1

¹ Membo muka omu na oohapu ndhoka Moses e dhi lombwele Aaisraeli, manga ye li mombuga kuuzilo waJordan. Oya li mesilu lyaJordan popepi naSuf, pokati komukunda Paran kombinga yimwe nomikunda Tofel, Laban, Hazerot naDi Sahab kombinga onkwawo.

² (Otashi pula omasiku omulongo nalimwe okuza kuSinai nokuya kuKadesh Barnea mondjila yokoondundu dhomoshilongo Seir.)

³ Mesiku lyotango lyomwedhi omutimulongo nagumwe gwomumvo omutimilongone, Aaisraeli sho ya tembuka muEgipiti, Moses okwe ya hokololele ashihe shoka Omuwa e mu lombwele, e ya lombwele.

⁴ Shika osha ningwa Omuwa sho a sindi Sihon, omukwaniilwa gwAayamori, ngoka a li ta pangele moshilando Heshbon, naOg, omukwaniilwa gwaBaasha, ngoka a li ta pangele miilando Ashtarot naEdrei.

⁵ Kuuzilo waJordan moshilongo shaMoab Moses okwa tameke okufatulula oompango nomalongo gOmuwa. Okwa ti:

⁶ “Manga twa li puSinai, Omuwa Kalunga ketu okwe tu lombwele ta ti: ‘Ethimbo ndyoka mwa kala pondundu ndjika, olya gwana.

⁷ Dhilukitheni po oontanda mu hume ko. Indeni koshilongo shokoondundu shAayamori nokomahala agehe ge shi kunduka — sigo esilu lyaJordan, koshilongo shokoondundu, kiikulundundu yoponyonga yadho, koshitopolwa shokuumbugantu nokomunkulofuta. Indeni kevi lyAakaanana nokombanda yoondundu dhaLibanon sigololo omulonga omunene Eufrat.

⁸ Ayihe mbika oyo evi ndyoka ngame Omuwa ndu uvaneke ndi li pe oohokulu Abraham, Isak naJakob nomaluvalo gawo. Indeni mu ke li lale.’ ”

⁹ Moses okwa lombwele aantu a ti: “Manga twa lyeni pondundu Sinai, onde mu lombwele nda tile: ‘Oshimpwiyu shoku mu wilika otashi hepeke ndje unene. Itandi vulu oku shi ihumbatela ongame awike.

¹⁰ Omuwa Kalunga keni okwe mu indjipaleke mu thike poonyothi dhokegulu.

¹¹ Omuwa Kalunga koohokulu ne mu indjipaleke neyuvi ye e mu laleke nuuyamba, ngaashi u uvaneka!

¹² Ihe otandi vulu ngiini ongame awike okuhumbata omutenge gwokuloteka oontamanana dheni?

¹³ Hogololeni aalumentu aanawino, aanandunge naasimani mezimo kehe, notandi ya langeke moku mu tonatela!

¹⁴ Omwa zimina kutya shika osho opala.

¹⁵ Onkee nda kutha aawiliki aanawino naasimani mboka mwa hogolola momazimo geni, nonde ya langeke ye mu tonatele. Yamwe oya ningi aatonateli yaantu eyuvi, yamwe oyethele, yamwe oyomilongo ntano nayamwe oyomulongo. Onda langeke ishewe aakuluntu yalwe momazimo agehe.’

¹⁶ “Pethimbo ndyoka onda londodha aatokolihapu yeni nda ti: ‘Pulakeneni nawa iihokolola mbyoka tayi tukuka maakweni. Iihokolola ayihe yi panguleni pauyuuki, nonando nayi kale yaakweni yomekota nenge yaakwiilongo mboka ya kala mokati keni.

¹⁷ Momatokolo geni inamu kala nando ondhipi; ayehe ya tokoleni pamuthika gumwe, nando naa kale oyo oolye yalye. Inamu tila nando olye, oshoka omatokolo ngoka tamu tokola, oga za kuKalunga. Ngele ope na shoka tashi mu nyenge, shi eteni kungame, notandi ke shi utha.’

¹⁸ Pethimbo tuu ndyoka onde mu lombwelele ashihe shoka mu na oku shi ninga.”

¹⁹ “Otwa gwanitha shoka Omuwa Kalunga ketu e tu lombwele. Otwa thigi po ondundu Sinai e tatu ka taaguluka ombuga ndjoka onene nontilithi mondjila yetu okuya koshilongo shokoondundu shAayamori. Sho twa thiki muKadesh Barnea,

²⁰ onda tile: ‘Otamu yi koshilongo shokoondundu shAayamori, shoka Omuwa Kalunga ketu, Kalunga kootatekulu te shi tu pe. Taleni, osho shiyaka. Indeni mu ke shi lale, ngaashi a tile. Inamu tenguka nenge mu kukuke kuumbanda.’

²¹

²² “Ihe ne omwe ya kungame tamu ti: ‘Tumii ko aalumentu, ya ka ndaadhe evi, opo ye ye ye tu lombwele kutya natu ende ondjila yini niilando mbyoka yi li ko oya tya ngiini.’

²³ “Osha li sho opala okuningwa, onkee nda hogololele aalumentu omulongo nayaali, gumwe mezimo kehe.

²⁴ Oya yi moshilongo shokoondundu sigololo esilu Eshkol e taye li konakona.

²⁵ Sho ya galuka, oye tu etele iiyimati mbyoka ya adhele ko, noya hokolola kutya evi ndyoka Omuwa Kalunga ketu te li tu pe, ewanawa noonkondo.

²⁶ “Ihe ne omwa tsu ondumbo noshipango shOmuwa Kalunga keni, noinamu ya we mevi ndyoka.

²⁷ Ne omwa ngungutulilathana mwa ti: ‘Omuwa oku tu tonde. Okwe tu tembudha muEgipiti, opo e tu gandje miikaha yAayamori mbaka, opo ya wape ye tu dhipage.

²⁸ Otatu yile ko we shike? Tse otwa tila ko. Aantu mboka twe ya tumine ko, oye tu hokololele kutya aantu yaahoka oya kola naaleeleka ye tu vule, noya kala miilando yi na omakuma ga tsa kegulu. Oya mwene ko nokuli aalefule!’

²⁹ “Ihe ngame onda tile: ‘Inamu tila aantu mboka.

³⁰ Omuwa Kalunga keni ote mu enditha, noye te ke mu kondjela, naanaa ngaashi mwe shi mono muEgipiti

³¹ nomombuga. Omwa mono, nkene e mu enditha nawa ondjila ayihe sigo okehala ndika, ngaashi yina ta kwiinine omwana omumati.’

³² Ihe nando ongeyi, ne inamu inekela Omuwa Kalunga keni,

³³ ngoka e mu kwatele komeho, mu mone eha mpoka tamu yungu oontanda. Okwe mu ulukile ondjila te mu tetekelele moshikogo shomulilo uusiku noshomuzile omutenya.”

³⁴ “Omuwa oku uvu omangungutulo geni e ta geye e ta gana ta ti:

³⁵ ‘Kape na nando omuntu gumwe gwomoluvalo nduka oluwinayi ta ka thika mevi ndyoka ewanawa ndu uvaneke oku li pa oohokulu.

³⁶ Kaleb kaJefunne oye awike ta ka ya mo. Okwa li i inekela ndje. Otandi mu pe noluvalo lwe evi ndyoka e ke li ndaadhele.’

³⁷ Molweni Omuwa okwa geele ndje e ta ti: ‘Nangoye wo ito ka thika mo mevi ndyoka.

³⁸ Ihe koleka eutho lyomukwathi gwoye, Josua yaNun. Oye ta ka wilika Israel okulala oshilongo.’

³⁹ “Omuwa okwe tu lombwele aluhe ta ti: ‘Aana yeni mboka aashona nokaye shi manga okuyoolola uuwanawa muuwinayi, oyo taa ka thika mo mevi ndyoka, nando omwa ti, otaa ka kwatwa po kaatondi yeni. Otandi ke ya pa oshilongo, notaye ke shi lala.

⁴⁰ Ihe ne shuneni mu ye kombuga mondjila yu uka kEkololo lyaAkaba.’

⁴¹ “Omwa yamukulile mwa ti: ‘Moses, tse otwa yono kOmuwa. Ihe ngashingeyi tse otatu ka homona, naanaa ngaashi Omuwa Kalunga ketu e tu lombwele.’ Noshaa ngoka gwomune okwa li i ilongekidhila olugodhi nota dhiladhila kutya oshipu okutondokela moshilongo shokoondundu.

⁴² “Ihe Omuwa okwa lombwele ndje a ti: ‘Ya londodha yaa homone, oshoka itandi kala pamwe nayo, naatondi yawo otaye ya sindi.’

⁴³ Onde mu hokololele shoka Omuwa a ti, ihe ne inamu pupa ko. Omwa tsu ondumbo naye, nomuuntsa weni omwa matukile oshilongo shokoondundu.

⁴⁴ Nena Aayamori mboka ya li moondundu, oye ya ye mu kondjithe ya fa ehunga lyoonyushi. Oye mu tidha sigo oHorma e taye mu dhengele moshilongo shokoondundu dhaEdom.

⁴⁵ One nomwa kugile Omuwa onkugo, ihe okwi ipwililike ye ine mu pulakena.”

⁴⁶ “Ano sho twa kala muKadesh ethimbo ele,

2

¹ Ohugunina otwa shuna e tatu yi mombuga twa lambalala ondjila yokEkololo lyaAkaba, ngaashi Omuwa a popi, notwa kala tatu endagula noshilongo shokoondundu dhaEdom.

² “Omuwa okwa lombwele ndje a ti:

³ ‘Omwa kala unene tamu endagula noondundu ndhika; ukeni ihe kuumbangalantu.

⁴ Lombwela aantu to ti: Otamu taakana oshilongo shokoondundu dhaEdom, oshilongo shaakweni, oluvalo lwaEsau. Otaa ke mu tila,

⁵ ihe inamu ya hingila iita, oshoka itandi ke mu pa nando okapambu kevi lyawo ke thike pepandja lyompadhi. Edom onde li pa oluvalo lwaEsau.

⁶ Futeni niimaliwa iikulya nomeya ngoka tamu landa kuyo.’

⁷ “Dhimbulukweni, nkene Omuwa e mu yambeke mwaayihe mwe yi longo. Okwe mu sile oshimpwiyu, sho mwa li tamu endagula nombuga ndjika onene. Okwa kala pamwe nane omimvo adhihe omilongo ne, nomwa kala mu na ayihe mwe yi pumbwa.

⁸ “Otwa humu ko notwe etha ondjila ndjoka ya za kiilando Elat naEziongeber yu uka kEfuta lya sa notwa pungulukile lwokuuzilombangalantu lwokuMoab.

⁹ Omuwa okwa lombwele ndje a ti: ‘Ino piyaganeka Aamoabi, oluvalo lwaLot nenge u ya hingile iita. Onde ya pe oshilando Ar, noitandi mu pe nando oshitopolwa mevi lyawo.’ ”

¹⁰ (Nale muAr omwa li mwa kala Aaemimi, oshigwana oshinene shaalefule naanankondo ngaashi Aayanaki.

¹¹ Pamwe nAayanaki oya li yomoludhi lwAarafa, ihe Aamoabi oye ya luku Aaemimi.

¹² MuEdom nale omwa li Aahori, ihe oluvalo lwaEsau olwe ya tidha mo nokuhanagula po oshigwana shawo e talu tula mo, naanaa ngaashi Aaisraeli ya tidha mo aatondi yawo mevi ndyoka Omuwa e li ya pe.)

¹³ “Otwa taaguluka omulonga Sered, ngaashi Omuwa e tu lombwele tu shi ninge.

¹⁴ Omumvo nguka omutimilongondatu nahetatu, sho twa zi muKadesh Barnea. Aakwiita ayehe yepipi ndyoka oya sa po, ngaashi Omuwa a tile, otaa ka sa po.

¹⁵ Oshikaha shOmuwa oshe ya dhenge, sigo e ya yonagula po ayehe.

¹⁶ “Ayehe sho ya si po,

¹⁷ Omuwa okwe tu lombwele a ti:

¹⁸ ‘Nena otamu ka taakana oshilongo Moab tamu piti muAr.

¹⁹ Otamu ka ya popepi nevi lyAayammoni, oluvalo lwaLot. Inamu ya piyaganeka tuu nenge mu ya hingile iita, oshoka itandi ke mu pa nando oshitopolwa shevi lyawo ndyoka nde ya pele.’ ”

²⁰ (Noshilongo shika wo osha li nale shAarafa, ihe Aayammoni oye ya luku Aasamsumi.

²¹ Oya li aaleeleka ya fa Aayanaki. Oya li mo oyendji naanankondo. Ihe Omuwa okwe ya hanagula po, nAayammoni oya kutha po evi lyawo noya tula mo.

²² Osho Omuwa a ningi wo omolwoluvalo lwaEsau, ndoka lu li koshilongo shokoondundu dhaEdom, sho a hanagula po Aahori. Oya tidha mo Aaedom mevi lyawo noye li lala nomo ye li natango.

²³ Evi lya kunkula nEfuta lyopokati olya kwatwa po kaantu yokontuntu Kreta. Oya hanagula po Aayavvim, aakalimo yamo aakulu, e taa kutha po evi lyawo sigololo okoshilando Gaza kuumbugantu.)

²⁴ “Sho twa taakana Moab, Omuwa okwe tu lombwele ta ti: ‘Thikameni mu tokole omulonga Arnori. Otandi gandja miikaha yoye omukwaniilwa gwAayammon Sihon, ngoka a kala muHeshbon, pamwe noshilongo she. Mu ponokela u lale oshilongo she.

²⁵ Okuza konena otandi ku ningi omutilithi gwuuyuni auhe. Shaa ngoka ota ka kakama kuumbanda, shaa te ku uvu to popiwa.’ ”

²⁶ “Onda tumu aatumwa okuza mombuga Kedemot, ya ye komukwaniilwa gwaHeshbon edhina lye Sihon ye na elaka lyombili tali ti:

²⁷ ‘Tu pitika tu taakane oshilongo shoye. Otatu ende tu ukilila; itatu zi mondjila tu uka kolulyo nenge kolumoho.

²⁸ Otatu landa iikulya nomeya gokunwa. Otwa hala ashike tu pite moshilongo shoye,

²⁹ sigo twa tokola omulonga Jordan tu ye kevi ndyoka Omuwa Kalunga ketu te li tu pe. Oluvalo lwaEsau, ndoka lu li muEdom, nAamoabi, mboka ye li muAr, oye tu zimine tu taakane miilongo yawo.’

³⁰ “Ihe omukwaniilwa gwaHeshbon Sihon ine tu pitika, tu tokole oshilongo she. Omuwa Kalunga keni okwe mu ningi omutangalali nomunandumbo, opo tu mu dhenge nokukutha po oshilongo she, shoka twe shi lala wo tuu shili.

³¹ “Omuwa okwa lombwele ndje a ti: ‘Tala ko, onda tyololokitha omukwaniilwa Sihon noshilongo she; ponokela evi lye, opo u li lale.’

³² Sihon okwe ya naakwiita ye ayehe, e tu kondjithe popepi naJahas,

³³ ihe Omuwa Kalunga ketu okwe mu gandja miikaha yetu, e tatu mu dhipaga pamwe noyana naantu ye ayehe.

³⁴ Pethimbo tuu ndyoka otwa kwata po nokuhanagula po oshilando kehe notwa dhipaga aalumentu, aakiintu naanona. Inatu hupitha nando ogumwe e na omwenyo.

³⁵ Otwa kutha po iimuna notwa yugu iilando.

³⁶ Omuwa Kalunga ketu okwe tu kwatitha po omikunda adhihe okuza kuAroer kooha dhesilu lyaArnon noshilando pokati kesilu, ondjila ayihe sigo oGilead. Kakwa li ku na oshilando shi na omakuma ge tu nyenge ando.

³⁷ Ihe inatu ya nando popepi noshilongo shAayammoni nenge komunkulo gwomulonga Jabbok nenge kiilando yokoshilongo shokoondundu nenge ehala lilwe nkoka Omuwa Kalunga ketu inee tu lombwela tu ye ko.”

3

¹ “Nosho twa hedha kuumbangalantu twa taalela oshilongo Baasha, omukwaniilwa Og okwe ya naakwiita ye ayehe, e tu kondjithe popepi noshilando Edrei.

² Omuwa okwa lombwele ndje a ti: ‘Ino tila, otandi mu gandja naantu ye noshilongo she ashihe miikaha yoye. Mu ninga ngaashi wa ningi Sihon, omukwaniilwa gwAayamori ngoka a kala muHeshbon.’

³ “Omuwa okwa gandja Og naantu ye miikaha yetu, e tatu ya dhipaga po ayehe.

⁴ Pethimbo tuu ndyoka otwa kwata po iilando ye ayihe. Kakwa li nando oshimwe inaatu shi kwata po. Ayihe kumwe oya li iilando omilongo hamano — oshikandjo ashihe shaArgob, moka omukwaniilwa Og gwaBashan a li ta pangele.

⁵ Iilando ayihe mbika oya li ya tungwa nomakuma omale, nomiyelo nomalukambo goku dhi patitha; okwa li wo omikunda dhaa na omankolokuma.

⁶ Iilando ayihe otwe yi hanagula po notwa dhipaga aalumentu ayehe naakiintu naanona, naanaa ngaashi twe shi ningile Sihon, omukwaniilwa gwaHeshbon.

⁷ Otwa kutha po iimuna notwa yugu iilando.

⁸ “Pethimbo tuu mpoka otwa yugu aakwaniilwa mbeyaka yaali yAayamori evi lyokuuzilo waJordan, okuza komulonga Arnon sigo okondundu Hermon.

⁹ (Ondundu Hermon oya lukwa kAasidoni Sirjon nokAayamori Senir.)

¹⁰ Otwa lala oshilongo ashihe shaOg, omukwaniilwa gwaBaasha: iilando yoketumbalalovi, Gilead alihe naBashan alihe sigo okiilando Salka naEdrei kuuzilo.”

¹¹ (Omukwaniilwa gwaBaasha Og oye a li Omurafe omuhugunini mokudhipagwa. Oshiketha she shomudhimba sha hongwa memanya osha li shuule woometa omugoyi noshomutamo gwoometa ne. Otashi monika moshilando shAayammoni Rabba.)

¹² “Sho twa lala oshilongo, onda pe omazimo gaRuben naGad oshilongo shokuumbangalantu woshilando Aroer popepi nomulonga Arnon noshitopolwa shoshilongo shokoondundu dhaGilead nomikunda dhasho.

¹³ Etatazimo lyaManasse onde li pe oshihupe shaGilead naBaasha alihe, moka Og a li ta pangele, kokutya oshitopolwa ashihe shaArgob.” (Bashan osha li oshilongo shAarafa.

¹⁴ Jair gwomezimo lyaManasse okwa kutha po oshitopolwa ashihe shaArgob, kokutya Baasha, sigo ongamba yaGeshur naMaaka. Omikunda okwe dhi ilukile, nohadhi ithanwa omikunda dhaJair.)

¹⁵ “Gilead onde li gandja koludhi lwaMakir gwomezimo lyaManasse.

¹⁶ Omazimo gaRuben naGad onde ga pe oshitopolwa shaGilead sigo omulonga Arnon. Ongamba yokuumbugantu oya li pokati komulonga, nongamba yawo yokuumbangalantu oya li omulonga Jabbok, ngoka oshitopolwa shimwe shagwo sha li ongamba yAayammoni.

¹⁷ Kuuninginino oshitopolwa shawo osha taandela sigo omulonga Jordan, okuza kefuta lyaGalilea kuumbangalantu sigo okEfuta lyeso kuumbugantu noponyonga yondundu Pisga kuuzilo.

¹⁸ “Pethimbo tuu ndyoka onde ya pe omakumagidho taga ti: ‘Omuwa Kalunga ketu okwe mu pe evi ndika kuuzilo waJordan, mu li lale. Ngashingeyi ihomatekeni, ne aalumentu amuhe mboka tamu vulu okukondja, mu kwatele Aaisraeli ooyakweni komeho, mu tokole Jordan noku ya kwathela okulala evi lyawo.

¹⁹ Aakulukadhi yeni ayehe, aana yeni niimuna yeni — ondi shi shi kutya omu na iimuna oyindji — otayi kala po miilando nde yi mu pe.

²⁰ Kwatheni Aaisraeli ooyakweni, sigo ya lala evi ndyoka Omuwa te li ya pe kuuninginino waJordan, sigo Omuwa te ya pe evululuko, ngaashi e mu ningile mpaka. Konima otamu ka galuka, mu ye kevi lyeni ndika nde li mu pe.’

²¹ “Onda lombwele Josua nda ti: ‘Owa mono ayihe mbyoka Omuwa Kalunga keni e yi ningile aakwaniilwa mbeyaka yaali, Sihon naOg. Osho ta ka ningila ayehe mboka tamu ka matukila evi lyawo.

²² Inamu ya tila, oshoka Omuwa Kalunga keni ote mu kondjele.’ ”

²³ “Pethimbo ndyoka onda galikana nda mana mo e tandi ti:

²⁴ ‘Omuwa Omupangeliawike, ondi shi shi kutya owu ulukile ndje etameko lyiinima iinene niikumithi mbyoka to ka ninga. Kape na kalunga megulu nenge kombanda yevi ta vulu okulonga iilongankondo mbyoka wa longo!

²⁵ Taagulukitha ndje Jordan, ndi ka mone evi ndyoka lyo opala handiyaka, oshilongo sho opala shokoondundu noondundu dhaLibanon.’

²⁶ “Ihe Omuwa okwa geele ndje molweni noina hala okupulakena ndje. Okwa ti owala: ‘Opuwo tuu ngaaka! Mwena nokuli, ino popya we nangame!

²⁷ Londa kondungu yondundu Pisga e to tala lwokuumbangalantu nolwokuumbugantu, kuuzilo nokuuninginino. Lengalenga u tale nawa shoka to mono, oshoka ito ka taaguluka Jordan nando okuli.

²⁸ Nongeka Josua. Mu tsa omukumo noku mu koleka, oshoka oye ta ka wilika oshigwana shi tokole Jordan, opo shi ka lale evi ndyoka to li tala.’

²⁹ “Otwa kala mesilu lya taalelathana noshilando Betpeor.”

4

¹ “Aaisraeli, vulikeni koompango adhihe tandi dhi mu nongeke, opo mu kale mu na omwenyo nomu ka lale evi ndyoka Omuwa Kalunga koohokulu te li mu pe.

² Inamu gwedha ko sha koohapu ndhoka tandi dhi mu lombwele, ne inamu kutha mo sha. Vulikeni kiipango yOmuwa Kalunga keni mbyoka nde yi mu pe.

³ Omwa mono ne yene shoka Omuwa a ningi pondundu Peor. Okwa yono po ayehe mboka ya longele Baal, oshikalunga shaPeor.

⁴ Ihe ne amuhe mboka mwa dhiginine okwiinekela Omuwa Kalunga keni, omu na omwenyo sigo ongashingeyi.

⁵ “Onde mu nongeke oompango adhihe, ngaashi Omuwa a lombwele ndje ndi shi ninge. Vulikeni kudho mevi ndyoka tamu ka kwata po.

⁶ Vulikeni kudho ne mu dhi dhiginine, notashi ulukile iigwana yilwe kutya ne aanandunge. Shampa taa kundana oompango adhihe ndhika, otaa ka tya: ‘Oshigwana shika oshi na uunongo noondunge dhi thike peni!’

⁷ “Kaku na oshigwana shilwe shi na kalunga kasho e li popepi nasho, ngaashika Omuwa Kalunga ketu e li natse. Ote tu yamukula, sho tatu mu kugile ekwatho.

⁸ Kaku na oshigwana shilwe shi na oompango dhuuyuuki dha fa ndhoka nde dhi mu nongeke nena.

⁹ Kotokeni! Ndhindhilikeni, ne mwaa dhimbwe ayihe mbyoka mwe yi mono nomeho geni yene, manga mu na omwenyo. Hokololeleni aana yeni naatekulu yeni

¹⁰ esiku ndyoka mwa thikama koshipala shOmuwa Kalunga keni pondundu Sinai, sho a lombwele ndje a ti: ‘Gongaleka oshigwana. Onda hala yu uve shoka ndi na okupopya, opo ya koneke okuvulika kungame aluhe, manga ye na omwenyo, nopo ya nongeke oyana okutila ndje.’

¹¹ “Hokololeleni aana yeni, nkene mwa yi nomwa thikama ponyonga yondundu ndjoka ya li ya siikilwa kiikogo yolwithi nomulilo tagu lilima gu uka mombanda.

¹² Ya hokololeleni, nkene Omuwa e mu popitha e li mehayango lyomulilo nonkene mwe mu uvu ta popi, ihe ne inamu mu mona nando e li molupe lwasha.

¹³ Okwe mu lombwele shoka mu na okuninga, mu dhiginine ehangano ndyoka e li hangana nane. Omu na okudhiginina Iipango Omulongo mbyoka e yi nyola miipelende iyali yomamanya.

¹⁴ Omuwa okwa lombwele ndje, ndi mu nongeke oompango adhihe ndhoka mu na okuvulika kudho mevi ndyoka tamu yi, mu ke li lale.”

¹⁵ “Omuwa sho e mu popitha e li mehayango lyomulilo kondundu Sinai, inamu mona nando olupe lwasha. Omoluuwanawa weni yene kotokeni,

¹⁶ mwaa yone mokwiihambulila iimenka molupe lwasha — kashi na nee mbudhi kutya omolupe lwomulumentu nenge lwomukiintu,

¹⁷ lwoshinamwenyo nenge lwondhila,

¹⁸ lwoshihono nenge lwohi.

¹⁹ Inamu kwatwa kohwehwe yokusimaneka nokulongela mbyoka yi li mewangandjo — etango, omwedhi noonyothi. Omuwa Kalunga keni okwe yi topolele aantu ayehe yomuuyuni.

²⁰ Ihe one oshigwana e shi mangululile muEgipiti, meziko lyomulilo. Okwe mu tembudha mo, mu ninge aantu ye mwene, ngaashi mu li ngashingeyi.

²¹ Molweni Omuwa okwa geele ndje nokwa uvaneke nokugana kutya itandi ka tokola we Jordan ndi ye kevi ndyoka ewanawa te ke li mu pa.

²² Otandi ka sila mevi ndika noitandi ka tokola Jordan, ihe ne otamu yi mu gu taaguluke ne mu ka lale evi ndyoka lyo ondoka.

²³ Kotokeni tuu, mwaa dhimbwe ehangano ndyoka Omuwa Kalunga keni a hangana nane. Vulikeni koshipango she noinamu iningila iimenka yasha,

²⁴ oshoka Omuwa Kalunga keni oye omulilo hagu lyana, Kalunga omulaadhi.

²⁵ “Nongele tamu kala olule moshilongo e tamu mono aanona naatekulu, inamu yona mokwiihambulila iimenka molupe lwasha. Mbika oyo iihuna koshipala shOmuwa notayi mu geyitha.

²⁶ Otandi ithana egulu nevi, yi ninge oonzapo dheni kutya ngele itamu vulika kungame, otamu kana mo moshilongo nziya. Itamu ka kala mo olule moshilongo shahandiyaka yaJordan shoka tamu ka lala. Otamu ka hanagulwa po thilu.

²⁷ Omuwa ote ke mu halakanithila kiilongo niilongo, nkoka taku ka hupila aantu yamweyamwe ayeke yomune.

²⁸ Oko nkoka tamu ka longela ookalunga ya hambulwa kiikaha yaantu, ookalunga yiiti noyomamanya mboka ihaa mono ko noihaa uvu ko, ihaa li noihaa thimbula ezimba.

²⁹ Hoka otamu ka konga Omuwa Kalunga keni, nongele tamu mu kongo nomutima aguhe, otamu ke mu mona.

³⁰ Uuna tamu adhika kuudhigu niinima mbika ayihe tamu yi ningilwa, nena ohugunina otamu galukile kOmuwa e tamu vulika kuye.

³¹ Oye Kalunga omunamutimahenda. Ite mu etha nando nenge e mu hanagule po, noita dhimbwa nando ehangano ndyoka ye mwene e li hangana noohokulu.

³² “Konakoneni utale omathimbo gonale, manga ne inaamu valwa, ethimbo alihe lyonale okuza mpoka Kalunga sho a shiti omuntu kombanda yevi. Konakoneni evi alihe. Iinima iinene yi thike mpaka oya ningilwe uunake nale? Oku na tuu ngoka u uvile iinima ya tya ngeyi?

³³ Oku na tuu oshigwana shilwe shu uvile Kalunga ta popi e li momulilo ndele tashi kala shi na we omwenyo, ngaashi ne mu li?

³⁴ Oku na tuu kalunga gulwe a yelekelele okutembudha mo oshigwana shontumba moshigwana shilwe e te shi ningi she mwene, ngaashi Omuwa Kalunga keni e mu ningile muEgipiti? Omontaneho yenilela a longitha oshikaha she shoonkondo nokwooko kwa taganana; okwe eta iiponga niita, a longo iilongandhindhiliko niinyengandunge nokwe eta iitilithilonga ya ningwa.

³⁵ Omuwa okwe mu hololele mbika, opo e mu ulukile kutya oye awike Kalunga nokaku na we gulwe.

³⁶ Okwe mu uvititha ewi lye tali zi megulu, opo e mu nongeke; naampaka kombanda yevi okwe mu talitha omulilo gwe omuyapuki e ta popi mugwo.

³⁷ Okwe mu hogolola, oshoka oku hole oohokulu, nokoonkondo dhe oonene okwe mu tembudha mo muEgipiti.

³⁸ Okwa tidha mo iigwana iinene niinankondo mondjila yeni, opo e mu ete mo mevi lyawo, evi ndyoka tali ningi lyeni.

³⁹ Dhimbulukweni ano nena ne mwaa dhimbwe nando kutya Omuwa oye Kalunga komegulu nokombanda yevi. Kaku na we kalunga gulwe.

⁴⁰ Vulikeni koompango adhihe ndhika tandi dhi mu pe nena ndjika, opo ayihe yi kale nawa kune naana yeni mevi ndyoka Omuwa Kalunga keni te li mu pe sigo aluhe.”

⁴¹ Moses okwa yoolola iilando itatu kuuzilo waJordan

⁴² moka tamu vulu okuholama omuntu ngoka a dhipaga mukwawo hanowina ye ke shi omutondi gwe. Ota vulu okuya ontuku moshilando shimwe mwaambika nota hupu.

⁴³ Ezimo lyaRuben olya li li na oshilando Bezer metumbalalovi lyombuga; ezimo lyaGad olya li li na Ramot moshilongo Gilead; nezimo lyaManasse olya li li na Golan moshilongo Baasha.

⁴⁴ Moses okwa gandja oompango dhaKalunga kAaisrael.

⁴⁵ Okwa gandja omalongo noompango ndhika kAaisrael, sho ya tembuka mo muEgipiti

⁴⁶ noya li mesilu kuuzilo waJordan ya taalelathana noshilando Betpeor, moshilongo shaSihon, omukwaniilwa gwAayamori, ngoka a pangele muHeshbon. Moses nAaisrael oye mu sindi, sho ya zi muEgipiti.

⁴⁷ Oya kutha po oshilongo she noshilongo shaOg, omukwaniilwa gwaBaasha. Og okwa li omukwawo gwomaakwaniilwa yAayamori kuuzilo waJordan.

⁴⁸ Oshilongo shika osha taandela okuza koshilando Aroer kooha dhomulonga Arnon sigo ondundu Sirjon, kokutya Hermon.

⁴⁹ Osha kwatelela mo oshikandjo ashihe shokuuzilo waJordan sigo okEfuta lya sa kuumbugantu noponyonga yondundu Pisga kuuzilo.

5

¹ Moses okwa hiya Aaisraeli ayehe e ta ti kuyo: “Aaisraeli ne, pulakeneni oompango adhihe ndhoka tandi mu pe nena. Dhi ilongeni, ne mu vulike kudho shili.

² Omuwa Kalunga ketu okwa hangana natse pondundu Sinai.

³ Ina hangana nootatekulu ayeke, ihe onatse atuhe mboka tu na omwenyo ngashingeyi.

⁴ Mpeyaka pondundu okwa popi nane oshipala noshipala e li momulilo.

⁵ Onda li nda thikama pokati keni nOmuwa pethimbo ndyoka nonde mu lombwele shoka a ti, oshoka omwa li mwa tila omulilo noinamu londa kondundu. “Omuwa okwa ti:

⁶ ‘Ongame Omuwa, Kalunga koye, nde ku tembudha muEgipiti, moka wa li omupika.

⁷ “ ‘Ino kala u na ookalunga yalwe koshipala shandje.

⁸ “ ‘Ino ihongela efano lyashaashoka megulu nenge kombanda yevi nenge momeya kohi yevi.

⁹ Ino inyongamena kiimenka nenge u yi galikane, oshoka ongame Omuwa, Kalunga koye, omulaadhi; otandi geele mboka ye tonde ndje nomaluvalo gawo sigo okepipi etitatu netine.

¹⁰ Ihe otandi sile ohenda omapipi gomayuvi gaamboka ye hole ndje nohaa vulika koompango dhandje.

¹¹ “ ‘Edhina lyandje ino li tumbulila iinima yowala, oshoka ongame Omuwa, Kalunga koye, tandi geele ayehe mboka taa tumbulile edhina lyandje iinima yowala.

¹² “ ‘Dhimbulukwa esiku lyEsabati ngoye u li yapule, ngaashi ngame Omuwa Kalunga koye nde shi ku lombwele.

¹³ Ou na omasiku gahamano moka to longo,

¹⁴ ihe esiku etiheyali olyo esiku lyevululuko lya yapulilwa ndje. Mesiku ndyoka kape na ngoka ta longo — ngoye mwene, aamwoye, aapika yoye, oongombe, uusino nenge iimuna yoye yilwe naakwiilongo ya kala moshilongo sheni. Aapika yoye oye na okuvululukwa, naanaa ngaashi ngoye mwene to ningi.

¹⁵ Dhimbulukwa kutya owa li omupika muEgipiti, moka ngame Omuwa, Kalunga koye, nde ku tembudha mo noshikaha shandje shoonkondo nokwooko kwa taganana. Omolwashoka tandi ku lombwele, u dhimbulukwe esiku lyevululuko.

¹⁶ “ ‘Simaneka ho nanyoko, ngaashika Omuwa Kalunga koye e ku lombwele, opo u kale u na elago nomwenyo omule mevi ndyoka Omuwa Kalunga koye te li ku pe.

¹⁷ “ ‘Ino dhipaga.

¹⁸ “ ‘Ino hondela.

¹⁹ “ ‘Ino yaka.

²⁰ “ ‘Ino lundila mukweni

²¹ “ ‘Ino haluka omukiintu gwamukweni; ino haluka egumbo lye, aapika ye, oongombe dhe, uusino we nenge shaa shoka she.’

²² “Mbika oyo iipango Omuwa e yi mu pe amuhe, sho mwa li mwa gongala pondundu. Okwa popi newi lyendundumo e li momalaka gomulilo nomoshikogo sha zigakana nokwa gandja iipango mbika nohasha shilwe. Okwe yi nyola kiipelende iyali yomamanya e te yi pe ndje.”

²³ “Ondundu ayihe sho ya li ya yaka omulilo nomu uvu oshihomo tashi zi muuluudhe thokothoko, aawiliki yeni naakuluntu yomazimo geni oye ya kungame

²⁴ e taa ti: ‘Omuwa Kalunga ketu okwe tu ulukile uunene we neadhimo lye, sho twe mu uvu ta popi e li momalaka gomulilo! Nena otwa mono kutya nani otashi vulika omuntu ta kala ngaa e na omwenyo, nando Kalunga okwa popya naye.

²⁵ Omolwashike tatu hupula oomwenyo dhetu? Omulilo nguka omunene otagu tu lungunitha po. Otatu si shili, ngele tatu uvu Omuwa Kalunga ketu ta popi ishewe.

²⁶ Oku na tuu omuntu a kalele e na omwenyo, u uvile Kalunga ta popi momalaka gomulilo?

²⁷ Moses, shuna e to pulakene ayihe mbyoka Omuwa Kalunga ketu ta ti. Galuka ihe u ye u tu lombwele shoka e ku lombwele. Otatu ke shi pulakena nokuvulika.’

²⁸ “Omuwa sho e shi uvu, okwa lombwele ndje a ti: ‘Ondu uvite ko shoka aantu mbaka ya ti noye li mondjila.

²⁹ Ando ya kale aluhe osho yu uvite ngaaka! Ando ya kale aluhe taa simaneke ndje e taa vulika kiipango yandje ayihe, opo ya kale nawa nomaluvalo gawo sigo aluhe!

³⁰ Inda u ke ya lombwele, ya shune komatsali gawo.

³¹ Ihe ngoye, Moses, oto kala mpaka pungame, notandi ke ku pa iipango, omautho noompango dhandje adhihe. Yi nongeka Aaisraeli, opo ya vulike kuyo mevi ndyoka tandi li ya pe!’

³² “Aaisraeli ne, kaleni ano tamu dhiginine nawa ashihe shoka Omuwa Kalunga keni e shi mu lombwele. Inamu kala tuu inaamu vulika koompango dhe adhihe.

³³ Vulikeni kudho adhihe, opo mu kale nawa nomu vule okukala mevi ndyoka tamu ke li lala.”

6

¹ “Ndhika odho oompango ndhoka Omuwa Kalunga keni e dhi lombwele ndje, ndi mu nongeke. Vulikeni kudho mevi ndyoka tamu ke li lala.

² Omasiku agehe manga mu na omwenyo, one nomaluvalo geni mu na okusimaneka Omuwa Kalunga keni nokuvulika koompango dhe adhihe ndhoka tandi dhi mu pe, opo mu kale mu na omwenyo omule moshilongo shoka.

³ Aaisraeli, dhi pulakeneni ano, ne mu dhi dhiginine nawa! Nena otamu ka kala nawa e tamu ningi oshigwana oshinankondo nokukala mevi ndyoka lya tondoka omahini nomagadhi goonyushi, ngaashi Omuwa Kalunga koohokulu u uvaneke.

⁴ “Israel, pulakena! Omuwa Kalunga ketu oye awike Kalunga.

⁵ Ano hola Omuwa Kalunga koye komutima gwoye aguhe, komwenyo gwoye aguhe nonoonkondo dhoye adhihe.

⁶ Ino dhimbwa oohapu ndhika tandi dhi ku lombwele nena.

⁷ Dhi nongeka aamwoye. Dhi hokolola, uuna u li moyaandjeni nuuna u li mepola, uuna to vululukwa nuuna to longo.

⁸ Nadhi kale edhimbulukitho lya fa lya mangelwa koshikaha shoye nenge li li moshipala shoye.

⁹ Dhi nyolela miikulo yomiyelo dhegumbo lyoye nomuuyanda.”

¹⁰ “Uuna Omuwa Kalunga koye te ku fala mevi ndyoka e li uvanekele oohokulu Abraham, Isak naJakob, oto ka pewa iilando iinene noyo opala mbyoka inoo yi tunga.

¹¹ Oto ka pewa omagumbo gu udha omaliko omawanawa inoo ga pungula mo, omithima inoo dhi hupa, iitsambe yomiviinu niikunino yomiolivi inoo dhi tsika. Omuwa nge te ku fala mevi ndyoka, noto kala u na ayihe wa hala okulya,

¹² kotoka tuu, waa dhimbwe Omuwa ngoka e ku tembudha muEgipiti, moka wa li omupika.

¹³ Tila Omuwa Kalunga koye, mu longela oye awike, nokuuvaneka omauvaneko goye medhina lye amuke.

¹⁴ Ino longela ookalunga yalwe, oomboka yiigwana ye ku kunduka.

¹⁵ Ngele to longele ookalunga yalwe, ondjahi yOmuwa otayi ku hwamene ya fa omulilo tagu ku lungunitha po thiluthilu, oshoka Omuwa Kalunga koye, ngoka e li pungoye, oye omulaadhi.

¹⁶ “Ino hinda Omuwa Kalunga koye, ngaashi we shi ningi puMassa.

¹⁷ Dhiginina iipango ayihe mbyoka Omuwa e yi ku pe nomikalo nomautho ge agehe.

¹⁸ Gwanitha shoka shu uka nosho opalela Omuwa. Nena ayihe otayi kala nawa, noto ka vula okuya mo nokulala evi ndyoka ewanawa Omuwa u uvanekele oohokulu.

¹⁹ Noto ka tidha mo aatondi yoye, ngaashi u uvaneke.

²⁰ “Komongula omumwoye nge te ku pula ta ti: ‘Omolwashike Omuwa Kalunga ketu a gandja omikalo, omautho noompango ndhika adhihe kune?’

²¹ Mu yamukula u tye: ‘Otwa li aapika yomukwaniilwa gwaEgipiti, ihe Omuwa okwe tu tembudha mo noshikaha she shoonkondo.

²² Otwa mono nomeho getu yene iilongandhindhiliko niinyengandunge iinene niitilithi ya ningilwa Aayegipiti, omukwaniilwa gwawo nomalenga ge agehe.

²³ Okwe tu mangulula muEgipiti nokwe tu eta huka e te tu pe evi ndika, ngaashi u uvanekele ootatekulu nokugana.

²⁴ Omuwa Kalunga ketu okwe tu lombwele tu dhiginine omautho ngaka agehe noku mu tila. Ngele otatu shi ningi, ota ka tonatela aluhe oshigwana shetu e te shi kaleke melago.

²⁵ Ngele otatu vulika shili kiipango mbika ayihe Omuwa Kalunga ketu e tu lombwele, ota kala e na ombili natse.’ ”

7

¹ “Omuwa Kalunga koye ote ku fala mevi ndyoka to ke li lala, oye nota ka tidha mo iigwana. Ote ke ku tidhila mo iigwana iheyali iinene niinankondo yi ku vule: Aaheti, Aagirgashi, Aayamori, Aakaanana, Aaperesi, Aahevi nAayebusi.

² Omuwa Kalunga koye shampa a tula aantu mbaka miikaha yoye e to ya sindi, ou na oku ya dhipaga po ayehe. Ino hangana nayo nenge u ya sile ohenda.

³ Ino hokanathana nayo, yo yaa hokane aamwoye,

⁴ oshoka otaa ka kutha aamwoye pOmuwa yo ya ka longele iikalunga. Ngele shika tashi ningwa, Omuwa ote ku geele e te ku dhimi po ohaluka.

⁵ Onkee ano kumuna po iiyambelo yawo, teyagula po oongundhimanya dhawo dhiidhila, ne mu keke po iiyelekela yoshikalungakiintu shawo Asheera, nokulungunitha po iimenka yawo.

⁶ Shi longa, oshoka ngoye oshigwana sha yapulilwa Omuwa Kalunga koye. Omuwa Kalunga koye okwe ku hogolola mokati kiigwana ayihe yomuuyuni, u ninge oshigwana she mwenelela.

⁷ “Omuwa ke ku hole ye ine ku hogolola ando molwashoka u vule iigwana yilwe muuwindji, aawe, owa li okagwana okashona miigwana ayihe yokombanda yevi.

⁸ Ihe Omuwa okwa li e ku hole nokwa hala okudhiginina euvaneko e li uvanekele oohokulu. Omolwashoka e ku tembudha mo noshikaha she shoonkondo e te ku mangulula muupika womukwaniilwa gwaEgipiti.

⁹ Kala u shi shi kutya Omuwa Kalunga koye oye awike Kalunga noye omudhiginini. Ota dhiginine ehangano lye nota hololele omapipi geyuvi esilohenda lye kumboka ye mu hole e taa vulika kiipango ye,

¹⁰ ihe iha lwedha okugeela mboka ye mu tonde.

¹¹ Vulika ano kumbyoka we yi nongekwa; vulika kiipango nomautho noompango adhihe ndhoka nde dhi ku pe nena.”

¹² “Ngele otamu pulakene iipango mbika e tamu yi dhiginine, nena Omuwa Kalunga keni ota ka dhiginina ehangano lye nane e te mu hololele esilohenda lye, ngaashika u uvanekele oohokulu nokugana.

¹³ Ota ka kala e mu hole e te mu yambeke noku mu indjipaleka. Ote ke mu pa aanona oyendji note ke mu yambeka noku mu pa eloolo lyiilya, omaviinu nomagadhi gooholivi; ote ke mu yambeka noku mu pa oongombe noonzi odhindji. Ote ke mu pa omayambeko agehe ngaka mevi ndyoka u uvanekele oohokulu nokugana kutya ote ke li mu pa.

¹⁴ Kaku na oshigwana muuyuni tashi ka kala shi na eyambeko she mu fa. Mokati keni itamu ka kala omulumentu nenge omukiintu ihaa vala nenge miimuna yeni.

¹⁵ Omuwa ote mu gamene koshivu kehe; ite mu ethele nando elega, ngaashi mwe shi koneke muEgipiti, ihe ote li undulile maatondi yeni.

¹⁶ Hanagulii po oshigwana kehe Omuwa Kalunga keni te shi gandja miikaha yeni; inamu shi sila nando ohenda. Inamu longela iikalunga yasho, otashi ka ninga omwigo gweni.

¹⁷ “Inamu ilombwela ne yene kutya iigwana mbika oyindji yi mu vule noitamu vulu oku yi tidha po.

¹⁸ Inamu yi tila; dhimbulukweni shoka Omuwa Kalunga keni e shi ningile omukwaniilwa gwaEgipiti naantu ye ayehe.

¹⁹ Dhimbulukweni omageelo giihuna ngoka mwa tala nomeho geni yene, iilongandhindhiliko niinyengandunge, oshikaha shoka shoonkondo nokwooko kwa taganana nkoka Omuwa Kalunga keni e mu mangulula nakwo. Pahedhi tuu ndjika otamu ka hanagula po iigwana ayihe mbyoka hamu yi tila ngashingeyi.

²⁰ Omuwa Kalunga keni ota ka tuma omambonzi mokati kawo, sigo ayehe ya pu po mboka ye mu hunuka ya ka holama.

²¹ Osho ano inamu tila aantu mboka. Omuwa Kalunga keni oku li pamwe nane; oye Kalunga omunene nomutilithilela.

²² Kashona nakashona ote mu tidhile po iigwana mbika. Inamu yi hanagula po polumwe; ngele tamu shi ningi, iithitukuti otayi indjipala e tayi mu gwililile po.

²³ Omuwa Kalunga keni ota ka gandja aatondi yeni miikaha yeni e te ya piyaganeke nayi, sigo ya dhimwa po.

²⁴ Ota ka gandja aakwaniilwa yawo miikaha yeni. Otamu ke ya dhipaga po, e taa dhimbiwa. Kape na ngoka ta ka vula oku mu kankeka; otamu ka hanagula po ayehe.

²⁵ Lungunithii po iimenka yawo. Inamu haluka iisiliveli nenge iingoli mbyoka yi li kuyo noinamu yi ikuthila. Ngele tamu shi ningi, otashi mu ningile omwigo, oshoka oyo iihunalela kOmuwa Kalunga keni.

²⁶ Iimenka mbika inamu yi eta nando okuli momagumbo geni, opo ethingano tuu ndyoka lyawo lyaaye mu kwate. Omu na okutonda nokudhina iimenka mbyoka, oshoka oya thingwa kOmuwa.”

8

¹ “Dhiginineni nawa iipango ayihe mbyoka tandi yi mu pe nena ndjika, opo mu kale mu na omwenyo, tamu indjipala notamu vulu okulala evi ndyoka Omuwa e li uvanekele oohokulu nokugana.

² Dhimbulukweni, nkene Omuwa Kalunga keni e mu enditha ondjila ndjika onde mokutokola ombuga momimvo ndhika omilongo ne. Okwa tumu omaudhigu e mu yeleke, opo a koneke shoka mwa dhiladhila okuninga nongele otamu vulika kiipango ye.

³ Okwe mu sitha ondjala, e te mu pe omanna mu lye, iikulya mbyoka inaayi liwa nale kune nokoohokulu. Shika okwe shi ningi, opo e mu longe kutya omuntu iha kala e na omwenyo koshikwiila ashike, ihe okohapu kehe tayi zi mokana kwOmuwa.

⁴ Momimvo ndhika omilongo ne oonguwo dheni inadhi kulupa, noompadhi dheni inadhi zinda.

⁵ Dhimbulukweni kutya Omuwa Kalunga keni ohe mu utha noku mu putudha, naanaa ngaashi he ta tekula oyana.

⁶ Longeni ano, ngaashi Omuwa e mu lombwele: Dhiginineni iipango ye e tamu kala mwe mu tila.

⁷ Omuwa Kalunga keni ote mu fala mevi ndyoka lyo ondoka — evi lyomilonga nolyoothithiya, evi lyoonza tadhi fuluka omeya momasilu nokoondundu,

⁸ evi li na olunza lwosiima niishokelya, omandjembele, oonkwiyu, oondunga dhomuti gwomugranati, ooholivi nomagadhi goonyushi.

⁹ Mevi ndyoka itamu ka sa we ondjala nenge mu kale mu na oluhepo. Momamanya galyo omu na oshimanya shosheela oshiluudhe nomoondundu dhalyo otamu vulu okulikola oshikushu.

¹⁰ Otamu ka kala mu na ashihe mwa hala oku shi lya notamu ka hambelela Omuwa Kalunga keni molwevi ewanawa ndyoka e li mu pe.”

¹¹ “Kotokeni tuu, mwaa dhimbwe Omuwa Kalunga keni; dhiginineni okuvulika kiipango, omautho noompango dhe tandi dhi mu pe nena.

¹² Uuna mwa kala mu na ayihe mbyoka mwa hala okulya nomwa tunga omagumbo omawanawa mu kale mo,

¹³ nuuna iimuna noonzi dheni dha valathana, oshisiliveli noshingoli neliko lyeni lilwe tali indjipala,

¹⁴ kaleni mu shi shi kutya kamu na okwiitanga nokudhimbwa Omuwa Kalunga keni, ngoka e mu tembudha mo muEgipiti, moka mwa li aapika.

¹⁵ Okwe mu pititha ombuga ontilithi nonene yi na omayoka guuzigo noondje. Mombuga ya kalanda yaa na omeya okwe mu tsipukithile omeya memanya ekukutu.

¹⁶ Mombuga tuu moka okwe mu pe omanna mu lye, iikulya mbyoka inaayi liwa koohokulu. Okwe mu tumine uudhigu e mu yeleke, opo pehulilo a wape e mu ningile uuwanawa.

¹⁷ Inamu dhiladhila ano kutya one yene mwi iningi aayamba koonkondo dheni yene.

¹⁸ Dhimbulukweni kutya Omuwa Kalunga keni oye he mu pe oonkondo dhokuninga aayamba. Ote shi ningi, oshoka oye omudhiginini, sigo onena ta dhiginine ehangano ndyoka a hangana noohokulu.

¹⁹ Inamu dhimbwa nando Omuwa Kalunga keni nenge mu game kiikalunga mu yi longele noku yi simaneka. Ngele tamu shi ningi, otandi mu londodha kutya otamu ka hanagulwa po shili.

²⁰ Ngele itamu vulika kOmuwa, nena otamu ka hanagulwa po naanaa mwa fa iigwana mbyoka te yi hanagula po, opo mu kale mo.”

9

¹ “Pulakena, Israel! Ngashingeyi oto ka taaguluka Jordan nokulala evi lyiigwana iinene niinankondo yi ku vule. Iilando yawo iinene yi na omankolokuma ga tsa mombanda.

² Aantu yo yene oyo Aayanaki aaleeleka naanankondo, mboka wu uva taku tiwa: ‘Kaku na ngoka te yi itakeke.’

³ Ihe ngashingeyi oto ki italela ko ngoye mwene kutya Omuwa Kalunga koye ote ku tetekele a fa omulilo hagu lyana. Ote ke ya sinda; ote ye ku tidhile mo. Ngoye oto ke ya tidha mo noku ya hanagula po mbala, ngaashi Omuwa u uvaneke.

⁴ “Omuwa Kalunga koye ngele te ye ku tidhile mo, ino dhiladhila u tye: ‘Okwe eta ndje mo, ndi likole evi ndika moluuyuuki wandje.’ Aawe, Omuwa ote ke ku tidhila po iigwana mbika moluukolokoshi wayo.

⁵ Hamolwashoka ngoye omwaanawa ando noho ningi shoka shu uka, Omuwa ando te ku pitikile okulala evi lyawo. Ote ke ya tidha mo, oshoka oyo aakolokoshi nomolwashoka ta lalakanene okugwanitha euvaneko ndyoka e li uvanekele oohokulu Abraham, Isak naJakob.

⁶ Kala tuu u shi shi kutya Omuwa ite ku pe evi ndika ewanawa omolwuuyuuki woye, oshoka ongoye oshigwana oshitangalali.

⁷ “Ino dhimbwa nando okuli, nkene wa geyitha Omuwa mombuga. Okuza uuna wa tembuka mo muEgipiti sigo uuna wa thiki mpaka, owa tsu ondumbo nOmuwa.

⁸ Nokuli pondundu Sinai owa geyitha Omuwa ondjahi ya gwana oku ku hanagulitha po.

⁹ Onda londo kondundu, ndi ka taambe iipelende yomamanya, moka mwa li mwa nyolelwa ehangano ndyoka Omuwa a hangana nangoye. Onda kala ko omasiku omilongo ne, uusiku nomutenya, inandi lya sha ngaye ine nwa sha.

¹⁰ Omuwa nokwa pe ndje iipelende yomamanya, moka a nyolela shoka ye mwene e ku lombwele e li momulilo esiku ndiyaka wa li pondundu.

¹¹ Eeno, konima yomasiku ngoka omilongo ne, uusiku nomutenya, Omuwa okwa pe ndje iipelende iyali yomamanya, moka a li a nyolela ehangano noshikaha she mwene.

¹² “Omuwa okwa lombwele ndje a ti: ‘Londoloka u ye pevi u ze kondundu mbala, oshoka aantu yoye mboka we ya tembudha mo muEgipiti, oya ningi esithahoni. Oya gamuka nokuli mondjila ndjoka nde yi ya lombwele ya kale mo noyi iningile oshimenka.’

¹³ “Omuwa okwa lombwele ndje ishewe a ti: ‘Aantu mbaka ondi ya shi kutya oyo aatangalali.

¹⁴ Ino mweneka ndje we. Onda hala ndi ya hanagule po nokudhima po edhina lyawo kombanda yevi. Ihe ngoye otandi ke ku ninga he yoshigwana oshinene noshinankondo shi ya vule.’

¹⁵ “Ngame nonda galuka ihe kondundu nda humbata iipelende iyali yomamanya, moka mwa nyolelwa ehangano. Ondundu oya li tayi lilima omalaka gomulilo.

¹⁶ Onda mono kutya ne omwa yono kOmuwa Kalunga keni: omwi ihambulile oshimenka shoshingoli molupe lwontana; omwa zi mbala mondjila ndjoka Omuwa e mu lombwele mu ende nayo.

¹⁷ Opo mpoka nda hata pevi iipelende ayihe iyali ya li miikaha yandje, e tandi yi tatula montaneho yeni.

¹⁸ Lumwe natango ondi isizimike pevi koshipala shOmuwa omasiku omilongo ne, uusiku nomutenya, ngame inandi lya sha noine nwa sha. Onde shi ningi, oshoka omwa yono kOmuwa nomwe mu geyitha.

¹⁹ Onda li nda tila uupyu wondjahi yOmuwa, oshoka okwa li a geya noonkondo e mu hanagule po thilu, ihe Omuwa okwa pulakene ndje natango.

²⁰ Omuwa okwa li a geele wo Aaron noonkondo a hala oku mu dhipaga, nopethimbo tuu ndyoka onda galikanene wo Aaron.

²¹ Onda kutha oshiningomwa sheni shuulunde, ontana ndjoka yoshingoli, nonde yi umbile meziko. Onde yi nyanyagula nde yi ningi omutoko e tandi gu gundu momeya ngoka taga tondoka taga zi mondundu.

²² “Ne omwa geyitha Omuwa ishewe, sho mwa li puTabera, Massa naKibrot Taava.

²³ MuKadesh Barnea Omuwa sho e mu tumu a ti: ‘Indeni mu ka lale evi ndyoka tandi li mu pe,’ omwa tsu ondumbo nelombwelo lyOmuwa; ne inamu mu itaala nokuvulika kuye.

²⁴ Ondi shi shi kutya ne otamu thengalalele Omuwa.

²⁵ “Ondi isizimike pevi koshipala shOmuwa omasiku omilongo ne, omutenya nuusiku, molwashoka Omuwa okwa ti, ote mu hanagula po.

²⁶ Onda galikana nda ti: Omuwa Omupangeliawike, ino hanagula po aantu yoye, oshigwana shoka we shi mangulula noku shi tembudha mo muEgipiti noshikaha shoye shoonkondo.

²⁷ Dhimbulukwa aapiya yoye Abraham, Isak naJakob noino pupa ko kuutangalali, kuukolokoshi nokuulunde woshigwana shika.

²⁸ Aayegipiti otaa ningi ya tye: ‘Omuwa okwa nyengwa okufala aantu ye kevi ndyoka e ya uvanekele. Okwa kutha mo ashike aantu ye, e ke ya dhipagele mombuga, oshoka okwa li e ya tonde.’

²⁹ Aantu mbaka oyoye, oshigwana shoye shoka we shi tembudha mo muEgipiti noshikaha shoye shoonkondo nokwooko kwa taganana.”

10

¹ “Omuwa okwa lombwele ndje a ti: ‘Honga iipelende iyali yomamanya ya faathana naambiyaka yotango e to pangele oshiketha shiipilangi shoku yi pungula mo. Londa ihe kondundu u ye kungame,

² notandi ka nyolela miipelende mbyoka shoka nda nyolele miipelende mbyoka we yi tatula; yi pungula moshiketha.’

³ “Onda pangele oshiketha shiipilangi yomuthiya e tandi hongo iipelende iyali yomamanya ya faathana naambiyaka yotango e tandi yi fala kondundu.

⁴ Omuwa nokwa nyolele miipelende mbyoka oohapu tuu ndhoka a li a nyola tango, iipango omulongo mbyoka e yi mu pe, sho a li ta popi e li momalaka gomulilo, uuna mwa li mwa gongala pondundu. Omuwa okwa pe ndje iipelende,

⁵ nonda galuka nda londoloka kondundu. Onde yi pungula moshiketha shoka nda pangele, naanaa ngaashi a ti, nomo yi li ngashingeyi.”

⁶ (Aaisraeli noya zi ko kuBeerot Bene Jaakan e taa yi kuMoser. Oko Aaron a sile ko e ta fumvikwa, nomwana Eleasar okwa yi peha lye moshilonga shuuyambi.

⁷ Okuza hoka oya yi kuGudgoda nokuza kuGudgoda oya yi kuJotbata, ehala lyiipemba yomeya.

⁸ Pethimbo ndiyaka Omuwa okwa langeke aalumentu yezimo lyaLevi ya ninge aahumbati yoshikethahangano, ye mu longele muuyambi noya tumbulile aantu omayambeko medhina lye. Mbika oyo iilonga yawo sigo onena.

⁹ Omolwashoka ezimo lyaLevi inali pewa oshitendelwa shevi nuuthiga mokati komazimo omakwawo, oshoka Omuwa oye uuthiga walyo, ngaashi Omuwa Kalunga e shi popi.)

¹⁰ “Onda kala kondundu omasiku omilongo ne, uusiku nomutenya, ngaashi nda ningile nale lwotango. Omuwa okwa pulakene ndje natango nokwa zimine kee ku yone po.

¹¹ Okwa lombwele ndje a ti: ‘Inda u ka endithe oshigwana, opo shi ka lale evi ndyoka nde li uvaneke tandi li pe oohokulu.’ ”

¹² “Israel, pulakena ngashingeyi shoka Omuwa Kalunga koye te ku pula: Tila Omuwa, ngoye u landule ondjila ye. Kala u mu hole, mu longela komutima gwoye aguhe nokomwenyo gwoye aguhe,

¹³ ngoye u dhiginine iipango nomautho ge agehe. Otandi yi ku pe nena omolwelago lyoye.

¹⁴ “Taleni ko! Egulu nomagulu gokombandambanda ogOmuwa, nevi noshaa shoka shi li mo.

¹⁵ Ihe ohole yOmuwa mokuhola oohokulu oya li onene, nokwe mu hogolola, one noluvalo lwawo, peha lyiigwana yilwe. One oshigwana sha hogololwa natango.

¹⁶ Onkee ano okuza kongashingeyi pititheni omitima dheni etanda ne inamu kukutika we oothingo dheni.

¹⁷ Omuwa Kalunga keni oye Kalunga kokombanda yookalunga ayehe noye e vule oonkondo adhihe. Oye omunene, omunankondo nomutilithi. Ke na ontondo ye iha taamba oombumbo.

¹⁸ Ohu uthile oothigwa naaselekadhi; oku hole aakwiilongo mboka ye li mokati keni te ya pe iikulya nomizalo.

¹⁹ Kaleni ano mu hole aakwiilongo, oshoka ne omwa li aakwiilongo muEgipiti.

²⁰ Tileni Omuwa Kalunga keni, noye awike mu longeleni. Mu inekeleni, nomedhina lye awike ningeni omauvaneko geni.

²¹ Mu hambeleleni — oye Kalunga keni, omwa mono nomeho geni yene iinima iinene niitilithi mbyoka e yi mu longele.

²² Oohokulu sho ya yi kuEgipiti, oya li owala aalumentu omilongo heyali. Ihe ngashingeyi Omuwa Kalunga keni okwe mu indjipaleke mu thike poonyothi dhokegulu.”

11

¹ “Holeni Omuwa Kalunga keni, ne mu dhiginine aluhe omalombwelo, omautho, oompango niipango ye.

² Molwokupyokoka kweni dhimbulukweni nena ndjika shoka mwa koneke kOmuwa. Onelela mwa mono owino, haana yeni. Omwa tala uunene wOmuwa, oshikaha she shoonkondo, okwooko kwe kwa taganana

³ niilongandhindhiliko ye. Omwa mono shoka a ningile omukwaniilwa gwaEgipiti noshilongo she ashihe.

⁴ Omwa tala, nkene Omuwa a kombo po omatangakwiita gAayegipiti, pamwe nuukambe wawo nomatembakwiita gawo, noku ya ninginitha mEfuta etiligane, sho ya li taye mu landula.

⁵ Omu shi shi shoka Omuwa e mu ningile mombuga, manga inaamu thika mpaka.

⁶ Otamu dhimbulukwa shoka a ningile Datan naAbiram, aana yaEliab yomezimo lyaRuben. Montaneho yaayehe evi olya makula okana kalyo e tali ya nina po, pamwe noyaandjawo, nomatsali gawo, naapiya yawo ayehe noniimuna yawo.

⁷ Eeno, one tuu mboka mwa mono nomeho geni yene iinima iinene mbyoka Omuwa e yi longo.”

⁸ “Dhiginineni iipango ayihe nde yi mu pe nena, opo mu ninge aanankondo nomu wape okutokola omulonga noku ka lala evi ndyoka moka tamu ka ya mo,

⁹ nopo mu kale ethimbo ele mevi ndyoka lya tondoka omahini nomagadhi goonyushi, mevi olyo tuu ndyoka Omuwa u uvaneke te li pe oohokulu nomaluvalo gawo.

¹⁰ Evi ndyoka tamu ka lala, inali faathana naEgipiti, moka mwa tembuka mo. MuEgipiti sho mwa kunu oombuto dheni, omwa tekele iimeno yomomapya geni nuudhigu.

¹¹ Ihe mevi ndyoka mu uka, olyo evi lyoondundu nomasilu, evi hali lokwa.

¹² Omuwa Kalunga keni ota sile evi ndika oshimpwiyu note li tonatele omumvo aguhe.

¹³ “Dhiginineni ano nawa iipango mbyoka nde yi mu pe nena ndjika. Holeni Omuwa Kalunga keni e tamu mu longele komitima dheni adhihe nokoomwenyo dheni adhihe.

¹⁴ Ngele otamu shi ningi, ota ka lokithila evi lyeni omvula, uuna sha pumbiwa, pethimbo lyoshikufuthinge nolyoshitemamvula, opo mu kale mu na iilya, omaviinu nomagadhi gooholivi,

¹⁵ nomwiidhi gwiimuna yeni. Otamu ka kala mu na iikulya ayihe mwe yi hala.

¹⁶ Inamu etha mu kuthwe po pOmuwa, ne mu ka longele ookalunga yalwe.

¹⁷ Ngele tamu shi ningi, Omuwa ote ke mu geela. Ota kaleke omvula yaa loke we, evi lyeni otali ka kalanda koluteni, niimeno yeni tayi si. One notamu ka sa po mbala, nando mu kale mu li mevi ewanawa ndyoka Omuwa te li mu pe.

¹⁸ “Thindileni ano oohapu ndhika dhandje moomwenyo, ne mu dhi dhiladhile. Nadhi kale edhimbulutho lya mangelwa kiikaha yeni nenge li li miipala yeni.

¹⁹ Dhi nongekeni aana yeni. Dhi hokololeni, uuna mu li moyaandjeni nuuna tamu ende mepola, uuna tamu vululukwa nuuna tamu longo.

²⁰ Dhi nyoleleni miikulo yomiyelo dhomagumbo geni nomuuyanda.

²¹ Opo ihe ne naana yeni otamu ka kala olule mevi ndyoka Omuwa Kalunga keni u uvaneke oku li pa oohokulu. Otamu kala mo, manga egulu nevi li li po.

²² “Dhiginineni nawa iipango ayihe mbika nde yi mu pe: Holeni Omuwa Kalunga keni, landuleni ondjila ye, ne mu mu inekele.

²³ Nena ote ke mu tidhila mo iigwana mbyoka ayihe, notamu ka lala evi lyiigwana iinene niinankondo yi mu vule.

²⁴ Evi alihe ndyoka tamu ke li lyata, otali ningi lyeni. Oshilongo sheni otashi ka taandela okuza kombuga kuumbugantu sigo okoondundu dhaLibanon, nokuza komulonga Eufrat kuuzilo sigo Efuta lyopokati kuuninginino.

²⁵ Mevi ndyoka shaa mpoka tamu yi, Omuwa Kalunga keni ote ke mu ninga etilitho lyiigwana, ngaashi u uvaneka, nokape na ngoka ta vulu oku mu ya moshipala.

²⁶ “Nena ndjika otandi mu pe, mu hogolole pokati keyambeko netulomutima —

²⁷ eyambeko, ongele tamu vulika kiipango yOmuwa Kalunga keni mbyoka tandi yi mu pe nena;

²⁸ ihe etulomutima, ongele itaamu vulika kiipango mbika notamu pilamene ko, mu ze po, mu ka longele ookalunga yalwe mboka inaamu ya longela nale.

²⁹ Omuwa Kalunga keni ngele te mu fala mevi ndyoka tamu ke li lala, ka uvithileni eyambeko kondundu Garizim netulomutima kondundu Ebal.

³⁰ (Oondundu ndhika mbali odhi li handiyaka yaJordan kuuninginino woshitauwa hoka haku ningine etango, popepi noomwandi dhaMore moshilongo shAakaanana mboka ya kala muAraba ontega naGilgal.)

³¹ Otamu ka tokola Jordan e tamu ka lala evi ndyoka Omuwa Kalunga keni te li mu pe. Shampa mwe li kwata po e tamu tula mo,

³² dhiginineni shili oompango adhihe ndhoka tandi dhi mu pe nena.”

12

¹ “Ndhika odho oompango ndhoka mu na oku dhi dhiginina nawa, manga mu li mevi ndyoka Omuwa Kalunga koohokulu te li mu pe. Dhi pulakeneni!

² Hanagulii po omahala agehe moka aantu ya li haa simanekele ookalunga yawo koondundu oondeendeka, kiikulundundu nomomizile dhomiti omitalala mevi ndyoka tamu ke li lala.

³ Kumunii po iiyambelo yawo ne mu teyagule po oongundhimanya dhawo dhiidhila. Fikii po iiyelekela yawo yoshikalungakiintu Asheera ne mu komangele po iimenka yawo, opo yaa simanekwe we pomahala ngoka.”

⁴ “Inamu longela Omuwa Kalunga keni pahedhi ndjoka aantu mbaka haa longele iikalunga yawo.

⁵ Ihe ehala limwe ndyoka Omuwa Kalunga keni te li hogolola moshitopolwa shomazimo geni, otamu li kongo, nopulyo opo tamu kala hamu gongalele, mu mu longele.

⁶ Oko tuu hoka tamu fala omafikilondjambo noontselelandjambo dheni, iitimulongo yeni, omagano ngoka gu uvanekelwa Omuwa nomayambo pahalo lyeni yene niisheeli yoongombe noonzi dheni.

⁷ Noko nkoka koshipala shOmuwa Kalunga keni, ngoka e mu yambeka nomagumbo geni, otamu li nokunyanyukilwa iinima iiwanawa mbyoka mwa longo.”

⁸ “Ethimbo ndyoka nge lya thiki, inamu ninga ngaashika mwa ningile. Sigo onena shaa ngoka okwa longo ngaashika e shi wete sho opala,

⁹ oshoka inamu thika natango mevi ndyoka Omuwa Kalunga te li mu pe, moka tamu ka kala mu na ombili.

¹⁰ Shampa mwa tokola Jordan, Omuwa ote ke mu langeka moshilongo e tamu kala mo. Ote mu gamene kaatondi yeni ayehe, e tamu kala nombili.

¹¹ Omuwa ota ka hogolola ehala lyontumba, moka ta longelwa, nopulyo otamu ka eta po ashihe shoka tandi mu lombwele: omafikilondjambo noontselelandjambo dheni, iitimulongo yeni nomagano ngoka gu uvanekelwa Omuwa.

¹² Nyanyukilweni koshipala shOmuwa Kalunga keni pamwe naana yeni, aapiya yeni nAalevi mboka ya kala miilando yeni; dhimbulukweni kutya Aalevi itaa ka kala ye na oshitendelwa shevi lyawo yene.

¹³ Inamu yamba omafikilondjambo geni shaa mpoka tamu hogolola,

¹⁴ ihe opehala limwe alike ndyoka Omuwa te li hogolola moshitopolwa shomazimo geni. Nopo apeke tamu yambele omafikilondjambo geni e tamu gwanitha iinima ayihe tandi yi mu lombwele.”

¹⁵ “Owa manguluka okudhipaga oshimuna shoye noku shi lya shaa mpoka u li. Oto shi li, ngaashi Omuwa te shi ku pe. Ashihe shimwe nge omuyogoki nenge ngoka a nika oshidhila, ota vulu oku shi lya, ngaashi naanaa haku liwa onyama yomenye nenge yohumba.

¹⁶ Ihe ombinzi yayo ino yi lya nando, yi tilahi pevi ya fa omeya.

¹⁷ Shoka to yambele Omuwa, inashi lilwa pehala ndyoka wa kala, nashi kale iitimulongo yiilya yomaviinu nenge yomagadhi goye gooholivi, osheeli shongombe nenge shonzi yoye, omagano ngoka wu uvanekele Omuwa, omagano to ga gandja pahalo lyoye mwene nenge omayambo galwe.

¹⁸ Ongoye naamwoye, pamwe naapiya yoye nAalevi mboka ye li miilando yeni, u na okulila omayambo ngaka koshipala shOmuwa Kalunga koye mehala tuu ndyoka limwe lyelongelokalunga lya hogololwa kOmuwa Kalunga koye. Nowu na okunyanyukilwa ayihe mbyoka we yi longo.

¹⁹ Sa oshimpwiyu waa dhimbwe po Aalevi ethimbo alihe to kala mevi lyeni.

²⁰ “Omuwa Kalunga koye ngele ta nenepeke oshilongo shoye, ngaashi u uvaneka, oto vulu okulya onyama, ngaashi wa hala.

²¹ Ehala lyelongelokalunga ngele oli li kokule unene, nena pahalo lyoye mwene oto vulu okudhipaga oongombe nenge oonzi ndhoka Omuwa e dhi ku pe noto lile onyama maandjeni, ngaashi nde ku lombwele.

²² Shaa ngoka omuyelele nenge a nika oshidhila, ota vulu okulya onyama ndjoka, ngaashi haku liwa onyama yomenye nenge yohumba.

²³ Shaa owala itoo yi li yi na ombinzi, oshoka omwenyo ogwa kala mombinzi, onkee ino lya omwenyo pamwe nonyama.

²⁴ Ombinzi ino yi ninga iikulya; yi tilahi pevi ya fa omeya.

²⁵ Ngele to vulika koshipango shika, Omuwa ota ka nyanyukwa, oku na ombili nangoye, naayihe otayi ke ku opalela, ongoye mwene naamwoye.

²⁶ Ihe omayambo goye nomagano goye ngoka wu uvanekele Omuwa, ga fala kehala lyelongelokalunga tuu ndyoka limwe.

²⁷ Onyama nombinzi yomafikilondjambo goye yi yambela koshiyambelo shOmuwa Kalunga koye. Moontselelandjambo ombinzi nayi tilwe koshiyambelo shOmuwa Kalunga koye, ihe onyama oto vulu oku yi lya.

²⁸ Vulika shili kwaayihe mbika nde ku lombwele, ngoye noluvalo lwoye, noto kala nawa aluhe sigo aluhe, oshoka oto ningi shoka shu uka nosho opalela Omuwa Kalunga koye.”

²⁹ “Omuwa Kalunga keni ota ka hanagula po iigwana, nge tamu ka matukila evi lyawo. Otamu ke li kwata po e tamu tula mo.

³⁰ Omuwa nge a hanagula po iigwana mbyoka, taleni nawa mwaa landule uupagani wawo, oshoka otashi ka ninga omwigo gweni. Inamu simonona tuu, nkene haa longele iikalunga yawo, opo mu shi yelekele.

³¹ Inamu longela Omuwa Kalunga keni pahedhi ndjoka haa longele iikalunga yawo, oshoka mokulongela kwawo iikalunga otaa ningi iinima iikungitha mbyoka Omuwa te yi tondo. Nokuli ohaa fikile oyana kiiyambelo yawo.”

³² “Gwanitheni ayihe mbyoka nde yi mu lombwele; inamu gwedha ko sha ne inamu kutha mo sha.”

13

¹ “Omuhunganeki nenge omulalindjodhi ota vulu okuuvaneka oshilongandhindhiliko nenge oshinyengandunge,

² opo e mu fale mokusimaneka nokulongela ookalunga mboka inaamu ya simaneka nale. Nonando shoka u uvaneka tashi tsu,

³ inamu mu pulakena. Omuwa Kalunga keni ote mu longitha, opo e mu lole a tale, ngele omu hole tuu shili Omuwa komutima aguhe.

⁴ Landuleni Omuwa Kalunga keni, ne mu mu tile; vulikeni kuye ne mu dhiginine iipango ye; mu longeleni noku mu inekela.

⁵ Ihe omuhunganeki nenge omulalindjodhi kehe te mu tsitha ondumbo nOmuwa Kalunga keni, ngoka e mu tembudha mo muEgipiti, moka mwa li aapika, mu dhipagii po. Omuntu a tya ngaaka omudhudhu nota kambadhala e mu gamune mondjila ndjoka Omuwa Kalunga keni e mu lombwele mu kale mo. Na dhipagwe, opo mu ikanyutulule kuuwinayi.

⁶ “Ngele oku na mumwanyoko nenge omumwoyemati nenge omumwoyekadhona nenge omukulukadhi u mu hole unene nenge kuume koye kopothingo te ku hongolola monanguwi ta ti: ‘Natu ka longele ookalunga yalwe,’ mboka ne noohokulu inaamu ya tseya,

⁷ ookalunga yiigwana mbyoka ye mu kunduka, mbyoka yi li popepi nenge kokule nane, okuza kooha dhevi sigo okoonkwawo,

⁸ ino mu pitika e ku heke; ino mu pulakena nokuli. Ino mu sila ohenda nande nenge u mu etele olukeno, ino mu gamena.

⁹ Mu dhipaga! Ongoye mu dhaadhiga tango nemanya, opo ihe ayehe naye mu dhenge nomamanya!

¹⁰ Mu dhipaga nomamanya! Okwa kambadhala e ku gamune kOmuwa Kalunga koye, ngoka e ku mangulula muEgipiti, moka wa li omupika.

¹¹ Nena Aaisraeli ayehe otaye shi uvu shoka sha ningwa po e taa tila, nokape na ngoka na longo we oshinima oshiwinayi sha tya ngaaka.”

¹² “Oto vulu okuuva kutya moshilando shontumba mwaambyoka Omuwa Kalunga koye te ku pe,

¹³ mokati keni omu na aalumentu yaamakaha mboka taa hekaheka aantu yomoshilando shawo okulongela ookalunga yalwe mboka inaamu ya tseya.

¹⁴ Shi konakona nokupulakena nawalela. Ngele oshoshili kutya iinima iinyanyalithi ya tya ngaaka oya ningwa mokati keni.

¹⁵ Nena dhipaga po aantu ayehe yomoshilando shoka niimuna yawo ayihe. Oshilando shi dhima po thilu.

¹⁶ Gongela omaliko agehe gaantu mboka ya kala mo e to ga ndumbile ondumba mehalandjandja lyoshilando. Fika po ihe oshilando naashihe shi li mo, shi ninge omudhidhindjambo kOmuwa Kalunga koye. Nashi ninge ondumba yomakulukuma aluhe sigo aluhe noitashi tungululwa we.

¹⁷ Ino ihupithila sha mushoka sha pangulilwa okudhimwa po, opo Omuwa a geyuluke e te ku sile ohenda. Ote ku etele olukeno e te ku indjipaleke, u ninge aantu oyendji, ngaashi u uvanekele oohokulu,

¹⁸ ngele to vulika kiipango ye ayihe mbyoka nde ku pe nena, e to ningi shoka shu uka momeho gOmuwa Kalunga koye.”

14

¹ “One aantu yOmuwa Kalunga keni. Ngele tamu lili oosa, inamu ishata oonsha nenge mu ikulule omapalu momitse, ngaashi aantu yalwe haa ningi.

² One oshigwana oshiyapuki, aantu yOmuwa Kalunga keni; okwe mu hogolola mu ninge ye mwene mokati kiigwana ayihe kombanda yevi.”

³ “Inamu lya sha shiihuna.

⁴ Iimuna mbyoka tamu vulu okulya, oyo mbika: ongombe, onzi, oshikombo,

⁵ ohumba, omenye, ompengu, etungu, oholongo, osino, okapundja.

⁶ Otamu vulu okulya iinamwenyo ayihe mbyoka yi na omakondo ga shandjuka nohayi ekeshele.

⁷ Ihe iinamwenyo yaa na omakondo ga shandjuka noihayi ekeshele, inayi liwa. Inamu lya oongamelo, uulimba nenge uundjele. Nayi talwe oyo iinamwenyo yoshipwe; ohayi ekeshele, ihe kayi na omakondo ga shandjuka.

⁸ Inamu lya iingulu. Nayi talwe oyi na oshipwe; oyi na omakondo ga shandjuka, ihe ihayi ekeshele. Inamu lya iinamwenyo ya tya ngaaka nenge mu gume omituntu dhayo.

⁹ “Otamu vulu okulya oohi adhihe ndhoka dhi na omilenge niipeta,

¹⁰ ihe ayihe mbyoka yi li momeya yaa na omilenge niipeta inamu yi lya; nayi talwe oyi na oshipwe.

¹¹ “Otamu vulu okulya oondhila adhihe oondjelele.

¹² Ihe moondhila inamu lya ndhika: ekodhi eluudhe, ekwatandimba, onkwalukwa,

¹³ embiimbili, oondhila oonkwakodhi,

¹⁴ omaludhi gomakola,

¹⁵ ompo, lumbamba, kakwaya, ookakodhi,

¹⁶ oshukutula, ehwiyu, kakulu,

¹⁷ onyundu, ontsa, ontyololola,

¹⁸ kandoko, omaludhi gomayamakalwa, dhepupu nelimalima.”

¹⁹ “Iipethipethi ayihe yomawawa oyi na oshidhila; inamu yi lya.”

²⁰ Otamu vulu okulya iipethipethi ayihe ya yela.

²¹ “Inamu lya oshinamwenyo shi isila. Otamu vulu oku shi pa omukwiilongo ngoka a kala mokati keni, a lye, nenge otamu shi landitha po komuyeni. Ihe one oshigwana sha yapulilwa Omuwa Kalunga keni. “Onyama yokanzona nenge yokakombwena inamu yi teleka momahini gayina.”

²² “Yoolola tuu oshitimulongo shaambyoka tayi zi momapya goye omumvo kehe.

²³ Inda kehala ndyoka Omuwa Kalunga koye te li hogolola omo a longelelwe; omo moka koshipala she to lile oshitimulongo shiilya, shomaviinu noshomagadhi gooholivi dhoye nosheeli shongombe noshonzi yoye. Shi ninga, opo u nongele okusimaneka Omuwa Kalunga koye aluhe.

²⁴ Ehala lyelongelokalunga ngele oli ku li kokule, opo u fale ko wa humbata oshitimulongo shaambyoka Omuwa e ku yambeke nayo, nena ninga ngeyi.

²⁵ Landitha po iinima, ngoye u fale iimaliwa kehala lyelongelokalunga.

²⁶ Yi landa po shoka wa hala — oongombe, oonzi, omaviinu nenge iikunwa yilwe — opo ihe oto ke yi lila mpeyaka koshipala shOmuwa Kalunga keni one noyaandjeni e tamu nyanyukwa.

²⁷ “Ino ngunguninina Aalevi ya kala miilando yeni, oshoka kaye na oshitendelwa shevi lyawo yene.

²⁸ Pehulilo lyomumvo omutitatu kehe eta oshitimulongo shiilya yoye ayihe e to yi pungula moshilando sheni.

²⁹ Iilya mbika otayi ningi yAalevi, mboka kaaye na oshitendelwa shasha, yaakwiilongo, oothigwa naaselekadhi mboka ye li miilando yeni. Naye ye, ya hawale oompumbwe dhawo. Shi ninga, opo Omuwa Kalunga koye e ku yambeke mwaayihe to longo.”

15

¹ “Momumvo omutiheyali ou na okudhima po oongunga dhaamboka ye ku hehelele iimaliwa.

² Oto shi ningi ngeyi. Shaa ngoka a hehelelwe ongunga kumukwawo, ne yi dhime po. Ina kambadhala i ilikolele sha. Omuwa mwene ota dhimi po oongunga.

³ Oto pula ongunga komuyeni, ihe ino pula komukweni.

⁴ “Omuwa Kalunga koye ote ke ku yambeka mevi ndyoka te li ku pe. Moshigwana shoye itamu kala ohepele,

⁵ ngele oto vulika kOmuwa Kalunga koye e to gwanitha shili ayihe mbyoka tandi ku lombwele nena.

⁶ Omuwa ote ke ku yambeka, ngaashi u uvaneka. Oto ka pa iigwana oyindji oongunga, ihe ngoye ito pumbwa okuhehela sha kuyo. Oto ka pangela iigwana oyindji, ihe kape na oshigwana tashi ke ku pangela.”

⁷ “Pungoye ngele ope na ohepele, gumwe gwomooyakweni moshilando shimwe shomevi ndyoka Omuwa Kalunga koye te li ku pe, ino mu kukutikila omwenyo gwoye, neke lyoye ino li kamininina omumwanyoko ohepele.

⁸ Mu kamunukila eke lyoye noku mu pa nenyanyu shoka te ku yaala uuthigona.

⁹ Ino mu tindila shoka te ku indile, molwashoka omumvo ngoka oongunga hadhi dhimwa po gu li popepi. Ino pitika edhiladhilo lya tya ngeyi ewinayi li mene momwenyo gwoye. Ngele oto tindi okugandja ongunga, ota ka kugila ndje te ku tamaneke, noto humbata ondjo.

¹⁰ Mu pa nohokwe, nomwenyo gwoye gwaa kale noshizimbi, nge to mu pe, oshoka omolwashika Omuwa Kalunga koye ote ku yambeke miilonga yoye ayihe nomwaayihe mbyoka to yi ningi.

¹¹ Oohepele itadhi pu mo moshilongo; omolwashoka tandi ku lombwele te ti: ‘Eke lyoye ou na oku li kamunukila mukweni omuthigona nohepele mevi lyoye.’ ”

¹² “Ngele oku na Omuisraeli omukweni ti ilanditha po kungoye a ninge omupika, ou na oku mu mangulula, sho e ku longele omimvo hamano. Momumvo omutiheyali oto mu mangulula a ye.

¹³ Nonge to mu mangulula a ye, ino mu etha a ye niikaha yowala.

¹⁴ Mu pa meloolo ndyoka Omuwa e ku yambekele — oonzi, iilya nomaviinu.

¹⁵ Dhimbulukwa kutya owa li omupika muEgipiti, nOmuwa Kalunga koye okwe ku mangulula. Omolwashoka tandi ku pe oshipango shika.”

¹⁶ “Ihe ngele ote ku lombwele ta ti: ‘Inandi hala okuza po pungoye,’ molwashoka e ku hole negumbo lyoye noku uvite uutoye pungoye,

¹⁷ nena mu fala meelo lyegumbo lyoye e to mu ulula kokutsi noniho, nota kala omupika gwoye aluhe. Naapika yoye aakiintu osho to ya ningi ngaaka.

¹⁸ Ino kala u na olungwenye, uuna to laleke omupika; ndishi okwe ku longela omimvo hamano nondjambi yomulongeli lwaali nokuli. Shi gwanitha, nOmuwa Kalunga koye ote ke ku yambeka mwaayihe to yi ningi.”

¹⁹ “Yoololela Omuwa Kalunga koye iisheeli ayihe iilumentu yoongombe noyoonzi. Oongombe dha tya ngaaka ino dhi longitha, noonzi ndhoka ino dhi kulula.

²⁰ Omumvo kehe ngoye naanegumbo lyoye omu na oku yi lila koshipala shOmuwa pehala ndyoka Omuwa e li hogolola.

²¹ Ihe ngele iinamwenyo oyi na oshipwe shasha, ngele iilema, iiposi nenge yi na oshipo shasha, ino yi yambela Omuwa Kalunga koye.

²² Iimuna ya tya ngaaka yi lila paandjeni. Ne amuhe, ongele aayogoki nenge mboka ye na oshidhila, otamu vulu oku yi lya, naanaa ngaashi onyama yomenye nenge yohumba.

²³ Ihe ombinzi yayo inamu yi lya nando, nayi tilwehi pevi ya fa omeya.”

16

¹ “Simaneka Omuwa Kalunga koye mokudhana Opaasa momwedhi Abib. Osha li uusiku momwedhi ngoka, sho e ku tembudha mo muEgipiti.

² Inda kehala lyelongelokalunga, u dhipagele ko onzi yoye nenge ongombe, yi ninge uulalelo Opaasa okusimaneka Omuwa Kalunga koye.

³ Uuna to li uulalelo mbuka, ino lya oshikwiila sha tulwa efulika. Omasiku gaheyali oto li iikwiila inaayi tulwa efulika, ngaashi wa ningile sho wa tembuka muEgipiti meulumo enene. Lya oshikwiila shika — otashi ka lukwa oshikwiila shuuwehame — opo, manga u na omwenyo, u dhimbulukwe, uuna wa tembuka muEgipiti, ehala lyuuwehame.

⁴ Omasiku gaheyali kape na omuntu ta kala e na efulika mevi lyeni megumbo lye; nonyama yoshimuna sha dhipagwa ongulohi yesiku lyotango nayi liwe po uusiku tuu mboka.

⁵ “Onzigona yaPaasa yi dhipagela pehala lyelongelokalunga — nohashaa mpoka mevi ndyoka Omuwa Kalunga koye te li ku pe. Shi ninga peningino lyetango, pethimbo ndyoka lyesiku wa tembuka mo muEgipiti.

⁶

⁷ Onyama yi paka po, u yi lile pehala lyelongelokalunga; nongula nge kwa shi, oto shuna kegumbo.

⁸ Omasiku gahamano taga landulathana oto li iikwiila inaayi tulwa efulika nomesiku etiheyali oto yi kelongelokalunga lyOmuwa Kalunga koye, noino longa esiku ndyoka.”

⁹ “Yalula iiwike iheyali okuza kesiku ndyoka wa tameke okuteya iilya yoye,

¹⁰ e to dhana Oshituthi shoshiwike, u simaneke Omuwa Kalunga koye noku mu etela omaganoyambo pamuthika ngoka e ku yambekele elikolo lyoye.

¹¹ Kala wa nyanyukwa koshipala shOmuwa pamwe naamwoye, aapiya yoye, Aalevi, aakwiilongo, oothigwa naaselekadhi mboka ye li miilando yeni. Shi ningila pehala lyelongelokalunga.

¹² Kotoka tuu u dhiginine iipango mbika. Ino dhimbwa tuu kutya owa li omupika muEgipiti.”

¹³ “Shaa wa yungula iilya yoye ayihe, nowa kolo oomviinu dhoye, dhana Oshituthi shomatsali giihwa iitalala omasiku gaheyali.

¹⁴ Shi nyanyukilwa pamwe naamwoye, aapiya yoye, Aalevi, aakwiilongo, oothigwa naaselekadhi mboka ya kala miilando yeni.

¹⁵ Simaneka Omuwa Kalunga koye nokudhana oshituthi shika omasiku gaheyali pehala lyelongelokalunga. Nyanyukwa, oshoka Omuwa okwa yambeka eteyo lyoye niilonga yoye.”

¹⁶ “Aalumentu ayehe yoshigwana shoye oye na okuya, ya galikane Omuwa Kalunga koye lutatu momumvo kehe pehala lyelongelokalunga: pOpaasa, Oshituthi shoshiwike nOshituthi shomatsali giihwa iitalala. Omulumentu kehe oku na okweeta omagano,

¹⁷ ngaashi ta vulu pamuthika ngoka Omuwa Kalunga koye e mu yambekele elikolo lye.”

¹⁸ “Langeka aatokolihapu naambala yalwe miilando ayihe mbyoka Omuwa Kalunga koye te ku pe. Aalumentu mboka oye na okutokola oohapu dhaantu pwaa na ondhipi.

¹⁹ Kaye na okupilika uuyuuki nenge ya holole ondhipi; kaye na okutaamba oombumbo, oshoka iisimpo ohayi tsikitha omeho gaanandunge nohayi pilike oohapu dhaakaanandjo.

²⁰ Kala aluhe omunashili nomuyuuki, opo u ka lale evi ndyoka Omuwa Kalunga koye te li ku pe, u kale mo.

²¹ “Ngele to tungile Omuwa Kalunga koye oshiyambelo, pooha dhasho ino tsika po omiti dhiiyelekela yoshikalungakiintu Asheera.

²² Ino dhika ongundhimanya yoshikalunga, Omuwa ohe yi tondo.”

17

¹ “Omuwa Kalunga ino mu yambela ongombe nenge onzi ndjoka yi na oshipo; Omuwa ohe yi tondo.

² “Oto vulu okukundana kutya miilando yeni omu na omulumentu nenge omukiintu ta ningi shoka inaashi uka koshipala shOmuwa Kalunga koye nota taaguluka ehangano lye,

³ sho ta simaneke nokulongela iikalunga nenge etango nenge omwedhi nenge oonyothi, nando onde shi indika.

⁴ Ngele oto kundana ehokololo lya tya ngaaka, nena li konakona nawa. Ngele oshoshili kutya iinima mbika iinyanyalithi oya ningwa muIsrael,

⁵ nena fala omuntu ngoka pondje yoshilando e to mu dhipaga nomamanya.

⁶ Ota dhipagwa ashike, ngele ope na oonzapo mbali nenge odhindji tadhi mu tompo; ita dhipagwa, ngele ope na owala onzapo yimwe ayike.

⁷ Oonzapo otadhi mu dhaadhiga tango nomamanya, opo ihe aantu ayehe otaa dhipaga omuntu ngoka; pahedhi ndjika oto dhimi po uuwinayi.

⁸ “Ngele iinima yimwe tayi ku dhigupalele oku yi tokola ngaashi oontamanana dhuumwene womaliko nenge omaehameko golutu nenge okuyoolola pokati kedhipago lyowina naandyoka lyaa shi lyowina, inda kehala lyelongelokalunga lya hogololwa kOmuwa Kalunga koye,

⁹ tula omukundu gwoye miikaha yaayambi Aalevi noyomutokolihapu ngoka e li miilonga pethimbo ndyoka, opo ye ku tseyithile etokolo moshinima shoka.

¹⁰ Otaa gandja etokolo lyawo, nangoye ou na okuninga naanaa shoka taa ti.

¹¹ Taamba epangulo lyawo nokuninga naanaa patokolo ndyoka taye li ku tseyithile.

¹² Shaa ngoka ta ningi oshityani ye ita vulika komutokolihapu nenge komuyambi gwomiilonga, na dhipagwe po; pahedhi ndjika oto kutha mo uuwinayi muIsrael.

¹³ Opo shaa ngoka te shi uvu, ota tila, nokape na ngoka te ke shi yelekela we.”

¹⁴ “Ngele to ka thika mevi ndyoka Omuwa Kalunga koye te li ku pe, e to li lala, oto ka dhiladhila kutya oto pumbwa omukwaniilwa ngaashi iigwana ayihe ye ku kunduka yi na aakwaniilwa.

¹⁵ Kala u shi shi kutya omuntu ngoka to mu hogolola a ninge omukwaniilwa, oye ngoka ta hogololwa kOmuwa Kalunga koye. Na kale tuu gwomaakweni; omukwiilongo ino mu ninga omukwaniilwa.

¹⁶ Omukwaniilwa ina kala e na uukambe owindji wetangakwiita, noke na okutuma aantu kuEgipiti ya ka lande uukambe, oshoka Omuwa okwa ti, aantu ye inaa shuna we kuEgipiti.

¹⁷ Omukwaniilwa ina kala e na aanyekadhi oyendji, oshoka shika otashi mu pilamenitha Omuwa; ini ilikolela iisiliveli niingoli oyindjiyindji.

¹⁸ Uuna ta kwaniilekwa, na nyolithe oshifeka shembo lyompango ndjika sha kuthwa membo lyompango lya dhigininwa kaayambi Aalevi.

¹⁹ Embo ndika na kale nalyo ta lesha mo mokukalamwenyo kwe akuhe, opo i ilonge okutila Omuwa Kalunga ke nokudhiginina oohapu adhihe dhompango ndjika nomautho ngaka.

²⁰ Shika otashi mu keelele kuuntsa, i itale kutya ye omwaanawa e vule Aaisraeli ooyakwawo, nokokwaavulika kiipango yOmuwa pahedhi kehe. Nena ota lele omimvo odhindji, noluvalo lwe otalu lele Israel omapipi ogendji.”

18

¹ “Ezimo lyaLevi lyuuyambi itali taamba oshitopolwa shevi muIsrael; otali kala hali hupu koondjambo nomagano galwe ngoka ga yambelwa Omuwa.

² Kaye na oshitendelwa shevi lyawo yene ngaashi omazimo omakwawo. Omuwa oye mwene oshipewa shawo, ngaashi u uvaneka.

³ “Shaa ngoka ta yamba ongombe nenge onzi, oku na okupa aayambi oshooko, oondjego nela.

⁴ Oye na okupewa oshipe shiilya, shomaviinu, shomagadhi gooholivi noshomafufu goonzi.

⁵ Momazimo geni agehe Omuwa okwa hogolola mo ezimo lyaLevi, li kale lyaayambi ye mu longele aluhe sigo aluhe.”

⁶ “Omulevi kehe ngoka a hala okuza moshilando kehe muIsrael ta yi kehala lyelongelokalunga,

⁷ ota vulu okuyakula nkoka Omuwa Kalunga ke miilonga yuuyambi, a fa Aalevi mboka taa yakula ko.

⁸ Oku na okupewa iipalutha yi thike pumbyoka yaayambi yalwe, nando na kale a thigulula sha meliko lyezimo lyahe.”

⁹ “Nge to ka ya mevi ndyoka Omuwa Kalunga koye te li ku pe, ino landula omikalo dhi nyanyalitha dhiigwana mbyoka ya kala mo.

¹⁰ Ino yamba aamwoye omafikilondjambo kiiyambelo; ino pitika aantu yoye ya nonome nenge ya anekele, ya kale nuumpulile nenge ya lye omayuku,

¹¹ ya tikile nenge ya pule iihehelela, oombepo dhuumpulile nenge aathithi.

¹² Omuwa Kalunga koye oha tondo aantu mboka haa ningi iinima mbika iinyanyalithi, nomolwashoka te ku tidhitha mo iigwana mbyoka mevi.

¹³ Kala waa na ondjo yasha koshipala shOmuwa Kalunga koye.”

¹⁴ Moses okwa ti: “Iigwana mbyoka to ka tidha mo, ohayi pulakene aayanekeli noompulile, ihe Omuwa Kalunga koye ite ku pitika, u ninge ngaaka.

¹⁵ Ote ku tumine omuhunganeki a fa ndje ta zi mokati kooyakweni; oye mu na oku mu pulakena.

¹⁶ “Mesiku ndiyaka wa li pondundu Sinai, owa galikana, waa uve Omuwa ta popi ishewe nenge u mu tale momulilo, oshoka wa li wa tila, opo waa se.

¹⁷ Omuwa okwa lombwele ndje a ti: ‘Oya popi dhu uka.

¹⁸ Otandi ke ya pa omuhunganeki e ku fa ta zi maantu yawo yene; otandi ka tula oohapu dhandje mokana ke, oye nota ka lombwela aantu ayihe mbyoka tandi ti.

¹⁹ Ota ka popya medhina lyandje, notandi ka geela shaa ngoka ta tindi okuvulika kuye.

²⁰ Ngele oku na omuhunganeki ta fulu oohapu medhina lyandje ngame inaandi mu lombwela e shi ninge, otashi mu dhipagitha, osho wo omuhunganeki kehe ta popi medhina lyiikalunga.’

²¹ “Oto vulu okwiipopila momutima gwoye to ti: ‘Otatu tseya ngiini oohapu ndhoka Omuwa inee dhi popya?’

²² Ndhindhilika uuna omuhunganeki ta popi medhina lyOmuwa, naashoka a ti ngele inashi gwanithwa, nena inashi za kOmuwa. Omuhunganeki ta popi paye mwene, ino mu tila.”

19

¹ “Omuwa Kalunga koye ngele a hanagula po iigwana yevi ndyoka te ke li ku pa, nangoye ngele wa lala iilando nomagumbo gawo nowa tula mo.

² Topola evi ndyoka Omuwa Kalunga koye te ke li ku pa, miitopolwa itatu. Moshitopolwa kehe yoolola oshilando shimwe shopokati, moka omuntu ta vulu okuholama, ngele a dhipaga mukwawo.

³

⁴ Ngele omuntu ta dhipaga mukwawo hanowina ye ke shi omutondi gwe, ota vulu okumatukila mushimwe shomiilando mbika, a holame.

⁵ Ngaashika ando aantu yaali taa yi mokuti ya ka komangele omiti, ndele gumwe ta keke omuti, ekuya e tali hukuka ko e tali dhipaga mukwawo, ota vulu okumatukila kushimwe shomiilando mbika itatu e ta hupu.

⁶ Ngele oku na owala oshilando shimwe, noshinano oshile noonkondo, omukwawo gwanakudhipagwa ngoka te mu galulile iikonene yokudhipaga, ote mu kwata nomondjahi ota dhipaga omukeenandjo. Ndishi shika oshiponga, sho omuntu a dhipaga mukwawo ngoka a li kee shi omutondi gwe.

⁷ Omolwashoka tandi ku lombwele, wi iyoololele iilando itatu.

⁸ “Omuwa Kalunga koye ngele ta taandelitha oshilongo, ngaashi a lombwele oohokulu kutya ote shi ningi note ku pe evi alihe e li uvaneka,

⁹ ihogololela tuu natango iilando itatu. (Ote ke ku pa evi ndika, ngele oto gwanitha ayihe mbyoka tandi ku lombwele nena ndjika nongele ou hole Omuwa Kalunga koye e to ende pamalongo ge.)

¹⁰ Shi ninga, opo aantu aakaanandjo yaa se nowaa kale u na ondjo yoku ya dhipaga mevi ndyoka Omuwa Kalunga koye te li ku pe.

¹¹ “Ihe ngele oku na ngoka e tonde mukwawo e te mu langele note mu dhipaga owina e ta ka holama mushimwe shomiilando mbika itatu,

¹² nena aakuluntu yoshilando she naye mu tume ko a ze ko notaye mu gandja miikaha yanakupula ombinzi, opo e mu dhipage.

¹³ Ino mu sila ohenda. Kutha Israel momadhipagathano, opo u kale u na elago.”

¹⁴ “Ino lundulula ongamba yamushiinda shoye ndjoka ya tendwa nalenale koohokulu mevi ndyoka Omuwa Kalunga koye te ke li ku pa.”

¹⁵ “Onzapo yimwe ayike inayi gwana okutompitha omuntu moontamanana, shila ongele oonzapo dhi li po mbali nenge ndatu dhi holole kutya omuntu omusama.

¹⁶ Ngele ope na omuntu te ehameke mukwawo te mu etele ondjo yiifundja nenge uusama,

¹⁷ ayehe yaali naa ye kehala lyelongelokalunga e taa tokolwa kaayambi naatokolihapu mboka ye li moshilonga.

¹⁸ Aatokolihapu naa konakone oshinima nawa, nongele omuntu okwa ningi onzapo yiifundja okutamaneka mukwawo,

¹⁹ na geelwe negeelo ndyoka lya li li na okugeelwa mukwawo a lundilwa. Pahedhi ndjika oto kombo po uuwinayi mbuka.

²⁰ Nena ayehe taye shi kundana, otaa tila nokape na we ngoka ta ka halela mukwawo uuwinayi u thike mpoka.

²¹ Miinima ya tya ngeyi ino kala nando u na ohenda; egeelo nali kale tuu omwenyo omomwenyo, eho omeho, eyego omeyego, oshikaha omoshikaha nompadhi omompadhi.”

20

¹ “Ngele to ka hinga iita, u kondjithe aatondi yoye e to mono omatembakwiita nuukambe naakwiita oyendji ye ku vule, ino ya tila. Omuwa Kalunga koye, ngoka e ku tembudha mo muEgipiti, oku li pamwe nangoye.

² Manga inaamu tameka ehomono, omuyambi na holoke komeho e ta popitha aantu ta ti:

³ ‘Aaisraeli ne, pulakeneni! Ngashingeyi otamu ka homona. Inamu tila aatondi yeni nenge mu kanithe omukumo nenge mu piyagane.

⁴ Omuwa Kalunga keni ote ende pamwe nane e te mu pe esindano.’

⁵ “Opo ihe omalenga otaga lombwele aantu taga ti: ‘Pamwe ope na omuntu opo a tungu egumbo ye ine li yapula natango. Nongele osho, na shune kaandjawo. Ota ningi a dhipagelwe molugodhi, negumbo tali ka yapulwa kugulwe.

⁶ Pamwe ope na omuntu opo a tsike oshitsambe shomiviinu, ihe ina likola mo manga omandjembele gasho. Ngele osho ngaaka, na ye kegumbo. Ota ningi a ka dhipagelwe molugodhi, nagulwe ta ka nyanyukilwa omaviinu ngoka.

⁷ Pamwe ope na omuntu i ipyakidhila nohango e na omufuko. Ngele osho ngaaka, na ye kegumbo. Ota ningi a dhipagelwe molugodhi, nagulwe ta ka hokana po omufuko gwe.’

⁸ “Omalenga oge na ishewe okulombwela aantu taga ti: ‘Pamwe ope na omuntu e na uumbanda nokwa sholola. Ngele osho ngaaka, na ye kegumbo ota ningi a shoshomeke aantu.’

⁹ Omalenga sho ga mana okupopitha aantu, oondjayi dhiita nadhi tulwe komeho gaantu.

¹⁰ “Manga inoo ponokela oshilando shontumba, tango shi pa ompito yokwiigandja kungoye.

¹¹ Ngele otaye egulula omiyelo notayi igandja, ayehe oye na okuninga aapika yoye notaye ku longele.

¹² Ihe aantu yomoshilando shoka ngele itayi igandja, oya hala okukondja, shi kondeka netangakwiita lyoye.

¹³ Omuwa Kalunga koye ngele okwe ku pe po oshilando, dhipaga aalumentu yamo ayehe.

¹⁴ Yuga po aakulukadhi, aanona niimuna naashihe shi li moshilando. Oto vulu okulongitha eliko lyaatondi yoye alihe ndyoka Omuwa Kalunga koye te li ku pe.

¹⁵ Iilando ayihe mbyoka yi li kokule noshilongo shoye, osho to yi ningi ngaaka.

¹⁶ “Ihe uuna to kwata po iilando mevi ndyoka Omuwa Kalunga koye te li ku pe, dhipaga omuntu kehe.

¹⁷ Aantu ayehe ya dhima po thilu: Aaheti, Aayamori, Aakaanana, Aaperesi, Aahevi nAayebusi, ngaashi Omuwa a ti nashi ningwe.

¹⁸ Ya dhipaga po, opo yaa ku yonithe kOmuwa, sho taye ku longo iinonoma yawo yiihuna mbyoka haa ningi mokusaagela iikalunga yawo.

¹⁹ “Ngele to kambadhala okukwata po oshilando, omiti dhasho dhiiyimati ino dhi keka po, nando shi kale ethimbo ele mekondeka lyoye. Lya iiyimati, ino keka po omiti; omiti kadhi shi aatondi yoye.

²⁰ Oto vulu okukomangela po omiti ndhoka hadhi imi iiyimati ihaayi liwa, opo u dhi dhike mekondeka lyoshilando, sigo sha kwatwa po.”

21

¹ “Pamwe otaku monika omuntu a dhipagelwa melundu mevi ndyoka Omuwa Kalunga koye te li ku pe, ngoye waa shi wo ngoka e mu dhipaga.

² Aawiliki naatokolihapu yoye naa ye ko ya yeleke oshinano okuza mpoka pu na omudhimba sigo okiilando mbyoka yi li popepi.

³ Aawiliki yoshilando shoka shi li popepi naampoka pwa monika omudhimba, oyo naa hogolole ondema yongombe inaayi longithwa sha.

⁴ Naye yi fale kesilu hali tondoka omeya, ihe mooha dhalyo inamu pululwa mo inamu kunwa sha. Oko naye yi teyele othingo hoka.

⁵ Aayambi Aalevi oye na okuya ko wo, oshoka oyo ye na okutokola iinima ayihe yoontamanana noyomaponokelo. Omuwa Kalunga koye okwe ya hogolola ye mu longele noya tumbulile aantu omayambeko medhina lye.

⁶ Aawiliki ayehe ya za moshilando shi li popepi nehala ndyoka omuntu a dhipagelwa, naa yogele iikaha yawo kombanda yondema

⁷ e taa ti: ‘Tse inatu dhipaga omuntu nguka, tse katu shi ngoka e mu dhipaga.

⁸ Omuwa, dhimina po aantu yoye Aaisraeli, mboka we ya mangulula muEgipiti. Tu dhimina po ngoye ino tu tala tu na ondjo yedhipago lyomuntu nguka kee na ondjo.’

⁹ Ano mokuninga shoka sho opalela Omuwa ito kala we u na ondjo yedhipago.”

¹⁰ “Uuna Omuwa Kalunga koye te ku pe esindano molugodhi e to kwata oonkwatwa,

¹¹ mokati kawo oto vulu okumona mo esingi noto mu hokwa wa hala oku mu hokana.

¹² Mu kutha u mu fale kaandjeni, nkoka ta kulula omutse gwe nokuteta oonyala dhe

¹³ e ta lundulula oonguwo dhe. Ota kala ihe maandjeni e ta lili he nayina uule womwedhi; konima yaambika oto vulu oku mu hokana.

¹⁴ Komeho ngele nani ino mu hala we, mu etha a ye. Ino mu landitha po ngoye ino mu pika, oshoka owa lala naye.”

¹⁵ “Ngele oku na omulumentu e na aakiintu yaali naayehe taye mu valele aamati, ihe nani osheeli kashi shi omuna gwomuholike gwe, ogwaanguka kee holike unene,

¹⁶ omusamane mokutopolela oyana eliko lye, ina pa nando omuna gwomuholike gwe oshindji, a tondole osheeli koshitopolelwa she shuusheeli.

¹⁷ Osheeli ne shi pe lwaali, nando inashi valwa komuholike gwe. Omusamane oku na okutunda osheeli e te shi pe oshipewa she shi sheyelwa.”

¹⁸ “Ngele oku na omuntu e na omwanamati omutangalali nomulunduki, ngoka ihaa vulika kuhe nayina, nando naye mu geele,

¹⁹ he nayina naye mu fale koshipala shaawiliki yoshilando shaandjawo posheelo shoshilando.

²⁰ Naa lombwele aawiliki yoshilando taa ti: ‘Omumwetu nguka omutangalali nomulunduki ta tindi okuvulika kutse; oye omuntu omuhanaguli nonkolwi.’

²¹ Nena aantu yomoshilando naye mu dhipage nomamanya, nosho ngaaka to dhimi mo uuwinayi. Aantu ayehe muIsrael otaye ke shi kundana e taa tila.”

²² “Momuntu ngele omu na ombedhi onene yoku mu dhipagitha e ta tulwa kohake,

²³ omudhimba gwe inagu endjelela komuti sigo ongulohi. Nagu fumvikwe esiku ndyoka, oshoka ngoka e endjelela momuti, okwa thingwa kuKalunga. Fumvika omudhimba, opo waa nyateke evi ndyoka Omuwa Kalunga koye te li ku pe.”

22

¹ “Ngele to mono ongombe nenge onzi yamukweni ya kana, yi galula e to yi shuna kumwene.

² Mwene ngele oku li kokule nenge ku mu shi, nena yi fala kaandjeni. Uuna mwene gwayo te yi kongo, yi mu pa.

³ Osho wo ninga, ngele owa mono okasino, oonguwo nenge shaa shoka shilwe mukweni a kanitha.”

⁴ “Ngele okasino nenge ongombe yamukweni ya gundila mondjila, ino mu holama. Mu kwatha mu yi tumbe po, yi thikame ishewe.”

⁵ “Aakiintu inaa zala omizalo dhoshilumentu, naalumentu inaa zala omizalo dhoshikiintu; Omuwa Kalunga koye oha tondo aantu haa ningi iinima ya tya ngaaka.

⁶ “Ngele ou li mondjila e to itsu oshihandhila momuti, nenge pevi pu na omvugo nondhila yu utumanena uunimona nenge omayi, ino kutha po yina nuunimona wayo.

⁷ Oto vulu okukutha po uudhilona, ihe yina yi etha yi ye, opo ngoye u kale nelago nonomwenyo omule.”

⁸ “Ngele to tungu ongulu ompe, kontala yayo tungila ko omushigo, opo waa etele egumbo lyoye ondjo yombinzi, ngele gulwe ta gu ko e ta si.”

⁹ “Moshitsambe shoye shomiviinu ino kuna mo oombuto dhomaludhi gaali. Ngele oto shi ningi, owa keelelwa okulongitha omaludhi agehe gaali, omandjembele noshilikolwa shoka shilwe.”

¹⁰ “Ino kutila onani nokasino kondjoko yimwe mepululo.”

¹¹ “Ino zala onguwo ya tungwa momafufu goonzi noliina mumwe.”

¹² “Itungila oondjendjelela dhi endjelele koonkotso ne dhomuzalo gwoye.”

¹³ “Ngele oku na omulumentu ta hokana omukiintu e ta lala naye, ndele te mu kunyukwa

¹⁴ te mu lundile nokutaandelitha oohapu oombwinayi ta ti: ‘Onda hokana omukiintu nguka, ihe sho nda yi kuye, ine mona uukadhona we,’

¹⁵ nena he nayina naa kuthe endhindhiliko lyuukadhona we e taye li fala koompangu kaawiliki yoshilando.

¹⁶ He yomukadhona ota ti kuyo: ‘Onda gandja omumwandjekadhona komulumentu nguka a ninge omukadhi, ihe okwe mu tondo.

¹⁷ Okwe mu lundile oohapu dhiifundja ta ti, ka li omukadhona, sho e mu hokana, ihe mpaka ope na endhindhiliko tali holola kutya omumwandjekadhona okwa li shili omukadhonalela.’ Oyo notaa yala onguwo komeho gaawiliki.

¹⁸ Nena aawiliki yoshilando naa kuthe omuntu ngoka e taye mu dhenge.

¹⁹ Naye mu futithe iimaliwa iisiliveli ethele, niimaliwa mbika otaye yi pe he yomukadhona, oshoka omuntu ngoka okwe etele omukadhona Omuisraeli ohoni. Ota ningi omukadhi sigo aluhe, noita vulu oku mu henga po omasiku ge agehe, manga e na omwenyo.

²⁰ “Ihe ngele omufuko oku na uusama, noinapu monika endhindhiliko kutya oye omukadhonalela,

²¹ na falwe keelo lyaandjahe, nkoka aalumentu yomoshilando taye mu dhipagele nomamanya. Okwa ningi esithahoni muIsrael, sho a hondelelwa maandjahe. Pahedhi ndjika oto dhimi po uuwinayi wa tya ngaaka.

²² “Ngele oku na omulumentu ta kwatwa moluhondelo a lala nomukiintu gwamukwawo, ayehe yaali naa dhipagwe. Osho ngeyi to kombo mo uuwinayi muIsrael.

²³ “Ngele oku na omukiintu a yalekwa kumwene, nomuntu gulwe te mu tsakaneke moshilando e ta lala naye,

²⁴ nena ayehe yaali ya faleni keelo lyoshilando e tamu ya dhipaga nomamanya. Omukiintu na dhipagwe, oshoka okwa li e na okukuga onkugo moshilando, nomulumentu, oshoka okwa lala nomuyalekwa gwamukwawo. Osho ngeyi to kombo po uuwinayi mokati keni.

²⁵ “Ngele oku na omulumentu ta adha omukadhona a yalekwa e li melundu, e te mu kwata nokulala naye, omulumentu ngoka a lala naye, oye awike na se.

²⁶ Ihe omukadhona ina ningwa sha, ke na ondjo yokusa. Shika osha fa owala omuntu a ponokelwa kumukwawo e te mu dhipaga.

²⁷ Omulumentu okwe mu tsakaneke melundu, omukadhona omuyalekwa okwa kugu, ihe kakwa li ngoka a tondoka onkugo ye.

²⁸ “Ngele oku na omulumentu ta adha omukadhona ngoka inaa yalekwa, e te mu kwata nokulala naye e taa adhikilila,

²⁹ nena omulumentu ngoka a lala naye oku na okufuta he yomukadhona iimaliwa iisiliveli omilongo ntano noku na oku mu hokana po, oshoka okwe mu kwata koonkondo. Na kale itee mu henge po sigo aluhe.

³⁰ “Hamulumentu ta hokana omukiintu gwahe, opo kaa sithe he ohoni.”

23

¹ “Omulumentu a tetwa uulumentu nenge a thelekenywa omatondo, ita kala mo megongalo lyOmuwa.

² “Omuntu gwoombinzi mbali ita vulu okukala megongalo lyOmuwa, nokuli oluvalo lwe olutimulongo italu vulu okukala megongalo lyOmuwa.

³ “Omuammoni nenge Omumoabi ke na okukala megongalo lyOmuwa, nando oluvalo lwepipi etimulongo.

⁴ Oya tindi oku ku yakula niikulya nomeya, sho wa li mondjila to zi kuEgipiti, noya futu Bileam yaBeor gwokoshilando Petor muMesopotamia, e ku lye muumpulile.

⁵ Ihe Omuwa Kalunga koye ina pulakena Bileam, peha lyoku ku thinga okwe ku laleke nuuyamba, oshoka oku ku hole.

⁶ Aluhe sigo aluhe ino ninga sha tashi kwatha iigwana mbika okumona elago.

⁷ “Ino nyanyala Aaedom, oshoka oyo aakweni. Ino dhina Aayegipiti; owa li mevi lyawo.

⁸ Epipi etitatu lyoluvalo lwawo otali vulu okukala megongalo lyOmuwa.”

⁹ “Uuna u li montanda pethimbo lyiita, ou na okukutha po ashihe shoka tashi ku nyateke.

¹⁰ Ngele omulumentu okwa nyata, molwaashoka okwa hiha omasita goluvalo uusiku, na pite mo a ye pondje yontanda.

¹¹ Lwokomatango ni iyoge, nopeningino lyetango ota vulu okuya montanda.”

¹² “Ou na okukala u na ehala pondje yontanda, nkoka to ka hundama.

¹³ Kala u na okapani, opo nge wa yi kondje u fulile oonyata dhoye.

¹⁴ Dhiginina uuyogoki wontanda, oshoka Omuwa Kalunga koye oku li pungoye montanda, e ku gamene noku ku pa esindano okusinda aatondi yoye. Ino ninga esithahoni lyasha tali pilamenitha Omuwa kungoye.”

¹⁵ “Omupika ngele okwa yi mwene gwe ontuku e te ya, a konge egameno kungoye, ino mu shunitha.”

¹⁶ Na kale mushimwe shomiilando yoye shoka a hogolola; ngoye ino mu ninga onyanya.

¹⁷ “Aakadhona aana yAaisraeli inaa ninga oohonda dhiikalunga, naamati inaa kala aasithahoni.

¹⁸ Mokugwanitha euvaneko lyoye ino yambela Omuwa iimaliwa ya za miihuna yoluhondelo. Oyo iikungitha koshipala shOmuwa.

¹⁹ “Ino pula Omuisraeli omukweni ontanitho kiimaliwa nenge elikolo kiikulya nenge sha shilwe sha hehelwa.

²⁰ Omukwiilongo oto vulu oku mu pula ontanitho kiimaliwa ya hehelwa, ihe omukweni ino yi mu pula. Vulika keutho ndika, nOmuwa Kalunga koye ote ku yambeke mwaayihe mbyoka to ningi mevi ndyoka to ke li lala.

²¹ “Ngele to uvanekele sha Omuwa Kalunga koye, ino shelelelwa okugwanitha shoka wu uvaneke; Omuwa ota tegelele euvaneko lyoye, notashi ningi ondjo, ngele ino li gwanitha.

²² Kayi shi ondjo, ngele ito uvaneke sha,

²³ ihe ngele oto uvaneke sha pahalo lyoye mwene, nena gwanitha shili euvaneko lyoye.”

²⁴ “Uuna to ende mepola moshitsambe shamukweni, oto vulu okulya omandjembele agehe wa hala, ihe ito vulu oku ga tula mompunda yoye u ye nago.

²⁵ Uuna to ende mepola mepya lyamukweni, oto vulu okupolola omaha u lye, ihe ito vulu okumwa po iilya yaantu noshimwitho.”

24

¹ Natu tye omuntu ota hokana omukiintu e te mu kunyukwa, molwashoka a mono muye ombedhi yasha. Ota nyola onzapo yehengo e te yi mu pe noku mu laleka mo megumbo lye.

² Omukiintu ngoka ota hokanwa kugulwe,

³ naanguka wo ote mu si uunye, ta nyola onzapo yehengo, te yi mu pe noku mu laleka mo megumbo lye; nenge omulume nguka ota mana oondjenda.

⁴ Nena omulumentu gwe gwotango ita vulu we oku mu hokanununa, ihe oku mu tala a nyata. Ngele ote mu hokanununa, shoka otashi ningi ondjo momeho gOmuwa. Ino longa iihuna ya tya ngaaka mevi ndyoka Omuwa Kalunga koye te li ku pe.

⁵ “Omulumentu ngele opo a hokana, ita pumbwa okuya kiita nenge kiilonga yuupyakadhi ulwe; na manguluke kuupyakadhi kehe omumvo gumwe, opo a wape okukala pegumbo a nyanyudhe omukadhi.”

⁶ “Kape na ngoka ta kutha po oshini ombambyona, oshoka oshini osho hashi tsilwa iilyamwenyo gwomuntu.

⁷ “Ngele ope na ngoka ta kwata Omuisraeli omukwawo, e mu ninge omupika gwe nenge e mu landithe po muupika, na dhipagwe. Komba po uuwinayi mokati keni.”

⁸ “Uuna to adhika kuuvu woshilundu, kotoka u ninge shili, ngaashi aayambi Aalevi taye ku lombwele. Dhiginina nawa omapukululo ngoka nde ge ya pa.

⁹ Dhimbulukwa Omuwa Kalunga koye shoka a ningile Miriam mondjila yokutembuka kweni muEgipiti.”

¹⁰ “Ngele owa hehelelwe sha kumukweni, ino ya maandjawo, u kwate po ekumbyatha lye ombambyona;

¹¹ tegelela pondje, e li ete kungoye ye mwene.

¹² Ngele oye ohepele, ino kala nalyo sigo ongulohi;

¹³ li shunitha kuye ongulohi kehe, e ki isiikile nalyo. Nena ota pandula, nOmuwa Kalunga koye ote ku yambeke.

¹⁴ “Ino kotokela nakufutwa ohepele nomukweyi, ongele Omuisraeli omukweni nenge omukwiilongo a kala miilando yoye.

¹⁵ Mu futa ondjambi ye esiku kehe, manga etango inaali ningina; ota pumbwa iimaliwa noku na etegameno kutya ote ke yi pewa. Ngele ito mu futu, ota kugile Omuwa onkugo, notashi ku ningile ondjo.”

¹⁶ “Aakuluntu inaa dhipagelwa oondjo dhoyana, noyana inaa dhipagelwa oondjo dhahe. Shaa ngoka na dhipagelwe iipogo ye mwene.

¹⁷ “Ino goyokitha uuthemba waakwiilongo nowoothigwa, nekumbyatha lyomuselekadhi ino li kwata po ombambyona.

¹⁸ Dhimbulukwa tuu kutya owa li omupika muEgipiti, nOmuwa Kalunga koye okwe ku mangulula; omolwashoka tandi ku pe oshipango shika.

¹⁹ “Uuna to teya iilya yoye, e to dhimbwa ondudhi yimwe mepya, ino ya ko we, u ke yi tale ko; nayi ninge yaakwiilongo, yoothigwa noyaaselekadhi, opo Omuwa Kalunga koye e ku yambeke mwaayihe to yi ningi.

²⁰ Ngele to shopola ko ooholivi dhoye, ino kutha ko nomakukila; naga ninge gaakwiilongo, goothigwa nogaaselekadhi.

²¹ Nge to likola omandjembele goye, omuviinu ino gu sinasina thiluthilu; omandjembele ngoka taga kala po, naga ninge gaakwiilongo, goothigwa nogaaselekadhi.

²² Dhimbulukwa tuu kutya owa li omupika muEgipiti, nomolwashoka tandi ku pe oshipango shika.”

25

¹ “Ngele Aaisraeli yaali otaa tamanana e taa yi koompangu, nagumwe ta monika kee na ondjo namukwawo omunandjo,

² omunandjo ngele ota dhengwa, omutokolihapu ne mu langeke egombe ye e mu dhengithe. Omwaalu gwomadhengo nagu faathanithwe nondjo ndjoka e na.

³ Ina dhengwa oongola dhi vule omilongo ne, opo kaa sithwe ohoni koshipala shoye.”

⁴ “Ino manga okana konani ndjoka tayi yungula nokulyatagulithwa iilya molupale.”

⁵ “Ngele ope na omuntu namumwayina ya kalathana puushiinda, nagumwe gwomuyo ta si inaa vala omumati, omukiintu gwanakusa ina hokanwa kaayeni, suwala ye ne mu kuthe po, e mu hokane po.

⁶ Omunona gwotango omumati ota ka yalulwa omuna gwanakusa, opo ezimo lye li kale po muIsrael.

⁷ Ihe omumwayina gwanakusa ngele ina hala e mu kuthe po, nena omukiintu ota yi kaawiliki yoshilando e ta ti: ‘Suwala yandje ina hala a gwanithe oshinakugwanithwa she; okwa tinda okupa omumwayina oluvalo mokati kAaisrael.’

⁸ Nena aawiliki yoshilando oye na okwiithana omulumentu ngoka, ye mu popithe. Ngele natango ota tindi okuhokana suwala ye,

⁹ omuselekadhi na ye kuye montaneho yaawiliki, ta kutha po olukaku lwe noku mu hiyila omayeye moshipala ta ti: ‘Osho ngaaka tashi ningilwa omuntu ngoka ta tindi okupa omumwayina oluvalo.’

¹⁰ Ezimo lye muIsrael otali ka tseyika ‘ezimo lyomuntu a hulwa olukaku.’ ”

¹¹ “Ngele oku na aalumentu yaali taa kondjo, nomukulukadhi gwagumwe gwaambaka taa kondjo te ya a popile omulume nomoku shi ninga ta kwata ngwiyaka komatondo,

¹² ina silwa nando ohenda; oshikaha she nashi tetwe ko.

¹³ “Ino kotokela mokulongitha iiyelekitho yiifundja yuudhigu nenge yiipindomwa.

¹⁴

¹⁵ Longitha oomasandjundo dhi shi kwiinekelwa, opo u kale u na omwenyo omule mevi ndyoka Omuwa Kalunga koye te li ku pe.

¹⁶ Omuwa oha tondo aantu mboka haa kotokele.”

¹⁷ “Dhimbulukwa shoka Aayamaleki ye ku ningile, sho wa li mondjila to zi muEgipiti.

¹⁸ Oya li inaa tila Kalunga noye ku kaakene, sho wa li wa vulwa nowa nkundipala, e taa dhipaga ayehe mboka ya li monima taa ende taa gaganyata.

¹⁹ Onkee ano shampa Omuwa Kalunga koye e ku pe evi ndyoka nokwe ku gamene kaatondi yoye ayehe mboka ye ku kunduka, dhipaga po Aayamaleki ayehe, opo pwaa kale ngoka te ya dhimbulukwa we kombanda yevi. Ino shi dhimbwa tuu!”

26

¹ “Ngele wa kwata po evi ndyoka Omuwa Kalunga koye te li ku pe e to tula mo,

² tula oshipe shiilikolwa yoye ayihe montungwa e to yi nayo kehala lyelongelokalunga.

³ Inda komuyambi ngoka e li miilonga pethimbo ndyoka e to mu lombwele to ti: ‘Ngashingeyi ngame otandi koleke koshipala shOmuwa Kalunga kandje kutya onde ya mevi ndyoka e li uvanekele ootatekulu te li tu pe.’

⁴ “Omuyambi ota kutha po ontungwa pungoye e te yi tula komeho goshiyambelo shOmuwa Kalunga koye.

⁵ Tangumuna ihe koshipala shOmuwa Kalunga koye to ti: ‘Tatekulu okwa li Omuaramea ondjendi nokwa yi kuEgipiti negumbo lye a kale ko. Oya li aashona momwaalu, sho ya yi ko, ihe oyi indjipala noya ningi oshigwana oshinankondo.

⁶ Aayegipiti oye tu ningi onyanya noye tu thiminikile iilonga yuupika.

⁷ Nena otwa kugile Omuwa Kalunga kootatekulu onkugo. Okwe tu uvu e ta mono uuwehame, uudhigu nuukweyi wetu.

⁸ Okwe tu tembudha mo muEgipiti noshikaha she shoonkondo nokwooko kwa taganana. Okwa longo iilongandhindhiliko niinyengandunge niitilithilonga ya ningwa.

⁹ Okwe tu eta huka e te tu pe evi ndika lya tondoka omahini nomagadhi goonyushi.

¹⁰ Onkee ngashingeyi onde etele Omuwa oshipe shiilikolwa yevi e li pe ndje.’ “Tula ihe ontungwa koshipala shOmuwa e to galikana.

¹¹ Nyanyukilwa iinima ayihe iiwanawa Omuwa Kalunga koye e yi ku pe negumbo lyoye; nyanyudha wo Aalevi naakwiilongo mboka ye li pungoye.”

¹² “Omumvo omutitatu kehe ogwo omumvo gwoshitimulongo. Gandja oshitimulongo shiilya yoye ayihe kAalevi, kaakwiilongo, koothigwa nokaaselekadhi yomiilando yoye, opo ya mone iipalutha noya kute. Ngele wa ningi ngeyi,

¹³ tya kOmuwa Kalunga koye: ‘Onda kutha megumbo lyandje oshitimulongo ashihe oshiyapuki nonde shi pa Aalevi, aakwiilongo, oothigwa naaselekadhi, ngaashi wa pa ndje oshipango ndi shi ninge. Kombinga yoshitimulongo inandi yona kiipango yoye nenge ndi yi dhimbwe.

¹⁴ Ine lya sha shomusho, sho nda li moluhodhi; ine kutha mo sha maandjetu, sho nda li nda nika oshidhila; noinandi gandja mo sha shi ninge ondjambo yoonakusa. Onda vulika kungoye, Omuwa; onda gwanitha ashihe wa popi kombinga yoshitimulongo.

¹⁵ Tu taalela megulu, monkalelo yoye ondjapuki, u yambeke aantu yoye Aaisraeli; yambeka wo evi ndika lya tondoka omahini nomagadhi goonyushi, ndyoka we li tu pe, ngaashi u uvanekele ootatekulu.’

¹⁶ “Nena ndjika Omuwa Kalunga koye ote ku lombwele, u vulike koompango dhe adhihe; dhi dhiginina ano komutima gwoye aguhe nokomwenyo gwoye aguhe.

¹⁷ Nena ndjika owa koleke kutya Omuwa oye Kalunga koye; owu uvaneke okuvulika kuye, okudhiginina oompango dhe adhihe nokuninga ashihe ta popi.

¹⁸ Nena ndjika Omuwa okwa koleke kutya ongoye oshigwana she mwene, ngaashi e ku uvanekele; nokwe ku lombwele, u dhiginine oompango dhe adhihe.

¹⁹ Ote ku nenepeke u vule iigwana ayihe yilwe mbyoka e yi shiti, noto ka etela edhina lye ehambelelo, esimano nepandulo. Oto ka ninga oshigwana she mwene, ngaashi u uvaneke.”

27

¹ Moses naawiliki yaIsrael oya lombwele aantu ya ti: “Dhiginineni iipango ayihe tandi yi mu lombwele nena ndjika.

² Uuna tamu ka tokola Jordan, mu ye mevi ndyoka Omuwa Kalunga keni te li mu pe, omu na okudhika omamanya omanene e tamu ga gwayeke nokaalaka.

³ Nyoleleni kugo oompango ndhika adhihe nomalongo. Uuna mwa thiki kevi ndyoka lya tondoka omahini nomagadhi goonyushi, Omuwa Kalunga koohokulu e li mu uvanekele,

⁴ nomwa yi handiyaka yaJordan, dhikeni omamanya ngaka kondundu Ebal, ngaashi tandi mu lombwele nena ndjika, ne mu ga gwayeke nokaalaka.

⁵ Tungilii ko oshiyambelo shomamanya inaaga gumithwa osheela,

⁶ molwashoka oshiyambelo kehe tamu tungile Omuwa Kalunga keni, oshi na okutungwa nomamanya inaaga hongwa. Oko nkoka tamu yambele Omuwa Kalunga keni omafikilondjambo,

⁷ noko nkoka tamu yambele ko nokulya omakwatathanondjambo e tamu nyanyukilwa koshipala shOmuwa Kalunga keni.

⁸ Komamanya ngoka ga gwayekwa nokaalaka, otamu nyolele ko iitya ayihe ya tonata nawa yoompango dhaKalunga.”

⁹ Moses pamwe naayambi Aalevi oya lombwele ihe Aaisraeli ayehe ya ti: “Aaisraeli ne, mweneni ne mu pulakene ndje. Onena tuu ndjika mwa ningi oshigwana shOmuwa Kalunga keni.

¹⁰ Vulikeni ano kuye ne mu dhiginine oompango dhe adhihe tandi dhi mu pe nena ndjika.”

¹¹ Moses okwa lombwele Aaisraeli e ta ti:

¹² “Shampa mwa tokola Jordan, omazimo ngoka ge na okuthikama kondundu Garizim, uuna omayambeko taga tumbulilwa aantu, ogo: Simeon, Levi, Juda, Issaskar, Josef naBenjamin.

¹³ Omazimo taga thikama kondundu Ebal, uuna etulomutima tali tumbulwa, ogo: Ruben, Gad, Aser, Sebulon, Dan naNaftali.

¹⁴ Aalevi otaa ka popya oohapu ndhika mokule taa ti:

¹⁵ “ ‘Kalunga na tule omutima kehe ngoka ta hongo oshimenka shemanya, shoshiti nenge shosheela note shi saagele meholamo; Omuwa oha tondo iimenka.’ “Aantu ayehe naa yamukule taa ti: ‘Amen!’

¹⁶ “ ‘Kalunga na tule omutima shaa ngoka ta dhini he nenge yina.’ “Aantu ayehe naa yamukule taa ti: ‘Amen!’

¹⁷ “ ‘Kalunga na tule omutima shaa ngoka ta lundulula ongamba yamukwawo.’ “Naantu ayehe naa yamukule taa ti: ‘Amen!’

¹⁸ “ ‘Kalunga na tule omutima shaa ngoka ta pukitha omuposi.’ “Naantu ayehe naa yamukule taa ti: ‘Amen!’

¹⁹ “ ‘Kalunga na tule omutima shaa ngoka ta goyokitha uuyuuki waakwiilongo, woothigwa nowaaselekadhi.’ “Naantu ayehe naa yamukule taa ti: ‘Amen!’

²⁰ “ ‘Kalunga na tule omutima shaa ngoka ta lala nomukulukadhi gwahe, oshoka okwa sitha he ohoni.’ “Naantu ayehe naa yamukule taa ti: ‘Amen!’

²¹ “ ‘Kalunga na tule omutima shaa ngoka ta lala noshimuna.’ “Naantu ayehe naa yamukule taa ti: ‘Amen!’

²² “ ‘Kalunga na tule omutima shaa ngoka ta lala nomumwayina nenge nomumwahe.’ “Naantu ayehe naa yamukule taa ti: ‘Amen!’

²³ “ ‘Kalunga na tule omutima shaa ngoka ta lala nayinamweno.’ “Naantu ayehe naa yamukule taa ti: ‘Amen!’

²⁴ “ ‘Kalunga na tule omutima shaa ngoka ta dhipaga meholamo.’ “Naantu ayehe naa yamukule taa ti: ‘Amen!’

²⁵ “ ‘Kalunga na tule omutima shaa ngoka ta taamba ombumbo, opo a dhipage omukeenandjo.’ “Naantu ayehe naa yamukule taa ti: ‘Amen!’

²⁶ “ ‘Kalunga na tule omutima shaa ngoka itaa vulika koompango nomalongo gaKalunga agehe ngaka.’ “Naantu ayehe naa yamukule taa ti: ‘Amen!’ ”

28

¹ “Ngele oto vulika kOmuwa Kalunga koye e to dhiginine shili iipango ye ayihe mbyoka tandi yi ku pe nena, ote ke ku nenepeka u vule iigwana ayihe kombanda yevi.

² Vulika ano kOmuwa Kalunga koye, nomayambeko ngaka agehe otaga ka ninga goye.

³ “Omuwa ota yambeke omikunda dhoye nomapya goye.

⁴ “Omuwa ote ku yambekele oluvalo lwoye, eloolo lyiimeno yoye niimuna yoye oongombe noonzi.

⁵ “Omuwa ota yambeke iilya yoye niikulya ya za muyo.

⁶ “Omuwa ota yambeke ashihe to shi ningi.

⁷ “Omuwa ota ka dhenga aatondi yoye, uuna taye ku ponokele. Nge taye ya, otaa ziilile kombinga yimwe, ihe otaa ka halakana noondjila heyali taa yi ontuku.

⁸ “Omuwa Kalunga koye ota ka yambeka iilonga yoye nota ka udhitha iigandhi yoye iilya. Ote ku yambeke mevi ndyoka te li ku pe.

⁹ “Ngele oto vulika kOmuwa Kalunga koye e to gwanitha ayihe mbyoka a popi, ote ku ningi oshigwana she mwene, ngaashi u uvaneke.

¹⁰ Nena iigwana ayihe kombanda yevi otayi ka mona kutya Omuwa okwe ku hogolola u ninge oshigwana she mwene, oyo notayi ku tila.

¹¹ Omuwa ote ke ku pa oluvalo olwindji, iimuna oyindji neloolo lyiilya mevi ndyoka e li uvanekele oohokulu te li ku pe.

¹² Ota ka lokitha omvula pethimbo lyo opala tayi zi mompungulo ye yeloolo megulu nokuyambeka iilonga yoye ayihe; oto ka lilwa oongunga kiigwana oyindji, ihe ngoye ito pumbwa okuhehela nando okushimwe shayo.

¹³ Omuwa Kalunga koye ote ke ku ninga omuwiliki mokati kiigwana, hamulandulishinkoti; oto ka kala aluhe u na elago noito shunduka, ngele to vulika shili kiipango mbyoka ayihe tandi yi ku pe nena ndjika.

¹⁴ Ihe ino gamuka ko kuyo, u uke kolulyo nenge kolumoho nenge u simaneke nokulongela iikalunga.”

¹⁵ “Ihe ngele ito vulika kOmuwa Kalunga koye noito dhiginine shili omautho niipango ye ayihe mbyoka tandi yi ku pe nena, etulomutima alihe ndika otali ku adha e tali ku thingi:

¹⁶ “Omuwa ota ka tula omutima iilando yoye nomalundu goye.

¹⁷ “Omuwa ota ka tula omutima iilya yoye niikulya ya za muyo.

¹⁸ “Omuwa ote ke ku tula omutima gwoluvalo lwa pumba, gwiilya ya theta noongombe noonzi dhimwedhimwe adhike.

¹⁹ “Omuwa ota ka tula omutima ashihe to shi ningi.

²⁰ “Ngele oto ningi nayi nokutinda Omuwa, ote ku undulile omupya, evundakano nomalwa mwaayihe to yi ningi, sigo wa yonuka po thiluthilu.

²¹ Ote ku tumine omalega, sigo wa pu mo naanaa moshilongo shoka to ka lala.

²² Omuwa ote ku umbu uuvu wepunga, olwiidhi nomuthithilalo; ote ku tumine omutenya gwetokopya noluteni nokukukutika po iimeno yoye. Omupya nguka otagu ku hepeke, sigo wa si.

²³ Omvula itayi ka loka we, nevi lyoye otali ka kalanda lya fa emanya.

²⁴ Peha lyomvula Omuwa ote ke ku tumina ontsi nomutoko, sigo wa hanagulwa po.

²⁵ “Omuwa ote ku sinditha kaatondi yoye. Oto ya homona to ziilile kombinga yimwe, ihe oto ke ya ya ontuku wa lamba oondjila heyali, naantu ayehe kombanda yevi otaa ka tila, ngele taa mono mbika tayi ku ningilwa.

²⁶ Uuna tamu ka sa, oondhila niithitukuti otayi ka lya po omidhimba dheni, nokape na ngoka te yi halutha.

²⁷ Omuwa ote ke ku tumina iitumbuka, ngaashi a ningile Aayegipiti. Olutu lwoye ote ke lu tutitha iilalo. Oto ka kakata iitumbuka nomaankadhi e to ka kala to nyu, ihe itaku ka kala omuti gwasha.

²⁸ Omuwa ote ku umbu uuvu woonkwengu e te ku umbile uuposi nepiyagano.

²⁹ Oto ka pampadhala moshanga shomutenya wa fa omuposi, noito vulu okumona ondjila yoye. Ito ka kala u na elago mwaayihe to yi ningi. Oto ka thindilwa pevi aluhe nokuyugwa, nopwaa na ngoka te ku kwatha.

³⁰ “Oto ka yaleka omukadhona — ihe gulwe te ke mu hokana po. Oto ka tunga ongulu — ihe ito ka kala mo nando. Oto ka tsika omiviinu — ihe ito li omandjembele gadho.

³¹ Oongombe dhoye otadhi ka tselelwa montaneho yoye, ihe onyama yadho ito ke yi lya. Uusino woye otau ka kookololwa po, manga we u tala, noitau ke ku galulilwa we. Oonzi dhoye otadhi ka pewa po aatondi yoye, nokape na ngoka te ke ku kwatha.

³² Aamwoye aamati naakadhona otaa ka gandjwa po kaakwiilongo, ya ninge aapika, manga we shi tala. Esiku kehe oto ka nzana mo omeho goye to ligamene, pamwe aamwoye otaa galuka, ihe osima yowala.

³³ Oshigwana oshikwiilongo otashi ka kutha po iimeno yoye ayihe mbyoka wi ihepekele oku yi kokitha, manga to kala po owala, kakele kedhiginino lyomahepeko nonyanya.

³⁴ Omahepeko goye otaga piyaganeke omutse gwoye.

³⁵ Omuwa ote ku umbu iitumbuka okuza komutse sigo okoshithi shompadhi.

³⁶ “Omuwa ote ke ku kutha po ngoye nomukwaniilwa gwoye e te mu fala kevi lyaakwiilongo, nkoka ngoye mwene nenge oohokulu inaamu kala ko nale; nkoka oto ka longela iikalunga ya hongwa miiti nomomamanya.

³⁷ Miilongo mbyoka Omuwa te ke ku halakanithila mo, aantu otaa ka haluthwa kwaashoka she ku ningilwa: otaye ke ku nyekelela noku ku sheka.

³⁸ “Oto ka kuna ombuto oyindji, ihe oto ka teya oshishonashona, oshoka oombahu otadhi ka lya po iimeno yoye.

³⁹ Oto ka tsika iitsambe yomiviinu e to yi helele, ihe ito ka likola omandjembele nenge u nwe omaviinu gayo, oshoka omazinyo otaga ka lya po oomviinu.

⁴⁰ Omiolivi otadhi ka mena shaa mpoka mevi lyeni, ihe ito ka kala nando u na omagadhi gooholivi, oshoka ooholivi otadhi ka yagumuka ko.

⁴¹ Oto ka kala u na aamati naakadhona, ihe oto ke ya kanitha, oshoka otaa ka kwatwa po oonkwatwa miita.

⁴² Omiti dhoye adhihe niilikolwa yevi lyoye otayi ka lika po kuupuka.

⁴³ “Aakwiilongo mboka ya kala mevi lyoye, otaye ke ku gwililila po ye ku vule, ngoye noto ka kanitha oonkondo.

⁴⁴ Otaa ka kala ye na iimaliwa ye ku pe oongunga, ihe ngoye ito ka kala u na sha u ya pe oongunga. Pehulilo otaa ka ninga aapangeli yoye.

⁴⁵ “Omathingano ngaka agehe otage ku adha, e taga kala ge ku na, sigo wa hanagulwa po thiluthilu, oshoka ino vulika kOmuwa Kalunga koye nokudhiginina omautho niipango ayihe e yi ku pe.

⁴⁶ Omathingano ngoka otaga ka ninga endhindhiliko sigo aluhe kutya ngoye noluvalo lwoye omwa pangulwa kuKalunga.

⁴⁷ Omuwa okwe ku yambeke pamikalo adhihe, ihe ino mu longela nenyanyu nonomwenyo gwa tundulukwa.

⁴⁸ Onkee ano oto ka longela aatondi mboka Omuwa te ku tumine, ye ku kondjithe. Oto ka kala wa sa ondjala nenota nou li omudhuu — u li moluhepo lwiinima ayihe. Omuwa ote ke ku hepeka nayi, sigo wa hanagulwa po thiluthilu.

⁴⁹ Omuwa ote ke ku tukulila oshigwana tashi zi kokule kooha dhevi, shi ye shi ku kondjithe, oshigwana shoka elaka lyasho kuu li shi. Otashi ke ku fegula po sha fa ekodhi.

⁵⁰ Otaa ka kala aananyanya, itaa ningile mo molwaakulupe noitaa si ohenda aagundjuka.

⁵¹ Otaa ka lya po oongombe dhoye niilikolwa yomevi lyoye, nangoye oto ka sa po kondjala. Itaye ku thigile po nando omuma yimwe yiilya, eta lyomaviinu, uugadhi wooholivi, ongombe nenge onzi; nangoye oto ka sa po.

⁵² Otaa ka ponokela oshilando kehe moshilongo shoka Omuwa Kalunga koye te shi ku pe sigo omadhingililokuma omaleeleka ngoka wi itula, otaga ka kumunwa po.

⁵³ “Uuna aatondi yoye taa kondeke iilando yoye, oto ka pumbwa iikulya, oto kala muuwehame nomeiyekelelo, sigo to li po aamwoye, onyama aamwoye aamati naakadhona mboka Omuwa Kalunga koye e ku pe.

⁵⁴ Nokuli omulumentu omvalekele nomulelwa ondembula ke na ohenda namumwayina, omukadhi omuholike nenge oyana mboka ya hupu ko;

⁵⁵ ite ya pe nando okantumba konyama yoyana ndjoka ye mwene ta li muuwehame nomeiyekelelo molwompumbwe yiikulya, sho u li wa kondekwa kaatondi.

⁵⁶ Omukiintu omvalekele nomulelwa ondembula, ngoka moluuyamba inee enda kolupadhi nando olumwe, ke na ohenda nomulume omuholike nenge omwana omumati nomukadhona.

⁵⁷ Ite ya pe okahanona e ka vala, nontungwa yako tayi zi moshivalelo she, oshoka muuwehame nomeiyekelelo omolwompumbwe yiikulya ye mwene ote yi li po meholamo, sho u li wa kondekwa kaatondi.

⁵⁸ “Ngele ito dhiginine shili oompango ndhika adhihe nomalongo ga nyolwa membo ndika, nongele ito simaneke edhina lyOmuwa Kalunga koye ekumithi netilithi,

⁵⁹ ote ku tumine ngoye noluvalo lwoye omauwehame gaa shi kupangwa, omalega omatilithi nomikithi omiwinayi dhomambwengelela.

⁶⁰ Ote ku undulile ishewe omikithi omitilithi ndhoka we dhi mwene muEgipiti noito ka hwepopala we.

⁶¹ Ote ke ku undulila omavu nomalega ngeyaka gi ili nogi ili inaaga tumbulwa membo ndika lyoompango nomalongo gaKalunga, ongoye noto ka hanagulwa po.

⁶² Nonando u indjipale u thike poonyothi dhokegulu, yamweyamwe yomune ayeke taa ka hupa ko, oshoka ino vulika kOmuwa Kalunga koye.

⁶³ Omuwa ngaashi a li a nyanyukilwa elago lyoye nokwiindjipala kwoye, osho wo ta ka nyanyukilwa moku ku yona po noku ku hanagula po. Oto ka nakulwa mo mevi ndyoka to ke li lala.

⁶⁴ “Omuwa ote ke ku halakanithila mokati kiigwana ayihe okuza kooha dhevi sigo okoonkwawo, naankoka oto ka longela iikalunga ya hongwa miiti nomomamanya, iikalunga mbyoka ngoye mwene nenge oohokulu inaaye yi longela nale.

⁶⁵ Ito ka mona ombili akuhe, kape na ehala to ka tya olyoye. Omuwa ote ke ku tula uumbanda, etyololoko neziyalalo.

⁶⁶ Okukala kwoye aluhe otaku kala moshiponga. Uusiku nomutenya oto ka kala nomwenyo tagu nuka mo noto ka kala muumbanda weso wa pitilila.

⁶⁷ Ongula oto ka tya: ‘Ando okwa li ongulohi,’ nongulohi oto ka tya: ‘Ando okwa li ongula.’ Osho u li u na ehaluko lya tya ngeyi momutima nomahaluhalu ga tya ngeyi momeho goye.

⁶⁸ Omuwa ote ke ku shunithila kuEgipiti mooskepa, nando ye mwene a tile: ‘Ito ka shuna we kuEgipiti.’ Oko hoka to ki ilanditha po kaatondi yoye u ninge omupika, ihe kaku na ngoka ta hala oku ku landa po.”

29

¹ Ndhika odho oohapu dhehangano ndyoka Omuwa a lombwele Moses e li dhike nAaisraeli mevi lyAamoabi; adhihe ndhika odha gwedhwa kehangano ndyoka Omuwa a hangana nayo pondundu Sinai.

² Moses okwa hiya Aaisraeli ayehe e ta ti kuyo: “Omwa mono nomeho geni shoka Omuwa a ningile omukwaniilwa gwaEgipiti, omalenga ge noshilongo she ashihe.

³ Omwa mono omageelo omatilithi, iilongandhindhiliko niinyengandunge mbyoka Omuwa a tsakanitha.

⁴ Ihe sigo onena Omuwa ine mu pa omutima gwokuuva ko, omeho gokumona ko nomakutsi gokuuva ko.

⁵ Omuwa okwe mu enditha omimvo omilongo ne mombuga, noonguwo dheni inadhi kulupa noongaku dheni inadhi nyanyuka po.

⁶ Inamu lya oshikwiila nenge mu nwe omaviinu nenge omalovu, ihe Omuwa okwe mu kongele iipalutha, opo e mu longe kutya oye Kalunga keni.

⁷ Sho twa thiki peha mpaka, Sihon, omukwaniilwa gwaHeshbon, naOg, omukwaniilwa gwaBaasha, oya piti mo ye ya ye tu kondjithe. Ihe otwe ya sindi

⁸ e tatu kutha po evi lyawo e tatu li topolele omazimo gaRuben naGad netatazimo lyaManasse.

⁹ Vulikeni shili komautho agehe gehangano ndika, opo mu kale mu na elago mwaayihe tamu yi ningi.

¹⁰ “Nena omwa thikama mpaka koshipala shOmuwa Kalunga keni, ne amuhe — aawiliki yeni nomalenga, aasamane yeni,

¹¹ aakulukadhi yeni, aana yeni naakwiilongo mboka ya kala mokati keni haye mu tyayele iikuni noku mu tekela omeya.

¹² Omu li mpaka nena, mu ye mehangano ndyoka Omuwa Kalunga keni ta hangana nane nokugana,

¹³ opo Omuwa a wape oku mu taamba oshigwana she nokuninga Kalunga keni, ngaashi e shi mu uvanekele noohokulu Abraham, Isak naJakob.

¹⁴ Hane amuke Omuwa ta hangana nane ehangano ndika nokugana.

¹⁵ Ota hangana natse atuhe mbaka twa thikama nena mpaka koshipala she nonomaluvalo getu ngoka inaaga valwa natango.

¹⁶ “Otamu dhimbulukwa okukala kwetu muEgipiti nokweenda mokati kiigwana mbika.

¹⁷ Omwa mono iimenka yawo yi nyanyalitha ya ningwa miiti, momamanya, moshisiliveli nomoshingoli.

¹⁸ Kotokeni, pwaa kale omulumentu nenge omukiintu, egumbo nenge ezimo lya thikama mpaka nena, tali pilamene Omuwa Kalunga ketu noku ka longela iikalunga yaapagani. Oshinima sha tya ngeyi osha fa omudhi tagu tsapuka oshigwanga shuuzigo uululu.

¹⁹ Kotokeni, pwaa kale omuntu ta pulakene omakumagidho ngaka, ihe natango oti itompo kutya ayihe otayi mu opalele, nando oye omutangalali mondjila ye. Shika otashi mu hanagula po amuhe, aawanawa naawinayi.

²⁰ Omuwa ita dhimine po omuntu a tya ngaaka. Ondjahi yOmuwa otayi mu hwamene, niiponga ayihe ya nyolelwa membo ndika, otayi ke mu undulilwa, sigo Omuwa e mu kombo po.

²¹ Omuwa ote mu ningi oshiholelwa mokati komazimo gaIsrael e te mu undulile iiponga yomathingano mehangano ndika ga nyolelwa membo ndika lyompango yOmuwa.

²² “Momapipi gokomeho oluvalo lweni naakwiilongo taa zi komavi gokokule, otaa ka tala iiponga nomahepeko ngoka Omuwa a tula mevi lyeni.

²³ Omapya otaga ka mbugala ga siikilwa kosulufuli noshimongwa; itamu kunwa sha, noitamu mene omwiidhi. Evi lyeni otali ka fa iilando Sodom naGomorra, Adma naZebojim, mbyoka Omuwa e yi yonagula po, sho a li a geya noonkondo.

²⁴ Nena uuyuni auhe otau ka pula tau ti: ‘Omolwashike Omuwa a ningile ngeyi oshilongo shika? Ondunge yondjahi ndjoka ontilithi otayi ti naanaa ngiini?’

²⁵ Eyamukulo otali ka kala: ‘Omolwashoka aantu yOmuwa oye etha ehangano ndyoka ya hangana naye, Kalunga koohekulu, sho e ya tembudha muEgipiti.

²⁶ Oya longele ookalunga yalwe, mboka inaaye ya longela nale, iikalunga mbyoka Omuwa e yi ya indike yaaye yi longele.

²⁷ Nomolwashoka Omuwa a geele oshigwana she e te shi undulile iiponga ayihe mbika ya nyolelwa membo ndika.

²⁸ Omuwa okwa geye noonkondo, nondjahi ye onene oye ya nakula mo mevi lyawo e tayi ya umbile mevi ekwiilongo, moka ye li sigo onena.’

²⁹ “Ope na iinima yimwe mbyoka Omuwa Kalunga ketu e yi holeka; ihe okwa holola ompango ye, natse nomaluvalo getu otu na okuvulika kuyo aluhe sigo aluhe.”

30

¹ “Onde ku pe ngashingeyi ehogololo pokati keyambeko netulomutima. Uuna ayihe mbika tayi ku ningilwa noto kala mokati kiigwana, moka Omuwa Kalunga koye e ku halakanithila mo, nena oto ka dhimbulukwa ehogololo ndyoka nde li ku pe.

² Ngele oto galukile kOmuwa, ngoye mwene noluvalo lwoye, e to vulika komwenyo gwoye aguhe kiipango mbika tandi yi ku pe nena,

³ Omuwa Kalunga koye ote ku sile ohenda. Ote ke ku kongolola mo miigwana, moka e ku halakanithila mo, note ke ku ninga omunelago ishewe.

⁴ Nonando u halakanene kooha dhuuyuni, Omuwa Kalunga koye ote ke ku gongela e te ku galula ko,

⁵ opo u ka likole ishewe evi ndyoka lya kalwa koohokulu. Ote ke ku ninga omunelagolela noku ku indjipaleka u vule oohokulu.

⁶ Omuwa Kalunga koye ote ke ku pa, ngoye noluvalo lwoye, omutima omuvuliki e to kala u mu hole komutima gwoye aguhe, noto kala ihe mevi ndyoka.

⁷ Omatulomutima agehe ngaka ote ga tula maatondi yoye, mboka ye ku tonde nohaa ku hepeke,

⁸ ongoye noto ka vulika kuye e to dhiginine iipango ayihe mbika tandi yi ku pe nena.

⁹ Omuwa ote ke ku yambekela ayihe to yi ningi, noto kala u na oluvalo olwindji, iimuna oyindji neloolo lyiilya. Ota ka nyanyukilwa oku ku ninga omunelago, ngaashi a ningile oohokulu aanelago,

¹⁰ ihe ngoye ou na okuvulika kuye e to dhiginine iipango nomautho ge ga nyolelwa membo ndika lyompango. Ou na okugalukila kuye komutima gwoye aguhe nokomwenyo gwoye aguhe.

¹¹ “Oshipango shika tandi shi ku pe nena ndjika, kashi shi oshidhigu unene nenge shi li kokule nangoye.

¹² Kashi li pombanda megulu, u pule ando u tye: ‘Olye ta londo e ke shi tu talele ko, opo tu shi uve tse tu vulike kusho?’

¹³ Kashi li handiyaka yefuta, u pule ando u tye: ‘Olye ta taaguluka a ye handiyaka yefuta e ke shi tu talele ko?’

¹⁴ Aawe, oshi li mpaka pungoye. Ou shi shi noto vulu oku shi tumbula nokuvulika kusho.

¹⁵ “Nena otandi ku pe, u hogolole pokati kuuwananwa nuuwinayi, pokati komwenyo neso.

¹⁶ Ngele oto vulika kiipango, omautho noompango dhOmuwa Kalunga koye ndhoka tandi dhi ku pe nena, ngele ou mu hole, to vulika kuye e to dhiginine oompango dhe adhihe, nena oto ka ninga omunelago e to ningi oshigwana oshinene. Omuwa Kalunga koye ote ke ku yambeka mevi ndyoka to ke li lala.

¹⁷ Ihe ngele oto tangalala e to tindi okupulakena e to falafalwa kelongelo lyiikalunga,

¹⁸ oto ka hanagulwa po — otandi ku londodha shili mpaka. Ito kala mo olule mevi ndyoka lyahandiyaka yaJordan ndyoka to ke li lala.

¹⁹ Nena otandi ku pe, u hogolole pokati komwenyo neso, pokati keyambeko lyaKalunga netulomutima lye, notandi hiya egulu nevi li ninge onzapo yehogololo ndyoka to hogolola. Hogolola omwenyo.

²⁰ Hola Omuwa Kalunga koye, vulika kuye nou mu dhame, nena ngoye mwene noluvalo lwoye otamu ka kala olule mevi ndyoka u uvaneke te li pe oohokulu Abraham, Isak naJakob.”

31

¹ Moses okwa tsikile okulombwela Israel

² ta ti: “Onda gwanitha ngashingeyi omimvo ethele nomilongo mbali noite vulu we oku ku wilika. Omuwa okwa lombwele ndje wo kutya kandi na okutokola omulonga Jordan.

³ Omuwa Kalunga koye oye mwene te ku kwatele komeho e ta yono po iigwana yaankoka, opo u lale evi lyayo. Josua oye ta ningi omuwiliki gwoye, ngaashi Omuwa a ti.

⁴ Omuwa ota ka hanagula po aantu mboka, naanaa ngaashi a ningi Sihon naOg, aakwaniilwa yAayamori, nokwa hanagula po oshilongo shawo.

⁵ Omuwa ote ya gandja miikaha yoye, ihe ya ninga tuu, ngaashi nde ku lombwela.

⁶ Ikolelela e to kala u na omukumo. Ino ya tila. Kalunga koye, Omuwa oye mwene, ta kala pamwe nangoye. Ite ku thigi po noite ku etha.”

⁷ Moses okwi ithana Josua e ta ti kuye montaneho yAaisraeli ayehe: “Ikolelela ngoye u kale nomukumo; ongoye tuu ngoka to ka wilika aantu mbaka, ya ka kwate po evi ndyoka Omuwa e li uvanekele oohekulu.

⁸ Omuwa oye mwene te ku wilike e ta kala pamwe nangoye. Ite ku thigi po noite ku etha, onkee ano ino tyololoka nenge u kale wa tila.”

⁹ Moses okwa nyola ompango yaKalunga e te yi pe aayambi Aalevi, mboka ya li haa tonatele oshikethahangano shOmuwa, naakuluntu yaIsrael.

¹⁰ Okwe ya kumagidha a ti: “Omumvo omutiheyali kehe, uuna oongunga tadhi dhimwa po, lesheni ompango ndjika mokule mOshituthi shomatsali giihwa iitalala.

¹¹ Yi lesheleni Aaisraeli, sho taa ya kelongelokalunga lyokulongela Omuwa Kalunga keni pehala ndyoka limwe lyelongelokalunga te li hogolola.

¹² Gongalekeni oshigwana ashihe, aalumentu, aakiintu aanona naakwiilongo mboka ya kala miilando yeni, opo shaa ngoka te yi uvu, oti ilongo okutila Omuwa Kalunga keni nokudhiginina oohapu adhihe dhompango ndjika.

¹³ Pahedhi ndjika omaluvalo geni ngoka inaaga uva nando ompango yOmuwa Kalunga keni, otage ke yi uva. Osho ngeyi otagi ilongo oku mu tila, manga mu li mevi ndyoka tamu ke li kwata po, nge mwa tokola Jordan.”

¹⁴ Omuwa okwa lombwele Moses a ti: “Ito kala we u na omwenyo olule. Ithana Josua u mu ete ketsalihangano, opo ndi mu langeke moshilonga.” Moses naJosua oya yi ketsalihangano,

¹⁵ Omuwa nokwe ya holokele moshikogo shokuungululu, shoka sha thikama posheelo shetsalihangano.

¹⁶ Omuwa okwa lombwele Moses a ti: “Oto si nziya, nokonima yeso lyoye aantu itaa inekele ndje we, otaa teya ehangano ndyoka nda hangana nayo. Otaa ka etha ndje e taa longele iikalunga yaapagani yomevi ndyoka taa ka ya mo.

¹⁷ Uuna shika tashi ningwa, otandi ya geele; otandi ya etha, e taa ka hanagulwa po. Otaa adhika kiiponga iinene nokomikundu odhindji, notaa ka dhimbulula kutya iinima mbika otaye yi ningilwa, oshoka ngame Kalunga kawo kandi li we pamwe nayo.

¹⁸ Otandi ka tinda oku ya kwatha, oshoka oya ningi nayi noya longele iikalunga.”

¹⁹ Ngashingeyi nyola eimbilo ndika. Li nongeka Aaisraeli, opo li ninge onzapo puyo.

²⁰ Otandi ya fala kevi ndyoka lya kunguluka omahini nomagadhi goonyushi, ngaashi ndu uvanekele oohekulu. Nkwiyaka otaa ka kala ye na iikulya ayihe ye yi hala, notaa ka kala kaaye na nando ombudhi. Ihe otaa ka pilamena ko e taa longele iikalunga. Otaa ka ekelahi ndje e taa yono ehangano lyandje,

²¹ niiponga oyindji iitilithi otayi ke ya adha. Ihe eimbilo ndika otali ka imbwa natango, notali ka ninga onzapo puyo. Nokuli ngashingeyi manga inaandi ya fala kevi ndyoka ndu uvaneke tandi li ya pe, ondi shi shi shoka taa dhiladhila.

²² Esiku ndyoka Moses okwa nyola eimbilo ndika e te li nongeke Aaisraeli.

²³ Omuwa okwa lombwele Josua yaNun e ta ti kuye: “Ikolelela ngoye u kale nomukumo. Oto ka fala Aaisraeli kevi ndyoka nde ya uvanekele, notandi ka kala pamwe nangoye.”

²⁴ Moses okwa nyolele ompango yaKalunga membo a kotoka kaa thige po nando osha.

²⁵ Sho a mana, okwa ti kaayambi Aalevi mboka taa tonatele oshikethahangano:

²⁶ “Taambeni embo ndika lyompango, mu li pungule ontega noshikethahangano shOmuwa Kalunga keni, opo li kale nkoka li ninge onzapo paantu ye.

²⁷ Ondi shi shi kutya oyo aantu aapandala naatangalali. Oya tsu ondumbo nOmuwa, manga nda li ndi na omwenyo, nosho taa ka tsa ondumbo konima yeso lyandje.

²⁸ Gongalekeni aakuluntu yomazimo geni ayehe nomalenga geni koshigongi shandje, opo ndi ya lombwele iinima mbika; otandi ithana egulu nevi, yi ninge oonzapo puyo.

²⁹ Ondi shi shi kutya konima yeso lyandje aantu otaa ka ninga aakolokoshi notaa ekelehi shoka nde ya nongeke. Komeho otaa ka adhika koshiponga, oshoka oya geyitha Omuwa, sho ya longo shoka ye shi indikwa.”

³⁰ Moses okwa tangumuna eimbilo ndika alihe, manga Aaisraeli ya pulakena.

32

¹ “One omagulu, pulakeneni, sho te ti, nangoye evi, uva oohapu dhomokana kandje.

² Omalongo gandje naga loke ngomvula, noohapu dhandje nadhi ndonde ngomume, ngaashi omata komwiidhi gwohuluhulu, ngaashi omvula yontemuna kiimeno tayi lelema.

³ Otandi uvitha edhina lyOmuwa; aakwetu, hambeleleleni uunene waKalunga ketu.

⁴ “Oye emanya; iilonga ye oyolela, noondjila dhe adhihe odhu uka. Kalunga omudhiginini kee na uugoyoki, omuyuuki nomunashili.

⁵ Ihe ne aahasha noinamu gwana okuninga aantu ye, oshigwana shuulunde noshomakoto.

⁶ Oyo nduno ompito yokuhinda Omuwa ndjono, shigwana ngoye oshilayi noshigoya? Oye ho, Omushiti gwoye, oye e ku ningi oshigwana.

⁷ “Dhiladhila utale nale, omathimbo gonale ndjiya; pula ooho ye ku lombwele shoka sha ningilwe, pula aakulupe ye ku hokololele iinima yonale.

⁸ Gwokombandambanda okwa pe iigwana omavi, sho a yoolola aantu naantu. Okwa utha omihoko mpoka dhi na okukala. Oshigwana kehe okwe shi uthile oongamba dhasho pamwaalu gwaana yaIsrael.

⁹ Oshoka oshitendelwa shOmuwa osho oshigwana she, Jakob a yelekwa uuthiga we.

¹⁰ “Okwe mu adha mombuga, montale mu udha elilagano lyiilikama. Okwe mu kunduka e mu tonatele ongota gamene ondanda yeho lye mwene,

¹¹ ongekodhi tali gamene oshihandhila shalyo, notali tengelele kombanda yuukodhigona walyo tali u kutha po noku u humbata komawawa galyo.

¹² Omuwa awike e mu enditha, nokapwa li kalunga kiigwana yilwe nando ogumwe puye.

¹³ Okwe mu londeke kiikulundundu yevi nokwe mu palutha niilikolwa yomomapya. Okwe mu thipitha omagadhi goonyushi moonkunkulumanya nomagadhi gooholivi momamanya omakukutu.

¹⁴ Okwe mu pe omagadhi goongombe nomahini goonzi nogiikombo; okwe mu pe oonzi oonyali noondumentu dho ondoka, osiimela ombwanawa nomaviinu ga dhindolwa.

¹⁵ “Jeshurun okwo ondoka e ta gu okafinyukila. A ondoka nduno taa, a ndinda, omagadhi gowala. Okwe ekelehi Kalunga ngoka e mu shiti, e ta dhini emanya lyehupitho.

¹⁶ Oya pendutha uulaadhi wOmuwa mokulongela iikalunga yiigwana, oye mu geyitha niinima yawo iinyanyalithi.

¹⁷ Oya yambele oompwidhuli, ndhoka dhaa shi Kalunga, iikalunga mbyoka inaaye yi tseya nale, iipeepeka opo ya holoka, noohekulu inaye yi kakamena.

¹⁸ Emanya ndyoka lye ku vala, owe li dhini, owa dhimbwa Kalunga ngoka e ku eta po.

¹⁹ Omuwa sho e shi mono, okwe ya ekelehi, mondjahi ye a geele aamati naakadhona ye.

²⁰ Okwa popi ta ti: ‘Onda hala ndi ya holeke oshipala shandje; onda hala okutala ehulilo lyawo, oshoka oyo oluvalo olutangalali, oluvalo lwaa na uudhiginini.

²¹ Oya tukulutha ondjahi yandje molwiimenka yawo, oya geyitha ndje niikalunga yawo. Otandi ka tukulukitha ondjahi yawo oshigwana shaamakaha; otandi ke ya geelitha koshigwana shanathangwa.

²² Oshoka omulilo ogwa hwamekwa mondjahi yandje, ndele otagu tema sigo omoshaasi. Otagu lungunike po evi niimeno yalyo, otagu fike po omakankameno goondundu.

²³ “ ‘Otandi ke ya ndumbila iiponga. Iikuti yandje otandi ke yi ya umbila.

²⁴ Otaa ka gundikwa kondjala nokolwiidhi; otaa ka sa koshivu oshitilithi. Otandi ke ya tumina iilikama yi na omayego omapyu nomayoka ge na uuzigo.

²⁵ Pondje egongamwele otali ka lyana, nomeni momagumbo otamu kala ehaluko, shamumati shamukadhona, okahanona pamwe nomukulupe.

²⁶ Ndi tye: Onda hala oku ya komba po, nokudhima po okudhimbulukiwa kwawo mokati kaantu.

²⁷ Ando onda li inaandi angala aatondi, aatamaneki ye shi tale ko pombambo yo ya tye: Otwa li aanankondo, nOmuwa haye a longo ayihe mbika.’

²⁸ Oshoka oshigwana shika kashi na omayele nokashi na nando owino.

²⁹ Ando ya li aanandunge, ando oye shi dhimbulula, ando ya mono ehulilo lyawo.

³⁰ Gumwe ota vulu ngiini okutidha po eyuvi, nayaali omayuvi omulongo? Emanya lyawo olye ya landitha po, nOmuwa okwe ya gandja po.

³¹ Oshoka emanya lyawo inali fa emanya lyetu, osho aatondi yetu taa tumbula.

³² Omuviinu gwawo ogwa za momuviinu gwaSodom nomoshitsambe shaGomorra. Omandjembele gawo oge na uuzigo, nomahila gawo omalulululu ga fa onyango.

³³ Omaviinu gawo uuzigo weyoka, omalulululu nguuzigo wontoka.

³⁴ “Omuwa ota dhimbulukwa shoka aatondi yawo ya ninga; ota tegelele ethimbo lyo opala, opo e ya geele.

³⁵ Egeelo olyandje; otandi ka futa. Pethimbo lyu uthwa oompadhi dhawo otadhi tenguka; esiku lyekano lyawo oli li popepi, nepangulo lyawo otali ya mbala.

³⁶ Omuwa ota ka uthila aantu ye nota sile aapiya ye olukeno, sho ta mono kutya oya nzanzama, nehulilo lyawo oli li popepi.

³⁷ Nena ota pula ta ti: ‘Ookalunga kawo oye li peni, nopeni pe na emanya ndyoka ye li inekele?

³⁸ Ookalunga mboka ya li oofu dhoontselelandjambo dhawo noya nu omaviinu giinuwandjambo yawo, oye li peni? Naa ye ye mu kwathe, opo mu kale megameno lyawo.

³⁹ “ ‘Talii ko, ngame ongame awike Kalunga, nokaku na gulwe ontega nangame. Otandi dhipaga e tandi mwenyeke, otandi dhenge e tandi aludha, nokaku na ngoka ta hupitha moshikaha shandje.

⁴⁰ Otandi yelutha omaako gandje lwokegulu e tandi ti: Oshili, ngaashi ndi na omwenyo aluhe sigo aluhe,

⁴¹ Uuna tandi upike egongamwele lyandje hali adhima e tii li kwata, ndi tameke okupangula, nena aakondjithi yandje otandi ya geele naatondi yandje otandi ya galulile uutondwe wawo.

⁴² Iikuti yandje otayi ka kolwa kombinzi, negongamwele lyandje tali ka lya onyama: ombinzi yaadhipagwa noyoonkwatwa, nomitse dhoondjayi dhaatondi.’

⁴³ “Ne iigwana, tangeni aantu yOmuwa, oshoka ota ka pula ombinzi yaantu ye; ota ka geela aakondjithi ye nota ka tsakanitha eyelithoyapulo lyevi lye naantu ye.”

⁴⁴ Moses naJosua yaNun oya totomona oohapu adhihe dheimbilo ndika momakutsi gAaisraeli.

⁴⁵ Moses sho a mana okunongeka aantu omalongo gaKalunga,

⁴⁶ okwa ti: “Vulikeni shili kiipango ayihe mbika tandi yi mu pe nena ndjika. Yi hokololeleni aana yeni, opo ya vulike shili komalongo gaKalunga agehe.

⁴⁷ Omalongo ngaka kage shi osima yowala; ogo omwenyo gweni. Vulikeni kugo notamu kala mu na omwenyo omule mevi lyahandiyaka yaJordan ndyoka tamu ke li lala.”

⁴⁸ Esiku ndyoka Omuwa okwa lombwele Moses e ta ti:

⁴⁹ “Londa u ye koondundu Abarim, moshilongo shaMoab ontega noshilando Jeriko, inda kondundu Nebo e to tala evi lyaKaanan, ndyoka tandi li pe Aaisraeli.

⁵⁰ Oto ka sila kondundu ndjoka, ngaashika omumwanyoko Aaron a sile kondundu Hor,

⁵¹ oshoka ne amuhe yaali inamu inekela ndje montaneho yAaisraeli. Sho mwa li pomeya gaMeriba popepi nomukunda Kadesh mombuga Zin, inamu vulika kungame montaneho yAaisraeli.

⁵² Eeno, evi lyo lyene oto li tala, ihe ito yi mo mulyo, evi ndyoka tandi li pe Aaisraeli.”

33

¹ Ngaka ogo omayambeko ngoka Moses, omupiya gwaKalunga, a tumbulile Aaisraeli, manga inaa sa.

² Omuwa ote ya ta zi kuSinai; ota yeluka ngetango kombanda yaEdom e ta minikile aantu ye okuza kondundu Paran. Puye ope na aayengeli yomayuvi omulongo, kolulyo lwe oku na onyeka ya hwama.

³ Omuwa oku hole aantu ye nota popile mboka ye. Osho tatu inyongamenene koompadhi dhe, e tatu vulika kiipango ye.

⁴ Otatu vulika kompango twe yi pewa kuMoses, eliko lyoshigwana shetu.

⁵ Omuwa okwa ningi omukwaniilwa muJeshurun, aakuluntu yoshigwana sho ya gongala, omazimo gaIsrael agehe kumwe.

⁶ Moses okwa ti kezimo lyaRuben: “Ruben, kala nomwenyo waa se, nando aantu yoye aashona.”

⁷ Kezimo lyaJuda okwa ti: “Omuwa, uva onkugo yaJuda; mu hanganitha noshigwana she. Okwe ya kondjele niikaha ye; mu kwatha ta pi kaatondi ye.”

⁸ Kezimo lyaLevi okwa ti: “Levi okwa pewa Tummim naUrim, oye omuyakuli gwoye omudhiginini. Owe mu yeleke muMassa nowe mu lolo pomeya gaMeriba.

⁹ Ohe ku simaneke unene shi vule okusimaneka he nayina nenge aamwayina noyana. Oha vulika kiipango yoye nokudhiginina ehangano lyoye.

¹⁰ Ota longo Jakob omautho goye nompango yoye okuIsrael. Komeho goye ota tula ko iitsinino nomidhidhindjambo koshiyambelo shoye.

¹¹ Omuwa, yambeka oonkondo dhe, niilonga yiikaha ye, yi ku opalele. Nyanyagula oonto dhaakondjithi ye, naatondi ye u ya dhenge, opo yaa penduke po we.”

¹² Kezimo lyaBenjamin okwa ti: “Oye omulelwa gwOmuwa omuholike. Omuwa ohe mu gamene esiku kehe, ota kala puye aluhe.”

¹³ Kezimo lyaJosef okwa ti: “Omuwa na yambeke evi lye nomagano gondilo: omume ndjoka tayi zi megulu, omeya ngoka taga zi mevi,

¹⁴ iilya ya tiliganekwa ketango, uuyamba wiiyimati yothinge kehe,

¹⁵ omagano ngoka taga zi koondundu oonkulu neloolo ndyoka tali etwa po kiikulundundu.

¹⁶ Oshilongo she nashi ete po uuyamba auhe tau zi mevi. Nashi kale sha yambekwa kOmuwa, ngoka a popi moshihwa sha hwama. Omayambeko agehe nage ye kuJosef. Oye a li omuwiliki mokati kaamwahe.

¹⁷ Josef a fa ontsezi ondhilikwa yi na ooniga dha fa dhosino. Ooniga dhe omayuvi gaManasse nomayuvi omulongo gaEfraim. Otu ulula nadho iigwana, te yi undulile sigo okooha dhevi.”

¹⁸ Kezimo lyaSebulon nolyaIssaskar okwa ti: “Sebulon na mone elago miipindi yokefuta, nuuyamba waIssaskar nau tane maandjawo.

¹⁹ Otaa hiyile aakwiilongo kondundu yawo notaa yambele ko omafikilondjambo go opala. Uuyamba wawo okefuta taa likola nomehekevi lyopomunkulo gwalyo.”

²⁰ Kezimo lyaGad okwa ti: “Na hambelelwe ngoka a taandelitha oshitopolwa shevi lyaGad. Gad okwa langele a fa onime, ota kutha oshooko, nomutse wo.

²¹ Okwi ikuthile oshitopolwa sho opala shevi, noshipewa shuuwiliki osha ningi she. Okwa vulika komalombwelo noompango dhOmuwa, aawiliki yaIsrael sho ya gongala pamwe.”

²² Kezimo lyaDan okwa ti: “Dan okwa fa onime ongundjuka; ota ndjomboka ta zi kuBaasha.”

²³ Kezimo lyaNaftali okwa ti: “Naftali okwa yambekwa kesilohenda lyOmuwa. Evi lyawo olya taandela lwokuumbugantu okuza kefuta lyaGalilea.”

²⁴ Kezimo lyaAser okwa ti: “Aser okwa yambekwa e vule omazimo galwe. Na kale omuningilwakombunda kaamwayina. Evi lye nali mene omiolivi odhindji

²⁵ Iilando ye nayi gamenwe nomiyelo dhiiyela. Aluhe na kale kee na ombudhi.”

²⁶ “Kaku na ngoka a fa Kalunga kaJeshurun, nakutaakana egulu meadhimo, nakweenda miikogo mookathele, opo e ku kwathe.

²⁷ Egameno lyoye oKalunga komathimbo agehe, omaako ge gaaluhe otage ku ukata. Okwe ku tidhile po aatondi yoye e te ku lombwele, u ya dhime po ayehe.

²⁸ Israel ota kala nombili, noluvalo lwaJakob lwa gamenwa mevi lyiilya nolyomaviinu, egulu lyalyo ohali gu omume.

²⁹ Israel, ngoye omunelago ngiini! Kape na ngoka e ku fa. Ongoye oshigwana sha hupithwa kOmuwa. Omuwa oye mwene oshikandekitho negongamwele lyoye. Aatondi yoye ohaye ku nyenkele, ihe oto ya lyatele pevi.”

34

¹ Moses okwa zi molushandja lwaMoab a londo kondundu Nebo, kondungu yondundu Pisga kuuzilo waJeriko. Oko nkoka Omuwa e mu ulukile evi alihe: oshilongo shaGilead sigo okoshilando Dan kuumbangalantu,

² evi alihe lyaNaftali, iilongo yaEfraim naManasse, oshilongo shaJuda sigo okEfuta lyopokati kuuninginino,

³ ombinga yokuumbugantu waJuda, nolushandja ndoka lwa taandela okuza kuZoar sigo oJeriko, oshilando shomilunga.

⁴ Omuwa okwa lombwele Moses ta ti: “Ndika olyo evi ndyoka ndu uvanekele Abraham, Isak naJakob tandi li pe oluvalo lwawo. Otandi li ku ulukile, ihe itandi ku pitika u ye mo.”

⁵ Osho ngaaka Moses, omupiya gwOmuwa, a sile mevi lyAamoabi, ngaashi Omuwa e shi tile.

⁶ Omuwa okwe mu fumvike mesilu limwe lyomuMoab, ontega noshilando Betpegor, ihe sigo onena kape na ngoka a tseya naanaa mpoka a fumvikwa.

⁷ Moses okwa li e na omimvo ethele nomilongo mbali, sho a si; nokwa li e na oonkondo natango, nomeho ge oga li ge wete ko natango.

⁸ Aaisraeli oye mu lili oosa omasiku omilongo ndatu molushandja lwaMoab.

⁹ Josua yaNun okwa li u udha ombepo yuunongo, oshoka Moses okwe mu langeke a ninge omulanduli gwe. Aaisraeli oya vulika kuJosua e taa dhiginine iipango mbyoka Omuwa e yi ya pele muMoses.

¹⁰ Kamwa li we omuhunganeki muIsrael a fa Moses; Omuwa a popi naye oshipala noshipala.

¹¹ Nokaku na omuhunganeki a longa iilongandhindhiliko niinyengandunge, ngaashi mbyoka ya longwa kuMoses, Omuwa sho e mu tumine, e yi ninge mokukondjitha omukwaniilwa gwaEgipiti, omalenga ge noshilongo she ashihe.

¹² Nokaku na omuhunganeki gulwe e na oonkondo okuninga iinima iinene niitilithi mbyoka Moses e yi longo montaneho yAaisraeli.