wawo, oshoka oya nyateke evi lyandje niimenka yawo iinyanyalithi, mbyoka yaa na omwenyo, noye li udhitha niiyelekela yawo yiifundja.”

¹⁹ Omuwa, ongoye awike to gamene ndje noto koleke ndje; oto kwatha ndje momathimbo guudhigu. Iigwana otayi ke ya kungoye tayi zi kooha dhuuyuni e tayi ti: “Ootatekulu oyi iningi oshege, oya kala niimenka yowala yaa na ekwatho lyasha.

²⁰ Omuntu ota vulu tuu okwiihambulila ookalunga? Aawe, ngele ote shi ningi, kaye shi ookalunga.”

²¹ Omuwa ota ti: “Osho ano tandi tseyithile iigwana ayihe oonkondo dhandje nomatha gandje: Otayi ka tseya kutya ongame Omuwa.”

17

¹ Omuwa ota ti: “Aajuda ne, uulunde weni owa nyolwa nopena yosheela, owa takelwa moomwenyo dheni nondungu yondiamande nowa negelwa kookolonela dhiiyambelo yeni.

² Aantu yeni ohaa saagele piiyambelo nopoongundhi dha dhikilwa oshikalungakiintu Asheera momuzile gwomuti kehe omutalala, koondungu dhoondundu,

³ nokoondundu dhomolushandja. Otandi ka sikumudha aatondi yeni ya yuge po uuyamba weni nomaliko geni moluulunde auhe mboka mwa longo mevi lyeni alihe.

⁴ Ne omu na okweetha evi nde li mu pe, otandi ke mu longithitha mu longele aatondi yeni mevi inaamu li tseya nale, oshoka ondjahi yandje oya fa omulilo, notayi kala ya hwama aluhe.”

⁵ Omuwa ota ti: “Otandi pangula omuntu ngoka ta pilamene ndje noti inekele omuntu, oonkondo dhomuntu gwowala

⁶ Okwa fa oshihwa mombuga tashi koko montale ya kukuta mevi lyoshimongwa, moka ihaamu koko sha shilwe. Ita ningilwa uuwanawa washa.

⁷ “Ihe ote yambeke omuntu ngoka i inekela ndje.

⁸ Okwa fa omuti tagu kokele pomatondokelo gomeya tagu taandelekele omidhi momeya. Itagu tila, nando ombepo ompyu tayi pepe, oshoka omafo gagwo oga ziza. Kagu na mbudhi, nando omvula yaa ko, otagu imi aluhe iiyimati.

⁹ “Omwenyo ogwo omunamakoto kombanda yiinima ayihe, nokagu shi kwaaludhwa. Olye ta vulu oku gu uva ko?

¹⁰ Ongame, Omuwa, tandi konakona omatedho notandi yeleke oomwenyo dhaantu. Shaa ngoka otandi mu ningi pakukala kwe, otandi mu futu pailonga ye.”

¹¹ Ngashika onkanga tayi tendula omayi inaayi ga vala, osho wo omuntu ngoka ta likola uuyamba nomakoto. Omasiku ge nge ga ti metifa, ote u thigi po, nopehulilo ota ningi egoya.

¹² Otempeli yetu oya fa oshipangelapundi sha simana; oya thikama kondundu ondeendeka okuza ketameko.

¹³ Omuwa, ongoye etegameno lyaIsrael, ayehe mboka taye ku etha, otaa si ohoni. Otaa dhimi po ya fa omadhina ga nyolelwa montsi, oshoka oyo ye ku etha, Omuwa, omuthima gwomeya omanamwenyo.

¹⁴ Panga ndje, Omuwa, ongame notandi aluka; hupitha ndje, note kala ndaa na ombudhi. Ongoye awike tandi hambelele!

¹⁵ Aantu otaa lombwele ndje taa ti: “Oohapu dhOmuwa odhi li peni? Nadhi kale dha tsa nduno!”

¹⁶ Ihe, Omuwa, inandi ku ulumika nando, u ya undulile omupya; inandi ya halela ethimbo lyomalwa. Omuwa, owe shi tseya; ou shi shoka nda ti.

¹⁷ Ino halutha ndje; ongoye eholameno lyandje, uudhigu nge tau ya.

¹⁸ Sitha aatidhagani yandje ohoni, ihe gamena ndje. Ya halutha noonkondo, ihe ino tilitha ndje. Ya undulila omupya, u ya ndimbule iintimbu.

¹⁹ Omuwa okwa lombwele ndje a ti: “Jeremia, inda u ka uvithe oohapu dhandje pOsheelo shaantu, mpoka hapu pitile aakwaniilwa yaJuda, nge taa yi nenge taa piti moshilando; inda ihe komiyelo adhihe dhilwe dhaJerusalem.

²⁰ Lombwela aakwaniilwa nAajuda ayehe noshaa ngoka a kala muJerusalem ha pitile miiyelo mbika, a pulakene shoka tandi popi.

²¹ Ya lombwela kutya ngele oye hole oomwenyo dhawo, inaa humbata nando omutenge gwasha mEsabati; kaye na okuhumbata sha taa pitile miiyelo yaJerusalem,

²² nenge ya humbate sha ye shi kutha momagumbo gawo mEsabati. Inaa longa sha mEsabati. Naye li dhiginine esiku eyapuki, ngaashi nda lombwele oohekulu.

²³ Oohekulu inaa pulakena ndje nenge ya pupe ndje. Oya tangalala; inaa vulika kungame nenge yi ilonge ndje.

²⁴ “Lombwela aantu mbaka kutya oye na okuvulika kiipango yandje ayihe. Inaa humbata nando omutenge taa pitile miiyelo yoshilando mEsabati. Oye na okudhiginina Esabati, li ninge esiku eyapuki, nokaye na okulonga sha.

²⁵ Nena aakwaniilwa nomalenga otaga ka pitila momiyelo dhaJerusalem notaga kala ge na uukwaniilwa mboka David a li e u na. Aajuda pamwe nAajerusalem otaa ka londa komatembakwiita nokuukambe, noshilando Jerusalem otashi ka udha aantu.

²⁶ Aantu otaa ka za kiilando yaJuda nokomikunda dha kunduka Jerusalem; otaa ke ya taa zi koshikandjo shaBenjamin nokiikulundundu yoponyonga yoondundu, koondundu nokuumbugantu waJuda. Otaa ka eta kotempeli yandje omafikilondjambo, oontselelandjambo, oondjambo dhiikulya nodhiitsinino nosho wo omahambelelondjambo.

²⁷ Ihe oye na okuvulika kungame nokudhiginina Esabati, esiku eyapuki. Inaa humbata nando omutenge gwasha taa pitile miiyelo yaJerusalem esiku ndyoka, oshoka ngele taye shi ningi, otandi ka tomeka iiyelo yaJerusalem omulilo. Omulilo otagu ka hwama moombala dhaJerusalem, nokaku na ngoka ta vulu oku gu dhima.”

18

¹ Omuwa okwa lombwele ndje a ti:

² “Kulukila monzimbogo yomuhongi gwiiyuma, omo tandi ku lombwelele oohapu.”

³ Onda yi mo nonda adha omuhongi gwiiyuma ta longele poshidhingolokitaafula she.

⁴ Oshihongwa ngele osha yonuka, ngaashi hashi ningwa olwindji, okwe shi mbumbinga nokwa hongo oshiyuma shilwe shi ili.

⁵ Omuwa okwa lombwele ndje a ti:

⁶ “Kandi na uuthemba okuninga aantu yandje Aaisraeli, ngaashi omuhongi gwiiyuma ta ningi neloya? Omu li miikaha yandje ngashika eloya li li miikaha yomuhongi gwiiyuma.

⁷ Ngele nda ti, otii ka tudha mo oshigwana nenge oshilongo, ndi shi teyagule noku shi hanagula po,

⁸ ihe oshigwana shoka ngele oshi itedhulula she etha uuwinayi washo, itandi ka ninga we, ngaashi nda tile.

⁹ Kombinga onkwawo ngele tandi ti, otandi ka tsika nenge ndi tunge po oshigwana nenge oshilongo,

¹⁰ ihe oshigwana shoka itashi vulika kungame e tashi kolokosha, itii ka ninga shoka nda tile.

¹¹ Onkee ano lombwela Aajuda nAajerusalem kutya otandi ya dhiladhilile omageelo. Ya lombwela, ya tule po uulunde wawo — ya ethe oondjila dhawo oombwinayi nokwoopaleka iikala niilonga yawo.

¹² Otaa ka yamukula taa ti: ‘Aawe, omolwashike tu na oku shi ninga? Otatu kala twa tangalala notatu ningi naanaa ngaashi twa hala, kehe ngoka meikukutiko lyomwenyo gwe.’ ”

¹³ Omuwa ota ti: “Ka puleni utale koshigwana kehe, ngele oshinima sha tya ngaaka osha ningilwe nale. Aaisraeli oya hunu!

¹⁴ Oondundu dhaLibanon otadhi kala tuu dhaa na olumi? Omalunza gomeya koondungu dhadho otaga pwine po tuu, uupompolonga waahwiyaka waa pompolokithe omeya omatalala?

¹⁵ Ihe aantu yandje oya dhimbwa ndje; otaa fikile iimenka iitsinino. Oya puka mo mondjila ndjoka ya li ye na okweenda nayo, itaa landula we ondjila yandje; otaa ende nomapola inaaga palwa.

¹⁶ Oya ningi evi lyawo eha lyehalutho, li dhinike sigo aluhe. Ayehe mboka taa piti po, otaa pukapuka komitse; otaa haluka ya kumwa.

¹⁷ Aantu yandje otandi ya halakanithile komeho gaatondi yawo, ya fa ontsi tayi pepwa po kombepo yokuuzilo. Otandi ya pilamene; itandi ya kwatha mesiku lyuudhigu wawo.”

¹⁸ Aantu oya ti: “Jeremia natu mu ninge sha! Oshoka aayambi ohaye tu longo aluhe ompango, aanandunge ohaye tu tsu omayele, naahunganeki ohaa uvitha oohapu dhaKalunga. Natu mu nukileni nomalaka getu, tse twaa pulakene we shoka ta popi.”

¹⁹ Onda galikana nda ti: “Omuwa, uva shoka tandi ti nou pulakene shoka aatondi yandje taa popi ndje.

²⁰ Uuwinayi otau ningi tuu ondjambi yuuwanawa? Oya fulile ndje ekelo, ndi gwile mo. Dhimbulukwa, nkene nde ya kungoye notandi ya popile, opo waaye ya geele.

²¹ Ihe ngashingeyi, Omuwa oyana naa se kondjala; ya dhipagela miita. Aakiiintu yawo naa ninge aaselekadhi yaa na oluvalo; aalumentu naa se po kelega, aalumentu aagundjuka naa sile miita.

²² Tuma ongundu yaayugi yi hanagule po omagumbo gawo pwaa na elondodho; ya halutha, ya lilagane muumbanda. Oya fulile ndje ekelo, ndi gwile mo, noya lukilile ndje omwigo gu yule ndje.

²³ Ihe, Omuwa, oto tseya iipotha yawo yokudhipaga ndje. Ino ya kuthila po uuwinayi wawo nenge u dhime po uulunde mboka ye u ningi. Ya hata pevi, ngoye u ya tamaneke esiku lyondjahi yoye.”

19

¹ Omuwa okwa lombwele ndje, ndi ka lande oshuma sheloya nondi kuthe aakuluntu yamwe yoshigwana noyomaayambi,

² tu ye kesilu Ben Hinnom nokupitila mOmweelo gwiikangwa, opo ndi uvithile ko oohapu te dhi pe ndje.

³ Omuwa okwa lombwele ndje, ndi tye: “Aakwaniilwa yaJuda nAajerusalem, pulakeneni shoka ngame, Omuwa Omunankondoawike, Kalunga kaIsrael, tandi ti. Otandi ka eta oshiponga mehala ndika, noshaa ngoka te shi kundana, ota ka kunkwa.

⁴ Otandi ka ninga ngaaka, oshoka aantu oye etha ndje e taa nyateke ehala ndika nokuyamba omafikilondjambo kiikalunga yaapagani — iikalunga tuu mbyoka yo yene nenge oohekulu nenge aakwaniilwa yaJuda inaye yi tseya. Ehala ndika oye li udhitha ombinzi yaakaanandjo.

⁵ Noya tungu iiyambelo yaBaal, opo ya lungunithile ko oyana ya ninge omafikilondjambo. Inandi ya lombwela nando, ye shi ninge; inashi ya mo nando okuli momadhiladhilo gandje.

⁶ Onkee ano ethimbo otali ya, uuna ehala ndika itaali ka ithanwa we Tofet nenge esilu Ben Hinnom. Otali ka tseyika Esilu lyonakupila.

⁷ Mehala tuu ndika otandi ka keelela oondunge adhihe dhAajuda nAajerusalem. Otandi ke ya sinditha kaatondi yawo, notaye ya dhipagele molugodhi. Omidhimba dhawo otadhi ka ninga oondya dhoondhila nodhiithitukuti.

⁸ Oshilando shika otandi ke shi ninga eha lyehalutho, li dhinike aluhe. Ayehe mboka taa piti po, otaa haluka ya kumwa.

⁹ Aatondi otaa ka kondeka oshilando notaa dhipaga aantu yasho. Ekondeka otali ka ninga elulululu, sigo aantu moshilando taa lyaathana po notaa li po wo uunona wawo.”

¹⁰ Omuwa okwa lombwele ndje, ndi tatule oshiyuma montaneho yaantu mboka nda yi nayo

¹¹ noku ya lombwela kutya Omuwa Omunankondoawike okwa ti: “Otandi tatula aantu mbaka noshilando shika, notashi ka fa oshiyuma shika sheloya sha tatuka, itashi vulu we okutulwa kumwe. Aantu otaa ka fumvika aasi yawo muTofet, oshoka itaku ka kala we ehala lyokufumvika palwe.

¹² Otandi uvaneke kutya oshilando shika naantu yasho otandi shi ningi sha fa Tofet.

¹³ Omagumbo gaJerusalem nomagumbo gaakwaniilwa yaJuda otaga ka kala ge na oshidhila ngaashi Tofet — omagumbo agehe ngoka kombanda yoondunda kwa fikililwa oonyothi iitsinino nokwa tililwa iikalunga yilwe oondjambo dhomaviinu.”

¹⁴ Opo ihe onda zi muTofet, moka Omuwa a tumine ndje, ndi ka uvithe oohapu dhe. Onda yi nonda ka thikama mehale lyotempeli nonda lombwele aantu ayehe

¹⁵ kutya Omuwa Omunankondoawike, Kalunga kaIsrael, okwa ti: “Otandi undulile oshilando shika niilando ayihe yi li popepi nasho, egeelo lyandje, oshoka one aatangalali noitamu pulakene shoka te ti.”

20

¹ Omuyambi Pashhur yaImmer, ngoka a li omutonateli omukuluntu gwotempeli, sho u uvu tandi uvitha iinima mbika,

² okwa ti, nandi dhengwe nokutulwa moonkandja posheelo shopombanda shaBenjamin motempeli.

³ Ongula sho kwa shi, Pashhur okwa mangululitha ndje nonde mu lombwele nda ti: “Omuwa ite ku luku we Pashhur, ote ku ithana Magor Missabib.

⁴ Omuwa mwene okwa ti: ‘Otandi ku ningi oshihaluthi kungoye mwene nokookuume koye, noto ke ya tala ayehe taa dhipagwa negongamwele lyaatondi. Aajuda ayehe otandi ya gandja miikaha yomukwaniilwa gwaBabilon; ota ka fala yamwe po aapongekwa koshilongo she nayamwe ote ya dhipaga po.

⁵ Otandi ka etha aatondi ya yuge po uuyamba auhe woshilando shika nokukwata iilikolwa nolutumbo aluhe lwasho, nokuli nomaliko gaakwaniilwa yaJuda, e taye ga fala kuBabilon.

⁶ Nangoye Pashhur naanegumbo yoye ayehe otamu ka kwatwa po notamu ka falwa kuBabilon. Oko to ka sila e to fumvikwa pamwe nookuume koye ayehe, oyo tuu mboka wa lombwele iifundja oyindjiyindji.’ ”

⁷ Omuwa, ongoye wa kotokele ndje, nonda kotokelwa. Ongoye omunankondo u vule ndje, owa gwililile ndje po. Shaa ngoka ota ningi ndje oshipwedhela, otaa nyonkele ndje omutenya aguhe.

⁸ Nge tandi popi, ondi na okwiigidha tandi kololoka te ti: “Eyugo! Ehanagulo!” Omuwa, otandi yolwa nonda nyemwa, uuna tandi uvitha oohapu dhoye.

⁹ Ihe nge te ti: “Otandi dhimbwa, ite popi we medhina lye,” nena etumwalaka lyoye olya fa omulilo gwa hwama meni lyandje. Onde gu idhidhimikile, ihe ine vula okumwena.

¹⁰ Ondu uvite, ayehe taa nongona taa ti: “Omahalutho akuhe! Natu ke mu popyeni kaambala!” Nookuume kandje oya langela ndje taa ti: “Pamwe tatu mu tula muugoya, nena otatu mu kwata e tatu polithile ondjahi yetu muye.”

¹¹ Ihe, Omuwa, ongoye u li pamwe nangame, omunankondo nomunamatha; aatidhagani yandje otaa ka punduka yo itaa vulu sha. Otaa ka sithwa ohoni sigo aluhe, oshoka itaa ka tompola sha. Ohoni yawo itayi ka dhimbiwa.

¹² Ihe, Omuwa Omunankondoawike, oto yeleke aayuuki; owa tseya shoka shi li momitima nomomatedho gawo. Pitika ndje ndi tale, sho to geele aatondi yandje, oshoka ondi ikalitha miikaha yoye.

¹³ Imbileni Omuwa! Hambeleleni Omuwa! Oye ha yululula omuhepekwa miikaha yaakolokoshi.

¹⁴ Esiku nda valwa nali thingwe! Esiku ndyoka meme a vala ndje inali yambekwa!

¹⁵ Ethingano nali adhe omuntu ngoka a nyanyudha tate pombanda, sho e mu etele onkundana tayi ti: “Okamati! Wa mono omumati!”

¹⁶ Na fe iilando mbyoka Omuwa a hanagula po pwaa na ohenda. Ongula na uve onkugo yuuwehame nonkalu moshanga shomutenya,

¹⁷ oshoka ina dhipagela ndje mela lyameme. Ando oshivalelo shameme sha ningi ombila yandje nela lye ondjugo yandje sigo aluhe!

¹⁸ Omolwashike nda zi mo moshivalelo shameme, ndi mone iihuna nuudhigu mbu nondi hulithile omwenyo gwandje mohoni?

21

¹ Omukwaniilwa Sedekia okwa tumu Pashhur yaMalkija nomuyambi Sefania yaMaaseia kungame ye na eindilo ndika tali ti:

² “Tu kwatha u tu galikanene kOmuwa, oshoka omukwaniilwa gwaBabilonia Nebukadnezzar naakwiita ye oya kondeka oshilando. Ngiika Omuwa te tu monithile oshilongandhindhiliko ngashika nale nota thiminike Nebukadnezzar a ze po.”

³ Omuwa okwa lombwele ndje, nonda lombwele aatumwa

⁴ ya ka lombwele Sedekia kutya Omuwa, Kalunga kaIsrael, okwa ti: “Sedekia, otandi ka dhenga etangakwiita lyoye ndyoka tali kondjitha omukwaniilwa gwaBabilonia naakwiita ye. Omatati gaakwiita yoye otandi ke ga ndumbila ondumba pokati koshilando.

⁵ Otandi ke ku kondjitha noshikaha shoonkondo nokwooko kwa taganana, nondjahi yandje, nongeyo yandje nonuupyundjahi wandje.

⁶ Otandi ka dhipaga ayehe moshilando shika; aantu niinamwenyo otayi si kelega etilithi.

⁷ Ihe ngoye, omalenga goye naantu mboka ya hupu ko kiita, kondjala nokelega, otandi ke mu kwatitha po amuhe komukwaniilwa Nebukadnezzar nokaatondi yeni, mboka ya hala oku mu dhipaga. Nebukadnezzar ote ke mu dhipaga. Ita ka hupitha ko nando ogumwe gwomune nenge e mu sile ohenda nenge e mu etele olukeno. Ongame, Omuwa, nda popi.”

⁸ Omuwa okwa lombwele ndje, ndi lombwele aantu ndi tye: “Pulakeneni! Ongame, Omuwa, otandi mu pe ehogololo, mu hogolole ondjila ndjoka tayi fala komwenyo nenge ndjoka tayi fala meso.

⁹ Shaa ngoka ta kala moshilando shika, ota ka dhipagelwa miita nenge ta ka sa kondjala nenge kelega. Ihe ngoka ta piti mo noti igandja kAababilonia, aakondeki yoshilando, ota ka hupa e ta kala e na omwenyo.

¹⁰ Onda tokola ndaa hupithe oshilando shika, ihe ndi shi hanagule po. Otashi ka gandjwa miikaha yomukwaniilwa gwaBabilon, oye note shi fike po, shi lungune po. Ongame, Omuwa, nda popi.”

¹¹ Omuwa okwa lombwele ndje, ndi gandje elaka ndika kombala yaJuda, oluvalo lwaDavid, tali ti: “Pulakeneni shoka ngame, Omuwa, tandi ti. Tokoleni pauyuuki esiku kehe. Hupitheni omuyugwa miikaha yomuyugi. Ngele itamu shi ningi, uuwinayi mboka tamu ningi, otau ka hwameka ondjahi yandje ya fa omulilo itaagu dhimwa.

¹²

¹³ Ngoye, Jerusalem, owa kuutumba puule pombanda yomasilu, wa fa ondundu ya yeluka kombanda yolushandja. Otandi ke ku kondjitha. Oto ti kaku na ngoka te ku ponokele nenge a teyagule omapopilo goye.

¹⁴ Otandi ku geelele shoka wa ningi. Ombala yoye otandi ke yi tomeka omulilo, nomulilo otagu ka lungunitha po ashihe shoka she yi kunduka. Ongame, Omuwa, nda popi.”

22

¹ Omuwa okwa lombwele ndje, ndi ye kuuwa womukwaniilwa gwaJuda, oluvalo lwaDavid, ndi ka lombwele omukwaniilwa, omalenga ge nAajerusalem, ya pulakene shoka Omuwa a popi ta ti:

²

³ “Ongame, Omuwa, tandi mu lombwele mu longe shoka oshiwanawa noshu uka. Hupitheni omuyugwa miikaha yomuyugi. Inamu ngwandjagula nenge mu hepeke aakwiilongo, oothigwa nenge aaselekadhi, ne inamu dhipagela aantu yaa na ondjo mehala ndika eyapuki.

⁴ Ngele otamu ningi shili, ngaashi nde mu lombwele, nena oluvalo lwaDavid otalu ka tsikila okukala muukwaniilwa. Noyo ayehe kumwe nomalenga gawo naantu yawo otaa tsikile okupitila miiyelo yuuwa ye li momatembakwiita noya kayila uukambe.

⁵ Ihe ngele itamu vulika komalombwelo gandje, nena otandi mu ganene kutya uuwa mbuka otau ka teka po. Ongame, Omuwa, nda popi.

⁶ “Sho te tala uuwa waJuda, owo opalela ndje wa fa oshilongo Gilead nowa fa oondundu dhaLibanon; ihe otandi u ningi ehala lyaa na aantu.

⁷ Otandi tumu aantu ye u hanagule po. Ayehe otaye etelele omakuya gawo, otaa keke po omiti omisendeli notaye dhi umbile meziko.

⁸ “Aantu yomiigwana oyindji otaa ka pitilila po poshilando shika notaa pulathana taa ti: ‘Omolwashike Omuwa a ningile ngeyi oshilando shika oshinene?’

⁹ Eyamukulo otali ka kala: ‘Oshoka oye etha ehangano lyOmuwa, Kalunga kawo, e taa simaneke nokulongela ookalunga yalwe.’ ”

¹⁰ Aajuda ne, inamu lila omusi Josia; inamu sila oluhodhi ngoka a ka lala nale. Ihe lileni omwanamati Joahas; otaye ke mu fala ko, noita galuka ko we, nevi a valelwa mo, ite ke li mona we.

¹¹ Omuwa ota popi Joahas yaJosia, ngoka a landula he muukwaniilwa waJuda ta ti: “Okwa yi a yililila, ita galuka we.

¹² Ota ka sila moshilongo shoka a falwa, noita ka mona we oshilongo shika.”

¹³ Yaye ngoka ta tungitha uuwa we uukolokoshi, nomafilitsa ge uugoyoki. Ota longitha omukwawo osima noita gandja ondjambi yaaniilonga ye.

¹⁴ Yaye ngoka ta popi ta ti: “Otandi ki itungila ongulumbala yi na efilitsa lyomala ga andjuka.” Ota tungile mo omakende, ote yi ambeke nomisendeli e te yi painda nuutiligane.

¹⁵ Ou shi, otashi ku ningi omukwaniilwa wa za ko, nge wa tungu uuwa womisendeli, egumbo ewanawa li vule galwe? Ho okwa li inaa hepa iikulya niikunuwa, ihe okwa longo shoka shu uka nosho opala, naayihe oye ende nawa.

¹⁶ Okwa popile oohepele naakweyi moontamanana; naayihe oye ende nawa. Shika otashi ti okutseya Omuwa.

¹⁷ Ihe ngoye oho lalakanene okutaneka owala eliko lyoye mwene, okutilahi ombinzi yaakaanandjo nokuthindila nonyanya aantu yoye pevi. Omuwa oye a popi.

¹⁸ Onkee ano Omuwa ta popi Jehoiakim yaJosia, omukwaniilwa gwaJuda, ta ti: “Kaku na ngoka ta ka lila oosa dhe ta ti: ‘Akutu, tatekulu, akwetse, mentu gwameme!’ Kaku na ngoka te ke mu lila nenge a popye a tye: ‘Akutu shime, akwetse Nkeyama!’

¹⁹ Ota ka fumvikwa a fa okasino taka kookololwa po e taka dhogelwa handiyaka yiiyelo yaJerusalem.”

²⁰ YAjerusalem, londeni kuLibanon mu kugagane, indeni koshilongo Baasha mu igidhe; kololokeni koondundu dhaMoab, oshoka ookuume keni ayehe oya dhengwa.

²¹ Omuwa okwe mu lombwele nale, manga mu li meloolo, ihe ne omwa tindi okupulakena. Shika osho hamu ningi aluhe mokukala kweni; ne ihamu vulika kOmuwa.

²² Aawiliki yeni otaa ka pepwa po kombepo, ookuume keni otaa ka kwatwa po miita, oshilando sheni otashi shundulwa nokusa ohoni, omoluuwinayi mboka mwa ningi.

²³ Owa kala megumbo lyomisendeli dhaLibanon, lya fa oshihandhila shokuvululukilwa mo. Oto ka fudhagana ngiini, uuna uuwehame tau ku kalukile, nuudhigu wa fa womukulukadhi ta thetwa.

²⁴ Omuwa okwa lombwele omukwaniilwa gwaJuda Jehoiakin yaJehoiakim ta ti: “Oshili, ngaashi ndi na omwenyo, nando u kale okalinga koshihako koshikaha shandje shokolulyo, otandi ku hukula ko.

²⁵ Otandi ku gandja kaantu mboka we ya tila, oomboka ya hala oku ku dhipaga. Otandi ke ku gandja miikaha yaNebukadnezzar, omukwaniilwa gwaBabilon, noyaakwiita ye.

²⁶ Otandi ke mu umbila ne nanyoko muupongekwa koshilongo hoka inaamu valelwa ko, noko tamu ka sila amuhe.

²⁷ Oshilongo shika shondjuulukwe yeni itamu shi mono we, itamu galukile we kusho.”

²⁸ Omulumentu nguka Jehoiakin okwa ningi nani a dhinika, a fa oshiyuma sha tatuka noshe ekelwahi, inaashi halika we? Omolwashike a dhogwa pamwe noyana, u umbilwa moshilongo kee shi shi?

²⁹ Evi, evi, evi! Pulakena oohapu dhOmuwa!

³⁰ Omuwa ota popi ta ti: “Ndhindhilikeni omulumentu nguka a fa kee na oluvalo, omuntu kee na elago mokukala kwe akuhe. Kaku na nando ogumwe gwomoyana ta kala e na elago lyokukuutumba koshipangelapundi shaDavid ye a pangele we muJuda.”

23

¹ “Akwetse aasita mboka taa yonagula nokuhalakanitha oonzi dhuusita wandje,” Omuwa osho ta ti.

² Onkee ano Omuwa, Kalunga kaIsrael, ota popi ta lombwele aasita mboka taa litha aantu ye ta ti: “Inamu sila nawa aantu yandje oshimpwiyu; omwe ya halakanitha nomwe ya tidha po. Ngashingeyi otandi ke mu geelela uuwinayi mboka mwe u ningi.

³ Otandi ka gongela oshihupe shaantu yandje miilongo moka nde ya halakanithile mo notandi ya eta kevi lyawo. Otaa ka kala ye na aanona oyendji notayi indjipala.

⁴ Otandi ka langeka aaleli ye ya sile oshimpwiyu. Aantu yandje itaa ka tila we nenge ya haluke, noitandi ke ya geela we. Ongame, Omuwa, nda popi.”

⁵ Omuwa ota ti: “Esiku otali ya, uuna tandi ka hogolola omukwaniilwa omuyuuki gwomoluvalo lwaDavid. Omukwaniilwa ngoka ota ka lela nowino nota longo shoka shu uka nosho opala mevi alihe.

⁶ Uuna ta ningi omukwaniilwa, Aajuda otaa ka kala yaa na ombudhi yasha, nAaisraeli otaa ka kala ye na ombili. Ota ka lukwa ‘Omuwa ehupitho lyetu.’ ”

⁷ Omuwa ota ti: “Esiku otali ya, uuna aantu itaa ka gana we medhina lyOmuwa omunamwenyo ngoka a tembudha mo Aaisraeli muEgipiti,

⁸ ihe otaa gana medhina lyOmuwa omunamwenyo ngoka e ya tembudha mo moshilongo shokuumbangalantu nomiilongo ayihe moka nde ya halakanithile mo. Nena otaa ka kala mevi lyawo yene.”

⁹ Omutima gwandje ogwa nyanyagulwa, nonda kwatwa kuugolwe. OmolwOmuwa noohapu dhe oondjapuki onda fa omuntu a kolwa, omulumentu a dhenga omeya.

¹⁰ Evi olyu udha mboka yi iteka Omuwa; otaa uka muuwinayi notaa longitha oonkondo dhawo pombambo. Molwethingano lyOmuwa oshilongo otashi lili, nomaunapelo oga kukuta.

¹¹ Omuwa ota ti: “Aahunganeki naayambi oyo aakaanakalunga; onde ya adhelele taa yonene motempeli yandje.

¹² Ondjila yawo otayi ka ninga omuthenu yo yi na omilema. Otandi ke ya tengukitha, ya gwile po. Otandi ke ya umbila omupya; ethimbo lyegeelo lyawo olya thikana. Ongame, Omuwa, nda popi.

¹³ Onda mono oshiyematitha maahunganeki yomuSamaria: oya hunganeke medhina lyaBaal noya pukitha aantu yandje.

¹⁴ Ihe maahunganeki yomuJerusalem onda mono mo iihuna: otaa hondele yo taa fundju; otaa koleke mboka taa kolokosha, onkee ano kaku na nando ogumwe te etha uuwinayi. Kungame oyo ayehe aawinayi, oya fa Aasodomu nAagomorra.

¹⁵ “Onkee ano ngame, Omuwa Omunankondoawike, otandi popi aahunganeki Aajerusalem te ti: otandi ke ya litha oshigwanga oshilulu noku ya nwetha omeya guuzigo, oshoka oya taandelitha uukwaanakalunga noshilongo ashihe.”

¹⁶ Omuwa Omunankondoawike ota lombwele Aajerusalem ta ti: “Inamu pulakena shoka aahunganeki mboka taa ti! Otaye mu tula muugoya, otaye mu lombwele omafafaeko gawo yene, hangaashi nde ya lombwela.

¹⁷ Otaa dhiginine okulombwela aantu mboka haa dhini ndje kutya Omuwa ota ti: ‘Otamu kala nombili.’ Nokumboka ya tangalala koomwenyo dhawo, otaa ti: ‘Itamu adhika nando okoshiponga shasha.’ ”

¹⁸ Olye gwomuyo a kundathana nOmuwa, a pulakene nokuuva elaka lye? Olye a dhimbulula nokupupa ko koohapu dhe?

¹⁹ Ondjahi ye oyo oshikungulu, ombepo yepukutula tayi ka tukulukila komitse dhaakaanakalunga,

²⁰ noitayi ka lota, sigo a gwanitha ayihe mbyoka a nuna okuninga. Momasiku tage ya aantu ye otaa ka uva ko nawa ayihe mbika.

²¹ Omuwa okwa ti: “Aahunganeki mbaka inandi ya tuma, nando oya yi. Inandi ya pa elaka lyandje, ihe otaa popi medhina lyandje.

²² Andola oya kundathana nangame, ando oyu uvithile aantu yandje oohapu dhandje noku ya galula ko koondjila dhawo oombwinayi nokiilonga yawo iiwinayi.

²³ “Ongame Kalunga ndi li apehe, hapeha limwe alike.

²⁴ Kaku na ngoka ta vulu okuholama ndje, ndaaye mu mone andola. Hangame nguka tandi udha egulu nokombanda yevi?

²⁵ Onda tseya aahunganeki mboka, nkene taa popi iifundja medhina lyandje. Aniwa onde ya lombwela oohapu dhandje moondjodhi dhawo.

²⁶ Sigo uunake aahunganeki mboka taa pukitha aantu yandje niilombo yawo ye yi toto?

²⁷ Otaa dhiladhila kutya oondjodhi ndhoka taa hokololelathana, otadhi dhimbitha ndje kaantu yandje, naanaa ngaashi oohekulu ya dhimbwa ndje e taa gama kuBaal.

²⁸ Omuhunganeki ngoka a yaguma, oku na okutya, ndjika ondjodhi yowala, ihe omuhunganeki ngoka u uvu oohapu dhandje, oku na oku dhi uvitha nuudhiginini. Etutu otali yelekwa tuu niilya?

²⁹ Oohapu dhandje odha fa omulilo, nodha fa osilwa tayi nyanyagula omamanya.

³⁰ Otandi kondjitha aahunganeki mboka taa taambathana oohapu yo taye dhi uvitha dha fa dhandje.

³¹ Otandi tsu ondumbo naahunganeki mboka taa uvitha oohapu dhawo notaa ti, odha za kungame.

³² Pulakeneni shoka ngame, Omuwa, tandi mu lombwele. Onda tsa ondumbo naahunganeki mboka taa hokolola oondjodhi dhawo dhu udha iifundja. Otaa uvitha oondjodhi dhawo e taa pukitha aantu yandje niilombo yawo nomainomo gawo. Inandi ya tuma nando nenge ndi ya lombwele ya ye, nokaye na omupondo gwasha kaantu yandje. Ongame, Omuwa, nda popi.”

³³ Omuwa okwa lombwele ndje a ti: “Jeremia, uuna gumwe gwomaantu yandje nenge omuhunganeki nenge omuyambi te ku pula ta ti: ‘Etumwalaka lyOmuwa oshike?’ ou na oku mu lombwela to ti: ‘One omutenge gwOmuwa, note ke mu ekelahi.’

³⁴ Ngele gumwe gwomaantu yandje nenge omuhunganeki nenge omuyambi ta longitha iitya mbika ‘omutenge gwOmuwa’, otandi ke mu geela negumbo lye.

³⁵ Peha lyasho shaa ngoka oku na okupula ookuume ke naakwawo ta ti: ‘Omuwa okwa gandja eyamukulo lini? Omuwa okwa ti ngiini?’

³⁶ Ano inaa popya we ya tye ‘omutenge gwOmuwa’, oshoka ngele oku na ngoka te shi ningi, etumwalaka lyandje otali ka ninga shili omutenge kuye. Aantu oya goyokitha oohapu dhaKalunga kawo, Kalunga omunamwenyo, Omuwa Omunankondoawike.

³⁷ Jeremia, pula aahunganeki to ti: ‘Omuwa okwe mu pe eyamukulo lyashike? Omuwa okwa ti ngiini?’

³⁸ Nongele itaa vulika kelombwelo lyandje yo taa tumbula iitya ‘omutenge gwOmuwa’, nena ya lombwela kutya

³⁹ otandi ke ya tudha mo e tandi ya umbile kokule nangame, ayehe pamwe noshilando shoka nde shi ya pele noohekulu.

⁴⁰ Otandi ya undulile ohoni nesheko lyaaluhe ndyoka lyaa na mpoka nali dhimbiwa.”

24

¹ Omuwa okwa ulukile ndje iimbamba iyali yoonkwiyu ya tentekwa posheelo shotempeli. (Shika osha ningwa konima yomukwaniilwa gwaBabilonia Nebukadnezzar sho a kwata po omukwaniilwa gwaJuda Jehoiakin yaJehoiakim a ninge omupongekwa okukuthwa muJerusalem nokufalwa kuBabilon, pamwe naakuluntu yaJuda, omangomba naahambudhi yiiyedhilitho.)

² Oshimbamba shotango osha li shi na oonkwiyu oontoye, oondhiye; oshikwawo osha li shi na omayamba gaa na omulyo.

³ Omuwa okwa pula ndje a ti: “Jeremia, ou wete shike?” Onda yamukula nda ti: “Oonkwiyu, oondhiye oontoyelela nomayamba omawinayi gaa shi kuliwa.”

⁴ Omuwa okwa lombwele ndje a ti:

⁵ “Ongame, Omuwa, Kalunga kaIsrael, tandi tala aantu mboka ya falelwe kuBabilonia kutya oya fa oonkwiyu oombwanawa, notandi ke ya ninga nawa.

⁶ Otandi ke ya tonatela notandi ya galulile kevi ndika. Otandi ke ya tunga noitandi ya kumuna po; otandi ke ya tsika noitandi ya tudha mo.

⁷ Otandi ke ya pa ondjuulukwe yokutseya kutya ongame Omuwa. Otaa ka ninga aantu yandje notandi ka ninga Kalunga kawo; oshoka otaa ka galukila kungame nomitima dhawo adhihe.

⁸ “Kombinga yomukwaniilwa gwaJuda Sedekia nomalenga ge nAajerusalem mboka ya kalele moshilongo shika nenge mboka ya kala muEgipiti, otandi ya ningi ya fa omayamba ngoka omawinayi kaage shi okuliwa.

⁹ Otandi ya undulile omupya gwa tya ngaaka, niigwana ayihe yomuuyuni otayi ka haluka. Aantu otaa ke ya nyonkela, otaa ningathana iileva noku ya ninga oshipwedhela; otaa tumbula edhina lyawo, ngele taa tukathana shaa hoka taa halakanene.

¹⁰ Otandi ya undulile iita, ondjala yekomba nelega, sigo inaku hupa nando ogumwe moshilongo shoka nde ya pe noohekulu.”

25

¹ Momumvo omutine Jehoiakim yaJosia sho a li omukwaniilwa gwaJuda, onda taamba etumwalaka lya zi kOmuwa tali popi Aajuda ayehe. (Nguka ogwa li omumvo gwotango gwomukwaniilwa gwaBabilonia Nebukadnezzar.)

² Onda lombwele Aajuda nAajerusalem nda ti:

³ “Omimvo omilongo mbali nandatu, okuza komumvo omutimulongo nomutitatu Josia yaAmmon sho a li omukwaniilwa gwaJuda sigo onena, Omuwa okwa popitha ndje, ihe inandi tonyala oku mu hokololela shoka a ti. Ihe ne inamu pupa ko.

⁴ Inamu pulakena nenge mu pupe ko, nando Omuwa okwa dhiginine okutuma aapiya ye aahunganeki.

⁵ Oye mu lombwele, mu ethe oondjila dheni oombwinayi niilonga yeni iiwinayi mbyoka tamu ningi, opo mu wape okukala mevi ndyoka Omuwa e li mu pe one noohokulu, li ninge eliko lyeni lyaaluhe.

⁶ Oye mu lombwele, mwaa simaneke nokulongela iikalunga ne mwaa geyithe Omuwa mokulongela iimenka mwe yi ningi. Ando omwa li mwa vulika kOmuwa, ando ine mu geela.

⁷ Ihe Omuwa mwene ota ti, ne omwa tindi oku mu pulakena. Peha lyokupulakena omwe mu geyitha niimenka yeni nomwi iyetele egeelo ne yene.

⁸ “Onkee ano sho inaamu mu pulakena, Omuwa Omupangeliawike ota ti:

⁹ ‘Otandi ke mu tumina aayumbangalantu ayehe nomupiya gwandje Nebukadnezzar, omukwaniilwa gwaBabilon. Otandi ye mu tumine, ya kondjithe Juda naakalimo yasho, osho wo iigwana ayihe yomuushiinda. Otandi ka hanagula po oshigwana shika naashiinda yasho noku ya ethela momakulukuma sigo aluhe, emoniko etilithi notali halutha. Ongame, Omuwa, nda popi.

¹⁰ Otandi ka mweneka ekugililo lyenyanyu nondigolo nomatanto goshituthi shohango. Itaa kala ye na omahooli gomoolamba dhawo nenge ye na iilya.

¹¹ Oshilongo ashihe otashi ka teka po nokumbugala, niigwana yomuushiinda otayi ka longela omukwaniilwa gwaBabilonia omimvo omilongo heyali.

¹² Konima yaambika otandi ka pangula Babilonia nomukwaniilwa gwasho moluuwinayi we. Otandi ka hanagula po oshilongo shoka notashi ningi ombuga yowala sigo aluhe.

¹³ Otandi ka geela Babilonia nomageelo agehe ngoka Jeremia a hunganeke tandi geele nago iigwana — iiponga ayihe ya nyolelwa membo ndika.

¹⁴ Otandi ka galulila Aababilonia shoka ya ningi; nayo wo onaa ka longela iigwana oyindji naakwaniilwa aanene.’ ”

¹⁵ Omuwa, Kalunga kaIsrael, okwa lombwele ndje a ti: “Mpaka ope na oshitenga shomaviinu shu udha ondjahi yandje. Shi kutha u shi fale kiigwana ayihe tandi ku tumu ko, u yi nwethe mo.

¹⁶ Nge ya nu mo, otayi ka pungauka moshidhungwe omolwiita tandi yi ya tumine.”

¹⁷ Onda taamba oshitenga moshikaha shOmuwa, onde shi pe iigwana ayihe mbyoka Omuwa a tumu ndje kuyo e tandi yi nwetha mo.

¹⁸ Jerusalem niilando yaJuda ayihe, pamwe naakwaniilwa naawiliki yasho, oya nu mo, opo ya hanagulwe po noya ninge emoniko etilithi noshinima shondhino noshethingano, ngaashi ye li sigo onena.

¹⁹ Yalwe mboka ya nu moshitenga, oyo mbaka: Omukwaniilwa gwaEgipiti, omalenga naawiliki ye; Aayegipiti ayehe naakwiilongo ayehe muEgipiti; Aakwaniilwa ayehe yoshilongo Uz; Aakwaniilwa ayehe yiilando yAafilisti Ashkelon, Gaza, Ekron noshihupe shaAshdod; Aaedom, Aamoabi nAayammoni; aakwaniilwa ayehe yaTiro naSidon; aakwaniilwa ayehe yomiilongo yopEfuta lyopokati; iilando Dedan, Tema naBus; aantu ayehe mboka yi ikulula omapalu; aakwaniilwa yaArabia ayehe; aakwaniilwa ayehe yomazimo gokombuga; aakwaniilwa ayehe yaSimri noyaElam naMedia; aakwaniilwa ayehe yokuumbangalantu, popepi nokokule, nguka naangwiyaka. Oshigwana kehe kombanda yevi osha li shi na okunwa mo. Hugunina omukwaniilwa gwaBabilonia ta ka nwa mo.

²⁰

²¹

²²

²³

²⁴

²⁵

²⁶

²⁷ Omuwa okwa lombwele ndje a ti: “Lombwela aantu kutya ngame, Omuwa Omunankondoawike, Kalunga kaIsrael, otandi ya lombwele, ya nwe, sigo ya kolwa taa kungu, sigo ya pundukile po itaa vulu okuyambuka, molwiita mbyoka tandi ya tumine.

²⁸ Nongele taa tindi okutaamba oshitenga moshikaha shoye, ya nwe mo, nena ya lombwela kutya Omuwa Omunankondoawike okwa ti, oye na okunwa.

²⁹ Otandi ka tameka iilonga yandje yokuhanagula moshilando shandje mwene. Otaa dhiladhila kutya otaa yi inaa geelwa? Aawe, otaa ka geelwa, oshoka otandi ka tuma iita kaantu ayehe yokombanda yevi. Ongame, Omuwa, nda popi.

³⁰ “Ngoye, Jeremia, ou na okuuvitha ashihe shoka nda popi. Ou na okulombwela aantu mbaka to ti: ‘Omuwa ota ndunduma megulu, omutyalakato otagu mbolongondja monkalelo ye ondjapuki. Ota ndundumine aantu ye; ota kololoka a fa omuntu ta kolo oomviinu. Shaa ngoka kombanda yevi ote mu uvu,

³¹ ekugagano lyewi otali ifala kooha nooha dhuuyuni. Omuwa oku na oontamanana niigwana. Ote eta aantu ayehe kompangu, naakolokoshi te ya etha ya dhipagwe. Omuwa oye a popi.’ ”

³² Omuwa Omunankondoawike ota ti, omupya otagu adha oshigwana, noshikungulu oshinene otashi tukuka kooha dhuuyuni.

³³ Mesiku ndyoka omidhimba dhaantu mboka ya dhipagwa kOmuwa, otadhi ka langathana okuza kooha dhuuyuni sigo okooha oonkwawo. Kape na ngoka ta lili oosa, nomidhimba itadhi kuthwa po dhi ka fumvikwe. Otadhi kangawala pevi dha fa oondumba dhuuhoho.

³⁴ Lileni, ne aawiliki; ne aasita yaantu yandje, ningeni oshikwanana! Hekumuneni nokugalangata montsi. Ethimbo olye mu adha, mu dhipagwe, notamu ka kutulwa ominino mwa fa oonzi.

³⁵ Itamu ka hunuka po nando.

³⁶ Otamu yemata notamu lilagana muuwehame, oshoka Omuwa ota hanagula po oshigwana sheni mondjahi ye, noshilongo sheni shombili te shi mbugaleke.

³⁷

³⁸ Omuwa okwe etha aantu ye a fa onime tayi thigi po ekololo lyayo. Iita iitilithi nondjahi yOmuwa ya hwama omulilo oya shitukitha oshilongo ombuga yowala.

26

¹ Petameko lyelelo lyomukwaniilwa Jehoiakim yaJosia, omukwaniilwa gwaJuda, oohapu dhOmuwa odhe ya kungame.

² Omuwa okwa lombwele ndje a ti: “Thikama mehale lyotempeli, u uvithe oohapu adhihe nde ku lombwele u dhi lombwele aantu mboka taa zi komikunda dhaJuda ye ya kelongelokalunga. Ino thiga po sha.

³ Pamwe aantu taa pulakene, ye ethe oondjila dhawo oombwinayi. Ngele taye shi ningi, otandi ki itedhulula kombinga yehanagulo ndyoka nde ya dhiladhilile molwiilonga yawo yuukolokoshi.”

⁴ Omuwa okwa lombwele ndje, ndi lombwele aantu ndi tye: “Ongame, Omuwa, nda ti, vulikeni kungame ne mu dhiginine ompango yandje nde yi mu pe.

⁵ Pulakeneni oohapu dhaapiya yandje aahunganeki, mboka nda dhiginine oku mu tumina, nando inamu vulika kushoka ya popi.

⁶ Ngele otamu tsikile okwaavulika, nena otempeli ndjika otandi ke yi ninga, ngaashi nda ningi Shilo, niigwana ayihe yomuuyuni otayi ka tumbula edhina lyoshilando shika, ngele tayi thingana.”

⁷ Aayambi, aahunganeki naantu ayehe oyu uvu ndje tandi uvitha iinima mbika motempeli.

⁸ Sho nda hulitha ayihe mbyoka Omuwa a lombwele ndje, ndi yi popye, oya kwata ndje noyi igidha ya ti: “Ou na okudhipagwa!

⁹ Omolwashike to popi medhina lyOmuwa kutya otempeli ndjika otayi ka fa Shilo, noshilando shika otashi ka hanagulwa po nokaku na ngoka ta ka kala mo?” Aantu noya gongalele ndje.

¹⁰ Aawiliki yaJuda sho ye shi uvu, oya zi ko kuuwa, ye ya kotempeli e taa kuutumba pOsheelo oshipe.

¹¹ Aayambi naahunganeki oya lombwele aawiliki naantu ayehe taa ti: “Omulumentu nguka okwi ilongele egeelo lyokusa, oshoka ota hunganeke a tsa ondumbo noshilando shetu. Omwe mu uvu nomakutsi geni yene.”

¹² Ngame onda ti: “Omuwa okwa tumu ndje, ndi uvithe ashihe shoka mu uvu tashi popi otempeli ndjika noshilando shika.

¹³ Opalekeni ano ngashingeyi omikalo niilonga yeni, ne mu vulike kOmuwa, Kalunga keni. Ngele otamu shi ningi, Omuwa oti itedhulula noite mu etele ehanagulo ndyoka a li e li dhiladhila.

¹⁴ Kombinga yandje, ondi li miikaha yeni! Ningii ndje shoka sho opala noshu uka momeho geni.

¹⁵ Ihe shi tseyeni ashike, ngele otamu dhipaga ndje, one naantu yomoshilando shika otamu kala mu na ondjo yedhipago lyomukeenandjo, oshoka Omuwa oye a tumu ndje, ndi mu pe elondodho ndika.”

¹⁶ Nena aawiliki naantu ayehe oya lombwele aayambi naahunganeki taa ti: “Omulumentu nguka okwe tu uvithile medhina lyOmuwa Kalunga ketu; ke na okudhipagwa andola.”

¹⁷ Konima yaambika yamwe yomaawiliki oya thikama e taa lombwele aantu mboka ya li ya gongala taa ti:

¹⁸ “Hiskia sho a li omukwaniilwa gwaJuda, omuhunganeki Mika gwokuMoreshet okwa lombwelele aantu ayehe kutya Omuwa Omunankondoawike okwa ti: ‘Sion ota papulwa a fa eputa, Jerusalem otashi ka ninga ondumba yomakulukuma, nondundu yotempeli otayi ka shituka okuti.’

¹⁹ Omukwaniilwa Hiskia nAajuda inaa dhipaga Mika. Peha lyasho Hiskia okwa tila Omuwa nokwe mu geulukitha. Omuwa nokwi itedhulula ye ine eta oshiponga shoka kwa li e na oku ya undulila. Ngashingeyi otatu iyetele oshiponga oshinene tse yene.”

²⁰ (Okwa li ku na omulumentu gulwe, edhina lye Uria waShemaja gwokuKiriat Jearim, ngoka a popi medhina lyOmuwa nokutsa ondumbo noshilando noshigwana, ngaashi naanaa Jeremia a ningi.

²¹ Omukwaniilwa Jehoiakim, aakwiita ye nomalenga sho yu uvu Uria shoka a ti, omukwaniilwa okwa kambadhala oku mu dhipagitha. Ihe Uria okwe shi uvu, okwa tila e ta yi ontuku kuEgipiti.

²² Omukwaniilwa Jehoiakim okwa tumu Elnatan lyaAkbor naalumentu yamwe, ya ka tale ko Uria kuEgipiti.

²³ Oye mu eta komukwaniilwa Jehoiakim, ngoka e mu dhipagitha, nomudhimba gwe ogu umbilwa moombila dhaantu yowala.)

²⁴ Ihe molwashoka nda li megameno lyaAhikam yaShafan, inandi gandjwa miikaha yaantu, ndi dhipagwe.

27

¹ Petameko lyelelo lyaSedekia yaJosia, omukwaniilwa gwaJuda, Omuwa okwa lombwele ndje,

² ndi ihongele ondjoko noositolopa dhoongodhi niisikayiwa ndi yi ikutile kothingo.

³ Nandi tume elaka kaakwaniilwa kuEdom, Moab, Ammon, Tiro naSidon naatumwa yawo mboka yi ile kuJerusalem, ya tale omukwaniilwa Sedekia.

⁴ Omuwa Omunankondoawike, Kalunga kaIsrael, okwa ti kungame, ndi ya lombwele ya faalele aakwaniilwa yawo etumwalaka lye tali ti:

⁵ “Koonkondo nokomatha gandje onda shiti uuyuni naantu niinamwenyo ayihe mbyoka yi li kombanda yevi; otandi li gandja kungoka nde mu hokwa.

⁶ Ngashingeyi otandi gandja iilongo mbika ayihe mepangelo lyomupiya gwandje, omukwaniilwa gwaBabilon, Nebukadnezzar, niiyamakuti otayi mu longele.

⁷ Iigwana ayihe otayi mu longele, otayi ka longela wo omwana nomutekulu gwe, sigo ethimbo lyetekopo lyoshilongo she lya thikana. Nena oshilongo she otashi ka longela iigwana yilwe naakwaniilwa aanankondo.

⁸ “Ihe oshigwana kehe nenge oshilongo shoka itaashi ki igandja kelelo lye, otandi ke shi tokolela iita, ondjala nelega, sigo nde etha Nebukadnezzar e shi hanagule po thiluthilu.

⁹ Inamu pulakena aahunganeki yeni nenge aayanekeli nenge aafatululi yoondjodhi noyomandhindhiliko nenge oompulile dheni. Ayehe otaye mu lombwele kutya itamu ka longela omukwaniilwa gwaBabilon.

¹⁰ Otaye mu kotokele notaye mu kuthitha po, mu falwe kokule noshilongo sheni. Otandi ke mu tidha mo, notamu ka hanagulwa po.

¹¹ Ihe ngele oku na oshigwana tashi igandja komukwaniilwa gwaBabilon, shi mu longele, otandi shi kaleke mevi lyasho shene; otashi li longo nokukala mo. Ongame, Omuwa, nda popi.”

¹² Shika onde shi lombwele wo omukwaniilwa gwaJuda Sedekia nda ti: “Igandjeni komukwaniilwa gwaBabilon. Mu longeleni naantu ye notamu kala mu na omwenyo.

¹³ Omolwashike ne naantu yeni mu na okusila miita, mondjala nomelega? Omuwa ota ti, shika otashi ningilwa oshigwana kehe itaashi igandja komukwaniilwa gwaBabilon.

¹⁴ Inamu pulakena kaahunganeki mboka taye mu lombwele, mwaa igandje kuye. Otaye mu tula muugoya.

¹⁵ Omuwa ota ti, ine ya tuma nando, oyo notaye mu fundju taa popi medhina lye. Otaye eta ashike, mu tidhwe mo ne mu ka dhipagwe pamwe naahunganeki mboka taye mu lombwele iifundja mbika.”

¹⁶ Onda lombwele aayambi noshigwana ashihe kutya Omuwa ota ti: “Inamu pulakena aahunganeki mboka taa ti, iikwaniipangitho yomotempeli otayi galulwa ko mbala kuBabilon. Otaye mu fundju.

¹⁷ Inamu ya pulakena! Igandjeni komukwaniilwa gwaBabilonia notamu kala mu na omwenyo! Omolwashike oshilando shika shi na okuninga ondumba yomakulukuma?

¹⁸ Ngele yo aahunganeki shili nongele oye na elaka lyOmuwa, naa galikane Omuwa Omunankondoawike, kaa pitike iiyuma mbyoka ya hupile motempeli nomuuwa, yi falwe kuBabilonia.”

¹⁹ (Omukwaniilwa Nebukadnezzar sho a fala omukwaniilwa gwaJuda Jehoiakin yaJehoiakim pamwe naawiliki yaJuda naJerusalem kuBabilonia, okwa thigi po oongudhi, ondama yoshikushu, uutemba niikwaniipangitho yilwe yomotempeli.)

²⁰

²¹ “Pulakeneni shoka ngame, Omuwa Omunankondoawike, Kalunga kaIsrael, tandi popi iikwaniipangitho mbyoka ya thigala motempeli nomuuwa muJerusalem:

²² Otayi ka falwa kuBabilonia notayi ka kala hoka sigo esiku ndyoka tandi yi dhimbulukwa. Opo ihe tandi ke yi galulila meha ndika noku yi pungulila mo. Ongame, Omuwa, nda popi.”

28

¹ Omumvo tuu ngoka momwedhi omutitano gwomumvo omutine Sedekia sho a li omukwaniilwa, Hanania yaAssur, omuhunganeki gwokomukunda Gibeon, okwa lombwele ndje motempeli montaneho yaayambi noyaantu ayehe a popi

² kutya Omuwa Omunankondoawike, Kalunga kaIsrael, okwa ti: “Onda teya po oonkondo dhomukwaniilwa gwaBabilonia.

³ Momimvo mbali otandi ka galulila iikwaniipangitho yotempeli ayihe mbyoka Nebukadnezzar, omukwaniilwa gwaBabilonia, e yi fala kuBabilonia.

⁴ Otandi ka galula wo omukwaniilwa gwaJuda Jehoiakin yaJehoiakim pamwe nAajuda ayehe mboka ya yi muupongekwa kuBabilonia. Eeno, oonkondo dhomukwaniilwa gwaBabilonia otandi dhi teya po. Ongame, Omuwa, nda popi.”

⁵ Ngame onda lombwele Hanania montaneho yaayambi noyaantu ayehe mboka ya li motempeli nda ti:

⁶ “Amen! Omuwa ne shi ninge! Na tsakanithe shoka wa hunganeke, nota ka galula ko kuBabilonia iikwaniipangitho yotempeli naantu ayehe ya falwa muupongekwa.

⁷ Ihe pulakena shoka tandi ku lombwele ngoye noshigwana ashihe.

⁸ Aahunganeki mboka ya hunganeke nale, komeho getu, oya hunganeke kutya iita, ondjala nelega tali adha iigwana oyindji niilongo iinankondo.

⁹ Ihe omuhunganeki ngoka ta hunganeke ombili, ota dhimbululwa kutya ye omuhunganeki ngoka a tumwa shili kOmuwa, uuna ehunganeko lye lya tsu.”

¹⁰ Hanania okwa kutulula ndje ondjoko e te yi teya po,

¹¹ e ta popi montaneho yaantu ayehe ta ti: “Omuwa okwa ti, osho ngeyi ta ka teya po ondjoko yomukwaniilwa Nebukadnezzar ya kutilwa koothingo dhiigwana ayihe; note shi ningi momimvo mbali.” Ngame nonda zi po.

¹² Konima yaambika Omuwa okwa lombwele ndje,

¹³ ndi ka lombwele Hanania ndi tye: “Omuwa ota ti, owa vulu okuteya po ondjoko yoshiti, ihe ye ote ke yi pingakanitha nondjoko yosheela.

¹⁴ Omuwa Omunankondoawike, Kalunga kaIsrael, ota ti, ye ota ka kutila iigwana ayihe ondjoko yosheela, niigwana otayi ka longela omukwaniilwa gwaBabilonia Nebukadnezzar. Niiyamakuti otayi ka longela Nebukadnezzar.”

¹⁵ Onda lombwele Hanania nda ti: “Pulakena, Hanania! Omuwa ine ku tuma nando, oto itaalitha aantu mbaka iilombo.

¹⁶ Onkee ano Omuwa mwene ta popi kutya ote ku kombo po. Omumvo nguka manga inaagu poka, oto ka sa, oshoka owa lombwele aantu ya tse ondumbo nOmuwa.”

¹⁷ Hanania nokwa si momwedhi omutiheyali gwomumvo ngoka.

29

¹ Onda nyolele aayambi, aahunganeki, aawiliki yoshigwana naayehe mboka Nebukadnezzar e ya fala oonkwatwa ya zi muJerusalem ya yi kuBabilon.

² Onde yi nyola konima omukwaniilwa Jehoiakin, yina, omalenga, aawiliki yaJuda noyaJerusalem, omangomba naahambudhi yiiyedhilitho sho ya falwa muupongekwa.

³ Ontumwafo onde yi pe Elasa lyaShafan naGemarja gaHilkia, mboka ya tuminwe komukwaniilwa gwaJuda Sedekia, ya ye komukwaniilwa gwaBabilonia Nebukadnezzar. Otayi ti:

⁴ “Omuwa Omunankondoawike, Kalunga kaIsrael, ota lombwele aantu ayehe mboka a ziminine Nebukadnezzar e ya kuthe muJerusalem oonkwatwa noku ya fale kuBabilon:

⁵ ‘Dhikeni omagumbo, mu kale mo. Tsikeni iitsambe, mu lye iiyimati yayo.

⁶ Hokanathaneni, mu vale aanona. Hokanitheni aana yeni, opo ya vale aanona. Omu na okwiindjipala, mu ninge oyendji, hakushonopala.

⁷ Longeni uuwanawa wiilando mbyoka nde mu fala kuyo muupongekwa. Yi galikaneneni Omuwa, oshoka ngele oyi li melago, nane omu li melago.

⁸ Ongame, Omuwa, Kalunga kaIsrael, tandi mu londodha mwaa pitike mu kotokelwe kaahunganeki mboka ye li mokati keni, nenge kuyalwe mboka taa popi taa ti, otaa vulu okuhunganeka onakuyiwa. Inamu pupa ko koondjodhi dhawo.

⁹ Otaye mu lombwele iifundja medhina lyandje. Inandi ya tuma. Ongame, Omuwa, nda popi.’

¹⁰ “Omuwa ota ti: ‘Omimvo dhomuBabilonia omilongo heyali nge dha piti po, otandi mu dhimbulukwa nokudhiginina euvaneko lyandje notandi mu galulile kegumbo.

¹¹ Ongame awike ndi shi shoka nde mu dhiladhilila, omadhiladhilo gandje ogelago, hagomupya; otandi mu pe onakuyiwa netegameno.

¹² Otamu ka ithana ndje. Otamu ke ya tamu galikana ndje, notandi ke mu yamukula.

¹³ Otamu ka konga ndje, notamu ka mona ndje, oshoka otamu ka konga ndje nomwenyo aguhe.

¹⁴ Eeno, otandi ti, otamu ka mona ndje, notandi ke mu tululula mevi lyeni. Otandi ke mu kongolola koshilongo kehe nokehala kehe nkoka nde mu halakanithile ko, notandi ke mu galulila mevi ndyoka nda li nde mu kutha mo, mu ye muupongekwa. Ongame, Omuwa, nda popi.’

¹⁵ “Otamu ti, Omuwa okwe mu pe aahunganeki muBabilon.

¹⁶ Pulakeneni shoka Omuwa ta popi omukwaniilwa ngoka a kuutumba koshipangelapundi shaDavid naantu ayehe ya thigala mo moshilongo shika, aakweni mboka inaa ya muupongekwa pamwe nane.

¹⁷ Omuwa Omunankondoawike ota ti: ‘Otandi eta kuyo iita, ondjala nelega, otandi ke ya ninga ya fa oonkwiyu dho ola noitadhi liwa we.’

¹⁸ Otandi ya landulitha iita, ondjala nelega, niigwana ayihe yomuuyuni otayi ka haluka kushoka tayi shi mono. Shaa nkoka nde ya halakanithile, aantu otaa kunkwa ya haluka kushoka she ya ningilwa. Aantu otaye ke ya nyonkela notaa tumbula edhina lyawo, ngele taa thingana.

¹⁹ Shika otashi ke ya ningilwa, oshoka inaa vulika koohapu ndhoka nda dhiginine oku dhi ya tumina maapiya yandje aahunganeki. Oya tindi okupulakena.

²⁰ Ne amuhe mboka nda tumu muupongekwa muBabilon, pulakeneni shoka ngame, Omuwa, tandi ti.”

²¹ Omuwa Omunankondoawike, Kalunga kaIsrael, okwa popi Ahab yaKolajia naSedekia yaMaaseia, mboka taye mu lombwele iifundja medhina lye. Ota ti, ote ke ya gandja miikaha yomukwaniilwa gwaBabilonia Nebukadnezzar, ngoka te ke ya dhipagela montaneho yeni.

²² Uuna aapongekwa Aajuda yomuBabilonia taa ka thinga omuntu gwontumba, otaa ka tya: “Omuwa ne ku ninge wa fa Sedekia nAhab, mboka omukwaniilwa gwaBabilonia e ya kanga piikangwa ye na omwenyo!”

²³ Eso lyawo osho tali ka kala lya tya ngaaka, oshoka oye na ondjo onenenene — oya hondele e taa popi iifundja medhina lyOmuwa. Shika osho okutsa ondumbo nOmuwa nehalo lye. Oku shi shi shoka ya ningi, oye onzapo yawo. Omuwa okwa popi.

²⁴ Omuwa Omunankondoawike, Kalunga kaIsrael, okwa pe ndje elaka tali popi Shemaja yaNehelam, ngoka a tumu ontumwafo medhina lye mwene kAajerusalem ayehe nokomuyambi Sefania yaMaaseia nokaayambi ayehe. Montumwafo ndjika Shemaja okwa nyolele Sefania ta ti:

²⁵

²⁶ “Omuwa okwe ku langeke muuyambi peha lyaJehoiada, u kale omukuluntu motempeli. Osho oshilonga shoye okutala kutya omuyanankwengu kehe ti ihungunine okuninga omuhunganeki, na tulwe momalyenge nolugondo lwosheela mothingo ye.

²⁷ Omolwashike inoo shi ningila Jeremia gwokuAnatot, ngoka tu uvithile aantu a fa omuhunganeki?

²⁸ Oku na okumwenekwa, oshoka okwa lombwele aantu muBabilonia kutya onaa ka kala muupongekwa ethimbo ele noye na okutunga omagumbo okukala mo nokutsika iitsambe, ya mone iiyimati okulya.”

²⁹ Sefania okwa leshele ndje ontumwafo ndjika.

³⁰ Nena Omuwa okwa lombwele ndje,

³¹ ndi tumine aapongekwa ayehe muBabilon elaka ndika tali popi Shemaja tali ti: “Ongame, Omuwa, tandi ka geela Shemaja noluvalo lwe, oshoka okwe mu hunganekele, nando inandi mu tuma. Okwe mu lombwele iifundja. Ita ka kala e na oluvalo mokati keni. Ita ka kala e na omwenyo, a mone uuwanawa mboka tandi ka ningila aantu yandje, oshoka okwe ya uvithile, ya tse ondumbo nangame. Ongame, Omuwa, nda popi.”

30

¹ Omuwa, Kalunga kaIsrael,

² okwa lombwele ndje a ti: “Nyolela membo ashihe shoka nde ku lombwele,

³ oshoka ethimbo otali ya, uuna tandi ka galula aantu yandje Aaisraeli nAajuda. Otandi ke ya galulila koshilongo nde shi pele oohekulu, notaye shi lalulula ishewe, shi ninge eliko lyawo. Ongame, Omuwa, nda popi.”

⁴ Omuwa ota lombwele Aaisraeli nAajuda ta ti:

⁵ “Otandi uvu onkugo yuumbanda, ekugagano lyetilo nolyaa shi lyombili.

⁶ Mweneni, ne mu shi dhiladhile! Omusamane ota ningi tuu omusimba? Omolwashike ano ndi wete omusamane kehe ti ikwatakwata mepunda, ngaashi omukulukadhi ta thetwa? Omolwashike ano kehe ngoka a pemba?

⁷ Esiku etilithilela otali ya; kape na esiku tali yelekwa nalyo — esiku lyoshiponga kuJakob, ihe ota ka hupithwa mo mulyo.”

⁸ Omuwa Omunankondoawike ota ti: “Esiku ndyoka otandi ka teya po ondjoko ndjoka ya kutilwa moothingo dhawo nokudhitulula omalyenge gawo, oyo noitaa ka kala we aapika yaakwiilongo.

⁹ Otaa ka longela ndje, Omuwa, Kalunga kawo, noluvalo lwaDavid, ngoka tandi kwaniileke,

¹⁰ “Omupiya gwandje Jakob, ino tila; oshigwana shaIsrael, ino haluka. Otandi ke mu hupitha moshilongo shokokule, moshilongo moka mwa pongekelwa mo. Otamu ka galukila kegumbo notamu kala nombili; otamu ka gamenwa, nokape na ngoka te mu tilitha.

¹¹ Otandi ke ya kune, ndi mu hupithe. Otandi ka hanagula po iigwana yaahoka nde mu halakanithile, ihe itandi mu hanagula po. Itandi mu etha inaandi mu geela, ihe otandi mu putudha nuuyuuki. Ongame, Omuwa, nda popi.”

¹² Omuwa ota lombwele oshigwana she ta ti: “Oshilalo shoye kashi shi kupangwa, nuuvu woye waa shi kwaaludhwa.

¹³ Kaku na ngoka te ku hungu, kape na omuti omolwoshilalo shoye, noitashi ka thootela.

¹⁴ Aaholi yoye ayehe oye ku dhimbwa; kaye na ko nasha nangoye. Onde ku ponokele nda fa omutondi; egeelo lyoye olya ningi enene, oshoka omayono goye ogendji, nuukolokoshi woye uunene.

¹⁵ Ino ngungutula we moluuvu woye, uuwehame woye kau na ealuko. Onde ku geele ngaaka, oshoka omayono goye ogendji, nuukolokoshi woye uunene.

¹⁶ Ihe ayehe mboka haye ku li po, otaa ka liwa po, naatondi yoye ayehe otaa ka falwa muupongekwa. Ayehe mboka taa ku hepeke, otaa ka hepekwa, naamboka taye ku yugu, otaa ka yugwa.

¹⁷ Otandi ke ku aludha ishewe, otandi ka panga iilalo yoye, nando aatondi yoye naa tye: ‘Sion a ekelwahi, kaku na ngoka te mu sile oshimpwiyu.’ Ongame, Omuwa, nda popi.”

¹⁸ Omuwa ota ti: “Otandi ka galulila aantu yandje kevi lyawo, nezimo kehe tandi li sile ohenda; Jerusalem otashi ka tungululwa, nuuwa washo otau ka dhikwa ishewe.

¹⁹ Aantu yamo otaa ka imba ekandanga; otaa ka ligola kenyanyu. Okeyambeko lyandje taa ka indjipala; eyambeko lyandje otali ya simanekitha.

²⁰ Aana yawo otaa ka kala ngaashi muuyuni wonale, egongalo lyawo otali ka kala lya kola koshipala shandje; otandi ka geela mboka taye ya hepeke.

²¹ Omupangeli gwawo ota ka za moshigwana shawo yene, omuleli gwawo omokati kaantu yawo yene. Ota ka hedha kungame, nge tandi mu ithana, oshoka olye te shi vulu inaa ithanwa? Otaa ka ninga aantu yandje, notandi kala Kalunga kawo. Ongame, Omuwa, nda popi.”

²²

²³ Ondjahi yOmuwa oyo oshikungulu, ombepo yeshikanyandi tayi pepele omitse dhaakolokoshi. Itayi kodha, sigo a gwanitha ayihe mbyoka a dhiladhila e yi ninge. Esiku otali ya, uuna aantu ye taa ka yelelwa kumbika.

31

¹ Omuwa ota ti: “Esiku otali ya, uuna tandi ka ninga Kalunga komazimo agehe gaIsrael, noyo taa ka ninga aantu yandje.

² Mombuga onda sile ohenda mboka ya hunuka meso. Aaisraeli sho yu uka kevululuko,

³ onde ya imonithile mondjila yokokule. Aaisraeli ne, ondi mu hole aluhe notandi mu hilile kungame nohole yaaluhe.

⁴ Otandi ke mu tungulula ishewe, notamu ka tungala. Otamu ka kutha oongoma dheni notamu ka tanta nokuligola.

⁵ Otamu ka tsika ishewe iitsambe yomiviinu koondundu dhaSamaria, naamboka taa ke dhi tsika, otaa ka lya shoka dhi imi.

⁶ Eeno, esiku otali ya uuna aalangeli taa ka kololoka koondundu dhaEfraim taa ti: ‘Tu thikameni tu yeni kuSion kOmuwa Kalunga ketu.’ ”

⁷ Omuwa ota ti: “Imbileni Jakob nenyanyu, igidhileni oshigwana oshikuluntu. Imbeni ondjimbohambelelo tamu ti: ‘Omuwa a hupitha aantu ye; okwa mangulula ayehe mboka ya hupu po.’

⁸ Otandi ke ya eta taa zi kuumbangalantu noku ya kongolola kooha dhuuyuni. Mokati kawo otamu ka kala aaposi niilema, aasimba naamwali. Otaa galuka oshigwana oshinene.

⁹ Otaye ya taa lili, nomokugalikana kwawo otandi ya eta. Otandi ke ya endithila pomatondokelo gomeya, mepola lya yelekana noitaa punduka, oshoka ongame he yaIsrael, naEfraim oye osheeli shandje.”

¹⁰ Omuwa ota ti: “Pulakenii ndje, ne iigwana, hokololeni oohapu dhandje koontuntu dhokokule. Onda halakanitha aantu yandje, ihe otandi ke ya gongela nokuya enditha ngaashi omusita te enditha oshigunda she.

¹¹ Oshoka onda kulile Aaisraeli nonde ya hupitha koshigwana oshinankondo.

¹² Otaye ya taa imbi ekandanga kondundu Sion. Otaa nyanyukilwa uuwanawa wandje — iilya, omaviinu nomagadhi gooholivi, iimuna yoonzi noyoongombe. Oomwenyo dhawo otadhi ka fa oshikunino sha hetukila noitaa ka sa we oluhepo.

¹³ Aakadhona otaa ka tanta ya nyanyukwa, aalumentu aagundjuka naakuluntu otaa ka shambukwa. Otandi ke ya hepulutha nokushitukitha okulila kwawo enyanyu.

¹⁴ Aayambi otandi ya kutitha noondya oontoye, naantu yandje otandi ya talaleke nuuwanawa wandje. Ongame, Omuwa, nda popi.”

¹⁵ Omuwa ota ti: “Ekudhilo otali uvika muRama, etakumo nelilagano. Rakel ta lilile oyana, ye ina hala okutalalekwa, oshoka oyo kaye po we.”

¹⁶ Omuwa ota ti: “Mwena waa lile we, theta po omahodhi goye, oshoka iilonga yoye otayi ka futwa. Otaa ka galuka ko kevi lyaatondi.

¹⁷ Oluvalo lwoye olu na etegameno komeho; aamwoye otaa ka galukila kegumbo. Ongame, Omuwa, nda popi.

¹⁸ “Ondu uvite shili, Aaisraeli taa lili taa ti: ‘Omuwa, otwa li twa fa okatana okagundjuka, ihe owe tu longo okuvulika. Tu galula; otwi ilongekidha okugalukila kungoye, Omuwa Kalunga ketu.

¹⁹ Otwe ku pilamene, ihe nanziya otwa hala tu galuke. Sho we tu geele, otwi isizimike moluhodhi. Otwa sa ohoni notwa gugwa, oshoka otwa yono, sho twa li aagundjuka.’

²⁰ Israel, ngoye omumwandjelela omuholike, omunona ndi mu hole unene. Shaa tandi tumbula edhina lyoye, otandi ku dhiladhila nohole. Omwenyo gwandje otagu ku tukulukile, notandi ku sile ohenda.

²¹ Dhikeni omaudhikilo, mu ndhindhilike ondjila; monununeni ondjila ndjoka mwe ende nayo, sho mwa yi. Galukeni, ne Aaisraeli, ileni kegumbo komikunda mwe dhi thigile po.

²² Sigo uunake tamu ongaonga, ne aakaaneitaalo? Onde eta po oshinima oshipe kombanda yevi — otashi yelekanithwa nomukiintu ta gamene omulumentu.”

²³ Omuwa Omunankondoawike, Kalunga kaIsrael, ota ti: “Uuna tandi galulile aantu kevi lyawo, otaa ka popya ishewe mevi lyaJuda nomomikunda dhalyo taa ti: ‘Omuwa na yambeke ondundu ondjapuki yaJerusalem, ehala eyapuki moka a kala.’

²⁴ Aantu otaa kala muJuda nomomikunda dhe adhihe, notamu ka munwa iimuna nokulongwa omapya.

²⁵ Otandi ndjangeke aaloloki nokukutitha mboka ya nama uuwanawa, ya ze ondjala.

²⁶ Onkee otaku tiwa: ‘Onda papudhuka e te lengalenga. Oomposi dhandje odha li oontoye.’

²⁷ “Ngame, Omuwa, ote ti, ethimbo nge lya thikana, otandi ka udhitha evi lyaJuda aantu niimuna.

²⁸ Ngaashi nda li nda tonatela okuvudhwa mo nokunakulwa mo kwawo, okweekelwahi, okuhanagulwa po nokuteywa po, osho tandi ke ya tonatela moku ya tsika nomoku ya tungulula.

²⁹ Momasiku ngoka aantu itaa ka tya we: ‘Oohekulu oya lile omagongwa gomandjembele, nomayego goyana oga ningi uuge.’

³⁰ Shaa ngoka ota sile uulunde we mwene, noshaa ngoka ta li omagongwa gomandjembele, ota ningitha omayego ge mwene uuge.”

³¹ Omuwa ota ti: “Esiku otali ya, uuna tandi ka dhika ehangano epe nAaisraeli nAajuda.

³² Inali fa nando ehangano ekulu ndyoka nda hanganene noohekulu, sho nde ya kwata koshikaha nonde ya tembudha muEgipiti. Nando onda li nda fa ombushiki kuyo, inaa dhiginina ehangano ndyoka.

³³ Ehangano epe ndyoka tandi hangana nAaisraeli, olyo ndika: Ompango yandje otandi yi tula momadhiladhilo gawo notandi yi nyolele moomwenyo dhawo. Otandi ningi Kalunga kawo, noyo taa ningi aantu yandje.

³⁴ Itaku kala we omuntu ta longo mukwawo nenge omuntu ta lombwele mumwayina ta ti: ‘Tseya Omuwa.’ Oshoka ayehe otaa ka tseya ndje, aagundjuka naakuluntu. Otandi dhimi po omayono gawo, nuulunde wawo itandi u dhimbulukwa we. Ongame, Omuwa, nda popi.”

³⁵ “Omuwa okwa utha etango okuminikila omutenya, nomwedhi noonyothi okuminikila uusiku. Ota pilula efuta note li ndundumitha; edhina lye Omuwa Omunankondoawike.

³⁶ Elandulathano ndika lyuunshitwe manga inaali tenguka po, oluvalo lwaIsrael nalwo wo italu hulu po, lu kale oshigwana koshipala shandje.

³⁷ Egulu pombanda ngele tali vulu okuyelekwa, nomakankameno gevi pohi ngele taga vulu okukonakonwa, nena otandi ekelehi Israel omolwaashihe shoka e shi ningi.”

³⁸ Omuwa ota ti: “Esiku otali ya, uuna Jerusalem ashihe tashi ka tungululwa shi ninge oshilando shandje okuza koshungo Hananel sigo okOsheelo shokokolonela.

³⁹ Okuza mpoka ongamba otayi ka tsikila sigo okoshikulundundu Gareb e tayi goyokele ihe lwokuGoa.

⁴⁰ Esilu alihe moka hamu fumvikwa aasi netoto lyiiyagaya nelundu alihe sigo okokalonga Kidron nosigo okOsheelo shuukambe kuuzilo, otali ka kala lya yapulilwa ndje. Oshilando itashi ka kumunwa po we nenge shi hanagulwe po.”

32

¹ Omuwa okwa lombwele ndje momumvo omutimulongo Sedekia sho a li omukwaniilwa gwaJuda, ngoka gwa li wo omutimulongo nomutihetatu gwaNebukadnezzar, omukwaniilwa gwaBabilon.

² Pethimbo ndyoka etangakwiita lyomukwaniilwa gwaBabilonia olya li tali ponokele Jerusalem, ngame nonda li nde edhililwa mongulu yomalangelo yomuuwa.

³ Omukwaniilwa Sedekia okwa li a tula ndje mondjedhililo nokwa alula ndje ta ti: “Omolwashike to hunganeke to ti, Omuwa ota ti: ‘Oshilando shika otandi ke shi gandja miikaha yomukwaniilwa gwaBabilon, oye note ke shi kwata po,

⁴ nomukwaniilwa Sedekia ita ka hunuka mo. Ota ka gandjwa miikaha yomukwaniilwa gwaBabilon; otaa ka monathana oshipala noshipala notaa ka popya kokana nokana.

⁵ Sedekia ota ka falwa kuBabilon, oko ta ka kala sigo tandi mu adha. Nando a kondjithe Aababilonia, ita ka tompola sha. Ongame, Omuwa, nda popi.’ ”

⁶ Omuwa okwa lombwele ndje

⁷ kutya omuna gwatategona Hanamel yaShallum ote ya kungame, a landithe po epya lye kuAnatot moshikandjo shaBenjamin, oshoka ongame omunezimo lyawo gwomekota nondi na uuthemba woku li ilandela.

⁸ Ngaashi naanaa Omuwa a lombwele ndje, Hanamel okwe ya kungame mongulu yomalangelo okulanditha epya. Onda li ndi shi shi nale kutya Omuwa okwe shi lombwela ndje shili.

⁹ Onda landa epya kuHanamel nonde mu pe iimaliwa yiisiliveli omulongo niiheyali.

¹⁰ Onda nyola onzapo yelando noku yi shaina montaneho yoombangi nonda yalula iimaliwa noku yi yeleka koshiviha.

¹¹ Onda kutha iifeka ayihe iyali yonzapo yelando — shimwe shoka sha patwa noshihako nosha nyolelwa mo euvathano nomautho noshikwawo shopuuyelele —

¹² nonde yi pe Baruk yaNerija yaMakseja montaneho yomuna gwatategona Hanamel, yoombangi ndhoka dha shaina onzapo yelando noyAajuda ayehe mboka ya li mongulu yomalangelo.

¹³ Onda lombwele Baruk montaneho yawo nda ti:

¹⁴ “Omuwa Omunankondoawike, Kalunga kaIsrael, okwe ku lombwele, u taambe oonzapo ndhika, yimwe ndjoka ya patwa noshihako naandjoka yopuuyelele, u dhi tule moshiyuma sheloya, opo dhi pungulwe sigo omimvo dhokomeho.

¹⁵ Omuwa Omunankondoawike, Kalunga kaIsrael, okwa ti, omagumbo, omapya niitsambe yomiviinu otayi ka landwa ishewe mevi ndika.”

¹⁶ Sho nda gandja onzapo yelando kuBaruk, onda galikana nda ti:

¹⁷ “Omuwa Omupangeliawike, ongoye wa shiti egulu nevi koonkondo nokomatha goye; kape na shoka tashi ku nyenge.

¹⁸ Oho hololele aantu omayuvi esilohenda, ihe oho geelele wo aantu uulunde woohekulu. Ongoye Kalunga omunene nomunankondo; ongoye Omuwa Omunankondoawike.

¹⁹ Oondunge dhoye odhindji, niilonga yoye oyoonkondo. Omeho goye oga tonatela oondjila dhaantu ayehe, oto futu shaa ngoka shi thike paihumbato lye nongaashi i ilongela.

²⁰ Nalenale owa gwanitha iilongandhindhiliko niilongankumwe muEgipiti nowa tsikile oku yi ninga muIsrael nomiigwana yilwe sigo onena, opo u tseyike apehepehe.

²¹ Owa tembudha aantu yoye muEgipiti nokulonga iilongandhindhiliko niilongankumwe, onoshikaha shoye shoonkondo nokwooko kwoye kwa taganana, shoka sha tilitha unene aatondi yoye.

²² Owe ya pe evi ndika lya tondoka omahini nomagadhi goonyushi, ngaashi we li uvanekele oohekulu.

²³ Ihe sho ye ya mevi muka e taye li lala, inaa vulika we kiipango yoye nenge ya kale, ngaashi we ya longo; inaa ninga nando shoka we ya lombwele ye shi ninge. Onkee owe ya umbile omupya gu thike mpaka.

²⁴ “Aababilonia oya tungile oshilando omutuni gwekondekela, opo ye shi ponokele. Iita, ondjala nelega otayi ka tulitha oshilando shika miikaha yawo. Oto vulu okumona kutya ayihe mbyoka wa popile, oya tsu ngashingeyi.

²⁵ Onkene tuu ngoye, Omuwa Omupangeliawike, owa lombwele ndje, ndi ilandele epya montaneho yoombangi, nando oshilando otashi kwatwa po kAababilonia.”

²⁶ Omuwa okwa lombwele ndje a ti:

²⁷ “Ongame Omuwa, Kalunga kaantu ayehe. Kaku na shoka tashi nyenge ndje.

²⁸ Otandi ka gandja oshilando shika miikaha yomukwaniilwa gwaBabilonia Nebukadnezzar netangakwiita lye; otaye shi kwata po

²⁹ e taye shi tomeke. Otaye shi fike po pamwe nomagumbo moka mwa li aantu ya geyitha ndje, sho ya fikile Baal oondjambo kombanda yoondundu nokusaagelela iikalunga omaviinu.

³⁰ Okuza kontsapo yondjokonona yawo Aaisraeli nAajuda oya hindi ndje e taa geyitha ndje niilonga yawo.

³¹ Okuza kesiku ndyoka oshilando shika sha tungwa sigo ongashingeyi aantu yasho oya tukulutha ondjahi nongeyo yandje. Onda tokola oku shi hanagula po

³² omoluuwinayi auhe mboka Aajuda nAajerusalem ya ningi pamwe naakwaniilwa naawiliki yawo nopamwe naayambi naahunganeki yawo.

³³ Oya pilamene ndje peha lyokugalukila kungame; nando onda dhiginine oku ya pukulula, inaa pulakena sha.

³⁴ Oya tula iimenka yawo iinyanyalithi motempeli ya tungilwa okusimaneka ndje. Osho ngeyi ya nyateke otempeli yandje.

³⁵ Oya tungile Baal iiyambelo mesilu Ben Hinnom noya yambele oshikalunga Molek oyana aamati naakadhona. Inandi ya lombwela nando, ye shi ninge; inashi ya mo nando okuli momadhiladhilo gandje, ya longe iihuna ya tya ngaaka nokuyonitha Aajuda.”

³⁶ Omuwa, Kalunga kaIsrael, okwa lombwele ndje a ti: “Jeremia, aantu otaa ti, iita, ondjala nelega otayi ka tulitha oshilando shika miikaha yomukwaniilwa gwaBabilon. Pulakena shoka tandi ti.

³⁷ Otandi ka gongela aantu yomiilongo ayihe moka nde ya halakanithila mo mondjahi nomongeyo yandje onene, notandi ke ya galulila kehala ndika noku ya kalitha mo nombili.

³⁸ Oyo notaa ka ninga aantu yandje, ongame notandi ningi Kalunga kawo.

³⁹ Otandi ya pe omwenyo gumwe nelalakano limwe, ya simaneke ndje omasiku agehe, omoluuwanawa wawo yene nomoluuwanawa woluvalo lwawo.

⁴⁰ Otandi ka hangana nayo ehangano lyaaluhe. Itandi ka loloka oku ya ninga nawa, notandi ke ya longa okutila ndje nomwenyo aguhe, opo yaa pilamene ndje we.

⁴¹ Otandi ka nyanyukilwa oku ya ninga nawa, notandi ke ya tsika mevi ndika.

⁴² “Naanaa ngashika ndu undulile aantu mbaka oshiponga shika oshinene, otandi ke ya ninga nawa, ngaashi ndu uvaneke.

⁴³ Aantu otaa ti, evi ndika otali ka kala lya fa ombuga yaa na aantu nenge iinamwenyo, notali ka gandjwa miikaha yAababilonia. Ihe omapya otaga ka landwa ishewe mevi ndika.

⁴⁴ Aantu otaa ke ga landa, oonzapo dhomalanditho otadhi ka shainwa, otadhi hakwa notadhi kolekwa koombangi. Osho tashi ka ningwa moshikandjo shaBenjamin, momikunda dha kunkula Jerusalem, miilando yaJuda, momikunda dhomoshilongo shokoondundu, poonyonga dhoondundu, nokuumbugantu waJuda. Otandi ka galulila aantu kevi lyawo. Ongame, Omuwa, nda popi.”

33

¹ Manga nda li natango mondjedhililo mongulu yomalangelo, oohapu dhOmuwa odha adha ndje ishewe.

² Omuwa, ngoka a shiti evi, ngoka e li umbinga, e te li tula peha lyalyo, okwa popitha ndje. Oye tuu ngoka edhina lye Omuwa, okwa ti:

³ “Ithana ndje, notandi ke ku yamukula; otandi ke ku hokololela iinima iikumithi niiholekwa mbyoka inoo yi tseya nale.

⁴ Ongame, Omuwa, Kalunga kaIsrael, tandi ti, omagumbo gaJerusalem nuuwa waJuda otau ka kumunwa po. Itashi kwatha sha oku ka kondjitha omutuni gwekondekela gwa tulwa po kAababilonia. Shika otashi ka udhitha owala oshilando nomidhimba dhaamboka tandi ka dhipaga mondjahi nomongeyo yandje. Onda pilamena oshilando shika omoluuwinayi auhe mboka aantu yasho taye u longo.

⁵

⁶ Ihe otandi ka aludha oshilando shika naantu yasho noku ya pa uundjangandjele. Otandi ke ya hololela ombili oyindji negameno.

⁷ Otandi ka ninga Juda naIsrael yi kale yi na elago, notandi ke yi tungulula ngashika ya li nale.

⁸ Otandi ya yogo omayono gawo agehe ngoka ya yono kungame, notandi ka dhima po oondjo dhawo nuukolokoshi wawo.

⁹ Jerusalem otashi ka etela ndje omupopiwo omwaanawa, enyanyu, ehambelelo nesimaneko; iigwana yomuuyuni otayi ka tila nokukakama, sho tayi kundana uuwanawa mboka tandi ningile Aajerusalem nelago ndyoka tandi li etele oshilando.”

¹⁰ Omuwa okwa ti: “Aantu otaa ti, ehala ndika olya fa ombuga yaa na aantu nenge iinamwenyo. Noye li mondjila; iilando yaJuda nomapandaanda gaJerusalem oge li owala; kamu na aantu nenge iinamwenyo. Ihe mehala tuu muka otamu ka uvika ishewe

¹¹ ekugililo lyenyanyu nondigolo yoshituthi shohango. Otamu ka uvika aantu taa imbi, sho taye eta omapandulondjambo kotempeli yandje. Otaa ka tya: ‘Hambeleleni Omuwa Omunankondoawike, oshoka oye omwaanawa, nesilohenda lye ohali kala aluheluhe.’ Evi ndika otandi li ningi lyelago, ngaashi lya li nale. Ongame, Omuwa, nda popi.”

¹² Omuwa Omunankondoawike okwa ti: “Mevi ndika lya fa ombuga yaa na aantu nenge iinamwenyo, otamu ka kala ishewe omaunapelo moka aasita taa ka litha oonzi dhawo.

¹³ Miilando yomoshilongo shokoondundu, poonyonga dhoondundu nokuumbugantu waJuda, moshikandjo shaBenjamin, momikunda dha kunkula Jerusalem nomiilando yaJuda aasita otaa ka yalula oonzi dhawo. Ongame, Omuwa, nda popi.”

¹⁴ Omuwa okwa ti: “Esiku otali ya, uuna tandi ka gwanitha shoka ndu uvanekele Aaisraeli nAajuda.

¹⁵ Pethimbo ndyoka otandi ka hogolola omukwaniilwa omuyuuki ta zi moluvalo lwaDavid. Ota ka tsakanitha oshili nuuyuuki moshilongo.

¹⁶ Aajuda nAajerusalem otaa ka hupithwa e taa kala yaa na ombudhi. Oshilando otashi ka lukwa ‘Omuwa ehupitho lyetu’.

¹⁷ Ongame, Omuwa, tandi uvaneke kutya otaku ka kala aluhe omukwaniilwa gwomoluvalo lwaDavid ta lele muIsrael

¹⁸ notaku ka kala aluhe omuyambi a za mezimo lyaLevi ta longele nota yamba omafikilondjambo, oondjambo dhiikulya noontselelandjambo.”

¹⁹ Omuwa okwa lombwele ndje a ti:

²⁰ “Onda hangana nomutenya nuusiku, opo omathimbo ngaka ga kale ngaashi gu uthwa. Ehangano ndika itali vulu okuteka po.

²¹ Osho nda hangana wo nomupiya gwandje David, nota ka kala aluhe e na omwana ta ningi omukwaniilwa, nonda hangana naayambi yomezimo lyaLevi, ya longele ndje aluhe; nomahangano ngaka itaga teka po we.

²² Otandi ka indjipaleka oluvalo lwomupiya gwandje David nomwaalu gwaayambi yomezimo lyaLevi, noitaa ka vulika okuyalulwa, ngaashi oonyothi dhokegulu nenge ehekevi lyomooha dhefuta.”

²³ Omuwa okwa lombwele ndje a ti:

²⁴ “Ino dhimbulula, nkene aantu taa ti, onde ekelehi Israel naJuda, omazimo gaali ngoka nde ga hogolola? Aantu yandje otaye ya tala nondhino noitaye ya yalula we oshigwana.

²⁵ Ihe ngame, Omuwa, onda hangana nomutenya nuusiku nonda utha oompango ndhoka tadhi pangele egulu nevi.

²⁶ Ngaashi naanaa nde shi ningi, osho tandi ka dhiginina ehangano lyandje noluvalo lwaJakob nomupiya gwandje David. Otandi ka hogolola mo gumwe gwomoluvalo lwaDavid, a lele oluvalo lwaAbraham, Isak naJakob. Otandi ka sila aantu yandje ohenda notandi ya ningi ishewe aanelago.”

34

¹ Etumwalaka lyOmuwa olye ya kungame, Nebukadnezzar, omukwaniilwa gwaBabilon, sho a li ta homona Jerusalem niilando ayihe yopuushiinda washo. Nebukadnezzar okwa kondjo netangakwiita lye alihe tali kwathelwa kiilongo nokiigwana ayihe yomepangelo lye.

² Omuwa, Kalunga kaIsrael, okwa lombwele ndje, ndi ye komukwaniilwa gwaJuda, Sedekia, ndi mu lombwele ndi tye: “Ongame, Omuwa, tandi ka gandja oshilando shika miikaha yomukwaniilwa gwaBabilon, oye note shi fike po.

³ Ngoye ito vulu okufadhuka po; oto ka kwatwa po e to gandjwa miikaha ye. Oto ke mu tala oshipala noshipala noto ka popya naye; oto ka falwa kuBabilon.

⁴ Sedekia, pulakena shoka tandi ku lombwele. Ito ka dhipagelwa molugodhi.

⁵ Oto ka sa nombili noto ka temenwa omulilo gwoosa, ngaashi aantu ya li haa ningile oohokulu mboka ya li nale aakwaniilwa. Otaye ku lili oosa taa ti: ‘Omukwaniilwa gwetu a si!’ Ongame, Omuwa, nda popi.”

⁶ Onda lombwele omukwaniilwa Sedekia oohapu ndhika adhihe muJerusalem,

⁷ manga etangakwiita lyomukwaniilwa gwaBabilonia lya li tali homona oshilando. Etangakwiita olya li wo tali homona Lakish naAseka, iilando mbyoka ayike ya li ya hupu ko miilandohote yomuJuda.

⁸ Omukwaniilwa Sedekia nAajerusalem oya ningi euvathano, ya mangulule

⁹ aapika yawo ayehe Aahebeli, aalumentu naakiintu, opo pwaa kale omuntu e na Omuisraeli omukwawo omupika gwe.

¹⁰ Aantu ayehe naawiliki yawo oya zimine, ya mangulule aapika yawo noitaye ya piki we. Oye ya mangulula,

¹¹ ihe konima oya lundulula omadhiladhilo gawo; oye ya kutha noye ya thiminike, ya ninge ishewe aapika yawo.

¹² Onkee ano Omuwa,

¹³ Kalunga kaIsrael, a lombwele ndje, ndi lombwele aantu ndi tye: “Onda hangana noohokulu, sho nde ya tembudha mo muEgipiti nonde ya mangulula muupika. Onde ya lombwele kutya

¹⁴ omumvo omutiheyali kehe naa mangulule aapika Aahebeli mboka ye ya longele omimvo hamano. Ihe oohokulu inaa pupa ndje nenge ya pulakene shoka nda ti.

¹⁵ Opwa piti omasiku gamwe, sho mwi itedhulula nomwa ningi shoka sho opalela ndje. Ne amuhe omwa zimine mu mangulule Omuisraeli omukweni, nomwa hangana nangame montaneho yandje motempeli.

¹⁶ Ihe omwa lundulula omadhiladhilo geni ishewe nomwa sitha ndje ohoni. Amuhe omwa kutha po aapika mboka mwa li mwa mangulula, ngaashi ye shi yuulukwa, nomwe ya thiminikile ishewe muupika.

¹⁷ Onkee ano ngashingeyi, ngame, Omuwa, tandi ti, inamu vulika kungame, inamu mangulula Aaisraeli aakweni. Eewa ano, otandi mu mangulula, otandi mu mangululile okusila miita, mondjala nomelega. Iigwana ayihe otandi ke yi haluthitha shoka tandi mu ningile.

¹⁸ Omalenga gaJuda naJerusalem, agehe kumwe naambala, aayambi naawiliki oya tandula ontana olumana noya hangana nangame nokweenda pokati komalumana gayo. Ihe oya teya ehangano noinaa dhiginina oohapu dhalyo. Aantu mbaka otandi ya ningi, ngaashi ya ningi ontana.

¹⁹

²⁰ Otandi ke ya gandja kaatondi yawo, mboka ya hala ye ya dhipage po, nomidhimba dhawo otadhi ka lika po koondhila nokiithitukuti.

²¹ Omukwaniilwa gwaJuda Sedekia nomalenga ge otandi ke ya gandja kumboka ya hala oku ya dhipaga. Otandi ke ya gandja miikaha yetangakwiita lyaBabilon, ndyoka lya kankeke manga eponokelo lyalyo lyoku mu matukila.

²² Otandi ke ya lombwela, notaa ka galukila koshilando shika. Otaye shi ponokele, taye shi kwata po notaye shi fike po. Iilando yaJuda otandi yi mbugaleke, itamu kala we nando omuntu. Ongame, Omuwa, nda popi.”

35

¹ Jehoiakim yaJosia sho a li omukwaniilwa gwaJuda, Omuwa okwa lombwele ndje a ti:

² “Inda utale kaantu yoludhi lwaRekab, u popye nayo. Ya fala mela limwe lyomomala gomotempeli e to ya pe omaviinu.”

³ Onda kutha oludhi aluhe lwaRekab Jaazania yaJeremia yaHabbazzinia naamwayina ayehe noyana aamati —

⁴ nonde ya fala motempeli. Onde ya fala mela lyaalongwa yomuhunganeki Hanan yaIgdalia. Ela ndika olya li kombanda yela lyaMaaseia gaShallum, elenga enene motempeli, popepi nela lyomalenga galwe.

⁵ Onda tula iitenga nuuyo wu udha omaviinu koshipala shAarekab e tandi ti kuyo: “Nweni omaviinu.”

⁶ Ihe oya yamukula ya ti: “Ihatu nu omaviinu. Tatekulu Jonadab yaRekab okwe tu lombwele, twaa nwe omaviinu. Tse yene noluvalo lwetu katu na okunwa omaviinu.

⁷ Okwe tu lombwele wo, twaa tunge omagumbo nenge tu longe omapya, twaa tsike iitsambe yomiviinu nenge tu yi lande. Okwe tu lombwele, tu kale aluhe momatsali, opo tu kale olule mevi ndika, moka tu li oondjendi.

⁸ Otwa vulika komalombwelo agehe ngoka Jonadab e ge tu pe. Otse yene ihatu nu omaviinu nenge aakiintu yetu nenge aana yetu aamati naakadhona.

⁹ Ihatu tungu omagumbo tu kale mo — ohatu kala momatsali — katu na iitsambe yomiviinu, omapya nenge iilya. Otwa vulika lela kwaayihe mbyoka tatekulu Jonadab e tu lombwele.

¹⁰

¹¹ Nebukadnezzar sho a homona oshilongo, otwa tokola tu ye kuJerusalem, opo tu tembuke iita yAababilonia noyAasiria. Omolwashoka twa kala muJerusalem.”

¹² Omuwa Omunankondoawike, Kalunga kaIsrael, okwa lombwele ndje, ndi ka lombwele Aajuda nAajerusalem ndi tye: “Ongame, Omuwa, tandi mu pula kutya omolwashike mwa tindi okupulakena ndje nokuvulika koohapu dhandje?

¹³

¹⁴ Oluvalo lwaJonadab olwa vulika koshipango she, lwaa nwe omaviinu. Sigo onena ndjika inalu ga nwa. Ihe nando ngame onda dhiginine oku mu kumagidha, ne inamu vulika kungame.

¹⁵ Onda tsikile oku mu tumina aapiya yandje aahunganeki noye mu lombwele, mu ethe oondjila dheni oombwinayi ne mu longe shoka shu uka. Oye mu londodha, mwaa simaneke nokulongela iikalunga yaapagani, opo mu wape okukala mevi ndyoka nde li mu pe noohokulu. Ihe ne inamu pulakena ndje noinamu pupa ndje nando.

¹⁶ Oluvalo lwaJonadab olwa vulika koshipango shahekulu, ihe ne inamu vulika kungame.

¹⁷ Onkee ano ngame, Omuwa Omunankondoawike, Kalunga kaIsrael, tandi undulile Aajuda nAajerusalem ayehe ehanagulo ndyoka ndu uvaneke. Otandi ke shi ninga, oshoka inamu pulakena shoka nde mu lombwele ne inamu itaala, sho nde mu ithana.”

¹⁸ Aarekab onde ya lombwele oohapu ndhika dhOmuwa Omunankondoawike, Kalunga kaIsrael, tadhi ti: “Omwa vulika koshipango shahokulu Jonadab; omwa landula omapukululo ge nomwa gwanitha ayihe mbyoka e mu lombwele.

¹⁹ Onkee ano ngame, Omuwa Omunankondoawike, Kalunga kaIsrael, otandi uvaneke kutya mezimo lyaJonadab yaRekab otamu kala aluhe mu na omutekulu koshipala shandje.”

36

¹ Momumvo omutine Jehoiakim yaJosia sho a li omukwaniilwa gwaJuda, Omuwa okwa lombwele ndje a ti:

² “Kutha ondhinga yembo, u nyolele mo adhihe ndhoka nde ku lombwele kombinga yaIsrael naJuda niigwana ayihe. Nyola adhihe nde dhi ku lombwele okuza ketameko muuyuni waJosia sigo onena.

³ Ngiika Aajuda nge taa uvu ehanagulo alihe ndyoka nda hala oku ya etela, otaa pilamene oondjila dhawo oombwinayi. Ongame note dhimi po uukolokoshi nuulunde wawo.”

⁴ Ondi ithana Baruk yaNerija nonde mu hokololele adhihe ndhoka Omuwa a lombwele ndje. Baruk nokwe dhi nyolele adhihe mondhinga yembo.

⁵ Onda lombwele ihe Baruk nda ti: “Itandi ziminwa we ndi ye motempeli.

⁶ Onda hala u ye mo esiku lyanofu, aantu sho tayi idhilike iikulya. Ya leshela mokule oohapu ndhika dhOmuwa e dhi lombwele ndje, ngaashi nde dhi ku hokololele. Dhi leshela Aajuda ayehe; ayehe mboka taa zi kiilando yawo, oye na oku dhi uva.

⁷ Pamwe taa ka galikana Omuwa notaye etha oondjila dhawo oombwinayi, oshoka Omuwa ota hala okugeela aantu mbaka nondjahi onene nongeyo ye ya hwama.”

⁸ Baruk okwa leshele oohapu dhOmuwa motempeli naanaa ngaashi nde mu lombwele, e shi ninge.

⁹ Momwedhi omutimugoyi gwomumvo omutitano Jehoiakim sho a li omukwaniilwa gwaJuda, Aajerusalem ayehe naantu ayehe mboka ya zi kiilando yaJuda, oya hiywa okwiidhilika iikulya, opo ya geulukithe Omuwa.

¹⁰ Nena Baruk okwe ya leshele motempeli oohapu adhihe ndhoka nde mu lombwele. Osha ningwa moshinyanga shaGemarja, omuna gwamushangampangu Shafan. Oshinyanga she osha li mehale lyopombanda popepi nOsheelo oshipe shotempeli.

¹¹ Mikaia yaGemarja, omutekulu gwaShafan, okwa uvu Baruk ta lesha mondhinga yembo shoka Omuwa a popi.

¹² Okwa yi muuwa moshinyanga shamushangampangu, moka omalenga agehe ga li taga pulakene iihokolola. Amushangampangu Elishama, Delaja yaShemaja, Elnatan lyaAkbor, Gemarja yaShafan, Sedekia yaHanania nomalenga omakwawo omo ga li.

¹³ Mikaia okwe ya lombwele adhihe e dhi uvu dha leshelwa aantu kuBaruk.

¹⁴ Nena omalenga oga tumu Jehudi yaNetania (omutekulu gwaShelemia, omutekulululwa gwaKushi), a ka lombwele Baruk e etelele ondhinga yembo ndjoka a leshele aantu. Baruk okwe ya etele ondhinga yembo.

¹⁵ Oya ti: “Kuutumba u tu leshele wo.” Baruk nokwe shi ningi.

¹⁶ Sho a mana okulesha, oya talathana mehaluko noya ti kuBaruk: “Oohapu ndhoka adhihe otu na oku dhi lombwela omukwaniilwa.”

¹⁷ Oye mu pula ya ti: “Tu lombwela utale, owa nyola ngiini oohapu adhihe ndhika? Owe dhi lombwelwa kuJeremia?”

¹⁸ Baruk okwa yamukula a ti: “Jeremia oye e dhi lombwele ndje adhihe, ongame nonde dhi nyolele nohinga mondhinga yembo ndika.”

¹⁹ Omalenga oga ti kuye: “Indeni mu ka holame ne amuhe naJeremia. Inamu tseyika nando okomuntu mpoka mu li.”

²⁰ Omalenga oga tula ondhinga yembo moshinyanga shamushangampangu Elishama e taga yi koshinyanga shomukwaniilwa, nkoka ye mu hokololele adhihe.

²¹ Omukwaniilwa okwa tumu Jehudi a ka tale ko ondhinga yembo. Okwe yi kutha moshinyanga shaElishama e te yi leshele omukwaniilwa nomalenga agehe ngoka ga li ga thikama ge mu kunduka.

²² Okwa li okufu, nomukwaniilwa okwa li a kuutumba pomulilo gwomakala moshinyanga shokufu.

²³ Jehudi shampa tuu a lesha ko iimpungu itatu nge ine, omukwaniilwa okwe yi lefula ko nokambele e te yi umbile momulilo. Okwa tsikile, sigo ondhinga yembo ayihe ya fikwa po.

²⁴ Ihe kakwa li nando ogumwe a haluka nenge a se oluhodhi, ongele omukwaniilwa mwene nenge omalenga, sho yu uvu adhihe ndhika.

²⁵ Nando Elnatan, Delaja naGemarja ya galikana omukwaniilwa kaa fike po ondhinga yembo, ine ya pulakena nando.

²⁶ Okwa lombwele omuna gwokombanda Jerakmeel, pamwe naSeraia yaAsriel naShelemia yaAbdeel, ya kwate omunyoli Baruk nomuhunganeki Jeremia. Ihe Omuwa okwe tu holeke.

²⁷ Omukwaniilwa Jehoiakim sho a fike po ondhinga yembo ndjoka nda li nda totomonene Baruk, Omuwa okwa lombwele ndje,

²⁸ ndi kuthe ondhinga yembo yilwe nondi nyolele mo oohapu adhihe dha li mondhinga yembo yotango, ndjoka omukwaniilwa gwaJuda Jehoiakim a fike po.

²⁹ Omuwa okwa lombwele ndje, ndi lombwele omukwaniilwa ndi tye: “Owa fike po ondhinga yembo nowa pula Jeremia kutya omolwashike a nyola ta ti, omukwaniilwa gwaBabilonia ote ya nokuhanagula po oshilongo shika nokudhipaga aantu yasho niinamwenyo.

³⁰ Onkee ano ngashingeyi ngame, Omuwa, tandi ku lombwele tandi ti, ngoye omukwaniilwa Jehoiakim ito ka kala u na oluvalo talu lele muukwaniilwa waDavid. Omudhimba gwoye otagu ka ekelwahi gu ka anekwe muupyu womutenya nomuutalala wombambi yuusiku.

³¹ Otandi ke ku geela, oluvalo lwoye nomalenga goye omoluulunde auhe we u ningi. Ngoye mwene, Aajerusalem nAajuda inamu pulakena omalondodho gandje. Onkee otandi mu undulile omupya aguhe nde gu mu sheyele.”

³² Onda kutha ondhinga yembo yilwe e tandi yi pe amushanga gwandje Baruk. Okwa nyolele mo adhihe ndhoka nde mu lombwele. Okwa nyola adhihe ndhoka dha li mondhinga yembo yotango ya fikwa po kuJehoiakim, omukwaniilwa gwaJuda. Omwa gwedhelwa oohapu odhindji dha fa oonkwawo.

37

¹ Nebukadnezzar, omukwaniilwa gwaBabilon, okwa kwaniileke Sedekia yaJosia peha lyaJehoiakin yaJehoiakim.

² Ihe Sedekia, omalenga ge nenge oshigwana inashi vulika koohapu dhOmuwa ndhoka e dhi lombwele ndje.

³ Omukwaniilwa Sedekia okwa tumu Jukal yaShelemia nomuyambi Sefania yaMaaseia, ya indile ndje, ndi galikanene oshigwana shetu kOmuwa Kalunga ketu.

⁴ Onda li inaandi tulwa manga mondjedhililo nonda li tandi vulu okwiinyenga nemanguluko mokati kaantu.

⁵ Etangakwiita lyaBabilonia olya li lya kondeke Jerusalem, ihe sho lya kundana kutya etangakwiita lyaEgipiti olya tokola ongamba yaEgipiti, olye etha ekondeka.

⁶ Nena Omuwa, Kalunga kaIsrael, okwa lombwele ndje,

⁷ ndi ka lombwele Sedekia ndi tye: “Etangakwiita lyaEgipiti oli li mondjila tali ya li mu kwathe, ihe otali ka shuna.

⁸ Aababilonia otaa galuka, otaa ponokele oshilando, otaye shi kwata po e taye shi fike po.

⁹ Ongame, Omuwa, tandi mu londodha, mwaa ifundjaleke mu dhiladhile kutya Aababilonia itaa galuka we, oshoka otaa ke ya.

¹⁰ Nokuli nando mu sinde etangakwiita alihe lyaBabilon, pu hupe oomwahe dhowala dha lala momatsali gadho, otadhi ka penduka po e tadhi fike po oshilando shika.”

¹¹ Etangakwiita lyaBabilonia olya zi po puJerusalem, oshoka etangakwiita lyaEgipiti olya li tali hedha kulyo.

¹² Onda zi muJerusalem, ndi ye koshikandjo shaBenjamin ndi ka taambe uuthiga, oshitendelwa shandje sheyana shomezimo.

¹³ Ihe sho nda thiki posheelo shaBenjamin, omukuluntu gwaalangeli, edhina lye Jirija yaShelemia, omutekulu gwaHanania, okwa kankeke ndje e ta ti: “Ngoye oto iyakele kAababilonia!”

¹⁴ Onda yamukula nda ti: “Hasho sho! Itandi iyaka.” Ihe Jirija ina hala okupulakena ndje. Okwa kwata ndje e ta fala ndje komalenga.

¹⁵ Oga geele ndje noonkondo, oga dhengitha ndje noge edhilile ndje mongulu yamushangampangu Jonatan. Ongulu ye oya li ya shitukithwa ondjedhililo.

¹⁶ Onda tulwa melambo nonda kala mo olule.

¹⁷ Omukwaniilwa Sedekia okwa tumu ihe, ndi ye kuye muuwa, e ta pula ndje ongumitila ta ti: “Inaku za elaka lyasha kOmuwa?” Onda yamukula nda ti: “Okwa za, ngoye oto ka gandjwa miikaha yomukwaniilwa gwaBabilon.”

¹⁸ Onda pula nda ti: “Onda yono ano shike kungoye nenge komalenga goye nenge koshigwana, sho wa tula ndje mondjedhililo?

¹⁹ Aahunganeki yeni mboka ye mu lombwele kutya Aababilonia itaye mu homona, nenge ya homone oshilongo shika, oya ningwa ngiini?

²⁰ Nkeyama, otandi ku galikana, u pulakene ndje ngoye u ninge shoka tandi ku pula nda gwaya evi, ino shuna ndje we maandja Jonatan. Ngele oto shi ningi, otandi ka sila mo shili.”

²¹ Osho ngaaka omukwaniilwa u utha, ndi edhililwe molugumbo lwomalangelo muuwa, nonda li handi pewa oshipambu shoshikwiila esiku kehe sha zi mombeka, sigo iikwiila ayihe ya pu po thilu moshilando.

38

¹ Shefatia yaMattan, Gedalia yaPashhur, Jukal yaShelemia naPashhur yaMalkija oya kundana sho nda li tandi lombwele aantu kutya

² Omuwa okwa ti: “Shaa ngoka ta kala moshilando shika, ota ka dhipagelwa molugodhi nenge ta si kondjala nenge kelega. Ihe shaa ngoka ta piti mo noti igandja kAababilonia, ita ka dhipagwa; ote ki ilikolela omwenyo gwe.”

³ Onda li wo tandi ya lombwele kutya Omuwa okwa ti: “Otandi ka gandja oshilando shika miikaha yetangakwiita lyaBabilon, oyo notaye shi kwata po.”

⁴ Omalenga oga yi komukwaniilwa e taga ti: “Omulumentu nguka oku na okudhipagwa. Mokupopya iinima ya tya ngaaka ota tyololokitha aakwiita moshilando nosho wo aantu ayehe ye li mo. Ita kwatha aantu, ote ya hepeke owala.”

⁵ Omukwaniilwa Sedekia okwa yamukula a ti: “Onawa, mu ningeni ngaashi mwa hala, itandi vulu oku mu keelela.”

⁶ Oya kutha ndje po noya kulukithile ndje noongodhi momuthima gwomuna gwokombanda Malkija, ngoka gwa li kaagu na omeya, enono alike, nonda ningine menono.

⁷ Ihe Omuetiopia Ebedmelek, omuthonwantu ngoka a li ha yakula muuwa, okwe shi uvu kutya oyu umbila ndje momuthima. Pethimbo ndyoka omukwaniilwa okwa li ta pulakene iihokolola posheelo shaBenjamin.

⁸ Ebedmelek okwa yi ko e ta ti komukwaniilwa:

⁹ “Nkeyama, aantu mbaka oya ningi nayi. Oya tula Jeremia momuthima; ota ka sila mo kondjala, oshoka moshilando kamu na we iikulya.”

¹⁰ Omukwaniilwa okwa lombwele Ebedmelek a kuthe aalumentu yatatu, ya hile ndje mo momuthima, manga inaandi sa.

¹¹ Ebedmelek okwa yi naalumentu mboka koompungulo dhuuwa e ta kutha iilapi yimwe ya kulupa, mbyoka a kulukithile ndje yi li koongodhi.

¹² Okwa lombwele ndje, ndi tule iinyanyu mbyoka moonkwapa dhandje, opo oongodhi dhaa ehameke ndje. Onde shi ningi,

¹³ oyo noya hili ndje mo momuthima. Konima yaambika onda kala molugumbo lwomalangelo.

¹⁴ Pethimbo ekwawo omukwaniilwa Sedekia okwi ithanene ndje kuye posheelo oshititatu shotempeli e ta ti: “Otandi ke ku pula epulo, ihe onda hala u lombwele ndje oshililela.”

¹⁵ Onda yamukula nda ti: “Ngele otandi ku lombwele oshililela, oto ka dhipaga ndje, nongele otandi ku tsu omayele, ngoye ito pupu ko nando.”

¹⁶ Omukwaniilwa Sedekia okwa uvanekele ndje ongumitila a ti: “Otandi gana kuKalunga omunamwenyo, Kalunga ngoka e tu pa omwenyo kutya itandi ke ku dhipaga nando nenge ndi ku gandje miikaha yaantu mboka ya hala oku ku dhipaga.”

¹⁷ Onda hokololele Sedekia kutya Omuwa Omunankondoawike, Kalunga kaIsrael, okwa ti: “Ngele oto igandja miikaha yomalenga gomukwaniilwa gwaBabilon, omwenyo gwoye otagu ka hupithwa, noshilando shika itashi ka fikwa po. Amuhe noyaandjeni otamu ka hupithwa.

¹⁸ Ihe ngele ito igandja, oshilando shika otashi ka gandjwa miikaha yAababilonia, notaye ke shi fika po. Nangoye wo ito hunuka mo miikaha yawo.”

¹⁹ Omukwaniilwa okwa yamukula a ti: “Onda tila Aajuda mboka ya yi kAababilonia. Ote ningi ndi gandjwe miikaha yawo notaa ka hepeka ndje.”

²⁰ Onda ti: “Ito ka gandjwa miikaha yawo. Otandi ku galikana, u vulike kelaka lyOmuwa; nena oto kala nawa, nomwenyo gwoye otagu hupithwa.

²¹ Omuwa okwa hololele ndje memoniko shoka tashi ka ningwa, ngele to tindi okwiigandja.

²² Onda mono kutya aakiintu ayehe ya thigala muuwa waJuda, otaa falwa ya ye komalenga gomukwaniilwa gwaBabilon. Pulakena shoka taa ti, sho taa yi: ‘Ookuume komukwaniilwa oye mu pukitha, oye mu gwililile po. Ngashingeyi oompadhi dhe odha ningine menono, ookuume ke oye mu thigi po.’ ”

²³ Onda gwedha ko nda ti: “Aakulukadhi yoye ayehe pamwe naanona otaa ka falwa kuBabilon, nangoye mwene ito ka hunuka mo miikaha yawo. Oto ka kwatwa po onkwatwa komukwaniilwa gwaBabilon, noshilando shika otashi ka fikwa po.”

²⁴ Sedekia okwa yamukula a ti: “Ino yakela ko tuu nando omuntu koonkundathana ndhika; ngele to shi ningi, oto si.

²⁵ Omalenga ngele ge shi uvu kutya otwa kundathana nangoye, otage ke ya notaga pula shoka twa li tatu popi. Otaga ka uvaneka kutya itage ku dhipaga, ngele to ga hokololele adhihe.

²⁶ Ga lombwela kutya owa galikana ndje, ndaaye ku shune we mondjedhililo, u sile mo.”

²⁷ Omalenga oge ya noga pula ndje, nonde ga lombwele naanaa shoka omukwaniilwa a lombwele ndje ndi popye. Kaga li we taga vulu sha shilwe, oshoka kaku na ngoka u uvu oonkundathana dhetu.

²⁸ Onda kala molugumbo lwomalangelo, sigo Jerusalem sha kwatwa po.

39

¹ Momwedhi omutimulongo gwomumvo omutimugoyi Sedekia sho a li omukwaniilwa gwaJuda, Nebukadnezzar, omukwaniilwa gwaBabilon, okwe ya netangakwiita lye alihe e ta ponokele Jerusalem.

² Mesiku etimugoyi lyomwedhi omutine gwomumvo gwaSedekia omutimulongo nagumwe, medhingililokuma lyoshilando omwa tsuwa oombululu.

³ (Jerusalem sho sha kwatwa po, omalenga agehe omanene gomukwaniilwa gwaBabilonia oge ya e taga kala pOsheelo shopokati, mu na Nergal Sareser, Samgar Nebo, Sarsekim naNergal Sareser gulwe.)

⁴ Omukwaniilwa Sedekia naakwiita ye ayehe sho ye shi mono, oya kambadhala ya gwaye mo uusiku ya ye ontuku. Oye ende nondjila tayi uka koshikunino shuuwa, oya pitile mosheelo shi li pokati komadhingililokuma gaali noya yi yu uka lwokesilu lyaJordan.

⁵ Ihe etangakwiita lyaBabilonia olye ya landula e tali kwatele Sedekia polushandja lu li popepi naJeriko. Oye mu fala komukwaniilwa Nebukadnezzar kuRibla moshikandjo Hamat, noko nkoka Nebukadnezzar e mu pangula.

⁶ Okwa dhipagitha aana yaSedekia montaneho yaSedekia, okwa dhipagitha wo omalenga omakuluntu gaJuda.

⁷ Konima yaambika okwa tsipulitha mo omeho gaSedekia e te mu tula momalyenge nokufalwa kuBabilon.

⁸ Aababilonia oya fike po uuwa nomagumbo gaantu noya kumuna po omadhingililokuma gaJerusalem.

⁹ Hugunina Nebusaradan, elenga ekuluntu lyaalangeli, okwa kwata po aantu mboka ya li ya hupile moshilando nokwe ya fala oonkwatwa kuBabilon, pamwe naamboka ya adhikile yi igandja kuye.

¹⁰ Ihe oohepele dhomoshigwana ndhoka dha li dhaa na sha, Nebusaradan okwe dhi thigi muJuda e te dhi pe iitsambe yomiviinu nomapya.

¹¹ Omukwaniilwa Nebukadnezzar okwa lombwele elenga ekuluntu lyaalangeli Nebusaradan a ti:

¹² “Inda u ka konge Jeremia, u mu sile oshimpwiyu. Ino mu ehameka tuu, ihe mu ningila shoka a hala.”

¹³ Nebusaradan, pamwe nomalenga omakuluntu ooNebushashan naNergal Sareser nomalenga galwe gomukwaniilwa gwaBabilon,

¹⁴ oya kutha ndje molugumbo lwomalangelo. Oya tula ndje moshimpwiyu shaGedalia yaAhikam, omutekulu gwaShafan, ngoka a li e na okuthindikila ndje sigo okegumbo. Osho ngaaka nda thigala mokati koshigwana.

¹⁵ Manga nda li molugumbo lwomalangelo, Omuwa okwa lombwele ndje,

¹⁶ ndi lombwele Omuetiopia Ebedmelek kutya Omuwa Omunankondoawike, Kalunga kaIsrael, okwa ti: “Otandi ningi shili ngaashi nda ti, otandi ka hanagula po oshilando shika, itashi kala shi na elago. Ihe shika nge tashi ningwa, oto ke shi tala nkene tashi ningwa.

¹⁷ Ihe ngame, Omuwa, otandi ke ku gamena, noito ka gandjwa miikaha yaantu mboka wa tila.

¹⁸ Otandi ke ku gamena, noito ka dhipagwa nando. Oto ka fadhuka po u na omwenyo, oshoka owi inekela ndje. Ongame, Omuwa, nda popi.”

40

¹ Omuwa okwa popi nangame, sho elenga ekuluntu lyaalangeli Nebusaradan lya mangulula ndje muRama. Onda li nda tulwa momalyenge pamwe naantu mboka ya zile kuJerusalem naJuda, oomboka ya li ye na okufalwa oonkwatwa kuBabilon.

² Elenga ekuluntu olyi ikalekele ndje e tali ti: “Omuwa Kalunga koye okwa uthile ehala ndika oshiponga shika.

³ Ngashingeyi okwa gwanitha shoka a tile ote shi ningi. Ayihe mbika oya ningwa, oshoka aantu yoye oya yono kOmuwa noinaa vulika kuye.

⁴ Ngashingeyi otandi ku kutha omalyenge gomomaako e tandi ku mangulula. Ngele owa hala okuya kuBabilonia pamwe nangame, shi ninga, notandi ke ku sila oshimpwiyu. Ihe ngele ino hala okuya ko, kala po. Oto vulu okuhogolola, noto vulu okuya mpoka wa hala.”

⁵ Manga inaandi yamukula, Nebusaradan okwa ti: “Shuna kuGedalia yaAhikam, omutekulu gwaShafan, ngoka omukwaniilwa gwaBabilonia e mu ningi omuleli gwaJuda. Oto vulu okukala naye, u kale mokati kaantu mbaka, nenge oto vulu okuya shaa mpoka pwe ku opalela.” Okwa pe ndje omagano niikulya, ndi ye nayo, nokwa laleke ndje, ndi ye nondjila yandje.

⁶ Onda yi ndi ka kale puGedalia muMispa mokati kaantu mboka ya thigalele moshilongo.

⁷ Omalenga gamwe omajuda naakwiita mboka inaayi igandja, oya kundana kutya omukwaniilwa gwaBabilonia a langeke Gedalia a ninge omuleli gwoshilongo ye a tonatele ayehe mboka inaa falwa kuBabilon — oohepele dhomoshilongo.

⁸ Ismael yaNetania, Johanan yaKarea, Seraia yaTanhumet, aana yaEfai yokuNetofa naJaazania gwokuMaaka oya yi pamwe naantu yawo kuGedalia kuMispa.

⁹ Gedalia okwa ti kuyo: “Otandi mu lombwele kutya inamu tila mu igandje kAababilonia. Kaleni moshilongo shika, longeleni omukwaniilwa gwaBabilon, notamu kala nawa.

¹⁰ Ngame mwene otandi kala muMispa notandi mu kalele po, uuna Aababilonia naa ke ya huka. Ihe ne otamu vulu okugongela nokupungula omaviinu, iiyimati nomagadhi gooholivi, ne mu kale momikunda mwe dhi lala.”

¹¹ Aaisraeli ayehe mboka ya li muMoab, Ammon, Edom nomiilongo yilwe, oyu uvu kutya omukwaniilwa gwaBabilonia okwa zimine Aajuda yamwe ya kale muJuda nokwa ningi Gedalia omuleli gwawo.

¹² Oya thigi po omahala ngoka ya li ya halakanene mo, e taa shuna kuJuda. Oye ya kuGedalia kuMispa, noya kolo omaviinu nokugongela iiyimati oyindji.

¹³ Konima yaambika Johanan yaKarea naawiliki yaakwiita mboka inaayi igandja, oye ya kuGedalia muMispa

¹⁴ e taa ti kuye: “Ou shi shi tuu kutya Baalis, omukwaniilwa gwaAmmon, okwa tuma Ismael yaNetania e ku dhipage?” Ihe Gedalia ine shi itaala.

¹⁵ Nena Johanan okwe mu lombwele muuwike ta ti: “Etha ndje, ndi ka dhipage Ismael, nokape na ngoka te shi tseya kutya olye e shi ningi. Omolwashike ta zimininwa e ku dhipage po? Shika otashi ka halakanitha Aajuda ayehe mboka ya gongala pungoye, notashi etele aantu ayehe mboka ya hupile muJuda, omupya.”

¹⁶ Ihe Gedalia okwa yamukula a ti: “Ino shi ninga! Oto lundile Ismael.”

41

¹ Momwedhi omutiheyali gwomumvo ngoka Ismael yaNetania, omutekulu gwaElishama, gwomezimo lyaawa, gumwe gwomomalenga omakuluntu, okwa yi kuMispa e na aalumentu omulongo, a ka talele po Gedalia. Manga ya li taa li uulalelo,

² Ismael pamwe naalumentu omulongo oya pweya mo omagongamwele gawo e taa dhipaga Gedalia.

³ Ismael okwa dhipaga Aaisraeli ayehe ya li puGedalia puMispa, osho wo aakwiita Aababilonia mboka ya li po.

⁴ Ongula sho kwa shi, manga aantu kaaye shi po sha,

⁵ aalumentu omilongo hetatu oya thiki ya zi kuShekem, Shilo naSamaria. Oya li ya kulula oombenzi dhawo, ya tuula oonguwo dhawo, yo yi ishata oontsa. Oya li ye na iikulya niitsinino, ya ka yambele motempeli yOmuwa.

⁶ Ismael okwa zi muMispa, e ke ya tsakaneke, te ende ta lili. Sho a thiki kuyo, okwa ti: “Ileni mu tale Gedalia yaAhikam.”

⁷ Nanziya sho ya yi meni lyoshilando, Ismael naantu ye oye ya dhipaga po e taa umbile omidhimba dhawo momuthima.

⁸ Ihe mongundu yawo omwa li aalumentu omulongo, mboka ya lombwele Ismael ya ti: “Ino tu dhipaga. Otu na osiima, iishokelya, omagadhi gooholivi nomagadhi goonyushi ga holekwa momapya.” Onkee okwe ya hupitha ko.

⁹ Momuthima moka Ismael u umbile omidhimba dhaantu mboka a dhipaga, ogwa li omunene gwa hupilwe komukwaniilwa Asa, sho a li a homonwa komukwaniilwa gwaIsrael Baasha. Ismael okwe gu udha omidhimba.

¹⁰ Opo ihe okwa kwata po oonkwatwa aakadhona aana yokombanda noshihupe shaantu mboka ya li muMispa, oomboka Nebusaradan, elenga ekuluntu lyaalangeli, lye ya thigile melelo lyaGedalia yaAhikam. Ismael okwe ya kwata po e tu uka nayo lwokoshilongo Ammon.

¹¹ Johanan yaKarea noondjayi dhiita ndhoka dha li puye, odha kundana iihuna mbyoka Ismael a longo.

¹² Odhe mu landula dhi li naantu yadho e tadhi mu adha petale lyaGibeon.

¹³ Oonkwatwa dhaIsmael sho dha mono Johanan noondjayi adhihe dhi li puye, oya nyanyukwa

¹⁴ noya galuka e taa matukile kudho.

¹⁵ Ihe Ismael naalumentu ye yahetatu oya fadhuka po Johanan e taa ka holama mevi lyaAmmon.

¹⁶ Johanan noondjayi dhiita odha kutha aantu mboka ya li ya kwatwa po kuIsmael, sho a dhipaga po Gedalia — aakwiita, aakulukadhi, aanona naathonwantu.

¹⁷ Oya li ya tila Aababilonia, oshoka Ismael okwa dhipaga Gedalia, ngoka omukwaniilwa gwaBabilonia e mu langeke omuleli gwoshilongo. Onkee oya dhiladhila okutembukila kuEgipiti, ya ka holame Aababilonia. Mondjila oya kankama puGerut-Kimham popepi naBetlehem.

42

¹ Oondjayi dhiita adhihe, mwa kwatelelwa Johanan yaKarea naAzaria yaHeshaia, odhe ya naantu ayehe okuza kaanona sigo aakuluntu

² e taa lombwele ndje taa ti: “Tu kwatha u tu ningile shoka tatu ku pula! Tu galikanena kOmuwa Kalunga ketu. Tu galikanena atuhe twa hupu ko. Otwa li oyendji, ihe ngashingeyi otse aashona yowala, ngaashi u shi wete.

³ Tu galikanena, opo Omuwa Kalunga ketu e tu ulukile ondjila tu na okweenda nayo naashoka tu na okuninga.”

⁴ Onda yamukula nda ti: “Eewa, onawa! Otandi galikana Omuwa Kalunga ketu, naanaa ngaashi mwe shi pula, noshaa shoka ta ti, otandi shi mu lombwele. Itandi ke mu holeka nando osha.”

⁵ Oya ti kungame: “Omuwa oye na ninge onzapo yetu yashili noyi shi kwiinekelwa, ngele itatu ka vulika koohapu adhihe ndhoka Omuwa Kalunga ketu te dhi tu tumine.

⁶ Ngele otadhi tu opalele nenge aawe, otatu ka vulika kOmuwa Kalunga ketu, kungoka tatu indile, u tu galikanene. Otatu ka kala nawa, ngele otatu vulika kuye.”

⁷ Sho pwa piti omasiku omulongo, Omuwa okwa lombwele ndje,

⁸ ndi ithane Johanan noondjayi adhihe dhiita ndhoka dha li puye, dhi gongale naantu ayehe.

⁹ Onde ya lombwele nda ti: “Omuwa, Kalunga kaIsrael, ngoka mwa tumine ndje kuye, ndi mu pule, okwa ti:

¹⁰ ‘Ngele otamu kala mevi ndika, otandi ke mu tungulula po noitandi mu kumuna po. Otandi ke mu tsika, itandi mu tudha mo. Ehanagulo ndyoka nde li mu undulile, olya sitha ndje oluhodhi.

¹¹ Etheni okutila omukwaniilwa gwaBabilon. Ondi li pamwe nane, notandi mu mangulula miikaha ye.

¹² Oshoka ngame omunamutimahenda, otandi mu longo oku mu sila ohenda, e mu pitikile okushuna komagumbo. Ongame, Omuwa, nda popi.’

¹³ “Ihe aantu ne mboka mwa thigalele muJuda, omu na okuvulika kOmuwa Kalunga keni. Inamu tinda okukala mevi ndika. Inamu tya: ‘Aawe, otatu yi tu ka kale muEgipiti, moka itatu ka tsakaneka we iita nenge tu uve onkugo yolugodhi nenge tu se po kondjala.’ Ngele otamu popi ngaaka, nena Omuwa Omunankondoawike, Kalunga kaIsrael, ota ti: ‘Ngele otamu tokola oku ka kala muEgipiti,

¹⁴

¹⁵

¹⁶ nena iita tuu mbyoka mwe yi tila, otayi ke mu adha ko, nondjala ndjoka ye mu mbandameke, otayi mu landulile ko, notamu ka sila kuEgipiti.

¹⁷ Aantu ayehe mboka taa tokola oku ka kala muEgipiti, otaa ka sa kiita nenge kondjala nenge kelega. Kape na nando ogumwe ta ka hupa ko, kape na nando ogumwe ta ka hunuka koshiponga shoka tandi shi ya undulile.’

¹⁸ “Omuwa, Kalunga kaIsrael, ota ti: ‘Ngashika naanaa ongeyo nuupyundjahi wandje wa tilililwe Aajerusalem, osho ongeyo yandje tayi ka tililwa mune, ngele otamu yi kuEgipiti. Otamu ka ninga ehalutho; aantu otaye ke mu dhina notaa tumbula edhina lyeni, nge taa tukana. Ehala ndika itamu ke li mona we.’ ”

¹⁹ Onda tsikile ko nda ti: “Omuwa okwe mu lombwele, ne aantu mboka mwa hupile muJuda, mwaa ye kuEgipiti. Onkee tandi mu londodha ngashingeyi

²⁰ kutya ne otamu ningi epuko enene. One mwi indile ndje, ndi mu galikanene kOmuwa Kalunga keni, nomwa uvaneke kutya otamu ka ninga ashihe shoka te mu lombwele.

²¹ Ngashingeyi onde mu lombwele, ihe ne otamu ekelehi ayihe mbyoka Omuwa Kalunga keni a tumu ndje, ndi yi mu lombwele.

²² Kaleni ano mu shi shi kutya otamu ka sila miita nenge mu se po kondjala nenge kelega moshilongo tuu shoka mwa hala mu ka kale mo.”

43

¹ Onda hulitha okulombwela aantu adhihe ndhoka Omuwa Kalunga kawo e dhi lombwele ndje, ndi dhi ya lombwele.

² Nena Azaria yaHoshaia naJohanan yaKarea naanamwiityo ayehe oya lombwele ndje ya ti: “Oto fundju. Omuwa Kalunga ketu ine ku tuma, u tu lombwele, kaatu ye kuEgipiti.

³ Baruk yaNerija okwe ku tsu omaminimini, u tse ondumbo natse, opo Aababilonia ye tu gwililile po noku tu dhipaga nenge ye tu fale kuBabilon.”

⁴ Osho Johanan, oondjayi dhiita naantu ayehe inaa hala okuvulika kelombwelo lyOmuwa, ya kale moshilongo shaJuda.

⁵ Johanan noondjayi dhiita adhihe odha kutha po aantu ayehe ya hupile muJuda e taye ya fala kuEgipiti, pamwe naantu ayehe mboka ya galukile ya zi kiigwana mbyoka ya halakanithilwa ko:

⁶ Aalumentu, aakiintu, aanona naakadhona aana yokombanda. Oya kutha ayehe mboka Nebusaradan, elenga ekuluntu lyaalangeli, e ya thigile Gedalia sigo oBaruk nangame.

⁷ Oya yi kuEgipiti, oshoka inaa vulika koohapu dhOmuwa, noya yi sigololo oTakpanhes.

⁸ Oko hoka Omuwa a lombwele ndje a ti:

⁹ “Gongela omamanya omanene, u ga tule momunoko mokati koondhopi dhi li mepandaanda peelo lyuuwa muTakpanhes, nAaisraeli yamwe naa tale sho to ningi.

¹⁰ Ya lombwela kutya Omuwa, Kalunga kaIsrael, ota ti: ‘Otandi ka tuma omupiya gwandje Nebukadnezzar, omukwaniilwa gwaBabilon, notandi ka tula oshipangelapundi she kombanda yomamanya ngoka nda tula mo. Ota ka yala kombanda yago ongwaya ye yuukwaniilwa.

¹¹ Nebukadnezzar ote ke ya e ta dhenge Egipiti. Aantu mboka yu uthilwa okusa kelega, otaa ka sa kelega, mboka yu uthilwa okukwatwa po, otaa ka kwatwa po, ya ninge aapongekwa, naamboka yu uthilwa okusila miita, otaa ka sila miita.

¹² Ootempeli dhiikalunga yaEgipiti otandi dhi tomeke omulilo, nomukwaniilwa gwaBabilonia ota ka fika po iikalunga yawo nenge e yi humbate po. Ngashika omusita ta tombola oongupa moonguwo dhe, osho omukwaniilwa gwaBabilon ta tombola iilyani muEgipiti e ta zi ko ondjolowele.

¹³ Ota ka hanagula po oongudhimanya dhiidhila muHeliopolis nomuEgipiti nokulungunitha po ootempeli dhiikalunga yAayegipiti.’ ”

44

¹ Omuwa okwa lombwele ndje kombinga yAaisraeli ayehe ya li muEgipiti, miilando Migdol, Takpanhes naMemfis nomuumbugantu woshilongo.

² Omuwa Omunankondoawike, Kalunga kaIsrael, okwa ti: “Ne yene omwa monene ehanagulo ndiyaka ndu undulile Jerusalem niilando yaJuda ayihe. Ngashingeyi oyi li momakulukuma natango, nokape na ngoka e li mo,

³ oshoka aantu yamo oya longo uuwinayi noya geyitha ndje. Oya yambele iikalunga omafikilondjambo e taa simaneke iikalunga mbyoka oohekulu nenge yo yene inaaye yi longela.

⁴ Okuza konale onda dhiginine oku mu tumina aapiya yandje aahunganeki, mboka ye mu lombwele, mwaa ninge iihuna yi thike mpaka handi yi tondo.

⁵ Ihe ne inamu pulakena nenge mu pupe ko nando. Inamu etha nando uuwinayi weni wokuyambela iikalunga omafikilondjambo.

⁶ Onkee onda poolele iilando yaJuda nomapandaanda gaJerusalem ongeyo nuupyundjahi wandje noku yi tomeka omulilo. Oya ningi omakulukuma niihaluthi, ngaashi yi li ngashingeyi.

⁷ “Onkee ano ngame, Omuwa Omunankondoawike, Kalunga kaIsrael, otandi mu pula ngashingeyi kutya omolwashike tamu iyetele omukundu gu thike mpoka? Omwa hala mu etele aantu ayehe oshiponga shi ye kaalumentu, kaakiintu, kaagundjuka nokuuhanona, opo kaaku hupe nando ogumwe gwomune?

⁸ Omolwashike tamu geyitha ndje, sho tamu longele iimenka notamu yambele iikalunga muEgipiti, moka mwa tembukile? Otamu shi ningi, opo mu iyone po, opo oshigwana kehe kombanda yevi shi mu dhine nokutumbula edhina lyeni, nge tashi tukana?

⁹ Mwa dhimbwa nale iilonga yuukolokoshi ya ningwa miilando yaJuda nomomapandaanda gaJerusalem koohokulu, kaakwaniilwa yaJuda naanyekadhi yawo, nokune naakiintu yeni?

¹⁰ Ihe sigo onena inamu ifupipika. Inamu simaneka ndje nenge mu kale paipango yandje mbyoka nde yi mu pe, one noohokulu.

¹¹ “Onkee ano ngame, Omuwa Omunankondoawike, Kalunga kaIsrael, otandi mu galukile notandi ka hanagula po Juda ashihe.

¹² Otandi ka nakula po oshihupe ashihe shAajuda mboka ya tokola oku ka tula muEgipiti. Ayehe otaa ka hanagulwa po. Oyo ayehe, aanene naashona, otaa ka sila miita nenge mondjala. Otaa ka ninga ehalutho; aantu otaa ke ya dhina nokutumbula edhina lyawo, nge taa tukana.

¹³ Otandi ka geela mboka ya kala muEgipiti, ngaashi nda geele Jerusalem — niita, ondjala nelega.

¹⁴ Kape na nando ogumwe gwomAajuda mboka ya yile kuEgipiti, ta ka hunuka po nenge a hupe ko. Kape na nando ogumwe gwomuyo ta ka shuna we kuJuda, kevi lyondjuulukwe yawo, a ka kale ko, shila oontauki dhimwe po.”

¹⁵ Aalumentu ayehe mboka ya li ye shi kutya aakadhi oya yambele iikalunga, naakulukadhi ayehe mboka ya li ya thikama mpoka onyankanyanka, pamwe nAaisraeli ayehe mboka ya kala muumbugantu waEgipiti, oya lombwele ndje ya ti:

¹⁶ “Otatu tindi okupulakena shoka we tu lombwele medhina lyOmuwa.

¹⁷ Otatu ka ninga ashihe shoka twa ti, otatu shi ningi. Otatu ka yambela oshikalunga oshikiintu shetu, omunyekadhi gwokegulu, iitsinino notatu mu tilile oondjambo dhomaviinu, ngaashi naanaa tse nootatekulu naakwaniilwa yetu nomalenga getu ya li haa ningi momikunda dhaJuda nomomapandaanda gaJerusalem. Otwa kala tu na eloolo lyiikulya nelago, katu na ombudhi yasha.

¹⁸ Ihe sho twe etha okusaagelela omunyekadhi gwokegulu noku mu tilila oondjambo dhomaviinu, inatu mona we sha, naantu yetu oya sile miita nomondjala.”

¹⁹ Aakulukadhi oya gwedha ko taa ti: “Sho twa telekele omunyekadhi gwokegulu iikwiila ya mbumbingwa ye mu fa notwe mu tilile oondjambo dhomaviinu, aalumentu yetu oya li ye shi tseya.”

²⁰ Onda lombwele aalumentu naakiintu ayehe mboka ya yamukula ndje pahedhi ndjika nda ti:

²¹ “Omuwa ina dhimbulukwa ando a dhiladhile olwithi lwiitsinino mbyoka mwe yi fikile momikunda dhaJuda nomomapandaanda gaJerusalem, ne noohokulu, aakwaniilwa yeni, omalenga geni naantu yomoshilongo?

²² Ngashingeyi evi lyeni oli li momakulukuma kaamu na omuntu. Olya ningi ehaluthi, naantu otaa tumbula edhina lyalyo, nge taa tukana, oshoka Omuwa ina vula we okwiidhidhimikila iilonga yeni iiwinayi noyuukolokoshi u thike mpoka.

²³ Oshiponga shika oshe mu adha, oshoka omwa yambele iikalunga omafikilondjambo e tamu yono kOmuwa, sho inaamu vulika kiipango, komalombwelo nokomautho ge.”

²⁴ Onda lombwele aantu ayehe, unene aakulukadhi, shoka Omuwa Omunankondoawike, Kalunga kaIsrael, a li ta lombwele Aajuda mboka ye li muEgipiti. Onda ti: “Ne amuhe naakiintu yeni omwa uvanekele omunyekadhi gwokegulu omauvaneko. Omwa uvaneke mu mu yambele omafikilondjambo noku mu tilila oondjambo dhomaviinu, nomwa dhiginine omauvaneko geni. Eewa ano! Dhiginineni utale omauvaneko geni! Gwanitheni egano lyeni!

²⁵

²⁶ Ihe pulakeneni wo kegano ndyoka ngame, Omuwa, nde li ganene Aaisraeli ayehe muEgipiti medhina lyandje lyoonkondo. Itandi ka etha we tuu nande omuntu a gane medhina lyandje ta ti: ‘Otandi gana kuKalunga omunamwenyo!’

²⁷ Otandi ke shi tonatela, mwaa kale mu na elago, ihe otamu ka hanagulwa po. Amuhe otamu ka sa, ngele kiita nenge kelega, sigo mwa pu po thilu.

²⁸ Aashona yowala yomune taa ka hupa ko keso notaa ka za muEgipiti taa yi kuJuda. Nena oshihupe shomune otashi ka tseya kutya oohapu dhaguni po dha tsu, odhandje nenge odheni.

²⁹ Ongame, Omuwa, tandi ke mu pa eyeleko kutya otandi ke mu geela mehala ndika, nokutya euvaneko lyandje lyoku mu etela oshiponga otali ka gwanithwa.

³⁰ Hofra, omukwaniilwa gwaEgipiti, otandi ke mu gandja miikaha yaatondi ye mboka ya hala oku mu dhipaga, naanaa ngaashi nda gandja Sedekia, omukwaniilwa gwaJuda, miikaha yaNebukadnezzar, omukwaniilwa gwaBabilon, omutondi gwe nokwa hala oku mu dhipaga.”

45

¹ Momumvo omutine sho Jehoiakim yaJosia a li omukwaniilwa gwaJuda, Baruk yaNerija okwa nyola oohapu ndhoka nde dhi mu totomonene. Onde mu lombwele nda ti

² kutya Omuwa, Kalunga kaIsrael, okwa ti: “Baruk,

³ oto ti: ‘Yaye ngame, Omuwa okwa gwedhele ndje ko uuwehame koluhodhi lwandje. Onda vulwa ketongo noite mono evululuko!’

⁴ “Ihe ngame, Omuwa, otandi ka kumuna po shoka nda tungu, notandi ka tudha mo shoka nda tsike. Shika otandi ke shi ninga noshilongo ashihe.

⁵ Oto ikongele iinima iinene? Ino yi konga. Oshoka otandi ka undulila aantu ayehe oshiponga, ihe ngoye oto ka hunuka mo, oto kala u na omwenyo, shaa mpoka to yi. Ongame, Omuwa, nda popi.”

46

¹ Omuwa okwa lombwele ndje ehunganeko tali popi iigwana.

² Momumvo omutine gwelelo lyaJehoiakim yaJosia, omukwaniilwa gwaJuda, Nebukadnezzar, omukwaniilwa gwaBabilon, okwa dhengele etangakwiita lyaNeko, omukwaniilwa gwaEgipiti, muKarkemish pomulonga Eufrat. Kombinga yetangakwiita ndika Omuwa okwa ti:

³ “Omalenga gaEgipiti taga kugu: ‘Homateni omahuuyanza geni, tondokeni onkugo!

⁴ Kutileni uukambe weni, mu u kayile! Thikameni mwa tegama mwa zala omagala giiyela! Upikeni omagonga! Zaleni omahuuyanza!’ ”

⁵ “Ondi wete shike?” Omuwa ta pula. “Otaa shuna mehaluko. Aakwiita yawo otaa shunithwa ko; oya kwatwa kuumbanda, oya yi ontuku yo itaa tala konima.

⁶ Aanandapolela itaa hunuka mo; aakwiita itaa vulu okufadhuka po. Muumbangalantu waEufrat otaa tantala e taa punduka.

⁷ Olye ngo ta tumbu ko a fa Niili, a fa omulongafundja gwa tsa koontuni?

⁸ OEgipiti a tumba a fa Niili, a fa omulongafundja gwa tsa koontuni. Egipiti a ti: ‘Otandi yeluka, ndi siikile uuyuni; tandi hanagula po iilando naantu ya kala mo.

⁹ Uukambe, homoneni; aanamatemba, mu ngangalale! Undukeni, ne aakwiita mboka mwa za kuEtiopia naPut mu na omahuuyanza, noondjumbeta mwa yambuka muLud.’ ”

¹⁰ Esiku ndika olyOmupangeliawike Omuwa Omunankondoawike; onena tuu ta polithile ondjahi ye maatondi ye, onenanena te ya geele. Egongamwele lye otali ka kuta notali ka kumwa okunwa ombinzi yawo. Omuwa ota tsele oontselelandjambo muumbangalantu puEufrat.

¹¹ Aayegipiti, indeni kuGilead; indii ko mu ka konge omuti! Omiti dheni adhihe odha tutuka, kadhi na omwago oku mu aludha.

¹² Iigwana oya kundana ohoni yeni; shaa ngoka okwa uvu tamu kugu. Omukwiita ota londakana mukwawo, naayehe yaali otaa gwile pevi ongali.

¹³ Omuwa okwa tseyithile ndje, nkene Nebukadnezzar, omukwaniilwa gwaBabilon, ta ka dhenga Egipiti. Okwa ti:

¹⁴ “Tseyitheni miilando yaEgipiti, muMigdol, Memfis naTakpanhes. Tyeni: ‘Langeleni komatati mu ipopile; amuhe tamu ka hanagulwa po miita.

¹⁵ Oshikalungangombe shoye Apis oshike sha gwila po? Inashi wapa okuthikama, oshoka Omuwa e shi hata pevi.’

¹⁶ Aakwiita yoye oya tantala noya gwile pevi omulape. Gumwe ota ti kumukwawo: ‘Thikama, tu ye koyaandjetu, tu henuke egongamwele lyomutondi.’

¹⁷ “Omukwaniilwa gwaEgipiti na lukululwe edhina epe — ‘Munalwango a mana po ethimbo lye.’

¹⁸ Ongame Omuwa Omunankondoawike, Omukwaniilwa, ongame Kalunga Omunamwenyo, ngoka te ku homona, a fa ondundu Tabor ya lundalala mokati koondundu, a fa ondundu Karmel ya tumbalala kombanda yefuta.

¹⁹ Ilongekidhileni okukwatwa po, ne Aayegipiti! Memfis otashi shituka ombuga, omakulukuma gowala mwaa na aantu.

²⁰ Egipiti olya fa onzinzi yoshawo oshinene, ya kolokelwa komatopola gokuumbangalantu.

²¹ Aakwiita yalyo aahehelwa oya fa oompunya. Otaa ka piluka ya ye ontuku, itaa tegama ya kondje, oshoka esiku lyehanagulo lyawo olye ya, esiku lyegeelo lyawo lya thiki.

²² Egipiti olya yele po, otali homa lya fa epili, aakwiita yomutondi sho taa hedha ko. Otaye li homona nomakuya ya fa aantu taa keke po omuti

²³ e taa mbugaleke omugulu omunene. Aantu yawo ya nyengana okuyalulwa; aakwiita yawo oyendji ye vule oombahu.

²⁴ Aayegipiti otaa sithwa ohoni; otaa sindika kaaumbangalantu. Ongame, Omuwa, nda popi.”

²⁵ Omuwa, Omunankondoawike, Kalunga kaIsrael, ota ti: “Otandi geele Ammon, oshikalunga shomuThebes, pamwe naEgipiti, iikalunga yalyo naakwaniilwa yalyo. Otandi ka kutha po omukwaniilwa gwaEgipiti naayehe mboka ye mu inekela,

²⁶ noku ya gandja kumboka ya hala oku ya dhipaga, komukwaniilwa gwaBabilonia Nebukadnezzar netangakwiita lye. Ihe konakuyiwa aantu onaa ka kala ishewe muEgipiti, ngaashi ya li ya kala mo nale. Ongame, Omuwa, nda popi.”

²⁷ “Omuntu gwandje Jakob, ino tila, Israel, ino haluka. Otandi ke ku yugulula ko koshilongo shokokule, kevi ndyoka wa falwa ko omupongekwa. Oto ka galukila kegumbo e to kala nombili; oto ka kala megameno, nopwaa na ngoka te ku halutha.

²⁸ Otandi ya kungoye, ndi ku hupithe. Otandi ka hanagula po iigwana ayihe nkoka nde ku halakanithile ko. Itandi ke ku yona po, ihe otandi ku putudha nuuyuuki. Ongame, Omuwa, nda popi.”

47

¹ Omukwaniilwa gwaEgipiti manga inaa matukila Gaza, Omuwa okwa lombwele ndje ehunganeko tali popi Filistia.

² Okwa ti: “Tala! Omeya otaga fuluka muumbangalantu notaga kunguluka ga fa omulonga gwefundja. Otaga siikile evi naashihe shi li mo, iilando naantu mboka ye li mo. Aantu otaa ka kuga onkugo; shaa ngoka kombanda yevi ota ka lila omahodhi omapyu.

³ Otaa ka uva elapato lyuukambe, embolongondjo lyomatemba nekolokoto lyomagulu gago. Oohe itaa ka galukila koyana, ye ya kwathe; omaako gawo oga gonwa.

⁴ Ethimbo olya thikana okuhanagula po Filistia, okuteta Tiro naSidon komakwatho agehe ga hupu ko. Ongame, Omuwa, tandi ka hanagula po Aafilisti, ayehe mboka ya zi kominkulo dhaKreta.

⁵ Oluhodhi olunene olwa kwata Aagaza, Aayashkelon oya tya tuu thilu. Oshihupe shAfilisti tashi lili sigo uunake?

⁶ Ngoye egongamwele lyOmuwa! Uunake to ki ilongelela? Shuna mo molumpangwa lwoye, lotela wa tya tuu thilu.

⁷ Ndele otali mwena ngiini, sho nde li pe oshipango? Onde li lombwele, li ponokele Ashkelon naamboka ya kala komukunkulo gwefuta.”

48

¹ Omuwa Omunankondoawike ota popi Moab ta ti: “Yaye Aanebo, oshilando shawo otashi hanagulwa po! Kirjatajim otashi kwatwa po, epopilongulu lyasho otali kumunwa po, naantu yasho otaa sithwa ohoni.

² Eadhimo lyaMoab otali hulu po. MuHeshbon otaa pangele okuhanagula po Moab. Nangoye Madmen, oto mwenekwa, omatangakwiita otage ku matukile.

³ Aahoronajim otaa kugu: ‘Oshiponga! Oshiponga!’

⁴ “Moab osha teka po; pulakeneni, aanona otaa lili.

⁵ Uveni omahekumuno gawo mondjila yu uka kuLuhit, oonkugo dhiiponga mondjila yu uka kuHoronajim.

⁶ Otaa ti: ‘Fadhukii po, mu ka holame. Kwinyoleni mwa fa oongolo mombuga!’

⁷ “Moab, owi inekela oonkondo nuuyamba woye, ihe ono sindika; kalunga koye Kemosh ota yi muupongekwa, pamwe nomalenga naayambi.

⁸ Kape na oshilando tashi yanda ehanagulo; esilu nolushandja otalu ka hanagulwa po. Ongame, Omuwa, nda popi.

⁹ Dhikeni emanyambila lyaMoab, otashi ka hanagulwa po mbala. Iilando yasho otayi kumunwa po, nokwaa na we ngoka ta kala mo.”

¹⁰ (Ngoka ta tonyala mokulongela Omuwa, na tulwe omutima! Na thingwe ngoka ta ngungunine egongamwele lye lyaa tilehi ombinzi!)

¹¹ Omuwa okwa ti: “Moab okwa kala aluhe megameno, noina falwa muupongekwa. Moab okwa fa omaviinu gi ilongelela inaaga pimpwa mo moshiyuma, ga tulwe moshiyuma oshikwawo. Omulyo gwago inagu lunduluka, notaga shata nawa ge vule agehe.

¹² “Onkee ano esiku otali ya, uuna tandi ka tuma aantu taa ka tilahi Moab a fa omaviinu. Otaa ka mana okutilahi omaviinu agehe miiyuma notaye yi tatula po.

¹³ Nena Aamoabi otaa ka sithwa ohoni pamwe nakalunga kawo Kemosh, naanaa ngaashi Aaisraeli ya li ya sithwa ohoni omolwokwiinekela ontsezi yoshingoli kuBetel, oshikalunga shoka ya li yi inekela.

¹⁴ “Aalumentu ne Aamoabi, oshike tamu iti oofule? Omwe shi mona molugodhi?

¹⁵ Moab ota hanagulwa po, iilando ye otayi matukilwa. Aagundjuka ye yo opala otaa dhipagwa po. Ongame omukwaniilwa, Omuwa Omunankondoawike, nongame tuu ngoka nda popi,

¹⁶ Epangulo lyaMoab otali hedha ko; ekumukopo lye otali endelele.

¹⁷ “Ne mboka aashiinda, lileni oshigwana shika, amuhe mboka mwa tseya esimano lyasho. Tyeni: ‘Epangelo lyasho lya kola olya teka po; kashi na we esimano noonkondo.’

¹⁸ One mboka mwa kala muDibon, zii ko komahala geni gesimano, mu kuutumbe mevi montsi; omuteyipo gwaMoab oye nguka, a kumune po oonguluhote dhoye.

¹⁹ Ne mboka mwa kala muAroer, thikameni mepola mu tegelele; puleni aafadhukipo, moneni utale shoka sha ningwa mo.

²⁰ ‘Moab okwa teka po,’ osho taa yamukula, ‘mu lileni, okwa sithwa ohoni. Uvitheni pomulonga Arnon kutya Moab okwa teka po.’

²¹ “Epangulo olya thiki kiilando yoketumbalovi: Holon, Jahsa, Mefaat.

²² Dibon, Nebo, Bet Diblataim,

²³ Kiriataim, Betgamul, Betmeon,

²⁴ Keriot naBozra. Epangulo olya thiki kiilando ayihe yaMoab, kokule nopopepi.

²⁵ Oonkondo dhaMoab odha teka po; omatha ge oga kana po. Ongame, Omuwa, nda popi.”

²⁶ Omuwa okwa ti: “Kolitheni Moab, oshoka okwa tsu ondumbo nangame. Moab ota ka galangata monkungo ye mwene, naantu otaye ke mu yola.

²⁷ Moab, oto dhimbulukwa tuu, sho wa ningi Aaisraeli oshipwedhela? Owe ya nyonkele ya fa aantu ya kwatelwa mongundu yaafuthi.

²⁸ “Aantu ne mwa kala muMoab, thigii po iilando yeni. Indeni mu ka kale komatayimanya! Feni onguti tayi yala oshihandhila shayo pooha dhekolombongo.

²⁹ Moab oku na uuntsa wa pitilila. Ondu uvu, nkene aantu ye ye na omwiityo, uuntseyele, oshilundo noshiikwatelo.

³⁰ Ngame, Omuwa, onda tseya elunduko lyawo. Einomo lyawo itali eta sha, naashoka taa longo itashi kalelele.

³¹ Omolwashoka tandi lili Aamoabi ayehe nondi na oluhodhi omolwaantu yokuKir Heres.

³² Otandi lili Aasibma unene shi vule Aajaser. Oshilando Sibma, owa fa omuviinu gu na iitayi ya taakana Efuta lya sa tayi ifala sigo oJaser. Ihe iiyimati yoye yothinge nomandjembele goye oga hanagulwa po.

³³ Elago nenyanyu olya kuthwa mevi lyo ondoka lyaMoab. Onda mweneke ekunguluko lyomaviinu komatemba gokukolela. Kaku na we ngoka ta kolo omaviinu ti imbi ye ta kugilile kenyanyu.

³⁴ “Aantu yomuHeshbon naElale otaa kugu, nonkugo yawo otayi uvika sigo okuJahas; otayi uvika kaantu yomuZoar, notayi uvika sigo okuHoronajim naEglat Shelishia. Okalonga Nimrim otaka pwine.

³⁵ Aamoabi otandi ke ya mweneka okuyamba omafikilondjambo pomahala gawo giinonoma nokokuyambela iikalunga yawo oontselelandjambo. Ongame, Omuwa, nda popi.

³⁶ “Omwenyo gwandje otagu lili Moab naantu yomuKir Heres gwa fa ohiya tayi hikwa, oshoka omaliko gawo ga yiwa nago.

³⁷ Oyo ayehe ya kulula omitse noombenzi dhawo. Oyi ishata komaako noya zala omahahi.

³⁸ Koontala dhomagumbo agehe nomomahalandjandja gaMoab omu na elilagano alike, oshoka onda tatula po Moab ongoshiyuma inaashi halika we.

³⁹ Moab a tatuka po! Lileni oosa! Moab a sithwa ohoni! Moab a ningwa oshipwedhela noshihaluthi shaashiinda ye ayehe. Ongame, Omuwa, nda popi.”

⁴⁰ Omuwa ota ti: “Tala, oku na sha sha fa ekodhi lya yalaleka omawawa galyo, tali tuka tali ukilile kuMoab.

⁴¹ Iilando nomapopilongulu otaga kwatwa po. Esiku ndyoka aakwiita yaMoab otaa ka haluka ya fa omukulukadhi ta thetwa.

⁴² Moab ota ka hanagulwa po, noita ka ninga we oshigwana, oshoka okwa tsu ondumbo nangame.

⁴³ Omahalutho, omakelo noomwigo otadhi mu tegelele, ne Aamoabi. Omuwa oye a popi.

⁴⁴ Ngoka ta kambadhala okufadhuka po ehalutho, ota gwile mekelo, naangoka ta zi mo mekelo, ota ka yulwa komwigo, oshoka otandi etele Moab ethimbo lyehanagulo.

⁴⁵ Oontauki dhaa na ekwatho, otadhi kambadhala okumona egameno muHeshbon, oshilando shonale shomukwaniilwa Sihon, ihe oshi li momalaka gomulilo. Omulilo gwa yaka kooha dhoshilongo nokoondundu dhaMoab e hole iita.

⁴⁶ Akwetse Moab! Aantu mboka ya simaneke Kemosh, oya hanagulwa po, noyana aamati naakadhona oya yiwa nayo oonkwatwa.

⁴⁷ Ihe momasiku tage ke ya otandi ka hepulutha ishewe Moab.” Oohapu dhepangulo lyaMoab otadhi hulile mpaka.

49

¹ Omuwa okwa popi Ammon ta ti: “Aalumentu Aaisraeli oye li peni? Kaku na nando ogumwe a popile evi lyawo? Omolwashike ye etha aalongeli yaMilkom taa kwata po oshikandjo shezimo lyaGad e taa kala mo?

² Ihe esiku otali ya, uuna aantu yomoshilandopangelo Rabba tandi ke ya uvitha onkugo yolugodhi, notashi ka kumunwa po, nomikunda dhasho otadhi ka lunguna po. Nena Israel ota ka kuthulula ko evi lye kumboka ye li kuthile po.

³ Heshbon, takuma, oshoka Ai osha hanagulwa po. Aakiintu yomuRabba, lileni oosa. Zaleni omahahi ne mu lile. Pwampwaukeni pokati komakulukuma. Kalunga keni Milkom ota falwa muupika pamwe naayambi nomalenga ge.

⁴ Aahasha ne, otamu itangele shike? Oonkondo dheni odha kwisha. Oshike mwi inekela oonkondo dheni notamu ti, kaku na ngoka te mu itakeke?

⁵ Otandi ke mu undulila ehaluko tali zi koombinga adhihe. Amuhe otamu ka ya ontuku. Shaa ngoka ota ka holeka omwenyo gwe mwene, nokape na we ngoka ta ka gongela ishewe omatanga.

⁶ “Ihe konakuyiwa otandi ka hepulutha Ammon ishewe. Ongame, Omuwa, nda popi.”

⁷ Omuwa Omunankondoawike okwa popi Edom ta ti: “Aaedom oya kanitha tuu oondunge dhawo? Aagandjindunge yawo itaye ya tsu we omayele mushoka taa ningi? Uunongo wawo auhe owa kana?

⁸ Aadedan, pilukeni mu matuke! Ka holameni! Otandi ka hanagula po oluvalo lwaEsau, oshoka ethimbo olya thiki, ndi ya geele.

⁹ Aatononi yomandjembele ohaa thigi ko omakukila komiviinu, aafuthi uusiku ohaa kutha po ashike shoka ye shi hala.

¹⁰ Ihe oluvalo lwaEsau otandi ke lu hula thiluthilu noku lu tula pontundulu, noitalu vulu we okuholama. Aaedom ayehe otaa ka yonagulwa po. Kape na ngoka ta hupu ko.

¹¹ Thigilii ndje oothigwa dheni, notandi ke dhi tekula; aaselekadhi yeni nayi inekele ndje.

¹² “Nokuli mboka inaayi ilongela okugeelwa, oye na okunwa moshitenga shegeelo. Omolwashike ngoye u kale inoo geelwa? Aawe, nangoye wo ou na okunwa mo.

¹³ Ongame mwene nda gana kutya oshilando Bozra otashi ka ningwa ehalutho notashi mbugala; aantu otaye ke shi nyonkela e taa tumbula edhina lyasho, nge taa tukana. Omikunda adhihe dhopopepi otadhi ka yonagulwa po sigo aluhe. Ongame, Omuwa, nda popi.”

¹⁴ Onda ti: “Edom, onda taamba elaka lya zi kOmuwa. Okwa tumu omutumwa a lombwele iigwana, yi gongaleke omatangakwiita gayo, ge ku ponokele.

¹⁵ Omuwa ote ke ku yululukitha, nokape na ngoka te ku simaneke.

¹⁶ Uuntsa woye owe ku ningilila mo. Kaku na ngoka te ku tila, ngaashi ho shi dhiladhila. Owa kala momakololo nokoondungu dhoondundu. Ihe nando u yale oshihandhila shoye pombanda wa fa ekodhi, Omuwa ote ke ku undulila pohi. Omuwa oye a popi.”

¹⁷ Omuwa okwa ti: “Ehanagulo ndyoka tali ka adha Edom, otali ka kala etilithi, noshaa ngoka ta piti po, ota ka haluka nokukumwa.

¹⁸ Edom ota ka ningilwa, ngaashi sha ningilwa Sodom naGomorra, sho ya hanagulwa po nomikunda dhopuushiinda. Nokape na we ngoka ta ka kala mo. Ongame, Omuwa, nda popi.

¹⁹ Otandi ke ya nda fa onime ya hituluka mongoya yomugulu gwaJordan tayi ya melundu lyuunapelo, notandi ka yitha Aaedom ontuku ohaluka, ya thige po oshilongo shawo. Nena omupangeli ngoka tandi hogolola, ota ka lela oshigwana. Olye ta yelekwa nangame? Olye ti itakeke ndje? Omupangeli lye ta kondjitha ndje?

²⁰ Onkee ano pulakeneni shoka nda dhiladhilile Aaedom, naashoka nda sheya okuningila aantu yokoshilando Teman. Nokuli aanona yawo otaa ka kookololwa po, noshaa ngoka ota ka haluka.

²¹ Uuna Edom ta teka po, otaku ka kala endundumo enene tali kakamitha evi alihe, nekugagano lyehaluko otali ka uvika sigololo okEkololo lyaAkaba.

²² Tala, omutondi ote ya a fa ekodhi tali yeluka lya yalaleka omawawa galyo tali tengele lyu uka kuBozra. Esiku ndyoka aakwiita yaEdom otaa ka sholola ya fa omukulukadhi ta thetwa.”

²³ Omuwa okwa popi Damaskus ta ti: “Aantu yomiilando yaHamat naArpad oya piyagana noya timpililwa, oshoka oya kundana onkundana ombwinayi, oya lulilwa ya fa efuta lya pindjala, itaa vulu okungungumana.

²⁴ Aadamaskus otaa tyololoka, taa kwatwa kuumbanda e taa yi ontuku. Oye na uuwehame wa fa womukulukadhi ta thetwa.

²⁵ Oshilando sha simana nda li nde shi hokwa, otashi hanagulwa po thilu.

²⁶ Esiku ndyoka aagundjuka aamatilela otaa dhipagelwa momapandaanda goshilando, naakwiita yasho ayehe otaa kombwa po.

²⁷ Otandi ka tomeka omadhingililokuma gaDamaskus omulilo e tandi fike po uuwa womukwaniilwa Benhadad. Ongame, Omuwa Omunankondoawike, nda popi.”

²⁸ Omuwa okwa popi ezimo lyaKedar niikandjo yaHazor, mbyoka ya lalwa komukwaniilwa gwaBabilonia Nebukadnezzar, ta ti: “Homoneni Kedar, mu hanagule po ezimo ndyoka lyaantu yokuuzilo!

²⁹ Kuthii po omatsali gawo niigunda yoonzi dhawo, omalapi gootenda dhawo naayihe yi li mootenda dhawo. Kuthii po oongamelo dhawo ne mu lombwele aantu mu tye: ‘Iihuna oyi li koombinga adhihe!’

³⁰ “Aantu ne yomuHazor, ongame, Omuwa, otandi mu londodha, mu ye ontuku mu ka holame. Nebukadnezzar, omukwaniilwa gwaBabilon, okwa tsu ondumbo nane nokwa ti:

³¹ ‘Ileni! Tu ponokeleni aantu mboka, manga ya thuwa! Oshilando shawo kashi na iiyelo nenge omakumba, ano kashi na eshigo lyasha.’

³² “Kwatii po oongamelo dhawo niimuna yawo ayihe! Otandi ka halakanithila koombinga adhihe aantu mboka haa ikulula omapalu. Otandi ya tumine oshiponga tashi zi koombinga adhihe.

³³ Hazor otashi ka mbugala sigo aluhe. Otashi ka ninga ehala lyoombandje. Kaku na we omuntu ta ka kala mo. Ongame, Omuwa, nda popi.”

³⁴ Pethimbo Sedekia a ningi omukwaniilwa gwaJuda, Omuwa Omunankondoawike, okwa lombwele ndje ehunganeko tali popi oshilongo Elam.

³⁵ Okwa ti: “Otandi ka dhipaga po oondjumbeta dhomuElam adhihe ndhoka dhe mu kingika.

³⁶ Otandi ka pepitha ombepo yi pepele Elam tayi ziilile koombinga adhihe, naantu yasho otandi ya halakanithile akuhe, sigo kaku na we oshilongo hoka taa ka holama ko.

³⁷ Otandi ka tilitha Aaelam, ya tile aatondi yawo mboka ya hala oku ya dhipaga. Mondjahi yandje ya hwama otandi ka hanagula po Aaelam e tandi ya tumine iita, sigo nde ya kombo po thilu.

³⁸ Otandi ka hanagula po aakwaniilwa naawiliki yawo e tandi tula ko oshipangelapundi shandje.

³⁹ Ihe konakuyiwa otandi ka hepulutha Aaelam ishewe. Ongame, Omuwa, nda popi.”

50

¹ Ndika olyo elaka ndyoka Omuwa e li pe ndje tali popi oshilando Babilon naantu yasho.

² “Hokololeleni iigwana onkundana! Yi uvitheni! Yelutheni ombaaneli, mu tomone onkundana! Inamu yi holeka nando! Babilon osha teka po! Kalunga kasho Merodak okwa nyankulwa po! Iimenka yaBabilon oya sithwa ohoni, iiyelekela yasho iinyanyalithi ya singulwa po!

³ “Oshigwana tashi zi kuumbangalantu, otashi ya okuponokela Babilonia notashi shi ningi ombuga. Aantu niinamwenyo otayi yi ontuku, nokape na ngoka ta kala mo.”

⁴ Omuwa ota ti: “Ethimbo otali ya, uuna Aaisraeli nAajuda ayehe taa ke ya taa lili, taa kongo ndje, Kalunga kawo.

⁵ Otaa ka pula ondjila yu uka kuSion notaye yi landula. Otaa ka hangana nangame ehangano lyaaluhe noitaye li yono we.

⁶ “Aantu yandje oya fa oonzi ndhoka omusita e dhi kanithile moondundu. Oye endaenda ya fa oonzi tadhi londakana oondundu, noya dhimbwa kaandjawo.

⁷ Oya ponokelwa kwaayehe ye ya mono. Aatondi yawo otaa ti: ‘Oya yono kOmuwa, onkee shoka twa ningi, oshi li mondjila. Oohekulu oyi inekele Omuwa, nayo yene oya li ye na oku mu inekela.’

⁸ “Aaisraeli ne, zii mo muBabilonia! Shi thigii po! Ningeni shanamutango oku shi thiga po!

⁹ Otandi ka sikumudha engathithi lyiigwana muumbangalantu noku yi ponokelitha Babilonia. Otaa ka tsa ompola molugodhi, ya kondjithe oshilongo noku shi lala. Oyo oondjumbeta oonkulungu, aashoneki yiikuti ihaayi palutha.

¹⁰ Babilonia otashi ka luwa po, naamboka taye shi lu po, otaa ka kagunyuna po ashihe ye shi hala. Ongame, Omuwa, nda popi.”

¹¹ Omuwa ota ti: “Aababilonia ne, omwa yugu oshigwana shandje. Omu na elago mwa nyanyukwa mwa fa ondema tayi yungula olupale, tamu hehema mwa fa okakambe okatsezi,

¹² ihe oshilando sheni oshinene otashi ka fupipikwa nokusithwa ohoni. Babilonia otashi ka ninga oshishona shi vulike kiigwana ayihe; otashi ka notelwa nokumbugala.

¹³ Molwondjahi yandje kape na ngoka ta ka kala mo muBabilon; otashi ka kumuka po, naamboka taa ka pita pusho, otaa ka haluka nokukumwa.

¹⁴ “Ondjumbeta, tseni ompola, mu kondeke Babilon. Hwanunineni iikuti yeni ayihe kuBabilon, oshoka osha yono kungame, Omuwa.

¹⁵ Tseni onkalu koombinga adhihe dhoshilando! Babilon otashi igandja. Omadhingililokuma gasho otaga kumunwa po. Otandi polithile ondjahi yandje mAababilonia. Onkee polithileni ondjahi yeni muyo, mu ya ninge, ngaashi ya ningile aantu ooyakwawo.

¹⁶ Inamu etha ombuto yi kunwe moshilongo shoka nenge eteyo li teywe. Omukwiilongo kehe a kala mo, ota ka haluka kehomono lyaahanaguli e ta ka shuna koshilongo shaandjawo.”

¹⁷ Omuwa ota ti: “Aaisraeli oya fa oonzi dha kukuma nodha halakanithwa koonime. Tango oya ponokelwa komupangeli gwaAssur. Opo ihe Nebukadnezzar, omukwaniilwa gwaBabilon, okwa kunya omasipa gawo.

¹⁸ Molwashika ngame, Omuwa Omunankondoawike, otandi ka geela omukwaniilwa Nebukadnezzar noshilongo she, naanaa ngaashi nda geelele omupangeli gwaAssur.

¹⁹ Otandi ka galulila Aaisraeli kevi lyawo. Otaa ka lya iikulya ya mena kondundu Karmel nomoshikandjo Baasha notaa ka kutitha ondjala yawo niilikolwa tayi zi miikandjo yaEfraim naGilead.

²⁰ Ethimbo nge lya thikana, muIsrael itamu ka monika we ombedhi nuukolokoshi muJuda, oshoka otandi ka dhimina po aantu mboka nde ya hupitha ko. Ongame, Omuwa, nda popi.”

²¹ Omuwa ota ti: “Ponokeleni aantu muMeratajim nomuPekod. Ya yapulileni Omuwa nokugana, mu ya dhipage noku ya hanagula po sheke. Gwanitheni ashihe tandi mu lombwele. Ongame, Omuwa, nda popi.

²² Oshihomo sholugodhi otashi uvika moshilongo, noku na ehanagulo enene.

²³ Babilonia osha nyankagula po uuyuni auhe, ngashingeyi osilwa ndjoka oya nyanyagulwa po! Iigwana ayihe oya haluka kushoka sha ningilwa oshilongo shoka.

²⁴ Babilonia, owa kondjitha ndje, nowa kwatwa komwigo ngoka nde ku tegele, nando ino shi tseya.

²⁵ Onde egulula ompungulilo yandje yomatati nomondjahi yandje onde ga kutha mo, oshoka ngame, Omupangeliawike, Omuwa Omunankondoawike, ondi na iilonga tandi yi longo muBabilon.

²⁶ Shi matukileni tamu ziilile koombinga adhihe. Matuleni iigandhi yasho. Iihakanwa yi ndumbileni ondumba ya fa ondumba yiilya. Hanagulii po oshilongo. Inamu thiga po nando oluthipa.

²⁷ Dhipagii po aakwiita ayehe. Ya faleni konakupila. Yaye Aababilonia! Ethimbo olya thikana, ya geelwe.”

²⁸ (Oontauki ndhoka dha zi muBabilonia nodhe ya kuJerusalem, odha hokolola, nkene Omuwa Kalunga ketu a polithile ondjahi ye mAababilonia, mboka ya hanagula po otempeli ye.)

²⁹ “Lombweleni oondjumbeta, ya ponokele Babilon. Tumii ko mboka ye shi okushoneka nawa iikuti. Kondekeni oshilando, inamu etha mu ze nando omuntu. Shi peni ondjambi ndjoka she yi ilongele; shi ningeni ngaashi sha ningi yakwawo, oshoka osha shongo ndje, ongame, Omuyapuki gwaIsrael.

³⁰ Onkee ano aagundjuka yasho otaa ka sila momapandaanda goshilando, naakwiita yasho ayehe otaa ka kombwa po esiku ndyoka. Ongame, Omuwa, nda popi.

³¹ “Babilonia, owa kinga unene, onkee ngame, Omuwa Omunankondoawike, onda tsa ondumbo nangoye. Ethimbo olya thiki, ndi ku geele.

³² Shigwana ngoye ho inomo, oto ka punduka; oto gwile po, nokaku na ngoka te ku kwatha. Iilando yoye otandi ke yi tomeka omulilo, noshaa shoka she ku kunduka, otashi ka hanagulwa po.”

³³ Omuwa Omunankondoawike ota ti: “Aaisraeli nAajuda oya hepekwa. Ayehe mboka ye ya kwata po, oye ya thitikinine mo noinaye ya etha we.

³⁴ Ihe omumangululi gwawo oye omunankondo — edhina lye oye Omuwa Omunankondoawike. Oye mwenemwene ti ikwatele ko nota ka eta ombili kombanda yevi, ihe kAababilonia omalwa.”

³⁵ Omuwa ota ti: “Nakusa oBabilon! Oonakusa aantu yasho, aaleli yasho naanongo yasho.

³⁶ Oonakusa aahunganeki yasho yiifundja — oya goyapala ngiini! Oonakusa aakwiita yasho — oya haluka ngiini!

³⁷ Hanagulii po uukambe nomatembakwiita gasho. Oonakusa aakwiita yasho aahehelwa — oyo aambanda ngiini! Hanagulii po omaliko gasho; hakaneni iihakanwa.

³⁸ Oluteni nalu kalaganye, omilonga dhi pwine. Babilonia evi lyiimenka iitilithi, mbyoka ya thethepaleke aantu.

³⁹ “Babilon otashi ka kalwa koombidhi, komambungu nokoondhila dha nyata. Itamu ka kala we aantu, sigo aluhe.

⁴⁰ Babilon otashi ka ningwa ngaashi Sodom naGomorra, sho nde ya hanagula nomikunda dhopuushiinda wayo. Kaku na we ngoka na ka kala mo. Ongame, Omuwa, nda popi.

⁴¹ “Oku na aantu taa ziilile koshilongo shokuumbangalantu, oshigwana oshinankondo otashi zi kokule; aakwaniilwa oyendji otaa ilongekidhile iita.

⁴² Oya homata omatati nomagonga; oyo aananyanya, kaa na nando onge. Oshihomo shawo osha fa efuta tali pupu, sho ya kayila uukambe wawo. Oyi ilongekidhila okuhomona Babilonia.

⁴³ Omukwaniilwa gwaBabilonia sho tu uvu onkundana, omaako ge otaga gonwa. Ye mwene ota kwatwa komahwilili a fa omukiintu ta thetwa.

⁴⁴ “Otandi ke ya nda fa onime ya hituluka mongoya yomugulu gwaJordan tayi ya melundu lyuunapelo, nohaluka otandi ka yitha Aababilonia ontuku, ya thige po oshilando shawo. Nena omupangeli ngoka tandi hogolola, ota ka lela oshigwana. Olye ta yelekwa nangame? Olye ti itakeke ndje? Omupangeli lye ta kondjitha ndje?

⁴⁵ Onkee ano pulakeneni shoka nda dhiladhilile oshilando Babilon, naashoka nda sheya okuningila aantu yasho. Nokuli naanona yawo otaa ka kookololwa po, noshaa ngoka ota ka haluka.

⁴⁶ Uuna Babilon tashi teka po, otaku ka kala endundumo enene tali kakamitha evi alihe, nekugagano lyehaluko otali ka uvika kiigwana.”

51

¹ Omuwa ota ti: “Otandi ka tukulutha ombepo yehanagulo, yi kondjithe Babilonia naLeb-Kamai.

² Otandi ka tuma aakwiilongo ya hanagule po Babilonia ya fa ombepo tayi pepe po etutu. Esiku ndyoka lyehanagulo uuna nali thiki, otaye ke shi homona taa ziilile koombinga adhihe notaa mbugaleke oshilongo.

³ Inamu pa oondjumbeta dhasho ompito okulukila omatati gadho nenge dhi homate omahwahwa gadho. Inamu hupitha ko aagundjuka. Etangakwiita alihe okomupeshe!

⁴ Otaa ka ninga oomwahe nokusila momapandaanda giilando yawo.

⁵ Ngame, Omuwa, Kalunga Omunankondoawike, inandi etha Israel naJuda, nando oya yono kungame, Omuyapuki gwaIsrael.

⁶ Tembukii mo muBabilonia! Ka holekeni okafudho keni! Inamu dhipagelwa uulunde wAababilonia! Ongame mwene tandi ikwatele ko noku shi geela ngaashi shi ilongele.

⁷ Babilonia osha li sha fa oshitenga shoshingoli miikaha yandje; osha kolitha uuyuni auhe. Iigwana oya kolwa komaviinu gasho noya pwidhuka moondunge dhayo.

⁸ Babilonia osha teka po ohaluka nosha hanagulwa po. Shi lileni! Shi gwayekeni omuti piilalo yasho, pamwe tashi vulu okwaaludhwa.

⁹ Aakwiilongo mboka ya kala mo, oya ti: ‘Otwa kambadhala okukwatha Babilonia, ihe ethimbo olya pu po. Tu tembukii mo, tu shune kaandjetu. Kalunga okwa geela Babilonia noonkondo dhe adhihe nokwe shi hanagula po thiluthilu.’ ”

¹⁰ Omuwa ota ti: “Aantu yandje taa kugu taa ti: ‘Omuwa okwa holola kutya otu li mondjila. Tu yeni tu ka lombwele aantu muJerusalem shoka Omuwa Kalunga ketu a ningi.’ ”

¹¹ Omuwa okwa sikumudha aakwaniilwa yaMedia, oshoka okwa dhiladhila a hanagule po Babilonia. Ota ka polithila ondjahi ye musho omolwehanagulo lyotempeli ye. Oondjayi dhiita otadhi igidha: “Upikeni iikuti yeni, kutheni omahuuyanza!

¹² Yelutheni epandela lyokuponokela omadhingililokuma gaBabilon! Indjipalekeni aatonateli! Langekeni aapekapeki! Tuleni aantu miilangela!” Omuwa ota gwanitha shoka a tile, ote shi ningile Aababilonia.

¹³ Oshilongo shoka oshi na omilonga odhindji nomaliko ogendji, ihe ethimbo lyasho lya pu po, nongodhi yasho yomwenyo ya tokoka.

¹⁴ Omuwa Omunankondoawike okwa gana momwenyo gwe kutya ote eta aantu oyendji, ya ponokele Babilonia ya fa oshiluku shoombahu, oyo notaa kugilile kenyanyu lyekandanga.

¹⁵ Omuwa okwa shiti evi koonkondo dhe; nokuunongo we okwa umbu uuyuni nokwa alele omagulu.

¹⁶ Okoohapu dhe omeya gomeyalelo taga ndunduma; ote eta iikogo okuza kooha dhevi. Ota shelitha oombadhi miikogo, nota tumu ombepo tayi zi moompungulo dhe.

¹⁷ Omuntu kehe omugoya noke na ontseyo; mboka haa hongo iimenka, oya thethelekwa, oshoka iimenka mbyoka ya hambula, oyiifundja nokayi na omwenyo.

¹⁸ Oyo iinima yowala noyi na okudhinika; otayi ka hanagulwa po, Omuwa ngele te ya e yi pangule.

¹⁹ Kalunga kaJakob ine yi fa; oye ngoka a shiti ayihe, nokwa hogolola Israel a ninge oshigwana she mwene. Omuwa Omunankondoawike olyo edhina lye.

²⁰ Omuwa ota ti: “Babilonia, ngoye osilwa yandje, omatati gandje miita. Onde ku teyitha po iigwana niilongo,

²¹ u tunte uukambe naakayili yawo, u tunte omatembakwiita naahingi yago,

²² u dhipage aasamane naakulukadhi, u tsele aakuluntu naanona, u kombe po aamati naakadhona,

²³ u kutule aasita niimuna yawo ominino, u ndande aapululi noonani dhawo, u mbandule omalenga naambala.”

²⁴ Omuwa ota ti: “Otamu ka mona ndje tandi galulile Babilonia naantu yasho uuwinayi mboka ye u ningile Jerusalem.

²⁵ Babilonia, owa fa ondundu tayi hanagula po uuyuni auhe, ihe ngame, Omuwa, ongame omutondi gwoye. Otandi ke ku kwata, noku ku yelekanitha nevi e tandi ku thigi momutoko.

²⁶ Mungoye itamu kuthwa we emanya tali longithwa metungo. Oto ka mbugala sigo aluhe. Ongame, Omuwa, nda popi.

²⁷ “Yelutheni epandela, mu homone! Hikeni enkuma, opo iigwana yi uve ko! Dheulileni iigwana iita yokukondjitha Babilonia! Lombweleni aakwaniilwa yaArarat, Minni naAshkenas, ya homone. Langekeni ondjayi yokuwilika eponokelo. Eteni po uukambe wa fa oshiluku shoombahu.

²⁸ Dheulileni iigwana iita yokukondjitha Babilonia. Tumeni mu hiye aakwaniilwa yaMedia, aawiliki nomalenga gawo nomatangakwiita giilongo ayihe mbyoka taye yi pangele.

²⁹ Evi otali kakama notali imanana, oshoka Omuwa ota gwanitha omadhiladhilo ge, a mbugaleke Babilonia, kaamu kale we nando omuntu.

³⁰ Aakwiita Aababilonia oye etha okukondja, otaa kala momapopilongulu gawo. Oya kanitha omukumo; oya fa aakulukadhi. Omiyelo dhoshilando odha teywa po, nomagumbo ga tomekwa omulilo.

³¹ Aatumwa ya tsatsakana otaa matukile komukwaniilwa gwaBabilonia, ye mu lombwele kutya omiyelo dhoshilando odha teywa po koombinga adhihe.

³² Aatondi oya kwata po onkondo yomulonga noya tomeke omapopilongulu omulilo. Aakwiita Aababilonia oya haluka.

³³ Ohaluka aatondi taye ya hata pevi e taye ya lyatagula ya fa iilya polupale. Ongame, Omuwa Omunankondoawike, Kalunga kaIsrael, nda popi.”

³⁴ Omukwaniilwa gwaBabilonia okwa keke po Jerusalem e te shi li po. Okwa koona oshilando sha fa ombiga; okwe shi ndhilagula po a fa evukule. Okwa yugu po shoka a hala e te ekelehi iihupe.

³⁵ Aasioni naa tye: “Babilonia nashi geelwe molwiikolokosha she yi tu ningile.” Aajerusalem naa tye: “Babilonia nashi geelwe molwashoka she tu hepeke.”

³⁶ Omuwa okwa lombwele Aajerusalem ta ti: “Otandi ke mu popila moontamanana dheni e tandi ka galulila aatondi yeni shoka ye mu ningile. Otandi ka pwinika oonza dhomeya gaBabilonia, omilonga dhasho otadhi ka kukuta.

³⁷ Oshilongo shoka otashi ka ninga ondumba yomakulukuma, moka tamu kala iithitukuti. Otashi ka ninga ehaluthitho; kamu na omuntu ta ka kala mo, noshaa ngoka te shi mono, ota ka haluka.

³⁸ Aababilonia ayehe otaa ndunduma ya fa oonime notaa gono ya fa uunkoshigona.

³⁹ Aafukedhi ano? Otandi ke ya hangela oshituthi e tandi ya kolitha ya nyanyukwe. Otaa ka kotha e taa kothelele.

⁴⁰ Otandi ke ya fala koshidhipagelo, ya ka kutulwe ominino ya fa oonzigona, iikombo noonzi. Ongame, Omuwa, nda popi.”

⁴¹ Omuwa ota popi Babilon ta ti: “Oshilando shoka sha li hashi tangwa kuuyuni, otashi kwatwa po! Babilon otashi ningi emoniko lyehalutho momeho giigwana.

⁴² Efuta otali kungulukile Babilon e tali shi siikile nomakuthikuthi taga pupu.

⁴³ Iilando otayi ningi ontale, ombuga ya kalanda yaa na omeya. Kaku na we aantu taa kala mo nenge taa pitile mo.

⁴⁴ Otandi ka pangula Bel muBabilonia noku mu ethitha iinima e yi yugu po; iigwana itayi ke mu longela we. “Omadhingililokuma gaBabilon oga kumuka po.

⁴⁵ Aaisraeli, zii mo musho. Fadhukii po, mu ka holeke oomwenyo dheni kuupyundjahi wandje.

⁴⁶ Inamu tyololoka nenge mu tile molwomitoto ndhoka tamu kundana. Omumvo kehe omutoto ogwi ili tagu taandelithwa — omitoto dhiikolokosha moshilongo, aakwaniilwa sho taa kondjithathana.

⁴⁷ Onkee ano tandi ti, ethimbo otali ya, uuna tandi ka geela iimenka yaBabilonia. Oshilongo ashihe otashi ka sithwa ohoni, naantu yasho ayehe otaa ka dhipagwa.

⁴⁸ Shaa shoka kombanda yevi nomegulu otashi ka ligola, uuna Babilonia tashi hanagulwa po kaantu mboka taa ziilile kuumbangalantu.

⁴⁹ Babilonia osha dhipagitha aantu akuhe muuyuni. Ngashingeyi Babilonia otashi teka po, oshoka osha dhipagitha Aaisraeli oyendji. Ongame, Omuwa, nda popi.”

⁵⁰ Omuwa ota lombwele aantu ye muBabilonia ta ti: “Omwa hunuka meso! Indeni! Inamu dhikala! Nando omu li kokule negumbo, dhimbulukwii ndje, Omuwa gweni, ne mu tedhe Jerusalem.

⁵¹ Otamu ti: ‘Otwa sithwa ohoni notwa gugwa; otu uvite twaa na omwago, oshoka aakwiilongo oya kwata po omahala omayapuki motempeli.’

⁵² Onkee ano tandi ti, ethimbo otali ya, uuna tandi ka geela iimenka yaBabilon, noomwahe otadhi ka tongagana noshilongo ashihe.

⁵³ Babilon nando oshi vule okulonda kegulu e tashi itungile ko epopilongulu, otandi ka tuma ko aantu ye shi hanagule po. Ongame, Omuwa, nda popi.”

⁵⁴ Omuwa ota ti: “Pulakena, oku na onkugo tayi zi muBabilon, elilagano omolwehanagulo moshilongo.

⁵⁵ Otandi hanagula po Babilon, otandi shi mweneke thiluthilu. Omatangakwiita otage shi ulumine ga fa omakuthikuthi taga pupu, notage shi nukile noshihomo sheigidho.

⁵⁶ Oye ya okuhanagula po Babilon; aakwiita yasho otaa kwatwa po, nomatati gawo taga teywa po. Ongame Kalunga tandi geele uuwinayi, notandi ningi Babilon, ngaashi shi ilongele.

⁵⁷ Aaleli yasho otandi ya kolitha — aanongo, aawiliki naakwiita. Otaa ka kotha e taa kothelele. Ngame, omukwaniilwa, nde shi popi, ongame Omuwa Omunankondoawike.

⁵⁸ Omadhingililokuma gaBabilon oshinankondo otaga ka kumunwa po, nomiyelo dhasho dhoondungululu tadhi ka fikwa po. Iigwana otayi ivulitha miilonga yaa na omupondo; oonkambadhala dhayo otadhi yi momulilo. Ongame, Omuwa, Omunankondoawike, nda popi.”

⁵⁹ Seraia yaNerija, omutekulu gwaMakseja, okwa li elenga lyomekolo lyomukwaniilwa Sedekia. Momumvo omutine Sedekia sho a li omukwaniilwa gwaJuda, Seraia okwa yi kuBabilonia pamwe naye, nonde mu pe omakumagidho gamwe.

⁶⁰ Onda nyolele membo ehokololo alihe tali ka adha Babilonia naayihe ya pamba Babilonia.

⁶¹ Onda lombwele Seraia nda ti: “Nge wa thiki kuBabilon, dhimbulukwa okuleshela aantu mokule ashihe nde shi nyola.

⁶² Galikana ihe u tye: ‘Omuwa, owa ti, oto yono po ehala ndika, opo mulyo mwaa kale nando oshishitwa, omuntu nenge oshinamwenyo, notali ningi ombuga sigo aluhe.’

⁶³ Seraia, nge wa hulitha okuleshela aantu embo ndika, li mangela kemanya e to li umbile momulonga Eufrat

⁶⁴ e to ti: ‘Babilonia osho tashi ka ningwa ngeyi — otashi ka kopita noitashi anduka ko we, omolwehanagulo ndyoka Omuwa te li shi undulile.’ ” Oohapu dhaJeremia odha hulile mpaka ihe.

52

¹ Sedekia okwa li e na omimvo omilongo mbali nagumwe, sho a ningi omukwaniilwa gwaJuda, nokwa lele muJerusalem omimvo omulongo nagumwe. Yina oHamutal yaJeremia gwokuLibna.

² Omukwaniilwa Sedekia okwa yono kOmuwa, naanaa ngaashi Jehoiakim a ningile.

³ Shika osha geyitha Omuwa noonkondo, sigo a kandula ko Aajerusalem nAajuda koshipala she. Sedekia sho a tsu ondumbo nomukwaniilwa gwaBabilonia Nebukadnezzar,

⁴ Nebukadnezzar okwe ya nomatangakwiita ge agehe e ta ponokele Jerusalem mesiku etimulongo lyomwedhi omutimulongo gwomumvo omutimugoyi gwepangelo lyaSedekia. Oya yungu ontanda yawo pondje yoshilando e taa tungu omituni dhekondekela.

⁵ Oshilando osha kala mekondekela sigo omumvo omutimulongo nogwotango gwepangelo lyaSedekia.

⁶ Mesiku etimugoyi lyomwedhi omutine gwomumvo tuu ngoka ondjala yekomba sho ya li ya geya, naantu kaa na sho taa li,

⁷ omakuma goshilando oga kumunwa po. Aababilonia nando oya li ya kondeka oshilando, aakwiita ayehe oyi iyaka mo uusiku. Oya pitile momukala gwosheelo pokati komadhingililokuma gaali kombinga yeyana lyuuwa e taa fadhuka po yu uka kolusilu lwaJordan.

⁸ Ihe aakwiita Aababilonia oya landula omukwaniilwa Sedekia e taye mu kwatele molushandja popepi naJeriko, naakwiita ye ayehe oye mu halakana.

⁹ Sedekia okwa falwa a yi komukwaniilwa Nebukadnezzar, ngoka a li muRibla moshikandjo shaHamat, naamoka Nebukadnezzar okwe mu pangula.

¹⁰ MuRibla okwa dhipagitha aana yaSedekia aamati montaneho ye, nomalenga gaJuda okwe ga dhipagitha po.

¹¹ Opo ihe okwa tsipulitha mo omeho gaSedekia e te mu tula momalyenge nokwe mu fala kuBabilon. Sedekia okwa kala mondjedhililo muBabilon sigo okeso lye.

¹² Mesiku etiheyali lyomwedhi omutitano gwomumvo omutimulongo nomutimugoyi gwepangelo lyaNebukadnezzar, omukwaniilwa gwaBabilon, Nebusaradan, omugandjindunge gwomukwaniilwa nondjayi yiita ye, okwe ya muJerusalem.

¹³ Okwa fike po otempeli, ombala nomagumbo gaanamadhina agehe muJerusalem,

¹⁴ naakwiita ye oya kumuna po omadhingililokuma goshilando.

¹⁵ Nena Nebusaradan okwa fala kuBabilonia aantu mboka ya thigalele moshilongo, oshihupe shomangomba naamboka yi igandjele kAababilonia.

¹⁶ MuJuda okwa thigile mo oohepele, mboka yaa na sho taa likola, e te ya tula miilonga yiitsambe yomiviinu nomomapya.

¹⁷ Aababilonia oya tatula po oongudhi dhiikushu nuutemba mboka wa li motempeli, osho wo ondama yoshikushu, e taa fala iikushu ayihe kuBabilon.

¹⁸ Oya fala ko wo iihupulo, iikangwa yokuyuka omutoko gwokoshiyambelo, iikonde yokutetitha uulapi woolamba, iiyaha yokukutha ombinzi moontselelandjambo, iitsininitho niikwaniipangitho yiikushu ayihe ya li hayi longithwa motempeli melongelokalunga.

¹⁹ Oya fala shaa shoka sha ningwa moshingoli nenge moshisiliveli, iiyaha iishona, iikangwa yomakala ga hanya, iiyaha yokukala ombinzi yoontselelandjambo, iikwatelwa yomutoko, iihukikwanyeka, iiyaha yiitsinino nuuyo wokutilila oondjambo dhomaviinu.

²⁰ Iinima yoshikushu yotempeli mbyoka Salomo a li e yi hambulitha — oongudhi mbali, uutemba, ondama noongombe omulongo nambali ndhoka ondama ya li ya tentekwa kudho — oya li iidhigu okuvihwa.

²¹ Oongudhi mbali odha li dha faathana: Shaa ndjoka oya li yi na omuthika gwoondya omulongo nahetatu nolumbumbu lwoondya omulongo nambali. Odha li dhi na omitutu noombati dhi thike pomutamo gweke. Kombanda yongudhi kehe okwa li oshipaka shoshikushu shoondya ntano momuthika. Molumbumbu lwoshipaka kehe omwa li uulenga woshikushu wa tatakanithwa. Muulenga mbuka omwa li oondunga dhoshikushu dhomuti omugranati.

²²

²³ Metatakanitho kehe omwa li oondunga dhomugranati ethele, mwaandhoka omilongo omugoyi nahamano dha monika okuza pevi.

²⁴ Nebusaradan, ondjayi yiita, okwa kwata po omuyambimukuluntu Seraia, omuyambi omutiyali Sefania naayambi aalangeli yatatu yoposheelo shotempeli.

²⁵ Moshilando okwa kutha mo omumbala ngoka a li omutaleli gwetangakwiita, aagandjimayele yaheyali yomukwaniilwa mboka ya kalele natango moshilando, amushanga gwondjayi yiita, ngoka a li ha kutu aakwiita, naanamadhina yalwe omilongo hamano.

²⁶ Nebusaradan okwe ya fala komukwaniilwa gwaBabilonia moshilando Ribla,

²⁷ shoka shi li moshikandjo shaHamat. Oko nkoka omukwaniilwa e ya dhengitha e te ya dhipagitha. Osho ngaaka Aajuda ya falwa muupika kokule nevi lyawo.

²⁸ Ndika olyo ehokololo lyaantu mboka Nebukadnezzar e ya kwata po e te ya fala muupongekwa: Momumvo gwe omutiheyali muukwaniilwa okwa fala ko aantu 3 023;

²⁹ momumvo gwe omutimulongo nomutihetatu aantu 832 yomuJerusalem;

³⁰ nomomumvo gwe omutimilongombali nomutitatu aantu 745 ya kwatwa mo kuNebusaradan. Ayehe kumwe aantu 4 600 oya falwa.

³¹ Momumvo ngoka Evilmerodak a ningi omukwaniilwa gwaBabilon, okwa sile omukwaniilwa gwaJuda Jehoiakin ohenda e te mu pititha mo mondjedhililo. Shika osha ningwa mesiku etimilongombali netiheyali lyomwedhi omutimulongo nomutiyali gwomumvo omutimilongondatu nomutiheyali, sho Jehoiakin a falwa muupika.

³² Evilmerodak okwe mu ningi nawa e te mu yele nesimano e vule aakwaniilwa aakwawo a li nayo muupika muBabilonia.

³³ Jehoiakin okwa li a pitikwa, a hule mo oonguwo dhe dhomondjedhililo e ta li poshitaafula shomukwaniilwa omasiku ge agehe, manga a li e na omwenyo.

³⁴ Esiku kehe manga a li e na omwenyo, okwa li a gwanithilwa oompumbwe dhe adhihe.