1 Ndhika oohapu dhomuuvithi, omuna gwaDavid, ngoka a li omukwaniilwa muJerusalem.
2 Omuuvithi ota ti: “Ayihe oyowala, eeno, ayihe oyowalawala!”
3 Omuntu oti ilikolele shike mokwiipyakidhila kwe akuhe kohi yetango?
4 Epipi limwe tali ka pita nekwawo otali ya, ihe evi otali kala sigo aluhe.
5 Etango otali piti, netango otali ningine nokushuna ishewe pehala mpoka hali pitile.
6 Ombepo otayi pepe yu uka kuumbugantu notayi ka galukila kuumbangalantu; otayi idhingoloka aluhe nokugalukila komakundukilo gayo.
7 Omilonga adhihe otadhi tondokele mefuta, ihe efuta itali udha nando; kehala hoka omilonga tadhi tondokele, otadhi tondokele ko aluhe.
8 Iinima ayihe oyi na eipyakidhilo nokape na omuntu ta vulu oku shi popya. Eho ihali kuta okutala, kwo okutsi ihaku vulwa okupulakena.
9 Shoka sha li ko, otashi ka kala ko ishewe; shoka sha ningwa, otashi ka ningwa natango.
10 Kohi yetango kaku na sha taku tiwa: “Tala utale, shika oshipeepee!” Oko sha li nale muuyuni waakulu yonale.
11 Kaku na ondhimbuluko yasha yootatekulu, nomapipi ngoka tage ya, itaga dhimbulukiwa kungoka taga ka kala ko ohugunina.
12 Ngame omuuvithi onda li omukwaniilwa gwaIsrael muJerusalem.
13 Ondu ukitha omwenyo gwandje kekonakono lyuunongo nokudhiladhila ayihe mbyoka tayi ningwa kohi yegulu. Shika osho oshinakugwanithwa oshidhigu Kalunga e shi pe aana yaantu, ya se oshimpwiyu nasho.
14 Onda mono iilonga ayihe mbyoka tayi ningwa kohi yetango; ayihe oyowala nokutidha ombepo.
15 Shoka sha goyoka, itashi vulu okuuthwa, naashoka shaa po, itashi vulu okuyalulwa.
16 Ondi ipopile nda ti: “Tala, onda koko nonda likola aluhe owino oyindji ndi vule ayehe mboka ya tetekelele ndje okulela muJerusalem, nomwenyo gwandje ogwa mono owino nuunongo.”
17 Ihe sho nda yelutha omwenyo gwandje, ndi ilonge okutseya owino nuunongo nokuuva ko uugoya nuusama, onde shi dhimbulula kutya nani osho okutidha ombepo.
18 Oshoka mowino oyindji omo mu na uupyakadhi owindji naangoka ti indjipaleke uunongo, oti indjipalitha uuwehame.
1 Ondi ipopile momwenyo nda ti: “Eewa, otandi ke ku makelitha enyanyu, nyanyukilwa uuwanawa!” Ihe tala, naashika osima yowala.
2 Koondjola onda ti, shika uugoya! Kenyanyu onda ti, otashi kwatha shike?
3 Onde shi dhiladhila momwenyo gwandje, ndi nyanyudhe olutu lwandje nomaviinu — manga omwenyo gwandje tagu endithwa kowino — nondi ikwatelele kuusama, opo ndi mone shoka sho opalela aana yaantu ye na oku shi ninga kohi yegulu momukokomoko gwomwaalu gwomasiku gokukalamwenyo kwawo.
4 Onda longa iilonga iinene; ondi itungile omagumbo, nondi itsikile iitsambe yomiviinu.
5 Ondi ikunine omapya niikunino nonda tsike omiti dhiiyimati dhi ili nodhi ili.
6 Ondi ihupile omatale, opo ndi tekele iimeno nomiti omishona.
7 Ondi ilandele aapika aalumentu naakiintu, nonda likola mboka ya valelwa megumbo lyandje. Onda munu oongombe, oonzi niikombo, ndi vule ayehe mboka ya tetekelele ndje muJerusalem.
8 Ondi igongelele wo oshisiliveli noshingoli nomaliko gaakwaniilwa niilongo; ondi imonene aayimbi aalumentu naakiintu nomanyanyu gaana yaantu, aaholike oyendjiyendji.
9 Onda koko aluhe nda ningi omunene ndi vule ayehe mboka ya li ndje komeho muJerusalem. Onda kaleke owino yandje pungame.
10 Noshaa shoka omeho gandje ge shi hala, inandi ge shi indika; omwenyo gwandje inagu iyageka enyanyu nando olimwe, oshoka omwenyo gwandje ogwa nyanyukilwa iilonga yandje ayihe ndi ipyakidhile nayo, nosho sha li oshitopolwa shiilonga yuupyakadhi wandje.
11 Sho nda tala iilonga yandje ayihe mbyoka ye etwa po kiikaha yandje nuupyakadhi woonkambadhala dhandje adhihe ndhoka nda ningi — tala, ayihe oya li osima yowala nokutidha ombepo, nokaku na sha shomupondo kohi yetango.
12 Onda pungulukile owino, uugoya nuusama nde u tongolola nomeho. Omukwaniilwa ota vulu okuninga shike shoka inaashi ningwa nale komutetekeli gwe?
13 Eeno, onda tala ko, owino oyi na omwago yi vule uugoya, ngaashi uuyelele u na omwago u vule omilema.
14 Omunawino oku na omeho momutse gwe, ihe omusama ote ende momilema. Ihe onde shi dhimbulula kutya ayehe otaa ka adhika keadhiko limwe.
15 Onkee ndi ipopile momwenyo gwandje nda ti: “Shoka ngaa tashi adha omugoya, osho wo tashi ka adha ndje. Owino oye etele ndje po shike ano?” Nondi ipopile momutima gwandje kutya naashika wo osima yowala.
16 Oshoka sho shene okudhimbulukiwa kwomunawino oku thike pamwe nokwegoya, oshoka monakuyiwa ayehe otaa ka dhimbiwa; ndishi omunawino naye wo ota si ngaashi egoya.
17 Onkee ano nda ketelwa kokukalamwenyo, oshoka iilonga mbyoka hayi longwa kohi yetango, oya ehameka ndje, molwaashoka ayihe oyowala nokutidha ombepo.
18 Onda kunyukwa oonkambadhala dhandje adhihe ndhoka nda gwanitha nuudhigu kohi yetango, nondi na oku dhi thigila omuntu ngoka ta landula ndje.
19 Olye a tseya ngele ye omunawino nenge egoya? Oye ta ka lela iilonga yandje mbyoka nde yi tsakanitha nuudhigu nonde yi likola nuunongo kohi yetango. Naashika wo osima yowala.
20 Onkee ano ondi iyekelele molwiilonga ayihe mbyoka nda tsakanitha nuudhigu kohi yetango.
21 Omuntu nando ti ipyakidhile nowino, nuunongo nonuunkulungu, ayihe ote yi thigile ngoka inee yi longela. Naashika osima yowala, oshiponga nokuli.
22 Oshoka omuntu oku na ondjambi yashike momaipyakidhilo nomoonkambadhala dhe ti ihepeke nadho kohi yetango?
23 Oshoka omasiku ge agehe oge na uuwehame nomaihepeko ge agehe omalulu, nokuli uusiku omwenyo gwe itagu vululukwa nando. Naashika owaleelela.
24 Omuntu ke na elago lilwe lyaa shi okulya nokunwa nokunyanyudha omwenyo gwe niilonga ye yuupyakadhi. Onde shi mono wo kutya osha zi miikaha yaKalunga.
25 Oshoka olye ta vulu okulya nokunyanyukwa keehe mu na?
26 Oshoka omuntu ngoka e mu opalela, Kalunga ote mu pe owino, uunongo nenyanyu, ihe omulunde ote mu pe oshilonga shokugongela noshokundumbila pamwe, opo e yi gandje kungoka e mu opalela. Naashika wo owaleelela nokutidha ombepo.
1 Ayihe oyi na otundi yayo, noshaa shoka kohi yegulu oshi na ethimbo lyasho:
2 ethimbo lyokuvalwa, nethimbo lyokusa ethimbo lyokutsika, nethimbo lyokutudha mo shoka sha tsikilwe
3 ethimbo lyokudhipaga, nethimbo lyokwaaludha ethimbo lyokukumuna po, nethimbo lyokutunga
4 ethimbo lyokulila, nethimbo lyokuyola ethimbo lyokunika uuthigwa, nethimbo lyokudhana
5 ethimbo lyokuhalakanitha omamanya, nethimbo lyoku ga gongela ethimbo lyepapatelathano, nethimbo lyokukala kokule nepapatelathano
6 ethimbo lyokukonga, nethimbo lyokukanitha ethimbo lyokupungula, nethimbo lyokweekelahi
7 ethimbo lyokutuula, nethimbo lyokuhondja ethimbo lyokumwena, nethimbo lyokupopya
8 ethimbo lyokuholathana, nethimbo lyokutondathana ethimbo lyiita, nethimbo lyombili.
9 Nakulonga oku na ekwatho lyashike mumbyoka e yi longo?
10 Onda tala kiilonga mbyoka iidhigu Kalunga a pe aana yaantu yi ipyakidhile nayo.
11 Ayihe okwe yi ningi yo opala pethimbo lye. Okwa tula uukwaaluhe moomwenyo dhaantu, po pwaa na omuntu ta tseya iilonga mbyoka Kalunga a longo okuza ketameko sigo okehulilo.
12 Onde shi dhimbulula kutya omuntu mokukalamwenyo kwe ke na elago lilwe lyaa shi okunyanyukwa nokulonga uuwanawa.
13 Naashika wo omuntu a lye ye a nwe noku nyanyukilwe iilonga yuupyakadhi we auhe — osho omagano gaKalunga.
14 Onda dhimbulula kutya ayihe mbyoka Kalunga a ningi, otayi kala po sigo aluhe, itaku gwedhwa sha noitaku kuthwa sha; Kalunga okwe yi ningi ngaaka, opo a tilike.
15 Ayihe mbyoka yi li ko, oko ya li nale; naambyoka tayi ka kala ko, oko ya li nale; Kalunga nota ka kongulula po mbyoka ya pitilila po.
16 Kohi yetango onda dhimbulula ko ishewe ehala lyetokolo — oko kwa li uukolokoshi, nehala lyuuyuuki — oko kwa li uukolokoshi.
17 Ondi ipopile momwenyo gwandje nda ti: “Kalunga ota ka pangula aayuuki naakolokoshi, oshoka oku na ethimbo lyoshinima kehe nolyoshilonga kehe.”
18 Ondi ipopile momwenyo gwandje nda ti: “Molwaana yaantu otashi ningwa po, opo Kalunga e ya yeleke noya dhimbulule kutya muyo yene oya fa iimuna.”
19 Oshoka shoka tashi adha aana yaantu, osho tashi adha wo iimuna; ayehe oye na oshipewa shi thike pamwe. Ngaashi gumwe ta si, osho wo mukwawo ta si, naayehe oye na omufudho gwa faathana. Omuntu ke vulathane niimuna, oshoka ayihe oyowalawala.
20 Ayihe otayi yi kehala limwe. Ayihe oya za montsi yevi, naayihe otayi galukile montsi yevi.
21 Olye e shi shi kutya omwenyo gwaana yaantu otagu londo handiyaka pombanda, nomwenyo gwiimuna otagu kulukile moombogo dhevi?
22 Onda dhimbulula ano kutya kape na oshiwanawa shaa shi shika, omuntu nge ti inyanyudha niilonga ye, oshoka oyo oshipewa she, oshoka olye te mu fala ko hoka, opo a mone shoka tashi ka kala ko, nge a zi po?
1 Konima yaambika onda tala komahepeko agehe taga ningwa kohi yetango. Onda mono omahodhi gaahepekwa nokaye na omutalaleki; aahepeki yawo oya li aanankondo, ihe aahepekwa kaya li ye na omutalaleki.
2 Onkee ano nda tanga aasi mboka ya sa nale, oyo aanelago ye vule aantu mboka ye na omwenyo ngashingeyi.
3 Ihe omunelagolela e ya vule ayehe mboka yaali, oye ngoka inaa valwa noina mona uukolokoshi mboka tau longwa muuyuni.
4 Komeho onda dhimbulula kutya omaipyakidhilo agehe nuulaadhi miilonga owo okusilathana efupa. Naashika wo owaleelela nokutidha ombepo.
5 Egoya otali ihukata omaako e tali ikunya onyama yalyo lyene.
6 Ekaminina lyevululuko oli vule eshambekela lyu udha uupyakadhi nokutidha ombepo.
7 Naishewe onda mono ko oonkambadhala dhowala kohi yetango.
8 Oku na gumwe awikewike kee na mukwawo omutiyali, ke na wo omwanamati nenge omumwayina; ihe kape na ehulilo koonkambadhala dhe adhihe dhiilonga ye, omeho ge itaga kuta uuyamba. Ano otandi ihepekele lye notandi idhilike uuwanawa? Naashika wo owalalela nosha puka.
9 Yaali ye vule gumwe, oshoka oye na ondjambi ombwanawa yomaipyakidhilo giilonga yawo.
10 Oshoka gumwe ngele ta punduka, mukwawo ota vulu oku mu toola po, ihe yayee ngoka ta punduka po pwaa na mukwawo e mu toole po.
11 Natango tuu yaali nge ya lala pamwe, otaa ningilathana omuyenye, ihe gumwe oti ipupyaleke ngiini?
12 Ngele oku na ngoka ta matukile po gumwe, nena ayehe yaali otaye mu thikamene. Ongodhi ya yogohwa oondali ndatu, ihayi tokoka mbala.
13 Omugundjuka ohepele, ihe oku na oondunge, oku vule omukwaniilwa a kulupa kee na oondunge noke shi kulombwelwa,
14 nando a zile mondjedhililo a ka ninge omukwaniilwa, nenge a zile muuhepele a ka lele oshilongo.
15 Onda mono, nkene aanamwenyo ayehe mboka ya kala kohi yetango ya gama kombinga yomugundjuka ngoka te mu landula.
16 Kakwa li ku na ehulilo lyaantu ayehe mboka e ya kwatele komeho. Ihe aatekulu ye inaye mu nyanyukilwa. Osho ngaaka shika owaleelela nokutidha ombepo.
1 Gamena oompadhi dhoye, nge to yi kongulu yaKalunga. Okuhedha ko noku ka pulakena oku vule aasama taye eta oontselelandjambo, oshoka kaye na oondunge, nosho ngeyi haa yono.
2 Ino ulumika okana koye, nomwenyo gwoye ino gu endelelitha okupopya oohapu koshipala shaKalunga, oshoka Kalunga oku li megulu, nangoye ou li kombanda yevi. Onkee oohapu dhoye odhi na okukala oonshona.
3 Oshoka oondjodhi ohadhi zi miimpwiyu oyindji nokupopya kwomugoya omoohapu odhindji.
4 Ngele to uvanekele Kalunga euvaneko, ino shelelelwa oku li gwanitha, oshoka omagoya inage mu opalela. Gwanitha shoka wu uvaneke.
5 Okukala inoo uvaneka sha hwepo, shi vule okuuvaneka ngoye ito tompola sha.
6 Ino pitika okana koye ke ku etele ondjo. Ino popya koshipala shomumbala gwaKalunga u tye: “Euvaneko lyandje olya li epuko.” Omolwashike Kalunga e na okugeyithwa koohapu dhoye nokuyona po iilonga yiikaha yoye?
7 Oshoka oondjodhi noohapu odhindji odhowala, ihe ngoye tila Kalunga.
8 Ngele to mono ko ehepeko lyoohepele negoyokitho lyomautho nuuyuuki moshilongo, ino kuminwa oshinima shoka, oshoka omunene ota tonatele omunene omukwawo, naanene ishewe ye ya vule taye ya tonatele.
9 Uuwanawa woshilongo, ongele omapya agehe taga kala ge na omukwaniilwa.
10 Nakuhola iimaliwa ihe yi kuta, nanakuhola uuyamba iha gwana. Naashika owaleelela.
11 Iinima ngele tayi indjipala, naali otaa indjipala wo; mwene gwayo ota mono mo omupondo gwashike, shila oku yi tongolola owala?
12 Oomposi dhanakulonga oontoye, ashihe shimwe, ngele ta li oshindji nenge oshishona, ihe eloolo lyomuyamba otali mu imbi oomposi.
13 Oku na oshiponga oshidhigu nde shi mono kohi yetango: uuyamba tau pungulwa kumwene gwawo, sigo oshiponga she she ya.
14 Omaliko taga kana molwoshiponga. Nando na vale omunona omumati, ita thigulula sha.
15 Ngashika a zile mela lyayina olutu lwowala, osho ta ka ya owala ngashika a zile mo; noita ka faalela sha shomiilonga yuupyakadhi we a ye nasho.
16 Naashika oshipongalela: ngaashi a zile mo, osho ngaa ta ka ya. Okwa mono shike miilonga mbyoka yowala i ipyakidhile nayo?
17 Omasiku ge ote ga manene momilema, noku na uuwehame, ehepeko nondjahi.
18 Onda koneka kutya osho opalela omuntu a lye ye a nwe a nyanyukilwe uuwanawa wuupyakadhi we mboka i ipyakidhile nawo kohi yetango momasiku omafupi gokukalamwenyo ngoka Kalunga e ge mu pa, oshoka osho oshipewa she.
19 Osho omagano gaKalunga, ngele ota pe omuntu uuyamba nomaliko e te mu pe ompito yokulya ko nokutaamba oshipewa she, opo i inyanyudhe miilonga ye yuupyakadhi.
20 Oshoka iha dhimbulukwa unene omasiku gokukalamwenyo kwe, molwashoka Kalunga e mu pitikile i ipyakidhile nenyanyu lyokomwenyo gwe.
1 Oku na oshiponga shoka nda mono kohi yetango tashi thindile uuntu pohi.
2 Omuntu ngoka a pewa kuKalunga uuyamba nomaliko nesimano, ina hepa we sha, ihe Kalunga ite mu pe ompito yoku yi nyanyukilwa, oshoka omuyeni ote yi nyanyukilwa. Shika eihepeko lyowala nuuwehame uululululu.
3 Omuntu nge ta vala aanona ethele nota kala ko olule, omimvo nokuli odhindji, ihe omwenyo gwe itagu kuta uuwanawa ye ita fumvikwa nokuli nawa, nena otandi ti: Omupononwa oku na elago e mu vule.
4 Oshoka te ya po owala nota yi momilema, nedhina lye otali siikilwa komilema.
5 Ina mona etango noine li tseya. Oku na evululuko e vule omuntu ngo.
6 Eeno, nando omuntu ngoka na kale e na omwenyo lwoomvula omayuvi gaali, ihe ina nyanyukilwa uuwanawa — ayihe itayi ka hulila pehala limwe?
7 Iilonga yuupyakadhi ayihe yomuntu oyokokana ke, ihe uuhalu itau fudhithwa.
8 Oshoka omunawino oku na shike e vule omusama, nohepele otayi mono shike mokutseya okukala mokati kaanamwenyo?
9 Okuligamena nomeho oku vule okweendagula kuuhalu. Naashika owaleelela nokutidha ombepo.
10 Ashihe shoka tashi ningwa, oshu uthwa nale; osha tseyika nale kutya omuntu omushike, ita vulu okutamaneka ngoka e mu vule.
11 Oohapu odhindji otadhi indjipalitha uupyakadhi, omuntu oti imonene mo shike?
12 Oshoka olye ta tseya shoka tashi opalele omuntu momasiku gokukalamwenyo kwe okufupi, ga fa omuzizimba? Olye ta tseyithile omuntu shoka tashi ka kala ko konima ye kohi yetango?
1 Edhina lya simana oli vule omugwayo gwa nika nawa, nesiku lyokusa oli vule esiku lyokuvalwa.
2 Okuya koshigumbo taku lilwa oosa oku vule okuya kegumbo li na oontselela, oshoka eso olyo ehulilo lyaantu ayehe, nomunamwenyo ote shi dhiladhila momutima gwe.
3 Okunika uupongo oku vule okuyola, oshoka oshipala ngele shi na oshizimbi, nena omwenyo ogu li nawa.
4 Omutima gwaanandunge otagu kala moshigumbo shoosa, manga omutima gwaagoya gu li megumbo lyenyanyu.
5 Okupulakena egando lyomunandunge oku vule okupulakena eimbilo lyomagoya.
6 Oshoka iikwekwela yaagoya oya fa omityotyomo dhomano taga pi kohi yombiga. Shika owaleelela.
7 Okwiihakanena iimaliwa otaku goyapaleke omunandunge, noombumbo otadhi nyateke omutima.
8 Ehulilo lyoshinima oli vule etameko lyasho. Omutalanteni oku vule omwiinenepeki.
9 Ino uluma okugeya mombepo yoye, oshoka ondjahi ohayi kala meni lyegoya.
10 Ino tya: “Omasiku gonale oshike ga li omawanawa ge vule gongashingeyi?” Oshoka ito shi popi moondunge.
11 Owino ombwanawa ya fa uuthiga, oyo ekwatho lyaamboka ye na omwenyo.
12 Oshoka owino oyo egameno, ngaashi iimaliwa oyo egameno, ihe ekwatho lyuunongo olyo ndika — owino otayi gamene omwenyo gwamwene gwayo.
13 Tala iilonga yaKalunga, oshoka olye ta vulu okuutha shoka a shita sha goyoka?
14 Nyanyukwa esiku ewanawa, nomesiku lyiiponga dhimbulukwa kutya Kalunga okwe li shiti ngaashika ndiyaka; omuntu ke shi shi shoka tashi mu adha konakuyiwa.
15 Ayihe onde yi mono momasiku gandje gowala: oku na aayuuki mboka taa sile muuyuuki wawo noku na aakaanakalunga mboka taa kalele uukeenakalunga wawo olule.
16 Ino ninga omuyuuki unene ngoye ino imonitha omunawino wa tsa pombanda — omolwashike wa hala okuhula po?
17 Ino ninga omukeenakalunga unene noino ninga egoya — omolwashike to si po mbala esiku inaali thika?
18 Osho opala okudhiginina shimwe nokwaagamuka ko koshikwawo, oshoka ngoka ha tila Kalunga, ota henuka ayihe mbika.
19 Owino otayi koleke omunawino shi vule oofule omulongo ya kala moshilando.
20 Oshoka kombanda yevi kaku na omuyuuki ngoka ta longo uuwanawa auke ye ita yono.
21 Ino pulakena oohapu adhihe aantu taa popi, opo waa uve omupiya gwoye te ku tuku.
22 Oshoka omwenyo gwoye mwene ogwa tseya kutya oho tuku ooyakweni.
23 Ayihe mbika onde yi konakona nowino. Onda popi nda ti: “Onda hala ndi ninge omunawino,” ihe osha kala ndje kokule.
24 Onkalo yowino oyi li kokule nomuule unene, olye ta vulu oku yi pikula?
25 Momwenyo gwandje onda tameke okukonakona nokutedhatedha nokukonga owino, opo ndi tseye kutya uukeenakalunga owo uugoya, nuugoya owo okwaanandunge.
26 Onda mono sha oshilulululu shi vule eso, omukiintu. Oye omwigo, omutima gwe etavu niikaha ye oonkandja. Omwaanawa koshipala shaKalunga ota manguluka miikaha ye, ihe omulunde ote mu kwata po.
27 Eeno, osho shoka nde shi dhimbulula, omuuvithi a ti, sho nda kambadhala okuyeleka oshinima noshikwawo, ndi mone ehuku.
28 Shoka nde shi kongakonga, ihe inandi shi mona, osho shika: Maantu eyuvi onda mono mo omulumentu gumwe omunashili, ihe inandi mona mo omukiintu omunashili nando ogumwe momwaalu tuu ngoka.
29 Tala, onda mono ashike kutya Kalunga okwa shiti aantu aayuuki, ihe yo yene ohayi ikongele iihelele oyindji.
1 Olye a fa omunawino, nolye a tseya okufatula iinima? Owino yomuntu otayi adhimitha oshipala she, nuukukutu woshipala she tau lundululwa kuyo.
2 Otandi ti: Vulika komalombwelo gomukwaniilwa, unene omolwegano we li ganene Kalunga.
3 Za po koshipala shomukwaniilwa, ngoye ino kalela po oshinima shoka inaashi mu opalela, oshoka ashihe shoka a hala, ote shi gwanitha.
4 Oshoka oohapu dhomukwaniilwa odhi na oonkondo, nolye ta vulu oku mu pula ta ti: “Oto ningi shike?”
5 Nakudhiginina iipango ye ita adhika kuuwinayi; nomwenyo gwomunandunge otagu tseya ethimbo netokolo lyu uka.
6 Oshoka oshinima kehe oshi na ethimbo lyasho neuthilo, nando uuwinayi womuntu otau mu thindile pohi.
7 Omuntu ke na owino yaashoka tashi ke mu adha komeho, olye te mu hololele shoka tashi ya konakuyiwa?
8 Kaku na omuntu ta vulu okupangela ombepo e yi keelele, kaku na ngoka e na oonkondo dhokuutha esiku lyeso nokaku na elaleko molugodhi; osho wo uukolokoshi itau hupitha ngoka te u ningi.
9 Ayihe mbika onde yi dhimbulula, sho omwenyo gwandje gwa koneke oshilonga kehe tashi ningwa kohi yetango methimbo uuna omuntu gumwe ta dhiladhilile mukwawo oshiponga.
10 Onda mono wo aakolokoshi taa fumvikwa taa yi mevululuko, manga mboka ye ende pauyuuki taa zi mehala eyapuki noya dhimbiwa moshilando. Naashika owalawala.
11 Uuna epangulo lyaalongi yuudhudhu itaali endelele okupangulwa, omwenyo gwaana yaantu ogwa fula okulonga uudhudhu.
12 Omulunde nando na yone lwethele nota kala nomwenyo omule, ondi shi shi kutya mboka haa tila Kalunga oye li nawa, oshoka haye mu tila,
13 ihe omulunde ita kala nawa noita lelepaleke omasiku ngaashi omuzizimba, oshoka iha tila Kalunga.
14 Shoka hashi ningwa kombanda yevi, oshowala, owaleelela, aayuuki sho taa ningwa ngaashi aakaanakalunga, naakaanakalunga sho haa ningwa ngaashi aayuuki. Osho nda ti kutya owala, owaleelela.
15 Opo mpoka nda tanga enyanyu, oshoka kohi yetango kaku na sha sho opalela omuntu, shila okulya nokunwa nokwiinyanyudha. Oyo mbika ta vulu okuninga momaipyakidhilo ge, manga e li kombanda yevi mokukalamwenyo nkoka Kalunga e ku mu pa kohi yetango.
16 Sho nda pungulula omutima gwandje, ndi ilonge okutseya owino nokutala iinima mbyoka tayi ningwa kombanda yevi, eeno, nokuli omutenya nuusiku kaku na ngoka ta mono oomposi —
17 onda mono miilonga ayihe yaKalunga kutya omuntu ita vulu okuuva ko shoka tashi ningwa kohi yetango; omuntu ni ipyakidhile okukonakona, ihe itu uvu ko sha. Nando omunawino a dhiladhile e yi uve ko, ita tompola sha.
1 Ayihe mbika onde yi kwatele momutima gwandje, naayihe onde yi simonona, kutya aayuuki naanawino niilonga yawo oyi li miikaha yaKalunga, ohole nosho wo uutondwe omuntu ina tseya shoka tashi mu adha komeho.
2 Ayihe oyi thike pamwe kwaayehe. Oshipewa shimwe ashike komuyuuki nokomukolokoshi, komwaanawa nokomwiinayi, komuyogoki nokomwiinyateki, kungoka ta yamba omayambo nokungoka itaa yamba omayambo; omwaanawa ke vulathane nomulunde, naangoka ta gana oha ningwa ngaashi ngoka a tila egano.
3 Mwaayihe tayi ningwa kohi yetango, omu na oshiponga shika: ayehe oye na oshipewa shimwe noomwenyo dhaana yaantu odhu udha uuwinayi nomitima dhawo uugoya mokukalamwenyo kwawo akuhe; navulwa taa yi koonakusa!
4 Onkene tuu ngoka e li mokati kaanamwenyo, oku na ngaa etegameno, oshoka ombwa yi na omwenyo oyi vule onime ya sa.
5 Oshoka aanamwenyo otaa tseya kutya oye na okusa, ihe aasi itaa tseya sha nando, nokaa na we ondjambi yasha, oshoka ondhimbulukilo yawo otayi dhimbiwa.
6 Ohole yawo, uutondwe wawo nuulaadhi wawo owa kana nale nokuli, nokaa na we sha mumbyoka tayi ningwa kohi yetango.
7 Inda ano, lya oshikwiila shoye nenyanyu nou nwe omaviinu goye nomutima gwa tundulukwa, oshoka Kalunga okwa hokwa nale iilonga yoye.
8 Tokitha aluhe oonguwo dhoye, nomugwayo inagu pumba ko komutse gwoye.
9 Nyanyudha omwenyo gwoye namukadhoye, ngoka u mu holelele omasiku goye agehe ganathangwa ngoka Kalunga e ku pa kohi yetango — omasiku goye agehe ganathangwa, oshoka osho oshipewa shoye mokukalamwenyo nomiilonga yoye mbyoka to yi longo nuudhigu kohi yetango.
10 Longa ashihe to vulu niikaha yoye, shi longa noonkondo dhoye, oshoka kaku na iilonga, ompangela, uunongo nenge owino moshaasi, moka noka ya mo.
11 Naishewe kohi yetango onda mono ko kutya esindano mokumatuka kali li aluhe mepangelo lyaamboka ye na ontuku, iita hayomapenda, oshikwiila hashaanawino, uuyamba hawaanandunge nolupundi halwoonkulungu, oshoka ethimbo neuthilo otali adha ayehe.
12 Eeno, omuntu ina tseya ethimbo lye mwene ngashika oohi ndhoka dha yulwa monete yoshiponga nenge oondhila ndhoka hadhi yulwa moomwigo. Osho wo aana yaantu otaa yulwa methimbo lyoshiponga, nge taa gwile mo ohaluka.
13 Naashika onde shi tala kohi yetango osho uunongo, nosha li oshinene momeho gandje:
14 Okwa li okalando okashona naalumentu aashona ya li mo. Omukwaniilwa omunene okwe ka matukile, e ka kondeke e te ka tungile etuni lyokukondekela.
15 Muko omwa li omulumentu ohepele, ihe omunawino; nguka okwa hupitha okalando nowino ye. Ihe kaku na we omuntu a dhimbulukwa omulumentu ngwiyaka ohepele.
16 Nena onda ti: Owino oyi vule oonkondo dhoofule, ihe owino yohepele oya dhinika, noohapu dhe itadhi pulakenwa.
17 Oohapu dhaanawino dha pulakenwa nengungumano, odhi vule omagandagulo gomukwaniilwa mokati komagoya.
18 Owino oyi vule omatati golugodhi, ihe omulunde gumwe ota yono po uuwanawa owindji.
1 Oondhi dha sa otadhi oleke nokumbutika omugwayo gwomupiluli; uusama uushona ou na ondjundo yi vule omayele nesimano.
2 Omwenyo gwomunawino ogwa gama kolulyo, ihe omutima gwomusama okolumoho.
3 Eeno, omugoya ngele te ende mepola, oondunge otadhi mu pumbu, noti ihololele shaa ngoka kutya ye egoya.
4 Ondjahi yomukwaniilwa ngele tayi ku hwamene, ino etha iilonga yoye, oshoka engungumano otali sindi omapuko omanene.
5 Oku na epuko limwe nde li koneke kohi yetango, ombedhi ndjoka tayi zi komupangeli:
6 aasama taa yelwa pombanda unene, naayamba taa shonopekwa.
7 Onda mono aapika ya kayila uukambe, naawa taye ende kolupadhi ya fa aapika.
8 Ngoka ta fulu ekelo, ota vulu okugwila mo; ngoka ta kumuna ekuma, ota lika keyoka.
9 Ngoka ta tandula omamanya, ote ehamekwa kugo; ngoka ta panda iikuni, ota tosholwa iilalo kuyo.
10 Ngele ekuya olya simpa, nomuntu ite li upike, nena nge te li longitha, ota hepeke oonkondo; ihe omunawino ote li upike.
11 Eyoka ngele tali li omuntu, manga inaali nonomwa, nena uunkulungu womunonomi kau na we oshilonga.
12 Oohapu dha za mokana komunawino, odha simana, ihe omilungu dhomugoya otadhi mu nina po ye mwene.
13 Etameko lyoohapu dhomokana ke olyo uugoya, nehulilo lyokupopya kwe uulayi wa pitilila.
14 Egoya ohali popyagana omahapu ogendji, ihe omuntu ito tseya shoka tashi ka ningwa naashoka tashi ka kala ko konima ye nolye te ke mu lombwela shika.
15 Uupyakadhi womugoya otau mu lolokitha, oshoka ita tseya nokuli okuya koshilando.
16 Yaye shilongo ngoye, omukwaniilwa ngele okanona, nomalenga goye haga menekele omatelekela ongulangula!
17 Omunelago shilongo ngoye, ngele omukwaniilwa gwoye omunedhina, nongele omalenga goye haga ningi iituthi pethimbo lyo opala pashilumentu nohangaashi oonkolwi.
18 Omoluunyenge omitenge dhongulu otadhi teka po, nomoluunyolowe ongulu tayi kala yi na oontongo.
19 Iitelekela ohayi telekelwa okunyanyudha, omaviinu haga hangelwa okushambudha omwenyo; ihe iimaliwa ohayi eta po ayihe.
20 Omukwaniilwa ino mu tuka nando omomadhiladhilo goye, nomondunda yoye yokulala ino tuka omuyamba, oshoka oondhila dhokegulu otadhi fala ewi lyoye, niikwamawawa tayi holola oohapu dhoye.
1 Umbila oshikwiila shoye kombanda yomeya, oshoka nge pwa piti omasiku ogendji, oto ke shi monununa.
2 Oshitopolwa shi pa ooheyali, eeno, oohetatu wo, oshoka ino tseya oshiponga oshini tashi ka kala kombanda yevi.
3 Iikogo ngele oyu udha, omvula otayi lokele kevi. Omuti ngele otagu gwile lwokuumbugantu nenge lwokuumbangalantu, otagu lala pehala tuu mpoka gwa gwile.
4 Oongoka ha tala ombepo, ita kunu; naangoka ha tala iikogo, ita teya.
5 Ngaashi ino tseya ondjila yombepo, nenge nkene omasipa taga tungwa mela lyomusimba, osho wo ino tseya iilonga yaKalunga, ngoka a longo ayihe.
6 Kuna oombuto dhoye ongula, ngoye ino vululukitha wo iikaha yoye komatango, oshoka ino tseya, oyini po tayi ka mena, oondjika nenge oondjiyaka, nenge adhihe mbali tadhi ka mena.
7 Uuyelele owo uutoye, nosho opalela omeho okutala etango.
8 Oshoka omuntu nge ta kala e na omwenyo omule omimvo odhindji, oku na okwiinyanyudha mwaadhihe e ta dhimbulukwa omasiku gomilema, kutya otaga ka kala ogendji. Ayihe mbyoka tayi ya, oyowala, owaleelela.
9 Mugundjuka ngoye, nyanyukwa muugundjuka woye, nou nyanyudhe omutima gwoye momathimbo guugundjuka woye. Enda momapola gokomutima gwoye nomokuligamena kwomeho goye, ihe kala u shi shi kutya Kalunga ote ke ku etela ayihe mbika mepangulo.
10 Tidha mo oshizimbi momutima gwoye nou kaleke uuwehame kokule nolutu lwoye, oshoka uugundjuka osho owala osho owala, owaleelela.
1 Dhimbulukwa Omushiti gwoye momasiku guugundjuka woye, manga omasiku guudhigu inaage ya nomimvo inaadhi hedha ko, uuna to ka popya to ti: “Inandi dhi hokwa.”
2 Momasiku ngoka etango, omutenya, omwedhi noonyothi otadhi ka kala dha luudha, niikogo ohayi galuka konima yomvula.
3 Omasiku ngoka aalangeli yegumbo taa ka kakama, aalumentu aanankondo taa andalalithwa, aatsi taa zimbuka, oshoka oya ninga po aashona, naamboka taye entamene momakende taa kala momilema.
4 Omasiku ngoka omiyelo dha taalela omapandaanda, otadhi ka kala dhe edhilwa po, omuthindo gwokoshini ogwa shonopala, omuntu ota penduka po, ngele uudhila opo tau tameke okulila, nomawi agehe oga gogoma.
5 Omuntu ota kala a tila momitunda, nomondjila omu na iihaluthi. Omuti omumandeli tagu tsapuka oonsheno, oshipethipethi tashi ende tashi gaganyata, noonkuto dhoshihwa shokaperi itadhi eta we uuhalu wokulya. Omuntu ota yi kegumbo lye lyaaluhe, naalilasa taye endaenda momapandaanda.
6 Ongodhi yoshisiliveli otayi tokoka, noshiyuma shoshingoli otashi tatuka. Oshiyuma shomeya otashi tatukile pomuthima, noshikweyitho otashi gwile monyombo.
7 Ontsi otayi shuna mevi, ngaashika ya li nale, nombepo otayi galukile kuKalunga, ngoka e yi gandjele.
8 Ayihe oyowala, omuuvithi ota ti, ayihe oyowalawala, owaleelela.
9 Omuuvithi ka li ashike omunawino, okwa longo wo aantu uunongo, okwa dhiladhila e ta konakona, okwa tungu omayeletumbulo ogendji.
10 Omuuvithi okwa kongo a mone oohapu dho opala nodha nyolwa dhu uka, oohapu dhoshili.
11 Oohapu dhaanawino odha fa iishongitho nomatumbulo gawo oomboha dha dhengelwa muule; oga gandjwa kOmusita gumwe awike.
12 Naishewe, mumwandje, londodhwa kushika: okunyola omambo ogendji ihaku hulu, nokwiipyakidhila nokulesha unene ohaku lolokitha olutu.
13 Ekota lyaashihe shu uvika, olyo ndika: Tila Kalunga nou dhiginine iipango ye, oshoka aantu ayehe osho ye na okuninga.
14 Oshoka Kalunga ote eta iilonga ayihe mepangulo, ndyoka tali adha iinima ayihe ya holekwa, iiwanawa nenge iiwinayi.