1 Aanelago oomboka ihaaya landula oondunge dhaagoyoki, ihaa holele iilonga yaalunde yo ihaa kala pamwe naashekedhi.
2 Ndele ohaa nyanyukilwa okuvulika kompango yOmuwa nohaye yi ilongo omutenya nuusiku.
3 Oyo ya fa omiti dha mena mooha dhomatondokelo gomeya, hadhi imi pethimbo lyu uthwa, nomafo gadho ihaga ganya. Ashihe shoka taye shi longo otashi eta eyambeko.
4 Aakolokoshi hasho ye li ngeyi; oya fa etutu tali falafalwa kombepo.
5 Aalunde otaa ka tsakaneka epangulo lyaKalunga e taa ka yoololwa mo maantu yaKalunga.
6 Aayuuki otaa wilikwa notaa gamenwa kOmuwa, ihe ondjila yaagoyoki oyu uka mekano.
1 Omolwashike iigwana ya ngundumana? Aantu mbano otaa kondjitha shike ano?
2 Aakwaniilwa yuuyuni oya kulumana, naapangeli oyi imanga kumwe okukondjitha Omuwa nomukwaniilwa omuhogololwa gwe notaa ti:
3 “Ileni, tu imangululeni, tu umbe ko ondjoko yawo koothingo dhetu.”
4 Omuwa ngoka a kala megulu, ote ya yolo note ya nyenkele.
5 Nena te ya popitha nomagandambadhi nomondjahi ye te ya shoshomeke e ta ti:
6 “Ongame nde mu gwayeke a ninge omukwaniilwa gwandje kuSion, ondundu yandje ondjapuki.”
7 Onda hala ndi hokolole shoka Omuwa e shi popi. Oye a tile: “Ongoye omumwandje, okuza nena ndjika ongame ho.
8 Indila ndje, ngame notandi ku pe iigwana uuthiga, evi alihe notali ningi eliko lyoye.
9 Oto ke yi pangela noshikaha shoonkondo e to yi tatagula ngiikangwa yeloya.”
10 Pukulukeni, ne aakwaniilwa; londodhweni, ne aapangeli yevi.
11 Longeleni Omuwa netilo; kakameni, ne mu nyongame koshipala she,
12 ondjahi ye opo kaayi mu hwamene, nane e tamu si po ombaadhilila. Aanelago oomboka haa kongo egameno puye.
1 Omuwa, aatondi yandje oyendji ngiini, oyendji ngiini, mbo ya hala okukondjitha ndje!
2 Oyo taa popi ndje taa ti: “Kalunga ite mu kwatha sha!”
3 Ihe Omuwa, ongoye to gamene ndje aluhe kiiponga; oho pe ndje esindano noho tsu ndje omukumo.
4 Ngame ohandi pula Omuwa ekwatho, ye nohu uvu egalikano lyandje kondundu ye ondjapuki.
5 Ngame onda lala e te kotha, Omuwa nota gamene ndje uusiku auhe.
6 Ngame ite tila aatondi yomayuvi ogendji, mboka ya kondeka ndje koombinga adhihe.
7 Ila, Omuwa! Hupitha ndje, Kalunga kandje! Ongoye to sindi aatondi yandje ayehe e to ya thigi yaa na we oonkondo dhokuhepeka ndje.
8 Omuwa, ngoka ha gandja esindano, na yambeke aantu ye!
1 Ngele tandi ku ithana, pe ndje eyamukulo, Kalunga, omupopili gwandje. Sho nda li muudhigu, owa kwatha ndje. Sila ndje ohenda, ngoye u uve egalikano lyandje.
2 Aantu ne, sigo uunake tamu kala nokusheka ndje? Sigo uunake, tamu kala mu hole iinima yaa na ekwatho, notamu landula iifundja?
3 Dhimbulukweni kutya Omuwa okwi ihogololele omuyuuki, notu uvu ndje, sho tandi mu ithana.
4 Tileni Omuwa, ne inamu yona; dhiladhileni nawa oshinima shika, uuna mwa lala moondunda dheni.
5 Eteleni Omuwa omayambo ngoka e ga hokwa, ne mu mu inekele.
6 Oku na oyendji taa indile: “Omuwa, tu pa natango omayambeko, tu tala onteni!”
7 Ihe enyanyu ndyoka wa pe ndje, oli vule lyaamboka ye na iilya oyindji nomaviinu.
8 Ngele tandi ka lala, otandi kotha nombili. Omuwa, ongoye awike to gamene ndje, ndi kale ndaa na nando ombudhi yasha.
1 Omuwa, pulakena sho tii ku lombwele, ngu u uve omakemo gandje.
2 Uva ndje, sho te pula ekwatho, Kalunga kandje, omukwaniilwa gwandje. Otandi ku indile, Omuwa;
3 ongula onene oto uvu ewi lyandje; pepito lyetango otandi ku etele eindilo lyandje notandi tegelele, u yamukule ndje.
4 Ngoye ku shi Kalunga ngoka ha nyanyukilwa uuwinayi; uukolokoshi ito u ethele po pungoye.
5 Ito vulu okwiidhidhimikila aayitumbaleki; ou tonde ayehe mboka haa longo uukolokoshi.
6 Ongoye to hanagula po aaniifundja ayehe; aadhipagi naagwaaleki oto ya nyanyala.
7 Ihe ngame molwohole yoye onene ondi na ompito okuya mongulu yoye ondjapuki ote pitikwa oku ku simaneka noku ku tsila oongolo nuutile.
8 Omuwa, ondi na aatondi oyendji! Wilika ndje, ndi longe ehalo lyoye; ulukila ndje ondjila yoye, ndi ende nayo.
9 Oohapu dhaatondi yandje kadhi shi kwiinekelwa; oya hala owala okuhanagula. Oohapu dhawo, odhi na omuheka nomuthenu, ihe odhu udha omakoto omawinayi
10 Kalunga, ya pa uusama, ngu u ya pangule; iineya yawo nayi ya etele omupya. Omolwoondjo dhawo odhindji nomolwondumbo yawo nangoye ya tidha po pungoye.
11 Naa nyanyukwe ayehe mboka haa kongo egameno pungoye; otaa ki imba aluhe oondjimbo dhenyanyu. Gamena mboka ye ku hole; omolwoye oye na shili elago.
12 Omuwa, ongoye ho yambeke mboka haa vulika kungoye; ohole yoye oyo oshikandekitho tashi ya gamene.
1 Omuwa, ino geela ndje wa sa ondjahi! Ino dhenga ndje wa geya!
2 Sila ndje ohenda, Omuwa, oshoka onda sa uunkundi! Koleka ndje, oshoka onda loloka nayi
3 nondi na uudhigu uunene mokukala kwandje akuhe. Omuwa, sigo uunake to kala inoo kwatha ndje?
4 Ila, u hupithe ndje, Omuwa; kutha ndje meso omolwesilohenda lyoye.
5 Mehala lyaasi omuntu ite ku dhimbulukwa, nokamu na ngoka te ku hambelele.
6 Ngame onda dhengwa kuuwehame; kehe uusiku ombete yandje oya tuta kokulila kwandje, nontala yandje otayi hiha omahodhi.
7 Kandi wete ko nawa; omeho gandje oga zinda kokulila omolwaatondi yandje.
8 Zii po pungame, ne aakolokoshi! Omuwa otu uvu okulila kwandje;
9 ota pulakene okwiigidha kwandje nota zimine eindilo lyandje.
10 Aatondi yandje ayehe otaa ka mwenekwa e taa sithwa ohoni; otaa ka tidhwa po mepiyagano lyohaluka.
1 Omuwa, Kalunga kandje, otandi ya kungoye okukonga egameno; hupitha ndje, ngu u yululule ndje miikaha yaatidhagani yandje,
2 yaa fale ndje nokutuulagula ndje ngaashi onkoshi nokaku na ngo ta hupitha.
3 Omuwa, Kalunga kandje, ando nda li nda ningile gumwe uuwinayi, nde enda mevi kuume kandje nenge nda sila ohenda omutondi gwandje pwaa na etompelo — ngele onda longa ayihe mbika,
4
5 nena ando oshu uka, u ethe aatondi yandje ya lambe ndje noya kwate ndje, ya thepule ndje noya dhipage ndje e taa thigi ndje nda sa.
6 Thikama, Omuwa, u geele ongeyo yaatondi yandje; tonata, u kwathe ndje Oto pula, uuyuuki u gwanithwe;
7 gongela ano aantu ayehe, ye ku kundukidhe e to ya pangele u li kombanda.
8 Ongoye omupanguli gwaantu ayehe. Omuwa, uthila ndje okwaanuusama; owa tseya kutya kandi na uusama.
9 Ongoye Kalunga omuyuuki noto pangula omadhiladhilo nomahalo getu. Hulitha po uukolokoshi waagoyoki, ngu u fute mboka taa longo uuwanawa.
10 Kalunga oye omugameni gwandje; oye ta hupitha mboka haa vulika kuye.
11 Kalunga oye omupanguli omuyuuki nota geele aakolokoshi.
12 Ngele itaa itedhulula, Kalunga otu upike egongamwele lye. Oye ta leve uutati we e te u lukile;
13 ota kutha iikondjitho ye hayi dhipaga noto odheke niikuti ye ya hwama omulilo.
14 Aakolokoshi otaa dhiladhila oku ka longa uuwinayi; otaa ningi oompangela dhuukolokoshi nodhiifundja.
15 Ihe momakelo ye ga fulile yakwawo, otaa gwile mo yo yene.
16 Onkee oya pilukilwa kuuwinayi wawo yene noya lulumikwa kuupwidhi wawo yene.
17 Ihe ngame otandi pandula Omuwa, sho ha longo pauyuuki, notandi imbile Omuwa gwokombandambanda.
1 Omuwa, Omuwa gwetu, edhina lyoye olya simana ngiini muuyuni auhe! Oto hambelelwa sigo okombanda yomagulu;
2 to imbilwa kuunona nokuuhanona. Owi ikaleka kokule naatondi yoye; oto mweneke kehe ngoka a tsa ondumbo nangoye.
3 Ngele te tala kegulu ndyoka we li shiti, komwedhi noonyothi mbyoka we yi uthile omahala gayo —
4 Omuntu omushike, sho ho mu dhimbulukwa; omushamba gwowala, u na oshimpwiyu naye?
5 Omuntu we mu shiti e vulike ashike kungoye mwene; owe mu zaleke eadhimo nesimano.
6 Owe mu ningi omupangeli gwaayihe we yi shiti; eshito alihe owe li tula melelo lye:
7 oonzi noongombe nosho wo iiyamakuti:
8 oondhila noohi niinamwenyo yomefuta.
9 Omuwa, Omuwa gwetu, edhina lyoye olya simana ngiini muuyuni auhe!
1 Omuwa, otandi ku hambelele nomwenyo gwandje aguhe; otandi hokolola iikumithalonga ayihe we yi longa.
2 Otandi imbi nda nyanyukwa omolwoye. Otandi ku imbile eimbilo, Kalunga Omunankondoawike.
3 Ngele to holoka, aatondi yandje otaa shuna lwaanima; otaa ihata po e taa si.
4 Ongoye omupanguli omuyuuki nomunashili; owu uthile ndje okwaanuusama.
5 Owa geele aapagani nowa yono po aakolokoshi, noitaa ka dhimbulukiwa we.
6 Aatondi yetu oya kana po sigo aluhe; owa hanagula po iilando yawo, noya dhimbiwa thilu.
7 Ihe Omuwa oye omukwaniilwa sigo aluhe; oye e na oshipundi she shokupangulila.
8 Oye ta pangele uuyuni nuuyuuki; ota pangula iigwana paushili.
9 Omuwa oye eholameno lyaathiminikwa; oye epopilongulu momathimbo guudhigu.
10 Omuwa, mboka ye ku shi, otaye ku inekele; iho etha nando ogumwe ngoka te ya kungoye.
11 Hambeleleni Omuwa, omupangeli muSion! Hokololeleni oshigwana kehe iilonga ye!
12 Kalunga oha dhimbulukwa mboka taa ehamekwa; iha dhimbwa okulila kwawo noha geele mboka haye ya ningile uuwinayi.
13 Omuwa, sila ndje ohenda! Tala, nkene aatondi yandje taa hepeke ndje! Omuwa, hupitha ndje meso,
14 opo ndi vule okuthikama komeho gAajerusalem noku ya hokololela ayihe kutya omolwashike tii ku hambelele. Otandi nyanyukwa, oshoka owa hupitha ndje.
15 Aapagani oya fulu elambo e taa gwile mo; oya tege omwigo e tagu ya yulu yo yene.
16 Omuwa okwi iholola momapangulo ge omayuuki; aakolokoshi oyi iyulitha kiilonga yawo.
17 Eso olyo ethikilo lyaakolokoshi ayehe, olyaayehe mboka taa etha Kalunga.
18 Aanaluhepo itaa kala ye ethiwa aluhe; etegameno lyaathiminikwa itali teywa po sigo aluhe.
19 Ila Omuwa, ino etha aantu ya kale mekuni. Gongela aapagani koshipala shoye, u ya pangule.
20 Omuwa, ya tilitha; yu ulukila, ya tseye kutya otaa hulu po.
1 Omuwa, omolwashike wa kala kokule? Omolwashike wa holama pomathimbo guudhigu?
2 Aakolokoshi oyo aainenepeki nohaa tidhagana oohepele; naa yulwe koomwigo ye dhi tega yo yene.
3 Omukolokoshi oti itangele uuhalu we uuwinayi; omunyokomi ota sheke e ta dhini Omuwa.
4 Omukolokoshi ke na ko nasha nOmuwa; mokwiinenepeka kwe ota dhiladhila kutya Kalunga ita kwatha sha.
5 Omukolokoshi ota tsakanitha ashihe shoka te shi ningi. Omapangulo gaKalunga ita vulu oku ga uva ko; aatondi ye okwe ya nyonkele.
6 Oye ti ilombwele ta ti: “Itandi ka adhika komupya; itandi ka adhika nando okuudhigu washa.”
7 Oohapu dhe odhu udha omasheko, iifundja nomatilitho; oku na oohapu dhuutondwe nuukolokoshi.
8 Oye ha langele aantu momikunda, a dhipage mboka inaaya yona sha. Oye ta ndaadha mboka itaaya vulu okwiikwatha;
9 ota langele moshiholameno she ngaashi onkoshi. Oye ta lala a langela oonakuhepa; ote ya yulu nomwigo gwe e ta yi nayo.
10 Omapongo otaga lala ga dhengwa; oonkondo oonkolokoshi odhe ga sindi.
11 Omukolokoshi oti ilombwele ta ti: “Kalunga ke na ko nasha nasho! Okwa thithikilitha omeho ge noita mono ndje!”
12 Omuwa, geela aakolokoshi mbo! Dhimbulukwa mboka taa hepekwa!
13 Omukolokoshi ota vulu ngiini okudhina Kalunga, a tye: “Kalunga ita geele ndje?”
14 Ihe ngoye Kalunga ou wete ayihe; owa tseya uuwehame nomahepeko nowi ilongekidha aluhe okukwatha. Epongo otali igandja kungoye; oho kwatha aluhe aanaluhepo.
15 Hanagula po oonkondo dhaakolokoshi nodhaapwidhi; ya geelela uuwinayi wawo sigo itaa shi ningi we.
16 Omuwa oye omukwaniilwa aluhe sigo aluhe. Aasimaneki yiikalunga otaa ka kana mo moshilongo she.
17 Ngoye Omuwa oto ka pulakena omagalikano gaafupi; oto ke ya tsa omukumo.
18 Oto ku uva okulila kwaathiminikwa nokwoothigwa; oto ke ya uthila pauyuuki, opo oonakukasa yaa longe iihuna.
1 Ngame otandi inekele Omuwa, a gamene ndje. One aagoya ngiini, sho tamu lombwele ndje: “Tukila koondundu wa fa okadhila,
2 oshoka aakolokoshi otaa lukile omatati notaa pameke iikuti moonkandja, ya yahele aayuuki momilema.
3 Omuyuuki ita vulu okuninga sha, uuna ku na epiyagano.”
4 Omuwa oku li motempeli ye ondjapuki; oshipangelapundi she oshi li megulu. Oye a tala kaantu ayehe nokwa tseya shoka taa longo.
5 Aayuuki naakolokoshi ote ya konakona shi thike pamwe; oku tonde unene ookakombwiilitha.
6 Aakolokoshi ote ya lokithile omakala gomulilo nosulufuli; ote ya geele noku ya pepithila ombepo ompyu.
7 Omuwa oye omuyuuki noku hole iilonga iiwanawa; mboka haa longo uuwanawa, otaa ka kala puye.
1 Omuwa, tu kwatha! Aayuuki inapu thigwa nando ogumwe; itaku monika we mboka haa kala moshili.
2 Aantu ayehe otaa lombwelathana iifundja; otaa mbembelekathana moohapu.
3 Omuwa, mweneka omalaka giifundja! Mutika omakana haga popi uuntsa taga ti:
4 “Oohapu dhetu otadhi tu etele shoka twa dhiladhila. Otatu popi shoka twa hala, nokaku na gumwe ta vulu oku tu mweneka.”
5 “Ihe ngashingeyi otandi ya,” Omuwa osho ta ti, “oshoka omapongo oga thiminikwa naatidhaganwa otaa tongo kuuwehame. Otandi ke ya pa egameno ndyoka ye li yuulukwa.”
6 Omauvaneko gOmuwa oge shi kwiinekelwa; oga yela ga fa oshisiliveli sha yelithwa momulilo luheyali.
7 Aakolokoshi oye li apehe nakehe gumwe ota tanga shoka oshiwinayi. Omuwa, tu gamena aluhe, ngu u tu keelele kaantu ya tya ngeyi.
1 Omuwa, sigo uunake to dhimbwa ndje? Sigo aluhe? Sigo uunake to holama ndje?
2 Osigo uunake ndi na okwiidhidhimikila uudhigu? Sigo uunake iimpwiyu yu udha momutima gwandje, omutenya nuusiku? Sigo uunake aatondi yandje taa nyanyukilwa oluhepo lwandje?
3 Omuwa, Kalunga kandje, tala ndje e to yamukula ndje. Shunithila ndje oonkondo; ino etha, ndi se.
4 Ino etha, aatondi yandje ya tye: “Ngashingeyi otwe mu sinda!” Ino ya etha, ya nyanyukilwe okugwilapo kwandje.
5 Ngame ondi inekela ohole yoye; otandi nyanyukwa, sho to hupitha ndje.
6 Omuwa, otandi ku imbile, oshoka owa ningile ndje uuwanawa.
1 Aagoya otaa ilombwele taa ti: “Kaku na Kalunga!” Aantu mbaka oya shunduka noya longo iisithahoni; kaku na nando ogumwe ta longo uuwanawa.
2 Omuwa oku li megulu noto ontamene aantu kombanda yevi, opo a tale, ngele oku na omunandunge nongele oku na nando ogumwe te mu simaneke.
3 Ihe ayehe oya puguma; ayehe oya yonana. Kaku na nando gumwe ta longo shoka shi li mondjila, nando ogumwe.
4 “Aakolokoshi mbaka inaye shi tseya nani?” Omuwa ta pula. “Oyo haa hupu mokuyuga aantu yandje yo ihaa galikana ndje.”
5 Oyo taa ka adhika kehaluko enene, oshoka Kalunga okwa gama kumboka haa vulika kuye.
6 Aakolokoshi ohaa shunitha monima oompangela dhomwiifupipiki, ihe Omuwa oye omugameni gwe.
7 Ando muSion mu zile Israel ekwatho! Uuna Omuwa ta ka hepulutha natango aantu ye, nena Aaisraeli otaa ka nyanyukwa ngiini!
1 Omuwa, olye ta pitikilwa okuya motempeli yoye? Olye ta pitikilwa okugalikanena kondundu yoye ondjapuki Sion?
2 Omuntu ngoka ha vulika kuKalunga miinima ayihe noha longo shoka shu uka; ngo ha popi oshili ye ke na omakoto,
3 naango ihaa lundile mukwawo. Oye iha ningile ookuume ke uuwinayi ye iha hokola aashiinda ye.
4 Oye ha dhini mboka ye ethiwa kuKalunga, ihe oha simaneke mboka haa vulika kOmuwa. Oha gwanitha shoka e shi uvaneka nonando oshi mu fale muudhigu.
5 Iimaliwa ye ihe yi pulile ontanitho ye iha taamba oombumbo, opo a pe uusama ngoka inaa yona sha. Omuntu ngoka ha ningi ngeyi, ota ka kala aluhe e li nawa.
1 Kalunga, gamena ndje; ngame onde ku inekela.
2 Ngame onda ti kOmuwa: “Ongoye Omuwa gwandje; iinima ayihe iiwanawa mbyoka ndi na, ohandi yi pewa kungoye.”
3 Aantu mboka haa inekele Omuwa, otaa kala ye li nawa! Ngame onde ya hokwa unene.
4 Ayehe mboka taa landula iikalunga, otaa iyetele uudhigu owindji. Ngame itandi ka gandja omayambo pamwe nayo; itandi ka galikana iikalunga yawo.
5 Omuwa, ongoye awike eliko lyandje noho pe ndje ashihe shoka nde shi pumbwa; omwenyo gwandje ogu li miikaha yoye.
6 Omagano goye oga kumitha ndje ngiini; onda panda oombalagelo dhoye.
7 Ngame ote hambelele Omuwa, oshoka oye ha wilike ndje, nomuusiku eiyuvo lyandje ohali londodha ndje.
8 Aluhe ondu uvite, Omuwa e li ndje popepi; oku li popepi, nokaku na shoka tashi hindi ndje.
9 Onkee ano ondu uvite uunelago nonda nyanyukwa, nondu uvite ndi li megamenolela
10 oshoka oto gamene ndje, ndaa tonwe koonkondo dheso, nomuntu gwoye omuholike ito mu ethele moshaasi.
11 Ongoye to tseyithile ndje ondjila yomwenyo; pungoye opu na enyanyu lyandje nuunelago wandje sigo aluhe.
1 Omuwa, pulakena ndje; sho te indilile uuyuuki; gameka okutsi kwoye kokulila kwandje! Pulakena, sho tandi ku indile nomwenyo gu uka.
2 Oto uthile ndje okwaanuusama, oshoka ou shi shoka shu uka.
3 Ongoye wa tseya omutima gwandje, oho ya kungame uusiku; owa konakona ndje nawa, ihe ino mona ndje uuwinayi.
4 Ihandi popi uukolokoshi, ngaashi yalwe haa ningi; onda dhiginine okulandula omautho goye, noinandi landula oondjila dhuupwidhi.
5 Onda dhiginine okweenda mondjila yoye, noonkatu dhandje inadhi puguma mo.
6 Kalunga, otandi ku galikana, oshoka oto uvu ndje; gameka okutsi kwoye kungame, u pulakene oohapu dhandje.
7 Holola ohole yoye onkumithi, ngu u tu hupithe; opungoye tatu holama aatondi yetu.
8 Gamena ndje ongomuni yeho lyoye; holeka ndje momuzile gwomawawa goye,
9 ndaa adhike komahomono gaakolokoshi. Aatondi yandje aadhipagi ohaa kondeke ndje;
10 oyo kaye na olukeno notaa popi oohapu dhiilundo.
11 Ngashingeyi oya kondeka ndje koombinga adhihe ya tega ompito yokunukila ndje.
12 Oyo taa langele ndje ya fa onime ya hala okutuulagula ndje.
13 Ila, Omuwa, kondjitha aatondi yandje, u ya sinde! Hupitha ndje miikaha yaakolokoshi negongamwele lyoye;
14 hupitha ndje mwaamboka ye na ashihe shoka ya pumbwa muuyuni mbuka. Ya geela nuudhigu mboka we ya pungulila. Egeelo nali gwanene oyana ko naku kale lyaana yoyana yawo.
15 Ihe ngame otandi ke ku mona, oshoka inandi longa sha sha puka; nongele te penduka, okukalapo kwoye otaku nyanyudha ndje.
1 Omuwa, ondi ku hole ngiini! Ongoye omupopili gwandje.
2 Omuwa oye omugameni gwandje; oye epopilongulu lyandje lya kola. Kalunga kandje oye omugameni gwandje, puye ondi li nawa. Oye oshikandekitho tashi gamene ndje; ota shigi ndje e ta kaleke ndje nawa.
3 Otandi ithana Omuwa, oye nota gamene ndje kaatondi yandje. Omuwa na hambelelwe!
4 Oshiponga sheso osha kundukidha ndje; omakuthikuthi geyonuuko oga gwilile ndje po.
5 Oshiponga sheso osha dhingilila ndje, noshilambo shombila oshe ekamena ndje.
6 Muudhigu wandje ondi ithana Omuwa; ondi ithana Kalunga kandje, a kwathe ndje. Oku uvu ewi lyandje motempeli ye; okwa pulakene okulilila kwandje ekwatho.
7 Nena evi olyi inyenge e tali kakama; omakota goondundu oga tanduka e taga kakama, oshoka Kalunga okwa li a geya.
8 Olwithi olwa gundumuka momayulu ge, omalaka gomulilo nomakala ga hanya oga zi mokana ke.
9 Okwa tuula eyalelo e ta kulukile pevi noshikogo oshiluudhe kohi yoompadhi dhe.
10 Okwa tuka nondapo onene a kayila omukerubi; okwe ende komawawa gombepo.
11 Okwi ikumbikile momilema; iikogo iiluudhe yu udha omeya, oye mu kundukidha.
12 Oompawe nomashelo gomulilo oya zi meadhimo lyoshipala she noya mbanduka miikogo iiluudhe.
13 Nena Omuwa, okwa ndunduma mewangandjo; ewi lyagwokombandambanda olyu uvika.
14 Oku umbu iikuti ye, aatondi ye e taa halakana; nomashelo goombadhi okwe ya halakanitha po.
15 Ondandelo yefuta oya mbenzuka ko, nomakankameno gevi oge ya pontundulu, Omuwa, sho wa ganda aatondi yoye nowe ya ndundumine mondjahi.
16 Omuwa okwa ganeke okwooko kwe e ta kwata ndje; okwa hili ndje mo mombwili yomeya.
17 Oye a hupitha ndje maatondi yandje aanankondo nomwaayehe mboka haa tondo ndje — oyo ya tono ndje oonkondo.
18 Sho nda li moshiponga, oya ponokele ndje, ihe Omuwa okwa gamene ndje.
19 Oye a pititha ndje moshiponga; okwa hupitha ndje, oshoka okwa hokwa ndje.
20 Omuwa ota futu ndje, oshoka ohandi longo shoka shu uka; ota yambeke ndje, oshoka ine yona sha.
21 Onda vulika kompango yOmuwa; inandi pilamena Omuwa gwandje.
22 Onda dhiginine iipango ye ayihe; inandi iteka omalombwelo ge.
23 Omuwa a tseya kutya kandi na uusama, nonda hala ndi ikeelela okulonga uuwinayi.
24 Nena ota futu ndje, oshoka onda longo shoka shu uka, oshoka oku shi shi kutya kandi na oondjo.
25 Omuwa, ongoye omwiinekelwa mokukalathana naamboka ye ku inekela; ngoye omwaanawalela kumboka yaa na oshipo shasha.
26 Ngoye omuyogoki kumboka aayogoki, ihe ou tonde aadhudhu.
27 Oto hupitha mboka haa ishonopeke, ihe oto shonopeke mboka ye hole uuntsa.
28 Omuwa, oto pe ndje uuyelele; oto tidha po omilema pungame.
29 Oto tsu ndje omukumo okuhomona aatondi yandje, noonkondo okusinda omaigameno gawo.
30 Kalunga oha longo nawa! Oohapu dhe odhi shi kwiinekelwa! Oye a fa oshikandekitho kumboka taa kongo egameno.
31 Omuwa oye awike Kalunga; Kalunga oye awike omupopili gwetu.
32 Oye Kalunga ngoka ta koleke ndje, ngoka ta gamene ndje mondjila.
33 Ota koleke oompadhi dhandje, ndi tondoke ngompundja; ota gamene ndje, ngele tandi ende koondundu.
34 Ota longo ndje olugodhi, opo ndi longithe omatati ngo ga kola.
35 Omuwa, ongoye to gamene ndje e to hupitha ndje; esiloshimpwiyu lyoye olya nenepekitha ndje, noonkondo dhoye odha gamene ndje.
36 Owa gamene ndje, ndaa yiwe nangame, noine gwila po.
37 Otandi landula aatondi yandje e tandi ya kwata; itandi mwena, sigo nde ya thekeke po.
38 Otandi ya pundulile pevi, yo itaa vulu we okuthikama; oya gwile po nde ya sinda.
39 Oto pe ndje omukumo molugodhi, ndi sinde aatondi yandje.
40 Oto fafagulitha po aatondi yandje; otandi hanagula po mbo ye tonde ndje.
41 Otaa kugu onkugo, ihe kaku na nando ogumwe te ya kwatha; otaa ithana Omuwa, ihe ite ya yamukula.
42 Otandi ya nyanyagula po, e taa ningi ngaashi ontsi yevi, ndjoka tayi pepwa po kombepo. Otandi ya lyatagula ngaashi enono lyomondjila.
43 Owa hupitha ndje miikaha yaadhudhu nowa ningi ndje omupangeli gwiigwana; aantu nda li ndaa ya shi, oya ningi aalelwa yandje.
44 Aakwiilongo otaa tsile ndje oongolo; ngele te popi, otaa vulika.
45 Otaa tyololoka notaa zi moohote dhawo taa kakama.
46 Omuwa oku na omwenyo! Omupopili gwandje na hambelelwe! Uvitheni uunene waKalunga, omuhupithi gwandje.
47 Ota sinditha ndje aatondi yandje; iigwana ote yi tula mepangelo lyandje,
48 nota hupitha ndje miikaha yaatondi yandje. Omuwa, oto sinditha ndje aatondi yandje; oto gamene ndje miikaha yaapwidhi.
49 Onkee tandi ku simaneke mokati kiigwana; otandi ku imbile omahambelelo.
50 Kalunga ota gandja omasindano omakumithi komukwaniilwa gwe; ota holola ohole ye yaaluhe kungoka e mu hogolola, oDavid noluvalo lwe sigo aluhe.
1 Eyalelo otali holola esimano lyaKalunga; Ewangandjo otali eta puuyelele iilonga ye!
2 Esiku kehe otali shi tseyithile esiku tali landula; uusiku kehe otau shi endululile uusiku uukwawo.
3 Itaku popiwa nando etumbulo nenge oshitya ko kaku na ewi tali uvika kokutsi;
4 onkene tuu omahambelelo taga lundu kombanda yevi alihe, nomasimaneko taga uvika sigo okooha dhuuyuni. Etango Kalunga okwe li dhikile egumbo mewangandjo;
5 ongula kehe otali piti ko lya fa ombushiki a nyanyukwa, ngaashi enyakwa tali ihilile kuudhano.
6 Otali zi koluha lumwe lweyalelo e tali taakanene kolukwawo. Kaku na sha tashi vulu okuholama uupyu walyo.
7 Ompango yOmuwa kaku na we; otayi nyashula omuntu. Omalombwelo gOmuwa oge shi kwiinekelwa, taga gandja uunongo kumboka taa u pumbwa.
8 Iipango yOmuwa oyi li mondjila; naamboka haa vulika kuyo, otaa kala aanelago. Omalombwelo gOmuwa ogu uka notaga uvitha ko omadhiladhilo.
9 Okusimaneka Omuwa okuwanawa; otaku kala aluhe. Omapangulo gOmuwa ogu uka; kage na okatongo.
10 Ogo omawanawa unene ge vule oshingoli oshiyelele; ogo omatoye ge vule omagadhi goonyushi.
11 Ngame, omuntu gwoye, otaga longo ndje oondunge; okuvulika kugo oku na ondjambi.
12 Kaku na omuntu ta vulu okutseya omapuko ge; Omuwa, hupitha ndje momayono ga holama!
13 Gamena ndje wo, ndaa yone owina; ino etha, oondjo dhi tone ndje. Nena otandi ka kala nda yela nonda manguluka moondjo.
14 Omuwa, omugameni nomuhupithi gwandje, taamba oohapu nomadhiladhilo gandje!
1 Omuwa ne ku yamukule, uuna u li muudhigu! Kalunga kaJakob ne ku gamene!
2 Ekwatho lye nali ku ziilile motempeli ye. Eambidhidho lye nali ku ziilile kondundu Sion.
3 Na taambe omagano ngoka to mu etele ye na hokwe omayambo goye agehe.
4 Ne ku pe shoka wa hala ye na tsakanithe oompangela dhoye adhihe.
5 Nena otatu ka kolwa kenyanyu omolwesindano lyoye, nokupandeka ekandanga mokusimaneka Kalunga ketu. Omuwa na yamukule omaindilo goye.
6 Ngashingeyi ondi shi shi kutya Omuwa oha gandja esindano komukwaniilwa gwe omuhogololwa; ote mu yamukula e li megulu lye eyapuki nokoonkondo dhOmuwa, omukwaniilwa ota sindana.
7 Aantu yamwe otaa inekele omatemba gawo guukwiita, yamwe uukambe wawo, ihe tse otwi inekela oonkondo dhOmuwa Kalunga ketu.
8 Aantu ya tya ngeyi otaa punduka etaa gwile po, ihe tse otwa thikama twa kolelela.
9 Omuwa, gandja esindano komukwaniilwa; tu yamukula, ngele tatu ku indile.
1 Omuwa, omukwaniilwa okwa nyanyukwa, sho we mu pe oonkondo; ota hambelele, sho we mu ningi omusindani.
2 Owe mu pe shoka omutima gwe gwa yuulukwa, owa yamukula omaindilo ge.
3 Owe ya kuye nomayambeko ogendji nowe mu zaleke oshishani shoshingoli komutse.
4 Okwa pula, a kale e na omwenyo nowe gu mu pe, omwenyo omule nogwaaluhe.
5 Kekwatho lyoye esimano lye olya ningi enene; owe mu pe esimano netumbalo.
6 Omayambeko goye otage mu landula sigo aluhe nokukalapo kwoye otaku mu nyanyudha.
7 Omukwaniilwa oti inekele Omuwa Omunankondoawike; ota kala megameno, oshoka Omuwa oku mu hole aluhe.
8 Omukwaniilwa ota ka kwata po aatondi ye ayehe; ota ka ya nakehe gumwe e mu tonde.
9 Ote ke ya hanagula po, ngaashi omulilo hagu ningi. Omuwa ote ke ya thekeka po mondjahi ye, nomulilo otagu ya li po.
10 Kape na nando ogumwe gwomoyana ta ka hupa po; omukwaniilwa ote ke ya dhipaga po ayehe.
11 Oyo taa ningi oompangela dhawo e taye mu kundathana meholamo, ihe omadhiladhilo gawo itaga ka pita.
12 Oye te ya yaha niikuti ye e taa fadhuka po.
13 Omuwa, otatu ku simaneke moluunene woonkondo dhoye! Otatu imbi e tatu simaneke oonkondo dhoye.
1 Kalunga kandje, Kalunga kandje, omolwashike we etha ndje? Moluhepo lwandje onda pula ekwatho, ihe itali holoka.
2 Kalunga kandje, otandi uhala noku ku igidha, ihe ito yamukula; muusiku ondi ithana, ihe ite mono evululuko.
3 Ihe ngoye Omukwaniilwa omuyapuki, oho simanekwa kuIsrael.
4 Ookuku oya li ye ku inekele; oye ku itula e to ya hupitha.
5 Oye ku ithana noya hupu moshiponga; oye ku inekele, yo inaa sithwa ohoni.
6 Ihe ngame kandi shi we omuntu; ezinyo lyowala, omudhinwa nomushekwa kukehe gumwe!
7 Ayehe mbo taa mono ndje, otaa yolo ndje; otaa nyonkele ndje e taa pukapuka komitse.
8 Oyo taa ti: “Wa ti owi inekela Omuwa. Omolwashike nduno itee ku hupitha? Ngele oku ku hole, omolwashike itee ku kwatha?”
9 Okoonkondo dhoye nde ya muuyuni, sho nda valwa kumeme, naasho nda li okahanona, owa gamene ndje.
10 Onde ku inekele okuza kesiku nda valwa, nowa kala aluhe Kalunga kandje.
11 Ino kala kokule nangame! Uudhigu ou li ndje popepi, nokaku na ngo ta kwatha ndje.
12 Aatondi oyendji ya kunduka ndje ya fa oontsezi; ya kondeka ndje ya fa oontsezi oompwidhi dhomuBaasha.
13 Oye ekamena ndje omakana ya fa oonime tadhi pumbu nodha hala okutudhagula ndje.
14 Oonkondo dhandje dha kana, ongomeya ga tilwahi pevi. Omasipa gandje agehe oga dhamuka; omutima gwandje ogwa fa eka lya hemunwa.
15 Omuligu gwandje ogwa kukuta kwele, nelaka lyandje lya kakatela kondaathelo. Owa thigile ndje eso montsi yevi.
16 Ongundu yaakolokoshi oya kunduka ndje; ongoshipandi shoombwa taa kondeke ndje; otaa nyankula iikaha noompadhi dhandje.
17 Ngame iipongo ayike. Aatondi yandje otaa sinasina ndje ya tongolola ndje.
18 Omuzalo gwandje otaye gu umbile oshihogololitho noonguwo dhandje otaye dhi itopolele.
19 Omuwa, ino kala ndje kokule! Ila nziya, u hupithe ndje!
20 Hupitha ndje, ndaa se kegongamwele; hupitha omwenyo gwandje momakana goombwa ndhi.
21 Hupitha ndje moonime ndhi; onda hepela mokati koonyati ndhika.
22 Onda hala okuhokololela yakwetu iilonga yoye; onda hala oku ku simaneka megongalo:
23 “Mu panduleni, ne aalongeli yOmuwa! Mu simanekeni, ne oluvalo lwaJakob! Mu tsileni oongolo, ne Aaisraeli!
24 Ihe etha oohepele ye iha dhini omaudhigu gawo; iha zi po puyo, ihe oha yamukula, ngele taa pula ekwatho.”
25 Megongalo alihe otandi ku pandulile iilonga yoye; mokati kaamboka haye ku simaneke, otandi ku pe omayambo ngoka nde ga uvaneke.
26 Oohepele otaa ka lya ya kuta; mboka taa ya kOmuwa, otaye mu simaneke. Naa kale nelago sigo aluhe!
27 Iigwana ayihe otayi ka tseya Omuwa. Koombinga adhihe dhuuyuni otaku zi aantu e taye ya kuye; omihoko adhihe otadhi ke mu simaneka.
28 Omuwa oye omukwaniilwa nota pangele iigwana.
29 Aanenentu ayehe otaa ke mu tsila oongolo; oonakukasa otaye ke mu simaneka.
30 Omaluvalo gokomeho otage ke mu longela; epipi tali landula otali ka tseyithilwa Omuwa.
31 Aantu inaa valwa natango otaa ka lombwelwa: “Omuwa okwa hupitha aantu ye.”
1 Omuwa oye omusita gwandje; inandi pumbwa sha.
2 Oye ta gondjithile ndje mondombe ontalala ta fala ndje komeya gevululuko.
3 Omwenyo gwandje ote gu talaleke. Ote enditha ndje nondjila yu uka, opauvaneko lye.
4 Nonando ndi na okweenda mesilu lyomilema thokothoko, itandi tila sha, oshoka, Omuwa, ou li pungame. Ondhimbo yoye nolwoondje lwoye ohayi gamene ndje.
5 Ongoye to yalele ndje oshililo montaneho yaatondi yandje; oto taamba ndje ngaashi omuyenda a simana, e to pindi oshitenga shandje shu udhilila.
6 Elago nesilohenda lyoye otali landula ndje mokukalamwenyo kwandje akuhe; otandi ka kala aluhe mongulu yOmuwa.
1 Uuyuni owOmuwa naashihe shoka shi li mo; evi olyOmuwa naayihe mbyoka yi li ko.
2 Oye e li tungile kombanda yomeya omale nomakankameno galyo oga dhikilwa muule wefuta.
3 Olye ta pitikwa okuya kondundu yOmuwa? Olye e na ompito okuya motempeli ye ondjapuki?
4 Oomboka ye na iilonga yu uka nomadhiladhilo ga yela, mboka ihaa simaneke iikalunga yo ihaa gandja omauvaneko giifundja.
5 Omuwa ote ya yambeke e te ya hupitha; Kalunga ote ya igidhile emangululo.
6 Osho ye li aantu mboka taye ya kuKalunga, oomboka taye ya miipathi yaKalunga kaJakob.
7 Mwashukeni, ne iiyelo, egulukeni, ne omiyelo dhonale, omukwaniilwa omunene a wape okuya meni.
8 Omukwaniilwa omunene olye? Oye Omuwa, omunankondo nofule. Omuwa omusindani molugodhi.
9 Mwashukeni, ne iiyelo, egulukeni, ne omiyelo dhonale, omukwaniilwa omunene a wape okuya meni.
10 Omukwaniilwa omunene oye olye? Omuwa omusindani oye omukwaniilwa omunene!
1 Otandi ku indile, Omuwa;
2 Kalunga kandje, onde ku inekela. Ino ethela ndje mohoni yesindiko; aatondi yandje yaa shi nyanyukilwe.
3 Mboka taa ku inekele, itaa sindika, kakele kaamboka taa ku iteka nziya.
4 Omuwa, longa ndje oondjila dhoye; dhi yelithila ndje.
5 Longa ndje okukala moshili yoye, oshoka ongoye Kalunga kandje, omuhupithi gwandje. Ngame onde ku inekela aluhe.
6 Omuwa, dhimbulukwa olukeno nohole yoye yaaluhe, ndjoka we yi holola nale.
7 Dhimina ndje po oondjo nomapuko gomuugundjuka. Dhimbulukwa ndje, Omuwa, omoluuwanawa nomolwohole yoye onene.
8 Omuwa oye omuyuuki nomwaanawa, aalunde ote ya longo ondjila ndjoka ye na oku yi landula.
9 Aayishonopeki ote ya tula mondjila yu uka note ya longo okutseya ehalo lye.
10 Nuudhiginini nohole ote enditha ayehe mboka haa dhama ehangano lye nohaa vulika kiipango ye.
11 Omuwa, dhima po oondjo dhandje pauvaneko lyoye, oshoka odhindji.
12 Mboka haa vulika kOmuwa, ote ya longo ondjila ndjoka ye na oku yi landula.
13 Oyo taa kala aluhe ye li nawa noyana otaa ka thigulula evi.
14 Omuwa okuume kaamboka haa vulika kuye nota koleke ehangano nayo.
15 OkOmuwa nda tala aluhe, ku zile ndje ekwatho, noye ta hupitha ndje moshiponga.
16 Omuwa, tala ndje, u sile ndje ohenda, oshoka ondi li muuwike nonda sa uunkundi.
17 Kutha ndje iimpwiyu, ngu u hupithe ndje muudhigu wandje auhe.
18 Tala ndje, nkene nda ziyalala nonda ngonwa, ngu u dhime po oondjo dhandje adhihe.
19 Tala aatondi yandje mpo ye thike; tala, nkene ye tonde ndje.
20 Gamena ndje, ngu u hupithe ndje; ino etha, ndi sindike. Opungoye te kongo egameno.
21 Uuyuuki nuunoshili wandje nau popile ndje, oshoka onde ku inekela.
22 Kalunga, hupitha Aaisraeli muudhigu wawo auhe!
1 Omuwa, igidhila ndje emangululo, oshoka ohandi longo shoka shu uka nonde ku inekela nomwenyo aguhe.
2 Omuwa, konakona ndje, ngu u tale mpo ndi ikwatelela.
3 Ohole yoye yaaluhe otayi enditha ndje; uudhiginini woye otau wilike ndje.
4 Kandi na uukuume naantu yaa fele; kandi na ko nasha naayiningithi.
5 Ondi tonde uukuume naakolokoshi nohandi gamuka kaadhudhu.
6 Omuwa, otandi iyogo kiikaha okuholola kutya kandi na oondjo notandi dhingoloka oshiyambelo shoye nesimaneko.
7 Otandi imbi ehambelelo notandi hokolola iikumithalonga yoye ayihe.
8 Omuwa, ondi hole egumbo lyoye, ehala mpo pu na esimano lyoye.
9 Ino hanagulila ndje mumwe naalunde; hupitha ndje momupya gwaadhipagi —
10 aantu mbo haa longo aluhe iihuna naamboka ya thowela iisimpo.
11 Ngame kombinga yandje ohandi longo shoka shu uka; sila ndje ohenda ngu u hupitha ndje.
12 Iiponga oyi li ndje kokule; Omuwa otandi mu hambelele megongalo lyaantu ye.
1 Omuwa oye uuyelele nomuhupithi gwandje; itandi tila nando olye. Omuwa ota gamene ndje kiiponga ayihe; itandi mbandama.
2 Aakolokoshi ngele taa ponokele ndje noya hala okudhipaga ndje, otaa punduka e taa gwile po.
3 Nonando etanga lyaakwiita li kondeke ndje, itaa vulu okutilitha ndje. Nonando aatondi yandje ya matukile ndje, natango otandi inekele Kalunga,
4 Omuwa onde mu indile ompumbwe yimwe; ondi na oshinima shimwe ashike nde shi hala: okukala mongulu yOmuwa okukalamwenyo kwandje akuhe, okunyanyudhwa kuuwanawa we nokupula ewiliko lye.
5 Methimbo lyuudhigu ota shigi ndje; ota gamene ndje motempeli ye e ta londeke ndje kemanya ele.
6 Aatondi mbono ya kundukidha ndje, otandi ke ya sinda. Nokwiimba ekandanga, otandi ke etela Omuwa omayambo motempeli ye; otandi ki imba te hambelele Omuwa.
7 Omuwa, uva ndje, sho tandi ku ithana! Sila ndje ohenda e to yamukula ndje!
8 Sho wa ti: “Ileni, mu simaneke ndje,” ngame onda yamukula: “Otandi ya, Omuwa;
9 ino holeka ndje oshipala shoye!” Ino geela ndje; ino tidha po omuntu gwoye. Noshito owa kala ekwatho lyandje; ino etha ndje, ngoye ino thiga ndje po, Kalunga, omuhupithi gwandje.
10 Tate nameme otaa vulu okweetha ndje, ihe Omuwa ota sile ndje oshimpwiyu.
11 Omuwa, longa ndje okulandula ehalo lyoye, enditha ndje nondjila yaa na iiponga, oshoka ondi na aatondi oyendji.
12 Ino ethela ndje miikaha yaamboka ye tonde ndje, mboka taa ponokele ndje niifundja nomatilitho.
13 Ondi shi shi kutya ote kala ndi na omwenyo nokumona uuwanawa wOmuwa mokukalamwenyo huka kwongashingeyi.
14 Inekela Omuwa. Itaala, ino limbililwa. Inekela Omuwa.
1 Omuwa, omupopili gwandje, otandi ku ithana. Tondoka onkugo yandje! Ngele ito yamukula ndje, nena otandi ka ninga gumwe gwaamboka taa mbolokotele moshaasi.
2 Uva ndje, sho tandi ku ithana, sho te ganeke omaako gandje lwokotempeli yoye ondjapuki.
3 Ino geela ndje pamwe naadhudhu naambo haa longo uukolokoshi — mbo haa popi nombili, ihe oye na uutondwe momitima dhawo.
4 Ya geelela iilonga yawo, uuwinayi ye u ninga. Ya geelela iilonga yawo ayihe; ya futa pakulonga kwawo.
5 Ihaa koneke iilonga yOmuwa naashoka e shi shita; onkee ano ote ya geele e te ya hanagula po sigo aluhe.
6 Hambeleleni Omuwa, sho a tondoka onkugo yandje.
7 Omuwa ota gamene ndje e ta popile ndje; onde mu inekela. Oye ta kwatha ndje e ta nyanyudha ndje; otandi mu imbile omaimbilo genyanyu.
8 Omuwa ota gamene aantu ye; ota popile e ta hupitha omukwaniilwa omuhogololwa gwe.
9 Omuwa, hupitha aantu yoye, ngu u yambeke aamwoye. Kala omusita gwawo e to ya sile oshimpwiyu sigo aluhe.
1 Hambeleleni Omuwa, ne oonakukala megulu; tangeni eadhimo noonkondo dhe.
2 Simanekeni uunene wedhina lyOmuwa; tseni oongolo koshipala shOmuyapuki, sho ta holoka.
3 Ewi lyOmuwa otali uvika momafuta; Kalunga keadhimo ota ndunduma, newi lye otali mbolongondja kombanda yomafuta.
4 Ewi lyOmuwa oli na oonkondo; ewi lyOmuwa oli na uukolele.
5 Ewi lyOmuwa otali teya omisendeli, naandhoka wo dhaLibanon.
6 Omuwa ota yanditha oondundu dhaLibanon omalondo ongoontaagona, nondundu Hermon ote yi nukitha ya fa ondumetana.
7 Ewi lyOmuwa otali zi olwaadhi.
8 Ewi lye otali kakamitha ombuga; ota dhekwetitha ombuga yaKadesh.
9 Ewi lyOmuwa otali shiki oomwandi notali kweya omafo komiti, manga kehe gumwe motempeli ye ti igidha: “Esimano olyaKalunga!”
10 Omuwa oye omupangeli gwomafuta omale; oye omukwaniilwa sigo aluhe.
11 Omuwa ota gandja oonkondo kaantu ye note ya pe eyambeko lyombili.
1 Omuwa, otandi ku hambelele, sho wa hupitha ndje, nowa keelele aatondi yandje, yaa yole ndje.
2 Onde ku lilile ekwatho, Omuwa Kalunga kandje, e to aludha ndje;
3 owa hili ndje mombila. Onda li nda mbolokela muule mwi, ihe owa ningi ndje ishewe omunamwenyo.
4 Hambeleleni Omuwa, ne aainekelwa ye amuhe! Dhimbulukweni iilonga yOmuyapuki, ne mu mu simaneke!
5 Ondjahi ye oyokathimbo kowala, ihe uuwanawa we otau kalelele. Ongulohi omahodhi otaga tondoka, ihe ongula otaku holoka enyanyu.
6 Ondi wete ndi li megameno nonda ti: “Itandi ka sindika nando olumwe.”
7 Omuwa, owa hololele ndje uuwanawa; owa koleke ohote yandje. Opo ihe owi iholeke ndje, ngame nonda haluka.
8 Omuwa, otandi ku ithana; otandi ku indile ekwatho:
9 “Eso lyandje otali ku likolitha shike? Okuya kwandje mombila otaku ku pe ontanitho? Aasi otaa vulu tuu oku ku simaneka? Otaa vulu tuu okuhokolola uudhiginini woye?
10 Uva ndje, Omuwa, ngu u sile ndje ohenda! Omuwa, kwatha ndje!”
11 Oondjila dhandje owe dhi shitukitha oondjimbo dhenyanyu; owa kodheke oluhodhi lwandje nowa nyanyudha ndje.
12 Onkee ano itandi mwena; otandi ku hambelele. Omuwa, ongoye Kalunga kandje, otandi ku pandula sigo aluhe.
1 Omuwa, otandi ya kungoye okukonga egameno; ino etha, ndi sindike. Ongoye Kalunga omuyuuki; otandi galikana, hupitha ndje.
2 Uva ndje! Hupitha ndje ngashingeyi! Kala epopilongulu lyokugamena ndje nohote yokuhupitha ndje.
3 Ongoye eshigo negameno lyandje; wilika, ngu u endithe ndje ngaashi wu uvaneke.
4 Gamena ndje, ndaa yulwe nomwigo gwa tegelwa ndje; keelela ndje koshiponga.
5 Otandi igameke kungoye. Omuwa, ongoye to hupitha ndje; ongoye Kalunga omudhiginini.
6 Ou tonde mboka haa simaneke iikalunga, ihe ngame onde ku inekela.
7 Otandi nyanyukwa nokutanta omolwesilohenda lyoye. Ou wete okuhepekwa kwandje nowa tseya uudhigu wandje.
8 Aatondi yandje ino ya pitika ya kwate ndje; owa pe ndje emanguluko, ndi ye shaa mpo nda hala.
9 Omuwa, sila ndje ohenda, oshoka ondi li muudhigu. Omeho gandje oga vulwa kokulila nonda pwa po kuudhigu.
10 Onda lolokithwa kiimpwiyu, nokulila okwa shonopeke omasiku gandje. Uudhigu owa nameke ndje, nomasipa gandje wo otaga thipuka.
11 Aatondi yandje ayehe, naashiinda, otaa yolo ndje. Aashiwikile yandje oya tila ndje; ngele taa mono ndje mepandaanda, otaa yi ndje ontuku.
12 Ayehe oya dhimbwa ndje, ongo nda sa; onda fa oshiyagaya showala.
13 Onda pupa omanongono ogendji gaatondi; etilitho olya kunduka ndje. Otaa kundathana okukondjitha ndje notaa uvanene okudhipaga ndje.
14 Ihe ngame ondi inekela Omuwa; ongoye Kalunga kandje.
15 Ondi li aluhe meke lyoye; hupitha ndje miikaha yaatondi yandje, noyaamboka haa tidhagana ndje.
16 Tala nonteni omuntu gwoye; hupitha ndje molwesilohenda lyoye.
17 Omuwa, otandi ku ithana; ino etha, ndi sithwe ohoni. Aadhudhu oyo naa sithwe ohoni; naa thenunukile moshaasi.
18 Mweneka aafundja mbo — aanuuntsa naaitumbaleki mbo haa nyana aayuuki.
19 Uuwanawa woye ou thike peni! Owe u pungulila mbo haa ku simaneke nowe u longekidhila mboka ye ku inekela montaneho yaantu.
20 Oho ya holeke megameno lyokukalapo kwoye, ya gamenwe koompangela dhaakolokoshi; oto ya edhilile mondunda ya patekeka, ya kale kokule nomasheko gaatondi yawo.
21 Hambeleleni Omuwa! Ohole ye onkumithi ngiini, ndjoka e yi hololele ndje, sho nda li nda kundukidhwa kaatondi!
22 Onda li nda tila nonda dhiladhila kutya Omuwa okwe etha ndje. Ihe nani oku uvu okulila kwandje, sho nde mu pula ekwatho.
23 Holeni Omuwa, ne mboka hamu mu inekele. Omuwa ota gamene aayinekeli ye, e ta geele aainenepeki, ngaashi ye shi ilongela.
24 Ikoleleni, ne mu kale nomukumo, amuhe mbo mu na etegameno mOmuwa.
1 Aanelago oomboka oondjo dhawo dha dhimwa po, mboka ya kuthilwa po omayono gawo.
2 Omunelago omuntu ngoka Omuwa itee mu pe uusama noke na iifundja nando yasha.
3 Sho nda li inee hempulula oondjo dhandje, onda li nda pwa po kokulila esiku kehe.
4 Uusiku nomutenya wa li wa geela ndje, Omuwa; omatha gandje oga li ga kana, ngaashi oshitosi tashi thekuka po kuupyu wopothinge.
5 Opo ihe onde ku hempululile oondjo dhandje; inandi holeka omayono gandje. Onda tokola oku ku hempululila omapuko gandje, nowa dhimi po oondjo dhandje adhihe.
6 Aantu yoye mbo ye ku inekela, otaa ku galikana momathimbo guudhigu; oshikungulu nando oshi nenepale, itashi ya gumu.
7 Ongoye egameno lyandje; owa hupitha ndje momupya. Otandi imbi mokule, sho wa hupitha ndje naasho wa gamene ndje.
8 Omuwa ota ti: “Otandi ku ulukile ondjila ndjo u na okulandula; otandi ku wilike e tandi ku tonatele.”
9 Ino kala egoya ngaashi onkambe nenge emulutiya, mbyo hayi endithwa kiitomo nokomiya, opo yi ngodhupale.
10 Aadhudhu otaa ka lila, ihe mbo haa inekele Omuwa, ote ya gamene omolwesilohenda lye.
11 Ne aayuuki, nyanyukweni ne mu imbe ekandanga omolwiilonga yOmuwa. Ne mbo hamu vulika kuye, tanteni.
1 Aayuuki amuhe, ligoleleni iilonga yOmuwa; mu hambeleleni, amuhe mbo hamu vulika kuye.
2 Panduleni Omuwa nuuharpa, mu imbileni nuuhumba wootheta
3 Mu imbileni eimbilo epe, hikeni okaharpa nuunkulungu e tamu ligola!
4 Oohapu dhOmuwa odhoshili niilonga ye ayihe oyi shi kwiinekelwa.
5 Omuwa oku hole uuyuuki nuunoshili; esilohenda lye olyu udhilila evi alihe.
6 Omuwa okwa shiti egulu nelombwelo lye, etango, omwedhi noonyothi onohapu yomokana ke.
7 Okwa gongele omafuta agehe peha limwe; okwa pimpile omilonga dhomuule mompungulo.
8 Evi alihe nali tile Omuwa! Mu simanekeni, ne aantu amuhe yomuuyuni!
9 Oye a popi, uuyuni nowa shitwa; ashihe osha holoka po koonkondo dhelombwelo lye.
10 Omuwa ota kateke omalalakano giigwana; ote yi imbi, yaa tsakanithe oompangela dhayo.
11 Omadhiladhilo ge otaga piti sigo aluhe; omalalakano ge kage na mpoka taga hulu po.
12 Oshigwana oshinelago osho shoka shi na Kalunga kasho Omuwa; aanelago aantu mboka Omuwa e yi ihogololele.
13 Omuwa oku li megulu to ontamene noku wete aantu ayehe.
14 Oku li mombala ye a nyongama, ta tala oonakukala kombanda yevi.
15 Okwa kutha mo omadhiladhilo gawo agehe nokwa tseya ashihe shoka taa ningi.
16 Omukwaniilwa ita sindi molwetangakwiita lye lyokwakola; omukwiita ite shi tompola molwoonkondo dhe.
17 Oonkambe dhuukwiita itadhi eta esindano; omankondo gadho itaga hupitha.
18 Omuwa ota tonatele mbo haa vulika kuye, oomboka haa inekele esilohenda lye
19 Oye te ya hupitha meso; ote ya kaleke nomwenyo methimbo lyondjala.
20 Tse otwi inekela Omuwa; oye omugameni nomukwathi gwetu.
21 Otatu nyanyukwa omolwe; otatu inekele edhina lye eyapuki.
22 Omuwa, esilohenda lyoye nali kale pamwe natse, ngaashi tu na etegameno mungoye.
1 Onda hala aluhe okupandula Omuwa; itandi hulitha oku mu hambelela.
2 Otandi mu hambelelele iilonga ye; aathiminikwa ayehe naa pulakene e taa nyanyukwa.
3 Uvitheni pamwe nangame uunene wOmuwa; tu simanekeni atuheni edhina lye.
4 Onda galikana Omuwa, oye nokwa yamukula ndje; okwa kutha ndje uumbanda auhe.
5 Aathiminikwa otaa itula puye e taa nyanyukwa; itaa thigilwa nando ofogo.
6 Omapongo otage mu ithana, oye note ga yamukula; ote ya hupitha moothina dhawo adhihe.
7 Omuyengeli gwOmuwa ota tonatele mboka haa vulika kOmuwa note ya hupitha moshiponga.
8 Konakona mwene, u mone, nkene Omuwa omwaanawa. Aanelago oomboka taa mono egameno puye.
9 Vulikeni kOmuwa, aantu ye amuhe; mbo haa vulika kuye, oye na ashihe ye shi pumbwa.
10 Oonime wo ohadhi hepa iikulya, ihe mboka haa vulika kOmuwa, oye na uukali auhe.
11 Aagundjuka, ileni, pulakenii ndje, ngame notandi mu longo okusimaneka Omuwa.
12 Owa hala okukalamwenyo okuwanawa? Owa hala omwenyo omule nelago?
13 Gamuka kokupopya uuwinayi nokokuhokolola oohapu dhiifundja.
14 Etha uukolokoshi e to longo uuwanawa; lalakanena ombili, ngu u yi kondjele.
15 Omuwa oha tonatele aayuuki noha pulakene okulila kwawo;
16 ihe oku tonde mbo haa longo uukolokoshi, onkee ano, uuna taa mana oondjenda, otaa dhimbiwa mbala.
17 Aayuuki otaa ithana Omuwa, oye notu uvu ko; ote ya hupitha muudhigu wawo auhe.
18 Omuwa oku li popepi naamboka ya dhengwa pevi; ota hupitha mbo ya kanitha etegameno.
19 Omuyuuki ota tsakanekwa kuudhigu owindji, ihe Omuwa ote mu hupitha muwo.
20 Omuwa ote mu shigi nawa lela; kape na nando olimwe lyomomasipa ge tali teywa.
21 Uukolokoshi otau li omuningi gwawo; mbo ye tonde omuyuuki otaa ka geelwa.
22 Omuwa ota hupitha aantu ye; ota popile mbo taa kongo egameno puye.
1 Omuwa, tamaneka mboka haa tamaneke ndje, ngu u kondjithe mbo haa kondjitha ndje.
2 Kutha oshikandekitho negonga lyoye, u hupithe ndje.
3 Ganeka omwele nekuya lyoye, u kondjithe mbo haa tidhagana ndje. Tseyithila ndje, ongoye omuhupithi gwandje.
4 Mbo taa kambadhala okudhipaga ndje, naa sindwe e taa sithwa ohoni! Mbo taa ende ndje mevi, naa shunithwe e taa piyaganekwa!
5 Naa fe etutu tali yi ombepo, omuyengeli gwOmuwa sho e ya lamba!
6 Ondjila yawo nayi ninge omilema nomuthenu, omuyengeli gwOmuwa sho te ya thekula po!
7 Oya tegele ndje omwigo, nando ine yona sha, noya fulile ndje ekelo, ndi gwile mo.
8 Ihe ehanagulo otali ya akele, manga inaaye li ndhindhilika; otaa iyulitha komwigo ye gu tega e taa gwile meyonuuko!
9 Ihe ngame otandi nyanyukilwa Omuwa; otandi shambukwa, oshoka okwa hupitha ndje.
10 Ngame ngaashi ndi li ondi na okutya kOmuwa: “Kaku na gumwe e ku fa. Oto gamene oshimbembe miikaha yomunankondo, ohepele meke lyomuthiminiki.”
11 Aakolokoshi otaa kondjitha ndje notaa tamanekele ndje omayono ndaa ga shi.
12 Otaa galulile ndje uuwinayi moluuwanawa, notandi kanitha etegameno.
13 Ihe sho ya li muuvu, onda si oluhodhi; ondi ikeye iikulya; onda galikana nomutse gwa nyongama,
14 ongo te galikanene kuume kandje nenge mumwameme. Oluhodhi olwa andalaleke ndje mokweenda, ongangoka ta lili oosa dhayina.
15 Ihe sho nda li muudhigu, ayehe oya li menyanyu noya gongalele ndje e taa sheke ndje; aantu ndaa ya shi oya mbondagula ndje noya tsikile okuhepeka ndje.
16 Oyo aantu taa vulu okusheka oshilema, oya tiliganekela ndje omeho guutondwe.
17 Sigo uunake, Omuwa, wa tala ko owala? Yugulula ndje momahomono gawo; hupitha omwenyo gwandje koonime ndhika.
18 Notandi ke ku pandula megongalo lyaantu yoye; otandi ke ku hambelela montaneho yawo ayehe.
19 Ino etha aatondi yandje aafundja, ya nyanyukilwe okusindika kwandje. Ino etha mbo ye tonde ndje pwaa na etompelo, yi imemehele iimpwiyu yandje.
20 Ihaa popi nombili; ihe otaa toto iifundja yi ili noyi ili okulundila aaholi yombili.
21 Oyo taa lundile ndje taa ti: “Sho wa ninga, otwe shi mona!”
22 Ihe ngoye, Omuwa, shika osha ningwa momeho goye. Onkee ano, Omuwa, ino mwena; ino kala ndje kokule!
23 Thikama, Omuwa, u popile ndje; ila, Kalunga kandje, u gamene ndje.
24 Omuwa, ongoye omuyuuki, onkee uthila ndje pauyuuki; ino etha aatondi yandje, ya yole ndje.
25 Ino ya pitika, ya tye: “E tu zi momeho! Osho twa hala nale!”
26 Mbo taa nyanyukilwa uudhigu wandje, naa sindwe e taa piyaganekwa; mbo taa idhiladhilile uulinawa ye vule ndje, naa yolwe e taa si ohoni.
27 Ihe mbo ya hala nda mangululwa, naa igidhe aluhe nenyanyu taa ti: “Omuwa oye omunene! Ota halele omuntu gwe elago.”
28 Nena otandi ka hokolola uuyuuki woye, otandi ke ku hambelela esiku alihe.
1 Uulunde otau popi momutima gwomukolokoshi; ota dhini Kalunga ye ite mu simaneke nando.
2 Oshoka ohi iyele ye mwene, oha dhiladhila kutya Kalunga ita mono oondjo dhe noite dhi geele.
3 Okupopya kwe okwiinayi noku udha iifundja; iha longo we sha shoondunge nenge oshiwanawa.
4 Mokulala kwe oha tungu oompangela dhuudhudhu; iha longo nando osha shu uka ye iha tindi okulonga uuwinayi.
5 Omuwa, esilohenda lyoye otali adha sigo okegulu; uudhiginini woye otau ifala sigo okeyalelo.
6 Uuyuuki woye otau yeluka wa fa oondundu; eutho lyoye olya fa uule wefuta. Aantu niinamwenyo oyi li meke lyoye.
7 Esilohenda lyoye, Kalunga, kali shi kuhepithwa! Otatu holama momuzile gwomawawa goye.
8 Otatu li iitendele poshililo shomongulu yoye; oto tu nwetha momulonga guuwanawa woye.
9 Ongoye oluthithiya lwomwenyo, nomuuyelele woye otu wete uuyelele wo wene.
10 Tsikila okuhola mbo ye ku shi, ngu u hupithe aayuuki.
11 Ino etha, aainenepeki ya ponokele ndje nenge aadhudhu ya tidhe ndje.
12 Tala mpo aakolokoshi ya lala. Oyo mbeya ya gwila po, itaa vulu okupenduka.
1 Ino impwiyika molwaakolokoshi; aalongi yuuwinayi ino ya sila efupa.
2 Otaa kana po mbala ongomwiidhi tagu kukuta; otaa si po ongiimeno tayi ganya.
3 Inekela Omuwa e to longo uuwanawa; kala moshilongo e to mono egameno.
4 Konga uulinawa pOmuwa, note ku pe shoka wa yuulukwa.
5 Igandja kOmuwa; mu inekela, oye te ku kwatha.
6 Oye ta ka adhimitha uuyuuki woye ongetango lyambandamutse.
7 Idhidhimika e to tege Omuwa, a longe sha; ino impwiyika naambo taa piti nawa nenge mbo taa enditha oompangela dhawo dhuudhudhu.
8 Ino iyethela moshimpwiyu nenge muugeyi; mbika ayihe otayi fala muupyakadhi.
9 Mboka haa inekele Omuwa, otaa ka thigulula evi, ihe aakolokoshi otaa ka tidhwa po.
10 Aadhudhu otaa ka kana po mbala; nando u ya konge, ito ya mono.
11 Aayifupipiki otaa ka thigulula evi notaa ka mona uulinawa nombili.
12 Omukolokoshi ota dhiladhilile omuyuuki iiponga note mu tiliganekele omeho guutondwe.
13 Ihe Omuwa ota yolo aakolokoshi, oshoka oku shi shi kutya otaa ka yonwa po nziya.
14 Aadhudhu otaa hitulula omagonga gawo notaa zula omatati gawo okudhipaga oohepele nomapongo, okutsa mboka haa longo shoka shu uka.
15 Ihe mbaka otaa idhipagitha komagonga gawo yene, nomatati gawo otaga teywa po.
16 Oshishona shoka omuyuuki e shi ilikolele, oshi vule omauyamba gaakolokoshi ayehe.
17 Oshoka Omuwa ota hulitha po oonkondo dhaakolokoshi nota gamene aayuuki.
18 Omuwa ota sile oshimpwiyu mbo haa vulika kuye, nevi otali ka ninga lyawo sigo aluhe.
19 Oyo itaa ka hepa momathimbo omawinayi; otaa ka kala ye na sha gwana methimbo lyondjala.
20 Ihe aakolokoshi otaa ka yonuka po; aatondi yOmuwa otaa ka thekuka po ongoongala dhokelundu; otaa ka kana po ya fa olwithi.
21 Omudhudhu ota li oongunga ye ite dhi galula nando, ihe omuyuuki ke shi omundalapata neliko lye.
22 Aayambekwa kOmuwa otaa ka thigulula evi, ihe mbo ya thingwa kuye, otaa ka halakanithwa po.
23 Omuwa ota wilike omuntu mondjila ndjoka e na okulandula nota gamene mboka e ya hokwa.
24 Ngele taa gu, itaa gwiilile, oshoka Omuwa ote ya pendula po.
25 Ngame ngashingeyi onda kulupa, onda kala muuyuni ethimbo ele, ihe inandi mona nando olumwe omuyuuki e ethiwa kOmuwa, nenge oyana taa hehela iikulya.
26 Omuyuuki ota gandja aluhe nomwenyo omwaanawa nota kamunukile yalwe, noyana otaa lalekwa nuuyamba.
27 Gamuka kuuwinayi e to longo uuwanawa, noluvalo lwoye otalu ka kala ko aluhe.
28 Oshoka Omuwa oku hole shoka shu uka noihe etha aantu ye aainekelwa. Ote ya gamene sigo aluhe, ihe oluvalo lwaakolokoshi otalu halakanithwa po.
29 Aayuuki otaa ka thigulula evi e taa kala mo sigo aluhe.
30 Omuyuuki oha tumbula oohapu dhoondunge, nomilungu dhe ihadhi pititha iifundja.
31 Oha dhiginine ompango yaKalunga ke momutima gwe, oonkatu dhe ihadhi puguma.
32 Omukolokoshi ota langele omuyuuki, a hala e mu dhipage,
33 ihe Omuwa ite ethele omuyuuki miikaha yomutondi gwe, nomoompangu Omuwa ite mu etha, a pewe uusama.
34 Inekela Omuwa, ngu u vulike kiipango ye; oye note ku lenge, u lale evi, noto ka mona okuyonuka po kwaakolokoshi.
35 Onda tseya omunanyanya omunankondo; okwa taandele koombinga adhihe a fa omusendeli gwaLibanon.
36 Konima onda piti po ishewe, ihe ke po we; onde mu kongo, ihe inandi mu mona.
37 Undja omuyuuki, ngu u ndhindhilike omunamikalo; omunambili oku na oluvalo olwindji,
38 ihe aalunde otaa dhimwa po sheke, noyana otaa yonwa po thilu.
39 Omuwa ota hupitha aayuuki note ya gamene momathimbo guudhigu.
40 Ote ya kwatha e te ya hupitha; ote ya hupitha miikaha yaadhudhu, oshoka opuye haa kongo egameno.
1 Omuwa, ino ganda ndje mekehuko, ngoye ino geela ndje wa sa ondjahi.
2 Owa yaha ndje niikuti yoye; owa thindile ndje pevi.
3 Omolwondjahi yoye ngame ondi li muuwehame uunene; olutu lwandje aluhe olwa pwa po kuuwehame woondjo dhandje.
4 Otandi sile meyelu lyoondjo dhandje; odho omutenge omudhigu okuhumbata.
5 Omoluugoya wandje omathina gandje oga nika nogo ola.
6 Onda dhengwa, nda dhengelelwa; tandi lili esiku alihe.
7 Onda pembekwa kekithi nondi li popepi nokusa.
8 Onda dhengwa, nda pwa po thilu; otandi tongo kuuwehame momutima gwandje.
9 Omuwa, owa tseya shoka nde shi yuulukwa; ohu uvu okutonga kwandje akuhe.
10 Omutima gwandje otagu dhenge, oonkondo dhandje odha pwa po, nomeho gandje oga kanitha eadhimo.
11 Ookuume naashiinda yandje itaa hedha ndje we popepi omolwomathina gandje; nooyakwetu oya tameke okukala ndje kokule.
12 Mbo ya hala okudhipaga ndje, otaa tege ndje noomwigo, naambo ya hala okwaalula ndje, otaa kongo ehulopo lyandje noihaa mwena okweenda ndje mevi.
13 Ihe ngame onda fa omuthitamatsi noitandi uvu sha, nongomuthitawi, ite popi.
14 Onda fa omuntu itaa yamukula, oshoka itu uvu sha.
15 Ihe ngame onde ku inekela, Omuwa, ngoye Omuwa, Kalunga kandje, oto yamukula ndje.
16 Ino etha aatondi yandje, ya yole okuhepa kwandje; ino ya etha, yu uvile uuntsa okupunduka kwandje!
17 Ngame ondi li pokugwila po; ondi na uuvu waaluhe.
18 Otandi hempulula oondjo dhandje; odha lindimaneka omwenyo gwandje.
19 Aatondi yandje oyo aandjolowele noye na uukolele. Ope na oyendji ye tonde ndje pwaa na etompelo.
20 Mbo haa galulile ndje uuwinayi peha lyuuwanawa, oya tsa ondumbo nangame, oshoka ohandi kambadhala okulonga uuwanawa.
21 Omuwa, ino etha ndje; Kalunga kandje, ino kala ndje kokule!
22 Kwatha ndje ngashingeyi, Omuwa, omuhupithi gwandje.
1 Onda ti: “Ondi na okukotokela iilonga yandje noitandi ethele elaka lyandje mokuyona. Itandi ti sha, manga aakolokoshi ye li popepi.”
2 Onda mwena, nda tya thilu, naashoka shu uka! Ihe uuwehame wandje owa nayipala
3 nonda legwa kothina. Sho nde shi dhiladhila, omwenyo gwandje ogwa lindimana; ngame nonda pula:
4 “Omuwa, tseyithila ndje ehulilo lyandje, uule womasiku gandje, opo ndi pikule kutya ngame oshipipili.”
5 Omasiku gandje owe ga ningi omashona nokukalamwenyo kwandje momeho goye itaku ti sha. Kehe omuntu okwa fa okambiya
6 nenge omuzizimba gwowala. Ashihe shi ta ningi, itashi kwatha sha; ota ndumbile omaliko ye ina tseya kutya otaga ka ninga galye.
7 Omuwa, ano ondi na okutegamena shike? Omungoye ndi na etegameno.
8 Hupitha ndje momayono gandje agehe, noino etha, aagoya ya yole ndje.
9 Otandi mwena, itandi ti nando osha, oshoka ongoye wa pe ndje uudhigu mbuka.
10 Ino geela ndje we! Ngame ondi li pokusa komadhengo goye
11 Oondjo dhomuntu oto dhi geele nomaputudho goye, ongoshushi, to halakanitha po shoka e hole. Osho omuntu kehe ki ivule nokambiya.
12 Omuwa, uva egalikano lyandje, u pulakene kokulila kwandje; ila, u kwathe ndje, sho te hekumuna. Ngaashi ootate ayehe, nangame wo omuyenda gwoye okathimbo okafupi kowala.
13 Etha ndje, ndi ikalele, opo ndi mone enyanyu lyasha, manga inee pepuka po noki po we!
1 Onda tega neidhidhimiko ekwatho lyOmuwa; okwa pulakene e tu uvu okulila kwandje.
2 Okwa hili ndje melambo lyeyonuuko nomembolokela lyeso. Okwa tula ndje puukukutu kemanya nokwa gamene ndje.
3 Okwa longo ndje okwiimba eimbilo epe, ondjimbo yokuhambelela Kalunga ketu. Oyendji mbo taye shi mono, otaa uvu ko elondodho notaa tameke okwiinekela Omuwa.
4 Aanelago oomboka haa inekele Omuwa; mbo ihaa gama kiimenka nenge ya simaneke iikalunga iifundja.
5 Owe tu ningile iinima oyindji, Omuwa, Kalunga ketu; kaku na gumwe e ku fa! Owe tu dhiladhilile uuwanawa owindji. Ine vula oku u tumbula auhe — owindji unene!
6 Ino pumbwa omayambo nomagano; ito pula omidhidhindjambo nenge omayambo gokukutha po oondjo. Ihe owa pe ndje omakutsi goku ku pulakena,
7 onkee nda yamukula: “Ongame nguka; mompango yoye oto holola shoka ndi na okuninga.
8 Kalunga kandje, ondi hole okugwanitha ehalo lyoye! Otandi dhiginine elongo lyoye momutima gwandje.”
9 Omuwa, megongalo lyaantu yoye ayehe otandi uvitha elaka etoye, nkene we tu hupitha. Ou shi shi kutya itandi ka mwena oku shi hokolola.
10 Elaka lyehupitho inandi li ingungunina; onda hokolola aluhe uudhiginini nekwatho lyoye. Megongalo lyaantu yoye ayehe ine vula okumwena; onda ti kutya ou shi kwiinekelwa nou na ohenda.
11 Omuwa, onda tseya kutya ito kala inoo sila ndje ohenda. Ote gamenwa kohole nokuudhiginini woye.
12 Ngame onda kondekwa kuudhigu owindji — owindji unene okutumbula! Onda ningina moondjo noite vulu we okumona ko; odho odhindji unene dhi vule omafufu gandje gokomutse. Ngashingeyi onda tyololoka.
13 Kalunga, hupitha ndje! Omuwa kwatha ndje mbala!
14 Mbo ya hala okudhipaga ndje naa sindililwe e taa piyaganekwa. Mbo taa nyanyukilwa uudhigu wandje, naa shunithwe e taa sithwa ohoni.
15 Mbo taa yolo ndje, naa gugithwe komupya gwawo.
16 Ayehe mboka taa ya kungoye, naa nyanyukwe e taa ligola. Ayehe mboka ye hole ehupitho lyoye Aluhe naa tye: “Omuwa omunene ngiini!”
17 Omuwa, ngame oshimbembe nohepele, ino dhimbwa ndje. Ongoye omuhupithi gwandje naKalunga kandje — endelela, u kwathe ndje!
1 Aanelago oomboka ye na oshimpwiyu noohepele; Omuwa ote ya kwatha, uuna ye li muudhigu.
2 Omuwa ote ya gamene e te ya shigi kiiponga; ote ya kaleke nawa moshilongo; ite ya ethele miikaha yaatondi yawo.
3 Omuwa ote ya kwatha, uuna ye li muuvu note ya galulile uukolele wawo.
4 Ngame onda ti: “Onda yono kungoye, Omuwa; sila ndje ohenda e to aludha ndje.”
5 Aatondi yandje otaa popi ndje nayi. Oya hala, ndi se e te dhimbiwa.
6 Mbo taa talele ndje po, kaye li moshili; otaa totele ndje omahokololo omawinayi notaa yi e taa ga taandelitha akuhe.
7 Ayehe mbo ye tonde ndje, otaa popi ndje nokunongona, taa fekele ndje uuwinayi.
8 Otaa ti: “Uuvu we owokusa; momulalo ita zi mo we.”
9 Nakuume lela ngo ndi inekela, ngo handi pe iikulya, okwa tsa ondumbo nangame.
10 Omuwa, sila ndje ohenda, u pe ndje ishewe uukolele, notandi ya shunithile uuwinayi wawo.
11 Itaa ka sinda ndje, nangame otandi ka tseya kutya owa hokwa ndje.
12 Oto kwatha ndje, oshoka ohandi longo shoka shu uka; oto kaleke ndje aluhe pungoye.
13 Hambeleleni Omuwa, Kalunga kaIsrael! Mu hambeleleni nena nosigo aluhe! Amen! Amen!
1 Ngoholongo tayi hala komilonga dhomeya omatalala, osho wo tandi ku yuulukwa, Kalunga.
2 Onde ku longola, Kalunga omunamwenyo; uunake tandi ya ndi kale koshipala shoye?
3 Otandi lili omutenya nuusiku, omahodhi oga ningi iikulya yandje; kehe ethimbo aatondi yandje otaa pula ndje taa ti: “Kalunga koye oku li peni?”
4 Omwenyo gwandje ogwa pongola, sho te dhimbulukwa onakuziwa. Sho nda li handi yi pamwe nongundu kongulu yaKalunga nohandi yi kwatele komeho molweendo, ongundu yaanyanyukwi tayi imbi nokuhambelela Kalunga.
5 Omolwashike nda sa oluhodhi ngeyi? Omolwashike nda dhigupalelwa ngeyi? Otandi inekele Kalunga, nonatango otandi ke mu hambelela, omuhupithi gwandje naKalunga kandje.
6 Muupongekwa mbuka omwenyo gwandje ogwa pongola, nokuye tandi gameke omadhiladhilo gandje. Okwa tumine ndje ekuyunguto momutima gwandje; epiyagano otali ponokele ndje ongefundja, ongomeya taga tondokele muJordan taga zi koondundu Hermon naMizar.
7
8 Omuwa na ulukile ndje esilohenda mokuuhala, opo muusiku ndi mu imbile nondi galikane Kalunga ngo a pa ndje omwenyo.
9 Ote lombwele Kalunga, omupopili gwandje, te ti: “Omolwashike wa dhimbwa ndje? Omolwashike ndi na okukala moshikele shaatondi yandje?”
10 Otandi ehamekwa komasheko gawo, sho taa pula ndje aluhe: “Kalunga koye oku li peni?”
11 Omolwashike nda sa oluhodhi ngeyi? Omolwashike nda dhigupalelwa ngeyi? Otandi inekele Kalunga, nonatango otandi ke mu hambelela, omuhupithi gwandje naKalunga kandje.
1 Kalunga, uthila ndje pauyuuki, popila ndje mepangulo mokati kaantu yaa na ohenda; hupitha ndje maafundja nomaakolokoshi.
2 Ongoye omugameni gwandje; omolwashike we etha ndje? Omolwashike ndi na okukala moluhodhi, te hepekwa kaatondi yandje?
3 Tumina ndje uuyelele noshili yoye, yi wilike ndje noyi fale ndje kondundu yoye ondjapuki Sion nokotempeli yoye ho wa kala.
4 Nena otandi ka ya kondjambelo yoye, Kalunga; ngoye oluthithiya luulinawa wandje. Otandi ka hika okaharpa notandi ke ku hambelela, Kalunga, Kalunga kandje.
5 Omolwashike nda sa oluhodhi ngeyi? Omolwashike nda dhigupalelwa ngeyi? Otandi inekele Kalunga, nonatango otandi ke mu hambelela, omuhupithi gwandje naKalunga kandje.
1 Onomakutsi getu yene twe shi uvu, Kalunga — ootate oye shi tu hokololele. Oya popi iilonga iinene we yi longo pethimbo lyawo opomasiku gonalenale.
2 Owa tidha po aapagani nowa langeke aantu yoye mevi ndyoka we li ya pe. Owa geele iigwana yilwe nowa kaleke nawa aantu yoye.
3 Aantu yoye inaa kwata evi molwomagonga gawo, inaa sindana koonkondo dhawo yene, ihe okoonkondo nokomatha goye, okeinekelo oku ku inekela, oshoka owa li u ya hole.
4 Ongoye omukwaniilwa gwandje naKalunga kandje; ongoye to pe aantu yoye esindano,
5 nokoonkondo dhoye tatu sindi aatondi yetu.
6 Ngame itandi inekele uutati wandje nenge egonga lyandje, li hupithe ndje;
7 ihe ongoye we tu hupitha miikaha yaatondi yetu nowa sitha aatondi yetu ohoni.
8 Otwa hala oku ku simaneka ethimbo kehe notatu ku pandula sigo aluhe.
9 Ihe ngashingeyi owe tu ekelehi nowe tu etha, tu sindike; ito tidha po we aatondi yetu.
10 Owe tu etha, tu tidhwe kaatondi yetu noyi ihakanene omaliko getu.
11 Owe tu etha, tu dhipagwe ongoonzi; owe tu halakanithile muupongekwa.
12 Owa landitha po aantu yoye kombiliha, ongo to tala kutya kaye na omupondo gwasha.
13 Aashiinda yetu oya mono shoka we tu ningile notaye tu sheke e taye tu yolo.
14 Owe tu ningi oshiyolwa mokati kiigwana; otaye tu tala nondhino taa pukapuka komitse.
15 Ngame ondi li momupya aluhe; onda gugwa
16 kokuuva omanyenkelo nomasheko gaaniita nangame naambo ye tonde ndje.
17 Ayihe mbika oye tu adha, nonando tse inatu ku dhimbwa nenge tu teye ehangano ndyoka wa hangana natse.
18 Otwa kala aainekelwa yoye; inatu kala inaatu vulika kiipango yoye.
19 Ihe ngoye owe tu ethele mokati kiiyamakuti; owe tu thigi momilema thokothoko.
20 Ngele ando otwe ethele okugalikana Kalunga ketu e tatu galikana oshikalunga shontumba,
21 nena ando owe shi dhimbulula, oshoka omadhiladhilo getu gomonguwi owe ga tseya.
22 Ihe omolwoye tatu dhipagwa ethimbo alihe; tatu ningwa ngaashi oonzi tadhi dhipagwa.
23 Omuwa, penduka! Omolwashike wa kotha? Yeluka! Ino tu ekelahi sigo aluhe!
24 Omolwashike to tu holama? Ino dhimbwa okuhepekwa nuudhigu wetu!
25 Otwa hatwa pevi; otwa lala montsi twa sindika.
26 Ila, u tu kwathe! Tu hupitha omolwesilohenda lyoye!
1 Iitya iiwanawa oyi li komutima gwandje, mokutotela omukwaniilwa ondjimbo ndjika. Ongopena yomunyoli onkulungu, elaka lyandje oli na nale oshitewo.
2 Ngoye ependa mokati komakanda agehe; ngoye omupopi onkulungu. Kalunga okwe ku yambeka aluhe.
3 Homata egonga lyoye, ndjayi omunankondo; ngoye omunene nowa simana.
4 Osheendo shomukwaniilwa nashi adhe esindano okupopila oshili nuuyuuki! Oonkondo dhoye otadhi ku pe esindano ekumithi.
5 Iikuti yoye oya tsa, otayi tyuula momitima dhaatondi yoye; iigwana otayi ihata poompadhi dhoye.
6 Epangelo ndyoka Kalunga e ku pe, otali kala sigo aluhe. Oto pangele aantu yoye nuuyuuki,
7 ou hole shoka shu uka nou tonde uuwinayi. Onkee Kalunga, Kalunga koye, e ku hogolola nokwe ku tilile eyambeko olindji, u vule omukwaniilwa kehe.
8 Omigwayo dha nika nawa odha tilwa koonguwo dhoye; aayimbi otaye ku imbile moombala dha polekwa nomasipa goondjamba.
9 Mokati kaakiintu aambala omu na aakadhona, aana yaakwaniilwa. Kolulyo lwoshipangelapundi shoye okwa thikama omunyekadhi, a zala omakwilika goshingolielela.
10 Mufuko gwomukwaniilwa, pulakena sho te ti — dhimbwa yaandjeni naakweni.
11 Eopalo lyoye otali ku hokitha komukwaniilwa; oye omuwa gwoye, ou na okuvulika kuye.
12 Aatiro otaa ku etele oombalagelo; aayamba otaa kambadhala oku ku heka neliko.
13 Omuna gwokombanda omukadhona oku li mombala nokwo opala ngiini! Omuzalo gwe ogwa tungwa noondali dhoshingoli.
14 Momuzalo gwe guulenga oye mu fala pomukwaniilwa, a landulwa kiinkumbi ye, nayo wo oya falwa pomukwaniilwa.
15 Oya li ya nyanyukwa taa ligola e taa ningine mombala yomukwaniilwa.
16 Ndjayi yandje, oto ka mona aamwoyemati, ya pingene oohekulu muukwaniilwa, noto ke ya kwaniileka kombanda yevi alihe.
17 Ondjimbo yandje otayi taandelitha esimano lyoye sigo aluhe, nakehe gumwe ote ke ku simaneka momathimbo gokomeho.
1 Kalunga oye epopilongulu noonkondo dhetu. Okwi ilongekidha aluhe okukwatha momathimbo guudhigu.
2 Onkee ano itatu tila sha, evi nando nali kakamithwe noondundu nando nadhi gwile muule wefuta;
3 omafuta nando naga geye nokupindjala, niikulundundu nando oyi ndjingandjingithwe kepiyagano.
4 Oku na omulonga tagu eta enyanyu moshilando shaKalunga, omuuwa uuyapuki waanguka gwokombandambanda.
5 Kalunga oku li moshilando shoka, noitashi ka yonagulwa po; petendo lyeluwa ote ya, e shi gamene.
6 Iigwana oya kuyunguta, iilongo otayi pegeya; Kalunga ota ndunduma, evi notali hemuka po.
7 Omuwa Omunankondoawike oku li pamwe natse; Kalunga kaJakob oye omupopili gwetu.
8 Ileni, mu tale iilonga yOmuwa. Konekeni iikumithalonga mbyoka e yi longo kombanda yevi.
9 Ota hulitha po omalugodhi kombanda yevi alihe; ota teya omatati, ta ndonyona omagonga, niikandekitho ote yi fike po.
10 Oye a ti: “Etheni okukondja. Shi tseyeni kutya ongame Kalunga, ndi li kombanda yiigwana nokombanda yuuyuni auhe.”
11 Omuwa Omunankondoawike oku li pamwe natse; Kalunga kaJakob oye omupopili gwetu.
1 Aantu amuhe, hakeleni nenyanyu! Hambeleleni Kalunga nomawi ga yeluka!
2 Omuwa gwokombandambanda oye e na okutilika; oye omukwaniilwa omunene ta pangele uuyuni auhe.
3 Oye e tu sinditha aakuuyuni; okwe tu pangelitha iigwana.
4 Okwe tu hogololele evi moka tu li, eliko lyaantu ye e ya hole noye li uvitile uuntsa.
5 Kalunga ota yi koshipangelapundi she. Ope na oondjimbo dhenyanyu nomahiko gomankuma, sho tu uka ko.
6 Imbileni Kalunga omahambelelondjimbo; imbileni omukwaniilwa gwetu.
7 Kalunga oye omukwaniilwa guuyuni auhe; mu hambeleleni noondjimbo!
8 Kalunga okwa kuutumba koshipangelapundi she oshiyapuki; oye omupangeli gwiigwana.
9 Aapangeli yiigwana otaa gongalele pamwe naantu yaKalunga kaAbraham. Kalunga oye omunankondo e vule omatangakwiita agehe; oye omupangeli a shiga ko.
1 Omuwa oye omunene, i ilongela okusimanekwa moshilando shaKalunga ketu, kondundu ye ondjapuki.
2 Sion, ondundu yaKalunga, oyo onde noyo opala; oshilando shomukwaniilwa omunene otashi nyanyudha uuyuni auhe.
3 Kalunga okwa holola kutya puye opu na egameno meni lyomapopilongulu goshilando.
4 Aakwaniilwa oya gongala, ye ya okumatukila ondundu Sion.
5 Ihe sho ya mono oshilando, oya kumwa; oya tila e taa fadhuka po.
6 Oya adhika kuumbanda nokehaluko ngaashi omusimba e li pokuvala,
7 nongoosikepa tadhi telaganithwa koshikungulu oshidhigu.
8 Otu uvu shoka Kalunga a longo, nongashingeyi otwe shi mono moshilando shaKalunga, Omuwa Omunankondoawike; ota gamene oshilando she sigo aluhe.
9 Motempeli yoye, Kalunga, otatu dhimbulukwa esilohenda lyoye.
10 Oto hambelelwa kaakuuyuni ayehe, edhina lyoye otali itaandelitha kombanda yevi alihe. Oto pangele nuuyuuki.
11 Aasioni ayehe naa nyanyukwe! Omapangulo goye ogu uka; ondigolo nayi kale miilando yaJuda.
12 Aantu ne yaKalunga, dhingolokeni Sion, ne mu yalule ooshungo dhasho.
13 Konekeni omakuma ne mu tale omapopilongulu, opo mu ka hokololele oluvalo lwokonakuyiwa:
14 “Kalunga ketu oye nguka aluhe sigo aluhe; oye te ke tu enditha nomethimbo tali ya.”
1 Kehe gumwe, pulakena! Pulakeneni, ne aantu yomuuyuni auhe,
2 aawa naathigona, aayamba noohepele.
3 Omadhiladhilo gandje ogomuule; otandi popi oohapu dhoondunge.
4 Onda gama unene komayeletumbulo notandi ga fatulula mokuhika okahumba.
5 Momathimbo guudhigu ine tila nando osha, uuna nda kundukwa kaatondi,
6 kaadhudhu mbo haa inekele uuyamba wawo nohaa inenepekele omaliko gawo ogendji.
7 Omuntu ita vulu okwiihupitha; ita vulu okufuta Kalunga, e mu kaleke nomwenyo,
8 oshoka ofuto molwomwenyo gwomuntu onene noonkondo. Shoka te shi futu ando, itashi gwana.
9 Ofuto ndjoka itayi mu keelele mombila; itayi mu kaleke nomwenyo sigo aluhe.
10 Kehe gumwe okwa tseya kutya naanandunge wo ohaa si; aagoya naathethe wo okombila yu uka. Ayehe mbaka omauyamba gawo otaye ga thigile omaluvalo gawo.
11 Oombila dhawo odho omagumbo gawo sigo aluhe; omo moka taa kala aluhe, nonando oya li ye na omayana gawo yene.
12 Esimano lyomuntu, itali vulu oku mu hupitha moonyala dheso; ota ka sa owala a fa oshinamwenyo.
13 Koneka sho tashi adha mbo yi iyinekela yo yene, shoka tashi ka tsakaneka mboka ya gwanenwa komaliko.
14 Otaa si omulape ya fa oonzi, neso otali ya landula ngomusita. Omalutu gawo otaga olele mbala muuyuni wokuusi kokule nomagumbo gawo, yo itaa yelekwa naayuuki.
15 Ihe Kalunga ota popile ndje; ota hupitha ndje moonyala dheso.
16 Ino piyaganekwa komuntu ngo ta ningi omuyamba, ngele eliko lye tali indjipala;
17 ita vulu okuya nalyo, uuna ta mana oondjenda; eliko lye itali ke mu thindikila kombila.
18 Omuntu nando oku kale a gwana mokukalamwenyo huno kwongashingeyi nota simanekwa, sho e li nawa,
19 ota ka sa ashike ngaashi oohekulu, oomboka ye li momilema dhaaluhe.
20 Esimano lyomuntu itali vulu oku mu hupitha moonyala dheso; ota ka sa ashike a fa oshinamwenyo.
1 Omuwa Kalunga Omunankondoawike ota popi; oti ithana evi alihe okuza kuuzilo sigo okuuninginino.
2 Uuyelele waKalunga otau zi muSion, moshilando sho opala, sho opalelela.
3 Kalunga ketu ote ya, ihe ite ende a mwena; omulilo hagu lungunitha otagu mu tetekele, nomalaka gomulilo oge mu kundukidha.
4 Oti ithana egulu nevi, ga ninge oonzapo oku mu tala, sho ta pangula aantu ye.
5 Oye ta ti: “Ileni kungame, aantu yandje aainekelwa, mbo mwa dhike ehangano nangame mokuyambela ndje omayambo.”
6 Ewangandjo otali hokolola kutya Kalunga oye omuyuuki, oshoka oye mwene omupanguli.
7 “Aantu yandje, pulakeneni, ongame tandi popi; Israel, otandi ku tamaneke. Ongame Kalunga, Kalunga koye.
8 Itandi ku nyenyetelele omayambo goye nomafikilondjambo ngoka ho etele ndje aluhe.
9 Ngame itandi pumbwa oondumetana dhomoohambo dhoye nenge iikombo yomiigunda yoye.
10 Iithitukuti ayihe oyandje, osho wo iimuna kiikulundundu yomayuvi.
11 Oondhila adhihe dhomiihwa odhandje niinamwenyo ayihe yokelundu.
12 Ngele ando ondi niwe kondjala, itandi shi ku lombwele, oshoka uuyuni naashihe shi li mo, oshandje.
13 Ohandi li tuu onyama yoondumetana nenge ndi nwe ombinzi yiikombo?
14 Pa Kalunga koye omayambo gomapandulo, gwanithila Omunankondoawike omauvaneko goye.
15 Ithana ndje esiku lyuudhigu woye; ngame otandi ku hupitha, ngoye e to simaneke ndje.”
16 Ihe komukolokoshi Kalunga ota ti ngeyi: “Omolwashike to tumbula iipango yandje? Oto popile shike ehangano lyandje?
17 Oho tindi, ndi ku pukulule; oho ekelehi omalombwelo gandje.
18 Oho panga uukuume nomufuthi ngo to tsakaneke noho itula kumwe naahondeli.
19 “Okana kwoye otaku popi aluhe uukolokoshi; iho fudha inoo popya iifundja.
20 Aamwanyoko oto ya tamaneke naana yanyoko oto ya pe uusama.
21 Owa longo ayihe mbika, ihe ngame inandi tya sha. Owa dhiladhila kutya onde ku fa. Ihe ngashingeyi otandi ku nyenyetele notandi ku ulukile epuko lyoye.
22 “Ne mboka hamu dhini ndje, pulakeneni, opo ndaaye mu yone po, nokaku na we ngoka te mu hupitha.
23 Omapandulo ogo omayambo gokusimaneka ndje, notandi ka hupitha ayehe mbo haa vulika kungame.”
1 Kalunga, sila ndje ohenda omoluuwanawa woye owindji. Dhima po oondjo dhandje omolwesilohenda lyoye enene.
2 Yoga ndje uuwinayi wandje auhe, ngu u thete po ondjo yandje.
3 Omayono gandje onde ga dhimbulula; oondjo dhandje odhi li aluhe momeho gandje.
4 Okungoye awike nda yono, nonda ningi shoka ho shi tondo. Onkee ano ino puka, sho to pangula ndje; oshu uka, sho to geele ndje.
5 Ngame omulunde okuza kevalo, okuza kesiku ndyoka nda valelwa muuyuni.
6 Ngoye oto pula, ndi kale moshili; pe ndje omadhiladhilo ge na oondunge.
7 Kutha po ondjo yandje, ndi kale nda yogekeka; yoga ndje, ndi kale nda yela ndi vule oonguwo oontokele.
8 Pulakenitha ndje omawi genyanyu nogeligolo; nonando wa dhenge ndje nokudhengelela, otandi ka nyanyukwa natango.
9 Isiikila, waa tale oondjo dhandje, dhima po omayono gandje agehe.
10 Kalunga, shitila ndje omutima omuyogoki, ngu u tule meni lyandje ombepo ompe noyevuliko.
11 Ino kutha ndje po koshipala shoye; ngoye ino kutha ndje Ombepo yoye ondjapuki.
12 Pe ndje natango enyanyu lyomehupitho lyoye, ngoye u ninge ndje omuvuliki.
13 Nena aalunde otandi ke ya longa okuvulika kiipango yoye, notaa ka galukila kungoye.
14 Kalunga, omuhupithi gwandje, keelela ndje ndaa dhipagwe, notandi ka hokolola nenyanyu uuyuuki woye.
15 Omuwa, makula okana kandje, e tandi ku hambelele.
16 Omayambo ito ga pumbwa, ando nde ge ku pe; omafikilondjambo ino ga hokwa.
17 Kalunga, ombepo yi ishonopeka oyo eyambo lyandje, omutima gwi itedhulula ito gu ekelehi.
18 Kalunga, sila Sion ohenda, ngu u mu kwathe; tungulula omakuma gaJerusalem.
19 Nena oto ka nyanyukilwa omayambo gu uka nomafikilondjambo getu. Oondumetana otadhi ka yambelwa koshiyambelo shoye.
1 Munankondo ngoye, omolwashike to inenepekele uukolokoshi woye? Esilohenda lyaKalunga otali kala sigo aluhe.
2 Oto longekidha okuyona po yakweni; elaka lyoye olya tsa ngaashi okakululo. Aluhe oto toto omahokololo giifundja.
3 Ou hole uukolokoshi peha lyuuwanawa nou hole iifundja peha lyoshili.
4 Mufundja ngoye, ou hole okupopya nayi yakweni!
5 Onkee ano Kalunga ote ku hulitha po sigo aluhe; ote ku kwata e te ku umbile kokule noyaandjeni; ote ku tembudha mo mehala lyaanamwenyo.
6 Aayuuki otaye shi mono e taa tila; otaye ku yolo e taa ti:
7 “Tala kunguka inaa pumbwa egameno lyaKalunga, ihe okwi inekele uuyamba we owindji, mokukolokosha omo a kongo egameno.”
8 Ihe ngame onda fa omuti gwomuolivi gwa mena megumbo lyaKalunga; otandi inekele esilohenda lye aluhe sigo aluhe.
9 Kalunga, onda hala oku ku pandula aluhe; ndi ku pandulile iilonga yoye. Megongalo lyaantu yoye otandi hokolola uuwanawa woye.
1 Aagoya otaa ilombwele taa ti: “Kaku na Kalunga!” Aantu mbaka oya shunduka noya longo omasithahoni; kaku na nando ogumwe ta longo uuwanawa.
2 Kalunga oku li megulu noto ontamene aantu kombanda yevi, opo a tale, ngele oku na omunandunge nongele oku na nando ogumwe te mu simaneke.
3 Ihe ayehe oya puguma; ayehe oya yonana. Kaku na nando gumwe ta longo shoka shi li mondjila, nando ogumwe.
4 “Aakolokoshi mbaka inaye shi tseya nani?” Kalunga ta pula. “Oyo haa hupu mokuyuga aantu yandje yo ihaa galikana ndje.”
5 Oyo taa ka adhika kehaluko enene inaaye li mona nale, oshoka Kalunga ota ka halakanitha iipongo yaambo ye tonde aantu ye. Kalunga okwe ya ekelehi, naIsrael ote ke ya sinda thilu.
6 Ando muSion mu zile Israel ekwatho! Uuna Omuwa ta ka hepulutha natango aantu ye, nena Aaisraeli otaa ka nyanyukwa ngiini!
1 Kalunga, hupitha ndje koonkondo dhoye; mangulula ndje nomatha goye!
2 Kalunga, uva egalikano lyandje; pulakena omatumbulo gandje!
3 Aayinenepeki otaa ponokele ndje; aadhudhu otaa kambadhala okudhipaga ndje — oyo aantu ihaaya dhiladhila Kalunga.
4 Ihe Kalunga oye omukwathi gwandje. Omuwa oye omupopili gwandje.
5 Kalunga na galulile aatondi yandje uukolokoshi wawo. Ote ya yono po, oshoka oku shi kwiinekelwa.
6 Omuwa, onda hala oku ku yambela nenyanyu omayambo; onda hala oku ku pandulila uuwanawa woye.
7 Owa hupitha ndje muudhigu wandje auhe, onda tala aatondi yandje ya sindika.
1 Kalunga, uva egalikano lyandje; ino pilamena eindilo lyandje!
2 Pulakena e to yamukula ndje; onda namekwa kiimpwiyu yandje.
3 Onda mbandamekwa komatilitho gaatondi, onda thindilwa pevi komathiminiko gaakolokoshi. Otaye etele ndje uudhigu; oya geela ndje noye tonde ndje.
4 Onda tilithwa, nomahalutho geso otaga thindi ndje.
5 Onda kwatwa ketilo nokekakamo, uumbanda owa tono ndje.
6 Ando onda li nomawawa ngaashi onguti, ando ote tuka, ndi ka konge evululuko.
7 Onda hala okutukila kokule nokutungila egumbo mombuga.
8 Onda hala ndi ikongele nziya epopilongulu, ndaa dhengwe kombepo nokoshikungulu.
9 Omuwa, piyaganeka okupopya kwaatondi yandje!
10 Moshilando ondi wete mo eyugo niipotha tayi shi kunduka omutenya nuusiku, oshu udha uudhudhu nuupyakadhi.
11 Akuhe oku na eyonuuko; omapandaanda ogu udha ethiminiko nekotokelo.
12 Ando okwa li omutondi gwandje a sheke ndje, ando onda vulu oku shi idhidhimikila; ngele ando omukondjithi gwandje ti inenepekele ndje, ando ote vulu oku mu holama.
13 Ihe ngo te shi ningi, okuume kandje hatu kala naye, omwiinekelwa.
14 Moonkundathana, otwa li hatu egululilathana omitima notwa galikana pamwe motempeli.
15 Eso nali kuthe po aatondi yandje, ethimbo manga inaali thika; naa kulukile mbala mehala lyaasi ye na omwenyo! Uuwinayi ou li momagumbo gawo nomomitima dhawo.
16 Ihe ngame ote pula ekwatho kOmuwa Kalunga, oye nota hupitha ndje.
17 Omayemato nomakemo gandje otaga thiki kuye ongula, omutenya nuusiku, oye notu uvu ewi lyandje.
18 Oye ta galula ndje nombili kolugodhi, sho nda li te kondjitha aatondi oyendji.
19 Kalunga ngoka a kala omupangeli okuza nalenale, ota ka uva ndje e te ya sindi; oshoka otaa tindi okwiitedhulula noihaye mu tila.
20 Kuume kandje konale okwa kondjitha ookuume ke; ina gwanitha omauvaneko ge.
21 Oohapu dhe odhi na omuthenu gu vule gwomagadhi, ihe oku na uutondwe momutima; iitya ye oyi na omuheka, ihe otayi tete ya fa omagonga ga tsa.
22 Uudhigu woye u fala kOmuwa, oye te ku popile; ihe etha aayuuki ya sindike.
23 Ihe ngoye Kalunga oto hulitha po aadhipagi naafundja mboka, manga etatakati lyokukalamwenyo kwawo inaali thika. Ihe ngame onde ku inekela.
1 Kalunga, sila ndje ohenda, oshoka onda langelwa; aatondi yandje otaa tidhagana ndje ethimbo alihe.
2 Okuza ongula sigo okomatango aakondjithi yandje otaa matukile ndje. Oyendji mboka taa kondjitha ndje.
3 Uuna nda tila, onde ku inekela, Omuwa Omunankondoawike.
4 Ondi inekela Kalunga noite tila; otandi mu simanekele omauvaneko ge. Omuntu ota ningi ndje shike?
5 Aatondi yandje otaa hindi ndje esiku alihe; aluhe otaa uvanene okuningila ndje uuwinayi.
6 Otaa gongala e taa langele ndje. Otaa tala shoka te longo, opo ya dhipage ndje.
7 Kalunga, ya geelela uukolokoshi wawo; sinda aantu mboka nondjahi yoye!
8 Owa tseya, nkene ndi na uudhigu; omahodhi gandje owe ga pungula. Inaga nyolelwa nani membo lyoye?
9 Esiku tandi ku ithana, aatondi yandje otaa shuna lwaanima. Ondi shi shi: Kalunga okwa gama kungame —
10 Omuwa ngoka tandi mu pandulile omauvaneko ge.
11 Onde mu inekela noite tila. Omuntu ota ningi ndje shike?
12 Kalunga, otandi ku pe shoka nde shi uvaneke; otandi ku pe omayambo gomapandulo,
13 Oshoka owa hupitha ndje meso nowa gamene ndje, ndaa sindike. Nena otandi ende koshipala shaKalunga, omuuyelele waanamwenyo.
1 Kalunga, sila ndje ohenda, sila ndje ohenda, oshoka okungoye tandi kongo egameno. Otandi holama momuzile gwomawawa goye, sigo iikungulu iidhigu tayi kodha.
2 Otandi ithana Kalunga gwokombandambanda, Kalunga ngo ha gwanithile ndje oompumbwe adhihe.
3 Oye ta yamukula ndje e li megulu e ta hupitha ndje; ota sindi aathiminiki yandje. Kalunga ota hololele ndje esilohenda lye nuudhiginini we.
4 Onda kondekwa kaatondi, mbo ya fa oonime dha fukila onyama yomuntu. Omayego gawo oga fa oomwele niikuti; omalaka gawo oga fa omagonga ga tsa.
5 Kalunga, holola uunene woye kegulu nesimano lyoye kombanda yevi alihe.
6 Aatondi yandje oyu umbu oshiyulitho shokuyula ndje; onda tonwa kuudhigu. Oyo ya fulile ndje ekelo mondjila, ihe oya gwile mo yo yene.
7 Kalunga, ngame ondi na einekelo lya kola; otandi imbi e tandi ku simaneke!
8 Mwenyo gwandje, penduka! Okaharpa nokashandja kandje, imba! Onda hala okupendutha etango.
9 Omuwa, otandi ku pandula mokati kiigwana. Otandi ku simaneke mokati kaakuuyuni.
10 Ohole yoye yaa na ndjele, oya tsa kegulu; uudhiginini woye otau thiki keyalelo.
11 Kalunga, holola uunene woye kegulu nesimano lyoye kombanda yevi alihe.
1 Ne aapangeli, ohamu tokola tuu pauyuuki? Ohamu pangula tuu aantu ayehe shi thike pamwe?
2 Ihamu shi ningi! Ohamu dhiladhila owala egeelo ndyo tamu ya pe notamu eta uupwidhi neyugo moshilongo.
3 Aakolokoshi otaa tsikile uukolokoshi wawo; ohaa fundju okuza kevalo lyawo.
4 Oyu udha uuzigo ya fa omayoka; otaa thitike omakutsi gawo ya fa efu embolo,
5 ndyoka ihaali uvu ewi lyomunonomi gwomayoka, neizizimo lyompulile onkulungu.
6 Kalunga, teya omayego goonime ndhika oonkolokoshi.
7 Naa kane po ongomeya taga pwine; naa lyatelwe pevi ongomwiidhi gwomondjila.
8 Naa fe oonkonkolosa tadhi hemuka po; naa fe okanona ka valwa ka sa, itaaka mono etango.
9 Manga inaaye shi tseya, otaa tetwa po ongiigwanga mepya; mondjahi ye Kalunga ote ya pepe po, manga ye na omwenyo.
10 Aayuuki otaa ka nyanyukwa, sho taa mono aalunde taa geelwa; otaa ende mombinzi yaakolokoshi.
11 Aantu otaa ti: “Aayuuki oya pewa ondjambi; eeno, oku na Kalunga omupangeli guuyuni.”
1 Kalunga kandje, hupitha ndje miikaha yaatondi yandje; gamena ndje kumboka ya hala okuponokela ndje!
2 Hupitha ndje kaakolokoshi; yululula ndje miikaha yaadhipagi!
3 Tala! Otaa langele okudhipaga ndje; aakolokoshi otaa gongalele okukondjitha ndje. Hamolwondjo nenge epuko lyasha nde li ninga.
4 Omuwa, hamolweyono lyasha ando nde li ninga, sho taa matukile komahala gawo.
5 Omuwa, Kalunga Omunankondoawike, penduka, u kwathe ndje; Kalunga kaIsrael, ila, u tale! Penduka, u geele aapagani; ino sila aakotokeli mbo aawinayi ohenda!
6 Pethimbo lyongulohi otaa galuka notaa ulula ya fa oombwa, sho taa ende moshilando.
7 Pulakena komasheko nomatilitho gawo. Omalaka gomomakana gawo oga fa omagonga, ihe otaa dhiladhila kutya kaku na ngoka e ya pulakena.
8 Ihe ngoye, Omuwa, oto ya yolo; oto sheke aapagani ayehe.
9 Ngame ondi inekela oonkondo dhoye; ongoye epopilongulu lyandje, Kalunga.
10 Kalunga kandje oku hole ndje note ya kungame; oye ta talitha ndje okusindika kwaatondi yandje.
11 Kalunga, ino ya dhipaga po, opo oshigwana shandje shaaye shi dhimbwe. Ya halakanitha noonkondo dhoye e to ya sindi, Omuwa, omugameni gwetu.
12 Oondjo odhi li komilungu dhawo; oohapu dhawo adhihe odhuulunde. Naa kwatelwe muuntsa wawo, oshoka ohaa tukana e taa fundju.
13 Ya geela wa sa ondjahi; ya yona po thiluthilu. Nena kehe gumwe ota ka tseya kutya Kalunga oye omupangeli muIsrael, nepangelo lye otali adha sigo okooha dhuuyuni.
14 Ongulohi aatondi yandje otaa galuka, otaa ulula ya fa oombwa, sho tadhi ende moshilando,
15 ongoombwa tadhi kongo iikulya notadhi nkwina, ngele inadhi mona sha.
16 Ihe ngame otandi imbi omolwoonkondo dhoye; kehe ongula otandi imbi mokule omolwesilohenda lyoye. Owa kala egameno lyandje, epopilongulu lyandje methimbo lyuudhigu.
17 Otandi ku pandula, omupopili gwandje. Kalunga oye egameno lyandje, Kalunga ngoka e hole ndje.
1 Kalunga, owe tu ekelehi nowe tu halakanitha po; owe tu geele, ihe ngashingeyi tu sila ohenda ishewe.
2 Owa kakamitha evi, nowe li tendeke omusa; ngashingeyi hondja omisa dhalyo, oshoka otali tatuka.
3 Aantu yoye owe ya tsike uudhigu uunene; otwa tantala ongaantu ya kolwa.
4 Mboka haa ku tila owe ya londodha, opo ya ye epangulo ontuku.
5 Tu hupitha noonkondo dhoye; zimina eindilo lyetu, aaholike yoye opo ya hupithwe.
6 Kalunga okwa popi e li muuyapuki we: “Mesindano otandi tende Shekem nolusilu lwaSukkot otandi lu topolele aantu yandje.
7 Gilead oshandje, naManasse osho tuu; Efraim oye egala lyandje lyosheela, naJuda oye ondhimbo yandje yuukwaniilwa.
8 Moab osho oshiyaha shandje shokwiiyogela notandi ka umbila Edom oongaku dhandje, okuholola kutya ongame mwene gwasho. Aafilisti, inamu nyanyukilwa edhiladhilo ndyoka kutya omwa sinda ndje.”
9 Kalunga, olye ta fala ndje moshilando sha kola? Olye ta thindikile ndje kuEdom?
10 Owe tu ekelahi nani? To ka enda tuu pamwe nomatangakwiita getu?
11 Tu kwatha mokukondjitha aatondi yetu. Ekwatho lyomuntu kali na shilonga.
12 Pamwe naKalunga otatu ka sindana; otatu ka sinda aatondi yetu.
1 Kalunga, pulakena okulila kwandje; uva egalikano lyandje.
2 Mokwaanetegameno nomokukala kokule noyaandjetu otandi ku ithana! Londeka ndje puule,
3 oshoka ongoye omugameni gwandje, epopilongulu lyandje lya kola kaatondi yandje!
4 Kaleka ndje muuyapuki woye sigo aluhe; tula ndje megameno kohi yomawawa goye.
5 Kalunga, owu uvu omauvaneko gandje, nowa pe ndje oshipewa shaamboka haye ku simaneke.
6 Komasiku gomukwaniilwa gwedhela ko oomvula odhindji; lelepeka okukalamwenyo kwe!
7 Na pangele aluhe koshipala shoye, Kalunga; mu gamena nesilohenda nuudhiginini woye.
8 Onkee ano otandi ke ku imbila aluhe omahambelelo, sho tii ku pe esiku kehe shoka nde shi uvaneke.
1 Onda tegelela neidhidhimiko, Kalunga a hupithe ndje; oye awike ndi inekela.
2 Oye awike ta gamene ndje e ta hupitha ndje; oye omupopili gwandje, noitandi ka sindika nando.
3 Sigo uunake ne amuhe tamu kondjitha omuntu gumwe, ngoka oshimbembe a fa olukutu lwa kulupa?
4 Otamu kundathana okuhulitha po esimano lye; omu hole iifundja. Momakana otamu tumbula omayambeko, ihe momitima otamu sheke.
5 Omwenyo gwandje, omuKalunga amuke to mono evululuko; omuye awike u na etegameno.
6 Oye awike ta gamene ndje nota hupitha ndje. Oye epopilongulu lyandje, ite sindika.
7 Ehupitho lyandje nesimano lyandje oli li muKalunga; oye emanya lyandje lya kola nepopilongulu lyandje.
8 Aantu ne, inekeleni aluhe Kalunga. Anekeni omaudhigu geni koshipala she, oshoka oye omupopili gwetu.
9 Aanenentu naathigona ayehe oyo omufudho gwowala; ayehe kaye na po sha. Ya tula koshiyelekitho, ayehe kape na sha; ayehe omufudho gwowala.
10 Ino inekela okulwa omakumbu; ino inekela iinima ya yugwa; nando uuyamba woye tau tana, ino tula mo omwenyo gwoye.
11 Olwindji ondu uvu Kalunga ta popi ta ti, oye Kalunga omunankondo,
12 oye Omuwa omunahole. Eeno, ota futu kehe omuntu shi thike piilonga ye.
1 Kalunga, ongoye Kalunga kandje, otandi ku kongo. Onde ku yuulukwa nda mana mo; ngaashi evi lya kukuta lya sa oluteni, osho omwenyo gwandje gwe ku yuulukwa.
2 Nandi ku mone u li muuyapuki woye; nandi tale oonkondo nesimano lyoye.
3 Okusilwa ohenda kungoye oku vulile ndje okukala nomufudho, notandi ke ku simaneka.
4 Onda hala oku ku hambelela, manga ndi na omwenyo; megalikano otandi yeluthile omaako gandje kungoye.
5 Omwenyo gwandje otagu kuta ongaashi moshituthi; omilungu nokana kandje otake ku tanga.
6 Otandi ku dhimbulukwa mokukala kwandje; otandi ku dhiladhila miikako yuusiku,
7 oshoka ongoye ekwatho lyandje, momuzile gwomawawa goye otandi imbi nokunyanyukwa.
8 Otandi ku dhama; oshikaha shoye osha gamena ndje.
9 Mbo taa kongo omwenyo gwandje, otaa ka kulukila meso.
10 Otaa ka lika po kegongamwele notaa ka ninga oondya dhoombandje.
11 Ihe omukwaniilwa ota ka nyanyukwa, oshoka Kalunga ote mu pe esindano. Ayehe mbo haa uvaneke medhina lyaKalunga, otaa ke mu hambelela, ihe omakana gaafundja otaga ka mwenekwa.
1 Kalunga, uva ndje mokulila kwandje; gamena omwenyo gwandje komatilitho gaatondi.
2 Holeka ndje omolwondjuvanena yaadhudhu nongundu yaakolokoshi.
3 Otaa upike omalaka gawo ngaashi omagonga; otaa zi iitya iilulu ya fa omaholongo.
4 Otaa uluma okutaandelitha iifundja yawo; omuyuuki otaye mu langele e taye mu yaha.
5 Otaa kolekelathana mokulonga uukolokoshi notaa uvanene, nkene ye na okutega oomwigo dhawo. Otaa ti: “Olye te dhi mono?”
6 Otaa uvanene okulonga uudhudhu e taa ti: “Otu na ompangela ya kola.” Omutima gwomuntu oshilongo shi ili.
7 Ihe Kalunga ote ya yaha niikuti ye, e taa gwile po mbala.
8 Kalunga ote ya geele molwoohapu dhawo; ayehe mboka taye ya tala, otaa pukapuka komitse ye ya dhina.
9 Aantu ayehe otaa ka tila; otaa ka hokolola iilonga yaKalunga notaa ka dhiladhila shoka e shi longa.
10 Aayuuki naa nyanyukilwe Omuwa yo naa konge eholameno muye. Ayehe mboka yaa na iihelele, otaye ke mu hambelela.
1 Kalunga, osho opala oku ku hambelela muSion; otatu ku gwanithile omauvaneko getu.
2 Eeno, ongoye nguka ho uvu omagalikano. Aantu ayehe otaye ya kungoye omolwoondjo dhawo
3 Omayono getu oge tu tono, ihe owe ga dhimi po.
4 Aanelago oomboka we ya hogolola nowe ya kaleke muuyapuki woye. Otatu ka kuta kuuwanawa womegumbo lyoye, otempeli yoye ondjapuki.
5 Kalunga omuhupithi gwetu, owe tu yamukula miilonga yoye iikumithi sho we tu hupitha. Aantu yomuuyuni auhe noyokombanda yomafuta otaye ku inekele.
6 Owa thikameke po oondundu koonkondo dhoye; omatha ogo omuzalo gwoye.
7 Owa loteke etukuluko lyomafuta nedhengo lyomakuthikuthi; owa mweneke omakolokosho giigwana.
8 Aakali kombanda yevi otaa kuminwa iinyengandunge yoye. Aantu yokoombinga adhihe dhevi otaye ku hambelele.
9 Evi oho li sile oshimpwiyu, sho ho li tekele; oho li yambapaleke. Omilonga dhaKalunga odhu udha omeya okupa aantu iilya, oshoka osho we li tulile po.
10 Oto tutike omasilu gevi noto yelekanitha iituntu yalyo. Oto li nengeneke niihomo, niimeno yalyo oto yi yambeke.
11 Oto gandja eteyo ewanawa; iinkoti yoye oyu udha uuyamba.
12 Omalundu oga ziza; oondundu odha nyanyukwa.
13 Omalundu ogu udha oonzi, nomapya oga ziza iilya; ayihe otayi ligola ya nyanyukwa.
1 Aantu amuhe, hambeleleni Kalunga!
2 Tangeni esimano lyedhina lye; mu simanekeni nokuhambelela!
3 Tyeni kuKalunga: “Iilonga yoye iikumithi ngiini! Oonkondo dhoye odho oonene, sho aatondi yoye taye ku tsile oongolo ya tila.
4 Kehe shimwe kombanda yevi otashi isizimike kungoye; otayi ku imbile ehambelelo notayi simaneke edhina lyoye.”
5 Ileni, mu tale iilonga yaKalunga, iikumitha ye mokati kaantu.
6 Okwa lundulula efuta, li ninge evi ekukutu; ootate oya taaguluka omulonga kolupadhi. Otse otwa nyanyukilwa iilonga ye.
7 Epangelo lye otali kala sigo aluhe; omeho ge otaga tongolola iigwana. Oonakwaavulika itaa vulu okutsa ondumbo naye.
8 Aantu ne, simanekeni Kalunga ketu; omaimbilo gepandulo naga uvike.
9 Okwe tu kaleke nomwenyo nokwe tu gamene twaa punduke.
10 Kalunga, owe tu yeleke; ngaashi oshisiliveli hashi yelithwa momulilo.
11 Owe tu ethele momwigo nowe tu tsike omitenge omidhigu koothingo dhetu.
12 Owe etha aatondi ye tu lyatagule; otwa piti momulilo nomomeya, ihe owe tu eta kehala lyomahupilo.
13 Otandi eta omafikilondjambo kotempeli yoye; otandi ku gwanithile omauvaneko gandje.
14 Otandi ku pe ngaashi nda popile, sho nda li muudhigu.
15 Otandi ku yambele iimuna yo ondoka pamwe noonzi; otandi ku pe oondumetana niikombo — olwithi lu uke pombanda.
16 Ileni, pulakeneni amuhe mboka hamu tila Kalunga. Otandi mu lombwele shoka Kalunga e shi ningile ndje.
17 Otandi mu kugile ekwatho; otandi mu hambelele noondjimbo.
18 Ando onda li nda mwenena oondjo dhandje inaandi dhi hempulula, ando Omuwa ina uva ndje.
19 Ihe Kalunga oku uva ndje; oku uva egalikano lyandje.
20 Otandi hambelele Kalunga, sho inaa tinda eindilo lyandje, ye a kale ando itaa sile ndje ohenda.
1 Kalunga, tu sila ohenda e to tu yambeke; tu tala nolukeno,
2 opo uuyuni auhe u tseye ehalo lyoye; aantu ayehe ya tseye kutya ongoye omuhupithi.
3 Kalunga, aantu ayehe naye ku simaneke; aantu ayehe naye ku hambelele!
4 Iigwana nayi nyanyukwe yo nayi ligole, oshoka oto pangula aantu shi thike pamwe noto wilike oshigwana kehe kombanda yevi.
5 Kalunga, aantu naye ku pe esimano; aantu ayehe naye ku hambelele!
6 Evi olya menitha iimeno yalyo; Kalunga, Kalunga ketu okwe tu yambeke.
7 Kalunga okwe tu yambeke; aantu ayehe kombanda yevi naye mu simaneke.
1 Kalunga okwa thikama nokwa tidha po aatondi. Mboka haa tsu ondumbo naye, naa ye ontuku.
2 Ya pepa po, ngaashi olwithi talu yi ombepo; ongaashi ezi tali hemukithwa komulilo, osho aakolokoshi taa kana po koshipala she.
3 Ihe aayuuki otaa shambukwa notaa nyanyukwa koshipala shaKalunga; otaa ligola e taa tanta.
4 Imbileni Kalunga, imbeni nokusimaneka edhina lye; longekidheni epola lyaanguka he ende miikogo. Omuwa olyo edhina lye — nyanyukweni koshipala she.
5 Kalunga oye he yoothigwa nomugameni gwaaselekadhi; oye a kala mehala lye eyapuki.
6 Oye ta pe omapongo omagumbo, ota piitha mo oonkwatwa e te ya pe emanguluko, ihe oonakwaavulika otaa ka kala mevi lya lokota komutenya.
7 Kalunga, owa kwatele komeho aantu yoye, sho we ende nayo mombuga.
8 Evi olya kakama, negulu olya lokitha omvula omolwokuholoka kwaKalunga puSinai, eholoko lyaKalunga kaIsrael.
9 Kalunga, owa gandja omvula ya gwana; owa mwenyeke evi lya li lya kukuta.
10 Aantu yoye oye li lala; eeno, Kalunga, molunza luuyamba woye owa pe mo oohepele.
11 Omuwa okwa gandja oshipango naakiintu oyendji oya ningi aayuvithi
12 “Aakwaniilwa naakwiita yawo otaa yi ontuku.” Aakiintu momagumbo otaa topola oshihakanwa:
13 iifetha yoonguti dha kolongithwa oshisiliveli, nomawawa gadho taga tayima oshingolilela, omanga yamwe yomuyo ye li mokati koonzi.
14 Kalunga Omunankondoawike sho a halakanitha aakwaniilwa mbeya, osha li sha fa oompawe tadhi loko kondundu Salmon.
15 Ondundu Baasha oya tumbalala, ondundu yomitse omile!
16 Ne oondundu dhomitse odhindji, omolwashike mwa sila efupa ondundu ndjoka Omuwa Kalunga a hogolola a kale ko sigo aluhe?
17 Omatembakwiita gaKalunga ogo omayuvi ogendji; Omuwa okwa zi kuSinai e te ya motempeli ye ondjapuki.
18 Sho a yi kombandambanda, okwa faalele oonkwatwa; okwa pewa oombalagelo kaantu nokoonakwaavulika wo — Omuwa Kalunga oko ta ka kala aluheluhe.
19 Esimano nali pewe Omuwa Kalunga, omuhupithi gwetu; ngoka ta humbata omaudhigu getu esiku kehe.
20 Kalunga ketu oye Kalunga ha hupitha; Omuwa ngoka te tu hupitha meso.
21 Kalunga ota ka keka ko omitse dhaatondi ye, odhaamboka taa tsikile okuyona kwawo.
22 Omuwa okwa ti: “Aatondi yeni otaye ke mu galukila taa zi kuBaasha, kohi yefuta otii ya kutha ko,
23 opo mu ke ende mombinzi yaatondi yeni, manga oombwa dheni tadhi shakumine ombinzi yawo.”
24 Kalunga, omusholondondo gwoye ogu wetike; osheendo shaKalunga, omukwaniilwa gwandje, oshu uka muuyapuki we.
25 Komeholela oku na aaimbi, taku landula aahiki yuuhumba, pamwe nayo aakadhona aahiki yoontunda.
26 Simanekeni Kalunga megongalo lyaantu ye; hambeleleni Omuwa megongalo lyaIsrael.
27 Ezimo enkelo lyaBenjamin olyo lye ya kwatela komeho, opo ihe aana yokombanda yaJuda pamwe nongundu yawo, notaku landula aana yokombanda yaSebulon naNaftali.
28 Kalunga, holola oonkondo dhoye; ulika oonkondo dhoye ngaashi shito.
29 Dhi holola motempeli yoye muJerusalem, moka aakwaniilwa taa ku etele omagano.
30 Ganda Egipiti, oshilikama shoka mokati komanenge, oshigunda shoontsezi mokati kuutaagona! Ayihe ngele yi igandja, otayi ke ku tsila oongolo e tayi ku pe oshisiliveli. Halakanitha aantu mbo ye hole okuhinga iita.
31 KuEgipiti otaku zi aatumwa; Aaetiopia otaa ka yelutha omaako nokugalikana Kalunga.
32 Imbileni Kalunga, omapangelo gokombanda yevi, simanekeni Omuwa!
33 Oonguka te ende miikogo, mewangandjo lyonalenale; uveni ngu ta ndunduma newi enene.
34 Uvitheni oonkondo dhaKalunga; uunene we ou li kombanda yaIsrael, oonkondo dhe odhu udha ewangandjo.
35 Kalunga, ongoye omutilithi motempeli yoye; Kalunga kaIsrael ota gandja oonkondo nomukumo kaantu ye. Kalunga na simanekwe!
1 Kalunga, hupitha ndje, oshoka omeya oga tsa ndje pothingo.
2 Otandi ningine menono, nokaku na oshilyatelelo. Onde ya puule womeya; efundja olya kondeka ndje.
3 Onda vulwa kokwiithana ekwatho omuligu gwandje ogwa thita. Omeho gandje otaga nyengwa okumona Kalunga kandje.
4 Mbo ye tonde ndje pwaa na etompelo, oye vule omwaalu gwomafufu gokomutse gwandje. Oyendji oya ningi aatondi yandje, nando inandi ya ninga sha; oya hala okudhipaga ndje. Otandi thiminikwa okufuta shoka inaandi shi yaka.
5 Kalunga, omayono gandje inage ku holekwa; omapuko gandje owe ga tseya.
6 Mboka ye na etegameno lyawo mungoye, inaa sithwa ohoni molwandje, Omuwa Omupangeliawike nOmunankondoawike. Mboka haye ku kongo, inaa sithwa ohoni molwandje, Kalunga kaIsrael!
7 Oshoka ondi idhidhimikile esheko omolwoye nonda humbata esithohoni.
8 Onda ningi ondjendi mokati kaamwatate, omukwiilongo mokati kaana yameme.
9 Oshoka uulaadhi omolwongulu yoye otau thiminike ndje, nomasheko gaambo haa ku sheke, oga gwile ndje.
10 Uuna ndi ifupipike nokwiidhilika, nena aantu oya sheke ndje;
11 uuna nda zala ehahi lyokuholola oluhodhi, aantu oya yolo ndje.
12 Mbo ya kuutumba peelo lyegumbo, otaa sheke ndje, nonda ningi eimbilo lyoonkolwi.
13 Ihe ngame otandi ku indile, Omuwa, yamukula ndje pethimbo lye ku opalela. Kalunga, omolwohole yoye onene yamukula ndje, oshoka ongoye omuhupithi.
14 Hupitha ndje montopo; nakula ndje miikaha yaambo ye tonde ndje, hupitha ndje momeya omale.
15 Ino etha efundja li siikile ndje; ino etha omeya ga ninginithe ndje nenge olumbogo lu ekamene ndje okana kalwo.
16 Omuwa, yamukula ndje omolwohole yoye; tala ndje omolwesilohenda lyoye enene.
17 Omupiya gwoye ino mu pilamena; yamukula ndje mbala, ondi li muudhigu.
18 Hedha ndje popepi, u hupitha ndje; hupitha ndje omolwaatondi yandje.
19 Owa tseya, nkene nda shekwa, nda fupipikwa nonda sithwa ohoni. Aatondi yandje ayehe oye li montaneho yoye.
20 Esheko olya hende omutima gwandje, olya thigi ndje ndaa na omukwathi; onda tegelele omunalukeno, ihe ine mona; kapu na omuhekeleki.
21 Oya tulile ndje onyango miikulya, sho nda li nda sa ondjala; noya pe ndje omaviinu omalulu, sho nda sa enota.
22 Omatelekela gawo nage ya etele epunduko, noondjambo dhawo nadhi ya fale meyonuuko.
23 Tsikitha omeho gawo! Andalaleka oombunda dhawo sigo aluhe!
24 Tilila ondjahi yoye kombanda yawo; ongeyo yoye nayi ya hwamene.
25 Oontanda dhawo nadhi tembukiwe, mootenda dhawo inamu pitikwa mu kale nando olye.
26 Oshoka ohaa tidhagana ngo wa geela; ohaa nyanyukilwa omeehamo gaangoka we mu nyanyagula.
27 Kaleka oondjo dhawo membo lyoye, ngoye ino ya mangulula.
28 Naa dhimwe mo membo lyaanamwenyo noino ya yalulila membo lyaayuuki.
29 Ondi na uuwehame nonda kanitha omukumo; Kalunga, hupitha ndje ngu u gamene ndje.
30 Otandi ka simaneka edhina lyaKalunga notandi mu pandula noku mu hambelela.
31 Shika otashi hokiwa kOmuwa shi vule omayambo giimuna, oshi vule eyambo lyoondumetana.
32 Aathiminikwa otaa uvu ondjimbo yandje e taa nyanyukwa; oonakukugila ekwatho kuKalunga otaa mono omukumo.
33 Omuwa ohu uvu omaindilo goohepele, ye iha dhimbwa oonkwatwa moondholongo.
34 Egulu nevi nali mu simaneke, naashihe hashi inyenge momafuta.
35 Oshoka Omuwa ota hupitha Jerusalem nota ka tungulula iilando yaJuda. Nena aantu ye otaa ka tula mo e taye shi lala.
36 Aana yaapiya ye otaa ke shi thigulula, naamboka ye hole edhina lye, otaa ka kala mo.
1 Kalunga, hupitha ndje! Omuwa, hupitha ndje mbala!
2 Mbo taa kongo omwenyo gwandje, naa sithwe ohoni e taa piyagana. Mbo ya hala ndi shunduke, naa shunithwe ya gugwa.
3 Mbo taa yolo ndje ongandja, naa shunithwe ya sa ohoni.
4 Ayehe mboka taa ya kungoye, naa nyanyukwe e taa ligola. Ayehe mboka ye hole ehupitho lyoye, aluhe naa tye: “Kalunga omunene ngiini!”
5 Ihe ngame epongo nohepele; Kalunga, hedha ndje mbala popepi. Ongoye omukwathi nomuhupithi gwandje; Omuwa, ino kala ko.
1 Omuwa, omungoye awike te holama; ino etha ndi sindike.
2 Kutha ndje mo moshiponga, hupitha ndje moluuyuuki woye; pulakena ndje e to hupitha ndje.
3 Ninga eholameno lyandje lya kola nepopilongulu lyandje li shige ndje; ongoye eholameno nepopilo lyandje.
4 Kalunga kandje, hupitha ndje miikaha yaakaanakalunga, moonkondo dhaakolokoshi nodhaadhudhu.
5 Oshoka ongoye awike etegameno lyandje, onde ku inekela okuza muugundjuka wandje.
6 Onde ku inekela okuza kevalo lyandje; owa piitha ndje mo moshivalelo shameme. Onda hala oku ku simaneka.
7 Onda ningi nda fa ndaa shi omuntu momeho goyendji, ihe ongoye egameno lyandje.
8 Otandi ku hambelele esiku kehe notandi tseyitha esimano lyoye.
9 Ino ekelahi ndje, sho ndaa na oonkondo.
10 Oshoka aatondi yandje oya hala okudhipaga ndje; otaa popi ndje nayi notaa ningi euvaneno lyawo.
11 Otaa ti: “Kalunga e mu thigi po; tu mu landuleni, tu mu kwate, oshoka kaku na ngo te mu popile.”
12 Kalunga, ino kala ndje kokule; Kalunga kandje, endelela, u kwathe ndje.
13 Aaponokeli yandje naa halakanithwe po e taa shundulwa; mbo ya halele ndje oshiponga, naa tidhwe po ya sa ohoni.
14 Ihe ngame otandi kala aluhe nde ku inekela; otandi ku simaneke aluhe sigo aluhe.
15 Otandi ka hokolola iilonga yoye iiwanawa; esiku kehe ondi na okutya: “Ongoye omuhupithi,” nonando ote nyengwa oku shi fatulula nawa.
16 Omuwa Omupangeliawike, otandi simaneke oonkondo dhoye; uuwanawa owoye auke tandi hokolola.
17 Kalunga, owa longo ndje okuza muugundjuka, sigo onena otandi uvitha iilonga yoye iikumithi.
18 Ngashingeyi sho nda kulupa nondi na oomvi, ino etha ndje, Kalunga! Kala pungame, sho te tseyitha oonkondo niikumitha yoye komaluvalo taga landula.
19 Kalunga, uuyuuki woye otau adha sigo okiikogo. Owa longa iikumitha; kaku na ngo e ku fa.
20 Owa tumine ndje uudhigu nuuwehame, ihe oto ka pa ndje oonkondo ishewe; ito ke etha, ndi ye mombila.
21 Uukuluntu wandje u indjipalitha ngu u talaleke ndje ishewe.
22 Otandi ku hambelele nokaharpa; Kalunga kandje, otandi ku pandula, oshoka ou shi kwiinekelwa. Otandi ku imbile nokaharpa, Omuyapuki gwaIsrael.
23 Omilungu dhandje nadhi makuke kenyanyu, ngame ngaashi ndi li, otandi ku hambelele, oshoka owa hupitha ndje.
24 Esiku alihe otandi ka tumbula iilonga yuuyuuki woye, oshoka mbo ya li ya halele ndje oshiponga, oya mwenekwa e taa sithwa ohoni.
1 Kalunga, longa omukwaniilwa, a tokole oohapu pauyuuki woye. Mu lombwela, a landule eutho lyoye,
2 opo a pangule aantu yoye pauyuuki, naathiminikwa e ya uthile nawa.
3 Oondundu nadhi etele aantu uuyamba, niikulundundu nayi ze uuwanawa.
4 Omukwaniilwa na popile aathiminikwa moshigwana; na kwathe oohepele e ta tidha po aahepeki.
5 Manga etango li li ko, nomwedhi tagu monika, aantu yoye naye ku simaneke.
6 Omukwaniilwa na kale naalelwa ye ngaashi omvula niimeno, omvula yomuzimbi tayi tutike evi.
7 Uuyuuki nau pangele methimbo lye; ombili nayi kale moshilongo, manga omwedhi tagu minikile.
8 Na pangele okuza kefuta sigo okefuta ekwawo, okuza kuEufrat sigo okooha dhuuyuni.
9 Aakali mombuga otaa ke mu tsila oongolo, naatondi ye otaa ki ihata po.
10 Aakwaniilwa yokuSpania naamboka yokoontuntu otaa ke mu etela oombalagelo; aakwaniilwa yokuSheba noyokuSeba otaa ke mu etela omagano.
11 Aakwaniilwa ayehe otaye ke mu tsila oongolo; iigwana ayihe otayi ke mu longela.
12 Ota hupitha ohepele ngo te mu lilile, omuthiminikwa ngo kee na ngo te mu kwatha.
13 Ota sile oshimbembe nohepele olukeno note ya hupitha meso.
14 Ote ya hupitha methiminiko nomepiyagano, oshoka oomwenyo dhawo odhi na ondilo momeho ge.
15 Omukwaniilwa na kale aluhe nomwenyo! Ne etelwe oshingoli shokuSheba. Aantu naye mu galikanene aluhe yo naye mu halele omayambeko gaKalunga esiku kehe.
16 Moshilongo namu kale eloolo lyiilya; kiikulundundu naku kale omapya, niiyimati nayi monike ngaashi yokuLibanon. Iilando nayi udhe aantu ngaashi omwiidhi gwokelundu.
17 Edhina lyomukwaniilwa nali simane sigo aluhe; nali kale ko ngaashi etango li li kegulu. Iigwana ayihe otayi ka yambekwa omolwe notayi ke mu ithana “Omulalekwa nuuyamba.”
18 Esimano nali ninge lyOmuwa, Kalunga kaIsrael! Oye awike ha longo iikumitha ya tya ngeyi.
19 Esimano nali ninge lyedhina lye sigo aluhe! Eadhimo lye nali udhithe uuyuni auhe. Amen! Amen!
20 Omagalikano gaDavid yaIsai oga hulile mpaka.
1 Kalunga oye omwaanawa shili kuIsrael, kumboka ye na oomwenyo dha yela.
2 Ihe ngame ando nda kanitha einekelo; okonyala ndaa na we eitaalo,
3 oshoka onda li nda sila aainenepeki efupa, sho nda mono uulinawa waakaanakalunga.
4 Ihaya alukwa; oye na oonkondo nuundjolowele.
5 Inaa adhika komaudhigu ngaashi aantu yalwe; inaya ala komavu ngaashi yalwe.
6 Onkee ano uuntsa otau kala wa fa iimona yoompole moothingo dhawo; epiyagano otali ya siikile ngaashi onguwo.
7 Omitima dhawo otadhi fuluka uuwinayi; omadhiladhilo gawo otaga tungu oompangela dhuukolokoshi.
8 Otaa yolo notaa sheke yakwawo; oyu udha einenepeko noya hala okuningilila mo yakwawo.
9 Otaa sheke Kalunga e li megulu; taa tumbula omalombwelo guuntsa kaakali kombanda yevi.
10 Onkee ano aantu otaye ya pulakene e taa itaale kehe shoka taa ti.
11 Otaa ti: “Kalunga ite shi tseya; gwokombandambanda ite shi dhimbulula.”
12 Aakaanakalunga osho naanaa ye li ngaaka; aluhe oye na uupu, nomaliko gawo otaga indjipala.
13 Itashi kwatha sha nani, sho ndi ikeelele kuuwinayi nonda kala inee yona?
14 Kalunga, esiku alihe owa dhenge ndje nomeehamo; owa geele ndje esiku kehe.
15 Ando onda tumbulile oohapu dha tya ngawo, ando onda ningi shoka inaashi opala okuuvika mokati kaantu yoye.
16 Sho nda kambadhala okudhiladhila oshinima shino, oshe etele ndje uudhigu.
17 Ihe sho nde ya mongulu yaKalunga, nena ondu uvu ko kutya oshike tashi ka ningilwa aakaanakalunga.
18 Oto ke ya enditha pehala tali pundukitha noto ke ya undulila meyonuuko.
19 Mbalambala otaa kana po; otaa kulukile mehanagulo.
20 Ngaashi omuntu ta penduthwa kondjodhi, osho taa ka kana po, uuna Omuwa to iholola.
21 Ano omwenyo gwandje sho gwa li gwa geye, niitiyanathigo sho ya tsu ndje,
22 onda ningi egoya, kandi uvite ko sha, nda li nda fa oshiyamakuti koshipala shoye.
23 Ihe nando ongeyi, ondi li aluhe pungoye; owa kwata ndje koshikaha.
24 Otandi wilikwa komaudhikilo goye, nopehulilo oto ka thikitha ndje meadhimo.
25 Kaku na we gulwe e ku vulile ndje, megulu nenge kombanda yevi.
26 Olutu nomwenyo gwandje nando nayi name, Kalunga oye oonkondo dhandje; oye awike nda pumbwa.
27 Mbo ye li kokule nangoye, otaa ka yonuka po; ayehe mbo yaa shi kwiinekelwa, oto ya kombo po.
28 Ihe ngame, osho opalela ndje okukala popepi naKalunga. Omuwa Omupangeliawike onde mu ningi egameno lyandje, niilonga ye ayihe otandi ke yi hokolola.
1 Kalunga, omolwashike we tu ekelehi ngeyi? Oto geele oonzi dhuusita woye sigo aluhe?
2 Dhimbulukwa aantu mbo we ya kulile muupika; aantu we ya hupitha, ya ninge yoye. Tala ondundu Sion, ehala lyokukala kwoye.
3 Enda momakulukuma ngaka; aatondi oya hanagula po ashihe motempeli.
4 Aatondi oya dhanene pehala lyoye eyapuki; oya dhike po omapandela gawo.
5 Oya li ya fa aalumentu taa kwata omakuya e taa keke po okuti.
6 Oya hanagula po iikwashiti ayihe nomakuya nonoosilwa dhawo.
7 Oya fike po otempeli yoye noya nyateke ehala mpo ho simanekelwa.
8 Oya popi ya ti: “Otatu ya kombo po thilu!” Ehala kehe moshilongo lyokusimaneka Kalunga oye li fike po.
9 Inapu hupa nando efano lyokuholola okukalapo kwaKalunga; inapu hupa omuhunganeki. Kaku na ngoka a tseya kutya otashi kala ngeyi sigo uunake.
10 Kalunga, sigo uunake aatondi taye ku sheke? Otaa ethiwa, ya tumbule owala edhina lyoye?
11 Omolwashike itoo tu kwatha? Omolwashike itoo ganeke oshikaha shoye, u ya yone po?
12 Kalunga, ongoye omukwaniilwa gwetu okuza konale; owa kala omuhupithi gwetu.
13 Owa topola efuta noonkondo dhoye; owa nyanyula omitse dhiilyani yomomeya.
14 Owa tete ko omitse dhevovo, nolya ningi oondya dhiilikama yomombuga.
15 Owe egulula oothithiya nomilonga dhomevi nowa pwinike omilonga ndhoka hadhi tondoka ethimbo alihe.
16 Owa shiti omutenya nosho wo uusiku; owa tula ko etango nomwedhi.
17 Ongoye wa tende oongamba dhevi; owa tula ko othinge nokufu.
18 Omuwa, tala aatondi yoye, nkene taye ku sheke, aagoya, nkene ya dhini edhina lyoye.
19 Ino gandja oomwenyo dhomapongo kiilikama; ino dhimbwa aantu yoye aatidhaganwa.
20 Dhimbulukwa ehangano ndyo wa hangana natse; oshilongo oshu udha omahalutho nepiyagano.
21 Ino etha aathiminikwa ya sithwe ohoni; oohepele nomapongo nage ku pandule.
22 Kalunga, thikama, u ipopile! Aagoya otaa ku yolo ethimbo alihe.
23 Tala, aatondi otaa tumbula omatilitho nomahalutho ethimbo kehe.
1 Otatu ku hambelele, Kalunga, otatu ku pandula, oshoka ou li popepi natse. Otatu hokolola esimano lyoye notatu uvitha iikumithalonga yoye.
2 Kalunga ota ti: “Ondu utha ethimbo, uuna tandi ka pangula; otandi ka tokola etokolo eyuuki.
3 Evi nando li kakame, nakehe shoka shi na omwenyo nando nashi tile, otandi li kwata lyaa tenguke.
4 Otandi lombwele aakaanakalunga, ye ethe uuntsa wawo.
5 Otandi ya lombwele, ye ethe okutuwalala kwawo.”
6 Esimano itali zi kuuzilo nenge kuuninginino, nohakombuga.
7 Oye Kalunga ngoka ta pangula, ota geele yamwe e ta mangulula yakwawo.
8 Moshikaha shOmuwa omu na oshitenga shomaviinu ga tutumika noga vongakanithwa niigwanga iilulu. Oye okwa pimpi oshitenga shondjahi ye, naakaanakalunga ayehe yokombanda yevi otaye ga nu po nehete lyago.
9 Ihe ngame ondi na oku shi hokolola sigo aluhe; otandi simaneke aluhe Kalunga kaJakob.
10 Kalunga ota hanagula po oonkondo dhaakaanakalunga, ihe aayuuki ote ya nenepeke.
1 Kalunga okwa tseyika muJuda; edhina lye olya simana muIsrael.
2 Okwa dhikile etsali muJerusalem; omutumba gwe ogu li muSion.
3 Omo moka a hanagula po iikuti yaatondi, omahuuyanza nomagonga niikondjitho yawo ayihe.
4 Omuwa, eadhimo lyoye enene ngiini! Esimano lyoye ekumithi, sho wa galuka koondundu hoka wa sindi aatondi yoye.
5 Aalumentu omapenda oya luwa noya gwile moomposi dheso; oonkondo nuungomba wawo inau ya kwatha sha.
6 Kegando lyoye, Kalunga kaJakob, uukambe naakayili yawo oya si.
7 Omuwa, ongoye awike u na okutilika. Kaku na ngo ta vulu okukala koshipala shoye, uuna wa geya.
8 Epangulo owe li tumbula u li megulu; uuyuni owa tila e tau mwena thilu,
9 sho wa thikama, u pangele nou hupithe aathiminikwa kombanda yevi.
10 Ondjahi yaantu otayi ka hulila moku ku simaneka, naamboka taa hupu miita, otaa ke ku pandula.
11 Uvanekela Omuwa Kalunga koye omauvaneko e to ga tsakanitha; iilongo ayihe yopuushiinda nayi ete oombalagelo kunguka e na okutilika.
12 Kalunga ota shonopeke aapangeli aanuuntsa; ota tilitha aakwaniilwa yomuuyuni.
1 Otandi kugu kuKalunga; otandi mu ithana, oye notu uvu ndje.
2 Methimbo lyuudhigu onda galikana Omuwa; muusiku onda yelutha omaako megalikano, ihe ite mono ehekeleko.
3 Otandi ku dhiladhila, Kalunga, e tandi tongo; onda kunkwa nonda sholola.
4 Onda tonata uusiku auhe; ondi na uudhigu noite vulu okupopya.
5 Onda dhiladhila omasiku gonale nonda dhimbulukwa onakuziwa.
6 Onda lala te dhiladhila nondi ipula nda ti:
7 “Kalunga okwe tu ekelehi sigo aluhe? Ite tu sile we ohenda?
8 Ohole ye yaaluhe oya hulu po? Euvaneko lye itali tsakanithwa we?
9 Kalunga okwa dhimbwa kutya oye omunesilohenda? Ongeyo ye oya kutha po olukeno lwe?”
10 Ngame onda ti: “Otashi ehameke ndje unene, sho oshikaha shaKalunga sha nkundipala.”
11 Itandi ka dhimbwa nando iilongankondo yoye, Omuwa; otandi ka dhimbulukwa iikumithalonga yoye yonale.
12 Ote kala nokutedhatedha iilongankondo yoye; otandi dhimbulukwa iilonga yoye iinene.
13 Iilonga yoye ayihe oya yapuka; kaku na gulwe omunene a fa Kalunga ketu.
14 Ongoye Kalunga ho longo iikumitha; ho holola oonkondo dhoye mokati kaantu.
15 Owa hupitha aantu yoye noshikaha shoye shoonkondo; oluvalo lwaJakob naJosef.
16 Kalunga, omeya oge ku mono e taga tila; efuta ele olya kakama.
17 Iikogo oya tilehi omeya; kegulu okwa zi omityalakato noombadhi dha shela koombinga adhihe.
18 Omutyalakato gwoye ogu uvika moshikungulu, nolwaadhi olwa minikile uuyuni auhe; evi olyi inyenge e tali kakama.
19 Owa taula omapola mefuta; wa pala ondjila mokati komeya omanene, ihe oompadhi dhoye inadhi monika.
20 Owe enditha aantu yoye ngaashi oshigunda shoonzi, omewiliko lyaMoses naAaron.
1 Aantu yandje, pulakeneni omalongo gandje; uvii ko oohapu dhandje.
2 Otandi longitha iipopiwamayele; otandi fatulula iiholekwa yonakuziwa.
3 Otandi popi iinima twe yi uva notu yi shi; iinima twe yi lombwelwa kootate yonale.
4 Itatu yi holeke aana yetu; otatu hokololele oluvalo lwokomeho iilonga iinene yOmuwa, oonkondo dhe niikumitha ye.
5 Omuwa okwa pe Aaisraeli iipango nokwa pe oluvalo lwaJakob omautho. Okwa lombwele ootatekulu omalongo ngoka ye na oku ga longa oyana.
6 Oluvalo lwokomeho opo lu tseye iipango yOmuwa, naamboka inaa valwa natango, otaa tegelelwa ye ke yi longe oyana.
7 Osho ngeyi otaa ki inekela Kalunga noitaa ka dhimbwa iilonga ye, ihe otaa ka vulika kiipango ye.
8 Itaa ka fa nando oohekulu mbo ya kala aapandala yo ihaa vulika. Oya li inaa igameka kuKalunga noinaye mu inekela.
9 Aalumentu Aaefraim oya li ya homata, aayumbi yomatati ya pyokoka, ihe molugodhi oya sindika.
10 Inaa dhiginina ehangano naKalunga; oya tindi okuvulika kiipango ye.
11 Oya dhimbwa shoka e shi ningi, iikumitha mbyoka ya mono te yi longo.
12 Omuwa okwa longo iikumitha montaneho yoohekulu muEgipiti, melundu lyaZoan
13 Okwa taula efuta nokwe ya pititha mo; okwa thikameke omeya ngaashi oontuni.
14 Omutenya Omuwa okwe ya wilike noshikogo shomuzile, nuusiku okwe ya minikile nonyeka yuuyelele.
15 Mombuga okwa tatula emanya nokwe ya pe omeya ogendji.
16 Okwe ya egululile oothithiya memanya nokwa pimpile omeya pevi ngaashi gomulonga.
17 Ihe oya tsikile okuyona kuKalunga; mombuga inaa vulika kungoka gwokombandambanda.
18 Oya makele Kalunga owina, sho ye mu pula iikulya.
19 Oya dhini Kalunga, sho ya ti: “Kalunga ota vulu tuu okugandja iikulya mombuga?
20 Otwa mona ngaa kutya okwa dhenge emanya, omeya noga pimpuka mo; ihe ota vulu tuu oku tu pa iikulya nota pe tuu aantu ye onyama?”
21 Omuwa sho u uvu taa popi ngeyi, okwa geye; omulilo gwe ogwa hwamene Jakob nondjahi ye oIsrael,
22 oshoka inaa itaala Kalunga yo inaa inekela kutya oha kwatha.
23 Okwa ithana eyalelo nokwe egulula iiyelo yalyo.
24 Okwe ya lokithile omanna; okwe ya pe iikulya yokegulu.
25 Oya li iikulya yaayengeli; Omuwa okwe ya pe iikulya ya gwana.
26 Okwa pepitha ombepo yokuuzilo, nokoonkondo dhe okwa tukulukitha ombepo yokuumbugantu.
27 Okwa tumine aantu ye oondhila dhonyama, odhindji dhi thike pehekevi lyopooha dhefuta.
28 Okwe dhi lambelitha moontanda dhawo, nomomudhingoloko gwomatsali gawo.
29 Aantu oya li e taa kuta; Kalunga okwe ya pe iipalutha ya gwana.
30 Ihe manga inaaya za pokulya, nomanga iikulya ya li natango momakana gawo,
31 Kalunga okwe ya geele, okwa dhipaga po aanenentu yomuyo nokwa kombo po aalumentu aagundjuka muIsrael.
32 Nando ongeyi, aantu oya tsikile owala okuyona; nando ya mono iikumitha mbyoka Omuwa e yi longo, inaa itaala.
33 Onkee okwa hulitha po omasiku gawo ngaashi omufudho, noomvula dhawo mehaluko.
34 Uuna Kalunga e ya dhenge, mbo ya hupu ko ohaye mu kongo; ohaa uluma okuya kuye.
35 Ohaa dhimbulukwa kutya Kalunga oye omugameni gwawo, Omunankondoawike oye omukwathi gwawo.
36 Oohapu dhawo odha li iifundja yowala; omakana gawo oga popi iilombo.
37 Kaya li nande yi inekela Kalunga yo inaa ikolelela mehangano naye.
38 Ihe Kalunga okwa kala omunahenda; okwe ya dhimine po omayono gawo ye ine ya yona po. Omathimbo nomathimbo okwa mweneke ondjahi ye ye ine etha yi mu tone.
39 Okwa dhimbulukwa kutya oyo aantu yowala; oya fa ombepo tayi pepe noitayi galuka we.
40 Olungapi inaaya vulika kuye mombuga, nolungapi ye mu nikitha oluhodhi!
41 Omalupita nomalupita oya yeleke Kalunga; oya geyitha Kalunga Omuyapuki gwaIsrael.
42 Inaa dhimbulukwa iilonga ye yoonkondo nesiku ndiya, sho e ya hupitha miikaha yaatondi,
43 esiku ndiya a holola iilongankondo ye niikumitha muEgipiti, melundu lyaZoan.
44 Omilonga dhamo okwe dhi shitukitha ombinzi, nAayegipiti inaa vula okunwa omeya gadho.
45 Okwe ya tumine iipupu yomatopola e tage ya li, nomafuma tage ya hepeke.
46 Iilya yawo momapya okwe yi likitha po kokambayaya, niimeno yawo koombahu.
47 Omiviinu dhawo okwe dhi teya po nomvula yoompawe, nomikwiyu dhawo noshikungulu.
48 Iimuna yawo okwe yi dhipagitha po oompawe, niigunda yiimuna yawo oya akulwa komalwaadhi.
49 Okwa hwameke omulilo gwondjahi ye mokati kawo: ongeyo, ehanyo nekehuko; mbika oya li ya fa aayengeli yehanagulo.
50 Ina kankeka ondjahi ye nenge e ya keelele meso, ihe okwe ya dhipaga po nelega.
51 Okwa dhipaga po iisheeli yAayegipiti, aamati aatango yomomatsali gawo.
52 Opo ihe okwa kutha mo aantu ye ngaashi omusita gwiimuna; okwe ya kwatele komeho nokwe ya enditha mombuga.
53 Moku ya piitha mo inaa mona oshiponga yo inaa tila; ihe aatondi yawo oya sile mefuta.
54 Okwe ya eta kevi eyapuki, koshilongo shoondundu e shi kwata ko noonkondo dhe.
55 Okwa tidha mo iigwana mbyo ya li mo; evi lyawo okwe li tendele omazimo gaIsrael nokwe li ya pe li ninge onkalelo yawo.
56 Ihe oya makele Kalunga gwokombandambanda, inaa vulika kiipango ye.
57 Oya li aapandala noinaa vulika ya fa oohekulu. Oya li yaa shi kwiinekelwa, ya fa uutati inaau lukilwa nawa.
58 Oye mu geyitha nokusimaneka iikalunga koondundu; oya pendutha ondjahi ye niimenka yawo.
59 Kalunga sho e shi mono, okwa geye nokwe ekelehi aantu ye Aaisraeli.
60 Okwe etha po etsalihangano lye muShilo egumbo lye ndyoka e li dhikile mokati kaantu.
61 Okwa falitha oshikethahangano shoonkondo dhe muupika, nesimano lye miikaha yaatondi.
62 Okwa geele aantu ye; okwe ya etha, ya dhipagwe nomagonga.
63 Omulilo ogwa fike po aamati aagundjuka; aafuko aakadhona inaa vula okwiimbilwa omaimbilo gohango.
64 Aayambi yawo oya dhipagwa nomagonga, naaselekadhi yawo inaa vula okulila oosa.
65 Nena Omuwa okwa penduka ongomuntu a li a kotha, ongaashi ofule a kolwa komaviinu.
66 Okwa dhenge aatondi ye nokwe ya sitha ohoni.
67 Ihe okwi iteka oluvalo lwaJosef; ina hokwa ezimo lyaEfraim.
68 Okwa hogolola ezimo lyaJuda; ondundu Sion okwe yi hokwa.
69 Okwa tungile ko otempeli ye yi li puule ya fa egulu; ya kola ngaashi evi ndyoka e li shiti konalenale.
70 Okwa hogolola David omupiya gwe, e mu kutha muusita woonzi.
71 Mokuza muusita woonzi, okwe mu ningi omusita gwaantu ye Aaisraeli.
72 David okwe ya litha nuuyuuki nokwa li e na oondunge moku ya wilika.
1 Kalunga, aapagani oya kwata po evi lyoye; oya nyateke otempeli yoye ondjapuki, Jerusalem oye shi ningi omakulukuma.
2 Omidhimba dhaantu yoye odha ningi iikulya yoondhila, nomalutu gaapiya yoye oga pewa iilikama.
3 Ombinzi yaantu yoye oya tilwahi ngaashi omeya; ashihe osha ningilwa momudhingoloko gwaJerusalem, naasi oya nyengana okufumvika.
4 Iigwana yopuushiinda otayi tu sheke; otayi tu yolo notayi tu nyeme.
5 Omuwa, sigo uunake to kala wa geya? Sigo uunake ongeyo yoye tayi hwama ya fa omulilo?
6 Geela iigwana mbyoka yaa ku shi; aantu mboka ihaaya tumbula edhina lyoye.
7 Oshoka oya mana po Jakob; oya hanagula po ehala lyoye.
8 Ino tu geelela omayono gootate. Tu sila ohenda mbala; otwa shonopekwa unene.
9 Kalunga, omuhupithi gwetu, tu kwatha. Omolwesimano lyedhina lyoye tu hupitha e to dhimi po oondjo dhetu.
10 Iigwana omolwashike yi na okutya: “Kalunga keni oku li peni?” Geela iigwana montaneho yetu, sho ya dhipaga po aapiya yoye.
11 Okulila kwaaedhililwa mondholongo naku thike momakutsi goye. Oonkondo dhoyenadhi hupithe mbo ya pangulilwa eso.
12 Omuwa, iigwana iishiinda yetu yi galulila luheyali uuwinayi wayo, sho ye ku sheke.
13 Otse aantu yoye noonzi dhuusita woye; otatu ku pandula aluhe notatu ku hambelele aluhe sigo aluhe.
1 Omusita gwaIsrael, tu uva; ongoye omuwiliki gwaantu yoye. Ngoye ngu wa kuutumba mokati kaakerubi, adhima!
2 Ihololela omazimo gaEfraim, Benjamin naManasse. Holola oonkondo dhoye, ila, u tu hupithe.
3 Kalunga, tu tula ishewe omwenyo! Tu sila ohenda, tu kale tu na omwenyo!
4 Omuwa Kalunga Omunankondoawike, osigo uunake to ekelehi omagalikano gaantu yoye?
5 Owe ya pe ethimbo edhigu; owe ya pe oshikwiila sholuhodhi noshitenga shomahodhi.
6 Owe etha tu dhinwe kaashiinda, naatondi yetu ye tu sheke.
7 Kalunga Omunankondoawike, tu tula ishewe omwenyo! Tu sila ohenda, tu kale tu na omwenyo!
8 Owa kutha omuviinu muEgipiti; owa tidha mo iigwana yilwe e to gu tsike mo.
9 Owe gu longekidhile oshimpungu; omidhi odha koko e tadhi taandele.
10 Omuzile gwagwo ogwa siikile oondundu, niitayi yagwo oya kuwike omisendeli ominene.
11 Iitayi yagwo oyi ifala sigo okefuta; iitutuma yagwo sigo okomulonga Eufrat.
12 Omolwashike wa kumuna po enkolokuma lyagwo? Ngashingeyi aapitipo otaa toonona ko omandjembele.
13 Omamwanka otage gu lyatagula po, niiyamakuti otayi gu li po.
14 Kalunga Omunankondoawike, tala kutse! Tu tala u li megulu; ila, u hupithe aantu yoye.
15 Ila, u hupithe omuviinu ngu wa kunu, omuti ngu omuhaha wa kokitha.
16 Aatondi oye gu keke po e taye gu fike po; ya geela e to ya yono po.
17 Popila e to gamene aantu yoye we ya hogolola, oshigwana we shi ningi oshinankondo.
18 Itatu ku etha we; tu kaleka nomwenyo, notatu ke ku pandula.
19 Omuwa Kalunga Omunankondoawike, tu tula ishewe omwenyo. Tu sila ohenda e to tu hupitha.
1 Imbeni, nyanyukweni! Kalunga oye omugameni gwetu; imbileni Kalunga kaJakob!
2 Tamekeni eimbilo, dhengeni oontunda. Hikeni uuharpa nuushandja.
3 Hikeni enkuma moshituthi shomwedhi omupe, ngele gwe ya ko nenge gwa toka.
4 Ndjika oyo ompango muIsrael; elombwelo lya zi kuKalunga kaJakob.
5 Ompango okwe yi pe Aaisraeli, sho a dhenge evi lyaEgipiti. Ondu uvu ewi inaandi li uva nale lya ti:
6 “Onda kutha ko omitenge komapepe geni; onde mu lombwele, mu thige po iilonga iidhigu.
7 Muumbanda weni omwi ithana ndje e tandi mu hupitha. Onde mu yamukula moshikogo shomindundumo. Onde mu yeleke pomeya gaMeriba.
8 Pulakeneni, ne aantu yandje, otandi mu londodha; Aaisraeli ne, onda hala mu uve ndje.
9 Inamu simaneka nando oshikalunga; inamu kala mu na oshimenka.
10 Ongame Omuwa Kalunga keni, ngoka nde mu tembudha muEgipiti. Ekamekeni omakana geni, ngame notandi mu palutha.
11 “Ihe aantu yandje inaa pulakena ndje; Israel ina vulika kungame.
12 Onkee onde ya ethele mokwaavulika kwawo, noya longo ngaashi ya hala.
13 Ando ya li ya pulakene ndje e taa vulika kungame,
14 ando onda tidha e te halakanitha po aatondi yawo.
15 Mbo ye tonde ndje, otaa ka tsila ndje oongolo kuumbanda; okugeelwa kwawo otaku kala sigo aluhe.
16 Ihe ne, otandi ke mu palutha niilyalela; otandi ke mu pa omagadhi goonyushi.”
1 Kalunga ota ningi oompangu megulu; ota tseyitha epangulo mokati kookalunga.
2 Inamu pangula we paugoyoki; omukeenakalunga, inamu mu ningila pondhipi.
3 Popileni oohepele noothigwa, uthileni aadhinwa naakwanaluhepo pauyuuki.
4 Ya yulululii mo miikaha yaakolokoshi.
5 “One aagoya ngiini ne mwaa na oondunge! Omwa yonana thilu, nuuyuuki owa kana ko kombanda yevi.
6 Ngame onda ti: ‘One ookalunga; ne amuhe aana yaanguka gwokombandambanda.’
7 Ihe otamu ka sa ngaashi naanaa aantu; omufudho gweni otagu ka hula po ngaashi gwomuvalekele kehe.”
8 Kalunga, thikama, u pangule uuyuni auhe; iigwana ayihe oyoye.
1 Kalunga, ino mwena; ino tya thilu!
2 Tala, nkene mbo ye ku tonde ya kolokosha; tala, sho inaa hala okuvulika.
3 Otaa ende aantu yoye mevi; otaa kotokele mbo ye li megameno lyoye.
4 Otaa ti: “Ileni, tu halakanithii po oshigwana shawo, opo Israel a dhimbiwe sigo aluhe.”
5 Otaa uvathana ompangela yawo notaa tungu elongelokumwe lyawo, ye ku kondjithe:
6 Aaedomi nAaismaeli, Aamoabi nAahagar,
7 aantu yaGebal, Ammon naAmalek, Aafilisti nAatiro.
8 Assur naye wo okwa hangana nayo, kuume kaAmmon naMoab omunankondo, yomoluvalo lwaLot.
9 Kalunga, ya ninga ngaashi wa ningi Aamidiana nongaashi wa ningi Sisera naJabin pomulonga Kishon.
10 Owe ya dhipagele puEndor, nomidhimba dhawo odho olele pontundulu.
11 Aawiliki yawo ya ninga ngaashi wa ningile Oreb naSeeb; ya sinda ngaashi wa sindi Seba naZalmunna.
12 Mboka ya popi ya ti: “Otatu ka kwata po omayana gaKalunga.”
13 Kalunga, ya ninga ngaashi ontsi tayi pepwa po kombepo, ngaashi iiyagaya tayi yi nokambiya.
14 Ngaashi epeya tali fike po omugulu, nongaashi omulilo tagu hwameke oondundu,
15 ya tidha po noshikungulu shoye; ya halutha noshihomo shoye.
16 Omuwa, ya sitha ohoni; naa tseye oonkondo dhoye.
17 Naa sindike e taa tila sigo aluhe; naa sile mohoni yawo.
18 Naye ku tseye kutya ongoye awike Omuwa Omupangeliawike kombanda yevi alihe.
1 Otempeli yoye onde yi hokwa ngiini, Omuwa Omunankondoawike!
2 Omwenyo gwandje otagu yuulukwa okuya motempeli yOmuwa. Omutima nolutu lwandje olu na enyanyu okuuka kuKalunga omunamwenyo.
3 Enza olya tungu oshihandhila, nevalelanganda olya mono egumbo. Omo lya kaleke oyana popepi noshiyambelo shoye, Omuwa Omunankondoawike, omukwaniilwa gwandje naKalunga kandje.
4 Aanelago oomboka haa kala motempeli yoye notaye ku hambelele aluhe.
5 Aanelago oomboka taa pewa oonkondo kungoye, oomboka ye li molweendo oluyapuki taa uka kuSion.
6 Sho taa ende mesilu lyomombuga, otaye li shitukitha oothithiya, nomvula yontemuna otayi li udhitha omeya.
7 Otaa nkondopala, sho taa humu ko; otaa ka holoka koshipala shaKalunga muSion.
8 Omuwa Kalunga Omunankondoawike, uva egalikano lyandje. Kalunga kaJakob, uva ndje!
9 Kalunga, yambeka omukwaniilwa, omugwayekwa gwoye omuholike.
10 Okukala esiku limwe motempeli yoye oku vule okukala omasiku geyuvi palwe. Ngame onda hokwa okukala pomweelo gwegumbo lyaKalunga kandje, shi vule okukala nomagumbo gaakaanakalunga.
11 Oshoka Omuwa Kalunga oye uuyelele negameno; ote tu sile ohenda noku tu nenepeka. Mboka haa longo uuwanawa, otaa kala yaa na omupya.
12 Kalunga Omunankondoawike, aanelago oomboka haa ku inekele!
1 Omuwa, owa kala nokusila evi lyetu ohenda; owa mwenyekulula aantu yoye Aaisraeli.
2 Owa dhimi po oondjo dhawo nowe ya kuthile po omayono gawo.
3 Owe etha oku ya geela nowa loteke ondjahi yoye.
4 Kalunga, omuhupithi gwetu, tu tula ishewe omwenyo; ino tsikila we oku tu geela.
5 Oto kala we tu geela sigo aluhe? Oto lelepeke ondjahi yoye, yi adhe omaluvalo agehe?
6 Tu mwenyeka ishewe, tse aantu yoye tu ku nyanyukilwe.
7 Omuwa, tu ulukila ohole yoye yashili; tu kwatha ngu u tu hupithe.
8 Otse otatu ka vulika koohapu dhOmuwa; oye oku uvanekele aantu ye ombili, ngele itatu shuna we momapuko getu.
9 Ekwatho lyOmuwa oli li popepi naamboka haye mu simaneke; ota kala moshilongo shetu.
10 Ohole neinekelo otayi ka tsakanena; uuyuuki nombili otayi ka minikathana.
11 Evuliko lyomuntu otali ka holoka, nuuyuuki waKalunga otau ka taalela kevi.
12 Omuwa ota ka gandja shoka oshiwanawa, nevi lyetu otali ka za iipalutha.
13 Uuyuuki otau ka tetekela Omuwa notau mu longekidhile ondjila.
1 Omuwa, pulakena e to yamukula ndje, oshoka ngame ohepele nomukwanaluhepo.
2 Gamena ndje, oshoka ondi igameka kungoye. Ongoye Kalunga kandje, nangame omupiya gwoye nde ku inekela.
3 Omuwa, sila ndje ohenda; otandi ku indile esiku alihe.
4 Omuwa, nyanyudha omupiya gwoye, oshoka omagalikano gandje otaga yelukile kungoye.
5 Omuwa, ongoye omunalukeno noho tu dhimine po; ou na esilohenda kumboka taye ku indile.
6 Omuwa, uva egalikano lyandje; otandi lili, ndi silwe ohenda.
7 Otandi ku ithana ethimbo kehe lyuudhigu, oshoka oho yamukula omaindilo gandje.
8 Kaku na Kalunga gulwe e ku fa, Omuwa; kaku na ngo ta longo ngaashi ho longo.
9 Iigwana ayihe mbyoka wa shiti, otayi ke ya e tayi ku tsile oongolo; otayi ke ku simaneka, Omuwa.
10 Oshoka ongoye omunankondo noho longo iikumitha; ongoye awike Kalunga.
11 Omuwa, longa ndje, ndi tseye ehalo lyoye, notandi ka vulika nokukala moshili. Longa ndje, ndi ku simaneke nomwenyo aguhe.
12 Omuwa Kalunga kandje, otandi ku hambelele nomwenyo aguhe; otandi ka hokolola uunene woye sigo aluhe.
13 Ohole yoye onene ngiini kungame! Owa hupitha omwenyo gwandje meso lyo lyene.
14 Kalunga, aanuuntsa otaa kondjitha ndje; ongundu yaakolokoshi oya hala okudhipaga ndje — oomboka kaaye na ko na sha nangoye.
15 Ihe ngoye, Omuwa, ongoye Kalunga omunesilohenda nomunahole, omwiidhidhimiki, omunalukeno nomwiinekelwa.
16 Tala ndje, u sile ndje ohenda; tula ndje omukumo e to hupitha ndje, oshoka ongame omupiya gwoye ngaashi meme a li.
17 Omuwa, ulukila ndje endhindhiliko tali hololele ndje uuwanawa woye. Nena aatondi yandje ngele taye shi mono, otaa si ohoni, sho wa kwatha ndje nowa tsu ndje omukumo.
1 Omuwa okwa tungile oshilando she kondundu ondjapuki.
2 MuIsrael kamu na ehala e li hole, ngaashi e hole oshilando Jerusalem.
3 Shilando shaKalunga, pulakena, Omuwa sho te ku tanga omolwiinima iinene:
4 “Egipiti naBabilonia otandi ke yi yalulila momwaalu gwiigwana mbyo hayi vulika kungame. Komwaalu gwaakali muJerusalem otandi ka gwedha ko Aafilisti, Aatiro nAaetiopia.”
5 Nena Sion otashi ka tiwa: “Iigwana ayihe otayi kala mo, Omunankondoawike ote shi koleke.”
6 Omuwa ota ka yalula aantu ayehe; ayehe ote ke ya tala oyo aakali muJerusalem.
7 Oyo notaa ka imba nokunyanyukwa taa ti: “Omayambeko agehe oge li muSion.”
1 Omuwa Kalunga, omuhupithi gwandje, otandi lili esiku kehe, nuusiku wo otandi ya kungoye.
2 Uva egalikano lyandje; pulakena, sho tandi ku kugile ekwatho!
3 Omaudhigu ogendji oga gwile ndje; ondi li popepi nokusa.
4 Eso olye eta ndje mo, nokaku na ngo ta kwatha.
5 Onda yalulilwa mokati kaasi, ongaashi aadhipagwa ya lala momayendo, mbo itaaya dhimbulukiwa we noitaa mono we ekwatho lyoye.
6 Owu umbile ndje muule wombila, momilema dholumbogo oluleeleka.
7 Ongeyo yoye oya dhigupalela ndje, oya hwamena ndje ya fa omulilo.
8 Owe etha ookuume kandje ya thige ndje po; onda ningi oshikungitha kuyo. Onde edhililwa mo noite vulu okuya ontuku.
9 Omeho gandje oga nama kuudhigu. Omuwa, ohandi ku ithana esiku kehe nohandi ku yeluthile omaako gandje megalikano.
10 Aasi oho ya longele tuu iikumitha? Itaa yumuka ando e taye ku hambelele?
11 Esilohenda lyoye ohali tumbulwa tuu mombila, nenge mehala lyehanagulo ohamu popiwa tuu uudhiginini woye?
12 Iikumithalonga yoye ohayi monika tuu mehala lyomilema, nenge uuwanawa woye otau tseyika tuu moshilongo shaambo ya dhimbiwa?
13 Omuwa, otandi ku indile ekwatho; ongula kehe otandi ku galikana.
14 Omuwa, omolwashike to ekelehi ndje? Omolwashike to etha ndje?
15 Onda kala muudhigu okuza muugundjuka wandje nonda kala popepi neso. Onda pwa po molwokukala megeelo lyoye.
16 Ongeyo yoye otayi taukile ndje; omaponokelo goye omadhigu otaga nyanyula ndje.
17 Esiku kehe mbika ayihe oya dhingoloka ndje ngaashi efundja tali zi koombinga adhihe.
18 Owa pitika nookuume kandjelela ye ethe ndje; omilema adhike ndi li nadho.
1 Omuwa, otandi imbi e tandi tanga esilohenda lyoye; otandi hokolola aluhe uudhiginini woye.
2 Ondi shi shi ohole yoye otayi kala omathimbo agehe, uudhiginini woye owa kola ngaashi eyalelo.
3 Owa ti: “Onda dhike ehangano naangoka nde mu hogolola; ondu uvanekele omupiya gwandje David nda ti:
4 ‘Gumwe gwomaamwoye ota ka kala aluhe omukwaniilwa; uukwaniilwa woye otii u kaleke po sigo aluhe.’ ”
5 Omuwa, egulu otali imbi molwiikumitha yoye; aayapuki otaa hambelele oshili yoye.
6 Omuwa, megulu kamu na nando ogumwe e ku fa; mokati koonakukala megulu kamu na ngo ta yelekwa nangoye.
7 Ngoye owa simana mokati kaayapuki; ayehe ye li pungoye, otaye ku tila.
8 Omuwa Kalunga Omunankondoawike, kaku na omunankondo e ku fa; Omuwa, ou shi kwiinekelwa miinima ayihe.
9 Oto ngambeke efuta enene; oto mweneke omakuthikuthi galyo.
10 Oto nyanyagula evovo Rahab e to li dhipaga po; oto sindi aatondi yoye noshikaha shoye oshinankondo.
11 Egulu olyoye, nosho wo evi; ongoye wa shiti uuyuni noshaa shoka shi li mo.
12 Owa shiti uumbangalantu nuumbugantu; oondundu Tabor naHermon otadhi ku imbile nenyanyu.
13 Ongoye omunankondo ngiini! Oshikaha shoye osha yeluka shi na oonkondo!
14 Epangelo lyoye olya tungilwa kuuyuuki nokoshili; ohole nuudhiginini otayi holoka miilonga yoye.
15 Aanelago oomboka haye ku simaneke noondjimbo; oomboka haa ende muuyelele wesilohenda lyoye.
16 Ongoye enyanyu lyawo esiku alihe, notaye ku hambelelele uuwanawa woye.
17 Ongoye esimano noonkondo dhetu; okehalo lyoye tatu sindana.
18 Omuwa, owe tu hogololele omugameni; Kalunga kaIsrael omuyapuki okwe tu pe omukwaniilwa.
19 Memoniko nalenale owa lombwele omupiya gwoye omukwaniilwa wa ti: “Onda kwatha omukwiita ofule nonda gandja epangelo kungoka nde mu hogolola mokati kaantu.
20 Omupiya gwandje David onde mu ningi omukwaniilwa, sho nde mu gwayeke nomugwayo omuyapuki.
21 Oonkondo dhandje otadhi kala aluhe pamwe naye, noshikaha shandje otashi mu koleke.
22 Aatondi ye itaa ka sindana mokutsa ondumbo naye; aakaanakalunga itaye ke mu sinda.
23 Otandi nyanyagula po aatondi ye notandi dhipaga po aahepeki ye.
24 Otandi kala ndi mu hole nonde mu inekela. Otandi mu pe aluhe esindano.
25 Otandi ka taandeleka oshilongo she sigo okefuta, nepangelo lye sigo ohandiyaka yomilonga.
26 Oye ota ka lombwela ndje ta ti: ‘Ongoye tate naKalunga kandje; ongoye omugameni nomuhupithi gwandje.’
27 Otandi ke mu ninga osheeli shandje shomumati, omunene mokati kaakwaniilwa.
28 Euvaneko ndyoka nde mu uvanekele, otali ka kala aluhe lya kola; ehangano lyetu naye otali kala sigo aluhe.
29 Epangelo lye otali kala lya pama ngaashi eyalelo; moluvalo lwe otamu ka za ngo ta ningi omukwaniilwa aluhe.
30 “Ihe oonakuza muye mbaka ngele itaa vulika kompango yandje, noitaa ende ngaashi tandi ya lombwele,
31 tashi ti, taa dhini omalongo gandje noitaa dhiginine iipango yandje,
32 nena otandi ya geelele oondjo dhawo notandi ya dhenge molwomayono gawo.
33 Ihe itandi etha okukala ndi hole David, nenge ndi dhimbwe shoka nde mu uvanekela.
34 Itandi ka teya po ehangano lyetu naye, nenge ndi ethe po euvaneko nando olimwelimwe nde li mu lombwela.
35 “Lumwe aluke olwa gwana, sho nde mu uvanekele nokugana okuyapuki: David itandi mu fundju.
36 Ota ka kala aluhe e na oluvalo, notandi kala nokugamena epangelo lye, manga etango li li ko tali minikile.
37 Otali kala ko ngaashi omwedhi gu li ko, ombangi yi shi kwiinekelwa yokeyalelo.”
38 Ihe nani owa geele omukwaniilwa omuhogololwa; owe mu thigi po nowe mu ekelehi.
39 Owa teya po ehangano lyeni naye, noshishani shepangelo lye owe shi umbile menono.
40 Owa teya po omakuma goshilando she; noohote dhe owe dhi thigi omakulukuma gowala.
41 Ayehe mbo taa piti po, otaa yaka po eliko lye; aashiinda ye ayehe otaye mu yolo.
42 Aatondi ye owe ya pe esindano nowe ya nyanyudha.
43 Iikondjitho ye owe yi simpike nowe mu etha, a sindike molugodhi.
44 Owa hulitha po esimano lye, noshipundi shepangelo lye owe shi ekelehi.
45 Owe mu kulupike, ethimbo manga inaali thika; owe mu sitha ohoni.
46 Omuwa, oto kala wa holama sigo aluhe? Osigo uunake ondjahi yoye ya hwama ya fa omulilo?
47 Dhimbulukwa uuhupi womasiku gandje; tseya kutya aantu atuhe we tu shiti, otu na okusa.
48 Olye ta vulu okukala e na omwenyo itaa si? Omuntu ota vulu tuu okwiikeelela mombila?
49 Omuwa, ohole yoye yonale oyi li peni? Omauvaneko ngo wa pele David, oge li peni?
50 Omuwa, ino dhimbwa, nkene omupiya gwoye nda shekwa, sho ndi idhidhimikile omapopyo agehe giigwana.
51 Omuwa, aatondi yoye oya sheke omukwaniilwa we mu hogolola; oye mu landula nomasheko shaa mpoka a yi.
52 Esimano nali ninge lyOmuwa sigo aluhe! Amen! Amen!
1 Omuwa, ongoye wa kala aluhe egameno lyetu.
2 Manga inoo shita oondundu nomanga inoo holola po uuyuni, ngoye Kalunga kaaluhe oko wa li noto ka kala aluhe sigo aluhe.
3 Oto lombwele omuntu, a shune mpoka a za; oto mu shuna montsi yevi.
4 Oomvula eyuvi limwe koshipala shoye odha fa owala esiku limwe; ongesiku lyohela lya pita, nenge otundi yimwe muusiku.
5 Aantu oto ya kombo po thilu; otaa piti po mbala ya fa ondjodhi. Omuntu okwa fa omwiidhi tagu tsapuka pepito lyetango.
6 Pethimbo lyongula otagu koko notagu sheneke, ihe komatango otagu kukuta e tagu si.
7 Otatu hulu po kondjahi yoye; otatu kana po kegeelo lyoye.
8 Omayono getu owe ga kaleke koshipala shoye; oondjo dhetu dhomeholamo owe dhi holola puuyelele.
9 Otse otatu hulu po kondjahi yoye; otatu kana po ngaashi omufudho.
10 Oomvula dhokukalamwenyo kwetu omilongo heyali, nongele odhindji, omilongo hetatu, ihe odhi na uudhigu noluhodhi; otadhi piti po mbala twa fa twa tuka.
11 Olye a tseya oonkondo dhondjahi yoye? Olye e shi oshilanduliko shongeyo yoye?
12 Tu longa okukoneka uuhupi womasiku getu, opo tu ninge aanandunge.
13 Okugeya kwoye otaku tsikile sigo uunake? Omuwa, sila aapiya yoye ohenda!
14 Ongula kehe tu ulukila esilohenda lyoye, opo tu imbe nenyanyu omasiku getu agehe.
15 Tu nyanyudha ihe shi thike poluhodhi ndoka we tu pele, ngaashi twa mono iihuna ethimbo ele.
16 Otse aapiya yoye, tu talitha iilongankondo yoye; talitha omaluvalo getu iilonga yoye ya simana.
17 Omuwa Kalunga ketu, esilohenda lyoye nali kale kombanda yetu. Koleka iilonga yiikaha yetu!
1 Kehe ngoka ti itula mepopilo lyOmuwa, nakehe ngoka ta kala megameno lyOmunankondoawike,
2 ota vulu okutya kuye: “Ongoye omupopili nomugameni gwandje. Ongoye Kalunga kandje, nde ku inekela.”
3 Omuwa ota kandula po iiponga ayihe note ku gamene komikithi dhomalega.
4 Ote ku siikile nomawawa ge; megameno lye kamu na iiponga; oku shi kwiinekelwa, oye eshigo nepopilo lyoye.
5 Ito pumbwa okutila iiponga yuusiku nenge eponokelo omutenya.
6 Elega itali ku akele uusiku, nuuvu itau ku kwata omutenya.
7 Ponto yoye nando napa se eyuvi nokolulyo lwoye omayuvi omulongo, ngoye ito adhika koshiponga.
8 Oto kala wa tala, aakaanakalunga nkene taa geelwa.
9 Oshoka Omuwa oye omupopili gwoye; gwokombandambanda owe mu ningi omugameni gwoye.
10 Onkee oshiponga itashi ku adha, nepiyagano itali thiki popepi nondunda yoye.
11 Kalunga ote ku tumine aayengeli ye, ye ku gamene; otaye ku shigi shaa mpoka to yi.
12 Otaye ku papatele momaako gawo, waa pume oompadhi dhoye komamanya.
13 Oto ka lyata oonime nomayoka, oonime oohahu nomayoka guuzigo.
14 Kalunga ota ti: “Otandi hupitha mboka ye hole ndje notandi gamene mboka ye shi kutya ongame Omuwa.
15 Uuna taa ithana ndje, otandi ya yamukula; uuna ye li muudhigu, ote kala pamwe nayo. Otandi ya hupitha e tii ya simanekitha.
16 Otandi ya pe omwenyo omule notandi ya hupitha.”
1 Omuwa, osho opala oku ku hambelela, okusimaneka edhina lyoye, Gwokombandambanda,
2 okuuvitha ongula kehe esilohenda lyoye, nuusiku kehe uudhiginini woye.
3 Otandi lilitha uuhumba wootheta; otandi imbi nokaharpa.
4 Omuwa, iilongankondo yoye otayi nyanyudha ndje; otandi imbi nda nyanyukwa molwaashoka we shi longo.
5 Omuwa, iilonga yoye iinene ngiini! Omadhiladhilo goye olye te ga pikula?
6 Ngoka itee shi dhimbulula, oye omugoya, naangoka itee shi mono, ke na omayele.
7 Aakaanakalunga nando naa kale muulinawa ya fa omwiidhi omutalala, aakolokoshi nando naa hupe nawa, ayehe otaa ka dhimwa po thilu.
8 Oshoka ngoye Omuwa ou li kombandambanda sigo aluhe.
9 Aatondi yoye, Omuwa, otaa ka hula po; aakolokoshi ayehe otaa ka kana po.
10 Omuwa, owa pe ndje oonkondo dha fa dhonyati nowa laleke ndje nuuyamba.
11 Onda mono okusindika kwaatondi yandje nondu uvu okulila kwaakolokoshi.
12 Aayuuki otaa ka koka ya fa omilunga; otaa ka ziza ya fa omisendeli dhaLibanon.
13 Otaa fe omiti dha tsikwa mongulu yOmuwa, tadhi kokele motempeli yaKalunga ketu.
14 Otadhi imi aluhe iiyimati; aluhe odha hapa nodha ziza.
15 Shika otashi holola kutya Omuwa oye omuyuuki; oye omugameni gwandje, ke na nando uuwinayi.
1 Omuwa oye omukwaniilwa. Okwa zala eadhimo noonkondo. Evi olya dhikwa lya dhikika, itali tenguka.
2 Omuwa, oshipundi shoye shepangelo osha kala okuza nale.
3 Omuwa, omafuta otaga popi mokule; endundumo lyago otali uvika.
4 Omuwa omunankondo oku vule epopyo lyomeya gefuta, oku vule omakuthikuthi galyo; Omuwa Gwokombandambanda oye omunankondo!
5 Omuwa, omautho goye ihaga lunduluka, otempeli yoye oyo ondjapuki aluhe sigo aluhe.
1 Omuwa, ongoye Kalunga ho geele; holola ondjahi yoye!
2 Ongoye omupanguli gwaantu ayehe; thikama, u pe aanuuntsa shoka ye shi ilongela.
3 Omuwa, sigo uunake aakaanakalunga taa kala nokunyanyukwa? Sigo uunake, Omuwa?
4 Sigo uunake aakolokoshi taa inenepeke notaa itangele uukolokoshi wawo?
5 Omuwa, oyo taa thenyene aantu yoye kongudhi; otaa hepeke aantu yoye.
6 Otaa dhipaga aaselekadhi noothigwa, osho wo aakwiilongo mbo ye li moshilongo.
7 Otaa ti: “Omuwa ke tu wete; Kalunga kaIsrael ita dhimbulula sha.”
8 Aantu yandje, one aagoya ngiini? Otamu ka ninga oondunge uunake?
9 Kalunga ngoka e tu pa omakutsi, ota kala tuu ihu uvu ko? Kalunga ngoka e tu pa omeho, ota kala tuu ihaa mono ko?
10 Omupangeli gwiigwana ita vulu oku yi geela? Omunongeki gwaantu ayehe ita tseya sha?
11 Omuwa okwa tseya ashihe shoka taa dhiladhila; okwa tseya uuhupi woondunge dhawo.
12 Omuwa, omunelago oye ngoka to mu putudha; oongoka to mu longo ompango yoye!
13 Oto mu pe ehekeleko momasiku guudhigu, sigo aakaanakalunga ya fulilwa ekelo, ya gwile mo.
14 Omuwa ite ekelehi aantu ye; ite etha po mboka ye.
15 Eutho eyuuki otali ka holoka moompangu, aayuuki ayehe otaye ke li landula.
16 Olye ta pingene ndje mokugeela aakaanakalunga? Olye ta pangula aakolokoshi peha lyandje?
17 Ando Omuwa ina kwatha ndje, ando onda yi mbala kehala lyeimweneneno.
18 Ngame onda ti: “Otandi ihata po!” Ihe, Omuwa, owa ambidhidha ndje molwohole yoye.
19 Uuna nda tila nonda sa iimpwiyu, oto hekeleke ndje e to nyanyudha ndje.
20 Ngoye Omuwa, ku na ehangano naapanguli aadhudhu, mbo haa popile uukolokoshi.
21 Ohaa ende aayuuki mevi, naamboka inaaya yona sha, otaa ya pangulile eso.
22 Ihe Omuwa oye omupopili gwandje; Kalunga kandje ota gamene ndje.
23 Ote ya geelele uukolokoshi wawo note ya yono po molwomayono gawo; Omuwa Kalunga ketu ote ke ya hulitha po.
1 Ileni, tu hambeleleni Omuwa! Ileni, tu imbeni tse tu nyanyukilweni Kalunga ngoka he tu gamene!
2 Tu yeni koshipala she noku mu pandula. Tu imbeni nenyanyu noku mu hambelela.
3 Oshoka oye Kalunga omunankondo, omukwaniilwa omunene kombanda yiikalunga.
4 Oye ta pangele evi alihe, okuza muule walyo sigo okoondungu dhoondundu.
5 Efuta oli li miikaha ye, oshoka oye e li shiti; oye e eta po evi ekukutu.
6 Ileni, tu isizimikeni kuye, tu mu simanekeni; tu tseni oongolo koshipala shOmuwa, Omushiti gwetu!
7 Oye Kalunga ketu; otse oonzi dhuusita we, aantu he ya sile oshimpwiyu.
8 Oye ota ti: “Onena tuu ndjika, sho tamu uvu ewi lyandje, inamu ikukutika, ongaashi oohokulu puMeriba nongaashi ya li esiku ndiyaka mombuga puMassa.
9 Mwiyaka oya makele ndje noya yeleke ndje, nando ya mono iilonga mbyoka nde yi ya longele.
10 Methimbo lyoomvula omilongo ne aantu mboka oya ningitha ndje omwenyo omwiinayi. Ngame nonda ti: ‘Oyo oonakwaavulika ngiini! Otaa tindi okuvulika kiipango yandje.’
11 Nena onda geye nonda ningi etokolo lya kola: ‘Itamu ka thika mo moshilongo moka nda li ndi na oku mu pa evululuko.’ ”
1 Imbileni Omuwa ondjimbo ompe! Imbileni Omuwa, uuyuni auhe!
2 Imbileni Omuwa, ne mu mu simaneke. Hokololeni esiku kehe elaka etoye kutya okwe tu hupitha.
3 Uvithileni iigwana esimano lye, iilonga yoonkondo okiigwana ayihe.
4 Omuwa oye omunene noku na okusimanekwa; oku na okutumbalekwa e vule iikalunga ayihe.
5 Iikalunga yiigwana ayihe yilwe oyo iimenka yowala, ihe Omuwa oye a shiti omagulu.
6 Esimano neadhimo olye mu kunduka; oonkondo neopalo oli li motempeli ye.
7 Hambeleleni Omuwa, one aantu amuhe kombanda yevi; tangeni eadhimo noonkondo dhe.
8 Peni edhina lyOmuwa esimano; eteni omagano, sho tamu ya motempeli ye.
9 Inyongameneni koshipala shOmuyapuki, uuna ta holoka; evi alihe nali kakame koshipala she!
10 Lombweleni iigwana ayihe tamu ti: “Omuwa oye omukwaniilwa! Evi olya dhikika lya kola, itali tenguka; Omuwa ota ka pangula aantu pauyuuki.”
11 Egulu nevi naga nyanyukwe! Efuta ndunduma, niishitwa ayihe yi li mungoye;
12 omalundu nyanyukwe, naashihe shi li mune! Omiti adhihe dhomomugulu otadhi ka kugilila kenyanyu
13 Omuwa sho te ya okupangela uuyuni. Ota ka pangula aantu ayehe yokombanda yevi e na uuyuuki noshili.
1 Omuwa oye omukwaniilwa! Evi, nyanyukwa! Ne oontuntu dhomomafuta, ligoleni!
2 Iikogo nomilema odhe mu dhingoloka; ota pangele nuuyuuki noshili.
3 Omulilo otagu mu tetekele, nota lungunitha po aatondi ye mbo ye mu kundukidha.
4 Olwaadhi lwe otalu minikile uuyuni auhe; evi otali shi mono e tali kakama.
5 Koshipala shOmuwa oondundu otadhi hengumuka dha fa ezi, okoshipala shOmuwa guuyuni auhe.
6 Egulu otali hokolola uuyuuki we, niigwana ayihe otayi mono eadhimo lye.
7 Kehe ngoka ha simaneke iimenka, ota sithwa ohoni; iikalunga ayihe oyi na okutsila Omuwa oongolo.
8 Aantu yomuSion otaa nyanyukwa, niilando yomuJuda oya shambukwa, oshoka Omuwa oye omupanguli.
9 Omuwa Omunankondoawike, ongoye omupangeli kombanda yevi alihe; ngoye omunene u vule iikalunga.
10 Omuwa oku hole mboka haa tondo uuwinayi, ota gamene aantu ye note ya hupitha miikaha yaakolokoshi.
11 Aayuuki otaa ende muuyelele; mboka ye na oomwenyo dha yela, otaa nyanyukwa.
12 Nyanyukilweni Omuwa, aayuuki amuhe; simanekeni edhina lye eyapuki.
1 Imbileni Omuwa ondjimbo ompe; okwa longo iilonga iikumithi! Okoonkondo dhe oonene a sindana.
2 Omuwa okwa tseyitha esindano lye; okwa hololele iigwana uuyuuki we.
3 Okwa kala aluhe e na ohole nuudhiginini kAaisraeli. Aantu ayehe oya mono kutya Kalunga ketu oye omusindani.
4 Evi alihe nali nyanyukwe nokuligolela Omuwa; nali mu imbile oondjimbo dhenyanyu nodhomahambelelo!
5 Hambeleleni Omuwa! Mu imbileni nuuhumba!
6 Hikeni omankuma noontunda; imbileni Omuwa, omukwaniilwa gwetu.
7 Efuta nali ndundume, naashihe shoka shi li mo; evi nali imbe, naayehe mboka ye li ko.
8 Omilonga nadhi hakele, noondundu adhihe nadhi ligole koshipala shOmuwa,
9 Oshoka ote ya okupangula uuyuni. Ota ka pangula aantu ayehe kombanda yevi pauyuuki nopashili.
1 Omuwa oye omukwaniilwa; aantu otaa kakama. Oye a kuutumba koshipangelapundi she shi li kombanda yaakerubi, evi notali kakama.
2 Omuwa oye omunankondo muSion; oye a simana kombanda yiigwana ayihe
3 Kehe gumwe oku na okusimaneka edhina lye ekumithi netilithi. Oye omuyapuki!
4 Ongoye omukwaniilwa omunankondo, ou hole shoka shu uka; owa dhike eutho eyuuki muIsrael nowa gandja uuyuuki noshili.
5 Simanekeni Omuwa Kalunga ketu; isizimikeni koompadhi dhe! Oye omuyapuki!
6 Moses naAaron oya li aayambi ye, naSamuel okwa li gumwe gwaamboka haa ithana edhina lye. Oyi indile Omuwa, nokwe ya yamukula.
7 Okwe ya popitha e li moshikogo; oyo noya vulika komalombwelo nokiipango ye.
8 Omuwa Kalunga ketu, owa yamukula omagalikano gawo. Owe ya dhimine po oondjo dhawo, nonando owe ya geelele wo omayono gawo.
9 Simanekeni Omuwa Kalunga ketu, ne mu galikane kondundu ye ondjapuki. Omuwa Kalunga ketu oye omuyapuki.
1 Uuyuni auhe, ligoleleni Omuwa!
2 Longeleni Omuwa nenyanyu; ileni koshipala she mwa nyanyukwa!
3 Tseyeni Omuwa oye Kalunga. Oye okwe tu shiti, otse oye; otse aantu ye noonzi dhuusita we.
4 Piteni miiyelo yotempeli ye nomapandulo; ileni melongelokalunga nomahambelelo. Mu panduleni ne mu simaneke edhina lye.
5 Oshoka Omuwa oye omwaanawa; esilohenda lye otali kala aluhe, nuudhiginini we komaluvalo nomaluvalo.
1 Omuwa, otandi ku imbile molwesilohenda nomoluuyuuki woye; otandi ku hambelele.
2 Otandi ikeelele ndi kale ndaa na ombedhi. Oto ya uunake kungame? Otandi angala uuwinayi megumbo lyandje,
3 noitandi popile nando uukolokoshi. lilonga yaashunimonima otandi yi tondo; noitandi kwatathana nayo
4 Iineya nayi kale ndje kokule; itandi popile uudhudhu
5 Ngoka ta ningilile mo mukwawo, otandi mu tidha po. Itandi gama nando komuholuuntsa nokomwiinomi
6 Otandi gama kwaamboka aainekelwa notandi ya kaleke mombala yandje. Mboka yaa na oshipo, otandi ya ningi aayakuli yandje.
7 Omufundja ita pitikwa, a kale megumbo lyandje; omufudhime ita kala koshipala shandje.
8 Esiku kehe otandi kombo mo aakolokoshi moshilongo; otandi ka tidha mo aadhudhu moshilando shOmuwa.
1 Omuwa, uva egalikano lyandje, pulakena, sho tandi ku lilile ekwatho!
2 Ino thiga ndje po, sho ndi li muudhigu! Pulakena eindilo lyandje, yamukula ndje mbala, sho tandi ku ithana!
3 Otandi kana po nda fa olwithi; molutu lwandje otamu pi ongo mu na omulilo.
4 Onda leela nda fa omwiidhi gwa ganya; onda kanitha ehalo lyiikulya.
5 Otandi tongo mokule; onda nanga omasipa gowala.
6 Ondi li muuwike nda fa endoko mombuga, ongaashi ehwiyu momakulukuma.
7 Ohe lala inee kotha; ondi ikalela nda fa okadhila ke li kombanda yondunda.
8 Esiku kehe aatondi yandje otaa sheke ndje; otaa yolo ndje notaa tumbula edhina lyandje nomusheko.
9 Iikulya yandje omutoko; nokunwa kwandje okwa gwedhakanithwa nomahodhi,
10 oshoka owa geele ndje; owe etha ndje nowe ekelehi ndje.
11 Omasiku gandje oga fa omuzile gwokomatango, ongaashi omwiidhi tagu kukuta.
12 Ihe Omuwa, ongoye omukwaniilwa sigo aluhe; omaluvalo agehe otage ku dhimbulukwa.
13 Oto yeluka, u sile Sion ohenda; ethimbo olya thiki oku shi etela olukeno. Ndika olyo ethimbo lyo opala.
14 Tse aapiya yoye otu hole omutungilo gwasho; otu uvite oluhodhi, sho sha halakanithwa po.
15 Iigwana otayi ka tila Omuwa, naakwaniilwa ayehe yomuuyuni eadhimo lye.
16 Uuna Omuwa ta ka tungulula Sion, ota ka holola uunene we.
17 Ota ka uva omagalikano gomapongo noita ka dhina omaindilo gago.
18 Nyola ayihe mbika, u yi pungulile omaluvalo tage ya, opo mboka inaaya valwa natango ya ka tseye shoka Omuwa e shi longo e taye mu simaneke.
19 Omuwa ota tala pevi e li megulu muuyapuki we; ota mono kombanda yevi.
20 Otu uvu omakemo goonkwatwa nota mangulula mbo ya tokolelwa eso.
21 Hambeleleni Omuwa, ne oonakukala megulu; nota ka simanekwa muJerusalem,
22 uuna iigwana nomapangelo tayi ka gongala okusimaneka Omuwa.
23 Omuwa okwa nkundipaleke ndje, manga omugundjuka; okwa fupipike omasiku gandje.
24 Kalunga, ino kutha ndje po, manga inaandi kulupa. Omuwa, ou na omwenyo aluhe sigo aluhe;
25 nalenale owa shiti evi, neyalelo olyo iilonga yiikaha yoye.
26 Oyo otayi hulu po, ihe ngoye oto kalelele; ayihe otayi ka kulupa ya fa oonguwo. Oto ke yi ekelahi ya fa iinyanyu, notayi kana po.
27 Ihe ngoye oto kala ngaashi wa za, ito hulu po.
28 Megameno lyoye aana yetu otaa kala ya vululukwa, nomaluvalo gawo oto ke ga popila.
1 Omwenyo gwandje, hambelela Omuwa! Ashihe shi li mungame, nashi simaneke edhina lye eyapuki!
2 Omwenyo gwandje, hambelela Omuwa! Ino dhimbwa uuwanawa we.
3 Oye ta dhimi po oondjo dhandje nota aludha uuvu wandje auhe.
4 Oye ta hupitha ndje meso nota landula ndje nesilohenda nontalanteni ye.
5 Ota kutitha ndje nuuwanawa we nota kaleke ndje nda nyashuka nda fa ontsa.
6 Omuwa ota pangula pauyuuki, naathiminikwa ote ya popile.
7 Okwa hololele Moses omadhiladhilo ge, Aaisraeli iilongankondo ye.
8 Omuwa oye omunamutimahenda nomunalukeno, ohi idhidhimike mokugeya noku na ohole ihaayi lunduluka.
9 Iha tamanana ethimbo kehe, ye iha kala a geya sigo aluhe.
10 Ote tu geele, ngaashi twe shi ilongela, note tu pula pakuyona kwetu.
11 Ngaashi uule wokuza pevi okuya kegulu, osho sha tya uunene wohole ye kumboka haye mu simaneke.
12 Ngaashi uuzilo u li kokule nuuninginino, osho ta kaleke kokule natse oondjo dhetu.
13 Ngaashi aanona taa silwa ohenda kuhe, osho Omuwa ta sile ohenda mboka haye mu simaneke.
14 Okwa tseya kutya otwa shitwa nashike; oku shi shi kutya otse ontsi yevi.
15 Oshoka omasiku getu oga fa omwiidhi. Otatu nyanyukwa twa fa ongala yokelundu;
16 ombepo sho ya tameke oku yi pepela, otayi si noitayi monika we.
17 Ihe esilohenda lyOmuwa itali lunduluka kumboka haye mu simaneke, nuuwanawa we komaluvalo nomaluvalo
18 okumboka haa dhiginine ehangano lye naamboka haa vulika kiipango ye.
19 Omuwa oku li koshipangelapundi she megulu; ota pangele ayihe.
20 Hambeleleni Omuwa, ne aayengeli oofule naanankondo, mbo hamu fala omalombwelo ge nohamu vulika koohapu dhe.
21 Hambeleleni Omuwa, ne oonakukala megulu; aapiya ye amuhe mbo hamu gwanitha ehalo lye.
22 Iishitwa ayihe nayi simaneke Omuwa, akuhe nkoka ku na epangelo lye. Mwenyo gwandje, hambelela Omuwa!
1 Mwenyo gwandje, hambelela Omuwa. Omuwa Kalunga kandje, ongoye omunene ngiini! Owa zala esimano neadhimo;
2 owi isiikila uuyelele. Owa yala egulu ngaashi othayila
3 nowa tungile egumbo lyoye mokati komeya gokombanda. Iikogo owe yi ningi ya fa etemba lyoye lyokweenda mo, nombepo omawawa goye gokutuka.
4 Iihomo yombepo oto yi ningi aatumwa yoye, noombadhi aapiya yoye.
5 Evi owe li tula komakankameno ga kola, itali tenguka.
6 Kombanda yalyo owa yala ko efuta ngaashi onguwo; omeya galyo oga tumba ge vule oondundu.
7 Sho wi iganda, omeya oga yi ontuku; oga fadhuka po, sho gu uvu endundumo lyelombwelo lyoye.
8 Oga kunguluka ga zi koondundu nokuuka momasilu, okomahala nkoka we ga uthile.
9 Owe ga dhikile oongamba itaadhi kondwa, nowe ga ngambeke kaaga siikile we evi.
10 Owa tula oothithiya momasilu nowa palele omilonga pokati koondundu.
11 Otadhi gandja omeya kiiyamakuti; uusino womokuti otau zi enota.
12 Momiti dhopooha dhomeya uudhila otau tungile mo iihandhila e tau nyanyukwa.
13 Miikogo otamu zi omvula tayi loko koondundu; evi olya kuta omayambeko goye.
14 Oto menitha omwiidhi gwiimuna niimeno yokukwatha aantu, sho to ya menithile mevi iipalutha.
15 Omaviinu otaga nyanyudha omuntu, omagadhi otaga adhimitha oshipala, niikulya otayi pe omuntu oonkondo oompe.
16 Omisendeli dhaLibanon odha lokwa omvula oyindji; odho omiti dhOmuwa e dhi kuna.
17 Uudhila otau tungile mo iihandhila yawo, nomandoko otaga tungile mo wo.
18 Uupundja otau ende koondundu, nuuhele oko tau holama.
19 Owa shiti omwedhi okuutha omathimbo; etango oli shi ethimbo lyokuningina kwalyo.
20 Owa tula ko uusiku; momilema iikwakuti ayihe otayi hituluka.
21 Oonimegona ohadhi pumbu, sho tadhi kongo iikulya; Kalunga ote dhi pe iipalutha yadho.
22 Shaa tuu etango tali piti, ayihe otayi shuna yi ka lale komahala gayo.
23 Ihe aantu otaa penduka, ya ye kiilonga, notaa longo sigo okomatango.
24 Omuwa, owa shiti iinima oyindji! Tala nkene wa shiti ayihe noondunge! Evi olyu udha iishitwa yoye.
25 Tala efuta enene lya mbwalangandja, omu na iinamwenyo yaa shi kuyalulwa, iinene niishona.
26 Oosikepa otadhi ende mefuta; Leviatan ndjoka wa shiti, otayi dhanene mo.
27 Ayihe mbika otayi ligamene kungoye, u yi pe iipalutha pethimbo.
28 Oto yi pe e tayi taamba; oto yi palutha e tayi kuta.
29 Uuna to yi etha, otayi haluka; ngele to kutha po omufudho gwayo, otayi si notayi shuna montsi yevi.
30 Ihe ngele to yi pe omufudho, nena otayi shitwa; oto pepaleke olupe lwevi.
31 Esimano lyOmuwa nali kale sigo aluhe! Omuwa na nyanyukilwe eshito lye!
32 Oye okwa tala evi, olyo nolya kakama; okwa gumu oondundu, odho nodha kungu omulilo.
33 Onda hala okwiimbila Omuwa omasiku gandje agehe; onda hala okuhambelela Kalunga kandje, manga ndi na omwenyo.
34 Omuwa na taambe ndje, sho tandi mu dhiladhila; otandi nyanyukilwa Omuwa.
35 Aalunde naa kane ko kombanda yevi, naakaanakalunga inaa monika ko we. Omwenyo gwandje, hambelela Omuwa! Halleluja!
1 Hambeleleni Omuwa, uvitheni uunene we; lombweleni iigwana shoka a longo.
2 Imbileni Omuwa omahambelelondjimbo; hokololeni iilongankumwe e yi longo.
3 Tangeni edhina lye eyapuki; amuhe mbo hamu ya koshipala shOmuwa, nyanyukweni!
4 Kongeni ekwatho kOmuwa, ne mu mu simaneke aluheluhe.
5 Ne oluvalo lwaAbraham, omupiya gwe, ne oluvalo lwaJakob, omuhogololwa gwe, dhimbulukweni iikumithalonga mbyoka Kalunga e yi longo nomapangulo ngoka a gandja.
6
7 Omuwa oye Kalunga ketu; oye ta pangula uuyuni auhe.
8 Ota dhiginine ehangano lye sigo aluhe, euvaneko lye sigo omaluvalo nomaluvalo.
9 Ota dhiginine ehangano lye naAbraham neuvaneko lye kuIsak.
10 Omuwa okwa dhike ehangano lya kola naJakob, ehangano lyaaluhe naIsrael.
11 Oye okwa ti: “Otandi ke ku pa evi lyaKaanan, notali ka ninga eliko lyoye.”
12 Aantu yaKalunga oya li aashona komwaalu; oya kala oondjendi mevi lyaKaanan
13 Oya tembukile koshilongo noshilongo; oya kala mokati kaantu mbaka naambeyaka.
14 Ihe Kalunga ina pitika ya hepekwe; okwe ya gamene nokwa ganda aapangeli ta ti:
15 “Inamu ningila aahogololwa yandje uuwinayi, inamu ehameka aahunganeki yandje.”
16 Omuwa okwa tumine oshilongo shawo ondjala nokwa kutha po iikulya ayihe.
17 Okwe ya tetekelithile omulumentu gumwe, Josef, ngoka a landithwa po omupika.
18 Oye okwa kwatwa e ta tulwa momalyenge nokwa tulwa olinga yosheela mothingo,
19 sigo ehunganeko lye lya gwanithwa. Oohapu dhOmuwa odhe shi koleke wo.
20 Omukwaniilwa gwaEgipiti okwe mu mangululitha mo; omupangeli gwiigwana okwe mu piitha mo.
21 Okwe mu ningi elenga lyegumbo lye nomutonateli gweliko lye alihe.
22 Okwa lenge Josef mokati komalenga ge agehe, a pukulule aagandjindunge ye.
23 Opo ihe Jakob okwe ke ya kuEgipiti nokwa tula moshilongo shoka.
24 Omuwa okwa pe aantu ye oluvalo olwindji; okwe ya ningi aanankondo ye vule aatondi yawo.
25 Aayegipiti okwe ya sikumudha, ya tonde aantu ye noya kotokele aapiya ye.
26 Okwe ya tumine omupiya gwe Moses, naAaron, omuhogololwa gwe.
27 Kalunga okwe ya longitha iinyengandunge nokwe ya ningitha iikumithalonga muEgipiti.
28 Kalunga okwa tumine oshilongo shAayegipiti omilema, oshoka inaa vulika kelombwelo lye.
29 Omilonga dhawo dhomeya okwe dhi shitukitha ombinzi nokwa dhipaga po oohi dhawo adhihe.
30 Oshilongo shawo osha li tashi wiwima omafuma; oga li gu udha nomoondjugo dhaapangeli yawo.
31 Kalunga okwa popi kutya naku ye oompawe nomatopola; iipupu yayo noya tuka noshilongo ashihe.
32 Peha lyomvula, okwa tumine oshilongo shawo oompawe noombadhi.
33 Okwa halakanitha po omiviinu nomikwiyu dhawo nokwa teya po omiti dhawo.
34 Okwa popi, oombahu nodha holoka, omayuvi nomayuvi.
35 Odha li po iimeno ayihe yomomapya; odha mana po iikunwa ayihe.
36 Okwa dhipaga po iisheelimati yawo ayihe, aavalwa yawo aatango ayehe.
37 Nena okwa piitha mo Aaisraeli; oya zi mo noshisiliveli noshingoli, naayehe oya li aayamba naanankondo.
38 Aayegipiti oya li ya tila nAaisraeli oya li ya nyanyukwa, sho ya zi mo.
39 Kalunga okwa tula ko oshikogo okusiikila aantu ye, nuusiku uuyelele woku ya minikila.
40 Oye mu pula nokwe ya tumine iimote; okwe ya pe iikulya yomegulu, e ya paluthe.
41 Okwa tsu ombululu memanya, omeya noga tsipuka mo, noga kunguluka nombuga ngaashi omulonga.
42 Omuwa okwa dhimbulukwa euvaneko lye eyapuki e li uvanekele omupiya gwe Abraham.
43 Oye okwa piitha mo aahogololwa ye noyi imbi nokunyanyukwa.
44 Okwe ya langeke miilongo yaantu yalwe, nomapya gawo okwe ga pe po Aaisraeli
45 Okwe shi ningi, opo aantu ye ya vulike kiipango ye noya dhiginine omalombwelo ge. Halleluja!
1 Hambeleleni Omuwa! Gandjeni omapandulo kOmuwa, oshoka ye omwaanawa; ohole ye oyaaluhe.
2 Olye ta vulu okuyalula iikumitha mbyo a longa? Olye ta vulu oku mu pa esimano lya gwana?
3 Aanelago oomboka haa kala moshili, mboka haa longo aluhe shoka shu uka.
4 Omuwa, dhimbulukwa ndje, uuna to sile aantu yoye ohenda; hupitha ndje wo, uuna to ya hupitha.
5 Talitha ndje uulinawa waantu yoye aahogololwa, opo ndi nyanyukwe pamwe noshigwana shoye nondi itangele mungoye pamwe nayo.
6 Otse otwa yono ngaashi ootate wo; otwa longo uudhudhu nuukolokoshi.
7 Ootate muEgipiti inaa longwa sha kiilongakumithi yaKalunga. Oya dhimbwa, nkene a kala e ya hole aluhe, sho ya tangalala pEfuta etiligane.
8 Ihe okwe ya hupitha ngaashi u uvaneke, opo i iholole kutya oye omunankondo.
9 Okwa lombwele Efuta etiligane li gandje ompito, olyo nolya pwine, nokwe enditha aantu ye puukukutu.
10 Okwe ya hupitha miikaha yaatondi yawo nokwe ya yugulula ko kaahepeki yawo
11 Ihe omeya oga siikile aatondi yawo; inapu hupa nando ogumwe.
12 Nena aantu ye oyi itaale omauvaneko ge noye mu imbile ehambelelo.
13 Ihe konima oya dhimbwa shoka e shi longo noya longo inaaya pula ewiliko lye.
14 Mombuga oya falafalwa komahalo gawo ga puka noya hindi Kalunga.
15 Kalunga okwe ya pe shoka ye mu indile, ihe okwe ya tumine wo omukithi omudhigu.
16 Mombuga oya sile Moses efupa, naAaron omuhogololwa gwOmuwa.
17 Evi olye ekama nolya nina po Datan; olya siikile Abiram naangandjawo ayehe.
18 Omulilo ogwa hwamene aalanduli yawo nogwa fike po aakolokoshi mboka.
19 PuSinai oya tholoma ontana yoshingoli noya galikana oshikalunga shoka.
20 Peha lyokusimaneka Kalunga, oya simaneke efano lyoshinamwenyo hashi li omwiidhi.
21 Oya dhimbwa Kalunga ngoka e ya hupitha, ngoka a longo iilongankondo muEgipiti,
22 oongoka a ningi iilonga iikumithi niitilithi pEfuta etiligane.
23 Kalunga sho a popi kutya okwa hala okuyona po aantu ye, omupiya gwe Moses okwa thikama nokwa galikana Kalunga e te mu indile kee ya geele.
24 Ano oyi iteka evi ewanawa, oshoka inaa itaala euvaneko lyaKalunga
25 Oya kala momatsali taa ngungutula noinaa hala okuuva Omuwa shoka ta ti.
26 Omuwa okwe ya lombwele elondodho lya kola kutya ngele itaa vulika, ote ke ya etha, ya sile mombuga.
27 Ote ke etha oluvalo lwawo lu sile nolu halakanene miilongo niilongo.
28 PuPeor oyi igameke kuBaal noya li omayambo ga yambelwa iikalunga yaa na omwenyo.
29 Oya geyitha Omuwa niilonga yawo noya adhika komukithi gwelega.
30 Ihe Pinehas okwa thikama nokwa geele aayoni, nomukithi ogwa mwena.
31 Shika osha holola uuwanawa wOmuwa, notashi ka dhimbulukiwa komaluvalo nomaluvalo.
32 Pomeya gaMeriba aantu oya geyitha Omuwa, naMoses okwa geelwa omolwawo.
33 Oya geyitha Ombepo yaKalunga, onkee Moses okwe ya nyenyetele itaa fudha po.
34 Inaa halakanitha po aapagani, ngaashi Omuwa e ya lombwele,
35 ihe oya hokanathana nayo noya taamba omikalo dhawo.
36 Oya simaneke iimenka yawo, naashika oshe ya fala meyonuuko.
37 Oya gandja oyana aamati naakadhona, ya ninge omayambo kiikalunga yAakaanana.
38 Oya dhipaga oyana yaa na oondjo, noshilongo osha nyatekwa kiilonga yawo.
39 Oyi inyateke niilonga yawo noye etha Kalunga.
40 Omuwa nokwa geele aantu ye; oya ningi iikungitha kuye.
41 Okwe ya ethele miikaha yaapagani, noya yi mepangelo lyaatondi yawo.
42 Aatondi yawo oye ya hepeke noye ya humbateke omitenge omidhigu.
43 Olwindji Omuwa okwa kala nokuhupitha aantu ye, ihe yo inaa vulika noya yono aluhe.
44 Ihe Omuwa oku uvu onkugo yawo, sho ye li muudhigu, ye ina gamuka ko kuyo.
45 Okwa dhimbulukwa ehangano lye ndyoka e li dhike molwawo, nokwa geuluka molwohole ye.
46 Okwa pe aahepeki yawo ombepo yolukeno, opo ye ya sile ohenda.
47 Omuwa Kalunga ketu, tu hupitha! Tu galula ngu u tu kongolole mo mokati kiigwana, opo tu ka pandule e tatu simaneke edhina lyoye eyapuki.
48 Hambeleleni Omuwa, Kalunga kaIsrael; mu simanekeni nena nosigo aluhe! Kehe gumwe na tye: “Amen!”
1 Hambeleleni Omuwa, oshoka oye omwaanawa; esilohenda lye otali kala aluhe.
2 Mboka ya hupithwa kOmuwa, naa tumbule iitya mbika yepandulo. Okwe ya hupitha miikaha yaatondi yawo.
3 Okwe ya kutha kiilongo hoka ya li ko oondjendi, noye ya taa zi kuuzilo nokuuninginino, kuumbangalantu nokuumbugantu.
4 Yamwe yomuyo oye ende mombuga yaa na ondjila, yo inaa mona epola lyu uka moshilando, opo ya kale mo.
5 Oya li ya sa ondjala nenota noya kanitha omukumo.
6 Nena muudhigu wawo oyi ithana Omuwa, nokwe ya hupitha mo moshiponga.
7 Okwe ya enditha nondjila yu ukilila nokwe ya fala moshilando ya kale mo.
8 Naa pandule Omuwa omolwesilohenda lye nomolwiilonga iikumithi e yi ya ningile.
9 Mbo ya sa enota, ote ya pe omeya gokunwa, naambo ya sa ondjala, ote ya pe uuwanawa owindji.
10 Yamwe oya li moluhodhi nomomilema, oonkwatwa ya mangwa nomalyenge,
11 oshoka oya tsu ondumbo nelombwelo lyaKalunga noya dhini omalongo gaGwokombandambanda.
12 Oya longithwa iilonga iidhigu tayi ya thindile pevi, nokakwa li ku na omukwathi.
13 Ihe muudhigu wawo oyi ithana Omuwa; oye nokwe ya hupitha mo methiminiko.
14 Okwe ya kutha mo moluhodhi nomomilema nokwa teya po omalyenge ge ya manga.
15 Naa pandulile Omuwa esilohenda lye, omolwiikumitha e yi ya ningile.
16 Okwa mwakula omiyelo dhoshikushu nokwa teya po iitenda yokupatitha.
17 Yamwe oya li aagoya noya geelwa omolwoondjo dhawo nomoluukolokoshi wawo.
18 Oya tondo iikulya noya li popepi nokusa.
19 Muudhigu wawo oyi ithana Omuwa, nokwe ya hupitha mo moshiponga.
20 Okwe ya aludha nohapu ye nokwe ya hupitha meso.
21 Naa pandulile Omuwa esilohenda lye, omolwiikumitha e yi ya ningile.
22 Naye mu pandule nomayambo nomahambelelondjimbo, naa hokolole iilonga ye.
23 Yamwe oya li aayendifuta moosikepa noya halitha iipindi yawo momafuta omanene.
24 Oya mono iilonga yOmuwa niikumitha ye momafuta.
25 Omuwa okwa popi, noombepo oonene odha pepe, nodha tukulutha omakuthikuthi.
26 Oosikepa odhu umbilwa mombanda, nodha gwile muule mwi. Aayendimo oya li moshiponga oshinene.
27 Oya nukauka nokupundauka ya fa oonkolwi; uunkulungu wawo inau ya kwatha sha.
28 Muudhigu wawo oyi ithana Omuwa, nokwe ya hupitha mo moshiponga.
29 Okwa loteke ombepo yoshikungulu nokwa mweneke omakuthikuthi.
30 Oya nyanyudhwa kemweno lyoshikungulu, Omuwa sho e ya thikitha kehelulilo ho ya li yu uka.
31 Naa pandulile Omuwa esilohenda lye, omolwiikumitha e yi ya ningile.
32 Naye mu simaneke megongalo lyaantu ye, naye mu tange moshigongi shaawiliki,
33 Omuwa okwa kukutike thilu omilonga nokwa pwinike oothithiya.
34 Etathapya okwe li ningi evi lyoshimongwa, omolwiilonga iiwinayi yaakalimo.
35 Ombuga okwe yi ningi oondombe dhomeya; evi lya kangala okwe li shitukitha oothithiya.
36 Aasindjala okwe ya pe egumbo noya tungu oshilando ya kale mo.
37 Oya kunu omapya noya tsike omiviinu, noya mono eteyo enene
38 Okwa yambeke aantu ye, e taa kala ye na oluvalo olwindji, niimuna yawo okwe yi indjipaleke.
39 Aantu ye oya sindika noya fupipikwa komathiminiko omadhigu.
40 Ihe Omuwa ota shundula aapangeli note ya tula mombuga yaa na ondjila.
41 Onkee oohepele okwe dhi hili mo methiminiko nokwi indjipalitha omazimo gaIsrael ga fa iigunda yoonzi.
42 Aayuuki naa tale e taa nyanyukwa, ihe aakolokoshi naa mweneke omakana gawo.
43 Mboka ye na oondunge, naa dhiladhile nawa iinima mbika, inaa dhimbwa esilohenda enene lyOmuwa.
1 Kalunga, ondi na einekelo lya kola, otandi imbi e tandi ku simaneke. Mwenyo gwandje, penduka!
2 Okaharpa nokashandja kandje, imba! Onda hala okupendutha etango.
3 Omuwa, otandi ku pandula mokati kiigwana. Otandi ku simanake mokati kaakuuyuni.
4 Ohole yoye yaa na ndjele, oya tsa kegulu; uudhiginini woye otau thiki keyalelo.
5 Kalunga, holola uunene woye kegulu nesimano lyoye kombanda yevi alihe.
6 Tu hupitha noonkondo dhoye; zimina eindilo lyandje, aaholike yoye opo ya hupithwe.
7 Kalunga okwa popi e li muuyapuki we: “Mesindano otandi tende Shekem, nolusilu lwaSukkot otandi lu topolele aantu yandje.
8 Gilead oshandje, naManasse osho tuu; Efraim oye egala lyandje lyosheela, naJuda oye ondhimbo yandje yuukwaniilwa.
9 Ihe otandi ka ninga Moab oshiyaha shandje shokwiiyogela notandi ka umbila Edom oongaku dhandje, kokutya: Ongame mwene gwasho. Otandi ka nyanyukwa, sho nda sindi Aafilisti.”
10 Kalunga, olye ta fala ndje moshilando sha kola? Olye ta thindikile ndje kuEdom?
11 Owe tu ekelehi nani? To ka enda tuu pamwe nomatembakwiita getu?
12 Tu kwatha mokukondjitha aatondi yetu. Ekwatho lyomuntu kali na oshilonga.
13 Pamwe naKalunga otatu ka sindana; Kalunga ota ka sinda aatondi yetu.
1 Kalunga, otandi ku hambelele; ino mwena we!
2 Aakaanakalunga naafundja oya ponokele ndje. Otaa lundile ndje
3 notaa popi ndje nayi e taa kondeke ndje pwaa na etompelo.
4 Otaa tondo ndje, nando ngame ondi ya hole nohandi ya galikanene.
5 Ohaa shunithile ndje uuwinayi peha lyuuwanawa nuutondwe peha lyohole.
6 Otaa ti: “Na kongelwe omupanguli omukolokoshi; etha gumwe gwomaatondi ye e mu tamaneke.”
7 Ihe omukolokoshi ngoka na pangulwe e ta monika ondjo; omagalikano ge naga talike eyono.
8 Omasiku ge naga hule po; omuntu gulwe na kuthe po iilonga ye.
9 Oyana naa ninge oothigwa; nomukiintu gwe omuselekadhi!
10 Oyana naa ninge omapongo gokuhehela owala; naa tidhwe mo momagumbo gawo!
11 Aanangunga ye naa ye neliko lye alihe, naayeni naa kuthe po iinima ye ayihe.
12 Inaku kala nando ogumwe e na ohenda naye nenge a kwathe oothigwa ndho a thiga po.
13 Oluvalo lwe aluhe nalu hule po, nedhina lye nali dhimbiwe kepipi tali landula.
14 Omuwa ita dhimbwa uukeenakalunga woohekulu, ye ita dhimi po oondjo dhayina.
15 Omuwa ota dhimbulukwa oondjo dhoohekulu, ihe aayoni yo yene ote ya dhimbwa thilu.
16 Omuntu a tya ngawo iha dhiladhila okukala omunahenda; oha tidhagana ohepele, epongo nomunaluhodhi.
17 Sho e hole okuthinga, naye na thingwe wo! Sho kee holele yakwawo uuwanawa, naye ina halelwa uuwanawa!
18 Na zale ethingo ngaashi onguwo, nali mu tondoke ngaashi omeya nongaashi omagadhi momasipa.
19 Nali mu kuwike ngaashi eguwo, ye ne li zale aluhe ngaashi epaya mombunda.
20 Omuwa, aatamaneki yandje ya geela pamukalo nguka, oomboka haa popile ndje muuwinayi.
21 Omuwa Kalunga kandje, kwatha ndje pauvaneko lyoye; hupitha ndje omoluuwanawa wesilohenda lyoye.
22 Ngame ohepele nepongo; onde ehama unene muule womutima gwandje.
23 Otandi kana po mbala ngaashi omuzile gwokomatango otandi pepwa po ngaashi oombahu.
24 Oongolo dhandje odha nongwa, sho ndaa na iikulya; onda nanga omasipa gowala.
25 Aantu sho taa mono ndje, otaa yolo ndje, omolwokudhina ndje, otaa ipukapuka komitse.
26 Omuwa Kalunga kandje, kwatha ndje; hupitha ndje omolwesilohenda lyoye.
27 Ulukila aatondi yandje kutya ongoye omuhupithi gwandje.
28 Otaa thingi ndje, ihe ngoye oto yambeke ndje. Aatidhagani yandje otaa ka sithwa ohoni, ihe ngame, omupiya gwoye, otandi ka nyanyukwa.
29 Aatondi yandje naa gugwe; naa zale ohoni ngaashi eguwo.
30 Otandi pandula Omuwa notandi mu hambelele; otandi mu simaneke mokati kegongalo,
31 oshoka ota popile ohepele note mu hupitha miikaha yaamboka ye mu pangulile eso.
1 Omuwa okwa lombwele omuwa gwandje, omukwaniilwa: “Kuutumba mpaka kolulyo lwandje, sigo tandi tula aatondi yoye kohi yoompadhi dhoye.”
2 Omuwa ote ku ningi omukwaniilwa omunankondo muSion, u pangele mokati kaatondi yoye.
3 Mesiku to homona aatondi yoye, aalelwa yoye otaye ku kwatha molugodhi. Ngaashi omume gwongula onene, osho aamati yoye taa ka adhima notaye ya kungoye kondundu ondjapuki.
4 Omuwa okwa gana egano lya kola ye ite li lundulula; “Ngoye oto ka ninga omuyambi gwaaluhe palandulathano lyopaMelkisedek.”
5 Omuwa oku li kolulyo lwoye; uuna ta ka geya, ota ka sinda aakwaniilwa.
6 Ota ka geela iigwana, nomidhimba otadhi ka lala apehe; ota ka sinda aakwaniilwa kombanda yevi alihe.
7 Omukwaniilwa ota ka nwa mokalonga popepi nondjila, noti ikoleke e ta ningi omusindani.
1 Halleluja! Hambeleleni Omuwa! Onda hala okupandula Omuwa nomwenyo aguhe, omegongalo lyaantu ye.
2 Iilonga yOmuwa iikumithi ngiini! Ayehe mboka ye yi hokwa, ohaa kala noku yi dhiladhila.
3 Ashihe shoka te shi longo, oshi na esimano nomutumbo; uuyuuki we otau kala aluhe.
4 Iilongankondo yOmuwa itayi dhimbiwa; oye omunamutimahenda nomunalukeno.
5 Mboka haye mu simaneke, ote ya pe iipalutha; ita dhimbwa ehangano lye sigo aluhe.
6 Aantu ye ote ya ulukile iilonga ye iikumithi, sho te ya pe iilongo yiigwana yilwe.
7 Iilonga ye ayihe oyoshili noyu uka, niipango ye oyi shi kwiinekelwa.
8 Oya kola sigo aluhe; oyi lile po oshili nuuyuuki.
9 Okwa hupitha aantu ye nokwa hangana nayo sigo aluhe. Oye omuyapuki nomunankondo!
10 Okutila Omuwa okwo ekota lyuunongo; Omuwa ota nongeke ayehe mboka haa vulika kuye. Na simanekwe aluhe sigo aluhe!
1 Halleluja! Hambeleleni Omuwa! Omunelago oye ngoka ha simaneke Omuwa, oongoka e hole okuvulika kiipango ye.
2 Oluvalo lwe otalu kala olunankondo moshilongo; oyana otaa yambekwa.
3 Megumbo lye otamu udha uuyamba nomaliko. Nakehe shoka te shi longo, oshu uka notashi kalelele.
4 Aayuuki momilema otaa ka mona uuyelele osho wo mboka ye na ohenda, olukeno noshili.
5 Omunelago oongoka kee shi omundalapata mokugandja, noha longo ayihe pauyuuki.
6 Omuyuuki iha tenguka; ota dhimbulukiwa aluhe.
7 Iha tila ngele u uvu onkundana ombwinayi; oku na eitaalo lya kola nohi inekele Omuwa.
8 Iha kala niimpwiyu ye iha tila, sigo a mono eshunduko lyaatondi ye.
9 Oha kwatha oohepele, nakehe shoka te shi longo, oshu uka notashi kalelele; esimano lye otali indjipala.
10 Aakaanakalunga otaye shi mono e taa kanitha ombili; otaa holola uutondwe wawo e taa kana po. Omahalo gawo itaga tompola sha.
1 Halleluja! Hambeleleni Omuwa! Ne aapiya yOmuwa! simanekeni edhina lye!
2 Edhina lyOmuwa nali simanekwe okuza nena sigo aluhe.
3 Okuza kuuzilo sigo okuuninginino edhina lyOmuwa nali simanekwe!
4 Omuwa ota pangele iigwana ayihe; esimano lye olya lundu egulu.
5 Kaku na nando ogumwe ta yelekwa nOmuwa Kalunga ketu. Oye ngoka a kala kombandambanda,
6 ihe oha nyongama, a tale egulu nokombanda yevi.
7 Ota kutha mo ohepele montsi yevi nota yambula mo omuthigona moluhepo.
8 Ote mu kuutumbike paanenentu, opaakwaniilwa yoshilongo shaandjawo.
9 Omukiintu ihaa vala ote mu simanekele megumbo lye; ote mu nyanyudha noku mu pa oluvalo. Halleluja!
1 Aaisraeli sho ya zi muEgipiti, oluvalo lwaJakob sho lwa thigi po oshilongo shaa shi shaandjawo,
2 Juda osha ningi ehala eyapuki lyOmuwa Israel osha ningi oshipangelwa she.
3 Efuta olye shi mono e tali yi ontuku; omulonga Jordan ogwa kankama.
4 Oondundu odha nuka dha fa oomenye, niikulundundu ongoonzigona.
5 Futa, oshike she ku fadhukitha po? Nangoye Jordan, owa mwena koshike?
6 Ne oondundu, omolwashike mwa nuka mwa fa oomenye, nane iikulundundu mwa fa oonzigona?
7 Kakama, ngoye evi, koshipala shOmuwa, okokukalapo kwaKalunga kaIsrael.
8 Oye ngoka ta lundulula oondundu, te dhi ningi omadhiya nomamanya te ga shitukitha oothithiya.
1 Omuwa, esimano inali ninga lyetu, aawe, kali shi lyetu. Nali ninge lyedhina lyoye, omolwesilohenda nuudhiginini woye.
2 Omolwashike iigwana yi na oku tu pula tayi ti: “Kalunga keni oku li peni?”
3 Kalunga ketu oku li megulu; ota longo shoka she mu opalela.
4 Ihe iikalunga yayo oyo oshisiliveli noshingoli noya hambulwa niikaha yaantu.
5 Oyi na omakana, ihe itayi vulu okupopya; oyi na omeho, ihe itayi vulu okumona ko.
6 Oyi na omakutsi, ihe itayi vulu okuuva ko; oyi na omayulu, ihe itayi vulu okunika sha.
7 Oyi na iikaha, ihe itayi vulu okukwata sha; oyi na oompadhi, ihe itayi vulu okweenda; momakana gayo ihamu zi ewi lyasha.
8 Mboka haye yi hambula, otaa ka faathana nayo, nosho wo mboka haye yi inekele.
9 Ne Aaisraeli, inekeleni Omuwa. Oye ote mu kwatha note mu gamene.
10 Ne yomezimo lyaAaron, inekeleni Omuwa. Oye ote mu kwatha note mu gamene.
11 Ne mboka hamu mu tila, inekeleni Omuwa. Oye ote mu kwatha note mu gamene.
12 Omuwa okwe tu dhimbulukwa note ke tu yambeka; ota ka yambeka Aaisraeli nezimo lyaAaron.
13 Ota yambeke mboka haye mu simaneke, aadhinwa nenge aanenentu.
14 Omuwa ne mu indjipalithe, one pamwe noluvalo lweni.
15 Lalekweni nuuyamba kOmuwa, omushiti gwegulu nogwevi!
16 Egulu lyokombandambanda olyo ehala lyOmuwa mwene, ihe evi okwe li pe aana yaantu.
17 Aasi itaa vulu okuhambelela Omuwa, naamboka taa kulukile mehala lyeimweneneno.
18 Ihe tse aanamwenyo otatu hambelele Omuwa, nena nosigo aluhe. Halleluja!
1 Ondi hole Omuwa, oshoka ohu uvu eigidho negalikano lyandje.
2 Okwa uvu ndje, onkee otandi mu ithana aluhe, manga ndi na omwenyo.
3 Iiponga yeso oya kondeke ndje, nuumbanda wokuusi owa kwata ndje. Onda gwilililwa po kuudhigu nokoluhodhi.
4 Ihe ondi ithana Omuwa nda ti: “Omuwa, hupitha ndje!”
5 Omuwa oye omunamutimahenda nomuyuuki; Kalunga ketu oye omunalukeno.
6 Omuwa ota popile omapongo; sho nda li muudhigu, okwa hupitha ndje.
7 Omwenyo gwandje, fudha ihe, oshoka Omuwa okwe ku ningile uuwanawa.
8 Omuwa okwa hupitha ndje meso, okwa keelele ndje moluhodhi nokwa gamene ndje, ndaa punduke.
9 Otandi vulu ihe okweenda koshipala shOmuwa moshilongo shaanamwenyo.
10 Ngame ondi itaala, nando ote popi e te ti: “Onda monithwa iihuna.”
11 Muumbanda wandje onda ti: “Aantu ayehe oyo aafundja.”
12 Omuwa otandi mu futu shike moluuwanawa we auhe e u ningile ndje?
13 Omuwa otandi mu yambele oshitenga shomaviinu omolwehupitho notandi ithana edhina lye.
14 Omauvaneko gandje otandi ga gwanithile Omuwa montaneho yaantu ye ayehe.
15 Kashi shi oshipu momeho gOmuwa okutala omuntu gwe ta si, ndele opuwo.
16 Eeno, Omuwa, ngame omuntu gwoye; ohandi ku longele, ngaashi meme a li. Ongoye wa hupitha ndje meso.
17 Otandi ku yambele ehambelelo e tandi ku galikana.
18 Omauvaneko gandje otandi ga gwanithile Omuwa montaneho yaantu ye ayehe,
19 omiinyanga yotempeli yOmuwa muJerusalem. Halleluja!
1 Hambeleleni Omuwa, iigwana ayihe; mu simanekeni, ne aakuuyuni amuhe.
2 Oshoka esilohenda lye kutse enenenene, nuudhiginini we otau kala aluhe sigo aluhe. Halleluja!
1 Hambeleleni Omuwa, oshoka oye omwaanawa, nesilohenda lye otali kala sigo aluhe.
2 Aaisraeli naa tye: “Esilohenda lye otali kala sigo aluhe.”
3 Ezimo lyaAaron nali tye: “Esilohenda lye otali kala sigo aluhe.”
4 Mboka haa galikana Omuwa naa tye: “Esilohenda lye otali kala sigo aluhe.”
5 Muudhigu wandje ondi ithana Omuwa, Omuwa noku uvu ndje e ta hupitha ndje.
6 Omuwa oku li pamwe nangame, onkee itandi tila sha; aantu otaa ningi ndje shike?
7 Omuwa oku li pamwe nangame, oye omukwathi gwandje; ota ka sindila ndje aatondi yandje.
8 Okwiinekela Omuwa oku vule okwiitula maantu.
9 Okwiinekela Omuwa oku vule okwiitula maapangeli.
10 Aatondi yandje ayehe oya kunduka ndje, ihe medhina lyOmuwa otandi ya halakanitha po.
11 Nando naa kundukidhe ndje koombinga adhihe, medhina lyOmuwa otandi ya halakanitha po.
12 Oyu uminine ndje ya fa oonyushi, ihe otaa pi po mbala ngaashi omano. Medhina lyOmuwa otandi ya halakanitha po.
13 Ondu undulwa lwanima, konyala ndi gwile po, ihe Omuwa okwa kwatha ndje.
14 Omuwa okwa ningi ndje omunankondo, notandi mu hambelele; oye omuhupithi gwandje.
15 Onkugilili yenyanyu noyesindano otayi uvika momatsali gaayuuki: Olulyo lwOmuwa olwa longo iilongankondo.
16 Iilongankondo ye oye tu etele esindano.
17 Ngame itandi si; otandi kala ndi na omwenyo notandi hokolola iilonga yOmuwa.
18 Omuwa okwa geele ndje noonkondo, ihe ina etha ndje, ndi se.
19 Egululilii ndje iiyelo yotempeli, ndi ye mo, ndi hambelele Omuwa!
20 Omweelo gwOmuwa ogwo nguka; omo moka aayuuki taa pitile.
21 Ngame otandi ku hambelele, Omuwa, sho wu uvu ndje nowa ningi omuhupithi gwandje.
22 Emanya ndyoka aatungi ye li ekelehi, olya ningi emanya li na esimano li vule agehe.
23 Osha, ningwa kOmuwa, nosha ningi oshikumitha momeho getu.
24 Esiku olyo tuu ndika Omuwa e li utha: tu imbeni pombanda tse tu li nyanyukilweni!
25 Omuwa, tu hupitha; Omuwa, tu pa elago!
26 Kalunga na laleke nuuyamba ngoka te ya medhina lyOmuwa Otatu mu laleke nuuyamba mongulu yOmuwa.
27 Omuwa oye Kalunga; okwe tu minikile nuuyelele we. Tu dhaneni oshituthi tu na iiyale yomilunga, tu uka lwokoshiyambelo.
28 Ongoye Kalunga kandje, nonda hala oku ku hambelela. Ongoye Kalunga kandje, onda hala oku ku simaneka.
29 Hambeleleni Omuwa, oshoka oye omwaanawa, nesilohenda lye, otali kala sigo aluhe.
1 Aanelago oomboka yaa na oshipo mokukala kwawo, oomboka haa vulika kompango yOmuwa.
2 Aanelago oomboka haa dhiginine iipango ye, nohaye mu kongo noomwenyo adhihe.
3 Ihaa puka nando; ohaa landula omautho ge.
4 Omuwa, owe tu pe iipango yoye nowe tu lombwele, tu vulike kuyo.
5 Ando nandi kale inaandi puka mokweenda kwandje, nandi vulike kiipango yoye!
6 Ngele ohandi dhiginine iipango yoye, itandi ka sithwa ohoni.
7 Otandi ilongo iipango yoye iiyuuki notandi ku hambelele nomwenyo gu uka.
8 Onda hala okuvulika kiipango yoye; ino etha ndje.
9 Omugundjuka oto opaleke ngiini okukala kwe, a kale a yela? Ongele ta vulika koohapu dhoye.
10 Otandi ku kongo nomwenyo gwandje aguhe; ino etha ndi paguke mo miipango yoye.
11 Oohapu dhoye otandi dhi pungula momutima gwandje, opo ndaa yone kungoye.
12 Omuwa, otandi ku hambelele; longa ndje omautho goye.
13 Otandi tumbula mokule iipango yoye ayihe.
14 Otandi nyanyukilwa okulandula iipango yoye shi vule okukala nuuyamba owindji.
15 Onda hala okwiilonga omautho goye nokundhindhilika oondjila dhoye.
16 Otandi nyanyukilwa iipango yoye; oohapu dhoye itandi dhi dhini.
17 Kaleka ndje nawa, omuntu gwoye, opo ndi kale ndi na omwenyo e tandi vulika komalongo goye.
18 Tonatitha omeho gandje, opo ndi vule okumona iikumitha yomompango yoye.
19 Ngame omukwiilongo kombanda yevi; ino holeka ndje iipango yoye
20 Omwenyo gwandje ogu na ondjuulukwe onene; onda hala okutseya omapangulo goye.
21 Oto ganda aainenepeki, aatangalali oto ya tula omutima.
22 Pegula ndje esheko nokudhinwa, oshoka ohandi dhiginine iipango yoye.
23 Aapangeli otaa gongala e taa ende ndje mevi, ihe ngame omuntu gwoye otandi dhiladhila iipango yoye.
24 Omalongo goye ogo enyangu lyandje, ogo aapukululi yandje.
25 Ondu umbilwa montsi yevi; tula ndje omwenyo pahapu dhoye.
26 Onda hempulula iilonga yandje, ongoye nowa yamukula ndje; longa ndje omautho goye.
27 Kwatha ndje, ndi uve ko iipango yoye, nena otandi ka dhiladhila iikumithalonga yoye.
28 Onda pwa po koluhodhi; tsa ndje omukumo pamauvaneko goye.
29 Keelela ndje mondjila ya puka, longa ndje iipango yoye moluuwanawa woye.
30 Onda hogolola okukala moshili nokwiitula miipango yoye.
31 Onda dhama omalongo goye, Omuwa, ino etha ndje, ndi sithwe ohoni.
32 Onda hokwa okuvulika kiipango yoye, oshoka omuyo to pe ndje euvoko lya gwana.
33 Omuwa, longa ndje okutseya ehalo lyoye; onda hala okuvulika kulyo sigo aluhe.
34 Fatulululila ndje ompango yoye, ongame notandi yi dhiginine e tandi vulika kuyo nomwenyo aguhe.
35 Iipango yoye nayi wilike ndje; oshoka onde yi hokwa.
36 Hokitha ndje okuvulika komalongo goye, ndaa game kuuhalu weliko.
37 Keelela ndje, ndaa hokwe iinima yaa na oshilonga; pe ndje omwenyo pamauvaneko goye.
38 Gwanithila omupiya gwoye omauvaneko goye, opo u kale wa simanekwa.
39 Kandula po esheko nde li tila, oshoka iipango yoye iiwanawa.
40 Onda hala okuvulika kiipango yoye; pe ndje omwenyo, oshoka ongoye omuyuuki.
41 Omuwa, ulukila ndje ohole yoye mpoka yi thike; hupitha ndje pamauvaneko goye.
42 Otandi yamukula ihe mboka taa sheke ndje, oshoka ondi inekela oohapu dhoye.
43 Kwatha ndje, ndi popye aluhe oshili, oshoka ondi inekela omapangulo goye.
44 Otandi inekele aluhe iipango yoye; eeno, aluhe sigo aluhe.
45 Otandi ke enda memanguluko, oshoka otandi ka vulika koohapu dhoye.
46 Iipango yoye otandi ke yi lombwela aakwaniilwa noitandi ka sithwa nando ohoni.
47 Onda hokwa iipango yoye nondi yi hole.
48 Iipango yoye ondi yi hole nohandi yi simaneke, ohandi dhiladhila omautho goye.
49 Dhimbulukwa oohapu dhoye ndho wa lombwele omuntu gwoye, oshoka odha pe ndje etegameno.
50 Etalaleko muuwehame wandje olyo omauvaneko goye taga pe ndje omwenyo.
51 Aayinenepeki otaa sheke ndje aluhe, ihe ngame itandi gamuka ko kiipango yoye.
52 Omuwa, onda dhimbulukwa omapangulo goye gonale nonda mono ehekeleko.
53 Sho nda mono aakolokoshi taa yono iipango yoye, onda kwatwa kondjahi.
54 Iipango yoye oya ningi oshikalimo shondjimbo yandje mokukala kwandje kuundjendi.
55 Omuwa, uusiku ohandi dhiladhila edhina lyoye nohandi dhiladhila iipango yoye.
56 Mokudhiginina iipango yoye onda adha mo enyanyu lyandje.
57 Omuwa, ongoye eliko lyandje. Otandi uvaneke okuvulika koohapu dhoye.
58 Otandi ku kongo nomwenyo gwandje aguhe; sila ndje ohenda pamauvaneko goye.
59 Onda tala omikalo dhandje notandi ukitha oonkatu dhandje komautho goye.
60 Otandi uluma mbala okuvulika kiipango yoye.
61 Aakaanakalunga nando oya tule ndje moonkandja, itandi ka dhimbwa iipango yoye.
62 Otandi penduka uusiku, ndi ku hambelelele omapangulo goye gu uka.
63 Ngame onda ningi kuume kaamboka haye ku simaneke, nokaayehe mboka haa vulika kiipango yoye.
64 Omuwa, evi olyu udha esilohenda lyoye; longa ndje iipango yoye.
65 Kaleka ndje nawa, omuntu gwoye, pamauvaneko goye.
66 Pe ndje oondunge nomatseho, oshoka ondi itaala iipango yoye.
67 Manga inaandi geelwa, ondi li nda puka, ihe ngashingeyi otandi vulika kiipango yoye.
68 Ngoye omunesilohenda noho longo uuwanawa; longa ndje iipango yoye.
69 Aayinenepeki nando taa fundjaleke ndje, iipango yoye otandi yi dhiginine nomwenyo aguhe
70 Oyo aayikukutiki, ye na omaiyuvo ga sa, ihe ngame onda hokwa iipango yoye.
71 Okugeelwa okwa li kwo opalela ndje, oshoka okwi ilongitha ndje iipango yoye.
72 Ompango ndjoka we yi gandja, oyi na ondilo kungame yi vule iimaliwa oyindji.
73 Owa shiti ndje niikaha yoye; pe ndje omayele, opo ndi ilonge iipango yoye.
74 Mboka haye ku simaneke, naa nyanyukwe, sho taa tala ndje, oshoka ondi inekela oohapu dhoye.
75 Omuwa, ondi shi shi kutya omapangulo goye ogu uka, nowa geele ndje, oshoka ou shi kwiinekelwa.
76 Esilohenda lyoye nali hekeleke ndje, ngaashi wu uvanekele ndje, omuntu gwoye.
77 Esilohenda lyoye nali siikile ndje, opo ndi kale ndi na omwenyo, oshoka onda hokwa ompango yoye.
78 Aayinenepeki naa sithwe ohoni, oshoka otaa hepeke ndje pwaa na etompelo lyasha.
79 Mboka haye ku simaneke, naye ye kungame, oomboka ya tseya iipango yoye.
80 Nandi vulike kiipango yoye, opo ndaa sithwe ohoni.
81 Omuwa, onda loloka nonda tegelela, u hupithe ndje; ondi inekela oohapu dhoye.
82 Omeho gandje oga vulwa, notandi yuulukwa egwanitho lyomauvaneko goye. Uunake to hekeleke ndje?
83 Onda fa ompunda yomaviinu yi li molwithi, ihe ite dhimbwa iipango yoye.
84 Sigo uunake ndi na okutegelela? Uunake to ka pangula aatidhagani yandje?
85 Aayinenepeki otaa fulile ndje omakelo, naashika osha tsa ondumbo nompango yoye.
86 Iipango yoye ayihe oyi shi kwiinekelwa; kwatha ndje, oshoka aantu otaa tidhagana ndje owala.
87 Konyala ya dhipage ndje, ihe ngame itandi etha iipango yoye.
88 Hupitha ndje molwesilohenda lyoye, ngame notandi vulika kiipango yoye.
89 Omuwa, oohapu dhoye odhaaluhe; otadhi kala dha kola sigo aluhe.
90 Uudhiginini woye otau kala sigo okoluvalo noluvalo; owa eta po evi nolya thikama.
91 Pahapu dhoye iinima ayihe otayi kala po, oshoka otayi vulika kungoye,
92 Ando onda li inaandi hokwa ompango yoye, ando nda si po nale komahepeko.
93 Omalongo goye itandi ga dhimbwa, oshoka omugo nda mono omwenyo.
94 Hupitha ndje, oshoka ngame omuntu gwoye. Nonda hala okuvulika kiipango yoye.
95 Aayinenepeki otaa tegele ndje omwigo, ya yone ndje po, ihe ngame otandi ilongo iipango yoye.
96 Onda mono kutya kehe oshinima oshi na ehulilo lyasho, ihe iipango yoye otayi kala sigo aluhe.
97 Ompango yoye ondi yi hole ngiini! Ohandi yi dhiladhila esiku alihe.
98 Iipango yoye otayi ndungike ndje ndi vule aatondi yandje, oshoka ondi yi na aluhe.
99 Ondi na euvoko ndi vule aanongeki yandje ayehe, oshoka ohandi dhiladhila omalongo goye.
100 Ondi na omayele ndi vule aakuluntu kungame, oshoka ohandi vulika komautho goye.
101 Ondi ikeelele okulonga uuwinayi, opo ndi vulike koohapu dhoye.
102 Inandi dhina omalongo goye, oshoka ongoye mwene we ga longo ndje.
103 Oohapu dhoye oontoye ngiini kelaka lyandje! Odho oontoyelela dhi vule omagadhi goonyushi.
104 Otandi likola oondunge miipango yoye, onkee otandi tondo uugoyoki.
105 Oohapu dhoye odho onyeka mokweenda kwandje, nuuyelele mondjila yandje.
106 Otandi dhiginine euvaneko lyandje, otandi vulika kiipango yoye iiyuuki.
107 Omuwa, onda hepekwa nayi; tula ndje omwenyo, ngaashi wu uvaneke.
108 Omuwa, taamba egalikano nepandulo lyandje, ngoye u longe ndje ompango yoye.
109 Otandi teneneke aluhe omwenyo gwandje, ihe itandi dhimbwa iipango yoye.
110 Aakaanakalunga otaa tegele ndje omwigo, ihe ngame itandi gamuka ko komalongo goye.
111 Iipango yoye oyo uuthiga wandje sigo aluhe, oyo enyanyu momutima gwandje.
112 Onda hala okuvulika kiipango yoye sigo aluhe.
113 Oonakulya oompanda mbali ohandi ya tondo, ihe ondi hole ompango yoye.
114 Ongoye eshigo negameno lyandje; otandi inekele oohapu dhoye.
115 Aakolokoshi ne, zii po pungame, opo ndi dhiginine iipango yaKalunga kandje!
116 Kwatha ndje pamauvaneko goye, notandi ka kala ndi na omwenyo. Ino etha ndi sithwe ohoni, sho nde ku inekela.
117 Yambula ndje po, e tandi hupu; otandi ka dhiladhila aluhe iipango yoye.
118 Oto ekelehi ayehe mboka haa yono iipango yoye, oshoka iifundja yawo itayi ya kwatha sha.
119 Aakaanakalunga ayehe yokombanda yevi, oto ya ekelehi ngaashi omange giiyela, onkee ngame ondi hole iipango yoye.
120 Olutu lwandje aluhe otalu kakama; onde ku tila omolwomapangulo goye.
121 Onda longo shoka shu uka nosho opala; ino gandja ndje miikaha yaahepeki yandje.
122 Popila omupiya gwoye, a kale nawa; ino etha aadhudhu ya hepeke ndje.
123 Omeho gandje otaga yuulukwa ekwatho lyoye, otandi tegamene omauvaneko goye ge shi kwiinekelwa.
124 Ningila omuntu gwoye pasilohenda; longa ndje iipango yoye.
125 Ngame omupiya gwoye, pe ndje omatseho, opo ndi uve ko nawa omalongo goye.
126 Omuwa, ethimbo lya thiki, u shi ninge, oshoka ompango yoye otayi yonwa.
127 Ngame ondi hole iipango yoye shi vule oshingoli, eeno, oshi vule oshingoli sha hogololwa.
128 Onkee otandi kala momautho goye agehe gu uka notandi tondo uugoyoki.
129 Omalongo goye ogo omakumithi, onkee otandi vulika kugo.
130 Efatukuluko lyoohapu dhoye otali gandja uuyelele; otali longo ngoka kee na oondunge.
131 Otandi ekama e tandi hetha, oshoka onda yuulukwa iipango yoye.
132 Tala ndje, u sile ndje ohenda, ngaashi ho shi ningile mboka ye ku hole.
133 Gamena ndje pamauvaneko goye; ino etha uulunde u pangele ndje.
134 Hupitha ndje miikaha yaathiminiki yandje, opo ndi vule okuvulika komalongo goye.
135 Minikila ndje nuuyelele woye. Nowu longe ndje iipango yoye.
136 Omilonga dhomahodhi otadhi tondoka momeho gandje, oshoka aantu itaa dhiginine iipango yoye.
137 Omuwa, ngoye omuyuuki, niipango yoye oyu uka.
138 Omautho goye ogo omayuuki; oga kola ga kolelela.
139 Onda geya unene, oshoka aatondi yandje oya dhina oohapu dhoye.
140 Omauvaneko goye ogo omawanawa, nomupiya gwoye oku ga hole.
141 Nando ngame onda dhinika, itandi dhimbwa nando omalongo goye.
142 Uuyuuki woye owaaluhe, nompango yoye oyoshili.
143 Uudhigu nuumbanda owa adha ndje, ihe iipango yoye otayi nyanyudha ndje.
144 Omalongo goye ogo omayuuki sigo aluhe; longa ndje oondunge, ndi kale ndi na omwenyo.
145 Omuwa, otandi ku galikana nomwenyo aguhe; uva ndje, notandi ka vulika kiipango yoye.
146 Otandi ku galikana, hupitha ndje; otandi dhiginine omalongo goye.
147 Ohandi meneka tandi galikana notandi ku kugile ekwatho; ondi inekela omauvaneko goye.
148 Uusiku auhe otandi lala nda tonata notandi dhiladhila oohapu dhoye.
149 Omuwa, uva egalikano lyandje pasilohenda lyoye; kaleka ndje nomwenyo pamautho goye.
150 Aatidhagani yandje aadhudhu oye li popepi, ihaa dhiginine iipango yoye.
151 Ihe ngoye, Omuwa, ou li popepi nangame, niipango yoye ayihe oyoshili.
152 Nonale onda tseya kutya omalongo goye owe ga tula po, ga kale po sigo aluhe.
153 Tala uudhigu wandje, u hupithe ndje, oshoka inandi dhimbwa iipango yoye.
154 Gamena ndje e to popile ndje; hupitha ndje, ngaashi wu uvaneke.
155 Ehupitho oli li kokule naakaanakalunga, oshoka ihaa vulika kiipango yoye.
156 Omuwa, olukeno lwoye olwo olunene; sila ndje ohenda e to hupitha ndje.
157 Ondi na aatondi naatidhagani oyendji, ihe itandi etha okuvulika kiipango yoye.
158 Aagwaaleki mbono otandi ya nyanyala, oshoka ihaa vulika koohapu dhoye.
159 Omuwa, tala nkene ndi hole omalongo goye; hupitha ndje pasilohenda lyoye.
160 Oohapu dhoye adhihe odhoshili; omapangulo goye agehe ogu uka nogaaluhe.
161 Aanankondo otaa tidhagana ndje pwaa na etompelo lyasha, ihe ngame otandi simaneke iipango yoye.
162 Otandi nyanyukilwa omauvaneko goye ongaashi omumoni gweliko.
163 Ohandi tondo nohandi nyanyala iifundja, ihe ompango yoye onde yi hokwa.
164 Otandi ku hambelele luheyali mesiku omolwomapangulo goye omayuuki.
165 Mboka ye ku hole, oye na ombili, nokaku na shoka tashi ya pukitha.
166 Omuwa, onda tegelela u hupithe ndje; otandi vulika kiipango yoye.
167 Otandi vulika komalongo goye, oshoka onde ga hokwa unene.
168 Otandi vulika komautho nokiipango yoye, oshoka okukala kwandje akuhe ou ku shi.
169 Omuwa, onkugo yandje nayi thike koshipala shoye; pe ndje omayele pamauvaneko goye.
170 Uva omagalikano gandje; hupitha ndje pamauvaneko goye.
171 Otandi ku hambelele aluhe, oshoka oto longo ndje iipango yoye.
172 Otandi tanga omalongo goye, oshoka iipango yoye ayihe oyo iiyuuki.
173 Kala aluhe popepi nangame, u kwathe ndje, oshoka onda hala okuvulika kiipango yoye.
174 Omuwa, onda yuulukwa ekwatho lyoye; iipango yoye oyo enyanyu lyandje.
175 Kaleka ndje nomwenyo, opo ndi ku simaneke; iipango yoye nayi kwathe ndje.
176 Onda puka nda fa onzi ya kana; konga omupiya gwoye, oshoka iipango yoye inandi yi dhimbwa.
1 Sho ndi li muudhigu, otandi galikana Omuwa, oye notu uvu ndje.
2 Gamena ndje, ndaa kale mongundu yaakotokeli noyaafundja.
3 Aakotokeli ne, Kalunga ote mu ningi ngiini? Ote mu geele ngiini?
4 Ote mu tumine ondjumbeta yi na iikuti ya tsa nomakala ga hanya omulilo.
5 Osho iihuna okukala mokati keni, osha faathana nokukala muMeshek nenge okukala maantu yaKedar.
6 Onda kala olule mokati kaantu haa tondo ombili.
7 Uuna tandi popi ombili, oya hala iita.
1 Otandi ligameke omeho gandje pombanda; ekwatho otandi li mono peni?
2 Ekwatho lyandje otali zi kOmuwa, omushiti gwegulu nogwevi.
3 Oye ite ku etha, u gwile po; omugameni gwoye iha kotha.
4 Omusita gwaIsraeli iha kumuka noiha kotha,
5 Omuwa ote ku tonatele; oye eshigo negameno lyoye.
6 Etango itali ku tsu pethimbo lyomutenya nenge omwedhi uusiku.
7 Omuwa ote ku gamene kiiponga ayihe note ku kaleke nomwenyo.
8 Omuwa ota gamene okupita kwoye nokugaluka kwoye, ngashingeyi nosigo aluhe.
1 Onda nyanyukwa, sho nda lombwelwa: “Tu yeni kongulu yOmuwa.”
2 Otse mbaka tu li miiyelo yoye, Jerusalem!
3 Jerusalem, ngoye oshilando sha tungwa sha kolelela.
4 Omo moka aantu yOmuwa taa yi oku mu simaneka, opampango ya pewa Israel.
5 MuJerusalem omo hamu ningilwa oompangu komukwaniilwa gwomoluvalo lwaDavid.
6 Haleleni Jerusalem ombili. Mboka ye ku hole, naa kale ye na elago.
7 Ombili nayi kale meni lyomadhingililokuma goye, egameno nengungumano, omoombala dhoye.
8 Omolwaamwameme nookuume kandje otandi ti: “Ombili nayi kale nangoye.”
9 Omolwongulu yOmuwa, Kalunga ketu, otandi galikana, u mone elago.
1 Otandi ligamene omeho gandje kungoye, okungoye nguka u li megulu.
2 Tala, ngaashi omeho gaapiya taga tala kiipala yooyene yawo nogaadhike taga ligamene kaanyekadhi, osho wo omeho getu taga tala kOmuwa, Kalunga ketu, sigo e tu sile ohenda.
3 Omuwa, tu sila ohenda! Omuwa, tu sila ohenda! Oshoka otwa kala twa dhinika noonkondo.
4 Otwi idhidhimikile omasheko gaanuuntsa nondhino yaayinenepeki.
1 Aaisraeli naa tye: Omuwa ando ina kala pamwe natse, ando otu uka peni?
2 “Omuwa ando ina gama kutse, aatondi sho ye tu ponokele,
3 ando oye tu hutu po thilu, sho ya li ye tu sila ondjahi.
4 Omuwa ando ina kala pamwe natse, efundja ando lye tu kombo po, eyelu etilithi lye tu kungulula po,
5 nomeya ga lundalala ga yi natse.”
6 Tu hambeleleni Omuwa, sho inaa etha aatondi yetu ye tu hanagule po.
7 Otwa hunuka ngaashi ondhila tayi zi momwigo gwomuyuli; omwigo ogwa teka, otse notwa manguluka.
8 Ekwatho lyetu otali zi kOmuwa, omushiti gwegulu nogwevi.
1 Oonakwiinekela Omuwa oya fa ondundu Sion, ndjoka itaayi teka po, ihe otayi kala ya kolelela.
2 Ngaashi oondundu dha kundukidha Jerusalem, osho Omuwa ta gamene aantu ye aluhe sigo aluhe.
3 Aakaanakalunga itaa ka pangela aluhe evi lyaayuuki, aayuuki opo kaaya gwile mepuko.
4 Omuwa, ninga nawa mboka haa longo uuwanawa, oomboka ye na oomwenyo dhu uka.
5 Ihe mboka haa landula oondjila dha goyoka, Omuwa ne ya geele pamwe naakolokoshi. Ombili nayi kale muIsrael!
1 Omuwa sho a galulile kegumbo oonkwatwa dhaSion, otwa li twa fa oonakuyaguma.
2 Otwa yolo e tatu ligola pombanda. Ihe iigwana yilwe oye tu popi ya ti: “Omuwa okwe ya ningile iinima iinene.”
3 Eeno, Omuwa okwe tu ningile iinima iinene, otse notwe shi nyanyukilwa.
4 Omuwa, tu galulila kegumbo, tu hepuluke twa fa esilu ekukutu mombuga tali lokwa.
5 Oomboka taa kunu nokulila omahodhi, otaa ka teya nokunyanyukwa.
6 Otaa ende taa lili, sho taa humbata oombuto; otaa galuka ko nokuligola, sho taa humbata oondudhi.
1 Omuwa ngele ita tungu egumbo, aatungi yalyo otaa ihepeke owala. Omuwa ngele ita gamene oshilando, aalangeli yasho otaa ihepeke owala.
2 Itashi kwatha sha okumeneka noku ka konga iipalutha, e to ka lala wa vulwa. Oshoka aaholike ye Omuwa ote yi ya pe mokukotha kwawo.
3 Aanona oyo omagano ga za kOmuwa; oluvalo olwo eyambeko lyo lyene.
4 Aamwoyemati u ya na methimbo lyuugundjuka woye, Oya fa iikuti moshikaha shofule.
5 Omunelago omuntu ngoka e ya na ongiikuti yu udha ombalukutu ye. Oye ita sindika, ngele ta tsakaneke aatondi ye meelo lyoshilando.
1 Aanelago oomboka haa simaneke Omuwa nohaa vulika kiipango ye.
2 Oto ka lya iiyimati yiilonga yoye noto ningi omunelago e to yambapala.
3 Mukadhoye ota kala a fa omuviinu gwi ima meni lyegumbo lyoye; aamwoyemati otaa ka fa iitutuma yomuolivi ya kunkula oshililo shoye.
4 Tala, osho ngaaka omulumentu ta yambekwa ngoka ha vulika kOmuwa.
5 Omuwa ne ku laleke nuuyamba muSion! Kala wa tala elago lyaJerusalem omasiku goye agehe, manga u na omwenyo.
6 Kala ko, u ka mone oluvalo lwaamwoye. Ombili nayi kale muIsrael!
1 Aatondi oya hepeke ndje nayi okuza kuugundjuka wandje, Israel osho na tye.
2 Oya monitha ndje iihuna okuza nale, ihe inaa vula okusinda ndje.
3 Oya hendagula ndje iilalo kombunda, ongaashi omupululi ta ningi omankalala.
4 Ihe Omuwa oye omuyuuki; okwa tokola ndje mo moomango dhaakolokoshi.
5 Naa se ohoni ayehe mboka ye tonde Sion.
6 Naa fe omwiidhi gwa mena kombanda yondunda, tagu ganya manga inaagu koka.
7 Kaku na ngoka te gu gongele e te gu manga iihampi.
8 Aapitipo itaa vulu okutya kuyo: “Omuwa ne mu laleke nuuyamba medhina lyOmuwa.”
1 Meni muule otandi ku kugile, Omuwa.
2 Omuwa, uva ewi lyandje; omakutsi goye naga pulakene ewi lyegalikano lyandje.
3 Omuwa, ngele to kala nokudhimbulukwa oondjo, olye ta vulu okukala po?
4 Ihe pungoye opu na edhimopo lyoondjo, opo u tilike nokusimanekwa.
5 Onda tegamena Omuwa, onde mu tegelela; oohapu dhe onde dhi inekela.
6 Onda tegelela Omuwa ndi vule omulangeli guusiku a tega ku she.
7 Israel, inekela Omuwa, oshoka ohole ye ihayi lunduluka; okwi ilongekidha aluhe okuhupitha.
8 Oye mwene ta ka kulila Israel moondjo dhe adhihe.
1 Omuwa, onde etha uuntsa, nomeho gandje itaga tala mbyoka yopuule. Inandi itula mumbyoka iinene nenge mbyoka tayi nyenge ndje.
2 Ihe omwenyo gwandje onde gu loteke noku gu ngungumaneka. Ngaashi okanona ka lala mekolo lyayina, osho omwenyo gwandje gwa ngungumana.
3 Israel, inekela Omuwa nena nosigo aluhe!
1 Omuwa, dhimbulukwa David nomaudhigu agehe ngoka a li nago.
2 Oye oku uvanekele Omuwa nokwa popi nokugana kOmunankondo, Kalunga kaJakob, a ti:
3 “Itandi ka ya megumbo lyandje nenge ndi ye mondunda yandje, ndi ka kothe.
4 Itandi ka etha, ndi kwatwe koomposi nenge ndi thithikile,
5 manga inaandi monena Omuwa omutumba, ehala lyokukala Omunankondo, Kalunga kaJakob.”
6 Oshikethahangano otwe shi kundana, manga shi li muEfrata; otwe shi mono momalundu gaJaar.
7 Ileni, tu yeni kongulu yOmuwa; ileni, tu tseni oongolo poompadhi dhe.
8 Thikama, Omuwa, u ye kehala lyoye lyokuvululukilwa. Ila noshikethahangano, endhindhiliko lyoonkondo dhoye.
9 Aayambi yoye naa longe shoka shu uka, naantu yoye naa imbe nokunyanyukwa.
10 Molweuvaneko ndyoka we li pe omuntu gwoye David, ino ekelahi omukwaniilwa ngoka we mu gwayeke.
11 Omuwa oku uvanekele David euvaneko itaali lunduluka a ti: “Gumwe gwomaamwoye otandi ke mu langeka koshipundi shuukwaniilwa woye.
12 Aamwoye ngele otaa dhiginine ehangano lyandje niipango nde yi ya nongeke, nena oyana otaa ke ku landula muukwaniilwa aluhe sigo aluhe.”
13 Omuwa okwa hogolola Sion; okwa hala shi kale omutumba gwe ta ti:
14 “Ndika olyo ehala lyandje lyokukala aluhe; onda hala okukala muka nokupangela.
15 Otandi yambeke Sion niilikolomwa yasho; oohepele dhamo otandi ke dhi pa eloolo.
16 Aayambi yamo otandi ke ya etela ehupitho, naantu yandje otaa ki imba nokunyanyukwa.
17 Otandi ka koleka uukwaniilwa waDavid, noluvalo lwe otalu ka ya koshipundi she shuukwaniilwa.
18 Aatondi ye otandi ke ya sitha ohoni, ihe oshishani otashi ka adhima komutse gwe.”
1 Osho opala sho opalelela aantu ayehe ngele taa kala ye holathana ngaashi aamwayinathana.
2 Okukala kwa tya ngaaka okwa fa omugwayo gwezimba lya nika nawa tagu tilwa komutse notagu pononokele koombenzi dhaAaron nokoongenge dhoonguwo dhe.
3 Ongaashi omume gwokondundu Hermon tagu gwile kondundu Sion. Oko hoka Omuwa ta gandja eyambeko nomwenyo sigo aluhe.
1 Hambeleleni Omuwa, ne aalongeli ye mboka tamu yakula uusiku mongulu yOmuwa.
2 Yelutheni omaako geni, sho tamu galikana motempeli, ne mu hambelele Omuwa!
3 Omuwa, omushiti gwegulu nogwevi ne mu laleke nuuyamba muSion!
1 Halleluja! Hambeleleni Omuwa! Simanekeni edhina lye, ne aalongeli yOmuwa,
2 one mboka tamu thikama mongulu yOmuwa, motempeli yaKalunga ketu.
3 Hambeleleni Omuwa, oshoka oye omwaanawa; osho opala okusimaneka edhina lye.
4 Omuwa okwa hogolola Jakob a ninge gwe, naIsrael a ninge eliko lye.
5 Ondi shi shi kutya Omuwa oye omunene, Omuwa gwetu oye omunene e vule iikalunga ayihe.
6 Omuwa oha longo ashihe shoka she mu opalela, megulu nokombanda yevi. Mefuta nomuule walyo.
7 Ote enditha iikogo okuza kohulo yevi, ota tumu omvula yi na oombadhi nota tukulutha ombepo mompungulilo ye.
8 Okwa dhipaga po aatango yAayegipiti, aatango yaantu noyiimuna.
9 Okwa longo iikumitha niinyengandunge muEgipiti; okwa geele omukwaniilwa nomalenga ge agehe.
10 Oye nguka a dhenge iigwana oyindji nokwa dhipaga aakwaniilwa aanankondo:
11 Sihon, omukwaniilwa gwaAayamori, Og, omukwaniilwa gwaBaasha naakwaniilwa ayehe yaKaanan.
12 Okwa gandja evi lyawo kaantu ye, lya ningi lyoshigwana she Israel.
13 Omuwa, edhina lyoye otali simanekwa aluhe sigo aluhe. Omuwa, oto ka simanekwa komaluvalo agehe.
14 Omuwa ota ka popila aantu ye nota ka sila aalongeli ye ohenda.
15 Iimenka yaapagani oyo oshingoli noshisiliveli, ya hambulwa kiikaha yaantu.
16 Oyi na omakana, ihe ihayi popi; oyi na omeho, ihe ihayi mono ko.
17 Oyi na omakutsi, ihe ihayi uvu ko, yo ihayi vulu okufudha.
18 Mboka taye yi hambula, otaa ka faathana nayo, nosho wo mboka taye yi inekele.
19 Ne Aaisraeli, simanekeni Omuwa; hambeleleni Omuwa, ne ezimo lyaAaron!
20 Ne Aalevi, simanekeni Omuwa! Mu hambeleleni, amuhe mboka hamu mu galikana!
21 Omuwa na hambelelwe muSion, oongoka a kala muJerusalem. Halleluja!
1 Hambeleleni Omuwa, oshoka oye omwaanawa, nesilohenda lye otali kala aluhe.
2 Hambeleleni Kalunga ngoka e vule ookalunga ayehe, oshoka esilohenda lye otali kala aluhe.
3 Hambeleleni Omuwa, omukwaniilwa gwaakwaniilwa, oshoka esilohenda lye otali kala aluhe.
4 Oye ngoka ta longo iikumitha iinene, oshoka esilohenda lye otali kala aluhe.
5 Oye a shiti egulu kuunongo we, oshoka esilohenda lye otali kala aluhe.
6 Oye a yala evi kombanda yomeya, oshoka esilohenda lye otali kala aluhe.
7 Oye a shiti omaminikilo omanene, oshoka esilohenda lye otali kala aluhe:
8 etango lyokupangela omutenya, oshoka esilohenda lye otali kala aluhe;
9 omwedhi noonyothi dhokupangela uusiku, oshoka esilohenda lye otali kala aluhe.
10 Oye ngoka a dhipaga po iisheelimati yAayegipiti; oshoka esilohenda lye otali kala aluhe.
11 Okwa tembudha mo Aaisraeli muEgipiti, oshoka esilohenda ye otali kala aluhe.
12 Okwe ya enditha noshikaha she shoonkondo, okwooko kwe kwa taganana, oshoka esilohenda lye otali kala aluhe.
13 Oye ngoka a taula Efuta etiligane pokati, oshoka esilohenda lye otali kala aluhe.
14 Okwe enditha Aaisraeli mokati kalyo, oshoka esilohenda lye otali kala aluhe.
15 Omukwaniilwa gwaEgipiti netanga lye oya sile mefuta, oshoka esilohenda lye otali kala aluhe.
16 Oye e enditha aantu ye mombuga, oshoka esilohenda lye otali kala aluhe.
17 Okwa dhenge aakwaniilwa ya simana, oshoka esilohenda lye otali kala aluhe.
18 Okwa dhipaga aakwaniilwa aanankondo, oshoka esilohenda lye otali kala aluhe:
19 Sihon, omukwaniilwa gwAayamori, oshoka esilohenda lye otali kala aluhe,
20 naOg, omukwaniilwa gwaBaasha, oshoka esilohenda lye otali kala aluhe.
21 Evi lyawo okwe li pe aantu ye, oshoka esilohenda lye otali kala aluhe.
22 Okwe li pe Israel, omuntu gwe, oshoka esilohenda lye otali kala aluhe.
23 Oye ngoka e tu dhimbulukwa muudhigu wetu, oshoka esilohenda lye otali kala aluhe.
24 Okwe tu mangulula maatondi yetu, oshoka esilohenda lye otali kala aluhe.
25 Oye ngoka ta palutha iinamwenyo ayihe, oshoka esilohenda lye otali kala aluhe.
26 Hambeleleni Kalunga komegulu, oshoka esilohenda lye otali kala aluhe.
1 Otwa kuutumba pomilonga dhaBabilon e tatu lili, sho twa dhimbulukwa Sion.
2 Uuhumba wetu otwe u tsilike komiti dhopomulonga.
3 Oshoka aahepeki yetu oye tu pula, tu ya nyanyudhe, ya ti: “Tu imbileni omaimbilo taga popi Sion.”
4 Otatu vulu ngiini okwiimbila Omuwa tu li mevi lyuundjendi?
5 Jerusalem, ngele otandi ku dhimbwa, nena oshikaha shandje shokolulyo nashi lemane.
6 Elaka lyandje nali kakatele kondaathelo, ngele otandi ku dhimbwa, Jerusalem, ngoye ngo ho nyanyudha ndje unene!
7 Omuwa, ino dhimbwa, Aaedomi sho ya ningi, uuna Jerusalem sha teka po. Oyi igidha ya ti: “Shi kumunii po, shi teyii po sigo okomakankameno gasho!”
8 Yaye, shilando Babilon! Oto ka hanagulwa po. Omunelago oye ngoka te ku galulile shoka we tu ningile.
9 Omunelago oye ngoka ta kutha uuhanona woye e te wu ndandele komamanya.
1 Omuwa, otandi ku pandula nomwenyo aguhe; montaneho yookalunga otandi ku hambelele.
2 Otandi inyongamene nda taalela otempeli yoye ondjapuki, ndi simaneke edhina lyoye, omolwesilohenda nuudhiginini woye, oshoka owa simanekitha edhina lyoye kombanda yaayihe.
3 Sho nde ku ithana, owu uvu omagalikano gandje; owa nyatipaleke ndje nowa koleke ndje.
4 Omuwa, aakwaniilwa ayehe kombanda yevi naye ku simaneke, oshoka oyu uva oohapu dhoye.
5 Naa tange iilonga yOmuwa, oshoka esimano lyOmuwa enene.
6 Omuwa, nando ou li pombanda megulu, oto tonatele aadhinwa, ihe mbo ye hole uuntsa, itaa vulu oku ku holama.
7 Nando ondi li mokati kuudhigu. Omwenyo gwandje oto gu gamene. Oto yelutha okwooko kwoye, u geele aatondi yandje e to hupitha ndje noonkondo dhoye.
8 Omuwa, oto shi ningile ndje. Omuwa, esilohenda lyoye otali kala aluhe; ino etha iilonga yiikaha yoye.
1 Omuwa, ongoye to konakona ndje nowa tseya ndje.
2 Owa tseya ndje, uuna nda kuutumba nongele nda thikama; omadhiladhilo gandje agehe oto ga tseya, manga inaaga holoka.
3 Ou wete ndje, ngele tandi yi kiilonga nenge te vululukwa; ashihe shoka te ningi, ou shi wete.
4 Omuwa, manga inaandi tumbula sha, owa tseya nale shoka tii ka tya.
5 Owa kunduka ndje koombinga adhihe; oshikaha shoye oshi li kombanda yomutse gwandje.
6 Okutseya ndje kwoye otaku kumitha ndje unene; otaku nyenge oondunge dhandje.
7 Otandi yi peni ontuku Ombepo yoye? Otandi vulu tuu oku ku holama?
8 Ngele tandi londo kegulu, oko u li; ngele tandi ka lala muuyuni wokuusi, naamoka omo u li.
9 Ngele te tuka ndu uka lwokuuzilo, nenge ndi ka kale kokule kuuninginino,
10 naahoka oshikaha shoye otashi kala nokuwilika ndje; olulyo lwoye otalu kwata ndje.
11 Nando ondi lombwele omilema, dhi siikile ndje, nomutenya gu shituke uusiku,
12 ongoye to mono ko nomomilema. Uusiku owa yela wa fa omutenya, oshoka omilema nuuyelele kungoye oya faathana.
13 Ongoye wa shiti ashihe shi li mungame; owa tungile ndje mela lyameme.
14 Otandi ku hambelele e tandi ku simaneke, oshoka onda shitwa nuunkulungu. Iilonga yoye iikumithi; shika ondi shi shi nawa.
15 Omasipa gandje sho ga shitwa noga tulwa kumwe nawa mela lyameme, naasho nda li te koko meholamo, owa li u shi shi.
16 Owa mono ndje, manga inaandi valwa. Omasiku nde ga uthilwa, agehe oga nyolelwa membo lyoye, manga inaaga thika.
17 Omadhiladhilo goye, Kalunga, olye te ga tseya? Ogo ogendji taga nyengana okuyalulwa.
18 Ngele tandi ga yalula, ogo ogendji ge thike pehekevi lyopefuta. Ngele te penduka, ondi li natango pamwe nangoye.
19 Kalunga, ando u dhipage po aakolokoshi mboka! Zii po pungame, aadhipagi ne!
20 Otaye ku lundile notaa popi nayi edhina lyoye.
21 Omuwa, ondi tonde mboka ye ku tonde notandi nyanyala mboka taye ku tsile ondumbo.
22 Otandi ya tondo nda mana mo; onde ya tala oyo aatondi yandje.
23 Konakona ndje, Kalunga, ngoye u tseye omutima gwandje; tala ndje, u dhimbulule omadhiladhilo gandje.
24 Tala ndje, ngele ndi li mondjila ndjoka yu uka kekano, u endithile ndje mondjila yaaluhe.
1 Omuwa, hupitha ndje miikaha yaakolokoshi; gamena ndje kaalumentu aadhudhu.
2 Otaa kaleke uuwinayi momitima dhawo noya hala olugodhi esiku kehe.
3 Omalaka gawo oga fa gomayoka guuzigo, noohapu dhawo odha fa uuzigo wontoka.
4 Omuwa, gamena ndje kiikaha yaakolokoshi, shiga ndje kaalumentu aadhudhu mboka taa dhiladhilile ndje uuwinayi notaa tegele ndje omwigo.
5 Oonakuholuuntsa, otaa tegele ndje oomwigo meholamo; otaa tegele ndje oshiliya notaa fulile ndje ekelo mondjila.
6 Ngame ote ti kOmuwa: “Ongoye Kalunga kandje.” Omuwa, uva egalikano lyandje.
7 Omuwa Omupangeliawike, ongoye omupopili gwandje omunankondo noto gamene ndje esiku lyolugodhi.
8 Omuwa, aakaanakalunga ino ya pitikila omakamba gawo; ino etha oompangela dhawo dhi tompole sha, opo yaa inenepeke.
9 Aatondi yandje ino etha ya sinde ndje; ya shunithila uuwinayi mboka ye u ningile ndje.
10 Ya tilahila omakala gomulilo; naa umbilwe meziko lyomulilo nomolumbogo moka itaa ka za mo.
11 Ino etha aalundili ya kale moshilongo; elega nali ya kombe po.
12 Ondi shi shi, Omuwa otu uthile oohepele pauyuuki nota popile aakwanaluhepo.
13 Aayuuki otaye ke ku hambelela, naanashili otaa ka kala koshipala shoye.
1 Omuwa, otandi ku ithana; endelela, u ye kungame! Uva eigidho lyegalikano lyandje!
2 Taamba omagalikano gandje ngaashi omatsinino; okuyelutha iikaha yandje naku ninge eyambo lyongulohi
3 Omuwa, tula omulangeli kokana kandje; langeka omukeeleli posheelo shomilungu dhandje.
4 Gamena ndje, ndaa hongololwe, ndaa longe uulunde pamwe naakolokoshi; ino etha, ndi ye kiituthi yawo.
5 Osho opala, omuyuuki ngele ta ganda ndje e ta dhenge ndje Otashi fe omugwayo gwomagadhi komutse gwandje. Ihe omagalikano gandje otaga tamaneke iilonga yaakolokoshi.
6 Aapangeli yawo otaa ka undulilwa molumbogo, aakolokoshi notaa ka tseya kutya oohapu dhandje odhoshili.
7 Ngaashi eputa tali henyagwa notali papulwa, osho omasipa gawo taga ka halakanena poombila dhawo.
8 Onde ku inekela, Omuwa Omupangeliawike; omungoye tandi kongo egameno; ino ethela ndje meso.
9 Gamena ndje koomwigo ye dhi tegela ndje nokomakelo nde ga fulilwa kaakolokoshi.
10 Aakaanakalunga naa gwile momakelo gawo yene, manga ngame te pitilile po nombili.
1 Otandi ithana Omuwa, a kwathe ndje; otandi yeluthile ewi lyandje kOmuwa, a sile ndje ohenda.
2 Otandi holola omayemato gandje koshipala she; otandi mu faalele uudhigu wandje.
3 Onda kanitha omukumo, ihe Omuwa ota tseya shoka ndi na okuninga. Mondjila moka ndi na okweenda, aatondi yandje oya tega mo omwigo.
4 Sho te tala moluha, kaku na ngoka e na ko nasha nangame. Kandi na ngo ta gamene ndje, kape na ngo e na oshimpwiyu nangame.
5 Omuwa, otandi ku kugile ekwatho; ongoye omugameni gwandje; ongoye awike nda pumbwa mokukalamwenyo kwandje.
6 Pulakena egalikano lyandje, oshoka ondi li muudhigu. Hupitha ndje miikaha yaatidhagani yandje, oshoka oye vule ndje oonkondo.
7 Hupitha ndje moothina, opo ndi simaneke edhina lyoye. Aayuuki otaa ka kunduka ndje moluuwanawa we u ningile ndje.
1 Omuwa, uva egalikano lyandje; pulakena, sho tandi ku kugile ekwatho. Ila, u kwathe ndje omoluudhiginini nuuyuuki woye.
2 Omupiya gwoye ino mu fala moompangu, oshoka kaku na omuntu omuyuuki koshipala shoye.
3 Omutondi ota tidhagana ndje e ta hata ndje pevi; otu undulile ndje momilema, ongaamboka ya sa nale.
4 Onda kanitha omukumo; onda tyololoka.
5 Otandi dhimbulukwa omasiku gonale; otandi tedhatedha ayihe mbyoka we yi ninga, notandi dhiladhila iilonga yoye ayihe.
6 Otandi yelutha omaako gandje kungoye; onde ku yuulukwa nda fa evi lya kukuta evi lya pumbwa omvula.
7 Omuwa, yamukula ndje mbala; onda vulwa okutegelela. Ino holeka ndje oshipala shoye, opo ndaa fe mbo taa kulukile muusi.
8 Ongula kehe nayi etele ndje elaka lyesilohenda lyoye, oshoka onde ku inekela. Otandi ya kungoye megalikano; ulukila ndje ondjila ndi na okweenda nayo.
9 Omuwa, hupitha ndje miikaha yaatondi yandje; otandi holama mungoye.
10 Longa ndje okugwanitha ehalo lyoye, oshoka ongoye Kalunga kandje. Ombepo yoye nayi endithe ndje mepola lya yelekana.
11 Omuwa, hupitha ndje omolwedhina lyoye; pititha ndje muudhigu omoluuyuuki woye.
12 Molwaasho u hole ndje, hanagula po aatondi yandje; komba po aahepeki yandje ayehe, oshoka ngame omupiya gwoye.
1 Omuwa na hambelelwe, oye omugameni gwandje; ota longekidhile ndje olugodhi.
2 Kalunga oye ohole nepopilongulu lyandje; oye omuhupithi noshikandekitho shandje, nomuye tandi holama. Oye ngoka ta sindile ndje iigwana.
3 Omuwa, omuntu omushike, sho ho mu dhimbulukwa? Ke shi sha, nando u na oshimpwiyu naye.
4 Omuntu okwa fa omufudho; omasiku ge oga fa omuzizimba tagu kana po.
5 Omuwa, tuula egulu, u kulukile pevi; guma oondundu, dhi ze olwithi.
6 Adhimitha olwaadhi, u halakanithe aatondi yoye; umba iikuti e to ya piyaganeke.
7 Ukitha oshikaha shoye pevi, u hile ndje momeya omale e to hupitha ndje. Yululula ndje miikaha yaakwiilongo,
8 mboka ihaaya popi oshili, ihe ohaa kotokele.
9 Kalunga, onda hala oku ku imbila eimbilo epe; onda hala ndi ku imbile nokahumba.
10 Ongoye to pe aakwaniilwa esindano, nowa hupitha omuntu gwoye David kegonga etilithi.
11 Hupitha ndje ngu u kanyutulule ndje miikaha yaakwiilongo, oomboka ihaaya popi oshili, ihe ohaa kotokele.
12 Aana yetu aamati muugundjuka wawo naa fe iimeno tayi koko nawa. Aana yetu aakadhona naa fe oongudhi dhuulenga mombala.
13 Iigandhi yetu nayi kale yu udha iikulya ye tu gwana. Oonzi dhetu koohambo nadhi tane lwomayuvi omulongo.
14 Iimuna yetu nayi ninge iisimba e tayi vala nawa itaayi gwitha. Momapandaanda getu inamu ka uvika onkugo yasha.
15 Oshigwana shi li ngeyi, oshi na elago; oshigwana shi na Omuwa, oye Kalunga kasho, oshi na elago.
1 Otandi ku simaneke Kalunga, omukwaniilwa gwandje; otandi tanga edhina lyoye aluhe sigo aluhe.
2 Onda hala oku ku pandula esiku kehe nonda hala okutanga edhina lyoye aluhe sigo aluhe.
3 Omuwa oye omunene a gwana okusimanekwa; uunene we otau nyengana okuyelekwa.
4 Iilonga yoye otayi tangwa komapipi nomapipi; otaga hokolola iilongankondo yoye.
5 Otaga uvitha esimano noonkondo dhoye, nangame wo otandi dhiladhila iilonga yoye iikumithi.
6 Aantu otaa ka hokolola iilongankondo yoye; ngame otandi ka uvitha iilonga yoye iinene.
7 Otaa ka tanga uuwanawa woye owindji notaa ki imba nokunyanyukilwa uuyuuki woye.
8 Omuwa oye omunamutimahenda nomunalukeno, omutalanteni noku udha ohole.
9 Omuwa oku na ombili naantu ayehe, oku na ohenda naayihe mbyoka e yi shita.
10 Omuwa, eshito lyoye alihe otali ku simaneke; aantu yoye otaye ku tanga.
11 Otaa hokolola esimano lyepangelo lyoye notaa uvitha oonkondo dhoye,
12 opo aantu ya tseye iilongankondo yoye nesimano lyoshilongo shoye.
13 Epangelo lyoye otali kala aluhe, nangoye oto kala omukwaniilwa sigo aluhe. Omuwa ota dhiginine omauvaneko ge, noku hole iishitwa ye ayihe.
14 Omuwa ota yambula po aapunduki nota pendutha po mboka yi ihata po.
15 Omeho gaayihe otage ku ligamene; ongoye noto yi pe oondya pethimbo.
16 Oto kamununa eke lyoye e to kutitha iinamwenyo ayihe kesilohenda lyoye.
17 Omuwa oye omuyuuki miilonga ye ayihe, noku hole iishitwa ye ayihe.
18 Omuwa oku li popepi naayehe mboka taye mu ithana, naamboka taye mu galikana moshili.
19 Mboka haye mu simaneke, ote ya pe ashihe shoka ye shi pumbwa, notu uvu omaindilo gawo e te ya hupitha.
20 Omuwa ota gamene ayehe mboka ye mu hole, ihe aakaanakalunga ayehe ote ya dhimi po.
21 Nandi hambelele aluhe Omuwa; iishitwa ayihe nayi simaneke edhina lye eyapuki aluhe sigo aluhe.
1 Halleluja! Omwenyo gwandje, hambelela Omuwa!
2 Onda hala okuhambelela Omuwa, manga ndi na omwenyo, nokwiimbila Kalunga, manga ndi li po.
3 Inamu inekela aanankondo yokombanda yevi; itaa vulu oku mu hupitha.
4 Uuna taa mana oondjenda, otaa shuna montsi moka ya zile. Esiku ndyoka oompangela dhawo otadhi hulu po.
5 Omunelago oye ngoka ekwatho lye tali zi kuKalunga kaJakob, oye ngoka i inekela Omuwa, Kalunga ke.
6 Oye omushiti gwegulu nogwevi, gwefuta noshaa shoka sha kala muyo,
7 otu uthile aahepekwa, ota palutha aasindjala e ta mangulula oonkwatwa.
8 Omuwa ota tonatitha omeho gaaposi, nota yambula po mboka ya thindilwa pevi.
9 Omuwa ota gamene aakwiilongo, ota tonatele oothigwa naaselekadhi, ihe oompangela dhaakaanakalunga ote dhi ponyitha.
10 Omuwa oye omukwaniilwa aluhe sigo aluhe. Sion, Kalunga koye ota pangele aluhe sigo aluhe. Halleluja!
1 Halleluja! Hambeleleni Omuwa! Osho opala okuhambelela Kalunga ketu; oshu uka oku mu imbila omahambelelo.
2 Omuwa ota tungulula Jerusalem; ota gongele aapongekwa yaIsrael.
3 Ota aludha mboka ye ehamekwa koomwenyo, nota manga iilalo yawo.
4 Otu utha omwaalu gwoonyothi note dhi ithana komadhina.
5 Omuwa gwetu oye omunene nomunankondo; oondunge dhe kadhi shi kuyelekwa.
6 Ota yambula po aaishonopeki, ihe aakaanakalunga ote ya shundula.
7 Imbileni Omuwa omahambelelo; hikileni Kalunga ketu uuhumba.
8 Eyalelo ote li siikile niikogo; evi ote li lokithile omvula nota kokitha omwiidhi komalundu.
9 Ota palutha iimuna, osho wo uudhilakolagona uuna tau lili.
10 Omuwa ina panda nande oonkondo dhuukambe noina hokwa uufule waakwiita,
11 ihe okwa hokwa mboka haye mu tila noku mu simaneka naamboka haa inekele esilohenda lye.
12 Jerusalem, simaneka Omuwa! Sion, hambelela Kalunga koye!
13 Oye ta koleke omiyelo dhoye nota yambeke aantu yoye.
14 Ota gamene oongamba dhoye note ku kutitha niikulya iitoye.
15 Ota gandja omalombwelo kombanda yevi, noohapu dhe otadhi uvika mbala.
16 Ota lokitha olumi lwa fa omahegele gomongwa nota gundu ombambi ngaashi omutoko.
17 Otu umbu oompawe ngaashi omamanya. Olye ta vulu okwiitakeka uutalala wombambi?
18 Ihe kelombwelo lye olumi otalu hemuka; ngele ta pepitha ombepo ompyu, omeya otaga tameke oku kunguluka.
19 Ota tseyithile Jakob oohapu dhe nota hololele Israel iipango nomautho ge.
20 Shika ine shi ningila iigwana yilwe, mbyoka inaayi tseya iipango ye. Halleluja!
1 Halleluja! Hambeleleni Omuwa! Hambeleleni Omuwa, ne yomegulu! Mu hambeleleni mboka mu li kombandambanda!
2 Mu hambeleleni, aayengeli ne amuhe! Mu hambeleleni, aakwiita ye ayehe yomegulu.
3 Mu hambeleleni, etango nomwedhi, noonyothi oondjelele nadhi mu hambelele.
4 Mu hambeleleni, ne omauyuni gokombanda, nomeya gokohi yeyalelo.
5 Ayihe nayi simaneke edhina lyOmuwa! Oye a popi, oyo noya holoka po.
6 Kelombwelo lye ayihe oya thikama pomahala gayo, naayihe otayi vulika kuye.
7 Ayihe yokevi nayi hambelele Omuwa, iikwameya iinene muule womefuta,
8 Oombadhi noompawe, olumi nosheentsi, noombepo dhoshikungulu ndhoka hadhi vulika kelombwelo lye.
9 Hambeleleni Omuwa, ne oondundu niikulundundu, omiti dhiiyimati naandhoka dhomokuti;
10 iiyamakuti ayihe niimuna, iihono noondhila.
11 Mu hambeleleni, ne aakwaniilwa naantu ayehe, aana yokombanda naapangeli ayehe;
12 aamati naakadhona, aakulupe nuunona.
13 Ayihe nayi hambelele edhina lyOmuwa; edhina lye olyo alike li na okusimanekwa; esimano lye oli li kombanda yevi nomegulu.
14 Oshigwana she okwe shi ningi oshinankondo. Aaisraeli opo ye mu simaneke; oyo aantu ye e ya hole. Halleluja!
1 Halleluja! Hambeleleni Omuwa! Imbileni Omuwa eimbilo epe; imbeni ehambelelo megongalo lyaantu ye.
2 Aaisraeli, nyanyukilweni omushiti gweni. Nane yomuSion, omukwaniilwa gweni
3 Tangeni edhina lye nokuligola ne mu mu hikile oontunda nuuhumba.
4 Omuwa okwa hokwa aantu ye aayifupipiki ote ya pe esindano.
5 Aantu ye naa nyanyukwe, sho ya simanekwa; naa imbe nokutanta uusiku auhe.
6 Naa imbile Kalunga nomakana gawo, manga miikaha yawo mu na omagonga goongenge mbali ga tsa,
7 okushunithila iigwana uukolokoshi wayo noku yi geela;
8 okumanga aakwaniilwa yayo nomalyenge nokutula aaleli yayo moomango;
9 okugeela iigwana, ngaashi Kalunga e shi utha. Shika osho esimano lyaantu ye ayehe. Halleluja!
1 Halleluja! Hambeleleni Omuwa! Hambeleleni Kalunga motempeli ye! Simanekeni oonkondo dhe oonkwagulu!
2 Simanekeni iilongankondo ye. Tangeni uunene we waa shi kutumbulwa.
3 Mu hambeleleni nokuhika omankuma. Mu hambeleleni nokuhika uuharpa nuushandja.
4 Mu hambeleleni noontunda nokutanta; mu hambeleleni nuuharpa noohiya.
5 Mu hambeleleni nokudhenga iikwelengendji; mu hambeleleni newi lyuungendjo.
6 Shaa shoka shi na omwenyo, hambelela Omuwa! Halleluja!