1

¹ Ondjimbolela yaSalomo. Omufuko:

² Omathipo goye gokomilungu naga kuwike ndje; ohole yoye ontoye yi vule omaviinu.

³ Ezimba lyomugwayo gwoye olya nika nawa; ezimba lyoye olya fa omugwayo gwa pimpwa mo. Omolwashoka aafuko ye ku hole.

⁴ Kwata ndje utale — natu endelele. Omukwaniilwa okwa fala ndje momutala gwe. Ookuume: Otwa hala okuligola noku ku nyanyukilwa; otatu tanga ohole yoye yi vule omaviinu. Omufuko: Omolwashoka ye ku hole shili.

⁵ Aakadhona yomuJerusalem, ngame omuluudhe, ihe onda mbweshukila. Omuluudhe nda fa omatsali gaKedar, ihe onda sheneka nda fa omashigolapi muuwa waSalomo.

⁶ Inamu tongolola ndje, nando ngame omuluudhe, molwashoka nda pya omutenya. Aamati aana yameme oya geele ndje noya ningi ndje omulangeli gwiitsambe yomiviinu. Oshitsambe shandje mwene shomiviinu inandi shi langela.

⁷ Muholike gwandje, lombwela ndje utale, openi ho litha iimuna yoye nopeni ho yi gondjitha omutenya? Omolwashike ndi na okukala tandi ku kongo mokati kiimuna yayakweni? Mbushiki:

⁸ Sha yela shomaakiintu, ngele ino shi tseya, pita mo u landule oshinkoti shoonzi nou lithe iikombo yoye pomatsali gaanahambo.

⁹ Kanuunyalona kandje, otandi ku faathanitha nokakambe okakiintu ka kutilwa komeho getemba lyaFarao.

¹⁰ Oompanda dhoye odho opala ngiini pokati komagola nothingo yoye metunda lyoshimona!

¹¹ Otatu ku hambulile omagola goshingoli ge na oombandi dhoshisiliveli. Omufuko:

¹² Omukwaniilwa manga a li poshililo, lyo ezimba lyomugwayo gwandje gwonardi otali nika nawalela.

¹³ Omuholike gwandje kungame oye oshihampi shomira ta vululukwa pokati komagundji gandje.

¹⁴ Omuholike gwandje kungame okwa fa ehila lyoongala dhohenna miitsambe yomiviinu kuEn-gedi. Mbushiki:

¹⁵ Kanuunyalona kandje, ngoye owo opala ngiini! Memememe, owa poloka mo ngiini! Omeho goye oga fa oonguti. Omufuko:

¹⁶ Muholike gwandje, ngoye owo opala ngiini! Oh, oshuuluko shoye oshi thike peni, taa! Ombete yetu oya hapa nawa. Mbushiki:

¹⁷ Egumbo lyetu olya tungwa momiti dhomisendeli, nomitenge dhalyo momikiperesi. Omufuko:

2

¹ Ngame ongala yokelundu lyaSharon, ongala yomavo gomomadhiya. Mbushiki:

² Omuholike gwandje mokati kaakadhona okwa fa ongala ya sheneka mokati komano.

³ Omuholike gwandje mokati kaamati okwa fa omuyapula mokati komiti dhomokuti. Otandi yuulukwa okukuutumba momuzile gwagwo, niiyimati yagwo oyi na omulyo mokana kandje.

⁴ Okwa fala ndje mondunda yomaviinu, nepandela lye kombanda yandje olyo ohole.

⁵ Kolekii ndje nomakaka gomandjembele, ne mu ndjangeke ndje niiyapula, oshoka onda pya ompiya yohole.

⁶ Olumoho lwe olu li kohi yomutse gwandje, nolulyo lwe otalu papatele ndje.

⁷ Ne aafuko Aajerusalem, otandi mu ganitha poomenye nopoompalala dhokomalundu: inamu pendutha ohole nenge mu yi kudhile, manga inaayi shi yuulukwa. Omufuko:

⁸ Pulakena! Omuholike gwandje! Tala, oye ngwiyaka te ya. Ota nuka omalondo koondundu, ta ndjomboka kiikulundundu.

⁹ Omuholike gwandje okwa fa omenye nenge ompalala ongundjuka. Oye ngwiya a thikama pondje pekuma lyetu. Ota talele momakende, to ontamene miitenda ya tatakana.

¹⁰ Omuholike gwandje okwa lombwele ndje a ti: “Kanuunyalona kandje, yambuka; nandjelo gwandje, ila!

¹¹ Oshoka tala, okufu okwa kuka, nethimbo lyuutalala lya piti.

¹² Iihwa oya ziza moshiheke, ethimbo lyoondjimbo lya thikana, netendeguti otali kululula moshilongo shetu.

¹³ Omikwiyu otadhi tiliganeke oondhiye, nomiviinu dha sheneka otadhi taandelitha ezimba lya nika nawa. Kanuunyalona kandje, yambuka; nandjelo gwandje, ila!

¹⁴ Kanguti kandje momakolombongo, ngoka to holama momakololo gometayimanya, talitha ndje ondjelo yoye, uvitha ndje ewi lyoye, oshoka ewi lyoye ohali kolitha, nondjelo yoye ohayi fuula.

¹⁵ Tu yulileni oombandje, uuyandje mboka hau li po iitsambe yomiviinu, oshoka iitsambe yetu oya sheneka.” Omufuko:

¹⁶ Omuholike gwandje ogwandje mwene, nangame ogwe, ogwaangoka ta litha mokati koongala dhokelundu,

¹⁷ sigo oshingulohi kwa pepelela, nomizizimba tadhi lelepala. Galuka ko, muholike gwandje, ngaashi omenye nenge ompalala ongundjuka koondundu dha nika iikwekwenyete.

3

¹ Okombete yandje uusiku nda kongo omuholike gwomwenyo gwandje. Onde mu kongo, ihe inandi mu mona.

² Onda hala okuthikama, ndi ka shilile noshilando, momapandaanda nopomahalandjandja tandi kongo omuholike gwomwenyo gwandje, ihe inandi mu mona.

³ Aalangeli mboka taa endaenda noshilando, oya adha ndje. “Inamu mona omuholike gwomwenyo gwandje?”

⁴ Opo sho nde ya pitilile po, onda mono omuholike gwomwenyo gwandje. Onde mu papatele noinandi mu etha, manga inaandi mu fala mokagumbo kameme, meni lyondjugo yaangoka a pulumutha ndje.

⁵ Ne aafuko Aajerusalem, otandi mu ganitha poomenye nopoompalala dhokomalundu: inamu pendutha ohole nenge mu yi kudhile, manga inaayi shi hokwa. Omufuko:

⁶ Olye ngoka te ya ta zi kombuga a fa olwithi lwokuungululu, a nika ezimba lyomira, nolyiitsinino yiigwanga yi ili noyi ili yomupindiki?

⁷ Tala! Osho oshiindopundi shaSalomo sha kundukwa kaakwiita omilongo hamano, omapenda gaIsrael.

⁸ Ayehe oya homata omagongamwele, ya pyokokela iita; shaa ngoka oku na egongamwele ponto ye, ye shi ningila omalondokelo uusiku.

⁹ Omukwaniilwa Salomo okwi ihongithile oshiindopundi, osha ningwa miipilangi yokuLibanon.

¹⁰ Oongudhi dhasho okwe dhi ningitha oshisiliveli, neegameno dhasho olyoshingoli. Omutumba ogwa siikilwa noshiyata oshitiliganembwilili; meni omwo opalekwa nawa nohole kaakadhona Aajerusalem.

¹¹ Aakadhona yaSion, pitii mo, ne mu ligamene omukwaniilwa Salomo. Okwa zala oshishani shoka yina e mu shanipike nasho esiku ndyoka a fukike, esiku ndyoka omwenyo gwe gwa li gwa nyanyukwa. Mbushiki:

4

¹ Kanuunyalona kandje, owo opala ngiini! Taa, owa poloka mo ngiini! Omeho goye taga konita mewiiwili lyoye, oga fa oonguti. Omafufu goye oga fa oshigunda shiikombo tayi kuluka kondundu Gilead.

² Omayego goye oga fa oshigunda shoonzi opo dha kululwa, opo tadhi zi mendipo. Adhihe odha vala oonkwanambwiyu, nomokati kadho kamu na nando oyimwe yaa na okanzona.

³ Omilungu dhoye odha fa okapaya okatiligane tye, nokana koye oko okatoye. Oombandu dhoye meni lyewiiwili lyoye odha fa oombinga dhondunga yomugranati.

⁴ Othingo yoye oya fa oshungo yaDavid ya tungwa nuulenga moka mwe endjelela omahuuyanza eyuvi, agehe ogo omahuuyanza goofule.

⁵ Omagundji goye oga fa uumbambyona uyali, ongaashi uukwanambwiyu wombambi tau napa mokati koongala dha sheneka.

⁶ Oshingulohi sho kwa pepa, nomizizimba tadhi lelepala, otandi yi kondundu yomira noshikulundundu shiitsinino.

⁷ Kanuunyalona kandje, ayihe oye ku opala; ino pumbwa sha.

⁸ Mufuko gwandje, ila, za nangame kuLibanon. Za ko kondungu yondundu Amana, kondungu yondundu Senir nokondungu yaHermon, okiiholameno yoonime nokoondundu dhoongwe.

⁹ Owa goola ndje, mumwameme, muyalekwa gwandje; owa goola ndje nekeuko limwe nokamona kamwe komuumona womothingo yoye.

¹⁰ Mumwameme, muyalekwa gwandje, ohole yoye oyo opala ngiini! Ohole yoye ontoye yi vule omaviinu, nezimba lyomugwayo gwoye oli vule iizimba ayihe yilwe!

¹¹ Omilungu dhoye, muyalekwa gwandje, ohadhi ndonda omagadhi goonyushi. Omagadhi goonyushi nomahini oge li kohi yelaka lyoye, nezimba lyoonguwo dhoye olya fa ezimba lyaLibanon.

¹² Mumwameme, muyalekwa gwandje, owa fa oshikunino shokuvululukilwa sha pateka, owa fa omuthima gwa siikilwa nothithiya yopaumwene.

¹³ Ngoye owa fa oshikunino shomiti dhomigranati dhi na iiyimati hayi eta olwiho okuliwa, oshikunino shiihwa yohenna niigwanga yonardi,

¹⁴ onardi nosaframi, olutope nokanakamuma pamwe nomiti dhi ili nodhi ili dhiitsinino, omira, endombo niizimbalela yi ili noyi ili.

¹⁵ Ongoye othithiya yiikunino, omuthima gwomeya omanamwenyo taga kunguluka taga zi kuLibanon. Omufuko:

¹⁶ Mbepo yokuumbangalantu, penduka, nombepo yokuumbugantu, ila! Pepeleni oshikunino shandje, opo omazimba gasho ga nika nawa ga taandele. Omuholike gwandje ne ye moshikunino she, na lye iiyimati yasho iitoye. Mbushiki:

5

¹ Mumwameme, muyalekwa gwandje, onde ya moshikunino shandje; otandi gongele omira niizimba yandje. Otandi li oshithima shehila lyoonyushi nomagadhi gandje goonyushi, otandi nu omaviinu nomahini gandje. Ookuume: Ookuume, lyeni ne mu kolwe kohole. Omufuko:

² Ngame onda li nda kotha ihe omwenyo gwandje ogwa tonata. Pulakena! Omuholike gwandje ta konkola. Mbushiki: Mumwameme, kanuunyalona kandje, egulula ndje, onguti yandje, namuyelele gwandje! Oshoka omutse gwandje ogwa hipa omume, nomafufu gandje oga hipa omata guusiku. Omufuko:

³ Ondi ihula nale oonguwo dhandje, nandi dhi zalulule? Onda yogo nale oompadhi dhandje, nandi dhi luudhike ishewe?

⁴ Omuholike gwandje okwa tsu oshikaha she mombululu yomweelo. Nena omwenyo gwandje ogwe mu tukulukile.

⁵ Onda yambuka ndi ke egulule omuholike gwandje, niikaha yandje otayi hiha omira, nominwe dhandje odha menka omugwayo gwomira poshipatitho shomweelo.

⁶ Onde egulula omuholike gwandje, ihe omuholike gwandje okwa adhika a zi po, a henuka po. Sho a li ta popi, onda ngwangwanekwa. Onde mu kongo, ihe inandi mu mona; onde mu ithana, ihe ina yamukula ndje.

⁷ Aalangeli mboka taa endaenda noshilando, oya adha ndje. Oya dhenge ndje noya toshola ndje iilalo; aalangeli yopomakuma oya kutha po elwaakani lyandje.

⁸ Aakadhona Aajerusalem, otandi mu ganitha: ngele tamu mono omuholike gwandje, otamu ke mu lombwela shike? Mu lombweleni kutya onda pya ompiya yohole. Ookuume:

⁹ Ngoye omunandjelo mokati kaakiintu, omuholike gwoye oku na shike e vule yakwawo? Omuholike gwoye omwaanawa ngiini e vule yakwawo, sho to tu ganitha ngeyi? Omufuko:

¹⁰ Omuholike gwandje omuyelele omushekesheke. Okwa simana mokati komayuvi omulongo.

¹¹ Omutse gwe oshingoli, oshingoli oshiyelele, nomafufu ge goondhinga omaluudhe ngedhilakola.

¹² Omeho ge oga fa oonguti pomatondokelo gomeya. Omayego ge omatokele ga fa ga yogwa momahini noga dhama nawa.

¹³ Oompanda dhe odha fa iimpungu yiimeno hayi zi eka lya nika nawa. Omilungu dhe ongoongala dha sheneka tadhi ndonda omira.

¹⁴ Omaako ge oga fa omitenge dhoshingoli dha dhamithwa ookrisoliti, nolutu lwe olwa fa omayego goondjamba ga hongwa nuunkulungu noga siikilwa noosafire.

¹⁵ Omagulu ge oga fa oongudhi dhomarmera dha ndjikwa moompadhi dhoshingoli sho sheneshene. Olupe lwe olwa fa lwondundu Libanon, lwa tuwalala lwa fa omisendeli.

¹⁶ Okana ke okatoyetoye, eeno, ashihe shomuye otashi kolitha ndje. Osho omuholike gwandje, kuume kandje, e li ngaaka, ne aafuko Aajerusalem. Ookuume:

6

¹ Ngoye omunandjelo mokati kaakiintu, omuholike gwoye oku uka ano peni? Omuholike gwoye okwa yi nondjila yini, opo tu ke mu konge pamwe nangoye? Omufuko:

² Omuholike gwandje okwa yi koshikunino she, okiimpungu yiimeno hayi zi eka lya nika nawa. Okwa ka litha miikunino nokutona oongala.

³ Omuholike gwandje ogwandje mwene, nangame ogwe, ogwaangoka ta litha mokati koongala dhokelundu. Mbushiki:

⁴ Kanuunyalona kandje, ngoye owo opala wa fa Tirza, ou na oshuuluko wa fa Jerusalem nowa tilikilila wa fa omatanga gaakwiita.

⁵ Pilamenitha ndje omeho goye, oshoka otaga gwililile ndje po. Omafufu goye oga fa oshigunda shiikombo tayi kuluka kondundu Gilead.

⁶ Omayego goye oga fa oshigunda shoonzi oonyali, opo tadhi zi mendipo. Adhihe odha vala oonkwanambwiyu, nomokati kadho kamu na nando oyimwe yaa na okanzona.

⁷ Oombandu dhoye meni lyewiiwili lyoye odha fa oombinga dhondunga yomugranati.

⁸ Naku kale aanyekadhi omilongo hamano naakiintu yopooha omilongo hetatu naadhike yaa shi kuyalulwa,

⁹ onguti yandje namuyelele gwandje oku ilile. Oye epona lyayina, omuningilwa kombunda komupulumuthi gwe. Aakadhona oye mu tala noye mu tanga omunelago, aanyekadhi naakiintu yopooha oye mu simaneke.

¹⁰ Olye ngoka ta holoka mpeya ongeluwa tali tende, omwaanawalela a fa omwedhi gwa toka, omushekesheke a fa etango nomuyeluki ongOmulalawili.

¹¹ Onda yi koshikunino shominkete, ndi ka tale omwiidhi omutalala nondi koneke, ngele omiviinu odha tsapuka nomugranati gwa sheneka oongala.

¹² Ohaluka yowala ondjuulukwe yandje oya kuutumbike ndje momatemba gaanamadhina yoshigwana shandje. Ookuume:

¹³ Galukila huka, galukila huka, omukadhona Omushulami; galukila huka, galukila huka opo tu ku tongolole nawa. Mbushiki: Omolwashike mwa hala okutongolola Omushulami ngaashi muudhano kuMahanaim?

7

¹ Oompadhi dhoye dha zala oongaku odho opala ngiini, ngoye mukadhona omvalekele! Omaziti moombwetelo dhoye oga ngongwa konkulungu ngaashi oshimona shontsino shomothingo.

² Ekuvu lyoye olya fa okayo ka hongekeka, moka ongwedhakanitha yomaviinu ihaayi pu mo. Ela lyoye ongondumba yiilya ya kundukwa koongala dha sheneka.

³ Omagundji goye oga fa uumbambyona uyali, oto ti uukwanambwiyu wombambi.

⁴ Othingo yoye oya fa oshungo yomayego goondjamba. Omeho goye ongomadhiya muHeshbon posheelo shaBat Rabbim. Eyulu lyoye olya fa oshungo kuLibanon ya taalela lwokuDamaskus.

⁵ Omutse gwoye ogwa yeluka gwa fa Karmel. Omafufu gokomutse gwoye ogo omaluudhe nohaga adhima — oondhinga dhago odha kwata omukwaniilwa.

⁶ Ngoye owo opala ngiini, oto kolitha ndje ngiini, ngoye muholike gwandje, mukadhona gwenyanyu lyandje!

⁷ Ongoye omule gwokashendjelutu wa fa omulunga, nomagundji goye ongomahila goondjembele.

⁸ Onda popi nda ti: “Etha utale ndi londe komulunga, ndi kwate omahila gagwo.” Omagundji goye naga kale ga fa omahila goondjembele, ezimba lyomufudho gwoye ongaandyoka lyiiyapula,

⁹ nokana koye ka fa omaviinu omatoye. Omufuko: Eeno, ihe otaga thenunukile nombili momuholike gwandje, notaga kungulukile komilungu dhoonakukotha.

¹⁰ Ngame mwene ogwomuholike gwandje, noha yuulukwa ndje.

¹¹ Ila, muholike gwandje, tu pite mo tu uke pondje komalundu, natu ye tu ka tokelwe komikunda.

¹² Natu meneke tu ye kiitsambe yomiviinu; natu ka tale, omiviinu ngele dha tutuma, oongala dhadho ngele odha sheneka, nomigranati ngele odhi li metifa lyoongala. Noko nkoka tandi ke ku pela ohole yandje.

¹³ Iiyimati yohole ohayi gandja ezimba, nopiiyelo yetu ope na iiyimati ayihe iitoye, iipe niikulu; onde yi ku pungulila, muholike gwandje.

8

¹ Ando owa li omumwamememati, wa yama komagundji gameme! Nge tandi ku tsakaneke pondje, ando tandi ku thipi komilungu, nokape na ngoka ta dhini ndje.

² Ando tandi ku fala mokagumbo kameme, ando to ka pukulula ndje, ando tandi ku nwetha omaviinu mwa tulwa iizimba ya nika nawa, oshinuwa sha kolwa moogranati dhandje.

³ Olumoho lwe olu li kohi yomutse gwandje, nolulyo lwe otalu papatele ndje.

⁴ Ne aafuko Aajerusalem, otandi mu ganitha: Inamu pendutha ohole nenge mu yi kudhile, manga inaayi shi yuulukwa. Ookuume:

⁵ Olye ngoka te ya ta zi kombuga te egamene omuholike gwe? Mbushiki: Onde ku pendutha mokati komiyapula. Oko tuu nkoka nyoko e ku pulumuthile, oko a li noshitheta, sho e ku eta paantu.

⁶ Tula ndje komutima gwoye nda fa oshihako, ngaashi okalinga koshihako kokwooko kwoye; oshoka ohole oya kola ya fa eso, uukodhi wayo ihau kodhuluka wa fa oshaasi. Ehayango lyayo olyo ehayango lyomulilo, ehayango lyOmuwa.

⁷ Efundja lyomeya ihali vulu okudhima ohole, nomilonga ihadhi vulu oku yi kungulula po. Omuntu nando na gandjele ohole eliko lye alihe, ota ka dhinwa ashike. Aamwayina yomufuko:

⁸ Tse otu na okamwamemekadhona onkelo inaaka tumba natango omagundji. Omumwameme nguka otatu mu ningi ngiini, uuna te endelwa?

⁹ Ye ngele ekuma, otatu mu tungile oshungo yoshisiliveli, ihe ngele omweelo, otatu mu siikile niipilangi yomisedeli. Omufuko:

¹⁰ Ngame mwene ekuma, nomagundji gandje oga fa ooshungo. Momeho ge onda ningi nda fa ngoka te eta egwaneneno.

¹¹ Salomo okwa li e na oshitsambe shomiviinu kuBaal Hamon; okwe shi thitha kaanashitsambe. Kehe ngoka oku na okufuta iimaliwa yoshisiliveli eyuvi omolwiiyimati yasho.

¹² Oshitsambe shandje shomiviinu oshandjelela, oshi li pungame mpaka. Salomo na likole iimaliwa ye eyuvi, nomathele gaali ogaamboka taa langele iiyimati ye. Mbushiki:

¹³ Muyalekwa gwandje ngoka wa kala miikunino, ookuume ohaa pulakene ewi lyoye, li pulakenitha ndje wo! Omufuko:

¹⁴ Galuka ko, muholike gwandje, ngaashi omenye nenge ompalala ongundjuka koondundu dha mena omiti dhiizimba.