1

¹ Membo muka omu na omatumwalaka taga popi Juda naJerusalem, ngoka Kalunga e ga hololele Jesaja yaAmos muuyuni waakwaniilwa yaJuda Usia, Jotam, Ahas naHiskia.

² Omuwa okwa popi a ti: “Uva ko, ngoye egulu! Nangoye evi, pulakena! Onda kokitha aanona nonde ya putudha, ihe oya tsile ndje ondumbo.

³ Ongombe oyi shi mwene gwayo, nokasino etemba lyokulila lyamwene gwako, ihe Israel ina tseya sha, aantu yandje kayu uvite ko.”

⁴ Yaye ngoye, oshigwana shuulunde, ne aantu mwa yona nayi, oluvalo lwaakolokoshi, aana yaatangalali! Omwi iteka Omuwa, omwa sheke Kalunga kaIsrael omuyapuki nomwe mu pilamene.

⁵ Omwa hala ngaa natango okudhengwa, sho tamu kala mwa tsa ondumbo? Israel, omutse gwoye ogu udha oombole, nomutima gwoye ogwa ala.

⁶ Okuza koshithi shompadhi sigo okomutse kaku na eha li li nawa. Okwa kanyata iilalo, omadhidhimika nomatuntila ngoka inaaga pangwa, inaaga mangwa go inaaga tulwa omuti.

⁷ Oshilongo sheni osha mbugala, niilando yeni oya lungunithwa po. Montaneho yeni aakwiilongo oya yugu po omapya geni; oga ninga omaputa, sho ga hanagulwa po kaayeni.

⁸ OJerusalem ashike sha hupu po, oshilando shi li mekondeka — osha fa shaa na epopilo, sha fa etsali lyomukeeleli gwoshitsambe shomiviinu nenge etala moshilonda shuutanga.

⁹ Ando Omuwa Omunankondoawike ine tu hupithila aantu yamwe, ando twa kombwa po twa fa Sodom notwa ningwa ngaashi Gomorra.

¹⁰ Jerusalem, aaleli yoye naantu yoye oya fa Aasodomu nAagomorra. Pulakena shoka Omuwa ta popi te ku lombwele. Ndhindhilika shoka Kalunga ketu te ku tsomayele.

¹¹ Ota ti: “Ou shi onda hokwa oontselelandjambo adhihe ndhoka tamu yambele ndje? Onda kuta koonzi ndhoka mwa lungunitha dhi ninge omafikilondjambo nokomagadhi gomitanda dheni dho ondodhwa. Onda kunyukwa ombinzi yoontsezi, yoonzi noyiikombo.

¹² Olye e mu lombwele, mu yi etele ndje ayihe, sho tamu holoka koshipala shandje? Olye e mu lombwele, mu ye motempeli yandje nokulyatagula kweni?

¹³ Inamu etela ndje we oondjambo dhiikulya dhaa na oshilonga! Iitsinino oyo iihuna kungame. Ite vulu we okwiidhidhimikila iituthi yeni yOmwedhi omupe, Omasabati niigongi yeni yomalongelokalunga. Ayihe oya nyatekwa kuulunde weni.

¹⁴ Otandi tondo iituthi yeni yOmwedhi omupe nomasiku geni omayapuki; ogo omutenge nda vulwa oku gu humbata.

¹⁵ “Uuna tamu yelutha omaako geni megalikano, itandi ke mu tala nando. Nando mu galikane olule ngiini, itandi ka pulakena, oshoka iikaha yeni oya nika ombinzi.

¹⁶ Iyogeni, mu yele. Etheni uuwinayi mbuka ndi wete tamu u ningi. Eeno, etheni okulonga iihuna,

¹⁷ ne mu ilonge okulonga uuwanawa. Seni oshimpwiyu uuyuuki u gwanithwe, kwatheni aahepekwa, uthileni oothigwa, nomu popile aaselekadhi.”

¹⁸ Omuwa ota ti: “Ileni tu ka tamananeni. Oondjo dheni nando nadhi kale dha tiligana mbyumbyumbyumbyu, otadhi ka toka dha fa oompawe; nonando nadhi kale dha tiliganenena, otadhi yele dha fa omafufu omatokele goonzi.

¹⁹ Ngele otamu zimine nokuvulika kungame, otamu ka lya uutoye wevi lyeni.

²⁰ Ihe ngele otamu tindi nomwa tangalala, otamu ka dhipagwa kegongamwele. Ongame Omuwa nde dhi popi ndhoka.”

²¹ Oshilando shoka sha li nale oshidhiginini, osha ningi sha fa ohonda! Nale osha li shu udha aayuuki, ihe ngashingeyi aadhipagi ya kala mo.

²² Jerusalem, nale owa li wa fa oshisiliveli, ihe ngashingeyi owa kanitha omwago; owa li wa fa omaviinu go gene, ihe ngashingeyi wa hayuka wa fa omeya gowala.

²³ Aawiliki yoye oya ningi aanandumbo nookuume kaafuthi. Ohaa taamba oombumbo nohaa lalakanene omilongelo. Ihaa popile oothigwa moompangu nenge ya pulakene aaselekadhi, uuna taa eta uudhigu wawo.

²⁴ Onkee ano ngashingeyi pulakeneni, sho Omuwa Omunankondoawike, Kalunga kaIsrael omunankondo ta popi ta ti: “Otandi mu kwatele iikonene, ne aatondi yandje, noitamu ka etela ndje we omukundu gwasha.

²⁵ Otandi ke mu kondjitha. Otandi ke mu yelitha, ngaashi osheela hashi yelithwa, e tandi mu kutha ondoya nomulilo.

²⁶ Otandi ke mu pa aatokolihapu ya fa mbeyaka yonale, naagandjindunge ngaashi ya li petameko. Nena Jerusalem otashi ka ithanwa oshilando shuuyuuki, oshilando oshidhiginini.”

²⁷ Omuwa ota hupitha Jerusalem naamboka ye li mo yi itedhulula, oshoka oye omuyuuki.

²⁸ Ihe aanandumbo naayoni ote ya hanagula po nota dhipaga po mboka taye mu etha po.

²⁹ Otamu ka sithwa ohoni omolwomiti ndhoka dhiidhila mwe dhi longele; otamu ka yemata omolwiikunino mbyoka yiinonoma mwa hogolola.

³⁰ Otamu ka kala mwa fa omwandi tagu si, mwa fa oshitsambe ihaashi tekelwa.

³¹ Ngashi naanaa oshihenguti tashi hwamekwa kohandje, osho wo niilonga yaanankondo tayi ka hanagulwa po kuukolokoshi wawo nokaku na nando ogumwe ta vulu okumweneka ehanagulo ndyoka.

2

¹ Ndika olyo elaka ndyoka Kalunga a gandja kuJesaja yaAmos tali popi Juda naJerusalem:

² Momasiku tage ke ya ondundu hoka kwa tungilwa otempeli, otayi ka ninga ondeendeka yi vule adhihe, otayi ki itumba kombanda yoondundu adhihe. Iigwana oyindji otayi ka matukila kuyo,

³ naantu yayo otaa ka tya: “Natu londeni kondundu yOmuwa, tu ye kotempeli yaKalunga kaIsrael. Ote ke tu nongeka shoka a hala tu longe; otatu ke enda momapola e ga hogolola. Oshoka elongo lyOmuwa otali zi muJerusalem; okuza muSion ota popitha aantu ye.”

⁴ Oye ta loteke oontamanana mokati kiigwana iinankondo. Otaa ka hambula omagonga gawo, omatemo nomagongamwele gawo iimwitho. Iigwana itayi ka ya we kiita, itayi ilongekidhile we olugodhi.

⁵ Ngashingeyi ne yomoluvalo lwaJakob, yambukeni, ileni tu lyangeni muuyelele mboka Omuwa te tu minikile nawo.

⁶ Kalunga, ongoye we etha aantu yoye, oluvalo lwaJakob! Evi olyu udha uunganga wokUuzilo nuumpulile wokuFilistia. Aantu ohaa panga uukuume naakwiilongo.

⁷ Evi lyawo olyu udha oshisiliveli noshingoli, nopwaa na ehulilo lyomapungulilo guuyamba wawo. Evi lyawo olyu udha uukambe, nomatembakwiita gawo kage na ehulilo.

⁸ Evi olyu udha iimenka, nohaa longele iinima mbyoka ye yi longa nomake gawo yene.

⁹ Omuntu kehe ota ka fupipikwa nokusithwa ohoni. Omuwa, ino ya dhimina po!

¹⁰ Otaa ka holama momakololo goondundu notaa fulu omakwena mevi, ya kambadhale okuhenuka ondjahi yOmuwa noya ka holame etilitho lye neadhimo lyoonkondo dhe!

¹¹ Esiku onali ya, uuna uuntsa wopantu tau hulithwa po neinomo lyuuntu tali hanagulwa po. Nena Omuwa oye awike ta ka simana pombanda.

¹² Esiku ndyoka Omuwa Omunankondoawike ota ka fupipika shaa ngoka e na oonkondo, kehe ngoka ti itanga noti inomo.

¹³ Ota ka komangela po omisedeli omile dhaLibanon noomwandi adhihe moshilongo Baasha.

¹⁴ Ota ka yeleka oondundu adhihe oondeendeka niikulundundu,

¹⁵ oshungo kehe ondeendeka nomakuma gepopilongulu kehe.

¹⁶ Ota ka ninginitha oosikepa oonenenene dho opala.

¹⁷ Eitango lyopantu otali hulithwa po, neinomo lyopantu otali shundulwa. Iimenka otayi ka hula po thiluthilu, nOmuwa awike ta ka simana pombanda esiku ndyoka.

¹⁸

¹⁹ Aantu otaa ka holama momakololo moondundu notaa fulu omakwena mevi, ya kambadhale okuhenuka ondjahi yOmuwa noya holame etilitho neadhimo lyoonkondo dhe, uuna te ya a ndjingandjinge evi.

²⁰ Uuna esiku ndyoka nali ya, otaa ka ekelahi iimenka yoshisiliveli noyoshingoli mbyoka ye yi hambula notaye yi thigile oombuku nomalimalima.

²¹ Uuna Omuwa te ya a ndjingandjinge evi, aantu otaa ka holama moombogo nomomakololo goondundu ya kambadhale okuhenuka ondjahi yOmuwa noya holame etilitho neadhimo lyoonkondo dhe.

²² Inamu inekela we omuntu. Oye omufudho gwowala. Oku na omwago gwashike?

3

¹ Oshoka tala, Omuwa Omunankondoawike ota ka kutha Jerusalam naJuda shoka tashi ya kwatha naashoka yi inekela. Ota kutha po iikulya nomeya gawo,

² oofule naakwiita yawo, aatokolihapu naahunganeki yawo, oonganga naakuluntu yawo,

³ ooyene yomatanga nomalenga gawo, aagandjindunge noonkulungu dhawo naayanekeli.

⁴ Omuwa oshigwana ote ke shi lelitha kuumatyona, naapwidhi otaye shi pangele.

⁵ Ayehe otaa ka thiminikathana. Aagundjuka otaye ki inomena aakulupe, naantu yaamakaha otaa ka dhina aasimanekwa.

⁶ Esiku onali ya, uuna aakwanezimo taa hogolola gumwe mezimo lyawo e taa ti kuye: “Molwaashoka u na omizalo, ninga omukuluntu gwetu methimbo ndika edhigu.”

⁷ Ihe ngwiyaka ota ka yamukula ta ti: “Hangame nando! Itandi vulu oku mu kwatha. Kandi na iikulya nenge omizalo. Inamu ninga ndje omukuluntu gweni!”

⁸ Eeno, Jerusalem osha pangulwa! Juda otashi teka po! Ashihe shoka taa popi notaa longo, osha tsa ondumbo nOmuwa; otaa hindi Omuwa mwene, noshi li po shi igalala.

⁹ Omeho gawo ga pota otage ya pe ombedhi. Uulunde wawo ohaye u igalaleke ya fa Aasodomu, ihaye u holeke. Oya pangulwa noye shi iyetele.

¹⁰ Aayuuki otaa ka kala ye na elago, niinima ayihe otayi ya longele uuwanawa. Otaa ka vula okunyanyukilwa iiyimati yiilonga yawo.

¹¹ Ihe yaye aalunde! Shoka ya ningile yakwawo, otaa ke shi ningilwa.

¹² Aaniimaliwa otaa ka thindila aantu yandje pevi, naanangunga yawo taye ya nyokoma. Aantu yandje, aaleli yeni oye mu tula mohwati, opo mwaa tseye ondjila ndjoka tamu ende nayo.

¹³ Omuwa okwi ilongekidha a holoke moompangu, ota thikama a pangule aantu ye.

¹⁴ Omuwa ota fala aakuluntu naawiliki yoshigwana she moompangu. Ota tamanana ta ti: “Omwa yugu po iitsambe yomiviinu, nomagumbo geni ogu udha iinima mwe yi yuga oohepele.

¹⁵ Kamu na uuthemba wokuthemenena aantu yandje nokukutha po eliko lyoohepele. Ongame Omuwa Omupangeliawike nOmunankondoawike nde dhi popi.”

¹⁶ Omuwa ote ti: “Taleni, nkene aakiintu Aajerusalem tayi inomo! Ohaye ende ya yelutha omayulu mombanda. Aluhe ohaa ndengandenga. Ohaa ende okanyaganye e taa kwelengendjitha oongondo dhokomagulu gawo.

¹⁷ Omolwaashika Omuwa ta menitha aakadhona yomuSion iipena ya ninge omapalu nota holola epenge lyawo.”

¹⁸ Esiku otali ya, uuna Omuwa ta ka hula aakiintu Aajerusalem ayihe mbyoka haye yi inomene — oongondo dhokomagulu, nuulenga komitse nomoothingo dhawo,

¹⁹ omagola, uugondo wopiikesho yawo, nomawiiwili;

²⁰ omatsilu, uulyenge wopoompando, omapaya ga nyonyombwa, oohanga dhomugwayo gwiizimba, niigegeti;

²¹ uulinga ye u zala kominwe nokomayulu gawo,

²² oonguwo dhawo adhihe dhokoshituthi, oondjatha, omalwaakani nuumpunda wiimaliwa;

²³ uuyitalelo, oonguwo dholiina, iisaali niikayiwa.

²⁴ Peha lyokugwaya omugwayo gwa nika nawa otaa ka nika nayi; peha lyepaya otaa zala oombale; peha lyomafufu ga fufulwa nawa otapu ya epalu; peha lyonguwo yoliina otaa zala ehahi; peha lyembweshukilo iiyadhi.

²⁵ Aalumentu yomoshilando, eeno tuu, naamboka aalumentwelela aanankondo otaa ka dhipagelwa molugodhi.

²⁶ Iiyelo yoshilando otayi ka lila nokutakuma, noshilando sho shene otashi ka kala sha fa omukiintu, omuhulwakadhi a kuutumba mevi.

4

¹ Esiku ndyoka aakiintu yaheyali otaa kwata omulumentu gumwe notaa ti: “Otatu li iikulya yetu yene notatu zala oonguwo dhetu yene, otwa hala ashike u ninge omusamane gwetu, opo twaa se ohoni.”

² Esiku otali ya, uuna Omuwa ta ka kokitha oshimeno nomuti kehe gu ninge omunene tagu lelema nawa. Aaisraeli ayehe mboka taa hupu ko, otaa ka nyanyukwa nokwiitangela iimeno mbyoka ya mena mevi.

³ Ayehe mboka ya hupile muJerusalem, oomboka Omuwa e ya hogolola ya hupe ko, otaa ka ithanwa aayapuki.

⁴ Okoonkondo dhe Omuwa ta ka tokola nokuyoga oshigwana e ta panga uutoni waJerusalem te shi ningi nombepo yepangulo noyelungunitho.

⁵ Nena Omuwa ota ka tumina kondundu Sion nokwaayehe mboka ya gongala ko, oshikogo sholwithi omutenya neye lyomulilo uusiku. Eadhimo lyaKalunga otali siikile nokugamena oshilando ashihe.

⁶ Eadhimo lye otali ka siikila oshilando noku shi tula momunzile, shi shigwe kuupyu womutenya noku shi ninga ehala lyegameneno, oku shi shiga koshikungulu nokomvula.

5

¹ Pulakeneni, manga tandi imbi eimbilo ndika, eimbilo lyomuholike gwandje noshitsambe she shomiviinu: Omuholike gwandje okwa li e na oshitsambe shomiviinu koshikulundundu mevi lyo ondoka.

² Okwe shi papula e ta fulu mo omamanya; okwa tsike mo omiviinu dha hogololwa. Okwe shi tungile oshungo yetonatelelo nokwa hoko etemba lyokukolela oomviinu. Okwa tegelele, shi ime omandjembele omatoye, ihe oshi imi omalulu.

³ Ngashingeyi, ne Aajerusalem naalumentu Aajuda, tokoleni pokati ketu noshitsambe shandje shomiviinu.

⁴ Oshitsambe shandje ondi na oku shi ningila shike natango? Omolwashike ano shi imi omandjembele omalulu, manga nda tegelela omatoye?

⁵ Ano shika osho tandi ka ningila oshitsambe shandje shomiviinu: enkolo lyasho otandi li gumbulula, ote kutha po eshigo lyasho notandi etha iiyamakuti yi shi lye po, noshi lyatagulwe po.

⁶ Otandi shi ningi eputu. Omiviinu dhamo itandi ke dhi thona nenge ndi dhi helele. Otandi shi etha shi mene oondjoho nomano. Otandi ka keelela iikogo yaahe shi lokele we omvula.

⁷ Oshitsambe shomiviinu shOmuwa Omunankondoawike osho oshigwana shaIsrael, aalumentu yaJuda oyo oshilonda shenyanyu lye. Okwe ya tegelele ya longe uuwanawa, ihe peha lyawo oya tilehi ombinzi. Okwe ya tegelele yu uthe pauyuuki, ihe opwe ya elilagano lyopombanda.

⁸ Yaye mboka taa gwedha egumbo kegumbo ekwawo notaa tula kumwe omapya, sigo ayihe ya ningi yawo, sigo kape na we eha lyokukala kuyalwe, noyo ayeke taa kala moshilongo.

⁹ Ondu uvu Omuwa Omunankondoawike ta popi ta ti: Omagumbo geni agehe otaga ka kala ga mbugala, oongoka omanene noga tungika kage na we aantu.

¹⁰ Oshitsambe tashi pululwa niipululo omulongo mesiku limwe, otashi gandja ondjupa yimwe yomaviinu; niilya ya kunwa oontungwa omulongo, otayi zi ontungwa yimwe.

¹¹ Yaye mboka haa meneka ongula onene ya tameke okunwa nohaa hungile taa nu iikolitha.

¹² Miituthi yawo yomatelekela omu na iiketala, uuharpa, oontunda noohiya pamwe nomaviinu. Ihe ihaa ndhindhilike nando iilonga yOmuwa yo kayu uvite ko shoka ta ningi.

¹³ Omolwashoka aantu yandje kaaye na oondunge, otaa ka falwa muupongekwa. Aambala yawo otaa ka sa po kondjala, naashamba otaa ka sa po kenota.

¹⁴ Uusi otau ke ya sa ondjala notau ekameke okana kawo ka mbwalangandja. Otau nina po aanamadhina yaJerusalem noongundu dhaamboka haa yogelele momanyanyu gawo.

¹⁵ Shaa ngoka ota ka tyololoka, naayehe mboka hayi inomo, otaa ka fupipikwa.

¹⁶ Ihe Omuwa Omunankondoawike ota holola uunene we mokulonga shoka shu uka, nota holola uuyapuki we mokutokola aantu ye.

¹⁷ Momakulukuma giilando oonzigona otadhi ka napa omwiidhi, nuukombwena otau ka mona oshinapelo.

¹⁸ Yaye mboka taa ihilile egeelo, itaa vulu okumanguluka kondjambi yuulunde.

¹⁹ Otamu ti: “Omuwa ne endelele a gwanithe shoka a popi, opo tu shi mone. Kalunga kaIsrael omuyapuki na tsakanithe omadhiladhilo ge; ne tu talithe shoka a dhiladhila.”

²⁰ Yaye mboka haa ti, uuwinayi owo uuwanawa, nuuwanawa owo uuwinayi, oomboka haa pilike omilema dhi ninge uuyelele, nuuyelele u ninge omilema! Shoka oshilulu ohaa shi ningi oshitoye, naashoka oshitoye ohaa shi ningi oshilulu.

²¹ Yaye mboka haa itala oyo aanawino nohaa itangele oondunge dhawo!

²² Yaye mboka haa inomene okunwa omaviinu e taa vuka mokuhanga oondungila,

²³ mboka haa mangulula omunandjo omolwoombumbo nohaa keelele uuyuuki womukeenandjo!

²⁴ Omolwaashoka, ongashika iiyagaya nomwiidhi omukukutu tagu igonyo nokulunguna momulilo, osho omidhi dhawo tadhi ka ola, neopalo lyawo tali pepuka po lya fa ontsi, oshoka oye ekelehi shoka Omuwa Omunankondoawike, Kalunga kaIsrael omuyapuki, e tu longo.

²⁵ Omuwa okwa geele oshigwana she nokwa ganeke oshikaha she e shi dhenge. Oondundu otadhi ka kakama, nomidhimba dhaamboka taa ka sa, otadhi ka kala momapandaanda dha fa uuhoho. Naampaka ondjahi yOmuwa inayi lota, ihe oshikaha she otashi kala natango sha taganana.

²⁶ Omuwa ota gandja endhindhiliko lyokwiithana oshigwana shokokule. Ote ya hikile ohiya, ya ze kooha dhuuyuni. Oko taa zi taa endelele nokukwinyola.

²⁷ Mongundu yawo kamu na nando ogumwe a loloka, kape na nando ogumwe ta tantala. Ihaa kumuka noihaa kotha. Kape na epaya tali tokoka nenge olukaku talu dhituka.

²⁸ Iikuti yawo oya honga, nomatati gawo oga lukilikika. Omakondo guukambe wawo ogo omakukutu ngemanya, nomagulu gomatembakwiita gawo otaga iteluka ga fa okambiya.

²⁹ Aakwiita yawo otaa ndunduma ngoonime, ongaashi oonime oongundjuka tadhi pumbu notadhi gono, sho tadhi kwata oshihakanwa e tadhi shi kookolola po, nokape na omukwathi.

³⁰ Uuna esiku ndyoka nali ya, otaa ka ndundumina Israel, ngaashi efuta hali ndunduma. Taleni utale oshilongo shika! Oku na ashike omilema nehaluko! Uuyelele owa ninwa po komilema.

6

¹ Momumvo ngwiyaka omukwaniilwa Usia a si, onda mono Omuwa. Okwa li a kuutumba koshipangelapundi she, pombanda puule meadhimo, noongenge dhoonguwo dhe odhu udhitha otempeli ayihe.

² Aaserafi oye mu kunduka, noshaa ngoka okwa li e na omawawa gahamano. Omawawa gaali oye gi isiikile koshipala nomawawa gaali oye gi isiikile kolutu nomawawa gaali oya tuka nago.

³ Oya li taa paathana omalufo taa ti: “Omuyapuki, omuyapuki, omuyapuki! “Omuwa Omunankondoawike omuyapuki! “Eadhimo lye olyu udha uuyuni.”

⁴ Oshihomo shomawi gawo osha kakameke omakankameno gotempeli, notempeli yo yene oyu udha olwithi.

⁵ Onda popi nda ti: “Yaye ngame! Otandi ka kana, oshoka ngame omulumentu ndi na omilungu dha nyata, nonda kala mokati kaantu ye na omilungu dha nyata, nonomeho gandje mwene onda tala Omukwaniilwa, Omuwa Omunankondoawike!”

⁶ Nena gumwe gwomaaserafi okwe ya kungame ta tuka, a humbata ekala lya hanya e li kutha nonkwato koshiyambelo.

⁷ Okwa gumu omilungu dhandje nekala lya hanya nokwa ti: “Tala, olya gumu omilungu dhoye; ngashingeyi oondjo dhoye odha thetwa po, nomayono goye oga dhimwa po.”

⁸ Opo ihe ndu uvu Omuwa ti igidha ta ti: “Olye ngo tandi mu tumu? Olye ta ningi omutumwa gwetu?” Onda yamukula nda ti: “Otandi yi! Tuma ndje!”

⁹ Osho ngaaka a lombwele ndje ndi ye ko ndi ka lombwele aantu elaka tali ti: “Okuuva ohamu uvu, ihe kamu uvite ko. Okumona ohamu mono, ihe kamu wete ko.

¹⁰ Kukutika oomwenyo dhaantu yoshigwana shika, thitika omakutsi gawo, thithikilitha omeho gawo, opo yaa mone ko yo yaa uve ko. Ngele otaa uvu ko notaa galukile kungame, otaa aludhwa.”

¹¹ Onda pula nda ti: “Otashi kala ngawo sigo uunake, Omuwa?” Omuwa okwa yamukula a ti: “Osigo iilando ya kumunwa po noya mbugala — sigo omagumbo taga kala gaa na aantu — sigo oshilongo tashi ningi ombuga yowala.

¹² Otandi ka fala aantu kokulekule, noshilongo ashihe otashi mbugala.

¹³ Nongele tamu hupu oshitimulongo shaantu moshilongo, nasho wo otashi ka yonagulwa po. Ihe otashi ka ninga sha fa oshithindi shomusati nenge shomwandi sha thigala mevi, omuti nge gwa kekwa po. Oshithindi shoka osho ombuto ondjapuki.”

7

¹ Omukwaniilwa Ahas yaJotam yaUsia sho a li ta pangele Juda, iita oya tukuluka. Rezin, omukwaniilwa gwaSiria, naPeka yaRemalia, omukwaniilwa gwaIsrael, oya matukile Jerusalem, ihe oya nyengwa oku shi teya po.

² Elaka sho lya adha omukwaniilwa gwaJuda tali ti, omatangakwiita gaSiria oge li nale nokuli moshilongo shaIsrael, nena oye mwene naantu ye oya sholola noya kakama ya fa omiti tadhi shikashikwa kombepo.

³ Omuwa okwa lombwele Jesaja a ti: “Kutha omumwoyemati Shear-Jashub, u ye u ka tsakaneke omukwaniilwa Ahas. Oto ke mu adha pondjila yaatungi yoonguwo pomukanka gwomeya ngoka tagu kutha omeya mondama yopombanda.

⁴ Mu lombwela a kale a kotoka, a ngungumane nokaa sholole nenge a piyagane. Ondjahi yomukwaniilwa Rezin nAasiria noyomukwaniilwa Peka oya fa owala olwithi talu tsinagala kiikuni iyali.

⁵ Siria, Israel nomuna gwaRemalia oye ku tsile ondumbo.

⁶ Oya dhiladhila okumatukila Juda, okuhalutha aantu ya game kuyo nokutula omuna gwaTabeel koshipundi.

⁷ “Ihe ngame, Omuwa, otandi popi te ti aawe, itaa tompola sha noitashi ningwa nando.

⁸ Omolwashike? Oshoka Siria kashi vule Damaskus, oshilandopangelo shamo, naDamasko kashi vule omukwaniilwa Rezin. Nonge pwa piti omimvo omilongo hamano nantano, Israel otashi kala sha teka po.

⁹ Oshilongo Israel kashi vule Samaria, oshilandopangelo shamo, naSamaria kashi vule omukwaniilwa Peka. “Ngele itamu ikolelele meitaalo, itamu kala po.”

¹⁰ Omuwa okwa lombwele Ahas ishewe a ti:

¹¹ “Pula Omuwa Kalunga koye e ku pe endhindhiliko. Otashi vulika li ze mookandoli, muuyuni wokuusi nenge mookathele, megulu.”

¹² Ahas okwa yamukula a ti: “Itandi pula endhindhiliko, opo ndaa hinde Omuwa.”

¹³ Jesaja okwa popi a ti: “Ne oluvalo lwaDavid, pulakeneni ngashingeyi. Inashi gwana tuu, sho hamu lolokitha aantu? Omwa hala mu lolokithe wo Kalunga kandje?

¹⁴ Eewa ano, Omuwa mwene te mu pe endhindhiliko: omukadhona ta ningi omusimba nota vala omumati, nedhina lye oImmanuel.

¹⁵ Ota ka lya omahini gomoosi nomagadhi goonyushi, sigo ta koko a tseye okuhogolola uuyuuki nokweetha uuwinayi.

¹⁶ Nokuli manga ethimbo ndyoka inaali ya, iilongo yaakwaniilwa mboka yaali mwe ya tila, otayi ningi omaputu gowala.

¹⁷ “Omuwa ota ka eta kombanda yoye, kombanda yaantu yoye nokombanda yegumbo lyoye iiponga yi kenyeneka yi vule ayihe ya li ko, hela Juda naIsrael ya topokele — ote eta omukwaniilwa gwaAssur.

¹⁸ “Uuna esiku ndyoka tali ya, Omuwa ota hikile Aayegipiti ohiya, ye ye ya fa oondhi tadhi zi kokule kiimpoko yaNiili, nAayassur, ye ye ya fa oonyushi tadhi zi kevi lyawo.

¹⁹ Otadhi ya tadhi kanyata omakolombongo goondundu nomakololo gomomamanya notadhi gumbakana iihwa niipemba ayihe.

²⁰ “Uuna esiku ndyoka tali ya, Omuwa ota ka ithana omukululi handiyaka yomulonga gwEufrat. Oye omupangeli gwaAssur. Ote ke mu kulula omafufu komitse, noombenzi wo ote dhi kulula ko.

²¹ “Esiku otali ya, uuna omunahambo ta hupitha owala ongombe ondjelipa niikombo iyali,

²² otayi kandwa omahini ga gwana. Eeno, aakaliko taa ka hupa moshilongo, otaa ka kala ye na omahini nomagadhi goonyushi gokulya.

²³ “Uuna esiku ndyoka nali ya, ehala kehe lya mena oomviinu eyuvi tadhi zi iimaliwa iisiliveli eyuvi, otali ka mena omano noondjoho.

²⁴ Aantu oko taa ka weya ye na omatati niikuti, oshoka oshilongo ashihe otashi ka mena omano noondjoho.

²⁵ Koondundu adhihe hoka kwa li haku kala iimeno ya kunwa ko, otaku ka mena omano, nokape na ngoka ta ka vula okuya ko. Otadhi ka ninga omahala gokunapa oongombe nokweendagulwa koonzi.”

8

¹ Omuwa okwa lombwele ndje a ti: “Kutha oshipelende oshinene, u nyolele mo oondanda dha tonata: Maher-Shalal-Hash-Bas.

² Kutha aantu yaali aainekelwa, omuyambi Uria naSakaria yaJerebekia, ya ninge oonzapo dhandje.”

³ Mukadhandje okwa ningi omusimba. Sho a vala okamati, Omuwa okwa lombwele ndje a ti: “Mu luka Maher-Shalal-Hash-Bas.

⁴ Okamati manga inaaka tseya okutumbula tate nenge meme, uuyamba waDamaskus auhe niihakanwa ayihe yaSamaria otayi yiwa nayo komukwaniilwa gwaAssur.”

⁵ Omuwa okwa lombwele ndje ishewe a ti:

⁶ “Aantu mbaka sho ya dhini omeya gomokalonga Siloa haga tondoka kashona, notaa kakama koshipala shomukwaniilwa Rezin noshomukwaniilwa Peka,

⁷ ongame, Omuwa, tandi ka tala ko omupangeli gwaAssur nomatangakwiita ge agehe, a ponokele Juda. Otaa ka matuka ya fa omeya gefundja lyomulonga gwEufrat taga kungulukile kominkulo dhagwo adhihe.

⁸ Otaa ka kungulula po Juda ngefundja tali tsu komapepe e tali siikile ayihe. Otaa ka halakana nevi alihe. Kalunga na kale pamwe natse!”

⁹ Pwidhukeni, ne iigwana, ihe otamu ka sindika! Pulakeneni, ne ooha dhuuyuni: Ihomatekeleni iita, ihe otamu ka dhengwa! Eeno, ilongekidheni, ihe otamu ka sindika!

¹⁰ Pangeleni oompangela, ihe itamu tompola sha. Uvathaneni, ihe itashi tsakanithwa, oshoka Kalunga oku li pamwe natse.

¹¹ Omuwa okwa londodha ndje noonkondo dhe adhihe, ndaa ende nondjila yoshigwana shika. Okwa ti:

¹² “Ino zimina shoka oshigwana shika tashi ti shi longa, ngoye ino tila iinima mbyoka hashi yi tila. Ino kwatwa kehaluko.

¹³ Ngame Omuwa Omunankondoawike, ngame omuyapuki, ongame awike u na okutila nokuhalukila.

¹⁴ Omoluuyapuki wandje uutilithi onda fa emanya ndyoka aantu tayi ipumu ko; onda fa omwigo tagu yulu aantu yomiilongo Juda naIsrael nAajerusalem.

¹⁵ Oyendji otaa ka tantala, otaa ka gwila po notaa ka nyanyulwa. Otaa ka yulwa komwigo.”

¹⁶ Onda hala okupungula nawa elondodho ndika lya zi kOmuwa nokupatela ompango moomwenyo dhaalongwa yandje.

¹⁷ Omuwa okwa holama oshigwana she mwene, ihe ngame onde mu inekela nondi na etegameno muye.

¹⁸ Ongame nguka naanona mbaka Omuwa e ya pe ndje. Omuwa Omunankondoawike, ngoka oshipangelapundi she shi li kondundu Sion, okwe tu tuma tu ninge oontumwalaka dhi na omwenyo kAaisraeli.

¹⁹ Nge taku tiwa, mu pule elaka kaathithi nokoompulile, mboka haa nongona nohaa dhilomota, omolwashike ando mwaa ka pule elaka kuKalunga keni? Omolwashike moshinima shaanamwenyo mu na okupula elaka kaathithi?

²⁰ Ya yamukula u tye: “Pulakeneni shoka Omuwa te mu nongeke. Inamu pulakena koompulile. Shoka tadhi mu lombwele, itashi mu opalele.”

²¹ Oshigwana otashi ka endaenda noshilongo, sha tyololoka nosha sa ondjala. Mondjala yasho nomondjahi yasho otashi ka tuka omukwaniilwa gwasho naKalunga kasho. Otashi ligalala sha tala pombanda,

²² nenge sha tongolola pevi, ihe itashi mono sha shaa shi uudhigu nomilema, omilema dhi tilitha, moka ya mbolokotithilwa mo.

9

¹ Itaku ka kala ku na ompito yokuhenuka uudhigu mbuka. Evi lyomazimo gaSebulon nogaNaftali olya li lya dhinika, ihe konakuyiwa esimano otali ke ya koshikandjo shika okuza kEfuta lyopokati sigo okevi lyohandiyaka yaJordan, nokuGalilea, moka aakwiilongo ya kala.

² Oshigwana she ende momilema, otashi mono uuyelele owindji. Oomboka ya kala momilema thokothoko, uuyelele otau ya minikile.

³ Aantu oto ya shambudha noonkondo, Omuwa, oto ya pe enyanyu enene. Otaa nyanyukilwa koshipala shoye, ngaashi aantu haa nyanyukwa, uuna taa teya iilya nenge taa topola oshihakanwa.

⁴ Oshoka ongoye wa teya ondjoko yawo ndjoka ya li ye yi uvitile uudhigu, nowa tokola ongola ndjoka ye ya dhenge komapepe. Omuwa, owa dhenge iigwana mbyoka ya hepeke aantu yoye, naanaa ngaashi wa dhengele Aamidiana nale ndjiyaka.

⁵ Oongaku dhaahomoni noonguwo dhawo dha yaywa mombinzi otadhi fikwa po.

⁶ Otwa valelwa omunona! Otwa pewa omumati! Epangelo olye; oli li komapepe ge. Ota lukwa Omupukululi omukumithi, Kalunga omunankondo, He yomuukwaaluhe, Omuwa gwombili.

⁷ Uukwaniilwa we kau na mpoka tau hulu po, noshilongo she otashi kala aluhe shi na ombili. Ota ka kuutumba koshipangelapundi shaDavid ta lele oshilongo she. Oonkondo dhe odha kankamekelwa keutho nokuuyuuki, okuza nena sigo aluhe. Uulaadhi wOmuwa Omunankondoawike otau shi ningi.

⁸ Omuwa okwa tumbulile oshilongo shaIsrael epangulo, a pangule oluvalo lwaJakob.

⁹ Aaisraeli ayehe, shaa ngoka a kala moshilando Samaria, ota ka tseya kutya shika okwe shi ninga. Ihe otayi inomo noya lunduka. Otaa ti:

¹⁰ “Oondhopi odha kumuka po, ihe otatu ka tunga po omakuma gomamanya ga hongwa. Omikwiyu odha hokoka po, ihe tse otatu ka tsika mo omisedeli.”

¹¹ Omuwa okwe ya shongele aatondi yawo ye ya matukile.

¹² Siria kuuzilo naFilistia kuuninginino oye ekama omakana gawo ya nine po Israel. Nomushika ondjahi yOmuwa inayi lota; okwooko kwe onatango kwa taganana.

¹³ Aaisraeli inayi itedhulula natango. Nando Omuwa Omunankondoawike okwe ya geele, inaa galukila kuye.

¹⁴ Polumwe Omuwa ota ka geela Israel naawiliki ye; ote ke ya teta omutse nomushila.

¹⁵ Aakuluntu naanenentu oyo omutse, naahunganeki mboka taa longo omalongo giifundja, oyo omushila.

¹⁶ Aawiliki yaantu mbaka oya ningi aapukithi, naawilikwa oya piyaganekwa thiluthilu.

¹⁷ Omolwashoka Omuwa ina hokwa aagundjukamati yawo noita sile nando aaselekadhi yawo noothigwa ohenda, oshoka aantu ayehe oyo aakaanakalunga naakolokoshi, naashihe shoka taa popi, oshiwinayi. Nopushika ondjahi yOmuwa inayi lota natango; okwooko kwe onatango kwa taganana.

¹⁸ Uukolokoshi waantu owa hwama wa fa epeya tali lungunitha po omano noondjoho. Owa taandela wa fa okuti taku pi notaku gundumuka olwithi.

¹⁹ Molwaasho Omuwa Omunankondoawike a geya, ondjahi ye oya hwama ya fa omulilo tagu lilima noshilongo tagu lungunitha po aantu, noitaa silathana ohenda.

²⁰ Shaa mpoka moshilongo aantu otaa hakana nokulya po uundjagumuke wiikulya mboka taa mono, ihe itaa kuta. Nando naa lye po oyana, aawe, onkene tuu itaa kuta.

²¹ Aamanasse nAaefraim otaa matukilathana, noyo kumwe ayehe otaa ponokele Juda. Natango ondjahi yOmuwa inayi lota; okwooko kwe onatango kwa taganana.

10

¹ Yaye mboka haa toto oompango dhaa ukile, oomboka haa tungu omautho haga hepeke aantu yandje!

² Osho haa keelele oohepele uuthemba wawo nohaa kutha aakweyi etokolo lyu uka. Osho haa thetula aaselekadhi eliko lyawo nohaa kutha po uuthiga woothigwa.

³ Otamu ka ninga ngiini, uuna Omuwa te mu geele? Otamu ka ninga ngiini, uuna te mu undulile ehanagulo tali zi moshilongo shokokule? Otamu ka matukila peni, mu ka mone ekwatho? Uuyamba weni otamu ke u holeka peni?

⁴ Otamu ka dhipagelwa miita nenge mu kwatwe po oonkwatwa. Natango ondjahi yOmuwa inayi lota, onatango tuu oshikaha she sha taganana.

⁵ Yaye Assur, ongoye ongola yondjahi yandje! Otandi longitha Assur ongondhimbo yokudhenga mboka nda geela.

⁶ Otandi tumu Assur okudhenga oshigwana oshikeenakalunga, aantu mboka ya geyitha ndje. Otandi ya tumu, ya yuge, ya hakane yo ya lyatagule aantu ngaashi iiyagaya momapandaanda.

⁷ Ihe omupangeli gwaAssur ita dhiladhila ngaaka, kali shi elalakano lye. Elalakano lye olyo okuhanagula nokukomba po iigwana oyindji.

⁸ Oti itanga ta ti: “Oondjayi dhandje adhihe dhaakwiita odho aakwaniilwa.

⁹ Onda lala iilando Kalno naKarkemish, Hamat naArpad, Samaria naDamaskus.

¹⁰ Onda ganeke okwooko kwandje, ndi geele iilongo mbyoka hayi simaneke iimenka oyindji yi vule mbyoka yaJerusalem naSamaria.

¹¹ Onda teya po Samaria niimenka yasho ayihe; osho te ningile wo Jerusalem niiyelekela mbyoka tayi simanekelwa mo.”

¹² Ihe Omuwa ota ti: “Uuna te mana shoka tandi longo kondundu Sion nomuJerusalem, otandi ka geela omupangeli gwaAssur omolwomwiityo gwe nuutsa we auhe.”

¹³ Omupangeli gwaAssur oti inomo ta ti: “Ayihe mbika ongame nde yi longo. Ngame ondi na oonkondo nowino nonda kotoka. Onda dhimi po oongamba pokati kiigwana nonde ya yugu uuyamba mboka ya li ya pungula. Aantu onde ya lyatagula nda fa ontsezi.

¹⁴ Iigwana yomuuyuni oya ningi ya fa oshihandhila shokadhila, uuyamba wawo onde u gongele nuupu nda fa tandi gongele omayi. Kakwa li ewawa lya papamene ndje, li haluthe ndje, nenge okana ke ekamene ndje, ka kudhile ndje.”

¹⁵ Ihe Omuwa ota ti: “Ekuya otali inomo tuu kutya olyo enene li vule ngoka te li tetitha? Oshisaaha oshi na tuu esimano li vule lyaangoka ta saaha nasho? Oshiti ohashi longitha tuu ngoka e shi yedha, nenge ondhimbo ohayi dhungadhunga tuu omuntu?”

¹⁶ Omuwa Omunankondoawike ota tumu uuvu, a geele aakwiita yaAssur yo ondoka. Momalutu gawo otamu ka yaka omulilo gwa fa epeya.

¹⁷ Kalunga, uuyelele waIsrael, ota ka kala omulilo. Kalunga kaIsrael omuyapuki ota ka kala omalaka gomulilo. Mesiku limwe otaga fike po omano noondjoho muIsrael.

¹⁸ Omakuti ge ga thitakana nomapya go ondoka otaga hanagulwa po thiluthilu, ngaashi omuvu ta thipuka.

¹⁹ Momakuti ge otamu ka hupa omiti omishona, nokanona taka vulu oku dhi yalula.

²⁰ Esiku otali ya, uuna Aaisraeli mboka ya hupu ko, itaa inekele we oshigwana shoka konyala she ya hanagula po. Otaa ka inekela shili Omuwa, Kalunga kaIsrael omuyapuki.

²¹ Aaisraeli aashona ayeke taa ka galukila kuKalunga kawo omunankondo.

²² Nando Aaisraeli oyendjiyendji ya fa ehekevi lyomooha dhefuta, aashona yowala taa ka galuka ko. Ehanagulopo olya tokolelwa Aaisraeli, noye li ilongela lela.

²³ Eeno shili, Omuwa, Omuwa Omunankondoawike ota ka tsakanitha etokolo lyehanagulopo moshilongo ashihe.

²⁴ Omuwa Omupangeliawike nOmunankondoawike ota lombwele aantu ye mboka ye li muSion ta ti: “Inamu tila Aayassur, nando taye mu hepeke, ngaashi Aayegipiti ya ningile.

²⁵ Egeelo lyandje kune otali hulithwa po mbala notandi ke ya hanagula po.

²⁶ Ongame, Omuwa Omunankondoawike, otandi ke ya nakula nongola yandje, ngaashi nda dhengele Aamidiana pemanya lyaOreb. Otandi geele Assur, ngaashi nda geelele Egipiti.

²⁷ Uuna esiku ndyoka lya thiki, otandi mu mangulula mepangelo lyaAssur, nondjoko yawo itayi ka kala we komapepe geni.”

²⁸ Etangakwiita lyaatondi otali homona Ai. Otaa pitilile muMigron. Omatemba gawo otaye ga thigi muMikmash.

²⁹ Otaa kondo etaulilo notaa ka hungila muGeba. Aantu yomuRama otaa haluka, naantu yomoshilando shaSaul Gibea otaa kukuma taa yi ondapo.

³⁰ Aagallim, kugeni onkugo! Ne Aalajesha, pulakeneni! Yamukuleni, ne Aayanatot!

³¹ Aamadmena nAagebimi otaa fadhuka po ya ka holame.

³² Esiku tuu ndyoka aatondi oye li moshilando Nob, naahwiyaka otaa ganeke oongonyo kondundu Sion muJerusalem.

³³ Omuwa Omunankondoawike ote ke ya pompona ya fa iitayi tayi tetwa ko komuti. Ndhoka dhi ifala pombanda nomileeleka dhomudho otadhi komangelwa po notadhi lyatelwa pevi.

³⁴ Omuwa ote ya komangele po ya fa omiti dhomokati komugulu tadhi komangelwa nekuya; nando nadhi kale omiwanawa ngaashi muLibanon, otadhi kewa po.

11

¹ Oshitutuma otashi tsapuka moshithindi shaIsai; noshitayi omomidhi dhasho e tashi imi iiyimati.

² Ombepo yOmuwa otayi mu lambele, ombepo yowino noyoondunge, ombepo yomayele noyoonkondo, ombepo yuunongo noyokutila Omuwa —

³ oye nota ka nyanyukilwa etilo okutila Omuwa. Iha pangula pakutala kwomeho, ye iha tokola pakuuva omauvila,

⁴ ihe ohu uthile oonakuhepa nuuyuuki nota popile uuthemba woohepele moshilongo Nohapu ye yoonkondo ota dhenge evi naakolokoshi ote ya dhipaga nomufudho gwomokana ke.

⁵ Uuyuuki owo epaya lyomombunda ye, uudhiginini noshili omuya gwomoombwetelo dhe.

⁶ Embungu otali ka kala pamwe nokanzigona, nongwe tayi kala ya lala pokakombwena. Okatana nokankoshona otau napele pamwe, nokamati okashona take u litha.

⁷ Ongombe onzinzi nemwanka enyali otayi napele pamwe, noyana taa gondjo pamwe. Nonime otayi li omwiidhi ya fa ongombe.

⁸ Okahanona haka yamu taka dhana pomututu gwontoka, nokamputu opo ka toyo otaka tsu oshikaha shako kokwena kwepili.

⁹ Kondundu yandje ondjapuki itaku ka longwa uuwinayi nenge iikolokosha, oshoka evi otali ka udha okutseya Omuwa kwa fa omeya ga siikila efuta.

¹⁰ Esiku otali ya, uuna oshitutuma shaIsai tashi ka ninga epandela lyiigwana. Iigwana otayi ka gongalela kuye, nonkalelo ye oyi na eopalo.

¹¹ Mesiku ndyoka Omuwa ota ka ganeka okwooko kwe olutiyali, a galulile kegumbo yamwe yomaantu ye mboka ya hupile muAssur nomuEgipiti, muPatros, Etiopia, Elam, Babilonia naHamat, pominkulo nokoontuntu dhomomafuta.

¹² Omuwa ota ka yelutha epandela, u ulukile iigwana kutya ota gongele ishewe Aaisraeli nAajuda mboka ya halakana e te ya kongolola koombinga adhihe dhevi.

¹³ Oshilongo shaIsrael itashi ka sila we Juda efupa, naJuda ita ka ninga omutondi gwaIsrael.

¹⁴ Ayehe otaa matukile Aafilisti kuuninginino e taa ka yuga aantu yokuuzilo. Otaa ka sinda Aaedomi nAamoabi, nAayammoni otaa ka vulika kuyo.

¹⁵ Omuwa ota ka kukutika Ekololo lyaSues nota pepitha ombepo ompyu kombanda yomulonga gwEufrat note gu topagula muulonga uheyali uushona tau vulu okutaagulukwa kolupadhi.

¹⁶ Ogwo notagu ningi onenendjila yokweendwa kaantu ye Aaisraeli mboka ya hupu ko taa zi kuAssur, naanaa ngaashi oohekulu ya zile muEgipiti.

12

¹ Esiku otali ya, uuna to popi e to ti: “Otandi ku hambelele, Omuwa! Owa geele ndje, ihe ondjahi yoye oya loto, ongoye nowa fudhitha ndje.

² Oshili, Kalunga oye ehupitho lyandje; onde mu inekela no ihe tila sha. Omuwa, Omuwa oye oonkondo dhandje neimbilo lyandje. Oye a ningi ehupitho lyandje.”

³ Nenyanyu otamu ka teka mo omeya momithima dhehupitho.

⁴ Esiku ndyoka otamu popi e tamu ti: “Hambeleleni Omuwa! Uvitheni edhina lye! Hokololeni iilonga ye mokati kiigwana! Uvitheni tamu ti edhina lye olya simana pombanda!

⁵ Imbileni Omuwa, oshoka okwa longo iinima iinene! Yi tseyithileni uuyuni auhe!

⁶ Igidheni mokule ne mu imbe nenyanyu, ne Aasioni, oshoka Kalunga Omuyapuki gwaIsrael oye omunene, a kala mokati keni.”

13

¹ Ndhika odho oohapu dhomahunganeko tadhi popi Babilon, dha hololelwa Jesaja yaAmos kuKalunga.

² Yelutheni epandela pontundulu kondungu yondundu, mu igidhe aakwiita! Yelutheni omaako mu ya lape, opo ya matukile iiyelo yoshilando shi na uuntsa.

³ Omuwa okwi ithana aakwiita ye oofule yi ihupula, ya hinge iita iiyapuki yo ya geele mboka e ya sila ondjahi.

⁴ Pulakeneni omundundumo koondundu — omuzizimo gwengathithi enene lyaantu, ombuyagano yiigwana niilongo tayi gongala. Omuwa, Kalunga komatangakwiita, ota dheula aakwiita ye.

⁵ Otaye ya taa zi kiilongo yokokule kooha dhuuyuni. Mondjahi ye Omuwa ote ya a hanagule po oshilongo ashihe.

⁶ Memekukwee! Esiku lyOmuwa oli li popepi. Omunankondoawike ote eta ehanagulopo.

⁷ Nena omake gaantu ayehe otaga ka nemanana, nomukumo gwawo otagu tyololoka.

⁸ Otaa ka haluka, otaa gwilililwa po kuuwehame ya fa omukulukadhi a adhika koshitheta. Otaa talathana ya sholola, niipala yawo ya pemba kohoni.

⁹ Esiku lyOmuwa otali ya. Olyo esiku etilithi li na uulaadhi nondjahi ondulu. Oshilongo otashi mbugala, nomulunde kehe ota hanagulwa po.

¹⁰ Oonyothi dhokegulu nomakaladhidhi gadho itaga ka minikila we. Etango otali ka kala lya luudha, sho tali piti, nomwedhi itagu toka we.

¹¹ Omuwa ota ti: “Otandi geele evi omoluuwinayi walyo, naakolokoshi omolwomayono gawo. Otandi ka hulitha po uuntsa waatangalali notandi ka thindila pohi omwiityo gwaakolokoshi.

¹² Oomboka taa hupu ko, otaa ka pumba ye vule oshingoli.

¹³ Otandi kakamitha omagulu; nevi otali ka ndjingandjingwa pehala lyalyo mesiku ndyoka, uuna ngame, Omuwa Omunankondoawike, tandi holola ondjahi yandje.

¹⁴ “Aakwiilongo mboka ya kala muBabilon, otaa ka ya ontuku kiilongo yawo, ya fa uupundja tau hunuka mokati kaakongo. Otaa halakana ya fa oonzi dhaa na omusita.

¹⁵ Shaa ngoka ta adhika, ota ka tsuwa negonga, shaa ngoka ta kwatwa, ota ka dhipagwa po.

¹⁶ Uunona wawo otau ka nyanyagulwa montaneho yawo, omagumbo gawo otaga ka yugwa naakulukadhi yawo otaa ka laliwa nayo.”

¹⁷ Omuwa ota ti: “Otandi ka sikumudha Aamedia ya matukile Babilon. Kaye na onkwa noshisiliveli noihaa haluka oshingoli.

¹⁸ Omatati gawo otaga yaha aagundjuka. Kaye na onge nuuhanona, nuunona itaye u tala nolukeno.

¹⁹ Babilonia osho oshilongo sho opala shi vule ayihe, osho uuntsa waantu yasho. Ihe ngame, Omuwa, otandi ka hanagula po Babilon, ngaashi nda ningi Sodom naGomorra!

²⁰ Kape na we mpoka tashi ka kalwa kaantu. Kape na Omuarabia ta dhike mo etsali lye, nokape na omusita ta napithile mo iimuna ye.

²¹ Otashi ningi ehala lyokugondja oombidhi. Moongulu dhasho omahwiyu taga ka tunga iihandhila, oompo odhi na mo onkalo yadho, niikombo yomokuti otayi ka ndjomboka-ndjomboka apehe.

²² Moongulumbala otamu yogelele oombandje, nomambungu otaga ulula miinyanga yasho. Eeno, ethimbo lyaBabilon olya thikana! Omasiku gasho ga pitilila.”

14

¹ Omuwa ota ka sila Aaisraeli ohenda e te ya hogolola ishewe, ya ninge aantu ye mwene. Ote ke ya fala ishewe mevi lyawo, naakwiilongo otaye ya e tayi itula mokati kawo.

² Iigwana oyindji otayi ka kwatha Aaisraeli ya galukile kevi ndyoka Omuwa e li ya pe, naankoka iigwana otayi ka ninga aapika yAaisraeli, yi ya longele. Mboka ya kwatele po Israel, otaa ka kwatwa po kuIsrael, nAaisraeli otaa ka pangela aantu mboka ye ya hepekele nale.

³ Omuwa ota ka pa Aaisraeli epepelelo, ya manguluke kuuwehame nokomahepeko gawo nokiilonga yuupika ya thiminikilwa oku yi longa.

⁴ Uuna Omuwa ta gwanitha mbika, aantu otaa ka nyekela omukwaniilwa gwaBabilon taa ti: “Omukwaniilwa omunanyanya a gwile po! Ita ka hepeka we omuntu!

⁵ Omuwa okwa teya oonkondo dhaapangeli aakaanakalunga

⁶ mboka ya li haa ponokele iigwana mondjahi nokuthiminika aapikwa yawo nonyanya pwaa na nando ohenda.

⁷ Uuyuni auhe otau nyanyukilwa evululuko nombili, noshaa ngoka oti imbi ta hambelele.

⁸ Omikiperesi nomisedeli dhaLibanon otadhi nyanyukilwa etekopo lyomukwaniilwa, oshoka kape na we ngoka te dhi komangele po, oshoka ke po.

⁹ “Uusi owa tegamena omukwaniilwa gwaBabilon. Aathithi yaamboka ya li aanankondo kevi, oya penduka. Aakwampungu yaakwaniilwa oya yambuka kiipangelapundi yawo.

¹⁰ Ayehe otaye mu igidha taa ti: ‘I! Wa ningi nani we tu fa! Owe tu fa lelalela!

¹¹ Owa li ho simanekwa noshihomo shuuhumba, ihe ngashingeyi we ya ishewe muuyuni wokuusi. To lala pombanza yeolelo nowa siikilwa komazinyo.’

¹² “Nyothingula, omuna gweluwa! Owa ningwa ngiini, sho wu umbilwa pevi, ngoye ngoka wa sindi iigwana?

¹³ Owi ipopile momwenyo gwoye wa ti: ‘Otandi ka londa kegulu, otandi ka thikameka oshipangelapundi shandje pombanda handiya yoonyothi dhaKalunga. Otandi ka kuutumba koshipangelapundi kondundu yokugongalela ookalunga, mookathelelela kondundu yiiholekwa.

¹⁴ Otandi londo handiyaka yiikogo, ngame ndi fe Omunankondoawike.’

¹⁵ Ihe nani owu umbilwa mohi moshaasi, mombwili yekolombongo.

¹⁶ “Aasi ye ku tongolola, otaye ku sheke taa pula taa ti: ‘Omulumentu oye tuu nguka a kakamitha nale uuyuni nokwa ndjingandjinga iilongo?

¹⁷ Oye tuu omulumentu ngoka a teya po iilando e ta mbugaleke uuyuni? Oye tuu ngono inaa mangulula nando oonkwatwa dhe nenge e dhi ethe dhi ye koyaandjawo?’

¹⁸ Aakwaniilwa ayehe yomuuyuni oya lala moombila dhawo nokusimanekwa,

¹⁹ ihe ngoye ku na ombila, nomudhimba gwoye ogwa umbilwa meolelo. Ogwa siikilwa komidhimba dhaakwiita ya sile molugodhi, ogwa umbilwa pamwe nadho mombogo yemanya nogwa lyatagulwa.

²⁰ Molwashoka wa yono po oshilongo shoye mwene e to dhipaga aantu yoye, ito ka fumvikwa wa fa aakwaniilwa yalwe. Kape na nando ogumwe gwomegumbo lyoye ta ka hupa ko.

²¹ Etheni utale, eso li homate! Aamati aana yomukwaniilwa otaa ka sa moluulunde woohekulu. Kape na nando ogumwe gwomuyo ta ka pangela uuyuni nenge e u tungile iilando.”

²² Omuwa Omunankondoawike ota ti: “Otandi ka ponokela Babilon e tandi shi kumuna po. Itandi hupitha po sha — itaku hupu aanona, itaku hupu omuntu e na omwenyo. Ongame mwene, Omuwa, nde dhi popi.

²³ Babilon otandi shi ningi ondombe yontopo nehala lyomahwiyu. Babilon otandi shi kombo po noshikombe shoka tashi kutha po ayihe. Ongame, Omuwa, nda popi!”

²⁴ Omuwa Omunankondoawike okwa gana ta ti: “Shoka nda nuna, otashi ka ningwa, shoka ndu utha okuningwa, otashi ka gwanithwa.

²⁵ Aayassur otandi ke ya dhipaga mo moshilongo shandje shaIsrael e tandi ya lyatagulile koondundu dhandje. Aantu yandje otandi ke ya mangulula mondjoko yAayassur nokomutenge ngoka ya li ye na oku gu humbata.

²⁶ Shika osho nda tokola kombinga yuuyuni; nokwooko kwandje okwa taganana okugeela iigwana.”

²⁷ Omuwa Omunankondoawike okwa tokola e shi gwanithe. Okwa taganeke okwooko kwe a geele, nokape na ngoka ta vulu oku mu kankeka.

²⁸ Elaka ndika olyu uvithwa omumvo ngwiyaka omukwaniilwa Ahas a sa.

²⁹ Aafilisti, ongola ndjoka ye mu dhenge, oya tokoka, ihe kamu na okunyanyukwa. Uuna eyoka tali si, ekwawo etilithi otali hituka peha lyalyo. Meyi lyeyoka omwa tendulwa oshikoko shomawawa.

³⁰ Omuwa ota ka ninga omusita gwaantu ye oohepele, naakwanaluhepo ote ke ya tula megameno. Ihe ne Aafilisti ote ke mu tumina ondjala yekomba, noitayi hupitha ko nando ogumwe a kale e na omwenyo.

³¹ Iilando ne amuhe yAafilisti, kugeni ne mu kolomoke! Amuhe kakameni! Oshikogo sholwithi otashi zi kuumbangalantu — osho etangakwiita moka kaamu na nando omumbanda.

³² Oontumwa ndhoka tadhi zi kuFilistia, otadhi yamukulwa ngiini? Eyamukulo olyo ndika kutya Omuwa okwa tungu Sion, naantu ye aahepekwa otaa ka mona mo egameno.

15

¹ Ehunganeko ndika otali popi Moab Iilando Ar naKir otayi hanagulwa po muusiku umwe, neimweneneno tali siikile evi lyaMoab.

² Aadibon: otaa londo kiikulundundu, ya ka lilile pomahala giinonoma. Aamoabi otaa lilagana moluhodhi omolwiilando Nebo naMedeba; oya kulula omitse dhawo noombenzi dhawo moluhodhi.

³ Aantu momapandaanda oya zala omahahi; momahalandjandja goshilando nokombanda yoongulu aantu taa lili yo taa kugu.

⁴ Aaheshboni nAaelale taa kugu, nonkugo yawo otayi uvika sigololo okuJahas. Nokuli aakwiita otaa kakama; omukumo gwawo ogwa kana.

⁵ Omwenyo gwandje tagu lili Moab. Aantu oya yi ontuku sigo okuZoar nokuEglat Shelishija. Yamwe otaa londo ondjila yokuLuhit taa yi taa lili; yamwe otaa ka holama kuHoronajim taa kugagana omolwehanagulo.

⁶ Okalonga Nimrim otaka pwine, omwiidhi gwe ka kunduka otagu kukuta, noitaku kala we sha sha ziza.

⁷ Aantu otaa tokola esilukuti lyomipopeli taa kambadhala okufadhuka po nomaliko gawo agehe.

⁸ Koongamba dhaMoab otaku kugu onkugo tayi uvika. Otayi mbololoka yi uvitike kiilando Eglaim naBeerelim.

⁹ Poshilando Dibon omeya momulonga oga tiliganekwa kombinzi, ihe natango Kalunga oku na sha oshitilithi e shi pungulila aantu yasho. Eeno, mboka ya hupu muMoab, ote ke ya tumina omudhipagi.

16

¹ Aamoabi otaa kutha onzigona moshilando Sela shi li mombuga e taye yi gandja omagano komuntu ngoka ta pangele muJerusalem.

² Oye li komunkulo gwomulonga Arnon ya tegelela notaa pwampwauka mpaka naampeyaka ya fa oondhila dha hanagulilwa po iihandhila yadho.

³ Otaa lombwele Aajuda taa ti: “Tu lombweleni shoka tu na okuninga. Tu shigeni ngaashi omuti ngoka gu na enzile lyaalofu moshanga shomutenya. Tu gondjitheni momunzile gweni. Otse oontauki; tu holekeni pwaa kale ngoka te tu mono.

⁴ Tu pitikeni tu kale moshilongo sheni. Tu gameneni kumboka ya hala ye tu yonagule po.” (Ehepeko nehanagulo otali ka hula, naamboka taa mbugaleke oshilongo, otaa ka hula po.

⁵ Nena gumwe gwomoluvalo lwaDavid ota ka ninga omukwaniilwa, nota ka lela aantu nuudhiginini nohole. Oye omutokoli ha gwanitha eutho lyu uka noha lalakanene uuyuuki.)

⁶ Aajuda otaa ti: “Otwa kundana, nkene Aamoabi ye na uuntsa; oye na oshilundo, etuwalalo, einomo nepumpagano, ihe omwiityo gwawo ogwowala.”

⁷ Aamoabi otaa ka lila moluudhigu tau ya hepeke. Ayehe otaa ka lilila omakaka gomandjembele ya li haye ga li nale muKir Heres. Otaa ka teka po.

⁸ Iitsambe yomiviinu yokuHeshbon niilonda yomiviinu yokuSibma oya hanagulwa po — omo moka mwa zi omaviinu haga kolitha aaleli yiigwana. Omaviinu ngoka oga li haga pindikwa sigo okoshilando Jaser, sigo okombuga kuuzilo, nokuuninginino handiyaka yEfuta lyeso.

⁹ Ngashingeyi otandi lilile omiviinu dhokuSibma, ngaashi Jaser tashi lili. Omahodhi gandje otaga pononoka omolwaHeshbon naElale, molwaashoka kaku na nando eteyo lyokunyanyudha aantu.

¹⁰ Kaku na ngoka ta nyanyukilwa omatathapya. Kaku na omuligoli nenge ngoka ti imbi miitsambe yomiviinu. Kaku na omukoli gwomandjembele a hange omaviinu; ondigolo yenyanyu oya hula.

¹¹ Onda yemata meni lyandje omolwaMoab, momwenyo gwandje onda sila Kir Heres oluhodhi.

¹² Aamoabi otayi ikulupike yo yene okuya kiinonoma yokoondundu noku ka galikana mootempeli dhawo; itashi ya kwatha.

¹³ Elaka olyo ndika Omuwa e li gandja nale tali popi Moab.

¹⁴ Ngashingeyi Omuwa ota ti: “Moomvula ndatu, ngaashi omupiya e li kondhalate te dhi yalula, eliko enene lyaMoab otali ka kana po. Maantu ye oyendji aashonashona yowala taa ka hupa ko ye na omwenyo, ihe kaye na omwago.”

17

¹ Omuwa ota ti: “Oshilando Damaskus itashi kala we olule; otashi ka ninga ondumba yomakulukuma.

² Iilando yaSiria otayi ka hanagulwa po sigo aluhe. Otayi ka ninga omaunapelo goonzi nogoongombe, nokape na ngoka te dhi tidha mo.

³ Israel ota ka kala itaa vulu okwiipopila, naDamaskus otashi kanitha eipangelo lyasho. Aasiria mboka taa hupu ko ye na omwenyo, otaa ka sa nohoni ya fa Aaisraeli. Ongame, Omuwa Omunankondoawike, nde dhi popi.”

⁴ Omuwa okwa ti: “Esiku otali ya, uuna esimano lyaIsrael tali hulu po, nuuyamba we tau halakana po.

⁵ Israel ota ka fa epya lya teywa iilya, a fa epya molusilu lwaRafaim uuna lya teywa.

⁶ Aantu aashuushuka yowala taa ka hupa ko, naIsrael ota ka fa omuolivi gwa likolwa ooholivi, shila oku na owala oombali noondatu ndhoka dha hupile kuundjendja nenge ooholivi ndhoka dha hupile piitayi yopevi. Ongame, Omuwa Kalunga kaIsrael, nde dhi popi.”

⁷ Esiku nge lya thikana, aantu otaa ka galukila komukwathi nokOmushiti gwawo, Kalunga kaIsrael omuyapuki.

⁸ Itaa ki inekela we iiyambelo ye yi tungu niikaha yawo yene, nenge yi itule iilonga yiikaha yawo — iiyelekela yoshikalungakiintu Asheera niiyambelo yiitsinino.

⁹ Esiku otali ya, uuna iilando ya kola tayi ka ninga ombuga notayi kumunwa po ya fa iilando mbyoka ya thigwa po kAahevi nokAayamori, sho ya fadhuka po Aaisraeli.

¹⁰ Israel, owa dhimbwa Kalunga ngoka e ku hupitha nokwe ku gamene a fa emanya lya kola. Peha lye owa tsike po iikunino yiinonoma, opo u longele iikalunga yokiilongo.

¹¹ Ihe nando yi koke mbalambala yi sheneke, itayi ka likolwa sha. Otaku kala owala omukundu nuuvu waa shi kupangwa.

¹² Iigwana iinankondo oya tsu ondumbo notayi ndundumitha ewi lyayo lya fa efuta, lya fa epupo lyomakuthikuthi omanene.

¹³ Iigwana otayi ndunduma ya fa omakuthikuthi, sho taga hedha ko, ihe Kalunga ote yi ganda, oyo notayi shuna. Ote yi tidha po ya fa ontsi kombanda yondundu, ya fa iiyagaya mokambiya.

¹⁴ Otayi tilitha aantu ongulohi, ihe ongula nge kwa shi, kayi po we. Shika osho oshipewa shashaa ngoka te tu yugu evi lyetu.

18

¹ Pomilonga dhaEtiopia ope na oshilongo mpoka oshihomo shomawawa tashi uvika.

² Okuza koshilongo shoka oontumwa otadhi ende moowato dhomanenge muNiili. Galukileni kegumbo, ne oontumwa mu na ontuku! Faaleleni elaka koshilongo sheni sha kambakanwa komilonga, koshigwana sheni sha kola sho shi na omatha, kaantu yeni aaleeleka ye na oshipa tashi adhima, mboka taa tilika kuuyuni auhe.

³ Pulakeneni, amuhe mboka mwa kala kombanda yevi! Taleni utale epandela tali yeluthwa koondungu dhoondundu! Pulakeneni ekugagano lyenkuma!

⁴ Omuwa okwa lombwele ndje a ti: “Otandi ka entamena ndi li megulu ndi ilongelela nda fa omata gomume muusiku wopothinge, ndi ilongelela nda fa etango tali minikile moshanga shomutenya.

⁵ Omandjembele manga inaaga toononwa, oongala sho dha yagumuka nomandjembele taga tiligana, aatondi otaa ka teya po Etiopia nuupu ya fa ombele tayi pompona ko iitayi komuviinu.

⁶ Omidhimba dhaakwiita yawo otadhi ka thigilwa oondhila niithitukuti. Othinge otaa lika po komambiimbili nokufu okiithitukuti.”

⁷ Esiku otali ya, uuna Omuwa Omunankondoawike ta ka taamba omayambo koshilongo shika sha kambakanwa komilonga, koshigwana shika sha kola noshinankondo, kaantu mbaka aaleeleka ye na oshipa tashi adhima, mboka haa tilika kuuyuni auhe. Otaa ke ya kondundu Sion, nkoka Omuwa Omunankondoawike ta simanekelwa.

19

¹ Ndika olyo elaka tali popi Egipiti. Omuwa ote ya kuEgipiti a londa oshikogo shi na ontuku. Iimenka yaEgipiti tayi kakama koshipala she, nAayegipiti otaa tyololoka.

² Omuwa ota popi ta ti: “MuEgipiti otandi tukuluthile mo iita yuukwashilongo, aantu naamwayina taa kondjithathana, omushiinda nomushiinda. Oshilando otashi kondjitha oshilando oshikwawo, oshikandjo noshikandjo oshikwawo.

³ Otandi ka ngwangwaneka ombepo yAayegipiti e tandi piyaganeke oompangela dhawo. Otaa ka pula omayele kiimenka yawo, kaayanekeli, kiihehelela nokoombepo dhuumpulile.

⁴ Aayegipiti otandi ke ya gandja miikaha yomutyakaleki, omukwaniilwa omudhudhu ngoka te ke ya pangela. Ongame, Omuwa Omunankondoawike, nde dhi popya.”

⁵ Omeya otaga ka pwina mo muNiili, nomulonga otagu ka kukuta.

⁶ Omikanka ndhoka tadhi zi momulonga, otadhi ka nika nayi, sho tadhi pwine. Oombungu nomanenge otaga ka ganya,

⁷ niimeno ayihe ya kunwa komunkulo gwaNiili, otayi ka lemba nokukukuta e tayi pepwa po.

⁸ Aayuli yoohi otaa ka nyenyeta nokuyemata. Oondjolo noonete dhawo kadhi na we oshilonga.

⁹ Aatekuli yiigwanga yoliina naatungi yoliina otaa ka kanitha omukumo.

¹⁰ Aayogohi yoongodhi noonakwiilongela oondjambi otaa ka sithwa uunye.

¹¹ Aakuluntu yoshilando Zoan omagoya gowala! Aanandungelela yaEgipiti otaa ka gandja omayele guugoyalela. Otaa vulu ngiini okulombwela omukwaniilwa gwawo kutya yo aayilongi yuunongo naakwaniilwa?

¹² Ngoye nduno omukwaniilwa gwaEgipiti, aagandjindunge yoye aanamayele oye li peni? Pamwe otaa vulu oku ku lombwela kutya oshike shoka Omuwa Omunankondoawike a dhiladhilila Egipiti.

¹³ Aawiliki yaZoan oya ningi omagoya, nomalenga gaMemfis oga lyalyakana. Oya li ndishi ye na okuwilika oshigwana? Ihe oye shi pukitha owala.

¹⁴ Omuwa okwe ya pilaaleke, ya gandje omayele ga goyoka. Pahedhi ndjika Egipiti otali puka miinima ayihe notali tantala lya fa onkolwe tayi gwile monkungo yayo.

¹⁵ MuEgipiti kamu na nando ogumwe, omuyamba nenge ohepele, omunenentu nenge omumbala, ngoka ta vulu okugandja ekwatho.

¹⁶ Esiku otali ya uuna Aayegipiti taa ka tila ya fa omukulukadhi. Otaa ka kakama meshololo, shampa ya mono kutya Omuwa Omunankondoawike a tagananeka okwooko kwe e ya geele.

¹⁷ Aayegipiti otaa ka tila Juda. Shaa tuu taa uvu edhina Juda tali tumbulwa, otaa ka haluka molwaashoka Omuwa Omunankondoawike e shi ya dhiladhilile.

¹⁸ Mesiku ndyoka otaku ka kala iilando itano muEgipiti moka aantu taa popi elaka lyOshihebeli notaa gana kOmuwa Omunankondoawike. Oshilando shimwe shomuyo otashi ka lukwa Ir Heres.

¹⁹ Esiku ndyoka muEgipiti otamu ka kala oshiyambelo shOmuwa nongudhimanya ye mu yapulilwa kongamba yaEgipiti.

²⁰ Otayi ka kala omandhindhiliko gOmuwa Omunankondoawike kutya oku li mokati kawo muEgipiti. Uuna oshigwana tashi hepekwa e tashi kugile Omuwa ekwatho, nena ota ka tuma ngoka te ya hupitha.

²¹ Omuwa oti ihololele ye mwene Aayegipiti, oyo notaye ke mu tseya noku mu longela. Otaye mu etele oontselelandjambo noondjambo dhiikulya. Otaye ke mu uvanekela omauvaneko nokugana notaye ke ga gwanitha.

²² Omuwa ota ka geela Aayegipiti, ihe ote ke ya aludha. Otaa ka galukila kuye, oye notu uvu omagalikano gawo noku ya aludha.

²³ Esiku otali ya, uuna taku ka kala onenendjila pokati kaEgipiti naAssur. Aantu yomiilongo mbyoka iyali otaa ka enda mo mokweendathana kwawo, niigwana mbyoka iyali ayihe otayi ka longela Omuwa.

²⁴ Esiku ndyoka Israel ota ka kala e thike pamwe naEgipiti naAssur, niigwana mbika itatu otayi ka ninga eyambeko lyuuyuni auhe.

²⁵ Omuwa Omunankondoawike ote ke ya yambeka e ta ti: “Otandi mu yambeke, ne Aayegipiti aantu yandje, ne Aayassur oshilonga shiikaha yandje nane Aaisraeli oshigwana shandje sha hogololwa.”

20

¹ Momumvo ngwiyaka ondjayi onene ya tumwa kuSargon, omupangeli gwaAssur, oye ya kuAshdod e tayi shi matukile noku shi kwata po.

² Methimbo ndyoka Omuwa okwa popitha Jesaja yaAmos a ti kuye: “Ihula ehahi ndyoka we li zala noongaku dhoye.” Oye nokwe shi ningi e te ende olutu lwowala noompadhi dhowala.

³ Omuwa okwa ti: “Omuntu gwandje Jesaja okwe ende olutu lwowala noompadhi dhowala omimvo ndatu. Shika ehunganeko kuEgipiti naEtiopia

⁴ kutya osho omupangeli gwaAssur te ke enditha oonkwatwa ndhoka e dhi kwata miilongo mbyoka iyali. Aagundjuka naakuluntu otaa ke enda oompadhi dhowala nomalutu gowala, ye li omudhuu — osho ohoni kuEgipiti.

⁵ Oomboka yi inekela Etiopia nohaa tanga Egipiti, otaa ke shi yematela, etegameno lyawo otali ka kana po.

⁶ Esiku ndyoka aantu mboka ya kala komunkulo gwaFilistia, otaa ka tya: ‘Taleni shoka sha ningilwa aantu mboka twa li twe yi inekela taye tu gamene komupangeli gwaAssur! Otatu ka hunukeni ngiini?’ ”

21

¹ Ndika ehunganeko tali hunganeke Babilon. Ngashika iikungulumbepo tayi zi kombuga kuumbugantu, osho omuponokeli ta ziilile kombuga, koshilongo oshitilithi.

² Ondu ulukilwa emoniko lyiiningwanima iitilithi, emoniko lyomahanagulo. Matukila, Elam! Media, ninga ekondeka! Kalunga ota ka hulitha po omahepeko ngoka ge etwa kuBabilon.

³ Shoka nda mono nondu uvu memoniko, osha halutha ndje noonkondo, nuuwehame owa kwata ndje wa fa uudhigu womukulukadhi ta thetwa.

⁴ Omwenyo gwandje otagu nuka mo. Otandi kakama kuumbanda. Onda hala ku toke, ihe ewiwilo otali gelelitha ndje.

⁵ Memoniko iitaafula tayi yalwa, aayenda ya kuutumbe. Otaa li yo taa nu. Ohaluka taku igidhwa: “Oondjayi, yambukeni! Longekidheni omahuuyanza!”

⁶ Omuwa okwa lombwele ndje a ti: “Inda u ka langeke omupekapeki; na hokolole shoka ta mono.

⁷ Ngele ta mono aantu taa ya momusholondondo gwooyaali nooyaali ya kayila uukambe, uusino noongamelo, oku na oku ya ndhindhilika nawa.”

⁸ Omupekapeki okwi igidha: “Tatekulu, onda thikama pomalangelo uusiku nomutenya.”

⁹ Ohaluka, oyo mbeya taa ya! Aalumentu ya kayila uukambe ooyaali nooyaali. Omupekapeki okwa popi onkundana ta ti: “Babilon osha teka po! Iimenka ayihe mbyoka ya li haa simaneke, oya tatulilwa pevi.”

¹⁰ Aantu yandje Aaisraeli, ne omwa yungulwa mwa fa iilya, ihe ngashingeyi onde mu tomonene onkundana ombwanawa ndjoka ndu uvu kOmuwa Omunankondoawike, Kalunga kaIsrael.

¹¹ Ndika ehunganeko tali popi Edom Omuntu gumwe okwi ithana ndje e li muSeir a ti: “Mulangeli, uusiku otau hulu po uunake? Mulangeli, uusiku otau hulu po uunake?”

¹² Omulangeli okwa yamukula: “Ongula otayi shi, nonando inaku yela natango. Ngele omwa hala okupula ishewe, galukeni.”

¹³ Ndika ehunganeko tali popi Arabia. Aantu ne yomuDedan, mboka mu na ontanda yiiyendo mombuga yaArabia,

¹⁴ gandjeni omeya kaasinota mboka taa ya kune. Aantu ne yomoshilongo Tema, peni oontauki iikulya.

¹⁵ Aantu otaa kukuma taa fadhuka po omagongamwele ngoka tage ya dhipaga nokuli, otaa yi ontuku omatati ngoka tage ya yaha nokuli, otaa yi ontuku yiita.

¹⁶ Omuwa okwa lombwele ndje a ti: “Omumvo gumwe nge gwa piti po — ngashika omumvo gwondhalate yomuunguli — esimano alihe lyaKedar otali hulu po.

¹⁷ Aashona ayeke yomoondjumbeta oofule dhaKedar taa ka hupa ko. Ongame, Omuwa Kalunga kaIsrael, nde dhi popi.”

22

¹ Ndika ehunganeko tali hunganeke Esilu lyemoniko. Oshike sha ningwa po? Omolwashike aantu ayehe moshilando ya londa kombanda yoongulu?

² Oshilando ashihe osha piyagana, shu udha onkugo nelondoko. Aalumentu yoye oya dhipagwa inaaya kondja ya sile molugodhi andola.

³ Aakuluntu yoye ayehe oya fadhuka po noya kwatwa, manga inaaya umba nando oshikuti shimweshimwe.

⁴ Ngashingeyi ethii ndje, ndi lile nokulililila oosa dhaantu mboka ya si. Inamu kambadhala mu hekeleke ndje nando.

⁵ Ndika ethimbo lyeshololo, lyesindiko nolyepiyagano mEsilu lyemoniko, Omupangeliawike Omuwa Omunankondoawike okwe shi tu tumine. Omakuma goshilando shetu oga kumunwa po, noonkugo odha mbolongondja mokati koondundu.

⁶ Aakwiita ya zi koshilongo Elam, oye ya ya kayila uukambe, ya homata omatati niikuti. Aakwiita ya zi koshilongo Kir, oya longekidha omahuuyanza gawo.

⁷ Omatathapya gomuJuda ogu udha omatembakwiita; aakwiita ya kayila uukambe oya li momusholondondo ya thikama komeho gomiyelo dhaJerusalem.

⁸ Omagameneno agehe gaJuda oga teka po. Uuna shika sha ningwa, omwa ka kutha omatati moshinyanga shomiti.

⁹ Omwa mono omahala ogendji moka omakuma gaJerusalem taga pumbwa okuthitikwa. Omwa konakona omagumbo agehe muJerusalem e tamu kumuna po gamwe gomugo, opo mu mone oondhopi mu thitike omakuma goshilando.

¹⁰

¹¹ Omwa tungu ondama meni lyoshilando okupungula omeya taga tondoka taga zi kedhiya ekulu. Ihe ne inamu pulakena Kalunga, ngoka a dhiladhila ayihe mbika nale naangoka e yi eta po yi ningwe.

¹² Omupangeliawike Omuwa Omunankondoawike okwa li te mu ithana, mu ye mu lile ne mu takume; mu kulule omitse dheni ne mu zale omahahi.

¹³ Ihe omwa ningi shike? Omwa yolo owala nokudhana iituthi. Omwa tsele iimuna, omwa dhipaga oonzi mu lye, nomwa nu omaviinu. Omwa ti: “Tu lyeni tse tu nweni, oshoka ngula otatu si.”

¹⁴ Omupangeliawike Omuwa Omunankondoawike oye mwenemwene a lombwele ndje a ti: “Oshili ondjo ndjika itayi ka dhimwa po sigo esiku lyokusa kweni. Ongame, Omupangeliawike Omuwa Omunankondoawike, nde dhi popi.”

¹⁵ Omupangeliawike Omuwa Omunankondoawike okwa lombwele ndje, ndi ye kuShebna, omusilishimpwiyu guuwa, ndi mu lombwele ndi tye:

¹⁶ “Oto dhiladhila ongoye olye? Epitikilo u li na olyashike, sho to ihokithile ombila memanya lyomondundu?

¹⁷ Kotoka, Omuwa ote ke ku kutha po e te ku ekelehi.

¹⁸ Ote ke ku toola po wa fa okatanga e te ke ku umbila moshilongo oshinene. Omo to ka sila ontega nomatembakwiita wa li we ga inomene. Oto ka sitha egumbo lyamwene gwoye ohoni.

¹⁹ Omuwa ote ku kutha uulenga e te ku shundula.

²⁰ “Uuna shika tashi ka ningwa, otandi ka ithana omuntu gwandje Eliakim lyaHilkia.

²¹ Otandi ke mu zaleka ondjatha yoye yoshilonga nepaya e tandi mu pe oonkondo adhihe wa li u dhi na. Ota ka ninga he yAajerusalem nAajuda.

²² Otandi ke mu pa oshipatululo shegumbo lyaDavid. Ngele te egulula, kape na ngoka te edhile po; nongele te edhile po, kape na ngoka te egulula.

²³ Otandi ke mu dhengela pokuma pwa kola ngomboha, noye ta ka ninga ekota lyesimano lyezimo lyahe.

²⁴ “Ihe oluvalo olwindji lwahe, aatekulu naatekulululwa otaa ka kala kombunda ye. Ote ke ya leka ya fa iiyuma, uuyo nomatenga ge li kontsiliko.

²⁵ Uuna shika tashi ningwa, omboha ndjoka ya li ya dhengelwa pokuma pwa kola, otayi ka nengena e tayi gu po. Shika otashi ka ninga ehulilo lyaayihe mbyoka ya li ye endjelela ko.” Omuwa oye e dhi popya.

23

¹ Ndika ehunganeko tali popi Tiro. Takumeni nokulila ne aanasikepa yokuSpania! Oshilandotulilo sheni Tiro osha hanagulwa po; omagumbo nomatulilo gasho kage po we. Onkundana ndjika oye ya zile kuKipro, sho ya li taa galukile kegumbo.

² Lilaganeni, ne aahalithi yokuSidoni! Omwa tumine aantu,

³ ya tokole efuta ya ka shingithe nokulanda iilya kuEgipiti nokupindika niigwana ayihe.

⁴ Shilando Sidon, sa ohoni! Efuta, omeya ganandjandja muule wago, otage ku idhimbike e taga ti: “Kandi na nando aanona. Moshitheta shandje ine pulumutha omumati nenge omukadhona.”

⁵ Nokuli Aayegipiti otaa ka kakama e taa haluka, uuna taa kundana kutya Tiro osha hanagulwa po.

⁶ Takumeni nokulila, ne Aafoinikia! Indeni ontuku kuSpania!

⁷ Otashi vulika ngiini kutya shika osho oshilando Tiro shomashambudho, shoka sha dhikilwe nalenale? Oshilando shika osho tuu shoka sha tumine aatembukili komavi gokokule kombanda yefuta?

⁸ Olye ngoka a dhiladhila a etele Tiro omupya gwa tya ngawo, oshilando oshiyamba shoka aahalithi yasho ya li aawagona, aanenentu kombanda yevi?

⁹ Omuwa Omunankondoawike okwe shi dhiladhila, opo a hulithe po einomo lyawo mushoka ya ningi nokufupipika aanenentu yamo.

¹⁰ Ne aantu yomiitembukilwa muSpania, tamekeni okulonga omapya. Kaku na we ngoka te mu gamene.

¹¹ Omuwa okwa taganekele efuta okwooko kwe e ta teya po iilongo. Okwa tokola okuhanagulitha po omapopilongulu gaFoinikia.

¹² Shilando ngoye Sidon, elago lyoye olya hula, naantu yoye taa hepekwa. Nando ya ye ontuku kuKipro, itaa ka hupa.

¹³ (Oya li Aababilonia, kaye shi Aayassur, mboka ya longekidhile iithitukuti ompito yokuya kuTiro. Aababilonia oyo ya tungu ooshungo dhekondekela, ya kumuna po omapopilongulu gaTiro nokuhanagula po oshilando.)

¹⁴ Lileni nokutakuma, ne aanasikepa yokuSpania! Oshilando mwi inekela osha hanagulwa po.

¹⁵ Ethimbo otali ya, uuna Tiro tashi ka dhimbiwa omimvo omilongo heyali, dhi thike pomasiku gomukwaniilwa gumwe. Omimvo ndhoka nge dha piti, Tiro otashi ka ninga, ngaashi oshiimbo shopauhonda tashi ti:

¹⁶ “Kutha okaharpa koye, endagula nomukunda, ngoye ohonda ya dhimbiwa! Hika nawa, imba natango, opo aalumentu ye ku dhimbulukwe!”

¹⁷ Omimvo omilongo heyali nge dha piti po, Omuwa ota ka galulila Tiro omapindiko gasho omakulu, nosho tashi ki ishingitha kiilongo ayihe yomuuyuni.

¹⁸ Iimaliwa mbyoka tashi ke yi likola mehalitho, otayi ka yoololelwa Omuwa. Itashi ki ingungunina nando osha, ihe mboka haa longele Omuwa, oyo taa ku utha iimaliwa yasho yokulanda iikulya nomizalo taye dhi pumbwa.

24

¹ Omuwa ota ka hanagula po evi e tali ningi eputu lyowala. Ota ka gonyagula evi e ta halakanitha aantu yalyo.

² Ayehe otaa ningilwa sha faathana: shomuyambi osho shomukwanegongalo, shomuhona osho shomupiya, shomulandithi osho shomulandi, shomulilwangunga osho shomulingunga, shomuyamba osho shohepele.

³ Evi otali ka kombwa po e tali ka yugwa po. Omuwa okwa popya notashi ka tsakanithwa.

⁴ Evi otali ka kaha notali ka kukuta; uuyuni auhe otau nongwa noonkondo; evi neyalelo otaga thithonoka po.

⁵ Aantu oya nyateke evi mokuyona iipango yaKalunga nokutaaguluka ehangano lyaaluhe ndyoka a hangana nayo.

⁶ Omolwashoka Omuwa okwa uthile evi etulomutima. Aantu yalyo otaa futilwa shoka ya longele. Aantu aashonashona mboka taa ka kala ye na omwenyo.

⁷ Omiviinu otadhi ganya nomaviinu taga kala ga pumba. Shaa ngoka a li nale nawa, ngashingeyi okwa nika uupongo.

⁸ Ehiko lyenyanyu lyuuharpa nolyoontunda dhawo olya mwena.

⁹ Aantu itaa nu we omaviinu nokwiimba; omalovu oga lulila aanwi.

¹⁰ Moshilando omu na evundakano, naantu momagumbo gawo otaa iyedhilile mo ya holame.

¹¹ Aantu otaa lilagana momapandaanda, oshoka kape na we omaviinu. Enyanyu olya kana po; olya tidhwa mo mevi.

¹² Oshilando osha kumunwa po nomiyelo dhasho odha teywa po.

¹³ Shika otashi ningilwa iigwana ayihe ya kala kombanda yevi. Otashi ka kala sha fa ehulilo pethimbo lyeshopolo lyooholivi komiolivi nongetoonono lyomandjembele komiviinu.

¹⁴ Mboka taa ka hupa ko, otaa ki imba kenyanyu. Mboka yokuuninginino otaa ka hempulula Omuwa omunene,

¹⁵ naamboka yokuuzilo otaa ke mu tanga. Aantu mboka ya kunkula nefuta, otaa ka hambelela Omuwa Kalunga kaIsrael.

¹⁶ Okuza kooha dhuuyuni otaku ka uvika omaimbilo taga tanga Israel, oshigwana oshiyuuki. Ihe ngame onda ti: “Otandi thithonoka po, otandi thipuka po! Yaye ngame! Aagwaaleki taa tsikile okugwaaleka notaa vuka moku shi ninga.”

¹⁷ Omahalutho, omakelo noomwigo otadhi mu tegelele, ne aakali kombanda yevi.

¹⁸ Shaa ngoka ta kambadhala okufadhuka po ehalutho, ota gwile mekelo, naangoka ta zi mekelo, ota ka yulwa komwigo. Iikungulu yomvula otayi puuka kegulu, nomakankameno gevi otaga kakama.

¹⁹ Evi otali ka pambuka e tali nyanyulwa po nokumwahuka.

²⁰ Evi lyo lyene otali ka tantala lya fa onkolwe notali pepwa po lya fa otenda yothayila moshikungulu. Uuyuni owa thindilwa pevi kuulunde wawo; otau ka gwila po, ihe itau ka yambuka po we.

²¹ Ethimbo otali ya, uuna Omuwa ta pangula aanankondo yomewangandjo naakwaniilwa yevi pohi.

²² Omuwa ota ka mbwinda mumwe aakwaniilwa ya fa oonkwatwa noku ya umbila melambo. Ote ya tula mondholongo, ya kale mo sigo ethimbo lyegeelo lyawo lya adha.

²³ Omwedhi otagu ka luudha, netango itali ka minikila we, oshoka Omuwa Omunankondoawike oye ta ka kala omukwaniilwa. Ota ka pangela muJerusalem kondundu Sion, naawiliki yoshigwana otaa ka tala eadhimo lye.

25

¹ Omuwa, ongoye Kalunga kandje; otandi ku simaneke nokuhambelela edhina lyoye. Owa longo iikumithalonga; muudhiginini woye owa gwanitha oompangela ndhoka wa pangele nalenale.

² Iilando we yi ningi omakulukuma, nowa kumuna po oongulushigo dhayo. Oongulumbala ndhoka dha tungwa kaatondi yetu, odha kana po sigo aluhe.

³ Aantu yiigwana iinankondo otaa ke ku hambelela; oto ka tilika miilando yiigwana iidhudhu.

⁴ Owa palutha oohepele naasindjala, nowe ya hupitha methimbo lyuuyina. Owe ya gamene kiikungulu nowe ya shigi kepupyu lyomutenya. Aadhudhu oya ponoka ko ya fa oshikungulu

⁵ noya fa oluteni mevi lyomutenya. Ihe ngoye, Omuwa, owa mweneke aatondi yetu; oto mweneke omauyagano gaalumentu aadhudhu, ngaashi omutenya momunzile gwoshikogo.

⁶ Kondundu Sion Omuwa Omunankondoawike ota hangele iigwana ayihe oshituthi shoontumba dhomagadhi noshomaviinu ga dhindolekeka.

⁷ Kondundu ndjika ota ka kayununa po esiikilo ndyoka tali kwidhidhike iigwana ayihe.

⁸ Omuwa Omupangeliawike ota ka hanagula po eso sigo aluhe. Ota ka theta po omahodhi momeho gaayehe e ta kutha po okudhinwa kwaantu ye muuyuni auhe. Omuwa mwenemwene a popi ngeyi.

⁹ Esiku ndyoka otaku tiwa: “Kalunga ketu oye nguka! Otwe mu inekela, noye e tu hupitha. Oye Omuwa! Otwe mu inekela notu li nawa ngashingeyi notu na enyanyu, oshoka okwe tu hupitha.”

¹⁰ Omuwa ota ka gamena ondundu Sion, ihe Aamoabi otaa ka lyatagulwa ya fa iiyagaya tayi lyatelwa muuhoho.

¹¹ Otaa ka lapa nomaako gawo ya fa taa yogo ontente, ihe Omuwa ote ke ya fupipika, niikaha yawo otayi ka nemanana.

¹² Ota ka kumuna po omapopilongulu gaMoab pamwe nomakuma gago omaleeleka e te ga undulile pevi montsi.

26

¹ Esiku onali ya, uuna aantu taa ki imba ekandanga mevi lyaJuda taa ti: “Oshilongo shetu osha kola! Kalunga mwene ota gamene omakuma gasho!

² Egululeni iiyelo yoshilando, opo oshigwana oshiyuuki shi ye mo, oshigwana hashi dhiginine eitaalo.

³ Omuwa, oho gandja ombililela kumboka ihaa tenguka noye ku inekela.

⁴ Inekeleni Omuwa sigo aluhe; ote ke tu gamena aluhe.

⁵ Okwa fupipike mboka ya li tayi inomo; okwa kumuna po oshilando shawo sha kola, nomakuma gasho okwe ga nyanyulile montsi.

⁶ Otashi tampagulwa kaathiminikwa, noompadhi dhaakweyi otadhi shi lyatagula.”

⁷ Omuwa, ongoye to yelekanithile aayuuki ondjila; ondjila ndjoka taa ende oya yelekana.

⁸ Otatu landula ehalo lyoye notwe ku inekela; etegameno lyomitima dhetu oli li medhina lyoye.

⁹ Omwenyo gwandje ogwe ku yuulukwa uusiku, moontundumene ombepo yandje tayi ku kongo. Uuna to pangula evi naantu yalyo, ayehe otaa ka koneka uuyuuki.

¹⁰ Nando to sile aakolokoshi ohenda, itaa koneke nando uuyuuki. Moshilongo nando mu kale aayuuki, aalunde otaa kolokosha owala; otaa tindi okudhimbulula uunene woye.

¹¹ Aatondi yoye itaa tseya kutya oto ke ya geela. Omuwa, ya sitha ohoni nou ya dhenge; naa adhike kegeelo we li ya longekidhile. Ya ulukila, nkene u hole aantu yoye.

¹² Omuwa, ongoye to tu pe elago; ashihe shoka tatu tompola, ongoye we shi tu ningile.

¹³ Omuwa Kalunga ketu, otwa pangelwa kaapangeli yalwe peha lyoye, nando ongoye awike Omuwa gwetu.

¹⁴ Ngashingeyi oya si noitaa ka kala we ye na omwenyo. Oomwenyo dhawo oya topoka nadho, itadhi ka yumuka we, oshoka owe ya geele e to ya hanagula po. Kape na we ngoka te ya dhimbulukwa.

¹⁵ Omuwa, ongoye wi indjipalitha oshigwana shetu, owa taandelitha oshilongo shasho koombinga adhihe, naashika oshe ku etele esimano.

¹⁶ Omuwa, ongoye wa geele aantu yoye, nomuuwehame oye ku galikana.

¹⁷ Omuwa, otwa keme kuudhigu twa fa omukulukadhi e na oshitheta.

¹⁸ Otwa li muuwehame woshitheta, ihe mokuvala otwa fa twa vala ombepo. Inatu mona esindano lyoshilongo shetu, inatu tompola sha.

¹⁹ Oonakusa yoye otaa ka ninga omwenyo ishewe! Omidhimba dhawo otadhi ka yumuka. Ayehe mboka ya kotha moombila, otaa ka penduka nokwiimba ekandanga. Ngashika omume tayi tutike evi, osho Omuwa ta ka mwenyeka mboka ya sa nale.

²⁰ Ne aantu yandje, indeni momagumbo geni, mu iyedhilile mo. Holameni okathimbo, manga ondjahi yaKalunga tayi pitilile po.

²¹ Omuwa ote ya ta zi monkalelo ye, a geelele oonakukala kombanda yevi oondjo dhawo. Aadhipagi mboka ya dhipaga aantu meholamo kombanda yevi, otaa ka hololwa, nevi itali ka holeka we mboka ya dhipagwa.

27

¹ Esiku ndyoka Omuwa ota ka leka egongamwele lya tsa nekukutu, a tse nalyo Leviatan, eyoka ndyoka li na ontuku, Leviatan, eyoka ndyoka hali nifauka nokungolyauka, evovo lyomefuta, note li dhipaga po.

² Esiku ndyoka Omuwa ota popi oshitsambe she e shi hokwa a ti:

³ “Otandi shi langele e tandi shi tekele omeya ethimbo alihe. Uusiku tandi shi tonatele nomutenya tandi shi keelele, pwaa kale ngoka te shi yono po.

⁴ Oshitsambe itandi shi geele we. Ngele osha mena owala omano noondjoho, otandi dhi vudha mo noku dhi fika po.

⁵ Ihe aatondi yaantu yandje ngele oya hala egameno lyandje, naa hangane nangame. Eeno, naa hangane nangame.”

⁶ Momasiku tage ya oluvalo lwaJakob otalu ka tsama ngaashi omuti, Israel ota ka temuna oongala nokututuma. Evi otali ka udha iiyimati mbyoka taa imitha.

⁷ Israel ina geelwa kOmuwa noonkondo noina kanitha aantu oyendji ngashika aatondi ye.

⁸ Omuwa okwa geele aantu ye, sho e ya tumu muupongekwa. Okwe ya kuthitha mo ombepo ondhigu yokuuzilo.

⁹ Uulunde waIsrael otau ka dhimwa po ashike, ngele omamanya giiyambelo yoshipagani taga ka tatulwa ga ninge ga fa omamanya gokaalaka ga nyanyulwa, noitapa thigala nando oshiyambelo shiitsinino nenge iiyelekela yoshikalungakiintu Asheera.

¹⁰ Oshilandohote osha ningi omakulukuma gowala. Osha mbugalekwa sha fa eputu lyowala. Osha ningi uunapelo wiimuna, moka tayi gondjo e tayi gugula mo.

¹¹ Iitayi yomiti nge ya kukuta, otayi teka ko, naakiintu otaye yi tyaya po, yi ninge iikuni. Molwaashoka aantu kaa uvite ko, Kalunga Omushiti gwawo ite ya sile ohenda nenge e ya uvitile ando olukeno.

¹² Mesiku ndyoka, okuza kuEufrat sigo okongamba yaEgipiti, Omuwa ota ka gongela aantu ye oogumwe noogumwe a fa omuntu ta yele iilya te yi yoolola metutu.

¹³ Uuna esiku ndyoka nali ya, enkuma otali ka hikwa, li ithane Aaisraeli ayehe aapongekwa kuAssur nokuEgipiti. Otaa ke ya notaa ka longela Omuwa muJerusalem kondundu ye ondjapuki.

28

¹ Yaye ngoye, shilongo Israel! Esimano lyoye otali ka ganya lya fa iishani yoongala komitse dhaawiliki yoye oonkolwi. Omitse dhawo odha gwayekwa tadhi nika nawa, ihe oya gwila po ya kolwa.

² Omuwa okwa longekidha omuntu gwontumba ngoka e na oonkondo e ya ponokele, ngoka te ya kolokele a fa oshikungulu shoompawe, a fa epoola lyomvula. Ongaashi omvula kataula nefundja ota ka mbolokotela oshilongo.

³ Eitango lyaakuluntu oonkolwi otali ka lyatelwa kohi yoompadhi.

⁴ Esimano lyaawiliki oonkolwi otali ka kana po lya fa ekuko lyoondhiye pethimbo lyadho, dha toononwa nodha liwa ko pethimbo lyetiligano lyadho.

⁵ Esiku otali ya, uuna Omuwa Omunankondoawike ta ka kala a fa oshishani shoongala kaantu ye oonakuhupako.

⁶ Ota ka gandja euvoko lyuuyuuki kaatokolihapu e ta koleke aakeeleli yomiyelo dhoshilando dhaa matukilwe.

⁷ Eeno, naahunganeki pamwe naayambi ohaa kolwa taa tengenya. Oyi idhenga mo momaviinu notaa kolwa taa tantala uutse wa pwa ko. Omoluunkolwe aahunganeki otaa puka momamoniko, naayambi otaa nyengwa okutokola iiyetwapo mbyoka taa etelwa.

⁸ Miililo yawo omu udha oonkungo noonyata, nokamu na sha inaashi nyatekwa.

⁹ Otaa nyenyetele ndje taa ti: “Olye ta ka pewa omayele komulumentu nguka? Olye ta pumbwa elaka lye? Otali opalele owala uuhanona mboka hau yamu!

¹⁰ Ota kambadhala e tu longe ondanda nondanda, omukweyo nomukweyo, oshilongwa noshilongwa.”

¹¹ Ngele itamu pulakene ndje, nena Kalunga ote ke mu nongekitha kaantu taa dhuma elaka ekwiilongo, ye mu longe oshilongwa nelaka tali kokoma.

¹² Amuhe okwe mu pe evululuko nombili, ihe ne omwa tindi oku mu pulakena.

¹³ Omolwaashoka Omuwa te ke mu longa ondanda nondanda, omukweyo nomukweyo, oshilongwa noshilongwa. Nena otamu ka tantala monkatu kehe tamu katuka. Otamu ka tosholwa iilalo, tamu gwile mekelo notamu ka kwatwa po oonkwatwa.

¹⁴ Ngashingeyi ne aahuni, one tuu mboka tamu pangele Jerusalem notamu lele aantu yasho, pulakeneni shoka Omuwa ta ti.

¹⁵ Otamu itanga tamu ti tse neso otu uvathana, otwa adha eziminathano nuuyuni wokuusi. Otamu inekele oshiponga tashi mu hunutha, uuna nashi ke ya, oshoka ne omwi itula iifundja notamu ikotokele mu hupe aniwa.

¹⁶ Omuwa Omupangeliawike ota ti: “Pulakena, otandi tula muSion emanya lya simana, emanya lya hogololwa, emanya lyokolonela okuninga ekankameno lya kola nolya pama; ngoka i itaala, iha tenguka.

¹⁷ Uuyuuki otau ka ninga oshiyelekithongodhi, noshili otayi ningi ongodhi yoshumbu.” Iikungulu yoompawe otayi ka komba po iifundja ayihe mbyoka mwi inekela, nefundja tali ka kungulula po egameno lyeni.

¹⁸ Euvaneno ndyoka mwa uvanena neso, otali ka kuthwa po neziminathano lyeni noshaasi otali dhimwa po. Uuna oshiponga tashi ka tukuka, otamu ka gwilililwa po.

¹⁹ Otashi ke mu kwata, tashi ya nofu nanofu, ongula nongula. Otamu ke shi humbata omutenya nuusiku. Onkundana ompe kehe ya zi kuKalunga, otayi ka eta eshololo.

²⁰ Otamu ka fa omulumentu ngoka ta kambadhala okulala mombete yoshingumbulila; ita vulu okutaandela, nekumbyatha efupi itali gwana.

²¹ Omuwa ota ka kondja, ngaashi a ningile kondundu Perazim nomesilu lyaGibeon, opo a gwanithe shoka a dhiladhila a longe. Ota ka gwanitha iilonga ye tayi halutha, iilonga ye yomeholeko.

²² Inamu dhina elondodho tandi li mu pe! Ngele tamu shi ningi, otashi ke mu dhigupalela okuya ontuku. Ondu uvu eutho lyOmuwa Omunankondoawike lyokuhanagula po oshilongo ashihe.

²³ Pulakeneni kushoka tandi popi; pakalekeleni omakutsi kushoka tandi mu lombwele.

²⁴ Kaku na omunepya ha kala ta pulula epya lye ethimbo alihe, e li longekidhile ekuno.

²⁵ Ngele a mana okupulula, ota kunu mo ombuto yiimeno ngaashi yodiili noyookumina, ta kunu oompa dhosiima nodhiishokelya nokomunkulo gwepya ota kunu ko osiima yoombo ndatu.

²⁶ Ota tseya, nkene e na okulonga, oshoka Kalunga okwe mu longa.

²⁷ Ita longitha omuhi omunene a yungule oodiili nenge ookumina, aawe, ota longitha oshiti oshipu sho opalela iimeno mbika.

²⁸ Ita likitha po iilya ye kuuhwa, ota tseya okuyungula nawa iilya, yi ze molungu inaayi tanduka.

²⁹ Uunongo mbuka auhe owa zi kOmuwa Omunankondoawike. Oye omunandunge ta nongeke uunongo, notau tompola ayihe.

29

¹ Yaye Ariel, Ariel, oshilando shokukala David! Gwedheni omumvo komumvo omukwawo, niituthi nayi dhanwe pethimbo lyayo.

² Kalunga ota ka undulila Ariel oshiponga. Oshilando otashi ka kala shu udha elilagano netakumo, otashi ka kala sha fa oshiyambelo shi li metente lyombinzi.

³ Kalunga ota ka ponokela oshilando, te shi kunduka note shi kondeke.

⁴ Jerusalem otashi ka fa oshiluli tashi kambadhala okupopya shi li mevi, ewi otali uma tali zi montsi yevi.

⁵ Jerusalem, aakwiilongo ayehe mboka taye ku matukile, otaa ka pepwa po ya fa ontsi yevi, nomatangakwiita gawo omatilithi otaga pepwa po ga fa etutu. Ohaluka manga inaashi tegelelwa,

⁶ Omuwa Omunankondoawike ote mu mangulula nomipwalakato, omakakamo gevi noshihomo oshinene. Ota tumu ombepo yepukutula, oshikungulu nomulilo hagu lyana.

⁷ Nena omatangakwiita agehe giigwana tayi kondjitha oshilando shoshiyambelo shaKalunga ye shi kondeka noku shi ponokela, otaga ka kana ga fa ondjodhi, ongaashi oshinima tashi hehelele uusiku.

⁸ Iigwana ayihe mbyoka tayi gongala yi ponokele Jerusalem, otayi ka kala ya fa omulumentu a sa ondjala, ta yaguma ta li e ta penduka kondjala, nenge ya fa omuntu a sa enota ta yaguma ta nu, nomokupenduka kwe okwa kangwa kenota.

⁹ Ifalii ko utale mu ninge aagoya! Hedhii ko utale mu ninge aaposi! Kolweni, nando inamu nwa omaviinu! Tantaleni, nando inamu nwa omagongo!

¹⁰ Omuwa okwe mu kumukitha nokwe mu kothitha oomposi oondhigu. Aahunganeki oyo ya li ye na okukala omeho goshigwana, ihe Kalunga okwe ya posipaleke.

¹¹ Efatululo lyemoniko lyehunganeko kehe otali mu holekwa; otali ka fa embo lya hotekwa oshihotekitho. Ngele to li pe omuntu e shi kulesha e to mu pula, e li ku leshele, ota ka tya, ita vulu, oshoka olya hotwa.

¹² Ngele to li pe omuntu ngoka kee shi kulesha e to mu pula, e li ku leshele, ota ka yamukula kutya ita tseya sha.

¹³ Omuwa okwa ti: “Aantu mbaka ohaa ya kungame nomilungu dhawo notaa simaneke ndje nomakana gawo, ihe oomwenyo dhawo odhi li kokule nangame. Elongelokalunga lyawo lyokulongela ndje olya tungwa owala komautho gaantu.

¹⁴ Omolwashoka tandi ya halutha niikumitha tayi hukakana yo inaayi tegelelwa. Uunongo waanongo otau ka kana, noondunge dhaanandunge otadhi ka shunduka.”

¹⁵ Yaye mboka taa kambadhala okuholeka Omuwa omadhiladhilo gawo. Otaa tsakanitha oompangela dhawo meholamo notaa dhiladhila kutya kape na ngoka te ya mono nenge ta tseya shoka taa ningi.

¹⁶ Yaye uulayi wawo! Oshike shi vule oshikwawo, omuhongi gwiiyuma nenge eloya? Ope na tuu oshiyuma tashi lombwele omuhongi gwasho tashi ti: “Hangoye wa honga ndje.” Nenge shi mu lombwele shi tye: “Ku shi shoka to ningi.”

¹⁷ Okathimbo kowala, Libanon sho tayi shituka yi ninge etathapya, netathapya otali ka fa okuti.

¹⁸ Uuna esiku ndyoka tali ya, ombolo otayi ka uva embo tali leshwa mokule, nomuposi, ngoka a kala momilema, omeho ge otaga tonata nota mono ko.

¹⁹ Oohepele naafupi otaa ka mona elago ndyoka Omuwa, Kalunga kaIsrael omuyapuki, te li gandja.

²⁰ Ndika otali ka ninga ehulilo lyaamboka haa hepeke yakwawo nohaa dhini Kalunga. Omulunde kehe ota ka hanagulwa po.

²¹ Kalunga ota ka yonagula po ayehe mboka haa hokola yakwawo, mboka haa keelele okugeelwa kwaakolokoshi naamboka haa popi iifundja ya goyokithe uuyuuki.

²² Omolwashoka Omuwa, Kalunga kaIsrael, ngoka a hupitha Abraham muudhigu, ta ti ngeyi: “Aantu yandje, itamu ka sithwa we ohoni, niipala yeni itayi ka pemba we kohoni.

²³ Sho tamu tala aanona mboka tandi ye mu pe, nena otamu ka tseya kutya ongame Kalunga kaIsrael omuyapuki. Otamu simaneke ndje notamu kala nokutila ndje.

²⁴ Aagoya otaa ka nyanyukilwa elongo.”

30

¹ Omuwa okwa popi a ti: “Yaye mboka haa lele Juda, oshoka oya tsile ndje ondumbo. Otaa landula oondunge inaadhi za mungame. Otaa hangana ehangano tali kondjitha ehalo lyandje nokundumbila oondjo mumwe.

² Otaa ka konga ekwatho kuEgipiti yo inaa pula ndje. Oya hala Egipiti li ya popile, nomukwaniilwa gwalyo e ya gamene.

³ Ihe omukwaniilwa ita ka vula oku ya popila, negameno lyokuEgipiti otali ka hulila momupya.

⁴ Nando aakalelipo yawo ya thika muEgipiti ya kale miilando Zoan naHanes,

⁵ Aajuda otaa ka pongola, sho yi inekela oshigwana shaa shi kwiinekelwa, oshigwana shoka tashi nyengwa oku ya kwatha.”

⁶ Ndika elaka lyaKalunga tali popi iithitukuti yomombuga kuumbugantu tali ti: “Aakalelipo otaye ende taa taakana oshilongo shi na iiponga, oonime, omayoka guuzigo niikoko hayi tuka. Otaa kutile omilongelo dhi na ondilo kuusino nokoongamelo dhawo, ye dhi fale koshigwana itaashi vulu oku ya kwatha.

⁷ Ekwatho ndyoka Egipiti te li gandja, itali tompola sha. Onkee nda luku Egipiti oshilukadhina ‘Munalwango lwa mwenekwa.’ ”

⁸ Kalunga okwa lombwele ndje, ndi nyolele membo onkalo yaantu, sho shi kale ehokololo tali holola kutya yo aawinayi.

⁹ Aluhe oya tsile Kalunga ondumbo, aluhe otaa fundju, aluhe otaa tindi okupulakena omalongo gOmuwa.

¹⁰ Otaa ganda aahunganeki ya mwene. Otaa ti: “Inamu tu lombwela uuyuuki mboka. Tu lombweleni shoka twa hala tu uve. Etheni tu kale nomafafaeko getu.

¹¹ Zii po putse, inamu tula omandangalati mondjila yetu. Tse inatu hala okuuva, sho tamu popi Kalunga kaIsrael omuyapuki.”

¹² Ihe Kalunga kaIsrael omuyapuki ota popi ta ti: “Ne kamu na ko nasha naashoka tandi mu lombwele nomwi itula ekuni mekoto.

¹³ Otamu hunu. Omwa fa ekuma eleeleka lya tenda omusa li gwe po; ohaluka tamu ka ongotela po.

¹⁴ Otamu ka nyanyulwa mwa fa oshuma sheloya sha tatuka nayi, noshikangwakangwa shokuhumbata omulilo nenge shoku ka talitha omeya kiipeleki, osho ngaa inaashi hupa po.”

¹⁵ Omuwa Omupangeliawike, Kalunga kaIsrael omuyapuki, ota lombwele oshigwana ta ti: “Galukeni, itedhululeni ne mu inekele ndje meimweneneno, notamu kala mu na oonkondo e tamu hupithwa.” Ihe ne omwa tindi oku shi ninga.

¹⁶ Omwa dhiladhila, mu ye ontuku aatondi yeni mwa kayila uukambe u na ondapo. Eeno, omu li mondjila, efadhukopo otamu li vulu! Omwa dhiladhila, uukambe weni ou na ondapo shili, ihe mboka taye mu tidha, oye mu vule!

¹⁷ Eyuvi lyomune otali ka ya ontuku, nge tali mono omukwiita gumwe gwomaatondi naakwiita yatano oya gwana oku mu fadhukitha po amuhe. Kape na nando ogumwe gwomomatanga geni ta thigala po, shila epandela alike tali kala kondungu yondundu.

¹⁸ Natango tuu Omuwa ota tegelele e mu sile ohenda. Okwi ilongekidha e mu sile olukeno, oshoka aluhe oha ningi ashike shoka shu uka. Aanelago oyo mboka ye mu inekela.

¹⁹ Ne aantu mboka mwa kala muJerusalem, itamu ka lila we. Omuwa oye omunamutimahenda; uuna tamu mu kugile onkugo, ote mu kwatha.

²⁰ Omuwa ote mu pititha momathimbo omadhigu, ihe oye mwene ta ka kala mo oku mu longa noitamu ka kala we noku mu konga.

²¹ Nge tamu peguka mo mondjila mu ye kolulyo nenge kolumoho, otamu ka uva ewi konima yeni tali ti: “Ondjila oyo ndjika. Yi landuleni.”

²² Otamu ka kutha iimenka yeni ya kolongwa noshisiliveli niimenka ya kolongwa noshingoli e tamu yi ekelehi ya fa onyata notamu igidha tamu ti: “Ukeni hwii!”

²³ Nongele mwa kunu oombuto dheni, Omuwa ota ka lokitha omvula e dhi menithe dhi koke, notamu ka mona eloolo lyeteyo, niimuna yeni tayi ka kala nomaunapelo ga andjuka.

²⁴ Oonani nuusino hau pulula omapya geni, otau ka lya omwiidhi gwehetuhetu.

²⁵ Esiku ndyoka uuna omapopilongulu gaatondi yoye taga kwatwa po, naantu yawo taa dhipagwa po, omilonga dhomeya otadhi ka tondoka tadhi kunguluka tadhi zi koondundu adhihe nokiikulundundu ayihe.

²⁶ Omwedhi otagu ka minikila gwa fa etango, netango otali ka yelelela li vule shito luheyali, uuyelele wa fa womasiku gaheyali wa gongelelwa esiku limwe. Mbika ayihe otayi ka ningwa, Omuwa sho ta manga nota aludha iilalo yaantu ye.

²⁷ Oonkondo dhOmuwa nesimano lye otali imonikila oshinano oshile. Omulilo nolwithi otayi holola ondjahi ye. Ota popi, noohapu dhe odha hwama omulilo.

²⁸ Omufudho gwe ogwa fa efundja tali kungulula po ayihe. Otagu kombo po iigwana notagu hulitha po omadhiladhilo gayo omawinayi.

²⁹ Ihe ne, aantu yaKalunga, otamu ka kala mu na elago notamu ki imba, ngaashi hamu ningi moshituthi oshiyapuki uusiku. Otamu ka kala mu na elago mwa fa mboka taa ende nokuhika oohiya yu uka kotempeli yOmuwa, omupopili gwaIsrael.

³⁰ Omuwa ota ka uvithitha ko omuntu kehe embolongondjo lyewi lye, opo a kale u uvite oonkondo dhondjahi ye. Otaku ka kala omalaka gomulilo, omipwalakato miikogo, omvula yepoola noyoompawe.

³¹ Aayassur otaa ka haluthwa, uuna taa uvu ewi lyOmuwa noyu uvite oonkondo dhepangulo lye.

³² Omuwa nge te ya dhenge ishewe niishewe, nena aantu otaa kala taa hiki oontunda nuuharpa. Kalunga mwene ta ka kondjitha Aayassur.

³³ Onalenale ndjoka eziko enenenene olya longekidhwa li kale li na ehwamo tali fike po omupangeli gwaAssur. Oli li po eleeleka nolya mbwalangandja, lya longelwa iikuni oyindjiyindji. Omuwa ota ka fudha omufudho gwomulilo notagu yakitha ehwamo lyagwo.

31

¹ Yaye mboka taa yi kuEgipiti ya ka konge ekwatho! Oyi inekela omatangakwiita gaEgipiti ga kola — uukambe, omatembakwiita naakwiita. Ihe yo inaa inekela Omuwa, Kalunga kaIsrael omuyapuki, nenge ye mu galikane, e ya kwathe.

² Oku shi shi shoka ta ka longa. Ota ka tuma oshiponga. Ota kondjitha aatondi ye nokugeela mboka haye ya popile.

³ Aayegipiti kaye shi Kalunga, oyo aantu yowala. Uukambe wawo owo onyama, kau shi ombepo. Omuwa nge ta ningi po sha, oshikwathi otashi ihata po, noshigwana oshikwathwa otashi gwile po. Ayihe iyali otayi yonwa po.

⁴ Eeno, shika osho naanaa shoka Omuwa a lombwele ndje a ti: “Ngaashi onime nenge okanimegona taka gonene poshihakanwa shako, nando oku ze ongundu yaasita taye ka kugile onkugo ye ka kondjithe, itaka zi po kekudhilo lyomawi gawo nenge ka keelelwe kokwiigidha kwawo. Osho ngame Omuwa Omunankondoawike tandi ka kulukila pohi, ndi ka kondje olugodhi kondundu Sion nokondungu yayo.

⁵ Ngame, Omuwa Omunankondoawike, otandi ka gamena Jerusalem notandi shi popile, naanaa ngaashi ondhila tayi tengelele poshihandhila shayo, yi gamene uudhilona wayo.”

⁶ Omuwa okwa ti: “Aaisraeli ne, omwa yona kungame nomwa kondjitha ndje. Ihe ngashingeyi galukileni kungame.

⁷ Ethimbo otali ya, uuna ne amuhe tamu ka ekelahi iimenka yeni yuulunde mbyoka mwa hambula moshisiliveli nomoshingoli.

⁸ Assur otashi ka hanagulwa po kiita, ihe hakaantu. Aayassur otaa ka ya ondapo yolugodhi, naagundjuka yawo otaa ka ninga aapika.

⁹ Omupangeli gwawo ota ka ya ontuku ta kukuma, naambala otaa ka sholola notaa thigi po omapandela gawo golugodhi.” Omuwa oye a popi — Omuwa tuu ngoka ta longelwa muJerusalem, oye ngoka omulilo gwomafikilondjambo gwa tema muSion.

32

¹ Talii ko, omukwaniilwa ota ka lela nuuyuuki, nomalenga otaga ka pangula nawalela.

² Omulumentu kehe ota ka kala eshigo lyokushiga ombepo negameno kiikungulu. Otaa ka fa omilonga dhomeya tadhi tondoka mombuga, ya fa omuzile gwetayimanya enenenene mevi lya notelwa.

³ Omeho gawo otaga ka kala ga tonata, nomakutsi gawo ga shokwa okupulakena.

⁴ Omadhiladhilo gombolo otaga ka ilonga okuuva ko, nelaka lyoshikokoma otali ka popya lyu uvitike.

⁵ Kape na ngoka ta ka dhiladhila kutya omugoya oye omvalekele nenge a tye ombudhi oya simana.

⁶ Omugoya oha popi uugoya, ta dhiladhila okulonga iihuna. Shoka ta ningi naashoka ta popi, otashi sheke Omuwa, noiha palutha aasindjala nenge a pe aanotelwa ya nwe.

⁷ Omunamakoto oku na uuwinayi noha longo uukolokoshi; ota gana a yone po oohepele niifundja noku ya imba okukala nuuthemba wawo.

⁸ Ihe omunashili ota longo uuyuuki nota kala mushoka shu uka.

⁹ Aakiintu ne mwa kala melalangali inaamu piyaganekwa kusha, pulakeneni shoka tandi popi.

¹⁰ Ngashingeyi omu li nawa mu na ombili, ihe omumvo tagu ya pethimbo ngaandika otamu ka kala meihupulo, oshoka itaku ka kala we elikolo lyomandjembele, netoonono lyiiyimati kali ko we.

¹¹ Ne omwa kala melalangali inaamu piyaganekwa nando okusha, ihe ngashingeyi kaleni mwa kakama kuumbanda! Ihuleni oonguwo dheni ne mu zale omahahi moombunda dheni.

¹² Ikwateni ombandamutse tamu lili, oshoka omatathapya niitsambe yomiviinu oya yonagulwa po.

¹³ Omano nokano kaKahandja ka mena mevi lyaantu yandje. Lilileni omagumbo agehe ngoka ga li ge na aantu aanelago noshilando shoka sha li melalangali.

¹⁴ Nuuwa wo wene otau ka thigwa po, noshilandopangelo otashi ka ninga eputu. Omagumbo nomapopilongulu ngoka ge ya gamene, otaga ka ninga omakulukuma sigo aluhe, nkoka uusinokuti tau nuka omalondo, niimuna tayi ka mona omaunapelo.

¹⁵ Omuwa ote ke tu tumina Ombepo ye polumwe. Evi lya shunduka otali ka kala lyo ondoka, nomapya taga ka valeka.

¹⁶ Eutho lyu uka nuuyuuki otau ka kala moshilongo.

¹⁷ Shaa ngoka ota ka longa shoka shu uka, otaku ka kala ombili, evululuko negameno sigo aluhe.

¹⁸ Aantu yaKalunga taa ka kala yaa na nando ombudhi, nomagumbo gawo ge na ombili nevululuko.

¹⁹ Ihe oompawe otadhi ka loka momakuti, noshilando otashi kumuka po.

²⁰ Aanelago one mboka tamu ka kuna pomatondokelo gomeya kehe, notamu ka kala mu na omaunapelo omawanawa goongombe nuusino.

33

¹ Yaye aatondi yetu! Oya yugu noya kotokele, nando kaku na ngoka e ya yugu nenge e ya kotokele. Ihe ethimbo lyawo lyokuyuga nokukotokela otali hulu po, noyo yene taa ka ninga omulape gwokuyugwa nokukotokelwa.

² Omuwa, tu sila ohenda. Otwe ku inekela. Tu gamena esiku nesiku nou tu hupithe methimbo lyuudhigu.

³ Uuna to tu kondjele, iigwana otayi yi ontuku oshihomo shiita.

⁴ Omaliko gawo otaga nyantukwa nago koombahu, otaga yiwa nago koshiluku shomakamuti.

⁵ Omuwa omunene ngiini! Oye ha pangele ayihe. Jerusalem ohe shi udhitha uuyuuki nuukwashili. Oha kolekele oshigwana omathimbo gasho.

⁶ Aluhe ota popile aantu ye e te ya pe uunongo nomayele. Etilo okutila Omuwa olyo uuyamba waSion.

⁷ Aalumentu oofule otaa kugu onkugo. Aakalelipo yoshilongo mboka taa kambadhala ye ete ombili, otaa kugu ya lulilwa.

⁸ Oonenendjila odha mbugala, kape na we aayendanandjila. Omauvathano oga tewa, nomaziminathano oga yonagulwa. Kape na omuntu ta simanekwa we.

⁹ Oshilongo osha polimana sha mbugala. Omakuti gaLibanon oga ganya po, esilu lyaSharon lyo ondoka olya fa owala ombuga, muBaasha nokuKarmel omafo otaga yagumuka ko komiti.

¹⁰ Omuwa ota lombwele iigwana ta ti: “Ngashingeyi otandi ikwatele ko. Otandi ka holola oonkondo dhandje kutya ongame lye.

¹¹ Otamu pangele oompangela dhaa na oshilonga naashihe tamu shi ningi, kashi na omwago. Ombepo yandje oya fa omulilo ngoka tagu mu lungunitha po.

¹² Otamu ka nyanyuka mwa fa omamanya gokaalaka taga fikwa, mwa fa omano taga tomekwa ga ninge omutoko.

¹³ Ne mboka yokokule, uveni shoka nda longo; nane mboka yopopepi tseyeni oonkondo dhandje.”

¹⁴ Aalunde yomuSion otaa kakama kehaluko. Otaa popi taa ti: “Epangulo lyaKalunga olya fa omulilo gwa tema sigo aluhe. Ope na tuu gumwe gwomutse ta ka hupa ko komulilo hagu lyana?”

¹⁵ Otamu vulu okuhupa ko, ngele otamu popi notamu longo shoka shu uka. Inamu nyokoma oohepele noinamu taamba oombumbo. Inamu gama kumboka taa dhiladhila okudhipaga nenge okulonga uukolokoshi.

¹⁶ Nena otamu ka kala mwaa na ombudhi yasha; otamu ka kala megameno mwa fa mu li mepopilongulu lya kola. Otamu ka kala mu na iikulya yokulya nomeya gokunwa.

¹⁷ Oto ka mona ko omukwaniilwa meopalo lye ta lele oshilongo shoka sha taandela koombinga adhihedhihe.

¹⁸ Uumbanda woye uukulu wokutila aafendelithi aakwiilongo naatonateli yooshungo otau ka kala owala momadhiladhilo.

¹⁹ Ito ka mona we aakwiilongo aadhudhu mboka haa popi elaka ndyoka waa li shi.

²⁰ Tala utale Sion, oshilando moka hatu dhana iituthi yomalongelokalunga! Tala Jerusalem! Ehala olyevululuko ngiini lyokukala omuntu! Olya fa etsali ndyoka ihaali tenguka, oomboha dhalyo ihadhi dhikulwa mo noongodhi dhalyo ihadhi tokolwa.

²¹ Omuwa ote ke tu ulukila eadhimo lye. Otatu ka kala pomilonga ominene nopomatondokelo gomeya, ihe oosikepa dhaatondi itadhi ka thayila mo.

²² Oongodhi adhihe dhokooshumbu dhoosikepa odha yululuka, oothayila itadhi wapa okuyalalekwa! Otatu ka kwata po uuyamba auhe waakwiita aatondi yetu. Otaku ka kala oshindjishindji, noshilema otashi ka mona po oshitopolelwa shasho. Omuwa ye mwene ta ka ninga omukwaniilwa gwetu; oye te ke tu lela e te tu gamene.

²³

²⁴ Kape na nando ogumwe muSion ta ka tya: “Otandi ehama.” Omayonagulo gawo agehe otaga ka dhimwa po.

34

¹ Ileni, ne iigwana ayihe! Gongaleni ne mu pulakene. Uuyuni auhe nane amuhe mwa kala kombanda yevi, ileni mu pulakene.

² Omuwa okwa geela iigwana ayihe nomatangakwiita gayo. Okwe ga pangulile okuyonwa po.

³ Omidhimba dhawo itadhi ka fumvikwa; otadhi ka langathana nokwoolela nkoka nokunika; oondundu otadhi ka tiligana ombinzi.

⁴ Etango, omwedhi noonyothi otadhi ka nyanyauka, sigo dha ningi ontsi. Ewangandjo otali ka gonywa lya fa ondhinga yembo, noonyothi otadhi ka gwa mo dha fa omafo taga yagumuka komiviinu nenge komikwiyu.

⁵ Omuwa okwa longekidha egongamwele lye megulu, nongashingeyi otali ka dhipaga Edom, aantu tuu mboka ya pangulilwa okuyonwa po.

⁶ Egongamwele lye otali ka gwayekwa ombinzi yawo noofu ngaashi ombinzi niinkene yoonzigona noyiikombo mbyoka hayi yambwa omafikilondjambo. Omuwa ota ka yamba omafikilondjambo ngaka moshilando Bozra; ota ka ninga omatselelo omanene moshilongo Edom.

⁷ Aantu otaa ka gwila po ya fa oonyati oondumentu noya fa oontsezi oongundjuka, nevi otali ka tiliganekwa kombinzi nolya siikilwa kiikagadhi.

⁸ Ndika olyo ethimbo ndyoka Omuwa ta ka mangulula Sion nota ka geela aatondi yaSion.

⁹ Omilonga dhaEdom otadhi ka ninga ontopo yonka, nevi otali ka ninga osulufuli. Evi alihe otali ka pya lya fa oteya.

¹⁰ Otali ka pya omutenya nuusiku, nolwithi otalu ka tsinagala mo aluhe sigo aluhe. Evi otali ka kala lya mbugala sigo omapipi nomapipi, nokape na we ngoka te ende mulyo sigo aluhe.

¹¹ Omahwiyu nomadhilakola otaga ka lala oshilongo. Omuwa ote ke shi mbugaleka ishewe, ngaashi sha li nale peshito.

¹² Itaku ka kala omukwaniilwa a lele oshilongo, nomalenga agehe otaga ka kala kaage mo.

¹³ Omano noondjoho otadhi ka mena mo moongulumbala adhihe nomiilando yomadhingililokuma, nuuyandje nomahwiyu otaga ka kala mo.

¹⁴ Iiyaluhwa ohayi tsakanene mo nomambungu, niikombo iindandi ohayi igidhathana. Evukule lyomomilema omo tali ya li konge omulalo.

¹⁵ Omahwiyu otaga tungu mo iihandhila yago e taga valele mo omayi, taga tendula uuhwiyugona wago e tage u paluthile mo. Oontsa oko tadhi ka gongala, onkwawo ponkwawo.

¹⁶ Shi konakoneni membo lyOmuwa lyiishitwa yi na omwenyo ne mu leshe shoka tali ti. Kape na nando oshimwe shomiishitwa mbika tashi kana po noshaa na oshikwawo. Omuwa okwe shi popi shi ningwe; oye mwenemwene te ke yi gongela.

¹⁷ Omuwa oye mwenemwene te yi topolele evi e te yi pe uuthiga wayo, yi kale mo okuza kepipi nepipi.

35

¹ Ombuga nomalondo otaga ka nyanyukwa, ontale otayi ka tundulukwa nokutemuna oongala.

² Ombuga otayi ka imba nokuligola kenyanyu; otayi ka opala ya fa oondundu dhaLibanon notayi ka ondoka ya fa omapya gokuKarmel naSharon. Aantu otaa mono eadhimo lyOmuwa, otaa tala uunene noonkondo dhe.

³ Kolekeni omaako ngoka ga vulwa noongolo ndhoka dha loloka.

⁴ Lombweleni ayehe mboka ya tyololoka tamu ti: “Ikoleleni, inamu tila!” Kalunga ote ya e mu mangulule, ote ya a pangule aatondi yeni.

⁵ Omeho gaaposi otaga ka tsikuluka, nomakutsi goombolo otaga ka uva ko.

⁶ Oshitiningili otashi ka nuka ngomenye, nelaka lyoshikokoma otali imbi kenyanyu. Omeya otaga ka tsipuka mombuga, nomontale otamu ka tondoka omilonga.

⁷ Ehekevi lya pupyala otali ka pola, nomalondo otaga ka ninga omadhiya goothithiya. Pokuma pwa li pwa kala oombandje, otapa mene omwiidhi, oombungu nomanenge.

⁸ Otaku ka kala onenendjila ya lukwa Ondjila ondjapuki. Ondjila ndjoka ihayi endwa komulunde, naangoka te ende nayo, iha puka nando na kale omugoya.

⁹ Itamu ka kala oonime; kape na iilikama iigeyi tayi tokola ondjila ndjoka. Ayehe mboka Omuwa e ya mangulula, otaa ka shuna kaandjawo nondjila ndjoka.

¹⁰ Aakulilwa yOmuwa otaa ka galuka. Otaa yi muSion nokuligola, enyanyu lyaaluhe otali adhima miipala yawo. Etunduluko nenyanyu olye ya kola, oluhodhi nomayemato kage po we.

36

¹ Momumvo omutimulongo nomutine gwepangelo lyomukwaniilwa Hiskia, Sennakerib, omupangeli gwaAssur okwa matukile iilandohote yaJuda e te yi kutha ko.

² Okwa tumu elenga lye ekuluntu lya zi muLakish pamwe netangakwiita enene, li ka kondjithe omukwaniilwa Hiskia muJerusalem. Elenga olya kwata po ondjila yaatungi yoonguwo pomukanka gwomeya ngoka tagu kutha omeya mondama yopombanda.

³ Aajuda yatatu oya yi yeke mu tsakaneke: elenga lyomuuwa Eliakim lyaHilkia, amushangampangu Shebna naamushangandjayi Joa yaAsaf.

⁴ Elenga enene lyomupangeli gwaAssur olya ti kuyo: “Lombwela Hiskia kutya omupangeli omunene gwaAssur ota ti ngeyi: ‘Einekelo lyoye olyo okwiinekela shike?’

⁵ Otandi ti: ‘Moohapu dhanathangwa ohamu zi tuu omayele noonkondo pethimbo lyiita? Ngoye owi inekela lye, sho wa tsile ndje ondumbo?

⁶ Ngiika owi inekela Egipiti, ihe Egipiti olya fa enenge lya shandjuka tali tsu oshikaha shomuntu ngoka ti itsile ko. Omukwaniilwa gwaEgipiti osho a tya, ngele pe na ngoka te mu inekele.’ ”

⁷ Elenga enene olya tsikile ko tali ti: “Nenge otamu lombwele ndje mu tye, otwi inekela Omuwa, Kalunga ketu? Hamba, Hiskia ina hanagula po nani omaha gokunonomena niiyambelo yOmuwa, sho a lombwele Aajuda nAajerusalem, ya simaneke oshiyambelo shimwe ashike?

⁸ Medhina lyamwene gwandje, omupangeli gwaAssur, otandi mbetse nangoye. Otandi ku pe uukambe omayuvi gaali, ngele oto vulu oku u monena aakayili.

⁹ Ngoye ito gwana nando okumatukila elenga limwe eshona lyokuAssur, ndele natango owi inekela Egipiti te ku tumine omatembakwiita naakayilinkambe!

¹⁰ Nenge oto dhiladhila kutya onda homona oshilongo shika noku shi hanagula po ndaa na eutho lyOmuwa? Omuwa oye mwene a lombwele ndje, ndi shi matukile, ngame ndi shi hanagule po.”

¹¹ Eliakim, Shebna naJoa oya lombwele elenga ya ti: “Tatekulu, popya Oshiaramea, otu shi uvite. Ino popya Oshihebeli, aantu ayehe ye li kombanda yedhingililokuma otaye tu pulakene.”

¹² Elenga olya yamukula lya ti: “Oto dhiladhila kutya mwene gwandje okwa tumu ndje kumwene gwoye nokungoye amuke, ndi popye oohapu ndhika? Aawoo, ondi na okulombwela wo aantu mboka ye li kekuma, mboka ye na okulya omapumba gawo notaa nu omasita gawo naanaa ngaashi ne.”

¹³ Elenga olya thikama po e tali igidha mOshihebeli tali ti: “Pulakeneni sho omupangeli gwaAssur te mu lombwele!

¹⁴ Ote mu londodha, mwaa kotokelwe kuHiskia. Hiskia ita vulu oku mu hupitha.

¹⁵ Inamu pitika, e mu heke mu inekele Omuwa. Inamu dhiladhila kutya Omuwa ote ke mu hupitha, nenge a keelele omatangakwiita getu gaAssur okukwata po oshilando sheni.

¹⁶ Inamu pulakena Hiskia. Omupangeli gwaAssur ote mu lombwele, mu pite mo moshilando, mu ye pondje ne mu igandje. Amuhe otamu ka pitikilwa, mu lye omandjembele komiviinu dheni yene, oonkwiyu komikwiyu dheni yene nokunwa omeya momithima dheni yene,

¹⁷ sigo omupangeli te mu fala moshilongo sha faathana nosheni, moka mu na iitsambe yomiviinu tayi gandja omaviinu nomu na iilya yokuninga iikwiila.

¹⁸ Inamu tulwa muugoya kuHiskia, mu dhiladhile kutya Omuwa ote mu hupitha. Ookalunga yiigwana yilwe oya hupitha tuu iilongo yawo miikaha yomupangeli gwaAssur?

¹⁹ Ookalunga yaHamat noyaArpad oye li peni ngashingeyi? Ookalunga yaSefarvaim oye li peni? Oya hupitha tuu Samaria?

²⁰ Uunake gumwe gwookalunga mbaka ya hupitha nando oshilongo shimwe shomuyo miikaha yomupangeli gwetu? Ndele nena oshike tashi mu dhiladhilitha kutya Omuwa ota hupitha Jerusalem?”

²¹ Aantu oya li ya tya thilu, naanaa ngaashi omukwaniilwa Hiskia e ya lombwele; inaa popye nando osha.

²² Nena Eliakim, Shebna naJoa oya tuula oonguwo dhawo moluhodhi e taa zi po e taa ka lombwela omukwaniilwa shoka elenga lyokuAssur lya ti.

37

¹ Hiskia sho u uvu ehokololo lyawo, okwa tuula onguwo ye moluhodhi, a zala ehahi e ta yi kotempeli yOmuwa.

² Okwa tumu elenga lyomuuwa Eliakim, amushangampangu Shebna naayambi aakuluntu komuhunganeki Jesaja yaAmos. Oya li ya zala omahahi.

³ Okwe ya tuma kuJesaja nelaka tali ti: “Esiku lyonena olyomalwa, olyegeelo nolyeshundulo. Otwa fa omukiintu ta thetwa, ihe ita vulu okupulumutha.

⁴ Omupangeli gwaAssur okwa tumu elenga lye ekuluntu okusheka Kalunga omunamwenyo. Omuwa, Kalunga koye, na uve omasheko ngaka nokugeela ngoka e ga popi. Galikana Kalunga omolwaamboka yomaantu yetu ya hupa ko.”

⁵ Jesaja sho u uvu elaka lyomukwaniilwa Hiskia,

⁶ okwa yamukula ta ti: “Omuwa ota ti: ‘Ino tila oohapu ndhoka dhuumatyona womupangeli gwaAssur we dhi uvu tadhi sheke ndje!

⁷ Otandi ku uvithitha omupangeli onkundana ndjoka tayi mu galukithile koshilongo she mwene, nkoka tandi ke mu dhipagithila.’ ”

⁸ Elenga lyaAssur olya mono kutya omupangeli a zi mo muLakish nokwa li ta kondjitha oshilando shopopepi Libna; onkee olya yi kuye.

⁹ Onkundana ya adha Aayassur, oya ti kutya etangakwiita lyAayegipiti mewiliko lyomukwaniilwa Tirhaka gwaSudan oli li mondjila, li ya homone. Omupangeli sho e shi uvu, okwa tumu aatumwa komukwaniilwa Hiskia.

¹⁰ Ye mu lombwele ngeyi: “Kalunga ngoka we mu inekela, okwe ku lombwele kutya ito ka ya miikaha yandje, ihe shika inashi ku tula muugoya.

¹¹ Owa kundana shoka omupangeli gwaAssur ta ningile iilongo ayihe mbyoka a tokola e yi hanagule po. Oto dhiladhila kutya oto ka hunuka?

¹² Ootatekulu oya hanagula po iilando Gosan, Haran naRezef noya dhipaga aantu yaBeteden mboka ya kala mu Telassar, ko kakwa li nando okalunga kamwe ta vulu oku ya hupitha.

¹³ Aakwaniilwa yomiilando Hamat, Arpad, Sefarvaim, Hena naIvva oye li peni?”

¹⁴ Omukwaniilwa Hiskia okwa taamba ontumwafo miikaha yaatumwa e te yi lesha. Okwa yi ihe kotempeli e ta aneke ontumwafo koshipala shOmuwa.

¹⁵ E ta galikana ta ti:

¹⁶ “Omuwa, Kalunga kaIsrael, ngoka wa kuutumba koshipangelapundi shoye kombanda yaakerubi, ongoye awike Kalunga ngoka to lele iilongo ayihe yomuuyuni. Ongoye wa shiti egulu nevi wo.

¹⁷ Ngashingeyi, Omuwa, tala, nkene tatu ningwa. Pulakena oohapu adhihe dhaSennakerib, nkene te ku sheke, ngoye Kalunga omunamwenyo.

¹⁸ Omuwa, otse atuhe otwa tseya kutya aapangeli yaAssur oya hanagula po iigwana oyindji e taa ningi omavi gayo omaputu.

¹⁹ Oya lungunitha po ookalunga kawo mboka kaaya li ookalunga nando, oyo iiyelekela ayike ya hongwa kaantu miiti nomomamanya.

²⁰ Ngashingeyi, Omuwa, Kalunga ketu, tu hupitha miikaha yAayassur, opo iigwana ayihe yomuuyuni yi tseye kutya ongoye awike Omuwa Kalunga.”

²¹ Jesaja okwa tumu komukwaniilwa Hiskia elaka tali mu tseyithile eyamukulo kegalikano lye.

²² Omuwa okwa ti: “Sennakerib, oshilando Jerusalem otashi ku yolo e tashi ku dhini.

²³ Olye ngoka andola we mu sheke noku mu popya nayi? Ongoye owa dhini ndje, ngame Kalunga kaIsrael omuyapuki.

²⁴ Owa tumu aatumwa yoye, u inenepekele ndje kutya ngoye nomatembakwiita goye agehe wa sindi oondundu oondeendeka dhaLibanon. Owi itanga to ti, owa komangele omiti omisendeli omile nomiti omikiperesi dho opala nowa thiki nomomaha gomuuleeleka momakuti.

²⁵ Owi inomo to ti, owa hupu omithima e to nu omeya momavi gokiilongo noompadhi dhaakwiita yoye odha lyatagula po omulonga Niili e tagu pwine.

²⁶ “Ino shi uva nani kutya shika ongame nde shi dhiladhila nalenale? Ngashingeyi onde shi gwanitha. Onde ku pe oonkondo, u kumune po iilandohote, yi ninge omakulukuma.

²⁷ Aantu mboka ya kala mo oya tyololoka; oya li ya haluka noya kunkwa. Oya li ya fa omwiidhi melundu nenge iigwanga tayi mene kombanda yondunda, uuna ombepo ompyu yokuuzilo tayi yi pepele.

²⁸ “Ihe ngame onde ku tseya aguhe, shoka to ningi naankoka to yi. Onda tseya, nkene wa pindjala okukondjitha ndje.

²⁹ Onda taamba etseyitho lyepindjalo lyoye nomwiityo gwoye, nongashingeyi otandi tula ondjolo momayulu goye noshitomo mokana koye e tandi ku shunitha nondjila ndjoka we ya nayo.”

³⁰ Jesaja okwa ti komukwaniilwa Hiskia: “Endhindhiliko lyaashika tashi ka ningwa, olyo ndika. Nuumvo nomumvo tagu ya omu na okulya oshinkumbwe ashike, ihe omumvo tagu ka landula ko otamu ka vula okukuna nokuteya iilya yeni, notamu ka tsika omiviinu e tamu li omandjembele.

³¹ Oomboka taa hupile muJuda, otaa ka tsapuka ya fa iimeno tayi fala omidhi dhayo muule mevi e tayi imi iiyimati.

³² MuJerusalem otamu ka kala aantu nokondundu Sion oomboka ya hupu ko, oshoka Omuwa oye ta ningitha ayihe mbika.

³³ “Omuwa okwa popi omupangeli gwaAssur ta ti: ‘Ite ya mo, a hite meni lyoshilando shika nenge a umbile mo nando oshikuti shimwe molugodhi. Kape na omukwiita e na ehuuyanza ta vulu okuya popepi noshilando, noshilando itashi tungilwa omutuni gwekondekela.

³⁴ Ota ka shuna nondjila ndjoka e ya nayo ite ya meni lyoshilando shika. Ongame, Omuwa, nde dhi tya.

³⁵ Otandi popile oshilando shika e tandi shi gamene omolwesimano lyandje mwene nomolweuvaneko nde li uvanekele omuntu gwandje David.’ ”

³⁶ Omuyengeli gwOmuwa okwa yi kontanda yAayassur e ta dhipagele ko aakwiita 185 000. Sho kwa shi, oya adhika ya lala ya sa ayehe.

³⁷ Nena omupangeli gwaAssur Sennakerib okwa zi po e ta shuna kuNinive.

³⁸ Esiku limwe, sho a li ta saagele motempeli yoshikalunga she Nisrok, yaali yomoyanamati, Adrammelek naSharezer, oye mu dhipaga nomagongamwele e taa fadhuka po taa yi koshilongo Ararat. Gumwe gwomoyanamati Asarhaddon okwe mu landula muukwaniilwa.

38

¹ Pomasiku ngeyaka Hiskia okwa kwatwa kuuvu uudhigu, konyala a se. Omuhanganeki Jesaja yaAmos okwa yi e ke mu talele po e ta ti kuye: “Omuwa ota ti: ‘Longekidha egumbo lyoye, oshoka ono si. Ito ka aluka we.’ ”

² Hiskia okwa pungulukile mekuma nokwa galikana:

³ “Omuwa, dhimbulukwa kutya onde ku longele nuudhiginini neinekelo nonda kambadhala aluhe okuninga shoka she ku opalela.” Okwa lili nokulililila.

⁴ Nena Omuwa okwa lombwele Jesaja

⁵ a shune kuHiskia, e mu lombwele a tye: “Ongame Omuwa, Kalunga kahokulu David, ndu uvu egalikano lyoye nonda mono omahodhi goye. Otandi ke ku kaleka ko omimvo omulongo nantano u na omwenyo.

⁶ “Otandi ku hupitha miikaha yomupangeli gwaAssur pamwe noshilando shika Jerusalem. Otandi ka popila oshilando shika.”

⁷ Jesaja okwa yamukula a ti: “Omuwa ote ke ku pa endhindhiliko, a holole kutya ota dhiginine euvaneko lye.

⁸ Omuwa ota ka shunitha omuzile monima oonkatu omulongo moshiulikithimbo shomukwaniilwa Ahas.” Omuzile nogwa shuna monima oonkatu omulongo.

⁹ Hiskia sho a aluka kuuvu we, okwa nyola eimbilo ndika lyehambelelo:

¹⁰ Onda dhiladhila kutya metifa lyokukalamwenyo kwandje otandi ka kulukila muuyuni wokuusi e tandi kuthwa ngaaka oshihupe shokukala ndi na omwenyo.

¹¹ Onda dhiladhila kutya itii ka mona we Omuwa, eeno, Omuwa gwandje omevi lyaanamwenyo. Itii ka ligamena we aana yaantu nenge ndi kale pamwe naamboka ye li kombanda yevi ndika.

¹² Omwenyo gwandje ogwa kuthwa mo nogwa adha ehulilo. Ongetsali lyaanahambo tali dhikulwa po, ongoshiyata tashi tetwa moongodhi dhokoshitungitho, sho sha pu okutungwa. Onda dhiladhila kutya Kalunga ota hulitha ndje po.

¹³ Uusiku auhe onda kugu kuuwehame, oto ti onkoshi tayi kokota po omasipa gandje. Onda dhiladhila kutya Kalunga ota hulitha ndje po.

¹⁴ Otandi kululula ongonguti. Omeho gandje oga ningi oshiwiwili, sho te ligamene kegulu. Omuwa, ondi na uudhigu, ila, u kwathe ndje!

¹⁵ Otandi ti ngiini? Nenge ondi mu lombwele shike? Omwenyo gwandje ogwa lulilwa, noite vulu nando okukotha.

¹⁶ Omuwa, otandi ku kalele, eeno, ongoye awike tuu! Panga ndje ndi kale ndi na omwenyo.

¹⁷ Tala, oluhodhi olululu olwa shitukile ndje elago. Mohole yoye owa hupitha ndje, owa hili ndje moshilambo shekano. Oondjo dhandje adhihe ongoye we dhi umbile konima yoye.

¹⁸ Oshoka ombila itayi vulu oku ku hambelela, uusi itau ku tanga. Mboka ya kulukile moshaasi, ihaa inekele uudhiginini woye.

¹⁹ Aanamwenyo, eeno, aanamwenyo oyo taye ku hambelele, ngashika ngame tandi shi ningi nena. Oohe taa hokololele oyana oshili yoye.

²⁰ Omuwa, ongoye wa aludha ndje. Otatu hiki uuharpa e tatu ku imbile omahambelelo motempeli yoye omasiku getu agehe.

²¹ Jesaja okwa lombwele omukwaniilwa a tule ekamina lyoonkwiyu poshitumbuka she, oye nota aluka.

²² Omukwaniilwa Hiskia okwe mu pula a ti: “Endhindhiliko olini po tali ulike kutya otii ka vula okuya motempeli?”

39

¹ Lwopomathimbo ngoka omukwaniilwa gwaBabilonia Merodak Baladan, omuna gwaBaladan, okwa kundana kutya omukwaniilwa Hiskia okwa li ta alukwa, onkee okwe mu tumine ontumwafo nomagano.

² Hiskia okwa kundu nawa aatumwa e te ya ulukile uuyamba we — iisiliveli ye niingoli ye, iizimba ye nomagadhi gondilo, niikwaniipangitho ye ayihe yuukwiita. Kakwa li sha moompungulo dhe nenge shaa mpoka moshilongo she inee shi ya ulukila.

³ Nena omuhunganeki Jesaja okwa yi komukwaniilwa Hiskia e ta pula ta ti: “Aantu mbaka oya zi peni noye ku lombwele shike?” Hiskia okwa yamukula a ti: “Oya zi koshilongo shokokule kuBabilonia.”

⁴ Jesaja okwa pula a ti: “Mombala oya mono mo shike?” Hiskia okwa yamukula a ti: “Oya tala iinima ayihe. Kamu na sha moompungulo inaandi shi ya ulukila.”

⁵ Jesaja okwa ti komukwaniilwa: “Omuwa Omunankondoawike ota ti kutya

⁶ esiku onali ke ya, uuna shaa shoka shi li muuwa woye, shaa shoka oohokulu ye shi pungulile, tashi ka falwa kuBabilon. Itapa thigwa sha.

⁷ Yamwe yomoluvalo lwoyelela otaa ka kuthwa po e taa ka ningwa aathonwantu, ya yakule muuwa womukwaniilwa gwaBabilon.”

⁸ Omukwaniilwa Hiskia shika okwe shi uvu ko tashi ti kutya, otaku ka kala ombili negameno monkalamwenyo ye, nomolwasho okwa yamukula ngeyi: “Oohapu dhOmuwa ndhoka wa popi, oombwanawa.”

40

¹ Kalunga ketu ota ti: “Hekelekeni, hekelekeni aantu yandje.

² Aajerusalem ya tseni omukumo. Ya lombweleni kutya ehepeko lyawo olya hulu, noondjo dhawo ngashingeyi odha dhimwa po. Onde ya geele egeelo lya gwana molwoondjo dhawo.”

³ Ewi tali kolomoka tali ti: “Longekidhileni Omuwa ondjila mombuga! Paleleni Kalunga ketu epola montale!

⁴ Omasilu agehe naga filwe po; oondundu adhihe nadhi kumunwe po. Iikulundundu nayi palwe, niisilukutumba nayi yelekanithwe.

⁵ Eadhimo lyOmuwa otali iholola: naana yaantu otaye ke li mona ko. Omuwa oye mwene e shi uvaneke.”

⁶ Ewi olya ti: “Uvitha!” Onda pula nda ti: “Nandi uvithe shike?” “Uvitha to ti: Aantu ayehe oya fa omwiidhi; nesimano lyawo olya fa oongala dhokelundu.

⁷ Omwiidhi otagu kukuta, noongala otadhi ganya, uuna Omuwa te dhi pepithile ombepo. Aantu kaa vulathane nomwiidhi.

⁸ Eeno, omwiidhi otagu kukuta, noongala otadhi ganya, ihe oohapu dhaKalunga ketu otadhi kala sigo aluhe.”

⁹ Jerusalem, londa pombanda kondundu nou uvithe elaka etoye! Sion, igidha newi lyopombandambanda, u tomone onkundana ombwanawa! Kugagana shili ngoye ino tila! Lombwela iilando yaJuda kutya Kalunga kawo ote ya!

¹⁰ Omuwa Omupangeliawike ote ya okulela, oye omunankondoawike. Ote etelele aantu mboka a mangulula,

¹¹ ongomusita ta litha oshigunda she; oonzigona ote dhi gongele pamwe noku dhi humbata momaako ge; oonyali ote dhi sisidha nawa.

¹² Oku na tuu ngoka ta vulu okuyeleka efuta neshambekela, nenge a yeleke eyalelo nolundya lwe? Oku na tuu ngoka ta pungula ontsi yevi montungwa, nenge a vihe oondundu niikulundundu moshiviha?

¹³ Oku na tuu ngoka ta vulu okulombwela Omuwa shoka e na okuninga? Olye ta vulu oku mu longa, nenge e mu pe omayele?

¹⁴ Kalunga ota pula oondunge kulye, opo a tseye ye uve ko nokwiilonga kutya iinima ohayi ningwa ngiini?

¹⁵ KOmuwa iigwana kayi na po sha; kuye oya faathana neta limwe lyomeya, iipuupuka moshiviha ya fa ontsi. Nge ta tumbu oontuntu, odho oompu dha fa owala ontsi.

¹⁶ Iiyamakuti ayihe momakuti gaLibanon inayi gwana okuyambelwa Kalunga ketu, nomiti adhihe kadhi shi odhindji dhi ninge iikuni yokutema omulilo.

¹⁷ Iigwana ayihe kayi shi sha koshipala she, kayi na omwago gwasha kuye.

¹⁸ Kalunga ota yelekwa nalye? Otamu mu faathanitha nashike?

¹⁹ Ita faathanitha noshimenka sha hongwa kiikaha yaantu, oshilonga shiiyela ya kolongwa noshingoli nosha tulwa mekota lyoshisiliveli.

²⁰ Omuntu ngoka ita vulu okulanda oshisiliveli nenge oshingoli, ota hogolola omuti gu na olute lwa kola. Ota ka konga onkulungu, a honge oshiyelekelakalunga, shi dhikwe itaashi tenguka.

²¹ Kamu shi shi? Inamu shi lombwelwa nale? Inamu kundana, uuyuni nkene wa tameka po?

²² Owa shitwa kungoka a kuutumba koshipangelapundi mookathele mwi handiyaka yeyalelo; aantu kombanda yevi oya fa uudhidhi. Egulu ote li yala lya fa onguwo, ote li alele ngetsali lyokukala mo.

²³ Aawa ote ya kutha ko kiipundi, aapangeli yomuuyuni ote ya shundula.

²⁴ Oya fa iimeno opo ya tsikwa, opo tayi tsapuka omidhi. Omuwa nge a pepitha ombepo, otaa pepuka po, taa yi ombepo ya fa etutu.

²⁵ Kalunga omuyapuki ota vulu okuyelekwa nalye? Oku na tuu ngoka e mu fa?

²⁶ Tala owala utale kegulu! Olye a shiti oonyothi ndhoka wa tala? Oye ngoka te dhi enditha dha fa etangakwiita. Adhihe okwe dhi tseya nawa, nokehe yimwe ote yi tumbula kedhina lyayo! Oonkondo dhe oonenenene, odha kolelela nokape na ndjoka e yi hunutha po.

²⁷ Israel, omolwashike to ngungutula to ti, Omuwa ina tseya uudhigu woye nenge e ku kwathe, sho to hepekelwa uuyuuki?

²⁸ Ku shi shi nani? Nani ino shi uva kutya Omuwa oye Kalunga kaaluhe? Oye a shiti omakankameno gevi. Oye iha vulwa ye iha loloka. Owino ye oya nyengana okutseyika.

²⁹ Oye ta tsu omukumo oonakuvulwa naamboka yaa na oonkondo, oonkondo dhawo ote dhi indjipaleke odhindji.

³⁰ Aagundjuka ohaa vulwa nohaa adhika kuutongwe, aalumentu aagundjuka otaa punduka e taa ihata po,

³¹ ihe mboka taa inekele Omuwa, ohaa mono oonkondo oompe. Oya fa oontsa tadhi yelutha omawawa pombanda; ohaa matuka yo itaa vulwa; otaye ende noitaa loloka.

41

¹ Kalunga ota popi ta ti: “Mweneni ne mu pulakene ndje, one oontuntu dhokokule! Ilongekidheni, tu ka kaleni moompangu; otamu kala mu na ompito yokupopya. Natu tokoleni, olye ngoka e li mondjila.

² “Olye ano ngoka e etele omusindani a ziilile kuuzilo nokwe mu ningi omusindani shaa nkoka ta yi? Olye te mu pe esindano, a sinde aakwaniilwa niigwana? Egongamwele lye otali ya dhengele pevi ya fa ontsi yevi. Iikuti ye otayi ya hwanukile ya fa iiyagaya tayi pepwa kombepo.

³ Ote ya tidha ta katuka kee na nando ombudhi, ta kwinyola a fa itaa lyata pevi.

⁴ Olye ngoka e shi longa nokwe shi toto? Olye u utha olweendo lwehistoli? Ngame, Omuwa, onda li petamekolela, ngame, Omuwa, otandi ka kala pehulilolela.

⁵ “Aantu yokokule oya mono shoka nda longo; oya haluka nokukakama kuumbanda. Omolwashoka ya gongala e taye ya.

⁶ Oonkulungu otadhi kwathathana nokutsaathana omukumo.

⁷ Engomba otali kumike omuhambuli gwoshingoli, nomumbunzi gwoshimenka ota lombwele ngoka ta ndanda poshikalo ta ti: ‘Owa ninga nawa.’ Oyo notaa kwatele oshimenka peha lyasho noomboha.”

⁸ “Ihe omuntu gwandje Israel, ngoye Jakob, ngoka nde ku hogolola, ngoye oluvalo lwakuume kandje Abraham,

⁹ ngame onde ku kongolola kooha dhuuyuni; onde ku ithana ko koombinga dhokokulekule, nonde ku lombwele nda ti: ‘Ngoye omuntu gwandje.’ Inandi ku ekelahi nando, ihe onde ku hogolola.

¹⁰ Ino tila — ongame ndi li pungoye! Ongame Kalunga koye — ino limbililwa! Otandi ku kankameke e tandi ku kwatha; otandi ku gamene notandi ku hupitha.

¹¹ “Ayehe mboka taa tsu ondumbo nangoye, otaa sithwa ohoni e taa sindika. Ayehe taye ku kondjitha, otaa ka sa po.

¹² Ayehe mboka ya li aatondi yoye, ito ke ya mona we, nando u ya konge. Ayehe mboka ye ku hingile iita, otaa ka pepuka po thilu.

¹³ Oshoka ongame Omuwa Kalunga koye; otandi ku tsu omukumo te ti: ‘Ino tila; otandi ku kwatha.’ ”

¹⁴ Omuwa ota popi ta ti: “Ino tila, ezinyo ngoye Israel, nangoye Jakob, okanima okashuushuu, oshoka ongame mwene tandi ku kwatha. Ngame Omuyapuki, Kalunga kaIsrael ongame tandi ku hupitha.

¹⁵ Otandi ku ningi omuhi gwokunyanyagula gu na ondjundo. Oto ka nyanyagula oondundu noku dhi hanagula po; oondundu otadhi ka vundulwa dhi ninge ontsi.

¹⁶ Oto ke dhi gunda mombanda; ombepo otayi dhi pepe po, notadhi ka halakanithwa koshikungulu. Nena ngoye oto ka kala u na enyanyu, oshoka ongame Kalunga koye; oto ka hambelela ndje, ngame Kalunga kaIsrael omuyapuki.”

¹⁷ Uuna aantu yandje moluhepo lwawo taa kongo omeya, uuna oondaathelo dhawo dha kangala kenota, nena ngame Omuwa otandi ka yamukula omagalikano gawo; ngame, Kalunga kaIsrael, itandi ke ya etha nando.

¹⁸ Otandi ka tondokitha omilonga miikulundundu yomamanya, noothithiya otadhi ka kunguluka momasilu. Ombuga otandi yi shitukitha omatope gomeya, nevi lya kalanda tandi li shitukitha omadhiya.

¹⁹ Mombuga otandi ka tsika mo omisedeli, omithiya, omihombo nomiolivi. Oontale otadhi ka shituka omakuti gomikiperesi, omipopeli nomihongo.

²⁰ Aantu otaye ke shi mona notaa ka tseya kutya ngame Omuwa onde shi ningi. Otaa ka uva ko kutya Omuyapuki, Kalunga kaIsrael oye e shi eta po.

²¹ Omuwa, omukwaniilwa gwaIsrael ota ti: “Ne ookalunga kiigwana, eteni huka oontamanana dheni, tumbuleni omatompelo geni.

²² Ileni huka ne mu hunganeke shoka tashi ka ningwa, opo tu shi tseye, uuna tashi ka ningwa. Fatululileni oompangu iiningwanima yonale, ne mu tu lombwele kutya otayi ti ngiini.

²³ Tu lombweleni, onakuyiwa shoka tayi tu etele, opo tu ka tseye kutya one ookalunga! Longeni po uuwanawa nenge uuwinayi; tu tilitheni ne mu tu haluthe!

²⁴ One yene kamu shi sha, niilonga yeni osima yowala. Yaye mboka taye mu hogolola!”

²⁵ “Onda hogolola omulumentu ngoka a kala kuuzilo otandi ke mu eta a homone ta zi kuumbangalantu. Ota ka lyata aapangeli ngaashi omunoko nongeloya lyomuhongi gwiiyuma.

²⁶ Olye gwomune e shi hunganeke, nkene tashi ka ningwa, opo tatu vulu okutya, omu li mondjila? Kape na nando ogumwe gweni a popi sha kusho; kape na ngoka u uva shoka tamu ti.

²⁷ Ngame Omuwa onda lombwele tango Sion onkundana; onda tumu omutumwa kuJerusalem a ka tye: ‘Aantu yeni otaa galuka! Eeno, otaye ya kegumbo!’

²⁸ Sho nda tala mokati kookalunga, kamu na nando ogumwe gwomuyo ta vulu okutya sha; kamu na nando ogumwe ta vulu okuyamukula omapulo gandje.

²⁹ Tala, ayehe oyo aaniifundja yowala, itaa vulu okuninga nando oshaashaa. Iimenka yawo kayi na omwago, ombepo yowala.”

42

¹ Omuwa ota ti: “Omupiya gwandje oye nguka, ngoka tandi mu nkondopaleke — Oye tuu ngoka nde mu hogolola, omuntu nde mu hokwa. Onde mu udhitha Ombepo yandje, oye nota ka uthila iigwana ayihe nuuyuuki.

² Ita ka igidha nenge a kololoke nenge ewi lye li kugagane momapandaanda.

³ Oshihenguti sha tanduka ite shi nyanyagula nonyeka tayi tsina ite yi dhimi po. Ota ka uthila ayehe pauyuuki.

⁴ Ita ka tenguka nenge a tyololoke; ota taandelitha uuyuuki kombanda yevi. Oontuntu dhomefuta otadhi tegelele elongo lye.”

⁵ Kalunga okwa shiti egulu nokwe li alele; oye a yala nokwaaneka evi naayihe mbyoka yi li mo; aantu ayehe okwe ya pe omwenyo nomufudho. Ngashingeyi Omuwa Kalunga ota lombwele omupiya gwe ta ti:

⁶ “Ongame Omuwa nde ku ithana e tandi ku koleke noku ku nkondopaleka, u tale, uuyuuki ngele otau gwanithwa tuu kombanda yevi. Omungoye tandi ka hangana naantu ayehe; mungoye otandi ka minikila iigwana.

⁷ Oto ka tonatitha omeho gaaposi nokumangulula mboka ya kuutumba momilema moondjedhililo.

⁸ “Ongame awike Omuwa, Kalunga koye. Itandi gandja esimano lyandje kugulwe; itandi etha okusimanekwa kwandje ku ye kiimenka.

⁹ Iinima nda hunganekithile nale, oya ningi yoshili. Ngashingeyi otii mu lombwele iinima iipeepeka, tandi shi ningi nokuli, manga inaayi ningwa.”

¹⁰ Imbileni Omuwa eimbilo epe; mu imbileni ondjimbohambelelo, ooha ne dhuuyuni! Mu hambeleleni, one mboka hamu thayile kefuta; mu hambeleleni, iishitwa ayihe yomefuta! Imbeni oondjimbohambelelo, oontuntu ne dhomefuta none oonakukala mudho!

¹¹ Ombuga niilando yayo nayi tange Kalunga; omikunda dhaKedar nadhi mu hambelele! One mboka mwa kala moshilando Sela, igidheni nokuligola koondunga dhoondundu!

¹² Hambeleleni, mboka mwa kala moontuntu dhomefuta, ne mu simaneke Omuwa!

¹³ Omuwa ota piti mo a ka kondje ngashika omukwiita ofule; okwi ilongekidha nokwa pupyalela olugodhi. Ota tsu onkalu, ta hiki ohiya yolugodhi; aatondi ye ote ya hololele oonkondo dhe.

¹⁴ Kalunga ota ti: “Onda mwena unene ethimbo ele nda tya thilu. Ine yamukula nando aantu yandje. Ngashingeyi ethimbo lyokulonga lya thiki; otandi keme nda fa omukiintu ta thetwa.

¹⁵ Otandi hanagula po iikulundundu noondundu, otandi kukutike omwiidhi nomiti. Omilonga otandi dhi shitukitha oontuntu nomatale otandi ga pwinike.

¹⁶ “Otandi ka enditha aaposi moondjila inaaye enda mo nale. Omilema dhawo otandi dhi shitukitha uuyelele, nevi lyiisilukutumba otandi li ya yelekanithile. Ngaka ogo omauvaneko gandje, notandi ga tsakanitha pwaa na ekandakando.

¹⁷ Ayehe mboka yi inekela iimenka, mboka taa galikana iiyelekela, aniwa ookalunga kawo, otaa ka fupipikwa nokusithwa ohoni.”

¹⁸ Omuwa ota ti: “Pulakeneni, ne oombolo! Tongololeni nawa, ne aaposi!

¹⁹ Oku na tuu omuposi e vule omupiya gwandje? Oku na tuu ombolo yi vule omutumwa gwandje tandi mu tumu?

²⁰ Israel, wa mono oshindji unene, ihe ino pupa ko. Ou na omakutsi gokuuva, ihe owu uvu shike?”

²¹ Omuwa oye Kalunga, ngoka a sa uulaadhi okuhupitha, onkee okwa ningi ompango ye ya kola noya simana.

²² Ihe aantu ye oya yugwa, oye edhililwa moondholongo noya patelwa moondjedhililo. Oya yugwa noya luwa, nokape na ngoka e ya mangulule.

²³ Ope na tuu gumwe mune ta pulakene shika? Okuza ngashingeyi olye ta pupu ko shili kushika?

²⁴ Olye a gandja po Jakob a luwe, naIsrael a yugwe? Oye Omuwa, ngoka twa yono kuye, oshoka inatu hala okulandula oondjila dhe nokuvulika kiipango ye.

²⁵ Okwe tu tilile ondjahi ye ya hwama niita iilulululu. Ondjahi ye oya tukulukile Israel ya fa omulilo; ihe ina ndhindhilika ye ina tseya sha.

43

¹ Omuwa ngoka e ku shiti, Jakob, oye tuu ngoka e ku umbu, Israel, ota ti: “Ino tila, oshoka onde ku kulila, onde ku ithana edhina lyoye, ongoye ogwandje.

² Ngele to pitile momeya, ondi li pungoye, nongele ku na omilonga dhomeya, itadhi ku ninginitha. Ngele to pitile momulilo, ito lunguna po, nomalaka gomulilo itage ku fike.

³ Oshoka ongame Omuwa, Kalunga koye, Kalunga kaIsrael omuyapuki, tandi ku hupitha. Otandi gandja Egipiti iikulila yoye, Etiopia naSeba opeha lyoye.

⁴ Molwashoka ou na ondilo momeho gandje, molwashoka owa simana nondi ku hole, otandi gandja aantu peha lyoye, yalwe ya ye pehala lyomwenyo gwoye.

⁵ Ino tila — ondi li pamwe nangoye! “Oluvalo lwoye otandi ke lu kongolola kokule kuuzilo notandi ke lu tala ko kuuninginino e tandi lu eta kegumbo.

⁶ Otii ka lombwela uumbangalantu u ya ethe ye ye, nuumbugantu u ya galule ye ye. Etheni aamwandjemati ye ye taa zi kokule, naamwandjekadhona taa zi kooha dhuuyuni.

⁷ Oyo mboka ya lukilwa edhina lyandje, oomboka nda shitile esimano lyandje.”

⁸ Omuwa ota ti: “Ithaneni aantu yandje koompangu. Oye na omeho, ihe oyo aaposi; oye na omakutsi, ihe oyo oombolo!

⁹ Ithaneni iigwana yi ye koompangu. Olye gwomookalunga kawo ta vulu okuhunganeka onakuyiwa? Olye gwomuyo a hunganeke iinima yananena? Ookalunga mboka naa ete po oonzapo dhawo, ya holole kutya oye na oshili, ye ete etompelo lyoshili yoohapu dhawo.

¹⁰ “Aaisraeli, one oonzapo dhandje; aantu yandje nde mu hogolola, opo mu tseye ndje ne mu itaale ndje nokuuva ko kutya ongame. Kaku na Kalunga a li ndje komeho, nokaku na ta ka landula ndje.

¹¹ “Ongame, ongame Omuwa, kaku na omuhupithi gulwe, ongame awike.

¹² Ongame nda hunganeke shoka tashi ka ningwa po nonde mu kwatha noku mu uvithila. Mokati keni kamwa li kalunga omukwiilongo a ningile ngeyi; one oonzapo dhandje kutya ongame Kalunga.

¹³ Ongame Kalunga nosho te kala aluheluhe. Kaku na ngoka ta hunuka miikaha yandje; kaku na ngoka ta lundulula shoka tandi ningi.”

¹⁴ Omuwa, Omuyapuki gwaIsrael, ngoka e mu hupitha ota ti: “Omolwoye tandi tumu iita yi matukile Babilon; otandi teyagula po omiyelo dhoshilando, nondigolo yaantu yawo otayi shituka onkugo.

¹⁵ Ongame Omuwa Kalunga keni omuyapuki. Ongame nde ku shiti, Israel, ngame omukwaniilwa gwoye.”

¹⁶ Konalenale Omuwa okwa ningile ondjila ye ende mefuta, epola lye enda mokati komeya ga pindjala.

¹⁷ Okwe enditha etangakwiita enankondo sigo omehanagulo, etanga lyomatembakwiita nuukambe. Vwangu, oyo mbeyaka ya ningina, eeno, inaa anduka ko we; oya dhimi ya fa elapi lyolamba!

¹⁸ Ihe Omuwa ota ti: “Inamu dhama miiningwanima yonale, inamu kakatela mumbyoka ya ningilwe nalenale ndjo.

¹⁹ Taleni nawa iinima iipe opo tandi ke yi ninga. Otayi ningwa nokuli ngashingeyi — otamu vulu oku yi tala nena! Otandi kokola ondjila momakuti e tandi tondokitha omeya mombuga.

²⁰ Niithitukuti otayi ka simaneka ndje; oombandje noompo otadhi ka hambelela ndje, uuna tandi tondokitha omeya mombuga, ndi gandje omeya kaantu yandje aahogololwa.

²¹ Oyo aantu mboka ndi ishitile ngame mwene, oyo notaa ka imbila ndje omahambelelo.”

²² Omuwa ota ti: “Israel, wa kunyukwa ndje nduno; ku na we nangame, Jakob.

²³ Iho etele ndje we oonzi dhomafikilondjambo; iho simaneke ndje we noontselelandjambo dhoye. Inandi ku tsika omutenge, ndi ku pule oondjambo dhiikulya nenge ndi ku piyaganeke, ndi pule omatsininondjambo.

²⁴ Ino etela ndje we omatsininondjambo nenge u geulukithe ndje noofu dhiimuna yoye. Ihe owa humbatitha ndje uudhigu woondjo dhoye nowa hepekitha ndje komayanagulo goye.

²⁵ Ihe natango tuu, ongame, eeno, ongame Kalunga tandi dhimi po omayonagulo goye omolwandje mwene, noondjo dhoye itandi dhi dhimbulukwa we.

²⁶ “Natu yeni koompangu, eteleleni eipopilo lyeni! Tuleni iihokolola yeni moompangu, mu monike aayelele!

²⁷ Hokulu gwonalenale okwa yonene; aawiliki yeni ya tsa ondumbo nangame,

²⁸ naaleli yeni ya shekitha uuyapuki wandje. Onkee onda hanagula po Israel; onde etha aantu yandje mwene ya shekwe.”

44

¹ Omuwa ota ti: “Shigwana shandje Israel noluvalo lwaJakob nde lu hogolola, pulakena ngashingeyi.

² Ongame Omuwa ngoka nde ku shiti; okuza kokuvalwa kwoye onde ku kwatha. Ino tila, oshigwana shandje Jeshurun, ngoye oluvalo lwaJakob nde lu hogolola.

³ “Otandi ka poolela omeya mevi lya sa enota nokutondokitha omilonga puukukutu. Ongame tandi tilile Ombepo yandje kombanda yaana yeni nomayambeko gandje kombanda yoluvalo lweni.

⁴ Otaa ka mena ya fa omwiidhi gwomelonzi, ya fa iihwa yopomilonga hadhi tondoka omeya.

⁵ “Nguka ota ka tya: ‘Ngame ogwOmuwa,’ namukwawo oti iluku edhina Jakob. Natango gumwe ti inyolithitha koshikaha she oshitya ‘gwOmuwa’ e ta taamba edhina Israel.”

⁶ Omuwa, omukwaniilwa nOmukulili gwaIsrael, Omuwa Omunankondoawike ta ti: “Ongame omutango nongame omuhugunini. Kaku na we Kalunga ponto yandje.

⁷ Oku na tuu ngoka ta vulu okulonga shoka nda longo? Olye a hunganekele ayihe mbyoka ya ningwa okuza konale ndjoka sigo opehulilo lyomathimbo?

⁸ Inamu tila, ne aantu yandje! Omwe shi tseya kutya okuza kuuyuni wonale sigo ongashingeyi onda hunganeke ayihe mbyoka yi na okuningwa, none oonzapo dhandje. Oku na tuu kalunga gulwe? Oku na tuu kalunga gulwe omunankondo inaandi mu uva?”

⁹ Ayehe mboka taa hongo iimenka, oyo oyowala, niikalunga mbyoka taa tanga, kayi na oshilonga. Mboka taa simaneke iikalunga, oyo aaposi nomagoya — otaa ka sithwa ohoni.

¹⁰ Inashi opala okuhambula oshiyelekela noku shi simaneka!

¹¹ Shaa ngoka te shi simaneke, ota ka fupipikwa. Aantu mboka taa hongo iimenka, oyo oyowala, kaye na omwago. Ya eteni koompangu — otaa ka haluthwa notaa sithwa ohoni.

¹² Omuhambuli ta kwata oshitenda e te shi tula momulilo. Omaako ge ge na oonkondo, otaga yelutha osilwa, a hambule oshitenda, shi ninge olupe. Sho te shi hambula, ota si ondjala nenota e ta loloka.

¹³ Omuhongi gwiipilangi ota yeleke oshiti nota thaneke efano nompya. Ote shi hongo nepanda e ta tula omandhindhiliko nopasera. Ota ningi efano molupe lwomuntu noku li mbunza nawa, opo e li tule megumbo lye.

¹⁴ Oku na okwiikomangelela omisendeli, opo e dhi longithe, nenge a hogolole omukiperesi nenge omwandi mokuti. Nenge oku na okutsika omupanda e ta tegelele omvula yi gu kokeke.

¹⁵ Omuntu ta longitha iitayi yomuti tuu ngoka, yi ninge iikuni, noshiti te shi hongo oshimenka. Iitayi yimwe te yi huhulukwa po nokwiitelekela iikulya, manga iitayi yimwe te yi ningi kalunga, e mu simaneke.

¹⁶ Iitayi yimwe te yi temitha omulilo, ta yotha nayo onyama e te yi li e ta kuta. Ota huhulukwa e ta ti: “Omulilo omwaanawa nguka! Omulilo gu na omuyenye ngiini!”

¹⁷ Shoka sha hupu ko, ote shi hongo po oshimenka note shi inyongamene noku shi simaneka. Ote shi hambelele ta ti: “Ongoye kalunga kandje, hupitha ndje.”

¹⁸ Aantu ya tya ngaaka aagoya okutseya shoka taa ningi. Kaye wete ko, oshoka otaa thithikile omeho gawo, nokaye uvite ko oshili, oshoka otaa pata oomwenyo dhawo.

¹⁹ Inashi ya momadhiladhilo gawo yo kaye na oondunge nomayele ya tye ando: “Ee, iitayi yimwe nde yi tema po. Yimwe nda telekitha iikulya peziko nonda yotha onyama nonde yi li po. Oshihupe shoshiti onde shi hongo oshimenka. Ngashingeyi ongame nguka tandi shi inyongamene, endangalati lyoshiti.”

²⁰ Otashi ningi omuntu a fa ta li omutoko. Omatedho ge guugoya oge mu pukitha kutya ota kwathwa. Ita zimine ye mwene kutya oshimenka shoka a yelutha momaako ge, kashi shi kalunga nando.

²¹ Omuwa ota ti: “Israel, ngoye oluvalo lwaJakob, dhimbulukwa iinima mbika, oshoka ongame nde ku shiti. Ongoye omupiya gwandje, nangame itandi ku dhimbwa.

²² Otandi dhimi po omayono goye ngashika oshikogo, noondjo dhoye ngashika osheentsi shongula. Galukila kungame; ongame tandi ku hupitha.”

²³ Imbeni nokuhambelela, ne omagulu, oshoka Omuwa okwe shi ningi! Ligoleni, ne oombogo dhevi! Mbolongondjitheni oondjimbohambelelo, ne oondundu, oshoka Omuwa okwa kulile oluvalo lwaJakob, oye a hololele Israel eadhimo lye.

²⁴ Omuwa, omuhupithi gwoye, ngoka e ku shitile mela lyanyoko, ota ti: “Ongame Omuwa, Omushiti gwiinima ayihe. Ongame awike nda alele egulu nonda yala evi, ko kakwa li ngoka a kwatha ndje.

²⁵ Aayanekeli otandi ya ningi aagoya, nokukeelela omahunganeko gaakoneki yoonyothi. Oohapu dhaanongo otandi dhi goyokitha notandi holola kutya uunongo wawo owo uugoya.

²⁶ Ihe aapiya yandje nge taa hunganeke, uuna tandi tumu aatumwa ya holole omadhiladhilo gandje, omadhiladhilo nomahunganeko ngoka otandi ke ga tsitha ga ninge goshili. Ote lombwele Jerusalem kutya aantu yasho omo taa ka kala ishewe, niilando yaJuda kutya otayi ka tungululwa. Otandi ka tungulula omakulukuma gasho.

²⁷ Ongame ngoka tandi lombwele efuta te ti: ‘Pwina; otandi ka kukutika omilonga dhoye.’

²⁸ Otandi popi Kores te ti: ‘Oye omuntu gwandje, oye ta gwanitha elalakano lyandje alihe.’ Ota ka tya: ‘Jerusalem nashi tungululwe,’ nokotempeli: ‘Omukanka nagu tamekwe.’ ”

45

¹ Omuwa okwa hogolola Kores a ninge omukwaniilwa! Okwa mu gwayeke a sinde iigwana; ote mu tumu, a kuthe aakwaniilwa kiipundi yawo. Omuwa ote ke mu egululila iiyelo yiilando. Omuwa ota lombwele Kores ta ti:

² “Ongame mwenemwene tandi ku palele ondjila, tandi yelekanitha oondundu niikulundundu. Otandi ka teya po omiyelo dhiiyela iikushu tandi tatula iiyedhilitho yadho yiiyela.

³ Otandi ke ku pa omaliko gomomilema nuuyamba womomahala gomeholamo. Oto ka tseya kutya ongame Omuwa, Kalunga kaIsrael ngoka nde ku ithana edhina lyoye.

⁴ Otandi ku langeke po, u kwathe oshigwana shandje Israel, oluvalo lwaJakob ndoka nda hogolola. Onde ku pe esimano enene, nando owa li inoo tseya ndje.

⁵ “Ongame Omuwa; kaku na kalunga gulwe. Otandi ke ku pa oonkondo ndhoka to pumbwa, nando ngoye ino tseya ndje.

⁶ Otandi shi ningi, opo shaa ngoka kooha dhuuyuni sigo okooha oonkwawo a kale e shi shi kutya ongame Omuwa nokaku na we kalunga gulwe.

⁷ Otandi shiti uuyelele nomilema; ohandi eta eyambeko nethingano. Ongame, Omuwa, tandi ningi ayihe mbika.

⁸ Otandi ka gandja esindano tali zi kegulu ngomvula; evi otali ke li taamba notali ka tsapuka emanguluko nuuyuuki. Ongame, Omuwa, tandi ka ningitha mbika.”

⁹ Oshuma sheloya otashi vulu tuu shi tamanane nomuhongi gwasho, oshuma sho inaashi fa iikwawo ayihe? Eloya otali pula tuu omuhongi gwiiyuma shoka ta ningi? Oshiyuma otashi tamanana tuu kutya omuhongi gwasho ke na uunkulungu?

¹⁰ Ope na tuu ngoka ta vulu okulombwela he kutya owa valela ndje shike? Nenge a tye kuyina, owa pulumuthile ndje shike?

¹¹ Omuwa omuyapuki, Kalunga kaIsrael omushiti gwe, oye tuu ngoka tu utha onakuyiwa. Ota ti: “Kamu na uuthemba, mu pule ndje aana yandje nenge mu lombwele ndje shoka ndi na okuninga!

¹² Ongame awike ngoka nda shiti evi nonda shitile ko aantu ya kale ko. Koonkondo dhandje onda alele egulu; otandi enditha etango, omwedhi noonyothi.

¹³ Ongame mwene nda pendutha Kores a gwanithe elalakano lyandje, a longe uuyuuki. Otandi ukitha ondjila kehe te ende nayo. Ota ka tungulula oshilando shandje Jerusalem nota mangulula aantu yandje aapongekwa. Kape na ngoka e mu futu sha nenge e mu pe oombumbo ando, opo e shi ninge.” Omuwa Omunankondoawike oye e shi popi.

¹⁴ Omuwa ota popi ta ti: “Uuyamba waEgipiti neliko lyaEtiopia otali ningi lyoye. Aalumentu aaleeleka yokuSeba otaa ka ninga aapika yoye; otaye ke ku landula taye ende ye li momalyenge. Otaye ku inyongamene yo taa hempulula taa ti: Kalunga oku li shili nangoye, oye awike, nokaku na we kalunga gulwe.

¹⁵ Kalunga kaIsrael, ngoka a kulile aantu ye, oye Kalunga ngoka hi iholeke.

¹⁶ Oomboka tayi iningile iimenka, otaa ka sithwa ohoni; ayehe yomuyo otaa ka gugwa.

¹⁷ Ihe Israel ota hupithwa kOmuwa, nesimano lye otali ka kala sigo aluhe; aantu ye itaa ka sithwa ohoni nando.”

¹⁸ Okwa shiti egulu oye awike Kalunga! Oye a tholoma evi e te li umbu, okwe li pameke noku li kalitha ko. Ine li shita li mbugale, ihe ehala lyokukala aantu. Oye tuu nguka ta ti: “Ongame Omuwa, nokaku na kalunga gulwe.

¹⁹ Inandi popya meholamo nenge ndi holeke elalakano lyandje. Inandi lombwela oluvalo lwaJakob: ‘Kongii ndje powalawala.’ Ongame Omuwa te popi oshili; tandi holola uuyuuki.”

²⁰ Omuwa ota popi ta ti: “Gongaleni, ileni, hedheni pamwe, aahupiko yomiigwana; holokeni koompangu! Aantu mboka kaaye shi sha, otayi iholola niimenka yawo yiiti notaa galikana ookalunga mboka itaa vulu oku ya hupitha.

²¹ Ileni, mu tule iihokolola yeni moompangu; etheni aapopili ya pulathane omayele. Olye a hunganekele nale shoka tashi ka ningwa? Hangame Omuwa, Kalunga ngoka ta kulile aantu ye? Kaku na kalunga gulwe.

²² Galukileni kungame ngashingeyi mu hupithwe, ne aantu yomuuyuni auhe! Ongame awike Kalunga, kaku na gulwe.

²³ Omauvaneko gandje ogoshili, noitaga ka lunduluka nando. Otandi uvaneke nokugana pungame mwene kutya shaa ngoka ote ke ya noti inyongamene koshipala shandje nokusimaneka ndje.

²⁴ “Otaa ka hempulula kutya esindano noonkondo otadhi monika mungame awike; ihe ayehe mboka ye tonde ndje, otaa ka sa ohoni.

²⁵ Ongame Omuwa tandi ka mangulula oluvalo aluhe lwaJakob, oyo notaa ka hambelela ndje.”

46

¹ Ndika olyo ehulilo lyiimenka yaBabilon. Bel naNebo oya li ya simanekwa nale, ihe ngashingeyi otayi tsilikwa kuusino, yi ninge omitsalo koombunda dhiinamwenyo ya loloka.

² Iimenka itayi vulu okwiihupitha yo yene; otayi kwatwa po notayi yiwa nayo. Ndika olyo ehulilo lyiimenka yaBabilon.

³ “Pulakenii ndje, ne oluvalo lwaJakob, amuhe mboka mwa hupu ko yomoshigwana shaIsrael. Onde mu dhiginine okuza kevalo lyeni.

⁴ Ongame Kalunga keni notandi mu gamene, sigo tamu kulupa mu ninge oomvi. Onde mu shiti notandi mu gamene; otandi mu kwatha notandi mu hupitha.

⁵ “Otamu yeleke ndje nalye? Oku na tuu ngoka a fa ndje?

⁶ Aantu taa dhitula oompunda dhawo e taa pimpi mo oshingoli; otaa vihi oshisiliveli moshiviha. Otaa futu omuhambuli gwoshingoli, a hambule oshimenka; otaye shi inyongamene e taye shi simaneke!

⁷ Oyo taye shi itsike komapepe gawo e taye shi humbata; otaye shi thikameke, sho itaashi vulu okwiinyenga. Ngele ku na ngoka te shi galikana, itashi vulu okuyamukula nenge shi mu hupithe muudhigu.

⁸ “Ne aalunde, dhimbulukweni shika; shi konakoneni moomwenyo dheni, ne aanandumbo.

⁹ Dhimbulukweni shoka sha ningilwe konale ndjo; shi konakoneni kutya ongame awike Kalunga, nokaku na we gulwe e thike pungame.

¹⁰ Okuza kontsapo onda hunganeke mbyoka tayi ya; onalenale nda popi mbyoka tayi ka ningwa. Onda tile, omadhiladhilo gandje itaga ka gwila pevi, notii ka gwanitha ashihe nda hala oku shi ninga.

¹¹ Otandi ithana omuntu e ye ta zi kuuzilo; ota ka koloka ko a fa okakodhi e ta gwanitha shoka nda dhiladhila. Onda popi, notashi ka gwanithwa.

¹² Pulakenii ndje, ne aatangalali, one tuu mboka mwa kala kokule nuuyuuki.

¹³ Otandi eta esiku lyuuyuuki popepi, kali li we kokule. Ehupitho lyandje itali kankama we. Otandi hupitha Sion nokweetela Israel esimano.

47

¹ “Babilon, kuluka ko koshipangelapundi shoye, kuutumba pevi montsi yevi. Owa li nale wa fa omufuko, oshilando ihaashi sindika, ihe ku shi we omvalekele nomulelwa ondembula. Ngashingeyi wa ningi omupika!

² Kutha omuhi, nkwalula omunziya! Isiikulula oshipala! Hula mo utale ohema yoye ombwanawa! Humina ohema yoye, u ka tokole omilonga!

³ Aantu otaa tala epenge lyoye; otaa ka tala okufupipikwa kwoye nohoni yoye. Ondi na onkone, nokape na ngoka ta politha ndje.”

⁴ Kalunga kaIsrael omuyapuki ote tu mangulula — edhina lye Omuwa Omunankondoawike.

⁵ “Shilando ngoye, omufuko gwAababilon, kuutumba wa tya thilu, inda momilema; ito ithanwa we omunyekadhi gwiigwana.

⁶ Onda geele aantu yandje; onda kala nayo ya fa yaa shi yandje. Onde ya gandja miikaha yoye, ongoye noino ya sila nando ohenda; naakulupe owe ya ningi onyanya.

⁷ Owa dhiladhila u kale omunyekadhi aluhe. Ino ipula niinima mbika nenge u dhiladhile, nkene tayi ka hula po.

⁸ “Pulakena shika, ngoye omuholi gwiipala, ngoka u li nawa e to ipopile to ti: ‘Ongame omunene nokaku na we. Kandi na mpoka tandi ningi omuselekadhi nenge ndi kale ndaa na oluvalo.’

⁹ Ihe ohaluka yowala, mesiku limwe iinima mbika ayihe tayi ka ningwa. Nando ou na oonganga odhindji noompulile ku mana, omusamane gwoye oto ke mu kanitha, oye pamwe naamwoye.

¹⁰ “Owa kala wa hokwa uuwinayi woye; owa dhiladhila kutya kape na ngoka te ku mono. Owa pukithwa koondunge nokuunongo woye. Owi ipopile wa ti: ‘Ongame kalunga, kaku na we gulwe a fa ndje.’

¹¹ Oshiponga otashi ku ya, nokaku na onganga tayi vulu oku shi kodheka. Ehanagulo otali ku adha ohaluka — ehanagulo inoo li yaguma nale.

¹² Holoka noonganga noompulile dhoye, ndhoka wa li ho anekelitha okuza muugundjuka woye. Pamwe otadhi ke ku kwatha ngaa; pamwe to ka halutha tuu aatondi yoye.

¹³ Owi ilolokitha nomayele gaagandjindunge yoye oyendji. Aakonekinyothi yoye naa holoke po, opo ye ku hupithe — aantu mboka haa koneke oonyothi, mboka haa konenene oshipala shegulu, naye ku lombwele omwedhi nomwedhi shoka tashi ku ningilwa.

¹⁴ “Otaa ka fa etutu, nomulilo otagu ke ya lungunitha po! Itaa ka vula nando okwiihupitha. Omalaka gomulilo otage ke ya latha po, kagu shi omulilo gwokuhuhulukwa.

¹⁵ Mbika ayihe otaye yi ku ningile, oomboka mwa longele kumwe nayo okuza kuugundjuka woye. Shaa ngoka gwomuyo oti iyukile, kaku na ngoka ta vulu oku ku hupitha.”

48

¹ Pulakeneni ndhika, ne oluvalo lwaJakob, one tuu mboka tamu tiwa Israel, ne yomoludhi lwaJuda, one mboka hamu gana medhina lyOmuwa e tamu ithana Kalunga kaIsrael — ihe itamu shi ningi moshili nomuuyuuki.

² Otamu iluku aanashilando oshiyapuki nomwi itula Kalunga kaIsrael, ngoka edhina lye Omuwa Omunankondoawike.

³ Omuwa ota lombwele Israel ta ti: “Onda hunganeke nale mbyoka tayi ka ningwa; ohaluka onde yi gwanitha.

⁴ Onda tseya kutya ngoye omutangalali, omathenga goye ga fa ga ningwa mosheela noshipala shoye omoshikushu.

⁵ Onde ku hunganekele nale onakuyiwa yoye, nda tomona iiningwanima, manga inaayi ningwa, opo waa tye, iimenka yoye niiyelekela yoye oye yi eta po.

⁶ “Ayihe nde yi popile, oya gwanithwa. Zimina ashike kutya omahunganeko gandje oge li mondjila. Ngashingeyi otandi ku lombwele iinima iipe tayi ke ya, iiholekwa mbyoka inoo yi tseya nale.

⁷ Ongashingeyi owala tandi yi longo, kape na shimwe sha fa shika sha ningilwe nale. Ngele nani oya ningilwe, oto vulu okutya owe yi tseya nale.

⁸ Ondi shi shi kutya ngoye ku shi omwiinekelwa, ngoye hela wa kala omupandala. Omolwasho ino uva iinima mbika nale, omolwasho kaku na nando ohapu yimwe ya yile momakutsi goye.

⁹ “Ongame omutalanteni omolwedhina lyandje mwene. Opo aantu ya pandule ndje, otandi kankeke ondjahi yandje. Onde yi lotitha, ndaaye ku hanagule po.

¹⁰ Onde ku yeleke momulilo gwomahepeko, ongoshisiliveli tashi hemuninwa montelekelo. Ihe onda dhimbulula kutya ngoye ogwowala nani.

¹¹ Shoka tandi shi ningi, otandi shi ningi molwandje mwene. Itandi ka etha nando, edhina lyandje li shekwe, nenge esimano lyandje li ye kugulwe.

¹² “Pulakena ndje, oluvalo lwaJakob, Israel, ngoye ngoka nde ku ithana. Ongame Kalunga, omutango nomuhugunini, Kalunga awike tuu ti.

¹³ Oshikaha shandje osha dhike evi, nolulyo lwandje lwa alele egulu. Sho ndi ithana evi neyalelo, oya holoka po polumwe yo yene.

¹⁴ “One amuhe gongaleni, ne mu pulakene! Oku na tuu kalunga, ngoka a hunganeke kutya omuntu ngoka nda hogolola, ota ka homona Babilon? Ota ka ninga shoka nda hala e shi ninge.

¹⁵ Ongame awike nda popi nonde mu ithana; onde mu pititha mo e tandi mu pe elago.

¹⁶ Ngashingeyi hedheni kungame, mu uve shoka tandi ti: ‘Okuza ketameko inandi popya meholamo. Oko nda li okuza kethimbo ndyoka mbika tayi ningwa.’ ” (Ngashingeyi Omuwa Omupangeliawike okwa tumu ndje pamwe nOmbepo ye.)

¹⁷ Kalunga kaIsrael omuyapuki, Omuwa omukulili gwoye ota ti: “Ongame Omuwa Kalunga koye, ngoka tii ku longele shoka she ku opalela noku ku ulukila ondjila u na okweenda nayo.

¹⁸ Ando to pulakene shili iipango yandje, andola omayambeko otage ku kungulukile ga fa omulonga tagu tondoka omeya, nuuyuuki otau tondokele kungoye wa fa omakuthikuthi gomefuta;

¹⁹ Oluvalo lwoye otalu indjipala lwa fa omawe gehekevi, naamwoye ongoomuma tadhi nyenge okuyalulwa. Edhina lyawo itali ka kana, itandi ke ya hanagula po.”

²⁰ Pitii mo muBabilon, tembukii mo muKaldea! Igidheni onkundana yenyanyu; yi tseyithileni apehepehe tamu ti: “Omuwa a hupitha oshigwana she Israel!”

²¹ Omuwa sho e enditha aantu ye mombuga ya kalanda noyomutenya, oya li inaa sa enota. Okwe ya kuthile omeya memanya: okwa panda emanya, omeya noga tondoka mo.

²² Omuwa ota ti: “Aakaanakalunga kaye na nando ombili.”

49

¹ Pulakenii ndje, ne aantu yokoontuntu dhomefuta, ne iigwana yokokulekule! Omuwa okwa hogolola ndje, manga inaandi valwa; okwa tumbula edhina lyandje, manga nda li mekolo lyameme.

² Okwa upike oohapu dhandje, dhi tse dha fa egongamwele. Okwa gamene ndje noshikaha she mwene, okwa ningi ndje oshikuti sha yagwa, e ta holeke ndje mombalukutu ye.

³ Okwa lombwele ndje a ti: “Israel, ngoye omupiya gwandje; omolwoye iigwana tayi ka hambelela ndje.”

⁴ Onda ti: “Onda longo, ihe osima yowala. Onda mana mo oonkondo dhandje, ihe inashi tompola sha.” Ihe natango tuu tandi inekele Omuwa ta popile ndje; ota ka futa ndje ondjambi yiilonga yandje.

⁵ Manga inaandi valwa, okwa utha ndje; okwa lenge ndje, ndi ninge omupiya gwe, ndi galule aantu ye, ndi galule Aaisraeli mboka ya halakana. Omuwa ta simaneke ndje; oye othithiya yoonkondo dhandje.

⁶ Omuwa okwa lombwele ndje a ti: “Ngoye omupiya gwandje, inashi ku gwanena, nge to galula owala omazimo gaJakob noto eta ko oonakuhupa yaIsrael. Otandi ku ningi uuyelele waapagani, ehupitho lyandje opo li thike nokooha dhuuyuni.”

⁷ Kalunga kaIsrael omuyapuki nomuhupithi ota ti kungoka a dhinikika, ngoka e tondike kiigwana nokwa ningi omupika gwaapangeli: “Aakwaniilwa otaa ka mona, sho to manguluka notaa ka thikama ye ku simaneke; aawa otaye ke shi tala notaa ka tsa oongolo, ye ku tumbaleke.” Shika otashi ka ningwa, oshoka Omuwa okwa hogolola omupiya gwe; Kalunga kaIsrael omuyapuki oha dhiginine omauvaneko ge.

⁸ Omuwa ota lombwele aantu ye ta ti: “Ethimbo lyo opala onde ku uvu, nethimbo lyehupitho onde ku kwatha. Otandi ku dhiginine nomungoye tandi hangana niigwana. Otandi ke ku tula ishewe mevi ndyoka lya mbugala ngashingeyi.

⁹ Otandi lombwele oonkwatwa te ti: ‘Mangulukeni!’ naamboka ya kala momilema: ‘Zii mo, mu ye muuyelele!’ Otaa ka fa oonzi tadhi napa koondundu;

¹⁰ itaa ka sa we ondjala nenge enota. Etango nepupyu lyombuga itali ya hepeke, oshoka otaa ka endithwa komuhepuluthi gwawo. Ote ke ya fala komatope gomeya.

¹¹ “Otandi ka ninga onenendjila ya tokola moondundu nokupalela aantu yandje epola lyokweenda mo.

¹² Tala, aantu yandje otaa ya taa zi komakule. Otaa zi kuumbangalantu nokuuninginino, nokevi lyaAswan muumbugantu.”

¹³ Imbeni, ne omagulu! Kugilila kenyanyu, ngoye evi! Oondundu nadhi mbolongondjithe omaimbilo! Omuwa ota hekeleke aantu ye; ote ehamenwa okuhepekwa kwaantu ye.

¹⁴ Ihe Aajerusalem oya ti: “Omuwa okwe tu etha! Oye e tu dhimbwa.”

¹⁵ Omuwa ota yamukula ta ti: “Ope na tuu omwali ta dhimbwa okahanona ke, a kale kee hole ando omunona e mu vala? Nonando nee yina a dhimbwe omwana, ngame itandi ku dhimbwa.

¹⁶ Tala, omiikaha yandje nde ku negele. Tala, omeke lyandje nda nyolela edhina lyoye, omadhingililokuma goye, Jerusalem, oge li aluhe momeho gandje.

¹⁷ “Aamwoye otaa ya nziya, naamboka ye ku mbugaleke, otaa shuna.

¹⁸ Yelutha omeho goye, ngoye u ligamene koombinga noombinga. Aantu yoye otaa kongoloka, otaye ya kegumbo! Oshili ngaashi ndi na omwenyo, oto ka kala u na uuntsa omolwaantu yoye, wa fa omufuko a zala iimona ye.

¹⁹ “Oshilongo shoye osha li sha teka po nosha ninga eputu, ihe ngashingeyi otashi ka ninga oshishona kaantu mboka taa ka kala mo. Naamboka ye ku hepeke nale, otaa ka kala kokule nangoye.

²⁰ Aamwoye ya valelwa muupongekwa, otaye ke ku lombwela taa ti: ‘Oshilongo shika oshishona unene, otatu pumbwa ehala lyokukala!’

²¹ Nena oto ki ipopila to ti: ‘Akwetu, aanona mboka ayehe olye e ya valele ndje? Onda li omuntimbe noinandi mona oluvalo. Onda li omupongekwa nomweekelwahi — olye a putudha aanona mbaka? Onda li po awike — aanona mbaka oya zi peni?’ ”

²² Omuwa Omupangeliawike ota ti ngeyi: “Tala, otandi ka lapa aapagani, otandi ka yeluthila iigwana ombaaneli yandje; otaa ka eta aamwoye aamati ye ya ukata, notaa humbata aamwoye aakadhona komapepe gawo.

²³ Aakwaniilwa otaa ka ninga aatekuli yoye; naanyekadhi otaa ka ninga aayamuthi yoye. Otaye ke ku inyongamena ya tsa iipala yawo mevi, notaa ka latha ontsi koompadhi dhoye. Nena oto ka tseya kutya ongame Omuwa. Mboka taa inekele ndje nokwiifupipika, itaa ka sa ohoni.

²⁴ Oto vulu tuu okuyuga aakwiita iihakanwa yawo? Oto vulu tuu okuyugulula ko oonkwatwa miikaha yofule?”

²⁵ Omuwa ota yamukula ta ti: “Osho naanaa tashi ka ningwa. Aakwiita otaa ka kuthwa oonkwatwa dhawo, niihakanwa yoofule otayi ka yugwa ko. Otandi ka kondjitha kehe ngoka te ku kondjitha, notandi ka mangulula aamwoye.

²⁶ Aahepeki yoye otandi ke ya litha onyama yawo yene. Otaa ka kolwa kombinzi yawo yene ngashika komaviinu. Aantu ayehe otaa ka tseya, ongame Omuwa, ongame omuhupithi gwoye. Omunankondo gwaJakob oye omukulili gwoye.”

50

¹ Omuwa ota ti: “Otamu dhiladhila nda tidha po aantu yandje, ya ye ngaashi omulumentu ta henge po omukadhi? Ngele osho, ombapila yehengano oyi li peni? Otamu dhiladhila nde mu landitha po muupika nda fa omuntu ta landitha po oyana, ya ninge aapika? Aawe, omwa yi muupongekwa omolwoondjo dheni yene; omwa tidhwa po molwomayono geni.

² “Omolwashike kaakwa li nando ogumwe, sho nde ya? Omolwashike kaakwa li ngoka i itaale, sho ndi ithana? Oshikaha shandje sha ningi oshifupi oku mu kwatha? Onda pumbwa oonkondo, ndi mu mangulule? Noshipango shandje otandi kukutike efuta, nomilonga otandi dhi shitukitha ombuga.

³ Egulu otandi li zaleke onguwo onduudhe e tandi li siikilitha oshako onduudhe.”

⁴ Omuwa Omupangeliawike okwa longo ndje shoka ndi na okutya, opo ndi koleke mboka ya gundila po. Ongula kehe ota ladhipike ndje, opo ndi uve shoka ta nongeke ndje.

⁵ Omuwa okwa thitulula omakutsi gandje. Ngame inandi mu tinda, inandi shuna monima.

⁶ Ombunda yandje nde yi pe mboka ya dhenge ndje. Ngame inandi ya kankeka, sho ya tuku ndje, sho ya dhakagula oombenzi dhandje noya hiyile ndje omayeye moshipala.

⁷ Omasheko gawo inaga alula ndje, oshoka Omuwa Omupangeliawike oha kwatha ndje. Ondi idhigupaleke, opo ndi ya idhidhimikile. Onda tseya kutya itandi sithwa ohoni,

⁸ oshoka Kalunga a kala ndje popepi noye tu utha ndje omuyuuki. Olye ta tompele ndje uuwinayi? Natu tongololathaneni! Omutamaneki gwandje olye? Oye na tsakaneke ndje!

⁹ Omuwa Omupangeliawike ota popile ndje. Olye ihe ta tompele ndje uuwinayi? Aatamaneki yandje ayehe otaa kana po; otaa kulupa ya ninge iinyakwi ya lika koothithi.

¹⁰ Amuhe ne mboka hamu simaneke Omuwa nohamu vulika kiipango yomupiya gwe, epola ndyoka tamu ende, otali vulu okuluudha nayi, ihe inekeleni Omuwa, ituleni muKalunga keni.

¹¹ Amuhe mboka hamu pangele ompangela okuyonagula po yalwe, otamu ka hanagulwa po koompangela dheni yene. Omuwa oye mwene ta ka ninga ayihe mbika; otamu ka hepekwa kuuwehame mboka wa tulwa po.

51

¹ Omuwa ota popi ta ti: “Pulakenii ndje, one mboka mwa hala okuhupithwa, ne mboka hamu kongo ekwatho kungame. Taleni utale emanya moka mwa pandwa, moshitapo shomamanya moka mwa hupwa.

² Taleni hokulu Abraham, nanyokokulu Sara, ngoka e mu vala. Sho ndi ithana Abraham, ka li e na aanona, ihe onde mu yambeke e tandi mu pe oluvalo; oluvalo lwe onde lu indjipaleke.

³ “Otandi ka hepulutha Sion, omakulukuma gasho agehe otii ke ga tala nohenda. Ombuga yasho otii yi shitukitha Eden, nomaputu gasho otii ga shitukitha oshikunino shOmuwa. Otamu ka kala enyanyu neligolo, oondjimbo dhepandulo nodhehambelelo.

⁴ “Pulakenii ndje, ne aantu yandje, pakalekeni omakutsi geni, ne iigwana. Otandi gandja omalongo gandje kiigwana; oompango dhandje tadhi yi etele uuyelele.

⁵ Otandi ya mbala ndi yi hupithe; ethimbo lyesindano lyandje olya thikana. Ongame mwene tii ka lela iigwana. Iilongo yokokule tayi tegelele ndje ndi ye kuyo; etegameno lyayo oli li mungame, ndi yi hupithe.

⁶ Ligameneni kegulu, ne mu tale kombanda yevi! Egulu otali ka kagunyuka po lya fa olwithi; nevi tali ka kulupa lya fa onguwo onkulu, naantu yalyo otaa ka sa po ya fa oondhi. Ihe ekulilo tandi li eta, otali ka kala aluheluhe; nesindano lyandje olyo lyahugunina.

⁷ “Pulakenii ndje, ne mboka mwa tseya uuyuuki, ne mboka mwa pungula omalongo gandje moomwenyo dheni. Inamu tila aantu, nge taye mu nyekele notaye mu nyeme,

⁸ oshoka oothithi otadhi ya li ya fa oonguwo, noontuko tadhi ya mana po ya fa omafufu goonzi. Ihe uuyuuki wandje kau na mpoka tau hulu po, nesilohenda lyandje ohali kala sigo aluhe.”

⁹ Penduka po! Yambuka po! Zala oonkondo, ngoye okwooko kwOmuwa. Penduka po utale ngaashi muuyuni wonale, methimbo lyomapipi gonale. Hangoye ngoka wa tetagula Rahab iintimbu, oongoka wa ulula oshikoko?

¹⁰ Ongoye tuu ngoka wa pwinike efuta nowa pala epola mokati komeya omanene, opo aakulilwa yoye ye ende puukukutu.

¹¹ Aakulilwa yOmuwa otaa ka galuka, taa ya kuSion nokuligola, nenyanyu lyaaluhe otali adhima miipala yawo. Oya adhika kenyanyu neligolo, oya manguluka moluhodhi nomeyemato.

¹² Omuwa ota ti: “Ongame, eeno, ongame mwene handi mu hekeleke. Otamu vulu ngiini okukala mwa tila omuntu omusi, omuna gwomuntu, ngoka a fa omwiidhi tagu ganya?

¹³ Omwa dhimbwa Omuwa, omushiti gweni, ngoka a alele egulu nokwa dhike omakankameno gevi? Omolwashike tamu kala mwa tila ondjahi yaahepeki yeni, mboka ya hala ye mu yone po? Ondjahi yawo itayi mu adha we.

¹⁴ Oonkwatwa otadhi ka mangululwa mbala; otadhi ka kala kombanda yevi omimvo odhindji, otadhi ka kala niikulya dhe yi pumbwa.

¹⁵ “Ongame Omuwa Kalunga keni; otandi tukulutha efuta e tandi tutumike omakuthikuthi galyo. Edhina lyandje Omunankondoawike.

¹⁶ Onda alele egulu nonda dhike omakankameno gevi. Otandi lombwele Sion tandi ti: ‘One aantu yandje! Onde mu longo omalongo gandje notandi mu gamene noshikaha shandje.’ ”

¹⁷ Jerusalem, penduka po! Iyelutha u yambuke po! Owa nu oshitenga shegeelo shoka Omuwa mondjahi ye e shi ku pe, u shi nwe. Owe shi tula kekothi, notashi ku tantalitha.

¹⁸ Kaku na ngoka te ku enditha, kaku na gulwe mokati kaantu yoye te ku kwatele komeho.

¹⁹ Iiponga yopaali ye ku lambele: oshilongo shoye osha mbugalekwa kiita, naantu yoye ya si po kondjala. Kape na nando ogumwe e ku uvitile ohenda.

²⁰ Aamwoye aamati oya lala yi iyekelela poshikololo shepandaanda kehe, ya fa ohumba ya gwila mekelo. Oyu uvite ondjahi yOmuwa nomagando gaKalunga koye.

²¹ Pulakena kushika, muhepekwa ngoye ngoka wa kolwa, nando hakomaviinu.

²² Omuwa Kalunga koye ote ku popile nota ti: “Otandi kutha po oshitenga shoka nde ku pele mondjahi yandje. Ito ka nwa we omaviinu ngoka tage ku telaganitha.

²³ Otandi ke ga nwetha mboka taye ku hepeke, mboka taye ku langitha momapandaanda notaye ku lyatagula wa fa iiyagaya.”

52

¹ Penduka po! Eeno, yambuka po, Sion! Izaleka oonkondo! Inzandula mo monguwo yoye yoshituthi, Jerusalem, ngoye oshilando oshiyapuki! Aafukolume naantu ya nyata itaa ka pita we miiyelo yoye.

² Jerusalem, ipupula ontsi! Yambuka mo montsi, u kuutumbe koshipangelapundi! Idhitulula omalyenge mothingo yoye, ngoye omukadhona onkwatwa Sion.

³ Omuwa ota lombwele aantu ye ta ti: “Sho mwa ningi aapika, inamu landwa niimaliwa; osho tamu ka mangululwa pwaa na ofuto yasha.

⁴ Aantu yandje oya yi tango kuEgipiti ya kale mo muundjendi; opo ihe Assur e ya kwata po koonkondo.

⁵ Nongashingeyi muBabilonia osha ningwa sha faathana: one aapongekwa noinamu kulilwa nasha. Mboka taye mu pangele, otayi itanga yo tayi inomo notaa sheke edhina lyandje aluhe.

⁶ Mesiku tali ya otamu ka tseya ndje kutya ongame Kalunga nonde shi mu lombwela.”

⁷ Oompadhi odho opala ngiini dhaangoka te ya ta zi koondundu te eta onkundana ombwanawa, tu uvitha ombili! Ota tseyitha elaka etoye lyehupitho e ta ti kuSion: “Kalunga koye oye omukwaniilwa!”

⁸ Pulakeneni! Aalangeli yoshilando otaa yelutha omawi gawo, oyo ayehe taa kugilile kenyanyu. Oshoka oye wete Omuwa oshipala noshipala, sho te ya ta galukile kuSion.

⁹ Nyanyukweni mu kugilile mokule, ne omakulukuma gaJerusalem, oshoka Omuwa ota hekeleke aantu ye, okwa hupitha Jerusalem.

¹⁰ Omuwa ota longitha okwooko kwe okuyapuki nota ka hupitha aantu ye, nuuyuni auhe otau ke shi mona.

¹¹ Zii mo muBabilon! Shi thigeni po! Inamu guma tuu shoka sha nyata! Iyoololeni mo musho ne mu iyapule, ne aahumbati yiiyuma yOmuwa.

¹² Itamu pumbwa okuza mo ompulukuta, itamu zi mo ontuku, oshoka Omuwa ote mu tetekelele, Kalunga kaIsrael te mu wilike.

¹³ Tala, omupiya gwandje ota ka hepuluka; ota ka yelwa pombanda, ta simanekwa nokutumbalekwa unene.

¹⁴ Oyendji oya li ye mu halukila, oshoka olupe lwe olwa li lwa shituka, inalu fa we lwaantu; ondjelo ye oya tutuka, inayi fa we yaana yaantu.

¹⁵ Ihe iigwana oyindji otayi mu kuminwa, naakwaniilwa otaye mu tsile omazima ya kumwa, oshoka otaa ka tseya sha inaaye shi hokololelwa nale, notaa ka uva ko shoka inaaye shi uva nale.

53

¹ Olye i itaale shoka twa uvithilwa? Nokwooko kwOmuwa okwa hololelwa lye?

² Okwa kokele montaneho yOmuwa a fa oshitutuma, a fa oshimpona shomevi lya kalanda. Ka li e na olupe nenge ondjelo, sho twe mu tala. Ka li e na eopalo, tu mu hokwe ando.

³ Okwa li a dhinwa nokwe ekelwahi kaantu, omulumentu gwomahepeko nomuvuntu. Okwa li a fa ngoka aantu ye mu isiikilile iipala yawo, yaaye mu tale. Okwa li a dhinwa, natse inatu mu simaneka nando.

⁴ Oshili, okwi itsike uuvu wetu, nuuwehame wetu e u humbata. Otwe mu tala a dhengwa kuKalunga, a geelwa nokwa hepekwa.

⁵ Ihe okwa tsuwa omolwomayono getu nokwa nyanyagulilwa oondjo dhetu. Egeelo olye mu ya, opo tu mone ombili, notwa aludhwa kiilalo ye.

⁶ Otse atuhe twa pukile twa fa oonzi, noshaa ngoka okwi iyukile nepola lye mwene. Ihe Omuwa okwe mu tsike oondjo dhetu atuhe.

⁷ Okwa hepekwa nokwa monithwa iihuna, ihe ina makula okana ke. Ongaashi onzigona tayi falwa koshidhipagelo, ongonzi tayi mwenenene omukululi gwayo, osho naye wo ina makula okana ke.

⁸ Okwa kuthwa po a thiminikwa nokwa pangulwa, ihe olye gwomepipi lye e shi dhiladhila? Oshoka okwa kuthwa mo mevi lyaanamwenyo; Omolwomayono goshigwana shandje okwa adhika kegeelo.

⁹ Okwa pewa ombila ye paakolokoshi, ihe okwa fumvikwa pomuyamba, oshoka oye ina yona sha nokwa li kee na iifundja mokana ke.

¹⁰ Ihe olya li ehalo lyOmuwa oku mu nyanyula noku mu etela uuwehame. Eso lye olyo eyonondjambo, nota ka mona ko oluvalo lwe. Ehalo lyOmuwa otali gwanithwa muye.

¹¹ Konima yomahepeko gomwenyo gwe ota ka kala ishewe menyanyu; ota ka tseya kutya nani ina hepekwa osima yowala. Omupiya gwandje omuyapuki ota ka humbata egeelo lyoyendji, nomolwe otandi ya dhimine po.

¹² Onkee ano otandi ke mu pa oshitendelwa mokati kaawa, oye nota ka topola iihakanwa pamwe naanankondo; oshoka omwenyo gwe okwe gu yambele meso, nokwa yalulilwa maakolokoshi. Okwa humbata po oondjo dhoyendji nokwa galikanene aayonaguli.

54

¹ Ligola, ngoye omuntimbe, ngoye ngoka inoo vala! Kugilila nokunyanyukwa newi lyopombanda, ngoye ngoka inoo thetwa, oshoka Omuwa ota ti, omuthigwapo oku na oyana oyendji ye vule aana yomuhokanwa.

² Tamununa etsali lyoye li ninge enene; oongodhi dhalyo dhi hilila kokule noomboha dhadho dhi dhengela muule.

³ Oto ka taandelitha oongamba dhoye koombinga adhihe. Oluvalo lwoye otalu ka lala iilongo mbyoka iigwana yilwe yi yi na ngashingeyi. Iilando ya mbugala otayi ka udha aantu.

⁴ Ino tila — ito ka sithwa we ohoni; ito ka fupipikwa we. Oto ka dhimbwa ohoni yomuufuko woye, noito dhimbulukwa we ezaza lyomuuselekadhi woye.

⁵ Omushiti gwoye oye omusamane gwoye, Omuwa Omunankondoawike olyo edhina lye. Kalunga kaIsrael omuyapuki ote ku hupitha — oye omupangeli gwuuyuni auhe.

⁶ Israel, owa fa omufuko e ethiwa komulume noku li moluhodhi olululu. Ihe Omuwa ote ku ithana, u galuke ta ti:

⁷ “Onde ku etha okathimbo okashona, ihe otandi ku galula nesilohenda enene.

⁸ Muupyundjahi onde ku iholeke oshipala shandje okathimbo, ihe otandi ku sile ohenda hayi kalelele.” Omuwa omukulili gwoye osho ta ti.

⁹ “Muuyuni waNoa ondu uvaneke kutya efundja lyaa ye ko we kombanda yevi. Ngashingeyi otandi uvaneke, ndaaye ku geele we nomagandambadhi nenge ndi ku dhenge.

¹⁰ Oondundu nando odhi dhikuke po, niikulundundu nando oyi kakame, esilohenda lyandje itali ku thigi po, nuukuume wetu nangoye itau teka po.” Omuwa naku ku silohenda osho ta ti.

¹¹ Omuwa ota ti: “Omunamupya ngoye, omutelaganithwa kiikungulu nopwaa na ngoka e ku hekeleke! Otandi ku tungulula nooagate, nomakankameno goye noosafire.

¹² Ooshungo dhoye otandi dhi tungulula noorubini, omiyelo dhoye nookristali, nedhingililokuma nomamanya gondilo.

¹³ “Ongame mwene tandi ka longa aantu yandje, notandi ya pe elago nombili.

¹⁴ Eutho nuuyuuki otau ke ku koleka. Uukolokoshi otau ka kala kokule nangoye, ito pumbwa okutila. Omahalutho oga gamuka ko, itage ku hedha popepi.

¹⁵ Ngele oku na ngoka te ku matukile, kashi shi pazimino lyandje; ngoka te ku kondjitha, ota ka teka po.

¹⁶ “Tala, ongame nda shiti omuhambudhi, ngoka ta pepele omupepo ta hambula iikuti. Ongame nda shiti wo omukwiita, ngoka ta longitha omatati a dhipage.

¹⁷ Oshikondjitho kehe tashi hambulwa shi ku kondjithe, itashi tompola sha. Nelaka kehe tali ku tamaneke, oto li tompele ondjo. Otandi ka popila aapiya yandje e tandi ya pe esindano.” Omuwa oye a popi.

55

¹ Ileni, amuhe mboka mwa sa enota, ileni huka komeya! Naamboka mwaa na iimaliwa, ileni, landeni mu lye! Ileni, landeni omaviinu nomahini; itayi gu sha.

² Omolwashike iimaliwa yeni tamu yi gandjele iinima ihaayi kutitha? Omolwashike tamu tula oondjambi dheni miinima ihaayi mu kutha ondjala? Uvii ndje, opo mu lye iikulya yuuyamba, noomwenyo dheni otadhi ka kutithwa kuutoye.

³ Pulakeneni, ne mu ye kungame notamu kala mu na omwenyo! Otandi ka hangana nane ehangano lyaaluhe notandi mu pe omayambeko ngeyaka ndu uvanekele David.

⁴ Tala, onda lenge David omuwiliki nondjayi yiigwana, nomuye onde yi ulukile oonkondo dhandje.

⁵ Oshili, oto ka ithana iigwana yaakwiilongo inoo yi tseya, niigwana mbyoka inaayi ku tseya, otayi ke ku endelela po, oshoka Omuwa Kalunga koye, Omuyapuki Kalunga kaIsrael, oye e ku pe esimano

⁶ Kongeni Omuwa, manga ta monika, ne mu mu ithane, manga e li popepi.

⁷ Omukeenakalunga ne ethe oondjila dhe, nomukolokoshi omadhiladhilo ge. Na galukile kOmuwa Kalunga ketu, ngoka te mu sile ohenda e te mu kuthile po.

⁸ Omuwa ota ti: “Omadhiladhilo gandje kage shi omadhiladhilo geni, noondjila dhandje kadhi shi oondjila dheni.

⁹ Ongaashi egulu li li pombanda puule li vule evi, osho wo oondjila dhandje dhi vule oondjila dheni, nomadhiladhilo gandje ge vule omadhiladhilo geni.

¹⁰ “Eeno, ngashika omvula nomume tayi gu kegulu noitayi shuna inaayi tutika evi noku li menitha iimeno noku yi kokitha, yi ete ombuto komukuni niikulya yokulya,

¹¹ osho wo oohapu dhandje tadhi zi mokana kandje. Itadhi galukile kungame owala inaadhi gwanitha ehalo lyandje; otadhi tsakanitha elalakano ndyoka nde dhi li tumine.

¹² “Eeno, otamu ka tembuka mo nenyanyu notamu ka thindikilwa nombili. Oondundu niikulundundu otayi ka tanta nokuligola pombanda, nomiti adhihe dhokelundu otadhi ka hakela nomake gadho.

¹³ Omikiperesi otadhi ka mena pokuma pwa li hapu mene omano, nomiti omimirte opokuma hapu mene oondjoho. Shika otashi ka ningila Omuwa esimano, endhindhiliko lyaaluhe ndyoka itaali ka dhimwa po nando.”

56

¹ Omuwa ota popi ta ti: “Dhiginineni oshili ne mu longe shoka shu uka, oshoka otandi ya ndi mu hupithe mbala.

² Otandi ka yambeka mboka haa dhiginine Esabati aluhe noihaye li longitha pombambo. Otandi ka yambeka ayehe mboka ihaa longo uuwinayi.”

³ Omukwiilongo ngoka e li maantu yOmuwa, ina tya: “Omuwa ita pitika ndje, ndi mu longele pamwe naantu ye.” Omulumentu ngoka a thonwa, ina dhiladhila kutya sho itaa vulu okuvala, ita vulu okukala maantu yaKalunga.

⁴ Molwaashika Omuwa ota ti: “Omuthonwantu ngoka ta yapula Esabati lyandje, ngoka a hogolola shoka sho opalela ndje nota dhiginine ehangano lyandje,

⁵ edhina lye otandi li dhimbulukwa motempeli yandje nomokati kaantu yandje shi vulithe e na aanona aamati naakadhona. Ita ka dhimbiwa nando.”

⁶ Omuwa ota lombwele aakwiilongo mboka ya ningi yomaantu ye, mboka ye mu hole notaye mu longele, mboka taa yapula Esabati notaa dhiginine ehangano lye nawa, ta ti:

⁷ “Otandi ke mu fala kuSion, ondundu yandje ondjapuki, otandi mu nyanyudhile mongulu yandje yomagalikano notandi taamba omafikilondjambo noontselelandjambo tamu dhi yamba koshiyambelo shandje. Otempeli yandje otayi ka ithanwa ongulu yokugalikanena yaantu yomiigwana ayihe.”

⁸ Omupangeliawike Omuwa Omunankondoawike ngoka te eta aantu ye Aaisraeli kegumbo taa zi muupongekwa, okwa uvaneke kutya ota ka kongolola wo aantu yalwe ya kale puyo.

⁹ Ne iigwana yaakwiilongo, ileni ngaashi iiyamakuti mu lye aantu yOmuwa.

¹⁰ Aalangeli ayehe yaIsrael oyo aaposi, kaye uvite ko sha. Oyo ayehe oombwa oombolo, itadhi vulu okugwedha. Otadhi galauka tadhi yaguma, odhi hole oomposi.

¹¹ Oya fa oombwa dha lumba, ihadhi kuta. Aawiliki osho ye li. Kaye uvite ko sha. Shaa ngoka ota ningi ngaashi a hala nota kongo ashike eliko lye mwene.

¹² Otaa igidhathana taa ti: “Ileni, tu peni omaviinu, otatu ka kolwa komalovu! Esiku lyangula otali ka kala lya fa lyonena, nenge tu tye li vule po nokuli.”

57

¹ Omuyuuki ota yonuka po, nokaku na omuntu te shi dhiladhila momwenyo gwe. Aakaanakalunga otaa kuthwa po, nokaku na ngoka te shi pula, oshoka otaa kuthwa po, opo ya hupithwe muuwinayi.

² Mboka ye ende muuyuuki, otaa yi mombili; otaa mono evululuko, sho taa lala meso.

³ Ihe ne, aamati aana yompulile onkiintu, oluvalo lwomuhondeli nolwanakuhola iipala, ileni huka.

⁴ Olye ngoka tamu mu sheke? Olye tamu nyonkele notamu mu yedhele mo omalaka geni? Ne kamu shi omahe gaanandumbo noluvalo lwaafundja?

⁵ Otamu longele iikalunga yoluvalo, sho tamu nikula momizile dhoomwandi nodhomuti kehe omutalala. Ohamu dhipaga nokuyamba aana yeni momasilu nomomakolombongo gomamanya.

⁶ Ohamu kutha omamanya gongolonga momasilu e tamu ga simaneke ga fa ookalunga. Ohamu ga tile omaviinu ga ninge iinuwandjambo e tamu ga etele oondjambo dhiikulya. Otamu dhiladhila kutya onda panda iinima mbyono?

⁷ Ohamu londo koondundu oondeendeka mu ka yambe omafikilondjambo nokukala moluhondelo.

⁸ Iiyelekela yeni yoshipagani omwe yi tula piiyelo meni lyomagumbo geni. Otamu iteka ndje, sho tamu ihula oonguwo dheni noku ka lala naaholi yeni koontala dheni dha tamununwa. Omwi ilandele ookuume, opo ya kutithe uuhalu weni nomwa tala omapenge gawo.

⁹ Omwa gwaya omugwayo nomagadhi guutiko e tamu yi mu ka longele Molek. Opo mu vule okumona iikalunga mu yi longele, omwa tumu aatumwa kokule, sigololo okuuyuni wokuusi.

¹⁰ Omwa vulwa komaendagulo geni, ihe inamu tya nando: “Otatu shi etha.” Omwa dhiladhila uuholume wiimenka otau mu koleke noitamu ka nkundipala we.

¹¹ Iikalunga mbika iishike ye mu tilitha, opo mu lombwele ndje iifundja nomu dhimbwe ndje thiluthilu? Omwe etha okulongela ndje, sho nde mu mwenene ethimbo ele?

¹² Otamu dhiladhila kutya shoka tamu ningi oshu uka, ihe ngame otandi holola iikala yeni, niikalunga yeni itayi vulu nando oku mu kwatha.

¹³ Sho tamu yi kugile ekwatho, nayi mu hupithe! Epepo lyombepo otali yi pepe po! Ihe mboka yi inekela ndje, otaa ka kala ye na omwenyo moshilongo notaa ka longela ndje motempeli yandje.

¹⁴ Otaku ka tiwa: “Kokoleni, opalekeni mu pale ondjila. Etheni aantu yandje ye ye kungame. Kandulii po iipundukitho mondjila.

¹⁵ “Ongame Kalunga omuyapuki gwokombandambanda, ngoka ndi na omwenyo aluhe sigo aluhe. Onda kala kombandambanda muuyapuki, ihe onda kala wo paantu mboka yi ifupipika noyi itedhulula, opo ndi talaleke oomwenyo dhaaifupipiki nokuhekeleka omitima dha nyanyagulwa.

¹⁶ Oshoka ihandi tamanana aluhe noihandi geye aluhe. Ando osho ngeyi, ando ombepo tayi gundile po koshipala shandje, omwenyo ngoka nde gu shiti.

¹⁷ Onde ya geelele ondjo yawo yolwiho; onde ya dhenge e tandi ya etha. Ihe yo oya tangalala noya lambalala oondjila dhawo yene.

¹⁸ “Onda mona, nkene taa longo, ihe otandi ya aludha. Otandi ya enditha notandi ya kwatha. Otandi ka talaleka mboka taa lili.

¹⁹ Ote gandja ombili kwaayehe, kumboka yopopepi noyokokule. Otandi panga aantu yandje.

²⁰ Ihe aakaanakalunga oya fa efuta lya tukuluka. Omakuthikuthi galyo inaga hala nando okulotela notaga fulukitha mo enono nontopo.”

²¹ Kalunga kandje ota ti: “Aakaanakalunga kaye na nando ombili.”

58

¹ Igidha mokule, ino mwena! Yelutha ewi lyoye lya fa lyenkuma. Hololela Israel oondjo dhe, naana yaJakob omayono gawo.

² Oshoka esiku nesiku oyo taa kongo ndje; oya fa ye na uulaadhi okutseya oondjila dhandje, oya fa oshigwana hashi longo uuyuuki noinashi etha iipango yaKalunga kasho. Otaa pula ndje omautho gu uka ya fa ye na uulaadhi waKalunga e ye popepi nayo.

³ Otaa pula taa ti: “Omolwashike tatu idhilike iikulya, ngele Omuwa ine shi ndhindhilika? Omolwashike tatu kala twaa na iikulya, ngele ye ke na ko nasha?” Omuwa ote ya lombwele ta ti: “Oshili oyo ndjika kutya pethimbo tamu idhilike iikulya, otamu ipyakidhile niinima yeni yene notamu hepeke aalongeli yeni.

⁴ Mokwiidhilika kweni iikulya otamu tamanana, tamu lokosha notamu kondjithathana. Otamu dhiladhila kutya ogwo omukalo gweidhiliko ngoka tagu pulakenitha ndje omagalikano geni?

⁵ Uuna tamu idhilike iikulya, otamu ihepeke tamu nyongameke omitse dheni pevi mwa fa omafo gomanenge notamu yala omahahi nokugunda omutoko, mu lale po. Olyo tamu ti eidhiliko ndyono? Otamu dhiladhila kutya otandi li hokwa?

⁶ “Eidhiliko lyiikulya ndyoka nde li hokwa, olyo ndi: Dhitululeni oongodhi dhuugoyoki, kutululeni oositolopa dhoondjoko ne mu mangulule aahepekwa. Teyeni po oondjoko adhihe.

⁷ Topoleleni aasindjala iikulya, edhilileni oondjendi oohepele momagumbo geni nokuzaleka aanankayi. Inamu tinda okukwatha aakweni.

⁸ “Nena uuyelele woye otau tende wa fa eluwa, niilalo yoye otayi ka aluka mbala. Omuhupithi gwoye ote ku kwatele komeho, neadhimo lyOmuwa otali ku gamene konima.

⁹ Nge to galikana, otandi ku zimine. Ngele to ithana ndje, otandi ku yamukula. “Ngele to hulitha po omathiminiko, ondhino nomutyanayi kehe;

¹⁰ ngele to palutha aasindjala noto ningi nawa mboka ye li muuyina, nena uuyelele otau ku tendele nomilema dhe ku kunduka, otadhi ka shituka oshanga shomutenya.

¹¹ Otandi ke ku wilika aluhe noku ku kutitha nuuwanawa. Otandi ke ku ninga ondjolowele wa kola nawa. Oto ka fa eyana lya kumwa nawa omeya, wa fa oluthithiya lwomeya ihaalu pwine.

¹² Aatekulu yoye otaa ka tungulula omakulukuma gonale, otaa ka gongolola omatungo pomahala gago omakulu. Oto ka ithanwa omugongololi gwomakulukuma nomutungululi gwoondjila nomagumbo.”

¹³ Omuwa ota ti: “Ngele otamu dhiginine Esabati noitamu li yono nokwiipyakidhila niinima yeni yene mesiku lyandje eyapuki, ngele otamu simaneke Esabati olyo esiku lyenyanyu, esiku lya yapulilwa Omuwa, noitamu yi kolweendo nenge tamu longo sha nenge tamu popi oohapu dhiipolopolo,

¹⁴ Otamu ka mona enyanyu ndyoka tali zi mokulongela ndje. Otandi ke mu simanekitha muuyuni auhe, notamu ka nyanyukilwa oshilongo shoka nda pele hokulu Jakob. Ongame Omuwa, ongame tuu nda popi.”

59

¹ Inamu dhiladhila kutya Omuwa ota nyengwa oku mu hupitha nenge a thita omakutsi kaa uve, sho tamu galikana.

² Omolwomayono geni ite mu pulakene. Oondjo dheni odho dhe mu yoolola muKalunga keni, mwaa mone oshipala she.

³ Iikaha yeni oya tiligana ombinzi, noonyala dheni odha nika omayono. Omilungu dheni otadhi popi iifundja, nelaka lyeni otali nongona omagwaaleko.

⁴ Otamu yi koompangu, ihe kamu na uuyuuki. Otamu popile iifundja, opo mu kale nawa. Otamu ningi aasimba e tamu vala iihuna.

⁵ Otamu utumanene omayi goshikoko notamu tungu omawiiwili. Ngoka ta li omayi ngoka, ota si; nongele limwe tali tendulwa, otamu zi epili.

⁶ Omawiiwili kage shi kuzalwa, itamu vulu okwiisiikila nago. Iilonga yeni oyo iiwinayi, niikaha yeni oyu udha iikolokosha.

⁷ Aluhe otamu matukile okulonga uuwinayi notamu endelele okutilahi ombinzi yomukeenandjo. Omadhiladhilo geni oga goyoka; ehanagulo oli li momapola geni.

⁸ Itamu tseya ondjila yombili, nomoompadhi dheni kamu na uuyuuki. Omapola geni oga ngolyauka, nokape na ngoka e li mugo ta kala nombili.

⁹ Aantu otaa ti: “Ngashingeyi otu shi shi kutya omolwashike Kalunga itee tu hupitha miikaha yaamboka taye tu hepeke. Otwa tegamena uuyelele, ihe otatu lyanga momilema thokothoko.

¹⁰ Otatu pwampwauka twa fa aaposi. Otatu lontauka omutenya twa fa tu li muusiku ongashika muuyuni womilema dheso.

¹¹ Otatu gono ngomamwanka, tatu kululula ngoonguti. Otatu kongo uuyuuki, ihe itatu u mono. Otwa hala emanguluko, ihe olya kala kokule.

¹² “Omuwa, omayono getu ngoka twa yono kungoye, ogendjigendji. Oondjo dhetu otadhi tu tamaneke. Omayono getu otage tu landula notwa tseya iilonga yetu iiwinayi.

¹³ Otwa tsu ondumbo nangoye, otwe ku idhimbike notwa tindi oku ku landula. Otwa hepeke yalwe notwe ku pilamene. Meni lyetu otwa dhiladhila iifundja, nomakana getu oga popi iilombo.

¹⁴ Okutokola kwomondjila otaku pegulwa po, nuuyuuki itau vulu okuhedha ko. Oshili otayi goyokithwa montaneho, nuuyuuki itau gwanithwa nando.

¹⁵ Oshili oya pumba, naangoka te etha uuwinayi, ota yugwa.” Omuwa okwe shi tala nokwa geye, sho kaku na uuyuuki.

¹⁶ Okwa tala nonkumwe kutya kakwa li nando oongoka ta kwatha aahepekwa. Omolwashoka ta longitha oonkondo dhe mwene, e ya mangulule noku ya pa esindano.

¹⁷ Ota zala uuyuuki wa fa ehuuyanza, nesindano lya fa egala lyosheela. Oti izaleke iikonene ya fa omutsuhu noti ikuwikile muulaadhi wa fa elwaakani.

¹⁸ Ota ka geela aatondi ye pailonga yawo, naamboka wo ya kala kokulekule.

¹⁹ Otaye ke mu tila okuza kuuzilo sigo okuuninginino. Shaa ngoka ota tila oonkondo dhe oonene. Ote ya a fa efundja lyomulonga, ta tsinuka ko a fa oshikungulu shombepo.

²⁰ Omuwa ota lombwele aantu ye ta ti: “Otandi ke ya kuSion ndi mu popile nondi hupithe ayehe mboka yi itedhulula moondjo dhawo.

²¹ Otandi ka hangana nane. Onde mu tilile Ombepo yandje nonde mu pe oohapu dhandje, dhi kale pune sigo aluhe. Okuza mpaka otamu ka vulika kungame nokulonga aana yeni noluvalo lwawo lu vulike kungame aluhe sigo aluhe.”

60

¹ Thikama, yela, oshoka uuyelele woye owa holoka, neadhimo lyOmuwa otali ku tayimine noonte dhalyo.

² Tala, omilema odha siikila evi nuuluudhe thokothoko iigwana, ihe Omuwa ota adhimine kombanda yoye, nesimano lye otali ku minikile.

³ Iigwana otayi ke ya kuuyelele woye, naakwaniilwa keminikilo lyeadhimo lyoye.

⁴ Ligamena koombinga noombinga. Ayehe oya gongala notaa ya kungoye; aamwoye aamati otaa ya taa zi kokule, naamwoye aakadhona taa kwiininwa. Oto ke shi mona e to adhima;

⁵ omwenyo gwoye otagu nyanyukwa nokushambukwa. Uuyamba wokomafuta otau etwa kungoye, aayamba yomiigwana otaa ya kungoye.

⁶ Iiyendo yoongamelo otayi ka napakana noshilongo sheni, oongamelo oongundjuka dhokuMidian nokuEfa. Adhihe otadhi zi kuSheba dha humbata oshingoli niitsinino. Aantu notaa ka holola esimano lyOmuwa.

⁷ Oonzi adhihe dhokuKedar niikombo yokuNebaiot otayi ka etwa kungoye, yi ninge omafikilondjambo go opalela Omuwa. Omuwa ota ka adhimitha otempeli ye shi vule shito.

⁸ Oolye mboka taa ya taa mweluluka ya fa iikogo, noya fa oonguti tadhi ya kiihandhila yadho?

⁹ Otaku zi oosikepa tadhi ya tadhi zi koontuntu dhokokule, tadhi eta aantu yaKalunga kegumbo. Otadhi ya eta pamwe noshingoli noshisiliveli shawo, opo ya simaneke edhina lyOmuwa, Kalunga kaIsrael omuyapuki, ngoka a simanekitha iigwana, yo yi simaneke aantu ye.

¹⁰ Aakwiilongo otaa ka tungulula edhingililokuma lyoye. Aakwaniilwa yawo otaa ku longele. Onde ku geele mondjahi yandje, ihe ngashingeyi otandi ku hololele ohole nesilohenda lyandje.

¹¹ Iiyelo yoye otayi kala ye eguluka omutenya nuusiku, opo aakwaniilwa yiigwana ye ku etele uuyamba wayo

¹² Ihe iigwana mbyoka itaayi ku longele, otayi ka hanagulwa po thilu.

¹³ Eopalo lyaLibanon otali ya kungoye. Iipilangi yomikiperesi, yomisedeli noyomihongo otayi ka etwa okwoopaleka nayo Jerusalem nokupoleka otempeli yandje.

¹⁴ Aamati aana yaahepeki yoye otaa ke ya yi isizimika meifupipiko. Mboka ye ku dhini nale, otaa ka nyongama poompadhi dhoye. Otaye ke ku luka “Oshilando shOmuwa,” “Sion, oshilando shaKalunga kaIsrael omuyapuki.”

¹⁵ Owa li oshilando she ethiwa nosha tondika, nokapwa li ngoka a pitile mungoye. Ihe otandi ke ku nenepeka noku ku opaleka, oto ka ninga ehala lyenyanyu aluhe sigo aluhe.

¹⁶ Oto ka likola uuyamba wiigwana nowaakwaniilwa yayo. Oto ka tseya kutya ongame Omuwa, omuhupithi gwoye, nOmunankondo gwaJakob oye omukulili gwoye.

¹⁷ Otandi ku etele oshingoli peha lyoshikushu, oshisiliveli peha lyiiyela iiluudhe. Peha lyoshiti otandi ku etele oshikushu nopeha lyomamanya, iiyela iiluudhe. Aapangeli yoye itaye ke ku hepeka we; otaye ke ku lela nuuyuuki nombili.

¹⁸ Mevi lyoye kamu na we ngoka ta hokolola uukolokoshi, ehanagulo neyonuko kali mo moshilongo shoye. Otandi ke ku gamena noku ku shiga nda fa ekuma; nangoye oto ka hambelela ndje, oshoka onde ku hupitha.

¹⁹ Etango itali ku minikile we omutenya, nomwedhi kagu shi we uuyelele woye uusiku. Ongame, Omuwa, tandi ka kala uuyelele woye waaluhe, eadhimo lyesimano lyandje otali ku minikile.

²⁰ Omasiku guuthigwa woye otaga kuka. Ongame, Omuwa, tandi kala uuyelele woye waaluhe. Etango lyoye itali ningine we, nomwedhi gwoye itagu si we.

²¹ Aantu yoye ayehe otaa ka ninga aayuuki, notaa ka thigulula oshilongo sigo aluhe. Onde ya tsike, onde ya tula mo, opo ndi hololele ayehe eadhimo lyandje.

²² Aashuushuka yomune otaa ka ninga eyuvi, naashona otaa ningi oshigwana oshinankondo. Ongame Omuwa; otandi shi ningi methimbo lyo opala.

61

¹ Ombepo yOmuwa Omupangeliawike oya lambele ndje, oshoka oye a gwayeke ndje, ndi uvithile oohepele onkundana ombwanawa, ndi aludhe mboka ye na omwenyo gwa nyanyagulwa, ndi igidhile aapongekwa emangululo, nondi pitithe mo oonkwatwa moondholongo.

² Okwa tumu ndje, ndi uvithe kutya ethimbo olya thikana, uuna Omuwa ta hupitha aantu ye nota dhenge aatondi yawo. Okwa tumu ndje, ndi hekeleke ayehe mboka taa lili.

³ Okwa tumu ndje, ndi etele oonakulila enyanyu peha lyuupongo, ehambelelo peha lyoluhodhi. Otaa ka fa omiti ndhoka Omuwa mwene e dhi tsike. Otaa ka longa uuyuuki, naKalunga ota ka hambelelelwa shoka e shi ninga.

⁴ Otaa ka tungulula omakulukuma gonale, nokwoopaleka omaputu gootatekulu. Otaa ka ngongolola iilando ya mbugala, mbyoka ya hanagulwa po kaakulu yonale.

⁵ Aantu yandje, aakwiilongo otaye ke mu longela. Oyo taa ka litha iimuna yeni notaa longo omapya geni niitsambe yeni yomiviinu.

⁶ Otamu ka ithanwa aayambi yOmuwa, aapiya yaKalunga ketu. Otamu ka nyanyukilwa uuyamba wiigwana, notaku tangwa taku tiwa oweni.

⁷ Ohoni yeni nokugugwa taku hulu. Otamu ka kala moshilongo sheni yene. Uuyamba weni otau ka ndambulwa, nenyanyu lyeni otali kala aluhe sigo aluhe.

⁸ Omuwa ota ti: “Ondi hole uuyuuki note tondo eyugo nuumbudhi. Muudhiginini wandje otandi ya futu notandi hangana nayo ehangano lyaaluhe.

⁹ Otaa ka kala ya simana mokati kiigwana. Shaa ngoka te ya mono, ota ka tseya kutya oyo aantu mboka nde ya yambeka.”

¹⁰ Otandi nyanyukilwa unene mOmuwa; omwenyo gwandje tagu ligola muKalunga kandje, oshoka okwa zaleke ndje omuzalo gwehupitho nokwa kuwike ndje ondjatha yuuyuuki. Okwa tula oshishani komutse gwandje nda fa omuyambi, nonda fa omufuko i igoleke niipako ye.

¹¹ Oshili, ngaashi evi tali menitha iimeno, notayi koko, osho Omuwa Omupangeliawike ta hupitha aantu ye, niigwana ayihe otayi ke mu hambelela.

62

¹ Itandi ka mwena molwaSion nomolwaJerusalem itandi ka kala nda tya thilu, sigo uuyuuki washo tau tende wa fa eluwa, nehupitho lyasho tali yeta lya fa onyeka.

² Iigwana otayi ka ligamena uuyuuki woye, naakwaniilwa ayehe eadhimo lyoye. Oto ka lukwa edhina epe, ndyoka Omuwa mwene te ke li gandja.

³ Oto ka ninga oshishani sheadhimo moshikaha shOmuwa, negala lyuukwaniilwa meke lyaKalunga koye.

⁴ Ito ka ithanwa we “Omuhengwa”, nenge oshilongo shoye shi lukwe “Eputu”. Edhina lyoye epe olyo “Kalunga e na ombili naye”. Oshilongo shoye otashi lukwa “Ondjokana yi na elago”, oshoka Omuwa okwe ku hokwa nota kala a fa ombushiki koshilongo shoye.

⁵ Ngashika omumati ta hokana omufuko gwe, osho naanaa naku ku shita te ke ku hokana. Ngashika mbushiki ta nyanyukilwa omufuko gwe, osho wo Kalunga te ke ku nyanyukilwa.

⁶ Jerusalem, kedhingililokuma lyoye onda langeke ko aalangeli. Naa kale itaaya mwena uusiku nomutenya. Naa dhimbulukithe Omuwa omauvaneko ge. Inamu mu etha e ga dhimbwe.

⁷ Inamu mu pa evululuko, manga inaa tungulula Jerusalem e te shi ningi oshilando tashi tangwa kuuyuni auhe.

⁸ Omuwa okwa gana koshikaha she shokoluyo nokokwooko kwoonkondo dhe kutya iilya yoye itayi ningi we oondya dhaatondi yoye. Aakwiilongo itaa ka nwa we omaviinu goye we ga longele nuudhigu.

⁹ Ihe mboka taa teya iilya, oyo taye yi li nokuhambelela Omuwa. Mboka taa likola omandjembele, otaa ka nwa omaviinu momikala dhotempeli yandje.

¹⁰ Aajerusalem, pitii mo, pitileni miiyelo! Paleleni aagalukilimo epola! Tungeni onenendjila; umbii mo omamanya! Yeluthileni iigwana ombaaneli!

¹¹ Shika Omuwa okwe shi tumbulile uuyuni auhe ta ti: “Lombweleni omuna omukadhona Sion tamu ti: ‘Omuwa ote ya e ku hupithe e na ondjambi ye note ke ku futa.’ ”

¹² Otamu ka lukwa “Oshigwana oshiyapuki”, “Aakulilwa yOmuwa”. Ngoye Jerusalem oto ka ithanwa “Omuyuulukiwa”, “Oshilando inaashi ethiwa”.

63

¹ “Olye ngoka te ya ta ziilile kuBozra shomuEdom? Olye ngoka a zala onguwo ya tiligana, te ende a tuwalala e na oonkondo odhindji? “Ongame ngu tandi popi muuyuuki ndi na oonkondo okuhupitha.

² “Omolwashike onguwo yoye ya tiligana ya fa yomuntu ha lyata omandjembele metemba lyokukolela oomviinu?”

³ Omuwa ta yamukula ta ti: “Ongame awike nda lyatagula iigwana nda fa te kolo omandjembele, nokakwa li ngoka a kwatha ndje. Mondjahi yandje onde ya lyatagula, nombinzi yawo oya shanukile koonguwo dhandje.

⁴ Onda tokola kutya ethimbo lyokuhupitha aantu yandje olya thikana, nolya li ethimbo lyokugeela aatondi yawo.

⁵ Onda li nda kumwa, sho nda tala e te mono kutya kaku na nando ogumwe a kwatha ndje. Ihe ondjahi yandje oya koleke ndje, nondi imonene esindano ngame mwene.

⁶ Mondjahi yandje onda lyatagula iigwana ayihe e tandi yi tyankagula. Ombinzi yawo onde yi poolele mevi.”

⁷ Otandi hokolola ontalanteni yOmuwa, iilonga tuu mbyoka tayi mu hambelelitha. Aaisraeli okwe ya yambeke neyambeko enene, omolwesilohenda lye nohole ye yaa na ondjele.

⁸ Omuwa okwa ti: “Oshili, oyo aantu yandje; oyo itaa ka kotokela ndje.” Onkee ano e ya hupitha

⁹ komahepeko gawo agehe. Hamuyengeli, ihe Omuwa oye mwenemwene e ya hupitha. Mohole ye nomontalanteni ye okwe ya yululula mo. Okwa li e ya sile oshimpwiyu nonale,

¹⁰ ihe oye mu tsile ondumbo noya nikitha Ombepo ye ondjapuki uuthigwa. Osho a shituka omutondi gwawo e te ya kondjitha.

¹¹ Opo mpoka oya dhimbulukwa uuyuni uukulu, omasiku gaMoses, omupiya gwOmuwa, noya pula ya ti: “Ngashingeyi Omuwa oku li peni? Oongoka a hupitha aawiliki yaantu ye mefuta. Omuwa ngoka a gandja Ombepo ye kuMoses, oku li peni?

¹² Omuwa ngoka okwe enditha Moses koonkondo dhe nokwa thikamitha omeya omaleeleka gefuta e te endithile mo aantu ye nokwi ilikolele esimano lyaaluhe.” Oye endithwa kOmuwa ya li ya fa uukambe mombuga, inaa punduka nando.

¹³

¹⁴ Omuwa okwa pe aantu ye evululuko, ngashika iimuna ya yi melonzi lyomwiidhi gwelendulendu. Okwe enditha aantu ye nokweetela edhina lye esimano.

¹⁵ Omuwa, tu taalela megulu moka wa kala muuyapuki woye meadhimo. Uulaadhi woye niilongankondo yoye oyi li peni? Ohole nonteni yoye oyi li peni? Ino kala waa na ko nasha natse!

¹⁶ Oshoka ongoye tate. Abraham ke tu shi, naIsrael ine tu tseya. Ngoye Omuwa, ongoye mwene tate, “Omukulili gwetu” olyo edhina lyoye hela wa za nalenale.

¹⁷ Omolwashike to tu etha, tu puke mo moondjila dhoye? Omolwashike to tu etha, tu kukutike oomwenyo dhetu tu kale inaatu ku tila? Galuka omolwaamboka taye ku longele, molwaantu mboka ya kala aantu yoye aluhe.

¹⁸ Tse mbaka aantu yoye aayapuki, otwa tidhwa mo kaatondi yetu konima yokathimbo okafupi; oyo taa lyatagula otempeli yoye.

¹⁹ Oto tu ningi twa fa aantu inaatu pangelwa kungoye, hela twa za nale, aantu twa fa inaatu lukilwa edhina lyoye.

64

¹ Akutu, andola u tuule egulu omusa e to kulukile pohi! Oondundu ando dhi hemukile koshipala shoye,

² ngaashi omulilo tagu fike po iihwa notagu fulukitha omeya! Kulukila pohi, u tseyithile aatondi yoye edhina lyoye nou kakamithe iigwana koshipala shoye.

³ Okwa li ethimbo, sho we ya e to longo iilonga iitilithi mbyoka inaatu yi tegelela nando; oondundu odhe ku tala e tadhi kakama.

⁴ Noshitonale kaku na ngoka omakutsi ge gu uvile nenge omeho ge ga tonatele kalunga gulwe a fa ngoye ngoka ho longo to popile ngoka te ku inekele.

⁵ Oto tsakaneke mboka taa mono enyanyu tali zi megwanitho lyuuyuuki, oyo tuu mboka haa dhimbulukwa, nkene wa hala ya kale. Ando twa li ngaaka aluhe, ando otwa hupithwa. Owe tu geele, ihe otwa tsikile okuyona.

⁶ Atuhe otwa yono; niilonga yetu iiwanawa oya nyata ayiheyihe. Omolwomayono getu otwa fa omafo ga kukuta notaga pepwa po kombepo.

⁷ Kape na ngoka a galukile kungoye momagalikano; kape na ngoka te ya kungoye a kwathwe. Owe tu iholeke nowe tu etha omoluulunde wetu.

⁸ Ihe, Omuwa, ongoye tate. Tse eloya, ngoye omuhongi gwiiyuma. Owe tu shiti,

⁹ onkee ino tu geela nenge u dhimbulukwe omayono getu sigo aluhe. Otse aantu yoye; tu sila ohenda.

¹⁰ Iilando yoye iiyapuki oya ningi ombuga, eeno, Sion osha ningi ombuga, Jerusalem eputu lyowala.

¹¹ Otempeli yetu ondjapuki noya simana, moka ootatekulu ye ku simanekele, oya fikwa po nomulilo, nuuyamba wetu auhe wa lala momakulukuma.

¹² Omuwa, ayihe mbika itayi ku inyengitha? Ito ka ninga po sha, sho to tu hepekitha shi vulithe poonkondo dhetu?

65

¹ “Ondi imonithile mboka inaa pula ndje nonda monika kumboka inaa konga ndje. Onda lombwele oshigwana inaashi ithana edhina lyandje nda ti: ‘Ongame ngu, ongame nguka.’

² Ondi ilongekidha aluhe ndi tsakaneke aantu yandje, mboka ya tangalala nohaa longo uuwinayi notaa landula oondjila dhawo yene.

³ Otaa hindi ndje aluhe notaa geyitha ndje. Otaa yamba miikunino yiinonoma notaa fike iitsinino kiiyambelo yuupagani.

⁴ Otaa ka hungila moombila nomomakololo, yo taa pula aathithi. Otaa li onyama yoshingulu nomuhoka gwonyama ya saagelelwa iimenka.

⁵ Otaa lombwelathana taa ti: ‘Kala kokule natse, otse aayapukilela, ino tu guma!’ Itandi vulu okwiidhidhimikila aantu ya tya ngaaka — ondjahi yandje yoku ya geela oya fa omulilo ihaagu dhimi.

⁶ “Onda tokola nokuli, nkene tandi ya geele. Epangulo lyawo olya nyolwa li li koshipala shandje. Itandi mwenene shoka ya ningi; otandi ke ya futila

⁷ oondjo dhawo noondjo dhoohekulu. Oya fikile iitsinino komahala giinonoma koondundu noya sheke ndje nayi. Otandi ya geele, ngaashi iilonga yawo yonale ye shi ilongele.”

⁸ Omuwa ota ti: “Kaku na ngoka ta yono po omandjembele omawanawa, oshoka otamu zi omaviinu. Nangame wo itandi ka yona po aantu yandje ayehe. Otandi ka hupitha mo mboka haa longele ndje.

⁹ Otandi ka holola oluvalo muJakob nomuJuda, oomboka taa ka thigulula oondundu dhandje. Aantu yandje aahogololwa taye ke dhi thigulula, naapiya yandje oko taa ka kala.

¹⁰ Otaa ka longela ndje notaa ka litha oonzi dhawo niimuna yawo momalundu gaSharon muuninginino nomEsilu lyomalwa muuzilo.

¹¹ “Ihe otashi ka kala shi ili kune mboka hamu etha Omuwa nohamu dhimbwa Sion, ondundu yandje ondjapuki, one mboka hamu yalele Gad oshililo nohamu hangele oshikalunga Meni omalovu.

¹² Otamu ka sa tamu dhipagwa, oshoka inamu itaala, sho nde mu ithana nenge mu pulakene, sho nda popi. Omwa hogolola shoka inaashi opalela ndje nomwa ningi shoka oshiwinayi koshipala shandje.

¹³ Onkee tandi mu lombwele kutya mboka haa longele ndje nohaa vulika kungame, otaa ka kala ye na iikulya niikunuwa ya ha, ihe ne otamu ka sa po kondjala nokenota. Otaa ka kala ye na elago, ihe ne otamu ka kala momupya.

¹⁴ Otaa ka imba omahambelelo, ihe ne otamu ka ula nomutima gwa nyanyagulwa.

¹⁵ Aantu yandje aahogololwa otaa ka tumbula edhina lyandje, uuna taa thingana. Ngame, Omuwa Omupangeliawike, otandi ke mu dhipaga po. Ihe mboka taa vulika kungame, otandi ke ya lukulula edhina epe.

¹⁶ Shaa ngoka moshilongo ta ka pula eyambeko, ota ka pula a yambekwe kuKalunga kashili. Shaa ngoka ta gana, ota ka gana kedhina lyaKalunga kashili. Omalwa gomuuyuni wonale otaga hulu po notaga dhimbiwa.”

¹⁷ Omuwa ota ti: “Tala, otandi shiti egulu epe nevi epe. Iiningwanima yonale otayi ka dhimbiwa thiluthilu.

¹⁸ Nyanyukweni nokuligola pombanda omolwaayihe mbyoka tandi yi shiti. Otandi shiti Jerusalem shi ninge oshilando shenyanyu, naantu yasho otaa ka kala ye na elago.

¹⁹ Ngame otandi ka nyanyukilwa Jerusalem naantu yasho. Itamu ka kala elilagano nenge ewi lyonkugo.

²⁰ Uuhanona itau ka sila we muumputu, naantu ayehe otaa ka sa ya koka. Ngoka ta si e na omimvo ethele, ota ka talwa a sa omugundjuka unene. Ngoka ta si inaa thikitha omimvo ethele, otaku ka tiwa okwa thingwa.

²¹ Otaa ka tunga omagumbo, opo ya kale mo yo yene. Otaa ka tsika omiviinu, opo ya lye iiyimati yadho yo yene.

²² Itaa ka tunga omagumbo, yalwe ya kale mo, nenge ya tsike omuviinu dhi ka liwe kuyalwe. Omasiku gaantu yandje otaga ka kala omale ga fa omasiku gomuti. Aahogololwa yandje otaa ka kala ko olule nokunyanyukilwa iilonga yiikaha yawo yene.

²³ Itaa ki ihepeka owala, noyana itaye ke ya valela omupya. Otandi ke ya yambeka pamwe noluvalo lwawo sigo aluhe.

²⁴ Manga nokuli inaaya galikana, otandi ya uvu, nomanga inaaya indila ndje, otandi ya yamukula.

²⁵ Embungu nokanzigona otayi ka napela pamwe; onime otayi li omwiidhi ya fa ongombe, neyoka oondya dhalyo ontsi yevi. Kondundu yandje ondjapuki kaku na we ehala mpoka tapu longwa uuwinayi nenge pu yonwe sha.” Osho Omuwa ta popi.

66

¹ Omuwa ota ti: “Egulu olyo oshipangelapundi shandje, nevi olyo oshilyatelelo shokoompadhi dhandje. Egumbo tamu tungile ndje, olya tya ngiini? Ehala lyandje lyokuvululukilwa otali kala peni?

² Oshikaha shandje hasho sha shiti ayihe mbino? Nosho ngeyi oya ningwa,” Omuwa osho ta popi. “Ngame otandi hokwa mboka yi ifupipika notayi itedhulula, oomboka haa tila ndje nohaa vulika kungame.

³ Aantu otaa ningi shoka ya hala. Ashihe shimwe kuyo, ngele taa tsele ongombe yi ninge efikilondjambo nenge taa dhipaga omuntu; ngele taa yamba onzigona nenge ya teye ombwa othingo; ngele taa gandja ondjambo yiikulya nenge taa yamba ombinzi yoshingulu; ngele taa fike iitsinino nenge taa galikana oshimenka. Oya hogolola oondjila dhawo yene, noomwenyo dhawo odha hokwa omasaagelo pamukalo gu tonditha.

⁴ Osho nangame wo tandi hogolola omukalo gwoku ya hepeka. Otandi ya undulile shoka haa tila, oshoka sho nde ya ithana, inaa itaala ndje noinaa pulakena, sho nda popi. Oya ningi shoka oshiwinayi momeho gandje, noya hogolola shoka inaashi opalela ndje.”

⁵ Pulakeneni shoka Omuwa ta popi, one mboka hamu mu tila nohamu vulika kuye. Elaka otali ti: “Molwaashoka mwa inekela ndje, yamwe yomooyakwenilela otaye mu tondo nokaa na ko nasha nane. Otaye mu nyenkele notaa ti: ‘Omuwa na holole uunene we ye e mu hupithe, opo tu vule okumona enyanyu lyeni.’ Ihe oyolela taa ka sa ohoni.

⁶ Pulakeneni utale! Euyagano oli li moshilando, oshihomo otashi uvika motempeli. Oshihomo shika oshOmuwa ta geele aatondi ye!

⁷ “Okwa pulumutha, manga inaa akukilwa koshitheta; nomanga uuwehame inaau mu kama, okwa pulumutha omumati.

⁸ Olye e shi uvile nale sha fa mpono? Olye e shi mwene nale sha tya ngeyi? Oshilongo otashi valwa tuu mesiku limwe, nenge oshigwana otashi vulu kutotwa po ohaluka? Sion ita hepekwa koshitheta ngele ta vala aanona ye.”

⁹ Omuwa ota ti: “Otandi thitulula oshivalelo, omuntu a kale inaa vala ando? Nenge hangame ngoka te valitha, ndi shi thitike?”

¹⁰ Nyanyukilweni pamwe naJerusalem, ligoleni omolwasho, amuhe mboka mu hole oshilando shika. Nyanyukweni pamwe nasho ngashingeyi, amuhe mboka mwe shi lilile.

¹¹ Oshoka otamu yamu e tamu kuta komagundji gomahepulutho gasho. Otamu yamu mu kutilile e tamu nyanyukilwa omagundji gasho ga hula.

¹² Omuwa ota ti: “Otandi ke mu galulila ombili ya fa omulonga; uuyamba wiigwana otau ka kungulukila kune wa fa efundja. Otamu ka fa omunona ta yamu komagundji gayina, ta kwiininwa nokuukatwa nohole.

¹³ Otandi ke mu hepuluthila muJerusalem, ngaashi yina ta hepulutha omwana.

¹⁴ Uuna tamu mono iinima mbika tayi gwanithwa, otamu ka nyanyukwa; otayi mu koleke noku mu aludha. Nena otamu ka tseya kutya ongame, Omuwa, tandi kwatha mboka haa vulika kungame notandi geele aatondi yandje.”

¹⁵ Tala, Omuwa ote ya momulilo, nomatembakwiita ge ga fa okambiya. Ota tumu ondjahi ye ya hwamenena, nomagandambadhi ge oga geta omalaka gomulilo.

¹⁶ Aantu ayehe yomuuyuni ye na ondjo, ote ya geele nomulilo negongamwele; oyendji otaa ka dhipagwa.

¹⁷ Omuwa ota ti: “Ehulilo otali ya kwaayehe mboka tayi iyapulile okuya kiikunino yiinonoma taa landula omulumentu e li mokati kawo, naamboka taa li onyama yoshingulu, oombuku niikulya yilwe yi nyanyalitha.

¹⁸ Omadhiladhilo niilonga yawo ondi yi shi. Otandi ya ndi gongele aantu yiigwana ayihe. Uuna taa gongala, otaa ka mona, nkene oonkondo dhandje tadhi longo.

¹⁹ “Otandi ka ninga endhindhiliko mokati kawo notandi ka tuma yamwe yomwaamboka ya hupu ko, kiigwana kuSpania, Libia, Lidia, Meshek, Rosh, Tubal naGreka nokoontuntu dhokokule mefuta ndhoka inaadhi uva ndje nenge dhi mone esimano lyandje. Otaa ka hokolola esimano lyandje mokati kiigwana.

²⁰ Otaa ka etela yakweni taa zi kiigwana ayihe ya ninge omagano gandje. Otaye ya eta kondundu yandje ondjapuki muJerusalem ya kayila uukambe, omamulutiya noongamelo, ye li momatembakwiita nomuukala, naanaa ngaashi Aaisraeli taa eta ondjambo yiikulya kotempeli miiyuma iiyapuki.

²¹ Yamwe yomuyo otandi ya ningi aayambi nAalevi.

²² “Ngashika egulu epe nevi epe tandi ke ga shita notaga kala koshipala shandje, osho wo oluvalo lweni nedhina lyeni tali ka kala po.

²³ Moshituthi kehe shomwedhi omupe nomEsabati kehe aantu ayehe otaa ka gongala kungame taa galikana koshipala shandje.” Omuwa osho ta ti.

²⁴ “Otaa ka pita mo notaa mono omidhimba dhaamboka ya tsu ondumbo nangame; ezinyo lyawo itali si, nomulilo gwawo itagu dhimi. Oyo notaa ka nyanyalitha aantu ayehe.”