1

¹ MuRama moshitopolwa shoondundu dhaEfraim omwa li omusamane edhina lye Elkana, gwomezimo lyaEfraim. Okwa li omuna gwaJeroham nomutekulu gwaElihu, gwomegumbo lyaTohu nogwomoludhi lwaZuf.

² Elkana okwa li e na aakiintu yaali, Hanna naPeninna. Peninna okwa li e na aanona, ihe Hanna ke na omunona.

³ Omumvo kehe Elkana okwa zi maandjawo muRama, a ka galikane Omuwa Omunankondoawike kuShilo noku mu yambela omayambo. Aana yaali yaEli, Hofni naPinehas, oya li aayambi hoka.

⁴ Ethimbo kehe Elkana sho a ka yamba omayambo ge, okwa li ha gandja oshitopolwa shimwe shonyama kuPeninna nashimwe komwana kehe.

⁵ Nonando okwa li e hole Hanna noonkondo, okwe mu pe owala oshitopolwa shimwe, oshoka Omuwa ina pa Hanna oluvalo.

⁶ Peninna, omukondjithi gwe, okwa li he mu ehameke noku mu sitha ohoni, oshoka Omuwa ine mu pa oluvalo.

⁷ Shika osha ningwa omimvo nomimvo, aluhe sho ya yi kongulu yOmuwa. Peninna okwa hindi Hanna unene, nolwindji Hanna okwa lili nokwa tindi okulya.

⁸ Omulume Elkana okwe mu pula ta ti: “Hanna, oto lilile shike? Oshike inoo hala okulya? Omolwashike wa nika uupongo aluhe? Ku li nani, ngaashi handi dhiladhila, kutya ngame pungoye oshi vulithe aamwoyemati omulongo?”

⁹ Esiku limwe sho ya mana okulya mongulu yOmuwa muShilo, Hanna okwa yeluka po. Okwa li u uvite uudhigu e ta lili noonkondo ta galikana Omuwa. Omuyambi Eli okwa li a kuutumba peha lye pomweelo.

¹⁰

¹¹ Hanna oku uvaneke a ti: “Omuwa Omunankondoawike, tala ndje, ongame omuntu gwoye! Tala kuudhigu wandje e to dhimbulukwa ndje! Ino dhimbwa ndje! Oshoka ngele to ka pa ndje okanona okamati, otandi uvaneke kutya otandi ke ku yapulile, ka kale koye okukalamwenyo kwako akuhe ko itaka kululwa nando.”

¹² Hanna okwa tsikile okugalikana Omuwa olule, naEli okwa li a tongolola omilungu dhe.

¹³ Okwa li ta galikana momwenyo a mwena, omilungu dhe adhike dha li tadhi inyenge, ihe ita popi ewi lyu uvitike. Eli okwa dhiladhila kutya okwa kolwa

¹⁴ nokwa ti kuye: “Ethimbo oli thike peni to italitha wa kolwa? Etha okunwa e to kololokwa.”

¹⁵ Hanna okwa yamukula a ti: “Aawe, inandi kolwa, tatekulu, inandi nwa! Onda dhigupalelwa nonda galikana nda aneka uudhigu wandje koshipala shOmuwa.

¹⁶ Ino dhiladhila kutya ngame omukiintu omwiinayi. Onda galikana ngeyi, oshoka ondi na uudhigu noluhodhi.”

¹⁷ Eli okwa ti: “Inda nombili. Kalunga kaIsrael ne ku pe shoka we mu indile.”

¹⁸ Hanna okwa yamukula a ti: “Dhimbulukwa ndje aluhe.” Nena okwa zi po e ta li ye ina sa we oluhodhi.

¹⁹ Ongula ya landula ko Elkana naangandjawo oya meneka, nokonima yokugalikana Omuwa, oya shuna kaandjawo kuRama. Elkana okwa monathana nomukadhi Hanna, Omuwa nokwa yamukula omagalikano gaHanna.

²⁰ Onkee okwa ningi omusimba nokwa mono okamati. Okwe ka luku Samuel, ndyoka tali ti: “Onde mu indile kOmuwa.”

²¹ Ethimbo olya thiki ishewe lyaElkana naangandjawo, ya ye kuShilo oku ka yambela Omuwa omayambo gokomumvo nomayambo geuvaneko.

²² Ihe pethimbo ndika Hanna ina ya ko. Okwa lombwele omulume a ti: “Omunona ngele a toyo, otandi mu fala mbala kongulu yOmuwa, nkoka ta ka kala aluhe.”

²³ Elkana okwa yamukula: “Eewa, ninga shoka to tala sho opala; kala ano pegumbo, sigo we mu toyitha Omuwa na tsakanithe euvaneko lyoye.” Osho ngeyi Hanna okwa kala pegumbo e ta yamutha okamwana.

²⁴ Sho e ka toyitha, okwa kutha ontsezi yomimvo ndatu, olata yimwe yuusila womunziya nombago yu udha omaviinu e ta fala okanona Samuel kuShilo kongulu yOmuwa.

²⁵ Sho ya tsele ontsezi, oya fala omunona kuEli.

²⁶ Hanna okwa ti kuye: “Ombili, tatekulu. Oto dhimbulukwa ndje tuu? Ongame omukiintu ngwiyaka wa li wa mono a thikama mpaka ta galikana Omuwa.

²⁷ Omuwa onda li nde mu indile, a pe ndje okanona haka, oye nokwa pe ndje shoka ndi indile.

²⁸ Onkee otandi ka yapulile Omuwa. Oko okOmuwa mokukalamwenyo kwako akuhe.” Nena oya simaneke Omuwa nkoka.

2

¹ Hanna okwa galikana a ti: “Omuwa oku udhitha omutima gwandje enyanyu; ondu uvite uunelago kushoka Omuwa a ningile ndje! Otandi yolo aatondi yandje; onda nyanyukwa, oshoka Kalunga okwa kwatha ndje!

² Kaku na omuyapuki a fa Omuwa; kaku na nando ogumwe e mu fa, kaku na omugameni a fa Kalunga ketu.

³ Inamu popya mokule omaitango geni; etheni oohapu dhomwiityo gweni. Oshoka Omuwa oye Kalunga a tseya ayihe nota pangula ashihe shoka aantu haye shi ningi.

⁴ Omatati gaakwiita aanankondo otaga teywa po, ihe mboka taa tengenya, otaa kolekwa.

⁵ Aantu mboka ya li aanekuta, ngashingeyi otaa hehela iipalutha, ihe aantu mboka ya li aanandjala, ondjala yawo ya kodha. Omukulukadhi ihaa vala, okwa mono uunona uheyali, ihe yina yoyendji ota thigwa e li owala.

⁶ Omuwa ota dhipaga nota yumudha; aantu ote ya tumu muusi e te ya galula mo ishewe.

⁷ Ota thigonapaleke yamwe e ta yambapaleke yakwawo; ota shundula yamwe, nayamwe ote ya nenepeke.

⁸ Ota yambula ohepele montsi nota kutha omukwanaluhepo muukweyi. Ote ya ningi ookuume kaana yokombanda e te ya tula pomahala gesimano. Omakankameno gevi ogOmuwa; okugo Omuwa a tungile uuyuni.

⁹ Ota gamene oomwenyo dhaamboka ye mu inekela, ihe aakolokoshi otaa kanene momilema; omulumentu ita sindana molwoonkondo dhe mwene.

¹⁰ Aatondi yOmuwa otaa ka yonwa po; ote ke ya ndundumina e li megulu. Omuwa ota ka pangula uuyuni auhe; ota ka pa omukwaniilwa gwe oonkondo, omukwaniilwa omuhogololwa gwe ote ke mu ninga omusindani.”

¹¹ Nena Elkana okwa shuna kegumbo kuRama, ihe omumati Samuel okwa kala muShilo nokwa longele Omuwa mewiliko lyomuyambi Eli.

¹² Aana yaEli oya li aadhudhu. Inaa pupa ko komalombwelo gOmuwa

¹³ noinaa gwanenwa kushoka aayambi ya vulu okupula koshigwana. Pehala lyasho, manga omuntu a li ta yamba ontselelandjambo ye, omupiya gwomuyambi okwe ya noshizigitho shoonyala ndatu. Onyama manga tayi pi,

¹⁴ ota tsu oshizigitho mombiga, naashoka te shi zigi mo, ooshoka shomuyambi. Aaisraeli ayehe mboka yi ile kuShilo okuyamba, osho ya ningwa ngaaka.

¹⁵ Nokuli manga oofu inaadhi kuthwa ko, dhi ka lungunithwe, omupiya gwomuyambi okwe ya nokwa lombwele nakuyamba ontselelandjambo: “Pe ndje onyama yomuyambi yokuyotha; ina hala onyama ya pakwa po, oondjoka ashike ombihu.”

¹⁶ Omuntu ngele ota yamukula ta ti: “Natu ningeni shoka shu uka, natu lungunitheni tango oofu; nena oto kutha shoka wa hala,” omupiya gwomuyambi ota ti: “Aawe! Yi pe ndje ngashingeyi! Ngele ito shi ningi, otandi ke yi kutha koonkondo.”

¹⁷ Uulunde mbuka waana yeEli owa li wa vuka unene koshipala shOmuwa, oshoka oya kala nokudhina omayambo gOmuwa.

¹⁸ Methimbo ndika omumati Samuel okwa tsikile okulongela Omuwa a zala oshitetahema sholiina shuuyambi.

¹⁹ Omumvo kehe yina okwe mu tungile okanguwo kokombanda naasho ye ya nomulume kotempeli okuyamba ontselelandjambo yokomumvo, okwe ke mu etele.

²⁰ Nena Eli okwa laleke nuuyamba Elkana nomukadhi nokwa ti kuElkana: “Omuwa ne ku pe aanona yalwe momukulukadhi nguka, ya kale peha lyaanguka mwe mu gandja kuye.” Konima yaashika oya shuna kaandjawo.

²¹ Omuwa okwa yambeke Hanna. Hanna okwa vala aamati yatatu naakadhona yaali. Omumati Samuel okwa kokele mongulu yOmuwa.

²² Eli okwa li a kulupa unene. Oku uvu ayihe mbyoka ya ningwa koyana ye yi ningile Aaisraeli kutya oya li ya lala nokuli naakiintu mboka ya li haa yakula posheelo shetsalihangano.

²³ Onkee Eli okwa nyenyetele oyana a ti: “Omolwashike tamu ningi iinima mbika? Shaa ngoka ota hokololele ndje uuwinayi mboka tamu ningi.

²⁴ Yi etheni, aamwandje! Mbika iihunalela tayi popiwa kaantu yOmuwa!

²⁵ Omuntu ngele ota yono komuntu omukwawo, Kalunga ota vulu oku mu popila, ihe olye ta vulu okupopila omuntu ngoka ta yono kuKalunga?” Ihe inaa pulakena he. Onkee Omuwa okwa tokola oku ya dhipaga po.

²⁶ Omumati Samuel okwa koko nokwa li a hokiwa kOmuwa nokaantu.

²⁷ Omuhunganeki okwe ya kuEli nelaka lya zi kOmuwa tali ti: “Hokulu Aaron negumbo lye sho ya li aapika muEgipiti, onde mu ihololele.

²⁸ Onda hogolola oluvalo lwe momazimo agehe gaIsrael, lu ninge aayambi yandje, ya yakule moshiyambelo, ya fike iitsinino, ya zale omapepenguwo, opo ya thike koshipala shandje. Onde ya pe uuthemba wokukutha oshitopolwa shomafikilondjambo koshiyambelo.

²⁹ Omolwashike ano ne mwa fukila omafikilondjambo niikulyandjambo mbyoka handi pula kaantu yandje? Ngoye Eli, omolwashike to simaneke aamwoye shi vule okusimaneka ndje, sho to ya etha, yi iyondodhe noontumba oombwanawa dhomafikilondjambo taga yambelwa ndje koshigwana shandje?

³⁰ Ngame, Omuwa Kalunga kaIsrael, ondu uvaneka nale kutya ezimo lyoye noludhi lwoye lu kale aluhe aayambi yandje. Ihe nena otandi ti kutya inandi lu hala we! 30 Ngame ote simaneke mboka haa simaneke ndje note tondo mboka taa dhini ndje.

³¹ Pulakeneni, ethimbo otali ya, uuna tii ka dhipaga po aagundjuka ayehe maandjeni nomoludhi lwoye, opo maandjeni mwaa kale omuntu ngoka ta adha epipi lyuukulupe.

³² Otamu ka kala muudhigu e tamu tala nefupa omayambeko agehe ngoka tandi ke ga pa aantu yalwe muIsrael, ihe maandjeni itamu ka kala ngoka e na omwenyo omule.

³³ Onkene ngaa otii ka hupitha po gumwe gwomoluvalo lwoye, a kale e na omwenyo nota ka kala omuyambi gwandje. Ihe ota ningi omuposi nota kanitha etegameno alihe. Ayehe yalwe moluvalo lwoye otaa ka sa mokudhipagwa.

³⁴ Aamwoyemati yaali Hofni naPinehas otaa si esiku limwe. Shika otashi ku ulukile kutya ashihe shoka nda popi, oshoshili.

³⁵ Otandi ka hogolola omuyambi ngoka ta kala omwiinekelwa gwandje nota gwanitha ayihe, ngaashi omwenyo gwandje gwa hala. Otandi ke mu pa oluvalo ndoka talu yakula aluhe koshipala shomukwaniilwa omuhogololwa gwandje.

³⁶ Kehe ngoka gwomoluvalo lwoye ta hupu po, oku na okuya komuyambi ngoka e ti indile iimaliwa niikulya ye e ta pula, a ziminwe okuyakula aayambi, opo a mone sha shokulya.”

3

¹ Pomasiku ngeyaka, manga Samuel a li ta longele Omuwa mewiliko lyaEli, omalaka ga za kOmuwa, oga li ga pumba, nomamoniko oga li gaa ko we.

² Uusiku umwe omusamane Eli, ngoka a li ihaa mono ko we nawa, okwa li a lala kontala ye a kotha.

³ Samuel wo okwa li a kothela motempeli, moka mwa li oshikethahangano oshiyapuki. Manga inaaku sha, nonyeka ya li ya minikila natango,

⁴ Omuwa okwi ithana Samuel. Samuel a yamukula: “Tatekulu!”

⁵ Nokwa matukile kuEli e ta ti: “Ongame nguka wi ithana.” Ihe Eli okwa yamukula: “Inandi ku ithana; inda, u ka lale.” Onkee Samuel okwa shuna, a ka lale.

⁶ Omuwa okwi ithana ishewe Samuel. Omumati ina tseya nando kutya oye Omuwa, oshoka Omuwa okwa li inaa popya naye nale. Onkee okwa penduka po nokwa yi kuEli e ta ti: “Owi ithana ndje, ongame nguka.” Ihe Eli okwa yamukula: “Mumwandje, inandi ku ithana; shuna, u ka lale.”

⁷

⁸ Omuwa okwi ithana Samuel olutitatu. Okwa penduka e ta yi kuEli e ta ti: “Ongoye wi ithana ndje, ongame nguka.” Nena Eli okwa dhimbulula kutya Omuwa oye ti ithana omumati.

⁹ Onkee okwa ti kuye: “Inda, u ka lale; nongele te ku ithana ishewe, tya: ‘Popya, Omuwa, omuntu gwoye onda pulakena.’ ” Osho ngaaka Samuel okwa shuna, a ka lale.

¹⁰ Omuwa okwe ya nokwa thikama hwiyaka, nokwi ithana ngaashi nale: “Samuel! Samuel!” Samuel okwa yamukula: “Popya, omuntu gwoye onda pulakena.”

¹¹ Omuwa okwa ti kuye: “Pomasiku ngaka mAaisraeli otii ka ninga mo oshinima oshitilithi, nakehe ngoka te shi uvu, ota ka kunkwa.

¹² Mesiku ndyoka otandi ka tsakanitha omalondodho gandje agehe megumbo lyaEli okuza ketameko sigo okehulilo.

¹³ Onde mu lombwela nale nokuli kutya otandi ka geela egumbo lye sigo aluhe, oshoka oyana oya dhini ndje. Eli okwa li e shi shi sho haa ningi, ihe ine ya ganda.

¹⁴ Onkee onda gana kutya eyono lyezimo lyaEli itali ka kuthwa po komafikilondjambo nenge kiikulyandjambo.”

¹⁵ Samuel okwa kala a lala sigo ongula; nena okwa penduka e te egulula omiyelo dhongulu yOmuwa. Okwa li a tila okuhokololela Eli emoniko ndyoka.

¹⁶ Eli okwe mu ithana a ti: “Samuel, mumati gwandje!” Samuel okwa yamukula a ti: “Ee, tatekulu!”

¹⁷ Eli okwe mu pula a ti: “Omuwa okwe ku lombwele shike? Ino holeka ndje nando osha. Kalunga ne ku geele sigo aluhe, ngele ito hokololele ndje adhihe ndhoka a ti.”

¹⁸ Onkee Samuel okwe mu lombwele adhihe; ina holeka po nando osha. Eli okwa ti: “Oye Omuwa; na longe shoka she mu opalela.”

¹⁹ Samuel okwa koko, Omuwa okwa li pamwe naye nokwa tsakanitha oohapu dhe adhihe a li e dhi mu lombwele.

²⁰ Onkee Aaisraeli ayehe moshilongo ashihe, okuza kuDan sigo okuBeersheba, oya li ya tseya kutya Samuel oye omuhunganeki gwOmuwa.

²¹ Omuwa okwa tsikile okwiiholola muShilo, moka a holokele Samuel nokupopya naye. NaSamuel ngele a popi, nena Aaisraeli ayehe oya pulakene.

4

¹ Pethimbo ndiyaka Aafilisti oya gongala, ya hingile Aaisraeli iita. Onkee Aaisraeli oya tokola oku ya kondjitha. Aaisraeli oya yungu ontanda yawo puEbenezer nAafilisti opuAfek.

² Aafilisti oya ponokele Aaisraeli, nokonima yolugodhi olululu oye ya dhenge noya dhipaga konyala aalumentu omayuvi gane.

³ Mboka ya hupu po, sho ye ya kontanda, aawiliki yaIsrael oya ti: “Omolwashike Omuwa e etha Aafilisti, ye tu dhenge nena? Tu yeni, tu ka tale oshikethahangano shOmuwa kuShilo, opo e ende natse, e tu hupithe kaatondi yetu.”

⁴ Onkee oya tumu aatumwa kuShilo noya kutha oshikethahangano shOmuwa, shoka shi lile po oshipangelapundi shOmuwa Omunankondoawike. Aana yaali yaEli, Hofni naPinehas, oya thindikile oshikethahangano.

⁵ Oshikethahangano sho sha thiki, Aaisraeli oya kugilile kenyanyu, ndele nevi olya fa tali kakama.

⁶ Aafilisti sho yu uvu onkugilili, oya ti: “Pulakeneni shoka tashi kugililwa montanda yAahebeli! Otashi ti ngiini?” Sho ya dhimbulula kutya nani oshikethahangano shOmuwa she ya montanda yAahebeli,

⁷ oya li ya tila noya ti: “Okalunga e ya montanda yawo! Yaye tse! Nonale inatu ningilwa iinima yi thike mpa!

⁸ Olye te tu hupitha kookalunga mboka aanankondo! Oyo ookalunga mboka ya dhipaga Aayegipiti mombuga!

⁹ Yafilisti ne, ikoleleleni! Kondjeni ngaashi aalumentu, opo twaa ninge aapika yAahebeli, ngaashi yo ya li aapika yetu. Onkee tu kondjeni twa mana mo!”

¹⁰ Aafilisti oya kondjo noonkondo noya dhenge Aaisraeli, onkee oya yi ondapo kaandjawo. Ekanitho olya li enene: aakwiita Aaisraeli omayuvi omilongo ndatu oya dhipagwa.

¹¹ Oshikethahangano shaKalunga osha kwatwa po, naana yaEli, Hofni naPinehas, ayehe yaali oya dhipagwa.

¹² Omulumentu gwomezimo lyaBenjamin okwa zi kolugodhi ta matuka e ta thiki kuShilo esiku tuu ndyoka. Opo a holole oluhodhi lwe, okwa li a tuula oonguwo dhe nokwiigunda evi momutse.

¹³ Eli, ngoka a li i impwiyika unene noshikethahangano, okwa li a kuutumba koshipundi pooha dhondjila ta talatala. Omulumentu okwa taandelitha elaka moshilando ashihe, naayehe oya kugu kuumbanda.

¹⁴ Eli oku uvu euyagano nokwa pula: “Euyagano ndyoka olyashike?” Omulumentu okwe ya kuEli meendelelo nokwe mu hokololele.

¹⁵ (Eli okwa li e na omimvo omilongo omugoyi nahetatu nokwa li omuposi.)

¹⁶ Omulumentu okwa ti: “Onda zi ontuku kolugodhi nonda matuka ondjila ayihe nena.” Eli okwa pula: “Oshike sha ningwa ko, mumwandje?”

¹⁷ Omutumwa okwa yamukula: “Aaisraeli oya yi Aafilisti ontuku; otwa dhengwa nayi. Nokuli aamwoye Hofni naPinehas oya dhipagwa, noshikethahangano shaKalunga osha kwatwa po!”

¹⁸ Omulumentu sho a tumbula oshikethahangano, Eli okwa gu ongali koshipundi she popepi nosheelo. Okwa li a kulupa noku na oshipapa sholutu, onkee mokugwa okwa teka othingo e ta si. Okwa li a wilike Aaisraeli omimvo omilongo ne.

¹⁹ Oshitenya shaEli, mukadhaPinehas, okwa li omusimba e li pokuvala. Sho a kundana kutya oshikethahangano shaKalunga osha kwatwa po, osho wo hemweno nomulume oya sa, okwa adhika mbala koshitheta e ta vala.

²⁰ Sho a li pokusa, aakulukadhi mboka ya li puye, oye mu lombwele ya ti: “Ikolelela! Owa mona omumati!” Ihe ina pupa ko ye ina yamukula sha.

²¹ Okwa luku okamati edhina lyako Ikabod nokwa ti: “Esimano lyaKalunga lya thigi po Israel.” Noohapu ndhika oku ulike ekwatopo lyoshikethahangano neso lyahemweno nolyomulume.

²² Oye a ti: “Esimano lyaKalunga lya thigi po Israel, oshoka oshikethahangano shaKalunga sha kwatwa po.”

5

¹ Konima Aafilisti sho ya kwata po oshikethahangano, oye shi kutha kuEbenezer e taye shi fala koshilando shawo Ashdod,

² ye shi tula motempeli yakalunga kawo Dagon noye shi langeke ontega noshiyelekela shaDagon.

³ Ongula onene sho kwa shi, aantu yokuAshdod oya mono efano lyoshiyelekela shaDagon lya gwila pevi nolya sizimaneka oshipala pevi komeho goshikethahangano shOmuwa. Oyo oye li toola po e taye li tula pehala lyalyo.

⁴ Ongulangula ya landula oya mono ishewe oshiyelekela shaDagon sha gwile pevi komeho goshikethahangano. Omutse gwasho nomaako gasho agehe oya li ya teka ko, yi li lwoposheelo; olutu aluke lwa li lwa kala po.

⁵ (Omolwashika aayambi yaDagon naasimaneki ye ayehe muAshdod ihaa lyata po we pehala mpoka sigo onena.)

⁶ Omuwa okwa geele aantu yokuAshdod noonkondo e te ya tilitha. Okwe ya geele pamwe naantu yomomikunda dhe ya kunduka nokwe ya etele iitumbuka.

⁷ Sho ya mono mbika ya ningwa, oya ti: “Kalunga kaIsrael ote tu geele e ta geele wo kalunga ketu Dagon. Itatu vulu we okukala noshikethahangano shika.”

⁸ Onkee oya tumu aatumwa noyi ithana aakwaniilwa yatano yAafilisti ya gongale noye ya pula: “Oshikethahangano shaKalunga kaIsrael otatu shi ningi ngiini?” Aakwaniilwa oye ya yamukula ya ti: “Shi faleni kuGat.” Osho ngaaka ye shi fala kuGat, oshilando shilwe shAafilisti.

⁹ Ihe sho sha thiki ko, Omuwa okwa geele noshilando shika wo nokwe eta ehaluko enene. Okwe ya geele niitumbuka maantu ayehe yomoshilando, aanona naakuluntu.

¹⁰ Oya tumu ishewe oshikethahangano kuEkron, oshilando shilwe shAafilisti; ihe sho sha thiki ko, aantu oyi igidha ya ti: “Oya tumu huka oshikethahangano shaKalunga kaIsrael, opo shi tu dhipage po atuhe!”

¹¹ Oya gongaleke ishewe aakwaniilwa ayehe yAafilisti noya ti kuyo: “Shunii ko oshikethahangano kehala lyasho, opo shaa tu dhipage po naangandjetu.” Moshilando ashihe omwa li etilo, oshoka Kalunga okwe ya geele noonkondo.

¹² Naamboka inaa sa, oya li yu udha iitumbuka, aantu noya kugile iikalunga yawo onkugo, yi ya kwathe.

6

¹ Oshikethahangano shOmuwa sho sha kala mevi lyAafilisti oomwedhi heyali,

² aantu oyi ithana aayambi noonganga noye ya pula ya ti: “Oshikethahangano shOmuwa otatu shi ningi ngiini? Ngele tatu shi shunitha nkoka sha li, otatu shi tumu nashike?”

³ Oya yamukula ya ti: “Ngele otamu shunitha oshikethahangano shaKalunga kaIsrael, omu na oku mu faalela omagano, mu futile ondjo yeni. Oshikethahangano kashi na okushuna shaa na magano. Opo ihe otamu ka aluka notamu ka dhimbulula kutya omolwashike e mu geele.”

⁴ Aantu oya pula ya ti: “Otatu mu tumine omagano gashike?” Oya yamukula ya ti: “Iiyelekela yoshingoli itano yiitumbuka noombuku ntano dhoshingoli, ano omwaalu ngoka gu thike pamwe nomwaalu gwaakwaniilwa yAafilisti. Egeelo ndika olye mu adha ne amuhe naakwaniilwa yeni yatano.

⁵ Hambuleni ano iiyelekela yiitumbuka noyoombuku ndhoka dha hepeke oshilongo sheni, ne mu simaneke Kalunga kaIsrael. Pamwe ta mweneke ondjahi ye yoku mu geela, one niikalunga yeni noshilongo sheni.

⁶ Omolwashike tamu ikukutike, ngaashi omukwaniilwa gwaEgipiti nAayegipiti ya ningi? Inamu dhimbwa, nkene Kalunga e ya posipaleke, sigo ye etha Aaisraeli, ya tembuke muEgipiti.

⁷ Pangeleni ano etemba epe ne mu kuthe oonzinzi mbali oonyali ndhoka inaadhi humbata nale ondjoko; dhi kutileni ketemba, ihe uutana wadho u tuleni koshigunda,

⁸ Kutheni oshikethahangano shOmuwa, mu shi tule metemba ne mu tule mo ontega nasho okaketha ke na iiyelekela yoshingoli mbyoka tamu tumine Kalunga kaIsrael omagano gokufuta oondjo dheni. Ukitheni etemba moshitauwa ne mu li ethe, li ye nondjila yalyo.

⁹ Li undjeni; ngele otali yi lyu uka koshilando Bet Shemesh, shika otashi ti kutya Kalunga kaIsrael oye a tumu egeelo ndika. Ihe ngele hasho, nena otatu tseya kutya nani haye a tumu uuvu mbuka, osha li pamwe oshiponga shi iyeta.”

¹⁰ Oya ningi, ngaashi ya lombwelwa: oya kutha oonzinzi mbali oonyali e taye dhi kutile ketemba, ihe uutana oye u edhilile moshigunda.

¹¹ Oya tula oshikethahangano metemba pamwe nokaketha ke na iiyelekela yoombuku noyiitumbuka.

¹² Oonzinzi odha yi dhu ukilila ondjila yokuBet Shemesh, inadhi penga mo mondjila nando. Odhe ende tadhi lili. Aakwaniilwa yAafilisti yatano oye dhi landula sigo okongamba yaBetShemesh.

¹³ Aantu yokuBet Shemesh oya li taa teya osiima molusilu, nohaluka sho ya ligamene ko, oya mono oshikethahangano noya nyanyukilwa oku shi mona.

¹⁴ Etemba olya thiki pepya lyomulumentu gwomuBet Shemesh edhina lye Josua e tali thikama popepi nemanya enene. Aantu oya tyaya po etemba noya dhipaga oonzinzi e taye dhi yambele Omuwa efikilondjambo.

¹⁵ Aalevi oya toola po oshikethahangano nokaketha kiiyelekela yoshingoli e taye yi tula pemanya enene. Nena aantu yaBet Shemesh oya yambele Omuwa omafikilondjambo noondjambo oonkwawo.

¹⁶ Aakwaniilwa yatano yAafilisti oya li taye ya undju, sho taa longo ngeyi, noya shuna kuEkron esiku tuu ndyoka.

¹⁷ Aafilisti oya tumu omagano giitumbuka itano yoshingoli kOmuwa okufuta oondjo dhawo; moshilando kehe omwa zi shimwe: Ashdod, Gaza, Ashkelon, Gat naEkron.

¹⁸ Oya tumu wo oombuku dhiingoli; moshilando kehe shaambyoka itano omwa zi yimwe, nayi kale iilandohote nenge omikunda dha kala pontundulu. Emanya enene mepya lyaJosua kuBet Shemesh, moka ya tula oshikethahangano shOmuwa, oko li li sigo onena onzapo yaashoka sha ningilwe ko.

¹⁹ Omuwa okwa dhipaga aalumentu omilongo heyali yokuBet Shemesh, oshoka oya tala moshikethahangano. Aantu noya lili oosa, oshoka Omuwa okwe ya geele ngaaka.

²⁰ Aalumentu yokuBet Shemesh oya ti: “Olye ta vulu okukala koshipala shOmuwa, Kalunga omuyapuki? Omuwa otatu mu fala peni, a ze mokati ketu?”

²¹ Oya tumu aatumwa kaantu yokuKiriat-Jearim taa ti: “Aafilisti oya galula oshikethahangano shOmuwa. Ileni, mu shi kuthe po.”

7

¹ Nena aantu yokuKiriat-Jearim oya kutha po oshikethahangano shOmuwa e taye shi fala megumbo lyomusamane edhina lye Abinadab, ngoka a kala koshikulundundu. Oya yoolola omwana Eleasar, a kale omukeeleli gwasho.

² Oshikethahangano shOmuwa osha kala muKiriatJearim ethimbo ele, omimvo omilongo mbali nokuli. Methimbo ndika Aaisraeli ayehe oya kugile Omuwa ekwatho.

³ Samuel okwa ti koshigwana shaIsrael: “Ngele otamu ka galukila kOmuwa noomwenyo dheni adhihe, etheni iikalunga ayihe iikwiilongo niiyelekela yoshikalungakiintu Astarte. Igamekeni lela kOmuwa noye awike mu simanekeni, note ke mu mangulula miikaha yAafilisti.”

⁴ Onkee Aaisraeli oye etha iiyelekela yawo yaBaal naAstarte noya simaneke Omuwa.

⁵ Nena Samuel okwa tumu kAaisraeli ayehe, ya gongale muMispa ta ti: “Otandi ke mu galikanena koshipala shOmuwa.”

⁶ Oyo oya gongala ayehe muMispa. Oya teke omeya noye ga tilehi okuyambela Omuwa noyi idhilike iikulya esiku alihe. Oyi ihokolola ya ti: “Otwa yono kOmuwa.” (MuMispa omo Samuel u utha iihokolola yAaisraeli.)

⁷ Aafilisti sho ya kundana kutya Aaisraeli oya gongala muMispa, aakwaniilwa yatano oya zi ko naantu yawo, ye ya ponokele. Aaisraeli oye shi uvu noya tila.

⁸ Oya ti kuSamuel: “Dhiginina okugalikana Omuwa Kalunga ketu, e tu hupithe miikaha yAafilisti.”

⁹ Samuel okwa dhipaga onzigona e te yi fikile Omuwa omudhidhi. Nena okwa galikana Omuwa, a gamene Aaisraeli, nOmuwa okwa yamukula egalikano lye.

¹⁰ Samuel manga a li ta yamba omayambo, Aafilisti oya hedha ko oku ya ponokela, ihe Omuwa okwe ya ndundumine kegulu. Oya piyagana e taa tila.

¹¹ Aaisraeli oya zi muMispa e taa tidha Aafilisti sigo okuBet Kar noye ya dhipagele mondjila.

¹² Nena Samuel okwa kutha emanya e te li dhike pokati kaMispa naJeshana. Okwe li luku Ebenezer (Emanya lyekwatho) e ta ti: “Sigo oompaka Omuwa okwe tu kwatha.”

¹³ Osho ngaaka Aafilisti oya dhengwa. Omuwa okwe ya keelele okumatukila oshilongo shaIsrael, Samuel manga a li e na omwenyo.

¹⁴ Iilando ayihe yopokati kaEkron naGat, mbyoka Aafilisti ya li ye yi kwata po, oya shuna kAaisraeli. Osho ngaaka Israel okwa shunithilwa oshilongo she ashihe. Pokati kAaisrael nAakaanana opwa li pu na wo ombili.

¹⁵ Samuel okwa pangele Israel ethimbo alihe ndyoka a li e na omwenyo.

¹⁶ Omumvo kehe okwa yi kolweendo kuBetel, Gilgal naMispa, nomomahala ngaka okwa pulakene iihokolola nokugandja omatokolo.

¹⁷ Nena okwa shuna kaandjawo kuRama, naankoka wo oku utha iihokolola. MuRama okwa tungile Omuwa oshiyambelo.

8

¹ Samuel sho a kulupa, oyana okwe ya ningi aatokolihapu muIsrael.

² Omwana omukuluntu oye Joel, nondenge oAbia; oya li aatokolihapu muBeersheba.

³ Ihe inaa landula oshiholelwa shahe; oya li ya hokwa iimaliwa, onkee oya taamba oombumbo noinaa utha oohapu pamukalo gu uka.

⁴ Nena aawiliki ayehe yaIsrael oya gongala noya yi kuSamuel kuRama.

⁵ Oya ti kuye: “Tala, ngoye owa kulupa, naamwoye inaa landula oshinkoti shoye. Onkee ano tu langekela omukwaniilwa, e tu pangele, opo tu kale tu na omukwaniilwa, ngaashi iilongo yilwe yi li.”

⁶ Samuel okwa li a ninga omwenyo omwiinayi, sho ya pula omukwaniilwa; onkee okwa galikana Omuwa.

⁷ Omuwa okwa ti: “Pulakena kwaashihe shoka aantu taye ku lombwele. Hangoye ya tindi; ongame ya tindi, ndaa kale we omukwaniilwa gwawo.

⁸ Okuza poku ya tembudha muEgipiti oya pilamene ndje e taa simaneke iikalunga yilwe. Ngashingeyi otaye ku ningile shoka haa ningile ndje.

⁹ Ya pulakena ano, ihe ya londodha noonkondo e to ya fatululile nawa shoka omukwaniilwa gwawo te ke ya ningila.”

¹⁰ Oshigwana sho sha li sha hala omukwaniilwa, Samuel okwe shi hokololele omalombwelo agehe gOmuwa.

¹¹ Samuel okwa ti: “Omukwaniilwa gweni ote ke mu pula iinima mbika. Aana yeni aamati ote ke ya ninga aakwiita ye; yamwe yomuyo otaa ka hinga omatembakwiita ge, yamwe otaa ka ninga aakayilinkambe nayamwe otaa ka matuka komeho gomatembakwiita ge.

¹² Ota ka ninga yamwe aambala naakuluntu yomatanga geyuvi, nayamwe oyomatanga gomilongo ntano. Aana yeni otaa ka pulula omapya ge, otaa ka teya iilya ye notaa ke mu hambulila iikondjitho nokupangela omatembakwiita ge.

¹³ Aana yeni aakadhona otaye ke mu longekidhila omigwayo dhiizimba notaye ke mu telekela iithima niikwiila.

¹⁴ Omatathapya geni ote ga kutha po, iitsambe yeni yomiviinu nomiti dheni dhomiolivi e te dhi pe aambala ye.

¹⁵ Ota ka kutha oshitimulongo shiilya yeni noshomandjembele geni, yi ninge yaambala ye aapanguli naambala ooyakwawo.

¹⁶ Ota kutha po aapika yeni niimuna yeni iiwanawa nuusino weni notau mu longele.

¹⁷ Ota ka kutha po oshitimulongo miigunda yeni yoonzi niikombo. Nane yene otamu ningi aapika ye.

¹⁸ Uuna ethimbo ndika tali thiki, otamu ka nyenyetela omukwaniilwa gweni, ngoka mwe mu ihogololele, ihe ita ka uva nando omayemato geni.”

¹⁹ Aantu inaa pupa ko nando kuSamuel, ihe oya ti: “Aawe! Tse otwa hala omukwaniilwa,

²⁰ opo tu kale ngaashi iigwana yilwe, tu kale nomukwaniilwa gwetu yene te tu pangele note tu wilike miita.”

²¹ Samuel okwa pulakene ohapu kehe ye mu lombwele, nena okwa yi nokwe shi lombwele Omuwa.

²² Omuwa okwa yamukula a ti: “Ninga, ngaashi ya hala, ya pa omukwaniilwa.” Nena Samuel okwa lombwele aalumentu ayehe yaIsrael, ya shune komagumbo.

9

¹ Okwa li ku na omunenentu omuyamba edhina lye Kish gwomezimo lyaBenjamin; okwa li omuna gwaAbiel nomutekulu gwaZeror gwomegumbo lyaBekorat, ondhikwa yoludhi lwaAfiak.

² Okwa li e na omwana a shitika edhina lye Saul. Saul okwa li metifa lyonkalamwenyo ye. Okwa li omule, omutse gwe gwa lunda aantu yalwe, noku na ondjelo yi vule yayalwe.

³ Uusino umwe waKish owa kana, nokwa lombwele Saul ta ti: “Kutha omumati gumwe, mu ka konge uusino.”

⁴ Oye ende oshilongo shokoondundu dhaEfraim noshitopolwa shaShalisha, ihe inaye u mona. Onkee oyu uka kuShaalim, ihe uusino kawa li ko nando. Nena oya kongo moshitopolwa shaBenjamin, ihe naankoka inaye u mona ko.

⁵ Sho ye ya moshitopolwa shaZuf, Saul okwa ti komumati: “Natu shune kegumbo, oshoka tate pamwe ita dhiladhila we uusino, ihe otse e na oshimpwiyu natse.”

⁶ Omumati okwa yamukula a ti: “Ihe tala! Moshilando shika omu na omulumentu omuyapuki, ngoka a simana unene, oshoka shaa shoka ta popi, otashi ningi shoshili. Natu ye kuye, otashi vulika te tu lombwele mpoka tatu ka adha uusino.”

⁷ Saul okwa yamukula a ti: “Ngele otatu yi kuye, otatu ke mu pa shike? Moompunda dhetu kamu na we nando oshikwiila, nokatu na sha shoku mu pa, nenge otu na ngaa sha?”

⁸ Omumati okwa yamukula a ti: “Ondi na po ngaa okamaliwa koshisiliveli. Otandi vulu oku ke mu pa, nonena ote ke tu lombwela mpoka tatu vulu oku u mona.”

⁹ Saul okwa yamukula: “Edhiladhilo ewanawa! Natu ye!” Osho ngaaka ya yi koshilando nkoka kwa kala omulumentu omuyapuki. Manga taa londo kondundu yu uka koshilando, oya tsakaneke po aakadhona yamwe ya zi moshilando taa ka teka omeya. Oya pula aakadhona: “Moshilando omu na Omumoni?” (Pethimbo ndiyaka omuhunganeki okwa li hi ithanwa omumoni, onkee shaa ngoka a li a hala okupula sha kuKalunga, okwa ti: “Natu yeni komumoni.”)

¹⁰

¹¹

¹² Aakadhona oya yamukula ya ti: “Eeno, omo e li. Oku li naanaa ho mu uka. Ngele otamu endelele, otamu ke mu adha. Shampa tuu mwa yi moshilando, otamu mu mono. Okwe ya mo nena moshilando, oshoka aantu otaa ka yamba omatselelandjambo koshiyambelo shokondundu. Aantu mboka ya hiywa, itaa tameke okulya, manga omumoni inaa ya ko, oshoka oku na okugalikanena omatselelandjambo tango. Ngele otamu yi ngashingeyi, otamu ke mu adha, manga inaa ya kondundu, a ka lye.”

¹³

¹⁴ Osho ngaaka Saul nomumati gwe oya yi koshilando, nomanga taa yi mo, oya mono Samuel ta zi komeho gawo e li mondjila u uka kehala lyelongelokalunga.

¹⁵ Ihe mesiku lya tetekela Omuwa okwa adhika a ti kuSamuel:

¹⁶ “Ngula pethimbo ngaandika otandi ke ku tumina omulumentu a za mezimo lyaBenjamin. Mu gwayeka, a ninge omuleli gwaantu yandje Aaisraeli. Oye te ke ya mangulula miikaha yAafilisti. Onda mono okuhepekwa kwaantu yandje nondu uvu onkugo yawo.”

¹⁷ Samuel sho a mono Saul, Omuwa okwe mu lombwele a ti: “Omulumentu oye naanaa nguka nde ku lombwelele. Ota ka lela aantu yandje.”

¹⁸ Nena Saul okwa yi u ukilila kuSamuel, ngoka a li popepi nosheelo, e te mu pula ta ti: “Lombwela ndje, omumoni oku li peni?”

¹⁹ Samuel okwa yamukula: “Ongame omumoni. Tetekeleni kehala lyelongelokalunga. Amuhe yaali otamu ka lya pamwe nangame nena. Ngula mokupenduka otandi ka yamukula omapulo geni agehe notandi mu laleke, mu tsikile ondjila yeni.

²⁰ Ngele okombinga yuusino mbu wa kanene konima yomasiku gatatu, inamu ipyakidhila nawo; owa monika nale nokuli. Ihe oshike shoka sha hokiwa unene kAaisraeli? Ongoye mwene negumbo lyaho.”

²¹ Saul okwa yamukula a ti: “Ngame ogwomezimo lyaBenjamin, ezimo eshonashona muIsrael, negumbo lyetu kali na simano lyasha. Omolwashike to lombwele ndje oohapu dha tya ngawo?”

²² Nena Samuel okwa fala Saul nomumati gwe mongulu onene e te ya pe ehala lyokomeho poshitaafula, moka mwa li konyala aayenda omilongo ndatu ya kuutumba.

²³ Samuel okwa ti komuteleki: “Eta ontumba yonyama ndjiyaka nde ku lombwelele, u yi itulile.”

²⁴ Nena omuteleki okwe eta ontumba ombwanawa yokoshilama e te yi tula mekolo lyaSaul. Samuel okwa ti: “Tala, mpaka ope na ontumba ndjoka wa li wa pungulilwa. Onde yi ku hupithile, u yi lye pethimbo ndika pamwe naantu mbaka nda hiya.” Osho ngaaka Saul naSamuel ya lile pamwe esiku ndyoka.

²⁵ Sho ya zi ko kehala lyelongelokalunga ya yi koshilando, oya yalele Saul kontala yongulu

²⁶ nokwa lala nkoka. Pokupita kwetango Samuel okwi ithana Saul kontala a ti: “Penduka. Otandi ku thindikile, ndi ku laleke.” Saul okwa penduka nokwa thindikilwa kuSamuel.

²⁷ Sho ya thiki pooha dhoshilando, Samuel okwa ti kuSaul: “Lombwela omumati, a tetekele komeho getu.” Omumati okwa yi, naSamuel okwa tsikile a ti: “Kala mpaka okathimbo, notandi ku lombwele shoka Kalunga a ti.”

10

¹ Nena Samuel okwa kutha ohanga yomagadhi e te ga tile komutse gwaSaul e te mu thipi komilungu e ta ti: “Omuwa okwe ku gwayeke, u ninge omuleli gwaantu ye Aaisraeli. Oto ka lela aantu mbaka e to ya popile kaatondi yawo. Naandika olyo endhindhiliko kungoye kutya Omuwa okwe ku hogolola, u ninge omuleli gwaantu ye:

² Shaa wa zi pungame nena, oto ka tsakaneka aalumentu yaali popepi nombila yaRakel puZelzak moshitopolwa shaBenjamin. Otaye ke ku lombwela kutya uusino mboka to kongo, owa monika, onkee ho ke na we oshimpwiyu nawo, ihe onangoye noti ipula: ‘Akwetu, ote ningi ngiini molwomumwandje?’

³ Okuza mpoka oto ka tsikila, sigo wa thiki pomwandi gwiidhila puTabor, mpoka to ka tsakaneka aalumentu yatatu mondjila taa ka yamba omayambo kuKalunga kuBetel. Gumwe gwomuyo okwa humbata uukombwena utatu, mukwawo okwa humbata iikwiila itatu nomutitatu okwa humbata ombago yu udha omaviinu.

⁴ Otaye ke ku kunda e taa ku pe iikwiila iyali, mbyoka u na oku yi taamba.

⁵ Nena oto ka ya kondundu yaKalunga muGibea, nkoka ku na ontanda yAafilisti. Posheelo shoshilando oto ka tsakaneka ongundu yaahunganeki taa zi koshiyambelo kondundu taa hiki uuharpa, oontunda, oohiya nuushandja yo taa kakuka.

⁶ Nanziya ombepo yOmuwa otayi ya mungoye noto kakuka pamwe nayo e to lunduluka.

⁷ Shaa iinima mbika ya ningwa, nena ninga shoka Kalunga te ku ulukile, u shi ninge.

⁸ Oto ka tetekela ndje kuGilgal, nkoka tandi ke ku tsakaneka noku ka yamba omafikilondjambo nomakwatathanondjambo. Tegelela nkoka omasiku gaheyali, sigo tandi ya, ndi ku lombwele shoka u na okuninga.”

⁹ Saul sho a punguluka, a ze po puSamuel, Kalunga okwe mu shitulula. Naashihe shoka e shi lombwelwa kuSamuel, osha ningwa esiku ndyoka.

¹⁰ Saul nomumati gwe sho ya thiki kuGibea, ongundu yaahunganeki oye mu tsakaneke. Ohaluka ombepo yaKalunga oye ya muye, nokwa tameke okukakuka pamwe nayo.

¹¹ Aantu mboka ya li ye mu shi nale, sho ye mu mono mokati kaahunganeki, oya pulathana ya ti: “Oshike sha adha omuna gwaKish? Saul okwa ningi omuhunganeki?”

¹² Omulumentu gumwe gwaankoka okwa pula a ti: “Aahunganeki mbaka yalwe oolye, noohe oolye?” Mpaka opwa zi omukalo gwokupula: “NaSaul wo okwa ningi omuhunganeki?”

¹³ Saul sho a mana okukakuka, okwa yi koshiyambelo kondundu.

¹⁴ Hekulu yaSaul okwe mu mono pamwe nomumati nokwe ya pula a ti: “Omwa li peni?” Saul okwa yamukula a ti: “Otwa li tatu kongo uusino. Sho twa nyengwa oku u mona, otwa yi kuSamuel.”

¹⁵ Hekulu yaSaul okwa pula: “Okwe mu lombwele shike?”

¹⁶ Saul okwa yamukula a ti: “Okwe tu lombwele kutya owa monika,” ihe ina lombwela hekulu shoka a lombwelwa kuSamuel kutya ota ningi omukwaniilwa.

¹⁷ Samuel okwa gongaleke aantu kelongelokalunga muMispa

¹⁸ nokwa ti kuyo: “Omuwa Kalunga kaIsrael ota ti: ‘Onde mu tembudha muEgipiti nonde mu yululula miikaha yAayegipiti noyaantu yalwe mboka ya li taye mu hepeke.

¹⁹ Ongame Kalunga keni, ngoka nde mu mangulula momaudhigu nomomaupyakadhi geni agehe, ihe nena omwa dhini ndje nomwi indile ndje, ndi mu pe omukwaniilwa. Ano ngashingeyi gongaleni koshipala shOmuwa ezimo nezimo, oludhi noludhi.’ ”

²⁰ Samuel okwa hedhitha kuye omazimo agehe, Omuwa nokwa totha mo ezimo lyaBenjamin.

²¹ Nena Samuel okwa hedhitha kuye omaludhi gomezimo lyaBenjamin, noludhi lwaMatri olwa tomonwa mo. Nena aalumentu yomoludhi lwaMatri oye ya po, naSaul yaKish okwa tothwa mo. Oye mu kongo, ihe sho ya li kaaye mu wete,

²² oya pula Omuwa ya ti; “Ope na ngaa natango omuntu gulwe mpano?” Omuwa okwa yamukula a ti: “Saul oye ngwiyaka a holama konima yomatemba.”

²³ Mbaka oya matuka noye eta mo Saul e taye mu thikameke mokati koshigwana. Oya dhimbulula kutya oye omule, omutse gwe ogwa lunda aantu ayehe yalwe.

²⁴ Samuel okwa ti koshigwana: “Omulumentu oye nguka a hogololwa kOmuwa. Mokati ketu kamu na muntu e mu fa.” Aantu ayehe oyi igidha ya ti: “Omukwaniilwa na kale aluhe e na omwenyo!”

²⁵ Samuel okwa fatululile aantu oompango niinakugwanithwa yomukwaniilwa nokwe yi nyolele membo, ndyoka e li pungula muuyapuki. Nena okwa shunitha aantu kaandjawo.

²⁶ Saul naye wo okwa yi kaandjawo kuGibea. Aalumentu yamwe aanankondo, mboka oomwenyo dhawo dha li dha gumwa kuKalunga, oya yi naye.

²⁷ Ihe aadhudhu yamwe oya ti: “Omumentu nguka ota vulu ngiini, e tu ningile uuwanawa washa?” Oya dhini Saul noinaye mu etela nando omagano gasha.

11

¹ Konyala omwedhi gumwe sho gwa piti po, Nahash, omukwaniilwa gwaAmmon, okwa ka kondjitha Jabesh shomuGilead nokwe shi kondeke. Aantu yomuJabesh oya ti kuNahash: “Uvathana natse, notatu ku taamba, u ninge omuleli gwetu.”

² Nahash okwa yamukula a ti: “Otandi ka uvathana nane, ngele tamu zimine, ndi tsipule mo eho lyokolulyo lyomuntu kehe, opo ndi sithe Aaisraeli ayehe ohoni.”

³ Aawiliki yomuJabesh oya ti: “Tu pa omasiku gaheyali, tu tume aatumwa noshilongo ashihe shaIsrael. Ngele kape na ngoka te tu kwatha, nena otatu ningi aantu yoye.”

⁴ Aatumwa oya thiki kuGibea, nkoka kwa kala Saul. Sho ya tseyitha oshinima shika, aantu oya tameke okulila.

⁵ Saul okwa adhika opo te ya ta zi kepya noonani dhe nokwa pula: “Oshike ano? Omolwashike aantu taa lili?” Oye mu hokololele elaka lyaatumwa mboka ya zi kuJabesh.

⁶ Saul sho e shi uvu, ombepo yaKalunga oye ya muye, nokwa geye noonkondo.

⁷ Okwa kutha oonani mbali e te dhi tetagula iintimbu nokwa tumu aatumwa ya humbata iintimbu taye ende noshilongo ashihe ye na elondodho ndika: “Shaa ngoka itaa landula Saul naSamuel molugodhi, oonani dhe osho tadhi ka ningwa ngeyi!” Aaisraeli oya tilithwa kushoka Omuwa ta vulu okuninga, onkee aantu ayehe oya gongala.

⁸ Saul okwe ya gongele puBesek. Okwa li aantu 300 000 ya za kuIsrael na 30 000 ya za kuJuda.

⁹ Oya lombwele aatumwa mboka ya zi kuJabesh: “Ka lombweleni yakweni kutya ngula pokati komutenya otaa ka kala ya hupithwa.” Aantu yokuJabesh sho yu uvu elaka ndika, oye li nyanyukilwa

¹⁰ e taa ti kuNahash: “Ngula otatu igandja miikaha yeni, notamu vulu oku tu ninga, ngaashi mwa hala.”

¹¹ Ongula onene yesiku lya landula, Saul okwa topola aantu ye momatanga gatatu noya matukile ontanda yaatondi e taa ponokele Aayammoni. Edhipago olya tsikile sigo opokati komutenya. Aahupipo oya halakana, shaa ngoka okwi iyukile.

¹² Nena Aaisraeli oya ti kuSamuel: “Aantu mboka ya tile kutya Saul ita ningi omukwaniilwa gwetu, oye li peni? Naa ye kutse, tu ya dhipage!”

¹³ Ihe Saul okwa ti: “Kape na muntu ta dhipagwa nena, oshoka esiku ndika Omuwa okwa hupitha Israel.”

¹⁴ Samuel okwa ti kuyo: “Natu yeni atuhe kuGilgal, tse tu koleke elangeko lyaSaul muukwaniilwa.”

¹⁵ Onkee ayehe oya yi kuGilgal, nokoshipala shOmuwa oya langeke Saul muukwaniilwa. Oya yamba omakwatathanondjambo, naSaul nAaisraeli ayehe oya dhana oshituthi shenyanyu enenenene.

12

¹ Samuel okwa lombwele Aaisraeli a ti: “Onda gwanitha shoka mwa pula ndje, ndi shi ninge. Onde mu pe omukwaniilwa, e mu lele.

² Ngashingeyi omu mu na, e mu wilike. Ngame onda kulupa ndi na oomvi, naamwandje oya li mokati keni. Onda kala omuwiliki gweni okuza muugundjuka wandje sigo ongashingeyi.

³ Ongame nguka. Ngele onda ninga sha mepuko, tamanekii ndje nena koshipala shOmuwa noshomukwaniilwa ngoka e mu hogolola. Onda yuga po ongombe yomuntu nenge okasino ke? Onda kotokela omuntu nenge nde mu thiminika? Ope na ngoka nda taamba ombumbo ye? Ngele onda ninga sha sha tya ngaaka, otandi ka futila po shoka nda kutha po.”

⁴ Aantu oya yamukula ya ti: “Aawe, ino kotokela nenge u tu thiminike; ino kutha po nando osha shomuntu.”

⁵ Samuel okwa yamukula a ti: “Omuwa pamwe nomukwaniilwa ngoka e mu hogolola oyo oonzapo nena ndjika, sho mwa mono ndje ndaa na uusama washa.” Oya yamukula: “Eeno, Omuwa oye onzapo yetu.”

⁶ Samuel okwa tsikile a ti: “Omuwa oye a hogolola Moses naAaron nokwa tembudha oohokulu muEgipiti.

⁷ Ngashingeyi mweneni, ndi mu tamanekele koshipala shOmuwa nondi mu dhimbuluthe iilongankondo ayihe Omuwa e yi ningi, sho e mu hupitha noohokulu.

⁸ Jakob negumbo lye olya tembukile kuEgipiti nAayegipiti oye ya hepeke, oohokulu oya kugu onkugo kOmuwa, e ya kwathe. Omuwa okwa tumu Moses naAaron, mboka ye ya tembudha muEgipiti noye ya eta mevi ndika.

⁹ Ihe aantu oya dhimbwa Omuwa Kalunga kawo, onkee okwe ya ethele miikaha yAafilisti noyomukwaniilwa gwaMoab naSisera, ondjayi yetanga lyoshilando Hazor, noye ya kondjitha e taye ya sindi.

¹⁰ Nena oya pula ekwatho kOmuwa noya ti: ‘Omuwa, otwa yono, oshoka otwe ku pilamene notwa simaneke iimenka yaBaal naAstarte. Tu mangulula momake gaatondi yetu, notatu ke ku simaneka.’

¹¹ Omuwa nokwe ya tumine Gideon naBarak nosho wo Jefta nohugunina ongame. Kehe gumwe gwomutse, okwe mu mangulula miikaha yaatondi yeni, nomwa kala megameno.

¹² Ndele sho mwa mono Nahash, omukwaniilwa gwAayammoni, te mu matukile, omwa tindi Omuwa, a kale omukwaniilwa gweni nomwa lombwele ndje mwa ti: ‘Otwa hala omukwaniilwa, e tu pangele.’

¹³ “Ngashingeyi omukwaniilwa ngu mwa hogolola, oye nguka; one mwe mu pula, ngashingeyi Omuwa okwe mu mu pe.

¹⁴ Ngele ne amuhe nomukwaniilwa gweni otamu simaneke Omuwa Kalunga keni, tamu mu longele, tamu mu pulakene notamu vulika kiipango ye, nena ayihe otayi ke enda nawa.

¹⁵ Ihe ngele itamu vulika kOmuwa, ihe tamu kala aatangalali ne itamu vulika kiipango ye, ote ke mu geela kumwe nomukwaniilwa gweni.

¹⁶ Ngashingeyi ngungumaneni ano notamu ka mona iinima iinene Omuwa te ke yi ninga.

¹⁷ Ethimbo ndika lyongashingeyi olyokwenye, ihe otandi indile Omuwa, a ndundumithe omityalakato nokulokitha omvula. Shika shampa sha ningwa, otamu dhimbulula kutya ne omwa yono nayi kOmuwa, sho mwe mu pula omukwaniilwa.”

¹⁸ Samuel okwa galikana, nomesiku tuu ndyoka Omuwa okwa ndundumitha omvula noku yi lokitha. Nena aantu ayehe oya tila Omuwa naSamuel

¹⁹ noya ti kuSamuel: “Ombili, tatekulu, tu galikanena kOmuwa Kalunga koye, opo twaa se. Ngashingeyi otwa dhimbulula kutya kakele komayono getu galwe, otwa gwedha ko ndika, sho twi indile omukwaniilwa.”

²⁰ Samuel okwa yamukula a ti: “Inamu tila. Nando omwa ningi uuwinayi u thike mpoka, inamu pilamena Omuwa, ihe mu longeleni nomutima aguhe.

²¹ Inamu landula iikalunga yiifundja; itayi vulu oku mu kwatha nenge oku mu hupitha, oshoka kayi shi yoshili.

²² Omuwa oku uvaneke noite mu etha nando, oshoka okwa tokola, e mu ninge oshigwana she.

²³ Ihe ngame, nashi kale ndje kokule, ndaa yone kuye, ngele itandi mu galikanene. Ondi na oku mu longa wo shoka oshiwananawa noshu uka.

²⁴ Vulikeni kOmuwa, ne mu mu longele nuudhigini nomitima dheni adhihe. Dhimbulukweni iinima iinene e yi mu ningile.

²⁵ Ihe ngele tamu tsikile okuyona, nena amuhe nomukwaniilwa gweni otamu ka hanagulwa po.”

13

¹ Saul okwa li e na oomvula omilongo ntano, nokwa li omukwaniilwa omimvo omilongo mbali nambali.

² Saul okwa hogolola aalumentu omayuvi gatatu. Okwa kaleke omayuvi gaali puye muMikmash nokombinga yokoondundu dhaBetel. Eyuvi limwe okwe li tumu nomwana Jonatan kuGibea, moshitopolwa shezimo lyaBenjamin. Aantu yalwe Saul okwe ya shunitha kaandjawo.

³ Jonatan okwa dhipaga ondjayi yiita yAafilisti muGeba, nAafilisti ayehe oye shi uvu. Nena Saul okwa tumu aatumwa, ya ka hike ombenda noshilongo ashihe nokuhiyila Aahebeli kiita.

⁴ Aaisraeli ayehe oya li ya lombwelwa kutya Saul okwa dhipaga ondjayi yiita yAafilisti, nAafilisti oya li ye ya tonde. Omolwashoka Aaisraeli oye ya kuGilgal, ya landule Saul kiita.

⁵ Aafilisti oya gongala, ya kondjithe Aaisraeli; oya li ye na omatembakwiita omayuvi omilongo ndatu, aakawilinkambe omayuvi gahamano naakwiita oyendjiyendji ya fa ehekevi lyomooha dhefuta. Oya yi kuMikmash, kuuzilo waBetaven, noya yungu ontanda nkoka.

⁶ Aaisraeli sho ya mono kutya oya li moshiponga oshinene, oya holama momakololo nokomitutu nenge pokati komamanya nenge miikweyo nomomithima.

⁷ Yakwawo oya taaguluka omulonga Jordan e taa yi koshitopolwa shaGad noshaGilead. Saul okwa li natango muGilgal. Aantu mboka ya li puye, oya li taa kakama kuumbanda.

⁸ Omasiku gaheyali okwa tegelele Samuel, ngaashi e mu lombwelele, e shi ninge, ihe Samuel ka li e ya natango kuGilgal. Aantu oya tameke okuthiga po Saul.

⁹ Onkee ano okwa ti kuyo: “Etelii ndje efikilondjambo nekwatathanondjambo.” Okwa yamba efikilondjambo.

¹⁰ Samuel okwe ya, manga Saul a li pokuzimbuka. Saul okwa yi, e ke mu kunde,

¹¹ ihe Samuel okwa ti: “Owa ningi shike?” Saul okwa yamukula a ti: “Aantu oya li taa thigi ndje po, nangoye wo ino ya pethimbo ndyoka wa tile, nando Aafilisti oya gongala muMikmash.

¹² Onda dhiladhila kutya Aafilisti otaa ka ponokela ndje muka muGilgal, manga inaandi konga ekwatathano nOmuwa. Onkee onda li ndu uvite ndi na okuyamba efikilondjambo.”

¹³ Nena Samuel okwa yamukula a ti: “Owa ningi nayi. Ino vulika koshipango shOmuwa Kalunga koye e shi ku pa. Ando owa li wa vulika, ando okwe ku etha noluvalo lwoye, mu lele Aaisraeli sigo aluhe.

¹⁴ Ihe ngashingeyi elelo lyoye itali ka kalelela we. Oshoka ino vulika kuye, Omuwa ote ki imonena omulumentu e mu opalela note mu ningi omuleli gwaantu ye.”

¹⁵ Samuel okwa zi muGilgal nokwa tsikile ondjila ye. Oshihupe shaantu osha landula Saul, sho a ka tsakaneka aakwiita ye. Oya zi kuGilgal yu uka kuGibea moshitopolwa shaBenjamin. Saul okwa konakona omatanga ge, konyala aalumentu ye thike pomathele gahamano.

¹⁶ Saul nomwana Jonatan naakwiita yawo oya yungu ontanda muGeba moshitopolwa shaBenjamin. Ontanda yAafilisti oya li muMikmash.

¹⁷ Montanda yAafilisti omwa zi omatanga gatatu, ga ka homone. Etanga limwe olyu uka lwokuOfra moshitopolwa shaShual,

¹⁸ ekwawo olyu uka lwokuBethoron, netitatu olyu uka kongamba pooha dholusilu lwaSeboim nombuga.

¹⁹ Pethimbo ndiyaka muIsrael kamwa li aahambudhi nando ogumwe, oshoka Aafilisti oye ya keelele okuhambula omagongamwele nomagonga.

²⁰ (Aaisraeli oya li ye na okuya kAafilisti, opo ya upikithe iipululo, omatemo, omakuya niimwitho yawo.

²¹ Ofuto oya li okamaliwa kamwe okuupikitha ekuya nenge okwoopalekitha epanda nuumaliwa uyali okuupikitha oshipululo nenge etemo.)

²² Onkee ano kakele kaSaul nomwana Jonatan, mesiku lyolugodhi muIsrael kamwa li nando omukwiita e na egongamwele nenge egonga.

²³ Aafilisti oya tumu etanga lyaakwiita, li popile etaulilo lyokuMikmash.

14

¹ Esiku limwe Jonatan okwa lombwele omuhumbati gwomatati ge a ti: “Tu taaguluke, tu ye kontanda yAafilisti.” Ihe Jonatan ina lombwela nando he Saul,

² ngoka a li a yungu ontanda momuti omugranati muMigron popepi naGibea; okwa li e na aalumentu konyala omathele gahamano.

³ (Omuyambi ngoka a zala omapepenguwo, okwa li Ahija yaAhitub. Ahitub okwa li omumwayina gwaIkabod yaPinehas nomutekulu gwaEli, ngoka a li nale omuyambi gwOmuwa muShilo.) Aantu inaa tseya kutya Jonatan okwa ya.

⁴ Metaulilo lyaMikmash, moka Jonatan a li e na okweenda, e ye kontanda yAafilisti, mondjila omwa li omamanya gaali, Bozez naSene ga tegama.

⁵ Ndyoka lya taalela kuMikmash, olya li kombinga yuumbangalantu wetaulilo, nekwawo lya taalela kuGeba, okombinga yuumbugantu.

⁶ Jonatan okwa ti komumati: “Natu ye popepi nontanda yAafilisti mboka aapagani. Pamwe Omuwa te tu kwatha. Ngele ote shi ningi, nena kape na shoka tashi mu imbi, e tu pe esindano, nando otu li po aashona.”

⁷ Omumati okwa yamukula a ti: “Shaa shoka wa hala u ninge, ondi li pamwe nangoye.”

⁸ Jonatan okwa ti: “Onawa. Otatu ka taaguluka e tatu yi montaneho yAafilisti.

⁹ Ngele otaye tu lombwele, tu ya tegelele, nena otatu thikama mpoka tu li.

¹⁰ Ihe ngele otaye tu lombwele, tu ye kuyo, nena natu ye, oshoka shika osho endhindhiliko kutya Omuwa okwe tu pa esindano, tu ya sinde.”

¹¹ Ano oyi imonitha kAafilisti, nAafilisti oya ti: “Taleni! Aahebeli yamwe oyo mbeyaka taa hololoka momakololo moka ya li ya holama.”

¹² Nena oyi igidha Jonatan nomumati ya ti: “Ileni huka! Otu na sha oku mu lombwela.” Jonatan okwa ti komumati: “Landula ndje. Omuwa okwa gandja esindano kuIsrael, e ya sinde.”

¹³ Jonatan okwa londo ta kookaya ta zi metaulilo, nomumati okwe mu landula. Jonatan okwa ponokele Aafilisti e te ya hata pevi, nomumati okwe ya dhipaga.

¹⁴ Meponokelo ndika lyotango Jonatan nomumati oya dhipaga konyala aalumentu omilongo mbali mehala eshona.

¹⁵ Aafilisti ayehe montanda oya haluka; aaponokeli naakwiita Aafilisti oya kwatwa kuumbanda; evi olya kakama, nokwa li epiyagano enene.

¹⁶ Aalangeli yaSaul muGibea moshitopolwa shaBenjamin oya mono Aafilisti taa matuka mepiyagano.

¹⁷ Nena Saul okwa ti kaantu ye: “Yaluleni aakwiita, mu mone mboka yaa po.” Oye shi ningi noya mono kutya Jonatan nomumati gwe ngoka ha humbata omatati ge, kaye po.

¹⁸ Saul okwa lombwele omuyambi Ahija ta ti: “Eta omapepenguwo huka.” (Esiku ndyoka Ahija okwa li e ga zala montaneho yAaisraeli.)

¹⁹ Manga Saul ta popi ta lombwele omuyambi, epiyagano montanda yAafilisti olya lundu pombanda noonkondo. Nena Saul okwa ti kuAhija: “Kape na ompito okupula omayele kOmuwa.”

²⁰ Opo ihe oya matukile kolugodhi okukondjitha Aafilisti, mboka ya li taa kondjithathana molwokupiyagana kwawo.

²¹ Aahebeli yamwe mboka ya li ya gama kombinga yAafilisti noya yi nayo kontanda, oye ya pilukile e taa gama kuSaul naJonatan.

²² Yalwe mboka ya li ya holama moondundu dhaEfraim, oyu uvu kutya Aafilisti otaa yi ontuku. Onkee oya gama kuyakwawo e taa ponokele Aafilisti.

²³ Oya kondjo ondjila ayihe, sigo ya kondo Betaven. Omuwa okwa hupitha Israel esiku ndyoka.

²⁴ Aaisraeli oya li ya loloka noya sa ondjala esiku ndyoka, oshoka Saul okwa li a gandja nokugana oshipango tashi ti: “Shaa ngoka ta li sha nena, manga inaandi galulila aatondi ondjahi yandje, na thingwe.” Onkee kakwa li omuntu a li a lya sha esiku alihe.

²⁵ Ayehe oye ya mokuti, naakuhe oya mono omagadhi goonyushi.

²⁶ Okuti okwa li ku udha omagadhi goonyushi, ihe kapwa li ngoka a vulu oku ga lya, oshoka ayehe oya li ya tila etulomutima lyaSaul.

²⁷ Ihe Jonatan okwa li inaa uva kutya he okwa tilitha aantu nethingo. Onkee okwa hoyo nondhimbo ndjoka a li nayo, a tsu mo mehila lyoonyushi nomagadhi oga zi mo e ta li. Ohaluka okwa ndjangumukwa nawa.

²⁸ Ihe gumwe gwomaantu okwa ti: “Tse atuhe otwa sa ondjala, ihe ho okwe tu kotokele a ti: ‘Oongoka ta li sha nena, na thingwe.’ ”

²⁹ Jonatan okwa yamukula a ti: “Akwetu, tate okwa ningile aantu ye iihuna yi thike peni! Taleni, nkene nda ndjanga, sho nda makele omagadhi goonyushi.

³⁰ Ando aantu yetu ya lile iikulya mbyoka ye yi kutha aatondi, ando oya ndjanga ngiini noya dhipaga Aafilisti yangapi!”

³¹ Esiku ndyoka Aaisraeli oya dhenge Aafilisti noye ya tidhagana ondjila ayihe okuza kuMikmash sigo okuAjalon. Ihe Aaisraeli oya li ya nongwa nayi kondjala.

³² Oya mbulukutile koshihakanwa ye shi yugu aatondi, oya kutha oonzi noongombe noya tselele mpoka noya li onyama yi na ombinzi.

³³ Saul okwa lombwelwa kwa tiwa: “Tala, aantu otaa yono kOmuwa, sho taa li onyama yi na ombinzi.” Saul okwi igidha a ti: “Yagwaaleki ne! Galangatithilii ndje huka emanya enene.”

³⁴ Okwe ya lombwele ishewe a ti: “Indeni mokati kaantu, mu ya lombwele, ye ete oongombe dhawo noonzi huka. Naye dhi tsele yo ye dhi lile mpaka; inaa yona kOmuwa mokulya onyama yi na ombinzi.” Uusiku mbwiyaka oye eta iimuna yawo ayihe noye yi tselele mpoka.

³⁵ Saul okwa tungile Omuwa oshiyambelo; osho oshiyambelo shotango a tungile Omuwa.

³⁶ Saul okwa ti kaantu ye: “Natu ka tidhagane Aafilisti uusiku, tu ya yuge, sigo taku shi tse tu ya dhipage ayehe.” Oya yamukula ya ti: “Ninga shoka wa tala sho opala.” Ihe omuyambi okwa ti: “Natu puleni tango Kalunga.”

³⁷ Saul okwa pula Kalunga a ti: “Nandi ka ponokele Aafilisti? Oto ke tu pa esindano?” Ihe Kalunga ina yamukula esiku ndyoka.

³⁸ Nena Saul okwa ti kaawiliki yoshigwana: “Ileni huka, mu konakone kutya epuko oli li peni nena.

³⁹ Otandi uvaneke koshipala shaKalunga omunamwenyo, ngoka ta pe Israel esindano, kutya omunandjo ngoka ota ka dhipagwa, nando na kale omumwandje Jonatan.” Ihe kapwa li ngoka a popya sha.

⁴⁰ Nena Saul okwa ti kuyo: “Amuhe thikameni kombinga ndjiyaka, manga tse naJonatan tatu thikama kombinga ndjika.” Oya ti: “Ninga shoka sho opala momeho goye.”

⁴¹ Saul okwa ti kOmuwa Kalunga kaIsrael: “Omuwa, oshike inoo yamukula ndje nena? Omuwa Kalunga kaIsrael, yamukula ndje momamanya omayapuki. Ngele uusama owaJonatan nenge owandje, yamukula muUrim; ihe ngele owaantu yoye Aaisraeli, yamukula muTummim.” Eyamukulo olyu ulike Jonatan naSaul, aantu noya manguluka.

⁴² Nena Saul okwa ti: “Tokola pokati ketu nomumwandje Jonatan.” Jonatan oku ulikwa.

⁴³ Nena Saul okwa pula Jonatan: “Owa ninga shike?” Jonatan okwa yamukula: “Onda lya uugadhi woonyushi. Ongame nguka, ondi ilongekidhila okusa.”

⁴⁴ Saul okwa ti kuye: “Jonatan, Kalunga na dhenge ndje, ndi se, ngele ito dhipagwa!”

⁴⁵ Ihe aantu oya ti kuSaul: “Ngiini? Jonatan a se, ngoka a sindile Israel esindano enene? Aawoo! Otatu gana kuKalunga omunamwenyo kutya ita ka kanitha nando ondali yefufu lyokomutse gwe. Shoka a ningi nena, okwe shi ningi kekwatho lyaKalunga.” Osho ngaaka aantu oya popile Jonatan, kaa se.

⁴⁶ Konima yaashika Saul okwa galuka okulandula Aafilisti, noya shuna koshilongo shaandjawo.

⁴⁷ Saul sho a ningi omukwaniilwa gwaIsrael, okwa kondjitha aatondi ye ayehe koombinga adhihe: Aamoabi, Aayammoni nAaedomi, aakwaniilwa yaZoba, nAafilisti. Shaa nkoka a ka kondja, okwa sindana.

⁴⁸ Okwa kondjo nuupenda nokwa dhenge nokuli Aayamaleki. Okwa mangulula Aaisraeli kwaamboka ya li haye ya yugu.

⁴⁹ Aana aamati yaSaul oya li Jonatan, Ishvi naMalkishua. Omwana omukadhona omukuluntu oye Merab, nomushona oMikal.

⁵⁰ Omukadhi okwa li Ahinoam yaAhimaaz; ondjayi yetangakwiita lye oAbner, omuna gwomumwahegona Ner.

⁵¹ He yaSaul, Kish, nahe yaAbner, Ner, oya li aana yaAbiel.

⁵² Ethimbo alihe mokukala kwe Saul okwa kondjitha Aafilisti. Shampa a mono omulumentu omunankondo nofule, okwe mu taamba momatanga ge.

15

¹ Samuel okwa ti kuSaul: “Ngame onda tumwa kOmuwa, ndi ku gwayeke omukwaniilwa gwaantu ye Aaisraeli. Ngashingeyi pulakena shoka Omuwa Omunankondoawike ta ti.

² Ota ka geela Aayamaleki, molwashoka oohekulu oya kondjitha Aaisraeli, sho ya li taa zi kuEgipiti.

³ Inda, u ka matukile Aayamaleki, u hanagule po thilu ashihe ye shi na. Ino hupitha nando osha; dhipaga aalumentu, aakiintu, aanona nuuhanona; oongombe, oonzi, oongamelo nuusino.”

⁴ Saul okwa hiya omatanga ge, ga gongale e te ga konakona puTelem: okwa li aakwiita 200 000 ya za muIsrael na 10 000 ya za muJuda.

⁵ Nena okwa yi naantu ye koshilando shAayamaleki noya langele momulonga gwa pwina.

⁶ Saul okwa londodha Aakeni a ti: “Zii mo, mu thige po Aayamaleki, opo ndaaye mu dhipage pamwe nayo, oshoka oohokulu oya li ya ningi nawa Aaisraeli, sho ya zi kuEgipiti.”

⁷ Saul okwa dhenge Aayamaleki ta kondjo ondjila ayihe okuza kuHavila sigo okuShur, kuuzilo waEgipiti.

⁸ Okwa kwata Agag, omukwaniilwa gwAayamaleki, e na omwenyo, nokwa dhipaga aantu ayehe.

⁹ Ihe Saul naantu ye oya hupitha Agag noinaa dhipaga oonzi oombwanawa, oongombe dho ondoka, uutana wo opala nuunzona nenge shaa shoka shi na ondilo; oya hanagula po ayihe mbyoka yaa na shilonga noyaa na mwago.

¹⁰ Omuwa okwa ti kuSamuel:

¹¹ “Onde ehama komwenyo, sho nda ningi Saul omukwaniilwa; okwa pilamene ndje noinaa vulika kiipango yandje.” Samuel okwa li a geya nokwa galikana Omuwa uusiku auhe.

¹² Ongula sho kwa shi, okwa meneka, a ka konge Saul. Oku uvu kutya Saul okwa yi koshilando Karmel, nkoka i itungile ondhimbulutho, nokwa yi ihe kuGilgal.

¹³ Samuel okwa yi kuSaul. Saul okwe mu kundu ta ti: “Omuwa ne ku yambeke. Onda vulika kelombwelo lyOmuwa.”

¹⁴ Samuel okwa pula a ti: “Ongiini ano, ondu uvite oongombe tadhi komo noonzi tadhi lili?”

¹⁵ Saul okwa yamukula a ti: “Aantu yandje oye dhi yugu Aayamaleki. Oya hupitha oonzi oombwanawa noongombe dho ondoka dhokuyambela Omuwa Kalunga koye omayambo, ihe ayihe yilwe otwe yi yono po thilu.”

¹⁶ Samuel okwa ti: “Mwena thilu, ndi ku lombwele shoka Omuwa a lombwele ndje uusiku wonena.” Saul okwa ti: “Lombwela ndje.”

¹⁷ Samuel okwa ti: “Nando ngoye oho idhini, ongoye omuwiliki gwomazimo gaIsrael. Omuwa okwe ku gwayeke omukwaniilwa gwaIsrael

¹⁸ nokwe ku tumu nelombwelo lyokuhanagula po Aayamaleki mboka aakolokoshi. Okwe ku lombwele, u kondje, sigo we ya dhipaga ayehe.

¹⁹ Omolwashike inoo vulika kuye? Oshike wu uluma okuyuga iihakanwa nowa ningi shoka inaashi opalela Omuwa?”

²⁰ Saul okwa yamukula: “Ihe onda vulika kOmuwa. Onda yi, ngaashi a lombwele ndje, onde eta omukwaniilwa Agag nonda dhipaga Aayamaleki ayehe.

²¹ Ihe aantu yandje inaa dhipaga oonzi noongombe oombwanawa ndhoka ye dhi kwata, ihe oye dhi etelele nkuka kuGilgal, ye dhi yambele Omuwa Kalunga koye omayambo.”

²² Samuel okwa ti: “Omuwa okwa hokwa shike: evuliko nenge omayambo noontselelandjambo? Okuvulika kuye okuwanawa ku vule oondjambo dhoonzi dho opala.

²³ Okwaavulika kOmuwa oku thike pamwe nuumpulile, nuutangalali owo ondjo yi shi kuyelekwa nokulongela iimenka. Molwashoka owe ekelehi elombwelo lyOmuwa, naye wo e ku ekelehi waa kale we omukwaniilwa.”

²⁴ Saul okwa yamukula: “Eeno, onda yono. Onda li nda tila aantu yandje nonda ningi shoka ya li ya hala.

²⁵ Ihe ngashingeyi otandi ku indile: dhimina ndje po ondjo yandje e to zimine ndje, tu ye pamwe kuGilgal, ndi ka simaneke Omuwa.”

²⁶ Samuel okwa yamukula: “Itandi shuna nando nangoye. Ngoye owe ekelehi elombwelo lyOmuwa, naye wo e ku ekelehi, waa kale we omukwaniilwa gwaIsrael.”

²⁷ Nena Samuel okwa punguluka, a thige po Saul, ihe Saul okwe mu kwata kelwaakani, olyo nolya tuuka.

²⁸ Samuel okwa ti kuye: “Nena tuu ndjika Omuwa okwe ku kutha uukwaniilwa waIsrael nokwe u pe ngoka u ku vule.

²⁹ Kalunga omupangelinkondo gwaIsrael iha fundju nenge a lundulule omadhiladhilo ge. Ke shi omuntu — iha lundulula nando omadhiladhilo ge.”

³⁰ Saul okwa yamukula a ti: “Onda yono. Ihe simaneka ndje montaneho yaawiliki yaantu yandje nAaisraeli ayehe. Zimina ndje, tu ye pamwe, opo ndi ka simaneke Omuwa Kalunga koye.”

³¹ Onkee Samuel okwa yi pamwe naye kuGilgal, Saul nokwa simaneke Omuwa.

³² Samuel okwa popi a ti: “Etelii ndje omukwaniilwa Agag.” Agag okwe ya kuye ta kakama kuumbanda ti idhiladhilile ta ti: “Akwetu, okusa oshinima oshitilithi ngiinyee!”

³³ Samuel okwa ti: “Ngaashi egongamwele lyoye lya kutha aakulukadhi oyendji oluvalo, osho nena nanyoko na kanithe oluvalo.” Nokwa tetagula Agag iintimbu koshipala sheyambelo muGilgal.

³⁴ Nena Samuel okwa yi kuRama, nomukwaniilwa Saul okwa yi kaandjawo kuGibea.

³⁵ Okuza mpoka Samuel ina mona we Saul, sigo okeso lye, nokwe mu ehamenwa unene. Omuwa okwa li u uvite nayi, sho a ningi Saul omukwaniilwa gwaIsrael.

16

¹ Omuwa okwa ti kuSamuel: “Sigo uunake to kala we ehamenwa Saul? Onde mu ekelehi, kaa kale we omukwaniilwa gwaIsrael. Ihe ngashingeyi kutha omagadhi gooholivi, u ye kuBetlehem komulementu edhina lye Isai, oshoka onda hogolola gumwe gwomoyana, a ninge omukwaniilwa.”

² Samuel okwa pula a ti: “Otandi shi ende ngiini? Saul nge te shi uvu, ota ka dhipaga ndje.” Omuwa okwa yamukula: “Faalela okatana e to ti kutya oto ka yambela Omuwa ondjambo nkoka.

³ Hiya Isai koshituthi shontselelandjambo notandi ke ku lombwela shoka u na okuninga. Oto ka gwayeka omulumentu ngoka tandi ku lombwele, a ninge omukwaniilwa.”

⁴ Samuel okwa ningi, ngaashi Omuwa e mu lombwele. Sho a yi kuBetlehem, aawiliki oye ya, ye mu tsakaneke taa kakama taa pula taa ti: “Ombili tuu, tatekulu?”

⁵ Okwa yamukula a ti: “Ombili. Onde ya okuyambela Omuwa ontselelandjambo. Ilongekidheni, tu yeni pamwe.” Okwa lombwele wo Isai noyana, yi ilongekidhile okuya kontselelandjambo.

⁶ Sho ya thiki, Samuel okwa mono Eliab lyaIsai nokwa dhiladhila: “Omulumentu nguka a thikama mpaka koshipala shOmuwa, oshili oye a hogololwa kOmuwa.”

⁷ Ihe Omuwa okwa ti kuye: “Ino tala koshuuluko she, sho e na omuthika omule nondjelo ombwanawa. Onde mu tinda, oshoka ite pangula, ngaashi omuntu ta pangula. Omuntu oha tala kombanda, ihe ngame ondi wete momutima.”

⁸ Nena Isai okwi ithana omwana Abinadab nokwe mu eta kuSamuel. Ihe Samuel okwa ti: “Aawe, Omuwa naye wo ine mu hogolola.”

⁹ Isai okwe eta Shamma. Samuel okwa ti: “Aawe, haye Omuwa e mu hogolola.”

¹⁰ Osho ngeyi Isai okwe eta oyanamati yaheyali kuSamuel. Ihe Samuel okwa ti kuye: “Aawe, Omuwa ina hogolola nando ogumwe gwomuyo.”

¹¹ Nena okwa pula Isai a ti: “Aamwoye oyo ayeke mbano?” Isai okwa yamukula: “Oku na onkelo, ihe oku li kuusita woonzi.” Samuel okwa ti: “Mu lombwela, e ye huka. Itatu ka yamba ontselelandjambo, manga inee ya.”

¹² Onkee Isai okwa tumu, e ki ithanwe. Ye okwa li omumati a ndjanga e na ondjelo ombwanawa nomeho taga konita. Omuwa okwa ti kuSamuel: “Oye nguka, mu gwayeka.”

¹³ Samuel okwa kutha omagadhi gooholivi e ta gwayeke David montaneho yaamwayina. Mbalambala Ombepo yOmuwa oye ya muDavid noya kala muye okuza esiku ndyoka. Nena Samuel okwa shuna kuRama.

¹⁴ Ombepo yOmuwa oya thigi po Saul, nombepo ombwinayi ya tumwa kOmuwa, oye mu hepeke.

¹⁵ Aapiya ye oye mu lombwele: “Otwa tseya kutya ombepo ombwinayi ya tumwa kuKalunga, otayi ku hepeke.

¹⁶ Onkee tu lombwela, tatekulu, notatu ke ku kongela omuntu ngoka e shi kuhika okaharpa. Nena uuna ombepo ombwinayi tayi ya mungoye, omuntu ngoka ota hiki okaharpa ke, nangoye to pepelelwa.”

¹⁷ Saul okwe ya lombwele a ti: “Kongelii ndje omuntu ngoka e shi kuhika nawa, mu mu ete kungame.”

¹⁸ Gumwe gwomaamati ye okwa ti: “Isai gwomoshilando Betlehem oku na omwanamati, ngoka onkulungu mokuhika okaharpa. Ye ependa wo nomulumentu gwondjelo, omukwiita ofule noku shi kupopya nawa. Omuwa oku li pamwe naye.”

¹⁹ Saul okwa tumu aatumwa kuIsai ta ti: “Tumina ndje omumwoye David, ngoka omusita gwoonzi.”

²⁰ Isai okwa tumu David kuSaul e na okakombo nokasino ka humbata iikwiila nombago yu udha omaviinu.

²¹ David okwe ya kuSaul nokwa ningi omuyakuli gwe. Saul okwa li e mu hole unene nokwe mu hogolola omuhumbati gwomatati ge.

²² Nena Saul okwa tumu elaka kuIsai tali ti: “Onda hokwa David. Mu pitika, a yakule ndje.”

²³ Okuza mpoka shampa ombepo ombwinayi ya tumwa kuKalunga, ye ya muSaul, nena David okwa kutha okaharpa ke nokwe ka hiki. Ombepo ombwinayi oya thigi po Saul, nokwa pepelelwa e ta ngungumana.

17

¹ Aafilisti oya gongalele olugodhi muSoko, oshilando shimwe shomuJuda. Oya yungu ontanda mehala haku tiwa Efes Dammim, pokati kaSoko naAseka.

² Saul nAaisraeli oya gongala wo noya yungu ontanda molusilu lwaEla, moka ya langele komauta, ya kondje nAafilisti.

³ Aafilisti oya li kondundu yimwe, Aaisraeli okonkwawo nopokati kawo opwa li olusilu.

⁴ Omulumentu gumwe edhina lye Goliat, ogwomoshilando Gat, okwa zi montanda yAafilisti ti igidha Aaisraeli. Okwa li gwomuthika gwoometa ndatu konyala

⁵ nokwa zala iisha yiiyela yuudhigu wookilograma omilongo ntano naheyali negala lyosheela.

⁶ Omagulu ge oga li ga shigwa kiisha yiiyela nokwa li a leka kepepe lye egonga ele lyosheela.

⁷ Egonga lye olya li li na oshikwatelo shi thike pondisimbumu, nefo lyegonga lye olya li osheela shuudhigu wookilograma heyali. Komeho ge ohaku kala omukwiita a humbata ehuuyanza lye.

⁸ Goliat okwa thikama nokwi igidha Aaisraeli ta ti: “Otamu ningi shike mpoka mwi ilongekidhila olugodhi? Ongame Omufilisti, one aapika yaSaul! Hogololeni mokati keni omulumentu, e ye, tu kondje.

⁹ Ngele ta sindana e ta dhipaga ndje, otatu ningi aapika yeni, ihe ngele tandi mu sindi e tandi mu dhipaga, otamu ningi aapika yetu.

¹⁰ Mpaka onda shongo etangakwiita lyAaisraeli. Ngame onda hala, mu tume omuntu, tu kondje naye.”

¹¹ Saul naantu ye sho yu uvu oohapu ndhika, oya sholola.

¹² David yaIsai okwa li Omuefrata gwomuBetlehem shomuJuda. Isai okwa li e na aamati yahetatu, nopethimbo lyuukwaniilwa waSaul okwa li omukokele.

¹³ Oyanamati yatatu aakuluntu oya adhika ya yi kiita metangakwiita lyaSaul. Omukuluntu gwawo okwa li Eliab, ontowele oAbinadab nashilandula oShamma.

¹⁴ David okwa li onkelo. Manga aamwayina yatatu aakuluntu ya li naSaul,

¹⁵ David okwa li ha zi po puyo ombalwaali, a ka lithe oonzi dhahe kuBetlehem.

¹⁶ Goliat okwa li ta shokashoka Aaisraeli ongula kehe nongulohi kehe omasiku omilongo ne.

¹⁷ Esiku limwe Isai okwa lombwele David: “Kutha oolata mbali dhiilya ya kangwa niikwiila omulongo, u yi fale nziya kaamwanyoko kontanda.

¹⁸ Iipambu mbika omulongo yehini yi faalela ondjayi yiita. Inda, u ka talele po aamwanyoko, nokutya oye li po ngiini, e to galuka nendhindhiliko lyasha tali holola kutya owe ya mona noye li nawa.

¹⁹ Omukwaniilwa Saul, aamwanyoko nAaisraeli ayehe oye li molusilu lwaEla taa kondjitha Aafilisti.”

²⁰ Ongula onene yesiku lya landula David okwa meneka. Oonzi okwe dhi thigile omusita omukwawo. Okwa kutha iikulya e ta yi, ngaashi he e mu lombwele. Kontanda okwa thiki ko pethimbo ndyoka Aaisraeli ya li taa piti mo, ya ka kondje, noya kaluluka onkugo yolugodhi.

²¹ Omatanga gAafilisti nogAaisraeli oga li ga langela komatati ga taalelathana.

²² David okwa thigi po iikulya pomukeeleli gwompungulilo e ta matukile keha lyolugodhi. Okwa yi kaamwayina e te ya pula kutya oye li po ngiini.

²³ Manga ta popi nayo, Goliat okwa holoka ta popi ngoshito kAaisraeli, naDavid oku uvite ko.

²⁴ Aaisraeli sho ya mono Goliat, oya fadhuka po kuumbanda.

²⁵ Oya lombwelathana ya ti: “Mu taleni! Pulakeneni omakudhilo ge. Omukwaniilwa Saul oku uvaneke okugandja ofuto onene komuntu ngoka te mu dhipaga. Omukwaniilwa ote ke mu pa ishewe omwana omukadhona, e mu hokane, noyaandjawo otaa mangululwa mokufendela oompale.”

²⁶ David okwa pula mukwawo ngoka a li popepi naye a ti: “Omuntu ngoka ta dhipaga Omufilisti nguka nota mangulula Israel momukundu nguka, ota ningwa ngiini? Nokuli omupagani nguka omufukolume oshike, sho ta nyana etangakwiita lyaKalunga omunamwenyo?”

²⁷ Oye mu hokololele shoka tashi ka ningilwa omuntu ngoka ta dhipaga Goliat.

²⁸ Eliab, omumwayina gwaDavid, oku uvu sho David ta lombwele aantu. Okwa geele David ta ti: “Oto ningi shike mpaka? Olye ta litha oonzi peha lyoye kombuga? Ntseyele ngoye! Owe ya ashike okutala olugodhi!”

²⁹ David okwa pula a ti: “Onda ningi shike ano? Ite vulu nani okupula sha?”

³⁰ Okwa shuna komuntu gulwe e te mu pula epulo olyo tuu ndyoka.

³¹ Aantu yamwe oyu uvu shoka David a ti noya lombwele Saul, Saul nokwi ithana David.

³² David okwa ti kuSaul: “Nkeyama, kape na mpumbwe yokutila Omufilisti nguka. Otandi yi, ndi ka kondje naye.”

³³ Saul okwa yamukula: “Aawe, oto vulu ngiini oku mu kondjitha? Ongoye omunona natango, ye omukwiita okuza kuugundjuka we.”

³⁴ David okwa ti: “Nkeyama, ohandi litha oonzi dhatate. Nongele onkoshi nenge emwanka tali nakula mo onzigona,

³⁵ otandi li landula e tandi li dhenge note yululula ko onzigona. Nongele onkoshi nenge emwanka tali galukile ndje, otandi li kwata momunino e tandi li dhipaga.

³⁶ Onda dhipaga oonkoshi nomamwanka, nosho tii ka ningila Omufilisti nguka omupagani, nguka a nyana aakwiita yaKalunga omunamwenyo.

³⁷ Omuwa okwa hupitha ndje koonkoshi nokomamwanka; ota ka hupitha ndje wo kOmufilisti nguka.” Saul okwa yamukula a ti: “Onawa, inda ano; Omuwa na kale nangoye.”

³⁸ Saul okwa zaleke David omahwahwa ge mwene: egala lyosheela okwe li tula komutse gwe nokwe mu pe ondjatha yosheela.

³⁹ David okwi izaleke egongamwele lyaSaul kombanda yoonguwo dhiiyela nokwa kambadhala okweenda, ihe ine shi vula nando, oshoka okwa li ina igilila oku dhi zala. Okwa ti kuSaul: “Itandi vulu okukondja nando, sho nda zala ndhika, oshoka inandi dhi longitha nale.” Onkee okwe dhi hula mo.

⁴⁰ Okwa kutha ondhimbo nokwa toola omamanya gatano gothethengele molusilu e te ga tula mokampunda ke. Okwa ka tsakaneka Goliat e na oshuumbitho shomamanya moshikaha she.

⁴¹ Omufilisti okwa tameke okuhedha kuDavid e na omuhumbati gwehuuyanza lye te ende komeho ge. Okwa hedha ko.

⁴² Sho a mono David nawa, okwe mu dhini, oshoka okamati kowala kondjelo ombwanawa.

⁴³ Okwa ti kuDavid: “Ondhimbo oyashike? Oto dhiladhila ngame ombwa?” Okwa thingi David medhina lyiikalunga ye.

⁴⁴ Okwa ti kuDavid: “Ila nduno, omudhimba gwoye ndi ke gu gandje koondhila nokiilikama, yi gu lye po.”

⁴⁵ David okwa yamukula a ti: “Oto ya, u kondjithe ndje u na egongamwele, omwele negonga, ihe ngame otandi ku kondjitha medhina lyOmuwa Omunankondoawike, Kalunga komatangakwiita gaIsrael, ngoka we mu nyana.

⁴⁶ Nena ndjika Omuwa ote ku gandja miikaha yandje; otandi ke ku dhenga e tandi tete ko omutse gwoye. Notandi ka gandja omidhimba dhaakwiita Aafilisti okuliwa koondhila nokiilikama. Nena uuyuni auhe otau ka tseya kutya Israel oku na Kalunga,

⁴⁷ noshaa ngoka e li mpaka ota ka mona kutya Omuwa ita pumbwa nando omagongamwele nenge omagonga, a hupithe aantu ye. Oye esindano molugodhi, note ke mu gandja amuhe miikaha yetu.”

⁴⁸ Goliat okwa tameke okweenda ta hedha ishewe kuDavid, naDavid okwa matukile nanziya komalondo gAafilisti, e mu kondjithe.

⁴⁹ Okwa hiti oshikaha she mokampunda ke e ta kutha mo emanya, a dhaadhigile kuGoliat. Olye mu dhenge mombamba yoshipala e tali ningine molukwe lwomutse, naGoliat okwa gwile pevi noshipala sha sizimana mevi.

⁵⁰ Osho ngaaka David a sindi Omufilisti kee na gongamwele; okwa dhipaga Goliat noshuumbitho nemanya!

⁵¹ Okwa matukile kuye e ta thikama puye e ta pweya mo egongamwele lyaGoliat molumpangwa e ta tete ko omutse, sho e mu dhipaga. Aafilisti sho ya mono kutya ofule yawo oya sa, oya fadhuka po.

⁵² Aaisraeli nAajuda oya kugilile noye ya tidha ye ya landula ondjila ayihe, sigo okuGat nokomiyelo dhaEkron. Aafilisti oomwahe oya kangawala ondjila ayihe ndjoka yu uka kuShaarajim, sigo okuGat naEkron.

⁵³ Aaisraeli sho ya galuka ko okulandula Aafilisti, oya yugu ontanda yawo.

⁵⁴ David okwa kutha po omutse gwaGoliat e te gu fala kuJerusalem, ihe egonga lyaGoliat okwe li kaleke motenda ye.

⁵⁵ Saul sho a mono David ta yi, a ka kondjithe Goliat, okwa pula ondjayi yetangakwiita lye Abner a ti: “Abner, omunona nguka ogwalye?” Abner okwa yamukula: “Nkeyama, kandi mu shi nando.”

⁵⁶ Saul okwa ti: “Inda ano, u ka pule.”

⁵⁷ Opo ihe David sho a galukile kontanda konima yokudhipaga Goliat, Abner okwe mu fala kuSaul. David okwa li natango e na omutse gwaGoliat.

⁵⁸ Saul okwe mu pula: “Mumati, ngoye omuna gwalye?” David okwa yamukula: “Ongame omuna gwaIsai, omupiya gwoye gwokuBetlehem.”

18

¹ David okwa mana okupopya naSaul. Okuza mpoka Jonatan yaSaul okwa panga uukuume wa kola naDavid nokwa li e mu hole, ngaashi i ihole ye mwene.

² Okuza esiku ndyoka Saul okwa dhiginine David, a kale puye, ye ine mu pitika we, a shune kaandjawo.

³ Jonatan okwa panga uukuume waaluhe naDavid, oshoka okwa li e mu hole, ngaashi i ihole mwene.

⁴ Okwa hula mo elwaakani lye ndyoka a li a zala e te li gandja kuDavid pamwe nomahwahwa ge negongamwele lye, uutati nekwamo.

⁵ David okwa li e na elago akuhe nkoka Saul e mu tumine, naSaul okwe mu ningi omunashihako metangakwiita lye. Shika osha li sho opalela Saul naambala ye naantu ye.

⁶ David sho a adhika a sindi Goliat noya li taa galukile komagumbo, aakiintu oya zi miilando ayihe yomuIsrael, ya ka tsakaneke omukwaniilwa Saul. Oya li taa imbi, taa ligola, taa tembula notaa hiki uuntunda nuushandja.

⁷ Mokutembula aakiintu oyi imbi taa ti: “Saul okwa dhipaga eyuvi, ihe David omayuvi omulongo.”

⁸ Saul ka li e shi hokwa nokwa geye unene. Okwa ti: “David otaku tiwa omayuvi omulongo, ihe ngame eyuvi limwe alike. Komeho otaye ke mu ninga omukwaniilwa.”

⁹ Okuza tuu kesiku ndyoka okwa sile David efupa nokwe mu limbililwa.

¹⁰ Esiku lya landula ombepo ombwinayi ya tumwa kuKalunga, oye ya muSaul, nokwa li a pwidhuka maandjawo a fa omuyanankwengu. David okwa li ta hiki okaharpa, ngaashi he shi ningi shito, naSaul okwa li e na egonga peke.

¹¹ Saul okwa dhiladhila: “Otandi mu alele kekuma,” nokwe mu umbu egonga lwaali, ihe David okwe li yanda.

¹² Saul okwa li a tila David, oshoka Omuwa okwa li naDavid nokwe etha Saul.

¹³ Onkee Saul okwe mu tumu po e mu ningi ondjayi yetanga lyeyuvi. David okwa wilike aantu ye molugodhi,

¹⁴ nokwa li e na elago mwaayihe mbyoka a ningi, oshoka Omuwa okwa li pamwe naye.

¹⁵ Saul okwa dhimbulula elago lyaDavid nokwa tameke oku mu tonda.

¹⁶ Ihe aantu ayehe muIsrael nomuJuda oya li ye hole David, oshoka okwa li omuwiliki omunelago.

¹⁷ Nena Saul okwa ti kuDavid: “Onda hala ndi ku hokanithe nomumwandjekadhona omukuluntu Merab, ngele to longele ndje nuupenda miita yOmuwa.” (Saul okwa dhiladhila kutya Aafilisti otaye mu dhipaga, noita pumbwa oku shi ninga ye mwene.)

¹⁸ David okwa yamukula: “Ongame lye, nezimo lyandje oshike, ndi ninge oshitenya shuuwa?”

¹⁹ Ihe ethimbo sho lya thikana, Merab a hokanwe kuDavid, Saul okwe mu gandja po komulumentu gulwe edhina lye Adriel a za kuMehola.

²⁰ Ihe Mikal yaSaul okwa li e hole David. Saul sho e shi uvu, okwe shi panda.

²¹ Okwa dhiladhila: “Ngele tandi gandja Mikal kuDavid, otandi ke mu yula, opo a ka dhipagwe kAafilisti.” Nena Saul okwa ti kuDavid ishewe: “Oto ningi oshitenya shandje.”

²² Okwa lombwele aambala ye, ya popye naDavid monguwi taa ti: “Omukwaniilwa okwe ku hokwa naambala ye oye ku hole, onkee ethimbo olyo opala kungoye okuhokana omwanakadhona.”

²³ Sho ya lombwele David oohapu ndhika, okwa yamukula: “Okuninga oshitenya shomukwaniilwa osho esimano enene, unene tuu komuntu omuthigona ngangame.”

²⁴ Aambala oya lombwele Saul shoka David a ti.

²⁵ Saul okwe ya lombwele, ya lombwele David ya tye: “Omukwaniilwa ina hala iigonda yilwe yomufuko, uupa owala wokuulumentu wAafilisti ethele ya sa, a galulile aatondi ondjahi ye.” (Ondunge ndjika Saul okwe yi dhiladhila, a dhipagithe David kAafilisti.)

²⁶ Aambala yaSaul oya tseyithile David shoka Saul a ti, naDavid okwa li a hokwa okuninga oshitenya shomukwaniilwa. Esiku lyu uthilwa ohango manga inaali thika,

²⁷ David naantu ye oya yi e taa dhipaga Aafilisti omathele gaali. Okwa tete ko uupa wuulumentu nokwe u eta komukwaniilwa nokwe u mu yalulile, opo a ninge oshitenya. Onkee Saul okwa gandja omwanakadhona Mikal, a hokanwe kuDavid.

²⁸ Saul okwa yelelwa kutya Omuwa okwa li e na David nosho wo kutya omwanakadhona Mikal oku mu hole.

²⁹ Onkee okwa tila unene David nokwa ningi omutondi gwe mokukalamwenyo kwe akuhe.

³⁰ Omatangakwiita gAafilisti oga li hage ya notaga kondjo, ihe molugodhi kehe David okwa li e na elago e vule aaniihako ayehe yalwe yaSaul. Onkee David okwa ningi omusimani unene.

19

¹ Saul okwa lombwele omwana Jonatan naambala ayehe kutya ye okwa dhiladhila okudhipaga David. Ihe shoka Jonatan okwa li e hole David,

² okwa ti kuye: “Tate ota kambadhala oku ku dhipaga. Ano kala wa kotoka ngula yanakwasha ongulangula; holama meha lyomonguwi, u kale mo manga.

³ Otandi ka ya e te thikama putate melundu moka wa holama, notandi ke ku popya kutate. Ngele onda dhimbulula sha, otandi ya, ndi ku tseyithile.”

⁴ Jonatan okwa tanga David puSaul ta ti: “Tate, omupiya gwoye David ino mu ningila uuwinayi washa. Ina yona sha kungoye, ihe aluhe okwe ku longele nuudhiginini.

⁵ Okwa li a hupula omwenyo gwe, sho a dhipaga Goliat, Omuwa nokwa pe Israel esindano enene. Sho we shi mono, owa li wa nyanyukwa. Omolwashike ngashingeyi wa hala okuninga nayi omulumentu kee na ndjo noku mu dhipaga iipundjamenye yowala?”

⁶ Saul okwa li a tompwa koohapu dhaJonatan e ta gana medhina lyOmuwa kutya ye ita dhipaga David.

⁷ Konima Jonatan okwi ithana David e te mu hokololele ayihe. Okwe mu fala kuSaul, naDavid okwa yakula omukwaniilwa, ngaashi a li ha ningi shito.

⁸ Iita yAafilisti oya tukuluka ishewe. David okwe ya ponokele e te ya dhenge nayi e taa fadhuka po.

⁹ Esiku limwe ombepo ombwinayi ya tumwa kOmuwa, oya yi muSaul. Okwa li a kuutumba megumbo lye e na egonga peke, naDavid omo a li ta hiki okaharpa ke.

¹⁰ Saul okwa kambadhala okwaalela David kekuma negonga lye, ihe David okwe li yanda, negonga olya ndjikama mekuma. David okwa lupuka mo e ta yi ontuku.

¹¹ Uusiku mbwiyaka Saul okwa tumu aalumentu yamwe, ya langele egumbo lyaDavid, opo ye mu dhipage, nge kwa shi. MukadhaDavid Mikal okwe mu londodha a ti: “Ngele ito fadhuka po uusiku wonena, ngula yanakwasha oto ka sa.”

¹² Mikal okwe mu kulukithile pevi a piti mekende, David nokwa fadhuka po e ta yi ontuku.

¹³ Nena Mikal okwa kutha oshimenka shomegumbo e te shi langeke kombete. Okwa tula ewiiwili lyiifufu yiikombo komutse gwasho e te shi siikile nelwaakani.

¹⁴ Aantu yaSaul sho ye ya, yi ile David, Mikal okwe ya lombwele kutya ote ehama.

¹⁵ Ihe Saul okwe ya tumununa, ya ka tale David. Okwe ya lombwele a ti: “Mu humbateleni huka nontala ye, notandi ke mu dhipaga.”

¹⁶ Oya yi megumbo noya mono oshimenka shomegumbo shi li mombete shi na ewiiwili lyiifufu yiikombo komutse gwasho.

¹⁷ Saul okwa pula Mikal: “Omolwashike wa kotokele ndje ngeyi nowa pitika omutondi gwandje, a ye ontuku?” Mikal okwa yamukula a ti: “Okwa tile kutya ota dhipaga ndje, ngele itandi mu kwatha, a ye ontuku.”

¹⁸ David okwa hupu e ta yi kuSamuel kuRama e te mu hokololele ayihe e yi ningilwa kuSaul. Nena yo naSamuel oya yi kongulu yaahunganeki noya kala nkoka.

¹⁹ Saul sho a hokololelwa kutya David oku li pongulu yaahunganeki muRama,

²⁰ okwa tumu ko aatumwa, ye mu kwate. Oya mono ongundu yaahunganeki taa kakuka ye li nomuwiliki gwawo Samuel. Nena ombepo yaKalunga oye ya maatumwa yaSaul, nayo wo oya tameke okukakuka.

²¹ Saul sho e shi uvu, okwa tumu aatumwa yalwe, ihe nayo wo oya tameke okukakuka. Okwa tumununa ko aatumwa olutitatu, nayo wo oya ningi ngashikwawo.

²² Nena okwi ikwatele ko ye mwene, a ye kuRama. Sho e ya pomuthima omunene muSeku, okwa pula Samuel naDavid mpoka ye li, nokwa lombwelwa kutya omongulu yaahunganeki muRama.

²³ Sho a li mondjila ta yi ko, ombepo yaKalunga oye ya wo muye nokwa kakuka ondjila ayihe sigo okongulu yaahunganeki.

²⁴ Okwi ihula oonguwo dhe nokwa kakuka koshipala shaSamuel nokwa lala e li omudhuu omutenya nuusiku auhe. (Mpaka okwa zi omukalo gwokupula: “NaSaul wo okwa ningi omuhunganeki?”)

20

¹ Nena David okwa zi mongulu yaahunganeki muRama e ta yi ontuku kuJonatan e te mu pula ta ti: “Onda ningi ano shike? Onda yono ngiini? Oshike sha puka nda ningi puho, sho a hala okudhipaga ndje?”

² Jonatan okwa yamukula a ti: “Aawe, ito si. Tate oha lombwele ndje ashihe shoka ta ningi, oshinene nenge oshishona. Ite shi holeke ndje nokuli, ngele a hala oku ku dhipaga. Aawe, ite shi ningi.”

³ Ihe David okwa yamukula a ti: “Ho oku shi shi nawa kutya ou hole ndje. Onkee okwa tokola, kee shi ku tseyithile, oshoka otashi ku ehameke unene. Otandi ku ganene koshipala shOmuwa omunamwenyo kutya ondi na ko owala onkatu yimwe, ndi se.”

⁴ Jonatan okwa ti: “Otandi ka ninga shaa shoka wa hala.”

⁵ David okwa yamukula: “Ngula oku na oshituthi shomwedhi omupe, notandi tegelelwa, ndi lye pamwe nomukwaniilwa. Ihe ngele oshe ku opalela, otandi ka holama melundu sigo ongulohi yahela.

⁶ Ngele ho ta dhimbulula kutya kandi po poshitaafula, mu lombwela kutya owa pitika ndje, ndi matukile kuBetlehem, oshoka pethimbo ndika ezimo lyetu alihe ohali yamba ondjambo yokomumvo.

⁷ Ngele ta ti: ‘Onawa,’ nena kandi na mbudhi; ihe ngele ota geye, oto tseya kutya okwa tokola, a yone ndje po.

⁸ Omolwehangano lyetu lyuukuume sila ndje ohenda. Ihe ngele ondi na ondjo, dhipaga ndje ngoye mwene! Ino fala ndje kuho, a dhipage ndje!”

⁹ Jonatan okwa yamukula a ti: “Ino shi dhiladhila nokuli. Ando tandi dhimbulula kutya tate okwa hala oku ku yona po, ando otandi shi ku lombwele. Osho oshili.”

¹⁰ Nena David okwa pula a ti: “Olye ta ka tseyithila ndje, ngele ho ta yamukula nongeyo?”

¹¹ Jonatan okwa yamukula: “Tu ye kelundu.” Oyo noya yi.

¹² Jonatan okwa ti kuDavid: “Omuwa Kalunga kaIsrael na ninge onzapo yetu. Ngula nahela pethimbo ngaandika otandi ka pula tate. Ngele oku na ohenda nangoye, otandi ku tumine elaka.

¹³ Ngele ota dhiladhila oku ku yona po, Omuwa na dhipage ndje, ngele itandi shi ku tseyithile, opo u ye ontuku. Omuwa na kale nangoye, ngaashi a li natate!

¹⁴ Nongele te kala ndi na omwenyo, kwatha ndje, u dhiginine euvaneko lyoye nou inekele ndje; ihe ngele te si,

¹⁵ sila ohenda oluvalo lwandje ndoka talu ka kala ko. Uuna Omuwa a adhika a mana po aatondi yoye ayehe,

¹⁶ ehangano lyetu nali kale inaali teka po. Ngele tali teka po, Omuwa ote ke ku geela.”

¹⁷ Lumwe natango Jonatan oku uvathanitha David kutya oku mu hole, oshoka Jonatan okwa li e hole unene David, ngaashi i ihole mwene.

¹⁸ Nena Jonatan okwa ti kuye: “Oshoka ngula oku na oshituthi shomwedhi omupe, okwaahakalapo kwoye poshililo otaku ka dhimbululwa.

¹⁹ Hela okwaahakalapo kwoye otaku ka dhimbululwa ishewe noonkondo; onkee ano inda kehala nkoka wa ka holamene nale e to holama konima yondumba yomamanya.

²⁰ Otandi ka umba iikuti itatu lwaankoka nda fa tandi umbu oshoodhekwa.

²¹ Nena otandi ka lombwela omupiya gwandje, a ye, e ke yi toole. Nongele tandi mu lombwele te ti: ‘Tala, iikuti oyi li kombinga ndjika yoye; yi toola,’ otashi ti kutya ku na mbudhi noto vulu okuhololoka mo. Otandi ku ganene koshipala shaKalunga omunamwenyo kutya ito kala nando moshiponga.

²² Ihe ngele otandi mu lombwele te ti: ‘Iikuti oyi li kombinga ndjiyaka yoye,’ nena inda, oshoka Omuwa okwe ku laleke, u ye.

²³ Omuwa ne tu kwathe, tu dhiginine ehangano lyetu sigo aluhe.”

²⁴ Onkee David okwa holama melundu. Moshituthi shomwedhi omupe omukwaniilwa Saul okwe ya koshililo

²⁵ e ta kuutumba pehala lye lyoshito lwopekuma. Abner okwa li a kuutumba ontega naye, naJonatan okwa kuutumba e mu taalela. Eha lyaDavid olya li owala,

²⁶ ihe Saul ina tya sha esiku ndyoka, oshoka okwa dhiladhila: “Ngiika oku na po sha, noku li po ino opala pamisindilo.”

²⁷ Esiku lya landula oshituthi shomwedhi omupe ehala lyaDavid olya li natango owala, naSaul okwa pula Jonatan: “Omolwashike ano David inee ya koshililo ohela ndele nonena?”

²⁸ Jonatan okwa yamukula: “Okwi indile ndje epitikilo okuya kuBetlehem.

²⁹ Okwa ti: ‘Nandi ye, oshoka ezimo lyetu otali dhana oshituthi shoondjambo moshilando, nomumwameme okwa lombwele ndje, ndi kale po. Onkee ano ngoye ngele okuume kandje, pitika ndje, ndi ka talele po aakwetu.’ Omolwashoka inee ya koshililo.”

³⁰ Saul okwa geele Jonatan nokwa ti kuye: “Muna gwomudhimbwe ngoye! Nena ondi shi shi kutya ngoye owa panga uukuume naDavid nowi iyetele ohoni ngoye mwene nanyoko.

³¹ Ku shi shi nani kutya manga David e na omwenyo, ito ka ninga omukwaniilwa gwoshilongo shino? Ngashingeyi inda, u ke mu tale, e ye huka, oshoka oku na okusa!”

³² Jonatan okwa yamukula: “Omolwashike ano e na okusa? Okwa ningi shike ano?”

³³ Nena Saul oku umpile Jonatan negonga, e mu dhipage, naJonatan okwa dhimbulula kutya he okwa mana mo shili, a dhipage David.

³⁴ Jonatan okwa yambuka po a zi poshitaafula a thita po kondjahi noina lya sha esiku ndyoka etiyali lyoshituthi shomwedhi omupe. Okwa li e ehamenwa shili David, oshoka Saul okwe mu sitha ohoni.

³⁵ Ongula ya landula Jonatan okwa yi komalundu, a ka tsakaneke David, ngaashi yu uvathana. Okwa yi ko nokamati

³⁶ nokwa ti kuko: “Matuka, u ka toole iikuti mbyoka tandi ka umba.” Omumati okwa matuka, naJonatan oku umbu oshikuti komeho ge.

³⁷ Omumati sho a thiki peha mpoka oshikuti sha ndjakele, Jonatan okwe mu igidha ta ti: “Oshikuti oshi li komeho!

³⁸ Ino thikama mpoka! Endelela!” Omumati okwa toola oshikuti nokwe ya kumwene gwe

³⁹ ye ina tseya shoka tashi ti; Jonatan naDavid oyo ayeke ya li ye shi tseya.

⁴⁰ Jonatan okwa gandja omatati ge komumati nokwe mu lombwele, e ga fale koshilando.

⁴¹ Omumati sho a yi, David okwa hololoka mo a zi konima yondumba yomamanya. Okwa tsu oongolo nokwa sizimike oshipala she pevi lutatu. Ayehe yaali oya li taa lili, sho taa thipathana komilungu; oluhodhi lwaDavid olwa li olunene lu vule lwaJonatan.

⁴² Nena Jonatan okwa ti kuDavid: “Kalunga na kale nangoye. Omuwa oye onzapo nokutya tse nangoye, osho wo oluvalo lwoye naandoka lwandje otalu ka dhiginina euvaneko ndyoka eyapuki twe li uvanekelathana.” Nena David okwa yi, naJonatan okwa shuna koshilando.

21

¹ David okwa yi komuyambi Ahimelek muNob. Ahimelek okwe ya oku mu tsakaneka ta kakama e ta pula: “Omolwashike we ya ongoye awike; ku li nando onomuntu?”

² David okwa yamukula: “Ondi li miilonga yambala. Omukwaniilwa okwa lombwele ndje, ndaa tseyithile nando olye shoka a tumine ndje. Naantu yandje onde ya lombwele, ya tsakaneke ndje peha lyontumba.

³ Ou na po sha shokulya? Pe ndje iikwiila itano nenge sha shilwe shoka u na.”

⁴ Omuyambi okwa ti: “Kandi na iikwiila yilwe, oombika iiyapuki ayike; oto vulu oku yi taamba, ngele aantu yoye opwa piti elala inaa gumathana naakiintu.”

⁵ David okwa yamukula: “Aawe, inaye shi ninga. Aantu yandje ohaa idhiginine yo yene, ya kale aayogoki pamisindilo, shampa tatu yi kolweendo; unene tuu ngashingeyi, sho tu li molweendo nduka lwa sheywa!”

⁶ Omuyambi okwa pe David iikwiila iiyapuki; okwa li kee na iikwiila yilwe, oombika ayike ya adhika ya kuthwa po koshitaafula oshiyapuki, sho ya pingenithwa niikwiila iipe.

⁷ (Omukuluntu gwaasita yaSaul, Omuedomi Doeg, oko a li nkoka esiku ndyoka, oshoka okwa li e na okugwanitha oshinakugwanithwa she shelongelokalunga.)

⁸ David okwa ti kuAhimelek: “Ou na po egonga nenge egongamwele to vulu oku li pa ndje? Omalombwelo gomukwaniilwa oge endelelitha ndje unene, onkee inandi kutha egonga lyandje nenge uutati washa.”

⁹ Ahimelek okwa yamukula: “Ondi na po egongamwele lyOmufilisti Goliat, ngoka wa dhipagele mesilu lyaEla; oli li konima yomapepenguwo lya gonyenwa melapi. Ngele owe li hala, li kutha po, oshoka olyo alike li li mpaka.” David okwa ti: “Li pa ndje. Kaku na egongamwele lilwe li vule ndi.”

¹⁰ Osho ngeyi David a yi Saul ontuku nokwa yi komukwaniilwa Akish gwokuGat.

¹¹ Aambala yaAkish oya ti komukwaniilwa gwawo: “Nguka ndishi oDavid, omukwaniilwa gwoshilongo she? Oye omulumentu ngoka a ligolelwa kaakiintu taa tembula yo taa ti: ‘Saul okwa dhipaga eyuvi, ihe David omayuvi omulongo.’ ”

¹² Oohapu dhawo odha halutha David unene, nokwa tila omukwaniilwa Akish noonkondo.

¹³ Onkee okwi ifethitha omuyanankwengu montaneho yawo nokwa pwidhuka, sho ya kambadhala oku mu thiminika. Okwa li ta nyolagula komiyelo dhoshilando nokwa ziyithile omayeye moombenzi dhe.

¹⁴ Onkee Akish okwa ti kaambala ye: “Taleni! Omulumentu omupwidhi! Omwe mu etele shike kungame?

¹⁵ Kandi na ano aapwidhi ya gwana? Omolwashike mwe eta ishewe gumwe, a piyaganeke ndje niikungunika ye megumbo lyandje?”

22

¹ David okwa zi moshilando Gat e ta yi ontuku popepi noshilando Adullam. Aamwayina naantu yalwe yezimo lye sho ye shi uvu, oye ya kuye.

² KuDavid okwe ya aantu aathiminikwa, aanangunga naayemati, aalumentu konyala omathele gane, nokwa ningi omuwiliki gwawo.

³ David okwa zi nkoka nokwa yi kuMispa muMoab e ta ti komukwaniilwa gwaMoab: “Kwatha ndje, ndi ithane tate nameme, ye ye ya kale nangoye, sigo te mono shoka Kalunga ta ningile ndje.”

⁴ David okwa fala aakuluntu ye komukwaniilwa gwaMoab, oyo noya kala nkoka ethimbo alihe David a li a holama mekololo.

⁵ Nena omuhunganeki Gad okwe ya kuDavid e ta ti: “Ino kala mpaka; inda kevi lyaJuda.” David nokwa zi nkoka e ta yi kokuti kwaHeret.

⁶ Esiku limwe Saul okwa li muGibea a kuutumba komulondo momuti omutamarisk e na egonga lye peke. Aambala ye ayehe oya thikama ye mu kunduka. Okwa li a lombwelwa kutya David naantu ye oya monika.

⁷ Saul okwa ti kaambala ye: “Pulakeneni, ne Aabenjamin! Otamu dhiladhila tuu kutya David ota ka gandja kune amuhe omapya niitsambe yomiviinu note mu ningi aaniihako yetangakwiita lye?

⁸ Kape na nando ogumwe gwomune a lombwela ndje kutya omumwandje okwa hangana naDavid. Kape na nando oongoka e na nangame nenge a lombwele ndje kutya David, gumwe gwomaantu yandje, oku li po ta kongo ompito yokudhipaga ndje, nomumwandje ote mu tsu omukumo!”

⁹ Doeg okwa li a thikama pamwe naaniihako yaSaul nokwa ti: “Onda mwene David, sho a yile kuAhimelek yaAhitub muNob.

¹⁰ Ahimelek okwa pula Omuwa kutya David oku na okuninga shike, nokwe mu pe iikulya negongamwele lyOmufilisti Goliat.”

¹¹ Omukwaniilwa Saul okwa tumu omuyambi Ahimelek, a ka talwe nezimo lye alihe lyaamboka ya li aayambi muNob, noye ya kuye.

¹² Saul okwa ti kuAhimelek: “Ahimelek, pulakena!” Okwa yamukula: “Eewa, tatekulu.”

¹³ Saul okwe mu pula: “Omolwashike ne naDavid mwa ninga ndje iineya? Omolwashike we mu pe iikulya negongamwele e to mu pulile omayele kuKalunga? Ngashingeyi okwa pilukila ndje nota kongo ompito okudhipaga ndje.”

¹⁴ Ahimelek okwa yamukula: “David omwiinekelwalela maambala yoye. Oye oshitenya shoye nondjayi yetanga yoku ku tonatela nokwa simanekwa unene kushaa ngoka gwomuuwa.

¹⁵ Eeno, onda pula ehalo lyaKalunga molwe, nohasho shotango nda ningi. Ngele iineya kungoye, Nkeyama, ino pa ndje uusama nenge gulwe mezimo lyandje. Inandi tseya nando osha miinima ya tya ngaaka.”

¹⁶ Omukwaniilwa okwa ti: “Ahimelek, ou na okusa nezimo lyoye alihe.”

¹⁷ Nena okwa ti kaatonateli mboka ya li ya thikama puye: “Dhipageni aayambi yOmuwa! Oya hangana naDavid noinaa lombwela ndje kutya a yi ontuku, nando oye shi shi nale nokuli.” Ihe aatonateli oya tindi okudhipaga aayambi yOmuwa.

¹⁸ Opo mpoka Saul okwa ti kuDoeg: “Ya dhipaga!” Doeg okwe ya dhipaga ayehe. Esiku ndyoka okwa dhipaga aayambi omilongo hetatu nayatano, mboka haa zala omapepenguwo.

¹⁹ MuNob, oshilando shaayambi, Saul okwa dhipagitha aakalimo ayehe: aalumentu naakiintu, aanona nuuhanona, osho wo iimuna, uusino noonzi — ayihe oya dhipagwa.

²⁰ Ihe Abiatar, gumwe gwomaana yaAhimelek, okwa yi ontuku kuDavid.

²¹ Okwe mu hokololele, nkene Saul a dhipaga aayambi yOmuwa.

²² David okwa ti kuye: “Sho nda mono Doeg mpeyaka esiku ndiyaka, onda li nda tseya nokuli kutya ote ke shi lombwela Saul. Onkee ongame nde eta omupya gweso kezimo lyeni alihe.

²³ Kala pungame, ino tila. Saul okwa hala, e tu dhipage atuhe tse nangoye, ihe pungame oto kala waa na nando ombudhi.”

23

¹ David okwa kundana kutya Aafilisti otaa matukile oshilando Keila e taa yaka po iilya pomalupale.

² Oye okwa pula Omuwa: “Nandi ye, ndi ka matukile Aafilisti?” Omuwa okwa yamukula: “Eeno, ya ponokela, u hupithe Keila.”

³ Ihe aantu yaDavid oya ti kuye: “Otu na uumbanda wa gwana muka muJuda; otau ka geya unene, ngele tatu yi kuKeila, tu ponokele Aafilisti.”

⁴ David okwa pululula Omuwa, Omuwa nokwa ti kuye: “Ka ponokele Keila, oshoka otandi ke ku pa esindano okusinda Aafilisti.”

⁵ Okuza mpoka David naantu ye oya yi kuKeila e taa ponokele Aafilisti. Oya dhipaga oyendji yomuyo e taa kwata po iimuna yawo. Osho David a mangulula Aakeila miikaha yAafilisti.

⁶ Abiatar yaAhimelek sho i iyaka po nokwa yi kuDavid kuKeila, okwa faalele ko omapepenguwo.

⁷ Saul okwa lombwelwa kutya David okwa yi kuKeila, nokwa ti: “Kalunga okwe mu gandja miikaha yandje. David okwi itegele omwigo ye mwene mokuya moshilando shi na omiyelo dha kola.”

⁸ Onkee Saul okwa hiyile omatanga ge kiita, opo ga katukile Keila onkatu nokukondekela mo David naantu ye.

⁹ David sho u uvu kutya Saul okwa dhiladhila oku mu ponokela, okwa ti komuyambi Abiatar: “Eta omapepenguwo huka.”

¹⁰ Nena David okwa ti: “Omuwa Kalunga kaIsrael, ondu uvu kutya Saul ota dhiladhila okuya kuKeila, e shi hanagule po molwandje, omuntu gwoye.

¹¹ Aakeila otaa ka gandja ndje miikaha yaSaul? Saul ote ya shili, ngaashi ndu uvu? Omuwa, Kalunga kaIsrael, otandi ku galikana, u yamukule ndje.” Omuwa okwa yamukula: “Saul ote ke ya.”

¹² David okwa pula ishewe: “Aakeila otaa ka gandja aantu yandje nangame mwene kuSaul?” Omuwa okwa yamukula a ti: “Eeno, otaye ke shi ninga.”

¹³ Nena David naantu ye — konyala omathele gahamano ayehe kumwe — oya zi muKeila polumwe noya yi. Saul sho u uvu kutya David i iyaka ko kuKeila, okwe etha omadhiladhilo ge.

¹⁴ David okwa kala a holama moshilongo shokoondundu, mombuga popepi naSif. Saul okwa li ta kambadhala aluhe, e mu mone, ihe Kalunga ina gandja David miikaha ye.

¹⁵ David okwe shi mono mo kutya Saul ota kongo oku mu dhipaga. David okwa li muHoresh, mombuga popepi naSif.

¹⁶ Jonatan okwa yi kuye e te mu tsu omukumo noku mu yelithila egameno lyaKalunga

¹⁷ ta ti kuye: “lno tila. Tate Saul ita vulu oku ku ninga sha. Ota tseya nawa kutya ngoye oto ka ninga omukwaniilwa gwaIsrael nangame ote kala elenga lyoye lyotango.”

¹⁸ Ayehe yaali yu uvanene euvaneko eyapuki lyuukuume. David a kala muHoresh, naJonatan okwa shuna kegumbo.

¹⁹ Aantu yamwe ya za kuSif, oya yi kuSaul kuGibea e taa ti: “David okwa holama moshilongo shetu muHoresh kondundu Hakila muumbugantu wombuga yaJudea.

²⁰ Nkeyama, otwa tseya kutya owa hala unene oku mu kwata; onkee ila koshilongo shetu, otatu ke shi sila oshimpwiyu, opo u mu kwate.”

²¹ Saul okwa yamukula a ti: “Kalunga ne mu yambekele iilonga ya tya ngaaka tamu yi ningile ndje!

²² Indeni, mu shi konakone nawa, mu tale mpoka oshinkoti she tashi monika naangoka e mu mona, oshoka onda lombwelwa kutya okwa lungundja.

²³ Moneni naanaa omahala mpoka a holama, ne mu etele ndje elaka lyu ukilila. Nena otandi ka ya nane. Ngele omo e li mombinga ndjoka, otandi ke mu shilila, nando nee ne konge evi alihe lyaJuda.”

²⁴ Mbaka oya shuna kuSif ya tetekela Saul. David naantu ye oya li mombuga yaMaon molusilu luuwike muumbugantu wombuga yaJudea.

²⁵ Saul naantu ye oya ka konga David, ihe ye okwe shi kundana e ta yi kondundu yomamanya mombuga yaMaon e ta kala nkoka. Saul sho e shi uvu, okwa landula David.

²⁶ Saul naantu ye oya li handiyaka yondundu, manga David naantu ye ye li handika yondundu. Oya li taa endelele okuya ontuku Saul naantu ye ngoka e ya hokele, konyala e ya kwate.

²⁷ Ohaluka elaka lye ya kuSaul tali ti: “Galuka mbala! Aafilisti oya matukila oshilongo!”

²⁸ Osho ngaaka Saul e etha okulandula David nokwa shuna, a ka kondjithe Aafilisti. Epandja ndyoka olyi ithanwa ihe “Emanya lyetopoko”.

²⁹ David okwa yi e tu uka kombinga yaEngedi, nkoka a kala a holama.

24

¹ Saul sho a galuka kolugodhi okukondjitha Aafilisti, okwa li a lombwelwa kutya David oku li mombuga popepi naEngedi.

² Saul okwa kutha aakwiita aapyokoki yomuIsrael omayuvi gatatu nokwa yi, a ka konge David naantu ye kuuzilo wOmamanya goomenye.

³ Okwe ya kekololo popepi niigunda yoonzi pondjila nokwa hiti mo, a ka hundame. Nani kosindo yekololo ndyoka oko kwa li kwa holama David naantu ye.

⁴ Oya ti kuye: “Opo mpoka ihe! Omuwa okwe ku lombwele kutya ota tula omutondi gwoye miikaha yoye noto vulu oku mu ninga shoka wa hala nena.” David okwa nyootoka ta yi kuSaul e ta tete okalapi monguwo ye, manga Saul kee shi po sha.

⁵ Ihe opo tuu mpoka eiyuvo lyaDavid olye mu tamaneke

⁶ nokwa ti kaantu ye: “Omuwa na gamene ndje, ndaa ningile mwene gwandje uuwinayi washa; oye tuu ngoka Omuwa e mu hogolola omukwaniilwa!”

⁷ Osho ngeyi David a tompo aantu ye, yaa ponokele Saul. Saul okwa thikama po, a zi mekololo e ta tsikile ondjila ye.

⁸ Nena David okwa piti mo e mu landula e te mu igidha ta ti: “Nkeyama!” Saul sho a punguluka, David okwa nyongameke omutse gwe pevi te mu simaneke

⁹ e ta ti: “Omolwashike to pulakene aantu mboka taa ti kutya otandi kambadhala oku ku dhipaga?

¹⁰ Oto vulu oku shi imonena ko kutya mekololo Omuwa opo a li e ku gandja miikaha yandje. Aantu yandje yamwe oya lombwele ndje, ndi ku dhipage, ihe onde ku sile ohenda. Onda dhiladhila kutya itandi ku ehameke nando okashona, oshoka ngoye owa hogololwa kOmuwa, u ninge omukwaniilwa.

¹¹ Tate, tala utale okalapi nkaka komonguwo yoye ndi ka na. Onda li te vulu oku ku dhipaga, ihe onda tete ko ashike okalapi nkaka. Ku wete kutya inandi dhiladhila okutsa ondumbo nangoye nenge oku ku dhipaga? Ongoye to kongo ndje, u dhipage ndje, nando inandi yona sha kungoye.

¹² Omuwa na tokole kutya olye gwomutse a puka. Omuwa ne ku geelele iilonga yoye yokukondjitha ndje, oshoka ngaye itandi ke ku ningila uuwinayi nando owasha.

¹³ Owa tseya aakulu yonale taa ti: ‘Uuwinayi ohau ningwa ashike kaantu aawinayi.’ Ano ngame itandi ku dhipaga nando.

¹⁴ Omukwaniilwa gwaIsrael ota kambadhala okudhipaga shike? Ota tidha shike? Ombwa ya sa, ona yowala!

¹⁵ Omuwa ota ka tokola e tu utha kutya olye gwomutse a puka. Oye na tale nawa oshinima shandje, na popile ndje nokuhupitha ndje miikaha yoye.”

¹⁶ David sho a mana okupopya, Saul okwa ti: “Ongoye lela shili mumwandje David?” Oye nokwa tameke okulila.

¹⁷ Nena okwa ti kuDavid: “Ou li mondjila, ngame onda puka. Owa ningi ndje nawa, manga nde ku dhiladhilile uuwinayi.

¹⁸ Nena ndjika owa hololele ndje uuwanawa, oshoka ino dhipaga ndje, nando Omuwa okwa gandja ndje miikaha yoye.

¹⁹ Oshoka omuntu ngele ti itsu omutondi gwe, ihe mu hunutha we ngaaka. Omuwa ne ku yambekele uuwanawa mboka wa ningile ndje nena.

²⁰ Ngashingeyi ondi shi shi nawa kutya oto ka ninga omukwaniilwa gwaIsrael, nuukwaniilwa mboka otau ka kalelela melelo lyoye.

²¹ Ihe uvanekela ndje medhina lyOmuwa kutya oto ka hupitha oluvalo lwandje, opo edhina lyandje nedha lyezimo lyandje lyaa dhimbiwe po thiluthilu.”

²² David oku uvaneke kutya ote ke shi ninga. Nena Saul okwa shuna kegumbo, ndele David naantu ye oya shuna koshiholameno shawo.

25

¹ Samuel okwa si, nAaisrael ayehe oya gongala e taa lili oosa dhe. Nena oye mu fumvike pegumbo lye muRama. Konima yaambika David okwa yi kombuga yaParan.

² Oko kwa li ku na omulumentu gwomoludhi lwaKaleb edhina lye Nabal. Okwa za moshilando Maon nokwa li e na ohambo ye popepi noshilando Karmel. Okwa li omuyambalela a likola oonzi omayuvi gatatu niikombo eyuvi limwe. Omukadhi Abigal okwa li omwaanawa nomunandunge, ihe Nabal okwa li inaa pwa nawa, nomugeyentu. Nabal okwa li ta kulula oonzi dhe muKarmel,

³

⁴ naDavid mombuga okwe shi uvu.

⁵ Onkee okwa tumu aagundjuka omulongo nokwe ya lombwele, ya ye kuNabal kuKarmel noye mu kundile po

⁶ ya tye: “Kuume koye David te ku kundile po, te ku halele uuwanawa ngoye mwene, aangandjeni naayihe u yi na.

⁷ Oye okwa kundana kutya oto kulula oonzi dhoye nokwa hala, u tseye kutya aasita yoye oya kala natse inaatu ya hinda. Iinima yawo inayi yakwa po ethimbo alihe ya kala puKarmel.

⁸ Ya pula ashike, notaye ke ku lombwela. Otwe ya koshituthi, naDavid okwi indile, u tu taambe nombili. Tu kwatha ano, u tu pe shoka to vulu oku tu pa tse aapiya yoye nakuume koye David.”

⁹ Aantu yaDavid oya gandja elaka ndika kuNabal medhina lyaDavid. Nena oya tegelele nkoka.

¹⁰ Ihe Nabal okwa pula ta ti: “David? Oye lye? Inandi mu uva nale! Oshilongo oshu udha ngashingeyi embulukuto lyaapika!

¹¹ Itandi ka kutha nando oshikwiila nomeya niimuna mbyoka nda tselele aakululi yandje, ngaye ndi yi pe aantu kaandi shi ho ya za!”

¹² Aantu yaDavid oya galukile kuye noye mu hokololele shoka Nabal a ti.

¹³ Nena David okwe ya lombwele a ti: “Itapakanekeni omagongamwele geni!” Oye shi ningi, aalumentu konyala omathele gane oya yi pamwe naDavid, ihe aalumentu omathele gaali oya kala piinima montanda.

¹⁴ Omupiya gumwe gwomaapiya yaNabal okwa ti kuAbigal: “Owa uva ngaa kutya David okwa tumu aatumwa ya zi mombuga ye na omakundo gamwene gwetu, ihe okwa vavauka nayo?

¹⁵ Aantu yaDavid oya li ya gama kutse. Inaye tu imba sha, nethimbo alihe twa li nayo momakuti, iinima yetu inayi yakwa po.

¹⁶ Oye tu popile omutenya nuusiku. Ethimbo alihe otwa kala nayo tatu litha iimuna yetu.

¹⁷ Shi tala nawa, meme, u tokole shoka tashi ningwa. Otashi vulika, shi etele mwene gwetu omupya omwiinayi negumbo lye alihe. Oye omunanyati ihaa pulakene omuntu.”

¹⁸ Abigal okwa kutha nziya iikwiila omathele gaali, oombago ndatu dhu udha omaviinu noonzi ntano dha yothwa, oontungwa ntano dhiilya ya kangwa, omahila gomandjembele ethele nomakaka goondhiye omathele gaali, e te yi kutile kuusino.

¹⁹ Nena okwa ti kaapiya: “Tetekeleni, manga tandi mu landula.” Ihe komulume ina tya ko sha.

²⁰ Okwa li a kayila okasino ke nokwa kulukile mesilu lyondundu, nohaluka okwa tsakaneke David naantu ye taa ziilile komeho ge.

²¹ David okwa li ta dhiladhila: “Akwetu, ondi ihepeke owala okugamena eliko lyomulumentu nguka mombuga. Kape na nando oshinima she sha yakwa po, ndele nena ota galulile ndje uuwinayi molwekwatho lyandje oku mu kwatha.

²² Kalunga na dhenge ndje, ndi se, ngele ite kala nda dhipaga aalumentu mbeyaka ayehe, manga inaaku sha!”

²³ Abigal sho a mono David, okwa londoloka mbala e ti ihata pevi

²⁴ poompadhi dhaDavid e ta ti kuye: “Tatekulu, pulakena ndje! Ondi na uusama, sho te popi nangoye.

²⁵ Kwatha ndje, waa pulakene oohapu dhaNabal, oye egoya, ngaashi naanaa edhina lye tali ti. Kanda li po, aatumwa yoye sho yi ile ko.

²⁶ Omuwa oye e ku gamene kokugalulila aatondi yoye ondjahi noku ya dhipaga. Ngashingeyi otandi ku ganene Omuwa omunamwenyo kutya aatondi yoye naayehe mboka ya li ya hala oku ku dhipaga, otaa ka geelwa ya fa Nabal.

²⁷ Tatekulu, kwatha ndje, u taambe omulongelo nguka nde ku etele e to gu pe aantu yoye.

²⁸ Tatekulu, dhima po oondjo dhandje mukehe shoka nda ningi. Omuwa ote ke ku ninga omukwaniilwa, noluvalo lwoye wo, oshoka oto kondjo olugodhi lwe noto ka ninga uusama washa, manga u na omwenyo.

²⁹ Ngele ope na ngoka te ku matukile nota kambadhala oku ku dhipaga, Omuwa Kalunga koye ote ke ku gamena, ngaashi omuntu ta langele eliko li na ondilo. Aatondi yoye ote ya dhogele kokule, ngaashi omuntu tu umbu omamanya noshuumbitho.

³⁰ Shampa Omuwa a tsakanitha iinima mbyoka ayihe iiwanawa e yi ku uvanekele nokwe ku ningi omukwaniilwa,

³¹ nena ito ka sa nando oluhodhi nenge u lile, tatekulu, molwasho wa dhipaga pwaa na etompelo lyasha nenge wa galulile aatondi yoye ondjahi. Nuuna nee Omuwa te ke ku yambeka, tatekulu, ino dhimbwa ndje.”

³² David okwa ti kuye: “Omuwa Kalunga kaIsrael na hambelelwe, sho e ku tumu, u tsakaneke ndje!

³³ Kalunga na hambelelwe molwoondunge dhoye oombwanawa nomolwashoka wa ningi nena ndjika okugamena ndje kiihuna yedhipago nokugalulila aatondi yandje ondjo yawo.

³⁴ Omuwa okwa gamene ndje ndaa ku alule. Ihe ote gana kuKalunga kaIsrael omunamwenyo kutya ando owa li inoo endelela u tsakaneke ndje, ando ongula pokupita kwetango aantu ayehe yaNabal oya adhika ya sa.”

³⁵ Nena David okwa taamba shoka Abigal e mu etele nokwa ti kuye: “Shuna kegumbo nombili. Otandi ka ninga shoka wa hala.”

³⁶ Abigal okwa shuna kuNabal, ngoka a li pegumbo e li metifa lyoshituthi ongomukwaniilwa. Okwa li a kolwa nomuutoye wa pwila po, onkee Abigajil ine mu hokololela sha, sigo taku shi ongula.

³⁷ Nena sho a kololokwa, okwe mu hokololele ayihe. Okwa si onkumamuthika e ta kambuka.

³⁸ Konima yomasiku omulongo Omuwa okwa dhenge Nabal e ta si.

³⁹ David sho a kundana kutya Nabal a si, okwa ti: “Omuwa na hambelelwe! Okwa geele Nabal molwokuvavauka nangame nokwa gamene ndje omuntu gwe kokulonga iihuna. Omuwa okwa geelele Nabal uuwinayi we.” Nena David okwe endele Abigal, a ninge omukadhi.

⁴⁰ Aamati yaDavid oya yi kuye kuKarmel e taa ti kuye: “David okwe tu tumu, tu ku ile, u ka ninge omukadhi.”

⁴¹ Abigal okwi inyongamene pevi e ta ti: “Ngame omuntu gwe, ndi ilongekidhila okuyoga oompadhi dhaapiya ye.”

⁴² Okwa yambuka nziya e ta kayile okasino ke. Okwa thindikilwa kaadhike ye yatano a yi naantu yaDavid e ta ningi omukadhi.

⁴³ David okwa li a hokana wo Ahinoam a za kuJesreel, ngashingeyi ayehe yaali oya ningi aakadhi.

⁴⁴ Ihe Saul okwa adhika a gandja omwana Mikal, ngoka a li mukadhaDavid, kuPalti yaLajish, ngoka a za momukunda Gallim.

26

¹ Aantu yamwe oya zi muSif ye ya kuSaul muGibea noye mu lombwele kutya David okwa holama mondundu Hakila koongamba dhombuga yaJudea.

² Saul okwa yi kombuga yaSif e na aakwiita Aaisraeli ya dheuka omayuvi gatatu, a ka konge David.

³ Okwa yungu ontanda pondjila yu uka kondundu Hakila. David okwa li natango mombuga. Sho a kundana kutya Saul okwe ya oku mu konga,

⁴ okwa tumu oondaadhi nodha koneke kutya Saul oko e li.

⁵ Nena David okwa yi ko wo nokwa koneke ehala mpoka Saul naAbner yaNer, ondjayi yiita yaSaul, ya kothela. Saul okwa lala meni lyontanda, naantu ye oye mu kunduka.

⁶ Nena David okwa pula Omuheti Ahimelek naAbisai, mumwayina gwaJoab (yina yawo oZeruia) ta ti: “Oguni gwomune yaali te ya, tu ye naye kontanda yaSaul?” Abisai okwa ti: “Ongame.”

⁷ Uusiku mboka David naAbisai oya yi montanda yaSaul noya adha Saul a kotha pokati kontanda negonga lye lya ndjikwa mevi popepi nomutse gwe. Abner pamwe naakwiita oya kotha ye mu kunduka.

⁸ Abisai okwa ti kuDavid: “Kalunga okwa gandja omutondi gwoye miikaha yoye uusiku mbuka. Ngashingeyi nandi mu tse egonga, li tunukile mevi polumwe aluke — ite pumbwa oku mu umpila lwaali!”

⁹ Ihe David okwa ti: “Ino mu dhipaga, oshoka kape na ngoka ta gumitha oshikaha omukwaniilwa omugwayekwa kOmuwa ndee ta kala inaa geelwa.”

¹⁰ David okwa tsikile e ta ti: “Ondi shi shi kutya Omuwa oku na omwenyo, oye mwene ta ka dhipaga Saul, shampa tuu uuna ethimbo lye lya thiki okusa eso lyomwenyo ngu gwomomayulu, nenge ta ka sila miita.

¹¹ Omuwa na keelele ndje, ndaa kambadhale okudhipaga omuntu ngoka a hogololwa kOmuwa, a ninge omukwaniilwa! Natu kuthe po egonga lye nombago ye, tu ye.”

¹² Osho ngaaka David a kutha po egonga nombago ontega nomutse gwaSaul, noya yi yo naAbisai. Nokapwa li ngoka e shi mono nenge e shi tseya shoka sha ningwa po, nenge ando a penduke. Ayehe oya li taa kotha, oshoka Omuwa okwe ya umbu oomposi oondhigu.

¹³ Nena David okwa taagulukile handiyaka yolusilu e ta londo kondungu yondundu, nopokati kawo opwa li elala lya gwana nawa, pwaa ye oshiponga shasha.

¹⁴ Nena David okwi igidha aakwiita yaSaul naAbner ta ti: “Abner! Ou uvite ndje?” Abner okwa pula a ti: “Olye ano ti igidha ta kudhile omukwaniilwa?”

¹⁵ David okwa yamukula: “Abner, ndishi ongoye ngaa sha muIsrael? Oshike ano inoo gamena mwene gwoye, omukwaniilwa? Oshoka montanda omwi ile omuntu, a dhipage mwene gwoye.

¹⁶ Wa ponyo miilonga yoye, Abner! Otandi gana kOmuwa omunamwenyo kutya ne amuhe omwi ilongela okusa, oshoka inamu gamena mwene gweni, ngoka a hogololwa kOmuwa. Taleni! Egonga lyomukwaniilwa oli li peni? Ombago ye oyi li peni, ndjoka ya li ontega nomutse gwe?”

¹⁷ Saul okwa dhimbulula ewi lyaDavid e ta pula: “Ongoye ngaa David, omumwandje?” David okwa yamukula a ti: “Eeno, Nkeyama.”

¹⁸ Okwa tsikile ta ti: “Ano oshike, tatekulu, to tidhagana ndje ngaa, omuntu gwoye? Onda ningi shike? Oshinima nda yona, oshishike ano?

¹⁹ Nkeyama, pulakena shoka te ti. Ngele Omuwa oye te ku tidhitha ndje, nena mu yambela omagano, opo a lundulule omadhiladhilo ge, ihe ngele aantu nena Omuwa ne ya tule omutima. Oshoka oya tidha ndje moshilongo shevi lyOmuwa, ndi ye kevi nkoka te vulu okulongela ashike iikalunga iikwiilongo.

²⁰ Ino dhipagithila ndje mevi lyuundjendi, kokule nOmuwa. Omolwashike omukwaniilwa gwaIsrael te ya okudhipaga ndje ona ngaa yowala? Omolwashike ta kongo ndje nda fa ondhila yomokuti?”

²¹ Saul okwa yamukula: “Onda puka. Galuka, mumwandje David. Itandi ku dhipaga we, oshoka owa hupitha omwenyo gwandje uusiku mbuka. Onda ningi uugoya. Onda longo iihuna.”

²² David okwa yi mo: “Egonga lyoye olyo ndika, Nkeyama. Tuma gumwe gwomaantu yoye, e li ile ko.

²³ Omuwa ota futu aayinekelwa naayuuki. Nena okwe ku gandja miikaha yandje, ihe inandi ku dhipaga, ngoye ngoka wa hogololwa kOmuwa, u ninge omukwaniilwa.

²⁴ Ngaashi nda hupitha omwenyo gwoye, Omuwa osho na hupithe ndje e ta mangulula ndje muudhigu auhe.”

²⁵ Saul okwa ti kuDavid: “Kalunga ne ku yambeke, mumwandje! Oto ka tompola ayihe mbyoka to longo.” Opo ihe David okwa tsikile nondjila ye, manga Saul a shuna kaandjawo.

27

¹ David okwi ipopile a ti: “Siku limwe Saul ona ka dhipaga ndje. Ondi na ashike ompito yimwe, okufadhukila kevi lyAafilisti. Nena Saul ote etha okukonga ndje muIsrael, note hupu ihe.”

² Onkee David naantu ye omathele gahamano oya yi kuAkish yaMaok, omukwaniilwa gwaGat.

³ David naantu ye oya kala muGat nomagumbo gawo. David okwa kala naakiintu ye yaali, Ahinoam a za kuJesreel naAbigal, omuselekadhi gwaNabal, a za kuKarmel.

⁴ Saul sho u uvu kutya David a yi ontuku kuGat, okwe etha oku mu landula.

⁵ David okwa ti kuAkish: “Ngoye ngele okuume kandje, pe ndje okalando, ndi kale mo, oshoka ite pumbwa okukala pamwe nangoye moshilandopangelo.”

⁶ Akish okwe mu pe oshilando Ziklag. Osho ngaaka Ziklag sha ningi shaakwaniilwa yaJuda nokuli.

⁷ David a lumbu mevi lyAafilisti oomwedhi omulongo nahamano.

⁸ Methimbo ndyoka David naantu ye oya li haa ponokele Aageshuri, Aagirzi nAayamaleki, mboka ya kala ethimbo ele moshitopolwa shoka sha taandela sigo oShur nokuEgipiti.

⁹ Okwa dhipaga aalumentu naakiintu ayehe e ta kutha po oonzi, oongombe, uusino, oongamelo nomizalo nokuli. Sho a galukile kuAkish,

¹⁰ Akish okwe mu pula: “Nena omwa ka yugile peni?” David okwe mu hokololele kutya okwa yile kuumbugantu waJuda nenge koshilongo sholudhi lwaJerakmeel nenge koshilongo shAakeni.

¹¹ David okwa dhipaga shaa ngoka, aalumentu naakiintu; inapa hupa nando ogumwe, e ke shi hokolole kuGat kutya ye naantu ye oya longo shike. David osho a li ha ningi ngaaka ethimbo alihe, sho a kala mevi lyAafilisti.

¹² Ihe Akish okwa li i inekele David nokwi ipopile ta ti: “Oku tondike unene koyaandjawo Aaisraeli, ota ka longela ndje okukalamwenyo kwe akuhe.”

28

¹ Pethimbo ndiyaka Aafilisti oya hiya omatanga gawo, ya ka hingile Israel iita. Akish okwa ti kuDavid: “Shu uva ko nawa kutya ngoye naantu yoye ou na okukondja wa gama kungame.”

² David okwa yamukula a ti: “Eewa ngame omupiya gwoye, noto ki imonena ko, nkene te ningi.” Akish okwa ti: “Onawa, otandi ke ku ninga omulangeli gwandje.”

³ Samuel okwa adhika a sa, nAaisraeli oya li ye mu lila oosa noku mu fumvika momukunda gwe muRama. Saul okwa li a tidha mo oonganga noompulile adhihe moshilongo shaIsrael.

⁴ Omatanga gAafilisti oga gongala nokuyunga oontanda popepi noshilando Shunem; Saul okwa gongele Aaisraeli e taa yungu ontanda kondundu Gilboa.

⁵ Saul sho a tala omatanga gAafilisti, okwa haluka.

⁶ Okwa pula Omuwa shoka e na okuninga. Ihe Omuwa ine mu yamukula nando, hamondjodhi nenge mokulongitha Urim na Tummim nenge kaahunganeki.

⁷ Nena Saul okwa lombwele aambala ye: “Kongelii ndje omukulukadhi e na ombepo yuumpulile, notandi ka ya kuye, ndi ke mu pule.” Oya yamukula ya ti: “Oku na gumwe e li muEndor.”

⁸ Saul okwi idhimbike ye mwene; okwa zala oonguwo dhilwe dhi ili nokwa yi naapiya ye yaali uusiku, ya ka konge omukulukadhi. Sho ye ya kuye, Saul okwa ti kuye: “Pulila ndje aathithi, u lombwele ndje shoka tashi ka ningwa. Ithanena ndje aathithi yomuntu ngoka tandi ku lombwele edhina lye.”

⁹ Omukulukadhi okwa yamukula a ti: “Ndishi ou shi shi naanaa shoka omukwaniilwa Saul a ningi, nkene a tidha mo oonganga noompulile muIsrael. Omolwashike to kambadhala okutega ndje, u dhipagithe ndje?”

¹⁰ Nena Saul okwa gana egano eyapuki a ti kuye: “Otandi uvaneke kuKalunga omunamwenyo kutya ito ka geelelwa iilonga mbika.”

¹¹ Omukulukadhi okwa pula a ti: “Otandi ku ithanene lye?” Saul okwa yamukula a ti: “OSamuel.”

¹² Omukulukadhi sho a mono Samuel, okwi igidha a ti kuSaul: “Omolwashike wa kotokele ndje? Nani ongweye omukwaniilwa Saul!”

¹³ Omukwaniilwa okwa ti kuye: “Ino tila! Ou wete shike?” Omukulukadhi okwa yamukula: “Ondi wete oshihehelela tashi zi mevi.”

¹⁴ Saul okwa pula a ti: “Osha tya ngiini?” Omukulukadhi okwa yamukula: “Omusamane a kulupa ta hololoka mo. Okwa zala elwaakani ele.” Nena Saul okwa tseya kutya oSamuel, nokwa isizimike pevi, e mu simaneke.

¹⁵ Samuel okwa ti kuSaul: “Omolwashike to kudhile ndje, sho to hololokitha ndje mo?” Saul okwa yamukula: “Ondi li miihuna iinene! Aafilisti otaa hingile ndje iita, naKalunga okwe etha ndje. Ita yamukula ndje we, hakaahunganeki nenge wo tuu moondjodhi. Onkee nde ku ithana, u lombwele ndje shoka ndi na okuninga.”

¹⁶ Samuel okwa ti: “Omolwashike to ithana ndje, nando Omuwa okwe ku thigi po e ta ningi omutondi gwoye?

¹⁷ Omuwa okwe ku ningile shoka e ku lombwele mokana kandje: okwe ku kutha uukwaniilwa nokwe u pa mukweni David.

¹⁸ Ngoye ino vulika koshipango shOmuwa noino yona po Aayamaleki thiluthilu naashoka ye na. Omolwashoka Omuwa te ku ningile ngaaka ngashingeyi.

¹⁹ Ote ke ku gandja nAaisraeli miikaha yAafilisti. Ngula yanakwasha ngoye naamwoye ngaandyoka omu li mpaka pungame, nOmuwa ota ka gandja wo omatanga gAaisraeli miikaha yAafilisti.”

²⁰ Ohaluka Saul okwi idhenge pevi a lala a kangawala a halukila shoka a lombwelwa kuSamuel. Okwa li ta yi etelele, oshoka ina makela sha esiku ndyoka alihe omutenya nuusiku.

²¹ Omukulukadhi okwa yi kuye nokwa mono kutya okwa haluka. Okwa ti kuye: “Ombili, tatekulu, onda hupula omwenyo gwandje, sho nda ningi shoka wa pula ndje.

²² Ngashingeyi kwatha ndje, u ninge shoka tandi pula. Nandi ku telekele oshithima. Oto pumbwa okumakela sha, opo u vule okweenda.”

²³ Saul okwa tindi nokwa ti kutya ye ita li sha. Ihe aambala ye wo oye mu thiminike, a lye. Hugunina okwa pitika, a yambuka po pevi e ta kuutumba kombete.

²⁴ Omukulukadhi okwa dhipaga mbalambala okatana nkoka a adhika e ka ondodha. Nena okwa kutha uusila womunziya, e u lungu e te u ningi oshikwiila shaa na efulika.

²⁵ Okwa tenteke iikulya komeho gaSaul naambala ye, noye yi li po. Oyo noya yi uusiku tuu mboka.

29

¹ Aafilisti oya gongaleke omatanga gawo agehe puAfek, manga Aaisraeli ya yunga ontanda poluthithiya molusilu lwaJesreel.

² Aakwaniilwa yatano yAafilisti oya piti mo taa ndhelela nomangathithi gawo gaalumentu omathele nomayuvi. David naantu ye wo oye li moshinkoti nomukwaniilwa Akish.

³ Oondjayi dhiita yAafilisti odhe ya mono no pula dha ti: “Aahebeli mbano otaa ningi shike mpano?” Akish okwa yamukula: “Nguka oDavid, omupiya gwomukwaniilwa gwaIsrael Saul. Okwa kala pungame ethimbo ele ngashingeyi. Ina ninga sha shomepuko ethimbo ndyoka alihe a kala nangame.”

⁴ Ihe oondjayi dhAafilisti odha geele Akish nodha ti kuye: “Omulumentu ngoka mu shunithila koshilando shoka we mu pa. Ina ya miita pamwe natse, ota ningi e tu pilukile molugodhi. Oshike tashi mu hokitha kumwene gwe, ngele haso lyaantu yetu?

⁵ Nguka ndishi oDavid, ngoka a ligolelelwe kaakiintu, sho ya li taa tembula taa ti: ‘Saul okwa dhipaga eyuvi, ihe David okwa dhipaga omayuvi omulongo.’ ”

⁶ Akish okwi ithana David e ta ti kuye: “Otandi gana kuKalunga kaIsrael omunamwenyo kutya ngoye omwiinekelwa gwandje nonda hala okuya nangoye, tu kondjeni molugodhi nduka. Inandi ku mona uusama hela esiku ndyoka we ya pungame. Ihe aakwaniilwa ooyakwetu inaye ku taamba.

⁷ Shuna ano kegumbo nombili ngoye ino ninga sha tashi ya geyitha.”

⁸ David okwa yamukula: “Tatekulu, onda yono shike? Ngele, ngaashi to ti, ino mona ndje uusama okuza uuna ndoka nda tameke oku ku longela, omolwashike itaandi yi nangoye, mwene gwandje omukwaniilwa, nokukondjitha aatondi yoye?”

⁹ Akish okwa yamukula a ti: “Ngame otandi ku tala omwiinekelwa ngaashi omuyengeli gwaKalunga. Ihe aakwaniilwa ooyakwetu oya ti kutya ngoye ito vulu okuya natse molugodhi.

¹⁰ Onkee nduno David naamuhe mboka mwa zi puSaul nomwe ya kungame, ongula otamu penduka moontundumene, mu shune nziya, eluwa sho tali tende.”

¹¹ David naantu ye oya meneka ongula onene, ya shune kevi lyAafilisti. Ihe Aafilisti oya yi kuJesreel.

30

¹ Esiku etitatu David naantu ye oya thiki kuZiklag. Aayameleki oya li ya yuga uumbugantu waJuda e taa ponokele Ziklag. Oya adhika ya fike po oshilando

² noya kwata po aakiintu ayehe; inaa dhipaga po nando ogumwe, ihe oya kutha po ayehe e taa yi nayo.

³ David naantu ye sho ya thiki, oya mono oshilando sha fikwa po, naakiintu yawo, aanona yaamati naakadhona oya yiwa nayo.

⁴ David naantu ye oya tameke okulila noinaa hala okumwena sigo ya vulwa thiluthilu.

⁵ Nokuli aakulukadhi yaali yaDavid, Ahinoam naAbigal, oya li ya yiwa nayo.

⁶ David okwa li muudhigu uunene, oshoka aantu ye oya li ya lulilwa kekanithopo lyoyana, noya li ya hala ye mu dhipage nomamanya; ihe Omuwa okwa kumike David.

⁷ David okwa ti komuyambi Abiatar yaAhimelek: “Etela ndje omapepenguwo,” naAbiatar okwe ga eta kuye.

⁸ David okwa pula Omuwa: “Nandi landule aayugi mbano? Otandi ke ya kwata po tuu?” Omuwa okwa yamukula: “Ya landula; oto ke ya kwata po e to mangulula oonkwatwa.”

⁹ Nena David naantu omathele gahamano oya piti mo nosho ya thiki pokalonga Besor, oya thigi ko yamwe.

¹⁰ David okwa tsikile ye naalumentu omathele gane; yakwawo omathele gaali oya li ya loloka unene, ya taaguluke okalonga Besor noya kala konima.

¹¹ Aantu mboka ya li naDavid, oyi itsu omumati Omuegipiti ta zi moshilongo noye mu eta kuDavid. Oye mu pe iikulya nomeya,

¹² ekaka lyoonkwiyu nomakaka gaali gomandjembele. Sho a mana okulya, okwa ndjangumukwa. Okwa li a ningi omasiku gatatu kee na sha shokulya nenge okunwa.

¹³ David okwe mu pula a ti: “Mwene gwoye olye, noto zi peni?” Omumati okwa yamukula a ti: “Ngame Omuegipiti, omupika gwOmuamaleki gumwe. Mwene gwandje okwa thigi ndje po konima yomasiku gatatu, oshoka onda li tandi alukwa.

¹⁴ Otwa ka yugile oshilongo shAakereti muumbugantu waJuda noshilongo sholudhi lwaKaleb notwa fike po Ziklag.”

¹⁵ David okwe mu pula a ti: “Oto fala ndje kaayugi mbono?” Okwa yamukula a ti: “Otandi shi ningi, ngele oto uvanekele ndje medhina lyaKalunga kutya ito ka dhipaga ndje nenge u gandje ndje miikaha yamwene gwandje.”

¹⁶ Oye nokwa fala David kuyo. Aayugi oya li ya andjagana neyalala alihe taa li yo taa nu ye li moshituthi, molwashoka oye na iihakanwa oyindjiyindji ye yi yugu mevi lyAafilisti nolyaJuda.

¹⁷ Etango sho tali piti, ye David oku li mokati kawo, ohela nee ya kondja sigo okongulohi. Opwa hupu ashike aagundjuka omathele gane mboka ya nukile koongamelo e taa fadhuka po.

¹⁸ David okwa yululula ko ayehe naayihe ya li ya kwatwa po kAayamaleki, nosho wo aakadhi yaali;

¹⁹ inapu kana nando osha. David okwa mono aana yaantu ye aamati naakadhona niihakanwa ayihe Aayamaleki ye yi hakanene.

²⁰ David okwa kutha ko wo oonzi noongombe adhihe, naantu ye oye dhi hingi dhi li komeho gawo noya ti: “Ndhika odhaDavid!”

²¹ Nena David okwa galukile kaantu ye omathele gaali mboka ya li ya gunda inaa vula okuya naye noya kalele konima pokalonga Besor. Oya piti mo, ya ka tsakaneke David naantu ye, naDavid okwa yi kuyo nokwe ya kundu.

²² Ihe aantu yaamakaha naakolokoshi mboka ya li pamwe naDavid, oya ti: “Itatu ya pe mo miihakanwa yetu, oshoka inaa ya natse. Naa kuthe po aakadhi noyana, ya ye.”

²³ Ihe David okwa yamukula: “Aamwameme, itamu vulu okuninga iinima mbyoka twa pewa kOmuwa ngaaka! Okwe tu gamene e te tu pe esindano, tu sinde aayugi.

²⁴ Kape na ngoka ta pitika shoka tamu ti. Ayehe naa topolelwe shi thike pamwe. Mboka ya kalele montanda piinima, naa pewe shi thike pamwe noshaamboka ya yile kolugodhi.”

²⁵ David okwa totele Israel eutho ndika, nosha kala hashi landulwa sigo onena.

²⁶ David sho a galukile kuZiklag, okwa tumine aawiliki yaJuda, ookuume ke, iikunditha yomiihakanwa, nelaka tali ti: “Taambeni ombalagelo ya yugwa aatondi yOmuwa.”

²⁷ Okwe yi tumine aantu yomuBetel, aantu yomuRama shokuumbugantu waJuda nokaantu yomuJattir,

²⁸ Aroer, Sifmot, Eshtemoa

²⁹ naKarmel koludhi lwaJerakmeel, kAakeni

³⁰ nokaantu yomuHorma, Borashan, Atak

³¹ naHebron. Okwe yi tumu komahala agehe nkoka a li he endagula naantu ye.

31

¹ Aafilisti oya kondjo olugodhi nAaisraeli kondundu Gilboa. Aaisraeli oyendji oya dhipagwa, naamboka ya hupu ko, oya fadhuka po. Mokati kawo omwa li Saul noyanamati.

² Ihe Aafilisti oye ya endje mo e taa dhipaga aana yaSaul yatatu: Jonatan, Abinadab naMalkishua.

³ Olugodhi olwa li olululululu lwa dhingilila Saul, noye mwene okwa yahwa kiikuti yaatondi e te ehamekwa nayi.

⁴ Okwa lombwele omumati omuhumbati gwomatati ge a ti: “Pweya mo egongamwele lyoye, u dhipage ndje, opo Aafilisti mbaka aakaanakalunga yaa inomene ndje nokudhipaga ndje.” Ihe omumati okwa li a tila oku shi ninga. Nena Saul okwa kutha egongamwele lye mwene e ti iyumbile ko.

⁵ Omumati sho a mono kutya Saul okwa si, naye wo okwi iyumbile kegongamwele lye mwene e ta si pamwe naSaul.

⁶ Osho ngaaka Saul, oyana yatatu nomumati gwe oya si; aakwiita yaSaul ayehe oya si esiku ndyoka.

⁷ Aaisraeli yahandiyaka yolusilu lwaJesreel nokuuzilo womulonga Jordan sho ya kundana kutya iita yAaisraeli oya halakanithwa, naSaul noyana ya dhipagwa, oya thigi po iilando yawo e taa yi ontuku. Nena Aafilisti oye ya e taye yi lala po.

⁸ Esiku lya landula olugodhi, Aafilisti sho ye ya ya ka yuge omidhimba, oyi itsu omudhimba gwaSaul nodhoyana yatatu dha kangawala kondundu Gilboa.

⁹ Oya tete ko omutse gwaSaul ya kutha po omatati ge noye ga tumu naatumwa noshilongo Filistia, ya ka hokololele iimenka naantu yawo onkundana ombwanawa.

¹⁰ Nena oya tula omatati gaSaul motempeli yoshikalungakiintu Astarte e taa alele omudhimba gwe kekuma lyoshilando Betshan.

¹¹ Aajabesh muGilead sho ya kundana shoka Aafilisti ya ningile Saul,

¹² aalumentu omapenda oya piti mo noye ende uusiku auhe sigo okuBetshan. Oya kutha ko omudhimba gwaSaul nodhoyana kekuma e taye dhi eta kuJabesh e taye dhi lungunitha nkoka.

¹³ Nena oya kutha omasipa e taye ga fumvike momuti omutamarisk moshilando noyi idhilike iikulya omasiku gaheyali.