1 Mesiku lyotango lyomwedhi omutiyali momumvo omutiyali Aaisraeli sho ya tembudhwa muEgipiti, Omuwa okwa lombwele Moses metsalihangano mombuga Sinai a ti:
2 “Ne naAaron yaluleni Aaisraeli pamaludhi nopamagumbo gawo. Ningeni elandulathano lyomadhina gaalumentu ayehe
3 ye na omimvo omilongo mbali nenge dhi vule po, mboka ya gwana okuhinga iita.
4 Puleni omukuluntu mezimo kehe, e mu kwathe.”
5 Aalumentu aawiliki momazimo gawo mboka ya hogololelwa oshilonga shika, oyo mbaka: Ezimo Omukuluntu Reuben Elizur lyaShedeur Simeon Shelumiel yaSurishaddai Juda Nahshon yaAminadab Issaskar Netanel yaZuar Sebulon Eliab lyaHelon Efraim Elishama lyaAmmihud Manasse Gamaliel gaPedazur Benjamin Abidan yaGidoni Dan Ahiezer yaAmmishaddai Aser Pagiel yaOkran Gad Eljasaf lyaDeuel Naftali Ahira yaEnan
6 Kekwatho lyaalumentu mbaka omulongo nayaali, Moses naAaron
7 oya hiya egongalo alihe mesiku lyotango lyomwedhi omutiyali e taa nyola aantu pamaludhi nopamagumbo gawo. Omadhina gaalumentu ayehe yomimvo omilongo mbali nenge dhi vule po, oga nyolwa e taa yalulwa,
8 ngaashi Omuwa a lombwele Moses. Moses okwa yalula aantu mombuga Sinai.
9 Aalumentu yomimvo omilongo mbali nenge dhi vule po ya gwana okuhinga iita, oya nyolwa omadhina gawo pamaludhi nopamagumbo gawo, okutameka nezimo lyaReuben, osheeli shaJakob. Omiyalu odha li, ngaashi tadhi landula: Ezimo Omwaalu Reuben 46 500 Simeon 59 300 Gad 45 650 Juda 74 600 Issaskar 54 400 Sebulon 57 400 Efraim 40 500 Manasse 32 200 Benjamin 35 400 Dan 62 700 Aser 41 500 Naftali 53 400 Kumwe 603 550
10 Aalevi inaa yalulwa pamwe nomazimo galwe,
11 oshoka Omuwa okwa lombwele Moses a ti:
12 “Uuna to yalula aalumentu mboka ya gwana okuhinga iita, ino kwatelela mo ezimo lyaLevi.
13 Tula Aalevi metonatelo lyetsalihangano niikwaniipangitho ayihe yalyo. Naye li humbate niikwaniipangitho yalyo. Oyo ayeke ye na okuyakula mo, e taa dhike ootenda dhawo dhe li kunduka.
14 Uuna to tembudha po ontanda, Aalevi naa humbate etsalihangano e taye li dhike ishewe montanda ompe. Shaa ngoka gulwe ta hedha ketsalihangano, na dhipagwe.
15 Aaisraeli yalwe naa yunge oontanda, ongundu nongundu, shaa ngoka nongundu ye mwene yi na epandela lyayo.
16 Ihe Aalevi naa yunge ontanda ya kunduka etsalihangano ye li langele, opo pwaa kale ngoka ta hedha kulyo okupendutha ondjahi yandje, yi hwamene Aaisraeli.”
17 Aaisraeli noya ningi ayihe, ngaashi Omuwa a lombwele Moses.
1 Omuwa okwa gandja omautho ngaka kuMoses naAaron.
2 Aaisraeli ngele taa yungu ontanda, omuntu kehe na yunge ontanda pepandela lyoshitopolwa shawo nokombinga yombaaneli yoludhi lwe. Ontanda nayi yungwe ya kunduka etsalihangano.
3 Mboka taa ka yunga oontanda nomatanga gawo kuuzilo kohi yepandela lyoshitopolwa shaJuda, oye li mewiliko lyaawiliki taa landula: Ezimo Omuwiliki Omwaalu Juda Nahshon yaAminadab 74 600 Issaskar Netanel yaZuar 54 400 Sebulon Eliab lyaHelon 57 400 t Kumwe 186 400 Oshitopolwa shaJuda otashi katuka tango.
4
5
6
7
8
9
10 Mboka taa ka yunga oontanda nomatanga gawo kuumbangalantu kohi yepandela lyoshitopolwa shaReuben, oye li mewiliko lyaawiliki taa landula: Ezimo Omuwiliki Omwaalu Reuben Elizur lyaShedeur 46 500 Simeon Shelumiel yaSurishaddai 59 300 Gad Eljasaf lyaDeuel 45 650 Kumwe 151 450 Oshitopolwa shaReuben otashi katuka olutiyali.
11
12
13
14
15
16
17 Konima yoshitopolwa shaReuben ontanda yAalevi otayi thikama. Aalevi naa humbate etsalihangano ye li mokati kiitopolwa ine yAaisraeli. Oshitopolwa kehe kohi yepandela lyasho nashi katuke melandulathano tuu ndyoka sha yunga oontanda.
18 Mboka taa ka yunga oontanda momatanga gawo kuuninginino kohi yepandela lyoshitopolwa shaEfraim, oye li mewiliko lyaawiliki taa landula: Ezimo Omuwiliki Omwaalu Efraim Elishama lyaAmmihud 40 500 Manasse Gamaliel yaPedazur 32 200 Benjamin Abidan yaGidoni 35 400 Kumwe 108 100 Oshitopolwa shaEfraim otashi katuka olutitatu.
19
20
21
22
23
24
25 Mboka taa ka yunga oontanda nomatanga gawo kuumbangalantu kohi yepandela lyoshitopolwa shaDan, oye li mewiliko lyaawiliki taa landula: Ezimo Omuwiliki Omwaalu Dan Ahiezer yaAmmishaddai 62 700 Aser Pagiel yaOkran 41 500 Naftali Ahira yaEnan 53 400 Kumwe 157 600 Oshitopolwa shaDan otashi katuka lwahugunina.
26
27
28
29
30
31
32 Omwaalu aguhe kumwe gwAaisraeli mboka ya yalulwa miitopolwa pamaludhi gawo, ogwa li 603 550.
33 Aalevi inaa yalulilwa mo, ngaashi Omuwa a lombwele Moses.
34 Aaisraeli oya ningi ayihe mbyoka Omuwa a lombwele Moses. Oya yungu oontanda shaa ngoka pombaaneli yawo noya zi po shaa ngoka noludhi lwe.
1 Ezimo lyaAaron naMoses olyo ndika, uuna ndoka Omuwa a popi naMoses kondundu Sinai.
2 Aaron okwa li e na oyana aamati yane; oyo Nadab, osheeli, Abihu, Eleasar naItamar.
3 Oya li ya gwayekwa noya yapulwa ya ninge aayambi,
4 ihe Nadab naAbihu oya dhipagwa, sho ya yambele Omuwa mombuga Sinai omulilo gwaa shi omuyapuki. Kaya li ye na aanona, onkee Eleasar naItamar oya longo oshilonga shuuyambi muuyuni wahe Aaron.
5 Omuwa okwa lombwele Moses a ti:
6 “Hedhitha huka Aalevi, u ya langeke aayakuli yomuyambi Aaron.
7 Naa longe iilonga tayi pumbiwa metsalihangano yo ya yakule omuyambi Aaron negongalo alihe.
8 Naa tonatele iikwaniipangitho ayihe metsalihangano e taa longo peha lyAaisraeli.
9 Aaisraeli naa gandje Aalevi, opo ya yakule Aaron noyana.
10 Ihe Aaron noyana oto ya langeke miilonga yuuyambi. Ngele oku na gulwe ta kambadhala oku ya holela, na dhipagwe.”
11 Omuwa okwa lombwele Moses a ti:
12 “Ngashingeyi Aalevi oyandje. Sho nda dhipaga aatango yAayegipiti, osheeli shomegumbo kehe lyomuIsrael onde shi iyapulile, nosheeli shoshimuna kehe. Ngashingeyi peha lyokukala niisheeli yomuIsrael ondi na Aalevi; oyo oyandje. Ongame Omuwa.”
13
14 Omuwa okwa lombwele Moses mombuga Sinai,
15 a yalule Aalevi pamaludhi nopamagumbo gawo nokunyola omulumentu kehe gwomwedhi gumwe nenge e vule po.
16 Moses okwe shi ningi.
17 Levi okwa li e na oyana aamati yatatu: Gerson, Kohat naMerari, mboka ya li oohekulu yomaludhi ngoka ge ya lukilwa. Gerson okwa li e na oyana aamati yaali: Libni naShimei. Kohat okwa li e na oyana aamati yane: Amram, Izhar, Hebron naUssiel. Merari okwa li e na oyana aamati yaali: Mahli naMushi. Oyo ya li oohekulu yomaludhi ngoka ge ya lukilwa.
18
19
20
21 MuGerson omwa zi ezimo lyaLibni nolyaShimei. Mbaka Aakwagerson.
22 Omwaalu gwawo aguhe gwaalumentu yomwedhi gumwe naamboka ye vule po, ogwa li 7 500.
23 Oludhi nduka olwa li halu yungu ontanda kuuninginino konima yetsalihangano
24 pamwe naEljasaf lyaLael, omukuluntu gwoludhi.
25 Oya li ye na oshimpwiyu shotenda, omasiikilo gayo, eshigolapi lyayo,
26 omalapi gehale lyetsalihangano, eshigolapi lyoposheelo shehale, oshiyambelo noongodhi dhehale. Oya li ye na oshimpwiyu shomayakulo agehe ge na ekwatathano niinima mbika.
27 MuKohat omwa zi ezimo lyaAmram, lyaIzhar, lyaHebron nolyaUssiel. Mbaka Aakwakehat.
28 Omwaalu gwawo aguhe gwaalumentu yomwedhi gumwe naamboka ye vule po, ogwa li 8 600.
29 Oludhi nduka olwa li halu yungu ontanda kuumbugantu wetsalihangano
30 pamwe naElisafan lyaUssiel, omukuluntu gwoludhi.
31 Oya li aanashimpwiyu yoshikethahangano, oshitaafula, oshihukikwanyeka, iiyambelo, iikwaniipangitho mbyoka hayi longithwa kaayambi melongelokalunga, netopolitho tali yoolola Ehala lyUuyapuki kEhala lyUuyapukielela. Oya li ye na oshimpwiyu shomayakulo agehe ge na ekwatathano niinima mbika.
32 Omukuluntu gwAalevi okwa li Eleasar lyaAaron omuyambi. Oye a li ta tonatele ayehe mboka taa yakula metsalihangano.
33 MuMerari omwa zi ezimo lyaMahli nolyaMushi. Mbaka Aakwamerari.
34 Omwaalu gwawo aguhe gwaalumentu yomwedhi gumwe naamboka ye vule po, ogwa li 6 200.
35 Oludhi nduka olwa li halu yungu ontanda kuumbangalantu wetsalihangano pamwe naSuriel yaAbihail, omukuluntu gwoludhi.
36 Oya li ya pewa oshimpwiyu shiipilangi yokuthikameka etsalihangano, omalukambo, oongudhi, oompadhi niipumbiwa yalyo ayihe. Oya li ye na oshimpwiyu shomayakulo agehe ge na ekwatathano niinima mbika.
37 Oya sile wo oongundhi dhehale noompadhi, oongodhi noomboha dhadho oshimpwiyu.
38 Moses naAaron noyana oya li ye na okuyunga ontanda komeho getsalihangano lwokuuzilo. Oya li ye na oshimpwiyu shokutsakanitha omayakulo metsalihangano molwAaisraeli. Shaa ngoka gulwe te shi yelekele e shi ninge, oku na okudhipagwa.
39 Omwaalu gwaalumentu Aalevi ayehe kumwe yomwedhi gumwe naamboka ye vule po payalulo lyomaludhi lya ningwa palombwelo lyOmuwa, ogwa li 22 000.
40 Omuwa okwa lombwele Moses a ti: “Yalula aamati ayehe aatango yAaisraeli okuza kumboka yomwedhi gumwe naamboka ye vule po; kutha omwaalu gwomadhina gawo.
41 Aalevi oye na okukala yandje peha lyaatango ayehe yAaisraeli, niimuna yAalevi otayi pingene po iimuna yAaisraeli. Ongame Omuwa.”
42 Moses okwa vulika nokwa yalula aamati ayehe aatango
43 yomwedhi gumwe naamboka ye vule po, nomwaalu gwawo aguhe ogwa li 22 273.
44 Omuwa okwa lombwele Moses a ti:
45 “Ngashingeyi yoololela ndje Aalevi ya ninge yandje peha lyaamati ayehe aatango yAaisraeli. Yoolola wo iimuna ayihe yAalevi peha lyiimuna ayihe iitango yAaisraeli.
46 Aatango mbaka 273 ye vule omwaalu gwAalevi ou na oku ya kulila ko.
47 Shaa ngoka ota gu iisiliveli itano pandjele yiimaliwa mbyoka hayi longithwa motempeli.
48 Gandja iimaliwa mbika yiikulila kuAaron noyana.”
49 Moses okwa kutha iimaliwa yiikulila yomwaalu gwaatango mboka ye vule omwaalu gwAalevi.
50 Okwa kutha iimaliwa iisiliveli 1 365
51 e ta pe Aaron noyana ofuto yekulilo, ngaashi Omuwa e mu lombwele.
1 Omuwa okwa lombwele Moses naAaron a ti:
2 “Yalula omwaalu gwAalevi yoludhi lwaKohat pamazimo nopamagumbo gawo,
3 aalumentu ayehe yomimvo omilongo ndatu sigo omilongo ntano mboka ya gwana miilonga yeyakulo lyetsalihangano.
4 Eyakulo lyawo olya kwatelela mo iinima iiyapukilela.
5 “Uuna ontanda tayi tembudhwa, Aaron noyana naya ye metsalihangano e taa kutha mo etopolitho ye li siikile oshikethahangano.
6 Naye shi siikile noshipa shongombefuta e taa yala ko onguwo ombulau kombanda nokuhwekela omitenge moonkogo.
7 “Naa siikile oshitaafula shiikwiila iiyapuki nelapi embulau e taa tenteke ko iiyaha, iitsinino, uuyo womayambo niitenga yiinuwandjambo. Koshitaafula naku kale aluhe iikwiila iiyapuki.
8 Naa siikile ayihe mbika nelapi etiligane e taa tula ko oshipa shongombefuta nokuhwekela omitenge moonkogo.
9 “Naa kuthe onguwo ombulau e taa siikile nayo oshihukikwanyeka noolamba dhasho, iikonde yokutetitha omalapi goolamba, iikangwa yokutula mo omutoko gwokomalapi niikwatelwa yomagadhi gooholivi.
10 Naye shi dhingile niikwaniipangitho yasho ayihe moshipa shongombefuta e taye shi tula piihumbatelo.
11 “Naa siikile oshiyambelo shoshingoli nelapi embulau e taa tula ko oshipa shongombefuta notaa hwekele mo omitenge.
12 Naa kuthe iilongitho ayihe hayi longithwa metsalihangano, notaye yi dhingile melapi embulau e taye yi siikile noshipa shongombefuta noku yi tula piihumbatelo.
13 Naa kuthe omutoko koshiyambelo e taye shi siikile nelapi etiliganembwilili.
14 Naa tenteke ko iikwaniipangitho ayihe hayi longithwa poshiyambelo: iikangwa yomakala, iizigitho, iihupulo nuuyo. Naye yi siikile ihe noshipa shongombefuta e taa hwekele mo omitenge.
15 Ontanda nge tayi tembuka, oludhi lwaKohat nalu humbate iinima iiyapuki, Aaron noyana shaa ya mana oku yi siikila niipumbiwa yayo ayihe. Oludhi lwaKohat inalu guma iinima iiyapuki, otaa ningi ya se. “Shika oshimpwiyu sholudhi lwaKohat, uuna etsalihangano tali tembuka.
16 “Eleasar, omuna gwomuyambi Aaron, na sile etsalihangano oshimpwiyu nomagadhi gomoolamba, iitsinino, oondjambo dhiikulya, omagadhi gokugwaya noshaa shoka metsalihangano sha yapulilwa Omuwa.”
17 Omuwa okwa lombwele Moses naAaron e ta ti:
18 “Inamu pitika, oludhi lwaKohat
19 lu dhipagwe po kokuhedha popepi niinima iiyapukilela. Opo shaa ningwe, Aaron noyana naa ye mo e taa pe omuntu kehe oshilonga she e taye mu lombwele shoka e na okuhumbata.
20 Ihe Aakwakehat ngele taa yi metsalihangano, ya tale aayambi nkene taa longekidhile iinima iiyapuki etembu, otaa si.”
21 Omuwa okwa lombwele Moses a ti:
22 “Yalula wo omwaalu gwAalevi yoludhi lwaGerson pamazimo nopamagumbo,
23 aalumentu ayehe yomimvo omilongo ndatu sigo omilongo ntano mboka ya gwana okuyakula metsalihangano.
24 Eyakulo lyawo olyo okuhumbata iinima tayi landula:
25 etsalihangano, esiikilo lyalyo lyomeni, esiikilo lyokombanda lyiipa yoongombefuta, eshigolapi lyoposheelo,
26 omalapi noongodhi dhehale lya kunduka etsalihangano noshiyambelo, eshigolapi lyoposheelo shehale, niipumbiwa ayihe yokuthikameka iinima mbika. Naa gwanithe iilonga ayihe tayi pumbiwa miinima mbika.
27 Moses naAaron naa tale, nkene oludhi lwaGerson talu gwanitha iilonga yalwo ayihe notalu humbata shaa shoka talu pewa kuAaron noyana.
28 Iimpwiyu yoludhi lwaGerson mokuyakula metsalihangano oyo mbika; naye yi gwanithe mewiliko lyaItamar yaAaron omuyambi.”
29 Omuwa okwa lombwele Moses a yalule Aalevi yoludhi lwaMerari pamazimo nopamagumbo gawo,
30 aalumentu ayehe yomimvo omilongo ndatu sigo oyomilongo ntano mboka ya gwana okuyakula metsalihangano.
31 Eyakulo lyawo olyo okuhumbata iipilangi, omalukambo, oongundhi noompadhi dhetsalihangano,
32 nosho wo oongundhi, oompadhi, oomboha noongodhi dhehale lya kunduka etsalihangano niipumbiwa yadho ayihe. Omulumentu kehe ota kala e na oshilonga shokuhumbata iinima yontumba.
33 Iimpwiyu yoludhi lwaMerari meyakulo metsalihangano oyo mbika; naye yi gwanithe mewiliko lyaItamar yaAaron omuyambi.
34 Palombwelo lyOmuwa Moses, Aaron naawiliki yegongalo oya yalula omaludhi gatatu gaLevi: Kohat, Gerson naMerari. Oye shi ningi pamazimo nopamagumbo gawo e taa yalula aalumentu ayehe yomimvo omilongo ndatu sigo oyomimvo omilongo ntano mboka ya gwana okuyakula metsalihangano. Omiyalu odho ndhika: Oludhi Omwaalu Kohat 2 750 Gerson 2 630 Merari 3 200 Kumwe 8 580
35 Omulumentu kehe okwa yalulwa, ngaashi Omuwa a lombwele Moses; nopalombwelo lyOmuwa lya pewa Moses, omulumentu kehe okwa pewa oshimpwiyu shokuhumbata.
1 Omuwa okwa lombwele Moses a ti:
2 “Aaisraeli naa tidhe mo moontanda shaa ngoka e na uuvu woshilundu nenge ngoka i ikwatitha oshidhila, sho a gumu omudhimba.
3 Aantu mbaka ya nika oshidhila naa tidhwe mo, opo yaa nyateke oontanda moka nda kala mokati kawo.”
4 Aaisraeli oya vulika e taye ya tidha mo moontanda.
5 Omuwa okwa lombwele Moses a ti:
6 “Lombwela Aaisraeli kutya ngele ope na omulumentu nenge omukiintu ti iteka Omuwa e ta yono komuntu mukwawo, ota kala e na ondjo.
7 Oku na okuhempulula eyono lye e ta futu ongunga ye a gwedhela ko oshititano.
8 Ihe omuntu ngoka a yono, ngele okwa si ye kee na omunezimo lyomekota gwokufutwa, ofuto nayi pewe Omuwa, yi ninge yomuyambi. Omufuti na gandje wo onzi ondumentu yehanganitho, ndjoka tayi dhimi po ondjo ye.
9 Oshigandjwa kehe oshiyapuki Omuisraeli te shi etele Omuwa, otashi ningi shomuyambi ngoka e shi etelwa.
10 Omuyambi kehe ota dhiginine omayambo e ga pewa.”
11 Omuwa okwa lombwele Moses a ti:
12 “Lombwela Aaisraeli omautho moshinima sha tya ngeyi. Otashi vulika omukiintu ta kotokele omulume e ta yi komulumentu gulwe.
13 Omulumentu nguka ota lala naye, ihe omukiintu ote shi holeke omulume. Kaku na wo ngoka e mu kwata onkankeka, nando ye mwene okwa yona shili.
14 Omulume ngele ota kwatwa kuukodhi molweyono ndika, nenge ota kwatwa kuukodhi, nando omukadhi ina yona,
15 ne mu fale komuyambi. Na fale wo ondjambo yomukadhi, yi thike pomakopi gaali guusila wiishokelya, ihe ina tula ko omagadhi nenge iitsinino, oshoka oyo ondjambo yuukodhi, ondjambo tayi dhimbulukitha eyono.
16 “Omuyambi ne ete po omukiintu e te mu thikameke komeho goshiyambelo.
17 Na tile omeya gamwe moshiyuma sheloya e ta kutha evi polupanda lwetsalihangano e te li tula momeya.
18 Opo ihe na thikameke omukiintu koshipala shOmuwa nokuhwatununa omafufu gomukiintu e ta tula ondjambo yedhimbulukitho, kokutya ondjambo yuukodhi, peke lyomukiintu. Meke lyomuyambi omu na omeya omalulu gethingano.
19 Omuyambi na ganithe omukiintu e ta ti kuye: ‘Ngele ino hondela, omeya gethingano itage ku etele oshiponga.
20 Ihe ngele owa hondela,
21 nena Omuwa na thinge edhina lyoye mokati kooyakweni. Na thinge oshivalelo shoye shi ganye, nela lyoye li zinde.
22 Omeya ngaka gethingano naga ye mela lyoye, opo ge li zindike, noshivalelo shoye shi ganye.’ “Omukiintu na yamukule ta ti: ‘Otandi zimine; Omuwa na longe.’
23 “Konima yaambika omuyambi na nyole etulomutima ndika nokuyoga enyolo momeya gethingano.
24 Manga inaa nwetha omukiintu omeya gethingano,
25 omuyambi na kuthe ondjambo yuukodhi miikaha yomukiintu, ye ne yi dhugadhuge koshipala shOmuwa e te yi tula koshiyambelo.
26 Na kuthe mondjambo eke lyu udha lyuusila noku u lungunithila koshiyambelo. Hugunina na nwethe omukiintu omeya.
27 Ngele omukiintu okwa hondela, omeya otage mu ehameke; ela lye otali zindi, noshivalelo she tashi ihunyu mumwe. Ota kala omuthingwa mokati koyaandjawo.
28 Ihe ngele ke na ondjo, ita ningwa sha nota vulu okuvala.
29 “Ndjika ompango yuukodhi, omukiintu nge ta kotokele omulume e ta hondele.
30 Ngele omulumentu ta kwatwa kuukodhi e ta kodhilile omukadhi, na tule omukadhi koshipala shOmuwa, nomuyambi ni ipyakidhile naye pautho lyompango ndjika.
31 Omulumentu na kale a manguluka kondjo, ihe omukiintu ngele oku na ondjo, na tegelele egeelo.”
1 Omuwa okwa lombwele Moses nokwa ti:
2 “Lombwela Aaisraeli u tye: Ngele ope na omulumentu nenge omukiintu ta gana egano lya sheywa, a ninge omunasiri noti iyapulile Omuwa,
3 ni idhilike omaviinu nomalovu. Na kale itaa nu sha sha kolwa moomviinu nenge a lye omandjembele omatalala nenge goonganye.
4 Ethimbo alihe manga e li muunasiri, ina lya sha sha za moomviinu, nando shi kale oonkenya nenge omayula gomandjembele.
5 “Ethimbo alihe e li kohi yegano lyuunasiri, ina tetitha omafufu ge nenge e ga kulule. Okwa mangwa kegano ethimbo alihe ndyoka i iyapulila Omuwa; na ethe omafufu ge noombenzi dhe dhi koke.
6 Omasiku agehe sho i iyapulila Omuwa, ke na okuhedha pomudhimba.
7 Nando na kale ohe nenge yina a sa, nenge omumwayina omulumentu nenge omukiintu, ini ikwatitha oshidhila kuyo, oshoka endhindhiliko lyeiyapulo lye kuKalunga oli li komutse gwe.
8 Ethimbo alihe manga e li muunasiri, okwa yapulilwa Omuwa.
9 “Omafufu omayapuki gomunasiri ngele oga nyatekwa, molwashoka pe na omuntu a si ombaadhilila popepi naye, na tegelele omasiku gaheyali, opo a kulule omafufu ge noombenzi dhe; osho ngeyi ta ka kala a yogoka.
10 Mesiku etihetatu ne ete oonguti mbali nenge uungutyona uyali komuyambi posheelo shetsalihangano.
11 Omuyambi na yambe yimwe yi ninge eyonondjambo, nonkwawo yi ninge efikilondjambo, opo a gwanithe eitheto lye pamusindilo molwekwatathano lye nomudhimba. Esiku tuu ndyoka omuntu na yapule omafufu ge,
12 ye a tamekulule okwiiyapulila Omuwa ethimbo lye alihe lyuunasiri. Ethimbo lyonale itali yalulwa we, oshoka okwa kwatitha omafufu ge oshipwe. Na yambe ondjondjambo yonzigona yomumvo gumwe.
13 “Uuna omunasiri ta tsakanitha euvaneko lye, na gwanithe omisindilo. Na ye kosheelo shetsalihangano
14 e te etele Omuwa iimuna itatu yaa na oshipo: onzigona ondumentu yomumvo gumwe omolwefikilondjambo, onzigona onkiintu yomumvo gumwe omolwondjondjambo nonzi ondumentu omolwekwatathanondjambo.
15 Ne ete wo ontungwa yi na iikwiila inaayi tulwa efulika: iikwiila ya mbumbwakana ya ningwa nuusila womunziya wa lungilwa momagadhi gooholivi, uukwiila wa pepuka wa gwayekwa omagadhi gooholivi nondjambo yiikulya niikunuwa pamwe niimuna mbyoka.
16 “Ayihe mbika omuyambi ne yi ete koshipala shOmuwa, ye a yambe ondjondjambo nefikilondjambo.
17 Na yambele Omuwa onzi ondumentu omolwekwatathanondjambo te yi yamba pamwe nontungwa yiikwiila yaa na efulika; na yambe wo ondjambo yiikulya niikunuwa.
18 Omunasiri na kululithe omutse gwe posheelo shetsalihangano, nomafufu ge ne ga umbile momulilo ngoka tagu lungunitha po ekwatathanondjambo.
19 “Shampa oshooko shonzi sha pi mombiga, omuyambi ne shi kuthe pamwe noshikwiila shimwe sha mbumbwakana, e te yi tula peke lyomunasiri.
20 Omuyambi ne yi dhungadhungithe koshipala shOmuwa. Oyo ondjambo ondjapuki tayi ningi yomuyambi, pamwe nondete noshilama shonzi, mbyoka tayi ningi yomuyambi pampango. Konima yaambika omunasiri ota pitikwa a nwe omaviinu.
21 “Ndjika oyo ompango yaanasiri, ihe omunasiri ngele ota gandja euvaneko tali pitilile shoka egano lye tali pula, na tsakanithe shili euvaneko ndyoka.”
22 Omuwa okwa lombwele Moses a ti:
23 “Lombwela Aaron noyana kutya mokuyambeka Aaisraeli oye na okutya ngeyi:
24 Omuwa ne ku laleke nuuyamba ye ne ku gamene.
25 Omuwa ne ku yelithile oshipala she ye ne ku sile ohenda.
26 Omuwa ne ku taalelithile oshipala she ye ne ku pe ombili.”
27 Osho ngeyi naa tumbulile Aaisraeli edhina lyandje, ngame notandi ya yambeke.
1 Moses sho a mana okudhika etsalihangano, okwe li gwayeke e te li yapula niikwaniipangitho yalyo ayihe, osho wo oshiyambelo niikwaniipangitho yasho.
2 Nena aakuluntu yomaludhi mboka ya li aawiliki yomazimo gaIsrael, aalumentu tuu mboka ya li aatonateli yomayalulo,
3 oye eta omayambo gawo kOmuwa: Omatemba gahamano noonani omulongo nambali, etemba limwe olya zi kaawiliki yaali, nonani okomuwiliki kehe. Sho ye ga gandja,
4 Omuwa okwa lombwele Moses e ta ti:
5 “Taamba omagano ngaka gokulongithwa miilonga omolwetsalihangano; ga pa Aalevi pailonga mbyoka ye na oku yi longa.”
6 Moses okwa gandja omatemba noonani kAalevi.
7 Omatemba gaali noonani ne okwe dhi gandja kAakwagerson,
8 nomatemba gane noonani hetatu okwe dhi gandja kAakwamerari. Iilonga yawo ayihe oya li yi na okulongwa mewiliko lyaItamar yaAaron.
9 Moses ina gandja omatemba nenge oonani kAakwakohat, oshoka oyo taa si oshimpwiyu shiilongitho iiyapuki mbyoka ye na oku yi humbata komapepe gawo.
10 Aawiliki oye eta wo omayambo, opo ya dhane oshituthi sheyapulo lyoshiyambelo. Sho ya li yi ilongekidha okugandja omagano gawo poshiyambelo,
11 Omuwa okwa lombwele Moses a ti: “Ya lombwela kutya esiku kehe lyethimbo lyomasiku omulongo nagaali, gumwe gwomaawiliki oku na okugandja omagano ge e ga gandjele eyapulo lyoshiyambelo.”
12 Omagano gawo oye ga gandja palandulathano ndika: Esiku Ezimo Omuwiliki 1 Juda Nahshon yaAminadab 2 Issaskar Netanel yaZuar 3 Sebulon Eliab yaHelon 4 Reuben Elizur lyaShedeur 5 Simeon Shelumiel yaSurishaddai 6 Gad Eljasaf lyaReguel 7 Efraim Elishama lyaAmmihud 8 Manasse Gamaliel yaPedazur 9 Benjamin Abidan yaGidoni 10 Dan Ahiezer yaAmmishaddai 11 Aser Pagiel yaOkran 12 Naftali Ahira yaEnan Omayambo ngoka ge etwa, oga li ga faathana: oshiyaha shimwe shoshisiliveli shoosekeli 130 nokayaha koshisiliveli koosekeli 70, ayihe pandjele yosekeli ndjoka hayi longithwa motempeli, ayihe iyali oya li yu udha uusila womunziya mwa tulwa omagadhi gooholivi omolwondjambo yiikulya; oshiyaha shimwe shoshingoli shoosekeli omulongo, shu udha uutsinino; ongombe yimwe ondumentu yomutanda, onzi yimwe ondumentu, onzigona yimwe yomumvo gumwe omolwefikilondjambo; noontsezi mbali, oonzi ntano oondumentu, iikombo itano noonzigona ntano dhomumvo gumwe omolwekwatathanondjambo.
13 Omayambo agehe kumwe ngoka ge etwa kaawiliki omulongo nayaali omolweyapulo lyoshiyambelo, oge li ngaashi taga landula mpaka: — iiyaha yoshisiliveli omulongo niiyali, uuyaha woshisiliveli omulongo nuuyali, ayihe kumwe yoosekeli 2 400 — iiyaha yoshingoli omulongo niiyali, ayihe kumwe yoosekeli 120, yu udha iitsinino — oontsezi omulongo nambali, oonzi oondumentu omulongo nambali noonzigona omulongo nambali dhomumvo gumwe pamwe noondjambo dhiikulya, omolwomafikilondjambo — iikombo omulongo niiyali, omolwoondjondjambo — oontsezi omilongo mbali nane, oonzi oondumentu omilongo hamano, iikombo omilongo hamano, oonzigona omilongo hamano dhomumvo gumwe, omolwomakwatathanondjambo.
14 Moses sho a yi metsalihangano a ka popye nOmuwa, okwa uvu Omuwa ta popi naye ewi tali zi koshisiikilo shoshikethahangano, pokati kaakerubi yaali.
1 Omuwa okwa lombwele Moses a ti:
2 “Lombwela Aaron kutya sho ta tula oolamba heyali koshihukikwanyeka, ne dhi tule tuu tadhi minikile lwokomeho goshihukikwanyeka.”
3 Aaron okwe shi ningi: okwa tula oolamba okuminikila lwokomeho goshihukikwanyeka.
4 Oshihukikwanyeka ashihe, okuza kompadhi yasho sigo okuulenga woongala osha li sha ningwa moshingoli sha hambulwa, pashiholelwa shoka Omuwa u ulukile Moses.
5 Omuwa okwa lombwele Moses a ti:
6 “Yoolola mo Aalevi mAaisraeli noku ya yelitha
7 mohedhi tayi landula: ya shashamina nomeya geyelitho e to ya lombwele, yi ikululithe sheke omalutu gawo noya yoge oonguwo dhawo. Nena otaa kala ya yogoka.
8 Naa kuthe ontana yomutanda ondumentu nondjambo yiikulya kokutya, uusila womunziya mwa tulwa omagadhi gooholivi, manga ngoye to kutha ongombe ondumentu yi ninge eyonondjambo.
9 Gongaleka egongalo alihe lyaIsrael e to thikameke Aalevi komeho getsalihangano.
10 Aaisraeli naa tenteke iikaha yawo komitse dhAalevi,
11 manga Aaron te ya yapulile ndje, ya ninge ondjambo yedhugadhugo ya zi kAaisraeli, opo ya yakule ndje.
12 Aalevi naa tenteke iikaha yawo komitse dhoongombe mbali oondumentu; yimwe nayi yambwe eyonondjambo nonkwawo efikilondjambo, opo eyelithoyapulo lyAalevi li tsakanithwe.
13 “Yapulila ndje Aalevi, ya ninge ondjambo yandje yedhugadhungo nou ya tule metonatelo lyaAaron noyana.
14 Yoolola Aalevi mAaisraeli, opo ya ninge yandje.
15 Sho wa yelitha nokuyapula Aalevi, otaa vulu okuyakula metsalihangano.
16 Onde ya ithana peha lyaatango ayehe yAaisraeli, oyo noya ningi yandje mwene.
17 Sho nda dhipaga aatango yAayegipiti, onda yapula osheeli kehe shomuntu noshoshimuna, shi ninge shandje.
18 Ngashingeyi otandi kutha Aalevi peha lyaatango ayehe yAaisraeli,
19 notandi gandja Aalevi kuAaron noyana, ya ninge omagano ga za kAaisraeli okuyakula metsalihangano peha lyAaisraeli, opo ndi gamene Aaisraeli koshiponga shoka tashi ya adha, ngele taa hedha pehala eyapuki.”
20 Moses, Aaron nAaisraeli ayehe oya yapula Aalevi, ngaashi Omuwa a lombwele Moses.
21 Aalevi oyi iyelitha e taa yogo oonguwo dhawo, naAaron okwe ya yapula, ya ninge omagano gOmuwa. Okwe ya tsakanithile eyelithoyapulo.
22 Aantu oya longo ashihe, ngaashi Omuwa a lombwele Moses kombinga yAalevi. Aalevi noya tameke okulonga metsalihangano mewiliko lyaAaron noyana.
23 Omuwa okwa lombwele Moses e ta ti:
24 “Omulevi kehe e na omimvo omilongo mbali nantano nenge dhi vule po, oku na oku ka yakula metsalihangano,
25 nomepipi lyomimvo omilongo ntano ota zimbuka.
26 Ota vulu ngaa okukwatha Aalevi aakwawo okugwanitha iilonga yawo metsalihangano, ihe ke na okulonga we iilonga yo yene. Ano osho ngeyi u na okuuthila Aalevi iilonga yawo mbyoka ye yi pewa.”
1 Omuwa okwa lombwele Moses mombuga Sinai momwedhi gwotango gwomumvo omutiyali Aaisraeli sho ya tembudha mo muEgipiti. Okwa ti:
2 “Mesiku etimulongo netine lyomwedhi nguka, peningino lyetango, Aaisraeli oye na okudhana Opaasa pamautho agehe gayo.”
3
4 Moses okwa lombwele aantu ya dhane Opaasa,
5 nongulohi yesiku etimulongo netine lyomwedhi gwotango oye shi ningi mombuga Sinai. Aantu oya gwanitha ayihe, ngaashi Omuwa a lombwele Moses.
6 Okwa li aalumentu yi ikwatitha oshidhila shokukwata omudhimba, noinaa vula we okudhana Opaasa esiku ndyoka. Oya yi kuMoses naAaron
7 e taa ti: “Otwa nika oshidhila, oshoka otwa guma omudhimba, ihe omolwashike itaatu pitikilwa tu gandje omayambo gOmuwa pamwe nAaisraeli yalwe?”
8 Moses okwe ya yamukula a ti: “Tegeleleni, sigo nda mono eutho kOmuwa.”
9 Omuwa okwa lombwele Moses
10 a lombwele Aaisraeli ta ti: “Ngele ope na gumwe gwomune nenge gwomoluvalo lweni i inikitha oshidhila a guma omudhimba nenge a ya mondjenda yokokule, ndele okwa hala ngaa okudhana Opaasa,
11 ota pitikwa e yi dhane momwedhi tagu landula, ongulohi yesiku etimulongo netine lyomwedhi omutiyali. Naye yi dhane niikwiila inaayi tulwa efulika niigwanga iilulu.
12 Inaa hupitha ko iikulya sigo esiku tali landula yo inaa teya nando esipa lyoshimuna. Naa dhane Opaasa pamautho agehe.
13 Ihe omulumentu ngoka omuyelele ye ina za po a ye kokule ando note etha okudhana Opaasa, na dhimwe mo maantu yandje, oshoka ine eta omayambo gOmuwa pethimbo lyu uthwa. Omuntu a tya ngaaka oku na ondjo.
14 “Ngele ope na omukwiilongo a kala mokati keni a hala a dhiginine Opaasa, ne yi dhane pamautho nopamisindilo. Ompango oyo tuu ndjoka yimwe tayi utha aavalelwamo naakwiilongo.”
15 Esiku ndyoka etsalihangano lya thikamekwa, oshikogo oshe li siikile. Ongulohi osha kala sha yeta omulilo, sigo taku shi.
16 Shika osha kala aluhe; oshikogo oshe li siikile, uusiku osha kala sha yeta omulilo.
17 Ano shampa tuu oshikogo sha yeluka po, Aaisraeli oya tembudha po oontanda e taye dhi yungile pokuma mpoka oshikogo sha kankama.
18 Aantu oya lundulula oontanda palombwelo lyOmuwa noye dhi yungu pashipango she. Oshikogo manga sha siikila etsalihangano, oya kala moontanda.
19 Uuna oshikogo sha siikila etsalihangano ethimbo ele, oya vulika kOmuwa yo inaa huma ko komeho.
20 Pomathimbo gamwe oshikogo osha kala owala sha siikila etsalihangano omasiku gamwe ageke, ihe aluhe oya kala moontanda nenge ya tembuka palombwelo lyOmuwa.
21 Momasiku gamwe oshikogo osha kala owala okuza ongulohi sigo ongula, noya tembuka, shaa tuu oshikogo sha yeluka po. Nando nashi kale uusiku nenge omutenya oshikogo sho sha yeluka po, otaa yi ashike.
22 Uuna oshikogo sha siikile etsalihangano omasiku gaali, omwedhi nenge omumvo nenge ethimbo ele, itaa tembuka. Ihe sho sha yeluka po, otaa tembuka.
23 Oya li haa tembudha po oontanda noku dhi yunga palombwelo lyOmuwa, ngaashi e ya lombwelithitha Moses.
1 Omuwa okwa lombwele Moses ta ti:
2 “Ihambulithila omankuma gaali goshisiliveli ga hambulikika gokwiithana egongalo li gongale, opo mu tembuke moontanda.
3 Ewi lyomankuma agehe gaali shampa lyu uvika, egongalo alihe nali gongale posheelo shetsalihangano.
4 Ihe ngele enkuma limwe alike tali hikwa, nena aawiliki yomazimo naa gongalele pungoye.
5 Uuna omankuma taga hikwa momadhengo omafupi, nena omazimo ngoka ge li kuuzilo, naga tembuke.
6 Shampa taga hikwa olutiyali, nena omazimo gokuumbugantu naga tembuke. Omankuma nge taga hikwa, oontanda otadhi tembudhwa,
7 ihe opo egongalo li ithanwe li gongale, omankuma oge na okuhikwa newi li ili.
8 Omankuma ohaga hikwa kaayambi aana yaAaron. “Omautho ngaka oge na okudhigininwa komaluvalo geni aluhe sigo aluhe.
9 Uuna mwa ponokelwa kaatondi moshilongo sheni, hikeni omankuma ga kuge onkugo yolugodhi. Ngame, Omuwa Kalunga keni, otandi mu kwatha notandi mu hupitha miikaha yaatondi yeni.
10 Osho wo methimbo lyenyanyu — mOshituthi shomwedhi omupe nomiituthi yeni yilwe — omu na okuhika omankuma, sho tamu yamba omafikilondjambo nomakwatathanondjambo geni, nena otandi mu kwatha. Ongame Omuwa Kalunga keni.”
11 Mesiku etimilongombali lyomwedhi omutiyali gwomumvo omutiyali oshikogo osha yeluka po kombanda yetsalihangano.
12 Aaisraeli noya tameke ondjenda yawo taa zi mombuga Sinai. Oshikogo osha kankama mombuga Paran.
13 Oyo oya zi po palombwelo lyOmuwa, ngaashi e ya lombwelithitha Moses,
14 noshaa ethimbo ya humu ko, oye shi ningi melandulathano limwe. Mboka ye li kohi yepandela lyoshitopolwa shaJuda, oya zi po tango, etanga netanga, mewiliko lyaNahshon yaAminadab.
15 Netanel yaZuar okwa li ta wilike ezimo lyaIssaskar,
16 naEliab lyaHelon oondyoka lyaSebulon.
17 Etsalihangano sho lya dhikulwa po, aantu yoludhi lwaGerson nolwaMerari oya zi po ya humbata etsalihangano.
18 Okwa landula ihe mboka ye li kohi yepandela lyoshitopolwa shaReuben taa ende etanga netanga mewiliko lyaElizur lyaShedeur.
19 Shelumiel yaSurishaddai okwa li ta wilike ezimo lyaSimeon,
20 naEljasaf lyaDeuel okwa li ta wilike ezimo lyaGad.
21 Opo ihe Aalevi yoludhi lwaKohat oya landula ko ya humbata iinima iiyapuki. Manga inaa thika kontanda ompe, etsalihangano olya adhika lya dhikwa nale.
22 Okwa landula mboka ye li kohi yepandela lyoshitopolwa shaEfraim, etanga netanga, mewiliko lyaElishama lyaAmmihud.
23 Gamaliel yaPedazur okwa li ta wilike ezimo lyaManasse,
24 naAbidan yaGidoni okwa li ta wilike ezimo lyaBenjamin.
25 Hugunina, mongundu yokugamena aatembuki konima okwa li mboka yokohi yepandela lyoshitopolwa shaDan ya piti mo etanga netanga mewiliko lyaAhiezer yaAmmishaddai.
26 Pagiel yaOkran okwa li ta wilike ezimo lyaAser,
27 naAhira yaEnan okwa li ta wilike ezimo lyaNaftali.
28 Ndika olyo elandulathano lyokuza moontanda etanga netanga, Aaisraeli sho taa thigi po oontanda e taa tembuka.
29 Moses okwa lombwele suwala ye Hobab yaJetro Omumidiana ta ti: “Otu li pokuthika kehala ndyoka Omuwa a ti ote li tu pe. Okwa uvaneke a laleke Israel nuuyamba, onkee ila tu yeni pamwe, notatu ka topoleni oshihakanwa.”
30 Hobab okwa yamukula a ti: “Aawe, ngame ondi na okushuna kevi lyetu nokoyaandjetu.”
31 Moses okwa ti: “Tu kwatha tuu, waa tu thige po, oshoka ongoye wa tseya nawa ombuga noto vulu oku tu ulukila mpoka tatu yungile oontanda.
32 Ngele otatu yeni, nena omayambeko agehe ngoka Omuwa te ke tu yambeka nago, otatu ke ga topoleni.”
33 Aantu sho ya zi puSinai, ondundu yOmuwa, oye ende omasiku gatatu. Oshikethahangano shOmuwa oshe ya tetekelele, opo shi ya monene ehala lyokuyunga oontanda.
34 Ethimbo kehe taa zi montanda, oshikogo shOmuwa osha tengelele kombanda yawo omutenya.
35 Shampa oshikethahangano sha thikama shi ye, Moses oti igidha ta ti: “Omuwa, yambuka: halakanitha aatondi yoye nou kondjithe mboka ye ku tonde.”
36 Uuna tashi kankama, oti igidha ta ti: “Omuwa, galuka, u ye koongundu dhomayuvi ogendji dhAaisraeli.”
1 Aantu oya tameke okungungutulila Omuwa omolwomaudhigu. Omuwa sho e ya uvu, okwa geye, nomulilo gwOmuwa ogwa yaka mokati kaantu. Ogwa hwama mokati kawo e tagu lungunitha po oontanda dhokooha.
2 Aantu oya kugile Moses ekwatho; oye okwa galikana Omuwa, omulilo nogwa dhimi.
3 Ehala ndyoka olya lukwa Tabera, oshoka omulilo gwOmuwa ogwa li gwa hwama mokati kawo.
4 Okwa li ku na aakwiilongo mokati kAaisraeli. Oya li ye na omwamwa gwonyama, nAaisraeli yo yene oya tameke okungungutula taa ti: “Akwetu, olye te tu pe onyama tu lye?
5 MuEgipiti otwa li hatu li oohi, ngaashi twa hala, dho inadhi futwa nando osha. Otatu dhiladhila okatanga kombihu, ookanuwa, oomboganyanga, oonyanga noonyalanyanga.
6 Ihe ngashingeyi otwa loloka, oshoka kape na sha shokulya kape na sha shilwe, omanna owala aluhe!”
7 (Omanna oya li ya fa oombuto oonshona oontokeleshunga.
8 Aantu oya yi ko noye yi toola, ye yi tsu koshini e taye yi teleke mombiga e taye yi anda omakaka.
9 Oya li yi na omulyo gwa fa oshikwiila she elelwa momagadhi gooholivi. Omume sho ya gwile moontanda, nomanna oya gwile mo wo.)
10 Moses okwa uvu aantu taa ngungutula yo ya thikama moongundu piiyelo yomatsali gawo. Ondjahi yOmuwa noya hwama, naMoses wo okwa li u uvite nayi.
11 Moses okwa ti kOmuwa: “Omolwashike wa hindi ndje? Omolwashike inoo sila ndje ohenda? Omolwashike wa pe ndje omutenge gwaantu mbano ayehe?
12 Hangame nde ya shita, hangame nde ya vala ndishi! Omolwashike to ti nandi ya yamuthe noku ya humbata momaako ya fa uuhanona noku ya fala kevi ndyoka we li uvanekele ootatekulu nokugana?
13 Onyama otandi yi adha peni yokuliwa kaantu ayehe mbano? Oshoka otaa lilile ndje taa ti: ‘Tu pa onyama tu lye.’
14 Itandi vulu we okwiihumbatela aantu mbaka ongame awike, oya tona ndje.
15 Ngele osho to ningi ndje ngaaka, sila ndje ohenda u dhipage ndje, opo ndaa kale we muudhigu u thike mpaka.”
16 Omuwa okwa lombwele Moses a ti: “Gongaleka aalumentu omilongo heyali ya simana ya talwa oyo aawiliki yoshigwana. Ya eta kungame posheelo shetsalihangano e to ya lombwele, ya thikame pamwe nangoye.
17 Otandi ka kulukila pohi e tandi popi nangoye notandi kutha ombepo mombepo ndjoka nde ku pa e tandi yi tula muyo. Nena otaye ku kwatha mokuhumbata omutenge gwaantu mbaka, opo waa gu humbate ngoye awike.
18 Ngashingeyi lombwela aantu to ti: ‘Iyapuleni omolwesiku lyangula; otamu ka mona onyama mu lye. Omuwa okwe mu uvu, sho tamu mu thiminike tamu ti: Otwa hala onyama tu lye! MuEgipiti otwa li nawa. Ngashingeyi Omuwa ote ke mu pa onyama, one nomu na oku yi lya.
19 Omu na oku yi lya, hasiku limwe nenge omasiku gaali nenge gatano nenge omulongo nenge omilongo mbali nokuli,
20 aawe, omwedhi aguhe, sigo tayi pitile momayulu notayi mu kungitha. Shika otashi ningwa, oshoka omwe ekelehi Omuwa, ngoka e li mokati keni, nomwe mu ngungutulile tamu ti ando otwa kalele nani muEgipiti.’ ”
21 Moses okwa ti kOmuwa: “Otandi enditha aantu 600 000, noto ti oto ya pe onyama ya gwana omwedhi.
22 Oku na tuu oongombe, iikombo noonzi dha gwana dhi dhipagwe, opo ya kute? Nenge oohi adhihe dhomefuta tadhi ya gwanene?”
23 Omuwa okwa yamukula a ti: “Oshikaha shOmuwa oshifupi nani? Oto ke shi tala, ngele shoka nda popi, otashi gwanithwa nenge aawe!”
24 Moses okwa piti mo e ta lombwele aantu shoka Omuwa a popi. Okwa gongaleke aawiliki omilongo heyali e te ya tula momukunkulo gwetsalihangano.
25 Omuwa okwa kulukile pohi e li moshikogo e ta popi naye. Okwa kutha ombepo mombepo ndjoka a pele Moses e te yi tula maawiliki omilongo heyali. Ombepo sho ye ya lambele, oya tameke okuhunganeka, ihe inashi kala olule.
26 Aawiliki yaali yomomilongo heyali, Eldad naMedad, oya li ya thigala montanda yo inaa ya kosheelo shetsalihangano. Ombepo ye ya lambelele montanda noya tameke okuhunganeka.
27 Omugundjuka gumwe okwa matuka a ka lombwele Moses shoka Eldad naMedad taa ningi.
28 Nena Josua yaNun, ngoka a kala omuyakuli gwaMoses okuza kuugundjuka we, okwa nukile moohapu ta lombwele Moses ta ti: “Tatekulu, ya ganda!”
29 Moses okwa yamukula a ti: “Owa sila ndje efupa? Ngame onda hala, Omuwa a pe aantu ayehe ombepo, ya hunganeke!”
30 Opo ihe Moses naawiliki Aaisraeli omilongo heyali oya shuna moontanda.
31 Omuwa okwa pepitha ombepo ya zi kefuta ye etelele iimote e tayi tengele oondja mbali kombanda yontanda. Iimote oya lambele montanda nomudhingoloko gwayo oshinano shesiku limwe.
32 Aantu oya tameke okukwata iimote. Oye yi kwata omutenya tuu ngoka aguhe, uusiku auhe nesiku lya landula. Ngoka a kwata iishona, oye ngoka a kwata oondoloma omulongo nayimwe. Oye yi aneke nontanda ayihe, opo yi kukute.
33 Onyama manga yi li momakana gawo, ondjahi yOmuwa oya hwamene aantu e tayi ya tukulile elega mokati kawo.
34 Ehala ndyoka olya lukwa Kibrot Taava (kokutya Oombila dhomwamwa), molwashoka omo ya fumvike aantu mboka ya li ye na omwamwa gwonyama.
35 Aantu oya tembuka muKibrot-Taava ya yi kuHazerot e taa lumbu ko.
1 Moses okwa hokana omukiintu Omukusha, ihe Miriam naAaron oye shi mu tamanekele.
2 Oya ti: “Omuwa ota popi ashike naMoses? Ita popi nando natse?” Omuwa oku uvu shoka ya ti.
3 (Moses okwa li omulumentu omwiifupipiki e vule aantu ayehe kombanda yevi.)
4 Ohaluka Omuwa okwa lombwele Moses, Aaron naMiriam a ti: “Onda hala ne amuhe yatatu mu pite mo mu ye ketsalihangano.” Oyo noya yi ko,
5 nOmuwa okwa kulukile pohi moluzigi lwoshikogo a thikama posheelo shetsalihangano nokwi igidha a ti: “Aaron! Miriam!” Oyo ayehe yaali oya holoka komeho,
6 Omuwa nokwa ti: “Ngashingeyi uvii ko shoka tandi popi! Ngele ope na aahunganeki mokati keni, ongame tandi ya ihololele momamoniko notandi ya lombwele moondjodhi.
7 Ope na eyooloko, ngele otandi popi nomuntu gwandje Moses. Onde mu langeke omudhiginini gwaantu yandje ayehe Aaisraeli.
8 Otandi popi naye twa talathana oshipala noshipala, sha yela, hamootumbutumbu. Okwa mono nokuli olupe lwandje! Omolwashike ano inaamu tila okusheka omuntu gwandje Moses?”
9 Omuwa okwe ya geele nokwa zi po.
10 Oshikogo sho sha yeluka po petsalihangano, ohaluka Miriam okwa toka oshilundu a fa omahegele gomongwa. Aaron sho e mu tala nokwa mono, sho a toka oshilundu,
11 okwa ti kuMoses: “Tatekulu, ombili, ino tu geelela uulunde wetu mboka twe u ningi muugoya wetu.
12 Ino mu etha a ninge a fa okahanona ka valwa ka sa, olutu lwako lwo olela kombinga moshivalelo shayina.”
13 Moses okwa kugile Omuwa ekwatho a ti: “Kalunga, mu aludha!”
14 Omuwa okwa yamukula a ti: “Ando ohe e mu hiyile omayeye moshipala, oku na okuhumbata omupya gwe omasiku gaheyali. Mu yoolola montanda omasiku gaheyali, konima yago ota vulu okugalukila mo.”
15 Miriam okwa li e edhililwa pondje yontanda omasiku gaheyali, naantu inaa huma ko, sigo a galukile mo.
16 Konima yomasiku ngaka aantu oya tembuka muHazerot e taa ka yunga oontanda mombuga Paran.
1 Omuwa okwa lombwele Moses a ti:
2 “Hogolola gumwe gwomaawiliki mezimo kehe lyomazimo omulongo nagaali, opo u ya tume oondaadhi ya ka ndaadhe evi lyaKaanan, ndyoka tandi ka pa Aaisraeli.”
3 Moses okwa tumu aawiliki, ngaashi taa landula: Ezimo Omuwiliki Reuben Shammua yaSakkur Simeon Shafat yaHori Juda Kaleb kaJefunne Issaskar Igal yaJosef Efraim Hosea yaNun Benjamin Palti yaRafu Sebulon Gadiel yaSodi Manasse Gadi yaSusi Dan Ammiel yaGemalli Aser Setur yaMikael Naftali Nakbi yaVofsi Gad Geuel yaMaki
4 Ndhika odho oondaadhi ndhoka Moses a tumu, dhi ka ndaadhe oshilongo. Okwa lundulula edhina lyaHosea yaNun, li ninge Josua.
5 Moses sho e dhi tumu, okwa ti kudho: “Indeni lwokuumbangalantu mu ye kuumbugantu waKaanan, sigo omoshilongo shokoondundu.
6 Taleni, evi nkene li li, naantu ye li mo oye thike peni noye na oonkondo dhi thike peni.
7 Taleni, evi ngele ewanawa nenge ewinayi, naantu yalyo ngele oya kala miilando yi li puuyelele nenge oya tungilwa omadhingililokuma ga kola.
8 Taleni, evi ngele olyo ondoka nenge olya hekuka, nongele oli na omiti. Seni oshimpwiyu mu etelele iiyimati mbyoka yi li ko.” (Olya li ethimbo lyetiligano lyomandjembele.)
9 Aalumentu oya yi kuumbangalantu e taa ndaadha evi okuza kombuga Zin muumbugantu ondjila ayihe sigo oRehob, popepi netaulilo lyaHamat muumbangalantu.
10 Tango oya yi kuumbugantu wevi noye ya kuHebron, hoka kwa kala omaludhi gaAhiman, gaSheshai nogaTalmai, oluvalo lwomuhoko gwaalefule halu ithanwa Aayanaki. (Hebron osha tungwa, sho pwa piti omimvo heyali, opo Zoan muEgipiti shi tungwe.)
11 Oye ya mesilu Eshkol noya tete mo ehila lyomandjembele lya humbatwa komutenge kaalumentu yaali ye li inda. Oye eta wo oondunga dhomugranati noonkwiyu.
12 (Ehala ndyoka oye li luku Eshkol molwehila lyomandjembele ndyoka Aaisraeli ya tete mo.)
13 Sho ya ndaadha evi omasiku omilongo ne, oondaadhi odha shuna
14 kuMoses, Aaron nokegongalo alihe lyaIsrael muKadesh mombuga Paran. Oya hokolola shoka ya mono noye ya ulukile iiyimati mbyoka ye yi eta.
15 Oya ti kuMoses: “Otwa ndaadha evi notwe li mono kutya olya tondoka shili omahini nomagadhi goonyushi; iiyimati yimwe oyo mbika.
16 Ihe aantu mboka ye li mo, oya kola, niilando yawo iinene unene noya kola. Mupyamunene otwa mwene mo wo aalefule, oluvalo lwaAnak.
17 Aayamaleki oya kala muumbugantu wevi; Aaheti, Aayebusi nAayamori oya kala moshilongo shokoondundu; Aakaanana oya kala pEfuta lyopokati nokulambalala omulonga Jordan.”
18 Kaleb okwa ngungumaneke aantu mboka ya li taa tamaneke Moses e ta ti: “Otatu vulu oku ya matukila noku ya sinda. Otu na oonkondo okulala evi ndyoka.”
19 Ihe aantu mboka ya yile ko naKaleb, oya ti: “Aawe, katu na oonkondo oku ya matukila. Aantu mbeyaka oye na oonkondo ye tu vule.”
20 Oya taandelitha omutoto mokati kAaisraeli omolwevi ndyoka ya ka ndaadhele. Oya ti: “Evi ndyoka twe endagula, kali na olunza lwokupalutha aakalimo; naantu mboka twa mono, aaleeleka,
21 otwa mwene mo nokuli aalefule, oluvalo lwaAnak. Sho twi itala, otu wete aashuushuka; nomomeho gawo osho tu li wo.”
1 Egongalo alihe olya tameke okukudhila nolya lili uusiku auhe.
2 Oya tamaneke Moses naAaron noya ti: “Osha li oshihwepo okusila muEgipiti, nenge nokuli mombuga muka!
3 Omolwashike Omuwa te tu fala koshilongo shoka? Otatu ka dhipagelwa molugodhi, naakiintu yetu naana yetu taa ka kwatwa po. Kashi shi oshipu, tu shune kuEgipiti?”
4 Oya lombwelathana ya ti: “Natu hogololeni omuwiliki, tu shuneni kuEgipiti!”
5 Nena Moses naAaron oyi inyongamene pevi montaneho yaantu ayehe.
6 Josua yaNun naKaleb kaJefunne, oondaadhi mbali, oya tuula oonguwo dhawo moluhodhi
7 e taa lombwele aantu taa ti: “Evi ndyoka twa ndaadha, olyo evi ewanawa.
8 Omuwa ngele okwe tu hokwa, ote tu fala ko e te tu pe evi ndyoka lya tondoka omahini nomagadhi goonyushi.
9 Inamu tsa ondumbo nOmuwa, ne inamu tila aantu mboka ya kala mo. Otatu ya sindi nuupu. Omuwa oku li pamwe natse nokwa sindi iikalunga mbyoka tayi ya gamene, ano inamu tila.”
10 Egongalo alihe olya ti, naa dhipagwe nomamanya, ihe ohaluka aantu oya mono olwaadhi lwa adhimine etsalihangano.
11 Omuwa okwa ti kuMoses: “Sigo uunake aantu mbaka taa kala nokudhina ndje? Sigo uunake taa tindi okwiinekela ndje, nando onda longa iikumithalonga mokati kawo?
12 Otandi ya tumine elega li ya kombe po, ihe otandi ku ningi he yoshigwana oshinene noshi na oonkondo dhi vule dhaambaka.”
13 Moses okwa ti kOmuwa: “Owa tembudha aantu mbaka muEgipiti koonkondo dhoye. Aegipiti nge taa kundana shoka wa ningile aantu yoye,
14 otaye ke shi lombwela aantu mboka ya kala mevi ndika. Aantu mbaka oyu uva nale kutya ongoye, Omuwa, u li putse nowe tu ihololela, oshikogo shoye sho tashi tu siikile noto tu tetekelele moshikogo shomuzile omutenya, nuusiku omoshikogo shomulilo.
15 Ngashingeyi ngele to dhipaga po aantu yoye ayehe, iigwana mbyoka tayi kundana shoka wa ningi, otayi ka tya:
16 ‘Omuwa okwa dhipagele aantu ye mombuga, oshoka okwa nyengwa oku ya thikitha kevi ndyoka e ya uvanekele e li ya pe.’
17 Ngashingeyi, Omuwa, otandi galikana, tu ulukila oonkondo dhoye, ngoye u ninge ngaashi wa uvaneke wa ti:
18 ‘Ongame, Omuwa, omunamutimahenda nomunesilohenda enene. Ohandi dhimi po oondjo nomayono, ihe ihandi etha inaandi geela. Ohandi kongolola omayono goohe moyana sigo okoluvalo olutitatu nolutine.’
19 Ngashingeyi, Omuwa, paunene wesilohenda lyoye ndyoka ihaali lunduluka, dhima po oondjo dhaantu mbaka, ngaashi ho ya dhimine po shito, sho ya tembudha muEgipiti.”
20 Omuwa okwa yamukula a ti: “Otandi ya kuthile po, ngaashi wa galikana.
21 Ihe otandi uvaneke kutya oshili, ngaashi ndi na omwenyo, nevi alihe lyu udha eadhimo lyOmuwa,
22 kape na nando ogumwe gwomaantu mbaka ye na omwenyo ngashingeyi, ta yi mevi ndyoka. Oya mono eadhimo lyandje niinyengandunge mbyoka nde yi longo muEgipiti nomombuga, ihe oya hindi ndje lwomulongo yo inaa pulakena ewi lyandje.
23 Itaa ka ya mo mevi ndyoka nde li uvanekele oohekulu. Kape na ngoka gwomuyo a dhini ndje, ta yi mo.
24 Ihe omuntu gwandje Kaleb, ngoka e na ombepo yi ili nokwi inekela ndje, otandi ke mu fala mevi ndyoka e ke li ndaadhele, notali ningi eliko lyoluvalo lwe.
25 Ihe oshoka Aayamaleki nAakaanana oya kala momasilu, shuneni ngula mu ye kombuga nondjila ndjoka yu uka kEkololo lyaAkaba.”
26 Omuwa okwa lombwele Moses naAaron a ti:
27 “Sigo uunake aantu mbaka aawinayi taa tsikile okutamaneka ndje? Onda vulwa okupulakena oontamanana!
28 Ya lombwela u tye: ‘Otandi gana kutya oshili, ngaashi ndi na omwenyo, otandi ningi ngaashi mwa pula. Ongame, Omuwa, nda popi.
29 Payalulo amuhe mboka mwa li mwa adha oomvula omilongo mbali nenge dhi vule po, otamu ka sa, nomidhimba dheni otadhi ka halakana mombuga ndjika, oshoka mwa tsu ondumbo nangame.
30 Kape na nando ogumwe gwomune ta yi mevi ndyoka nda li ndu uvaneke negano nde li mu pe, kakele kaKaleb naJosua.
31 Omwa ti aana yeni otaa ka kwatwa po, ihe oyo tandi ka fala mevi ndyoka mwe li ekelehi, notali ka ninga lyawo.
32 Ne otamu ka sila mombuga muka.
33 Aana yeni otaa ka endagula nombuga omimvo omilongo ne taa hepekwa kokwiitekapo kweni, sigo omuhugunini gwomune a si po.
34 Otamu ke shi mona moluulunde weni omimvo omilongo ne, omumvo gumwe ogu lile po esiku kehe mwa pititha mokundaadha evi. Otamu ke shi tseya shoka tashi ti, ngele tandi mu iteka.
35 Otandi gana kutya otandi shi mu ningile, aantu ne aawinayi mwa gongala mu tse ondumbo nangame. Amuhe otamu ka sila muka mombuga, ongame, Omuwa, nde dhi popya.’ ”
36 Ihe aalumentu mboka Moses a tumine okundaadha evi, sho ya taandelitha moshigwana uumbanda molwevi ndyoka e tashi tamanekitha Moses, Omuwa okwe ya tumine oshivu e taa si.
37
38 Josua naKaleb ayeke oya hupu ko maalumentu mboka ya ka ndaadhele evi.
39 Moses okwa hokololele oshigwana ashihe shoka Omuwa a popi, oyo noya lili omahodhi omapyu.
40 Ongula sho kwa shi, oya meneka ya ye koshilongo shokoondundu taa ti: “Otwi ilongekidha okuya kevi ndyoka Omuwa e li tu uvanekele. Otwa zimina eyono lyetu.”
41 Moses okwa ti: “Omolwashike itaamu vulika kOmuwa ngashingeyi? Itamu tompola sha!
42 Inamu ya. Omuwa ke li pamwe nane, naatondi yeni otaye ke mu sinda.
43 Ngele tamu tsakaneke Aayamaleki nAakaanana, otamu ka sila molugodhi; Omuwa ita ka kala pamwe nane, oshoka omwa tindi oku mu landula.”
44 Natango oya tangalala e taa yi koshilongo shokoondundu, nando oshikethahangano shOmuwa naMoses ina za mo montanda.
45 Nena Aayamaleki nAakaanana mboka ya kala mo, oye ya ponokele e taye ya sindi e taye ya lambalala sigo okuHorma.
1 Omuwa okwa lombwele Moses a ti:
2 “Lombwela Aaisraeli u tye: Ngele tamu ka ya mevi lyokukalamo, ndyoka tandi li mu pe,
3 otamu vulu okuyambela Omuwa ongombe ondumentu, onzi ondumentu, onzi nenge oshikombo, shi ninge efikilondjambo nenge ontselelandjambo mokugwanitha euvaneko nenge omuntu ta yamba pahalo lye mwene nenge ondjambo yomoshituthi shontumba; ezimba lyoondjambo ndhika otali opalele Omuwa.
4 Kehe ngoka ta yambele Omuwa efikilondjambo lyonzi nenge lyoshikombo, ne ete pamwe noshimuna kehe oograma mbali dhuusila womunziya wa lungilwa molita yimwe yomagadhi gooholivi, u ninge ondjambo yiikulya. Ne ete wo olita yimwe yomaviinu ga ninge oshinuwandjambo.
5
6 Uuna onzi ondumentu tayi yambwa, pamwe nayo napa yambwe ondjambo yiikulya yoograma ne netata lyuusila womunziya wa lungilwa momagadhi gooholivi golita yimwe noshititano.
7 Omolwoshinuwandjambo omuntu ne ete olita yimwe noshititano shomaviinu. Ezimba lyoondjambo ndhika otali opalele Omuwa.
8 Uuna ongombe ondumentu tayi yambelwa Omuwa yi ninge efikilondjambo nenge ontselelandjambo mokugwanitha euvaneko nenge ekwatathanondjambo,
9 napa yambwe ondjambo yiikulya yuusila womunziya woograma hamano netata wa lungilwa moolita mbali dhomagadhi gooholivi,
10 pamwe noolita mbali dhomaviinu. Ezimba lyondjambo ndjika otali opalele Omuwa.
11 “Shika osho shoka tashi ningwa, ngele taku yambwa ongombe ondumentu, onzi ondumentu, onzi nenge oshikombo.
12 Uuna taku yambwa iimuna yi vule shimwe, pamwe noshimuna kehe naku yambwe ondjambo yasho yiikulya nomaviinu.
13 Omuisraeli kehe ne shi ninge, uuna ta yamba ondjambo yiikulya, ezimba lya nika nawa tali opalele Omuwa.
14 Pethimbo kehe omukwiilongo a kala mokati keni, kashi na nee mbudhi, okathimbo okafupi nenge ethimbo ele, ta yamba oondjambo dhiikulya, ezimba lya nika nawa tali opalele Omuwa, oku na okugwanitha omautho tuu ngoka.
15 Osho ngaaka omautho ngoka tage mu manga aluhe sigo aluhe one yene naakwiilongo mboka ya kala mokati keni. Ne nayo omu thike pamwe koshipala shOmuwa.
16 Oompango tuu ndhoka dhimwe nomautho tage mu pula, osho nayo wo.”
17 Omuwa okwa lombwele Moses a ti:
18 “Lombwela Aaisraeli u tye: Ngele tamu ka ya mevi ndyoka tandi li mu pe,
19 omu na okugandja omagano kOmuwa miikulya mbyoka tamu li.
20 Nge tamu teleke iikwiila, gandjeni oshikwiila shotango shiilya iipe omagano kOmuwa. Nashi ninge ondjambo tayi zi kolupale.
21 Ondjambo ndjika yomiikwiila ya telekwa miilya iipe, ne omu na oku yi gandja kOmuwa aluhe sigo aluhe.
22 “Ngele otamu ningi epuko noitamu gwanitha oshipango shontumba Omuwa a lombwele Moses,
23 — ano okuza kesiku ndyoka Omuwa a lombwele Moses iipango ye sigo okomaluvalo tage ya ngele itamu gwanitha sha shomiipango —
24 ihe egongalo lya yono mokwaashiwo, nali yambe ongombe ondumentu yi ninge efikilondjambo, ezimba lya nika nawa tali opalele Omuwa, pamwe nondjambo yiikulya nomaviinu. Naa yambe wo oshikombo oshilumentu shi ninge eyonondjambo.
25 Omuyambi na gwanithe eyelithoyapulo lyegongalo, notali dhiminwa po, oshoka epuko olya li mokwaashiwo, nolye etele Omuwa efikilondjambo neyonondjambo lyalyo.
26 Egongalo alihe lyaIsrael naakwiilongo ya kala mokati kawo otaa dhiminwa po, oshoka shaa ngoka okwa li mepuko.
27 “Ngele omuntu gumwe oye a yono mokwaashiwo, na yambe oshikombo oshikiintu shomumvo gumwe shi ninge eyonondjambo.
28 Poshiyambelo omuyambi ota gwanitha eyelithoyapulo lyomuntu ngoka, nota kala a dhiminwa po.
29 Eutho ndika olimwe kukehe ngoka ta yono mokwaashiwo, na kale nee Omuisraeli nenge omukwiilongo a kala mokati kAaisraeli.
30 “Ihe omuntu ngoka ta yono owina, na kale nee omuvalelwamo nenge omukwiilongo, oku na ondjo yokuhinda Omuwa noku na okudhipagwa,
31 oshoka okwa dhini shoka Omuwa a popi nokwa yono owina iipango ye. Okwi ilongela eso.”
32 Esiku limwe manga Aaisraeli ya li mombuga, okwa monika omulumentu ta tyaya iikuni mEsabati.
33 Okwa falwa kuMoses, Aaron negongalo alihe,
34 noye mu manga, oshoka inaa tseya nkene ye na oku mu ninga.
35 Omuwa okwa ti kuMoses: “Omulumentu ngoka oku na okudhipagwa; egongalo alihe nali mu dhipage nomamanya pondje yoontanda.”
36 Egongalo alihe olye mu fala pondje yoontanda e tali mu dhipaga nomamanya, ngaashi Omuwa a lombwele Moses.
37 Omuwa okwa lombwele Moses a ti:
38 “Lombwela Aaisraeli u tye: Itungileni oondjendjelela dhi endjelele koonkotso dhomizalo dheni ne mu tule ko ongodhi ombulau kondjendjelela kehe. Shika omu na oku shi ninga aluhe sigo aluhe.
39 Oondjendjelela ohadhi mu dhimbulutha iipango yandje shaa ethimbo tamu dhi tala, opo mu vulike kuyo; nena itamu pilamene ndje we nokulandula omahalo nuuhalu weni.
40 Oondjendjelela ohadhi mu dhimbulutha mu dhiginine iipango yandje notamu ningi ihe yandjelela.
41 Ongame Omuwa, Kalunga keni; onde mu tembudha muEgipiti ndi ninge Kalunga keni. Ongame Omuwa.”
1 Kora kaIzhar, omutekulu gwaKohat yaLevi, yo pamwe naDatan naAbiram, aana yaEliab, naOn yaPelet yaReuben oya tsile Moses ondumbo pamwe naalumentu 250 yomAaisraeli, aawiliki ya simana ya hogololwa kegongalo.
2
3 Oya gongalele Moses naAaron e taa ti kuyo: “Omwa pitilila unene! Iilyo ayihe yegongalo oyOmuwa, nOmuwa oku li pamwe natse atuhe. Omolwashike ano ngoye, Moses, to inenepekele kombanda yegongalo lyOmuwa?”
4 Moses sho e shi uvu, okwi ihata pevi e ta galikana.
5 Opo ihe okwa ti kuKora naalanduli ye: “Ongula yanakwasha Omuwa ota ka ulika, olye ngoka gwe. Ngoka gwe, kokutya ngoka e mu hogolola, ote mu pitika a hedhe koshiyambelo.
6 Ongula yanakwasha, ngoye Kora naalanduli yoye, kutheni iikangwa yomulilo, tulii mo omakala ga hanya niitsinino ne mu yi fale koshiyambelo. Opo mpoka tatu ka mona, olye gwomutse a hogololwa kOmuwa. Aalevi ne, omakamba geni oga vuka unene!”
7
8 Moses okwa lombwele natango Kora a ti: “Aalevi ne, pulakeneni!
9 Inashi mu gwanena nani, Kalunga kaIsrael sho e mu yoolola megongalo lyaIsrael mu hedhe kuye metsalihangano, opo mu thikame montaneho yegongalo noku li yakula?
10 Okwe mu pe esimano ndika pamwe nAalevi ooyakweni, ihe ngashingeyi omwa hala ishewe noshilonga shuuyambi.
11 Sho tamu tsu ondumbo naAaron, otashi ti otamu kondjitha Omuwa.”
12 Moses okwa tumu elaka i ithana Datan naAbiram, ihe oya ti: “Itatu ya ko!
13 Inashi gwana nani, sho we tu tembudha mevi lya tondoka omahini nomagadhi goonyushi, opo u tu dhipagele mombuga? Ngashingeyi owa hala u tu pangele?
14 Ou shi owe tu eta kevi ndyoka lya tondoka omahini nomagadhi goonyushi nowe tu pe omapya niitsambe yomiviinu? Ou shi oto vulu u tu kotokele? Itatu ya ko!”
15 Moses okwa geye nokwa lombwele Omuwa a ti: “Ino taamba omayambo gaalumentu mbaka taye ga yamba. Ngame inandi ya ninga nayi. Ine kutha nando ogumwe nando oko okasino.”
16 Moses okwa ti kuKora: “Ongula yanakwasha ngoye naalanduli yoye ayehe omu na okuholoka ketsalihangano. Aaron oko ta ka kala wo.
17 Shaa ngoka gwomune ota kutha oshikangwa she shomulilo a tula mo iitsinino note yi yamba koshiyambelo.”
18 Omulumentu kehe okwa kutha ihe oshikangwa she a tula mo omakala ga hanya niitsinino nokwa thikama posheelo shetsalihangano pamwe naMoses naAaron.
19 Kora okwa gongaleke egongalo alihe, nolya thikama lya taalela Moses naAaron posheelo shetsalihangano. Ohaluka eadhimo lyOmuwa olya adhimine egongalo alihe,
20 Omuwa nokwa lombwele Moses naAaron ta ti:
21 “Zii po utale paantu mbano, notandi ya kombo po mbalambala.”
22 Ihe Moses naAaron oya tsu iipala yawo pevi e taa ti: “Akutu, Kalunga, Kalunga, ongoye othithiya yomwenyo aguhe. Ndishi omuntu gumwe awike a yono noto geele egongalo alihe?”
23 Omuwa okwa ti kuMoses:
24 “Lombwela aantu ya ze po pomatsali gaKora, Datan naAbiram.”
25 Moses okwa yi kuDatan naAbiram a thindikilwa kaawiliki yAaisraeli.
26 Okwa lombwele aantu a ti: “Thikameni kokule nomatsali gaantu mbaka aadhudhu, ne inamu guma iinima yawo ayihe, opo mwaa kombwe po pamwe nayo moluulunde wawo.”
27 Aantu noya zi po pomatsali gaKora, Datan naAbiram. Datan naAbiram oya piti mo ya thikama piiyelo yomatsali gawo, ye li pamwe naakulukadhi yawo noyana.
28 Moses okwe ya lombwele a ti: “Nena otamu ke shi tseya kutya Omuwa okwa tumu ndje ndi longe iilonga mbika noitandi yi longo pahalo lyandje mwene.
29 Aantu mbaka ngele otaa si, ngaashi aantu ayehe haa si pwaa na egeelo lyaKalunga, nena Omuwa ina tuma ndje.
30 Ihe ngele Omuwa ota ningi sha inaashi uvika nale, nevi otali makula okana kalyo noku ya huta po niinima yawo ayihe, e taa kulukile muusi ye na omwenyo, otamu ka tseya kutya aantu mbaka oya sheke Omuwa.”
31 Mbalambala Moses manga inaa mana okupopya, evi olye ekama mpoka ya li
32 nolya nina po Datan naAbiram, omatsali gawo, aalanduli yaKora ayehe nomaliko gawo agehe.
33 Oya kulukile muusi ye na omwenyo, pamwe nomaliko gawo. Evi olye ya siikile noya ningine mo.
34 Aaisraeli ayehe mboka ya li ko, oya yi ontuku, sho yu uvu onkugo yawo. Oyi igidha ya ti: “Tu fadhukii po! Evi otali ningi li tu nine po wo!”
35 Omuwa okwa tumu omulilo gwa hwama, nogwa lungunitha po aalumentu 250 mboka ya li ye na iitsinino.
36 Omuwa okwa lombwele Moses a ti:
37 “Lombwela omuyambi Eleasar lyaAaron a kuthe mo iikangwa yomulilo momutoko noku halakanithe omakala muyo shaa mpoka, oshoka iikangwa yomulilo oyo iiyapuki.
38 Oya yapulwa, sho ya tulwa poshiyambelo shOmuwa. Ano kuthii po iikangwa yomulilo yaalumentu mboka ya dhipagwa moluulunde wawo, yi hambulii po iisha ya pepuka e tamu yi siikilitha oshiyambelo. Otayi ka londodha Aaisraeli.”
39 Omuyambi Eleasar okwa kutha iikangwa yomulilo e te yi hambulitha iisha ya pepuka yi siikile oshiyambelo.
40 Ndika olya li elondodho kAaisraeli kutya hamuntu gulwe kee shi oluvalo lwaAaron ta hedha koshiyambelo, opo a fikile Omuwa iitsinino. Ota ningi a yonwe po ngaashi Kora naantu ye. Ayihe mbika oya ningwa, ngaashi Omuwa a popitha Moses e shi lombwele Eleasar.
41 Esiku lyanofu egongalo alihe olya tamaneke Moses naAaron lya ti: “Ne omwa dhipaga aantu yOmuwa.”
42 Ayehe sho ya gongala ya tamaneke Moses naAaron, oya pilamene etsalihangano noya mono lya siikilwa koshikogo, neadhimo lyOmuwa olya monika.
43 Moses naAaron oya yi noya thikama komeho getsalihangano.
44 NOmuwa okwa lombwele Moses a ti:
45 “Zii po paantu mbaka, notandi ya kombo po mbala!” Ayehe yaali oya tsu iipala yawo mevi,
46 naMoses okwa lombwele Aaron a ti: “Kutha oshikangwa shoye shomulilo, tula mo omakala ga hanya gokoshiyambelo e to tula mo iitsinino momakala. Endelela u ye mokati kaantu, opo u ya gwanithile eyelithoyapulo. Endelela! Ondjahi yOmuwa oya hwama nokuli, nelega olya tameka.”
47 Aaron okwa ningi, ngaashi Moses e mu lombwele. Okwa yi, a kutha oshikangwa e ta matukile mokati kaantu. Sho a mono oshiponga sha tameka nale nokuli, okwa tula iitsinino momakala e ta ningi eyelithoyapulo.
48 Elega olya kodha, nokwa li a thikama pokati kaanamwenyo noonakusa.
49 Omwaalu gwaantu mboka ya si, ogwa li 14 700, moka inaamu yalulilwa mboka ya sile moshipotha shaKora.
50 Elega sho lya kodha, Aaron okwa galukile kuMoses posheelo shetsalihangano.
1 Omuwa okwa lombwele Moses a ti:
2 “Lombwela Aaisraeli ye ku pe oondhimbo omulongo nambali, ondhimbo yimwe oyomuwiliki mezimo kehe. Kondhimbo kehe nyola ko edhina lyamwene gwayo,
3 nedhina lyaAaron li nyola kondhimbo ndjoka yi lile po Aalevi. Otaku ka kala ondhimbo yimwe yomuwiliki mezimo kehe.
4 Dhi fala metsalihangano e to dhi tula komeho goshikethahangano, nkoka tandi ku tsakaneke.
5 Ondhimbo yomuntu ngoka nda hogolola, otayi tutuma. Pahedhi ndjika otandi mweneke omangungutulo gAaisraeli, sho haye ku tamanekele ndje.”
6 Moses okwe shi lombwele Aaisraeli, nomuwiliki gwezimo kehe mokati kawo okwe mu pe ondhimbo yimwe, adhihe kumwe omulongo nambali pamwe nondhimbo yaAaron.
7 Moses okwa tula oondhimbo adhihe metsalihangano komeho goshikethahangano shOmuwa.
8 Esiku lyanofu Moses sho a yi mo metsalihangano, okwa mono ondhimbo yaAaron, ndjoka ya kalele po ezimo lyaLevi, ya tutuma. Oya tsapuka noya sheneka oongala noyi ima oomandeli dho oloya.
9 Moses okwa kutha ko oondhimbo adhihe e te dhi ulukile Aaisraeli. Oya mono shoka sha ningwa po, nomuwiliki kehe okwa taamba ondhimbo ye.
10 Omuwa okwa lombwele Moses a ti: “Shuna ondhimbo yaAaron komeho goshikethahangano. Oyi na okupungulwa, yi kale elondodho kAaisraeli mboka ye na omangungutulo, opo yaa se.”
11 Moses okwa ningi, ngaashi Omuwa e mu lombwele.
12 Aaisraeli oya lombwele Moses ya ti: “Tala, otatu hulu po, tse atuhe tatu ka kana!
13 Shaa ngoka ta hedha ketsalihangano, ota si. Otwa uthilwa ano, tu se po atuhetuhe?”
1 Omuwa okwa lombwele Aaron e ta ti: “Ngoye mwene, aamwoye nAalevi, one tamu pewa kehe uusama mboka u na ekwatathano netsalihangano; ihe ngoye naamwoye amuke tamu pewa uusama mboka wa ningwa muuyambi.
2 Eta aakweni, ezimo lyaLevi, ya longe pamwe nane, manga ngoye naamwoye tamu yakula komeho getsalihangano.
3 Naa kale ye na oshimpwiyu shiilonga yoye niilonga ayihe yetsalihangano, ihe inaa kwatathana niinima iiyapuki mEhala Lyuuyapuki nenge noshiyambelo. Ngele taye shi ningi, ne pamwe nayo otamu dhipagwa.
4 Oyo ye na okulonga pamwe nangoye nokutsakanitha iinakugwanithwa yawo yeyakulo alihe metsalihangano, ihe omuntu gulwe kee shi Omulevi ita longo nangoye.
5 Ongoye naamwoye amuke tamu longo iilongo yomEhala Lyuuyapuki noshiyambelo, opo ondjahi yandje yaa hwamene we Aaisraeli.
6 Ongame nde mu hogololele aakweni Aalevi mokati kAaisraeli, opo ya ninge omagano ga yapuliwa Omuwa noye mu yakule metsalihangano.
7 Ihe ngoye naamwoye, one amuke tamu gwanitha iinakugwanithwa yuuyambi kombinga yoshiyambelo nomEhala Lyuuyapuki. Mbika oyo iilonga yenilela, molwaashoka onde mu pa uuyambi omagano. Omuntu gulwe kee shi Omulevi, ngoka ta hedha popepi niinima iiyapuki, na dhipagwe.”
8 Omuwa okwa lombwele Aaron a ti: “Aaisraeli uuna taa etele ndje iigandjwa iiyapuki, ongame tandi ku pe mbyoka itaayi lungunithilwa koshiyambelo. Nayi kale oshitopolelwa shoye naamwoyemati aluhe sigo aluhe.
9 Komagano omayapukilela ngoka itaaga lungunithwa koshiyambelo, oto pewa ngaka taga landula mpaka: oondjambo dhiikulya, omayonondjambo noondjondjambo. Oondjambo ndhika adhihe oondjapukilela tadhi yambelwa ndje, otadhi ningi dhoye naamwoyemati.
10 Adhihe ndhika dhi lileni pehala eyapuki, aalumentu ayeke taa dhi li; nadhi kale oondjapuki kune.
11 “Oondjambo adhihe dhomadhungadhungo dhAaisraeli otadhi ningi wo dhoye. Otandi dhi ku pe, ngoye mwene naamwoye aamati naakadhona aluhe sigo aluhe. Omuntu kehe megumbo lyoye ngoka kee na oshipwe, ote dhi li.
12 “Otandi ku pe oshipe ashihe shomagadhi omawanawa gooholivi, shomaviinu omawanawa noshiilya shoka aantu taa etele Omuwa.
13 Oshipe shaayihe mevi lyawo tashi etelwa Omuwa, oshoye. Omuntu kehe megumbo lyoye ngoka kee na oshipwe, ote shi li.
14 “Ashihe shomuIsrael shoka tashi yapulilwa Omuwa nokugana, otashi ningi shoye.
15 “Osheeli kehe shomuntu nenge shoshimuna shoka Aaisraeli taa yambele ndje, otashi ningi shoye. Ihe ou na okutaamba ofuto tayi kulile osheeli shomuntu nenge osheeli shoshimuna shoka shi na oshidhila.
16 Uunona nau kulilwe mepipi lyomwedhi gumwe niimaliwa iisiliveli itano pandjele yoshimaliwa oshisiliveli hashi longithwa motempeli.
17 Ihe osheeli shongombe, shonzi nenge shoshikombo inashi shunithwa; oyandjelela, noyi na okuyambwa oontselelandjambo. Ombinzi yayo otayi tilwa koshiyambelo nokulungunitha oofu dhi ninge ondjambo yiikulya, ezimba lya nika nawa lyo opalela Omuwa.
18 Onyama yayo oyoye ngaashi wo ondjambo yedhugadhugo lyondete noshilama shokolulyo.
19 “Iigandjwa ayihe iiyapuki Aaisraeli taa etele Omuwa, otandi yi ku pe naamwoye aamati naakadhona aluhe sigo aluhe. Ehangano ndika nde li hangana nangoye noluvalo lwoye, olya kola nokukolelela.”
20 Omuwa okwa lombwele Aaron e ta ti: “Mevi lyawo ito ka thigulula mo sha, oshitopolwa shevi lyaIsrael ito shi pewa. Ongame mwene oshipewa shoye nuuthiga woye mokati kAaisraeli.”
21 Omuwa okwa ti: “Aalevi otandi ya pe iitimulongo ayihe muIsrael, yi ninge uuthiga wawo molwiilonga mbyoka taa longo, sho taa sile etsalihangano oshimpwiyu.
22 Aaisraeli yalwe inaa hedha we ketsalihangano, opo yaa dhipagwe.
23 Okuza nena Aalevi oyo ayeke naa tonatele etsalihangano, noyo ye na oku li pulwa. Eutho ndika olyaaluhe tali ka dhigininwa wo komaluvalo gawo. Aalevi oye na okukala yaa na uuthiga mokati kAaisraeli,
24 oshoka otandi ya pe iitimulongo mbyoka Aaisraeli taye yi etele ndje. Omolwaashoka nde ya lombwele kutya itaa pewa uuthiga mokati kAaisraeli.”
25 Omuwa okwa lombwele Moses e ta ti:
26 “Lombwela Aalevi to ti: Uuna tamu taamba iitimulongo kAaisraeli, mbyoka Omuwa te yi mu pe yi ninge yeni, omu na okugandja mo oshitimulongo shi ninge shOmuwa.
27 Oshitimulongo shika otashi talwa osho oshigandjwa sheni shi thike pamwe noshipe shiilya tashi gandjwa kolupale nenge shomaviinu tashi kuthwa metemba lyokukolela.
28 Pahedhi ndjika nane wo otamu etele Omuwa iigandjwa tayi zi miitimulongo ayihe mbyoka tamu taamba kAaisraeli. Omuyambi Aaron ta taamba iigandjwa mbika tamu yi pe Omuwa.
29 Gandjeni kOmuwa iigandjwa ya gwana po mwe yi kutha miitaambwa yeni ayihe; gandjeni oshitopolwa oshiwanawa.
30 Uuna tamu gandja oshitopolwa oshiwanawa, otashi talwa osho oshigandjwa sheni shi thike pamwe noshipe shiilya tashi gandjwa kolupale nenge shomaviinu tashi kuthwa metemba lyokukolela.
31 Mbyoka ya kala po, otamu yi li naanegumbo yeni shaa mpoka, oshoka oyo ondjambi yeni yokuyakula metsalihangano.
32 Nge tamu yambele Omuwa tango oshitopolwa oshiwanawa shomiitaambwa yeni, itamu pewa ondjo shampa itaamu nyateke omagano omayapuki gAaisraeli, opo mwaa se.”
1 Omuwa okwa popi naMoses naAaron
2 e tu uthile Aaisraeli omautho ngaka ta ti: “Eteni ondema ontiligane yaa na oshipo yo inayi tulwa kondjoko,
3 mu yi gandje komuyambi Eleasar. Nayi falwe pondje yontanda e tayi dhipagelwa montaneho ye.
4 Eleasar na kuthe nomunwe gwe mombinzi yayo e te yi ndondele luheyali lwokomeho getsalihangano.
5 Ondema ayihe, ekunka, onyama, ombinzi niikwamela nayi lungunithwe montaneho yomuyambi.
6 Omuyambi na kuthe oshiti shomusedeli, oshisopi nongodhi ontiligane e te yi umbile meziko.
7 Konima yaambika na yoge oonguwo dhe e ti itile omeya nota shuna kontanda, ihe ota kala a nika oshidhila sigo ongulohi.
8 Omulumentu ngoka a lungunitha po ondema, oku na okuyoga oonguwo dhe nokwiitila omeya, ihe naye wo ota kala a nika oshidhila sigo ongulohi.
9 Omulumentu gumwe a yogoka na kuthe po omutoko gwondema e te gu fala pehala eyelele pondje yontanda. Nagu pungulilwe egongalo lyAaisraeli, gu longithwe momeya geyelitho. Ohaga yogo po omayono.
10 Omulumentu ngoka a yuku omutoko, na yoge oonguwo dhe, ihe ota kala a nika oshidhila sigo ongulohi. Eutho ndika otali kala aluhe sigo aluhe kAaisraeli nokaakwiilongo ya kala mokati kawo.”
11 “Oongoka ta gumu omudhimba, ota kala a kwata oshidhila omasiku gaheyali.
12 Oku na okwiiyelitha nomeya geyelitho mesiku etitatu nomesiku etiheyali, nota kala a yela. Ihe ngele iti iyelitha momasiku agehe gaali, ita kala a yela.
13 Oongoka ta gumu omudhimba noini iyelitha, ota kala a kwata oshidhila, oshoka omeya geyelitho inage mu tilwa. Ota nyateke etsalihangano lyOmuwa, noku na okudhimwa mo maantu yaKalunga.
14 “Ngele oku na ngoka ta sile metsali, shaa ngoka ta adhika metsali pethimbo lyetokoko nenge ta yi mo, ota kala a kwata oshidhila omasiku gaheyali.
15 Oshuma kehe metsali shoka shaa na oshisiikilo, otashi kala sha kwata oshidhila.
16 Shaa ngoka ta gumu omuntu a dhipagwa nenge i isila kelundu nenge omuntu ta gumu iipongo yomuntu nenge ombila, ota kala a kwata oshidhila omasiku gaheyali.
17 “Nakukwata oshidhila na kuthilwe mo omutoko gwondema ndjoka ya yambelwa edhimopo lyoondjo, e tagu tulwa moshuma notamu gwedhwa omeya omayelele.
18 Omuntu gumwe a yogoka na kuthe oshisopi, te shi yaya momeya e ta shashamine etsali, ayihe yi li mo naantu ya li mo. Omuntu ngoka omuyelele na shashamine wo omeya komuntu ngoka a guma iipongo yomuntu nenge omudhimba nenge ombila.
19 Mesiku etitatu nomesiku etiheyali omuntu ngoka omuyelele na shashamine omeya komuntu ngoka a kwata oshidhila. Mesiku etiheyali ota yelitha omuntu ngoka. Omuyelithwi na yoge oonguwo dhe nokwiitila omeya, nopeningino lyetango ota kala omuyelele.
20 “Shaa ngoka a kwata oshidhila noita iyelitha, ota kala a nika oshidhila, oshoka omeya geyelitho inage mu tilahilwa. Ota nyateke etsalihangano lyOmuwa, noku na okudhimwa mo maantu yaKalunga.
21 Ne omu na okudhiginina eutho ndika aluhe sigo aluhe. Omuntu ngoka ta shashamine omeya geyelitho, oku na wo okuyoga oonguwo dhe; shaa ngoka ta gumu omeya, ota kala a kwata oshidhila sigo ongulohi.
22 Shaa shoka omuntu ngoka e na oshidhila te shi gumu, otashi nika oshidhila, noshaa ngoka te shi gumu, ota kala a kwata oshidhila sigo ongulohi.”
1 Momwedhi gwotango egongalo alihe lyAaisraeli olye ya mombuga Zin e tali yungu ontanda muKadesh. Miriam okwa mana oondjenda e ta fumvikwa.
2 Mpoka ya yungu ontanda, kapwa li omeya, aantu noya gongalele Moses naAaron
3 noya tamanana ya ti: “Akutu, osha li oshihwepo, ando twa sile komeho getsalihangano pamwe nooyakwetu, sho ya yonukile po koshipala shOmuwa.
4 Omolwashike mwe tu etele mombuga muno? Otu sile mo niimuna yetu?
5 Omolwashike mwe tu tembudha mo muEgipiti mu tu ete meha ndino ewiwiwiwi noihamu mene nando osha? Mwaa na iilya nomwaa na oonkwiyu, mwaa na omandjembele nomwaa na oondunga dhomigranati. Nokuli kamu na omeya gokunwa!”
6 Moses naAaron oya zi mokati kaantu e taa thikama posheelo shetsalihangano. Oya tsu iipala yawo mevi, neadhimo lyOmuwa olye ya adhimine.
7 Omuwa okwa lombwele Moses e ta ti:
8 “Kutha ondhimbo, ithana omumwanyoko Aaron e tamu gongaleke egongalo alihe. Montaneho yalyo alihe lombwela emanya, nomeya otaga tsipuka mo. Pahedhi ndjika oto kutha omeya memanya ga nuwe kaantu nokiimuna.”
9 Moses okwa yi nokwa kutha ondhimbo, ngaashi Omuwa e mu lombwele.
10 Pamwe naAaron oya gongaleke egongalo alihe pemanya, naMoses okwa ti: “Pulakeneni, ne aatangalali! Natu mu kuthile omeya memanya ndika?”
11 Moses okwa yelutha ondhimbo e ta dhenge nayo emanya lwaali, nomwa tsipuka omeya ogendji, aantu niimuna noya nu mo.
12 Omuwa okwa ganda Moses naAaron e ta ti: “Molwaashoka ne kamu na eitaalo lya gwana okwiinekela oonkondo dhandje montaneho yAaisraeli, itamu ya fala we mevi ndyoka nde ya uvanekele tandi li ya pe.”
13 Shika osha ningwa puMeriba, mpoka Aaisraeli ya tamaneke Omuwa naampoka i iholola kuyo kutya oye omuyapuki.
14 MuKadesh Moses okwa tumu aatumwa ya ye komukwaniilwa gwaEdom taa ti: “Elaka ndika olya zi kaakweni, omazimo gaIsrael. Owa tseya nkene twa talithwa omalwa,
15 sho ootatekulu ya yi kuEgipiti, nkoka twa kala omimvo odhindji. Aegipiti oya hepeke ootatekulu noonkondo,
16 otse notwa kugile Omuwa ekwatho. Oku uvu onkugo yetu e ta tumu omuyengeli, ngoka e tu tembudha muEgipiti. Ngashingeyi otu li muKadesh, oshilando shi li pongamba yoshilongo shoye.
17 Tu kwatha, u tu pitikile tu tokole oshilongo shoye. Otse niimuna yetu itatu zi mo mondjila tu ye momapya goye nenge miitsambe yomiviinu dhoye, noitatu nu momithima dhoye. Otatu kala mondjila, sigo twa pitilile oshilongo shoye.”
18 Ihe omukwaniilwa gwaEdom okwa yamukula a ti: “Itamu pitikwa okutokola oshilongo shandje! Ngele tamu shi yelekele, otatu ya tu mu tsakaneke tu na egongamwele.”
19 Aaisraeli oya ti: “Otatu kala mondjila, nongele tatu nu omeya geni nenge iimuna yetu tayi ga nu, otatu futu. Otwa hala owala tu pite mo.”
20 Omukwaniilwa gwaEdom okwe ya yamukula a ti: “Aawe, ndati!” Aaedom oya piti mo ya homata noya ponokele Aaisraeli.
21 Molwaashoka Aaedom inaa pitika Aaisraeli ya tokole oshilongo shawo, Aaisraeli oya shuna e taa yi nondjila yilwe.
22 Egongalo alihe lyAaisraeli olya zi muKadesh e tali thiki pondundu Hor,
23 pongamba yaEdom. Oko Omuwa a lombwele Moses naAaron a ti:
24 “Aaron ita yi mevi ndyoka ndu uvaneke tandi li pe Israel; ota si, oshoka ne yaali omwa tindi oshipango shandje puMeriba.
25 Kutha Aaron nomwana Eleasar, mu londe kondundu Hor,
26 naankoka to hula Aaron oonguwo dhe dhuuyambi e to dhi zaleke Eleasar. Aaron ota ka sila ko.”
27 Moses okwa ningi, ngaashi Omuwa e mu lombwele. Oya londo kondundu Hor montaneho yegongalo alihe,
28 naMoses okwa hula Aaron oonguwo dhuuyambi e te dhi zaleke Eleasar. Aaron nokwa sile kondungu yondundu, Moses naEleasar oya galuka ko ya kulukile pohi.
29 Egongalo alihe olya koneke kutya Aaron a mana oondjenda, olyo nolye mu lili oosa omasiku omilongo ndatu.
1 Ano omukwaniilwa Omukaanani gwaArad muumbugantu waKaanan sho a kundana kutya Aaisraeli otaa ya nondjila yokuAtarim, okwe ya matukile e ta kwata po yamwe oonkwatwa.
2 Nena Aaisraeli oya ningi euvaneko kOmuwa ya ti: “Ngele oto tu sinditha aantu mbaka, otatu ku yapulile nokugana iilando yawo.
3 Omuwa okwe ya uvu e te ya kwatha okusinda Aakanaan. Aaisraeli noye ya hanagula po niilando yawo, nehala ndyoka oye li luku Horma.”
4 Aaisraeli oya zi po pondundu Hor taa ende nondjila yu uka kEkololo lyaAkaba, opo ya dhingoloke oshilongo shaEdom. Ihe mondjila aantu oya kanitha eidhidhimiko lyawo
5 noya tamaneke Kalunga naMoses ya nyenyeta ya ti: “Omolwashike mwe tu tembudha muEgipiti, tu sile mombuga muno? Muka kamu na iikulya nenge omeya. Iikulya mbino yomukaga otwe yi kenyanana!”
6 Nena Omuwa okwa tumu omayoka ge na uuzigo mokati kaantu, nAaisraeli oyendji oya lika noya si.
7 Aantu oye ya kuMoses noya ti: “Otwa yono, sho twa popi twa tsa ondumbo nOmuwa nonangoye. Galikana Omuwa, a kuthe mo omayoka mokati ketu.” Moses nokwa galikanene aantu.
8 Omuwa okwa lombwele Moses a hambule eyoka e li endjeleleke koshiti, opo shaa ngoka a lika e li tale ye a kale nomwenyo.
9 Moses okwa hambula eyoka lyoshikushu e te li endjeleleke koshiti. Shaa ngoka a lika e ta tala keyoka lyoshikushu, okwa kala nomwenyo.
10 Aaisraeli oya tembuka po e taa ka yunga oontanda puObot.
11 Sho ya zi po, oya ka yunga oontanda pomakulukuma gaAbarim, mombuga yokuuzilo woshilongo Moab.
12 Opo ihe oya yungu oontanda molusilu Sered.
13 Okuza nkoka oya tembudha ishewe e taa ka yunga oontanda kombinga yuumbangalantu womulonga Arnon, mombuga ndjoka ya tsa koshilongo shAayamori. (Arnon ogwa li ongamba pokati kAamoabi nAayamori.)
14 Omolwashoka mEmbo lyehingo lyiita yOmuwa mwa tiwa: “…oshilando Vaheb moshikandjo Sufa nomasilu; omulonga Arnon
15 nomasilukila gomasilu ga adha koshilando Ar nokuuka kongamba yaMoab.”
16 Okuza hoka oya yi keha hali ithanwa Beer, ogwo omuthima ngoka Omuwa a lombwele Moses ta ti: “Gongaleka aantu, ndi ya pe omeya.”
17 Pethimbo ndyoka Aaisraeli oyi imbi eimbilo ndika taa ti: “Muthima ngoye, vivila omeya; tse otatu ku kundu nokwiimba.
18 Omuthima ogwa hupwa kaana yokombanda, gwa yuulwa kaakuluntu yoshigwana. Oya hupu nondhimbo yuukwaniilwa, oya panda nomapanda gawo.” Oya zi mombuga yu uka kuMattana.
19 Okuza kuMattana oyu uka kuNahaliel nokuza kuNahaliel oyu uka kuBamot.
20 Okuza kuBamot oyu uka kolusilu lwoshilongo shAamoabi, ponyonga yondundu Pisga, ndjoka ya tumbalala mombuga.
21 Aaisraeli oya tumu aatumwa kuSihon, omukwaniilwa gwAayamori, nelaka tali ti:
22 “Tu pitika tu tokole moshilongo shoye. Otse niimuna yetu itatu zi mondjila tu ye ando momapya goye nenge miitsambe yoye yomiviinu, noitatu nu nando omeya momithima dhoye, otatu kala owala mondjila, sigo twa tokola oshilongo shoye.”
23 Ihe Sihon ina pitika Aaisraeli ya taaguluke oshilongo she. Okwa hiya iita e ta zi mo a yi kuJahas mombuga e ta ponokele Aaisraeli.
24 Aaisraeli oya dhipaga aantu oyendji e taa lala po evi lyawo okuza komulonga Arnon sigo okuJabbok, tashi ti sigo evi lyAayammoni, oshoka ongamba yAayammoni oya li ya gamenwa noonkondo.
25 Osho ngaaka Aaisraeli ya lala iilando ayihe yAayamori, mwa kwatelelwa mo Heshbon nomikunda dhe shi kunduka e taa kala mo.
26 Heshbon osha li oshilandopangelo shomukwaniilwa gwAayamori Sihon, ngoka a kondjitha omukwaniilwa gwonale gwaMoab e ta yugu ko evi lye sigo okomulonga Arnon.
27 Omolwashoka aatoti yiitewo taa ti: “Ileni kuHeshbon, koshilando shomukwaniilwa Sihon! Otwa hala tu shi tale tashi tungululwa notashi ningwa oshipe.
28 Oshoka muHeshbon omwa zi omulilo, ondalu yanelyanga moshilando shaSihon. Oya lungunike po oshilando Ar muMoab nokulatha po omitumbo puArnon.
29 Memekukwee, ne Aamoabi! Ne aalongeli yaKemosh, omwa hanagulwa po! Kalunga keni okwe etha aantu ye, ya ninge oontauki, naakulukadhi ya ninge oonkwatwa dhomukwaniilwa gwAayamori.
30 Ihe ngashingeyi oluvalo lwawo olwa yonwa po, okuza kuHeshbon ndongo oDibon, okuza kuNashim sigololo Nofak popepi naMedeba.”
31 Aaisraeli oya tula moshilongo shAayamori,
32 naMoses okwa tumu aalumentu ya ka ndaadhe Jaser. Aaisraeli oye shi kwata po nomikunda dhe shi kunduka e taa tidha mo Aayamori mboka ya li mo.
33 Opo ihe Aaisraeli oya galuka noya lamba ondjila yokuBaasha. Og, omukwaniilwa gwaBaasha, okwa piti mo naakwiita ye e te ya ponokele puEdrei.
34 Omuwa okwa lombwele Moses a ti: “Ino mu tila. Otandi mu gandja miikaha yoye, aantu ye ayehe noshilongo she. Mu ningila, ngaashi wa ningile Sihon, omukwaniilwa gwAayamori ngoka a pangele muHeshbon.”
35 Aaisraeli oya dhipaga Og, oyana aamati naantu ye ayehe, noinaa etha pu hupe ngoka e na omwenyo, e taa lala oshilongo she.
1 Aaisraeli oya tembuka po e taa ka yunga oontanda molushandja lwaMoab kuuzilo waJordan ontega naJeriko.
2 Balak yaZippor, omukwaniilwa gwaMoab, sho a kundana shoka Aaisraeli ya ningile Aayamori nonkene Aaisraeli ye li po oyendjiyendji,
3 oye pamwe naantu ye oya sholola.
4 Aamoabi oya lombwele aawiliki yAamidiana ya ti: “Engathithi ndika otali tu mana po ongondumetana tayi gugula po omwiidhi omutalala komaunapelo.” Omukwaniilwa Balak
5 okwa tumu aatumwa ya ka tale Bileam yaBeor, ngoka a li muPetor popepi nomulonga Eufrat mevi lyoyaandjawo Amaw, ye mu lombwele ya tye: “Onda hala ndi ku tseyithile kutya muEgipiti omwa zi oshigwana oshindji, aantu yasho oya andjalala apehepehe notaa hala okukwata po evi lyetu.
6 Otaye tu nyenge okuyalula. Tu kwatha ano, u ye u ya lile ndje muumpulile. Pamwe tatu vulu oku ya sinda noku ya tidha mo mevi lyetu. Ondi shi shi kutya shaa to tomonene omuntu eyambeko, ota kala a yambekwa, naangoka to mu tomonene etulomutima, ota kala a tulwa omutima.”
7 Aawiliki Aamoabi naawiliki Aamidiana oya faalele iikahu kuBileam e taye mu lombwele etumwalaka lyaBalak.
8 Bilean okwe ya lombwele e ta ti: “Laleni mpaka, ongula otandi mu lombwele shoka Omuwa a lombwele ndje.” Aawiliki Aamoabi noya tokelwa puBileam.
9 Kalunga okwe ya kuBileam e ta ti: “Aalumentu mboka ya tokelwa pungoye, oolye?”
10 Bileam okwa yamukula a ti: “Balak yaZippor, omukwaniilwa gwaMoab, oye e ya tumu kungame, ya lombwele ndje
11 kutya aantu ya tembuka muEgipiti, oya siikila oshilongo ashihe. Nokwa hala ndi ye mu lile muupulile, opo a wape oku ya kondjitha noku ya tidha po.”
12 Kalunga okwa ti kuBileam: “Ino ya nando naantu mboka ngoye ino tula Aaisraeli omutima, oshoka oyo aalalekwa nuuyamba.”
13 Ongula sho kwa shi, Bileam okwa yi kaatumwa yaBalak e ta ti: “Shuneni kevi lyeni, Omuwa okwa tindi okuzimina ndje ndi ye nane.”
14 Oyo noya shuna kuBalak e taye mu lombwele kutya okwa tindi ko.
15 Nena Balak okwa tumununa ko aawiliki oyendji noya simana ye vule mbeyaka yotango.
16 Oya yi kuBileam e taye mu pe elaka lyaBalak yaZippor tali ti: “Inapa kala shoka tashi ku dhike waa ye kungame.”
17 Otandi ke ku futa ondjambi onene notandi ningi shaa shoka to lombwele ndje. Kwatha ndje u ye u lile ndje aantu mbaka muumpulile.
18 Bileam okwa yamukula a ti: “Balak nando na pe ndje oshisiliveli noshingoli shu udha egumbo lye, itandi vulu okutaaguluka elaka lyOmuwa Kalunga kandje nando okashona.
19 Kwathii ndje mu lale mpaka ongulohi ndjika, opo ndi koneke shoka Omuwa ta lombwele ndje.”
20 Kalunga okwe ya kuBileam uusiku tuu mbwiyaka e ta ti: “Aalumentu mbaka ngele oye ya kungoye ye ku ile, inda ano nayo, ihe longa ashike shoka tandi ku lombwele.”
21 Ongula sho kwa shi, Bileam okwa kutile okasino ke e ta yi naawiliki Aamidiana.
22 Kalunga okwa geele Bileam, sho a yi. Bileam okwa kayile okasino ke a thindikilwa kaamati ye yaali, nomuyengeli gwOmuwa okwa thikama mondjila a keelele ondjila ye.
23 Okasino sho ka mono omuyengeli a thikama mondjila a yedha egongamwele, oka peguka mo mondjila ku uka mepya. Bileam okwa dhenge okasino e te ka galulile mondjila.
24 Nena omuyengeli gwOmuwa okwa humu ko e ta ka thikama pothina pokati kiitsambe yomiviinu ya gumbilwa omankolo gomakuma.
25 Okasino sho ka mono omuyengeli, oki iwegenyene kekuma e taka thengenyene ko ompadhi yaBileam. Bileam okwe ka dhengulula.
26 Omuyengeli okwa humu ko ishewe e ta thikama pokuma pwaa na ompito yokuhenukila kolulyo nenge kolumoho.
27 Okasino sho ka mono omuyengeli, oka tsu po oongolo. Bileam okwa geye e ta dhenge okasino noshitago.
28 Nopo mpoka Omuwa okwa makula okana kwokasino e taka ti kuBileam: “Onde ku ningi shike? Omolwashike wa dhenge ndje lutatu?”
29 Bileam okwa yamukula a ti: “Omolwashoka wa tala ndje egoya! Ando nda li ndi na egongamwele, ando otandi ku dhipaga.”
30 Okasino oka yamukula ka ti: “Kandi shi okasino koye ho kayile ndje noshito? Onde ku ningile nale ngawo?” Bileam okwa yamukula a ti: “Aawe!”
31 Omuwa okwa tonatitha omeho gaBileam e ta mono omuyengeli a thikama e na egongamwele; naBileam okwi iyundulile pevi koshipala shomuyengeli.
32 Omuyengeli okwa pula a ti: “Omolwashike wa dhenge okasino koye lutatu? Onde ya ndi ku keelele mondjila yoye, oshoka kakwa li u na okuya molweendo nduka.
33 Okasino koye oka mono ndje, noka peguka ndje lutatu. Ando oka li inaake shi ninga, ando nde ku dhipaga, ihe ando ko onde ka etha ka kale ke na omwenyo.”
34 Bileam okwa yamukula a ti: “Onda yona. Inandi shi tseya kutya omo u li mondjila to keelele ndje, ihe ngashingeyi ngele ino hala ndi tsikile nondjila yandje, otandi shuna kegumbo.”
35 Omuyengeli okwa ti: “Inda ngaa naalumentu mbaka, ihe popya ashike shoka tandi ku lombwele u shi popye.” Bileam nokwa yi naantu yaBalak.
36 Balak sho ku uvu kutya Bileam ote ya, okwa yi e ke mu tsakaneke puAr, oshilando shi li pomulonga Arnon pongamba yaMoab.
37 Balak okwa ti kuBileam: “Omolwashike inoo ya, sho nde ku tuminine lwotango? Oto dhiladhila kutya ite vulu oku ku futa ondjambi ya gwana?”
38 Bileam okwa yamukula a ti: “Ngashingeyi onde ya, ihe ondi na oonkondo dhashike? Ote vulu owala okupopya shoka Kalunga ta lombwele ndje ndi shi popye.”
39 Bileam nokwa yi naBalak kuKirjat Huzot,
40 nkoka Balak a tselele oongombe noonzi e ta pe Bileam naawiliki mboka a li nayo onyama.
41 Ongula sho kwa shi, Balak okwa kutha Bileam e te mu fala kondungu yondundu Bamot Baal pombanda, mpoka ta vulu okumona ombinga yimwe yAaisraeli.
1 Bileam okwa lombwele Balak a ti: “Tungila ndje mpaka iiyambelo iheyali ngoye u etele ndje oongombe heyali noonzi oondumentu heyali.”
2 Balak okwa ningi, ngaashi a lombwelwa, oye naBileam noya yamba ongombe nonzi ondumentu poshiyambelo kehe.
3 Opo ihe Bileam okwa ti kuBalak: “Kala mpaka pefikilondjambo lyoye, manga tandi ka tala, pamwe Omuwa ta tsakaneke ndje. Otandi ya ndi ku lombwele, ngele okwi ihololele ndje.” Okwa londo koshikulundundu shimwe,
4 naKalunga okwe mu tsakaneke. Bileam okwa ti kuye: “Onda tungu iiyambelo iheyali nonda yambele ongombe nonzi ondumentu koshiyambelo kehe.”
5 Omuwa okwa lombwele Bileam shoka e na oku shi popya e te mu tumu kuBalak, opo e mu lombwele elaka lye.
6 Okwa shuna e ta adha Balak a thikama pefikilondjambo e li pamwe naawiliki yaMoab.
7 Bileam okwa totomona ehunganeko lye e ta ti: “Balak okwi ile ndje muAram, omukwaniilwa gwaMoab okoondundu dhokuuzilo, a ti: ‘Ila, u lile ndje Jakob muumpulile; ila, u tikilile ndje Israel.’
8 Otandi mu li ngiini, Kalunga sho ite mu li? Otandi mu tikile ngiini, Omuwa sho ite mu tikile?
9 Opombanda mpaka nde mu tala, okiikulundundu tandi mu ligamene. Tala, oshigwana shi iyoololelwa sho itaashi yalulilwa maantu yalwe.
10 Olye ta vulu okuyalula oluvalo lwaJakob, nenge okuyeleka omwaalu gwaIsrael? Nandi se eso lyaayuuki, ndi tokoke ndi na ombili, ngaashi aantu yaKalunga!”
11 Balak okwa ti kuBileam: “Owa ningi ndje ngiini? Onde ku ithana, u ye u lile ndje aatondi yandje muumpulile, ihe owe ya laleke nuuyamba.”
12 Bileam okwa yamukula a ti: “Otandi popi ashike shoka Omuwa ta lombwele ndje, ndi shi popye.”
13 Balak okwa lombwele Bileam a ti: “Ila, tu ye kehala lilwe nkoka to vulu okutala ombinga onkwawo yAaisraeli, ngoye u ya lile ndje muumpulile.”
14 Okwe mu fala kelundu lyaZofim kondungu yondundu Pisga. Okwa tungile ko iiyambelo iheyali e ta yambele ongombe nonzi ondumentu koshiyambelo kehe.
15 Bileam okwa ti kuBalak: “Kala mpaka pefikilondjambo lyoye, manga tandi ka tsakaneka Kalunga hwiyaka.”
16 Omuwa okwa tsakaneke Bileam e te mu lombwele shoka e na okupopya, nokwe mu shunitha kuBalak, e mu faalele elaka.
17 Okwa shuna e ta adha Balak a thikama pefikilondjambo lye, pamwe naawiliki yaMoab. Balak okwa pula shoka Omuwa a ti,
18 naBileam okwa totomona ehunganeko lye a ti: “Thikama, Balak, u pulakene! Omuna gwaZippor, pulakena ndje!
19 Kalunga hamuntu a popye iifundja, Ye hamuna gwomuntu i idhiladhilulule. A uvaneke sha ye kee shi gwanithe; a popye sha ye kee shi ninge.
20 Onda nongekwa okuyambeka, nongele Kalunga a yambeke, ite vulu oku shi galula.
21 Omuntu ka mono omukundu muJakob nenge okundhindhilika oshiponga muIsrael. Omuwa, Kalunga kawo, oku li puyo, nesimano lyomukwaniilwa tali ligolelwa mokati kawo.
22 Kalunga okwe ya tembudha muEgipiti; oku ya lile po a fa ooniga dhonyati.
23 Kaku na uumpulile tau li Jakob, kaku na uulodhi tau logo Israel. Ngashingeyi aantu taa popi Jakob naIsrael taa ti: ‘Tala shoka Kalunga a ningi!’
24 Oshigwana shaIsrael osha thikama sha fa onkoshi onyali. Ongaashi onime otashi iyelutha po, itashi ka lala, manga inaashi lya shoka she shi yugu, manga inaashi nwa ombinzi yoshihakanwa shasho she shi dhipaga.”
25 Nena Balak okwa ti kuBileam: “Owa tindi okuthinga Aaisraeli, ihe ino ya laleka wo nuuyamba!”
26 Bileam okwa yamukula a ti: “Inandi ku lombwela nani kutya otandi ningi ashike shoka Omuwa ta lombwele ndje?”
27 Balak okwa ti: “Ila, tu ye ndi ku fale kehala lilwe. Pamwe Kalunga ota ka pitika, u ya lile ndje muumpulile nkoka.”
28 Okwa fala Bileam kondungu yondundu Peor, ndjoka ya tumbalala mombuga.
29 Bileam okwe mu lombwele e ta ti: “Tungila ndje iiyambelo iheyali mpaka e to etele ndje oongombe heyali noonzi oondumentu heyali.”
30 Balak okwa ningi, ngaashi a lombwelwa, e ta yambele ongombe nonzi ondumentu koshiyambelo kehe.
1 Ngashingeyi Bileam sho a ndhindhilike kutya Omuwa nani okwe mu hala a yambeke Aaisraeli, ina anekela we, ngaashi ha ningi shito. Okwa pungululile oshipala she kombuga
2 e ta mono Aaisraeli ye li moontanda omazimo nomazimo. Ombepo yaKalunga oye mu lambele,
3 e ta totomona ehunganeko lye ta ti: “Bileam yaBeor, popya; omulumentu gwomeho ga tonata, uvitha!
4 Ndika ehunganeko lyomuuvi gwoohapu dhaKalunga, lyanakumona omamoniko gOmunankondoawike nolyomukakuki ngoka e na omeho ga tonata:
5 Omatsali goye, Jakob, ogo opala ngiini! Oonkalelo dhoye, Israel, odha poleka ngiini!
6 Odha andjalala dha fa omalusilu gomeya, odha fa iitsambe pooha dhomulonga, odha fa omandombo ga tsikwa kOmuwa nenge omisedeli pooha dhomeya.
7 Omeya otaga kungulukile miiyuma yawo. Otaa kunu oombuto dhawo momapya ga tosima. Omukwaniilwa gwawo omunene e vule Agag, nelelo lye olya taandela nolya yeluka.
8 Kalunga okwe ya tembudha muEgipiti; oku ya lile po a fa ooniga dhonyati. Otaa ka nyanyagula aatondi yawo, taye ya teyagula omasipa notaye ya yaha niikuti.
9 Otaa hundjunine notaa ka lala ya fa onkoshi, ongonime onyali; olye te ya pendutha? Ngoka te ku yambeke, Israel, ota yambekwa, ihe ngoka te ku thingi, ota thingwa.”
10 Nena Balak okwa geele Bileam. Okwa dhenge iikaha ye kumwe e ta lombwele Bileam ta ti: “Onde ku ithana u ye u lile ndje aatondi yandje muumpulile, ihe peha lyasho owe ya laleke nuuyamba lutatu nokuli.
11 Shuna kaandjeni! Onda li ndu uvaneke tandi ku futu, ihe Omuwa okwe ku keelele okutaamba ondjambi.”
12 Bileam okwa yamukula a ti: “Onda lombwele aatumwa mboka wa tumine kutya
13 nando u pe ndje iisiliveli ayihe niingoli ayihe yu udha egumbo lyoye, itandi pandakana noshipango shOmuwa, ndi ninge sha mungame mwene. Otandi popi owala shoka Omuwa ta lombwele ndje, ndi shi popye.”
14 Bileam okwa ti kuBalak: “Ngashingeyi otandi shuna koyaandjetu, ihe manga inaandi ya, otandi ku lombwele shoka Aaisraeli taa ka ningila aantu yoye monakuyiwa.”
15 Okwa totomona ehunganeko lye a ti: “Bileam yaBeor, popya; omulumentu gwomeho ga tonata, uvitha!
16 Ndika ehunganeko lyomuuvi gwoohapu dhaKalunga, lyanakutseya uunongo waanguka Gwokombandambanda, nolyaangoka ha mono omamoniko gOmunankondoadhihe:
17 Ondi mu wete, ihe hangashingeyi, otandi mu ligamene, ihe hapopepi. Onyothi otayi piti muJakob, ondhimbo yuukwaniilwa otayi yeluka muIsrael. Oye ta nyanyagula po aawiliki yaMoab, nota kombo po oluvalo aluhe lwaSet.
18 Ota sindi aatondi ye muEdom e ta lala evi lyawo Seir, ihe Israel ota nkondopala aluhe.
19 MuJakob otamu zi omupangeli, nota kombo po mboka ya hupile ko.”
20 Bileam okwa mono wo Amalek nokwa totomona ehunganeko lye a ti: “Amalek oye oshigwana oshinankondo shotango, ihe ehulilo lyasho olyo ekano lyasho.”
21 Sho a mono Aakeni, okwa totomona ehunganeko lye a ti: “Oonkalelo dhoye odha gamenwa, odhi li puule pemanya ngoshihandhila shontsa.
22 Ihe ne Aakeni otamu ka hanagulwa po. Assur ote mu fala muupika.”
23 Bileam okwa tsikile okutotomona kwe a ti: “Yayee, akwetse, olye ta kala nomwenyo, Kalunga ngele ta gwanitha mbika?
24 Aayendifuta otaa zi kombinga yaKipro. Otaa teya po Assur naEber, ihe nayo wo otaa ka yonuka po thilu.”
25 Bileam sho a mana, okwa thikama e ta shuna kaandjawo, naBalak wo okwa yi nondjila ye.
1 Aaisraeli sho ya kala muShittim, aantu oya hondele naakadhona Aamoabi,
2 mboka ye ya hiya kiituthi yomasaagelo. Aaisraeli oya li iikulya yawo noyi inyongamene kiikalunga yawo.
3 Aaisraeli sho ya simaneke ngeyi Baal, oshikalunga shaPeor, Omuwa okwe ya geele
4 e ta ti kuMoses: “Kutha aawiliki yAaisraeli ayehe, u ya tule kohake montaneho yaantu, opo ondjahi yOmuwa yokugeela Israel yi lote.”
5 Moses okwa lombwele aatokolihapu yaIsrael a ti: “Kehe gumwe gwomune oku na okudhipaga omuntu ngoka a ningi omulongeli gwaBaal Peor.”
6 Omulumentu gumwe Omuisraeli okwa kutha omufuko Omumidiana e te mu fala ketsali lye montaneho yaMoses negongalo alihe lyaIsrael, manga ya li taa lilile posheelo shetsalihangano.
7 Omuyambi Pinehas yaEleasar, omutekulu gwaAaron, sho e shi mono, okwa thikama a zi moshigongi. Okwa kutha egonga
8 e ta landula omulumentu ngoka e na omufuko sigo ometsali e te ya tsu negonga ayehe yaali, Omuisraeli nomufuko Omumidiana. Pahedhi ndjika elega ndyoka lya yono po Aaisraeli, olya kodha,
9 ihe olya faalele nokuli aantu 24 000.
10 Omuwa okwa lombwele Moses e ta ti:
11 “Molwoshinima shoka sha ningwa kuPinehas, itandi kala we nda geela Aaisraeli. Okwa tindi okwiidhidhimikila okusimaneka iikalunga, nomolwashoka inandi ya yonagula po ayehe.
12 Lombwela Pinehas kutya otandi dhike ehangano naye, ndyoka tali kala aluhe sigo aluhe.
13 Oye noluvalo lwe tandi ya langeke ya ninge aayambi sigo aluhe, molwashoka okwa kodhilile esimano lyaKalunga ke e te etele aantu edhimopo lyomayono gawo.”
14 Edhina lyOmuisraeli ngoka a dhipagelwa pamwe nomufuko Omumidiana, oSimri yaSalu, omukuluntu gwegumbo mezimo lyaSimeon.
15 Edhina lyomufuko Omumidiana oKosbi yaSur; he okwa li omukuluntu gwongundu yomaludhi gAamidiana.
16 Omuwa okwa lombwele Moses a ti:
17 “Ponokela Aamidiana, opo u ya hanagule po,
18 omoluuwinayi mboka ye mu ningile, sho ye mu kotokele puPeor nomolwaKosbi, ngoka a dhipagwa pethimbo lyelega puPegor.”
1 Elega sho lya kodha, Omuwa okwa lombwele Moses naEleasar lyaAaron
2 e ta ti: “Yaluleni omwaalu gwegongalo alihe lyaIsrael pamazimo, aalumentu ayehe yepipi lyomimvo omilongo mbali naamboka ye vule po ya gwana okuhinga iita.”
3 Moses nomuyambi Eleasar oye ya uvithile molushandja lwaMoab puJordan ontega naJeriko ya ti:
4 “Naa holoke ayehe mboka yomimvo omilongo mbali naamboka ye vule po, ngaashi Omuwa a lombwele Moses.” Aaisraeli mboka ya tembuka muEgipiti, oyo mbaka
5 Ezimo lyaReuben, osheeli shaJakob: omaludhi gaHanok, Pallu,
6 Hezron naKarmi.
7 Omaludhi ngaka oga li ge na aalumentu 43 730.
8 Oluvalo lwaPallu oEliab
9 noyana Nemuel, Datan naAbiram. (Datan naAbiram oyo mbeyaka ya li ya hogololwa kegongalo. Oyi itumbile Moses naAaron e tayi itula maalanduli yaKora, sho ya li ya tsu ondumbo nOmuwa.
10 Evi olya makuka e tali ya nina po, noya sile pamwe naKora naalanduli ye, omulilo sho gwa lungunitha po aalumentu 250; oya ningi elondodho koshigwana.
11 Ihe aana yaKora inaa dhipagwa.)
12 Ezimo lyaSimeon: omaludhi gaNemuel, Jamin, Jakin,
13 Sera naShaul.
14 Omwaalu gwaalumentu momaludhi ngaka ogwa li 22 200.
15 Ezimo lyaGad: omaludhi gaZefon, Haggi, Shuni,
16 Osni, Eri,
17 Arod naAreli.
18 Omwaalu gwaalumentu momaludhi ngaka ogwa li 40 500.
19 Ezimo lyaJuda: omaludhi gaShela, Perez, Sera, Hezron naHamul. (Aana yaJuda yaali aamati, Er naOnan oya sile mevi lyaKaanan.)
20
21
22 Omwaalu gwaalumentu momaludhi ngaka ogwa li 76 500.
23 Ezimo lyaIssaskar: omaludhi gaTola, Puwa,
24 Jashub naShimron.
25 Omwaalu gwaalumentu momaludhi ngaka ogwa li 64 300.
26 Ezimo lyaSebulon: omaludhi gaSered, Elon naJahleel.
27 Omwaalu gwaalumentu momaludhi ngaka ogwa li 60 500.
28 Omazimo gaJosef, ngoka a li he yaamati yaali, Manasse naEfraim.
29 Ezimo lyaManasse: Makir gaManasse okwa li he yaGilead, nomaludhi taga landula oga zi muhekulu Gilead:
30 omaludhi gaIeser, Helek,
31 Asriel, Shekem,
32 Shemida naHefer.
33 Zelofhad yaHefer ka li e na aanona aamati, ihe aakadhona ayeke; omadhina gawo ogo Mahla, Noa, Hogla, Milka naTirza.
34 Omwaalu gwaalumentu momaludhi ngaka ogwa li 52 700.
35 Ezimo lyaEfraim: omaludhi gaShuthela, Beker naTahan.
36 Oludhi lwaEran olwa zi moludhi lwaShuthela.
37 Omwaalu gwaalumentu momaludhi ngaka ogwa li 32 500. Ngaka ogo omaludhi ga za muJosef.
38 Ezimo lyaBenjamin: omaludhi gaBela, Ashbel, Ahiram,
39 Shefufam naHufam.
40 Omaludhi gaArd naNaeman oga zi muBela.
41 Omwaalu gwaalumentu momaludhi ngaka ogwa li 45 600.
42 Ezimo lyaDan: oludhi lwaShuham,
43 lu na omwaalu gwaalumentu 64 400.
44 Ezimo lyaAser: omaludhi gaImna, Ishvi naBeria.
45 Omaludhi gaHeber naMalkiel oga zi muBeria.
46 Aser okwa li e na omwana omukadhona edhina lye Sera.
47 Omwaalu gwaalumentu momaludhi ngaka ogwa li 53 400.
48 Ezimo lyaNaftali: omaludhi gaJakzeel, Guni,
49 Jezer naShillem.
50 Omwaalu gwaalumentu momaludhi ngaka ogwa li 45 400.
51 Omwaalu gwaalumentu Aaisraeli aguhe kumwe ogwa li 601 730.
52 Omuwa okwa lombwele Moses e ta ti:
53 “Topolela omazimo ngaka evi pamiyalu dhago.
54 Oshilongo oto shi topola mokuumba iihogololitho e to gandja oshitendelwa oshinene kezimo enene noshishona kezimo eshona.”
55
56
57 Ezimo lyaLevi lya thikama momaludhi gaGerson, Kohat naMerari.
58 Omaluvalo gawo oga kwatelela mo omaludhi gaLibni, Hebron, Mahli, Mushi naKora. Kohat ohe yaAmram,
59 ngoka a hokanene omuna gwaLevi omukadhona Jokebed, ngoka a valelwa muEgipiti. Jokebed okwa valele Amram aamati yaali, Aaron naMoses, nomukadhona Miriam.
60 Aaron okwa li e na aanona aamati yane: Nadab, Abihu, Eleasar naItamar.
61 Nadab naAbihu oya si, sho ya yamba omulilo gwaa shi omuyapuki.
62 Aalevi aalumentu mboka ya li ye na omwedhi gumwe nenge ye vule po, omwaalu gwawo 23 000. Oya li ya yoololwa mAaisraeli, oshoka inaa pewa oshitendelwa muIsrael.
63 Omaludhi agehe ngaka oga li ga yalulwa kuMoses nomuyambi Eleasar, sho ya yalula Aaisraeli molushandja lwaMoab pomulonga Jordan ontega naJeriko.
64 Maalumentu mbaka kamwa li nando ogumwe gwaambeyaka ya yalulilwe kuMoses nomuyambi Aaron mombuga Sinai.
65 Omuwa okwe ya lombwelele kutya otaa ka sila mombuga. Muyo inamu hupa nando ogumwe, kakele kaKaleb kaJefunne naJosua yaNun.
1 Mahla, Noa, Hogla, Milka naTirza oya li aakadhona aana yaZelofhad yaHefer yaGilead yaMakir gaManasse gaJosef
2 Oya yi noya thikama koshipala shaMoses nomuyambi Eleasar naawiliki negongalo alihe posheelo shetsalihangano e taa ti:
3 “Tate okwa sile mombuga ye ina thiga po aamati. Ka li nando mokati kaalanduli yaKora, mboka ya tsu ondumbo nOmuwa; okwa sile uulunde we mwene.
4 Molwashoka ka li e na aanona aamati, edhina lye otali kana mo muIsrael. Tu pa oshitendelwa shevi mokati kaamwayina yatate!”
5 Moses okwa tula oshinima shawo koshipala shOmuwa.
6 Omuwa okwa lombwele Moses a ti:
7 “Shoka sha pulwa kaana yaZelofhad, oshi li mondjila, ya pa oshitendelwa mokati kaamwayina yahe. Ya pa oshitendelwa shahe.
8 Lombwela Aaisraeli kutya ngele oku na omuntu ta si ye ke na aanona aamati, omwana omukadhona na thigulule eliko lye.
9 Ngele ke na omwana omukadhona, aamwayina naye mu thigulule.
10 Ngele ke na aamwayina, oohegona naye mu thigulule.
11 Ngele ke na aamwayina nenge oohegona, nena omukwawo ngoka e mu li popepi, ne mu thigulule, opo eliko li ninge lye. Aaisraeli oye na okugwanitha eutho ndika Omuwa a lombwele Moses.”
12 Omuwa okwa lombwele Moses a ti: “Londa kondundu Abarim u tale evi ndyoka tandi li pe Aaisraeli.
13 Shampa tuu we li tala, oto si, ngaashika omumwanyoko Aaron a si,
14 oshoka ne amuhe yaali omwa tsile ondumbo noshipango shandje mombuga Zin. Egongalo alihe sho lya ngungutulile ndje pomeya gaMeriba, omwa tindi okwiinekela oonkondo dhandje oondjapuki montaneho yalyo.” (Meriba olwo oluthithiya puKadesh mombuga Zin.)
15 Moses okwa lombwele Omuwa e ta ti:
16 “Omuwa Kalunga, ongoye othithiya yomwenyo aguhe, langeka po omulumentu ngoka ta wilike aantu mbaka
17 note ya kwatele komeho molugodhi, opo egongalo lyoye lyaa kale lya fa oonzi dhaa na omusita.”
18 Omuwa okwa lombwele Moses e ta ti: “Kutha Josua yaNun, omulumentu ependa, u mu tenteke iikaha yoye komutse.
19 Mu thikameka montaneho yomuyambi Eleasar negongalo alihe, nomontaneho yawo oto mu langeke a ninge omulanduli gwoye.
20 Mu pa oonkondo dhoye, opo egongalo alihe lyaIsrael li vulike kuye.
21 Na thikame koshipala shomuyambi Eleasar, ngoka ta koneke ehalo lyandje mokulongitha Urim naTummim. Pahedhi ndjika Eleasar ota wilike Josua negongalo alihe lyaIsrael miinima yawo ayihe.”
22 Moses okwa ningi, ngaashi Omuwa e mu lombwele. Okwa thikameke Josua montaneho yomuyambi Eleasar negongalo alihe.
23 Moses okwa tenteke iikaha ye komutse gwaJosua, ngaashi Omuwa e mu lombwele e te mu langeke a ninge omulanduli gwe.
1 Omuwa okwa lombwele Moses a ti:
2 “Lombwela Aaisraeli u tye: ‘Seni oshimpwiyu, mu yambele ndje iikulya mbyoka tayi opalele ndje.’
3 Ya lombwela kutya ondjambo ndjoka ye na okweetela Omuwa, oyo ndjika: oonzigona mbali oondumentu dhomumvo gumwe dhaa na oshipo nadhi ninge efikilondjambo lyesiku kehe.
4 Onzigona yimwe nayi yambwe ongula, nontiyali ongulohi,
5 shaa ndjoka pamwe noograma mbali dhuusila womunziya wa pilulilwa molita yimwe yomagadhi gooholivi.
6 Ndika olyo efikilondjambo lyesiku kehe lya yambelwa lwotango pondundu Sinai, li gandje ezimba lya nika nawa lyo opalela Omuwa.
7 Oshinuwandjambo pamwe nonzigona tashi tililwa koshiyambelo, osho olita yimwe yomaviinu.
8 Ongulohi otaku yambwa onzigona, ngaashi naanaa pwa ningilwe ongula, pamwe nondjambo yiikunuwa, yi gandje ezimba lya nika nawa lyo opalela Omuwa.”
9 “Mesiku lyEsabati otamu yambwa oonzigona mbali dhomumvo gumwe dhaa na oshipo, pamwe niikulyandjambo yuusila womunziya woolita ne netata wa pilulilwa momagadhi gooholivi, nondjambo yomaviinu.
10 Efikilondjambo ndika oli na okuyambwa Esabati kehe, mwa gwedhwa efikilondjambo lyoshito nondjambo yalyo yomaviinu.”
11 “Yambeleni Omuwa efikilondjambo petameko lyomwedhi kehe: oonzigona mbali oondumentu, onzi yimwe ondumentu noonzigona heyali oondumentu dhomumvo gumwe dhaa na oshipo.
12 Pamwe nongombe ondumentu kehe yamba ondjambo yiikulya yuusila womunziya woograma hamano netata wa pilulilwa momagadhi gooholivi; pamwe nonzi ondumentu yamba uusila womunziya woograma ne netata wa pilulilwa momagadhi gooholivi,
13 nokonzigona kehe oograma mbali dhuusila womunziya wa pilulilwa momagadhi gooholivi. Ndika olyo efikilondjambo li na ezimba lya nika nawa lyo opalela Omuwa.
14 Kongombe ondumentu kehe oku na okukala ondjambo yomaviinu goolita mbali, konzi ondumentu olita yimwe noshititano nokonzigona kehe olita yimwe. Ndika olyo efikilondjambo lyomwedhi omupe kehe momumvo.
15 Kakele kefikilondjambo lyesiku kehe noshinuwandjambo shalyo yamba ondjondjambo yoshikombo shimwe oshilumentu.”
16 “Momwedhi gwotango esiku etimulongo netine olyo Opaasa yOmuwa.
17 Mesiku etimulongo netitano oshituthi otashi tameke tashi kala omasiku gaheyali; momasiku ngoka otamu liwa iikwiila inaayi tulwa efulika.
18 Mesiku lyotango lyoshituthi otamu gongala kelongelokalunga, noitaku longwa nando.
19 Yambeleni Omuwa efikilondjambo lyoongombe mbali oondumentu, onzi ondumentu noonzigona heyali oondumentu dhomumvo gumwe dhaa na oshipo.
20 Yambeni ondjambo yiikulya yuusila womunziya woograma hamano netata wa pilulilwa momagadhi gooholivi kongombe kehe, oolita ne netata konzi kehe
21 noolita mbali konzigona kehe.
22 Yambeni wo oshikombo oshilumentu shi ninge ondjondjambo. Pahedhi ndjika otamu gwanitha eyelithoyapulo lyoshigwana.
23 Yambeni mbika ya gwedhela kefikilondjambo lyongulohi kehe.
24 Pamukalo nguka yambeleni Omuwa oondjambo dhiikulya momasiku agehe gaheyali, ezimba lya nika nawa lye mu opalela. Dhi yambeni mwe dhi gwedha kefikilondjambo lyesiku kehe nokoshinuwandjambo shalyo.
25 Mesiku etiheyali gongaleni kelongelokalunga, ihe inamu longa sha.”
26 “Mesiku lyoshipe, uuna tamu yambele Omuwa ondjambo yiilya iipe mOshituthi shoshiwike, gongaleni kelongelokalunga ne inamu longa sha.
27 Eteleni Omuwa omitanda mbali, onzi ondumentu noonzigona heyali dhomumvo gumwe dhaa na oshipo, dhi ninge efikilondjambo li na ezimba lya nika nawa tali mu opalele.
28 Komutanda kehe yambeni ondjambo yiikulya yuusila womunziya woograma hamano netata wa pilulilwa momagadhi gooholivi, oolita ne netata konzi kehe
29 noolita mbali konzigona kehe.
30 Yambeni wo oshikombo oshilumentu okugwanitha eyelithoyapulo lyoshigwana.
31 Yambeni oondjambo ndhika mwe dhi gwedha kefikilondjambo lyesiku kehe nokiikulyandjambo.”
1 “Mesiku lyotango lyomwedhi omutiheyali omu na okugongala kelongelokalunga, noitaku longwa sha. Esiku ndyoka omankuma naga hikwe.
2 Yambeleni Omuwa efikilondjambo, ezimba lya nika nawa lye mu opalela: omutanda gumwe, onzi yimwe ondumentu noonzigona heyali dhomumvo gumwe dhaa na oshipo.
3 Yambeni wo ondjambo yalyo yiikulya, uusila womunziya wa pilulilwa momagadhi gooholivi: oograma hamano netata pamwe nomutanda, oograma ne netata pamwe nonzi ondumentu
4 noograma mbali pamwe nonzigona kehe.
5 Yambeni wo oshikombo oshilumentu shi ninge ondjondjambo, opo mu gwanithe eyelithoyapulo lyoshigwana.
6 Gwedheni oondjambo ndhika kefikilondjambo lyomwedhi omupe nondjambo yalyo yiikulya nokefikilondjambo lyesiku kehe nondjambo yalyo yiikulya niikunuwa. Odho oondjambo dhi na ezimba lya nika nawa tali opalele Omuwa.”
7 “Gongaleni kelongelokalunga mesiku etimulongo lyomwedhi omutiheyali; idhilikeni iikulya ne inamu longa sha.
8 Yambeleni Omuwa efikilondjambo, ezimba lya nika nawa lye mu opalela: omutanda gumwe, onzi yimwe ondumentu noonzigona heyali oondumentu dhomumvo gumwe dhaa na oshipo.
9 Yambeni wo ondjambo yalyo yiikulya, uusila womunziya wa pilulilwa momagadhi gooholivi: oograma hamano netata pamwe nomutanda, oograma ne netata pamwe nonzi ondumentu
10 oograma mbali pamwe nonzigona kehe.
11 Kakele koshikombo sheyelithoyapulo lyoshigwana nefikilondjambo lyesiku kehe pamwe nondjambo yalyo yiikulya niikunuwa, yambeni wo oshikombo oshilumentu shi ninge ondjondjambo.”
12 “Gongaleni kelongelokalunga mesiku etimulongo netitano lyomwedhi omutiheyali. Dhaneni oshituthi mokusimaneka Omuwa omasiku gaheyali noitamu longo sha.
13 Mesiku lyotango yambeleni Omuwa efikilondjambo lyiikulya, ezimba lya nika nawa tali mu opalele: omitanda omilumentu omulongo nandatu, oonzi oondumentu mbali noonzigona oondumentu omulongo nane dhomumvo gumwe dhaa na oshipo.
14 Yambeni wo ondjambo yiikulya yuusila womunziya wa pilulilwa momagadhi gooholivi: oograma hamano netata pamwe nomutanda kehe, oograma ne netata pamwe nonzi kehe
15 oograma mbali pamwe nonzigona kehe.
16 Kefikilondjambo lyesiku kehe pamwe nondjambo yalyo yiikulya niikunuwa gwedhii ko oshikombo oshilumentu shi ninge ondjondjambo.
17 “Mesiku etiheyali yambeni omitanda omilumentu omulongo nambali, oonzi oondumentu mbali noonzigona oondumentu omulongo nane dhomumvo gumwe dhaa na oshipo.
18 Pamwe nomitanda, oonzi oondumentu noonzigona yambeni wo oondjambo dhiikulya niikunuwa pamiyalu dhadho, ngaashi kwa uthwa.
19 Kefikilondjambo lyesiku kehe pamwe nondjambo yalyo yiikulya niikunuwa gwedhii ko oshikombo oshilumentu shi ninge ondjondjambo.
20 “Mesiku etitatu yambeni omitanda omilumentu omulongo nagumwe, oonzi oondumentu mbali noonzigona oondumentu omulongo nane dhomumvo gumwe dhaa na oshipo.
21 Pamwe nomitanda, oonzi oondumentu noonzigona yambeni wo oondjambo dhiikulya niikunuwa pamiyalu dhadho, ngaashi kwa uthwa.
22 Kefikilondjambo lyesiku kehe pamwe nondjambo yalyo yiikulya niikunuwa gwedhii ko oshikombo oshilumentu shi ninge ondjondjambo.
23 “Mesiku etine yambeni omitanda omilumentu omulongo, oonzi oondumentu mbali noonzigona oondumentu dhomumvo gumwe omulongo nane dhaa na oshipo.
24 Pamwe nomitanda, oonzi oondumentu noonzigona yambeni wo oondjambo dhiikulya niikunuwa pamiyalu dhadho, ngaashi kwa uthwa.
25 Kefikilondjambo lyesiku kehe pamwe nondjambo yalyo yiikulya niikunuwa gwedhii ko oshikombo oshilumentu shi ninge ondjondjambo.
26 “Mesiku etitano yambeni omitanda omilumentu omugoyi, oonzi oondumentu mbali noonzigona oondumentu dhomumvo gumwe omulongo nane dhaa na oshipo.
27 Pamwe nomitanda, oonzi oondumentu noonzigona yambeni wo oondjambo dhiikulya niikunuwa pamiyalu dhadho, ngaashi kwa uthwa.
28 Kefikilondjambo lyesiku kehe pamwe nondjambo yalyo yiikulya niikunuwa gwedhii ko oshikombo oshilumentu shi ninge ondjondjambo.
29 “Mesiku etihamano yambeni omitanda omilumentu hetatu, oonzi oondumentu mbali noonzigona oondumentu dhomumvo gumwe omulongo nane dhaa na oshipo.
30 Pamwe nomitanda, oonzi oondumentu noonzigona, yambeni wo oondjambo dhiikulya niikunuwa pamiyalu dhadho, ngaashi kwa uthwa.
31 Kefikilondjambo lyesiku kehe pamwe nondjambo yalyo yiikulya niikunuwa gwedhii ko oshikombo oshilumentu shi ninge ondjondjambo.
32 “Mesiku etiheyali yambeni omitanda omilumentu heyali, oonzi oondumentu mbali noonzigona oondumentu dhomumvo gumwe omulongo nane dhaa na oshipo.
33 Pamwe nomitanda, oonzi oondumentu noonzigona yambeni wo oondjambo dhiikulya niikunuwa pamiyalu dhadho, ngaashi kwa uthwa.
34 Kefikilondjambo lyesiku kehe pamwe nondjambo yalyo yiikulya niikunuwa gwedhii ko oshikombo oshilumentu shi ninge ondjondjambo.
35 “Mesiku etihetatu gongaleni kelongelokalunga, noitamu longo sha.
36 Yambeleni Omuwa efikilondjambo, ezimba lya nika nawa tali mu opalele: omutanda gumwe, onzi yimwe ondumentu noonzigona heyali oondumentu dhomumvo gumwe dhaa na oshipo.
37 Pamwe nomutanda, onzi ondumentu noonzigona, yambeni wo oondjambo dhiikulya niikunuwa pamiyalu dhadho, ngaashi kwa uthwa.
38 Kefikilondjambo lyesiku kehe pamwe nondjambo yalyo yiikulya niikunuwa gwedhii ko oshikombo oshilumentu shi ninge ondjondjambo.”
39 Ngaka ogo omautho kombinga yomafikilondjambo, oondjambo dhiikulya, oondjambo dhiikunuwa nomakwatathanondjambo ngoka mu na okuyambela Omuwa miituthi yeni. Koondjambo ndhika otaku gwedhwa oondjambo dhomauvaneko noondjambo ndhoka tadhi yambwa pahalo lyomuntu mwene.
40 Moses okwa lombwele Aaisraeli ayihe mbyoka Omuwa e mu lombwele.
1 Moses okwa lombwele aawiliki yomazimo gaIsrael e ta ti: “Omuwa okwa gandja omautho ngaka:
2 Ngele ope na omuntu tu uvanekele Omuwa sha nenge ta gana kutya oti idhilike sha, ina yona tuu euvaneko lye, ihe na gwanithe shoka a popi.
3 “Ngele oku na omukiintu omugundjuka e li maandjahe e tu uvanekele Omuwa sha nenge ta gana kutya oti idhilike sha,
4 na gwanithe shoka u uvaneke nenge a gana, he ngele ite mu indike, sho e shi uvu.
5 Ihe he ngele te mu indike okugwanitha egano, sho e li uvu, nena ita pumbwa oku li gwanitha. Omuwa ote mu dhimine po, oshoka he okwe mu indike.
6 “Ngele omukiintu ngoka u uvaneke sha nenge a popi shoka tashi mu manga, ta ka hokanwa,
7 nena na gwanithe shoka u uvaneke nenge a ganene, ngele omulume ite shi indike, sho e shi uvu.
8 Ihe omulume ngele ote mu indike okugwanitha euvaneko lye, sho e li uvu, nena ita pumbwa we oku li gwanitha. Omuwa ote mu kuthile po.
9 “Omuselekadhi nenge omukiintu a hengwa na gwanithe euvaneko lye kehe e li uvanekele Omuwa.
10 “Omuhokanwa ngele ta gana nenge tu uvaneke okwiidhilika sha,
11 na gwanithe shoka a ganene nenge u uvaneke, ngele omulume ite shi indike, sho e shi uvu.
12 Ihe ngele omulume te mu indike okugwanitha egano, sho e li uvu, ita pumbwa oku li gwanitha. Omuwa ote mu dhimine po, oshoka omulume okwe mu indike.
13 Omulume oku na uuthemba okukoleka nenge okudhima po egano nenge euvaneko kehe ndyoka omukadhi a gana nenge u uvaneka.
14 Ihe ngele omulume ine mu indika, uuna u uvu egano nenge euvaneko ndyoka, nena na gwanithe shoka a gana nenge u uvaneka. Okwa koleke egano nenge euvaneko, sho inee li tinda, uuna e li uvu.
15 Ihe ngele ota dhimi po egano nenge euvaneko konima, nena ota humbata ondjo yomukadhi.”
16 Ngaka ogo omautho ngoka Omuwa e ga pe Moses kombinga yomauvaneko gu uvanekelwa Omuwa komukiintu e li maandjahe nenge komuhokanwa.
1 Omuwa okwa lombwele Moses a ti:
2 “Geelela Aamidiana shoka ya ningile Aaisraeli. Shampa we shi ningi, oto ka mana oondjenda.”
3 Moses okwa lombwele oshigwana a ti: “Ilongekidhileni iita, opo mu ponokele Aamidiana mu ya geelele shoka ya ningile Omuwa.
4 Mezimo kehe lyaIsrael namu ze aalumentu eyuvi ya ye kiita.”
5 Aalumentu eyuvi oya hogololwa mezimo kehe, aalumentu ayehe kumwe omayuvi omulongo nagaali yi ilongekidhila olugodhi.
6 Moses okwe ya tumu kiita mewiliko lyomuyambi Pinehas yaEleasar, ngoka ta tonatele iinima iiyapuki nomankuma gokukuga onkugo.
7 Oya ponokele Midian, ngaashi Omuwa a lombwele Moses e taa dhipaga aalumentu ayehe,
8 mwa kwatelelwa aakwaniilwa yatano yaMidian: Evi, Rekem, Sur, Hur naReba. Oya dhipaga wo Bileam yaBeor.
9 Aaisraeli oya kwata po aakiintu naanona Aamidiana, oya kutha po oongombe, oonzi niikombo yawo e taa yugu po uuyamba wawo auhe.
10 Oya fike po iilando nomagumbo gawo.
11 Oya kutha po iihakanwa ayihe mbyoka ye yi hakana, mwa kwatelelwa oonkwatwa niimuna,
12 e taye yi eta kuMoses naEleasar nokegongalo lyAaisraeli, mboka ya li moontanda momalundu gaMoab puJordan ontega naJeriko.
13 Moses, Eleasar naawiliki ayehe yegongalo oya piti mo moontanda, ya ka tsakaneke iita.
14 Moses okwa geele aawiliki yiita, aakuluntu yeyuvi naakuluntu yethele mboka ya galuka kiita.
15 Okwe ya pula a ti: “Omolwashike mwe etha aakiintu ayehe ya kale nomwenyo?
16 Dhimbulukweni kutya aakiintu mbaka oyo mboka ya landula ondunge yaBileam puPeor noya pukitha oshigwana shi iteke Omuwa. Oyo tuu mboka ye etithile elega moshigwana shOmuwa.
17 Dhipagii po uumati auhe naakiintu ayehe ya lalwa nayo,
18 ihe ihupithileni aakadhonalela ayehe.
19 Ngashingeyi amuhe mboka mwa ningi oontoni nenge mwa guma omidhimba, otamu kala pondje yoontanda omasiku gaheyali. Mesiku etitatu nometiheyali otamu iyelitha ne yene noonkwatwa dheni.
20 Yelitheni wo onguwo kehe yoshipa, iinima ayihe yomafufu giikombo nenge yiiti.”
21 Omuyambi Eleasar okwa lombwele aantu mboka ya galuka kiita a ti: “Omautho ngaka Omuwa okwe ga pe Moses:
22 oshingoli, oshisiliveli, oshikushu, osheela oshiluudhe, otina, oshumbu
23 noshinima kehe tashi vulu okupita momulilo, shi pititheni momulilo, notashi kala oshiyelele; ihe nonando ongeyi, nashi yogwe tuu momeya. Ihe ayihe mbyoka itaayi vulu okupita momulilo, nayi pite tuu momeya.
24 Mesiku etiheyali yogeni oonguwo dheni; nena otamu kala mwa yogoka notamu pitikilwa okuya moontanda.”
25 Omuwa okwa lombwele Moses ta ti:
26 “One naEleasar naawiliki yalwe yegongalo omu na okuyalula shaa shoka sha kwatwa miita, oonkwatwa niimuna.
27 Topola, shoka sha hakanwa miitopolwa iyali yi thike pamwe, oshitopolwa shimwe oshaakwiita noshikwawo oshegongalo.
28 Moshitopolelwa shaakwiita kutha mo oshitimathelegatano shimwe shoonkwatwa, shoongombe, shuusino, shoonzi noshiikombo shi ninge oompale kOmuwa.
29 Dhi pa omuyambi Eleasar, dhi ninge omagano gOmuwa.
30 Moshitopolelwa shegongalo kutha mo oshitimilongontano shimwe shoonkwatwa, shoongombe, shuusino, shoonzi noshiikombo. Yi pa Aalevi mboka ye li mesiloshimpwiyu lyetsalihangano.”
31 Moses neEleasar oya ningi, ngaashi Omuwa a ti.
32 Oshihakanwa, iihupe yeliko mbyoka aakwiita ye yi kwata po, oyo oonzi niikombo 675 000,
33 oongombe 72 000,
34 uusino 61 000
35 naantu mboka yomaakiintu inaa lala naalumentu ayehe kumwe 32 000.
36 Etata lyasho, oshitopolelwa shaamboka ya yile kiita, osho oonzi niikombo 337 500,
37 moka mwa zi oompale dhOmuwa, iimuna 675;
38 oongombe 36 000 mwaandhoka 72 odho oompale;
39 uusino 30 500, moka mwa zi oompale 61;
40 naantu 16 000, moka mwa zi oompale kOmuwa 32.
41 Moses okwa gandja oompale komuyambi Eleasar, omagano ngoka gu uthilwa Omuwa, ngaashi Omuwa a lombwele Moses.
42 Oshitopolelwa shegongalo lyaIsrael shoka Moses a yoolola moshitopolelwa shaakwiita,
43 etata lyoshihakanwa ashihe, osho oonzi niikombo 337 000,
44 oongombe 36 000,
45 uusino 30 500
46 naantu 16 000.
47 Metata ndika lyegongalo Moses okwa kutha mo oshitimilongontano shimwe shoonkwatwa noshiimuna, ngaashi Omuwa a popi, e te yi pe Aalevi mboka ye li mesiloshimpwiyu lyetsalihangano.
48 Aawiliki yiita oya yi kuMoses
49 e taa ti: “Tatekulu, otwa yalula aakwiita mewiliko lyetu noinatu kanitha nando ogumwe.
50 Omolwashoka otatu eta uulenga woshingoli, uugondo wokomaako nowopiikesho, uulinga, uutenda womomakutsi nuulyenge womothingo mbyoka twa yugu ko. Otatu yi yambele Omuwa, tu popile oomwenyo dhetu koshipala shOmuwa, opo e tu gamene.”
51 Moses naEleasar oya taamba oshingoli nuulenga auhe.
52 Oshingoli ashihe shoka aawiliki yiita ye shi gandja omagano kOmuwa, osha li oosekeli 16 750.
53 Aakwiita yowala oyi ipungulile iihakanwa yawo, inaa gandja sha.
54 Moses naEleasar oya tula oshingoli metsalihangano, opo Omuwa a gamene Israel.
1 Omazimo gaReuben naGad oga li ge na iigunda iinene yiimuna. Ano sho ya mono kutya oshilongo Jaser naGilead osho opalela iimuna,
2 oya yi kuMoses, Eleasar nokaawiliki yalwe yegongalo e taa ti:
3 “Atarot, Dibon, Jaser, Nimra, Heshbon, Elale, Sibma, Nebo naBehon,
4 evi ndika Omuwa e li kwatele Aaisraeli ye li lale, otali opalele iimuna, notse aaniimuna.
5 Tu kwatha u tu pe evi ndika, li ninge eliko lyetu, tse twaa taaguluke we omulonga Jordan.”
6 Moses okwa yamukula a ti: “Ongiini, ooyakweni ye na okukondja, manga ne tamu kala mpano?
7 Otamu kumike ngiini Aaisraeli ya tokole Jordan, ya ye kevi ndyoka Omuwa e li ya pe?
8 Osho naanaa sha ningilwe kooho, sho nde ya tumine muKadesh Barnea, ya ka ndaadhe evi.
9 Oya yile sigo okesilu Eshkol e taa tala evi, ihe sho ya galuka, oya tyololokitha oshigwana shi ye kevi ndyoka Omuwa e li ya pe.
10 Omuwa okwa li a geya esiku ndyoka e tu uvaneke nokugana ta ti:
11 ‘Oshoka inaa inekela ndje, kape na gumwe gwomaalumentu mboka yomimvo omilongo mbali nenge ye vule po ya tembuka muEgipiti ta yi mevi ndyoka ndu uvanekele Abraham, Isak naJakob.
12 Kaleb kaJefunne Omukenasi naJosua yaNun oyo ayeke mboka taa yi mo, oshoka oyi inekele Omuwa.’
13 Omuwa okwa geele oshigwana e te shi endagulitha nombuga omimvo omilongo ne, sigo epipi ndyoka alihe lya pu po okusa.
14 Ihe ngashingeyi ne otamu yi ishewe pehala lyooho, ne omahe gaayoni, otamu tukula ondjahi yOmuwa a geele Israel ishewe!
15 Ngele ne Aareuben nAagad tamu tindi oku mu landula ngashingeyi, nena ote ethele oshigwana ashihe mombuga, none tamu pulwa ekano lyasho.”
16 Oya hedha kuMoses e taa ti: “Tu zimina owala, tu dhikile iimuna yetu iigunda mpaka nokutungila aakiintu naana yetu iilando.
17 Opo ihe otatu homata e tatu kwatele Aaisraeli ooyakwetu komeho molugodhi, sigo twe ya thikitha komathikilo gawo. Ihe aakiintu naana yetu ya kale mpaka miilandohote ya gamenwa kaantu yaamuka.
18 Itatu galukile komagumbo getu, manga Aaisraeli ooyakwetu ayehe inaa taamba omaliko gawo gevi ndyoka ye na oku ga pewa.
19 Tse itatu ka taamba nando oshitopolwa mokati kawo handiyaka yaJordan, oshoka otwa taamba ombinga yetu mpaka kuuzilo waJordan.”
20 Moses okwa yamukula a ti: “Ngele otamu ningi, ngaashi tamu ti, ilongekidhileni olugodhi mpaka koshipala shOmuwa.
21 Aakwiita yeni naa tokole Jordan, opo mewiliko lyOmuwa ya ponokele aatondi yetu, sigo Omuwa e ya sindi
22 e taa kwata po evi. Konima yaambika otamu vulu okugaluka, oshoka omwa gwanitha oshinakugwanithwa sheni kOmuwa nokAaisraeli ooyakweni. Nena Omuwa ota ka zimina kutya evi ndika lyokuuzilo waJordan olyeni.
23 Ihe ngele itamu dhiginine euvaneko lyeni, otamu yono kOmuwa notamu ke shi mona.
24 Onkee ano tungeni iilando yeni niigunda yiimuna yeni, ihe gwanitheni euvaneko lyeni!”
25 Aagad nAareuben oya ti: “Tatekulu, otatu ningi, ngaashika wa ti.
26 Aakiintu naana yetu otaa kala muka miilando yaGilead, osho wo oongombe noonzi dhetu.
27 Ihe tse atuhe otatu yi kolugodhi mewiliko lyOmuwa. Otatu tokola Jordan tu ka kondje, ngaashika wa ti.”
28 Moses okwa gandja elaka komuyambi Eleasar, Josua nokaawiliki yalwe yaIsrael tali ti:
29 “Aagad nAareuben ngele otaa tokola Jordan yi ilongekidhila olugodhi mewiliko lyOmuwa, nokekwatho lyawo ngele otamu vulu okulala evi, nena ya peni evi lyaGilead li ninge eliko lyawo.
30 Ihe ngele itaa tokola Jordan noitaa yi molugodhi pamwe nane, nena oye na okutaamba oshitopolwa shawo muKaanan ngaashika ne.”
31 Aagad nAareuben oya yamukula ya ti: “Tatekulu, tse otatu ningi, ngaashika Omuwa a ti.
32 Mewiliko lye otatu tokola Jordan tu ye kuKaanan kolugodhi, opo tu pewe eliko lyetu mpaka kuuzilo waJordan.”
33 Moses okwa gandja komazimo gaGad naReuben netatazimo lyaManasse oshilongo ashihe shomukwaniilwa gwAayamori Sihon noshomukwaniilwa gwaBaasha Og, pamwe niilando yasho nomikunda dhe yi kunduka.
34 Ezimo lyaGad olya tungulula iilandohote Dibon, Atarot, Aroer,
35 Atarot Shofan, Jaser, Jogbeha,
36 Bet Nimra naBet Haran.
37 Ezimo lyaReuben olya tungulula Heshbon, Elale, Kirjatajim,
38 osho wo Nebo, Baal Meon (omadhina gayo oga lundululwa) naSibma. Oya luku iilando ye yi tungulula omadhina omape.
39 Oludhi lwaMakir gaManasse olwa matukile evi lyaGilead e talu li sindi. Olwa tidha mo Aayamori mboka ya li mo.
40 Moses okwa gandja Gilead koludhi lwaMakir, nolwa kala mo.
41 Jair gwomezimo lyaManasse okwa ponokele omikunda dhimwe nokwe dhi sindi e te dhi luku “Omikunda dhaJair.”
42 Nobak okwa matukile e ta lala Kenat nomikunda dhasho e te shi lukulula Nobak, e shi ilukile mwene.
1 Ndjika ondjila yAaisraeli sho ya tembuka muEgipiti oongundu noongundu mewiliko lyaMoses naAaron.
2 Moses okwa nyola omadhina gomahala mpoka ya yungu oontanda palombwelo lyOmuwa.
3 Aaisraeli oya thigi po Egipiti etimulongo netitano lyomwedhi gwotango gwomumvo, esiku lya landula Opaasa. Oya thigi po oshilando Rameses megameno lyOmuwa montaneho yAayegipiti,
4 manga taa fumvike aatango mboka ya dhipagwa kOmuwa. Omuwa okwi iholola mpaka kutya oye omunankondoawike e vule ookalunga yaEgipiti.
5 Aaisraeli oya zi muRameses e taa yungu oontanda muSukkot.
6 Okuza mpoka oya ka yunga oontanda muEtam kooha dhombuga.
7 Okuza kuEtam oya shuna kuPi Hahirot kuuzilo waBaal Zefon noya yungu oontanda popepi naMigdol.
8 Oya zi puPi Hahirot e taa tokola Efuta etiligane e taa yi mombuga Etam. Sho ye ende omasiku gatatu, oye ya kuMara noya yungu oontanda.
9 Okuza kuMara oya yi kuElim noya yungile ko oontanda dhawo, oshoka nkoka okwa li omithima omulongo nambali dhi na omeya, nomilunga omilongo heyali.
10 Oya zi po puElim e taa ka yunga oontanda mooha dhEkololo lyaSues.
11 Oya zi pEfuta lyomanenge noya ka yunga oontanda mombuga Sin.
12 Oya zi mombuga Sin e taa ka yunga oontanda kuDofka.
13 Oya zi kuDofka noya ka yunga oontanda muAlush.
14 Oya zi kuAlush noya ka yunga oontanda muRefidim, nkoka ya li yaa na omeya gokunwa.
15 Okuza kuRefidim sigo okondundu Hor oya yungu oontanda pomahala taga landula: ombuga Sinai, Kibrot Taava (nenge “Oombila dhomwamwa”), Hazerot, Ritma, Rimmon Perez, Libna, Rissa, Kehalata, ondundu Shefer, Harada, Makkelot, Tahat, Tera, Mitka, Hashmona, Moserot, Bene Jaakan, Hor Haggidgad, Jotbata, Abrona, Eziongeber, ombuga Zin (kokutya Kadesh) nondundu Hor kooha dhoshilongo Edom.
16 Omuyambi Aaron okwa londo kondundu Hor, ngaashi Omuwa a popi, e ta sile ko momumvo omutimilongone okuza mpoka Aaisraeli sho ya tembuka muEgipiti; osha li momwedhi omutitano esiku lyotango lyomwedhi.
17 Aaron sho a sile kondundu, okwa li e na omimvo 123.
18 Omukwaniilwa Omukaanani gwaArad, ngoka a li muumbugantu woshilongo Kaanan, okwa kundana kutya Aaisraeli oya thiki.
19 Okuza kondundu Hor sigo okolushandja lwaMoab Aaisraeli oya yungile oontanda pomahala taga landula: Zalmona, Punon, Obot, Iye Abarim moshilongo Moab, Dibon-Gad, Almon Diblataim, ondundu Abarim popepi nondundu Nebo nomolushandja lwaMoab kuuzilo waJordan ontega naJeriko.
20 Pomulonga Jordan oontanda dhawo odha li pokati kaBet Jeshimot naAbel Shittim molushandja lwaAkasia.
21 Omuwa okwa lombwele Moses molushandja lwaMoab pomulonga Jordan ontega naJeriko e ta ti:
22 “Lombwela Aaisraeli u tye kuyo: Ngele tamu tokola Jordan mu ye kuKaanan,
23 tidhii mo aakwashilongo ayehe nokuteyagula po iimenka yawo ayihe ya hongwa memanya nenge ya hambulwa mosheela. Hanagulii po omitumbo dhawo adhihe dhiinonoma yuupagani.
24 Kwatii po oshilongo ne mu kale mo, oshoka otandi shi mu pe.
25 Topoleni evi pamazimo nopamaludhi geni mokuumba iihogololitho. Oludhi olunene nalu pewe oshitopolwa oshinene, noludhi olushona oshitopolwa oshishona.
26 Ihe ngele itamu tidha mo aakalimo yomoshilongo, mboka taa ka hupila mo, otaa ningi ya fa omakwega momeho geni noongona moombati dheni notaye mu kondjitha moshilongo.
27 Ngele itamu ya tidha mo, otandi ke mu hanagula, ngaashi nda dhiladhilile oku ya hanagula po.”
1 Omuwa okwa lombwele Moses a ti:
2 “Lombwela Aaisraeli to ti: ‘Ngele tamu ka ya mevi Kaanan, oshilongo shoka tandi shi mu pe, oongamba otadhi ka kala, ngaashi tashi landula mpaka:
3 Ongamba yokuumbugantu otayi ka taandela ya za kombuga Zin ya lambalala ongamba yaEdom. Otayi tameke muuzilo kohulo yokuumbugantu wEfuta lya sa.
4 Okuza ketaulilo lyondundu Akrabbim, otayi goyokele lwokuumbugantu, tayi pitilile Zin sigo okuKadesh Barnea. Okuza nkoka otayi goyokele lwokuuningininombangalantu sigo okuHazar Addar nokuAzmon.
5 Nkoka tayi goyokele lwokokamulonga pongamba yaEgipiti nokuhulila mEfuta lyopokati.’ ”
6 Ongamba yokuuninginino oyo Efuta lyopokati.
7 Ongamba yokuumbangalantu otayi landula ompola ya za kEfuta lyopokati sigo okondundu Hor,
8 nokuza hoka oyu uka ketaulilo lyaHamat. Otayi tsikile sigo okuZedad
9 nokuSifron notayi hulile puHazar Enan.
10 Ongamba yokuuzilo otayi landula ompola ya za kuHazar Enan sigo okuSafam.
11 Otayi tsikile yu uka kuumbugantu kuRibla, kuuzilo waAin, nokoondundu komunkulo gwokuuzilo gwefuta lyaGalilea.
12 Okuza nkoka ongamba otayi lambalala omulonga Jordan sigo Efuta lya sa. Ndhika odho oongamba ne dhevi lyeni.
13 Moses okwa lombwele Aaisraeli a ti: “Ndika olyo evi ndyoka tamu ka taamba moku li umbila iihogololitho, evi ndyoka Omuwa e li gandja komazimo omugoyi netata.
14 Omazimo gaReuben naGad netatazimo lyaManasse oga taamba nale oshitendelwa shago sha topolelwa omaludhi gago,
15 kuuzilo waJordan ontega naJeriko.”
16 Omuwa okwa lombwele Moses a ti:
17 “Omuyambi Eleasar naJosua yaNun oyo taa ka tendela aantu evi.
18 Kutha wo mezimo kehe omuwiliki gumwe, opo e ya kwathe mokutenda evi.”
19 Omuwa okwa hogolola aalumentu mboka: Ezimo Omuwiliki Juda Kaleb kaJefunne Simeon Shemuel yaAmmihud Benjamin Elidad lyaKislon Dan Bukki yaJogli Manasse Hanniel yaEfod Efraim Kemuel kaShiftan Sebulon Elisafan lyaParnak Issaskar Paltiel yaAsan Aser Ahihud yaShelomi Naftali Pedahel yaAmmihud
20
21
22
23
24
25
26
27
28
29 Mbaka oyo aalumentu mboka Omuwa e ya pe oshilonga shokutendela Aaisraeli evi lyaKaanan.
1 Molushandja lwaMoab pomulonga Jordan ontega naJeriko Omuwa okwa lombwele Moses a ti:
2 “Lombwela Aaisraeli kutya momaliko ngoka taa pewa, naa pe mo Aalevi iilando yimwe yokukala mo nomaunapelo ge yi kunduka.
3 Iilando mbyoka nayi ninge yAalevi, notaa kala mo. Omaunapelo otaga ningi giimuna yawo, oongombe noonzi niinamwenyo ayihe.
4 Evi lyomaunapelo nali kale lya taandela okuza kedhingililokuma lyoshilando oondya 1 000 koombinga adhihe,
5 opo pu kale ombine yoondja 2 000 lwoondja 2 000, noshilando shi li pondingandinga yayo.
6 Mokati kiilando mbyoka tamu yi pe Aalevi, namu kale iilando ihamano yokwiigamena, moka omuntu ngoka a dhipaga mukwawo hanowina ta vulu okuya mo. Kakele kiilando mbika ya peni ishewe iilando yilwe omilongo ne niiyali
7 yi na omaunapelo gayo, opo yi ninge omilongo ne niihetatu ayihe kumwe.
8 Omwaalu gwiilando yAalevi mezimo kehe nagu uthwe komwaalu gwiilando moshitopolwa shalyo.”
9 Omuwa okwa lombwele Moses e ta ti:
10 “Lombwela Aaisraeli u tye: Shampa mwa tokola omulonga Jordan e tamu yi mevi lyaKaanan,
11 ihogololeleni iilando yokwiigamena, moka omuntu ta vulu okuholama, ngele a dhipaga mukwawo hanowina.
12 Omo moka ta ka hupila, kaa dhipagwe kaakwawo yanakusa. Omuntu ngoka e na ondjo yedhipago, ina dhipagwa pwaa na ompangu tango.
13 Hogololeni iilando ihamano,
14 itatu okuuzilo waJordan niitatu omuKaanan.
15 Mbika otayi kala iilando yegameno kOmuisraeli, omukwiilongo omukaleleli nge omuyeni kehe mokati keni, ngoka a dhipaga omuntu hanowina. Ota vulu okumatukila mo a holame.
16 “Ngele oku na omuntu ta dhipaga mukwawo nomatati giiyela nenge nemanya nenge noshiti, oye omudhipagi gwowina; na dhipagwe.
17
18
19 Omukwawo nakupula ombinzi yanakudhipagwa oku na uuthemba wokudhipaga omudhipagi. Ngele te mu mono, ne mu dhipage.
20 “Ngele oku na omuntu ta tondo mukwawo e te mu dhipaga noku mu ndwangulila pevi nenge e mu dhaadhiga nasha,
21 nenge e mu thendula nongonyo, oku na ondjo yedhipago, nomuntu a tya ngaaka na dhipagwe. Omukwawo nakupula ombinzi oku na uuthemba woku mu dhipaga. Uuna te mu itsu, ne mu dhipage.
22 “Ihe ngele oku na omuntu ta dhipaga mukwawo hanowina ye ine mu tonda, sho e mu ndwangulile pevi nenge e mu dhaadhiga nasha,
23 nenge u umbu emanya ye ina lengalenga tango e ta dhipaga omuntu ngoka inaa dhiladhila nando e mu dhipage ye ke shi omutondi gwe,
24 egongalo nali pangule pokati kaangoka a dhipaga mukwawo nomukwawo nakupula ombinzi tali shi ningi pamautho ngaka.
25 Egongalo nali hupithe omudhipagi miikaha yomukwawo gwanakudhipagwa, nakupula ombinzi. Egongalo nali mu pitike, a shune koshilando shokwiigamena, nkoka a li a holama. Na kale hoka sigo okeso lyomuyambimukuluntu.
26 Omudhipagi ngele okwa zi moshilando shokwiigamena,
27 e ti itsuwa kunakupula ombinzi, ngoka te mu dhipaga, nena nakupula ombinzi ke na ondjo yasha.
28 Omudhipagi oku na okukala moshilando shokwiigamena sigo okeso lyomuyambimukuluntu, ihe konima yalyo ota vulu okushuna kaandjawo.
29 Omautho ngaka omu na oku ga dhiginina nomaluvalo geni miilongo yeni sigo aluhe.
30 “Omudhipagi ota vulu okumonika ondjo yeso, ngele ope na oonzapo mbali, onzapo yimwe inayi gwana okudhipagitha omudhipagi.
31 Omudhipagi na dhipagwe. Ita vulu okuhenuka eyono lye a fute ondjo ye.
32 Ngele ope na omuntu ta yi ontuku koshilando shokwiigamena, ita ziminwa a fute ye a shune, manga omuyambimukuluntu inaa sa.
33 Ngele tamu shi ningi, otamu nyateke evi moka mu li mo. Ombinzi yedhipago otayi nyateke evi, nokape na eyelithoyapulo lyalyo lilwe, ombinzi ayike yaangoka a dhipaga.
34 Inamu nyateka evi moka mwa kala mo, oshoka ongame Omuwa nonda kala mokati kAaisraeli.”
1 Aakuluntu yomagumbo moludhi lwaGilead yaMakir, omutekulu gwaManasse gaJosef, oya yi kuMoses nokaawiliki yalwe.
2 Oya ti: “Omuwa okwe ku lombwele, u tendele Aaisraeli evi mokuumba iihogololitho. Okwe ku lombwele wo, u gandje eliko lyomukwetu Zelofhad koyana aakadhona.
3 Ihe ngele taa hokanwa kaayeni, nena eliko otali yi komazimo omayeni, noshitendelwa shetu tashi ka shonopala.
4 Momumvo gweligolo iinima sho tayi ka shuna kooyene yonale mboka ye yi landithile po, eliko lyaana aakadhona yaZelofhad otali ka kala kezimo hoka ya hokanwa, notatu li kanitha.”
5 Moses okwa yamukula Aaisraeli nohapu yOmuwa a ti: “Shoka tashi pulwa kezimo lyaManasse, oshi li mondjila.
6 Omuwa ota ti kutya aana aakadhona yaZelofhad oya mangulukila okuhokanwa kungoka ya hala, ihe ogwomezimo lyawo.
7 Eliko lyOmuisraeli kehe nali kale mezimo lyahe lyaa ye kezimo ekwawo.
8 Omukiintu kehe ngoka ta thigulula uuthiga mezimo lyontumba lyAaisraeli, oku na okuhokanwa komulumentu gwezimo ndyoka. Pahedhi ndjika Omuisraeli kehe oha thigulula oohekulu,
9 nuuthiga itau zi we mezimo ndika nokuya kundiyaka. Ezimo kehe ohali dhiginine uuthiga walyo.”
10 Aana aakadhona yaZelofhad oya ningi, ngaashi Omuwa a lombwele Moses.
11 Mahla, Tirza, Hogla, Milka naNoa, aana aakadhona yaZelofhad oya hokanwa po koohegona.
12 Oya hokanwa komaludhi gezimo lyaManasse gaJosef, nuuthiga wawo owa kala mezimo lyoohe.
13 Mbika oyo iipango nomautho ngoka Omuwa e ga pethitha Aaisraeli kuMoses molushandja lwaMoab puJordan ontega naJeriko.