1

¹ Saul sho a si, David okwa galuka ko kesindano lye, sho a sindi Aayamaleki e ta kala muZiklag omasiku gaali.

² Esiku lyanofu okwe ya omumati a zi ontuku kontanda yaSaul. Okwe ya a tuula oonguwo dhe nokwa gunda omutse gwe evi, shoka tashi holola oluhodhi lwe. Okwa yi kuDavid nokwi inyongamene pevi te mu simaneke.

³ David okwe mu pula a ti: “Owa zi peni?” Omumati okwa yamukula a ti: “Onda zi ontuku kontanda yAaisraeli.”

⁴ David okwa ti: “Lombwela ndje utale shoka sha ningwa ko.” Omumati okwa yamukula a ti: “Etangakwiita olya fadhuka po olugodhi, noyendji yomaakwiita yetu oya dhipagwa, Saul nomwana Jonatan oya dhipagwa wo.”

⁵ David okwe mu pula: “Owe shi tseya ngiini kutya Saul naJonatan oya sa?”

⁶ Omumati okwa yamukula ta ti: “Sho nda yi kondundu Gilboa, onda mono Saul i itsa kegonga lye mwene, nomatembakwiita naakawilinkambe aatondi oya li ye mu endja mo noye mu kunduka.

⁷ Nena okwa punguluka nokwa mono ndje e ti ithana ndje. Ondi itaale nda ti: ‘Ee, tatekulu.’

⁸ Okwa pula ndje kutya ongame lye, nonde mu hokololele kutya ngame Omuamaleki.

⁹ Nena okwa ti: ‘Ila, u sigule ndje, oshoka onda tsuwa nayi nondi li pokusa.’

¹⁰ Osho ngaaka nda yi kuye e tandi mu dhipaga, oshoka onda li ndi shi shi kutya ota ka ongotela pevi e ta si. Nena onda hula ko oshishani komutse gwe nokagondo koshikesho she nonde yi eta kungoye, tatekulu.”

¹¹ Omolwoluhodhi David okwa tuula oonguwo dhe, naantu ye osho ya ningi wo.

¹² Oya si oluhodhi noya lili noyi idhilike iikulya sigo ongulohi omolwaSaul naJonatan nomolwaIsrael, oshigwana shaKalunga, oshoka aantu oyendji oya dhipagelwa molugodhi.

¹³ David okwa pula omumati ngoka e mu etele onkundana ndjoka a ti: “Ngoye ogwapeni?” Omumati okwa yamukula a ti: “Ngame Omuamaleki, ihe onda kala moshilongo sheni.”

¹⁴ David okwe mu pula a ti: “Ngiini, ino ninga nando uugelele okuganeka oshikaha shoye, u dhipage omukwaniilwa omuhogololwa gwOmuwa?”

¹⁵ Nena David okwi ithana gumwe gwomaamati ye e ta ti kuye: “Dhipaga Omuamaleki!” Omumati nokwe mu dhipaga,

¹⁶ David okwa ti kOmuamaleki: “Ongoye we shi iyetele, sho wa pitika, u dhipage omukwaniilwa ngoka a hogololwa kOmuwa.”

¹⁷ David okwa tangumunine Saul naJonatan ontakumandjimbo ndjika

¹⁸ e ta gandja elaka, yi longwe oshigwana shaJuda. (Oya nyolwa membo lyaJashar.)

¹⁹ “Aawiliki yetu ya sile koondundu dhaIsrael. Omapenda gaakwiita yetu ga gwile ko.

²⁰ Inamu shi tseyitha mo muGat nenge momapandaanda gaAshkelon. Inamu nyanyudha aakiintu yomuFilistia; inamu etha aakadhona aapagani ya ligole.

²¹ “Omvula nenge omume inayi gwila koondundu dhaGilboa; omalundu gadho naga kale aluhe ga kunyuka! Oshoka omahuuyanza gomapenda ga gwithilwa pevi; ehuuyanza lyaSaul inali lomonwa we nomagadhi.

²² Uutati waJonatan owa li hau lyana, egongamwele lyaSaul olya dhenge onkama, aanankondo ya dhengwa pevi, aatondi ye ya dhipaga.

²³ “Aaholike, Saul naJonatan, aakwetu, mwa kala pamwe momwenyo ndele nomeso, mondapo mu vule omakodhi, moonkondo mu vule oonime.

²⁴ “Aakiintu muIsrael, lileni molwaSaul! Okwe mu zaleke omizalo omitiliganembwilili, nokwe mu poleke nuuwe noniingoli.

²⁵ “Aakwiita omapenda yi ihata po. Oya dhipagelwa molugodhi. Jonatan a kangawala koondundu.

²⁶ Mentu gwameme Jonatan, onde ku ehamenwa; onda li ndi ku hole unene! Ohole yoye oya li onkumithi kungame, eeno, oya li onene yi vule ohole yaakiintu.

²⁷ “Aakwiita aapenda ya gwila po, omatati gawo ge ethiwa gaa na mwago.”

2

¹ Konima yaambika David okwa pula Omuwa ta ti: “Nandi ye, ndi ka lale po oshilando shimwe shomiilando yomuJuda?” Omuwa okwa yamukula a ti: “Eeno.” David okwa pula a ti: “Oshini?” Omuwa okwa ti: “OHebron!”

² David okwa kutha aakadhi yaali: Ahinoam a za kuJesreel naAbigal, ngoka a li omuselekadhi gwaNabal gwokuKarmel, nokwa yi nayo kuHebron.

³ Okwa fala ko wo aantu ye nomagumbo gawo noya tula momikunda dha kunduka Hebron.

⁴ Nena Aajuda oye ya kuHebron noya gwayeke David omukwaniilwa gwaJuda. David sho u uvu kutya Aajabesh muGilgal ya fumvike Saul,

⁵ okwa tumu ko aantu yamwe ye na elaka tali ti: “Omuwa ne mu yambeke molwashoka mwa holola esimaneko lyokufumvika omukwaniilwa gweni.

⁶ Ngashingeyi Omuwa ne mu hololele ontalanteni ye nuudhiginini we. Ngame wo otandi ke mu ninga nawa molwashoka mwa ningi nawa.

⁷ Ikoleleleni, mu pendapale! Omukwaniilwa gweni Saul a si, nAajuda oya gwayeke ndje, ndi ninge omukwaniilwa gwawo.”

⁸ Ondjayi yiita yaSaul, edhina lye Abner yaNer, okwa fadhuka po pamwe nomuna gwaSaul Ishboshet ya tokola omulonga Jordan yu uka muMahanaim.

⁹ Nkwiyaka Abner okwa ningi Ishboshet omukwaniilwa gwoshitopolwa shaGilead, Aser, Jesreel, Efraim naBenjamin, eeno, nogwaIsrael alihe.

¹⁰ Okwa li e na omimvo omilongo ne, sho a ningi omukwaniilwa gwaIsrael nokwa lele omimvo mbali. Ihe ezimo lyaJuda olya landula David,

¹¹ nokwa lele Juda muHebron omimvo heyali netata.

¹² Abner nomalenga gaIshboshet oya zi kuMahanaim yu uka koshilando Gibeon.

¹³ Joab, yina oZeruia, nomalenga omakwawo gaDavid oye ya tsakaneke pedhiya lyaGibeon mpoka ya kala yamwe ye li handika, manga yakwawo ye li gama handiyaka.

¹⁴ Abner okwa ti kuJoab: “Natu kuthe aagundjuka yamwe koombinga adhihe, ya ninge elolelathano lyiita.” Joab okwa ti: “Onawa!”

¹⁵ Aamati omulongo nayaali oya kalele po Ishboshet nezimo lyaBenjamin ya kondjitha aamati omulongo nayaali yaDavid.

¹⁶ Omuntu kehe okwa kwata omukondjithi gwe komutse e ta tsu omwele gwe moombati dhomukondjithi gwe, onkee ayehe omilongo mbali nayane ya si oshita. Omolwashoka eha ndyoka muGibeon lya lukwa “Elundu lyomagongamwele.”

¹⁷ Nena olugodhi olwa tukuluka. Abner nAaisraeli oya sindwa kaantu yaDavid.

¹⁸ Oyanamati yatatu yaZeruia: Joab, Abisai naAsael oko ya li. Asael, ngoka ha vulu

¹⁹ okwa tameke okutidha Abner e mu endja mo.

²⁰ Abner okwa tala konima e ta ti: “Ongoye Asael?” Okwa yamukula a ti: “Eee.”

²¹ Abner okwa ti: “Etha okulandula ndje. Tidha gulwe gwomaakwiita, u yuge ko shoka e na.” Ihe Asael okwe mu lamba owala.

²² Lumwe natango Abner okwa ti kuye: “Etha okutidha ndje. Omolwashike to thiminike ndje, ndi ku dhipage. Otandi vulu ngiini okutsakaneka omumwanyoko Joab?”

²³ Ihe Asael ina kankama, onkee Abner e mu tsu oshilwanima negonga mela e tali tunukile kombunda. Asael okwi ihata pevi omukukutu, noshaa ngoka e ya pehala mpoka a kangawala, okwa kankama.

²⁴ Ihe Joab naAbisai oya tameke okutidha Abner. Pokuningina kwetango oye ya poshikulundundu shaAmma, shoka shi li kuuzilo waGiak mondjila yu uka kombuga yaGibeon.

²⁵ Aantu yomezimo lyaBenjamin oya gongalele Abner ishewe noya kala kondungu yondundu.

²⁶ Abner okwi igidha Joab ta ti: “Otatu kondjithathaneni sigo aluhe? Ku wete kutya otashi hulile ashike muuwinayi? Tse aakwashilongo aakweni. Otashi kala sigo uunake, manga inoo lombwela aantu yoye, ye ethe oku tu landula?”

²⁷ Joab okwa yamukula ta ti: “Otandi gana kuKalunga omunamwenyo kutya ando wa li inoo popya, ando aantu yandje ye mu landula, sigo ongula taku shi.”

²⁸ Nena Joab okwa hiki ombenda endhindhiliko lyokulombwela aantu ye, ye ethe okutidha Aaisraeli, nosho ngaaka olugodhi lwa hulu.

²⁹ Abner naantu ye oye ende uusiku auhe ya taakana olusilu lwaJordan, oya tokola omulonga Jordan noya shuna kuMahanaim esiku lya landula ko.

³⁰ Joab sho e etha okutidha Abner, okwa gongaleke aantu ye ayehe nokwa mono kutya aalumentu omulongo nomugoyi kaye po mwa kwatelwa Asael.

³¹ Aantu yaDavid oya dhipaga aantu yaAbner yomezimo lyaBenjamin 360.

³² Joab naantu ye oya kutha po omudhimba gwaAsael e taye gu fumvike mombila yahe. Nena oye ende uusiku auhe noya thiki kuHebron pokutenda kweluwa.

3

¹ Ekondjo pokati kaamboka taa popile egumbo lyaSaul naamboka taa popile David, olya tsikile olule. Ihe David okwa li ta nkondopala, manga egumbo lyaSaul tali nkundipala.

² Oyanamati yahamano ya valelwa David muHebron, oyo mbaka melandulathano lyokuvalwa kwawo: osheeli Amnon, yina oAhinoam a za kuJesreel;

³ Kilab, yina oAbigal, omuselekadhi gwaNabal a za kuKarmel; Absalom, yina oMaaka, omuna gwomukwaniilwa Talmai gwaGeshur;

⁴ Adonia, yina oHaggit; Shefatia, yina oAbital;

⁵ Ithream, yina oEgla. Aamati mbaka ayehe oya li ya valelwa muHebron.

⁶ Ekondjo sho lya tsikile pokati kaapopili yegumbo lyaDavid naapopili yegumbo lyaSaul, Abner okwa ningi omunankondo maalanduli yaSaul.

⁷ Esiku limwe Ishboshet yaSaul okwa nyenyetele Abner omolwokulala nohonda yaSaul, edhina lyayo Rizpa yaAja.

⁸ Shika osha geyitha Abner e ta ti: “Oto dhiladhila kutya ote gwaaleke Saul? Oto dhiladhila shili kutya otandi longele Juda?” Okwi igidha a ti: “Okuza koshitonale onda simanekwa mokulongela ho Saul, aamwayina nookuume ke, nonde ku hupitha kedhengo lyaDavid; ihe nena oto pe ndje ombedhi omolwomukulukadhi!

⁹ Omuwa okwa uvanekele David kutya ota kutha ko oshilongo kuSaul noluvalo lwe nota ningi David omukwaniilwa gwaIsrael naJuda, okuza kuDan sigo oBeersheba. Ngashingeyi Kalunga na geele ndje ndi se, ngele ite kwathele shika shi gwanithwe!”

¹⁰

¹¹ Ishboshet okwa li a kankwa a tila Abner ye ina vula we okutya sha.

¹² Abner okwa tumu aatumwa kuDavid, ngoka a li muHebron pethimbo ndyoka, ya tye: “Olye ta ka lela oshilongo shika? Ninga euvathano nangame, notandi ke ku kwatha okusinda Israel alihe, li game kungoye.”

¹³ David okwa yamukula a ti: “Onawa! Otandi ka ninga euvathano nangoye, ihe ongele to etelele Mikal, omuna gwaSaul, uuna to ya kungame.”

¹⁴ David okwa tumu wo aatumwa kuIshboshet, ya tye: “Galulila ndje mukadhandje Mikal. Onde mu futa uupa wuulumentu wAafilisti ethele, opo ndi mu hokane.”

¹⁵ Ishboshet okwa kutha ko Mikal komulume Paltiel yaLajish.

¹⁶ Paltiel okwe mu landula ondjila ayihe, sigo okoshilando Bahurim, e ende ta lili. Ihe Abner sho a ti: “Shuna kegumbo,” okwa yi kegumbo.

¹⁷ Abner okwa yi kaawiliki yaIsrael nokwa ti kuyo: “Omwa kala mwa tegelela nale ethimbo ele, David a ninge omukwaniilwa gweni.

¹⁸ Ngashingeyi olweedhe olweni. Dhimbulukweni kutya Omuwa okwa ti: ‘Otii ka longitha omumati gwandje David, a mangulule aantu yandje Aaisraeli miikaha yAafilisti noyaatondi yawo ayehe yalwe.’ ”

¹⁹ Abner okwa popitha wo aantu yezimo lyaBenjamin, nena okwa yi kuHebron, a lombwele David shoka Aabenjamin nAaisraeli ya zimine, ya ninge.

²⁰ Abner sho e ya kuDavid puHebron e na aalumentu omilongo mbali, David okwe ya hangele oshituthi.

²¹ Abner okwa lombwele David a ti: “Otandi ke ku sindila Aaisraeli ayehe, Nkeyama. Otaye ke ku taamba, u ninge omukwaniilwa gwawo, nonena oto ka kala u na shoka wa hala e to ka lela evi alihe.” Nena David okwa laleke Abner, a ye nombili.

²² Konima Joab naambala yalwe yaDavid oya galuka kekumbu noye etelele iihakanwa oyindji. Abner ina kala we muHebron puDavid, oshoka David okwa li e mu laleke nombili.

²³ Joab naantu ye sho ya thiki, okwa lombwelwa kutya Abner okwi ile komukwaniilwa, David nokwe mu etha a ye nombili.

²⁴ Nena Joab a yi komukwaniilwa e ta ti kuye: “Owa ningi shike? Abner e ya kungoye; omolwashike we mu etha ngawo?

²⁵ Ku wete kutya okwe ya huka oku ku kotokela, a ndaadhe shoka to ningi naankoka to yi?”

²⁶ Joab okwa zi puDavid nokwa tumu aatumwa, ya ka tale Abner. Oye mu galula okuza komuthima gwaSira; ihe David ine shi tseya.

²⁷ Abner sho a thiki muHebron, Joab okwe mu kutha po e te mu fala mooha dhomweelo a fa a hala ya kundathane po. Nena okwe mu tsu mela. Osho ngaaka Abner a dhipagwa, oshoka okwa dhipagele Asael, omumwayina gwaJoab.

²⁸ David sho e shi kundana, okwa ti: “Omuwa okwa tseya oshilongo shandje nangame mwene kandi na ondjo yombinzi yaAbner.

²⁹ Egeelo lyayo nali lambele Joab nezimo lyawo alihe! Mezimo lye namu kale aluhe aantu ye na uuvu woshinena nenge oshilundu nenge taa endele komampango nenge taa si koomemo dhegongamwele nenge aasindjala.”

³⁰ Osho ngaaka Joab nomumwayina Abisai ya dhipagele Abner molwiikonene, molwashoka a dhipagele omumwayina Asael molugodhi lwokuGibeon.

³¹ Nena David okwa lombwele Joab naantu ye, ya tuule oonguwo dhawo, ya zale omahahi noya lile Abner. Nopefumviko omukwaniilwa David okwa yi konima yomudhimba.

³² Abner okwa fumvikwa muHebron, nomukwaniilwa okwa lili pombila, naantu ayehe osho ya ningi wo.

³³ David nokwi imbi oshitewo shika molwaAbner ta ti: “Omolwashike Abner a li e na okusa ngegoya?

³⁴ Omaako ge inaga mangwa, oompadhi dhe kadha li meti; okwa si ongaangoka a dhipagwa kiipululu.” Aantu noye mu lili ishewe.

³⁵ Esiku alihe aantu oya kambadhala, ya heke David a lye sha, ihe okwa gana a ti: “Kalunga na geele ndje ndi se, ngele te li sha, manga esiku inaali pita!”

³⁶ Oya ndhindhilike shika noye shi hokwa. Shaa shoka omukwaniilwa a ningi, osha li sho opala momeho gaantu.

³⁷ Aantu yaDavid ayehe naantu ayehe muIsrael oya tseya kutya omukwaniilwa ke na mbedhi yedhipago lyaAbner.

³⁸ Omukwaniilwa okwa ti kaambala ye: “Kamu shi shi kutya esiku ndika omuwiliki omunene muIsrael okwa sa?

³⁹ Nando ngame omukwaniilwa nda hogololwa kuKalunga, ondu uvite uunkundi nena. Aamentu mbaka yaZeruia oya alula ndje noonkondo. Omuwa na geele iipululu mbyoka, ngaashi yi ilongela.”

4

¹ Ishboshet yaSaul sho u uvu kutya Abner a dhipagelwa muHebron, okwa haluka, nAaisraeli ayehe oya li ya tila.

² Ishboshet okwa li e na omalenga gaali ngoka haga wilike okulwa omakumbu, omadhina gago ogo Baana naRekab, aana yaRimmon yokuBeerot mezimo lyaBenjamin. (Beerot ohashi yalulilwa koshitopolwa shaBenjamin.

³ Aabeeroti yonale oya zile mo ondapo e taa yi kuGittaim, nkoka ya kala.)

⁴ Oluvalo olukwawo lwaSaul olwa li omuna gwaJonatan Mefiboshet, ngoka a li e na omimvo ntano, sho Saul naJonatan ya dhipagwa. Onkundana yeso lyawo sho ya zi kuJesreel, omuyamuthi gwe okwe mu yambula po e ta fadhuka po; ihe meendelelo enene okanona oke mu hunuka e taka ningi oshitiningili.

⁵ Rekab naBaana oya tameke okuya kaandjaIshboshet noya thiki ko omutenya, manga a li a gondja ta vululukwa po.

⁶ Omukiintu gwopomweelo okwa li ta kumuka, manga a li ta thitha iilya, ndele nani a kothelele, onkee Rekab naBaana oyi inyowele mo.

⁷ Ohaluka nale meni, oya yi momutala gwaIshboshet, moka a li a kotha, e taye mu dhipaga. Nena oya tete ko omutse gwe e taye gu kutha nokweenda uusiku auhe ya taakana olusilu lwaJordan.

⁸ Oya gandja omutse oonganda komukwaniilwa David muHebron noya ti kuye: “Omutse gwaIshboshet ogwo nguka, omuna gwomutondi gwoye Saul, ngoka a kambadhala oku ku dhipaga. Nkeyama, ngashingeyi Omuwa okwe ku pitikile, u galulile Saul noluvalo lwe ondjahi.”

⁹ David okwe ya yamukula a ti: “Otandi gana kOmuwa omunamwenyo, ngoka a hupitha ndje kiiponga ayihe.

¹⁰ Omutumwa ngoka i ile kungame muZiklag e ta hokololele ndje eso lyaSaul, okwa dhiladhila kutya okwe eta onkundana ombwanawa. Onde mu kwata e tandi mu dhipaga. Oyo ondjambi ye nde mu futile molwonkundana ombwanawa!

¹¹ Iihuna iinene yi thike peni yaantu ya dhipaga omuntu kee na ndjo a li a kotha megumbo lye mwene! Otandi ke mu pula ombinzi ye e tandi mu kombo po kombanda yevi.”

¹² David okwa gandja elaka, naakwiita ye oya dhipaga Rekab naBaana. Oya tete ko iikaha yawo noompadhi dhawo noye ya endjeleleke popepi nedhiya lyaHebron. Oya kutha po omutse gwaIshboshet e taye gu fumvike mombila yaAbner muHebron.

5

¹ Nena omazimo agehe gaIsrael oge ya kuDavid muHebron e taga ti kuye: “Tse onyama nombinzi yoye.

² Noshitonale, manga Saul a li omukwaniilwa gwetu, owa wilike Aaisraeli molugodhi, nOmuwa okwe ku uvanekele kutya oto ka wilika aantu ye nokuninga omuleli gwawo.”

³ Osho ngaaka aawiliki ayehe yaIsrael ye ya komukwaniilwa David muHebron. Okwa hangana nayo ehangano eyapuki, oye mu gwayeke nokwa ningi omukwaniilwa gwaIsrael.

⁴ David okwa li e na omimvo omilongo ndatu, sho a ningi omukwaniilwa nokwa lele omimvo omilongo ne.

⁵ Okwa lele Juda muHebron omimvo heyali netata, nomuJerusalem Israel alihe naJuda omimvo omilongo ndatu nandatu.

⁶ Ethimbo sho lya thikana, omukwaniilwa David naantu ye oya piti mo, ya ka homone Jerusalem. Aayebusi mboka ya kala mo, oya dhiladhila kutya David ita ka vula okulala oshilando shawo, onkee ya ti kuye: “Ito ke ya mo muka. Aaposi niilema otaye ke ku keelela.”

⁷ (Ihe David okwa kutha ko epopilongulu lyaSion nosha lukwa “Oshilando shaDavid”.)

⁸ Esiku ndyoka David okwa ti kaantu ye: “Oku na tuu ngoka ta tondo Aayebusi a fa ndje? Kokutya a hala oku ya dhipaga ayehe? Nena na londe a pite momukanka gwomeya, a ka homone aaposi niilema mbeyaka aakweyi.” (Osha ningi omuhapo haku tiwa kutya aaposi niilema itaa vulu okuya mongulu yOmuwa.)

⁹ Epopilongulu sho lya kwatwa po, David okwa kala mo nokwe li luku “Oshilando shaDavid”. Okwa tungu oshilando she li kunduka, sha tameka puMillo shu uka meni.

¹⁰ David okwa ningi omunene ethimbo alihe, oshoka Omuwa Kalunga Omunankondoawike okwa li pamwe naye.

¹¹ Omukwaniilwa Hiram gwaTiro okwa tumu oontumwa kuDavid; okwe mu kwatha omiti dhomisedeli pamwe naanashihongelo naahongi yomamanya, ye mu tungile ombala.

¹² Osho ngaaka David kwa li u uvite kutya Kalunga okwe mu ningi omukwaniilwa gwaIsrael nokwa koleke uukwaniilwa we molwoshigwana she Israel.

¹³ Konima yetembu lyokuza kuHebron nokuya kuJerusalem, David okwa kala e na oohonda odhindji naahokanwa nokwa valelwa aamati naakadhona oyendji.

¹⁴ MuJerusalem okwa valelwa aanona mbaka: Shammua, Shobab, Natan, Salomo,

¹⁵ Ibhar, Elishua, Nefeg, Jafia,

¹⁶ Elishama, Eliada naElifelet.

¹⁷ Aafilisti sho ya kundana kutya David a ningi omukwaniilwa gwaIsrael, etangakwiita lyawo olya piti mo, ye ke mu kwate po. David sho e shi kundana, okwa zi ko a yi meholameno.

¹⁸ Aafilisti oya thiki polusilu lwaRefaim e taye lu lala.

¹⁹ David okwa pula Omuwa a ti: “Nandi matukile Aafilisti? Oto pe ndje esindano?” Omuwa okwa yamukula a ti: “Eeno, ya matukila! Otandi ku pe esindano!”

²⁰ Osho ngaaka David a yi kuBaal-Perazim nokwa dhenge Aafilisti. Okwa ti: “Omuwa okwa panukile aatondi yandje a fa omeya gefundja.” Okuza kesiku ndiyaka epandja ndyoka olya lukwa Baal-Perazim.

²¹ Aafilisti sho ya yi ontuku, oya thigi po iimenka yawo, naDavid naantu ye oye yi kutha po.

²² Nena Aafilisti oya shuna kolusilu lwaRefaim e taye lu kwata po ishewe.

²³ David okwa pula ishewe ehalo lyOmuwa, nOmuwa okwa yamukula a ti: “Ino ya ponokela okuziilila mpaka, ihe ya kunduka, u ya homone to ziilile kombinga yilwe, popepi nomiti dhomitaku.

²⁴ Shampa wa uvu iikukulo yoompadhi momumbolongondjo gwomitaku, nena ya ponokela, oshoka otandi ka katuka ndi li komeho goye, ndi dhenge etangakwiita lyAafilisti.”

²⁵ David okwa ningi shoka Omuwa e mu lombwele, nokwa li ta vulu okutidha Aafilisti okuza kuGeba ndongo ondjila ayihe sigo okuGeser.

6

¹ Konima yaambika David okwa hiya e ta gongele aakwiita ya pyokoka muIsrael, ayehe kumwe aalumentu omayuvi omilongo ndatu.

² Okwe ya fala kuBaala muJuda, ya ka tale ko oshikethahangano shaKalunga shi na edhina lyOmuwa Omunankondoawike, oshipangelapundi she shi li kombanda yaakerubi.

³ Oye shi kutha maandjaAbinadab kondundu e taye shi tula metemba epe. Ussa naAhio, aana yaAbinadab oya li taa hingi etemba,

⁴ naAhio e li komeho.

⁵ David nAaisraeli ayehe oya li taa tanta yo taa imbi noonkondo dhawo adhihe taa simaneke Omuwa. Oya li taa hiki iihikomwa — uuharpa, uuliri, oontunda, ooshakashaka noosimbaale.

⁶ Sho ya thiki kolupale lwaNakon, oonani odha lyatakana, naUssa okwa ganeke oshikaha she, a shige oshikethahangano.

⁷ Ohaluka Omuwa Kalunga okwa geele Ussa e te mu dhipaga moluusama we. Ussa okwa sile ontega noshikethahangano,

⁸ onkee ehala ndyoka lya lukwa Perez Ussa sigo onena. David okwa geye, oshoka Omuwa okwa geele Ussa mondjahi.

⁹ Nena David okwa li a tila Omuwa nokwa ti: “Ote vulu ngiini okupitika, oshikethahangano shi ye kungame?”

¹⁰ Sho kwa li inaa hala oku shi fala kuJerusalem, okwa peguka mondjila e te shi fala kaandjaObed Edom, omvalele yomoshilando Gat.

¹¹ Osha kalele nkoka oomwedhi ndatu, Omuwa nokwa yambeke Obed Edom negumbo lye.

¹² Omukwaniilwa David sho a kundana kutya omolwoshikethahangano Omuwa okwa yambeke egumbo lyaObed Edom naayihe mbyoka e na, okwa ka tala ko oshikethahangano kaandjaObed Edom e te shi fala kuJerusalem nenyanyu olindji.

¹³ Aahumbati yoshikethahangano sho ya adhika ya katuka oonkatu hamano, David okwe ya kankameke, manga ta yamba ontsezi nompunya yo ondodhwa.

¹⁴ David okwa li a zala onguwo yoliina e yi idhingila, ta tanta a mana mo oonkondo dhe adhihe, a simaneke Omuwa.

¹⁵ Osho ngaaka oye nAaisraeli ayehe oya fala oshikethahangano kuJerusalem nomaligolo noshihomo shomankuma.

¹⁶ Oshikethahangano sho sha li tashi etwa moshilando, Mikal yaSaul okwa talele mekende e ta mono omukwaniilwa David ta tanta ye ta nuka koshipala shOmuwa muudhano uuyapuki, nokwe mu dhini.

¹⁷ Oye eta oshiketha e taye shi tula peha lyasho motenda ndjoka ye shi dhikilwa kuDavid. Nena David okwa yambele Omuwa omafikilondjambo nomakwatathanondjambo.

¹⁸ Sho a mana okuyamba oondjambo, okwa yambeke aantu medhina lyOmuwa Omunankondoawike

¹⁹ nokwa topolele ayehe iikulya a pe omulumentu kehe nomukiintu kehe oshipambu shoshikwiila, ontumba yonyama ya yothwa nekaka lyomandjembele. Konima yokulya shaa ngoka okwa shuna kaandjawo.

²⁰ Konima sho David a yi megumbo, a kunde yaandjawo, Mikal okwa piti mo te mu tsakaneke e ta ti: “Omukwaniilwa gwaIsrael okwi inenepekele edhina enene ye mwene nena! Okwi ishundula ye mwene a fa egoya montaneho yaadhike yaambala ye!”

²¹ David okwa yamukula a ti: “Onda li te tantele Omuwa noku mu simaneka, ngono a hogolola ndje peha lyaho nezimo lye, a ninge ndje omuwiliki gwaantu ye Aaisraeli. Notandi tsikile okutantela Omuwa noku mu simaneka.

²² Koshipala she onda hala okwiishonopeka natango. Ngoye oto vulu okutala ndje omunima gwowala, ihe aadhike mboka wa popi, otaa yele ndje momadhiladhilo gawo!”

²³ Mikal yaSaul ina kala e na okanona sigo okeso lye.

7

¹ Omukwaniilwa David okwa li a kala mombala ye, Omuwa nokwe mu gamene kaatondi ye ayehe.

² Nena omukwaniilwa okwa ti komuhunganeki Natan: “Ondi li megumbo lya tungika komisedeli, ihe oshikethahangano shaKalunga otwe shi pungula motenda.”

³ Natan okwa yamukula a ti: “Ninga shoka to dhiladhila, oshoka Omuwa oku ku na.”

⁴ Ihe muusiku tuu mboka Omuwa okwa ti kuNatan:

⁵ “Inda, u ka lombwele omuntu gwandje David to ti: ‘Hangoye nguka to tungile ndje otempeli, ndi kale mo.

⁶ Okuza uuna ndwiyaka nda hupitha Aaisraeli muEgipiti sigo onena, ine kala motempeli; onda kala tandi endagula ndi li motenda.

⁷ Moondjenda dhandje adhihe pamwe nAaisraeli ine pula nando ogumwe gwomaawiliki mboka nda langeke okuwilika aantu yandje, ndi tye, omolwashike inaa tungila ndje otempeli ya tungithwa omisedeli!’

⁸ “Lombwela ano omuntu gwandje David kutya Omuwa Omunankondoawike ota ti kuye: ‘Onde ku kutha kuusita woonzi momalundu e tandi ku ningi omuleli gwaantu yandje Aaisraeli.

⁹ Onda kala nangoye shaa nkoka wa yile nonda sindi aatondi yoye ayehe mondjila yoye. Otii ke ku ninga omuntu omunene wa fa aawiliki aanenenene muuyuni.

¹⁰ Aaisraeli onde ya hogololele ehala e tandi ya tula mo, ya kale mo itaaya piyaganekwa we. Sigo onena sho ye ya mevi ndika, oya matukilwa kaageyentu, ihe shika itashi ka ningwa we. Otandi uvaneke oku ku hupitha miikaha yaatondi yoye ayehe noku ku pa oluvalo.

¹¹

¹² Uuna no si e to fumvikwa poohokulu, otii ka kwaniileka gumwe gwomaamwoyemati a ninge omukwaniilwa omunene omunankondo.

¹³ Ota ka tungila ndje otempeli, e tandi si oshimpwiyu, oluvalo lwe lu tsikile uukwaniilwa sigo osigo.

¹⁴ Otii ka ninga he noye ta ningi omumwandje. Ngele ta puka, otandi mu geele, ngaashi he ta geele omwana.

¹⁵ Ihe esilohenda lyandje itali mu thigi po, ngaashi nda ningi Saul ngoka nda shundula, opo u wape okuninga omukwaniilwa.

¹⁶ Oto kala u na oluvalo aluhe, notii ka kalekela po oshilongo shoye sigo aluhe. Ezimo lyoye itali hulu po.’ ”

¹⁷ Natan okwa lombwele David ashihe shoka Kalunga e mu hololele.

¹⁸ Nena omukwaniilwa David okwa yi metsalihangano, i inyongamene pevi e ta galikana ta ti: “Omuwa Omupangeliawike, inandi gwanena ashihe shoka wa longele ndje nezimo lyandje sigo onena.

¹⁹ Ihe ngashingeyi, Omuwa Omupangeliawike, oto ningile ndje natango oshindji shi vule shonale; owa uvaneke omauvaneko taga popi oluvalo lwandje moomvula dhokomeho. Omuwa Omupangeliawike, owa pitika, omuntu a mone shika.

²⁰ Ote vulu we, ndi tye shike kungoye! Ongoye wa tseya ndje, omuntu gwoye.

²¹ Omolwehalo lyoye nelalakano lyoye owa hololele ndje iinima mbika ayihe iinene.

²² Omuwa Omupangeliawike, ongoye omunene u thike peni! Kaku na ngoka e ku fa; otwa tseya aluhe kutya ongoye awike Kalunga.

²³ Kaku na shigwana shilwe kombanda yevi sha fa Israel, shoka wa hupitha muupika, shi ninge oshigwana shoye mwene. Owe shi ningile iinima iinene niinyengandunge nowa taandelitha esimano lyoye nuuyuni auhe. Owa tidha mo iigwana yilwe niikalunga yawo mondjila yaantu yoye, mboka wa tembudha muEgipiti, ya ninge yoye mwene.

²⁴ Owa ningi Aaisraeli aantu yoye mwene sigo aluhe, nangoye, Omuwa, Kalunga kawo.

²⁵ “Nongashingeyi, Omuwa Kalunga, gwanitha aluhe euvaneko ndyoka u uvanekele ndje noluvalo lwandje, u ninge shoka wa popi.

²⁶ Esimano lyoye otali ningi enene, naantu otaa ka tya aluhe: ‘Omuwa Omunankondoawike oye Kalunga kaIsrael.’ Oluvalo lwezimo lyandje oto ke lu dhiginina sigo aluhe.

²⁷ Omuwa Omunankondoawike, Kalunga kaIsrael! Ondi na omukumo okugalikana egalikano ndika, oshoka owa hololele ndje ayihe mbika, ngame omuntu gwoye, nowa lombwele ndje kutya oluvalo lwandje oto ke lu ninga olukwaniilwa.

²⁸ “Nongashingeyi, Omuwa Omupangeliawike, ongoye Kalunga; aluhe oho dhiginine omauvaneko goye nowa uvanekele ndje euvaneko ndika ekumithi.

²⁹ Otandi ku indile, u yambeke oluvalo lwandje, opo lu nyanyukilwe okukala mesilohenda lyoye. Ngoye, Omuwa Omupangeliawike, wa uvaneke shika, noluvalo lwandje otalu ka kala lu na eyambeko lyoye aluhe.”

8

¹ Konima yaambika omukwaniilwa David okwa matukile ishewe Aafilisti, okwe ya dhenge e ta hulitha po epangelo lyawo lyokulela evi.

² Nena David okwa dhenge Aamoabi. Oonkwatwa okwe dhi langeke pevi noonkwatwa mbali dhomoonkwatwa ndatu kehe okwe dhi dhipaga. Onkene Aamoabi ya ningi aapiya ye nohaa fendele kuye.

³ Nena okwa dhenge Hadadezer yaRehob, omukwaniilwa gwaZoba, ombinga yimwe yaSiria. Hadadeser okwa li mondjila oku ka lala evi sigo okomulonga Eufrat.

⁴ David okwa kwata po aakawilinkambe ye eyuvi limwe nomathele gaheyali naakwiita yokolupadhi omayuvi omilongo mbali. Okwa hupitha ko uukambe ethele wokomatembakwiita nokwa lemaneke auhe ulwe.

⁵ Aasiria yokuDamaskus sho ya tumu etangakwiita lyokukwatha omukwaniilwa Hadadeser, David okwe li matukile e ta dhipaga aalumentu omayuvi omilongo mbali nagaali.

⁶ Nena okwa yungile ko oontanda dhuukwiita koshilongo shawo noya ningi aantu ye haye mu pe oompale. Omuwa okwa ningi David omusindani kehe nkoka a yile ko.

⁷ David okwa hakana ko omahuuyanza giingoli ga li haga humbatwa kaambala yaHadadeser e te ga fala kuJerusalem.

⁸ Okwa yugu ko ishewe iikushu oyindji kuBeta naBerotai, iilando ya lelwa kuHadadeser.

⁹ Omukwaniilwa Toi gwokuHamat okwa kundana kutya David a dhenga etangakwiita alihe lyaHadadeser.

¹⁰ Toi okwa tumu omwana Joram, a kunde omukwaniilwa David te mu halele elago molwesindano lye, sho a sindi Hadadeser, oshoka Hadadeser okwa adhika a kondjitha Toi olule. Joram okwa faalele David omagano goshingoli noshisiliveli noshikushu.

¹¹ Omukwaniilwa David okwe yi yoololele elongelokalunga pamwe niisiliveli niingoli mbyoka a yugu kiigwana mbyoka a sindi:

¹² Edom, Moab, Ammon, Filistia naAmalek, osho wo ombinga yimwe yoshihakanwa shoka a yugu kuHadadeser.

¹³ David okwa kala a simana unene, sho a galuka kedhipago lyAaedom omayuvi omulongo nagahetatu mEkango lyomongwa.

¹⁴ Okwa tula oontanda dhuukwiita muEdom alihe, naantu oya ningi aapiya ye. Omuwa okwa sinditha David shaa nkoka a yile ko.

¹⁵ David okwa lele Israel alihe nokwa kala a kotoka, aantu ye ya ningwe nawa noya kalwe nayo nuuyuuki.

¹⁶ Joab, omuna gwomukulukadhi Zeruia, okwa li ondjayi yaakwiita; Jehosafat yaAhilud okwa li amushangandjayi.

¹⁷ Sadok yaAhitub naAhimelek yaAbiatar oya li aayambi; Seraia okwa li amushangampangu.

¹⁸ Benaia yaJehoiada okwa li omukuluntu gwaalangeli yaDavid, naana yaDavid, ya li aayambi.

9

¹ Esiku limwe David okwa pula a ti: “Mezimo lyaSaul omwa hupa ngaa omuntu? Ngele omu na, onda hala ndi mu hololele olukeno omolwaJonatan.”

² Okwa li ku na omupiya megumbo lyaSaul edhina lye Ziba. Oye a lombwelwa, a ye kuDavid. Omukwaniilwa okwa pula a ti: “Ongoye Ziba?” Ziba okwa yamukula a ti: “Ongame omupiya gwoye, tatekulu.”

³ Omukwaniilwa okwe mu pula a ti: “Oku na tuu ngoka a hupa ko mezimo lyaSaul, ndi vule oku mu hololela olukeno, ngaashi ndu uvanekele Kalunga?” Ziba okwa yamukula a ti: “Oku na natango gumwe gwomoyanamati yaJonatan, ndele oshilema.”

⁴ Omukwaniilwa okwa pula a ti: “Oku li peni?” Ziba okwa yamukula a ti: “OkaandjaMakir gaAmmiel muLodebar.”

⁵ Nena omukwaniilwa David okwa tumu ko, a ka talwe.

⁶ Mefiboshet yaJonatan, omutekulu gwaSaul, sho e ya, okwi inyongamene koshipala shaDavid, e mu simaneke. David okwa ti: “Mefiboshet.” Oye a yamukula: “Ongame nguka, mupiya gwoye, tatekulu.”

⁷ David okwa tsikile a ti: “Ino tila, otandi ku sile ohenda molwaho Jonatan. Otandi ke ku galulila omapya agehe gahokulu Saul, noto ka lya aluhe poshililo shandje.”

⁸ Mefiboshet okwa nyongama ishewe e ta ti: “Ngame kandi ivule nombwa ya sa, tatekulu! Omolwashike to pukulula ndje e to sile ndje ohenda yi thike mpono?”

⁹ Nena omukwaniilwa okwi ithana Ziba, omupiya gwaSaul, e ta ti: “Otandi pe Mefiboshet, omutekulu gwamwene gwoye, iinima ayihe yaSaul noyezimo lye.

¹⁰ Ngoye, aamwoyemati naapiya yoye, ka longeni omapya gezimo gamwene gwoye Saul noku ga teya, opo omuna gwamwene gwoye a mone iipalutha. Ihe Mefiboshet ye mwene ota ka lya aluhe koshililo shandje.” (Ziba okwa li e na oyanamati omulongo nayatano naapiya omilongo mbali.)

¹¹ Ziba okwa yamukula a ti: “Otandi ningi shaa shoka Nkeyama ta ti.” Osho ngaaka Mefiboshet a kala ta li poshililo shomukwaniilwa a fa naanaa gumwe gwomoyanamati yomukwaniilwa.

¹² Mefiboshet okwa li e na okamwanamati edhina lyako Mika. Aantu ayehe yomegumbo lyaZiba oya ningi aapiya yaMefiboshet.

¹³ Onkee Mefiboshet, ngoka a li a lemana komagulu ge agehe, a kala muJerusalem ta li oondya dhe adhihe koshililo shomukwaniilwa.

10

¹ Konima yaambika omukwaniilwa gwAayammoni Nahash okwa si, nomwana Hanun okwa ningi omukwaniilwa.

² Omukwaniilwa David okwa ti: “Onda hala okuninga nawa Hanun, ngaashi he Nahash a ningile ndje.” Onkee David okwa tumu aatumwa, a holole omauvito ge golukeno. Aatumwa sho ya thiki muAmmon,

³ Aayammoni oya ti komukwaniilwa: “Oto dhiladhila kutya David okwa tumu aatumwa mbaka mokusimaneka ho, a holole omauvito ge golukeno kungoye? Hasho nando! Okwe ya tuma huka oondaadhi, dhi shilile oshilando, opo e tu sinde!”

⁴ Hanun okwa kwatitha aatumwa yaDavid e te ya kululitha omapalu koombenzi nokutetitha oonguwo dhawo poombwetelo e te ya shunitha.

⁵ Oya li ya sa ohoni okushuna kaandjawo. David sho u uvu shoka sha ningwa po, okwe ya tumine elaka, ya kale muJeriko yo yaaha ze mo, sigo oombenzi dhawo dha koko ishewe.

⁶ Aayammoni sho ya dhimbulula kutya oya geyitha nayi David, oya hehela aakwiita Aasiria omayuvi omilongo mbali ya za kuBetrehob nokuZoba, aalumentu omayuvi omulongo nagaali ya za kuTob nomukwaniilwa gwokuMaaka e na aalumentu eyuvi.

⁷ David okwe shi uvu e ta tumu Joab, e ya kondjithe netangakwiita alihe.

⁸ Aayammoni oya pupumuka ko e taa yungu ontanda ya langela komauta puupitilo yoshilandopangelo shawo Rabba, manga Aasiria naakwiita ya za kuTob naMaaka ya li meyalala lyelundu.

⁹ Joab okwa mono kutya omatanga gaatondi otaga vulu oku mu matukila taga zi komeho nokonima. Omolwaasho a hogolola aakwiitalela Aaisraeli nokwe ya langeke ya taalela Aasiria.

¹⁰ Oshihupe shetangakwiita lye okwe shi tula mewiliko lyomumwayina Abisai, ngoka e ya tula mehala ya taalela Aayammoni.

¹¹ Joab okwa ti kuye: “Ngele wa mono Aasiria taa gwililile ndje po, ila u kwathe ndje, nongele Aayammoni taa ku gwililile po, otandi ya ndi ku kwathe.

¹² Kaleni mu na omukumo ne mwi ikolelela! Natu kondjeleni aantu yetu oshilumentu nomolwiilando yaKalunga ketu. Ehalo lyOmuwa nali gwanithwe!”

¹³ Joab naantu ye oya humu ko, ya ka homone, nAasiria oya fadhuka po.

¹⁴ Aayammoni sho ya mono Aasiria taa yi ontuku, oya fadhuka po Abisai e taa shuna moshilando. Nena Joab okwa galuka kolugodhi nAayammoni e ta shuna kuJerusalem.

¹⁵ Aasiria oya dhimbulula kutya oya dhengwa kAaisraeli, onkee oya ka hiya omatanga gawo agehe.

¹⁶ Omukwaniilwa Hadadeser okwa hiya Aasiria mboka ya li kuuzilo womulonga Eufrat, noye ya kuHelam mewiliko lyaShobak, ondjayi yiita yomukwaniilwa gwaZoba Hadadeser.

¹⁷ David sho e shi uvu, okwa gongele omatanga gAaisraeli nokwa tokola omulonga Jordan yu uka kuHelam, nkoka Aasiria ye ya tegamena. Olugodhi olwa tameke,

¹⁸ nAaisraeli oya tidha Aasiria. David naantu ye oya dhipaga aahingi yomatembakwiita Aasiria omathele gaheyali naakawilinkambe omayuvi gomilongo ne, e taa yaha ondjayi yiita Shobak, ngoka a ka sila wo molugodhi.

¹⁹ Aakwaniilwa mboka ya li mepangelo lyaHadadeser, sho ya dhimbulula kutya oya dhengwa kAaisraeli, oya panga ombili nayo noya ningi aapangelwa yawo. NAasiria oya li ya tila noinaa kwatha we Aayammoni.

11

¹ Oshitemamvula sha landula, ethimbo ndyoka lyomumvo omukwaniilwa ha ka hinga olwindji iita, David okwa tumu Joab naambala ye netangakwiita lyAaisraeli. Oya dhenge Aayammoni e taa kondeke oshilando shawo Rabba. Ihe David ye mwene okwa kala muJerusalem.

² Esiku limwe komatango David okwa zi momutala gwe e ta ka lyanga kontala yongulu. Manga ta lyanga nkoka, okwa mono omukulukadhi ti iyogo. Okwa li o opala.

³ David okwa tumu omutumwa, a uve kutya oye olye, nokwa koneke kutya nani oye Batseba yaEliam, omukiintu gwaUria Omuheti.

⁴ David okwa tumu aatumwa, ye ke mu tale. Oye mu eta kuye, oye nokwa lala naye. (Okwa adhika opo a mana eiyopaleko lye lyokomwedhi.) Nena okwa shuna kaandjawo.

⁵ Konima yaambika okwi idhimbulula kutya nani omusimba e ta tumu elaka kuDavid oku mu tseyithila.

⁶ Nena David okwa tumu elaka kuJoab tali ti: “Tumina ndje Uria Omuheti.” Osho ngaaka Joab okwe mu tumu kuDavid.

⁷ Uria sho a thiki, David okwe mu pula, ngele Joab naakwiita oye li nawa, nolugodhi kutya olwa tya ngiini.

⁸ Nena okwa ti kuUria: “Inda kaandjeni, u ka vululukwe manga.” Urija okwa zi po, naDavid okwa tumu omulongelo kaandjawo.

⁹ Ihe Uria ina ya kegumbo, ndele okwa lala kehale lyuuwa pamwe naalangeli yomukwaniilwa.

¹⁰ David sho u uvu kutya Uria ina ya kaandjawo, okwe mu pula a ti: “Ndishi owa kala ethimbo ele kuu po pegumbo; omolwashike nduno inoo ya kegumbo?”

¹¹ Uria okwa yamukula a ti: “Aalumentu Aaisraeli nAajuda oye li kiita, noshikethahangano oshi li pamwe nayo; mwene gwandje Joab naantu ye oye li montanda melundu. Ote vulu ngiini okuya kaandjetu, ndi ka lye e tandi nu nokulala pamwe nomukiintu gwandje? Oshili ngaashi u na omwenyo, otandi gana kutya itandi ka ninga nando iinima ya tya ngeyi!”

¹² David okwa ti: “Kala ano muka esiku limwe, ngula otandi ke ku laleka, u shune.” Osho Uria a kalele muJerusalem esiku ndyoka nesiku lyanofu wo.

¹³ David okwe mu ithana koshililo nokwe mu kolitha. Ihe uusiku mboka wo Uria ina ya kegumbo; okwi igonyene ashike mekumbyatha lye komitala dhaalangeli yombala.

¹⁴ Ongula sho kwa shi, David okwa nyolele Joab ombilive nokwe yi tumu naUria.

¹⁵ Okwa nyola ngeyi: “Tula Uria pokuma pu na olugodhi olupyu, ne mu ze po ondapo, opo a dhipagwe.”

¹⁶ Nena mokukondeka oshilando Joab okwa tula Uria pehala mpoka a tseya kutya opu na aatondi aanankondo.

¹⁷ Omatanga gaatondi oga tsinuka ko ga zi koshilando taga kondjitha Joab naantu ye; omalenga gamwe gaDavid ga dhipagwa nosho wo Uria.

¹⁸ Nena Joab okwa tumu etseyitho kuDavid e te mu hokololele olugodhi.

¹⁹ Joab okwa longo omutumwa ta ti: “Shampa wa mana okuhokololela omukwaniilwa olugodhi,

²⁰ otashi vulika a geye e te ku pula ta ti: ‘Omolwashike mwa yile pooha dhoshilando noku ya kondjitha? Inamu shi dhimbulula nani kutya aanamatati otaye mu yaha ya londa kedhingililokuma lyoshilando?

²¹ Itamu dhimbulukwa, nkene Abimelek yaGideon a dhipagwa puTebes, mpoka omukulukadhi e mu umbile oshikweyithilomanya okuza kekuma e tali mu dhipaga. Omolwashike nduno mwa yi popepi nekuma?’ Omukwaniilwa ngele ote ku pula shika, mu lombwela u tye: ‘Omumati gwoye Uria okwa sa wo.’ ”

²² Omutumwa okwa yi nduno kuDavid nokwe mu hokololele shoka Joab e mu lombwele, a tye.

²³ Okwa ti: “Aatondi yetu oya li aanankondo ye tu vule. Oye tu gwililile po ya piti mo moshilando, ye tu kondjithe melundu, ihe tse otwe ya shunitha mo sigo posheelo.

²⁴ Nena oye ta umbu iikuti okuza kekuma, nayamwe yomomalenga goye, Nkeyama, oya dhipagwa; omumati gwoye Uria okwa dhipagwa wo.”

²⁵ David okwa ti komutumwa: “Tsa Joab omukumo, ngoye u mu lombwele u tye: ‘Ino piyagana, oshoka egonga otali dhipaga nena ngu, ngula ngwiyaka. Ponokeleni ashike oshilando, mu shi kwate po.’ ”

²⁶ Batseba sho a kundana omulume a dhipagwa, okwe mu lili.

²⁷ Oosa sho dha halakana, David okwe mu tumu a ka talwe ko, e ye kombala. Okwa ningi omukiintu gwe e te mu valele okanona okamati. Ihe Omuwa ka li a panda shoka David a ningi.

12

¹ Omuwa okwa tumu omuhunganeki Natan kuDavid. Natan okwa yi kuye e ta ti: “Momukunda gumwe omwa li mu na aalumentu yaali; gumwe okwa li omuyamba, nomukwawo okwa li ohepele.

² Omuyamba okwa li e na iimuna oyindji, oonzi noongombe,

³ manga ohepele okwa li e na okanzi kamwe, nkoka e ka landa. Okwe ka palutha niikulya ye mwene, noka kokele maandjawo pamwe noyana, haka nwine moshitenga she mwene nohaka lala mekolo lye. Okanzi oka li ka fa omwana omukadhona.

⁴ Esiku limwe omuyenda okwe ya kegumbo lyomuyamba. Omuyamba ka li a hala a dhipage po shimwe shomiimuna ye, a telekele omuyenda gwe, ihe okwa kutha po okanzi kohepele e te ka telekele po omuyenda gwe.”

⁵ David okwa geele omuyamba noonkondo e ta ti: “Otandi gana kuKalunga omunamwenyo kutya omuntu ngoka oku na okusa, sho a longo ngaaka!

⁶ Sho a longo iihuna yi thike mpoka, oku na okufuta lune shi vulithe shoka a kutha.”

⁷ Natan okwa ti kuDavid: “Omulumentu ngoka ongoye. Omuwa Kalunga kaIsrael ota ti ngeyi: ‘Onde ku ningi omukwaniilwa gwaIsrael nonde ku yugulula miikaha yaSaul.

⁸ Onde ku pe oshilongo she naakiintu ye; onde ku kwaniileke, u pangele Israel naJuda. Nongele mbika inayi gwana, ando onda li ndi na oku yi ku pa lwaali nokuli.

⁹ Omolwashike ano wa dhini iipango yandje? Omolwashike wa ningi iinima iiwinayi ya tya ngeyi? Owa dhipagitha Uria miita; we mu dhipagitha kAayammoni e to kutha po omukiintu gwe!

¹⁰ Kongashingeyi egongamwele itali ka gamuka ezimo lyoye, oshoka wa dhini ndje nowa yugu po omukulukadhi gwaUria.

¹¹ Otandi ku ganene kutya otandi ka pendutha gumwe gwomegumbo lyoye mwene, ngoka te ke ku etela uudhigu. Oto ke shi mona, sho tii ke ku kutha aakiintu yoye e tandi ya gandja kugulwe; noye ta ka lala nayo moshanga shomutenya.

¹² Ngoye owe shi ningi meholamo, ihe ngame otandi ke shi ningitha moshanga shomutenya montaneho yAaisraeli ayehe.’ ”

¹³ David okwa ti: “Ngame onda yono kuKalunga.” Natan okwa yamukula a ti: “Omuwa okwe ku dhimine po; ito ka sa we.

¹⁴ Ihe sho wa holola ondhino ya tya ngaaka yokudhina Omuwa, e to ningi ngeyi, okanona koye otaka si.”

¹⁵ Nena Natan okwa yi kaandjawo. Kalunga okwa gombokitha okanona nkoka ka valelwa David komukiintu gwaUria; oka li taka alukililwa.

¹⁶ David okwa galikana Kalunga, opo okanona ka aluke. Okwa tindi okulya iikulya, uusiku okwa yi momutala gwe nokwa kala a lala pevi.

¹⁷ Aambala ye aakuluntu oya yi kuye noya kambadhala oku mu pendutha, ihe okwa tindi noina hala okulya pamwe nayo.

¹⁸ Mesiku etiheyali okanona oka si, naambala ye oya tila oku mu lombwela kutya okanona ka sa. Oya ti: “Okanona sho ka li ke na omwenyo, David ine tu yamukula, sho twe mu popitha. Otatu vulu oku mu hokololela ngiini kutya okanona ka si? Otashi vulika i imonithe oshiponga.”

¹⁹ David sho a ndhindhilike kutya aambala ye otaa nongonenathana, okwa dhimbulula kutya okanona oka sa. Onkee okwe ya pula a ti: “Okanona oka sa?” Oya yamukula ya ti: “Eeno, oka si.”

²⁰ David okwa yambuka po pevi, okwi iyogo, okwi igwayeke nokwi ikamula nawa e ta zala oonguwo dhilwe. Nena okwa yi mongulu yOmuwa e ta galikana. Sho a galukile muuwa, okwa pula a pewe iikulya nokwe yi li po mbala, sho e yi etelwa.

²¹ Aambala ye oya ti kuye: “Shika katu shi uvite ko nande. Okanona manga ka li ke na omwenyo, owe ka lili noino hala nando okulya; ihe nanziya okanona sho ka si, owa yambuka po e to li!”

²² David okwa yamukula a ti: “Eeno, ondi idhilike iikulya nonda lili, manga ka li ke na omwenyo. Onda dhiladhila kutya Kalunga pamwe ota sile ndje ohenda noita pitika, okanona ka se.

²³ Ihe ngashingeyi sho ka si, otandi idhilikile we shike? Itandi vulu we oku ka galulila omwenyo. Esiku limwe onandi ka ya ngaa nkoka ke li, ihe ko itaka vulu okugalukila kungame.”

²⁴ Nena David okwa hupulutha omukadhi Batseba. Okwa lala naye e ta vala okamati, nkoka David e ka luku Salomo. Omuwa okwa li e hole okamati haka

²⁵ e ta lombwele omuhunganeki Natan, a luke okamati Jedidja, oshoka Omuwa okwa li e mu hole.

²⁶ Joab okwa tsikile okumatukila Rabba, oshilandolelo shaAmmon, nokwa li poku shi lala.

²⁷ Okwa tumu aatumwa kuDavid, ye mu tseyithile taa ti: “Onda ponokele Rabba nonda kwata po eha lyomeya.

²⁸ Ngashingeyi hiya omatanga goye ngoka ga kala hoka, u ponokele oshilando, u shi sinde ngoye mwene. Ngame ine hala ku tiwe, ongame nde shi kwata po.”

²⁹ Osho ngaaka David okwa gongele omatanga ge, a yi kuRabba, e shi ponokele e te shi lala.

³⁰ Komutse gwoshimenka shAayammoni, edhina lyasho Milkom, David okwa kutha ko oshishani shuudhigu wookilohalama omilongo ndatu nantano sha tya okawe kondilo. David okwe shi zala komutse gwe mwene. Okwa yangudhula wo omaliko ogendjigendji moshilando.

³¹ Aantu yasho okwe ya tula miilonga yiisaaha, yoombike noyomakuya, nokutholoma oondhopi. Aantu ayehe yomomikunda dhilwe dhAayammoni okwe ya ningile sha faathana. Nena okwa galukile naantu ye kuJerusalem.

13

¹ Absalom yaDavid okwa li e na omumwayinakadhona gwondjelo ombwanawa edhina lye Tamar. Amnon, gumwe gwomoyanamati yaDavid, okwa pwile mohole naye.

² Ohole ye oye mu dhimuna unene, sigo ota gomboka, oshoka osha fa itaashi vulika e mu mone. Sho a li omukadhona, Amnon okwa nyengwa oku mu ninga sha.

³ Ihe Amnon okwa li e na kuume ke, omumwahegona Jonadab yaShamma, ngoka a li omulumentu a lungundja.

⁴ Jonadab okwa ti kuAmnon: “Ngoye omuna gwomukwaniilwa, ndele oshike esiku nesiku handi ku mono wa sa oluhodhi? Oshike shi ku na?” Amnon okwa yamukula a ti: “Ondi hole Tamar, omumwayina gwomumwatate Absalom.”

⁵ Jonadab okwa ti kuye: “Ifethitha to alukwa, u ka lale momutala gwoye. Ngele ho te ya e ku tale, tya kuye: ‘Tate, kwatha ndje u lombwele omumwatate Tamar, a pe ndje sha shokulya. Onda hala, e shi longekidhe montaneho yandje, opo ndi shi lye.’ ”

⁶ Osho ngaaka Amnon okwi ifethitha ta alukwa e ta ka lala momutala gwe. Omukwaniilwa David okwa yi e ke mu tale, naAmnon okwa ti kuye: “Tate, kwatha ndje, Tamar e ye a telekele ndje uukuki umwe montaneho yandje ye a pe ndje ndi lye.”

⁷ Osho David a tumine Tamar elaka muuwa tali ti: “Inda kaandjaAmnon, u ke mu telekele iikulya.”

⁸ Tamar okwa yi ko nokwe mu adha momutala. Okwa lungu ondombo, te yi umbinga e ta teleke uukuki, manga Amnon e mu tala.

⁹ Opo ihe Tamar okwe u mu hukulile e te u mu pe a lye, ihe ina hala. Amnon okwa ti: “Ayehe naa ze mo!” Osho ayehe ya zi mo.

¹⁰ Nena Amnon okwa ti kuTamar: “Eta uukuki momutala gwandje, u pe ndje ndi lye.” Tamar okwa kutha uukuki e ta yi kuye.

¹¹ Manga te mu pe a lye, Amnon okwe mu shambakata e ta ti: “Lala pungame, kamwayina!”

¹² Tamar okwa ti: “Aawe, ino thiminika ndje okulonga iihuna yi thike mpoka. Wuwuu-wuwuu!

¹³ Ondi ye peni nohoni yandje? Nangoye oto ka talwa omuyoni muIsrael. Omolwashike itoo indile ndje komukwaniilwa? Ondi shi shi, ota ka gandja ndje kungoye.”

¹⁴ Ihe Amnon ine mu pulakena nando, ndele okwe mu gwililile po e te mu lala koonkondo.

¹⁵ Nena Amnon okwa kwatwa kenyanyalo olindji; okwe mu tondo nokutondelela shi vulithe pohole ndjoka a li e mu hole nale. Okwa ti kuye: “Za po!”

¹⁶ Tamar okwa yamukula a ti: “Aawe, okutidha ndje ngeyi okwo eyono enene li vule ndyoka opo wa ningile ndje.” Ihe Amnon ine mu pulakena.

¹⁷ Okwi ithana omuyakuli gwe ta ti: “Tidhii mo omukiintu nguka, ne mu pate omweelo.”

¹⁸ Omumati okwe mu pititha mo e ta pata po omweelo. Tamar okwa li a zala onguwo onde yomaako, oshoka aana yokombanda momasiku ngeyaka osho ya li haa zala, manga inaaya hokanwa.

¹⁹ Okwi igundu omutoko momutse, a tuula onguwo ye, i ikwata ombandamutse ye ta yi ta lilagana.

²⁰ Omumwayina Absalom sho e mu mono, okwa pula a ti: “Amnon okwe ku piyaganeka? Mwena, kamwameme, oshoka oye omumwaho. Ino ipula nasho nokuli.” Okuza mpoka Tamar okwa lumbu muuwike maandjaAbsalom a sa ohoni.

²¹ Omukwaniilwa David sho u uvu shoka sha ningwa po, okwa li a thita po kondjahi.

²² Ihe Absalom ina popya we nando naAmnon; okwa tondo Amnon noonkondo, sho a lala omumwayina Tamar koonkondo.

²³ Konima yomimvo mbali Absalom okwa li ta kululitha oonzi dhe muBaal Hazor popepi naEfraim, nokwa hiya oyanamati yomukwaniilwa ayehe, ya ye ko.

²⁴ Okwa yi komukwaniilwa David e ta ti: “Nkeyama, otandi kululitha oonzi dhandje. Ito ya ko wo pamwe nomalenga goye, tu dhaneni oshituthi?”

²⁵ Omukwaniilwa okwa yamukula a ti: “Aawe, mumwandje. Otashi ke ku dhigupalela unene, ngele tse atuhe otatu ya.” Absalom okwe mu indile noonkondo, ihe omukwaniilwa ina zimina nokwa laleke Absalom.

²⁶ Ihe Absalom okwa ti: “Eewa, oto vulu nduno u pitike, omumwatate Amnon e ye?” Omukwaniilwa okwa pula a ti: “Omolwashike oye e na okuya nangoye?”

²⁷ Ihe Absalom okwa thiminike, sigo David a pitika Amnon noyana ayehe aamati, ya ye naAbsalom. Absalom okwa longekidha omatelekela gopaukwaniilwa

²⁸ e ta kumagidha aapiya e ta ti: “Kotokeni, ngele Amnon a kolwa, nonge tandi mu lombwele, mu dhipageni. Inamu tila. Shika oshinima shandje mwene. Ikoleleleni, ne inamu tenguka!”

²⁹ Osho ngaaka aapiya ya ningi palombwelo lyaAbsalom e taa dhipaga Amnon. Oyanamati yaDavid ayehe oya londo omamulutiya gawo e taa fadhuka po.

³⁰ Manga ya li mondjila yu uka kegumbo, David okwa lombwelwa kwa tiwa: “Absalom okwa dhipaga po aana yoye ayehe, kape na nando ogumwe a hupu ko.”

³¹ Omukwaniilwa okwa thikama a tuula oonguwo dhe moluhodhi e ti iyumbile pevi. Aapiya mboka ya li pamwe naye oya tuula wo oonguwo dhawo.

³² Ihe Jonadab, omuna gwomumwayina gwaDavid Shamma, okwa ti: “Nkeyama, inaa dhipaga po aamwoye ayehe. Amnon oye awike a sa. Shika osha tokolelwe kuAbsalom esiku ndiyaka Amnon a lala mumwayina Tamar koonkondo.

³³ Ino itaala kutya aamwoye ayehe oya sa; Amnon oye awike a dhipagwa.”

³⁴ Absalom okwa fadhuka po. Opo tuu mpoka omukwiita ngoka a li melangelo, okwa mono ongundu onene tayi kuluka kondundu mondjila ya za kuHoronajim. Okwa yi komukwaniilwa, a tseyithe shoka a mono.

³⁵ Jonadab okwa ti kuDavid: “Mboka ayehe aamwoye taa ya, naanaa ngaashi nda ti.”

³⁶ Manga inaa hulitha okupopya, yo aana yaDavid oye ya mo nale. Oya tameke okulila; nena David naambala ye ayehe oya lili wo omahodhi omapyu.

³⁷ Absalom okwa fadhuka po e ta yi komukwaniilwa gwaGeshur edhina lye Talmai, omuna gwaAmmihud, e ta kala nkoka omimvo ndatu. David okwa lili omwana Amnon ethimbo ele.

³⁸

³⁹ Ihe sho a hupula Amnon, okwa kala a yuulukwa omwana Absalom.

14

¹ Joab, omuna gwaZeruia, okwa tseya kutya omwenyo gwaDavid ogwa kanyatela kuAbsalom,

² onkee a tumu komukiintu omunandunge a kala muTekoa. Sho a thiki, Joab okwe mu lombwele a ti: “Ifethitha omuntu ta lili oosa; zala oonguwo dholuhodhi ngoye ino kamula omafufu goye. Kala wa fa omukulukadhi a kala moosa ethimbo ele.

³ Nena inda komukwaniilwa e to ti kuye shoka tii ku lombwele, u shi tye.” Nena Joab okwe mu lombwele shoka ta ka tya.

⁴ Omukulukadhi okwa yi komukwaniilwa, okwi inyongamene pevi, e mu simaneke e ta ti: “Nkeyama, kwatha ndje.”

⁵ Omukwaniilwa okwe mu pula a ti: “Owa hala shike?” Omukulukadhi okwa yamukula a ti: “Tatekulu, ngame omuselekadhi ohepele. Omusamane gwandje okwa sa.

⁶ Tatekulu, onda li ndi na aamwandjemati yaali. Esiku limwe oya tamanana melundu, nokakwa li ngoka te ya hangukununa. Gumwe okwa dhipaga mukwawo.

⁷ Ngashingeyi, tatekulu, aakwetu otaa konenene ndje e taa pula ndje, ndi ya pe omumwandje, opo ye mu dhipage molwashoka a dhipagele mumwayina. Ngele oye shi ningi, nena ote kala po kaandi na we munona. Otaa ka kutha po etegameno lyandje alihe e taa kaleke omusamane gwandje keehe na munona, ngoka ta thigi ko ando edhina lye kombanda yevi.”

⁸ Omukwaniilwa okwa yamukula a ti: “lnda kegumbo, iinima mbika otandi ke yi sila oshimpwiyu.”

⁹ Omukulukadhi okwa ti kuye: “Nkeyama, meyono ndika tse nezimo lyetu otatu taamba ombedhi; ngoye nezimo lyoye ekwaniilwa kali na ndjo.”

¹⁰ Omukwaniilwa okwa yamukula a ti: “Ngele ope na ngoka te ku hindi, mu eta kungame, noite ke ku piyaganeka we.”

¹¹ Omukulukadhi okwa ti: “Nkeyama, galikana Omuwa Kalunga koye, opo omunezimo lyandje ngoka ta konenene eso lyomumwandje, kaa longe iihuna yi thike mpoka, a dhipage po omumwandje omukwawo.” David okwa yamukula a ti: “Otandi uvaneke kOmuwa omunamwenyo kutya omumwoye ita ningwa nando osha.”

¹² Omukulukadhi okwa ti: “Nkeyama, kwatha ndje, ndi tumbule sha natango.” Omukwaniilwa okwa yamukula a ti: “Eewa!”

¹³ Omukulukadhi okwa ti kuye: “Omolwashike wa ningi epuko li thike mpoka kaantu yaKalunga? Ino pitika, nando omumwoyelela, a galuke mo muupongo. Osho ngeyi wi ipangula ngoye mwene, sho wa popi oohapu dha tya ngaaka.

¹⁴ Atuhe otatu ka sa, otwa fa omeya taga tilwa pevi go itaga vulu okugongelwa ishewe. Nando nee Kalunga ita yumudha aasi, ya kale ye na omwenyo, oshike omukwaniilwa itaa vulu okumona ondjila yokugalula omuntu muupongo?

¹⁵ Nkeyama, onde ya okupopya nangoye, oshoka aantu oya tilitha ndje. Onda dhiladhila, nandi ka popye nomukwaniilwa. Ngiika ota ningi shoka te pula.

¹⁶ Ota vulu okupulakena ndje nokuhupitha ndje miikaha yaangoka a hala oku tu dhipaga tse nomumwandje, opo e tu kuthe mevi ndika Kalunga e li pa aantu ye.

¹⁷ Onda dhiladhila kutya oohapu dhoye, tatekulu, otadhi gundjilike ndje, oshoka omukwaniilwa okwa fa omuyengeli gwaKalunga nota vulu okuyoolola uuwanawa muuwinayi. Omuwa Kalunga koye na kale pamwe nangoye!”

¹⁸ Omukwaniilwa okwa yamukula a ti: “Otandi ku pula epulo, nou na okulombwela ndje oshili ayihe.” Omukulukadhi okwa ti: “Nkeyama, pula ndje shaa shoka.”

¹⁹ David okwe mu pula a ti: “Oohapu ndhika owe dhi lombwelwa kuJoab?” Omukulukadhi okwa yamukula a ti: “Nkeyama, otandi gana kOmuwa kutya kape na ompito okuhenuka epulo lyoye. Eeno, elenga lyoye Joab olyo lya lombwele ndje shoka ndi na okupopya.

²⁰ Ihe okwe shi ningi, opo a opaleke oshinima shika. Nkeyama, ngoye omunandunge wa fa omuyengeli gwaKalunga nowa tseya ayihe tayi ka ningwa.”

²¹ Konima omukwaniilwa okwa ti kuJoab: “Onda tokola okugwanitha shoka wa hala. Inda, u ka tale omugundjuka Absalom, u mu shunithe huka.”

²² Joab okwi ihata pevi koshipala shaDavid, e mu simaneke e ta ti: “Nkeyama, Kalunga ne ku yambeke! Ngashingeyi ondi shi shi kutya ou na ombili nangame, oshoka owa hala omaindilo gandje.”

²³ Nena okwa yambuka po e ta yi kuGeshur e ta galulile Absalom kuJerusalem.

²⁴ Ihe omukwaniilwa okwa li inaa hala, Absalom a kale muuwa. Okwa li ihee mu ti we meho. Onkee Absalom okwa kala megumbo lye mwene noina holoka nando okoshipala shomukwaniilwa.

²⁵ MuIsrael kamwa li nando omuntu a simana a shitika ngaashi Absalom; ka li e na oshipwe okuza komutse sigo ompadhi.

²⁶ Omafufu ge oga li ge na ondjundo nokwe ga kululitha ko omumvo kehe; ngele oga koka ga ninga omale nomadhigu. Ohaga vihwa ge vule ookilograma mbali pandjeleko yomukwaniilwa.

²⁷ Absalom okwa li e na oyana aamati yatatu nomukadhona gumwe edhina lye Tamar, omukiintu a shitika.

²⁸ Absalom okwa kala omimvo mbali muJerusalem inaa mona omukwaniilwa.

²⁹ Nena okwa tumu kuJoab, opo e mu tume komukwaniilwa, ihe Joab ine ya ko. Absalom okwa tumununa ko ishewe, ihe Joab okwa tindi okuya.

³⁰ Nena Absalom okwa ti kaapiya ye: “Taleni, epya lyaJoab olya tegama nolyandje noli na iishokelya. Indeni, mu ke li tomeke omulilo.” Oyo noya yi e taye li tomeke omulilo.

³¹ Nena Joab okwa yi kaandjaAbsalom e te mu pula ta ti: “Omolwashike aapiya yoye ya fike po epya lyandje?”

³² Absalom okwa yamukula: “Oshoka inoo ya, nando nde ku tumine elaka, u ye. Onda halele u ye komukwaniilwa, u mu pule kombinga yandje u tye: ‘Omolwashike nda zi muGeshur, ndi ye huka? Ando nda kalele natango nkoka!’ ” Absalom okwa tsikile a ti: “Onda hala u longekidhile ndje ondjila, ndi ye komukwaniilwa. Ngele ondi na ondjo, nena na dhipage ndje.”

³³ Joab okwa yi komukwaniilwa David e te mu lombwele shoka Absalom a ti. Omukwaniilwa nokwi ithana Absalom, ngoka e ya kuye e ti inyongamene pevi koshipala she. Omukwaniilwa okwe mu taamba nombili e te mu thipi komilungu.

15

¹ Konima yaambika Absalom okwi imonene etembakwiita nuukambe, osho wo ongundu yaamati aathindikili omilongo ntano.

² Okwa li ha meneka ongulangula e ta yi, a ka thikame pondjila pomweelo gwoshilando. Ngele ku na ngoka te ya e na iihokolola a hala omukwaniilwa, yi pulakenwe, Absalom ohe mu ithana e te mu pula mpoka ta zi. Omuntu sho e mu hokololele kutya okwa za mezimo lini,

³ Absalom oha ti: “Tala, oveta otayi ku popile, ihe kape na omukalelipo gwomukwaniilwa, a uve uupyakadhi woye.”

⁴ Oha gwedha ko ta ti: “Ando ongame nda li omutokolihapu moshilongo shika, ando shaa ngoka e na iihokolola nenge omayeme gasha, ando ote ya kungame e tandi mu tokolele pauyuuki.”

⁵ Omuntu sho ta hedha kuAbsalom noti inyongamene koshipala she, Absalom oha yeluka e te mu yelutha e te mu thipi komilungu.

⁶ Absalom okwa kala ha ningi ngeyi kOmuisraeli kehe ngoka e ya a tokolelwe komukwaniilwa, nosho ngeyi a sindi einekelo lyawo.

⁷ Konima yomimvo ne Absalom okwa ti komukwaniilwa David: “Tate, kwatha ndje, ndi ye kuHebron, ndi gwanithe euvaneko nde li uvanekele Omuwa.

⁸ Manga nda li muGeshur muSiria, ondu uvanekele Omuwa kutya ngele ta galulile ndje kuJerusalem, onda hala oku mu simanekela muHebron.”

⁹ Omukwaniilwa okwa ti: “Inda nombili.” Onkee Absalom okwa yi kuHebron.

¹⁰ Ihe okwa tumu aatumwa komazimo agehe gaIsrael ya tye: “Shampa mu uvu oshihomo shoombenda tadhi hikwa, tyeni: ‘Absalom a ningi omukwaniilwa muHebron.’ ”

¹¹ Okwa li aantu omathele gaali mboka ya zi muJerusalem kehiyo lyaAbsalom ye mu landula. Oya li inaa tseya sha kombinga yoshikumungu noya yi kaaye na mbudhi.

¹² Manga a li ta yamba oontselelandjambo, Absalom okwa tumu koshilando Gilo kuAhitofel, gumwe gwomaagandjimayele yaDavid, naalanduli yaAbsalom oya ningi ongundu onene.

¹³ David okwe etelwa elaka tali ti: “Aaisraeli oyi igameke kuAbsalom.”

¹⁴ Nena David okwa ti kaambala ye ayehe mbaka ya li pamwe naye muJerusalem: “Natu zeni po mbala, ngele otwa hala okufadhuka po Absalom. Endeleleni! Otashi vulika ta holoka mpaka nziya e te tu dhenge e ta dhipaga aantu ayehe moshilando.”

¹⁵ Oya yamukula ya ti: “Eewa, Nkeyama, otwi ilongekidha okuninga shoka to ti.”

¹⁶ Osho omukwaniilwa okwa yi a landulwa kaanegumbo ye ayehe, kakele koohonda omulongo ndhoka a dhi thigi po, dhi keelele uuwa.

¹⁷ Omukwaniilwa naantu ye sho ya li taa zi moshilando, oya kankama pegumbo lyahugunina.

¹⁸ Aambala ye ayehe oya thikama ontega naye, manga aalangeli aayinekelwa taa piti po montaneho ye. Aakwiita omathele gahamano mboka ye mu landula ya za kuGat, oya pitilile po wo.

¹⁹ Omukwaniilwa okwa ti komuwiliki gwawo Ittai: “Oshike to yi natse? Shuna, u ka kale nomukwaniilwa omupe. Ngoye omukwiilongo, ontauki wa zi koshilongo sheni.

²⁰ Muka owa kala mo owala ethimbo efupi, omolwashike ndi ku endagulithe pamwe nangame? Kandi shi nokuli kutya ondu uka peni. Shuna nooyakweni yokoshilongo shaandjeni. Omuwa ne mu sile ohenda ye e mu dhiginine.”

²¹ Ihe Ittai okwa yamukula a ti: “Nkeyama, otandi ku ganene medhina lyOmuwa kutya otandi yi nangoye shaa mpoka to yi, nando nee nashi pule eso.”

²² David okwa ti: “Eewa, inda ano!” Onkee Ittai a tsikile a yi naantu ye ayehe.

²³ Aantu oya lilagana, sho aalanduli yaDavid taa piti po. Omukwaniilwa a tokola okalonga Kidron a landulwa kaantu ye yu uka kombuga.

²⁴ Omuyambi Sadok opo a li e na ongundu yAalevi ya humbata oshikethahangano oshiyapuki. Oye shi tula po yo inaye shi tumba po we, sigo aantu ayehe ya zi moshilando. Omuyambi Abiatar opo a li wo.

²⁵ Nena omukwaniilwa okwa ti kuSadok: “Shunitha oshikethahangano moshilando. Omuwa ngele ta sile ndje ohenda, esiku limwe na galula ndje ngaa, ndi ye ndi shi mone nehala mpoka sha kala.

²⁶ Ihe ngele ita sile ndje ohenda, nena na ningile ndje shoka a hala.”

²⁷ Okwa tsikile okulombwela Sadok ta ti: “Tala, kutha omumwoye Ahimaaz naJonatan yaAbiatar, ne mu shune nombili moshilando.

²⁸ Otandi ku tegelele manga poonkondo dhomilonga mombuga, sigo tandi uvu onkundana ya za kune.”

²⁹ Onkee Sadok naAbiatar oya fala oshikethahangano kuJerusalem e taa kala nkoka.

³⁰ David okwa londo kOndundu yooholivi ta lili; okwa li oompadhi dhowala a siikila omutse gwe endhindhiliko lyoluhodhi. Ayehe mboka ye mu landula, oyi isiikile omitse dhawo noya lili wo.

³¹ David sho a lombwelwa kutya Ahitofel okwi itula moshikumungu shaAbsalom, okwa galikana a ti: “Omuwa, otandi ku galikana, tula omayele gaAhitofel muugoya.”

³² David sho a thiki kondungu yondundu, nkoka kwa li eha lyegalikaneno, kuume ke kopothingo Omuarki Hushai okwe mu tsakaneke e na oonguwo dha tuuka nomutse gwa gundwa evi.

³³ David okwa ti kuye: “Ngele oto kala pungame, ito kwatha ndje sha,

³⁴ ihe oto vulu okukwatha ndje, ngele to shuna koshilando e to lombwele Absalom kutya ngashingeyi oto ke mu longela nuudhiginini, ngaashi wa yakulile he. Ninga ashihe to vulu, u kondjithe nou tompe ondunge kehe tayi gandjwa kuAhitofel.

³⁵ Aayambi Sadok naAbiatar otaa kala po; ya lombwela kehe sho to uvu muuwa womukwaniilwa.

³⁶ Oye na oyana aamati Ahimaaz naJonatan, noto vulu oku ya tuma kungame, opo u tseyithile ndje ashihe to uvu.”

³⁷ Osho ngaaka kuume kaDavid Hushai okwa galukile koshilando, naanaa pethimbo ndyoka Absalom a li e li pokuthika.

16

¹ David sho a hedha kashona ponyonga yondungu yondundu, okwa tsakaneke mbala Ziba, omupiya gwaMefiboshet e na uusino uyali u na iithala, wa humbata iikwiila omathele gaali, omakaka gomandjembele ethele limwe, omahila giiyimati iitalala ethele limwe nombago yu udha omaviinu.

² Omukwaniilwa David okwe mu pula a ti: “Iinima mbika oto ka ninga shike nayo?” Ziba okwa yamukula a ti: “Nkeyama, uusino owokulondwa kungoye negumbo lyoye, iikwiila niiyimati oyokuliwa kaantu nomaviinu ogokunuwa, uuna ya kangala mombuga.”

³ Omukwaniilwa okwe mu pula a ti: “Mefiboshet, omutekulu gwamwene gwoye Saul, oku li peni?” Ziba okwa ti: “Okwa kala muJerusalem, oshoka okwa dhiladhila, Aaisraeli ngashingeyi otaye ke mu galulila uukwaniilwa wahekulu Saul.”

⁴ Omukwaniilwa okwa ti kuZiba: “Shaa shoka shaMefiboshet shi kutha po, shi ninge shoye.” Ziba okwa yamukula a ti: “Ngame omupiya gwoye. Sila ndje ohenda, Nkeyama!”

⁵ Omukwaniilwa David sho a thiki kuBahurim, Shimei yaGera, gumwe gwomezimo lyaSaul, okwa holoka e mu tsakaneke, te mu tuku sho te ya.

⁶ Shimei okwa tameke okuumba omamanya kuDavid naambala ye, nando David okwa li mekondeka lyaantu ye naalangeli ye.

⁷ Shimei okwe mu tuku e ta ti: “Za po! Mudhipagi! Oshidhudhu ngoye!

⁸ Wa yugu po uukwaniilwa waSaul, nongashingeyi Omuwa ote ku geelele omadhipago ogendji gezimo lyaSaul. Omuwa okwa gandja uukwaniilwa komumwoye Absalom, noto hanagulwa po, mudhipagi ngoye!”

⁹ Abisai, omuna gwaZeruia, okwa ti komukwaniilwa: “Nkeyama, oshike to pitika, ombwa ndjika yi ku tuke? Nandi ye kuye, ndi ka tete ko omutse gwe!”

¹⁰ Omukwaniilwa okwa ti kuAbisai nomumwayina Joab: “Mbika kayi shi iilonga yeni. Ngele ota tuku ndje, sho Omuwa e mu lombwele oku shi ninga, olye ta vulu oku mu pula kutya omolwashike to shi ningi?”

¹¹ David nokwa ti kuAbisai nokaambala ye ayehe: “Omumwandjelela ta hala okudhipaga ndje, omolwashike nduno tamu kuminwa Omubenjamin nguka? Omuwa okwe mu lombwele, a tukane; onkee mu etheni, a tukane.

¹² Pamwe Omuwa ta mono oluhepo lwandje e ta yambeke ndje peha lyethingo.”

¹³ David naantu ye oya tsikile ondjila yawo. Shimei okwe ya landula te ende kolungenge lwondundu. Okwa li ta tukana ye ta umbu omamanya ye te ya fundile omavi.

¹⁴ Omukwaniilwa naantu ye oya li ya vulwa, sho ya thiki kuJordan, onkee oya vululukwa.

¹⁵ Absalom nAaisraeli ayehe ya li naye, oye ya kuJerusalem, naAhitofel okwa li nayo.

¹⁶ Kuumelela kaDavid Hushai a tsakaneke Absalom, okwi igidha a ti: “Omukwaniilwa na kale e na omwenyo! Omukwaniilwa na kale e na omwenyo!”

¹⁷ Absalom okwe mu pula a ti: “Uuwinekelwa woye u li peni? Oshike inoo ya nakuume koye ngoka e ku inekela?”

¹⁸ Hushai okwa yamukula a ti: “Otandi shi vulu ngiini? Onda gama kombinga yaangoka a hogololwa kOmuwa, kaantu mbaka nokAaisraeli ayehe. Ote kala pungoye.

¹⁹ Patiyali, ndi longele lye, ngele ke shi omuna gwamwene gwandje? Onda longele nale ho, nena otandi ke ku longela.”

²⁰ Nena Absalom okwa pungulukile kuAhitofel e ta ti: “Ngashingeyi sho tu li mpaka, oto tu pe ondunge, tu ninge shike?”

²¹ Ahitofel okwa yamukula a ti: “Inda, u ka lale noohonda dhaho ndhoka a thigi po dha keelela uuwa. Nena shaa ngoka muIsrael ota ka tseya kutya ho ote ku tala omutondi gwe, naalanduli yoye otaa kwatwa komukumo omunene.”

²² Oya dhikile Absalom otenda kombanda yongulu yuuwa, nomontaneho yaantu Absalom okwe ki ipyologela mo e ta lala noohonda dhahe.

²³ Ondunge kehe ya gandjwa kuAhitofel omasiku ngeyaka, oya taambwa ya fa ohapu ya popiwa kuKalunga; oya li ya landulwa kwaayehe yaali David naAbsalom.

17

¹ Inapu pita ethimbo ele, Ahitofel sho a lombwele Absalom ta ti: “Nandi hogolole mo aalumentu omayuvi omulongo nagaali, ndi landule David uusiku mbuka wonena.

² Otandi ke mu ponokela, manga a loloka nokwa tyololoka. Ota ka haluka, naantu ye ayehe otaa ka ya ontuku. Otandi ka dhipaga ashike omukwaniilwa,

³ nonena ote galulile aantu ayehe kungoye ongomufuko ta galukile kombushiki ye. Owa hala owala okudhipaga omuntu gumwe awike; oshigwana ashihe otashi kala shaa na mbudhi.”

⁴ Omayele ngaka oga li go opalela Absalom naawiliki ayehe Aaisraeli.

⁵ Absalom okwa ti: “Ithaneni Hushai, tse tu pulakene shoka ta ti.”

⁶ Hushai sho e ya, Absalom okwa ti kuye: “Ahitofel okwe tu pe omayele ga tya ga tya, natu ga landule? Ngele hasho, tu lombwela shoka tu na okuninga.”

⁷ Hushai okwa yamukula a ti: “Omayele gaAhitofel e ge mu pe, kage shi omawanawa.

⁸ Ou shi shi kutya ho David naantu ye aakondji aanankondo. Oyo aageyentu ya fa emwanka enyali lya yugwa uunimona walyo. Ho omukwiita a pyokoka, nuusiku iha lala paantu ye.

⁹ Ngashingeyi okwa holama ngiika mekololo lyontumba nenge peha lilwe. David nge ta homona aantu yoye, nena kehe ngoka te shi uvu, ota ka tya, aantu yoye ya dhengwa.

¹⁰ Nena omapendafule, aantu mboka ihaaya kukuka ya fa oonime, otaa ka tila, oshoka muIsrael shaa ngoka okwa tseya kutya ho omukwiita omunene.

¹¹ Ngame otandi ku tsu omayele, u gongele Aaisraeli ayehe kumwe okuza kooha dhoshilongo sigo okoonkwawo, oyendjiyendji ya fa ehekevi lyomooha dhefuta, nangoye mwene oto ya wilike molugodhi.

¹² Otatu ka adha David nkoka e li, e tatu mu matukile, manga kee shi po sha. Nena ye mwene nenge gumwe gwomaantu ye itaa ka hupa.

¹³ Nongele te ki ipyologela moshilando shontumba, aantu yetu ayehe otaa ke eta oongodhi, tu hilile oshilando molusilu ponyonga yasho. Nokape na emanya tali kala we kondungu yondundu.”

¹⁴ Absalom nAaisraeli ayehe oya ti: “Omayele gaHushai omawanawa ge vule gaAhitofel.” Omuwa okwa tokola, pwaa landulwe omayele omawanawa gaAhitofel, opo omupya gu lambele Absalom.

¹⁵ Nena Hushai okwa lombwele aayambi Sadok naAbiatar omayele ngoka a gandja kuAbsalom naawiliki Aaisraeli, osho wo omayele ngoka Ahitofel a gandja.

¹⁶ Hushai okwa gwedha po a ti: “Ngashingeyi endeleleni! Tumeni elaka kuDavid, kaa lale poonkondo dhomulonga mombuga, ihe na tokole Jordan meulumo, opo kaa kwatwe noku dhipagwe naantu ye.”

¹⁷ Jonatan yaAbiatar naAhimaaz yaSadok oya li ya tegamena poluthithiya lwaEnrogel pondje yaJerusalem, oshoka oya li yaa na omukumo okukala moshilando. Omukalele omukadhona oha yi te ya hokololele shoka sha ningwa po, noyo otaa yi e taa hokololele omukwaniilwa David.

¹⁸ Ihe esiku limwe omumati gumwe okwe ya mono e ta ka lombwela Absalom; onkee oya zi po neendelelo ya ka holama megumbo lyomulumentu gwontumba muBahurim. Okwa li e na omuthima popepi negumbo, noyo ya yi mo.

¹⁹ Omukulukadhi gwomulumentu ngoka okwa kutha oshisiikilo e te shi yala komuthima e ta aneke po iilya, opo pwaa kale ngoka ta dhimbulula sha.

²⁰ Aambala yaAbsalom oye ya kegumbo ndyoka noya pula omukulukadhi taa ti: “Ahimaaz naJonatan oye li peni?” Omukulukadhi okwa yamukula a ti: “Oya tokola omulonga.” Aalumentu oye ya lengalenga, ihe inaa vula oku ya mona nonkee ya galukile kuJerusalem.

²¹ Konima sho ya yi, Ahimaaz naJonatan oya zi mo momuthima e taa yi noye shi tseyithile omukwaniilwa David. Oye mu hokololele shoka Ahitofel a dhiladhila oku mu kondjitha noya ti: “Endelela, tokola omulonga.”

²² Onkee David naantu ye oya tameke okutokola Jordan. Eluwa sho tali tende, yo oye gu tokola nale.

²³ Ahitofel sho a mono, omayele ge inaga landulwa, okwa kutile okasino ke e ta yi koshilando shaandjawo. Sho a tula iinima ye melandulathano, okwi imangeleke. Okwa fumvikwa mombila yezimo lyawo.

²⁴ David okwa thiki komukunda Mahanaim pethimbo ndyoka Absalom nAaisraeli taa tokola Jordan.

²⁵ (Absalom okwa lenge Amasa ondjayi yiita peha lyaJoab. Amasa yaJeter Omuismaeli, yina oAbigal lyaNahash, omumwayina gwaZeruia ngoka yina yaJoab.)

²⁶ Absalom naantu ye oya yungu oontanda mevi lyaGilead.

²⁷ David sho a thiki kuMahanaim, okwa tsakanekwa kuShobi yaNahash a za koshilando Rabba muAmmon nokuMakir gaAmmiel a za kuDebir nokuBarsillai a za kuRoglim muGilead.

²⁸ Oye eta uuyo, oombiga, iinguma niikulya kuDavid naantu ye: iilya, uusila, omaha ga yaywa, omakunde, uukunde, omagadhi goonyushi, ehini, olukawe noonzi. Oya tseya kutya David naantu ye oya sa ondjala nenota noya vulwa mombuga.

18

¹ Omukwaniilwa David okwa gongele aantu ye ayehe e te ya topola momatanga geyuvi nogethele e te ga pe aawiliki.

² Nena okwe ya tumu moongundu ndatu. Joab okwa li omuwiliki gwongundu yimwe, omumwayina Abisai ogwongundu onkwawo naIttai gwokuGat gwongundu ontintatu. Omukwaniilwa nokwa ti kaantu ye: “Otandi yi nane ngame mwene.”

³ Aantu oya yamukula ya ti: “Ku na kuya natse. Itashi ti unene sha komutondi, ngele yamwe yomutse taa fadhuka po, nenge ngaa nokuli etata lyetu tali dhipagwa po; ihe ngoye ou na ondilo u thike paantu omayuvi omulongo gomutse. Otashi opala, nge to kala mpoka moshilando e to tu tumine ekwatho.”

⁴ Omukwaniilwa okwa yamukula a ti: “Ote ningi shoka tamu tala shu uka.” Nena okwa thikama pooha dhosheelo, aalumentu ye sho taa katuka momatanga geyuvi nogethele.

⁵ Okwa lombwele Joab, Abisai naIttai a ti: “Inamu ehameka omugundjuka Absalom molwandje.” Omatanga agehe oga li gu uvite ko sho David ta lombwele omalenga ge.

⁶ Aakwiita yaDavid oya yi e taa kondjitha Aaisraeli mokuti kwaEfraim.

⁷ Aaisraeli oya sindika kaakwiita yaDavid. Olugodhi olwa li olululululu; aalumentu omayuvi omilongo mbali ya dhipagwa esiku ndyoka.

⁸ Olugodhi lwa taandele noshikandjo ashihe, aantu oyendji noya sile mokuti ye vule mboka ya sile molugodhi.

⁹ Ohaluka Absalom a tsakaneke yamwe yomaantu yaDavid. Absalom okwa li a londa kemulutiya, nolyo sho lye ende meni lyomuti omunene gwomwandi, okwa patekene pokati kiitayi. Emulutiya lya fadhuka po, naAbsalom okwa kala e endjelela.

¹⁰ Gumwe gwomaantu yaDavid okwe mu mono e te shi tseyithile Joab ta ti: “Tatekulu, onda mono Absalom e endjelela momwandi!”

¹¹ Joab okwa yamukula a ti: “Ngele owe mu mona, omolwashike inoo mu dhipagela mo? Ando ngame mwene otii ku pe iimaliwa yiisiliveli omulongo nekwamo.”

¹² Ihe omulumentu okwa yamukula a ti. “Nando nee u pe ndje iimaliwa yiisiliveli eyuvi, ite yelutha omunwe, ndi kondjithe omuna gwokombanda. Tse otu uvu shoka omukwaniilwa te mu kumagidha ne naAbisai naIttai, sho a ti: ‘Omugundjuka Absalom inamu mu ehameka omolwandje.’

¹³ Ihe ngele ine vulika komukwaniilwa e tandi dhipaga Absalom, omukwaniilwa one shi uvu, ndishi ihu uvilwa nangoye ito ka popila ndje.”

¹⁴ Joab okwa ti: “Itandi mana po ethimbo nangoye.” Okwa kutha omagonga gatatu e te ga tsu montulo yaAbsalom, manga e na omwenyo e endjelela momwandi.

¹⁵ Nena aakwiita yaJoab omulongo oya hedha ko noya sigula Absalom.

¹⁶ Joab okwa hikitha ohiya, olugodhi lu zimbuke, nomatanga ge oga galuka kokutidha Aaisraeli.

¹⁷ Oya kutha ko omudhimba gwaAbsalom e taye gu umbile moshilambo oshile mokuti e taa siikile ko nondumba onene yomamanya. Aaisraeli ayehe oya fadhuka po, shaa ngoka kaandjawo.

¹⁸ Absalom sho a li e na omwenyo, okwi idhikithile ondhimbuluthomanya ye mwene mEsilu lyaakwaniilwa, oshoka ka li e na omwanamati a kaleke po edhina lye li na omwenyo. Okwe yi ilukile ye mwene, nosigo onena oya tseyika “Ondhimbulutho yaAbsalom.”

¹⁹ Nena Ahimaaz yaSadok okwa ti kuJoab: “Pitika, ndi ye komukwaniilwa nda tya onkundana ombwanawa tayi hokolola Omuwa e mu hupitha kaatondi ye.”

²⁰ Joab okwa ti: “Aawe, nena ito fala oonkundana oombwanawa. Esiku lyanofu oto ke shi ninga, ihe hanena, oshoka omuna gwokombanda okwa si.”

²¹ Nena okwa ti komupika gwe Omukusha: “Inda, u ka lombwele omukwaniilwa shoka wa mono.” Omupika okwi inyongamene pevi e ta yi ta matuka.

²² Ahimaaz okwa tsitsimike a ti: “Hi na ko naashoka tashi ningwa. Pitika ndje, ndi fale wo onkundana.” Joab okwe mu pula a ti: “Mentu gwandje, omolwashike ano wa hala oku shi ninga? Ito ka mona ondjambi yasha.”

²³ Ahimaaz okwa ti ishewe: “Onda hala okuya.” Nena Joab okwa ti: “Inda.” Osho ngaaka Ahimaaz a matuka nondjila yesilu lyaJordan, nokwa pitilile nziya omupika.

²⁴ David okwa li a kuutumba pomapitilo pokati komiyelo adhihe mbali dhoshilando. Omupekapeki okwa ka londa kombanda yekuma e ta thikama kontala yekuma lyopomiyelo. Okwa ligamene ko e ta mono omuntu ti imatukile oye awike.

²⁵ Okwi igidha ta lombwele omukwaniilwa. Omukwaniilwa okwa ti: “Ngele oye awike, ote eta onkundana ombwanawa.” Omumatuki okwa hedha popepi, te ya, te ya.

²⁶ Nena omupekapeki okwa mono omumatuki omukwawo e li awike, nokwi igidha komukeeleli gwomweelo ta ti: “Tala! Otaku zi ishewe omuntu ta matuka.” Omukwaniilwa okwa yamukula a ti: “Nguka wo ote eta onkundana ombwanawa.”

²⁷ Omupekapeki okwa ti: “Ote vulu okumona kutya omumatuki gwokomeho oku na iimatuka ya fa yaAhimaaz.” Omukwaniilwa okwa ti: “Ote eta onkundana ombwanawa, oshoka oye omulumentu omwaanawa.”

²⁸ Ahimaaz okwi igidha ekundo komukwaniilwa, okwi ihata pevi komeho gomukwaniilwa e ta ti: “Hambelela Omuwa Kalunga koye, ngoka e ku pe esindano lyokusinda aantu mboka ye ku tukulile oshipotha, ye ku kondjithe, Nkeyama!”

²⁹ Omukwaniilwa okwa pula a ti: “Omugundjuka Absalom oku li tuu nawa?” Ahimaaz okwa yamukula a ti: “Tatekulu, elenga lyoye Joab sho lya tumu ndje, onda mono epiyagano enene, ihe ite vulu okutya, olyashike.”

³⁰ Omukwaniilwa okwa ti: “Thikama ano mpee,” nokwa yi e ta thikama poluha.

³¹ Nena omupika okwa thiki e ta ti komukwaniilwa: “Onde eta onkundana ombwanawa, Nkeyama. Nena Omuwa okwe ku pe esindano lyokusinda ayehe mboka ye ku tukulile oshipotha!”

³² Omukwaniilwa okwa pula a ti: “Omugundjuka Absalom oku li nawa?” Omupika okwa yamukula a ti: “Onda hala shoka she mu ningilwa, otashi ningilwa aatondi yoye ayehe, tatekulu, notashi ningilwa ayehe mboka taye ku tukulile oshipotha.”

³³ Omukwaniilwa nokwa kwatwa koluhodhi olunene. Okwa londo a yi mondunda kombanda yosheelo e ta lili. Manga te ende, okwa lili ta ti: “Mentu gwandje! Omumwandje Absalom! Absalom, mentu gwandje! Ando nda sile peha lyoye, mentu gwandje! Absalom omumwandje!”

19

¹ Joab okwa lombwelwa kutya omukwaniilwa David ota lili nokwa sila Absalom oluhodhi.

² Osho ngaaka enyanyu lyesindano lya shituka oosa momatanga gaDavid agehe esiku ndyoka, oshoka oyu uvu kutya omukwaniilwa ota lili omwana.

³ Oya shuna moshilando ya fa aakwiita ya gugwa, sho ya za ondapo kolugodhi.

⁴ Omukwaniilwa okwa siikile oshipala she nokwa lili muule ta ti: “Mentu gwandje! Omumwandje Absalom! Absalom, mentu gwandje!”

⁵ Joab okwa yi kongulu yomukwaniilwa e ta ti kuye: “Nena ndjika owa sitha aantu yoye ohoni, aantu tuu mboka ya hupitha omwenyo gwoye, oomwenyo dhaamwoye aamati naakadhona noomwenyo dhaanyekadhi nodhoohonda dhoye.

⁶ Oto thikamene mboka ye ku hole e to popile mboka ye ku tonde! Owe shi yelitha nawa kutya ku na ko nasha nomalenga goye naantu yoye. Ondi wete ko kutya nani ngele okwa li tse atuhe twa sa, naAbsalom e na omwenyo, ando opo nduno wa panda.

⁷ Ngashingeyi inda, u ka ngungumaneke aantu yoye. Otandi gana medhina lyOmuwa kutya ngele ito shi ningi, kape na nando ogumwe ta kala pungoye ongula yanakwasha. Shika otashi ningi oshiponga oshinene inoo shi mona nale hene wa valelwe.”

⁸ Nena omukwaniilwa okwa yambuka po e ta yi e ta kuutumba posheelo shoshilando. Aantu ayehe oya tseyithilwa kutya oku li hwiyaka, noye mu gongalele. Aaisraeli ayehe oya adhika ya fadhuka po, noshaa ngoka okwa yi kaandjawo.

⁹ Moshilongo ashihe aantu oya tameke okungungutula ya lombwelathana ya ti: “Omukwaniilwa David okwe tu hupitha miikaha yaatondi yetu. Okwe tu mangulula kAafilisti, ihe ngashingeyi okwa fadhuka po Absalom e ta thigi po oshilongo.

¹⁰ Otwa gwayeke Absalom omukwaniilwa gwetu, ihe okwa dhipagwa molugodhi. Oshike ano itaamu galulile omukwaniilwa David huka?”

¹¹ Oohapu ndhoka tadhi popiwa kAaisraeli, odha adha omukwaniilwa David. Okwa tumu aayambi Sadok naAbiatar, ya pule aakuluntu yaJuda ya tye: “Omolwashike tamu ningi aahugunini mokukwatha okugalulila omukwaniilwa kuuwa we?

¹² One aakwetu, onyama yandje nombinzi yandje; omolwashike mu na okuhugunina mokushuna ndje ko?”

¹³ David okwe ya lombwele wo, ya tye kuAmasa: “Ngoye omukwetu. Okuza ngashingeyi otandi ku tula muukuluntu wetangakwiita peha lyaJoab. Kalunga na dhenge ndje ndi se, ngele itandi shi ningi.”

¹⁴ Omalaka gaDavid oga sindi shili einekelo lyaantu ayehe yaJuda, noye mu tumine elaka, a galuke nomalenga ge agehe.

¹⁵ Mondjila ye yokushuna omukwaniilwa okwa tsakanekwa pomulonga Jordan kAajuda, mboka ye ya kuGilgal, ye mu thindikile okutokola omulonga.

¹⁶ Pethimbo tuu ndyoka Omubenjamin Shimei yaGera okwa zi kuBahurim meulumo te ya kuJordan, a tsakaneke omukwaniilwa David.

¹⁷ Okwa li e na aalumentu eyuvi yomezimo lyaBenjamin. NaZiba, omupiya megumbo lyaSaul, okwe ya wo noyanamati omulongo nayatano naapiya omilongo mbali, noya thiki tango puJordan komeho gomukwaniilwa.

¹⁸ Oya taaguluka omulonga, ya thindikile egumbo lyomukwaniilwa oku li konditha omulonga yo ya yakule mpoka omukwaniilwa ta pumbwa ekwatho. Omukwaniilwa manga a li pokukonda omulonga, Shimi okwi iyumbile komeho ge

¹⁹ e ta ti: “Nkeyama, kwatha ndje, u dhimine ndje po omapuko gandje nde ga ningi esiku ndiyaka wa zi muJerusalem. Ino geela ndje nenge u ga dhimbulukwe we.

²⁰ Tatekulu, ondi shi shi kutya onda yona, nomolwashoka ongame gwotango okuza komazimo gokuumbangalantu nde ya, ndi ku tsakaneke nena, Nkeyama.”

²¹ Abisai, omuna gwaZeruia, okwi igidha a ti: “Shimei na dhipagwe, oshoka okwa tukile omukwaniilwa a hogololwa kOmuwa.”

²² Ihe David okwa ti kuAbisai namumwayina Joab: “Olye a pula omayele geni, ne aana yaZeruia. Otamu tula ndje muudhigu? Ndishi ngame omukwaniilwa gwaIsrael ngashingeyi, nokape na ngoka ta dhipagwa nena muIsrael.”

²³ Oye nokwa ti kuShimei: “Otandi ku lombwele kutya ito dhipagwa.”

²⁴ Nena Mefiboshet, omutekulu gwaSaul, okwe ya a tsakaneke omukwaniilwa. Okwa li inaa yoga nando oompadhi dhe, ino opaleka nando oombenzi dhe nenge a yoge oonguwo dhe okuza uuna ndoka omukwaniilwa a zi muJerusalem, sigo osho a galuka nekandanga lyesindano.

²⁵ Mefiboshet sho a thiki okuza kuJerusalem, a tsakaneke omukwaniilwa, omukwaniilwa okwa ti kuye: “Mefiboshet, matsa oshike inoo ya pamwe nangame?”

²⁶ Okwa yamukula a ti: “Nkeyama, ou shi shi kutya ngame oshilema. Onda lombwele omupiya gwandje, a kutilile ndje okasino kandje, opo ndi londe ndi ku landule, ihe okwa gwaaleke ndje.

²⁷ Okwa popi ndje ko kungoye, Nkeyama, ihe ngoye owa fa omuyengeli gwaKalunga, onkee ninga shoka shu uka momeho goye.

²⁸ Ezimo alihe lyatate oli ilongele okudhipagwa kungoye, Nkeyama, ihe ngoye owa pe ndje uuthemba wokulya koshililo shoye. Kandi na we uuthemba woku ku indila esilohenda, Nkeyama.”

²⁹ Omukwaniilwa okwa yamukula a ti: “Ino tya sha we. Onda tokola, ne naZiba mu topole uuthiga waSaul.”

³⁰ Mefiboshet okwa ti: “Ziba na kuthe po ayihe. Osha gwanena ndje, sho wa galukile kegumbo nombili, Nkeyama.”

³¹ Barsillai gwokuGilead okwe ya a zi kuRoglim, a thindikile omukwaniilwa okutokola Jordan.

³² Barsillai okwa li a kulupilila, omusamane gwomimvo omilongo hetatu. Okwa li omuyamba omunene nokwa li a palutha omukwaniilwa niikulya, sho a li muMahanaim.

³³ Omukwaniilwa okwa ti kuye: “Ila nangame kuJerusalem, notandi ke ku sila oshimpwiyu.”

³⁴ Ihe Barsillai okwa yamukula a ti: “Itandi kala we ndi na omwenyo ethimbo ele; omolwashike te yi nangoye kuJerusalem, Nkeyama?

³⁵ Ondi na omimvo omilongo hetatu nokuli, nokape na we shoka hashi nyanyudha ndje. Shoka tandi li kandi shi uvite omulyo, nokandi uvite we omawi gaayimbi. Otandi ku pe owala omukundu, Nkeyama.

³⁶ Itandi pula ondjambi yi thike mpo. Shila otandi ku thindikile owala okanano kowala handiyaka yaJordan.

³⁷ Nena pitika ndje, ndi shune kaandjetu, ndi sile popepi nombila yaakuluntu yandje. Omumwandje Kimham oye nguka. Oye te ke ku yakula. Mu kutha po, Nkeyama, mu ye naye, nou mu ningile shoka to tala shu uka.”

³⁸ Omukwaniilwa okwa yamukula a ti: “Otandi mu taamba e tandi mu ningile, ngaashi wa hala. Notandi ke ku ningila shaa shoka to pula.”

³⁹ Nena David naantu ye ayehe oya tokola Jordan. Okwa thipi Barsillai komilungu e te mu yambeke, naBarsillai okwa shuna kaandjawo.

⁴⁰ Omukwaniilwa sho a ka yauka omulonga a thindikilwa kAajuda noketata lyAaisraeli, okwa yi sigo okuGilgal, naKimham okwa yi naye.

⁴¹ Nena Aaisraeli ayehe ye ya komukwaniilwa e taa ti kuye: “Nkeyama, omolwashike aamwanyoko Aajuda ya dhiladhila kutya oye na uuthemba woku ku kutha po, ye ku thindikile, sho wa tokola Jordan pamwe negumbo lyoye naantu yoye?”

⁴² Aajuda oya yamukula ya ti: “Otwe shi ningi, oshoka omukwaniilwa ogwomezimo lyetu. Ano omolwashike shika tashi mu geyitha? Ina futa iikulya yetu ye ine tu pa sha.”

⁴³ Aaisraeli oya yamukula ya ti: “Otu mu vule lwomulongo, tu kale tu na omukwaniilwa David, nando oye ogwomezimo lyeni. Omolwashike ano mwe tu dhina? Inamu dhimbwa kutya otse twa popi tango egaluko lyomukwaniilwa!” Ihe oohapu dhAajuda odha li oonkunkutu noonkondo dhi vule dhAaisraeli.

20

¹ Pethimbo ndiyaka muGilgal omwa li omulumentu omupwidhi, Sheba yaBikri gwomezimo lyaBenjamin. Okwa hiki ombenda e ti igidha ta ti: “Tse katu na sha naDavid, katu na uuthiga nomuna gwaIsai! Aaisraeli, indeni kaandjeni!”

² Nena Aaisraeli ya thigi po David e taa landula Sheba, ihe Aajuda oya ningi aayinekelwa naalanduli yaDavid okuza kuJordan sigo oJerusalem.

³ David sho a thiki muuwa we muJerusalem, okwa kutha oohonda omulongo ndhoka a thigile po, dhi keelele uuwa, e te dhi tula metonatelo. Okwe dhi sile oshimpwiyu moompumbwe dhadho, ihe ina lala we nadho. Odha kala dhe edhililwa sigo okusa kwadho, dha kala dha fa aaselekadhi.

⁴ Omukwaniilwa okwa ti kuAmasa: “Ithana Aajuda ya gongale, mu ye nayo huka esiku lyahela.”

⁵ Amasa okwa yi, e ke ya hiye, ihe ina galuka pethimbo ndyoka omukwaniilwa e li utha.

⁶ Onkee omukwaniilwa okwa ti kuAbisai: “Sheba ote ke tu piyaganeka unene e vule Absalom. Kutha aantu yandje, mu mu landule, opo kaa lale iilandohote yimwe ye a fadhuke po.”

⁷ Onkee aantu yaJoab, aalangeli aayinekelwa naakwiita ayehe yalwe ya zi muJerusalem ye li naAbisai taa landula Sheba.

⁸ Sho ya thiki pemanya enene puGibeon, Amasa okwe ya tsakaneke. Joab okwa li a homata oshikwiita, a zala egongamwele li li molumpangwa lwalyo mepaya lye. Sho a li u uka ko, egongamwele olya gu mo.

⁹ Joab okwa ti kuAmasa: “Ou li ngiini, kuume kandje?” Ye ta kwata oombenzi dhe nolulyo lwe a fa te mu thipi komilungu.

¹⁰ Amasa ka li nando a kotokela egongamwele ndyoka Joab a li a kwata noshikaha oshikwawo, Joab nokwe mu mbwangula nalyo mela nomandjandja oga tika mo ga gwile pevi. Okwa si mbala nokuli, naJoab ine mu tsuulula we. Nena Joab nomumwayina Abisai oya landula Sheba.

¹¹ Gumwe gwomaantu yaJoab okwa thikama pomudhimba gwaAmasa e ti igidha ta ti: “Shaa ngoka a gama kuJoab naDavid, na landule Joab!”

¹² Omudhimba gwaAmasa ogwa li gwa kangawala metente lyombinzi mokati kondjila. Omupiya gwaJoab okwa mono kutya aantu otaa kankama, onkee okwa pwedha po omudhimba e te gu siikile elwaakani.

¹³ Omudhimba sho gwa kuthwa mo mondjila, shaa ngoka okwa landula Joab melandulo lyaSheba.

¹⁴ Sheba okwa tokola iilongo yomazimo agehe gaIsrael e te ya koshilando Abel Bet Maaka, naakwazimo ayehe yoludhi lwaBikri oya gongala e taye mu landulile moshilando.

¹⁵ Aantu yaJoab oyu uvu kutya Sheba omo e li, onkee ya yi e taa kondeke oshilando. Oya ningi omituni pedhingililokuma noya tameke okufula kohi yekuma, ye li gwithe po.

¹⁶ Moshilando omwa li omukulukadhi omunandunge i igidha handiyaka yekuma a ti: “Pulakeneni! Pulakeneni! Lombweleni Joab, e ye huka; onda hala ndi kundathane naye.”

¹⁷ Joab okwa yi kuye, nomukiintu okwe mu pula a ti: “Ongoye ngaa Joab?” Joab okwa yamukula a ti: “Ee, ongame.” Omukulukadhi okwa ti kuye: “Pulakena ndje, tatekulu.” Joab okwa yamukula: “Onda pulakena.”

¹⁸ Omukulukadhi okwa ti: “Muuyuni wonale okwa li haku tiwa: ‘Inda, u ka tsuwe omayele moshilando Abel,’ nosho naanaa ya ningi.

¹⁹ Oshilando shetu oshinene, osho shimwe shomiilando yombilielela noshi inekelwa muIsrael. Omolwashike to shi hanagulile po? Owa hala okukumuna po oshilando shOmuwa?”

²⁰ Joab okwa yamukula a ti: “Shivalelwe! Itandi shi kumuna po nenge ndi shi hanagule po.

²¹ Ndyoka kali shi ando edhiladhilo lyetu. Omulumentu gumwe, edhina lye Sheba yaBikri koshilongo shokoondundu dhaEfraim, okwa tameke okutukulila omukwaniilwa David oshipotha. Tu peni owala omuntu nguka, notandi ka etha oshilando, ndi shune.” Omukulukadhi okwa ti: “Omutse gwe otatu ke gu umbila pondje.”

²² Nena okwa yi kaantu yomoshilando nedhiladhilo lye ndyoka, oyo noya tete ko omutse gwaSheba e taye gu umbile handiyaka yekuma kuJoab. Joab okwa hiki ombenda endhindhiliko lyokutya aantu naa ethe oshilando, noya shuna kaandjawo. NaJoab okwa shuna kuJerusalem komukwaniilwa.

²³ Joab okwa li ondjayi yomatangakwiita gaIsrael; Benaia yaJehoiada okwa li omukuluntu gwaalangeli yaDavid;

²⁴ Adoniram okwa li omukuluntu gwiilonga yethiminiko; Jehosafat yaAhilud okwa li amushangandjayi;

²⁵ Sheva okwa li amushangampangu; Sadok naAbiatar oya li aayambi.

²⁶ NaIra gwomuJair okwa li wo gumwe gwomaayambi yaDavid.

21

¹ Muuyuni waDavid okwa li ondjala yekomba ya kala omimvo ndatu. David okwa pula Omuwa molwayo, Omuwa nokwa ti: “Saul nezimo lye oyo ye na oshipwe shedhipago; okwa dhipagele Aagibeon.”

² (Aagibeon kaya li Aaisraeli; oya li okangundu okashona kAayamori mboka ya li yu uvanekelwa kAaisraeli, ye ya hupithe, ihe Saul okwa kambadhala oku ya komba po molwokuladhipalela Israel naJuda.)

³ David okwi ithana Aagibeon nokwe ya pula ta ti: “Nandi mu ninge ngiini? Onda hala okwoopaleka epuko ndyoka mwe li ningilwa, opo mu yambeke oshigwana shOmuwa.”

⁴ Oya yamukula ya ti: “Oontamanana dhetu naSaul nezimo lye itadhi vulu okwoopalekwa noshisiliveli nenge noshingoli, tse inatu hala wo okudhipaga Omuisraeli nando gumwe.” David okwa pula a ti: “Nena nduno otamu dhiladhila, ndi mu ningile shike?”

⁵ Oya yamukula ya ti: “Saul okwa li a hala e tu hanagule po, pwaa kale nando ogumwe gwetu e na omwenyo shaa mpoka muIsrael.

⁶ Onkee tu pa mo aalumentu yaheyali yomoluvalo lwe, notatu ke ya endjeleleka montaneho yOmuwa puGibea, omukunda gwaSaul, omukwaniilwa a hogololwa kOmuwa.” Omukwaniilwa David okwa yamukula a ti: “Otandi ye mu pe.”

⁷ Ihe molweuvaneko eyapuki ndyoka yu uvanekelathana naJonatan, David okwa hupitha omuna gwaJonatan Mefiboshet, omutekulu gwaSaul.

⁸ Ihe okwa kutha Armoni naMefiboshet, aamati yaali mboka Rizpa yaAja e ya valele Saul; okwa kutha wo aamati yatano yomuna gwaSaul Merab, mboka a valele Adriel yaBarsillai gwokuMehola.

⁹ David okwe ya gandja kAagibeon, mboka ye ya endjeleleke kondundu koshipala shOmuwa; ayehe yaheyali oya sile pamwe. Oya dhipagwa petameko lyomasiku gotango gokuteya, petameko lyeteyo lyiishokelya.

¹⁰ Nena ohonda yaSaul Rizpa yaAja oya yala iinguma yomahahi pemanya mpoka pwa li omidhimba; oya kala hoka okuza ketameko lyokuteya, sigo omvula ya loko iipongo. Inayi pitika oondhila dhi lambele puyo omutenya nenge iilyani yi yi gume uusiku.

¹¹ David sho u uvu shoka Rizpa yaAja a ningi,

¹² okwa yi e ta kutha ko iipongo yaSaul noyomwana Jonatan kAajabesh muGilead. (Oye yi yakele kekuma lyoshilando muBetshan, nkoka Aafilisti ya li ya tsilika omidhimba, uuna ya dhipagele Saul kondundu Gilboa.)

¹³ David okwa kutha iipongo yaSaul naJonatan nokwa gongele wo iipongo yaalumentu yaheyali mboka ya li ye endjelelekwa.

¹⁴ Nena oya fumvike iipongo yaSaul noyaJonatan mombila yaKish, he yaSaul, muZela moshilongo shaBenjamin, ya gwanitha ayihe mbyoka omukwaniilwa a popi. Konima yaambika Kalunga okwa yamukula omagalikano gawo e ta sile evi ohenda.

¹⁵ Okwa li wo ku na iita yilwe pokati kAafilisti naIsrael. David okwa yi naantu ye, ya kondjithe Aafilisti. Metifa lyolugodhi David okwe etwa mo komvulwe.

¹⁶ Omulefule, edhina lye Ishbibenob, ngoka a li a humbata egonga lyoshikushu lyuudhigu wookilohalama ndatu netata nokwa li a zala egongamwele epe, okwa dhiladhila kutya ota dhipaga David.

¹⁷ Ihe Abisai, omuna gwaZeruia, okwe ya a popile David. Okwa ponokele omulefule e te mu dhipaga. Nena aantu yaDavid oyu uvaneke kutya ita lyata we kiita. Oya ti: “Ongoye etegameno lyaIsrael; tse inatu hala, tu ku kanithe.”

¹⁸ Konima yaambika opwa li olugodhi nAafilisti puGob; molugodhi nduka Sibbekai Omuhusha okwa dhipaga omulefule edhina lye Saf.

¹⁹ Okwa li ishewe olugodhi olukwawo nAafilisti puGob. Nena Elhanan yaJair gwokuBetlehem okwa dhipaga Goliat Omugat, ngoka a li e na egonga li na oshikwatelo shi thike pondisimbumu.

²⁰ Okwa li ishewe olugodhi olukwawo muGat, moka mwa li omulefule e hole okukondja. Okwa li e na ominwe oohamano kiikaha nokoompadhi.

²¹ Sho a sheke Israel, Jonatan, omuna gwamumwayina gwaDavid, edhina lye Shamma, okwe mu dhipaga.

²² Ayehe mbaka yane oya li oluvalo lwaalefule yokuGat, noya li ya dhipagwa po kaantu yaDavid.

22

¹ Omuwa sho a hupitha David miikaha yaSaul noyaatondi ye ayehe, David okwi imbile Omuwa ondjimbo ndjika:

² Omuwa oye omugameni gwandje; oye epopilongulu lyandje lya kola.

³ Kalunga kandje oye omugameni gwandje, puye ondi li nawa. Oye oshikandekitho tashi gamene ndje; ota shigi ndje e ta kaleke ndje nawa. Oye omukulili gwandje; ota gamene ndje e ta hupitha ndje kiiponga.

⁴ Otandi ithana Omuwa, oye nota gamene ndje kaatondi yandje. Omuwa na hambelelwe.

⁵ Omakuthikuthi geso oga kundukidha ndje; omakuthikuthi geyonuko oga tookele ndje.

⁶ Oshiponga sheso osha dhingilila ndje, noshilambo shombila oshe ekamena ndje.

⁷ Muudhigu wandje ondi ithana Omuwa; ondi ithana Kalunga kandje, a kwathe ndje. Oku uvu ewi lyandje motempeli ye; okwa pulakene okulilila kwandje ekwatho.

⁸ Nena evi olyi inyenge e tali kakama; omakota goondundu oga tanduka e taga dhedhema, oshoka Kalunga okwa li a geya.

⁹ Olwithi olwa gundumuka momayulu ge, omalaka gomulilo nomakala ga hanya oga zi mokana ke.

¹⁰ Okwa tuula eyalelo e ta kulukile pevi noshikogo oshiluudhe kohi yoompadhi dhe.

¹¹ Okwa tuka nondapo onene metembakwiita lyokegulu; okwe ende komawawa gombepo.

¹² Okwi ikuwikile momilema; iikogo iiluudhe yu udha omeya oye mu kundukidha.

¹³ Omakala ga geta oga tyotyomoka ga zi metayimo koshipala she.

¹⁴ Nena Omuwa okwa ndunduma mewangandjo; newi lyaKalunga Omunankondoawike olyu uvika.

¹⁵ Oku umbu iikuti ye, aatondi ye e taa halakana; nomashelo goombadhi okwe ya halakanitha po.

¹⁶ Ondaandelo yefuta oya mbenzuka ko, nomakankameno gevi oge ya pontundulu, Omuwa sho a ganda aatondi ye nokwe ya ndundumine mondjahi.

¹⁷ Omuwa okwa ganeke okwooko kwe e ta kwata ndje; okwa hili ndje mo mondowi.

¹⁸ Oye a hupitha ndje maatondi yandje aanankondo nomwaayehe mboka haa tondo ndje — oyo ya tono ndje oonkondo.

¹⁹ Sho nda li moshiponga, oya ponokele ndje, ihe Omuwa okwa gamene ndje.

²⁰ Oye a pititha ndje moshiponga; okwa hupitha ndje, oshoka okwa hokwa ndje.

²¹ Omuwa ota futu ndje, oshoka ohandi longo shoka shu uka; ota yambeke ndje, oshoka ine yona sha.

²² Onda vulika kompango yOmuwa; inandi pilamena Omuwa gwandje.

²³ Onda dhiginine iipango ye ayihe; inandi iteka omalombwelo ge.

²⁴ Omuwa okwa tseya kutya kandi na uusama, nonda kala ndi ikeelela okulonga uuwinayi.

²⁵ Nena ota futu ndje, oshoka onda longo shoka shu uka, oshoka oku shi shi kutya kandi na oondjo.

²⁶ Omuwa, ongoye omwiinekelwa mokukalathana naamboka ye ku inekela; ngoye omwaanawalela kumboka yaa na oshipo shasha.

²⁷ Ngoye omuyogoki kumboka aayogoki, ihe ou tonde aadhudhu.

²⁸ Oto hupitha mboka haa ishonopeke, ihe oto shonopeke mboka ye hole uuntsa.

²⁹ Omuwa, oto pe ndje uuyelele; oto tidha po omilema pungame.

³⁰ Oto tsu ndje omukumo okuhomona aatondi yandje, noonkondo okusinda omaigameno gawo.

³¹ Kalunga oha longo nawa! Oohapu dhe odhi shi kwiinekelwa! Oye a fa oshikandekitho kumboka taa kongo egameno.

³² Omuwa oye awike Kalunga; Kalunga oye awike omupopili gwetu.

³³ Kalunga nguka oye epopilongulu lyandje lya kola; ota gamene ndje mondjila.

³⁴ Ota koleke oompadhi dhandje, ndi tondoke ngompundja; ota gamene ndje, ngele tandi ende koondundu.

³⁵ Ota longo ndje olugodhi, opo ndi longithe omatati ngo ga kola.

³⁶ Omuwa, ongoye to gamene ndje e to hupitha ndje; esiloshimpwiyu lyoye olya nenepekitha ndje, noonkondo dhoye odha gamene ndje.

³⁷ Owa gamene ndje, ndaa yiwe nangame, noine gwila po.

³⁸ Otandi landula aatondi yandje e tandi ya dhenge; itandi mwena, sigo nde ya thekeke po.

³⁹ Otandi ya pundulile pevi, yo itaa vulu we okuthikama; oya gwile po nde ya sinda.

⁴⁰ Oto pe ndje omukumo molugodhi, ndi sinde aatondi yandje.

⁴¹ Oto fadhukitha po aatondi yandje; otandi hanagula po mbo ye tonde ndje.

⁴² Otaa kongo ekwatho, ihe kaku na nando ogumwe te ya hupitha; otaa ithana Omuwa, ihe ite ya yamukula.

⁴³ Otandi ya nyanyagula po, e taa ningi ngaashi ontsi yevi, ndjoka tayi pepwa po kombepo. Otandi ya lyatagula ngaashi enono lyomondjila.

⁴⁴ Owa hupitha ndje miikaha yaadhudhu nowa ningi ndje omupangeli gwiigwana; aantu nda li ndaa ya shi, oya ningi aalelwa yandje.

⁴⁵ Aakwiilongo otaa tsile ndje oongolo; ngele te popi, otaa vulika.

⁴⁶ Otaa tyololoka notaa zi moohote dhawo taa kakama

⁴⁷ Omuwa oku na omwenyo! Omupopili gwandje na hambelelwe! Uvitheni uunene waKalunga omunankondo, omuhupithi gwandje.

⁴⁸ Ota sinditha ndje aatondi yandje; iigwana ote yi tula mepangelo lyandje,

⁴⁹ nota hupitha ndje miikaha yaatondi yandje. Omuwa, oto sinditha ndje aatondi yandje; oto gamene ndje miikaha yaapwidhi.

⁵⁰ Onkee tandi ku simaneke mokati kiigwana; otandi ku imbile omahambelelo.

⁵¹ Kalunga ota gandja omasindano omakumithi komukwaniilwa gwe; ota holola ohole ye yaaluhe kungoka e mu hogolola, oDavid noluvalo lwe sigo aluhe.

23

¹ David yaIsai okwa li omuntu omunene gwaKalunga, a hogololwa kuKalunga kaJakob, a ninge omukwaniilwa, ngoka a li omutoti gwomaimbilo omawanawa. Oohapu dhaDavid dhahugunina odho ndhika:

² Ombepo yaKalunga otayi popi mungame; etumwalaka lye oli li komilungu dhandje.

³ Kalunga kaIsrael okwa popi; omugameni gwaIsrael a ti kungame: “Omukwaniilwa ngo ta lele nuuyuuki, ngoka ta lele mevuliko kuKalunga,

⁴ okwa fa etango tali minikile kegulu lyaa na iikogo, etango ndyoka tali tayimitha omwiidhi opo gwa lokwa.”

⁵ Kalunga ota ka yambeka oluvalo lwandje, oshoka okwa hangana nangame ehangano lyaaluhe, euvathano ndyoka itaali yonuka po we, euvaneko ndyoka itaali lunduluka nando. Shika osho shoka nda yuulukwa nale; otashi ka ninga esindano lyandje, naKalunga ote shi gwanitha.

⁶ Ihe aakaanakalunga oya fa omano taga ekelwahi; kape na ngoka te ga kwata noonyala dhowala.

⁷ Shila oto longitha oshipani shosheela, nenge oshitsitho; otaa ka lunguna po thilu.

⁸ Omadhina gaakwiita yaDavid oofule ogo ngaka: omutango oJosheb Bashebet gwokuTakemon. Okwa li omuwiliki mokati koofule ndatu, okwa kondjitha negonga lye aalumentu omathele gahetatu e te ya dhipaga molugodhi lwoshikando shimwe.

⁹ Omutiyali gwomoofule oye Eleasar lyaDodo gwomoludhi lwaAho. Esiku limwe okwa li naDavid ya kulumanena Aafilisti mboka ya gongalele olugodhi. Aaisraeli ya shuna,

¹⁰ ihe Eleasar okwa thikama omuthika e ta kondjitha Aafilisti, sigo oshikaha she sha vulwa sha kanyatela kegonga. Omuwa okwa sindana esindano enene esiku ndyoka. Konima yelotelo Aaisraeli oya galukile kuEleasar e taa kutha ko omatati komidhimba.

¹¹ Omutitatu gwomoofule ndatu oye Shamma yaAge a za kuHarar. Aafilisti oya li ya gongala puLehi, mpoka pwa li epya lyuukunde. Aaisraeli oya yi Aafilisti ontuku,

¹² ihe Shamma okwa kala mepya, e li popile e ta dhipaga Aafilisti. Omuwa okwa sindile esindano enene esiku ndyoka.

¹³ Lwopetameko lyethimbo lyokuteya, oofule ndatu dhomomilongo ndatu oya yi kekololo lyaAdullam, nkoka David a li, manga ongundu yAafilisti ya li ya yunga ontanda mesilu lyaRefaim.

¹⁴ Pethimbo ndyoka David okwa li mepopilongulu lyokondundu, netanga limwe lyAafilisti olya li lya kwata po Betlehem.

¹⁵ David okwa li u uvite uupongo e ta ti: “Ando pu kale omuntu te etele ndje omeya gokunwa ga za momuthima gu li posheelo shaBetlehem.”

¹⁶ Aakwiita mbeyaka yatatu oofule oya taakana montanda yAafilisti e taa teke omeya momuthima e taye ga eta kuDavid. Ihe ina hala oku ga nwa; okwe ga tile pevi omayambo kOmuwa

¹⁷ e ta ti: “Omuwa, itandi vulu oku ga nwa! Onda fa tandi nu ombinzi yaalumentu mboka ya hupula oomwenyo dhawo!” Onkee okwa tindi oku ga nwa. Mbika oyo iilonga yuupenda yaakwiita yatatu oofule.

¹⁸ Abisai, omumwayina gwaJoab, (yina oZeruia) okwa li omuwiliki gwomapenda omilongo ndatu. Negonga lye okwa kondjitha aalumentu omathele gatatu e te ya dhipaga e ta yelwa mokati komilongo ndatu.

¹⁹ Okwa li ependa lyomilongo ndatu e ta ningi omuwiliki gwawo, ihe ka li a fa yatatu mboka oofule.

²⁰ Benaia yaJehoiada gwokuKabzeel okwa li omukwiita gulwe a simana omolwiilonga yuufule, mwa kwatelwa edhipago lyaakwiita yaali Aamoabi ya simana. Esiku limwe lyolumi okwa ningine monyombo e ta dhipaga onime.

²¹ Okwa dhipaga wo Omuegipiti, omulumentu omutilithi a li e na egonga. Benaia okwe mu ponokele e na onkulundhimbo, a nakula mo egonga miikaha yOmuegipiti e te mu dhipaga nalyo.

²² Mbyoka oyo iilonga yuupenda yaBenaia, gumwe gwomapenda omilongo ndatu.

²³ Okwa li a simana mokati kawo, ihe ka li a fa yatatu mboka oofule. David okwe mu ningi omukuluntu gwetanga lyaalangeli ye mwene.

²⁴ Yamwe yomomapenda omilongo ndatu oyo mbaka: Asahel, omumwayina gwaJoab Elhanan yaDodo gwokuBetlehem Shamma naElika yokuHarod Helez gwokuPelet Ira yaIkkesh gwokuTekoa Abieser gwokuAnatot Mebunnai gwokuHusha Salmon gwokuAhoh Maharai gwokuNetofa Heleb yaBaana gwokuNetofa Ittai yaRibai gwokuGibea muBenjamin Benaia gwokuPiraton Hiddai gwokomasilu gaGaash Abialbon gwokuAraba Asmavet gwokuBahurim Eliahaba gwokuShaalbon Omuna gwaJashen Jonatan Shamma gwokuHarar Ahiam yaSharar gwokuHarar Elifelet yaAhasbai gwokuMaaka Eliam yaAhitofel gwokuGilo Hezro gwokuKarmel Paarai gwokuArab Igal yaNatan gwokuZoba Bani gwokuGad Zelek gwokuAmmon Naharai gwokuBeerot, omuhumbati gwomatati gaJoab Ira naGareb yokuJattir Uria Omuheti. Oya li aakwiita ya simana omilongo ndatu nayaheyali ayehe kumwe.

24

¹ Ondjahi yOmuwa oya hwamene Israel ishewe. Okwa hongakanitha David, e ya etele oshiponga. Omuwa okwa ti kuye: “Inda, u ka yalule Aaisraeli nAajuda.”

² Nena David okwa lombwele Joab, ondjayi yetangakwiita lye ta ti: “Inda nomalenga goye komazimo agehe gaIsrael okuza kooha dhoshilongo sigo okooha oonkwawo, u yalule oshigwana. Onda hala okutseya omwaalu gwasho.”

³ Ihe Joab okwa yamukula omukwaniilwa a ti: “Nkeyama, Omuwa Kalunga koye ni indjipaleke Aaisraeli lwethele ye vule mpo ye thike ngashingeyi, nangoye kala u na omwenyo, u shi mone. Ndele omolwashike wa hala okuninga ngawo?”

⁴ Ihe omukwaniilwa okwa vulikitha Joab nomalenga ge; oya zi koshipala she e taa yi, ya ka yalule Aaisraeli.

⁵ Oya tokola Jordan e taa yungu ontanda kuumbugantu waAroer, oshilando shopokati kolusilu moshitopolwa shaGad. Okuza mpoka oyu uka kuumbangalantu kuJaser,

⁶ nokuGilead nokuKadesh, moshitopolwa shAaheti. Nena oya yi kuDan, nokuza kuDan oya yi kuuninginino kuSidon.

⁷ Opo ihe oya yi kuumbugantu koshilandohote Tiro nokiilando ayihe yAahevi nAakaanana, nohugunina okuBeersheba, muumbugantu waJuda.

⁸ Konima yoomwedhi omugoyi nomasiku omilongo mbali oya galukile kuJerusalem, sho ya mana okweenda oshilongo ashihe.

⁹ Oya hokololele omukwaniilwa omwaalu gwaantu mboka taa vulu okuya kiita; aakwiita 800 000 muIsrael na 500 000 muJuda.

¹⁰ Ihe konima David sho a yalulitha aantu, eiyuvo lye olye mu hepeke nokwa ti kOmuwa: “Onda yono nayi kungoye, sho nda ningi ngeyi. Kwatha ndje u dhimine ndje po. Onda ningi uugoya.”

¹¹ Omuwa okwa lombwele Gad, omuhunganeki gwaDavid, ta ti: “Inda, u ka lombwele David, otandi mu pe oompito ndatu, a hogolole po yimwe. Otandi ka gwanitha ndjoka ta hogolola.” Ongula yanakwasha, konima David sho a penduka,

¹²

¹³ Gad okwa yi kuye, te mu hokololele shoka Omuwa a popi e ta pula ta ti: “Oshike tashi kala po? Omimvo ndatu dhondjala yekomba moshilongo shoye, nenge oomwedhi ndatu hamu yaayaa ontuku aatondi yeni, nenge omasiku gatatu gelega mevi lyeni? Shi dhiladhila nduno, u lombwele ndje shoka tandi ka lombwela Omuwa.”

¹⁴ David okwa yamukula a ti: “Ngame ondi li muudhigu uunene! Ihe ine hala ndi geelwe kaantu. Omuwa oye mwene ne tu geele, oshoka oye omunahenda.”

¹⁵ Osho ngaaka Omuwa okwa tumu elega muIsrael lya kala okuza ongula ndjoka ethimbo ndyoka a hogolola. Okuza kooha dhoshilongo sigo kooha oonkwawo Aaisraeli omayuvi omilongo heyali oya si.

¹⁶ Omuyengeli gwOmuwa sho a li pokuhanagulapo Jerusalem, Omuwa okwa geyuluka e ta ti komuyengeli ngoka a li te ya dhipaga: “Opuwo nduno! Sha gwana!” Omuyengeli okwa li polupale lwaArauna Omuyebusi.

¹⁷ David okwa mono omuyengeli ngoka a li ta dhipaga aantu e ta ti kOmuwa: “Ngame, ongame omusama. Ongame nda puka. Aantu mbaka oya ningi shike? Geela ndje negumbo lyandje.”

¹⁸ Esiku olyo tuu ndyoka Gad okwa yi kuDavid e ta ti kuye: “Inda kolupale lwaArauna, u tungile Omuwa oshiyambelo.”

¹⁹ David okwa vulika kOmuwa e ta yi, ngaashi Gad e mu lombwele.

²⁰ Arauna sho a mono omukwaniilwa nomalenga ge taye ya kuye, okwa yi kuye e ti inyongamene kuye

²¹ e ta pula ta ti: “Nkeyama, oshike we ya mpano?” David okwa yamukula a ti: “Onde ya, ndi lande po olupale lwoye nokutungila Omuwa oshiyambelo, opo elega li pite po.”

²² Arauna okwa ti: “Nkeyama, lu kutha po, u yambele Omuwa, ngaashi wa hala. Oondumetana odho ndhika, u dhi fikile omayambo koshiyambelo, oondjoko dhadho niiyungulitho oyo mbika, yi longitha iitemitho.”

²³ Arauna okwa gandja ayihe mbika komukwaniilwa e ta ti kuye: “Omuwa Kalunga koye na taambe omayambo goye.”

²⁴ Ihe omukwaniilwa okwa yamukula a ti: “Aawe, otandi yi futu. Itandi yambele Omuwa Kalunga kandje omafikilondjambo inaaga pula ndje sha.” Oye nokwa landa olupale noondumetana iimaliwa iisiliveli omilongo ntano.

²⁵ Nena okwa tungile Omuwa oshiyambelo e ta yamba omafikilondjambo nomakwatathanondjambo. Omuwa okwa yamukula omagalikano ge, nelega olya kodha muIsrael.