1 Adam ohe yaSet, Set ohe yaEnos, Enos ohe yaKenan,
2 Kenan ohe yaMahalalel, Mahalalel ohe yaJared,
3 Jared ohe yaEnok, ngoka he yaMetusala; Metusala ohe yaLamek,
4 ngoka he yaNoa. Noa okwa li e na oyanamati yatatu: Sem, Ham naJafet.
5 Aana aamati yaJafet — Gomer, Magog, Madai, Javan, Tubal, Meshek naTiras — oyo oohekulu yiigwana mbyoka ya lukilwa omadhina gawo.
6 Oluvalo lwaGomer olwAashkenas, Aarifat nAatogarma.
7 Omaluvalo gaJavan oga li Aaelisha, Aaespania, Aakipro nAarodes.
8 Aana yaHam aamati oyo Kush, Misraim, Put naKaanan.
9 Aana yaKush aamati oya li Seba, Havila, Sabta, Raama naSabteka. Aana yaRaama aamati oya li Sheba naDedan.
10 (Kush okwa li e na omwanamati edhina lye Nimrod, ngoka a ningi omusindani omunene omutango muuyuni.)
11 Omaluvalo gaEgipiti oga li Aalidia, Aayanam, Aalehab, Aanaftu,
12 Aapatros, Aakaslu nAakreta (moka mwa zi Aafilisti.)
13 Aana yaKaanan aamati oyo osheeli Sidon naHet, oyo oohekulu yaantu mboka haa ithanwa nomadhina gawo.
14 Kaanan okwa li wo hekulu yAayebusi, yAayamori, yAagirgashi,
15 yAahevi, yAayarki, yAasini,
16 yAayarvadi, yAazemari noyAahamati.
17 Aana yaSem aamati oyo Elam, Assur, Arpakshad, Lud, Aram, Uz, Hul, Geter naMeshek.
18 Arpakshad ohe yaShela, ngoka a vala Eber.
19 Eber okwa li e na oyanamati yaali. Gumwe okwa lukwa Peleg, molwashoka aantu yomuuyuni we oya topoka. Mukwawo okwa lukwa Joktan.
20 Omaluvalo gaJoktan oga li Aayalmodad, Aashelef, Aahazarmavet, Aajerak,
21 Aahadoram, Aausal, Aadikla,
22 Aaebal, Aayabimael, Aasheba,
23 Aaofir, Aahavila nAajobab.
24 Omusholondondo gwezimo okuza kuSem sigo oAbram ogwo nguka: Sem, Arpakshad, Shela,
25 Eber, Peleg, Reu,
26 Serug, Nahor, Tera
27 naAbram (kokutya Abraham).
28 Abraham okwa li e na oyanamati yaali, Isak naIsmael.
29 Aana yaIsmael aamati oya ningi oonkungulu dhomazimo omulongo nagaali: Nebaiot (osheeli shaIsmael), Kedar, Adbeel, Mibsam,
30 Mishma, Duma, Massa, Hadad, Tema,
31 Jetur, Nafish naKedema.
32 Abraham okwa li a hokana omudhike gwe Ketura, ngoka e mu valele aamati yahamano: Simran, Jokshan, Medan, Midian, Jishbak naShua. Jokshan okwa li e na oyanamati yaali, Sheba naDedan.
33 Midian okwa li e na oyanamati yatano: Efa, Efer, Hanok, Abida naEldaa.
34 Isak yaAbraham okwa li e na oyanamati yaali, Esau naJakob.
35 Aana yaEsau aamati oyo Elifas, Reuel, Jeush, Jalam naKora.
36 Aana yaElifas aamati oyo Teman, Omar, Zefi, Gatam, Kenas, Timna naAmalek.
37 Reuel okwa ningi hekulu yomazimo gaNahat, gaSera, gaShamma nogaMissa.
38 Aakalimo muEdom aakulu oyo oluvalo lwa za maana yaSeir mbaka taa landula ko: Lotan ohekulu yoludhi lwaHori nolwaHomam. (Lotan okwa li e na omumwayina omukiintu Timna). Shobal ohekulu yomaludhi gaAlvan, gaManahat, gaEbal, gaShefi nogaOnam. Zibeon okwa li e na oyanamati yaali, Aja naAna. Ana ohe yaDishon naDishon ohekulu yomaludhi gaHamran, gEshban, gaItran nogaKeran. Ezer ohekulu yomaludhi gaBilhan, Saavan naJaakan. Dishan ohekulu yomaludhi gaUz naAran.
39
40
41
42
43 Aakwaniilwa mboka ya lele Edom ya landulathana muuyuni mbwiyaka, manga muIsrael kaamwa li omukwaniilwa, oyo: Bela yaBeor gwomuDinhaba Jobab yaSera gwomuBozra Husham gwokoshikandjo Teman Hadad yaBedad gwomuAvit (okwa sindi Aamidiana molugodhi moshilongo Moab) Samla gwomuMasreka Shaul gwomuRehobot shopomulonga (Eufrat) Baal-Hanan yaAkbor Hadad gwomuPai (omukadhi oMehetabel yaMatred, omutekulu gwaMe-Sahab)
44
45
46
47
48
49
50
51 Mboka ya li aaniikandjo muEdom, oyo Timna, Alva, Jetet,
52 Oholibama, Ela, Pinon,
53 Kenas, Teman, Mibzar,
54 Magdiel naIram.
1 Jakob okwa li e na oyanamati omulongo nayaali. Oyo Reuben, Simeon, Levi, Juda, Issaskar, Sebulon,
2 Dan, Josef, naBenjamin, Naftali, Gad naAser.
3 Juda okwa li e na oyanamati ayehe kumwe yatano. Omukadhi Bathshua, Omukaanani, okwe mu valele aamati yatatu: Er, Onan naShela. Osheeli she Er osha li inaashi opalela Omuwa, nOmuwa okwe shi dhipaga.
4 Oshitenya she Tamar oshe mu valele Perez naSera.
5 Perez okwa li e na oyanamati yaali, Hezron naHamul.
6 Omumwayina Sera okwa li e na oyanamati yatano: Simri, Etan, Heman, Kalkol naDarda.
7 Aran kaKarmi, gumwe gwomoluvalo lwaSera, okwe eta omupya mAaisraeli, sho a yaka iinima ya dhilikilwa Kalunga.
8 Etan okwa li e na omwanamati gumwe, Azaria.
9 Hezron okwa li e na oyanamati yatatu: Jerakmeel, Ram naKaleb.
10 Ompola yezimo okuza Ram sigo Isai oyo ndjika: Ram, Aminadab, Nahshon (omunedhina gwomezimo lyaJuda),
11 Salmon, Boas,
12 Obed naIsai.
13 Isai okwa li e na oyanamati yaheyali. Osheeli Eliab, ontowele Abinadab, shilandula Shamma,
14 omutine Netanel, omutitano Raddai,
15 omutihamano Ozem nonkelo David.
16 Okwa li wo e na oyanakadhona yaali, Zeruia naAbigal. Zeruia yaIsai okwa li e na oyanamati yatatu: Abisai, Joab naAsahel.
17 Nomwana Abigal okwa hokanwa kuJeter, gwomoluvalo lwaIsmael, noyo ya li ye na omunona omumati edhina lye Amasa.
18 Kaleb kaHezron okwa hokana Asuba e ta vala omukadhona edhina lye Jeriot. Oyanamati yatatu oyo mbaka: Jesher, Shobab naArdon.
19 Asuba sho a si, Kaleb okwa hokana Efrata e te mu valele Hur.
20 Omuna gwaHur oye Uri, naUri okwa valelwa Bezalel.
21 Hezron sho a gwanitha omimvo omilongo hamano, okwa hokana omuna gwaMakir, mumwayina gwaGilead. Oya vala omumati edhina lye Segub,
22 naSegub okwa li e na omwanamati edhina lye Jair. Jair okwa li ta lele iilando omilongo mbali niitatu moshikandjo shaGilead.
23 Ihe iilongo Geshur naAram oya lala omikunda dhaankoka omilongo hamano, mwa kwatelelwa mo omikunda dhaJair naKenat nomikunda dhomuushiinda wadho. Aantu ayehe mboka ya li hoka, oyo oluvalo lwaMakir, he yaGilead.
24 Hezron sho a si, omwana Kaleb okwa hokana Efrata, omuselekadhi gwahe, noya vala omumati edhina lye Ashhur, ngoka a toto po oshilando Tekoa.
25 Jerahmeel, osheeli shaHezron, okwa li e na oyanamati yatano: Ram, osheeli, Buna, Oren, Ozem naAhija.
26 Ram okwa li e na oyanamati yatatu: Maaz, Jamin naEker. Jerahmeel okwa li e na po omukulukadhi gulwe edhina lye Atara, ngoka e mu valele Onam.
27
28 Onam okwa li e na oyanamati yaali, Shammai naJada. Shammai okwa li e na oyanamati yaali, Nadab naAbishur.
29 Abishur okwa hokana omukulukadhi edhina lye Abihail, noya li ye na oyanamati yaali, Ahban naMolid.
30 Nadab, mumwayina gwaAbishur, okwa li e na oyanamati yaali, Seled naAppaim, ihe Seled okwa si kee na omunona.
31 Appaim okwa vala Ishi, Ishi okwa vala Sheshan, naSheshan okwa vala Ahlai.
32 Jada, mumwayina gwaShammai, okwa li e na oyanamati yaali, Jeter naJonatan, ihe Jeter okwa si inaa vala omumati.
33 Jonatan okwa li e na oyanamati yaali, Pelet naSasa. Mbaka ayehe oyo oluvalo lwaJerahmeel.
34 Sheshan ka li e na oyanamati, ihe okwa li a vala owala aakadhona. Okwa li e na omupiya Omuegipiti edhina lye Jarha.
35 Sheshan okwe mu pe, a hokane po gumwe gwomoyanakadhona. Oya vala omumati, ngoka a lukwa Attai.
36 Ompola yezimo okuza kuAttai sigo okuElishama oyo: Attai, Natan, Sabad,
37 Eflal, Obed,
38 Jehu, Azaria,
39 Helez, Eleasa,
40 Sismai, Shallum,
41 Jekamia naElishama.
42 Osheeli shaKaleb, mumwayina gwaJerahmeel, osha li Mesha. Mesha okwa vala Sif, ngoka a vala Maresha, he yaHebron.
43 Hebron okwa li e na oyanamati yane: Kora, Tappua, Rekem naShema.
44 Shema okwa vala Raham, Raham okwa vala Jorkeam. Mumwayina gwaShema Rekem okwa vala Shammai,
45 ngoka he yaMaon, ngoka a vala Bet Sur.
46 Kaleb okwa li e na ohonda edhina lyayo Efa, noye mu valele aamati yatatu. Oyo Haran, Moza naGases. Haran naye wo okwa li e na omumati edhina lye Gases.
47 (Omusamane gumwe haku tiwa oJahdai, okwa li e na oyanamati yahamano: Regem, Jotam, Geshan, Pelet, Efa naShaaf.)
48 Kaleb okwa li e na ishewe ohonda edhina lyayo Maaka, ndjoka ye mu valele aamati yaali, Sheber naTirhana.
49 Konima oya gwedha ko ishewe aamati yaali: Shaaf, ngoka a toto po omukunda Madmanna, naSheva, ngoka a toto po omukunda Makbena naGibea. Natango Kaleb okwa li e na omwanakadhona edhina lye Aksa.
50 Naambaka wo oluvalo lwaKaleb. Hur oye osheeli shaKaleb nomukadhi Efrata. Osheeli shaHur Shobal okwa tungu Kiriat Jearim.
51 Salma yaHur okwa tungu po Betlehem, naHaref yaHur okwa tungu po Betgader.
52 Shobal, omutungipo gwaKiriat Jearim, okwa li hekulu yoludhi lwaHaroe noyetata lyaakalimo muMenuhot.
53 Omaludhi muKiriat Jearim oga li Aajeter, Aaput, Aashumati nAamishrai. (Aantu yomiilando Soar naEshtaol oya li iilyo yomaludhi ngoka.)
54 Salma, omutungipo gwaBetlehem, oye hekulu yaakalimo muNetofa, muAtrot Bet Joab, yetata lyaakalimo muManahat noyaakalimo muZora.
55 (Omaludhi ngaka ga kala muJabez, oga li aanongo momishangwa nomomanyolo: Aatirati, Aashimati nAasukati. Oya li Aakeni mboka ya hokanathana naantu yomuRekab.)
1 Aana yaDavid aamati mboka ya valwa, sho a li muHebron, oyo mbaka melandulathano paukuluntu wawo: Amnon, yina oAhinoam Omujesreel Daniel, yina oAbigal Omukarmel Absalom, yina oMaaka, omuna gwomukwaniilwa gwaGeshur Talmai Adonia, yina oHaggit Shefatia, yina oAbital Ithream, yina oEgla.
2
3
4 Ayehe yahamano oya valelwa muHebron pethimbo lyomimvo heyali netata, David sho a li ta lele mwiyaka. MuJerusalem okwa kala omukwaniilwa omimvo omilongo ndatu nandatu,
5 nokwa valelwa oyanamati oyendji mwiyaka. Omukadhi Batseba yaAmmiel okwe mu valele aamati yane: Shimea, Shobab, Natan naSalomo.
6 Okwa li wo e na oyanamati yalwe omugoyi. Oyo Ibhar, Elishua, Elifelet,
7 Nogah, Nefeg, Jafia,
8 Elishama, Eliada naElifelet.
9 Kakele kaambaka, David okwa li e na wo oyanamati ya valwa koohonda dhe. Okwa li wo e na omwanakadhona Tamar.
10 Ompola yoluvalo lwaSalomo okuza kuhe sigo okomwana oyo ndjika: Salomo, Rehoboam, Abia, Asa, Jehosafat,
11 Joram, Ahasia, Joas,
12 Amazia, Usia, Jotam,
13 Ahas, Hiskia, Manasse,
14 Ammon naJosia.
15 Josia okwa li e na oyanamati yane: Johanan, Jehoiakim, Sedekia naShallum.
16 Jehoiakim okwa li e na oyanamati yaali, Jehoiakim naSedekia.
17 Nduka olwo oluvalo lwomukwaniilwa Jehoiakin, ngoka a li a kwatwa onkwatwa kAababilonia. Jehoiakin okwa li e na oyanamati yaheyali. Oyo Shealtiel,
18 Malkiram, Pedaia, Shenazzar, Jekamia, Hoshama naNedabia.
19 Pedaia okwa li e na oyanamati yaali, Serubbabel naShimei. Serubbabel okwa li e na oyanamati yaali, Meshullam naHanania, nomukadhona gumwe, Shelomit.
20 Okwa li wo e na oyanamati yalwe yatano. Oyo Hashuba, Ohel, Berekia, Hasadia naJushab Hesed.
21 Hanania okwa li e na oyanamati yaali, Pelatia naJeshaja. Jeshaja ohe yaRefaia, ngoka a vala Arnan, he yaObadia, ngoka a vala Shekania.
22 Shekania okwa li e na eponamati edhina lyalyo Shemaia, naatekulumati yatano: Hattush, Igal, Baria, Nearia naShafat.
23 Nearia okwa li e na oyanamati yatatu: Elioenai, Hiskia naAsrikam.
24 Elioenai okwa li e na oyanamati yaheyali: Hodavia, Eliashib, Pelaia, Akkub, Johanan, Delaja naAnani.
1 Oluvalo lwaJuda olwo Perez, Hezron, Karmi, Hur naShobal.
2 Shobal ohe yaReaia, ngoka a vala Jahat, he yaAhumai naLahad, oohekulu yaantu mboka ya kala muSoar.
3 Hur okwa li osheelimati shomukulukadhi gwaKaleb, edhina lye Efrata, nahe Kaleb, noluvalo lwe olwo lwa tota po Betlehem. Hur okwa li e na oyanamati yatatu: Etam, Penuel naEzer. Etam okwa li e na oyanamati yatatu: Jesreel, Ishma naIdbash, nomukadhona edhina lye Hezzelponi. Penuel okwa toto po oshilando Gedor, naEser okwa toto po oshilando Husha.
4
5 Ashhur, ngoka a toto po oshilando Tekoa, okwa li a hokana ombanda, aakadhi oHela naNaara.
6 Oyanamati yawo naNaara oye li yane: Ahusam, Hefer, Temeni naIlaahashtari.
7 Ashhur yo naHela oya li ye na oyanamati yatatu: Zeret, Izhar naEtnan.
8 Koz ohe yaAnub naZobeba nahekulu yomaludhi goluvalo lwa za muAharhel yaHarum.
9 Okwa li ku na omulumentu edhina lye Jabez, ngoka a li a simana mokati kezimo lye. Yina okwe mu luku edhina Jabez, oshoka evalo lye olya li li na oshitheta oshilulu.
10 Jabez okwa galikana Kalunga kaIsrael ta ti: “Kalunga, yambeka ndje, pe ndje evi enene. Kala pungame e to gamene ndje kuuwinayi auhe mboka tau vulu okweetela ndje uuwehame.” Kalunga okwe mu pe shoka i indile.
11 Keleb, mumwayina gwaShuha, okwa li e na omwanamati Mehir, Mehir okwa vala Eshton,
12 ngoka a li e na oyanamati yatatu: Bet Refa, Pasea naTehinna. Tehinna oye a toto po oshilando Ir Nahash. Omaluvalo gaalumentu mbaka oga kala muReka.
13 Kenas okwa li e na oyanamati yaali, Otniel naSeraia. Otniel okwa li e na oyanamati yaali, Hatat naMeonotai.
14 Meonotai okwa li he yaOfra. Seraia ohe yaJoab, omutotipo gwOlusilu lwaaniilonga yiikaha, oshoka oya li aaniilonga ya putuka.
15 Kaleb kaJefunne okwa li e na oyanamati yatatu: Iru, Ela naNaam. Ela ohe yaKenas.
16 Jehallele okwa li e na oyanamati yane: Sif, Sifa, Tiria naAsarel.
17 Esra okwa li e na oyanamati yane: Jeter, Mered, Efer naJalon. Mered okwa hokana Bitia, omuna gwokombanda gwomukwaniilwa gwaEgipiti, noya vala omukadhona Miriam naamati yaali, Shammai naIshba. Ishba okwa toto po omukunda Eshtemoa. Mered okwa hokana ishewe omukulukadhi gwomoluvalo lwaJuda, noya vala aamati yatatu. Oyo Jared, omutotipo gwomukunda Gedor; Heber, omutotipo gwomukunda Soko; naJekutiel, omutotipo gwomukunda Sanoa.
18
19 Hodia okwa hokana omumwayina gwaNaham. Omaluvalo gawo ogo ga za oludhi lwaGarm, ndoka lwa kala momukunda Keila, noludhi lwaMaakat, ndoka lwa kala momukunda Eshtemoa.
20 Shimon okwa li e na oyanamati yane. Oyo Amnon, Rinna, Benhanan naTilon. Ishi okwa li e na oyanamati yaali, Sohet naBensohet.
21 Shela okwa li gumwe gwomaana yaJuda aamati. Oluvalo lwe olwa kwatelela mo Er, ngoka a toto po omukunda Leka; Laada, omutotipo gwomukunda Maresha; oludhi lwaatungi yoonguwo dholiina, ndoka lwa kala momukunda Bet Ashbea;
22 Jokim naantu mboka ya kala momukunda Kozeba; naJoas naSaraf, ngoka a hokana omukulukadhi Omumoabi e ta kala muBetlehem. (Ohedhi ndjika onkulunkulu.)
23 Oya li aahongi yoombiga miilonga yomukwaniilwa noya li momikunda Netaim naGedera.
24 Simeon okwa li e na oyanamati yatano: Nemuel, Jamin, Jarib, Sera naShaul.
25 Omuna gwaShaul oShallum, omutekulu gwe oMibsam nomutekulululwa gwe oMishma.
26 Ano okuza muMishma ompola yoluvalo tayi pitile muHammuel, Sakkur naShimei.
27 Shimei okwa li e na oyanamati omulongo nayahamano naakadhona yahamano, ihe moludhi lwe oluvalo olwa li lwa pumba, nezimo lyaSimeon inali indjipala unene, ngaashi ezimo lyaJuda lya li lyi indjipala.
28 Oya kalele miilando mbika: Beersheba, Molada, Hazarshual,
29 Bilha, Ezem, Tolad,
30 Betuel, Horma, Ziklag,
31 Bet Markabot, Hazarsusim, Betbiri naShaaraim.
32 Oya kala wo momahala galwe: Etam, Ain, Rimmon, Token naAshan,
33 nomikunda dhe ga kunduka sigo okomukunda Baal. Ngaka ogo omahokololo ye ga pungula gomazimo gawo nomahala moka ya kala.
34 Aakuluntu yomaludhi gawo oya li mbaka: Meshobab, Jamlek, Josha yaAmazia, Joel, Jehu (yaJoshibia yaSeraia yaAsiel), Elioenai, Jaakoba, Jeshohaia, Asaia, Adiel, Jesimiel, Benaia, Sisa (yaShifi yaAllon oluvalo lwaJedaia, Shimri naShemaia.) Molwashoka oluvalo lwawo lwa tsikile talu tana,
35
36
37
38
39 olwa taandele lwokuuninginino, unene lwokuGedor e taa litha oonzi dhawo lwokuuzilo wolusilu moka mwa kala oshilando shoka.
40 Oyi itsu omaulithilo omawanawa ge na omwiidhi. Oshilongo osha li sha andjuka noshi na ombili. Aantu mboka ya li mo nale, oya li Aakwaham.
41 Muuyuni waHiskia, omukwaniilwa gwaJuda, aantu mboka ya popiwa nale, oya tembukile kuGedor e taa hanagula po ootenda nomatsali gaantu nogAameunite. Oya tidha mo aantu e taa kalelele mo, oshoka okwa li ku na omanapelo ogendji omawanawa goonzi.
42 Iilyo yilwe yezimo lyaSimeon omathele gatano oya yi kuuzilo kuEdom. Oya li taa wilikwa kaana yaIshi: Pelatia, Nearia, Refaia naUssiel.
43 Oya dhipaga Aayamaleki mboka ya hupile ko noya kala moka ndongo onena.
1 Mpaka otapa landula oluvalo lwaReuben, omukuluntu gwomaana yaJakob. (Molwaashoka a lalele nagumwe gwomoohonda dhahe, okwa kanitha uuthemba wuusheeli, mboka wa pewa Josef.
2 Ezimo lyaJuda olya ningi enankondo nolya lele omazimo agehe, ihe Josef okwa li e na uuthemba wuusheeli.)
3 Aana yaReuben, osheeli shaJakob, oya li Hanok, Pallu, Hezron naKarmi.
4 Nduka oluvalo lwaJoel, okuza kepipi sigo okepipi ekwawo: Shemaia, Gog, Shimei, Mika, Reaia, Baal naBeera. Omupangeli gwaAssur Tiglat Pileser okwa kwata po Beera, omuwiliki gwezimo, e te mu fala muupika.
5
6
7 Ondjalula yaawiliki yomaludhi mezimo lyaReuben oyo ndjika: Jeiel, Sakaria,
8 naBela yaAzaz yaShema yaJoel. Oludhi nduka olwa kala muAroer moshikandjo shokuumbangalantu sigo oNebo naBaal Meon.
9 Oya li ye na iimuna oyindji moshilongo Gilead, onkee oya lala evi sigo okooha dhombuga ndjoka ya taandela kuuzilo sigo omulonga Eufrat.
10 Muuyuni womukwaniilwa Saul ezimo lyaReuben olya matukile Aahagari, olye ya dhipagele molugodhi, e tali kwata po evi lyawo muuzilo waGilead.
11 Ezimo lyaGad olya kala kuumbangalantu waReuben mevi Baasha sigo uuzilo kuSalka.
12 Joel okwa li omutotipo gwoludhi lwokomeho, naShafam ogwoludhi olutiyali mesimano. Janai naShafat oya li aatotipo yomaludhi muBaasha.
13 Iilyo iikwawo yomezimo ndika oya pamba omaludhi ngaka gaheyali: Mikael, Meshullam, Sheba, Jorai, Jakan, Sia naEber.
14 Oyo oluvalo lwaAbihail yaHuri, ngoka oohekulu ya li ngaashi tashi landula mpaka: Abihail, Huri, Jaroa, Gilead, Mikael, Jeshishai, Jahdo, Bus.
15 Ahi yaAbdiel, omutekulu gwaGuni, okwa li omukuluntu gwomaludhi ngaka.
16 Oya li moshikandjo shaBaasha naGilead, miilando yaankoka nokomaunapelo agehe gaSharon.
17 Mbika ayihe oya nyolelwa mondjalula yomazimo muuyuni waJotam, omukwaniilwa gwaJuda, nopethimbo lyaJeroboam, omukwaniilwa gwaIsrael.
18 Momazimo gaReuben, Gad naManasse kuuzilo omwa li aakwiita 44 760 ya pyokoka nawa okulongitha iikandekitho, omagongamwele nomatati.
19 Oya yi kiita, ya ka matukile Aahagari, omazimo gaJetur, Nafish naNodab.
20 Oyi inekele Kalunga e taye mu kugile ekwatho, Kalunga nokwa yamukula omagalikano gawo e te ya sinditha Aahagari naayehe mboka ya li ya hangana nAahagari.
21 Kaatondi oya kwata ko oongamelo 50 000, oonzi 250 000 nuusino 2 000 e taa kwata oonkwatwa miita 100 000.
22 Oya dhipaga aatondi oyendji, oshoka iita mbika oya li yopahalo lyaKalunga. Oya yi ya ka kale moshikandjo shoka, sigo ya falwa muupika.
23 Ezimo lyaManasse kuuzilo olya li moshikandjo shaBaasha sigo oBaal Hermon, Senir nondundu Hermon, naantu yalyo oyi indjipala noonkondo.
24 Aakuluntu yomaludhi gawo oya li mbaka: Efer, Ishi, Eliel, Asriel, Jeremia, Hodavia naJahdiel. Oya li aakwiita oofule naawiliki aasimani yomaludhi gawo.
25 Ihe aantu inaa dhiginina Kalunga koohekulu. Oye mu etha e taa longele iikalunga yiigwana mbyoka Kalunga e yi tidhile mo moshilongo.
26 Onkee ano Kalunga okwa sikumudha Pul, omupangeli gwaAssur (kokutya Tiglat Pileser), a matukile oshilongo shawo. Okwa kwata po omazimo gaReuben, Gad naManasse kuuzilo e te ga langeke ga kalelele muHalak, Habor naHara nopomulonga Gosan.
1 Levi okwa li e na oyanamati yatatu: Gerson, Kohat naMerari.
2 Kohat okwa li e na oyanamati yane: Amram, Izhar, Hebron naUssiel.
3 Amram okwa li e na oyanamati yaali, Aaron naMoses, nomukadhona gumwe Miriam. Aaron okwa li e na oyanamati yane: Nadab, Abihu, Eleasar naItamar.
4 Oluvalo lwaEleasar okuza kepipi nepipi olwo ngaashi talu landula mpaka: Pinehas, Abishua,
5 Bukki, Ussi,
6 Serahia, Meraiot,
7 Amaria, Ahitub,
8 Sadok, Ahimaaz,
9 Azaria, Johanan,
10 Azaria (oye ngoka a yakula motempeli ndjoka Salomo a tungu muJerusalem),
11 Amaria, Ahitub,
12 Sadok, Shallum,
13 Hilkia, Azaria,
14 Seraia, Jehosadak.
15 Omukwaniilwa Nebukadnezzar okwa kwata po Jehosadak pamwe nAajuda yalwe nAajerusalem mboka Omuwa e ya undulile muupika.
16 Levi okwa li e na oyanamati yatatu: Gerson, Kohat naMerari.
17 Kehe gumwe gwaambaka okwa li e na oyanamati. Gerson okwa vala Libni naShimei;
18 Kohat okwa vala Amram, Izhar, Hebron naUssiel;
19 naMerari okwa vala Mahli naMushi.
20 Omaluvalo gaGerson okuza kepipi nepipi ogo ngaka: Libni, Jahat, Simma,
21 Joa, Iddo, Sera, Jeaterus.
22 Omaluvalo gaKohat okuza kepipi nepipi ogo ngaka: Aminadab, Kora, Assir,
23 Elkana, Abiasaf, Assir,
24 Tahat, Uriel, Ussia, Shaul.
25 Elkana okwa li e na oyanamati yaali, Amasai naAhimot.
26 Omaluvalo gaAhimot okuza kepipi nepipi ogo ngaka: Elkana, Zofai, Nahat,
27 Eliab, Jeroham, Elkana.
28 Samuel okwa li e na oyanamati yaali, osheeli Joel nonkelo Abia.
29 Omaluvalo gaMerari okuza kepipi nepipi ogo ngaka: Mahli, Libni, Shimei, Ussa,
30 Shimea, Haggia, Asaia.
31 Okwa li ku na aalumentu mboka omukwaniilwa David e ya langekele mesiloshimpwiyu lyolwiimbo mehala lyelongelokalunga muJerusalem, oshikethahangano sho she etwa nkoka.
32 Pamalufo oyo ya li aayimbi komeho getsalihangano lyOmuwa, sigo opethimbo ndyoka omukwaniilwa Salomo sho a tungu otempeli.
33 Ompola yomazimo gaamboka ya li ya tonatele iilonga mbika, oyo ndjika: Moludhi lwaKohat: Heman yaJoel okwa li omuwiliki gwongundulwiimbo yotango. Ompola yezimo lye oya za kuJakob, ngaashi tashi landula mpaka; Heman yaJoel yaSamuel
34 yaElkana lyaJeroham yaEliel lyaTooa
35 yaZuf yaElkana lyaMahat gaAmasai
36 gaElkana lyaJoel yaAzaria yaSefania
37 yaTahat yaAssir yaAbiasaf yaKora
38 yaIzhar yaKohat yaLevi yaJakob.
39 Asaf okwa li omuwiliki gwongundulwiimbo ontiyali. Ompola yezimo lye oya za kuLevi, ngaashi tashi landula: Asaf yaBerekia yaShimea
40 shaMikael yaMaaseia gaMalkija
41 gaEtni lyaSera yaAdaia
42 yaEtan lyaSimma lyaShimei
43 shaJahat yaGerson yaLevi.
44 Etan gwomoludhi lwaMerari okwa li omuwiliki gwongundulwiimbo ontintatu. Ompola yezimo lye sigo okuLevi oyo ndji: Etan, Kishi, Abdi, Malluk,
45 Hashabia, Amazia, Hilkia,
46 Amzi, Bani, Shemer,
47 Mahli, Mushi, Merari, Levi.
48 Aalevi ooyakwawo ayehe oya li yu uthilwa iilonga yokuyakula metsalihangano.
49 Aaron noluvalo lwe oya lungunitha iitsininondjambo nomafikilondjambo koshiyambelo. Oya li aasilishimpwiyu yelongelokalunga alihe mEhala lyUuyapukielela noyomayonondjambo ngoka taga dhimitha po oondjo dhAaisraeli kuKalunga. Oya longo ayihe mbika pamalombwelo ga gandjelwe kuMoses, omumati gwaKalunga.
50 Ompola yoluvalo lwaAaron oyo ndjika: Eleasar, Pinehas, Abishua,
51 Bukki, Ussi, Serahia,
52 Meraiot, Amaria, Ahitub,
53 Sadok, Ahimaaz.
54 Iikandjo ya pewa oluvalo lwaAaron lwoludhi lwaKohat oyo mbika. Oya taamba oshitopolwa shotango shevi lya pewa Aalevi.
55 Osha kwatelele mo Hebron moshikandjo shaJuda nomalundu gomaunapelo ge shi kunduka.
56 Ihe omapya nomikunda dhoshilando odha pewa Kaleb kaJefunne.
57 Iilando mbika oya pewa oluvalo lwaAaron: Hebron, oshilando shokwiigamena, Jattir, Libna, Eshtemoa, Hilen, Debir, Ashan naBet Shemesh pamwe nomaunapelo gayo.
58
59
60 Moshikandjo shaBenjamin oya pewa iilando tayi landula, pamwe nomaunapelo gayo: Geba, Alemet naAnatot. Oya pewa iilando omulongo niitatu yokukala mo omaludhi gawo.
61 Moshikandjo shaManasse kuuninginino iilando omulongo oya pewa mo pashihogololitho oshihupe sholudhi lwaKohat, egumbo negumbo.
62 Omagumbo moludhi lwaGerson oga pewa iilando omulongo niitatu miikandjo yaIssaskar, Aser, Naftali naManasse kuuzilo muBaasha.
63 Omagumbo moludhi lwaMerari oga pewa pashihogololitho iilando omulongo niiyali miikandjo yaReuben, Gad naSebulon.
64 Osho Aaisraeli oya pe Aalevi iilando yokukala mo, pamwe nomaunapelo ge yi kunduka.
65 (Iilando mbyoka ya tumbulwa yomiikandjo yaJuda, Simeon naBenjamin, nayo wo oya gandjwa nokuumbilwa oshihogololitho.)
66 Omagumbo gamwe goludhi lwaKohat oga pewa iilando nomaunapelo moshikandjo shaEfraim:
67 Shekem, oshilando shokwiigamena koondundu dhaEfraim, Geser,
68 Jokmeam, Bethoron,
69 Ajalon naGatrimmon.
70 Moshikandjo shaManasse kuuninginino oya pewa iilando Aner naBileam nomaunapelo ge yi kunduka.
71 Omagumbo goludhi lwaGerson oga pewa iilando niinapelo yayo, ngaashi tashi landula mpa. Moshikandjo shaManasse kuuzilo: Golan muBaasha naAshtarot.
72 Moshikandjo shaIssaskar: Kedesh, Daberat,
73 Ramot naAnem.
74 Moshikandjo shaAser: Mashal, Abdon,
75 Hukok naRehob.
76 Moshikandjo shaNaftali: Kedesh muGalilea, Hammon naKiriataim.
77 Omagumbo ga hupu ko goludhi lwaMerari oga pewa iilando nomaunapelo ge yi kunduka, ngaashi tashi landula mpa. Moshikandjo shaSebulon: Rimmono naTabor.
78 Moshikandjo shaReuben, kuuzilo womulonga Jordan handiyaka yaJeriko: Bezer mombuga, Jahsa,
79 Kedemot naMefaat.
80 Moshikandjo shaGad: Ramot muGilead, Mahanaim,
81 Heshbon naJaser.
1 Issaskar okwa li e na oyanamati yane: Tola, Pua, Jashub naShimron.
2 Tola okwa li e na oyanamati yahamano. Oyo Ussi, Refaia, Jeriel, Jahmai, Ibsam naShemuel. Oyo ya li aakuluntu yomagumbo goludhi lwaTola noya li aakwiita oofule. Muuyuni womukwaniilwa David oya li ye thike po 22 600.
3 Ussi okwa li e na eponamati Izrahia. Izrahia okwa li e na oyanamati yane: Mikael, Obadia, Joel naIsshia. Ayehe oya li aawiliki.
4 Oya li ye na aakulukadhi oyendji naanona oyendji, nomaluvalo gawo oga ningi etangakwiita lyaalumentu 36 000.
5 Mondjalula yezimo alihe lyaIssaskar omwa li aalumentu oofule 87 000 mboka ya vulu okuya miita.
6 Benjamin okwa li e na oyanamati yatatu: Bela, Beker naJediael.
7 Bela okwa li e na oyanamati yatano: Ezbon, Ussi, Ussiel, Jerimot naIri. Oya li aakuluntu yomagumbo moludhi ndoka noya li aakwiita ya simana. Omaluvalo gawo oga kwatelele mo aalumentu 22 034 mboka taa vulu okuya miita.
8 Beker okwa li e na oyanamati omugoyi: Semira, Joas, Elieser, Elioenai, Omri, Jeremot, Abia, Anatot, naAlemet.
9 Ondjalula yomaluvalo gawo pamagumbo oya kwatelele mo aalumentu 20 200 mboka taa vulu okuya miita.
10 Jediael okwa li e na eponamati Bilhan. Bilhan okwa li e na oyanamati yaheyali: Jeush, Benjamin, Ehud, Kenaana, Setan, Tarshish naAhishahar.
11 Oya li aakuluntu yomagumbo moludhi ndoka noya li aakwiita ya simana. Omaluvalo gawo oga kwatelele mo aalumentu 17 200 mboka taa vulu okuya miita.
12 Shuppim naHuppim oya li aana yaIr, Hushim aana yaAher.
13 Naftali okwa li e na oyanamati yane: Jahziel, Guni, Jezer naShallum. (Mbaka aana yaBilha.)
14 Ohonda yaManasse Omuaramea oye mu valele oyanamati yaali, Asriel naMakir. Makir okwa vala Gilead.
15 Makir okwa kongele Huppim omukiintu, osho wo Shuppim. Edhina lyamumwayina omukiintu oMaaka. Omuna gwaMakir omumati omutiyali oZelofhad, nokwa li e na oyana aakadhona ayeke.
16 Omukulukadhi gwaMakir Maaka okwa vala aamati yaali mboka e ya luku Peresh naSheresh. Peresh okwa li e na oyanamati yaali, Ulam naRakem.
17 Ulam okwa li e na omwanamati edhina lye Bedan. Nduka oluvalo lwaGilead yaMakir, omutekulu gwaManasse.
18 Omumwayina gwaGilead omukiintu Hammoleket okwa li e na oyanamati yatatu: Ishod, Abieser naMahla.
19 (Shemida okwa li e na oyanamati yane: Ahian, Shekem, Likhi naAniam.)
20 Omaluvalo gaEfraim okuza kepipi nepipi ogo Shuthela, Bered, Tahat, Eleada, Tahat,
21 Sabad, Shuthela. Efraim okwa li e na oyanamati yalwe yaali ontega naShuthela, Ezer naElead, mboka ya dhipagwa, sho ya li taa yugu iimuna yaakalimo muGat.
22 He Efraim okwe ya lili oosa omasiku ogendji, naamwayina oye ya oku mu hupulutha.
23 Nena okwa lalulula nomukadhi e ta ningi omusimba e ta vala omumati. Oye mu luku Beria, oshoka okwa valwa pethimbo lyuudhigu megumbo lyawo.
24 Efraim okwa li e na omwanakadhona edhina lye Sheera. Okwa tungu iilando yopombanda noyopevi Bethoron naUssen Sheera.
25 Efraim okwa li e na wo omwanamati edhina lye Refa, ngoka oluvalo lwe lwa li Reshef, Telah, Tahan,
26 Ladan, Ammihud, Elishama,
27 Nun, Josua.
28 Oshikandjo shoka ya taamba noya kala mo, osha kwatelele mo Betel nomikunda dhe shi kunduka sigo oNaaran kuuzilo nokuGeser kuuninginino nomikunda dhe shi kunduka. Osha kwatelele mo ishewe iilando Shekem naAyya nomikunda dhe yi kunduka.
29 Omaluvalo gaManasse oga li taga pangele iilando Betshan, Taanak, Megiddo naDor nomikunda dhe yi kunduka. Agehe ngaka ogo omahala ga kalwa koluvalo lwaJosef yaJakob.
30 Mpaka ope na oluvalo lwaAser. Okwa li e na oyanamati yane: Imna, Ishva, Ishvi naBeria, nomukadhona Sera.
31 Beria okwa li e na oyanamati yaali, Heber naMalkiel. (Malkiel oye omutotipo gwoshilando Birsait.)
32 Heber okwa li e na oyanamati yatatu: Jaflet, Shomer naHotam, nomukadhona gumwe Shua.
33 Jaflet okwa li e na oyanamati yatatu: Pasak, Bimhal naAshvat.
34 Mumwayina Shomer okwa li e na oyanamati yatatu: Rohga, Jehubba naAram.
35 Mumwayina Hotam okwa li e na oyanamati yane: Zofah, Imna, Shelesh naAmal.
36 Oluvalo lwaSofah olwa li Suah, Harnefer, Shual, Beri, Imra,
37 Bezer, Hod, Shamma, Shilsha, Itran naBeera.
38 Oluvalo lwaJeter olwo Jefunne, Pispa naAra,
39 noluvalo lwaUlla olwo Arah, Hanniel naRizia.
40 Ayehe mbaka omaluvalo gaAser. Oya li aakuluntu yomagumbo, aakwiita ya simana, aawiliki ya pyokoka. Oluvalo lwaAser olwa li lu na aalumentu 26 000 mboka taa vulu okuya miita.
1 Benjamin okwa li e na oyanamati yatano. Paukuluntu wawo oyo Bela, Ashbel, Aharah,
2 Noha naRafa.
3 Oluvalo lwaBela oonduka: Addar, Gera, Abihud,
4 Abishua, Naeman, Ahoa,
5 Gera, Shefufan naHuram.
6 Oluvalo lwaEhud olwo Naeman, Ahija naGera. Oya li aakuluntu yomagumbo ngoka ga li muGeba, ihe oga tidhilwe mo e taga yi ga ka kale muManahat. Gera, ngoka a vala Ussa naAhihud, okwe ya wilike metembu.
7
8 Shaharaim okwa henge po aakadhi yaali, Hushim naBaara. Konima sho a kala moshilongo shaMoab, okwa hokana Hodesh, ngoka e mu valele aamati yaheyali: Jobab, Zibia, Mesha, Malkam,
9
10 Jeuz, Sakeia naMirma. Oyana ayehe oya ningi ooyene yomikunda.
11 Okwa li wo a valelwa aamati yaali kuHushim. Oyo Abitub naElpaal.
12 Elpaal okwa li e na oyanamati yatatu: Eber, Misham naShemed. Shemed oye a tunga po iilando Ono naLod nomikunda dhe yi kunduka.
13 Beria naShema oya li ooyene yomikunda ndhoka dha li moshilando Ajalon noya tidha mo aantu mboka ya kala moshilando Gat.
14 Oluvalo lwaBeria olwa kwatelele mo Ahio, Shashak, Jeremot,
15 Sebadia, Arad, Eder,
16 Mikael, Ishpa naJoha.
17 Oluvalo lwaElpaal olwa kwatelele mo Sebadia, Meshullam, Hiski, Heber,
18 Jishmerai, Islia naJobab.
19 Oluvalo lwaShimei olwa kwatelele mo Jakim, Sikri, Zabdi,
20 Elienai, Zilletai, Eliel,
21 Adaia, Beraia naShimrat.
22 Oluvalo lwaShashak olwa kwatelele mo Ishpan, Eber, Eliel,
23 Abdon, Sikri, Hanan,
24 Hanania, Elam, Antotija,
25 Jifdeia naPenuel.
26 Oluvalo lwaJeroham olwa kwatelele mo Shamsherai, Sheharia, Atalia,
27 Jaareshia, Elia naSikri.
28 Mbaka oya li oohekulu yomagumbo nomaluvalo gawo ngoka ga kala muJerusalem.
29 Jeiel okwa dhike oshilando Gibeon e ta kala mo. Omukulukadhi gwe oMaaka,
30 osheeli she oAbdon. Oyanamati yalwe Sur, Kish, Baal, Ner, Nadab,
31 Gedor, Ahio, Sakaria
32 naMiklot, he yaShimea. Omaluvalo gawo oga kala muJerusalem popepi nomagumbo galwe goludhi lwawo.
33 Ner okwa vala Kish, naKish okwa vala omukwaniilwa Saul. Saul okwa li e na oyanamati yane: Jonatan, Malkishua, Abinadab naEshbaal.
34 Jonatan okwa vala Meribbaal, he yaMika.
35 Mika okwa li e na oyanamati yane: Piton, Melek, Tarea naAhas.
36 Ahas okwa vala Jehoadda, ngoka a vala aamati yatatu: Alemet, Asmavet naSimri. Simri okwa vala Moza.
37 Moza okwa vala Binea, Binea oRafa, Rafa oEleasa naEleasa oAzel.
38 Azel okwa li e na oyanamati yahamano: Asrikam, Bokeru, Ismael, Shearia, Obadia naHanan.
39 Mumwayina gwaAzel, Eshek, okwa li e na oyanamati yatatu: Ulam, Jeush naElifelet.
40 Oyanamati yaUlam oya li aakwiita oofule, aanamatatilela. Okwa li e na oyanamati naatekulu aamati ayehe kumwe ethele nomilongo ntano. Ayehe mbaka ya tumbulwa mpaka, oya li iilyo yezimo lyaBenjamin.
1 Aaisraeli ayehe oya li ya nyolelwa momusholondondo pamazimo gawo, nomayelithilo ngaka oga li ga nyolelwa membo lyaakwaniilwa yaIsrael. Aajuda oya kwatwa po ya falwa kuBabilon omolwokugeelelwa oondjo dhawo.
2 Mongundu yaantu mboka ya shuna tango kaandjawo kiilando yawo omwa li Aaisraeli, aayambi, Aalevi naayakuli motempeli.
3 Aantu yomomazimo gaJuda, gaBenjamin, gaEfraim nogaManasse oya ka kala muJerusalem.
4 Okwa li ku na omagumbo 690 gAajuda mboka ya ka kala muJerusalem. Oluvalo lwaPerez yaJuda olwa li lu na omuwiliki gwalwo Utai waAmmihud, omutekulu gwaOmri. Oohekulu yalwe oyo Imri naBani. Oluvalo lwaShela yaJuda olwa li lu na omuwiliki gwalwo Asaia, ngoka a li omukuluntu gwegumbo lye. Oluvalo lwaSera yaJuda olwa li lu na omuwiliki gwalwo Jeuel.
5
6
7 Iilyo mbika yezimo lyaBenjamin oya kala muJerusalem: Sallu yaMeshullam gwaHodavia yaHassenua Ibneia yaJeroham Ela lyaUssi, omutekulu gwaMikri, Meshullam yaShefatia gwaReuel yaIbnija.
8
9 Okwa li omagumbo 956 gomezimo ndika ga kala moka. Aasamane ayehe ya tomonwa komadhina, oya li ooyene yomikunda.
10 Aayambi taa landula ko, oya kala muJerusalem: Jedaia, Jehoiarib, Jakin Azaria yaHilkia (omukuluntu motempeli), ngoka oohekulu taa kwatelele mo Meshullam, Sadok, Meraiot naAhitub Adaia yaJeroham yaPashhur yaMalkija Masai yaAdiel, ngoka oohekulu taa kwatelele mo Jahsera, Meshullam, Meshillemit naImmer.
11
12
13 Aayambi mboka ya li ooyene yomikunda ayehe kumwe 1 760. Oya li omapenda miilonga ayihe yomotempeli.
14 Aalevi mboka ya kala muJerusalem, oyo mbaka: Shemaia yaHasshub ngoka oohekulu ya kwatelele mo Asrikam naHashabia yoludhi lwaMerari Bakbakkar, Heresh naGalal Mattania yaMika ngoka oohekulu taa kwatelele mo Sikri naAsaf Obadia yaShemaia ngoka oohekulu taa kwatelele mo Galal naJedutun Berekia yaAsa, omutekulu gwaElkana, ngoka a kala moshikandjo moka mu na oshilando Netofa.
15
16
17 Mbaka oya li aatonateli yotempeli muJerusalem: Shallum, Akkub, Talmon naAhiman. Shallum oye a li omuwiliki gwawo.
18 Pethimbo ndiyaka aantu yomaludhi gawo oya li taa tonatele posheelo shokuuzilo haku tiwa Osheelo shomukwaniilwa. Nale oya kala taa tonatele pomaelo goontanda dhAalevi.
19 Shallum yaKore, omutekulu gwaAbiasaf, pamwe nayakwawo yoludhi lwaKora, oya li aasilishimpwiyu yokutonatela osheelo shetsalihangano lyOmuwa, naanaa ngaashi oohekulu ya li taa tonatele ontanda yOmuwa.
20 Pinehas yaEleasar — Omuwa na kale pamwe naye — okwa li nale omukuluntu gwawo.
21 Sakaria yaMeshelemia okwa li wo omutonateli posheelo shetsalihangano lyOmuwa.
22 Aalumentu mboka ya li ya hogololelwa okutonatela piiyelo, oya li 212 ayehe kumwe. Oya li ya tulwa momisholondondo pamikunda dhaandjawo hoka ya kala. Omukwaniilwa David nomuhunganeki Samuel oyo ya langekele oohekulu mesiloshimpwiyu lyiilonga mbika.
23 Oyo pamwe nomaluvalo gawo oya tsikile okutonatela piiyelo yotempeli.
24 Okwa li omweelo gwa taalela ombinga kehe: uumbangalantu, uumbugantu, uuzilo nuuninginino, noshaa ngoka ogwa li gu na omutonateli omukuluntu.
25 Aatonateli mbaka oya li ya thikama maakwanezimo yawo, mboka ya kala momikunda noya li haa ningi omalufo gomasiku gaheyali miilonga yetonatelo.
26 Oondjayi dhaakuluntu yaatonateli oya li Aalevi yane. Oya li wo haa tonatele omala gomotempeli nomaliko ngoka ga pungulilwa mo.
27 Oya kala popepi notempeli, oshoka oya li haa yi tonatele nokweegulula omiyelo ongula kehe.
28 Aalevi yalwe oya li aasilishimpwiyu yiilongitho yomelongelokalunga. Taa yi yalula, sho tayi zi mo, notaye yi yalula, sho tayi ka pungulwa ishewe.
29 Yalwe oya li ya tonatele iilongitho yilwe iiyapuki, uusila womunziya, omaviinu, omagadhi, iitsinino niizimba.
30 Oshimpwiyu shokulunga iizimba osha li kaayambi.
31 Omulevi, edhina lye Mattitia, osheeli shaShallum gwomoludhi lwaKora, okwa li omunashimpwiyu gwomayambo ga kangwa.
32 Aantu yoludhi lwaKohat oya li taa sile oshimpwiyu okuninga iikwiila iiyapuki yomotempeli Esabati kehe.
33 Omagumbo gamwe gAalevi oga li taga sile oshimpwiyu shomaimbilo gomotempeli. Aakuluntu yomagumbo ngaka oya li ya kala momatungo gamwe gomotempeli noya li ya manguluka kiilonga yilwe, oshoka oya kala meyakulo omutenya nuusiku.
34 Aalumentu ya tumbulwa oya li ooyene yomikunda pampola yoohekulu. Oya li aakuluntu ya kala muJerusalem.
35 Jeiel okwa dhike oshilando Gibeon e ta kala mo. Omukulakadhi gwe oMaaka.
36 Osheeli she oAbdon, noyana yalwe oyo Sur, Kish, Baal, Ner, Nadab,
37 Gedor, Ahio, Sakaria naMiklot,
38 he yaShimea. Omaluvalo gawo oga kala muJerusalem popepi nomagumbo galwe goludhi lwawo.
39 Ner ohe yaKish, naKish okwa vala Saul. Saul okwa li e na oyanamati yane: Jonatan, Malkishua, Abinadab naEshbaal.
40 Jonatan okwa valelwa Meribbaal, ngoka a valelwa Mika.
41 Mika okwa li e na oyanamati yane. Oyo Piton, Melek, Tahrea naAhas.
42 Ahas okwa valelwa Jara, ngoka a li e na oyanamati yatatu: Alemet, Asmavet naSimri. Simri okwa valelwa Moza.
43 Moza ohe yaBinea, Binea oyaRefaia, Refaia oyaEleasa naEleasa oyaAzel.
44 Azel okwa li e na oyanamati yahamano: Asrikam, Bokeru, Ismael, Shearia, Obadia naHanan.
1 Aafilisti oya kondjo olugodhi nAaisraeli kondundu Gilboa. Aaisraeli oyendji oya dhipagwa, naamboka ya hupu ko, oya fadhuka po. Mokati kawo omwa li Saul noyanamati.
2 Ihe Aafilisti oye ya endje mo e taa dhipaga aana yaSaul yatatu: Jonatan, Abinadab naMalkishua.
3 Olugodhi olwa li olululululu lwa dhingilila Saul, noye mwene okwa yahwa kiikuti yaatondi e te ehamekwa nayi.
4 Okwa lombwele omumati omuhumbati gwomatati ge a ti: “Pweya mo egongamwele lyoye, u dhipage ndje, opo Aafilisti mbaka aakaanakalunga yaa inomene ndje.” Ihe omumati okwa li a tila oku shi ninga. Nena Saul okwa kutha egongamwele lye mwene e ti iyumbile ko.
5 Omumati sho a mono kutya Saul okwa si, naye wo okwi iyumbile kegongamwele lye mwene e ta si.
6 Osho ngaaka Saul noyana yatatu oya si oshita nuukwaniilwa we wa hulu po.
7 Aaisraeli mboka ya kala molusilu lwaJesreel, sho ya kundana kutya iita oya halakanithwa, naSaul noyana ya si, oya thigi po iilando yawo e taa yi ontuku. Nena Aafilisti oye ya e taye yi lala po.
8 Esiku lya landula olugodhi, Aafilisti sho ye ya ya ka yuge omidhimba, oyi itsu omudhimba gwaSaul nodhoyana dha kangawala kondundu Gilboa.
9 Oya tete ko omutse gwaSaul, ya kutha po omatati ge noye ga tumu naatumwa koshilongo Filistia, ya ka hokololele iimenka naantu yawo onkundana ombwanawa.
10 Oya tula omatati gaSaul motempeli yimwe yawo e taa endjeleleke omutse gwe motempeli yoshikalunga shawo Dagon.
11 Ajabesh muGilead sho ya kundana shoka Aafilisti ya ningile Saul,
12 aalumentu omapenda oya yi ya ka tale ko omudhimba gwaSaul nodhoyana e taye dhi fala kuJabesh. Oye dhi fumvike momwandi noyi idhilike iikulya omasiku gaheyali.
13 Saul okwa si, oshoka okwa li inaa dhiginina Omuwa. Ina vulika kiipango yOmuwa. Okwa kambadhala okupula omayele kaathithi
14 peha lyokupula oondunge kOmuwa. Onkee Omuwa okwe mu dhipaga e ta gandja epangelo lyoshilongo kuDavid yaIsai.
1 Aaisraeli ayehe oye ya kuDavid kuHebron e taa ti kuye: “Otse onyama nombinzi yoye mwene.
2 Monale nokuli manga Saul a li omukwaniilwa gwetu, owa wilike Aaisraeli miita, nOmuwa, Kalunga koye, okwe ku uvanekele kutya ou na okuwilika aantu ye nokuninga omuleli gwawo”.
3 Osho ngaaka aakuluntu ayehe yaIsrael ye ya komukwaniilwa David kuHebron. Okwa hangana nayo ehangano eyapuki, oye mu gwayeke nokwa ningi omukwaniilwa gwaIsrael pauvaneko lyOmuwa lya popiwa kuSamuel.
4 Omukwaniilwa David nAaisraeli ayehe oya yi e taa matukile oshilando Jerusalem. Pethimbo ndiyaka edhina lyasho olya li Jebus, nAayebusi, ooyene yevi aakulu, omo ya kalele moka.
5 Aayebusi oya lombwele David kutya ke na mpo ta vulu okuya moshilando, ihe David okwa kwata po epopilongulu lyawo Sion, nosha ningi “oshilando shaDavid”.
6 David okwa ti: “Omulumentu ngoka ta dhipaga po Omuyebusi gwotango, ota lengwa ondjayi yiita.” Joab, omuna gwaZeruia, okwa wilike eponokelo nokwa ningi ondjayi yiita.
7 David sho a yi e ta kala mepopilongulu ndyoka, olyi ithanwa nduno “oshilando shaDavid”.
8 Okwa tungulula oshilando okuza kuMillo, manga Joab o opaleke ombinga onkwawo yoshilando.
9 Oonkondo dhaDavid odha kolo, oshoka Omuwa Omunankondoawike okwa li pamwe naye.
10 Nguka omusholondondo gwaakwiita oofule yaDavid. Oyo pamwe noshigwana shaIsrael oye mu kwatha okuninga omukwaniilwa, ngaashi Omuwa u uvaneke, noya koleke uukwaniilwa we.
11 Omutango oJashobeam gwomoludhi lwaHakmon, omuwiliki gwaambeyaka yatatu. Negonga lye okwa kondjitha aalumentu omathele gatatu nokwe ya dhipagele molugodhi lumwe.
12 Eleasar lyaDodo gwomoludhi lwaAhoh okwa li omutiyali gwomoofule mbeyaka yatatu.
13 Okwa li pamwe naDavid, sho Aafilisti ya gongalele olugodhi kuPas Dammim. Okwa li mepya lyiishokelya, sho Aaisraeli ya tameke okufadhuka po.
14 Pamwe naantu ye, Eleasar okwa thikama pokati kepya e taa kondjo nAafilisti. Omuwa okwe mu pe esindano enene.
15 Esiku limwe yatatu yomaakwiita aawiliki omilongo ndatu oya yi kemanya hoka David a li popepi nekololo lyaAdullam, manga ongundu yAafilisti ya li ya yunga ontanda molusilu lwaRefaim.
16 Pethimbo ndyoka David okwa li mepopilongulu lyokondundu, nongundu yAafilisti oya adhika ya kwata ko Betlehem.
17 David okwa li u uvite uupongo e ta ti: “Ando pu kale omuntu te etele ndje omeya gokunwa ga za momuthima gwoposheelo shaBetlehem!”
18 Aakwiita mbeyaka oofule yatatu oya taakana mokati kontanda yaAafilisti, oya teke omeya noye ga eta kuDavid. Ihe David ina hala oku ga nwa, okwe ga tile koshipala shOmuwa omayambo,
19 e ta ti: “Itandi vulu oku ga nwa! Onda fa tandi nu ombinzi yaalumentu mboka ya li ya hupula oomwenyo dhawo.” Onkee okwa tindi oku ga nwa. Mbika oyo iilonga yuupenda yaakwiita yatatu oofule.
20 Abisai, mumwayina gwaJoab okwa li omuwiliki gwomapenda omilongo ndatu. Okwa kondjitha aalumentu omathele gatatu negonga lye e te ya dhipaga e ta simana mokati komilongo ndatu.
21 Okwa li ependa lyomilongo ndatu e ta ningi omuwiliki gwawo, ihe ka li a fa yatatu mboka oofule.
22 Benaia yaJehoiada gwokuKabzeel okwa li omukwiita gulwe a simana. Okwa longo iilonga oyindji yuupenda, ngaashi sho a dhipaga aakwiita yaali Aamoabi oofule. Esiku limwe lyolumi okwa ningine momuthima e ta dhipagele mo onime.
23 Okwa dhipaga wo Omuegipiti, omulefule gwomuthika gu vule oometa mbali, a li a homata egonga enenenene. Benaia okwe mu ponokele nonkulundhimbo e ta nakula mo egonga miikaha yOmuegipiti e te mu dhipaga nalyo.
24 Mbiyaka oyo iilonga yuufule yaBenaia, gumwe gwomaapenda omilongo ndatu.
25 Okwa li a simana mokati kawo, ihe ka li a fa yatatu mboka oofule. David okwe mu ningi omukuluntu gwetanga lyaalangeli ye mwene.
26 Mbaka oyo aakwiita ya dhenga mbanda: Asahel mumwayina gwaJoab Elhanan lyaDodo gwomuBetlehem Shammot gwomuHarod Helez gwomuPelet Ira yaIkkesh gwomuTekoa Abieser gwomuAnatot Sibbekai gwomuHusha Ilai gwomuAhoh Maharai gwomuNetofa Heled yaBaana gwomuNetofa Ithai yaRibai gwomuGibea, muBenjamin Benaia gwomuPiraton Hurai gwopomasilu gopuGaash Abiel gwomuBetarba Asmavet gwomuBahurum Eliahaba gwomuShaalbon Hashem gwomuGison Jonatan yaShagee gwomuHarar Ahiam yaSakar gwomuHarar Elifal yaUr Hefer gwomuMekera Ahija gwomuPelon Hezro gwomuKarmel Naarai yaEzbai Joel mumwayina gwaNatan Mibhar yaHagri Zelek gwomuAmmon Naharai omuhumbati gwomatati gaJoab gwomuBeerot Ira naGareb yomuItrite Uria Omuheti Sabad yaAhlai Adina yaShisa (omukuluntu gumwe mezimo lyaReuben nongundu ye mwene yaakwiita omilongo ndatu) Hanan yaMaaka Jehosafat gwomuMitan Ussia gwomuAshtarot Shamma naJeiel, aana yaHotam muAroer Jediael naJoha, aana yaShimri muTiz Eliel gwomuMahava Jeribai naJoshavia, aana yaElnaam Itma Omumoabi Eliel, Obed naJaasiel yomuZoba.
1 David manga a li muZiklag, nkoka a ka holamene omukwaniilwa Saul, puye opwe ya aakwiita aapyokoki naainekelwa,
2 aakwanezimo lyaBenjamin, ndyoka wo ezimo lyaSaul. Oya li haa vulu okuumba iikuti nenge omamanya nomaako agehe gaali, omalulyo nomalumoho.
3 Oya li mewiliko lyondjayi Ahiezer naJoas, aana yaShemaa gwomuGibea. Aakwiita oyo mbaka: Jesiel naPelet, aana yaAsmavet Beraka naJehu yomuAnatot Ishmaia gwomuGibeon, omukwiita ofule nomuwiliki gumwe gwomilongo ndatu Jeremia, Jahasiel, Johanan naJosabad muGedera Elusai, Jerimot, Bealia, Shemaria naShefatia muHarif Elkana, Isshia, Asarel, Joeser naJashobeam gwoludhi lwaKora Joela naSebadia, aana yaJeroham gwomuGedor.
4
5
6
7
8 Ngaka ogo omadhina gaakwiita aapyokoki noofule yomezimo lyaGad mboka yi itula momatanga gaDavid, sho a li mepopilongulu lyokondundu mombuga. Oya li aapyokoki mokulongitha iikandekitho nomagonga, ye na iipala yomagonya ga fa goonime noye na ondapo oto ti oompengu koondundu.
9 Oya li ya tulwa momusholondondo tagu landula: Ezer, Obadia, Eliab, Mishmanna, Jeremia, Attai, Eliel, Johanan, Elsabad, Jeremia naMakbannai.
10
11
12
13
14 Yamwe yomwaambaka yomezimo lyaGad oya li aawiliki yomatanga gaalumentu eyuvi nayamwe oya li aawiliki yomatanga gaalumentu ethele.
15 Momwedhi gwotango gwomumvo gumwe, pethimbo lyefundja lyomulonga Jordan gwa udha omeya sigo oontuni, oya tokola omulonga e taa tidha mo aantu mboka ya kala momalusilu gomulonga, handika nohaandiyaka yagwo.
16 Ongundu yimwe yaalumentu Aabenjamin nAajuda oya piti mo noya yi kuDavid kepopilongulu lye lyokondundu.
17 David okwa yi oku ya tsakaneka e ta ti: “Ngele omwe ya nombili okukwatha ndje, nena otamu taambwa nawa. Ileni kutse! Ihe ngele otamu dhiladhila okugwaaleka ndje, nando inaandi mu ningila nayi, nena Kalunga kootate ne shi tseye ye e mu geele.”
18 Ombepo yaKalunga oye ya muAmasai, ondjayi yaambeyaka omilongo ndatu e ta ti: “David yaIsai, otse aantu yoye! Kala wa nyanyukwa, naakwatheli yoye naa kale aanelago! Kalunga okwa gama kungoye.” David okwe ya taamba nombili e te ya ningi aanashihako yetangakwiita lye.
19 Aakwiita yamwe yomezimo lyaManasse oyi igameke kuDavid, sho a li melondo pamwe nAafilisti, ya kondjithe Saul. Sho shene David ina kwatha Aafilisti, oshoka aakwaniilwa yawo oya li ye mu angala ya dhiladhila kutya ota vulu oku ya gwaaleka kumwene gwe gwonale Saul. Osho ye mu shunitha kuZiklag.
20 Aakwiita Aamanasse mbo ya gama kuDavid, sho a shuna, oyo mbaka: Adna, Josabad, Jediael, Mikael, Josabad, Elihu naZilletai. Mezimo lyaManasse kehe gumwe gwaambaka okwa li omuwiliki gwetanga lyaakwiita eyuvi.
21 Mokuyakula David oya li aanashihako yomatanga ge, oshoka oya li oofule muukwiita. Konima oya ka ninga aanashihako metangakwiita lyAaisraeli.
22 Konyala esiku kehe okwa kala taku ya aantu kuDavid, sigo etangakwiita lye lya ningi lya tilitha ngaashi etanga lyaKalunga.
23 David sho a li muHebron, aakwiita oyendji ya dheuka oya gama komatanga ge noku mu kwathela, ye mu ninge omukwaniilwa peha lyaSaul, ngaashi Omuwa a li u uvaneka. Omiyalu dhawo otadhi landula mpaka: Juda: aalumentu ya homata nawa ye na iikandekitho nomagonga 6 800; Simeon: aalumentu ya dheuka nawa ye li 7 100; Levi: aalumentu 4 600; Aalanduli yaJehoiada moluvalo lwaAaron: aalumentu 3 700; Aakwawo yaSadok, omukwiita omugundjuka gwoshitima: aawiliki 22; Benjamin (ezimo lyaSaul ye mwene): aalumentu 3 000 (Aabenjamin oyendji pethimbo ndiyaka oya li natango ya gama kuSaul); Efraim: aalumentu aanamadhina momaludhi gawo yene 20 800; Manasse kuuninginino: aalumentu aahogololwa ya kwaniileke David ye li 18 000; Issaskar: aawiliki ye li 200 pamwe naawilikwa yawo. (Aawiliki mbaka oya li ya tseya shoka Israel a li e na okuninga nesiku ewanawa lyoku shi gwanitha); Sebulon: aalumentu aavuliki naainekelwa 50 000 yi ilongekidhila olugodhi, ya dheulwa okulongitha omatati niikondjitho yomaludhi agehe; Naftali: aawiliki 1 000 naalumentu 37 000 ya homata iikandekitho nomagonga; Dan: aalumentu ya dheuka ye li 28 600; Aser: aalumentu ya pyokokela olugodhi ye li 40 000; Omazimo gokuuzilo waJordan — Reuben, Gad naManasse kuuzilo: aalumentu 120 000 ye shi okulongitha omatati gomaludhi agehe.
24 Aakwiita mbaka ayehe yi ilongekidhila olugodhi, oya yi kuHebron ya tokola ya ninge David omukwaniilwa gwaIsrael alihe. Aaisraeli ayehe yalwe nayo wo oya li ya ya omuyogumwe.
25 Oya kala omasiku gatatu puDavid, ya dhana oshituthi shiikulya nokunwa shoka ya longekidhilwa kuyakwawo yomoshilongo.
26 Okuza kokule kuumbangalantu, komazimo gaIssaskar, Sebulon naNaftali, aantu oye ya nuusino, oongamelo, omamulutiya noonkutsa dha humbata iikulya — uusila womunziya, oonkwiyu, omandjembele, omaviinu nomagadhi. Oye eta wo oongombe noonzi dhokudhipagwa nokuliwa. Ndika olya li enyanyu moshilongo ashihe.
1 Omukwaniilwa David okwa kundathana naawiliki ayehe, mboka yaalumentu eyuvi naamboka yaalumentu ethele.
2 Nena okwa lombwele Aaisraeli ayehe e ta ti: “Ngele otamu shi pitika nongele olyo ehalo lyOmuwa, Kalunga ketu, natu tumeni kaanashilongo shetu ayehe nokaayambi nokAalevi komikunda dhawo, ya gongale pamwe natse.
3 Nena otatu ka tala oshikethahangano, shoka sha li shaa niwe nasho muuyuni waSaul.”
4 Aantu oya li ya hokwa omadhiladhilo ngoka noye ga zimine.
5 David okwa gongele Aaisraeli ya zi oshilongo ashihe, okuza kongamba yaEgipiti muumbugantu sigo uupitilo waHamat muumbangalantu, opo ya kuthe oshikethahangano kuKiriat Jearim ye shi fale kuJerusalem.
6 David okwa yi nAaisraeli koshilando Baala, kokutya Kiriat-Jearim, moshikandjo shaJuda, ya ka tale ko oshikethahangano shaKalunga shi na edhina lyOmuwa a kuutumba kombanda yaakerubi.
7 Oya kutha oshikethahangano maandjaAbinadab e taye shi tula metemba epe. Ussa naAhio oya hingi etemba,
8 manga David naantu ayehe taa tanta ya mana mo okusimaneka Kalunga. Oyi imbi yo taa hiki iihikomwa — uuharpa, oontunda, oosimbaale nomankuma.
9 Sho ya thiki kolupale lwaKidon, oonani odha lyatakana, naUssa okwa ganeke oshikaha she, a shige oshikethahangano.
10 Ohaluka Omuwa okwa geele Ussa e te mu dhipaga, molwashoka okwa gumu oshikethahangano. Okwa sile montaneho yOmuwa,
11 onkee eha ndyoka lya lukwa Perez Ussa sigo onena ndji. David okwa geye, oshoka Omuwa a geele Ussa mondjahi.
12 Nena David okwa li a tila Kalunga e ta ti: “Otandi vulu ngiini okupitika, oshikethahangano shi ye kungame?”
13 David ine shi fala we kuJerusalem, ihe okwe shi thigi paandjaObed Edom, omvalele yomoshilando Gat.
14 Osha kalele nkoka oomwedhi ndatu, Omuwa nokwa yambeke egumbo lyaObed Edom naashihe e shi na.
1 Omukwaniilwa Hiram gwaTiro okwa tumu aatumwa kuDavid; okwe mu kwatha omiti dhomisendeli naahongi yomamanya naanashihongelo, ye mu tungile ongulumbala.
2 Osho ngaaka David okwa dhimbulula kutya Omuwa okwe mu ningi omukwaniilwa gwaIsrael nokwa koleke uukwaniilwa we omolwoshigwana she Israel.
3 MuJerusalem David okwa hokanene mo aakulukadhi oyendji nokwa li e na oyana aamati naakadhona oyendji.
4 Mboka e ya valelwa muJerusalem, oyo Shammua, Shobab, Natan, Salomo,
5 Ibhar, Elishua, Elpelet,
6 Nogah, Nefeg, Jafia,
7 Elishama, Beeliada naElifelet.
8 Aafilisti sho ya kundana kutya David a ningi omukwaniilwa gwaIsrael alihe, etangakwiita lyawo olya piti mo, ye ke mu kwate po. David sho e shi uvu, okwe ke ya tsakaneka.
9 Aafilisti oya thiki polusilu lwaRafaim e taa tameke okuyuga.
10 David okwa pula Kalunga a ti: “Nandi matukile Aafilisti? Oto pe ndje esindano?” Omuwa okwa yamukula a ti: “Eeno, ya matukila! Otandi ku pe esindano!”
11 Osho ngaaka David okwe ya ponokele puBaal-Perazim e te ya sindi. Okwa ti. “Kalunga okwa longitha ndje, ndi panukile aatondi yandje nda fa omeya gefundja.” Okuza kesiku ndiyaka epandja ndyoka olya lukwa Baal-Perazim.
12 Aafilisti sho ya yi ontuku, oya thigi po iimenka yawo, naDavid okwa gandja elaka, yi fikwe po.
13 Nanziya Aafilisti oya galukile kolusilu e taa tameke oku lu yuga ishewe.
14 Natango lumwe David okwa pula Kalunga, ngoka e mu yamukula a ti: “Ino ya matukila okuziilila mpaka, ihe ya kunduka, u ya homone to ziilile kombinga yilwe, popepi nomiti dhomitaku.
15 Shampa wa uvu iikukulo yoompadhi momumbolongondjo gwomitaku, nena ya ponokela, oshoka otandi ka katuka ndi li komeho goye, ndi dhenge etangakwiita lyAafilisti.”
16 David okwa ningi, ngaashi Omuwa e mu lombwele, e ta tidha Aafilisti okuza kuGibeon ndongo ondjila ayihe sigo okuGeser.
17 Esimano lyaDavid olya taandele akuhe, nOmuwa okwa tilithitha David kiigwana ayihe.
1 David okwi itungile egumbo lye mwene moshilando shaDavid. Okwa longekidhile wo oshikethahangano shaKalunga eha e te shi dhikile etsali.
2 Nena okwa ti: “Aalevi ayeke ye na okuhumbata oshikethahangano, oshoka oyo ayeke ya hogololwa kOmuwa oku shi humbata noku mu longela sigo aluhe”.
3 David okwa hiya Aaisraeli ayehe, ye ye kuJerusalem, opo ya ka fale oshikethahangano pehala mpoka e shi longekidhila.
4 Okwi ithana oluvalo lwaAaron nAalevi.
5 KAalevi yoludhi lwaKohat okwa zi Uriel, omukuluntu gwoludhi lwe lwaakwazimo 120;
6 koludhi lwaMerari okwa zi Asaia, omukuluntu gwaalumentu 220;
7 koludhi lwaGerson oJoel, omukuluntu gwaalumentu 130;
8 koludhi lwaElisafan oShemaia, omukuluntu gwaalumentu 200;
9 koludhi lwaHebron oEliel, omukuluntu gwaalumentu 80;
10 nokoludhi lwaUssiel oAminadab, omukuluntu gwaalumentu 112.
11 David okwa hiya aayambi Sadok naAbiatar nAalevi yahamano: Uriel, Asaia, Joel, Shemaia, Eliel naAminadab.
12 Okwa ti kAalevi: “One aawiliki yoludhi lwAalevi. Iyapuleni pamwe nAalevi aakweni, opo mu ete oshikethahangano shOmuwa, Kalunga kaIsrael, pehala ndyoka nde shi li longekidhila.
13 Oshoka ne kamwa li ko tango, mu shi humbate, Omuwa, Kalunga ketu, okwe tu geele, oshoka inatu mu simaneka, ngaashi twa li tu na oku shi ninga.”
14 Nena aayambi nAalevi oyi iyapula, opo ya ka lundulule ko oshikethahangano shOmuwa, Kalunga kaIsrael.
15 Aalevi oye shi humbata komitenge komapepe gawo, ngaashi Omuwa a lombwelele Moses.
16 David okwa lombwele aawiliki yAalevi, ya hogolole mokati kAalevi mboka taa imbi omahambelelondjimbo naamboka taa hiki uuharpa, iiketala noosimbaale.
17 Momaludhi gaayimbi oya hogolola aalumentu mbaka ya hike oosimbaale dhiikushu: Heman yaJoel nomukwazimo lye Asaf yaBerekia naEtan lyaKushaia gwomoludhi lwaMerari. Aalevi mbaka oya hogololwa oku ya yakula taa hiki uuharpa womawi gopombanda: Sakaria, Jaasiel, Shemiramot, Jehiel, Unni, Eliab, Maaseia naBenaia. Mokuhika uuharpa womawi gopevi oya hogolola Aalevi mbaka: Mattitia, Elifelehu Mikneia, Azazia naalangeli yotempeli Obed Edom naJeiel.
18
19
20
21
22 Kenania sho a li onkulungu yokuhika, okwa hogololwa omukuluntu gwaahiki Aalevi.
23 Berekia naElkana pamwe naObed Edom naJehia oya hogololwa aalangeli yoshikethahangano. Aayambi Shebania, Josafat, Netanel, Amasai, Sakaria, Benaia naElieser oya hogololelwa okuhika omankuma komeho goshikethahangano.
24
25 Omukwaniilwa David, aakuluntu yaIsrael noondjayi dhiita oya yi kaandjaObed Edom, ya ka tale ko oshikethahangano, noya dhana oshituthi oshinene.
26 Oya yamba oongombe oontsezi heyali noonzi oontsezi heyali, opo ya kale yi itula kutya Kalunga a kwathe Aalevi mboka ya humbata oshikethahangano.
27 David okwa li a zala elwaakani lyoliina ombwanawa, nosho wo aahiki yuuhumba, omuwiliki gwawo Kenania nAalevi mboka ya humbata oshikethahangano. David okwa li a zala omapepenguwo.
28 Aaisraeli ayehe oya thindikile oshikethahangano kuJerusalem taa ligola, taa kugilile kenyanyu yo taa hiki omankuma, oohiya, iiyaha nuuharpa.
29 Oshikethahangano sho sha thiki moshilando, Mikal yaSaul okwa talele mekende e ta mono omukwaniilwa David ta tanta ye ta nuka kenyanyu, e te mu dhini.
1 Oya fala oshikethahangano meni lyetsali ndyoka lye shi tungilwa kuDavid. Noya yamba omafikilondjambo nomakwatathanondjambo kuKalunga.
2 David sho a zimbuka okuyamba oondjambo, okwa yambeke oshigwana medhina lyOmuwa
3 e te ya palutha ayehe. Okwa pe omulumentu nomukiintu kehe muIsrael oshikwiila, ontumba yonyama ya yothwa noonganye dhomandjembele.
4 David okwa langeke Aalevi yamwe, ya wilike elongelokalunga lyokusimaneka Omuwa, Kalunga kaIsrael, komeho goshikethahangano taa imbi noku mu hambelela.
5 Asaf okwa langekwa muuwiliki yo naSakaria, omuyakuli gwe. Jeiel, Shemiramot, Jehiel, Mattitia, Eliab, Benaia, Obed Edom naJeiel oya li aahiki yuuharpa. Asaf okwa li omukwelengendjithi gwoosimbaale.
6 Naayambi yaali, Benaia naJahasiel, oya li ye na okuhika omankuma ethimbo alihe komeho goshikethahangano.
7 Esiku ndyoka olya li lyotango, David sho a gandja kuAsaf pamwe nAalevi ooyakwawo oshimpwiyu shokwiimbila Omuwa omahambelelondjimbo.
8 Hambeleleni Omuwa, uvitheni uunene we; lombweleni iigwana shoka a longo.
9 Imbileni Omuwa omahambelelondjimbo; hokololeni iilongankumwe e yi longo.
10 Nyanyukweni, oshoka tseni oye; ayehe mboka haye mu simaneke, naa nyanyukwe!
11 Kongeni ekwatho kOmuwa, ne mu mu simaneke aluheluhe.
12 Ne oluvalo lwaJakob, omupiya gwaKalunga, oluvalo lwaIsrael, ne mboka mwa hogololwa kuKalunga, dhimbulukweni iikumithalonga mbyoka Kalunga e yi longo nomapangulo ngoka a gandja.
13
14 Omuwa oye Kalunga ketu; iipango ye oyuuyuni auhe.
15 Inamu dhimbwa ehangano lyaKalunga, ndyoka a dhike sigo aluhe,
16 ehangano e li hangana naAbraham, euvaneko e li uvanekele Isak.
17 Omuwa okwa hangana naJakob, naIsrael li kale lyaaluhe.
18 Okwa ti: “Otii ku pe evi lyaKaanan, otali ka ninga eliko lyoye.”
19 Aantu yaKalunga oya li aashona momwaalu, aakwiilongo moshilongo shaKaanan.
20 Oye endagula oshilongo noshilongo, okuza koshitunda noshitunda.
21 Ihe Kalunga ine etha nando ogumwe, e ya hepeke; moku ya gamena okwa londodha aawa:
22 “Inamu alula aapiya yandje aahogololwa, inamu guma aahunganeki yandje.”
23 Imbileni Omuwa, uuyuni auhe! Hokololeni esiku kehe elaka etoye nokutya okwe tu hupitha.
24 Uvithileni iigwana esimano lye, iilonga yoonkondo okiigwana ayihe.
25 Omuwa oye omunene nomusimanekwa pombanda; oye omutilithi e vule ookalunga ayehe.
26 Iikalunga yiigwana ayihe yilwe oyo iimenka yowala, ihe Omuwa okwa shiti omagulu.
27 Eadhimo nesimano olye mu kunduka, oonkondo nenyanyu olyu udha otempeli ye.
28 Hambeleleni Omuwa, ne aantu amuhe; kombanda yevi; tangeni eadhimo noonkondo dhe.
29 Hambeleleni edhina lyOmuwa lyeadhimo, eteni omayambo ne mu ye motempeli ye. Isizimikeni koshipala shOmuyapuki, nge ta holoka;
30 evi alihe nali kakame koshipala she! Evi olya dhikika lyo itali inyenganyenga.
31 Nyanyukweni, ne evi negulu! Hokololeleni iigwana kutya Omuwa omukwaniilwa.
32 Efuta, ndunduma, niishitwa ayihe yi li mungoye! Omalundu ligoleni, naashihe shi li mune!
33 Omiti dhomokuti otadhi ka kugilila kenyanyu, uuna Omuwa te ya, okupangela uuyuni.
34 Hambeleleni Omuwa, oshoka oye omwaanawa; ohole ye oyaaluhe.
35 Mu lombweleni mu tye: “Tu hupitha, Kalunga Omuhupithi gwetu; tu gongela pamwe, tu hupitha kiigwana, opo tu pandule nokusimaneka edhina lyoye eyapuki.”
36 Hambeleleni Omuwa, Kalunga kaIsrael! Mu simanekeni nena nosigo aluhe! Nena aantu ayehe oya ti: “Amen,” noya simaneke Omuwa.
37 Omukwaniilwa David okwa langeke Asaf nAalevi aakwawo okuninga kehe esiku elongelokalunga pehala mpoka pwa pungulwa oshikethahangano.
38 Obed Edom lyaJedutun naalumentu omilongo hamano nayahetatu yoludhi lwe oya li aayakuli yawo. Hosa naObed-Edom oya li miilonga yokutonatela omiyelo.
39 Omuyambi Sadok naayambi ooyakwawo oya li mesiloshimpwiyu lyokusimaneka Omuwa pehala lyelongelokalunga muGibeon.
40 Ongula nongulohi kehe oya li ye na okuyamba omidhidhindjambo, ye dhi lungunithile koshiyambelo, ngaashi mwa shangwa mompango ndjoka Omuwa e yi gandja kuIsrael.
41 Oya li pamwe naHeman naJedutun nayalwe mboka ya li ya hogololelwa okwiimba nokuhambelela Omuwa omolwohole ye yaaluhe.
42 Heman naJedutun oya tonatele wo omankuma niiyaha niihikomwa yilwe mbyoka ya li hayi hikwa, uuna omahambelelondjimbo ga li taga imbwa. Ondhikwa yoludhi lwaJedutun oya li aalangeli yopiiyelo.
43 Nena shaa ngoka okwa yi kaandjawo naDavid okwa yi kegumbo, a kale ethimbo pamwe naangandjawo.
1 Omukwaniilwa David okwa kala muuwa we. Esiku limwe okwa tumu komuhunganeki Natan e ye kuye e ta ti kuye: “Ondi li megumbo lya tungika nomisedeli, ihe oshikethahangano shOmuwa osha pungulwa metsali!”
2 Natan okwa yamukula a ti: “Ninga shoka wa dhiladhila, oshoka Kalunga oku ku na.”
3 Ihe muusiku tuu mboka Kalunga okwa ti kuNatan:
4 “Inda, u ka lombwele omuntu gwandje David to ti: ‘Hangoye nguka to tungile ndje otempeli, ndi kale mo.
5 Okuza kethimbo ndiyaka nda hupitha Aaisraeli muEgipiti sigo ongashingeyi, ine kala motempeli; aluhe onda kala momatsali ga dhilukithilwa kehala nehala.
6 Moondjenda dhandje adhihe pamwe nAaisraeli inandi pula nando ogumwe gwomaawiliki mboka nda langeke kutya omolwashike inaa tungila ndje otempeli yomisedeli.’
7 “Ano ka lombwele omuntu gwandje David kutya ngame Omuwa Omunankondoawike ote ti kuye: ‘Onde ku kutha kuusita woonzi momalundu nonde ku ningi omuleli gwaantu yandje Aaisraeli.
8 Onda kala nangoye shaa nkoka wa yile nonda sindi aatondi yoye ayehe mondjila yoye. Otii ke ku ninga omuntu omunene wa fa aawiliki aanenenene muuyuni.
9 Onda hogololele aantu yandje Aaisraeli ehala moka nde ya langeke mo, moka taa kala yo itaa piyaganekwa we. Hela ye ya mevi ndika, oya matukilwa kaageyentu, ihe itashi ka ningwa we. Otandi uvaneke okusinda aatondi yoye ayehe noku ku pa oluvalo.
10
11 Nge wa si e to fumvikwa poohokulu, otandi ka kwaniileka gumwe gwomaamwoyemati nota kala e na uukwaniilwa wa kola.
12 Oye ta ka tungila ndje otempeli notii ka sila ezimo lye oshimpwiyu, li kale koshipundi shuukwaniilwa sigo aluhe.
13 Otii ka ninga he noye ta ningi omumwandje. Itandi ke mu thiga po, ngaashi nda ningi Saul, ngoka nde mu shundula, opo u ninge omukwaniilwa.
14 Otandi mu pe uusita waantu yandje moshilongo shandje sigo aluhe. Ezimo lye itali hulu po.’ ”
15 Natan okwa lombwele David ashihe shoka Kalunga e mu hololele.
16 Nena omukwaniilwa David okwa yi metsalihangano, i inyongamene pevi e ta galikana ta ti: “Omuwa Omupangeliawike, inandi gwanena ashihe shoka wa ningile ndje nezimo lyandje sigo onena.
17 Ihe ngashingeyi oto ningile ndje oshindji shi vule shonale; owa uvaneke omauvaneko taga popi oluvalo lwandje momimvo dhokomeho. Omuwa Kalunga, oto ningi ndje nda fa omunenentu.
18 Ote vulu we okutya shike kungoye! Nando owa tseya ndje nawa, oto simaneke ndje, omuntu gwoye.
19 Shika osha li ehalo lyoye nelalakano lyoye, u shi ningile ndje ngoye u ulukile ndje uunene wandje wokonakuyiwa.
20 Omuwa, kape na ngoka e ku fa; otwa tseya aluhe kutya ongoye awike Kalunga.
21 Kaku na shigwana shilwe kombanda yevi sha fa Israel, shoka wa hupitha muupika, shi ninge oshigwana shoye mwene. Owe shi ningile iinima iinene niikumithi nowa taandelitha esimano lyoye nuuyuni auhe. Owa hupitha aantu yoye muEgipiti e to tidha mo iigwana yilwe mondjila yaantu yoye.
22 Owa ningi Aaisraeli aantu yoye mwene sigo aluhe, nangoye, Omuwa, wa ningi Kalunga kawo.
23 “Nongashingeyi, Omuwa Kalunga, gwanitha aluhe euvaneko we li uvanekele ndje noluvalo lwandje, u ninge shoka wa popi.
24 Esimano lyoye otali ningi enene, naantu otaa ka tya aluhe: ‘Omuwa Omunankondoawike oye Kalunga kaIsrael.’ Ongoye noto dhiginine ezimo lyandje sigo aluhe.
25 Ondi na omukumo okugalikana egalikano ndika, Kalunga kandje, oshoka wa hololele ndje ayihe mbika, ngame omuntu gwoye, nowa lombwele ndje kutya oluvalo lwandje oto ke lu ninga olukwaniilwa.
26 Omuwa, ongoye Kalunga nowa uvanekele ndje euvaneko ndika ekumithi.
27 Otandi ku galikana, u yambeke oluvalo lwandje, opo lu nyanyukilwe okukala mesilohenda lyoye. Ngoye, Omuwa, owe lu yambeke, neyambeko lyoye otali ka kala kombanda yalwo aluhe sigo aluhe.”
1 Konima yaambika omukwaniilwa David okwa matukile ishewe Aafilisti, okwe ya dhenge e ta hulitha po epangelo lyawo lyokulela oshilando Gat nomikunda dhe shi kunduka.
2 Okwa dhenge wo Aamoabi, mboka ya ningi aapiya ye nohaye mu fendelele.
3 Nena David okwa matukile Hadadeser, omukwaniilwa gwaZoba, ombinga yimwe yaSiria. Shika osha ningwa popepi noshikandjo shaHamat, oshoka Hadadeser okwa li mondjila ta ka koleka epangelo lye miitopolwa mbyoka mpoka omulonga Eufrat gwa tameka.
4 David okwa kwata po eyuvi lyomomatembakwiita ge, aakawilinkambe omayuvi gaheyali, naakwiita yokolupadhi omayuvi omilongo mbali. Okwa hupitha ko uukambe wa gwana omatembakwiita ethele e ta lemaneke auhe ulwe.
5 Aasiria yokuDamaskus sho ya tumu etangakwiita lyokukwatha omukwaniilwa Hadadeser, David okwe li ponokele e ta dhipaga aalumentu omayuvi omilongo mbali nagaali.
6 Nena okwa yungu oontanda dhuukwiita koshilongo shawo, noya ningi aapiya ye haye mu fendelele oompale. Omuwa okwa ningi David omusindani kehe nkoka a yile ko.
7 David okwa hakana ko iikandekitho yoshingoli ya li hayi humbatwa kaambala yaHadadeser e te yi fala kuJerusalem.
8 Okwa yugu wo iikushu oyindji kuTibhat naKun, iilando hayi lelwa kuHadadeser. (Konima Salomo okwa longitha iikushu mbika, yi ninge ondama yoshikushu, oongundhi niilongitho yoshikushu yomotempeli.)
9 Omukwaniilwa Toi gwokuHamat okwa kundana kutya David a dhenge etangakwiita alihe lyaHadadeser.
10 Toi okwa tumu omwana Joram, a kunde omukwaniilwa David noku mu halela elago molwesindano lye, sho a sindi Hadadeser, oshoka Hadadeser okwa adhika a kondjitha Toi olule. Joram okwa faalele David omulongelo gwoshingoli, oshisiliveli noshikushu.
11 Omukwaniilwa David okwe yi yoololele elongelokalunga pamwe niisiliveli niingoli mbyoka a yugu kiigwana mbyoka a sindi: Edom, Moab, Ammon, Filistia naAmalek.
12 Abisai, ngoka omuna gwanekulu Zeruia, okwa dhenge Aaedom mEkango lyomongwa e ta dhipaga po omayuvi omulongo nagahetatu yomuyo.
13 Okwa yungu oontanda dhuukwiita muEdom alihe, naantu yaankoka oya ningi aapiya yomukwaniilwa David. Omuwa okwa sinditha David shaa nkoka a yile ko.
14 David okwa lele Israel alihe nokwa kala a kotoka, aantu ye ya ningwe nawa noya kalwe nayo nuuyuuki.
15 Joab, mumwayina gwaAbisai, okwa li ondjayi yaakwiita; Jehosafat yaAhilud okwa li amushangandjayi;
16 Sadok yaAhitub naAhimelek yaAbiatar oya li aayambi; Seraia okwa li amushangampangu;
17 Benaia yaJehoiada okwa li omukuluntu gwaalangeli yaDavid, naana yaDavid oya kala ye na eha lya simana meyakulo lye
1 Konima yaambika omukwaniilwa gwAayammoni Nahash okwa si, nomwana Hanun okwa ningi omukwaniilwa.
2 Omukwaniilwa David okwa ti: “Onda hala okuninga nawa Hanun, ngaashi he Nahash a ningile ndje.” Onkee David a tumu aatumwa, a holole olukeno lwe. Aatumwa sho ya thiki kuAmmon, ya hupuluthe Hanun,
3 aawiliki Aayammoni oya ti komukwaniilwa: “Oto dhiladhila kutya David okwa tumu aatumwa mbaka mokusimaneka ho, e ku hololele olukeno lwe? Hasho nando! Okwe ya tumu huka oondaadhi, dhi shilile oshilongo, opo e shi sinde!”
4 Hanun okwa kwatitha aatumwa yaDavid e te ya kululitha omapalu koombenzi nokutetitha oonguwo dhawo poombwetelo e te ya shunitha.
5 Oya li ya sa ohoni okushuna kaandjawo. David sho u uvu shoka sha ningwa po, okwe ya tumine elaka, ya kale muJeriko yo yaa ze mo, sigo oombenzi dhawo dha koko ishewe.
6 Omukwaniilwa Hanun nAayammoni sho ya dhimbulula kutya oya geyitha nayi David, oya futu oshisiliveli shondjundo yoograma 34,000 opo ya hehele omatembakwiita naanamatembakwiita muMesopotamia shokuumbangalantu muAram-Maaka nomuZoba.
7 Omatembakwiita omayuvi omilongo ndatu nagaali ngoka ya hehela netangakwiita lyomukwaniilwa gwaMaaka olye ya e tali yungu ontanda popepi naMedeba. Aayammoni oye ya wo ya zi kiilando yawo noya kala ya langela komauta.
8 David sho u uvu shoka tashi ningwa po, okwa tumu Joab netangakwiita alihe.
9 Aayammoni oya pupumuka ko e taa yungu ontanda ya langela komauta pompitilo yoshilandopangelo shawo Rabba, naakwaniilwa mboka ye ya oku ya kwatha, oya li melundu.
10 Joab okwa mono kutya omatanga gaatondi otaga vulu oku mu matukila taga zi komeho nokonima. Omolwasho a hogolola aakwiitalela Aaisraeli nokwe ya langeke ya taalela Aasiria.
11 Oshihupe shetangakwiita lye okwe shi tula mewiliko lyamumwayina Abisai, ngoka e ya tula mehala ya taalela Aayammoni.
12 Joab okwa ti kuye: “Ngele wa mono Aasiria taa gwililile ndje po, ila u kwathe ndje, nongele Aayammoni taa ku gwililile po, otandi ya ndi ku kwathe.
13 Kaleni mu na omukumo ne mwi ikolelela! Natu kondjeleni aantu yetu oshilumentu nomolwiilando yaKalunga ketu. Ehalo lyOmuwa nali gwanithwe!”
14 Joab naantu ye oya humu ko, ya ka homone, nAasiria oya fadhuka po.
15 Aayammoni sho ya mono Aasiria taa yi ontuku, oya fadhuka po Abisai e taa shuna moshilando. Nena Joab okwa galuka kolugodhi nAayammoni e ta shuna kuJerusalem.
16 Aasiria oya dhimbulula kutya oya dhengwa kAaisraeli, onkee oya ka hiya omatanga gokiilongo yaSiria kombinga yokuuzilo womulonga Eufrat e taye ga tula mewiliko lyondjayi Shobak, ondjayi yetangakwiita lyomukwaniilwa gwaZoba Hadadeser.
17 David sho e shi uvu, okwa gongele omatanga gAaisraeli nokwa tokola omulonga Jordan e te ga tula ga taalela Aasiria. Olugodhi olwa tameke,
18 nAaisraeli oya tidha po etangakwiita lyAasiria. David naantu ye oya dhipaga aahingi yomatembakwiita Aasiria omayuvi gaheyali naakwiita yokolupadhi omayuvi omilongo ne. Oya dhipaga wo ondjayi yiita yAasiria Shobak.
19 Aakwaniilwa mboka ya li mepangelo lyaHadadeser, sho ya dhimbulula kutya oya dhengwa kuIsrael, oya panga ombili naDavid e taa ningi aapangelwa ye. Aasiria inaa hala we nando olumwe okukwatha Aayammoni.
1 Oshitemamvula sha landula ko, pethimbomumvo aakwaniilwa haa hingi iita, Joab okwa pititha mo etangakwiita a matukile oshilongo shaAmmon, ihe omukwaniilwa David okwa thigala muJerusalem. Oya kondeke oshilando Rabba, ye shi matukile e taye shi hanagula po.
2 Oshimenka shAayammoni, edhina lyasho Molek, osha li shi na oshishani shoshitalendi shimwe. Musho omwa li okawe kondilo. David okwe shi kutha po e te shi zala komutse gwe. Okwa yugulula omaliko ogendjigendji moshilando.
3 Okwa kutha mo aantu yomoshilando e te ya tula miilonga yiisaaha, yoombike noyomakuya. Aantu ayehe yomomikunda dhilwe dhAayammoni okwe ya ningile sha faathana. Oye nokwa galukile naantu ye kuJerusalem.
4 Konima yethimbo iita oya tukuka ishewe pokati kAafilisti nAaisraeli puGeser. Shika osha ningwa, sho Sibbekai gwomuHusha a dhipaga omulefule edhina lye Sippai, nAafilisti oya sindika.
5 Opwa li ishewe olugodhi olukwawo nAafilisti, naElhanan lyaJair a dhipaga Lahmi, mumwayina gwaGoliat gwomuGat, ngoka a li e na egonga li na oshikwatelo shi thike pondisimbumu.
6 Okwa li ishewe olugodhi olukwawo muGat, moka mwa li omulefule e na ominwe oohamano kiikaha nokoompadhi. Oye a li oluvalo lwaalefule yonale.
7 Okwa sheke Aaisraeli, naJonatan, omuna gwamumwayina gwaDavid Shamma, okwe mu dhipaga.
8 Mbaka yatatu ya dhipagwa kuDavid naantu ye, oya li oluvalo lwaalefule yokuGat.
1 Satana okwa halele, a tule Aaisraeli momupya, nokwa tokolitha David, a yalulithe oshigwana.
2 David okwa lombwele Joab nomalenga omakwawo ta ti: “Indeni naIsrael alihe okuza kooha dhoshilongo sigo okooha oonkwawo, ne mu yalule aantu. Onda hala okutseya mpoka ye thike.”
3 Joab okwa yamukula a ti: “Omuwa na indjipaleke Aaisraeli lwethele ye vulithe pumboka ye li po ngashingeyi! Nkeyama, ayehe aantu yoye ndishi. Omolwashike wa hala okulonga shika, u yonithe oshigwana ashihe?”
4 Ihe omukwaniilwa okwe mu vulikitha nelombwelo lye. Joab okwa yi te endagula noshilongo ashihe shaIsrael e ta galukile kuJerusalem.
5 Okwe eta komukwaniilwa David omwaalu aguhe kumwe gwaalumentu ya gwana okuhinga iita: 1 100 000 muIsrael na 470 000 muJuda.
6 Molwashoka Joab okwa li u uvite nayi molwelaka lyomukwaniilwa, ina yalula we omazimo gaLevi nogaBenjamin.
7 Kalunga ka li a hokwa shoka sha ningwa, onkee a geele Israel.
8 David okwa ti kuKalunga: “Onda yono nayi kungoye, sho nda ningi ngeyi! Kwatha ndje u dhimine ndje po. Onda ningi uugoya!”
9 Nena Omuwa okwa ti kuGad, omuhunganeki gwaDavid:
10 “Inda, u ka lombwele David kutya otandi mu pe oompito ndatu, a hogolole po yimwe. Otandi ka gwanitha ndjoka ta hogolola.”
11 Gad okwa yi kuDavid e te mu hokololele shoka Omuwa a ti e ta pula: “Oshike tashi kala po?
12 Omimvo ndatu dhondjala yekomba? Nenge oomwedhi ndatu hamu yaayaa ontuku aatondi yeni? Nenge omasiku gatatu moka Omuwa te mu ponokele negongamwele lye nota tumu elega moshilongo sheni ta longitha omuyengeli gwe mokweetela muIsrael eso? Tokola, opo ndi fale eyamukulo kOmuwa.”
13 David okwa yamukula Gad a ti: “Ngame ondi li muudhigu uunene! Ihe ine hala ndi geelwe kaantu. Omuwa oye mwene ne tu geele, oshoka oye omunahenda.”
14 Osho ngaaka Omuwa okwa tumu elega mAaisraeli, nomayuvi omilongo heyali gomuyo oya si.
15 Omuwa okwa tumu omuyengeli, a hanagule po Jerusalem, ihe okwa geyuluka e ta ti komuyengeli: “Opuwo nduno! Sha gwana!” Omuyengeli okwa li a thikama polupale lwaArauna Omuyebusi.
16 David okwa mono omuyengeli a thikama mewangandjo a yelutha egongamwele moshikaha she, opo a hanagule po Jerusalem. Nena David naakuluntu yoshigwana — ayehe mboka oya li ya zala omahahi — oyi isizimike ya tsa iipala yawo mevi.
17 David okwa galikana a ti: “Kalunga, ongame ngoka nda yono. Ongame nda gandja elaka, aantu ya yalulwe. Aathigona mbano oya ningi shike? Omuwa, Kalunga kandje, geela ndje negumbo lyandje nou hupithe aantu yoye”.
18 Omuyengeli gwOmuwa okwa lombwele Gad, a ka lombwele David, a ka tungile Omuwa oshiyambelo polupale lwaArauna.
19 David okwa vulika kelaka lyOmuwa e ta yi ko, ngaashi Gad e mu lombwele.
20 Arauna noyanamati yane oya li taa yungula iilya polupale. Sho ya mono omuyengeli, aamati oya fadhuka po noya holama.
21 Arauna sho a mono omukwaniilwa David ta hedha ko, okwa zi po polupale e ti isizimike a tsa oshipala she mevi.
22 David okwa ti kuye: “Kwatha ndje ndi lande po olupale lwoye, opo ndi tungile po Omuwa oshiyambelo, elega li kodhe. Otandi ku pe ofuto ya gwana po.”
23 Arauna okwa ti: “Nkeyama, lu kutha po, u ninge shoka wa hala. Oonani odho ndhika dhokulungunithilwa omayambo koshiyambelo, niiyungulitho oyo mbika, yi longitha iitemitho, niilya yi ninge omayambo. Ayihe otandi yi gandja kungoye.”
24 Ihe omukwaniilwa okwa yamukula a ti: “Aawe, otandi landa lela. Itandi gandja omayambo kOmuwa shoka shoye, shoka inaashi pula ndje sha.”
25 Okwa futu Arauna molwolupale lwe iimaliwa yoshingoli omathele gahamano.
26 Okwa tungile po Omuwa oshiyambelo e ta yambele ko omafikilondjambo nomakwatathanondjambo. Okwa galikana, nOmuwa okwe mu yamukula, sho a tumu omulilo gwa gu megulu e tagu lungunitha po oondjambo koshiyambelo.
27 Omuwa okwa lombwele omuyengeli, a shune mo egongamwele lye molumpangwa.
28 David okwa mono mushika kutya Omuwa okwa yamukula omagalikano ge, onkee okwa yamba oondjambo koshiyambelo polupale lwaArauna.
29 Etsalihangano lyOmuwa ndyoka Moses a tungile mombuga, noshiyambelo hoka haku lungunithilwa oondjambo, oya li natango peha lyelongelokalunga muGibeon pethimbo ndika,
30 ihe David ka li ta vulu okuya ko, a ka simaneke Kalunga, oshoka okwa li a tila egongamwele lyomuyengeli ngaashi Gad e mu lombwele.
1 David okwa ti: “Mpaka napa kale otempeli yOmuwa Kalunga naampaka napa kale oshiyambelo mpoka Aaisraeli taa lungunithile omayambo.”
2 David okwa gandja elaka kaakwiilongo ayehe ya kala moshilongo shaIsrael, ya gongale, e te ya tula miilonga. Yamwe yomuyo oya hongo omamanya gokutunga otempeli.
3 David okwa gongele ondumba yiitenda, mu ze oomboha nomakandula gomiyelo, noshikushu oshindjishindji kaashi shi kuyelekwa.
4 Okwa uvathana nAatiro nAasidoni, ye mu etele omiti dhomisedeli odhindjidhindji.
5 David okwa dhiladhila: “Otempeli ndjoka tayi ka tungwa komumwandje Salomo, oyi na okukala onene noyo opala ya simana muuyuni auhe. Ihe oye omunona noke na ontseyo, onkee nandi mu ningile omalongekidho.” Osho ngaaka David a gongele iitungitha oyindjiyindji, manga inaa sa.
6 David okwi ithana omwana Salomo e te mu lombwele, a tungile Omuwa, Kalunga kaIsrael, otempeli.
7 David okwa ti kuye: “Mentu gwandje, onda halele okutungila Omuwa, Kalunga kandje, otempeli, ndi mu simaneke.
8 Ihe Omuwa okwa lombwele ndje kutya onda dhipaga aantu oyendji nonda hinga iita olwindji. Molwomatilohimbinzi ngaka agehe nda ningi ina pitika ndje, ndi mu tungile otempeli.
9 Okwa uvanekele ndje a ti: ‘Oto ka kala u na omumwoyemati ngoka ta ka lela nombili, oshoka otandi ke mu vululukitha kaatondi ye ayehe. Edhina lye otali ithanwa Salomo, oshoka muuyuni we otandi ka pa Israel ombili negameno.
10 Oye ta ka tungila ndje otempeli. Ye ota ningi omumwandje, nangame ote ningi he. Ezimo lye otali ka lela sigo aluhe.’ ”
11 David okwa tsikile a ti: “Mentu gwandje, Omuwa, Kalunga koye, na kale ano nangoye ye na dhiginine euvaneko lye, e ku lagopaleke moku mu tungila otempeli.
12 Omuwa, Kalunga koye, ne ku pe omayele nuunongo, opo u pangele Israel pampango ye.
13 Ngele oto vulika kiipango ayihe mbyoka Omuwa a pele Moses, e yi lombwele Israel, nena oto ka kala kuu na mbudhi. Kala wa tokola nou na einekelo ngoye ino etha, u haluthwe kusha.
14 Omolwa etungo lyotempeli, onda kambadhala okugongela ootona 3400 dhoshingoli nootona 34 000 dhoshisiliveli, opo yi ka longithwe metungo lyotempeli. Onda gongele wo omiti dhomisedeli noondhopi dhomamanya, ihe nangoye oto ka gwedha po.
15 Ou na aaniilonga oyendji. Oku na aahongi yomamanya, aatungi naanashihongelo, oku na wo aahambudhi oyendji yi ili noyi ili mboka haa hambula
16 iingoli, iisiliveli, iikushu niiyela iiluudhe. Tameka ano iilonga. Omuwa na kale pamwe nangoye.”
17 David okwa lombwele aawiliki ayehe yaIsrael, ya kwathe Salomo.
18 Okwa ti: “Omuwa, Kalunga keni, okwa kala pamwe nane nokwe mu pe ombili koombinga adhihe. Okwa sinditha ndje aantu ayehe mboka ya li mevi ndika, noya ningi aapiya yeni noyOmuwa.
19 Longeleni ano Omuwa, Kalunga keni, noomwenyo dheni adhihe nomitima dheni adhihe. Tamekeni okutunga otempeli, opo mu pungule mo oshikethahangano shOmuwa niikwaniipangitho ayihe iiyapuki mbyoka hayi longithwa melongelokalunga.”
1 David sho a kulupa, okwa kwaniileke omwana Salomo omukwaniilwa gwaIsrael.
2 Omukwaniilwa David okwa gongaleke aakuluntu yAaisraeli naayambi ayehe nAalevi.
3 Okwa yalulitha aalumentu Aalevi mboka yomimvo omilongo ndatu nenge ye vule po. Ayehe kumwe oya li omayuvi omilongo ndatu nagahetatu.
4 Omayuvi omilongo mbali nagane yomuyo oye na okutonatela iilonga yomotempeli nomayuvi gahamano aadhiginini yoondjalula naatonateli yoontamanana,
5 omayuvi gane ogokukeelela piiyelo nomayuvi gane ogokwiimba omahambelelondjimbo taa tanga Omuwa niihikomwa ya ningithwa kuDavid.
6 David okwa topola Aalevi moongundu ndatu pamaludhi gawo: Gerson, Kohat naMerari.
7 Gerson okwa li e na oyanamati yaali, Ladan naShimei.
8 Ladan okwa li e na oyanamati yatatu: Jehiel, Setam naJoel,
9 mboka ya li aakuluntu yomaludhi ga za muLadan. (Shimei okwa li e na oyanamati yatatu: Shelomot, Hasiel naHaran.)
10 Shimei okwa li e na oyanamati yane: Jahat, Sina, Jeush naBeria, melandulathano lyawo lyuukuluntu, Jeush naBeria kaya li ye na omaluvalo ogendji, omolwasho ya talwa oludhi lumwe.
11
12 Kohat okwa li e na oyanamati yane: Amram, Izhar, Hebron naUssiel.
13 Osheeli she Amram okwa vala Aaron naMoses. (Aaron noluvalo lwe oya yoololelwa okutonatela iinima iiyapuki sigo aluhe, okulungunitha omatsininondjambo mokusimaneka Omuwa, oku mu longela nokuyambeka oshigwana medhina lye.
14 Ihe aana yaMoses, omumati gwaKalunga, oya tulwa mumwe nAalevi.)
15 Moses okwa li e na oyanamati yaali, Gersom naElieser.
16 Omuwiliki mokati kaana yaGersom oye Shebuel.
17 Elieser okwa li e na omwanamati epona Rehabia, ihe Rehabia okwa li e na oluvalo olwindji.
18 Omuna gwaKohat omutiyali, Izhar, okwa li e na omwanamati Shelomit, omukuluntu gwoludhi.
19 Kohat okwa li e na omwanamati omutitatu, Hebron, ngoka a li e na oyanamati yane: Jeria, Amaria, Jahasiel naJekameam.
20 Aana yomuna gwaKohat omutine, Ussiel, oya li Mika naIsshia.
21 Merari okwa li e na oyanamati yaali, Mahli naMushi. Mahli okwa li ishewe e na oyanamati yaali, Eleasar naKish,
22 ihe Eleasar okwa si inaa vala omumati, aakadhona ayeke. Oyana aakadhona oya hokanwa kaamwahegona, aana yaKish.
23 Omuna gwaMerari omutiyali, Mushi, okwa li e na oyanamati yatatu: Mahli, Eder naJeremot.
24 Nduka oluvalo lwaLevi pamaludhi nomagumbo, ngaashi ya yalulwa pamadhina gawo. Oluvalo kehe lwomimvo omilongo mbali nenge lu vule po lwa li lu na oshitopolwa miilonga yotempeli yOmuwa.
25 David okwa ti: “Omuwa, Kalunga kaIsrael, okwa pe aantu ye evululuko noye mwene ta ka kala muJerusalem sigo aluhe.
26 Aalevi itaa pumbwa we okuhumbata po etsalihangano niipumbiwa ayihe hayi longithwa melongelokalunga.”
27 Palombwelo lyaDavid lyahugunina Aalevi ayehe oya yoololelwa eyakulo, shaa ya adha epipi lyomimvo omilongo mbali.
28 Oya pewa iilonga mbika: okuyakula aayambi yomoluvalo lwaAaron melongelokalunga, okusila oshimpwiyu omahala noondjugo dhomotempeli, okwoopaleka iinima ayihe iiyapuki;
29 okusila oshimpwiyu iikwiila iiyapuki nuusila womunziya tau pumbiwa miikulyandjambo nomiikwiila yuupapi yaa na efulika, uukuki wokuyamba nuusila wa lungilwa momagadhi, nokutonatela iiyotitho niimetitho ayihe;
30 okuhambelela nokwaadhimitha Omuwa ongula kehe nongulohi;
31 nokuyambela Omuwa omafikilondjambo agehe mOmasabati, miituthi yomwedhi omupe nomiituthi iikwawo, ngaashi sha li shu uthwa, Aalevi ye shi ninge ethimbo alihe.
32 Oya pewa oshimpwiyu shokuyakula metsalihangano lyOmuwa nomotempeli noya kwathe aanezimo lyawo, aayambi yomoluvalo lwaAaron melongelokalunga lyomotempeli.
1 Ndhika oongundu dhomaluvalo gaAaron. Aaron okwa li e na oyanamati yane: Nadab, Abihu, Eleasar naItamar.
2 Nadab naAbihu oya si, manga he e na omwenyo, noinaa thiga po oluvalo, onkee aamwayina Eleasar naItamar oya ningi aayambi.
3 Omukwaniilwa David okwa tula oluvalo lwaAaron moongundu pailonga yawo. Okwa li a kwathwa kuSadok gwomoluvalo lwaEleasar naAhimelek gwomoluvalo lwaItamar.
4 Oluvalo lwaEleasar olwa li lwa topolwa moongundu omulongo nahamano, manga oluvalo lwaItamar lwa li lwa topolwa moongundu hetatu. Shika osha ningwa, oshoka moluvalo lwaEleasar omwa li ooyene yomikunda oyendji.
5 Okwa li nokuli aakuluntu yomotempeli naawiliki yopambepo mokati komaluvalo gaEleasar nogaItamar, onkee omagandjo oga ningwa niihogololitho.
6 Oluvalo lwaEleasar nolwaItamar olwa umbilwa iihogololitho palufo. Nena omadhina gawo oga nyolwa membo kuShemaia yaNetanel, amushanga Omulevi. Omukwaniilwa, omalenga ge, omuyambi Sadok, Ahimelek yaAbiatar nooyene yomikunda dhaayambi nodhomagumbo gAalevi, ayehe oya li oonzapo.
7 Ndika olyo elandulathano moka oongundu dhomagumbo omilongo mbali nagane dha pewa iilonga: 1. Jehoiarib 2. Jedaia 3. Harim 4. Seorim 5. Malkija 6. Mijamin 7. Hakkoz 8. Abia 9. Jeshua 10. Shekania 11. Eliashib 12. Jakim 13. Huppa 14. Jeshebeab 15. Bilga 16. Immer 17. Hesir 18. Happizzez 19. Petahia 20. Jeheskel 21. Jakin 22. Gamul 23. Delaja 24. Maasia
8
9 Melandulathano ndika aantu mbaka oya li haa yi kotempeli okugwanitha iilonga yawo ye yi thigilwa kuhekulu Aaron, ngaashi Omuwa, Kalunga kaIsrael, e mu lombwelele.
10 Mbaka aakuluntu yomagumbo goluvalo lwaLevi: Shebuel oluvalo lwaAmram, Jehdeia oluvalo lwaShebuel;
11 Isshia oluvalo lwaRehabia;
12 Shelomit oluvalo lwaIzhar, Jahat oluvalo lwaShelomit;
13 Jeria, Amaria, Jahasiel naJekameam aana yaHebron pamapipi gawo;
14 Mika oluvalo lwaUssiel, Shamir oluvalo lwaMika;
15 Isshia omumwayina gwaMika, Sakaria oluvalo lwaIsshia;
16 Mahli, Mushi naJaasia oluvalo lwaMerari.
17 Jaasia okwa li e na oyanamati yatatu: Shoham, Sakkur naIbri.
18 Mahli okwa li e na oyanamati yaali, Eleasar naKish. Eleasar ka li e na oyanamati, ihe Kish okwa li e na eponamati Jerahmeel.
19
20 Mushi okwa li e na oyanamati yatatu: Mahli, Eder naJerimot. Ngaka omagumbo gAalevi.
21 Omukuluntu gwegumbo kehe nagumwe gwomaamwayina aagundjuka oyu umbile iihogololitho iilonga yawo, naanaa ngaashi aanezimo yawo, aayambi yomoluvalo lwaAaron, ya ningile. Omukwaniilwa David, Sadok, Ahimelek naakuluntu yomagumbo gaayambi nogAalevi oya li oonzapo.
1 Omukwaniilwa David naakuluntu yAalevi oya hogolola omaludhi gAalevi taga landula, ya wilike elongelokalunga: Asaf, Heman naJedutun. Oya li taa uvitha elaka lyaKalunga taa hiki uuharpa niikwelengi. Elandulathano lyaamboka ya hogololelwa okuwilika elongelokalunga, olyo ndika:
2 Oyanamati yane yaAsaf: Sakkur, Josef, Netania naAsharela. Oya li mewiliko lyaAsaf, ngoka u uvitha elaka lyaKalunga, uuna omukwaniilwa e shi tya.
3 Aana yaJedutun aamati yahamano: Gedalia, Zeri, Jeshaja, Shimei, Hashabia naMattitia. Oyu uvitha elaka lyaKalunga mewiliko lyahe ye shi ningi mehiko lyuuharpa nomahambelelondjimbo nokupandula Omuwa.
4 Aana yaHeman omulongo nayane: Bukia, Mattania, Ussiel, Shebuel, Jerimot, Hanania, Hanani, Eliata, Giddalti, Romamti Ezer, Joshbekasha, Malloti, Hotir naMahasiot.
5 Kalunga okwa pe omuhunganeki gwaDavid Heman aamati mbaka omulongo nayane naakadhona yatatu, ngaashi u uvaneke, opo a pe Heman oonkondo.
6 Oyana ayehe oya li haa hiki iikwelengi nuuharpa mewiliko lyahe melongelokalunga motempeli. Asaf, Jedutun naHeman oya li mewiliko lyomukwaniilwa.
7 Aalumentu mbaka ayehe omilongo mbali nayane oya li oonkulungu ngashika wo Aalevi mboka ya li ya longwa okwiimba. Ayehe kumwe oya li aalumentu 288.
8 Opo ya koleke elandulathano lyiilonga, oyu umbu iihogololitho, kape na mbudhi ngele aagundjuka nenge aakuluntu, aapyokoki nenge aatameki.
9 Aalumentu mbaka 288 oya li ya topolwa pamagumbo moongundu omilongo mbali nane dhomulongo nayaali. Ongundu kehe oya li nomuwiliki gwayo te yi tonatele. Iilonga yawo oya landulathana ngeyi: 1. Josef gwegumbo lyaAsaf 2. Gedalia 3. Sakkur 4. Zeri 5. Netania 6. Bukia 7. Asharela 8. Jeshaja 9. Mattania 10. Shimei 11. Ussiel 12. Hashabia 13. Shebuel 14. Mattitia 15. Jerimot 16. Hanania 17. Joshbekasha 18. Hanani 19. Malloti 20. Eliata 21. Hotir 22. Giddalti 23. Mahasiot 24. Romamti Ezer.
1 Mpaka ope na etopolo lyiilonga lyAalevi mboka ya langele otempeli. Moludhi lwaKora oMeshelemia yaKore gwomegumbo lyaAsaf.
2 Okwa li e na oyanamati yaheyali. Pamapipi gawo oyo Sakaria, Jediael, Sebadia, Jatniel,
3 Elam, Jehohanan naEliehoenai.
4 Okwa li wo Obed Edom, ngoka Kalunga e mu yambeke e te mu pe aanona aamati yahetatu, ngaashi taa landula pamapipi gawo: Shemaia, Jehosabad, Joa, Sakar, Netanel,
5 Ammiel, Issaskar naPeulletai.
6 Osheeli shaObed Edom, Shemaia, osha li shi na oyanamati yahamano: Othni, Refael, Obed, Elsabad, Elihu naSemakia. Oya li aalumentu aanamadhina moludhi lwawo moluunongo wawo; aahugunini yaali oya li aanamaganolela.
7
8 Egumbo lyaObed Edom olye eta po aalumentu ya pyokokela iilonga ye li omilongo hamano nayaali ayehe kumwe.
9 Egumbo lyaMeshelemia olye eta po aalumentu ya pyokoka omulongo nayahetatu.
10 Moludhi lwaMerari omwa li Hosa, ngoka a li e na oyanamati yane: Shimri (he okwe mu lenge omukuluntu, nando ka li sheeli),
11 Hilkia, Tebalia naSakaria. Megumbo lyaHosa omwa li aantu omulongo nayatatu mboka ya li aalangeli yotempeli.
12 Aalangeli yotempeli oya li ya topolwa moongundu pamagumbo noya topolelwa iilonga motempeli ngaashi naanaa Aalevi ooyakwawo.
13 Egumbo kehe, pwaa na yoololo, olyu umbilwa oshihogololitho, pu talike omweelo guni taa sile oshimpwiyu.
14 Oshihogololitho shomweelo gwokuuzilo osha kwata Shelemia, nomwanamati Sakaria, omulumentu ngoka ha gandja aluhe omayele omawanawa, okwa kwatwa koshihogolitho shomweelo gwokuumbangalantu.
15 Obed Edom okwa yoololelwa omweelo gwokuumbugantu, noyanamati oyu uthilwa okutonatela oompungulilo.
16 Shuppim naHosa oyu uthilwa omweelo gwokuuninginino nomweelo gwaShelleket pepandaanda lya londa. Iilonga yomalangelo oya topolwa momalufo.
17 Kuuzilo, aalangeli yahamano oya li miilonga esiku kehe, kuumbangalantu yane nokuumbugantu yane. Aalangeli yane oya kala poompungulilo esiku kehe, yaali pukehe yimwe.
18 Popepi netsali kuuninginino opwa li aalangeli yane pondjila nayaali petsali lyo lyene.
19 Ndhika odho oongundu dhaalangeli yomiyelo yomoludhi lwaKora noyomoludhi lwaMerari.
20 Aalevi yalwe ooyakwawo oya li metonatelo lyomaliko gotempeli noompungulilo dhomagano ga yapulilwa Kalunga.
21 Ladan, gumwe gwomaana yaGerson, okwa li hekulu yoongundu dhomagumbo ogendji, mwa kwatelelwa oluvalo lwomwana Jehiel.
22 Aana yaLadan yaali yalwe, Setam naJoel, oya tonatele omaliko gomotempeli noompungulilo.
23 Iilonga oya topolelwa wo oluvalo lwaAmram, Izhar, Hebron naUssiel.
24 Shebuel gwoludhi lwaGersom yaMoses okwa li elenga ekuluntu lyokudhiginina omaliko gomotempeli.
25 Shuebuel okwa li e na ekwatathano naShelomit lya za muElieser, omumwayina gwaGersom. Elieser okwa vala Rehabia, ngoka a vala Jeshaja, he yaJoram, he yaSikri, he yaShelomit.
26 Shelomit naanegumbo lye oya li aatonateli yomagano agehe ga yoololelwa Kalunga komukwaniilwa David, kooyene yomikunda, kaawiliki yoongundu dhomaludhi nokoondjayi dhiita.
27 Oya kutha iihakanwa yimwe mbyoka ye yi yugu miita e taye yi yoololele okulongithwa motempeli.
28 Shelomit naanegumbo lye oya li metonatelo lyashaa shoka sha yapulilwa okulongithwa motempeli, mwa kwatelelwa omagano ge etelwe komuhunganeki Samuel, komukwaniilwa Saul, kuAbner yaNer nokuJoab, omuna gwanekulu Zeruia.
29 Mokati koluvalo lwaIzhar, Kenania noyanamati oya pewa eyakulo lyelelo: okudhiginina oondjalula nokutokola oontamanana dhAaisraeli.
30 Mokati koluvalo lwaHebron, Hashabia naanezimo lye 1 700, ayehe aalumentu ya dhenga mbanda, oya tulwa metonatelo lyiinima ayihe yomalongelokalunga noyelelo muIsrael kuuninginino womulonga Jordan.
31 Jeria okwa li omuwiliki gwoluvalo lwaHebron. Momumvo omutimilongone David sho a li omukwaniilwa, oluvalo lwegumbo lyaHebron olwa konakonwa, naakwiita oofule yegumbo ndika oya monika ye li puJaser moshikandjo Gilead.
32 Omukwaniilwa David okwa hogolola mo aakuluntu yomagumbo 2 700 maanezimo lyaJeria e te ya langeke metonatelo lyiinima ayihe yelongelokalunga noyelelo muIsrael kuuzilo womulonga Jordan — iikandjo yaRuben, Gad naManasse kuuzilo.
1 Ndika elandulathano lyooyene yomikunda naawiliki yomaludhi pamwe nomalenga gawo mboka ya yakula omukwaniilwa. Omwedhi kehe momumvo etanga li ili lyomomayuvi omilongo mbali nagane lya li nolufo mewiliko lyondjayi yolufo lwomwedhi ngoka.
2 Oondjayi ndhoka dha kala momwedhi kehe, otadhi landula mpaka: Omwedhi gwotango: Jashobeam yaZabdiel (okwa li gwondhikwa yoludhi lwaPerez mezimo lyaJuda) Omwedhi omutiyali: Dodai oluvalo lwaAhohi (Miklot okwa li ondjayi ontiyali kuye) Omwedhi omutitatu: Benaia yaJehoiada omuyambi; okwa li omuwiliki “gwomilongo ndatu” (omwana Ammisabad okwe mu landula muuwiliki wetanga lye) Omwedhi omutine: Asahel, mumwayina gwaJoab (omwana Sebadia okwe mu landula) Omwedhi omutitano: Shamhut oluvalo lwaIzhar Omwedhi omutihamano: Ira yaIkkesh gwomuTekoa Omwedhi omutiheyali: Helez Omuefraim a za kuPelon Omwedhi omutihetatu: Sibbekai gwomuHusha (okwa li gwondhikwa yoludhi lwaZerah mezimo lyaJuda) Omwedhi omutimugoyi: Abieser gwomuAnatot moshikandjo shezimo lyaBenjamin Omwedhi omutimulongo: Maharai gwomuNetofa (okwa li gwondhikwa yoludhi lwaSera) Omwedhi omutimulongo nagumwe: Benaia gwomuPiraton moshikandjo shezimo lyaEfraim Omwedhi omutimulongo nomutiyali: Heldai gwomuNetofa (okwa li oluvalo lwaOtniel).
3 Ndika elandulathano lyaawiliki yomazimo gaIsrael: Ezimo Omuwiliki Reuben, Elieser, yaSikri, Simeon, Shefatia, shaMaaka, Levi, Hashabia, yaKemuel, Aaron, Sadok, Juda, Elihu, gumwe gwomaamwayina yomukwaniilwa David, Issaskar, Omri, yaMikael, Sebulon, Ishmaia, yaObadia, Naftali, Jeremot, yaAsriel, Efraim, Hosea, yaAzazia, Manasse, kuuninginino Joel, yaPedaia, Manasse, kuuzilo Iddo, yaSakaria, Benjamin, Jaasiel, yaAbner, Dan, Asarel, yaJeroham.
4 Omukwaniilwa David ina yalulitha aantu mboka ya li inaa gwanitha omimvo omilongo mbali, oshoka Omuwa okwa uvaneke, i indjipalithe Aaisraeli ye thike poonyothi dhokegulu.
5 Joab, omuna gwanekulu Zeruia, okwa tameke okuyalula aantu, ihe ine shi tsakanitha. Kalunga okwa geele Israel omolweyalulo ndika, onkee omwaalu gwaayehe inagu holoka mondjalula yomukwaniilwa David.
6 Ndika elandulathano lyaamboka ya kala ye na iimpwiyu yomaliko gomukwaniilwa: Oompungulilo dhuuwa: Asmavet yaAdiel Oompungulilo dhomikunda: Jonatan yaUssia Iilonga yuunahambo: Esri lyaKelub Iitsambe yomiviinu: Shimei gwomuRama Oondunda dhokupungula omaviinu: Zabdi gwomuShefam Aaniitsambe yomiolivi nomikwiyu (kiikulundundu yoponyonga yoondundu dhokuuninginino): Baal-Hanan gwomuBet Geder Omusilishimpwiyu gwomagadhi gooholivi: Joas Omunahambo gwiimuna molushandja lwaSharon: Shirtai gwomuSharon Omunahambo momasilu: Shafat yaAdlai Omunahambo gwoongamelo: Obil Omuismaeli Omunahambo guusino: Jehdeia gwomuMeronot Omunahambo gwoonzi niikombo: Jasis Omuhagari.
7 Jonatan, hegona yomukwaniilwa David, okwa li omugandjindunge a pyokoka nomulongwantu. Oyo naJehiel yaHakmoni oya li aalongi yaana yomukwaniilwa.
8 Ahitofel okwa li omugandjindunge gwomukwaniilwa, naHushai Omuarki okwa li kuume komukwaniilwa nomugandjindunge.
9 Ahitofel sho a si, Abiatar naJehoiada yaBenaia oya ningi aagandjindunge. Joab okwa li ondjayi yiita yomukwaniilwa.
1 David okwa hiya omalenga agehe gaIsrael, ga gongale muJerusalem. Aakuluntu ayehe yomazimo, omalenga ngoka haga wilike iilonga yoshilongo, aawiliki yomaludhi, aatonateli yomaliko noyiimuna yomukwaniilwa noyana — eeno, omalenga guuwa agehe, aakwiita aakuluntu naanamadhina — oya gongalele muJerusalem.
2 David okwa thikama komeho gawo e te ya popitha ta ti: “Shigwana shandje, pulakenii ndje. Onda li nda hala okutungila oshikethahangano ongulu, moka Omuwa, Kalunga ketu, ta kala. Onda gongele iitungitha yotempeli oku mu simaneka,
3 ihe okwi indike ndje oku shi ninga, molwashoka ngame omukwiita nonda tilehi ombinzi oyindji.
4 Omuwa, Kalunga kaIsrael, okwa hogolola ndje noluvalo lwandje, tu lele Israel sigo aluhe. Okwa hogolola ezimo lyaJuda, li kale ewiliki, nomuJuda okwa hogolola mo egumbo lyatate. Megumbo ndyoka alihe Kalunga ongame a kutha e ta kwaniileke ndje, ndi lele Israel.
5 Okwa pe ndje oluvalo, aamati oyendji, nomokati kawo okwa hogolola mo Salomo, a lele Israel, oshigwana shOmuwa.
6 “Omuwa okwa lombwele ndje a ti: ‘Omumwoye Salomo oye ta ka tungila ndje otempeli. Onde mu hogolola, a ninge omumwandje, nangame te ningi he.
7 Ota ka koleka uukwaniilwa we, u kale sigo aluhe, ngele ota vulika shili kiipango yandje ayihe nokomautho agehe, ngaashi e li nena.’
8 “Aantu yandje, ngashingeyi sho mwa gongala koshipala shaKalunga ketu noshaIsrael alihe, oshigwana shOmuwa, otandi mu lombwele, mu vulike shili kukehe shoka Omuwa, Kalunga ketu, e tu lombwele, opo mu kale nawa mevi ndika ewanawa, noluvalo lweni lu vule okukala mo wo sigo aluhe.”
9 Nena okwa lombwele Salomo a ti: “Mentu gwandje, tseya Kalunga kaho, ngoye u mu longele nomutima aguhe nehalo alihe. Omadhiladhilo getu agehe noondjuulukwe dhetu adhihe oku dhi shi. Nge to yi kuye, ote ku taamba, ihe ngele to mu pilamene, nena ote ku etha sigo aluhe.
10 Kala wa tseya kutya Omuwa okwe ku hogolola, wu mu tungile otempeli ondjapuki, kala ano wi ikolelela e to tameke iilonga.”
11 David okwa pe Salomo ondunge yomatungo agehe gotempeli, yoompungulilo noyomala galwe ngashika wo ndjoka yEhala lyUuyapukielela, moka tamu falwa oondjo.
12 Okwe mu pe omayele gaashoka ta dhiladhila kombinga yomahale nomala ngoka ge ga kunduka, nokombinga yoompungulilo dhiikwaniipangitho yotempeli nodhomagano ga yoololelwa Omuwa.
13 David okwe mu tsu wo omayele gokutula aayambi nAalevi moongundu, ya tsakanithe iinakugwanithwa yawo okulonga iilonga yotempeli noya sile oshimpwiyu iinima ayihe yomotempeli.
14 Okwe mu pe omalombwelo, nkene oshisiliveli noshingoli shi na okulongithwa miipumbiwa,
15 oolamba, oshihukikwanyeka,
16 iitaafula yoshisiliveli niitaafula yoshingoli, nkoka taku tentekwa iikwiila iiyapuki.
17 Okwa utha wo ondjundo yoshingolilela tashi longithwa mokuhambula oofoloko, iiyaha niiyuma, nondjundo yoshisiliveli noyoshingoli tashi longithwa mokuhambula uuyo,
18 ngashika wo ondjundo yoshingolilela tashi longithwa mokuhambula oshiyambelo nkoka taku lungunithilwa omatsininondjambo, nandjoka mokuhambula etemba lyoshingoli naakerubi mboka ya kwidhidhika oshikethahangano nomawawa ga yalalekwa.
19 Omukwaniilwa David okwa ti: “Ayihe mbika oyi li menyolo lyopamalombwelo gOmuwa, ngaashi a lombwele ndje ndi yi gwanithe”.
20 Omukwaniilwa David okwa lombwele omwana Salomo a ti: “Kala wa tokola nou na einekelo. Tameka iilonga, ino katekwa kusha. Omuwa Kalunga ngoka tandi longele, ota ka kala pamwe nangoye. Ite ku etha, ndele ota kala nangoye, sigo wa hulitha iilonga mbyoka tayi longwa molwotempeli.
21 Aayambi nAalevi oya pewa omalufo gokulonga motempeli. Oonkulungu dholudhi kehe odha hala oku ku kwatha, oshigwana ashihe naawiliki otaye ku pulakene.”
1 Omukwaniilwa David okwa lombwele aantu ayehe a ti: “Kalunga okwa hogolola omumwandje Salomo, ihe ye omunona natango noke na ontseyo. Iilonga mbyoka yi na okugwanithwa, iinene noonkondo, oshoka mbuka kau shi uuwa womuntu, ihe otempeli yOmuwa Kalunga.
2 Onda ningi oonkambadhala adhihe, ndi longekidhe iitungitha yotempeli — iingoli, iisiliveli, iikushu, iiyela iiluudhe, iipilangi, omamanya ge na ondilo, uuwe, omamanya guulenga nomarmera.
3 Kwaayihe mbika nda ningi, onda gandja iisiliveli niingoli meliko lyandje mwene, oshoka ondi hole otempeli yaKalunga.
4 Onda gandja oshingoli shokuOfir shondjundo yomayuvi gatatu noshisiliveli sha yelithwa shondjundo yomayuvi gaheyali, opo ekuma li kolongwe
5 nomolwiinima ayihe yuulenga mbyoka tayi ningwa koonkulungu. Ope na tuu mbela mboka ya hala okweetela Omuwa oombalagelo?”
6 Nena aakuluntu yomaludhi, omalenga gomazimo, oondjayi dhiita naadhiginini yomaliko gambala oya hala okugandjela
7 etungo lyotempeli iinima mbika: oshingoli shondjundo yomayuvi gatano, iimaliwa yiingoli omayuvi omulongo, oshisiliveli shondjundo yomayuvi omulongo, oshikushu shondjundo yomayuvi omulongo nagahetatu nosheela oshiluudhe shondjundo yomayuvi gethele.
8 Ayehe mboka ya li ye na omamanya gondilo, oye ga gandja momaliko gomotempeli, ngoka ga li metonatelo lyaJehiel gwomoludhi lwaGerson mezimo lyaLevi.
9 Aantu oya gandja nehalo kOmuwa noya li yu uvite elago unene, sho ya gandja. Omukwaniilwa David naye wo okwa li a nyanyukwa unene.
10 David okwa hambelele Omuwa montaneho yAaisraeli e ta ti: “Omuwa, Kalunga katatekulu Jakob, hambelelwa aluhe sigo aluhe.
11 Uunene owoye noonkondo odhoye, eadhimo nesimano nuuyelele owoye, oshoka iinima ayihe oyoye megulu nokombanda yevi. Omuwa, ongoye omukwaniilwa nOmupangeliawike.
12 Ongoye ho gandja uuyamba nesimano, ewangandjo alihe oli li mepangelo lyoye; moshikaha shoye omu na oonkondo nelelo, oto vulu okunenepeka nokukoleka omuntu.
13 Ngashingeyi, Kalunga ketu, otatu ku hambelele e tatu tanga edhina lyoye lya simana.
14 “Ngame omushike, noshigwana shandje oshishike, tu ku pe sha, oshoka ayihe oyo omagano ga za kungoye? Ano otwe ku galulile owala shoka shoye.
15 Omuwa, otse oondjendi naakwiilongo kombanda yevi, ngaashi ootatekulu ya li wo. Omasiku getu otaga pitilile po ga fa omuzizimba, tse itatu vulu okuhenuka eso.
16 Omuwa, Kalunga ketu, otwa gongele uuyamba mbuka okutunga otempeli, tu simaneke edhina lyoye, ihe ayihe oya zi kungoye, naayihe oyoye.
17 Kalunga kandje, onda tseya kutya ngoye oto konakona omwenyo nowa hokwa aantu mboka haa kala moshili. Ayihe mbika onde yi ku pe moshili nomehalo ewanawa, nonda mono, nkene aantu yoye mbaka ya gongala mpaka, ye ku yambele omayambo nenyanyu.
18 Omuwa, Kalunga kootatekulu Abraham, Isak naJakob, koleka ehalo lya tya ngeyi aluhe momitima dhoshigwana shoye ngoye u shi dhiginine pungoye.
19 Pa omumwandje Salomo omwenyo gu uka, a vulike komalombwelo goye agehe ye a tunge otempeli ndjoka nda ningile omalongekidho ngaka.”
20 Nena David okwa lombwele aantu ayehe ta ti: “Hambeleleni Omuwa, Kalunga keni!” Oshigongi ashihe osha hambelele Omuwa, Kalunga koohekulu, oyo noya tsu iipala pevi noya simaneke Omuwa nosho wo omukwaniilwa.
21 Esiku lya landula ko oya dhipaga iimuna noye yi yapulile Omuwa. Oya yamba oontsezi eyuvi, oonzi oontsezi eyuvi noonzigona eyuvi, dhi ninge omafikilondjambo ga lungunithwa omidhidhi koshiyambelo. Oya yamba wo iinuwandjambo.
22 Esiku ndyoka oya li ya nyanyukwa, sho taa li notaa nu montaneho yOmuwa. Oya hogolola Salomo lutiyali, a ninge omukwaniilwa. Oye mu gwayeke medhina lyOmuwa, a ninge omuleli gwawo, naSadok, a ninge omuyambi.
23 Osho ngaaka Salomo a landula he David muukwaniilwa koshipangelapundi shoka sha tulwa po kOmuwa. Okwa li omukwaniilwa e na elago, noshigwana ashihe shaIsrael osha vulika kuye.
24 Omalenga agehe naakwiita, nokuli naana yaDavid aamati oyu uvaneke okwiinekelela Salomo uukwaniilwa.
25 Omuwa okwa nenepeke Salomo montaneho yoshigwana ashihe nokwe mu pe esimano enene e vule aakwaniilwa ayehe mboka ya lelele Israel.
26 David yaIsai okwa lele Israel
27 omimvo omilongo ne. Okwa lele muHebron omimvo heyali nomuJerusalem omimvo omilongo ndatu nandatu.
28 Okwa si mepipi lyuukulupe, a kuta uuyamba nesimano, nomwana Salomo okwe mu landula muukwaniilwa.
29 Ondjokonona yomukwaniilwa David okuza ketameko sigo okehulilo oya nyolelwa momambo goondjokonona gaahunganeki mbaka yatatu: Samuel, Natan naGad.
30 Oondjokonona otadhi hokolola, nkene a lele, nkene a li omunankondo, niinima ayihe mbyoka ye mu ningilwa noya ningilwa Israel niilongo yilwe wo.