1

¹ Salomo yaDavid okwa koleke uukwaniilwa woshilongo Israel, nOmuwa, Kalunga ke, okwe mu laleke nuuyamba e te mu ningi omunenenene.

² Omukwaniilwa Salomo okwa hiya aakuluntu ayehe mboka haa wilike aalumentu eyuvi nenge ethele naakwanepangelo ayehe, aakuluntu yomagumbo ayehe noshigwana ashihe,

³ e te ya lombwele ya ye pamwe naye keha lyelongelokalunga kuGibeon. Oya yi ko, oshoka oko kwa li etsalihangano lyOmuwa, ndyoka lya li lya tungwa mombuga kuMoses, omumati gwaKalunga.

⁴ (Oshikethahangano osha li sha pungulwa muJerusalem metsali ndyoka lya dhikwa komukwaniilwa David, sho a ka talele ko oshikethahangano kuKiriat Jearim.)

⁵ Oshiyambelo oshikushu shoka sha li sha ningwa kuBezalel yaUri, omutekulu gwaHur, osha li wo muGibeon komeho getsalihangano lyOmuwa. Omukwaniilwa Salomo noshigwana ashihe oya simanekele Omuwa nkoka.

⁶ Omukwaniilwa okwa simanekele Omuwa komeho getsalihangano, sho a yamba iimuna eyuvi omafikilondjambo koshiyambelo shoshikushu.

⁷ Uusiku mboka Omuwa okwi ihololele Salomo e te mu pula ta ti: “Owa hala, ndi ku pe shike?”

⁸ Salomo okwa yamukula a ti: “Ongoye owa hololele aluhe tate David ohole yoye onene nowa landulitha ndje tate muukwaniilwa.

⁹ Omuwa Kalunga, gwanitha euvaneko lyoye we li uvanekele tate. Ongoye wa kwaniileke ndje, ndi lele aantu oyendji yaa shi kuyalulwa,

¹⁰ onkee ano pe ndje owino nuunongo tandi u pumbwa moku ya lela. Ngele hasho, otandi vulu ngiini okulela oshigwana shoye oshinene shi thike mpano?”

¹¹ Kalunga okwa yamukula Salomo a ti: “Owa hogolola nawa, oshoka ino pula uuyamba nenge omaliko nenge esimano nenge eso lyaatondi yoye nenge omwenyo omule kombanda yevi, ihe owi indile owino nuunongo, opo u vule okulela aantu yandje, mboka nde ye ku pe, u ya lele.

¹² Otandi ku pe owino nuunongo. Otandi ku pe wo uuyamba, omaliko nesimano enene u vule aakwaniilwa ayehe mboka ye ku tetekela nenge mboka taye ke ku landula.”

¹³ Salomo okwa zi ko keha lyelongelokalunga muGibeon, moka mwa li etsalihangano lyOmuwa, e ta shuna kuJerusalem. Nkoka okwa lele Israel.

¹⁴ Salomo okwa gongele omatembakwiita geyuvi limwe nomathele gane naakawilinkambe omayuvi omulongo nagaali. Yamwe yomuyo okwa kala nayo muJerusalem nayalwe okwe ya langeke miilando yilwe.

¹⁵ Muuyuni we oshisiliveli noshingoli oya li ya ha muJerusalem ya fa evi, nomisendeli odha li odhindji dha fa omikwiyu muShefela.

¹⁶ Aalongeli yomukwaniilwa oye ke mu landela uukambe kuMusri naKilikia

¹⁷ nomatembakwiita okuEgipiti. Oya landa uukambe nomatembakwiita kaakwaniilwa Aaheti nAasiria. Omatembakwiita oga gu iimaliwa iisiliveli 600 kehe limwe nuukambe owa gu 150 kukehe.

2

¹ Omukwaniilwa Salomo okwa tokola, a tunge otempeli moka Omuwa ta simanekelwa, ye i itungile wo uuwa we mwene.

² Okwa tula aalumentu 70 000 miilonga yokututa iitungitha naalumentu 80 000 miilonga yokuhonga omamanya. Okwa li aalumentu 3 600 mboka taa tonatele iilonga.

³ Salomo okwa tumu elaka komukwaniilwa Hiram gwaTiro tali ti: “Tu longele kumwe, ngaashi wa li ho longele kumwe natate, omukwaniilwa David, sho we mu landitha omisendeli dhokutunga uuwa we.

⁴ Otandi ka tunga otempeli, ndi simaneke Omuwa, Kalunga kandje. Otayi ka kala eha eyapuki, moka tse naantu yandje tatu ke mu simanekela moku mu fikila iitsinino yiizimba ya nika nawa, moka tatu ka gandja kuye omagano gomayambo giikwiila iiyapuki sigo aluhe, notatu ka yamba omafikilondjambo ongula kehe nongulohi kehe, mOmasabati nomiituthi yomwedhi omupe nomomasiku omakwawo omayapuki, tu simaneke Omuwa, Kalunga ketu, palombwelo lye ndongo aluhe.

⁵ Otempeli ndjoka tandi yi tungu, otayi kala onene, oshoka Kalunga ketu oye omunene e vule ookalunga ayehe yalwe.

⁶ Nokuli kape na muntu ta vulu okutungila Kalunga otempeli, oshoka negulu lyo lyene, eeno, nuule walyo itau vulu oku mu kwatelela mo. Ano ote vulu ngiini okutunga otempeli ndjoka tayi ti sha? Shila okulungunithila ashike Kalunga omayambo.

⁷ Ngashingeyi tumina ndje omuntu enyakwa miilonga yokutaka, mokuhambula oshingoli, oshisiliveli, oshikushu, nosheela oshiluudhe nomokutunga iiyata iimbulau, iitiliganembwilili niitiligane. Ota ka longa pamwe noonkulungu dhomuJuda naJerusalem ndhoka dha kongelwe kutate David.

⁸ Onda tseya kutya aantu yoye oonkulungu miipilangi, onkee tumina ndje omiti dhomisendeli, dhomikiperesi nodhomisendeli dhokuLibanon. Ondi ilongekidha okutuma aantu yandje, ya kwathe aantu yoye

⁹ mokulongekidha omiti odhindjidhindji, oshoka otempeli ndjoka nda dhiladhila yi tungwe, otayi ka kala onene noyo opalelela.

¹⁰ Otandika sila aakomangeli oshimpwiyu shiikulya. Otandi ku tumine osiima yoolata omayuvi omathele gane, iishokelya yoolata omayuvi omathele gane nomaviinu goolata omayuvi omilongo ne nomagadhi gooholivi goolata omayuvi omilongo ne.”

¹¹ Omukwaniilwa Hiram okwa yamukula Salomo e te mu tumine ontumwafo. Okwa nyola ta ti: “Omuwa okwe ku ningi omukwaniilwa gwoshigwana she, oshoka oku shi hole.

¹² Omuwa, Kalunga kaIsrael, Omushiti gwegulu nogwevi na hambelelwe! Okwa pe omukwaniilwa David omunawino e na oondunge nuunkulungu okutungila Omuwa otempeli nokwiitungila uuwa we mwene.

¹³ Otandi ku tumine omulumentu onkulungu nomunandunge, edhina lye Huram.

¹⁴ Yina ogwomezimo lyaDan nahe omvalele yomuTiro. Oku shi okuhambula oshingoli, oshisiliveli, oshikushu niiyela iiluudhe, noku shi okuhonga omamanya niipilangi. Oku shi okutunga iiyata iimbulau, iitiliganembwilili niitiligane noyoliina. Oku shi okutaka omamanya nota kutha mo nawa shoka ta lombwelwa. Mu longitha pamwe noonkulungu dhoye naamboka ya li haa longele ho, omukwaniilwa David.

¹⁵ Tu tumina ano osiima, iishokelya, omaviinu, nomagadhi ngoka wa uvaneke.

¹⁶ Omisendeli ndhoka to pumbwa, otatu ke dhi ku komangelela moondundu dhaLibanon e tatu dhi manga iihampi noku dhi tula mefuta, dhi endithilwe mo sigo okuJoppa. Okuza mpoka otamu dhi kutha po, mu dhi fale kuJerusalem.”

¹⁷ Omukwaniilwa Salomo okwa yalulitha aakwiilongo ayehe ya kala mevi lyaIsrael, ngaashi he David a ningile. Okwa li aakwiilongo ya kala moshilongo 153 600.

¹⁸ Aantu 70 000 yomuyo okwe ya ningi aahumbati yomitenge, aantu 80 000 oyokuhonga omamanya moondundu naantu 3 600 ya tonatele iilonga yi gwanithwe.

3

¹ Omukwaniilwa David, he yaSalomo, okwa li a longekidha nale ehala mpoka otempeli tayi ka tungilwa. Olya li muJerusalem, kondundu Moria, ehala tuu ndyoka Arauna Omuyebusi a li e li ninga olupale lwe. Omukwaniilwa Salomo okwa tameke etungo

² momwedhi omutiyali gwomumvo omutine gwelelo lye.

³ Otempeli ndjoka omukwaniilwa Salomo a tungu oya li oometa 27 muule noometa 9 momutamo.

⁴ Ondjugo yethikilo oya li oometa 9 momutamo, ngoka gu thike pamwe nomutamo gwotempeli, nomutumbo gwayo ogwa li oometa 54. Meni omwa li mwa kolongwa noshingolilela.

⁵ Ela enene olya li lya siikilwa niipilangi yomisedeli ya kolongithwa oshingolilela mo mwa takelwa omafano gomilunga nogomalyenge.

⁶ Omukwaniilwa okwa opaleke otempeli nomamanya gondilo noshingoli sha za kevi lyaParvaim.

⁷ Ongulu ayihe okwe yi kolongitha oshingoli, omiti dhontala, omishigo, omakuma nomiyelo. Komakuma aaniilonga oya takele ko omafano gaakerubi.

⁸ Ela lyomeni, ndyoka lya lukwa Ehala lyUuyapukielela, olya li oometa 9 momutaandelo noometa 9 momutamo ngaashi otempeli yo yene. Oshingoli shondjundo yootona 20 osha longithwa mokukolonga Ehala lyUuyapukielela.

⁹ Oshingoli shoograma 570 osha hambulwa oomboha. Noondjugo dhopombanda wo okwe dhi kolongitha noshingoli.

¹⁰ Omukwaniilwa okwa hambulitha aakerubi yaali, e ya kolongitha noshingoli e te ya tula mEhala lyUuyapukielela,

¹¹ moka taa thikama ya tegama ya taalela kosheelo. Shaa ngoka oku na omawawa gaali, ewawa kehe li thike poometa 2,2 muule. Omawawa ga yalalekwa oga tsakanene pokati kela ga tsa kekuma koombinga adhihe mbali dhongulu. Oga taakana ano omutamo aguhe gwoometa 9 gwEhala lyUuyapukielela.

¹²

¹³

¹⁴ Etopolitho lyotempeli ndyoka lya topola ko Ehala lyUuyapukielela, olya li lya tungwa moshiyata sholiina nomoshiyata oshimbulau, oshitiliganembwilili noshitiligane, sha tungilwa omafano gaakerubi.

¹⁵ Omukwaniilwa okwa tholomitha po oongundhi mbali, shaa ndjoka yuule woometa 15,5 omilongo ndatu nantano, e te dhi dhike komeho gotempeli. Ongundhi kehe oyi na oshipaka shi na uule woometa 2,2.

¹⁶ Koshipaka shongundhi kehe okwa li uulenga wa tatwa niiyimati ethele yomuti omugranati ya tholomwa moshikushu.

¹⁷ Oongundhi ndhika odha tulwa posheelo shotempeli: ndjoka ya li kombinga yokuumbugantu, oya lukwa Jakin naandjoka yokuumbangalantu oBoas.

4

¹ Omukwaniilwa Salomo okwa hambulitha oshiyambelo shoshikushu shoombinemeta 9 noometa 4,5 muule.

² Okwa hambulitha wo ondama yoshikushu ya ngolongwa yoometa 2,2 mevi, oometa 4,4 montaakano noometa 13,2 momukunduluko.

³ Koongenge dhondama okwa li omikweyo mbali dhuulenga, gumwe pombanda yomukwawo. Uulenga mbuka owa li molupe lwoontsezi, ndhoka dha li dha tholomwa moshikushu pamwe nondama.

⁴ Ondama oya tentekwa koontsezi omulongo nambali dhoshikushu, ndhoka dha pilamenathana: ndatu dha taalela kuumbangalantu, ndatu okuuninginino, ndatu okuumbugantu nandatu okuuzilo.

⁵ Oongenge dhondama odha li dhi na uupapi wuunene u thike poomilimeta 75. Ongenge yayo oya li ya fa yekopi, ya tivulilwa kondje ya fa ongala ya sheneka. Ondama otayi gwana konyala oolita omayuvi gahamano.

⁶ Oya hambula wo oombaalitha omulongo, ntano odhokutulwa kuumbugantu wotempeli nantano okuumbangalantu. Odha li hadhi longithwa okuyoga iitopolwa yiimuna mbyoka ya lungunithwa yi ninge omafikilondjambo. Omeya gomondama oga li haga iyogwa kaayambi.

⁷ Okwa hambulitha iihukikwanyeka omulongo pamautho ngoka yi na okuhambulwa, niitaafula omulongo, nokwe yi tula mela enene motempeli, iihukikwanyeka itano niitaafula itano okombinga kehe. Okwa hambulitha wo iiyaha yoshingoli ethele.

⁸

⁹ Okwa tungitha ehale lyaayambi nehale enene. Omiyelo dhopokati komahale odha li dha kolongithwa oshikushu.

¹⁰ Ondama oya li mokolonela yokuuzilombugantu wotempeli.

¹¹ Huram okwa longekidha wo oombiga, iihupulo niiyaha. Okwa tsakanitha iilonga mbyoka a li e na okulongela omukwaniilwa Salomo omolwotempeli yOmuwa: Oongudhi mbali Iipaka iyali koombando dhoongundhi Uulenga wa tatwa koshipaka kehe Iiyimati yomugranati yoshikushu omathele gane ya kunduka oshipaka kehe momikweyo mbali, kehe gumwe ethele limwe Uutemba omulongo Oombaalitha omulongo Ondama Oontsezi omulongo nambali dha humbata ondama Oombiga, iihupulo noofoloko. Omuhambudhi onkulungu Huram okwa longekidhile omukwaniilwa Salomo iikwaniipangitho mbika ayihe yoshikushu sha yelithwa, yi longithwe motempeli yOmuwa.

¹²

¹³

¹⁴

¹⁵

¹⁶

¹⁷ Omukwaniilwa okwe yi tholomitha ayihe moshitholomeno pokati kaSukkot naZereda molusilu lwaJordan.

¹⁸ linima mbika oya li oyindji noonkondo nokape na ngoka a yeleke owindji woshikushu shoka sha longithwa.

¹⁹ Omukwaniilwa Salomo okwa hambulithile otempeli iiyakulitho yilwe wo: oshiyambelo, niitaafula yokutenteka iikwiila iiyapuki;

²⁰ iihukikwanyeka noolamba dhoshingolilela, ndhoka dha li hadhi minikile komeho gEhala lyUuyapukielela ngaashi sha sheywa;

²¹ uulenga woongala, oolamba niikonde yokutetitha uulapi woolamba;

²² iimbele, iiyaha, omatemba, iitsininitho niikangwa yomakala. Ayihe mbika oya ningwa moshingolilela. Omiyelo dhotempeli nomiyelo dhEhala lyUuyapukielela odha li dha kolongithwa oshingoli.

5

¹ Omukwaniilwa Salomo sho a mana iilonga yotempeli, okwa tula moompungulilo dhayo iinima ayihe mbyoka he David a li e yi yoololela Omuwa — iisiliveli, iingoli niinima iikwawo.

² Salomo okwi ithana aawiliki ayehe yomazimo noyomaludhi gaIsrael, ya gongale muJerusalem, opo ya kuthe ko oshikethahangano shOmuwa koshilando shaDavid, kokutya Sion, yo ye shi fale motempeli.

³ Ayehe oya gongala pethimbo lyoshituthi shomatsali giihwa iitalala.

⁴ Aawiliki sho ya gongala, nena Aalevi oya yelutha po oshikethahangano

⁵ e taye shi fala kotempeli. Aayambi nAalevi oya dhikulula po etsalihangano, iikwaniipangitho yalyo ayihe noye yi fala kotempeli.

⁶ Omukwaniilwa Salomo nAaisraeli ayehe oya gongala komeho goshikethahangano e taa yamba oonzi noongombe odhindji kaadhi shi kuyalulwa.

⁷ Nena aayambi oya fala oshikethahangano shOmuwa motempeli, e taye shi tula pehala lyasho mUuyapukielela pokati komawawa gaakerubi.

⁸ Omawawa gawo ga yalalekwa oga siikile oshikethahangano niihumbatitho yasho.

⁹ Oombando dhiihumbatitho otadhi vulu okumonika kushaa ngoka ta thikama a taalela Ehala lyUuyapukielela, ihe hapalwe we. (Iihumbatitho oko yi li nonena.)

¹⁰ Moshikethahangano kamwa li sha, kakele komayambi gaali giipango ga tulilwe mo kuMoses kondundu Sinai, Omuwa sho a hangana nAaisraeli mokuza kwawo kuEgipiti.

¹¹ Aayambi ayeheyehe oya li ya gongala yo yi iyapula. Aayambi Aalevi ayehe — Asaf, Heman, Jedutun naantu yomaludhi gawo — oya li ya zala oonguwo dhooliina. Aalevi oya li ya thikama kombinga yokuuzilo woshiyambelo ye na iiyaha nuuharpa, pamwe nayo opwa li aayambi ethele nomilongo mbali taa hiki omankuma. Aayimbi oya thindikilwa momutono gwa gwana po komankuma, kiiyaha nokiihikomwa yilwe, sho taa hambelele Omuwa noku mu imbila taa ti: “Hambeleleni Omuwa, oshoka oye omwaanawa, nohole ye oyaaluhe.” Opo mpoka oshikogo oshu udha otempeli yOmuwa. Aayambi inaa vula we okutsikila elongelokalunga, oshoka eadhimo lyOmuwa olya udhitha otempeli.

6

¹ Omukwaniilwa Salomo okwa galikana a ti: “Omuwa, ongoye wa hogolola, u kale moshikogo oshiluudhe.

² Ngashingeyi onde ku tungile otempeli yo opala, egumbo moka to kala sigo aluhe.”

³ Aaisraeli ayehe oko ya li ya thikama. Omukwaniilwa okwa pungulukile kuyo e te ya indilile eyambeko lyaKalunga.

⁴ Okwa ti: “Omuwa, Kalunga kaIsrael, na hambelelwe! Okwa gwanitha euvaneko ndyoka a uvanekele tate David, sho a tile kuye:

⁵ ‘Okuza kethimbo ndyoka nda tembudha aantu yandje muEgipiti, sigo onena, inandi hogolola oshilando shasha mevi lyaIsrael shokutungila mo otempeli moka ndi na okusimanekelwa, noinandi hogolola nando ogumwe a wilike aantu yandje Aaisraeli.

⁶ Ihe ngashingeyi onda hogolola Jerusalem, li ninge ehala mpoka tandi simanekelwa, nangoye David, u lele aantu yandje.’ ”

⁷ Salomo okwa tsikile a ti: “Tate David okwa dhiladhilile a tunge otempeli yokusimanekela mo Omuwa, Kalunga kaIsrael,

⁸ ihe Omuwa okwa ti kuye: ‘Onawa, sho wa hala okutungila ndje otempeli,

⁹ ashike ito ke yi tunga. Omumwoye, omumwoyelela, oye ta ka tungila ndje otempeli.’

¹⁰ “Ngashingeyi Omuwa okwa gwanitha euvaneko lye. Ngame onda landula tate muukwaniilwa waIsrael nonda tungu otempeli yokusimanekela mo Omuwa, Kalunga kaIsrael.

¹¹ Onda tula motempeli oshikethahangano, moka mwa pungulwa omayambi giipango yehangano ndyoka Omuwa a hangana nAaisraeli.”

¹² Montaneho yaantu Salomo okwa yi komeho goshiyambelo, a yelutha omaako ge e ta galikana.

¹³ Salomo okwa li a tungitha omutuni gwoshikushu mokati kehale enene. Ogwa li oombinemeta 2,2 nometa 1,3 pombanda. Okwa londo komutuni, a tsu oongolo mpoka ayehe ye mu wete nokwa yelutha omaako ge lwokegulu.

¹⁴ Okwa galikana a ti: “Omuwa, Kalunga kaIsrael, kaku na Kalunga megulu pombanda nenge kombanda yevi pohi e ku fa! Oto dhiginine ehangano lyoye naantu yoye noto ya hololele ohole yoye, oomboka taa vulika kungoye mokukala kwawo akuhe.

¹⁵ Owa gwanitha euvaneko we li uvanekele tate David; nena ohapu kehe oya gwanithwa.

¹⁶ Ano ngashingeyi Omuwa, Kalunga kaIsrael, dhiginina euvaneko lilwe we li uvanekele tate, sho we mu lombwele kutya moluvalo lwe otamu ka kala aluhe omukwaniilwa ngoka ta ka pangela Israel, ngele oluvalo lwe otalu vulika kungoye, ngaashi tate a ningile.

¹⁷ Ano ngashingeyi, Omuwa, Kalunga kaIsrael, tsakanitha omauvaneko goye ngoka wa uvanekele omuntu gwoye David.

¹⁸ “Omuwa, ndishi ito vulu okukala shili kombanda yevi mokati kaantu? Eeno, negulu nomagulu inage ku gwanena, ano otempeli ndjika nde yi ku tungile, oto gwana mo ngiini?

¹⁹ Omuwa, Kalunga kandje, ngame omuntu gwoye. Pulakena omagalikano gandje, ngoye u taambe omaindilo tandi ge ku hehela nena.

²⁰ Tonatela otempeli ndjika omutenya nuusiku. Owa uvaneka kutya mpaka opo mpoka to simanekelwa, onkee uva ndje ano, sho te taalele otempeli ndji e tandi galikana.

²¹ Uva omagalikano gandje nomagalikano gaantu yoye Aaisraeli, uuna taa galikana muka. Megumbo lyoye megulu tu uva, u tu dhimine po oondjo.

²² “Ngele ope na omuntu ta tamanekelwa oondjo ye ke dhi na e te etwa koshiyambelo shoye motempeli ndjika, a gane kutya ye ke na ndjo,

²³ Omuwa, mu pulakena megulu lyoye ngoye u tokole aantu yoye. Pangulila uuwinayi ngoka e shi ilongela, nou yululule omukeenandjo.

²⁴ “Aantu yoye Aaisraeli nge taa dhengwa kaatondi yawo molwashoka ya yono kungoye, e taa galukile kungoye notaa ya motempeli ndjika, taa ku galikana yi ifupipika, u ya dhimine po,

²⁵ ya pulakena megulu. Dhima po omayono gaantu yoye, noku ya galulila kevi ndyoka we li pe oohekulu.

²⁶ “Uuna to ya etele oluteni molwashoka ya yono kungoye, ndele taa itedhulula e taa ya motempeli ndjika taa ku galikana neifupipiko,

²⁷ Omuwa, ya pulakena megulu. Dhima po oondjo dhaantu yoye, Aaisraeli, ngoye u ya longe okuninga shoka shu uka. Omuwa, lokithila evi ndika lyoye omvula, ndyoka we li pe aantu yoye, li ninge eliko lyawo lyaaluhe.

²⁸ “Moshilongo ngele otamu ya ondjala nenge elega, nenge iilya tayi ningi oshikombo nenge omulegu, nenge tayi lika po koshapapa nenge koombahu, nenge aantu yoye taa matukilwa kaatondi yawo nenge taa adhika koshivu nenge komikithi,

²⁹ pulakena omagalikano gawo. Omuisraeli kehe ta adhika koluhodhi momwenyo gwe, e ta yelutha omaako ge motempeli ndjika yoye,

³⁰ uva egalikano lye. Ya pulakena megumbo lyoye megulu, ya dhimina po ngoye u ya kwathe. Ongoye awike wa tseya omadhiladhilo gomomutima gwomuntu. Shaa ngoka mu ningila, ngaashi i ilongela,

³¹ opo aantu yoye ya kale ya vulika kungoye mokukala kwawo akuhe mevi ndika we li pe ootatekulu.

³² “Ngele omukwiilongo ngoka a kala mevi lyokokule, ta kundana edhina lyoye enene, oshikaha shoye shoonkondo nokwooko kwoye kwa taganana e te ya, e ku galikanene motempeli ndjika,

³³ pulakena omagalikano ge. Mu uva megulu lyoye, moka wa kala mo, nou mu ningile shoka te shi pula, opo iigwana ayihe yomuuyuni yi ku tseye noyi vulike kungoye, ngaashi aantu yoye Aaisraeli taa ningi. Nena otaa ka tseya kutya otempeli ndjika nde yi tungu, oyo ehala moka to simanekelwa.

³⁴ “Uuna to tumu aantu yoye, ya ye kolugodhi okukondjitha aatondi yawo notaa ku galikana shaampoka ye li, ya taalela koshilando shika we shi hogolola, notempeli ndjika nde yi ku tungile,

³⁵ pulakena omagalikano gawo. Ya uva megulu, u ya pe esindano.

³⁶ “Ngele aantu yoye otaa yono kungoye — ko kwaa na ngo inaa yona — nomondjahi yoye oto etha aatondi yawo ye ya sinde, e taye ya fala muupika komavi galwe, nando evi ndyoka li kale kokule,

³⁷ pulakena omagalikano gaantu yoye. Ngele otaa itedhululile mevi ndyoka e taa ku galikana taa hempulula oondjo dhawo, nkene ya yono, nuuwinayi ye u longo, Omuwa, uva omagalikano gawo.

³⁸ Ngele otaa itedhululile shili mevi ndyoka koomwenyo dhawo e taye ku galikana ya taalela kevi ndika we li pe ootatekulu, koshilando shika we shi hogolola notempeli ndjika nde yi ku tungile,

³⁹ nena pulakena omagalikano gawo. Ya uva megumbo lyoye megulu ngoye u ya sile ohenda nokudhima po omayono agehe gaantu yoye.

⁴⁰ “Omuwa, Kalunga kandje, tu tala ngoye u uve omagalikano taga ningwa meha ndika.

⁴¹ Thikama, Omuwa Kalunga, u ye motempeli pamwe noshikethahangano, endhindhiliko lyoonkondo dhoye, u kale mo sigo aluhe. Yambeka aayambi yoye mwaayihe taa ningi, naantu yoye naa hambelelele uuwanawa woye.

⁴² Omuwa Kalunga, ino ekelahi omukwaniilwa we mu hogolola. Dhimbulukwa ohole yoye okuhola omuntu gwoye David.”

7

¹ Omukwaniilwa Salomo sho a hulitha egalikano lye, omulilo ogwa gu megulu e tagu lungunitha po omafikilondjambo ngoka ga li ga yambwa, neadhimo lyOmuwa olyu udha otempeli.

² Aayambi inaa wapa okuya motempeli omolweadhimo.

³ Aaisraeli sho ya mono omulilo tagu kuluka megulu, nuuyelele u udha otempeli, oya tsu iipala pevi kolupale lwomamanya, taa simaneke Kalunga taye mu hambelelele uuwanawa we nohole ye yaaluhe.

⁴ Nena Salomo pamwe naantu ayehe oya yamba omafikilondjambo kOmuwa.

⁵ Okwa yamba ekwatathanondjambo lyoongombe 22 000 noonzi 120 000. Osho ngaaka ye naantu ayehe ya sindilile otempeli.

⁶ Aayambi oya thikama mehala ndyoka ye li uthilwa, nokomeho gawo okwa thikama Aalevi taa tanga Omuwa niihikomwa mbyoka omukwaniilwa David e yi longekidhile, yo taa imbi eimbilo tali ti “Ohole ye oyaaluhe”, ngaashi ya lombwelwa kuDavid. Aayambi oya hiki omankuma, manga aantu ayehe ya thikama.

⁷ Esiku tuu ndyoka Salomo okwa yapula wo endiki lyehale lyokomeho gotempeli e ta yambele nkoka: omidhidhindjambo, iikulyandjambo noofu dhiimuna yomekwatathanondjambo. Okwa ningi ngaaka, oshoka oshiyambelo shoshikushu osha li oshishona okuyambela mo omayambo ngaka agehe.

⁸ Salomo nAaisraeli ayehe oya dhanene Oshituthi shomatsali giihwa iitalala omasiku gaheyali. Okwa li ongundu onenenene yaantu ya kongoloka okuza kuupitilo waHamat kuumbangalantu nokongamba yaEgipiti nuumbugantu.

⁹ Oya kala omasiku gaheyali gokusindilila oshiyambelo niishewe omasiku omakwawo gaheyali goshituthi. Mesiku lyahugunina oya zimbuka okudhana oshituthi,

¹⁰ nomesiku lya landula ko, metimilongombali nagatatu lyomwedhi omutiheyali, Salomo okwa laleke aantu, ya shune komagumbo. Oya li ya nyanyukilwa omayambeko agehe ngoka Omuwa a yambeke nago aantu ye Aaisraeli, David naSalomo.

¹¹ Salomo sho a mana etungo lyotempeli nombala ye e ta tsakanitha ayihe yilwe a halele oku yi tunga,

¹² Omuwa okwe mu ihololele uusiku. Okwa ti kuye: “Ondu uvu egalikano lyoye nonda taamba otempeli ndjika, yi kale eha moka omayambo taga yambelwa ndje.

¹³ Uuna tandi eta oluteni, ko kaku na omvula, nenge te tumu oombahu, dhi lye po iimeno, nenge te tumu elega mokati kaantu yandje,

¹⁴ ngele taa galikana ndje e tayi itedhulula notaa pilamene uuwinayi mboka ye u ningile, nena otandi ya uvu megulu, te dhimi po oondjo dhawo e tandi hepulutha ishewe oshilongo shawo.

¹⁵ Otandi tonatele otempeli ndjika e tandi uvu omagalikano agehe ngoka taga galikanenwa mo,

¹⁶ oshoka onde yi hogolola e tandi yi yapula, yi kale eha moka te simanekelwa mo sigo aluhe. Otandi yi tonatele noku yi gamena aluhe.

¹⁷ Ngele oto longele ndje nuudhiginini, ngaashi ho David a ningile, to vulika kiipango yandje e to gwanitha ayihe mbyoka nde ku lombwele,

¹⁸ otandi ka tsakanitha euvaneko nde li uvanekele ho David, sho nde mu lombwele kutya Israel oku na okulelwa aluhe koluvalo lwe.

¹⁹ Ihe ngele ngoye naantu yoye itamu vulika kiipango yandje nokomalombwelo gandje ngoka nde ge mu pa, e tamu simaneke ookalunga yalwe,

²⁰ nena otandi ke mu tembudha mevi ndyoka nde li mu pele, e tandi ka thiga po otempeli ndjika nda yapula, yi kale eha moka tandi simanekelwa mo. Iigwana koombinga noombinga otayi ke yi sheka noku yi dhina.

²¹ “Otempeli ndjika oya simana ngashingeyi, ihe nena kehe omupitipo ota ka haluka e ta pula ta ti: ‘Omolwashike Omuwa a ningile ngeyi oshilongo shika notempeli ndjika?’

²² Aantu otaa ka yamukula taa ti: ‘Osha ningwa, oshoka oyo oye etha Omuwa. Kalunga kawo, ngoka a tembudha oohekulu muEgipiti. Oyi inekele ookalunga yalwe e taye ya simaneke. Omolwashoka Omuwa e ya etele omupya nguka.’ ”

8

¹ Osha pula Salomo omimvo omilongo mbali okutunga otempeli nuuwa we.

² Okwa tungulula wo iilando mbyoka e yi pewa komukwaniilwa Hiram, e ta langeke mo Aaisraeli.

³ Okwa kwata po oshikandjo shaHamat naZoba

⁴ e ta tungile oshilando Tadmor mombuga edhingililokuma. Okwa koleke iilando ayihe muHamat, opo a pungule mo omaliko.

⁵ Salomo okwa tungulula wo iilando Bethoron shopombanda naBethoron shopohi (okwe yi tungile edhingililokuma li na omiyelo tadhi vulu okupatwa),

⁶ osho wo oshilando Baalat, iilando ayihe moka ta pungula omaliko, niilando moka tamu kala uukambe nomatembakwiita ge. Okwa gwanitha omadhiladhilo ge agehe gomatungo muJerusalem, muLibanon nomoshilongo ashihe moka a li ta pangele.

⁷ Salomo okwa longitha miilonga yethiminiko omaluvalo agehe gAakaanana mboka inaa dhipagwa po kAaisraeli, sho ya kutha ko evi lyawo. Muka omwa kwatelelwa Aaheti, Aayamori, Aaperesi, Aahevi nAayebusi, mboka omaluvalo gawo ga kala aapika sigo onena.

⁸

⁹ Aaisraeli inaa longithwa miilonga yethiminiko, ihe oya ningi aakwiita, aaniihako, oondjayi, dhomatembakwiita noondjayi dhaakayilinkambe.

¹⁰ Okwa li aanambelewa 250 metonatelo lyiilonga yethiminiko yomatungo gi ili nogi ili.

¹¹ Salomo okwa tembudha omunyekadhi gwe omuna gwomukwaniilwa gwaEgipiti, a zi moshilando shaDavid a yi muuwa mboka Salomo e u mu tungile. Salomo okwa ti: “Omunyekadhi nguka ita vulu okukala muuwa waDavid, omukwaniilwa gwaIsrael, molwashoka eha ndyoka li na oshikethahangano, olyo eyapuki.”

¹² Salomo okwa yamba omafikilondjambo kOmuwa koshiyambelo shoka e shi tungile komeho gotempeli.

¹³ Okwa yamba omafikilondjambo pamautho gompango yaMoses esiku kehe eyapuki: Omasabati, iituthi yoomwedhi oompe niituthi yopatatu yomomumvo — Oshituthi shiikwiila yaa na efulika, Oshituthi shoshiwike nOshituthi shomatsali giihwa iitalala.

¹⁴ Ngaashi shu uthwa kuhe David, Salomo okwa pongolola iilonga yesiku kehe yaayambi noyAalevi mboka taa kwathele aayambi mokwiimba omaimbilo nomokutsakanitha iilonga yawo. Okwa topola wo aalangeli yotempeli moongundu okulangela pomweelo kehe, opautho lyaDavid, omumati gwaKalunga.

¹⁵ Omautho ngoka David a gandjele kaayambi nAalevi omolwoompungulilo niinima yilwe, oga gwanithwa naanaa.

¹⁶ Iilonga yaSalomo ayihe oya tsakanithwa. Okuza ketameko lyekankameno lyotempeli sigo okehulilo lyetungo iilonga ayihe oya li ye ende nawa.

¹⁷ Nena Salomo okwa yi kuEziongeber naElat, komatulilo gopEkololo lyaAkaba mevi lyaEdom.

¹⁸ Omukwaniilwa Hiram okwe mu tumine oosikepa mewiliko lyomalenga ge mwene naantu mboka ya tseya efuta. Oya thayile pamwe naantu yaSalomo yu uka kevi lyaOfir noye etele Salomo oshingoli shondjundo yookilograma 15,000.

9

¹ Omukwaniilwa omukiintu gwaSheba okwa kundana esimano lyaSalomo nokwa yi kuJerusalem e te mu pula omapulo gokanaku. Okwe ya pamwe nongundu onene yaakalele noongamelo dha humbata omilongelo dhiizimba, uuwe noshingoli oshindjishindji. Sho ya tsakanene naSalomo, okwe mu pula omapulo agehe kwa li e ga dhiladhila.

² Salomo okwe ga yamukula agehe; kapwa li sha oshidhigu unene kuye okufatulula.

³ Omukwaniilwa omukiintu gwaSheba okwa uvu uunongo waSalomo e ta tala ombala ndjoka a tungu.

⁴ Okwa mono iikulya mbyoka tayi tentekwa koshitaafula, aambala ye mpoka ya kala nonkene ya yakula niizala ya zala, aayakuli yopiililo miituthi, iinuwa ye nomafikilondjambo ngoka ha yamba motempeli. Mbika ayihe oye mu mana oohapu e ta kumwa.

⁵ Okwa ti komukwaniilwa Salomo: “Shoka nde ku kundana moshilongo shandje, ngoye mwene nuunongo woye, oshoshili!

⁶ Ihe kanda li te vulu oku shi itaala, sigo nde ya nonde shi mono ngame mwene. Nani netatatata olyo ngaa inaandi uva kombinga yuunongo woye. Uunongo woye uunene u vule aantu sho taa ti.

⁷ Aantu mboka taye ku yakula, aanelago ngiini, mboka taa kala aluhe koshipala shoye noye na elago okuuva, sho to popi uunongo woye!

⁸ Hambelela Omuwa, Kalunga koye! Okwa holola kutya okwe ku hokwa, sho e ku ningi omukwaniilwa gwaIsrael, u lele medhina lye. Oshoka oku hole aantu ye Aaisraeli nokwa hala oku ya gamena sigo aluhe, okwe ku ningi omukwaniilwa gwawo, opo u popile ompango nelandulathano.”

⁹ Okwa pe omukwaniilwa Salomo omulongelo ngoka e gu eta: oshingoli shookilograma dhi vule omayuvi gane, niizimba oyindjiyindji nuuwe. Inaku etwa nale iizimba yilwe iiwanawa ngambyoka omukwaniilwa omukiintu gwaSheba e yi pele omukwaniilwa Salomo.

¹⁰ (Aantu yomukwaniilwa Hiram noyomukwaniilwa Salomo mboka ye eta oshingoli sha za kuOfir, oye etelele wo omiti dhomisandeli nuuwe.

¹¹ Salomo okwa hongitha muyo iikolo yomotempeli noyomuuwa we, osho wo iiketala nuuharpa waayimbi. Iinima ya tya ngeyi inayi monika nale mevi lyaJuda.)

¹² Omukwaniilwa Salomo okwa gandja komukwaniilwa omukiintu gwaSheba ashihe shoka a li e mu pula. Okwa gwedha ko ishewe omulongelo. Omukwaniilwa omukiintu naantu ye oya shuna ihe kevi lyawo kuSheba.

¹³ Salomo okwa taamba omumvo kehe oshingoli shookilograma konyala omayuvi omilongo mbali nagatatu.

¹⁴ Okwa taamba wo oompale dha futwa kaalandithi naahalithi. Aakwaniilwa Aayarabia naaleli yiikandjo yomuIsrael oye mu etele oshisiliveli noshingoli.

¹⁵ Salomo okwi ihambulithile iikandekitho iinene omathele gaali nokwa kolongitha kehe shimwe noshingoli sha ngolongwa shookilograma konyala heyali,

¹⁶ niikandekitho iishona omathele gatatu ya kolongithwa oshingoli shookilograma konyala ndatu kehe shimwe. Okwe yi pungula ayihe moshinyanga shomiti dhokuLibanon.

¹⁷ Omukwaniilwa okwa pangelitha wo oshipangelapundi oshinene. Ombinga yimwe oya li yomayego goondjamba, nonkwawo oyoshingolilela.

¹⁸ Oshipangelapundi osha li shi na iilyatelelo ihamano, nokalyatelelo koompadhi koshingoli. Osha li shi na iiyegameneno koombinga adhihe mbali nopooha dhosheegameno kehe shokwaako okwa li efano lyonime.

¹⁹ Piilyatelelo opwa li pu na omafano goonime omulongo nambali, yimwe koluha kehe lwoshilyatelelo kehe. Miilongo ayihe kamwa li oshipangelapundi sha fa shika.

²⁰ Iitenga yaSalomo ayihe oya li yoshingoli, niiyuma ayihe moshinyanga shomiti dhokuLibanon oya li yoshingolilela. Oshisiliveli osha li kaashi na mwago muuyuni waSalomo.

²¹ Okwa li e na oosikepa mefuta dhe ende pamwe noosikepa dhaHiram. Momumvo omutitatu kehe odha galuka dhe etelele oshingoli, oshisiliveli, omayego goondjamba, oondjima noondhila dhoonankwe.

²² Omukwaniilwa Salomo okwa li omuyambalela nomunandunge e vule aakwaniilwa ayehe muuyuni.

²³ Ayehe oye ya okupula omayele kuye, yu uve uunongo mboka Kalunga e u mu pa.

²⁴ Shaa ngoka okwe mu etele oombalagelo — iisiliveli, oshingoli, oonguwo, omatati, iizimba, uukambe nomamulutiya. Shika osha ningwa omumvo nomumvo.

²⁵ Omukwaniilwa Salomo okwa li e na omatala omayuvi gane gomatembakwiita noguukambe, naakawilinkambe omayuvi omulongo nagaali. Ongundu yimwe yomuyo oya kala muJerusalem, manga ombinga onene ya kala miilando yilwe.

²⁶ Okwa li a pangele aakwaniilwa ayehe muuyuni okuza komulonga Eufrat sigo oFilistia nokongamba yaEgipiti.

²⁷ Muuyuni we oshisiliveli osha li oshindjishindji muJerusalem sha fa evi, nomisendeli odha li wo odhindji dha fa omikwiyu muShefela.

²⁸ Salomo okwe eta mo uukambe wa zi kuMusri nokiilongo yilwe wo.

²⁹ Iinima yilwe mondjokonona yaSalomo okuza ketameko sigo okehulilo oya nyolelwa membo lyondjokonona lyomuhunganeki Natan, momahunganeko gaAhija gwomuShilo nomomamoniko gomuhunganeki Iddo a hunganekele Jeroboam yaNebat.

³⁰ Salomo okwa lele Israel alihe muJerusalem omimvo omilongo ne.

³¹ Okwa si nokwa fumvikwa moshilando shaDavid, nomwana Rehoboam okwe mu landula muukwaniilwa.

10

¹ Rehoboam okwa yi kuShekem, nkoka Aaisraeli ayehe yokuumbangalantu ya gongala, ye mu kwaniileke.

² Jeroboam yaNebat, ngoka a li a ya ontuku omukwaniilwa Salomo kuEgipiti, sho e shi kundana, okwa galukile kegumbo.

³ Aantu yomazimo gokuumbangalantu oye mu tumu a ze ko, noyo ayehe oya yi kuRehoboam e taa ti kuye:

⁴ “Ho okwe tu tsike omitenge omidhigu. Ngele oto pupaleke omitenge ndhika e to tu vululukitha, otatu ningi aapiya yoye.”

⁵ Rehoboam okwa yamukula a ti: “Pii ndje omasiku gatatu, ndi shi dhiladhile nawa notamu galuka ihe.” Aantu oya yi.

⁶ Omukwaniilwa Rehoboam okwa pula omayele kaasamane aakulupe mboka ya li haa pe he Salomo omayele. Okwe ya pula a ti: “Otamu pe ndje eyamukulo lya tya ngiini, ndi yamukule aantu mbaka?”

⁷ Aasamane oya yamukula ya ti: “Ngele ou na ohenda naantu mbaka e to kambadhala u ya mbilipaleke moku ya pa eyamukulo taye li panda, otaye ke ku longela aluhe nuudhiginini.”

⁸ Rehoboam okwa dhini omayele gaasamane aakulupe nokwa yi kaagundjuka yepipi lye mboka ya li ya putukila pamwe naye noya li aagandjindunge ye.

⁹ Okwe ya pula a ti: “Otandi ka tya ngiini kaantu mbo ya pula ndje, ndi ya pupalekele omitenge dhawo?”

¹⁰ Oyo ya yamukula ya ti: “Ya lombwela to ti: ‘Okanwegona kandje okanene ke vule oombwetelo dhatate.’

¹¹ Ya lombwela to ti: ‘Tate okwe mu tsike omitenge omidhigu; ngame otandi ke dhi dhigupaleka noonkondo. Okwe mu dhenge nongola; ngame otandi ke mu kwinunitha ekoosa!’ ”

¹² Omasiku gatatu sho ga piti po, Jeroboam naantu ayehe oya galukile komukwaniilwa Rehoboam, ngaashi e ya tseyithilile.

¹³ Omukwaniilwa okwa dhini omayele gaasamane aakulupe e ta vavele aantu,

¹⁴ ngaashi a taamba omayele gaagundjuka. Okwa ti: “Tate okwe mu tsike omitenge omidhigu; ngame otandi ka gwedha ko, dhi dhigupale. Okwe mu dhenge nongola; ngame otandi ke mu kwinunitha ekoosa!”

¹⁵ Shika osha li ehalo lyOmuwa, a gwanithe shoka a popile kuJeroboam yaNebat momuhunganeki Ahija gwokuShilo. Omolwashoka omukwaniilwa ina pulakena nando oohapu dhaantu.

¹⁶ Aantu sho ya mono kutya nani omukwaniilwa ite ya pulakene, oyi igidha ya ti: “Otu na shike naDavid negumbo lye nuuthiga womuna gwaIsai? Oye tu ningile shike? Aaisraeli ne, tu yeni kegumbo. Rehoboam na tale sho ta ningi!” Osho ngaaka Aaisraeli ya pindjala,

¹⁷ noya thigi po Rehoboam, a kale ashike omukwaniilwa gwaantu mboka ye li moshikandjo shaJuda.

¹⁸ Nena omukwaniilwa Rehoboam okwa tumu Adoniram, ngoka a li omuwiliki gwiilonga ya thiminikwa, a ye kAaisraeli, ihe oye mu dhipaga nomamanya. Opo mpoka Rehabeam okwa nukile metembakwiita lye e ta yi ontuku kuJerusalem.

¹⁹ Okuza mpoka aantu yokuumbangalantu waIsrael oyi iteka ezimo lyaDavid.

11

¹ Rehoboam sho a thiki muJerusalem, okwa hiya aakwiita ya pyoka 180 000 yomomazimo gaBenjamin nogaJuda. Okwa dhiladhila, a ye miita, a galule omazimo gAaisraeli gokuumbangalantu, e ga pangele natango.

² Ihe Omuwa okwa lombwele omuhunganeki Shemaia,

³ a fale elaka ndika komukwaniilwa Rehoboam nokaantu ayehe yomazimo gaJuda nogaBenjamin

⁴ tali ti: “Inamu matukila aamwanyoko Aaisraeli. Shuneni komagumbo amuhe. Shika sha ningwa, ongame nde shi hala.” Oya vulika keutho lyOmuwa noinaa ka kondjitha Jeroboam.

⁵ Rehoboam okwa kala muJerusalem e ta tungithile iilando mbika yomuJuda naBenjamin omadhingililokuma:

⁶ Betlehem, Etam, Tekoa,

⁷ Bet Sur, Soko, Adullam,

⁸ Gat, Maresha, Sif,

⁹ Adoraim, Lakish, Aseka,

¹⁰ Soar, Ajalon naHebron.

¹¹ Okwe yi koleke, yi ninge iilandohote, nomukehe shimwe shomuyo okwa langeke mo elenga, nokwa pungulithile mo iikwakuliwa, omagadhi nomaviinu,

¹² osho wo iikandekitho nomagonga. Mokuninga ngeyi okwa kaleke Juda naBenjamin mepangelo lye.

¹³ Aayambi nAalevi oya zi noshilongo ashihe shaIsrael noye ya kuumbugantu kuJuda.

¹⁴ Aalevi oya thigi po iinapelo yawo nomapya gawo e taa tembukile kuJuda naJerusalem, oshoka omukwaniilwa gwaIsrael Jeroboam noluvalo lwe inaye ya pitika, ya longe iilonga yaayambi yOmuwa.

¹⁵ Jeroboam okwa langeke aayambi ye mwene, ya nonomene pomahala giinonoma yuupagani, ya saagelele oompwidhuli niimenka mbyoka e yi hambulithitha molupe lwoontsezi.

¹⁶ Momazimo agehe gaIsrael aantu mboka ya li ya hala okulongela shili Omuwa, Kalunga kaIsrael, oya landulile Aalevi kuJerusalem, opo ya vule okuyamba omayambo kOmuwa, Kalunga koohekulu.

¹⁷ Shika osha koleke oshilongo shaJuda, nomomimvo ndatu oya popile Rehoboam yaSalomo noya kala ngaashi muuyuni womukwaniilwa David nowomukwaniilwa Salomo.

¹⁸ Rehoboam okwa hokana Mahalat gaJerimot yaDavid, yina oAbihail yaEliab lyaIsai.

¹⁹ Oya mono aamati yatatu: Jeush, Shemaria naSaham.

²⁰ Konima Rehoboam okwa ka hokana po ishewe Maaka gaAbsalom noya mono aamati yane: Abia, Attai, Sisa naShelomit.

²¹ Aakiintu yaRehoboam ayehe kumwe oya li omulongo nayahetatu noohonda omilongo hamano. Okwa ningi he yaamati omilongo mbali nayahetatu naakadhona omilongo hamano. Maakadhi ayehe nomoohonda dhe okwa li e hole mo unene Maaka,

²² nomoyana okwa li a hokwa Abia e vule yalwe ayehe, e te mu hogolola, e mu landule muukwaniilwa.

²³ Okwa longo pandunge, sho a halakanithile oyana miilandohote ayihe miikandjo yaJuda naBenjamin nokwe ya kongele iikulya naakiintu oyendji.

12

¹ Rehoboam sho a koleke oshilongo she nokwa ningi omunankondo, oye pamwe naantu ye oye etha ompango yOmuwa.

² Momumvo omutitano gwepangelo lyaRehoboam okwaainekelwa kwawo kOmuwa okwa geelwa. Omukwaniilwa gwaEgipiti Shishak okwa matukile Jerusalem

³ e na omatembakwiita eyuvi limwe nomathele gaali, aakawilinkambe omayuvi omilongo hamano naakwiita oyendjiyendji yaa shi kuyalulwa, ya kwatelela mo Aalibia, Aasuki nAasudani.

⁴ Okwa kwata po iilandohote yaJuda nokwa humu ko sigo okuJerusalem.

⁵ Omuhunganeki Shemaia okwa yi komukwaniilwa Rehoboam naawiliki yAajuda mboka ya li ya gongala muJerusalem, ya ye Shishak ontuku. Okwa ti kuyo: “Elaka lyOmuwa kune olyo ndika: ‘Ne omwe ekelehi ndje, onkee ngashingeyi nde mu ethele miikaha yaShishak.’ ”

⁶ Omukwaniilwa naakuluntu oya zimine kutya oya yona noya ti: “Shoka Omuwa ta longo, osho shu uka.”

⁷ Omuwa sho e shi mono, okwa lombwele Shemaia ishewe a ti kuye: “Itandi ya hanagula po we, sho ya zimine epuko lyawo. Ihe uuna Shishak ta homona, otaa ka hupa ko ngaa. Jerusalem itashi ka gumwa koonkondo adhihe dhondjahi yandje,

⁸ ihe Shishak ote ke ya sinda, notaa ki ilonga eyooloko pokati kokulongela ndje nokulongela aapangeli yiilongo.”

⁹ Omukwaniilwa Shishak okwe ya kuJerusalem nokwa yugu po omaliko agehe gomotempeli nogomombala. Okwa kutha shaa shoka sigo iikandekitho yoshingoli mbyoka ya hambulithilwe kuSalomo.

¹⁰ Peha lyayo Rehoboam okwa hambulithile po iikandekitho yoshikushu nokwe yi pe aambala mboka ya li ye na oshimpwiyu shokutonatela eelo lyuuwa.

¹¹ Aluhe omukwaniilwa nge ta yi kotempeli, nena aalangeli ohaa humbata iikandekitho noku yi shuna ishewe kongulu yetonatelo.

¹² Molwashoka okwi ifupipike koshipala shOmuwa, ondjahi yOmuwa inayi mu hanagula po thilu, niinima oye ende nawa muJuda.

¹³ Rehoboam okwa lele muJerusalem e ta taneke oonkondo dhe dhuukwaniilwa. Okwa li e na omimvo omilongo ne nagumwe, sho a ningi omukwaniilwa, e ta lele omimvo omulongo naheyali muJerusalem, oshilando shoka Omuwa a hogolola mokati kiilando yomuIsrael, shi kale eha moka ta simanekelwa. Rehabeam oye omuna gwomukulukadhi Naama gwokoshilongo Ammon.

¹⁴ Okwa longo uuwinayi, oshoka inu ukitha omwenyo gwe a konge Omuwa.

¹⁵ Iilonga yaRehoboam okuza ketameko ndongo kehulilo negumbo lye oya nyolelwa mondjokonona yomuhunganeki Shemaja nomondjokonona yomuhunganeki Iddo. Rehoboam naJeroboam oya li ya hingilathana iita aluhe.

¹⁶ Rehoboam okwa si nokwa fumvikwa moombila dhaakwaniilwa moshilando shaDavid, nomwana Abia okwe mu landula muukwaniilwa.

13

¹ Momumvo omutimulongo nahetatu gwepangelo lyaJeroboam, omukwaniilwa gwaIsrael, Abia okwa ningi omukwaniilwa gwaJuda

² nokwa lele omimvo ndatu muJerusalem. Yina oMikaia gaUriel gwokoshilando Gibea. Iita oya tukuluka pokati kaAbia naJeroboam.

³ Abia okwa li e na aakwiita oofule 400 000, ihe Jeroboam okwe mu kondjitha naakwiita 800 000.

⁴ Omatangakwiita oga tsakanene mevi lyokoondundu dhaEfraim. Omukwaniilwa Abia a londo kondundu Semaraim e ti igidha Jeroboam nAaisraeli ta ti: “Pulakenii ndje!

⁵ Omwa tseya tuu kutya Omuwa, Kalunga kaIsrael, okwa dhike ehangano lya kola naDavid e te mu pe pamwe noluvalo lwe uukwaniilwa womuIsrael sigo aluhe?

⁶ Jeroboam yaNebat okwa tsu ondumbo naSalomo, mwene gwe.

⁷ Konima okwi ihilile ongundu yaantu yaamakaha e taa thiminike Rehoboam yaSalomo, ngoka a li omugundjukalela nomunenguni, ina vula oku ya sinda.

⁸ Nena ne otamu kambadhala okukondjitha uuthemba wuukwaniilwa mboka Omuwa e u gandja koluvalo lwaDavid. Ne omu na omatanga ga gongelwa nomu na oontsezi mbali dhoshingoli ndhoka Jeroboam e dhi hambulitha, dhi ninge iikalunga yeni,

⁹ Omwa tidha po aayambi yOmuwa, oluvalo lwaAaron, nomwa tidha po Aalevi. Peha lyawo omwa langeke mo aayambi, ngaashi iigwana yilwe hayi ningi. Shaa ngoka te ya e na ontsezi nenge oonzi heyali, ota vulu okuyapulwa, a ninge omuyambi gwiikalunga yeni.

¹⁰ “Ihe tse otatu longele Omuwa, Kalunga ketu, noinatu mu thiga po. Aayambi yomoluvalo lwaAaron otaa gwanitha iilonga yawo, nAalevi otaye ya yakula.

¹¹ Ongula nongulohi kehe otaye mu yambele omidhidhindjambo niitsininondjambo. Otaa tula iikwiila iiyapuki moondumba koshitaafula sho opalekwa, nongulohi kehe otaa sakala oolamba dhoshihukikwanyeka shoshingoli. Tse otatu gwanitha shoka Omuwa a popi, ihe ne omwe mu thigi po.

¹² Kalunga mwene oye omuwiliki gwetu, naayambi ye oyo mbaka yi ilongekidha okuhika omankuma, ye tu ithanene kolugodhi, tu mu kondjithe. Aaisraeli ne, inamu kondjitha Omuwa, Kalunga koohokulu! Itamu vulu sha!”

¹³ Jeroboam okwa li a tumu aakwiita ye, ya ka kondeke Aajuda okuza konima, manga yamwe ye ya taalela moshipala.

¹⁴ Aajuda sho ya lengalenga, oya mono ye li mekondeka. Oya kugile Omuwa ekwatho, naayambi oya hiki omankuma.

¹⁵ Aajuda oya tsu onkalu nomewiliko lyaAbia oya homona. Kalunga okwa dhenge Jeroboam netangakwiita lyaIsrael.

¹⁶ Aaisraeli oya yi Aajuda ontuku, naKalunga okwa gandja Aaisraeli miikaha yAajuda.

¹⁷ Abia naakwiita ye oya dhenge noonkondo Aaisraeli — aakwiita Aaisraeli ya pyokoka oya sile miita aalumentu omayuvi omathele gatano.

¹⁸ Osho Aajuda ya sindi Aaisraeli, molwashoka oyo ya li yi inekela Omuwa, Kalunga koohekulu.

¹⁹ Abia okwa tidha aakwiita yaJeroboam e ta kutha ko iilando ye yimwe: Betel, Jeshana naEfron nomikunda dhi li popepi niilando mbika.

²⁰ Jeroboam ina nkondopala we muuyuni waAbia. Hugunina Omuwa okwe mu dhenge e ta si.

²¹ Abia okwa ningi omunankondo. Okwa li a hokana aakiintu omulongo nayane e ta vala aamati omilongo mbali nayaali naakadhona omulongo nayahamano.

²² Iinima yilwe mondjokonona yaAbia, shoka a popile nashoka a longo, oya nyolelwa mondjokonona yomuhunganeki Iddo.

14

¹ Omukwaniilwa Abia okwa si nokwa fumvikwa moombila dhaakwaniilwa moshilando shaDavid. Omwana Asa okwe mu landula muukwaniilwa, nomuuyuni waAsa oshilongo osha kala shi na evululuko omimvo omulongo.

² Asa okwa longo shoka sho opalela Omuwa, Kalunga ke.

³ Okwa yonagula po iiyambelo yiikalunga nomahala giinonoma yuupagani, okwa kumagula po oongundhimanya dhiidhila e ta ke po iiyelekela yoshikalungakiintu Asheera.

⁴ Okwa lombwele Aajuda, ya gwanithe ehalo lyOmuwa, Kalunga koohekulu, noya vulike komalongo nokiipango ye.

⁵ Sho a hanagula po omahala giinonoma yuupagani niiyambelo yomatsinino momikunda adhihe dhaJuda, oshilongo osha kala shi na evululuko muuyuni we.

⁶ Okwa tungu omadhingililokuma giilando yaJuda pethimbo lyepangelo lye, nopwa piti omimvo odhindji pwaa na iita, oshoka Omuwa okwe mu vululukitha.

⁷ Asa okwa lombwele Aajuda a ti: “Natu tungileni iilando omadhingililokuma nooshungo nomiyelo hadhi patwa. Otatu pangele oshilongo, molwashoka twa gwanitha ehalo lyaKalunga ketu. Oye te tu gamene e te tu shigi koombinga adhihe.” Osho ya tungu, niilonga yawo oye yi tompola.

⁸ Omukwaniilwa Asa okwa li e na etangakwiita lyaalumentu Aajuda 300 000 ya homata iikandekitho nomagonga naalumentu Aabenjamin 280 000 ye na iikandekitho nomatati. Ayehe mbaka oya li oofule noya pyokoka nawa.

⁹ Omusudani Sera okwa homona Juda e na aakwiita emiliyona nomatembakwiita omathele gatatu nokwe ya sigo opuMaresha.

¹⁰ Asa okwa yi e ke mu kondjithe, oyo noya tula koombinga adhihe mbali molusilu lwaSefata popepi naMaresha.

¹¹ Asa okwa galikana Omuwa, Kalunga ke, a ti: “Omuwa, oto vulu okukwatha aakwiita aankundi, ya ninge aanankondo. Ngashingeyi tu kwatha, Omuwa, Kalunga ketu, oshoka otwe ku inekela nomedhina lyoye twa piti mo, tu kondjithe ongundu ndjika onenenene. Omuwa, ongoye Kalunga ketu; nokape na ngoka te ku itakeke.”

¹² Omuwa okwa dhenge etangakwiita lyAasudani, Asa nAajuda sho ye ya homona. Oya fadhuka po,

¹³ Asa nomatanga ge oye ya tidha sigo okuGerar. Aasudani oyendji oya dhipagwa, naakwiita kaya li taa vulu okungungila nenge okukondja. Oya li ya sindwa kOmuwa nokaakwiita ye, netangakwiita olya yugu ko iihakanwa oyindji.

¹⁴ Nena oya hanagula po iilando ya kunduka Gerar, oshoka aantu yaankoka oya li ya haluthwa kOmuwa. Etangakwiita olya yugu iilando ayihe e tali kwata po iinima oyindji.

¹⁵ Oya homona wo oontanda dhaasita e taa yugu ko oonzi odhindji noongamelo. Nena oya shuna kuJerusalem.

15

¹ Ombepo yaKalunga oye ya muAzaria yaOded,

² oye nokwa yi komukwaniilwa Asa. Okwi igidha a ti: “Omukwaniilwa Asa nAajuda amuhe nAabenjamin, pulakenii ndje! Omuwa ota kala nane, ngele otamu kala naye. Ngele otamu mu kongo, ote ke mu ihololela, ihe ngele otamu mu pilamene, ote ke mu etha.

³ Opwa piti ethimbo ele Israel kee na Kalunga kashili, kee na aayambi yoku ya longa nokee na ompango.

⁴ Ihe uudhigu sho wa holoka, oya galukile kOmuwa, Kalunga kaIsrael. Oye mu kongo noye mu mono.

⁵ Momasiku ngeyaka kapwa li ngoka ta vulu okuya nokushuna kee na oshiponga shasha, oshoka moshilongo kehe omwa li uudhigu nevundakano.

⁶ Oshigwana shimwe osha hepeke oshigwana oshikwawo, noshilando shimwe osha hepeke oshilando oshikwawo, oshoka Kalunga okwa li te ya undulile omalwa nomupya.

⁷ Ihe ne ikoleleleni ne inamu tyololoka nando. Iilonga mbyoka tamu longo, oyi na ondjambi.”

⁸ Asa sho a uvu ehunganeko ndyoka lya popiwa kuAzaria yaOded, okwa nkondopala e ta vudha mo iimenka ayihe moshilongo shaJuda naBenjamin niimenka ayihe miilando mbyoka e yi kwatele po mevi lyokoondundu dhaEfraim. Okwo opaleke wo oshiyambelo shOmuwa shoka shi li mehale lyotempeli.

⁹ Aantu oyendji oye ya kombinga yaAsa ya zi komazimo gaEfraim, gaManasse nogaSimeon e taa kala moshilongo she, oshoka oya dhimbulula kutya Omuwa oku li pamwe naye. Asa okwe ya gongele ayehe kumwe nAajuda nAabenjamin.

¹⁰ Oya gongala muJerusalem momwedhi omutitatu gwomumvo omutimulongo nomutitano guukwaniilwa waAsa.

¹¹ Esiku ndyoka oya yamba omagandjelondjambo kOmuwa ga zi miihakanwa mbyoka ye etelele: oongombe omathele gaheyali noonzi omayuvi gaheyali.

¹² Oya ningi ehangano, moka ya zimine okulongela Omuwa, Kalunga koohekulu, nomitima dhawo adhihe noomwenyo dhawo adhihe.

¹³ Shaa omuntu, omugundjuka nenge omukuluntu, omulumentu nenge omukiintu, ngoka inaa simaneka Omuwa, Kalunga kaIsrael, okwa li e na okudhipagwa.

¹⁴ Oya popi pombanda ya gana medhina lyOmuwa, ya dhiginine ehangano, nena oya kugilile taa ligola nokuhika omankuma.

¹⁵ Aajuda ayehe oya li ya nyanyukwa, oshoka ya hangana ehangano ndika nomitima dhawo adhihe. Oya nyanyukilwa okulongela Omuwa, oye nokwe ya taamba e te ya pe ombili koombinga adhihe.

¹⁶ Omukwaniilwa Asa okwa shundula yinakulu Maaka, kaa kale we muunenentu, oshoka okwa li a hambulitha oshimenka oshinyanyalithi Asheera, oshikalungakiintu sholuvalo. Asa okwa ke po oshimenka shoka, e shi tetagula e ta fikile iintimbu yasho mesilu lyaKidron.

¹⁷ Asa nando ina hanagula po omahala agehe giinonoma yuupagani moshilongo, okwa kala i inekela Omuwa mokukala kwe akuhe.

¹⁸ Okwa tula motempeli iinima ayihe mbyoka he Abia e yi yoololela Kalunga, osho wo oshingoli noshisiliveli shoka ye mwene e shi yoololele Kalunga.

¹⁹ Inaku kala we iita sigo okomumvo omutimilongontano gwelelo lye.

16

¹ Momumvo omutimilongondatu nahamano gwepangelo lyaAsa, omukwaniilwa gwaJuda, omukwaniilwa Baasha gwaIsrael okwa matukile Juda e ta tameke okuninga Rama oshilandohote, opo a tokole ondjila yokuya nokupita mo muJuda.

² Nena Asa okwa kutha iisiliveli niingoli ayihe mbyoka ya li ya hupile motempeli nomombala e te yi tumu kuDamaskus komukwaniilwa Benhadad gwaSiria nelaka tali ti:

³ “Natu hangane, ngaashi ootate ya li. Iisiliveli niingoli mbika omulongelo gwoye. Teya po ehangano lyoye nomukwaniilwa gwaIsrael Baasha, opo a kuthe mo omatanga ge moshilongo shandje.”

⁴ Benhadad okwa zimine ethaneko lyaAsa e ta tumu oondjayi dhiita nomatanga gawo, ya ka homone iilando yaIsrael. Oya kwata po Ijon, Dan, Abel Bet Maaka, niilando ayihe yaNaftali, moka omaliko ga li ga pungulwa.

⁵ Omukwaniilwa Baasha sho u uvu shoka tashi ningwa po, okwa hulitha okukoleka Rama e te etha iilonga.

⁶ Nena omukwaniilwa Asa okwa gongele aantu ya za muJuda alihe e te ya lombwele, ya humbate po omamanya nomiti ndhoka Baasha a li ta longitha puRama noye yi longitha okukoleka iilando Geba naMispa.

⁷ Pethimbo ndyoka omuhunganeki Hanani okwe ya komukwaniilwa Asa e ta ti: “Molwashoka wi itula omukwaniilwa gwaSiria peha lyokwiinekela Omuwa, Kalunga koye, etangakwiita lyomukwaniilwa gwaIsrael olye ku yi ontuku.

⁸ Aasudani nAalibia kaya li ando ye na omatangakwiita omanene pamwe nomatembakwiita ogendji nuukambe? Ndele molwashoka owa li wi inekela Omuwa, oye okwa sinditha ayehe.

⁹ Omuwa ota tonatele uuyuni auhe, a nkondopaleke mboka ye na omitima dhe mu inekela. Owa longo uugoya, onkee okuza nena oto ka kala aluhe to hingilwa iita.”

¹⁰ Omolwashika Asa a geele omuhunganeki noonkondo e te mu tula moonkandja. Pethimbo tuu ndyoka Asa okwa tameke okuhepeka nayi aantu yamwe yomoshigwana.

¹¹ Iiningwanima ayihe yomepangelo lyaAsa, okuza ketameko sigo okehulilo, oya nyolelwa mondjokonona yaakwaniilwa yaJuda naIsrael.

¹² Momumvo gwe guukwaniilwa omutimilongondatu nomugoyi okwa kwatwa kuuvu uudhigu wokoompadhi. Ihe nando ongeyi, ina kugila Omuwa ekwatho, okwa yi owala koonganga.

¹³ Sho pwa piti omimvo mbali, okwa si

¹⁴ nokwa fumvikwa mombila ya hokwa memanya, ndjoka e yi ihokithile ye mwene moshilando shaDavid. Efumviko lye olya longekidhilwa iizimba nomagadhi ga nika nawa, noya tema omulilo omunene e taa lili oosa dhe.

17

¹ Jehosafat okwa landula he Asa muukwaniilwa e ta kondjitha Israel noonkondo.

² Okwa langeke omatanga miilandohote yaJuda, moshilongo shaJuda nomiilando mbyoka ya kwatelwe po kuAsa moshikandjo shaEfraim.

³ Omuwa okwa yambeke Jehosafat, oshoka okwa landulile oshinkoti shahe shopetameko noina simaneka Baal.

⁴ Okwa longele Kalunga kahe, a vulika kiipango yaKalunga ye ina ninga, ngaashi aakwaniilwa yaIsrael ya ningi.

⁵ Omuwa okwa pe Jehosafat epangelo lya kola moshilongo shaJuda, naantu oye mu etele omilongelo, e ta ningi omuyamba nomusimanekwa unene.

⁶ Okwi ikumike mokulongela Kalunga e ta hanagula po omahala agehe giinonoma yuupagani niiyelekela yoshikalungakiintu Asheera muJuda.

⁷ Momumvo omutitatu gwepangelo lye okwa tumu aambala ye Benhail, Obadia, Sakaria, Netanel naMikaia, ya ka longe aantu miilando yaJuda.

⁸ Oya thindikilwa kAalevi omugoyi naayambi yaali. Aalevi oyo Shemaia, Netania, Sebadia, Asahel, Shemiramot, Jehonatan, Adonia, Tobia naTobadonia, naayambi oyo Elishama naJoram.

⁹ Oya kutha embo lyompango yOmuwa e taa ende iilando ayihe yaJuda taa longo aantu ompango.

¹⁰ Omuwa okwa mbandameke iilongo ayihe ya kunduka Juda okuhingila Jehosafat iita.

¹¹ Aafilisti yamwe oye etele Jehosafat oshisiliveli oshindji nomagano galwe, nAayarabi yamwe oye mu etele oonzi 7 700 niikombo 7 700.

¹² Jehosafat okwa kala ta yi pombanda moonkondo. MuJuda alihe okwa tungile mo omapopilongulu niilando,

¹³ moka omaliko ga li ga pungulilwa mo ogendjigendji. MuJerusalem okwa li e na mo aaniihako ya dhenga pombanda

¹⁴ pamaludhi gawo. Adna okwa li ondjayi yomatanga goludhi lwaJuda; nokwa li e na aakwiita 300 000 mewiliko lye.

¹⁵ Ontega naye oJehohanan e na aakwiita 280 000,

¹⁶ nomutitatu oAmasia gaSikri e na aakwiita 200 000. (Amasia okwa li i igandjela Omuwa.)

¹⁷ Ondjayi yomatanga goludhi lwaBenjamin oya li Eliada, omukwiita ofule ta wilike aakwiita 200 000 ya homata iikandekitho nomagonga.

¹⁸ Ngoka e mu landula omutiyali, oye Jehosabad e na aantu 180 000 ya pyokokela nawa okukondja.

¹⁹ Aalumentu mbaka oya yakula omukwaniilwa muJerusalem, kakele kaamboka e ya langekele miilandohote yilwe yaJuda.

18

¹ Omukwaniilwa gwaJuda Jehosafat sho a yambapala e ta simana, okwa hokanithitha omukwazimo lye nomukwazimo gwaAhab, omukwaniilwa gwaIsrael.

² Omimvo dhimwe sho dha piti po, Jehosafat okwa yi koshilando Samaria, a ka talele po Ahab. Ahab okwe mu longekidhile oshituthi nokwa tsele oongombe odhindji noonzi odhindji. Okwa kambadhala okuheka Jehosafat, a ye naye molugodhi, a matukile oshilando Ramot shaGilead.

³ Ahab okwa pula Jehosafat a ti: “Oto ka ya pamwe nangame, tu ka ponokele Ramot?” Jehosafat okwa yamukula a ti: “Ondi ilongekidha nde ku fa, nosho wo aakwiita yandje. Otatu gama kungoye.”

⁴ Nena okwa gwedha ko a ti: “Ihe tango tu puleni Omuwa.”

⁵ Ahab okwi ithanene mo aahunganeki ye thike lwopomathele gane, e te ya pula ta ti: “Nandi ye ndi ka homone Ramot nenge aawe?” Aahunganeki oya yamukula ya ti: “Shi matukila, Omuwa ote ku pe esindano.”

⁶ Ihe Jehosafat okwa pula a ti: “Kape na omuhunganeki gulwe ngoka tatu vulu oku mu pula omayele gOmuwa?”

⁷ Ahab okwa yamukula a ti: “Oku na ngaa Mikaia yaImla. Ihe onde mu tonda, oshoka iha hunganekele ndje uuwanawa; aluhe uuwinayi auke.” Jehosafat okwa yamukula a ti: “Ino tya ngaaka.”

⁸ Nena Ahab okwi ithana elenga lye e te li lombwele, li ka tale Mikaia nziya.

⁹ Aakwaniilwa mbaka yaali oya li ya zala oonguwo dhawo dhopaukwaniilwa e taa kuutumba kiipangelapundi yawo polupale pondje yosheelo shaSamaria, naahunganeki ayehe taa hunganeke komeho gawo.

¹⁰ Gumwe gwomuyo, Sedekia yaKenaana, okwa hambula ooniga dhiiyela iiluudhe e ta ti kuAhab: “Omuwa ota ti ngeyi: ‘Oto ka kondjitha Aasiria nooniga ndhika e to ya sindi thiluthilu.’ ”

¹¹ Aahunganeki yalwe ayehe oye shi koleke wo taa ti: “Indeni, mu ka kondjithe Ramot notamu ka sindana. Omuwa ote ke mu pa esindano.”

¹² Elenga ndiyaka lya li lya ka tala Mikaia, olya ti kuye: “Aahunganeki yalwe ayehe oya hunganekela omukwaniilwa elago, nangoye wo popya oohapu oombwanawa we ya fa.”

¹³ Ihe Mikaia okwa yamukula a ti: “Otandi uvaneke kOmuwa omunamwenyo kutya otandi ka popya ashike shoka ta lombwele ndje.”

¹⁴ Sho e ya koshipala shomukwaniilwa Ahab, omukwaniilwa okwe mu pula a ti: “Mikaia, tse nomukwaniilwa Jehosafat natu ka homone Ramot, nenge aawe?” Mikaia okwa yamukula a ti: “Ka homoneni! Otamu ka sindana shili. Omuwa ote mu pe esindano.”

¹⁵ Ahab okwa yamukula a ti: “Ngele oto lombwele ndje medhina lyOmuwa, popya oshili! Olungapi ano ndi na oku shi ku lombwela?”

¹⁶ Mikaia okwa yamukula: “Ondi wete etangakwiita lyaIsrael lya halakanena kiikulundundu lya fa oonzi dhaa na omusita. NOmuwa okwa ti: ‘Aantu mbaka kaa na omukwatelikomeho; ya etheni ya ye kaandjawo nombili.’ ”

¹⁷ Ahab okwa ti kuJehosafat: “Onde ku lombwele kutya iha hunganekele ndje uuwanawa; aluhe uuwinayi auke!”

¹⁸ Mikaia okwa tsikile a ti: “Ngashingeyi pulakeneni shoka Omuwa ta ti! Onda mono Omuwa a kuutumba koshipangelapundi she megulu pamwe naayengeli ye ayehe ya thikama ontega naye.

¹⁹ Omuwa okwa pula a ti: ‘Olye ta ka kotokela Ahab, opo a ka ye a ka dhipagelwe kuRamot?’ Gumwe okwa ti shontumba nomukwawo okwa popi shongandi,

²⁰ sigo ombepo ya holoka komeho tayi hedha kOmuwa e tayi ti: ‘Otandi ke mu kotokela.’ Omuwa okwa pula a ti: ‘To mu ende ngiini?’

²¹ Ombepo oya yamukula ya ti: ‘Otandi ka popitha aahunganeki yaAhab iifundja.’ Omuwa okwa ti: ‘Inda, u ke mu kotokele. Oto shi tompola.’ ”

²² Mikaia okwa hulitha a ti: “Omuwa okwa ningi aahunganeki yoye, ye ku fundje. Ihe ye mwene okwa tokola kutya oto ka adhika koshiponga!”

²³ Nena omuhunganeki Sedekia okwa yi kuMikaia e te mu dhenge kolupanda ye ta pula ta ti: “Ombepo yOmuwa oya thigi ndje po uunake, yi popye nangoye?”

²⁴ Mikaia okwa yamukula: “Oto ke shi mona, uuna to ka ya mongulu yimwe yokonima u ka holame.”

²⁵ Nena omukwaniilwa Ahab okwa lombwele limwe lyomomalenga ge a ti: “Kwata Mikaia, u mu fale kuAmmon, omupangeli gwoshilando, nokuJoas, omuna gwokombanda.

²⁶ Ya lombwela, ye mu tule mondjedhililo yo ye mu pe oshikwiila nomeya ageke, sigo tandi galuka nda sindana.”

²⁷ Mikaia okwi igidha a ti: “Ngele oto galuka wa sindana, nena Omuwa ina popitha ndje!” Oye nokwa gwedha ko a ti: “Shi pulakeneni, amuhe, shoka nda popi!”

²⁸ Nena omukwaniilwa gwaIsrael Ahab nomukwaniilwa gwaJuda Jehosafat oya yi, ya ka homone oshilando Ramot shaGilead.

²⁹ Ahab okwa ti kuJehosafat: “Ngele tatu yi molugodhi, otandi ki idhimbika, ihe ngoye zala oonguwo dhoye dhopaukwaniilwa.” Osho ngaaka omukwaniilwa gwaIsrael a yi molugodhi i idhimbika.

³⁰ Omukwaniilwa gwaSiria okwa li a lombwele oondjayi dhe dhomatembakwiita omilongo ndatu nayaali, yaa homone nando olye kakele komukwaniilwa gwaIsrael.

³¹ Sho ya mono Jehosafat, yo ayehe oyo dhiladhila kutya oye omukwaniilwa gwaIsrael, noye mu galukile, ye mu ponokele. Ihe Jehosafat okwa kugu onkugo, nOmuwa Kalunga okwe mu hupitha e ya galula kuye.

³² Oondjayi dhomatembakwiita oya mono kutya nani ke shi omukwaniilwa gwaIsrael, noye etha oku mu landula.

³³ Polumwe omukwiita Omusiria oku umbu omposi oshikuti sha yaha omukwaniilwa Ahab pokati kehuuyanza nongama ye. Ahab okwi igidha omuhingi gwetembakwiita lye a ti: “Nda yahwa, galuka, tu ze mo molugodhi!”

³⁴ Olugodhi sho lwa li lwa kwata miiti, omukwaniilwa Ahab okwa kala e egamena metemba lye lya taalela Aasiria. Peningino lyetango okwa si.

19

¹ Omukwaniilwa gwaJuda Jehosafat okwa galukile kuuwa we kuJerusalem nombili.

² Omuhunganeki Jehu yaHanani okwa yi a ka tsakaneke omukwaniilwa e ta ti kuye: “Oto dhiladhila tuu kutya oshu uka okukwatha mboka aawinayi nokugama kumboka ye tonde Omuwa? Shoka wa longo, oshe ku tukuluthile ondjahi yOmuwa.

³ Ihe nando ongeyi, mungoye omu na ngaa uuwanawa washa. Owa kombolola po iiyelekela ayihe yoshikalungakiintu Asheera, shoka sha simanekwa kaantu, nowa kambadhala okulandula ehalo lyOmuwa.”

⁴ Jehosafat nando okwa kalele muJerusalem, okwa endaenda olwindji mokati kaantu, okuza kuBeersheba muumbugantu sigo okooha dhoshilongo shokoondundu dhaEfraim muumbangalantu, opo a igidhile aantu, ya galukile kOmuwa, Kalunga koohekulu.

⁵ Okwa langeke aatokolihapu miilandohote ayihe yomuJuda

⁶ e te ya kumagidha ta ti: “Mokutomona ompangu kaleni mwa kotoka; itamu longo moonkondo dhuuntu, aawe, omoonkondo dhOmuwa. Omuwa oku li pamwe nane, uuna tamu utha oompangu.

⁷ Tileni Omuwa ne mu mu longele mwa kotoka, oshoka Omuwa, Kalunga ketu, iti idhidhimikile omakoto nenge ontondo nenge etaambo lyoombumbo.”

⁸ Jehosafat okwa langeke wo muJerusalem Aalevi, aayambi nayamwe yomaawiliki yoshilando, ya ninge aatokolihapu yokuutha oohapu mokutonatela ompango yOmuwa nenge oontamanana maakali yomoshilando.

⁹ Okwe ya kumagidha a ti: “Gwanitheni iilonga yeni mokutila Omuwa, mu vulike kuye nuudhiginini mwaayihe tamu yi longo.

¹⁰ Ngele aakwashilongo aakweni miilando yawo taye ya kune ye na iihokolola omolwedhipago nenge ya yono kompango nenge keutho lyontumba, ya kumagidheni, nkene ye na okukala mompangu, yaa kwate oshidhila shokuyona kOmuwa. Ngele itamu ya kumagidha, ne naakwashilongo aakweni otamu ka adhika kondjahi yOmuwa. Ihe ngele otamu gwanitha oshilonga sheni, itamu ka kala mu na ombudhi.

¹¹ Omuyambimukuluntu Amaria ota ka kala omukuluntu mokutokola iinima ayihe yeitaalo, naSebadia yaIsmael, omunashikandjo gwaJuda, ota ka kala e na etokolo lyahugunina miinima ayihe yonkalathano. Aalevi oyo omalenga geni. Kaleni mu na omukumo, ne mu tameke iilonga yeni. Omuwa na kale naayuuki!”

20

¹ Konima yaambika omatangakwiita gAamoabi nAayammoni pamwe noshipambu shimwe shAameuni, oga ponokele Juda.

² Oontumwa dhimwe odhe ya tadhi lombwele omukwaniilwa Jehosafat tadhi ti: “Etangakwiita enene lya za kuEdom olye ya lya ziilile handiyaka yEfuta lya sa, li ku ponokele. Olya kwata po nokuli Hazazon Tamar.” (Edhina ndika olyaEn-gedi.)

³ Jehosafat okwa li a haluka e ta galikana Omuwa, e mu wilike. Nena okwa gandja elaka, aantu yi idhilike iikulya moshilongo ashihe.

⁴ Aantu ya kongoloka ya zi miilando ayihe yaJuda ye ya kuJerusalem, ya konge ekwatho.

⁵ Oyo nAajerusalem oya gongala mehale epe lyotempeli. Omukwaniilwa Jehosafat okwa thikama komeho gawo

⁶ e ta galikana muule ta ti: “Omuwa, Kalunga kootatekulu, ongoye to lele megulu iigwana ayihe yomuuyuni. Ongoye u na oonkondo noonkondopangelo, nokape na ngoka te ku itakeke.

⁷ Ongoye Kalunga ketu. Aantu yoye Aaisraeli sho ye ya mevi ndika, owa tidha mo aantu mboka ya li mo, e to li gandja koluvalo lwaAbraham, kuume koye, li ninge lyalwo sigo aluhe.

⁸ Oya kala muka e taa tungu otempeli yoku ku simaneka, noya tseya

⁹ kutya ngele oshiponga shasha tashi ya adha, shi ya yone po — ongele iita, elega nenge ondjala yekomba — nena otaa ya e taa thikama komeho gotempeli ndjika moka to simanekelwa. Otaa vulu oku ku galikana muudhigu wawo, ongoye noto ya uvu e to ya hupitha.

¹⁰ “Ngashingeyi Aayammoni, Aamoabi nAaedom oye tu ponokele. Ootatekulu sho ya zi muEgipiti, ino ya pitikila ya pite momavi ngoka, onkee ootatekulu oye ga kunkula noinaye ga hanagula po.

¹¹ Shika osho taye tu galulile nena — oye ya, ye tu tidhe mevi we li tu pa.

¹² Ongoye Kalunga ketu! Ya geela, oshoka tse itatu vulu okukondjitha etangakwiita li thike mpoka tali tu matukile. Katu shi nokuli shoka tu na okuninga, ihe otatu kongo ekwatho kungoye.”

¹³ Aajuda ayehe, aalumentu naakiintu yawo noyana, oya li ya thikama potempeli.

¹⁴ Ombepo yOmuwa oya lambele Omulevi ngoka a li mokati kongundu. Edhina lye oJahasiel yaSakaria; okwa li gwomoludhi lwaAsaf nokwa li gwomoluvalo okuza kuAsaf sigo Mattania, Jeiel naBenaia.

¹⁵ Jahasiel okwa ti: “Nkeyama nAajuda ne amuhe nAajerusalem, Omuwa ota ti: ‘Inamu tila, mu tyololoke nenge mu mbandapale okutsakaneka etangakwiita ndika enene. Olugodhi kalu shi lweni, ihe olwOmuwa.

¹⁶ Ya matukileni ngula, sho taa ya taa tokola Ziz. Otamu ke ya tsakaneka pehulilo lyolusilu ndoka lu uka lwokombuga popepi naJeruel.

¹⁷ Itamu pumbwa okukondja. Thikameni owala mwa tegelela: Otamu ka tala, nkene Omuwa te mu pe esindano.’ Aajuda nAajerusalem, inamu tenguka nenge mu haluke. Indeni kolugodhi, nOmuwa ota ka kala pamwe nane!”

¹⁸ Omukwaniilwa Jehosafat okwi isizimike e ta tsu oshipala she mevi, naantu ayehe oyi inyongamene pevi e taa simaneke Omuwa.

¹⁹ Aalevi yomoludhi lwaKohat nolwaKora oya thikama noya hambelele Omuwa, Kalunga kaIsrael, newi lyopombanda.

²⁰ Ongula onene aantu oya meneka ya yi kombuga popepi naTekoa. Sho ya tameke okuya, Jehosafat okwe ya lombwele ta ti: “Aajuda ne nAajerusalem! Inekeleni Omuwa, Kalunga keni, thikameni mwa kola. Itaaleni shoka aahunganeki ye taye mu lombwele, one notamu ka sindana.”

²¹ Sho ya pulathana omayele, omukwaniilwa okwa lombwele aaimbi, ya zale oonguwo dhoshituthi yo ya kwatele komeho etangakwiita taa imbi taa ti: “Hambeleleni Omuwa, oshoka esilohenda lye ohali kala aluheluhe.”

²² Sho ya tameke okwiimba, Omuwa okwa vundakanitha aahomoni nayi.

²³ Aayammoni nAamoabi oya matukile Aaedom e taye ya kombo po thilu. Nena oya pilukilathana molugodhi olululu.

²⁴ Etangakwiita lyAajuda sho lya thiki koshungo ndjoka yi li mombuga, oya tala lwokaatondi noya mono omidhimba dha langathana pevi. Inapu za nando ondhi.

²⁵ Jehosafat naakwiita ye oya yi, ya ka yuge iihakanwa, e taa mono oongombe odhindji, omaliko, oonguwo niinima yilwe yi na ondilo. Oshe ya pula omasiku gatatu taa gongele iihakanwa, ihe iinima oya li oyindjiyindji, noinaa vula we okukutha shaa shoka.

²⁶ Mesiku etine oya gongala molusilu lwaBeraka e taa hambelele Omuwa molwaayihe mbyoka a longo. Omolwashoka olusilu ndoka lwa lukwa “Beraka”.

²⁷ Jehosafat nomatanga ge oya shuna kuJerusalem mekandanga, oshoka Omuwa okwa dhenge aatondi yawo.

²⁸ Sho ya adha oshilando, oya yi kotempeli taa hiki uuharpa, iiketala nomankuma.

²⁹ Oshigwana kehe shoka sha kundana kutya Omuwa a dhenga aatondi yAaisraeli, osha sholola.

³⁰ Molwashika Jehosafat okwa lele nombili, Kalunga okwe mu vululukitha koombinga adhihe dhe mu kunduka.

³¹ Jehosafat okwa ningi omukwaniilwa gwaJuda mepipi lyomimvo omilongo ndatu nantano. Yina oAsuba yaShilhi.

³² Okwa ningi shoka shu uka momeho gOmuwa a fa he Asa, ngoka e mu tetekele;

³³ ihe omahala giinonoma yuupagani kaga li ga hanagulwa po. Aantu inaa galukila naanaa noomwenyo dhawo adhihe kOmuwa, Kalunga koohekulu.

³⁴ Ashihe shilwe shoka Jehosafat a ningi, okuza ketameko lyepangelo lye sigo okehulilo, osha nyolelwa membo lyondjokonona yaJehu yaHanani, ndyoka oshitopolwa shondjokonona yaakwaniilwa yaIsrael.

³⁵ Pethimbo limwe omukwaniilwa Jehosafat okwa hangana nomukwaniilwa gwaIsrael Ahasia, ngoka a longo uuwinayi owindji.

³⁶ Oya tungile oosikepa dhenenefuta puEziongeber.

³⁷ Ihe Elieser lyaDodavahu gwokuMaresha okwa londodha Jehosafat a ti: “Molwashoka wa hangana naAhasia, Omuwa ota ka hanagula po ashihe we shi tungile.” Noosikepa odha tekauka po noinadhi thayila we.

21

¹ Jehosafat okwa si nokwa fumvikwa moombila dhaakwaniilwa moshilando shaDavid, nomwana Joram okwa ningi omukwaniilwa peha lye.

² Joram yaJehosafat okwa li e na aamwayinamati yahamano: Azaria, Jehiel, Sakaria, Azaria, Mikael naShefatia.

³ He okwe ya pe iingoli oyindji niisiliveli nomagano galwe ge na ondilo nokwa langeke kehe gumwe, a pangele oshilandohote shimwe shomuJuda. Joram sho a li osheeli, Jehosafat okwe mu ningi omulanduli gwe muukwaniilwa.

⁴ Joram sho a ningi omunankondo moshilongo, okwa dhipagitha aamwayina ayehe nomalenga gamwe Omaisraeli.

⁵ Joram okwa ningi omukwaniilwa mepipi lyomimvo omilongo ndatu nambali, nokwa lele muJerusalem omimvo hetatu.

⁶ Okwa landula uuwinayi woshinkoti shaAhab naakwaniilwa yalwe yaIsrael, oshoka okwa hokana omuna gwaAhab. Okwa yono kOmuwa,

⁷ ihe Omuwa ka li a hala okuyona po ezimo lyaDavid, oshoka okwa hangana naDavid e te mu uvanekele kutya oluvalo lwe otalu ka lela aluhe.

⁸ Muuyuni waJoram, Edom okwa tsu ondumbo naJuda e ta manguluka.

⁹ Joram nomalenga ge oya piti mo ye na omatembakwiita e taa homona Edom. Etangakwiita lyaEdom olye ya kondeke, ihe uusiku oye shi tompola, sho ya gwaya mo e taa yi ontuku.

¹⁰ Okuza mpoka Edom okwa manguluka ko kuJuda. Pethimbo tuu ndyoka, oshilando Libna osha tsu ondumbo, molwashoka Joram okwe etha Omuwa, Kalunga koohekulu.

¹¹ Okwa tungu nokuli omahala giinonoma yuupagani miikulundundu yaJuda e ta yonitha Aajuda nAajerusalem kOmuwa.

¹² Omuhunganeki Elia okwa tumine Joram ontumwafo tayi ti: “Omuwa, Kalunga kahokulu David, okwe ku pangula, oshoka ino landula oshinkoti shaho, omukwaniilwa Jehosafat nenge shanyokokulu, omukwaniilwa Asa.

¹³ Peha lyasho owa landula onshingo yaakwaniilwa yaIsrael e to hongolola Aajuda nAajerusalem okwiiteka Kalunga, ngaashi naanaa Ahab naalanduli ye ya ningi. Owa dhipaga po nokuli aamwanyoko, mboka ya li aawanawa ye ku vule.

¹⁴ Molwoshinima shika, Omuwa ota ka geela shili oshigwana shoye, aamwoye naakiintu yoye e ta halakanitha po omaliko goye.

¹⁵ Ngoye mwene oto ka ala uuvu womandjandja taga tuta iilalo, nomeni lyomimvo mbali uuvu otau ka pititha mo omandjandja goye.”

¹⁶ Puushiinda wAasudani mboka ya adhika ya tula komunkulofuta opwa li Aafilisti nAayarabi yamwe. Omuwa okwe ya tsu omaminimini, ya ka hingile Joram iita.

¹⁷ Oya matukile Juda e taa yugu uuwa womukwaniilwa e taa kwata po aakiintu yomukwaniilwa noyana, kakele kaAhasia, onkelo ye.

¹⁸ Konima yaambika, Omuwa oku umbu omukwaniilwa uuvu womandjandja.

¹⁹ Pethimbo lyomimvo mbali uuvu mbuka owa koko, sigo pehulilo omukwaniilwa a si kuuwehame uunene. Aathigona ye inaye mu simaneka nande, ya teme omulilo gwoosa, ngaashi ya ningile oohekulu.

²⁰ Joram okwa ningi omukwaniilwa mepipi lyomimvo omilongo ndatu nambali, nokwa lele muJerusalem omimvo hetatu. Kapwa li ngoka a yemata, sho a si. Oye mu fumvike moshilando shaDavid, ihe hamoombila dhaakwaniilwa.

22

¹ Aajerusalem oya kwaniileke Ahasia, onkelo yaJoram, peha lyahe, oshoka oyanamati ayehe aakuluntu oya adhika ya dhipagwa po kaayugani mboka yi ile kontanda pamwe nAayarabi.

² Ahasia okwa kwaniilekwa mepipi lyomimvo omilongo mbali nambali, nokwa lele muJerusalem omumvo gumwe. Ahasia naye wo okwa landula oshinkoti shezimo lyomukwaniilwa Ahab, oshoka yina Atalia-omuna gwaAhab nomutekulu gwaomukwaniilwa Omri gwaIsraelokwe mu tsu omayele ngoka ge mu fala muuwinayi.

³

⁴ Okwa yono kOmuwa, oshoka konima yeso lyahe, aanezimo lyaAhab oya kala aagandjindunge ye noya longekidha eyonukopo lye.

⁵ Pamayele gawo okwa hangana nomukwaniilwa gwaIsrael Joram, ya kondjithe Hasael, omukwaniilwa gwaSiria. Aakwiita oya pwakele muRamot shaGilead, naJoram okwe ehamekwa molugodhi.

⁶ Okwa galukile koshilando Jesreel, a ka pangwe iishaho ye, naAhasia okwa yi ko, e ke mu talele po.

⁷ Kalunga okwa longitha etalelopo ndika kuJoram, li etele Ahasia eyonukopo. Manga Ahasia a li hoka, ye naJoram oya tsakanekwa komulumentu edhina lye Jehu yaNimshi, ngoka Omuwa e mu hogololele eyonopo lyezimo lyaAhab.

⁸ Jehu sho a li ta tsakanitha elombwelo lyaKalunga, a yone po ezimo lyaAhab, okwi itsu kongundu yaawiliki Aajuda naamwahegona yaAhasia, mboka ya longele Ahasia. Jehu okwe ya dhipaga ayehe.

⁹ Ahasia okwa landulwa e ta adhika a holama muSamaria. Oye mu fala kuJehu e taye mu dhipaga. Oya fumvike omudhimba gwe, opo ya simaneke hekulu, omukwaniilwa Jehosafat, ngoka a longele Omuwa pankondo dhe adhihe. Inapa thigwa nando omunezimo lyaAhasia ngoka ta vulu okulela oshilongo.

¹⁰ Atalia, yina yomukwaniilwa Ahasia, sho a koneke kutya omwana a dhipagwa, okwa dhipagitha aawagona ayehe muJuda.

¹¹ Ahasia okwa li e na omumwahe omukiintu, edhina lye Jehosheba, a hokanwa komuyambi Jehoiada. Okwa hupitha po Joas, gumwe gwomaana yokombanda aamati yaAhasia. Okwe mu kutha mofuthi maana yokombanda mboka ya li taa dhipagwa e te mu holeke pamwe nomuyamuthi gwe mongulu yokulala motempeli. Atalia ina wapa oku mu dhipagitha.

¹² Joas okwa kala a holekwa omimvo hamano, manga Atalia ta pangele oshilongo.

23

¹ Momumvo omutiheyali omuyambi Jehoiada okwa tokola kutya ota ningi po sha. Okwa uvathana naawiliki mbaka yaakwiita ethele: Azaria yaJeroham, Ismael yaJehohanan, Azaria yaObed, Maaseia yaAdaia naElisafat yaSikri.

² Oye ende niilando ayihe yaJuda e taye etelele Aalevi naakuluntu ayehe yomaludhi kuJerusalem.

³ Ayehe oya gongala motempeli e taa hangana naJoas, omuna gwokombanda. Jehoiada okwa ti kuyo: “Omuna gwokombanda oye nguka. Ota ningi omukwaniilwa, ngaashi Omuwa u uvanekele oluvalo lwomukwaniilwa David.

⁴ Shika osho tatu gwanitha. Aayambi nAalevi sho taa ya miilonga mEsabati, oshititatu shawo otashi tonatele omiyelo dhotempeli,

⁵ oshititatu oshikwawo otashi tonatele uuwa, noshihupe otashi kala posheelo Jesod. Aantu ayehe naa gongale mehale lyotempeli.

⁶ Kape na ngoka ta vulu okuya motempeli kakele kaayambi nAalevi mboka ye li miilonga. Oyo otaa vulu okuya mo, oshoka oyo ya yapuka, ihe aantu yalwe naa vulike komalombwelo gOmuwa, ya kale pondje.

⁷ Aalevi naa tonatele omukwaniilwa ye na omagongamwele pomake ye mu tula mekondeka. Naa kale pomukwaniilwa shaa mpoka ta yi. Shaa ngoka ta yelekele okuya motempeli, na dhipagwe.”

⁸ Aalevi nAajuda oya gwanitha omalombwelo gaJehoiada. Aantu inaa lalekwa, sho taa zi miilonga mEsabati, omalenga oga tula ayehe miilonga — mboka taa ya koshilonga naamboka taa zimbuka.

⁹ Jehoiada okwa pe omalenga omagonga niikandekitho yaDavid, mbyoka ya li ya pungulwa motempeli.

¹⁰ Okwa tula aantu ye na omagongamwele ya kunduka omukwaniilwa potempeli, ye mu gamene.

¹¹ Nena Jehoiada okwa pititha mo Joas e te mu zaleke oshishani komutse e te mu pe embo lyompango yokulelitha. Osho ngaaka a kwaniilekwa. Omuyambi Jehoiada noyana oya gwayeke Joas, noshaa ngoka okwa kugilile ta ti: “Omukwaniilwa na kale e na omwenyo!”

¹² Atalia oku uvu aantu taa ligolele omukwaniilwa nokwa matukile kotempeli, nkoka kwa gongala aantu oyendji.

¹³ Okwa mono ko omukwaniilwa omupe a thikama posheelo shotempeli pongudhi yaakwaniilwa, e li mekondeka lyomalenga giita naahiki yoombenda. Aantu ayehe oya li taa igidha kenyanyu yo taa hiki oombenda, naayimbi yomotempeli ye na iihikomwa yawo taa wilike oshituthi. Atalia okwa tuula oonguwo dhe a sa uumbanda e ti igidha ta ti: “Mwa kotokele ndje!”

¹⁴ Jehoiada ka li a hala Atalia a dhipagelwe mehale lyotempeli, onkee okwa lombwele omalenga giita a ti: “Mu pititheni pokati komikweyo dhaalangeli ne mu dhipage shaa ngoka ta yelekele oku mu popila.”

¹⁵ Oye mu kwata e taye mu fala muuwa e taye mu dhipagele pOsheelo shuukambe.

¹⁶ Omuyambi Jehoiada okwa hangana nomukwaniilwa noshigwana ashihe kutya yo otaa ningi aantu yOmuwa.

¹⁷ Nena oya yi kotempeli yaBaal e taye yi kumuna po. Oya kumagula po iiyambelo niimenka e taa dhipaga Mattan, omuyambi gwaBaal, komeho giiyambelo.

¹⁸ Jehoiada okwa langeke aayambi nAalevi mesiloshimpwiyu lyotempeli. Oya li ye na okugwanitha iilonga ye yi pelwe komukwaniilwa David, ya fikile Omuwa omayambo pampango yaMoses. Oya li wo taa tonatele olwiimbo niituthi.

¹⁹ Jehoiada okwa langeke wo aalangeli piiyelo yotempeli, opo ya keelele mo ngoka kee na uuyogoki pamisindilo.

²⁰ Omalenga giita, oomvalekele, aakwanepangelo noshihupe shoshigwana oye ende mosheendo naJehoiada, sho a pititha mo omukwaniilwa motempeli e te mu fala muuwa. Oya pitile mosheelo shopombanda, nomukwaniilwa a kuutumba koshipangelapundi she.

²¹ Aantu ayehe oya li ya nyanyukwa, nengungumano olya pangele moshilando, oshoka Atalia okwa dhipagwa.

24

¹ Joas okwa ningi omukwaniilwa gwaJuda mepipi lyomimvo heyali nokwa lele muJerusalem omimvo omilongo ne. Yina oZibia gwokuBeersheba.

² Okwa longo shoka sho opalela Omuwa, omuyambi Jehoiada sho a li e na omwenyo.

³ Jehoiada okwa kongele omukwaniilwa Joas aanyekadhi yaali, oyo noye mu valele aamati naakadhona.

⁴ Konima yethimbo sho a ningi omukwaniilwa, Joas okwa tokola, a opalekithe otempeli.

⁵ Okwa lombwele aayambi nAalevi, ya ye kiilando yaJuda okugongela iimaliwa yokomumvo maantu ayehe yokwoopalekululitha otempeli. Okwe ya lombwele ya longe neulumo, ihe Aalevi oya kakadhala.

⁶ Nena omukwaniilwa i ithana omuyambimukuluntu Jehoiada e te mu pula ta ti: “Omolwashike ano inoo tonatela Aalevi, ya gongele muJuda naJerusalem oompale ndhoka Moses, omumati gwOmuwa, u uthile koshigwana okufuta ekoleko lyetsalihangano?”

⁷ (Aalanduli yaAtalia, omukiintu ngoka omukeenakalunga, oya li ya nyateke otempeli e taa longitha iilongitho yayo iiyapuki mokusimaneka Baal.)

⁸ Omukwaniilwa okwa lombwele Aalevi, ya pangele oshiketha shomakwathelo yo ye shi tule posheelo shotempeli.

⁹ Oyi igidha muJerusalem naJuda kutya shaa omuntu ne etele Omuwa oompale ndhoka Moses, omumati gwaKalunga, u uthile mombuga.

¹⁰ Shika osha li sho opalela aantu naawiliki yawo, oyo noye eta oompale dhawo dhiimaliwa e taa udhitha oshiketha.

¹¹ Shaa siku Aalevi ohaa fala oshiketha kelenga ekuluntu ndyoka hali shi tonatele. Sho shu udha, amushanga guuwa nomukalelipo gwomuyambimukuluntu ohaa kutha mo iimaliwa e taa shuna oshiketha peha lyasho. Oyo noya gongele iimaliwa oyindjiyindji.

¹² Omukwaniilwa naJehoiada oya gandja iimaliwa kaatonateli yeopaleko lyotempeli, mboka ya futu aahongi yomamanya, aanashihongelo naahambudhi ya pumbiwa meopaleko.

¹³ Aaniilonga ayehe oya longo nuudhiginini e taa galulile otempeli konkalo yayo yonale noye yi opaleke e tayi fe ompe.

¹⁴ Omaopaleko sho ga pu, oshingoli noshisiliveli shoka sha hupu ko, osha pewa omukwaniilwa naJehoiada, mboka ye shi longitha okuhambula iiyaha niikwaniipangitho yilwe yomotempeli. Jehoiada manga a li e na omwenyo, oondjambo odha li hadhi yambwa nuudhiginini motempeli.

¹⁵ Ihe muukokele womimvo ethele nomilongo ndatu Jehoiada okwa si.

¹⁶ Molwokusimaneka iilonga mbyoka a ningile Aaisraeli, Kalunga notempeli, okwa fumvikwa moombila dhaakwaniilwa moshilando shaDavid.

¹⁷ Konima yeso lyaJehoiada aawiliki yAajuda oya heke omukwaniilwa Joas e ya pulakene.

¹⁸ Oshigwana osha hulitha okuninga omambo motempeli yOmuwa, Kalunga koohekulu, e taa tameke okusimaneka iimenka niiyelekela yoshikalungakiintu Asheera. Oya kwata oshidhila, nuulunde mbuka owa hilile Juda naJerusalem ondjahi yOmuwa.

¹⁹ Omuwa okwa tumu aahunganeki oku ya londodha, ya galukile kuye, ihe aantu oya tindi okupulakena.

²⁰ Nena ombepo yaKalunga oye ya muSakaria, omuna gwomuyambi Jehoiada. Okwa thikama montaneho yaantu ayehe e ti igidha ta ti: “Omuwa Kalunga ota pula ta ti: ‘Oshike inaamu vulika kiipango yandje notamu iyetele omupya! Omwa ekelehi ndje, onkee onde mu ekelehi wo!’ ”

²¹ Omukwaniilwa Joas okwe mu kondjitha, nopalombwelo lye oya dhipaga Sakaria nomamanya mehale lyotempeli.

²² Omukwaniilwa okwa dhimbwa eyakulo lyuudhiginini ndyoka Jehoiada, he yaSakaria, e mu hupithile nalyo e ta dhipaga Sakaria. Sakaria sho a li pokusa, okwa igidha a ti: “Omuwa ne mu tale ye e mu geele!”

²³ Poshikufuthinge shomumvo ngoka Aasiria oya matukile Juda naJerusalem, ya dhipaga aawiliki ayehe e taa fala eliko enene kuDamaskus.

²⁴ Etangakwiita lyAasiria olya li eshona, ihe Omuwa okwe li dhengitha etangakwiita lyaJuda enene, oshoka aantu oye ekelehi Omuwa, Kalunga koohekulu. Osho ngeyi omukwaniilwa Joas a geelwa.

²⁵ Okwa li e ehamekwa unene, naatondi sho ya shuna, aambala ye yaali oye mu tsile ondumbo e taye mu dhipagele montala ye, opo ye mu galulile edhipago lyomuna gwomuyambi Jehoiada. Okwa fumvikwa moshilando shaDavid, ihe hamoombila dhaakwaniilwa.

²⁶ (Mboka ye mu tsile ondumbo, oyo Sabad, omuna gwomukulukadhi Omuammoni, edhina lye Shimehat, naJehosabad, omuna gwomukulukadhi Omumoabi, edhina lye Shimrit.)

²⁷ Efatululo lyembo lyaakwaniilwa oli na omahokololo gaana yaJoas, omahunganeko ngoka ge mu popi tage mu tamaneke, nehokololo lyetungululo lyotempeli. Omwana Amazia okwe mu landula muukwaniilwa.

25

¹ Amazia okwa ningi omukwaniilwa mepipi lyomimvo omilongo mbali nantano, nokwa lele muJerusalem omimvo omilongo mbali nomugoyi. Yina oJehoaddin Omujerusalem.

² Amazia okwa longo shoka sho opalela Omuwa, ihe ine shi longa nomwenyo gwe aguhe.

³ Nanziya uukwaniilwa we sho wa kolo, okwa dhipagitha omalenga ngeyaka ga dhipagele he.

⁴ Ihe ina dhipaga po oyana yago. Okwa landula shoka Omuwa a popya mompango yaMoses: “Aakuluntu inaa dhipagelwa epogolo lyoyana, noyana inaa dhipagelwa epogolo lyaakuluntu yawo; omuntu na dhipagelwe ondjo ye mwene.”

⁵ Omukwaniilwa Amazia okwa pongolola Aajuda nAabenjamin momatanga giita pamaludhi gawo e ta tula po aawiliki yomatanga gaalumentu eyuvi noyomatanga gaalumentu ethele. Omatanga ge oge edhilila mo aalumentu ayehe yepipi lyaantu yomimvo omilongo mbali nenge ye vule po, ayehe kumwe 300 000. Oga li omatanga ga hogololwa, gi ilongekidhila olugodhi, omanyakwa okulongitha omagonga niikandekitho.

⁶ Okwa hehela wo aakwiita 100 000 kuIsrael mondando yi thike konyala piisiliver yookilohalama 3400.

⁷ Ihe omuhunganeki okwa yi komukwaniilwa e ta ti kuye: “Ino ya naakwiita mbaka Aaisraeli. Omuwa ke li pamwe naantu mbaka yomOshilongo shokuumbangalantu.

⁸ Ngele oto yi pamwe nayo, Kalunga ote ku sindikitha kaatondi yoye, oshoka Kalunga oku na oonkondo okugandja esindano nenge esindiko.”

⁹ Amazia okwa pula omuhunganeki a ti: “Ihe oshisiliveli shandje nde shi ya futu, otashi ningwa ngiini?” Omuhunganeki okwa yamukula a ti: “Omuwa ota vulu oku ku galulila shi vule shoka.”

¹⁰ Amazia okwa shunitha omatanga ga hehelwa e te ga lombwele, ga shune kaandjawo. Oyo noya shuna kaandjawo, ya thita po kondjahi omolwAajuda.

¹¹ Amazia okwi itsu omukumo e ta fala omatanga ge kEkango lyomongwa. Oya kondjele hoka etaa dhipaga po omayuvi omulongo gaakwiita Aaedom,

¹² e taa kwata po omayuvi omulongo. Oonkwatwa oye dhi fala kondungu yondundu poshilando Sela e taye dhi umbile pevi nodha dhipagwa komamanya, sho tadhi koloka ko.

¹³ Ihe aakwiita Aaisraeli mboka Amazia inaa pitika, a ye nayo molugodhi, oya homona iilando yaJuda pokati kaSamaria naBethoron. Oya dhipaga aantu omayuvi gatatu e taa yugu ko eliko enene.

¹⁴ Amazia sho a galuka kedhengo lyAaedom, okwe etelele ko iimenka yawo, yi ninge ye, e te yi simaneke e te yi fikile omafikilondjambo.

¹⁵ Shika osha geyitha Omuwa, e ta tumu omuhunganeki kuAmazia. Omuhunganeki okwa pula a ti: “Omolwashike to longele iikalunga iikwiilongo mbyoka inaayi vula nokuli okuhupitha aantu yayo miikaha yoye?”

¹⁶ Amazia okwe mu kwata melaka a ti: “Matsa uunake twe ku lenge omugandjindunge gwomukwaniilwa? Mwena, ote ningi ndi ku dhipage!” Omuhunganeki okwa mwena po e ta ti: “Ngashingeyi onda tseya kutya Kalunga okwa tokola, e ku yonagule po molwambyoka ayihe wa ningi, sho wa dhini omayele gandje.”

¹⁷ Omukwaniilwa gwaJuda Amazia naagandjindunge ye oya tsu ondumbo naIsrael. Okwa tumu elaka komukwaniilwa Jehoas gwaIsrael, ngoka a li omuna gwaJehoahas nomutekulu gwaJehu, te mu shongele olugodhi.

¹⁸ Jehoas okwa yamukula Amazia a ti: “Eno lyokuLibanon olya tseyithile omusendeli gwokuLibanon tali ti: ‘Gandja omumwoye omukadhona, a ninge omufuko gwomumwandjemati.’ Ihe iiyamakuti yomokuti oya piti po e tayi lyatagula po eno.

¹⁹ Tala ko, Amazia, oto inenepeke, sho wa dhenge Aaedom, ihe ngame otandi ku pukulula, u kale paandjeni. Omolwashike to ishongele iiponga ngoye mwene naantu yoye?”

²⁰ Ihe Amazia okwa tindi okupulakena ko. Osha li ehalo lyaKalunga, opo Amazia a sindike, oshoka okwa simaneke iimenka yAaedom.

²¹ Omukwaniilwa gwaIsrael Jehoas okwa yi molugodhi, a kondjithe omukwaniilwa gwaJuda Amazia. Oya tsakanene puBet Shemesh muJuda,

²² etangakwiita lyAajuda olya dhengwa, naakwiita oya yi ondapo kaandjawo.

²³ Jehoas a kwata Amazia e te mu fala kuJerusalem. Nkoka okwa kumuna po edhingililokuma lyoshilando okuza kOsheelo shaEfraim sigo okOsheelo shokokolonela, oshinano shoometa konyala omathele gaali.

²⁴ Okwa faalele kuSamaria oshingoli noshisiliveli ashihe motempeli, iikwaniipangitho yomotempeli mbyoka hayi tonatelwa koluvalo lwaObed-Edom, nomaliko gomuuwa. Okwa fala ko wo oonkwatwa ombambyona.

²⁵ Amazia gaJehoas, omukwaniilwa gwaJuda, okwa kala natango e na omwenyo omimvo omulongo nantano konima yeso lyaJoas yaJehoahas, omukwaniilwa gwaIsrael.

²⁶ Iinima ayihe mbyoka Amazia a ningi okuza petameko sigo opehulilo lyepangelo lye, oya nyolelwa mondjokonona yaakwaniilwa yaJuda naIsrael.

²⁷ Okuza pethimbo ndyoka Amazia sho i iteka Omuwa, okwa tsilwa ondumbo muJerusalem. Hugunina okwa yi ondapo koshilando Lakish, ihe aatondi ye oye mu landulile ko e taye mu dhipaga.

²⁸ Omudhimba gwe ogwe etwa kuJerusalem gwa humbatwa kokakambe nogwa fumvikwa moombila dhaakwaniilwa moshilando shaDavid.

26

¹ Aajuda ayehe oya hogolola Ussia gwaAmazia gwomimvo omulongo nahamano, a ninge omukwaniilwa peha lyahe.

² (Konima yeso lyaAmazia, Ussia okwa kwata po oshilando Elat e te shi tungulula.)

³ Ussia okwa ningi omukwaniilwa mepipi lyomimvo omulongo nahamano, nokwa lele muJerusalem omimvo omilongo ntano nambali. Yina oJekolja Omujerusalem.

⁴ Okwa landula oshinkoti shahe, okwa longo shoka sha hokiwa kOmuwa.

⁵ Manga omugandjindunge gwe Sakaria a li e na omwenyo, Ussia okwa longele Omuwa nuudhiginini, naKalunga okwe mu yambeke.

⁶ Ussia okwa yi a ka kondjithe Aafilisti. Okwa kumuna po omadhingililokuma giilando Gat, Jabne naAshdod nokwa tungu iilandohote popepi naAshdod nomoshihupe shaFilistia.

⁷ Kalunga okwe mu kwatha, a sinde Aafilisti, Aayarabi yomuGurbaal nAameuni.

⁸ Aayammoni oye mu pe oompale e ta nkondopala, onkee esimano lye olya adha sigo okuEgipiti.

⁹ Ussia okwa koleke Jerusalem nokutunga ooshungo pOsheelo shokokolonela, pOsheelo shopesilu naampoka edhingililokuma tali goyoka.

¹⁰ Nomoshilongo wo okwa tungu ooshungo dha kola e ta hupu omithima odhindji, oshoka okwa li e na iigunda iinene yiimuna miikulundundu yoponyonga yoondundu dhokuuninginino nomolushandja. Molwashoka Ussia okwa li e hole uunamapya, okwa tsu oshigwana omukumo, shi tsike omiviinu mevi lyokoondundu nokulonga omapya.

¹¹ Ussia okwa li e na etangakwiita enene meilongekidho okuya molugodhi. Oondjalula dhalyo odha li dha ningwa koohamushanga ye Jeiel naMaaseia metonatelo lyaHanania, limwe lyomomalenga gomukwaniilwa.

¹² Metangakwiita lye omwa li aanashihako 2 600.

¹³ Mewiliko lyawo omwa li aakwiita 307 500, mboka ya pyokoka okukondjitha aatondi yomukwaniilwa.

¹⁴ Ussia okwa homateke aakwiita omahuuyanza, omagonga, omagala giiyela, oonguwo dhiiyela, omatati niikuti nomamanya gothethengele gokuumba.

¹⁵ MuJerusalem oonkulungu dhe odha longekidha iiyumbitho yiikuti noyomamanya omanene, mbyoka ya tulwa mooshungo nokookolonela dhomadhingililokuma goshilando. Esimano lye olya taandele kokule e ta ningi omunankondo, oshoka Kalunga okwe mu kwatha.

¹⁶ Ussia sho a ningi omunankondo, okwa tumbu pombanda, naashika oshe mu fala mepunduko. Okwa hindi Omuwa, Kalunga ke, sho a yi motempeli a fike iitsinino ketsininoyambelo.

¹⁷ Omuyambi Azaria, a lambwa kaayambi omilongo hetatu ye na omukumo, oya landula omukwaniilwa,

¹⁸ opo ye mu keelele. Oya ti kuye: “Ussia! Ku na uuthemba okufikila Omuwa iitsinino. Aayambi yomoluvalo lwaAaron oyo ayeke ya yapulilwa oku shi ninga. Za mo nokuli motempeli. Owa hinda Omuwa Kalunga, noito yambekwa we kuye.”

¹⁹ Ussia okwa li a thikama motempeli poshiyambelo shiitsinino nokwa li a yelutha oshitsininitho. Okwa geele aayambi, nohaluka uuvu woshilundu owa mbunyuka moshipala she.

²⁰ Azaria naayambi yalwe oya tala oshipala shomukwaniilwa sha nyata, noye mu tidha mo motempeli. Okwe endelele okuza mo, oshoka Omuwa okwe mu dhenge.

²¹ Osho ngaaka omukwaniilwa Ussia a kwatwa koshilundu sigo okesiku lyeso lye. Ina vula we okuya motempeli. Okwa kala mongulu yi ikalekelwa, a manguluka kiilonga ayihe, manga omwana Jotam ta pangele oshilongo.

²² Omuhunganeki Jesaja yaAmos okwa nyola iinima ayihe mbyoka omukwaniilwa Ussia a ningile muuyuni wepangelo lye.

²³ Ussia okwa si nokwa fumvikwa momayendo gaakwaniilwa, ihe moluuvu we ina fumvikwa moombila dhaakwaniilwa. Omwana Jotam okwe mu landula muukwaniilwa.

27

¹ Jotam okwa ningi omukwaniilwa mepipi lyomimvo omilongo mbali nantano, nokwa lele muJerusalem omimvo omulongo nahamano. Yina oJerusha yaSadok.

² Okwa longo shoka sho opalela Omuwa, ngashika naanaa he a ningile; ihe ina yona a fa he, a fike ando iitsinino motempeli, ihe oshigwana osha tsikile ngaa muulunde.

³ Jotam okwa tungu Osheelo shuumbangalantu wotempeli. Okwa tungu wo ombinga onene yedhingililokuma lyomuOfel muJerusalem.

⁴ Okwa tungitha iilando moondundu dhaJuda, nomomakuti okwa tungitha mo omapopilongulu nooshungo.

⁵ Okwa kondjitha omukwaniilwa gwaAmmon netangakwiita lye e te ya sindi. Nena okwa thiminike Aayammoni, ye mu fute omumvo kehe omimvo ndatu oshisiliveli shookilograma 3400, osiima yoolata 1000 niishokelya yoolata 1000.

⁶ Jotam okwa ningi omunankondo, oshoka okwa vulika lela kOmuwa, Kalunga ke.

⁷ Iiningwanima yilwe mepangelo lyaJotam, iita ye nomulandupangelo gwe oya nyolelwa membo lyondjokonona yaakwaniilwa yaIsrael naJuda.

⁸ Jotam okwa li e na omimvo omilongo mbali nantano, sho a ningi omukwaniilwa, nokwa lele muJerusalem omimvo omulongo nahamano.

⁹ Okwa si e ta fumvikwa moshilando shaDavid, nomwana Ahas okwe mu landula muukwaniilwa.

28

¹ Ahas okwa ningi omukwaniilwa, sho a li e na omimvo omilongo mbali, nokwa lele muJerusalem omimvo omulongo nahamano. Ina landula oshinkoti shahekulu, omukwaniilwa David, ihe okwa ningi shoka inaashi opalela Omuwa,

² e ta landula oshinkoti shaakwaniilwa yaIsrael. Okwa hambulitha iiyelekela yaBaal,

³ okwa lungunithile omafikilondjambo molusilu lwaBen Hinnom nokwa fike po oyanamati e ya saagelele iimenka. Osho a landula omikalo dhi kungitha dhaantu mboka Omuwa e ya tidha mo mondjila yAaisraeli.

⁴ Komahala giinonoma yaapagani, kiikulundundu nomomunzile kehe gwomuti omutalala, Ahas okwa yambele ko oontselelandjambo nokwa fikile ko iitsinino.

⁵ Omukwaniilwa Ahas sho a yono, Omuwa, Kalunga ke, okwe etha omukwaniilwa gwaSiria e mu dhenge e ta faalele Aajuda oyendji kuDamaskus oonkwatwa. Omuwa okwe etha ishewe omukwaniilwa gwaIsrael, edhina lye Peka yaRemalia, a dhenge Ahas e ta dhipaga po aakwiita omapenda yAajuda 120 000 esiku limwe. Omuwa, Kalunga koohekulu, okwa pitika shika shi ningwe, oshoka Aajuda oye etha Omuwa.

⁶

⁷ Omukwiita Omuisraeli, edhina lye Sikri, okwa dhipaga Maaseia, omuna gwomukwaniilwa Ahas, Asrikam, elenga lyuuwa, naElkana, ondjayi yiita, ngoka melandulathano e li elenga etiyali lyomukwaniilwa.

⁸ Aaisraeli nando aamwayina yAajuda, oya kwata po aakulukadhi naanona 200 000, ya ninge aapika, e taye ya fala kuSamaria pamwe niihakanwa oyindjiyindji.

⁹ MuSamaria omwa li omuhunganeki gwOmuwa, edhina lye Oded. Okwa ka tsakaneka etangakwiita lyaIsrael posheelo shoshilando, sho tali galuka li na oonkwatwa Aajuda, e ta ti: “Omuwa, Kalunga koohokulu, okwa li a geele Juda nokwe mu etha mu ya dhenge, ihe oku uvu, sho mwe ya dhipaga nonyanya.

¹⁰ Ngashingeyi omwa dhiladhila, mu pike aakiintu naalumentu yomuJerusalem naJuda. Itamu tseya nani kutya nane wo omwa yona kOmuwa, Kalunga keni?

¹¹ Pulakenii ndje! Oonkwatwa ndhika aamwanyoko. Ya etheni ya shune, oshoka Omuwa ota ningi e mu geele mondjahi ye.”

¹² Aakuluntu yane yomOshilongo shokuumbangalantu, Azaria yaJehohanan, Berekia yaMeshillemot, Jehiskia yaShallum naAmasa gaHadlai, oya ka kondjitha etangakwiita.

¹³ Oya ti: “Inamu eta oonkwatwa ndhoka huka! Otwa yona nale nokuli kOmuwa notwe mu geyitha a gwana oku tu geela. Nonatango mwa hala okulonga shoka tashi nenepeke ondjo yetu.”

¹⁴ Nena etangakwiita olya gandja oonkwatwa niihakanwa kaawiliki yoshigwana nokaantu yawo,

¹⁵ naalumentu mboka yane oya tulwa po, ya longekidhile oonkwatwa oonguwo ndhoka dha zi miihakanwa. Oye dhi pe oonguwo noongaku, iikulya nomeya, e taa gwayeke omigwayo piilalo yadho. Ndhoka dha li dha vulwa, odha londekwa kuusino, noonkwatwa adhihe odha falwa koshilongo shaJuda, kuJeriko, oshilando shomilunga. Nena Aaisraeli oya shuna kaandjawo kuSamaria.

¹⁶ Aaedom sho ya tameke okulwa Juda ekumbu e taa kwata po oonkwatwa odhindji, omukwaniilwa Ahas okwa kongo ekwatho kuTiglat-Pileser, omuleli gwaAssur.

¹⁷

¹⁸ Pethimbo tuu ndyoka Aafilisti oya lu po omikunda dhoponyonga yoondundu kuuninginino nomuumbugantu waJuda. Oya kwata po iilando Bet Shemesh, Ajalon naGederot, niilando Soko, Timna naGimso nomikunda dhayo e taa kalelele mo.

¹⁹ Molwashoka Ahas, omukwaniilwa gwaJuda, a goyokitha uuthemba waantu ye e ta kondjitha Omuwa, Omuwa oku undulile Juda omalwa ngaka.

²⁰ Omupangeli gwaAssur, peha lyokukwatha Ahas, okwe mu etele owala uudhigu.

²¹ Ahas okwa kutha oshingoli motempeli, muuwa nomomagumbo gaawiliki yoshilongo e te shi gandja komupangeli, ihe shika inashi kwatha sha.

²² Uudhigu we nando owa li owindji, Ahas okwa yono kOmuwa e vule nale.

²³ Okwa yambele iikalunga yaasindi ye Aasiria oondjambo. Okwa ti: “Ookalunga yAasiria oya kwatha omukwaniilwa gwawo, onkee ngele otandi ya fikile omayambo, otaa vulu okukwatha ndje wo.” Shika oshe mu etele oshiponga pamwe noshigwana she.

²⁴ Ahas okwa kutha mo iikwaniipangitho ayihe motempeli e te yi nyanyagula po. Omiyelo dhotempeli okwe dhi edhile po e ta tungitha iiyambelo piikololo ayihe yaJerusalem.

²⁵ Moshilando nomomukunda kehe gwaJuda okwa tungile mo omahala giinonoma yuupagani, moka omafikilondjambo taga lungunithilwa iikalunga iikwiilongo. Pahedhi ndjika okwi iyetele ondjahi yOmuwa, Kalunga koohekulu.

²⁶ Iiningwanima yilwe yepangelo lye, okuza ketameko sigo okehulilo oya nyolelwa membo lyondjokonona yaakwaniilwa yaJuda noyaIsrael.

²⁷ Omukwaniilwa Ahas okwa si nokwa fumvikwa muJerusalem, ihe hamoombila dhaakwaniilwa. Omwana Hiskia okwe mu landula muukwaniilwa.

29

¹ Hiskia okwa ningi omukwaniilwa gwaJuda mepipi lyomimvo omilongo mbali nantano, nokwa lele muJerusalem omimvo omilongo mbali nomugoyi. Yina oye Abia yaSakaria.

² Hiskia okwa landula oshinkoti shahekulu David, a longo shoka sho opalela Omuwa.

³ Momwedhi gwotango gwomumvo ngoka Hiskia a ningi omukwaniilwa, okwa egulululula omiyelo dhotempeli e te dhi opalekitha.

⁴ Okwa gongele ongundu yaayambi nAalevi mehale lyokuuzilo wotempeli

⁵ e ta popi nayo ta ti: “Ne Aalevi, iyapuleni ne mu yelithe otempeli yOmuwa, Kalunga koohokulu. Motempeli kuthii mo shaa shoka tashi yi nyateke.

⁶ Ootate oyi iteka Omuwa, Kalunga ketu, e taa longo shoka inaashi mu opalela. Oye mu etha e taa pilamene ehala lye eyapuki.

⁷ Oye edhile po omiyelo dhotempeli, ya dhimitha oolamba noye etha okufika iitsinino nenge okulungunitha omafikilondjambo motempeli yaKalunga kaIsrael.

⁸ Molwashika Omuwa okwa geele Juda naJerusalem, naashoka e ya ningile, osha kakamitha e tashi halutha shaa ngoka.

⁹ Ootate oya dhipagelwa miita, aakulukadhi yetu naana yetu oya kwatwa po aapika.

¹⁰ “Ngame onda tokola ndi hangane nOmuwa, Kalunga kaIsrael, opo kee tu geele we.

¹¹ Aamwandjemati, inamu shelelelwa we. Onelela mboka mwa hogololwa kOmuwa, mu mu fikile iitsinino ne mu fale aantu moku mu simaneka.”

¹² Aalevi mboka ya li po, oyomoludhi lwaKohat, Mahat gaAmasai naJoel yaAzaria lwaMerari, Kish yaAbdi naAzaria yaJehallelel lwaGerson, Joa yaSimma naEden lyaJoa lwaElzafan, Shimri naJeuel lwaAsaf, Sakaria naMattania lwaHeman, Jehuel naShimui lwaJedutun, Shemaia naUssiel.

¹³

¹⁴

¹⁵ Aantu mbaka oya gongele Aalevi aakwawo, naayehe oyi iyapula. Palombwelo lyomukwaniilwa oya tameke ihe okuyapululula otempeli pampango yOmuwa.

¹⁶ Aayambi oya yi motempeli, ye yi yapule, noya kutha mo iinima ayihe mbyoka ya li ya nyata e taye yi fala mehale lyotempeli. Aalevi oye yi taamba e taye yi tutile pondje yoshilando kesilu lyokalonga Kidron.

¹⁷ Iilonga mbika oya li ya tamekwa mesiku lyotango lyomwedhi gwotango, nomesiku etihetatu oye yi manene mondunda yokuthikila yotempeli. Oya longo ishewe omasiku gahetatu, sigo etimulongo netihamano lyomwedhi, opo otempeli yi opalekelwe elongelokalunga.

¹⁸ Aalevi oye ya komukwaniilwa Hiskia e taa ti: “Otwa mana omaopaleko gotempeli ayihe, oshiyambelo shokulungunithila omayambo, oshitaafula shiikwiila iiyapuki niilongitho yayo ayihe.

¹⁹ Otwe eta mo wo iilongitho mbyoka omukwaniilwa Ahas a li a kutha mo pethimbo ndyoka a li i iteka Kalunga, notwe yi yelitha. Ayihe oyi li komeho goshiyambelo shOmuwa.”

²⁰ Hiskia okwa gongele mbala aawiliki yoshilando, noyo ayehe oya yi kotempeli.

²¹ Oya kutha oontsezi heyali, oonzi heyali, oonzigona heyali niikombo iheyali, ye yi yambele omagandjelo goondjo dhezimo lyomukwaniilwa nodhoshigwana shaJuda nokuyapula otempeli. Omukwaniilwa okwa lombwele aayambi, oluvalo lwaAaron, ye yi yambele koshiyambelo shOmuwa.

²² Aayambi oya dhipaga tango oontsezi, taku landula oonzi, nena oonzigona e taa shashamine ombinzi yondjambo kehe koshiyambelo.

²³ Hugunina oya kutha iikombo ye yi eta komukwaniilwa nokaagalikani, mboka ya tenteke iikaha yawo kuyo.

²⁴ Nena aayambi oya dhipaga iikombo e taa tile ombinzi yayo koshiyambelo, yi ninge ondjambo yokukutha po oondjo dhaantu ayehe, oshoka omukwaniilwa okwa lombwele, omafikilondjambo nomayonondjambo ga ningilwe Israel alihe.

²⁵ Omukwaniilwa okwa landula omalombwelo ngoka Omuwa e ga lombwele omukwaniilwa David mokana kaGad, omuhunganeki gwomukwaniilwa, nokomuhunganeki Natan; okwa tula Aalevi motempeli ye na iiyaha, uuharpa niiketala,

²⁶ iihikomwa ngaashi mbyoka ya li hayi longithwa kuDavid. Aayambi oya li ya thikama mpeyaka ye na omankuma.

²⁷ Hiskia okwa ti, efikilondjambo nali etwe po. Eyambo sho lya tameke, aantu oyi imbi taa hambelele Omuwa, naahiki oya tameke okuhika omankuma niihikomwa ayihe yilwe.

²⁸ Ayehe mboka ya li ko, oya simaneke Omuwa nokwiimba nokuhika, sigo oondjambo dha lungunithwa po.

²⁹ Omukwaniilwa Hiskia naantu ayehe oya tsu oongolo e taa simaneke Kalunga.

³⁰ Omukwaniilwa naawiliki yoshigwana oya lombwele Aalevi, ya imbile Omuwa omaimbilohambelelo ngoka ga nyolwa kuDavid nokomuhunganeki Asaf. Oyi imbi nenyanyu, oya tsu oongolo e taa galikana Kalunga.

³¹ Hiskia okwa ti kaantu: “Ngashingeyi sho mwi iyapula, eteleni Omuwa oontselelandjambo nomapandulondjambo.” Oye shi ningi, nayamwe yomuyo oye eta wo kehalo lyawo yene omafikilondjambo.

³² Oye eta oontsezi omilongo heyali, oonzi ethele limwe noonzigona omathele gaali, dhi lungunithilwe Omuwa;

³³ oye eta wo oontsezi omathele gahamano noonzi omayuvi gatatu, dhi ninge oondjambo dhokuliwa kaantu.

³⁴ Nokuli kakwa li aayambi ya gwana okudhipaga iimuna mbika ayihe, onkee Aalevi oye ya kwatha, sigo iilonga ya tsakanithwa, naayambi yi iyapula. (Aalevi oya li aadhiginini muuyogoki wopamisindilo ye vule aayambi.)

³⁵ Kakele komidhidhindjambo, aayambi oya li ye na wo oshimpwiyu shokufika oofu ndhoka dha zi momakwatathanondjambo noshokutilahi iinuwandjambo tayi longithwa pamwe nomafikilondjambo. Osho ngaaka elongelokalunga motempeli lya tameke ishewe.

³⁶ Omukwaniilwa Hiskia noshigwana ashihe oya li ya nyanyukwa, molwashoka Kalunga e ya kwatha okugwanitha ayihe mbika mbalambala.

30

¹ Oshigwana inashi vula okudhana Opaasa pethimbo lyo opala momwedhi gwotango, oshoka kapwa li aayambi ya gwana mboka yi iyapula, naantu oyendji inaa gongala muJerusalem. Omolwasho omukwaniilwa Hiskia, omalenga ge naantu yomuJerusalem ya zimine, yi dhanwe momwedhi omutiyali, nomukwaniilwa okwa tumu elaka kaantu ayehe muIsrael nomuJuda. Okwa nyolele wo omazimo gaEfraim nogaManasse te ga hiya, ge ye kotempeli muJerusalem okudhana oshituthi shOpaasa, ga simaneke Omuwa, Kalunga kaIsrael.

²

³

⁴ Omukwaniilwa noshigwana oya li ya nyanyukilwa edhiladhilo ndika,

⁵ onkee ya hiya Aaisraeli ayehe, okuza kuDan muumbangalantu sigo okuBeersheba muumbugantu, ye ye kuJerusalem noya dhane Opaasa pampango yOmuwa mongundu onene ye vule nale.

⁶ Palombwelo lyomukwaniilwa nomalenga gee aatumwa oye ende naJuda alihe naIsrael ye na ehiyo ndika tali ti: “Aaisraeli ne, one tuu mboka mwa hupu ko, sho omukwaniilwa gwaAssur a lala evi. Galukileni kOmuwa, Kalunga kaAbraham, Isak naJakob, noye ta ka galukila kune.

⁷ Inamu fa oohokulu nAaisraeli ooyakweni mboka yi iteka Omuwa, Kalunga kawo. Omu shi wete nokuli kutya okwe ya geele shili.

⁸ Inamu tangalala ngayo, ihe vulikeni kOmuwa. Ileni kotempeli muJerusalem, ndjoka Omuwa e yi yapula sigo aluhe, ne mu mu longele, opo kee mu geele we.

⁹ Ngele tamu galukile kOmuwa, nena mboka ya kutha po aakweni noya yi nayo oonkwatwa, otaye ke ya sila ohenda e taye ya galulile kegumbo. Omuwa, Kalunga keni, oye omunamutimahenda nomunesilohenda. Ngele tamu yi kuye, ote mu taamba.”

¹⁰ Aatumwa oya yi koshilando kehe moshitopolwa shomazimo gaEfraim naManasse, sigo okezimo lyaSebulon, ihe aantu oye ya yolo e taye ya sheke.

¹¹ Okwa li ngaa yamwe muAser, Manasse naSebulon mboka ya hala okuya kuJerusalem.

¹² Kalunga okwa li ta longo wo muJuda e ta hanganitha aantu metokolo lyawo, ya vulike kehalo lye yo ya landule oshipango shomukwaniilwa nomalenga ge.

¹³ Aantu oyendjiyendji oya gongala muJerusalem momwedhi omutiyali, ya dhane Oshituthi shIikwiila yaa na efulika.

¹⁴ Oya kutha po iiyambelo ayihe mbyoka ya li hayi longithwa muJerusalem okuyamba omafikilondjambo niitsinino e taye yi umbile mesilu lyaKidron.

¹⁵ Mesiku etimulongo netine lyomwedhi, oya dhipaga oonzigona dhOpaasa. Aayambi nAalevi mboka ya li inaa iyapula, oya li ya sa ohoni noyi iyapulile Omuwa, nokuza mpoka oya vulu ihe okuyamba omafikilondjambo motempeli.

¹⁶ Oya ka thikama pomahala gawo motempeli palombwelo lyompango yaMoses, omumati gwaKalunga. Aalevi oya gandja ombinzi yoondjambo kaayambi, mboka ye yi shashamine koshiyambelo.

¹⁷ Aantu oyendji sho ya li inaa iyapula, inaa vula okudhipaga oonzigona dhOpaasa, omolwashoka Aalevi oye shi ya ningile e taa yapulile Omuwa oonzigona.

¹⁸ Oyendji mboka ya zi momazimo gaEfraim, Manasse, Issaskar naSebulon kaya li ya yogoka pamisindilo, onkee ya li ya sheshwa okudhana Opaasa. Omukwaniilwa Hiskia okwe ya galikanene ta ti:

¹⁹ “Omuwa, Kalunga kootatekulu, omolwesilohenda lyoye dhimina po mboka taa ku simaneke noomwenyo dhawo adhihe, nonando ya kale inaa yogoka pamisindilo.”

²⁰ Omuwa oku uvu egalikano lyaHiskia; okwa dhimine po aantu, ye ine ya ehameka.

²¹ Aantu mboka ya gongala muJerusalem, oya dhana Oshituthi shiikwiila yaa na fulika omasiku gaheyali nenyanyu enene. Kehe esiku Aalevi naayambi oya hambelele Omuwa noonkondo dhawo adhihe.

²² Hiskia okwa tanga Aalevi, sho ya wilike elongelokalunga nawa. Konima yomasiku gaheyali gokuyamba omakwatathanondjambo nokuhambelela Omuwa, Kalunga koohekulu,

²³ ayehe oya tokola okutsikila oshituthi ishewe omasiku gaheyali. Oye shi dhana nenyanyu.

²⁴ Omukwaniilwa Hiskia okwa gandja oontsezi eyuvi noonzi omayuvi gaheyali, opo aantu ya dhipage yo ya lye, nomalenga oge ya pe ishewe oontsezi eyuvi noonzi omayuvi omulongo. Aayambi oyendji oyi iyapula.

²⁵ Aantu ayehe oya li ya nyanyukwa — Aajuda, aayambi, Aalevi, aantu mboka ya zile kuumbangalantu naakwiilongo mboka ya li ya tula muIsrael nomuJuda.

²⁶ Oshilando Jerusalem osha li shu udha enyanyu, oshoka iinima ngaambika kayi ningilwe we okuza muuyuni waSalomo yaDavid.

²⁷ Aayambi nAalevi oya laleke aantu nuuyamba wOmuwa. Kalunga nokwa uvu omagalikano gawo megumbo lye lyomegulu e te ga taamba.

31

¹ Oshituthi sho sha hulu, Aaisraeli ayehe oya yi niilando ayihe muJuda e taa kumuna po oongundhimanya e taa teya po iiyelekela ya dhilikilwa oshikalungakiintu Asheera, taa yonagula po iiyambelo ayihe nomahala giinonoma yuupagani. Oye shi ningi muJuda alihe nomiitopolwa yaBenjamin, Efraim naManasse e taa shuna kaandjawo.

² Omukwaniilwa Hiskia okwa pongololulula iilonga yaayambi noyAalevi, shaa ngoka a kale e na oshimpwiyu she te shi dhiginine. Muka omwa kwatelelwa okuyamba omafikilondjambo nomakwatathanondjambo, okukala melongelokalunga motempeli nokuhambelela nokutanga Omuwa miitopolwa yi ili noyi ili yomotempeli.

³ Omukwaniilwa okwa kutha miimuna ye mwene iinamwenyo tayi yambwa omafikilondjambo ongula nongulohi kehe, mEsabati, mOshituthi shomwedhi omupe nomiituthi iikwawo pampango yOmuwa.

⁴ Omukwaniilwa okwa lombwele Aajerusalem, ye etele aayambi nAalevi omayambo ngoka ge ya uthilwa, opo ya kale ethimbo alihe miilonga pampango yOmuwa.

⁵ Nanziya elaka sho lya gandjwa, Aaisraeli oye eta omagano giilya yawo iiwanawa, omaviinu, omagadhi gooholivi, omagadhi goonyushi niinima yilwe yomomapya gawo; oye eta iitimulongo yashaa shoka ya likola.

⁶ Aantu ayehe mboka ya kala miilando yaJuda, oye eta iitimulongo yomoongombe noonzi dhawo noye eta wo omagano ogendjigendji, ngoka ya yoololela Omuwa, Kalunga kawo.

⁷ Omagano oga tameke okuthika momwedhi omutitatu noga tsikile okundumbilwa oomwedhi ne dha landula ko.

⁸ Omukwaniilwa Hiskia nomalenga ge sho ya mono, nkene aantu ya gandja oshindji, oya hambelele Omuwa nokupandula aantu ye Aaisraeli.

⁹ Omukwaniilwa okwa pula aayambi nAalevi shoka taa ningi nomagano ngaka,

¹⁰ nomuyambimukuluntu Azaria gwomoluvalo lwaSadok okwa ti kuye: “Okuza mpoka aantu sho ya tameke okweeta omagano gawo kotempeli, iikulya oya kala ya ha nokwa hupu oyindji. Otu na ayihe mbika, oshoka Omuwa okwa yambeke aantu ye.”

¹¹ Palombwelo lyomukwaniilwa oya longekidha oompungulilo motempeli

¹² e taa pungula mo omagano niitimulongo ayihe. Omulevi Konania okwa langekwa a kale omutonateli gwadho nomuyakuli gwe omumwayina Shimei.

¹³ Aalevi mboka omulongo ya pewa iilonga mewiliko lyawo, oyo Jehiel, Azazia, Nahat, Asahel, Jerimot, Josabad, Eliel, Ismakia, Mahat naBenaia. Ayihe mbika oya ningwa palombwelo lyomukwaniilwa Hiskia nomuyambimukuluntu Azaria.

¹⁴ Omulevi Kore kaImna, ngoka a li omulangeli omukuluntu pOsheelo shokuuzilo wotempeli, okwa li omutonateli gwokutaamba omagano ge etelwa Omuwa nogwoku ga topola.

¹⁵ Miilando yilwe moka mwa kala aayambi, Kore okwa yakulwa moshilonga she nuudhiginini kAalevi mbaka: Eden, Miniamin, Jeshua, Shemaia, Amaria naShekania. Oya topolele Aalevi aakwawo iikulya pailonga yawo,

¹⁶ hapamaludhi. Oya gandja oshitopolwa kaalumentu yomimvo omilongo ndatu nenge ye vule po, mboka ya li ye na iinakugwanithwa motempeli pamalangeko gawo.

¹⁷ Aayambi oya pewa iilonga yawo pamaludhi, nAalevi yomimvo omilongo mbali nenge ye vule po, oya pewa iilonga yawo pamatanga giilonga.

¹⁸ Oya nyolwa momisholondondo naakiintu yawo, oyana naatekulu yawo yalwe, oshoka oya li yi ilongekidhila okugwanitha iilonga yawo iiyapuki ethimbo kehe.

¹⁹ Mokati kaayambi mboka ya li miilando ya pewa oluvalo lwaAaron, nenge miinapelo yayo, omwa li aantu mboka ye na oshimpwiyu shokutopola iikulya kaalumentu ayehe yomomazimo gaayambi nokukehe ngoka a li mo momisholondondo dhomaludhi gAalevi.

²⁰ MuJuda alihe omukwaniilwa Hiskia okwa ningi shoka shu uka nosho opalela Omuwa, Kalunga ke.

²¹ Okwa li omunelago, oshoka shaa shoka a ningile otempeli nenge egwanitho lyompango, okwe shi ningi mombepo yuudhiginini neinekelo nokwiiyapulila Kalunga ke.

32

¹ Konima yaambika, Hiskia sho a longele Omuwa nuudhiginini, Sennakerib, omupangeli gwaAssur, okwa matukile Juda. Okwa kondeke iilandohote e ta lombwele aakwiita ye, ye yi kwate po.

² Hiskia sho a mono Sennakerib te ya, a ponokele wo Jerusalem,

³ okwa tokola pamwe nomalenga ge, ya thitike omukanka gwomeya pondje yoshilando, opo ya keelele Aayassur kaaya mone omeya, uuna ya thiki popepi naJerusalem. Omalenga oga kutha ongundu onene yaantu e taa thitike oothithiya adhihe, opo omeya gaa tondokele kuyo.

⁴

⁵ Omukwaniilwa okwa koleke omagameneno goshilando, sho a tungulula edhingililokuma lya li lya kumunwa po e ta tungile mo ooshungo mulyo e ta tungu edhingililokuma lyokondje. Okwa tungile wo omapopilo muMillo kuuzilo wombinga onkulu yaJerusalem. Okwa hambulitha omagonga ogendji niikandekitho.

⁶ Okwa tula aalumentu ayehe moshilando mewiliko lyomalenga e te ya lombwele, ya gongale mehalandjandja posheelo shoshilando. Okwa ti kuyo:

⁷ “Kaleni mwa tokola nomu na einekelo, inamu tila omupangeli gwaAssur nenge etangakwiita ndyoka te li wilike. Otu neni oonkondo tu ya vule.

⁸ Oku na oonkondo dhopantu, ihe tse otu na ekwatho lyOmuwa, Kalunga ketu, te tu kwatha molugodhi lwetu.” Aantu oya pendapala pahapu dhomukwaniilwa gwawo.

⁹ Konima manga Sennakerib netangakwiita lye ya li muLakish, okwa tumu elaka kuHiskia nokAajuda mboka ya li puye muJerusalem tali ti:

¹⁰ “Ngame Sennakerib, omupangeli gwaAssur, ote pula kutya omwi itula mushike, sho mu li muJerusalem sha kondekwa?”

¹¹ Hiskia ote mu lombwele kutya Omuwa, Kalunga keni, ote ke mu hupitha miikaha yetu, ihe Hiskia ote mu kotokele note mu sitha kondjala nenota.

¹² Oye naanaa ngoka a hanagula po omahala gokunonoma niiyambelo, ihe nena ota lombwele Aajuda nAajerusalem, ya simaneke noya yambe iitsinino koshiyambelo shimwe ashike.

¹³ Inamu tseya ootatekulu sho ya ningile, nasho nda ningile iigwana? Ookalunga yiigwana oya hupitha tuu iigwana yawo komupangeli gwaAssur?

¹⁴ Ookalunga oyeni ya hupitha oshilongo shawo miikaha yetu? Ano otamu dhiladhila ngiini kutya Kalunga keni ota vulu oku mu hupitha?

¹⁵ Inamu fundjalekwa kuHiskia nenge e mu pukithe owala. Inamu mu itaala! Kakwa li kalunga a vulu okuhupitha aantu yoshigwana shontumba miikaha yomupangeli gwaAssur. Osho naanaa naKalunga keni ita vulu oku mu hupitha!

¹⁶ Omalenga gaAssur oga popi oohapu oombwinayi nokusheka Omuwa Kalunga nomuntu gwe Hiskia.

¹⁷ Ontumwafo ndjoka omupangeli a nyola, otayi kondjitha Omuwa, Kalunga kaIsrael. Otayi ti: “Ookalunga yiigwana inaa hupitha aantu yawo miikaha yandje. Osho wo Kalunga kaHiskia ita ka hupitha aantu ye miikaha yandje.”

¹⁸ Omalenga ogi igidha oohapu ndhika mOshihebeli, opo ga haluthe noga tyololokithe Aajerusalem mboka ya li kombanda yedhingililokuma lyoshilando, opo ya kwate po oshilando nuupu.

¹⁹ Oya popi Kalunga kaJerusalem, ngaashi haa popi iikalunga yiigwana yilwe, iimenka ya hongwa niikaha yaantu.

²⁰ Nena omukwaniilwa Hiskia nomuhunganeki Jesaja yaAmos oya galikana Kalunga e taye mu kugile ekwatho.

²¹ Omuwa okwa tumu omuyengeli, ngoka a dhipaga aakwiita naanashihako yetangakwiita lyaAssur. Omupangeli okwa shuna kuAssur a sa ohoni. Esiku limwe manga a li motempeli yoshikalunga she, yamwe yomoyanamati oye mu dhipaga nomagongamwele.

²² Pamukalo nguka Omuwa okwa hupitha omukwaniilwa Hiskia nAajerusalem miikaha yaSennakerib, omupangeli gwaAssur, nosho wo kaatondi yawo yalwe. Okwe ya kalitha nombili niilongo ayihe yopuushiinda.

²³ Aantu oyendji oye ya kuJerusalem, oya yambele Omuwa omayambo noya pe Hiskia omagano, okuza mpoka iigwana ayihe oya simaneke Hiskia.

²⁴ Pomasiku ngeyaka Hiskia okwa kwatwa kuuvu uudhigu, konyala a se. Oye nokwa galikana Omuwa, nOmuwa okwe mu pe endhindhiliko kutya ota ka aluka.

²⁵ Ihe Hiskia okwi inenepeke ye ina pandula Omuwa, onkee okwa adhika kegeelo pamwe naJuda naJerusalem.

²⁶ Ihe Hiskia nAajerusalem sho yi ifupipike, Omuwa ine ya geela we, sigo okeso lyaHiskia.

²⁷ Omukwaniilwa Hiskia okwa yambapala unene, naayehe oye mu simaneke. Okwi itungile oompungulilo dhokupungula mo oshingoli, oshisiliveli, omamanya gondilo, iizimba, omahuuyanza niinima iikwawo yi na ondilo.

²⁸ Okwa tungu iigandhi yiilya, oondunda dhomaviinu nomagadhi gooholivi, iigunda yoongombe noyoonzi.

²⁹ Kalunga okwe mu yambeke e te mu pe oonzi noongombe nuuyamba owindjiwindji e ta tungu iilando oyindjii.

³⁰ Hiskia tuu nguka a thitike omatondokelo gomeya gokweeta omeya koluthithiya lwaGihon e ta fulu okwena kwokufala omeya meni lyedhingililokuma lyaJerusalem. Hiskia okwa li e na elago mwaayihe mbyoka e yi longo.

³¹ Nokuli aatumwa Aababilonia sho ye ya okukonakona oshinyengandunge shoka sha ningwa moshilongo, Kalunga okwe etha Hiskia a ye nondjila ye mwene, opo a vule oku mu tala sho e li momwenyo gwe.

³² Ashihe shilwe shoka omukwaniilwa Hiskia a ningi neiyapulilo lye Omuwa, osha nyolelwa memoniko lyomuhunganeki Jesaja yaAmos nomembo lyondjokonona yaakwaniilwa yaJuda naIsrael.

³³ Hiskia okwa si nokwa fumvikwa moshitopolwa shopombanda shoombila dhaakwaniilwa. Aajuda ayehe nAajerusalem oye mu simaneke peso lye. Omwana Manasse okwe mu landula muukwaniilwa.

33

¹ Manasse okwa li e na omimvo omulongo nambali, sho a ningi omukwaniilwa gwaJuda, nokwa lele omimvo omilongo ntano nantano muJerusalem.

² Manasse okwa yono kOmuwa. Okwa landula iilonga iinyanyalithi yiigwana mbyoka Omuwa e yi tidha mo mevi, opo aantu ye ya kale mo.

³ Okwa tungulula omahala giinonoma yuupagani ngoka he Hiskia a li a kumuna po. Okwa tungu iiyambelo yokusimanekela Baal, okwa ningitha iiyelekela yoshikalungakiintu Asheera, nokwa simaneke oonyothi.

⁴ Okwa tungitha iiyambelo yuupagani motempeli, moka Omuwa a tile, oku na okusimanekelwa mo aluhe.

⁵ Momahale agehe gaali gotempeli okwa tungile mo iiyambelo yokusimanekela oonyothi.

⁶ Okwa yamba oyanamati omafikilondjambo mesilu lyaBen Hinnom, ya ninge omalungunithondjambo. Okwa anekelitha nokupulitha oonganga noompulile. Okwa yono nayi kOmuwa e ta tukulutha ondjahi ye.

⁷ Okwa tula oshiyelekela motempeli, mehale moka Omuwa a lombwele David nomwana Salomo ta ti: “Muka muJerusalem, motempeli ndjika, omo mu na ehala ndyoka nde li hogolola mokati komazimo omulongo nagaali gaIsrael, li ninge ehala moka tandi simanekelwa.

⁸ Ngele Aaisraeli otaa vulika kiipango yandje ayihe e taa dhiginine ompango ayihe ndjoka ya pewa komuntu gwandje Moses, nena itandi ka pitika nando, ya tidhwe mo mevi ndyoka nde li pe oohekulu.”

⁹ Manasse okwa fala Aajuda mepogolo enene li vule ndyoka lya pogolwa kiigwana mbyoka Omuwa e yi tidha mo moshilongo, opo aantu ye ya kale mo.

¹⁰ Omuwa nando okwa londodhele Manasse naantu ye, oya tindi oku mu pulakena.

¹¹ Nena Omuwa okwe etha, oondjayi dhetangakwiita lyaAssur dhi homone Juda. Odha kwata Manasse, odhe mu tsu oongona, tadhi mu tula momalyenge noku mu fala kuBabilon.

¹² Muuwehame we Manasse okwi ifupipike e ta galukile kOmuwa, Kalunga ke, e te mu indile ekwatho.

¹³ Kalunga okwa taamba egalikano lyaManasse e te li yamukula, sho e mu galulithile kuJerusalem, e ta lele ishewe. Shika osha tompo Manasse, a tseye kutya nani Omuwa oye Kalunga.

¹⁴ Konima yaambika Manasse okwa lelepeke omutumbo gwedhingililokuma lyokondje kombinga yokuuzilo woshilando shaDavid, okuza popepi noluthithiya lwaGihon molusilu sigo okOsheelo shoohi nokukondeka ngeyi ehala lyoshilando lya lukwa Ofel. Okwa langeke wo ondjayi yiita moshilandohote kehe muJuda.

¹⁵ Okwa kutha iikalunga ayihe iikwiilongo motempeli noshiyelekela shoka a tulile mo, niiyambelo yuupagani mbyoka ya li kondundu hoka kwa tungilwa otempeli nopomahala galwe muJerusalem; okwa fala iinima mbika ayihe pondje yaJerusalem e te yi ekelehi.

¹⁶ Okwo opalekulula wo oshiyambelo shoka hashi simanekelwa Omuwa e ta yamba omakwatathanondjambo nomapandulondjambo. Okwa lombwele Aajuda ayehe, ya simaneke Omuwa, Kalunga kaIsrael.

¹⁷ Nando aantu oya yamba oontselelandjambo pomahala ga li giinonoma, oye ga gandjele ashike Omuwa.

¹⁸ Ashihe shilwe shoka Manasse a ningi, egalikano lye kuKalunga ke, nomalaka gaahunganeki mboka ya popi naye medhina lyOmuwa, Kalunga kaIsrael, oya nyolelwa membo lyondjokonona yaakwaniilwa yaIsrael.

¹⁹ Egalikano lyomukwaniilwa neyamukulo lyaKalunga, nehokololo lyokuyona kwe, manga ini itedhulula — uuwinayi mboka e u ningi, omahala giinonoma yuupagani niiyelekela yoshikalungakiintu Asheera mbyoka e yi hambulitha, niimenka mbyoka e yi longele — oya nyolelwa ayihe membo lyondjokonona yaahunganeki.

²⁰ Manasse okwa si nokwa fumvikwa muuwa we, nomwana Ammon okwe mu landula muukwaniilwa.

²¹ Ammon okwa li e na omimvo omilongo mbali nambali, sho a ningi omukwaniilwa gwaJuda, nokwa lele muJerusalem omimvo mbali.

²² Okwa yono kOmuwa a fa he Manasse, nokwa simaneke iimenka mbyoka he a li a simaneke.

²³ Ihe ini ifupipika koshipala shOmuwa, ngaashi he a ningile; okwa li omulunde omunene e vule he.

²⁴ Omalenga ge oge mu tsile ondumbo e tage mu dhipagele muuwa we miineya.

²⁵ Aajuda oya dhipaga ayehe mboka ya kotokele Ammon e taa kwaniileke omwana Josia.

34

¹ Josia okwa li e na omimvo hetatu, sho a ningi omukwaniilwa gwaJuda, nokwa lele muJerusalem omimvo omilongo ndatu nagumwe.

² Josia okwa longo shoka sho opalela Omuwa; okwa landula oshinkoti shahekulu, omukwaniilwa David, nokwa vulika lela kiipango ayihe yaKalunga.

³ Momumvo omutihetatu guukwaniilwa we, manga omugundjuka, Josia okwa tameke okusimaneka Kalunga kahekulu David. Konima sho pwa piti omimvo ne, okwa tameke okuhanagula po omahala giinonoma yuupagani, iiyelekela yoshikalungakiintu Asheera niimenka yilwe wo.

⁴ Mewiliko lye aantu ye oya kumagula po iiyambelo mpoka hapu simanekelwa Baal e taa kumuna po iiyambelo yiitsinino. Oya tatagula po iiyelekela yaAsheera niimenka yilwe e taa halakanitha po uutandu koombila dhaantu mboka ya li ye yi yambele.

⁵ Okwa lungunithile omasipa gaayambi aapagani kiiyambelo nkoka ya yambelele. Sho a ningi ngeyi, okwa yapula Juda naJerusalem, yi yogoke.

⁶ Shika okwe shi ningi wo miilando yaManasse, Efraim naSimeon, sigo okuumbangalantu kuNaftali.

⁷ Moshilongo ashihe shokuumbangalantu okwa kumagula po iiyambelo niiyelekela yoshikalungakiintu Asheera, iimenka okwe yi tatagula po, nomatsininoyambelo okwe ga tatula uutandu. Nokwa galukile kuJerusalem.

⁸ Momumvo omutimulongo nahetatu gwepangelo lye, sho a adhika a yogola oshilongo nosho wo otempeli nokuhulitha po esimaneko lyiimenka, omukwaniilwa Josia okwa tumu aantu yatatu, ya opaleke otempeli yOmuwa Kalunga. Oyo Shafan yaAzalia, Maaseia, omupangeli gwaJerusalem, naJoa yaJoahas, amushangandjayi.

⁹ Iimaliwa mbyoka ya gongelwa kaatonateli Aalevi motempeli, oya pewa omuyambimukuluntu Hilkia. (Oyu umbwa ongalo kAaefraim nAamanasse nokoshihupe shOshilongo shokuumbangalantu nokAajuda, Aabenjamin nAajerusalem.)

¹⁰ Iimaliwa mbika oya pewa aantu yatatu mboka taa tonatele iilonga yotempeli, noye yi gandja

¹¹ kaanashihongelo naatungi, opo ya lande omamanya niipilangi tayi longithwa meopaleko lyomatungo ngoka aakwaniilwa yaJuda ye etha ga yonuke.

¹² Aantu mboka ya li taa longo iilonga mbika, oya li aayuuki. Oya tonatelwa kAalevi yane: Jahat naObadia gwomoludhi lwaMerari naSakaria naMeshullam gwomoludhi lwaKohat. (Aalevi oya li aayimbi oonkulungu.)

¹³ Aalevi ooyakwawo oya li taa tonatele eenditho lyiinima e taa wilike aaniilonga miilonga yi ili noyi ili, yamwe oya li aadhiginini yomambo nayamwe aakeeleli yopiiyelo.

¹⁴ Iimaliwa sho ya li tayi kuthwa mompungulilo, Hilkia okwa mono embo lyompango yOmuwa, ndjoka Omuwa a gandjele kuMoses.

¹⁵ Okwa ti kuShafan: “Ondi itsu embompango motempeli.” Okwa gandja embo kuShafan,

¹⁶ naShafan okwe li fala komukwaniilwa. Okwa hokolola a ti: “Otwa gwanitha shoka wa ti.

¹⁷ Otwa kutha iimaliwa mbyoka ya li ya pungulwa motempeli e tatu yi gandja kaaniilonga naawiliki yawo.”

¹⁸ Oye nokwa gwedha ko a ti: “Ondi na po embo mpaka ndyoka Hilkia a pe ndje.” Oye nokwe li leshele omukwaniilwa muule.

¹⁹ Omukwaniilwa sho u uvu embo tali leshwa, okwa tuula oonguwo dhe moluhodhi

²⁰ e ta lombwele Hilkia, Ahikam yaShafan, Abdon yaMikaia, amushangampangu Shefan nomukalele gwomukwaniilwa Asaja ta ti:

²¹ “Indeni, mu ke tu pulile Omuwa tse naantu ya hupile muIsrael naJuda. Monii mo shoka sha popiwa membo ndika. Omuwa okwe tu geele, oshoka ootatekulu inaa vulika koohapu dhOmuwa yo inaa ninga shoka embo ndika tali ti nashi ningwe.”

²² Palombwelo lyomukwaniilwa, Hilkia nayalwe oya yi, ya ka pule komukulukadhi edhina lye Hulda, omuhunganeki ngoka a kala moshitopolwa oshipe muJerusalem. (Omulume Shallum yaTikva, omutekulu gwaHarhas okwa li omutonateli gwoonguwo dhomotempeli.) Oya hokololele Hulda shoka sha ningwa po.

²³ Hulda okwe ya lombwele, ya shune komukwaniilwa, yo ye mu faalele

²⁴ elaka lya zi kOmuwa tali ti: “Otandi ka geela Jerusalem naantu yasho ayehe nethingano ndyoka lya nyolelwa membo nolya leshelwa omukwaniilwa.

²⁵ Oye ekelehi ndje e taa yambele iikalunga omafikilondjambo. Osho ngaaka oya tukulutha ondjahi yandje niilonga yawo. Ondjahi yandje oya tukuluthwa, yi geele Jerusalem noitayi ka lotela we.

²⁶ Ihe tyeni komukwaniilwa gwaJuda, shika osho shono ngame, Omuwa, Kalunga kaIsrael, tandi ti: ‘Owa pulakene shoka sha nyolelwa membompango,

²⁷ nowi itedhulula e to ifupipike koshipala shandje, nokutuula oonguwo dhoye e to lili, sho wa uvu kutya tandi ka geela Jerusalem naantu yasho. Ondu uvu egalikano lyoye,

²⁸ negeelo ndyoka tandi etele Jerusalem, itali ya we, manga inoo sa. Oto ka sa nombili.’ ” Aantu oya fala elaka ndika komukwaniilwa Josia.

²⁹ Omukwaniilwa Josia okwa hiya aawiliki yaJuda noyaJerusalem.

³⁰ Oyo ayehe oya gongala noya yi kotempeli ya thindikilwa kaayambi, Aalevi nokoshihupe ashihe shoshigwana, aayamba noohepele. Montaneho yawo omukwaniilwa okwa lesha embo lyehangano alihe mokule, ndyoka lyi itsuwa motempeli.

³¹ Okwa thikama pongundhi yaakwaniilwa e ta hangana nOmuwa. Oshigwana ashihe osha li shi na okuuvaneka, shi vulike kOmuwa sho shi dhiginine iipango ye ayihe nomautho ge agehe nomutima aguhe noonkondo adhihe. Ashihe shoka shu uthwa membo lya monika, oshi na okudhigininwa.

³² Okwa hanganithitha Aabenjamin naayehe mboka ya li po muJerusalem, ya uvaneke okudhiginina ehangano. Osho ngaaka Aajerusalem ya vulika, ya ende pahangano ye li hangana naKalunga koohekulu.

³³ Omukwaniilwa Josia okwa hanagula po iimenka ayihe yi nyanyalitha miitopolwa ayihe yaIsrael. Manga a li e na omwenyo, aantu oya simaneke Omuwa, Kalunga koohekulu.

35

¹ Omukwaniilwa Josia okwa dhana Opaasa muJerusalem, a simaneke Omuwa; mesiku etimulongo netine lyomwedhi gwotango oya dhipaga onzigona yOpaasa.

² Okwa gandja kaayambi iilonga ya longe motempeli nokwe ya tsu omukumo mokulongela Omuwa.

³ Okwa kumagidha Aalevi, aanongeki yaIsrael, mboka ya li ya yapulilwa Omuwa ta ti: “Tuleni oshikethahangano motempeli ndjoka ya tungwa komukwaniilwa Salomo, omuna gwaDavid. Itamu shi humbata we, mu shi fale pehala nehala, ndele otamu longele Omuwa, Kalunga keni, naantu ye Aaisraeli.

⁴ Ilongekidheni pamaludhi geni okutsakanitha iimpwiyu mbyoka mwe yi pewa komukwaniilwa David nomwana Salomo,

⁵ opo motempeli mu kale oongundu dhAalevi tadhi kwatha omagumbo gAaisraeli yowala, ongundu kehe okegumbo limwe.

⁶ Omu na okudhipaga oonzigona dhOpaasa. Iyapuleni ano, mu longekidhile Aaisraeli aakweni onzigona yOpaasa pamalombwelo ngoka Omuwa e ga pele Moses.”

⁷ Omukwaniilwa Josia okwa kutha miimuna ye mwene oonzi, oonzigona noonkombwena omayuvi omilongo ndatu noontsezi omayuvi gatatu e te yi pe aathigona omayambo gOpaasa.

⁸ Omalenga ge oga pe wo oshigwana, aayambi nAalevi omayambo gOpaasa. Aakuluntu yomotempeli — Hilkia, omuyambimukuluntu, Sakaria naJehiel — oya pe aayambi oonzigona noonkombwena omayuvi gaali nomathele gahamano noontsezi omathele gatatu, ye dhi yambe pethimbo lyoshituthi.

⁹ Aawiliki yAalevi — Konania, Shemaia nomumwayina Netanel, Hashabia, Jeiel naJosabad — oye eta oonzigona noonkombwena omayuvi gatano noontsezi omathele gatano dha pewa Aalevi, ya yambe oontselelandjambo.

¹⁰ Oshituthi shOpaasa osha longekidhwa. Aayambi nAalevi oya ka thikama pomahala gawo, ngaashi ya lombwelwa komukwaniilwa.

¹¹ Oonzigona dhOpaasa odha dhipagwa, Aalevi oye dhi yuyu, naayambi oya shashamine ombinzi koshiyambelo.

¹² Aalevi oya tula omafikilondjambo poluha, opo ye ga pe oongundu dhomagumbo, ga yambelwe Omuwa pamalombwelo gompango yaMoses. Osho ya ningi wo noongombe.

¹³ Oya yotha omayambo gOpaasa momulilo, ngaashi shu uthwa, noya teleke omayambo omayapuki moombiga, miiketitha nomiipana noye etele mbala aantu onyama.

¹⁴ Shika sho sha ningwa, Aalevi oya teleke onyama yawo noyaayambi yomoluvalo lwaAaron, oshoka aayambi oya longo sigo uusiku taa lungunitha omafikilondjambo noofu.

¹⁵ Aayambi Aalevi yoludhi lwaAsaf oya li pomahala ngoka ye ga uthilwa komukwaniilwa David, Asaf, Heman naJedutun, omuhunganeki gwomukwaniilwa.

¹⁶ Esiku ndyoka iinima ayihe oya ningilwa esimaneko lyOmuwa, okudhana Opaasa, nokuyamba omafikilondjambo koshiyambelo, ngaashi omukwaniilwa Josia a li u utha.

¹⁷ Omasiku gaheyali Aaisraeli ayehe mboka ya li ko, oya dhana Opaasa nOshituthi shiikwiila yaa na fulika.

¹⁸ Okuza muuyuni womuhunganeki Samuel kaku dhanenwe we Opaasa ya fa ndjika. Kaku na ngoka gwomaakwaniilwa yaIsrael a dhanene Opaasa ya fa ndjika ya dhanenwe komukwaniilwa Josia, aayambi, Aalevi nAajuda, Aaisraeli nAajerusalem

¹⁹ momumvo omutimulongo nahetatu gwomepangelo lyaJosia.

²⁰ Omukwaniilwa Josia sho a ningile otempeli iinima mbika ayihe, omukwaniilwa gwaEgipiti Neko okwa yi netangakwiita lye, a ka kondjithe Karkemish pomulonga Eufrat. Josia okwa kambadhala oku mu keelela,

²¹ ihe Neko okwa tumine Josia elaka tali ti: “Iita mbika tandi hingi kayi na sha nangoye, omukwaniilwa gwaJuda. Inandi ya ndi ku kondjithe, ihe okukondjitha aatondi yandje, naKalunga okwa lombwele ndje, ndi endelele. Kalunga okwa gama kungame, ino kondjitha ndje, ota ningi e ku yone po.”

²² Josia ine mu pulakena nando. Okwa tindi okupulakena shoka Kalunga a popi momukwaniilwa Neko. Okwi idhimbike e ta yi molugodhi molushandja lwaMegiddo.

²³ Molugodhi iikuti yAayegipiti oya yaha omukwaniilwa Josia. Okwa lombwele aapiya ye a ti: “Kuthii ndje po, oshoka onda yahwa nayi!”

²⁴ Oyo noye mu kutha mo metembakwiita lye e taye mu tula metembakwiita etiyali ndyoka lya li po, e taye mu fala kuJerusalem. Okwa si nokwa fumvikwa moombila dhaakwaniilwa. Aajuda ayehe nAajerusalem oye mu lili oosa.

²⁵ Omuhunganeki Jeremia okwa totele eso lyomukwaniilwa Josia ontakumandjimbo. Osha ningi omukalo gwaayimbi ayehe muIsrael okwiimba ontakumandjimbo ndjika, sho taye mu lili oosa. Ondjimbo ndjika oyi li membo lyoontakumandjimbo.

²⁶ Ashihe shoka Josia a ningi — eigandjo lye kOmuwa, evuliko lye kompango,

²⁷ nondjokonona ye okuza ketameko sigo okehulilo — ayihe oya nyolelwa membo lyondjokonona yaakwaniilwa yaIsrael naJuda.

36

¹ Aajuda oya hogolola Joahas yaJosia e taye mu gwayeke omukwaniilwa muJerusalem.

² Joahas okwa li e na omimvo omilongo mbali nandatu, sho a ningi omukwaniilwa gwaJuda, nokwa lele muJerusalem oomwedhi ndatu.

³ Omukwaniilwa Neko gwaEgipiti okwe mu kwata po onkwatwa e ta futitha Juda oshisiliveli shookilograma 3 400 noshingoli shookilograma 34 iifendela.

⁴ Neko okwa kwaniileke omumwayina gwaJoahas, edhina lye Eliakim, a ninge omukwaniilwa gwaJuda, e ta lukulula edhina lye, li ninge Jehoiakim. Joahas okwa falwa kuEgipiti.

⁵ Jehoiakim okwa li e na omimvo omilongo mbali nantano, sho a ningi omukwaniilwa gwaJuda, nokwa lele muJerusalem omimvo omulongo nagumwe. Okwa yono kOmuwa, Kalunga ke.

⁶ Omukwaniilwa gwaBabilonia Nebukadnezzar okwa matukile Juda e ta kwata po Jehoiakim e te mu fala kuBabilonia e li momalyenge.

⁷ Nebukadnezzar okwa kutha po omaliko gamwe gomotempeli e te ga pungula muuwa we muBabilon.

⁸ Ashihe shoka Jehoiakim a longo, mwa kwatelelwa iilonga ye iinyanyalithi nuuwinayi we mboka a hunu, oya nyolelwa membo lyondjokonona yaakwaniilwa yaJuda. Omwana Jehoiakin okwe mu landula muukwaniilwa.

⁹ Jehoiakin okwa li e na omimvo omulongo nahetatu, sho a ningi omukwaniilwa gwaJuda, nokwa lele muJerusalem oomwedhi ndatu nomasiku omulongo. Okwa yono wo kOmuwa.

¹⁰ Poshitemamvula omukwaniilwa Nebukadnezzar okwa fala Jehoiakin kuBabilonia onkwatwa, e ta faalele omaliko gotempeli. Nena Nebukadnezzar okwa kwaniileke hegona yaJehoiakin, edhina lye Sedekia, a ninge omukwaniilwa gwaJuda naJerusalem.

¹¹ Sedekia okwa li e na omimvo omilongo mbali nagumwe, sho a ningi omukwaniilwa gwaJuda, nokwa lele muJerusalem omimvo omulongo nagumwe.

¹² Okwa yono kOmuwa, ye ini ifupipika montaneho yomuhunganeki Jeremia, sho a hunganeke oohapu dhOmuwa.

¹³ Sedekia okwa tsu ondumbo nomukwaniilwa Nebukadnezzar, ngoka e mu ganithithile medhina lyaKalunga a kale omwiinekelwa. Okwa li omutangalali nokwi ikukutike ye ina hala okugalukila kOmuwa, Kalunga kaIsrael.

¹⁴ Ihe naawiliki wo yAajuda, aayambi noshigwana osha landula oshiholelwa shuulunde shiigwana mbyoka ye ya kunduka mokulongela iimenka, noya nyateke otempeli ndjoka Omuwa e yi yapula muJerusalem.

¹⁵ Omuwa, Kalunga koohekulu, okwa tsikile okutuma aahunganeki, ya londodhe aantu ye, oshoka okwa li a hala e ya hupithe pamwe notempeli.

¹⁶ Ihe yo oya dhini aatumwa yaKalunga, ya dhini oohapu dhe e taa yolo aahunganeki, sigo pehulilo ondjahi yOmuwa okugeela aantu ye oya ningi onene, noinaa vula oku yi yanda.

¹⁷ Omuwa okwe etha omukwaniilwa gwaBabilonia e ya homone. Omukwaniilwa ngoka okwa dhipaga aagundjuka Aajuda, nomotempeli nokuli. Ina sila nando olye ohenda, omunona nenge omukuluntu, omulumentu nenge omukiintu, omuvu nenge ondjolowele. Kalunga okwe ya gandja ayehe kuye.

¹⁸ Omukwaniilwa gwaBabilonia okwa yugu otempeli, omaliko gayo nuuyamba womukwaniilwa nomalenga ge, nokwa fala ayihe kuBabilon.

¹⁹ Okwa fike po otempeli noshilando, oongulu dhasho adhihe nuuyamba washo, e ta kumuna po edhingililokuma lyoshilando.

²⁰ Ayehe mboka ya hupu ko, okwe ya fala muupika kuBabilon, nkoka ye mu longele nomaluvalo ge, sigo okuholokapo kwoshilongo shaPersia.

²¹ Osho oohapu ndhoka Omuwa a popithile nale omuhunganeki Jeremia, odha gwanithwa. Otadhi ti: “Evi otali ka kala lya mbugala omimvo omilongo heyali, li ninge evululuko lyEsabati, ndyoka lya li inaali dhigininwa.”

²² Momumvo gwotango Kores sho a li omupangeli gwaPersia, Omuwa okwa tsakanitha shoka sha popilwe komuhunganeki Jeremia. Omuwa okwa hwameke ombepo yaKores, a gandje oshipango molupe lwenyolo sho shi leshwe pombanda moshilongo she ashihe:

²³ “Kores, omupangeli gwaPersia ota ti ngeyi: ‘Omuwa, Kalunga komegulu, okwa ningi ndje omuleli guuyuni auhe nokwa pe ndje oshilongo shoku mu tungila otempeli muJerusalem muJuda. Ngashingeyi, ne amuhe mboka aantu yaKalunga, indeni ko, nOmuwa, Kalunga keni, na kale pamwe nane!’ ”