1

¹ Ndika olyo ehokololo ndyoka Nehemia omuna gwaHakalia a tsakanitha. Momwedhi Kislev momumvo omutimilongombali sho Artakserkses a li omupangeli gwaPersia, ngame onda li moshilandohote Susa.

² Hanani, gumwe gwomaamwameme, okwa thiki mo a zi kuJuda e li pamwe nongundu yaalumentu ooyakwawo. Ngame onde ya pula kombinga yaJerusalem noyAajuda ooyakwetu mboka ya zi muupika muBabilon.

³ Oya hokololele ndje kutya mboka ya hupile ko noya galukile kevi lyooyina, oye li muudhigu uunene, naakwiilongo mboka ye li puyo, otaye ya tala nondhino. Oya hokololele ndje ishewe kutya omadhingililokuma gaJerusalem oga kumunwa po, nomiyelo dhasho inadhi longwa we, hela dha fikilwe po.

⁴ Sho nda kundana ayihe mbika, onda gwile po e te lili. Onda lili omasiku ogendji nondi idhilike iikulya. Onda galikana Kalunga nda ti:

⁵ “Omuwa, Kalunga komegulu! Ongoye omunene, tse otatu ku tila. Ongoye to dhiginine ehangano lyoye naamboka ye ku hole e taa gwanitha shoka wa ti.

⁶ Tala ndje, Omuwa, ngoye u uve omagalikano gandje, sho te galikanene aantu yoye Aaisraeli omutenya nuusiku. Otandi hempulula kutya tse Aaisraeli otwa yona. Onda yono pamwe nootatekulu.

⁷ Otwa ningi nayi, sho twa tsu ondumbo nangoye tse inatu gwanitha shoka wa ti. Inatu dhiginina iipango mbyoka we yi tu pele ye endele muMoses, omuntu gwoye.

⁸ Ngashingeyi dhimbulukwa shoka wa lombwelele Moses to ti: ‘Ngele ne Aaisraeli tamu iteka ndje, otandi mu halakanithile mokati kiigwana.

⁹ Ihe ngele otamu galukile kungame e tamu ningi shoka nde mu lombwele, otandi ke mu fala kehala ndyoka nde li hogolola, ndi simanekelwe mo, nonando mu kale mwa halakanithilwa sigo okooha dhuuyuni.’

¹⁰ “Omuwa, mbaka aapiya yoye, aantu yoyelela, ongoye we ya mangulula koonkondo dhoye oonene nokomatha goye.

¹¹ Ano ngashingeyi pulakena egalikano lyandje nomagalikano gaapiya yoye yalwe mboka ya hala oku ku simaneka. Nena ndjika monitha ndje elago, opo omupangeli a etele ndje olukeno.” Pethimbo ndiyaka onda li omupindi gwoondjupa dhuuwa.

2

¹ Sho pwa piti oomwedhi ne; esiku limwe momwedhi Nisan gwomumvo omutimilongombali gwelelo lyomupangeli Artakserkses, onda li tandi mu pindile omaviinu. Sho inaa tseya ndje nale ndi na oshipala shi na oshizimbi,

² okwa pula ndje a ti: “Omolwashike wa sa oluhodhi? Ngoye inoo gomboka, shila ou na uudhigu washa?” Onda haluka

³ e te yamukula te ti: “Nkeyama, kala u na omwenyo sigo aluhe! Otandi kala ngiini ndaa na luhodhi, sho oshilando shoka sha fumvikwa ootatekulu, osha kumunwa po nomiyelo dhasho dha fikwa po?”

⁴ Omupangeli okwa pula a ti: “Owa hala nduno shike?” Onda galikana Kalunga komegulu,

⁵ nonda ti komupangeli: “Nkeyama, ngele ou uvitile ndje ohenda nowa hala u kwathe ndje, taamba eindilo lyandje, u tume ndje kevi lyaJuda, koshilando shoka sha fumvikwa ootatekulu, opo ndi ke shi tungulule.”

⁶ Omupangeli okwa li pamwe nomunyekadhi a kuutumba ontega naye, nokwa taamba eindilo lyandje. Okwa pula ndje kutya uunake tii ka kala nda za po nuunake tandi ka galuka, nonde mu lombwele.

⁷ Onde mu pula, a pe ndje oontumwafo dha nyolelwa aaniikandjo yoshitopolwa shokuuninginino waEufrat, e ya lombwele, ya pitike ndje ndi ye kuJuda.

⁸ Ondi indile ishewe, omupangeli a nyolele wo Asaf, omulangeli gwomakuti guuwa, ontumwafo, e mu lombwele, a kwathe ndje omiti dhokupangela omiyelo dhepopilongulu moka tamu tonatelelwa otempeli, nodhomomadhingililokuma goshilando nodhongulu ndjoka tandi ka kala mo. Omupangeli okwa pe ndje ayihe nda li nde yi pula, oshoka Kalunga okwa li pamwe nangame.

⁹ Omupangeli okwa tumu aaniihako yamwe yetangakwiita naakayilinkambe pamwe nangame nonda tameke ondjenda yu uka koshitopolwa shokuuninginino waEufrat. Nkoka onda pe aaniikandjo oontumwafo dhomupangeli.

¹⁰ Ihe Sanballat gwokuBethoron naTobia, omukwanepangelo moshikandjo Ammon, sho yu uvu kutya okwe ya omuntu gumwe a kalele po Aaisraeli, oya ningi omwenyo omwiinayi.

¹¹ Onda yi kuJerusalem nonda kala mo omasiku gatatu

¹² inaandi lombwela nando olye shoka Kalunga a uthile ndje, ndi shi ningile Jerusalem. Nena onda penduka mokati kuusiku e te piti mo naalumentu yamwe. Otwa kutha okasino kamwe akeke hoka nda kayile.

¹³ Okwa li uusiku natango, sho nda zi moshilando nda pitile mOsheelo shopesilu kuuninginino nondu uka kuumbugantu te pitilile Oluthithiya lwomayoka ndu uka kOsheelo shuuhoho. Mokweenda onda tala omadhingililokuma goshilando ga kumuka nomiyelo dha fikwa po.

¹⁴ Kombinga yokuuzilo woshilando onda yi kuumbangalantu kOsheelo shopoluthithiya nokEdhiya lyuuwa. Okasino hoka nda kayila inaka wapa we okupandakana miitandu yomamanya.

¹⁵ Okuza mpoka onda silukile kokalonga Kidron nda kayila, te talatala edhingililokuma. Opo ihe onda shuna nondjila nde endele nayo nonda yi moshilando nda pitile mOsheelo shopesilu.

¹⁶ Ihe aawiliki inaa tseya manga mpoka nda yile naashoka nda ningi, oshoka onda li inaandi shi tseyithila nando Aajuda, ongele aayambi, aawiliki, omalenga nenge mboka ye na okukala miilonga mbyoka.

¹⁷ Onda ti kuyo: “Omu wete tuu uudhigu mboka tu u na, molwaashoka Jerusalem oshi li momakulukuma, nomiyelo dhasho odha yonagulwa po. Natu tungululeni omadhingililokuma goshilando, tu hulitheni po omupya gwetu.”

¹⁸ Onde ya lombwele, nkene Kalunga a li nangame nokwa kwatha ndje, naashoka omupangeli a lombwele ndje. Oyo noya yamukula ya ti: “Natu tamekeni etungululo.” Oyi ilongekidhile okutameka iilonga.

¹⁹ Sanballat, Tobia nOmuaraba gumwe edhina lye Geshem sho ye shi uvu, oye tu yolo e taa ti: “Otamu ningi aniwa shike? Otamu tsu ondumbo nomupangeli?”

²⁰ Onda yamukula nda ti: “Kalunga komegulu ote ke tu pa elago. Otse aapiya ye, notatu ka tameka etungo. Ihe ne kamu na uuthemba weliko lyasha muJerusalem ne mwaa na nomithigululwakalo dhasho.”

3

¹ Edhingililokuma lyoshilando olya tungululwa ngeyi. Omuyambimukuluntu Eliashib naayambi ooyakwawo oya tungulula Osheelo shoonzi, oye shi yapula e taa tula omawawa gomiyelo mehala lyago. Oya yapula edhingililokuma sigo okoshungo Hammea nokoshungo Hananel.

² Aajeriko oya tungu kuuninginino wawo. Sakkur yaImri okwa tungu kuuninginino wAajeriko.

³ Oludhi lwaHassenaa olwa tungu Osheelo shoohi. Oya tula omitenge nomawawa gomiyelo mehala lyago e taa tula mo iipatithi nomalukambo, opo omiyelo dhi patwe.

⁴ Meremot yaUria, omutekulu gwaHakkoz, okwa tungu ombinga ya landula ko. Meshullam yaBerekia, omutekulu gwaMeshesabel, okwa tungu ombinga ya landula ko. Sadok yaBaana okwa tungu ombinga ya landula ko.

⁵ Aantu yomuTekoa oya tungu ombinga ya landula ko, ihe aawiliki yoshilando oya tindi okulonga iilonga ye yi pewa kaatonateli.

⁶ Joiada yaPasea naMeshullam yaBesodia oya tungulula osheelo Jeshana. Oya tula omitenge nomawawa gomiyelo mehala lyago e taa tula mo iipatithi nomalukambo, opo omiyelo dhi patwe.

⁷ Melatia gwokuGibeon, Jadon gwokuMeronot naantu yokuGibeon naMispa oya tungu ombinga ya landula ko sigo ongulu yomunashikandjo gwoshitopolwa shokuuninginino waEufrat.

⁸ Ussiel yaHarhaia, omuhambuli gwoshingoli, okwa tungu ombinga ya landula ko. Hanania, omulungi gwiizimba, okwa tungu ombinga ya landula ko sigo Ekuma lya mbwalangandja.

⁹ Refaia yaHur, omuleli gwetata lyaJerusalem, okwa tungu ombinga ya landula ko.

¹⁰ Jedaia yaHarumaf okwa tungu ombinga ya landula ko, ndjoka ya li popepi negumbo lye mwene. Hattush yaHashabneia okwa tungu ombinga ya landula ko.

¹¹ Malkija gaHarim naHasshub yaPahat Moab oya tungu ombinga ya landula ko nOshungo yomaziko.

¹² Shallum yaHallohesh, omuleli gwoshikandjo oshikwawo shaJerusalem, okwa tungu ombinga ya landula ko. (Oyana aakadhona oya kwatha miilonga.)

¹³ Hanun naakali moshilando Sanoa, oya tungulula Osheelo shopesilu. Oya tula omawawa gomiyelo mehala lyago e taa tula mo iipatithi nomalukambo gokupata osheelo e taa opaleke edhingililokuma oometa 440 sigo okOsheelo shuuhoho.

¹⁴ Malkija gaRekab, omuleli gwoshikandjo Betakerem, okwa tungulula Osheelo shuuhoho. Okwa tula omawawa gomiyelo mehala lyago e ta tula mo iipatithi nomalukambo gokupata osheelo.

¹⁵ Shallum yaKolhose, omuleli gwoshikandjo Mispa, okwa tungulula Osheelo shopoluthithiya. Okwa tula ko oshipamba, okwa tula omawawa gomiyelo mehala lyago e ta tula mo iipatithi nomalukambo. Pedhiya lyaSiloa okwa tungu po edhingililokuma popepi noshikunino shuuwa, sigo okiikolo tayi kuluka tayi zi moshilando shaDavid.

¹⁶ Nehemia lyaAsbuk, omuleli gwombinga yimwe yoshikandjo Bet-Sur, okwa tungu ombinga ya landula ko sigo okombila yaDavid, kedhiya lyopaunongo nokEgumbo lyoofule.

¹⁷ Aalevi taa landula mpaka oya tungulula oombinga dha landula ko odhindji dhedhingililokuma: Rehum yaBani okwa tungu ombinga ya landula ko; Hashabia, omuleli gwetata lyoshitopolwa Keila, okwa tungu ombinga ya landula ko medhina lyoshitopolwa she;

¹⁸ Bavai yaHenadad, omuleli gwetata ekwawo lyaKeila, okwa tungu ombinga ya landula ko;

¹⁹ Ezer lyaJeshua, omuleli gwaMispa, okwa tungu ombinga ya landula ko komeho gongulu yomatati sigo oompoka edhingililokuma tali goyokele;

²⁰ Baruk yaSabbai okwa tungu ombinga ya landula ko sigo osheelo shongulu yomuyambimukuluntu Eliashib;

²¹ Meremot yaUria, omutekulu gwaHakkoz, okwa tungu ombinga ya landula ko okuza kosheelo shongulu yaEliashib sigo opehulilo lyayo.

²² Aayambi taa landula mpaka oya tungulula oombinga odhindji dhekuma: Aayambi ya zi momudhingoloko gwaJerusalem, oya tungu ombinga ya landula ko;

²³ Benjamin naHasshub oya tungu ombinga ya landula ko, ndjoka ya li komeho gomagumbo gawo; Azaria yaMaaseia, omutekulu gwaAnaneia, okwa tungu ombinga ya landula ko, ndjoka ya li komeho gegumbo lye;

²⁴ Binnui yaHenadad okwa tungu ombinga ya landula ko okuza kaandjaAzaria sigo okolonela yedhingililokuma;

²⁵ Palal yaUsai okwa tungu ombinga ya landula ko, okuza pokolonela yedhingililokuma noshungo yuuwa yopombanda popepi nehale lyaalangeli. Pedaia yaParosh okwa tungu ombinga ya landula ko sigo opopepi nOsheelo shomeya kuuzilo noshungo ya umbuka ko. (Ndjika oya li popepi noshitopolwa shoshilando hashi ithanwa Ofel, mpoka pwa kala aakalele yomotempeli.)

²⁶

²⁷ Aantu yokuTekoa oya tungu ombinga ya landula ko, oshitopolwa shawo oshitiyali, okuza peha lya taalela oshungo onene ya umbuka ko sigo okekuma lyopopepi naOfel.

²⁸ Ongundu yaayambi oya tungu ombinga ya landula ko okuuka kuumbangalantu okuza kOsheelo shuukambe; kehe ngoka okwa tungu komeho gegumbo lye mwene.

²⁹ Sadok yaImmer okwa tungu ombinga ya landula ko, ndjoka ya li komeho gegumbo lye. Shemaia yaShekania, omulangeli gwOsheelo shokuuzilo, okwa tungu ombinga ya landula ko.

³⁰ Hanania yaShelemia naHanun, omwanamati omutihamano gwaZalaf, oya tungu ombinga ya landula ko, ndjoka ya li ontiyali yawo. Meshullam yaBerekia okwa tungu ombinga ya landula ko, ndjoka ya li komeho gegumbo lye.

³¹ Malkija, omuhambuli gwoshingoli, okwa tungu ombinga ya landula ko sigo okongulu yaakalele yomotempeli naahalithi, ndjoka ya li pOsheelo shaalangeli, popepi nondunda yi li kombanda yokolonela yokuuzilombangalantu yedhingililokuma.

³² Aahambuli yoshingoli naahalithi oya tungu ombinga yahugunina, okuza kondunda yopokolonela sigo Osheelo shoonzi.

4

¹ Sanballat sho a kundana kutya tse Aajuda twa tameke etungululo, okwa li a thita po kondjahi e ta tameke oku tu sheka.

² Okwa popi montaneho yooyakwawo noyetangakwiita lyAasamaria ta ti: “Aajuda mbaka aatsaangidhi otaa dhiladhila ya longe shike? Otaa tedha okutungulula oshilando? Otaa dhiladhila kutya mokuyamba omafikilondjambo otaa vulu okumana iilonga mesiku limwe? Otaa vulu okutunga noondhopi dha za miitandu ya yothoka?”

³ Tobia gwokuAmmon okwa li a thikama ontega naye e ta gwedha ko ta ti: “Ekuma ndyoka taa tungu olya tya ngiini? Nokuli ombandje otayi vulu oku li kumuna po!”

⁴ Onda galikana nda ti: “Kalunga, ya pulakena, sho taye tu sheke. Esheko lyawo nali gwile komitse dhawo. Naa yugwe ashihe shoka ya likola yo ya kwatwe po oonkwatwa, ya ka ninge aapika mevi lyuundjendi.

⁵ Ino dhima po uuwinayi taye u ningi, ngoye ino dhimbwa oondjo dhawo, oshoka oye tu sitha ohoni tse mboka tatu tungu.”

⁶ Osho ngaaka twa tsikile okutungulula edhingililokuma. Mbalambala olya adha etatakati momuthika gwalyo, molwaashoka aantu oya li aalaadhi miilonga.

⁷ Sanballat, Tobia, Aayarabia, Aayammoni naantu yokuAshdod oya kundana kutya etungululo lyedhingililokuma lyaJerusalem otali humu ko nawa, noombululu mekuma odha thitikwa; nena oya geye.

⁸ Oya hangana ya matukile Jerusalem, opo ye tu piyaganeke,

⁹ ihe tse otwa galikana Kalunga ketu notwa tula po aalangeli, ye tu gamene omutenya nuusiku.

¹⁰ Aajuda oya li ye na eimbilo ye li imbi tali ti: “Otatu ningi aankundi mokuhumbata omitenge; iitandu oyo oyindjiyindji, tu yi kuthe po. Itatu vulu okutunga ekuma.”

¹¹ Aatondi yetu oya popi taa ti: “Manga inaaye shi tseya nenge inaaye tu dhimbulula, otatu ya ponokele e tatu ya dhipaga nokuhulitha po iilonga yawo.”

¹² Ihe ethimbo nethimbo Aajuda mboka ya kala mokati kaatondi yetu, oye ya ye tu londodhe omolwaatondi yetu, sho taa pangele ye tu kondjithe.

¹³ Omolwashoka onda homateke aantu omagongamwele, omagonga nomatati. Onde ya langeke pamaludhi gawo konima yekuma ndyoka lya li inaali pwa.

¹⁴ Onda mono kutya aantu oya piyaganekwa nonda ti kuyo nokaawiliki yawo nokomalenga: “Inamu tila aatondi yetu. Dhimbulukweni, nkene Omuwa omunene nomutilithi. Kondjeleni ooyakweni, aana yeni, aakiintu yeni nomagumbo geni.”

¹⁵ Aatondi yetu oyu uvu kutya otwe shi tseya kutya otaye tu dhiladhilile ondumbo. Oya dhimbulula kutya nani Kalunga okwa kondjitha omadhiladhilo gawo. Nena tse atuhe otwa shuna, tu ka tungulule ekuma.

¹⁶ Okuza kesiku ndyoka etata lyaantu yandje oya longo, manga etata ekwawo lya langela komauta lya zala oonguwo dhiiyela lya homata omagonga, omahuuyanza nomatati. Aawiliki yetu oya kwatha Aajuda ayehe

¹⁷ mboka ya li metungululo lyekuma. Nokuli naamboka ya li taa humbata iitungitha, oye na egonga moshikaha shimwe.

¹⁸ Shaa ngoka a li petungo, okwa zala egongamwele moshiya. Omuhiki gwoohiya okwa li pungame.

¹⁹ Onda lombwele oshigwana nomalenga gasho naawiliki yasho nda ti: “Iilonga oya taandela moshinano oshile, tse otu li po twa halakana nekuma.

²⁰ Ngele tamu uvu ohiya, gongaleni pungame. Kalunga ketu ote tu kondjele.”

²¹ Esiku kehe okuza keluwa tali tende sigo oonyothi dhe ya kegulu uusiku, etata lyomutse otali tungu ekuma, manga etata ekwawo lya thikama lya langela komauta.

²² Methimbo ndika onda lombwele aanamagumbo naakwathi yawo, ya kale muJerusalem uusiku, opo tu wape okutonatela oshilando uusiku, tse tu longe omutenya.

²³ Inatu ihula oonguwo dhetu nando uusiku, ngee ngame nenge ooyakwetu nenge aakalele yandje nenge aalangeli yandje. Atuhe otwa kala tu na omatati pomake.

5

¹ Konima yaambika aantu oyendji, aalumentu naakiintu, oya tameke okungungutulila Aajuda ooyakwawo.

² Yamwe oya ti: “Otu na aanona oyendji, otatu pumbwa iilya, tu paluthe omagumbo getu.”

³ Yamwe oya ti: “Otwa gandja omapya, iitsambe yomiviinu nomagumbo getu ombambyona, opo tu mone iilya twaa se ondjala.”

⁴ Yamwe ishewe oya ti: “Otwa hehela iimaliwa, opo tu fute oompale dhuuwa molwomapya niitsambe yetu yomiviinu.

⁵ Tse atuhe aantu yoludhi lumwe nAajuda ooyakwetu. Kape na eyooloko pokati kaana yetu noyawo. Ihe tse otu na okugandja po aana yetu, ya ninge aapika. Yamwe yomaana yetu aakadhona oya landithwa po nokuli ya ningi aapika. Ihe tse itatu vulu sha, oshoka omapya niitsambe yetu yomiviinu otwe yi yugwa.”

⁶ Ngame sho ndu uvu omayemato gawo, onda geye

⁷ e tandi tokola okuninga po sha. Onda nyenyetele aawiliki nomalenga goshigwana e tandi ya lombwele te ti: “Otamu hepeke unene aamwanyoko!” Onda hiya oshigongi shaayehe, ya gongalele omukundu nguka

⁸ e te ti: “Sho twa kaleni sigo oompaka, otwa kulile Aajuda ooyakwetu mboka ya li ya landwa po kaapagani. Ndele nena ne otamu thiminike aamwanyoko, yi ilandithe po kune, kAajuda ooyakwawo!” Aawiliki oya mwena yo inaa tya we sha.

⁹ Onda ti: “Otamu ningi nayi! Omu na okutila Kalunga, ne mu longe shoka shu uka. Nena aatondi yetu aapagani itaa vulu oku tu sheka.

¹⁰ Ngame nooyakwetu naakalele yandje otwa gandja wo iimaliwa niilya kaantu.

¹¹ Etheni oongunga adhihe ye dhi mu lile — iimaliwa nenge iilya nenge omaviinu nenge omagadhi gooholivi. Ya shunithileni wo mbala omapya, iitsambe yomiviinu, omiti dhomiolivi nomagumbo gawo!”

¹² Aawiliki oya yamukula ya ti: “Tse atuhe otatu ningi shoka to ti. Tse otatu shunitha omaliko gawo, tse itatu ya pula we oongunga.” Ondi ithana aayambi e tandi ganitha aawiliki montaneho yawo, ya dhiginine euvaneko ye li uvaneke.

¹³ Nena ondi ihula ongama yi na ondjato, nde yi shikumuna e te ti: “Kalunga osho ne mu shikumune ngeyi, ngele itamu gwanitha euvaneko lyeni. Ne mu kuthe omagumbo geni noshaa shoka mu shi na e te mu thigi pontundulu.” Nena oshigongi ashihe osha ti: “Amen,” noya hambelele Omuwa. Aawiliki noya dhiginine euvaneko lyawo.

¹⁴ Momimvo omulongo nambali ndhoka nda li omunashikandjo mevi lyaJuda, okuza komumvo omutimilongombali gwelelo lyomupangeli Artakserkses sigo okomumvo omutimilongondatu nambali gwelelo lye, tse nooyakwetu inatu lya iikulya yuunenentu.

¹⁵ Aanashikandjo ayehe mboka ya tetekela ndje, oya kala omutenge koshigwana. Oya li taa pula iimaliwa iisiliveli omilongo ne mesiku, ya lande iikulya nomaviinu. Aapiya yawo oya hepeke wo aathigona. Ihe ngame onda longo shi ililela, oshoka onda tila Kalunga.

¹⁶ Ondi itula wo metungululo lyekuma pamwe naakalele yandje ayehe. Inandi ikongela nande epya.

¹⁷ Poshililo shandje onda palutha Aajuda ethele nomilongo ntano naawiliki yawo, kakele kaantu ayehe mboka ye ya kungame taa zi miigwana yopuushiinda.

¹⁸ Esiku kehe onda gandja ondumetana yimwe, oonzi oohogololwa hamano noondhila odhindji. Lumwe momasiku omulongo otwi imonene omaludhi gi ili nogi ili gomaviinu omape. Ihe onda tseya omitenge ndhoka omidhigu tadhi humbatwa koshigwana, onkee inandi pula oshipewa shoka omunashikandjo e na uuthemba washo.

¹⁹ Otandi ku galikana Kalunga, dhimbulukwa ndje, naayihe mbyoka nda ningile oshigwana shika.

6

¹ Sanballat, Tobia, Geshem naatondi yetu yalwe oyu uvu kutya twa hulitha etungo lyedhingililokuma lyo kali na we nando okambululu, nando otwa li inaatu tula mo manga omiyelo miikulo.

² Sanballat naGeshem oya tumine ndje elaka taa indile ndje, tu tsakanene nayo muKefirim molushandja lwaOno. Shika osha li omwigo ye gu lukilila ndje, gu yule ndje.

³ Onda tumu kuyo elaka tali ti: “Ondi na iilonga ya simana, ite vulu okuza po. Itandi vulu okuzimbula iilonga, ndi ye kune.”

⁴ Oya tumine ndje elaka olyo tuu ndyoka lune, nonde ya tumine aluhe eyamukulo lya faathana.

⁵ Opo ihe Sanballat okwa tumu omupiya gwe gumwe kungame e na elaka etitano li li montumwafo yomontaneho.

⁶ Otali ti: “Geshem okwa lombwele ndje kutya omufofotolo ogu li miigwana yopuushiinda kutya ne Aajuda omwa hala okutukula oshipotha. Omolwashoka tamu tungulula edhingililokuma. Okwa ti ishewe, oto dhiladhila u ininge omukwaniilwa

⁷ nowa longekidha aahunganeki yamwe ya kugilile muJerusalem kutya ngoye omukwaniilwa gwaJuda. Iinima mbika otayi uvika komukwaniilwa, onkee nda dhiladhila, tse nangoye tu tsakanene, opo tu kundathane po nawa.”

⁸ Onde mu tumine eyamukulo tali ti: “Wa fundju, shoka to popi kashi shi shoshili.”

⁹ Oya kambadhala oku tu tilitha, ya kankameke iilonga. Onda galikana nda ti: “Ngashingeyi, Kalunga, nkondopaleka ndje.”

¹⁰ Esiku limwe onda ka talela po Shemaia yaDelaja, omutekulu gwaMehetabel, ngoka a li itaa vulu okuza maandjawo. Okwa ti kungame: “Natu ye, tu ka holame mela enene lyotempeli, tse tu pate omiyelo, molwaashoka otaye ya, ye ku dhipage. Uusiku wontumba otaye ya, ye ku dhipage.”

¹¹ Onda yamukula nda ti: “Ngame, hatse yokufadhuka po nokuholama. Oto dhiladhila, omuntu ngangame ndi hupithe omwenyo gwandje nokuholama motempeli? Itandi shi ningi.”

¹² Sho nda dhimbulula kutya Kalunga ina lombwela Shemaia, ndele oSanballat naTobia, mboka ye mu pe oombumbo, opo a londodhe ndje.

¹³ Oye mu futu, opo ya haluthe ndje, ndi yone yo ya vule okunyateka edhina lyandje noya fupipike ndje.

¹⁴ Onda galikana nda ti: “Kalunga, dhimbulukwa shoka Tobia naSanballat ya longo, ngoye u ya geele. Dhimbulukwa omuhunganeki omukulukadhi Noadia naahunganeki ooyakwawo ya kambadhala okutilitha ndje.”

¹⁵ Sho pwa piti omasiku omilongo ntano nagaali, edhingililokuma alihe olya pu mesiku etimilongombali nagatano gomwedhi Elul.

¹⁶ Aatondi yetu miigwana ye tu kunduka sho ye shi uvu, oya haluka, oshoka oya li yu uvite kutya oshilonga shika osha longwa kekwatho lyaKalunga ketu.

¹⁷ Methimbo alihe aawiliki yaJuda oya li haa nyolelathana naTobia.

¹⁸ Aantu oyendji muJuda oya li ya gama kuye molwahemweno Omujuda, edhina lye Shekania yaArah. Niishewe, omwanamati Jehohanan okwa li a hokana omuna gwaMeshullam yaBerekia.

¹⁹ Oya hokololele ndje iilonga yaTobia iiwanawa noye mu hokololele ashihe shoka nda ti. Okwa li ha nyolele ndje oontumwafo ta tilitha ndje.

7

¹ Edhingililokuma sho lya pu okutungululwa, omiyelo odha tulwa miikulo, naalangeli yotempeli, aayimbi nAalevi yalwe oya pewa iilonga yawo.

² Onda langeke aalumentu yaali melelo lyoshilando Jerusalem: omumwameme Hanani naHanania, elenga ekuluntu lyepopilongulu. Hanania okwa li omwiinekelwa nomutiliKalunga kee shi kuyelekwa.

³ Onde ya lombwele, yaa egulule omiyelo dhaJerusalem ongula, manga etango inaali pita nawa yo ye dhi edhile noku dhi pata, manga aalangeli inaa zimbuka peningino lyetango. Onde ya lombwele ishewe, ya langeke aalangeli taa zi mokati kAajerusalem. Yamwe naa kale pomahala gu uthwa, nayamwe naa kale taa shilile pomagumbo gawo yene.

⁴ Jerusalem osha li oshilando oshinene, ihe kasha li naantu oyendji nokamwa li omagumbo ogendji ga tungwa mo manga.

⁵ Kalunga okwa tsu ndje ondunge, ndi gongaleke aantu naawiliki yawo nomalenga, ngame ndi konakone oondjalulo dhomazimo gawo. Onda mono oondjalulo dhaamboka ya zi muupika nonda dhimbulula kutya nani:

⁶ Oyendji yomuupika oya thigi po oshitopolwa shaBabilon e taa galukile kuJerusalem naJuda, kehe ngoka okoshilando shaandjawo. Omazimo gawo oga kala muupika muBabilonia okuza sho omukwaniilwa Nebukadnezzar e ya kwatela oonkwatwa.

⁷ Aawiliki yawo oSerubbabel, Josua, Nehemia, Azaria, Raamia, Nahamani, Mordekai, Bilshan, Misperet, Bigvai, Nehum naBaana.

⁸ Omusholondondo gwomaludhi gaIsrael nomwaalu gwoludhi kehe ndoka lwa galuka muupika: Parosh — 2 172 Shefatia — 372 Arah — 652 Pahat Moab (oluvalo lwaJeshua naJoab) — 2 818 Elam — 1 254 Sattu — 845 Sakkai — 760 Binnui — 648 Bebai — 628 Asgad — 2 322 Adonikam — 667 Bigvai — 2 067 Adin — 655 Ater (haku tiwa Hiskia) — 98 Hashum — 328 Bezai — 324 Harif — 112 Gibeon — 95.

⁹ Aantu mboka oohekulu ya kalele miilando tayi landula mpaka, ndele oya galuka wo: Betlehem naNetofa — 188 Anatot — 128 Bet-Asmavet — 42 Kiriat Jearim, Kefira naBeerot — 743 Rama naGeba — 621 Mikmash — 122 Betel naAi — 123 Nebo shilwe — 52 Elam shilwe — 1 254 Harim — 320 Jeriko — 345 Lod, Hadid naOno — 721 Senaa — 3 930.

¹⁰ Nguka omusholondondo gwomaludhi gaayambi mboka ya galuka muupika: Jedaia (oluvalo lwaJeshua) — 973 Immer — 1 052 Pashhur — 1 247 Harim — 1 017.

¹¹ Omaludhi gAalevi ngoka ga galuka muupika: Jeshua naKadmiel (oluvalo lwaHodavia) — 74 Aayimbi yomotempeli (oluvalo lwaAsaf) — 148 Aalangeli yotempeli (oluvalo lwaShallum, Ater, Talmon, Akkub, Hatita naShobai) — 138.

¹² Omaludhi gaalongi motempeli ngoka ga galuka muupika: Ziha, Hasufa, Tabbaot, Keros, Sia, Padon, Lebana, Hagaba, Salmai, Hanan, Giddel, Gahar, Reaia, Rezin, Nekoda, Gasam, Ussa, Pasea, Besai, Meunim, Nefushesim, Bakbuk, Hakufa, Harhur, Bazlit, Mehida, Harsha, Barkos, Sisera, Tema, Neziah naHatifa.

¹³ Omaludhi gaapiya yaSalomo ngoka ga galuka muupika: Sotai, Soferet, Perida, Jaala, Darkon, Giddel, Shefatia, Hattil, Pokeret, Hazzebaimna, Ammon.

¹⁴ Omwaalu aguhe kumwe gwomaluvalo gaalongi yomotempeli nogwaapiya yaSalomo mboka ya galuka muupika, ogwa li 392.

¹⁵ Okwa li ku na 642 yomomaludhi gaDelaja, Tobia naNekoda mboka ya zi komikunda Tel Mela, Tel Harsha, Kerub, Addon naImmer; ihe inaku tseyika tuu, ngele oluvalo lwaIsrael.

¹⁶ Omaludhi ngoka gaayambi taga landula kaga li taga vulu okumona kutya oohekulu oolye: Hobaia, Hakkoz naBarsillai (Hekulu yoludhi lwaayambi lwaBarsillai okwa hokanene omukulukadhi gwomoludhi lwaBarsillai gwokuGilead e ta taamba edhina lyoludhi lwahemweno.) Oshoka inaa vula okutya oohekulu oolye, inaa ziminwa, ya ninge aayambi.

¹⁷ Omuleli gwAajuda okwe ya indike iikulya ya yambelwa Kalunga, manga kaaku na omuyambi ta vulu okulongitha Urim naTummim.

¹⁸ Omwaalu gwaayehe mboka ya galuka muupika, ogwa li 42 360,

¹⁹ kakele kaapiya yawo aalumentu naakiintu, mboka ya li 7 337. Oya li ye na wo aayimbi aalumentu naakiintu 245.

²⁰ Oya li ye na uukambe 736, omamulutiya 245,

²¹ oongamelo 435 nuusino 6 720.

²² Aantu oyendji oya gandjele etungululo lyotempeli omagano. Omupangeli okwa gandja iimaliwa yoshingoli ookilograma 8, iiyaha yomalongelokalunga 50 noonguwo dhaayambi 530. Aakuluntu yomaludhi oya gandja iimaliwa yoshingoli ookilograma 168, nuutale woshisiliveli ookilograma 1250. Aantu yalwe oya gandja iimaliwa yoshingoli ookilograma 168, uutale woshisiliveli ookilograma 140 noonguwo dhaayambi 67.

²³ Aayambi, Aalevi, aalangeli yotempeli, aaimbi, oyendji yomaantu yowala, aakalele yomotempeli — Aaisraeli ayehe — oya tula momikunda nomiilando yaJuda. Omwedhi omutiheyali sho gwe ya, Aaisraeli oya adhika ya tula nokuli momikunda nomiilando yawo.

8

¹ Mesiku lyotango lyomwedhi omutiheyali oshigwana ashihe osha gongala muJerusalem mehalandjandja lyopOsheelo shomeya. Oya pula omuyambi nomunongompango Esra, a ka tale embo lyompango ndjoka Omuwa e yi pele Aaisraeli ye endele muMoses.

² Esra okwe li eta moshigongi shaantu mboka ya gongala — aasamane naakulukadhi naanona mboka ye na omimvo dha gwana noyu uvite ko.

³ Mehalandjandja lyopOsheelo shomeya okwe ya leshele mompango okuza kepito lyetango sigo omoshanga shomutenya, noyo ayehe oya pulakene yi itula mo.

⁴ Esra okwa li a thikama komutuni gwiipilangi ngoka gwa li gwa tungilwa ompumbwe ndjoka. Mboka ya li ya thikama kolulyo lwe, oyo Mattitia, Shema, Anaia, Uria, Hilkia naMaaseia; naamboka ya li ya thikama kolumoho lwe, oyo Pedaia, Mishael, Malkija, Hashum, Hashbaddana, Sakaria naMeshullam.

⁵ Esra sho a thikama komutuni puule pombanda, aantu oya li ye mu nzanena mo omeho. Oya thikama mbala, sho a yanuna embo.

⁶ Esra okwa ti: “Hambeleleni Omuwa, Kalunga omunene!” Aantu ayehe oya yelutha omaako gawo mombanda e taa yamukula taa ti: “Amen! Amen!” Oya tsu oongolo yi inyongamena pevi e taa galikana.

⁷ Nena oya galuka e taa thikama pomahala gawo. Aalevi mbaka ye ya fatululile ompango: Jeshua, Bani, Sherebia, Jamin, Akkub, Shabbetai, Hodia, Maaseia, Kelita, Azaria, Josabad, Hanan naPelaia.

⁸ Oya tolokele aantu ompango yaKalunga e taye yi fatulula, opo ye yi uve ko.

⁹ Aantu sho ya pulakene ompango tayi leshwa, oya tameke okulila. Nena omunashikandjo Nehemia, omuyambi nomunongompango Esra nAalevi mboka ya li taa fatululile aantu ompango, oya lombwele ayehe taa ti: “Esiku ndika olya yapulilwa Omuwa, Kalunga keni, onkee inamu yemata nenge mu lile.

¹⁰ Ngashingeyi indeni kaandjeni, mu dhane oshituthi. Topoleni iikulya nomaviinu naamboka yaa na sha. Esiku ndika olya yapulilwa Omuwa gwetu, onkee inamu yemata. Enyanyu ndyoka Omuwa te li gandja, nali mu kumike.”

¹¹ Aalevi oye ende mokati kaantu, taye ya hekeleke taa ti: “Mweneni, oshoka esiku ndika eyapuki. Inamu sa oluhodhi.”

¹² Aantu ayehe oya yi koyaandjawo e taa li e taa nu nokunyanyukwa noya topolele wo yalwe shoka ya li ye shi na, oshoka oya li yu uvite ko shoka ye shi leshelwa.

¹³ Esiku lya landula ko aakuluntu yomaludhi pamwe naayambi nAalevi oya yi kuEsra, ya konakone ompango.

¹⁴ Oye shi kutha mo nawa kutya ompango ndjoka Omuwa a pele Moses, otayi lombwele Aaisraeli, ya kale momatsali giihwa iitalala momasiku goshituthi.

¹⁵ Oyi igidhile aantu muJerusalem, miilando yilwe nomomikunda adhihe taa ti: “Indeni koondundu, mu ka komangele iitayi yomiolivi noyomidhime, iiyale yomilunga niihwa yilwe iitalala, mu dhike omatsali giihwa iitalala, ngaashi sha popiwa mompango.”

¹⁶ Aantu oya ka tala iitayi e taa dhike omatsali kombanda yoontala dhoongulu dhawo, momahalandjandja gomagumbo gawo, mehale lyotempeli nomehalandjandja lyopOsheelo shomeya nolyopOsheelo shaEfraim.

¹⁷ Aantu ayehe mboka ya galuka muupika, oya dhike omatsali e taa kala mo. Shika osho sha li shotango sha ningwa okuza komasiku gaJosua yaNun, naayehe oya li ya nyanyukwa noonkondo.

¹⁸ Okuza kesiku lyotango lyoshituthi sigo okehulilo oya kala taa lesha sha mompango yaKalunga. Oya dhana oshituthi omasiku gaheyali, nomesiku etihetatu oya hulitha nelongelokalunga, ngaashi shu uthwa kompango.

9

¹ Mesiku etimilongombali nagane lyomwedhi tuu ngoka omutiheyali Aaisraeli oya gongala yi idhilike, opo ya holole oluhodhi molwoondjo dhawo. Oya adhika yi iyoolola maakwiilongo ayehe. Oya li ya zala omahahi e tayi igundu omutoko momitse dhawo endhindhiliko lyoluhodhi. Nena oya thikama e taa tameke okuhempulula oondjo dhawo ndhoka ya yono noohekulu.

²

³ Oya leshelwa ompango yOmuwa konyala ootundi ndatu, nootundi ndatu dha landula oya hempulula oondjo dhawo e taa galikana Kalunga, Omuwa gwawo.

⁴ Oko kwa li omutuni gwAalevi, nkoka kwa thikama Jeshua, Bani, Kadmiel, Shebania, Bunni, Sherebia, Bani naKenani. Oya galikana mokule Omuwa, Kalunga kawo.

⁵ Aalevi Jesua, Kadmiel, Bani, Hashabneia, Sherebia, Hodia, Shebania naPetahia oyi ithanene aantu kegalikano ya ti: “Thikameni, mu hambelele Omuwa, Kalunga keni; mu hambeleleni sigo aluheluhe! Shaa ngoka na hambelele edhina lye lya simana, nando ehambelelo lyopantu kali na mupondo gwasha.”

⁶ Aaisraeli oya galikana egalikano ndika: “Ngoye Omuwa, ongoye awike Omuwa; ongoye wa shiti ewangandjo noonyothi dhomewangandjo. Ongoye wa shiti evi nefuta naayihe yi li mo; ayihe owe yi pe omwenyo. Aanankondo yomegulu otaa ku inyongamene e taa ku simaneke.

⁷ Ongoye, Omuwa Kalunga wa hogolola Abram e to mu piitha mo muUr shomuBabilon; owa lundulula edhina lye, li ninge Abraham.

⁸ Owe shi tseya kutya okwe ku inekela, e to hangana naye. Owe mu uvanekele u mu pe evi lyAakaanana, evi lyAaheti nolyAayamori, evi lyAaperesi, lyAayebusi nolyAagirgashi, li ninge eliko lyoluvalo lwe. Owa gwanitha euvaneko lyoye, oshoka ngoye omudhiginini.

⁹ “Owa mono, nkene ootatekulu taa hepekwa muEgipiti; owa uvu onkugo yawo, sho taa kugile ekwatho pEfuta lyomanenge.

¹⁰ Owa longo iinyengandunge we yi longele omukwaniilwa gwaEgipiti, nomalenga ge naantu yevi lye, oshoka owa li wa mono, nkene ya hepeke aantu yoye. Owa kolekitha nena esimano ndyoka u li na sigo onena.

¹¹ Aantu yoye owe ya longele ondjila mefuta e to ya endithile mo puukukutu. Oomboka ye ya tidhagana, owe ya undulile muule womeya, oya ka ningina mo ya fa omamanya mefuta lya pindjala.

¹² Omutenya owe ya enditha noshikogo shomuzile, nuusiku owa minikile ondjila yawo noshikogo shomulilo.

¹³ Pondundu Sinai owa kulukile pevi wa zi megulu; owa popitha aantu yoye e to ya pe oompango oombwanawa nomalongo gu uka.

¹⁴ Owe ya longo, ya dhiginine okuyapula Omasabati goye, nomomumati gwoye Moses owe ya pe iipango yoye.

¹⁵ “Uuna ya sa ondjala, owe ya pe oshikwiila sha zi megulu, nomeya ga zi memanya, uuna ya sa enota. Owe ya lombwele ya ka pangele evi ndyoka wa uvaneke, u li ya pe.

¹⁶ Ihe ootatekulu oya li aainenepeki naatangalali noya tindi okuvulika kiipango yoye.

¹⁷ Oya tindi okuvulika; oya dhimbwa ayihe we yi longo; oya dhimbwa iinyengandunge we yi longo. Muuntsa wawo oyi ihogololele omuwiliki, e ya shune muupika muEgipiti. Ihe ongoye Kalunga to dhimi po oondjo; ongoye omunamutimahenda nomunahole, iho geye mbala. Esilohenda lyoye enene; ino ya ekelela.

¹⁸ Oyi ihambulile oshimenka molupe lwongombe e taa ti osho kalunga ngoka e ya tembudha muEgipiti! Oye ku hindi unene, Omuwa!

¹⁹ Ihe ngoye ino ya thiga po mombuga, oshoka esilohenda lyoye enene. Ino kutha po oshikogo shomuzile noshomulilo shoka she ya ulukile ondjila omutenya nuusiku.

²⁰ Muuwanawa woye owe ya lombwele shoka ya li ye na okuninga; owe ya paluthitha omanna e to ya pe omeya gokunwa.

²¹ Moomvula omilongo ne, owe ya gwanithile oompumbwe dhawo adhihe mombuga; oonguwo dhawo inadhi kulupa, noompadhi dhawo inadhi zinda.

²² “Owe ya sinditha iigwana niilongo, omavi ngoka ge ya kunduka. Oya sindi oshilongo Heshbon sha lelwa kuSihon, noshilongo Baasha shomukwaniilwa Og.

²³ Owe ya pe aanona ye thike poonyothi dhomewangandjo, oya sindana e taa kala moshilongo shoka wa uvanekele oohekulu.

²⁴ Oya lala evi lyaKaanan; owa sindi aantu mboka ya kala mo. Owa pe aantu yoye oonkondo, ya ninge aantu naakwaniilwa yaKaanan, ngaashi ya hala.

²⁵ Aantu yoye oya kwata po iilando ya kola, evi lyo ondoka, omagumbo guuyamba nomithima dha pandwa momamanya, omiti dhomiolivi, omiti dhiiyimati niitsambe yomiviinu. Oya li ashihe shoka ya hala e taa ondoka; oya nyanyukilwa iiwanawa ayihe we yi ya pe.

²⁶ Aantu yoye inaa vulika noya tsu ondumbo nangoye, oya pilamene ompango yoye. Oya dhipaga aahunganeki mboka ye ya londodha, mboka ye ya lombwele, ya galukile kungoye. Aantu oye ku hindi olwindji.

²⁷ Omolwashoka we etha aatondi yawo, ye ya sinde yo ye ya pangele. Muudhigu wawo oye ku kugile onkugo, ongoye nowe ya yamukula megulu. Mesilohenda lyoye enene owe ya tumine aawiliki mboka ye ya hupitha maatondi yawo.

²⁸ Ombili sho ye ya, oya yono ishewe, nowa etha ishewe aatondi yawo, ye ya sinde. Ihe uuna yi itedhulula noye ku pula, u ya hupithe, owe ya uvu megulu. Ethimbo nethimbo owe ya hupitha omolwohenda yoye onene.

²⁹ Owe ya londodha ya vulike komalongo goye, ihe muuntsa oye ekelehi iipango yoye, nando okudhiginina iipango yoye okwo okukala nomwenyo. Oya tindi okuvulika, ya tangalala noya li oontseyele.

³⁰ Omumvo nomumvo owe ya londodha neidhidhimiko. Owa hwameke aahunganeki yoye, ye ya uvithile, ihe aantu yoye oya li oombolo, onkee we ya etha, ya sindike kiigwana yilwe.

³¹ Molwesilohenda lyoye enene, ino ya thiga po nenge u ya yone po. Ongoye Kalunga omunalukeno nomunesilohenda.

³² “Kalunga, Kalunga ketu, ngoye omunene ngiini! Omunankondo nomutilithi shili! Uudhiginini woye otau gwanitha omauvaneko goye. Okuza mpoka aakwaniilwa yaAssur ye tu hepeke, sigo onena nokuli, otwa tala iihuna ngiini! Aakwaniilwa yetu, aawiliki yetu, aayambi yetu naahunganeki yetu, ootatekulu naantu yetu ayehe oya hepekwa. Dhimbulukwa, nkene twa mono iihuna!

³³ Owa longo nawa, sho we tu geele; owa kala omudhiginini, nando twa yono.

³⁴ Ootatekulu, aakwaniilwa yetu, aawiliki yetu naayambi yetu inaa dhiginina ompango yoye. Inaa pulakena iipango yoye nomalondodho goye.

³⁵ Nando oya kalele meloolo mevi ndyoka enene nolyo ondoka we li ya pe, inaye etha iilonga yawo iiwinayi yo ye ku longele.

³⁶ Ngashingeyi otwa ninga aapika mevi ndyoka we li tu pe, mevi ndika lyo ondoka lyoku tu palutha.

³⁷ Eloolo lyeteyo lyalyo otali pewa aakwaniilwa mboka we ya tula po ye tu pangele, molwaashoka twa yono. Otaye tu ningi ngaashi ya hala, tse niimuna yetu, notu li momupya omunene!”

³⁸ Omolwaayihe mbyoka ya ningwa po, tse Aaisraeli otatu nyola euvaneno lyolela, naawiliki yetu, Aalevi yetu naayambi yetu otaye li shaina.

10

¹ Omushaini gwotango oye omunashikandjo Nehemia yaHakalia, okwa landula Sedekia. Aashaini ooyakwawo oyo mbaka:

² Aayambi: Seraia, Azaria, Jeremia, Pashhur, Amaria, Malkija, Hattush, Shebania, Malluk, Harim, Meremot, Obadia, Daniel, Ginneton, Baruk, Meshullam, Abia, Mijamin, Maasia, Bilgai naShemaia.

³

⁴

⁵

⁶

⁷

⁸

⁹ Aalevi: Jeshua yaAsania, Binnui gwoludhi lwaHenadad, Kadmiel, Shebania, Hodia, Kelita, Pelaia, Hanan, Mika, Rehob, Hashabia, Sakkur, Sherebia, Shebania, Hodia, Bani naBeninu.

¹⁰

¹¹

¹²

¹³

¹⁴ Aawiliki yoshigwana: Parosh, Pahat Moab, Elam, Sattu, Bani, Bunni, Asgad, Bebai, Adonia, Bigvai, Adin, Ater, Hiskia, Assur, Hodia, Hashum, Bezai, Harif, Anatot, Nebai, Magpiash, Meshullam, Hesir, Meshesabel, Sadok, Jaddua, Pelatia, Hanan, Anaia, Hosea, Hanania, Hasshub, Hallohesh, Pilha, Shobek, Rehum, Hashabna, Maaseia, Ahia, Hanan, Anan, Malluk, Harim naBaana.

¹⁵ Tse Aaisraeli, aayambi, Aalevi, aalangeli yotempeli, aayimbi yomotempeli, aakalele yomotempeli naayehe yalwe mboka haa vulika kompango yaKalunga noyi iyoolola mokati kaakwiilongo ya kala mevi lyetu, otse atuhe pamwe naakiintu yetu naamwetu ayehe ya koka noyu uvite ko,

¹⁶ otatu hangana pamwe naawiliki yetu mokugana nokuganenena kutya otatu kala pampango yaKalunga, ndjoka Kalunga e yi pele omuntu gwe Moses, notatu vulika kwaayihe mbyoka Omuwa, Kalunga ketu, te yi tu lombwele; e tatu dhiginine iipango ye ayihe nomautho ge agehe.

¹⁷ Tse itatu hokanathana we naakwiilongo mboka ya kala mevi lyetu.

¹⁸ Aakwiilongo ngele otaye tu etele iilya nenge sha shilwe, tu shi lande mEsabati nenge mesiku lilwe eyapuki, itatu shi landa nando. Kehe omumvo omutiheyali otatu vululukitha omapya, notatu dhimi po oongunga adhihe.

¹⁹ Omumvo kehe otatu ka gandja oshititatu shoshimaliwa oshisiliveli, tu kwathe iiniwe yotempeli.

²⁰ Otatu ka sila oshimpwiyu elongelokalunga lyomotempeli miinima mbika: iikwiila iiyapuki, iikulyandjambo yesiku kehe, omafikilondjambo gesiku kehe, omayambo omayapuki gOmasabati, giituthi yomwedhi omupe nogiituthi yilwe, omayambo omakwawo omayapuki, omayonondjambo naashihe shilwe tashi pumbiwa motempeli.

²¹ Tse, oshigwana, aayambi nAalevi, otatu ka umba oshihogololitho omumvo kehe, opo tu mone omaludhi ngoka tage tu tyayele iikuni yokulungunitha po omafikilondjambo taga yambelwa Omuwa, Kalunga ketu, ngaashi shu uthwa mompango.

²² Oshipe shometeyo lyetu niiyimati mbyoka tayi tiligana tango komiti dhetu, otatu yi eta kotempeli yOmuwa omumvo kehe.

²³ Omumati kehe osheeli ta valwa, otatu mu fala kaayambi kotempeli, ngaashi tashi pulwa kompango, tu mu yapulile Kalunga. Uutana auhe wi iyelipwa kooyina, otatu u yapulile Omuwa, osho wo uunzigona nenge uukombwena wi iyelipwa koonzi nokiikombo.

²⁴ Ongundo ndjoka tayi zi miilya mbyoka tatu teya kehe tango omumvo, otatu yi fala kaayambi, nomayambo getu galwe gomaviinu, gomagadhi gooholivi, nogiiyimati yomaludhi agehe. Aalevi mboka taa kunguna oshitimulongo momikunda dhi na omapya, otatu ya faalele oshitimulongo sheteyo lyetu.

²⁵ Aayambi aana yaAaron oye na okukala pamwe nAalevi, uuna iitimulongo tayi etwa, nAalevi oye na okukutha oshitimulongo mwaayihe mbyoka ye etwa e taye shi fala moompungulilo dhomotempeli.

²⁶ Aaisraeli nAalevi oye na okufala iigandjwa yiilya, yomaviinu noyomagadhi gooholivi moompungulilo moka iikwaniipangitho yomotempeli hayi pungulwa naamoka hamu kala aayambi, aalangeli yotempeli naayimbi mboka ye na olufo lwiilonga. Tse itatu etha nande egumbo lyaKalunga ketu.

11

¹ Aawiliki oya tula muJerusalem, ihe aantu yalwe oyu umbu iihogololitho, opo ya hogolole gumwe gwomaantu omulongo okukala moshilando oshiyapuki Jerusalem, manga ooyakwawo omugoyi taa ka kala miilando yilwe nomomikunda.

² Oshigwana osha pandula ayehe mboka ya tula muJerusalem pahalo lyawo yene.

³ Palwe Aaisraeli, aayambi, Aalevi, aakalele yomotempeli nomaluvalo gaapiya yaSalomo oya kala momagumbo gawo yene momikunda dhi ili nodhi ili. Mbaka oyo aawiliki yiikandjo ya kalele muJerusalem:

⁴ Yomezimo lyaJuda: Ataia yaUssia waSakaria yaAmaria gaShefatia shaMahalalel gwomoluvalo lwaPerez.

⁵ Maaseia gaBaruk yaKolhose yaHasaia yaAdaia yaJoiarib yaSakaria gwomoluvalo lwaShela.

⁶ Oluvalo lwaPerez olwa li lu na aalumentu oofule 468 mboka ya kala muJerusalem.

⁷ Yomezimo lyaBenjamin: Sallu yaMeshullam, omutekulu gwaJoed. Moohekulu omwa li Pedaia, Kolajia, Maaseia, Itiel naJeshaja.

⁸ Gabbai naSallai, yezimo lyaSallu. Aabenjamin ya li muJerusalem ayehe kumwe 928.

⁹ Joel yaSikri oye a li omuwiliki gwawo, naJuda yaHassenua okwa li omukuluntu omutiyali moshilando.

¹⁰ Aayambi oyo: Jedaia yaJoiarib naJakin.

¹¹ Seraia yaHilkia, omutekulu gwaMeshullam. Moohekulu omwa li Sadok, Meraiot naAhitub, ngoka a li omuyambimukuluntu.

¹² Aantu ayehe kumwe yoludhi nduka lwezimo ya yakula motempeli, oya li 822. Adaia yaJeroham, omutekulu gwaPelalia. Moohekulu omwa li Amzi, Sakaria, Pashhur naMalkija.

¹³ Aantu ayehe kumwe 242 yoludhi nduka oya li aakuluntu yomazimo. Amashsai yaAsarel, omutekulu gwaAhsai. Moohekulu omwa li Meshillemot naImmer.

¹⁴ Okwa li aantu 128 yoludhi nduka, mboka ya li aakwiita oofule. Ondjayi yawo oya li Sabdiel yaHaggedolim.

¹⁵ Aalevi oyo: Shemaia yaHasshub, omutekulu gwaAsrikam. Moohekulu omwa li Hashabia naBunni.

¹⁶ Shabbetai naJosabad, Aalevi ya simana, mboka ya tonatele iilonga pondje yotempeli.

¹⁷ Mattania yaMika, omutekulu gwaZabdi, oluvalo lwaAsaf. Okwa li ha wilike olwiimbo lwotempeli momagalikanohambelelo. Bakbukia, omupeha gwaMattania. Abda yaShammua, omutekulu gwaGalal, oluvalo lwaJedutun.

¹⁸ Aalevi ayehe kumwe 284 oya kala moshilando oshiyapuki Jerusalem.

¹⁹ Aalangeli yotempeli: Akkub, Talmon naakwawo, ayehe kumwe 172.

²⁰ Aaisraeli yalwe, aayambi yalwe nAalevi yalwe oya kala momagumbo gawo yene momikunda dhaJuda.

²¹ Aakalele yomotempeli oya kala moshitopolwa shaJerusalem hashi ithanwa Ofel. Oya li taa yakula metonatelo lyaZiha naGishpa.

²² Omutonateli gwAalevi muJerusalem okwa li Ussi waBani, omutekulu gwaHashabia. Moohekulu omwa li Mattania naMika yomoludhi lwaAsaf, oludhi ndoka lwa li halu sile olwiimbo oshimpwiyu momalongelokalunga.

²³ Omukwaniilwa okwa li a uthila aaimbi elandulathano lyokwiimba motempeli esiku kehe.

²⁴ Petahia yaMeshesabel gwoludhi lwaSera mezimo lyaJuda okwa li e lile po Aaisraeli muuwa waPersia miinima ayihe.

²⁵ Aantu oyendji oya kalele miilando ya kundukwa komapya gawo. Yomezimo lyaJuda oya li muKiriatarba, Dibon naKabzeel nomiikandjo yi li popepi niilando.

²⁶ Oya li wo miilando Jeshua, Molada, Betpelet

²⁷ naHazarshual nomuBeersheba nomomikunda dhe yi kunduka.

²⁸ Oya kala muZiklag, muMekona nomomikunda dhe yi kunduka,

²⁹ muEnrimmon, muSoar muJarmut,

³⁰ muSanoa, muAdullam nomomikunda dhi li popepi niilando mbika. Oya kala muLakish nomomapya ge li popepi nasho, muAseka nomomikunda dhasho. Aajuda oya kala ano moshilongo shi li pokati kaBeersheba muumbugantu nokolusilu lwaHinnom muumbangalantu.

³¹ Aantu yezimo lyaBenjamin oya kala muGeba, Mikmash, Ai, Betel nomomikunda dhi li popepi nayo,

³² muAnatot, Nob, Ananeia,

³³ Hazor, Rama, Gittaim,

³⁴ Hadid, Seboim, Neballat,

³⁵ Lod naOno nomOlusilu lwaaniilonga yiikaha.

³⁶ Oongundu dhimwe dhAalevi yomuJuda oya pewa ya kale pamwe nAabenjamin.

12

¹ Mpaka otapa landula omusholondondo gwaayambi nAalevi mboka ya galuka muupika pamwe naSerubbabel yaShealtiel nomuyambimukuluntu Josua:

² Aayambi oyo: Seraia, Jeremia, Esra, Amaria, Malluk, Hattush, Shekania, Rehum, Meremot, Iddo, Ginnetoi, Abia, Mijamin, Maadia, Bilga, Shemaia, Joiarib, Jedaia, Sallu, Amok, Hilkia naJedaia. Aantu mbaka oya li aawiliki mokati kaayambi ooyakwawo muuyuni waJosua.

³

⁴

⁵

⁶

⁷

⁸ Aalevi: Mboka ya li haa wilike oondjimbohambelelo, oyo Jeshua, Binnui, Kadmiel, Sherebia, Juda naMattania.

⁹ Mboka ya thikama ya taalelathana nayo taa imbi eziminathano, oyo Bakbukia, Unni nAalevi ooyakwawo.

¹⁰ Josua okwa li he yaJoiakim, Joiakim ohe yaEliashib, Eliashib ohe yaJoiada,

¹¹ Joiada ohe yaJonatan, naJonatan ohe yaJaddua.

¹² Joiakim sho a li omuyambimukuluntu, aayambi aawiliki yomaludhi gaayambi oyo: Omuyambi Oludhi Meraia Seraia Hanania Jeremia Meshullam Esra Jehohanan Amaria Jonatan Malluk Josef Shebania Adna Harim Helkai Meraiot Sakaria Iddo Meshullam Ginneton Sikri Abia Piltai Miniamin na Maadja Shammua Bilga Jehonatan Shemaia Mattenai Joiarib Ussi Jedaia Kallai Sallai Eber Amok Hashabia Hilkia Netanel Jedaia

¹³

¹⁴

¹⁵

¹⁶

¹⁷

¹⁸

¹⁹

²⁰

²¹

²² Ondjalulo yaakuluntu yomazimo gAalevi noyomazimo gaayambi oya dhigininwa muuyuni waayambi aakuluntu Eliashib, Joiada Jonatan naJaddua. Ondjalulo ndjika oya li ya pu muuyuni waDarius, omupangeli gwaPersia.

²³ Ondjalulo yaakuluntu yomazimo gAalevi oya dhigininwa ashike sigo omuuyuni waJonatan omutekulu gwaEliashib.

²⁴ Mewiliko lyaHashabia, Sherebia, Jeshua, Binnui naKadmiel, Aalevi oya topolwa moongundu. Oongundu mbali molufo lumwe odha li dhi na oshimpwiyu shokutanga nokuhambelela, Kalunga, ngaashi sha li shu uthwa komukwaniilwa David, omuntu gwaKalunga.

²⁵ Aantu mboka ya li taa tonatele omiyelo dhoompungulilo dhotempeli, oyo Mattania, Bakbukia, Obadia, Meshullam, Talmon naAkkub.

²⁶ Aantu mbaka oya li ko muuyuni waJoiakim yaJosua, omutekulu gwaJehosadak, nomuuyuni womunashikandjo Nehemia nopethimbo lyomuyambi nomunongompango Esra.

²⁷ Omadhingililokuma gaJerusalem sho ga li taga yapulwa, Aalevi oye etwa mo ya zi nkoka ya kala, opo ya dhane eyapulo noondjimbohambelelo taa hiki iiyaha, uuharpa nuushandja.

²⁸ Omazimo gaayimbi Aalevi oga gongala ga zi komaha gago nkoka ga kala puushiinda waJerusalem nokomikunda dhopuNetofa,

²⁹ kuBetgilgal, Geba naAsmavet.

³⁰ Aayambi nAalevi oyi iyopaleke opo ya kale ya yogoka, oyo opaleke wo aantu, omiyelo nedhingililokuma lyoshilando pamisindilo.

³¹ Onda gongaleke aawiliki yaJuda kombanda yekuma e tandi ya tula metonatelo lyoongundu oonene mbali, ya katuke taa dhingoloka oshilando yo taa hambelele Kalunga. Ongundu yotango oya yi lwokolulyo kombanda yekuma yu ukilila kOsheelo shuuhoho.

³² Hoshaia okwa katuka konima yaaimbi, a landulwa ketata lyaawiliki yaJuda

³³ nokaayambi mboka taa hiki omankuma: Azaria, Esra, Meshullam, Juda, Benjamin, Shemaia naJeremia. Oya landulwa kuSakaria yaJonatan, omutekulu gwaShemaia. (Moohekulu omwa li wo Mattania, Mikaia naSakkur gwoludhi lwaAsaf.)

³⁴

³⁵

³⁶ Sakaria okwa landulwa kaantu yalwe yoludhi lwe — Shemaia, Asarel, Milalai, Gilalai, Maai, Netanel, Juda naHanani — ayehe mboka oya li ya humbata iihikomwa yomaludhi gokuhikwa komukwaniilwa David, omuntu gwaKalunga. Omunongompango Esra okwa wilike ongundu ndjika mosheendo.

³⁷ POsheelo shopoluthithiya oya londo pombanda piikolo yu uka koshilando shaDavid, oya pitilile uuwa waDavid e taa galukile kekuma pOsheelo shomeya kuuzilo woshilando.

³⁸ Ongundu onkwawo yaahambeleli oyu uka kolumoho ya lambalala ekuma pombanda, nangame onda landula ko nongundu ya hupu ko. Otwa katuka tatu pitilile Oshungo yomaziko, twe ya pEkuma lya mbwalangandja,

³⁹ twa pitilile Osheelo shaEfraim, Osheelo oshikulu, Osheelo shoohi, oshungo Hananel, oshungo Hammea nOsheelo shoonzi. Otwa hulile popepi nosheelo shotempeli.

⁴⁰ Oongundu adhihe mbali ndhoka dha li tadhi hambelele Kalunga, odha adha ehala lyotempeli. Kakele kaawiliki mboka ya li pungame,

⁴¹ mongundu yandje omwa li aayambi mboka taa hiki omankuma: Eliakim, Maaseia, Miniamin, Mikaia, Elioenai, Sakaria naHanania;

⁴² noya landulwa kuMaaseia, Shemaia, Eleasar, Ussi, Jehohanan, Malkija, Elam naEzer. Aayimbi mewiliko lyaJezrahia oya imbi nomawi gomuule.

⁴³ Esiku ndyoka aantu oya yamba omafikilondjambo ogendji noya li ya nyanyukwa pombanda, oshoka Kalunga okwe ya nyanyudha. Aakulukadhi naanona oyi itula wo moshiindingili, onkee omawi goondigolo oga uvika kokule naJerusalem.

⁴⁴ Pethimbo ndyoka aantu oya langekwa metonatelo lyoompungulilo moka iigandjwa yotempeli tayi pungulwa, mwa kwatelelwa iitimulongo noshipe shiilya noshiiyimati yomumvo kehe. Aantu mboka oya li ye na oshimpwiyu shokugongela pampango iitaambwa yaayambi nAalevi mbyoka ya zi komapya ge li puushiinda wiilando yi ili noyi ili. Aajuda ayehe oya li ye na ombili naayambi nAalevi,

⁴⁵ oshoka oya gwanitha omayakulo agehe nomisindilo dhomaitheto ndhoka Kalunga e ya lombwele. Aayimbi yomotempeli naalangeli yotempeli nayo wo oya gwanitha iilonga yawo pamalombwelo ga gandjelelwe komukwaniilwa David nomwana Salomo.

⁴⁶ Okuza nale, muuyuni womukwaniilwa David nomwiimbithi Asaf, aayimbithi oya kala haa wilike omaimbilo gokutanga nokuhambelela Kalunga.

⁴⁷ Muuyuni waSerubbabel, osho wo muuyuni waNehemia, Aaisraeli ayehe oya gandja omagano esiku kehe, opo ya gwanithe oompumbwe dhaaimbi yomotempeli nodhaalangeli yotempeli. Aantu oya gandja omayambo omayapuki kAalevi, nAalevi oya gandja oshitopolwa kaayambi.

13

¹ Ompango yaMoses sho ya li tayi leshelwa aantu mokule, oya adha peha mpoka taku tiwa kutya Aayammoni nenge Aamoabi kaye na okupitikilwa ekwatathano naantu yaKalunga.

² Shika osha ningwa, molwaashoka Aayammoni nAamoabi inaa pa Aaisraeli omeya niikulya mondjila yokuza kuEgipiti. Peha lyasho oya futu Bileam iimaliwa, a thinge Israel, ihe Kalunga ketu ethingano ndika okwe li galulile elaleko nuuyamba.

³ Aaisraeli sho yu uvu ompango ndjika tayi leshwa, oyi iyoolola maakwiilongo ayehe, yaa kwatathane nayo.

⁴ Omuyambi Eliashib, ngoka a li omutonateli gwoompungulilo dhomotempeli, okwa li e na ekwatathano naTobia.

⁵ Okwa pitika, Tobia a longithe ela enene ndyoka lya li lya dhiladhililwa okupungula iikulyandjambo niitsinino, iikwaniipangitho yomotempeli, omayambo omolwaayambi niitimulongo yiilya, omaviinu nomagadhi gooholivi ga pewa Aalevi naayimbi yomotempeli naalangeli yotempeli.

⁶ Ihe ayihe mbika sho ya ningwa, kanda li mo muJerusalem, oshoka momumvo omutimilongondatu nambali sho Artakserkses a li omukwaniilwa gwaBabilonia, onda shunine, ndi ke mu tseyithile iinima. Sho pwa piti omasiku, okwa pitikile ndje,

⁷ ndi shune kuJerusalem. Onda haluka, sho nda mono Eliashib a zimine Tobia a longithe ela limwe motempeli.

⁸ Onda li nda thita po kondjahi e tandi umbu mo iikoloiikolokoto yaTobia ayihe.

⁹ Onda gandja elaka, omala ga opalekwe pamisindilo, niikwaniipangitho yomotempeli, iikulyandjambo niitsinino yi galulilwe mo.

¹⁰ Onda koneke wo kutya aayimbi yomotempeli nAalevi yalwe ya li muJerusalem, oya adhika ya shuna koohambo dhawo, molwaashoka aantu inaye ya pa oompumbwe dhawo.

¹¹ Onda nyenyetele omalenga, sho ge etha otempeli yi dhanenwe. Onda galulile Aalevi naayimbi motempeli e tandi ya langeke ishewe miilonga.

¹² Nena Aaisraeli ayehe oya tameke okweeta ishewe iitimulongo yawo yiilya, yomaviinu noyomagadhi gooholivi.

¹³ Onda tula aalumentu mbaka melangelo lyoompungulilo: omuyambi Shelemia, omunongompango Sadok nOmulevi Pedaia. Hanan yaSakkur, omutekulu gwaMattania, okwa li omuyakuli gwawo. Aalumentu mbaka oya talwa aainekelwa mokutopolela aayakuli ooyakwawo iipewa yawo yiikulya.

¹⁴ Kalunga kandje, dhimbulukwa ndje, ngoye ino dhimbwa oholeyakulo yandje. Ayihe onde yi ningi omolwotempeli yoye nelongelokalunga lyamo.

¹⁵ Methimbo ndyoka onda mono aantu muJuda taa kolo omaviinu mEsabati. Yamwe oya londeka iilya, omaviinu, omandjembele, oonkwiyu niinima yilwe kuusino wawo e taye yi eta muJerusalem. Onde ya londodha, yaa landakanithe sha mEsabati.

¹⁶ Aantu yamwe yoshilando Tiro oya li ya kala muJerusalem noye eta mo oohi niinima yi ili noyi ili, ye yi landakanithe naantu yetu mEsabati.

¹⁷ Onda nyenyetele aawiliki yAajuda e te ti: “Taleni uuwinayi mpoka u thike tamu u ningi. Ne otamu nyateke Esabati.

¹⁸ Osho naanaa shoka Kalunga a geelele oohokulu, sho a hanagula po oshilando shika. Natango ne otamu tukuluthile Israel ondjahi onene yaKalunga yi vule yonale, sho tamu hunu mokunyateka Esabati.”

¹⁹ Onda gandja elaka, omiyelo dhoshilando dhi edhilwe petameko lyEsabati, shampa kwa wiwile ongulohi, noitadhi egululwa we, sigo Esabati lya piti. Onda langeke aantu yandje yamwe pomiyelo, opo ya tale, ngele ope na ngoka te eta sha moshilando esiku lyEsabati.

²⁰ Lumwe nolwaali aalandithi naashingithi yiipindi yi ili noyi ili oya kala uusiku auhe pondje yoshilando taa landitha iipindi yawo.

²¹ Onde ya londodha nda ti: “Oshike tamu hungile pekuma? Ngele tamu shi yelekele natango, otandi ke mu geela.” Okuza mpoka inaa galuka we mEsabati.

²² Onda lombwele Aalevi, yi ithete pamisindilo yo ye ye ya langele omiyelo yo ya tale, ngele Esabati otali yapulwa tuu. Kalunga kandje, dhimbulukwa ndje, ngoye u sile ndje ohenda omoluunene wesilohenda lyoye.

²³ Pethimbo ndyoka onda koneke ishewe kutya nani Aajuda oyendji oya hokana aakulukadhi ya za kuAshdod, Ammon naMoab.

²⁴ Etata lyomaana yawo otali popi elaka lyokuAshdod nenge elaka lilwe li ili yo inaa tseya okupopya elaka lyetu.

²⁵ Onda nyenyetele aasamane, onde ya thingi e tandi ya dhenge noku ya tudha omafufu gawo. Nena onde ya ganitha medhina lyaKalunga, opo yaa hokane we aakwiilongo, noyana yaaye shi ninge.

²⁶ Onda ti: “Aakulukadhi aakwiilongo oyo ya yonitha Salomo. Okwa li omulumentu omunene e vule aakwaniilwa yiigwana yilwe. Kalunga okwa li e mu hole e te mu ningi omukwaniilwa gwaIsrael alihe, ndele natango okwa gwile ngaa muulunde.

²⁷ Natu landule nduno oshinkoti sheni, twaa vulike kuKalunga ketu, tu hokane aakulukadhi aakwiilongo?”

²⁸ Joiada okwa li omuna gwomuyambimukuluntu Eliashib, ihe omwanamati gwaJoiada okwa li a hokana omufuko omuna gwaSanballat gwokomukunda Bethoron. Onda tidha mo Joiada muJerusalem.

²⁹ Kalunga kandje, ya landula, oshoka oyo ya nyateke uuyambi nehangano ndyoka wa hangana naayambi nAalevi.

³⁰ Onda yelitha oshigwana kuukwiilongo; ondu uthile aayambi nAalevi iinakugwanithwa yawo, shaa ngoka pamuthika gwiilonga ye;

³¹ ondu utha, uuna iikuni yokulungunitha omayambo yi na okweetwa, osho wo oshipe shomiilya noshomiiyimati. Kalunga kandje, dhimbulukwa ayihe mbika nokuyambeka ndje.