1 Konalenale manga muIsrael kaamwa li omukwaniilwa, oshilongo osha adhika kondjala. MuBetlehem shaJuda omwa li omusamane Omuefrata, edhina lye Elimelek. Pamwe nomukadhi Naemi noyanamati Maklon naKilion Elimelek okwa tembukile kuMoab, ya kale ko. Manga nee ya li ko,
2
3 Elimelek okwa mana oondjenda, Naemi e ta kala noyana,
4 mboka ya li ya hokana aakadhona Aamoabi, Orpa naRut. Sho pwa piti omimvo omulongo,
5 Maklon naKilion oya mana wo oondjenda, Naemi e ta kala po kee na omulumentu noyana.
6 Konima yethimbo Naemi okwa kundana kutya Omuwa okwa yambeke aantu ye muJuda e ya pe eloolo. Osho ngaaka okwa thigi po Moab e ta yi niitenya ye.
7 Oyi idhenge mela lyondjila, opo ya shune kuJuda, ihe mondjila
8 Naemi okwa ti kiitenya ye: “Shuneni kaandjeni. Omuwa ne mu pe uuwanawa, ngaashi mwa kala nawa nangame nonaasi yandje.
9 Omuwa na pe kehe gumwe ompolo yokuhokanwa, a mone egumbo.” Osho ngaaka Naemi okwe ya laleke nohole. Ihe oya tameke okulila
10 taa ti kuye: “Aawe, kuku. Otatu yi nangoye koyaandjeni.”
11 Naemi okwe ya yamukula ta ti: “Shuneni, aamwandje. Omolwashike mwa hala okuya nangame? Omu shi, otandi mono we aamati, ye mu hokane?
12 Indeni kaandjeni, oshoka ngame onda kulupa, ite hokanwa we. Nonando nee ndi tye, ondi na etegameno lyehokano ongulohi ndjika, ndi mone aamati,
13 otamu ya tegelele tuu, ye mu adhe ye mu hokane? Aawe, aamwandje, omu shi shi kutya itashi vulika. Omuwa okwa fupipike ndje, ngame nondi na shili ohenda nane.”
14 Iitenya ye oya tameke okulila ishewe. Opo ihe Orpa a hupita yinamweno e ta shuna koyaandjawo, ihe Rut okwa tindile po puye.
15 Naemi okwa ti kuye: “Uutenyuukweni okwa yi koyaandjawo nokookalunga ke. Inda naye.”
16 Ndele Rut okwa yamukula: “Ino tya, nii ku thige po. Pitika ndje, ndi ye nangoye. Nankoka to yi, oko te yi wo, naankoka to kala, oko nda hala okukala wo. Aangandjoye otaa ka ninga aangandjetu, ngaashika Kalunga koye ota ka kala Kalunga kandje wo.
17 Mpoka to sile, nangame wo opo tii ka sila nopo wo pombila yandje. Omuwa na geele ndje nayi, ngele tandi ku etha, shila eso tali tu topola.”
18 Ano Naemi sho a mono kutya Rut a tindile metokolo lye okuya pamwe naye, okwa ti ashike thilu.
19 Oya yi sigo okuBetlehem. Sho ya thiki ko, omukunda aguhe ogwa tukuluka, aakulukadhi e taa igidha taa ti: “ONaemi tuu shili nguno?”
20 Nguka okwa yamukula: “Inamu tya ndje we Naemi, tyeni shila Mara, oshoka Kalunga Omunankondoawike okwa monitha ndje uululu.
21 Sho nda zile mpaka, onda li omuyamba, ihe Omuwa a galula ndje ndaa na noluthipathipa. Oshike tamu ithana ndje Naemi, Omuwa sho a pangula ndje, nOmunankondoawike sho u unzile ndje momupya?”
22 Osho ano ngaaka Naemi a zile kuMoab pamwe naRut, oshitenya she Oshimoabi. Sho ya thiki muBetlehem, eteyo lyiishokelya olya li opo lya tameke.
1 Naemi okwa li e na omunezimo Boas, omulumentu omuyamba nomusimani gwomezimo lyomulume Elimelek.
2 Esiku limwe Rut okwa ti kuNaemi: “Andiya ndi ye komapya, ndi ka pupule nda landula olwenge lwaateyi. Ondi inekela kutya ote mono ngaa ngoka te shi pitikile ndje.” Naemi okwa yamukula ta ti: “Eewa, inda ano, mumwandje.”
3 Osho Rut a yi komapya ta pupula a landula aateyi. Nani sho a yi, okwa yi mepya lyaBoas, omunezimo gwaElimelek.
4 Ohaluka Boas okwe ya a zi kuBetlehem e ta kundu aateyi ta ti: “Omuwa na kale pamwe nane.” Yo oya yamukula taa ti: “Omuwa ne ku laleke nuuyamba.”
5 Nena Boas okwa pula omuwiliki gwaateyi: “Omufuko ngoka ogwalye?”
6 Omuwiliki okwa yamukula: “Oye omukwiilongo ngoka a zi kuMoab pamwe naNaemi.
7 Okwa pula ndje, ndi mu zimine, a pupule a landula aateyi. Okwa tameke ongula onene nokwa thuwa po ashike okathimbo momuzile.”
8 Nena Boas okwa ti kuRut: “Ndati, mumwandje: Ino ya komapya galwe, u ka pupule. Longa ashike pamwe naakiintu ooyakweni mpaka;
9 yu undja mpoka taa teya, u kale pamwe nayo. Onda lombwele aamati yandje, yaaye ku piyaganeke. Nuuna wa sa enota, inda u ka nwe omeya miiyuma ya thikikwa.”
10 Rut okwi isizimike omutse pevi nokwa ti kuBoas: “Omolwashike u na olukeno nangame, u sile ndje oshimpwiyu, nando ngame omukwiilongo?”
11 Boas okwa yamukula: “Ondu uvu ayihe mbyoka wa ningila nyokomweno okuza pomulumentu gwoye sho a mana oondjenda. Owa thigi po ho nanyoko noshilongo shaandjeni nowe ya okukala mokati kaantu kuu ya shi shitonale.
12 Omuwa ne ku futile shoka we shi ningi. Kala u na ondjambi ya gwanenena ya za kOmuwa Kalunga kaIsrael, kungoka we ya okukonga egameno.”
13 Rut okwa yamukula: “Tatekulu, ngoye owa sile ndje ohenda. Ondu uvite nawa, sho wa popitha ndje nombili, nando ngame ine gwana, onda fe gumwe gwomaapiya yoye.”
14 Pethimbo lyomwiha Boas okwa lombwele Rut: “Ila, u pewe sha shokulya, u shi elele momahoka.” Osho ngeyi a kuutumba pamwe naateyi, Boas e te mu pe omaha ga yaywa. Rut okwa li e ta kuta nokwa hupitha ko.
15 Sho a yi ishewe, a ka pupule, Boas okwa lombwele aateyi ta ti: “Mu pitikeni, a pupule pooha dhoondudhi, ne inamu mu indika. Shila oku mu homononena omitse dhimwe moondudhi, e dhi toole po.”
16
17 Osho Rut a tsikile okupupula mepya sigo ongulohi. Sho a yungula, okwa mono mo oolata mbali dhiishokelya.
18 Okwa kutha iilya e ta yi koshilando noku ulukile yinamweno shoka a gongele. Rut okwe mu pe wo iikulya mbyoka ya hupu komwiha.
19 Naemi okwe mu pula: “Owa pupula peni nena? Owa teya mepya lyalye? Kalunga na laleke nuuyamba omulumentu ngoka e ku sile ohenda.” Osho Rut okwa hokololele yinamweno nokutya okwa teya mepya lyomulumentu edhina lye Boas.
20 Naemi okwi igidha a ti: “Omuwa na yambeke Boas! Omuwa oha dhiginine omauvaneko ge kaanamwenyo nokaasi.” Okwa tsikile ko ta ti: “Omulumentu ngoka ogwomezimo lyetu, oye gumwe gwomwaamboka ye na oku tu sila oshimpwiyu.”
21 Nena Rut okwa ti: “Ndele okwa lombwele ndje wo, ndi tsikile ashike okupupula pamwe naateyi ye sigo opehulilo lyeteyo.”
22 Naemi okwa ti kuRut: “Eewa, mumwandje, oshe ku opalela okulonga pamwe naakiintu yaandjaBoas. Momapya gayalwe oto vulu okungwandjagulwa.”
23 Osho nduno Rut a pupula puyo, sigo iishokelya nosiima ya pu okuteywa. Okwa kala pamwe nayinamweno nombili.
1 Esiku limwe Naemi okwa ti kuRut: “Ondi na oku ku monena ombushiki, opo u mone elugo lyoye mwene.
2 Dhimbulukwa kutya omulumentu nguka Boas ngu gwaakiintu mwa teya nayo, omukwetu. Pulakena nduno ngashingeyi. Ongulohi yonena ota ka yungulitha iishokelya.
3 Iyoga ano e to igwayeke nde to zala nawa. Inda kolupale, ihe kambadhala, waa monike kuye, sigo naanaa a mana okulya nokunwa.
4 Tala mpoka ta ka lala nongele a pwile moomposi, inda u yeluthe ekumbyatha e to lala poompadhi dhe. Nena ote ku lombwele shoka u na oku shi ninga.”
5 Rut okwa yamukula: “Ote ningi ashihe to lombwele ndje.”
6 Rut okwa yi kolupale e ta ningi naanaa, ngaashi yinamweno e mu lombwele.
7 Boas sho a mana okulya nokunwa, okwa li a shambukwa. Okwa ka lala pondumba yiilya. Rut okwa gogonyotokele kuye e ta yelutha ekumbyatha e ta lala poompadhi dhe.
8 Pokati kuusiku Boas okwa haluka e ta punguluka nokwa mono kutya omukiintu a lala poompadhi dhe.
9 Okwe mu pula: “Ongoye lye?” Omukiintu okwa yamukula: “Ongame omuntu gwoye Rut, tatekulu. Shoka ngoye ogwomezimo lyetu, osho oshinakugwanithwa shoye okusila ndje oshimpwiyu.”
10 Boas okwa ti: “Omuwa ne ku yambeke, mumwandje. Mushoka wa ningi ngashingeyi, owa holola ohole yuunezimo shi vule shoka wa ningile nyokomweno, sho inoo lambalala aalumentu aagundjuka, aayamba nenge oohepele.
11 Ino tila, Rut, otii ku ningile ashihe shoka to pula. Kehe omuntu moshilando shika okwa tseya kutya ngoye omukiintu wo opala.
12 Eeno, oshoshili, ngame omunezimo nguka ndi na oku ku sila oshimpwiyu, ihe ope na gumwe gwomekoto e vule ndje.
13 Kala mpaka uusiku mbuka. Ongula otatu tala, ngele te ku kutha po. Ngele te shi ningi, onawa, nongele ite shi ningi, nena ote gana kuKalunga omunamwenyo kutya otii ku sile oshimpwiyu. Lala ashike, u tege ku she.”
14 Osho Rut a lala poompadhi dhaBoas, ihe okwa penduka, manga inaaku sha nawa, oshoka Boas ka li a hala, shi tseyike kutya Rut okwe ya kolupale.
15 Boas okwa ti kuye: “Hula mo eguyo lyoye u liyale mpee.” Rut okwe shi ningi. Nena Boas okwa tile po oolata mbali dhiishokelya e te mu tsike kepepe lye. Rut okwa shuna koshilando.
16 Sho e ya kegumbo yinamweno okwe mu pula: “Oshe ende ngiini?” Rut okwe mu hokololele ashihe e shi ningilwa kuBoas.
17 Okwa gwedha ko ta ti: “Okwa lombwele ndje kutya itandi ya niikaha yowala kungoye, omolwasho a pe ndje iishokelya mbika ayihe.”
18 Naemi okwa ti kuye: “Ngashingeyi idhidhimika, Rut, sigo to mono, ayihe mbika nkene tayi ende. Boas ita fudha, manga inaa tsakanitha oshinima shika.”
1 Boas okwa yi kehalandjandja lyoshigongi posheelo shoshilando e ta kuutumba. Omunezimo gwaElimelek gwomekoto, oye tuu ngoka a tomonenwe kuBoas e mu vule, okwa holoka po, naBoas okwa ti kuye: “Ila komeho, kuume kandje, u kuutumbe.” Okwa yi e ta kuutumba.
2 Nena Boas okwa kutha aakuluntu omulongo yomoshilando nokwe ya indile, ya kuutumbe wo. Manga nee ya kuutumba,
3 okwa ti kumukwawo: “Kuku Naemi sho a galuka kuMoab, okwa hala okulanditha po epya lyomukwetu Elimelek.
4 Ote dhiladhila kutya ou na oku shi tseya. Nena ngele owe li hala, li landa po montaneho yaalumentu mbaka ya kuutumba mpaka. Ihe ngele ino li hala, shi popya, oshoka uuthemba woku li landa owoye tango nopo ihe te landula ko.” Omulumentu okwa ti: “Otandi li landa po.”
5 Ye Boas ta ti: “Onawa, ihe nge to landa epya kuNaemi, nena oto landa wo Rut, omuselekadhi Omumoabi, opo epya li kale mezimo lyomusi.”
6 Omulumentu okwa yamukula: “Nena otandi etha uuthemba wandje woku li landa, oshoka otashi ti kutya aamwandje itaye li thigulula. Li landa po, ngame itii shi vulu.”
7 Pethimbo ndiyaka muIsrael omwa li ohedhi kutya omulandithi oha gandja olukaku komulandi. Shika osha holola kutya oshinima tashi kulilwa nenge tashi landithwa, osha kolekwa.
8 Omulumentu okwa ti kuBoas: “Li landa,” nokwa hula ko olukaku lwe e te lu gandja kuBoas.
9 Nena Boas okwa ti kaakuluntu nokwaayehe yalwe: “One oonzapo dhandje nena kutya onda landa kuNaemi ashihe shoka sha li shaElimelek noyanamati Kilion naMaklon.
10 Shika otashi ti wo kutya Rut Omumoabi, omuselekadhi gwaMaklon, ota ningi mukadhandje. Shika otashi kalitha emona mezimo lyomusi noludhi lwondhikwa ndjika otalu ka kala mokati kaakwawo nomoshilando shika. One oonzapo nena ndjika.”
11 Aakuluntu nayalwe oya ti: “Eeno, otse oonzapo. Omuwa na fethithe mukadhoye ngaashi Rakel naLea, mboka ya valele Jakob oluvalo. Ninga omuyamba muEfrata nomusimanekwa muBetlehem.
12 Aanona mboka to ka pewa kOmuwa mumukadhoye, naa ninge ezimo lyoye ngaashi ezimo lyaPerez, omuna gwaJuda naTamar.”
13 Boas okwa hokana Rut. Omuwa okwe mu yambeke e ta ningi omusimba nokwa vala okamati.
14 Aakiintu oya lombwele Naemi: “Pandula Omuwa, sho e ku pe okatekulu ngashingeyi, ke ku sile oshimpwiyu. Okamati naka ninge omunenentu muIsrael!
15 Oshitenya shoye oshi ku hole noshe ku ningile oshindji shi vulithe paamati yaheyali. Nonena oshe ku etela ko okatekulu, nkoka take ku mwenyeke notake ku sile oshimpwiyu muukulupe woye.”
16 Naemi okwa kutha okanona e te ka hempe noku ka lela.
17 Aakulukadhi yopuushiinda oya luku okamati Obed. Oya lombwelathana: “Naemi a valelwa okamati.” Obed oye he yaIsai, ngoka he yaDavid.
18 Ndika olyo elandulathano lyezimo okuza kuPerez sigo oDavid: Perez, Hezron, Ram, Aminadab, Nahashon, Salmon, Boas, Obed, Isai, David.