1 Momumvo gwotango Kores sho a li omupangeli gwaPersia, Omuwa okwa tsakanitha shoka sha popilwe komuhunganeki Jeremia. Omuwa okwa hwameke ombepo yaKores, a gandje oshipango molupe lwenyolo sho shi leshwe pombanda moshilongo she ashihe:
2 “Kores, omupangeli gwaPersia ota ti ngeyi: Omuwa, Kalunga komegulu, okwa ningi ndje omuleli guuyuni auhe nokwa pe ndje oshilonga shoku mu tungila otempeli muJerusalem shomuJuda.
3 Kalunga na kale nane amuhe, ne aantu ye. Indeni kuJerusalem, mu tungulule otempeli yOmuwa, Kalunga kaIsrael, Kalunga ngoka ta simanekelwa muJerusalem.
4 Ngele gumwe gwomaantu muupika ta pumbwa ekwatho mokushuna, aashiinda ye naye mu kwathe. Naye mu pe oshisiliveli noshingoli, omaliko niimuna, nomayambo goku ka fala motempeli yaKalunga muJerusalem.”
5 Nena aakuluntu yomaludhi gomazimo gaJuda naBenjamin, aayambi nAalevi naayehe mboka Kalunga a pendutha, oyi ilongekidhile okuya, ya ka tungulule otempeli yOmuwa muJerusalem.
6 Aashiinda yawo ayehe oye ya kwatha noku ya pa iinima oyindji: iikwaniipangitho yoshisiliveli noyoshingoli, omaliko, iimuna niinima yilwe yi na ondilo, nomayambo gomotempeli.
7 Kores okwe ya shunine iiyaha niitenga mbyoka omukwaniilwa Nebukadnezzar a kuthile motempeli muJerusalem e te yi tula motempeli yiikalunga ye.
8 Okwe yi ya pe mewiliko lyaMitredat, omukuluntu gwomaliko guuwa, ngoka e yi yalula noku yi pa Sheshbazzar, omunashikandjo gwaJuda,
9 ngaashi tashi landula mpaka: iiyaha yoshingoli 30 iiyaha yoshisiliveli 1 000 iiyaha yilwe 29 uuyaha woshingoli 30 uuyaha woshisiliveli 410 iikwaniipangitho yilwe 1 000.
10
11 Ayihe kumwe oya li iiyaha 5 400 yoshingoli noyoshisiliveli niinima iikwawo mbyoka Sheshbazzar a yi nayo, aapongekwa sho ya zi muupika waBabilon nokuya kuJerusalem.
1 Oyendji yomaapongekwa oya zi moshikandjo shaBabilon e taa shuna kuJerusalem naJuda, shaa ngoka okoshilando shaandjawo. Omazimo gawo oga li muupika muBabilonia, okuza sho omukwaniilwa Nebukadnezzar e ya kwatele oonkwatwa.
2 Aawiliki yawo oya li Serubbabel, Josua, Nehemia, Seraia, Reelaia, Mordekai, Bilshan, Mispar, Bigvai, Rehum naBaana. Nguka omusholondondo gwomaludhi gaIsrael, pamwe nomwaalu gwoludhi kehe ndoka lwa galuka muupika:
3 Parosh — 2 172 Shefatia — 372 Arah — 775 Pahat Moab (omaluvalo gaJeshua naJoab) — 2 812 Elam — 1 254 Sattu — 945 Sakkai — 760 Bani — 642 Bebai — 623 Asgad — 1 222 Adonikam — 666 Bigvai — 2 056 Adin — 454 Ater (haku tiwa Hiskia) — 98 Bezai — 323 Jora — 112 Hashum — 223 Gibbar — 95.
4 Aantu mboka oohekulu ya li momikunda tadhi landula, oya li wo ya galuka: Betlehem — 123 Netofa — 56 Anatot — 128 Asmavet — 42 Kiriat Jearim, Kefira naBeerot — 743 Rama naGeba — 621 Mikmash — 122 Betel naAi — 223 Nebo — 52 Magbish — 156 Elam oshikwawo — 1 254 Harim — 320 Lod, Hadid naOno — 725 Jeriko — 345 Senaa — 3 630.
5 Nguka omusholondondo gwomaludhi gaayambi mboka ya galuka muupika: Jedaia (omaluvalo gaJeshua) — 973 Immer — 1 052 Pashhur — 1 247 Harim — 1 017.
6 Omaludhi gAalevi ngoka ga galuka muupika: Jeshua naKadmiel (omaluvalo gaHodavia) — 74 Aayimbi motempeli (omaluvalo gaAsaf) — 128 Aalangeli yotempeli (omaluvalo gaShallum, Ater, Talmon, Akkub, Hatita naShobai) — 139.
7 Omaludhi gaalongi yomotempeli ngoka ya galuka muupika: Ziha, Hasufa, Tabbaot, Keros, Siaha, Padon, Lebana, Hagaba, Akkub, Hagab, Shamlai, Hanan, Giddel, Gahar, Reaia, Rezin, Nekoda, Gasam, Ussa, Pasea, Besai, Asna, Meunim, Nefisim, Bakbuk, Hakufa, Harhur, Bazlut, Mehida, Harsha, Barkos, Sisera, Temah, Neziah naHatifa.
8 Omaludhi gaapiya yaSalomo mboka ya galuka muupika: Sotai, Hassoferet, Peruda, Jaala, Darkon, Giddel, Shefatia, Hattil, Pokeret Hazzebaim naAmi.
9 Omwaalu aguhe kumwe gwomaluvalo gwaalongi yomotempeli nogwaapiya yaSalomo mboka ya galuka muupika, ogwa li 392.
10 Okwa li aantu 652 yomomaludhi gaDelaja, Tobia naNekoda mboka ya galuka ya zi kiilando Tel Mela, Tel Harsha, Kerub, Addan, naImmer; ihe kaya li taa vulu okuholola kutya yo omaluvalo gAaisraeli.
11 Mokati komaludhi gaayambi omwa li omaluvalo gaHabaia, Hakkoz naBarsillai (omulumentu ngoka a hokanene omuna gwOmugilead Barsillai nokwi ithanwa nedhina lyahemweno.)
12 Omaludhi ngaka sho inaaga wapa okumona oondjalula dhomazimo gago, oga kondwa mo muuyambi.
13 Omuleli gwAajuda okwe ya indike iikulya ya yambelwa Kalunga, manga kaaku na omuyambi ta vulu okulongitha Urim naTummim.
14 Omwaalu gwaayehe mboka ya galuka muupika ogwa li 42 360,
15 kakele kaapiya yawo aalumentu naakiintu, mboka ya li 7 337. Oya li ye na wo aayimbi aalumentu naakiintu 200.
16 Oya li ye na uukambe 736, omamulutiya 245,
17 oongamelo 435 nuusino 6 720.
18 Aapongekwa sho ya thiki potempeli yOmuwa muJerusalem, yamwe yomaawiliki yomaludhi oya gandja pahalo lyawo yene omagano gomayambo, ya kwathe metungululo lyotempeli pehala lyayo.
19 Pankondo dhawo oya gandja moshiketha shetungululo iimaliwa yiingoli 61 000, uutale wiisiliveli 5 000 noonguwo dhaayambi 100.
20 Aayambi, Aalevi nayamwe yomaantu oya kala muJerusalem nenge popepi nasho; aaimbi, aalangeli yotempeli naalongi motempeli oya tula momikunda dhopuushiinda; noshihupe shAaisraeli osha tula momikunda moka oohekulu ya li ya kala.
1 Momwedhi omutiheyali Aaisraeli ayehe oya li ya tula momikunda dhawo. Nena ayehe oya gongala muJerusalem.
2 Josua yaJehosadak, aayambi ooyakwawo naSerubbabel yaShealtiel pamwe nezimo lye oya tungulula oshiyambelo shaKalunga kaIsrael, opo ya wape okulungunithila ko omafikilondjambo pamalombwelo ga nyolwa mompango yaMoses, omumati gwaKalunga.
3 Nonando aapongekwa ya galuka, oya tila mboka ya li moshilongo, oya tungulula oshiyambelo mpoka sha li nale. Nena oya tameke okulungunithila ko omafikilondjambo ongula nongulohi kehe.
4 Oya dhana Oshituthi shiihwa iitalala pamisindilo; esiku kehe oya yamba omafikilondjambo gu uthilwa esiku ndyoka;
5 oya yamba wo omidhidhindjambo nomayambo gOshituthi shomwedhi omupe naangoka giituthi ayihe yilwe moka Omuwa ta simanekelwa, osho wo omayambo gomagano.
6 Aantu nando oya li inaa tameka okutunga otempeli, oya tameke mesiku lyotango lyomwedhi omutiheyali okulungunithila Omuwa omafikilondjambo.
7 Aantu oyu umbu ongalo yiimaliwa, opo ya fute aahongi yomamanya naanashihongelo. Oya gandja iikulya, iinuwa nomagadhi gooholivi kAatiro nAasidoni, opo ye ya etele omisendeli dhokuLibanon tadhi pitile kefuta kuJoppa. Ayihe mbika oya ningwa pazimino lyaKores, omupangeli gwaPersia.
8 Momwedhi omutiyali gwomumvo omutiyali, sho ya galuka ye ya kehala lyotempeli muJerusalem, iilonga oya tameke. Serubbabel yaShealtiel, Josua yaJehosadak nooyakwawo, aayambi nAalevi, ayehe mboka ya zi muupika noye ya kuJerusalem, oyi itula miilonga. Aalevi ayehe yomimvo omilongo mbali nenge ye vule po oya tulwa metonatelo lyetungululo lyotempeli.
9 Omulevi Jeshua, oyana naakwawo, naKadmiel noyana (oludhi lwaHodavia) oyi itula kumwe, ya tonatele etungululo lyotempeli. (Oya kwathwa kAalevi yoludhi lwaHenadad.)
10 Aantu sho ya tameke okutula po omakankameno gotempeli, aayambi oya hiki omankuma ya zala oondjatha dhawo, nAalevi yoludhi lwaAsaf oya li ye na iikwelengi. Oya hambelele Omuwa pamalombwelo ye ga pelwe muuyuni womukwaniilwa David.
11 Oyi imbi taa hambelele Omuwa ye endulula taa ti: “Omuwa oye omwaanawa; esilohenda lye hali kala aluheluhe.” Aantu ayehe oyi igidha ya mana mo taa hambelele Omuwa molwaashoka omakankameno gotempeli ga tulwa po.
12 Aayambi oyendji aakulupe, Aalevi naakuluntu yomaludhi mboka ya monene otempeli yotango, oya lili nokulililila, sho ya tala etulopo lyekankameno lyotempeli ndjika. Ihe yalwe mboka ya li ko, oya kaluluka kenyanyu.
13 Kapwa li ngoka ta vulu okuyoolola ekaluluko lyenyanyu noondila, oshoka aantu oya kaluluka mokule noyu uvika kokulekule.
1 Aatondi yAajuda nAabenjamin oyu uvu kutya aantu mboka ya galuka muupika, otaa tungulula otempeli yOmuwa, Kalunga kaIsrael.
2 Oya yi kuSerubbabel naakuluntu yomaludhi e taa ti: “Tu pitikeni, tu tunge otempeli pamwe nane. Ndishi ohatu simaneke Kalunga gumwe, notwe mu yamba omayambo okuza komasiku ngoka, omupangeli gwaAssur Asarhaddon sho e tu tumine tu kale huka.”
3 Serubbabel, Josua naakuluntu yomaludhi oya ti kuyo: “Itatu pumbwa ekwatho lyeni okutunga otempeli yOmuwa, Kalunga ketu. Otatu yi tungu tse yene, naanaa ngaashi omupangeli gwaPersia Kores e tu lombwele.”
4 Nena aantu mboka ya adhika moshilongo, oya kambadhala okutyololokitha nokuhalutha Aajuda, opo yaa tunge we.
5 Oya gandja oombumbo kaakwanepangelo yAapersia, opo ye ya kondjithe. Oye ya keelele ethimbo alihe lyelelo lyaKores sigo omelelo lyaDarius.
6 Petameko lyepangelo lyaKserkses aatondi yaantu mboka ya li muJuda naJerusalem, oya nyola oontumwafo tadhi ya kondjitha.
7 Muuyuni womupangeli Artakserkses gwaPersia Bishlam, Mitredat, Tabeel naahangani nayo oya nyolele omupangeli ontumwafo. Ontumwafo oya li ya nyolwa melaka lyOshiaramea nomoondanda dhasho.
8 Omunashikandjo Rehum naAmushanga Shimshai oya nyolele Artakserkses ontumwafo tayi popi Jerusalem:
9 “Rehum, omunashikandjo naShimshai, Amushanga naakwanepangelo ooyakwawo, aatokolihapu oontumwa, aatonateli nomalenga agehe, aantu ya za muErek, Babilon naSusa muElam,
10 ayehe kumwe naantu mboka Asenappar omunene nomunankondo e ya tembudha maandjawo e te ya langeke moshilando Samaria nopalwe kuuninginino womulonga Eufrat.”
11 Ontumwafo otayi ti: “Komupangeli Artakserkses, otse aamati yoye kombinga ndjika yokuuninginino waEufrat.
12 “Otwa hala oku ku tseyithila kutya Aajuda mboka ye ya huka ya zi miitopolwa yilwe yoshilongo shoye, oya tula muJerusalem notaa tungulula oshilando shoka shoshipwe noshondumbo. Oya tameke okutungulula omadhingililokuma notaye ke ga mana mbala.
13 Nkeyama, oshilando shino ngele otashi tungululwa, nomadhingililokuma gasho taga opalekwa, aantu otaa ka tinda okufuta oompale, neliko lyoye otali fupipala.
14 Ngashingeyi, oshoka tse oyopungoye, tatekulu, noinatu hala shika shi ningwe, otwa dhiladhila,
15 u konakonithe embo lyondjokonona yoohokulu. Ngele to shi ningi, oto ka dhimbulula kutya oshilando shoka oshipwidhi okuza konale noshe etele aakwaniilwa naaleli yiikandjo uudhigu. Omolwashoka osha hanagulwa po.
16 Tse ano otatu ku tseyithile kutya oshilando shika ngele tashi tungululwa nomadhingililokuma gasho taga kolekwa, nena ito ka vula we okupangela oshitopolwa shika shokuuninginino waEufrat.”
17 Omupangeli okwa tumu eyamukulo tali ti: “KuRehum omunashikandjo nokuShimshai amushanga nokaakwanepangelo ooyakwawo ye li muSamaria nokuuninginino womulonga Eufrat, kundweni.
18 “Ontumwafo ndjoka mwa tumu, oya leshwa kungame noya yela.
19 Onda gandja elaka, ekonakono li ningwe, nosha monika mo kutya konalenale Jerusalem osha tukulila epangelo iipotha nosha li shu udha aatsindumbo naatsithi yomaminimini.
20 Aakwaniilwa aanankondo omo ya lele noya pangele oshitopolwa ashihe shokuuninginino waEufrat nokupula oompale nomaliko.
21 Ano lombweleni aantu, ya mweneke etungululo lyoshilando, sigo tandi ka gandja elaka.
22 Shi ningeni mbala, opo pwaa kale oshiponga tashi etelwa aakwaniilwa.”
23 Ontumwafo yaArtakserkses sho ya leshelwa Rehum, Shimshai nooyakwawo, oya yi mbala kuJerusalem e taa indike Aajuda okutungulula oshilando.
24 Iilonga yotempeli oya kankekwa noya kala sigo omumvo omutiyali gwepangelo lyomupangeli gwaPersia, Darius.
1 Pethimbo ndiyaka aahunganeki yaali, Haggai naSakaria yaIddo oya hunganeke medhina lyaKalunga kaIsrael ya lombwele Aajuda mboka ya kala muJuda naJerusalem.
2 Serubbabel yaShealtiel naJosua yaJehosadak sho yu uvu elaka lyawo oya tameke okutunga otempeli muJerusalem, naahunganeki mboka yaali oye ya kwatha.
3 Pethimbo ndyoka Tattenai, omunashikandjo shokuuninginino waEufrat, Shetar Bosenai naakwanepangelo ooyakwawo oye ya kuJerusalem e taa ti: “Olye e mu pe elaka, mu tunge otempeli nokutsakanitha omakuma?”
4 Oya pula wo omadhina gaamboka ya kwatha okutunga otempeli.
5 Ihe Kalunga okwa tonatele aawiliki yAajuda, naakwanepangelo Aapersia oya tokola okutegelela, sigo ya nyolele Darius noya mone eyamukulo lye.
6 Ehokololo ndyoka ye li tumu komupangeli, olyo ndi:
7 “Komupangeli Darius, lela nombili.
8 “Nkeyama, ou na okutseya kutya tse otwa yi moshilongo shaJuda notwa mono otempeli yaKalunga omunene tayi tungululwa nomamanya omanene nomiti tadhi tulwa momakuma. Iilonga otayi ende po nawa nesiloshimpwiyu e tayi humu ko.
9 “Otwa pula aawiliki yoshigwana, ye tu hokololele ngoka e ya pe uuthemba wokutungulula otempeli noku yi opaleka.
10 Otwe ya pula wo omadhina gawo, opo tu vule oku ku yelithila nawa kutya aawiliki yiilonga mbika oolye.
11 “Oya yamukula ya ti: ‘Otse aapiya yaKalunga kegulu nevi, notatu tungulula otempeli ndjoka ya li ya tungwa nale ya pwa komukwaniilwa omunankondo gwaIsrael.
12 Ihe molwaashoka ootatekulu ya geyitha Kalunga komegulu, okwe ya sinditha kuNebukadnezzar, omukwaniilwa Omukaldea gwaBabilon. Otempeli oya hanagulwa po naantu oya falwa muupika kuBabilon.
13 Ndele momumvo gwotango gwepangelo lyaKores, omupangeli gwaBabilon, Kores okwa gandja elaka, otempeli yi tungululwe.
14 Okwa gandja wo iiyuma yoshingoli noyoshisiliveli mbyoka Nebukadnezzar a li a kutha motempeli muJerusalem e te yi pungula motempeli yaBabilon. Kores okwa gandja iikwaniipangitho mbika komulumentu edhina lye Sheshbazzar e te mu langeke omunashikandjo muJuda.
15 Omupangeli okwe mu lombwele, e yi shune kotempeli kuJerusalem, noku tungulule otempeli mpoka ya li nale.
16 Sheshbazzar okwe ya e ta tula po omakankameno; okuza mpoka otaku tungwa ihe otempeli, ihe inayi pwa natango.’
17 “Ngashingeyi, ngele tashi ku opalele, Nkeyama, konakonitha momambo gondjokonona yuuwa muBabilon, ngele oKores a gandja elaka, otempeli yi tungululwe muJerusalem, ngoye u tu tseyithile shoka wa hala moshinima shika.”
1 Omupangeli Darius okwa gandja elaka, ku konakonwe momambo gondjokonona yuuwa ngoka ga pungulwa muBabilon.
2 Moshilando Ekbatana, moshitopolwa Media, omwi itsuwa ondhinga yembo lya nyolwa ehokololo tali ti:
3 “Momumvo gwotango gwepangelo lye omupangeli Kores okwa utha ngeyi: Otempeli yaKalunga muJerusalem nayi tungululwe, yi kale eha lyokuyambela omayambo. Otempeli nayi kale oometa omilongo mbali naheyali momutumbo noometa omilongo mbali naheyali momutamo.
4 Omakuma naga tungwe ge na palufo oshiyalo shimwe shomiti kombanda yiiyalo itatu yomamanya. Omafutilo agehe naga ze moshiketha shuuwa.
5 Iikwaniipangitho yoshingoli noyoshisiliveli mbyoka omukwaniilwa Nebukadnezzar e yi kutha motempeli yaJerusalem e te yi eta kuBabilon, oyi na okushunithwa kehala lyayo lyolela motempeli yaJerusalem.”
6 Nena Darius okwa tumu eyamukulo tali ti: “KuTattenai, omunashikandjo shokuuninginino waEufrat, Shetar-Bosenai naakwanepangelo ooyakwawo yokuuninginino waEufrat. “Ikalekeni kokule notempeli
7 ne inamu ipyakidhila noshinima shika. Etheni omunashikandjo gwaJuda naawiliki Aajuda ya tungulule otempeli yaKalunga pehala lyayo.
8 Otandi mu lombwele, mu ya kwathe oku yi tunga. Omafutilo gawo naga ze miiketha yuuwa yomafendelo moshikandjo shokuuninginino waEufrat, opo iilonga yaa katekwe.
9 Esiku nesiku, pwaa na ekwatakwato, omu na okupa aayambi muJerusalem shoka taye mu lombwele ye shi pumbwa: oontsezi oongundjuka, oonzi noonzigona dhokuyambwa omafikilondjambo gaKalunga komegulu, iilya, omongwa, omaviinu nenge omagadhi gooholivi.
10 Shika nashi ningwe, opo ya yambe omayambo ngoka ge shi kutaambwa kuKalunga komegulu nokwiindilila eyambeko lye kungame naamwandjemati.
11 Otandi utha natango kutya ngele oku na ngoka itaa vulika kelaka ndika, maandjawo namu dhikulwe omuti omunene gu na ondungu, opo a tsilikwe kugwo olutu lwe lwa ululwa. Egumbo lye nali ningwe ondumba yiiyagaya.
12 Kalunga ngoka a hogolola Jerusalem, shi ninge ehala moka ta simanekelwa, na ekelehi omukwaniilwa kehe nenge oshigwana kehe shoka tashi kondjitha oshipango shika notashi kambadhala okuhanagula po otempeli. Ongame Darius nda gandja elaka ndika. Oli na okugwanithwa lela.”
13 Nena omunashikandjo Tattenai, Shetar Bosenai naakwanepangelo ooyakwawo oya ningi naanaa ngaashi omupangeli a ti.
14 Aawiliki yAajuda oya humu nawa komeho netungo lyotempeli taa kumikwa kaahunganeki Haggai naSakaria. Oya hulitha otempeli, ngaashi ya lombwelwa kuKalunga kaIsrael nokuKores, Darius naArtakserkses, aapangeli yaPersia.
15 Oya mana otempeli mesiku etitatu lyomwedhi Adar momumvo omutihamano gwepangelo lyomupangeli Darius.
16 Nena Aaisraeli — aayambi, Aalevi nayalwe ayehe mboka ya zi muupika — oya yapula otempeli nenyanyu enene.
17 Meyapulo oya yamba oontsezi ethele, oonzi omathele gaali noonzigona omathele gane, niikombo omulongo niiyali yomayonondjambo, shimwe okukehe ezimo lyaIsrael.
18 Oya tula wo aayambi nAalevi melandulathano miilonga yomotempeli muJerusalem, opamalombwelo ge li membo lyaMoses.
19 Oshigwana shoka sha zi muupika, osha dhana Opaasa mesiku etimulongo netine lyomwedhi gwotango gwomumvo gwa landula.
20 Aayambi ayehe nAalevi oya adhika yi iyapula noya li aayogoki pamisindililo. Aalevi oya dhipaga oonzigona dhOpaasa dhaantu ayehe mboka ya galuka, dhaayambi nodhawo yene.
21 Odha liwa kAaisraeli ayehe mboka ya galuka muupika nokwaayehe mboka ya li ye etha uupagani waantu mboka ya li moshilongo noyi ile okusimaneka Omuwa, Kalunga kaIsrael.
22 Oya dhana Oshituthi shiikwiila yaa na efulika nenyanyu enene omasiku gaheyali. Oya li yu udha enyanyu molwaashoka Omuwa e ya silitha ohenda komupangeli gwaAssur, sho e ya kwatha miilonga yetungululo lyotempeli yaKalunga kaIsrael.
1 Konima yomimvo odhindji, Artakserkses sho a li omupangeli gwaPersia, okwa li ku na omulumentu edhina lye Esra. Oohekulu oya za momuyambimukuluntu Aaron, ngaashi tashi landula mpaka: Esra olyaSeraia yaAzaria yaHilkia
2 yaShallum yaSadok yaAhitub
3 yaAmaria gaAzaria yaMeraiot
4 gaSerahia yaUssi waBukki
5 yaAbishua yaPinehas yaEleasar lyaAaron.
6 Esra okwa li omunongompango a tseya ompango ndjoka Omuwa, Kalunga kaIsrael, a pe Moses. Omupangeli okwe mu pe ashihe a li a pula, oshoka okwa li e na eyambeko lyOmuwa, Kalunga ke. Momumvo omutiheyali gwepangelo lyaArtakserkses, Esra okwa zi muBabilonia u uka kuJerusalem e li nongundu yAaisraeli mu na aayambi, Aalevi, aayimbi motempeli, aalangeli yotempeli naayakuli yomotempeli.
7
8 Oya thigi po Babilonia mesiku lyotango lyomwedhi gwotango, nokekwatho lyaKalunga oya thiki muJerusalem mesiku lyotango lyomwedhi omutitano.
9
10 Esra okwa li i igandjela okwiilonga ompango yOmuwa, oku yi landula nokulonga Aaisraeli iipango nomautho gayo agehe.
11 Ndjika oyo ontumwafo Artakserkses e yi pe omuyambi nomunongompango Esra, ngoka a tseya iipango nomautho ngoka Omuwa e ga pe Israel. Ontumwafo otayi ti ngeyi:
12 “Ya zi kuArtakserkses omupangeli, kuEsra omuyambi nomunongompango yaKalunga komegulu.
13 “Ote utha moshilongo shandje ashihe kutya Aaisraeli ayehe, aayambi nAalevi mboka ya hala okuya nangoye kuJerusalem, naa pewe epitikilo.
14 Ngame, pamwe naagandjindunge yandje yaheyali, otatu ku tumu, u konakone onkalo muJerusalem naJuda, opo u mone, nkene ompango yaKalunga koye, ndjoka ye ku inekelelwa, tayi gwanithwa.
15 Faalela ko omayambo goshingoli noshisiliveli ngoka tse naagandjindunge yandje twa hala okupa Kalunga kaIsrael, ngoka otempeli ye yi li muJerusalem.
16 Faalela ko wo oshisiliveli noshingoli ashihe shoka to shi gongele moshitopolwa Babilon nomayambo ngoka oshigwana shaIsrael naayambi yawo taye ga gandjele otempeli yaKalunga kawo muJerusalem.
17 “Dhiginina nawa iimaliwa mbika, u lande oongombe, oonzi oondumentu noonzigona, iilya nomaviinu u yi yambele koshiyambelo shotempeli muJerusalem.
18 Longitha oshihupe shoshisiliveli noshingoli kushoka ngoye nooyakweni tamu tala olyo ehalo lyaKalunga keni.
19 Iikwaniipangitho ayihe mbyoka we yi pewa, u yi longithe melongelokalunga, yi tula motempeli muJerusalem.
20 Ashihe shilwe to shi pumbwa motempeli yaKalunga koye, oto shi pewa moshiketha shuuwa.
21 “Otandi lombwele omalenga agehe gomaliko moshitopolwa shokuuninginino waEufrat, ya pe Esra, omuyambi nomunongompango mompango yaKalunga komegulu, ashihe shoka ta pula,
22 ihe inashi konda ookilograma 3400 dhoshisiliveli, ookilograma 10 000 dhiilya, oolita 2000 dhomaviinu, oolita 2000 dhomagadhi gooholivi nomongwa gwa gwana nawa.
23 Ashihe shoka tashi pumbiwa motempeli yaKalunga komegulu, nashi tsakanithwe naanaa, opo kaa geele ndje nenge mboka taa landula ndje mepangelo.
24 Tseyeni wo kutya omwi indikwa okupula aayambi, Aalevi, aaimbi, aalangeli, aayakuli nenge aaniilonga yalwe motempeli oompale.
25 “Ngoye Esra, longitha owino mboka Kalunga koye e wu ku pa, wu langeke aakwanepangelo naatokolihapu, ya lele aantu ayehe mboka ya tseya ompango yaKalunga koye moshitopolwa shokuuninginino waEufrat. Mboka inaaye yi tseya, yi ya longeni.
26 Ngele oku na ngoka itaa vulika kompango yaKalunga koye nenge kompango yoshilongo, oku na okugeelwa mbalambala: na dhipagwe nenge ta pongekwa nenge eliko lye tali kwatwa po nenge ta tulwa mondjedhililo.”
27 Esra okwa ti: “Omuwa, Kalunga kootatekulu, na hambelelelwe! Okwa tula ehalo momupangeli, opo a simaneke ngeyi otempeli yOmuwa muJerusalem.
28 Kesilohenda lyaKalunga onda mono ohokwe komupangeli, aagandjindunge ye nomalenga ge agehe omanankondo. Omuwa, Kalunga kandje, okwa pe ndje omukumo, nonda vulu okugongela aakuluntu oyendji yomaludhi gaIsrael, ya ye pamwe nangame.”
1 Nguka omusholondondo gwaakuluntu yomaludhi mboka ya kala muupika waBabilonia noye ya pamwe naEsra kuJerusalem, Artakserkses sho a li omupangeli:
2 Gersom gwoludhi lwaPinehas Daniel gwoludhi lwaItamar Hattush yaShekania gwoludhi lwaDavid Sakaria gwoludhi lwaParosh, pamwe naalumentu 150 yoludhi lwe (okwa li embo lyondjokonona yuuhekulu wawo) Eliehoenai yaSerahia gwoludhi lwaPahat Moab, pamwe naalumentu 200 Shekania yaJahasiel gwoludhi lwaSattu, pamwe naalumentu 300 Ebed lyaJonatan gwoludhi lwaAdin, pamwe naalumentu 50 Jeshaja yaAtalia gwoludhi lwaElam, pamwe naalumentu 70 Sebadia yaMikael gwoludhi lwaShefatia, pamwe naalumentu 80 Obadia yaJehiel gwoludhi lwaJoab, pamwe naalumentu 218 Shelomit yaJosifia gwoludhi lwaBani, pamwe naalumentu 160 Sakaria yaBebai gwoludhi lwaBebai, pamwe naalumentu 28 Johanan yaHakkatan gwoludhi lwaAsgad, pamwe naalumentu 110 Elifelet, Jeuel naShemaia gwoludhi lwaAdonikam, pamwe naalumentu 60 (Oya galuka konima) Utai naSakkur gwoludhi lwaBigvai, pamwe naalumentu 70.
3
4
5
6
7
8
9
10
11
12
13
14
15 Onda gongele ongundu ayihe pomukankameya gu uka lwokuAhava e tatu yungu ontanda nkoka omasiku gatatu. Mongundu onda mono mo aayambi, ihe kamwa li nando Aalevi.
16 Ondi ithana aawiliki omugoyi: Elieser, Ariel, Shemaia, Elnatan, Jarib, Elnatan, Natan, Sakaria naMeshullam, naanongeki yaali, Joiarib naElnatan,
17 nonde ya tumu kuIddo, mwene gwomukunda puKasifia, nokaakalele yomotempeli yaankoka oku ya pula, ye tu tumine aantu yokulonga motempeli.
18 Kesilohenda lyaKalunga oye tu tumine Sherebia, omulumentu omunandunge, Omulevi gwoludhi lwaMahli, pamwe noyanamati naamwayina aalumentu omulongo nayahetatu.
19 Oya tumu wo Hashabia naJeshaja gwoludhi lwaMerari, pamwe naanezimo lyawo omilongo mbali.
20 Oya tumu wo aakalele yomotempeli 220 mboka oohekulu ya pelwe oshilonga shika komukwaniilwa David nomalenga ge, ya yakule Aalevi. Oya li melandulathano lyomadhina.
21 Pomukankameya gwaAhava ondi igidha eidhiliko lyiikulya, opo tu ifupipike koshipala shaKalunga ketu noku mu galikana, e tu wilike mondjenda yetu noku tu gamena tse naanona yetu nomaliko getu agehe.
22 Onda si ohoni okupula omupangeli etanga lyaakwiita naakayilinkambe, ye tu gamene kaatondi mondjila yetu, oshoka onde mu hokololele kutya Kalunga ketu ota yambeke shaa ngoka e mu inekela, ihe ota geele shaa ngoka te mu pilamene.
23 Onkee otwi idhilike e tatu galikana Kalunga, e tu gamene, oye nokwa uvu omagalikano getu.
24 Mokati kaayambi aawiliki onda hogolola mo Sherebia, Hashabia nayalwe omulongo.
25 Nena onda vihi oshisiliveli, oshingoli niikwaniipangitho mbyoka omupangeli, aagandjindunge ye nomalenga ge, nAaisraeli ye yi gandja, yi longithwe motempeli, nonde yi gandja kaayambi.
26 Onde ya pe ootona 22 dhoshisiliveli, iiyuma yoshisiliveli 100 yi na ondjundo yookilograma 70 yoshingoli,
27 ookilograma 3 400 iiyaha 20 yoshingoli niiyaha iiyelele yoshikushu 2 yi na ondilo yoshingoli.
28 Onde ya lombwele nda ti: “One aayapuki yOmuwa, Kalunga koohokulu, nosho wo iiyuma yoshisiliveli noyoshingoli ye mu etelwa omaganoyambo.
29 Yi tonateleni nawa, sigo tayi thiki kotempeli. Yi vihileni mongulu yaayambi, ne mu yi gandje kaawiliki yaayambi noyAalevi, nokaawiliki yAaisraeli muJerusalem.
30 Aayambi nAalevi oya taamba oshisiliveli, oshingoli niiyuma, noye yi faalele kotempeli kuJerusalem.”
31 Olya li esiku etimulongo netiyali lyomwedhi gwotango sho twa zi pomukankameya Ahava, tu ye kuJerusalem. Kalunga ketu okwa li pamwe natse e te tu gamene komahomono gaatondi nokiilangela, manga tatu ende.
32 Sho twa thiki kuJerusalem, otwa vululukwa omasiku gatatu.
33 Mesiku etine otwa yi kotempeli, tatu vihi oshisiliveli, oshingoli niiyuma e tatu yi pe omuyambi Meremot yaUria. Okwa li pamwe naEleasar lyaPinehas nAalevi yaali, Josabad yaJeshua naNoadia yaBinnui.
34 Iinima ayihe oya yalulwa noya vihwa noya nyolwa nawa mondjalula pethimbo tuu ndyoka.
35 Ayehe mboka ya zi muupika, oye eta omayambo, ga fikilwe Kalunga kaIsrael. Oya yamba oongombe 12 molwaIsrael adhihe, oonzi oontsezi 96 noonzigona 77; oya yamba wo iikombo 12 yokudhima po oondjo dhawo yene. Iimuna mbika ayihe oya lungunithilwa po Omuwa omafikilondjambo.
36 Oya gandja wo ontumwafo yomupangeli kaanashikandjo nomalenga goshitopolwa shokuuninginino waEufrat, mboka ya kwatha oshigwana notempeli.
1 Ayihe mbika sho ya pu, aawiliki yamwe yAaisraeli oye ya e taa lombwele ndje kutya oshigwana, aayambi nAalevi inaa kala yi iyoolola miigwana yomuushiinda: Aakaanana, Aaheti, Aaperesi, Aayebusi, Aayammoni, Aamoabi, Aayegipiti nAayamori. Ohaa longo iihuna ngaashi aapagani.
2 Aajuda oya hokana aakulukadhi aakwiilongo, nosho ngaaka aantu aayapuki yaKalunga yi inyateke. Aawiliki nomalenga oya li aakwatelikomeho moshinima shika shokwiiteka Kalunga.
3 Sho nde shi kundana, onda tuula oonguwo dhandje meiyekelelo, ndi itudha omafufu noombenzi dhandje nonda kuutumba nda kunkwa.
4 Onda kala nda kuutumba nda kunkwa, sigo omayambo gongulohi taga yambwa, naantu oya gongalele ndje — ayehe mboka ya li ya haluka kushoka Kalunga kaIsrael a popile kuulunde waamboka ya galuka muupika.
5 Ethimbo lyeyambo lyongulohi sho lya thiki, onda penduka po mpoka nda li moluhodhi nda zala natango oonguwo dhandje dha tuuka, onda tsu oongolo ndi galikane nonda ganeke omaako gandje kOmuwa, Kalunga kandje,
6 nonda ti: “Kalunga, onda sa ohoni unene, ndi yeluthe oshipala shandje koshipala shoye. Omayono getu oga ndumbala ga lundu omitse dhetu, nuulunde wetu owa adha muule megulu.
7 Okuza muuyuni wootatekulu sigo ongashingeyi, tse aantu yoye otwa yono unene. Moluulunde wetu tse naakwaniilwa yetu naayambi yetu otwa gwile momake gaakwaniilwa yokiilongo, notwa dhipagwa, twa yugwa, twa yiwa natse ngaashi oonkwatwa. Otwa sithwa ohoni sigo onena.
8 Ngashingeyi okathimbo okafupi. Omuwa, Kalunga ketu, ongoye we tu sile ohenda nowa mangulula yamwe yomutse muupika noku tu tula megameno mehala ndika lyoye eyapuki. Owe tu pe omwenyo omupe, tu fudhe po uupika wetu.
9 Otwa li aapika, ihe ino tu ethela muupika wetu. Owe tu silitha ohenda omupangeli gwaPersia, e tu pitike tu kale tu na omwenyo, tu ka tungulule otempeli yoye, ndjoka ya li omakulukuma, notu kale nawa muJuda naJerusalem.
10 “Ihe nena Kalunga, otatu ti we shike kumbyoka ya ningwa po? Tse otwe ekelahi iipango yoye
11 mbyoka we tu pele maamati yoye aahunganeki. Oye tu lombwele kutya evi ndyoka tatu ka ya mulyo tu li lale, olyo evi lyoshidhila, molwaashoka aantu mboka ya ka kala mo, oye li udhitha niilonga ya nyata noyi tonditha.
12 Oye tu lombwele, twaa hokanathane naantu mboka, tse twaaye ya kwathe nando olumwe, ya mone elago nolupolo, ngele otwa hala okukala nokunyanyukilwa evi ndika noku li gandja komaluvalo getu sigo aluhe.
13 Shoka she tu adha, sho we tu geele molwiilonga yetu iiwinayi nuulunde wetu, osho oshishona shi vulithe pushoka twi ilongele, Kalunga ketu, nowa hupitha mutse ongundu yi thike mpa.
14 Nena otatu vulu ngiini okuyona kiipango yoye, tu hokanathane naantu mboka aakolokoshi? Ngele tatu shi ningi, oto ka geya e to tu hanagula po thiluthilu noito hupitha ko nando ogumwe.
15 Omuwa, Kalunga kaIsrael, ngoye omuyuuki, ihe owe tu hupitha ko. Otatu hempulula uusama wetu kungoye; katu vulu okuholoka koshipala shoye.”
1 Esra manga a li a nyongama megalikano komeho gotempeli, ta lili ye ta hempulula oondjo ndhika, ongundu onene yAaisraeli — aalumentu, aakulukadhi naanona — oye mu gongalele taa lili omahodhi omapyu.
2 Nena Shekania yaJehiel gwomoludhi lwaElam okwa ti kuEsra: “Otwi iteka Kalunga, sho twa ushike aakiintu aakwiilongo. Ihe nando ongeyi, Israel oku na ngaa etegameno.
3 Ngashingeyi natu ningeni euvaneko lya kola kuKalunga ketu kutya tse otatu tidha po aakulukadhi mboka noyana, ya shune. Otatu ka ninga pamayele goye nogaamboka haa simaneke iipango yaKalunga. Otatu ka ninga shoka tashi pulwa kompango yaKalunga.
4 Oshinima shika oshi li moshikaha shoye. Otatu ku pulakene. Kala nomukumo e to ke shi tsakanitha.”
5 Esra okwa tameke okuganitha aawiliki yaayambi, yAalevi noyoshihupe shoshigwana, ya ninge shoka Shekania a faneke.
6 Nena okwa zi ko komeho gotempeli e ta yi mongulu yaJehohanan yaEliashib e ta lala moka uusiku a sa oluhodhi molwokwaaneitaalo kwaantu mboka ya zi muupika. Ina lya ye ina nwa sha.
7 Elaka olya tumwa muJerusalem nomuJuda ashihe kutya ayehe mboka ya galuka muupika, naa tsakanene muJerusalem
8 palombwelo lyaawiliki yoshigwana. Ngele ope na ngoka itee ya ko momasiku gatatu, omaliko ge agehe otaga ka hanagulwa po e ta kondwa mo megongalo lyaamboka ya galuka muupika.
9 Momasiku gatatu, mesiku etimilongombali lyomwedhi omutimugoyi, aasamane ayehe mboka ya li moshikandjo shaJuda naBenjamin, oye ya kuJerusalem e taa gongala mehale lyotempeli. Oya li taa kakama omolwondjundo yoshigongi nomolwomvula yepoola.
10 Omuyambi Esra okwa thikama e te ya uvithile ta ti: “Omwi iteka Kalunga e tamu etele Israel ombedhi, sho mwa hokana aakulukadhi yokiilongo.
11 Ngashingeyi hempululeni ano oondjo dheni kOmuwa, Kalunga koohokulu, ne mu ninge shoka she mu opalela. Iyoololeni ko ne yene kaakwiilongo ya kala mevi lyetu, mu ethe po aakulukadhi yeni aakwiilongo.”
12 Oshigongi ashihe osha yamukula newi enene sha ti: “Otatu ningi shoka to ti.
13 Ihe otu li po oyendji ko ku na wo omvula. Itatu vulu okukala othika mpaka puuyelele. Shika kashi shi wo oshinima tashi ningwa mesiku limwe nenge gaali, oshoka tse oyendji otwa kwatakana nondjo ndjika.
14 Omalenga getu naga kale muJerusalem, opo ga sile oshinima shika oshimpwiyu. Nena shaa ngoka a hokana omukulukadhi omukwiilongo, ne ye mesiku lyu uthwa pamwe naawiliki naatokolihapu yoshilando shaandjawo. Pamukalo nguka ondjahi yaKalunga otayi ke tu gamuka.”
15 Kapwa li ngoka a kondjitha ondunge ndjika, shila oJonatan yaAsahel naJahseia yaTikva, mboka ya kolekwa kuMeshullam nOmulevi Shabbetai.
16 Aagaluki muupika oya taamba epukululo ndika. Omuyambi Esra okwa hogolola aalumentu mokati kaakuluntu yomaludhi e ta tseyitha omadhina gawo. Mesiku lyotango lyomwedhi omutimugoyi oya tameke ekonakono lyawo,
17 nomoomwedhi ndatu dha landula oya konakona aasamane ayehe ye na aakulukadhi yokiilongo.
18 Nguka omusholondondo gwaasamane mboka ya hokana aakulukadhi yokiilongo: Omaluvalo gaayambi pamaludhi gago: Oludhi lwaJosua yaJehosadak naamwayina: Maaseia, Elieser, Jarib naGedalia.
19 Oyu uvaneke, ya henge po aakulukadhi yawo e taa yamba onzi ondumentu omolwoondjo dhawo.
20 Oludhi lwaImmer: Hanani naSebadia.
21 Oludhi lwaHarim: Maaseia, Elia, Shemaia, Jehiel naUssia.
22 Oludhi lwaPashhur: Elioenai, Maaseia, Ismael, Netanel, Josabad naElasa.
23 Aalevi: Josabad, Shimei, Kelaia (haku tiwa Kelita), Petahia, Juda naElieser.
24 Aaimbi: Eliashib. Aalangeli yotempeli: Shallum, Telem naUri.
25 Yalwe: Oludhi lwaParosh: Ramia, Issia, Malkija, Mijamin, Eleasar, Malkija naBenaia.
26 Oludhi lwaElam: Mattania, Sakaria, Jehiel, Abdi, Jeremot naElia.
27 Oludhi lwaSattu: Elioenai, Eliashib, Mattania, Jeremot, Sabad naAsisa.
28 Oludhi lwaBebai: Jehohanan, Hanania, Sabbai naAtlai.
29 Oludhi lwaBani: Meshullam, Malluk, Adaia, Jashub, Sheal naJeremot.
30 Oludhi lwaPahat Moab: Adna, Kelal, Benaia, Maaseia, Mattania, Bezalel, Binnui naManasse.
31 Oludhi lwaHarim: Elieser, Ishija, Malkija, Shemaia, Simeon, Benjamin, Malluk naShemaria.
32
33 Oludhi lwaHashum: Mattenai, Mattatta, Sabad, Elifelet, Jeremai, Manasse naShimei.
34 Oludhi lwaBani: Maadai, Amram, Uel, Benaia, Bedeia, Keluhi, Vania, Meremot, Eliashib, Mattania, Mattanai naJaasu.
35
36
37
38 Oludhi lwaBinnui: Shimei, Shelemia, Natan, Adaia, Maknadebai, Shashai, Sharai, Asarel, Shelemia, Shemaria, Shallum, Amaria naJosef.
39
40
41
42
43 Oludhi lwaNebo: Jeiel, Mattitia, Sabad, Sebina, Jaddai, Joel naBenaia.
44 Aasamane ayehe mbano oya li ya hokana aakulukadhi aakwiilongo. Oye ya henge po e taye ya shunitha pamwe noyana.