1 Konima yeso lyaMoses, omumati gwOmuwa, Omuwa okwa popitha omukwathi gwaMoses, Josua yaNun.
2 Okwa ti kuye: “Omuntu gwandje Moses okwa si. Ngashingeyi ilongekidha, ngoye noshigwana shaIsrael, mu tokole omulonga Jordan, mu ye mevi ndyoka tandi ke li ya pa.
3 Ngaashi nda lombwele Moses, onde mu pe noshigwana shandje ashihe evi alihe ndyoka tamu ka lyata.
4 Oongamba dhalyo otadhi ka tameka okuza kombuga muumbugantu, sigo okoondundu dhaLibanon muumbangalantu; okuza komulonga omunene Eufrat muuzilo otadhi ka taakana oshilongo shAaheti, sigo Efuta lyopokati kuuninginino.
5 Josua, kape na ngoka te ku itakeke e te ku dhenge ando, manga u na omwenyo. Ote kala pamwe nangoye, ngaashi nda li naMoses. Ote kala nangoye aluhe; itandi ke ku etha nando.
6 Ikolelela e to kala nomukumo, oshoka oto ka ninga omuwiliki gwoshigwana shika, nge tashi ka lala evi ndika nde li uvanekele oohekulu nokugana.
7 Onkee ano ikolelela e to kala nomukumo; dhiginina ompango ayihe ndjoka omuntu gwandje Moses e yi ku pe. Ino dhina nando okatumbulo kamwe kayo, opo u kale nawa shaa mpoka to yi.
8 Kotoka aluhe, embo ndika lyompango li kale aluhe tali leshwa melongelokalunga lyeni. Yi ilonga omutenya nuusiku, u vulike kwaayihe ya nyolelwa mo. Nena oto kala omusindani nomunelago.
9 Dhimbulukwa kutya onde ku lombwela, u ikolelele nou kale nomukomo. Ino tila ngoye ino tyololoka, oshoka ongame, Omuwa Kalunga koye, ndi li pungoye shaa nkoka to yi.”
10 Nena Josua okwa lombwele aawiliki,
11 ye ende nontanda, yo ya lombwele oshigwana ya tye: “Longekidheni iikulya, oshoka konima yomasiku gatatu otamu ka tokola omulonga Jordan, mu ka lale evi ndyoka Omuwa Kalunga keni te li mu pe.”
12 Josua okwa lombwele ezimo lyaRuben nolyaGad netatazimo lyaManasse ta ti:
13 “Dhimbulukweni shoka omuntu gwOmuwa Moses e mu lombwele kutya Omuwa Kalunga keni ote ke mu pa evi ndika lyokuuzilo waJordan, li ninge lyeni.
14 Aakiintu yeni, aana yeni niimuna otayi kala mpaka, ihe aakwiita yeni ya homatela olugodhi otaa ka taaguluka, ya tetekele Aaisraeli ooyakweni, opo ye ya kwathe,
15 sigo ya lala evi lyokuuninginino waJordan, ndyoka Omuwa Kalunga keni e li ya pe. Ihe ngele a gandja egundjilo komazimo agehe gaIsrael, nena otamu galuka, mu ye mu kale mevi lyeni muka muuzilo waJordan, ndyoka Moses, omuntu gwaKalunga, e li mu pe.”
16 Oyo ya yamukula Josua ya ti: “Otatu ningi ashihe shoka to tu lombwele notatu yi nkoka to tu tumu.
17 Otatu vulika kungoye, naanaa ngaashi twa li hatu vulika kuMoses. Omuwa Kalunga koye na kale nangoye, ngaashi a li naMoses.
18 Oongoka ta thindanda komalombwelo goye ye ita vulika kugo, na dhipagwe. Ikolelela ngoye u kale u na omukumo.”
1 Nena Josua okwa tumu oondaadhi mbali okuza kontanda yokuShittim nokwe dhi lombwele, dhi ye dhi ka ndaadhe evi lyaKaanan, unene oshilando Jeriko. Sho dhe ya moshilando, odha ka lala megumbo lyohonda edhina lyayo Rahab.
2 Omukwaniilwa gwaJeriko oku uvu kutya Aaisraeli yamwe oye ya uusiku, ya ndaadhe oshilongo.
3 Onkee a tumu elaka kuRahab tali ti: “Aalumentu mboka ye ya maandjeni, oye ya okundaadha oshilongo ashihe. Ya piitha mo.”
4 Rahab okwa yamukula: “Aalumentu yamwe oyi ile shili maandjetu, ihe inandi tseya mpoka ya zi. Yo yene oya yi peningino lyetango, manga omweelo gwoshilando inaagu edhilwa. Kandi shi wo nkoka yu uka, ihe ngele otamu ya landula mbala, otamu vulu oku ya kwata.” (Ihe Rahab okwa adhika a fala oondaadhi ndhoka mbali pombanda yondunda noku dhi holeka kohi yiigwanga yoliina, mbyoka e yi tulile ko.)
5
6
7 Aantu yuuwa oya zi mo moshilando, nomweelo ogwa patwa. Oya ka lengaalenga oondaadhi dhAaisraeli, sigo oponkondo yaJordan.
8 Oondaadhi manga inaadhi ilongelela, dhi ka lale, Rahab okwa londo pombanda
9 e ta ti kudho: “Ondi shi shi kutya Omuwa okwa gandja evi ndika miikaha yeni. Kehe omuntu moshilongo shika okwe mu tila.
10 Otu uvu, nkene Omuwa a pwinike Efuta etiligane komeho geni, sho mwa tembuka muEgipiti. Otu uvu, nkene mwa dhipaga Sihon naOg, aakwaniilwa yaali yAayamori kuuzilo waJordan.
11 Sho twe shi uvu, otwa tameke okusholola. Otwa kanitha omukumo omolweni. Omuwa Kalunga keni oye Kalunga e li megulu nokombanda yevi wo.
12 Ngashingeyi ganeni kuye kutya otamu ka ninga nawa egumbo lyandje, ngaashi ngame nde mu ningile nawa, ne mu pe ndje endhindhiliko lyontumba, opo ndi mu inekele.
13 Uvanekelii ndje kutya otamu ka hupitha tate nameme, aamwameme aakiintu naalumentu, naangandjawo ayehe. Inamu tu etha, tu dhipagwe.”
14 Aalumentu oya ti kuye: “Kalunga ne tu geele, ngele tse itatu ningi, ngaashi tatu ti. Ngele ito lombwele aantu shoka twe endele, otatu ku uvanekele kutya Omuwa ngele a gandja evi ndika miikaha yetu, otatu ke ku ninga nawa.”
15 Rahab okwa li megumbo lya tungilwa mekuma lyoshilando, onkee okwa kulukitha aalumentu mekende ye endjelele kongodhi.
16 Okwa ti kuyo: “Indeni kevi lyokoondundu, opo aambala kaaye mu mone. Holameni nkwiyaka omasiku gatatu, sigo taa galuka. Nena otamu vulu okutsikila ondjila yeni.”
17 Aalumentu oya ti kuye: “Otatu dhiginine omauvaneko ngoka twe ge ku pe.
18 Ninga ano ngeyi. Uuna tatu ponokele evi lyeni, tula ongodhi ndjika ontiligane mekende moka we tu piithile. Kaleka aakuluntu yoye naamwanyoko maandjeni.
19 Ngele ope na ngoka ta zi mo megumbo, nena ombedhi oye mwene ngele ta si; tse katu na ndjo mpoka. Ihe ngele opu na gumwe megumbo ta mono oshiponga shasha, nena ombedhi oyetu.
20 Ihe ngele oto lombwele ngandi sho twa ningi, nena itatu dhiginine we euvaneko lyetu ndyoka tu uvathana nangoye.”
21 Rahab okwa zimine e te ya etha, ya ye. Sho ya yi, okwa mangele ongodhi ontiligane mekende.
22 Oondaadhi odha yi moondundu nodha holama. Aambala oye dhi kongo noshilongo ashihe omasiku gatatu, ihe inaye dhi mona. Onkee oya shuna kuJeriko.
23 Nena oondaadhi ndhoka mbali odha kuluka koondundu nodha taaguluka omulonga e tadhi shuna kuJosua. Odhe mu lombwele ashihe shoka sha ningwa po
24 nodha ti: “Otu shi shi nawalela kutya Omuwa okwe tu pa oshilongo shika ashihe. Aantu ayehe yaahoka oye tu tila.”
1 Josua noshigwana ashihe shaIsrael oya meneka ongula onene, ya zi montanda yaShittim noya yi kuJordan, nkoka ya yungu ontanda, ya tegelele okutokola omulonga.
2 Konima yomasiku gatatu aawiliki oye ende nontanda
3 noya lombwele aantu ya ti: “Shimpa mwa mono aayambi ya humbata oshikethahangano shOmuwa Kalunga keni, zii mo montanda, mu ya landule.
4 Otaye mu kwatele komeho, oshoka ondjila kamu yi shi. Ihe omu na okukala kokule noshikethahangano, tu tye oshinano shi thike pokilometa yimwe.”
5 Josua okwa lombwele oshigwana a ti: “Iyapuleni, oshoka ngula Omuwa ota ka longa iikumithalonga mokati keni.”
6 Nena okwa lombwele aayambi, ya kuthe oshikethahangano, ya tetekele nasho komeho gaantu. Oyo noya ningi, ngaashi ya lombwelwa.
7 Omuwa okwa ti kuJosua: “Shoka tandi ningi nena, otashi ku simanekitha kAaisraeli ayehe, u ninge omuntu omunene, notaa dhimbulula kutya ondi li nangoye, ngaashi nda li naMoses.
8 Lombwela aayambi taa humbata oshikethahangano kutya nge ya adha omulonga, oye na okuthikama popepi nomunkulo.”
9 Nena Josua okwa ti kAaisraeli: “Ileni, mu pulakene shoka Omuwa Kalunga keni ta ti.
10 Ngele tamu humu komeho, ote ke mu tidhila po Aakaanana, Aaheti, Aahevi, Aaperesi, Aagirgashi, Aayamori nAayebusi. Otamu ka tseya kutya Kalunga omunamwenyo oku li mokati keni,
11 sho oshikethahangano shOmuwa gwevi alihe tashi tokola Jordan komeho geni.
12 Ngashingeyi hogololeni aalumentu omulongo nayaali, gumwe mezimo kehe lyaIsrael.
13 Shimpa tuu aayambi mboka taa humbata oshikethahangano shOmuwa gwevi alihe, taa lyata oompadhi dhawo momeya, nena Jordan otagu kankama okukunguluka, nomeya ngoka taga zi kombanda, otaga gongala peha limwe.”
14 Ethimbo olya li lyeteyo, nomulonga ogwa li gu na efundja. Aantu sho ya zi montanda, ya tokole Jordan, aayambi oye ya tetekelele ya humbata oshikethahangano. Naanziya sho aayambi ya lyata omeya,
15
16 omeya oga mwena okumatuka noga gongala puAdam, oshilando shi li pooha dhaSaretan. Ekunguluko lyokuuka kEfuta lyeso olya li lya tokolwa thilu; Aaisraeli oya vulu okupita popepi naJeriko.
17 Manga taa ende puukukutu, aayambi mboka ya humbata oshikethahangano, oya li ya thikama puukukutu pokati kaJordan, sigo oshigwana ashihe sha piti.
1 Oshigwana ashihe sho sha taaguluka Jordan, Omuwa okwa ti kuJosua:
2 “Hogolola aalumentu omulongo nayaali, gumwe mezimo kehe,
3 e to ya lombwele, ya toole omamanya omulongo nagaali pokati kaJordan, peha naanaa mpoka pwa li pwa thikama aayambi. Ya lombwela, ya humbate omamanya ngaka, ye ga tule mpoka tamu ka tula nena.”
4 Nena Josua okwi ithana aalumentu omulongo nayaali mboka a hogolola
5 e ta ti: “Indeni momulonga komeho goshikethahangano shOmuwa Kalunga keni. Kehe gumwe na toole emanya e te li itsike, emanya limwe kezimo kehe muIsrael.
6 Omamanya ngaka otaga dhimbulutha oshigwana kushoka Omuwa a ningi. Konakuyiwa aana yeni nge taye mu pula kutya omamanya ngaka otaga ti ngiini kune,
7 otamu ya hokololele, nkene omeya gaJordan ga thikama, sho oshikethahangano sha tokola omulonga. Omamanya ngaka otaga dhimbulutha aluhe Aaisraeli shoka sha ningilwa nkoka.”
8 Aalumentu oya ningi, ngaashi Josua e ya lombwele. Ngaashi naanaa Omuwa a lombwele Josua, oya kutha omamanya omulongo nagaali pokati kaJordan, emanya limwe kezimo kehe, e taye ga fala mpoka ya ka lala noye ga tula mpoka.
9 Josua okwa tula po ishewe omamanya omulongo nagaali pokati kaJordan mpoka aayambi ya li ya thikama, sho ya humbata oshikethahangano. (Omamanya ngoka oko ge li sigo onena.)
10 Aayambi oya thikama pokati kaJordan, sigo ashihe sha gwanithwa, ngaashi Omuwa a lombwele Josua, a lombwele Aaisraeli. Shika osho shoka Moses a tile nashi ningwe. Aantu oye endelele okutokola omulonga.
11 Ayehe sho ya gama handiyaka yomulonga, nena aayambi pamwe noshikethahangano shOmuwa oya zi momulonga noye ya komeho goshigwana.
12 Aalumentu yomezimo lyaRuben nolyaGad netatazimo lyaManasse, mboka ya li yi ilongekidhila olugodhi, oya ka tetekela oshihupe shoshigwana, ngaashi Moses e ya lombwelele, ye shi ninge.
13 Aalumentu konyala omayuvi omilongo ne ya homatela olugodhi, oye ende koshipala shOmuwa ya yi kolushandja lwaJeriko.
14 Shoka sha ningwa kOmuwa esiku ndyoka, osha nenepekitha Josua momeho gAaisraeli. Oye mu simaneke mokukalamwenyo akuhe, ngaashi ya li ya ningi Moses.
15 Nena Omuwa okwa lombwele Josua,
16 a lombwele aayambi ya humbata oshikethahangano, ya ze mo muJordan.
17 Josua okwe shi ningi.
18 Aayambi sho ya thiki koontuni, omulonga ogwa shuna kumwe, nomeya oga kala ngaashi shito.
19 Aaisraeli oya tokola Jordan mesiku etimulongo lyomwedhi gwotango e taa yungu ontanda puGilgal, kuuzilo waJeriko.
20 Oko nkoka Josua a dhike nduno omamanya ngoka omulongo nagaali ga zile muJordan.
21 Okwa ti kAaisraeli: “Konakuyiwa, uuna aana yeni taye ke mu pula omamanya ngaka shoka taga ti,
22 otamu ke ya hokololela ethimbo ndyoka Israel a tokola Jordan puukukutu.
23 Ya hokololeleni kutya Omuwa Kalunga keni okwe mu pwinikile omeya gaJordan, sigo mwe gu tokola, ngaashi e shi tu ningile pEfuta etiligane.
24 Omolwashika omuntu kehe kombanda yevi ota ka tseya, oonkondo dhOmuwa nkene oonene, nane wo otamu ka kala mwa tila Omuwa Kalunga keni sigo aluheluhe.”
1 Aakwaniilwa ayehe yAayamori kuuninginino waJordan naakwaniilwa ayehe yAakaanana komunkulo gwEfuta lyopokati oyu uvu kutya Omuwa okwa pwinike omeya gaJordan, sigo oshigwana shaIsrael she gu tokola. Oya sholola e taa tyololoka molwAaisraeli.
2 Nena Omuwa okwa lombwele Josua ta ti: “Longekidha iimbele yomamanya, u kenke nayo Aaisraeli ishewe.”
3 Josua okwa ningi, ngaashi Omuwa e mu lombwele e ta kenkele Aaisraeli pehala lya lukwa Oshikulundundu shefukaleko.
4 Oshigwana shaIsrael sho sha zi muEgipiti, aalumentu ayehe oya li ya fukalekwa nokuli. Ihe momukokomoko gwondjila yomombuga omimvo omilongo ne oya li yi ipyakidhila nolweendo, onkee uunona wuumati owa li inaau fukalekwa. Ishewe, pethimbo ndyoka aalumentu ayehe yepipi lyokuhinga iita sho ya zi muEgipiti, oya li ya hulu po kokusa, oshoka oya li inaa vulika kOmuwa. Ngaashi naanaa a li e ya ganene, inaa pitikwa okumona evi ndyoka eyamba noli na omalunza, ngaashi e shi uvanekele oohekulu.
5
6
7 Oyanamati yaantu mbaka oya li inaa fukalekwa, ano oluvalo nduka olupe olwo aluke lwa fukalekwa kuJosua.
8 Konima yefukaleko oshigwana ashihe osha kala montanda, sigo iilalo ya polo nawa.
9 Omuwa okwa ti kuJosua: “Onena tuu ndjika onde mu pengitha omupya gwokukala aapika muEgipiti.” Onkee eha ndyoka lya lukwa Gilgal, nosho li li sigo onena.
10 Manga Aaisraeli ya li montanda puGilgal, polushandja ontega naJeriko, oya dhana Opaasa ongulohi yesiku etimulongo netine lyomwedhi ngoka.
11 Esiku lya landula ko olya li esiku lyotango, sho ya tameke okulya iikulya yomuKaanan, iikwiila inaayi fulikwa nomaha giilya ga yaywa.
12 Omanna oga sheka okuloka nduno, Aaisraeli inaye ga mona we. Okuza kesiku ndyoka oya li iikulya yomuKaanan.
13 Josua manga a li popepi naJeriko, ohaluka oku wete omulumentu a thikama komeho ge a yelutha egongamwele. Josua okwa yi kuye e te mu pula: “Ngoye omukwiita omukwetu nenge ogwaatondi yetu?”
14 Omulumentu okwa ti: “Aawe, ngame ondjayi yiita yOmuwa.” Josua okwi ihata pevi koshipala she e te mu simaneke ta ti: “Ngame omupiya gwoye, tatekulu. Owa hala, ndi ninge shike?”
15 Ondjayi yiita yOmuwa oya ti kuye: “Hula ko oongaku dhoye, oshoka owa thikama peha eyapuki.” Josua nokwa ningi, ngaashi a lombwelwa.
1 Omiyelo dhaJeriko odha li dha patwa nodha langelwa, opo Aaisraeli ya keelelwe. Kapwa li nando ogumwe ta vulu okuya mo nenge okuza mo.
2 Omuwa okwa ti kuJosua: “Jeriko otandi shi gandja miikaha yoye nomukwaniilwa gwasho naakwiita yasho oofule.
3 Ongoye naakwiita yoye omu na okudhingoloka oshilando esiku kehe momasiku gahamano.
4 Aayambi naa kale yaheyali ya tya oombenda ya tetekela oshikethahangano. Mesiku etiheyali ongoye naakwiita yoye otamu dhingoloka oshilando luheyali, manga aayambi taa hiki oombenda.
5 Nena shaa ya hiki omunzinzi omule, nongele mwe shi uvu, nena aantu ayehe naa kugilile, nedhingililokuma lyoshilando otali ka kumuka po. Nena etangakwiita alihe otali ningine moshilando.”
6 Josua okwi ithana aayambi e ta ti kuyo: “Kutheni oshikethahangano, nayaheyali yomune naa tetekele komeho ya tya oombenda.”
7 Nena okwa lombwele aantu ye, ya tameke okudhingoloka oshilando noshikethahangano sha tetekelwa kaalangeli.
8 Ngaashi Josua e ya lombwele, aalangeli oya tameke okutetekela aayambi mboka taa hiki oombenda. Konima yawo okwa li aayambi mboka ya humbata oshikethahangano noya landulwa kaatonateli. Ethimbo alihe oombenda odha li tadhi hikwa.
9
10 Ihe Josua okwa li a lombwele aantu ye, yaaha kugilile noyaa tye sha, sigo te ya lombwele.
11 Osho nduno a lombwele ongundu yaantu ye, ya kuthe po oshikethahangano, ya dhingoloke lumwe oshilando. Opo ihe oya shuna kontanda e taa lala nkoka.
12 Josua okwa meneka ongula onene esiku lya landula, aayambi naakwiita oya dhingoloka oshilando melandulathano ndyoka ye shi ningi esiku lya tetekela: aalangeli, taku landula aayambi yaheyali taa hiki oombenda, nena aayambi ya humbata oshikethahangano nohugunina aatonateli. Ethimbo alihe oombenda odha li tadhi hikwa.
13
14 Esiku ndika etiyali oya dhingoloka oshilando ishewe lumwe e taa shuna kontanda. Shika oye shi ningi omasiku gahamano.
15 Mesiku etiheyali oya meneka petendo lyeluwa noya dhingoloka oshilando pamukalo ngoka luheyali — esiku ndika olyo alike ya dhingoloka oshilando luheyali.
16 Moshikando oshitiheyali manga aayambi ya hala okuhika oombenda, Josua okwa lombwele aantu ye, ya kugilile, e ta ti: “Omuwa okwe mu pe oshilando shika!
17 Oshilando naashihe shoka shi li mo, nayi yonagulwe po, yi ninge omayambo gOmuwa. Shila ohonda Rahab noyaandjawo oyo ayeke taa hupu, oshoka okwa holeke oondaadhi dhetu.
18 Inamu ikuthila nando osha shoka shi na okuhanagulwa po. Ngele tamu shi ningi, otamu kongo oshipwe e tamu etitha ehanagulo montanda yaIsrael.
19 Oshisiliveli, oshingoli niinima ayihe yoshikushu noyosheela nayi yoololelwe Omuwa. Oyi na okutulwa meliko lyOmuwa.”
20 Aayambi oya hiki oombenda. Aantu sho ye dhi uvu, oya kugilile, nedhingililokuma olya kumuka po. Nena aakwiita oya matukile oshilando noye shi kwata po.
21 Oya dhipaga negongamwele kehe gumwe moshilando, aalumentu naakiintu, aagundjuka naakuluntu. Oya dhipaga wo iimuna, oonzi nuusino.
22 Josua okwa lombwele aalumentu mboka yaali ya ndaadhele oshilando: “Indeni megumbo lyohonda, mu yi ete naangandjawo ngashingeyi, ngaashi mwe yi uvanekelele.”
23 Oya yi noye eta Rahab, he, yina, aamwayina naanegumbo ye ayehe. Oye ya eta naapika yawo noye ya tula megameno popepi nontanda yaIsrael.
24 Oshilando oye shi tomeke omulilo noye shi lungunitha po ashihe niinima ayihe pamwe nasho, kakele kiinima ya ningwa moshingoli, oshisiliveli, oshikushu nosheela, mbyoka ya tulwa meliko lyOmuwa.
25 Ihe Josua okwa hupitha ohonda Rahab naanegumbo ye, oshoka okwa li a holeke oondaadhi ndhoka mbali a tumine kuJeriko. (Ombuto ye oyi li muIsrael Sigo onena.)
26 Esiku ndyoka Josua okwa tumbula eganolondodho ta ti: “Shaa ngoka ta kambadhala okutungulula Jeriko, na thingwe kOmuwa. Ngoka ta fulu omukanka gwasho, ota kanitha omwanamati osheeli; Ngoka ta kula omiyelo dhasho, ota kanitha omwanamati onkelo.”
27 Omuwa okwa li pamwe naJosua, nepopiwo lye olya taandele nevi alihe.
1 Elombwelo lyOmuwa kutya Israel ina kutha nando osha muJeriko, inali gwanithwa. Omuntu gumwe edhina lye Ashan ina vulika kelombwelo ndika, onkee Omuwa okwa geele Aaisraeli (Ashan oyaKarmi, omutekulu gwaZabdi nogwomoludhi lwaSera gwomondhikwa yezimo lyaJuda.)
2 Josua okwa tumu aalumentu yamwe okuza kuJeriko ya yi kuAi, oshilando shi li kuuzilo waBetel, popepi naBetaven. Okwe ya lombwele, ya ka ndaadhe oshilongo shoka. Sho ye shi ningi,
3 oya hokololele Josua taa ti: “Itashi pumbiwa unene, aantu ayehe ya matukile Ai. Tuma ko owala shila aantu omayuvi gaali nge gatatu. Ino tuma etangakwiita alihe kolugodhi ndoka; oshilando kashi shi oshinene.”
4 Aaisraeli konyala omayuvi gatatu oye shi matukile, ihe oya dhengwa e taa shunithwa ko.
5 Aantu yomuAi oye ya tidha okuza komweelo gwoshilando, sigo okoshitapo shomamanya, e taa dhipaga po aalumentu omilongo ndatu nayahamano, sho ya kuluka koshikulundundu. Nena Aaisraeli oya tyololoka noya li ya tililila.
6 Josua naawiliki yaIsrael oya tuula oonguwo dhawo moluhodhi e tayi ihata pevi komeho goshikethahangano shOmuwa. Oko ya kala ya lala ndongo ongulohi noyi ifundile omavi komitse, ya holole oluhodhi.
7 Josua nokwa ti: “Omuwa Kalunga! Akwetu! Oshike we tu taagulukitha Jordan? Ou tu gandje nduno kAayamori? Oto tu hanagula po? Oshike inaatu kala ngaa handiyaka yaJordan?
8 Nena otandi ti ngiini, Omuwa, Israel sho a tidhwa kaatondi ye?
9 Aakaanana nokehe nee ngaa ngoka moshilongo ote ke shi uva. Otaa ke tu dhingilila e taa dhipaga shaa ngoka. Nena oto ka ninga shike, u popile esimano lyoye?”
10 Omuwa okwa ti kuJosua: “Thikama! Oshike wi iyekelahi ngawo pevi?
11 Aaisraeli oya yono! Oya teya euvaneno lyandje ndyoka nde ya lombwele, ye li dhiginine. Oya kutha iinima yimwe mbyoka ya tokolelwa efikwopo. Oye yi yaka, oya fundju e taye yi tula momaliko gawo.
12 Ndika olyo epuko lyAaisraeli, mboka itaa vulu we nokuli okukondjitha aatondi yawo. Otaye ya sindi, oshoka Aaisraeli oya geelwa nehanagulo. Itandi kala we nokuli nane, manga inaamu hanagula po iinima mbyoka mwa lombwelelwe, kaamu yi gume.
13 Thikama, yelitha oshigwana, u shi longekidhile okuholoka kungame. Ya lombwela, yi ilongekidhe ngula, oshoka ongame Omuwa Kalunga kaIsrael nda popi ndhika nda ti: ‘Israel, momaliko goye owa tula mo iinima nde yi ku lombwele, u yi yonagule po. Ito vulu okukondjitha aatondi yoye, manga inoo holola iinima mbika!’
14 Ya lombwela kutya ngula naa holoke po omazimo nomazimo. Ezimo ndyoka tandi ke li ulika, olyo nali holoke montaneho, oludhi noludhi. Oludhi ndoka tandi lu ulike, nena nalu ye montaneho egumbo negumbo. Negumbo ndyoka tandi li ulike, nena nali ye montaneho omuntu nomuntu.
15 Ngoka nee tu ulikwa nota monika e na iinima yi indikwa, oye na fikwe po pamwe naangandjawo neliko lye alihe, oshoka okwe eta oshiponga nesithahoni muIsrael, sho a yono ehangano lyandje.”
16 Josua okwa meneka e ta gongele Aaisraeli ezimo nezimo, nezimo lyaJuda olya li lyu ulikwa.
17 Nena okwe eta po ezimo lyaJuda alihe oludhi noludhi, noludhi lwaSera olwa tothwa mo. Nena okwe eta po oludhi lwaSera egumbo negumbo, negumbo lyaZabdi olya tothwa mo.
18 Okwe eta po egumbo lyaZabdi omuntu nomuntu, naAshan yaKarmi, omutekulu gwaZabdi, okwa tothwa mo.
19 Josua okwa ti kuye: “Mumwandje, popya oshili koshipala shOmuwa, Kalunga kaIsrael, ihempulula. Lombwela ndje ngashingeyi shoka wa ninga. Ino kambadhala okuholeka ndje sha.”
20 Ashan okwa yamukula a ti: “Eeno, oshili, onda yono kOmuwa, Kalunga kaIsrael. Onda ningi ngeyi.
21 Mokati kiinima mbyoka twa hakana, onda mono ondjatha yOshibabiloni yo opala, ookilograma mbali dhoshisiliveli nuutale woshingoli wuudhigu wetata lyokilograma. Onde yi holeke e tandi yi kutha po. Onde yi fumvike motenda yandje, noshisiliveli shi li kohi.”
22 Josua okwa tumu aantu, ya matukile otenda noya mono iinima yi indikwa ya fumvikwa, noshisiliveli shi li kohi.
23 Oye yi kutha mo motenda noye yi fala kuJosua nAaisraeli ayehe noye yi tula koshipala shOmuwa.
24 Josua noshigwana ashihe shaIsrael oya kwata Ashan, oshisiliveli, ondjatha nuutale woshingoli pamwe naana yaAshan aamati naakadhona, iimuna, uusino noonzi, otenda ye neliko lye alihe; ayihe oye yi fala kEsilu lyomalwa.
25 Josua nokwa ti: “Omolwashike we tu etele uudhigu u thike mpaka? Omuwa nena ote ku undulile omupya.” Nena oshigwana ashihe osha dhipaga Ashan nomamanya, oye mu dhipaga e taa fike wo aangandjawo neliko lye alihe.
26 Oye mu ndumbile ondumba yomamanya onenenene, ndjoka oko yi li sigo onena. Omolwashoka ehala ndyoka ohali ithanwa sigo onena Esilu lyomalwa. Nena Omuwa okwa geyuluka ihe.
1 Omuwa okwa lombwele Josua a ti: “Kutha aakwiita ayehe, u ye nayo kuAi. Ino tila ngoye ino tyololoka. Otandi ke ku pa esindano lyokusinda omukwaniilwa gwaAi; aantu ye, oshilando nevi otayi ningi yeni.
2 Ai nomukwaniilwa gwasho oto mu ningi, ngaashi wa ningi Jeriko nomukwaniilwa gwasho, ihe nena otamu ka likola iinima niimuna. Longekidha, u matukile oshilando ombaadhilila kosindo yasho.”
3 Josua okwa pyakudhukwa okuya kuAi pamwe naakwiita ye ayehe. Okwa kutha po aakwiita ya pyokoka omayuvi omilongo ndatu e te ya tumu uusiku
4 nelaka ndika: “Holameni kombinga ndjiya yoshilando, ihe hakokule unene; ilongekidheni oku ya matukila.
5 Aantu yandje nangame otatu ki ikokela moshilando. Shimpa Aayai ya zi mo taye tu matukile, otatu finyuka tatu fadhuka po, ano ngaashi twe shi ningi moshikando shotango.
6 Otaye ke tu tidha, sigo twe ya heke okuza ko koshilando. Otaa ka dhiladhila kutya otatu ya yi ontuku, ngaashi twa ningile nale.
7 Nena ne otamu hololoka mo miilangela yeni e tamu kwata po oshilando. Omuwa Kalunga keni ote ke shi mu pa.
8 Shimpa mwa kwata po oshilando, shi tomekeni omulilo, ngaashi Omuwa a ti. Omalombwelo ogo ngaka.”
9 Josua okwe ya tumu e taa yi kiilangela pokati kaAi naBetel, kuuninginino waAi, noya tegelele nkoka. Josua okwa tokelwa uusiku mboka montanda.
10 Ongulangula Josua okwa penduka e ta gongele aakwiita. Oye naawiliki yaIsrael oye ya kwatele komeho okuya kuAi.
11 Aakwiita pamwe naye oya yi popepi noshilando e taa yungu ontanda kuumbangalantu washo. Pokati kawo naAi opwa li olusilu.
12 Josua okwa kutha konyala aalumentu omayuvi gatano e te ya holeke kuuninginino woshilando, pokati kaAi naBetel.
13 Aakwiita oya longekidhilwa olugodhi. Ontanda onene oya li kuumbangalantu woshilando noshihupe shaakwiita osha li kuuninginino washo. Josua okwa tokelwa molusilu uusiku mboka.
14 Omukwaniilwa gwaAi sho a mono aantu yaJosua, oku uluma. Oye naantu ye oya hwanuka yu ukilila olusilu lwaJordan, ya ka kondje nAaisraeli, ngaashi ya ningile nale. Oya li inaa tseya kutya otaa vulu okumatukilwa okuza konima.
15 Josua naantu ye oya shuna ya fa taa yi ontuku noya fadhuka po yu uka kombuga.
16 Aalumentu ayehe yomoshilando oya lombwelwa, ye ke ya landule. Sho ya tidha Josua, oya yi kokule kashona noshilando.
17 Aalumentu ayehe yomuAi nenge Betel, oya ka tidha Aaisraeli; moshilando inamu kala we omupopili.
18 Nena Omuwa okwa ti kuJosua: “Ganeka egonga lyoye kuAi, otandi shi ku pe.” Josua okwa ningi, ngaashi a lombwelwa.
19 Ohaluka sho a yelutha oshikaha she, aalumentu mboka ya li ya holama, oya hituluka mo mbala e taa yi moshilando e taye shi kwata po. Ohaluka oye shi tomeke omulilo.
20 Aalumentu yomuAi sho ya tala konima, oya mono olwithi lwa tsinagala kegulu. Kaya li we ye na ompito yokuhenuka, oshoka Aaisraeli mbeyaka ya li yu uka lwokombuga, oya piluka, opo ye ya homone.
21 Josua naakwiita ye sho ya mono kutya yakwawo mbeya oya kwata po oshilando notashi tsinagala olwithi, oya piluka e taa dhipaga aalumentu yaAi.
22 Aaisraeli yomoshilando oye ya wo kolugodhi. Aalumentu yaAi oya dhimbulula kutya oya kondekwa kAaisraeli, noya dhipagwa ayehe. Inapu za nando ondhi po inapu kala ngoka e na omwenyo,
23 shila omukwaniilwa gwaAi, okwa kwatwa nokwa falwa kuJosua.
24 Aaisraeli oya dhipaga kehe gumwe gwaatondi yawo meyalala kombuga, nkoka ye ya tidhile. Nena oya galukile ishewe kuAi e taa dhipaga ayehe.
25 Josua okwa kala a taganekela egonga lye kuAi noine li tenteka pohi, manga aantu ayehe inaaya pwa po okudhipagwa. Oshigwana ashihe shaAi osha dhipagwa esiku ndyoka — aalumentu naakiintu omayuvi omulongo nagaali.
26
27 Aaisraeli oyi ihupithile iimuna niinima mbyoka ya hakana moshilando, ngaashi Omuwa a lombwele Josua.
28 Josua okwa fike po Ai e te shi lokotitha po ashihe. Osha ningi eputu nosho shi li sigo onena.
29 Okwa mangeleke omukwaniilwa gwaAi komuti okusa e te ethele omudhimba gwe nkoka sigo ongulohi. Peningino lyetango Josua okwa lombwele, omudhimba gu kuthwe ko, nogu umbilwa posheelo shoshilando. Oye gu siikile nondumba yomamanya, ndjoka tayi monika natango nkoka.
30 Josua okwa tungile Omuwa, Kalunga kaIsrael, oshiyambelo kondundu Ebal.
31 Okwe shi tungu pamaudhikilo ngoka Moses, omumati gwOmuwa, e ga pe Aaisraeli, ngaashi tashi popiwa mompango yaMoses taku tiwa: “Oshiyambelo nashi kale shomamanya inaaga hongwa niiyela.” Oya yambele ko Omuwa omafikilondjambo noye mu etele omakwatathanondjambo.
32 Josua okwa kutha emanya e li hongo montaneho yAaisraeli e ta nyola mo oohapu dhompango yaMoses.
33 Aaisraeli pamwe naawiliki yawo, aambala naatokolihapu naakwiilongo mboka ya li mokati kawo, oya li ya thikama koombinga noombinga dhoshikethahangano ya tongolola aayambi Aalevi mboka ye shi humbata. Etata limwe lyaantu oya li ya thikama ya pilamena kondundu Garizim, manga etata limwe lya thikama lya pilamena kondundu Ebal. Omumati gwOmuwa Moses okwe ya lombwelele, ya ninge ngeyi, ngele ethimbo lyeyambeko lyawo lya thiki.
34 Josua okwa lesha mokule ompango ayihe mwa kwatelelwa omayambeko nomatulomutima, ngaashi naanaa sha nyolwa membo lyompango.
35 Oshipango kehe shaMoses osha leshwa kuJosua pokugongala kwaayehe, nkoka kwa kwatelele mo aakiintu naanona nosho wo aakwiilongo mboka ya kala mokati kawo.
1 Omasindano gaIsrael oga tseyika kaakwaniilwa ayehe ya li kuuninginino waJordan — koondundu, kiikulundundu yoponyonga yadho nokombinga ayihe yomunkulo gwEfuta lyopokati, sigo okuLibanon kuumbangalantu. Mbaka oyo aakwaniilwa Aaheti, Aayamori, Aakaanana, Aaperesi, Aahevi nAayebusi.
2 Oya gongala kumwe, ya hangane okukondjitha Josua nAaisraeli.
3 Ihe aantu yomuGibeon, mboka ya li Aahevi, sho yu uvu, Josua nkene a ningile Jeriko naAi,
4 oya tokola, ye mu kotokele. Oya yi niikulya yimwe ye yi londeke kuusino nomahahi omakulu noompunda dhomaviinu dha andekwa.
5 Oya zala oonguwo dha kulupa noongaku oonkulu dha andekwa. Iikwiila yawo oya li ya kukuta noyi na oshushi.
6 Oya yi kontanda kuGilgal taa ti kuJosua nokaalumentu yaIsrael: “Otwa zi koshilongo shokokule; otwa hala, mu ninge euvaneno natse.”
7 Ihe aalumentu Aaisraeli oya ti: “Omolwashike tu na okuninga euvaneno nane? Mwa fa ngaa mu li popepi mpoka.”
8 Oyo ya ti kuJosua: “Tse aapiya yoye.” Josua okwe ya pula: “One oolye notamu zi peni?”
9 Oyo ye mu hokololele ya ti: “Otatu zi kevi lyokokule, tatekulu, oshoka otwa kundana Omuwa Kalunga keni. Otu uvu ayihe mbyoka a ningi muEgipiti.
10 Naashoka a ningile aakwaniilwa yaali yAayamori kuuzilo waJordan: omukwaniilwa Sihon gwaHeshbon nomukwaniilwa Og gwaBaasha, mboka ya kala muAshtarot.
11 Aawiliki yetu naantu ayehe moshilongo shetu oye tu lombwele, tu kuthe iikulya yimwe, tu idhenge mondjila, tu ye tu ku tsakaneke. Otwa lombwelwa, tu ninge aayakuli yoye noku ku pula, u ninge euvaneno natse.
12 Tala kiikwiila yetu. Sho twa zi kegumbo, tu ye tu ku tsakaneke, oya li ya pupyala. Ihe yi tala ngashingeyi! Oya kukuta noyi na oshushi.
13 Sho tu udha oompunda ndhika dhomaviinu, odha li oompe, ihe ngashingeyi odha kulupa. Oonguwo dhetu noongaku dhetu odha kulupile mondjila onde.”
14 Aalumentu Aaisraeli oya taamba kuyo iikulya yimwe, ihe inaa pula nando omayele kOmuwa moshinima shika.
15 Josua okwa ningi euvaneno lyombili naantu yomuGibeon e te ya pitika, ya kale ye na omwenyo. Aawiliki yAaisraeli oye shi koleke nokugana.
16 Omasiku gatatu sho ga piti po okuza keuvaneno, Aaisraeli oya koneke kutya nani aantu mbaka oya zi popepi.
17 Onkee Aaisraeli oya thikama nokonima yomasiku gatatu oya thiki kiilando yawo: Gibeon, Kefira, Beerot naKiriat Jearim.
18 Ihe Aaisraeli inaye ya dhipaga, oshoka aawiliki oya adhika ya ninga naantu mbaka euvaneko lyokwakola medhina lyOmuwa, Kalunga kaIsrael. Aantu ayehe oye shi nyenyetele kaawiliki,
19 ihe mbaka oya yamukula: “Otse twe ya pe euvaneko lyokwakola medhina lyOmuwa Kalunga kaIsrael. Onkee itatu vulu oku ya ninga nayi.
20 Otu na oku ya etha, ya kale ye na omwenyo omolweuvaneko lyetu; ngele itatu shi ningi, nena Kalunga ote tu geele.
21 Naa kale ye na omwenyo, ihe oye na okutyaya iikuni noku tu tekela omeya.” Osho aawiliki ya tokola omolwawo.
22 Josua okwi ithanitha aantu yomuGibeon, ye ye kuye, nokwe ya pula: “Omolwashike tamu tu kotokele noku tu lombwela kutya omwa zi kokule, nando omu li popepi natse?
23 Molwashoka mwa ningi ngeyi, Kalunga okwe mu tokola. Oshigwana sheni otashi ka kala aluhe oshipika, aatyayi yiikuni naateki yomeya gomotempeli yaKalunga kandje.”
24 Oya yamukula ya ti: “Shika otwe shi ningi, tatekulu, oshoka otu uvile kutya Omuwa Kalunga koye okwa li a lombwele omumati gwe Moses, e mu pe evi ndika alihe nokudhipaga aantu ayehe mondjila yeni. Otwe shi ningi, oshoka otwa li twe mu tila nokutya otamu tu dhipaga.
25 Ngashingeyi otu li miikaha yoye; tu ninga shoka she ku opalela noshu uka.”
26 Josua osho a ningi. Okwe ya gamene noina zimina, Aaisraeli ye ya dhipage.
27 Ihe okwe ya ningi aapika yokutyaya iikuni nokuteka omeya gAaisraeli nogoshiyambelo shOmuwa. Sigo ongashingeyi oya tsikile okulonga mbika meha ndyoka Omuwa a hogolola, a simanekelwe mo.
1 Adonizedek, omukwaniilwa gwaJerusalem, oku uvu kutya Josua okwa sindi nokuyonagula po Ai thiluthilu nokwa dhipaga omukwaniilwa gwasho, ngaashi naanaa a ningile Jeriko nomukwaniilwa gwasho. Oku uvu wo kutya oshigwana shaGibeon osha panga uukuume nAaisraeli noye li mokati kawo.
2 Aantu yomuJerusalem oya li ya lulilwa kushika, oshoka Gibeon osha li oshilando oshinene shi thike pamwe noshilando kehe shi na omukwaniilwa; osha li shi vule Ai, naalumentu yomuGibeon oya li aakwiita ya pyokoka.
3 Ano Adonizedek okwa tumu elaka komukwaniilwa Hoham gwaHebron, omukwaniilwa Piram gwaJarmut, omukwaniilwa Jafia gwaLakish nomukwaniilwa Debir gwaEglon. Elaka otali ti:
4 “Ileni, mu kwathe ndje okuponokela Gibeon, oshoka osha panga uukuume naJosua nAaisraeli.”
5 Aakwaniilwa mbaka yatano yAayamori, ngoka gwaJerusalem, ngoka gwaHebron, ngoka gwaJarmut, ngoka gwaLakish naangoka gwaEglon, oya hangenene olugodhi, ya kondeke Gibeon e taye shi ponokele.
6 Aalumentu yomuGibeon oya tumu elaka kuJosua kontanda kuGilgal tali ti: “Ino tu ethela, tatekulu! Endelela, u tu kwathe! Tu hupitha! Aakwaniilwa ayehe yAayamori mevi lyokoondundu oya hangenene olugodhi noye tu ponokele.”
7 Onkee Josua okwa zi muGilgal pamwe netangakwiita lye alihe, moka mwa li oofulelela adhihe.
8 Omuwa okwa ti kuJosua: “Ino ya tila. Onde ku pa nale esindano. Kaku na nando ogumwe gwomuyo ta vulu oku ku thikamena.”
9 Uusiku auhe Josua naantu ye oya li mondjila okuza kuGilgal, sigo oGibeon, noya koloka e taa ponokele Aayamori.
10 Omuwa okwa vundakanitha Aayamori, sho ya mono etangakwiita lyAaisraeli. Aaisraeli oye ya dhipaga puGibeon noye ya tidha nondjila yuupitilo waBethoron e taye ya dhipaga, sigo okuAseka naMakkeda kuumbugantu.
11 Manga nee Aayamori ya li taa yi ontuku yetangakwiita lyAaisraeli taa kuluka metaulilo lyaBethoron, Omuwa okwe ya lokithile omamanya omanene goompawe ethimbo alihe, sigo okuAseka. Mboka ya si koompawe, oya li oyendji ye vule mboka ya dhipagwa kAaisraeli.
12 Esiku ndyoka Omuwa a pe Aaisraeli esindano okusinda Aayamori, Josua okwa popi nOmuwa. Okwa popi montaneho yAaisraeli a ti: “Tango, kankama thilu muGibeon; Mwedhi, mwena molusilu lwaAjalon.”
13 Etango olya kala lya mwena, nomwedhi inagu inyenga, sigo oshigwana sha sindi aatondi yasho. Shika osha nyolwa mEmbo lyaJashar. Etango olya thikama lya mwena pokati komutenya noinali peguka esiku alihe.
14 Muuyuni wonale nenge mboka wa landula ko inamu kala esiku lya fa ndika, Omuwa sho a vulika komuntu. Omuwa okwa kondjele shili Aaisraeli.
15 Konima yaambika Josua naakwiita ye oya shuna kontanda kuGilgal.
16 Aakwaniilwa mbeyaka yatano yAayamori oya adhika ya fadhuka po e taa holama mekololo lyaMakkeda.
17 Omuntu gumwe okwe ya mono, naJosua okwa lombwelwa mpoka ya holama.
18 Oye a ti: “Galangatithilii po omamanya gamwe omanene posheelo shekololo. Tulii po wo aalangeli,
19 ihe inamu kala po ne yene. Ka landuleni aatondi, ne mu ya homone tamu zi molutako lwawo. Inamu ya etha, ya ka shune miilando yawo. Omuwa Kalunga keni okwe ye mu sinditha.”
20 Josua naakwiita ye oye ya dhipaga, nando aanelago yamwe ya hupu ngaa, sho ya ka holama moohote dhiilando yawo noinaa dhipagwa.
21 Nena aantu yaJosua ayehe oya galukile kuye kontanda puMakkeda yaa na mbudhi. Moshilongo kamwa li nando ogumwe ta vulu okwiitakeka Aaisraeli.
22 Nena Josua okwa ti: “Thitululeni osheelo shekololo, ne mu ete aakwaniilwa mboka yatano kungame.”
23 Ekololo olye egululwa, naakwaniilwa gwaJerusalem, gwaHebron, gwaJarmut, gwaLakish nogwaEglon oya kuthwa mo
24 e taa falwa kuJosua. Josua okwi ithanene kuye aalumentu ayehe yaIsrael, e ta lombwele aambala mboka ye ende pamwe naye, ya lyate aakwaniilwa koothingo. Osho ya ningi.
25 Nena Josua okwa ti kaambala: “Inamu tila nenge mu tyololoke. Ikoleleni, ne mu kale nomukumo, oshoka shika osho shoka Omuwa ta ka ninga aatondi yeni ayehe.”
26 Nena Josua okwa dhipaga aakwaniilwa e te ya endjeleleke komiti ntano, nkoka omidhimba dhawo dha kala sigo ongulohi.
27 Peningino lyetango Josua okwa lombwele, omidhimba dhi kuthwe ko dho dhi umbilwe mekololo moka ya li ya holama nale. Omimanya ominene odha tulwa posheelo shekololo noko dhi li natango.
28 Josua okwa homona e ta sindi Makkeda nomukwaniilwa gwasho esiku ndyoka. Okwa dhipaga aantu ayehe moshilando; inaku hupa nondhi. Omukwaniilwa gwaMakkeda okwe mu ningi ngaashi omukwaniilwa gwaJeriko.
29 Konima yaambika Josua netangakwiita lye oya zi muMakkeda yu uka kuLibna e taye shi ponokele.
30 Omuwa okwa sinditha Aaisraeli oshilando shika nomukwaniilwa gwasho. Inaa hupitha nando ogumwe, ndele oya dhipaga omuntu kehe musho. Omukwaniilwa oye mu ningi, ngaashi ya ningile omukwaniilwa gwaJeriko.
31 Konima yaambika Josua netangakwiita lye oya zi muLibna yu uka kuLakish. Oye shi kondeke e taye shi ponokele.
32 Omuwa okwa pe Aaisraeli esindano okusinda Lakish esiku etiyali lyolugodhi. Ngaashi naanaa ya ningile puLibna, inaa hupitha nando ogumwe, ihe oya dhipaga ayehe moshilando.
33 Omukwaniilwa Horam gwaGeser okwe ya okukwatha Lakish, ihe Josua okwe mu dhenge netangakwiita lye ye ina hupitha nando ogumwe gwomuyo, a kale e na omwenyo.
34 Opo ihe Josua netangakwiita lye oya zi muLakish yu uka kuEglon noye shi kondeke e taye shi ponokele.
35 Oye shi kwata po esiku tuu ndyoka e taa dhipaga omuntu kehe, ngaashi naanaa ya ningile muLakish.
36 Konima yaambika Josua netangakwiita lye oya zi muEglon yu uka koondundu kuHebron. Oye shi ponokele
37 e taye shi kwata po. Oya dhipaga omukwaniilwa nomuntu kehe moshilando shika, osho wo miilando yopuushiinda. Josua okwa yono po oshilando thiluthilu, naanaa ngaashi a ningi Eglon. Ina hupitha nondhi.
38 Nena Josua netangakwiita lye oya pilukile kuDebir noye shi ponokele.
39 Okwe shi kwata po nomukwaniilwa gwasho niilando ayihe yopuushiinda. Oya dhipaga ayeheyehe. Josua okwa ningi Debir nomukwaniilwa gwasho, ngaashi a ningile Hebron naLibna nomukwaniilwa gwasho.
40 Josua okwa lala evi alihe. Okwa sindi aakwaniilwa yomevi lyokoondundu, komasilukila gadho gokuuzilo nokiikulundundu yoponyonga yadho kuuninginino, osho wo mboka yokombinga yokuumbugantu ihaaku lokwa. Ina hupitha nando olye; ayeheyehe oya dhipagwa. Osho Omuwa Kalunga kaIsrael okwa li a lombwele Aaisraeli.
41 Josua okwa lala evi alihe okuza kuKadesh Barnea kuumbugantu, sigo oGaza popepi nomunkulo, oshitopolwa ashihe shaGoshen nosigo okuGibeon kuumbangalantu.
42 Oshitopolwa shika naakwaniilwa ayehe yasho Josua okwe shi kwata po moshikando shimwe, oshoka Omuwa, Kalunga kaIsrael, okwa kondjele Israel.
43 Konima yaambika Josua netangakwiita lye oya shuna kontanda kuGilgal.
1 Omukwaniilwa Jabin gwaHazor sho u uvu onkundana yomasindano gAaisraeli, okwa tumu elaka komukwaniilwa Jobab gwaMadon, ngoka gwaShimron naangoka gwaAksaf,
2 osho wo kaakwaniilwa mboka ya kala mevi lyokoondundu kuumbangalantu, molusilu lwaJordan kuumbugantu wEfuta lyaGalilea, kiikulundundu yoponyonga nopomunkulofuta popepi naDor.
3 Okwa tumu wo elaka kAakaanana koombinga adhihe mbali dhaJordan, kAayamori, kAaheti, kAaperesi nokAayebusi mevi lyokoondundu, osho wo kAahevi ya kala ponyonga yondundu Hermon mevi lyaMispa.
4 Oye ya naakwiita yawo ayehe. Oya li oyendjiyendji ya fa ehekevi pooha dhefuta. Oya li ye na wo uukambe owindji nomatembakwiita ogendji.
5 Aakwaniilwa mbaka ayehe oya hangenene olugodhi noye ya kumwe e taa yungu ontanda pokalonga kaMerom, ya kondjithe Israel.
6 Omuwa okwa ti kuJosua: “Ino ya tila. Ngula pethimbo ndika otandi ya gandja ayehe ya sindika miikaha yaIsrael. Otamu ka lemaneka uukambe wawo nokufika po omatemba gawo guukwiita.”
7 Josua naakwiita ye oye ya homona oshikumithi okalonga kaMerom.
8 Omuwa okwa pe Aaisraeli esindano; Aaisraeli oye ya ponokele noye ya tidha sigo oMisrefot Majim naSidon kuumbangalantu nokolusilu lwaMispe kuuzilo. Oye ya kondjitha, sigo inaku hupa we nando ogumwe gwawo.
9 Josua okwe ya ningile, ngaashi Omuwa e mu lombwele. Okwa lemaneke uukambe wawo nokwa fike po omatemba gawo guukwiita.
10 Opo ihe Josua okwa piluka, a kwata po Hazor e ta dhipaga omukwaniilwa gwasho. (Pethimbo ndiyaka Hazor osha li oshilando oshinankondo shi vule ayihe yilwe.)
11 Oya dhipaga ayeheyehe; inapu hupa nando ogumwe, noshilando osha fikwa po.
12 Josua okwa kwata po iilando mbika ayihe naakwaniilwa yayo nokwa dhipagitha ayehe, naanaa ngaashi Moses, omumati gwOmuwa, a li e mu lombwele.
13 Ihe Aaisraeli inaa fika nando oshimwe shomiilando mbyoka yokiikulundundu kakele kaHazor, shoka Josua a fike po.
14 Miilando mbika Aaisraeli oya hakana iinima ayihe yondilo niimuna noya kala nayo. Ihe oya dhipaga omuntu kehe; inaa hupitha nando ogumwe.
15 Omuwa okwa li a lombwele omumati gwe Moses, osho wo Moses okwa li a lombwele Josua, naJosua okwa li a vulika. Okwa ningi ashihe shoka Omuwa a li a lombwele Moses.
16 Josua okwa lala evi alihe — evi lyokoondundu niikulundundu yoponyonga yadho, kuumbangalantu nokuumbugantu, oshitopolwa ashihe shaGoshen nombinga ihaayi lokwa
17 kuumbugantu washo, osho wo olusilu lwaJordan. Oshitopolwa osha li sha taandela okuza kondundu Halak kuumbugantu popepi naEdom, sigo oBaal Gad kuumbangalantu molusilu lwaLibanon kuumbugantu wondundu Hermon. Ethimbo ele Josua okwa li ta kondjitha aakwaniilwa yoshitopolwa shika, ndele okwe ya sindi ayehe e te ya dhipaga.
18
19 Oshilando shimwe ashike shoka sha panga ombili nAaisraeli, osha li Gibeon, shoka sha kalwa kAahevi. Iilando ayihe yilwe oya sindika miita.
20 Omuwa okwa li e ya uthile okukondjitha Israel, opo ya wape okupangulilwa okuhanagulwapo pwaa na henda. Shika osho shoka Omuwa a lombwele Moses.
21 Pethimbo ndiyaka Josua okwa yi e ta thekagula po oludhi lwaalefule halu ithanwa Aayanakim. Oya kala mevi lyokoondundu — muHebron, Debir, Anab nomevi alihe lyokoondundu dhaJuda naIsrael. Josua okwe ya hanagula po sheke niilando yawo.
22 Mevi lyAaisraeli inamu thigala nando Omuanakim gumwe; omandaangela oga kala ngaa muGaza, Gat naAshdod.
23 Josua okwa kwata po evi alihe, ngaashi Omuwa a lombwelele Moses. Josua okwe li pe Aaisraeli, li ninge lyawo nokwe li topola miitopolwa, ezimo kehe oshitopolwa shalyo. Osho ngeyi Aaisraeli oya ngungile ihe, iita sho ya kuka.
1 Okuza kolusilu lwaArnon okuuka nolusilu lwaJordan, sigo okondundu Hermon kuumbangalantu, Aaisraeli oya adhika ya kwata po nokulala evi lyokuuzilo waJordan. Oya sindi aakwaniilwa yaali.
2 Gumwe oSihon, omukwaniilwa gwAayamori, ngoka a li ta pangele muHeshbon. Oshilongo she osha kwatelele mo etata lyaGilead: okuza kuAroer (kooha dholusilu lwaArnon) noshilando shi li pondinga yolusilu ndoka, sigo okomulonga Jabbok, ngoka ongamba yaAmmon;
3 e tashi kwatelele mo olusilu lwaJordan okuza kEfuta lyaGalilea okuuka lwokuumbugantu, sigo oBet Jeshimot (kuuzilo wEfuta lya sa) noponyonga yondundu Pisga.
4 Oyo ya sindi wo omukwaniilwa Og gwaBaasha, ngoka a li gumwe gwomAarafa yahugunina; okwa lele muAshtarot naEdrei.
5 Oshilongo she osha kwatelele mo ondundu Hermon, Salka naBaasha, ashihe, sigo okoongamba dhaGeshur naMaaka, osho wo etata lyaGilead, sigo okoshitopolwa shomukwaniilwa Sihon gwaHeshbon.
6 Aakwaniilwa mbaka yaali oya li ya sindwa kuMoses nAaisraeli. Omumati gwOmuwa Moses okwa gandja evi lyawo kezimo lyaRuben nolyaGad noketatazimo lyaManasse, li ninge eliko lyawo.
7 Josua nAaisraeli oya sindi aakwaniilwa ayehe yomoshitopolwa shokuuninginino waJordan, okuza kuBaal Gad molusilu lwaLibanon, sigo ondundu Halak kuumbugantu popepi naEdom. Josua okwa topolele omazimo evi ndika, ga kale mo aluhe.
8 Oshitopolwa shika osha kwatelele mo evi lyokoondundu, iikulundundu yoponyonga yadho kuuninginino, olusilu lwaJordan niikulundundu yoponyonga yalwo, omasilukila gokuuzilo nevi lyokuumbugantu hoka ihaaku lokwa. Evi ndika olya li lyAaheti, lyAayamori, lyAakaanana, lyAaperesi, lyAahevi nolyAayebusi.
9 Aaisraeli oya sindi aakwaniilwa yiilando mbika: Jeriko, Ai (popepi naBetel),
10 Jerusalem, Hebron,
11 Jarmut, Lakish,
12 Eglon, Geser,
13 Debir, Geder,
14 Horma, Arad,
15 Libna, Adullam,
16 Makkeda, Betel,
17 Tappua, Hefer,
18 Afek, Lashar on,
19 Madon, Hazor,
20 Shimron Meron, Aksaf,
21 Taanak, Megiddo,
22 Kedesh, Jokneam (ponyonga yaKarmel),
23 Dor (komunkulo), Goiim (muGalilea)
24 naTirza — kumwe aakwaniilwa omilongo ndatu nagumwe.
1 Josua okwa li a kulupa nokuli. Omuwa okwa ti kuye: “Ngoye owa kulupa nokuli, ihe oku na natango ombinga onene yevi ndyoka li na okukuthwa ko:
2 oshilongo ashihe shAafilisti noshAageshur,
3 osho wo shoka shAayavvim kuumbugantu. (Evi okuza kokalonga Shihor pongamba yaEgipiti, sigo okoshitopolwa shaEkron, olya talwa lyAakaanana; aakwaniilwa yAafilisti oya kala muGaza, Ashdod, Ashkelon, Gat naEkron.)
4 Nkoka oku na natango oshilongo ashihe shAakaanana, naMeara (shoka oshAasidoni), sigo Afek pongamba yAayamori;
5 evi lyAagebali; Libanon ashihe kuuzilo okuza kuBaal Gad kuumbugantu wondundu Hermon, sigo eelo lyaHamat.
6 Shika osha kwatelele mo oshilongo ashihe shAasidoni, mboka ya kala mevi lyokoondundu pokati koondundu dhaLibanon naMisrefot Majim. Otandi ka tidha mo iigwana mbika ayihe mokuhuma komeho kwoshigwana shaIsrael. Ou na okutopolela Aaisraeli evi, naanaa ngaashi nde ku lombwela.
7 Ngashingeyi evi ndika li topolela omazimo omulongo netatazimo lyaManasse, li ninge eliko lyago.”
8 Ezimo lyaRuben nolyaGad netatazimo lyaManasse oga taamba nale nokuli evi ndyoka Moses, omumati gwOmuwa, e li ga pe; olya li kuuzilo womulonga Jordan.
9 Oshitopolwa shago osha li sha taandela sigo Aroer (kooha dholusilu lwaArnon) nokoshilando shopondinga yolusilu ndoka nosha kwatelele mo etumbalalovi okuza Medeba, sigo oDibon.
10 Osha adha kongamba yaAmmon notashi kwatelele mo iilando ayihe mbyoka ya li ya pangelwa komukwaniilwa gwAayamori Sihon, ngoka a pangele muHeshbon.
11 Osha kwatelele mo Gilead, oshitopolwa shaGeshur noshaMaaka, ondundu Hermon ayihe naBaasha ashihe, sigo oSalka.
12 Osha kwatelele mo oshilongo shaOg, Omurafa omuhugunini, ngoka a pangele muAshtarot naEdrei. Moses okwa sindile aantu mbaka e te ya tidha po.
13 Onkene tuu Aaisraeli inaa tidha po Aageshuri nAamaaka; oya kala mAaisraeli sigo onena.
14 Moses ina gandja nando evi kAalevi. Ngaashi Omuwa a lombwelele Moses, oya li ye na okupewa oshitopolwa moondjambo ndhoka dha lungunithilwa Omuwa Kalunga kaIsrael.
15 Moses okwa adhika a gandja oshitopolwa shimwe shevi komaludhi gomezimo lyaRuben.
16 Oshitopolwa shago osha li sha taandela sigo Aroer (kooha dholusilu lwaArnon) nokoshilando shopondinga yolusilu ndoka nosha kwatelele mo etumbalalovi alihe momudhingoloko gwaMedeba.
17 Osha kwatelele mo Heshbon niilando ayihe yoketumbalalovi: Dibon, Bamot Baal, Bet Baal Meron,
18 Jahas, Kedemot, Mefaat,
19 Kirjatajim, Sibma, Zeret Shakar koshikulundundu shomolusilu,
20 Betpeor, omasilukila goondundu Pisga naBet Jeshimot.
21 Osha kwatelele mo iilando ayihe yoketumbalalovi noshilongo ashihe shomukwaniilwa Omuamori Sihon, ngoka a li a pangele kuHeshbon. Moses okwe mu sindi, osho wo aapangeli yaMidian: Evi, Rekem, Sur, Hur naReba. Ayehe mbaka oya li aaniikandjo moshilongo shomukwaniilwa Sihon.
22 Mokati kaamboka ya dhipagwa kAaisraeli, omwa li wo omwaanekeli Bileam yaBeor.
23 Jordan ogwa li ongamba yokuuninginino yezimo lyaRuben. Mbika oyo iilando nomikunda dha pewa omaludhi gomezimo lyaRuben, dhi ninge eliko lyawo.
24 Moses okwa li a gandja wo oshitopolwa shimwe shevi komaludhi gomezimo lyaGad.
25 Oshitopolwa shago osha kwatelele mo Jaser niilando ayihe yomuGilead, etata lyevi lyaAmmon sigo Aroer, shoka shi li kuuzilo waRabba;
26 evi lyago olya li lya taandela okuza Heshbon, sigo oRamat Mispe naBetonim, okuza Mahanaim, sigo ongamba yaDebir.
27 Molusilu lwaJordan osha kwatelele mo Bet Haram, Bet Nimra, Sukkot naZafon, oshihupe shoshilongo shomukwaniilwa Sihon gwaHeshbon. Ongamba yasho yokuuninginino oya li omulonga Jordan, sigo Efuta lyaGalilea.
28 Mbika oyo iilando nomikunda dha pewa omaludhi gomezimo lyaGad, dhi ninge eliko lyawo.
29 Moses okwa li a gandja oshitopolwa shimwe shevi komaludhi gometatazimo lyaManasse.
30 Oshitopolwa shago osha li sha taandela sigo oMahanaim nosha kwatelele mo Baasha ashihe — oshilongo ashihe shaOg, omukwaniilwa gwaBaasha, osho wo omikunda adhihe omilongo hamano dhaJair muBaasha.
31 Osha kwatelele mo etata lyaGilead, osho wo Ashtarot naEdrei, iilandopangelo yoshilongo shaOg muBaasha. Ayihe mbika oya pewa omaludhi ga za muMakir yaManasse.
32 Osho Moses a topola evi lyokuuzilo waJeriko naJordan, sho a li kolushandja lwaMoab.
33 Ihe Moses ina gandja evi lyasha kezimo lyaLevi. Okwe ya lombwele kutya oshitopolwa shawo otashi zi moondjambo tadhi yambelwa Omuwa Kalunga kaIsrael.
1 Mpaka otapa landula ehokololo, nkene evi lyaKaanan kuuninginino waJordan lya topolelwa Aaisraeli. Osha ningwa komuyambi Eleasar, kuJosua yaNun nokaawiliki yomaludhi gomomazimo gaIsrael.
2 Ngaashi Omuwa a li a lombwele Moses, iitopolwa yomazimo omugoyi netata kuuninginino waJordan oyu uthwa nokuumba oshihogololitho.
3 Moses okwa li a gandja nokuli evi kuuzilo waJordan komazimo gaali netata. (Oluvalo lwaJosef olwa li lwa topolwa momazimo gaali: ndyoka lyaManasse naandyoka lyaEfraim.) Ihe Aalevi inaa pewa kuMoses oshitopolwa shasha. Oya pewa ashike iilando yokukala mo nomalundu guunapelo okulitha oongombe dhawo, oonzi niikombo yawo.
4
5 Aaisraeli oya topola evi, ngaashi Omuwa a lombwelele Moses.
6 Esiku limwe aantu yamwe yomezimo lyaJuda oye ya kuJosua kuGilgal. Gumwe gwomuyo, Kaleb kaJefunne Omukenasi, okwa ti kuye: “Ou shi shi shoka Omuwa a popi muKadesh Barnea kombinga yetu nangoye kuMoses, omuntu gwaKalunga.
7 Onda li ndi na omimvo omilongo ne, sho Moses, omumati gwOmuwa, a tumu ndje okuza kuKadesh Barnea okundaadha evi ndika. Onde mu etele ondjokonona yoshili.
8 Aalumentu mboka ya yile ko pamwe nangame, oya mbandameke oshigwana shetu, ihe ngame onda li nda dhiginine okuvulika kOmuwa, Kalunga kandje.
9 Sho nda ningi ngeyi, Moses oku uvanekele ndje euvaneko lya kola nokutya ngame noluvalo lwandje otatu ka pewa eliko lyetu mevi ndyoka nde li lyata oompadhi.
10 Eewa, ngashingeyi opwa piti omimvo omilongo ne nantano, Omuwa sho e shi lombwele Moses. Shika osha ningwa, manga Israel a li mombuga. Pauvaneko lye Omuwa okwa gamene ndje, ndi kale ko natango ndi na omwenyo. Ondi na oomvula omilongo hetatu nantano,
11 ihe oonkondo dhandje natango tuu odhi thike pundhoka, Moses sho a tumine ndje. Natango tuu onda gwana okuhinga iita nenge okuninga sha shilwe.
12 Pe ndje ano evi ndyoka lyokoondundu Omuwa u uvanekele ndje esiku ndiyaka. Ngoye owa kundana esiku ndiyaka kutya hwiyaka oku na oludhi lwaalefule halu ithanwa Aayanakim, ya kala miilando iinene yomadhingililokuma. Ondi inekela, Omuwa ota ka kala pamwe nangame, opo ndi ya tidhe mo, naanaa ngaashi Omuwa a ti.”
13 Josua okwa yambeke Kaleb kaJefunne e te mu pe oshilando Hebron, shi ninge eliko lye.
14 Sigo onena Hebron osholuvalo lwaKaleb kaJefunne Omukenasi, oshoka okwa li a vulika kOmuwa, Kalunga kaIsrael.
15 Nale Hebron osha li hashi ithanwa oshilando shaArba. (Arba okwa li nale omunenentu mokati kAayanakim.) Nomoshilongo omwa li ombili.
1 Omaludhi gomezimo lyaJuda oga pewa oshitopolwa shevi, ngaashi tashi landula: Kuumbugantu evi olya li lya taandela sigo onkotso yahugunina yombuga Zin pongamba yaEdom.
2 Ongamba ndjika yokuumbugantu oya tameke kohulo yEfuta lya sa,
3 yu uka lwokuumbugantu okuza pomulondo gwondundu Akrabbim, sigo oZin, sigo oKadesh Barnea, tayi pitilile Hezron, tayi londo yu uka kuAddar, tayi goyokele lwokuKarka,
4 yu uka kuAzmon nokulandula ihe okalonga pongamba yaEgipiti, sigo okEfuta lyopokati, mpoka ongamba tayi hulile. Ndjika oyo ongamba yokuumbugantu yaJuda.
5 Ongamba yokuuzilo oyo Efuta lya sa, sigo oompoka Jordan tagu yi mulyo. Oko nkoka ongamba yokuumbangalantu tayi tameke.
6 Oya adha kuBet Hogla nokupitilila Bet Araba kuumbangalantu washo. Okuza nkoka oyu uka kemanya lyaBohan (omuna gwaRuben),
7 okuza kEsilu lyomalwa otayi londo yu uka kuDebir nokugoyokela kuumbangalantu yu uka lwokuGilgal, shoka sha taalela omulondo gwaAdummim handiyaka yolusilu kuumbugantu. Nena otayi tsikile yu uka koothithiya dhaEnshemesh nokuhulila muEnrogel.
8 Okuza nkoka ongamba otayi londo ya lambalala olusilu lwaGe Ben Hinnom kuumbugantu woshikulundundu, nkoka kwa li Jerusalem shAayebusi. Opo ihe otayi londo komutse gwoshikulundundu kuuninginino wolusilu lwaHinnom, kombinga yokuumbangalantu wolusilu lwaRefaim.
9 Okuza nkoka otayi uka komaluthithiya gaNeftoak nokiilando yi li popepi nondundu Efron. Nkoka otayi piluka yu uka kuBaala (kokutya Kiriat Jearim),
10 mpoka otayi goyokele kuuninginino yu uka kevi lyokiikulundundu yaSeir, tayi kunkula nondundu yaKiriat Jearim (kokutya Kesalon) kuumbangalantu nokusilukila kuBet Shemesh nokuTimna.
11 Opo ihe ongamba tayi tsikile yu uka koshikulundundu kuumbangalantu waEkron, tayi goyokele lwokuShikkaron, tayi pitilile ondundu Baala yu uka kuJamnia. Oya hulile mEfuta lyopokati,
12 ndyoka tali ningi ongamba yokuuninginino. Meni lyoongamba ndhika aantu yomaludhi gaJuda oya kala mo.
13 Kaleb kaJefunne, ogwomezimo lyaJuda, okwa pewa okambinga moshitopolwa shaJuda, ngashi Omuwa a lombwele Josua. Okwa pewa Hebron, oshilando shaArba, he yAayanak.
14 Kaleb okwa tidha mo oluvalo lwaAnak — oludhi lwaSheshai, lwaAhiman, nolwaTalmai.
15 Okuza nkoka okwa ka matukila aantu yomuDebir. (Oshilando shika osha li hashi ithanwa Kiriat Sefer.)
16 Kaleb okwa ti: “Omulumentu ngoka ta tompola okusinda Kiriat Sefer, otandi mu pe omumwandje omukadhona Aksa, e mu hokane po.”
17 Otniel yaKenas, omuna gwamumwayina Kaleb, okwe shi sindi; osho ngaaka Kaleb okwe mu pe omwana Aksa, a ninge omukadhi.
18 Mohango Otniel oku ulumike omukadhi, i indile he epya. Aksa okwa londoloka kokasino ke, naKaleb okwe mu pula sho a hala.
19 Okwa yamukula: “Onda hala omithima dhimwe dhomeya. Evi ndyoka we li pe ndje, oli na enota.” Nena Kaleb okwe mu pe omatope gokiiheke noonyombo dhomomadhiya.
20 Ndika olyo evi omaludhi gezimo lyaJuda ge li taamba, li ninge eliko lyago.
21 Iilando yawo mbyoka ya tsa kokule kuumbugantu popepi nongamba yaEdom, oyo Kabzeel, Eder, Jagur,
22 Kina, Dimona, Adada,
23 Kedesh, Hazor, Jitnan,
24 Sif, Telem, Bealot,
25 Hazor Hadatta, Kerijot-Hezron (kokutya Hazor),
26 Amam, Shema, Molada,
27 Hazar Gadda, Heshmon, Bet Pelet,
28 Hazar Shual, Beersheba, Biziotia nomikunda dhasho,
29 Baala, Ijim, Ezem,
30 Eltolad, Kesil, Horma,
31 Ziklag, Madmanna, Sansanna,
32 Bet Lebaot, Shilhim, Ain naRimmon: iilando omilongo mbali nomugoyi nomikunda dhayo.
33 Iilando yoponyonga yoondundu oyo mbika: Eshtaol, Soar, Ashna,
34 Sanoa, En-gannim, Tappua, Enam,
35 Jarmut, Adullam, Soko, Aseka,
36 Shaarajim, Aditajim, Gedera, Gederotajim: iilando omulongo niine nomikunda dhayo.
37 Okwa li wo Zenan, Hadasha, Migdal Gad,
38 Dilean, Mispe, Jokteel,
39 Lakish, Bozkat, Eglon,
40 Kabbon, Lakmas, Kitlish,
41 Gederot, Bet Dagon, Naama naMakkeda: iilando omulongo niihamano nomikunda dhayo.
42 Okwa li wo Libna, Eter, Ashan,
43 Jiftak, Ashna, Nezib,
44 Keila, Aksib, Maresha: iilando omugoyi nomikunda dhayo.
45 Okwa li Ekron niitayilando yasho nomikunda dhasho,
46 niilando ayihe nomikunda adhihe popepi naAshdod okuza kuEkron, sigo okEfuta lyopokati.
47 Okwa li Ashdod naGaza niitayilando yayo nomikunda dhayo dha adha sigo okalonga kongamba yaEgipiti nokomunkulo gwEfuta lyopokati.
48 Mevi lyokoondundu omwa li Shamir, Jattir, Soko,
49 Danna, Kirjat Sanna (kokutya Debir),
50 Anab, Eshtemoa, Anim,
51 Goshen, Holon naGilo: iilando omulongo nashimwe nomikunda dhayo.
52 Okwa li Arab, Duma, Eshan,
53 Janim, Bet Tappua, Afek,
54 Humta, Hebron naZior: iilando omugoyi nomikunda dhayo.
55 Okwa li Maon, Karmel, Sif, Jutta,
56 Jesreel, Jokdeam, Sanoa,
57 Kain, Gibea naTimna: iilando omulongo nomikunda dhayo.
58 Okwa li Halhul, Bet-Sur, Gedor,
59 Maarat, Bet Anot, naEltekon: iilando ihamano nomikunda dhayo.
60 Okwa li Kirjat Baal (kokutya Kiriat Jearim) naRabba: iilando iyali nomikunda dhayo.
61 Mombuga omwa li Bet Arab, Middin, Sekaka,
62 Nibshan, Oshilando shOmongwa, naEn-gedi: iilando ihamano nomikunda dhayo.
63 Ihe oshigwana shaJuda inashi wapa okutidha mo Aayebusi mboka ya kala muJerusalem. Natango tuu Aayebusi omo ya kala pamwe nAajuda.
1 Ongamba yokuuninginino wevi lya pewa oluvalo lwaJosef, otayi tameke muJordan popepi naJeriko, kuuzilo woothithiya dhaJeriko, yu uka kombuga. Okuza kuJeriko oyu uka kevi lyokoondundu, sigo okuBetel.
2 Okuza kuBetel oyu uka kuLus notayi tsikile kuAtarot, nkoka Aayarki ya kala.
3 Nena oyu uka kuuninginino kehala lyAajaflet, sigo okuBethoron shomolusilu. Okuza nkoka otayi tsikile kuGeser nokuhulila mEfuta lyopokati.
4 Oluvalo lwaJosef, ezimo lyaEfraim nolyaManasse kuuninginino, olwa pewa evi ndika, li ninge eliko lyalwo.
5 Oshitopolwa shomaludhi gomezimo lyaEfraim osho shika: Ongamba yasho oyu uka okuza kuAtarot Addar lwokuuzilo kuBethoron shopombanda,
6 nokuza nkoka sigo Efuta lyopokati. Kuumbangalantu Mikmetat oyo ongamba. Kuuzilo waahoka ongamba otayi goyokele lwokuTaanat Shilo noku shi pitilila kuuzilo yu uka kuJanoa.
7 Okuza kuJanoa otayi silukile kuAtarot naNaara, tayi adha Jeriko e tayi hulile muJordan.
8 Okuza kuTappua ongamba oyu uka kuuninginino kokalonga Kana e tayi hulile mEfuta lyopokati. Evi ndika olya pewa omaludhi gomezimo lyaEfraim, li ninge eliko lyago,
9 pamwe niilando nomikunda dhimwe dhi li meni lyoongamba dhaManasse.
10 Ihe inaa tidha mo Aakaanana mboka ya kala muGeser, onkee Aakaanana oya kala mokati kAaefraim sigo onena, ihe oya thiminikwa okulonga ngaapika.
1 Oshitopolwa shimwe shevi kuuninginino osha pewa omagumbo gamwe gomoluvalo lwaManasse, osheeli shaJosef, Makir, he yaGilead, okwa li osheeli shaManasse. Shoka okwa li omukwiita ofule, okwa pewa Gilead naBaasha kuuzilo waJordan.
2 Evi lyokuuninginino waJordan olya pewa oshihupe shomomagumbo gaManasse: Abieser, Helek, Asriel, Shekem, Hefer naShemida. Mbaka oya li aalumentu yomoluvalo lwaManasse gaJosef noya li aakuluntu yomagumbo.
3 Zelofhad yaHefer yaGilead yaMakir gaManasse okwa li kee na nando omwanamati, aakadhona ayeke. Omadhina gawo ogo Mahla, Noa, Hogla, Milka naTirza.
4 Oya yi komuyambi Eleasar naJosua yaNun nokaawiliki e taa ti: “Omuwa okwa lombwele Moses, e tu pe ngaashi aalumentu aakwetu oshitopolwa shevi, shi ninge eliko lyetu.” Oyo noya pewa eliko lyawo mokati koohegona aasamane, ngaashi sha tiwa kOmuwa.
5 Osho ngeyi Manasse okwa pewa iitopolwa omulongo kakele kaGilead naBaasha kuuzilo waJordan,
6 oshoka noluvalo lwe lwaakiintu olwa pewa evi ngaashi ndoka lwaalumentu. Evi lyaGilead olya pewa oshihupe sholuvalo lwaManasse.
7 Oshitopolwa shaManasse osha li okuza Aser, sigo oMikmetat kuuzilo waShekem. Ongamba oyu uka kuumbugantu nokweedhilila mo aantu yomuEntappua.
8 Evi momudhingoloko gwaTappua olya li lyaManasse, ihe oshilando Tappua pongamba osha li sholuvalo lwaEfraim.
9 Opo ihe ongamba tayi silukile kokalonga Kana. Iilando yokuumbugantu wokalonga oya li yaEfraim, nando oya kala moshitopolwa shaManasse. Ongamba yaManasse otayi ende kombinga yokuumbangalantu wokalonga notayi hulile mEfuta lyopokati.
10 Efraim okwa li kuumbugantu, Manasse okuumbangalantu, nEfuta lyopokati olya li ongamba yawo yokuuninginino. Aser okwa li kuuningininombangalantu nalsaskar okuuzilombangalantu.
11 Miitopolwa yaIssaskar noyaAser Manasse okwa pewa mo Betshan naJibleam pamwe nomikunda dhayo, osho wo Dor (shoka shokomunkulo), Endor, Taanak, Megiddo niitayilando yayo.
12 Ihe Aamanasse inaa wapa okutidha mo aantu miilando mbika, onkee Aakaanana oya tsikile okukala muyo.
13 Nokuli Aaisraeli nando oya ningi aanankondo, inaa tidha mo Aakaanana, ihe oye ya thiminike oku ya longela.
14 Oluvalo lwaJosef olwa ti kuJosua: “Omolwashike we tu pe ashike oshitopolwa shimwe shevi, shi ninge eliko lyetu? Otu li oyendji, oshoka Omuwa okwe tu yambeka.”
15 Josua okwa yamukula: “Ngele ne oyendji nevi lyokoondundu dhaEfraim eshona nane, nena indeni momakuti, mu ki ikokolele omapya mevi lyAaperisi nolyAarafa,”
16 Oyo ya yamukula: “Evi lyokoondundu inali tu gwanena, ihe Aakaanana ya kala momalushandja, oye na omatembakwiita giiyela, ayehe mboka ye li muBetshan nomikunda dhasho naamboka ye li molusilu lwaJesreel.”
17 Josua okwa ti kezimo lyaEfraim nolyaManasse: “Eeno shili, ne oyendji, ne aanankondo wo unene. Ne otamu pumbwa evi enene li vule oshitopolwa shimwe.
18 Evi lyokoondundu olyeni. Nonando olyo okuti, li kokoleni, li ninge lyeni, sigo okooha dhalyo. Kombinga yAakaanana, ya tidhii po, nando oye na omatembakwiita giiyela yo aanankondo.”
1 Konima yokusinda evi, oshigwana ashihe shaIsrael osha gongala muShilo e tashi dhiki etsalihangano lyOmuwa.
2 Okwa li kwa hupa omazimo gaheyali goshigwana shaIsrael, ngoka ga li inaaga pewa natango iitopolwa yago yevi.
3 Ano Josua okwa ti kAaisraeli: “Sigo uunake tamu ka tegelela, manga inaamu ka kwata po evi ndyoka mwa pewa kOmuwa, Kalunga koohokulu?
4 Mezimo kehe namu ze aalumentu yatatu, otandi ke ya tuma nevi alihe, ye li koneke mpoka ya hala okupewa omaliko gawo. Konima nge ye shi ningi, naye ye kungame.
5 Evi nali topolwe miitopolwa iheyali. Juda na kale moshitopolwa she kuumbugantu ngaashika wo Josef mushe kuumbangalantu.
6 Nyoleni ehokololo lyiitopolwa mbika iheyali, mu li etele ndje. Nena otandi ke mu umbila oshihogololitho koshipala shOmuwa Kalunga ketu.
7 Ihe Aalevi itaa ka pewa oshitopolwa shevi mokati keni, oshoka uuyambi wOmuwa owo oshitopolwa shawo. Nokuli ezimo lyaGad nolyaRuben netatazimo lyaManasse oga pewa nale kuMoses, omumati gwaKalunga, evi kuuzilo waJordan.”
8 Aalumentu oya yi nondjila yawo e taa thaneke evi membo, ngaashi Josua e ya lombwele a ti: “Endeni evi alihe noku li thaneka membo e tamu galukile kungame. Nena otandi mu umbile oshihogololitho koshipala shOmuwa muka muShilo.”
9 Osho aalumentu ya yi noye ende evi alihe nokuthaneka membo, nkene tali topolwa miitopolwa iheyali niilando ayihe yalyo. Opo ihe oya galukile kuJosua pontanda yaShilo.
10 Josua okwe ya umbile oshihogololitho koshipala shOmuwa muShilo nokwa topolele oshihupe shomazimo gaIsrael evi.
11 Omaludhi gomezimo lyaBenjamin oge ya tango molufo. Oshitopolwa shago oshi li pokati kezimo lyaJuda nolyaJosef.
12 Kuumbangalantu ongamba yasho otayi tameke puJordan e tayi londo tayi uka koshikulundundu kuumbangalantu waJeriko nolwokuuninginino ya taakana evi lyokoondundu, sigo okombuga yaBetaven.
13 Okuza nkoka ongamba otayi uka koshikulundundu kuumbugantu waLus (ohashi ithanwa wo Betel), nena otayi kulukile kuAtarot Addar, kondundu kuumbugantu waBethoron shopohi.
14 Opo ihe ongamba tayi goyokele kuumbugantu okuza kesilukila lyokuuninginino wondundu yaBethoron tayi uka kuKirjat Baal (kokutya Kiriat Jearim), shoka oshezimo lyaJuda. Ndjika oyo ongamba yokuuninginino.
15 Ongamba yokuumbugantu otayi tameke kooha dhaKiriat Jearim nokuuka koothithiya dhaNeftoak.
16 Okuza nkoka otayi kulukile ponyonga yondundu ndjoka ya taalela kolusilu lwaGeben Hinnom kombinga yokuumbangalantu wolusilu lwaRefaim. Opo ihe otayi lambalala olusilu lwaGeben Hinnom kombinga yuumbugantu woshikulundundu shAayebusi nokuuka lwokuEnrogel.
17 Okuza nkoka otayi goyokele lwokuumbangalantu kuEnshemesh nokuGelilot sha taalela omulondo gwaAdummim. Opo ihe ongamba otayi silukile kemanya lyaBohan (omuna gwaRuben)
18 nokupitilila oshikulundundu sha taalela Bet Arab kombinga yuumbangalantu nokusilukila kuBet Arab.
19 Nena ongamba otayi ende kombinga yuumbangalantu woshikulundundu shaBet Hogla e tayi hulile muumbangalantu wEfuta lya sa mpoka Jordan tagu yi mulyo.
20 Jordan ogwo ongamba yokuuzilo. Ndhika odho oongamba dhevi ndyoka lya gandjwa, li ninge eliko lyomaludhi gomezimo lyaBenjamin.
21 Iilando yomaludhi gomezimo lyaBenjamin oyo mbika: Jeriko, Bet Hogla, Emek Keziz,
22 Bet Araba, Semaraim, Betel,
23 Avvim, Para, Ofra,
24 Kefar Ammon, Ofni naGeba: iilando omulongo niiyali pamwe nomikunda dhayo.
25 Okwa li wo Gibeon, Rama, Beerot,
26 Mispe, Kefira, Moza,
27 Rekem, Jirpeel, Tarala,
28 Zela, Elef, Jebus (kokutya Jerusalem), Gibea naKiriat Jearim: iilando omulongo niine nomikunda dhayo. Ndika olyo evi lya gandjwa, li ninge eliko lyomaludhi gomezimo lyaBenjamin.
1 Egandjo etiyali olya ningilwa omaludhi gomezimo lyaSimeon. Oshitopolwa shago osha li sha taandela, sigo omokati kevi lya pewa ezimo lyaJuda.
2 Osha kwatelele mo Beersheba, Sheba, Molada,
3 Hazar Shual, Baala, Ezem,
4 Eltolad, Betul, Horma,
5 Ziklag, Bet Markabot, Hazar Susa,
6 Bet Lebaot naSharuhen: iilando omulongo niitatu nomikunda dhayo.
7 Okwa li wo Ain, Rimmon, Eter naAshan: iilando ine nomikunda dhayo.
8 Shika osha kwatele mo omikunda adhihe momidhingoloko dhiilando mbika, sigo oBaalat Beer (kokutya Rama) shokuumbugantu. Ndika olyo evi lya gandjwa, li ninge eliko lyomaludhi gomezimo lyaSimeon.
9 Oshoka oshitopolwa shaJuda osha li oshinene kuyo, ombinga yoshitopolwa shawo oya pewa ezimo lyaSimeon.
10 Egandjo etitatu olya ningilwa omaludhi gomezimo lyaSebulon. Evi ndyoka ga taamba olya adha sigo oSarid.
11 Okuza nkoka ongamba oyu uka kuuninginino kuMarala nokuguma kuDabbeshet nokokalonga kuuzilo waJokneam.
12 Kombinga onkwawo yaSarid tayi uka kuuzilo kongamba yaKislot Tabor, nena okuDaberat e tayi londo kuJafia.
13 Okuza nkoka otayi tsikile kuuzilo kuGat Hefer naEt Kazin nokugoyokela lwokuNea mondjila yokuuka kuRimmon.
14 Kuumbangalantu ongamba otayi goyokele lwokuHannaton nokuhulila molusilu lwaIftahel.
15 Evi lyawo olya kwatelele mo Kattat, Nahalal, Shimron, Jidala naBetlehem: iilando omulongo niiyali nomikunda dhayo.
16 Iilando mbika nomikunda dhayo oya li mevi ndyoka lya gandjwa, li ninge eliko lyomaludhi gomezimo lyaSebulon.
17 Egandjo etine olya ningilwa omaludhi gomezimo lyaIssaskar.
18 Oshitopolwa shago osha kwatelele mo Jesreel, Kesullot, Shunem,
19 Hafarajim, Shion, Anahara,
20 Rabbit, Kishion, Ebez,
21 Remet, En-gannim, En Hadda naBet Pazzez.
22 Ongamba oya guma kuTabor, Shahazuma naBet Shemesh e tayi hulile muJordan. Otayi kwatelele mo iilando omulongo niihamano nomikunda momidhingoloko dhayo.
23 Iilando mbika nomikunda dhayo oya li mevi ndyoka lya ningi eliko lyomaludhi gomezimo lyaIssaskar.
24 Egandjo etitano olya ningilwa omaludhi gomezimo lyaAser.
25 Oshitopolwa shago otashi kwatelele mo Helkat, Hali, Beten, Aksaf,
26 Alammelek, Amad naMishal. Kuuninginino ongamba oya guma kuKarmel naShihor Libnat.
27 Okuza nkoka otayi goyokele lwokuuzilo, tayi adha kuBet Dagon, tayi gumu kuSebulon nokolusilu lwaIftahel e tayi uka kuBet Emek naNegiel kuumbangalantu. Otayi tsikile yu uka kuumbangalantu kuKabul,
28 Ebron, Rehob, Hammon naKana nosigo oSidoni.
29 Opo ihe ongamba otayi goyokele kuRama nokwaadha oshilandohote Tiro; nena otayi goyokele kuHosa nokuhulila mEfuta lyopokati. Otayi kwatelele mo Mahalab, Aksib,
30 Umma, Afek naRehob: iilando omilongo mbali niiyali nomikunda dhayo.
31 Iilando mbika nomikunda dhayo oya li mevi ndyoka lya gandjwa, li ninge eliko lyomaludhi gomezimo lyaAser.
32 Egandjo etihamano olya ningilwa omaludhi gomezimo lyaNaftali.
33 Ongamba yago otayi zi kuHelef yu uka komwandi gwokuZaanannim, kuAdaminekeb, kuJamnia nokuLakhum, sigo tayi hulile muJordan.
34 Okuza nkoka ongamba otayi goyokele lwokuuninginino kuAsnot Tabor nokuHukkok nokuguma kuSebulon kuumbangalantu, kuAser kuuninginino nokuJordan kuuzilo.
35 Iilandohote oya li Ziddim, Zer, Hammat, Rakkat, Kinneret,
36 Adama, Rama, Hazor,
37 Kedesh, Edrei, Enhazor,
38 Jiron, Migdalel, Horam, Betanat naBet Shemesh: iilando omulongo nomugoyi nomikunda dhayo.
39 Iilando mbika nomikunda dhayo oya li mevi ndyoka lya ningi eliko lyomaludhi gomezimo lyaNaftali.
40 Egandjo etiheyali olya ningilwa omaludhi gomezimo lyaDan.
41 Oshitopolwa shago otashi kwatelele mo Soar, Eshtaol, Ir-Shemesh,
42 Shaalbim, Ajalon, Jitla,
43 Elon, Timna, Ekron,
44 Elteke, Gibbeton, Baalat,
45 Jehud, Beneberak, Gatrimmon,
46 Mejarkon naRakkon, osho wo omudhingoloko gwaJoppa.
47 Ihe Aadan sho ya kanitha evi lyawo, oya yi kuLaish e taye shi ponokele. Oye shi kwata po e taa dhipaga aantu yasho e taye shi ningi shawo yene. Oya tula mo noya lundulula edhina lyasho Lajish e tali ningi Dan, ye shi lukile hekulu Dan.
48 Iilando mbika nomikunda dhayo oya li mevi lya gandjwa, li ninge eliko lyomaludhi gomezimo lyaDan.
49 Aaisraeli sho ya mana okutopola evi, oya pe Josua yaNun oshitopolwa, shi ninge she mwene.
50 Palombwelo lyOmuwa oye mu pe oshilando shoka a pula: Timnat Sera kevi lyokoondundu dhaEfraim. Okwa tungulula oshilando nokwa tula mo.
51 Omuyambi Eleasar, Josua yaNun naawiliki yomaludhi gomomazimo gaIsrael oya topola iitopolwa mbika nokuumba oshihogololitho koshipala shOmuwa posheelo shetsalihangano muShilo. Osho ngaaka oya mana okutopola evi.
1 Nena Omuwa okwa lombwele Josua ta ti:
2 “Lombwela Aaisraeli u tye: ‘Ihogololeleni iilando yokwiigamena, ngaashi nda popi naMoses, e mu lombwele.
3 Omuntu ngoka a dhipaga mukwawo hanowina, ota vulu okuya mo, a holame ngoka a hala oku mu shunina uuwinayi.
4 Ota vulu okutondokela mushimwe shomiilando mbika e ta yi kehala lyepangulo posheelo shoshilando, a fatululile aawiliki sho a ningi. Nena otaye mu fala moshilando e taye mu pe eha lyokukala mo, opo a kale puyo.
5 Ngele ota landulwa kungoka a hala oku mu dhipagela eyono lye, kaye na oku mu gandja miikaha ye. Naye mu gamene, oshoka ina dhipaga omuntu owina ye ke mu tonde shito.
6 Omudhipagi na kale moshilando shoka, sigo a pangulwa montaneho yaayehe nosigo okeso lyomuyambimukuluntu ngoka ta adhika pethimbo ndyoka. Nena omulumentu ota vulu okushuna koshilando shaandjawo, nkoka a zile ontuku.’ ”
7 Onkee kuuninginino waJordan oya hogolola Kedesh muGalilea, mevi lyokoondundu dhaNaftali, Shekem mevi lyokoondundu dhaEfraim naHebron mevi lyokoondundu dhaJuda.
8 Kuuzilo waJordan, metumbalalovi lyombuga kuuzilo waJeriko, oya hogolola Bezer moshitopolwa shaRuben, Ramot Gilead moshitopolwa shaGad naGolan muBaasha moshitopolwa shaManasse.
9 Mbika oyo iilando yokwiigamena ya hogololelwa Aaisraeli ayehe naakwiilongo ayehe ya kala mokati kawo. Kehe ngoka a dhipaga omuntu hanowina, ota vulu okwiimonena egameno muyo komuntu ngoka a hala oku mu dhipagela eyono lye. Ina wapa okudhipagwa, manga inaa pangulwa tango montaneho yaayehe.
1 Aawiliki yomaludhi gAalevi oya yi komuyambi Eleasar, kuJosua yaNun nokaawiliki yomaludhi gomazimo agehe gaIsrael.
2 MuShilo mevi lyaKaanan oye ya lombwele: “Omuwa okwa lombwelele Moses, tu pewe iilando yokukala mo, osho wo omaunapelo giimuna yetu momidhingoloko dhayo.”
3 Onkee palombwelo lyOmuwa Aaisraeli oya kutha miitopolwa yawo yene iilando yimwe nomaunapelo e taye yi pe Aalevi.
4 Omagumbo gomoludhi lwaKohat mezimo lyaLevi oga pewa tango iilando. Omaludhi ngoka ga za momuyambi Aaron, oga pewa iilando omulongo niitatu moshitopolwa shaJuda, shaSimeon noshaBenjamin.
5 Oshihupe sholudhi lwaKohat osha pewa iilando omulongo moshitopolwa shaEfraim, shaDan noshaManasse kuuninginino.
6 Oludhi lwaGerson olwa pewa iilando omulongo niitatu moshitopolwa shaIssaskar, shaAser, shaNaftali noshaManasse kuuzilo.
7 Omagumbo gomoludhi lwaMerari oga pewa iilando omulongo niiyali moshitopolwa shaRuben, shaGad noshaSebulon.
8 Paumbo lyoshihogololitho Aaisraeli oya pe Aalevi iilando mbika niinapelo yayo, ngashi Omuwa a li a lombwele Moses.
9 Mpaka otapa landula omadhina giilando yomoshitopolwa shaJuda noshaSimeon, mbyoka ya pewa
10 oludhi lwaKohat moluvalo lwAaron lwomezimo lyaLevi. Egandjo ndika olya ningwa tango.
11 Okwa pewa oshilando shaArba (Arba oye he yaAnak), shoka shi ithanwa ngashingeyi Hebron, mevi lyokoondundu dhaJuda, pamwe nomaunapelo momudhingoloko gwasho.
12 Ihe omapya goshilando nomikunda dhasho oga li ga pewa Kaleb kaJefunne, ga kale eliko lye.
13 Kakele kaHebron (oshilando shimwe shokwiigamena), iilando tayi tumbulwa mpaka, oya pewa oluvalo lwomuyambi Aaron: Libna,
14 Jattir, Eshtemoa,
15 Holon, Debir,
16 Ain, Jutta naBet Shemesh pamwe nomaunapelo gayo: iilando omugoyi yomezimo lyaJuda nolyaSimeon.
17 Moshitopolwa shaBenjamin oya pewa iilando ine: Gibeon, Geba,
18 Anatot naAlemet pamwe nomaulithilo gayo.
19 Ayihe kumwe iilando omulongo niitatu pamwe nomaulithilo gayo oya pewa aayambi yomoluvalo lwAaron.
20 Omagumbo galwe gAalevi moludhi lwaKohat oga pewa iilando yimwe moshitopolwa shaEfraim.
21 Oga pewa iilando ine: Shekem nuunapelo washo mevi lyokoondundu dhaEfraim (oshilando shimwe shokwiigamena), Geser,
22 Kibzajim naBethoron nomaunapelo gayo.
23 Moshitopolwa shaDan oga pewa iilando ine: Elteke, Gibbeton,
24 Ajalon naGatrimmon pamwe nomaunapelo gayo.
25 Moshitopolwa shaManasse kuuninginino oga pewa iilando iyali: Taanak naGatrimmon nomaunapelo gayo.
26 Omagumbo ngaka gomoludhi lwaKohat oga taamba iilando omulongo ayihe kumwe pamwe niinapelo yayo.
27 Ongundu yimwe yAalevi, oludhi lwaGerson, oya pewa moshitopolwa shaManasse kuuzilo iilando iyali: Golan muBaasha (oshilando shimwe shokwiigamena) naAshtarot niinapelo yayo.
28 Moshitopolwa shaIssaskar oya pewa iilando ine: Kishion, Daberat,
29 Jarmut naEn-gannim niinapelo yayo.
30 Moshitopolwa shaAser oya pewa iilando ine: Mishal, Abdon,
31 Helkat naRehob nomaulithilo gayo.
32 Moshitopolwa shaNaftali oya pewa iilando itatu: Kedesh muGalilea nomaunapelo gasho (oshilando shimwe shokwiigamena), Hammot Dor naKartan niinapelo yayo.
33 Omagumbo gomoludhi lwaGerson oga pewa iilando omulongo niitatu ayihe kumwe niinapelo yayo.
34 Oshihupe shAalevi, oludhi lwaMerari, osha pewa moshitopolwa shaSebulon iilando ine: Jokneam, Karta,
35 Dimna naNahalal niinapelo yayo.
36 Moshitopolwa shaRuben osha pewa iilando ine: Bezer, Jahas,
37 Kedemot naMefaat niinapelo yayo.
38 Mezimo lyaGad osha pewa iilando ine: Ramot Gilead noshinapelo shasho (oshilando shimwe shokwiigamena), Mahanaim,
39 Heshbon naJaser niinapelo yayo.
40 Onkee oludhi lwaMerari olwa pewa ayihe kumwe iilando omulongo niiyali.
41 Kevi ndyoka Aaisraeli ye li likola, iilando ayihe kumwe omilongo ne niihetatu pamwe niinapelo momidhingoloko dhayo oya pewa Aalevi.
42
43 Osho Omuwa a pe Israel evi alihe ndyoka e li uvanekele oohekulu nokugana, e li ya pe. Sho ya mana oku li kwata po, oya tula mo.
44 Omuwa okwe ya kaleke mo nombili mevi alihe, naanaa ngaashi a adhika u uvanekele oohekulu. Kapwa li nando ogumwe maatondi yawo a vulu oku yi itakeka, oshoka Omuwa okwa pe Aaisraeli esindano okusinda aatondi yawo ayehe.
45 Omuwa okwa dhiginine euvaneko lye kehe a li u uvanekele oshigwana shaIsrael.
1 Nena Josua okwi ithana, aantu yomezimo lyaRuben, lyaGad netatazimo lyaManasse ya gongale.
2 Oye a ti kuyo: “Ne omwa tsakanitha ashihe shoka omumati gwOmuwa Moses e mu lombwele, mu shi ninge, nomwa vulika komalombwelo gandje agehe.
3 Ethimbo ndika alihe inamu ethela Aaisraeli yakweni. Ne omwa kala mwa dhiginina omalombwelo agehe gOmuwa Kalunga keni.
4 Ngashingeyi Omuwa Kalunga keni okwa kaleke yakweni nombili, ngaashi u uvaneke. Shuneni kaandjeni kevi ndyoka mwe li pewa komumati gwOmuwa Moses kuuzilo waJordan, li ninge lyeni.
5 Dhiginineni nawa ompango ndjoka Moses e mu lombwele: holeni Omuwa Kalunga keni, gwanitheni ehalo lye, vulikeni komalombwelo ge, gameni kuye, ne mu mu longele nomutima aguhe nomwenyo aguhe.”
6 Josua okwe ya shunitha kaandjawo nomayambeko nokwe ya lombwele: “Otamu shuna kaandjeni aayamba mu na iigunda yiimuna, iisiliveli, iingoli, iikushu, iiyela noonguwo odhindji. Topolelathaneni naanezimo yakweni mbyoka mwa yugu aatondi yeni.” Noya shuna ihe kaandjawo. Moses okwa adhika a pe etatazimo lyaManasse evi kuuzilo waJordan, ihe etata ekwawo olya li lya pewa evi kuuninginino waJordan pamwe nomazimo omakwawo.
7
8
9 Onkee Aareuben, Aagad nAamanasse kuuzilo oya shuna komagumbo. Oya thigi po oshihupe shAaisraeli muShilo mevi lyaKaanan noya yi kevi lyawo, evi lyaGilead, ndyoka ya taamba, ngaashi Omuwa a li a lombwele Moses.
10 Ezimo lyaRuben, lyaGad nolyaManasse kuuzilo sho ga thiki kuGelilot pomulonga Jordan, oga tungile ko oshiyambelo oshinene.
11 Oshihupe shAaisraeli osha kundana kutya Aareuben, Aagad nAamanasse kuuzilo oya tungu oshiyambelo puGelilot kombinga yahandika yaJordan.
12 Aaisraeli sho ye shi uvu, egongalo alihe lyAaisraeli olya gongala muShilo, ya ye kiita okukondjitha omazimo gokuuzilo.
13 Nena Aaisraeli oya tumu ko Pinehas, omwana gwomuyambi Eleasar, kAareuben, Aagad nAamanasse kuuzilo kevi lyaGilead.
14 Aawiliki omulongo oya yi pamwe naPinehas; mezimo kehe kuuninginino omwa zi omuwiliki gumwe, omukuluntu gwegumbo lyontumba lyomomaludhi.
15 Oye ya kevi lyaGilead kAareuben, Aagad nAamanasse kuuzilo
16 noye ya lombwele ya ti: “Omolwashike mwa ningi uuwinayi u thike mpono okuyona kuKalunga kaIsrael? Omwa tukulile Omuwa oshipotha, sho mwi itungile oshiyambelo shika! Nani ne itamu mu landula we?
17 Dhimbulukweni epogo lyetu puPeor, Omuwa sho a geelele oshigwana she nuuvu welega. Natango otatu ehamekwa kusho. Nani epogo ndyono inali gwana?
18 Otamu ka tinda oku mu landula natango? Ngele otamu tukulile Omuwa oshipotha ngashingeyi, ota ka geela kehe omuntu muIsrael.
19 Ngashingeyi nduno, ngele evi lyeni inali gwanena esimaneko, ileni kevi lyOmuwa, nkuka ku na etsalihangano. Indileni evi mokati ketu, ihe inamu tukulila Omuwa oshipotha ne inamu tu tukulila oshipotha, sho tamu itungile oshiyambelo shi ili shaa shi shoka shOmuwa Kalunga ketu.
20 Dhimbulukweni Ashan yaSera nkene a tindi okuvulika kelombwelo tali keelele iinima ya tokolelwa okuyonagulwapo; egongalo alihe lyaIsrael olye shi geelelwa. Ashan haye awike ngoka a si molweyono lye.”
21 Aareuben, Aagad nAamanasse kuuzilo oya yamukula aakuluntu yomagumbo gomomazimo gokuuninginino:
22 “Kalunga Omupangelinkondoawike! Oye Omuwa! Kalunga Omupangelinkondoawike! Oye Omuwa! Oye a tseya nokutya omolwashike twa ningi shika, tse notwa hala, nane wo mu shi tseye! Ngele otwe shi ningile oshipotha noinatu dhiginina okulandula Omuwa, nena ino tu pitika we okukala nomwenyo!
23 Ngele otwa tungu oshiyambelo mokwaavulika kOmuwa, tu lungunithile ko omidhidhindjambo nenge iikulyandjambo nenge tu ete po omakwatathanondjambo, nena Omuwa mwene ne tu geele.
24 Aawe! Otwe shi ningi ashike, oshoka otwa li twa tila nokutya konakuyiwa omaluvalo geni otaga vulu okulombwela ngoka getu: ‘Ne omu na shike nOmuwa, Kalunga kaIsrael?
25 Jordan okwe gu ningi ongamba pokati ketu nane Aareuben nAagad. Ne kamu na sha nOmuwa.’ Nena omaluvalo geni otaga vulu okukeelela omaluvalo getu, gaa galikane we Omuwa.
26 Onkee otwa tungu oshiyambelo, hakufikila ko omidhidhindjambo nenge oondjambo,
27 ihe okukala endhindhiliko pokati ketu nane, osho wo pokati komapipi ngoka tage tu landula, nokutya tse otwa hala shili okusimaneka Omuwa petsalihangano lye nomidhidhindjambo, oontselelandjambo nomakwatathanondjambo. Shika otashi keelele omaluvalo geni, gaa lombwele ngoka getu: ‘Ne kamu na sha nOmuwa.’
28 Otwa dhiladhila, ngele shika tashi ka ningwa, nena omaluvalo getu otaga vulu okutya: ‘Taleni koshiyelekela shoshiyambelo shOmuwa sha tungwa kootatekulu. Kashi shi shokufikila omidhidhindjambo nenge oontselelandjambo, ihe osho endhindhiliko pokati ketu nane.’
29 Tse inatu hala okutukulila Omuwa oshipotha nenge tu mu iteke ngashingeyi noku mu tungila oshiyambelo shi ili shomidhidhindjambo, shiikulyandjambo nenge shoontselelandjambo, kakele kaashoka shi li komeho getsalihangano.”
30 Omuyambi Pinehas naawiliki omulongo yoshigwana, ano aakuluntu yomagumbo gomomazimo gokuuninginino mboka ya li pamwe naye, oyu uvu ko shoka Aareuben, Aagad nAamanasse kuuzilo ya ti noya ngungumana.
31 Pinehas, omuna gwomuyambi Eleasar, okwa ti kuyo: “Nena otu shi shi kutya Omuwa oku li pamwe natse. Ne inamu mu tukulila nando oshipotha, onkee omwa hupitha Aaisraeli kondjahi yOmuwa.”
32 Nena Pinehas naawiliki oya laleke Aareuben nAagad muGilead e taa shuna kuKaanan kAaisraeli noye ya tseyithile ashihe.
33 Aaisraeli oya ngungumana noya hambelele Kalunga. Inaa dhiladhila we oku ka hinga iita, ya vunyagule po evi moka mwa tula Aareuben nAagad.
34 Aareuben nAagad oya ti: “Oshiyambelo shika osho onzapo kutseni atuheni kutya Omuwa oye Kalunga.” Noye shi luku “Onzapo”.
1 Konima yethimbo ele okuza mpoka Omuwa sho a kalekele Aaisraeli nombili mokati kaatondi yawo, Josua, ngoka a li muukulupe uunene,
2 okwi ithana Aaisraeli ayehe, aakuluntu, aawiliki, aatokolihapu naambala yoshigwana nokwa ti kuyo: “Ngame onda kulupa ngashingeyi.
3 Omwa mono iinima ayihe Omuwa Kalunga keni e yi ningile iigwana mbika omolweni. Omuwa Kalunga keni okwe mu kondjele.
4 Ngame onda gandja komazimo geni evi lyiigwana ayihe mbyoka ya hupu po natango, li ninge eliko lyeni, ngashika wo evi lyiigwana ayihe mbyoka nda sindi okuza komulonga Jordan kuuzilo, sigo Efuta lyopokati kuuninginino.
5 Omuwa Kalunga keni ote ya gamuna kune note ya tidha po mokuhuma ko kweni. Otamu ka kwata po evi lyawo, ngaashi Omuwa e li mu uvanekele.
6 Kotokeni ano, mu vulike kwaayihe mbyoka ya nyolwa membo lyompango yaMoses. Inamu hunutha po nando okantoko kamwe kayo,
7 mwaa kwatathane naantu mbaka ye li mokati keni nenge mu ithane iikalunga yawo nokugana komadhina gayo nenge okusimaneka iikalunga mbyoka nokwiinyongamena kuyo.
8 Gameni kOmuwa, ngaashi mwa kala sigo onena.
9 Omuwa okwa tidha po iigwana iinene niinankondo, ngaashi mwa humu ko nokapwa li shimwe sha vulu oku mu itakeka.
10 Kehe ngoka gwomune ota vulu okukukumitha aalumentu eyuvi, oshoka Omuwa Kalunga keni ote mu kondjele, ngaashi u uvaneke.
11 Kotokeni ano, mu kale mu hole Omuwa Kalunga keni.
12 Ihe ngele tamu ningi aahethi e tamu vundakana niigwana mbika ya hupile mokati keni e tamu hokanathana nayo,
13 nena kaleni mu shi shi kutya Omuwa ite ke mu tidhila po we iigwana mbika mokuhuma ko kweni. Nena otayi ka ninga emakelo, elulo nekelo lyeni, ongaashi ongola tayi tapata moombunda dheni nenge uuyagaya momeho geni, sigo mwa hulu po amuhe mevi ndika ewanawa Omuwa Kalunga keni e li mu pe.
14 “Ngashingeyi etembu lyandje olya hedha popepi. Kehe gumwe gwomune oku shi shi momutima gwe nomomwenyo gwe kutya Omuwa Kalunga keni okwe mu pe iinima ayihe iiwanawa mbyoka e yi mu uvanekele. Okwa gwanitha euvaneko kehe e li uvaneke; kape na nando olimwe lya gwile pohi.
15 Ihe ngaashi a dhiginine euvaneko kehe ndyoka e li mu uvanekele, osho wo ta ka tsakanitha iihuna ayihe,
16 ngele itamu dhiginine ehangano ndyoka Omuwa Kalunga keni e mu uthile, mu li dhiginine. Nongele tamu longele iikalunga noku yi simaneka, nena ote mu geele muupyundjahi we, nanziya itapu hupu nando ogumwe mevi ndika ewanawa e li mu pe.”
1 Josua okwa gongele omazimo agehe gaIsrael puShekem. Okwi ithana aakuluntu, aawiliki, aatokolihapu naambala yaIsrael, oyo noya holoka miipathi yaKalunga.
2 Josua okwa ti koshigwana ashihe: “Omuwa Kalunga kaIsrael ota ti: ‘Nalenale oohokulu oya li ya kala handiyaka yomulonga Eufrat noya simaneke iikalunga. Gumwe gwawo oTera, he yaAbraham naNahor.
3 Nena onda kutha hokulu Abraham handiyaka yaEufrat nonde mu enditha a taakana evi alihe lyaKaanan. Onde mu pe oluvalo olwindji. Onde mu pe Isak,
4 naIsak onde mu pe Jakob naEsau. Esau onde mu pe evi lyokoondundu dhaEdom, li ninge eliko lye, ihe hokulu Jakob noyana oya yi kuEgipiti.
5 Konale onda ka tuma Moses nAaron nonda tumine Egipiti uudhigu uunene. Ihe onde mu tembudha mo.
6 Onda tembudha oohokulu muEgipiti, nAayegipiti oye ya landula nomatembakwiita naakawilinkambe. Ihe oohokulu sho ye ya pEfuta etiligane,
7 oya kugile ndje onkugo, ndi ya kwathe, nonda tula omilema pokati kawo nAayegipiti. Onda wayulile Aayegipiti efuta nonde ya li omeya. Omu shi shi shoka nda ningile Aayegipiti. “ ‘Omwa kala mombuga ethimbo ele.
8 Nena onde mu eta mevi lyAayamori, mboka ya kala kuuzilo waJordan. Oye mu kondjitha, ihe onde ye mu sinditha. Omwa kutha po evi lyawo, nonde ya yonagula po komeho geni.
9 Nena omukwaniilwa gwaMoab, Balak yaZippor, okwe mu kondjitha. Okwa tumu elaka kuBileam yaBeor, e mu thinge.
10 Ihe ngame inandi pulakena nando Bileam, onkee okwe mu yambeke, nonde mu yululula kuBalak.
11 Omwa tokola Jordan nomwe ya kuJeriko. Aalumentu yaJeriko oye mu kondjitha, ngashika wo Aayamori, Aaperesi, Aakaanana, Aaheti, Aagirgashi, Aahevi nAayebusi. Ihe onde ye mu sinditha ayehe.
12 Onda tumu omambonzi ge mu tetekele noga tidha po aakwaniilwa mbeyaka yaali Aayamori. Shika inashi ningwa komagongamwele geni nokomatati geni.
13 Onde mu pe evi ndyoka inaamu li kokola, niilando mbyoka inaamu yi tunga. Ngashingeyi omo mu li tamu li omandjembele gomiviinu ndhoka inaamu dhi tsika, nomu na ooholivi dhomiti inaamu dhi kuna.’ ”
14 Josua okwa tsikile: “Ngashingeyi nduno simanekeni Omuwa noku mu longela mevuliko nomuudhiginini. Mangulukeni kiikalunga mbyoka oohokulu ye yi simaneke muMesopotamia nomuEgipiti, mu longele Omuwa awike.
15 Ngele inamu hala okulongela Omuwa, tokoleni nena ndjika ngoka tamu longele; ongele iikalunga yoohokulu yomuMesopotamia nenge mbyoka yAayamori mboka mwa kala mevi lyawo. Ihe ngame negumbo lyandje, tse otatu longele Omuwa.”
16 Oshigwana osha yamukula: “Katu na mpoka tatu etha Omuwa, tse tu longele iikalunga.
17 Omuwa Kalunga ketu okwa tembudha ootate natse muupika womuEgipiti, otse notwa mono iinyengandunge mbyoka a ningi. Oye e tu gamene shaa mpoka twa yi mokati kiigwana ayihe mbyoka twa pitilile.
18 Sho twe ya mevi ndika, Omuwa okwa tidha po Aayamori ayehe ya kala mpaka. Onkee natse wo otatu longele Omuwa, oshoka oye Kalunga ketu.”
19 Josua okwa ti koshigwana: “Ihe itamu vulu okulongela Omuwa, oye Kalunga omuyapuki noita dhimi po oondjo dheni. Ita vulu okwiidhidhimikila ookalunga yalwe,
20 nongele tamu mu etha, mu longele iikalunga yiigwana mbyoka, nena ote mu pilukile e te mu geele. Ote mu thekeke po, nonando okwa li nale omwaanawa kune.”
21 Oshigwana osha ti kuJosua: “Aawe! Otatu longele Omuwa.”
22 Josua okwa ti kuyo: “One oonzapo kune yene moshinima shika, sho mwa hogolola okulongela Omuwa.” Oya yamukula ya ti: “Eeno, osho tu li.”
23 Okwa ti: “Etheni nduno iikalunga yiigwana mbyoka, ne mu igandje mevuliko kOmuwa, Kalunga kaIsrael.”
24 Oshigwana osha yamukula Josua: “Tse otatu longele Omuwa Kalunga ketu. Otatu vulika kiipango ye.”
25 Onkee esiku ndyoka Josua okwa ningi ehangano noshigwana nokwe ya pele muShekem iipango nomautho, ye ga landule.
26 Josua okwa nyola iipango mbika membo lyompango yaKalunga. Nena okwa kutha emanya enene e te li dhike momwandi gwopuuyapuki wOmuwa.
27 Okwa ti koshigwana ashihe: “Emanya ndika otali kala onzapo yetu. Olyu uvu oohapu adhihe ndhoka Omuwa e dhi tu lombwele. Olyo onzapo yoku mu pangula, ngele otamu tukulile Kalunga keni oshipotha.”
28 Nena Josua okwa laleke oshigwana, noya shuna kehe gumwe koshitopolwa shezimo lye.
29 Konima yaambika omumati gwOmuwa Josua yaNun okwa sile muukulupe wepipi lyomimvo ethele nomulongo.
30 Oye mu fumvike mevi lye mwene puTimnat Sera mevi lyokoondundu dhaEfraim kuumbangalantu wondundu Gaash.
31 Josua manga a li e na omwenyo, oshigwana shaIsrael osha longele Omuwa. Osho sha li pethimbo lyaawiliki ayehe mboka ya li ya mono yo yene shoka Omuwa e shi ningile Israel.
32 Iipongo yaJosef, mbyoka Aaisraeli ye yi etelele okuza nayo kuEgipiti, oye yi fumvike puShekem, meyana ndyoka Jakob e li landele niimaliwa yiisiliveli ethele limwe kaana yaHamor, he yaShekem. Eyana ndika olya ningi eliko lyoluvalo lwaJosef.
33 Eleasar lyAaron okwa mana oondjenda nokwa fumvikwa puGibea, oshilando shomevi lyokoondundu dhaEfraim shoka sha adhika sha pewa omwana Pinehas.