1

¹ Josua sho a si, oshigwana shaIsrael osha pula Omuwa sha ti: “Olini po lyomomazimo getu tali yi tango, li ka homone Aakaanana?”

² Omuwa okwa yamukula a ti: “Ezimo lyaJuda olyo nali ye tango. Otandi li pe epangelo lyevi.”

³ Aantu yaJuda oya lombwele aantu yaSimeon: “Ileni, tu ka kondjitheni Aakaanana, tu ya kuthe omikunda dhetu. Opo ihe tatu ke mu kwathela kombinga yeni.” Osho ngaaka aantu yaSimeon

⁴ naJuda oya yi pamwe molugodhi. Omuwa okwe ya sinditha Aakaanana nAaperesi noya dhenge aalumentu omayuvi omulongo puBesek.

⁵ Oya tsakaneke Adonibesek noye mu kondjitha.

⁶ Okwa fadhuka po, ihe oye mu tidha e taye mu kwata, oye mu tete omilumenwe dhokiikaha nodhokoompadhi.

⁷ Adonibesek okwa ti: “Aakwaniilwa omilongo heyali ya li ya tetwa ngeyi, oya toola uundjagumuke kohi yoshitaafula shandje. Ngashingeyi Kalunga okwa ningile ndje, ngashi nde ya ningile.” Okwa falwa kuJerusalem, nkoka a manene oondjenda.

⁸ Aalumentu Aajuda oya matukile Jerusalem noye shi sindi. Oya dhipaga aantu noshilando ye shi tomeke omulilo.

⁹ Oya tsikile okukondjitha Aakaanana mboka ya kala koondundu, kiikulundundu yoponyonga yadho nokombinga yokuumbugantu ihaaku lokwa.

¹⁰ Oya homona Aakaanana ya kala muHebron haku tiwa Kiriatarba. Nkoka oya sindi oludhi lwaSheshai, Ahiman naTalmai.

¹¹ Okuza nkoka Aajuda oya matukile oshilongo shaDebir shi ithanwa Kiriat Sefer.

¹² Gumwe gwomuyo haku tiwa Kaleb, okwa ti: “Omulumentu ngoka ta tompola okusinda Kiriat Sefer, otandi mu pe omumwandje omukadhona Aksa, e mu hokane po.”

¹³ Otniel yaKenas, omuna gwondenge yaKaleb, okwe shi sindi; osho ngaaka Kaleb okwe mu pe omwana Aksa, a ninge omukadhi.

¹⁴ Mohango Otniel oku ulumike omukadhi, i indile he epya. Aksa okwa londoloka kokasino ke, naKaleb okwe mu pula sho a hala.

¹⁵ Okwa yamukula: “Onda hala omithima dhimwe dhomeya. Evi ndyoka we li pe ndje, oli na enota.” Nena Kaleb okwe mu pe omatope gokiiheke noonyombo dhomomadhiya.

¹⁶ Oluvalo lwahemweno yaMoses, Aakeni, oya zi pamwe naantu yaJuda kuJeriko, oshilando shomilunga, noya yi moshilongo sha hekulu muumbugantu waArad muJuda. Hwiya oya tula mokati kAayamaleki.

¹⁷ Aantu yaJuda ya yi pamwe naantu yaSimeon e taa sindi Aakaanana mboka ya kala moshilando Zefat. Oya thingi oshilando noye shi hanagula po e taye shi luku Horma.

¹⁸ Omuwa okwa kwatha aantu yaJuda e taa lala evi lyokoondundu. Ihe inaa lala manga Gaza, Ashkelon nenge Ekron nuushiinda wayo. Aantu mboka ya kala komunkulo gwefuta, oya li ye na omatembakwiita giiyela, onkee aantu yaJuda ya nyengwa oku ya tidha mo.

¹⁹

²⁰ Palombwelo lyaMoses Hebron osha pewa Kaleb, ngoka a tidha mo omazimo gatatu goluvalo lwaAnak.

²¹ Ihe aantu yezimo lyaBenjamin inaa tidha mo Aayebusi ya li muJerusalem. Aayebusi noya kala pamwe naantu yaBenjamin muJerusalem, sigo onena.

²² Ezimo lyaEfraim nolyaManasse oga yi ga ka matukile Betel haku tiwa Lus. Omuwa okwe ya kwatha. Oya tumu oondaadhi moshilando,

²³

²⁴ ndhoka dha adha omulumentu ta zi moshilando nodha ti: “Tu ulukila, nkene moshilando hamu yiwa, opo twaaye ku ningile nando uuwinayi washa.”

²⁵ Okwe ya ulukile, naantu yaEfraim nAamanasse oya dhipaga shaa ngoka moshilando kakele komulumentu ngoka naangandjawo.

²⁶ Konima okwa tembukile kevi lyAaheti e ta tungile ko oshilando e te shi luku Lus, nolya ningi ngaaka edhina lyasho.

²⁷ Aamanasse inaa tidha po nando aantu mboka ya li ya kala miilando Betshan, Taanak, Dor, Jibleam, Megiddo nomuushiinda wayo. Aakaanana oya kala ko.

²⁸ Aaisraeli sho ya tana, oya thiminike po Aakaanana, ye ya longele, onkee inaye ya tidha po we.

²⁹ Aaefraim inaa tidha po Aakaanana mboka ya li muGeser, onkee Aakaanana ya kala pamwe nayo.

³⁰ Aasebulon inaa tidha po aantu ya li miilando Kitron naNahalal, nosho Aakaanana ya kala puyo. Aasebulon noye ya thenyenene kongundhi, ye ya longele.

³¹ Aayaser inaa tidha po aantu ya li miilando Akko, Sidon, Ahlab, Aksib, Helba, Afek naRehob.

³² Aayaser oya kala mokati kAakaanana, oshoka inaye ya tidha mo.

³³ Aanaftali inaa tidha po aantu ya li miilando Bet Shemesh naBetanat. Aanaftali oya kala mokati kAakaanana, ihe oye ya thiminike, ye ya longele.

³⁴ Aayamori oya thiminike Aadan, ya tembukile kevi lyokoondundu, noinaye ya pitikila, ya ye polushandja.

³⁵ Aayamori oya kala muAjalon, Shaalbim nokondundu Heres. Ihe Aaefraim nAamanasse oye ya thiminikile melelo lyawo e taye ya thiminike, ye ya longele.

³⁶ Oshilongo shAayamori osha li sha taandela okuza kondundu Akrabbim, tashi uka kuuzilombangalantu wondundu Sela.

2

¹ Omuyengeli gwOmuwa okwa zi kuGilgal u uka kuBokim e ta ti kAaisraeli: “Onde mu tembudha muEgipiti nonde mu eta mEvi lyeuvaneko nde li uvanekele oohokulu. Onda tile: ‘Ngame itandi etha okuhangana nane.

² One kamu na okuhangana nando naantu ya kala mevi ndika. Omayambelo gawo ga mbonyagulii po.’ Ihe inamu ninga shoka nde mu lombwele. Omwa ningi naanaa shoka inaashi pitikwa.

³ Onkee tii mu lombwele ngashingeyi kutya kandi na mpoka ne tidha po we aantu mbaka mondjila yeni. Oyo aatondi yeni, niikalunga yawo otayi ningi epundukitho lyeni.”

⁴ Omuyengeli sho a popi ndhika, oshigwana ashihe shaIsrael osha tameke okulila.

⁵ Onkee ehala ndyoka lyi ithanwa Bokim. Oko nkoka ya yambele Omuwa omayambo.

⁶ Josua nokwe etha Aaisraeli, ya ye shaa ngoka nondjila ye, nomuntu kehe okwa ka lala oshitopolwa she shomevi.

⁷ Manga Josua a li e na omwenyo, aantu oya longele Omuwa, nokonima yeso lye oya tsikile ngaaka molwaawiliki mboka ya li ya mono iilongankondo yOmuwa e yi ningile Israel.

⁸ Omupiya gwOmuwa Josua yaNun okwa mana oondjenda muukokele womimvo ethele nomulongo.

⁹ Okwa fumvikwa mepya lye puTimnat Sera mevi lyokoondundu dhaEfraim kuumbangalantu wondundu Gaash.

¹⁰ Epipi lye alihe olya mana oondjenda, nepipi lya landula olya dhimbwa Omuwa naashoka a ningile Israel.

¹¹ Oshigwana shaIsrael osha yono kOmuwa nosha tameke okulongela ooBaal.

¹² Oye etha elongelokalunga okulongela Kalunga koohekulu, Kalunga ngoka e ya tembudha muEgipiti, noya tameke okulongela iikalunga, iimenka yaantu yopuushiinda wawo. Oye yi inyongamene nosho ngeyi ya geyitha Omuwa.

¹³ Oye etha okulongela Omuwa noya longele ooBaal nooAstarte.

¹⁴ Omuwa nokwa pindjile Aaisraeli nokwe etha aaponokeli, ye ya matukile noku ya yuga. Okwe etha aatondi ayehe ye ya kunduka, ye ya gwililile po. Aaisraeli noinaa vula we okwiipopila.

¹⁵ Ethimbo kehe ya yi molugodhi, Omuwa okwe ya gamuka, ngaashi naanaa a tile. Oya li ya lulilwa.

¹⁶ Onkee ano Omuwa okwe ya penduthile aawiliki mboka ye ya mangulula maaponokeli.

¹⁷ Ihe Aaisraeli inaa vulika kaawiliki yawo. Israel okwa li kee na uudhiginini wokudhiginina Omuwa nokwa longele iikalunga yilwe. Oohekulu oya li ya vulika kiipango yOmuwa, ihe epipi epe olye shi etha po.

¹⁸ Uuna Omuwa a gandja kuIsrael omuwiliki, Omuwa okwa li a hala oku mu kwatha nokumangulula aantu miikaha yaatondi yawo. Oya kala nawa, manga omuwiliki e na omwenyo. Omuwa okwa li a hala oku ya sila ohenda, oshoka oya kugu muupyu womahepeko nowomalwa gawo.

¹⁹ Uuna omuwiliki a si, aantu oya shuna kuukulu wawo noyi inyateke ye vule oohekulu. Oya li ya hala okusimaneka nokulongela iikalunga noya tindi okweetha oondjila dhawo oombwinayi.

²⁰ Ndele Omuwa okwa li a geele Israel e ta ti: “Aantu mbaka oya yono ehangano ndyoka nda lombwele oohekulu, ye li dhiginine. Sho inaa vulika kungame,

²¹ itandi tidha po nande oshigwana shimwe shomwaambyoka ya hupile ko, sho Josua a si.

²² Otandi yi longitha okuulukila Aaisraeli, ngele ya hala okulandula oondjila dhandje, ngaashi oohekulu ya ningi, nenge aawe.”

²³ Osho Omuwa a pitikile iigwana mbika, yi hupe ko. Ine yi gandja miikaha yaJosua noine yi tidhitha mo mbala konima yeso lye.

3

¹ Omuwa okwe ethele iigwana yimwe mevi, a makele Aaisraeli mboka inaa pitila miita muKaanan.

² Okwe shi ningi ashike, opo a longe epipi kehe lyAaisraeli okuhinga iita, unene tuu mboka inaaya kondja nkene ya valwa.

³ Osho mevi mwa kala iilando itano yAafilisti, Aakaanana ayehe, Aasidoni nAahevi mboka ya kala koondundu dhaLibanon okuza kondundu Baal Hermon sigololo eelo lyaHamat.

⁴ Oyo ya li emakelo lyaIsrael okutala tuu, Israel ngele ota vulika kiipango mbyoka Omuwa e yi pele oohekulu ya pitile muMoses.

⁵ Ano Israel okwa kala mokati kAakaanana, Aaheti, Aayamori, Aaperesi, Aahevi nAayebusi.

⁶ Oya hokanathana naantu yiigwana mbyoka e taa longele iikalunga yawo.

⁷ Oshigwana shaIsrael osha dhimbwa Omuwa Kalunga kasho. Oya yono kuye e taa longele iikalunga yaBaal naAsheera.

⁸ Omuwa a geele Israel e te etha omukwaniilwa Kushan Rishataim gwaMesopotamia oku ya sinda noku ya pangela omimvo hetatu.

⁹ Nena Aaisraeli oya kugu kOmuwa nokwe ya tumine ekanda ndyoka lye ya mangulula. Oye nee Otniel, omuna gwondenge yaKaleb Kenas.

¹⁰ Ombepo yOmuwa ye mu lambele e ta ningi omuwiliki muIsrael. Otniel okwa yi kiita, Omuwa nokwe mu sinditha omukwaniilwa gwaMesopotamia.

¹¹ Oshilongo sha kala mevululuko omimvo omilongo ne, opo nduno Otniel a mana oondjenda dhe.

¹² Oshigwana shaIsrael osha yonununa ishewe kOmuwa. Molwashika Omuwa okwa nkondopaleke Eglon, omukwaniilwa gwaMoab, e vule Israel.

¹³ Eglon okwa hangana nAayammoni nAayamaleki. Oya dhenge Israel e taa sindi Jeriko, oshilando shomilunga.

¹⁴ Eglon okwa pangele Aaisraeli omimvo omulongo nahetatu.

¹⁵ Nena Aaisraeli oya kugu kOmuwa nokwe ya tumine omulumentu, e ya mangulule. Oye Ehud, omulumentu gwolumoho, omuna gwaGera, mezimo lyaBenjamin. Oshigwana shaIsrael osha tumu Ehud komukwaniilwa Eglon gwaMoab e na ombalagelo yomukwaniilwa.

¹⁶ Ehud okwi ihambulile omwele gwa tsa e gu zala miiteta kombinga yokolulyo.

¹⁷ Okwa kutha omagano gaEglon, ngoka a li omunenenene.

¹⁸ Ehud sho e mu pe omagano, okwa lombwele aalumentu mboka ya li ya humbata omagano, ya shune kegumbo.

¹⁹ Ehud mwene okwa galukile piihongwamenka mbyoka ya li muGilgal a shuna kuEglon e ta ti: “Nkeyama, ondi na oshiholekwa okukundathana nangoye.” Omukwaniilwa okwa lombwele aapiya ye: “Natu ikalele.” Ayehe noya zi mo.

²⁰ Omukwaniilwa manga a kuutumba metala mezile lyaalofu, Ehud okwa yi kuye e ta ti: “Ondi ku nine elaka lya zi kuKalunga.” Omukwaniilwa okwa thikama po.

²¹ Ehud okwa hiti olumoho lwe miiteta kombinga yokolulyo e ta homonona mo omwele e te gu mbwangula mela lyaEglon.

²² Omwele aguhe gwa ningine mo noshikwatelo, oofu nodha mbathuka mo. Ehud ine gu kutha mo, ogwa mbandukile kombunda.

²³ Nena Ehud okwa piti mo e edhile omiyelo noku dhi pata

²⁴ e ta yi. Aapiya sho ye ya, oya mono omiyelo dha patwa. Oya dhiladhila, omukwaniilwa omo e li owala moshinyanga shokombanda kokandjugo.

²⁵ Oya tegelele, ngaashi taa dhiladhila, ihe sho inee egulula omiyelo, oya kutha iipatululo noya patulula. Oya adha omukwaniilwa a kangawala a sa, a lala polupanda.

²⁶ Ehud okwa yi nale, manga ya tegelela. A pitilila nale iihongwamenka. Onkee a fafagula sigo oSeira.

²⁷ Sho a thiki kevi lyokoondundu dhaEfraim, okwa hiki epoli, i ithane Aaisraeli kiita. Nena okwe ya kwatele komeho ya kuluka ya zi koondundu.

²⁸ Okwa ti: “Landulii ndje! Omuwa okwe mu pe esindano, mu sinde aatondi yeni Aamoabi.” Osho ngaaka oya landula Ehud e taa kwata ehala mpoka Aamoabi ya li ye na okutaaguluka omulonga Jordan noinaa pitika nando omuntu gumwe a taaguluke.

²⁹ Uuna ndoka oya dhipaga aakwiitalela Aamoabi konyala omayuvi omulongo; inapu hupa nondhi.

³⁰ Uuna ndoka Aaisraeli oya sindi Moab, moshilongo nomwa kala ombili omimvo omilongo hetatu.

³¹ Omuwiliki a landula ko oye Shamgar, omuna gwaAnat, ngoka a mangulula Israel, sho a dhipaga Aafilisti omathele gahamano negonga.

4

¹ Ehud sho a si, oshigwana shaIsrael osha yono ishewe kOmuwa.

² Osho Omuwa e ya gandja miikaha yaJabin, omukwaniilwa Omukaanani, ngoka a li ta pangele muHazor. Ondjayi yetangakwiita lye oSisera, ngoka a kala muHaroshet shaakwiilongo.

³ Jabin okwa li e na omatembakwiita omathele omugoyi nokwa tyakalekele Aaisraeli omimvo omilongo mbali. Oshigwana shaIsrael nosha pula ekwatho kOmuwa.

⁴ Nena Debora, mukadhaLappidot, okwa li omuhunganeki nokwa li ta wilike Aaisraeli pethimbo ndyoka.

⁵ Okwa li ha kuutumba momulunga gwontumba pokati kaRama naBetel mevi lyokoondundu dhaEfraim, nAaisraeli oya yi kuye, e ya tokolele oohapu.

⁶ Esiku limwe okwa tumu Barak, omuna gwaAbinoam a zi koshilando Kedesh muNaftali e ta ti kuye: “Omuwa Kalunga kaIsrael ota gandja elombwelo ndika: ‘Kutha aalumentu omayuvi omulongo momazimo gaNaftali nogaSebulon, u ya fale kondundu Tabor.

⁷ Otandi eta Sisera, ondjayi yetangakwiita lyaJabin, e ku kondjithe pomulonga Kishon. Ote ke ya nomatembakwiita giiyela naakwiita ye, ihe otandi mu gandja miikaha yoye.’ ”

⁸ Barak okwa yamukula a ti: “Otandi yi ashike, ngele to yi nangame, ihe ngele ito yi nangame, nangame wo itandi yi ko.”

⁹ Debora a yamukula: “Eeno, onawa, otandi yi nangoye, ihe esimano lyesindano itali ka ninga lyoye, oshoka Omuwa ota gandja Sisera miikaha yomukiintu.” Okuza mpoka Debora naBarak oya thikama e taa yi kuKedesh.

¹⁰ Barak okwi ithana ezimo lyaNaftali nolyaSebulon kuKedesh, naalumentu omayuvi omulongo oye mu landula. Debora okwa yi pamwe naye.

¹¹ Pokati mpoka Heber Omukeni okwa dhike otenda ye puKedesh popepi nomwandi puZaanannim. Okwa li a tembuka pAakeni yalwe yomoluvalo lwaHobab, suwala yaMoses.

¹² Sisera sho u uvu kutya Barak okwa londa kondundu Tabor,

¹³ okwi ithanene kuye omatembakwiita ge giiyela omathele omugoyi naalumentu ayehe nokwe ya tumu ya zi muHaroshet-shaakwiilongo, ya ye komulonga Kishon.

¹⁴ Nena Debora okwa ti kuBarak: “Unduka! Omuwa ote ku wilike! Nena ota gandja Sisera miikaha yoye.” Osho ngaaka Barak a kuluka ta zi kondundu Tabor pamwe netanga lye lyaalumentu omayuvi omulongo.

¹⁵ Barak sho e ya mbolokotele netanga lye, Omuwa okwa vundakanitha Sisera pamwe nomatembakwiita ge agehe naakwiita ye. Sisera a nuka metemba lye e ta yi ontuku.

¹⁶ Barak okwa tidhagana omatembakwiita netangakwiita, sigo oHaroshet-shaakwiilongo, netangakwiita lyaSisera alihe olya dhipagwa; inapu hupa nondhi.

¹⁷ Sisera okwa matukile motenda yaJael, mukadhaHeber Omukeni, oshoka omukwaniilwa gwaHazor Jabin okwa li e na ombili negumbo lyaHeber.

¹⁸ Jael okwa piti mo, a tsakaneke Sisera e ta ti kuye: “Ila mo, tatekulu, ila motenda yandje. Ino tila.” Osho ngaaka a yi mo, nomukulukadhi okwe mu holeke e mu gumbika omulapi.

¹⁹ Sisera okwa ti kuye: “Kwatha ndje omeya, onda kangala.” Jael okwa siikulula ombago yomahini e te mu pe, a nwe, nokwe mu siikile ishewe.

²⁰ Nena Sisera okwe mu lombwele: “Ka thikame posheelo shotenda, nongele taku zi omuntu te ku pula ta ti, olye e li mo muno, tya aawe, kamu na muntu.”

²¹ Sisera okwa li a tatuka ontulo nokwa kwatwa koomposi. Nena Jael okwa kutha ohamala nomboha yotenda e ta nyootoka u uka kuye nokwe mu dhipaga nokumbambalela omboha pombandu ye e tayi mbathuka kombinga onkwawo e tayi yi mevi.

²² Barak sho e ya ta kongo Sisera, Jael okwe ke mu tsakaneka e ta ti kuye: “Ila, ndi ku ulukile omulumentu ngoka to kongo.” Osho a yi mo pamwe naJael nokwa adha Sisera a kangawala a sa nomboha ye mu ndjikwa momutse.

²³ Esiku ndyoka Kalunga okwa pe Aaisraeli esindano, sho ya sindi Jabin, omukwaniilwa Omukaanani.

²⁴ Oya li taye mu thininike nokuthininika, sigo ye mu thekula po.

5

¹ Esiku ndyoka Debora naBarak yaAbinoam oyi imbi eimbilo ndika taa ti:

² Hambeleleni Omuwa! Aaisraeli oya li yu uthilwa okukondja; aantu oya zimine nenyanyu.

³ Pulakeneni, ne aakwaniilwa! Pakalekeni omakutsi, ne aapangeli! Ngame otandi imbi, otandi hiki okahumba tandi shi ningile Omuwa, Kalunga kaIsrael.

⁴ Omuwa, sho wa zi koondundu dhaSeir, sho wa zi komikuma dhaEdom, evi olya kakama, nomvula oya puuka ya zi mealelo. Eeno, omeya oga pooka ga zi miikogo.

⁵ Oondundu dha kakama koshipala shOmuwa gwaSinai, okoshipala shOmuwa, Kalunga kaIsrael.

⁶ Muuyuni waShamgar yaAnat, momasiku gaJael, iiyendo yoongamelo inayi taakana we evi, naayendanandjila oye ende moondjila dha kunkula.

⁷ Debora, iilando yaIsrael ya thikama ye ethiwa; oya kulumana yi li omupulungundju, sigo we ya, sigo wa uluka ko ngaashi yina yaIsrael.

⁸ Mevi omwa kala nduno iita, sho Israel a hogolola iikalunga. Ihe momayuvi omilongo ne gaalumentu muIsrael inamu monika ngoka e na oshikandekitho nenge egonga.

⁹ Omutima gwandje gwa gama kaakwatelikomeho yaIsrael, gwa pamba kaantu mboka ya zimine nenyanyu. Hambeleleni Omuwa!

¹⁰ Shi hokololeni, ne mboka mwa londa kuusino uutokele, one mboka mwa kuutumba piithala, nane mboka tamu lyanga akuhe.

¹¹ Pulakeneni! Ewi lyombuyagano tali ziilile komadhiya, ndjoka tayi hokolola omasindano gOmuwa, omasindano gaantu ye Aaisraeli! Nena aantu yOmuwa otaa katuka taa zi miilando yawo.

¹² Wilika, Debora! Kwata komeho! Wilika! Imba eimbilo! Wilika! Thikama, Barak yaAbinoam, kwatela komeho oonkwatwa dhoye!

¹³ Nena aainekelwa oye ya kaawiliki yawo; aantu yOmuwa oye ya kuye yi ilongekidha okukondja.

¹⁴ Oya zi kuEfraim yu uka molusilu, handiyaka yaBenjamin naantu ye. Aawiliki oya zi kuMakir, oondjayi odha koloka kuSebulon.

¹⁵ Aawiliki yaIssaskar oye ya pamwe naDebora; eeno, Issaskar okwe ya ndele naBarak wo, noye mu landulile molusilu. Ihe ezimo lyaReuben olya li lya limbililwa; inaa vula okutokola, ngele otaye ya.

¹⁶ Omolwashike ya kala handiyaka pamwe noonzi, taa pulakene aasita taa ithana iigunda yoonzi? Eeno, ezimo lyaReuben olya li lya limbililwa; inaa vula okutokola, ngele otaye ya.

¹⁷ Ezimo lyaGad olya kala kuuzilo waJordan, nezimo lyaDan olya thigala petulilo lyoosikepa. Ezimo lyaAser olya kala komunkulo, olya thigala pooha dhefuta.

¹⁸ Ihe aantu yaSebulon noyaNaftali oya hupula oomwenyo dhawo melundu lyolugodhi.

¹⁹ PuTaanak, pomulonga gwaMegiddo, aawa oye ya, opo ya kondje, aawa yaKaanan oya kondjo, ihe inaa hakana nando oshisiliveli.

²⁰ Oonyothi odha kondjo okuza kealelo, nkene dha taakana egulu, odha kondjitha Sisera.

²¹ Efundja lyomuKishon olye ya kungulula po — epomboloko lyomulonga Kishon. Otii ka katuka, te katuka ndi na omatha!

²² Nena uukambe otau ya tau lapata tau lyata evi nomakondo gawo.

²³ Omuyengeli gwOmuwa okwa ti: “Thingeni Meros, aantu yaahoka naa thingwe, naa thingwe. Yo inaye ya okukwatha Omuwa, okukondjela Omuwa mengathithi lye.”

²⁴ Omukiintu omunelagwelela oJael, omukadhaHeber Omukeni — omukiintu omunelagwelela oye ngoka e li mootenda.

²⁵ Sisera okwe mu indile omeya, ihe okwe mu pe omahini; okwe mu etele omoosi mombago yuuzeko.

²⁶ Moshikaha shimwe oku na omboha yotenda nomoshikwawo ohamala; okwa mokola Sisera e ta tatula olukwe lwe; oku ulula omutse gwe.

²⁷ Sisera okwa ongotele pevi, okwa gu e ta kangawala a tya thilu poompadhi dhaJael. Eeno, opoompadhi dhe a ongotele e ta gu; a gwile pevi a sa thilu.

²⁸ Yina yaSisera okwa talele mekende a kwidhidhikwa kiitenda ya tatakana. “Omolwashike etemba lye lya tokelwa ngeyi?” osho a pula. “Omolwashike uukambe we itaau endelele okugaluka?”

²⁹ Ookanee ke aanandunge oye mu yamukula, nokwe endulula oohapu dhawo a ti:

³⁰ “Otaa kwata owala omakumbu nokwiitopolela, omukwiita kehe ota yi nomukadhona gumwe nenge yaali, iihakanwa yiiyata yuuzeko oyaSisera, iisaali ya nyonyombwa oyomothingo yomunyekadhi.”

³¹ Omuwa, aatondi yoye ayehe naa se ngaaka, ihe aaholike yoye naa yele ongetango tali piti. Moshilongo nomwa li ombili ethimbo lyoomvula omilongo ne.

6

¹ Aaisraeli oya yono ishewe kOmuwa, nokwe ya gandja miikaha yAamidiana, mboka ye ya pangele omimvo heyali.

² Aamidiana oya li ye na oonkondo ye vule Aaisraeli, noshigwana shaIsrael oshe ya holama momakololo nomomaholameno moondundu.

³ Shaa uuna Aaisraeli ya kunu omapya, Aamidiana nAayamaleki oye ya pamwe naantu yokombuga noye ya matukile.

⁴ Oya yungu oontanda noya thekeke po iilya kuumbugantu sigo opuushiinda waGaza. Oya yugu po oonzi, iimuna nuusino noya thigi Aaisraeli ye li owalawala.

⁵ Oye ya nuukambe wawo nootenda dhawo, engathithi oto ti oombahu. Oye ya noongamelo dhawo dhaa shi kuyalulwa. Oye ya noya mbugaleke evi,

⁶ naIsrael ina vula we okutya sha kuyo.

⁷ Nena Aaisraeli oya kugu onkugo kOmuwa, e ya hupithe miikaha yAamidiana,

⁸ noye e ya tumine omuhunganeki, ngoka e ya etele elaka lya zi kOmuwa, Kalunga kaIsrael, tali ti: “Onde ku tembudha muupika waEgipiti.

⁹ Onde ku yululula miikaha yAayegipiti nomiikaha yaantu mboka ye ku kondjitha mevi ndika. Onde ya tidha mo miipathi yeni nonde mu pe evi lyawo.

¹⁰ Onde mu lombwele nda ti: ‘Ongame Omuwa, Kalunga keni, inamu longela iikalunga yAayamori mboka mu li mevi lyawo. Ihe inamu pulakena ndje.’ ”

¹¹ Omuyengeli gwOmuwa okwe ya komukunda gwaOfra nokwa kuutumba momwandi gwaJoas, omulumentu gwomezimo lyaAbieser. Omwana Gideon okwa li ta yungula iilya iishona meholamo moshikolelo shoomviinu, opo kaa monike kAamidiana.

¹² Omuyengeli gwOmuwa okwe mu ihololele nkoka nokwa ti kuye: “Omuwa oku li nangoye, ngoye ependa nomulumentu gwonkama.”

¹³ Gideon okwa ti kuye: “Nandi ku pule, tatekulu, ngele Omuwa oku li pamwe natse, oshike tatu mono iihuna? Oshike Omuwa itaa longo iinyengandunge mbyoka twa hokololelwa kootate, nkene e tu tembudha muEgipiti? Omuwa okwe tu gandja miikaha yAamidiana e tu ekelehi.”

¹⁴ Nena Omuwa okwe mu lombwele: “Inda noonkondo dhoye oonene, u ka mangulule Aaisraeli miikaha yAamidiana. Ongame tandi ku tumu.”

¹⁵ Gideon okwa yamukula: “Ihe otandi mangulula ngiini Aaisraeli? Oludhi lwetu kalu na edhina mezimo lyaManasse, nangame mwene omunima gwowala mezimo lyandje.”

¹⁶ Omuwa okwa yamukula: “Oto shi vulu, oshoka otandi ku kwatha. Oto ka nyanyagula Aamidiana wa fa to lyatagula omuntu gumwe.”

¹⁷ Gideon okwa yamukula: “Ongame ngele nda silwa ohenda kungoye, pe ndje endhindhiliko, li holole kutya ongoye shili Omuwa.

¹⁸ Kwatha ndje, u kale mpaka, sigo tandi ku etele omayambo giikulya.” Okwa ti: “Otandi kala mpaka, sigo to galuka.”

¹⁹ Gideon okwa yi maandjawo e ta paka po okakombwena nokwa ningi oshikwiila shaa na efulika shuusila wookilograma omilongo. Okwa tula onyama montungwa nomahoka mokayiga nokwe yi fala komuyengeli gwOmuwa momwandi nokwe yi mu pe.

²⁰ Omuyengeli okwe mu lombwele: “Tula onyama noshikwiila kemanya ndika e to tile ko omahoka.” Gideon okwe shi ningi.

²¹ Nena omuyengeli gwOmuwa okwa ganeke oshikaha e ta gumu onyama noshikwiila noshiti sha li moshikaha she. Omulilo ogwa zi memanya e tagu lungunitha po onyama noshikwiila. Omuyengeli nokwa kana momeho ge.

²² Nena Gideon okwa dhimbulula kutya nguka a mono, nani omuyengeli gwOmuwa nokwi ipopile kuumbanda a ti: “Kalunga omusimanekwa pombanda, onda mono omuyengeli gwoye moshipala!”

²³ Omuwa okwa ti kuye: “Kala nombili, ino tila. Ito si.”

²⁴ Gideon okwa tungile Omuwa oshiyambelo e te shi luku “Omuwa Oye Ombili.” (Oshi li natango muOfra, momukunda gwAayabieser.)

²⁵ Uusiku mbwiyaka Omuwa okwa lombwele Gideon: “Kutha ontsezi yaho nontsezi yilwe yomimvo heyali, hanagula po oshiyambelo shaho shoka a tungile Baal, e to komangele po wo omuti gwoshikalungakiintu Asheera ngoka gu li pooha dhasho.

²⁶ Tunga po oshiyambelo sha tungika, u shi tungile Omuwa Kalunga koye kombanda yoshikulundundu shika. Nena kutha ontsezi ontiyali, u yi lungunithe po omudhidhi to tema niikuni tayi zi komuti gwaAsheera ngoka we gu komangele po.”

²⁷ Gideon okwa kutha omulongo gwomaamati ye nokwa ningi, ngaashi Omuwa e mu lombwele. Okwa li a tila unene aakwawo naantu yomoshilando oku shi ninga omutenya, onkee okwe shi ningi uusiku.

²⁸ Aantu yomoshilando sho ya penduka ongula onene, oya mono oshiyambelo shaBaal nomuti gwaAsheera ya yonagulwa po. Oya mono wo ontsezi ontiyali ya lungunithwa poshiyambelo shoka a tungile ko.

²⁹ Oya pulathana: “Olye a ningi ngeyi?” Oya konakona noya mono kutya oGideon yaJoas e shi ningi.

³⁰ Nena oya lombwele Joas: “Eta omumwoye, tu mu dhipage. Okwa kumuna po oshiyambelo shaBaal nokwa komangele po omuti gwaAsheera.”

³¹ Ihe Joas okwa lombwele aatamaneki ye ta ti: “Omwa gama kuBaal? Otamu mu gamene? Shaa ngoka te mu kondjele, oye na se, manga ngula inaali sha. Baal ngele okalunga, ni ipopile mwene, oshoka oshiyambelo oshe sha yonagulwa po.”

³² Okuza mpoka Gideon okwa lukwa Jerubbaal, oshoka Joas okwa ti: “Baal ni ipopile ye mwene, oshoka oshiyambelo oshe sha yonagulwa po.”

³³ Nena Aamidiana ayehe, Aayamaleki nomazimo gokombuga oya gongala ya taaguluka omulonga Jordan noya yungu oontanda mesilu lyaJesreel.

³⁴ Ombepo yOmuwa oya yi muGideon nokwa hiki enkuma ti ithana aalumentu yomoludhi lwaAbieser, ye mu landule.

³⁵ Okwa tumu elaka kiitopolwa ayihe iyali yAamanasse, ye mu landule. Okwa tumu elaka kAayaser, kAasebuloni nokAanaftali, noye ya kuye.

³⁶ Nena Gideon okwa ti kuKalunga: “Owa ti kutya owa tokola okulongitha ndje, ndi mangulule Israel.

³⁷ Eewa, ote tula nduno omafufu gonzi polupale. Ngele oga kwatwa komume ongula, manga evi lya kukuta, nena ote tseya kutya oto ka longitha ndje, ndi mangulule Israel.”

³⁸ Osho naanaa sha ningwa. Gideon sho a penduka ongula onene, okwa kama omafufu nokuthinina mokayo e taku udha omeya.

³⁹ Nena Gideon okwa ti kuKalunga: “Ino geela ndje, pitika ndje, ndi popye lumwe natango. Kwatha ndje, ndi ninge ishewe elolelo limwe nomafufu. Omafufu naga kale omakukutu, manga evi lya tosima.”

⁴⁰ Uusiku Kalunga osho a ningi. Ongula ya landula omafufu oga li omakukutu, ihe evi olya li lyu udha omume.

7

¹ Esiku limwe Gideon okwa meneka ongula onene pamwe netanga lye e ta yungu ontanda ontega noluthithiya lwaHarod. Ontanda yAamidiana oya li mesilu kuumbugantu wawo pondundu More.

² Omuwa okwa ti kuGideon: “Ou na aalumentu oyendji unene mokusinditha Aamidiana. Otaa ningi ya tye, oya sindi kuyo yene yo itaa simaneke ndje.

³ Lombwela aantu to ti: ‘Shaa ngoka a tila, na shune kegumbo, notatu kala mpaka pondundu Gilead.’ ” Omayuvi omilongo mbali nagaali oga shuna, ihe opwa kala omayuvi omulongo.

⁴ Nena Omuwa okwa lombwele Gideon ta ti: “Natango ou na aalumentu oyendji. Inda nayo kedhiya notandi ku yoololelemo yamwe. Ngoka tandi ku lombwele, u ye naye, oye inda naye. Ngoka tandi ti, ino ya naye, na kale po, ino ya naye.”

⁵ Gideon okwa fala aalumentu kedhiya, nOmuwa okwa ti kuye: “Yoolola mo aalumentu mboka taa shakumine omeya mumboka taa kotamene, ya nwe.”

⁶ Okwa li aalumentu omathele gatatu mboka ya shakumine. Yalwe oya kotamene ya tsa oongolo, ya nwe.

⁷ Omuwa okwa ti kuGideon: “Otandi ku hupitha noku ku sinditha Aamidiana kaalumentu mbaka omathele gatatu mboka ya shakumine. Lombwela yalwe, ya shune komagumbo.

⁸ Osho ngaaka Gideon okwa shunitha Aaisraeli ayehe komagumbo kakele kaamboka omathele gatatu, mboka ya li ye na onguta yomondjila noombenda. Ontanda yAamidiana oya li komeho gawo mesilu.”

⁹ Uusiku mbwiyaka Omuwa okwa lombwele Gideon: “Thikama, matukila ontanda; otandi ku sinditha.

¹⁰ Ihe ngele owa tila oku yi matukila, inda ko kuyo nomupiya gwoye Pura.

¹¹ Oto ku uva shoka taa ti, e to kala wa nyatipala oku yi matukila.” Gideon nomupiya gwe oya kuluka ya yi popepi nontanda yaatondi.

¹² Aamidiana, Aayamaleki naantu yokombuga oya li ya gumbakana nesilu ya fa oshapapa noye na oongamelo odhindjidhindji, oto ti ehekevi lyopooha dhefuta.

¹³ Gideon sho a thiki ko, oku uvu omulumentu ta hokololele kuume ke ondjodhi. Okwa li ta ti: “Onda yaguma oshikwiila shiishokelya sha galangatele montanda yetu e tashi dhenge otenda yimwe. Otenda oya ongotele pevi e tayi yalalala.”

¹⁴ Kuume ke okwa yamukula: “Ndyoka egonga lyOmuisraeli Gideon, omuna gwaJoas. Kashi shi sha shilwe. Kalunga okwa gandja Midian miikaha ye netangakwiita lyetu alihe.”

¹⁵ Gideon sho u uvu ondjodhi yomulumentu naashoka tayi ti, okwa tsu oongolo e ta hambelele Kalunga. Nena okwa galukile kontanda yAaisraeli e ta ti: “Thikameni! Omuwa okwa gandja etangakwiita lyaMidian miikaha yeni.”

¹⁶ Okwa topola aalumentu ye omathele gatatu momatanga gatatu nokwa pe omulumentu kehe ombenda noshiyuma shi na onyeka meni.

¹⁷ Okwe ya lombwele: “Shimpa nda thiki kooha dhontanda, talii ndje nawa, ne mu ninge shoka te ningi.

¹⁸ Uuna tatu hiki oombenda pamwe netanga lyandje, nane wo hikeni dheni mwa kunduka ontanda ne tamu igidha tamu ti: ‘OmolwOmuwa nomolwa Gideon.’ ”

¹⁹ Mokati kuusiku Gideon netanga lye lyaalumentu ethele oye ya popepi nontanda, naanaa konima aatonateli aape sho ye ya miilonga. Nena oya hiki oombenda e taa tatula iiyuma mbyoka ya li nayo,

²⁰ nomatanga gaali ongashikwawo. Oya yelutha oonyeka nomalumoho gawo noombenda okomalulyo gawo noyi igidha taa ti: “Egonga lyOmuwa nolyaGideon!”

²¹ Aalumentu ayehe oya thikama ya dhingilila ontanda, etangakwiita lyaatondi nolya yi ondapo tali kaluluka.

²² Manga aantu yaGideon taa hiki oombenda dhawo, Omuwa okwa vundakanitha aatondi, ya pilukilathana nomagonga gawo ga tagananenathana. Oya fadhukile kuSaretan, sigololo oBet Shitta nandongo oshilando Abel Mehola popepi naTabbat.

²³ Nena aalumentu yomezimo lyaNaftali, lyaAser nolyiitopolwa ayihe iyali yAamanasse oyi ithanwa noya tidha Aamidiana.

²⁴ Gideon okwa tumu aatumwa nevi alihe lyokoondundu dhaEfraim ta ti: “Londolokeni, tu kondjeni nAamidiana. Tonateleni omulonga Jordan noompanalonga, sigo oBet-Bara, mu keelele Aamidiana, yaa taaguluke.” Aaefraim oya hiywa noya tonatele omulonga Jordan noompanalonga, sigo oBetbara.

²⁵ Oya kwata aakwaniilwa yaali yAamidiana, Oreb naSeeb. Oya dhipaga Oreb pemanya lyaOreb naSeeb poshikolelo shoomviinu shaSeeb. Oya tsikile okutidhagana Aamidiana noye eta omitse dhaOreb naSeeb kuGideon, ngoka a li kuuzilo waJordan.

8

¹ Nena Aaefraim oya lombwele Gideon ya ti: “Oshike inoo tu lombwela, sho wa ka homona Aamidiana? Omolwashike we tu ningile ngeyi?” Oye shi tamaneke noonkondo.

² Ihe Gideon okwa ti: “Shoka nda li te vulu okuninga, kashi shi sha nokuyelekwa naashoka mwe shi ningi. Nokuli oshishona shoka mwe shi ningi, oshi vule shoka ezimo lyandje alihe lye shi ningi.

³ Sho shene, okoonkondo dhaKalunga mwa dhipaga aawa yaali yAamidiana, Oreb naSeeb. Oshike nda ningi, shi tukule shino?” Sho a ti ngeyi, oya gololoka.

⁴ Gideon netanga lye lyaalumentu omathele gatatu oye ya komulonga Jordan noye gu taaguluka. Oya li ya loloka nayi, ihe oya landula ngaa aatondi yawo.

⁵ Sho ye ya kuSukkot, okwa lombwele aantu yomoshilando: “Peni wo aantu yandje iikwiila yimwe. Oya loloka, nangame onda landula Seba naZalmunna, aakwaniilwa yAamidiana.”

⁶ Ihe aakuluntu yaSukkot oya ti: “Omolwashike tu na okupa aakwiita yoye iikulya? Ndishi inamu kwata natango Seba naZalmunna.”

⁷ Gideon okwa ti: “Eewa ano! Omuwa ngele okwa gandja Seba naZalmunna miikaha yandje, nena otii ke mu takula nomano nomapokolo gokombuga!”

⁸ Gideon okwa yi kuPenuel nokwe ya hehela ngaashi puSukkot, ihe aantu mbaka oya yamukula ngaashi Aasukkot.

⁹ Okwa ti kuyo: “Ote yi, ihe otii ka galuka ondjolowele nonda ndjanga, nongele nda galuka, otii ka hanagula po epopilongulu lyeni.”

¹⁰ Seba naZalmunna oya li puKarkor pamwe netangakwiita lyawo. Maakwiita ayehe yomazimo gokombuga omwa li mwa hupu ashike 15 000; aakwiita 120 000 oya dhipagwa.

¹¹ Gideon okwa yi nondjila yokooha dhombuga kuuzilo waNobak naJogbeha e ta koloka ta matukile etangakwiita.

¹² Aakwaniilwa mbeyaka yaali yAamidiana, Seba naZalmunna, oya yi ontuku, ihe okwe ya landula e te ya kwata e ta shoshomeke etanga lyawo alihe.

¹³ Gideon sho a li ta galuka kolugodhi ta piti metaulilo lyaHeres,

¹⁴ okwa kwata omumati Omusukkot e te mu pula. Omumati okwe mu nyolele omadhina gaakuluntu omilongo heyali yaSukkot.

¹⁵ Nena Gideon okwa yi kaantu yaSukkot nokwa ti: “Dhimbulukweni, nkene mwa tindile okukwatha ndje. Omwa tile, itamu pe aakwiita yandje ya loloka iikulya, oshoka onda li manga inaandi kwata Seba naZalmunna. Eewa, oyo mbaka nduno!”

¹⁶ Opo ihe okwa kutha omano nomapokolo gokombuga e ta takula nago aakuluntu yaSukkot.

¹⁷ Okwa hanagula po wo epopilongulu puPenuel nokudhipaga aalumentu yomoshilando shoka.

¹⁸ Nena Gideon okwa pula Seba naZalmunna: “Ongiini kombinga yaantu mbeya mwa dhipagele puTabor?” Oya yamukula: “Oye ku fa, shaa ngoka okwa fa munyembala.”

¹⁹ Gideon okwa ti: “Oya li aamwameme yomekoto, ndele ote gana naanaa kutya ando omwa li inaamu ya dhipaga, ando itandi mu dhipaga.”

²⁰ Nena okwa lombwele osheeli she Jeter: “Ila, u ya dhipage!” Ihe omumati ina pweya mo nande egongamwele lye. Okwa li ta kakama, oshoka oye omputu natango.

²¹ Nena Seba naZalmunna oya ti kuGideon: “Ila, u tu dhipage ngoye mwene, oshoka ngoye omulumentu gwomatha.” Osho Gideon e ya dhipaga nokwa kutha po iiwengendje ya li moothingo dhoongamelo dhawo.

²² Konima yaambika Aaisraeli oya ti kuGideon: “Ninga omuleli gwetu — ongoye noluvalo lwoye. Owe tu yululula miikaha yAamidiana.”

²³ Gideon okwa yamukula: “Itandi ningi nando omuleli gweni, nohamumwandje. Omuwa oye omuleli gweni.”

²⁴ Ihe okwa tsikile ta ti: “Nandi mu pule oshinima shimwe. Shaa ngoka gwomune na pe ndje omagola ngoka a hakana.” (Aamidiana naambuga oya li haa zala omagola giingoli.)

²⁵ Aantu oya yamukula: “Otatu nyanyukilwa oku ge ku pa.” Oya yala ekumbyatha pevi noshaa ngoka oku umbile po omagola ngoka a hakana.

²⁶ Omagola giingoli ngoka Gideon a taamba, oge na uudhigu u thike konyala pookilograma omilongo mbali, inaamu yalulilwa omitsuhu nomakwilika noonguwo oombwilili, ndhoka hadhi zalwa kaakwaniilwa yAamidiana, niiwengendje mbyoka ya li moothingo dhoongamelo dhawo.

²⁷ Gideon okwe yi tungitha ondjatha ya nyeleketela e te yi tula moshilando shaandjawo Ofra. Aaisraeli oya gamuka ko kuKalunga kawo noye yi simaneke ya ningi oshikalunga shawo. Osha ningi epundukitho kuGideon noluvalo lwe.

²⁸ Osho Aamidiana ya sindwa kAaisraeli nokapwa li we omahindo. Oshilongo osha li shi na ombili omimvo omilongo ne, sigo okeso lyaGideon.

²⁹ Gideon okwa shuna kaandjawo noko a kala.

³⁰ Okwa li e na oyana aamati omilongo heyali, oshoka okwa li a hokana ombanda.

³¹ Okwa li e na ohonda muShekem; noye mu valele okamati e te ka luku Abimelek.

³² Gideon yaJoas okwa si muukokele wa tya ko nokwa fumvikwa mombila yahe Joas puOfra, oshilando shezimo lyaAbieser.

³³ Konima yeso lyaGideon oshigwana shaIsrael inashi dhiginina Kalunga; osha longele ooBaal. Oya ningi Baal-Berit oshimenka shawo

³⁴ yo inaa tsikila we okulongela Omuwa Kalunga kawo, ngoka e ya mangulula miikaha yaatondi yawo ye ya kunduka.

³⁵ Inaa sila ohenda egumbo lyaGideon moluuwanawa mboka e u ningile Israel.

9

¹ Abimelek yaGideon okwa yi kuShekem, nkoka kwa kala ezimo lyayina,

² e te ya lombwele: “Oshike shi mu vulile oshikwawo? Okupangelwa kaalumentu omilongo heyali, ayehe aana yaGideon, nenge okomulumentu gumwe? Dhimbulukweni kutya Abimelek oye omukweni gwomekoto.”

³ Aakwawo yayina oye shi lombwele aalumentu Aashekem, mboka ya tokola okulandula Abimelek, oshoka omukwawo.

⁴ Oye mu pe iimaliwa iisiliveli omilongo heyali ya zi motempeli yaBaal-Berit, Abimelek nokwa thitha nayo aantu yaamakaha naakolokoshi.

⁵ Okwa yi koohe kuOfra, nokemanya limwe okwa dhipagele ko aamwahe omilongo heyali, aana yaGideon. Ihe Jotam, onkelo yaGideon, okwa holama ye ina dhipagwa.

⁶ Nena aalumentu ayehe yaShekem noyaBetmillo oya yi komwandi gwiidhila kuShekem, nkoka ya ningi Abimelek omukwaniilwa.

⁷ Jotam sho e shi uvu, okwa londo kondungu yondundu Garizim nokwe ya igidha a ti: “Pulakenii ndje, ne aalumentu yaShekem, opo Kalunga e mu pulakene!

⁸ Konalenale omiti odha li dha gongala, dhi ihogololele omukwaniilwa. Odha lombwele omuholivi: ‘Ninga omukwaniilwa gwetu.’

⁹ Omuholivi ogwa yamukula: ‘Ndi ethe ooholivi dhandje hadhi zi omagadhi haga simanekitha ndje kaantu nokiikalunga, opo ndi mu pangele? Aawe.’

¹⁰ Nena omiti odha lombwele omukwiyu: ‘Ila, u ninge omukwaniilwa gwetu.’

¹¹ Ihe omukwiyu ogwa yamukula: ‘Ndi ethe oonkwiyu dhandje oontoye, ngaye ndi mu pangele? Aawe.’

¹² Opo ihe omiti odha lombwele omuviinu: ‘Ila, u ninge omukwaniilwa gwetu.’

¹³ Ihe omuviinu ogwa yamukula: ‘Ndi ethe omaviinu gandje haga nyanyudha aantu niikalunga, ngaye ndi mu pangele? Aawe.’

¹⁴ Osho ngaaka omiti adhihe odha lombwele eno: ‘Ila, u ninge omukwaniilwa gwetu.’

¹⁵ Eno olya yamukula: ‘Ngele omwa hala shili, ndi ninge omukwaniilwa gweni, nena ileni, mu gondje momuzile gwandje. Ngele itamu shi ningi, nena omulilo nagu ndwafuke miitayi yandje yomakwega notagu fike po omisedeli dhaLibanon.’ ”

¹⁶ Jotam okwa tsikile ko a ti: “Omwa kala tuu moshili nomuuyuuki, sho mwa ningi Abimelek omukwaniilwa gweni? Omwa simaneke tuu Gideon nokuninga nawa egumbo lye, ngaashi e shi ilongela?

¹⁷ Dhimbulukweni kutya tate okwa li e mu kondjele. Okwa hupula omwenyo gwe, opo e mu hupithe kAamidiana.

¹⁸ Ihe nena ndjika otamu kondjitha ezimo lyatate. Omwa dhipagele oyana aalumentu omilongo heyali kemanya limwe. Omukweni Abimelek, omuna gwohonda, omwe mu ningi omukwaniilwa gwaShekem.

¹⁹ Ngashingeyi ano shono mwe shi ningile Gideon negumbo lye, ngele oshu uka noshoshili, kaleni mu na ombili naAbimelek, naye na kale nombili nane.

²⁰ Ihe ngele hasho, nena omulilo nagu ndwafuke muAbimelek, gu tyotyomeke aalumentu yaShekem naBetmillo. Omulilo nagu ndwafuke nomaalumentu yaShekem naBetmillo, gu lungunithe Abimelek.”

²¹ Ano Jotam sho a li a tila omumwahe Abimelek, okwa fadhuka po nokwa yi, a ka kale muBeer.

²² Abimelek okwa pangele Israel omimvo ndatu.

²³ Nena Kalunga okwa tula etondathano pokati kaAbimelek naalumentu yaShekem noya tukulilathana iipotha.

²⁴ Shika osha ningilwa okugeelela uutoni waAbimelek naalumentu yaShekem, mboka ya li ye mu kingika okudhipaga aana yaGideon omilongo heyali.

²⁵ Aalumentu yaShekem oya tula aalangeli koondungu dhoondundu, noya yugu ayehe mboka taa piti po. Abimelek okwe shi hokololelwa.

²⁶ Nena Gaal yaEbed okwe ya kuShekem naamwayina, naalumentu yaShekem oye mu inekele.

²⁷ Oya yi ayehe komayana gawo gomiviinu e taa toonona omandjembele e taa ga kolo omaviinu e taa hanga oshituthi. Oya yi motempeli yoshikalunga shawo, moka ya li e taa nu noya nyana Abimelek.

²⁸ Gaal okwa ti: “Tse aantu twa tya ngiini ano muShekem? Omolwashike tatu longele Abimelek? Oye olye nokwa zi peni? Omuna gwaGideon! Sebul oye elenga lye, ihe oshike tatu mu longele? Vulikeni kunyokokulu Hamor, omutoti gwezimo.

²⁹ Ando ndi kale te wilike oshigwana shika, ando otandi shi kanyutulula kuAbimelek! Onda hala ndi tye kuye: ‘Ikolelela! Koleka omatanga goye e to ya okukondja!’ ”

³⁰ Sebul, omuleli gwoshilando, okwa geye, sho a kundana omulombo gwaGaal.

³¹ Okwa tumu aatumwa kuAbimelek puAruma, ya tye: “Gaal yaEbed naamwayina oye ya kuShekem noitaa ke ku pitika nando, u kale moshilando.

³² Onkee ano ngoye naantu yoye zii ko uusiku, mu ye koshilangela kelundu.

³³ Ngula penduka pepito lyetango, u ponokele oshilando ohaluka. Gaal sho te ya naantu ye oku ku kondjitha, ya gopagula, ngaashi tashi vulika.”

³⁴ Osho Abimelek naantu ye oya yi uusiku e taa holama pondje yaShekem momatanga gane.

³⁵ Abimelek naantu ye sho ya mono Gaal ta zi mo e ta thikama posheelo shoshilando, oya hololoka mo miilangela yawo.

³⁶ Gaal okwe ya e ta ti kuSebul: “Heyi! Tala! Aalumentu oombeya taa ya taa zi koondundu.” Sebul okwa yamukula: “Kaye shi aantu, ndhoka omizizimba monyonga yondundu.”

³⁷ Gaal okwa ti ishewe: “Tala nduno! Aalumentu oombeya taa kuluka taa ende kombanda yondundu, nongundu yimwe oya lambalala ondjila ya za komwandi gwiidhila.”

³⁸ Nena Sebul okwa ti kuye: “Okana koye hoka wa lenga ho, oke li peni? Ndishi owa ti, oshike tatu longele omulumentu nguno Abimelek? Mbaka oyo aalumentu mboka wa popi nondhino. Ya matukila nduno, oyo mbo!”

³⁹ Gaal okwa wilike aalumentu yaShekem e ta kondjitha Abimelek.

⁴⁰ Gaal okwa fadhuka po, naAbimelek okwe mu landula. Oyendji oya li ye ehamekwa, unene posheelo shoshilando.

⁴¹ Abimelek okwa kala muAruma, naSebul okwa tidha Gaal naamwayina muShekem, opo yaa kale mo we.

⁴² Esiku lyanofu Abimelek okwa dhimbulula kutya Aasikem oya dhiladhila okuya ondapo momalundu.

⁴³ Onkee a kutha aantu ye e te ya topola momatanga gatatu, ya ka langele momalundu. Sho a mono aantu ya thigi po oshilando, okwa hololoka ko, opo e ya dhipage.

⁴⁴ Abimelek nongundu ye manga taa matuka yu uka komweelo gwoshilando, ye gu tonatele, omatanga omakwawo gaali oga ponokele aantu momalundu e taye ya dhipaga ayehe.

⁴⁵ Olugodhi olwa tsikile esiku alihe. Abimelek okwa kwata oshilando, a dhipaga aantu yasho e te shi hanagula po noku shi gunda uuzigo.

⁴⁶ Ano aawiliki ayehe mepopilongulu lyaShekem sho ye shi uvu, oya ka holama mohote yomotempeli yaBaal-Berit.

⁴⁷ Abimelek okwa lombwelwa kutya oya gongala nkoka,

⁴⁸ onkee okwa yi a londo kondundu Salmon naalumentu ye. Oko a kutha ekuya e ta tete oshitayi shomuti e te shi leke kepepe lye.

⁴⁹ Osho ngaaka omulumentu kehe a tete oshitayi shomuti, noya landula Abimelek noya ndumbike iiti pohote. Oye yi tomeke, manga aantu ye li meni; aantu ayehe yomohote noya lokotele mo komulilo. Mbaka oya li aalumentu naakiintu ye thike peyuvi.

⁵⁰ Nena Abimelek okwa yi kuTebes e ta kondeke oshilando e te shi kwata po.

⁵¹ Oshilando osha li shi na epopilongulu lya kola. Aantu ayehe, aalumentu naakiintu, naawiliki wo, oya ka holama ya matukile mo. Oyi ipatele mo e taa yi pombanda.

⁵² Abimelek sho e ya, a matukile epopilongulu, okwa yi komweelo, opo e li tomeke.

⁵³ Ihe omukulukadhi gumwe oku umbu oshikweyithilomanya e tashi mokola nokunyanyula omutse gwe.

⁵⁴ Abimelek okwi igidha nziya omumati omuhumbati gwomatati ge e te mu lombwele: “Pweya mo egongamwele lyoye, u dhipage ndje. Inandi hala taku tiwa kutya omukulukadhi a dhipaga ndje.” Omumati okwe mu tsu e ta si.

⁵⁵ Aaisraeli sho ya mono Abimelek a si, oya shuna kaandjawo.

⁵⁶ Osho Kalunga okwa galulile Abimelek shoka a ningile egumbo lyahe mokudhipaga aamwahe omilongo heyali.

⁵⁷ Kalunga a talitha wo aalumentu yaShekem uudhigu moluugoyoki wawo, ngaashi Jotam yaGideon a ti, sho e ya tula omutima.

10

¹ Konima yeso lyaAbimelek Tola yaPua, omutekulu kwaDodo, okwa holoka, a mangulule Israel. Okwa li gwomezimo lyaIssaskar nokwa kalele muShamir kevi lyokoondundu dhaEfraim.

² Okwa wilike Israel omimvo omilongo mbali nandatu. Nena okwa mana oondjenda nokwa fumvikwa muShamir.

³ Tola okwa landulwa kuJair gwokuGilead. Okwa wilike Israel omimvo omilongo mbali nambali.

⁴ Okwa li e na oyanamati omilongo ndatu, mboka ya kayile uusino omilongo ndatu. Oya li ye na iilando omilongo ndatu muGilead, mbyoka hayi ithanwa nduno iilando yaJair.

⁵ Jair okwa si nokwa fumvikwa puKamon.

⁶ Aaisraeli oya yono ishewe kOmuwa, sho ya simaneke ooBaal nooAstarte, osho wo iikalunga yaSiria, yaSidoni, yaMoab, yaAmmon noyAafilisti. Oye etha Omuwa yo inaye mu simaneka we.

⁷ Onkee Omuwa okwa geele Aaisraeli nokwe etha Aafilisti nAayammoni ye ya sinde.

⁸ Omimvo omulongo nahetatu oya thininike nokuhepeka Aaisraeli ayehe mboka ya kala moshilongo shAayamori kuuzilo womulonga Jordan muGilead.

⁹ Aayammoni oya taaguluka nokuli omulonga Jordan ye ya, ya kondjithe ezimo lyaJuda, lyaBenjamin nolyaEfraim. Israel okwa li muudhigu kaawu shi kutumbulwa.

¹⁰ Nena Aaisraeli oya kugile Omuwa e taa ti: “Otwa yono kungoye, oshoka otwe ku etha, Kalunga ketu, notwa simaneke ooBaal.”

¹¹ Omuwa okwe ya yamukula a ti: “Aayegipiti, Aayamori, Aayammoni, Aafilisti,

¹² Aasidoni, Aayamaleki nAamaon oye mu hepeke monale, nomwa kugu kungame. Inandi mu hupitha miikaha yawo?

¹³ Ihe ne omwe etha ndje owala e tamu simaneke iikalunga yilwe, onkee itandi mu hupitha we.

¹⁴ Indeni, ki ithaneni iikalunga yeni mbyoka mwa hogolola. Nayi mu mangulule, sho mwa adhika kuudhigu.”

¹⁵ Ihe oshigwana shaIsrael osha yamukula sha ti kOmuwa: “Otwa yono. Ninga shoka she ku opalela, shaa tuu to tu hupitha nena.”

¹⁶ Osho ya manguluka kiikalunga yawo iikwiilongo noya longele Omuwa; oye nokwe ehamenwa uudhigu waIsrael.

¹⁷ Nena Aayammoni oya gongala, ya ye kiita noya yungu ontanda muGilead. Aaisraeli oya gongala wo noya yungu ontanda muMispe muGilead.

¹⁸ Nkwiyaka oshigwana naawiliki yomazimo gaIsrael oya pulathana: “Olye ta wilike olugodhi okukondjitha Aayammoni? Ngoka te shi ningi, oye na kale omuwiliki gwaantu ayehe yomuGilead.”

11

¹ Jefta, omukwiita ofule gwokuGilead, okwa li omuna gwohonda. He Gilead

² okwa li e na oyana yalwe nomukadhi. Sho ya koko, oya tidha po Jefta noya ti kuye: “Ito ka thigulula nando osha putate, oshoka nyoko okwi ili.”

³ Jefta okwa yi ontuku yaamwahe e ta ka kala mevi lyaTob. Okwi ihilile ongundu yaantu yaamakaha noye ende ye mu tula mokakuwilili.

⁴ Konima yethimbo Aayammoni oya hingile Aaisraeli iita.

⁵ Shika sho sha ningwa, aawiliki yaGilead oya ka tala Jefta kevi lyaTob.

⁶ Oya ti: “Ila, u tu wilike, opo tu kondjithe Aayammoni.”

⁷ Ihe Jefta okwa yamukula: “Ne omwa tondo ndje nayi, sigo mwa tidha ndje maandjatate. Omolwashike tamu ya kungame ngashingeyi, sho mwa adhika kuudhigu?”

⁸ Oya ti kuye: “Otwi igameke kungoye, oshoka otwa hala, tu ye nangoye, tu ka kondjithe Aayammoni, ngoye u wilike aantu ayehe muGilead.”

⁹ Jefta okwa ti kuyo: “Ngele otamu galulile ndje kegumbo, ndi kondjithe Aayammoni, nOmuwa ta pe ndje esindano, nena otii ka ninga omuleli gweni.”

¹⁰ Oya yamukula: “Otwa zimine. Omuwa oye onzapo yetu.”

¹¹ Osho ngaaka Jefta a yi naawiliki yaGilead, naantu oye mu ningi omuleli nomuwiliki gwawo. Koshipala shOmuwa muMispa Jefta okwe endulula oohapu dhe adhihe e dhi popi naawiliki.

¹² Nena Jefta okwa tumu aatumwa komukwaniilwa gwaAmmon nelaka tali ti: “Oshike to tamanana natse? Omolwashike to matukile oshilongo shetu?”

¹³ Omukwaniilwa gwaAmmon okwa yamukula aatumwa yaJefta ta ti: “Aaisraeli sho ya zile muEgipiti, oya kutha po evi lyandje okuza komulonga Arnon sigo omulonga Jabbok nomulonga Jordan. Ngashingeyi li galulila ndje nombili.”

¹⁴ Jefta okwa tumununa ko ishewe aatumwa komukwaniilwa gwaAmmon,

¹⁵ neyamukulo lye tali ti: “Kashi shi oshili kutya Israel okwa kutha po evi lyaMoab nenge evi lyaAmmon.

¹⁶ Shoka sha ningwa, osho shika. Aaisraeli sho ya thigi po Egipiti, oya taula ombuga, sigo okEkololo lyaAkaba, e taa thiki kuKadesh.

¹⁷ Nena oya tumu aatumwa komukwaniilwa gwaEdom, ye mu pule epitikilo, ya taakane evi lye. Ihe omukwaniilwa gwaEdom ine ya pitikila. Oya pula ishewe omukwaniilwa gwaMoab, naye ongashikwawo, ine ya pitikila, ya pite mevi lye. Osho nduno Aaisraeli ya kala muKadesh.

¹⁸ Nena oya tsikile ya piti mombuga taa dhingoloka evi lyaEdom nevi lyaMoab, handiyaka yomulonga Arnon. Oko ya yungu ontanda, ihe inaa tokola nando Arnon, oshoka ogwa li ongamba yaMoab.

¹⁹ Nena Aaisraeli oya tumu aatumwa kuSihon, omukwaniilwa gwAayamori gwokuHeshbon noye mu pula epitikilo, ya taakane oshilongo she, ya ye kevi lyaandjawo.

²⁰ Ihe Sihon ina pitika nando, Aaisraeli ye shi ninge. Okwe eta aakwiita ye ayehe e taa yungu ontanda puJahas nokwa matukile Aaisraeli.

²¹ Ihe Omuwa, Kalunga kaIsrael, okwa sinditha Aaisraeli ya sindi Sihon niita ye. Osho ngaaka Israel a lala oshilongo ashihe shAayamori mboka ya kala moshilongo shoka.

²² Oya kutha po oshilongo shAayamori ashihe okuza kuArnon muumbugantu sigo oJabbok muumbangalantu nokuza kombuga kuuzilo sigo oJordan kuuninginino.

²³ Shika osha ningwa kOmuwa, Kalunga kaIsrael, ngoka a kwatha aantu ye Aaisraeli, ya tidhe po Aayamori.

²⁴ Owa hala, u kambadhale oku li kutha ko? Dhiginina ndyoka wa pewa kukalunga koye Kemosh. Ihe tse otatu ka takamitha ashihe shoka Omuwa, Kalunga ketu, e tu pe.

²⁵ Oto dhiladhila kutya ongoye omwaanawa u vule Balak yaZippor, omukwaniilwa gwaMoab? Okwa homona tuu Israel nenge e ya etela iita nando olumwe?

²⁶ Oshoka pwa piti omimvo omathele gatatu, sho Israel a lala Heshbon naAroer, niilando yomuushiinda wayo, niilando ayihe komunkulo gwomulonga Arnon. Oshike inoo yi kutha ko nale?

²⁷ Aawoo, inandi ku hinda nando okashona. Ongoye to hindi ndje, sho to etele ndje iita. Omuwa oye omutokoli. Oye ta ka tokola pokati kAaisraeli nAayammoni.”

²⁸ Ihe omukwaniilwa gwaAmmon ina pupa ko nokuli kelaka lyaJefta.

²⁹ Ombepo yOmuwa oya lambele Jefta. Okwa taakana Gilead naManasse e ta galukile kuMispe muGilead e ta yi kuAmmon.

³⁰ Jefta oku uvanekele Omuwa: “Ngele oto sinditha ndje Aayammoni,

³¹ omuntu ngoka ta ka tsakaneka ndje tango ta zi maandjetu, otandi ke mu gandja kOmuwa omayambo, sho te galuka kiita nda sindana. Omuntu ngoka otandi ke mu ninga efikilondjambo.”

³² Osho Jefta a tokola omulonga, a ka kondje nAayammoni; Omuwa nokwe mu pe esindano.

³³ Okwe ya thepagula okuza kuAroer nombinga ayihe muushiinda waMinnit, iilando omilongo mbali ayihe kumwe, sigololo Abel Keramim. Opwa li omulape gwowala, Aayammoni noya sindika kAaisraeli.

³⁴ Jefta sho a galukile kegumbo kuMispe, omwana omukadhona okwe ke mu tsakaneka ta tembula ye ta hiki ontunda. Okwa li epona.

³⁵ Sho e mu mono, okwa tuula oonguwo dhe moluhodhi e ta ti: “O, mumwandje! Owa tatula omutima gwandje! Omolwashike wa undulile ndje momupya gu thike mpano? Onda ninga euvaneko nde li uvanekele Omuwa, noite vulu oku li lundulula.”

³⁶ Omwanakadhona okwa ti kuye: “Ngele owa uvanekele Omuwa euvaneko, ninga sho wa ti, u shi ningile ndje. Omuwa ndishi okwe ku pa esindano, sho wa dhenge aatondi yoye Aayammoni.”

³⁷ Ihe okwi indile he a ti: “Ningila ndje shika. Etha ndje manga oomwedhi mbali, ndi ye nookanee kandje koondundu, ndi ka lilile ko uukadhona wandje, sho te si inaandi fukala.”

³⁸ He okwe mu lombwele, a ye, nokwe mu etha, a kale oomwedhi mbali. Okwa yi nookanee ke koondundu nokwa lilile ko uukadhona we, oshoka ina hokanwa noke na oluvalo.

³⁹ Konima yoomwedhi mbali okwa galukile kuhe. Jefta okwa ningi, ngaashi u uvanekele Omuwa, nomwana okwa si manga ye omukadhona. Shika osha ningile ondjigilile muIsrael.

⁴⁰ Aakiintu aagundjuka haa yi omasiku gane omumvo kehe oku ka lila omwana omukadhona gwaJefta gwokuGilead.

12

¹ Aantu yaEfraim oyi ilongekidhile olugodhi. Oya tokola omulonga Jordan yu uka kuZafon noya ti kuJefta: “Omolwashike wa kondo oongamba wa ka kondja nAayammoni, nando ino tu lombwela, tu yeni nangoye? Otatu fike po egumbo lyoye.”

² Ihe Jefta okwa ti kuyo: “Tse noshigwana shandje otwa li tu na oontamanana dha kwata miiti nAayammoni. Onde mu ithana, ihe ne inamu ya, mu hupithe ndje miikaha yawo.

³ Sho nda mono kutya inamu shi ninga, onda hupula omwenyo gwandje nonda tokola oongamba, ndi ke ya kondjithe, Omuwa nokwa pe ndje ompolo yoku ya sinda. Omolwashike mwa hala okukondjitha ndje ngashingeyi?”

⁴ Nena Jefta okwa gongele aalumentu ayehe yaGilead, a matukile Aaefraim, e te ya dhenge. (Aaefraim oya tile: “Ne Aagilead mu li muEfraim naManasse, one oontauki mwa za kuEfraim.”)

⁵ Aagilead oya kala poonkondo dhaJordan apehe mpoka hapu tokolwa, opo ya keelele Aaefraim, yaa taaguluke omulonga, yaa ye ondapo. Omuefraim kehe ngoka a hala okutaaguluka omulonga ta yi ondapo, sho a pula eziminino, nena Aagilead oya pula: “Ngoye Omuefraim?” Ngele ota ti: “Aawe”,

⁶ nena otaye mu lombwele e taa ti: “Tya ‘Shibbolet.’ ” Ngele ota ti: “Sibbolet”, oshoka ita vulu oku shi tumbula nawa, nena otaye mu kwata e taye mu dhipaga ponkondo ndjoka yaJordan. Pethimbo ndyoka Aaefraim omayuvi omilongo ne nagaali oya dhipagwa.

⁷ Jefta okwa wilike Israel omimvo hamano. Nena okwa mana oondjenda nokwa fumvikwa moshilando shaandjawo muGilead.

⁸ Jefta sho a si, Ibzan Omubetlehem okwa wilike Israel.

⁹ Okwa li e na oyanamati omilongo ndatu naakadhona omilongo ndatu. Okwa hokanitha oyana aakadhona kaayeni nokwa tenyitha oyana aamati kaayeni. Ibzan okwa wilike Israel omimvo heyali.

¹⁰ Okwa si nduno nokwa fumvikwa puBetlehem.

¹¹ Konima yaIbzan Elon Omusebulon okwa wilike Israel omimvo omulongo.

¹² Oye a si nduno nokwa fumvikwa puAjalon moshilongo shaSebulon.

¹³ Elon okwa landulwa kuAbdon yaHillel gwokuPiraton.

¹⁴ Okwa li e na oyanamati omilongo ne naatekulumati omilongo ndatu, mboka ya li haa londo kuundoongi omilongo heyali. Abdon okwa wilike Israel omimvo hetatu.

¹⁵ Okwa si nokwa fumvikwa puPiraton moshitopolwa shaEfraim omevi lyoondundu lyAayamaleki.

13

¹ Aaisraeli oya yono ishewe kOmuwa, oye nokwe ya gandja miikaha yAafilisti, ye ya pangele omimvo omilongo ne.

² Pethimbo ndyoka opwa li omulumentu, edhina lye Manoak, gwokoshilongo Soar. Okwa li gwomezimo lyaDan. Omukadhi okwa li ihaa mono uunona.

³ Omuyengeli gwOmuwa okwe mu holokele nokwa ti kuye: “Sigo ongashingeyi ino mona uunona, ihe oto ka kala metegelelo, u vale omumati.

⁴ Kotoka, waa nwe nando omaviinu nenge omalovu, ngoye waa lye iikulya yi indikwa.

⁵ Omunona ngele a valwa, ino kulula ko omafufu ge, oshoka okuza kevalo lye ota ka kala omunasiri, a yoololelwa Kalunga. Oye ta ka mangulula Israel miikaha yAafilisti.”

⁶ Omukulukadhi okwa yi e te shi lombwele omulumentu gwe ta ti: “Omuntu gwaKalunga okwi ile kungame; okwa li omutilithi a fa omuyengeli gwaKalunga. Inandi mu pula nando mpoka a zi, ye ina lombwela ndje nando edhina lye.

⁷ Ihe okwa lombwele ndje kutya otandi ka kala metegelelo e tii ka vala okamati. Okwa lombwele ndje, ndaa nwe omaviinu nenge omalovu, nenge okulya iikulya yi indikwa, oshoka omumati ota ka kala omunasiri, a yoololelwa Kalunga sigo okesiku lyeso lye.”

⁸ Nena Manoak okwa galikana Omuwa a ti: “Omuwa, tumununa omuntu gwaKalunga kutse, opo e tu lombwele kutya okamati otatu ka ningi ngiini, nge ka valwa.”

⁹ Kalunga okwa ningi, ngaashi Manoak a pula. Omuyengeli gwe okwa galukile komukiintu, manga a li omutumba mepya. Omulumentu gwe Manoak ka li puye.

¹⁰ Omukadhi okwe ke mu lombwela e ta ti: “Tala! Omulumentu ngoka i ile kungame uunambo, okwe ya ishewe kungame.”

¹¹ Manoak okwa thikama e ta landula omukadhi. Okwa yi komulumentu ngoka e ta ti: “Ongoye tuu omulumentu ngoka a li ta popi namukadhandje?” Okwa yamukula a ti: “Eeno.”

¹² Nena Manoak okwe mu pula: “Ngele oohapu dhoye dha tsakanithwa, omumati oku na okuninga shike? Ota putudhwa ngiini?”

¹³ Omuyengeli okwa yamukula: “Mukadhoye na dhimbulukwe ayihe mbyoka nde mu hokololele.

¹⁴ Na kale itaa li sha shoka hashi zi momandjembele; ke na okunwa omaviinu nenge omalovu, nenge okulya iikulya yi indikwa. Na gwanithe ashihe shoka nde mu lombwele.”

¹⁵ Manoak ina tseya nando kutya oye omuyengeli gwOmuwa. Onkee okwa ti kuye: “Kwatha ndje alikana, waa ye manga. Tu pitika, tu ku telekele onyama yonkombwena.” Ihe omuyengeli okwa ti: “Nando ondi kale mpaka, itandi ka lya oondya dhoye. Ihe ngele wa hala, u dhi longekidhe, dhi fikila Omuwa omayambo.”

¹⁶

¹⁷ Manoak okwa yamukula: “Tu lombwela edhina lyoye, opo tu ku simaneke, uuna oohapu dhoye tadhi ka tsakanithwa.”

¹⁸ Omuyengeli okwa pula: “Omolwashike mwa hala okutseya edhina lyandje? Edhina lyandje eholekwa.”

¹⁹ Manoak okwa kutha onkombwena niilya iishona, noposhiyambelo shemanya okwe yi yambele Omuwa ngoka ha ningi iikumithalonga.

²⁰ Omulilo manga tagu lilima poshiyambelo, Manoak nomukadhi oya mono omuyengeli gwOmuwa ta yelukile kegulu momalaka gomulilo. Manoak okwa dhimbulula nduno kutya nani omulumentu oye omuyengeli gwOmuwa, oye nomukadhi oya tsu iipala yawo pevi. Inaa mona we omuyengeli.

²¹

²² Manoak okwa ti komukadhi: “Otu shi kutya tse oyokusa naanaa, oshoka otwa mono Kalunga.”

²³ Ihe omukadhi okwa yamukula a ti: “Ando Omuwa a li a hala oku tu dhipaga, ando ina taamba omayambo getu; ando ine tu ulukila ayihe mbika nenge ando nena ine tu hokololela iinima ya tya ngeika.”

²⁴ Omukulukadhi okwa pulumutha okamati noye ka luku Simson. Okanona oka koko, Omuwa nokwe ka laleke nuuyamba.

²⁵ Oonkondo dhOmuwa nodha tameke oku mu koleka, manga a li pokati kaSoar naEshtaol montanda yaDan.

14

¹ Esiku limwe Simson okwa yi kuTimna, nkoka i itsu omukadhona Omufilisti.

² Okwa shuna kaandjawo e ta ti kaakuluntu ye: “Onde endela omukadhona Omufilisti kuTimna. Ke mu talelii ndje; onda hala oku mu hokana.”

³ Ihe aakuluntu ye oye mu pula: “Omolwashike to yi kumboka aapagani Aafilisti, u kuthe ko omukiintu? Ito vulu okukutha omukiintu moludhi lwetu, mokati koshigwana shetu?” Ihe Simson okwa ti kuhe: “Oye awike nda hala, mu ke mu talele ndje. Ondi mu hole.”

⁴ Aakuluntu ye inaa tseya kutya Omuwa okwa li te enditha Simson okuninga ngeyi, oshoka Omuwa okwa li ta kongo olweedhe lwo opala okukondjitha Aafilisti. Pethimbo ndika Aafilisti oya li taa pangele Israel.

⁵ Osho ngaaka Simson okwa yi kuTimna pamwe naakuluntu ye. Manga ya li taa yi koshitsambe shomiviinu, oku uvu onkoshi ongundjuka tayi pumbu.

⁶ Ohaluka oonkondo dhOmuwa dhe ya muSimson, nokwa toogonyona onkoshi niikaha ye, oto ti omuntu ta toogonyona onkombwena. Ihe ina lombwela nando aakuluntu ye shoka a ningi.

⁷ Okwa yi nduno e ta popi nomukadhona nokwa li e mu hokwa.

⁸ Omasiku gamwe sho ga piti po, Simson okwa shuna ko ishewe, e ke mu hokane. Mondjila okwa peguka mo, a tale onkoshi ndjoka a dhipagele, nokwa li a kumwa, sho a mono ehunga lyoonyushi nomagadhi gadho ge li molukolo lwonkoshi ndjoka ya sa.

⁹ Okwa kogonyona mo omagadhi goonyushi niikaha ye e te ga li, manga te ende. Nena okwa yi kaakuluntu ye e te ya pe ko wo. Oye ga li, ihe Simson ine ya lombwela kutya okwe ga kutha molukolo lwonkoshi ya sa.

¹⁰ He yaSimson okwa yi kaandjamukadhona, naSimson okwa ningi omatelekela hwiyaka. Shika osha li omukalo mokati kaagundjuka.

¹¹ Aafilisti sho ye mu mono, oya tumu aagundjuka aamati omilongo ndatu, ya kale puye.

¹² Simson okwa ti kuyo: “Nandi mu pule otumbutumbu. Otandi mbetse nakehe gumwe gwomune ohema yoliina ya thola nomutsuhu gwuufuuli nokutya itamu vulu okulombwela ndje momasiku ngaka gaheyali gohango kutya otayi ti ngiini.” Oyo ya ti kuye: “Tu lombwela otumbutumbu yoye.”

¹³

¹⁴ Okwa ti: “Iikulya oya zi momufukedhi; uutoye owa zi momunankondo.” Oya kala ya nyengwa uule womasiku gatatu okutseya otumbutumbu.

¹⁵ Mesiku etine oya ti kumukadhaSimson: “Enda omulumentu gwoye miineya, u tu lombwele kutya otumbutumbu otayi ti ngiini. Ngele hasho, otatu ka tomeka egumbo lyaho omulilo e tatu mu lungunithile mo. Omwe tu hiya nani, mu tu yuge! Hasho?”

¹⁶ MukadhaSimson okwe ya kuye ta lili e ta ti: “Ngoye ku hole ndje! Ou tonde ndje! Owa pula yakwetu otumbutumbu ngoye ino lombwela ndje kutya otayi ti ngiini.” Simson okwa ti kuye: “Tala, inandi yi lombwela nande otate nameme. Omolwashike ndi na oku yi ku lombwela?”

¹⁷ Oye a lili omasiku ngoka agehe gaheyali gohango. Ihe mesiku etiheyali Simson okwe mu lombwele shoka otumbutumbu tayi ti, oshoka omufuko okwe mu tsitsimike unene. Nena omukiintu okwa lombwele Aafilisti.

¹⁸ Mesiku etiheyali manga Simson inaa ka lala, aantu yomoshilando oya ti kuye: “Oshike oshitoye shi vule omagadhi goonyushi? Oshike shi na oonkondo shi vule onkoshi?” Simson okwa yamukula: “Ando omwa li inaamu pululitha ontana yandje, ando inamu tseya eyamukulo.”

¹⁹ Ohaluka oonkondo dhOmuwa odhe ya muye nokwa yi kuAshkelon e ta dhipaga aalumentu omilongo ndatu e ta kutha ko oonguwo dhawo dhuufuuli e te dhi pe aalumentu mboka ya fatulula otumbutumbu. Konima yaashika okwa yi kegumbo nokwa li a ngunya, a geele shoka sha ningwa po.

²⁰ Omufuko gwe okwa kuthwa po koshinkumbi she.

15

¹ Esiku limwe konima Simson okwa yi, a ka talele po omukadhi pethimbo lyeteyo lyosiima nokwa faalele onkombwena. Okwa ti kuhemweno: “Onda hala okuya kumukadhandje.” Ihe hemweno ine mu pitika.

² Okwa ti kuSimson: “Onda li ndi shi, owe mu tondo nokuli, nomolwashoka onde mu gandja koshinkumbi shoye. Ihe opu na omumwayina ondenge ye omwaanawa e mu vule. Oye kutha po, a ninge gwoye.”

³ Simson okwa ti: “Ngashingeyi kandi na we mbedhi, ngele tandi geele Aafilisti.”

⁴ Okwa yi nokuli e ta kwata oombandje omathele gatatu. Okwa kutha oombandje oombali noombali, nomishila dhadho okwe dhi mangele kumwe e ta tula ko onyeka.

⁵ Nena okwe dhi tidhile momapya gAafilisti e dhi tomeka omulilo. Pamukalo nguka okwa fike po oondudhi adhihe niilya wo mbyoka inaayi teywa manga, osho wo iitsambe yomiviinu nooholivi ndhoka hadhi zi omagadhi.

⁶ Aafilisti sho ya pulathana kutya olye a ningi ngeyi, oya koneke kutya nani oSimson e shi ningi, oshoka hemweno gwokuTimna okwa gandja omufuko gwe koshinkumbi she. Aafilisti oya yi e taa fike po omufuko negumbo lyahe.

⁷ Simson okwe ya lombwele. “Omwa ningi nayi! Oshili ite mwena, manga inaandi mu galulila ondjambi yeni!”

⁸ Okwe ya mbolokotele e te ya vunyagula, noyendji yomuyo okwe ya dhipaga. Nena okwa yi e ta kala mekololo lyemanya puEtam.

⁹ Aafilisti oye ya noya yungu ontanda muJuda e taa matukile oshilando Lehi.

¹⁰ Aajuda oye ya pula: “Omolwashike tamu tu matukile?” Oya yamukula ya ti: “Otwe ya, tu kwate Simson, tu mu tule meti, tu mu ningile, ngaashi e tu ningile.”

¹¹ Nena aalumentu omayuvi gatatu gaJuda oya yi kekololo lyemanya puEtam e taa ti kuSimson: “Ku shi shi kutya Aafilisti oyo aapangeli yetu? Owe tu ningi ngiini?” Okwa yamukula: “Onde ya ningile naanaa shoka ya ningile ndje.”

¹² Aalumentu oya ti: “Otwe ya, tu ku mange, tse tu ku gandje kuyo.” Simson okwa ti: “Ganenii ndje, mwaa dhipage ndje ne yene.”

¹³ Oyo ya ti kuye: “Onawa, otatu ku manga ashike e tatu ku gandja miikaha yawo. Itatu ku dhipaga.” Oye mu manga noongodhi oompe noye mu kutha mo mekololo.

¹⁴ Sho ye ya kuLehi, Aafilisti oye mu matukile taye mu igidha. Ohaluka oonkondo dhOmuwa odhe ya muye, e ta tokola oongodhi dha li dhe mu manga komaako nokiikaha dha li dha fa oondali dha pya komulilo.

¹⁵ Nena okwa mono oluyego lwokasino opo ka sile. Okwa petama e te lu toola po e ta dhipaga nalwo aalumentu eyuvi limwe.

¹⁶ Simson nokwi imbi eimbilo tali ti: “Aalumentu eyuvi limwe onde ya dhipaga noluyego lwokasino; onoluyego lwokasino onde ya ndumbike mondumba.”

¹⁷ Konima yaambika okwe ekelehi oluyego lwokasino. Ehala mpoka pwa ningilwa mbika, olya lukwa Ramat Lehi.

¹⁸ Simson sho a li e endjwa mo kenota, okwi ithana Omuwa e ta ti: “Ongoye wa pe ndje esindano ndika ekumithi, ihe ngashingeyi oto etha, ndi se kenota ngaye ndi kwatwe kaapagani mbano Aafilisti.”

¹⁹ Nena Kalunga okwe egulula olumbogo mevi puLehi, nomeya oga fuluka mo. Simson okwe ga nu e ta talalelwa noku uvite nawa. Oluthithiya nduka olwa lukwa Hakkore; olu li sigo onena puLehi.

²⁰ Simson okwa wilike Israel omimvo omilongo mbali, manga Aafilisti ya li taa pangele evi.

16

¹ Esiku limwe Simson okwa yi koshilando shAafilisti edhina lyasho Gaza, nkoka i itsu ohonda e ta lala nayo.

² Aantu yaGaza oya koneke kutya Simson oku li moshilando. Oya kunduka eha ndyoka noye mu tegelela uusiku auhe posheelo shoshilando. Oya li ya mwena uusiku auhe e taa dhiladhila: “Otatu tegelele sigo opepito lyetango, opo naanaa tu mu dhipage.”

³ Ihe Simson okwa ka lala ashike sigo pokati kuusiku. Nena okwa penduka e ta kwata iikulo yomweelo gwoshilando e te yi nakula mo — omiyelo, iikulo, iipatitho naayihe. Okwe yi itsike komapepe a ta yi nayo ayihe, sigo okondungu yondundu ya talathana naHebron.

⁴ Konima yaambika Simson okwa yaleke omukiintu a kala mesilu lyaSorek, edhina lye Delila.

⁵ Aakwaniilwa yatano yAafilisti oya yi kuye noya ti: “Enda Simson nawa, opo e ku lombwele kutya oonkondo dhe oonene odha kala peni. Otatu vulu oku mu sinda ngiini, tu mu mange notu mu ninge omukatalume gwowala? Nena shaa gumwe gwetu ote ke ku pa iimaliwa iisiliveli eyovi limwe nethele limwe.”

⁶ Delila okwa ti kuSimson: “Alikana, lombwela ndje shoka hashi ku nkondopaleke. Ngele ope na omuntu a hala oku ku manga, e ku ninge omukatalume, ote shi ningi ngiini?”

⁷ Simson okwa yamukula: “Ngele otaa manga ndje noothipa heyali oompe inaadhi kukuta, nena ote fe yakwetu.”

⁸ Onkee aakwaniilwa oye etele Delila oothipa heyali inaadhi kukuta, oye nokwa manga Simson.

⁹ Okwa li e na aalumentu yamwe ya langela mela ekwawo. Okwi igidha: “Simson! Aafilisti oyo mbo!” Ihe nguka okwa ndifula oothipa ndhoka dha fa oondali dha pya komulilo. Onkee inaa tseya oshiholekwa shoonkondo dhe.

¹⁰ Delila okwa ti kuSimson: “Ndati, ou wete ndje egoya, sho inoo lombwela ndje oshili. Alikana, kwatha ndje, u lombwele ndje kutya oto mangwa ngiini.”

¹¹ Okwa yamukula: “Ngele otaa manga ndje noongodhi oompeempeka, ndhoka inaadhi longithwa nale, nena otandi fe yakwetu.”

¹² Delila okwa kutha oongodhi oompe e te mu manga e ti igidha: “Simson! Aafilisti oyo mbo!” Aalumentu oya li ye mu langela mela ekwawo. Ihe okwa ndifula oongodhi komaako ge ngaashi oondali.

¹³ Delila okwa ti kuSimson: “Ngoye oto ningi ndje oshege, sho itoo lombwele ndje oshili. Lombwela ndje, oto mangwa ano ngiini?” Okwa yamukula: “Ngele to tatakanithile moongodhi oondhinga heyali dhomafufu gandje e to dhi dhenge nawa kumwe, nena ote fe shaa ngoka.”

¹⁴ Delila okwe mu kotheke e ta tatakanithile moongodhi oondhinga heyali dhomafufu ge e te dhi dhenge kumwe e ti igidha: “Simson! Aafilisti oyo mbo!” Oye a papudhuka e ta nakula omafufu ge moongodhi.

¹⁵ Delila okwa ti kuye: “Oto vulu ngiini okutya, ou hole ndje, nando ino inekela ndje? Owa kotokele ndje lutatu, nonatango ino lombwela ndje shoka hashi ku nkondopaleke.”

¹⁶ Okwa dhiginine oku mu pula esiku nesiku. Simson okwa vulwa okutsitsimikwa

¹⁷ nohugunina okwe mu lombwele oshili: “Omafufu gandje ihaga tetwa. Ngame omunasiri, omuyoololelwa Omuwa okuza kevalo lyandje. Ngele onda kululwa, nena ote fe yakwetu.”

¹⁸ Delila sho a dhimbulula kutya e mu lombwela nduno dholela, okwa tumu etumwalaka kaakwaniilwa yAafilisti tali ti: “Endeleleni, mu ye huka. Okwa lombwele ndje oshili.” Oye ya noye etelele iimaliwa.

¹⁹ Delila okwa kothekele Simson mekolo lye. Sho a kumuka, okwi ithana omulumentu okukulula oondhinga dhomafufu ge. Nena okwa tameke oku mu ehameka, oshoka a kanitha oonkondo dhe.

²⁰ Okwi igidha: “Simson! Aafilisti oyo mbo!” Simson okwa penduka nokwa dhiladhila: “Otandi tokoka mo e te manguluka ngoshito.” Ina tseya kutya Omuwa okwe mu thigi po.

²¹ Aafilisti oye mu kwata e taye mu tsiya omeho. Oye mu fala kuGaza e taye mu tula momalyenge e taye mu kweyitha emanya lyoshini, a tse iilya mondholongo.

²² Ihe omafufu ge oga koko ishewe.

²³ Aakwaniilwa yAafilisti oya gongala, ya dhane oshituthi shokuhambelela kalunga kawo Dagon, ye mu yambele omayambo. Oyi imbi taa ti: “Kalunga ketu okwe tu sinditha omutondi gwetu Simson.”

²⁴ Oya li ya shambukwa noya ti: “Ithaneni Simson, e tu shambudhe.” Sho ya ka tala Simson mondholongo, opo e ya shambudhe, oye mu thikameke pokati koongudhi. Aantu sho ye mu mono, oyi imbi omahambelelo taa tanga kalunga kawo taa ti: “Kalunga ketu okwe tu sinditha omutondi gwetu, ngoka a vunyagula po evi lyetu nokudhipaga oyendji.”

²⁵

²⁶ Simson okwa lombwele omumati ngoka a li e mu kwata keti a ti: “Kwatha ndje, ndi pampadhale oongundhi ndhoka dha humbata etungo. Onda hala okweegamena kudho.”

²⁷ Etungo olya li lyu udhilila aalumentu naakiintu ndo. Aakwaniilwa yatano yAafilisti ayehe omo ya li, nokontala okwa li aalumentu naakiintu omayuvi gatatu taa tala Simson notaye mu nyana noku mu nyankela.

²⁸ Nena Simson okwa galikana a ti: “Omuwa Omupangeliawike, dhimbulukwa ndje. Kalunga, pe ndje oonkondo dhandje polumwe, opo moshikando shika ndi geele Aafilisti omolwomeho gandje.”

²⁹ Simson okwa kwata oongundhi ndhoka mbali dhopokati dha humbata etungo. Okwa kwata oshikaha shimwe kongundhi yimwe noshikwawo konkwawo, okwe dhi undula

³⁰ e ti igidha: “Nandi sile pamwe nAafilisti.” Okwe dhi undula nomatha ge agehe, netungo olyo ongotele mumwe e tali fumvike aakwaniilwa yatano naayehe yalwe. Simson okwa dhipaga aantu oyendji peso lye shi vulithe pumboka a dhipagele, manga a li e na omwenyo.

³¹ Aamwayina naakwawo oye ya noya kutha po omudhimba gwe. Oye gu fala noye gu fumvike pokati kaSoar naEshtaol mombila yahe Manoak. Okwa li a wilike Israel omimvo omilongo mbali.

17

¹ Mevi lyokoondundu dhaEfraim omwa li mu na omulumentu edhina lye Mika.

² Okwa lombwele yina a ti: “Sho wa yakwa iimaliwa iisiliveli mbyoka eyovi limwe nethele limwe, owa thingi omufuthi. Ondu uvu shoka wa ningi. Tala, ngame ondi na iimaliwa mbyoka, ongame nde yi yaka.” Yina okwa ti: “Mumwandje, Omuwa ne ku yambeke!”

³ Mika okwa galulile yina iimaliwa mbyoka, yina nokwa ti: “Opo ndi hulithe po ethingo lyokweetela omumwandje oshipwe, iisiliveli mbika otandi yi yoololele Omuwa. Otayi ka longithwa okuhonga oshimenka shoshiti sha tulwa oshisha shoshisiliveli. Onkee otandi ku galulile iisiliveli.”

⁴ Ihe Mika okwa gandja ishewe iimaliwa kuyina. Nguka okwa kutha iisiliveli omathele gaali e te yi gandja komukwaanga, ngoka a hongo oshimenka shoshiti e te shi kolongitha oshisiliveli. Osha tulwa nduno maandjaMika.

⁵ Omulumentu nguka Mika okwa li e na eha lye mwene lyelongelokalunga. Okwa hambulitha iimenka yimwe nokwa hondjitha omapepenguwo nokwa ningi omuna gwe gumwe omuyambi gwe.

⁶ Pethimbo ndiyaka kamwa li omukwaniilwa muIsrael; shaa ngoka okwa li kakombwiilitha.

⁷ Pethimbo ndyoka opwa li omugundjuka Omulevi a kala moshilando Betlehem muJuda.

⁸ Okwa tembuka muBetlehem, a ka tule mpoka pwo opala. Manga a li te ende, okwi itsu maandjaMika kevi lyokoondundu dhaEfraim.

⁹ Mika okwe mu pula: “Oto zi peni?” Oye a yamukula: “Ngame Omulevi te zi kuBetlehem muJuda. Ote kongo ehala lyokukala.”

¹⁰ Mika okwa ti: “Kala pungame. Ninga omugandjindunge nomuyambi gwandje, nomumvo kehe otandi ke ku pa iimaliwa iisiliveli omulongo, oonguwo niikulya.”

¹¹ Omugundjuka Omulevi okwa zimine, a kale puMika, nokwa li a fa omwana.

¹² Mika okwe mu langeke muuyambi, nokwa kala maandjaMika.

¹³ Mika okwa ti: “Ngashingeyi sho ndi na Omulevi a ningi omuyambi gwandje, ondi shi shi kutya Omuwa otu ukitha iinima yandje ayihe nawa.”

18

¹ Pethimbo ndiyaka muIsrael kamwa li nando omukwaniilwa. Uuna ndwiyaka ezimo lyaDan olya li tali kongo ehala lyokukala, oshoka natango olya li inaali pewa ehala lyalyo lyene mokati komazimo gaIsrael.

² Onkee aantu yaDan oya hogolola momagumbo gawo agehe miilando Soar neEshtaol aalumentu ya pyokoka nawa noye ya lombwele, ya ka ndaadhe evi. Sho ya yi mevi lyokoondundu dhaEfraim, oya kankama paandjaMika.

³ Manga nee ya li mpoka, oya dhimbulula iipopya yomugundjuka Omulevi. Onkee ya yi kuye e taa pula: “Oho longo shike mpaka? Olye e ku eta huno?”

⁴ Ye okwa yamukula: “Otu uvathana naMika, a fute ndje, sho te longo puye iilonga yuuyambi.”

⁵ Oyo ya ti kuye: “Alikana, tu kwatha, u pule Kalunga, ondjila yetu ndjika tatu ende ngele oyelago.”

⁶ Omuyambi okwa yamukula: “Inamu ipyakidhila owala, Omuwa ote mu sile oshimpwiyu mondjila ndjika.”

⁷ Onkee aalumentu mbaka yatano ya yi e taa ya moshilando Lajish. Oya mono kutya aantu oye li nawa yaa na okapethili kasha, ngaashi naanaa Aasidoni. Oyo aantu aanambili naamweni, mboka ihaaya tamanana nando onalye; oye na ashihe ye shi pumbwa. Oya kala kokule nAasidoni noyaa na ekwatathano naantu yalwe.

⁸ Aalumentu yatano sho ya galukile kuSoar naEshtaol, aangandjawo oye ya pula shoka ya dhimbulula.

⁹ Oya yamukula: “Ileni! Tu matukileni Lajish. Otwa mono evi nuuwanawa walyo. Inamu kuutumba owala tamu ongaonga; endeleleni! Undukeni, mu shi hakane!

¹⁰ Shimpa mwa thiki ko, otamu ka dhimbulula kutya aantu itaa fekele nando osha. Oshilongo oshinene. Oshi na ayihe omuntu te yi pumbwa, naKalunga okwa gandja ayihe kune.”

¹¹ Onkee etanga lyaalumentu omathele gahamano yomezimo lyaDan oya yi muSoar naEshtaol ya homata.

¹² Oya yi e taa yungu ontanda kuuninginino waKiriat Jearim muJuda. Omolwashoka ehala ndyoka natango tuu olya lukwa “Ontanda yaDan”.

¹³ Oya tsikile ya yi, sigo okaandjaMika kevi lyokoondundu dhaEfraim.

¹⁴ Nena aalumentu yatano mboka ya li ya ndaadhele oshilongo sha kunduka Lajish, oya ti kuyakwawo: “Omu shi shi tuu kutya megumbo limwe lyomwaangaka omu na oshimenka shoshiti sha kolongwa noshisiliveli? Omu na ishewe iimenka iikwawo nomapepenguwo. Otamu dhiladhila, tu ningeni ngiini?”

¹⁵ Nena oya yi maandjaMika, moka mwa kala omugundjuka Omulevi noye mu kundu.

¹⁶ Aakwiita mboka omathele gahamano ya homata ya za kuDan, oya li ya thikama posheelo.

¹⁷ Oondaadhi ndhoka ntano odha yi dhu ukilila megumbo e tadhi kutha mo oshimenka shoshiti sha kolongwa noshisiliveli, iimenka iikwawo nomapepenguwo, manga omuyambi a li posheelo pamwe naakwiita omathele gahamano.

¹⁸ Aalumentu sho ya yi maandjaMika e taa kutha mo iinima iidhilikwa, omuyambi okwe ya pula: “Otamu ningi shike?”

¹⁹ Oyo ya ti: “Mwena! Ino tya sha. Tu landula, u ninge omuyambi nomugandjindunge gwetu. Inashi opala nani okukala omuyambi muIsrael ashihe shi vule okukalela egumbo limwe?”

²⁰ Shika osha shambukitha omuyambi, onkee okwa kutha iinima iidhilikwa e te ya landula.

²¹ Oyo ya piluka, ya ka tsikile nondjila yawo, noya tetekelitha aanona yawo, iimuna yawo niiniwe yawo yilwe.

²² Oya adhika ya ende oshinano shontumba okuza kegumbo, Mika sho i ithana aashiinda ye, ya ye kolugodhi. Oya adha Aadan

²³ noye ya igidha. Aalumentu Aadan oya punguluka e taa pula Mika taa ti: “Oshike ano? Ongundu ndjono oyashike ayihe?”

²⁴ Mika okwa yamukula: “Otamu dhiladhila ngiini, sho tamu ti: ‘Oshike ano?’ One mwa kutha po omuyambi gwandje niikalunga mbyoka nda hongo nomwa yi nayo. Nena onda kala po ihe nashike?”

²⁵ Aalumentu Aadan oya ti: “Ihwepo, waa ye moohapu, opo aalumentu mbaka yaa geye, e taa ku dhenge. Nena ongoye noyaandjeni otamu si.”

²⁶ Opo ihe oya tsikile nondjila yawo. Mika okwa dhimbulula kutya oye mu vule oonkondo, onkee okwa piluka e ta shuna kegumbo.

²⁷ Aalumentu Aadan sho ya adhika ya kutha po omuyambi niinima mbyoka Mika a longekidha, oya ka matukila Lajish, oshilando shoka shaantu aanambili naamweni, shoka sha li molusilu lumwe naBetrehob. Oya dhipaga aakalimo e taa fike po oshilando. Kakwa li nando ogumwe te ya popile, oshoka Lajish osha li kokule naSidon noya li yaa na ekwatathano naantu yalwe. Aalumentu Aadan oya tungulula oshilando noya tula mo.

²⁸

²⁹ Oya lundulula edhina lyasho Lajish lya ningi Dan ye shi lukile hekulu Dan yaJakob.

³⁰ Aalumentu Aadan oya dhike po oshimenka shaMika, opo ye shi simaneke. Jonatan yaGersom, omutekulu gwaMoses, okwa li omuyambi gwezimo lyaDan. Osho wo oluvalo lwe, sigo aantu ya falwa muupika.

³¹ Oshimenka shaMika osha kala ko ethimbo alihe, otenda yokusimanekela mo Kalunga sho ya li muShilo.

19

¹ Pethimbo ndiyaka, manga muIsrael kaamwa li omukwaniilwa, okwa li Omulevi a kala kokule kevi lyokoondundu dhaEfraim. Okwa kutha omukadhona muBetlehem shaJuda, a ninge oshikumbu she.

² Ihe oshikumbu oshe mu geele e tashi shuna kaandjahe kuBetlehem nosha kala ko oomwedhi ne.

³ Nena omulumentu okwa tokola oku shi landula nokwa kambadhala oku shi heka, shi galukile kuye. Okwa yi ko nomupiya gwe nuusino uyali. Omukadhona okwa fala Omulevi maandjahe, nahe sho e mu mono, okwe mu taamba noku mu hambelela.

⁴ He okwe mu thiminike, a kale po, nokwa kala po omasiku gatatu. Omulevi nomukadhona gwe oya pakelwa po e taa lala mo.

⁵ Ongula yesiku etine oya meneka, ya ye. Ihe he yomukadhona okwa ti kOmulevi: “Lya utale tango. Otashi ku koleke. Opo ihe tamu vulu okuya”

⁶ Osho ngaaka aalumentu mboka yaali oya kuutumba e taa li e taa nu. Nena he yomukadhona okwa ti kuye: “Zimina, u lale muka e to nyanyukwa.”

⁷ Omulevi okwa thikama, a ye, ihe hemweno okwe mu indile noonkondo, onkee okwa lala mo natango uusiku umwe.

⁸ Ongula onene yesiku etitano okwa penduka, a ye, ihe he yomukadhona okwa ti: “Alikana, lya iikulya, mu ye komatango.” Osho aalumentu mbeyaka yaali oya lile pamwe.

⁹ Omulumentu, oshikumbu she nomupiya gwe sho ya tameke okuthikama, he okwa ti: “O, etango otali peguka; laleni ano mpaka. Otaku ka luudha mbala; kaleni mpaka, mu nyanyukwe. Ngula otamu vulu okumeneka, mu idhenge mondjila, mu ye kegumbo.”

¹⁰ Ihe omulumentu okwa li inaa hala okulala we nkoka, onkee yo noshikumbu she nomupiya gwe oyi idhenge mela lyondjila nuusino wawo uyali u na iithala. Olya li lya toka nokuli, sho ye ya popepi naJebus (tashi ti Jerusalem), onkee omupiya okwa ti kumwene gwe: “Omolwashike itaatu kankama, tu lale moshilando shAayebusi?”

¹¹

¹² Ihe mwene okwa ti: “Itatu kankama moshilando shaa shi shAaisraeli. Otatu pitilile po, tu tsikile kashona, tu ka laleni puGibea nenge puRama.”

¹³

¹⁴ Osho ya pitilile Jebus noya tsikile ondjila yawo. Sho ye ya muGibea moshilongo shAabenjamin, etango otali ningine nokuli.

¹⁵ Oya paguka mondjila noya lala mwiyaka. Oya yi moshilando noya kuutumba pomapindikilo, ihe kakwa li ngoka e ya taamba maandjawo uusiku mboka.

¹⁶ Manga ya li mpoka, omusamane gumwe omukulupe okwe ya pomuzimbuko gwiilonga ta zi komapya. Ye mwene ogwoshilongo shokoondundu dhaEfraim, ihe nena okwa li muGibea. (Aantu yalwe muGibea oyomezimo lyaBenjamin.)

¹⁷ Omusamane omukulupe okwa ndhindhilike omweendanandjila pomapindikilo nokwe mu pula: “Oto zi peni noto yi peni?”

¹⁸ Omulevi okwa yamukula: “Otwa yile kuBetlehem shomuJuda, nonena otu li mondjila tu uka kegumbo li li kokule moshilongo shokoondundu dhaEfraim. Kaku na ngoka e tu taamba maandjawo, tu lale mo,

¹⁹ nando ngame, mukwetu nomupiya gwandje otu na oshikwiila nomaviinu niikulya yuusino wandje. Otu na ayihe tatu yi pumbwa.”

²⁰ Omusamane omukulupe okwa ti: “Otamu taambwa megumbo lyandje. Otandi mu sile oshimpwiyu, inamu tokelwa pomapindikilo.”

²¹ Okwe ya taamba maandjawo e ta palutha uusino wawo. Aayenda ye oyi iyogo koompadhi noya li uulalelo.

²² Oya li ya nyanyukwa, sho ohaluka aakongi yiipala oya zi moshilando noya kunduka egumbo e taa dhenge omweelo. Oya ti komusamane omukulupe: “Piitha mo omulumentu ngoka e ya maandjeni. Otwa hala, tu lale naye.”

²³ Ihe omukulupe okwa yi pondje e ta ti kuyo: “Aawe, itashi vulika, ookuume kandje! Alikana, inamu longa iihuna yi thike mpoka! Omulumentu nguka omuyenda gwandje.

²⁴ Taleni, oshikumbu she osho shika nomumwandje omukadhonalela. Otandi ye mu etele pondje ngashingeyi. Ningeni nayo shoka mwa hala. Ihe omulumentu inamu mu ningila iihuna yi thike mpoka.”

²⁵ Ihe aalumentu inaye mu pulakena. Osho Omulevi okwa kutha oshikumbu she e te shi unzile pondje puyo. Oyo ye shi kutha e taa lala nasho uusiku auhe, sigo otaku shi.

²⁶ Pepito lyetango omukiintu okwe ya e ti imbwata popepi nomweelo gwegumbo lyomusamane omukulupe, moka mwa li omulumentu gwe. Okwa kala mpoka, sigo etango tali piti.

²⁷ Omulumentu gwe sho a penduka ongula ndjoka nokwe egulula omweelo, a ye, okwa mono oshikumbu she sha lala pomweelo gwegumbo nomaako gu uka komweelo.

²⁸ Okwa ti: “Penduka, tu ye.” Ihe inashi yamukula sha. Okwa kambakaneke omudhimba gwasho kokasino e ta tsikile ondjila ye yu uka kegumbo.

²⁹ Sho a thiki, okwa yi megumbo e ta kutha oshimbele. Okwa kutha omudhimba gwoshikumbu she, okwe gu tete miitopolwa omulongo niiyali e ta tumu oshitopolwa shimwe kukehe limwe lyomazimo gaIsrael omulongo nagaali.

³⁰ Shaa ngoka e shi mono, okwa ti: “Inatu shi uva nando onale, iihuna yi thike mpaka! Iinima mbika inayi ningwa, hela Israel a tembuka muEgipiti! Otu na okuninga po sha. Oshike nee?”

20

¹ Aantu ayehe muIsrael okuza kuDan kuumbangalantu, sigo oBeersheba muumbugantu, osho wo evi lyaGilead muuzilo, oya tondoka onkugo. Oya gongala puMispa ya ya omuyo gumwe miipathi yOmuwa.

² Aawiliki yomazimo agehe gaIsrael omo ya li moshigongi shika shoshigwana shaKalunga, nokwa li aakwiita yokolupadhi 400 000.

³ Pokati mpoka Aabenjamin oya kundana kutya Aaisraeli yalwe ayehe oya gongala muMispa. Aaisraeli oya pula: “Tu hokololeleni, iihuna mbika nkene ya longwa.”

⁴ Omulevi ngoka gwoshikumbu sha dhipagwa okwa yamukula: “Tse noshikumbu shandje otwa yile kuGibea moshilongo shaBenjamin, tu ka konge omulalo uusiku mboka.

⁵ Aalumentu yokuGibea oya ponokele ndje noya kondeke egumbo moka nda li nda lala. Oya li ya hala okudhipaga ndje; peha lyaashoka oya lala oshikumbu shandje koonkondo e tashi si.

⁶ Ngame onda kutha omudhimba gwasho nonde gu tete miitopolwa e te tumu oshitopolwa shimwe kukehe ezimo lyaIsrael. Aantu mbaka oya longo iihuna mokati ketu.

⁷ Amuhe mbaka mu li mpaka, Aaisraeli. Otatu shi ningi ngiini?”

⁸ Aantu ayehe oya thikama e taa ti: “Kape na nande gumwe gwetu, ongele a kala motenda nenge megumbo, ta ka shuna kaandjawo.

⁹ Shika osho shoka tatu ningi. Otatu umbu oshihogololitho, tu hogolole aalumentu yamwe ya matukile Gibea.

¹⁰ Oshitimulongo shimwe shaalumentu muIsrael otashi sile iikulya yaakwiita oshimpwiyu, nayalwe otaa yi e taa geele Gibea molwiihuna mbika ya longo muIsrael.”

¹¹ Osho ngaaka aalumentu ayehe ya gongala muIsrael ye na elalakano limwe — ya matukile oshilando shoka.

¹² Omazimo gaIsrael oga tumu aatumwa momikunda adhihe dhezimo lyaBenjamin taa ti: “Iihuna oya tya ngiini mbyoka mwa longo?

¹³ Ngashingeyi gandjeni aapwidhuki mboka yomuGibea, opo tu ya dhipage, tu kuthe mo oshipwe muIsrael.” Ihe Aabenjamin inaa pupa ko kAaisraeli ooyakwawo.

¹⁴ Oya kongoloka kiilando ayihe yaBenjamin noye ya kuGibea, ya kondjithe Aaisraeli ooyakwawo.

¹⁵ Oyi ithana aakwiita omayuvi omilongo mbali nagahamano ya zi kiilando yawo. Kakele nee kaambaka Aagibea oya gongele natango aalumentu aahogololwa omathele gaheyali aanalumoho. Shaa ngoka gwomuyo okwa li e shi kuumba nomamanya itaa palutha nando.

¹⁶

¹⁷ Oshihupe shomazimo gaIsrael osha gongele aakwiita ya dheukika 400 000.

¹⁸ Aaisraeli oya yi kehala lyelongelokalunga Betel. Oko nkoka ya pula Kalunga ya ti: “Ezimo olini tali matukile tango Aabenjamin?” Omuwa okwa yamukula: “Ezimo lyaJuda.”

¹⁹ Osho Aaisraeli oya penduka ongula ya landula noya yungu ontanda ontega naGibea.

²⁰ Oya yi e taa ponokele etangakwiita lyaBenjamin, noya tula aakwiita ya taalela oshilando.

²¹ Aakwiita Aabenjamin oya zi moshilando nuuna ndoka oya dhipaga aakwiita Aaisraeli omayuvi omilongo mbali nagaali.

²² Nena Aaisraeli oya yi kehala lyelongelokalunga noya lili oosa koshipala shOmuwa, sigo ongulohi. Oye mu pula: “Natu shune natango molugodhi, tu kondjithe aamwameme Aabenjamin?” Omuwa okwa yamukula: “Eeno.” Aakwiita Aaisraeli oya li yi itula mo noya tula aakwiita yawo melandulathano, ngaashi ya ningile nale.

²³

²⁴ Oya katuka yu ukilila aakwiita Aabenjamin olutiyali.

²⁵ Olutiyali Aabenjamin oya zi muGibea nomoshikando shika oya dhipaga aakwiita ya dheuka yaIsrael omayuvi omulongo nagahetatu.

²⁶ Nena oshigwana ashihe shaIsrael osha yi kuBetel, shi ka lile oosa. Oya kuutumba hoka koshipala shOmuwa yo inaa lya, sigo ongulohi. Oya yamba omakwatathanondjambo noya lungunitha omidhidhindjambo koshipala shOmuwa.

²⁷ Oshikethahangano shaKalunga osha li muBetel momasiku ngeyaka, naPinehas yaEleasar, omutekulu gwaMoses, okwa li omudhiginini gwasho. Aaisraeli oya pula Omuwa: “Natu ye, tu ka kondjithe aamwameme Aabenjamin ishewe nenge natu shi ethe?” Omuwa okwa yamukula: “Ke ya kondjitheni. Ongula otandi ke ye mu sinditha.”

²⁸

²⁹ Aaisraeli oya tula aakwiita miilangela momudhingoloko gwaGibea.

³⁰ Nena esiku etitatu lya landula ko oya ka homona etangakwiita lyAabenjamin noya tula aakwiita yawo melandulathano ya taalela oshilando, ngaashi haa ningi shito.

³¹ Aabenjamin oya zi mo, ya kondje, noya hekelwa kondje yoshilando. Ngaashi shito oya tameke okudhipaga Aaisraeli meyalala moondjila ndhoka tadhi uka kuBetel nokuGibea. Oya dhipaga konyala Aaisraeli omilongo ndatu.

³² Aabenjamin oya ti: “Otwe ya dhenge nale, ngaashi hatu ningi shito.” Ihe Aaisraeli oya ti: “Natu ningeni twa fa tatu yi ontuku e tatu ya heke, ye ye kokule noshilando ya lamba oondjila.”

³³ Manga etangakwiita lyAaisraeli lya shuna lwanima nokutula ishewe moongundu puBaaltamar, aalumentu mboka ya li miilangela momudhingoloko gwaGibea gwa nika omamanya, oya hololoka ohaluka.

³⁴ Aalumentu omayuvi omulongo ya tothwa muIsrael alihe, oya ponokele Gibea, nolugodhi olwa li olulululu. Aabenjamin inaa dhimbulula kutya oye li pokuhanagulwa po.

³⁵ Omuwa okwa gandja kAaisraeli esindano okusinda etangakwiita lyAabenjamin. Esiku ndyoka Aaisraeli oya dhipaga aatondi 25 100.

³⁶ Aabenjamin oya dhimbulula kutya oya sindika. Ombinga onene yetangakwiita lyAaisraeli oya li ya shuna lwanima molwAabenjamin, oshoka oyi inekele aalangeli mboka ya li momudhingoloko gwaGibea ya holama.

³⁷ Aalangeli mbaka oya matukile Gibea; oyi ihana noshilando ashihe e taa dhipaga omuntu kehe moka.

³⁸ Ombinga onene yetangakwiita oya li yu uvathana naalangeli kutya ngele tayi mono oshikogo sholwithi moshilando,

³⁹ nena oyi na okupiluka. Manga shika inaashi ningwa, Aabenjamin oya adhika ya dhipaga Aaisraeli mbeyaka omilongo ndatu. Oya lombwelathana: “Eeno, otwe ya dhenge, ngaashi hatu ningi shito.”

⁴⁰ Opo mpoka oshikogo sholwithi osha tameke okutsinagala moshilando. Aabenjamin oya tala lwanima noya li ya kumwa, sho ye wete oshilando tashi lokota komulilo.

⁴¹ Nena Aaisraeli oya piluka ko. Aabenjamin oya li ya haluka, oshoka oya dhimbulula kutya oye li pokukombwa po.

⁴² Oya fadhuka po yu uka meyalala, ihe inaa vula we okuhenuka. Oya kondekwa kombinga onene yetangakwiita nokaalumentu mboka taa zi moshilando, noya thekekwa po.

⁴³ Aaisraeli oya li ya tula aatondi momwigo noinaa zimbuka oku ya tidhagana, sigo okuuzilo waGibea, noye ya dhipaga.

⁴⁴ Omayuvi omulongo nagahetatu yomaakwiita Aabenjamin ya pyokoka oya dhipagwa.

⁴⁵ Yalwe oya punguluka noya yi ontuku yu uka komalundu, kemanya Rimmon. Omayuvi gatano gomuyo oya dhipagelwa mondjila. Aaisraeli oya tsikile okutidhagana oshihupe, sigo oGidom, noya dhipaga musho omayuvi gaali.

⁴⁶ Aabenjamin ayehe kumwe mboka ya dhipagwa esiku ndyoka, oya li omayuvi omilongo mbali nagatano — ayehe oya li aakwiita ya pyokoka.

⁴⁷ Ihe aalumentu omathele gahamano oya vulu okuya ontuku komalundu, kemanya Rimmon noya kala ko oomwedhi ne.

⁴⁸ Aaisraeli oya galukile oshihupe shoka shAabenjamin noye shi dhipaga po ashihe — aalumentu, aakiintu naanona, osho wo iinamwenyo. Iilando ayihe oya fikwa po.

21

¹ Aaisraeli sho ya gongala muMispa, oya ningi euvaneko ye li uvanekele Omuwa ya ti: “Mutse kamu na nando ogumwe ta pitika, omwana omukadhona a hokanwe kOmubenjamin.”

² Aaisraeli noya yi kuBetel e taa kuutumba koshipala shaKalunga, sigo ongulohi. Oya lili oosa ya ti:

³ “Omuwa Kalunga kaIsrael, omolwashike ezimo lyaBenjamin li li pokukana muIsrael?”

⁴ Ongula onene yesiku lya landula aantu oya meneka e taa tungu oshiyambelo noya yamba omakwatathanondjambo noya lungunitha omidhidhindjambo.

⁵ Oya pula ya ti: “Momazimo gaIsrael omu na tuu ongundu ndjoka inaayi ya koshigongi shika koshipala shOmuwa muMispa?” (Oya adhika ya gana kutya ngoka inaa ya kuMispa, ota dhipagwa.)

⁶ Aaisraeli oya li yu uvite oluhodhi omolwaamwayina Aabenjamin e taa ti: “Nena Israel okwa kanitha limwe lyomomazimo ge.

⁷ Otatu ningeni ngiini, opo tu monene Aabenjamin mboka ya hupu ko aakiintu? Tse otwa gana medhina lyOmuwa kutya itatu ya pe nando ogumwe gwaana yetu aakadhona.”

⁸ Sho ya pula, ngele ope na ongundu yimwe yomomazimo gaIsrael ndjoka inaayi ya koshigongi muMispa, oya koneke kutya nani kape na nando ogumwe a za kuJabesh muGilead.

⁹ Mokwiithana omadhina gaakwiita inaku yamukulwa nando okugumwe gwokuJabesh.

¹⁰ Onkee oshigongi osha tumu ko omayuvi omulongo nagaali goofuleelela nelaka tali ti: “Indeni, mu ka dhipage aantu ayehe muJabesh, aakiintu naanona wo.

¹¹ Dhipageni aalumentu ayehe naakiintu ayehe mboka yaa shi aakadhona.”

¹² Maantu yomuJabesh oya mono mo aakadhona omathele gane noye ya eta kontanda puShilo, shoka shi li mevi lyaKaanan.

¹³ Nena oshigongi ashihe osha tumu elaka kAabenjamin mboka ya li kemanya Rimmon kutya oya hala okupanga ombili nayo.

¹⁴ Aabenjamin oya galuka, nAaisraeli oye ya pe aakadhona yokuJabesh mboka inaa dhipagwa. Ihe kaya li ye ya gwanena.

¹⁵ Oshigwana osha sile Aabenjamin oluhodhi, oshoka Omuwa okwa topola omazimo gaIsrael.

¹⁶ Aawiliki yoshigongi oya ti: “Mezimo lyaBenjamin kamu na we aakiintu. Otatu ka ninga ngiini, tu monene aalumentu mboka ya hupu ko aakiintu?

¹⁷ Israel na kale inaa kanitha limwe lyomomazimo ge omulongo nagaali. Otu na okumona ompito, opo ezimo lyaBenjamin lyaa hule po.

¹⁸ Ihe itatu vulu oku ya pitika, ya hokane aana yetu aakadhona, molwashoka otwa thingi kehe ngoka gwomutse ta pitika, Omubenjamin a hokane gumwe gwomaana yetu aakadhona.”

¹⁹ Nena oya dhiladhila: “Oshituthi shOmuwa shokomumvo muShilo oshi li popepi.” (Shilo oshi li kuumbangalantu waBetel, kuumbugantu waLebona nokuuzilo wondjila yopokati kaBetel naShekem.)

²⁰ Oya ti kAabenjamin: “Indeni, mu ka holame miitsambe yomiviinu,

²¹ mu ya langele. Uuna aakadhona yokuShilo taa zi mo, ya ka dhane pethimbo lyoshituthi, nena otamu hololoka miitsambe yomiviinu. Kehe gumwe gwomune na kwate omukiintu kethiminiko maakadhona mboka e te mu fala koshilongo shaBenjamin.

²² Ngele oohe nenge aamwayina taye ya kune taa nyenyeta, otamu ti: ‘Alikana, tu kwatheni, tu kale nayo, oshoka inatu ya yuga kune molugodhi, ya ninge aakiintu yetu. Nane wo inamu ye tu pa ne yene, onkee ne kamu na ondjo yokuyona euvaneko lyeni.’ ”

²³ Aabenjamin oya ningi, ngaashi ya lombwelwa. Kehe gumwe gwomuyo okwi ihogololele omukiintu maakadhona mboka ya li taa dhana puShilo e ta yi naye. Nena oya shuna koshilongo shawo, oya tungulula iilando yawo noya kala mo.

²⁴ Pethimbo olyo tuu ndyoka oshihupe shaIsrael osha yi wo shaa ngoka kezimo lyaandjawo, kegumbo lye nokeliko lye.

²⁵ MuIsrael kamwa li omukwaniilwa pethimbo ndyoka. Shaa ngoka okwa li kakombwiilitha.