1 Okwa li ku na omulumentu, edhina lye Job, a kala moshilongo Uz. Okwa li omukeenashipo nomuyuuki. Okwa li ha tila Kalunga noha tondo uuwinayi.
2 Okwa li e na oyana aamati yaheyali naakadhona yatatu.
3 Okwa li e na oonzi omayuvi gaheyali, oongamelo omayuvi gatatu, oongombe eyuvi limwe nuusino omathele gatano. Okwa li wo e na aapiya oyendjiyendji, nokwa li omuyamba e vule aayuzilo ayehe.
4 Oyana aamati oya li haa ningi iituthi pamalufo momagumbo gawo. Oya li wo haa hiya aamwayina aakadhona kiituthi mbika.
5 Oshituthi ngele sha pu, mesiku kehe lya landula Job oha meneka e ta yamba omolwomwana kehe ontselelandjambo, opo a kale a yogoka. Okwe shi ningi olwindji, oshoka okwa dhiladhila kutya pamwe oyana oya yono noya sheke Kalunga momadhiladhilo gawo.
6 Esiku limwe aayengeli yaKalunga oya holoka koshipala shOmuwa, naSatana okwa li mokati kawo.
7 Omuwa okwa pula Satana: “Oto ziilile peni?” Satana okwa yamukula Omuwa: “Onde endagula mpaka naampeyaka nonda taakana evi.”
8 Omuwa okwe mu pula a ti: “Ino mona omuntu gwandje Job? Kombanda yevi kaku na omuntu e shi okwiinekelwa e mu fa, omulumentu ha tila Kalunga noha tondo uuwinayi.”
9 Satana okwa yamukula a ti: “U shi Job oha tila Kalunga owala?
10 Oshoka owala ho mu gamene pamwe negumbo lye naashihe shoka e shi na. Owa yambeke iilonga ye nowe mu pe iimuna yi indjipala moshilongo ashihe.
11 Ando u yelekele e to ganeke oshikaha shoye, u yone po eliko lye, nena ote ku iteka po mbala.”
12 Omuwa okwa ti kuSatana: “Eewa, ayihe e yi na, otandi yi tula miikaha yoye, ihe ino mu guma kolutu.” Satana nokwa zi po.
13 Esiku limwe manga aana yaJob ya li moshituthi megumbo lyomumwayinamati osheeli,
14 omutumwa okwe ya kuJob ta matuka e ta ti: “Otwa li tatu pupula omapya noonani, uusino nowa li tau napa popepi.
15 Ohaluka Aasaba oya matukile iimuna e taye yi yaka po. Oya dhipaga po aapiya yoye ayehe. Ongame awike nda hupu po nonde ya ndi shi ku lombwele.”
16 Manga inaa mana okupopya, omupiya omukwawo okwe ya po e ta ti: “Olwaadhi olwa akula po oonzi naasita e talu ya dhipaga po ayehe. Ongame awike nda hupu po nonde ya ndi shi ku lombwele.”
17 Manga inaa mana okupopya, omupiya omukwawo okwe ya e ta ti: “Aahomoni Aababilonia ye li iiluku itatu, oye tu ponokele e taa yugu po oongamelo noya dhipaga po aapiya yoye ayehe. Ongame awike nda hupu po nonde ya ndi shi ku lombwele.”
18 Manga inaa mana okupopya, omupiya omukwawo okwe ya po e ta ti: “Aamwoye oya li moshituthi megumbo lyosheeli shoye.
19 Ombepo yoshikungulu oya zi kombuga noya hanagula po egumbo lyasho noya dhipaga po ayehe. Ongame awike nda hupu po nonde ya ndi shi ku lombwele.”
20 Job okwa yambuka po e ta tuula oonguwo dhe molwoluhodhi. Okwa kulula omutse gwe nokwa tsu oshipala she pevi e ta galikana
21 ta ti: “Olutu lwowala nda zile mela lyameme notandi ka ya ndi li olutu lwowala. Omuwa okwe yi pele ndje, Omuwa okwe yi kutha ndje. Edhina lye nali simanekwe.”
22 Mumbika ayihe ya ningwa po, Job ina yona a pe ando Kalunga ombedhi.
1 Opwa ningi ishewe, aayengeli yaKalunga sho ya holoka koshipala shOmuwa, Satana okwa li wo mokati kawo.
2 Omuwa okwe mu pula a ti: “Oto zi peni?” Satana okwa yamukula a ti: “Onde ende mpaka naampeyaka nonda taakana evi alihe.”
3 Omuwa okwa pula a ti: “Ino mona omuntu gwandje Job? Kombanda yevi kaku na omuntu e mu fa. Oye omuyuuki kee na oshipo, omulumentu ha tila Kalunga noha tondo uuwinayi. Ngoye owa lombwele ndje, ndi mu dhenge pwaa na etompelo, ihe Job okwa dhiginine eitaalo lye.”
4 Satana okwa yamukula a ti: “Omuntu ota gandja po iinima ye ayihe, opo a kale e na omwenyo.
5 Ihe ngele to gumu olutu lwe, nena ote ku sheke montaneho!”
6 Omuwa okwa ti kuSatana: “Eewa, ngashingeyi otandi mu gandja miikaha yoye, mu dhenga kolutu, ihe omwenyo gwe ino gu guma.”
7 Satana okwa zi ko koshipala shOmuwa nokwa umbu Job iitumbuka molutu aluhe.
8 Job okwa kuutumba momutoko nokwa kutha oshikangwa e ta yaga nasho iitumbuka ye.
9 Omukadhi okwa ti kuye: “Natango owa hala ngaa okukala omuyuuki? Sheka Kalunga, u se.”
10 Job okwe mu yamukula a ti: “Oto popi wa fa omukiintu omugoya. Ndishi Kalunga ngele te tu pe uuwanawa, otatu u taamba. Otatu mu pe tuu uusama, ngele te tu pe uudhigu?” Mwaayihe mbika Job ina yona sha, a tamaneke Kalunga.
11 Ookuume kaJob yatatu oyo Elifas gwomoshilando Teman, Bildad Omushuak naSofar Omunaema. Ano sho yu uvu kutya Job ota alukwa, oya tokola ye ke mu talele po noku mu hekeleka.
12 Manga ya li kokule, oya mono Job, ihe inaye mu dhimbulula. Sho ye ya popepi naye, oya tameke okulila mokule e taa tuula oonguwo dhawo molwoluhodhi yo taa igundu evi momitse.
13 Opo ihe oye mu kuutumbile omasiku gaheyali, uusiku nomutenya, yo itaa popi nando osha, oshoka oya mono kutya Job oku li muudhigu uunene.
1 Hugunina Job okwa popi e ta thingi esiku lyokuvalwa kwe.
2 Esiku nda valwa nali thingwe, nuusiku mbwiyaka kwa tiwa: “Okamati ke ya ko!”
3
4 Esiku ndyoka nali shituke omilema; Kalunga komegulu ine li dhiladhila, nuuyelele inau li minikila.
5 Omilema nomuzizimba gweso nagu li luudhile, niikogo nayi li siikile; uuluudhe nau li kuwikile.
6 Uusiku mbwiyaka nau ninge omilema; inau yalulilwa momasiku gomumvo, wo inau ya momwaalu gwoomwedhi.
7 Muusiku mbwiyaka inamu valwa sha, muwo inamu uvika ondigolo.
8 Mboka haa thingi omasiku, naye shi ninge, oyo tuu mboka yi ilongekidha okupendutha Leviatan.
9 Oonyothi dhongula nadhi luudhe; okutegelela eluwa naku ninge osima, uusiku inau mona oonte dhongula.
10 Oshoka inau edhilila ndje po osheelo shoshivalelo shameme, u siikile omeho gandje gaa tale iihuna.
11 Omolwashike inaandi nyangwa pokuvalwa, ndi se sho ndi li pokupulumuthwa?
12 Omolwashike oongolo dhameme dha yakula ndje, nomagundji ge ga yamutha ndje?
13 Ando ngashingeyi onda vululukwa nonda thuwa,
14 opamwe naakwaniilwa naapangeli yevi, mboka yi itungile oombala, ihe ngashingeyi omakulukuma gowala.
15 Onda li ndi na okukala nda fa omalenga, ngoka gu udhitha omagumbo gago oshingoli noshisiliveli.
16 Nenge omolwashike inaandi holekwa mevi nda fa omupononwa, ongaashi okahanona inaaka mona uuyelele wetango?
17 Mombila aakaanakalunga otaa hulitha po okuyona kwawo, omo moka aaloloki taa vululukwa.
18 Aapika wo otaa kala mo ye na ombili; itaa pulakene we omagandagulo.
19 Aanenentu naadhinwa oye thike pamwe, nomupika okwa manguluka komuhona gwe.
20 Omolwashike mbo ye li muudhigu taa ethiwa ya kale nomwenyo? Omolwashike aanaluhodhi taa pewa uuyelele?
21 Oya tegelela eso, ihe itali thiki; otaye li kongo nuupenda lya fa eliko.
22 Itaa nyanyukwa, manga inaaya sa e taa fumvikwa.
23 Omuntu ngoka Kalunga e mu nine iiholekwa, omolwashike e na okukala kombanda yevi e li mekondeka?
24 Peha lyokulya otandi lili; omahodhi gandje otaga matuka ga fa omeya.
25 Shoka hashi tilitha nokuhalutha ndje, osha ningilwa ndje.
26 Kandi na mbili, kandi na luthuwo; kandi na vululuko, ihe epiyagano lyowala.
1 Nena Elifas Omuteman okwa yamukula ngeyi.
2 Job, ngele oku na gumwe a hala a popye nangoye, oto vulwa ando?
3 Dhiladhila, nkene wa pukulula oyendji nowa pameka omaako ga gwa.
4 Oohapu dhoye odha kumike aatenguuki; owa kankameke mboka ya tonyala.
5 Ihe ngashingeyi sho wa adhika kuudhigu, owa tyololoka; sho we ku gumu, owa haluka.
6 Okulongela Kalunga hakwo wi inekela? Oondjila dhoye dhaa na oshipo, nadhi kale etegameno lyoye.
7 Dhiladhila nawa, olye a kala kee na mbudhi a adhika komupya? Openi pwa li omuyuuki a yonwa po?
8 Onda koneke kutya mboka haa papula iimpungu yuudhudhu, oyo wo mboka haa kunu uukolokoshi notaye u teya wo.
9 Otaa ka pepwa po komufudho gwaKalunga, nehwamo lyondjahi ye otali ya hanagula po.
10 Oonime oohahu ohadhi gono nohadhi pumbu kondjala, ihe omayego goonime oongundjuka oga teywa mo.
11 Onime otayi si, ngele kayi na sho tayi li, nuunimona otau halakana.
12 Elaka olya popitha ndje meholamo; omakutsi gandje ogu uvu enongono.
13 Oondjodhi otadhi ende mokati kuusiku, uuna oomposi tadhi kwata omuntu.
14 Uumbanda nekakamo olya kwata ndje, nonda dhekweta okuza komutse sigo okoompadhi.
15 Ombepo oya dhenge ndje moshipala, nolufufu kolutu lwandje olwa shindalala.
16 Oya mwena, ihe ine vula okukoneka kutya oshike shoka. Ongoshihehelela shi li momeho gandje. Ondu uvu ewi tali nongona tali ti:
17 “Nakukasa ota ningi tuu omuyuuki koshipala shaKalunga? Nenge omuyelele momeho gomushiti gwe?
18 Kalunga ini inekela naapiya ye yomegulu, nomaayengeli ye ota mono mo omapuko.
19 Ongiini ando mboka ya shitwa neloya, oomboka yu umbwa montsi yevi, mbo taa yonuka po mbala ya fa embilimbili?
20 Otaa tetagulilwa methimbo lyokuza ketendo lyeluwa sigo okeningino lyetango. Otaa yonuka po sigo aluhe noitaa dhimbulukiwa we.
21 Uuyamba wawo auhe owa yiwa nawo; otaa si yaa na oondunge.”
1 Job, igidha! Oku na tuu ngo te ku yamukula? Oguni gwomaayapuki te ku yamukula?
2 Ongeyo otayi li egoya, nefupa otali fala omuhasha meso.
3 Ngame mwene onda mono omugoya ta yugu, ihe ohaluka egumbo lye olya thingwa.
4 Oyana oya kala kokule negameno; moompangu otaa lyatelwa pevi pwaa na omupopili.
5 Aasindjala otaa li po iilya ye — otaa teya nomombungwiidhi aanotelwa otaa kwata po eliko lye.
6 Oshoka oshiponga ihashi hituka mohi, nuudhigu ihau ndjituka mevi.
7 Omuntu oti iyetele uudhigu, osho lela ngaashi oohandje hadhi tuka dhu uka pombanda.
8 Ihe ando ngame onda li ngoye, ando otandi uka kuKalunga notandi mu faalele uudhigu wandje.
9 Ota longo iinyengandunge itaayi vulu okuyelekwa, iilongankondo itaayi vulu okuyalulwa.
10 Evi ote li lokithile omvula, nomeya ote ga poolele momalundu.
11 Eeno, oye Kalunga ta yambula po aafupi e ta nyanyudha mboka taa lili.
12 Ota pilaaleke oompangela dhaanandunge nota hanagula po omakoto gaanongo, opo yaa tompole sha.
13
14 Omilema otadhi ke ya luudhila moshanga shomutenya, notaa ka pampadhala ngaashi muusiku.
15 Kalunga ota hupitha oohepele meso, ote ya hupitha miikaha yaanankondo.
16 Ohepele ote yi pe etegameno nomukolokoshi ote mu mweneke.
17 Omunelago omuntu ngoka Kalunga te mu pukulula. Ino dhina egeeloputudho lyOmunankondoawike.
18 Oshoka ota dhenge, ihe ota panga wo, ote ehameke, ihe iikaha ye otayi aludha.
19 Ote ku hupitha miiponga ihamano, nomoshitiheyali ito adhika kuupyakadhi.
20 Mondjala ote ku keelele meso, nomiita ite ku etha u se.
21 Ote ku gamene komasheko; ito pumbwa okutila, uuna ehanagulo tali ya.
22 Oto ka yola ehanagulo nuulumbu noito ka tila iilikama.
23 Epya lyoye itali ka kala noowege, niilikama itayi ke ku etela, nando oshiponga shasha.
24 Oto ka kala nombili metsali lyoye niimuna yoye otayi ka kala ya gwana po inaapu kana sha.
25 Aamwoye otaa ka indjipala, noluvalo lwoye otalu ka fa omwiidhi gwokelundu.
26 Oto ka ya mombila muukokele wa kola, ngaashi iilya ya adha okuteywa.
27 Job, shika otwe shi konakona notwa tseya kutya osho lela. Shi taamba ano.
1 Uudhigu nuuwehame wandje ando u yelekwe koshiviha,
2
3 ando uudhigudhigu u vule ehekevi lyopooha dhefuta, omolwasho oohapu dhandje inadhi dhiladhilwa nawa.
4 Iikuti yOmunankondoawike oyi li mungame, uuzigo wayo otau ehameke ndje; omatilitho gaKalunga otaga halutha ndje.
5 Ongolo ohayi lili tuu, ngele oyi li pomwiidhi, nenge ondumetana ohayi komo, uuna yi li pelonzi?
6 Iikulya yomunya otayi liwa tuu, ngele inayi toywa, nenge muutokele weyi omu na tuu omulyo gwasha?
7 Itandi vulu oku yi lya, iikulya ya tya ngaaka otayi alukitha ndje.
8 Kalunga oshike itaa yamukula eindilo lyandje, a pe ndje shoka nda hala?
9 Kalunga okwa hokwa okunyanyagula ndje, okwa ganeke oshikaha she, a tete ndje.
10 Nando ongaaka, ote kala nda nyanyukwa, eeno, ote nuka kenyanyu mokati kuuwehame uunene; ine dhina oohapu dhOmuyapuki.
11 Omukumo gwandje oguni, ndi kale ndi na etegameno? Onakuyiwa yandje oyini, ndi kale ndi idhidhimika?
12 Ondi na oonkondo nda fa emanya? Olutu lwandje oshiyela?
13 Itandi vulu we okwiikwatha ngame mwene; kape na ngo ta hupitha ndje.
14 Omuntu e li muudhigu ota pumbwa ekwatho lyookuume, nonando ne ethe Omunankondoawike.
15 Ihe ne, ookuume kandje, omwa fundju ndje, omwa fa omilonga tadhi pwine, uuna kwaa na mvula,
16 uuna omeya gadho itaaga tondoka, sho ga ningi iikangwa nolumi talu ga hekelitha.
17 Ihe uupyu ngele we ya, otadhi hengumuka.
18 Omasilu gomilonga otaga uka huka naahwiyaka notaga londo pombanda, sigo ga hulu.
19 Oongamelo tadhi zi kuTema otadhi kongo omeya, aahalithi Aasheba oye na etegameno,
20 ihe etegameno lyawo otali kanene momilonga dha pwina.
21 Ngame otii mu tala mwa fa omilonga ndhoka, omu wete oshiponga shandje nomwa haluka.
22 Inandi mu pula, mu pe ndje sha, ine indila nando osha shomeliko lyeni.
23 Inandi mu pula, mu hupithe ndje miikaha yomutondi nenge yakayamukulwa.
24 Eewa ano, nongekii ndje, mu lombwele ndje omapuko gandje. Otandi ngungumana e tandi mu pulakene.
25 Oohapu dhi na uukwashili otadhi tompola sha. Ihe ne oompata dheni otadhi kwatha shike?
26 Otamu dhiladhila okupopya kwandje ombepo yowala tayi pepe, ihe omolwashike tamu yamukula omuntu a kanitha omukumo?
27 Otamu umbile oothigwa iihogololitho notamu iyambapaleke neliko lyakuume keni.
28 Ngashingeyi talii ndje nawa. Itandi mu fundju.
29 Omwa ya kokule unene. Etheni uugoyoki. Inamu pangula ndje. Inandi puka.
30 Elaka lyandje oli na uukolokoshi? Eiyuvo lyandje itali vulu ando okuulukila ndje epuko?
1 Omuntu ita kala nani mekondjo, manga e li kombanda yevi? Omasiku ge inaga fa ganakukutwa miilonga?
2 Ongaashi omupika a hala momuzile nongomulongelindjambi ta tegelele ofuto ye.
3 Oomwedhi noomwedhi ine mona kutya ote kala ndi na omwenyo. Omausiku otage etele ndje uuwehame.
4 Ngele tandi ka lala, otandi kala nokudhiladhila, otandi ka penduka tuu? Uusiku otau ningi uule, notandi igalula nda hala ku she.
5 Olutu lwandje otalu lika po komazinyo nokolwaga, notandi tumbu omathina.
6 Omasiku gandje otaga tondoka ge vule okweenda kwonane mokuhondja. Otaga hulu po pwaa na etegameno.
7 Kalunga, dhimbulukwa kutya okukalamwenyo kwandje okwa fa omufudho; omasiku gandje gelago oga hula po.
8 Ou wete ndje ngashingeyi, ihe ito ka mona ndje we. Oto ka konga ndje, ihe ongohela nda li po.
9 Ngaashi oshikogo tashi halakana notashi yi, osho naangoka ta kulukile muusi, ita galuka mo we.
10 Ita ka galukila we kaandjawo; ota dhimbiwa kwaayehe mboka ya li ye mu shi.
11 Onkee ano itandi mwena! Otandi popi muuwehame wandje notandi yemata muululume womwenyo gwandje.
12 Kalunga, omolwashike wa langelitha ndje? Oto tala kutya ngame efuta, nenge oshilikama shamo?
13 Sho te dhiladhila, ontala yandje otayi loolola ndje, ombete yandje otayi yakula ndje uuwehame.
14 Oto halutha ndje noondjodhi noto tilitha ndje nomamoniko.
15 Nandi hogolole po okupondwa e te si, shi vule okukala iipongo yowala.
16 Onda vulwa okukala nomwenyo; itandi kala nagwo sigo aluhe. Ethii ndje, okukala nomwenyo itaku kwatha sha.
17 Omuntu omushike, sho ho mu ningi nawa noho mu sile oshimpwiyu?
18 Oho mu konakona ongula kehe, noto mu yeleke ethimbo kehe.
19 Uunake to etha okutongolola ndje, ito etha nando, ndi fudhe po?
20 Ngele nani onda yona kungoye, onda yona shike, ngoye omutonateli gwaantu? Omolwashike wa ningi ndje omushekwa? Onda ningi omutenge kungoye?
21 Ito dhimi po omayono gandje e to theta po oondjo dhandje? Oshoka ethimbo olya thika, notandi ka lala mbala mombila; oto ka konga ndje, ihe kandi po we.
1 Bildad Omushuak okwa yamukula ngeyi.
2 Sigo uunake to popi oohapu dha tya ngaaka? Oohapu dhoye odhi li mombepo yuuntsa.
3 Kalunga ota goyokitha tuu uuyuuki? Omunankondoawike ita vulu okugoyokitha oshili.
4 Aamwoye sho ya yono kuKalunga, okwe ya geelele eyono lyawo.
5 Konga Kalunga nomwenyo aguhe e to galikana Omunankondoawike.
6 Ngele ngoye omuyelele nomuyuuki, nena ota thikama e ku kwathe note ku galulile aanegumbo yoye.
7 Etameko lyoye olya li eshona, ihe onakuyiwa yoye otayi ka yambekwa.
8 Pula utale omapipi gonale, noto ka tseya shoka oohekulu ya koneke.
9 Oshoka tse opo twa valwa ohela nokatu shi po sha; omasiku getu kombanda yevi oga fa omuzizimba.
10 Itaye ku pukulula noku ku longa? Itaye ku hololele shoka shi li moontulo dhawo?
11 Omanenge otaga mene tuu pokuma pwaa na edhiya? Oombungu otadhi tsapuka mpoka pwaa na omeya?
12 Omanga dhi li mokukoka, inaadhi tetwa manga, otadhi ganya mbala dhi vule omwiidhi.
13 Shika otashi yeleke mboka haa dhimbwa Kalunga, osho wo etegameno lyaakaanakalunga tali kana, uuna Kalunga a dhimbiwa.
14 Shoka yi inekela itashi kwatha sha; shoka yi itula osha fa egumbo lyewiiwili.
15 Ngele oto egamene koondali dhewiiwili, ito vulu okuthikama noito vulu okwiikwatelela ko.
16 Aakaanakalunga oya fa oshimeno sha tsikwa pooha dhomeya nohashi mono etango. Otashi taandeleke omidhi dhasho akuhe.
17 Omidhi dhasho otadhi idhingile komamanya notadhi ikwatelele ko.
18 Ihe uuna tashi vudhwa mo, nena kape na ngoka ta tseya mpo sha li.
19 Otashi kukuta mbala, nopeha lyasho otapu mene shilwe.
20 Osha yela kutya Kalunga ite ekelehi omukeenashipo nenge a kwathe omuyoni.
21 Ote ke ku nyanyudha, noto ka yola.
22 Aatondi yoye ote ke ya sitha ohoni, nomagumbo gaalunde otaga ka teka po.
1 Job okwa yamukula ngeyi:
2 Eeno, onda tseya kutya shika oshoshili. Ihe nakukasa ota wapa ngiini okukala omuyuuki koshipala shaKalunga?
3 Kaku na omuntu ta vulu okuludhika naKalunga noku mu yamukula. Ita vulu okuyamukula nando epulo lye limwe lyomomapulo eyuvi.
4 Kalunga oye omunandunge, oku na oonkondo dha shiga ko; kaku na omuntu ta vulu oku mu kondjitha.
5 Oondundu ote dhi pungulula inaadhi shi tseya nomokugeya kwe ote dhi hanagula po.
6 Ota tumu omakakamo gevi, notage li shikashika, nota telaganitha oongudhi dhalyo.
7 Ota lombwele etango lyaa minikile we nota luudhike oonyothi uusiku.
8 Oye a alele ko egulu noye te ende kombanda yomakuthikuthi mefuta.
9 Oye a shiti Oshothi, Okalimbanombwa, Omanyuku nEkaladhidhi.
10 Oha longo iinyengandunge tayi nyenge oondunge dhetu, niikumitha itaayi wapa okuyalulwa.
11 Kalunga ngele te ende pungame, itandi mu mono, ngele ta piti po, itandi mu dhimbulula.
12 Kalunga ngele ta kutha sha, olye ta vulu oku mu keelela? Olye ta vulu oku mu pula: “Oto ningi shike?”
13 Kalunga ita shunitha ondjahi ye, naakwathi yaRahab otaye mu tsile oongolo.
14 Otandi vulu ngiini okuludhika naKalunga? Otandi adha peni iitya, tu tompathane naye?
15 Nando ondi kale omuyuuki, itandi vulu oku mu yamukula. Otandi vulu owala okwiindila omutokoli gwandje, a sile ndje ohenda.
16 Nando onde mu ithanene e ta yamukula ndje, natango itandi itaale kutya otu uvu ndje.
17 Ota dhengitha ndje oshikungulu noti indjipaleke iilalo yandje pwaa na etompelo.
18 Ite etha we ndi fudhe po; okwa pe ndje uululume.
19 Ote vulu okuthiminika ngoka e na oonkondo e vule ndje? Ote vulu oku mu fala koompangu? Olye te mu fala ko?
20 Nando ondi kale omuyuuki, okana kandje otaka pe ndje uusama. Nando ondi kale omukeenashipo, otaka tamaneke ndje.
21 Nonando kandi na uusama, kashi shi oshinima shandje. Onda vulwa okukala nomwenyo.
22 Ashihe osha faathana: Kalunga ota dhipaga po omuyuuki nomulunde.
23 Ngele omuyuuki ta adhika keso lyombaadhilila, Kalunga ote mu yolo, sho kee na omukumo.
24 Uuna uuyuni tau yi mepangelo lyaakaanakalunga, aatokolihapu ayehe ote ya posipaleke. Ngele Kalunga ine shi ninga, olye te shi ningi?
25 Omasiku gandje otage endelele ge vule omumatuki; otaga tuka po gaa na nando enyanyu lyasha.
26 Otaga matuka ga fa oowato, noga fa omakodhi taga fegula iihakanwa.
27 Ngele tandi ti kutya otandi ka dhimbwa omayemato gandje, nena ote lundulula oshipala shandje e tandi imemeha.
28 Onda tilithwa kuuwehame, oshoka ondi shi shi kutya Kalunga ita tala ndje omuyuuki.
29 Ngele ngame omunandjo, omolwashike tandi ihepeke?
30 Kaku na othewa tayi yogo po oondjo dhandje, nomutoko itagu yeleke iikaha yandje.
31 Kalunga otu umbile ndje moshilambo shontopo, noonguwo dhandje otadhi si ndje ohoni.
32 Oshoka Kalunga ke shi muntu, opo ndi vule oku mu yamukula nondi tamanane naye moompangu.
33 Kape na nando omuntu gumwe ta vulu okuninga omupanguli pokati ketu, a tokole pokati kandje naKalunga.
34 Olye ta kutha ndje omadhengo gaKalunga, opo gaa haluthe ndje we?
35 Nena ando otandi popi inaandi mu tila, ihe ngashingeyi ite vulu sha.
1 Onda kenyanana okukala nomwenyo. Otandi holola omayemato gandje notandi popi moluululume womwenyo gwandje.
2 Otandi lombwele Kalunga kaa pangule ndje, ihe a lombwele ndje shoka nda yona.
3 Okuhepeka ndje okwe ku opalela tuu? Osho opala tuu okunyema nokweekelahi iilonga yiikaha yoye, manga to pitika oompangela dhaakaanakalunga?
4 Oho tala iinima ngaashi omuntu te yi tala?
5 Omasiku goye oga fa gomuntu, nenge omimvo dhoye odhi thike podhomuntu?
6 Omolwashike to kongo omapuko gandje noto konakona omayono gandje?
7 Ou shi shi kutya kandi na uusama, nokaku na ngoka ta vulu okukutha ndje mo miikaha yoye.
8 Iikaha yoye oyo yu umbinga ndje nonda mewa, ihe ngashingeyi oto hanagula ndje po.
9 Dhimbulukwa kutya owa shiti ndje meloya. Owa hala u shune ndje montsi?
10 Owa tilehi ndje ngaashi omahini nowa kukutike ndje ngaashi ehini.
11 Olutu lwandje owe lu tungitha omasipa noothipa nowe lu zaleke oshipa noontumba.
12 Owa pe ndje omwenyo nowa li u hole ndje e to sile ndje oshimpwiyu.
13 Shika owe shi kaleke momutima gwoye; onda tseya kutya shika osha kala elalakano lyoye okudhenga ndje.
14 Ando onda yonene, ando owa mono ndje, noino etha ndi kale inaandi geelwa.
15 Ngele onda yono, yaye ngame! Nonando kandi na uusama, ite vulu okuyelutha omutse gwandje. Onda sa ohoni nonda pwila muuwehame.
16 Sho te kambadhala okuyeluka, oto hundjunine ndje ngaashi onkoshi noto ulukile ndje oonkondo dhoye.
17 Owe eta po oombangi oompe, dhi tamaneke ndje, nowi indjipalithile ndje ondjahi yoye; oonkondo dhoye otadhi thindi ndje dhaa na oluthuwo.
18 Omolwashike ano wa pititha ndje mo moshivalelo shameme? Ando onda sile mo, manga kaaku na ngo a mona ndje!
19 Oshihwepo ando nda li inee holoka po; ando onda sile moshivalelo shameme nokuukilila mombila.
20 Omasiku gandje kage shi omashona nani? Etha ndje, ndi ikalele, opo ndi nyanyukwe methimbo lya hupu ko.
21 Otandi yi mbala hoka ihaaku galukiwa, koshilongo shomilema, mombwili yeso,
22 molumbogo lwomilema omiluudhe thokothoko, mekolombongo lyomuzizimba gweso nevundakano, moka uuyelele wa faathana nomilema.
1 Sofar Omunaema okwa yamukula ngeyi.
2 Omapulo agehe ngano otaga kala inaaga yamukulwa? Omupopi nguno oku li tuu mondjila?
3 Job, okupopya kwoye kwanathangwa otaku tu tompo, twaa vule oku ku yamukula? Kaku na ngo te ku ganda, ngele to sheke?
4 Oto lombwele Kalunga kutya omaiuvito goye kage na ndjo, ngoye omuyogoki koshipala she.
5 Akutu, onda hala ando Kalunga a popye, e ku tamaneke.
6 Ne ku hololele oshiholekwa shuunongo, oshoka uunongo washili ou li opendji. Kalunga ite ku pula ngaashi wi ilongela.
7 Oto wapa tuu okutseya iiholekwa yaKalunga? Oto vulu tuu okuyeleka uunene wOmunankondoawike?
8 Owo u vule uule wegulu — oshike to vulu okuninga? Owo u vule uule woshaasi — oshike to vulu okutseya?
9 Uunene waKalunga ou vule evi nowa mbwalangandja u vule efuta.
10 Kalunga ngele te ya e te ku edhilile mondholongo nota ithana aantu koompangu, olye ta vulu oku mu keelela?
11 Kalunga aapwidhi oku ya shi; iilonga yawo ayihe iiwinayi ita kala inee yi mona.
12 Momutsemwapwa ota vulu okuninga oondunge, ihe okasino itaka vulu okuninga omuntu.
13 Job, ikonakona nawa momutima gwoye; yeluthila kuye omaako goye.
14 Etha uuwinayi; ino pitika, uukolokoshi u kale megumbo lyoye.
15 Nena oto ka yelutha oshipala shoye waa na ohoni; oto ka kala othika waa na uumbanda.
16 Oto ka dhimbwa uudhigu woye; oto ke u dhimbulukwa owala wa fa omeya ga tondoka po.
17 Omasiku goye otaga ka fa uuyelele moshanga shomutenya, nomilema otadhi ka fa uuyelele wongula.
18 Oto ka kala nawa, u na egameno; to kala wa gamenwa nou na ombili.
19 Oto ka lala, nokapu na ngoka te ku halutha, naantu oyendji otaa ka hala, u kale u ya hole.
20 Omeho gaakaanakalunga otaga ka tsika, nokaye na mpo taa ka holama. Otaa ka tegelela owala okusa.
1 Job okwa yamukula ngeyi.
2 Eeno, osho lela, one aantu, nuunongo otau ka sa pamwe nane!
3 Ngame wo ondi na oondunge nde mu fa. Kandi shi oshikengelela showala. Olye inaa tseya iinima mbino ayihe?
4 Onda yolwa kookuume kandje, nando ngame ohandi indile Kalunga e ta yamukula. Onda yolwa, nando ngame omuyuuki nomukeenashipo!
5 Aalinawa otaa dhini oshiponga, omupya tagu adha ngoka ta gwile po.
6 Aafuthi oye li mombili, naambo haa geyitha Kalunga, oye li nawa; oomboka haa humbata iikalunga miikaha yawo.
7 Pula iinamwenyo, oyo notayi ku nongeke, nenge u pule oondhila dhokegulu.
8 Popya niishitwa yokevi, oyo notayi ku lombwele, nenge oohi dhomefuta otadhi ku yelithile.
9 Ayihe mbika oya tseya kutya Omuwa oye e yi shita.
10 Omwenyo gwiishitwa ayihe ogu li miikaha ye, osho wo omufudho gwaantu ayehe.
11 Ngaashi okutsi ku hole okuuva, osho wo elaka li hole okulola iikulya.
12 Oondunge otadhi monika mokati kaakokele; okukala nomwenyo omule otaku ku etele owino.
13 Kalunga oye oluthithiya lwoondunge noonkondo, oku na uunongo nomayele.
14 Kalunga ngele ta kumuna po, olye ta vulu okutungulula? Ngele ta tula omuntu mondjedhililo, olye te mu mangulula mo?
15 Kalunga ngele ta kankeke omeya, otaku ya oshikukuta, nongele te ga etha, otaga kungulula evi.
16 Kalunga oku na oonkondo noye omusindani aluhe; nakupukithwa nomupukithi ayehe oye li miikaha ye.
17 Aagandjimayele ote ya fala mokusindika, naatokolihapu ote ya goyapaleke.
18 Aakwaniilwa ote ya kutha oonkondo yaa mange we aantu, note ya ningi oonkwatwa.
19 Aayambi ya luwa iinima yawo ote ya fala kiilongo, nota shundula aanankondo.
20 Ota mweneke aayinekelwa nota hulitha po omayele gaakuluntu.
21 Aanenentu ote ya undulile mesithahoni, noonkondo dhaapangeli ote dhi hulitha po.
22 Ota holola puuyelele iinima yomomilema, nomilema ote dhi eta muuyelele.
23 Oti indjipaleke iigwana e te yi hanagula po; ote yi halakanitha noku yi pongeka.
24 Aapangeli yomuuyuni ote ya kutha omayele; ote ya pukithile mombuga mwaa na omapola.
25 Otaa pampadhala momilema mwaa na uuyelele, note ya telaganitha ya fa oonkolwi.
1 Ayihe mbika wa popi, onde yi mona, nomakutsi gandje oge yi uva.
2 Shoka mwa tseya, onde shi tseya wo; kamu vule ndje.
3 Onda hala ndi popye nOmunankondoawike, nonda hala ndi tamanane naKalunga.
4 Otamu gwayeke ndje owala omahoka goombwa komulungu; ne oonganga mwaa na ekwatho.
5 Ando omwa mwenene inaamu popitha ndje, ando omwa ningi aanandunge.
6 Pulakeneni ano omatompelo gandje; ne mu uve iitya yomilungu dhandje.
7 Omwa hala okupopya omapuko medhina lyaKalunga? Omakoto geni otaga kwatha tuu Kalunga?
8 Otamu gamene Kalunga nokupopya iifundja? Otamu yi koompangu peha lye?
9 Otashi ka kala tuu nawa, ngele te mu konakona? Otamu vulu tuu okukotokela Kalunga, ngaashi hamu kotokele aantu?
10 Kalunga ote ke mu pandula tuu, ngele omu na ontondo ya holama?
11 Eadhimo lye itali mu tilitha? Ehalutho lye itali mu kakamitha?
12 Omayeletumbulo geni kage na oshilonga, oga fa owala omutoko. Omatompelo geni otaga halakana ngaashi eloya.
13 Pii ndje olweedhe, ndi popye; shoka tashi adha ndje, nashi ningwe.
14 Omwenyo gwandje otii gu tula tuu pokakangwa? Itandi kambadhala okwiigamena?
15 Kalunga nando ona ukithe ndje egonga, onde mu inekela; otandi ipopile ashike koshipala she.
16 Shika osho ehupitho lyandje, oshoka omukeenakalunga ita kala koshipala she.
17 Ngashingeyi pulakeneni nawa; omakutsi geni naga taambe shoka te popi.
18 Ondi ilongekidha okwiipopila, oshoka onda tseya kutya ondi li moshili.
19 Oku na tuu ngoka ta vulu okupa ndje uusama? Ngele osho, ote mwena e te si.
20 Kalunga, pitikila ndje iinima mbika iyali, nena itandi ke ku holama:
21 Oshikaha shoye shi kaleka kokule nangame; hulitha po okutilitha ndje nomagando goye.
22 Kalunga, ithana ndje notandi ku itaale, nenge u pitike, ndi popye e to yamukula.
23 Oondjo nomayono ano ogendji nde ga ningi? Ulukila ndje oondjo nomayono gandje.
24 Omolwashike to holeke ndje oshipala shoye noto tala ndje omutondi gwoye?
25 Oto tilitha efo tali pepwa kombepo. Oto tidhatidha etutu lyowala.
26 Owa tokolele ndje epangulo elulu nowa taambitha ndje omayono gomuugundjuka wandje.
27 Owa tula oompadhi dhandje meti; oonkatu dhandje adhihe oho dhi tonatele notu ulike mpoka ndi na okulyata.
28 Oshoka omuntu ota pepuka po a fa omuti tagu tukwa nongonguwo tayi lika po.
1 Omuntu a valwa komukiintu omasiku ge omafupi nogu udha uupyakadhi.
2 Ota hapa ongongala nota ganya; okwa fa omuzizimba tagu matuka nota kana po.
3 Omuntu a tya ngawo oto mu tongolola? Oto mu eta koshipala shoye, a pangulwe?
4 Maantu ya nyata otamu zi tuu omuyelele? Itamu zi nando ogumwe!
5 Omasiku gomuntu ogu uthwa nale, omwaalu gwoomwedhi dhe owe gu ngambeka; okwa tendelwa ongamba noita vulu oku yi konda.
6 Onkee ano, kala wa fa waahe mu wete, opo a vululukwe po, sigo a thiki kethimbo lye ongomulongeli gwondjambi.
7 Nomuti wo ogu na etegameno: ngele tagu kewa po, otagu tsapuka ishewe, niitayi yagwo iipe itayi pu po.
8 Nando omidhi dhagwo tadhi kulupile mevi, noshithindi shagwo tashi sile mo,
9 ihe ngele gwa mono omeya, otagu tsapuka ishewe iitayi iipe.
10 Omuntu ota si noke na po we sha; ota fudha mo omufudho nolwa hulu.
11 Ngaashi omeya taga pwine metale, nenge omulonga tagu filala,
12 osho ngeyi omuntu ta lala noita penduka po we. Manga egulu inaali hula po, aantu itaa papudhuka moomposi dhawo.
13 Andola u langeke ndje ashike muusi, u holeke ndje, sigo ondjahi yoye ya kodha. Ando u holeke ndje mo ethimbo lyu uthwa e to ka dhimbulukwa ndje ihe konale.
14 Omuntu ngele okwa si, ota kala ishewe e na omwenyo? Momasiku guudhigu wandje otandi tegelele, sigo emanguluko lyandje lya thiki.
15 Oto ka ithana ndje notandi ku itaale; oto ka yuulukwa omushitwa gwoye.
16 Oto ka tonatela onkatu yandje kehe, noito tala omayono gandje.
17 Omayono gandje oto ga holeke mompunda; oto siikile oondjo dhandje.
18 Ngaashi oondundu tadhi gu, omamanya taga halakana,
19 omeya taga wegula omamanya nekunguluko lyomeya tali fulu po evi, osho to hanagula po etegameno lyomuntu.
20 Oto mu sindi sigo aluhe, nota kana po. Oto shundula oshipala she e to mu tidha po.
21 Oyana ngele taa simanekwa, ite shi tseya, nongele taa dhinwa, ite shi mono.
22 Ota kala e na uuwehame molutu lwe noti ilili ye mwene.
1 Elifas Omuteman okwa yamukula ngeyi:
2 Job, omunamayele ota gandja tuu eyamukulo lyaa na oondunge, nenge otu udhitha ela lye nombepo ompyu yokuuzilo?
3 Ota ningi omaludhi gaa na shilonga, oohapu dhaa na sho tadhi kwatha?
4 Ihe ongoye to hanagula po etilokalunga noto dhini okugalikana Kalunga.
5 Oondjo dhoye otadhi holoka moohapu dhoye; oto landula okupopya kwaaniineya.
6 Okana koye oko take ku pangula, hangame; omilungu dhoye mwene tadhi ku tompo.
7 Ongoye omuvalwa gwotango mokati kaantu? Owa valwa, manga oondundu inaadhi holoka?
8 Owa pulakenene oompangela dhaKalunga? Oto dhiladhila ongoye awike omunandunge?
9 Oshike wa tseya, tse kaatu shi shi? Omatseho ogeni po u na kaatu ga na?
10 Aakulupe naasamane yoomvi oye li nomokati ketu, aasamane aakuluntu nokuho.
11 Omahekeleko gaKalunga inage ku gwana, noohapu oontalala we dhi lombwelwa?
12 Omolwashike omwenyo gwoye tagu ku thigi po, nomeho goye taga pakuma?
13 Owa geela Kalunga, sho to pititha mo oohapu dha tya ngawo mokana koye?
14 Omuntu a wape ngiini okukala omuyelele, omuvalwa komukiintu a ninge omuyuuki?
15 Ngele nomaayapuki ye ini inekela mo nando ogumwe, negulu lyo lyene inali yela momeho ge,
16 omuntu haye ngoka a nyata nokwa yonuka, ta nu uulunde ngaashi omeya?
17 Job, pulakena ndje, ndi ku pukulule, nandi ku lombwele shoka nda mona.
18 Aanamayele oya hokolola yo inaa holeka shoka ye shi uva koohekulu.
19 Oyo ayeke ya li mo moshilongo; mokati kawo kamwa li omukwiilongo.
20 Omukeenakalunga oku li muudhigu omasiku agehe; uuwehame owe mu tegelela.
21 Oonkugo nomahalutho otage ya momakutsi ge; uuna a fa a fudha po, omuhanaguli ote mu matukile.
22 Ita vulu okuhunuka mo momilema; oku uthilwa a se kegongamwele.
23 Ota telagana ta kongo iipalutha ye ina tseya esiku lyoshiponga li li popepi.
24 Uuwehame nuumbanda otau mu tilitha, otau mu adha ngaashi ehomono tali akele omukwaniilwa.
25 Okwa ganeke omaako ge, a kondjithe Kalunga, nokwi inenepekele Omunankondoawike.
26 Otu ukilile Kalunga e na othingo ya taganana nehuuyanza lya kola.
27 Oshipala she okwe shi gwayeka omagadhi; omatundji ge oga pama,
28 ihe ota ka kala miilando ya yonuka po nomomagumbo gaa na aantu; oga ethiwa ga ningi oondumba dhomamanya.
29 Oye ita yambapala we; uuyamba we itau kalelele, nomaliko ge itaga ihana we noshilongo.
30 Ita zi mo we momilema; omulilo otagu fike iitutuma ye, nomufudho gwomokana kaKalunga otagu mu tidha po.
31 Inamu mu etha i ifundjaleke netalaleko lyaa na oshilonga, oshoka ita ka likola sha.
32 Ota ka lemba, manga e li metifa lyokukala kwe; ota ka ganya ngaashi oshitayi ye ita penduka po we.
33 Ota ka fa omuviinu tagu yagumuka omagongwa, nokwa fa omuolivi tagu yagumuka oonsheno.
34 Aakaanakalunga kaye na oluvalo, nomulilo otagu lungunitha po omatsali gaaholi yoombumbo.
35 Otaa kokitha uupyakadhi e taa vala omalwa; otaa kokitha omakotokelo meni lyawo.
1 Job okwa yamukula ngeyi:
2 Iinima ngaambika onde yi uva nale; ne amuhe aahekeleki mwaa na shilonga.
3 Oohapu dheni odhi na tuu ehulilo? Oshike tashi mu endelelitha okuyamukula?
4 Ngame wo ote vulu okupopya nde mu fa, ando one mwa li ngame, ote vulu okupopya, ndi mu tompe noku mu pukapukila omutse gwandje.
5 Oohapu dhandje otadhi vulu oku mu laadhipika; etalaleko tali zi mokana kandje, otali vulu okufudhitha.
6 Ihe ngele tandi popi, uuwehame wandje itau pepelele, nongele tandi mwena, itau pu po.
7 Kalunga, owa hepeke ndje unene; oluvalo lwandje owe lu hanagula po.
8 Owa kwata ndje nowa ningi ombangi yokutamaneka ndje; onda ningi omasipa gowala, naantu otaa tala kutya ongame omuyoni.
9 Kalunga ota kondjitha ndje, ota tuula ndje mondjahi ye noti ikokotele ndje omayego; ota tongolola ndje nda fa omutondi gwe.
10 Aantu oya makulila ndje omakana nokuninga ndje oshipwedhela. Otaa dhenge ndje koompanda ya dhina ndje, otaa imanga okapandi, ya hangene ndje.
11 Kalunga okwa gandja ndje miikaha yaakolokoshi noku umbile ndje momake gaakaanakalunga.
12 Onda li ndi na ombili, ihe okwa nyanyagula ndje; okwa kwata ndje e ta hata ndje po. Okwa ningi ndje oshishonekwa she.
13 Oondjumbeta dhe odha kunduka ndje, niikuti ye oya yaha ndje miitiyanathigo pwaa na henda, nonyango yandje oya tikile pevi.
14 Okwa matukile ndje omathimbo nomathimbo nokwa ponokele ndje ongomukwiita omuhahu.
15 Mokusa oluhodhi ondi izaleke ehahi, nesimano lyandje onde li fumvike montsi.
16 Oshipala shandje osha pembe kokulila, nomulema omuluudhe ogwa kunduka oombafu dhandje,
17 ihe natango tuu iikaha yandje oya kwatunuka kondjahi, nomagalikano gandje omayelele.
18 Evi, ino siikila uuwinayi mbo nda ningilwa! Ino etha okulila kwandje ku mwenekwe!
19 Tala, ombangi yandje oyi li megulu; omupopili gwandje oku li muule wokombanda.
20 Ookuume kandje otaa yolo ndje. Omahodhi gandje otaga tondokele kuKalunga.
21 Ando pu kale ngoka ta galikanene ndje kuKalunga, ngaashi omuntu ta galikanene kuume ke!
22 Oku na owala oomvula dhimwe, ndi ye molweendo itaandi galuka we.
1 Omwenyo gwandje ogwa tekauka, nomasiku gandje oga fupipikwa; eso otali tegelele ndje.
2 Aasheki yandje otaa kunduka ndje; omeho gandje otaga tala uutondwe wawo.
3 Kalunga, ninga omupopili gwandje. Olye we ta popile ndje?
4 Omadhiladhilo gawo oga patwa, kaye na omayele, onkee itaa ka sindana.
5 Omuntu ngoka ta popi nayi kuume ke omolwokufutwa, omeho goyana otaga ka tsika mo.
6 Kalunga okwa ningi ndje omunyanwa gwashaa ngoka, omuntu gwokuhiyilwa omayeye moshipala.
7 Omeho gandje oga tsiyala koluhodhi; olutu lwandje olwa fa omuzizimba.
8 Aayuuki otaye shi kuminwa; aakaanashipo otaa thikamene aakaanakalunga.
9 Ihe nando ongeyi, aayuuki otaa dhiginine oshili yawo, naamboka ye na iikaha ya yela, otaa tsikile nomukumo.
10 Eewa, galukeni, ileni amuhe! Mokati keni kandi wete mo omunandunge.
11 Omasiku gandje oga pita po, oompangela dhandje odha hulithwa po nosho wo ondjuulukwe yandje.
12 Aantu mbaka otaa faathanitha uusiku nomutenya, sho taa ti: “Momilema otamu zi uuyelele.”
13 Ngele ote tegelele muusi omo mu kale maandjetu, nenge te yala ontala yandje momilema,
14 ngele ote lombwele eolelo kutya ongoye tate, nomazinyo otandi ga ithana meme nomumwamemekadhona,
15 nena ando etegameno lyandje oli li we peni? Olye te ke li mona?
16 Otali ka ya pamwe nangame mombila? Otatu ka ningina pamwe nalyo mevi?
1 Bildad Omushuak okwa yamukula ngeyi:
2 Job, uunake to hulitha okupopya? Ninga omunandunge, nena otatu wapa okupopya.
3 Omolwashike to tu tala twa fa iimuna, notwa ningi aagoya momeho goye?
4 Mondjahi oto inyanyagula mwene. Evi otali ka mbugalekwa molwondjahi yoye, nenge oondundu otadhi lundululwa po pomahala gadho?
5 Eeno, uuyelele womukeenakalunga otau dhimi po, noonte dhe itadhi yele we.
6 Olamba yometsali lye otayi dhimi, onyeka ye mu minikila otayi dhimwa po.
7 Oonkatu dhe nando odha li dha kola, otadhi ka pegeya; uunongo we mwene otau mu thigi po.
8 Oompadhi dhe otadhi yi momwigo e ta yulwa.
9 Omwigo otagu mu kwata koshithi, netavu otali mu yulu lye mu nkenena.
10 Elulo olye mu tegelwa mevi, nekelo olye mu fulilwa mepola.
11 Ehalutho otali tilitha akuhe, notali mu landula shaa mpoka ta yi.
12 Omupya ogwe mu ekamena okana, noshiponga oshi li popepi naye.
13 Omukithi omudhigu otagu li ko iilyo ye kolutu notagu tokola ko omagulu nomaako.
14 Ota kuthwa metsali lye e li inekela nota falwa komukwaniilwa gwomatilitho.
15 Omulilo itagu thigi mo sha metsali lye, osulufuli otayi fike po onganda ye.
16 Omidhi dhe otadhi sile mevi, niitayi ye otayi kukutile kombanda.
17 Ita dhimbulukiwa we kombanda yevi, nesimano lye otali hulu po.
18 Ota tidhwa muuyelele, a ye momilema, nota kondwa mo mokati kaantu.
19 Ke na oshitutuma nenge oluvalo mokati koyaandjawo, megumbo lye itamu hupu nando omuntu e na omwenyo.
20 Omupya gwe ogwa kumitha aayuninginino, naauzilo oya tila taa kakama.
21 Eeno, shika osho tashi adha aakaanakalunga, ndjika oyo onkalo yaamboka kaaye shi Kalunga.
1 Sigo uunake tamu ehameke ndje notamu alula ndje noohapu?
2
3 Omwa hindi ndje lwomulongo nomwa ponokele ndje mwaa na nando ohoni.
4 Ngele oshoshili kutya onda puka, nena omapuko gandje oshinima shandje mwene.
5 Omwa hala mu hololele ndje einenepeko lyeni, ne mu tompe ndje molwaasho ndi ishonopeka.
6 Tseyeni kutya Kalunga oye a ningi ngaaka, hane! Oye a tula ndje melulo.
7 Nonando onda kugu nda ti: “Onda lundilwa!” Ine mona eyamukulo. Nando nda pula ekwatho, inandi mona eutho.
8 Kalunga okwa thitike ondjila yandje, ite vulu we okutsikila ko; epola lyandje okwe li siikile omilema.
9 Okwa hula ndje esimano neliko, noshishani shandje okwe shi kutha ko komutse.
10 Okwa tuulagula ndje e tandi hulu po; etegameno lyandje okwe li vudha mo ngaashi omuti.
11 Ondjahi ye oya hwamene ndje, nokwa yalulile ndje mokati kaatondi ye.
12 Aakwiita ye otaa ponokele ndje; otaa tungile ndje ekondeka notaa yungu oontanda dha kunduka etsali lyandje.
13 Okwa kutha ndje aamwameme; aashiwikile yandje okwe ya ningi yaa shi ndje we.
14 Aakwetu oye li ndje kokule, ookuume kandje oya dhimbwa ndje.
15 Aatalelipo megumbo lyandje naamboka haa yakula ndje, kaye shi ndje we; onda ningi omukwiilongo momeho gawo.
16 Nando ndi ithane omupiya gwandje, iti itaale, nando ndi mu indile neifupipiko, ita pe ndje.
17 Onda tondwa nokomukulukadhi gwandje, onda ningi iikungitha mokati kaamwameme.
18 Nuumatyona otau nyonkele ndje; sho te yambuka po, otau sheke ndje.
19 Ookuume kandje lela oya tonda ndje, aaholike yandje oya pilukila ndje.
20 Oshipa shandje osha kakatela komasipa; oontumba dhokoshama odho adhike ndi na.
21 Silii ndje ohenda, silii ndje ohenda, ookuume kandje! Oshikaha shaKalunga osha dhenge ndje.
22 Omolwashike tamu lambalala ndje mwa fa one Kalunga? Inamu vulwa ndje nani?
23 Akutu, oohapu dhandje ando odha li dha nyolwa, dha shangelwa mondhingambo,
24 nenge dha negelwa memanya nopena yosheela, nena otadhi kala sigo aluhe.
25 Ondi shi shi kutya Omukulili gwandje oku na omwenyo; pehulilo ota ka thikama kevi.
26 Olutu lwandje nando nalu yonagulwe po, nonatango tuu otandi ka mona Kalunga ndi li molutu.
27 Ngame otandi ke mu mona nomeho gandje mwene, hagulwe. Omwenyo gwandje ogu na ngiini ondjuulukwe onene!
28 Ngele tamu ti: “Otatu mu ehameke nomukalo guni? Uudhigu oye mwene e u iyetele.”
29 Onkee ano, tileni egongamwele, oshoka otali holola ondjahi yaKalunga, ne mu tseye kutya oku na omupanguli.
1 Sofar Omunaema okwa yamukula ngeyi:
2 Job, omatedho gandje owe ga piyaganeke, ite vulu okukala inaandi yamukula.
3 Ondu uvu oohapu dhomusheko dha sitha ndje ohoni, ihe pamayele gandje ote tseya, nkene te yamukula.
4 Owe shi tseya okuza konale, okuza omuntu sho a shitilwa muuyuni,
5 kutya enyanyu lyomulunde nolyomukeenakalunga olyo efupi.
6 Nando uuntsa we u tse kegulu, nomutse gwe gu adhe kiikogo,
7 ota kana po a fa onyata ye. Mboka ya li haye mu mono, otaa ka tya: “Oku li peni ano?”
8 Ota tuka po ngondjodhi noita monika we, ota wilola po ongemoniko lyuusiku.
9 Omeho ge mu mwene, itage mu mono we, nopehala mpo a li, ita monika po we.
10 Oyana otaa ka panga uukuume naafupi notaa ka shunithila ooyene eliko lyawo ndyo e ya yugile.
11 Oonkondo dhomuugundjuka we ndho dha li momasipa ge, otadhi ka ya mevi pamwe naye.
12 Uulunde ou na omulyo mokana ke, note u holeke kohi yelaka lye.
13 Ina hala oku u etha, ote u kaleke mokana ke.
14 Ihe iikulya mbika otayi shituka onyango mela lye, notayi ningi uuzigo wontoka meni lye.
15 Eliko e li lile, ote li kungu mo, Kalunga ote li mu kungitha mo.
16 Okwa fa a lya uuzigo wontoka; omayego gefu otage mu dhipaga.
17 Ita ka mona omilonga noompompolonga tadhi kunguluka omahini nomagadhi goonyushi.
18 Ota gandja po ashihe shoka a longele nuudhigu, noita ka nyanyukilwa iihohela yiipindi ye.
19 Oshoka okwa hepeke oohepele nokwe dhi ethele moluhepo e ta lala omagumbo inee ga tunga.
20 Uufukedhi we itau lotele; eliko lye itali mu kwatha sha.
21 Olwiho lwe inalu mu thigila po nando osha, onkee uuyamba we itau kalelele.
22 Metifa lyuuyamba we omupya otagu mu kwata; oluhepo olululu otalu mu matukile.
23 Uuna a hokwa okuudhitha ela lye, Kalunga ote mu tumine ondjahi ye ompyu note mu lokithile ongeyo ye.
24 Nando na fadhuke po iikondjitho yosheela, omivi otadhi mu yaha.
25 Oti itona iikuti, eholongo tali tayima otali tyuula mehuli lye; ehaluko otali mu kwata.
26 Omilema thokothoko otadhi langele emona lye, nomulilo itaagu dhimi otagu mu lungunitha po, nakehe shoka sha kala megumbo lye, otashi pi po.
27 Egulu otali holola omayono ge puuyelele, nevi otali mu tsile ondumbo.
28 Efundja otali ka kungulula po egumbo lye; uuyamba we otau yi nomeya mesiku lyondjahi yaKalunga.
29 Shika osho oshipewa shomukeenakalunga, uuthiga e u tulilwa po kuKalunga.
1 Pulakeneni nawa oohapu dhandje; nadhi mu hekeleke.
2
3 Idhidhimikilii ndje manga tandi popi, nongele nda hulitha, shekeni ihe.
4 Sho te lili, ote lilile omuntu? Itashi vulika ndi idhidhimike?
5 Talii ndje e tamu kumwa; ikwateni komilungu.
6 Ngele tandi shi dhiladhila, otashi halutha ndje; otandi ningi omahwilili.
7 Omolwashike aakaanakalunga taa ethiwa ya kale nomwenyo, taa li nawa notaa ningi aanankondo?
8 Otaa kokitha oyana ye li puyo, naatekulu yawo oye li momeho gawo.
9 Momagumbo gawo omu na ombili, kamu na uumbanda. Ondhimbo yaKalunga itayi ya adha.
10 Oontsezi dhiimuna yawo odhi na ombuto ombwanawa; oonzinzi dhawo otadhi vala nawa.
11 Otaa pititha mo oyana ngaashi oonzi, nuuhanona wawo otau nyanyukwa.
12 Otaa imbi taa dhenge oontunda nokuhika uuharpa, notaa nyanyukilwa ehiko lyomankuma.
13 Otaa kala ethimbo alihe ye na elago, notaa yi mombila ye na ombili.
14 Aakaanakalunga otaa lombwele Kalunga a ze po puyo; inaa hala okutseya ehalo lye.
15 Otaa ti: “Omunankondoawike olye, opo tu mu longele? Otashi tu kwatha shike oku mu galikana?”
16 Ihe itaa mono elago koonkondo dhawo yene, onkee omadhiladhilo gawo naga kale ndje kokule.
17 Olungapi uuyelele waakaanakalunga tau dhimwa po, nolungapi oshiponga tashi ya akele? Kalunga ote ya tumine iiponga mondjahi ye?
18 Otaa fe iiyagaya tayi yi ombepo nongetutu tali pepwa po kokambiya?
19 Omwa hala Kalunga a geele omunona molwoondjo dhahe. Ihe hasho, Kalunga na geele omuyoni ye mwene, opo e shi tseye.
20 Omeho ge naga tale omupya gwe mwene, noye mwene e na okunwa ondjahi yOmunankondoawike.
21 Oshoka oku na shike nasho, uuna ta thigi po yaandjawo, uuna omasiku ge taga ti kehulilo?
22 Oku na tuu omuntu ta longo Kalunga oondunge, oongoka ta pangula naamboka yomegulu?
23 Omuntu gumwe ota si e na oonkondo dha gwana, e li nawa noku na ombili.
24 Oondjupa dhe odhu udha omahini, nomasipa ge oge na omongo ogwindji.
25 Manga omuntu mukwawo ta si e na uululume momutima ye ina mona nando uuwanawa washa.
26 Ayehe otaa si e taa fumvikwa mevi, omazinyo notage ya li po.
27 Taleni, onda tseya shoka tamu dhiladhila, sho tamu kotokele ndje niineya yeni.
28 Otamu pula: “Egumbo lyomunenentu oli li peni, eha moka hamu longelwa uukolokoshi?”
29 Omwa pulile mbo taa ende momapola? Omwa tseya omahokololo ngoka taye ge mu lombwele?
30 Omukeenakalunga ota ka hupa tuu mesiku lyegeelo, ota ka hunuka mo tuu mesiku lyondjahi?
31 Olye te mu ulukile omikalo dhe, nolye te mu geelele shoka a longo?
32 Ota falwa kombila, aalangeli notaa tonatele ombila ye.
33 Evi lyomolusilu otali mu siikile nombili; aantu ayehe otaye mu landulile mombila, ongaashi oyendji ye mu tetekelele mo.
34 Omahekeleko geni itaga kwatha ndje sha. Omayamukulo geni ogu udha iifundja.
1 Omuntu ota vulu tuu okwoopalela Kalunga? Omunandunge ote mu kwatha tuu sha?
2
3 Ngele ngoye omuyuuki, otashi kwatha shike Omunankondoawike? Ota likola po shike, oondjila dhoye ngele kadhi na oshipo?
4 Kalunga ite ku geele molwaasho ho mu tila, noite ku fala koompangu molwaasho ho mu simaneke.
5 Omayono goye ogo ga lundu pombanda. Uukolokoshi woye owo waa na ehulilo.
6 Mumwanyoko owe mu pula oongunga pwaa na etompelo nowa hula omunankayi omizalo dhe.
7 Omusinota owe mu tindile omeya, nomusindjala ino mu pa iikulya,
8 nando ongoye omulumentu omuyamba, omunedhina moshilongo.
9 Omuselekadhi owe mu tidha po iikaha yowala, nowa keelele oothigwa dhi kwathwe.
10 Onkee oomwigo odhe ku tegelwa nodhe ku kunduka; otadhi ku halutha ombaadhilila.
11 Omolwaasho ku na omilema waa dhi wete nefundja lyomeya tali ku siikile.
12 Kalunga ke li megulu lyokombandambanda? Tala noonyothi, nkene dhi li muuleeleka.
13 Ngoye oto pula: “Kalunga ota tseya shike? Okwa siikilwa kiikogo iiluudhe — ota vulu ngiini oku tu tokola?
14 Iikogo otayi mu siikile, opo kee tu mone, note ende momunkulo gweyalelo.”
15 Owa hala okukala momadhiladhilo gaakaanakalunga?
16 Oya kuthwa po, manga ethimbo lyawo inaali thika, nomakankameno gawo oga kungululwa po kefundja.
17 Oya lombwele Kalunga ya ti: “Za po putse! Omunankondoawike ote tu ningi ngiini?”
18 Oye tuu ngoka a udhitha omagumbo gawo niinima iiwanawa, ihe omatedho gawo ogi iyukila.
19 Aayuuki otaa mono eyonuuko lyawo e taa nyanyukwa, naakaanashipo otaa ya nyonkele taa ti:
20 “Eeno, aatondi yetu ya halakanithwa po, nuuyamba wawo wa fikwa po komulilo.”
21 Igandja kuKalunga, opo u kale u na ombili naye, nena oto ka kala u li nawa.
22 Taamba omapukululo ge e to pungula oohapu dhe momutima gwoye.
23 Ngele oto galukile kOmunankondoawike nongele oto etha uulunde u kombwe mo maandjeni, nena oto ka hepuluka.
24 Ngele oto ekelehi oshingoli shoye montsi, oshingolilela shokuOfir to shi umbile molusilu lu li mokati koondundu,
25 nena Omunankondoawike ota ningi oshingoli shoye, oshisiliveli shoye sha hogololwa.
26 Okuza mpoka oto ka panda Omunankondoawike noto ka taalelitha oshipala shoye kuKalunga.
27 Uuna to galikana, ote ku yamukula, noto longo ngaashi wu uvaneke.
28 Omatokolo goye otaga ka gwanithwa, nuuyelele otau minikile mondjila yoye.
29 Aantu ngele taa kuthwa kiipundi, nena oto ti: “Na simanekwe!” Kalunga nota hupitha aadhinwa.
30 Kalunga ota hupitha omukeenashipo. Eeno, nangoye wo ote ku hupitha, ngele iilonga yoye oyu uka.
1 Ngame natango ote nyenyeta note lili omahodhi omapyu; oshikaha shaKalunga osha thinda ndje.
2
3 Ando onda li nda tseya mpoka tandi mu adha, ando otandi yi kuye.
4 Otandi vulu okutamanana koshipala she, ndi popye omatompelo gandje.
5 Onda hala okutseya kutya ota yamukula ndje ngiini, nokuuva shoka ta lombwele ndje.
6 Ota yi ndje moshipala noonkondo dhe oonene? Aawe! Ota pulakene ndje nawa.
7 Ongame omuyuuki, ote vulu okutamanana naye notandi manguluka, ndaa thikame we komeho gomupanguli gwandje.
8 Ihe ngele tandi ka konga kuuzilo, Kalunga itandi mu adha ko; nongele tandi uka kuuninginino, itandi mu mono ko.
9 Uuna e li miilonga kuumbangalantu, itandi mu mono; uuna ta shuna kuumbugantu, ite mono nando okuwilola kwe.
10 Kalunga okwa tseya okukala kwandje, ngele ta yeleke ndje, ota mono ndje nda yela nda fa oshingoli.
11 Onda landula ondjila ndjoka a halela ndje, itandi zi mo nande.
12 Itandi gamuka ko nando kiipango ye, oohapu dhe onde dhi pungula shi vule iikulya yandje yesiku kehe.
13 Kalunga oku li ngaashi a kala shito, olye ta vulu oku mu tamaneka? Oye ta longo shoka a hala.
14 Ota tsakanitha shoka nda tokolelwa. Shika oshinima shimwe shomomadhiladhilo ge.
15 Omolwasho tandi tila oshipala she; ngele tandi mu dhiladhila, otandi kakama.
16 Kalunga okwa kutha ndje omukumo; Omunankondoawike okwe etele ndje uudhigu.
17 Ihe ngame itandi mwenekwa komilema nokuuluudhe thokothoko wa siikila ndje.
1 Omolwashike Omunankondoawike itu utha esiku, uuna ta pangula? Omolwashike mboka ye mu tseya, itaye li mono?
2 Aantu otaa nenepeke oongamba dhomapya gawo, notaa litha iimuna ye yi yaka.
3 Otaa hingi po okasino kothigwa, notaa kwata ongombe yomuselekadhi ombambyona.
4 Otaa pukitha oohepele, notaa holamitha aafupi ayehe yomoshilongo.
5 Oohepele odha fa oongolo dhomombuga, otadhi yi dhi ka konge iipalutha; ombuga otayi palutha oyana.
6 Otadhi pupula iipalutha momapya, notadhi toonona omakukila miitsambe yaakaanakalunga.
7 Otadhi lala omudhu, dha pumbwa oonguwo; kadhi na omakumbyatha gokwiisiikila dhaa se uutalala.
8 Otadhi ende dha hipa komvula yepoola; sho dha pumbwa egameno, otadhi ondama pekololo.
9 Aakaanakalunga ohaa piki othigwa ohanana, nokahanona kohepele ohaye ka kwata po, opo ongunga yi futwe.
10 Ihe oohepele otadhi ende nomalutu gowala, dhaa na oonguwo; otadhi humbata iilya, ihe itadhi yi li.
11 Otadhi yenge omagadhi gooholivi, otadhi kolo omandjembele, ihe odha sa enota.
12 Omakemo goonakudhipagwa otaga uvika moshilando, ihe Kalunga ita pulakene nando omagalikano gawo.
13 Oku na aantu ya tsa ondumbo nuuyelele; inaye u koneka noitaye u landula.
14 Omudhipagi ota meneka, manga eluwa inaali tenda, nota dhipaga ohepele; nomuusiku ota yaka.
15 Aahondeli otaa tonata momilema; otaa dhiladhila kutya kape na ngoka e ya wete notaa siikile iipala yawo.
16 Aafuthi otaa teya omagumbo uusiku, ihe omutenya otaa ipatele meni; inaa hala okukala muuyelele.
17 Oshoka oyo ayehe ohaa endele kumwe nomilema, nomilema itadhi ya tilitha.
18 Aakaanakalunga otaa yiwa nayo komeya gefundja, omapya gawo oga thingwa, nokape na ngo ta longo miitsambe yomuviinu.
19 Ngaashi uupyu nuukukutu tau kutha po uututo, osho omulunde ta kana po.
20 Nayina ote mu dhimbwa; omazinyo otage mu li po; nota hanagulwa po a fa omuti gwa teka po.
21 Oshoka oha yugu omukiintu ihaa vala, noiha si omuselekadhi ohenda.
22 Ihe Kalunga aanankondo ote ya tidha po; nando naa kale ya kola, itaa kala ye na egameno.
23 Nando Kalunga te ya etha e taa kala ya fa taa vululukwa, omeho ge oga tonatela oondjila dhawo.
24 Otaa kala ya simana okathimbo, ihe ohaluka kaye po we. Otaa fupipikwa notaa gongelwa ya fa yakwawo, notaa teywa ya fa iilya.
25 Oku na tuu ngo ta vulu okutinda kutya hasho? Oku na tuu ngo ta vulu okutya, ote popi iifundja.
1 Bildad Omushuak okwa yamukula ngeyi.
2 Epangelo nesimano nali pewe Kalunga; oshilongo shomegulu ote shi kaleke nombili.
3 Omatangakwiita ge otaga wapa tuu okuyalulwa? Olye ngo itaa minikilwa kuuyelele waKalunga?
4 Omuntu ota vulu tuu okukala omuyuuki koshipala shaKalunga? Nakuvalwa komuntu ota vulu tuu okukala omuyelele?
5 Tala, nomwedhi inagu yela, noonyothi kadhi na uuyelele momeho ge.
6 Unene tuu omuntu oye ezinyo, omuna gwomuntu okapuka kowala.
1 Owa kwatha ngiini omunkundi! Owa koleke tuu omaako ga loloka?
2
3 Omayele ogeni po wa nongeke omusama? Uunongo ou thike peni we u holola?
4 Olye e ku popitha oohapu ndhika? Owa hwamekwa kombepo yini po, u dhi tye?
5 Aasi oye li muumbanda uunene, ayehe mboka ye li mevi kohi yomeya.
6 Uusi ou li puuyelele koshipala shaKalunga, noshaasi oshi li pontundulu.
7 Kalunga ota yalaleke eyalelo lyokuumbangalantu, nota tula evi powalawala.
8 Ota kaleke omeya miikogo, niikogo itayi tuuka kuudhigu wago.
9 Omwedhi gwa toka ote gu kwidhidhike, note gu siikilitha iikogo.
10 Ota tende omusinda kombanda yomeya nota yoolola uuyelele momilema.
11 Oongundhi dheyalelo otadhi tenguka notadhi tila kegando lye.
12 Koonkondo dhe ota tukulutha efuta, nokomayele ge ota teyagula po evovo Rahab.
13 Omufudho gwe otagu yeleke eyalelo; iikaha ye otayi dhipaga eninangamba lya kotoka.
14 Ayihe mbika otayi ulike oonkondo dhe; oyo enongono lyowala momakutsi getu. Olye tu uvu ko uunene woonkondo dhaKalunga?
1 Otandi uvaneke kuKalunga omunamwenyo nOmunankondoawike, ngoka inaa zimina uuyuuki wandje nokwa pe ndje uululu.
2
3 Manga ndi na omwenyo,
4 omilunga dhandje itadhi ka popya uukolokoshi, nelaka lyandje itali ka tumbula iifundja.
5 Itandi ka zimina okupopya kweni kutya oku li mondjila, sigo okusa itandi ki idhimbika uuyuuki wandje.
6 Itandi ke etha uushili wandje; eiyuvo lyandje olya yela.
7 Aatondi yandje naa talwe ya fa aakolokoshi, naaniita nangame ya fe iipululu.
8 Aakaanakalunga oye na etegameno lyashike ngele taa hulu po, uuna Kalunga te ya kutha omwenyo?
9 Kalunga ota ka uva tuu okulila kwawo, uuna oshiponga tashi ya adha?
10 Otaa ka nyanyukilwa tuu Omunankondoawike? Otaa ka galikana tuu Kalunga omasiku agehe?
11 Otandi mu nongeke, mu tseye oonkondo dhaKalunga, oondjila dhOmunankondoawike itandi dhi holeke.
12 Taleni, ngaashi mwe shi imonena! Omolwashike tamu ihepeke?
13 Mpaka ope na omupya, Kalunga e gu nunina aakaanakalunga, shika oshipewa shaakolokoshi sha zi kOmunankondoawike.
14 Oyana nando oyendji, oyu uthilwa okusila miita, noluvalo lwawo italu ka kala lu na iikulya ya gwana.
15 Elega otali kutha po mboka ya hupu po, naaselekadhi yawo itaa ke ya lila.
16 Aakaanakalunga nando naa indumbile oshisiliveli shi thike pontsi yevi noonguwo dhaa shi kuyalulwa, itashi kwatha sha.
17 Omuyuuki ote dhi zala po, nomunashili ota ka kutha po oshisiliveli shawo.
18 Omagumbo gawo oga fa owala omawiiwili, ongaashi omatsali gaalangeli yepya.
19 Otaa ka lala aayamba, ihe sho taa penduka, uuyamba wawo wa kana po.
20 Uumbanda otau ya siikile ngaashi efundja; ombepo yoshikungulu otayi yi nayo uusiku.
21 Ombepo yokuuzilo otayi ya pepe po notayi ya umbu mo momagumbo gawo.
22 Otayi ya ndanga po pwaa na ohenda, manga taa kambadhala okuya ontuku.
23 Ombepo otayi ya dhenge moshipala notayi ya tilitha noonkondo dhayo.
1 Oku na oomina dhoshisiliveli, nomahala mpoka oshingoli hashi yelithwa.
2 Oshiyela otashi fulwa mevi, noshikushu otashi hemunwa tashi zi moshimanya.
3 Aantu otaa entamene momilema, otaa konakona muule womevi notaa kongo oshimanya muuleeleka.
4 Otaa fulu iikolo yoomina mevi, kokule naantu mboka ye li kombanda; pokuma ihaapu endiwa kaantu, opo mpoka taa fulu ye li muuwike.
5 Mevi omo hamu zi iikulya, ihe meni lyalyo otamu lunduluka mwa fa mu na omulilo.
6 Omamanya gosafire ohaga zi mevi; ontsi yalyo oyi na oshingoli.
7 Nondhila yekodhi inayi tseya ondjila ndjo yu uka koomina, nomeho gembiimbili inage yi mona.
8 Iiyamakuti iinuuntsa inayi yi lamba, nonime inayi enda mo.
9 Aantu otaa panda omamanya omakukutukukutu, otaa dhikula mo oondundu nomidhi dhadho.
10 Otaa hoko omikala moondundu; omeho gawo oge wete emanya kehe li na ondilo.
11 Otaa itsu oonza dhomilonga, notaa holola puuyelele iinima ya holekwa.
12 Ihe uunongo otau adhika peni? Openi tatu ilongo oondunge?
13 Omuntu itu uvu ko ondilo yawo; itau adhika maantu yokombanda yevi.
14 Muule womohi kau mo, nefuta kali u na.
15 Itau vulu okulandwa noshingolilela, ondando yawo oyi vule ndjoka yoshisiliveli.
16 Itau vulu okulandwa noshingoli shokuOfir, nenge nomamanya gondilo gaoniks nosafire.
17 Ondilo yawo oyi vule yoshingoli nenge yemanya lyokristali, noitau landakanithwa nuuwe woshingoli.
18 Ondilo yoonyoka noyojaspes itayi adha mo. Ondando yuunongo oyi vule ndjoka yorubini.
19 Itau yelekwa nondilo yotopasi yokuEtiopia; itau vulu okulandwa noshingolielela.
20 Ihe uunongo otau zi peni ano? Oondunge otatu dhi adha peni?
21 Owa holekwa aantu ayehe yokombanda yevi, nowa holekwa oondhila dhokegulu.
22 Eso noshaasi oya ti, oye wu uvu omufofoto.
23 Kalunga oye awike a tseya ondjila yoku wu adha; oye e shi mpoka wa kala.
24 Oshoka Kalunga ota mono sigo okooha dhuuyuni, nota tala ayiheyihe yi li kohi yegulu.
25 Okwa pe ombepo oonkondo dhayo nokwa yeleke uule womeya.
26 Omvula kehe okwe yi ningile eutho, noombadhi ondjila yadho.
27 Nena okwa tala uunongo e te wu yeleke; okwe wu koleke ko e te wu zimine.
28 Okwa lombwele aantu a ti: “Okutila Kalunga okwo uunongo, nokwiidhilika uuwinayi okwo oondunge.”
1 Job okwa tameke ishewe okupopya.
2 Akutu, ando onda li ngaashi momasiku ngeyaka, Kalunga sho a li ta gamene ndje!
3 Kalunga okwa kala pungame nokwa minikile ndje nuuyelele we, nomomilema onde endithwa kuye.
4 Eeno, omasiku ngeyaka onda li ndi na uukuume naKalunga, nokwa yambeke egumbo lyandje.
5 Omunankondoawike okwa li pamwe nangame, naamwandje oya li ya kunduka ndje.
6 Onda li ndi na omukando ogwindji, noondundu odha kungulukithile ndje omagadhi gooholivi.
7 Uuna nda yi koshigongi shaakuluntu yoshilando nonda kuutumba mpo hapu gongala aantu,
8 aagundjuka ngele ya mono ndje, oya yapukile ndje, naasamane aakulupe oya simaneke ndje ya thikama.
9 Aanenentu oye etha okupopya noya mutike omakana gawo.
10 Omawi goomvalekele oga thiti, nomalaka gawo oga kakatele koondaathelo.
11 Kehe ngoka u uvu ndje te popi, okwa popile ndje muuwanawa, naambo ya mono ndje, oya hokolola ndje.
12 Oshoka onda hupitha oohepele tadhi kugile ndje ekwatho, noothigwa ndhoka dhaa na omupopili.
13 Omuntu e li muudhigu uunene, okwa pandula ndje; onda nyanyudha omwenyo gwomuselekadhi.
14 Onda longo pashili nopauyuuki nonde u dhiginine ngaashi omuzalo gwandje.
15 Onda li omeho gaaposi nomagulu giilema.
16 Onda ningi he yaakwanaluhepo nonda gama komukwiilongo e li muudhigu.
17 Onda teyagula po oonkondo dhaakolokoshi nonde ya yugu iihakanwa yawo.
18 Onda dhiladhila, otandi ka kala nomwenyo omule notandi ka sila megumbo lyandje.
19 Onda li nda fa omuti gu na omidhi dha adha komeya niitayi yagwo oya gwilwa komume.
20 Kehe omuntu okwa li ha simaneke ndje, niikondjitho yandje oya li ya kola.
21 Aantu oya pulakene ndje nokumwena noya taamba omayele ngoka nde ya pe.
22 Ngele nda popi, inaa tya we sha; oohapu dhandje oye dhi taamba nawa.
23 Oya tegelele ndje ngaashi omunepya a tegelela omvula yontemuna.
24 Onde ya uvile ohenda, sho ya tyololoka; enyanyu moshipala shandje olye ya tsu omukumo.
25 Onde ya kwatele komeho nonda kuutumba nda fa omuwiliki gwawo. Onda li nda fa omukwaniilwa mokati komatangakwiita ge nonda li omuhekeleki gwoonakulila.
1 Ihe ngashingeyi nokuli aagundjuka otaa sheke ndje. Oohe onde ya sheshitha okukala pamwe noombwa dhandje taa litha iimuna.
2 Oonkondo dhiikaha yawo inadhi kwatha ndje sha; inaa longela ndje sha.
3 Oya li oohepele naasindjala; uusiku oye endagula taa kongo iikulya.
4 Oya li omafo giihwa, noombimbo odha li iikulya yawo.
5 Oya li ya kondwa mo maandjawo; aantu oye ya kugile onkugo ya fa aafuthi.
6 Oya thiminikwa okukala momakololo nomomakwena kohi yomamanya.
7 Oya kugu mokati kiihwa noyi ingundu mumwe ye li mongoya.
8 Oya li aagoya naadhinwa noya tidhwa mo moshilongo.
9 Ngashingeyi oyana otaa sheke ndje miiyimbo; onda ningi omuhapo mokati kawo.
10 Otaa nyanyala ndje e taa kala ndje kokule; inaa tila okuhiyila ndje omayeye moshipala.
11 Ngashingeyi sho Kalunga a nkundipaleke ndje nokwa fupipike ndje, oya ponokele ndje mondjahi onene.
12 Aaponokeli otaa zi ndje kolulyo; oya tegele ndje omwigo, opo ndi lyate mo.
13 Oya fulile ndje omakelo ga kunduka ndje, ya hala okuyona ndje po pwaa na ekeelelo lyasha.
14 Sho nda kuthwa eshigo lyandje, oya mbolokotele ndje.
15 Uumbanda owa adha ndje; esimano lyandje olya kanene mombepo, nelago lyandje olya pepuka po lya fa iikogo.
16 Ngashingeyi ondi li pokusa; omasiku guudhigu oga adha ndje.
17 Muusiku omasipa gandje otaga tende; uuwehame wandje otau tana noitau fudha po nande.
18 Kalunga ota kama ndje noonkondo dhe oonene e ta pondo ndje.
19 Oku umbile ndje menono nonda ningi nda fa ontsi nomutoko.
20 Kalunga, otandi ku kugile ekwatho, ihe ito yamukula; otandi ku galikana, ihe ngoye ito tala ndje.
21 Ongoye wa pilukile ndje; nowa ponokele ndje noshikaha shoye shoonkondo.
22 Owa akula ndje po nonda yi ombepo, nowa dhenge ndje nepepo lyoshikungulu.
23 Ondi shi shi, ou ukitha ndje muusi, omehala ndyoka lyu uthilwa aantu ayehe.
24 Nakutekapo oku na owala okumwena, naangoka e li moshiponga, ita vulu andola okukugila ekwatho?
25 Inandi lila molwaamboka ya kala miiponga, nenge omwenyo gwandje inagu ehamenwa oohepele?
26 Onda tegelele uuwanawa, ihe uuwinayi wa uluka ko; onda tegelele uuyelele, ihe omilema dha mbunzuka ko.
27 Mela lyandje otamu kulukuta mwaa na oluthuwo. Omasiku guuwehame ga akukile ndje.
28 Otandi ende momilema thokothoko ndaa na uuyelele; otandi thikama mokati kaantu, ndi pule ekwatho.
29 Onda ningi mukwawo gwoombandje nakuume koompo.
30 Oshipa shandje osha luudha, sha ninga omakoko notashi natuka ko kolutu; olutu lwandje otalu pi kolwiidhi.
31 Okuhika okahumba kwandje okwa shituka oosa, nokuhika ohiya kwandje okwa ningi oonkali.
1 Onda ningi etokolo lya kola, ndaa tale omukadhona nde mu haluka.
2 Oshoka omuntu ota pewa shike kuKalunga, Omunankondoawike ota futu ngiini iilonga ye?
3 Eyonuuko otali adha omukeenakalunga, noshiponga oongoka ha longo uukolokoshi.
4 Oondjila dhandje ke dhi wete ando nokutseya ashihe shoka te longo?
5 Inandi hala okuya miifundja nenge ndi ye mokukotokela.
6 Kalunga na koneke ndje nawa nota ka mona kutya nani ngame kandi na uusama.
7 Ngele nda puka mo mondjila nda hilwa kokahalu komeho nenge iikaha yandje ya nyatekwa kuulunde,
8 nena shoka nda kuna, nashi liwe po kuyalwe, niilya yandje nayi vudhwe mo.
9 Ngele onda fuulwa komukiintu gulwe nenge nda li te petapeta poontu dhaashiinda,
10 nena mukadhandje na ninge gwomulumentu gulwe.
11 Shika osho iihunalela, uulunde tau pangulitha omuntu.
12 Osho omulilo gwehanagulo tagu lungunitha po eliko lyandje alihe.
13 Inandi ekelahi omatamaneko gaapiya yandje aamati naakadhona, uuna taa pe ndje uusama.
14 Ngele onde shi ninga, otandi ka ninga ngiini, uuna Kalunga ta adha ndje? Otandi ka tya ngiini, Kalunga ngele ta pangula ndje?
15 Kalunga ngoka a shiti ndje, oye wo e ya shita. Oye awike e tu shitila momala goomeme.
16 Inandi tinda okukwatha oohepele, nomuselekadhi inandi mu thiga po owala.
17 Inandi etha oothigwa dhi ye nondjala, ngame ndi na iikulya.
18 Onde dhi tekula nda fa he okuza muugundjuka wandje, nokokuza kevalo lyandje onda sile aaselekadhi oshimpwiyu.
19 Uuna nda mono omuntu e na onkayi nenge omukwanaluhepo kee na ekumbyatha,
20 onde mu pe oonguwo dha za momafufu goonzi dhandje. Oye nokwa pandula ndje unene.
21 Ngele ando ondi na oohapu nothigwa e tandi popi iifundja mompangu,
22 nena iikaha yandje nayi teke, niipepeti yandje yi dhomoke.
23 Omolwokutila egeelo nuuyelele waKalunga, itandi vulu okuninga ngaaka.
24 Inandi inekela iimaliwa, nenge ndi tale oshingoli sha hogololwa kutya osho egameno lyandje.
25 Inandi itangela uuyamba wandje nakehe shoka sha longwa kiikaha yandje.
26 Inandi galikana etango, sho tali eta oonte dhuuyelele, nenge omwedhi mokutoka kwagwo.
27 Inandi pukithwa nenge ndi hongololwe okusimaneka ayihe mbika.
28 Oshoka okulonga ngeyi okwo oondjo tadhi pangulitha omuntu. Shika ando otashi holola kutya inandi inekela Kalunga.
29 Nando esiku limwe inandi nyanyukilwa oshiponga shaatondi yandje, noinandi shambukilwa uudhigu we ya adha.
30 Inandi popya oohapu tandi ya halele ethingo nenge eso.
31 Ayehe mboka ye li megumbo lyandje, oya tseya kutya kaku na ngoka nde mu panga iikulya.
32 Inandi tokelitha omukwiilongo momapandaanda, oshoka egumbo lyaandjetu olye egulukila aluhe oondjendi.
33 Inandi holeka oondjo dhandje nda fa aantu yalwe; inandi kaleka omayono gandje momutima inaandi ga holola.
34 Inandi tila kutya aantu otaye shi tala ngiini; inandi mwena, ihe onda yi pondje.
35 Oku na tuu omuntu ta pulakene sho te ti? Ngashingeyi otandi nyola eipopilo lyandje; Omunankondoawike na yamukule ndje, nomutamaneki gwandje na nyolele omatompelo ge membo.
36 Otandi ga nateke komapepe gandje notandi ga zala ngaashi oshishani.
37 Ondi na okuhokololela Kalunga ayihe mbyoka nde yi ninga, notandi yi kuye ngaashi komukwaniilwa.
38 Ngele ando onda longele owala epya lyandje inaandi li futila,
39 ando onda lile iipalutha mbyo ya zi mo, ngame tandi etha aalongi yalyo ya se ondjala,
40 nena ando peha lyokumena iilya niishokelya, nali mene oondjoho nomano. Oohapu dhaJob odha hulile mpaka.
1 Molwaasho Job okwa li u uvite kutya ke na oondjo, aalumentu mboka yatatu oye etha oku mu yamukula.
2 Ihe opwe ya gumwe, edhina lye Elihu lyaBarakel, Omubusi gwomezimo lyaRam. Okwa li a geya a mana mo, oshoka Job okwa li ti iningi ye mwene omuyuuki nokwa pe Kalunga uusama.
3 Okwa geele wo ookuume ke yatatu, oshoka oya nyengwa okuyamukula Job noku mu tompa.
4 Ngashingeyi Elihu okwa kala a tegelela, sigo ya hulitha okupopya naJob, oshoka oya li aakuluntu ye mu vule.
5 Ihe sho a mono kutya oya tompwa kuJob yo itaa ti we sha, okwa geye
6 nokwa tameke okupopya. Ngame omunona moomvula, one aakuluntu, onkee nda li nda tila oku mu hololela omadhiladhilo gandje.
7 Onda tala kutya aakuluntu naa popye; aanamimvodhindji naa holole oondunge dhawo.
8 Omuntu oku na omwenyo, ihe ombepo yaKalunga Omunankondoawike oyo tayi gandja oondunge.
9 Uukokele hawo tau ningi omuntu omunandunge, aantu yoomvi hayo ayeke ya tseya shoka shu uka.
10 Onkee ano pulakeneni shoka te ti; pitikii ndje, ndi holole omadhiladhilo gandje.
11 Onda tegelele neidhidhimiko, mu mane okupopya; onda pulakene omayele geni, mu mone oohapu dhu uka.
12 Onda tala nokutongolola, nkene tamu popi, ihe kaku na ngoka a tompele Job uusama we.
13 Otamu vulu tuu okutya, omu na oondunge? Kalunga oye na yamukule Job, oshoka ne omwa nyengwa.
14 Job ka li ta popi nangame, onkee ngame itandi mu yamukula, ngaashi mwe mu yamukula.
15 Ngashingeyi kaye na we sha shokutya, iitya ye ya yi ontuku.
16 Ngame wo ote mwena, sho itaaya popi we, sho yaa na eyamukulo?
17 Ondi na okupopya notandi popi shoka ndi shi shi.
18 Ondi na oohapu odhindji; ondi na ethiminiko meni lyandje.
19 Onda fa ombago yomaviinu tayi hunga nongaashi ompunda ya fulalala yi li pokutopa.
20 Ondi na okupopya, opo ndi fudhe; ondi na okumakula okana, ndi yamukule.
21 Itandi ka ningila omuntu pondhipi; itandi ka thethenga nando olye.
22 Oshoka ando okwa li handi mbembeleke aantu, ando Kalunga okwa li e na okugeela ndje mbala.
1 Ano ngashingeyi, pulakena ndje, Job! Ndhindhilika ashihe shoka te popi.
2 Otandi popi mo ashihe shoka shi li montulo yandje.
3 Oohapu dhandje otadhi zi momutima gwa yela, nomilungu dhandje otadhi popi oshili.
4 Oshoka ombepo yaKalunga oyo ya shiti ndje, nomufudho gwOmunankondoawike ogwo gwa mwenyeke ndje.
5 Job, yamukula ndje, ngele oto shi vulu; ilongekidha, u pe ndje omatompelo goye.
6 Tse nangoye otu thike pamwe koshipala shaKalunga; atuhe otwa kuthwa meloya.
7 Tala, ito pumbwa okutila ndje; oshikaha shandje itashi ku thindile pevi.
8 Ondu uvu to ti:
9 “Kandi na uusama washa; inandi ninga sha sha puka. Onda yela nokandi na oondjo dhasha.
10 Ihe Kalunga ota pe ndje uusama; ota tala ndje nda fa omutondi gwe.
11 Oompadhi dhandje ote dhi tula meti nota tonatele oonkatu dhandje adhihe.”
12 Job, otandi ku lombwele kutya owa puka, oshoka Kalunga omunene e vule omuntu kehe.
13 Omolwashike to ludhike naye, sho itaa yamukula omanyenyeto gaantu?
14 Kalunga nando oku popye e ta popi ishewe, aantu itaye mu pulakene.
15 Ihe muusiku uuna aantu ya kotha, Kalunga ota popi moondjodhi nomomamoniko.
16 Ewi lyaKalunga otali hiti momakutsi gawo notaa haluka komalondodho ge.
17 Kalunga ota galula omuntu momapuko ge, note mu gamuna kuuntsa.
18 Ote mu hupitha, kaa kulukile meso nokaa se kegongamwele.
19 Kalunga oha putudha omuntu noku mu tumina uuvu noku mu dhenga kolutu nuuwehame.
20 Omuvu ota kanitha ehalo lyiikulya, niikulya iitoye ote yi tondo.
21 Olutu lwe otalu pwine, lwaa na eopalo; omasipa ge ga li gaa wetike, sigo otaga kala puuyelele.
22 Eeno, oku li popepi nokusa, oku li pokuuka kuuyuni wokuusi.
23 Ando opu ye omuyengeli gumwe gwomaayengeli yomayuvi, e mu popile noku mu kwatha, a lombwele omuntu shoka shu uka!
24 Molwolukeno omuyengeli ota popi e ta ti: “Mu hupitha, kaa ye meso! Iikulila oyo mbika.”
25 Nena olutu lwe otalu shuna ko; talu kolo e talu nkondopala ishewe.
26 Uuna ta galikana, Kalunga ote mu sile ohenda. Ota kala nokuhedha koshipala shaKalunga a nyanyukwa. Osho Kalunga ta longele omuntu pauyuuki.
27 Omuntu noti imbi montaneho ta ti: “Onda yono, nda goyokitha uuyuuki, ihe inandi pewa ngaashi ndi ilongele.
28 Kalunga okwa hupitha ndje meso; otandi kala ndi na omwenyo nokutala uuyelele we.”
29 Ayihe mbika Kalunga ote yi ningile omuntu pomathimbo nomathimbo.
30 Ote mu hupitha meso, opo a kale muuyelele mokukala kwe.
31 Job, pulakena ndje; ilongelela, opo ndi popye.
32 Ngele ou na sha shokupopya, otandi pulakene; popya owala, onda hala u ipopile.
33 Ngele ito shi ningi, pulakena ndje owala, notandi ku nongeke oondunge.
1 Aalumentu ne aanandunge, pulakenii ndje; ne aanawino, uvii ndje.
2
3 Omu shi iikulya iitoye, uuna mwe yi lolo, ihe kamu shi kuyoolola oohapu dhoondunge moku dhi pulakena.
4 Natu moneni tse yene shoka shu uka; natu ilongeni shoka sho opala.
5 Job okwa ti kutya oye omukeenashipo, ihe Kalunga okwe mu tindile uuthemba we.
6 Ota ti: “Onda talwa omufundja, nando kandi na oondjo. Onda yahwa nda yahekeka kiikuti yaKalunga.”
7 Oku na tuu omuntu a dhina Kalunga a fa Job?
8 Oye e na ehangano naalunde noku na ekwatathano naakaanakalunga.
9 Oye ota ti kutya itashi kwatha omuntu sha okukambadhala o opalele Kalunga.
10 Onkee ano ne aanamayele, pulakenii ndje! Itashi vulika Kalunga a longe uugoyoki. Omunankondoawike ita vulu okulonga uuwinayi.
11 Oha futile aantu shi thike piilonga yawo, note ya galulile shoka yo yene ye shi ilongela.
12 Kalunga iha puka, Omunankondoawike iha goyokitha uuyuuki.
13 Olye e mu pe oonkondo dhokupangela, nolye e mu langeke a tonatele uuyuni auhe?
14 Kalunga ngele ta kutha po ombepo nomufudho,
15 nena kehe omuntu ota si nota shuna montsi yevi.
16 Ngele ou na oondunge, pulakena ndje; pulakena shoka te popi.
17 Ngoka e tonde uuyuuki, ota vulu tuu okuninga omupangeli? Ota vulu tuu okugandja uusama kungoka Omuyuuki nOmunankondo?
18 Kalunga oye ngoka ta geelele aakwaniilwa naanenentu uuhethi nuukolokoshi wawo.
19 Oye iha ningile omalenga pondhipi, ye iha tala aayamba ye vule oohepele, oshoka oyo ayehe oya shitwa kuye.
20 Otaa si ombaadhilila mokati kuusiku. Kalunga ota shikashika aantu, notaa kana po; aanankondo ote ya kombo po pwaa na onkambadhala yasha.
21 Omeho ge oga tonatela oondjenda dhaantu, notaga tala oonkatu dhawo adhihe.
22 Kaku na uuluudhe nenge omilema tadhi vulu okuholeka aalunde.
23 Kalunga ota dhimbulula mbala kutya omuntu omushike, opo e mu uthe.
24 Aanankondo ote ya halakanitha po pwaa na ekonakono lyasha, nopeha lyawo ota langeke po yalwe.
25 Oshoka okwa tseya iilonga yawo; ote ya umbile momilema, notaa yonukile mo.
26 Ote ya geelele uukolokoshi wawo montaneho yaantu ayehe,
27 molwaasho ye mu pilamene noya dhini iipango ye.
28 Oya thininike oohepele e tadhi kugu kuKalunga, oye noku uvu okulila kwadho e te dhi kwatha.
29 Kalunga ngele ta mwena, olye te mu tamaneke? Ngele ta holeke oshipala she, olye te mu mono?
30 Iigwana itayi vulu okuninga sha, opo yi keelele omapangelo omakolokoshi.
31 Job, owa hempulula tuu oondjo dhoye kuKalunga? Owu uvaneka tuu kutya ito yono we?
32 Oto vulu okutya: “Longa ndje shoka ndaa shi shi, nongele onda yona, itandi shi yelekele we?”
33 Kalunga oku na okutokola ando pahalo lyoye, ngele oto tindi okwiitedhulula? Ongoye mwene u na okutokola, hangame. Lombwela ndje ano oshili yoye.
34 Aanandunge naalumentu aanamayele mboka yu uvu ndje, otaa ka lombwela ndje taa ti:
35 “Job ota popi uugoya, oohapu dhe kadhi na omayele.”
36 Sigo oompaka Job okwa popi ngaashi omulumentu omukeenakalunga.
37 Keyono lye okwa gwedhele ko okwaavulika; ota sheke Kalunga montaneho yetu atuhe.
1 Job, inashi opala u tye, ku na oondjo koshipala shaKalunga.
2
3 Ito vulu okupula Kalunga to ti: “Oondjo dhandje odhi na shike nangoye? Otashi kwatha ndje shike, ngele inandi yona?”
4 Onda hala ndi mu yamukule nookuume koye.
5 Ligamena kegulu, u tale iikogo nkene yi li mombanda muule!
6 Ngele to yono, otashi kutha ko tuu sha kuKalunga? Ngele oto yono olwindji, otashi mu etele shike?
7 Ngele ngoye omuyuuki, otashi mu kwatha shike, nenge ota taamba shike moshikaha shoye?
8 Okuyona kwoye otaku etele owala omuntu mukweni oshiponga; uuyuuki woye otau ti sha owala kaantu.
9 Aantu ngele taa ehamekwa, ohaa kugu, ohaa ithana ya hupithwe miikaha yomunankondo.
10 Ihe itaa galukile kuKalunga, Omushiti gwawo, oongoka te ya nyanyudha nomethimbo lyomilema.
11 Itaye ya kuKalunga ngoka he tu longo oondunge tu vule iinamwenyo ayihe yokombanda yevi noondhila dhokegulu.
12 Oyo otaye mu kugile ekwatho, ihe ita yamukula, oshoka oyo aanuuntsa naakolokoshi.
13 Itashi ya kwatha sha okugalikana Kalunga, Omunankondoawike ite ya yamukula.
14 Job, Kalunga ke ku wete aniwa? Tegelela owala neidhidhimiko, uudhigu woye ou li koshipala she.
15 Oto dhiladhila kutya Kalunga ita geele noita landula okuyona kwomuntu.
16 Oto popi oohapu dhaa na omutse nondungu; oto popi nuupu iitya yaa na oondunge dhasha.
1 Idhidhimika natango kashona, u pulakene. Ondi na oshindji shokupopya peha lyaKalunga.
2
3 Ondi na omayele ga za kokule; Omushiti gwandje oye omuyuuki.
4 Kala wa tseya kutya oohapu dhandje kadhi shi dhiifundja; nguka e li koshipala shoye, oye omulumentu omunandunge.
5 Kalunga oye omunankondo, ihe ina dhina aantu; oha dhiginine edhiladhilo lye.
6 Ite etha aalunde ya kale nomwenyo; aathiminikwa ote ya uthile pauyuuki.
7 Ota gamene aayuuki; ote ya kwaniileke pamwe naakwaniilwa e te ya simaneke sigo aluhe.
8 Ihe aantu ngele oya tulwa momalyenge notaa geelelwa omayono gawo,
9 nena Kalunga ote ya ulukile oondjo dhawo nuuntsa wawo.
10 Ote ya pukulula note ya lombwele, ye ethe uuwinayi wawo.
11 Ngele otaa vulika kuKalunga notaye mu longele, omasiku gawo otaga ka hulila melago nomuuwanawa.
12 Ihe ngele itaa pulakene, otaa ka sa kegongamwele notaa hulu po omoluugoya wawo.
13 Aakaanakalunga otaa kaleke ondjahi momitima dhawo, nongele ye li muudhigu, itaa pula Kalunga ekwatho.
14 Otaa si manga aagundjuka, otaa si ya fa aahondeli.
15 Kalunga ota putudha omuntu muuwehame we note mu tonatitha muudhigu we.
16 Kalunga okwe ku kuthile muudhigu e te ku tula pehala lyaa na iiponga nokoshililo shi na iikulya yoludhi kehe.
17 Ihe nena oto geelwa nepangulo tali adha aayoni, egeelo otali ku ukilile.
18 Kotoka, waa fundjalekwe keliko; oombumbo dhaahe ku pukithe.
19 Uuyamba woye noonkambadhala dhoye otadhi ku kwatha tuu, waa ye moshiponga?
20 Ino yuulukwa uusiku mbwiyaka, uuna iigwana tayi ka pangulilwa eso.
21 Tonata, waa ye muulunde mboka wa fa wa hala okuhogolola peha lyokweehamekwa.
22 Kalunga oye a simana noku na oonkondo dha shiga ko. Oye omuputudhi omunene.
23 Kaku na ngoka ta vulu okupa Kalunga omayele nenge a tye, okwa puka.
24 Dhimbulukwa, u mu simanekele iilonga ye; aantu otaye yi tanga momaimbilo.
25 Aantu ayehe oye yi mona, ihe kaku na ngoka e yi uvite ko.
26 Kalunga omunene ngiini! Oondunge dhetu otadhi nyengwa oku mu tseya. Omwaalu gwoomvula dhe itatu vulu oku gu yalula.
27 Kalunga oye ta gongele omata gomeya ngoka taga ningi omvula moonzigi.
28 Iikogo otayi pooka omeya, niihomo otayi ya kaantu ayehe.
29 Olye ta tseya, nkene ta tula ko iikogo kegulu nonkene ta ndunduma muyo?
30 Tala, nkene ta adhimitha oombadhi, nuuleeleka wefuta ote u kaleke momilema.
31 Kalunga ta pangula iigwana, oye ote yi pe wo eloolo lyiikulya.
32 Ota kutha olwaadhi niikaha ye note lu lombwele lu akule.
33 Endundumo lye otali tetekele oshikungulu, niimuna wo oya tseya eholoko lye.
1 Eeno, molwaashika omwenyo gwandje ogwa nuka mo, notagu yi pehala lyagwo.
2 Pulakeneni ewi lyaKalunga, endundumo ndyoka tali zi mokana ke.
3 Ota halakanithile oombadhi kegulu note dhi unzile sigo okooha dhuuyuni.
4 Nena otaku uvika endundumo lyewi lye; oye omukwaniilwa ta ndunduma, noombadhi otadhi shela.
5 Kalunga ota ndunduma pamukalo omukumithi; ota longo iikumitha itaatu vulu oku yi uva ko.
6 Ota lombwele oompawe dhi gwile pevi, nomvula ote yi puukitha.
7 Aashitwa ye ayehe naa tseye iilonga ye. Oye ota mweneke iilonga yaantu.
8 Iiyamakuti otayi hiti momakololo gayo notayi kala momahala gayo.
9 Oshikungulu otashi tukuluka, nombepo otayi zi uutalala.
10 Omufudho gwaKalunga otagu kukutike omeya e taga ningi iikangwa, nomafuta omanene otaga hekele.
11 Iikogo ote yi humbatitha omeya note yi udhitha oombadhi.
12 Kewiliko lye otadhi shela nevi alihe, dhi gwanithe shoka e dhi lombwele.
13 Kalunga ota lokitha omvula, a geele aantu nenge wo a holole ohole ye.
14 Job, pulakena! Ilongelela, ndhindhilika iilongankumwe yaKalunga!
15 Owa tseya kutya Kalunga ote enditha ngiini iikogo, nonkene ta shelitha oombadhi?
16 Owa tseya, nkene iikogo tayi mweluluka kegulu? Mbika oyo iilonga iikumithi yaKalunga.
17 Ngoye oho hepekwa kuupyu, uuna ku na ombepo ya pupyala.
18 Oto vulu tuu okukwatha Kalunga, a yale egulu noku li koleka li fe osheela sha yaminwa?
19 Tu longa shoka tu na okulombwela Kalunga; katu shi wo shoka tu na okupopya.
20 Ngame ite vulu okupopya naKalunga; omolwashike ndi na oku mu pa ompito, a yone ndje po.
21 Aantu itaa vulu okutongolola etango; uuyelele walyo otau togo omeho gawo, uuna egulu lya yela sheke.
22 Eadhimo enene otali monika kuumbangalantu, nuuyelele waKalunga otau tu tilitha.
23 Omunankondoawike otatu nyengwa oku mu adha; oye omuyuuki nomunashili mokukalathana kwe naantu.
24 Onkee ano aantu naye mu simaneke, oshoka ita hokwa aantu mboka yi ishi oondunge.
1 Nena Omuwa okwa yamukula Job moshikungulu.
2 Ongoye lye to pilaaleke omayele gandje noohapu dhaa na oondunge?
3 Ilongekidha ngaashi omulumentu, u yamukule omapulo gandje.
4 Owa li peni, sho nda shiti uuyuni? Lombwela ndje, ngele ou na ontseyo yasha.
5 Olye a tokola uunene wawo? Olye e u yeleke nondjelekongodhi?
6 Evi olya thikamekwa po koshike? Olye a dhike omakankameno galyo?
7 Esiku ndiyaka oonyothi dhongula odhi imbi, naayengeli oya ligola kenyanyu.
8 Olye e edhile po iiyelo yefuta, uuna omeya ga pimpuka mo mela lyayina?
9 Ongame nda siikile efuta niikogo nonde li gonyene momilema omiluudhe.
10 Onde li ningile oongamba nonde li kaleke handiya yomiyelo dha patekeka.
11 Onde li lombwele nda ti: “Opo to hulile mpa! Omakuthikuthi goye opo taga hulile mpa.”
12 Job, mokukalamwenyo kwoye owa lombwelele uusiku u she?
13 Owa vulile okulombwela eluwa li tende nokutukulutha mo aalunde momaholameno gawo?
14 Uuyelele wetango otau minikile iikulundundu nomasilu gevi ngaashi omagonyoto moonguwo nenge omandhindhiliko moshihotekitho.
15 Aalunde otaa togwa kuuyelele walyo notau ya keelele kiilonga yuukolokoshi.
16 Owa yile sigo okoonza dhefuta nenge u adhe sigo okondaandelo yalyo?
17 Owu ulukilwa omiyelo dhokuusi nenge u entamene momilema omiluudhe thokothoko?
18 Owa tseya uuyuni mpo u thike? Lombwela ndje, ngele owa tseya ayihe mbika.
19 Ondjila yokuya kaandjawo yuuyelele ou yi shi, nenge kaandjawo yomilema owa tseya ko?
20 Oto vulu tuu okweenditha uuyelele nokugalula omilema?
21 Eeno, oto shi vulu, oshoka ngoye omuntu gwonale, noomvula dhoye odhindjidhindji.
22 Owe enda tuu maandjawo yuutalala, nenge u tale mompungulilo yoompawe?
23 Mbika onde yi pungulile omathimbo guudhigu, oongoka goontamanana nogiita.
24 Owa talela po ehala mpo etango hali piti, naampo ombepo yokuuzilo hayi ziilile?
25 Oku na tuu ngo a vulu okupalela omvula oompompolonga nenge okuwilika omityalakata?
26 Oku na tuu omuntu a lokithile omvula moshilongo shaa na aantu, nenge mombuga yowalawala?
27 Olye ta vulu okututika ombuga nomalondo nokumenithila mo omwiidhi omutalala?
28 Omvula oyi na he, olye a gwitha omume?
29 Olye yina yiikangwa noyombambi?
30 Omeya otaga kukuta ga fa emanya notaga hekele kombanda yefuta.
31 Omanyuku oto vulu oku ga mangela kumwe? Oto vulu okumangulula Okalimbanombwa?
32 Oto vulu okuholokitha po Ekaladhidhi pomathimbo galyo nokweenditha Hungilila noyana?
33 Oompango dhomewangandjo ou dhi shi, nenge oto vulu oku dhi longitha kombanda yevi?
34 Iikogo otayi vulika tuu kelombwelo lyoye, e tayi tameke okuloka?
35 Oto vulu okulombwela oombadhi dhi adhime? Dhi tye ando: “Otwa longo, ngaashi we tu lombwele.”
36 Olye a pe iikogo oondunge, newangandjo olye e li nongeke uunongo?
37 Olye e na oondunge dha gwana okuyalula iikogo? Olye ta pimpi iiyuma yokegulu, yi pooke omvula?
38 Omvula nge ya loko, evi otali mbandele.
39 Oto vulu tuu okukwatela oonime iihakanwa yadho, nenge u kutithe oonime oongundjuka,
40 ngele tadhi holama momakololo, nenge tadhi lala dha langela moomvugo dhadho?
41 Olye ha palutha omadhilakola, uuna taga tuka ga sa ondjala, nuuna uumwana tau ithana ndje notau pula ndje iikulya?
1 Oto tseya, uuna uupundja tau valwa? Owa li to entamene ooholongo tadhi vala?
2 Oho yalula oomwedhi dhuusimba wadho? Ou shi, uuna tadhi ka vala?
3 Ohadhi tsu enyonti e tadhi vala; uuwehame woshitheta notau kana po.
4 Uunimwena wadho otau kolo notau kokele melundu; opo ihe otau yi noitau galuka we.
5 Olye a piitha mo ongolo yomokuti, yi ka nape, nolye e yi mangulula mo moomango?
6 Onde yi pa ombuga yi kale mo, nomatotha yi hupile mo.
7 Otayi yi ontuku einyengo lyaantu moshilando, yo inayi hala okuninga onani.
8 Otayi tala uunapelo wayo koondundu notayi kongo omwiidhi omutalala.
9 Ompugulu otayi zimine tuu, yi ninge omukalele gwoye, notayi pitika, yi kale moshigunda shoye uusiku?
10 Oto vulu tuu oku yi kutila koshipululo, nenge oku yi helelitha epya lyoye?
11 Oto yi inekele molwoonkondo dhayo, noto yi tegelele yi longe po iilonga yoye iidhigu?
12 Oto yi tegelele yi ku tutile iilya, yi kuthe iilya yoye kolupale?
13 Omawawa gompo ohaga papama nawa, ihe itayi vulu okutuka ngaashi endoko.
14 Ompo ohayi vugile omayi gayo momvugo, opo ga pupyalekwe kehekevi.
15 Ohayi dhimbwa kutya oompadhi otadhi vulu oku ga lyata, niiyamakuti oku ga nyanyagula.
16 Otayi ningile uumpogona wayo onyanya, wa fa waa shi wayo; kayi na ko nasha, ngele iilonga yayo tayi ningi osima yowala.
17 Oshoka ngame Kalunga inandi yi pa oondunge; onde yi panga uunongo.
18 Ihe uuna tayi yalaleke omawawa, yi matuke, ohayi yolo onkambe nomukayili.
19 Onkambe ongoye we yi pa oonkondo, nenge ongoye we yi zaleka omulenge kothingo?
20 Ongoye ho yi nukitha muule, nohayi tilitha aantu, ngele tayi pembe?
21 Otayi palagula pevi yu uvite uuntsa, notayi uluma okuuka kolugodhi.
22 Kayi na uumbanda washa, negonga itali yi shunitha lwanima.
23 Ombalukutu otayi kolokota pombunda yayo, egonga nomwele otagu tayima.
24 Oya lungundja ya hala okukutha kolupadhi; itayi kankama, enkuma ngele lya hikwa.
25 Enkuma ngele tali hiki, otayi hehema. Ezimba lyiita otayi li uvile kokule, eigidho lyoondjayi dhiita nonkugo yolugodhi.
26 Ongoye wa longo mbiimbili okutuka, uuna ta yalaleke omawawa ge u uka lwokuumbugantu?
27 Okelombwelo lyoye ontsa tayi tungile oshihandhila shayo kondungu yondundu?
28 Otayi tungile egumbo lyayo koondundu oondeendeka, nokoondungu dhoondundu epopilongulu lyayo.
29 Oko nkoka tayi lengalenga notayi mono iikulya yayo.
30 Kokuma nkoka ku na omudhimba, oko haku gongala oontsa, nuuntsagona otau li ombinzi.
1 Job, owa tamaneke Kalunga Omunankondoawike. Owa hulile mpono nenge oto yamukula?
2
3 Omuwa, onda popi oohapu dhuugoya. Otandi ikwata komulungu.
4
5 Oshoka onda popi naashoka nda li ndaa na okupopya.
6 Nena Omuwa okwa popitha ishewe Job moshikungulu.
7 Thikama wu ukilila ngaashi omulumentu, u yamukule omapulo gandje.
8 Owa tamaneke ndje kutya kandi na uuyuuki; owa pe ndje uusama e to iningi omuyuuki.
9 Ou na oonkondo dhi thike pundhoka dhandje? Ewi lyoye otali vulu okundunduma ngaashi lyandje?
10 Ngele osho, zala nduno uuyelele neadhimo, oonkondo nesimano.
11 Aantu mboka ye na uuntsa, ya poolela ondjahi yoye e to ya shundula.
12 Eeno, ya tala e to ya shonopeke; hanagula po sheke aakaanakalunga.
13 Ya fumvika mevi ayehe; ya pandekela muuyuni wokuusi.
14 Nena otandi ka zimina kutya oonkondo dhoye odho dhe ku pe esindano.
15 Tala evukule; ongame nde li shiti, ngaashi nde ku shiti wo. Ohali li omwiidhi lya fa ongombe,
16 ihe oli na oonkondo oonene molutu nomoontumba dhalyo.
17 Omushila gwalyo otagu tekateka gwa fa omusedeli; oothipa noonto dhalyo odha kola nawa.
18 Omasipa galyo oga kola ngaashi oshikushu, nomagulu galyo ongaashi iitenda.
19 Evukule olyo oshinamwenyo oshikumithi shi vule ayihe! Omushiti gwalyo oye awike e li sinde.
20 Oondundu ohadhi li menithile iipalutha, niiyamakuti ayihe otayi dhana popepi nalyo.
21 Otali kothele kohi yomano notali holama mokati komanenge gomomulonga.
22 Omano otage li ningile omuzile, nomiti dhopomulonga otadhi li kundukidha.
23 Ihali tila efundja, ngele tali li adha; omulonga Jordan sho tagu kunguluka, itali inyenge.
24 Olye ta vulu oku li manga komeho noku li kwata? Olye ta wapa oku li kwata nondjolo meyulu?
1 Oto vulu tuu okuyula eninangamba Leviatan nondjolo, nenge u mange elaka lyalyo nongodhi?
2 Oto vulu tuu oku li tula ongodhi meyulu, nenge u ulule olupanda lwalyo nolungona?
3 Otali kala tali ku indile, u li sile ohenda? Otali ku pula noohapu oontalala?
4 Otamu uvathana tuu nalyo e tali zimine, li ninge omupika gwoye sigo aluhe?
5 Oto li dhanitha tuu, ngaashi ho dhanitha ondhila, nenge u li ninge kuume kaakadhona yaandjeni?
6 Aayuli yoohi otaa vulu oku li halitha? Aahalithi otaa vulu oku li dhipaga noku li landitha po?
7 Oshipa shalyo oto shi ulula nolungona, nenge omutse gwalyo nolukupa?
8 Ngele to li gumu noshikaha shoye, oto dhimbulula uuhahu walyo noito shi yelekele we.
9 Shaa ngoka ta mono Leviatan, ota tyololoka e ti ihata po.
10 Ngele lya hindwa, otali geye; kaku na ngoka ta vulu oku li ya moshipala.
11 Olye ta vulu oku li kondjitha e ta kala e na omwenyo? Kombanda yevi kaku na nando ogumwe ta vulu oku shi ninga.
12 Onda hala okuhokolola omagulu galyo, uunene noonkondo dhalyo.
13 Olye ta vulu okuulula omukoya gwalyo? Olye ta hedha kulyo noshitomo?
14 Olye ta yelekele okumakula okana kwalyo? Omayego galyo omatilithi.
15 Ombunda yalyo oyi na iikokonyoto ya londathana ya ninga iiyalo.
16 Kehe oshiyalo osha londa koshikwawo, nokape na nando ombululu.
17 Oya tulwa kumwe nawa, nokaku na ngo te yi kutha kumwe.
18 Ngele tali shemita, otali shela uuyelele; omeho galyo oga fa etango tali piti.
19 Mokana kalyo otamu zi omalaka gomulilo noohandje.
20 Olwithi otalu tsina momayulu galyo, ngaashi ombiga tayi yaya, ya hohelithwa iihenguti.
21 Omufudho gwalyo otagu temitha omulilo, nomalaka gomulilo otaga lukumuka mokana kalyo.
22 Othingo yalyo oyi na oonkondo; ayehe mboka taye li tsakaneke, otaa haluka.
23 Oontumba dholutu lwalyo odha pama; odha kola noitadhi inyenge.
24 Omutima gwalyo ogwa kolonda gwa fa emanya, nomukukutu ngaashi emanya lyoshini.
25 Uuna tali yambuka po, aanankondo otaa kakama; otaa tilithwa kokwiiyumba kwalyo.
26 Egongamwele itali li ulula; osho wo egonga, omwele nenge olukupa
27 Oshiyela kulyo oshihenguti showala, noshikushu ombolo yowala.
28 Iikuti itayi li fadhukitha po; oku li umba nomamanya itaku ti sha.
29 Ondhimbo kulyo oshipipili, notali yolo, ngele tali umbwa negonga.
30 Oshipa shela lyalyo oshi na iipakosolwa ya tsa; otali sindolola omisinda lya fa oshileyi shi li montopo.
31 Otali vongagula efuta omeya e taga fe taga fuluka, notali li pindjaleke, ngaashi ombiga tayi yaya.
32 Omunyengo gwalyo otagu adhima, nomeya otaga tutumike ondutu ontokele.
33 Kombanda yevi kaku na oshinamwenyo she li fa; olyo oshiyamakuti ihaashi tila sha.
34 Otali tala nondhino iinamwenyo ayihe iinuuntsa; olyo omukwaniilwa gwiilikama ayihe.
1 Job okwa yamukula Omuwa.
2 Omuwa, onda tseya kutya ayihe oto yi vulu; kaku na shoka tashi ku nyenge.
3 Owa pula ndje, ngele ote vulu tuu okugoyokitha uunongo woye, ngame sho ndaa na oondunge. Onda popi iinima ndaa yi shi, iikumitha iinene tayi nyenge omayele gandje.
4 Owa lombwele ndje, ndi ku pulakene, sho to popi, nowa pula ndje e te yamukula.
5 Nale onda li nde ku uvu omufofoto, ihe ngashingeyi ondi ku wete nomeho gandje mwene.
6 Onkee onda sa ohoni molwaayihe mbyoka nde yi popi, notandi itedhulula nokukuutumba montsi nomomutoko.
7 Omuwa sho a mana okulombwela Job iinima mbika, okwa lombwele Elifas Omuteman a ti: “Otandi ku geele, osho wo ookuume koye yaali, oshoka inamu popila ndje muuwanawa. Inamu popya oshili, ngaashi omuntu gwandje Job e shi ningi.
8 Ngashingeyi kutheni oongombe heyali noonzi oondumentu heyali, mu dhi fale kuJob. Dhi yambeni omalungunithondjambo molweni yene. Omuntu gwandje Job ne mu galikanene, ongame notandi uvu omaindilo ge e tandi mu dhimine po uugoya weni. Inamu popila ndje moshili, ngaashi omuntu gwandje Job a ningi.”
9 Osho ngaaka Elifas Omuteman, Bildad Omushuak naSofar Omunaema ya ningi, ngaashi Omuwa e ya lombwele. Omuwa nokwa uvu omagalikano gaJob.
10 Job sho a galikanene ookuume ke, Omuwa okwe mu yambapaleke ishewe nokwa ndambula uuyamba we mokuyeleka naambwiyaka wotango.
11 Aamwayina yaJob aalumentu naakiintu nookuume ke oye ya ye mu talele po nokudhana oshituthi megumbo lye. Oye mu hupulutha noye mu hekeleke omoluudhigu auhe mboka a li e u pewa kOmuwa. Kehe gumwe okwa pe Job omagano giimaliwa nokalinga koshingoli.
12 Omuwa okwa yambeke ohugunina yaJob shi vulithe nale. Job okwa li e na oonzi omayuvi omulongo nagane, oongamelo omayuvi gahamano, oongombe omayuvi gaali nuusino eyuvi.
13 Okwa li e na oyana aamati yaheyali naakadhona yatatu.
14 Omukadhona omutango okwe mu luku Jemima, omutiyali oKesia nomutitatu oKeren-Happuk.
15 Moshilongo ashihe inamu monika aakiintu aawanawa yo opala ya fa aana yaJob. He okwe ya pe iitopolwa yawo yuuthiga pamwe naamwayina aalumentu.
16 Konima yaambika Job okwa kala e na omwenyo omimvo ethele nomilongo ne. Okwa mono aatekulu naatekulululwa.
17 Job nokwa si omusamane a kulupilila.