1

¹ Oshipangelapundi shomukwaniilwa Kserkses, ngoka a li ta lele iitopolwa 127 okuza kuIndia sigo kuEtiopia, osha li moshilandolelo Susa.

²

³ Momumvo omutitatu gwepangelo lye Kserkses okwa hiya aakwanepangelo noongoloneya ye ayehe komatelekela. Oondjayi dhiita dhaPersia naMedia oko dha li, osho wo aaniikandjo noomvalekele dhomiikandjo ayihe.

⁴ Muule woomwedhi hamano okwe ya ulukile uuyamba woupakwaniilwa we nuunene wesimano lye.

⁵ Konima yaambika omukwaniilwa okwa ningile aantu ayehe, aayamba noohepele, yomoshilandolelo Susa oshituthi shomasiku gaheyali sha dhanenwa moshikunino shuuwa shokuvululukilwa.

⁶ Kehale okwa li kwa tsilikwa omalapi omambulau nomatokele ga dhitikilwa muulinga wiisiliveli wokoongudhi dhomarmera nuupaya wooliina uutiliganembwilili. Okwa li wo kwa tulwa iipundi yiingoli noyiisiliveli. Olupanda lwalyo olwa li lwa ningwa nomarmera ontokele nongeline, moomba nomuumanya wondilo uumbulau.

⁷ Aantu oya li taa nwine miitenga yiingoli, oshitenga kehe oshi na olupe lwi ili. Pamukalo gwopakwaniilwa, omaviinu oga li ogendjigendji.

⁸ Mokunwa kamwa li nando ondjele yontumba; omukwaniilwa okwa li a lombwela aapindi ayehe yoondjupa, ya pe kehe ngoka ngaashi a hala.

⁹ Manga shika tashi ningwa, ye omunyekadhi Vashti okwa li a telekela wo aakiintu oshituthi komuhandjo gwe.

¹⁰ Mesiku etiheyali lyoshituthi, omukwaniilwa sho a li i idhenga mo naanaa a nyanyukwa, okwi ithana omalenga ge gopothingo, aathonwantu yaheyali: Mehuman, Bista, Harbona, Bigta, Abagta, Setar naKarkas.

¹¹ Okwe ya lombwele, ya ete mo omunyekadhi Vashti a zala oshishani she shuunyekadhi. Omunyekadhi okwa li a shitika, nomukwaniilwa okwa li a hala oku mu ulika kaayenda nokomalenga.

¹² Ihe aapiya sho ya lombwele Vashti elaka lyomukwaniilwa, okwa tindi okuya ko. Shika osha geyitha omukwaniilwa.

¹³ Omukwaniilwa okwa li e na omukalo gwokupula omayele kombinga yompango nuuyuuki, onkee okwi ithanitha aagandjindunge ye, mboka taa tseya shoka shi na okuningwa.

¹⁴ Mongundu yaagandjindunge yopothingo omwa li Karshena, Shetar, Admata, Tarshish, Meres, Marsena naMemukan — omalenga gaheyali gaPersia naMedia ngoka ga li komeho gaagehe moshilongo.

¹⁵ Omukwaniilwa okwe ga pula a ti: “Pampango otu na okuninga ngiini nomunyekadhi Vashti, oshoka ina vulika kelombwelo lyomukwaniilwa Kserkses ndyoka omalenga ge ge mu faalele?”

¹⁶ Nena Memukan okwa lombwele omukwaniilwa nomalenga ge a ti: “Omunyekadhi Vashti ina yona ashike komukwaniilwa, ihe okomalenga ge agehe wo nokomulumentu kehe moshilongo ashihe!

¹⁷ Omukulukadhi kehe moshilongo ashihe shampa tuu a kundana shoka omunyekadhi a ningi, ota ka dhina omulumentu gwe. Otaa ka tya: ‘Omukwaniilwa Kserkses okwa lombwele omunyekadhi Vashti e ye kuye, ihe okwa tindi.’

¹⁸ Nokuli nena, manga etango inaali ningina, aakulukadhi yomalenga gaPersia naMedia otaa ka uva, nkene omunyekadhi a ningi, e taye ke shi hokololela aalumentu yawo. Aakulukadhi ayehe otaa ka dhina aalumentu yawo, naasamane otaa ka geela aakiintu yawo.

¹⁹ Nkeyama, ngele tashi ku opalele, gandja eutho lyopakwaniilwa kutya Vashti ke na mpoka na holoka we koshipala shomukwaniilwa. Eutho ndika nali nyolwe moompango dhokwaalunduluka dhaPersia naMedia. Omukwaniilwa na konge omukiintu gulwe omwaanawa e vule Vashti, a ninge omunyekadhi.

²⁰ Shampa eutho lyoye lya tseyika noshilongo ashihe oshinene, omukulukadhi kehe ota vulika komulumentu gwe nesimaneko, na kale omuyamba nenge ohepele.”

²¹ Omukwaniilwa nomalenga ge oya hokwa ondunge ndjika, omukwaniilwa nokwa gwanitha shoka Memukan a faneke.

²² Koshitopolwa kehe shoshilongo okwa tumu ko etumwalaka lya nyolwa melaka lyasho nomoondanda dhelaka ndyoka. Etumwalaka otali ti kutya omusamane kehe na pangele egumbo lye, noohapu dhe nadhi kale ompango yegumbo.

2

¹ Konima yethimbo, ondjahi yomukwaniilwa sho ya adhika ya lota, okwa dhiladhila shoka Vashti e shi ningi neutho ndyoka lya gandjwa omolwe.

² Gamwe gomomalenga gomukwaniilwa gopothingo oga ti: “Omukwaniilwa na kongelwe aakadhona ya shitika.

³ Nkeyama, oto vulu okulangeka omalenga moshitopolwa kehe shoshilongo e to ga lombwele, ga ete aakadhona aawanawa komuhandjo gwaanyekadhi yoye muka muSusa. Naa tulwe metonatelo lyaHegai, omuthonwantu ngoka ha tonatele aanyekadhi yoye nembonzolo lyawo.

⁴ Nena oto kutha po omukadhona ngoka we mu hokwa unene, oye a ninge omunyekadhi peha lyaVashti.” Ondunge ndjika oyo opalele omukwaniilwa, nokwe yi landula.

⁵ MuSusa omwa li Omujuda edhina lye Mordekai yaJair yaShimei yaKish gwomezimo lyaBenjamin.

⁶ Nebukadnezzar, omukwaniilwa gwaBabilonia, sho a falele omukwaniilwa gwaJuda Jehoiakin muupika pamwe noonkwatwa dhilwe muJerusalem, mongundu ndjoka omwa li wo Mordekai.

⁷ Okwa li nomwanagona Ester, edhina lye mOshihebeli oHadassa. Ester okwa li omukadhona o opala e na ondjelo ombwanawa. Aakuluntu ye sho ya si, Mordekai okwe mu kutha po e te mu putudha ongomwana omukadhona.

⁸ Omukwaniilwa sho a gandja eutho lye, naakadhona oyendji oye etwa muSusa, Ester okwa li mokati kawo. Naye wo a tulwa moshimpwiyu shaHegai, ngoka ha tonatele omuhandjo gwaanyekadhi.

⁹ Hegai okwa hokwa Ester nokwe mu opalele. Mbalambala okwa tameke embonzolitho lye e te mu pe iikulya ya sheywa. Okwe mu pe wo aayakuli yaheyali aahogololwa nelugo dhingi momuhandjo gwaanyekadhi.

¹⁰ Ester ina holola kutya oye Omujuda, oshoka Mordekai okwa li e mu indike oku shi ninga.

¹¹ Esiku nesiku Mordekai okwa li te ende pondje yehale lyomuhandjo gwaanyekadhi, opo a kundane, ngele Ester oku li nawa naashoka she mu ningilwa.

¹² Omukadhona manga inaa falwa komukwaniilwa, okwa mbonzolwa oomwedhi omulongo nambali: muule woomwedhi hamano okwa thetwa nomagadhi gomira noomwedhi hamano nomagadhi gokanakamuma niinima yilwe yuutiko.

¹³ Sho ta zi momuhandjo gwaanyekadhi u uka mombala, ota vulu okuzala ngaashi a hala.

¹⁴ Oha yi mo ongulohi, nongula nge kwa shi, ota falwa komuhandjo omukwawo e ta kala moshimpwiyu shaShaashgas, omuthonwantu gwokutonatela aakiintu yopooha. Ita yi we komukwaniilwa, shila omukwaniilwa e mu hokwa e te mu ithana kedhina.

¹⁵ Olufo lwaEster olwe ya okuya komukwaniilwa. Ester olyaAbihail, omwanagona gwaMordekai, ngoka e mu taamba a ninge omwana. Ester okwa ziminwa kukehe ngoka e mu tsu keho. Sho a yi, okwa zala ngaashi a lombwelwa kelenga Hegai, ndyoka hali tonatele omuhandjo gwaanyekadhi.

¹⁶ Ester okwa falwa komukwaniilwa Kserkses momwedhi omutimulongo, omwedhi Tebet, momumvo omutiheyali gwepangelo lye.

¹⁷ Omukwaniilwa okwe mu hokwa unene shi vule aakiintu ayehe, nokwa li e mu opalela shi vule aakadhona ayehe. Omukwaniilwa okwe mu zaleke uulenga womunyekadhi komutse gwe e te mu ningi omunyekadhi peha lyaVashti.

¹⁸ Mokusimaneka Ester, omukwaniilwa okwe mu ningile omatelekela e ta hiya aakwanepangelo noongoloneya ye ayehe. Okwa utha ongondji moshilongo ashihe nokwa gandja omagano gopakwaniilwa.

¹⁹ Mordekai okwa adhika a pewa iilonga yontumba kehale lyuuwa, aakadhona sho ya li taa gongelwa olutiyali.

²⁰ Ester okwa li inaa holola manga ezimo nuukwashigwana we, oshoka Mordekai okwa li e mu indike oku shi ninga, naEster okwa vulika kuye, ngaashi a li ha vulika muunona we.

²¹ Methimbo ndyoka Mordekai a taamba iilonga muuwa, Bigtan naTeresh, yaali yomaalangeli yopomiyelo dhoongulu dhomukwaniilwa, oya geele omukwaniilwa noyu uvanene, ye mu dhipage ofuthi.

²² Mordekai okwe shi koneke e ta yakele ko omunyekadhi Ester, ngoka a lombwele omukwaniilwa shoka Mordekai a dhimbulula.

²³ Oshinima osha konakonwa nosha monika mo kutya oshoshili, onkee aalumentu ayehe yaali oya tulwa kohake. Omukwaniilwa okwa nyolitha oshiningwanima shika mondjokonona yoshilongo.

3

¹ Konima yaambika omukwaniilwa Kserkses okwa lenge omulumentu, edhina lye Haman, a ninge elenga ekuluntu lyomalenga agehe. Haman oyaHammedata gwomoluvalo lwaAgag.

² Omukwaniilwa okwa gandja eutho, omalenga ge agehe ga simaneke Haman nokutsa oongolo noku mu inyongamena. Oge shi ningi, kakele kaMordekai, ngoka a tindi.

³ Omalenga galwe gomukwaniilwa oge mu pula kutya omolwashike itaa vulika keutho lyomukwaniilwa.

⁴ Esiku nesiku oge mu kumagidha, ihe ine ga pulakena. Okwa ti, ite shi ningi, oshoka oye Omujuda. Nena omalenga oge shi tseyithile Haman, opo ga mone, ngele etompelo lyaMordekai tali ziminwa.

⁵ Haman okwa li a thita po kondjahi, sho a dhimbulula kutya Mordekai iha tsu oongolo noku mu inyongamena.

⁶ Sho a koneke wo kutya nani Mordekai Omujuda, Haman okwa tokola okuninga sha oshinene shi vule okugeela Mordekai awike. Okwa dhiladhila a dhipage Omujuda kehe moshilongo shaPersia.

⁷ Momumvo omutimulongo nomutiyali gwepangelo lyomukwaniilwa Kserkses, momwedhi gwotango, omwedhi Nisan, Haman okwa umbitha iihogololitho (oya li hayi ithanwa “purim”), opo ku monike esiku nomwedhi gwo opala okugwanitha ompangela ye. Oshihogololitho osha kwata esiku etimulongo netitatu lyomwedhi omutimulongo nomutiyali, omwedhi Adar.

⁸ Haman okwa lombwele omukwaniilwa Kserkses ta ti: “Moshilongo shoye omu na oshigwana shimwe shi iyoolola, sha halakanena miitopolwa ayihe. Ohaa dhiginine omikalo inaadhi faathana naandhoka dhi niwe kiigwana yilwe, yo ihaa vulika koompango dhoshilongo. Itashi opalele omukwaniilwa oku ya idhidhimikila.

⁹ Nkeyama, ngele osho opala, gandja eutho, ya dhipagwe. Ngele oto shi ningi, otandi ka gandja oshisiliveli ookilograma 340 000 moompungulilo dhuuwa mokuyakula oshilongo ashihe.”

¹⁰ Omukwaniilwa okwa hukula ko okalinga ke koshihako e te ka pe Haman yaHammedata gwomoluvalo lwaAgag, omutondi gwAajuda.

¹¹ Omukwaniilwa okwe mu lombwele ta ti: “Aantu mboka niimaliwa yawo oyoye, ya ninga ngaashi wa hala.”

¹² Mesiku etimulongo netitatu lyomwedhi gwotango Haman okwa hiya oohamushanga yomukwaniilwa e te ya nyolitha eutho momalaka agehe moondanda dhago, li tuminwe oongoloneya, ookomufala naaleli ayehe miitopolwa ayihe yoshilongo. Eutho ndika olya gandjwa medhina lyomukwaniilwa Kserkses nolya hakwa nokalinga ke.

¹³ Aatondoki oya fala eutho ndika koshitopolwa kehe shomoshilongo ashihe. Elaka otali ti kutya mesiku etimulongo netitatu lyomwedhi Adar Aajuda ayehe — aagundjuka naakuluntu, aakulukadhi nuunona — oye na okudhipagwa. Oye na okutsuwa pwaa na henda, nomaliko gawo oge na okuyugwa po.

¹⁴ Enyolululo lyeutho ndika oli na okuninga ompango moshitopolwa kehe noyi na okutseyithilwa iigwana ayihe, opo ayehe ya kale yi ilongekidhila esiku ndyoka.

¹⁵ Palombwelo lyomukwaniilwa eutho olya hololwa puuyelele moshilandolelo Susa, naatondoki oya yi koondjila nokweendelela. Omukwaniilwa naHaman oya kuutumba yo taa nu, ihe moshilandolelo Susa omwa li ekuyunguto enene.

4

¹ Mordekai sho a koneke shoka sha ningwa po, okwa tuula oonguwo dhe moluhodhi. Okwa zala ehahi, i igundu omutoko momutse e te endagula noshilando ta kugu mokule a lulilwa,

² sigo ta thiki peelo lyuuwa. Ina ya mo muuwa, oshoka ihamu yio muntu a zala ehahi.

³ Kiitopolwa ayihe, nkoka eutho lyomukwaniilwa lya tseyithwa, okwa li elilagano enene mokati kAajuda. Oyi idhilike iikulya, ya lili nokukuga; oyendji oya zala omahahi e taa lala momutoko.

⁴ Aadhike yaEster naathonwantu oye mu hokololele shoka tashi ningwa kuMordekai. Ester okwa si oluhodhi olunene. Okwa tumine Mordekai oonguwo, e dhi zale peha lyehahi, ihe ine dhi taamba.

⁵ Nena Ester okwi ithana Hatak, gumwe gwomaathonwantu yomuuwa, ngoka a tulwa po komukwaniilwa a kale omupiya gwe, e te mu lombwele, a ye kuMordekai a uve shoka sha ningwa po nomolwashike.

⁶ Hatak okwa yi kuMordekai mehalandjandja lyoshilando peelo lyuuwa.

⁷ Mordekai okwe mu hokololele ashihe shoka she mu ningilwa. Okwe mu tseyithile wo ondjundo yoshisiliveli Haman e yi uvaneka, yi tulwe moompungulilo dhuuwa, ngele Aajuda ayehe oya dhipagwa po.

⁸ Okwa pe Hatak ombapila yenyolululo lyeutho ndyoka lya gandjwa muSusa lyokudhipaga Aajuda, opo e yi fale kuEster noku mu tseyithila oshinima ashihe. Ester ne ki ikumbe omukwaniilwa noku mu indila, opo a sile ohenda oshigwana she Oshijuda.

⁹ Hatak okwe shi ningi,

¹⁰ naEster okwe mu pe elaka, e li fale kuMordekai, tali ti:

¹¹ “Shaa ngoka, omulumentu nenge omukiintu, ta yi kehale lyomeni a mone omukwaniilwa ye ini ithanwa, oku na okusa. Ndjika ompango; omalenga gomukwaniilwa agehe naantu ayehe miitopolwa yoshilongo she oye yi tseya. Ope na ompito yimwe ayike okukala nomwenyo. Omuntu ngoka omukwaniilwa te mu ganeke nondhimbo ye yuukwaniilwa yoshingoli, ita dhipagwa. Ihe opwa piti omwedhi omukwaniilwa ini ithana ndje, ndi ye kuye.”

¹² Mordekai sho u uvu oohapu dhaEster,

¹³ okwe mu tumine eyamukulo tali ti: “Ino ifundjaleka kutya ou li megameno u vule Aajuda yalwe, sho u li muuwa womukwaniilwa.

¹⁴ Ngele to mwenene ompito ndjika, ekwatho otali zile Aajuda palwe e taa ka hupithwa, ihe ngoye nezimo lyaho otamu ka yonuka po. Olye e shi tseya kutya ino ninga omunyekadhi omolwompito ndjika?”

¹⁵ Ester okwa tumine Mordekai eyamukulo tali ti:

¹⁶ “Inda, u ka gongele Aajuda ayehe muSusa; idhilikeni iikulya ne mu galikanene ndje. Inamu lya ne inamu nwa sha omasiku gatatu, uusiku nomutenya. Nangame osho te ningi pamwe naadhike yandje. Konima yaambika otandi ka ya komukwaniilwa, nando nashi kale sha pingathana nompango. Ngele ote si, nandi se.”

¹⁷ Mordekai okwa yi e ta ningi, ngaashi Ester e mu lombwele.

5

¹ Mesiku etitatu lyeidhiliko lyiikulya Ester okwa zala oonguwo dhe dhuunyekadhi e ta yi e ta thikama mehalandjandja lyomeni lyuuwa a taalela oshinyanga shoshipangelapundi. Omukwaniilwa okwa li meni a kuutumba koshipangelapundi shuukwaniilwa a taalela kosheelo.

² Omukwaniilwa sho a mono Ester a thikama pondje, okwe mu sile ohenda e te mu ganeke nondhimbo ye yoshingoli. Ester okwa hedha ko e ta gumu ondhimbo komutse gwayo.

³ Omukwaniilwa okwa pula a ti: “Munyekadhi Ester, oshike ano? Lombwela ndje shoka wa hala, notandi shi ku pe — nashi kale nando etata lyoshilongo shandje ashihe.”

⁴ Ester okwa yamukula a ti: “Nkeyama, ngele otashi ku opalele, onda hala ne naHaman mu ye ongulohi komatelekela nde ge mu longekidhila.”

⁵ Omukwaniilwa okwa ti: “Ka taleni Haman mbala, tu ninge ngaashi Ester a hala.” Omukwaniilwa naHaman oya yi komatelekela gaEster.

⁶ Manga taa nu omaviinu, omukwaniilwa okwa ti kuEster: “Lombwela ndje shoka wa hala, ongame notandi shi ku pe. Otandi ka gwanitha eindilo lyoye, nando li pule ndje etata lyoshilongo shandje.”

⁷ Ester okwa yamukula ta ti:

⁸ “Ngele oshe ku opalela, Nkeyama, u uve eindilo lyandje, onda hala, ne naHaman mu ye ishewe ongula komatelekela gandje tandi ge mu longekidhile. Pethimbo ndyoka otandi ke ku lombwela shoka nda hala.”

⁹ Haman okwa zi mo momatelekela a nyanyukwa nokwa panda nawa. Ihe sho a mono Mordekai peelo lyuuwa, ye Mordekai ina thikama nenge e mu hololele esimaneko lyasha, Haman okwe mu geele noonkondo.

¹⁰ Ihe okwi idhidhimike e ta yi kegumbo. Opo ihe okwa hiya ookuume ke e ta pula omukadhi Seresh e ye kuyo.

¹¹ Okwe ya inomene omoluuyamba we wa pitilila, oyanamati oyendji, nonkene omukwaniilwa e mu lenge elenga enene e vule omalenga agehe galwe gomukwaniilwa.

¹² Okwa tsikile ko a ti: “Nokuli omunyekadhi Ester ina telekela yalwe omatelekela kakele komukwaniilwa nangame tuu nguka. Otwa hiywa, tu ye ko ishewe ongula.

¹³ Ihe ayihe mbika itayi gwanene ndje, manga ndi wete Omujuda nguka Mordekai a kuutumba peelo lyuuwa.”

¹⁴ Omukadhi Seresh nookuume ke oye mu lombwele ya ti: “Omolwashike itoo dhikitha ohake yi na omutumbo gwoondya omilongo ntano? Ngula ongula oto vulu okupula omukwaniilwa, Mordekai a tulwe ko. Opo to vulu okuya komatelekela u na enyanyu.” Oohapu ndhoka odho opalele Haman, nokwa dhikitha ohake.

6

¹ Uusiku tuu mboka omukwaniilwa okwa londokwa koomposi, nokwa gandja elaka, ondjokonona yoshilongo yi etwe kuye, e yi leshelwe.

² Moshitopolwa sha leshwa omwa li wo ehokololo, nkene Mordekai a holola Bigtan naTeresh, aathonwantu yaali aalangeli yoposheelo, mboka ya li ya tsile omukwaniilwa ondumbo, ye mu dhipage ofuthi.

³ Omukwaniilwa okwa pula a ti: “Mordekai okwa simanekwa nokwa futwa ngiini, sho a ningi ngeyi?” Aapiya oya yamukula ya ti: “Ina pewa nando osha.”

⁴ Omukwaniilwa okwa pula a ti: “Olye e li kehale?” Haman okwa li opo a thiki kehale lyopondje, opo a indile omukwaniilwa, a endjeleleke Mordekai kohake ya dhikwa nale nokuli.

⁵ Aapiya oya yamukula: “Haman oko e li.” Omukwaniilwa okwa ti: “Ne ye mo.”

⁶ Haman sho e ya mo, omukwaniilwa okwe mu pula: “Omuntu ngoka omukwaniilwa a hala oku mu simaneka unene, oku na okuningwa ngiini?” Haman okwi idhiladhilile: “Olye mbela omukwaniilwa a hala oku mu simaneka? Ndishi ongame.”

⁷ Haman okwa yamukula omukwaniilwa ta ti: “Omulumentu ngoka omukwaniilwa a hala oku mu simaneka, na etelwe oonguwo dhuukwaniilwa, ndhoka wa li wa zala ngoye mwene. Na etelwe wo okakambe haka kayilwa komukwaniilwa noka zalekwa uulenga wopaukwaniilwa komutse.”

⁸

⁹ Nena lombwela elenga limwe lya simana, li zaleke omulumentu ngoka oonguwo ndhoka noku mu enditha nehalandjandja lyoshilando a londa kokakambe. Elenga lya simana nali igidhe li tye: “Omulumentu ngoka ta simanekwa komukwaniilwa, osho ta ningwa ngeyi.”

¹⁰ Nena omukwaniilwa okwa ti kuHaman: “Endelela, u ka kuthe oonguwo nokakambe, ngaashi wa ti. Esimaneko ndika nali ningilwe Mordekai Omujuda, ngoka a kuutumba peelo lyuuwa. Mu ningila naanaa ashihe shoka wa popi.”

¹¹ Haman okwa kutha oonguwo nokakambe e ta zaleke Mordekai. Mordekai okwa kayile okakambe, naHaman okwe mu enditha nehalandjandja lyoshilando ti igidha, sho taa ende ta ti: “Omulumentu ngoka ta simanekwa komukwaniilwa, osho ta ningwa ngeyi!”

¹² Mordekai okwa shuna keelo lyuuwa, manga Haman ta yi kegumbo nokweendelela a siikila oshipala she a tyololoka.

¹³ Okwa lombwele omukadhi nookuume ke ashihe shoka she mu ningilwa. Nena omukadhi nookuume ke aanandunge oya ti kuye: “Eyonuko lyoye olya tameke montaneho yaMordekai. Oye Omujuda, nangoye ito vulu oku mu sinda. Ote ke ku sinda lela.”

¹⁴ Manga ya li taa kundathana, aathonwantu yomukwaniilwa oye ya noya fala Haman neendelelo komatelekela.

7

¹ Osho ngaaka omukwaniilwa naHaman ya yi, ya ka lye naEster

² olutiyali. Manga taa nu omaviinu, omukwaniilwa okwa pula Ester a ti: “Munyekadhi Ester, owa hala shike? Lombwela ndje, ongame notandi shi ku pe. Otandi gwanitha eindilo lyoye, nando li pule ndje etata lyoshilongo shandje.”

³ Omunyekadhi Ester okwa yamukula a ti: “Nkeyama, ngele otashi ku opalele, otandi ku indile neifupipiko, u zimine, ndi kale nomwenyo, noshigwana shandje shi kale nomwenyo.

⁴ Tse noshigwana shetu otwa landithilwa po okuhanagulwa po, okudhipagwa nokukombwa po. Ando twa landithwa po ashike aapika, ando nde shi mwenene, oshoka kashi shi sha shokukudhila omukwaniilwa.”

⁵ Omukwaniilwa Kserkses okwa pula omunyekadhi Ester: “Olye ano ta ningi iihuna mbika? Omuntu ngoka oku li peni?”

⁶ Ester okwa yamukula a ti: “Omutondi gwetu, omuhepeki gwetu, ye oye oshiponga shetu, oHaman!” Haman okwa tongolola omukwaniilwa nomunyekadhi Ester a kankwa.

⁷ Omukwaniilwa okwa yambuka po a thita po kondjahi. Okwa zi mo moshinyanga e ta yi pondje koshikunino shuuwa shokuvululukilwa. Haman okwa mono kutya omukwaniilwa okwa tokola oku mu geela, onkee a kala po ta galikana Ester omolwomwenyo gwe.

⁸ Okwa adhika opo ti iyumbile komeho goshipundi shaEster ti indile ombili, omukwaniilwa sho a galukile moshinyanga okuza koshikunino. Omukwaniilwa sho e shi mono, okwi igidha a ti: “Omuntu nguka ota thiminike omunyekadhi nokuli montaneho yandje, muuwa wandje mwene?” Omukwaniilwa manga inaa mana okupopya ndhika, yo aapiya ye aathonwantu oya siikila nale Haman koshipala.

⁹ Gumwe gwomuyo, edhina lye Harbona, okwa ti: “Nkeyama, pongulu yaHaman ope na ohake yi na omutumbo gwoondya omilongo ntano e yi dhikile Mordekai, ngoka a hupitha omwenyo gwoye.” Omukwaniilwa okwa ti: “Tulii ko Haman.”

¹⁰ Osho ngaaka Haman a tulwa kohake ndjoka a li e yi dhikile Mordekai. Nena ondjahi yomukwaniilwa oya polo.

8

¹ Esiku tuu ndyoka omukwaniilwa Kserkses okwa pe omunyekadhi Ester omaliko agehe gaHaman, omutondi gwAajuda. Ester okwa lombwele omukwaniilwa kutya Mordekai omukwawo, nokuza mpoka Mordekai okwa pitikilwa okukala koshipala shomukwaniilwa.

² Omukwaniilwa okwa hukula ko okalinga ke koshihako (hoka a kuthululile Haman) e te ka pe Mordekai. Ester okwa langeke Mordekai metonatelo lyomaliko gaHaman.

³ Ester okwa popitha ishewe omukwaniilwa, i inyongamena koompadhi dhe e ta lili. Okwe mu indile, a ninge po sha, opo a keelele ondumbo yaHaman, oluvalo lwaAgag, yaa tsile kAajuda.

⁴ Omukwaniilwa okwe mu ganeke nondhimbo yuukwaniilwa yoshingoli, Ester nokwa thikama po e ta ti:

⁵ “Nkeyama, ngele tashi ku opalele nou na ohenda nangame nongele oshu uka kungoye, gandja eutho tali ningulula oshipango shaHaman yaHammedata, oluvalo lwaAgag, shokuhanagula po Aajuda miitopolwa ayihe yoshilongo.

⁶ Otandi vulu ngiini oku shi idhidhimikila, ngele oshiponga tashi adha oshigwana shetu, nezimo lyandje mwene tali dhipagwa po?”

⁷ Nena omukwaniilwa Kserkses okwa ti komunyekadhi Ester naMordekai, Omujuda: “Talii ko, onda tulitha Haman kohake omolwondumbo ndjika yokukondjitha Aajuda nonda pe Ester omaliko ge.

⁸ Eutho lya gandjwa medhina lyomukwaniilwa nolya sitombwa noshihako she, kali shi kuningululwa. Ihe medhina lyandje otamu vulu okunyola eutho epe tali popi Aajuda e tamu li sitomba noshihako shandje.”

⁹ Mesiku etimulongo netitatu lyomwedhi omutitatu, omwedhi Sivan, Mordekai okwa hiya oohamushanga yomukwaniilwa e te ya nyolitha eutho li tuminwe oongoloneya, ookomufala naaleli yomiitopolwa ayihe 127 okuza kuIndia sigo kuEtiopia. Eutho olya li lya nyolwa momalaka agehe gomiitopolwa moondanda dhago nokAajuda melaka lyawo nomoondanda dhalyo.

¹⁰ Mordekai okwa nyolitha oontumwafo medhina lyomukwaniilwa Kserkses e te dhi sitomba noshihako shuuwa. Odha tumwa naakayili ya londa uukambe womiigunda yuuwa u na ondapo.

¹¹ Eutho ndika otali zimine Aajuda yi ilongekidhile okwiipopila. Ngele otaa matukilwa kaakwiita yomoshitopolwa shontumba, otaa vulu okukondja e taye ya hanagula po noku ya dhipaga pamwe naakiintu yawo noyana. Otaa vulu oku ya komba po nokuyuga po omaliko gawo.

¹² Esiku uuna Aajuda taa vulu okuninga shika miitopolwa ayihe yoshilongo shaKserkses, olyo etimulongo netitatu lyomwedhi omutimulongo nomutiyali, omwedhi Adar.

¹³ Enyolululo lyeutho ndika oli na okuninga ompango moshitopolwa kehe noyi na okutseyithilwa iigwana ayihe, opo Aajuda ya kale yi ilongekidhila okugalulila aatondi yawo ondjahi, uuna esiku lya thiki.

¹⁴ Palombwelo lyomukwaniilwa eutho olya holokithwa moshilandolelo Susa, naakayili ya londa uukambe womiigunda yuuwa, oya yi koondjila nokweendelela.

¹⁵ Mordekai okwa zi muuwa a zala oonguwo dhuukwaniilwa oombulau noontokele, elwaakani lyoliina etiliganembwilili noshishani oshinene shoshingoli. Nomomapandaanda gaSusa omwa li tamu kwelengendja omawi genyanyu noondigolo.

¹⁶ Aajuda oya li ya nyanyukwa noya pepelelwa, oya adhika kelago nesimaneko.

¹⁷ Moshilando kehe nomoshikandjo kehe moka eutho lyomukwaniilwa lya leshwa, Aajuda oyi igidha esiku lyongondji, oshituthi nenyanyu. Aantu oyendji yomiigwana yilwe oyi iningi Aajuda, oshoka oya li ye ya tila.

9

¹ Esiku etimulongo netitatu lyaAdar olye ya, esiku ndyoka eutho lyomukwaniilwa lya li li na okugwanithwa, esiku uuna aatondi yAajuda ya li ya tegelela, ye ya tule mokakuwilili. Ihe nani Aajuda oye ya sindi.

² Moshikandjo shAajuda moshilando kehe moshilongo ashihe Aajuda oyi ilongekidha nawa okuhomona kehe ngoka ta kambadhala oku ya etela oshiponga. Aantu oya li ye ya tila akuhe, nokakwa li ngoka a vulu oku ya kondjitha.

³ Aaleli ayehe yomiitopolwa, oongoloneya, ookomufala naakwanepangelo yomukwaniilwa oya gama kAajuda, oshoka oya li ya tila Mordekai.

⁴ Osha li sha tseyika noshilongo ashihe kutya ngashingeyi Mordekai elenga ekuluntu muuwa nokwa li ta nkondopala natango.

⁵ Omolwashoka Aajuda ya ningile aatondi yawo shoka ya hala. Oye ya ponokele nomagongamwele e taye ya dhipaga.

⁶ Moshilandolelo Susa Aajuda oya dhipagele mo aantu omathele gatano.

⁷ Mokati kawo omwa li aana aamati omulongo yaHaman yaHammedata, omutondi gwAajuda. Oyo Parshandata, Dalfon, Aspata, Porata, Adalia, Aridata, Parmashta, Arisai, Aridai naVaiesata. Ihe Aajuda inaa yuga iihakanwa.

⁸

⁹

¹⁰

¹¹ Esiku tuu ndyoka omwaalu gwaadhipagwa yomuSusa ogwa tseyithilwa omukwaniilwa.

¹² Okwa ti komunyekadhi Ester: “MuSusa amuke Aajuda oya dhipaga aantu omathele gatano, mumwe naana aamati yaHaman. Ngele omiitopolwa yilwe nduno, oya ningi ngiini! Ngashingeyi owa hala shike? Otandi ke shi ku pa. Lombwela ndje owala shoka wa hala natango, neindilo lyoye otali gwanithwa.”

¹³ Ester okwa yamukula a ti: “Nkeyama, ngele otashi ku opalele, ongula pitika natango, Aajuda ya ninge muSusa shoka ya ningi nena. Omidhimba dhaana aamati yaHaman nadhi tulwe kohake.”

¹⁴ Omukwaniilwa okwa tokola shi ningwe, neutho ndika olya gandjwa muSusa. Omidhimba dhaana aamati omulongo yaHaman odha tsilikwa puuyelele.

¹⁵ Mesiku etimulongo netine lyaAdar Aajuda yomuSusa oya dhipaga ishewe aantu omathele gatatu moshilando. Natango inaa hakana iihakanwa nande.

¹⁶ Aajuda yomiitopolwa oya li ya gongala okwiipopila. Oya manguluka kaatondi yawo, sho ya dhipaga aantu omayuvi omilongo heyali nagatano mboka ya li ye ya tonde. Ihe inaa hakana iihakanwa.

¹⁷ Esiku ndika etimulongo netitatu lyaAdar. Mesiku etimulongo netine inaku dhipagwa we omuntu, nolya ningi esiku lyoshituthi nolyenyanyu.

¹⁸ Aajuda yomuSusa oya yapula esiku etimulongo netitano, li ninge esiku lyoshituthi nolyenyanyu, oshoka oya dhipagele aatondi yawo mesiku etimulongo netitatu mesiku etimulongo netine.

¹⁹ Omolwashoka ano Aajuda mboka ya kala momikunda omishona, oya ningi esiku etimulongo netine lyomwedhi Adar esiku lyenyanyu nolyoshituthi notaa tuminathana iikunditha.

²⁰ Mordekai okwa nyolitha ondjokonona yiinima mbika e ta tumine Aajuda ayehe moshilongo shaPersia, ongele popepi nenge kokule, oontumwafo

²¹ tadhi ya lombwele, ya dhane oshituthi kehe omumvo mesiku etimulongo netine netimulongo netitano lyaAdar.

²² Momasiku ngaka Aajuda oyi imangulula kaatondi yawo, nomomwedhi nguka oluhodhi lwawo olwa shituka enyanyu nokutakuma kwawo eligolo. Oya lombwelwa, ya dhane momasiku ngaka iituthi noonshingo nokutuminathana iikunditha yiikulya nokupa oohepele omagano.

²³ Okudhana oshituthi shika okwa ningi omukalondjigilile, ngaashi Mordekai e ya nyolele.

²⁴ Haman yaHammedata, oluvalo lwaAgag nomutondi gwAajuda, okwa li u umbu iihogololitho (nenge “purim”, ngaashi ye shi luka), opo a uthe esiku lyokuyonagula po Aajuda; okwa dhiladhila e ya kombe po sheke.

²⁵ Ihe Ester okwa yi komukwaniilwa, nomukwaniilwa okwa gandja eutho lyopakunyola, ndyoka lya galulile Haman omupya ngoka e gu dhiladhilile Aajuda. Oye pamwe noyana oya tulwa kohake.

²⁶ Omolwashoka omasiku ngaka oga lukwa Purim. Molwontumwafo yaMordekai nomolwiinima ayihe mbyoka ye yi ningilwa,

²⁷ Aajuda oyi iyuthile omukalo gwokwaalunduluka kutya yo yene noluvalo lwawo naayehe mboka taa iningi Aajuda, oye na okudhana omasiku ngaka gaali kehe omumvo palombwelo lyaMordekai pethimbo lyo opala.

²⁸ Omasiku ngaka oga li ge na okudhimbulukiwa pwaa na elunduluko nokudhanwa kepipi kehe lyAajuda megumbo kehe moshitopolwa kehe nomoshilando kehe.

²⁹ Omunyekadhi Ester yaAbihail pamwe naMordekai oya nyola ontumwafo ontiyali kombinga yaPurim nokulongitha oonkondo dhawo, opo ye yi koleke.

³⁰ Mordekai okwa tumine Aajuda ayehe yomiitopolwa 127 yoshilongo shaPersia oontumwafo noku ya halela ombili negameno.

³¹ Okwa koleke kutya Aajuda ayehe noluvalo lwawo oye na okudhana omasiku gaPurim pethimbo lyo opala, ngaashi omunyekadhi Ester naMordekai, Omujuda, ye shi utha nongaashi Aajuda yo yene ya li yu utha kombinga yeidhiliko lyiikulya noontakumo.

³² Elombwelo lyaEster olya koleke omautho gaPurim noga nyolelwa membo.

10

¹ Omukwaniilwa Kserkses okwa utha iilonga yethiminiko moshilongo ashihe okuza komunkulofuta nookoontuntu sigo omokati koshilongo.

² Iinima ayihe iinene niikumithi mbyoka e yi ningi, nehokololo alihe nkene a lenge Mordekai elenga enene, ayihe oya nyolelwa membo lyondjokonona yaakwaniilwa yaPersia naMedia.

³ Omujuda Mordekai okwa li omutiyali moshilongo a landula omukwaniilwa mwene Kserkses. Okwa li a simana noku holike kAajuda ooyakwawo, oshoka okwa longele oshigwana shawo uuwanawa nokwa popile elago lyoluvalo lwawo.