1

¹ Omukwaniilwa gwaIsrael Ahab sho a si, oshilongo shaMoab osha tsu ondumbo naIsrael.

² Omukwaniilwa gwaIsrael Ahasia okwa gu kontala yongulu yuuwa we muSamaria nokwa li e ehama unene. Okwa tumu aatumwa, ya ka pule Baalzebub, oshikalunga shomoshilando shAafilisti Ekron, kutya ota aluka tuu nenge ongiini.

³ Ihe omuyengeli gwOmuwa okwa lombwele omuhunganeki Elia gwokuTishbe, a ka tsakaneke aatumwa yomukwaniilwa Ahasia, ye e ya pule ta ti: “Omolwashike tamu ka pula owino kuBaalzebub, oshikalunga shomuEkron? Otamu dhiladhila ando kutya muIsrael kamu na Kalunga?

⁴ Ka lombweleni omukwaniilwa tamu ti: ‘Ito ka penduka we, ihe oto ka sa!’ ” Elia nokwa yi.

⁵ Aatumwa sho ya galuka, omukwaniilwa okwe ya pula a ti: “Oshike mwa galuka mbala?”

⁶ Oya yamukula ya ti: “Otwa tsakanekwa komuntu gumwe, ngoka e tu lombwele, tu galuke tse tu ku lombwele kutya Omuwa ota ti kungoye: ‘Omolwashike to tumu aantu, ya ka pule Baalzebub, oshikalunga shomuEkron? Oto dhiladhila ando kutya muIsrael kamu na Kalunga? Ito ka penduka we, oto ka sa!’ ”

⁷ Omukwaniilwa okwa pula a ti: “Omuntu ngono okwa tya ngiini?”

⁸ Oya yamukula ya ti: “Okwa zala elwaakani lyoshipa e li manga nepaya lyoshipa.” Omukwaniilwa okwa ti: “Omuntu ngoka oElia!”

⁹ Nena okwa tumu elenga li na aantu omilongo ntano, ya ka tale Elia. Elenga olye mu adha a kuutumba koshikulundundu e tali ti kuye: “Muntu gwaKalunga, omukwaniilwa ota ti: ‘Ila!’ ”

¹⁰ Elia okwa yamukula a ti: “Ngele ngame omuntu gwaKalunga, nena omulilo nagu gwe megulu, gu ku lungunithe po naantu yoye!” Mbalambala omulilo ogwa gu megulu e tagu lungunitha po elenga naantu yalyo.

¹¹ Omukwaniilwa okwa tumu ko ishewe elenga ekwawo li na aantu omilongo ntano nolya yi nayo koshikulundundu e tali ti kuElia: “Muntu gwaKalunga, omukwaniilwa ota ti: ‘Ila mbala!’ ”

¹² Elia okwa yamukula a ti: “Ngele ngame omuntu gwaKalunga, nena omulilo nagu gwe megulu nogu ku lungunithe po naantu yoye!” Mbalambala omulilo gwaKalunga ogwa gu ko e tagu lungunitha po elenga naantu yalyo.

¹³ Omukwaniilwa okwa tumununa ko ishewe elenga limwe li na aantu omilongo ntano. Olya yi koshikulundundu, lya tsu oongolo koshipala shaElia e tali galikana tali ti: “Muntu gwaKalunga, sila ndje ohenda naantu yandje. Hupitha oomwenyo dhetu!

¹⁴ Omalenga gaali naantu yago oga lungunithwa po komulilo gwa za megulu, ihe sila ndje ohenda!”

¹⁵ Omuyengeli gwOmuwa okwa ti kuElia: “Inda pamwe nalyo, ino tila.” Nopo mpoka Elia okwa yi nelenga komukwaniilwa

¹⁶ e ta ti kuye: “Omuwa ota ti: ‘Molwashoka owa tumu aatumwa, ya ka pule owino kuBaalzebub, oshikalunga shaEkron — muIsrael mwa fa mwaa na Kalunga u mu pule — ito ka aluka we; oto ka sa!’ ”

¹⁷ Ahasia okwa si, ngaashi Omuwa a popitha Elia. Ahasja ka li e na aanona, onkee omumwayina Joram okwe mu landula muukwaniilwa momumvo omutiyali gwepangelo lyaJehoram yaJehosafat, omukwaniilwa gwaJuda.

¹⁸ Ashihe shilwe shoka omukwaniilwa Ahasia a longa, osha nyolelwa membo lyondjokonona yaakwaniilwa yaIsrael.

2

¹ Ethimbo olya thikana, Omuwa a fale Elia kegulu moshikungulu. Elia naElisa oya zi muGilgal,

² nomondjila Elia okwa ti kuElisa: “Kala mpaka, oshoka Omuwa okwa tumu ndje kuBetel.” Ihe Elisa okwa yamukula a ti: “Otandi gana kOmuwa omunamwenyo nokungoye kutya itandi ku thigi po.” Osho ngaaka ya yi kuBetel.

³ Ongundu yaahunganeki mboka ya kala nkoka, oya yi kuElisa e taye mu pula taa ti: “Ou shi shi tuu kutya Omuwa ota ka kutha po mwene gwoye pungoye nena?” Elisa okwa yamukula a ti: “Ee, ondi shi shi, ihe inamu shi popya.”

⁴ Nena Elia okwa ti kuElisa: “Kala mpaka, oshoka Omuwa okwa tumu ndje kuJeriko.” Ihe Elisa okwa yamukula a ti: “Otandi gana kOmuwa omunamwenyo nokungoye kutya itandi ku etha po.” Oyo noya yi kuJeriko.

⁵ Ongundu yaahunganeki mboka ya kala nkoka, oya yi kuElisa noye mu pula ya ti: “Ou shi shi tuu kutya Omuwa ota ka kutha po mwene gwoye nena pungoye?” Elisa okwa yamukula a ti: “Ee, ondi shi shi, ihe inamu shi popya.”

⁶ Nena Elia okwa ti kuElisa: “Kala mpaka, oshoka Omuwa okwa tumu ndje komulonga Jordan.” Ihe Elisa okwa yamukula a ti: “Otandi gana kOmuwa omunamwenyo nokungoye kutya itandi ku etha po.” Oyo noya tsikile ondjila.

⁷ Nongundu yaahunganeki omilongo ntano oye ya landula kuJordan. Elia naElisa oya thikama pomulonga, naahunganeki mbeyaka omilongo ntano oya thikama lwopopepi nayo.

⁸ Nena Elia okwa kutha elwaakani lye, e li gonyo e te li dhenge omeya. Omeya oga topoka pokati, Elia naElisa noya tokola Jordan puukukutu e taa yi handiyaka.

⁹ Hwiyaka Elia okwa ti kuElisa: “Lombwela ndje shoka wa hala ndi ku ningile, manga inaandi kuthwa po.” Elisa okwa yamukula a ti: “Otandi ku galikana, thigululitha ndje iitopolwa iyali yomombepo yoye mbyoka tayi ningitha ndje omulanduli gwoye.”

¹⁰ Elia okwa yamukula a ti: “Eindilo ndika edhigu okugwanitha, ihe oto ke yi pewa, ngele oto mono ndje, sho te kuthwa po pungoye; ihe ngele ito mono ndje, nena ito pewa sha.”

¹¹ Oya li taa kundathana, manga taye ende. Ohaluka etemba lyomulilo tali hilwa kuukambe womulilo, olye ya pokati kawo, naElia okwa kuthwa po a falwa megulu moshikungulu.

¹² Elisa okwe shi mono e ti igidha Elia ta ti: “Tate, tate! Etemba lyaIsrael naakawili yalyo!” Sigo ke mu wete we. Moluhodhi Elisa okwa tuula elwaakani lye pokati miitopolwa iyali.

¹³ Okwa toola po elwaakani lyaElia ndyoka lye mu gu e ta shuna nokwa thikama pomunkulo gwaJordan.

¹⁴ Okwa dhenge omeya nelwaakani lyaElia e ta ti: “Omuwa, Kalunga kaElia, ou li peni?” Nena okwa dhenge omeya ishewe, ogo noga topoka. Okwa taaguluka a yi handiyaka.

¹⁵ Aahunganeki mbeyaka omilongo ntano yokuJeriko oye mu mono noya ti: “Ombepo yaElia oyi li muElisa!” Oya yi, ye mu tsakaneke. Oye mu inyongamene

¹⁶ e taa ti: “Mpaka otu li po omilongo ntano, atuhe otwa kola. Tu etha, tu ka konge mwene gwoye. Pamwe ombepo yOmuwa oye mu fala e tayi mu thigi mondundu yontumba nenge molusilu lwapenipeni.” Elisa okwa yamukula a ti: “Aawe, inamu ya ko.”

¹⁷ Ihe oye mu thiminike, sigo e ya pitika, ya ye. Mbeyaka omilongo ntano oya yi e taa kongo Elia koondundu nomomasilu omasiku gahetatu, ihe inaye mu mona.

¹⁸ Nena oya galukile kuElisa, ngoka a li a tegelela puJeriko e ta ti kuyo: “Inandi mu lombwela kutya inamu ya ko?”

¹⁹ Aantu yamwe ya zi muJeriko, oya yi kuElisa e taa ti: “Ou shi shi naanaa, tatekulu, kutya oshilando shika oshiwanawa, ihe omeya gamo omawinayi, naakiintu olwindji ohage ya gwithitha mo omala.”

²⁰ Elisa okwa ti: “Tuleni omongwa mokayo okape ne mu ka ete kungame.” Oye ka eta kuye,

²¹ noye okwa yi koluthithiya e ta pimpile omongwa momeya e ta ti: “Omuwa ota ti: ‘Omeya ngaka otandi ga ningi omayelele noitaga ka sitha we nenge ga gwithithe mo ela.’ ”

²² Omeya noga ningi omayelele sigo onena, opahapu dhaElisa ndhoka a popi.

²³ Elisa okwa thigi po Jeriko u uka kuBetel, nomondjila okwa tsakaneke aamati yamwe taa zi koshilando e taye mu nyenkele taa ti: “Za po, angwala! Angwala, inda!”

²⁴ Elisa okwa pungulukile kuyo e te ya geele nokwe ya thingi medhina lyOmuwa. Opo ihe omamwanka gaali omanyali oga hituluka miihwa e taga nyanyagula aagundjuka omilongo ne nayaali.

²⁵ Elisa okwa tsikile ondjila sigo okondundu Karmel, nokonima okwa ka galukila kuSamaria.

3

¹ Momumvo omutimulongo nahetatu gwepangelo lyomukwaniilwa gwaJuda Jehosafat, Joram yaAhab okwa ningi omukwaniilwa gwaIsrael, nokwa lele muSamaria omimvo omulongo nambali.

² Okwa yono kOmuwa, ihe ka li omwiinayi a fa he nenge yina Isebel. Okwa hanagula po ongundhimanya ndjoka ya li ya dhikilwa Baal kuhe.

³ Ihe okwa landula ondjila yomukwaniilwa Jeroboam yaNebat, ngoka e mu tetekela, e ta fala Israel muulunde noine u etha.

⁴ Omukwaniilwa gwaMoab, edhina lye Mesha, okwa li omunahambo gwiigunda yoonzi, nomumvo kehe okwa gandja komukwaniilwa gwaIsrael oonzigona 100 000 nomafufu goonzi ga zi koonzi 100 000.

⁵ Ihe omukwaniilwa gwaIsrael Ahab sho a si, nena Mesha okwa tsu ondumbo naIsrael.

⁶ Joram okwa zi mo mbala muSamaria e ta gongele omatanga ge agehe.

⁷ Okwa tumu elaka kuJehosafat, omukwaniilwa gwaJuda, tali ti: “Omukwaniilwa gwaMoab okwa tsu ondumbo nangame. Ito kwatha ndje, tu ke mu hingile iita?” Omukwaniilwa Jehosafat okwa yamukula a ti: “Otandi gama kungoye naantu yandje nuukambe wandje.

⁸ Otatu ke enda ondjila yini, sho tatu ka homona?” Joram okwa yamukula a ti: “Otatu ka ya nondjila onde yokombuga yaEdom.”

⁹ Omukwaniilwa Joram naakwaniilwa gwaJuda naEdom oya yi. Sho ye ende omasiku gaheyali, omatangakwiita niinamwenyo ya li ye yi na, oya adhika kenota.

¹⁰ Omukwaniilwa Joram okwi igidha a ti: “Twe shi ningwa po! Omuwa okwe tu tula atuhe miikaha yomukwaniilwa gwaMoab!”

¹¹ Omukwaniilwa Jehosafat okwa pula a ti: “Ope na tuu omuhunganeki mpano, tu mu lombwele, a pule Omuwa?” Elenga limwe lyomomalenga gaJoram olya yamukula lya ti: “Ope na Elisa lyaShafat, ngoka a tulile omeya peke lyaElia.”

¹² Omukwaniilwa Jehosafat okwa ti: “Ngoka omuhunganeki shili!” Aakwaniilwa ayehe yatatu noya yi kuElisa.

¹³ Elisa okwa ti komukwaniilwa gwaIsrael: “Omolwashike ndi na oku ku kwatha? Inda, u ka pule aahunganeki mboka ya pulwa kuho nokunyoko.” Joram okwa yamukula a ti: “Aawe! Omuwa oye a tula aakwaniilwa mbaka yatatu miikaha yomukwaniilwa gwaMoab.”

¹⁴ Elisa okwa yamukula a ti: “Otandi gana kOmuwa omunamwenyo, ngoka handi mu longele, kutya ando kanda li ndi na sha nangoye, ando ine simaneka omukwaniilwa gwaJuda Jehosafat.

¹⁵ Ngashingeyi etelii ndje po utale omuhiki gwokaharpa.” Omuhiki sho a hiki okaharpa, Ombepo yOmuwa oye ya muElisa,

¹⁶ oye nokwa ti: “Omuwa ota ti: ‘Fuleni iilambo mesilu ndika.

¹⁷ Nonando kamu wete omvula nenge ombepo, esilu ndika otali ka udha omeya, nane niimuna yeni niinamwenyo yeni otamu ka nwa mu kumwe.’ ”

¹⁸ Elisa okwa tsikile a ti: “Shika oshipu okulongwa kOmuwa, ote ke mu pa wo esindano, mu sinde Aamoabi.

¹⁹ Otamu ka lala iilandohote yawo ayihe yo opala; otamu ka ka po omiti dhawo adhihe dhiiyimati e tamu ka fila po oothithiya dhawo adhihe e tamu ka yona po omatathapya gawo noku ga ndumbila omamanya.”

²⁰ Ongula ya landula pethimbo lyiikulyandjambo yongula, omeya oga kunguluka taga ziilile kuEdom e taga siikile evi.

²¹ Aamoabi sho yu uvu kutya aakwaniilwa yatatu oye ya oku ya homona, aalumentu ayehe mboka taa vulu okuhinga iita oya hiywa, aashona naanene, e taa kala pongamba.

²² Ongula yesiku lya landula aantu sho ya penduka, etango olya li tali minikile kombanda yomeya e taga ningi ga tiligana ga fa ombinzi.

²³ Oyi igidha ya ti: “Ombinzi! Aatondi yatatu yomatangakwiita oya fa ya kondjithathana noya dhipagathana! Tu yeni, tu ka hakane oontanda dhawo!”

²⁴ Ihe sho ya thiki poontanda, Aaisraeli oye ya ponokele e taye ya tidha po. Aaisraeli oye ya landula, e taye ya dhipaga

²⁵ nokuyonagula po iilando yawo. Shaa ya pitilile etathapya, Omuisraeli kehe okwa dhogele mo emanya, sigo pehulilo omapya agehe ga siikilwa naanaa. Oya thitike po wo oothithiya e taa ke po omiti dhiiyimati. Pehulilo oshilandolelo Kir Hares osha li sha thigala po, ihe aakwiita mboka ye shi okudhaadhiga omamanya, oye shi kunduka e taye shi ponokele.

²⁶ Omukwaniilwa gwaMoab sho a dhimbulula kutya oku li po ta sindika molugodhi, okwa kutha aanamagongamwele omathele gaheyali pamwe naye nokwa kambadhala okupandakana mokati kaatondi, a ye ondapo komukwaniilwa gwaSiria, ihe osima yowala.

²⁷ Onkee ano okwa kutha omumati gwe gwosheeli, ngoka a li te mu landula muukwaniilwa, e te mu yambele komakuma goshilando efikilondjambo, e mu yambele oshikalunga shaMoab. Nena Aaisraeli oya geye unene noya zi moshilando ya shuna koshilongo shawo.

4

¹ Omuselekadhi gwomuhunganeki gumwe okwa yi kuElisa e ta ti: “Tatekulu, omusamane gwandje okwa si! Okwa li omulumentu omutilikalunga, ngaashi u shi shi. Nena omupulingunga gumwe okwa adha ndje a hala okukutha po aamwandjemati yaali omolwoongunga, ya ninge aapika ye.”

² Elisa okwa pula a ti: “Hm, otandi ku ningi ngiinyee? Lombwela ndje, oshike u na maandjeni?” Omukulukadhi okwa yamukula a ti: “Kandi na sha tuu, kakele kokayo ke na uugadhi.”

³ Elisa okwe mu lombwele a ti: “Inda kaashiinda yoye, u ka hehele iiyuma oyindji yaa na sha.

⁴ Inda ihe naamwoyemati megumbo, edhila omweelo e to tameke okupimpila omagadhi miiyuma. Shoka shu udha, shi itulila mpee.”

⁵ Omuselekadhi okwa yi megumbo lye pamwe noyanamati nokwe edhile omweelo. Okwa kutha okayo komagadhi e te ga tile miiyuma mbyoka oyanamati taye mu etele.

⁶ Sho yu udhitha iiyuma ayihe, okwa pula, ngele opu na natango oshiyuma. Gumwe gwomoyanamati okwa ti: “Aawe, shika osho sha li shahugunina.” Omagadhi noga sheka okuvila.

⁷ Omuselekadhi okwa shuna komuhunganeki Elisa, ngoka a ti kuye: “Landitha po omagadhi e to futu oongunga dhoye adhihe noto ki ihupithila po iimaliwa ye ku gwanena naamwoyemati, mu ipaluthe nayo.”

⁸ Esiku limwe Elisa okwa yi kuShunem, nkoka kwa li omukiintu omuyamba. Omukiintu okwe mu ithana komwiha, nokuza mpoka shaa ngaa a ka yile kuShunem, oha li megumbo lyaandjawo.

⁹ Omukiintu okwa lombwele omulume a ti: “Ngame ondi shi shi nawa kutya omulumentu nguka he ya kaandjetu olwindji, oye omuyapuki.

¹⁰ Natu mu tungile ela lye kombanda yongulu moka mwa tulwa ombete, oshitaafula, oshipundi nolamba, opo a vule okumenekela putse, uuna te tu talele po.”

¹¹ Esiku limwe Elisa okwa galukile kuShunem e ta londo, a ka vululukwe mondunda ye pombanda.

¹² Okwa lombwele omumati gwe Gehasi, a ye a ka ithane omukulukadhi. Sho e ya,

¹³ okwa ti kuGehasi: “Mu pula kutya okwa hala ndi mu ningile shike, sho e tu kwatha ngeyi moompumbwe dhetu. Pamwe okwa hala ndi ye nando okomukwaniilwa nenge kondjayi yaakwiita, ndi ke mu popile.” Omukiintu okwa yamukula a ti: “Ondi na ayihe nde yi pumbwa, oshoka ondi li mokati kaantu yaandjetu.”

¹⁴ Elisa okwa pula Gehasi a ti: “Ope na tuu sha te vulu oku mu ningila?” Gehasi okwa yamukula a ti: “Ope na, oshoka ke na munona, nomulume okwa kulupa.”

¹⁵ Elisa okwa ti: “Mu ithana, e ye huka.” Omukiintu okwe ya nokwa thikama pomweelo.

¹⁶ Elisa okwa ti kuye: “Pethimbo ngaandika omumvo tagu ya oto ka kala wa ukata okanona okamati momaako goye.” Omukiintu okwi igidha a ti: “Atyetyetye! Tatekulu, ino fundja ndje. Ngoye omuntu gwaKalunga.”

¹⁷ Ihe lwopethimbo ngaandyoka lyomumvo gwa landula ko omukiintu okwa vala okanona okamati, ngaashi Elisa a tile.

¹⁸ Omimvo dhimwe sho dha piti po, pethimbo lyeteyo, omumati okwa zi megumbo ongula yimwe, a ye kuhe a li mepya pamwe naateyi.

¹⁹ Ohaluka okwi igidha he ta ti: “Omutse gwandje tagu pwatuka! Omutse gwandje tagu pwatuka!” He okwa ti komupiya: “Fala omumati kuyina!”

²⁰ Omupiya okwe mu yambula po e te mu fala kuyina, ngoka e mu kuutumbike komatundji ge sigo omutenya, nopethimbo ndyoka omumati okwa si.

²¹ Yina okwe mu yambula po e te mu fala mondunda yaElisa. Okwe mu langeke kombete e ta zi po nokwe edhile omweelo.

²² Nena okwi ithana omulume e ta ti kuye: “Tumina ndje omupiya nokasino. Ote pumbwa okuya komuhunganeki Elisa. Otandi galuka mbalambala.”

²³ Omulume okwe mu pula a ti: “Omolwashike u na okuya nena? Kali shi esiku lyEsabati nenge oshituthi shomwedhi omupe.” Omukiintu okwa yamukula a ti: “Kape na mbudhi.”

²⁴ Nena okwa kutilitha okasino e ta lombwele omupiya ta ti: “Tidha okasino, ke endelele; ino fudha, manga inaandi ku lombwela!”

²⁵ Osho a zi mo e ta yi kondundu Karmel, nkoka kwa li Elisa. Elisa okwe mu mono te ya kuye, manga a li kokule e ta ti komumati gwe Gehasi: “Tala, omukulukadhi gwokuShunem!

²⁶ Endelela, u ke mu pule, ngele ye mwene, omulume nomwanamati oye li tuu nawa.” Omukulukadhi okwa lombwele Gehasi kutya oye li nawa,

²⁷ ihe sho e ya kuElisa, okwe mu inyongamene e te mu kwata koompadhi. Gehasi okwa li a hala e mu undule po, ihe Elisa okwa ti: “Mu etha; ku wete kutya okwa nika oluhodhi olunene? NOmuwa ine shi lombwela ndje.”

²⁸ Omukulukadhi okwa ti kuye: “Tatekulu, onde ku pulile omunona? Kanda li nda tya, ino fundja ndje?”

²⁹ Elisa okwa shuna kuGehasi e ta ti: “Endelela! Kutha ondhimbo yandje e to yi. Ino thikama, u kunde ngo te ku tsakaneke, nongele ku na ngoka te ku kundu, ino mana po ethimbo noku mu yamukula. Ukilila kegumbo nou yeluthile ondhimbo yandje komumati.”

³⁰ Omukulukadhi okwa ti kuElisa: “Otandi gana kOmuwa omunamwenyo nokungoye kutya itandi ku thigi po!” Osho ngaaka Elisa okwa yi pamwe naye.

³¹ Gehasi okwe ya tetekelele e ta yeluthile omumati ondhimbo yaElisa, ihe muye kamwa li omufudho nenge endhindhiliko lyomwenyo. Onkee a shuna, a ka tsakaneke Elisa e ta ti: “Omumati ina penduka nande.”

³² Elisa sho a thiki, okwa yi mondunda oye awike e ta mono omumati a lala mombete a sa.

³³ Okwe edhile omweelo nokwa galikana Omuwa.

³⁴ Nena okwa lala pomumati a tula okana ke pokana komumati, omeho ge pomeho gomumati niikaha ye piikaha yomumati. Sho a lala a laminina omumati, olutu lwomumati olwa tameke okupupyala.

³⁵ Elisa okwa penduka po, e endagula nondunda nokwa shuna ishewe e ta lala komumati. Omumati okwa shemita luheyali, nopo ihe a tonata.

³⁶ Elisa okwi ithana Gehasi e te mu lombwele, i ithane yina yomumati. Yina sho e ya mo, Elisa okwa ti kuye: “Omumwoye oye nguka.”

³⁷ Nena yina okwi inyongamene koompadhi dhaElisa a tsa oshipala pevi; opo ihe okwa toola po omwana e ta yi.

³⁸ Esiku limwe oshilongo ashihe sho sha li shi na ondjala, Elisa okwa galukile kuGilgal. Manga a li ta nongeke ongundu yaahunganeki, okwa lombwele omupiya gwe, a tule po ombiga onene peziko, e ya telekele iikulya.

³⁹ Gumwe gwomuyo okwa yi melundu, a ka tale iikwamboga. Okwi itsu okatanga kamuthithi e ta kutha ko uutanga, ngaashi ta vulu oku u humbata monguwo ye. Okwe u eta e te u pambulile mombiga, oshoka ine u tseya.

⁴⁰ Iikulya oya hukulilwa aantu ya lye, ihe sho ye yi makele, oyi igidha Elisa taa ti: “Eso mombiga!” — noinaa vula oku yi lya.

⁴¹ Elisa okwa pula, e etelwe uusila, e te u zikile mombiga e ta ti: “Yi hukululileni ishewe aantu.” Nena kapwa li we oshiponga shasha.

⁴² Esiku limwe omulumentu gumwe okwa zi kuBaal Shalisha e etela Elisa iikwiila omilongo mbali yiilya iipe yomumvo ngoka nomaha omayihu. Elisa okwa lombwele omupiya gwe, a paluthe nayo ongundu yaahunganeki,

⁴³ ihe omupiya okwa yamukula a ti: “Oto dhiladhila kutya otayi gwanene aalumentu ethele?” Elisa okwa yamukula a ti: “Yi ya pa, ya lye, oshoka Omuwa ota ti, otaa ka lya e taa hupitha ko.”

⁴⁴ Omumati okwa tula iikulya puyo, nongaashi Omuwa a popi, ayehe oya lya nokwa hupu sha natango.

5

¹ Naeman, ondjayi yetangakwiita lyAasiria, okwa li a simanekwa noonkondo nokwa li e na oshilonga oshinene pomukwaniilwa gwaSiria, oshoka omolwaNaeman Omuwa a gandja esindano kaakwiita yaSiria. Naeman okwa li omukwiita ependa, ihe okwa li a hepekwa koshilundu.

² Mekumbu lyawo limwe mokulwa naIsrael, Aasiria oya kwata po okakadhona Okaisraeli, noka ningi omupika gwomukulukadhi gwaNaeman.

³ Esiku limwe omukadhona okwa lombwele mwene gwe a ti: “Nda hala tuu, omuwa gwandje a ye komuhunganeki e li muSamaria! Ote ke mu aludha oshilundu she.”

⁴ Naeman sho e shi uvu, okwa yi komukwaniilwa e te mu lombwele, shoka omukadhona a popi.

⁵ Omukwaniilwa okwa ti: “Inda komukwaniilwa gwaIsrael, u mu faalele ontumwafo ndjika.” Naeman okwa yi e na iimaliwa yiisiliveli omayuvi omilongo ndatu, iimaliwa yoshingoli omayuvi gahamano nomitsuhu omulongo dhuuyamba.

⁶ Ontumwafo ndjoka a faalele omukwaniilwa gwaIsrael, otayi ti: “Otandi tumu elenga lyandje Naeman pamwe nontumwafo ndjika kungoye. Onda hala, u aludhe uuvu we woshilundu.”

⁷ Omukwaniilwa gwaIsrael sho a lesha ontumwafo, okwa kunkwa e ta tuula oonguwo dhe ti igidha ta ti: “Omukwaniilwa gwaSiria ota vulu ngiini okudhiladhila, ndi aludhe omuntu nguno? Ota dhiladhila kutya ongame Kalunga ndi na oonkondo okumwenyeka nokudhipaga. Ndika ehindo ta kambadhala okuhinda ndje shila!”

⁸ Omuhunganeki Elisa sho a kundana shoka sha ningwa po, okwa tumu elaka komukwaniilwa tali ti: “Omolwashike wa piyagana? Tuma omuntu ngoka kungame notandi ke mu ulukila kutya muIsrael omu na omuhunganeki.”

⁹ Naeman okwa yi nuukambe we netemba lye e ta thikama peelo lyegumbo lyaElisa.

¹⁰ Elisa okwa tumu omupiya, e mu lombwele, a ye e ki iyogele luheyali momulonga Jordan, nota aluka thiluthilu kuuvu we woshilundu.

¹¹ Ihe Naeman okwa zi po a sa ondjahi ta ti: “Onda li ndi shi, ote ya kungame nokuli, ta galikana Omuwa, Kalunga ke, ta fungafunga noshikaha she kombanda yehala lyoshilundu e ta aludha ndje!

¹² Nokuli Abana naParpar, omilonga dhomuDamaskus, odhi vule omilonga adhihe muIsrael? Onda li te vulu okwiiyogela mudho, ndi aluke!”

¹³ Aapiya ye oya yi kuye e taa ti: “Tatekulu, omuhunganeki ando okwa li e ku lombwela sha oshidhigu, ando ino shi ninga? Ngashingeyi oshike itoo iyogo, ngaashi a ti, e to aluka?”

¹⁴ Nena Naeman okwa yi kuJordan, i ininginitha mo luheyali, ngaashi Elisa e mu lombwele, nokwa aluka thiluthilu. Olutu lwe olwa ningi lwa fa lwomugundjuka nolwa yela.

¹⁵ Okwa galukile kuElisa naantu ye ayehe e ta ti: “Ngashingeyi ondi shi shi kutya kaku na kalunga gulwe kakele kaKalunga kaIsrael awike, onkee ano, tatekulu, kwatha ndje u taambe omagano gandje.”

¹⁶ Elisa okwa yamukula a ti: “Otandi gana kOmuwa omunamwenyo, ngoka handi mu longele, kutya itandi taamba omagano nando.” Naeman okwa thiminike, e ga taambe, ihe ine ga taamba.

¹⁷ Nena Naeman a ti: “Ngele ino hala okutaamba omagano gandje, etha ndje ndi humbate evi komamulutiya gaali, ndi li faalele kegumbo oshoka okuza nena ndjika itandi ka yamba we efikilondjambo nenge ontselelandjambo kukalunga gulwe, ihe okOmuwa awike.

¹⁸ Ondi inekela kutya Omuwa ota ka dhimina ndje po, uuna te thindikile omukwaniilwa gwandje, sho ta yi kotempeli yaRimmon, oshikalunga shaSiria, note shi inyongamene e egamena kokwooko kwandje. Oshili, Omuwa ota ka dhimina ndje po!”

¹⁹ Elisa okwa ti: “Inda nombili!” Naeman okwa yi. Naeman okwa adhika e ende owala oshinano oshishona,

²⁰ sho omupiya gwaElisa Gehasi i ipopile ta ti: “Hm, mwene gwandje okwe etha Naeman inaa futa nando osha! Okwa li e na okutaamba shoka Omusiria kwa li ta gandja. Oshili, ngaashi Omuwa e na omwenyo, otandi tondoka, ndi mu landule ngaye ndi taambe sha kuye.”

²¹ Osho ngaaka a landula Naeman. Naeman sho a mono omuntu te ya tondokele e ya landula, okwa londoloka metemba e ta yi, e ke mu tsakaneke. Okwe mu pula ta ti: “Ope na epuko lyasha?”

²² Gehasi okwa ti: “Aawe, ihe mwene gwandje okwa tumu ndje, ndi ku lombwele kutya moshilongo shokoondundu dhaEfraim omwa zi aahunganeki yaali aagundjuka, mboka opo ya thiki kuye. Ya pa iimaliwa iisiliveli omayuvi gatatu nomitsuhu mbali dhuuyamba.”

²³ Naeman okwa yamukula a ti: “Kwatha ndje u taambe iimaliwa iisiliveli omayuvi gahamano.” Okwe mu thiminike e ta mangele iisiliveli moompunda mbali e te dhi gandja nomitsuhu mbali dhuuyamba kaapiya ye yaali e te ya tumu mewiliko lyaGehasi.

²⁴ Sho ya thiki kondundu nkoka Elisa a li, Gehasi okwa kutha oompunda ndhoka mbali e te dhi fala megumbo nokwa shunitha aamati yaNaeman.

²⁵ Sho a galukile megumbo, Elisa okwe mu pula a ti: “Owa li peni?” Gehasi okwa yamukula a ti: “Aawe, kandi na mpo nda li, tatekulu!”

²⁶ Ihe Elisa okwa ti: “Ou shi, omwenyo gwandje inagu ku landula, omusamane sho a londoloka metemba lye, e ku tsakaneke? Ethimbo ndika kali shi lyokutaamba iimaliwa nomizalo, iitsambe yomiolivi noyomiviinu, oonzi noongombe nenge aapika!

²⁷ Ihe ngashingeyi oto kwaula ko uuvu waNaeman, ongoye mwene noluvalo lwoye otamu ka kala nawo sigo aluhe.” Gehasi sho a zi po, okwa kwatwa koshilundu — olutu lwe olwa toka lwa fa omahegele gomongwa.

6

¹ Esiku limwe ongundu yaahunganeki mboka ya li metonatelo lyaElisa, oya ti: “Ondunda moka twa kala, oya thinana.

² Tu pitikila, tu ye kuJordan, tu ka komangele omiti, opo tu itungile eha lyokukala.” Elisa okwa yamukula a ti: “Onawa.”

³ Gumwe gwomuyo okwe mu thiminike, ya ye pamwe naye. Elisa okwa zimine,

⁴ noya piti mo ayehe e taa yi. Sho ya thiki puJordan, oya tameke okukomangela.

⁵ Omuhunganeki gumwe manga a li ta komangele omuti, ohaluka ekuya lye olya hukukile momeya. Okwi igidha Elisa a ti: “Tatekulu! Akwetu, ote ningi ngiini? Ekuya kali shi lyandje, olyaantu!”

⁶ Elisa okwa pula a ti: “Olya gwile naanaa peni?” Omuhunganeki okwe mu ulukile ehala, naElisa okwa tete oshitayi e te shi umbile momeya e tashi igalaleke ekuya kombanda yomeya.

⁷ Elisa okwa ti: “Li kutha po,” omulumentu nokwa petama e te li kutha po.

⁸ Omukwaniilwa gwaSiria okwa hingile Israel iita. Okwa pula omalenga ge omayele e ta hogolola ehala, a yungile po ontanda ye.

⁹ Ihe Elisa okwa tumu elaka komukwaniilwa gwaIsrael e mu londodha, kaa hedhe kehala ndyoka, molwashoka Aasiria oya langela miiholameno.

¹⁰ Omukwaniilwa gwaIsrael okwa londodha aantu mboka ya kala mehala ndyoka, noya li ya tonata. Shika osha ningwa olwindjilwindji.

¹¹ Shika osha piyaganeke omukwaniilwa gwaSiria nokwi ithana omalenga ge e te ga pula ta ti: “Olye ano gwomune a gama komukwaniilwa gwaIsrael?”

¹² Limwe lyomugo olya yamukula lya ti: “Kape na nando ogumwe, Nkeyama. Omuhunganeki Elisa oye ta lombwele omukwaniilwa gwaIsrael shoka to ti, nando nashi kale muuwike mondunda yoye mwene.”

¹³ Omukwaniilwa okwa ti: “Ke mu kongeni, ongame notandi ke mu kwata po.” Sho a lombwelwa kutya Elisa oku li muDotan,

¹⁴ okwa tumu ko etanga enene li na uukambe nomatembakwiita. Oya thiki koshilando uusiku e taye shi kondeke.

¹⁵ Omumati gwaElisa okwa penduka ongula onene e ta yi pondje nokwa mono omatanga gAasiria ge na uukambe wago nomatembakwiita ya kondeka oshilando. Okwa galukile kuElisa ti igidha ta ti: “Yayee, tatekulu! Otatu ningi ngiini?”

¹⁶ Elisa okwa yamukula: “Ino tila, otu na oyendji ya gama kutse ye vule mboka ya gama kuyo.”

¹⁷ Nena okwa galikana a ti: “Omuwa, tonatitha omeho ge, opo a tale!” Omuwa okwa yamukula egalikano lye, nomumati gwaElisa okwa ligamene ko e ta mono ondundu ya kundukidhwa kuukambe womulilo nokomatembakwiita gomulilo ga kunduka Elisa.

¹⁸ Aasiria sho ya homona, Elisa okwa galikana a ti: “Omuwa, tsikitha aantu mbaka!” Omuwa okwa yamukula egalikano lye e te ya tsikitha.

¹⁹ Nena Elisa okwa yi kuyo e ta ti: “Omu li mondjila haayo noshilando shoka tamu kongo hasho shika. Landulii ndje, notandi mu fala komuntu ngoka tamu kongo.” Oye nokwe ya fala kuSamaria.

²⁰ Mbalambala sho ya yi meni lyoshilando, Elisa okwa galikana a ti: “Omuwa, tonatitha omeho gawo, opo ya mone ko.” Omuwa okwa yamukula egalikano lye; okwe ya tonatitha e taa mono kutya nani oye li meni lyaSamaria.

²¹ Omukwaniilwa gwaIsrael sho a mono Aasiria, okwa pula Elisa ta ti: “Tatekulu, nandi ya dhipage? Nandi ya dhipage?”

²² Elisa okwa yamukula a ti: “Aawe! Ino shi ninga! Oto vulu okudhipaga mboka wa kwata negongamwele lyoye nuutati woye? Ya pa iikulya nomeya, ya lye yo ya nwe yo ya shune kumwene gwawo.”

²³ Omukwaniilwa gwaIsrael okwe ya ningile oshituthi oshinene. Sho ya li noya nu, okwe ya etha, ya shune komukwaniilwa gwaSiria. Okuza mpoka Aasiria oya hulitha okulwa Israel omakumbu.

²⁴ Konima yaambika omukwaniilwa gwaSiria Benhadad okwa hingi iita yolela, a kondjithe Israel e ta wilike ekondeko lyoshilando Samaria.

²⁵ Molwekondeko ndika iikulya oya li ya pumba moshilando noonkondo, sigo omutse gwokasino ogwa landwa niimaliwa iisiliveli omilongo hetatu, netatalita lyuuhoho woonguti olya gu iimaliwa iisiliveli itano.

²⁶ Omukwaniilwa gwaIsrael okwa li te ende kombanda yekuma lyoshilando, sho omukulukadhi gumwe i igidha ta ti: “Nkeyama, kwatha ndje!”

²⁷ Omukwaniilwa okwa yamukula a ti: “Omuwa ngele ina hala oku ku kwatha, otandi ku kwatha ngiini? Iilya tandi ku pe nenge omaviinu?

²⁸ Uudhigu woye owashike?” Omukulukadhi okwa yamukula a ti: “Uunambo omukulukadhi mukwetu nguka okwa tile, natu lye po omumwandjemati, opo helelenya tu lye po omwanamati.

²⁹ Otwa teleke po omumwandje notwe mu li po. Esiku lyanofu sho nde mu lombwele, tu lye po omwana, okwe mu holeke.”

³⁰ Omukwaniilwa sho e dhi uvu, okwa tuula oonguwo dhe moluhodhi, naantu mboka ya li popepi nekuma, oya mono omukwaniilwa sho a zala omahahi kolutu lwe.

³¹ Okwi igidha a ti: “Kalunga na dhipage ndje, ngele omutse gwaElisa lyaShafat otagu kala ko kuye nena.”

³² Omukwaniilwa nokwa tumu omutumwa okwaadha Elisa. Elisa okwa li maandjawo pamwe naakuluntu mboka ye ya oku mu talela po. Manga omutumwa guuwa inaa thika, Elisa okwa ti kaakuluntu: “Omudhipagi ngoka okwa tumu omuntu gumwe, e ye a dhipage ndje! Ngashingeyi manga inaa thika, edhileni omweelo ne inamu pitika, e ye meni. Omukwaniilwa ye mwene ote mu landula mbala.”

³³ Manga a li ta popi, omukwaniilwa okwa thiki e ta ti: “Omuwa oye e tu undulile uudhigu mbuka! Omolwashike ndi na okutegelela natango, Omuwa a ningile ndje sha?”

7

¹ Elisa okwa yamukula a ti: “Pulakeneni shoka Omuwa ta ti. Pethimbo ngaandika ngula yanakwasha otamu ka vula okulanda muSamaria ookilograma ndatu dhuusila wosiimela nenge ookilograma hamano dhuusila wiishokelya tau gu oshimaliwa shimwe oshisiliveli.”

² Elenga lyomekolo lyomukwaniilwa olya ti kuElisa: “Itashi vulika okuningwa sho — nando Omuwa mwene a lokithe omvula polumwe!” Elisa okwa yamukula a ti: “Oto shi mono sho tashi ningwa, ihe iikulya mbyoka ito ke yi lola nando.”

³ Aalumentu yane mboka ya li taya alukwa oshilundu, oya li pondje yosheelo shaSamaria noya lombwelathana ya ti: “Omolwashike tatu kala mpaka, sigo tatu si?

⁴ Itashi tu kwatha, tu ye moshilando, oshoka otatu ka sa kondjala; ihe ngele otatu kala owala mpano, otatu ka sa ishewe. Natu yeni kontanda yAasiria. Otaa vulu oku tu dhipaga, ihe otashi vulika wo, ye tu hupithe tu kale tu na omwenyo.”

⁵ Etango sho li li pokuningina, oya yi kontanda yAasiria, ihe sho ya thiki ko, oyi iyadhaadha ko.

⁶ Omuwa okwa li u uvitha Aasiria oshihomo shaakwiita oyendjiyendji taa hedha ko ye na uukambe nomatembakwiita, nAasiria oya dhiladhila kutya omukwaniilwa gwaIsrael okwa li a hiya aakwaniilwa yAaheti noyAayegipiti nomatangakwiita gawo, ye ya ponokele.

⁷ Ongulohi ndjoka Aasiria oya adhika ya fadhuka po, ya ka hupithe oomwenyo dhawo. Oya thigi po ootenda dhawo, uukambe nuusino, noye etha ontanda yi li ngaashi ya li.

⁸ Aalumentu mbeyaka yane sho ya thiki kooha dhontanda, oya yi motenda yimwe, ya li e taa nu shoka sha li mo, oya hakana iisiliveli niingoli noonguwo ndhoka ya mono mo, e taa zi mo e taye dhi holeke. Nena oya galuka e taa yi ishewe motenda onkwawo e taa ningi, ngaashi ya ningile.

⁹ Ihe oya lombwelathana ya ti: “Otatu ningi nayi. Otu na onkundana ombwanawa nokatu vulu oku yi mwenena. Ngele otatu tegelele, sigo ongula taku shi, otatu ka geelwa. Tu yeni mbala, tu ka lombweleni omalenga gomukwaniilwa!”

¹⁰ Oya thigi po ontanda yAasiria e taa shuna kuSamaria yo tayi igidha aalangeli yopiiyelo taa ti: “Sho twa yile kontanda yAasiria, inatu ya adha ko; uukambe nuusino auke twa adha ko wa mangwa, nootenda odha li, ngaashi Aasiria ye dhi thigile po.”

¹¹ Aalangeli oyi igidha, noonkundana odha tseyithwa muuwa.

¹² Ethimbo olya li lyuusiku, ihe omukwaniilwa okwa penduka a piti mo e ta ti komalenga ge: “Nandi mu lombwele shoka Aasiria ya dhiladhila! Oya tseya kutya otu na ondjala muka, omolwashoka ya thigi po ontanda yawo noya ka holama melundu. Otaa dhiladhila kutya otatu ka za mo moshilando, tu ka konge iikulya. Nena otaye ke tu kwata tu na omwenyo e taa yugu po oshilando.”

¹³ Limwe lyomomalenga ge olya ti: “Aantu mbaka yomoshilando kaye na we etegameno, oya fa naanaa mboka ya sa nokuli. Natu tumeni ano aantu yamwe ye na uukambe utano mboka wa hupu ko, opo tu dhimbulule shoka sha ningwa po.”

¹⁴ Oya hogolola aantu yamwe, nomukwaniilwa okwe ya tumu momatembakwiita gaali, ya ka tale shoka etangakwiita lyAasiria lya ningilwa.

¹⁵ Aantu oya yi sigo okuJordan nomondjila ayihe oya mono oonguwo nomatati ngoka Aasiria ya gwithile pevi, sho taa yi ontuku. Nena oya shuna noye ke shi hokololela omukwaniilwa.

¹⁶ Nena Aasamaria oya piti mo moshilando e taa hakana iihakanwa montanda yAasiria. Nodha tsa ndhoka dha popiwa kOmuwa, sho a ti kutya ookilograma ndatu dhuusila wosiimela nenge ookilograma hamano dhuusila wiishokelya owa landithwa po oshimaliwa shimwe oshisiliveli.

¹⁷ Omukwaniilwa gwaIsrael okwa adhika a tula elenga lye enene posheelo shoshilando okutonatela elandulathano. Ihe olya nyankulilwa pevi kaantu, sho ya li taa thindakana, e tali si, ngaashi Elisa a tile, sho omukwaniilwa a li e ke mu talela po.

¹⁸ Elisa okwa lombwelele omukwaniilwa kutya pethimbo ndyoka esiku tali landula ookilograma ndatu dhuusila wosiimela nenge ookilograma hamano dhuusila wiishokelya otau ka landithwa muSamaria oshimaliwa shimwe oshisiliveli;

¹⁹ nelenga ndyoka lya yamukulile tali ti: “Shika itashi vulika okuningwa — nonando Omuwa a lokithe omvula polumwe!” NaElisa okwa yamukulile a tile: “Oto ka mona tashi ningwa, ihe ito ka lola sha miikulya mbyoka.”

²⁰ Nosho shoka she mu ningilwa naanaa — okwa nyankulilwa pevi kethindakano lyaantu pomweelo gwoshilando e ta si.

8

¹ Elisa okwa lombwele omukulukadhi gwokuShunem, ngoka a li e na omwanamati a yumudhwa, kutya na tembukile negumbo lye shaa mpoka taa vulu okuhupila, oshoka Omuwa ota tumine oshilongo ondjala yekomba, ndjoka tayi ka kala omimvo heyali.

² Omukulukadhi okwa landula omayele gaElisa e ta yi negumbo lye, ya ka kale muFilistia omimvo heyali.

³ Pehulilo lyomumvo omutiheyali okwa galukile kuIsrael e ta yi komukwaniilwa neindilo, a galulilwe egumbo lye nepya lye.

⁴ Okwa adha omukwaniilwa taa kundathana naGehasi, omupiya gwaElisa. Omukwaniilwa okwa li a hala okutseya iinyengandunge yaElisa.

⁵ Gehasi manga ta hokololele omukwaniilwa, nkene Elisa a yumudha omusi, omukulukadhi okwe ya pomukwaniilwa. Gehasi okwa ti komukwaniilwa: “Nkeyama, nekulu oye nguka nomwanamati oye nguka ngoka a yumudhwa kuElisa.”

⁶ Mokuyamukula omapulo gomukwaniilwa omukulukadhi okwa koleke ehokololo lyaGehasi, nonkee omukwaniilwa i ithana elenga lye limwe e te li lombwele, li mu pe iinima ye ayihe mwa kwatelelwa ondjundo yiikwakuliwa ayihe ya menene mepya lye momimvo ndhoka heyali, sho a li a tembuka moshilongo.

⁷ Elisa okwa yi kuDamaskus pethimbo ndyoka omukwaniilwa gwaSiria Benhadad a li ta alukwa. Omukwaniilwa sho a lombwelwa kutya oku na Elisa,

⁸ okwa ti kelenga lye Hasael: “Faalela omuhunganeki omagano, ngoye u mu lombwele, a pule Omuwa kutya ote kala po ngiini? Otandi ka aluka tu?”

⁹ Hasael okwa kutile oongamelo omilongo ne omaliko guuyamba waDamaskus e ta yi kuElisa. Hasael sho e mu tsakaneke, okwa ti: “Omuntu gwoye Benhadad okwa tumu ndje, ndi ku pule kutya ota ka aluka tu kuuvu we”.

¹⁰ Elisa okwa yamukula a ti: “Omuwa okwa hololele ndje kutya ota si, ihe inda kuye, u mu lombwele kutya ota aluka.”

¹¹ Nena Elisa okwe mu tongolola nomeho guutile, sigo Hasael ta ngwangwana. Ohaluka Elisa okwa tameke okulila omahodhi omapyu.

¹² Hasael okwa pula a ti: “Tatekulu, omolwashike to lili?” Elisa okwa yamukula a ti: “Omolwashoka te tseya iihuna mbyoka to ka ningila Aaisraeli. Omapopilongulu gawo oto ke ga fika po, to dhipaga aagundjuka yawo yo opala negongamwele, aanona yawo oto ke ya nyanyagula po ya se, aakulukadhi yawo aasimba oto ke ya vutula.”

¹³ Hasael okwa pula a ti: “Otandi vulu ngiini okulonga iilonga yi thike mpono? Kandi na mwago!” Elisa okwa yamukula ta ti: “Omuwa okwa hololele ndje kutya oto ka ninga omukwaniilwa gwaSiria.”

¹⁴ Hasael okwa yi a shuna kuBenhadad, ngoka e mu pula ta ti: “Elisa okwa ti ngiini?” Hasael okwa yamukula a ti: “Okwa lombwele ndje ta ti, oto aluka.”

¹⁵ Ihe esiku lyanofu Hasael okwa kutha ekumbyatha e te li yaya momeya e te li siikile omukwaniilwa komayulu. Osho ngaaka omukwaniilwa a si, naHasael okwa ningi omukwaniilwa gwaSiria.

¹⁶ Momumvo omutitano gwelelo lyaJoram yaAhab, omukwaniilwa gwaIsrael, Joram yaJehosafat okwa ningi omukwaniilwa gwaJuda

¹⁷ e na omimvo omilongo ndatu nambali e ta lele muJerusalem omimvo hetatu.

¹⁸ Omunyekadhi gwe okwa li omuna gwaAhab, nokwa landula omapola omawinayi gaakwaniilwa yaIsrael, ngaashi ezimo lyaAhab lya ningile. Okwa yono kOmuwa,

¹⁹ ihe Omuwa ka li a hala okuyona po Juda, oshoka okwa li u uvanekele omuntu gwe David kutya oluvalo lwe otalu ka pangela aluhe.

²⁰ Pethimbo lyepangelo lyaJoram Edom okwa tsile Juda ondumbo nokwi ikwaniileke uukwaniilwa we mwene.

²¹ Onkee Joram a piti mo a yi nomatembakwiita ge agehe kuZair, nkoka omatanga gAaedom ge ya kondeke. Mokati kuusiku oye nomalenga gomatembakwiita ge oye shi pondola okugwaya mo e taa piti mo, naakwiita ye oyi ihana e taa yi komagumbo gawo.

²² Edom okwa li a manguluka mepangelo lyaJuda. Methimbo tuu ndyoka, noshilando Libna osha tsu wo ondumbo.

²³ Ashihe shilwe shoka Joram a ningi, osha nyolwa membo lyondjokonona yaakwaniilwa yaJuda.

²⁴ Joram okwa si nokwa fumvikwa mombila yaakwaniilwa moshilando shaDavid, nomwana Ahasia okwe mu landula muukwaniilwa.

²⁵ Momumvo omutimulongo nambali gwepangelo lyaJoram yaAhab, omukwaniilwa gwaIsrael, Ahasia yaJoram okwa ningi omukwaniilwa gwaJuda

²⁶ mepipi lyomimvo omilongo mbali nambali, nokwa lele omumvo gumwe muJerusalem. Yina oAtalia omuna gwomukwaniilwa Ahab, nomutekulu gwomukwaniilwa gwaIsrael Omri.

²⁷ Ahasia, ngoka a li omutekulu gwomukwaniilwa Ahab, okwa yono kOmuwa a fa naanaa ezimo lyaAhab.

²⁸ Omukwaniilwa Ahasia okwa hangana nomukwaniilwa gwaIsrael Joram, opo ya hingile omukwaniilwa gwaSiria iita. Aakwiita oya pwakele muRamot shaGilead, naJoram okwe ehamekwa molugodhi.

²⁹ Okwa galukile koshilando Jesreel, a ka pangwe iishaho ye, naAhasia okwa yi ko, e ke mu talele po.

9

¹ Omuhunganeki Elisa okwi ithana gumwe gwomaahunganeki aagundjuka e ta ti kuye: “Ilongekidha, u ye kuRamot shaGilead. Kutha ohanga ndjika yomagadhi, u ye nayo.

² Nge wa thiki ko, konga Jehu yaJehosafat, omutekulu gwaNimshi. Inda naye meni lyongulu mu ze mooyakwawo,

³ tilila omagadhi ngaka komutse gwe e to ti: ‘Omuwa ota popi ta ti kutya ote ku gwayeke omukwaniilwa gwaIsrael.’ Nena za po to matuka wa dhiginina.”

⁴ Omuhunganeki omugundjuka okwa yi kuRamot,

⁵ nkoka a adha omalenga gomatangakwiita ge li moshigongi. Okwa ti: “Tatekulu, ngame omuyenda gwoye.” Jehu okwa pula a ti: “Olye gwomutse to lombwele?” Okwa yamukula a ti: “Ongoye, tatekulu.”

⁶ Nena ayehe yaali oya yi meni lyongulu, nomuhunganeki omugundjuka okwa tilile omagadhi komutse gwaJehu e ta ti: “Omuwa, Kalunga kaIsrael, ota ti: ‘Onde ku gwayeke omukwaniilwa gwaantu yandje Aaisraeli.

⁷ Dhipaga mwene gwoye omukwaniilwa, omuna gwaAhab, opo ndi geelele Isebel omadhipago ge, sho a dhipaga aahunganeki naantu yandje yalwe.

⁸ Ezimo alihe lyaAhab noluvalo lwe olu na okusa. Otandi ka komba po aalumentu ayehe mezimo lye, aakuluntu nosho wo aanona.

⁹ Otandi ka ninga ezimo lye, ngaashi nda ningi omazimo gomukwaniilwa gwaIsrael Jeroboam nogomukwaniilwa gwaIsrael Baasha.

¹⁰ Isebel ita ka pakwa nande. Omudhimba gwe otagu ka lika po koombwa melundu lyaJesreel.’ ” Omuhunganeki omugundjuka sho a mana okupopya, okwa zi mongulu e ta fadhuka po.

¹¹ Jehu okwa galukile komalenga omakwawo ngoka ge mu pula ga ti: “Onawa tuu? Omukakuki nguno ota ti ngiini ano?” Jehu okwa yamukula a ti: “Omu shi shi shoka a hala.”

¹² Oyo noya yamukula ya ti: “Aawe, katu shi shi! Tu lombwela shoka a ti!” Oye nokwa yamukula a ti: “Okwa lombwele ndje kutya Omuwa ota ti: ‘Onde ku gwayeke omukwaniilwa gwaIsrael.’ ”

¹³ Ohaluka omalenga omakwawo gaJehu oga yala oonguwo dhago pevi, Jehu a lyate po, taga hiki oombenda go taga kaluluka taga ti: “Jehu a ningi omukwaniilwa!”

¹⁴ Nena Jehu okwa hangene omukwaniilwa Joram, ngoka a li muJesreel, hoka a yile, a pangwe iishaho mbyoka a yahelwa molugodhi puRamot, sho a li ta kondjitha omukwaniilwa gwaSiria Hasael. Jehu okwa lombwele omalenga omakwawo a ti: “Ngele omwa gama kungame, kotokeni, pwaa ze nando omuntu puRamot, a ka londodhe aantu muJesreel.”

¹⁵

¹⁶ Nena okwa yi metembakwiita lye e ta yi kuJesreel. Joram ka li a aluka natango, nomukwaniilwa Ahasia okwa li ko te mu talele po.

¹⁷ Omupekapeki moshungo yetonatelo puJesreel okwa mono Jehu naantu ye taa hedha ko. Okwi igidha a ti: “Ondi wete ongundu tayi hedha ko!” Joram okwa yamukula a ti: “Tuma omulondinkambe, a tale, ngele oye na ombili nenge aaniita natse.”

¹⁸ Omutumwa okwa kayile a yi kuJehu e ta ti kuye: “Omukwaniilwa ota pula kutya ombili ngaa?” Jehu okwa yamukula a ti: “Ombili oto yi ningi shike, kayi shi iinima yoye mbyoka! Landula ndje!” Omupekapeki poshungo yetonatelo okwa tseyitha kutya omutumwa okwa thiki pongundu, ihe ina galuka we.

¹⁹ Omutumwa omukwawo okwa tumwa ishewe, nokwa pula Jehu epulo ngaandiyaka. Jehu okwa yamukula ishewe a ti: “Ombili oto yi ningi shike, kayi shi iitunwa yoye mbyo! Landula ndje!”

²⁰ Natango omupekapeki poshungo yetonatelo okwa tseyitha kutya omutumwa okwa thiki pongundu, ihe ina galuka we. Okwa gwedha ko a ti: “Omuwiliki gwongundu ota hingi etembakwiita lye a fa omupwidhi, oto ti oJehu yaNimshi!”

²¹ Omukwaniilwa Joram okwa ti: “Kutileni etemba lyandje.” Etemba nolya kutilwa, ye nomukwaniilwa Ahasia oya londo ya zi mo shaa ngoka e li metemba lye, ya ka tsakaneke Jehu. Oye mu tsakaneke pepya lyaNabot.

²² Joram okwa pula a ti kuye: “Ombili ngaa?” Jehu okwa yamukula a ti: “Ombili yi li peni, sho tu li mokati kiimenka nuumpulile noluhondelo lwanyoko Isebel ndu e eta muno?”

²³ Joram okwi igidha ta ti: “Ahasia, ndika ekotokelo!” Ye ta galula etemba, a fadhuke po.

²⁴ Jehu okwa kutha uutati we e u nana e ta yaha Joram oshikuti pokati komapepe e tashi yi sigo okomutima. Joram okwa ongotele metemba lye omukukutu.

²⁵ Jehu okwa lombwele omukwathi gwe Bidkar: “Toola po omudhimba nguka, u gu umbile mepya lyaNabot. Ndishi oto dhimbulukwa ngaa, sho twa li nangoye twa landula Ahab, he yomukwaniilwa Joram, twa londa uukambe kutya Omuwa okwa popile oohapu ndhika ta popi Ahab ta ti:

²⁶ ‘Ohela onda mwene omudhipagi gwaNabot noyana aamati. Ondu uvaneke nda ti kutya otandi ku geelele mepya olyo tuu ndika.’ Kutha po ano omudhimba gwaJoram, u gu umbile mepya lyaNabot, euvaneko lyOmuwa opo li tsakanithwe.”

²⁷ Omukwaniilwa Ahasia okwa mono shoka sha ningwa po, onkee okwa matukile metemba lye, noku uka komukunda Betgan. Jehu okwe mu tidha ye ti igidha ta ti: “Mu dhipageni wo!” Oyo noye mu yaha, sho a li ta hingi etemba lye mondjila yu uka kuGur, popepi naJibleam. Ihe okwe shi tompola, a ye sigo okwa adha oshilando Megiddo, nkoka a sile.

²⁸ Omalenga ge oga kutha omudhimba gwe e tage gu fala kuJerusalem gu li metemba e tage gu fumvike moombila dhaakwaniilwa moshilando shaDavid.

²⁹ Ahasia okwa ningi omukwaniilwa gwaJuda momumvo omutimulongo nagumwe, Joram yaAhab sho a li omukwaniilwa gwaIsrael.

³⁰ Jehu okwa thiki muJesreel. Isebel sho a kundana shoka sha ningwa po, okwa gwayeke omeho ge e ga luudhika e to opaleke omafufu ge e ta ka thikama ta ligamene mekende momapandaanda e li mombala.

³¹ Sho Jehu a piti mosheelo, Isebel okwi igidha a ti: “Simri ngweye, mudhipagi gwamwene gwoye, onawa ngaa ngawo! Ou lile po shike ano mpano?”

³² Jehu okwa ligamene ko e ti igidha ta ti: “Olye a gama kungame?” Gaali nenge gatatu gomomalenga gomuuwa oga li pekende ga tala pevi kuye.

³³ Jehu okwa ti kugo: “Undulileni Isebel pevi!” Ogo noge mu undulile pevi, nombinzi ye oya shanukile kekuma nokuukambe, mboka we mu lyatagula nayi.

³⁴ Jehu okwa yi muuwa e ta li e ta nu. Sho a mana, okwa ti: “Kuthii po okakulukadhi nkoka, mu ka fumvike, oshoka oko ngaa omuna gwokombanda.”

³⁵ Ihe aalumentu mboka ya yile, ye ke mu fumvike, inaa mona ko sha, kakele kolukwe lwomutse nomasipa giikaha ye nogoompadhi dhe.

³⁶ Sho ye shi tseyithile Jehu, okwa ti: “Shika osha ningwa naanaa, ngaashi Omuwa a tile, sho a popitha omuntu gwe Elia ta ti: ‘Oombwa otadhi ka lya omudhimba gwaIsebel molushandja lwaJesreel.

³⁷ Omudhimba gwaIsebel otagu ka halakana ngaashi uuhoho momapya, nokape na ngoka ta ka vula okutya: Nguka oIsebel.’ ”

10

¹ MuSamaria omwa li aana yaAhab aamati ye li omilongo heyali. Jehu okwa nyola ontumwafo e te yi tumine aaleli yoshilando, aanashilando aawiliki naatonateli yoluvalo lwaAhab. Ontumwafo otayi ti:

² “One aatonateli yoluvalo lwomukwaniilwa, ne omu na omatembakwiita, uukambe, omatati niilandohote. Shaa tuu mwa taamba ontumwafo ndjika,

³ hogololeni omumati gumwe a kotoka nawa gwomoluvalo lwomukwaniilwa, a ninge omukwaniilwa, ne mu kondje mu mu gamene.”

⁴ Aaleli yaSamaria oya li ya tila e taa ti: “Otatu vulu ngiini okukondjitha Jehu, sho omukwaniilwa Joram nenge omukwaniilwa Ahasia inaye shi tompola?”

⁵ Osho ngaaka elenga lyokutonatela mombala nelenga lyokutonatela oshilando ayehe kumwe naawiliki yoshilando naalangeli ya tumu elaka kuJehu tali ti: “Tse aapiya yoye notwi ilongekidha, tu ninge shoka to ti. Ihe tse itatu kwaniileke ngandi, ninga shoka to tala sho opala.”

⁶ Jehu okwe ya nyolele ontumwafo onkwawo tayi ti: “Ngele ano omwa gama kungame nomwi ilongekidha okulandula iipango yandje, etelii ndje omitse dhaana yomukwaniilwa Ahab muJesreel ngula yanakwasha pethimbo ngaandika.” Aana yomukwaniilwa Ahab omilongo heyali oya li mesiloshimpwiyu lyaawiliki yoshilando shaSamaria, mboka ye ya putudha.

⁷ Ontumwafo yaJehu sho ya taambwa, aawiliki yaSamaria oya dhipaga aana yaAhab ayehe omilongo heyali, oya tula omitse dhawo miimbamba e taye dhi tumu kuJesreel.

⁸ Jehu sho a tseyithilwa kutya omitse dhaana yaAhab odhe etwa, okwa gandja elombwelo, dhi gongelwe moondumba mbali posheelo shoshilando, dhi kale nkoka sigo ongula tayi landula ko.

⁹ Ongula okwa piti mo, a yi kosheelo shoshilando e ta ti kaantu mboka ya li po: “Ngame onda tsu ondumbo nomukwaniilwa Joram e tandi mu dhipaga; ne kamu na ndjo moshinima shika. Ihe olye a dhipaga mbaka ayehe?

¹⁰ Shi tseyeni ano kutya shaa ohapu ya popiwa kOmuwa ta popi oluvalo lwaAhab, otayi ka tsa shili. Omuwa okwa gwanitha shoka a hunganekitha omuhunganeki gwe Elia.”

¹¹ Nena Jehu okwa dhipaga po ezimo lyaAhab alihe lya li muJesreel nomalenga ge agehe, ookuume ke yopothingo naayambi ye, inapu kala nando ogumwe gwawo e na omwenyo.

¹² Jehu okwa zi muJesreel e ta yi kuSamaria. Mondjila sho e ya pehala hali ithanwa “Okamba yoonzi”,

¹³ okwa tsakaneke yamwe yomezimo lyomukwaniilwa gwaJuda Ahasia e te ya pula ta ti: “One oolye?” Mbeyaka oya yamukula ya ti: “Tse aakwawo yaAhasia, tatu yi kuJesreel, tu ka talele po aana yomunyekadhi Isebel noomvalekele megumbo ekwaniilwa.”

¹⁴ Jehu okwa lombwele aantu a ti: “Ya kwateni ye na omwenyo.” Oyo noye ya kwata, oye nokwe ya dhipagele popepi nomuthima gwaBeteked. Oya li aantu omilongo ne nayaali, noinapa hupa nando ondhi.

¹⁵ Jehu okwa zi nkoka nomondjila okwa tsakanekwa kuJonadab yaRekab. Jehu okwe mu kundu ta ti: “Tse nangoye otatu dhiladhila shimwe. Oto ka popila ndje?” Jonadab okwa yamukula a ti: “Eeno, otandi ke ku kwatha.” Jehu okwa ti kuye: “Pe ndje eke lyoye nduno.” Oya minikathana, naJehu okwe mu yambulile metemba lye

¹⁶ ta ti: “Landula ndje, u ki imonene ko ngoye mwene, nkene nda laadhipalela Omuwa.” Oyo noya yi pamwe sigo oSamaria.

¹⁷ Sho ya thiki ko, Jehu okwa dhipaga po ezimo lyaAhab alihe ko inaku hupa nando ondhi. Shika osho shika Omuwa a lombwelele Elia kutya otashi ka ningwa.

¹⁸ Jehu okwa hiya Aasamaria ayehe ya gongale e ta ti kuyo: “Omukwaniilwa Ahab okwa longele Baal kashona kowala, ihe ngame otandi ke mu longela ndi vulithe po.

¹⁹ Hiyeni aahunganeki yaBaal ayehe, aasimaneki ye ayehe naayambi ye ayehe, ya gongale. Inapa kala nando ogumwe inee ya; otandi ka yambela Baal omatselelandjambo omanene, ndele ngoka inaa holoka ko, ota ka dhipagwa.” (Ihe Jehu okwe shi ningi nomakoto, opo a kombe po aasimaneki yaBaal ayehe.)

²⁰ Nena Jehu okwa ti: “Utheni esiku lyokusimaneka Baal.” Eutho olyu uthwa,

²¹ naJehu okwa tumu elaka noshilongo ashihe shaIsrael. Aasimaneki yaBaal ayehe oye ya; nokapwa li ngoka inaa holoka. Ayehe oya yi motempeli yaBaal, noya li yu udhilila ndo!

²² Nena Jehu okwa lombwele omutonateli gwoonguwo oondjapuki, a ka tale oonguwo e dhi gandje kaalongeli yaBaal.

²³ Konima yaambika Jehu okwa yi motempeli yo naJonadab yaRekab e ta lombwele aantu ta ti: “Kotokeleni aasimaneki yaBaal oyo ayeke ya kale mo. Aalongeli yOmuwa inaye ya mo!”

²⁴ Nena Jehu naJonadab oya yi mo, ya ka yambe oontselelandjambo nomafikilondjambo kuBaal. Ihe pondje yotempeli Jehu okwa adhika a tula po aalumentu omilongo hetatu nokwe ya lombwele a ti: “Ne otamu dhipaga aantu mbaka ayehe. Shaa ngoka ta hunutha po omuntu, otashi mu pula omwenyo gwe mwene!”

²⁵ Nanziya Jehu sho a yamba omayambo, okwa ti kaalangeli nokomalenga: “Indeni mo, mu dhipage ayehe; inamu za nando ogumwe!” Oya ningine mo ye na omagongamwele ga tsa, ya dhipaga ayehe e taa kookololele omidhimba dhawo pondje. Nena oya yi meni lyuuyapuki wotempeli

²⁶ e taa kutha mo ongundhi ondjapuki e taye yi fike po.

²⁷ Oya teyagula po ongundhi ondjapuki notempeli ye yi shitukitha oshihundameno — sigo onena ndji.

²⁸ Osho ngaaka Jehu a kombo mo esimaneko lyokulongela Baal muIsrael.

²⁹ Ihe okwa holele uulunde waJeroboam yaNebat, ngoka a yonitha Aaisraeli mokusimaneka oontsezi dhiingoli ndhoka a dhikile muBetel nomuDan.

³⁰ Omuwa okwa ti kuJehu: “Owa ningile oluvalo lwaAhab ashihe shoka nda halele u ninge. Omolwashika tandi ku uvanekele kutya oluvalo lwoye otalu kala muukwaniilwa waIsrael sigo oluvalo olutine.”

³¹ Ihe Jehu ina vulika nomwenyo gwe aguhe kiipango yOmuwa, Kalunga kaIsrael. Peha lyasho okwa landula oshiholelwa shaJeroboam yaNebat, ngoka a yonitha Aaisraeli.

³² Pethimbo ndyoka Omuwa okwa tameke okufupipika oshilongo shaIsrael. Omukwaniilwa gwaSiria Hasael okwa lala oshilongo shaIsrael ashihe

³³ kuuzilo waJordan sigo Aroer pomulonga Arnon kuumbugantu — shika osha kwatelela mo iikandjo yaGilead noyaBaasha, kuuzilo nkoka kwa kala omazimo gaGad, gaReuben nogaManasse.

³⁴ Ashihe shilwe shoka Jehu a ningi, mwa kwatelelwa iilonga ye yuupenda, osha nyolelwa membo lyondjokonona yaakwaniilwa yaIsrael.

³⁵ Okwa si nokwa fumvikwa muSamaria, nomwana Jehoahas kwe mu landula muukwaniilwa.

³⁶ Jehu okwa lelele Israel muSamaria omimvo omilongo mbali nahetatu.

11

¹ Atalia, yina yaAhasia, sho a koneke kutya omwana a dhipagwa, okwa dhipagitha aawagona ayehe.

² Joas yaAhasia oye awike a hupu. Okwa li e na okudhipagwa pamwe nayakwawo, ihe okwa hupithwa kuhegona omukiintu Josheba yaJoram, omumwahe gwaAhasia. Okwe mu holeke nomuyamuthi gwe mongulu yimwe yokulala motempeli moka a holama Atalia, noina dhipagwa.

³ Josheba okwa dhiginine Joas omimvo hamano e mu holeka motempeli, manga Atalia ta pangele oshilongo.

⁴ Ihe momumvo omutiheyali omuyambi Jehoiada okwa tumine omalenga omalangeli gomukwaniilwa nokaalangeli yuuwa e te ya lombwele, ye ye kotempeli, nkoka a hangana nayo, ya ganene shoka tashi ka ningwa. Okwe ya ulukile omuna gwokombanda Joas yaAhasia

⁵ e te ya lombwele ta ti: “Sho tamu ya koshilonga mEsabati, oshititatu shomune otashi tonatele uuwa;

⁶ manga oshititatu oshikwawo tashi tonatele osheelo Sur, noshititatu oshikwawo otashi tonatele osheelo shi li konima yaalangeli yomukwaniilwa.

⁷ Oongundu mbali ndhoka dhaa li moshilonga mEsabati, nadhi tonatele omukwaniilwa motempeli.

⁸ Omu na okutonatela omukwaniilwa Joas mu na omagongamwele pomake mwe mu tula mekondeka. Kaleni puye shaa mpoka ta yi. Shaa ngoka ta hedha kune, na dhipagwe.”

⁹ Omalenga oga vulika komalombwelo gaJehoiada e taa eta aantu yawo kuye — mboka taa yi koshilonga mEsabati naamboka taa zimbuka moshilonga.

¹⁰ Omalenga okwe ga pe omagonga nomahuuyanza gaDavid, ngoka ga li ga pungulwa motempeli,

¹¹ e ta langeke aantu ye na omagongamwele ya kunduka omukwaniilwa potempeli, ye mu gamene.

¹² Nena Jehoiada okwa pititha mo Joas e te mu zaleke oshishani komutse gwe e te mu pe embo lyoompango dhokulela te mu gwayeke omukwaniilwa. Aantu oya hakele taa igidha taa ti: “Omukwaniilwa na kale e na omwenyo!”

¹³ Omukwaniilwa Atalia sho u uvu omawi gaalangeli nogaantu ayehe, okwe endelele okuya kotempeli, nkoka kwa li kwa gongala ongundu onene.

¹⁴ Okwa mono ko omukwaniilwa omupe a thikama pongundhi yoposheelo shotempeli pamisindilo. Okwa li mekondeka lyomalenga naahiki yoombenda, naantu ayehe oya li tayi igidha nenyanyu yo taa hiki oombenda, Atalia okwa tuula oonguwo dhe a sa uumbanda e ta ti: “Mwa kotokele ndje! Mwa kotokele ndje!”

¹⁵ Jehoiada ka li a hala, Atalia a dhipagelwe mehale lyotempeli, onkee a lombwele omalenga gaakwiita a ti: “Mu pititheni pokati komikweyo dhaalangeli ne mu dhipage shaa ngoka ta yelekele oku mu popila.”

¹⁶ Oye mu kwata e taye mu fala mombala noye mu dhipagele pOsheelo shuukambe.

¹⁷ Omuyambi Jehoiada okwa hanganitha omukwaniilwa Joas noshigwana e te ya fala mehangano nOmuwa, ya ninge oshigwana shOmuwa. Okwa hangana nomukwaniilwa noshigwana.

¹⁸ Nena oshigwana osha yi kotempeli yaBaal e tashi yi kumuna po nokukumagula po iiyambelo niimenka e taa dhipagele omuyambi gwaBaal Mattan komeho giiyambelo. Jehoiada okwa langeke aalangeli okutonatela otempeli.

¹⁹ Nena ye mwene pamwe nomalenga aalangeli yomukwaniilwa naalangeli yuuwa oya thindikile omukwaniilwa okuza motempeli sigo omombala ya landulwa koshigwana ashihe. Joas okwa hiti mosheelo shetonatelo e ta kuutumba koshipangelapundi she.

²⁰ Aantu ayehe oya li ya nyanyukwa, nengungumano olya pangele moshilando, oshoka Atalia okwa dhipagwa.

²¹ Joas okwa li e na omimvo heyali, sho a ningi omukwaniilwa gwaJuda.

12

¹ Momumvo omutiheyali gwepangelo lyomukwaniilwa gwaIsrael Jehu, Joas okwa ningi omukwaniilwa gwaJuda e ta lele muJerusalem omimvo omilongo ne. Yina oZibia gwokoshilando Beersheba.

² Mokukalamwenyo kwe Joas okwa longo shoka sho opalela Omuwa, oshoka omuyambi Jehoiada okwe mu pukulula.

³ Nando ongeyi, omahala giinonoma yuupagani oga li inaaga yonwa po, noshigwana osha tsikile okuyambela ko oontselelandjambo niitsininondjambo.

⁴ Joas okwa hiya aayambi nokwe ya lombwele, ya taambe iimaliwa ayihe mbyoka ya gandjwa molwoondjambo motempeli, iimaliwa ayihe mbyoka omuntu e na okufuta molwe mwene nenge molwaantu yalwe niimaliwa mbyoka ya gandjwa omagano.

⁵ Omuyambi kehe oku na okudhiginina iimaliwa e yi etelwa kaayakulwa ye, niimaliwa mbyoka oyi na okulongithwa meopaleko lyotempeli, mpoka tali pumbiwa.

⁶ Ihe pomumvo omutimilongombali nomutitatu gwepangelo lyaJoas aayambi inaa ninga omaopaleko gotempeli.

⁷ Okwi ithana Jehoiada naayambi yalwe e te ya pula ta ti: “Omolwashike ano inaamu opaleka otempeli? Okuza nena itamu kala we niimaliwa mbyoka tamu taamba; omu na oku yi gandja, opo omaopaleko ga ningwe.”

⁸ Aayambi oya zimine shika, yaa taambe we iimaliwa koshigwana noyaa opaleke omaopaleko motempeli.

⁹ Nena Jehoiada okwa kutha oshiketha e te shi tsu ombululu e te shi tula peyambelo, kombinga yokolulyo. Aayambi mboka ya tonatele posheelo, oya tula mo iimaliwa ayihe mbyoka ya yambwa kumboka ye ya kelongelokalunga.

¹⁰ Iimaliwa shampa ya ningi oyindji moshiketha, amushanga guuwa nomuyambimukuluntu oye ya e taye yi yalula.

¹¹ Konima yokuyalula oye yi gandja kaatonateli yiilonga yeopaleko lyotempeli, opo ya fute ihe aanashihongelo, aatungi,

¹² aahongi yomamanya naasaahi yago yo ya lande wo iipilangi nomamanya ngoka taga longithwa meopaleko lyotempeli, noompumbwe adhihe dhilwe.

¹³ Ihe iimaliwa mbika inayi longithwa nando mokufuta ehambulo lyiitenga yoshisiliveli, iiyaha, oombenda nenge iikwatitho yoolamba, nenge iilongitho yilwe iikwawo yoshisiliveli nenge yoshingoli.

¹⁴ Ayihe oya li ya longithwa mokufuta aaniilonga nokulanda iitungitha meopaleko lyotempeli.

¹⁵ Aalumentu mboka ya li taa tonatele iilonga, oya li aainekelwalela yo inaa pulwa nando, nkene ya longitha iimaliwa mbyoka.

¹⁶ Iimaliwa ya gandjelwa oondjondjambo nomayonondjambo inayi taambelwa moshiketha, oshoka oyaayambi.

¹⁷ Pomasiku ngeyaka omukwaniilwa gwaSiria Hasael okwa matukile oshilando Gat e te shi sindi; nena okwa tokola, a matukile Jerusalem.

¹⁸ Omukwaniilwa gwaJuda Joas okwa kutha omayambo agehe ngoka aatetekeli ye Jehosafat, Joram naAhasia ya li ye ga yapulila Omuwa. Okwe ga gwedha komayambo ge mwene niingoli ayihe ya li ya pungulwa motempeli nomuuwa e ta tumine omukwaniilwa Hasael omagano, nguka nokwa kutha po omatanga ge puJerusalem.

¹⁹ Ashihe shilwe shoka omukwaniilwa Joas a ningi, osha nyolelwa membo lyondjokonona yaakwaniilwa yaJuda.

²⁰ Omalenga gaJoas oge mu uvanene monanguwi, ge mu dhipage. Gaali gomugo, Josakar yaShimeat naJehosabad yaShomer, oge mu dhipagele megumbo lyokuSilla, kuuzilo waJerusalem pondjila ndjoka yu uka kuSilla. Joas okwa fumvikwa moombila dhaakwaniilwa moshilando shaDavid, nomwana Amazia okwe mu landula muukwaniilwa.

13

¹ Momumvo omutimilongombali nandatu gwepangelo lyaJoas yaAhasia omukwaniilwa gwaJuda, Jehoahas yaJehu okwa ningi omukwaniilwa gwaIsrael nokwa lele muSamaria omimvo omulongo naheyali.

² Okwa yono, sho a landula oondjila dhaJeroboam yaNebat, ngoka a yono kOmuwa nokwa fala Israel muulunde; ine etha oondjila dhe oombwinayi.

³ Omolwashoka Omuwa okwa geele Israel e ta pitika, omukwaniilwa gwaSiria Hasael nomwana Benhadad ya sinde Israel omathimbo nomathimbo.

⁴ Nena Jehoahas okwa galikana Omuwa. Omuwa okwa yamukula omagalikano ge, oshoka okwa mono, nkene omukwaniilwa gwaSiria ta hepeke Aaisraeli noonkondo.

⁵ Omuwa okwa penduthile Israel omuwiliki, ngoka e ya mangulula miikaha yAasiria. Aaisraeli oya kala ye na ombili, ngaashi ya kala nale.

⁶ Ihe natango tuu inaa etha uulunde mboka ya falwa mo kuJeroboam. Oya tsikile oku u ninga, noshiyelekela shoshikalungakiintu Asheera osha kala muSamaria.

⁷ Jehoahas okwa kanitha aakwiita ye ayehe, kakele kaakawilinkambe omilongo ntano nomatembakwiita omulongo naakwiita yokolupadhi omayuvi omulongo, oshoka omukwaniilwa gwaSiria okwa li e ya hanagula po e te ya lyatele pevi ngaashi ontsi.

⁸ Ashihe shilwe shoka Jehoahas a ningi niilonga ye ayihe yuupenda oya nyolelwa membo lyondjokonona yaakwaniilwa yaIsrael.

⁹ Okwa si nokwa fumvikwa muSamaria nomwana Jehoas okwe mu landula muukwaniilwa.

¹⁰ Momumvo omutimilongondatu naheyali gwepangelo lyomukwaniilwa gwaJuda Joas, Joahas yaJohoahas okwa ningi omukwaniilwa gwaIsrael e ta lele muSamaria omimvo omulongo nahamano.

¹¹ Naye wo okwa yono kOmuwa e ta landula oshiholelwa oshiwinayi shomukwaniilwa Jeroboam, ngoka a fala Israel muulunde.

¹² Ashihe shilwe shoka Jehoas a ningi, mwa kwatelelwa uufule we miita okukondjitha omukwaniilwa gwaJuda Amazia, osha nyolelwa membo lyondjokonona yaakwaniilwa yaIsrael.

¹³ Jehoas okwa si e ta fumvikwa moombila dhaakwaniilwa muSamaria, nomwana Jeroboam okwe mu landula muukwaniilwa.

¹⁴ Omuhunganeki Elisa okwa kwatwa kuuvu. Sho a li popepi nokusa, omukwaniilwa Jehoas okwe ya oku mu talela po. Okwe ya ta lili ta ti: “Tate, tate! Etemba lyaIsrael naakawili yalyo!”

¹⁵ Elisa okwe mu lombwele ta ti: “Inda, u ka tale uutati niikuti.” Jehoas okwe shi ningi,

¹⁶ Elisa nokwe mu lombwele, a pameke oshikuti monkandja. Omukwaniilwa okwe shi ningi. Elisa okwa tula iikaha ye kiikaha yomukwaniilwa.

¹⁷ Nena palombwelo lyomuhunganeki omukwaniilwa okwe egulula ekende ndyoka lya taalela lwokuSiria. Elisa okwa ti: “Umba!” Nanziya sho omukwaniilwa u umbu, omuhunganeki okwi igidha a ti: “Ngoye oshikuti shOmuwa shoka ta ka sinda nasho Siria. Oto ka kondjitha Aasiria muAfek, sigo to ya dhenge.”

¹⁸ Nena Elisa okwa ti komukwaniilwa: “Kutha iikuti yilwe e to dhenge nayo pevi.” Omukwaniilwa okwa dhenge pevi lutatu e ta mwena.

¹⁹ Shika osha geyitha Elisa e ta ti komukwaniilwa: “Ando wa dhengele lutano nenge luhamano, ando owa ka sinda Aasiria thilu; ihe nena oto ke ya dhenga ashike lutatu.”

²⁰ Elisa okwa si nokwa fumvikwa. Omumvo kehe aayugani Aamoabi oya matukile moshilongo shaIsrael.

²¹ Esiku limwe manga aalumentu yamwe yi ipyakidhila okufumvika omudhimba gwontumba, oya mono ongundu yaayugi. Oyu umbile omudhimba mombila yaElisa e taa fadhuka po. Nanziya omudhimba sho gwa gumathana niipongo yaElisa, omulumentu okwa yumuka e ta yambuka po.

²² Omukwaniilwa gwaSiria Hasael okwa hepeke Aaisraeli methimbo alihe lyepangelo lyaJehoahas,

²³ ihe Omuwa okwe ya sile ohenda nokwa li e na ombili nayo. Ine ya etha, ya hanagulwe po, ihe okwe ya kwatha omolwehangano lye naAbraham, Isak naJakob. Ina dhimbwa nando oshigwana she.

²⁴ Peso lyomukwaniilwa gwaSiria Hasael, omwana Benhadad okwa ningi omukwaniilwa.

²⁵ Nena omukwaniilwa gwaIsrael Jehoas okwa dhenge Benhadad lutatu e ta yugulula ko iilando mbyoka ya kuthilwe ko kuBenhadad muuyuni waJehoahas, he yaJehoas.

14

¹ Momumvo omutiyali gwelelo lyaJehoas yaJehoahas, omukwaniilwa gwaIsrael, Amazia gaJoas okwa ningi omukwaniilwa gwaJuda

² mepipi lyomimvo omilongo mbali nantano, nokwa lele muJerusalem omimvo omilongo mbali nomugoyi. Yina oJehoaddin gwomuJerusalem.

³ Okwa longo shoka sho opalela Omuwa, ihe ina fa naanaa hekulu, omukwaniilwa David. Mwaayihe okwa longo, ngaashi he Joas a ningile.

⁴ Ina kumuna po nando omahala giinonoma yuupagani, naantu oya tsikile okuyambela ko oontselelandjambo niitsininondjambo.

⁵ Nanziya uukwaniilwa we sho wa kolo, Amazia okwa dhipagitha omalenga ngeyaka ga dhipagele omukwaniilwa he.

⁶ Ihe ina dhipaga aana yago. Okwa landula shoka Omuwa a popya mompango yaMoses: “Aakuluntu inaa dhipagelwa oondjo dha yonwa koyana, naanona inaa dhipagelwa oondjo dha yonwa kaakuluntu yawo; omuntu oku na okudhipagelwa ondjo e yi yono ye mwene.”

⁷ Amazia okwa dhipagele Aaedom omayuvi omulongo mEkango lyomongwa e ta kwata po oshilando Sela molugodhi e te shi luku Jokteel, sigo onena.

⁸ Nena Amazia okwa tumu aatumwa komukwaniilwa gwaIsrael Jehoas noku mu shongela olugodhi.

⁹ Ihe omukwaniilwa Jehoas okwa galula eyamukulo tali ti: “Eno lyokuLibanon olya tseyithile omusendeli gwokuLibanon tali ti: ‘Gandja omumwoye omukadhona, a ninge omufuko gwomumwandjemati.’ Ihe iiyamakuti yomokuti oya piti po e tayi lyatagula po eno.

¹⁰ Tala ko, Amazia, ngashingeyi owa dhenge Aaedom noto inenepeke pombanda. Kala wa gwana nesimano lyoye, e to kala pegumbo. Omolwashike to ishongele iiponga ngoye mwene naantu yoye?”

¹¹ Ihe Amazia okwa tindi ye ina pulakena ko, onkee omukwaniilwa Jehoas a piti mo naantu ye e taye mu kondjitha muBet Shemesh muJuda.

¹² Etangakwiita lyaAmazia olya dhengwa, naakwiita ye ayehe oya yi ondapo kaandjawo.

¹³ Jehoas okwa kwata Amazia onkwatwa, okwa tsikile u uka kuJerusalem e ta kumuna po edhingililokuma lyoshilando okuza kOsheelo shaEfraim sigo okOsheelo shokokolonela, oshinano shoometa konyala omathele gaali.

¹⁴ Okwa yugu po iisiliveli ayihe niingoli ayihe mbyoka a mono, iikwaniipangitho ayihe yotempeli nomaliko agehe gomuuwa, e ta shuna nago kuSamaria pamwe noonkwatwa.

¹⁵ Ashihe shilwe shoka Jehoas a ningi, mwa kwatelelwa uufule we miita yokukondjitha omukwaniilwa gwaJuda Amazia, osha nyolelwa membo lyondjokonona yaakwaniilwa yaIsrael.

¹⁶ Jehoas nokwa si e ta fumvikwa moombila dhaakwaniilwa muSamaria, nomwana Jeroboam okwe mu landula muukwaniilwa.

¹⁷ Omukwaniilwa gwaJuda Amazia okwa kala e na omwenyo omimvo omulongo nantano okuza keso lyomukwaniilwa gwaIsrael Jehoas.

¹⁸ Ashihe shilwe shoka Amazia a ningi, osha nyolelwa membo lyondjokonona yaakwaniilwa yaJuda.

¹⁹ Aatondi yaAmazia muJerusalem oye mu uvanene monanguwi, ye mu dhipage. Okwa yi ondapo koshilando Lakish, ihe aatondi ye oye mu landulile ko e taye mu dhipaga.

²⁰ Omudhimba gwe ogwe etwa kuJerusalem gwa humbatwa kokakambe nogwa fumvikwa moombila dhaakwaniilwa moshilando shaDavid.

²¹ Oshigwana shaJuda osha kwaniileke osheeli she omumati gwomimvo omulongo nahamano edhina lye Azaria.

²² Azaria okwa lala Elat e te shi tungulula konima yeso lyahe.

²³ Momumvo omutimulongo nantano gwepangelo lyaAmazia gaJoas, omukwaniilwa gwaJuda, Jeroboam yaJehoas okwa ningi omukwaniilwa gwaIsrael nokwa lele muSamaria omimvo omilongo ne nagumwe.

²⁴ Okwa yono kOmuwa a landula oshiholelwa shuulunde waJeroboam yaNebat, ngoka a fala Israel muulunde.

²⁵ Okwa lala oshilongo ashihe shoka sha li nale shaIsrael, okuza ketaulilo lyaHamat muumbangalantu sigo Efuta lya sa muumbugantu. Shika osha ningwa pahapu dhOmuwa, Kalunga kaIsrael, a li e dhi popi mokana komumati gwe omuhunganeki Jona yaAmittai gwokuGat Hefer.

²⁶ Omuwa okwa mono okuhepekwa okudhigu kwAaisraeli; ko kakwa li ngoka te ya kwatha.

²⁷ Kalya li elalakano lyOmuwa, a dhime po Aaisraeli thiluthilu, onkee okwa longitha omukwaniilwa Jeroboam yaJehoas oku ya hupitha.

²⁸ Ashihe shilwe shoka Jeroboam yaJehoas a ningi, omalugodhi ge guufule, nonkene a yugulula ko Damaskus naHamat yi ye kuIsrael, oya nyolelwa membo lyondjokonona yaakwaniilwa yaIsrael.

²⁹ Jeroboam okwa si nokwa fumvikwa moombila dhaakwaniilwa, nomwana Sakaria okwe mu landula muukwaniilwa.

15

¹ Momumvo omutimilongombali naheyali gwepangelo lyomukwaniilwa gwaIsrael Jeroboam yaJehoas, Usia waAmazia okwa ningi omukwaniilwa gwaJuda

² mepipi lyomimvo omulongo nahamano, nokwa lele muJerusalem omimvo omilongo ntano nambali. Yina oJekolia gwomuJerusalem.

³ Okwa landula oshinkoti shahe, okwa longo shoka sha hokiwa kOmuwa.

⁴ Ihe omahala giinonoma yuupagani inaga yonagulwa po, naantu oya tsikile okuyambela ko oontselelandjambo niitsininondjambo.

⁵ Omuwa okwa dhenge Usia nokwe mu umbu oshilundu, shoka she mu hepeke sigo okeso lye. Okwa kala megumbo lyi ikalekelwa lye mwene a manguluka kuupyakadhi auhe, manga omwana Jotam ta pangele oshilongo.

⁶ Ashihe shilwe shoka Usia a ningi, osha nyolelwa membo lyondjokonona yaakwaniilwa yaJuda.

⁷ Usia okwa si nokwa fumvikwa moombila dhaakwaniilwa moshilando shaDavid, nomwana Jotam okwe mu landula muukwaniilwa.

⁸ Momumvo omutimilongondatu nahetatu gwepangelo lyomukwaniilwa gwaJuda Usia, Sakaria yaJeroboam okwa ningi omukwaniilwa gwaIsrael nokwa lele muSamaria oomwedhi hamano.

⁹ Okwa li a fa aatetekeli ye, e ta yono kOmuwa. Okwa landula uulunde woshiholelwa shomukwaniilwa Jeroboam yaNebat, ngoka a yonitha Israel.

¹⁰ Shallum yaJabesh okwa kotokele omukwaniilwa Sakaria. Okwe mu dhipagele puJibleam e te mu landula muukwaniilwa.

¹¹ Ashihe shilwe shoka Sakaria a ningi, osha nyolelwa membo lyondjokonona yaakwaniilwa yaIsrael.

¹² Osho ngaaka euvaneko lya tsakanithwa ndyoka Omuwa a popi omukwaniilwa Jehu ta ti: “Ondhikwa yoye otayi hulile moluvalo olutine, sho talu kala muukwaniilwa waIsrael.”

¹³ Momumvo omutimilongondatu nomugoyi gwepangelo lyomukwaniilwa gwaJuda Usia, Shallum yaJabesh okwa ningi omukwaniilwa gwaIsrael nokwa lele muSamaria omwedhi gumwe.

¹⁴ Menahem yaGadi okwa zi kuTirza u uka kuSamaria e ta dhipaga Shallum e te mu landula muukwaniilwa.

¹⁵ Ashihe shilwe shoka Shallum a ningi, mwa kwatelelwa mo omakoto ge, osha nyolelwa membo lyondjokonona yaakwaniilwa yaIsrael.

¹⁶ Menahem manga a li mondjila ye ta zi kuTirza, okwa hanagula po thiluthilu oshilando Tifsak, aakali musho nomikunda dhomomudhingoloko gwasho, oshoka oshilando inashi igandja kuye. Okwa vutula omapunda gaakulukadhi aasimba.

¹⁷ Momumvo omutimilongondatu nomugoyi gwepangelo lyomukwaniilwa gwaJuda Usia, Menahem yaGadi okwa ningi omukwaniilwa gwaIsrael e ta lele muSamaria omimvo omulongo.

¹⁸ Okwa yono kOmuwa a landula oshinkoti oshiwinayi shomukwaniilwa Jeroboam yaNebat, ngoka a fala Israel muulunde, sigo okeso lye.

¹⁹ Tiglat Pileser, omupanguli gwaAssur, okwa matukile Israel, ihe Menahem te mu pe iisiliveli yiitalenti eyuvi limwe, opo Tiglat Pileser e mu kwathe mokukoleka uukwaniilwa we.

²⁰ Menahem okwa kutha iimaliwa kaayamba muIsrael moku ya thiminika. Shaa ngoka a gandja iimaliwa yiisiliveli omilongo ntano, onkee Tiglat Pileser a shuna koshilongo she.

²¹ Ashihe shilwe shoka Menahem a ningi, osha nyolelwa membo lyondjokonona yaakwaniilwa yaIsrael.

²² Okwa si nokwa fumvikwa, nomwana Pekahia okwe mu landula muukwaniilwa.

²³ Momumvo omutimilongontano gwepangelo lyomukwaniilwa gwaJuda Usia, Pekahia yaMenahem okwa ningi omukwaniilwa gwaIsrael e ta lele muSamaria omimvo mbali.

²⁴ Okwa yono kOmuwa a landula oshinkoti oshiwinayi shomukwaniilwa Jeroboam yaNebat, ngoka a fala Israel muulunde.

²⁵ Elenga lyaPekahia ekuluntu, Peka yaRemalia, pamwe naalumentu omilongo ntano ya za kuGilead, oya tsu ondumbo noya dhipaga Pekaja ofuthi mepopilongulu lyomeni lyomuuwa muSamaria. Peka nokwe mu landula muukwaniilwa.

²⁶ Ashihe shilwe shoka Pekahia a ningi, osha nyolelwa membo lyondjokonona yaakwaniilwa yaIsrael.

²⁷ Momumvo omutimilongontano nambali gwepangelo lyomukwaniilwa gwaJuda Usia, Peka yaRemalia okwa ningi omukwaniilwa gwaIsrael nokwa lele omimvo omilongo mbali muSamaria.

²⁸ Okwa yono kOmuwa a landula oshiholelwa shuulunde womukwaniilwa Jeroboam yaNebat, ngoka a fala Israel muulunde.

²⁹ Manga Peka a li omukwaniilwa, Tiglat Pileser, omupangeli gwaAssur, okwa kwata po iilando Ijon, Abel Bet Maaka, Janoa, Kedesh naHazor niikandjo yaGilead, yaGalilea noyaNaftali, e ta fala aantu kuAssur oonkwatwa.

³⁰ Momumvo omutimilongo mbali gwepangelo lyaJotam yaUsia, omukwaniilwa gwaJuda, Hosea yaEla okwa tsile omukwaniilwa Peka ondumbo e te mu dhipaga ofuthi nokwe mu landula muukwaniilwa.

³¹ Ashihe shilwe shoka Peka a ningi, osha nyolelwa membo lyondjokonona yaakwaniilwa yaIsrael.

³² Momumvo omutiyali gwepangelo lyaPeka yaRemalia, omukwaniilwa gwaIsrael, Jotam yaUsia okwa ningi omukwaniilwa gwaJuda

³³ mepipi lyomimvo omilongo mbali nantano nokwa lele muJerusalem omimvo omulongo nahamano. Yina oJerusha yaSadok.

³⁴ Jotam okwa landula oshinkoti shahe Usia, ta ningi shoka sho opalela Omuwa.

³⁵ Ihe omahala giinonoma yuupagani inaga yonagulwa po, naantu oya tsikile okuyambela ko oontselelandjambo niitsininondjambo. Jotam oye tuu ngoka a tungu osheelo shokuumbangalantu shotempeli.

³⁶ Ashihe shilwe shoka Jotam a ningi, osha nyolelwa membo lyondjokonona yaakwaniilwa yaJuda.

³⁷ Manga ye a li omukwaniilwa, Omuwa okwa tumu tango omukwaniilwa gwaSiria Rezin nomukwaniilwa gwaIsrael Peka, ya homone Juda.

³⁸ Jotam okwa si nokwa fumvikwa moombila dhaakwaniilwa moshilando shaDavid, nomwana Ahas okwe mu landula muukwaniilwa.

16

¹ Momumvo omutimulongo nomutiheyali gwepangelo lyaPeka yaRemalia, omukwaniilwa gwaIsrael, Ahas yaJotam okwa ningi omukwaniilwa gwaJuda

² mepipi lyomimvo omilongo mbali nokwa lele muJerusalem omimvo omulongo nahamano. Ye ina landula oshinkoti oshiwanawa shahekulu omukwaniilwa David, ihe okwa ningi shoka inaashi opalela Omuwa, Kalunga ke,

³ e ta landula oshiholelwa shaakwaniilwa yaIsrael. Ye mwene okwa yamba omwanamati efikilondjambo kiimenka ta holele iilonga yiitonditha yaantu mboka Omuwa e ya tidha moshilongo, opo Aaisraeli ye ye mo.

⁴ Komahala giinonoma yaapagani, kiikulundundu nomomunzile kehe gwomuti omutalala, Ahas okwa yambele ko oontselelandjambo nokwa fikile ko iitsinino.

⁵ Omukwaniilwa gwaSiria Rezin nomukwaniilwa gwaIsrael Peka oya matukile Jerusalem e taye shi kondeke, ihe oya nyengwa okusinda Ahas.

⁶ (Pethimbo tuu ndyoka limwe omukwaniilwa Rezin okwa galulile Edom oshilando Elat e ta tidha mo Aajuda mboka ya li mo. Aaedom oya tula muElat, nomo ye li sigo onena.)

⁷ Ahas okwa tumu aantu kuTiglat Pileser, omupangeli gwaAssur, ye na elaka tali ti: “Ngame omupiya gwoyelela. Ila, u mangulule ndje miikaha yomukwaniilwa gwaSiria nogwaIsrael, mboka ya matukile ndje.”

⁸ Ahas okwa kutha iisiliveli niingoli motempeli nomoompungulo dhuuwa e te yi tumu omulongelo komupangeli ngoka.

⁹ Tiglat Pileser okwa zimine eindilo lyaAhas e ta piti ko e na etangakwiita lye. Okwa matukile Damaskus nokwe shi kwata po e ta dhipaga omukwaniilwa Rezin e ta fala aantu kuKir oonkwatwa.

¹⁰ Omukwaniilwa Ahas sho a yi kuDamaskus, a tsakaneke omupangeli Tiglat Pileser, okwa mono ko oshiyambelo e ta tumu komuyambi Uria efano lyomutungilo gwasho ngaashi naanaa sha tya.

¹¹ Nena Uria okwa tungu oshiyambelo she shi fa naanaa e te shi mana, manga Ahas inee ya.

¹² Ahas sho a galuka ko kuDamaskus, okwa mono oshiyambelo sha pwa nale,

¹³ nokwa lungunithile ko oontselelandjambo niikulyandjambo, okwa tile ko iinuwandjambo e te shi shashamine nombinzi yomakwatathanondjambo.

¹⁴ Oshiyambelo shoshikushu shoka sha yapulilwa Omuwa, osha li pokati kotempeli noshiyambelo oshipe. Ahas okwe shi lundululile kuumbangalantu woshiyambelo she oshipe.

¹⁵ Nena okwa lombwele Uria a ti: “Longitheni oshiyambelo shika shandje oshinene mokuyamba omafikilondjambo gongula niikulyandjambo yongulohi, osho wo omafikilondjambo niikulyandjambo yomukwaniilwa noyoshigwana niinuwandjambo yoshigwana. Tilila ko ombinzi yiimuna ayihe mbyoka tayi yambwa omafikilondjambo noontselelandjambo. Ihe kombinga yoshiyambelo shoshikushu, otandi dhiladhila natango, nkene tandi shi longitha.”

¹⁶ Uria okwa ningi, ngaashi omukwaniilwa Ahas a ti.

¹⁷ Omukwaniilwa Ahas okwa tetitha ko iitakamithi yuutemba woshikushu wa longithwa motempeli e ta kutha ko oombaalitha dha li kuwo. Okwa kuthitha po wo ondama yoshikushu kombanda yoongombe dhoshikushu omulongo nambali e te yi tentekitha pomamanya.

¹⁸ Opo a kale e na ombili nomupangeli gwaAssur, Ahas okwa zitha motempeli omukala gwEsabati gwa kumbwa e ta thitike osheelo shomukwaniilwa shu uka kotempeli.

¹⁹ Ashihe shilwe shoka omukwaniilwa Ahas a ningi, osha nyolelwa membo lyondjokonona yaakwaniilwa yaJuda.

²⁰ Ahas okwa si nokwa fumvikwa moombila dhaakwaniilwa moshilando shaDavid, nomwana Hiskia okwe mu landula muukwaniilwa.

17

¹ Momumvo omutimulongo nambali gwepangelo lyomukwaniilwa gwaJuda Ahas, Hosea yaEla okwa ningi omukwaniilwa gwaIsrael nokwa lele muSamaria omimvo omugoyi.

² Okwa yono kOmuwa, ihe hangaashi aakwaniilwa mboka ya lele Israel ye mu tetekela.

³ Omupangeli Salmaneser gwaAssur okwe mu hingile iita; Hosea okwi igandja kuSalmaneser e te mu futu omumvo kehe oompale.

⁴ Ihe omumvo gumwe Hosea okwa tumu aatumwa komukwaniilwa gwaEgipiti, edhina lye So, ti indile ekwatho lye ye ina fendela we oompale kuAssur. Salmaneser sho e shi koneke, okwa kwata po Hosea e te mu tula mondjedhililo.

⁵ Nena Salmaneser okwa matukile Israel e ta kunduka Samaria. Momumvo omutitatu sho e shi kunduka,

⁶ ngoka gwa li omumvo omutimugoyi gwepangelo lyaHosea, omupangeli gwaAssur okwa kwata po Samaria e ta fala Aaisraeli kuAssur oonkwatwa. Yamwe yomuyo okwe ya langeke moshilando Halak, yamwe opopepi nomulonga Habor moshikandjo shaGosan nayamwe omiilando yAamedia.

⁷ Samaria osha teka po, oshoka Aaisraeli oya yono kOmuwa, Kalunga kawo, ngoka a li e ya yululula miikaha yomukwaniilwa gwaEgipiti e te ya tembudha muEgipiti. Oya simaneke iikalunga yilwe,

⁸ oya landula oohedhi dhiigwana mbyoka Omuwa e yi tidha po, opo aantu ye ye ye mo, noya taamba oohedhi dha zi kaakwaniilwa yaIsrael.

⁹ Aaisraeli oya ningi iinima mbyoka Omuwa, Kalunga kawo, he yi tondo. Momikunda dhawo adhihe oya tungile mo omahala giinonoma yuupagani, okuza mokakunda okashona sigo okoshilando oshinene.

¹⁰ Koondundu adhihe nomomizile dhomiti omitalala oya dhike mo oongundhi dhomamanya niiyelekela yoshikalungakiintu Asheera,

¹¹ oyo noya yambele omafikilondjambo kiiyambelo yaapagani, ya landula oshiholelwa shaantu mboka Omuwa e ya tidha mo moshilongo. Oya pendutha ondjahi yOmuwa niilonga yawo iiwinayi

¹² yo inaa vulika kOmuwa, nando e ya lombwelele, yaa longele iimenka.

¹³ Omuwa okwa li a tumu aatumwa ye naahunganeki ye, ya londodhe Israel naJuda taa ti: “Etheni oondjila dheni oombwinayi, ne mu vulike komalombwelo gandje ngoka ga kwatelelwa mompango ndjoka nda pele oohokulu. Onde yi mu tseyithile maantu yandje aahunganeki.”

¹⁴ Ihe inaa vulika nando; oya li aatangalali ya fa oohekulu mboka ya li inaa inekela Omuwa, Kalunga kawo.

¹⁵ Oya tindi okuvulika komautho ge, inaa dhiginina ehangano e li hangana noohekulu, oyo noya dhini omalondodho ge. Oya simaneke iimenka yowalawala. Noyo yene oya ningi iifakufaku yowala, sho ya landula oohedhi dhiigwana ye ya kunduka yo inaa vulika komalombwelo gOmuwa, yaaye dhi holele.

¹⁶ Oya thigi po iipango ayihe yOmuwa, Kalunga kawo, e tayi ihambulile oontana mbali, ye dhi simaneke; oya hambula wo iiyelekela yoshikalungakiintu Asheera, oya simaneke oonyothi noya longele Baal.

¹⁷ Oya yamba oyana aamati naakadhona, ya ninge omafikilondjambo kiikalunga yaapagani, oya yi koonganga nokaayanekeli e tayi igandjele naanaa okulonga iihuna koshipala shOmuwa e taa pendutha ondjahi ye.

¹⁸ Omuwa okwa geele Aaisraeli e te ya tidha po koshipala she; okwa thigi po ashike oshilongo shaJuda.

¹⁹ Ihe nAajuda wo inaa vulika kiipango yOmuwa, Kalunga kawo; oya holele oohedhi dhe ya zile kAaisraeli.

²⁰ Omuwa okwe ekelehi Aaisraeli ayehe, e ya geele e te ya gandja miikaha yaatondi aananyanya, sigo pehulilo e ya undula po koshipala she.

²¹ Omuwa sho a yoolola Israel muJuda, Aaisraeli oya ningi Jeroboam yaNebat omukwaniilwa gwawo. Jeroboam okwe ya zitha pOmuwa e te ya fala muulunde wiihuna.

²² Oya landula Jeroboam taa longo uulunde auhe mboka a ningile,

²³ sigo pehulilo Omuwa te ya undula po koshipala she, ngaashi e ya londodhithile aapiya ye aahunganeki. Osho ngaaka Aaisraeli ya falwa muupika kuAssur, nkoka ya kala sigo onena.

²⁴ Omupangeli gwaAssur okwa kutha aantu miilando Babilon, Kuta, Ivva, Hamat naSefarvaim e te ya langeke miilando yaSamaria peha lyAaisraeli mboka e ya fala muupika. Oya kala miilando mbika noya ningi yawo.

²⁵ Sho ye ya mo tango, inaa longela Omuwa, onkee Omuwa okwa tumu oonime, nodha dhipaga yamwe yomuyo.

²⁶ Omupangeli gwaAssur okwa lombwela kutya aantu mboka e ya langeke miilando yaSamaria, inaa tseya oshipango shaKalunga koshilongo shiyaka, omolwashoka Kalunga okwe ya tumine oonime, ndhoka tadhi ya li po.

²⁷ Nena omupangeli a gandja elaka tali ti: “Shunitheni ko gumwe gwomaayambi mboka twe eta huka oonkwatwa, a ye a ka kale hoka, opo a longe aantu ompango yakalunga kevi ndyoka.”

²⁸ Osho omuyambi gumwe Omuisraeli ngoka a zile muSamaria, okwa yi ko e ta kala muBetel, moka a longo aantu, nkene Omuwa ta simanekwa.

²⁹ Ihe aantu mboka ya tula muSamaria, oya tsikile okwiiningila iikalunga yawo yene. Oyo noye yi tula momahala omayapuki ngoka ga tungilwe kAaisraeli. Ezimo kehe olyi iningile iimenka yalyo miilando moka ya kala mo.

³⁰ Aababiloni oya hambula iimenka yoshikalunga Sukkot Benot; mboka ya zi kuKuta, iikalunga yaNergal; mboka yokuHamat, iimenka yaAshima;

³¹ mboka yokuIvva, iikalunga yaNibhas noyaTartak; nAasefarvajim oya yamba oyana omafikilondjambo kiikalunga yawo Adrammelek naAnammelek.

³² Aantu mbaka oya simaneke wo Omuwa e taa hogolola mokati kawo aantu yamwe, ya kale aayambi pomahala giinonoma yuupagani, ye ya yambele mpoka oondjambo.

³³ Oya simaneke Omuwa, ihe oya longele wo iikalunga yawo pahedhi yiilongo yawo nkoka ya zile.

³⁴ Oya humbata oohedhi dhawo sigo onena. Ihaa simaneke Omuwa yo ihaa vulika kiipango nokomautho ngoka e ga pele oluvalo lwaJakob, ngoka haku tiwa Israel.

³⁵ Omuwa okwa li a hangana nayo e te ya lombwele ta ti: “Inamu simaneka ookalunga yalwe; inamu inyongamena nenge mu ya longele nenge mu ya yambele oondjambo.

³⁶ Vulikeni kungame, Omuwa, nguka nde mu tembudha muEgipiti noonkondo oonene nomatha; ne omu na okwiinyongamena ndje nokuyambela ndje oondjambo.

³⁷ Vulikeni aluhe kiipango nokomautho ngoka nde mu nyolele. Inamu simaneka ookalunga yalwe

³⁸ ne inamu dhimbwa ehangano nde li hangana nane.

³⁹ Vulikeni kungame, Omuwa, Kalunga keni, notandi mu hupitha miikaha yaatondi yeni.”

⁴⁰ Ihe aantu mboka inaa pulakena, oya tsikile okulandula omikalo dhawo omikulu.

⁴¹ Osho ngaaka aantu mboka oya longele Omuwa, ihe oya simaneke ishewe iimenka yawo. Sigo onena oluvalo lwawo olwa tsikile wo okulonga iilonga ya tya ngaaka.

18

¹ Momumvo omutitatu gwepangelo lyomukwaniilwa gwaIsrael Hosea yaEla, Hiskia yaAhas okwa ningi omukwaniilwa gwaJuda

² mepipi lyomimvo omilongo mbali nantano nokwa lele muJerusalem omimvo omilongo mbali nomugoyi. Yina oAbi yaSakaria.

³ Okwa landula oshinkoti shahekulu omukwaniilwa David e ta ningi shoka sho opalela Omuwa.

⁴ Okwa yonagula po omahala giinonoma yuupagani, okwa kumuna po oongundhimanya nokwa kumagula po iiyelekela yakalungakiintu Asheera. Okwa tatula po eyoka lyoshikushu ndyoka lya hambulilwe kuMoses hali ithanwa Nehushtan. Aaisraeli oya li haye li yambele iitsininondjambo noku li simaneka.

⁵ Hiskia okwi inekele Omuwa, Kalunga kaIsrael; muJuda kamwa li omukwaniilwa gulwe e mu fa, e mu tetekela ando nenge e mu landula.

⁶ Okwa li omwiinekelwa gOmuwa ye ina etha okuvulika kuye, ihe okwa dhiginine iipango mbyoka Omuwa e yi pele Moses.

⁷ Omolwashoka Omuwa a li e mu na nokwa li e na elago mwaayihe mbyoka a ningi. Okwa tsu ondumbo nomupangeli gwaAssur e ta tindi okwiigandja kuye.

⁸ Okwa sindi Aafilisti e ta matukile iitembukilwa yawo ayihe, iishona niinene, sigo okuGaza nomikunda dhe shi kundukidha.

⁹ Momumvo omutine gwepangelo lyaHiskia, omumvo omutiheyali gwepangelo lyomukwaniilwa gwaIsrael Hosea yaEla, omupangeli gwaAssur Salmaneser okwa homona Israel e ta kondeke Samaria.

¹⁰ Momumvo omutitatu gwekondeko Samaria osha teka po; omumvo nguka ogwa li omutihamano gwepangelo lyaHiskia nomutimugoyi gwepangelo lyaHosea.

¹¹ Omupangeli gwaAssur okwa fala Aaisraeli kuAssur oonkwatwa. Yamwe yomuyo okwe ya tula moshilando Halak, yamwe opopepi nomulonga Habor moshikandjo shaGosan nayamwe omiilando yAamedia.

¹² Samaria osha teka po, oshoka Aaisraeli inaa vulika kOmuwa, Kalunga kawo, ihe oya teya ehangano ndyoka a hangana nayo yo inaa vulika kiipango ayihe mbyoka ye yi pelwe kuMoses, omumati gwOmuwa. Inaa pulakena yo inaa vulika nando.

¹³ Momumvo omutimulongo nomutine gwepangelo lyomukwaniilwa Hiskia, Sennakerib omupangeli gwaAssur, okwa matukile iilandohote yaJuda e te yi kutha ko.

¹⁴ Hiskia okwa tumu elaka kuSennakerib, sho a li muLakish tali ti: “Onda puka; ombili, hulitha po omahomono goye, notandi ke ku futa shoka to pula.” Eyamukulo lyomupangeli olya li tali ti kutya Hiskia ne mu tumine oshisiliveli shondjundo yookilograma 10,000 noshingoli shondjundo yookilograma 1000.

¹⁵ Hiskia okwe mu tumine iingoli ayihe ya li motempeli nomoompungulo dhomuuwa.

¹⁶ Okwa kugunyuna ko wo oshingoli shokomiyelo dhotempeli noshingoli shoka a kolongelele kiikulo yomiyelo e ta tumine kuSennakerib.

¹⁷ Omupangeli gwaAssur okwa tumu etangakwiita enene lya zi muLakish, li ka matukile Hiskia muJerusalem. Olya li lya wilikwa komalenga omanene gatatu. Sho ga thiki kuJerusalem, oga kwata po ondjila yaatungi yoonguwo, pomukanka gwomeya ngoka tagu kutha omeya mondama yopombanda,

¹⁸ noga tumu komukwaniilwa Hiskia. Elenga lyomuuwa Eliakim lyaHilkia, amushangampangu Shebna na amushangandjayi Joak yaAsaf oya yi kugo.

¹⁹ Elenga enene lyomupangeli gwaAssur olya ti kuyo: “Lombweleni Hiskia kutya omupangeli omunene gwaAssur ota ti ngeyi: ‘Einekelo lyoye olyo okwiinekela shike?

²⁰ Oto tengeneke ngiika kutya moohapu dhanathangwa ohamu zi omayele noonkondo miita. Ngoye owi inekela lye, sho wa tsa ondumbo nangame?

²¹ Ngiika owi inekela Egipiti, ihe olya fa enenge lya shandjuka tali ulula oshikaha shomuntu ngoka ti itsile ko. Omukwaniilwa gwaEgipiti osho a tya, ngele pe na ngoka te mu inekele.’ ”

²² Elenga enene olya tsikile ko tali ti: “Nenge otamu lombwele ndje mu tye, otwi inekela Omuwa, Kalunga ketu? Nani Hiskia ina hanagula po omahala gokunonoma niiyambelo yOmuwa ngoka, sho a lombwele Aajuda nAajerusalem, ya simaneke ashike oshiyambelo shomuJerusalem?

²³ Medhina lyamwene gwandje, omupangeli gwaAssur, otandi ku uvanekele, ndi ku pe uukambe omayuvi gaali, ngele oto vulu oku u monena aakayili yawo.

²⁴ Ngoye ito gwana nando okumatukila elenga limwe eshona lyokuAssur, ndele natango omwi inekela Egipiti te ku tumine omatembakwiita naakawilinkambe!

²⁵ Nenge oto dhiladhila kutya onda homona oshilongo shika noku shi hanagula po ndaa na eutho lyOmuwa? Omuwa oye mwene a lombwele ndje, ndi shi matukile, ngame ndi shi hanagule po.”

²⁶ Nena Eliakim, Shebna naJoah oya lombwele elenga ya ti: “Tatekulu, popya Oshiaramea, otu shi uvite. Ino popya Oshihebeli, aantu ayehe kombanda yedhingililokuma otaye tu pulakene.”

²⁷ Elenga olya yamukula lya ti: “Oto dhiladhila kutya mwene gwandje okwa tumu ndje kumwene gwoye nokungoye amuke, ndi popye oohapu ndhika? Aawoo, ondi na okulombwela wo aantu mboka ye li kekuma, mboka ye na okulya omapumba gawo notaa nu omasita gawo, naanaa ngaashi ne.”

²⁸ Nena elenga olya thikama po e tali igidha mOshihebeli tali ti: “Pulakeneni sho omupangeli gwaAssur te mu lombwele!

²⁹ Ote mu londodha, mwaa kotokelwe kuHiskia. Hiskia ita vulu oku mu hupitha.

³⁰ Inamu pitika, e mu heke mu inekele Omuwa. Inamu dhiladhila kutya Omuwa ote ke mu hupitha, nenge a keelele omatangakwiita getu gaAssur okukwata po oshilando sheni.

³¹ Inamu pulakena Hiskia. Omupangeli gwaAssur ote mu lombwele, mu pite mo moshilando, mu ye pondje ne mu igandje. Amuhe otamu ka pitikilwa, mu lye omandjembele koomviinu dheni yene, oonkwiyu komikwiyu dheni yene nokunwa omeya momithima dheni yene,

³² sigo omupangeli te mu fala moshilongo sha faathana nosheni yene, moka mu na iitsambe yomiviinu tayi gandja omaviinu nomu na iilya yokuninga iikwiila; olyo evi lyomiolivi, lyomagadhi gooholivi nolyomagadhi goonyushi. Ngele tamu ningi shoka ta ti, itamu ka sa, ihe otamu kala mu na omwenyo. Inamu tulwa muugoya kuHiskia, mu dhiladhile kutya Omuwa ote mu hupitha.

³³ Ookalunga yiigwana yilwe oya hupitha tuu iilongo yawo miikaha yomupangeli gwaAssur?

³⁴ Ookalunga yaHamat noyaArpad oye li peni ngashingeyi? Ookalunga yaSefarvaim, yaHena noyaIvva oye li peni? Ope na tuu shoka sha hupitha Samaria?

³⁵ Uunake gumwe gwomookalunga mbaka a hupitha nando oshilongo shimwe shomuyo miikaha yomupangeli gwetu? Ndele nena oshike tashi mu dhiladhilitha kutya Omuwa ota hupitha Jerusalem?”

³⁶ Aantu oya li ya tya thilu, naanaa ngaashi omukwaniilwa Hiskia e ya lombwele; inaa popya sha nando.

³⁷ Nena Eliakim, Shebna naJoah oya tuula oonguwo dhawo moluhodhi e taa zi po e taa ka lombwela omukwaniilwa shoka elenga lyokuAssur lya ti.

19

¹ Hiskia sho u uvu ehokololo lyawo, okwa tuula oonguwo dhe moluhodhi e ta zala ehahi e ta yi kotempeli yOmuwa.

² Okwa tumu elenga lyomuuwa Eliakim, amushangampangu Shebna naayambi aakuluntu komuhunganeki Jesaja yaAmos. Oya li ya zala omahahi.

³ Okwe ya tumu kuJesaja nelaka tali ti: “Esiku lyonena olyomalwa, olyegeelo nolyeshundulo. Otwa fa omukiintu ta thetwa, ihe ita vulu okupulumutha.

⁴ Omupangeli gwaAssur okwa tumu elenga lye ekuluntu okusheka Kalunga omunamwenyo. Omuwa, Kalunga koye, na uve omasheko ngaka nokugeela ngoka e ga popi. Galikana Kalunga omolwaamboka yomaantu yetu ya hupa ko.”

⁵ Jesaja sho u uvu elaka lyomukwaniilwa Hiskia,

⁶ okwa yamukula ta ti: “Omuwa ota ti: ‘Ino tila oohapu ndhoka dhuumatyona womupangeli gwaAssur we dhi uvu tadhi sheke ndje!

⁷ Otandi tumine omupangeli onkundana ndjoka tayi mu galukithile koshilongo she mwene, nankoka tandi ke mu dhipagithila.’ ”

⁸ Elenga lyokuAssur olya koneke kutya omupangeli a zi mo muLakish nokwa li ta kondjitha oshilando shopopepi Libna; onkee a yi kuye.

⁹ Onkundana ya adha Aayassur, oya ti kutya etangakwiita lyAayegipiti mewiliko lyomukwaniilwa Tirhaka gwaSudan oli li mondjila, li ya homone. Omupangeli sho e shi uvu, okwa tumu aatumwa komukwaniilwa Hiskia,

¹⁰ ye mu lombwele ngeyi: “Kalunga ngoka we mu inekela, okwe ku lombwele kutya ito ka ya miikaha yandje, ihe shika inashi ku tula muugoya.

¹¹ Owa kundana shoka omupangeli gwaAssur ta ningile iilongo ayihe mbyoka a tokola e yi hanagule po. Oto dhiladhila kutya oto ka hunuka?

¹² Ootatekulu oya hanagula po iilando Gosan, Haran naRezef noya dhipaga aantu yaBeteden mboka ya kala muTelassar, ko kakwa li nando okalunga kamwe ta vulu oku ya hupitha.

¹³ Aakwaniilwa yomiilando Hamat, Arpad, Sefarvaim, Hena naIvva oye li peni?”

¹⁴ Omukwaniilwa Hiskia okwa taamba ontumwafo miikaha yaatumwa e te yi lesha. Nena okwa yi kotempeli e ta aneke ontumwafo koshipala shOmuwa

¹⁵ e ta galikana ta ti: “Omuwa, Kalunga kaIsrael, ngoka wa kuutumba koshipangelapundi shoye kombanda yaakerubi, ongoye awike Kalunga ngoka to lele iilongo ayihe yomuuyuni. Ongoye wa shiti egulu nevi wo.

¹⁶ Ngashingeyi, Omuwa, tala, nkene tatu ningwa. Pulakena oohapu adhihe dhaSennakerib, nkene te ku sheke, ngoye Kalunga omunamwenyo.

¹⁷ Omuwa, tse atuhe otwa tseya kutya aapangeli yaAssur oya hanagula po iigwana oyindji e taa ningi omavi gayo omaputu.

¹⁸ Oya lungunitha po ookalunga yawo mboka kaya li ookalunga nando, oyo iiyelekela ayike ya hongwa kaantu miiti nomomamanya.

¹⁹ Ngashingeyi, Omuwa, Kalunga ketu, tu hupitha miikaha yAayassur, opo iigwana ayihe yomuuyuni yi tseye kutya ongoye awike Omuwa Kalunga.”

²⁰ Nena Jesaja okwa tumu komukwaniilwa Hiskia elaka tali mu tseyithile eyamukulo kegalikano lye.

²¹ Omuwa okwa ti: “Sennakerib, oshilando Jerusalem otashi ku yolo e tashi ku dhini.

²² Olye ngoka andola we mu sheke noku mu popya nayi? Ongoye owa dhini ndje, ngame Kalunga kaIsrael omuyapuki.

²³ Owa tumu aatumwa yoye, u inenepekele ndje kutya ngoye nomatembakwiita goye agehe wa sindi oondundu oondeendeka dhaLibanon. Owi itanga to ti, owa komangele omiti omisedeli omile nomiti omikiperesi dho opala nowa thiki nomomaha gomuuleeleka momakuti.

²⁴ Owi inomo to ti, owa hupu omithima e to nu omeya momavi gokiilongo noompadhi dhaakwiita yoye odha lyatagula po omulonga Niili e tagu pwine.

²⁵ “Ino shi uva nani kutya shika ongame nde shi dhiladhila nalenale? Ngashingeyi onde shi gwanitha. Onde ku pe oonkondo, u kumune po iilandohote, yi ninge omakulukuma.

²⁶ Aantu mboka ya kala mo oya tyololoka; oya li ya haluka noya kunkwa. Oya li ya fa omwiidhi melundu nenge iigwanga tayi mene kombanda yondunda, uuna ombepo ompyu yokuuzilo tayi yi pepele.

²⁷ “Ihe ngame onde ku tseya aguhe, shoka to ningi naankoka to yi. Onda tseya, nkene wa pindjala okukondjitha ndje.

²⁸ Onda taamba etseyitho lyepindjalo lyoye nomwiityo gwoye, nongashingeyi otandi tula ondjolo momayulu goye noshitomo mokana koye e tandi ku shunitha nondjila ndjoka we ya nayo.”

²⁹ Nena Jesaja okwa ti komukwaniilwa Hiskia: “Endhindhiliko lyashika tashi ka ningwa, olyo ndika. Nuumvo nomumvo tagu ya omu na okulya oshinkumbwe ashike, ihe omumvo tagu ka landula ko otamu ka vula okukuna nokuteya iilya yeni, notamu ka tsika omiviinu e tamu li omandjembele.

³⁰ Oomboka taa hupile muJuda, otaa ka tsapuka ya fa iimeno tayi fala omidhi dhayo muule mevi e tayi imi iiyimati.”

³¹ MuJerusalem otamu ka kala aantu nokondundu Sion oomboka ya hupu ko, oshoka Omuwa oye ta ningitha ayihe mbika.

³² Omuwa okwa popi omupangeli gwaAssur ta ti: “Ite ya mo, a hite meni lyoshilando shika nenge a umbile mo nando oshikuti shimwe molugodhi. Kape na omukwiita e na ehuuyanza ta vulu okuya popepi noshilando, noshilando itashi tungilwa omutuni gwekondekela.

³³ Ota ka shuna nondjila ndjoka e ya nayo ye ite ya meni lyoshilando shika. Ongame, Omuwa, nde dhi tya.

³⁴ Otandi popile oshilando shika e tandi shi gamene omolwesimano lyandje mwene nomolweuvaneko nde li uvanekele omuntu gwandje David.”

³⁵ Uusiku mbwiyaka omuyengeli gwOmuwa okwa yi kontanda yAayassur e ta dhipagele ko aakwiita 185 000. Sho kwa shi, oya adhika ya lala ya sa ayehe.

³⁶ Nena omupangeli gwaAssur Sennakerib okwa zi po e ta shuna kuNinive.

³⁷ Esiku limwe, sho a li ta saagele motempeli yoshikalunga she Nisrok, yaali yomoyanamati, Adrammelek naSharezer, oye mu dhipaga nomagongamwele e taa fadhuka po taa yi koshilongo Ararat. Gumwe gwomoyanamati Asarhaddon okwe mu landula muukwaniilwa.

20

¹ Pomasiku ngeyaka Hiskia okwa kwatwa kuuvu uudhigu, konyala a se. Omuhunganeki Jesaja yaAmos okwa yi e ke mu talele po e ta ti kuye: “Omuwa ota ti: ‘Longekidha egumbo lyoye, oshoka ono si. Ito ka aluka we.’ ”

² Hiskia okwa pungulukile mekuma nokwa galikana:

³ “Omuwa, dhimbulukwa kutya onde ku longele nuudhiginini neinekelo nonda kambadhala aluhe okuninga shoka she ku opalela.” Okwa lili nokulililila.

⁴ Jesaja okwa zi po pomukwaniilwa, ihe manga inaa thiga po ehale lyuuwa, Omuwa okwe mu lombwele,

⁵ a shune kuHiskia, omuleli gwoshigwana shOmuwa, e mu lombwele a tye: “Ngame, Omuwa, Kalunga kahokulu David, ondu uvu egalikano lyoye nonda mono omahodhi goye. Otandi ke ku aludha, nongele pwa piti omasiku gatatu, oto ka ya motempeli.

⁶ Otandi ke ku kaleka ko omimvo omulongo nantano u na omwenyo. Otandi ku hupitha miikaha yomupangeli gwaAssur pamwe noshilando shika Jerusalem. Otandi ka popila oshilando shika omolwesimano lyandje mwene nomolweuvaneko lyandje nde li uvanekele omuntu gwandje David.”

⁷ Nena Jesaja okwa lombwele aakalele yomukwaniilwa, ya tule ekamina lyoonkwiyu poshitumbuka she, oye nota aluka.

⁸ Omukwaniilwa Hiskia okwa pula a ti: “Endhindhiliko olyashike tali holola kutya Omuwa ota ka aludha ndje, nongele pwa piti omasiku gatatu, otii ka vula okuya motempeli?”

⁹ Jesaja okwa yamukula a ti: “Omuwa ote ku pe endhindhiliko, u tseye kutya ota ka gwanitha euvaneko lye. Olini po mwaangaka gaali li ninge endhindhiliko kungoye: omunzile moshiulikithimbo gu hume komeho oonkatu omulongo nenge ogu shune monima oonkatu omulongo?”

¹⁰ Hiskia okwa yamukula a ti: “Oshipu omunzile gu uke komeho oonkatu omulongo. Nagu shune konima oonkatu omulongo.”

¹¹ Jesaja okwa galikana Omuwa, nOmuwa okwa shunitha omunzile monima oonkatu omulongo moshiulikithimbo shomukwaniilwa Ahas.

¹² Lwopomathimbo ngoka omukwaniilwa gwaBabilonia Merodak Baladan, omuna gwaBaladan, okwa kundana kutya omukwaniilwa Hiskia okwa li ta alukwa, onkee okwe mu tumine ontumwafo nomagano.

¹³ Hiskia okwa kundu nawa aatumwa e te ya ulukile uuyamba we — iisiliveli ye niingoli ye, iizimba ye nomagadhi gondilo, niikwaniipangitho ye ayihe yuukwiita. Kakwa li sha moompungulo dhe nenge shaa mpoka moshilongo she inee shi ya ulukila.

¹⁴ Nena omuhunganeki Jesaja okwa yi komukwaniilwa Hiskia e ta pula ta ti: “Aantu mbaka oya zi peni noye ku lombwele shike?” Hiskia okwa yamukula a ti: “Oya zi koshilongo shokokule, kuBabilon.”

¹⁵ Jesaja okwa pula a ti: “Mombala oya mono mo shike?” Hiskia okwa yamukula a ti: “Oya tala iinima ayihe. Kamu na sha moompungulo inaandi shi ya ulukila.”

¹⁶ Jesaja okwa ti komukwaniilwa: “Omuwa Omunankondoawike ota ti kutya

¹⁷ esiku onali ke ya, uuna shaa shoka shi li muuwa woye, shaa shoka oohokulu ye shi pungulile, tashi ka falwa kuBabilon. Itapa thigwa sha.

¹⁸ Yamwe yomoluvalo lwoyelela otaa ka kuthwa po e taa ka ningwa aathonwantu, ya yakule muuwa womukwaniilwa gwaBabilon.”

¹⁹ Omukwaniilwa Hiskia shika okwe shi uvu ko tashi ti kutya, otaku ka kala ombili negameno monkalamwenyo ye, nomolwasho okwa yamukula ngeyi: “Oohapu dhOmuwa ndhoka wa popi, oombwanawa.”

²⁰ Ashihe shilwe shoka Hiskia a ningi, iilonga ye yuufule, nehokololo nkene a hupu ondama nomukanka ngoka tagu eta omeya moshilando, ayihe oya nyolelwa membo lyondjokonona yaakwaniilwa yaJuda.

²¹ Hiskia okwa si, nomwana Manasse okwe mu landula muukwaniilwa.

21

¹ Manasse okwa li e na omimvo omulongo nambali, sho a ningi omukwaniilwa gwaJuda, nokwa lele omimvo omilongo ntano nantano muJerusalem. Yina oHefzi Bah.

² Manasse okwa yono kOmuwa. Okwa landula iilonga iinyanyalithi yiigwana mbyoka Omuwa e yi tidha mo mevi, opo aantu ye ya kale mo.

³ Okwa tungulula omahala giinonoma yuupagani ngoka he Hiskia a li a hanagula po. Okwa tungu iiyambelo yokusimanekela Baal, okwa ningitha iiyelekela yoshikalungakiintu Asheera, ngaashi Ahab, omukwaniilwa gwaIsrael, a ningile. Manasse okwa simaneke wo oonyothi.

⁴ Okwa tungitha iiyambelo yuupagani motempeli, moka Omuwa a tile e na okusimanekelwa.

⁵ Momahale agehe gaali gotempeli okwa tungile mo iiyambelo yokusimanekela oonyothi.

⁶ Okwa yamba omwanamati efikilondjambo. Okwa anekelitha e ta pulitha oonganga noompulile. Okwa yono nayi kOmuwa e ta tukulutha ondjahi ye.

⁷ Okwa tula oshiyelekela shoshikalungakiintu Asheera motempeli, mehala tuu ndyoka Omuwa a lombwele omuntu gwe David nomwana Salomo ta ti: “Muka muJerusalem, motempeli ndjika, omo mu na ehala ndyoka nde li hogolola mokati komazimo omulongo nagaali gaIsrael, li ninge ehala moka tandi simanekelwa.

⁸ Ngele Aaisraeli otaa vulika kiipango yandje ayihe e taa dhiginine ompango ayihe ndjoka ya pewa komuntu gwandje Moses, nena itandi ka pitika nando, ya tidhwe mo mevi ndyoka nde li pe oohekulu.”

⁹ Ihe Aajuda inaa vulika kOmuwa, naManasse okwe ya fala mepogolo enene li vule ndyoka lya pogolwa kiigwana mbyoka Omuwa e yi tidha mo moshilongo, opo aantu ye ya kale mo.

¹⁰ Omuwa okwe ya lombwelitha aamati ye aahunganeki ta ti:

¹¹ “Omukwaniilwa Manasse okwa longo iihuna mbika yi vule mbyoka ya longwa kAakaanana; nopamwe niimenka ye okwa fala Aajuda muulunde.

¹² Omolwashika ngame, Omuwa, Kalunga kaIsrael, otandi undulile Jerusalem naJuda omupya, noshaa ngoka te gu kundana, ota ka kunkwa.

¹³ Otandi ka geela Jerusalem, ngaashi nda ningi Samaria nongaashi nda ningi Ahab, omukwaniilwa gwaIsrael noluvalo lwe. Otandi ka komba po aantu muJerusalem, ngaashi aantu haa pyaana iiyaha e taye yi sizimike.

¹⁴ Otandi ka thiga po aantu mboka taa ka hupa ko, e tandi ke ya gandja miikaha yaatondi yawo, mboka taa ke ya sinda e taa yugu po evi lyawo.

¹⁵ Aantu yandje otandi ke ya longela ngeyi, oshoka oya yono kungame e taa tukula ondjahi yandje okuza kethimbo ndiyaka oohekulu ya tembuka muEgipiti sigo ongashingeyi.”

¹⁶ Manasse okwa dhipaga aantu oyendjiyendji yaa na ndjo, nombinzi yawo ya tondokele momapandaanda gaJerusalem. Okwa gwedhele shika kondjo ye yokufala Aajuda mokusimaneka iimenka noku ya yonitha kOmuwa.

¹⁷ Ashihe shilwe shoka Manasse a ningi, mwa kwatelelwa omayono ge, osha nyolelwa membo lyondjokonona yaakwaniilwa yaJuda.

¹⁸ Manasse okwa si nokwa fumvikwa meyana lyuuwa, meyana lyaUssa, nomwanamati Ammon okwe mu landula muukwaniilwa.

¹⁹ Ammon okwa li e na omimvo omilongo mbali nambali, sho a ningi omukwaniilwa gwaJuda nokwa lele muJerusalem omimvo mbali. Yina oMeshullemet yaHaruz gwokuJotba.

²⁰ Okwa yono kOmuwa a fa he Manasse.

²¹ Okwa lamba oshinkoti shahe e ta simaneke iimenka mbyoka ya li hayi simanekwa kuhe.

²² Okwe ekelehi Omuwa, Kalunga koohekulu, ye ina vulika kiipango yOmuwa.

²³ Omalenga gaAmmon oge mu tsile ondumbo e tage mu dhipagele muuwa we miineya.

²⁴ Ihe Aajuda oya dhipaga aadhipagi yaAmmon e taa kwaniilekitha omwana Josia.

²⁵ Ashihe shilwe shoka Ammon a ningi, osha nyolelwa membo lyondjokonona yaakwaniilwa yaJuda.

²⁶ Ammon okwa fumvikwa mombila yomeyana lyaUssa, nomwana Josia okwe mu landula muukwaniilwa.

22

¹ Josia okwa li e na omimvo hetatu, sho a ningi omukwaniilwa gwaJuda nokwa lele muJerusalem omimvo omilongo ndatu nagumwe. Yina oJedida yaAdaia gwokuBozkat.

² Josia okwa longo shoka sho opalela Omuwa; okwa landula oshinkoti shahekulu, omukwaniilwa David, nokwa vulika lela kiipango ayihe yaKalunga.

³ Momumvo omutimulongo nomutihetatu gwepangelo lyomukwaniilwa Josia, Josia okwa tumu amushangampangu Shafan yaAzalia, omutekulu gwaMeshullam, a ye kotempeli nelaka tali ti:

⁴ “Inda, u ka lombwele omuyambimukuluntu Hilkia, a yalule iimaliwa mbyoka ya gongelwa kaayambi aalangeli yoposheelo, sho aantu taa yi motempeli.

⁵ Na gandje iimaliwa mbyoka kaatonateli yiilonga yeopaleko lyotempeli. Oye na okufuta

⁶ aanashihongelo, aatungi naasaahi yomamanya noya lande iipilangi nomamanya gokwaandeka motempeli.

⁷ Aalumentu mboka taa tonatele iilonga, oyo aainekelwalela, inaa pulwa nando, nkene ya longitha iimaliwa mbyoka.”

⁸ Shafan okwa thikitha elaka lyomukwaniilwa kuHilkia, naHilkia okwe mu hokololele kutya okwi itsu embompango motempeli. Hilkia okwe mu pe embo, naShafan okwe li lesha.

⁹ Nena okwa shuna komukwaniilwa e ta ti kuye: “Aapiya yoye oya kutha mo iimaliwa mbyoka ya li motempeli e taye yi pe aantu mboka haa tonatele iilonga yomaopaleko.”

¹⁰ Oye nokwa ti: “Ondi na po embo mpaka nde li pewa kuHilkia.” Oye nokwe li leshele omukwaniilwa mokule.

¹¹ Omukwaniilwa sho u uvu embo tali leshwa, okwa tuula oonguwo dhe moluhodhi

¹² nokwa lombwele omuyambi Hilkia naAhikam yaShafan naAkbor yaMikaia namushangampangu Shafan nomukalele gwomukwaniilwa Asaja a ti kuyo:

¹³ “Indeni, mu ke tu pulile Omuwa tse nAajuda kutya embo ndika otali longo shike. Omuwa okwe tu geele molwashoka ootatekulu inaa gwanitha shoka embo ndika tali ti nashi ningwe.”

¹⁴ Hilkia, Ahikam, Akbor, Shafan naAsaja oya yi, ya ka pule omayele komuhunganeki omukiintu, edhina lye Hulda, ngoka a kala moshitopolwa oshipe muJerusalem. (Omulume Shallum yaTikva, omutekulu gwaHarhas, okwa li ha tonatele oonguwo dhomotempeli.) Oya hokololele Hulda shoka sha ningwa po.

¹⁵ Hulda okwe ya lombwele, ya shune komukwaniilwa, yo ye mu faalele

¹⁶ elaka lya zi kOmuwa tali ti: “Otandi ka geela Jerusalem naantu yasho ayehe, ngaashi sha nyolelwa membo ndyoka lya leshwa komukwaniilwa.

¹⁷ Oye ekelehi ndje e taa yambele iikalunga omafikilondjambo. Osho ngaaka ya tukulutha ondjahi yandje niilonga yawo. Ondjahi yandje oya tukuluthwa yi geele Jerusalem noitayi ka lotela we.

¹⁸ Ihe tyeni komukwaniilwa gwaJuda, shika osho shono ngame, Omuwa, Kalunga kaIsrael, tandi ti: ‘Owa pulakene shoka sha nyolelwa membompango,

¹⁹ nowi itedhulula e to ishonopeke koshipala shandje, nokutuula oonguwo dhoye e to lili, sho wa uvu kutya otandi ka geela Jerusalem naantu yasho. Otandi shi ningi endhindhiliko li tilitha, ehala ndyoka taku tiwa olya thingwa. Ihe nena ondu uvu egalikano lyoye,

²⁰ negeelo ndyoka tandi etele Jerusalem, itali ya we, manga inoo sa. Oto ka sa nombili.’ ” Aantu oya fala elaka ndika komukwaniilwa Josia.

23

¹ Omukwaniilwa Josia okwa hiya aawiliki yaJuda noyaJerusalem.

² Oyo ayehe oya gongala noya yi kotempeli ya thindikilwa kaayambi naahunganeki nokoshihupe ashihe shoshigwana, aayamba noohepele. Montaneho yawo omukwaniilwa okwa lesha mokule embo lyehangano alihe mokule, ndyoka lyi itsuwa motempeli.

³ Okwa thikama pongudhi yaakwaniilwa e ta hangana nOmuwa. Oshigwana ashihe osha li shi na okuuvaneka, shi vulike kOmuwa sho shi dhiginine iipango ye ayihe nomautho ge agehe nomutima aguhe noonkondo adhihe. Ashihe shoka shu uthwa membo lya monika, oshi na okudhigininwa. Aantu ayehe oyu uvaneke okudhiginina ehangano.

⁴ Nena Josia okwa lombwele omuyambimukuluntu Hilkia, naayakuli ye aayambi naayambi aalangeli yoposheelo shotempeli, ya kuthe mo motempeli iikwaniipangitho ayihe ya longithwa mokusimaneka Baal, oshikalungakiintu Asheera noonyothi. Omukwaniilwa okwa lungunitha po iikwaniipangitho mbika ayihe pondje yoshilando popepi nokalonga Kidron, nomutoko okwe gu falitha kuBetel.

⁵ Okwa hanagula po aayambi yiikalunga mboka ya langekelwe kaakwaniilwa yaJuda, ya yambe omafikilondjambo kiiyambelo yoshipagani miilando yaJuda nomomahala gopopepi naJerusalem — aayambi ayehe mboka ya li haa yamba omafikilondjambo kuBaal, ketango, komwedhi, koonyothi nokoongundu dhomegulu.

⁶ Okwa kutha mo motempeli oshiyelekela shaAsheera e te shi fala pondje yoshilando kokalonga Kidron, te shi lungunitha po shi ninge omutoko gwowala e te gu gundu kombanda yoombila.

⁷ Okwa hanagula po omahala gaanona yiihuna motempeli ga lalwa koohonda dhomotempeli. (Okwa li aakulukadhi haa tungu oonguwo dha longithwa mokusimaneka Asheera.)

⁸ Okwe eta muJerusalem aayambi mboka ya li miilando yaJuda nokwa shundula iiyambelo yawo moshilongo ashihe. Okwa kumuna po wo iiyambelo mbyoka ya yapulilwa iikalungakombo popepi nosheelo sha tungwa komupangeli gwoshilando, Josua, kolumoho lwosheelo moka aantu taa piti, nge taa yi moshilando.

⁹ Aayambi mboka kaya li ya ziminwa okuyakula motempeli yOmuwa muJerusalem, ihe oya vulu okulya iikwiila mbyoka inaayi tulwa efulika ye etelwa aayambi ooyakwawo.

¹⁰ Omukwaniilwa Josia okwa shundula wo Tofet, ehala lyiinonoma yuupagani mesilu lyaHinnom, opo shaa ngoka kaa yambe omwana omumati nenge omukadhona, a ninge efikilondjambo koshikalunga Molek.

¹¹ Okwa hanagula po wo iiyelekela yuukambe mbyoka aakwaniilwa yaJuda ya yoololele okusimaneka etango e ta fike po omatemba ga longithwa miinonoma mbika. (Iiyelekela mbika oya li posheelo shotempeli, popepi nongulu yaNatan Melek, elenga enene.)

¹² Omayambelo ngoka ga tungilwe po kaakwaniilwa yaJuda kontala yokombanda yongulu yaAhas, omukwaniilwa Josia okwe ga kumuna po, osho wo iiyambelo mbyoka ya tungilwe po komukwaniilwa Manasse momahalandjandja gaali gotempeli; okwa nyanyagula po iiyambelo noku yi nyangushula po, nontsi oya gundwa molusilu lwaKidron.

¹³ Josia okwa shundula iiyambelo mbyoka omukwaniilwa Salomo a tungile kuuzilo waJerusalem, kuumbugantu wOndundu yomiolivi, ya tungilwa iinonoma yiikalunga iikungitha — Astarte, oshikalungakiintu shaSidon, Kemosh, oshikalunga shaMoab, naMilkom, oshikalunga shaAmmon.

¹⁴ Omukwaniilwa Josia okwa teyagula po oongundhimanya e ta kumuna po oshiyelekela sha yapulilwa oshikalungakiintu Asheera, nevi ndyoka mpoka pwa li iikalunga, okwe li siikile niipongo yaantu.

¹⁵ Josia okwa yonagula po wo ehala lyiinonoma muBetel, ndyoka lya tungilwe komukwaniilwa Jeroboam yaNebat, ngoka a fala Israel muulunde. Josia okwa kumagula po oshiyambelo, ta nyangushula omamanya gasho uutandu e te u ningi omutoko; okwa lungunitha po oshiyelekela shaAsheera.

¹⁶ Nena Josia okwa lengalenga koombinga noombinga e ta mono oombila dhimwe dhi li koshikulundundu, okwa fumvulitha mo iipongo e te yi lungunithile koshiyambelo. Pamukalo nguka okwa shundula oshiyambelo, a gwanitha shoka omuhunganeki a popile nale medhano lyoshituthi, uuna omukwaniilwa Jeroboam a li ta yamba omayambo koshiyambelo shika. Omukwaniilwa Josia okwa lengalenga ishewe koombinga noombinga e ta mono ombila yomuhunganeki ngoka a popile iinima mbika.

¹⁷ Okwa pula a ti: “Ombila ndjino oyalye?” Aabetel oye mu yamukula ya ti: “Ombila ndjika oyomuhunganeki ngu a zile kuJuda e ta hunganeke iinima mbika wa ningi koshiyambelo.”

¹⁸ Josia okwa ti: “Yi etheni, yi kale ngaashi yi li, iipongo ye itayi fumvulwa mo.” Osho ngaaka iipongo ye inayi fumvulwa mo nosho wo iipongo yomuhunganeki ngoka a zile kuSamaria.

¹⁹ Nomiilando ayihe yaIsrael omukwaniilwa Josia okwa hanagula po omahala agehe giinonoma yuupagani ngoka ga li ga tungwa kaakwaniilwa yaIsrael, mboka ya pendutha ondjahi yOmuwa. Agehe okwe ga hanagula po, ngaashi a ningi muBetel.

²⁰ Aayambi ayehe aapagani okwe ya dhipagele kiiyambelo nkoka ya li haa nonomene, e ta lungunithile iipongo yaantu koshiyambelo kehe. Nena okwa galukile kuJerusalem.

²¹ Omukwaniilwa Josia okwa lombwele aantu, ya dhane Opaasa mesimaneko lyOmuwa, Kalunga kawo, ngaashi sha nyolelwa membo lyehangano.

²² Kaku na Opaasa ya dhanenwe ngaandjika kaakwaniilwa yaIsrael nenge yaJuda, okuza kaatokolihapu sho ya li melelo lyoshigwana.

²³ Osha ningwa ashike momumvo omutimulongo nomutihetatu gwepangelo lyaJosia, Opaasa sho ya dhanenwe muJerusalem.

²⁴ Opo oompango dhi gwanithwe ndhoka dha nyolwa membo ndyoka lyi itsuwa komuyambimukuluntu Hilkia motempeli, omukwaniilwa Josia okwa kombo muJerusalem nomuJuda oompulile adhihe naayanekeli ayehe niikalunga ayihe yomomagumbo, iimenka ayihe niinonoma ayihe yuupagani.

²⁵ Kakwa li omukwaniilwa e mu tetekela e mu fa, ngoka a longele Omuwa nomutima gwe aguhe noondunge dhe adhihe noonkondo dhe adhihe nokuvulika kompango ayihe yaMoses, noinaku landula we omukwaniilwa e mu fa.

²⁶ Ihe ondjahi yOmuwa ya hwama oya kala kombanda yaJuda ya tukuluthwa kiilonga yomukwaniilwa Manasse yo inayi lotela we.

²⁷ Omuwa okwa ti: “Otandi ningile Juda naanaa, ngaashi nda ningile Israel: otandi kandula ko Aajuda koshipala shandje e tandi ekelehi Jerusalem, oshilando shoka nde shi hogolola, notempeli, ehala ndyoka nda popile te ti, omo tandi simanekelwa.”

²⁸ Ashihe shilwe shoka omukwaniilwa Josia a ningi, osha nyolelwa membo lyondjokonona yaakwaniilwa yaJuda.

²⁹ Josia manga a li omukwaniilwa, omukwaniilwa gwaEgipiti Neko okwa fala etangakwiita lye sigo okomulonga Eufrat, a ka kondjithe omupangeli gwaAssur. Omukwaniilwa Josia okwa kambadhala okukeelela etangakwiita lyAayegipiti puMegiddo. Nena Neko, omukwaniilwa gwaEgipiti, okwe mu dhipaga, sho e mu mono.

³⁰ Omalenga ge oga tula omudhimba gwe metembakwiita e tage gu fala kuJerusalem, nkoka a fumvikwa moombila dhaakwaniilwa. Aajuda oya hogolola omuna gwaJosia, edhina lye Joahas, e taye mu kwaniileke.

³¹ Joahas okwa li e na omimvo omilongo mbali nandatu, sho a ningi omukwaniilwa gwaJuda nokwa lele muJerusalem oomwedhi ndatu. Yina oHamutal yaJeremia gwokuLibna.

³² Joahas okwa landula oshinkoti shoohekulu e ta yono kOmuwa.

³³ Epangelo lye olya hulu po, sho omukwaniilwa gwaEgipiti Neko e mu kwatele muRibla moshilongo shaHamat e ta futitha Juda oshisiliveli shondjundo yookilograma 3,400 noshingoli shondjundo yookilograma 34.

³⁴ Omukwaniilwa Neko okwa ningi Eliakim lyaJosia omukwaniilwa gwaJuda, a landule Josia, e ta lukulula edhina lye li ninge Jehoiakim. Joahas okwa falwa kuEgipiti, nkoka a sile.

³⁵ Omukwaniilwa Jehoiakim okwa gongele iifendela e yi kunguna kaantu mekwatathano lyuuyamba wawo, opo a tsakanithe omwaalu tagu pumbiwa okufuta shoka tashi pulwa komukwaniilwa gwaEgipiti.

³⁶ Jehoiakim okwa li e na omimvo omilongo mbali nantano, sho a ningi omukwaniilwa gwaJuda nokwa lele muJerusalem omimvo omulongo nagumwe. Yina oSebida yaPedaia gwokuRuma.

³⁷ Jehoiakim okwa landula oshinkoti shoohekulu e ta yono kOmuwa.

24

¹ Muuyuni waJehoiakim omukwaniilwa gwaBabilonia Nebukadnezzar okwa matukile Juda. Jehoiakim okwa thiminikwa, a igandje kelelo lye, ihe konima yoomvula ndatu okwa tsu ondumbo.

² Omuwa okwa tumu omatanga ga homata gAababilonia, gAasiria, gAamoabi nogAayammoni, ga kondjithe Jehoiakim noga hanagule po Juda, ngaashi Omuwa e shi lombwelitha aamati ye aahunganeki kutya ote ke shi ninga.

³ Shika osha gwanithwa palombwelo lyOmuwa, opo a geele Aajuda e ya kandule ko koshipala she moluulunde auhe mboka omukwaniilwa Manasse a ningi,

⁴ ndele unene omolwokudhipaga aantu kaaye na ndjo. Omuwa ina vula nando okukuthila po Manasse molwaambika.

⁵ Ashihe shilwe shoka Jehoiakim a ningi, osha nyolelwa membo lyondjokonona yaakwaniilwa yaJuda.

⁶ Jehoiakim okwa si, nomwana Jehoiakin okwe mu landula uukwaniilwa.

⁷ Omukwaniilwa gwaEgipiti ina pita mo we moshilongo she, a ka hinge iita, oshoka omukwaniilwa gwaBabilonia okwa lala iikandjo mbyoka ya li yomukwaniilwa gwaEgipiti okuza komulonga Eufrat sigo okongamba yaEgipiti muumbangalantu.

⁸ Jehoiakim okwa li e na omimvo omulongo nahetatu, sho a ningi omukwaniilwa gwaJuda nokwa lele muJerusalem oomwedhi ndatu. Yina oNehushta yaElnatan gwomuJerusalem.

⁹ Jehoiakin okwa landula oshinkoti shahe e ta yono kOmuwa.

¹⁰ Muuyuni we etangakwiita lyAababilonia mewiliko lyomalenga gomukwaniilwa Nebukadnezzar olye ya kuJerusalem e tali shi kondeke.

¹¹ Pethimbo lyekondekela Nebukadnezzar okwe ya kuJerusalem.

¹² Nena omukwaniilwa Jehoiakin pamwe nayina, oyanamati, omalenga ge naambala oyi igandja kAababilonia. Momumvo omutihetatu gwepangelo lyaNebukadnezzar okwa fala Jehoiakin onkwatwa

¹³ e ta fala omaliko agehe gotempeli nogombala kuBabilon. Pahapu yOmuwa Nebukadnezzar okwa tatula iikwaniipangitho ayihe yoshingoli mbyoka ya li ya hambulithilwa otempeli kuSalomo.

¹⁴ Nebukadnezzar okwa fala Aajerusalem muupika, aawagona ayehe naanamadhina ayehe, ayehe kumwe omayuvi omulongo. Okwa yi wo nomangomba agehe, mwa kwatelelwa aahambudhi. Aanima yowala okwe ya thigi po, ya kale muJuda.

¹⁵ Nebukadnezzar okwa fala Jehoiakin kuBabilon onkwatwa pamwe nayina, aakadhi, omalenga ge naawiliki yaJuda.

¹⁶ Nebukadnezzar okwa fala aanenentu ayehe kuBabilon, ayehe kumwe omayuvi gaheyali, omangomba eyuvi, mwa kwatelelwa aahambudhi, ayehe omapenda okuhinga iita.

¹⁷ Nebukadnezzar okwa kwaniileke hegona yaJehoiakin, edhina lye Mattania, a ninge omukwaniilwa gwaJuda e ta lundulula edhina lye li ninge Sedekia.

¹⁸ Sedekia okwa li e na omimvo omilongo mbali nagumwe, sho a ningi omukwaniilwa gwaJuda nokwa lele muJerusalem omimvo omulongo nagumwe. Yina oHamutal, omuna gwaJeremia gwokuLibna.

¹⁹ Omukwaniilwa Sedekia okwa yono kOmuwa, naanaa ngaashi omukwaniilwa Jehoiakim a ningile.

²⁰ Shika osha geyitha Omuwa noonkondo, sigo a kandula ko Aajerusalem nAajuda koshipala she.

25

¹ Sedekia okwa tsu ondumbo nomukwaniilwa gwaBabilonia Nebukadnezzar, nomolwashoka Nebukadnezzar okwe ya nomatangakwiita ge agehe e ta ponokele Jerusalem mesiku etimulongo lyomwedhi omutimulongo gwomumvo omutimugoyi gwepangelo lyaSedekia. Oya yungu ontanda pondje yoshilando e taa tungu omituni dhekondekela

² e taye shi kondeke sigo omumvo omutimulongo nogwotango gwepangelo lyaSedekia.

³ Mesiku etimugoyi lyomwedhi omutine gwomumvo tuu ngoka ondjala yekomba sho ya li ya geya, aantu sho ya li yaa na sho taya li,

⁴ omakuma goshilando oga kumunwa po. Aababilonia nando oya li ya kondeka oshilando, aakwiita ayehe oyi iyaka mo uusiku. Oya pitile momukala gwosheelo pokati komadhingililokuma gaali kombinga yeyana lyuuwa e taa fadhuka po yu uka kolusilu lwaJordan.

⁵ Ihe aakwiita Aababilonia oya landula omukwaniilwa Sedekia e taye mu kwatele molushandja popepi naJeriko, naakwiita ye ayehe oye mu halakana.

⁶ Sedekia okwa falwa a yi komukwaniilwa Nebukadnezzar, ngoka a li muRibla, naankoka Nebukadnezzar okwe mu pangula.

⁷ Oya dhipaga aana yaSedekia montaneho ye; opo ihe Nebukadnezzar okwa tsipulitha mo omeho gaSedekia e te mu tula momalyenge nokwe mu fala kuBabilon.

⁸ Mesiku etiheyali lyomwedhi omutitano gwomumvo omutimulongo nomutimugoyi gwepangelo lyaNebukadnezzar, omukwaniilwa gwaBabilon, Nebusaradan, omugandjindunge gwomukwaniilwa nondjayi yiita ye, okwe ya muJerusalem.

⁹ Okwa fike po otempeli, ombala nomagumbo gaanamadhina agehe muJerusalem,

¹⁰ naakwiita ye oya kumuna po omadhingililokuma goshilando.

¹¹ Nena Nebusaradan okwa fala kuBabilonia aantu mboka ya thigalele moshilando, oshihupe shomangomba naamboka yi igandjele kAababilon.

¹² MuJuda okwa thigile mo oohepele, mboka yaa na sho taa likola, e te ya tula miilonga yiitsambe yomiviinu nomomapya.

¹³ Aababilonia oya tatula po oongundhi dhiikushu nuutemba mboka wa li motempeli, osho wo ondama yoshikushu, e taa fala iikushu ayihe kuBabilon.

¹⁴ Oya fala ko wo iihupulo, iikangwa yokuyuka omutoko gwokoshiyambelo, iikonde yokutetitha uulapi woolamba, iiyaha yokukutha ombinzi moontselelandjambo, iitsininitho niikwaniipangitho yiikushu ayihe yilwe ya li hayi longithwa motempeli melongelokalunga.

¹⁵ Oya fala shaa shoka sha ningwa moshingoli nenge moshisiliveli, iiyaha iishona niikangwa yomakala ga hanya.

¹⁶ Iinima yoshikushu mbyoka Salomo a li e yi hambulithila otempeli — oongundhi mbali, uutemba nondama — oya li iidhigu okuvihwa.

¹⁷ Oongundhi mbali odha li dha faathana: shaa ndjoka oya li yi na uule woondya omulongo nahetatu, yi na oshipaka shoshikushu kombando, oondya ndatu momuthika. Oshipaka kehe osha kundukwa kuulenga wa tatwa nomwa longelwa iiyimati yoshikushu yomugranati.

¹⁸ Nebusaradan, ondjayi yiita, okwa kwata omuyambimukuluntu Seraia, omuyambi omutiyali Sefania naayambi aalangeli yatatu yoposheelo shotempeli.

¹⁹ Moshilando okwa kutha mo omumbala ngoka a li omutaleli gwetangakwiita, aagandjimayele yatano yomukwaniilwa mboka ya kalele natango moshilando, amushanga gwondjayi yiita, ngoka a li ha kutu aakwiita, naanamadhina yalwe omilongo hamano.

²⁰ Nebusaradan okwe ya fala komukwaniilwa gwaBabilonia moshilando Ribla,

²¹ moshikandjo Hamat. Oko nkoka omukwaniilwa e ya dhengitha e te ya dhipagitha. Osho ngaaka Aajuda ya falwa muupika kokule nevi lyawo.

²² Omukwaniilwa gwaBabilonia Nebukadnezzar okwa langeke Gedalia yaAhikam, omutekulu gwaShafan, a ninge omupangeli gwaJuda, e te mu tula po, a tonatele ayehe mboka inaa falwa kuBabilon.

²³ Omalenga Omajuda naakwiita mboka inaa igandja sho ya kundana shika, oya yi kuGedalia kuMispa. Mbaka oyo Ismael yaNetania, Johanan yaKarea, Seraia yaTanhumet gwokuNetofa naJaazania gwokuMaaka.

²⁴ Gedalia okwa ti kuyo: “Otandi mu lombwele kutya inamu tila mu igandje kAababilon. Kaleni moshilongo shika, ne mu longele omukwaniilwa gwaBabilon. Nena otamu kala nawa.”

²⁵ Ihe momwedhi omutiheyali gwomumvo tuu ngoka Ismael yaNetania, omutekulu gwaElishama gwomezimo lyaakwaniilwa, okwa yi kuMispa e na aalumentu omulongo e ta dhipaga Gedalia nAaisraeli nAababilonia mboka ya li puye.

²⁶ Nena Aaisraeli ayehe, aale naafupi, pamwe naakuluntu yomatangakwiita oya tembukile kuEgipiti, oshoka oya tila Aababilonia.

²⁷ Momumvo ngoka Evilmerodak a ningi omukwaniilwa gwaBabilon, okwa sile omukwaniilwa gwaJuda Jehoiakin ohenda e te mu pititha mo mondjedhililo. Shika osha ningwa mesiku etimilongombali netiheyali lyomwedhi omutimulongo nomutiyali gwomumvo omutimilongondatu nomutiheyali, sho Jehoiakin a falwa muupika.

²⁸ Evilmerodak okwe mu ningi nawa e te mu yele nesimano e vule aakwaniilwa aakwawo a li nayo muupika muBabilon.

²⁹ Jehoiakin okwa li a pitikwa, a hule mo oonguwo dhe dhomondjedhililo e ta li poshitaafula shomukwaniilwa omasiku ge agehe, manga a li e na omwenyo.

³⁰ Esiku kehe manga a li e na omwenyo, okwa li a gwanithilwa oompumbwe dhe adhihe.